MARKUS

MARKUS

¹ Èn mo Sukuten Simerandal terrèngèt Jesus Kristus Anak Dèbata. ² Sukuten Simerandal idi mulai bagè nisuratken Nabi Jesaya, bagèen, " ’Èn mo utusenKu,’ nina Dèbata; ’Kuutus ngo ia lebbèen asa Kono, asa ihantari dalan baMu.’ ³ Lot mo kalak dilo-dilo i padang gurun, ’Hantari kènè dalan bai Tuhan i, pedèas mo dalan sinaing bellusenNa.’ " ⁴ Bagè sitersurat idi, bagi ma ngo pekiroh si Johanes i padang gurun. Iperidi ngo kalak i janah ikataken ngo sukuten bai Dèbata nai. "Kennah tobat ngo kènè ibas dosa-dosa ndènè nai janah kennah iperidi ngo kènè, asa isasa Dèbata karina dosa ndènè," nina si Johanes. ⁵ Mbuè ngo kalak i Juda nai dekket i Jerusalem nai roh mendengkohken jamita si Johanes. Iakku kalak i ngo dosana, nai iperridi si Johanes mo kalak idi i Laè Jordan. ⁶ Ukum pakkèen si Johanes bukbuk unto ngo. Tali abakna bebbak janah panganna balang dekket tenggoli wani. ⁷ Ibagahken mo sukuten ènda, "Janah enggo kessa aku roh ngo kalak belgahen asa aku. Lako mengosari tali cipatuNa sambing pè, oda ndorok dèng aku. ⁸ Laè ngo kuperidiken bai ndènè, tapi ukum Ia, iperidi ngo kènè merkitè Tendi Dèbata." ⁹ Tikanna i, roh mo Jesus i Nazaret nai sini nagerri Galilea, mendahi si Johanes perridiken mi Laè Jordan. ¹⁰ Karuar kessa Jesus i laè idi nai, iidah mo mbuka langit janah Tendi Simbadia susur mi babona bagè rumang ndarapati. ¹¹ Nai terdengkoh mo sora i langit nai mendokken, "Kono ngo AnakKu kekelengenKu, lemmo ngo atèngKu midah kono." ¹² Mènter ibabai Tendi Dèbata mo Jesus laus mi padang gurun. ¹³ Empatpuluh ari mo dekkahna Ia i sidi, iunjuni Sibolis. Lot mo mbuè binatang i sidi rebbakkenSa, dekket malaèkat-malaèkat mengkebasiSa. ¹⁴ Enggo kessa terkurung si Johanes, laus mo Jesus mi Galilea lako mengkataken Sukuten Simerandal bai Dèbata nai. ¹⁵ Nina mo, "Enggo dapet katikana imulai Dèbata Kerajaenna. Tobat mo kè ibas dosa-dosa ndènè nai, percaya mo kènè mi Sukuten Simerandal bai Dèbata nai!" ¹⁶ Tikan merdalan Jesus i biding tao Galilea, iidah mo dua kalak perrikan, imo si Simon dekket anggina si Andreas. Tupung menjala ngo kalak i i tao idi. ¹⁷ Idokken Jesus mo taba kalak idi, "Èkutken mo Aku. Naing Kuajari ngo kènè menjala jelma." ¹⁸ Nai mènter itadingken kalak i mo jalana lako mengèkutken Jesus. ¹⁹ Iterusken Jesus mo merdalan, iidah nola ma mo dua kalak sibeltek imo si Jakobus dekket si Johanes, dukak si Zebedeus. Ibagasen bungki ngo kalak i peliasken jalana. ²⁰ Idah Jesus kessa kalak idi, idilo mo. Itadingken kalak i mo bapana si Zebedeus i, ibagasen bungki rebbakken sigajinna. Ièkutken kalak idi mo Jesus. ²¹ Nai soh mo kalak i mi kuta Kapernaum. Tikan ari Sabat, laus mo Jesus mi bages perguruun lako mengajar. ²² Lengang ngo kalak karina simendengkoh carana mengajar. Ai merseppuh ngo pengerananNa, oda bagè guru agama sidèban. ²³ Sinderrang bagidi, masuk mo mi bages perguruun sada kalak nisellapen sètan janah mersurak, ²⁴ "Naing ikekadè Kono kami alè Jesus, kalak Nazaret? Roh Kono misèn lako memunuh kami ngo? Kubettoh ngo barang isè Kono; Simbadia bai Dèbata nai!" ²⁵ Isergangi Jesus mo tendi jahat idi nina mo, "Sip kono, karuar mo kono bana nai!" ²⁶ Nai itembem-tembemken nisellapen sètan i mo dirina, nai mendempik ninganna karuar ibas sinisellapen idi nai. ²⁷ Lengang kalohon mo karina jelma nisidi, mersidokenken mo kalak idi samahsa, "Iah kadè nola ngo èn? Sada pengajaren rimbaru nola ma ngo kidahken ènda! Iperèntah kessa tendi jahat idi iuèi ngo oda mengilak!" ²⁸ Mènter ndor mo sar berrita terrèngèt Jesus i suberri nagerri Galilea. ²⁹ Enggo kessa i laus mo Jesus i bages perguruun idi nai rebbakken dekket siempat kalak idi memènter mi bages si Simon dekket si Andreas. Berkat ma ngo si Jakobus bak si Johanes rebbak dekket kalak i. ³⁰ Mersakit panè ngo simatua daberru ni si Simon, dak galè ngo i peddemmenna. Soh kessa Jesus dekket denganna mi bages idi, ibagahken mo taba Jesus terrèngèt sakit idi. ³¹ Idapetken Jesus mo simatua si Simon idi, ijamah mo tanganna ninganna iteggu mo asa kèkè. Mènter malum mo iakap, janah ikebbasi mo pangaan bai kalak idi. ³² Cibonna i, enggo kessa sundut mataniari, iembahi jelma i mo kalak simersakit bagi ma nisellapen sètan. ³³ Karina pengisi kuta idi merrengngemmen i lebbè bages idi. ³⁴ Nai ipemalum Jesus mo mbuè kalohon kalak simenggong matcam bagè sakit janah mengusir sètan. Oda ipaduè sètan-sètan idi mongkam, ai ibettoh sètan idi ngo, isè Ia. ³⁵ Sibarembenkenna, langat dèng, kèkè mo Jesus menadingken bages i. Laus mi sada bekkas melongo i ruar kuta janah mersodip mo Ia i sidi. ³⁶ Nai itulusi si Simon dekket denganna mo Ia i sidi. ³⁷ Jumpa kalak i kessa Jesus, idokken kalak idi mo, "Karina ngo kalak menulusi Kono." ³⁸ Tapi ialoi Jesus mo, "Kita mo menerusken perdalanenta mi kuta-kuta sidèban si slot sikuliling èn. Ai kennah merjamita ma ngo Aku i sidi, ai kumarna i ngo asa roh Aku." ³⁹ Idahi Jesus mo suberri Galilea. Ikataken mo sukuten Simerandal i bages perguruun ninganna mengusir sètan-sètan. ⁴⁰ Lot mo sada kalak sikoliten roh mendahi Jesus. Isembah mo Jesus ninganna mengido pengurupiin tabaSa, "Mula uè Kono Tuan," nina, "Terpemalum Kono ngo aku." ⁴¹ Masèh mo atè Jesus midahsa, idorokem mo tanganNa menjamahSa. Idokken mo, "Uè ngo Aku, malum mo iakap kono." ⁴² Nai mènter ntangtang mo kolitna idi karina janah mpanting i dagingna i nai. ⁴³ Ipasulak Jesus mo ia laus janah seppè ipernoi: ⁴⁴ "Jaga kono, ulang bagahken simasa èn barang taba isè pè. Laus mo ko mendahi imam, pengido asa iperrèso kono. Enggo kessa i pèlèken mo pèlèen bai Dèbata mengèkutken hatoren sinidokken si Musa, asa iidah jelma nterrem enggo malum iakap kono." ⁴⁵ Laus mo ia, tapi ipesaar mo berita idi. Oda pellin bagi tapi makin irana-ranaken mo berrita idi, gabè sanga mak terbaing Jesus nèngè ntarar masuk mi sada-sada kuta. Gabè i ruar kuta i mo Ia, i bekkas melongo. Tukasi pè bagi, dak merrohen ngo kalak mendahiSa, tah i dikè nai dèba i.

¹ Enggo kessa barang piga ari nola, balik mo Jesus mi Kapernaum, saar mo berrita mendok, enggo i bages Ia. ² Nai mbuè mo jelma merrohen. Rengngem mo kalak i isidi, pella maknè lot bekkas. I babah pèntu pè enggo mersessak-sessak jelma. Nai iranaken Jesus mo berita bai Dèbata nai taba jelma nterrem idi. ³ Sinderrang mengerana Jesus, lot mo sada kalak nitempuk sigading iosong empat kalak mendahi Jesus. ⁴ Tapi kumarna jelma nterrem idi, gabè oda terbaing kalak idi merembah nitempuk sigading idi soh mi gembar Jesus. Iongkam kalak i mo saong sapo idi pas ibabo bekkas Jesus kundul idi. Enggo kessa i itontonken kalak idi mo nitempuk sigading idi i bagasen peddemmenna. ⁵ Idah Jesus kessa bagidi belgahna kepercayaen kalak idi, idokken mo taba nitempuk sigading i, "Alè pa, enggo isasa dosa-dosamu." ⁶ Lot mo isidi kundul guru-guru agama, mengerana mo ibagasen atèna bagèen. ⁷ "Pang ma mo kalak èn mongkam bagidi! Mengelèai Dèbata ngo ia. Isè poda ndorok mennasa dosa laènken Dèbata!" ⁸ Ibettoh Jesus ngo sura-sura kalak idi, nai idokken mo, "Kasa bagi sura-sura ndènè? ⁹ Apaina ngo murahen nidokken taba nitempuk sigading ènda, ’Enggo isasa dosamu, barang, kèkè mo ko, embah mo bellagenmu, merdalan mo kono?’ ¹⁰ Kubagahken mo bai ndènè, merkuasa ngo Anak Jelma menasa dosa i babo tanoh èn." Nai idokken Jesus mo taba nitempuk sigading idi, ¹¹ "Kudokken mo bamu, kèkè mo kono, balun mo bellagenmu, molih mo kono!" ¹² Ipetengen-tengen jelma nterrem idi, kèkè mo nitempuk sigading i, ibalun mo bellagenna nai merdalan mo ia laus. Lengang ngo karina nisidi; ipoji mo Dèbata, nina kalak idi mo, "Makdèng nung kuidah kami masa sibagèen!" ¹³ Nai balik nola mo Jesus mi biding Tao Galilea. Nai merrohen mo mbuè jelma mendahiSa janah Iajari mo kalak idi. ¹⁴ Tikan merdalan Jesus isidi, dapet pennengenna mo sada kalak pertunggu cokè mergerar si Lepi i kantorna. "Èkutken mo Aku!" nina Jesus tabasa. Mènter cènder mo si Lewi janah ièkutken mo Jesus. ¹⁵ Enggo kessa i, itamuèi si Lewi mo Jesus mi bagesna. Mbuè ngo pertunggu cokè dekket kalak siso kasèa dokatè jelma nterrrem rebbak dekket Jesus isidi. Janah mbuè ma ngo kalak idi rebbakken mangan dekket Jesus bak sisinNa. ¹⁶ I idah barang piga-piga kalak mo Jesus rebbak mangan dekket siso kasèa dokatè jelma nterrem idi, gabè ikusoi mo sisiin Jesus, "Kasa rebbak mangan Jesus dekket pertunggo cokè bak siso kasèa idi?" ¹⁷ Idengkoh Jesus ngo kuso-kuso idi, gabè nina mo, "Oda perlu penambari bai kalak sijuah-juahen, pellin taba kalak simersakit ngo. Roh Aku oda ngo mendiloi kalak bennar, tapi kalak perdosa ngo." ¹⁸ Puasa ngo sisiin si Johanes Peridiken bagi ma kalak Parisè pè. Nai lot mo kalak mengkuso mendahi Jesus, "Kasa sisiin si Johanes Peridiken dekket Parisè puasa, keppèken sisiinmu oda?" ¹⁹ Ialoi Jesus mo, "Mula tikan merbayo, otang mangan ngo karina tamuè? Jadi, mula isidi dèng ngo kèla idi tentu mangan ngo tamuè idi. ²⁰ Tapi roh mo kettikana, ialengi mo kèla idi, nai pè asa oda mangan nèngè tamuè idi. ²¹ Oda nung idongkapken dèba kaèn rimbaru mi pakkèen sienggo mumuk. Ukum bagi ngo ibaing, makin mbelgahna mo ribakna kaèn mumuk idi ibantun kaèn rimbaru idi. ²² Bagi ma ngo ènda, isè poda nung mengosèken anggur rimbaru mi kiong bebbak sienggo buruk. Mula bagi ngo ibaing, mpustak mo kiong idi ibaing anggur i. Ujungna duana oda nèngè terpakkè. Anggur rimbaru, kennah mi kiong rimbaru ma ngo iosèken." ²³ Tikan sada ari Sabat, mentas mo Jesus arap juma. Nderrang merdalan i, ipotikken sisinNa mo rohi pagè. ²⁴ Nai idokken kalak Parisè mo mbang Jesus, "Tengen mo, enggo ilausken sisinMu idi hatoren agamanta. Ai iulaken ngo ulaen siso ndorok bahanen tikan ari Sabat?" ²⁵ Nai ialoi Jesus mo, "Madèng ngo nung ijaka kènè pemmaing si Daud tikan mellèhè ia dekket denganna, keppè oda lot pangaan bai kalak idi? ²⁶ Ibengketti ngo Bages Dèbata, ipangan ngo roti sienggo ipèlèken bai Dèbata, nderrang si Abyatar imam huntuun tikanna i. Tapi ipangan si Daud ngo janah ipemberrèken taba denganna." ²⁷ Idokken Jesus dèng ma. "Ibaing pè ari Sabat i, keperluun ni jelma ngo janah oda keperluun ari Sabat. ²⁸ Kuasa Anak Jelma ngo ari Sabat i."

