MATEUS

MATEUS

¹ Bagèen ngo tarombo Jesus Kristus pinempar si Daud. Mungkah bai si Abraham nai bagèen mo gerar-gerar ibas tarombo i: ² si Abraham, si Isak si Jakob, si Juda bak kaka-anggina, si Peres bak si Zerah (inang kalak i mergerar si Tamar), si Hezron, si Ram, si Aminadab, si Nahason, si Salmon, si Boas (inangna imo si Rahab), si Obed (inangna imo si Rut), si Isai, dekket Raja Daud. ⁶ (6b)Tikan si Daud nai soh mi tikki bangsa Israel ibuang mi Babel tersurat mo begèen: si Salomo (inangna imo sinibages si Uria), si Rehabeam, si Abia, si Asa, si Josafat, si Joram, si Usia, si Jotam, si Ahas, si Hizkia, si Manasye, si Amon, si Josia, si Jekhonya dekket dèdah-dèdahenna. ¹² Mungkah tikan bangsa Israel nai ibuang soh mi tikki pertubuh Jesus tersurat ngo gerar-gerar tarombo idi bagèen: si Jekhonya, si Sealtiel, si Zerubabel, si Abihud, si Elyakim, si Azur, si Zadok, si Akhim, si Eliud, si Eleazar, si Matan, si Jakob, si Josep sinibalè si Maria. Janah si Maria mo menubuhken Jesus simergerarken Raja Sipaluah siniperbagah-bagah Dèbata. ¹⁷ Mulai bai si Abraham nai soh mi si Daud, sipuluh empat cundut, bai si Daud nai soh mi kalak Israel ibuang mi Babel, sipuluh empat cundut ma. Nai i sidi nai soh mi pertubuh Raja Sipaluah i, tong ma ngo sipuluh empat cundut. ¹⁸ Bagèen ngo tersèngèt pertubuh Jesus Kristus: Ukum inangNa si Maria, imo ranto si Josep. Tapi sinderrang makdèng jejap kalak idi, merkitè kuasa Tendi ni Dèbata, berrat-berrat rumah mo si Maria. ¹⁹ Ukum si Josep rantona i, sada kalak mengulaken bennar ngo. Jadi naing isangsangi mo rantona si Maria i, janah ulang pella ibettoh dèba asa ulang mèla si Maria idi, i jelma nterrem. ²⁰ Tikan bagidi perukuren si Josep, datang mo nipina. Ibas nipina idi iidah mo sada kalak malaèkat, mendokken tabasa, "Alè Josep, pinempar si Daud, ulang kono mbiar jejap dekket si Maria, karna ukum anak sini dagingna (sinikandongenna) idi, bai Tendi Dèbata nai ngo idi. ²¹ Menubuhken sada anak mo ia, janah Jesus mo baing gerarna, kerna naing paluahenNa mo bangsaNa ibas dosa-dosana nai." ²² Masa pè karinana idi, asa saut ngo sinidokken Tuhan merkitè nabiNa bagèen, ²³ "Berrat-berrat rumah mo sada simerbaju janah menubuhken sada dukak daholi, baingenna mo gerarna Immanuel." (Lapaten Immanuel kata Heber imo denganta Dèbata). ²⁴ Terengnget kessa si Josep, iuèi mo sinidokken malaèkat i tabasa. Jejap mo ia dekket si Maria. ²⁵ Tapi sidekkah si Maria makdèng menubuhken anak i, oda campur si Josep dekket si Maria. Janah tubuh kessa anak idi, ibaing si Josep mo gerarNa Jesus.

¹ Ukum kuta bekkas Jesus tubuh imo kuta Betlehem i nageri Juda, tikan si Herodes Raja i sidi. Sinderrang nai roh mo mi Jerusalem kalak sipandè bintang i kebincaren nai, kuso-kuso, ² "Idikè ngo anak sirimbaru tubuh idi, sinaing gabè raja kalak Jahudi? Enggo kuidah kami bintangNa i kebincaren janah roh ngo kami naing mersembah tabasa". ³ Idengkoh si Herodes kessa kata i, tersengget kalohon mo ia bagi ma karina jelma silot i Jerusalem. ⁴ Idokken mo pulung karina imam ekuten dekket guru-guru Agama Jahudi, ikusoken mo taba kalak idi, "Idikè ngo bekkas tubuh Raja Sipaluah i, siniperbagah-bagah Dèbata?" ⁵ Ialoi kalak idi mo, "I Betlehem si ni nageri Juda ngo, ai bagèen ngo isuratken nabi, ⁶ ’Ukum kono alè Betlehem si ni Juda kètèksu ngo ko nemmuken mertimbangken karina kuta silot i Juda. Kerna bamu nai ngo naing roh sada kalak raja, sinaing menggem-gemi Israel bangsangKu.’ " ⁷ Enggo kessa ibettoh si Herodes, idilo mo sipandè bintang i kebincaren i nai merkitè kosik. Ikuso mo kalak i, ndigan ngo tuhu mulai idah kalak i bintang i. ⁸ Nai ipasulak mo kalak i laus mi Betlehem merkitè tennah bagèen, "Laus mo kènè, pemanat kènè mo Anak idi. Mula enggo jumpa kènè Ia, bagahken kènè mo bangku asa laus ma dekket aku mersembah baNa." ⁹ Nai laus mo kalak idi. I tengah ndalan, iidah kalak i nola mo bintang i, imo bintang siniidah kalak i tikanna i kebincaren. Merdalan ngo bintang idi i lebbè kalak i, nai kom mo i babo bekkas Anak idi. ¹⁰ Soh mo lolona kalak idi mengidah bintang i. ¹¹ Mbengket mo kalak idi mi bages i, janah idah kalak i mo Anak i dekket inangNa si Maria. Nai isembah kalak idi mo Anak i, enggo kessa i ibuka kalak i mo perbekasen hartana janah ipèlèken mo taba anak idi emmas, kemènjen, dekket minak mur mahan persembahenna. ¹² Tikan lako balik kalak i mi kutana, oda nèngè arap dalanna idi kin kalak i, karna enggo ipesèngèt Dèbata kalak idi ipas nipina, asa ulang nèngè pella balik mendahi si Herodes. ¹³ Enggo kessa laus sipandè bintang i, iidah si Josep mo sada malaèkat ibas nipina, nina malaèkat i mo, "Kèkè mo kono, embah mo Anak idi dekket inangNa mbungkas mi Mesir. I sidi mo kènè merian pèma roh nola ranangku bamu, ai iletlet si Herodes ngo Anak idi naing ibunuh". ¹⁴ Nai kèkè mo si Josep, iembah mo Anak i dekket inangNa mbungkas mi Mesir bernginna idi. ¹⁵ Merian i Mesir mo kalak i soh mi matè si Herodes. Saut mo sinidokken Tuhan i merkitè nabiNa, "I Mesir nai ngo Kudilo AnakKi". ¹⁶ Ibettoh si Herodes kessa enggo iakkali sipandè bintang idi ia, mellaga kalohon mo ia. Iperèntahken mo, kennah bunuhen nasa anak daholi simerumur dua tahun mi terruh,, i kuta Betlehem dekket i sikulilingna, ai bagi ngo cocok perndekkahna ibettoh bai sipandè bintang i nai. ¹⁷ Merkitè bagidi, saut mo sinidokken Nabi Jeremia, bagèen, ¹⁸ "Terdengkoh ngo sora derru-derru i kuta Rama, itangisi si Rahel ngo dukak-dukakna, oda terrapoon nèngè kalak i, ai enggo matè karina dukakna". ¹⁹ Enggo kessa matè si Herodes, iidah si Josep mo i Mesir sada kalak Malaèkat ibas nipina. ²⁰ Idokken Malaèkat i mo tabasa, "Kèkè mo kono, embah mo Anak idi dekket inangna balik mi Israel, ai enggo matè kalak sinaing memunuh Anak i". ²¹ Nai kèkè mo si Josep, iembah mo Anak i dekket si Maria balik mi Israel. ²² Tapi ibettoh si Josep kessa, si Arkelaus anak si Herodes ngo mbangkit raja gancih bapana si Herodes mengerajai Juda, gabè mbiar mo si Josep balik mi sidi. Enggo kin ma ngo ipesèngèt Tuhan i ia ibas nipina terèngèt idi, gabè mi Galilea mo ia laus. ²³ Merian i kuta Nazaret mo ia. Merkitè bagidi, saut mo sinidokken nabi-nabi bagèen, "Idokken dèba mo ia kalak Nazaret".

¹ Sinderrangna i roh mo si Johanes Peridiken mi padang gurun Juda janah mulai merjamita nina mo, ² "Tobat mo kènè ibas dosa-dosa ndènè nai, kerna ndor nèngè mo roh pemerèntahen Dèbata." ³ Si Johanes èn mo sinidokken Nabi Jesaya ibas ranana, "Sora tenggo-tenggo i padang gurun pelias kènè dalan bai Tuhan i, pedèas kènè mo dalan sidalanenNa i." ⁴ Ukum pakkèen si Johanes, bukbuk unto ngo. Pementingna koling-koling, panganna balang dekket tenggoli rambah. ⁵ Nterrem ngo roh jelma i Jerusalem nai, i suberri Juda nai dekket kuta si lot i kacimbang lambung Laè Jordan, merrohen mendahi si Jonanes. ⁶ Iperketuhu kalak i ngo dosa-dosana, nai iperidi si Johanes mo kalak idi i Laè Jordan. ⁷ Merrohen ma mo mèduk kalak Parisè bak Sadusè p’mendahi si Johanes lako iperidi. Tikan iidah si Johanes kalak idi merrohen, nina mo taba kalak i, "Kènè alè jelma jahat! Isè ngo mendokken taba kènè ndorok maluah tarap hukum Dèbata sinaing roh? ⁸ Tuduhken mo ibas ulaen ndènè, magahken enggo tobat kènè ibas dosa-dosa ndènè nai. ⁹ Ulang mo dok atè ndènè ndorok gabè maluah kènè pellin mendokken, si Abraham ngo empung nami. Bettoh kènè mo, i batu èn nai pè ndorok ngo ibaing Dèbata gabè pinempar si Abraham. ¹⁰ Enggo mo ampè takkè i babo daling, lako menabah kayu siso merbuahken merandal janah iporoni mi api. ¹¹ Kuperidi ngo kènè merkitè laè magahken enggo tobat kènè ibas dosa-dosa ndènè nai. Tapi roh nèngè mo Ia, iperidi mo kènè dekket tendi Dèbata bak api. Belgahen ngo ia asa aku. Salang merembah cipatuNa sambing pè oda dèng ndorok aku. ¹² I tanganNa ngo ndèru lako menapi, itapi ngo nasa pagè sampè mbersih. Nasa pagè mberras, ipepulung mo mi kebben, tapi ukum ronci dekket apa-apa, itutung ngo mi api siso ndorok mèntep." ¹³ Sinderrangna i laus mo Jesus i Galilea nai mi Laè Jordan. Idapetken mo si Johanes janah idokken mo asa iperidi si Johanes Ia. ¹⁴ Tapi icuba si Johanes ngo menulak pengidoen i. Nina si Johanes mo tabaSa, "Aku ngo nemmu iperidi Kono. Keppèken roh nola Kono mendahi aku." ¹⁵ Tapi nina Jesus mo, "Bagi mo lebbè ukum bagèndari. Ai merkitè bagidi enggo sibahanken nasa sinipergeddo Dèbata." Nai iperidi si Johanes mo Jesus. ¹⁶ Enggo kessa iperidi, karuar mo Jesus i laè idi nai. Mènter sintempu mo mbuka langit, iidah Jesus mo Tendi Simbadia susur bagè ndarapati, mi baboNa. ¹⁷ Nai terdengkoh mo Dèbata mendokken, "Èn ngo AnakKu siKukekelengi idi, ngkelleng ngo atèngKu midahsa." Ms. 22:2; Ps. 2:7; Jes. 42:1; Mat. 12:18, 17:5; Mrk. 1:11; Luk. 9:35*

¹ Enggo kessa i, iarahken Tendi Simbadia mo Jesus mi kelongoon asa iunjuni sibolis. ² Oda mangan Jesus empatpuluh ari empatpuluh berngin dekkahna. Nai melèhè mo iakap. ³ Roh mo sibolis mengunjunisa, "Mula Anak Dèbata ngo kono, dokken mo batu-batu èn gabè roti." ⁴ Ialoi Jesus mo, lot ngo tersurat ibas bukku, "Oda ngo ndorok ngelluh jelma i ibaing roti sambing, tapi kumarna kata ni Dèbata ngo." ⁵ Enggo kessa bagidi, iarahken sibolis i mo Jesus mi Jerusalem mi babo bungkulen Bages Dèbata. ⁶ Nai idokken sibolis i mo tabaSa, "Mula Anak Dèbata ngo kono, dabuhken mo dirimu mi terruh; ai tersurat ngo i bukku simabadia i bagèen, ’Ipasulak Dèbata ngo malaèkat-malaèkatNa menjaga Kono, janah itatang ngo Kono asa ulang tertuktuk nèhèmu mi batu.’ " ⁷ Ialoi Jesus mo, "Tersurat ngo ibas Bukku Simbadia idi bagèen, ’Ulang iunjuni kono Tuhan Dèbatamu.’ " ⁸ Nai iarahken Sibolis i nola ma mo Jesus mi sada delleng ndates kalohon, ituduhken Sibolis i mo i sidi karinana kerajaen dunia èn dekket karina kinibèakna. ⁹ Nai idokken Sibolis i mo mbang Jesus, "Karinana idi kuberrèken baMu, mula isembah kono aku." ¹⁰ Ialoi Jesus mo, "Laus mo ko Bolis, tersurat ngo ibas Bukku Simbadia i: Tuhan Dèbatamu ngo sisembahenmu, pellinSa ngo kessa siuèenmu." ¹¹ Ujungna laus mo Sibolis idi, nai roh mo Malaèkat-malaèkat mendahisa. ¹² Tikan idengkoh Jesus beritana, enggo ikurung si Johanes i Galilea. ¹³ Itadingken mo Nazaret, lako merrian i Kapernaum. Imo i biding tao Galilea i nageri Zebulon dekket Naptali. ¹⁴ Kumarna bagidi, saut mo sinidokken Nabi Jesaya bagèen: ¹⁵ "Tanoh Zebulon dekket Naptali, dalan lako mi laut, i kèparen Laè Jordan, Galilea siso masuk tanoh Jahudi, ¹⁶ kalak sinibagessen kegellapen, mengidah cuhaya mbellen enggo mbincar mataniari taba kalak sinilenggemmen kematèen!" ¹⁷ Mungkah i sidi nai mo Jesus menjamitaken, "Tobat mo ibas dosa-dosa ndènè nai, ai memerèntah nèngè mo Dèbata bagè Raja." ¹⁸ Tikan merdalan-dalan Jesus i biding Tao Galilea, iidah mo dua kalak sibeltek perikan, imo si Simon (igerari ma Petrus) dekket anggina si Andreas. Tupung menjala ngo kalak idi, ai perikan ngo kalak i. ¹⁹ Idokken Jesus mo taba kalak i, "Ekutken mo Aku, asa Kuajari kènè menjala jelma." ²⁰ Nai mènter itadingken kalak i sidua mo jalana idi janah ièkutken mo Jesus. ²¹ Iterusken Jesus mo merdalan, nai iidah nola ma mo dua kalak sibeltek sidèbanna, imo si Jakobus dekket si Johanes, imo dukak-dukak si Zebedeus ibagessen bungkina ngo kalak i rebbak dekket bapana peliasken jala. Idiloi Jesus nola ma mo kalak idi. ²² Mènter itadingken kalak i mo bungkina dekket bapana lako mengèkutken Jesus. ²³ Ikulilingi Jesus mo nageri Galilea i. Mengajari mo Ia i bages perguruen janah memagahken Sukuten Keluahen, imo Kerajaen Dèbata. Ipemalum ngo simersakit dekket simertikas. ²⁴ Tersaar ngo berita Jesus terèngèt Jesus idi i suberri nageri Siria, sanga ngo nterrem kalak merrohen mendahiSa. Iembah kalak idi ngo kalak simenggong matcam bagè sakit, dekket simenggong mermatcam bagè kesusahen; kalak sinisellapen tendi jahat, si solpetten, bagi ma dekket nitempuk sigading, ipemalum Jesus ngo karinana. ²⁵ Soh mo buèna kalak simengèkutken Jesus tikanna i, lot mo i dèba i Galilea nai, dèba i Sipuluh Kuta nai, dèba i Jerusalem nai, bagi ma i Juda nai, janah lot ma ngo dèba i kèparen laè Jordan nai.

¹ Tikan itengngen Jesus jelma mbellang i, merrohen mo simengèkutkensa tabasa. ² Nai ipungkah mo mengajari kalak idi: ³ "Sayur ntua ngo kalak simengakap dirina oda mergegoh janah mengharap pellin bai Tuhan sambing; ai kalak i ngo masuk mi Kerajaen Dèbata. ⁴ Sayur ntua ngo kalak sibonek atè, ai iapoi Dèbata mo kalak i. ⁵ Sayur ntua ngo kalak sincerrep merukur, ai jaloen kalak i mo siniperbagah Dèbata. ⁶ Sayur ntua mo kalak nteddoh mengulaken lemmo atè Dèbata, ai pebessuren Dèbata mo kalak idi. ⁷ Sayur ntua ngo kalak simerkelleng atè midah kalak sidèbaan, ai ikekelengi Dèbata ngo kalak idi. ⁸ Sayur ntua ngo kalak simpanting merukur, ai idahen kalak i ngo Dèbata. ⁹ Sayur ntua ngo kalak simemaing damè i tengngah jelma nterrem ai duka-dukak ni Dèbata ngo kalak i. ¹⁰ Sayur ntua ngo kalak simenggong simbernit, kumarna mengulaken lemmo atè Dèbata, ai kalak idi ngo masuk mi Kerajaen Dèbata. ¹¹ Sayur ntua mo kènè, mula irèhèi janah iletlet dèba kènè janah icemburu kumarna mengèkutken Aku. ¹² Bagi ngo ibaing kalak idi taba nabi-nabi i lebbènken ndènè pè. Lolo janah mersampang atè mo kènè, ai jaloon ndènè ngo upah ndènè mbelgah kalohon bai Dèbata nai." ¹³ "Kènè ngo sira dunia èn. Mula gabè ndèngap sira idi, kadè mo bakinen asa gabè masin mengolihi? Ipatakken mo i janah ideddoh-deddohi dèba. ¹⁴ Kènè ngo cuhaya dunia èn. Oda terboniken kuta si ni babo delleng. ¹⁵ Oda madun kalak menungkupi lampu sinilakatenna dekket kendang. Tapi mi babo perpelitaan ngo tupèh ibaing, asa icuhayai lampu idi nasa jelma silot i bages i. ¹⁶ Kennah bagi ma mo cuhaya ndènè merbindella i lebbè jelma nterrem, asa idah kalak i pemahan ndènè simerandal idi, nai ipoji mo Bapa ndènè ni sorga i." ¹⁷ "Ulang mo dok atè ndènè roh Aku lako mematei hatoren agama Jahudi siniajarken si Musa dekket nabi-nabi. Roh Aku oda ngo lako mematei, tapi lako petettahken ngo. ¹⁸ Èngèt kènè mo! Sidekkah lot dèng langit dekket tanoh èn, sada titik barang sada nggurat kettek pè ibas hatoren-hatoren idi oda ipitakken, mula makdèng ipesaut karinana. ¹⁹ Kumarnana i, barang isè mengelausken tah apaina pè i bas puhpuh idi nai, tah pè sikètèkna, janah memmedahken taba sidèbaan memaing bagidi ma, kalak sibagidi mo sikètèkna i ibas ummat Dèbata. Tapi barang isè pedalanken puhpuh idi janah memmedahken taba sidèban asa iulaken, kalak sibagidi mo simbelgahna i Kerajaen Dèbata. ²⁰ Èngèt kènè mo: Oda ndorok kènè gabè ummat Dèbata, mula mak lot kesurungen ndènè bai guru-guru Agama dekket Parisè nai, terrèngèt menguèi lemmo atè Dèbata." ²¹ "Ibettoh kènè ngo, lot peddah taba empungta bagèen: Ulang memmunuh; barang isè memmunuh, kennah irungguken ngo ia. ²² Tapi bagèndari Aku mendokken taba kènè, barang isè melaga taba sidèbaan, kennah irungguken ngo ia; janah barang isè mengurat-ngurati sidèbaan, kennah irungguken i runggu Agama. Nai, barang isè mendokken taba sidèbaan, ’Lengngah’ kennah idabuh ngo ia mi api narakka. ²³ Kerna nai, mula lot sakalak ibas kènè nai tupung memèlèken pèlèen taba Dèbata, keppè terrèngèt mo ia lot kalak simerncio atè bana, ²⁴ itadingken mo lebbè pèlèenna idi, laus mo ia lebbè merdamè dekketsa. Nai pè asa molih nola ia lako memmèlèken pèlèenna i taba Dèbata. ²⁵ Tah bakunè lot kalak mengaduken kènè taba penghukum, merdamè mo kènè dekketsa, sinderrang lot dèng tikki janah makdèng soh mendahi penghukum i. Mula oda, ipessoh kalak idi mo kènè taba hakim, nai isohken hakim i mo kènè mendahi Polisi. Nai ikurungken polisi idi mo kènè. ²⁶ Èngèt kènè mo èn: Oda ndorok karuar kènè i kurungen idi nai, ukum makdèng tupa karinana utang ndènè i." ²⁷ "Ibettoh kènè ngo lot peddah bagèen: Ulang kono merlangkah julu meddem. ²⁸ Bagèndari Aku mendokken taba kènè: barang isè menengen daberru janah tergerrek ukurna lako merlangkah pilit, enggo merlangkah julu meddem kalak sibagidi taba daberru idi ibagessen ukurna. ²⁹ Mula matamu kamuhun i ngo memmaing kono merdosa, polditken mo i janah pitakken, lotin mo kènè kembalangen dèba sindihi dagingmu idi daripada bolet dagingmu i ibuang mi narakka. ³⁰ Mula tanganmu kamuhun memmaing kono merdosa, gettap janah ambongken mo i, lotiin mo kono mak mertangan serrap daripada bolet badanmu idi masuk mi narakka." ³¹ "Lot ma ngo peddah bagèen: barang isè menirangken sinibagesna, kennah iberèken ngo surat sirang bana. ³² Tapi bagèndari Aku mendokken taba kènè: barang isè menirangken sinibagesna, keppèken oda ngo merlangkah julu meddem sinibagesna idi, i nola sebabna asa gabè merlangkah julu meddem sinibagesna idi mula sijahè nola. Janah barang isè mengkabini daberru sinisirangken i, merlangkah julu meddem ngo." ³³ "Ibettoh kènè ma ngo peddah mi empungta bagèen: ulang kènè mengosè bulaban. Barang kadè sienggo ibulabanken kènè i hadeppen Dèbata, kennah ngo ulaken. ³⁴ Bagèndari Aku mendokken taba kènè: Ulang mo kènè merbulaban. Ulang ma mo merbulaban mi langit i, karna bekkas Dèbata ngo langit idi. ³⁵ Barang pè mi tanoh èn, kerna alas nèhèNa ngo tanoh èn; barang pè mi Jerusalem, karna kuta raja aur ngo idi. ³⁶ Ulang mo merbulaban mi babontakalmu, kerna oda ndorok ko memaing bukmu idi mbulan barang mbèrèng giam sirambar pè. ³⁷ Dokken mo uè barang oda, mula lebbih isidi nai, bai sibolis nai ngo rohna i." ³⁸ "Ibettoh kènè ngo peddah bagèen: mata ngo abul mata, èpen ngo abul èpen. ³⁹ Tapi bagèndari Kudokken mo bai ndènè: ulang mo balesken kènè siso mendè taba kalak simaing siso mendè i. Tapi mula iparap kalak kurummu kamuhun, berrèken mo dekket kurummu kambirang. ⁴⁰ Janah mula iaduken kalak kè mi hakim mengido bajumu berrèken mo bana dekket inang bajumu. ⁴¹ Mula lot sada kalak perkuasa memaksa kènè asa ipersan embahen sabatu daohna, persan mo soh dua batu. ⁴² Mula ipido dèba bamu nai barang kadè, berrèken mo bana. Ulang mo itulak kono, kalak sinaing menginjam barang kadè bamu nai." ⁴³ "Ibettoh kènè ma ngo peddah bagèen: kekelengi mo denganmi janah kecegoken musuhmu. ⁴⁴ Tapi bagèndari Aku mendokken bai ndènè: kekelengi mo musuhmu, janah sodipken kènè mo kalak sipepersuk-persukken kènè, ⁴⁵ asa gabè anak Bapa ndènè sini sorga i kènè. Kerna ipebincar Dèbata ngo mataniari taba kalak bennar dekket taba kalak jahat pè. Iberrè ngo udan taba kalak simemaing bennar dekket simemaing jahat pè. ⁴⁶ Ai mula pellin kalak simengkekelengi kènè sambing ngo ikekelengi kènè, kadè mo pella balessen Dèbata sinibaing ndènè i? Otang kalak simenunggu belasting pè bagi ngo ibaing? ⁴⁷ Mula pellin taba denganmu sambing ngo kessa kènè mertabi, kadè mo kelebihenna? Kalak siso menandai Dèbata pè bagi ngo ibaing. ⁴⁸ Selloh ngo Bapa ndènè sini Sorga i mengkekelengi karina jelma. Kènè pè kennah bagidi ma ngo."

