1 PETRUS

¹ Humbani si Petrus, apostel ni Jesus Kristus, hubani sagala panginsolat, na merap i Pontius, Galatia, Kappadosia, Asia ampa Bitinia, na dob tarpilih in, ² domu hubani panandaion ni Naibata Bapa hinan, marhitei na pinapansing ibagas Tonduy Napansing, ase pambalosi bani Jesus Kristus, anjaha iuras marhitei pamispison bani darohNi in. Sai martambah-tambah ma idop ni uhur ampa damei bani nasiam. ³ Pinuji ma Naibata, Bapa ni Tuhanta Jesus Kristus, na dob manubuhkon hita paduahalihon, domu hubani banggal ni idop ni uhurni, marhitei parpuhoon ni Jesus Kristus humbani na matei, ase marpangarapan na manggoluh hita, ⁴ ase banta siteanon na so ra seda, na so martikas, na so ra melus, na sinimpan banta i nagori atas. ⁵ Iramotkon do hita hinorhon ni gogoh ni Naibata, marhitei haporsayaon, ase das hita hu haluahon, na dob sirsir sipatalaron bani panorang parpudi. ⁶ In do ihamalashon nasiam, age pe marhoru nasiam tongkin sonari, anggo porlu ibagas bagei ni parlajouan, ⁷ ase taridah ma pitah ni haporsayaon nasiam, na harganan marimbang omas na ra seda, age pe domma iuji ibagas apuy, bahen puji-pujian, hasangapon ampa hamuliaon bani partalar ni Jesus Kristus. ⁸ Ihaholongi nasiam do Ia, age pe seng iidah nasiam Ia; ihaporsayai nasiam do Ia, age pe seng iidah nasiam Ia sonari, gabe marolob-olob do nasiam ibagas malas ni uhur na marhasangapon, na so tarpajojor pamangan, ⁹ halani dapot nasiam tujuan ni haporsayaon nasiam, ai ma haluahon ni tonduy nasiam. ¹⁰ In ma haluahon, na pinindahan anjaha na pinapangkei-pangkei ni nabi-nabi, na dob manjahai pasal idop ni uhur, na bani nasiam in. ¹¹ Ipapangkei-pangkei sidea do barang sadihari panorangni ai, anjaha sonaha do ai, domu hubani na pinatalar ni Tonduy ni Kristus, na ibagas sidea, na manaksihon hinan pasal sitaronon, na sihol sogop bani Kristus, ampa hamuliaon na i pudi ni ai. ¹² Ipatalar pe ai bani sidea, sedo bani sidea sandiri, nasiam do na sinarihon ni sidea ijai. Lanjar in do na pinatugah ni par Ambilan Namadear nuan bani nasiam marhitei Tonduy Napansing, na sinuruh hun nagori atas. Masihol do malekat-malekat mangkawah hu bagas ai. ¹³ Halani ai, gonditi nasiam ma uhur nasiam; torang ma uhur nasiam, anjaha sabonar mangarap ma nasiam bani idop ni uhur, na sihol bereon bani nasiam bani partalar ni Jesus Kristus. ¹⁴ Songon dakdanak sipambalosi, ulang be paihut-ihut nasiam hisap-hisap, na binalosan nasiam hinan sanggah haotoon nasiam, ¹⁵ tapi songon Sipandilo nasiam pansing, sonai ma homa nasiam pansing ibagas haganup parlahou nasiam. ¹⁶ Ai tarsurat do: Pansing ma nasiam, ai na pansing do Ahu! ¹⁷ Anggo Bapa igoran nasiam Ia, na so siidah-idah bohi manguhumi ganup jolma pasal pambahenanni bei, marhasoman biar ma nasiam marparlahou sanggah panginsolatan nasiam on. ¹⁸ Ai ibotoh nasiam do: Sedo marhitei arta na ra maseda, omas barang pirak, ase maluah nasiam humbani pargoluhon nasiam na so margagan in, na tinean nasiam humbani bapa nasiam, ¹⁹ tapi marhitei daroh ni Kristus na maharga in do, na songon daroh ni biri-biri na so martikas, na so marsining. ²⁰ Na dob ipilih do Ia, sanggah lape jonam dunia on, anjaha ipatalar bani ujung ni panorang halani nasiam. ²¹ MarhiteihonSi do nasiam porsaya bani Naibata, na papuhohonSi humbani na matei, anjaha na mamberehon hasangapon Bani, ase bani Naibata nasiam porsaya anjaha marpangarapan. ²² Halani domma ipapansing nasiam diri nasiam marhitei na mambalosi hasintongan in, laho mandalankon holong na so sipakulah-kulah bani hasoman, sai marsihaholongan ma nasiam humbani gok ni uhur. ²³ Ai domma mangulaki tubuh nasiam, sedo humbani bonih na ra maseda, tapi humbani na so ra maseda do, ai ma marhitei hata na manggoluh anjaha na totap in, na humbani Naibata. ²⁴ Ai sagala daging songon poyon-poyon do, anjaha sagala hasangaponni ai songon bunga ni poyon-poyon ai. Melushonsi poyon-poyon ai, bungani pe marurus ma. ²⁵ Tapi anggo hata ni Tuhan in, totap do ronsi sadokah ni dokahni. In ma hata, na niambilankon bani nasiam.

