1 KORINT

¹ Humbani si Paulus, na tardilo gabe apostel ni Kristus Jesus mangihutkon rosuh ni Naibata, ampa si Sostenes sanina in, ² hubani kuria ni Naibata na i Korint, na dob pinapansing ibagas Kristus Jesus, halak na mapansing, na tardilo rap pakon haganup halak na mandilo Goran ni Tuhanta Jesus Kristus atap ija pe Tuhan ni sidea ampa Tuhanta: ³ Idop ni uhur ma bani nasiam ampa damei humbani Naibata Bapanta ampa humbani Tuhan Jesus Kristus! ⁴ Mangkatahon tarima kasih do ahu tongtong bani Naibata halani nasiam, mardingat idop ni uhur ni Naibata na binereNi bani nasiam ibagas Kristus Jesus. ⁵ Ai na dob bayak do nasiam ibagas Ia pasal haganup, ibagas ganup hata in ampa bani ganup pangarusion, ⁶ halani hasaksian pasal Jesus domma totap bani nasiam, ⁷ gabe seng marhahurangan be nasiam pasal haganup masam ni sibere-bere partonduyon ibagas na paimahon nasiam bani partalar ni Tuhanta Jesus Kristus. ⁸ Patotaponni do nasiam ronsi ujungni, gabe seng sihataon be bani ari ni Tuhan Jesus Kristus. ⁹ Haposan do Naibata, na mandilo nasiam hu parsaoran pakon AnakNi Jesus Kristus Tuhanta in. ¹⁰ Tapi hupodahi ma nasiam, nasiam saninangku, marhitei Goran ni Tuhanta Jesus Kristus, ase sahata ma nasiam haganup, ulang ma adong parbolah-bolahan bani nasiam, tapi totap ma nasiam sada marhitei sada ni uhur ampa sada ni pingkiran. ¹¹ Ai das do hubakku marhitei parrumah ni si Kloe pasal nasiam, saninangku, paboa adong do paringoran i tongah-tongah nasiam. ¹² On do na huhatahon: Ganup do nasiam mangkatahon: Ahu susian ni si Paulus! Ahu susian ni si Apollos! Ahu susian ni si Kepas! Ahu susian ni Kristus! ¹³ Ai na binagi do Kristus in? Ai na dob tarsilang do si Paulus manghophop nasiam? Ai hubagas goran ni si Paulus do nasiam tardidi? ¹⁴ Tarima kasih ma huhatahon, halani seng dong hudidi humbani nasiam sobali si Krispus ampa si Gayus, ¹⁵ ase ulang adong na mangkatahon hubagas goranku sandiri nasiam tardidi. ¹⁶ Tapi dihut do tene parrumah ni si Stepanas hudidi; na legan, seng hubotoh atap adong ope, na dob hudidi. ¹⁷ Ai seng isuruh Kristus ahu mandidihon, tapi mangambilankon Ambilan Namadear do, anjaha ai pe seng marhata hapentaron, ase ulang lumei kuasa ni silang ni Kristus. ¹⁸ Ai haotoon do hata pasal silang in bani halak na laho magou, tapi hagogohon ni Naibata do in banta, na jumpahan haluahon. ¹⁹ Ai tarsurat do: Huparseda do hapentaron ni na pentar, anjaha huambukkon do uhur ni siparuhur. ²⁰ Ija do halak na pentar? Ija do sibotoh surat? Ija do siparsual-sual ni dunia on? Ai lang gabe haotoon do hapentaron ni dunia on ibahen Naibata? ²¹ Ai halani ibagas hapentaron ni Naibata, seng itanda dunia on Naibata marhitei hapentaron, gabe iharosuhkon Naibata ma paluahon na porsaya in marhitei ambilan haotoon. ²² Ai na mangindo tanda do halak Jahudi, anjaha mangindahi hapentaron halak Gorik. ²³ Tapi anggo hanami, Kristus na tarsilang in do iambilankon hanami; parsangsian do in bani Jahudi anjaha haotoon bani halak sipajuh begu-begu. ²⁴ Tapi bani na dob tardilo ai, halak Jahudi age halak Gorik, Kristus, ai ma hagogohon ni Naibata ampa hapentaron ni Naibata. ²⁵ Ai haotoon ni Naibata, pentaran do ai ase jolma in, anjaha hagalekon ni Naibata, gogohan do ai ase jolma in. ²⁶ Tonggor nasiam ma pandiloonni in bani nasiam, saninangku, seng piga nasiam na pentar mangihutkon pardagingon, seng piga na markuasa, seng piga na sangap. ²⁷ Tapi na oto nini uhur ni dunia on, ipilih Naibata laho pailahon na pentar, anjaha na galek nini uhur ni dunia on, ipilih Naibata laho pailahon na gogoh. ²⁸ Na toruh anjaha na mahiri i dunia on ipilih Naibata, na lang in do tene, ase langkononni na adong hinan, ²⁹ ase ulang adong hajolmaon na mangunsagah i lobei ni Naibata. ³⁰ Tapi marhiteihonsi do ase ibagas Kristus Jesus nasiam, ai Ia do gabe hapentaron banta humbani Naibata, hapintoron ampa hapansingon ampa haluahon, ³¹ ase saud na dob tarsurat in: Na mamuji dirini, ibagas Tuhan in ma ia mamuji!

¹ Ahu pe nasiam sanina, sanggah na roh ahu bani nasiam, seng roh ahu mangambilankon hasaksian pasal Naibata marhitei hata hamaloon atap hapentaron pe. ² Ai huputuskon do ibagas uhurhu, aha pe lang sihol botohonku i tongah-tongah nasiam sobali Jesus Kristus, ai ma na dob tarsilang ai. ³ Ia ahu, ibagas hagalekon, biar ampa hagobiron do i tongah-tongah nasiam. ⁴ Hatangku ampa parambilanonku pe, seng marhata hapentaron na manarik ai, tapi marhasoman hagogohon pakon Tonduy do, ⁵ ase maronjolan haporsayaon nasiam bani hagogohon ni Naibata, ulang ma bani hapentaron ni jolma. ⁶ Tapi hapentaron do, na sinahapkonnami ai bani halak na dob matoras, tapi sedo hapentaron ni dunia on atap hapentaron ni pambobai ni dunia on, na laho salpu in. ⁷ Tapi hapentaron na sinahapkonnami ai, ai ma hapentaron ni Naibata, gok rusia anjaha ponop, na dob tinotapkon ni Naibata, paima dong dunia on bahen hamuliaonta. ⁸ Ai ma na so tinanda ni pambobai ni dunia on, ai ambit itandai, tontu seng parsilangkononni Tuhan ni hamuliaon in. ⁹ Tapi songon na tarsurat in: Na so ongga niidah ni mata, na so ongga binogei ni pinggol anjaha na so ongga tubuh ibagas uhur ni jolma, ai do ipasirsir Naibata bani na manghaholongiSi. ¹⁰ Tapi ipatalar Naibata do ai banta marhitei Tonduy in. Ai haganup do idadap Tonduy in, ronsi na ibagas uhur ni Naibata. ¹¹ Ai ise jolma mambotoh na bani jolma in, sobali tonduy ni jolma na ibagas dirini? Sonai ma homa, seng dong na mananda na bani Naibata, sobali Tonduy ni Naibata. ¹² Tapi seng ijalo hita tonduy ni dunia on, tapi Tonduy na humbani Naibata do, ase ibotoh hita na nilayak-layakkon ni Naibata banta. ¹³ Anjaha in do na hinatahonnami, seng ibagas hata hapentaron ni jolma na targuruhon, tapi na pinodahan ni Tonduy do, laho patorangkon partonduyon bani halak na dob igoki Tonduy. ¹⁴ Ia jolma pardunia on, seng tarjalosi na humbani Tonduy ni Naibata, ai haotoon do ai bani, anjaha seng tartandasi, ai marhitei Tonduy do hansa boi dadapon ai. ¹⁵ Tapi sipartonduy idadap do haganupan ai, tapi ia sandiri seng tardadap atap ise pe. ¹⁶ Ai ise ma na mananda pingkiran ni Tuhan in, ase ia ma mangajariSi? Tapi uhur ni Kristus do banta.