¹ "Èngèt mo ulang kènè mengulaken hatoren Agama ndènè i hadeppen sinterrem, pellin asa iidah dèba sambing, mula bagi ngo ibaing kènè, oda ngo iberrè Bapa ndènè si ni sorga idi upah ndènè. ² Mula iberrè kènè cudekkah taba kalak sincoor, ulang pella ibettoh dèba, bagè pemaing kalak perbuah ringadar. Perulaan ni kalak i simemaing bagidi i garèja dekket i dalan mbelgah asa ipoji kalak ia. Èngèt mo enggo ijalo kalak idi upahna merkitè bagidi. ³ Tapi ukum kènè, mula iberrèken kènè cudekkah ndènè sipsip mo iberèken, ulang lot mettohsa. ⁴ Selloh ngo sinibaingmu idi, oda pella ibettoh barang isè pè, ai ibettoh Bapa ndènè si ni sorga i ngo idi, janah iberèken mo upah bamu." ⁵ Mula mersodip kènè ulang mo bagè pemaing kalak sipekulah-kulahken. Ai ngkasah ngo kalak i mersodip ninganna cènder i bekkas persodipen dekket i sirpang dalan asa idah dèba. Èngèt mo, enggo ijalo kalak idi upahna. ⁶ Tapi mula mersodip kènè mi bilik mo kènè laus, gerruk kènè mo pèntu i, nai mersodip mo kènè taba Bapa ndènè siso teridah i, ai iidah ngo siniula ndènè siso nibettoh barang isè pè. Nai iberèken mo bai ndènè upah ndènè. ⁷ Mula mersodip kènè, ulang mo mergeddang-geddangen, bagè pemaing dèba siso menandai Tuhan. Idok atèna ngo idengkohken Dèbata sodipna simergeddang-geddangen idi. ⁸ Ulang mo bagidi. Ai enggo ibettoh Bapa ndènè kin, barang kadè perlu bai ndènè sinderrang madèng ipido kènè. ⁹ Bagèen mo sodip ndènè, ’Ialè Bapa nami si ni sorga: Dak niperbadia mo gerarMu. ¹⁰ Dak roh mo kerajaenMu, Saut mo lemmo atèMu i babo tanoh èn bagè si ni sorga. ¹¹ Berrèken mo bai nami sidari èn pangaan nami sipat ari. ¹² Sasa mo dosa nami bagè penasa nami, i dosa ni dengan simerdosa taba kami. ¹³ Ulang kami arahken mi pengojiin, paluah mo kami ibas pengago nai [Ai Ko ngo sidasa kerajaen, dekket kegegohen, bang pè kesangapen soh mi amman sumendah. Amèn.]’ ¹⁴ Mula isasa kènè dosa dengngan ndènè simerdosa taba kènè, sasaen Bapa ndènè si ni sorga i mo dosa ndènè. ¹⁵ Tapi mula oda isasa kènè dosa ni kalak simerdosa taba kènè, oda ma ngo isasa Bapa ndènè si ni sorga idi dosa ndènè." ¹⁶ "Mula puasa kènè, ulang mo merèngut abè ndènè bagè kalak sipekulah-kulahken. Ai merèngut ngo abè kalak i, asa ibettoh dèba kalak i puasa. Èngèt mo, idi mo upah sienggo nijalo kalak i. ¹⁷ Tapi mula puasa kènè, duhapi kènè mo abè ndènè, janah sori kènè mo buk ndènè. ¹⁸ Asa ulang ibettoh dèba puasa kènè. Asa pellin Bapa ndènè siso teridah idi ukum mettohsa. Ai iidah ngo siniulaken ndènè, siso nibettoh ndènè, nai iberèken mo upah bai ndènè." ¹⁹ "Ulang mo pepulung-pulung kènè harta dunia, sindorok terpangan karat dekket ngitngit i, janah ndorok tertangko penangko. ²⁰ Tapi pepulung-pulung mo harta sorga i, siso ndorok terpangan karat dekket ngitngit i, janah oda ndorok tertangko penangko. ²¹ Ai barang i dikè hartamu, dak mi sidi ngo ukurmu. ²² "Mata imo lampu ni daging. Mula ncihur penengenmu, ncihur mo karina dagingmu. ²³ Tapi mula ramben ngo penengenmu, gellap bulita mo karina dagingmu, soh mo gellapna karinana. Asa mula gellap ngo lampu dagingmu, soh mo gellapna karinana." ²⁴ "Oda ndorok sada kalak mahan bahaan taba dua induk. Kerna ikekelengi ngono sada, tapi ikecegoken ngo kum sisada nai. Barang, menguèi ngo ia taba sisada, tapi itonja ngo sisada nai. Bagi ngo bang kènè pè. Oda terbaing kènè mengula lako mi Dèbata ninganna mengula asa kaya ma. ²⁵ Kumarna nai, èngèt kènè mo, ulang pella kelsohken nggelluhmu mendok: Kadè mo pangaan dekket ènumen nami, kadè mo oles nami. Otang hargaen ngo kessah asa pangaan? ²⁶ Tengngen kènè mo manuk-manuk simerkabangen i, oda ngo mardang kalak idi, oda merrani, oda ma ngo pepulungken hasil suan-suanen mi kebben. Tapi ipehèdu-hèdu Bapa ndènè si ni Sorga i ngo kalak i! Otang lebbih mahargaen ngo kènè asa manuk-manuk? ²⁷ Isè mo kè ndorok pegedangken umurna giam cituk pè merkitè-kitè kekelsohen? ²⁸ Kasa mo pella ikelsohken kènè perolessen ndènè? Tengngen kènè mo bunga-bunga pancur simertubuhen i rambah idi. Oda ngo mengula kalak i, oda mertennun. ²⁹ Tapi perdatèken mo! Si Salomo bèak tangas-tangasen idi pè, oda ngo nung memakkè bagè sinipakkè bunga-bunga i mendèna! ³⁰ Salang dukut-dukut si ni rambah i bagidi mo mendèna sidari èn ipehèdu-hèdu Dèbata, keppè barembenkenna enggo mo ipatakken janah itutung. Mula bagi mo sellohna Dèbata pehèdu-hèdu dukut-dukut i, makinsa nola mo kènè! Tapi kepercayaenmu ngo oda ntegguh! ³¹ Ulang mo kènè roga ninganna mendokken, ’Kadè mo pangaan nami, barang kadè mo ènumen nami, barang kadè nola mo oles nami?’ ³² Kalak siso menandai Dèbata ngo dakdak mengkelsohken sibagidi. Ai ibettoh Bapa ndènè si ni Sorga i ngo, perlu idi bai ndènè karinana. ³³ Siperluna usahanken ndènè imo: bakunè carana asa ndorok kènè gabè ginemgem i Kerajaen Dèbata, janah mengulaken si ni pergeddo atèna. Mula enggo lebbèen idi itulusi kènè, nai iberrèken mo karinana sindai bai ndènè ma. ³⁴ Kumarna nai, ulang mo pella roga kènè terrèngèt ari baremben. Karna ari baremben pè lot ngo kelsohkenenna. Kesusahen sigennep ari pè, enggo mo toko mbotongna."

¹ "Ulang kènè menghukumi kalak sidèban, asa ulang ihukumi Dèbata kènè. ² Kerna bakunè kènè menghukum taba sidèbaan, bagi ma ngo Dèbata menghukumi kènè. Bakunè sukaten sinibaing ndènè taba sidèbaan, idi ma ngo sukaten ibaing Dèbata bai ndènè. ³ Kasa mo pukpuk iperèso-rèso si ni mata ndèba nasa pellèmen, keppèken nasa pungur i mata ndènè idi oda iperdatèken kè? ⁴ Bakunè mo kè mendokken taba denganmu, ’Dikè kuagoi pellèmen si ni matami,’ keppèken i matamu sendiri lot nasa pungur belgahna? ⁵ Ee, kènè perbuah ringadar! Lebbèen mo agoi pungur ni matami, ipè asa ntangkas idah ko, janah agoi nasa pellèmen si ni mata dengnganmu. ⁶ Ulang berrèken harta simbadia i taba biang, asa ulang merbhalik biang i janah menarut ko nola. Ulang berrèken buradda bai babi, asa ulang gabè ideddohi nola idi." ⁷ "Pengido kènè mo, nai jaloon ndènè mo, tulusi mo, nai dapet kènè mo, tuktuki kènè mo, nai bukaenna mo bai ndènè. ⁸ Ai dapetten ngo sidak tong mengido, kenaan ngo ngo si dak tong menulusi, janah ibuka ngo kalak si dak tong menuktuki. ⁹ Isè kènè merrèken batu taba dukakna ukum roti ngo ipido? ¹⁰ Barang nipè iberrèken, ukum ikan ngo ipido? ¹¹ Barang bakunè pè jahat ndènè, ibettoh kènè ngo memerrèken simendè taba dukak-dukak ndènè, makinsa nola mo Bapa ndènè si ni sorga i, tentu iberrèken simende taba kalak simengido tabasa! ¹² Bakin kènè mo lebbèen taba sidèbaan, barang kadè ipergeddo kènè naing bakinenna taba kènè. I ngo pemusaten hatoren agama sinipeddahken si Musa dekket nabi-nabina." ¹³ "Mbengket mo kènè arap pèntu sempit, kerna ukum arap pèntu mbellang janah dalan mbellen, mi narakka ngo puasna! Nterrem ngo kalak merdalan arap idi. ¹⁴ Tapi ukum pèntu sempit janah pècet, mi kenggeluhen ngo puasna. Oda piga kalak soh mi sidi." ¹⁵ "Mermanat mo kènè meradepken nabi-nabi palsu. Roh ngo kalak idi mendahi kènè bagè biri-biri, tapi ukum ukurna tosè bagè biahat menjerngem ngo. ¹⁶ Tandaan ndènè mo kalak idi merkitè-kitè hasil perulaenna. Oda terbuahken kopi-kopi buah anggur, janah oda terbuahken cipako, buah kayu ara. ¹⁷ Nasa Kayu merandal merbuahken mendè, tapi ukum kayu siso mendè nggodo ngo buahna. ¹⁸ Kayu merandal, oda nè merbuahken nggodo, janah ukum kayu nggodo oda ndorok merbuahken buah merandal. ¹⁹ Nasa kayu siso merbuahken merandal, itabah ngo janah itutung. ²⁰ Asa bagi ngo bang nabi-nabi palsu idi pè. Itandai kènè ngo kalak i merkitè-kitè perulanna." ²¹ "Oda ngo karina kalak simendiloi Aku, ’Tuhan, Tuhan!’ gabè ginemgem i Kerajaen Dèbata, tapi pellin kalak simengulaken lemmo atè BapangKu si ni sorga i ngo. ²² Tikan Ari Kiamat, mbuè ngo kalak mendokken bangKu, ’Tuhan, Tuhan,’ otang enggo kupesoh kami sukuten bai Dèbata nai merkitè-kitè Gerarmu! Janah otang merkitè-kitè Gerarmu pè enggo kupelaus kami nasa bolis, janah memaing matcam bagè tanda kelengangen? ²³ Tapi ningku mo, ’Oda kutandai kènè! Laus mo kènè i sèn nai, kènè simengulaken jahat!’ " ²⁴ "Barang isè simendengkoh kata èn, janah iulaken, codi mo ia bagè kalak si mpantas pekadèken bagesna i babo batu mpihir. ²⁵ Tukasi pè roh udan janah mbelgah laè idi bagi ma angin sapa-sipu mi bages i, oda nggèut merumpak bages i, kerna ipajek merdanganen batu mpihir. ²⁶ Tapi kalak simemegèken ranangKu, keppè oda iulaken, codi mo ia bagè kalak simoto, simemajek bagesna i babo kersik. ²⁷ Sinderrang roh udan, mengeraja mo laè janah sapa-sipu angin menerpa bages i, nai merumpak mo bages i!" ²⁸ Enggo kessa pul Jesus mengajari, lengang mo jelma nterrem ni sidi mendengkoh peddahNa i. ²⁹ Ai meheji kalohon ngo peddahNa i, oda bagè guru-guru agama Jahudi i.

¹ Mengencuah mo Jesus i delleng i nai, janah nterrem ngo kalak mengèkutkenSa. ² Sinderrangna i roh mo sada kalak si koliten mendapetkenSa, mengido urup. Sujud mo ia menembah Jesus ninganna idokken, "Tuhan, mula uè Kono, terpemalum Ko ngo aku." ³ Nai idoroken Jesus mo tanganna lako menjamahsa, idokken Jesus mo, "Uè ngo Aku, malum mo kono!" Mènter kejapkenna i mersep mo kolitna i, janah malum mo ikap. ⁴ Nai nina Jesus mo mbangsa, "Èngèt da! Ulang ibagahken kono i taba barang isè pè. Tapi laus mo ko mendahi imam asa iperèso kono. Nai pèlèken mo pèlèenmu bagè sinihatorken si Musa, mahan tanda bukti taba jelma nterrem, magahken tuhu-tuhu enggo malum kono!" ⁵ Tikanna Jesus memengketti kuta Kapernaum, roh mo sada perwira tenterra Rom menimbakisa, mengido urup tabaSa. ⁶ "Tuan nami," nina perwira idi, "sakiten ngo naposongku i bages, dak gampar ngo ia i peddemmenna kumarna mpiahna itempuk sigading i." ⁷ "Laus pè aku pemalumkensa," nina Jesus. ⁸ "Ulang pella alè Tuan," nina perwira idi, "merlèasu ngo Aku alè Tuan nami menjalo kono mi bagesku. Kata sambing mo dokken alè Tuan, enggo njuah nahan iakap naposongki. ⁹ Ai aku pè kennah tunduk ngo mi perèntah indukku. Janah perajurit terruhenku i pè kennah patuh ngo bangku. Mula kudokken taba sada kalak, ’Laus!’ nai laus ngo ia. Taba si sada, ’roh mi sèn, nai roh mo ia’; mula kudokken taba naposongku, ’Ulaken bahaan èn’ mènter iulaken ngo." ¹⁰ Tikan idengkoh Jesus kadè sinidokken perwira i, kagum kalohon ngo Ia. Nai idokken mo taba kalak simengèkutkensa: "Dengkohken! Oda nung dèng kuidah kepercayaen bagidi belgahna barang isè pè kalak Israel. ¹¹ Èngèt kènè mo! Nterrem ngo roh i kebincaren nai dekket i kecunduten nai lako meroang-oang rebbak dekket si Abraham, si Isak dekket si Jakob i Kerajaen Dèbata, ¹² keppè kalak sipatut gabè ginemgem i Kerajaen Dèbata i sendiri, iambongken ngo mi bagasen kegellapen i. I sidi mo kalak i tangis kumara mpersukna." ¹³ Nai idokken Jesus mo taba perwira i, "Lako mo balik, dapet kono mo bagè kepercayaenmu i." Mènter malum mo iakap naposona i karangkenna i. ¹⁴ Laus mo Jesus mi bages si Petrus. Panè-panèen ngo i peddmenna simatua daberru ni si Petrus idah Jesus. ¹⁵ Ijamah Jesus mo tanganna, nai mènter malum mo panèna i. Kèkè mo ia lako mengkebasi Jesus. ¹⁶ Mayak bon ari, iembahi kalak mo mbuè si ni sellapen sètan. Ipelaus Jesus ngo sètan-sètan idi merkitè kata sambing janah ipemalum ngo karina si sakiten i. ¹⁷ Merkitè karinana idi, saut mo si nidokken Nabi Jesaya, imo, "Ia ngo menggong kinipersukta, janah pemalumken karina sakitta." ¹⁸ Lot mo mbuè kalohon mencingkoi Jesus. Idah Jesus kessa kalak i karinana ipasulak mo sisinna mi suberrang tao. ¹⁹ Nai roh mo sada kalak Guru Agama mendahiSa, nina mo, "Guru, uè ngo aku mengèkutken Kènè, barang dempak dikè pè." ²⁰ Ialoi Jesus mo, "Merliang ngo ukum sorigala, janah merasar ngo ukum manuk, manuk, tapi ukum Anak ni Jelma i oda lot bekkasna lako galè, mentadi." ²¹ Nai nina sada kalak sidèban simengkusokenSa mo, "Tuan nami, paduè mo balik aku lebbè lako mengkubur bapa." ²² Tapi ialoi Jesus mo, "Ekutken mo Aku, belli mo simatè i menanem simatèna." ²³ Mbengket mo Jesus mi bungki, rebbak dekket sisinna. ²⁴ Sintempu roh mo angin sapasipu mi tao i, gabè iserpa galombang mo bungki idi. Meddem ngo Jesus tikala i. ²⁵ Nai idahi sisinNa mo Ia lako mendungoiSa, "Tuhan urupi mo kami! Mermara ngo kita!" nina kalak idi. ²⁶ "Kasa buradan kènè?" nina Jesus. "Kurang ngo kepercayaen ndènè!" Nai cènder mo Jesus, isenggak mo angin dekket galombang idi. Mènter kom mo galombang i. ²⁷ Lengang mo karinana si ni sidi. Nina kalak i mo, "Kalak i dikè nai ngo èn? Angin dekket galombang pè patuh ngo mi perèntahNa!" ²⁸ Soh mo Jesus mi suberrang tao i nageri Gadara. Mènter iambat dua kalak ni sellapen sètan mo ia i sidi. Gasaen kalohon ngo kalak i duana, gabè isè poda pang mentas tarap i. ²⁹ Karuar i liang-liang kuburen nai ngo kalak idi, janah menurakken, "Kono alè Anak ni Dèbata, naing ikekadè ko ngo kami? Mada ngo naing isiksa ko kami makdèng pè dapet katikana?" ³⁰ Oda ndaoh i sidi nai, lot sanggung-gunen babi dak menggigi tanoh. ³¹ Ipido sètan-sètan idi mo taba Jesus, "Mula naing ikaruarken ngo kami, pasulak mo kami mbengket mi babi-babi adonang." ³² "Lako mo!" nina Jesus. Nai laus mo sètan-sètan i sidi nai janah mbengket mi babi-babi idi. Mènter mermangkaten mo babi-babi idi i biding tebbing i nai mi tao, gabè mermatèen janah lenneng mo i sidi. ³³ Nai merlojangen mo permakan babi i mi kuta. Isukutken kalak i mo karina simasa i, ibagahken ma mo tersèngèt simasa taba sidua kalak si nisellapen sètan i. ³⁴ Gabè karina pengisi kuta i laus mendapetken Jesus. Idah kalak i kessa mo Jesus nggemmes mo ipidoken kalak idi, asa itadingken nageri i.

¹ Ibengketti Jesus mo bungki, nai isuberrangi mo tao i lako balik mi kutaNa. ² Iosong dèba mo mendahiSa sada kalak nitempuk sigading, gampar i peddemmenna. Tikan idah Jesus bagi belgahna kepercayaen kalak i, nina mo taba jelma nitempuk sigading i, "Percaya mo kono alè pa, enggo iampuni dosa-dosamu." ³ Nai mengeranai mo ibagasen ukurna guru-guru agama silot i sidi bagèen, "MengelèaI Dèbata ngo kalak èn." ⁴ Ibettoh Jesus ngo sinibagasen ukur kalak i, gabè nina mo, "Kasa bagi jahatna sura-sura ndènè? ⁵ Apaina ngo lotiin nidokken, ’enggo iampuni dosamu, barang kèkè mo ko merdalan mo’? ⁶ Kubuktiken mo bagèndari bai ndènè, merkuasa ngo Anak ni Jelma i i babo tanoh èn lako mengampuni dosa." Nai idokken Jesus mo taba nitempuk sigading i, "Kèkè mo kono, embah mo peddemmenmi, molih mo kono!" ⁷ Nai molih mo nitempuk sigading i mi bagesna. ⁸ Iidah jelma nterrem i kessa mo simasa i, mbiar mo kalak idi, ipoji kalak i mo Dèbata, kerna enggo iberrèken Dèbata kuasa sibagidi taba jelma. ⁹ Nai itadingken Jesus mo bekkas idi. Tikan merdalan i, idah Jesus mo sada kalak pertunggu belasting, si Mateus gerarna, kundul i kantorna. Idokken Jesus mo mbangsa, "Èkutken mo Aku!" Mènter cènder mo si Mateus janah mengèkutken Jesus. ¹⁰ Tikan mangan Jesus i bages si Mateus, merrohen mo mbuè sijalo belasting mi sidi dekket kalak perdosa janah rebbak mangan dekket Jesus bagi ma sisinNa. ¹¹ Idah Parisè ngo idi. Ikuso kalak idi mo sisiin Jesus, "Kasa rebbak mangan guru ndènè dekket pertunggu belasting bak si perdosa?" ¹² Idengkoh Jesus ngo kuso-kuso kalak idi, nai ialoi mo, "Oda perlu penambari bai kalak si juah-juahen, pellin taba kalak simersakit ngo. ¹³ Radum-radumi mo lapaten ayat ènda, ’Masèh atè ngo kukelemoken, oda ngo pèlèen.’ Roh Aku oda ngo mendilo kalak simengètong dirina enggo bennar, tapi kalak simerlèa iètong dèba ngo." ¹⁴ Enggo kessa i, roh mo sisiin si Johanes Peridiken mendahi Jesus. Nai ikusoi kalak idi mo, "Kasa ndia kami dekket kalak Parisè nggati puasa keppèken sisinmu oda nung?" ¹⁵ Ialoi Jesus mo, "Bakunè dok atè ndènè, terbakin anak-anak kèla mo marsak tikan merbayo, sidekkah rebbak dèng kalak i dekket kèla i? Tentu oda! Tapi roh mo katikana, ialengi mo kèla i i gambarna nai. Kessa i sidi nai pè asa puasa kalak idi. ¹⁶ Oda nung kalak mendongkapken kaèn rimbaru mi baju singgo mumuk janah nggettem, ai terrago ngo sinidongkapken idi, gabè makin merribakna mo sidongkapen i. ¹⁷ Bagi ma ngo, oda nung ibaing dèba anggur tangkasen mi kiong sienggo buruk, mula ibaing mi sidi mpustak ngo kiong i. Ancuh mo anggur idi, janah kiong i pè maknè terpakkè. Kennah mi kiong rimbaru ngo anggur i ibaing, asa duana tong selloh." ¹⁸ Sinderrang mengeranai Jesus dekker sisiin si Johanes Peridiken, roh mo sada kalak pengendeng bages perguruen. Isembah mo Jesus ninganna idokken, "Gejapken èn dèng matè berrungku, èn pè masèh mo atèMu roh mo Ko lako menjamahsa asa ngelluh ia." ¹⁹ Kèkè mo Jesus, rebbakken laus mo kalak idi. SisinNa pè dekket ngo. ²⁰ Tikan merdalan idi, roh mo sada kalak daberru menjolmiti Jesus i podi nai, enggo sipuluh dua tahun dekkahna ketimbasen. ²¹ Kerna dok atèna ngo ibagasen, "Asal mo giam kujamah olesNa, malum mo kuakap." Ijamah mo punca oles Jesus. ²² Karangkenna i tumulih mo Jesus. Idah kessa mo daberru i, nina mo tabasa, "Pos mo atèmu! Kerna percaya ko bangku, malum mo kono!" Nai mènter malum mo iakap daberru idi. ²³ Nai soh mo Jesus mi bages pengendeng bages perguruen i. Tikan idah Ia peroning-oning bai kalak sibonek, janah mèngèr jelma mbuè, ²⁴ nina Jesus mo bai kalak i, "Karuar mo kènè karina! Oda ngo matè si tatat ènda, medem ngo." Itertabai kalak idi ngo Jesus. ²⁵ Sinderrang karuar jelma nterrem i, masuk mo Jesus mi bilik si tatat idi, ijamah mo tanganna. Kèkè janah cènder mo si tatat idi. ²⁶ Nai mènter tersiar mo berita idi mi suberri nagerri idi. ²⁷ Laus kessa Jesus i sidi nai, ièkutken dua kalak sipètung mo Ia. Dak itenggoken kalak idi mo, "O anak si Daud, masèh mo atèMu midah kami!" ²⁸ Mbengket kessa Jesus mi bages, idapetken sipètung sidua kalak i mo Ia. Nai ikusoi Jesus mo kalak i, "Percaya ngo kènè ndorok Aku pejuahken kènè?" "Percaya ngono kami!" nina kalak i. ²⁹ Nai ijamah Jesus mo mata kalak idi ninganna idokken, "Kerna percaya ngo kè saut mo bagè sinikepercayaen ndènè i." ³⁰ Nai ndorok mo mata kalak i merpendidah. Nai pahè mo kalak i ipernoi Jesus, asa ulang ibagah-bagahken bai barang isè pè. ³¹ Tapi laus ngo kalak idi, ibagah-bagahken ngo mi suberri nagerri i, terrèngèt Jesus. ³² Tikanna laus jelma sidua kalak idi, lot mo merembah sada kalak sipekkak, nikekkang sètan. ³³ Ipelaus kessa sètan idi, mengolihi nola mo ndorok ia mengerana. Lengngang mo jelma sinterem i, nina mo, "Oda nung dèng idah kami bagèen i Israel!" ³⁴ Tapi idokken Parisè mo, "Ekuten sètan ngo memerèken kuasa bana, lako pelausken sètan." ³⁵ Bagi mo dak merkaliling Jesus i sada kuta nai mi kuta sisada, i sada sosor nai mi sosor sisada. Mengajari ngo Ia i bages perguruun, janah menukutken sukuten kelluahen terèngèt Kerajaen Dèbata. Ipemalum ngo kalak i ibas matcam bagè sakit nai, bagi ma simertikas pè. ³⁶ Tikan itengen Jesus jelma nterrem idi, masèh mo atèna, ai bingung ngo kalak idi janah ndotè, bagè biri-biri siso lot mermakan. 4 Ms. 27:17; 1 Raj. 22:17; 2 Kron. 18:16; Hes. 34:5; Zak. 10:2; Mrk. 6:34* ³⁷ Nai idokken Jesus mo taba sisinNa, "Mbellang kalohon ngo peraniin tapi cituk ngo kum simerrani. ³⁸ Kerna nai; pido kènè mo taba sidasa juma idi asa ipasulak kalak lako merani jumana i."

