TITUS

TITUS

¹ Alè Titus anakku! Aku si Paulus menuratken surat èn, naposo Dèbata janah rasul Jesus Kristus. Ipasulak ngo aku mengurupi kalak sienggo ipilih Dèbata asa ntegguh kalak i ibas kepercayanna. Kennah kuurupi ngo kalak i asa menandai kebennaren niajarken agamanta. ² Asa mengharap kalak i mi kenggeluhen siamman sumendah kerna enggo kin ngo iperbagah-bagah Dèbata idi sinderrang makdèng kin pè ihanaken dunia èn, janah oda uè merluap Dèbata. ³ Ipetarar Dèbata ngo niperbagah-bagahNa i tupung ketikana ibas tennahNa. Enggo ipercayaken tennahna i bangku janah kusukutken ngo i merkitèken perèntah Dèbata Sipaluahken kita. ⁴ Alè Titus, anakku tuhu-tuhu ngo kono kerna samah percaya ngo kita bai Jesus Kristus. Masèh atè dekket damè bai Dèbata Bapa bak Jesus Kristus Raja Sipaluahken kita idi nai mo mendengani kono. ⁵ Asa kutadingken pè kono tikala idi i Kreta, asa ipeturè kono ngo ulaan sibanggungna i dèng. Nai asa pebangkitenmu pengendeng kuria i gennep kuta; janah èngèt mo tennahku èn: ⁶ Ulang lot sirèhèen bai pengendeng; pellin sada ukum sinibagesna, perdukak percaya bai Kristus, oda perdukak jèngèng, janah oda ndorok iatur. ⁷ Kumarna perkebbas Dèbata ngo pengendeng i, ulang mo lot sirèhèen pengellakona. Ulang tunggang barang perlaga barang permabuk, barang perubat-rubat, ulang mbara matana midah riar. ⁸ Kennah pertamuè, lolo ia midah simerandal, merpengerrem, bujur, perukur mpanting, dekket terajansa dirina. ⁹ Ntegguh menjèmak Sukuten bai Dèbata nai sikepercayaen i, bagè sienggo iajarken bana, asa merkitè bagidi merseppuh ia memeddahi kalak dekket peddah kesèntengen i janah ndorok memincang kalak simengalo-ngalo. ¹⁰ Mèduk ngo kalak oda tunduk, terlebbih kalak peragama Jahudi. Ioto-otoi kalak i ngo jelma nterrem merkitè kata-kata luap kalak i. ¹¹ Kennah ikontam ngo babah kalak sibagidi, ai mèduk ngo enggo perjejapen ni dèba isursari kerna iajarken siso jadi, janah ibaing kalak idi pè bagi, pellin naing mengaum laba sambing arap dalan siso patut ngo. ¹² Nung ngo idokken nabi kalak i siroh i Kreta nai bagèen, "Jelma perluap ngo kalak Kreta, janah binatang penjerngem, mokkus janah permalas." ¹³ Tuhuna ngo kadè sinidokken nabi idi. Kerna naidi, nggemmes mo pincangenmu kalak idi, asa tettap kalak i percaya bai Dèbata ibagasen kebennaren, ¹⁴ janah oda nèngè percaya mi tori-toriin kalak Jahudi barang pè mi hatoren-hatoren jelma lako mengalo peddah Dèbata. ¹⁵ Mpanting ngo sagumanna bai kalak simpanting. Tapi ukum bai kalak perukur macik janah siso percaya bai Dèbata, oda lot barang kadè pè mpanting, kerna enggo melamun ukurna bak pikirenna pè! ¹⁶ Idokken kalak idi itandai ngo nina Dèbata, tapi merkitè pengelakona, ialo kalak i ngo Dèbata. Ai perukur jahat ngo kalak i janah oda merpenguèi; oda nung ndorok terbahanken kalak i barang kadè pè simerandal.