¹ Nai balik nola mo Jesus mi bages perguruun. Lot mo isidi sada kalak matè serrap tanganna. ² Jadi lot mo isidi kalak simengentip kesalahen Jesus asa ndorok iaduken katèna. Dak inelnelli kalak i ngo Jesus, tah uè ma pemalumken simersakit tikan ari Sabat. ³ Idokken Jesus mo taba kalak pertangan matè serrap idi, "Roh mo kono misèn, cènder mo ko i tengah ènda!" ⁴ Nai ikuso mo jelma silot isidi, "Mengèkutken hatoren agama, kadè ngo ndorok ulaenken tikan ari Sabat? Mengulaken mendè ngo barang mengulaken nggodo? Paluahken jelma ngo barang memmunuh?" Tapi sip sambing ngo kalak idi. ⁵ Mellui ngo ukur Jesus kerna perkata sada ngo kalak idi. Itengen Jesus mo kalak i kaliling merdengan mellaga, nai idokken Jesus mo taba pertangan matè serrap idi, "Doroken mo tanganmi!" Nai idoroken mo tanganna, mènter malum mo tanganna idi. ⁶ Itadingken Parisè i mo bages perguruun idi, ndor mo kalak i laus mersungkuun dekket barang piga kalak horong si Herodes lako memmunuh Jesus. ⁷ Laus mo Jesus dekket sisinNa sondar mi biding Tao Galilea. Nai mbuè kaloon ngo jelma i Galilea nai mengèkutken Jesus. Mbuè ma ngo merrohen i Juda nai. ⁸ I Jerusalem nai, i nagerri Idumea nai, bagi ma i nagerri i kèparen Jordan dekket i sikuliling kuta Tirus bak Sidon pè, roh mendahi Jesus. ⁹ Kumarna bagi buèna jelma nterrem idi, idokken Jesus mo taba sisinNa asa ipèmaken sada bungki baNa, tah bakunè isessak jelma nterrem idi Ia. ¹⁰ Ai enggo mbuè jelma ipemalum, gabè karina sisakiten pè mersisessaken lako menjamah Jesus. ¹¹ Bagi ma sinisellapen sètan pè, mula mengidah Jesus, mènter sujud mo mi hadeppenNa, janah mendengkuk, ninganna idokken, "Kono ngo Anak Dèbata!" ¹² Tapi igerra Jesus ngo tendi sètan-sètan i memagahken bai barang isè pè terrèngèt Jesus. ¹³ Nai menangkeng mo Jesus mi sada uruk, iarahken mo kalak lemmo atèna janah merrohen ngo kalak idi. ¹⁴ Nai ipilih mo ibas kalak idi nai sipuluh dua kalak. Nina mo, "Kupilih ngo kènè asa gabè rebbak dekket Aku, asa Kuutus kènè lako pesarken Sukuten Simerandal bai Dèbata nai, ¹⁵ janah merkuasa mo kènè lako mengusir sètan-sètan." ¹⁶ Èn mo gerar sisipuluh dua kalak idi: Si Simon (igerari ma, Petrus), ¹⁷ si Jakobus dekket si Johanes anggina, imo dukak-dukak si Zebedeus (sidua kalak èn igerari Boanerges lapatenna jelma binubuh renggur). ¹⁸ Si Andreas, Pilipus, Bartolomeus, Mateus, Tomas, Jakobus anak si Alpeus, Tadeus, Simon kalak lubalang. ¹⁹ Dekket si Judas Iskariot simenelbuh Jesus. ²⁰ Nai balik mo Jesus. Tapi mertumpu ngo jelma nterrem idi, sanga gabè oda lot nèngè tikki bai Jesus dekket sisinNa mangan. ²¹ "Enggo gila ia", nina jelma i. Idengkoh pamiliNa kessa mo bagidi, laus mo kalak i merralengSa. ²² Ukum guru-guru agama siroh i Jerusalem nai mendokken, "Isellapi Beelzebul ngo Ia!" Lot mo dèba mendokken, "Induk sibolis ngo merrèken kuasa baNa lako mengusir sibolis idi." ²³ Nai idiloi Jesus mo jelma nterrem idi, ibagahken mo codiin bai kalak idi, "Bakunè ngo pemmaing sibolis mengusir sibolis?" nina Jesus. ²⁴ "Mula oda mersada kata sada kerajaen, janah mula mermusuh ginemgemna i samahsa, mago mo kerajaen i. ²⁵ Janah mula ibas sisada mpangaan oda mersada kata, janah merselisih samahsa, lako mago mo sisempangaan idi. ²⁶ Bagidi ma ngo mula enggo masa persilisihen i kerajaen Sibolis idi, oda ndekkah nè kerajaen idi pasti lako tumpat mo. ²⁷ Oda ngo termasuken isè bages kepala perrang lako mengerampok hartana mula oda lebbè ièkèti keppala perrang idi, asa ndorok buatenna hartana idi. ²⁸ Èngèt mo, nasa dosa nibaing jelma bak kata nggodo niruapkenna ndorok ngo iampuni. ²⁹ Tapi kalak simengelèai Tendi Dèbata oda nèngè terampuni! Ai hot mo dosana idi." ( ³⁰ Idokken Jesus pè bagi, kumarna lot ngo simendokken lot tendi sètan ibagasen Jesus.) ³¹ Enggo kessa i, roh mo inang dekket anggi Jesus. I ruar ngo kalak i memèma, janah ipasulak mo mendiloi Jesus. ³² Ibas katika i mbuè ngo jelma dogok mencingkoi Jesus. Idokken pasulaken idi mo, "O Guru, i ruar ngo bagèndari inang dekket anggimu, itulusi ngo Guru i." ³³ Ialoi Jesus mo, "Isè ngo inangKu? Isè ngo anggingKu?" ³⁴ Nai itengen mo sikundul i sikulilingNa, nina mo, "Èn ngo inangku janah anggingKu! ³⁵ Barang isè mengulaken lemmo atè Dèbata, ia ngo anggingku dekket turangku bak inangKu."

¹ Nai mengajar nola mo Jesus i biding Tao Galilea. Mbuè kalohon ngo jelma mencingkoiSa. Kumarna bagidi, gabè laus mo Ia kundul mi babo sada bungki i babo la1e idi, janah mercènderren ngo jelma mbellang idi i biding tao i. ² Mbuè kalohon ngo iajarken Jesus bai kalak i merkitè codiin. Bagèen mo Iajarken bai kalak i. ³ "Lot mo sada kalak laus menaburken bennih. ⁴ Tikan menabur idi ia, lot mo dèba bennih i ndabuh mi biding dalan. Nai roh mo manuk-manuk, kerri mo ipangan bennih idi. ⁵ Lot ma mo dèba bennih i ndabuh mi babo tanoh merbatu, mennipis sambing ngo tanohna. ⁶ Ndor ngo nemmu turah bennih idi tapi nggara kessa ari, males mo pagè i gabè ngkerrah kerna oda mbages uratna. ⁷ Lot ma mo dèba bennih idi ndabuh mi tanoh kopi-kopi. Rebbakken tubuh mo kopi-kopi dekket pagè idi, tapi ipetcek kopi-kopi idi mo pagè i, gabè oda merbuah. ⁸ Tapi lot ma mo bennih idi ndabuh mi tanoh nggabur. Turah mo bennih idi, gabè mbellen mo janah mbuè buahna, dèba tellupuluh lempit hasilna, dèba ennempuluh lempit janah dèba nai soh seratus lempit." ⁹ Enggo kessa isukutken codiin idi, idokken Jesus nola mo, "Barang isè kènè merpènggel, idengkohken mo i mendè." ¹⁰ Tikan pellin Jesus sadasa, idapetken kalak sienggo nung mendengkohken peddahNa dekket sisinNa sisipuluh dua i mo Ia. Ipidoken kalak i mo asa ipeterrang lapaten codiin idi. ¹¹ Nai nina Jesus mo, "Mendahi kènè enggo iberrèken basa-basa lako memettoh rahasia bakunè Dèbata memerèntah. Tapi ukum kalak sidèban, ibagahken ngo merkitè codiin, ¹² asa, ’Dak ngo kalak i mendatèken tapi oda ibettoh kadè masa, dak ngo kalak i mendengkoh, tapi oda mengantusi, masa pè èn asa ulang idah janah iantusi, janah asa ulang roh kalak i mendahi Dèbata gabè iampuni Dèbata kalak i.’ " ¹³ Enggo kessa i idokken Jesus mo taba kalak idi, "Mula codiin ndai oda iantusi kènè, bakunè nola mo pengantusi ndènè mi codiin sidèban? ¹⁴ Penabur idi imo kalak simenukutken kelluahen bai Dèbata nai. ¹⁵ Dèba ndabuh ngo bennih idi mi biding dalan, imo jelma simendengkoh sukuten idi, tapi idengkoh kalak i kessa, roh mo sibolis memmuat sukuten sienggo isaburken mi bagasen atè-atèna. ¹⁶ Bagi ma mo sinisaburken mi tanoh merbatu-batu idi, imo jelma simendengkoh sukuten idi, mènter lolo ngo ia menjalo. ¹⁷ Tapi oda lekket sukuten idi ibagasen atè-atèna janah oda ndekkah tahan isidi. Mula roh kesusahen barang iletlet dèba kumarna sukuten idi, mènter mo kalak i oda nè sètia. ¹⁸ Bennih sindabuh mi tanoh kopi-kopi idi imo jelma simendengkoh berrita idi. ¹⁹ Tapi dak mengkelsohken nggelluhna, janah sèkel ia naing bèak dekket cubellek mermatcam bagè mendomi ukurna, gabè i mo memmaing patè sukuten bai Dèbata nai janah oda nèngè merbuah ibagasen ukur kalak sibagidi. ²⁰ Bennih sinisaburken mi tanoh nggabur imo jelma simendengkoh kata i, nai ijalo mo sukuten idi janah merbuah; dèba tellupuluh, dèba ennempuluh janah dèba nai seratus kali lempit buahna." ²¹ Nai idokken Jesus nola mo bai kalak idi, "Nung ngo kalak mengelakati lampu janah itungkupi nola dekket kendang barang tah igamparken nola mi terruh peddemmen? Oda mi bekkas perpelitaan igamparken lampuna idi? ²² Oda lot simboni mak ntarar nola; janah oda lot sinirahasiaken mak terbettoh i ari segen i. ²³ Kumarna nai, kènè simerpènggel, beggèken mo i!" ²⁴ Nai idokken Jesus nola ma mo, "Radumi kènè mo sikudokken ènda! Sukaten sinibaing ndènè taba kalak sidèban i ma ngo ibaing Dèbata bai ndènè. Oda pellin i tupèh tapi iberrè Dèbata ngo terbelgahen isidi nai. ²⁵ Kerna mula kalak lot bana, iberrèken ngo mbuè tambahna, tapi mula cituk ngo lot bana, buatenna nola ngo bana nai." ²⁶ Iuduti Jesus nola mo ranaNa, "Codi ngo Kerajaen Dèbata mi sada kalak simenaburken bennih mi jumana. ²⁷ Meddem ngo ia berngin, ndungo ngo ukum mahar. Nai turah ngo ukum bennih idi janah makin mbelgah, oda pella pemettohen sidasa idi. ²⁸ Tanoh i sendiri ngo mergegoh memmaing merhasil, imo batangna, nai tangkèna, nai buahna nola. ²⁹ Janah mula enggo ntua pagè i, iperrani sidasa i mo, karna enggo waktuna merrani." ³⁰ "Mi kadè mo sicodiken Kerajaen Dèbata?" nina Jesus dèng ma. "Mi kadè mo ndorok terdokken lako peterangken? ³¹ Codi ngo Kerajaen Dèbata bagè buah arum, imo buah sikitikna ibas nasa buah i suberri dunia ènda. ³² Isuan kessa mo buahna i mahan bennih mi tanoh, turah mo ia janah ndeppur mbellen gabè belgahen asa karina suan-suanen simerumbut. Dahanna pè mbuè janah ntem-ntem bulungna gabè seggep mo manuk-manuk mi dahanna i janah merrasar i terruh dahanna i." ³³ Bagi mo isukutken Jesus sukuten bai Dèbata nai, merkitè-kitè umpama sindorok iantusi kalak idi. ³⁴ Dak merkitè umpama ngo Jesus mendahi kalak idi. Tapi mula pellin kalak idi ngo dekket sisinNa, ipeterrang ngo karinana bai kalak i. ³⁵ Cibonkenna i, idokken Jesus mo taba sisinNa, "Laus mo kita merlayar mi suberrang tao." ³⁶ Nai mbangkit mo sisinNa i mi perrau. Enggo kin ngo lebbèen Jesus mi perrau i janah itadingken ngo jelma nterrem idi i biding tao. Berkat mo Jesus rebbak dekket sisinNa. Lot ma ngo perrau sidèban isidi. ³⁷ Oda sadikè dekkah, mènter roh mo angin sapasipu. Iombang-ambingken galombang i mo perrau idi janah mbuè ngo laè masuk mi bagasen perrau idi, sanga naing dom. ³⁸ I podi perrau idi meddem ngo Jesus. Idungoi sisinNa i mo Jesus nina mo, "O Guru, oda isarihken kono, lako mago mo kita?" ³⁹ Ndungo mo Jesus, isergangi mo angin sapasipu idi, idokken mo taba galombang i, "Mènak mo ko!" Mènter mènak mo tuhu angin i janah ndong kaloon mo. ⁴⁰ Nai idokken Jesus mo taba sisinNa, "Kasa mbiar kènè? Oda dèng ngo kè percaya taba Aku?" ⁴¹ Gabè mbiar mo simengèkutken Jesus idi, nina mo samahsa, "Isè ngo situhunna kalak ènda, dekket ngo angin bak galombang idi tunduk mi perèntahNa!"

¹ Enggo kessa i, soh mo Jesus dekket simengèkutkensa mi suberrang Tao Galilea, i nagerri Gerasa. ² Sampur kessa Jesus ibagasen perrau idi nai, idapetken sada daholi siroh i liang kuburen nai mo Jesus. ³ Ikuasai tendi sètan ngo kalak èn janah bekkasna pè i perkuburen ngo. Oda ndorok terrèketen ia, barang dekket rantè pè oda tellap nèngè. ⁴ Enggo nggati tanganna dekket nèhèna ilanggu, tapi dak irettes ngo langguna idi janah bessi bèangenna pè ipenggelken ngo. Gegohna menempurung, gabè isè poda ndorok mencèkèpisa. ⁵ Mahar dekket berngin pè dak kadap ngo ia i pekuburen dekket mi delleng, ninganna mendengkuk-ndengkuk janah ipempaluken ngo batu mi dagingna. ⁶ Tikan itatap ia roh Jesus, mènter merdigal mo ia mendapetken Jesus janah mersujud i hadeppenNa. ⁷ Nggang mo sorana menurakken, "Jesus, Anak Dèbata sintèmbul i! Kadè naing bakinenmu taba aku? Kuèlèk-èlèk kono merkitè Dèbata asa ulang susahi aku!" ( ⁸ Idokken pè bagidi kumarna idokken Jesus tabasa, "Tendi sètan,laus kono bana nai!") ⁹ Ikuso Jesus mo ia, "Isè ngo gerarmu?" Ialoi mo, "Gerarku Lègiun, ai mbuè kalohon ngo kami!" ¹⁰ Iendik-endik mo Jesus asa ulang isuruh sètan-sètan idi karuar i nagerri idi nai. ¹¹ Njolmit isidi nai, mbuè ngo babi dak menggigi i tebbing uruk nisidi. ¹² Ipidoken sètan i mo taba Jesus asa ipaduè kalak idi mbengket mi bagasen babi idi. ¹³ Nai ipaduè Jesus mo. Jadi karuar mo tendi sètan-sètan idi bai jelma idi nai janah ibengketti mo karina babi idi. Gabè karinana babi silungguken idi mermangkaten i tebing i nai mi tao, nai merlennengen mo. Karinana babi idi lot ngo dua ribu. ¹⁴ Bulanting mo permakan babi idi laus, ipembagahken mo simasa idi mi kuta dekket sosor-sosor. Merrohen mo kalak lako menengen simasa idi. ¹⁵ Idahi kalak i mo Jesus, iidah kalak i mo nisellapen sètan idi kin kundul i sidi. Enggo mo merroles ia janah enggo terrus ukurna. Gabè mbiar mo kalak idi karinana. ¹⁶ Isukutken simengidah idi mo simasa bai jelma i ndai dekket mi babi-babi idi. ¹⁷ Kumarnaken idi, gabè ièlèk-èlèk mo Jesus asa itadingken nagerri idi. ¹⁸ Tikan naing mbangkit mi perrau idi Jesus, nai roh mo sisellapen sètan idi kin mengidoken tabasa, asa ipaduè ia mengèkutken Jesus. ¹⁹ Tapi oda ipaduè Jesus, balikna nola ngo idokken Jesus tabaSa, "Mulak mo kono mendahi kaka-anggimu. Bagahken mo taba kalak idi terrèngèt karinana sienggo nibaing Tuhan i bamu dekket kiniselloh nibaingna i taba kono!" ²⁰ Nai laus mo ia, ibagahken mo mi Sisipuluh Kuta nibaingken Jesus i tabasa. Lengang mo kalak karina simendengkohsa. ²¹ Balik mo Jesus mi suberrang tao, mbuè ngo kalak roh mengerengemmi Jesus i biding tao idi. ²² Roh mo sada kalak mergerar si Jairus. Ia ngo pengulu ibages perguruun ni kuta idi. Iidah kessa Jesus, sujud mo ia mi hadepenNa. ²³ Ipidoken mo taba Jesus, "Alè Guru, mpiah kalohon ngo sakit berrungku. Tolong mo roh Kono mengampèken tanganmu bana asa malum janah nggelluh ia!" ²⁴ Nai laus mo Jesus rebbakken si Jairus. Mbuè kalohon ngo mengèkutkenSa, gabè isessak jelma i ngo Ia kacimbang lambung. ²⁵ Lot ma mo isidi sada kalak daberru, enggo sanga sipuluh dua tahun lalap bubus. ²⁶ Enggo mbuè penambari mendaunisa janah enggo lahlah kèpèng ikerriken lako pertambarna. Tapi ulang lebbè malum iakap, makin mparahna nola ngo. ²⁷ Enggo nung idengkoh terrèngèt Jesus. Asa i tengah-tengah jelma nterrem idi, isessak ia mo lako menjolmiti Jesus i podi nai. ²⁸ Ai dok atèna, "Asal mo ndorok giam kujamah olesNa, pasti njuah kuakap!" ²⁹ Ijamah mo jubah Jesus, mènter kom mo iakap sibubus i. Pengakapna oda lot nèngè ipas dagingna penakit idi. ³⁰ Gejapkenna i, iakapken Jesus mo lot karuar gegoh i diriNa nai. Itulihken mo mi jelma nterrem idi, ikusoken mo, "Isè menjamah olesKu?" ³¹ Nina sisiin idi mo, "Iidah Guru i sendiri ngo bagèen jelma èn menessak Guru i, keppè ikusoken Guru idi barang isè menjamah jubah Guru i?" ³² Tapi dak irior Jesus ngo merkuliling lako menulus kalak sienggo menjamahSa idi. ³³ Ibettoh daberru idi ngo, kadè sienggo masa bana. Mbiar janah menggirgir mo ia roh mersembah mi hadeppen Jesus, janah ipertuhu mo karinana. ³⁴ Nai idokken Jesus mo taba daberru i, "Kepercayaenmi ngo pejuahken kono alè nangè! Laus mo kono merdamè-damè. Enggo njuah kono!" ³⁵ Tikan mengerana dèng Jesus, enggo roh pasulaken i bages si Jairus nai. "Enggo matè berrumu i," nina taba si Jairus, "Kadè pella lejaan nèngè Guru idi?" ³⁶ Oda pella ipikirken sinidokken pasulaken idi idokken Jesus mo taba si Jairus, "Ulang kono roga, percaya mo kono!" ³⁷ Nai terrus mo merdalan Jesus, tapi oda ipaduè barang isè pè mengèkutkenSa laènken si Petrus dekket si Jakobus bak si Johanes dengan sibeltek si Jakobus. ³⁸ Nai soh mo kalak i mi bages si Jairus pengulu bages perguruun idi: Iidah Jesus mo isidi bagi mèngèrna janah idengkoh mo sora tangis milangi pelluiken ukur. ³⁹ Nai mbengket mo Jesus, nina mo taba kalak idi, "Kasa mèngèr kènè janah tangis? Ai oda ngo matè anak idi pellin meddem ngo!" ⁴⁰ Itertabai kalak idi mo Jesus. Kernana i idokken Jesus mo kalak i mi ruar. Iarahken mo partua anak i duana dekket sisinNa idi masuk mi bilik anak idi. ⁴¹ Icèkèp Jesus mo tangan anak idi, idokken mo tabasa ibas kata Heber, "Talita kum," lapatenna, "Alè tatat, Aku mendokken bamu: kèkè mo ko!" ⁴² Mènter kèkè mo sitatat idi janah merdalan-dalan. Umurna enggo sipuluh dua tahun. Kagum ngo karinana simengidah simasa idi. ⁴³ Tapi ipernoi Jesus ngo kalak idi, asa ulang ibagah-bagahken bai barang isè pè. Nai idokken mo asa iberrè mangan si tatat idi.