¹ Ahu pe, nasiam sanina, seng tarbahen ahu hinan marsahap bani nasiam songon bani partonduy, tapi songon dompak pardaging do, anjaha poso-poso ibagas Kristus. ² Dadih do hupainumkon bani nasiam, sedo sipanganon hinan, ai seng tarjalo nasiam ope in; gari sonari, seng tarjalo nasiam ope, ³ ai tong ope nasiam pardaging. Ai anggo masa bani nasiam parsimburuon ampa parsalisihan, ai lang pardaging do nasiam, anjaha marparlahou domu hubani biak hajolmaon? ⁴ Ai anggo adong na mangkatahon: "Susian ni si Paulus do ahu", anjaha na legan use mangkatahon, "Susian ni si Apollos do ahu", ai lang paruhur hajolmaon do nasiam ai? ⁵ Ai ise do si Apollos? Ise si Paulus? Juak-juak do sidea, parhiteian nasiam gabe porsaya, anjaha ganup domu hubani pambere ni Tuhan bani. ⁶ Ahu do manuan, si Apollos mangarbahi, tapi Naibata do patubuhkon. ⁷ Sedo sipanuan atap sipangarbahi na penting, tapi Naibata, na patubuhkon ai do. ⁸ Dos do sipanuan ampa sipangarbahi, anjaha ganup manjalo upahni domu hubani horjani bei. ⁹ Ai hasoman parhorja ni Naibata do hanami; juma ni Naibata anjaha rumah ni Naibata do ia nasiam. ¹⁰ Domu hubani idop ni uhur ni Naibata, na binereNi bakku, hupauli onjolan ai, songon binahen ni tukang na pandei; tapi na legan do na pajongjongkon i atasni. Tapi ganup ma mardiateihon, sonaha parpajongjongni i atas ni ai. ¹¹ Ai seng tarpauli onjolan na legan, sobali na dob pinajonam in, ai ma Jesus Kristus in. ¹² Ase anggo adong halak na paulihon i atas ni ai, omas, pirak, batu na maharga, hayu, lamlam atap anggala pe, ¹³ hinorjahon ni ganup halak maningon talar do ai. Ai ari simagira ai do patandahon ai, halani marhitei apuy do ai roh, anjaha apuy ai do manguji barang sonaha horja ni ganup halak. ¹⁴ Anggo totap horja ni atap ise pe, na pinajongjongni iatas ni ai, jaloonni do upah. ¹⁵ Tapi anggo bois mosog hinorjahonni, rugi ma ia; maluah do anggo ia sandiri namin, tapi songon na manlopusi apuy ma. ¹⁶ Ai seng ibotoh nasiam, rumah ni Naibata do nasiam anjaha Tonduy ni Naibata marianan ibagas nasiam? ¹⁷ Anggo adong na parsedahon rumah ni Naibata, parsedaon ni Naibata do ia, ai na pansing do rumah ni Naibata, ai ma nasiam. ¹⁸ Ulang ma adong na paoto-otohon dirini. Anggo adong i tongah-tongah nasiam na mamingkir na pentar ia i tanoh on, gabe oto ma ia lobei, andohar pentar use. ¹⁹ Ai hapentaron ni dunia on, haotoon do in i lobei ni Naibata, ai tarsurat do: Itangkap do halak na pentar ibagas akal ni sidea. ²⁰ Dob ai use: Ibotoh Tuhan in do, sisoya-soya do pingkiran ni halak na pentar. ²¹ Ase ulang ma adong na mangunsagah bani jolma. Ai haganup in nasiam do simadasi, ²² barang si Paulus, si Apollos, si Kepas, dunia on, hagoluhan, hamateian, na masa sonari ampa na sihol masa, haganup do bani nasiam, ²³ tapi Kristus do simada nasiam anjaha Naibata do simada Kristus.

¹ Ihira jolma in ma hanami juak-juak ni Kristus anjaha sijolom anak-kunsi ni rusia ni Naibata. ² Na parlobei ipindo humbani sijolom anak kunsi, ai ma ase haposan sidea jumpah. ³ Anggo bakku, parkara na hampung do ai, ia iuhumi nasiam pe ahu, atap pangadilan ni jolma pe; tapi ahu pe, seng huuhumi diringku. ⁴ Ai seng dong salahku, anggo na hubotoh, tapi seng pintor ahu halani ai, Tuhan in do na manguhumi ahu. ⁵ Halani ai ulang ma nasiam manguhumi ilobei ni panorangni, ilobei ni parroh ni Tuhan in, na manondangi sagala na ponop ibagas na golap, anjaha na patalarhon sagala sura-sura ni uhur. Jadi ganup ma bani panorang ai dapotan puji-pujian humbani Naibata. ⁶ Tapi hubakku ampa hubani si Apollos do, nasiam sanina, hutarik hata ai, halani nasiam, ase marhitei hanami iguruhon nasiam, ulang ma nalobihi na tarsurat in: Ulang ma adong humbani nasiam na pabanggal dirini manghasomani na sada, laho mangimbang na sada nari. ⁷ Ai ise mambahen marhasurungan ham? Ai aha na adong bamu, na so jinalomu? Anggo na manjalo do, mase ma mangenjeng ham songon na so manjalo? ⁸ Domma bosur nasiam, domma bayak. Domma gabe raja nasiam, hanami lape. Ambit ma namin gabe raja nasiam, ase dihut hanami raja rap pakon nasiam! ⁹ Ai nini uhurhu, na dob ibahen Naibata do hanami apostel, gabe sitoruhan, songon na dob ipadas hu hamateian; gabe sitontonan do hanami bani dunia on, bani malekat ampa jolma. ¹⁰ Na oto do hanami halani Kristus, tapi nasiam, na pentar do ibagas Kristus. Hanami na galek, tapi nasiam na gogoh. Hanami na dorun, tapi nasiam na sangap. ¹¹ Ronsi panorang on loheian anjaha horahan do hanami, hurang bani parhiouan, hona bogbogan anjaha seng marianan na totap, ¹² loja marhorja marhitei tangannami sandiri. Anggo hona parpahiri mamasu-masu do hanami, anggo hona parburu, sabar do hanami, ¹³ anggo ipahata-hata, basar do hanami. Gabe songon tompoh-tompoh ni dunia on do hanami, songon apus-apus ni nahei ni haganup halak ronsi sonari. ¹⁴ Sedo na laho pailahon nasiam ase husurat on, laho paingat nasiam do songon anak na hinaholongan. ¹⁵ Ai age pe adong salaksa pangajari bani nasiam marhitei Kristus, seng piga anggo bapa, ai ahu do manubuhkon nasiam ibagas Kristus Jesus, marhitei Ambilan Namadear. ¹⁶ Halani ai huojur ma nasiam, gabe sitiru ahu ma nasiam! ¹⁷ Halani ai do ase husuruh bani nasiam si Timoteus, ai ma anak bakku, na hinaholongan anjaha hatengeran ni uhur ibagas Tuhan, ase ia ma paingatkon nasiam pasal dalanku ibagas Kristus Jesus, songon na huajarhon ija-ija pe bani haganup kuria in. ¹⁸ Adong do deba na pabanggal-banggal dirini, songon na so roh be ahu bani nasiam. ¹⁹ Tapi podas do ahu roh marayak nasiam, anggo marosuh Tuhan, anjaha botohonku ma ijin gogoh ni na pabanggal-banggal dirini, sedo hata ni sidea. ²⁰ Ai sedo ibagas hata harajaon ni Naibata, tapi ibagas hagogohon do. ²¹ Aha do ipangindo uhur nasiam? Marlonsing-lonsing do ahu roh bani nasiam, barang ibagas holong atap lamlam ni uhur do?

¹ Tongon, tarbogei do, masa parriah-riahon bani nasiam, anjaha gari bani sipajuh begu-begu parriah-riahon na sonai seng masa, ai ma, pala iparjolma parinangon ni bapani. ² Anjaha sonai pe, ipagijang nasiam do diri nasiam. Ai lang dearan ma namin marpusok ni uhur nasiam, ase ipabali hun tongah-tongah nasiam na mangkorjahon na sonai? ³ Anggo ahu, age pe daoh pamatangku, i tongah-tongah nasiam do mangihutkon partonduyon; domma songon na i tongah-tongah nasiam ahu mandabuh uhum bani na mangkorjahon sisonai ai, ⁴ ibagas Goran ni Tuhan Jesus. Anggo martumpu nasiam, anjaha tonduyhu rap pakon nasiam, marhasoman hagogohon ni Tuhanta Jesus, ⁵ padason ma halak na sonai bani setan, laho mangagou dagingni, andohar maluah tonduyni bani ari ni Tuhan Jesus. ⁶ Seng dear pangenjengon nasiam in. Lang ibotoh nasiam, otik pe na migar in, iigari do ganup niagu in? ⁷ Borsih ma padarat nasiam na migar na dob dokah in, ase na niagu na baru nasiam, halani seng niigaran nasiam. Ai domma ibunuh Biri-biri paska banta, in ma Kristus. ⁸ Ai pe marpesta ma hita, ulang marhitei na migar na dob madokah, ulang marhitei na migar hajahaton atap hasamboron, tapi marhitei ruti na so niigaran ma ibagas hasusion ampa hasintongan. ⁹ Domma husuratkon bani nasiam, na so bulih saor nasiam pakon parriah-riah. ¹⁰ Seng huhatahon ganup parriah-riah na i dunia on atap paruhur haut atap panrampok atap sisombah gana-gana; ambit sonai, maningon mandarat ma nasiam hun dunia on. ¹¹ On do tene na huhatahon bani nasiam bani surat in. Ulang ma saor nasiam bani halak na margoran sanina, hape parriah-riah do, atap bani paruhur haut atap sisombah gana-gana atap sipanrisai atap siparmabuk atap sipanrampok. Gari rap mangan pakon halak sisonai ai seng bulih. ¹² Ai mase ma uhumonku na idarat ni kuria? Ai lang nasiam siuhumi na ibagas kuria? ¹³ Na i darat, Naibata do na manguhumi ai. Padarat nasiam ma siparjahat in hun tongah-tongah nasiam!

