PILIPI

PILIPI

¹ Kènè karina ummat Dèbata simerian i Pilipi, sienggo mersaor dekket Kristus Jesus. Bagi ma pè dekket kènè pengendeng bak pengurupi i kuria! ² Kami sidua, imo si Paulus bak si Timoteus naposo Kristus Jesus mengharapken, dak masèh atè dekket damè mo bai ndènè siroh bai Dèbata Bapanta dekket Tuhan Jesus Kristus idi nai. ³ Gennep kuèngèt kènè dakdak ngo kudokken melias atè taba Dèbata. ⁴ Janah gennep kusodipken kènè karinana, dak ibagasen sampang atè ngo aku mersodip. ⁵ Mejalo metangkup kudokken taba Dèbata kumarna pengurupi ndènè bangku i bennana nai soh mi bagèndari lako pesarken Sukuten Kelluahen bai Dèbata nai. ⁶ Tok kalohoon ngo ukurku tersèngèt èn: Dèbata sienggo mentebbennai bahaan i mendè soh mi ari pekiroh Jesus Kristus i nola. ⁷ Dak ibagasen ukurku ngo kènè karinana. Jadi patut ngo bagidi pengèngètku bai ndènè. Ai karinana ngo kènè enggo bagè aku menjalo masèh atè bai Dèbata nai; bang bagèndari ibagasen kurungen aku barang sinderrang i ruar aku lako mennukutken Sukuten Kelluahen i. ⁸ Soh mo messengna nteddohku midah kènè karinana i bagasen ngkelleng bai Jesus Kristus i nai. Dèbata ngo saksingku tersèngèt i. ⁹ Èn ngo kupidoken ibas sodipku: naing mo makin mbellen ngkelleng atè ndènè ibagasen bijak, ¹⁰ asa ibettoh kènè memmilih simendèna. Ai mula bagi ngo kènè, mpanting mo kènè oda mertikas janah oda pertuktuken tikan ari pekkeroh Kristus i nola. ¹¹ Nai gabè mertinèncuk mo simendè ipas perrulaan ndènè i bagasen Jesus Kristus i, asa gabè mermulia Dèbata janah terpoji. ¹² Ipergeddo ukurku, naing mo ibettoh kènè alè dengan, karina simasa bangku, gabè peddorken sar ngo Sukuten Kelluahen i. ¹³ Janah gabè karinana ngo pengisi tangsi i bak sidèbanna i pè tupèh memmettoh, i kurung pè aku kumernaken naposo Kristus i ngo aku. ¹⁴ Janah makin posna ngo atè dèba dengan sisada kepercayaen bai Tuhan i, makin nggasangna ngo ukurna lako mennukutken sukuten Kelluahen i, oda pella nèngè mbiar. ¹⁵ Tuhu lot ngo dèba kalak i mennukutken Kristus i kumarna ncian dekket perselisihen, tapi lot ma ngo dèba mennukutken ibagasen ukur mbersih. ¹⁶ Ukum kalak sibagèn i iulaken bagi imo kerna sinienjar ukur ngkelleng bai Dèbata bak bangku ngo i, kumarna ibettoh kalak i ipasulak Dèbata ngo aku, lako mengkesaksiken bennar ngo Sukuten Kelluahen i. ¹⁷ Tapi ukum sidèbanna idi menjamitaken Kristus i oda ngo mendè tujunna, ai dirina ngo isarihken. Ai dok atè kalak i, merkitè pemaingna bagidi, gabè muat susahna mo kuakap i kurungen i. ¹⁸ Tapi oda pella kadè i! Ai barang bakunè pè i, asal mo ijamitaken Kristus, tah arap ukur mendè pè i barang ukur merroha, lolo ngo aku. Janah dak ngo lolo aku soh mi podiin èn, ¹⁹ kubettoh ngo, merkitèken sodip ndènè dekket pengurupi Tendi Jesus Kristus menumpak ngo i gabè kelluahenku. ²⁰ Ukum sikupido janah sikuketeddohken imo: asa ulang nemmuken sondat sikuula. Nai dak kuharapken ngo asa gennep tèk -- terlebbih-lebbih bagèndari, tong