¹ Balik mo isidi nai Jesus rebbak dekket sisinNa mi kutanNa. ² I ari Sabat idi imulai mo mengajar i bages perguruun. Mbuè ngo jelma isidi. Idengkoh kalak i kessa pengajaren Jesus, lengang kalohoon mo kalak idi. Idokken kalak i mo, "Idikè nai ngo ibettoh Ia karinana idi? Bakunè asa ndorok Ia memmaing kellengangen? ³ Otang Ia ngo anak tukkang kayu, anak si Maria i janah kaka si Jakobus, si Joses, si Judas dekket si Simon? Otang turangNa pè lot ngo merrian i sènda?" Kernana idi, oda percaya kalak idi baNa. ⁴ Nai idokken Jesus mo taba kalak idi, "Ukum nabi dak ipesangap ngo barang idikè pè, tapi mula i kutana ia rebbak dekket kadè-kadèna bak kaka anggina, oda ihormati." ⁵ Oda terbaing Jesus i kutaNa idi memakinken sada kellengangen pè giam laènken pejuahken barang piga-piga kalak sisakiten merkitè mengampèken tanganNa taba kalak i sambing mo kessa. ⁶ Lengang ngo ia kumerna oda percaya kalak idi. Enggo kessa i, laus mo Jesus mi gennep kuta i kuliling ni sidi mengajari kalak idi. ⁷ Idiloi mo sisinNa si sipuluh dua i, ipasulak mo kalak i dua-dua sindalaan janah iberrèken mo kuasa lako mengusir tendi sètan. ⁸ Itennahi mo kalak idi, "Ulang iembah kènè barang kadè mi perdalanen, laènken sada tongket. Ulang embah kènè bekkel, barang tagan-tagan bekkas cudekkah, barang pè kèpèng ibas bagut-bagut. ⁹ Mercipatu mo kènè, tapi ulang memakkè dua baju." ¹⁰ Itennahi Jesus dèng ma mo kalak idi bagèen, "Mula ijalo ngo kènè i sada bages, i bages idi mo kènè lebbè mèma itadingken kènè kuta idi. ¹¹ Tapi mula soh kènè mi sada bekkas, keppè oda uè nisidi menjalo kènè janah oda uè mendengkohken kènè, tadingken kènè mo bekkas idi. Janah pirpirken kènè mo abu silekket i nèhè ndènè idi mahan pernèngèten taba kalak idi." ¹² Nai berkat mo sisiin Jesus si sipuluh dua idi. Laus mo kalak idi menaarken sukuten asa itadingken jelma dosa-dosana. ¹³ Iusir sisiin Jesus idi mo mbuè sètan-sètan. Mbuè ma ngo sisakiten itambari merkitè mengapusken minak janah pejuahken kalak idi. ¹⁴ Soh ngo berrita simasa idi taba Raja Herodes, kerna gerar Jesus enggo termurmur barang i dikè pè. Lot dèba mendokken, "Enggo nggelluh mengolihi si Johanes Peridiken! Kernana i ngo asa ndorok Ia memmaing tanda kellengangen." ¹⁵ Tapi sidèban mendokken, "Si Elias ngo Ia." Lot ma mendokken, "Nabi Ia, bagè sada kalak nabi arnia." ¹⁶ Idengkoh si Herodes kessa mo idi, nina mo, "Si Johanes Peridiken arnia ngo èn, sienggo kudokken kin ipancong takalna. Bagèndari enggo balik nggelluh ia." ¹⁷ Ai si Herodes ngo pasulakken kalak menangkup si Johanes janah ikurung. Ibaing si Herodes pè karina idi kumarna si Herodias anggina berru ngo, imo sinialihken si Herodes, padahal sinibages anggina kaloon imo simergerar si Pilipus. ¹⁸ Terrèngèt idi enggo kin ngo dak ipesèngèt si Johanes si Herodes bagèen, "Oda ndorok kono mengalihken sinibages anggimu idi!" ¹⁹ Kumarnana i ngo asa merngetnget atè si Herodias taba si Johanes, janah kennah bunuhen katèna si Johanes, tapi oda terbakinsa pesautken takina idi kerna ihalang-halangi si Herodes. ²⁰ Ai enggo idokken si Herodes menjaga si Johanes i kurungen, kerna mbiar ngo ia midah si Johanes idi, ai ibettoh ngo sada kalak niutus Dèbata ia. Janah mula mengerana si Johanes, lemmo ngo atè si Herodes mendengkohken tukasi pè dak bulisah kalohoon ia kumarna si Herodias idi. ²¹ Keppè tikan ulang tahun pertubuh si Herodes, lot mo kesempaten bana. Merpèsta mo tikanna i si Herodes janah idilo mo karina pejabat ndates dekket perwira-perwira bagi ma pengituai ni Galilea. ²² Tumatak mo berru si Herodias i pèsta idi janah lolo kalohon ngo raja Herodes dekket tamuèna mengidah tatakna idi. Nai idokken raja i mo taba simerbaju situmatak idi, "Barang kadè katèmu naing bamu, pido sambing mo, Kuberrèken pè bamu!" ²³ Pella isumpahken si Herodes ranana idi taba simerbaju idi, "Kubulabanken, kennah kuberrèken bamu barang kadè sambing ipido kono. Agia nola pè sitengah kerajaenki ipido kono, kuberrèken ngo!" ²⁴ Karuar mo simerbaju i, ikusoi mo inangna si Herodias idi, "Nangè, kadè ngo sisellohna kupido?" Ialoi inangna idi mo, "Pido mo takal si Johanes Peridiken!" ²⁵ Ndor mo balik ia mendahi raja i idokken mo, "Kupido taba raja i, asa berrèken bangku bagèndari takal si Johanes Peridiken i babo pinggan!" ²⁶ Mendengkoh pengidonna idi tersengget mo raja i. Tapi oda ndorok nèngè imadaken pengidonna idi, kerna enggo sanga ibulabanken i hadeppen tamuèna. ²⁷ Idokken mo taba pengabalna asa ipancong takal si Johanes Peridiken. Laus mo pengabalna idi mi kurungen, ipancong mo takal si Johanes. ²⁸ Iembah mo takal idi i babo pinggan, iberrèken mo taba simerbaju idi. Nai iberrèken nola mo taba inangna. ²⁹ Idengkoh sisiin si Johanes kessa mo simasa idi, laus mo kalak i mengaleng bangkè si Johanes nai ikuburken mo. ³⁰ Rasul-rasul niutus Jesus idi, enggo mo balik janah pulung rebbak dekket Jesus. Ibagahken kalak idi mo karinana nibahanken janah niajarken kalak idi. ³¹ Mbuè kalohon ngo jelma merlaus roh i sidi sampè oda terbakin Jesus dekket sisinNa mangan kumarna oda sempat. Kernana i idokken Jesus mo taba sisinNa, "Èta kènè mo laus mi bekkas melongo, asa pellin kita i sidi, asa ndorok kènè mentadi giam sigejap." ³² Berkat mo kalak idi merbungki mi bekkas melongo. ³³ Tapi mbuè ngo kalak mengidah perberkat ni kalak idi janah ibettoh dèba ngo mikè tujunna. Jadi mbuè ngo kalak pengisi nagerri i merdalan arap darat, isudu lako mi bekkas idi mengelebbèi Jesus dekket sisinNa. ³⁴ Susur kessa Jesus i bungki i nai, enggo mo idah Jesus isidi jelma mbellang idi. Masèh mo atèna midah kalak idi, ai codi mi biri-biri siso lot permakan, bagi mo kalak idi. Jadi imulai Jesus mo memeddahi jelma nterrem idi tarrèngèt mermatcam bagè. ³⁵ Enggo kessa bon ari, idokken sisiin idi mo taba Jesus, "Enggo bon ari, janah mpunjung ngo bekkas èn. ³⁶ Lotiin mo ipasulak Guru i kalak èn laus mi sosor dekket kuta silotna ndessing i sèn asa ndorok menokor pangaan." ³⁷ Tapi idokken Jesus mo, "Kènè mo memerrè kalak idi mangan!" Nai nina sisiin idi mo, "Idikè nai mo tokoren nami roti giamken dua ratus kèpèng pirak mahan pangaan kalak ènda?" ³⁸ Nai idokken Jesus mo, "Piga ngo lot roti ndènè? Tengen kènè mo lebbè." Enggo kessa laus kalak idi menengen, idokken kalak idi mo, "Lot ngo lima roti dekket dua ikan." ³⁹ Nai idokken Jesus mo jelma nterrem idi kundul merpulguk-pulguk i babo dukut-dukut nisidi. ⁴⁰ Merkundulen mo kalak idi merratur merpulguk-pulguk. Lot mo dèba siratus kalak simpulguken, dèba limapuluh kalak simpulguken. ⁴¹ Ibuat Jesus mo roti silima dekket ikan sidua idi, itarè mo mi langit ninganna idokken mo mejalo metangkup taba Dèbata. Enggo kessa bagidi, ipenggelli mo roti idi, ipemberrèken mo taba sisinNa asa ibagi-bagiken mendahi jelma mbellang idi. Ikan sidua i pè bagi ma ngo ibaing mendahi kalak idi karina. ⁴² Bessur ngo mangan kalak idi karina. ⁴³ Nai ipepulung sisiin Jesus mo siso kerri idi -- dom sipuluh dua baka mbellen. ⁴⁴ Pellin daholi lot ngo kira-kira lima ribu kalak buèna simangan idi. ⁴⁵ Ipasulak Jesus mo sisinNa i perlebbè ndor laus merbungki mi Betsaida i suberrang tao i, ukum Jesus isidi dèng ngo lako pemolihken jelma nterrem idi. ⁴⁶ Enggo kessa mersirang Jesus dekket kalak idi, laus mo Ia mi sada uruk lako mersodip. ⁴⁷ Enggo kessa gellap, soh mo bungki kalak idi i tengah tao, ukum Jesus tong dèng ngo i darat. ⁴⁸ Idah Jesus ngo kalak idi ledja kalohon mengkayuh bungki idi, ai mengalo angin ngo perdalan bungki idi. Kerna naidi, antara pukkul tellu mi pukkul ennem siceggen, roh mo Jesus mendahi kalak idi merdalan nènèh i babo tao idi. Ipakulah ngo terus merdalan mengelausi kalak idi. ⁴⁹ Idah kalak i kessa simerdalan i arap babo laè idi, idokken kalak idi mo bègu i. ⁵⁰ Gabè mendengkuk mo kalak i ibaing mbiarna. Ai karina ngo kalak i mengidahSa janah tersengget kalohon. Tapi mènter idokken Jesus mo mendahi kalak idi, "Tennang mo kènè, Aku ngo èn, ulang mbiar!" ⁵¹ Nai ibengketti Jesus nola mo bungki idi janah menter mènak mo angin. Gabè lengang kalohon mo sisin Jesus karinana. ⁵² Kelengangen merkitè lima roti pè madèng iarti kalak idi, ai mahal ngo iradumi. ⁵³ Merlabuh mo bungki kalak idi i biding tao Genesaret, soh kessa mi suberrang tao. ⁵⁴ Karuar kessa kalak i i bungki idi nai, mènter enggo itandai kalak idi Jesus. ⁵⁵ Mènter merlojangen mo kalak nisidi ni suberri nagerri idi. Janah iembah mo simersakitna i babo bellagen mendahi Jesus. Ai barang i dikè Jesus idengkoh kalak idi, iembah ngo mi sidi simersakitna. ⁵⁶ Barang mikè roh Jesus tah pè i kuta -- i kota barang pè i sosor -- dak merrohen ngo kalak mi sidi janah ibaing ngo simersakit i i penongkohen. Nai iendik-endik kalak i mo asa ipaduè ijamah simersakit i tah pè pellin punca jubah Jesus. Ai karinana simenjamahsa, gabè malum ngo.