¹ Tikan sidari, idilo Jesus mo sisinna sipuluh dua kalak idi pulung. Iberrèken mo taba kalak idi kuasa lako mengusir tendi jahat, janah lako pejuahken nasa matcam sakit dekket nasa matcam tikas daging. ² Gerar sisiin si sipuluh dua kalak idi imo: perlebbè si Simon (igerari ma Petrus) dekket anggina si Andreas, nai si Jakobus dekket anggina si Johanes, imo dukak si Zebedeus. ³ Nai si Pilipus dekket si Bartolomeus, si Thomas, si Mateus pertunggu belasting i dekket si Jakobus anak si Alpeus, si Tadeus. ⁴ Nai si Simon kalak bhoho idi, dekket si Judas Iskariot simenelbuh Jesus. ⁵ Nai ipasulak Jesus mo sisinNa sipuluh dua kalak idi, enggo kessa itennahi bagèen, "Ulang laus kènè mi nagerri siso meragama Jahudi. Ulang laus kènè mi kuta-kuta kalak Samaria. ⁶ Tapi laus mo kènè mendahi kalak Israel, mendahi kalak i silaling. ⁷ Bagahken mo taba kalak idi, enggo seggep Kerajaen Dèbata. ⁸ Pejuah kènè mo kalak si sakiten, pegelluh kènè simatè, pejuah kènè sipuruun, janah pelaus kènè mo bolis. Enggo ijalo kènè idi karinana oda pella menokor; nai berrèken kènè mo i, oda pella mertokor. ⁹ Ulang pella embah kènè riar, emmas barang pirak, barang pè kèpèng tembaga i bagasen sakku ndènè. ¹⁰ Ulang pella embah kènè bagut-bagut cudekkah, barang pè dua mpasang pakkèen ndènè i perdalanen, barang pè cipatu barang tongket. Kerna barang isè mahan bahaan kennah mangan ngo i bahaanna i nai. ¹¹ Soh kessa kènè mi sada kuta barang sosor, tulusi kènè mo i sidi kalak siuè menjalo kènè. Merrian i sidi mo kènè mèma laus nola kènè. ¹² Sinderrang mbengket kènè mi bages ndèba, dokken kènè mo, ’Njuah-njuah mo bai ndènè!’ ¹³ Mula ijalo persapo idi ngo kènè, hot mo bana salam ndènè i. Tapi mula oda ijalo kènè, balik ngo bai ndènè salam i. ¹⁴ Mula tah lot bages barang kuta siso uè menjalo kènè barang tah oda nggèut mendengkohken rana ndènè, tadingken kènè mo bekas idi, janah pirpirken kènè mo abu silot i tapap nèhè ndènè idi. ¹⁵ Èngèt mo! Tikan Ari Kiamat, lotiin mo iampuni Dèbata kalak Sodom dekket Gomora, dari pada kalak perkuta idi." ¹⁶ "Peratè-atèken kènè mo ènda: Kupasulak ngo kènè bagè biri-biri mi tengah-tengah sorigala. Kennah pantas ngo kènè merrukur bagè nipè, janah merrukur mpanting bagè ndarapati. ¹⁷ Mermanat mo kènè, ai lot ngo kalak naing menangkup kènè, janah iembah mi runggu Agama. Isiksa ngo kènè i bages perguruen kalak i. ¹⁸ Iembah ngo kènè taba perkuasa dekket raja-raja kumarna sisinKu kènè, janah idi mo kesempaten bai ndènè lako menaksiken terrèngèt Aku taba kalak siso menandai Dèbata. ¹⁹ Tapi mula pè iaduken kè asa iadili, ulang pella bulisah kènè terèngèt barang kadè sinaing ruapenken ndènè, ibagahken ngo idi tupung katikana. ²⁰ Oda ngo kènè simengeranai i sidi, tapi Tendi Bapa ni Sorga i ngo merkitè kènè. ²¹ Roh mo arina, isohken kakana mo anggina asa ibunuh. Bagi ma mo bapana mi dukakna. Dukakna mengalo taba Bapa dekket inangna, janah pesakatken asa ibunuh. ²² Karina kalak merceggo atè midah kènè kumarna Aku. Tapi barang isè menahanken soh mi puncana, i ngo paluahenna. ²³ Mula ipedersa-dersa kalak idi kènè ibas sada kuta, mperrus mo kènè mi kuta sidèban. Kubagahken mo bai ndènè: mak dèng sanga karina idahi kènè kuta Israel lako mengulaken ulaen ndènè, enggo mo roh Anak ni Jelma idi utusen ni Dèbata. ²⁴ Oda ngo belgahen sisiin asa guruna, oda ngo belgahen perkebbas asa indukna. ²⁵ Mula dos sisiin dekket guruna, janah mula dos naposo dekket indukna, enggo mo cukup idi bai kalak i. Mula idokken dèba induk ni bages idi Belsebul, makin nola mo taba pengisi bages i, otang igerari nola mo lebbih merroha!" ²⁶ "Ulang mo kebbiari kè ukum jelma, barang kadè i simboni kennah ntarar ngo, barang kadè irusiaken kennah ntangkas ngo i seggen. ²⁷ Barang kadè Kuruapken taba kènè i sigellap, kennah bagahenken ndènè ngo idi tikan mahar. Barang kadè ikosikken mi pènggelmu, tingtingken nola mo idi. ²⁸ Ulang mo kebbiari kènè sindorok memunuh daging, tapi oda merkuasa memunuh tendi. Kebbiari kènè mo Dèbata, simerkuasa memunuh daging bak tendi mi narakka. ²⁹ Dua perrik dapet itokor sada sèn, tukasi pè bagidi, sada perrik oda ndorok ndabuh mi tanoh, kum oda pemmettohen Bapamu ni sorga idi. ³⁰ Salang bilangen buk sini babo ntakal idi ibettoh ngo karina. ³¹ Kerna nai, ulang kènè mbiar! Mahargaen ngo kènè bai Dèbata asa perrik!" ³² "Barang isè menaksiken i hadeppen jelma nterrem, memagahken ia sisinKu, Kusaksiken ma mo ia i hadeppen BapangKu i sorga. ³³ Tapi barang isè memperso mada sisinKu ia i hadeppen jelma nterrem, Aku pè kupersomada mo ia i hadeppen Bapa i sorga." ³⁴ "Ulang mo idokdok atè ndènè merembah damè Aku asa roh mi dunia èn, tapi peraloon ngo. ³⁵ Roh aku memmakin asa pehalo ngo anakna mi bapana, berruna pehhalo mi inangna, janah purmaènna pehalo taba simatuana berru. ³⁶ Uè, musuh simbelgahna imo denganna sada jabu. ³⁷ Barang ise mengkekelengi bapana barang inangna lebbih daripada Aku, oda tau ia mahan sisinKu. Bagi ma kalak simengkekelengi anakna barang berruna lebbih dari pada Aku, oda tau sibagidi gabè sisinKu. ³⁸ Kalak siso uè memersan silang dekket mengekutken Aku, oda tau ia gabè sisinKu. ³⁹ Barang ise mengkekelengi nggelluhna, kemagoon nggelluh mo ia, tapi simenggiaken ngelluhna kumernaken Aku, ia ngo dapetten kenggeluhen." ⁴⁰ "Barang isè menjalo kènè, Aku ngo sinijalona i sidi. Simenjalo Aku, sipasulakken Aku i ngo nijalona idi. ⁴¹ Simenjalo nabi, kumarna ia nabi, dapetten upah bagè sijaloon nabi. Simenjalo kalak simengulaken lemmo atè Dèbata, menjalo balesna bagè sinijalo kalak simengulaken lemmo atè Dèbata. ⁴² Barang isè memerèken laè sintèktèk giam bai kalak simerlèa èn, kumarna sisinKu ia, percaya mo kènè kenah ijalo ngo balesna."

¹ Enggo kessa pul ipernoi Jesus sisinNa si sipuluh dua kalak idi, itadingken mo bekkas i. Laus mo Ia mengajar janah menukutken kata Dèbata soh mi kuta-kuta sinjolmit i si. ² Idengkoh si Johanes Peridiken sienggo terkurung i ngo beritana terrèngèt ulaen Jesus Kristus. Ipasulak mo dèba sisinna mendahi Jesus lako mengkusoken bagèen, ³ "Kènè ngo kalakna siniperbagah-bagah sinaing roh i, barang sidèban dèng ngo kupèma kami?" ⁴ Ialoi Jesus mo, "Bagahken mo taba si Johanes sinidengkoh dekket siniidah ndènè: ⁵ Merpendidah nola ngo sipètung, merdalan ngo sinitempuk sigading, malum ngo sipuruun, merpendengkoh ngo si tongkik, balik nggelluh ngo simatè, janah Sukuten Kelluahen bai Dèbata nai isukutken taba kalak sincor. ⁶ Sayur ntua ngo kalak siso mercudalihen menonja Aku." ⁷ Balik kessa sisiin si Johanes idi, iranaken Jesus mo taba sinterrem si lot i sidi, terrèngèt si Johanes nina mo, "Kadè ngo tengennen ndènè tikan laus kènè mendahi si Johanes i kelongoon? Sirambar bulung sinikabangken angin ngo? ⁸ Kadè ngo situhunna dahiin ndènè? Sada anak laki merpakèen merandal kalohon ngo? Kalak simerpakèen bagidi i bages Raja ngo! ⁹ Kadè ngo situhunna naing idahen ndènè mula laus kènè mendahi si Johanes? Sada kalak nabi ngo? Imo tuhu, kudokken mo bai ndènè, belgahen ngo si Johanes asa nabi. ¹⁰ Ia ngo sinidoken ni ayat sitersurat i Bukku Bibèl, bagèen, ’èn ngo utusenKu, nina Dèbata; Kupesulak ngo ia lebbèen asa ia peliasken dalan baMu.’ ¹¹ Èngèt mo! Oda lot i suberri dunia èn jelma belgahen asa si Johanes Peridiken! Tukasi pè bagidi kalak sikètèkna i kerajaen Dèbata, belgahen dèng ngo ia asa si Johanes. ¹² Kessa nai si Johanes mulai menukutken Sukuten Kelluahen bai Dèbata nai soh bagèndari, mbuè ngo kalak mengalo Sukuten Kelluahen i, gabè ipepèol lako mengabin bana. ¹³ Hatoren-hatoren Agama Jahudi sini peddahken si Musa dekket Nabi-nabi i arnia nai soh mi pekiroh si Johanes, karina ngo i memagahken terèngèt sikennah masa. ¹⁴ Mula percaya kènè mi peddah idi, bettoh kènè mo, si Johanes èn ngo si Elias singgo ibagahken nabi terrèngèt pekirohna. ¹⁵ Mula merpendengkoh ngo coping ndènè, dengkohken mo! ¹⁶ Asa kadè mo Kubaingken codinna jelma sibagèndari? Codi ngo kalak i bagè anak-anak sikundul i tengah ndalan; dak dilo-dilo taba denganna sidèbaan. ¹⁷ ’Mergenderrang ngo kami, tapi oda nggèut kènè tumatak! Tangis milangi ngo kami, tapi oda nggèut kènè terèluh!’ ¹⁸ Roh si Johanes puasa ngo ia janah oda nggèut mènum anggur, ’Tapi idokken dèba ngo ia isellapi sètan.’ ¹⁹ Bagèndari roh Anak ni Jelma i, mangan dekket mènum ngo ia, keppè idokken dèba nola mo, ’Tengen mo kalak adoi! Kucul, permabuk, dengan kalak pertunggu belasting janah dengan jelma perdosa.’ Tukasi pè bagidi dak merpenganju ngo Dèbata janah terridah ngo penganjuna i arap bahanna." ²⁰ Nai isumbiahi Jesus mo nasa kuta siso nggèut mertobat, tukasi pè i sidi buèen ibaing tanda kelengangen. ²¹ "Merjaya mo kono alè Korazim bang kono alè Betsaida! Ukum i kuta Tirus dekket Sidon kin ibaing tanda kelengangen i, bakunè pè peselsel ngo kalak idi janah mertobat ibas dosa-dosana nai, janah memakè pakèen tanda bonek janah memaing abu mi babontakal. ²² Èngèt mo, lotiin ngo kalak Tirus dekket Sidon terolih masèh atè Dèbata i Ari Kiamat seggen, ulang pada kono. ²³ Kènè pè alè Kapernaum! Tah dok atè ndènè ipedates kènè soh mi sorga? Oda! Tapi ibuang ngo kènè mi narakka! Ukum i Sodom kin ngo ibaing tanda kelengangen bagè sinibaing bamu idi, lot dèng ngo nemmuken Sodom i soh bagèndari. ²⁴ Èngèt mo! Lotiin ngo Sodom terolih masèh atè tikan Ari Kiamat ulang pada kènè!" ²⁵ Tikanna i mersodip mo Jesus, "Alè Pa, Tuhan simengkuasai langit dekket tanoh èn! Mendokken lias atè ngo Aku baMu kerna mboni ngo karinana ibaing Kono ukum taba kalak mpantas janah pandè. Ai pellin taba kalak siso pandè ngo kessa ipacidah Kono. ²⁶ Idi mo pesennangken ukur Bapa." ²⁷ "Karinana idi enggo mo ipesoh Bapangku taba Aku. Janah sada kalak poda lot menandai Bapa, laènken Anak i dekket kalak sienggo ipetandaken Anak idi Bapai tabasa." ²⁸ "Roh mo kènè karinana mendahi Aku kènè sienggo leja janah botongen asa Kupesennang kènè. ²⁹ Uèi kènè mo Aku janah guruken kènè mo bangku nai, ai melamlam janah ncerrep merukur ngo Aku, asa dapetten kesennangen Tendi ndènè. ³⁰ Ai maing sennang ngo perèntah-perèntahKu janah menahang ngo siKupepersanken bai ndènè."

¹ I sada ari tikan ari Sabat, mentas mo Jesus arap juma. Enggo mellèhè tikanna i sisinna idi, gabè ipotiki kalak idi mo pagè janah iguguti. ² Idah kalak Parisè kessa mo i, idokken kalak i mo taba Jesus, "Tengen mo! SisinMu i enggo mengelausken hatoren Agama. Iulaken kalak idi ngo siso ndorok ulaenken tupung ari Sabat." ³ Ialoi Jesus mo, "Oda nung pana ijaka kènè sinibaing si Daud tikanna mellèhè ia dekket denganna? ⁴ Ibengketti ngo Bages Dèbata, nai ipangan kalak i ngo roti sienggo ipèlèken taba Dèbata. Ukum mengèkutken hatoren agamanta oda ndorok panganen barang isè kum sibagidi, laènken imam-imam. ⁵ Barang tah madèng ngo nung ijaka kènè hatoren Agama nipeddahken si Musa bagèen: Gennep ari Sabat iulaken imam-imam ngo ulanna i Bages Dèbata, tapi oda pella isalahken? ⁶ Perdatèken kènè mo siKudokken èn: lot ngo isèn terbelgahen dari pada Bages Tuhan. ⁷ Tersurat ngo ibas Bibèl: Masèh ni atè ngo siKukellemoken, oda ngo pèlèen pinakan. Mula tuhu-tuhuna kin iantusi kènè kata ènda, pasti ngo oda isalahken kènè kalak siso mersalah. ⁸ Kerna Anak Jelma idi ngo merkuasa taba ari Sabat." ⁹ Itadingken Jesus mo bakkas idi lako laus mi sada bages perguruun. ¹⁰ Lot mo i sidi sada kalak matè serrap tanganna. Ikusoken kalak simengentip kesalahen i mo taba Jesus, "Norok ngo ndia pemalumken kalak sisakiten tikan ari Sabat?" ¹¹ Ialoi Jesus mo, "Barang isè kènè lot kerbona, keppè ndabuh mo kerbo i mi geddung mbages tikan ari Sabat, oda ngo ndia iusahaken sidasa kerbo i peluahken kerbona i i geddung i nai? ¹² Nai, otang mahargaan dèng ma ngo jelma asa kerbo? Merlapaten ngo i: Ndorok ngo mengurupi jelma tikan ari Sabat." ¹³ Nai idokken Jesus mo taba pertangan matè serrap idi, "Pekustang mo tanganmi." Nai ipekustang mo tanganna, mènter malum mo tanganna i. ¹⁴ Itadingken kalak Parisè i mo bages perguruun idi, mertuptup mo kalak i lako memmunuh Jesus. ¹⁵ Ibettoh Jesus ngo enggo merniat jahat kalak Parisè i mendahiSa. Nai laus mo Jesus i bekkas i nai, janah ièkutken jelma nterrem i ngo Ia. Nai ipemalum mo karina kalak simersakit. ¹⁶ Tapi igerra ngo kalak i asa ulang ibagah-bagahken taba sidèbaan. ¹⁷ Merkitè idi saut mo sinidokken Dèbata merkitè Nabi Jesaya, ¹⁸ "Èn ngo utusenKu siKupilih idi, siKukellengi janah lemmo atèngKu. Kuberrèken ngo tendingKu baNa, janah sukutkenenNa ngo ketègerenKu taba karina bangsa. ¹⁹ Oda nèngè ngo ia merselisih barang mersurak, q2 barang pè mengerana i dalan mbellen. ²⁰ Oda nè ngo Ia memenggelken buluh sienggo naing mbohok, janah lampu sienggo mèlep-èlep, oda ngo iènteppi, dak juhap ngo ia sampè mennang keadilen, ²¹ janah karina bangsa ngo mengharapkenSa." ²² Nai lot mo kalak merembahken taba Jesus sada kalak sipètung bana pekkak, ikuasai sètan ngo ia. Ipemalum Jesus mo sipètung i janah gabè ndorok kirana janah merpendidah mengolihi. ²³ Karina kalak simengidahsa lengngang ninganna nina, "Tah èn ngo Anak si Daud sini perbagah-bagah idi?" ²⁴ Idengkoh kalak Parisè kessa kata i, ialoi kalak i mo, "Ndorok pè kalak èn mengusir sètan, kumara pengulu sètan imo si Beelzebul enggo memerrèken kuasa baNa." ²⁵ Ibettoh Jesus ngo pikiren kalak Parisè idi. Gabè idokken mo taba kalak idi, "Mula merselisih ngo sada kerajaen samah-samahsa, oda ngo ndekkah tahan kerajaen idi. Janah sada kuta barang sada jabu pe mula merrubat barang mersikosomen, lako tumpat mo idi. ²⁶ Bagi ma ngo ibas kerajaen Sisètan; mula merselisih ngo pulungen sisada mi pulungen sisada nai, imo tanda-tanda oda sada kata janah lako kimpat mo kalak i oda ndekkah nèngè. ²⁷ Idokken kènè nola ma, Kuusir ngo sètan i kumarna kuasa Beelzebul. Mula bagi, bai isè nai nola ngo keppè sisiin ndènè menjalo kuasa lako mengusir sètan? Mula bagi, sisiin ndènè i sendiri ngo kibuktiken kènè salah. ²⁸ Asa ukum Aku, Tendi Dèbata ngo memerrèken kuasa bangku lako mengusir sètan. Merlapaten ngo i: Enggo imulai Dèbata kerajaenNa i tengah-tengah ndènè. ²⁹ Bakunè kin mo ndorok mbengket mi sada bages simergegoh lako mengerampasi hartana, kum mak lebbèen ièkèti kalak simergegoh i? Nai ipè asa ndorok irampasi hartana idi. ³⁰ Barang isè siso kan Aku, alongku mo ia, janah siso rebbak dekket Aku lako pepulungken, mencèdai ulaenKu ngo i. ³¹ Kumarna i, èngèt mo: Nasa dosa dekket nasa rana jahat sienggo iruapken, ndorok dèng ngo isasa. Tapi rana simengelèai Tendi Simbadia, oda nèngè ndorok isasa! ³² Barang isè mengeruapken rana mengalo Anak Jelma ndorok ngo iampuni, tapi kalak simengeruapken kata mengalo Tendi Simbadia, mak ndorok nèngè iampuni, bagèndari bang seggen pè." ³³ "Asa mendè buahna, kennah mendè ngo batangna. Mula oda ngo mendè batangna buahna pè oda ngo mendè. Asa lako menandai mendè barang nggodo sada kayu, nibettoh ngo arap buahna. ³⁴ Kalak jahat ngo kènè, bakunè mo kènè ndorok mengeruapken simendè, mula jahat ngo kènè? Ai barang kadè dak nisura-sura i ma ngo ruap i babah. ³⁵ Barang isè kalak bujur tong ngo ia mengeruapken simendè ibas ukurna i nai, kerna tuhu ngo bujur ia. Barang isè jahat, dakdak ngo ia mengeruapken kejahaten si turah ibas ukurna jahat idi, kerna dom kejahaten ngo ia. ³⁶ Kerna nai, èngèt mo: tikan Ari Kiamat, gennep jelma kennah mertanggung jabab kumarna karina rana siso merguna si niruapkenna. ³⁷ Kerna ranamu i ngo ibaing sukat-sukatna, barang tah mersalah barang oda." ³⁸ Enggo kessa i, pulung mo deba guru Agama dekket Parisè nina mo, "Guru, sèkel ngo kami naing mengidah, asa ibaing kono tanda kelengangen." ³⁹ "Soh mo jahat bak tunggangna jelma si sencundut èn!" nina Jesus, "Kènè jelma jahat mengidoken asa Kubakin tanda kelengangen? Mada! Oda berrèen taba kènè sada tanda kelengangen pè, laènken pellin tanda kelengangen Nabi Jona. ⁴⁰ Ai i beltek ikan mbellen ngo si Jona tellu ari tellu berngin dekkahna. Bagi ma mo Anak Jelma tellu ari tellu berngin i beltek tanoh. ⁴¹ Luas i ari perhukumen i cènder mo pengisi Niniwe rebbak jelma jaman bagèndari lako mendaba kènè. Ai enggo mertobat kalak Niniwe ibas dosana nai, tikan merjamita si Jona taba kalak idi. Tapi belgahen ngo nisènda bagèndari asa si Jona. ⁴² Luas tikan ari perhukumen, cènder ngo sada raja daberru i nagerri Selatan nai rebbak dekket jelma bagèndari lako mendaba kènè. Ai roh ngo ia i kutana sindaoh nai, pellin lako mendengkohken peddah si Salomo kalak bijak i; tapi belgahen ngo si ni sènda bagèndari asa si Salomo!" ⁴³ "Mula itadingken tendi sètan sada kalak jelma, pukpuk ngo kadap tendi sètan i lako menulusi bekkas ngkerrah, mahan pentadinna, tapi oda jupasa. ⁴⁴ Nai idokken mo, ’Mulak mo aku mi bages sienggo kutadingken idi.’ Soh kessa mo ia mi bages idi, rumar ngo idapet bages idi, mbersih janah merratur. ⁴⁵ Nai laus mo tendi sètan i mendiloi pitu nai tendi sètan sidèbanna, si lebbih jahat dèng asa ia. Nai ibengketti kalak i mo jelma idi, janah merrian i sidi. Ujungna gabè mparahen mo jelma sibagidi dari pada i mulana i nai. Bagi ma ngo masa bang taba kalak jahat si sincundut ènda." ⁴⁶ Sinderrang mengeranai dèng Jesus dekket jelma nterrem idi, roh mo inangna dekket anggiNa. I ruar ngo kalak icènder ninganna mengusahaken asa ndorok nemmuken mengerana dekket Jesus. ⁴⁷ Sada kalak i jelma nterrem i nai mendokken taba Jesus, "Guru! i ruar ngo bagèndari partua ndè naing mengerana dekket kènè." ⁴⁸ Ialoi Jesus mo, "Isè ngo inangKu? Isè ngo anggingKu?" ⁴⁹ Nai idempakken mo sisinNa ninganna idokken, "Tengen kènè mo, èn ngo inangKu dekket anggingKu. ⁵⁰ Barang isè mengulaken lemmo atè BapangKu si ni sorga i, i ngo anggingku janah i ngo turangku, idi ma ngo inangKu."