nemmu nggasang ukurku bagè dekkah ari, -- barang matè barang nggelluh pè aku, -- mersangap nemmu Kristus. ²¹ Ai Kristus ngo kenggelluhen bangku, janah laba ngo kemmatèen. ²² Tapi mula merkitè nggelluh i dunia èn ndorok kuulaken ulaan termendèen, oda kubettoh siapai kupilih. ²³ Duana ngo menessak aku. Sèkel kalohoon ngo atèngku laus mennadingken dunia èn, asa rebbak dekket Kristus, ai merandalen ngo i; ²⁴ tapi lotiin ngo nggelluh aku i dunia èn lako mengkepkep kènè. ²⁵ Tok ngo ukurku tersèngèt idi. Kubettoh ngo, idi ngo sebabna asa mian dèng aku, tong rebbak dekket kènè karinana, asa kuurupi kènè karinana, asa muat ntegguhna janah muat nggasangna kepercayaen ndènè bai Tuhan i. ²⁶ Kerna naidi, mula enggo balik aku luas mendahi kènè makin ganda mo sampang atè ndènè mengkepercayai Jesus Kristus kemmulihken aku. ²⁷ Siperluna bagèndari imo: Kennah tosè mi sinipergeddo Sukuten Kelluahen tersèngèt Kristus mo pernggelluh ndènè. Nai tah ndorok dèng luas pejumpa aku dekket kènè, barang tah oda pè, giam kudengkoh berita ndènè, magahken hot ngo kènè ibagasen kessadaen mengkepercayai Sukuten Kelluahen bai Dèbata nai. ²⁸ Ulang kènè mbiar midah musuh i. Tanda-tanda ngo i bai kalak i magahken kettalunna, tapi mennang ngo ukum kènè kumarna Dèbata sendiri ngo merrèken kemmennangen i taba kènè. ²⁹ Ai iberrèken Dèbata ngo basa-basa bai ndènè oda pellin percaya bai Kristus, tapi dekket ngo sitahanen kumarna Kristus. ³⁰ Bagèndari pè dekket ngo kènè juhap, imo perjuapen siniidah ndènè tikala i janah dak tong dèng kuperjuapken soh bagèndari bagè sienggo nidengkoh ndènè bagèndari.

¹ Mergegoh ngo kènè, kerna mersada ibagasen Kristus. Janah terapo ngo kènè kerna ikekelengi Kristus kènè! Itegu-tegu Tendi Dèbata ngo kènè, janah bagi ma mersikekelengen ngo kènè bak mersimasèh atèen samah kènè. ² Kerna naidi domi kènè mo sampang atèngku merkitèken: Dak sada atè sada orjok mo kènè janah mersikekelengen bak dos ukur. ³ Ulang merdikkan barang mengakut mi diri bang tunggang. Tapi karina mo kènè merukur ncerrep, janah radumi mo lot ngo kesurungen dengan i bamu nai. ⁴ Ulang mo siperlu bamu sambing pikiri, tapi dekket mo pikiri siperlu bai dengan. ⁵ Bagè perukuren Jesus Kristus mo perukuren ndènè: ⁶ Tukasi pè tosè bai Dèbata Ia tapi oda pella kennah Ipertahanken ketosènNa dekket Dèbata idi. ⁷ Tapi Irumari ngo dirina isellukken rupa hamba asa tosè ia dekket jelma janah rumang dekket pergelluh jelma ngo dapet bana. ⁸ Ipecerrep ngo ukurna, janah merpenguèi ngo ia taba Dèbata soh matè -- i kayu persilang. ⁹ Kerna naidi ngo ipedates Dèbata Ia soh mi sindatesna kalohoon, janah iberrèken baNa kuasa mbellen belgahen dari pada kuasa silot bai sidèban. ¹⁰ Jadi lako menghormati Jesus sagumanna silot i sorga dekket i dunia èn, bak ni terruh tanoh pè, mersembah baNa. ¹¹ Karina dilah mengaku, Jesus Kristus ngo Tuhan; merkitè bagidi mermulia mo Dèbata Bapa. ¹² Kerna naidi alè dengan si