LUKAS

LUKAS

¹ Alè Teopilus sinipersangapen, Enggo mbuè kalak merrusaha mennuratken terratur terrèngèt simasa sienggo terjadi i tengah-tengahta. ² Isuratken kalak i ngo tosè bagè sienggo isukutken kalak sienggo mengidah sendiri simasa idi i mulana nai, nai isukutken ma soh mendahi kita. ³ Tapi bagèndari, kumarna aku pè enggo mo kurisiki seppè karinana idi i permulanna nai, katèngku selloh ngo kusuratken merratur bamu alè supan. ⁴ Kubaingken pè bagidi, asa ibettoh kono ngo karinana sienggo ipeddahken bamu idi bennar janah tuhu. ⁵ Tikan si Herodes mengerajai nagerri Juda, lot mo sada kalak imam mergerar Zakharia. Imam horong si Abia ngo ia. Sinibagesna mergerar si Elisabet, tong ma ngo turunen imam. ⁶ Lemmo ngo atè Dèbata mengidah persaripèen kalak idi. Duana ngo kalak i menguèi karina patiin Tuhan. ⁷ Oda ngo lot dukakna, kerna nggempus ngo si Elisabet idi janah enggo mo tua-tua kalak i duana. ⁸ Ibas sidari, tikanna si Zakharia mengulaken ulanna sibagè imam i hadeppen Dèbata, kerna tupung dapet anggapna gèlèren horong imam Abia mengula. ⁹ Bagè biasana ibakin imam-imam, ikerret ngo tendung lako memilih, jadi tupung mo terpilih si Zakharia masuk mi Bages Dèbata lako menutung kemènjen mahan dahupa isidi. ¹⁰ Sidangna merdahupa idi, iruar ngo cènder karina ukum jelma nterrem. ¹¹ Tikan bagidi, roh mo sada malaèkat mendahi si Zakharia, cènder kan kamuhun mèja perdahupaan idi. ¹² Idah si Zakharia kessa mo malaèkat idi, tersengget mo ia janah mbiar. ¹³ Tapi idokken malaèkat idi mo mendahisa, "Ulang kono mbiar, alè Zakharia! Enggo iuèi Dèbata sodipmu. Menubuhken sada anak mo sinibagesmu si Elisabet. Si Johanes mo baing gerarna. ¹⁴ Lolo kalohon mo kono bagi ma mbuè kalak mersampang atè, enggo kessa tubuh anak idi sikalièn! ¹⁵ Gabè kalak mbelgah mo ia ipenengennen Tuhan. Oda ndorok ia mènum anggur barang ènumen mperngis. Kessa nai tubuh ia, dak ibagasen Tendi Dèbata ngo ia. ¹⁶ Mbuè ngo kalak Israel iteggu lako balik taba Dèbata, Tuhan ni kalak idi. ¹⁷ Sada kalak utusen mergegoh bai Dèbata nai ngo ia janah merkuasa bagè si Elias. Ipedamè mo bapana mi anakna, janah menguluken kalak siso tunduk gabè balik mi dalan bennar. Karinana idi ibaing lako menghantari jelma memmèma Tuhan i." ¹⁸ "Kadè mo pertandana magahken tuhu saut karina nidokkenmu idi?" nina si Zakharia mengkuso Malaèkat idi. "Aku enggo tua-tua, sinibagesku pè enggo tua-tua." ¹⁹ Ialoi malaèkat i mo, "Gabriel ngo aku! Naposo Dèbata ngo aku, janah ia ngo pasulakken aku memmagahken berrita èn mendahi kono. ²⁰ Kennah saut ngo karina sikuranaken èn sienggo ibuhul Dèbata. Tapi kumarna oda tok kono, pekkak mo kono, mak ndorok mengerana soh mi persautna karina sikuranaken idi." ²¹ Nderrang bagidi, enggo mo dak ipèma-pèma jelma nterrem idi si Zakharia. Lengngang mo kalak idi, kumarna bagidi dekkahna i Bages Dèbata. ²² Karuar kessa ia, oda nèngè terbaingsa mengerana mi jelma nterrem idi. Tanganna mo