¹ Nai roh mo dèba kalak Parisè dekket piga-piga kalak guru agama i Jerusalem nai mendahi Jesus. ² Kerna idah kalak idi barang piga kalak simengèkutkensa oda pella merborih bagè nihatorken Parisè mènter mangan. ³ Ai ukum Parisè bagi ma Jahudi dak ièngèt ngo mengèkutken adat sienggo isusurken empung ni empungna i. Oda uè mangan kalak idi kum mak lebbè iborih tanganna mengèkutken hatoren sitertentu. ⁴ Pangaan i onan nai, oda ndorok ipangan ukum mak lebbè iborih. Mbuè dèng hatoren-hatoren sidèban nisusurken empung kalak idi. Ntegguh ngo ipatuhi kalak idi, umpamana hatoren memorih galas, mangkuk, perkakas-perkakas tembaga bagi ma peddemmen. ⁵ Kerna nai, ikuso Parisè dekket guru agama idi mo Jesus, "Kasa oda idalanken simengèkutken Kono idi adat sienggo isusurken empungta banta? Kasa mangan kalak idi, tanganna oda mbersih?" ⁶ Ialoi Jesus mo, "Tuhu kalohon ngo siniberitaken nabi Jesaya ibas bukkuna terèngèt kalak perbuah ringadar bagè kènè èn. Ai bagèen ngo isukutken, ’Idokken Dèbata, ipesangap kalak èn ngo Aku ibas ranana, tapi ukum ukurna ndaoh ngo bangKu nai. ⁷ Sia-sia ngo kalak i menembah Aku, ai ipeddahken kalak i ngo hatoren nibaing jelma idokdok atèna idi hatoren bangKu nai!’ ⁸ Ipesisi kènè ngo hatoren Dèbata, keppè hatoren jelma ièkutken kènè mertuhu-tuhu." ⁹ Idokken Jesus dèng ma, "Soh mo pandè ndènè pesisiken hatoren Dèbata, asa ndorok iulaken kènè hatoren ndènè sendiri. ¹⁰ Enggo ihatorken si Musa bagèen, ’Pesanagap mo inangmu dekket bapamu, dekket, barang isè mengelèai partuana kennah matè ngo ia ihukum.’ ¹¹ Tapi ipeddahken kènè ngo bagèen: Mula lot kalak mendokken taba partuana, ’Kadè kin patut berrènkenku bai bapa bak inang enggo kupèlèken bai Dèbata,’ ¹² mula bagi, enggo ihalangi kènè kalak idi memaing sipatut taba partuana. ¹³ Jadi, merkitè hatoren nibaing ndènè, enggo mo ipitakken kènè hatoren sinibakin Dèbata. Mbuè dèng tupèh sinibahan ndènè codi mi sidi." ¹⁴ Nai itenggoi Jesus mo jelma nterrem idi sikali nai janah idokken mo, "Kènè karina sipulung èn, dengkohken kènè mo janah bettoh kènè! ¹⁵ Oda mellamun jelma ukum ibaing simbengket i ruar nai. Tapi sikaruar ibagasen nai ngo mengellamuni jelma. [ ¹⁶ Kerna naidi, radumi kènè mo mendè-mendè, mula lot ma ngo pènggèl ndènè lako mendengkohken!]" ¹⁷ Enggo kessa itadingken Jesus jelma nterrem idi janah laus mi bages, ikuso sisinNa i mo Ia terrèngèt tujuen codiin nidokkenNa ndai. ¹⁸ Nai idokken Jesus mo taba kalak idi, "Kènè pè moto ngo bagè jelma sidèban i? Oda ngo idah janah iantusi kènè ukum simasuk i ruar nai mi bagasen jelma oda terbakin mengellamuni jelma? ¹⁹ Kerna simasuk i oda ngo atè-atè ibellus, tapi mi beltek ngo, nai karuar nola ngo i dagingna idi nai." Merkitè kata èn ntarar mo idokken Jesus, "Karinana pangaan, halal ngo nipangan." ²⁰ Idokken Jesus dèng ma, "Sikaruar i jelma idi nai ngo memaing ia mellamun. ²¹ Kerna sikaruar bai jelma idi nai, imo ipas pusuh perratènna nai tubuh pikiren-pikiren jahat memmaingken asa iulaken ulaan cubellek daging, menangko, memmunuh, ²² merlangkah julu meddem, mengaitken bana dekket karina sijahat; merluap, mengulaken ulaan nggodo, ncian, mengelèai, jukkat, janah mahal ajaren. ²³ Karinana sijahat idi rohna ibagasen dirina nai ngo, ingo memakin mellamun ia." ²⁴ Enggo kessa bagidi, itadingken Jesus mo bekkas idi janah laus mi nagerri ndessing mi kuta Tirus. Mbengket mo ia mi bagasen sada bages janah oda ibettoh dèba Ia i sidi. Tapi oda terbonikenSa diriNa bai jelma i nai. ²⁵ Sada kalak partua ibages mendengkoh terrèngèt Jesus. Kerna lot berruna isellapi sètan, roh mo ia mendahi Jesus mersembah mi hadeppenNa. ²⁶ Oda ngo bangsa Jahudi daberru idi, kalak situbuh i ladang Fenesia i Siria ngo ia. Mènter mo ièlèk-èlèk ia Jesus, asa uè mengusir sètan idi ibagasen berruna i nai. ²⁷ Tapi ialoi Jesus mo, "Lebbèen ngo niberrèken pangaan taba anak-anak, kerna oda patut buaten pangaan anak-anak idi, gabè niberrèken mi biang!" ²⁸ "Tuan," nina daberru idi, "Tapi ipangan biang ni terruh mèja i ngo iba-iba anak-anak idi!" ²⁹ Nai idokken Jesus mo mbangsa, "Kerna pengaloimu idi, molih mo kono, enggo karuar sètan idi bai berrumu i nai!" ³⁰ Molih mo partua ibages i, idapet mo berruna idi galè-galè i peddemmenna i bages, janah tuhu ngo enggo karuar sètan idi bai berruna idi nai. ³¹ Enggo kessa i, itadingken Jesus mo nagerri Tirus, mennerusken perdalanenNa arap Sidon lako mi Tao Galilea. Arap dalan mengelausi nagerri Sipuluh Kuta. ³² Iembahken dèba mo mendahi Jesus sada kalak tongkik bana pekkak. Ipido kalak i mo asa iampèken Jesus tanganNa mi baontakalna. ³³ Iarahken Jesus mo ia mellin bai jelma nterrem i nai, nai igirikken Jesus mo jari-jariNa mi bagasen copingna. ³⁴ Nai itarè Jesus mo mi langit janah merkessah nggeddang Ia, nina mo, "Hèpata, lapatenna mbuka mo!" ³⁵ Mènter mbuka mo pènggelna janah dilahna pè mellèah mo mengolihi janah mengerana mo. ³⁶ Nai igerra Jesus mo karina kalak idi asa ulang ibagah-bagahken barang bai isè pè. Tapi makin irarang Jesus, makin ipesar kalak idi ngo. ³⁷ Karina simendengkoh idi lengang kalohon. Idokken kalak i mo, "Mbelgah tuhu-tuhu ngo nibaingNa i karina. Merpendengkoh ngo jelma tongkik janah mengerana ngo sipekkak."

¹ Oda sadikè dekkah nai, lot mo jelma nterrem roh mertumpu. Kumarna oda lot pangaan bai kalak idi, idilo Jesus mo sisinNa, idokken mo, ² "Masèh ngo atèngKu midah jelma nterrem ènda. Enggo tellu ari kalak i rebbak dekket Aku; bagèndari oda lot pangaan kalak idi. ³ Mula Kupasulak kalak idi asa mulak nderrang mellèhè, gabè pangsan nola mo kalak idi i tengah ndalan. Bagi dèng ma kalak idi roh i sindaoh nai." ⁴ Ialoi sisiin Jesus mo, "I bekkas panjil bagèen, idikè mo ndorok dapet pangaan cukup bai jelma nterrem èn?" ⁵ "Piga ngo lot roti bai ndènè?" nina Jesus. "Pitu ngo," nina pengaloi kalak i. ⁶ Idokken Jesus mo jelma nterrem idi kundul i babo tanoh i, ibuat mo roti sipitu idi, idokken mo lias atè taba Dèbata. Nai ipenggelli mo roti idi ibas tanganNa, ipemberrèken mo taba sisinNa asa ipembagiken bai jelma mbellang idi. Nai ibaing sisinNa idi mo bagidi. ⁷ Lot ma mo jumpa kalak idi piga-piga ngkabuah ikan kètèk. Idokken Jesus mo lias atè mi Dèbata kumarnaken ikan idi janah idokken ma mo taba sisinNa membagi-bagiken ikan idi ma. ⁸ Bessur ngo karinana mangan jelma mbellang idi, lot kira-kira empat ribu kalak buèna simangan idi. ⁹ Ipepulung sisiin idi mo siso kerri idi -- dom pitu baka nai. Nai ipasulak Jesus mo jelma nterrem idi molih. ¹⁰ Tapi ukum Ia rebbak dekket sisinNa berkat mo merbungki mi nagerri Dalmanuta. ¹¹ Roh mo tah piga kalak Parisè mendahi Jesus, ipungkah mo mersoal dekket Jesus lako mengenggepSa. Ipido kalak i mo asa ibaing Jesus tanda kellengangen pertandaan tandana, roh bai Dèbata nai Ia. ¹² Ikelsohken Jesus mo ninganna mendokken, "Kasa ipido sisencundut èn ndia asa Kubakin tanda kelengangen? Oda! Oda uè Aku memerrèken tanda sibagidi bai ndènè!" ¹³ Itadingken Jesus mo kalak idi, ibengketti mo bungki, nai berkat mo Ia mi suberrang tao. ¹⁴ Lupa ngo sisiin Jesus merembah roti. Ai pellin sada sambing ngo kessa roti i bungki kalak idi. ¹⁵ "Manat mo kènè i ragi kalak Parisè dekket ragi si Herodes," nina Jesus. ¹⁶ Nai mengerana mo sisiin idi terrèngèt idi; nina kalak i, "Idokken pè bagi, kumarna oda siembah roti." ¹⁷ Ibettoh Jesus ngo niranaan kalak idi, kernana i ikusoken mo taba kalak idi, "Kasa iranai kènè terrèngèt oda merembah roti? Oda ngo memmettoh kènè janah oda iarti kènè? Oda ngo merpendidah kènè? ¹⁸ Lot ngo mata ndènè kasa oda perpendidah kènè. Mercoping ngo kènè -- nai kasa oda merpendengkoh kènè? Oda ngo ièngèt kènè? ¹⁹ Imo lima roti sikupenggelli taba si lima ribu kalak idi? Piga baka nai dom siso kerri nipepulung ndènè?" "Sipuluh dua baka," nina kalak i. ²⁰ "Nai sinderrang Kupenggelli roti sipitu ngkabuah taba siempat ribu kalak," nina Jesus mo mengkuso kalak idi, "Piga baka nai oda kerri sinipepulung ndènè i?" "Pitu baka," nina kalak idi. ²¹ "Mula bagi, madèng ngo iarti kènè?" nina Jesus dèng ma. ²² Soh mo kalak idi mi Betsaida. Iembah dèba mo i sidi sada kalak sipètung mendahi Jesus janah ipido mo asa ijamah Jesus sipètung idi. ²³ Icèkèp Jesus mo tangan sipètung idi, iteggu mo ia mi ruar kuta. Nai ièduri Jesus mo mata sipètung idi janah iampèken mo tanganNa mi sipètung idi. Nai ikuso mo ia, "Lot ngo idah kono enggo bagèndari?" ²⁴ Itengen sipètung i mo mi babo, "Uè, Kuidah ngo jelma idi, tapi bagè tongkoh merdalan-dalan." ²⁵ Iampèken Jesus nola mo tanganNa mi mata sipètung idi. Nai ipetangkan sipètung idi nola mo menengen. Malum mo enggo matana i janah enggo ndorok ntangkas kalohon mengidah. ²⁶ Nai ipasulak Jesus mo ia balik janah idokken bana, "Ulang kono balik mi kuta!" ²⁷ Laus mo Jesus rebbak dekket sisinNa mi kuta silot i gembar Kaisarèa Pilipi. I tengah ndalan, ikusoken Jesus mo taba kalak idi, "Isè ngo Aku idokken sinterrem?" ²⁸ Ialoi kalak idi mo, "Lot dèba mendokken, si Johanes Peridiken, lot ma dèba mendokken, si Elias, tapi sidèban ma mendokken, sada kalak ibas nabi-nabi idi nai." ²⁹ "Kènè, bakunè ngo dok atè ndènè?" nina Jesus. "Ukum dok ndènè isè ngo Aku?" Ialoi si Petrus mo, "Kono ngo Raja Sipaluah siniperbagah-bagah idi!" ³⁰ Nai ipernoi Jesus mo kalak idi, asa ulang ibagahken barang bai isè pè terrèngèt diriNa. ³¹ Enggo kessa i ibagahken Jesus mo taba sisinNa, ia ukum Anak Jelma idi kennah menggong simpersuk ngo. Kennah ialo pengulu-pengulu ngo, bagi ma dekket imam-imam ekuten dekket guru-guru agama. Ibunuh mo ia, tapi balik nggelluh ngo Ia ari petelluken. ³² Ntangkas kalohoon ngo ibagahken Jesus terrèngèt idi taba sisinNa. Tapi iarahken si Petrus mo Jesus pellinsa, naing ipesèngèt katèna. ³³ Tapi mènter ipodiken Jesus mo si Petrus, idempakken mo sisinNa sidèbanna i, ilagai mo si Petrus. Idokken Jesus mo, "Laus mo kono isèn nai bolis! Sinipikiren jelma ngo pikirenmi; oda pikiren Dèbata!" ³⁴ Nai idilo Jesus mo jelma nterrem ni sidi dekket sisinNa. Idokken mo taba kalak idi, "Barang isè uè mengèkutken Aku, kennah ipesisi mo nipergeddo dagingna, nai ipersan mo silangna, nai pè asa ièkutken Aku. ³⁵ Ai barang isè sinaing mempertahanken nggelluhna, i ngo kembalangen kessah. Tapi kalak siuè memerrèken nggelluhna baKu dekket kumarna Berrita Simerandal bai Dèbata nai, i ngo pegelluhkensa. ³⁶ Kadè mo labana bai jelma, mula pè milikna suberri dunia ènda ukum mago ngo kessahna? Tentu oda lot gunana! ³⁷ Ndorok kin mo dok atè ndènè kessah i itukar dekket barang kadè pè? ³⁸ Barang isè mèla mempertuhu Aku dekket peddahKu ipas jaman jukkat bak jahat èn, Anak Jelma i pè mèla ma ngo mempertuhuken jelma sibagidi tikan roh Ia sikali èn merdengan kemuliaen BapaNa rebbak dekket Malaèkat-malaèkatna simbadia i."