¹ Sidarinkenna idi, itadingken Jesus mo bages idi laus mo ia mo biding tao, janah kundul i sidi. ² Nterrem ngo kalak pulung mencingkoi Jesus. Kerna i mbengket mo Jesus mi sada bungki janah kundul mo ia i bagasen bungki i, tapi ukum jelma nterrem idi mercènderren ngo i biding tao i. ³ Nai iajari Jesus mo jelma nterrem i terrèngèt matcam bagè merkitè umpama. "Lot mo sada kalak peruma-uma lako menaburken bennih," nina Jesus mo mentebbennai ajarNa. ⁴ "Tikan isaburken bennih idi, lot mo dèba ndabuh i dalan. Nai roh mo manuk-manuk ipangani mo keri bennih i. ⁵ Lot ma mo dèba ndabuh mi bekkas merbatu, siso pella ngkapal tanohna. Nturah ngo bennih i ndor kerna kurang tanohna. ⁶ Tapi enggo kessa ndates mataniari, males mo pagè sienggo turah idi, nai ngkerrah mo janah matè, kumerna oda mbages uratna mi tanoh i. ⁷ Lot ma mo dèba bennih idi ndabuh mi tanoh merkopi-kopi, makin mbelgah mo kopi-kopi idi, gabè ipeccek mo pagè siturah idi, gabè matè. ⁸ Tapi lot ma ngo bennih idi ndabuh mi tanoh nggabur, nai merbuah mo, janah lot dèba seratus lempit, deba ennempuluh lempit janah dèba nai tellupuluh lempit hasilna." ⁹ Enggo kessa isukutken Jesus umpama idi nina Jesus mo, "Mula lot ngo pènggel ndènè, dengkohken kènè mo i." ¹⁰ Enggo kessa i roh mo sisiin Jesus janah mengkuso taba Jesus, "Kasa ndia merkitè umpama ko Guru lako mengerana taba jelma nterrem?" ¹¹ Ialoi Jesus mo, "Ipergeddo Dèbata ngo asa rusia kerajaen idi pellin kènè ukum mettohsa, oda dekket kalak idi. ¹² Ai barang isè enggo lot bana, makin mbuè ngo itambahi bana, asa mertinèncuk silot bana i. Tapi barang isè oda lot sadikè milikna, milikna sicituk i pè buaten ngo bana nai. ¹³ Kumarna nai ngo asa merkitè umpama Aku mengerana taba jelma nterrem. Merpendidah ngo nemmu kalak i, tapi tosè ngo bagè kalak siso merpenengen; merpendengkoh ngo nemmu kalak idi, tapi tosè ngo bagè siso merpemeggè, janah oda ma mengantusi. ¹⁴ Merkitè bagi saut mo bagè sinidokken Nabi Jesaya terrèngèt kalak idi: ’Nina Dèbata: Idengkoh kènè ngho nemmu tapi oda iarti kènè; itengen kènè ngo nemmu tapi oda idah kènè. ¹⁵ Ai enggo majel pikiren ndènè coping ndènè pè enggo tongkik janah enggo pètung mata kalak i. Asa ulang merpendidah mata kalak i ulang merpendengkoh copingna ulang mengantusi pikirenna asa ulang balik mendahi Aku, nai Kupemmalum kalak i.’ " ¹⁶ "Tapi ukum terrèngèt kènè," nina Jesus dèng ma taba sisinNa, "merlaba olih ngo kènè! Kerna merpendidah mata ndènè, janah merpendengkoh ngo pènggel ndènè. ¹⁷ Èngèt kènè mo: Mbuè ngo arnia nabi bak jelma pè menguèi Dèbata, sèkel mengidah sini idah ndènè bagèndari. Tapi oda terolih kesempaten kalak idi lako mengidah. Sèkel kalohon ngo kalak i naing mendengkoh bagè sinidengkoh ndènè bagèndari, tapi oda terolih kesempaten kalak idi lako mendengkoh." ¹⁸ "Dengkohken kènè mo mendè, lapaten umpama terrèngèt sada kalak penabur idi. ¹⁹ Kalak simendengkoh sukuten terrèngèt Kerajaen Dèbata, tapi oda iarti, kalak i mo bagè bennih sindabuh i dalan. Roh mo si jahat mengerampasi enggo kessa isabur mi bagasen ukurna. ²⁰ Bennih sindabuh mi tanoh batu, imo kalak simendengkoh sukuten idi, mènter lolo mo ia menjalo. ²¹ Tapi oda mbages sukuten idi iradum-radumi, gabè oda ndekkah mertahan. Roh kessa taba kalak i simpersuk barang kinidersa kumarna sukuten idi, mènter murtat mono kalak i. ²² Bennih sindabuh mi tengah-tengah kopi-kopi i, codi mo i bagè kalak simendengkoh sukuten idi, tapi dak mengkelsohken nggelluh sipat ari idi dekket naing nggelluh mewah. Kerna i gabè terkapit mo sukuten idi ibas ukurna, gabè oda sanga merbuah. ²³ Ukum bennih sinisaburken mi tanoh nggabur, imo kalak simendengkohken sukuten idi janah iarti. Kalak idi mo merbuah ratraten, dèba seratus kali lempit, dèba ennempuluh kali lempit, dèba nai tellupuluh kali lempit, i bennih idi nai." ²⁴ Isukutken Jesus nola ma mo perumpamaan taba jelma nterrem. Nina mo, "Codi ngo Kerajaen Dèbata i bagè sada kalak perjuma-juma menaburken bennih merandal mi jumana. ²⁵ I sada berngin sinderrang enggo meddem kalak, roh mo musuh perjuma i menuani isa-isa mi tengah-tengah pagè i, nai mulak mo ia. ²⁶ Turah kessa pagè i, makin mbelgah mo janah roh mo rohina taridah nola ma mo isa-isa idi. ²⁷ Nai roh mo sigajiin mendahi perjuma i nina mo, ’Tuan, otang bennih selloh ngo isaburken kono mi juma i? Kadè ndia merulah asa tubuh nola isa-isa i juma i?’ ²⁸ Ialoi mo, ’Musuh i ngo maing i.’ Nai nina sigajinna i dèng ma mo, ’Ipaduè ko ngo asa laus kami memerkati isa-isa idi?’ ²⁹ ’Oda’, nina, ’Mula irengkati isa-isa idi, gabè dekket nola ngo pagè idi mberkat rebbakken isa-isa idi. ³⁰ Belli mo bagi isa-isa idi rebbak tubuh dekket pagè i soh mi perraniin. Kudokken pè taba kalak simerrani i, asa ipepulung lebbèen isa-isa idi, nai rakuti mo asa itutung. Nai pè asa perrani kènè pagè i, janah ibaing mi kebben.’ " ³¹ Nai isukutken Jesus nola mo sada perumpamaan taba jelma nterrem i nina mo, "Codi ngo Kerajaen Dèbata mi buah arum ibuat sada kalak janah isuanken mi jumana. ³² Buah arum mo sikètèkna nasa buah suan-suanen. Tapi turah kessa mo buahna i mènter ndeppur mo mbellen, janah belgahen ngo ia ibas nasa suan-suanen simerumbut. Gabè merkayu mo ia janah merrohen mo manuk-manuk merrasar mi dahanna." ³³ Isukutken Jesus nola dèng ma mo umpama sidèban taba jelma nterrem, nina mo, "Codi ngo Kerajaen Dèbata bagè ragi, sinicampurken sada kalak daberru mi nditak empatpuluh litèr, asa sanga kambang karinana." ³⁴ Karinana idi ipeddahken Jesus taba jelma nterrem merkitè umpama. ³⁵ Saut mo sinidokken nabi bagèen: "Merkitè umpama ngo Aku mengerana taba kalak i, Kusukutken ngo siso nibettohna kessa nai hana dunia èn." ³⁶ Enggo kessa i itadingken Jesus mo jelma nterrem i. Nai idapetken sisinNa mo ia, idokken mo, "Guru! bagahken mo bai nami lapaten umpama terrèngèt isa-isa ni kellang-kellang pagè idi." ³⁷ Ialoi Jesus mo, "Simenaburken bennih merandal idi imo Anak Jelma. ³⁸ Ukum juma idi imo dunia ènda. Bennih merandal idi imo kalak sienggo gabè ginemgem Kerajaen Dèbata. Janah isa-isa idi imo kalak si kan Sibolis. ³⁹ Musuh simenaburken bennih isa-isa i, imo Sibolis. Tikan perraniin, imo Ari Kiamat, janah kalak simerrani idi, imo malaèkat-malaèkat. ⁴⁰ Bagè isa-isa sinipepulung janah itutung mi api, bagi ma mo tikan Ari Kiamat seggen. ⁴¹ Anak Jelma, pasulakken malaèkatNa lako pepulungken ibas ummatNa nai, karina simengèta-èta maing merdosa, dekket karinana jelma sidèbanna simemaing kejahaten. ⁴² Ibuang mo kalak idi karinana mi api mergollah-gollah, i sidi mo kalak idi derru-derru kumarna mpiahna. ⁴³ Tapi ukum kalak simengulaken lemmo atè Dèbata, mercuhaya ngo bagè mataniari i Kerajaen Dèbata. Kumarna idi dengkohken mo mendè-mendè, mula lot dèng ma ngo pènggel ndènè lako mendengkohken!" ⁴⁴ "Codi ngo Kerajaen Dèbata bagè harta maharga itanem mboni ibas tanoh, nai jumpa dèba mo i, janah itanem nola balik mi bagasen tanoh i. Kessa i kumarna sampang atèna, laus mo ia mendèaken karina hartana, balik nola mo ia, itokor mo tanoh idi." ⁴⁵ Codi ngo Kerajaen Dèbata bagè sada kalak pertiga-tiga menulusi buradda simahargana. ⁴⁶ Jumpasa kessa buradda merandal kalohon, menter laus mo ia mendeaken karina hartana, nai itokor mo buradda sisada i. ⁴⁷ "Codi ma ngo Kerajaen Dèbata bagè jala sinisampakken mi tao, nai dapetsa mo ikan mermatcam bagè. ⁴⁸ Dom kessa jala idi, iruah perrikan i mo jala i mi darat. Nai kundul mo perrikan idi, ipilihi mo ikan i mengèkutken matcamna. Simendèna ipepulung ngo mi ucangna, tapi siso mendè idi iambongken ngo. ⁴⁹ Bagi ma ngo tikan Ari Kiamat idi, isirang malaèkat-malaèkat i mo jelma jahat tarap jelma simengulaken lemmo atè Dèbata nai. ⁵⁰ Nai ibuang mo jelma jahat idi mi api mergollah-gollah. I sidi mo kalak i derru-derru kumarna mbernitna." ⁵¹ "Iarti kènè ngo karinana idi?" nina Jesus. "Kuarti kami ngo Guru!" nina kalak idi. ⁵² Nai nina Jesus mo, "I ngo sebabna, nasa guru agama sienggo gabè ginemgem Kerajaen Dèbata, codi bagè sada kalak sidasa bages mengkaruarken barang-barang maharga i gudangna nai, barang rimbaru dekket sienggo malè." ⁵³ Enggo kesa pul isukutken Jesus perumpamaan ndai karina, itadingken mo bekkas idi, ⁵⁴ balik mo ia mi kutaNa. Mengajar mo Ia i sidi i bages perguruun. Bengap kalohon ngo kalak mendengkoh peddahna i. Idokken kalak idi mo, "I dikè nai ndia dapetsa pengajaren bagidi hejjina? Janah i idikè nai Ia menjalo kuasa lako memaing tanda kelengangen? ⁵⁵ Otang dukak tukkang kayu ngo Ia? Otang si Maria ngo inangNa? Janah anggina si Jakobus, si Josep, si Simon dekket si Judas? ⁵⁶ Janah otang tading i kuta èn ngo dekket turangna? Idikè nai ndia ibettoh karinana idi?" ⁵⁷ Gabè oda ijalo jelma ni sidi Jesus. Nai idokken Jesus mo taba kalak idi, "Ukum nabi, ihormati ngo ukum i kuta ndèba, tapi ukum i kutana dekket i sapona, oda ihormati." ⁵⁸ Kemulihkenna i, oda pella sadikè ibaing Jesus tanda kelengangen i sidi, kerna oda percaya kalak i.

¹ Sinderrangna i si Herodes ngo raja i Galilea, janah idengkoh berita terrèngèt Jesus. ² Idokken si Herodes mo taba pugabèna, "Kenah si Johanes Peridiken singgo matè idi ngo kalak ènda, balik nggelluh! Kumarnaken nai ngo asa bagidi kuasana i." ³ Kerna simadèngkenna i idokken si Herodes ngo menangkup si Johanes, ièkèti janah ikurung. Ibakin si Herodes pè bagi, kumarnaken si Herodias ngo imo purkat i si Pilipus anggina i. ⁴ Ai nung ngo idokken si Johanes bai si Herodes, "Oda ndorok ialihken ko si Herodias i! Ai mengelausi hatoren agama ngo i." ⁵ Ukum situhunna merngetnget ngo atè si Herodes naing memunuh si Johanes, tapi mbiar ngo ia taba jelma nterrem, ai Nabi ngo si Johanes idi dok atè jelma nterrem. ⁶ Tikan memestaken ulang tahunna si Herodes, tumatak mo berru si Herodias i hadeppen sitampak pulung i. Lolo kalohon mo si Herodes mengidah tatakna idi. ⁷ Gabè merjanji mo si Herodes tabasa merdengan sumbiah, nina barang kadè sambing pè ipido ukurna kennah iberrèken bana! ⁸ Kumarna iajar-ajari inangna, gabè idokken simerbaju i mo, "Berrèken mo bangku takal si Johanes Peridiken bagèndari i babo pinggan!" ⁹ Mendengkoh pengidonna idi, bonek kalohon mo si Herodes. Tapi kumarna enggo merjanji ia i hadeppen sitampak pulung i, idokken mo asa ipesaut pengidoon simerbaju i. ¹⁰ Ipasulak mo pasulakenna mi kurungen lako memancong takal si Johanes. ¹¹ Iembahken mo takal si Johanes idi i babo pinggan janah iberrèken mo taba simerbaju i. Nai iembah simerbaju i mo taba inangna. ¹² Enggo kessa i, roh mo sisiin si Johanes, ibuat mo bangkè si Johanes i lako mengkuburkensa. Laus mo kalak i ibagahken mo simasa idi mendahi Jesus. ¹³ Idengkoh Jesus kessa berita idi, itadingken mo bekkas i merbungki sadasa lako laus mi bekkas melongo. Tapi ibettoh jelma nterrem ngo barang mikè ia laus. Jadi kalak idi pè itadingken ma mo kutana gennep, lako mengèkutken Jesus kan dalan darat. ¹⁴ Susur kessa Jesus i bungki i nai janah iidah mo jelma nterrem i, gabè masèh mo atèna midah kalak i. Nai ipemalum mo kalak si sakiten ibas kalak i nai. ¹⁵ Cibonkenna i, roh mo sisiin Jesus mendokken tabaSa, "Enggo ramben ari janah melongo ngo bekkasta ènda. Lotiin mo ipasulak Guru i kalak idi laus menokor pangaan mi kuta sinjolmitna asa lot panganna." ¹⁶ "Oda pella laus kalak i," nina Jesus, "berrè kènè mo kalak idi mangan." ¹⁷ "Pellin lima ngkabuah ngo kessa lot roti bai nami dekket dua ikan!" nina sisiin Jesus. ¹⁸ "Embah kènè mo misèn!" nina Jesus. ¹⁹ Nai idokken mo jelma nterrem i kundul i babo dukut-dukut i. Nai ibuat mo roti silima dekket ikan sidua ngkabuah idi, itarè mo mi langit janah idokken melias atè taba Dèbata. Kessa i, ipasu-pasu mo roti dekket ikan idi. Nai ipenggelli mo, ipemberrèken taba sisinna asa ipellaken taba jelma nterrem i. ²⁰ Mangan mo karinana kalak i janah bessur. Kessa pul mangan, ipepulung sisiin i mo iba-iba roti dekket ikan idi dom sipuluh dua barunjat nai. ²¹ Kalak simangan roti i buèna kira-kira lima ribu kalak, laènken daberru dekket anak-anak. ²² Enggo kessa i idokken Jesus mo sisinNa mbangkit mi bungki asa perlebbè kalak i suberrang turèpar tao. Ukum Jesus podi dèng ngo i bekkas idi lako pasulakken jelma nterrem idi molih. ²³ Enggo kessa laus jelma nterem i menangkeng mo Jesus mi sada uruk lako mersodip i sidi. Enggo mo temmulai gellap ari, tapi i sidi dèng ngo Jesus sadasa. ²⁴ Nderrang bagidi, keppèken bungki nitompang sisiin Jesus enggo mo ndaoh i tengah-tengah tao. Tumiling-tiling ngo bungki idi ibaing galombang, kumarna mengalo angin ngo tujuen bungki i. ²⁵ I kellang-kellang pukkul tellu bak pukkul ennem siceggen, idapetken Jesus mo kalak idi, merdalan i babo laè i. ²⁶ Idah sisinNa kessa Ia merdalan i babo laè i, tersengget kalohon mo kalak idi ninganna buradan. ²⁷ Tapi nina Jesus mo, "Mènak mo kènè! Aku ngo i! Ulang kènè mbiar!" ²⁸ Nai nina si Petrus mo, "Mula tuhu-tuhu ngo Jesus kono, dokken mo aku roh mendahi kono Tuhan janah merdalan i babo laè i." ²⁹ "Roh mo kono," nina Jesus. Nai susur mo si Petrus i bungki i nai, merdalan i babo laè idi lako mendapetken Jesus. ³⁰ Tapi iakapken si Petrus kessa mo penempul angin nderras i tao idi, mbiar mo ia, gabè lenneng mo, "Tuhan, urupi mo aku!" nina tenggo si Petrus. ³¹ Mènter idoroken Jesus mo tanganNa lako menangkupsa. Nai idokken Jesus mo, "Kurang percaya ngo kono Petrus, kasa ganggu kono?" ³² Nai mbangkit mo kalak i duana mi bungki i, angin i pè ndong mo. ³³ Isembah sisiin silot i bungki i mo Jesus. Nina kalak i mo, "Tuhunna ngo kono Tuhan Anak Dèbata!" ³⁴ Soh kessa kalak i mi suberrang tao i, mi darat mo kalak i i Genesaret. ³⁵ Idah kalak i kessa Jesus ngo siroh i, ipembagahken kalak i mo berita idi mi kuliling kuta kalak idi. Iembah kalak i mo karina simersakitna mendahi Jesus. ³⁶ Ipidoken kalak i mo tabaSa, mula ndorok asa ijamah kalak i giamken punca jubahNa. Nai malum mo nasa simenjamah jubahNa idi.

¹ Tikan sikali lot mo roh kalak Parisè dekket guru-guru Agama Jahudi i Jerusalem nai mendahi Jesus. Ikusoken kalak idi mo taba Jesus bagèen: ² "Kasa ilausi sisinMu adat sienggo itetapken empungta? Ai sinderrang naing mangan kalak idi, oda ngo iborih tanganna lebbèen bagè sinikecemmalken adatta!" ³ Ialoi Jesus mo, "Nai kènè kasa ilausken kènè kata Dèbata, pellin kumarnaken menguèi adat empung ndènè? ⁴ Ai idokken Dèbata ngo, ’Pesangap mo partuamu,’ ai ’Barang isè mendokken rana merroha taba partuana, kennah matè ngo ihukum kalak sibagidi.’ ⁵ Keppè iajarken kènè ngo bagèen: Mula idokken dèba taba partuana, ’Barang kadè naing bai partuangku kin, enggo mo kupèlèken i taba Dèbata, ⁶ nai oda nè pella ipesangap kalak sibagidi partuana.’ Kumarnaken adat empung ndènè idi, gabè oda iparduliken kata Dèbata? ⁷ Èo, kènè perbuah ringadar! Tuhu kalohon ngo bagè sinidokken nabi Jesaya terrèngèt kènè sinderrang nidokkenna: ⁸ ’Bagèen ngo idokken Dèbata: Ipesangap kalak ènda ngo Aku pellin i babah sambing, ukum ukurna ndaoh ngo bangku nai. ⁹ Oda lot lapatenna isembah kalak i Aku, karna hatoren agama sinipeddahken kalak i gabè hatoren sinibaing jelma ngo.’ " ¹⁰ Nai idilo Jesus mo jelma nterrem i roh ndessing tabaSa, nai idokken mo taba kalak idi; "Dengkoh janah peratè-atèken kènè mo mendè-mendè. ¹¹ Ukum simbengket arap babah jelma, oda ngo meronah ia ibakin, pellin sikaruar arap babah ngo simemaingken ia meronah." ¹² Nai roh mo sisiin Jesus, "Ibettoh kono ngo Guru tikan idokken Kono ranaMu ndai, ai gabè ncio ngo atè kalak Parisè?" ¹³ Ialoi Jesus mo, "Nasa suan-suanen siso ni suan BapangKu ni sorga, kennah irengkat ngo. ¹⁴ Ulang pella pikirken kènè kalak Parisè idi. Ai ekuten pètung ngo idi, janah mula iuluken sipètung ngo jelma pètung, gabè rebbak ndabuh ngo kalak i mi parik." ¹⁵ Idokken si Petrus nola mo, "Bagahken mo bai nami umpama ndai Guru!" ¹⁶ Ialoi Jesus mo, "Petrus, lalap dèng ngo oda iarti kono? ¹⁷ Oda ngo ibettoh kono simasuk mi babah jelma gabè ndabuh mo i mi beltek, nai karuar nola i dagingna nai? ¹⁸ Tapi ukum sikaruar i babah jelma nai, siturah ibas ukurna nai ngo i, sibagidi mo memaing meronah jelma. ¹⁹ Ai ibagasen ukur nai ngo tubuh pikiren-pikiren jahat, maing kalak memmunuh, merlangkah julu meddem, rorang, menangko, mengerampok, merluap dekket mengkilang. ²⁰ Sibagidi ngo memmaing jelma merronah. Tapi ukum mangan kumarna tanganna oda iborih, oda ngo memmaing meronah jelma!" ²¹ Nai laus mo Jesus i sidi nai mi gembar kuta Tirus dekket Sidon. ²² Roh mo sada kalak daberru Kanaan si ni sidi i mendahi Jesus ninganna dilo-dilo, "Tuhan, Anak si Daud, masèh mo atèmu midah aku! Isellapi sètan ngo berrungku. Mpiah kalohon ngo iakap." ²³ Laju ngo oda ialoi Jesus daberru i. Nai idapetken sisinna mo Jesus lako mengidoken, "Guru pesulak mo daberru i laus. Ai menggutturi ngo ia i podinta!" ²⁴ Ialoi Jesus mo, "Pellin taba kalak Israel siso menguèi lemmo atè Dèbata sambing ngo kessa Aku ipasulak." ²⁵ Tukasi pè enggo idokken Jesus bagidi, tapi dak tong ngo roh daberru idi mendahiSa, nai sujud mo ia mersembahSa ninganna idokken, "Tuan urupi mo aku." ²⁶ Tapi ialaoi Jesus mo, "Oda ngo selloh buaten pangaan anak-anak niberrèken nola taba biang." ²⁷ "Tuhu ngo i Tuan," nina daberru i, "Tapi ipangan biang ngo iba-iba pangaan sindabuh i mèja empungna nai." ²⁸ Nai idokken Jesus mo tabasa, "Mbelgah ngo kepercayaenmu i nangè! Saut mo bagè nipergeddomu i!" Mènter gejapkenna i mo malum iakap berruna i. ²⁹ Itadingken Jesus mo bekkas i, janah merdalan mo Ia menepi-nepi tao Galilea. Nai ipenangkengi mo sada uruk janah kundul mo Ia i sidi. ³⁰ Mbuè ngo kalak merrohen mendahiSa merembah kalak sikèpang, sipètung, nitempuk sigading, sipekkak, janah mbuè dèng ma kalak simersakit. Ipenggamparken mo kalak i mi gembar Jesus, nai ipemalum Jesus mo kalak i. ³¹ Bengngap kalohon ngo jelma nterrem idi, idah kalak i kessa ndorok mongkam kalak sipekkak, sikèpang gabè njerdik, nitempuk sigading gabè merdalan, janah kalak pètung gabè merpendidah mengolihi. Nai ipepoji-poji kalak i mo Dèbata ni kalak Israel. ³² Enggo kessa i, idiloi Jesus mo sisinNa, idokken mo taba kalak i, "Masèh ngo atèngKu midah jelma nterrem èn. Enggo tellu ari dekkahna kalak i i sèn rebbakken Aku, janah bagèndari oda lot nèngè mahan panganna. Oda kubelli kalak i mellèhè lako molih, ulang gabè rapar kalak i i tengah ndalan." ³³ Ikusoken sisinNa i mo taba Jesus, "Idikè nai mo dapet kita pangaan i rambah èn, cukup bai jelma nterrem èn?" ³⁴ "Piga ngo roti ndènè?" nina Jesus taba kalak i. "Pitu ngo," nina kalak idi, "janah ikan cituk." ³⁵ Nai idokken Jesus mo jelma nterrem i kundul i babo tanoh idi. ³⁶ Ibuat Jesus mo roti pitu ngkabuah idi dekket ikan idi, nai idokken mo mejalo metangkup taba Dèbata, enggo kessa i ipenggelli mo roti idi dekket ikan idi, ipemberrèken mo taba sisinNa asa ipembagiken taba jelma nterrem idi. ³⁷ Mangan mo kalak i karina janah bessur. Nai ipepulung sisiin i mo iba-iba roti dekket ikan i, buèna pitu baka dom-dom. ³⁸ Buèna anak laki si mangan idi empat ribu kalak, laènken daberru bak anak-anak. ³⁹ Nai ipasulak Jesus mo jelma nterrem i balik. Ukum Ia ibengketti mo sada bungki lako laus mi nagerri Magadan.

