ROM

ROM

¹ Kènè karina dengan si lot i Rom, sinikekellengen Dèbata janah sienggo idilo Dèbata gabè ummatNa. Enggo ipilih janah ipebangkit Dèbata aku mi bahaan magahken Sukuten Kelluahen bai Dèbata nai. ² Imo niperbagah-bagah Dèbata kin merkitè nabi-nabiNa arnia enggo tersurat ibagasen Bukku Simbadia. ³ Sukuten Kelluahen i imo tersèngèt Anakna Jesus Kristus Tuhanta i. Secara perdagingen tubuh arap pemparen si Daud nai ngo Ia, ⁴ tapi Anak Dèbata ngo Ia mengèkutken pertendiin. Terbukti ngo i merkitè kuasana mahantu i iperkèkèNa idi ipas simatè nai. ⁵ Merkitè-kitèsa ngo kujalo ulaan pengendeng dekket masèh atè lako mennuanken mi bagasen karina bangsa -- imo asa percaya janah menguèi Dèbata. ⁶ Kènè pè dekket ngo ibas kalak i kènè sienggo nidilo gabè milik Kristus. ⁷ Mendahi kènè karinana simerian i Rom janah sinimasèh atèen Dèbata, sinidilona janah ibaing gabè kalak simbadia. Masèh atè mo bai ndènè dekket damè bai Dèbata Bapanta dekket Tuhan Jesus Kristus i nai. ⁸ Lebbèen kudokken mejalo metangkup taba Dèbata merkitè Jesus Kristus, kumarnaken kènè karina, ai sar ngo suberri dunia èn tok kalohoon kènè bai Kristus. ⁹ Dak kuèngèt ngo kènè gennep mersodip aku. Dèbata mo saksina magahken kadè sikudokken i bennar ngo. Ia ngo Dèbata sikukebbasi tarap nasa ukurku nai merkitè mennukutken Berita Merandal tersèngèt AnakNa i. ¹⁰ Dak kupidoken ngo taba Dèbata ibagasen sodipku, asa Ipaduè nemmuken aku roh mendahi kènè. ¹¹ Ai sun ngo sèkel ukurku naing mengidah kènè, asa ndorok kuberrèken bai ndènè dèba sibasa-basa pertendiin, lako petegguhken perrukuren ndènè. ¹² Maksudku imo kerna enggo rebbak percaya kita bai Jesus Kristus, nai ndorok mo kita mersipegasangen ukur. ¹³ Kènè alè dengan! Naing mo nemmu bettohen ndènè, enggo nggati kukebbasi naing roh mendahi kènè, tapi dak ngo mbuè halangen. Dok atèngku naing ngo asa nemmuken merbuah aku bang bai ndènè pè, bagè taba bangsa sidèban i. ¹⁴ Ai merutang ngo aku kuakap taba karinana bangsa, imo taba kalak simpantas bang pè taba siso mpantas. ¹⁵ Kemulihken naidi ngo asa sèkel kalohoon aku menjamitaken Sukuten Kelluahen i taba kènè simerian i Rom pè. ¹⁶ Tok kalohoon ngo aku, kegegohen Dèbata ngo Sukuten Kelluahen i lako paluahken karina sipercaya, kalak Jahudi lebbè, nai pè asa bangsa sidèban. ¹⁷ Kerna merkitè Sukuten Simerandal i, ituduhken Dèbata ngo bakunè carana hubungen jelma dekket Dèbata enggo gabè selloh balik; carana imo merkitè percaya bai Dèbata i mulana nai soh mi puncana. Dos ngo i bagè sitersurat ibas Bibèl, "Kalak sipercaya bai Dèbata, gabè selloh nola hubungenna dekket Dèbata, nai nggelluh mo ia." ¹⁸ Ipetarar Dèbata ngo pungurNa i sorga nai taba jelma perdosa dekket perrukur nggèduk simengambati kebennaren i, merkitè-kitè nggèdukna i gabè oda nèngè itandai jelma i Dèbata. ¹⁹ Kadè sindorok ibettoh jelma tersèngèt Dèbata enggo ntangkas ibas perukuren jelma. Ai enggo ibagahken Dèbata sendiri bai jelma. ²⁰ Ndorok teridah ngo kedèbataan ni Dèbata simboni i kin, kessa nai ihanaken dunia èn, imo kuasaNa dekket kedèbatanNa simenettap i; asa oda lot nèngè cudalihen jelma i lako memènterri dirina. ²¹ Ai tukasi pè itandai jelma i Dèbata, tapi oda ngo ipessangap jelma Dèbata janah oda uè mendokken mejalo metangkup tabaSa, gabè ioto-otoi pikirenna ngo tupèh jelma i janah gellap bulita. ²² Idokdok mpantas ia, keppè moto ngo. ²³ Oda ngo Dèbata simenettap i isembah kalak i, tapi gana-gana tosè mi siniteppa singgèut matè i ngo; imo mi jelma, manuk-manuk, binatang-binatang siempat nèhè dekket mi binatang-binatang simenjoror i. ²⁴ Kerna naidi, ibelli Dèbata ngo kalak i mi sinipergeddo ukur kalak i, imo cubellek simellamun i, gabè ibaing kalak i mo simeronah bai samah kalak i sendiri. ²⁵ Igancih kalak i ngo Dèbata sibennar i merkitè ipetupa siso tuhu. Nai gabè isembah janah iuèi kalak i ngo siniteppa singkat penempa i. Keppèken penempa i ngo nemmuken kennah ipoji soh mi amman-sumendah. Amèn. ²⁶ Kumarna naidi, ibelli Dèbata ngo kalak idi i cubellek kememèla idi. Oda nèngè lemmo ètongen daberru-daberru kalak idi taba anak laki bagè patutna kin bai jelma, tapi enggo gabè sèkel bai samah kalak i daberru. ²⁷ Bagidi ma ngo sinibalè pè, gabè itadingken kalak i ngo percampuren dekket sinibagesna, ai gabè luhlah ngo kalak i, sanga gabè samah-samah daholi nola mengulaken percampuren kememmèla idi. Gabè ijalo mo bales ulah-ulah kalak idi i. ²⁸ Kumarnaken oda ikerencetken kalak idi nèngè menandai Dèbata, gabè ibelli Dèbata mo kalak i mi pikiren-pikiren ncèda nai ibahanken kalak idi mo siso patut, ²⁹ imo kejahaten, kegèduken, nahaka, ncian, bunuh-bunuh, rubat, taki-taki dekket bècuk. ³⁰ Ikellemmoken ngo peroha-rohaken sidèban, perkata tondal, ikosomi ngo Dèbata, bana ngo jukkat, perukur ndates, perbual, perukur macik, oda iuèi partuana; ³¹ oda iparduliken denganna sidèban, oda sètia kalak i janah oda lot ipaduliken jelma. ³² Ibettoh kalak idi ngo nemmu pati-patiin Dèbata simendokken, barang isè mengulaken bagidi kennah merutang kessah no, keppè tong ngo dak ibahanken; balikna nola ngo tupèh, ai lemmo ngo atèna midah kalak simengulaken sibagidi.

¹ Kerna naidi isè ngo kènè alè jelma, dak ihukumi kono ngo denganmu sidèban. Dirimu ngo nihukumenmu i, tikan ihukumi kono denganmi, menghukum dirimu ngo kono i si, ai dos ngo ulah-ulahmu bagè ulah-ulahna i. ² Sibettoh ngo, sènteng ngo hukum Dèbata, simengennai taba kalak simengulaken bagidi. ³ Asa, kono alè jelma idokdok kono ngo terimbilken kono hukum Dèbata, mula pè ihukumi kono kalak simengulaken bagidi, keppèken kono sendiri pè mengulaken bagidi? ⁴ Barang, tah mada ngo murah dok atèmu mendè basana, kessobarenNa dekket ukurna melamlam idi? Oda ngo ibettoh kono, ukum mendè basa Dèbata, imo mennogike kono asa gabè tobat ipas dosa-dosa ndenè nai? ⁵ Tapi kumarna ukurmu jeggal i, ipegukguk kono ngo mi dirimu pungur Dèbata i ari perhukumen i, enggo kessa ntarar hukum Dèbata sibennar i. ⁶ Ai ibalesken Dèbata ngo taba gennep jelma codi mi pemmahanna. ⁷ Iberrèken Dèbata ngo kenggelluhen siamman sumendah taba kalak simbingit memmaing mendè lako mennulusi kessangapen, kemmuliaan dekket simenettap i. ⁸ Tapi pungur dekket laga ngo ukum bai kalak sitau, siso menguèi mi kebennaren, janah dak mengulaken kejahaten. ⁹ Barang isè jelma mengulaken jahat, kennah gabè susah janah mpersuk, perlebbè kalak Jahudi, nai bangsa sidèban. ¹⁰ Tapi karina kalak siuè mengulaken mendè, iberrèken ngo kessangapen, kemmuliaan dekket damè sitermurmur i, perlebbè bai kalak Jahudi bagi ma taba kalak bangsa-bangsa sidèban pè. ¹¹ Kerna dos ngo karina jelma ibaing Dèbata. ¹² Merdosa ngo jelma bangsa sidèban kumarna mak ibettoh pati-patiin i, ihukum ngo ia oda merkitè pati-patiin i; janah karina jelma perdosa si nipas gemgemmen pati-patiin i; ihukum ngo merkitè pati-patiin i. ¹³ Oda ngo maluah jelma kumarna ibettoh pati-patiin i, tapi maluah ngo ia kumarna iulaken sinidokken pati-patiin i. ¹⁴ Tukasi pè oda ibettoh bangsa sidèban pati-patiin i, tapi mula iulaken ngo sinidokken pati-patiin idi ipas dirina nai, kalak sibagidi ngo gabè pati-patiin mi dirina. ¹⁵ Merkitè pengelakona bagidi teridah ngo kadè nidokken pati-patiin i tersurat ibas pusuh peratènna. Pusuh peratèen kalak i pè iindangke ngo i, kerna kalak i sendiri pè lot ngo dèba isalahken bak ibennarken pikiren kalak i. ¹⁶ Bagidi ngo masa segen tupung ari sienggo ibuhul kin, roh kessa -- Dèbata merkitè-kitè Jesus Kristus bagè Sukuten Kelluahen sienggo kubagahken i, lako menghukumi sagumanna silot i simboni ibagasen pusuh peratèen jelma. ¹⁷ Tapi mula igerari kono dirimu kalak Jahudi, ulang mo manggang kono kumarna pati-patiin i, janah ulang mo ièndèl-èndèlken kono Dèbata. ¹⁸ Otang iajari pati-patiin i ngo kono, asa ibettoh kono nipergeddo atè Dèbata, janah asa ibettoh kono mennirang paina mendè dekket oda. ¹⁹ Tok ngo kono dok atèmu, gabè pengendeng taba kalak sipètung, janah penendang taba kalak nibagasen kegellapen; ²⁰ gabè pemmeddahi taba kalak anak ajaren, pengajari taba kalak simoto, ai tok ngo kono, ibagasen pati-patiin idi dapet kono ngo karina matcam perbinettohen dekket kebennaren. ²¹ Nteng, sidèban ipeddahi kono ngo, kasa oda ipeddahi Kono dirimu sendiri? Iajarken Kono ngo, "Ulang mennangko", keppèken menangko ngo Kono! ²² Iajari Kono ngo sidèban asa, "Ulang merlangkah julu meddem," keppèken perlangkah julu meddem ngo Kono! Moyang atèmu midah sembahen, keppèken kasa ibuat ko ugasen ibas sembahen nai? ²³ Mokka ngo kono kerna pati-patiin Dèbata niberrèkenna merkitè si Musa, keppèken kasa ilèai kono Dèbata, merkitè ilausken kono pati-patiin idi? ²⁴ Otang lot ngo tersurat ibas Bibèl bagèen, "Kumarnaken kènè kalak Jahudi ngo gabè merlèa Dèbata idah kalak bangsa sidèban." ²⁵ Tuhu lot ngo gunana mertakkil, mula iperangèken kono ngo pati-patiin idi. Tapi ukum ilausken kono ngo pati-patiin idi, kadè poda lapaten pertakkilenmu i bamu. ²⁶ Asa mula ijamotken kalak siso mertakkil i ngo sinidokken pati-patiin i, otang iètong Dèbata ngo enggo ia bagè kalak sienggo mertakkil? ²⁷ Janah isalahken kalak siso mertakkil i mo kono kalak Jahudi, kerna kono ngo mersidasaken pati-patiin Agama Jahudi janah mertakkil, tapi kono nola ngo mengelausi pati-patiin i. Ukum kalak i oda ngo mertakkil, tapi kalak i nola ngo menguei pati-patiin Agama Jahudi. ²⁸ Ukum Jahudi tuhu-tuhu, oda ngo pellin gerar sambing ia Jahudi, janah kalak situhu-tuhu mertakkil, oda ngo kumarna itakkil secara perdagingen. ²⁹ Tapi barang isè i pusuh peratènna Jahudi, ia ngo tuhu-tuhu Jahudi; janah pertakkilen tuhu-tuhu imo mertakkil ibagasen ukur sinibahanken Tendi Perbadia, oda ngo sinisurat ibagasen bukku, janah kalak i sibagidi ngo terrolih pemmojiin bai Dèbata nai, oda ngo bai jelma nai.