nikekellengen, bagè penguèi ndènè bangku, sinderrang i tengah-tengah ndènè aku, naing mo nemmu lebbih bagi dèng penguèi ndènè tukasi pè pedaoh-daoh kita. Enggo ipaluah Dèbata kènè janah ayaki kènè mo asa makin seppèna nggelluh ndènè. Ulaken mo i merdengan sangap janah merkebiaren taba Dèbata, ¹³ kerna Dèbata ngo mengula ibagasen kediriin ndènè, asa gabè kalak sipessennangken atè Dèbata kènè. ¹⁴ Ipas karina pemmakinen ndènè ulang mo ngutnguten kènè barang pè merselisih. ¹⁵ Merkitè bagidi gabè ituduhken kènè mo diri ndènè sienggo gabè dukak-dukak Dèbata siso mertikas, janah nggelluh ibagasen ketègerren i tengah-tengah kalak perjahat bana merdosa. Jadi tikan ibagahken kènè taba kalak i berita kenggelluhen, gabè cuhaya mo kènè menendangi dunia èn. ¹⁶ Mula enggo bagi pernggelluh ndènè ndorok mo gegah aku tersèngèt kènè sinderrang roh Jesus Kristus nola mengolihi. Gabè sada pertandaan mo i magahken oda magosia pengulankenku, tapi merguna ngo. ¹⁷ Mula pè ipèlèken nggelluhku èn lako peseppèken pèlèen si ni pèlèken ndènè ibagasen kepercayaen bai Dèbata, mejalo metangkup ngo kudokken, janah lolo ngo aku rebbak dekket kènè. ¹⁸ Bagidi ma mo nemmu bang kènè pè mendokken mejalo metangkup janah rebbak lolo dekket aku. ¹⁹ Tok ngo aku merkitèken pengurupiin Tuhan Jesus ndorok kupasulak ndor èn si Timoteus mendahi kènè, asa mersampang atè aku mendengkoh berita tersèngèt kènè. ²⁰ Pellin si Timoteus nai ngo kessa terharapken aku janah ndorok denganku sada atè lako mennarihken kènè. ²¹ Ukum sidèbanna idi, pellin dirina nai ngo kessa isarihken, oda nèngè isarihken siperlu bai Jesus Kristus. ²² Kènè pè enggo ibettoh kènè, merguna ngo si Timoteus i. Mertuhu-tuhu ngo pengkebasina rebbak dekket aku lako mennukutken Sukuten Kelluahen bai Dèbata nai. Tosè ngo kami sidua bagè dukak mi bapana. ²³ Kerna naidi, dok atèngku kupasulak mo ia mendahi kènè enggo kessa kubettoh bakunè ujungna perkarangku èn. ²⁴ Tok ngo aku merkitèken pengurupiin Tuhan i, oda pella ndekkah nèngè roh ngo aku mendahi kènè. ²⁵ Ukum tersèngèt denganta si Epaproditus, sinipasulak ndènè lako mengurupi aku, dok atèngku lotiin mo kupasulak ia balik mendahi kènè. Enggo ngo iurupi aku ipas ulanku janah rebbak menggong sindersa ngo kami. ²⁶ Ai enggo nteddoh kalohoon ia midah kènè karina janah ikelsohken ngo kerna enggo soh bai ndènè beritana sakiten i ia. ²⁷ Tuhu ngo ia sakiten, enggo sanga naing-naing matè. Tapi masèh ngo atè Dèbata bana, oda pellin bana sambing tupèh dekket ngo bangku asa ulang makin bonekna aku. ²⁸ Kerna naidi ngo asa doliin dok atèngku kupasulak ia balik mendahi kènè, asa lolo kènè, mula enggo idah kènè ia, nai sennang mo dekket atèngku. ²⁹ Èn pè lolo mo kènè menjalosa bagè dengan sisada kepercayaen. Hargai kènè mo kalak sibagidi. ³⁰ Ai mengkepkep ulaan Kristus ngo asa enggo sanga naing matè ia; janah isèaken ngo kessahna mengkebasi aku janah mendomi sikurangna dèng si bai ndènè nai i.