¹ Anggo adong humbani nasiam na marpakara dompak hasomanni, pag do ia pauhumhon dirini bani halak sipargeduk, anjaha sedo bani halak na mapansing? ² Ai lang ibotah nasiam, halak na pansing do na sihol manguhum dunia on? Jadi, anggo nasiam do na manguhumi dunia on, ai lang talup do homa nasiam manguhumi parkara na sonin etekni? ³ Ai lang ibotoh nasiam, malekat pe uhumonta do? Lambin pasal pargoluhon ari-ari on ma lang? ⁴ Hape anggo adong parkara nasiam pasal pargoluhan ari-ari, mase ma ipauhumhon nasiam in bani halak na madorun bani kuria in? ⁵ Na pailahon nasiam do hatangkon: Na so adong do na maruhur bani nasiam, age sahalak, na boi manguhumi sanina samah sanina? ⁶ Na marpakara do hape sanina samah sanina, anjaha i lobei ni na so porsaya? ⁷ Tongon, hataluon nasiam do in, anggo marpakara nasiam samah nasiam. Mase ma lang rahanan itaron nasiam na so pintor? Mase ma lang rahanan balosan nasiam hona rampas? ⁸ Hape nasiam sandiri do mambahen na so pintor anjaha manrampasi, anjaha samah na marsanina. ⁹ Ai lang ibotoh nasiam, na so sitean harajaon ni Naibata do halak pargeduk? Ulang nasiam kahou! Seng sitean harajaon ni Naibata parriah-riah atap sisombah gana-gana atap parbangkis atap na marjolmahon dalahi, ¹⁰ atap panangko atap paruhur haut atap parmabuk atap panrisai atap panrampok pe. ¹¹ Anjaha sisonai do nasiam deba lobei. Tapi domma nasiam iburihi, domma ipapansing, domma ipintori marhitei Goran ni Tuhan Jesus Kristus ampa marhitei Tonduy ni Naibatanta. ¹² Haganup do bulih bakku, tapi seng haganup marguna. Haganup do bulih bakku, tapi seng bulih palopasonku diringku patundukon ni atap aha pe. ¹³ Bani boltok do sipanganon anjaha boltok bani sipanganon, tapi rap parontihonon ni Naibata do in. Tapi anggo angkula in, ulang bani parriah-riahon, bani Tuhan ma in, anjaha bani angkula in do Tuhan. ¹⁴ Naibata do na dob papuho Tuhan in, anjaha papuhoonNi do age hita marhitei hagogohonNi ai. ¹⁵ Ai lang ibotoh nasiam pagori ni Kristus do angkula nasiam? Mintor pakeionku ma pagori ni Kristus in gabe pagori ni boru jalang? Lang ale! ¹⁶ Ai lang ibotoh nasiam, na padomu dirini bani boru jalang, na gabe sada angkula do ai? Ai nini do: Na gabe sada daging do na dua ai. ¹⁷ Tapi na padomu dirini bani Tuhan in, gabe sada tonduy do ia pakonSi. ¹⁸ Maporus ma nasiam humbani parriah-riahon! Sagala dousa na hinorjahon ni jolma, idarat ni angkulani do ai, tapi na marriah-riah, bani angkulani do ia na mardousa ai. ¹⁹ Ai lang ibotoh nasiam, angkula nasiam do rumah ni Tonduy Napansing, na adong ibagas nasiam, na dob jinalo nasiam humbani Naibata, anjaha sedo nasiam simada nasiam? ²⁰ Ai harga do nasiam itobus, halani ai pasangap nasiam ma Naibata marhitei angkula nasiam.

¹ Tapi pasal na sinuratkon nasiam, on ma balosku: Dear do bani dalahi, ulang manjamah naboru. ² Tapi laho manlembangi parriah-riahon, dear ma ganup dalahi adong parinangonni sandiri, anjaha ganup naboru adong paramangonni sandiri. ³ Idalankon paramangon ma hawajipanni bani parinangonni, sonai homa parinangon dompak paramangonni. ⁴ Seng saguru bani parinangon in angkulani, tapi bani paramangonni do; sonai homa, seng saguru bani paramangon angkulani, tapi bani parinangonni do. ⁵ Ulang ma marsipadaohan nasiam, anggo seng humbani dos ni riah anjaha marpanorang, ase sompat martonggo; dob ai marsipadohoran ma use, ase ulang ilajou sibolis in nasiam, halani seng tahan mangorom. ⁶ Tapi huhatahon pe sonai, na mambere partimbangan do ahu, sedo na mamarentah. ⁷ Huparsinta do ase ganup jolma songon ahu on; tapi bani ganup do adong silayak-layak humbani Naibata, na sada sonon, na sada nari sonin. ⁸ Tapi on ma hatangku bani na so mompo ampa bani naboru na mabalu: Dear ma bani sidea, totap songon ahu on. ⁹ Tapi anggo seng tarrajai sidea diri ni sidea, marhajabuan ma; ai dearan do marhajabuan humbani na garang. ¹⁰ Bani na dob marhajabuan huparentahkon ma, sedo ahu tene tapi Tuhan do: Seng bulih sirang naboru ai humbani paramangonni. ¹¹ Tapi anggo domma sirang, ulang be laho, atap mardomu ma use bani paramangonni hinan. Anjaha dalahi pe, seng bulih sirangkononni parinangonni. ¹² Bani na legan ai ahu mangkatahon, sedo Tuhan in: Anggo adong sada sanina na marparinangon na so porsaya, anggo marosuh do uhur ni naboru ai rap pakonsi, ulang ma isirangkon ia. ¹³ Anjaha anggo seng porsaya halahoan ni sada naboru, anggo marosuh do dalahi ai rap pakonsi, ulang ma itadingkon ia. ¹⁴ Ase gabe pansing do dalahi na so porsaya ai marhitei parinangon ai, anjaha gabe pansing do naboru na so porsaya ai marhitei sanina ai. Ambit lang, butak ma niombah nasiam, tapi tongon pansing do sidea. ¹⁵ Tapi anggo isirangkon na so porsaya ai dirini, paturut ma sirang. Seng sangkut sanina atap botou na dob Kristen bani na sonai ai; tapi bani pardameian do idilo Naibata nasiam. ¹⁶ Ai sonaha ma ibotoh ham inang, atap na tarpaluah ham do paramangonmu? Ham bapa, ai sonaha ma ibotoh ham, atap na tarpaluah ham do parinangonmu? ¹⁷ Tapi ganup ma marpalahou domu hubani na binere ni Tuhan bani, domu hubani pandilo ni Naibata bani. Lanjar in do bani ganup kuria in hutaurhon. ¹⁸ Anggo domma tarsunat sada halak tardilo, ulang ma ipaubah ai; na so tarsunat, sanggah tardilo ia, ulang ma ipasunatkon dirini. ¹⁹ Ai na marsunat atap na so marsunat seng adong harga ni ai, tapi na mandalankon titah ni Naibata do. ²⁰ Ganup ma totap songon sanggah na tardilo ai ia. ²¹ Anggo jabolon ham sanggah na tardilo ai, ulang ma haru uhurmu pasal ai. Tapi anggo boi do maluah ham, dearan ma maluah. ²² Ai jabolon na tardilo ibagas Tuhan in, halak na maluah do ai bani Tuhan in; sonai homa, halak na maluah na tardilo ai, jabolon ni Kristus do. ²³ Harga do nasiam itobus, ulang ma ra nasiam parjabolonon ni jolma. ²⁴ Ganup ma nasiam sanina, sonin ia tardilo, sonai ma ia totap i lobei ni Naibata. ²⁵ Ia pasal anak boru, seng adong bakku parentah ni Tuhan in. Tapi pingkiranku ma huhatahon songon sada halak hatengeran, halani idop ni Tuhan in. ²⁶ Nini uhurhu, mangidah hasunsahan na masa sonari, dear ma sada halak totap ia songon sisonari ai. ²⁷ Domma sangkut ham bani sada naboru? ulang pindahi dalan sirang! Seng sangkut ham bani sada naboru? Ulang pindahi naboru! ²⁸ Anggo mompo ham, seng mardousa ham ijai, anjaha anggo laho anak boru seng mardousa ia. Tapi marhasunsahan do halak sisonai bani daging, anjaha sihol do uhurhu maluah nasiam hunjai. ²⁹ Tapi on do na huhatahon, nasiam sanina: Pondok mando panorangni. Sonon ma hu lobeian on: Songon na so marparinangon ma na marparinangon, ³⁰ anjaha na tangis songon na so tangis, anjaha na marmalas ni uhur songon na so marmalas ni uhur, anjaha na mamboli songon na so marnah, ³¹ anjaha na mamorluhon dunia on songon na so mamorluhon, ai na laho salpu do ruhut ni dunia on. ³² Tapi sihol do uhurhu ulang sunsah nasiam. Isarihon na so marhajabuan do na porlu bani Tuhan in, ai ma, sonaha mambahen rosuh ni Tuhan in. ³³ Tapi na marparinangon mansarihon na porlu i dunia on, sonaha ia boi mambuat uhur ni parinangonni, jadi mardua uhur do ia. ³⁴ Anjaha puang-puang na so marparamangon pakon anak boru, isarihon do na porlu bani Tuhan in, ai ma sonaha ase pansing sidea bani angkula age bani tonduy. Tapi na dob marparamangon isarihon do na porlu i dunia on, sonaha ase boi ia mambuat uhur ni paramangonni. ³⁵ Tapi huhatahon pe sonin, ase marguna do bani nasiam, sedo na laho manidingi nasiam, tapi ase porman do nasiam anjaha totap bani Tuhan in, seng manirpang-nirpang. ³⁶ Tapi anggo hurang patut do iahap sada halak paturutonni sonin boruni, na dob anak boru, na dob torasan, anggo maningon do laho, ipasaud ma rosuhni ai; seng mardousa ia ijai, marhajabuan ma sidea. ³⁷ Tapi barang ise na dob martotap ni uhur, sedo na tarpaksa, tapi humbani rosuhni do sura-surani ai, anjaha domma iputuskon ai ibagas uhurni torus manramotkon boruni ai, dear do pambahenni ai. ³⁸ Ase, atap ise na palaho boruni na dob anak boru, dear do pambahenni ai, tapi dearan do pambahen ni na so palahohonsi. ³⁹ Sangkut do naboru na dob laho sadokah manggoluh paramangonni, tapi anggo matei paramangonni, maluah ma ia anjaha boi laho atap bani ise harosuh ni uhurni, asal ma ibagas Tuhan in. ⁴⁰ Tapi nini uhurhu, sonangan ma ia, anggo sonai totap ia, anjaha porsaya do ahu adong do homa bakku Tonduy ni Naibata.