¹ Lot mo roh barang piga kalak Parisè dekket Sadusè mendahi Jesus naing pedapetkenSa. Ipido kalak i mo asa ibaing Jesus tanda kelengangen, magahken Ia roh bai Dèbata nai. ² Ialoi Jesus mo, ["Mula enggo bon ari, janah mbara langit i, idokken kènè mo, ’leggo mo ari.’ ³ Janah mula siceggen idokken kènè ngo, ’Oo, roh ngo pana udan sidari èn, ai nggondem ngo.’ Ndorok ngo kènè mengeramalken ari merkitè menengen langit, keppèken tanda-tanda jaman oda ndorok iramalken kènè."] ⁴ "Jahat janah tunggangna i jelma jaman bagèndèen. Ipido kènè ngo Aku maing tanda kelengangen. Sada tanda kelengangen poda pacidahen bai ndènè, laènken tanda Nabi Jona." Enggo kessa idokken bagi, laus mo Jesus itadingken mo kalak i. ⁵ Soh kessa sisiin i mi suberrang tao, ibettoh kalak i mo enggo lupa keppè kalak i merembah roti. ⁶ Idokken Jesus mo taba kalak i, "Mermanat mo kènè meradepken ragi ni kalak Parisè dekket Sadusè." ⁷ Mendengkoh rana Jesus idi, mengerana mo sisiin i samahsa; "Kumarna oda lot siembah roti, memaingken asa bagi ranana". ⁸ Ibettoh Jesus ngo siniranaen kalak idi, jadi idokken nola mo, "Kasa mengerana kènè terrèngèt oda lot roti? Oo, kènè sikurang percaya! ⁹ Laju dèng mak iarti kènè? Oda ngo ièngèt kènè si lima roti Kupenggelli lako memerèken mangan lima ribu kalak? Piga baka lahna roti siso kerri ipepulung kènè? ¹⁰ Janah bagi ma si pitu roti taba si empat ribu kalak i? Idi pè oda ngo ièngèt kènè ma? Piga baka roti iba-iba sinipepulung ndènè? ¹¹ Kasa oda iarti kènè, kudokken ranangku idi taba kènè oda ngo terrèngèt roti? Mermanat mo kènè taba ragi kalak Parisè dekket Sadusè." ¹² Nai iarti sisiin mo maksud Jesus, idokken Jesus pè mermanat terrèngèt ragi nipakkè mahan roti, tapi terrèngèt peddah Parisè dekket Sadusè ngo perlu mermanat. ¹³ Nai laus mo Jesus mi nagerri sindessing mi kuta Kaisarèa Pilipi. Ikusoken Jesus mo i sidi taba sisinNa, "Isè ngo Anak Jelma idi idokken jelma nterrem?" ¹⁴ Ialoi sisiin idi mo, "Lot dèba mendokken si Johanes Peridiken; lot ma dèba mendokken si Elias, sidèban ma mendokken si Jeremia, barang sada ibas nabi-nabi i nai." ¹⁵ "Tapi ukum kènè isè ngo, Aku dok atè ndènè?" ¹⁶ Ialoi si Simon Petrus mo, "Kono ngo Raja Sipaluah siniperbagah-bagah Dèbata. Kono ngo Anak ni Dèbata singgelluh i." ¹⁷ Merlaba olih ngo ko alè Simon anak si Jona!" nina Jesus. "Ai oda ngo jelma memagahken idi bamu, tapi BapangKu ni sorga i ngo. ¹⁸ Kernana i èngèt mo mendè-mendè alè Petrus. Batu ngkong ngo kono, janah i babo batu cendi èn mo Kupecènder kuriangKu, siso ndorok itakiken barang isè pè, barang tah kematèen pè! ¹⁹ Kuberrèken mo bamu anak konci Kerajaen Dèbata. Barang kadè irarang kono i babo tanoh ènda, irarang ma ngo idi i sorga. Barang kadè ibennarken ko i babo tanoh ènda, ibennarken ma ngo idi i sorga." ²⁰ Nai ipernoi Jesus mo sisinNa idi asa ulang ibagah-bagahken barang bai isè pè, memagahken Ia ngo Raja Sipaluah niperbagah-bagah Dèbata. ²¹ Mungkah i sidi nai, tompel mo ibagahken Jesus taba sisinNa, "Kennah laus ngo Ia mi Jerusalem, janah menggong mbuè kinipersuk bai pengulu-pengulu, imam-imam ekuten, dekket guru-guru agama. Ibunuh mo Ia tapi ipekèkè nola ngo iari petelluken. ²² Iarahken si Petrus mo Jesus mi lambung idi, ipesèngèt si Petrus mo Ia nina mo, "Katerra pè ipedaoh Dèbata mo sibagidi bamu nai Tuhan! Ulang mo terjadi i bamu." ²³ Itengen Jesus mo si Petrus, ninganna idokken, "Laus mo kono i gembarKu nai bolis! Dak ihalang-halangi ko ngo Aku. Ai sura-sura jelma ngo ipikiri kono oda ngo sura-sura Dèbata!" ²⁴ Enggo kessa bagidi idokken Jesus mo taba sisinNa, "Barang isè mengèkutken Aku, kennah ilupaken mo dirina, ipersan mo silangna, nai ièkutken mo Aku. ²⁵ Ai barang isè mengkekelengi kessahna, ia ngo kembalangen kessah. Tapi barang isè kembalangen kessah kumarna Aku, ia ngo mengerasaken kenggelluhen soh mi amman sumendah. ²⁶ Kadè mo gunana mula pè suberri dunia èn milikna, ukum mago ngo tendina? Tentu oda lot labana. Ai oda ndorok itukarken dekket barang kadè pè kenggelluhen? ²⁷ Ai roh nè mo Anak ni Jelma merdengan Kuasa BapaNa, rebbak dekket malaèkat-malaèkatNa. I sidi mo balessenNa taba gennep jelma rembang mi sinibahanna. ²⁸ Èngèt mo, lot ngo ipas kènè simertumpu èn nai, oda matè dèng ia ukum makdèng idah ia Anak Jelma idi roh bagè Raja."

¹ Enggo kessa ennem ari nola, iarahken Jesus mo si Petrus, si Jakobus dekket si Johanes, simerkaka merkuanggi i mi babo delleng ndates. Pellin kalak i ngo kessa i sidi. ² Nai mènter mobah mo rupa Jesus idah kalak i, abèNa mercala-cala bagè mataniari janah pakkènNa merkillok-killok bagè cuhaya. ³ Nai idah kalak i sitellu nola mo si Musa dekket si Elias mengeranai dekket Jesus. ⁴ Idokken si Petrus mo taba Jesus, "Tuhan, merasa kaloon siakap i sènda, mula uè Kono Tuhan, asa kupekkadè i sènda tellu sapo-sapo, sada bamu, sada bai si Musa, janah sada nai bai si Elias." ⁵ Sinderrang mongkam dèng si Petrus idi, roh mo hembun nterrang kalohon menangkemmi kalak idi janah terdengkoh mo sora i hembun idi nai, "Èn ngo AnakKu siKukekelengi, lemmo ngo atèngKu midahsa. Dengkohken kènè mo Ia!" ⁶ Idengkoh sisiin Jesus kessa mo sora idi, buradan mo kalak idi, sanga tangkep kalak i mi tanoh. ⁷ Tapi roh mo Jesus menjamah kalak i, "Kèkè mo kènè" nina, "Ulang kènè mbiar". ⁸ Kèkè kessa mo kalak i, sada kalak poda idah nèngè i sidi, laènken pellin Jesus nai ngo kessa. ⁹ Tikan mengencuah kalak i i delleng i nai, ipernoi Jesus mo kalak idi, "Ukum mak dèng balik nggelluh mengolihi Anak ni Jelma idi, ulang lebbè bagah-bagahken bai barang isè pè sini idah ndènè ndai." ¹⁰ Nai ikusoken sisinna mo taba Jesus, "Kasa idokken guru-guru agama Jahudi roh ngo nina lebbè si Elias?" ¹¹ Ialoi Jesus mo, "Tuhu ngo lebbèen roh si Elias janah kennah ihantari ngo karinana. ¹² Tapi kodokken mo taba kènè, enggo roh si Elias, tapi oda itandai dèba ia; lemmo-lemmo kalak i ngo ibaing tabasa. Bagi ma ngo bang Anak jelma idi ibaing kalak i." ¹³ Nai iarti sisiin idi mo, si Elias nidokkenNa idi, imo si Johanes Peridiken. ¹⁴ Soh kessa mo kalak i mendahi jelma nterrem idi, roh mo sada kalak anak laki, mènter sujud i hadeppen Jesus. ¹⁵ Nina mo, "Guru, masèh mo atèMu taba anakku i. Ai solpetten ngo ia. Mula menemboh solpetna idi, mènter oda nèngè ngo ibettoh jèhè juluna, ai nggati ngo ia onjem mi api, janah sipata mi laè. ¹⁶ Enggo ngo kutaruhken nemmu mendahi sisinMu i, tapi oda terpemalum kalak i." ¹⁷ Ialoi Jesus mo, "Nong, soh mo iakap kènè i! Tuhu-tuhu ngo kènè siso percaya janah enggo salah kalohon. Kennah sadikè dekkah nai Aku rebbak dekket kènè janah sobar mengidah kè? Embahken kè mo anak i mi sèn." ¹⁸ Nai ipelaus Jesus mo sètan i karuar. Janah karuar mo sètan-sètan i, nai mènter njuah mo iakap anak i gejapkenna i. ¹⁹ Nai idapetken sisiin i mo Jesus sadaSa, ikusoken mo tabaSa, "Guru, kasa oda terpelaus kami sètan idi?" ²⁰ Ialoi Jesus mo, "Kumarna kurang percaya ngo kènè. Èngèt mo! Kum lot ngo kepercayaen ndènè nasa buah arum, ndorok ngo dokkonen ndènè bai delleng adèi, ’Mompat mo kono i sèn nai mi sadona’ Kennah mompat ngo delleng i, janah kadè poda mak ndorok bakinen ndènè! ²¹ Tapi ukum sètan si samatcam èn, pellin mersodip dekket puasa ngo kessa ndorok mengusir idi.]" ²² Sinderrang pulung sisiin Jesus i Galilea, idokken Jesus mo taba kalaki, "Oda ndekkah nèngè, ipessoh mo Anak Jelma i bai jelma. ²³ Ibunuh kalak idi mo ia tapi kèkè nola ngo Ia i ari petelluken." "Nai mellui kalohon mu ukur sisiin idi." ²⁴ Tikan soh Jesus dekket sisinNa mi Kapernaum, roh mo simertunggu belasting mi bages Jerro mendahi si Petrus lako mengkusoken, "Igarar Gurumu ngo gugu mi Bages Jerro barang oda?" ²⁵ Ialoi si Petrus mo, "Igarar ngo!" Balik kessa mo si Petrus, tikan madèng mongkam ia, idokken Jesus mo mbangsa, "Simon, bakunè ngo dok atèmu? Isè ngo kenah menggarar cokè barang gugu bai raja-raja dunia èn? Rayat ngo barang sidèban?" ²⁶ "Kalak sidèban ngo," nina si Petrus. "Mula bagi ngo," nina Jesus nola ma, "rayat oda pella menggarar. ²⁷ Tapi ulang ncio ukur kalak i sibakin. Laus mo ko mengkail mi tao. Buat mo ikan siperlebbè sidapet kono i. Ibagasen babah ikan idi, jumpa kono mo kèpèng, cukup menggarar gugunta sidua. Buat mo kèpèng idi, nai garar mo taba kalak idi gugu mi Bages Jerro."

¹ Sinderrangna i roh mo sisiin i mendahi Jesus janah ikusoken mo, "Isè ngo simbelgahna i Kerajaen Dèbata?" ² Nai idokken Jesus mo roh sada kalak anak-anak, idokken mo ia cènder i lebbè-lebbè kalak idi. ³ Idokken Jesus mo, "Èngèt mo! Mula lot perrobahen ndènè janah tosè bagè anak-anak, baru pè asa ndorok kènè mbengket mi Kerajaen ni Dèbata. ⁴ Kalak simbelgahna i Kerajaen Dèbata, imo kalak sipeteruhken dirina janah tosè bagè anak-anak idi. ⁵ Asa, barang isè menjalo anak-anak sibagèn kumarnaken Aku, dosken Aku ngo sinijalona i sidi." ⁶ "Barang isè memaing sada kalak ibas sikèdèk ènda nai gabè oda nè percaya taba Aku, lotiin mo igantungken batu penggilingen mi kerahongna lako mengelennengkensa mi laut mbages. ⁷ Merjaya mo dunia ènda, kerna mengèla jelma lako merdosa. Dak tong ngo lot sibagidi, tapi merjaya mo kalak simemaingsa." ⁸ "Mula tanganmu barang nèhèmu memaing ko merdosa, gettap mo janah pitakken. Lotiin mo ko nggelluh rebbak Dèbata, oda i sidi serrap tanganmu barang nèhèmu, ulang pada bolet karina sendihimu ibuang mi narakka. ⁹ Janah mula matamu memaing kono merdosa, poldit mo i janah pitakken. Lotiin mo kono nggelluh rebbak Dèbata mermata sada, ulang pada ibuang mi narakka rebbak duana." ¹⁰ "Abas! Ulang pellèa kènè barang apaina ibas sikèdèk èn nai. Kerna èngèt mo, ai dak i hadeppen BapangKu si ni sorga idi ngo malaèkat-malaèkatna." [ ¹¹ Kerna roh pè Anak Jelma, lako peluahken kalak si laling ngo.] ¹² "Bakunè ngo dok atè ndènè? Umpamana lot sada kalak merbiri-biri serratus, nai mbalang mo sada biri-birina i, bakunè ngo baingen sidasa i? Otang itadingken mo biri-biri sibahpuluh sibah i jampalen, lako menulusi biri-biri si laling i. ¹³ Janah mula jumpasa nola biri-biri i, kum katèngKu kennah loloon ngo ia mengidah biri-biri sisada i, ulang pada sisibahpuluh sibah siso laling i. ¹⁴ Bagi ma ngo Bapa ndènè ni sorga i, oda toko atèna mula lot ibas singkèdèk èn nai gabè laling." ¹⁵ "Mula merdosa denganmu meradepken kono, dahi mo ia, bagahken mo kesalahenna. Baing mo bagidi sipsip pellin kè sidua sambing. Mula iuèi ranamu, merhasil mo kono merdenganken denganmu i mengolihi. ¹⁶ Tapi mula oda ngo, arahken nola mo denganmu sidèban sada barang dua kalak nai. Ai tersurat ngo ibas Bibèl; nasa tukas kennah dua barang tellu kalak saksi." ¹⁷ Mula bagidi pè oda ma terjalosa sipesèngèt kalak idi, bagahken mo mi kuria. Janah mula oda ma terjalosa sipesèngèt kuria i, ètong mo ia bagè sada kalak siso menandai Tuhan barang bagè sada kalak pertunggu belasting." ¹⁸ "Èngèt kènè mo èn, "Barang kadè irarang kènè i dunia èn, irarang ma ngo idi i sorga, barang kadè ibennarken kènè i dunia ènda, ibennarken ma ngo idi i sorga. ¹⁹ Janah èngèt kènè ma mo: Mula lot dua kalak merdos atè kènè lako menodipken barang kadè sambing, iuèi BapangKu ni sorga i ngo sodipna idi. ²⁰ Kerna mula lot dua barang tellu kalak rebbak tumpu kumernaken Aku, i tengah-tengah kalak idi ngo Aku." ²¹ Nai roh mo si Petrus mendahi Jesus lako mengkusoken, "Tuhan piga kali ngo ndorok kuampuni denganku mersalah taba aku? Sanga ngo pitu kali?" ²² Ialoi Jesus mo, "Èngèt mo! Oda ngo pitu kali, tapi soh pitupuluh kali pitu ngo! ²³ Kerna codi ngo Kerajaen Dèbata bagè sada kalak Raja naing merrètong utang-utang naposona. ²⁴ Tikan imulai merrètong i, lot mo ibas naposo i nai iembah mi hadeppenna. Naposo èn merutang merjuta-juta, ²⁵ janah maknè tergararsa utangna idi. Idokken raja i mo asa idèaken nasa milikna dekket dukak-dukakna bak sinibagesna pè, asa lot lako menggarar utangna idi. ²⁶ Kumarna nai, mersembah merkuraja mo naposo i taba raja i lako mengidoken, ’Tuan, pesobar mo lebbè midah aku naposomen, kugarar pè karinana utangku idi.’ ²⁷ Nai masèh mo atè Raja i midahsa, gabè iampuni mo ia janah patè mo utangna i karinana. ²⁸ Tapi karuar kessa mo naposo ndai, pesimbak mo ia dekket sada kalak denganna naposo simerutang bana barang piga-piga ribu. Itangkup mo dengana i, mènter ipokkik mo, ’Garar karina utangmu i bangku!’ ²⁹ Nai mersembah merkuraja mo denganna i ninganna mengidoken, ’Sobar mo ko lebbè oè, kugarar pè karina utangku idi!’ nina. ³⁰ Tapi oda isarihken naposo i pengidoon denganna idi, sampè igarar utangna idi. ³¹ Nai idah denganna naposo sidèbanna i kessa mo simasa i, mellui mo atè kalak i, ibagahken mo i taba raja i. ³² Nai itenggoi raja i mo naposo jahat ndai, idokken mo tabasa, ’Naposo jahat! Karinana utangmu enggo kuselangsaèken kerna ièlèk kono aku. ³³ Otang kono pè nemmu kennah bagi ma ngo mermasèh atè taba denganmu naposo, bagè sienggo kubaing i mendahi ko?’ ³⁴ Nai mellaga kalohoon mo raja i, ipemasuk mo naposo si jahat i mi kurungen. I sidi mo ia mèma igarar karinana utangna idi." ³⁵ Pengujungi sukuten idi idokken Jesus mo, "Bagi ma ngo ibaing BapangKu ni sorga i taba kènè, ukum mak iampuni kènè dengan ndènè ibagasen atè mbersih."

¹ Enggo kessa pul iranaken Jesus karinana sindai, itadingken mo Galilea lako laus mi nagerri Juda i kèparen Laè Jordan. ² Mbuè ngo kalak mengèkutkenSa, janah ipemalum ngo kalak i karina. ³ Nai roh mo kalak Parisè naing mencuba Jesus. Ikusoken kalak i mo, "Bakunè ndorok ngo kalak menirangken sinibagesna mengèkutken hatoren agamanta barang merkitè alasen kadè pe?" ⁴ Ialoi Jesus mo, "Oda ngo pennah ijaka kè ibas Bibèl, ai daholi dekket daberru ngo jelma itempa situmempai i mulana i? ⁵ Kessa i idokken nola ma mo, ’Kumarna nai, kennah itadingken anak laki ngo partuana lako mendahiken sinibagesna asa gabè sada kalak i sidua.’ ⁶ Asa oda ngo kalak idi dua kalak nèngè, tapi sada ngo. Kumarna nai, jelma i mak ndorok menirang barang kadè sienggo ni peddemmu Dèbata." ⁷ Nai ikusoken kalak Parisè dèng ma mo tabaSa, "Mula bagi ngo kasa idokken si Musa, berèenken mo surat sirang lako menirangken?" 19:7: 5 Ms. 24:1-4; Mat. 5:31* ⁸ Nai mènter idokken Jesus mo taba kalak i, "Kerna ni jahat ndènè ngo memmaing asa ibelli si Musa kènè menirangken sinibages ndènè; tapi oda kin ngo bagidi arnia i. ⁹ Dengkohken kènè mo ènda: Kalak simenirangken sinibagesna -- keppèken oda kumerna merlangkah julu meddem -- janah kabin nola ma ia dekket daberru sidèban, merlangkah julu meddem ngo kalak i terdokken." 19:9: Mat. 5:32; 1 Kor. 7:10-11* ¹⁰ Gabè idokken sisiin i mo taba Jesus, "Mula bagi ngo keppèken terrèngèt jejap, padaan mo ulang." ¹¹ Ialoi Jesus mo, "Oda ngo karina jelma ndorok terjalosa kata idi, laènken pellin kalak sienggo itentuken Dèbata. ¹² Kerna lot pè kalak oda kabin, kerna enggo kin ngo pertubuhna bagidi. Lot ma ngo oda kabin jelma, kerna nakkatna ibaing dèba, janah lot ma ngo memilih sendiri ia oda kabin asa lebbih mertuhu-tuhu mengkebasi Dèbata. Barang isè ndorok mengulaken peddah ènda, ijalo mo i." ¹³ Lot mo kalak merembahken anak-anak mendahi Jesus, asa iampèken Jesus tanganNa mi babontakal kalak i janah isodipken. Tapi mènter mellaga mo sisiin i taba kalak i. ¹⁴ Tapi idokken Jesus mo, "Padiat kènè mo roh sikèdèk-kèdèk i mendahi Aku! Ulang gerai kènè kalak i, kerna bagè kalak èn ngo simbengket mi Kerajaen Dèbata!" ¹⁵ Nai, iampèken Jesus mo tanganNa bai sikèdèk-kèdèk idi, janah memasu-masu kalak i. Nai laus mo Ia i sidi nai. ¹⁶ Tikan i sada ari, lot mo sada kalak anak laki roh mendahi Jesus. "O Guru," nina, "Simendè bakunè ngo bakinenku asa dapet aku kenggelluhen soh mi amman sumendah i?" ¹⁷ Ialoi Jesus mo, "Kasa ikusoi ko Aku terrèngèt apaina simendè? Pellin sada ngo kessa mendè, imo Dèbata. Mula sèkel ko naing terolih kenggelluhen soh amman sumendah i, kennah ulaken mo karinana sinidokken Dèbata." ¹⁸ "Siapaina mo idi?" nina anak laki i. Ialoi Jesus mo, "Ulang ko memmunuh, ulang ko merlangkah julu meddem; ulang ko menangko; ulang kono merluap. 19:18: 2 Ms. 20:13-16; 5 Ms. 5:17-20* ¹⁹ Pesangap partuamu, janah kekelengi mo denganmu jelma bagè pengkekelengimu mi dirimu." 19:19: 2 Ms. 20:12; 5 Ms. 5:16; 3 Ms. 19:18* ²⁰ "Karinana idi, enggo mo kuulaken," nina anak perana idi, "Nai kadè dèng dèba nai siperluna?" ²¹ Idokken Jesus mo mbangsa, "Mula naing sèkel kono merandal kalohoon, laus mo ko merdèa karina silot bamu. Berrèken mo tokorna i taba kalak sincoor, nai merharta mo kono i sorga. Enggo kessa i, roh mo ko balik mi sèn, èkutken mo Aku." ²² Idengkoh anak perrana i kessa mo rana idi, laus mo ia merdengan bonek, ai kalak kaya joong ngo ia. ²³ Nai idokken Jesus mo taba sisiinNa, "Kodokken mo bai ndènè, mahal kalohoon ngo kalak sibèak mbengket mi Kerajaen Dèbata." ²⁴ Kudokken mo taba kènè, "Murahen ngo iakap sada gajah mbengket mi lubang jarum, ulang pada sibèak mbengket mi Kerajaen Dèbata." ²⁵ Idengkoh sisiin i kessa mo nidokken Jesus i, lengang mo kalak i. "Mula bagi, isè ngo kessa maluah?" Nina sisiin i. ²⁶ Itengen Jesus mo kalak i, ninganna idokken, "Mahal ngo i, ukum bai jelma! Tapi oda lot mahal ukum bai Dèbata!" ²⁷ Nai idokken si Petrus mo, "Idah mo, ukum kami enggo mo kutadingken kami karinana, lako mengèkutken Guru i. Nai kadè mo sinaing jaloon nami?" ²⁸ Idokken Jesus mo taba kalak i, "Èngèt kènè mo! Anak Jelma idi kundul sikali èn i babo tahta kerajaen simermulia i dunia rimbaru. Nai kènè pè sisinKu kundul ma mo i babo tahta sisipuluh dua tahta janah mengerungguken sipuluh dua marga Israel! 19:28: Mat. 25:31; Luk. 22:30* ²⁹ Barang isè sienggo menadingken bagesna, kaka-anggina, barang turangna, barang partuana, barang dukak-dukana, barang jumana kumarna Aku, jalonna mo siratus kali lempit. Janah iberrèken ma mo bana kenggelluhen amman-sumendah i. ³⁰ Tapi mbuè ngo kalak sibagèndari, perlebbè kin gabè perpodi, janah mbuè ma ngo siperpodi kin gabè perlebbè." 19:30: Mat. 20:16; Luk. 13:30*

¹ "Codi ngo Kerajaen Dèbata bagè sada kalak sidasa pekken anggur lako menulusi kalak mengulaken pekken anggur idi njengkas. ² Enggo kesa lot keputusenna lako penggararen upah sada kalak imo sada kèpèng pirak sidari, ipasulak mo kalak idi mengula mi pekken anggurna i. ³ Tupung pukkul sibah siceggen, laus nola mo sidasa pekken i, jumpasa nola mo tah piga-piga kalak nai oda lot bahanna i pasar. ⁴ Jadi idokken mo taba kalak i. ’Laus mo kènè mengula mi peken anggurku. Kugarar pè upah ndènè bagè patutna.’ ⁵ Nai laus nola ma mo ia tupung cèger ari, bagi ma i pukkul tellu ciboon, laus dèng ma ngo sidasa pekken anggur idi, memmaing bagè sindai dèng ma. ⁶ Janah kira-kira pukkul lima mayak ramben, laus dèng ma ngo ia, gabè iidah mo lot kalak, laju oda lot bahanna. Nai ikusoken mo taba kalak idi, ’Kasa dak cènder sambing kènè i sènda suntuk ari èn oda merkadè?’ ⁷ Ialoi kalak idi mo, ’Isè poda pasulakken kami lako mengula.’ ’Mula bagi ngo,’ nina sidasa pekken i, ’Laus mo kènè dekket mengula mi pekken anggurku.’ ⁸ Enggo kessa ramben, idokken sidasa pekken anggur i mo taba mandurna, ’Dilo mo karina simengula idi, asa igarari upahna, mulai i perpodi nai soh mi si perlebbè masuk.’ ⁹ Nai roh mo pengula simengula mulai pukkul lima mayak ramben. Ijalo kalak i mo tersada kèpèng pirak. ¹⁰ Nai roh ma mo pengula sinigaji mulai siceggen. Dokatè kalak idi, bakunè pe menjalo mo ia lebbih nasa i. Keppèken kalak i pè tong ngo ijalo sada kèpèng pirak ma. ¹¹ Sinderrang menjalo kèpèng idi kalak i, ngutnguten mo kalak i taba sidasa pekken anggur i. ¹² Nina mo, ’Pengula siperpodi roh i, pellin sada jam ngo kalak i mahan bahaan, keppèken kami mahan bahaan soh sidari suntuk menggongken nggara ari. Kasa nola igarar kono upah nami dos dekket kalak idi!’ ¹³ Ialoi sidasa pekken i mo, ’Oè, oda lot kubakin siso adil bamu, otang enggo kin ngo toko atèmu menjalo upah sada kèpèng pirak sidari? ¹⁴ Na, jalo mo upahmu lako mo. Ai naing ngo dok atèngku kuberrèken upah taba kalak siperpodi masuk idi dos dekket sikuberrèken bamu. ¹⁵ Otang lemmongku ngo memmaing barang bakunè hartangku? Barang tah oda kono sennang kumarna mendè kubaing taba sidèban?’ " ¹⁶ Nai idokken Jesus nola ma mo, "Bagi mo siperpodi i kin gabè perlebbè janah siperlebbè i kin gabè perpodi." ¹⁷ Tikan laus Jesus mi Jerusalem, nai i tengah ndalan idilo Jesus mo sisinNa merpulung pellin kalak i. Idokken mo taba kalak idi, ¹⁸ "Dengkohken mo! Bagèndari laus mo kita mi Jerusalem. Ipesakat mo Anak Jelma idi mendahi imam-imam ekuten dekket mendahi guru agama. Nai ihukum matè mo Ia. ¹⁹ Nai ipesakat mo ia taba kalak siso bangsa Jahudi. Itertabai kalak i mo Ia, isiksa janah ipersilangken mo Ia. Tapi ipegelluh nola ngo mengolihi i ari petelluken." ²⁰ Enggo kessa i roh mo sinibages si Zebedeus rebakken dekket dukak-dukakna mendahi Jesus. Mersembah mo ia i hadeppen Jesus lako mengido. ²¹ "Kadè naing bamu nangè?" nina Jesus. Ialoi mo, "Dok atèngku naing mo duana dukakku ènda kundul sada i kamuhunmu sada i kambirangmu, mula enggo kessa saut Tuan i gabè Raja." ²² "Oda ibettoh kènè sinipido ndènè idi," nina Jesus taba kalak idi. "Terrènum kènè ma ngo arap perrènumen kinidersa sikennah Kuènum idi?" "Terrènum kami ngo," nina kalak i. ²³ Nai idokken Jesus nola mo, "Tuhu ngi, iènum kènè ngo arap perènumenki. Tapi ukum terrèngèt isè kundul i kamuhunku barang i kambirangKu oda ngo guru bangku i. Iberèken Bapa pè bekkas i pellin taba sienggo itentuken kin ngo." ²⁴ Mendengkoh i, sisinna sisipuluh i nai, mellaga mo kalak i taba sidua kalak merkaka meranggi i. ²⁵ Kernana i idilo Jesus mo kalak i karina, nai idokken mo, "Ibettoh kènè ngo mula bangsa siso menandai Dèbata gabè ekuten, itindas ngo rayatna. Janah perpangkat-perpangkat ndates memetcek kalak i. ²⁶ Tapi oda ngo bagi ukum kènè. Barang isè kènè naing mbelgah, kennah mo ia gabè perkebbas. ²⁷ Janah barang isè naing gabè perlebbè, ia mo naposo pasulaken. ²⁸ Bagè Anak Jelma idi, roh oda ngo asa ikebbasi, tapi lako mengkebasi ngo, janah memerrèken kessahNa mahan tebbus jelma mbuè." ²⁹ Tikan itadingken kalak i kuta Jeriko, mbuè ngo kalak mengèkutken Jesus. ³⁰ I biding dalan, lot mo dua kalak sipètung kundul-kundul. Tikan idengkoh kalak i memellus Jesus, dilo-dilo mo kalak i, "O Tuhan, Anak si Daud, masèh mo atèmu bai nami!" ³¹ Ilagai jelma nterrem ni sidi mo kalak idi, janah idokken asa sip. Tapi makin ipegang kalak i nola ngo mendiloken, "Alè Anak si Daud, masèh mo atèmu bai nami!" ³² Nai mentadi mo Jesus, idiloi mo kalak idi, ikusoi mo, "Kadè ipergeddo kènè bakinenku bai ndènè?" ³³ Ialoi kalak i mo, "Tuhan, merpendidah mo nemmu kami!" ³⁴ Masèh mo atè Jesus midah kalak idi, ijamah mo mata ni kalak idi, nai mènter merpendidah mo. Ièkutken kalak i mo Jesus gejapkenna i.