¹ Mula bagidi kadè ngo kesurungenna gabè kalak Jahudi? Janah kadè ngo gunana mertakkil? ² Mbuè ngo gunana! Perlebbè, kalak Jahudi ngo kesoh-sohen kata Dèbata. ³ Tapi bakunè nola ngo mula lot dèba kalak Jahudi siso sètia? Mada ngo kerna kalak siso sètia i gabè oda sètia Dèbata? ⁴ Oda ngo bagidi! Balikna nola ngo tupèh. Bennar ngo ukum Dèbata, mula pè karina jelma merluap. Ai bagèen ngo tersurat ibas Bibèl, "Asa naing mo lot buktina bennar kono ipas karina ranamu janah mennang kono tikan i perhukumen!" ⁵ Tapi mula makin ntarar kebennaren Dèbata kerna kegèdukenta, kadè mo dokkenkenta? Nggèduk ngo Dèbata mula Ihukum kita? (Sintabi bai Dèbata, mengerana aku cara jelma). ⁶ Ndaoh mo i, oda ngo bagidi! Ai mula oda bennar Dèbata bakunè mo Ia menghukum dunia èn? ⁷ Tapi mula makin ntèmbul ngo Dèbata kumarna luapku, janah makin merbungaren kemmulianna, kasa idokken dèng aku salah bagè perdosa? ⁸ Janah kasa oda ndorok sidokken, "Ia sibahan mo merroha, asa makin ntèmbul kesangapen Dèbata?" Lot ngo dèba mengelèai aku, nina lot kudokken bagidi. Jadi ukum kalak sibagidi, kennah ngo ihukum Dèbata! ⁹ Mula bagidi bakunè ngo? Lot ngo kesurungen kalak Jahudi bai kalak siso Jahudi nai? Oda! Ai enggo kubagahken, "Rebbak igemgemmi dosa ngo karinana, barang kalak Jahudi pè i, barang bangsa siso Jahudi." ¹⁰ Bagè sitersurat ibas Bibèl: "Sada poda lot bennar. ¹¹ Sada poda merukur, janah sada poda lot menulusi Dèbata. ¹² Suberri jelma ngo laling, gabè ndaoh bai Dèbata nai; Isè potang lot nèngè bennar, mak lot nèngè giamken sada pè memmaingken merandal. ¹³ Tosè bagè pendèbaan ngangang ngo bergeng kalak i, marir ngo kata mengoto-ngotoi arap dilah kalak i, janah bibir kalak i memurpurken selbuh, bagè bisa nipè. ¹⁴ Dom ngo sumbiah dekket sumpah ibas babah kalak idi. ¹⁵ Ngkasting ngo nèhè kalak i mula lako meniksa bak memunuh jelma. ¹⁶ Kemmagoon dekket kinipersuk ngo isuanken kalak i, barang i dikè sambing. ¹⁷ Oda ibettoh kalak i dalan kiniduma ¹⁸ janah oda merbebiaren kalak i midah Dèbata." ¹⁹ Smbettoh ngo, bai nigemgemmen pati-patiin i ngo karina kata pati-patiin i, janah oda terbaing barang isè mercudalihen, ai merutang ngo karinana jelma i hadeppen Dèbata. ²⁰ Isè poda ipaluah Dèbata ipas dosana nai ukum kumarnaken mengulaken pati-patiin. Tapi gabè merkitè pati-patiin i, enggo itandai jelma i mo dosana. ²¹ Tapi ukum bagèndari, oda pè merkitèken pati-patiin i, enggo ipetarar Dèbata dalan perdamèen dekketsa bagè nidokken pati-patiin i dekket bukku nabi-nabi, ²² mula percaya jelma i bai Jesus Kristus, merdamè mo ia dekket Dèbata. Ibaing Dèbata dalan bagidi bai karinana sipercaya, ai oda lot kalihna barang isè pè jelma i. ²³ Ai karinana jelma ngo merdosa janah ndaoh bai Dèbata simermulia i nai. ²⁴ Jadi enggo gabè terolih ketègerren jelma i kumarna masèh atè Dèbata ibagasen pengkepkeppen Kristus Jesus. ²⁵ Iberrèken Dèbata ngo Jesus Kristus mi kemmatèen, asa merkitè kemmatèenNa i maluah karina jelma sipercaya baNa. Ibaing Dèbata pè bagidi, lako mennuduhken kebennarenNa ngo, ai sobar Dèbata i sienggona i nai mengidah dosa jelma i, oda pella Ihukum tikala i. ²⁶ Tapi bagèndari italuken ia ngo dosa lako petararken kebennarenna. Merkitè bagi mo menuduhken dirina bennar; janah gennep kalak sipercaya taba Jesus, igerari mo ia gabè kalak sienggo mende balik dekket Dèbata. ²⁷ Mula bagidi, kadè ngo asangenkenta bagèndari? Oda lot! Mada ngo kumarna siulaken pati-patiin i? Oda! Tapi kumarna kepercayanta i ngo. ²⁸ Jadi bagèen ngo rèmpunna: Kepercayaen i ngo maing asa gabè maluah jelma i, oda kumarna mengulaken pati-patiin. ²⁹ Barang, pellin Dèbata kalak Jahudi sambing ngo kessa Dèbata? Uè, I ngo tuhu! Dekket ngo kalak siso Jahudi merdèbata taba Dèbata. ³⁰ Ai sada ngo Dèbata. Ia ngo paluahken kalak Jahudi simertakkil i mula percaya Ia, janah Ia ma ngo paluahken kalak siso Jahudi siso mertakkil pè, kumarna percaya ngo kalak i. ³¹ Nai mendokken asa gabè sitadingken ngo pati-patiin i kumarna percaya kita bai Kristus? Oda! Tapi merkitè kepercayanta idi enggo mo gabè sipecèndek pati-patiin.

¹ Mula bagidi, bakunè ngo pendokkenta tersèngèt si Abraham, empungta i cara i daging? ² Ukum bennar ngo ia kumarna perulanna, tentu lot mo dalanna gegah. Tapi oda ndorok ia gegah i hadeppen Dèbata. ³ Tersurat ngo ibas bukku Bibèl, "Percaya ngo si Abraham bai Dèbata janah kepercayanna i ngo iètong Dèbata gabè kebennarenna." ⁴ Ai menjalo upah ngo karina kalak simahan bahaan, janah upahna i oda ngo sibasa-basa barang pemmerrèken, tapi hakna ngo i. ⁵ Tapi lot ngo dèba maluah kerna percaya bai Dèbata simengampuni dosa-dosana tukasi pè oda merdengan perulaan. Kepercayanna i ngo iètong Dèbata gabè kebennarenNa. ⁶ Bagi ma ngo pendokken si Daud; sayurntua ngo kalak sienggo ijalo Dèbata janah mula oda pella ilugun Dèbata pengellakoNa, ai nina si Daud ngo: ⁷ "Sayurntua ngo jelma, sienggo isasa pengellausina, janah enggo ikemkemmi dosa-dosana. ⁸ Sayurntua ngo barang isè mula oda ilugun Tuhan i dosana!" ⁹ Pellin mendahi kalak simertakkil ngo kessa ndia rana simendokken sayurntua i, barang tah dekket ngo ndia taba kalak siso mertakkil pè? Enggo sidokken, "Iètong Dèbata ngo kepercayaen si Abraham gabè kebennarenNa!" ¹⁰ Ndigan ngo idokken Dèbata bagidi? Sinderrang madèng mertakkil barang enggo mertakkil ngo si Abraham? Sinderrang madèng mertakkil ngo. ¹¹ Kessa i mertakkil mo ia, janah pertakkilenna i pellin kira pertanda sambing ngo i magahken enggo ijalo Dèbata ia gabè pesennangken atè Dèbata, kerna percaya ia taba Dèbata. Ijalo Dèbata ngo ia sinderrang makdèng ia mengulaken hatoren mertakkil. Janah gabè bapa karina kalak sipercaya taba Dèbata mo si Abraham ibagasen pertendiin, janah kumernakenna i enggo ijalo Dèbata maing pesennangken ukurna, tukasi pe kalak i oda mengulaken hatoren mertakkil. ¹² Janah tong ma ngo si Abraham i gabè bapa bai kalak sienggo mertakkil; tapi oda ngo asal mertakkil ia, ai kennah icodi ngo bagè keppercayaen si Abraham bapanta i, sinderrang madèng mertakkil i ia. ¹³ Oda ngo kumarna pati-patiin i asa roh bagah-bagah Dèbata bai si Abraham bang taba pinemparna pè, mendokken, "gabè milikna ngo dunia ènda", tapi kumernaken ketègerenna i bagasen kepercayaen idi ngo. ¹⁴ Ai mula ukum pellin kalak simenjamotken pati-patiin idi sambing ngo kessa menjalo niperbagah-bagah Dèbata magosia ngo percaya bai Dèbata, janah sontar ngo bagah-bagah i. ¹⁵ Ai kumarnaken pati-patiin idi ngo, oda ngo lot pengelausiin. ¹⁶ Jadi kepercayaen i ngo maingken asa roh bagah-bagah Dèbata. Idi ngo perkitèen pemmerrèken Dèbata ibagasen masèh atèna taba karinana pinempar si Abraham; oda pellin taba kalak simengulaken pati-patiin i sambing, tapi bagi ma ngo dekket taba kalak sipercaya bai Dèbata, tosè bagè si Abraham percaya bai Dèbata. Ai karina ngo kita merbapa taba si Abraham, ¹⁷ bagè sitersurat i, "Kupebangkit ngo kono gabè bapa taba mèduk bangsa." Bagi ngo cara Dèbata merrèken bagah-bagah i taba si Abraham, janah percaya ngo si Abraham, ai Ia ngo Dèbata sipegelluhken kalak sienggo matè, janah simenghanaken sagumanna silot merkitèken kataNa sambing. ¹⁸ Ai tukasi pè oda lot nèngè harapen tapi tong ngo tok si Abraham janah percaya ibagasen pengharapen, gabè bapa bai mèduk bangsa ngo ia, rembang bagè sitersurat, "Nterrem kalohon ngo seggen pinemparmu." ¹⁹ Tukasi pè ibettoh si Abraham oda nèngè harapen merdukak ia kumarna enggo tua-tua ia janah umurna pè neggo mayak seratus tahun, si nibagesna si Sara pè nggempus ngo, tong ngo hot kepercayanna. ²⁰ Oda nung ia ganggu, tapi percaya ngo ia i bagah-bagah Dèbata. Dak makin ipergegohi kepercayanna i ngo ia, ai makin ipesangap ngo Dèbata. ²¹ Percaya kalohoon ngo ia, tuk ngo gegoh Dèbata pesautken niperbagah-bagahNa i. ²² Kumarna naidi ngo, asa gabè kelemonken Dèbata ia. ²³ Bagè kata simendokken, "gabè kelemonken Dèbata," oda ngo isuratken i pellin bai si Abraham sambing, ²⁴ tapi dekket ngo banta. Kita pè ijalo ngo gabè kelemonken gabè kelemonken Dèbata, kumarna percaya kita bai Dèbata, sipegelluhken Jesus Tuhanta i, ibas simatè ai. ²⁵ Ipessoh ngo Jesus asa ibunuh kumarna dosanta, janah Ipegelluh Dèbata nola ngo ia, asa gabè ntèger janah bennar kita.