¹ Ai pe, ambukkon nasiam ma sagala hajahaton, sagala pangoto-otoion, hasipakulah-kulahon, subil ampa sagala tukas-tukas. ² Songon dakdanak na baru tubuh, horahan ma nasiam bani tadah partonduyon na pitah, ase lambin magodang nasiam halani ai anjaha maluah, ³ anggo na tongon ma domma idai nasiam dear layak ni Tuhan in. ⁴ Hubani ma nasiam roh, batu na manggoluh in, na niambukkon ni jolma tongon, tapi na pinilih anjaha na maharga bani Naibata. ⁵ Sai ra ma nasiam paulion songon batu na manggoluh, jadi rumah partonduyon ampa hamalimon na mapansing, laho mamboan galangan partonduyon, harosuh ni uhur ni Naibata, marhitei Jesus Kristus. ⁶ Ai tarsurat do bani Surat in: Tonggor ma, hupatibal do i Sion sada batu parsuhi na pinilih anjaha na maharga; sabonar seng tarbador na porsaya Bani. ⁷ Anjaha harga do Ia bani nasiam na porsaya. Tapi bani na so porsaya: Batu na niambukkon ni tuhang ai, ai ma na gabe batu parsuhi ai, ⁸ anjaha batu partolsuan ampa batu parsangsian. Ai tartolsu do sidea hujai, halani seng porsaya sidea bani hata in, age pe hujai do sidea namin ipasirsir. ⁹ Tapi marga na pinilih do nasiam, harajaon hamalimon, bangsakna mapansing, bangsa ni Naibata sandiri, ase iambilankon nasiam dear ni hauhuronNi, na dob mandilo nasiam humbani na golap hu haliharonNi, na gok halongangan in. ¹⁰ Hinan seng bangsa ni Naibata nasiam, sonari nani bangsaNi ma; hinan seng dapotan idop ni uhur nasiam, sonari nani dapotan idop ni uhur ma. ¹¹ Nasiam na hinaholongan, huojur ma nasiam songon panginsolat ampa halak dagang: Horom nasiam ma hisap-hisap pardagingon, na marlawan dompak tonduy. ¹² Marpangabak na madear ma nasiam i tongah-tongah ni sipajuh begu-begu, ase, anggo adong na pahata-hata nasiam songon parjahat, gabe ipasangap sidea Naibata bani ari parrohNi, dob iidah sidea horja nasiam na madear in. ¹³ Unduk ma nasiam dompak sagala paraturan, na tinotapkon ni jolma, halani Tuhan, age dompak raja, parkuasa sigijangan, ¹⁴ age dompak sipanrajai, ai ma sinuruhNi, laho maminsang sibahen na jahat, tapi laho mamuji sihorjahon na madear. ¹⁵ Ai on do rosuh ni uhur ni Naibata: Sihol ma marhitei horja na madear pasipon nasiam haotoon ni halak na hurang uhur, ¹⁶ songon halak na bebas, tapi ulang ma na pakei habebason ai, laho manrungkub na masambor; songon juak-juak ni Naibata ma tene. ¹⁷ Hormat ma nasiam bani haganup, marholong ni uhur bani hasoman, mabiar bani Naibata anjaha pasangap ma raja. ¹⁸ Unduk ma nasiam juak-juak bani tuan nasiam, marhasoman biar; ulang pitah dompak paruhur na dear ampa na basar, tapi dihut do dompak paruhur na jungkat. ¹⁹ Ai idop ni uhur do ai, anggo tahan halak manaron na marsik ampa pambahenan na so patut, halani ingat ia bani Naibata. ²⁰ Ai aha ma sipujion ijai, porini sabar pe nasiam hona lonsingan anggo halani salah nasiam do? Tapi anggo sabar nasiam manaron halani pambahenan na madear, ai ma na hinarosuhkon ni Naibata. ²¹ Ai hujin do nasian tardilo, ai Kristus pe manaron na marsik do halani