¹ Enggo kessa ndessing kalak i mi Jerusalem, soh mo kalak i mi Betpage i Uruk Zaitun. Ipasulak Jesus mo i sidi nai dua kalak sisinNa lebbèen merdalan. ² "Laus mo kènè mi kuta si ni jolo ndènè adoi," nina Jesus taba kalak idi. "Mènter idah kènè mo nahan i sidi sada kalodè tertambat rebbak dekket anakna. Osari kènè mo duana kalodè i janah iring kènè mi sènda. ³ Mula lot kalak mendokken ranana, dokken kènè mo tabasa, ’Perlu ngo i bai Tuhan i,’ nai ibelli ia mo kalodè i iiring kènè." ⁴ Masa pè bagi asa saut sinidokken nabi bagèen, ⁵ "Bagahken mo taba kuta Sion, Rajamu roh bagèndari mendahi kono. Percerrep ukur ngo ia janah mengkunduli sada kalodè, imo anak kalodè bajar dèng." ⁶ Nai laus mo sisiin sidua kalak i, pesautken bagè ni tennahken Jesus taba kalak idi. ⁷ Iiring kalak i mo kalodè i dekket anakna, ialasken kalak idi mo jubahna mi gurung kalodè i. Nai ipasang Jesus mo kalodè i. ⁸ Jelma nterrem ni sidi pè mènter ipengalasken mo jubahna i dalan idi janah dèba memenggelli ranting-ranting lako bakinen mi tengah ndalan i. ⁹ Jelma nterrem simerdalan i lebbè dekket i podi Jesus mengoangken: "Hosianna bai Anak si Daud! Ipasu-pasu Tuhan i mo Ia siroh merkitè-kitè gerar Tuhan! Poji mo Dèbata Sintèmbul i!" ¹⁰ Nai ibengketti Jesus kessa mo Jerusalem, gabè gontar mo kuta i. "Isè ngo èn?" nina pengisi kuta i. ¹¹ "Nabi Jesus ngo i, i Nazaret si ni Galilea nai," nina jelma nterrem sirebbakken dekket Jesus i. ¹² Nai masuk mo Jesus mi kasèan Bages Dèbata, iusir mo karina jelma simertiga-tiga i sidi. Ipentombang-mbalingken mo mèja kalak simenukari riar, dekket bangku-bangku simerdèa ndarapati. ¹³ Nina mo taba kalak i, "Lot ngo tersurat ibas Bibèl, idokken Dèbata ngo ’Bekkas mersodip ngo bagesKu.’ Tapi gabè ibaing kènè nola ngo gabè bekkas pengkilangen." ¹⁴ Merrohen mo kalak sipètung dekket nitempuk sigading mendahi Jesus mi Bages Dèbata idi janah ipemalum Jesus ngo kalak idi. ¹⁵ Tapi punguren mo imam ekuten dekket guru-guru agama Jahudi mengidah simasa kelengangen nibaing Jesus idi. Makin punguren ngo kalak i mendengkoh oang-oang anak-anak silot i Bages Dèbata idi, "Hosianna bai Anak si Daud!" ¹⁶ Idokken kalak i mo taba Jesus, "Idengkohken kono ngo sinidokken kalak idi?" "Uè kudengkoh ngo," nina Jesus. "Mak dèng ngo pennah ijaka kènè ayat Bibèl bagèen, ’Anak-anak dekket anak mbara enggo iajari kono lako mengeruapken kata pemoji-mojiin’?" ¹⁷ Nai itadingken Jesus mo kalak idi, karuar mo ia i kuta i nai laus mi Betania, i sidi mo ia mermalam. ¹⁸ Sibarembenkenna ceggen i, i tengah ndalan tikan lako balik mi kuta Jerusalem, mellèhè mo iakap Jesus. ¹⁹ Idah Jesus mo ibiding dalan idi lot kayu ara. Idahi mo kayu ara idi, tapi oda lot buahna giam singkabuah, mak pellin bulungna sambing. Nai idokken Jesus mo taba kayu ara idi, "Oda ndorok merbuah nèngè kono!" Nai mènter males mo kayu ara idi. ²⁰ Idah sisiin i kessa mo simasa i, lengngang kalohoon mo kalak idi. "Bakunè ngo perjadina i ndorok gejapkenna i matè kayu ara i?" nina kalak idi. ²¹ "Èngèt kènè mo!" nina Jesus. "Mula percaya kènè janah oda sangsi, ndorok ngo ibaing kènè bagè sienggo Kubaing mi kayu ara èn. Oda pellin i sambing tupèh; mendahi uruk ènda pè ndorok ngo idokken kènè, ’Mompat mo kono mi laut!’ saut ngo bagidi. ²² Ai barang kadè sambing pè ipido kènè ibagasen sodip ndènè, jaloon ndènè ngo i asal mo percaya kènè." ²³ Enggo kessa bagidi, ibengketti Jesus nola mo Bages Dèbata, nai mengajari mo ia i sidi. Sinderrang mengajari i Ia, roh mo imam ekuten dekket pengulu-pengulu Jahudi mengkusoken baNa, "Dikè ngo dalanna kono memaing ènda karinana? Isè memerèken kuasa i baMu?" ²⁴ Ialoi Jesus mo, "Aku pè naing mengkuso ngo mendahi kènè. Enggo kessa ialoi kènè kuso-kusongku èn, nai pè asa kubagahken taba kènè, kuasa bai isè nai Aku memaingken karinana idi. ²⁵ Kuasa bai isè nai ngo bai si Johanes lako peridiken jelma i? Bai Dèbata nai ngo barang bai jelma nai?" Nai mersungkuun mo imam-imam ekuten dekket pengulu-pengulu Jahudi samah-samahsa, nina bagèen, "Mula sidokken, ’Bai Dèbata nai,’ dokkenenkenna mo banta, ’Kasa oda percaya kènè bai si Johanes?’ ²⁶ Tapi mula sidokken, ’Bai jelma nai,’ tentu sijaga perasaan jelma nterrem ai nabi ngo ia dok atè sinterrem idi." ²⁷ Jadi ialoi kalak idi mo, "Oda kubettoh kami i." Nai idokken Jesus mo taba kalak idi, "Oo, mula bagi ngo, Aku pè oda Kubagahken bai ndènè, barang kuasa isè sikubaing èn." ²⁸ "Bagèndari pè bakunè ngo dok atè ndè terrèngèt mi sèn?" nina Jesus nola. "Lot mo sada partua bak dua anakna. Idahi mo anakna situaan nina mo mbangsa, ’Alè pa, laus mo ko mengula mi pekken anggur ari èn.’ ²⁹ Ialoi anakna i mo, ’Oda uè aku’ nina. Tapi gabè mobah nola mo ukurna, nai laus mo ia mengula mi pekken anggur i. ³⁰ Nai laus nola mo partua i mendahi anakna sipeduaken, idokken ma mo bagè katana bai situaan i. Ialoi anakna peduaken i mo, ’Uè pa,’ tapi oda laus ia. ³¹ Bagi mo idi, siapaina ngo anakna sidua i mengulaken nidokken bapana i?" "Situaan idi ngo," nina imam ekuten dekket pengulu-pengulu Jahudi i. Nai idokken Jesus mo taba kalak i, "Peratè-atèken kènè mo: Lebbèen ngo kalak pertunggu cokè dekket daberru siso kasèa gabè ginemgem Kerajaen Dèbata, asa kènè. ³² Roh ngo si Johanes Peridiken menuduhken dalan situhunna bai ndènè tapi oda percaya kènè bana. Ai tukasi pè enggo idah kènè karinana idi, lalap ngo oda mobah pikiren ndènè, janah oda percaya bai Tuhan." ³³ "Dengkohken mo codiin èn," nina Jesus. "Lot mo sada kalak sidasa pekken anggur. Ipagar ngo pekkenna i kuliling. Janah ibahan bekkas lako memerroh anggur idi. Ipekadè pantar bekkas merjaga. Nai ibellah pinangken mo pekken anggur idi bai ndèba, janah laus mo ia kiladang. ³⁴ Dapet kessa katikana, memotik buah anggur, ipasulak sidasa pekken anggur i mo naposona mendahi simellah-pinang i, lako menjalo bagianna. ³⁵ Tapi itangkup simellah-pinang i mo naposo pasulaken i, sisada ipekpekki, sidèbanna ibunuh, dèba nai ibentiri dekket batu. ³⁶ Nai ipasulak sidasa pekken i nola mo naposona sidèban, buèen asa siperlebbè idi. Tapi ukum simellah-pinang idi, tong ngo ibaing bagè mendahi pasulaken perlebbè ndai. ³⁷ Perpodi kaloon, ipasulak sidasa pekken i mo anakna sendiri, dekket pengharapen; tentu nangga atè pemellah pinang i midah anakna nipasulakna i. ³⁸ Tapi, idah pemellah pinang i kessa mo anak sidasa pekken idi, nina kalak i mo samahsa, ’Èn ngo anak sidasa pekken i; aci, sibunuh mo ia, asa banta harta tinadingna i!’ ³⁹ Itangkup kalak i mo anak idi, isaran mo ia mi ruar pekken idi, nai ibunuh mo!" ⁴⁰ "Mula balik kessa mo sidasa pekken anggur idi, bakunè mo ndia ibaing taba pemellah pinang idi?" nina Jesus. ⁴¹ Ialoi kalak idi mo, "Tentu bunuhenna mo kalak perjahat i, janah ipebellah-pinangken nola pekken anggurna i taba kalak siuè memerèken bagianna ibas hasil tanoh idi nai." ⁴² Gabè idokken Jesus mo taba kalak idi, "Mak dèng ngo nung ijaka kènè sitersurat ibas Bibèl bagèen: ’Batu si nipatakken tukkang bages idi, enggo gabè batu simahargana. Èn mo nibaing Tuhan i, soh mo mendèna!’ " ⁴³ "Asa èngèt kènè mo," nina Jesus. "Karinana hak ndènè kin nemmu gabè bangsa Dèbata icabut mo i bai ndènè nai, janah iberrèken mo taba bangsa simenguèi perèntah Dèbata. [ ⁴⁴ Barang isè pè ndabuh mi batu èn, mpustak merbincahcah mo ia; janah merlicaten mo kalak nitinggangen sindabuh i.]" ⁴⁵ Kessa pul idengkoh imam-imam ekuten bak Parisè umpama idi, iartiken mo rana i; taba kalak i ngo mengenna kata idi. ⁴⁶ Nai mertaki sinunu mo kalak i lako menangkup Jesus; tapi mbiar ngo kalak i midah jelma nterrem idi, ai nabi ngo Jesus idok atè jelma nterrem i.

¹ Mengerana nola mo Jesus taba jelma nterrem merkitè codiin. ² Nina mo, "Codi ngo kerajaen Dèbata bagè sada kalak raja memèstaken anakna merbayo. ³ Ipasulak raja i mo naposona mengalengi kalak sienggo idilo kin mi pèsta i. Tapi oda uè roh kalak sienggo idilo i kin. ⁴ Nai ipasulak raja i nola mo nposona sidèbaan. Idokken raja i mo taba kalak i, ’Enggo kuhantari karinana i pèsta i lembu dekket anak lembu singgomokna enggo mo isembellih. Enggo mo hantar karina. Roh mo kè mi pesta merbayo idi!’ ⁵ Tapi oda isarihken si ni dilo idi kin. Merlausen ngo kalak idi mi bahanna gennep -- dèba mi jumana, dèba nai mi perusahanna; ⁶ janah sidèbanna nai tupèh menangkup naposo raja i ninganna ipukkuli janah ibunuh. ⁷ Idengkoh raja i kessa mo idi mellaga kalohon mo ia. Ipasulak mo pakalimana memunuh perjahat-perjahat i, janah ilekkup mo kuta kalak i. ⁸ Enggo kessa bagi, idiloi mo naposona nina mo, ’Enggo mo hantar karinana mi bahaan pèsta i, tapi ukum kalak nidiloon idi kin, oda ndorok nèngè dekket. ⁹ Laus mo kènè bagèndari mi dalan-dalan mbellen, barang piga jumpa kènè, dokken kènè mo roh mi pèsta idi.’ ¹⁰ Nai laus mo kalak idi, idahi kalak i mo dalan mbellen janah ipendokken mo nasa jelma silot jumpa kalak idi, jelma merpengelako selloh bak jahat pè. Gabè dom tamuè mo perpèstaan idi. ¹¹ Roh mo raja idi mi perpèstaan idi lako mengidah tamuè i. Idah matana mo lot sada kalak i pèsta i oda merpakèen pèsta. ¹² Ikusoi mo, ’Bakunè ngo permbengketmu mi pèsta èn oda merpakèen pèsta?’ Gabè mertahan sip mo tamuè sisada kalak i. ¹³ Nai idokken raja i mo taba naposona, ’Ekèti kènè mo tanganna dekket nèhèna i, embah kènè mo ia mi bekkas singgellap tuiten. I sidi mo ia derru-derru menggong simpersuk.’ " ¹⁴ Idokken Jesus mo lako mengenggoi codinna i, "Mbuè ngo terdiloon tapi cituk ngo terpilih." ¹⁵ Enggo kessa bagidi, laus mo kalak Parisè lako mersungkuun, bakunè carana lako mengenggep Jesus merkitè-kitè kuso-kuso. ¹⁶ Iutus kalak idi mo murid-murid kalak i mendahi Jesus rebbak dekket barang piga-piga i horong si Herodes nai. Itennahken kalak i mo sinaing dokkenen pasulaken i taba Jesus bagèen, "O Guru, kubettoh kami, kalak burju ngo kono. Ntompel ngo iajarken kono terrèngèt nipergeddo Dèbata bai jelma, oda pella ikebbiari kono barang isè. Kerna oda pella pilih-pilih rupa kono. ¹⁷ Kernana i bagahken mo bai nami barang bakunè ngo peddahmu terrèngèt ènda; Mengèkutken hatoren kalak Jahudi, ndorok ngo kugarar kami belasting taba Kèsar Rom, barang oda?" ¹⁸ Ibettoh Jesus ngo tujuun kalak i sijahat idi, jadi idokken mo, "Èo kènè pertaki-taki! Kasa mo naing ienggep kènè Aku? ¹⁹ Pacidah kènè mo bangKu kèpèng ni berrèken ndènè menggarar belasting idi." Nai iberrèken kalak idi mo taba Jesus sada kèpèng pirak. ²⁰ Nai ikusoken Jesus mo taba kalak idi, "Gombaren dekket gerar isè ngo ènda?" ²¹ "Kèsar idi ngo," nina kalak idi. Nai idokken Jesus mo taba kalak idi, "Mula bagi, berrèken kènè mo bai Kèsar idi siroh bai Kèsar idi nai, janah berrèken mo bai Dèbata, siroh bai Dèbata nai." ²² Enggo kessa idengkoh kalak i penjelasen i, lengang kalohon mo kalak idi. Nai laus mo kalak i menadingken Jesus. ²³ Arinkena idi, roh ngo kalak Sadusè mendahi Jesus. Kalak Sadusè mo simendokken, mula enggo matè jelma, oda nèngè ndorok balik nggelluh. ²⁴ "O Guru", nina kalak i, "Ipeddahken si Musa ngo bagèen: Mula matè sada anak laki, ikebaluken sinibagesna janah madèng lot dukakna, kennah igelluhi anggina ngo simengkebaluken i pecèndekken pemparen bai kakana i. ²⁵ Asa, lot mo pitu kalak sibeltek. Kabin mo situaan i, nai mènter matè oda dèng sanga lot dukakna, nai igelluhi anggina i mo daberru simengkebaluken idi. ²⁶ Matè ma mo simenggelluhi kakana idi, oda dèng sanga lot dukakna, janah bagi ma mo anggina sipetelluken, soh mi pepituken. ²⁷ Perpodi kalohoon, matè ma mo dekket daberru idi. ²⁸ Nai bagi mo i bakunè ngo seggen i ari podi i, siapaina ngo kalak i sidasa daberru idi? Ai pituna ngo kalak idi kabin dekketsa." ²⁹ Ialoi Jesus mo, "Ai salah ngo pengantusi ndènè, ai oda iantusi kènè isi Bibèl i, janah oda ibettoh kènè terrèngèt kuasa Dèbata. ³⁰ Kerna mula balik nggelluh sienggo matè, oda nèngè ngo kabin ia. Tapi bagè malaèkat ngo kalak idi i sorga. ³¹ Oda dèng ngo nung ijaka kènè pendokken Dèbata terrèngèt simatè ipegelluh nola? Idokken Dèbata ngo ³² ’Aku ngo Dèbata si Abraham, Dèbata si Isak, dekket Dèbata si Jakob.’ Ukum Dèbata i, oda ngo Dèbata simatè, tapi Dèbata singgelluh ngo!" ³³ Mendengkoh kejelasen Jesus idi, kagum kalohon mo jelma nterrem idi. ³⁴ Asa enggo kessa idengkoh kalak Parisè enggo jellak kalak Sadusè ibakin Jesus, merpulung mo kalak idi. ³⁵ Nai mengkuso mo sada kalak ibas kalak i nai, imo guru agama mengkusoken lako mengenggep Jesus. ³⁶ "O Guru," nina, "Siapaina ngo ibas pati-patiin idi nai terdokken patiin raya?" ³⁷ Ialoi Jesus mo, "Kennah kekelengenmu ngo Tuhan Dèbatamu, ibas nasa atè-atèmu nai, dekket nasa kessahmu, dekket nasa pikirenmu. ³⁸ Imo patiin raya janah sipèntingna! ³⁹ Tapi dos ngo idi dekket sipeduaken ènda. Kennah kekelengenmu ngo denganmi dosken dirimu. ⁴⁰ Karinana hatoren agama nipeddahken si Musa dekket nabi-nabi, patiin sidua èn mo rèmpunna." ⁴¹ Tikan pulung dèng kalak Parisè i sidi, ikusoi Jesus mo kalak idi: ⁴² "Bakunè ngo dok atè ndènè terrèngèt Raja Sipaluah niperbagah-bagah Dèbata? Pemparen isè ngo Ia?" "Pemparen si Daud," nina kalak idi. ⁴³ "Mula bagi ngo," nina Jesus, "Kasa idokken si Daud tikan i bagasen Tendi Dèbata terrèngèt Raja Sipaluah niperbagah-bagah Dèbata idi ’Tuhan’? Ai nina si Daud ngo, ⁴⁴ ’Idokken Tuhan i ngo taba Tuhanku: Kundul mo kono i kamuhunKu, pèma Kupetunduk karina musuhMu mi terruh nèhèMu.’ ⁴⁵ Jadi mula si Daud mengakui Raja Sipaluah niperbagah-bagah idi ’Tuhan’, bakunè mo ia dokkenen pemparen si Daud?" ⁴⁶ Sadapoda kalak i tellap mengaloi Jesus nèngè, janah mulai sidarinkenna i nai maknè pang kalak idi mengkusoken barang kadè taba Jesus.

¹ Nai mengerana mo Jesus taba jelma nterrem dekket taba sisinNa, ² "Guru-guru agama dekket Parisè menjalo kuasa ngo bagè niberrèken bai si Musa. ³ Kerna naidi, uèi kènè mo karina barang kadè idokken kalak i sibahanen ndènè. Tapi ulang mo ulaken kènè kadè niulaken kalak idi, ai oda ngo iulaken kalak i bagè nipeddahkenna idi. ⁴ Ipeddahken kalak i ngo simahal ulanken. Idokken kalak i ngo asa iulaken dèba hatoren simberratna, tapi cituk poda lot kalak i mengurupi jelma mengulakensa. ⁵ Karinana niulaken kalak idi pellin asa iidah dèba sambing. Ai ipakkè kalak i ngo tinali mbellang-mbellang kaloon mersodip; janah ipegeddang ngo rambu jubahna. ⁶ Dak ipilih-pilih kalak i ngo bekkas simendèna mula i perpèstaan, bagi ma karosi huntuun mula ibagasen bages persodipen. ⁷ Soh mo lolona kalak i menjalo penghormaten i tengah ndalan, janah mula idokken dèba ’Guru’. ⁸ Tapi ukum kènè, ulang mo kènè uè idiloken dèba Guru, ai pellin sada ngo Guru ndènè, ukum kènè karinana merkaka-kuanggi ngo. ⁹ Ulang mo lot bai ndènè nai mergerar Bapa, ai sada ngo kessa Bapa ndènè, imo Bapa sini sorga. ¹⁰ Ulang mo uè kènè idiloken ’pengulu’, ai sada ngo pengulu ndènè imo Raja Sipaluah niperbagah-bagah Dèbata. ¹¹ Kalak simersangapna ibas kènè nai mo kennah mahan naposo bai ndènè. ¹² Ai kalak sipedatesken dirina, sipeteruhen ngono, janah kalak sipecerrepken dirina, sipedatessen ngo." ¹³ "Merjaya mo kènè guru-guru agama dekket Parisè! Ai jelma sipakulah-kulahken dirina ngo kènè, iambati kènè ngo kalak siuè ginemgem Kerajaen Dèbata. Kènè sendiri oda uè gabè ginemgem Kerajaen Dèbata, keppè kalak siuè, ihalang-halangi kènè. [ ¹⁴ Merjaya mo kènè guru-guru agama dekket Parisè! Kènè jelma sipakulah-kulahken dirina! Itipu janah irampasi kènè ngo bages simbalu. Nai ipakulah-kulah kènè mo mersodip nggeddang lako memmoniken pengelako ndènè i. Kumarna naidi, mberrat ngo kènè ihukum.] ¹⁵ Merjaya mo kènè guru-guru agama dekket Parisè! Kènè jelma sipakulah-kulahken dirina! Isuberrangi kènè ngo laut lako mengayaki darat pellin pemasukken sada kalak mi agamamu. Enggo kessa uè kalak idi, gabè ibaing kè mo kalak i pengisi narakka, lebbih dua kali jahat bai ndènè nai. ¹⁶ Merjaya mo kènè pengulu pètung! Ipeddahken kènè ngo bagèen, ’Mula merbulaban kalak i merkitè Bages Dèbata, gabè maluah mo kalak i ibas bulabanna idi nai; tapi mula merbulaban kalak i mi emmas si ni Bages Dèbata, gabè lekket mo ia i bulabanna idi.’ ¹⁷ Kènè mo jelma moto janah pètung, siapaina ngo mahargaan: emmas, barang Bages Dèbata simemmaing emmas mpanting? ¹⁸ Ipeddahken kènè dèng ma, ’Mula lot merbulaban mi langgaten, maluah ngo ia ibas bulabanna i nai, tapi mula merbulaban ia mi pèlèen si ni babo langgaten idi, lekket mo ia i bulabanna i.’ ¹⁹ Soh mo pètungna kènè, siapaina ngo mahargaan! Pèlèen idi ngo barang langgaten simemaing langgaten idi mpanting? ²⁰ Kerna nai, mula lot merbulaban mi pèlèen, merlapaten ngo idi merbulaban ia mi langgaten dekket karina pèlèen ni babona i. ²¹ Janah mula lot mersumpah mi Bages Dèbata, merlapaten ngo idi merbulaban ia mi Bages Dèbata dekket bai Dèbata ni sidi i. ²² Janah mula lot mersumpah merkitè sorga, merlapaten ngo idi merbulabanken mi tahta Dèbata dekket bai Dèbata simengkunduli tahta idi. ²³ Merjaya mo kènè guru-guru agama dekket Parisè! Kènè sipekulah-kulahken dirina! Rempah ratus pè umpamana; bulung lemmas, serrè dekket acem pè ipersipuluh kènè berrènken mi Tuhan i. Keppèken hatoren siperluna mi agama imo: adil, permasèh atè, sètia, oda iparduliken kènè. Nemmuken kennah iulaken kènè ngo i, ninganna mengulaken sidèbanna i. ²⁴ Èe kènè pengulu pètung! Naleng silot ibas ènumenmu iagoi kènè, keppèken unto iberrur kènè. ²⁵ Merjaya mo kènè guru-guru agama dekket Parisè! Kènè sipakulah-kulahken dirina. Mangkuk dekket pahar ndènè iborihi kènè i ruarna, keppè ibagasen soh mellamunna merdengan mekerruh dekket penghakai ndènè. ²⁶ Èe, kènè Parisè pètung! Borih mo lebbèen mpanting perbagasen mangkuk dekket pahar ndènè, asa mpanting dekket ni ruarna! ²⁷ Merjaya mo kènè guru-guru agama dekket Parisè! Kènè sipekulah-kulahken dirina! Ai codi ngo kènè bagè kuburen si ni cèt mbulan; ukum i ruarna mendè tengennen, tapi ibagasen dom tulan-tulan bangkè jelma dekket karinana simacik. ²⁸ Bagi ma mo kènè, tengennen mendè i ruar ngo kènè taba jelma; tapi kum ibagasen dom taki nggodo dekket pengelausiin." ²⁹ "Merjaya mo kènè guru-guru agama dekket Parisè! Kènè sipelulah-kulahken dirina! Ipellias kènè ngo asa merandal kuburen nabi-nabi dekket perandalken tugu-tugu pernèngèten jelma kumerna mendè ia nderrang nggelluhna. ³⁰ Janah idokken kènè ngo, ’Ukum kami kin nggelluh tikan i umur empungta arnia, oda uè kami bagè kalak idi memmunuhi nabi-nabi.’ ³¹ Jadi kènè mengakuken, pemparen simemunuh nabi-nabi idi ngo kènè! ³² Mula bagi terrusken kènè mo janah salpunken kènè mo dosa-dosa sienggo itebbennai empung ndènè idi! ³³ Jahat ngo kènè, janah pemparen kalak jahat bakunè mo kènè paluahken diri ndènè i hukumen narakka? ³⁴ Kerna naidi, dengkoh kènè mo mendè-mendè; Kupasulak pè mendahi kènè nabi-nabi dekket kalak sipandè, bak guru-guru, dèba bai kalak i nai ibunuh kènè janah dèba ipersilangken kènè. Lot mo dèba isiksa kènè ibagasen garèja janah iletlet kènè i kuta sisada nai mi kuta sisada. ³⁵ Ujungna hukum kerna karina perbuaten ndènè idi taba kalak siso mersalah kennah mengenna bai ndènè sendiri -- mulai terbunuh si Abel siso mersalah idi soh mi si Zakharia anak si Berekia si ni bunuh ndènè i kellang-kellang Bages Dèbata dekket langgaten. ³⁶ Bettoh kènè mo: karinana idi jelma jaman bagèndari mo menggongken." ³⁷ "Jerusalem, Jerusalem! Ibunuh kono ngo nabi-nabi. Janah ibentiri kono ngo sinipasulak Dèbata mendahi kono dekket batu soh matè! Enggo barang piga-piga kali naing kukeruduk karina pengisimu, bagè pengkeruduk inang manuk menjaga anakna ibas terruh kabengna, tapi oda uè kènè! ³⁸ Idah mo terulang mo bagesmu èn, janah gabè longo-longoon. ³⁹ Kudokken mo bai ndènè; mulai bagèndari nai oda nèngè idahen ndènè Aku soh mi podinkenna èn pèma idokken kènè, ’Ipasu-pasu Dèbata mo ia siroh merkitè gerar ni Tuhan i.’ "