¹ Asa ukum bagèndari enggo gabè ntèger janah bennar kita kumarna percaya. Kerna naidi enggo merdamè kita dekket Dèbata merkitè-kitè Tuhan Jesus Kristus. ² Merkitè-kitèkensa dekket kemulihken kepercayaen idi gabè mbengket kita iembah mi bagasen mendè basa bak masèh atè Dèbata. Ibagasen naidi ngo kita nggelluh janah mergegoh bagèndari. Jadi lolo janah mersampang atè mo kita mengharap lako menjalo kesangapen Dèbata. ³ Lebihna i dèng ngo tupèh, ai kennah lolo ngo kita mula pè irenrenni simpersuk i kita, kerna sibettoh ngo, kumarna kepersuken i ngo gabè mbingit kita, ⁴ janah kumarna mbingit kita, gabè tahan mo kita i pengojiin, janah i ngo mengkerohken pengharapen. ⁵ Oda ngo gabè mpadu siakap ibaing pengharapen sibagidi, kerna enggo idomi kelleng atè Dèbata ukurta merkitè-kitè Tendi Simbadia sienggo niberrèkenNa i banta. ⁶ Tupung kessa ketikana, sienggo ibuhul Dèbata kin, imo tikan mpersuk janah ndotè i kita, tupung bagidi ngo matè Kristus lako mengkepkep kita, tukasi pè kalak ndaoh kita bai Dèbata nai. ⁷ Ai salang mengkepkep kalak bennar janah ntèger, mahal ngo uè kalak matè, tapi nggèut ngo dèba uè matè mengkepkep kalak permendè basa. ⁸ Tapi ukum Dèbata masèh ngo atèna midah kita sinderrang merdosa dèng pè kita, ai tikan bagidi ngo matè Kristus mengkepkep kita. ⁹ Jadi makinsa nola mo bagèndari enggo kessa kebbas kita kumarna permatè Kristus, mak makin maluahna nola mo kita ipas pungur Dèbata nai, kemulihken daroh Kristus idi! ¹⁰ Ai mula ipedamè permatè Anakna i kita dekket Dèbata sinderrang musuhNa dèng kita, makinsa nola mo bagèndari enggo kessa mengolihi merdamè kita dekket Dèbata, otang makin paluahenna mo kita sienggo merdemu dekket Dèbata ibagasen Kristus? ¹¹ Lampo i sidi nai dèng ngo tupèh, lolo kalohoon ngo kita midah mendè basa Dèbata merkitè-kitè Tuhan Jesus Kristus. Kerna merkitè Kristus i ngo sirasaken kinitaboh perdemunta sienggo mendè dekket Dèbata. ¹² Masuk ngo dosa i mi dunia èn arap sada kalak jelma janah kumarnaken dosa i ngo roh kemmatèen. Nai gabè sempa mo kemmatèen i taba suberri jelma, ai karinana jelma ngo enggo merdosa. ¹³ Sinderrang madèng kin pè iberrèken pati-patiin idi, enggo kin ngo lot dosa idi i dunia èn; tapi oda ilugun dèng dosa idi kumarna madèng lot pati-patiin. ¹⁴ Tukasi pè bagidi, enggo mo igemgemmi kemmatèen idi suberri jelma mulai si Adam nai soh mendahi si Musa. Janah tukasi pè oda dos rumangna pengelausiin jelma bagè nibaing si Adam, tapi gabè karina jelma ngo igemgemmi kemmatèen i. Asa si Adam i ngo bagè lèndung sinaing roh i. ¹⁵ Tapi oda dos sidua i; ai belagahen ngo masèh atè Dèbata, mula ipesobok mi pengelausiin si Adam. Kumarna pengelausiin sada kalak ngo memmaingken nterrem kalohoon jelma matè. Tapi belgahen dèng ngo ngkelleng atè Dèbata merkitèken masèh atè sada kalak, imo Jesus Kristus. ¹⁶ Sibasa-basa Dèbata pè ndaoh dèng ngo belagahen dari pada dosa si sada kalak i. Ai kumarnaken hukum taba sisada kalak simerdosa i ngo sempa hukum kemmagoon. Tapi enggo kessa mèduk jelma merdosa, gabè roh mo basa-basa Dèbata, imo maluah ibas dosa idi nai. ¹⁷ Kemulihken pengelausiin sada kalak, gabè sempa kemmatèen i menggem-nggemmi karina jelma. Tapi belgahen dèng ngo sinibaing sisada kalak nai, imo Jesus Kristus bai jelma i. Ai gabè ibasa-basaken Dèbata ngo masèh atèna paluahken jelma idi ipas dosana nai. Jadi gabè igemgemmi kalak i ngo dunia èn merkitèken Kristus. ¹⁸ Asa merkitè pengelausiin sada kalak, gabè karinana jelma ihukum, bagidi ma mo merkitè penguèi sada kalak ipas nipergeddo atè Dèbata, gabè maluah karinana jelma janah ipegelluh. ¹⁹ Kumarnaken njais sada kalak jelma gabè nterrem jelma merdosa, tapi kumarnaken penguèen sisada kalak i ma, gabè nterrem jelma nggelluh janah bennar ibaing Dèbata. ²⁰ Dèbata ngo merrèken pati-patiin i. Tapi makin igegohi jelma mengulaken pati-patiin i, makin ilausi nola ngo i gabè makin merdosana mo jelma i bai Dèbata. Nai makin gandana mo perdosa i, makin mbelgahna ma mo ngkelleng atè Dèbata. ²¹ Asa kennah gabè matè ngo kita kumarna merdosa. Bagi ma ngo masèh atè Dèbata menggem-nggemmi janah peliasken dalan banta, asa balik merdamè taba Dèbata. Janah kumarna enggo merdamè kita mengolihi dekket Dèbata, gabè iberrèken mo kenggelluhen siamman sumendah banta merkitè Jesus Kristus Tuhanta i.

¹ Mula bagidi, bakunè mo dokkenkenta? Dakdak mo kita merdosa asa makin masèh atè Dèbata midah kita? ² Ngganè bagidi! Oda nèngè ngo merkuasa dosa i taba kita; jadi bakunè ngo kita ndorok nggelluh ninganna mengulaken dosa? ³ Oda dèng ngo ibettoh kènè, sinderrang iperridi kita mi bagasen Jesus Kristus, sienggo ikubur ngo kita rebbak dekket Kristus mi kemmatèen? ⁴ Merkitè peridiin i sienggo ikubur ngo kita rebbak dekket Kristus mi kemmatèen, asa codi bagè Kristus sienggo ipegelluh kuasa Dèbata ipas kemmatèen nai, bagidi ma mo kita ipegelluh janah mernggelluh rembaru. ⁵ Ai mula enggo gabè sada kita dekket Kristus kumarna rebbak matè kita dekketsa, suang bagi ma ngo gabè sada kita dekketsa i perkèkèNa i. ⁶ Sibettoh ngo enggo ibunuh tabiat kejelmaan sienggo buruk i rebbak dekket Kristus i kayu silang i, asa sipettadi tabiat dosa i; merkitè bagidi oda nèngè kita iperhamba dosa. ⁷ Ai mula enggo matè jelma i, lias ngo ia ipas dosana nai. ⁸ Mula matè kita rebbakken Kristus, percaya ngo kita, pegelluhenNa ma ngo kita rebbakken Kristus. ⁹ Ai sibettoh ngo enggo ipegelluh Kristus idi i simatè nai, janah oda nèngè matè Ia, ai oda nèngè merkuasa kemmatèen i baNa. ¹⁰ Kemmatèen sinibellus Kristus, imo kemmatèen meradepken dosa. Pellin sikali ngo kessa i ibellus soh mi sidekkahNa. Nggelluh Ia bagèndari, nggelluh kumarna Dèbata ngo janah bai Dèbata. ¹¹ Kènè pè alè dengan, tosè bagidi ma mo ètong kènè diri ndènè matè kerna dosa i, tapi nggelluh ibas Dèbata merkitèken Jesus Kristus. ¹² Nteng ulang nèngè mo dosa i mengerajai nggelluh ndènè i dunia èn, menguèi cubellek-cubellek jahat i. ¹³ Ulang mo padiat kènè nèngè sendihi ndènè i mengulaken dosa janah mengulaken kejahaten. Tapi pesakat kènè mo diri ndènè bai Dèbata, bagè sienggo ilompat i kemmatèen nai mi kenggelluhen. Bagidi ma mo bang sendihi ndènè i pessakat kènè mo bai Dèbata, asa ibaing mengulaken lemma atèNa. ¹⁴ Oda nèngè irajai dosa i kènè, kerna oda nèngè igemgemmi pati-patiin idi kènè, tapi enggo igemgemmi masèh atè Dèbata. ¹⁵ Mula bagidi bakunè ngo rèmpunna? Ndorok ngo kita merdosa, kumarna oda nèngè kita igemgemmi pati-patiin i, tapi enggo nigemgemmen masèh atè Dèbata? Ngganè ngo bagidi! ¹⁶ Oda ngo ibettoh kènè, mula ipessoh kènè diri ndènè bai sada kalak lako mengulaken nipergeddo atèna, otang enggo mo gabè hamba si niuèen ndènè i kènè -- tah pè hamba dosa simerembah kènè mi kemmatèen, barang tah hamba simerpenguèi mi Dèbata, janah merkitè bagidi mendè nola balik taba Dèbata. ¹⁷ Tapi mejalo metangkup mo bai Dèbata! Kerna enggo leppas tikki ndènè i perhambaan dosa, janah ukum bagèndari enggo gabè penguèi kènè i peddah sienggo iberrèken bai ndènè. ¹⁸ Enggo ngo kènè ipaluah ipas dosa nai, janah gabè penguèi bai Dèbata. ¹⁹ Kumarna ndotè ukur ndènè, codiin jelma mo kubakin asa melukah iarti kènè; rembang bagè perbollet diri ndènè ibaing kènè menguèi simellamun janah jahat, bagi ma mo nemmuken naing bolet berrèken kènè diri ndènè bagè hamba menguèi nipergeddo Dèbata mi simerkedekoon bai Dèbata. ²⁰ Kerna sinderrang hamba dosa kènè, oda nigemgemmen lemmo atè Dèbata kènè. ²¹ Kadè mo buahna dapet kènè bagèndari ipas ulah-ulah ndènè sinderrang naidi nai, imo ulah-ulah ukum bagèndari enggo mèla kènè mengulakensa? Karina ulah-ulah i pellin merembahken mi kemmatèen. ²² Tapi ukum bagèndari enggo ipaluah kènè ipas dosa nai janah enggo gabè hamba Dèbata. Jaloon ndènè mo buah simerembahken kènè mi kebadiaan janah imo mengkerohken kenggelluhen siamman sumendah. ²³ Ai kemmatèen ngo ukum upah dosa; tapi basa-basa Dèbata ngo kenggelluhen amman sumendah merkitè-kitè Jesus Kristus Tuhanta i.

