ALAMAT

ALAMAT

¹ Isi bukku èn imo terrèngèt kadè sinipetarar Jesus Kristus terrèngèt barang kadè sinaing masa oda pella ndekkah nèngè. Ibagahken Dèbata ngo taba Kristus asa pacidahken taba pengendeng Dèbata kadè sinaing ndor nè masa. Ipasulak Kristus ngo malaèkatNa taba si Johanes naposoNa, lako magahken simasa i tabasa. ² I indangken si Johanes ngo kata Dèbata janah ikesaksiken ngo tersèngèt Jesus Kristus imo tersèngèt sagumanNa sienggo idah. ³ Sayurntua ngo simenjaka dekket simendengkohken kata alamat èn dekket simenjamoti sitersurat ibagasenna, ai ndessing ngo enggo ketikana. ⁴ Kènè dengan silot i sipitu kuria i Asia! Aku, si Johanes, mengharapken dak ipasu-pasu Dèbata mo kènè, imo Dèbata bagèndari -- Dèbata i sinderbi nai janah Dèbata sinaing roh i -- bagi ma dekket tendi sipitu silot i hadeppenna sirebbak memerèntah dekket Dèbata, ⁵ dekket bai Jesus Kristus saksi kettoken idi nai. Ia ngo perlebbè ipegelluh i simatè nai janah Ia ma ngo merkuasa taba raja-raja ni dunia èn. Masèh mo atè Jesus midah kita, janah merkitè permatèNa i, Ipaluah ngo kita ipas dosanta nai. ⁶ Ibaing ngo kita gabè keturunen raja janah gabè malim i kerajaen Dèbata BapaNa i. Bai Jesus i mo kemuliaan dekket kuasa soh mi amman sumendah! Amèn. ⁷ Tengen, roh mo Ia ibagasen hembun! Karina ngo mengidahSa bang kalak sienggo memmantemSa i pè. Derru-derru mo karina bangsa silot i dunia èn menderruken diriNa kumarnakensa. Imo tuhu! Amèn! ⁸ "Aku ngo Alpa dekket Omèga (Bennana dekket puncana)," nina Tuhan Dèbata, simengkuasai sagumanna silot. Dèbata bagèndari, Dèbata sienggo lot kin janah Dèbata sinaing roh i. ⁹ Aku si Johanes dengan ndènè sisada nasip ibas kinidersa siniakapen gennep simengèkutken Kristus. Mbingit ngo kita menggong sindersa sebagè ummatNa. Mi pulo Patmos ngo aku ibuang kumarna kusukutken Kelluahen bai Dèbata nai, sinipesoh Jesus. ¹⁰ Tupung ari Tuhan i, ikuasai Tendi Perbadia ngo aku -- nai kudengkoh mo sora i podingku nai nggang kalohoon tosè bagè sora sarunè mengerana. ¹¹ Bagèen nina, "Suratken mo si niidahmu mi sada lapihen, nai tengesken mo i mi kuria sipitu èn, imo Epesus, Smirna, Pergamos, Tiatira, Sardis, Piladelpia dekket Laodikia." ¹² Tumulih mo aku mi podi, menengen isè simermongkami aku i, gabè kuidah mo pitu pelita emmas mernèhè. ¹³ I tengah-tengah pelita i kuidah cènder tosè bagè jelma memakè jubah nggeddang soh mi nèhèna. Janah i tentenNa lilit kokos emmas. ¹⁴ Mbulan ngo bukNa bagè kapas, mernala-nala ngo mataNa bagè api; ¹⁵ nèhèNa merkillong bagè tembaga niumbaken i perpandèen, soraNa gumeruhguh bagè sora sampuren ndates. ¹⁶ Ijèmak tanganNa kamuhun ngo pitu bintang janah karuar ngo i babahNa nai peddang sidua babah ntajem kalohoon, nai mercala-cala ngo abèNa bagè mataniari mpilngas. ¹⁷ Kuidah kessa Ia, tangkep mo aku i lebbè nèhèNa bagè sienggo matè; nai Iampèken mo tanganna kamuhun taba aku, ninganna idokken, "Ulang kono mbiar! Aku ngo merkuasa i mulana nai soh mi puncana. ¹⁸ Aku simemerèken nggelluh! Sienggo matè kin ngo enggo Aku arnia, tapi tengen mo, nggelluh ngo Aku soh mi amman sumendah. Merkuasa ngo Aku bang i kemmatèen bang bekkas i balik i. ¹⁹ Kernana idi suratken mo si niidahmu, imo simasa bagèndari dekket sinaing masa i podiin èn. ²⁰ Èn ngo rusia bintang sipitu si niidahmu i tanganKu dekket pelita emmas mernèhè i. Ukum bintang sipitu i, imo malaèkat-malaèkat sipitu kuria, janah nèhè lampu sipitu i, imo kuria sipitu i."

¹ "Bagèen mo suratken mendahi malaèkat kuria Epesus: Èn ngo tennah simenjèmak pitu bintang i tanganNa kamuhun janah merdalan-dalan i tengah-tengah nèhè pelita emmas sipitu i. ² Kubettoh ngo perulanmu; kelejanmu bak mbingitmu. Kubettoh ngo oda terdessingen perjahat kono, bang pè kalak simengaku apostèl ia, keppè oda; enggo mo iunjuni kènè kalak i, terdapet ngo perluap ngo keppè kalak i. ³ Kubettoh ngo mbingit kènè janah susah kemulihken gerarKu, tapi oda uè kènè mendellè. ⁴ Tapi lot ngo pengkurangi ukurKu bai ndè imo: Oda bagè kelleng atè ndènè bangku i mulana i ngkelleng atè ndènè bagèndari. ⁵ Kerna i, perdatèken mo kettadingen ndènè i! Tobat mo kènè ibas dosa-dosa ndènè nai janah ulaken mo bahanmu bagè siperlebbè i. Mula oda, roh mo Aku mendahi kènè, menunggalingken pelita ndènè idi i bekkasna nai. ⁶ Tapi lot ma ngo tuhu kesurungenmu; ncego atèmu midah perulaan sisiin si Nikolaus siKukecegoken i ma. ⁷ Idengkohken simerpènggel mo sinidokken Tendi i taba kuria-kuria. Simennang i ngo kubaing kipangan buah kayu kenggelluhen si ni pekken Paradaiso ni Dèbata!" ⁸ "Mendahi malaèkat kuria Smirna suratken mo bagèen: Bagèen ngo kata bana nai simerkuasa i mulana nai soh mi podiin èn -- sienggo matè janah mengolihi nola nggelluh. ⁹ Kubettoh ngo kepersuken ndènè dekket kinipogos ndènè, tapi situhunna bèak ngo kènè; Kubettoh ma ngo bak pennukasi ndèba mendahi kènè, imo kalak simendokken Jahudi ia nina, keppè oda tuhu; ai pulungen Sibolis ngo kalak i. ¹⁰ Ulang kènè mbiar midah kepersuken sinaing sempa mendahi kènè ndor èn. Èngèt kènè mo, ikurung Sibolis mo barang piga-piga kalak bai ndènè nai lako mengunjuni kènè, gabè susah mo kènè sipuluh ari dekkahna. Dak burju mo kènè soh matè nai Kuberrèken mo bai ndènè rudang kenggelluhen i! ¹¹ Idengkohken simerpènggel mo kata sinidokken Tendi Dèbata taba kuria-kuria. Oda terkekadè kemmatèen pedua kaliken i karina simennang i." ¹² "Bagèen mo suratken mendahi malaèkat kuria Pergamos: Èn ngo tennah simenjèmak peddang sidua babah janah ntajem. ¹³ Kubettoh ngo i dikè kènè merrian imo i bekkas tahta Sibolis. Sètia ngo kènè bangKu. Ai tikan ibunuh pè tikala i naposongku kettoken imo si Antipas i tengah-tengah ndènè i bekkas Sibolis i, oda ngo iperso kènè Aku sinikepercayaen ndènè i. ¹⁴ Tapi lot ngo siso Kukellemmoken bai ndènè. Lot ngo dèba bai ndènè nai mengèkutken peddah si Bileam. Iajarken ngo taba si Balak bakunè pemmaing asa gabè merdosa kalak Israel; ièla ngo kalak i kipangan pangaan sienggo ipèlèken bai sembahen dekket mengulaken ulaan luhlah. ¹⁵ Bagi ma lot kè dèba mengèkutken peddah si Nikolaus. ¹⁶ Kerna naidi tobat mo kènè i dosa-dosa ndènè nai! Mula oda, ndor mo Aku roh lako juhap taba kalak i merkitè peddang silot i babahKu. ¹⁷ Idengkohken simerpènggel mo sinidokken Tendi i mi kuria-kuria. Simennang i ngo Kuberrèken kipangan manna simboni i dèng janah karina kalak i menjalo sada batu mbulan bangKu nai. Tersurat ngo i batu i sada gerar rimbaru, siso nibettoh barang isè pè, laènken simenjalosa i." ¹⁸ "Bagèen mo suratken taba malaèkat kuria Tiatira: Bagèen ngo tennah Anak Dèbata simermata mernala-nala bagè api janah nèhèNa bagè tembaga siniumabaken i perpandèen. ¹⁹ Kubettoh ngo perulaan ndènè -- kelleng atè ndènè bak kepercayaen ndènè, bang pengkebasi ndènè dekket mbingit ndènè. Buèen ngo ihanaken kènè bagèndari daripada tikala i. ²⁰ Tapi ukum sisada matcam èn, lot ngo pengkurangi ukurku midah kènè. Ibelli kènè ngo daberru Isebel simengaku dirina sinipasulak Dèbata idi. Enggo mèduk naposongKu iakkali janah iajari mengulaken luhlah, bak kipangan pangaan sienggo ipèlèken bai sembahen. ²¹ Enggo Kuberrèken nemmu tikki bana asa mertobat ipas dosa-dosana nai, tapi oda nggèut mentadi ia mengulaken ulaan luhlah idi. ²² Èngèt mo! Kudabuh mo ia mi bagasen persakiten. Bagi ma pè dekket denganna simerlangkah julu meddem i. Kupatakken mo ia mi bagasen kepersuken mahantu -- ukum oda mertobat ia ibas perulanna nai. ²³ Janah Kuradasken mo karina parangenna simengèkutkensa i, asa ibettoh karina kuria Aku ngo mengoji pusuh peratèen jelma karinana, janah Kubalesken tabasa rembang bagè siniulana gennep. ²⁴ Tapi ukum taba kalak siso mengèkutken peddah laling i, imo sitading i Tiatira janah oda mengguruken hèlmu Sibolis bagè kalak i, bagèen mo Kudokken Oda kuampèken boban mberrat taba kènè. ²⁵ Asal mo tong ijèmak kènè sienggo lot bai ndènè i kin sakat soh roh Aku. ²⁶ Taba kalak simennang janah simengulaken lemmo atèngKu soh mi puncana Kuberrèken mo kuasa dos dekket sikujalo bai BapangKu nai. ²⁷ Ijalo kalak i mo kuasa bangKu nai lako memerèntah bangsa-bangsa merdengan tongket bessi, janah mengereppuk bangsa-bangsa i bagè mengereppuk koden tanoh. ²⁸ Ijalo kalak i mo bangKu nai bintang perlambuk. ²⁹ Idengkohken simerpenggel mo nidokken Tendi i taba kuria-kuria."