¹ Itadingken Jesus mo Bages Dèbata i, roh mo sisinNa mendahiSa, janah ituduhken mo Bages Dèbata idi. ² Nai idokken Jesus mo taba kalak idi, "Idah kènè ma ngo karinana idi? Bettoh kènè mo oda ngo padiatenna sada batu pè mersusun ibas bangunen-bangunen idi hot i bekkasna. Karinana ngo irumpakken." ³ Enggo kessa i laus mo Jesus janah kundul i Uruk Zaitun. Tikan kundul idi Ia, roh mo sisinNa lako mengeranai pellin-pellin, "Bagahken mo bai nami ndigan mo terjadi karinana idi?" nina kalak i tabaSa. "Janah kadè mo pertandanna katika pekirohmu dekket ari kiamat?" ⁴ Ialoi Jesus mo, "Kennah mermanat ngo kènè, ulang sanga iakkali dèba kènè. ⁵ I ari podi, mbuè ngo kalak roh menelluk gerarKu janah mendokken, ’Aku ngo Raja sipaluah niperbagah-bagah Dèbata!’ Mbuè ngo kalak iluapi kalak idi. ⁶ Idengkoh kènè mo berrita geraha dekket berita juhap, tapi ulang kènè mbiar. Ai kennah masa ngo i, tapi oda dèng pertanda dunia èn lako kiamat idi. ⁷ Bangsa sisada juhap dekket bangsa sidèban. Kerajaen sisada mi kerajaen sidèban. Ninganna bagidi masa ma mo kellèhèen bagi ma rènur. ⁸ Karinana idi pellin pertanda dèng ngo kessa idi, bagè pengakap partua ibages tikan lako kettaring. ⁹ Enggo kessa bagidi, kènè pè naing tangkupenna mo, janah pesakatenna lako isiksa dekket ibunuh. Karinana dunia ènda merceggo atè midah kènè kemulihken Aku. ¹⁰ Sinderrang bagidi, mbuè mo kalak merbalik bangku nai. Mersiselbuhen mo kalak i janah mersikosomen. ¹¹ Nai kèkè mo mbuè nabi-nabi palsu janah mengelalingken jelma mbuè. ¹² Kejahaten pè makin mengentuda mo janah makin ndèngapna mo ukur ngkelleng. ¹³ Tapi barang isè menahan soh mi puncana, i ngo paluahenna. ¹⁴ Nai ibagahken mo mi suberri dunia ènda Sukuten Kelluahen terrèngèt Kerajaen Dèbata, asa karina jelma mendengkohsa. Enggo kessa i roh mo ari kiamat." ¹⁵ "Nai idahen ndènè mo masa pengelako siso puna-puna, bagè sinidokken Nabi Daniel, cènder i bekkas simbadia. (Iperatè-atèken simenjaka èn mo kadè lapatenna). ¹⁶ Mula masa bagidi, kennah mperrus mo pengisi Juda mi delleng. ¹⁷ Kalak si ni lotèng bages, ulang mo pella susur nèngè mi terruh lako memmuat olesna. ¹⁸ Kalak si ni juma, oda terbakinsa nèngè balik memmuat jubahna. ¹⁹ Soh mo masèh atè menengngen daberru berrat-berrat rumah dekket partua ibages pesusuken anak mbara tikan bagidi. ²⁰ Mersodip mo kènè taba Dèbata asa ulang nemmu mperrus kènè tikanna mosim udan barang tikan ari Sabat! ²¹ Ai masa ngo tikan bagidi kepersuken siso tertahanken jelma, ai kessa nai tembem dunia èn soh mi sidari èn, mak dèng nung masa bagidi, janah enggo kesa i, oda nèngè masa bagidi. ²² Mula oda kin iorui Dèbata katikana, sada poda lot maluah jelma. Tapi kumarna ummatNa iorui Dèbata mo dekkahna tikki i. ²³ Mula lot sinderrang bagidi mendokken taba kènè, ’Tengen, èn ngo Raja Sipaluah niperbagah-bagah idi!’ barang ’i sadèi ngo ia!’ -- nina, ulang kettoki kènè jelma bagidi! ²⁴ Kerna merrohen ngo seggen sipaluah palsu dekket nabi palsu. Matcam ngo bagèna ibakin kalak idi ulaan mahantu dekket kelengangen-kelengangen lako menipu jelma. Janah mula ndorok, dekket ngo katèna ginemgem Dèbata sienggo terpilih idi. ²⁵ Asa, èngèt kènè mo! Enggo kubagahken kin idi lebbèen taba kènè sinderrang madèng masa. ²⁶ Mula lot mendokken bai ndènè, ’Tengen mo, i kellongoon ngo ia!’ -- ulang laus kènè mi sidi. Barang mula idokken kalak idi, ’Roh mo kènè menengngen, i sèn ngo ia ciboni!’ -- ulang ketoki! ²⁷ Kerna ukum pekiroh Anak Jelma idi, bagè pellian merdebbet i kebincaren nai, merbendella soh mi kecunduten. ²⁸ Barang i dikè lot bangkè, mi sidi ngo kelliki merdèmbur." ²⁹ "Oda pella ndekkah i kepersuken simasa idi nai, gellap mo mataniari janah bulan idi pè maknè mercuhaya. Merrurus mo bintang i langit i nai janah merbulut-bulut mo nasa si lot i abang-abang idi. ³⁰ Enggo kessa bagidi, teridah mo tanda-tanda Anak ni Jelma idi i langit i, nai tikan bagidi, derru-derru mo karina bangsa silot i dunia ènda. Idah kalak i mo roh Anak Jelma merkitèken hembun merkuasa dekket merkemuliaan mbellen. ³¹ Ipalu mo sarunè, nai ipasulak mo malaèkat-malaèkatNa mi dèsa siempat ni tanoh èn. Ipepulung kalak i mo ginemgem sienggo terpilih i, i kebincaren nai dekket i kesunduten nai, bagi ma i utara dekket i sèlatan nai, i punca langit sisada soh mi punca langit sisada nai." ³² "Perdatèken kènè mo kayu ara, mula mertunas rantingna janah merratah bulungna, roh nè mo mosim mpeddas. ³³ Bagi ma mo mula iidah kènè enggo masa karinana sibagidi, bettohen ndènè mo, enggo njolmit katikana. ³⁴ Janah èngèt mo! Masa ngo karinana idi sinderrang madèng matè karina jelma singgelluh bagèndari. ³⁵ Salpun pè karinana langit dekket tanoh èn tapi ukum katangKi hot ngo soh mi amman-sumendah." ³⁶ "Isè poda memettoh ndigan arina barang katikana. Malaèkat-malaèkat sorga pè oda ibettoh idi. Anak idi pè oda ibettoh, pellin Bapai ngo kessa bettoh-bettohen. ³⁷ Bagè simasa sinderrang i umur si Noak, bagi ma mo masa tikan pekiroh Anak Jelma. ³⁸ Tikan makdèng roh laè mbuncar idi, mangan mènum ngo kalak i, jejap dekket pejejapken, soh mi ari si Noak masuk mi keppel mbellen i. ³⁹ Kessa nola pè iremrem laè mbuncar idi jelma i, asa satdar jelma i tah barang kadè masa. Bagi ma mo masa ibas pekiroh Anak Jelma. ⁴⁰ Mula lot dua kalak mahan bahaan i juma; sada kalak mo ijalo, tapi kum sisada nai itadingken. ⁴¹ Mula dua kalak daberru nderrang menutu, sada mo iarahken, sisada nai itadingken. ⁴² Kernana i ulang mo terpeddem kènè, ai oda ibettoh kènè katikana pekirooh Tuhan ndènè. ⁴³ Èngèt kènè mo! Ukum ibettoh sidasa bages ngo ndigan pekiroh penangko, oda terbaing mak ndungo ia barang tah ibelli penangko i mi bagesna. ⁴⁴ Kernana i, kènè pè kennah ngo dak kebbas. Kerna pekiroh Anak Jelma idi oda ibettoh kènè janah siso pengharapen ndènè." ⁴⁵ "Mula bagi, naposo apai ngo sètia janah bijak? Ia mo ipebangkit indukna mahan ekuten perkebbas sidèban, asa iberrè kalak i mangan tupung kettika sienggo itentuken. ⁴⁶ Mertua mo naposo idi, mula idapet indukna ia mengulaken ulanna tikan balik indukna. ⁴⁷ Tok mo kènè, gabè ipesoh indukna i mo tabasa karina harta mahan jamotenna. ⁴⁸ Tapi mula naposo siso kasèa; dok atèna ngo ibagasen. ⁴⁹ Ndekkah dèng ngo asa balik indukku idi, nai iligasi mo naposo-naposo sidèban, janah mangan mènum mo ia rebbak dekket kalak permabuk. ⁵⁰ Keppè roh mo indukna ibas siso pengharapenna dekket ibas katika siso nibettohna. ⁵¹ Nai ihukum indukna mo ia, gabè iambongken mi bekkas kalak perbuah ringadar. Rebbak derru-derru mo kalak idi kumarna mpersukna."

¹ "Mula roh Anak Jelma sikira Tuhan, codi ngo bagè si ni umpama ènda: Lot mo sipuluh kalak simerbaju rading gennep merembah oborna, menimbaki kèla sinaing roh. ² Lima kalak bai kalak i nai moto, tapi merrukur ngo ukum si lima kalak nai. ³ Simerbaju moto si lima kalak i, iembah ngo nemmu oborna, tapi oda iembah dekket bekkas minak. ⁴ Tapi kum silima nai sipandè merukur i, iembah ngo bekkas minakna dekket oborna gennep. ⁵ Kumerna mellaun roh kèla idi, tertunduh mo simerbaju idi karinana janah terpeddem. ⁶ Tengah mberngin, terdengkoh mo sora dilo-dilo, ’Enggo roh kèla idi! Simbak-simbak kènè mo!’ ⁷ Ndungo mo simerbaju sisipiluh kalak idi, ilakati mo oborna. ⁸ Nina simerbaju simoto i mo taba simerbaju simerukur idi: ’Berrèken baku dèba minak ndènè idi, ai enggo naing mèntep obor nami.’ ⁹ ’Oda kuberrè kami kè,’ nina simerbaju simerukur idi. ’Ai gabè karina nola ngo kita nahan oda cukup minak. Laus mo kènè menokor mi tokko.’ ¹⁰ Nai laus mo simerbaju simoto i menokor minak. Tikan laus idi kalak i, soh mo kèla i. Rebbak mbengket mo simerbaju simerukur silima kalak i dekket kèla i mi bekkas perpèstaan, janah igerruk mo pèntu. ¹¹ Nai roh mo simerbaju simoto si lima kalak i, dilo-dilo mo kalak i, ’O tuan, tuan buka kènè mo, asa masuk kami.’ ¹² Tapi ialoi kèla i mo, ’Oda kutandai kènè!’ " ¹³ Irempun Jesus mo umpama idi bagèen, "Kerna naidi, ndungo mo kènè, ai oda ibettoh kènè arina barang katikana." ¹⁴ "Mula roh kessa Anak Jelma i sikira Tuhan, codi ngo bagè si ni umpama ènda. Lot mo sada kalak anak laki naing laus mi kuta ndaoh. Idiloi mo naposo-naposona, nai ipesakat mo hartana bai kalak idi. ¹⁵ Iberrèken mo hartana bai gennep naposo mengèkutken patutna. Bai sada kalak iberrèken lima ribu riar emmas. Bai sidèbanna iberrèken dua ribu riar emmas janah bai sada kalak nai seribu riar emmas. Nai berkat mo ia. ¹⁶ Naposo simenjalo lima ribu riar emmas idi, mènter ndor mo ia laus mertiga-tiga janah merlaba mo ia lima ribu riar emmas nai. ¹⁷ Bagi ma ngo naposo simenjalo dua ribu riar emmas idi, merlaba ngo ia dua ribu riar. ¹⁸ Tapi naposo simenjalo seribu riar emmas idi, itanem ngo riar idi asa mboni. ¹⁹ Enggo kessa ndekkah, mulak mo indukna idi, ibaing mo perrètongen taba kalak idi. ²⁰ Mbengket mo naposo simenjalo lima ribu riar i, iberèken mo gabè sipuluh ribu riar. ’Tuan,’ nina. ’Ipesakat kono bangku lima ribu riar. Èn pè, tengen mo, dapet aku ngo laba lima ribu riar nai.’ ²¹ ’Selloh mo i,’ nina indukna i. ’Naposo mendè ngo kono janah sètia. Kumarna kettoken ngo kono ipas sicituk, kupessoh mo bamu mbuè. Arko mo misèn, asa rebbak mersennang-sennang rebbak aku!’ ²² Nai masuk nola mo naposo simenjalo dua ribu riar idi, nina mo, ’Tuan, iberrèken kono bangku dua ribu riar. Bagèndari tengen mo, dapet aku ngo dua ribu riar nai.’ ²³ ’Selloh mo i,’ nina indukna idi. ’Naposo mendè ngo kono janah sètia. Kumarna kettoken ngo kono ipas sicituk, kupesoh mo bamu mbuè. Arko mo kita, asa mersennang-sennang kono rebbak dekket aku!’ ²⁴ Nai masuk nola mo naposo simenjalo seribu riar i, nina mo: ’Tuan, kubettoh ngo ukum kono sada kalak perukur mpihir. Ai itapu kono ngo buah tukasi pè oda lot isuan kono. Janah ipotik kono ngo hasil tukasi pè oda lot isamèken kono. ²⁵ Jadi mbiar ngo aku, gabè kuboniken ngo riar tuan idi ibagasen tanoh. Na mo tuan riarmu ènda!’ ²⁶ ’Èo, kono naposo jahat janah mahangkè!’ nina indukna i. ’Ibettoh kono ngo keppè aku merrani ibas siso kusuan nai, janah memmuat hasil ibas siso kusamèken nai? ²⁷ Tentu ianakken kono mo nemmu giam kèpèng i bai dèba, asa roh kessa aku kujalo riarku i dekket anakna? ²⁸ Kerna nai, buat kènè mo riar idi bana nai, janah berrèken taba naposo simenjalo sisipuluh ribu riar idi. ²⁹ Ai makin buèen ngo berèenken taba kalak sikelloten asa mertinèncuk bana janah meriba-iba. Tapi sibuaten ngo bai simenjalo sicituk i nai, bagi ma silot bana i kin pè. ³⁰ Janah naposo siso kasèa i pè dabuhken kènè mo mi sigellap tuiten. I sidi mo ia derru-derru kerna mpersukna.’ " ³¹ "Mula roh kessa Anak Jelma i bagè Raja rebbak dekket malaèkat-malaèkatNa kundul mo ia i babo kerajaenNa. ³² Ipepulung mo karinana bangsa ni dunia èn mi hadeppenNa. Nai isirang mo kalak i gabè dua bagian bagè pemaing permakan menirang biri-biri dekket kambing. ³³ Kalak simengulaken lemmo atè Dèbata ibaing mo mi kamuhunna janah sidèbanna i mi kambirangNa. ³⁴ Nai idokken Raja i mo taba kalak si ni kamuhunNa, ’Roh mo kènè sinipasu-pasu Bapa. Jalo janah akapi kènè mo rasana i Kerajaen Dèbata sienggo ihantari kin bai ndènè kessa nai ntembem dunia ènda. ³⁵ Kerna sinderrang mellèhè Aku, iberrè kènè ngo Aku mangan, sinderrang muasen Aku iberrè kè ngo Aku mènum. Jelma mpanjil ngo nemmu Aku tapi ijalo kènè ngo Aku mi bages ndènè. ³⁶ Mada merroles pè Aku, iperrolessi kènè ngo. Sakiten ngo Aku, ikebbaru kènè ngo Aku. I kurungen pè Aku, idahi kènè ngo.’ ³⁷ Nai idokken simengulaken lemmo atè Dèbata i mo, ’Tuhan ndigan i kuidah kami kono mellèhè, gabè kuberrè kami kono mangan, barang muasen, gabè kuberrè kami kono mènum? ³⁸ Ndigan i kuidah kami kono bagè jelma mpanjil, gabè kuarahken kami kono mi bages nami? Ndigan i kuidah kami kono mada merroles, gabè kuperolessi kami kono? ³⁹ Ndigan i kuidah kami kono sakiten barang i kurungen gabè kudahi kami kono?’ ⁴⁰ Ialoi Raja i mo, ’Bettoh kènè mo, nasa sinibaing ndènè bai sada kalak anggingKu simerlèa ènda, bangku ngo sinibaing ndènè idi!’ ⁴¹ Nai idokken Raja i mo taba kalak ni kambirangNa idi, ’Laus mo kènè i gembarku ènda nai, kènè alè sikenna sempetta, mi bekkas api siso nggèut mèntep, sienggo ipèmaken bai sibolis dekket malaèkat-malaèkatna! ⁴² Kerna sinderrang mellèhè Aku, oda iberrè kènè mangan; sinderrang muasen Aku, oda iberrè kènè mènum. ⁴³ Kalak jelma mpanjil ngo Aku, oda ijalo kènè mi bages ndènè. Malot meroles Aku, oda iperrolessi kènè Aku. Sakiten ngo Aku janah kurungen, oda ikebbaru kènè Aku.’ ⁴⁴ Nai idokken kalak i mo mbangSa, ’Tuhan, ndigan i kuidah kami kono mellèhè barang muasen, barang kalak jelma mpanjil kono, barang oda merroles, barang sakiten, barang kurungen, oda kuurupi kami kono?’ ⁴⁵ Ialoi raja i mo, ’Dengkohken kènè mo, tikan oda iurupi kènè barang apaina pè simerlèa ènda, merlapaten ngo i, oda iurupi kènè Aku.’ ⁴⁶ Asa ihukum mo kalak idi soh mi amman sumendah, tapi ukum kalak simengulaken lemmo atè Dèbata, nggelluh janah mersennang-sennang rebbak dekket Dèbata."