¹ Adumna i alè dengan, lolo mo kènè ibagasen Tuhan i. Oda pella mbotong kuakap mendokken bagè sienggo kusurat kin taba kènè ibas suratku i; ai selloh ngo i gabè kelluahen ndènè. ² Mermanat mo kènè merradepken kalak simengulaken jahat kalak sipatut geraren biang; dak ipaksa kalak i ngo asa kennah mersittak nina. ³ Pada hal kita enggo mengulaken mersittak situhunna, oda ngo kalak i; siuèi ngo Dèbata ibagasen penneggu-negguun Tendi Perbadia sendiri, janah mejalo metangkup mo sidokken kumarna enggo mersaor kita dekket Jesus Kristus. Oda ngo mergantung mi cara perdagingen kita. ⁴ Situhunna, ukum aku ndorok ngo nemmu mergantung mi cara-cara perdagingen i. Ai mula lot kaltu mendokken lot alasenna ia mergantung mi cara perdagingen i makinsa nola mo aku. ⁵ Ai isittak i ari peualuhken ngo aku. Kalak Israel ngo aku itubuhken i marga Benjamin nai, janah kalak Heber asli ngo aku. Ukum tersèngèt penguèenku mi hatoren pati-patiin kalak Jahudi, horong Parisè ngo aku. ⁶ Tikka ngo aku mengulaken i, gabè kuletlet ngo kuria i. Ukum ipas hatoren pati-patiin idi sada kalak siso tercodi dengan i ngo aku i tengah-tengah kalak Jahudi. ⁷ Tapi kumarnaken Kristus, perlabaan kin dok atèngku tikala i, enggo gabè sada kerogiin mbellen ukum bagèndari. ⁸ Oda pellin i sambing; tapi gabè karinana ngo pellin keroginku sambing. Ai mahargaan ngo milikku sibagèndari i mo menandai Jesus Kristus Tuhanki. Kumarna Kristus enggo kupaluah karinana i, ai dosken empak-empak sambing ngo i karina kuètong, asal mo dapet aku Kristus, ⁹ janah tuhu-tuhu ibagasensa aku. Oda nèngè ngo arap penguènkenku mi hatoren pati-patiin, asa gabè ndorok mersaor aku dekket Dèbata. Tapi kumarna percaya ngo aku bai Kristus. Jadi bai Dèbata nai ngo rohna persaoren i janah merdangaan mi kepercayaen bai Jesus Kristus. ¹⁰ Siperluna bangku imo asa kutandai Kristus janah asa kuperakapken kegegohen sipegelluhkenSa i simatè nai. Sèkel ngo aku rebbak mpersuk dekketsa janah dos bagèsa i permatèNa i. ¹¹ Janah kuharapken tuhu-tuhu ngo ipegelluh aku i simatè nai. ¹² Oda ngo kumarna enggo dapet aku i asa kudokken bagidi, barang enggo gabè soh selloh aku, tapi dak kuayaki ngo sibasa-basa sienggo ipèmaken Jesus Kristus i. Kerna naidi ngo asa Itangkup aku gabè milikNa. ¹³ Alè dengan, oda dèng ngo kuakap enggo dapet aku sibasa-basa i tapi lot ngo sienggo kubaingken, imo kulupaken sinipodingku, kuuayaki ngo si nilebbèngku. ¹⁴ Dak kupuspusken ngo lojang mi tujuun perpodi lako menjalo sibasa-basa i, imo nggelluh i sorga. Mi sidi ngo kita idilo Dèbata merkitè Jesus Kristus. ¹⁵ Karinana kita sienggo sondel mengantusi cara pertendiin, imo dakdak siperatè-atèken. Tapi mula lot bai ndènè nai laèn pengantusinna, peterangen Dèbata ngo i bai ndènè. ¹⁶ Asal mo èngèt kènè: Kennah ngo kita nggelluh mengèkutken hatoren sienggo sijalo bagèndari. ¹⁷ Kènè karinana alè dengan, codi kènè mo aku! Enggo kutuduhken kami diri nami mahan codiin sènteng, kerna naidi perdatèken kènè mo selloh-selloh simencodi kami i. ¹⁸ Enggo nggati kubagahken taba kènè, janah kuulaki mendokken i bagèndari taba kènè merdengan èluh; mèduk ngo bagèndari gabè musuh silang Kristus i. ¹⁹ Ukum kalak sibagidi lako mago ngo i ujungna, kumerna cubellek dagingna ngo i perdèbata. Kadè makinken merlèa, idi nola ngo ihargaken; kerna siperlu i dunia èn sambing ngo kessa ipikiri. ²⁰ Tapi ukum kita i sorga ngo bekkasta, janah i sidi nai ngo Raja Sipaluahken kita, imo Tuhan Jesus Kristus sinaing roh i. Ia ma ngo dakdak sipèma-pèma dekket siketedohken. ²¹ Dagingta sindotè janah singgèut melala èn gabè iobah Kristus nola ngo tosè mi badanNa sendiri simermulia i. Ibakin bagidi, rembang mi kuasana sindorok pepatuken karinana.