nasiam, mambere siusihan bani nasiam, ase iirikkon nasiam bokas ni naheiNi. ²² Seng dong dousa ihorjahon, anjaha seng dong jumpah akal-akal ibagas pamanganNi. ²³ Seng manrisai Ia, sanggah na hona risa; seng asup-asup Ia, sanggah manaron na marsik; tapi iondoskon do ai bani Panguhum na pintor in. ²⁴ Iporsan do dousanta ibagas angkulaNi hubani hayu ai, ase matei hita bani dousa, gabe manggoluh bani hapintoran. Anjaha marhitei ugahNi ai do malum nasiam. ²⁵ Ai songon biri-biri na kahou do nasiam ijia, tapi domma idompakkon nasiam nuan Parmahan anjaha Sijaga tonduy nasiam in.

¹ Sonai homa nasiam parinangon, unduk ma nasiam bani paramangon nasiam, ase porini adong deba na so pambalosi bani Hata in, gabe tartarik uhurni marhaporsayaon marhitei parlahou ni parinangon ai, seng pala marhasoman hata, ² anggo iidah sidea nasiam marparlahou ibagas hasusion ampa biar dompak Naibata. ³ Ulang ma ipajagar-jagar rupani hun darat, marhitei na mangkariting-karitingkon jambulan, na mamakei-makei omas barang na pajenges-jenges pakeian. ⁴ Tapi jolma parbagas na ponop ai, na tongtong martonduy na lamlam anjaha na mardamei, ai do na harga bani Naibata. ⁵ Sonin do sapari parinangon na mapansing, na mangarap bani Naibata, somal pajengeshon dirini anjaha unduk bani paramangonni. ⁶ Umpamani si Sarah, ibalosi do si Abraham, anjaha igoran do ia "tuanni". Anjaha gabe boruni ma nasiam, anggo ihorjahon nasiam na madear, anjaha seng mabiar bani asup-asup aha pe. ⁷ Paramangon pe sonai ma, maruhur ma nasiam manghasomani sidea, halani galekan do hadirion ni parinangon. Sangap ma bahen nasiam sidea, halani dihut do sidea hasoman panean bani sibere-bere hagoluhan na humbani Naibata, ase ulang tarlanglang tonggo nasiam. ⁸ Na songon rimpunni: Sauhur ma nasiam haganup, sapangahapan, parholong ni uhur bani hasoman, paridop ni uhur anjaha partoruh ni uhur. ⁹ Ulang ma balaskon nasiam na jahat imbang ni na jahat, risa-risa imbang ni risa-risa; lambin mamasu-masu ma nasiam, ai sihol teanon nasiam do pasu-pasu, ase tardilo nasiam. ¹⁰ Ai ise na holong uhur bani hosahni, anjaha sihol mangidah ari na sonang, iparontihon ma dilahni humbani na jahat, age bibirni ulang ma isahapkon ladung. ¹¹ Isimbili ma hajahaton anjaha ihorjahon na madear; ipindahi ma damei, ai ma iparayak. ¹² Ai hubani paruhur na pintor do pangkawah ni Tuhan in, anjaha bani pangindoan ni sidea do pinggolni; tapi iimbang bohi ni Tuhan in do sihorjahon na jahat. ¹³ Anjaha ise do na manjahati nasiam, anggo na madear iporluhon nasiam? ¹⁴ Tapi anggo manaron nasiam halani hapintoran, na martuah do nasiam ai. Ulang ma mabiar nasiam bani pambibiari ni sidea, anjaha ulang ma gobir uhur nasiam. ¹⁵ Tapi papansing nasiam ma Kristus Tuhan in ibagas uhur nasiam, tongtong ma nasiam sirsir patorangkon bani haganup halak na manungkun nasiam pasal onjolan ni pangarapan nasiam, tapi marhasoman lamlam ampa hormat ma. ¹⁶ Anjaha marpanggora ni uhur na borsih ma nasiam, ase maila sidea na