¹ Tapi pasal gulei na dob ginalangkon, ibotoh hita do, paboa haganup do hita marnah habotohon. Na pabanggal-banggalhon diri do habotohon, tapi na padear-dearhon do holong ni uhur. ² Anggo adong na mangagan, na dob dong binotohni, seng ibotoh ai ope sonaha habotohon na sasintongni. ³ Tapi barang ise na mangkaholongi Naibata, ai do na tinanda ni Naibata. ⁴ Pasal na mangankon gulei na dob ginalangkon, ibotoh hita do, paboa seng dong naibata-naibata i dunia on, anjaha seng adong Naibata sobali Sisada-sada in. ⁵ Ai age pe dong igoran naibata i langit sonai i tanoh on, ai buei do tongon iparnaibata ampa ipartuhan, ⁶ tapi banta sada do Naibata, Bapa in, parmulaan ni haganup anjaha hita hu-Bani; anjaha sada do Tuhan, in ma Jesus Kristus, parhiteian ni haganup, anjaha marhiteihonsi do hita adong. ⁷ Tapi seng haganup simada habotohon ai. Adong ope na mangankon ai songon galangan tongon, halani somal iparhatongon naibata-naibata ronsi nuan, gabe butak ma panggora ni uhur ni sidea na hurang toguh in. ⁸ Tapi seng ipadohor sipanganon hita bani Naibata. Anggo seng napangan ai, seng harugian hita, anjaha napangan pe seng maruntung hita. ⁹ Tapi jaga ma, ulang ma kuasa nasiam in gabe parsangsian bani halak na galek. ¹⁰ Ai anggo adong na mangidah ham, simada habotohon ondi, hundul mangan i rumah panumbah-numbahan, ai lang na mangojur panggora ni uhurni na galek ai ma ai, mangankon gulei sigalanghononkon bani naibata-naibata? ¹¹ Gabe magou ma na galek in halani habotohonmu in, ai ma sanina, na hinopkop ni Kristus marhitei parmateiNi. ¹² Anggo mardousa nasiam sonai bani sanina ai, anjaha isedai nasiam panggora ni uhur ni na galek ai, mardousa do nasiam homa ijai bani Kristus. ¹³ Halani ai, anggo sangsi do saninangku halani sipanganon, sabonar lang be panganonku gulei lalab, ase ulang sangsi saninangku hubahen.

¹ Ai lang bebas do ahu? Ai lang apostel do ahu? Ai lang domma huidah Jesus, Tuhanta in? Ai lang horjangku do nasiam ibagas Tuhan in? ² Anggo lang apostel ahu bani halak na legan, tapi apostel do anggo ahu bani nasiam, ai nasiam do lak ni haapostelonku ibagas Tuhan in! ³ On ma balosku bani halak na sihol mamareksai ahu. ⁴ Na so marhak do hanami mangan ampa minum? ⁵ Na so marhak do hanami ase adong na gabe sinrumah pangkasomani bennami, songon apostel na legan ai, pakon anggi ni Tuhan in ampa si Kepas? ⁶ Ai pitah ahu ampa si Barnabas do na maningon marhorja laho mansarihon goluhnami? ⁷ Ija ma adong tentara, na mambalanjai dirini sandiri? Ise ma na mambahen pohon anggur, na so mangankon humbani buahni? Ise ma na marmahan pinahan, na so minum dadih humbani na pinarmahanni? ⁸ Domu hubani hasomalan ni jolma do na huhatahon in? Ai lang sonin do homa hata ni titah in? ⁹ Ai bani titah ni si Musa pe tarsurat do: Seng bulih huntamonmu babah ni lombu na mardogei! Ai lombu do sinarihon ni Naibata ijai? ¹⁰ Ai lang hubanta do hata ai? Ai halani hita do ase tarsurat: Patut do mangarap paninggala humbani na tininggalaanni, anjaha pardogei mangarap bani parbagiananni. ¹¹ Anggo isuan hanami bani nasiam partonduyon, ai banggal ma ai anggo marpariama hanami humbani nasiam na porlu bani pardagingon? ¹² Ai anggo marrupei na legan humbani nasiam, samintolah hanami ma lang? Tapi seng ipakei hanami hak in, tapi sabar do hanami bani haganup, ase ulang tarambat Ambilan Namadear ni Kristus ibahen hanami. ¹³ Ai lang ibotoh nasiam, na mangkorja i rumah panumbahan mangan hun rumah panumbahan, anjaha na marugas bani anjap-anjap, dapotan hunjai? ¹⁴ Lanjar sonai do iaturhon Tuhan in bani siparambilan na madear: Humbani Ambilan Namadear in ma sidea manggoluh. ¹⁵ Tapi anggo ahu, sada pe lang hudalankon ai; anjaha seng husurathon on, ase ipadalan in bakku. Ai rahanan do matei ahu, humbani na maseda hasurungankai. ¹⁶ Ai anggo huambilankon Ambilan Namadear in, seng hasurungan in bakku, ai na maningon do in bakku. Bursik ma ahu, anggo seng huambilankon Ambilan Namadear in. ¹⁷ Ai anggo huhorjahon in humbani rosuh ni uhurhu, marupah ma ahu. Tapi anggo seng humbani rosuh ni uhurhu, na niondoskon ma jabatan in bakku. ¹⁸ Ase aha do upahku? Ai ma, huambilankon do Ambilan Namadear in, seng pala marupah, ase ulang hupakei hakku na mardomu bani Ambilan Namadear in. ¹⁹ Ai age pe bebas ahu humbani ganup halak, huparjabolon do diringku bani haganup, ase humbuei sidea dapot ahu. ²⁰ Gabe songon Jahudi do ahu bani Jahudi, ase dapot ahu Jahudi. Bani na ginomgoman ni titah in, songon na ginomgoman ni titah do ahu, age pe lang ginomgoman ni titah in ahu, andohar dapot ahu na ginomgoman ni titah in. ²¹ Bani na so martitah songon na so martitah, age pe sedo na so martitah ahu humbani Naibata, tapi itoruh ni titah ni Kristus do, ase jumpah ahu na so martitah. ²² Bani na galek, gabe songon na galek do ahu, ase dapot ahu na galek in. Huparomban do diringku bani haganup, andohar siotikanni maluah deba hubahen. ²³ Tapi haganupan in huhorjahon halani Ambilan Namadear, andohar dihut ahu marrupei bani pasu-pasuni. ²⁴ Ai lang ibotoh nasiam, ia na marlumba haganup do namin na marlintun, tapi sada do na manjalo upah hamonangan. Sonai ma bujur nasiam marlintun, ase dapotan nasiam. ²⁵ Tapi sagala siparlumba mangorom do bani haganup. Ibahen sidea do sonai, ase ijalo sidea sortali rudang na ra seda, tapi hita na so ra maseda. ²⁶ Ia ahu, sedo na so martujuan parlintunonku, sedo songon na manenju logou ahu martenju. ²⁷ Tapi hupukpuki do angkulangku anjaha hupatunduk, ase ulang halak na legan huambilani, hape ahu magou.