¹ Kènè alè dengan! Simettoh hukum ngo kènè karina. Ibettoh kènè ngo, igemgemmi hukum ngo jelma sidekkah nggelluh ia. ² Sada kalak daberru sienggo sijahè, kennah tunduk ngo ia ibas hukum bai sinibalèna, sidekkah nggelluh sinibalèna i. Tapi mula enggo kessa matè sinibalèna i, bèbas mo daberru idi ipas hukum simengèkètsa taba sinibalèna i. ³ Asa mula sijahè nola sada daberru taba sada anak laki, keppè nggelluh dèng ngo sinibalèna, merlangkah julu meddem ngo terdokken daberru i. Tapi mula enggo matè sinibalèna, jadi secara hukum, enggo mo bèbas daberru i. Jadi mula sijahè nola pè ia taba anak laki sidèban, oda ngo merlangkah julu meddem nèngè ia. ⁴ Bagi ma ngo bang kènè pè alè dengan. Sienggo matè ngo kènè ipas pati-patiin i, kemulihken ipesada kènè dekket daging Kristus janah ia sienggo ipekèkè ibas simatè nai sidasa kènè. Ipegelluh ngo Ia ibas kematèen nai, asa gabè merguna kita bai Dèbata sinderrang nggelluh dèng kita. ⁵ Kerna sinderrang nggelluh ibagasen perdagingen dèng kita, nggelluhta pè mengèkutken bakko-bakko kejelmaan ngo. Janah mergegoh ngo cubellek-cubellek sendihi daging i mengabin lako mengulaken dosa, kumarnaken pati-patiin i. Idi ngo kulih sebabna asa siulaken ulaan patè mi kemmatèen. ⁶ Tapi ukum bagèndari, oda nè ngo kita terrèkèt ipas pati-patiin i. Janah sienggo matè ngo kita ipas pati-patiin siperlebbè simenggemgem kita i kin. Jadi oda nèngè ngo kita tunduk bagèndari mi pati-patiin sitersurat bagè siperlebbè i, tapi tunduk mi cara rembaru ngo kita, imo sinipeddahken Tendi Dèbata banta. ⁷ Nteng bakunè mo pendokkenta? Dosa ngo pati-patiin i? Ngganè, oda ngo bagi! Tapi pati-patiin i ngo petandaken bangku tersèngèt dosa, ai oda kubettoh kin kadè lapaten kata mokkus, ukum oda kin ibagahken pati-patiin i, "Ulang kono mokkus." ⁸ Pati-patiin i ngo bikkasna, gabè idungkul ukurku mi matcam bagè kemokkusen, kerna dosken matè ngo dosa ukum oda lot kin pati-patiin. ⁹ Nggelluh ngo aku tikala i, tukasi pè oda merpatiin. Tapi roh mo pati-patiin i, gabè kèkè mo dosa, ¹⁰ nai gabè matè mo aku. Asa ukum i mulana, merembahken kenggelluhen kin ngo nemmuken pati-patiin i, keppèken gabè merembahken kemmatèen nola ngo bangku. ¹¹ Kerna merkitè pati-patiin i gabè ioto-otoi dosa i ngo aku, nai gabè ibunuh dosa i mo aku. ¹² Bai Dèbata nai ngo pati-patiin i, janah perèntah sinibagasen pati-patii i pè bai Dèbata nai ngo; jadi bennar ngo i janah selloh. ¹³ Mula bagidi, mada ngo siselloh i nola mengkerrohken kemmatèen bangku? Tentu oda! Dosa ngo mengkerrohken kemmatèen i. Tapi asa ntangkas ibaing dosa i mo siselloh i merembahken kemmatèen i bangku, nai gabè ntangkas mo taridah bakko-bakko dosa i. Asa, merkitè hatoren Dèbata, makin nakkat mo taridah kejahaten dosa siterlebbih i. ¹⁴ Sibettoh ngo bai Tendi Dèbata nai ngo pati-patiin i. Ukum aku perdaging ndotè ngo. Enggo idèa aku mahan hamba dosa. ¹⁵ Kerna aku sendiri oda kuantusi nibakinku. Ai barang kadè kukellemmoken oda kuulaken, tapi barang kadè moyang atèngku, idi nola ngo kuulaken. ¹⁶ Jadi mula kuulaken ngo moyang atèngku, merlapaten ngo i, kuakkui ngo selloh pati-patiin i. ¹⁷ Jadi situhunna oda ngo aku mengulaken i, tapi dosa sienggo menguasai aku i ngo. ¹⁸ Kubettoh ngo, oda lot simerandal merian i bagasen diringku, imo ibagasen kejelmanku. Lot ngo nemmuken sura-surangku lako mahanken selloh, tapi oda terbahanken aku ulaan selloh i. ¹⁹ Ai oda kuulaken selloh bagè sura-surangku i; balikna nola ngo tupèh, gabè kuulaken simeroha, siso lemmo atèngku mengulakensa. ²⁰ Asa, mula kuulaken kecegonken atèngku, oda ngo aku simengulaken i, tapi dosa simengerajai aku i ngo. ²¹ Jadi kubaing mo rèmpunna: mula naing kuulaken selloh, gabè pellin simerroha sambing ngo terdapet bangku. ²² Ikellemmoken pusuh perratènku ngo nemmuken pati-patiin Dèbata. ²³ Tapi kuidah ngo lot hatoren sidèban ibagasen diringku -- juhap dekket patip-patiin ni pusuh perratèenku i. Kerna naidi ngo ipepatu aku mi pati-patiin dosa silot ibagasen diringku i. ²⁴ Èo, aku jelma simertulbang èn! Isè ngo ndia paluahken aku ipas perdagingen kemmatèen ènda nai? ²⁵ Mellias atè mo bai Dèbata merkitè-kitè Jesus Kristus Tuhanta i. Ai kuuèi ngo pati-patiin Dèbata ibagasen batinku, tapi kuulaken ngo patiin dosa ipas dagingku.

¹ Èn pè, oda nèngè mengenna hukum taba kalak sienggo sada dekket Jesus Kristus. ² Kumarna hatoren Tendi Perbadia simemmaing kita nggelluh rebbak dekket Jesus Kristus, enggo paluahken kita ipas hukum dosa dekket kemmatèen idi nai. ³ Ai barang kadè siso ndorok ibaing pati-patiin i kumarna ndotèna kita jelma enggo mo ibaing Dèbata. Italuken Dèbata ngo kegegohen dosa sinibagasen bakko jelma merkitè-kitè ipasulak Dèbata AnakNa sendiri merrupaken daging perdosa i lako mennasa dosa. ⁴ Ibaing Dèbata pè bagidi, asa ndorok ngo siulaken ibas dirinta, sinipergeddo Dèbata silot ibagasen pati-patiin i, mengèkutken Tendi Dèbata oda nèngè bagè mengèkutken bakko kejelmaan. ⁵ Kalak singgelluh mengèkutken bakko jelma, dakdak ngo memikiri nipergeddo bakko jelma. Tapi ukum kalak singgelluh mengèkutken Tendi Perbadia, dakdak ngo mengeradumi nipergeddo Tendi Perbadia. ⁶ Mula irajai bakko jelma ngo perukuren ndènè, mi kemmatèen ngo ujungna i. Tapi mula ikuasai Tendi Dèbata pikiren ndènè, nggelluh bak merdamè dekket Dèbata ngo ujungna. ⁷ Barang isè irajai bakko daging pikirenna, mermusuh ngo ia taba Dèbata; oda uè tunduk kalak sibagidi mi pati-patiin Dèbata; ai oda terbaing kalak sibagidi menguèi pati-patiin Dèbata. ⁸ Kalak simenguèi bakko perdagingen, oda ngo uè Dèbata menjalo sibagidi. ⁹ Tapi ukum kènè, oda nèngè ngo nggelluh ibagasen bakko sibagidi, tapi nggelluh iabagasen Tendi Perbadia ngo -- mula tuhu Tendi Perbadia merrian ibagasen kènè. Barang isè oda iiani Tendi Perbadia oda ngo Kristus ibagasen ia. ¹⁰ Tapi mula Kristus nggelluh ibagasen kènè, mula pè matè daging ndènè kumarna dosa, tapi berrènken Tendi Perbadia ngo bai ndènè kenggelluhen, kumarna enggo merdemmu kènè dekket Dèbata. ¹¹ Asa mula merrian ngo bai ndènè Tendi Dèbata sipegelluhken Kristus ibas simatè nai, gabè pegelluhenna ma mo daging ndènè siuè matè i, merkitè Tendina singgelluh ibagasen kènè. ¹² Èn pè kènè alè dengan, kennah lot ngo tanggung jababta; tapi oda ngo tanggung jabab bakko kejelmaan; ulang nèngè mo kita nggelluh mengèkutken cubellek daging. ¹³ Mula merguru mi daging ngo kènè merperangè, matè ngo kènè; tapi mula ibunuh kènè perrulaan daging merkitè Tendi Perbadia, nggelluh mo kènè. ¹⁴ Ai barang isè itogiken Tendi Dèbata, ia ngo dukak Dèbata. ¹⁵ Ai Tendi niberrèken Dèbata bai ndènè, oda ngo asa gabè hamba kènè, gabè memmaing buradan tapi memmaing asa gabè dukak-dukak Dèbata ngo kènè. Janah merkitè kegegohen Tendi Dèbata i ngo kènè mendiloken, "Abba", mendokken, "Alè Pa!" ¹⁶ Janah Tendi Dèbata i ngo mengindangken mi tendinta, magahken tuhu-tuhu ngo kita dukak-dukak Dèbata. ¹⁷ Asa mula dukak-dukakna ngo kita, gabè persidasa ngo kita i basa-basa nipèmaken Dèbata taba dukak-dukakna. Rebbakken menjalo mo kita dekket Kristus sinipèmaken Dèbata bana; ai mula dengan Kristus kita i sigongenken, denganna ma ngo kita bang i kesangapen pè. ¹⁸ Kuradumi karina kinidersa sinigongta bagèndari, kira siso lot ngo i mertimbangken kesangapen sinaing petararenna seggen banta. ¹⁹ Ai dak nteddoh ngo karina tinempa i memèma-mèma kettikana asa ipettarar Dèbata kesangapen dukak-dukakNa. ²⁰ Ai karinana tinempa i, enggo ibelli soh mumuk, oda ipas lemmo atèna nai, tapi kumarnaken ibelli Dèbata ngo bagidi. Tukasi pè bagidi lot dèng ngo siharapen bagèen: ²¹ tupung kettikana, ipaluah mo tinempa idi ipas kemmagonna nai mi kessangapen rebbak dekket dukak-dukak Dèbata. ²² Sibettoh ngo soh bagèndari pehehui ngo tinempa i kumarna mpiahna tosè bagè partua ibages sinderrang rabisen. ²³ Janah dèng ma oda ngo pellin sagumanna tinempa i kessa kekelsohen, kita sendiri pè kekelsohen ngo ibas ukurta. Ai tukasi pè kita menjalo Tendi Dèbata imo sibasa-basa Dèbata perlebbè banta, dak tong dèng ngo kita terpèma-pèma taba Dèbata paluahken dirinta, asa ibaing gabè dukak-dukakNa. ²⁴ Ai dak tong ngo kita mengharap, asa ipaluah kita. Tapi ukum enggo ngo siidah niharapta idi, oda nèngè ngo pengharapen i. Ai kasa nè mo harapen ukum enggo ngo ndidah? ²⁵ Tapi mula siharap simakdèng ndidah, mbingit mo kita mèma. ²⁶ Ai bagidi ma ngo Tendi Dèbata roh mengurupi kita tikan ndotè kita. Oda ngo sibettoh bakunè ngo patutna mersodip. Tendi i sendiri ngo menghadep Dèbata lako mengidoken banta merkitè kiniteddoh ukur siso terhuapken nèngè. ²⁷ Nai idah Dèbata simengidah pusuh peratèen kejelmaan i ngo nihendakken Tendi i; kerna nipidoken Tendi taba Dèbata siperlu bai ummat Dèbata ngo, janah rembang ngo i mi sinipergeddo atè Dèbata. ²⁸ Sibettoh ngo iatur Dèbata ngo karinana, asa gabè mengkerrohken merandal taba kalak simengkekelengi Dèbata janah sinidilona ibas takina nai kin. ²⁹ Ai kalak sienggo ipilih Dèbata idi ngo iteddo i mulana i nai, asa gabè tosè kalak idi bagè AnakNa imo Jesus Kristus. Merkitè bagidi, Anakna i mo situaan bai karina anggina. ³⁰ Bagi ngo Dèbata mendilo kalak sienggo itentuken kin lebbèen. Nai kalak sienggo nidiloNa i, kalak i ngo ndorok merdamè dekket Dèbata. Janah sienggo merdamè dekket Dèbata idi ma ngo nggelluh ibagasen Dèbata. ³¹ Èn pè, bakunè mo ndorok sidokken tersèngèt i karina? Mula Dèbata denganta, isè mo terbakinsa mengalo kita? ³² Oda ngo ikellini AnakNa sendiri, tapi ipesakat ngo mi kemmatèen lako mengkepkep kita karinana; nai mèter harapen mo mak ibasa-basaken banta sidèbankenna i karinana? ³³ Isè menggugat kita ummat sienggo ipilih Dèbata, mula Dèbata ngo mendokken kita oda mersalah? ³⁴ Isè lot mendokken kita salah? Kristus Jesus sienggo matè janah sienggo balik nggelluh i ngo membèla kita. I kamuhun Dèbata ngo ia bagèndari mengondiken kita. ³⁵ Isè terbakinsa mennirang kita ipas kelleng atè Jesus Kristus nai? Kinipersah ngo barang kinipersuk? Kinidersa ngo barang kumarna rapar, barang kinicor ngo barang mara, tah barang kemmatèen ngo? ³⁶ Tersurat ngo ibas Bibèl bagèen: "Suntuk ari ngo mermara nggelluh nami kumarnaken Kono. Tosè bagè biri-biri naing sembellihen ngo kami iètong." ³⁷ Oda! Tapi sondel ngo tupèh kemmennangenta i karinana i, kemulihken Ia simengkekelengi kita. ³⁸ Tok kalohoon ngo ukurku, oda lot mennondati kelleng atè Dèbata kumarna kemmatèen barang kenggelluhen, bang malaèkat penguasa pè, bang asup-asup sibagèndari barang asup-asup simasa luas, bang kegegohen pè, ³⁹ barang bakinen si ni langit bang si ni tanoh èn pè, barang bakinen tah kadè sidèban naidi pè, taba kita ibagasen Jesus Kristus Tuhanta i.