¹ "Èngèt mo!" nina Jesus. "Lot ngo barang piga kalak si nisènda èn, oda dènga matè kum mak dèng iidah Dèbata memerèntah merkitè kuasa!" ² Enggo kessa ennem ari nola, idilo Jesus mo si Petrus, si Jakobus dekket si Johanes simerkaka-kuanggi idi, iarahken mo kalak idi memellin mi sada delleng ndates. Soh kessa kalak idi mi sidi, idah kalak idi mo mobah rupa Jesus bagè merbendella. ³ OlesNa mbulan merkillok-killok. Isè poda ndorok i dunia ènda menaptapi bagidi mbulanna oles. ⁴ Nai iidah sisinna sitellu idi mo Jesus mengeranai dekket si Elias bak si Musa. ⁵ Idokken si Petrus mo taba Jesus, "O Guru, merrasana i siakap i sènda. Kubahan kami mo isèn tellu sapo-sapo: sada baMu, sada bai si Musa janah sada nai bai si Elias." ⁶ Situhunna oda ngo ibettoh si Petrus kadè naing dokkenenna, ai mbiar kalohoon ngo ia bagi ma denganna sidua kalak idi. ⁷ Nai mènter roh mo hembun menangkemmi kalak idi dekket lèndungna, terdengkoh mo sora i hembun idi nai mendokken, "Èn ngo AnakKu siKukekellengi i. Uèi kènè mo Ia!" ⁸ Mènter tumulih mo kalak idi kuliling, isè nèngè poda lot idah isidi rebbak dekket kalak idi, pellin Jesus nai ngo kessa. ⁹ Enggo kessa i, mengencuah mo kalak idi i delleng i nai. Sinderrang lako susur idi idokken Jesus mo bagèen taba kalak i, "Ukum makdèng balik nggelluh Anak Jelma idi i kematèen nai, ulang bagahken kènè barang mendahi isè pè siniidah ndènè ndai." ¹⁰ Iuèi kalak idi ngo tennah idi, tapi lot mo samah-samah kalak idi mersikusoon, tah kadè ngo maksud Jesus mendokken, "Balik nggelluh i kematèen nai." ¹¹ Nai ikusoi kalak idi mo Jesus, "Kasa idokken guru-guru agama kennah lebbèen ngo roh si Elias?" ¹² Ialoi Jesus mo, "Tuhu ngo lebbèen roh si Elias lako menghantari karinana. Tapi bakunè ngo terrèngèt Anak Jelma? Kadè sebabna asa ibas Bibèl tersurat, menggong simpersuk ngo Ia janah ipelèa-lèa dèba? ¹³ Mendè mo èngèt kènè èn. Enggo roh si Elias, lemmo-lemmona ngo ibaing tabasa. Pas ngo i bagè sienggo tersurat ibas Bibèl terrèngèt dirina." ¹⁴ Enggo kessa roh kalak idi mulak rebbak dekket sisiin sidèbanna idi, idah kalak idi mo mbuè jelma i sidi. Lot mo isidi piga-piga kalak guru agama tupung mersoal dekket sisinna. ¹⁵ Idah kalak idi kessa mo Jesus, lolo mo kalak idi, mènter merlojangen mo menimbakiSa. ¹⁶ "Kadè ipersoalken kènè dekket guru-guru agama idi?" nina Jesus mengkusoi sisinNa idi. ¹⁷ Ialoi sada kalak ibas jelma mbuè idi nai mo, "O Guru, kuembah ngo dukakku taba Guru i. Solpetten ngo ia gabè pekkak. ¹⁸ Mula selluk kessa tendi sètan idi, itembem-tembemken mo dirina mi tanoh i, babahna merkupkup, èpenna pekekerrep, nai mènter nggenggeng mo karina dagingna. Enggo kuèlèk-èlèk sisin Guru idi asa iusir sètan idi, tapi oda terpemalumsa." ¹⁹ Nai nina Jesus mo taba sisinna i, "Nong kènè i! Oda ngo keppè percaya kènè. Sadikè dekkah nai Aku rebbak dekket kènè janah sobar mengidah kènè? Embah kènè mo misènda anak idi!" ²⁰ Iembah kalak i mo anak idi mendahi Jesus. Iidah tendi sètan i kessa mo Jesus, mènter ipegenggeng sètan i mo anak idi, gabè geppah mi tanoh janah gumoling-goling. Babahna pè merkupkup mo. ²¹ Nai ikusoi Jesus mo bapa anak idi, "Enggo sadikè dekkah ia bagèen?" "Mulai anak-anak nai ngo!" nina bapana idi. ²² "Enggo ngo nggati naing ibunuh sètan idi ia merkitè idabuhken dirina mi api barang mi laè. Tapi mula ndorok ngo iurupi Guru idi, masèh mo atèMu bai nami, urupi mo kami!" ²³ "Bakunè nimu? Mula ndorok?" nina Jesus. "Ndorok ngo karinana asal kalak percaya!" ²⁴ Mènter ipegang partua i mo sorana, "Tuhan, percaya ngo aku, tapi kurang ngo belgahna kepercayanku. Urupi mo aku, asa makin percaya!" ²⁵ Idah Jesus kessa mo enggo makin mbuè jelma rengngem, ipasulak mo tendi sètan idi laus. Idokken mo, "Alè tendi tongkik dekket pekkak, Kudokken bamu, laus mo kono bai anak ènda nai, janah oda ndorok nèngè kono balik mendahisa!" ²⁶ Mendengkuk mo tendi sètan idi, ipegenggeng mo daging anak idi, nai karuar mo ia bai anak idi nai. Bagè bangkè nai ngo idahen daging anak idi, gabè karina kalak mendokken, "Enggo matè ia." ²⁷ Tapi ijèmak Jesus mo tanganna, iteggu mo asa kèkè. Nai kèkè mo anak idi. ²⁸ Enggo kessa mi bages Jesus, ikusoi sisinNa mo ia, "Kasa oda terusir kami ndia tendi sètan idi?" ²⁹ "Sètan sibagidi, oda ndorok terusir i merkitè-kitè sidèban, pellin merkitè sodip ngo kessa," nina Jesus. ³⁰ Berkat nola mo Jesus dekket sisinNa menerusken perdalanen memellus Galilea. Oda lemmo atè Jesus ibettoh dèba barang i dikè Ia, ³¹ kerna sidang mengajari sisinna Ia. "Anak Jelma, isohken mo taba kuasa jelma," bagi ngo idokken Ia, "Tapi balik nggelluh ngo Ia i ari petelluken!" ³² Oda iarti sisiin idi niajarken Jesus, tapi oda ma lot isè pang lako mengkuso tabaSa. ³³ Nai soh mo kalak i mi Kapernaum. Enggo kessa i sapo kalak idi, ikuso Jesus mo sisinNa, "Kadè ngo niranaen ndènè i tengah ndalan ndai?" ³⁴ Tapi oda ialoi kalak idi, kerna i tengah ndalan merselisih ngo kalak idi terrèngèt isè ngo kalak idi simbellenna. ³⁵ Kundul mo Jesus, nai idilo mo sisinNa sisipuluh dua i, idokken mo taba kalak i, "Barang isè naing perlebbè, ibaing mo dirina gabè perpodi, janah gabè naposo i karina jelma." ³⁶ Enggo kessa i iarahken mo sada kalak anak-anak janah ipecènder mi hadeppen kalak idi karina. Ikaol Jesus mo anak-anak idi ninganna idokken taba sisinNa, ³⁷ "Barang isè menjalo anak-anak sibagèen kumernaken Aku, Aku ngo nijalona. Janah barang isè menjalo Aku, oda ngo pellin Aku nijalona, tapi Dèbata sipasulakken Aku dekket nijalona isidi." ³⁸ Nai idokken si Johanes mo taba Jesus, "O Guru, kuidah kami lot ngo mengusir sètan mengasangken gerarMu. Kugerra kami ngo ia memmaing bagidi kumarna oda denganta ia." ³⁹ Tapi ialoi Jesus mo, "Ulang gerra kènè ia, kerna barang isè memmaing kellengangen merkitè gerarKu, tentu oda ngo mènter merukur jahat ia meraloken Aku. ⁴⁰ Ai barang isè oda mengalo kita, merlapaten ngo i, kan kita ngo ia. ⁴¹ Èngèt kènè mo! Barang isè memerrè kènè mènum kemulihken mengèkutken Raja Sipaluah i kènè, ibalesken Dèbata ngo bana kinimendèna i." ⁴² "Barang isè memmaing sada kalak ibas anak-anak ènda nai sienggo percaya kin taba Aku gabè mortat ibaing, lotiin mo igantungken mi kerahongna batu penggilingen janah iambongken mi laut. ⁴³ Mula tanganmu memmaing kono mengulaken ulaan siso nikellemmoken Dèbata, gettap mo tanganmi! Lotiin mo ko mertangan serrap masuk mi sorga, ulang pada cukup mersendihi keppè masuk mi narakka, imo api siamman sumendah. ⁴⁴ Isidi api oda nggèut mèntep janah olong nisidi oda ndorok matè.] ⁴⁵ Janah mula nèhèmu i memmaing kono mengulaken ulaan siso lemmo atè Dèbata, gettap mo nèhèmi. Lotiin mo kono mernèhè serrap masuk mi sorga, ulang pada bolet dagingmu ibuang mi narakka. [ ⁴⁶ Isidi mo api siso nggèut mèntep dekket olong nisidi mak ndorok matè.] ⁴⁷ Mula matami memmaing kono mengulaken siso lemmo atè Dèbata, polditken mo matami! Lotiin mo kono mermata sada tapi gabè ginemgem i Kerajaen Dèbata, ulang pada bolet dagingmu mi narakka. ⁴⁸ I sidi mo api siso nggèut mèntep dekket olong nisidi mak ndorok matè. ⁴⁹ Karina jelma kennah memellus api pengojiin asa lot penguèen bana. Merkitè bagidi, enggo bagè sinisiraan ia. ⁵⁰ Mendè ngo sira i, tapi mula gabè ndèngap sira idi, bakunè nola mo pemasinken sira i mengolihi? Jadi naing mo kènè bagè kalak sienggo isirai -- janah nggelluh mo kènè ibagasen damè."

¹ Enggo kessa i, itadingken Jesus mo bekkas idi janah laus mi nagerri Juda dekket mi nagerri i kèparen Laè Jordan. Nai merrohen ma mo jelma nterrem mencingkoi Jesus. Bagè biasana, iajari Jesus mo kalak idi. ² Roh ma mo dekket kalak Parisè lako mengenggep Jesus. Ikusoken kalak idi mo bagèen, "Peterrang mo bai nami, ndorok ngo kalak menirangken sinibagesna?" ³ Ialoi Jesus mo dekket kuso-kuso, nina mo, "Bakunè pana pendokken si Musa taba kènè?" ⁴ "Idokken si Musa mo, ndorok ngo isirangken sinibagesna, asal mo iberrèken surat sirang," nina kalak idi. ⁵ "Idokken si Musa pè bagidi, kumarnaken mahalna ngo kènè ajaren," nina Jesus taba kalak idi. ⁶ "Otang i mulana i nai ngo, imo tikan itempa Dèbata jelma i, idokken ngo, ’Itempa Dèbata mo kalak idi daholi dekket daberru. ⁷ Kernana i ngo asa kennah itadingken sada kalak anak laki mo partuana lako mengianken sinibagesna. ⁸ Nai gabè sada mo kalak i sidua.’ Jadi oda nèngè kalak i dua kalak, tapi sada ngo. ⁹ Kerna nai oda ndorok sirang jelma, sienggo nipesada Dèbata!" ¹⁰ Balik kessa kalak idi mi bages, ikuso sisinNa mo Jesus terrèngèt sindai. ¹¹ Idokken Jesus mo taba kalak i, "Nasa daholi simenirangken sinibagesna, janah kabin nola dekket daberru sidèban, merlangkah julu meddem ngo ia mi sinibagesna idi. ¹² Bagi ma ngo daberru simenirangken sinibalèna, janah kabin nola dekket daholi sidèbaan, merlangkah julu meddem ngo ia." ¹³ Lot mo kalak merembah anak-anak mendahi Jesus asa ijamah janah ipasu-pasu. Tapi ilagai sisiin Jesus mo kalak idi. ¹⁴ Menengen i, mellaga mo Jesus nai idokken mo taba sisinNa, "Belli kènè mo roh anak-anak idi mendahi Aku! Ulang gerra kènè, ai kalak sibagidi ngo ginemgem Kerajaen Dèbata. ¹⁵ Èngèt kènè mo! Barang isè oda bagè anak-anak menjalo Kerajaen Dèbata, oda mbengket ia gabè ummat Dèbata." ¹⁶ Enggo kessa idokken bagi, ikaol mo anak-anak idi, nai iampèken mo tanganNa mi babo kalak i gennep lako memasu-masu. ¹⁷ Sinderrang menerusken perdalanenNa Jesus, lot mo sada kalak anak laki roh lojang-lojang mendahi Jesus. Mènter mersembah mo ia mi hadeppen Jesus ninganna ikusoken, "O Guru, permendè ukur, bakunè ngo kubakin asa ndorok kujalo kenggelluhen situhunna janah soh mi amman sumendah?" ¹⁸ "Kasa idokken kono Aku permendè ukur?" nina Jesus. "Isè poda lot permendè ukur laènken Dèbata sendiri. ¹⁹ Otang enggo ibettoh kono sinidokken Dèbata: Ulang memmunuh, ulang merlangkah julu meddem, ulang menangko, ulang merluap, ulang mengkilang, pesangap mo bapamu bak inangmu?" ²⁰ "Alè Guru," nina, "mulai kèdèk nai dèng aku enggo mo kuulaken karinana idi." ²¹ Nai itengen Jesus mo ia ibagasen kelleng janah idokken, "Pellin sada matcam nai ngo kessa kurangna. Laus mo kono merdèa karina hartamu; nai berrèken mo tokorna bai kalak sincor, nai terrolih mo kono i harta ni sorga i. Enggo kessa idi, roh mo kono mengèkutken Aku." ²² Mendengkoh rana Jesus idi, sèkoh mo iakap, nai laus mo ia menadingken bekkas idi, ibagasen bonek, ai kaya joong ngo ia. ²³ Itengen Jesus mo sisinNa, nina mo taba kalak idi, "Mahal kalohoon ngo kalak sibèak mahan ginemgem i Kerajaen Dèbata!" ²⁴ Lengang ngo sisinNa idi mendengkoh rana Jesus idi. Tapi idokken Jesus nola ma mo, "Alè pa, mahal ngo lako mbengket gabè ginemgem i Kerajaen Dèbata! ²⁵ Murahen ngo gajah cucuk mi lubang jarum daripada sibèak mbengket mi Kerajaen Dèbata." ²⁶ Gabè tersengget mo sisiin idi kumarna kata niruapken Jesus idi, mersikusoon mo kalak i samahsa, "Ukum bagi, isè mo ndorok maluah?" ²⁷ Itengngen Jesus mo kalak i karinana janah ialoi, "Ukum bai jelma, oda terbakin idi, tapi ukum bai Dèbata terbakinsa ngo i, ai oda lot siso terbakin Dèbata!" ²⁸ Nai idokken si Petrus mo, "Tengen mo, enggo kutadingken kami karinana, lako mengèkutken Guru i." ²⁹ "Imo tuhu," nina Jesus. Asa èngèt kènè mo, "Kalak sienggo menadingken bagesna, barang kaka anggina, barang turangna, barang bapana, barang dukak-dukakna, barang jumana kumernaken Aku dekket kumarnaken Sukuten Kelluahen bai Dèbata nai, ³⁰ jalonna mo bagèndari pè seratus kali lempit buèna bages, kaka anggi, turang, inang, bapa, juma -- bagi ma ngo bang sindersa nola pè. Tapi seggen i ari podi, ijalo mo kenggelluhen situhunna soh mi amman sumendah idi. ³¹ Tapi mbuè ngo jelma sibagèndari ènda sienggo perlebbè gabè perpodi, janah mbuè ma ngo sibagèndari èn perpodi gabè perlebbè." ³² Sinderrang i tengah ndalan laus mi Jerusalem, Jesus dekket sisinNa, merdalan mo Jesus i lebbè sisinNa janah karina sisinna terendep-endep. Bagi ma ngo simengèkutken kalak idi i podi nai pè, mbiar ngo. Nai idilo Jesus mo manihan sisinNa i, ibagahken mo bai kalak i sinaing masa mi diriNa. ³³ "Dengkohken kènè mo," nina, "Bagèndari kita lako mi Jerusalem. Isohken mo i sidi Anak Jelma taba imam-imam ekuten dekket guru-guru agama. Iputusken kalak idi mo hukumen matè tabasa, janah ipesoh taba kalak siso Jahudi. ³⁴ Irèhè-rèhè kalak i mo Ia, icèduri, nai ipersilangken mo Ia. Tapi enggo kessa tellu ari, balik nggelluh ngo Ia." ³⁵ Nai roh mo si Jakobus dekket si Johanes dukak si Zebedeus mendahi Jesus, "O Guru," nina kalak i, "Lot pengidoon nami sinaing bakinenMu bai nami." ³⁶ "Kadè pana ipergeddo kènè sinaing bakinenKu bai ndènè?" nina Jesus. ³⁷ Ialoi kalak i mo, "Mula kundul kessa Ko sikalienda ibas Kerajaen Dèbata merdengan kuasa, kupido kami asa paduè kami kundul rebbak dekket Kono, sada i kamuhunMu, sada nai i kambirangMu." ³⁸ "Oda ibettoh kènè kadè nipido ndènè," nina Jesus taba kalak idi, "Sanggup ma ngo kènè mengènum i caban kinipersuk idi nai sinaing Kuènum idi, janah menggongken simpersah bagè sinaing Kugongken idi?" ³⁹ "Sanggup ngo," nina kalak idi. Nai idokken Jesus nola mo bai kalak idi, "Tuhu ngo nemmu dekket ngo kènè mengènum ibas caban kinipersuk idi nai bagè sikuènum idi janah menggongken simpersah bagè siKugongken idi. ⁴⁰ Tapi ukum memmaing isè kundul i kamuhunKu barang mi kambirangKu, oda ngo kuasangKu. Dèbata ngo menentuken barang isè mengkunduli bekkas idi." ⁴¹ Idengkoh sisiin sisipuluh kalak i nai kessa mo i, mellaga mo kalak i taba si Jakobus dekket si Johanes. ⁴² Nai idilo Jesus mo kalak i karina, idokken mo, "Ibettoh kènè ngo barang bakunè ibaing kalak penggemgemmi, memerèntah rayatna merkitè paksa janah ekuten nipebangkitna pè mengasangken gegoh ngo. ⁴³ Tapi ukum kènè oda ndorok bagi! Barang isè naing mersangap bai ndènè nai, kennah gabè perkebbas ndènè mo ia. ⁴⁴ Janah barang isè naing gabè huntuun, kennah gabè hamba mo ia bai ndènè. ⁴⁵ Ai Anak Jelma idi pè, oda roh ia asa ikebbasi. Tapi roh Ia lako mengkebasi ngo janah merrèken kessahNa mahan tebbus ni mbuè jelma." ⁴⁶ Soh mo kalak idi mi Jeriko. Nai itadingken Jesus dekket sisiin bak jelma nterrem i kessa kuta idi, lot mo i biding dalan idi sada kalak sipètung mengido-ngido. Si Bartimeus ngo gerarna, imo anak si Timeus. ⁴⁷ Idengkoh kessa enggo mentas Jesus kalak Nazaret, dilo-dilo mo ia, "Jesus, Anak si Daud! Masèh mo atèMu midah aku!" ⁴⁸ Ipincang jelma simentas i mo ia janah idokken asa sip. Tapi makin ipegang mo sorana mendiloken, "Alè Anak si Daud, masèh mo atèMu midah aku!" ⁴⁹ Nai mentadi mo Jesus janah idokken mo, "Diloi mo ia misènda." Idiloi kalak i mo sipètung idi. Idokken kalak idi mo tabasa, "Tennang mo kono! Kèkè mo ko, idilo Jesus ngo kono!" ⁵⁰ Nai ipitakken sipètung i mo jubahna, kèkè mo ia, laus mo ia mendapetken Jesus. ⁵¹ "Kadè ipergeddo kono Kubaing bamu?" nina Jesus mbangsa. Ialoi sipètung idi mo, "Alè Guru, ipergeddo atèngku asa merpendidah aku." ⁵² "Laus mo kono" nina Jesus, "enggo ipejuah kepercayaenmi kono." Nai mènter merpendidah mo ia gejapkenna i. Ièkutken mo Jesus merdalan.