¹ "Bagèen mo suratken bai malaèkat kuria Sardes: Bagèen ngo tennah sidasa Tendi sipitu bai Dèbata nai, dekket simenjèmak bintang sipitu i. Kubettoh ngo karinana perulanmu. Terdokken nggelluh ngo kènè nemmu, keppèken matè ngo! ² Kernana idi, kèkè mo kènè, petegguh mo dengan ndènè sitading i, imo kalak sinaing-naing matè i. Ai oda lot jupa Aku ulanmu merandal i hadeppen Dèbata. ³ Nteng, èngèt mo balik barang kadè sienggo ipeddahken dekket sienggo idengkoh kènè, ulaken mo i janah tobat mo kènè! Kum oda ndungo kènè, roh mo Aku mendahi kè bagè pekerroh penangko, oda ibettoh kènè ndigan ketikana pekirohKu i. ⁴ Tapi lot ma ngo i tengah-tengah ndènè i Sardes simenjaga olesna asa tong mpanting. Rebbak merdalan mo kalak i dekket Aku seggen meroles mbulan, ai tau ngo kalak i. ⁵ Oles mbulan sibagidi ngo seggen iberrèken bai kalak simennang i. Oda kusasa gerarna ibas lapihen kenggelluhen i nai, tapi Kuindangken ngo gerarna i hadeppen BapangKu bak i hadeppen malaèkat-malaèkatNa. ⁶ Barang isè merpènggel, idengkohken mo sinidokken Tendi i taba kuria-kuria." ⁷ "Nai bagèen mo baing surat mendahi malaèkat kuria Piladelpia: Èn ngo kata simbadia janah bennar simenjèmak anak konci si Daud. Mula enggo Ibuka oda lot sindorok memmuka. ⁸ Kubettoh ngo karina perulaan ndènè, tengen mo, enggo Kubuka pèntu bai ndènè, siso ndorok ikonci barang isè pè. Tukasi pè oda sadikè gegoh ndènè, tapi dak iuèi kènè ngo katangKu, janah dak satia taba Aku. ⁹ Èngèt mo èn; kubaing mo kalak sienggo gabè mengèkutken Sibolis i, smendokken Jahudi ia keppèken oda tuhu, perluap ngo ia, asa roh kalak i mi hadeppenmu lako mersembah taba kènè, janah mengaku ngo Kukekelengi kènè! ¹⁰ Kumarna mbingit ngo kènè menjamotken katangKu, Aku pè Kujamotken mo kènè tupung ari kesusahen sinaing sempa mi suberri dunia èn. Masa ngo i lako mengunjuni karina kalak simerian i babo tanoh èn. ¹¹ Ndor mo aku roh! Cèkèp mo sienggo lot bai ndènè i, ulang gabè ibuat dèba nola rudangmi! ¹² Simennang i ngo Kubakin gabè binangun Bages DèbatangKu Simbadia i, janah i sidi nola merian soh sidekkahna. Kusuratken mo ibas diri kalak i gerar DèbatangKu dekket gerar kuta DèbatangKu -- imo Jerusalem sirembaru, susur i sorga nai bai DèbatangKu nai -- bagi ma dekket gerarKu sirembaru i. ¹³ Barang isè merpènggel janah ndorok merpendengkoh, ibeggèken mo sinidokken Tendi i taba kuria-kuria." ¹⁴ "Bagèen mo suratken mendahi malaèkat kuria Laodikia: Bagèen ngo kata si Amèn, saksi kettoken janah bennar i, permulaan sinitempa Dèbata. ¹⁵ Kubettoh ngo karina perulaan ndènè; mbarngap so mbarngap janah mpeddas so mpeddas ngo kènè. Mbarngap barang mpeddas mo kè nemmu. ¹⁶ Kumarna nggara-nggara sisèlu ngo kènè, oda mbarngap oda ma mpeddas, Kuutahken mo kè i babahKu nai. ¹⁷ Idokken kènè ngo, ’bèak ngo kènè janah kaya, oda kurangen kadè kènè.’ Oda ibettoh kènè kalak mpersuk ngo kè bana mpersah, ncor bak pètung janah sabar. ¹⁸ Kerna naidi, Kupernoi mo kènè, tokor mo bangKu nai emmas sienggo itingtingi asa tuhu bèak kènè, bagi ma dekket oles mbulan mahan abit ndè, asa ulang termèla kènè kumarna sabar i kènè. Bagi ma pè dekket minak sidalisenken mi mata ndènè, asa merpendidah kènè! ¹⁹ Ai kalak siKukekellengi, kalak i ngo Kupesèngèt janah Kupeddahi. Kernana i mertuhu-tuhu mo ukur ndènè ninganna mertobat ibas dosa-dosa ndènè nai. ²⁰ Tengen mo! Cènder ngo Aku i lebbè pèntu i ninganna menuktuki. Barang isè mendengkoh sorangKu janah memmuka pèntu i, mbengket mo Aku mendapetkensa janah rebbak mangan mo Aku dekketsa, janah ia rebbak dekket Aku. ²¹ Kupehantar mo kundulen taba simennang idi i kerajanKu, bagè Aku sienggo mennang janah rebbak kundul i karjaan BapangKu. ²² Barang isè merpènggel sindorok merpendengkoh, idengkohken mo sinidokken Tendi i taba kuria-kuria!"

¹ Nai kuidah nola mo sada alaten. Mbuka mo sada pèntu i sorga, janah kudengkoh rana sienggo mengerana idi kin taba aku bagè sarunè. Nina mo, "Roh mo kono mbengket mi sèn, asa Kubagahken bamu kadè sinaing masa i podinkenna èn." ² Mèter ikuasai Tendi Dèbata mo aku. Nai kuidah mo sada tahta i sorga, janah lot sada kalak kundul i babona. ³ Ukum rupa sikundul i tahta i, bagè intan jaspis janah bagè Sardes ngo tengenen. Merkillong-killong ngo mengkulilingi tahta idi, janah perbintoha bagè zamrud. ⁴ I sikuliling tahta i lot dèng ma ngo duapuluh empat nai tahta ikunduli duapuluh empat pengendeng merpakèen mbulan janah merudangken buradda i babontakalna. ⁵ Gumeruhguh ngo dengkohen tahta i janah butbat pellian mencuhayai. Merjollah-jollah ngo pitu obor i hadeppen tahta i, imo Tendi Dèbata sipitu i. ⁶ Lot dèng ma ngo i hadeppen tahta i teridah bagè laut kaca nciho bagè cermin terrus. Ipas empat persoki tahta i tengah-tengah idi, lot ngo empat pernggelluh, mbuè ngo matana i lebbè dekket i podi. ⁷ Ukum rupa pernggelluh siperlebbè tosè bagè rupa singa ngo, sipeduaken bagè rupa lembu jenggi; sipetelluken merabè tosè bagè abè jelma, janah sipeempatken tosè bagè manuk-manuk sipanggor daha sidang ngkabang ngo. ⁸ Siempat pernggelluh idi merkabeng ngo gennep terennem; dom ngo mata i sikulilingna dekket i bagasenna pè. Oda mengadi-ngadi kalak i mahar ari berngin mengendèken bagèen, "Simbadia, simbadia, simbadia ngo Tuhan Dèbata simenggem-nggemmi saguanna silot, sienggo lot kin janah sienggo lot bagèndari, dekket sinaing roh i." ⁹ Empatna pernggelluh i mengendèken endè lako memmoji janah pesangapken bak mendokken mejalo metangkup taba sikundul i babo tahta i janah singgelluh soh mi amman sumendah. Janah tikan merendè pernggelluh i ¹⁰ nai mèter tangkep mo pengendeng siduapuluh empat i mi hadeppen si kundul i babo tahta i, isembah kalak i mo singgelluh soh mi amman sumendah i, nai ipenggamparken kalak i mo rudangna mi hadeppen tahta i ninganna idokken, ¹¹ "Alè Tuhan Dèbata nami! Pellin kono ngo patut ipoji, ipessangap kumarna merkuasa. Kono ngo menghanaken sagumanna silot janah kemmulihken lemmo atèMu ngo memmaingken asa terhana janah nggelluh."

¹ Nai kuidah mo tangan sikundul i tahta i sada lapihen sienggo isurat ibagasen dekket i ruarna janah sienggo isègèl merkitè pitu sègèl. ² Nai kuidah ma mo sada kalak malaèkat mergegoh, nggang kalohoon ngo sorana mendiloken, "Isè ngo ndia ndorok mengkarkari sègèl i janah mengogè lapihen simerserpih i?" ³ Tapi isè poda sanggup memuka lapihen i dekket menengen mi bagasen ukum kalak si ni sorga, bang si ni tanoh èn pè bak si ni terruh tanoh i pè. ⁴ Nai gabè tangis janah semmep-semmep mo aku, kerna isè poda lot sanggup mengogè lapihen i dekket menniah mi bagasenna. ⁵ Nai nina sada kalak ipas pengendeng idi nai mo taba Aku, "Ulang kono tangis! Tengen mo. Enggo mennang Singa i bas marga Judèa nai, pinempar si Daud simbellen i, lako mengkarkari sègèl sipitu i memmuka lapihen merserpih i." ⁶ Nai kuidah ma mo sada Anak Biri-biri cènder i tengah-tengah tahta i, ikulilingi pernggelluh siempat i bak karina pengendeng pè. Ukum Anak Biri-biri i, enggo bagè cara tersembellih kin. Pitu ngo tandukna janah pitu matana, imo tendi sipitu sienggo iutus mi suberri dunia èn. ⁷ Nai ibuat Anak Biri-biri i mo lapihen merserpih i, i tangan sikundul i babo tahta i nai. ⁸ Ningan bagidi, tangkep mo mersembah siempat pernggelluh bak pengendeng siduapuluh empat idi i hadeppenNa. Karina pengendeng i menggelem kucapi i tanganna gennep dekket caban emmas merisi kemenjen, imo sodip ummat Dèbata. ⁹ Jadi iendèken kalak i mo sada endè rembaru, "Kono ngo kessa sanggup memmuat lapihen i dekket mengkarkari sègèl-sègèlna. Kumarna Enggo kin ibunuh kono, janah merkitè permatèMu, enggo itebbus kono karinana jelma i gennep marga, kata, nègara bak bangsa Dèbata. ¹⁰ Enggo gabè ibaing kono kalak idi gabè usur imam-imam asa gabè mengkebasi Dèbatanta kalak idi, janah menggem-nggemmi dunia èn." ¹¹ Nai kuidah nola mo. Kudengkoh ma mo sora malaèkat merribu-ribu bak merjuta-juta buèna! Cènder ngo kalak i mencingkoi tahta i, bak mencingkoi pernggelluh siempat i bang pengendeng-pengendeng i. ¹² Merendè ngo kalak i nggang kalohoon, "Anak Biri-biri sienggo isembellih i ngo patut menjalo kuasa; kinibèak kebijaken bak kegegohen; patut ngo Ia sipessangap, imuliaken dekket ipepoji-poji!" ¹³ Nai kudengkoh ma mo merendè karina sinitempa i langit i, i tanoh èn, i terruh tanoh dekket ibagasen laut i -- "Ia sikundul i babo tahta i -- dekket Anak Biri-biri i ngo sipojiin dekket sipesangapen janah mermulia bak merkuasa soh mi amman sumendah!" ¹⁴ Jadi ialoi pernggelluh siempat i mo, "Amèn!" Nai tangkep mo pengendeng-pengendeng i mersembah.