¹ Seng dear uhurhu lang ibotoh nasiam, nasiam saninangku; Ia ompungta haganup do sidea nilinggoman ni hombun ai, anjaha ganup do sidea mandipari laut ai, ² anjaha haganup do sidea tardidi hubani si Musa ibagas hombun ai ampa ibagas laut ai, ³ anjaha haganup do sidea mangan sipanganon partonduyon na samasam ai, ⁴ lanjar haganup do sidea manginum siinumon partonduyon na samasam ai. Ai minum do sidea humbani dolog batu partonduyon na mangirikkon sidea ai, anjaha Kristus do dolog batu ai. ⁵ Tapi seng marosuh Naibata bani bueinan humbani sidea, ai rasei do sidea i halimisan ai. ⁶ Tapi gabe panjoraan ma ai banta, ase ulang hisapan hita bani na masambor songon sidea na hisapan ai. ⁷ Anjaha ulang ma sibalosi naibata na legan nasiam songon deba humbani sidea, ai tarsurat do: Hundul ma bangsa ai mangan ampa minum, anjaha jongjong ma sidea manortori. ⁸ Ulang ma hita marriah-riah, songon deba humbani sidea na marriah-riah ai, gabe rasei ibagas sadari dua puluh tolu ribu halak. ⁹ Ulang ma lajou hita Tuhan in songon deba humbani sidea na manlajou ai, gabe marmateian sidea ibahen ulog ai. ¹⁰ Ulang ma nasiam marungut-ungut songon deba humbani sidea na marungut-ungut ai, gabe magou sidea ibahen sipangagou. ¹¹ Gabe usihan do na masa bani sidea, tapi isurathon do ai bahen lumba-lumba banta, na manggoluh ibagas panorang ni ujung ni dunia on. ¹² Halani ai, halak na mangagan jongjong ia, pangkei ma, ase ulang tompas ia. ¹³ Parlajouan na somal bani jolma do masa bani nasiam: Hatengeran do Naibata, seng paturutonNi nasiam lajouon lobih humbani gogoh nasiam; tapi rap pakon parlajouan ai bahenonni do homa hadobanni, ase tartaron nasiam. ¹⁴ Halani ai, nasiam na huhaholongi, maporus ma nasiam humbani parsombahon bani sisombah-sombahon. ¹⁵ Hubani na maruhur do hatangku. Timbangi nasiam ma aha na huhatahon. ¹⁶ Panginuman pasu-pasu, na tinarima kasihkonta in, ai lang parsaoran pakon daroh ni Kristus do in? Anjaha ruti na ipartopik hita in, ai lang parsaoran pakon badan ni Kristus do in? ¹⁷ Halani sada do ruti ai, gabe sada daging do hita buei, ai haganup do hita parrupei bani ruti na sada ai. ¹⁸ Tonggor nasiam ma Israel mangihutkon pardagingon! Ai lang gabe marpardomuan do sidea, na mangan humbani galangan ai ampa anjap-anjap ai? ¹⁹ Aha do na huhatahon? Na marnidok do gulei na ginalangkon, atap na margogoh do sisombah-sombahon? ²⁰ Ai lang ginalangkon ni sidea ai, bani tonduy na jahat do igalangkon sidea ai, sedo bani Naibata? Tapi seng dear uhurhu saor nasiam bani tonduy na jahat. ²¹ Seng tarbahen nasiam minum humbani panginuman ni Tuhan in, sonai homa humbani panginuman ni tonduy na jahat. Seng tarbahen nasiam parrupei humbani meja ni Tuhan in, sonai homa humbani meja ni tonduy na jahat. ²² Puhoanta ma simburu ni Tuhan in? Ai gogohan do hita hum-Bani? ²³ Haganup do boi, tapi lang haganup marguna. Haganup do boi, tapi lang haganup padearhon. ²⁴ Ulang ma marsisarihon na bani dirini bei, tapi na bani hasoman ma. ²⁵ Pangan nasiam ma haganup na jinual i pajak gulei, ulang pala martimbang-timbang halani panggora ni uhur in, ²⁶ ai gok bani Tuhan in do tanoh on ampa isini. ²⁷ Anggo iontang na so porsaya nasiam, anjaha marosuh do uhur nasiam laho, pangan nasiam ma haganup na pinatibal i lobei nasiam, ulang pala martimbang-timbang halani panggora ni uhur in! ²⁸ Tapi anggo adong na mangkatahon bani nasiam: "Gulei na ginalangkon do on," ulang ma pangan nasiam ai, halani halak na mangkatahon ai, ampa halani panggora ni uhur in. ²⁹ Sedo panggora ni uhurmu na huhatahon ai, tapi panggora ni uhur ni na legan ai do. Ai mase ma uhuman ni panggora ni uhur ni na legan ahu, bani hamardekaonku? ³⁰ Ai anggo hupangan ai marhasoman tarima kasih, mase ma pala hona risa ahu, halani na dob hujalo marhasoman tarima kasih? ³¹ Ai pe, atap na mangan atap na minum nasiam, atap aha pe ihorjahon nasiam, bahen nasiam ma haganup ai pasangaphon Naibata. ³² Ulang ma bahen nasiam parsangsian bani halak Jahudi, barang bani halak Gorik, barang bani kuria ni Naibata pe. ³³ Songon ahu pe, hubuat do uhur ni halak bani haganup, ai seng hupindahi na marguna bakku, na marguna bani na mabuei in do, andohar maluah sidea.

¹ Usihi nasiam ma ahu, songon ahu na mangusihi Kristus. ² Tapi hupuji do nasiam, halani idingat nasiam do ahu bani haganup, anjaha ijolom nasiam do aturan in, songon na dob huaturhon bani nasiam. ³ Tapi sihol ma botohon nasiam, nini uhurhu: Kristus do ulu ni haganup paramangon, paramangon ulu ni parinangon, anjaha Naibata do ulu ni Kristus in. ⁴ Sagala paramangon, na martangkuluk martonggo atap manjahai, pahiri uluni do ai. ⁵ Tapi sagala parinangon, na martonggo barang manjahai, seng marpanrungkub uluni, na pahiri uluni do ai, ai doshon na jinambak do sidea ai. ⁶ Ai anggo seng irungkub parinangon ai uluni, dearan ma ipaguntingkon. Tapi, anggo mahiri iahap parinangon igunting atap ijambak, irungkub ma dearan. ⁷ Ia paramangon, seng pala irungkub uluni, ai usihan ampa sinalsal ni hasangapon ni Naibata do ia. Tapi parinangon ai, sinalsal ni hasangapon ni paramangonni do. ⁸ Ai seng humbani naboru roh ni dalahi, tapi humbani dalahi do roh ni naboru. ⁹ Anjaha sedo halani naboru tartompa dalahi, tapi naboru halani dalahi do. ¹⁰ Halani ai, patut do marpanrungkub hasangapon parinangon bani uluni, halani malekat-malekat in. ¹¹ Tapi age sonai, ibagas Tuhan parinangon marguru bani paramangon do, anjaha paramangon marguru bani parinangon. ¹² Ai songon naboru marharohan humbani dalahi, sonai do homa dalahi marharohan humbani naboru; tapi haganup marharohan humbani Naibata do. ¹³ Nasiam sandiri ma manimbang, atap na patut do naboru martonggo bani Naibata, seng marpanrungkub uluni? ¹⁴ Ai lang biak pe iajarhon do bani nasiam, anggo marjambulan ganjang dalahi, hadorunon do ai bani? ¹⁵ Tapi anggo marjambulan ganjang naboru, hasangapon do ai bani, ai jambulan ganjang ai do ibere bani sidea gabe panrungkub. ¹⁶ Tapi anggo adong na sihol manlawan, adat na sonai seng adong banta, sonai age bani kuria ni Naibata. ¹⁷ Tapi ibagas na sihol mangaturhon on, seng hupuji nasiam, ai seng lambin dearni, tapi lambin samborni do anggo martumpu nasiam. ¹⁸ Parlobei hubogei, anggo martumpu nasiam ibagas kuria in, adong do parbolah-bolahan i tongah-tongah nasiam, anjaha huparhatongon do ai deba. ¹⁹ Ai maningon do adong golongan-golongan, ase talar paruhur na totap bani nasiam. ²⁰ Anjaha sanggah martumpu nasiam, seng tongon nasiam mangankon parpadanan ni Tuhan in. ²¹ Ai sanggah na mangan nasiam, mintor marsipangan panganonni bei do nasiam, gabe loheian ma na deba, mabuk na deba nari. ²² Ai na so adong do rumah nasiam, ase ijai nasiam mangan anjaha minum? Atap na mapas do nasiam bani kuria ni Naibata, gabe ipaila nasiam na marhahurangan? Aha ma hatahononku? Pujionku do nasiam? Pasal on seng hupuji nasiam. ²³ Ai na hujalo humbani Tuhan, ai do hupadas bani nasiam: Ia Tuhan Jesus, bani borngin sanggah hona partahian Ia, ibuat ma ruti, ²⁴ ihatahon ma tarima kasih, ipartopik, anjaha ihatahon ma: DagingKu do on, na mangkopkop nasiam. Bahen nasiam ma sonin, gabe pardingatan Bakku! ²⁵ Lanjar sonai do homa panginuman ai dob salpu na mangan ai, nini: Ia panginuman on, padan na baru ma on ibagas darohKu. Bahen nasiam ma sonin, gabe pardingatan Bakku, ganup hali iinum nasiam in. ²⁶ Ai ganup hali ipangan nasiam ruti na sonin, anjaha iinum nasiam humbani panginuman in, parmatei ni Tuhan in do iambilankon nasiam, ronsi roh Ia. ²⁷ Ase anggo adong na mangankon ruti in, anjaha na minum humbani panginuman ni Tuhan in ibagas na so talup, parsalah do ia bani badan ampa daroh ni Tuhan in. ²⁸ Tapi ipareksa jolma in ma dirini, dob ai pe ase ipangan ruti in, anjaha iinum humbani panginuman in. ²⁹ Ai barang ise na mangankon anjaha na manginum in, uhum bani dirini do na pinangan anjaha na niinumni ijin, anggo seng itimbangi daging in. ³⁰ Halani in do ase buei na galek anjaha na boritan bani nasiam, anjaha hundong ma na dob modom. ³¹ Tapi anggo iuhumi hita dirinta, seng siuhumon be hita. ³² Tapi hita na niuhuman ni Tuhan in, hona ajar do hita marhitei ai, ase ulang hona uhum hita rap pakon dunia on. ³³ Halani ai, nasiam saninangku, anggo martumpu nasiam laho mangan, marsipaimaan ma nasiam. ³⁴ Anggo dong na loheian, i rumahni ma ia mangan, ase ulang paroh uhum partumpuan nasiam. Ia na legan ai, dob roh pe ahu ase huatur.