¹ Tikan lako mendapetken Jerusalem, soh mo kalak idi mi Betpage dekket Betanma, i pispis Uruk Jetun. Ipasulak Jesus mo i sidi nai dua kalak sisinNa perlebbè. ² "Laus mo kènè mi kuta ni lebènta adoi," nina Jesus taba kalak idi. "Mbengket kessa kènè mi kuta idi, idahen ndènè mo i sidi anak kalodè tertambat, madèng nung ibaing dèba mahan kuda tunggang. Osari kènè mo kalodè idi, janah iring kènè mi sèn. ³ Mula lot kalak mendokken bai ndènè, kasa iosari kènè kalodè idi, dokken kènè mo: Perlu ngo i bai Tuhan i, janah ndor ngo iolihken i." ⁴ Laus mo sisiin sidua kalak i, janah idapet mo sada anak kalodè tertambat i pèntu pengkerruhen i biding dalan idi. Iosari kalak i mo kalodè i. ⁵ Ikuso kalak sicènder nisidi mo kalak idi, "Ei, merkadè kènè? Kasa iosari kènè kalodè i?" ⁶ Ialoi kalak idi mo bagè sienggo itennahken Jesus taba kalak i. Nai ibelli kalak nisidi mo iiring kalodè idi. ⁷ Soh kessa mendahi Jesus, ialasi kalak i mo gurung kalodè i dekket oles, nai ipasang Jesus mo. ⁸ Mbuè ma mo kalak mengalasken olesna mi dalan i, lot dèba menggamparken ranting kayu mi dalan sinialengna i jumana nai. ⁹ Kalak simerdalan i lebbè dekket simengèkut i podi nai pè mendiungken, "Poji mo Dèbata! Nipasu-pasu mo Ia siroh bai Tuhan i nai! ¹⁰ Nipasu-pasu mo kerajanNa siroh i -- kerajaen bapanta si Daud! Nipoji mo Dèbata sintèmbul i!" ¹¹ Nai soh mo Jesus mi Jerusalem, ibengketti mo Bages Dèbata, iperèso mo kuliling, nai berkat mo Ia mi Betania rebbakken sisinNa sisipuluh dua idi, kumarna enggo gellap. ¹² Sibarembenkenna, berkat kessa kalak idi i Betania nai, mellèhè mo iakap Jesus. ¹³ Itatap mo sada ngkabenna kayu ara ntem-ntem bulungna. Idahi mo batang kayu ara idi lako menengngen tah lot buahna. Tapi soh kessa Ia mi benna kayu ara idi, pellin bulungna ngo kessa lot idapet, ai madèng mosimna merbuah. ¹⁴ Nai idokken Jesus mo mi kayu ara idi, "Mulai bagèndari nai, isè poda ndorok nèngè kipangan buahmu!" Idengkoh sisin Jesus ngo kata idi. ¹⁵ Nai soh mo kalak idi mi Jerusalem, janah laus mo Jesus mi Bages Dèbata. Iusir Jesus mo karina jelma simertiga-tiga dekket simenokor nisidi. Mèja ni kalak penukari kèpèng pè dekket bangku simerdèa ndarapati ipentombang-mbalingken ngo karinana. ¹⁶ Isè poda ipadiat merembah barang kadè sambing arap kasèan Bages Dèbata idi. ¹⁷ Nai ipeddahi Jesus mo nisidi, nina mo, "Otang lot ngo tersurat ibas Bibèl bagèen: Idokken Dèbata, bekkas mersodip karina bangsa ngo BagesKu! Tapi gabè ibaing kènè nola ngo Bages Dèbata gabè bekkas pennamun!" ¹⁸ Idengkoh imam-imam ekuten dekket guru-guru agama ngo rana idi. Itulusi kalak idi mo dalan lako memmunuh Jesus, ai mbiar ngo kalak idi midahSa, kerna karina jelma nterem kagum mendengkoh peddahNa. ¹⁹ Cibonkenna idi, itadingken Jesus dekket sisinNa mo kuta idi. ²⁰ Njengkas sibarembenkenna i, tikan ilausi kalak i kayuara idi, idah kalak i mo enggo matè kayu ara idi soh mi uratna. ²¹ Nai ièngèt si Petrus mo rana sienggo iruapken Jesus mi kayuara idi. Gabè idokken si Petrus mo, "O Guru, tengen mo. Kayu ara sikenna kata idi enggo matè!" ²² Ialoi Jesus mo, "Èngèt mo! Percaya mo ko bai Dèbata. ²³ Ndorok ngo dokkenken ndènè taba uruk ènda, ’Mompat mo kono janah capak mi laut!’ saut ngo bagidi; asal mo ulang ragu-ragu kènè, janah mula percaya kènè, saut ngo sinidokken ndènè i karinana. ²⁴ Kernana i èngèt kènè mo: Mula mersodip kènè, mengido barang kadè, percaya mo kènè, enggo iberè Dèbata bai ndènè sinipido ndènè i, nai jaloon ndènè mo idi. ²⁵ Janah mula mersodip kènè, keppè oda selloh ukur ndènè taba sada kalak, lebbèen mo ampuni kènè ia, asa iampuni Bapa ndènè ni sorga i dosa-dosa ndènè. ²⁶ Mula oda iampuni kènè dosa sidèban, dosa-dosa ndènè pè, oda iampuni Bapa ndènè ni sorga idi.]" ²⁷ Mulak nola mo kalak i mi Jerusalem. Nai tikan merdalani mi kuliling Bages Dèbata, roh mo imam-imam ekuten, guru-guru agama dekket pengulu-pengulu Jahudi mendahi Jesus. ²⁸ Mengkuso mo kalak idi, "Kadè dalanna asa pang Kono memaing karinana ènda? Isè ngo memerrèken hak bamu lako memmaing bagidi?" ²⁹ Ialoi Jesus mo, "Aku pè naing kukusoi ngo kènè lebbè. Mula ialoi kènè kuso-kusongKu idi, nai pè asa Kubagahken bai ndènè terrèngèt hakku lako mahanken bagidi. ³⁰ Bagahken kènè mo bangku, isè ngo merrèken hak bai si Johanes Perridiken lako perridiken kalak, Dèbata ngo barang jelma?" ³¹ Nai mersungkuun mo kalak i samahsa, nina kalak idi, "Bakunè pendokkenta? ’Mula sidokken bai Dèbata nai,’ dokkenenna mo banta, kasa oda percaya kènè taba si Johanes?’ ³² Tapi mahal ngo mendokken bai jelma nai." Kerna mbiar kalak i midah jelma nterrem, ai karina kalak mendokken, nabi ngo si Johanes. ³³ Jadi ialoi kalak idi mo, "Oda kubettoh kami." Nai idokken Jesus mo taba kalak i, "Mula bagi ngo, Aku pè oda kubagahken taba kènè terrèngèt hakku lako mahanken karinana idi."

¹ Enggo kessa i, mengerana mo Jesus merkitè-kitè codiin mendahi imam-imam ekuten guru-guru agama bagi ma dekket pengulu-pengulu Jahudi idi. Idokken Jesus mo, "Lot mo sada kalak merpekken anggur, ipagar mo kuliling pekkenna idi. Nai ikurak mo lubang bekkas memerroh anggur i, janah ibahan mo pantar bekkas jaga. Enggo kessa i, ipebellah pinangken mo pekken anggur idi taba sigajiin. Nai laus mo ia kiladang. ² Enggo kessa dapet katikana mosim menapu buah anggur, ipasulak sidasa idi mo sada kalak naposona mendahi simemellah pinang idi lako menjalo bagianna ibas hasil pekken i nai. ³ Tapi itangkup simemellah pinang pekken idi mo naposo pasulaken i, ipekpekki mo, ipasulak mo balik, laju bagidi merembah kadè poda. ⁴ Nai ipasulak sidasa pekken idi nola mo naposona sidèban. Tapi ipekpekki pemellah pinang idi mo takal naposo idi, janah iusir ninganna ipelèa-lèa. ⁵ Ipasulak sidasa pekken i dèng ma mo naposona sidèban. Tapi ibunuh ngo naposo idi, bagi mo dakdak ibaing kalak idi taba mbuè naposo sidèbanna ma, lot dèba ipekpekki lot dèba ibunuh. ⁶ Isè nola mo ndorok bagèndari pasulaken sidasa pekken idi? Pellin sada kalak nai ngo kessa, imo anakna sendiri, nikekellengenna. Jadi perpodi ipasulak mo anakna sendiri mendahi pemellah pinang idi. Bakunè pè ihargai ngo anakku, katèna. ⁷ Tapi mengerrana mo pemellah pinang i samah-samahsa, ’Èn ngo warisna, aci sibunuh mo ia, asa banta milikna idi.’ ⁸ Nai itangkup kalak i mo anak idi, ibunuh mo. Bangkèna pè ipitakken mi ruar pekken idi." ⁹ Nai idokken Jesus nola mo, "Kadè mo ndia ibaing sidasa pekken idi? Bakunè pe kennah roh ngo ia, janah ibunuh pemellah pinang i, gabè ipesoh janah iberrèken bai pemellah pinang sidèban. ¹⁰ Tentu enggo pennah ijaka kènè ayat sitersurat i Bibèl bagèen, Batu sinipitakken tukang bages idi enggo gabè batu persoki. ¹¹ Ènda mo pemaing Tuhan; soh mo mendèna." ¹² Pengituai-pengituai Jahudi simendengkoh codiin idi merusaha lako menangkup Jesus, ai ibettoh kalak i ngo codiin idi merlapaten janah mengenna bai kalak idi, tapi mbiar ngo kalak i midah jelma mbellang. Jadi itadingken kalak i mo Jesus. ¹³ Barang piga kalak Parisè dekket horong si Herodes, ipasulak lako mengenggep Jesus merkitè-kitè kuso-kuso. ¹⁴ Roh mo kalak idi mendahi Jesus nina mo, "O Guru, kubettoh kami, kono sada kalak perrukur sènteng janah oda pella isarihken kono bakunè pemmikiren ndèba terrèngèt kono. Iajarken kono ngo terrèngèt lemmo atè Dèbata imo merdengan kebennaren sambing, kerna oda mengidahidah abè kono. Nai bakunè dok atèmu, bagahken mo bai nami, ’Mula sigarar belasting taba Kèsar Rom, mengelanggar hatoren agama ngo i barang oda? Kennah sigarar ngo idi barang oda?’ " ¹⁵ Ibettoh Jesus ngo taki-taki kalak idi. Nai ialoi mo, "Kasa ienggep kènè Aku? Pacidah mo taba Aku sada kèpèng pirak." ¹⁶ Nai iberrèken kalak i mo tabaSa sada kèpèng pirak. Ikuso Jesus mo kalak idi, "Gombaren janah cap isè ngo èn?" "Kèsar," nina kalak idi mengaloi. ¹⁷ "Mula bagi ngo," nina Jesus, "Berrèken kènè mo balik bai Kèsar barang milik Kèsar, janah berrèken balik bai Dèbata, barang milik Dèbata." ¹⁸ Roh mo mendahi Jesus piga-piga kalak Sadusè. [Kalak èn mo horong simendokken, oda lot ndorok balik nggelluh enggo kessa matè.] ¹⁹ "O Guru," nina kalak idi taba Jesus. "Ipeddahken si Musa banta mula matè daholi menadingken sinibagesna, oda sanga lot dèng dukakna, kennah igelluhi anggina mo daberru simbalu i, lako pecèndekken turunen bai kakana sienggo matè i. ²⁰ Lot mo pitu kalak sibeltek. Kabin mo situaan i, mènter matè oda dèng sanga lot dukakna. ²¹ Nai ialihken anggina sipeduaken mo daberru mbalu i. Tapi ia pè matè ma mo oda sanga lot dukakna. Bagi ma mo bang sipetelluken, ²² dekket peempatken soh mi pepituken. Ujungna matè ma mo dekket daberru idi. ²³ Mula balik nggelluh kalak i karina i ari kiamat, sinibages isè mo daberru idi? Kerna pituna kalak i enggo kabin dekketsa!" ²⁴ Ialoi Jesus mo, "Enggo laling kènè. Kerna oda iantusi kènè Bibèl, janah kuasa Dèbata pè oda iarti kènè. ²⁵ Ai mula balik nggelluh nola simatè idi, oda nèngè ngo kabin idi, tapi pergelluh kalak idi tosè bagè malaèkat ni sorga idi nai ngo. ²⁶ Janah terrèngèt sienggo matè ipegelluh mengolihi, makdèng ngo nung ijaka kènè ibas bukku si Musa, ’Aku ngo Dèbata si Abraham, Dèbata si Isak dekket Dèbata si Jakob.’ ²⁷ Ukum Dèbata i oda ngo Dèbata kalak simatè. Dèbata kalak singgelluh ngo Ia. Pilit ngo pengantusi ndènè i!" ²⁸ Nai roh mo sada kalak guru agama mendengkohken pengeranaan Jesus dekket kalak Sadusè idi. Idah guru agama idi enggo mendè pengaloi Jesus taba kalak idi i. Nai mengkuso mo ia taba Jesus, "Siapaina ngo patiin siperluna kalohon ibas nasa patiin idi nai?" ²⁹ Ialoi Jesus mo, "Patin raya perlebbè imo, ’Dengkohken kènè mo bangsa Israel! Pellin Dèbata Tuhanta idi ngo kessa Dèbata. ³⁰ Kennah kekellengenmu ngo Tuhan Dèbatamu ibas nasa atèmu dekket nasa kessahmu, dekket nasa pikirenmu dekket nasa gegohmu!’ ³¹ Patiin raya peduaken imo, ’Kennah kekellengenmu ngo sidèban, bagè pengkekelengimu mi dirimu sendiri.’ Oda lot nèngè patiin sidèban belgahen dari pada patiin sidua idi." ³² Nai idokken guru agama id mo taba Jesus, "Tuhu kaloon ngo Pengaloi Gurui! Bennar ngo karina nidokkenmu idi, pellin Dèbata ngo kessa Tuhan, oda lot nèngè laènkenna. ³³ Janah kennah ikekelengi jelma ngo Dèbata, ibas nasa atè-atèna, dekket ibas nasa pikirenna, dekket ibas nasa gegohna, janah kennah ikekelengi ngo jelma sidèban bagè pengkekelengina mi dirina sendiri. Lotiin ngo bagidi, ulang pada memèlèken pinakan bak pèlèen sidèbanna i babo langgaten taba Dèbata." ³⁴ Idah Jesus pengaloi guru agama idi enggo mo mendè kalohon. Gabè idokken Jesus mo mbangsa, "Enggo mulai iarti kono bakunè carana gabè ginemgem i Kerajaen Dèbata." Enggo kessa i, isè nèngè poda pang memmaing kuso-kuso taba Jesus. ³⁵ Sinderrang mengajari idi i Bages Dèbata, mengkuso mo Jesus, "Bakunè ngo asa idokken guru-guru agama, ukum Raja Sipaluah idi pemparen si Daud? ³⁶ Keppèken si Daud sendiri -- kumerna idomi Tendi Dèbata -- mendokken, ’Enggo idokken Tuhan i taba Tuhanku; kundul mo kono i kamuhunKu mèma Kubaing karina musuhMu tunduk baMu.’ ³⁷ Jadi, mula si Daud mendokken Ia ’Tuhan’, nai bakunè mo jadina Raja Sipaluah idi pemparen si Daud?" Jelma nterrem silot i Bages Dèbata idi, sennang ngo mendengkoh Jesus mengajar. ³⁸ Ibas pengajaren idi idokken Jesus, "Jaga mo kènè taba guru-guru agama. Ngkasah ngo kalak i merdalan-dalan memakkè jubah nggeddang janah lolo ngo ia mula ihormati dèba i pasar-pasar. ³⁹ Ipilih kalak i ngo bekkas mehangga i bages perguruun dekket i pèsta-pèsta. ⁴⁰ Ikilang kalak i ngo simebbalu, janah iakkal-akkali dekket bagesna. Lako memmoniken kejahaten kalak idi, mersodip nggeddang mo kalak idi. Asa, mberrat ngo hukum mengenna mi kalak i seggen!" ⁴¹ Sikali, kundul mo Jesus i gembar pèti pèlèen i Bages Dèbata. Iperdatèken Jesus mo jelma simenèktèkken kèpèngna mèduk mi sidi, ⁴² nai roh mo sada kalak daberru simebbalu. Irèhrèhken ma mo dua kèpèng tembaga, imo pèsèr, im siperterruhna kèpèng. ⁴³ Mènter idilo Jesus mo sisinNa, idokken mo taba kalak idi, "Perratèken kènè mo èn: Buèen ngo kèpèng niberrèken daberru simebbalu sincor adèi mi pèti-pèti idi ulang pada niberrèken karina kalak sidèbanna i. ⁴⁴ Kerna karina kalak i lebbih-lebbih hartana ngo iberèken. Tapi daberru simebbalu idi, tukasi pè ncor ia -- enggo iberrèken karina silot bana tukasi pè idi ngo kessa nggelluhna."