¹ Enggo kessa bagidi, kuidah mo ikarkari Anak Biri-biri i sègèl perlebbè i pas sipitu sègèl i nai. Nai kudengkoh mo sada ipas pernggelluh siempat i nai mendokken, "Roh mo kono!" Tosè bagè renggur nggang sorana i. ² Jadi kuperdatèken mo, gabè kuidah mo sada kuda putih. Ijèmak simemmasang kuda i ngo sada cèur, janah iberrèken bana sada rudang. Berkat mo ia bagè sada kalak permennang juhap merkemennangen. ³ Nai ikarkari Anak Biri-biri i nola ma mo sègèl peduaken. Kudengkoh ma mo pernggelluh sipeduaken i mendokken, "Roh mo kono!" ⁴ Jadi karuar mo sada kuda sidèban mbara rupana. Iberrèken mo taba simemmasang kuda i kuasa lako memmuat damè i babo tanoh èn nai, asa mersirasipen samah-samah jelma, janah iberrèken dèng ma ngo sada peddang mbelgah bana. ⁵ Nai ikarkari Anak Biri-biri i nola mo sègèl sipetelluken. Jadi kudengkoh ma mo pernggelluh sipetelluken i mendokken, "Roh mo kono!" Jadi kuperdatèken mo, bagè kuidah mo lot sada kuda mbèrèng. Icèkèp simemmasang kuda i ngo sada dacing i tanganna. ⁶ Nai kudengkoh mo sora bagè cara i tengah-tengah pernggelluh siempat idi nai mendokken, "Sisellup berras upah sidari janah tellu sellup jagong upah sidari. Tapi ulang kekkadè batang zaitun dekket pekken anggur!" ⁷ Nai ikarkari Anak Biri-biri i nola mo sègèl sipeempatken, gabè kuidah mo pernggelluh sipeempatken i mendokken, "Roh mo kono!" ⁸ Kuperdatèken mo, gabè taridah mo sada kuda kellabu rupana. Ukum gerar simemmasang kuda i, kemmatèen ngo, janah mengèkut ngo i podina kebèguun. Iberrèken ngo bana kuasa mi siperempat tanoh èn, asa iradasken merkitè-kitè geraha dekker keraparen bak merkitèken sakit uabba dekket merkitè binatang penjerngem silot i tanoh èn. ⁹ Enggo kessa bagidi, ikarkari Anak Biri-biri i nola mo sègèl pelimaken, nai kuidah mo i terruh langgaten pemèlèen i tendi kalak sienggo matè terbunuh kumarna percaya kalak i mi kata Dèbata dekket kumarnaken iindangken kalak i ngo sukuten i. ¹⁰ Dak itenggo-tenggoken tendi i ngo merkitè sora nggang, "Ialè Tuhan Perkuasa, simbadia janah persènteng! Sadikè dekkah nai ngo asa ihukum kono pengisi dunia èn, kumarnaken pemmaing kalak i sienggo memmunuh kami?" ¹¹ Jadi iberrèken mo taba gennep tendi i tersada jubah mbulan. Nai idokken mo taba kalak i asa ipèma sinempas nari, soh tumpat lebbè denganna sada ulaan dekket kaka anggina sinaing bunuhen dèng bagè kalak idi i. ¹² Nai kuidah nola mo ikarkari Anak Biri-biri i sègèl sipeenemken. Mèter masa mo rènur gaya-guyu. Gabè mbèrèng mo mataniari i bagè kaèn mbèrèng, janah bulan i pè mbara bagè daroh. ¹³ Merrurus mo bintang i, i langit nai mi tanoh bagè buah kayu ara merntalpungen idegger angin ndor. ¹⁴ Langit i pè mersep mo bagè cara bellagen sinibalun janah mèrèt mo karina delleng dekket pulo igèsèr i bekkasna nai kin. ¹⁵ Gabè ciboni mo karina raja ni tanoh èn dekket simersangap, ekuten balapergunggung, kalak sibèak dekket kalak perkuasa pè bang kalak sidèbanna i, barang hamba pè i barang siso hamba karinana ngo kalak i ciboni mi liang-liang bak mi ruang-ruang batu delleng. ¹⁶ Nina kalak i mo taba batu bak delleng i, "Dendenni janah boniken mo kami, asa ulang kuidah kami abè sikundul i babo tahta kerajaen sienggo punguren i, bak Anak Biri-biri i! ¹⁷ Ai enggo dapet tikkina roh pungur sikundul i babo tahta kerajaen i dekket Anak biri-biri i; isè poda mennahan i hadeppenna!"

¹ Enggo kessa bagidi, kuidah nola mo lot cènder empat kalak malaèkat i dèsa siempat ni tanoh i. Itagangi kalak i ngo siempat mata angin ni tanoh èn asa ulang nèngè menempul angin i mi darat bang mi laut barang mi kayu i pè. ² Nai kuidah ma mo sada malaèkat sidèban kèkè kan kebincaren nai, icèkèp ngo sada sègèl sinijalona bai Dèbata singgelluh i nai. Nggang ngo sorana mendiloken taba malaèkat siempat i, sienggo menjalo kuasa bai Dèbata nai lako mencèdaken darat dekket laut. ³ Nina malaèkat sisada i mo, "Ulang lebbè cèdai kènè darat barang laut barang pè kayu, pèma kubaing kami lebbè tanda sègèl i abè naposo Dèbatanta." ⁴ Jadi kudengkoh mo ibagahken buè kalak sienggo iberrè sègèl i seratus empatpuluh empat ribu kalak. Karinana idi ipas sisipuluh dua marga Israel i nai ngo; ⁵ i marga Judèa nai sipuluh dua ribu kalak sienggo iberrè tanda sègèl, i marga Ruben nai sipuluh dua ribu kalak, i marga Gat nai sipuluh dua ribu kalak, ⁶ i marga Asyer nai sipuluh dua ribu kalak, i marga Naptali nai sipuluh dua ribu kalak, i marga Manasye nai sipuluh dua ribu kalak, ⁷ i marga Simeon nai sipuluh dua ribu kalak, i marga Lewi nai sipuluh dua ribu kalak, ⁸ i marga Zebulon nai sipuluh dua ribu kalak, i marga Josep nai sipuluh dua ribu kalak, i marga Benjamin nai sipuluh dua ribu kalak. ⁹ Enggo kessa salpun i, lot mo kuidah nterrem kalohoon jelma, siso terbilangen buèna -- imo i suberri bangsa, marga, kaum dekket perkataan silot idi nai. Dak cènder ngo kalak i mengadep tahta bak mengadep Anak biri-biri i, merpakèen jubah mbulan janah menjèmak lambè i tanganna. ¹⁰ Nggang kalohoon ngo idiloken kalak i, "Bai Dèbata simengkunduli tahta i dekket bai Anak Biri-biri i nai ngo rohna keluahenta!" ¹¹ Tikan bagidi cènder ngo malaèkat-malaèkat mengkulilingi tahta i bak i sikuliling pengendeng dekket pernggelluh siempat i. Tangkep ngo malaèkat-malaèkat idi i lebbè tahta i menembah Dèbata. ¹² Idiungken kalak i ngo, "Amèn! Nipoji mo Dèbatanta simermulia i janah bijak. Ia ngo Dèbata janah patut menjalo kata merlias atè dekket pemoji-mojiin mertinèncuk. Dèbata perkuasa janah mergegoh ngo Ia soh mi amman sumendah! Amèn." ¹³ Nai ikuso sada kalak pengendeng i mo aku, "Isè ngo kalak simerjubah mbulan i janah i dikè nai ngo rohna kalak idi?" ¹⁴ Kualoi mo ia, "Oda kubettoh i alè Tuan. Kono ngo bettoh-bettohen idi." Nai nina mo taba aku, "Kalak i ngo sienggo maluah ibas kepersuken idi nai. Enggo itaptapi kalak i jubahna, janah ipeputih merkitè daroh Anak Biri-biri i. ¹⁵ Kemulihkenna idi ngo asa dak cènder kalak idi i hadeppen tahta Dèbata, ninganna menguèi Dèbata Simbadia i. Janah sikundul i tahta i, dak rebbak mo dekket kalak i lako mengkeruduk kalak idi. ¹⁶ Oda nèngè mellèhè kalak i, oda nè muasen, oda nè isenggang nggara niari, bang singgara bakunè pè, ¹⁷ ai ipermakan Anak Biri-biri sikundul i tengah-tengah tahta i ngo kalak i. Itogiken ngo kalak i mi laè mul kenggelluhen, janah iapusi Dèbata mo èluh i mata kalak i nai."

¹ Jadi ikarkari Anak Biri-biri i kessa mo sègèl sipepituken i, nono mo karina si ni sorga i kira-kira setengah jom dekkahna. ² Nai kuidah mo iberrèken sarunè taba malaèkat sipitu sicènder i hadeppen Dèbata i. ³ Nai roh ma mo sada kalak malaèkat sidèban merembah perdahupaan buradda, cènder mo ia i lebbè langgaten pemmèlèen i. Iberrèken mo tabasa kemènjen mbuè kalohoon, asa ipersada mi sodip karina ummat Dèbata, asa ipèlèken i langgaten pemèlèen silot i hadeppen tahta i. ⁴ Kumèkè mo cèmber dahupa i rebbak dekket sodip ummat Dèbata mercèmpul i tangan malaèkat sicènder i hadeppen Dèbata i nai. ⁵ Nai ibuat malaèkat i mo perdahupaan i, idomi mo dekket rara api i langgaten pemèlèen i nai, janah ibentirken mo mi tanoh èn. Mèter purpar mo renggur bak sora merderrem-derrem, butbat mo pellian janah dumegger mo dunia èn. ⁶ Enggo kessa bagidi, kebbas mo malaèkat sipitu simenjèmak sarunè i lako menempul. ⁷ Nai isempul malaèkat perlebbè i mo sarunèna, gabè merrohen mo baho dekket api mercampur daroh mi dunia èn, nai melettup mo sepertellu dunia èn; bagi ma dekket sepertellu sagumanna kayu, messeng ngo karinana dukut-dukut simeratah i. ⁸ Nai isempul malaèkat sipeduaken i ma mo sarunèna, nai taridah mo sada mbelgah kalohoon tosè bagè delleng merjollah-jollah ndabuh mi laut, nai mèter mobah mo sepertellu laut i gabè daroh, ⁹ radas mo sepertellu sinihanaken janah singgelluh i ibagasen laut i; janah karam mo sepertellu keppel silot i laut i. ¹⁰ Nai isempul malaèkat sipetelluken i ma mo sarunèna, mèter ndabuh mo i langit i nai sada bintang mbellen mergollah-gollah bagè api pinoron, itinggang mo sepertellu batang laè dekket takal laè. ¹¹ Ukum gerar bintang i, Apsintos (mpagit) ngo. Jadi gabè mpagit mo sepertellu suberri laè, mermatèen mo mbuè jelma simengènum laè i. ¹² Nai isempul sipeempatken mo sarunèna gabè terpastap mo sepertellu mataniari i, bak sepertellu bulan i, dekket sepertellu bintang-bintang i, janah mèlep mo sepertellu cuhayana. Gellap bulita mo sepertellu mahar bak berngin i. ¹³ Jadi kuperdatèken mo, kuidah mo sada manuk-manuk sipanggor daha ngkabang ndates kalohoon i abang-abang i. Nggang ngo sorana pingko-pingko, "Merjaya! Merjaya! Merjaya mo karinana jelma simerian i dunia, mula isempul malaèkat-malaèkat sitellu kalak i nai kessa sarunèna i!"