¹ Tuhu ngo sikudokken èn, kerna milik Kristus ngo aku. Oda ngo luap aku. Itegu-tegu Tendi Perbadia ngo ukurku peposken ukurku tuhu sikudokken èn. ² Bonek kalon ngo atèngku janah merhendem; ³ kumarna kaka-anggi denganku sada bangsa. Ai isumpahi janah iliplip Dèbata pè aku i hadeppen Kristus nai, mengkepkep kalak idi, jadi ngo. ⁴ Kerna bangsa sinipilih janah ibaing Dèbata ngo kalak i gabè dukak-dukakNa janah terrolih kessangapen rebbak dekketsa. Kalak i ngo denganna merpadan janah iberrèken pati-patinna. Ibagahken ngo bai kalak i bakunè hatoren meragama, janah enggo ijalo kalak i bagah-bagahNa. ⁵ Pinempar empungta i ngo kalak i, janah roh pè Kristus tubuh merrupa daging, arap kalak i ngo; Ia ngo sindatesna ipas nasa karinana. Nipoji mo Dèbata soh mi amman-sumendah. Amèn. ⁶ Oda ngo kudokken sondat padan sinidokken Dèbata; tapi oda ngo karinana kalak Israel ipilih Dèbata. ⁷ Oda karina dokkenken pemparen si Abraham dukak-dukak Dèbata. Tapi, "Pellin pemparen si Isak ngo dokkenken pinemparmu." ⁸ Lapatenna, pinempar si Abraham sigabè dukak-dukak Dèbata imo pellin pemparen situbuh kumarnaken iperbagah-bagah Dèbata. Asa oda ngo karinana pinemparna i. ⁹ Ai bagèen ngo bagah-bagah Dèbata, "Tupung bagèen ma luas tikkina roh aku, lot mo enggo sada anak bai si Sara!" ¹⁰ Janah makin ntangkasna dèng ma: Dua kalak ngo anak si Rebekka, sada bapana imo si Isak empungta i. ¹¹ Ai sinderrang madèng tubuh kalak i sidua, enggo kin ngo lebbèen itentuken Dèbata nipilihNa i. Ukum pemmilih Dèbata oda ngo merguru mi sindorok ibaing jelma, tapi mergantung mi pemmilihen Dèbata sendiri ngo. Kerna makdèng tubuh anak si Rebekka sidua kalak i, oda ngo lot dèng ibahanken kalak i mendè barang nggodo pè, ¹² enggo kin ngo idokken Dèbata taba si Rèbèkka kennah mengkebasi bai anakna sikèdèken i ngo situanna, ¹³ bagè sitersurat i Bibèl, "Kukekelengi ngo si Jakob, tapi ncego ngo atèngku midah si Esau." ¹⁴ Jadi, bakunè mo ninta bagèndari? Otang bagè oda adil tengennen Dèbata? Mada lè! Adil ngo! ¹⁵ Ai nina Dèbata ngo taba si Musa, "Kuberrèken ngo mendè basangKu bai kalak sinaing berrènkenKu, janah masèh ngo atèngKu bai kalak simasehenKu." ¹⁶ Asa oda ngo merguru mi hendak jelma, barang pè mi usaha jelma, tapi pellin mergantung mi lemmo atè Dèbata sambing ngo barang isè kalak nipilihNa i. ¹⁷ Ai tersurat ngo ibas Bibèl, "Idokken Dèbata ngo taba raja Mesir, asa kupebangkit pè kono gabè raja, asa kupacidah ngo kuasangku merkitè kono, janah asa termurmur gerarku i suberri dunia èn." ¹⁸ Jadi masèh ngo atè Dèbata midah kalak sinaing masèh atèna, janah ipejèngèng Dèbata ngo ukur kalak sinaing pejèngèngenna dok atèna. ¹⁹ Tah bakunè idokken kènè bagèen taba aku, "Ukum bagi ngo kasa pella isalahken Dèbata dèng jelma? Otang isè poda ndorok mengalo takina?" ²⁰ Èo, alè jelma permanusia! Isè ngo kono pana asa pang mersoal kono taba Dèbata? Ndorok ngo ndia idokken siniteppa taba peneppa, "Kasa iteppa kono aku bagèen?" ²¹ Otang lemmo atè peneppa i ngo memmaing tanoh dendang i dèba merandal dèba nai merroha. ²² Tosè bagi ngo pemmaing Dèbata, lako pacidahken pungurNa dekket petararken kuasaNa, ipelambas kalohoon ngo lebbè ukurna menganju kalak sienggo patut kenna hukum kumarnaken Idungkul sienggo ipediri mi kemmagoon i lagana. ²³ Bagi ma ngo mula naing ipetarar Dèbata mendè basana mertinèncuk banta sinimasèh atèna janah sienggo ipilih asa merkesangapen, ²⁴ i mo kita sienggo nidilona, oda pellin kalak Jahudi tapi dekket ngo bangsa sidèban pè. ²⁵ Ai nina Dèbata ngo ibas bukku Nabi Hosea: "Gabè bangsangKu ngo kalak siso bangsangKu kin, janah Kukekelengi ngo bangsa siso ni kekellengenKu kin." ²⁶ Janah i bekkas sipernah idokken: "Oda ngo ummatKu kènè," i sidi ngo idokken ma taba kalak i: "dukak-dukak Dèbata singgelluh i." ²⁷ Si Jesaya mendokken tersèngèt bangsa Israel bagèen: "Tukasi pè nterrem kalak Israel bagè kersik i laut, tapi situk ngo kessa maluah; ²⁸ ai ndor mo saut nidokken Tuhan i mendabuh hukum mi suberri dunia èn." ²⁹ Bagèen ma ngo pendokken si Jesaya, "Ukum oda kin itadingken Dèbata Pergegoh Sisotercodi pinempar banta, enggo kin mo nemmu kita bagè Sodom dekket Gomora." ³⁰ Jadi bagèen mo rèmpunna: Bangsa sidèban siso bangsa Jahudi oda pellin merrusaha asa mendè nola balik perdemunna dekket Dèbata. Tapi kerna percaya kalak i, gabè mengolihi nola mo mendè perdemunna taba Dèbata ibaing Dèbata. ³¹ Tapi ukum kalak Israel merusaha menguèi hatoren asa merdemmu nola mengolihi dekket Dèbata, keppèken oda sakat mi sidi. ³² Kasa oda terbakin kalak idi? Kumarna iulaken kalak i pè i, oda ngo kumarna ibagasen kepercayaen taba Dèbata, tapi merkitè usahana sendiri ngo. Jadi gabè tertuktuk janah tergempang mo kalak idi ipas ’Batu Pertuktuken’. ³³ Bagè sitersurat i: "Kugamparken ngo i Sion sada batu bekkas jelma tertuktuk; imo sada batu mbellen memmaing jelma tergempang. Tapi barang isè percaya tabaSa, oda ngo termalu."