¹ Enggo kessai laus mo Jesus i Bages Dèbata i nai. Sinderrang bagidi idokken sada kalak ibas sisiin i nai mo, "O Guru, tengen mo bages ènda, bagi dekket batu nisusunna i. Soh mo mendèna!" ² Ialoi Jesus mo, "Iidah kono bagidi belgahna bages idi? Sada batu pè oda lot nèngè mersusun i bekkas idi tading. Kennah irumpakken ngo karinana." ³ Kessa i laus mo Jesus mi Uruk Zaitun janah kundul i sada bekkas mendempak mi lebbè Bages Dèbata. Roh mo mendahisa si Petrus, si Jakobus, si Johanes dekket si Andreas lako mengeranai pellin. ⁴ "Bagahken mo bai nami Guru," nina kalak idi tabaSa. "Ndigan mo masa idi karinana?" Janah kadè mo tanda-tandana mula enggo dapet tikkina masa idi. ⁵ "Kennah lot ngo germet bai ndènè," nina Jesus mengaloi, "asa ulang itipu dèba kènè. ⁶ Mbuè ngo kalak roh merkitè-kitè gerarKu ia nina, janah mendokken, ’Aku ngo Ia!’ nai itipu mo mbuè jelma. ⁷ Mula idengkoh kènè berrita geraha, ulang kènè mbiar. Kennah masa ngo sibagidi, tapi madèng ngo roh kettikana kiamat. ⁸ Mergeraha mo bangsa sisada merraloken bangsa sisada nai. Lako i dikè, masa mo rènur dekket kellèhèen. Karina idi pellin pertemmenanna dèng ngo idi bagè pengakap sada partua ibages rabisen nderrang lako kettaring. ⁹ Asa kennah mermanat ngo kènè, kerna kènè pè naing itangkup ngo janah iaduken mi runggu agama. Ipekpekki mo kènè i bages perguruun. Icaran mo kènè mi hadeppen penguasa dekket raja-raja kumernaken Aku, asa merkitè bagidi iindangken kènè terrèngèt Aku mendahi kalak idi. ¹⁰ Kennah lebbè isarken mo Sukuten Kelluahen bai Dèbata nai mi karina bangsa. ¹¹ Mula itangkup kènè, janah mula iembahken mi perhukumen, ulang kènè mbiar terrèngèt sinaing dokkenken ndènè. Mula enggo dapet tikkina naing mengerana, ruapken mo barang kadè sinibagahken Tuhan idi bamu sinaing ruapenkenmu i kettikana. Karina rana sinaing ranaenken ndènè, oda ngo rana ndènè idi, tapi rana siroh bai Tendi Dèbata nai ngo idi. ¹² Itakiken jelma mo dengan sibeltekna sendiri lako bunuhen. Bagi ma mo masa bai bapana mi dukakna. Dukak-dukak mengalo bai partuana, janah pesakatken kalak i lako bunuhen. ¹³ Karina ngo kalak merceggo atè midah kènè kumarnaken Aku. Tapi barang isè menahan soh mi puncana, ia ngo kessa ipaluah." ¹⁴ "Nai idahen ndènè mo, pengelako siso puna-puna masa i bekkas siso patutna. (Cataten penjaka: arti mo kadè lapatenna idi). Masa kessa idi, kalak sitading i Juda kennah mperrus mi delleng. ¹⁵ Kalak si ni pagu, ulang pella nèngè susur lako memmuat barang kadè i bages nai. ¹⁶ Kalak si ni juma, ulang pella balik nèngè lako mengaleng jubahna. ¹⁷ Soh mo ntengngamna simasa idi taba daberru simengkandong dekket partua ibages pennusuun. ¹⁸ Mersodip mo taba Dèbata, asa ulang masa bagidi tikan ari perrudan. ¹⁹ Kerna tikan bagidi lot mo kepersuken ntengam kalohoon, makdèng nung masa bagidi i dunia èn kessa nai itempa Dèbata dunia èn soh mi bagèndari, janah oda nèngè masa mi podinken èn. ²⁰ Ukum oda kin ipejoppok Dèbata tikki simasa idi, isè poda lot meluah. Tapi kemulihken ummatNa i ngo, gabè ipejoppok Dèbata tikkina. ²¹ Sinderrang bagidi, mula lot mendokken taba kènè, ’Ita tengen mo, Raja Sipaluah niperbagah-bagah idi isèn ngo Ia, barang i sadèi ngo Ia!’ -- ulang kènè percaya taba kalak idi. ²² Kerna raja-raja sipaluah palsu dekket nabi-nabi palsu naing roh. Ibaing kalak idi ngo ulaan kellengangen dekket tanda-tanda kellengangen lako menipu ginemgem Dèbata. Janah ninggat siterbakinsa, dekket ngo sienggo terpilih idi ma. ²³ Jadi, manat mo! Enggo Kubagahken karinana idi taba kènè, sinderrang madèng i permasana." ²⁴ "Enggo kessa salpun tikki simpersuk idi, gellap mo mataniari, bulan i pè maknè mercuhaya. ²⁵ Merrurus mo bintang ni langit idi, janah sompar-baèr mo karina silotna i abang-abang i. ²⁶ Sinderrang bagidi, teridah mo roh Anak Jelma i bagasen hembun merdengan hejji bak kuasa. ²⁷ Ipasulak mo malaèkatna lako pedèmpuken bangsana sienggo terpilih i dèsa siempat idi nai, i punca tanoh èn soh mi punca sisada janah i punca langit soh mi punca sisada ma." ²⁸ "Perdatèken kènè mo kayuara idi, mula mertunasi ia merratah bagi janah melamlam, ibettoh kènè mo mosim mpeddas enggo mayak njolmit. ²⁹ Bagi ma mo mula idah kè ma masa sindai, bettoh kènè mo enggo njolmit kalohon tikkina. ³⁰ Èngèt mo! Karinana simasa idi terjadi nderrang madèng matè karina jelma singgelluh bagèndari. ³¹ Salpun pè langit dekket tanoh, tapi ukum katangKu oda ndorok salpun." ³² "Tukasi pè bagidi, sada kalak poda memettoh ndigan arina barang pè kettikana. Malaèkat-malaèkat ni sorga idi poda, Anak Dèbata pè oda memettoh, pellin Bapa i sambing ngo kessa bettoh-bettohen. ³³ Asa kennah ngo kènè ndungo janah mergermet gennep tèk, ai oda ibettoh kènè, ndigan mo kettikana. ³⁴ Codi ngo i bagè sada kalak menadingken bagesna laus mi bekkas ndaoh. Itennahi mo naposona lako menjamotken bagesna idi, janah iberrèken siulanken naposo idi gennep. Taba penjaga pèntu itennahi asa mendè-mendè ijaga. ³⁵ Kernana i, kènè pè kennah merjaga-jaga ngo, ai oda ibettoh kènè ndigan pekiroh sidasa bages idi -- tah ciboon, tah tengah mberngin, tah takuak manuk, barang pè tah nderrang mbincar mataniari. ³⁶ Mula simpusta ia roh, ulang mo idapet kènè terpeddem. ³⁷ Kadè siKubagahken bai ndènè èn, Kubagahken ma ngo i taba karinana jelma, ndungo mo kono janah mergermet!"

¹ Dua ari nai asa dapet Pèsta Paskah dekket Ari Raya Roti Siso Meragi. Imam-imam ekuten dekket guru-guru agama menulusi dalan lako menangkup Jesus sip-sip naing bunuhenna. ² "Tapi ulang mo silaluken idi tikan pèsta idi," nina kalak idi, "asa ulang masa kegontaren." ³ Tikan Jesus tupung i Betania, i bages si Simon simersakit puru nambi idi kin, roh mo sada kalak kalak mendahiSa merembah gori-gori merrisi minak baungkus. Sinderrang mangan Jesus, ipecahken daberru idi mo gori-gori idi, iarirken mo minak baungkus idi mi babontakal Jesus. Maharga kalohoon ngo minak baungkus idi, ijadiken pulungen urat baungkus nai. ⁴ Ceggo mo atè dèba jelma silot nisidi, nina mo samah-samahsa, "Kadè gunana ibakin bagidi minak baungkus idi? ⁵ Ndorok ngo idèa minak idi lebbih tellu ratus kèpèng pirak; janah iberrèken tokorna idi bai kalak sincoor!" Ngerrah mo atè kalak idi taba daberru idi. ⁶ Tapi nina Jesus mo, "Belli mo ia! Kasa isusahi kènè ia? Ibaing ngo mendè janah sipojiin taba Aku. ⁷ Dak lot ngo i tengah-tengah ndènè kalak sincoor gennep tèk, mula uè kènè, ndorok ngo iurupi kènè kalak idi. Tapi ukum Aku oda ngo menettap rebbak kènè. ⁸ Ibaing daberru èn ngo kadè sindorok ibakin. Sinderrang madèng dapet kettikana, enggo ikebbasi Aku merkitè minak baungkus hatoren mengkubur Aku. ⁹ Percaya mo kènè! Barang idikè i suberri dunia èn Sukuten Kelluahen idi ibagahken, isukutken ma ngo sinibakin daberru èn mahan pernèngèten bana." ¹⁰ Sada kalak ibas sisiin Jesus si sipuluh dua kalak idi nai, mergerar si Judas Iskariot laus ngo ia mendahi imam-imam ekuten dekket niat menelbuh Jesus lako bai kalak idi. ¹¹ Nai sennang kalohon mo iakap kalak i mendengkoh pengidoon idi janah merjandi mo kalak i merrèken riar taba si Judas. Nai mènter itentuken si Judas mo tikkina lako menelbuh Jesus. ¹² I ari perlebbè Pèsta Roti Mak Meragi i -- idahi smsinna mo Jesus. Biasa ngo i ari i isembellih biri-biri Paskah -- Ikusoi sisiin i mo Jesus, "I dikè ngo dok atèmu kuhantari kami pangaan Paskah bai Guru i?" ¹³ Nai ipasulak Jesus mo dua kalak sisiin idi, nina mo, "Laus mo kènè mi kuta, pejumpa ngo kènè nahan i sidi dekket sada daholi merembah jantar merrisi laè. Èkutken kènè mo ia, ¹⁴ mi bages sinaing bengkettenna, janah dokken mo taba sidasa bages i, ’Alè bapa, ikusoken Guru i, idikè ngo bekkas Guru i dekket sisinNa lako kipangan pangaan Paskah.’ ¹⁵ Nai ituduhken mo bai ndènè sada bilik mbelgah perdates. Enggo kin ngo iatur bekkas idi dekket perkakasna, i sidi mo hantari banta." ¹⁶ Nai laus mo sisin sidua kalak i mi kuta. Tuhu ngo bagè sinidokken Jesus idi karinana. Mènter ikebbasi kalak i mo pangaan Paskah idi. ¹⁷ Berngin kessa, roh mo Jesus dekket sisinNa sisipuluh dua i. ¹⁸ Sidang kundul kalak i mangan, idokken Jesus mo, "Dengkohken kènè mo sikudokken èn, sada kalak bai ndènè nai sirebbakken mangan dekket Aku bagèndari, naing menelbuh Aku." ¹⁹ Gabè bonek kalohoon mo sisiin idi. Nai mengkuso mo sisiin idi sasakalak mendahi Jesus, "Oda ma ngo aku i Tuhan?" ²⁰ Ialoi Jesus mo, "Ukum kalakna imo sada kalak ibas kènè sisipuluh dua èn nai. Imo sirebbak sada permangaan dekket Aku. ²¹ Tuhu ukum Anak Jelma kennah matè ngo bagè sienggo tersurat ibas Bibèl. Tapi magosiana i kalak simenelbuh Anak Jelma i! Padaan kin ia ulang sanga tubuh!" ²² Sinderrang mangan idi kalak i, ibuat Jesus mo roti, idokken mo sodip mellias atè mi Dèbata. Ipenggelli mo roti idi, nai ipemberrèken mo taba sisinNa ninganna idokken, "Pangan kènè mo dagingKu ngo èn." ²³ Enggo kessa pul idi, ibuat nola mo sada perrènumen anggur. Idokken mo sodip mellias atè mi Dèbata, nai iberrèken mo siènumen idi bai sisinNa. Karina kalak idi mengènum anggur i sidi nai. ²⁴ Enggo kessa bagidi, idokken Jesus mo, "DarohKu ngo èn, siniorèken menebbus mbuè jelma, daroh mensahken perjandiin Dèbata. ²⁵ Percaya mo kènè: Oda nè Kuènum anggur bagèen i, soh mi katika Aku mènum anggur sirimbaru rebbak dekket kènè i Dunia Rimbaru rebbak BapangKu." ²⁶ Nai iendèken kalak i mo sada endè pemoji-mojiin. Janah enggo kessa pul idi, laus mo kalak i mi Uruk Jetun. ²⁷ Mengerana nola mo Jesus taba kalak idi, "Mperrus ngo kènè karina menadingken Aku. Kerna tersurat ngo ibas Bibèl, ’Ibunuh Dèbata ngo permakan idi, nai mperrus mo biri-birina mersitendeng dalanna.’ ²⁸ Tapi enggo kessa balik nggelluh Aku, Kulebbèi mo kènè mi Galilea." ²⁹ "Oda," nina si Petrus mengaloi, "Barang karina nola kalak i menadingken Guru i, ukum aku oda ngo." ³⁰ "Èngèt mo," nina Jesus, "I berngin ènda, sinderrang makdèng takuak manuk peddua kaliken, enggo mo tellu kali kono memerso, oda itandai ko nimu Aku." ³¹ Mènter ialoi si Petrus mo ntompel, "Mula pè kennah matè aku rebbak dekket Guru i, bakunè pè oda nggèut aku mendokken oda kutandai Guru i." Karinana ngo sisiin sidèbanna i mendokken bagi. ³² Soh mo kalak idi mi sada bekkas mergerar Getsemane. Idokken Jesus mo taba sisinNa, "Kundul mo kènè lebbè i sènda, Aku laus sigejap mersodip." ³³ Nai iarahken Jesus mo si Petrus, si Jakobus dekket si Johanes laus rebbak dekketSa. Mulai mo bonek ukurna janah bulisah. ³⁴ "Soh mo bonekna ukurKu," nina Jesus taba kalak i, "bagè dosken naing matè ngo pengakapKu. Pèma kènè mo i sènda janah ulang kè terpeddem!" ³⁵ Laus mo Jesus narih ndaoh cituk, nai tangkep mo mi tanoh janah mersodip. Ibas sodipNa idi ipidoken, mula ndorok asa ulang pella irasai simpersuk idi. ³⁶ "Alè Pa, O Pa," nina, "Ai oda lot mak terpetupa Bapa i. Agoi mo kinipersuk èn bangKu nai. Tapi ulang mo lemmongKu, lemmoMu mo saut." ³⁷ Enggo kessa i, balik mo Jesus, janah meddem ngo idapet sisinNa idi. Idokken mo taba si Petrus, "Simon, meddem ngo kono? Oda ngo terbaing kono ndungo giamken sada jom?" ³⁸ Idokken Jesus nola mo taba kalak idi, "Ndungo mo kènè janah mersodip, asa ulang mbengket kènè mi pengojiin. Ukum tendimu uè ngo mengulaken sibennar, tapi oda terrulaken kènè kerna ndotè ngo tabiat jelma." ³⁹ Iolihi Jesus nola mo mersodip sikali nai janah mendokken kata sodip bagè sindai ma. ⁴⁰ Enggo kessa i, balik nola mo ia mendahi sisinNa, janah idapet meddem dèng ma ngo kalak idi, ai soh mo mbotongna cilèben kalak i. Gabè oda ibettoh kalak idi kadè sidokkenkenna taba Jesus. ⁴¹ Tikan Jesus balik petellu kaliken taba kalak idi, idokken mo, "Iempet kènè dèng ngo meddem dekket mentadi? Enggo mi! Enggo jupa tikkina Anak Jelma itangkup janah ipesakat mendahi kalak perdosa. ⁴² Kèkè mo kènè, laus mo kita. Tengngen! Idi mo enggo roh menelbuh Aku!" ⁴³ Ningan tikan mengerana dèng Jesus, roh mo si Judas, sada kalak ibas sisipuluh dua sisiin idi nai. Rebbak dekketsa roh ma mo mbuè kalak merpeddang dekket merpalu-palu. Ipasulak imam-imam ekuten ngo kalak idi dekket guru-guru agama bagi ma pengulu-pengulu Jahudi. ⁴⁴ Enggo kin ngo itentuken penelbuh idi tanda bai kalak idi. "Mula idi kusanggoh," nina taba kalak idi, "I mo ia. Tangkup mo Ia janah iembah ijaga mertuhu-tuhu." ⁴⁵ Soh kessa si Judas, mènter idapetken mo Jesus janah nina mo, "Njuah-njuah Guru!" nai mènter isanggoh mo Jesus. ⁴⁶ Mènter roh mo jelma sirebbakken dekket si Judas idi menangkup Jesus, janah ilanggu mo Ia. ⁴⁷ Tapi sada kalak silot ni sidi menintak peddangna, itampul mo coping naposo imam huntuun idi sanga ntalsun. ⁴⁸ Nai idokken Jesus mo taba kalak idi, "Penjahat ngo Aku katèndènè, asa roh kènè merpeddang dekket merpalu-palu lako menangkup Aku? ⁴⁹ Gennep ari ngo Aku mengajari i Bages Dèbata i hadeppen ndènè, tapi oda itangkup kènè Aku. Tapi kennah ngo bagidi, asa saut bagè sitersurat ibas Bibèl idi." ⁵⁰ Mperrus ngo karina sisiin Jesus idi menadingkenSa. ⁵¹ Lot mo sada kalak anak perrana mengèkutken Jesus, pellin sirambar gedda ngo kessa i dagingna. Naing itangkup mo dekket ia. ⁵² Tapi ipaluahi mo geddana i, mperrus mo ia lubus sambing bagidi. ⁵³ Iiring mo Jesus mi bages imam huntuun. Enggo tumpu i sidi imam-imam ekuten, pengulu-pengulu Jahudi dekket guru agama. ⁵⁴ Dak mendirip-ndirip ngo si Petrus mengèkutken Jesus i podi nai narih ndaoh, soh mbengket mi kasèan bages imam huntuun idi. Kundul mo ia i sidi cidudu i gembar api lako pepedasken dagingna rebbak dekket perjaga idi. ⁵⁵ Imam-imam ekuten bak karina anggota rungguun mbellen idi menulusi dalan dekket bukti-bukti menalahken Jesus, asa ndorok ihukum matè. Tapi oda lot dapet kalak idi giamken sada pè. ⁵⁶ Mbuè ngo ipecènder saksi-saksi palsu, tapi merralo ngo kesaksiin kalak idi karina. ⁵⁷ Nai cènder nola mo tah piga kalak nai saksi palsu. ⁵⁸ Idokken mo, "Kudengkoh kami idokken kalak èn, Kurumpakken mo Bages Dèbata sinipecènder jelma ènda, janah enggo kessa tellu ari, Kupajek nola mo Bages Dèbata sidèban siso nibahan jelma." ⁵⁹ Tapi pengindangken kalak idi pè tong ngo merralo samah-samahsa. ⁶⁰ Nai cènder mo imam huntuun i hadeppen kalak idi karina, ikuso mo Jesus, "Oda ngo terraloi Kono giam sada kesaksiin kalak i terrèngèt Kono?" ⁶¹ Tapi sip sambing ngo Jesus, laju oda ialoi. Nai ikusoi imam huntuun i mo sikali nai mendahi Jesus, "Kono ngo Raja Sipaluah niperbagah-bagah idi? Anak Dèbata Simbadia ngo kono?" ⁶² "Aku mo i!" nina Jesus, "Idahen ndènè karina mo Anak Jelma i kundul i kamuhun Dèbata Pergegoh Sisotercodi, janah idahen ndènè mo Ia roh ibagasen hembun i langit nai!" ⁶³ Nai mènter iribakken imam huntuun i mo geddana, ninganna idokken, "Oda perlu nèngè saksi. ⁶⁴ Enggo idengkoh kènè ntompel kata-kataNa jahat idi. Bagèndari bakunè keputusenmu?" Karina kalak idi memmutusken salah Jesus, janah patut ihukum matè. ⁶⁵ Nai dèba kalak idi mulai mo mencèduri Jesus, lot dèba menutupi mataNa janah ipalui mo, ninganna idokken, "Aloi mo Kudengkoh, isè memmalu kono?" Perjaga i pè dekket ngo memarapi Jesus. ⁶⁶ Sidang i kasèan i si Petrus, roh mo sada kalak naposo daberru imam huntuun i mi kasèan i. ⁶⁷ Idah kessa si Petrus cidudu i gembar api idi, iperdatèken mo abè si Petrus, idokken mo, "Kono pè otang sisiin Jesus kalak Nazaret idi ngo?" ⁶⁸ Tapi iperso si Petrus mo, "Oda kubettoh janah oda kuantusi kadè maksudmu," nina taba naposo idi. Nai laus mo si Petrus mi pèntu gerbang imam huntuun i. [Nai mènter takuak mo manuk.] ⁶⁹ Idah naposo daberru idi dèng ma mo ia i sidi. Idokken nola mo taba jelma nisidi, "Tuhu ngo kalak èn sada kalak ibas sisiin Jesus idi nai!" ⁷⁰ Tapi iperso si Petrus dèng ma. Oda ndekkah kessa bagidi, idokken jelma nisidi nola mo taba si Petrus, "Mak ndorok mada, sada kalak bai kalak i nai ngo kono, kerna kalak Galilea ngo kono!" ⁷¹ Isumpah-sumpahken si Petrus mo, nina mo, "Mènter isintakken pè aku, oda kutandai kalak nidokken ndènè i!" ⁷² Gejapkenna idi mènter takuak mo manuk pedua kaliken. Ièngèt si Petrus mo kata nidokken Jesus tabasa, "Nderrang madèng takuak manuk peddua kaliken, enggo tellu kali idokken kono, oda itandai kono Aku." Nai tangis semmep-semmep mo si Petrus.