¹ Nai isempul malaèkat sipelimaken i mo sarunèna, gabè kuidah mo ndabuh sada bintang i langit nai mi dunia èn. Iberèken ngo taba bintang i anak konci lembeng kemmatèen. ² Ibuka bintang i mo lembeng kemmatèen i, nai mèter karuar mo cèmber i bagasenna nai, tosè bagè cember pinoron kayu matah, gabè gellap mo mataniari soh mi perlangiten kemulihken cèmber i. ³ Jadi merrohen mo balang i cèmber i nai mi tanoh i, iberrèken mo taba balang i kuasa tosè bagè siniberrèken taba bik. ⁴ Igerra mo balang i, mak ndorok icèdai dukut-dukut, barang pè ka}u dekket suan-suaan sidèbanna i. Pellin jelma siso lot tanda sègèl bai Dèbata nai ipas perdempakenna ngo kessa ndorok iletlet. ⁵ Oda ma ngo ndorok balang i memmunuh jelma, pellin isiksa sambing ngo kessa lima bulan dekkahna. Ukum mpiahna peniksa balang i tosè bagè mpiahna itebbi bik ngo. ⁶ Sidekkah lima bulan i, ipergeddo jelma ngo asa matè nemmuken ia, tapi oda ndorok matè; sèkel kalohoon ngo kalak i matè tapi ndaoh ngo kemmatèen i bai kalak i nai. ⁷ Ukum rupa balang i tosè ngo bagè rupa kuda sienggo kebbas lako geraha. Lot ngo i babontakalna bagè rudang emmas idahen. Abèna bagè abè jelma. ⁸ Bukna bagè buk daberru janah èpenna bagè èpen singa. ⁹ Tentenna mertutup bagè tutup baju bessi. Sora kabengna tosè bagè sora kurèta kuda mbuè kalohoon lojang mi perjuapen. ¹⁰ Lot ngo uitna janah merbisa ngo uitna i bagè bisa bik, janah ipas uitna i ngo kuasana lako meniksa jelma sidekkah lima bulan. ¹¹ Ukum raja kalak i, imo raja kemmatèen i. Ukum gerarna ipas kata Heber imo Abadon; ukum i kata Junani gerarna Apolion (lapatenna pencèdai). ¹² Enggo mo leppas ukum olpek perlebbè, kessa i lot dèng ngo dua nai olpek kennah roh. ¹³ Nai isempul malaèkat sipeennemken mo sarunèna. Jadi kudengkoh mo lot sora ipas soki siempat langgaten emmas bekkas pemmèlèen ni hadeppen Dèbata idi nai. ¹⁴ Bagèen ngo katana taba malaèkat sipeennemken simenjèmak sarunè i, "Paluah mo empatna malaèkat sinitambat idi i Laè Euprat i!" ¹⁵ Nai ipaluah mo empatna malaèkat i, asa kebbas ia tupung kettikana, tupung arina, tupung bulanna dekket tupung tahunna sienggo itentuken kin lako mengeragèken sepertellu ipas ummat kejelmaan idi nai. ¹⁶ Ibagahken ngo buè balapergunggung simerkuda i, imo dua ratus juta. ¹⁷ Ibas alaten nibagahkenna bangku i kuidah ngo, ukum kuda i dekket simenunggang i pè memakè baju bessi janah mbara sol ngo dèba rupana, dèba meratah bagè batu nilam janah dèba nai nggersing bagè belèrang. ¹⁸ Kumarnaken tulbang sitellu i terbunuh ngo sepertellu kejelmaan, imo kumarnaken api, cèmber dekket belèrang siremuar i muncung kuda i nai. ¹⁹ Ai ipas muncung dekket uit kuda idi ngo gegohna. Codi bagè nipè ngo uitna i mertakal, janah merkitè-kitè uitna iderder kuda i jelma. ²⁰ Tapi laju ngo oda tobat jelma sitadingna i, imo jelma siso ibunuh kinipersuk i. Laju ngo oda mentadi kalak i menembah bègu bak gana-ganaan emmas, pirak, tembaga, batu dekket kayu si nigana siso merpendidah i, dekket siso merpendengkoh janah siso ndorok merdalan i. ²¹ Oda tobat kalak i ipas ulah-ulahna dak memmunuh idi nai, mengulaken merlangkah julu meddem dekket mennangko i nai.

¹ Enggo kessa i, kuidah mo sada kalak malaèkat sidèban susur i sorga nai mergegoh kalohoon. Ibalut hembeun ngo ia janah cengko bintoha i babontakalna. Bagè mataniari ngo cuhaya abèna, janah nèhèna bagè tihang api. ² Icèkèp ngo sada lapihen kètèk janah mbuka ipas tanganna. Nèhèna kamuhun mendeddoh laut janah nènèhna kambirang mendeddoh darat. ³ Nai nggang kalohoon mo sorana bagè sora singa mengaung mendiloken; jadi dilo-dilo kessa mo malaèkat i gabè mengaloi mo pitu renggur. ⁴ Mersora kessa mo renggur sipitu i, naing mennurat mo aku, tapi kudengkoh nola mo sora i sorga nai mendokken, "Rusiaken mo sinikataken renggur sipitu i; ulang suratken i!" ⁵ Nai ipekustang malaèkat simendeddohken nèhèna mi laut dekket mi darat i mo tanganna kamuhun mi langit. ⁶ Isumbiahken mo taba Dèbata singgelluh soh mi amman-sumendah situmempa langit, tanoh dekket laut, soh mi karina pengisina, nina mo, "Oda nèngè tersondaten tikkina! ⁷ Ai tupung isempul malaèkat sipepituken idi kessa mo sarunèNa, saut mo karina hendak Dèbata simakdèng ipetarar i, imo bagè sienggo ibagahken kin taba naposona nabi-nabi i." ⁸ Nai nina sienggo mengerana taba aku i sorga idi nola mo taba aku, "Lako mo, jalo mo lapihen simergolong sienggo mbuka i bai malaèkat simendeddohken nèhèna mi laut dekket mi darat i nai." ⁹ Laus mo aku mendahi malaèkat i, kupido mo bana nai asa iberrèken bangku lapihen kètèk i. Jadi nina mo taba aku, "Na, pangan mo. Mpagit ngo i ibagasen beltekmu, tapi tenggi ngo i bagè tenggoli ukum i babahmu." ¹⁰ Kujalo mo lapihen kèdèk idi i tanganna nai janah mèter kupangan. Tenggi ngo kuakap i babahku, tapi enggo kessa kutellen, gabè mpagit ngo kuakap ibagasen beltekku. ¹¹ Enggo kessa bagi, nina mo taba aku, "Kennah ulakenmu dèng ngo menjamitaken sukuten bai Dèbata nai mendahi marga, bangsa dekket kata, bang raja pè."

¹ Nai enggo kessa i, iberrèken mo bangku sada kayu mahan sibar-sibar, tosè bagè tongket, ninganna idokken, "Lako mo, sibar mo Bages Dèbata dekket langgaten pemmèlèen taba Dèbata idi; bilang ma mo dekket kalak simersembah taba Dèbata nisidi. ² Tapi ulang pella sibar kasèan niruar Bages Dèbata i, kerna ukum kan idi, enggo iberèken i taba kalak siso menandai Tuhan; ipededdoh-deddoh kalak i mo kuta simbadia i sidekkah empatpuluh dua bulan. ³ Nai kupasulak mo dua kalak saksingKu merpakèen oles bonek, jadi isukutken kalak i mo kata Dèbata sidekkah seribu dua ratus ennempuluh ari." ⁴ Ukum saksi sidua i, imo batang kayu zaitun, dekket dua ngkabuah nèhè lampu silot i hadeppen Tuhan ni sagumanna silot. ⁵ Mula lot kalak naing makin jahat taba kalak i, mèter remuar ngo api i babah kalak i nai lako mengelettup musuh-musuhna, asa gabè mermatèen mo bagidi. ⁶ Merkuasa ngo kalak i mengkonci langit, asa ulang roh udan, sidekkah ijamitaken kalak i kata Dèbata. Merkuasa ma ngo kalak i pekellihken takal laè, asa gabè daroh nola laèna i, janah merkuasa ma ngo kalak i memmaing simpersuk mi dunia èn, barang ndigan dok atèna. ⁷ Mula enggo pul pengkesaksiken kalak idi, roh mo binatang i napa kematèen idi nai lako mergeraha dempak kalak i, gabè italuken janah ibunuh mo kalak i. ⁸ Gampar mo bangkè kalak idi i dalan mbellen i kuta mbelgah i bekkas Tuhan kalak idi i, ipersilangken. Ukum gerar-gerar codiin kuta idi imo Sodom barang Mesir. ⁹ Idah karina marga, bangsa, kata dekket kerajaen ngo bangkè kalak idi i. ¹⁰ Lolo mo pengisi tanoh i mengidah permatè sidua kalak i. Mersampang atè mo kalak i janah meriaia, kemulihken matcam bagèna kinipersuk dumatang ibaing nabi sidua kalak i taba suberri jelma. ¹¹ Enggo leppas tengah empat ari, roh mo kessah kenggelluhen bai Dèbata nai janah mbengket taba nabi sidua kalak i, gabè kèkè janah cènder mo kalak i; nai buradan mo karina kalak simengidah i. ¹² Nai idengkoh kalak i mo nggang sora i sorga nai mendilo kalak i, "Roh mo kènè mennaik mi sènda!" Jadi mennaik mo kalak idi ibagasen hembun mi sorga inelnelli musuh-musuhna. ¹³ Nai masa mo rènur gejapkenna i mergegoh kalohoon, merumpak mo sepersipuluh kuta i, matè mo pitu ribu kalak kumarnaken rènur i. Jadi mbiar kalohoon mo kalak sidèban siso matè i, nai gabè ipoji kalak i mo kemuliaan Dèbata si ni sorga. ¹⁴ Enggo salpun olpek sipeduaken i. Tapi tengen mo, roh nèngè mo olpek sipetelluken! ¹⁵ Nai isempul malaèkat sipepituken i mo sarunèna; jadi masa mo sora nggang kalohoon i sorga mendiloken, "Enggo sakat kuasa bai Tuhanta lako memerèntah dunia èn dekket bai Raja Sipaluah niperbagah-bagahNa i, mbangkit Raja mo ia soh mi amman sumendah!" ¹⁶ Ukum pengendeng siduapuluh empat simengkunduli tahtana gennep i hadeppen Dèbata idi, tangkep ngo lako mersembah taba Dèbata. ¹⁷ Nina kalak i ngo, alè Tuhan Dèbata Perkuasa, Dèbata bagèndari bak Dèbata i sinderbi nari, melias atè kudokken kami bamu kerna enggo ipacidah kono kuasaMu simeheji i; janah enggo imulai kono memerèntah! ¹⁸ Enggo punguren kalak siso menandai Tuhan, jadi Enggo dapet katikana mellaga kono; janah Enggo ma ngo dapet tikkina ihukum kono kalak sienggo matè i, ninganna berènkenmu sibasa-basa taba naposoMu nabi-nabi i, bagima pè taba karina ummatMu, imo bai karina kalak simerkebiaren taba kono, simbelgah bang anak-anak pè. Èn ma mo kettikana iago kono kalak simengago tanoh i! ¹⁹ Nai mbuka mo Bages Dèbata i sorga; taridah mo Pèti Perpadanen i, ibagasen. Nai masa mo kasiksak pelian janah purpar sora renggur. Dumegger-degger mo tanoh èn, janah roh mo baho gata-gutu.