¹ Alè dengan! Ipergeddo atèngku, asa bangsangku pè nemmu, dekket ipaluah Dèbata. Kerna naidi dakdak ngo kusodipken i taba Dèbata. ² Kusaksiken ngo ukum kalak idi mertuhu-tuhu ngo menguèi Dèbata, tapi semangat kalak i oda merhenjellen mi perbinettohen siroh bai Dèbata nai. ³ Kerna oda ibettoh kalak idi cara Dèbata memmaingken asa mendè nola persaoren Dèbata dekket jelma; janah ibaing kalak i ngo carana sendiri, nai gabè oda nèngè tunduk kalak i mi cara sinituduhken Dèbata. ⁴ Ai enggo ipuncai Kristus pati-patiin i. Jadi barang isè percaya bai Kristus, gabè mengolihi mendè nola ngo hubungenna dekket Dèbata. ⁵ Isuratken si Musa ngo tersèngèt kelluahen kumarna pati-patiin i, "Barang isè mengulaken pati-patiin i, nggelluh ngo ia." ⁶ Tapi taba barang isè percaya, bagèen ngo idokken, "Ulang dokken ibas pikirenmu; isè ngo ndia laus mi Sorga? (lapatenna merembah Kristus i susur). ⁷ Barang: Isè ngo susur mi lembeng kemmatèen i? (lapatenna mengarahken Kristus i kemmatèen nai)." ⁸ Bagèen ngo tupèh pengartinna, "Ntalpè ngo bai ndènè Sukuten bai Dèbata i nai ibagasen babah dekket ibagasen pusuh perratèen ndènè." I ngo Sukuten sikubagahken kami; sukuten mendokken kennah ngo kalak percaya. ⁹ Ai mula iakku kènè ngo "Jesus i Tuhan" janah mula ikettoki kènè ngo ipegelluh Dèbata Jesus i kemmatèen nai, maluah mo kènè. ¹⁰ Ai ukur i ngo percaya, asa selloh dekket Dèbata; babah i ngo mengeruapken, asa mi kelluahen. ¹¹ Tersurat ngo ibas Bibèl, "Barang isè percaya bai Jesus, oda ngo termalu." ¹² Taba karina jelma ngo rana i, ai oda lot kalihna kalak Jahudi barang bangsa sidèban pè; ai sada ngo Tuhan mi karinana. Iberrèken ngo pasu-pasuna mertinèncuk taba barang isè mengido urup baNa. ¹³ Ai tersurat ngo ibas Bibèl, "Maluah ngo karina simendilo gerar Tuhan i". ¹⁴ Tapi bakunè mo jelma i dilo-dilo taba Tuhan, ukum oda ngo ia percaya? Janah bakunè mo jelma i percaya, ukum oda ngo idengkoh dèng katana? Nai bakunè mo jelma i mendengkoh katana, ukum oda lot mennukutken? ¹⁵ Janah bakunè mo mennukutken kata i, mula oda lot pasulaken? Tersurat ngo ibas Bibèl bagèen, "Sellohna i langkah kalak simerembah Sukuten Kelluahen i!" ¹⁶ Tapi oda ngo karinana mendengkohken Sukuten Kelluahen i. Ai nina si Jesaya ngo, "Alè Tuhan, isè mo percaya mi jamita nami?" ¹⁷ Ai merkitèken mendengkohken jamita i ngo gabè lot kepercayaen, janah idengkoh jamita kumarna lot kalak simenjamitaken tersèngèt Kristus. ¹⁸ Tapi mengkuso mo aku: Oda ngo ndia idengkoh kalak i dèng Sukuten i? Enggo ngo nemmuken! Ai tersurat ngo ibas Bibèl, "Enggo terdengkoh sorana mi suberri dunia èn, janah enggo soh katana i mi gennep soki tanoh èn." ¹⁹ Tapi mengkuso nola mo aku, "Oda dèng ngo ndia tahu kalak Israel? Si Musa ngo mengaloi perlebbè: ’Kubaing mo kènè cemburu meradepken siso ummatku kin, janah Kudungkul mo laga ndènè midah kalak simoto.’ " ²⁰ Pangen dèng ngo si Jesaya mendokken, "Kalak siso mennulusi aku idi nola ngo kennaan; janah Kupacidah ngo diringKu taba kalak siso madun mengkuso tersèngèt Aku." ²¹ Tapi ukum tersèngèt bangsa Israel idokken si Jesaya ngo bagèen, "Suntuk ari ngo Kudoroken tanganKu mendahi bangsa jèngèng bana mengalo-ngalo."

¹ Mengkuso mo aku: Mada ngo ndia enggo ipitakken Dèbata bangsaNa? Tentu oda! Ai aku pè kalak Israel ngo, pinempar si Abraham marga Benjamin. ² Oda ngo ipatakken Dèbata bangsaNa sienggo ipilih idi i mulana nai kin. Otang ibettoh kènè ngo sinidokkenna sitersurat ibas Bibèl tersèngèt si Elias, tikanna iaduken bai Dèbata tersèngèt Israel, ai nina ngo, ³ "Alè Tuhan, enggo ibunuh kalak i nabi-nabiMu janah enggo irumpakken langgaten pemmèlèen baMu i; pellin sadaku nai ngo tading, tapi dekket ngo kessahku i pè iletlet kalak i." ⁴ Bakunè pengaloi Dèbata taba si Elias? Bagèen ngo, "Kukiraken ngo bangku pitu ribu kalak nai siso menurimpang. Oda nung dèng kalak i mersembah taba Dèbata Baal." ⁵ Bagidi ma ngo bang bagèndari pè. Lot dèng ngo cituk nai bilangen kalak sienggo ipilih Dèbata, kerna masèh atèna midah kalak i. ⁶ Kumarna masèh atè Dèbata ngo asa ipilih kalak idi, oda ngo kemulihken perulaan kalak i. Ai ukum kemulihken perulaan jelma ngo pemilih Dèbata, oda ngo masèh atè Dèbata i dokkenken! ⁷ Asa, bakunè ngo keppè? Oda jupa kalak Israel si ni tulusenna. Pellin siterpilih i ngo kessa terolih. Ukum sidèbanna i, oda parduli i penenggoon Dèbata. ⁸ Rembang bagè sitersurat ibas Bibèl, "Soh bagèndari ngo lalap atè-atè pikiren kalak idi ibaing Dèbata, mata kalak i pè laju ngo oda merpendidah, pènggelna pè oda merpendengkoh." ⁹ Janah idokken si Daud ngo bagèen: "Belli mo gabè togong-togong pèsta bak kerja kalak idi bai kalak i, janah gabè geddung kedabuhenna! ¹⁰ Belli mo gellap mata kalak i ulang merpendidah, janah belli mo mukung kalak i sidekkah-dekkahna." ¹¹ Mengkuso nola mo aku: Sinderrang geppah kalak Jahudi, asa gabè tumpat ngo? Oda! Tapi kemulihken pengellausiin kalak idi, gabè ipaluah mo bangsa sidèban, asa katerra pè gabè cemburu kalak Jahudi midah bangsa sidèban i. ¹² Mula kemulihken pengelausiin kalak Jahudi ngo gabè dapetten pasu-pasu Dèbata bangsa sidèban, makinsa nola mo mula mengolihi mendè hubungen kalak Jahudi dekket Dèbata, tentu makin mertinèncukna mo pasu-pasu berrènken Dèbata! ¹³ Kudokken mo ranangku bai ndènè dengan siso bangsa Jahudi! Sidekkahna èn, kumarna rasul taba kalak siso bangsa Jahudi ngo aku, mulia ngo kuètong ulanku i. ¹⁴ Dak kuharapken ngo asa gabè cemburu bangsangku sendiri, asa merkitè bagidi ndorok kutegu dèba kalak i. ¹⁵ Kumarna itulak Dèbata ngo kalak i, gabè mengolihi mendè nola mo hubungen Dèbata dekket dunia èn; makinsa nola mo ukum ijalo Dèbata kalak i! Tosè mo i, balik nggelluh sienggo matè. ¹⁶ Ai mula milik Dèbata ngo nditak nikupul perlebbè i pas nditak idi nai, merlapaten ngo i, milik Dèbata ngo karina nditak i. Janah mula Dèbata sidasa urat kayu, Dèbata ngo sidasa kayu i karina. ¹⁷ Tuhu iagoi ngo dèba ranting kayu Zaitun i -- imo kalak Jahudi. Nai singkat nola mo ranting sidèban mi sidi, imo kènè siso bangsa Jahudi, asa irasaken kènè simendè ipas kayu Zaitun tuhu i nai, imo kalak Jahudi. ¹⁸ Kerna naidi ulang mo bagè pis mata ndènè alè dengan midah ranting sienggo iagoi i. Èngèt mo ranting si ni dampelken ngo kono. Oda ngo ranting merrèken pangaan taba urat, tapi urat i ngo merrèken pangaan taba ranting. ¹⁹ Tah bakunè idokken kono, "Otang iagoi ngo enggo ranting i kin, asa aku nola idampelken mi sidi!" ²⁰ Uè, tuhu ngo i! Kumarna oda percaya ngo kalak i asa iagoi; janah kumarna percaya ngo kènè asa ijalo. Jadi ulang mo kono gabè gegah, tapi merkebiaren mo. ²¹ Ai mula oda pella rogi iakap Dèbata memmatakken ranting tuhu i kin i mo kalak Jahudi, ulang mo dok atèmu rogi iakap Dèbata memmatakken Kono! ²² Nai merkitèken i sidi nai si idah ngo mendè basa Dèbata dekket bakunè mposiNa. Ai mposi ngo pemmaingna taba kalak perdosa, tapi mendè ngo basana taba kono, asal mo tettap kono i bagasen mendè basaNa i; kum oda ngo, ipatakken ma ngo bang kono pè. ²³ Nai kalak Jahudi pè, mula percaya nola kalak idi, ijalo nola ma ngo. Kerna merkuasa ngo Dèbata menjalosa mengolihi. ²⁴ Kènè siso kalak Jahudi kin codi ngo bagè ranting kayu rambah. Asa mula idampelken ngo kènè mi kayu Zaitun tuhu, siso dos kin kayu ndènè, makinsa nola mo kalak Jahudi si niumpamaken mi kayu Zaitun tuhu; otang makin murah bai Dèbata lako mengolihken kalak i mi kayuna sendiri kin. ²⁵ Alè dengan! Ulang idokdok kènè enggo mpantas kènè, tapi naing mo dok atèngku bettohen ndènè nihendakken Dèbata, siso nung ibettoh kalak i dèng. Gegah pè dèba kalak Israel ninggat enggo kessa tumpu ngo kalak siso Israel kin mendahi Dèbata. ²⁶ Nai gabè maluah mo kalak Israel, rembang bagè sitersurat i kin, "Roh mo Raja Sipaluahken i Sion nai; Isasa mo karina kejahaten pemparen si Jakob. ²⁷ Èn mo padanku dekket kalak i, tikan Kuampuni dosa-dosa kalak i." ²⁸ Kumarna oda uè kalak Jahudi menjalo Sukuten Kelluahen bai Dèbata nai, gabè musuh Dèbata ngo kalak i janah gabè perlabaan ngo idi bai ndènè siso Jahudi, tapi kemmulihken pemmilihenna i, gabè kekellengen atè Dèbata ngo kalak i merkitèken empung kalak idi i. ²⁹ Ai oda ngo uè Dèbata mennondati masèh atè dekket pemmilihenNa i. ³⁰ Kènè pè, oda ngo menguèi Dèbata ukum arnia, tapi terolih masèh atè Dèbata ngo kènè bagèndari, kemulihken oda menguèi i kalak Israel. ³¹ Bagi ma ngo bang kalak Israel i pè. Oda menguèi kalak i bagèndari bai Dèbata, asa gabè terolih masèh atè bak kesasaan dosa kènè. Tapi i podi ari, kalak i pè terolih masèh atè kesasaan dosa ma ngo kemmulihken masèh atè sienggo ijalo kènè. ³² Ai enggo ibelli Dèbata karina jelma irajai ukur oda merpenguèi, asa gabè terolih masèh atè kalak karinana. ³³ Mahantuna i tupèh kekayaan Dèbata! Mbagesna i tupèh keppantasen dekket nahu Dèbata. Oda terradumen karina hukum nidabuhna, janah oda tertulusen karina dalan-dalanna. ³⁴ Bagè sitersurat i: Isè memettoh pikiren Tuhan i? Isè pennah memmeddahiSa? ³⁵ Isè nung merèken taba Dèbata, asa ipido nola balesNa? ³⁶ Dèbata ngo menghanaken sagumanna silot. Bana nai ngo rohna karinana i, janah merpunca bana. Pessangap mo Dèbata soh mi amman sumendah! Amèn.