manukas-nukasi nasiam, na manrisai parlahou nasiam na madear ibagas Kristus. ¹⁷ Ai rahanan ma nasiam manaron na marsik halani horja na madear, anggo sonai rosuh ni Naibata, ulang ma halani horja na masambor. ¹⁸ Ai Kristus pe matei do sahali halani dousa, Ia parpintor ai halani pargeduk, ase iboban hita hubani Naibata. Na tarbunuh do Ia ibagas pardagingon, tapi ipagoluh do ibagas partonduyon. ¹⁹ Ibagas tonduy laho do Ia marambilan bani tonduy na ibagas tutupan ai, ²⁰ ai ma na so mambalosi ijia, sanggah na paima-imahon lumbang ni uhur ni Naibata bani panorang ni si Noak, sanggah na paulihon parau ai. Halak na otik i parau ai, ualuh halak haganup, maluah do marhitei na manlopusi bah ai. ²¹ Ai do usihan ni pandidion in, na paluahkon nasiam nuan: sedo ai songon na mangambukkon na mabutak humbani angkula, tapi ipindo hita do ijin humbani Naibata panggora ni uhur na borsih, marhitei parpuho ni Jesus Kristus. ²² I siamun ni Naibata do Ia hundul dob laho hu nagori atas; tunduk do hu Bani haganup malekat, kuasa ampa hagogohon.

¹ Ai pe, halani na dob marsitaronon Kristus ibagas pardagingon, uhur sisonai ma gabe sinjata age bani nasiam, ai barang ise na manaron bani pardagingon, maronti do ia mangkorjahon dousa, ² ase ulang be nasiam manggoluh marguru hubani hisap-hisap ni hajolmaon, tapi marguru bani rosuh ni Naibata ma, barang sadiha dokah nari nasiam ibagas goluh on. ³ Ai sungkup ma panorang na dob salpu in marpambahenan nasiam domu hubani harosuh ni sipajuh begu-begu, ai ma marparlahou ibagas goluh na so marrantei, hahisapon, parmabukon, parmangan-manganon, parminum-minumon, ampa pambalosion bani gana-gana sihagigihonon ai. ⁴ Ai na ganjil ma ai nini uhur ni sidea, na so dihut ai be nasiam mandalankon pambahenan ni sidea na butak anjaha na so margagan ai, gabe manrisai ma sidea. ⁵ Tapi maningon martanggung jawab do holi sidea bani Naibata, na sirsir manguhum na manggoluh ampa na matei. ⁶ On do halani ase iambilankon Ambilan Namadear age bani na dob matei, ase manggoluh sidea ibagas partonduyon halani Naibata, age pe hona uhum ibagas pardagingon mangihutkon hajolmaonni. ⁷ Tapi domma dohor ujung ni haganup. Ai pe maruhur ma nasiam, anjaha torang ma uhur nasiam martonggo. ⁸ I lobei ni haganup, marsihaholongan botul ma nasiam, ai irungkub holong ni uhur in do buei dousa. ⁹ Marsitamueian ma nasiam, ulang ibagas ungut-ungut. ¹⁰ Marsipadear-dearan ma nasiam marhitei sibere-bere idop ni uhur na jinaloni bei songon sijolom anakkunsi na bujur bani bagei-bagei ni idop ni uhur ni Naibata. ¹¹ Anggo adong na marsahap songon pangkatahon ni Naibata ma, anggo adong na marugas, domu hubani gogoh na binere ni Naibata ma, ase bani haganupan ai ipasangap Naibata marhitei Jesus Kristus. Bani ma hasangapon ronsi sadokah ni dokahni. Amen. ¹² Nasiam hinaholongan, ulang ma pala longang nasiam pasal hamilason in, na roh manguji nasiam; ulang ma pala songon na ganjil in, nini uhur nasiam. ¹³ Tapi malas ma uhur nasiam, anggo saor nasiam