¹ Enggo kessa pul ipeddahken Jesus karina sindai, nina mo taba sisinNa: ² "Ibettoh kènè ngo dua ari nai dapet mo Ari Raya Paskah, ipesakat mo Anak Jelma asa ipersilangken!" ³ Sinderrangna idi merpulung ngo imam-imam ekuten dekket pengulu-pengulu Jahudi i bages Imam Huntuun i mo si Kayafas. ⁴ Irungguken kalak i ngo lako menangkup Jesus dekket cara tipu lako memunuhSa. ⁵ "Tapi," idokken kalak idi, "ulang mo siulaken bagidi tikan pèsta i, asa ulang gontar jelma nterrem idi." ⁶ Tikan i Betania Jesus, i bages si Simon imo sikoliten tikanna i, ⁷ roh mo sada kalak daberru mendahi Jesus. Iembah ngo sada botol bagak merisi minak baungkus maharga kalohoon. Sinderrang kundul Jesus mangan, iarirken daberru i mo minak mi babontakal Jesus. ⁸ Mellaga mo sisiin Jesus mengidah bagidi, "Man kadè mo gunana baingenna bagi mbuasna?" nina kalak i. ⁹ "Otang lotiin idèaken minak i dekket harga mahal, asa niberrèken tokorna taba kalak sincoor?" ¹⁰ Ibettoh Jesus ngo pikiren kalak idi, nai nina mo, "Kasa isusahi kènè daberru ènda? Mendè ngo pemaingna i bangKu. ¹¹ Pukpuk ngo lot kalak sincor bai ndènè, tapi ukum Aku oda menettap rebbak dekket kènè. ¹² Merkitè iarirken minak baungkus idi mi dagingKu, solo-solo mengkuburken Aku ngo i. ¹³ Èngèt kènè mo! Barang i dikè luas ibagahken Sukuten Kelluahen bai Dèbata nai, dekket ngo pemaing daberru ènda isukutken, lako mernèngèt ia." ¹⁴ Nai sada kalak ibas sisiin sisipuluh dua idi nai, mergerar si Judas Iskariot, laus mendahi imam-imam ekuten. ¹⁵ Idokken mo taba kalak idi, "Kadè iberrèken kènè bangku, mula kupesakat Jesus bai ndènè?" Nai mènter ibilang kalak i mo tellupuluh riar pirak, iberrèken mo riar i bana. ¹⁶ Mulai i sidi nai mo itulus si Judas Iskariot ketika cocok lako menelbuh Jesus. ¹⁷ I ari perlebbè tupung Pèsta Roti Siso Meragi, roh mo sisiin Jesus tabaSa. Ikusoken kalak i mo, "Idikè sèkel Tuhan idi kipangan pangaan Paskah asa kuhantari kami?" ¹⁸ Ialoi Jesus mo, "Laus mo kènè mendahi sada kalak i kuta, dokken kènè mo tabasa, ’Tennah Guru i, enggo mo dapet katikangKu, jadi naing mengerayaken Paskah ngo Aku i bagesmu rebbak dekket sisinKu.’ " ¹⁹ Ibagahken sisiin idi mo bagè nidokken Jesus idi taba kalak i. Laus mo kalak i menghantari pangaan Paskah idi. ²⁰ Gellap kessa mo ari, kundul mo Jesus rebbak dekket sisinNa lako mangan. ²¹ Sinderrang mangan idi, mongkam mo Jesus, "Dengkohken kènè: sada kalak bai ndènè nai naing menelbuh Aku." ²² Idengkoh sisiin i kessa mo rana Jesus idi, mellui kalohon mo ukur kalak idi. Nai gennep mo kalak i mendokken taba Jesus, "Otang oda ma ngo aku nidokkenmi Tuhan?" ²³ Ialoi Jesus mo, "Sirebbakken dekket Aku mengosepken roti mi bagasen caban, ia mo sinaing menelbuh Aku. ²⁴ Kennah matè ngo Anak Jelma i, ai tersurat ngo ibas Bibèl, kennah matè ngo ia. Tapi merjaya mo kalak simenelbuh Anak Jelma idi! Lotiin kin ngo ulang sanga tubuh ia i dunia ènda!" ²⁵ Nai mongkam mo si Judas penelbuh idi, "Otang oda ma ngo aku nidokken Guru i?" Ialoi Jesus mo, "Bagi ngo nimu!" ²⁶ Enggo kessa bagidi, ibuat Jesus mo roti idokken mo lias atè, nai ipenggelli mo roti idi ibas tanganNa, ipemberrèken mo taba sisinNa ninganna idokken, "Jalo kènè mo janah pangan kènè, dagingKu ngo ènda." ²⁷ Enggo kessa i, ibuat mo perènumen anggur, idokken mo melias atè bai Dèbata. Nai ipepènumken mo taba sisinNa ninganna idokken, "Mènum mo kènè karina i sidi nai! ²⁸ Ai darohKu ngo ènda, pehotken perpadanen -- Iorèken ngo darohKu mahan kesasaan dosa bai jelma mbuè. ²⁹ Èngèt kènè mo: Oda nèngè ènumenku anggur idi soh mi katikana Aku rebbak dekket kènè mengènum anggur sirimbaru i Dunia Sirimbaru dekket BapangKu." ³⁰ Enggo kessa bagidi, iendèken kalak i mo endè pemoji-mojiin, kessa pul i laus mo kalak i mi Uruk Zaitun. ³¹ Nai idokken Jesus mo taba sisinNa, "Berngin èn, itadingken kènè mo Aku lako mperrus; ai tersurat ngo ipas Bibèl, ’ibunuh Dèbata ngo permakan i janah mermèrapen ngo biri-biri simpulguken idi.’ ³² Tapi kèkè kessa Aku, Kulebbèi ngo kènè mi Galilea." ³³ Nai idokken si Petrus mo taba Jesus, "Barang karina kalak i menadingken Kono Tuhan, tapi ukum aku oda!" ³⁴ Nai idokken Jesus mo tabasa, "Èngèt mo, sinderrang madèng takuak manuk berngin ènda, enggo mo ipersomada ko Aku tellu kali." ³⁵ Ialoi si Petrus mo, "Mula pè matè aku rebbak Kono Tuhan, oda kudokken baMu; oda kutandai Kono Tuhan." Janah karinana ngo sisiin idi mendokken bagidi ma. ³⁶ Nggo kessa i laus mo Jesus dekket sisinNa mi sada bekkas mergerar Getsemane. Idokken Jesus mo taba kalak i, "Kundul mo kènè i sènda, laus Aku lebbè mersodip mi sandi." ³⁷ Iarahken mo si Petrus dekket anak si Sebedeus si dua i laus rebakken Jesus. Nderrang bagidi teridah ngo Jesus bonek janah bulisah kalohoon. ³⁸ Idokken mo taba sisinNa, "Bonek kalohon ngo kuakap ukurKu, bagè naing matè ngo. Isèn mo kènè, merjaga-jaga rebbak dekket Aku." ³⁹ Nai misir mo Jesus narih merkellang situk, i sidi mo Ia tangkep mi tanoh janah mersodip, "Ialè Pa," nina, "Ukum ndorok, pesisi mo bangku nai kinipersuk simahan kugongken ènda. Tapi ulang mo lemmongku, lemmoMu mo." ⁴⁰ Enggo kessa bagi, balik mo Jesus mendahi sisinna sitellu kalak idi, tapi meddem ngo kalak i idapet. Nina mo taba si Petrus, "Oda ngo kèppè tergong kè ndungo rebbak dekket Aku giam sinempas? ⁴¹ Merjaga-jaga mo kènè ninganna mersodip, asa ulang talu kènè i pengojiin. Tuhuna bennar ngo naing iulaken tendi ndènè, tapi oda tellap kè, kerna ndotè ngo tabiat jelma i." ⁴² Nai iolihi Jesus nola mo mersodip pedua kaliken, nina mo, "Ialè Pa, mula kennah Kubellus ngo kinipersuk ènda janah mak ndorok mada, saut mo lemmo atèMu alè Pa!" ⁴³ Balik nola mo Jesus, idapet ma mo tong meddem sisinNa idi. Oda terbuka kalak i nèngè matana, ai mbotong ngo cilèbenna. ⁴⁴ Itadingken Jesus mo kalak i sikali nai, lako mersodip petellu kaliken. Dos ngo sodipNa bagè perlebbè idi. ⁴⁵ Nai molih mo Ia mendahi sisinna janah nina mo, "Dak iempet kènè dèng ngo meddem janah mentadi? Tengngen mo, enggo dapet katikana ipesakat mo Anak Jelma i taba kuasa jelma perdosa. ⁴⁶ Kèkè mo kènè, ita kènè mo. Tengngen kènè mo! Enggo soh mi sèn kalak simenelbuh Aku!" ⁴⁷ Tikan mengerana dèng Jesus, roh mo si Judas, sada kalak ibas sisipuluh dua idi nai. Rebbak roh ngo ia dekket mbuè jelma merembah peddang dekket palu-palu, imo pasulaken imam ekuten dekket pengulu-pengulu Jahudi. ⁴⁸ Enggo kin ngo ibagahken penelbuh idi bai kalak idi tandana: "Barang isè nahan kusanggoh, i mo kalakna. Tangkup kènè mo Ia!" ⁴⁹ I si soh mi bekkas idi, mènter idapetken si Judas mo Jesus janah nina mo, "Njuah-njuah mo Guru!" Ninganna isanggoh mo Jesus. ⁵⁰ Ialoi Jesus mo, "Merkadè ko roh mi sèn anggia?" Nai mènter roh mo jelma mbuè i, itangkup mo Jesus. ⁵¹ Sada kalak sisiin Jesus sini gembar Jesus idi menintak peddangna. Ipastik mo naposo imam huntuun idi, sampè mistak pènggelna. ⁵² Idokken Jesus mo taba sisinNa idi, "Sembungken peddangmi, kerna barang isè mengasangken peddangna, matè ngo ia bakinen peddang. ⁵³ Katèmu oda ndorok kupido bai Bapa, asa ipasulak bagèndari sipuluh dua ntinegu tenterra malaèkat? ⁵⁴ Tapi mula bagi ngo, bakunè mo persautna bagè sienggo ikataken ibas Bibèl, kennah masa ngo bagèen?" ⁵⁵ Nai idokken Jesus mo taba jelma mbuè idi, "Roh kènè lako menangkup Aku merembah peddang ninganna merpalu-palu, bagè dempak kalak perjahat! Gennep ari ngo Aku mengajari i Bages Dèbata, tapi oda itangkup kènè Aku. ⁵⁶ Tapi karinana ènda kennah ngo terjadi, asa saut bagè nisuratken nabi-nabi i bagasen Bibèl." Enggo kessa bagi, mperrus mo karina sisiin idi menadingken Jesus. ⁵⁷ I iring kalak i mo Jesus mi bages Imam Huntuun Kayafas. Enggo mo pulung i sidi guru-guru agama Jahudi dekket pengulu-pengulu Jahudi. ⁵⁸ Tapi ukum si Petrus dak ièkut-èkut ngo Jesus ndaoh-ndaoh i podi nai, soh mi kasèan imam huntuun i. Ibengketti si Petrus mo mi kasèan i, janah rebbak kundul dekket perjaga ni sidi. Ai naing bettohenna ngo barang bakunè dungna. ⁵⁹ Karina imam-imam ekuten dekket kerungguun idi menulusi saksi-saksi palsu, asa ndorok Jesus idi ihukum matè. ⁶⁰ Tapi oda dapet bukti-bukti bai kalak i, tukasi pè enggo mbuè saksi ipecènder. Perpodi kalohon lot mo dua kalak cènder mi lebbè. ⁶¹ Nina mo, "Idokken kalak ènda, boi ngo irumpakken Bages Dèbata, janah ndorok nola ipecènder ibagasen tellu ari." ⁶² Nai cènder mo imam huntuun idi, idokken mo taba Jesus, "Oda ngo ialoi Kono tukas sinidokkenna baMu idi?" ⁶³ Tapi sip sambing ngo ukum Jesus. Iulaki imam huntuun i mo sikali nai mendokken taba Jesus, "Merkitèken Dèbata singgelluh idi, dokken mo bai nami tuhu ngo kono Raja Sipaluah Anak ni Dèbata?" ⁶⁴ Ialoi Jesus mo, "Bagi ngo nimu. Tapi percaya mo kènè, mulai bagèndari nai idahen ndènè mo Anak Jelma idi kundul i kamuhun Dèbata Pergegoh Sisotercodi janah roh merkitè-kitè hembun i langit!" ⁶⁵ Nai mènter iribakken imam huntuun idi mo olesna, ninganna idokken, "Ilèai Ia ngo Dèbata! Oda perlu nè tulusen saksi. Karina kè enggo mendengkohken pengelèaina mi Dèbata. ⁶⁶ Bagèndari pè bakunè katè ndènè?" Ialoi kalak i mo, "Sah mo ia ihukum matè!" ⁶⁷ Nai icèduri kalak i mo abè Jesus janah iligasi. Lot mo dèba memarap. ⁶⁸ Ninganna idokken, "Bagahken bai nami alè Raja Sipaluah! Isè ngo simemarap Kono?" ⁶⁹ Kundul ngo si Petrus i ruar kasèan i. Roh mo sada kalak daberru, naposo imam huntuun idi, nina mo taba si Petrus, "Kono pè dekket ngo dengan Jesus kalak Galilea idi?" ⁷⁰ Tapi iperso si Petrus ngo i hadeppen ni kalak i. "Kadè ngo nimu, oda kubettoh i!" nina si Petrus. ⁷¹ Nai laus mo si Petrus narih mi pèntu kasèan, iidah sada kalak naposo daberru sidèbanna mo ia janah mendokken taba jelma ni sidi, "Rebbak ngo ndai kalak ènda dekket Jesus i Nazaret nai." ⁷² Memerso dèng ma mo si Petrus janah mersumpah. "Tuhu-tuhu ngo oda kutandai ia!" nina si Petrus. ⁷³ Oda ndekkah nèngè kessa bagidi, roh mo mendahi si Petrus kalak si cènder ni sidi janah mendokken, "Pasti kono ngo sada kalak bai kalak i nai, ai kennataan ngo arap permongkammu!" ⁷⁴ Nai mersumpah-sumpah mo si Petrus mendokken, "Oda kutandai kalak i!" Nai mènter gejapkenna i mo takuak manuk. ⁷⁵ Ièngèt si Petrus mo nidokken Jesus tabasa, "Sinderrang madèng takuak manuk berngin èn, enggo iperso kono Aku tellu kali, mendokken: Oda itandai kono nimu Aku." Nai laus mo si Petrus, tangis mo ia kerna bonekna soh mi ruar.

¹ Sibarembenkenna i siceggen, karinana imam-imam ekuten dekket pengulu-pengulu Jahudi memutusken, kennah bunuhen mo Jesus. ² Ièkèti kalak i mo ia janah iembah lako pesohken taba si Latus, gubèrnur kerajaen Rom. ³ Iidah si Judas penelbuh idi kessa mo enggo idabuh hukum taba Jesus, peselsel mo ia. Iulakken mo kèpèng sitellupuluh pirak i taba imam-imam dekket pengulu-pengulu kalak Jahudi. ⁴ Nina mo, "Enggo merdosa aku, menelbuh kalak siso merdosa, pella ihukum matè!" Tapi ialoi kalak idi mo, "Oda parduli kami! Otang urusenmu ngo i?" ⁵ Nai ibentirken si Judas mo kèpèng i mi Bages Dèbata. Laus mo ia i sidi nai lako mendelles. ⁶ Ipepulung imam-imam mo kèpèng i janah idokken, "Kèpèng daroh ngo kèpèng èn. Mengèkutken hatoren agama, oda ngo ndorok pesadaan kèpèng èn mi bekkas pèlèen i Bages Dèbata." ⁷ Mersungkuun mo kalak idi, itokorken kalak idi mo kèpèng i mi tanoh janah igerari mo Tanoh Tukang Koden. Ibaing kalak i mo tanoh i maing perkuburen kalak siroh. ⁸ Kumarna idi ngo asa igerari tanoh idi, "Tanoh Daroh" soh mi ari sidari ènda. ⁹ Merkitèken i, saut mo si nidokken Nabi Jeremia, bagèen, "Ijalo kalak idi ngo tellupuluh kèpèng pirak, imo buèna kèpèng isetujui kalak Israel mahan gararna. ¹⁰ Janah itokorken kalak i ngo kèpèng idi menokor Tanoh Tukang Koden, bagè sienggo nidokken Tuhan i taba aku." ¹¹ Tikanna Jesus i hadeppen si Latus gubèrnur nagerri idi, ikusoi si Latus mo ia, "Kono ngo raja ni kalak Jahudi?" "Uè, idi mo tuhu bagè nidokkenmu idi," nina Jesus. ¹² Tapi sinderrang imam ekuten dekket pengulu Jahudi mengeranaken tukas-tukas terrèngèt Jesus, oda ngo ialoi Jesus kalak i. ¹³ Kerna nai, idokken si Latus mo mbang Jesus, "Oda ngo idengkoh Kono karinana ni tukasken kalak idi taba kono?" ¹⁴ Laju oda ialoi Jesus, gabè lengang kalohon mo gubèrnur i. ¹⁵ Gennep Ari Raya Paskah, ncemmal ngo ipaluah gubèrnur sada kalak siterhukum barang apaina iteddo jelma nterrem. ¹⁶ Sinderrangna i, lot mo ikurung sada kalak perjahat mahantu mergerar si Barabas. ¹⁷ Jadi enggo kessa pulung jelma nterrem i, ikusoi si Latus mo, "Isè ipergeddo atè ndènè naing kupaluah? Si Barabas ngo barang Jesus simergerar Kristus?" ¹⁸ Idokken gubèrnur idi pè bagi, kerna ibettoh ngo iaduken kalak idi pè Jesus tabasa kumernaken ncian atè ngo. ¹⁹ Tikan kundul si Latus i kantorna, itennahken sinibagesna mo tabasa, "Ulang iantoi kono perkara kalak siso mersalah idi, ai kumarnaken Ia, lot nipingku ntengam kaloon berngin i." ²⁰ Tapi dak ipejuju imam dekket pengulu Jahudi ngo jelma nterrem i, lako mengidoken bai si Latus; asa ipaluah si Barabas, tapi ibunuh mo ukum Jesus. ²¹ Nai ikuso gubèrnur i nola mo kalak idi, "Isè ngo sidua kalak èn dok atè ndènè kupaluah bai ndènè?" "Si Barabas," nina kalak idi. ²² "Nai bakunè mo kubaing taba Jesus sinidokken Kristus?" nina si Latus mengkuso kalak idi. "Persilangken mo Ia!" nina kalak idi. ²³ "Nai mula bagi, kejahaten kadè pana ibakin Ia?" Nina si Latus. Nai makin nggang mo surak kalak i, "Persilangken mo Ia!" ²⁴ Ujungna ibettoh si Latus mo maknè terdokken barang kadè, tah bakunè nola mènter berontak jelma idi, ibuat mo laè, iborih mo tanganna i lebbè-lebbè kalak idi ninganna idokken, "Oda pendikèi aku ibas permatè kalak èn! Urusen ndènè mo idi!" ²⁵ Karinana jelma nterrem idi mengaloi, "Uè, kami dekket pinempar nami mo gemongken hukumenNa!" ²⁶ Nai ipaluah mo si Barabas bai kalak idi, janah idokken mo kalak lako mengeligas Jesus nai ipesakat mo asa ipersilangken. ²⁷ Nai iiring soridadu ni si Latus mo Jesus mi istana gubèrnur janah karinana mo kalak i mengkulilingi Jesus. ²⁸ Iosari kalak i mo pakkèen Jesus janah isellukken baNa jubah mbara mesiap. ²⁹ Ibaing kalak i mo sada bulang-bulang ibas ranting-ranting merdori nai, janah ibaing mo i mi takal Jesus. Nai ibaing kalak i mo sada tongket mi tangan kamuhunNa, nai mersembah mo klak idi mi lebbè Jesus ninganNa mengerèhè-rèhèi, "Njuah-njuah mo Raja Jahudi!" nina kalak idi. ³⁰ Nai icèduri kalak i mo Ia, ibuat mo tongket idi, ipalu mo takalNa. ³¹ Enggo kessa pul Ia ipelèa-lèa, italkasi mo jubah mbara mesiap idi janah ipakkèken nola mo olesna kin. Nai iiring kalak i mo ia mi ruar asa ipersilangken. ³² I tengah ndalan pesimbak mo kalak idi dekket sada kalak Kirene mergerar si Simon. Ia mo igantal kalak idi lako memersan kayu persilang i. ³³ Nai soh mo kalak idi mi sada bekkas mergerar Golgota, lapatenna "Bekas Tulan". ³⁴ I sidi mo iberrè kalak i Jesus mènum anggur mersakkor peggu. Tapi iakapi Jesus kessa anggur i, gabè oda nggèut Ia mengènum. ³⁵ Nai ipersilangken kalak i mo Ia, tapi ipella-pella kalak i ngo olesNa merkitè tendung. ³⁶ Enggo kessa i, kundul mo kalak idi ninganna merjaga i sidi. ³⁷ Ilekketken kalak i mo mi babontakalNa sada surat terrèngèt tukas mbangsa. Bagèen mo tersurat, "Jesus ngo èn, Raja kalak Jahudi." ³⁸ Sinderrangna i, lot mo dua kalak penggarong rebbak ipersilangken dekket Jesus. Sada mo i kamuhun janah sada nai kan kambirangNa. ³⁹ Karina kalak simemellus arap idi mengelèai ia ninganna ipetèldèng-tèldèng takalna. ⁴⁰ Nina mo, "Èo, kono alè simengerumpakken Bages Dèbata janah pecènderken nola ibagasen tellu ari! Mula tuhu Anak Dèbata kono, paluah mo diriMu! Susur mo kono i kayu persilang idi nai." ⁴¹ Bagi ma ngo bang imam ekuten dekket guru agama Jahudi bak pengulu Jahudi pè, pukpuk mengerèhèi Jesus. Nina kalak i ngo, ⁴² "Sidèban ipaluah, diriNa oda terpaluahsa. Otang Raja Israel ngo ia? Mula bagi susur mo Ia nemmu bagèndari i kayu persilang i nai asa percaya kami tabaSa. ⁴³ Percaya ngo Ia nina taba Dèbata, janah Anak Dèbata ngo Ia nina. Asa, siidah mo, tah ipaluah Dèbata ma ngo Ia bagèndari." ⁴⁴ Pennamun sitersilang rebbakken Jesus idi pè bagi ma ngo pengelèaina. ⁴⁵ I mulai ncèger ari nai gellap mo dunia èn sampè tellu jom dekkahna. ⁴⁶ Pukkul tellu ciboon, nggang kaloon mo sora Jesus mendiloken, "Eli, Eli, lama sabakhtani?" Lapatenna, "Alè DèbatangKu, DèbatangKu, kasa itadingken Kono Aku?" ⁴⁷ Lot mo cènder i sidi mendengkoh nidilokenna idi, nina mo, "Mendiloi si Elias ngo ia." ⁴⁸ Nai mènter lojang mo sakalak ipas kalak i nai memmuat lumut, isornepken mo lumut i mi anggur macem, iberretken mo mi sada biski, idudurken mo asa iènum Jesus. ⁴⁹ Tapi dèba nai mendokken, "Pèma mo siidah lebbè, tah roh ma si Elias paluahkenSa!" ⁵⁰ Nai mengolihi mo mersora nggang Jesus, mpostep mo kessahNa. ⁵¹ Meribak mo kirè-kirè Bages Dèbata i babo nai soh mi terruh bellah dua. Dumegger mo dunia èn janah merpustaken delleng batu. ⁵² Mermbukaan mo kuburen janah mbuè ngo ginemgem Dèbata sienggo matè i kin balik nggelluh. ⁵³ Asa kessa kèkè Jesus i kematèen i nai, karuar mo kalak i kuburen i nai janah mbengket mi Jerusalem. Janah mbuè ngo kalak mengidah kalak i isidi. ⁵⁴ Buradan kalohon mo soridadu dekket ekuten simenjaga Jesus, iidah kalak i kessa rènur idi dekket karina simasa i, idokken kalak i mo, "Tuhunna ngo Ia Anak Dèbata!" ⁵⁵ Lot ma mbuè daberru isidi roh menatap ndaoh-ndaoh. Mulai i Galilea nai, enggo dak ièkutken daberru idi Jesus lako mengkebasi Jesus. ⁵⁶ Imo si Maria Magdalena, si Maria inang si Jakobus dekket si Josep, bagi ma inang dukak-dukak si Zebedeus. ⁵⁷ Bernginna idi roh mo sada kalak sibèak i Arimatea nai mergerar Josep. Ia pè sada kalak simengèkutken Jesus ngo. ⁵⁸ Laus mo ia mendahi si Latus mengido bangkè Jesus. Nai iperèntahken si Latus mo asa iberrèken bana bangkè Jesus. ⁵⁹ Ibuat si Josep mo bangkè i, nai ibalut mo dekket kaèn kapan mbersih. ⁶⁰ Igamparken mo bangkè idi mi kuburen sirimbaru sienggo ipahat i sada uruk batu. Nai igoling mo sada batu mbellen mi babah lubang kuburen idi, nai laus mo ia. ⁶¹ Si Maria Magdalena dekket si Maria sisada nai dak kundul ngo isidi padep-adep kuburen idi. ⁶² Sibarembenkenna, imo enggo kessa ari Sabat, laus mo imam ekuten dekket kalak Parisè menghadep si Latus. ⁶³ Idokken kalak idi, "Tuan, kuèngèt kami nderrang nggelluhna dèng penipu idi lot ngo katana bagèen, ’Enggo kessa tellu ari, nggelluh nola ngo Aku.’ ⁶⁴ Kerna naidi suruh mo kalak menjaga kuburen idi sampè soh mi ari petelluken. Kum oda bagi, nggèut ngo sisinNa menangko bangkèNa i, nai idokken mo bai jelma nterem, ’Enggo balik nggelluh ia,’ gabè merrohaan nola penipu siperpodi ulang perlebbè." ⁶⁵ "Arahken kènè soridadu lako menjaga," nina si Latus mo taba kalak idi, "Janah jaga mo kuburen idi mertuhu-tuhu." ⁶⁶ Nai laus mo kalak i mi kuburen, isègèl mo kuburen idi merkitè memaing cap mi batu tutupna i janah idokken mo soridadu merjaga isidi.

¹ Enggo kessa leppas ari Sabat, teridah buk betekken dèng siceggen ari Minggu i, laus mo si Maria Magdalena dekket si Maria sisada nai lako menongkir kuburen idi. ² Sintempu kaloon, masa mo rènur gegoh kalohon. Susur mo sada malaèkat i sorga nai menggulang batu penutup i janah kundul i babona. ³ Merbindella ngo abèna janah pakkènna mbulan bagè kapas. ⁴ Buradan mo perjaga ni sidi janah menggirgir sakkor mellangan bagè kalak simatè. ⁵ Nina malaèkat i mo mbang daberru silotna i sidi, "Ulang kènè mbiar! Kubettoh itulusi kènè ngo Jesus sienggo ipersilangken idi. ⁶ Oda i sèn nèngè ia, ai enggo kèkè ia bagè sienggo nidokkenna idi kin. Tengen kènè mo bekkasNa gampar ènda. ⁷ Bagèndari ndor mo kènè laus magahken taba sisinNa, ’Enggo balik nggelluh Ia, janah ilebbèi ngo kènè nahan mi Galilea. I sidi mo idahen ndènè Ia!’ Èngèt mo sienggo nidokkenNa i bai ndènè." ⁸ Nai ndor mo itadingken daberru-daberru idi kuburen idi, mbiar mercampur lolo ukur kalak idi lojang lako memagahken simasa i taba sisiin Jesus. ⁹ Sintempu, roh mo Jesus mendahi daberru idi, nina mo, "Damè mo bai ndènè!" Nai roh mo kalak i menjolmitiSa, ikaol mo nèhèNa janah isembah mo Jesus. ¹⁰ "Ulang kènè mbiar!" nina Jesus taba kalak idi, "Laus mo kènè janah bagahken kènè mo bai karina anggingKu, asa laus kalak i mi Galilea, i sidi mo idahen kalak i Aku." ¹¹ Enggo kessa laus karinana daberru idi, laus ma mo dèba soridadu penjaga kuburen idi mi kuta, ibagahken mo taba imam ekuten terrèngèt karina simasa idi. ¹² Nai merrunggu mo imam ekuten dekket pengulu-pengulu Jahudi. Iputusken kalak idi mo asa iberrè kèpèng bai soridadu penjaga i. ¹³ Janah idokken mo, "Kennah mo dokken kènè bagèen, ’Tikan neddem kami, roh ngo sisinNa bernginna idi menangko bangkè i.’ ¹⁴ Jadi, mula ibettoh gubèrnur idi pè i, kami pè mengamoh-ngamohisa, asa ulang susah nola kènè." ¹⁵ Ijalo kalak i mo kèpèng idi janah iulaken soridadu idi mo bagè sinidokken imam ekuten dekket pengulu Jahudi, nai tersaar ngo berrita bagidi soh sidari èn mi kalak Jahudi. ¹⁶ Laus mo sisiin sisipuluh sada i mi delleng i Galilea rembang mi siniperèntahken Jesus taba kalak idi. ¹⁷ Iidah kalak i kessa Jesus i sidi, sujud mo kalak i ninganna mersembah, tapi lot ngo ipas kalak i nai oda tok ukurna. ¹⁸ Nai ijolmiti Jesus mo kalak idi janah idokken, "Karina kuasa memerèntah sorga dekket dunia èn, enggo isohken bangKu. ¹⁹ Kerna nai, laus mo kènè mendahi karina bangsa i suberri dunia èn, bakin kènè mo kalak i gabè sisinKu, perridi kènè mo kalak i mi bagasen gerar Bapa, Anak dekket Tendi Dèbata. ²⁰ Peddahi kènè mo kalak i, asa tunduk mi karina sienggo Kuperèntahken bai ndènè idi. Èngèt mo! Dak denganenKu ngo kènè soh mi ari perpodi."