¹ Kènè alè dengan! Bagi mo merandalna mendè basa Dèbata banta. Kerna naidi ngo asa kuèlèk-èlèk kènè, asa bakin kènè diri ndènè pèlèen singgelluh janah mbadia kellemmonken atè Dèbata. Bagi mo nemmuken penguèen ndènè taba Dèbata. ² Ulang dos cara ndènè dekket dunia èn. Paduè mo Dèbata perimbaruken diri ndènè, asa gabè mobah. Nai merkitè bagidi gabè terbaing kènè mo memmettoh lemmo atè Dèbata -- imo kadè mendè ikesampangken atè Dèbata janah sondel kinimerandalna. ³ Kumarna enggo iberrèken Dèbata masèh atèna bangku, jadi kupeddahi mo kènè karinana: Ulang ètong kènè diri ndènè lampo dari pada patutna. Tapi ibagasen ncerrep perrukuren mo radumi kènè diri ndènè mengèkutken bakunè belgahna kepercayaen iberrèken Dèbata bai gennep kènè. ⁴ Codinna, mbuè janah matcam bagè ngo sendihi dagingta. Gennep sendihi lot ngo ulanna. ⁵ Bagidi ma ngo bang kita pè. Tukasi pè mbuè kita, tapi sada daging ngo kita kerna sada mi Kristus. Janah gennep ngo sendihi kita samah kita. ⁶ Karinana kita menjalo allèh merguru mi pemmerrèken masèh atè Dèbata banta. Kerna naidi sipakkè mo allèhta i; mula merjamita ngo allèhta, sukutken mo Sukuten Kelluahen idi ibagasen kepercayaen silot banta. ⁷ Mula allèh mengajari, mengajari mo. ⁸ Mula allèh memmeddahi taba sidèban, iulaken mo i selloh. Mula allèh merbasa-basa, berrèken mo idi ibagasen sampang atè dekket sènteng. Mula allèh menguluken, menguluken mo ia ngkasah. Mula allèh mermasèh atè taba sidèban, ulaken mo idi ibagasen ukur nggasang. ⁹ Ulang mo merpengait ngkelleng atè i. Nggogo mo atèmu midah sijahat janah bahanken mo simerandal. ¹⁰ Èngèt kènè mo mersikekelengen samah dengan bagè merkaka kuanggi, janah mersilebbè-lebbèen mo kènè mersipesangapen. ¹¹ Ulang moru ngakasah ndènè mahan bahaan; nggasang mo kènè mengkebasi bahaan bai Tuhan i merkitèken Tendi Perbadia. ¹² Sampang mo atè ndènè mengharap taba Tuhan, janah mbingit mo kènè ipas sitahanen, nai empet kènè mo mersodip. ¹³ Sarihken kènè mo siperlu bai kalak sipercaya bai Dèbata janah jalo kènè mo kalak i kiserrang mi bages ndènè ibagasen sampang atè. ¹⁴ Pido kènè mo bai Dèbata asa ipasu-pasu kalak simenessak-nessak kènè. Uè, pido mo asa ipasu-pasu Dèbata kalak idi, ulang sumpahi. ¹⁵ Rebbak lolo mo kènè dekket si lolo, janah rebbak tangis mo kènè dekket kalak si tangis i. ¹⁶ Sada mo orjok ndènè samah kènè. Ulang ndates ukur merpengelako, tapi pessobok mo dirimu mi kecereppen. Ulang mpantasen kono dok atèmu ipas situhunna nai. ¹⁷ Ulang balesken jahat alo jahat, tapi baing mo mendè i hadeppen kalak karinana! ¹⁸ Usahaken mo nggelluh ibagasen damè meradepken karina jelma. ¹⁹ Kènè alè si nikekellengen! Ulang kènè bales dendam, belli mo Dèbata merlulu, ai tersurat ngo ibas Bibèl, "Aku ngo menghukum, Aku ngo memmales, nina Tuhan i." ²⁰ Balikna nola mo tupèh baing, mula mellèhè musuhmi berrèken ia mangan; mula muasen ia, berrè mènum. Ai mula ibaing kono bagidi, termèla mo ia ibaing kono. ²¹ Ulang talu kono ibaing kejahaten, tapi taluken mo kejahaten i merkitè-kitè selloh.

¹ Gennep mo kalak kennah tunduk mi pemerèntah, di oda lot pemerèntah ukum mak bai Dèbata nai menjalo kuasa. Janah pemerèntah silot bagèndari pedalanken kuasana merkitè perèntah bai Dèbata nai. ² Mengalo sinitentuken Dèbata ngo barang isè kalak mengalo pemerèntah. Asa barang isè mengalo pemerèntah, mengaitken hukum mi dirina ngo ia simengalo i. ³ Kalak memmakin mendè ulang mbiar midah pemerèntah. Pellin kalak simengulaken jahat ngo kessa patut mbiar. Mula sèkel kono ulang mbiar midah pemerèntah, kennah mo ulaken simerandal asa gabè ipoji nola kono. ⁴ Kerna naposo Dèbata ngo pemerèntah i, lako menghatorken simerandal bamu. Tapi mula iulaken kono kejahaten, patut ngo kono buradan midahsa, ai oda sia-sia kuasana i lako menghukum barang isè. Ai suruhen Dèbata ngo kalak i lako mendabuh hukum ni Dèbata taba barang isè simaingken kejahaten. ⁵ Kerna naidi kennah tunduk ngo kènè taba pemerèntah -- ulang kumarna mbiar ihukum, tapi kumerna ienjar pusuh peratèen mo. ⁶ Kumarna naidi ngo asa menggarar belasting kènè, kerna perkebbas Dèbata ngo kalak idi, janah mi ulaan i ngo kalak idi ipebangkit. ⁷ Jadi garar kènè mo bai pemerèntah kadè patut gararen bana; imo belasting, taba sipatut menjalosa, cokè taba kalak sipatut kessakaten cokè; merkebiaren mo kènè taba kalak sipatut kebbiaren, hormat taba kalak sihormaten. ⁸ Ulang merutang kènè barang bai isè pè, laènken utang mersikekelengen. Barang isè mengkekelengi denganna, kalak sibagidi ngo mengulaken pati-patiin Dèbata siniberrèken merkitè-kitè si Musa. ⁹ Ai idokken pati-patiin i ngo: Ulang kono merlangkah julu meddem; ulang memmunuh, ulang mennangko; ulang mennakiken kadè silot bai ndèba, karinana dekket pati-patiin sidèbanna idi, èn ngo rèmpunna, "Kekellengi mo denganmu jelma dosken dirimu." ¹⁰ Barang isè perkelleng atè, oda nggèut ia memmaing nggodo taba denganna jelma; jadi barang isè kalak perrukur ngkelleng, enggo mo idomi nipergeddo pati-patiin i. ¹¹ Tambahna, kerna ibettoh kènè ngo tikkina, ukum bagèndari enggo mbasna lako kèkè ipas simeddem nai, ai enggo makin ndessing ketikana kelluahenta i, mertimbangken mula-mula kita gabè percaya. ¹² Salpun nèngè mo bernginna, sigejap nai mahar mo. Nteng sitadingken mo ulaan kegellapen i siselluk mo sinjata kecihuren i. ¹³ Mehator mo pengellakonta, bagè pengellako patut sinderrang mahar, ulang tikka caranta mangan bak mènum, merpèsta-pèsta, ulang rorang barang mabuk, ulang mak merjullat. Ulang merrubat barang merrukur ncian. ¹⁴ Tapi paduè mo Jesus Kristus menghatorken sinaing bahankenmu. Ulang uèi cubellek daging ndènè memmaing dosa.

¹ Anju kènè mo kalak sikurang ntegguh merkepercayaen, ulang pella mersoal dekketsa tersèngèt pemikirenna. ² Lot ngo dèba mendokken ndorok ipangan karina matcam pangaan. Tapi lot ma ngo dèba kalak sikurang ntegguh kepercayaenna merdok atè, pellin roroh bulung-bulung idi sambing mo kessa ndorok pangaan. ³ Barang isè sindorok kipangan mermatcam bagè pangaan, ulang gabè lègan nola dok atèna kalak sikipangan pangaan merkedekoon. Bagidi ma mo kalak simengerrem oda kipangan pangaan mermatcam bagè, ai sienggo ijalo Dèbata ngo bang kalak i pè. ⁴ Isè ngo ko pana dok atèmu, asa gabè ihukumi kono denganmu naposo sidèban? Tah hot pè ia barang geppah, tuanna ngo mennarihken i. Tapi tettah ngo ia cènder, ai terpetettah Tuhan i ngo ia. ⁵ Lot ngo dèba merdok atè, merkesurungen ari sisada bai ari sisada nai, tapi lot ma ngo dèba mengakap dos ngo karinana ari. Belli mo kalak i menentuken memmes pikirenna sendiri! ⁶ Barang isè memmaing lot ari merkesurungen, lako pesangapken Tuhan i mo idi ibaing. Barang isè kipangan pangaan simermatcam bagè, baing mo i lako pessangapken Tuhan i, ninganna mendokken mejalo metangkup taba Dèbata, kemmulihken pangaan i. Bagi ma mo kalak simengerrem i imo pellin kipangan pangaan merkedekoon, kalak i pè pesangapken Tuhan i ngo janah mendokken mejalo metangkup taba Dèbata. ⁷ Isè poda kita nggelluh ibas dirinta nai sendiri; isè ma poda kita matè ibas dirinta nai sendiri. ⁸ Mula nggelluh kita, nggelluh bai Tuhan i ngo, janah mula matè pè kita, matè bai Tuhan i ngo. Asa, nggelluh barang matè pè kita, tong ngo milik Tuhan i kita. ⁹ Ai enggo matè Kristus janah balik nggelluh. Kerna naidi ngo Ia gabè Tuhan kalak singgelluh janah Tuhan kalak sienggo matè pè. ¹⁰ Jadi kerna naidi alè dengan, kadè mo lapatenna mula ihukum-hukumi kono denganmu sisada kepercayaen? Kasa pis matamu midah denganmu? Ai rebbak hadep ngo kita seggen i jolo Dèbata lako iadili. ¹¹ Tersurat ngo ibas Bibèl, "Tuhuna ngo nggelluh Aku," nina Tuhan i. "Karina jelma kennah mersembah i hadeppenKu, janah gennep jelma merkettuhuken, Aku ngo Dèbata." ¹² Karinana kita kennah mertanggung jabab tersèngèt mi sinibaingta seggen i hadeppen Dèbata. ¹³ Èn pè, ulang nèngè mo kita mersihukum-hukumen. Tapi dak sipikiri mo asa ulang nibakin siso puna-puna taba dengan, asa ulang gabè laling ia. ¹⁴ Ntangkas ngo kubettoh janah tok ngo aku ibagasen Tuhan Jesus, ukum ujutna kadè poda lot simellamun, tapi gabè mellamun ngo i bai kalak simendokken mellamun. ¹⁵ Tapi mula ncio ukur kaltumu ibaing kono kemmulihken pangaan, oda nèngè ibagasen ngkelleng i kono. Ulang mo mago denganmi kumarna peppanmu, ai enggo matè Kristus mengkepkepsa. ¹⁶ Kerna naidi ulang paduè simerandal silot bamu i oda selloh ibaing denganmu. ¹⁷ Ai ukum kerajaen Dèbata, oda ngo perlu pangaan barang ènumen. Tapi menguèi Dèbata ngo dekket mengakapi kedamèen bak menjalo sampang atè si niberrèken Tendi Perbadia. ¹⁸ Ai mula bagi penguèimu taba Kristus, ikellemmoken Dèbata mo kono janah maharga mo kono i tengah-tengah jelma nterrem. ¹⁹ Kumarna naidi siayaki mo memmaingken damè janah mersipehèdu-hèduun samah kita. ²⁰ Ulang sicèdai nibaing Dèbata kumarna pangaan. Halal ngo karinana sipanganen, tapi mula mengkerrohken dosa ngo i bai dèba dengan, ulang kita gabè mersalah. ²¹ Lotiin mo ulang kipangan gulè, ulang mènum anggur kita, barang mengulaken tah kadè pè, mula i nola memmakin merdosa dengan sipercaya bai Tuhan Jesus. ²² Mula percaya kono, ntegguh mo idi jèmak i hadeppen Dèbata. Sayurntua ngo kalak siso ganggu ukurna i sinaing bakinenna! ²³ Tapi barang isè sèk ukurna lako kipangan barang kadè, keppè mula ipangan nola pangaan i kenna hukum Dèbata ngo ia, kumarna oda ibagasen kepercayaenna ia mengulaken tersèngèt kadè bennar bak salah. Ai barang kadè sambing nibahanken mula oda tok atè, dosa ngo i.