¹ Nai taridah mo tanda-tanda lègan i langit i. Sada kalak daberru merolesken mataniari, janah cènder ia i babo bulan i. Ipas takalna lot rudangna sipuluh dua bintang. ² Mbadan ngo daberru i. Dak mendeherreng ngo ia, kerna rabisen naing kettaring. ³ Nai taridah dèng ma mo i langit i tanda-tanda lègan sidèban. Lot sada naga mbara mbellen kalohoon, pitu takalna janah sipuluh tandukna. Gennep takal memakè rudang kerajaen. ⁴ Iruah ngo merkitè uitna sepertellu bintang ni langit i janah idabuh mi tanoh. Cènder ngo naga idi i lebbè-lebbè daberru sinaing kettaring i kerna naing ipangan ngo dukak sinaing tubuh i. ⁵ Nai tubuh mo anak daberru i sinaing mengerajai karina bangsa, merkitè tongket bessi. Tapi galip mo anakna i mi hadeppen Dèbata mi bekkas tahtaNa. ⁶ Ukum daberru i, mperrus mo ia mi padang gurun, mi bekkas sienggo ihantari Dèbata bana. Isidi mo ia ipehèdu-hèdu seribu dua ratus ennempuluh ari dekkahna. ⁷ Tapi masa mo geraha i sorga. Juhap mo Mikhael rebbak dekket malaèkat-malaèkatna mergeraha taba naga i; naga i pè iurupi malaèkat-malaèkatna ma mo mengalo Mikhael. ⁸ Tapi talu ngo naga i, jadi oda nèngè ipadiat ia bak balapergunggungna i merian i sorga. ⁹ Iusir mo naga mbellen i, simergerar nipè sinderbi, imo Sibolis barang sètan simengoto-ngotoi suberri dunia èn, mi tanoh i rebbak dekket malaèkat-malaèkatna karina. ¹⁰ Nai kudengkoh mo sora nggang kalohoon i sorga mendokken, "Bagèndari mo kettikana ipaluah Dèbata ummatNa i! Ai enggo ipacidah Dèbata kuasaNa bagè Raja! Raja Sipaluahken niperbagah-bagah i pè bagèndari ma mo pacidahken kuasaNa! Ai enggo iusir i sorga nai simengasungi kaka-angginta mahar dekket berngin i hadeppen Dèbata. ¹¹ Enggo talu ia ibakin kaka angginta merkitè daroh Anak Biri-biri i, dekket merkitè-kitè sukuten bai Dèbata nai sinisukutken kalak idi; oda ikellini kalak i kessahna soh matè. ¹² Kernana idi meroang-oang mo sorga rebbak dekket karina pengisina i! Meroang-oang mo kènè! Tapi merjaya mo tanoh i dekket laut, ai enggo susur Sibolis i mendahi kono ibagasen pungur ai ibettoh ngo, sigejap nai ngo tikkina." ¹³ Saddar kessa mo naga i, enggo keppè ibuang ia mi dunia, iletlet mo daberru sienggo menubuhken anak i. ¹⁴ Tapi enggo kin ngo iberrèken dua kabeng manuk-manuk sipanggor daha simbellen kalohoon i, taba daberru i, asa ngkabang ia mi bekkasna i padang gurun, asa ulang dapet naga i ia. I padang gurun i mo ia ipehèdu-hèdu tengah empat tahun dekkahna. ¹⁵ Ukum naga i, iborsikken mo laè mbuè kalohoon taba daberru i, asa giam ianun laè i ia nemmuken. ¹⁶ Tapi iurupi tanoh i ngo daberru i, ipengangang tanoh i mo babahna, itellen mo laè siniborsikken naga i. ¹⁷ Punguren mo naga i taba daberru i, gabè laus mo ia mengèkutken tading-tadingen daberru i, imo karina kalak simenguèi kata Dèbata janah simerkettoken mi sukuten bai Dèbata nai sinibagahken Jesus. ¹⁸ Nai cènder mo naga i, i biding laut.

¹ Nai kuidah nola mo sada binatang remuar i laut nai. Sipuluh ngo tandukna, pitu takalna. Ipas gennep tanduk i lot ngo rudang janah i gennep takalna i lot tersurat sada gerar pengelèaiin taba Dèbata. ² Tosè bagè biahat ngo rupa binatang i, nèhèna bagè nèhè geppul; muncungna bagè muncung singa. Iberèken naga sikuidah i lebènkenna imo gegohna dekket tahtana bai binatang i. ³ Sada ipas takal binatang sipitu i nai, enggo bagè sikenna luka mbakat kin pana, tapi enggo pana njuah. Ièkut-èkut suberri dunia èn ngo ia ninganna lengang. ⁴ Isembah kalak i mo naga i, kumarna iberrèken kuasana taba binatang i janah isembah kalak i ma ngo bak binatang i, nina mo, "Isè mo tosè bagè binatang i! Janah isè ngo ndorok mengalosa!" ⁵ Ipadiat ngo binatang i mengeruapken kata gegah mengellèai Dèbata, janah iberrèken ngo kuasa bana lako memerèntah empatpuluh dua bulan dekkahna. ⁶ Nai imulai mo mengellèai Dèbata bak gerar Dèbata dekket bekkas Dèbata soh mi karina kalak simerian si ni sorga. ⁷ Ipaduè ma ngo ia mengalo ummat Dèbata janah memmaing mèla taba kalak i. Iberrèken ma ngo bana kuasa lako mengerajai marga, kaum bak perkataan dekket bangsa pè. ⁸ Isembah karina singgelluh pengisi tanoh èn ngo binatang i. Laènken kalak sienggo tersurat gerarna i lapihen kenggelluhen i, imo sienggo gabè milik Anak Biri-biri sienggo tersembellih i. ⁹ Kumarna i, mula merpendengkoh ngo kènè, beggèken kènè mo sukuten èn, ¹⁰ "Barang isè mennaban kennah tertaban ngo, janah barang isè memmunuh merkitè peddang, kennah terbunuh ma ngo merkitè peddang. Jadi ukum ummat Dèbata kennah mbingit ngo janah sètia." ¹¹ Enggo kessa i, kuidah nola mo lot binatang remuar i tanoh i nai. Dua ngo tandukna, bagè tanduk anak biri-biri. Ukum sorana bagè sora naga ngo. ¹² I lebbè binatang perlebbè i ipakè ia ngo kuasa mbellen sinijalona tarap binatang idi nai ma. Karina tanoh en bak kerina simerian i babona, ipaksa lako menembah binatang siperlebbè i, sienggo njuah ugahna mbakat i. ¹³ Ihanaken binatang sipeduaken i ngo tanda kelengangen i hadeppen jelma nterrem i janah susur ngo api i langit nai ibaing mi tanoh i. ¹⁴ Ilalingken ngo kalak simerian i tanoh i merkitè tanda kelengangen nibaingna i hadeppen binatang perlebbè i. Idokken ngo taba kalak i karina asa memmahan mèjan lako pesangapken binatang sienggo luka ibaing peddang i, tapi tong dèng nggelluh. ¹⁵ Iberrèken ma ngo kuasa taba binatang sipeduaken i lako menempulken kessah kenggelluhen taba mèjan i, asa gabè ndorok mengerana janah memmunuh karina kalak siso uè mersembah tabasa. ¹⁶ Karina ngo kalak singkèdèk barang simbelgah sibèak barang sincor, hamba barang anak asal ipaksa binatang i ngo menjalo pertandaan i tanganna kamuhun barang i perdempakenna. ¹⁷ Isè poda ndorok merdèa bak mennokor barang kadè pè, ukum oda lot bana pertandaan i, imo gerar binatang i sendiri barang pè nomor magahken gerar binatang i. ¹⁸ Isèn mo perlu kebijaken lako memmikiri lapaten ipas nomor binatang i nai, ai gerar sada kalak jelma ngo i. Ukum nomor idi, ennem ratus ennempuluh ennem.

¹ Enggo kessa bagidi menengen mo aku, gabè kuidah mo Anak Biri-biri i cènder i Delleng Sion. Lot ngo i sidi rebbak dekketsa seratus empatpuluh empat ribu kalak sienggo lot tersurat gerar Anak Biri-biri i dekket gerar BapaNa i perdempakenna. ² Nai kudengkoh mo sora i langit nai gumeruhguh bagè sora sampuren dekket bagè sora renggur purpar bagi. Lot ma ngo sora i bagè sora oning-oning dengkohen sinderrang igerrit perkucapi kucapina. ³ I hadeppen tahta dekket pernggelluh siempat bak pengendeng simencingkoi tahta i, iendèken seratus empatpuluh empat ribu kalak idi ngo endè rembaru. Oda terguruken barang isè endè i, laènken seratus empatpuluh empat ribu kalak i. Kalak i ngo sienggo itebbus i tanoh i nai. ⁴ Kalak i ngo anak laki tulèn siso pesaorken dirina taba daberru; tulèn ngo kalak i bagè sitertatakken rambu-rambu dèng. Dak ièkutken kalak i ngo Anak Biri-biri i barang dempak dikè pè laus. Kalak i ngo sienggo itebbus mahan pertebbennaan i suberri kejelmaan nai bai Dèbata dekket bai Anak Biri-biri i. ⁵ Oda nung merluap kalak i, janah oda lot sitikasen bai kalak idi. ⁶ Nai kuidah mo sada malaèkat sidèban ngkabang ndates kalohoon. Iembah ngo Sukuten Kelluahen siamman sumendah i sinaing bagahenkenna mi dunia èn taba gennep bangsa, marga, kata dekket kaum. ⁷ Dak pingko-pingko ngo malaèkat i, "Kebbiari kènè mo Dèbata janah poji kènè mo kessangapenNa i! Enggo dapet tikkina mendabuh hukum Dèbata taba jelma. Sembah kènè mo Ia situmempa langit, tanoh dekket karina takal laè!" ⁸ Nai mengèkut nola ma mo malaèkat peduaken pingko-pingko, "Enggo tumpat, enggo tumpat kuta Babel simbellen i! Enggo mabuk karina bangsa ibakin merkitè anggur -- imo anggur cubellek luhlah bak perlangkah julu meddemenken!" ⁹ Nai mengèkut nola ma mo sada kalak malaèkat sipetelluken taba malaèkat sidua kalak i ninganna pingko-pingko, "Barang isè mersembah taba binatang i dekket taba gombarenna, barang tah lot bana pertandaan binatang idi i perdempakenna bang i tanganna pè, ¹⁰ kennah mènum ngo ia ipas anggur pungur Dèbata nai sienggo iarirken mi bekkas pungurNa! Karina kalak i kennah isiksa ipas api dekket balèrang i hadeppen malaèkat-malaèkat Dèbata dekket i hadeppen Anak Biri-biri i. ¹¹ Mercèmpul mo cèmber api peniksaan kalak idi i soh mi amman sumendah. Oda ngo mengadi-ngadi isiksa kalak i suntuk ari suntuk berngin kerna mersembah kalak i bai binatang i bak gombarenna pè dekket karina kalak simenjalo pertandaan gerar binatang i." ¹² Sinderrang bagidi mo perlu mbingit ummat janah simenguèi Dèbata dekket kalak simenguèi Jesus. ¹³ Nai kudengkoh mo sora i sorga nai mendokken, "Suratken mo èn. Sayurntua ngo kalak simatè ibagasen Tuhan i mulai bagèndari nai." "Imo tuhu!" nina Tendi Dèbata mengaloi. "Mentadi mo kalak idi ipas ulanna nai janah ijalo mo buah perulanna i karina." ¹⁴ Nai kutengen mo, kuidah mo lot bagè hembun mbulan. Kundul ngo i babo hembun i sada kalak bagè jelma. Lot ngo rudang emmas i babontakalNa, janah i tanganNa lot sada sabi-sabi ntajem. ¹⁵ Nai karuar nola mo sada malaèkat sidèban i Bages Dèbata nai. Nggang ngo idiloken taba sikundul i babo hembun i, "Sabiken mo sabi-sabiMu janah perani mo bagèndari, ai enggo dapet tikkina peraniin; iperani mo dunia èn, ai enggo ntua!" ¹⁶ Jadi iambasken sikundul i hembun i mo sabi-sabiNa mi dunia èn, iperani mo dunia èn. ¹⁷ Nai kuidah nola mo sada kalak malaèkat sidèban remuar i Bages Dèbata nai i sorga, Ijèmak ma ngo sabi-sabi ntajem. ¹⁸ Enggo kessa i remuar mo sada kalak malaèkat sidèban, i langgaten pemèlèen i nai simerkuasa tersèngèt api. Nggang ngo idiloken taba simenjèmak sabi-sabi ntajem i, "Ambasken mo sabi-sabimu sintajem i, potiki mo buah kayu anggur ni tanoh i, ai enggo ntasak buahna!" ¹⁹ Iambasken malaèkat i mo sabi-sabina mi tanoh i janah ipotiki mo buah anggur i bennana nai, ipepulung mo i mi pengilangen anggur pungur ni Dèbata. ²⁰ Iilang mo anggur idi i ruar kuta, gabè menjarir mo i pengilangen i nai daroh sanga tellu ratus batu daohna janah naing-naing dua mèter bagesna.