bani sitaronon ni Kristus in, ase bani partalar ni hasangaponNi ai marmalas ni uhur homa nasiam anjaha marolob-olob. ¹⁴ Martuah do nasiam, anggo hona risa nasiam halani goran ni Kristus, ai sogop do bani nasiam Tonduy Hasangapon, Tonduy ni Naibata. ¹⁵ Ulang ma adong hun tongah-tongah nasiam na manaron halani mamunuh, barang manangko, barang marjahat, barang halani mangurus na so siurusonni. ¹⁶ Barang ise na marsitaronon halani halak Kristen ia, ulang ma maila ia, tapi ipasangap ma Naibata marhitei goran in. ¹⁷ Ai jumpah ma panorangni madabuh uhum, mamungkah humbani rumah ni Naibata. Ai anggo parlobei humbanta, sonaha ma ujung ni na so mambalosi Ambilan Namadear, na humbani Naibata? ¹⁸ Ai anggo narus lang maluah halak parpintor, huja ma gakni halak na so daulat anjaha sipardousa ai? ¹⁹ Halani ai, na marsitaronon halani rosuh ni Naibata, iondoskon ma tonduyni hubani Sipanompa hatengeran in, marhitei na manghorjahon na madear.

¹ Ase, hupaingat ma sintua-sintua na i tongah-tongah nasiam, songon hasoman sintua anjaha saksi pasal sitoronon ni Kristus, homa siparrupei bani hasangapon na sihol sipatalaron ope: ² Parmahani nasiam ma hulanan ni Naibata na bani nasiam, ulang songon paksaan, tapi humbani malas ni uhur ma, domu hubani rosuh ni Naibata; ulang ma halani uhur haut, tapi humbani porlu ni uhur ma. ³ Ulang ma songon na mamaksa dompak hasoman, na niondoskon bani nasiam, tapi gabe siusihan ma bani na pinarmahan in. ⁴ Jadi, jaloon nasiam ma sortali hasangapon na so ra melus ai, talarhonsi Parmahan Bolon in. ⁵ Lanjar sonai ma homa nasiam na maposo, unduk ma nasiam bani partua-partua. Haganup ma nasiam margondithon toruh ni uhur samah nasiam, ai iimbang Naibata do sigijang uhur, tapi ibere do idop ni uhur bani na toruh maruhur. ⁶ Halani ai patoruh nasiam ma diri nasiam hu toruh ni tangan ni Naibata na gogoh in, ase ipagijang nasiam bani panorangni. ⁷ Ompashon nasiam ma haganup na hinolsohkon nasiam hu Bani, ai isarihon do nasiam. ⁸ Torang ma uhur nasiam anjaha puho ma nasiam, ai mawat-awat do imbang nasiam, sibolis in, songon singa na maraum, mangindahi sibondutonni. ⁹ Imbang nasiam ma ia marhitei haporsayaon na toguh, ai ibotoh nasiam do, age haganup sanina nasiam na i sab dunia on ihonai sitaronon na sonai do. ¹⁰ Tapi Naibata, paridop ni uhur in, na mandilo nasiam ibagas Kristus Jesus hu hasangaponNi na manongtong in, pauli-ulionNi, patotaponNi, pargogohanNi anjaha pajonamonNi do nasiam, dob manaron nasiam tongkin. ¹¹ Bani ma hagogohon ronsi sadokah ni dokahni. Amen. ¹² Marhitei humbani si Siluannus, na huhira hasoman hatengeran ni uhur, hubahen do surat na pondok on bani nasiam, laho pagolpahon anjaha manaksihon, in do tongon idop ni uhur ni Naibata na sintong in, hajongjongan nasiam in. ¹³ Manongos tabi do bani nasiam kuria na i Babel, na tarpilih songon nasiam; sonai homa anakku si Markus. ¹⁴ Marsitabian ma nasiam marhitei summah holong ni uhur. Damei ma bani nasiam haganup na ibagas Kristus.