¹ Anjaha pasal sibere-bere partonduyon ai, nasiam sanina, seng dear uhurhu lang marpambotoh nasiam. ² Ibotoh nasiam do, sanggah sipajuh begu-begu ope nasiam, na dob itogu anjaha isarad do nasiam bani gana-gana na longah. ³ Halani ai hupabotohkon ma bani nasiam: Seng adong halak, na marsahap marhitei Tonduy ni Naibata mangkatahon: "Hona papa ma Jesus," anjaha seng adong na boi mangkatahon "Jesus ai ma Tuhan," anggo lang marhitei Tonduy Napansing. ⁴ Bagei do sibere-bere partonduyon, tapi sada do Tonduy. ⁵ Bagei do horja pangidangion, tapi sada do Tuhan. ⁶ Bagei do hagogohon, tapi sada do Naibata, na mangkorhon haganupan ai ibagas haganup. ⁷ Bani ganup do ibere partalar ni Tonduy in bahen hadearon ni ganup. ⁸ Bani na sada ibere marhitei Tonduy in hata hapentaran, bani na sada nari hata habotohon romban hubani Tonduy na sasada in. ⁹ Bani na legan use haporsayaon marhitei Tonduy na sada in, bani na legan sibere-bere pamalumhon marhitei Tonduy na sada in. ¹⁰ Bani na legan hagogohon mambahen halongangan, bani na legan panjahaion, bani na legan panimbangion pasal bagei ni tonduy, bani na legan marsahap ibagas hata na legan, anjaha bani na legan use patorangkon sahap ai. ¹¹ Tapi haganupan ai ihorjahon Tonduy na sada in, palegan-legan ibagihon bani ganup romban bani rosuh ni uhurNi. ¹² Ai songon badan, sada do in, anjaha marpagori buei, tapi haganup pagorini in, age pe buei in, sada badan do in; sonai do age Kristus. ¹³ Ai ibagas sada Tonduy do haganup hita tardidi hubagas sada badan, age Jahudi, age Gorik, age jabolon age halak na bebas, anjaha sada do Tonduy ipainumhon bani hita haganup. ¹⁴ Ai badan in pe, seng sada pagori, tapi buei do. ¹⁵ Porini ihatahon nahei: Halani seng tangan ahu, seng masuk ahu bani badan, mintor lang masuk badan ma ai halani ai? ¹⁶ Anjaha porini ihatahon pinggol: Halani seng mata ahu, seng masuk ahu bani badan, mintor lang ma masuk badan ai halani ai? ¹⁷ Anggo mata haganup badan, ija ma parbinogeian? Anggo haganup pinggol, ija ma panganggoh? ¹⁸ Tapi iatur Naibata do pagori in, ganup bani iananni bei bani badan, domu hubani rosuh ni uhurNi. ¹⁹ Porini sada pagori haganup, ija ma badan? ²⁰ Ase age pe buei pagori, sada do badan. ²¹ Ase seng boi hatahonon ni mata bani tangan: "seng benahangku ho!"; atap ulu mangkatahon bani nahei: "Seng benahangku ho!" ²² Tapi tene, pagori na tar hurang idahon, ai do siporlunan, ²³ anjaha pagori ni angkulanta, na hurang harga nini uhurta, ai do sangapan ibahen hita, anjaha na hurang sangap nini uhurta sarinan do hita pasal ai. ²⁴ Tapi seng pala porlu ai bani pagori na sangap hinan. Ia Naibata, iatur do angkula in, anjaha sangapan ibahen pagori na dorun hinan, ²⁵ ase ulang adong parbolah-bolahan ibagas badan, tapi ase marsiurupan pagori samah pagori. ²⁶ Anggo mangarou sada pagori, rap mangarou do haganup pagori in, anjaha anggo ipasangap sada pagori, rap marmalas ni uhur do ganup pagori in. ²⁷ Nasiam do badan ni Kristus in, anjaha pagori do nasiam samah nasiam. ²⁸ Anjaha ipabangkit Naibata do ibagas kuria in parlobei apostel, paduahon nabi, patoluhon sipangajari, dob ai hagogohon mambahen halongangan, dob ai sibere-bere pamalumkon, gogoh laho mangurupi, hapentaran mambobai, marsahap na legan. ²⁹ Ai haganup do gabe apostel? Ai haganup do gabe nabi? Ai haganup do gabe sipangajari? Ai haganup do margogoh mambahen halongangan? ³⁰ Ai haganup do dapotan sibere-bere pamalumkon? Ai haganup do marhata na legan? Ai haganup do pandei patorangkon? ³¹ Tapi pindahi nasiam ma sibere-bere sibanggalan. Anjaha patuduhononku ope bani nasiam dalan sisurungan.

¹ Porini pe husahapkon sagala sahap ni jolma ampa malekat pe, anggo seng adong holong bakku, songon gung na marolol do ahu atap giring-giring na mardiring. ² Porini pe adong bakku sibere-bere panjahaion, anjaha hubotoh haganup rusia ampa haganup habotohon, anjaha porini pe parhaporsayaon na botul ahu gabe tarpaosor ahu dolog, anggo seng adong holong bakku, na lang do ahu. ³ Anjaha porini hulayak-layakkon haganup artangku anjaha huondoskon badanku ase itutung, anggo seng adong haholongon bakku, sabonar na so marguna do ai bakku. ⁴ Na sabar do haholongon in anjaha na basar, seng subil haholongon in, seng mangunsagah anjaha ipajuntul-juntul dirini. ⁵ Hormat do haholongon in, seng ipindahi na bani sandiri, seng urah marah, anjaha seng ipadingat-dingat na jahat. ⁶ Seng malas uhurni mangidah hagedukon, tapi malas do uhurni bani hasintongan. ⁷ Bani haganup do ia tahan, haganup do ihaporsayai, haganup do iarapkon, sabar do ia manaron haganup. ⁸ Seng na ra salpu haholongan in. Ia panjahaion maronti do, mangadi do age sahap, habotohon pe maronti do. ⁹ Ai mardeba-deba do habotohonta, anjaha mardeba-deba do age panjahaionta. ¹⁰ Anggo roh na gokan dear ai, parontihonon ma na mardeba-deba. ¹¹ Sanggah dakdanak ahu, danak do parsahapku, danak paruhuronku, danak pingkiranku, tapi dob mangodang ahu, hutadingkon do biak hadanakon ai. ¹² Anggo sonari, mangkawah do hita songon bani sormin, samak hansa, tapi use padumpar bohi ma. Mardeba-deba do panandaionku nuan, tapi anggo use gok ma panandaionku, songon na dob tinandani ahu. ¹³ Ase tolu do na totap, ai ma haporsayaon, pangarapan ampa haholongan tapi haholongan ai do sibanggalan.