¹ Enggo kessa i kuidah mo i langit tanda kelengangen lègan kalohoon. Lot mo pitu malaèkat menjèmak pitu kepersuken perpodi. Èn mo puncaNa pungur Dèbata. ² Nai kuidah mo lot bagè cara cermin laut mersaor api. Kuidah ma mo cènder i biding laut cermin i kalak sienggo mennang meraloken binatang i bak gombarenna dekket meradepken kalak simertandaken gerarna merkitè bilangen nomorna. Icèkèp kalak i ngo kucapi niberrèken Dèbata bai kalak i. ³ Iendèken kalak i ngo endè si Musa, naposo Dèbata i dekket endè Anak Biri-biri i. Bagèen ngo endè kalak idi i, "Ialè Tuhan Perkuasa, mbelgah kalohoon janah kelengangen ngo karina nibakinMu! Raja ni karina bangsa, adil janah bennar kalohoon ngo karina pemaingMu! ⁴ Isè mo siso mengkebiari kono alè Tuhan? Isè mo kalak siso uè menukutken kebelgahenMu? Ai pellin kono ngo kessa simbadia karina bangsa roh menembah Kono kemulihken adil ngo hukumMu sienggo idah karina jelma." ⁵ Enggo kessa i kuidah mo mbuka Bages Dèbata dekket undung-undung bekkas Dèbata i bagasen. ⁶ Nai remuar mo malaèkat simenjèmak kepersuken sipitu i merolesken kaèn mbulan merèlèng-èlèng janah emmas ngo tutup i tentenna. ⁷ Nai sada kalak ipas pernggelluh siempat i nai memerrèken taba malaèkat sipitu i pitu caban emmas dom pungur Dèbata singgelluh i soh mi amman sumendah. ⁸ Nai dom cèmber kehejiin Dèbata mo Bages i oda terbengketten barang isè bages i sidekkah madèng pul kepersuken sipitu i, ibaing malaèkat sipitu kalak i.

¹ Nai kudengkoh mo sora nggang kalohoon i Bages Dèbata idi mendokken taba malaèkat sipitu i, "Berkat mo kènè, orèken kènè mo isi caban sipitu sienggo dom pungur Dèbata i mi tanoh!" ² Nai laus mo malaèkat perlebbè mengorèken isi cabanna mi tanoh i, gabè masa mo baroh meroha janah mpiah kalohoon taba kalak simenjalo pertandaan binatang i dekket taba kalak simenembah gombarenna. ³ Enggo kessa i, iorèken malaèkat sipeduaken i mo isi cabanna mi laut, nai gabè daroh simatè mo laut i; mermatèen mo karina singgelluh i laut i. ⁴ Nai iorèken malaèkat petelluken i mo isi cabanna i mi laè dekket mi takal laè, gabè daroh mo karina laè i. ⁵ Jadi kudengkoh mo sora malaèkat simengkuasai laè i bagèen, "Ntèger ngo karina nibakinmu alè simbadia, Dèbata bagèndari janah Dèbata bang arnia nai! ⁶ Enggo iorèken kalak i daroh Umat Dèbata dekket daroh nabi-nabi; bagèndari ibaing ko ngo kalak i mènum daroh. Situhuna patut ngo i bai kalak i." ⁷ Nai kudengkoh mo sora ipas langgaten pemèlèen idi nai mendokken, "Uè alè Tuhan Dèbata simenggem-nggemmi karinana, bennar janah sènteng ngo karinana hukummu!" ⁸ Enggo kessa i, iorèken malaèkat peempatken mo isi cabanna mi mataniari, gabè ipaduè mo mataniari i mengelettup jelma merkitè kininggarana kalohoon i. ⁹ Gabè messeng mo jelma i kemulihken nggarana, nai isumpahi jelma i mo gerar Dèbata simerkuasa menenges kepersuken i. Tukasi pè bagidi, laju ngo oda uè tobat kalak i janah oda uè pesangapken kebelgahen Dèbata. ¹⁰ Nai iorèken malaèkat pelimaken i mo isi cabanna mi tahta binatang i, mèter gellap mo suberri kerajanna; nai dak pekekkerrep mo dakdak èpen kalak i kumarna mpiahna. ¹¹ Jadi dak isumpahi kalak i mo Dèbata i sorga kemulihken mpiahna iakap dekket kumarna baroh kalak idi i. Tapi laju ngo oda uè tobat kalak idi ipas pengelakona jahat i nai. ¹² Enggo kessa i, iorèken malaèkat peennemken mo isi cabanna mi laè Euprat simbellen i. Marsak mo laè i, gabè ndorok mo raja i kebincaren nai merdalan arap i. ¹³ Nai kuidah mo tellu tendi jahat bagè tekkuk rupana, remuar i babah naga i nai, i muncung binatang i nai i babah nabi palsu i nai. ¹⁴ Tendi sètan ngo kalak i simemmaing tanda kelengangen. Idahi tendi sitellu i ngo karina raja ni suberri dunia èn, lako pepulungken kalak i mergeraha i Ari mbellen i, imo Ari Dèbata simenggem-nggemmi karinana. ¹⁵ "Dengkohken mo! Roh mo aku bagè penangko! Sayurntua ngo kalak sindungo janah menjamotken olesna, kerna oda uè ia merdalan mak meroles, asa ulang gabè mèla ia i hadeppen sinterrem!" ¹⁶ Nai ipepulung tendi-tendi i mo raja-raja i mi sada bekkas mergerar Harmagedon ukum i kata Heber. ¹⁷ Enggo kessa bagidi, iorèken malaèkat pepituken mo isi cabanna mi abang-abang. Jadi terdengkoh mo sora nggang kalohoon i tahta si ni Bages Dèbata i nai mendokken, "Enggo pul!" ¹⁸ Nai masa mo siksak pelian, janah dumegger-degger mo dunia èn. Oda nung dèng masa rènur bagi, kessa nai ihanaken Dèbata jelma. Idi mo rènur simahantuna! ¹⁹ Gabè bellah tellu mo kuta mbellen i janah megargar mo karina kuta bak nagerri i suberri dunia èn. Jadi ièngèt Dèbata mo kuta Babel simbellen i. Iberrèken Dèbata mo ia mènum anggur i caban anggur Dèbata nai -- imo anggur pungur dekket laga. ²⁰ Gabè mperrus mo karina pulo janah mersep mo karina delleng. ²¹ Merdabuhen mo baho mbellen-mbellen berrat-berrat limapuluh kilo i langit nai mendempangi jelma, nai gabè isumpahi jelma i mo Dèbata kumarna simpersuk merkitè baho i.

¹ Enggo kessa i, roh mo mendahi aku sada kalak malaèkat sipitu i, nina mo, "Roh mo kono, asa kutuduhken bamu bakunè cara hukumen taba perlangkah julu meddem i, imo kuta mbellen sinipajek i gembar laè. ² Ai merlangkah julu meddem ngo raja-raja dunia èn rebbak dekketsa, janah gabè mabuk ngo pengisi tanoh èn kerna mènum anggur perlangkah julu meddemenkenna i." ³ Nai iembah malaèkat i mo aku i bagasen tendi mi padang pasir. Jadi kuidah mo i sidi sada kalak daberru kundul i babo sada binatang mbara sol janah dom gerar-gerar pengelèaan mi Dèbata ngo binatang i. Pitu ngo takalna janah sipuluh ngo tandukna. ⁴ Ukum daberru i kelabu ngo rupa bajuna dekket mbara sol janah itiktik dekket emmas bak intan dekket mutiara. Ijèmak ngo i tanganna caban emmas dom simellamun dekket sikotor ipas luhlahna idi nai. ⁵ Tersurat ngo ipas perdempakenna sada gerar rusia, imo, "Babel Simbelgah i, inang ni karina perlangkah julu meddem dekket karina pengelako luhlah i dunia." ⁶ Nai kuidah mo mabuk daberru i kemulihken daroh ummat Dèbata dekket daroh sinibunuh kumarna menguèi Jesus. Jadi lengang kaloon mo aku mengidah daberru i. ⁷ Nai nina malaèkat i mo taba aku, "Kasa lengang kono? Kubagahken mo bamu rusia daberru i dekket rusia binatang nipasangna i, imo binatang simertakal pitu bak mertanduk sipuluh i. ⁸ Nggelluh ngo arnia binatang i, tapi enggo matè ukum bagèndari. Sigejap nai remuar mo ia i napa kemmatèen i nai janah laus mi kemogoon. Lengang mo ukur jelma pengisi dunia èn siso tersurat gerarna (sinderrang makdèng kin ihanaken dunia èn) ipas bukku kenggelluhen i, mengidah binatang i. Ai nggelluh kin ngo arnia binatang i, tapi ukum bagèndari mak nèngè lot, tapi naing taridah nola mo ia mengolihi. ⁹ Isèn perlu ngo pengantusiin. Ukum takal sipitu i, imo pitu delleng bekkas daberru i kundul. Janah pitu raja ngo i, ¹⁰ lima raja bai kalak i nai enggo mo tumpat, sada tong dèng memerèntah, janah sada nai madèng roh. Tapi roh kessa ia luas, mengerajai mo ia sigejap. ¹¹ Ukum binatang sipernah nggelluh i arnia, tapi oda nè lot ukum bagèndari, imo raja peualuhken, sada raja ipas sipitu i nai, bagèndari enggo berkat mi kemmagoon. ¹² Ukum sipuluh tanduk niidahmu idi, imo sipuluh raja, tapi madèng memerèntah. Tapi iberrèken mo kuasa bai kalak i lako memmerèntah rebbak dekket binatang i sada jom dekkahna. ¹³ Dos ngo hendak raja si sipuluh i; ipesakat kalak i ngo gegohna dekket kuasana taba binatang i. ¹⁴ Mergaraha mo kalak i dempak Anak Biri-biri i bak denganna sienggo idilo dekket nipilihna i. Tapi italuken Anak Biri-biri i bak denganNa i ngo kalak idi, ai Tuhan ni karina tuan janah Raja ni karina raja ngo Anak Biri-biri i." ¹⁵ Nai nina malaèkat i dèng ma, "Ukum laè siniidahmu idi, imo bekkas kundul perlangkah julu meddem, imo bangsa-bangsa, pulungen mbellen, marga dekket kata. ¹⁶ Ukum sipuluh tanduk dekket binatang siniidahmu i, ceggo ngo atèna midah perlangkah julu meddem i. Irampasi kalak i mo karina milik perlangkah julu meddem i, janah gabè sabar mo perlangkah julu meddem idi ibakin kalak i. Ipangan kalak i mo jukutna janah itutungi mi api. ¹⁷ Ai enggo idungkul Dèbata ukur kalak i lako pessautken lemmo atè Dèbata. Ipersada Dèbata ngo ukur kalak i lako merrèken kuasana taba binatang i, asa mengerajai binatang i soh mi saut karina sinidokken Dèbata. ¹⁸ Ukum daberru si niidahmu idi, imo kuta mbellen simemerèntah karina raja si ni tanoh èn."