¹ Kita sienggo ntegguh merkepercayaen bai Dèbata, kennah sianju ngo denganta perkepercayaen ndotè. Ulang mo kita pellin pesennangken dirinta sambing. ² Karina mo kita memmaing sampang atè denganta, asa makin ntegguh kepercayanna. ³ Ai Kristus pè oda ngo memikirken kesennangen diriNa sendiri, bagè nidokken sitersurat i Bibèl bagèen, "Gabè sempa bangku ngo ramin-ramin, aturen bamu i kin." ⁴ Karina sitersurat ibagasen Bibèl, mahan peddah banta ngo i, asa ntegguh janah mbingit kita merpengharapen taba Dèbata. ⁵ Dak iberrèken Dèbata mo bai ndènè mbingit dekket pengapoon, asa mersikatè-katèen kènè mengèkutken lemmo atè Kristus Jesus, ⁶ asa merkitè sada kata sada orjok kènè, memmoji Dèbata Bapa ni Tuhanta Jesus Kristus. ⁷ Kerna naidi, mersijaloon mo kènè tosè bagè penjalo Kristus banta mahan kessangapen bai Dèbata. ⁸ Èngèt mo. Singgo mengkebasi kalak Jahudi ngo Kristus mennuduhken kesètiaan Dèbata pesautken bagah-bagahNa bai empungta arnia. ⁹ Bang bangsa sidèban i pè, ipesanagap ngo Dèbata merkitè-kitè Jesus, kumarna mendè basana taba kalak i, bagè sitersurat ibas Bibèl bagèen: "Kumarna i ngo kupoji Kono i tengah-tengah karina bangsa janah kuèndèken ngo èndè pemoji-mojiin mi gerarmi." ¹⁰ Tersurat dèng ma ngo bagèen, "Meroang-oang mo kènè rebbak dekket bangsa sienggo terpilih i, alè karina bangsa!" ¹¹ Dèba nai dèng ma, "Poji kènè mo Dèbata, kènè alè karina bangsa poji kènè mo Ia, kènè alè karina jelma!" ¹² Si Jesaya mendokken bagèen, "Kèkè ngo seggen ipas pemparen si Jese nai, lako menggem-nggemmi karina bangsa. Ia ngo siharapenken karina bangsa." ¹³ Dèbata ngo siharapenken ndènè. Dak Iberrèken mo sampang atè, mendomi atè-atè ndènè; bagi ma pè damè, kerna percaya kènè, asa merkitè-kitè Tendina i, makin mengharap kènè bai Dèbata. ¹⁴ Tok ngo aku alè dengan, kènè pè enggo idomi simendè dekket perbinettohen, janah terbaing kènè ngo mersiajar-ajaren. ¹⁵ Tapi lot ngo perlu kupessèngèt taba kènè, kerna enggo ibasa-basaken Dèbata bangku ulaan i. ¹⁶ Enggo ipebangkit aku gabè naposo Jesus Kristus, mahan pasulaken taba kalak siso Jahudi. Aku ngo gabè imam memmagahken Sukuten Simerandal bai Dèbata nai asa kalak siso Jahudi gabè mahan pèlèen sindorok ijalo D èbata. Katerra pè Tendi Dèbata mo memmaing kalak i gabè pèlèen merkedekoen bai Dèbata. ¹⁷ Jadi kumarna ibagasen Kristus Jesus ngo aku, ndorok mo kupoji diringku tersèngèt pengkebasingku bai Dèbata. ¹⁸ Pang ngo aku mengeruapken bagidi, kemmulihken sienggo ibahanken Kristus merkitè-kitè aku lako memmaing kalak siso Jahudi menguèi taba Dèbata. Kuulaken ngo i merkitè kata bak pemakin, ¹⁹ merdengan tanda kelengangen bak kuasa mahantu merkitè Tendi Perbadia. Bagi ngo enggo kupesakat Sukuten Kelluahen tersèngèt Kristus mendahi suberri jelma, mulai i Jerusalem nai soh mi Ilirikum. ²⁰ Ipergeddo atèngku ngo, asa kubagahken Sukuten Kelluahen bai Dèbata nai taba jelma simakdèng mendengkoh tersèngèt Kristus, asa ulang kupajek bages i babo batu cendi si nibahan sidèban. ²¹ Bagè sinidokken Bibèl, "Idah kalak simakdèng nung menjalo Sukuten i mo Ia, janah iantusi kalak i mo si mak nung dèng mendengkohsa." ²² Idi ngo sebabna asa enggo nggati terhabat langkahku roh mendahi kènè. ²³ Tapi ukum bagèndari, enggo pul bahanku i nagerri i. Jadi kumarna enggo kin ma ngo mertahun-tahun dekkahna sèkel aku naing mendahi kènè, ²⁴ sikali èn tikan memellus aku arap kuta ndènè lako mi Spanyol, harap ngo aku ndorok pessimbak dekket kènè. Nai kuharapken ma ngo iurupi kènè aku i perdalanenku mi Spanyol i. ²⁵ Tapi ukum bagèndari naing mi Jerusalem dèng ngo aku lako mennaruhken pengurupiin bai ummat Dèbata nisidi. ²⁶ Kerna ipepulung Kuria Makedonia dekket Akhaya ngo pengurupiin bai dengan sincor ni Jerusalem. ²⁷ Ibagasen sennang atè ngo kalak i memutusken i. Situhunna patut ngo kalak i mengurupi sincor i Jerusalem; kerna bai kalak Jahudi nai ngo bangsa siso Jahudi enggo manjalo pasu-pasu Dèbata. Jadi patutna ngo kalak siso Jahudi i mengurupi kalak Jahudi merkitè pasu-pasu perhartaan. ²⁸ Mula enggo pul kubakin bahanku èn janah mula enggo kupesakat taba kalak ni Jerusalem pengurupiin sienggo terpeppulung i, mèter berkat mo aku mi Spanyol memellus arap kuta ndènè. ²⁹ Mula roh kessa aku medahi kènè, roh ibagasen mbuè pasu-pasu Kristus ngo lako bai ndènè. ³⁰ Ibagasen Tuhan Jesus Kristus dekket ibagasen ngkelleng atè Tendi Perbadia, memmes kupidoken bai ndènè asa tuhu-tuhu kènè mennodipken rebbak dekket aku mendahi Dèbata lako baku; ³¹ asa ipaluah Dèbata aku ipas tangan kalak siso percaya i Judèa nai, janah katerra pè asa ijalo ummat Dèbata, si ni Jerusalem pengurupiin sikutaruhken i. ³² Nai mula ikellemmoken Dèbata, terbaing aku mo roh mendahi kènè ibagasen sampang atè. Jadi gabè nggasang mo kuakap i tengah-tengah ndènè. ³³ Dak idengani Dèbata perdamè i mo kènè karinana. Amèn.

¹ Kupetandaken mo bai ndènè turangta si Poibè pengurupi i kuria Kengkrea ngo ia. ² Jalo kènè mo ia, ai sada kalak sipercaya bai Tuhan i ngo ia, ai bagi ngo patut kalak sipercaya bai Dèbata kennah mersijaloon; urupi kènè mo ia, mula iperluken pengurupiin bai ndènè nai, ai enggo mèduk kalak iurupi -- termasuk aku pè. ³ Pessoh kènè salamku bai si Priska dekket si Akwila denganku mengula bai Jesus Kristus. ⁴ Sanga ngo naing matè kalak i lako paluahken aku. Asa oda pellin aku kessa mendokken melias atè tabasa -- tapi dekket ngo karina kuria bangsa sidèban siso Jahudi. ⁵ Pessoh kènè ma salamku bang mendahi kuria simertumpu i bages kalak i. Salamku ma bai si Epenetus kekellengenku; Ia ngo perlebbè percaya bai Kristus i Asia. ⁶ Salamku ma bai si Maria sienggo leja lako mendahi kènè. ⁷ Pessoh kènè ma salamku bai si Andronikus dekket bai si Junias. Denganku sada marga ngo ia janah pennah kurungen dekket aku. Lebbèen ngo kalak i percaya bai Kristus dari pada aku. Janah termurmur ngo ia bai karina apostèl. ⁸ Salamku bai si Ampliatus, sikukekelengi kerna rebbak ngo kami ibagasen Tuhan i. ⁹ Salamku bai si Urbanus denganna rebbak mengula bai Kristus. Bagi ma salamku bai si Stakhis kekellengenku. ¹⁰ Salamku bai si Apeles, sètia kalohoon ngo ia bai Kristus. Salamku ma bai dengan simpangaan si Aristobulus. ¹¹ Salamku bai si Herodion denganku sada marga. Salamku ma bai dengan simpangaan si Narkisus sirebbak percaya bai Tuhan i. ¹² Salamku bai si Tripena dekket bai si Triposa siuè leja mengkebasi Tuhan i, dekket bai si Persis sikukekellengi, sienggo uè merleja-leja mengkebasi Tuhan i. ¹³ Salamku bai si Rufus dekket bai inangna sidosken inangku. Sinipilih Tuhan i ngo si Rupus janah terpoji. ¹⁴ Pessoh kènè ma salamku bai si Asinkritus, si Plegon, si Hermes, Patrobas, si Hermas bak taba karina dengan Kristen sirebbak dekketsa. ¹⁵ Salamku bai si Pilologus, si Julia, si Nereus dekket bai Turangna i; bai si Olimpas dekket karina sipercaya sirebbak dekket kalak i. ¹⁶ Mersisalam-salamen mo kènè ninganna mersisanggohen perkaka-kuanggiin. Soh mo bai ndè salam karina kuria Kristus. ¹⁷ Kupeddahi mo kènè alè dengan! Jagaken kènè mo kalak simentebbennaken persilisihen dekket kalak simaing merbulut kepercayaen bai Tuhan i, ai meralo ngo i mi sienggo iajarken bai ndènè i. Ilakken kènè mo kalak sibagidi. ¹⁸ Ai ukum kalak sibagidi, oda ngo iuèi kalak i Tuhanta Kristus i, tapi beltekna ngo isarihken. Janah merkitè rana mendè dengkohen nèam-nèam penggel, ioto-otoi kalak i ngo perborjok-borjok. ¹⁹ Ai enggo karina kalak memettoh sètia kènè mi Sukuten Kelluahen bai Dèbata nai, i ngo lolo atèngku midah kènè. Tapi dok atèngku naing mo bijak kènè tersèngèt mi simerandal janah moto tersèngèt simerroha. ²⁰ Dèbata perdamè i mo pettumpatken Sibolis mi terruh kuasa ndènè. Dak idengani janah ipasu-pasu Jesus Kristus Tuhanta i mo kènè. ²¹ Mennenges salam ngo si Timoteus denganku i bai ndènè. Bagidi ma ngo si Lukius, si Jason dekket Sosipater denganku sada marga. ²² Kudokken ma mo salamku simennuratken surat èn, aku si Tertius, imo salam perkaka kuanggiin. ²³ Si Gayus pè mennenges salam ma ngo bai ndènè; kiserrang i bagesna ngo aku, janah kuria nami pè i sidi ngo. Si Erastus kesakaten riar ni kuta i pè menenges salam ngo bai ndènè. Bagi ma denganta si Kuartus. ²⁴ Dak idengani janah ipasu-pasu Tuhanta i mo kènè. Amèn.] ²⁵ Kessangapen mo bai Dèbata! Merkuasa ngo ia petegguhken kepercayaen ndènè tosè bagè Sukuten Kelluahen bai Dèbata nai sikubagahken tersèngèt Jesus Kristus. Kuberitaken sukuten i rembang mi kadè sinipetarar Dèbata, imo rencana Dèbata i sinderbi nai simakdèng nung ibettoh jelma. ²⁶ Tapi bagèndari enggo ipetarar janah ibagahken taba suberri bangsa merkitè surat nabi-nabi mengèkutken kata Dèbata simenettap i, asa gabè percaya janah iuèi kalak i Dèbata. ²⁷ Sadasa ngo kessa Dèbata sibijakna kalohoon. Dak terpoji mo Ia soh mi amman-sumendah merkitè-kitè Jesus Kristus! Amèn. Tabe nami, Paulus, perserrèaan Kristus Jesus