¹ Njengkas kalohon, karina runggu Agama rebbak dekket imam-imam ekuten, pengulu-pengulu Jahudi dekket guru-guru agama mersungkuun. Ilanggu kalak i mo Jesus, iiring mo Ia, janah ipesakat mendahi si Latus. ² Ikuso si Latus mo Jesus, "Tuhu ngo Kono raja kalak Jahudi?" "Uè! Bagè nidokkenmi mo tuhu," nina Jesus mengaloi. ³ Mbuè ngo tukas idokken imam-imam ekuten taba Jesus. ⁴ Nai ikuso si Latus nola mo Jesus, "Oda ngo uè Kono mengaloi? Tengen mo matcam bagè nitukasken kalak idi taba Kono!" ⁵ Tapi laju oda uè Jesus mengaloi, gabè lengang mo si Latus. ⁶ Gennep Pèsta Paskah, ncemmal ngo ipaluah si Latus sada kalak sikurungen mengèkutken nipilih jelma nterrem. ⁷ Ibas pemberontak-pemberontak sikurungen, lot mo sada kalak daholi mergerar si Barabas imo kalak simemunuh jelma tikan kegontaren. ⁸ Mertumpu mo jelma nterrem janah mengido taba si Latus asa ipaluah sada kalak sikurungen bagè ncemmalna. ⁹ Ikuso si Latus mo kalak idi, "Uè ngo kènè asa kupaluah raja kalak Jahudi i bai ndènè?" ¹⁰ Ibettoh si Latus ngo, iaduken imam-imam ekuten pè Jesus tabasa, pellin kumarna ncian ngo. ¹¹ Tapi iajar-ajari imam-imam idi mo jelma nterrem, asa ipido taba si Latus, si Barabas mo ipaluah. ¹² Nai idokken si Latus nola mo taba jelma nterrem i, "Mula bagi bakunè mo kubaing taba kalak sinidokken ndènè Raja kalak Jahudi?" ¹³ Isurakken kalak idi mo, "Persilangken mo Ia!" ¹⁴ "Tapi kadè ngo pana kejahatenNa?" nina si Latus mengkusoi. Nai makin nggang mo isurakken kalak idi, "Persilangken mo Ia!" ¹⁵ Nai ipaluah si Latus mo si Barabas taba kalak idi, kerna asa sennang ukur kalak idi. Enggo kessa i, ipasulak mo lako mengeligasi Jesus, nai ipessoh mo asa ipersilangken. ¹⁶ Iembah soridadu i mo Jesus mi bages perhukumen i istana gubèrnur. Nai karina pasukan idokken mo mertumpu. ¹⁷ Ipakkèken kalak i mo jubah mbara messiap taba Jesus, ibakin mo bulang-bulangna ibas dori-dori nai janah ibaing mo idi mi takal Jesus. ¹⁸ Enggo kessa i, itabi kalak i mo Ia, "Njuah-njuah mo bai Raja kalak Jahudi!" nina kalak idi. ¹⁹ Ipalui kalak idi mo takal Jesus dekket tongket, nai icèduri mo Ia janah mersembah mi hadeppenNa. ²⁰ Enggo kessa ipelèa-lèa kalak idi Jesus, ibuka kalak i mo jubah mbara-messiap idi, ipakkèken nola mo pakkènNa kin. Nai iiring kalak i mo Ia mi ruar asa ipersilangken. ²¹ I tengah ndalan, ipaksa kalak i mo sada kalak daholi siroh i sosor kuta nai laus mi kuta merembah kayu persilang Jesus idi. (Gerarna si Simon -- anak Kirene -- bapa si Aleksander dekket si Rufus.) ²² Iiring kalak i mo Jesus mi sada bekkas mergerar Golgota, lapatenna "Bekkas Tulan-tulan". ²³ Naing iberrè kalak i mo isidi bai Jesus anggur mercampur mur, tapi oda uè Jesus mengènum. ²⁴ Nai ipersilangken kalak i mo Ia, olesNa ibagi-bagiken merkitèken tendung. ²⁵ Pukkul sibah siceggen mo Jesus ipersilangken kalak idi. ²⁶ I babo persilang idi isuratken ngo tukas bana bagèen, "Raja kalak Jahudi." ²⁷ Rebbak dekket Jesus ipersilangken kalak i ngo dua kalak nai pennamun, sada i kamuhunna, janah sada kalak nai kan kambirangna. [ ²⁸ Merkitè i, saut mo sitersurat ibas Bibèl, "Idokken dèba ngo ia kalak jahat."] ²⁹ Kalak simentas arap idi pè pellèa-lèaken janah mengerèhèi Jesus. Ipengopirken kalak i ngo takalna ninganna idokken, "Aa, akapi mo bagèndari! Kono sinaing mengerumpakken Bages Dèbata janah memajek nola ibagasen tellu ari. ³⁰ Susur mo kono i kayu persilang i nai janah paluah diriMu!" ³¹ Bagi ma mo imam-imam ekuten dekket guru agama mengerèhèi Jesus. Nina kalak i mo samahsa, "Sidèban ipaluah, keppè diriNa oda terpaluahsa! ³² Mula Raja Israel ngo Ia janah Raja Sipaluah niperbagah-bagah idi, susur mo Ia i kayu persilang i nai asa kuidah kami janah asa percaya kami baNa!" Kalak nipersilangken rebbak dekket Jesus idi pè ipelèa-lèa ngo Jesus. ³³ Tengah ari nai, gellap mo suberri nagerri i tellu jom dekkahna. ³⁴ I pukkul tellu ciboon, mersora nggang mo Jesus mendiloken, "Èloi, Èloi, lama sabakhtani?" Lapatenna, "Alè DèbatangKu, DèbatangKu, kasa itadingken Kono Aku?" ³⁵ Simendengkoh sora mendengkuk idi mendokken, "Dengkohken, idiloi ngo si Elias!" ³⁶ Sada kalak bai kalak i nai lojang mengaleng lumut, isernepken mo mi anggur macem. Nai ilekketken mo lumut i mi sada kayu, idudurken mo mi bibir Jesus, ninganna idokken, "Sipèma mo tah roh ma tuhu si Elias lako pesusurken Ia i kayu persilang i nai." ³⁷ Nai mersora nggang nola mo Jesus, mpostep mo kessahna. ³⁸ Merribak mo kirè-kirè Bages Dèbata, i babo nai mi terruh ribak dua. ³⁹ Soridadu sicènder i jolo kayu persilang idi, mengidah bakunè pendengkuk Jesus dekket permatèna, nina mo, "Tuhu ngo kalak èn Anak Dèbata!" ⁴⁰ Lot ma ngo ndaoh-ndaoh daberru memperdatèken karinana idi, imo si Salome, si Maria Magdalena, si Maria inang si Jakobus mposo dekket si Joses. ⁴¹ Kalak i mo daberru simengèkutken janah mengkebasi, sinderrang i Galilea Jesus. Mbuè dèng ma ngo daberru sidèban i sidi sienggo roh mi Jerusalem rebbak dekket Jesus. ⁴² Enggo mo ramben ari tikan roh si Josep i Arimatea nai. Anggota Sanhèdrin ngo ia janah kalak mersangap. Dak terpèma-pèma ngo ia mi Kerajaen Dèbata. Ari perkebbasen ngo ari i (imo ari mendapetken ari Sabat). Kernanai, iberraniken mo mendahi si Latus lako mengido bangkè Jesus. ⁴⁴ Lengang ngo si Latus mendengkoh enggo matè Jesus. Ipasulak mo menenggoi sada kalak ekuten soridadu, ikusoi mo tah enggo ndekkah matè Jesus. ⁴⁵ Enggo kessa idengkoh pendokken ekuten soridadu i, ipaduè si Latus mo ibuat si Josep bangkè Jesus. ⁴⁶ Itokor si Jusuf mo kaèn kapan lennen halus, janah ipesampur kessa bangkè Jesus, ibalut mo dekket kaèn idi. Itaruhken mo bangkè Jesus mi sada pendèbaan rimbaru sinipahat ibas uruk batu. Nai igoling mo sada batu mbellen mi babah lubang kuburen idi mahan tutupna. ⁴⁷ Dak iperdatèken si Maria Magdalena dekket si Maria inang si Joses ngo i dikè Jesus igamparken.

¹ Enggo kessa leppas ari Sabat, laus mo si Maria Magdalena, si Maria inang si Jakobus dekket si Salome menokor ramu-ramuun minak rempah mahan meminaki bangkè Jesus. ² Njengkas kalohon dèng ari perlebbè minggu i, laus mo kalak idi mi kuburen. ³ I tengah ndalan mengeranai mo kalak i samahsa, "Isè ngo mengurupi kita menggoling batu tutup lubang kuburen idi?" Ai mbelgah kalohon ngo batu idi. Tapi soh kessa kalak idi, iidah mo enggo tergoling batu idi. ⁵ Nai ibengketti kalak i mo pendèbaan i. Idah kalak i mo ibagasen lot sada anak perrana kundul kan kamuhun. Mbulan ngo jubahna gabè tersengget mo kalak i. ⁶ Nina anak perrana i mo, "Ulang kènè mbiar. Kubettoh itulusi kènè ngo Jesus kalak Nazaret sienggo ipersilangken i. Oda isèn nè ia. Enggo kèkè ia! Tengen kènè mo bekkas bangkèna gampar idi. ⁷ Laus mo kènè bagèndari, bagahken kènè mo berrita i mendahi sisinNa dekket si Petrus. Dokken kè mo, ’Laus ngo Ia mengelebbèi kènè mi Galilea. I sidi mo asa idahen ndènè Jesus, bagè sienggo nidokkenNa i kin bai ndènè.’ " ⁸ Karuar mo kalak idi i pendèbaan i nai, lojang mo kalak idi kerna sengget dekket mbiarna. Oda lot ibagahken kalak idi simasa i barang bai isè pè kumarna buradanna. PUNCA KARANGEN SI MARKUS MENGEKUTKEN NASKAH KUNO [ ⁹ Laus mo daberru-daberru i mendahi si Petrus dekket dengan-denganna, ninganna manukutken seppe karina sienggo nibagahken anak perana i taba kalak i. ¹⁰ Enggo kessa i, Jesus sendiri merkitèken sisinNa isukutken kalak i mo sukuten simbadia janah menettap i, ikebincaren nai mi kesunduten imo tersèngèt keluahen soh mi amman sumendah.] ¹¹ Tapi idengkoh kalak i kessa sukuten si Maria Magdalena magahken enggo balik nggelluh Jesus janah enggo idah si Maria, oda percaya kalak i. ¹² Enggo kessa i, ipacidah Jesus mo dirina taba dua kalak sisinNa merkitè cara sidèban. Masa mo bagidi tikan merdalan sidua kalak idi mi sada kuta. ¹³ Balik mo kalak idi janah ibagahken mo simasa taba denganna sidèbanna. Tapi oda ma tok kalak idi. ¹⁴ Perpodi, ipacidah Jesus mo dirina taba sisinNa taba sisipuluh dua kalak i, sinderrang mangan kalak idi. Ipincang ngo kalak i kerna kurang kepercayaenna janah oda tok taba kalak sienggo mengidah, nggelluh ngo Jesus. ¹⁵ Idokken Jesus mo taba kalak idi, "Laus mo kènè mi suberri dunia èn, bagahken kènè mo Sukuten Kelluahen bai Dèbata nai mendahi karina jelma. ¹⁶ Barang isè percaya janah iperridi, maluah ngo. Tapi kalak siso percaya, kenna hukum ngo. ¹⁷ Taba kalak sipercaya, iberrèken ngo tanda-tanda kuasa: Iusir kalak idi mo sètan-sètan merkitè gerarKu, mengerrana ngo kalak i dekket kata siso itandai kin. ¹⁸ Mula pè ijamah kalak idi nipè, barang iènum racun, oda kadèen kalak idi. Mula iampèken kalak i tanganna bai kalak sisakiten, njuah mo iakap sisakiten idi." ¹⁹ Enggo kessa mengerana Tuhan Jesus dekket kalak idi, mènter terkèkè mo Ia mi sorga. Isidi mo Ia kundul i kamuhun Dèbata. ²⁰ Nai laus mo sisinNa memagahken Sukuten bai Dèbata nai mi suberri aur. Dekket ngo Tuhan i mengula rebbak dekket kalak i lako petegguhken tuhuna ngo sukuten kalak idi.] PUNCA NASKAH KUNO SIDEBAN [