¹ Enggo kessa i, kuidah mo sada kalak malaèkat sidèban susur i sorga nai. Mbelgah ngo kuasana. Kumarna cuhayana, ncihur ngo suberri dunia èn ibaing. ² Nggang kalohoon ngo idiungken, "Enggo tumpat Babel simbellen i! Enggo tumpat daberru i! Bekkas sètan dekket tendi jahat ngo ia, janah ranjang-ranjang manuk-manuk si nikecegoken jelma. ³ Karina bangsa enggo mengènum anggur pengellakona luhlah i, janah raja-raja dunia èn enggo merlangkah julu meddem dekketsa. Enggo bèak karina pertiga-tiga i suberri dunia èn kemulihken nipergeddo dagingna siso terantaken i." ⁴ Nai kudengkoh mo sora sidèban i sorga mendokken, "Karuar mo kènè alè ummatKu! Karuar mo kènè ibagasenNa nai! Ulang mo ièkutken kènè dosa-dosana i, asa ulang dekket kènè menggongken hukum simengenna bana! ⁵ Ai enggo mertinèncuk dosana soh mi langit, janah enggo ièngèt Dèbata karina kejahatenna i. ⁶ Balesken kènè mo bana tosè bagè pemmaingna i bai ndènè; balesken kènè mo dua kali lempit bana, bales ni karinana pemmaingna i. Baing kènè mo perrènumenna dua kali lempit lebbih mperngis dari pada ènumen si nipènumkenna bai ndènè. ⁷ Baing kènè mo bana kinidersa dekket kinipersuk dos buèna bagè kesangapen dekket kiniduma si ni abinkenna mi dirina, ai dak nina ngo mi dirina, ’Aku ngo raja, oda mbalu Aku, oda kurasai bonek!’ ⁸ Kumarna naidi ngo asa ipas sidari roh olpek bana -- persakiten, bonek bak lèhè. Itutung mo ia ibas api, ai sondel ngo kuasa Tuhan Dèbata simenghukumsa." ⁹ Karina raja si ni tanoh èn sienggo dengan daberru i mengulaken luhlah dak menangisi kuta i, mula idah kalak i kessa mo mercèmpul cèmber i api simengelettupsa i nai. ¹⁰ Ndaoh-ndaoh mo kalak i cènder, ai mbiar ngo ia kenna kepersukenna i, janah nina mo, "Inang ngalè nang, sondel kinipersuk ngo mengenna taba -- kuta Babel sitermurmur janah kuta ntegguh i! Ibagasen sada jom sambing ngo roh hukum lako petumpatken kono!" ¹¹ Pertiga-tiga ni dunia èn pè tangis mo janah bonek kumarna oda nèngè lot menokor tiga-tiga kalak i. ¹² Oda lot nèngè menokor emmas, pirak, intan dekket mutiara kalak idi i; bagi ma dekket kaèn linen, kaèn mbara, sutera bak kaèn mbalo, bagi ma dekket kayu maharga, gading bak barang-barang kayu maharga, tembaga, bessi dekket marmar; ¹³ kulit manis, rempah ratus, pemurpuri, minak mur bak kemenjen; kuda bak kurèta, katoban bang jelma pè. ¹⁴ Nina pertiga-tiga i mo taba daberru i, "Karina sinaing imiliki kono, oda ngo lot nèngè, janah karina si nikecemmalkenmu dekket kinimendèmu enggo mo mersep. Oda nèngè jumpa kono i!" ¹⁵ Pertiga-tiga sienggo gabè kaya jong i kuta i nai gabè ndaoh-ndaoh mo ia cènder, ai mbiar ngo kalak i dais mi kinipersuk kuta i. Dak tangis ngo kalak i janah merhendem, ¹⁶ nina ngo, "Nong ngalè nang, cilakana i kuta sitermurmur i! Ncemmal kin ngo ko merpakèen linen janah meroles mbara mbèrèng, dakdak kin ngo kono memakè emmas, intan bak mutiara pè! ¹⁷ Keppèken ibagasen sada jom sambing ngo enggo mo mago karina kinibèakna i!" Ndaoh-ndaoh nai ngo cènder juru mudi dekket pesisir, bak perkeppel dekket karina simencari i laut, ¹⁸ janah dak mendilo-ndiloken tikan idah kalak i mercèmpul cèmber api simengelettup kuta i, nina mo, "Oda lot i dikè kuta bagè kuta mbellen èn!" ¹⁹ Nai icircirken kalak i mo cirabun mi babontakal mahan tanda bonek, ninganna derru-derru, "Nong ngalè nang cilakana i kuta mbellen èn! Kinibèakna i ma ngo makinken kalak perkeppel i laut gabè kaya, keppèken ibagasen sada jom sambing, enggo mersep bana nai karinana!" ²⁰ Mersampang atè mo kono alè sorga, dekket kènè alè ummat Dèbata, bagi ma rasul-rasul dekket nabi-nabi pè, ai enggo ibalesken Dèbata hukum bana mahan bales sinibakinna i bai ndènè! ²¹ Enggo kessa i, ipekèkè sada malaèkat mergegoh mo sada batu -- mbellen nasa lessung mbellen -- ibentirken mo i mi laut, ninganna idokken, "Bagèen ngo carana kuta Babel sitermurmur idi ibentirken gabè oda jupa nèngè. ²² Oda nèngè terdengkoh i tengah-tengahmi sora kucapi dekket sora perendè bang sora sordam bak sarunè pè! Oda nè dapet i tengah-tengahmi kalak pandè meneppa, barang sora mennutu pè mak terdengkoh nèngè i sidi. ²³ Oda lot idah dèba nèngè bendella togok i tengah-tengahmi; oda nèngè terdengkoh oang-oang tikan merbayo i sidi, ai enggo sap i suberri dunia èn pertiga-tigamu janah kemulihken kedatunmu ikilang kono ngo karina bangsa ni tanoh èn!" ²⁴ Ihukum pè Babel i, kumarna terdapet ngo i kuta i daroh nabi-nabi, daroh ummat Dèbata -- dekket daroh karina siterbunuh i dunia èn.

¹ Enggo kessa i kudengkoh mo sora merdengung bagè sora jelma nterrem i sorga nai dak mendilo-ndiloken, "Halèluya! Bai Dèbatanta ngo kelluahen, kemuliaan dekket kuasa! ² bennar janah sènteng ngo hukumNa! Enggo idabuh hukum taba perlangkah julu meddem mbellen i, sienggo mencèdai dunia èn merkitè perulanna luhlah i. Enggo ihukum Dèbata Ia, bales kumarna ibunuh kalak i naposo Dèbata." ³ Nai nina jelma nterrem i dèng ma, "Halèluya! Mercèmpul ngo mi dates cèmber simengelettup kuta i soh mi amman sumendah!" ⁴ Nai tangkep mo pengulu siduapuluh empat i dekket pernggelluh siempat simencingkoi tahta i lako mersembah taba Dèbata sikundul i tahta i. Nina kalak i mo, "Amèn, Halèluya!" ⁵ Nai terdengkoh mo sora i tahta i nai mendokken, "Poji kènè mo Dèbatanta alè kènè karina naposoNa dekket kènè karina simerkebiaren midah Dèbata, singkèdèk bang simbelgah pè!" ⁶ Enggo kessa i kudengkoh mo sora bagè sora jelma nterrem kalohoon bagè sora laè mbellen merdeggar janah purpar bagi, bagè sora renggur, nina mo: Halèluya! Tuhan Dèbatanta simenggem-nggemmi karinana i ngo bagèndari memmerèntah. ⁷ Lolo mo kita janah mersampang atè; sipoji mo kesangapenna i; kerna enggo dapet ari perbayonken Anak Biri-biri i, janah enggo merkebbas berru tokoren i. ⁸ Enggo iberrèken bana oles ndalit merkillong i mahan pakèen [Pakèen ndalit merkillong idi imo pengelako mendè ummat Dèbata.] ⁹ Nai nina malaèkat i mo taba aku, "Suratken mo èn; sayurntua ngo barang isè idilo mi pèsta perjejapen Anak Biri-biri i." Janah nina malaèkat i dèng ma, "Èn ngo kata bennar bai Dèbata nai." ¹⁰ Jadi tangkep mo aku i hadeppen malaèkat i naing mersembah, tapi mèter nina mo taba aku, "Ulang aku sembah kono, tapi Dèbata mo sembah! Aku pè denganmu naposo ngo janah tosè bagè kaka-anggimu sienggo menjalo sukuten bai Jesus nai!" Ai tendi ngo mendasdas nabi-nabi i mengkesaksiken tersèngèt Jesus. ¹¹ Nai kuidah mo mbuka sorga janah remuar mo sada kuda putih. Ukum simemmasang kuda i mergerar Kettoken janah Persènteng ngo. Adil ngo ia mendabuh hukum bang ibas geraha pè. ¹² Bagè nala api ngo mataNa janah merudang ngo takalNa. Iokirken ngo sada gerar ipas dagingna janah isè poda bettoh-bettohen i laènken Ia. ¹³ Merguyu daroh ngo jubahna. Gerarna idokken, "Kata Dèbata." ¹⁴ Ièkut-èkut balapergunggung sorga ngo Ia janah karina kalak i mengkunduli kuda putih bak meroles kaèn linen putih mersillak. ¹⁵ Karauar ngo i babahNa nai sada peddang ntajem kalohoon, janah merkitè peddang i ngo italuken karinana bangsa, janah iperèntah ngo kalak i merkitè tongket bessi. Ia ngo mengilang anggur ipas pengilangen anggur pungur Dèbata simenggem-nggemmi karinana. ¹⁶ Tersurat ngo gerarNa idi ipas jubahNa dekket ipas pahaNa, "Raja ni karina raja janah Tuhan ni karina tuan." ¹⁷ Nai kuidah mo sada kalak malaèkat cènder i babo mataniari. Nggang ngo idiloken taba karina manuk-manuk simerkabangen i, "Roh mo kènè pulung mi kerja mbellen nisukutken Dèbata! ¹⁸ Roh mo kènè kipangan jukut daging raja-raja, jukut daging pakalima-pakalima dekket jukut daging ummat manusia simbelgah bang singkèdèk pè, hamba barang siso hamba pè." ¹⁹ Nai kuidah mo binatang i dekket raja-raja dunia èn bak balapergunggungna mertumpu lako geraha mengalo simemmasang kuda putih i bak balapergunggungNa. ²⁰ Nai tertangkup mo binatang i rebbak dekket nabi palsu sienggo menghanaken tanda kelengangen i hadeppen binatang i. (Merkitè tanda kelengangen i ngo ikilang binatang i jelma sienggo lot pertanda binatang i bana, dekket kalak simenembah gombarenna.) Nai ibuang mo gelluh-gelluhen binatang i dekket nabi palsu i mi laut api barèrang mergollah-gollah. ²¹ Balapergunggungna i pè iripasken ngo merkitè peddang sikaruar i babah simemmasang kuda putih i nai. Jadi merrohen mo manuk-manuk kipangan jukut kalak siterbunuh i sanga bessuren.

¹ Enggo kessa i kuidah mo sada kalak malaèkat susur i sorga nai. Ijèmak ngo i tanganna anak konci napa kemmatèen dekket sada rantè mbellen. ² Nai itangkup mo naga i, nipè sinderbi -- imo Sibolis barang Sètan i -- irantè mo ia seribu tahun dekkahna. ³ Idabuh malaèkat i mo naga i mi lembeng kemmatèen. Ikonci mo luhung i janah isègèl, asa ulang ndorok nèngè naga i mengkilang jelma ukum makdèng salpun seribu tahun dekkahna. Enggo kessa pè leppas seribu tahun i asa ipaluah nola ia sinempas. ⁴ Nai kuidah mo tahta dekket jelma sikundul i babo tahta i; iberrèken mo bai kalak simengkunduli tahta-tahta i kuasa lako menghukum. Kuidah ma mo dekket tendi jelma sienggo ipancong takalna kemulihken mengindangken Jesus dekket kata Dèbata, imo kalak siso mersembah taba binatang i, barang pè menjalo pertanda binatang idi i perdempakenna bang pè i tanganna. Mengolihi nggelluh ngo kalak i janah mengerajai rebbak dekket Kristus seribu tahun dekkahna. ⁵ Èn mo perlebbè ipegelluh i simatè nai. (Tapi ukum simatè sidèbankenna i oda dèng ngo ipegelluh sidekkah seribu tahun i.) ⁶ Sayurntua janah terpasu-pasu ngo kalak sidekket ipegelluh perlebbè i simatè i nai. Ai oda terkekadè kematèen pedua kaliken i nèngè kalak i. Gabè imam Dèbata dekket imam Kristus ngo kalak i tupèh; janah mengerajai dekket Kristus seribu tahun dekkahna. ⁷ Enggo kessa dung tikki seribu tahun i, ipaluah nola mo Sibolis i, i kurungen i nai, ⁸ jadi laus mo ia mengkilang karina bangsa silot mèrap i suberri dunia èn, imo Gok dekket Magok. Ipepulung Sibolis i mo kalak i lahlah kalohoon oda terbilangen buèna lako berkat mergeraha. ⁹ Nai kadap mo kalak i mi suberri tanoh èn, ikubu kalak i mo kuta gotting i mo kuta ummat Dèbata dekket kuta si nikekellengen Dèbata i. Tapi roh mo api i langit nai lako mengeradasken kalak i. ¹⁰ Jadi idabuh mo Sibolis simengelalingken kalak idi i mi laut api mercampur barèrang. Imo bekkas binatang dekket nabi palsu idi i buang arnia. Isiksa mo kalak idi i sidi mahar dekket berngin oda mengadi-ngadi soh mi amman sumendah. ¹¹ Nai kuidah mo sada tahta mbelgah, mbulan rupana. Kuidah ma mo dekket ia kundul i baboNa. Mersep mo langit dekket tanoh i hadeppenna, gabè oda teridah nèngè. ¹² Nai kuidah mo kalak sienggo matè i simbelgah bang singkèdèk rebbak cènder i lebbè tahta i; jadi ibuka mo lapihen-lapihen. Nai ibuka mo lapihen sidèban, imo lapihen kalak singgelluh. Ihukum mo kalak sienggo matè i, rembang mi pengellakona bagè sitersurat ibas lapihen i. ¹³ Nai iberrèken laut i mo jelma silot matè ibagasenna. Iberrèken kemmatèen dekket napa kemmatèen i mo jelma sienggo matè silot bana, gabè ihukumi mo kalak i rembang mi perulanna gennep. ¹⁴ Nai idabuh mo kemmatèen dekket napa kemmatèen i mi laut api. (Kemmatèen pedua kaliken i ngo laut api i.) ¹⁵ Karina jelma siso tersurat gerarna ibas lapihen jelma nggelluh, ibuang ngo i karina mi laut api i.