¹ Kerna naidi alè denganku sinikekkellengen! Dak bagidi mo kènè nemmuken tettap merpengelako janah tuhu-tuhu percaya bai Tuhan i. Ntedoh ngo ukurku bai ndènè! Kènè ngo kebangganku janah pesampangken atèngku. ² Kènè alè turang Euodia dekket si Sintikè! Memmes kupido bai ndènè asa sada orjok kènè bagè dengan sipercaya bai Kristus i. ³ Bang kono pè alè Sunsugos pertobok, kupido bamu asa urupi duana turangta i. Ai enggo ikelejaken kalak i mengurupi aku lako mennukutken Sukuten Kelluahen bai Dèbata nai; tosè bagè si Klemen dekket sidèbankenna i pè sienggo mengula rebbak dekket aku. Tersurat ngo gerar kalak idi ibas Bukku Kenggelluhen. ⁴ Dak mersampang atè mo kènè sienggo ibagasen Tuhan i; kuulaki mo mendokken, mersampang atè mo kènè! ⁵ Naing mo nemmu idah karina jelma mendè perukuren ndènè. Roh nèngè mo Tuhan i! ⁶ Ulang kelsohken kènè barang kadè. Dak bagahken kènè mo bai Dèbata merkitè sodip pengidoon ndènè i merdengan ukur mejalo metangkup. ⁷ Nai damè Dèbata sitermurmur ibas karina perukuren, imo menjamoti atè-atè dekket pikiren ndènè ibagasen Kristus Jesus. ⁸ Adumna i alè dengan, pikiri kènè mo simerandal, imo kesèntengen, mehormat, ntèger, merjullat, mendè dekket kebujuren, ndorok gabè pemoji-mojiin. ⁹ Ulaken mo sienggo nigurukenmi dekket sinijalomu bangku nai; tah pè i merkitè ranangku, bang pè merkitè sikubaingken. Idengani Dèbata siperdamè i mo kènè. ¹⁰ Ibagasen nggelluhku mersada dekket Tuhan, sennang kalohoon ngo kuakap, kerna enggo sanga narih ndekkah, baru pè bagèndari asa mengolihi nola ukur ndènè mennarihken aku. Oda ngo kudokken ilupaken kènè aku; tong ngo dak isarihken kènè aku, tapi tikkina ngo oda tupung. ¹¹ Kudokken pè bagidi, oda ngo kumarna naing lot buat-buatenku bai ndènè nai, ai enggo kukecemmalken mengkesampang atèken bakunè lotna. ¹² Ai ndorok ngo aku pecituk-citukken mula pè buèen sikurangna, barang pè mula merlebbih-lebbih. Ai enggo dapet aku rèmpunna lako pesobokken diringku tupung nduma bang pè ncor, barang tupung oda kadè kurang, bang pè tupung mèter kadè poda lot. ¹³ Merkitèken kuasa Kristus niberrèkenna bangku, dak ipergegohi ngo aku lako mengalo barang bakunè sambing pè. ¹⁴ Tapi enggo iurupi kènè aku ipas kesusahenku nai; jadi selloh ngo pemmaing ndènè i. ¹⁵ Kènè dengan si ni Pilipi! Ntangkas ngo ibettoh kènè, sinderrang kutadingken Makedonia, imo tikan perlebbè kalohon dèng Kusukutken Sukuten Kelluahen i, pellin kènè ngo kessa kuria siuè mengurupi aku janah denganku mengètongi laba rogi. ¹⁶ Ai tikan i Tesalonika pè aku janah memerluken pengurupiin, enggo lebbih sikali itèngès kènè pengurupiin taba aku. ¹⁷ Jadi oda ngo pellin pengurupiin i perlu bangku, tapi buahna i ngo, janah ido ndènè ngo i bangku. ¹⁸ Bagèndari enggo kujalo tinenges ndènè i -- jadi enggo merlebbih-lebbih aku, mertinèncuk ngo enggo bangku enggo kessa soh tinenges ndènè idi iembah si Epaproditus. Jadi gabè huap baungkus mo i, pèlèen kelemonken atè Dèbata. ¹⁹ Tapi tok ngo aku, idomi Dèbatangku ngo siperlu bai ndènè, rembang mi kekayanna i kesangapenna idi, ibagasen Kristus Jesus! ²⁰ Kessangapen mo bai Dèbata Bapanta i, soh mi amman sumendah! Amèn. ²¹ Pesakat kènè mo salamku bai karina sipercaya ibagasen Kristus Jesus. Soh ma mo bai ndènè salam sirebbak dekket aku. ²² Bagidi ma salam bai karina kalak sienggo ummat Dèbata, tapi buèen salam silot i bages Kesar idi nai. ²³ Idengani masèh atè Tuhan Jesus Kristus mo tendi ndènè. Tabe nami, Paulus