¹ Parayak nasiam ma haholongon in, porluhon nasiam partonduyon, tapi siporlunan, ai ma panjahaion. ² Ia na marhata na legan, sedo jolma na pinarsahapkonni, tapi Naibata do. Ise pe lang na mangarusi, ai rusia do ihatahon ibagas tonduy. ³ Tapi na manjahai, jolma do iparsahapkon, laho pauli-ulihon, mamodahi ampa mangapohi. ⁴ Na pauli-ulihon dirini do na marhata na legan, tapi kuria in do ipauli-uli na manjahai. ⁵ Marosuh do uhurhu namin, anggo haganup nasiam marhata na legan, tapi harganan do na manjahai. Halak na manjahai surungan do ai humbani na marhata na legan, anggo seng lanjar ipatorang, laho pauli-ulihon kuria in. ⁶ Ai pe, nasiam sanina, anggo roh ahu bani nasiam marhata na legan, aha ma gunani ai bani nasiam, anggo seng huhatahon bani nasiam pangungkabon atap habotohon atap panjahaion atap pangajarion? ⁷ Umpamani parugas na so manggoluh, songon sordam atap husapi, anggo samak sorani, sonaha ma boi botohon atap na isordamhon atap na ihusapihon? ⁸ Anjaha anggo seng torang sora ni tarompet, ise ma na ra marugas laho hu parporangan? ⁹ Sonai ma nasiam pasal sahap na legan ai. Anggo isahapkon nasiam hata na so torang, sonaha ma boi botohon na hinatahon nasiam? Ai lang songon na marsahap bani logou mando in? ¹⁰ Buei do tongon bagei ni sahap i dunia on, anjaha sada pe lang na so adong artini. ¹¹ Anggo lang hubotoh arti ni hata ai, gabe bangsa na legan ma ahu bani na marsahap ai, anjaha na marsahap ai pe gabe bangsa na legan ma bakku. ¹² Anjaha sonai ma nasiam, halani ihaporluhon nasiam do partonduyon, pindahi nasiam ma hasurungan, laho pauli-ulihon kuria in. ¹³ Halani ai martonggo ma parhata na legan ai, ase tarpatorangsi. ¹⁴ Anggo martonggo ahu ibagas hata na legan, tonduyhu do na martonggo soh do anggo pingkiranku. ¹⁵ Ase sonaha ma bahenon? Martonggo ma ahu ibagas tonduyhu, tapi sihol martonggo do ahu homa ibagas pingkiranku. Mandoding ma ahu ibagas tonduyhu, tapi sihol mandoding do ahu homa ibagas pingkiranku. ¹⁶ Ai anggo mamuji ham ibagas tonduymu, sonaha ma tarbahen halak na dihut ijai mangkatahon amen bani hata tarimakasihmu ai, anggo seng iarusi? ¹⁷ Dear do namin hata tarima kasih ai, tapi seng paulihon ai bani hasoman. ¹⁸ Tarima kasih do uhurhu bani Naibata, halani pandeinan ahu marhata na legan marimbang nasiam haganup. ¹⁹ Tapi anggo ibagas kuria in, rosuhan do uhurhu mangkatahon lima hata na tararusi humbani saloksa ibagas hata na legan, ase tarajari ahu na legan. ²⁰ Nasiam sanina, ulang ma dakdanak nasiam ibagas paruhuron, dakdanak ma nasiam pasal hajahaton, tapi matoras ma bani paruhuron. ²¹ Bani titah in tarsurat do: Marhitei parhata na legan ampa marhitei bibir ni halak na legan sihol marsahap do ahu bani bangsa in, tapi age pe sonai, seng tangihonon ni sidea Ahu, nini Tuhan in. ²² Ase tanda do sahap na legan, sedo bani na porsaya, tapi bani na so porsaya do; tapi anggo panjahaion sedo bani na so porsaya, tapi bani na porsaya do. ²³ Ase anggo martumpu haganup kuria in, anjaha marhata na legan haganupan, anjaha adong masuk parguru atap na so porsaya, ai lang hatahonon ni sidea ma na gila nasiam? ²⁴ Tapi anggo haganup manjahai, anjaha adong masuk na so porsaya atap parguru, gabe haganup ma marsipaingat bani, anjaha haganup ma manguhumi na ibagas uhurni, ²⁵ gabe talar ma ponopan na ibagas uhurni, gabe manrogop ma ia, marsombah bani Naibata, anjaha marhatongonkon, na tongon do Naibata i tongah-tongah nasiam. ²⁶ Ase sonaha do, nasiam sanina? Anggo martumpu nasiam, adong do bani na sada doding, bani na sada pangajarion, bani na sada pangungkabon, bani na sada sahap na legan, bani na sada hatorangan. Tapi haganupan ai laho pauli-ulihon kuria in ma namin. ²⁷ Anggo adong na marhata na legan, sungkup ma dua atap sibueinan ma tolu halak, anjaha sada-sada ma, anjaha sahalak ma na patorangkon. ²⁸ Tapi anggo seng adong na patorangkon, sip ma ia i lobei ni kuria in; bani dirini ampa bani Naibata ma ai ihatahon. ²⁹ Anggo nabi, dear ma dua atap tolu halak manjahai, anjaha na legan ai manimbangi. ³⁰ Tapi anggo dapotan pangungkabon sada halak na hundul ijai, sip ma na parlobei ai. ³¹ Ai bulih do nasiam haganup manjahai sada-sada, ase haganup dapotan podah ampa sipaingat; ³² anjaha pambalosi do tonduy ni nabi bani nabi in, ³³ ai seng iharosuhkon Naibata na geor, tapi damei do. Songon bani haganup kuria ni halak na mapansing in, ³⁴ parsip ma naboru ibagas kuria in; ai seng patut mangkatahon hata sidea, tapi pambalosi ma, songon na hinatahon ni titah in. ³⁵ Tapi anggo adong na sihol sibotohon ni sidea, isungkun ma i rumah paramangonni, ai pantang do bani parinangon marsahap i kuria in. ³⁶ Ai humbani nasiam do luar hata ni Naibata? Atap hubani nasiam do hansa das in? ³⁷ Ganup ma mamingkir, nabi atap partonduy ia ibotoh ma, ia na husuratkon bani nasiam, in ma parentah ni Tuhan. ³⁸ Tapi anggo adong na so mangakui in, seng siakuan ia! ³⁹ Ai pe, nasiam sanina, haporluhon nasiam ma na manjahai, tapi ulang ma pandang nasiam na marhata na legan. ⁴⁰ Asal ma haganup mardalan dear anjaha maratur.