¹ Nai kuidah mo langit sirembaru dekket tanoh rembaru, ai enggo salpun langit dekket tanoh siperlebbè i; laut i pè oda ngo lot nèngè. ² Jadi kuidah mo kuta simbadia i, imo Jerusalem sirembaru susur i sorga bai Dèbata nai. Enggo kin ngo ikebbasi kuta idi bagè berru tokoren sienggo iuras lako mendapetken sinibalèna. ³ Nai kudengkoh mo sora i tahta i nai nggang mendiloken, "Ukum bagèndari rebbak mo Dèbata dekket jelma! Rebbak nggelluh mo Dèbata dekket kalak idi, janah gabè ummat Dèbata mo kalak i. Mersaor mo Dèbata sendiri dekket kalak i janah gabè Dèbata kalak i mo Dèbata. ⁴ Iapusi Dèbata mo èluh kalak idi i matana nai. Oda lot nèngè kemmatèen i sidi, ai enggo salpun karinana siperlebbè i." ⁵ Nai nina sikundul i tahta i mo, "Tengen mo karinana ngo Kuperembaru bagèndari!" Janah idokken mo taba aku, "Suratken mo èn, ai tuhu ngo rana èn janah kettoken!" ⁶ Nina dèng ma taba aku, "Enggo saut! Aku ngo Tuhan benanna soh mi puncana, Aku ngo Perlebbè dekket Perpodi. Barang isè muasen Kuberrèken mo ia mènum i laè mul kenggelluhen i nai oda pella mennokor. ⁷ Ijalo simennang i ngo karinana bangKu nai. Aku ngo gabè Dèbatana janah ia gabè dukakKu. ⁸ Tapi ukum kalak simendellè, kalak siso tettap percaya, kalak simerbalik, pemmunuh, perlangkah julu meddem, kalak simemmakkè kinangguruun, kalak simenembah gana-ganaan, dekket karina perluap, ijalo mo bagianna, imo laut api dekket barèrang sidak mergollah-gollah, imo kemmatèen pedua kaliken i." ⁹ Nai roh mo mendahi aku sada kalak ipas malaèkat sipitu simenjèmak pitu caban sienggo dom kepersuken perpodi i, nina mo taba aku, "Roh mo kono, asa Kutuduhken bamu sinibages Anak Biri-biri i." ¹⁰ Nai ikuasai Tendi Perbadia mo aku janah iembah malaèkat i mo aku mi babo delleng ndates kalohoon. Ituduhken mo taba aku Jerusalem kuta simbadia i, susur i sorga nai bai Dèbata nai, ¹¹ merdenganken oang-oang bak kesangapen Dèbata. Merkillok-killok ngo kuta i bagè batu intan simahargana, bagè batu jaspis janah nciho bagè kaca. ¹² Ndates janah mbelgah ngo pagar kuta i, sipuluh dua ngo pèntuna, janah sipuluh dua ma ngo malaèkat menjaga babah pèntu i. Isuratken ngo i tekkang pèntu i marga Israel sisipuluh dua i. ¹³ Tellu pèntu mendempak mi kebincaren, tellu mendempak mi selatan, tellu mendempak mi utara janah tellu nai mendempak mi kesunduten. ¹⁴ Sipuluh dua ngo batu cendi kuta i. Ipas batu cendi i tersurat gerar sisipuluh dua rasul ni Anak Biri-biri i. ¹⁵ Icèkèp malaèkat sikirana dekket aku i ngo sada tongket emmas mahan sibar-sibar kuta i bak pèntuna dekket parikna. ¹⁶ Empat soki ngo kuta i -- dos ngo henjurna dekket bekkangna. Isibar malaèkat mo kuta i merkitè tongket i, gabè dapet mo henjurna dua ribu empat ratus sipuluh lima batu, datesna bak bekkangna dos ngo mi henjurna i. ¹⁷ Isibar malaèkat i mo dates pagarna, dapet mo ennempuluh mèter. Dos ngo sibar-sibar nipakkè malaèkat i dekket nipakkè jelma. ¹⁸ Batu jaspis ngo pagar kuta i; ukum kuta i ipas emmas matah nai ngo karina tosè bagè kaca. ¹⁹ Itiktik ngo batu cendi kuta i dekket matcam bagè batu maharga. Ukum batu cendi perlebbè, batu jaspis ngo idakdak, sipeduaken batu nilam, sipetelluken batu mirah, sipeempatken batu zamrud, ²⁰ sipelimaken batu unam, sipeennemken batu sardis, sipepituken batu ratna cempaka, sipeualuhken batu pirus, sipesibahken batu topas, sipesipuluhken batu krisopras, sipesebelasken batu lazuardi, janah sipeduabelasken batu kecubung. ²¹ Ukum pèntuna sisipuluh dua i, i batu mutiara nai ngo ibahan; gennep pèntu ibaing i sada batu mutiara nai. Ukum dalan mbellen i kuta idi, ipas buradda nai ngo ibaing ncerling bagi. ²² Oda kuidah Bages Dèbata ibagasen kuta i, ai Dèbata Tuhan simenggem-nggemmi karinana i dekket Biri-biri i sendiri ngo Bages Dèbata i sidi. ²³ Oda perlu cuhaya mataniari bak cuhaya bulan menendangi kuta i, ai cuhaya Dèbata ngo menendangi kuta i janah Anak Biri-biri i ngo lampuna. ²⁴ Merdalan ngo bangsa-bangsa ni dunia èn ibagasen cuhayana janah karina raja merembah kinibèakna mi kuta i. ²⁵ Mbuka ngo pèntu kuta i suntuk ari, ai oda lot nèngè berngin i sidi. ²⁶ Kesangapen dekket kekayaan bangsa-bangsa pè iembah ngo mi kuta i. ²⁷ Tapi ukum kalak simengulaken ulaan kotor, kalak perluap -- oda ipaduè mbengket mi kuta i, ai pellin kalak sienggo tersurat gerarna ipas lapihen Anak Biri-biri i ngo kessa ndorok mbengket mi sidi, imo ipas lapihen kenggelluhen i.

¹ Nai ituduhken malaèkat i dèng ma mo taba aku laè kenggelluhen i, nciho kalohoon janah ncerling menjarir i tahta Dèbata nai dekket i tahta Anak Biri-biri i nai, ² soh mi tengah ndalan mbellen ni kuta i. I biding laè i kacimbang lambung, lot ngo kayu kenggelluhen dak merbuah dua belas kali sitahun, imo gennep bulan. Ukum bulungna mahan daun pejuahken karina bangsa. ³ Oda lot i kuta i sikenna sumpah Dèbata. I kuta i ngo tahta Dèbata bak Anak Biri-biri i. I sidi ma ngo naposo Dèbata menguèi Dèbata, ⁴ janah idah kalak i mo abè Dèbata. Tersurat ngo gerar Dèbata i perdempaken kalak i. ⁵ Oda perlu bai kalak i lampu barang cuhaya mataniari pè, ai oda lot nèngè berngin i sidi, ai Tuhan Dèbata sendiri ngo menendangi kalak i. Nai rebbak memerèntah mo kalak i soh mi amman sumendah. ⁶ Nai nina malaèkat i mo taba aku, "Tuhu ngo kata èn janah kettoken. Tuhan Dèbata simemerèken Tendina taba nabi-nabi, Ia ma ngo mengutus malaèkatNa lako magahken mendahi naposona sinaing masa ndor èn." ⁷ "Peratè-atèken mo ènda!" nina Jesus. "Ndor mo Aku roh. Sayurntua ngo kalak simemperatè-atèken alamat sitersurat ibas bukku èn!" ⁸ Aku si Johanes ngo sienggo mendengkoh dekket mengidah karinana ènda. Enggo kessa dung kuidah janah kudengkoh, gabè tangkep mo aku mi hadeppen malaèkat simenuduhken karinana i taba aku, janah naing mersembah tabasa, ⁹ tapi nina mo taba aku, "Ulang ko mersembah taba aku! Dèbata mo sembah! Denganmu naposo ngo aku janah bagè kaka anggimu nabi-nabi i dekket bagè karina kalak simengeradum-radumi sipesèngèt ibas bukku èn!" ¹⁰ Nina dèng ma, "Ulang mo rusiaken sipesèngèt silot ibas alamat nibagasen bukku èn, ai enggo ndessing ketikana permasana i karinana. ¹¹ Barang isè jahat, iempet mo maing jahat, barang isè melamun, makin ilamuni mo dirina, barang isè menguèi Dèbata janah barang isè nggelluh ibagasen Dèbata, terrus mo ia nggelluh ibagasen Dèbata." ¹² "Radumi mo èn!" nina Jesus. "Oda ndekkah nèngè, roh mo Aku merembahken upah taba karinana jelma rembang mi sinibakinna. ¹³ Aku Alpa dekket Omèga, Bennana dekket puncana, Perlebbè janah Perpodi." ¹⁴ Sayurntua ngo barang isè simenaptapi olesna soh mpanting ai kalak i ngo kipangan buah kayu kenggelluhen i, janah mbengket mi bagasen kuta i arap pèntuna. ¹⁵ Tapi kalak simengulaken kinilèa dekket simerkinangguruun, dekket kalak luhlah, kalak pemunuh, kalak simenembah gana-gana dekket kalak perluap merkitè kata bak pemmahan, karinana sibagidi i ruar ngo bekkasna. ¹⁶ "Aku, Jesus ngo mengutus malaèkatKu mendahi kènè asa ibagahken karinana i taba kènè kuria-kuria. Aku ngo pinempar si Daud, Aku ngo bintang pelambuk simercala-cala i." ¹⁷ Nai nina Tendi Perbadia dekket Berru Tokoren i mo, "Roh mo kono!" Karina kalak simendengkoh i mendokken, "Roh mo kono!" Barang isè muasen, roh mo ia! Barang isè uè, itakui mo laè kenggelluhen i, oda pella mennokor! ¹⁸ Aku si Johanes, simengindangken karina sipesèngèt nibas alamat èn mendokken: Barang isè menambahi sitersurat ipas alamat èn, itambahi Dèbata mo bana tulbang marè-marè sitersurat ibas bukku èn. ¹⁹ Barang isè mengkurangi alamat èn, ikurangi Dèbata mo bana pasu-pasu silot ipas kayu simerrèken kenggelluhen i kuta simbadia i. ²⁰ Nina simagahken simasa èn dèng ma, "I mo Tuhu! Ndor ngo Aku roh!" Amèn! Roh mo kono alè Tuhan Jesus! ²¹ Dak ipasu-pasu Tuhan Jesus mo kènè karinaNa ummat Dèbata! Amèn!