¹ Tapi ukum kono alè Titus! Ajarken mo peddah simerdemmu dekket peddah merandal. ² Ajari mo anak laki sienggo tua-tua asa merpengerrem kalak i janah nggelluh bagè kalak sipatut pesangapen. Kennah ngo kalak i hot ibagasen peddah sèntèng bai Dèbata nai, merukur ngkelleng siso merpengait janah mbingit bana sobar ipas sitahanen. ³ Bagi ma ngo kennah peddahi daberru sienggo tua-tua, asa merpengalako mpanting kalak i bagè patutna kalak simenguèi Dèbata. Oda ndorok kalak i menikas-nikasi kalak sidèban, janah ulang ketagiin mengènum simperngis. Kennah iajarken kalak i ngo simerandal, ⁴ asa merkitè bagidi ndorok iajari kalak i daberru sinarih poso dèng lako mengkekelengi sinibalèna bak dukak-dukakna pè, ⁵ asa bijak, metemman, janah gabè pertua ibages codiin menguèi simennokorsa. Merkitè bagidi oda lot dalan ndèba mengerèhèi kata Dèbata. ⁶ Pessèngèt ma mo bang simatah daging pè, asa metemman pengelakona. ⁷ Baing mo dirimu gabè codiin ipas pengelako selloh, janah pengajari sènteng tuhu-tuhu. ⁸ Bijak mo kono mengerana, ulang ndorok irèhè barang isè pè, asa mèla karina alomi, kumarna oda lot simak toko dapetsa bamu nai kata-katankenna tersèngèt kita. ⁹ Kennah tunduk mo hamba mi indukna, janah iulaken mo lemmo atè indukna idi ibas karinana. Oda ndorok kalak i mengalo-ngalo, ¹⁰ barang mennangko. Kennah ituduhken pengellakona kalak mendè ia janah kettoken; asa merkitè pemmahanna i gabè ipoji kalak Dèbata, Sipaluahken kita i. ¹¹ Ai enggo ipetarar Dèbata masèh atèna lako paluahken karina jelma. ¹² Iajari Dèbata ngo kita, asa ulang nèngè mengalo lemmo atèNa janah ulang nèngè mengulaken cubellek tanoh èn. Iajari ngo kita asa nggelluh i dunia èn sibettoh merpengerrem, metemman janah sètia taba Dèbata. ¹³ Bagèndari mèma-mèma Ari siharapen i ngo kita. Tupung pekirohna i, idah dunia èn mo kehejiin Dèbata simahangga i dekket Jesus Kristus Raja Sipaluahken kita. ¹⁴ Ai iberrèken ngo diriNa mahan pèlèen lako paluahken kita ipas karina kejahaten nai, janah memmaing kita, gabè ummat simbadia janah uè mengkekasahken bahaan merandal. ¹⁵ Ajarken janah peddahken mo i karina, nai pesèngèt mo sinijamitanmu. Ulang belli mapas kalak midah kono.

¹ Pessèngèt mo ruas kuriamu asa tunduk taba penggemnggemmi dekket raja janah ngkasah mengulaken gennep ulaan merandal. ² Dokken bai kalak i asa ulang menukasi barang merubat barang taba isè pè, tapi merdamè-damè mo janah merpenganju ninganna merpengelako melamlam. ³ Ai kita pè tikan naidi moto ngo, njais janah laling, iperhamba matcam bagè cubellek dekket roh-roh gèut daging. Siulaken ngo kejahaten dekket ukur ncian, bagi ma mersikosomen pè. ⁴ Tapi ipetarar Dèbata Sipaluahken kita i ngo masèh atèNa dekket mendè basana banta. ⁵ Oda ngo kumarna lot siulaken simerandal memmaing asa ipaluah kita, tapi kumarna pellin masèh atèna sendiri ngo, merkitè-kitè perridiin pepantingken nibaing Tendina i, gabè iperimbaru kita mengolihi. ⁶ Iberrèken Dèbata ngo TendiNa i banta merkitè-kitè Jesus Kristus Raja Sipaluahken kita, ⁷ Asa merkitè masèh atè Jesus i, gabè merdamè kita dekket Dèbata janah gabè terolih kenggelluhen kita imo kenggelluhen siamman sumendah, si siharapken idi kin. ⁸ Tuhuna ngo sikudokken èn. Kupido bamu, memmes ajarken i, asa karina kalak sienggo percaya bai Dèbata mertuhu-tuhu mengulaken ulaan merandal janah merguna taba karina jelma. ⁹ Peddaoh dirimu ipas persoalen siso merguna i nai dekket tori-toriin tarombo i. Ulang kono uè mencampuri perselisihen bak perubaten tersèngèt pati-patiin i. Ai oda lot gunana janah oda lot peruntungenna. ¹⁰ Barang isè maing perselisihen i kuria, pessèngèt ia sikali dua kali; enggo kessa i, ulang nèngè mersaor ko dekketsa. ¹¹ Ai ibettoh kono ngo, enggo menurimpang kalak sibagidi, janah dosana i ngo magahken mesalah ia. ¹² Mula enggo soh mendahi kono si Artemas barang si Tikikus, usahaken mo ndor roh mendapetti aku mi Nikopolis, ai dok atèngku merian i sidi mo aku sidekkah mosim mbergoh. ¹³ Kerencetken mengurupi si Zenas simemettoh patiin i dekket si Apolos; asa terbaing kalak i berkat janah oda kurangen i barang kadè pè. ¹⁴ Kennah sipecemmal-cemmal ngo denganta asa ngkasah ia mennarihken siperlu mahan kebbasen; ulang gabè mak merguna nggelluh kalak idi. ¹⁵ Menenges salam ngo bamu karinana denganku si nisèn dekket aku pè. Pessoh salam nami taba karina denganta sipercaya bai Kristus. Idengani masèh atè Dèbata mo kènè karinana. Tabe nami, Paulus