¹ Nasiam sanina, hupaingat ma nasiam pasal Ambilan Namadear, na dob huambilankon bani nasiam, na dob jinalo nasiam, na gabe hajongjongan nasiam, ² anjaha parhiteian nasiam maluah, anggo poltik panjolom nasiam bani na dob huambilankon bani nasiam; anggo na so soya do nasiam porsaya. ³ Ai parlobei do hupadas bani nasiam, na dob hujalo sandiri, ai ma: Na dob matei do Kristus halani dousanta domu hubani na tarsurat in. ⁴ Na dob tartanom do Ia, anjaha ipapuho bani ari patoluhon, domu hubani na tarsurat in. ⁵ Anjaha ipataridahkon do diriNi bani si Kepas, dob ai bani na sapuluh dua ai. ⁶ Dob ai ipataridahkon do diriNi sahali bani lobih lima ratus sanina; bueinan ope hunjai na manggoluh ronsi nuan, deba do na dob modom. ⁷ Dob ai ipataridahkon do diriNi bani si Jakobus, dob ai bani haganup apostel in. ⁸ Tapi ipudi ni haganupan ai, ipataridahkon do diriNi bakku, na tarhatahon tubuh bani na so panorangni. ⁹ Ai ahu do sietekan humbani apostel in, na seng talup namin goranon apostel, halani na dob huparburu kuria ni Naibata. ¹⁰ Tapi halani idop ni uhur ni Naibata do, ase sonon ahu nuan, anjaha seng soya idop ni uhurNi na hubakku in, ai bueinan do na huhorjahon humbani sidea haganup; sedo ahu tene, tapi idop ni uhur ni Naibata do na mangkasomani ahu. ¹¹ Atap ahu pe atap sidea, sonin do parambilanonnami, anjaha sonin do nasiam gabe porsaya. ¹² Tapi anggo domma na ambilankon Kristus, paboa na dob puho do Ia humbani na matei, mase ma adong deba i tongah-tongah nasiam, na mangkatahon, na so adong parpuhoon humbani na matei? ¹³ Tapi, anggo seng adong parpuhoon humbani na matei, Kristus pe seng puho humbani na matei. ¹⁴ Tapi, anggo seng puho Kristus humbani na matei, jadi lumei ma ambilannami, anjaha lumei ma homa haporsayaon nasiam. ¹⁵ Tardapot ma age hanami saksi palsu ni Naibata, halani isaksihon hanami pasal Naibata, na dob papuho Kristus, hape seng ipapuho, anggo na tongon do seng mulak manggoluh na matei. ¹⁶ Ai, anggo seng ipapuho na matei, seng tongon puho age Kristus. ¹⁷ Tapi, anggo seng ipapuho Kristus in, soya ma haporsayaon nasiam, anjaha tong ope nasiam ibagas dousa nasiam. ¹⁸ Anjaha na dob matei pe ibagas Kristus magou ma. ¹⁹ Anggo sanggah manggoluh on do hansa mangarap hita bani Kristus, hita ma sisombuhan humbani haganup. ²⁰ Tapi domma puho Kristus humbani na matei, Ia do parlobei ni sagala na dob modom in. ²¹ Ai songon marhitei sada jolma roh hamateian, sonai do marhitei sada jolma adong parpuhoon humbani na matei. ²² Ai songon ibagas si Adam haganup matei, sonai do ibagas Kristus haganup ipagoluh. ²³ Tapi ganup ma mangihutkon parjojorni; parlobei Kristus, dob ai na bani Kristus bani parrohNi ai. ²⁴ Dob ai roh ma ujungni; ijai ma ondoshononNi harajaon in bani Naibata anjaha Bapa, dob iparontihon sagala pamarentahan, kuasa ampa hagogohon. ²⁵ Ai maningon manrajai do Ia, ronsi ipatunduk haganup munsuh in hutoruh ni naheiNi. ²⁶ Munsuh na parpudi siparontihononNi, ai ma hamateian. ²⁷ Ai haganup do patundukon ni Naibata hutoruh ni naheiNi. Tapi anggo ihatahon haganup do ipatunduk, torang ma ijai seng dihut Ia, na patundukkon haganup hu-Bani. ²⁸ Tapi dob tunduk haganup ai hu-Bani, gabe dihut ma Anak in sandiri unduk hubani sipatunduk haganup Bani, ase Naibata gabe haganup ibagas haganup. ²⁹ Anggo seng sonai, aha do guna ni pambahenan ni halak na padidihon dirini mangkophop halak na matei? Ai anggo sabonar na so puho do na matei, mase ma padidihonon ni sidea dirini mangkophop na matei? ³⁰ Anjaha hanami pe, mase ma pala tarononnami parmaraan ganup panorang? ³¹ Narus-narus matei do ahu ganup ari; tongon, nasiam sanina, halani hamegahonku pasal nasiam, na adong bakku ibagas Kristus Jesus, Tuhanta in. ³² Ai anggo mangihutkon hajolmaon do maringor ahu ampa binatang panoroh i Epesus, aha ma gunani ai bakku? Anggo seng puho na matei, mangan minum ma lah hita, ai matei do hita patar. ³³ Ulang nasiam kahou! Magou do biak na madear, anggo nahombari na masambor. ³⁴ Patut ma nasiam tarjolma, ulang be mardousa, ai adong do deba na so mananda Naibata. Laho pailahon nasiam do na huhatahon. ³⁵ Tapi nini halak deba: Sonaha ma parpuho ni na dob matei? Marbadan na sonaha ma sidea na roh ai? ³⁶ E, ham na oto! Na sinaburhonmu ai, seng manggoluh ai, anggo seng matei lobei. ³⁷ Anjaha sanggah manabur ham, seng badan ni na sihol roh ai isaburhon ham, tapi sangkamata gandum do atap na legan. ³⁸ Tapi Naibata do mambere badan hujai, domu hubani rosuh ni uhurNi, bani ganup bonih ibere badanni bei. ³⁹ Seng sarupa ganup masam ni daging in, tapi legan do na bani jolma, legan na bani pinahan, legan na bani manuk-manuk, anjaha legan na bani dengke. ⁴⁰ Adong do badan parnagori atas anjaha adong do badan parnagori tongah on, tapi legan do sangap ni na i nagori atas, legan na i tanoh on. ⁴¹ Legan do sondang ni mata ni ari, legan do sondang ni bulan, anjaha legan do homa sondang ni bintang-bintang. Ai bintang pe palegan-legan do sinondangni. ⁴² Sonai do homa bani parpuhoon ni na dob matei. Isaburhon do na ra maseda, tapi ipapuho na so ra maseda. ⁴³ Tarsabur do ibagas hahirion, tapi ipapuho do ibagas hasangapon. Tarsabur do ibagas hagalekon, tapi ipapuho do ibagas hagogohon. ⁴⁴ Na isaburhon, ai ma badan pardagingon, ipapuho badan partonduyon. Anggo adong pardagingon, adong do age badan partonduyon. ⁴⁵ Domu hubani na tarsurat in: Jolma na parlobei, ai ma si Adam, gabe hosah na manggoluh do. Si Adam na parpudi gabe Tonduy na pagoluhkon. ⁴⁶ Tapi sedo badan partonduyon na parlobei, tapi badan pardagingon do, dob ai pe ase badan partonduyon. ⁴⁷ Jolma na parlobei ai ma hun tanoh on, anjaha marbiak tanoh on, jolma na paduahon hun nagori atas do. ⁴⁸ Domu hubani biak ni na hun tanoh on do sagala na i tanoh on; anjaha domu hubani biak ni na hun nagori atas do sagala na i nagori atas. ⁴⁹ Anjaha songon na dob ipakei hita rumang tanoh on, sonai do pakeionta rumang na hun nagori atas. ⁵⁰ Nasiam sanina, on do na huhatahon: Seng tarbahen daging ampa daroh manean harajaon ni Naibata, seng tartean na ra salpu on na totap ai. ⁵¹ Tonggor ma, hupatugah ma bani nasiam sada rusia: Seng haganup hita matei, tapi haganup do hita paubahon. ⁵² Sompong ibagas sangkidop mata, bani parsora ni tarompet na parpudi ai, ai marsora ma tarompet, gabe puho ma na matei hu hatongtongon, lanjar paubahonni ma anggo hita. ⁵³ Ai maningon na totap ai do solukhononkon bani na ra salpu on, anjaha goluh na totap ai solukhononkon bani na ra matei on. ⁵⁴ Tapi dob isolukhon, na totap ai bani na ra salpu on, anjaha dob isolukhon goluh na totap ai bani na ra matei on, ijai ma jumpah hata na tarsurat in: Domma tarbondut hamateian hubagas hamonangan. ⁵⁵ O hamateian, ija do hamonanganmu? O hamateian, ija do sorodmu? ⁵⁶ Sorod ni hamateian ai ma dousa, anjaha gogoh ni dousa ai ma titah. ⁵⁷ Tapi tarima kasih ma bani Naibata, na pamonang hita marhitei Tuhanta Jesus Kristus. ⁵⁸ Ai pe, nasiam sanina na hinaholongan, totap ma nasiam, ulang mubah-ubah, anjaha lambin surung ma ibagas horja ni Tuhan in, ai ibotoh nasiam, sedo na soya halojaon nasiam ibagas Tuhan in.

¹ Ia pasal tumpak na hubani halak na mapansing ai, bahen nasiam ma, songon na dob huaturhon bani kuria Galatia. ² Siap ari Minggu ma ganup nasiam papulighon sibar na tarbahensi, anjaha isimpan ma ai, ase lang pala be patumpuhon tumpak rohhonsi ahu. ³ Anjaha rohhonsi ahu, suruhhonku ma hasoman na patut nini uhur nasiam, marhasoman surat hu Jerusalem, laho padaskon tumpak idop ni uhur nasiam ai. ⁴ Tapi anggo humbanggal do, gabe pala dihut ahu misir, rap pakon ahu ma sidea laho. ⁵ Roh do ahu bani nasiam, dob hudalani Makedonia; ai dalananku do lobei Makedonia, ⁶ tapi ra soh do ahu bani nasiam, atap pasalpuonku do musim borgoh ai rap pakon nasiam, ase boi taruhkonon nasiam ahu barang huja ahu laho. ⁷ Ai seng marosuh uhurhu asal tuluy bani nasiam sahali on, tapi arap do uhurhu marianan hundokah rap pakon nasiam, anggo ilopas Tuhan in. ⁸ Tapi i Epesus do ahu soh, das ronsi pesta Pentakosta. ⁹ Ai mungkab do bakku labah na banggal, na marpangkorhon tumang, tapi buei do homa imbang. ¹⁰ Tapi anggo roh si Timoteus, jaga nasiam ase ulang mabiar ia i tongah-tongah nasiam. Ai horja ni Tuhan in do ihorjahon, usih songon ahu. ¹¹ Ulang ma adong na mapas bani. Tapi taruhkon nasiam ma ia ibagas damei, ase roh ia marayak ahu, ai hupaima-ima do ia rap pakon sanina in. ¹² Tapi anggo saninanta, si Apollos, domma gogoh namin huojur, ase itohu nasiam rap pakon sanina on. Seng ra ope ia sonari, tapi sihol roh do ia, anggo adong panorang na dear bani. ¹³ Puho ma nasiam; totap ma jongjong ibagas haporsayaon, gopas songon dalahi anjaha margogoh. ¹⁴ Dalankon nasiam ma haganup pambahenan nasiam ibagas holong. ¹⁵ Ibotoh nasiam do, nasiam sanina, ia si Stepanas ampa keluargani, ai ma limbuah ni nagori Akaya, anjaha iondoskon sidea do dirini marugas bani halak na mapansing in. ¹⁶ Huojur ma, ase marunduk ni uhur nasiam bani halak sisonai, age bani haganup halak na dihut marhorja anjaha loja. ¹⁷ Malas do uhurhu bani parroh ni si Stepanas, si Fortunas ampa si Akaikus; ai sidea do manggoki na lang tarbahen nasiam, ¹⁸ ai tarapoh do tonduyhu ibahen sidea, tontu age tonduy nasiam. Harga ma bahen nasiam halak na sonin. ¹⁹ Manongos tabi do bani nasiam kuria na i Asia. Manongos tabi na buei do bani nasiam ibagas Tuhan in, si Akila ampa si Priska rap pakon kuria, na martumpu i rumah ni sidea. ²⁰ Das ma tabi ni haganup sanina in bani nasiam. Marsitabian ma nasiam samah nasiam, marhitei summah na mapansing. ²¹ Ahu, si Paulus, manuratkon hata tabi on marhitei tanganku sandiri. ²² Hona papa ma na so marholong ni uhur bani Tuhan in! Maranata (Na roh ma Tuhanta)! ²³ Ihasomani idop ni uhur ni Tuhan Jesus ma nasiam! ²⁴ Ihasomani holong ni uhurhu ma nasiam haganup ibagas Kristus Jesus!