iambas-ambasken mahan pertanda, nai memettoh mo sinterrem idi; bakunè pè enggo mo pana lot idah ia barang kadè i Bages Dèbata. ²³ Enggo kessa pul mengula i Bages Dèbata nai, balik mo si Zakharia mi sapona. ²⁴ Oda sadikè dekkah nai, mengkandong mo si Elisabet sinibagesna i, gabè ikirung mo dirina ibagasen lima bulan dekkahna. ²⁵ "Iurupi Tuhan i ngo aku, enggo iagoi kinilèangku idi bangku nai," nina. ²⁶ Enggo kessa ennem bulan si Elisabet mengkandong; ipasulak Dèbata mo malaèkat Gabriel mi sada kuta mergerar Nazaret i nagerri Galilea. ²⁷ Mendahi sada kalak simerbaju mergerar si Maria sienggo ranto anak laki mergerar si Josep, ibas pemparen si Daud nai. ²⁸ Soh kessa malaèkat i mendahi si Maria, nina malaèkat i mo, "Sintabi bamu sinimasèh atèen Tuhan i! Idengani Tuhan i mo kono!" ²⁹ Tersengget mo si Maria mendengkoh kata malaèkat idi, kata pikirenna mo ibagasen, persentabiin bakunè ngo ndia i. ³⁰ Nai nina malaèkat i mo tabasa, "Ulang kono mbiar alè Maria, ai lemmo ngo atè Dèbata midah kono. ³¹ Mengkandong mo kono janah menubuhken sada anak, Jesus mo baing gerarNa. ³² Gabè sada kalak mbelgah ngo Ia janah idokken mo Ia Anak Dèbata Sintèmbul idi. Pebangkiten Dèbata mo Ia gabè Raja pergemgem bagè empungNa si Daud. ³³ Janah rajanNa mo karinana pemparen si Jakob soh mi amman sumendah. KerajaenNa i pè oda merpengadi-ngadiin." ³⁴ "Bakunè mo terbakin masa i, ai tertatakken rambu-rambu dèng ngo aku?" nina si Maria taba malaèkat idi. ³⁵ Ialoi malaèkat idi mo, "Roh ngo Tendi Perbadia mendahi kono janah kuasa Dèbata ngo perlènggemenmu. Kernana i anak sinaing tubuhenkenmu igerari ngo idi Simbadia, Anak Dèbata. ³⁶ Bettoh mo: si Elisabet kadè-kadèmu i pè enggo mo mengkandong ennem bulan, janah daholi ngo ni dagingna i, tukasi pè ia enggo tua-tua janah idokken dèba ia nggempus. ³⁷ Ai oda lot siso terbakin Dèbata." ³⁸ Nai idokken si Maria mo, "Naposo ni Tuhan i ngo Aku, saut mo tuhu masa bangku bagè sinidokkenmu idi." Laus mo malaèkat i menadingken si Maria. ³⁹ Enggo kessa i, laus mo si Maria mi uruk Judèa. ⁴⁰ Iteppet mo bages si Zakharia. Tikan naing mbengket mi bages i ia, itabi mo si Elisabet. ⁴¹ Idengkoh si Elisabet kessa mo tabi si Maria i, mènter gumerrak mo sinikandongen si Elisabet idi. Nai dom Tendi Perbadia mo si Elisabet. ⁴² Nina mo, "Dapetten pasu-pasu ngo kono i tengah-tengah partua ibages, janah ipasu-pasu ngo nidagingmi. ⁴³ Isè mo pella aku ènda, asa pella roh inang Tuhanki mendahi aku? ⁴⁴ Ai kudengkoh kessa salammu idi, mènter gumerrak mo ni dagingku idi kumarna lolona. ⁴⁵ Sayur ntau ngo kono kerna ikettoki kono ngo kennah saut nidokken Tuhan idi bamu!" ⁴⁶ Nai nina si Maria mo, "Kupoji mo Tuhan i ibas ukurku, ⁴⁷ janah mersampang atè ngo aku, kerna ipaluah Dèbata ngo Aku. ⁴⁸ Ièngèt ngo aku naposoNa simerlèa ènda! Mulai bagèndari nai, karina kalak mendokken aku sayurntua. ⁴⁹ Kerna Dèbata Pergegoh Sisotercodi memmaing ulaan mbelgah bangku. Mbadia mo gerarNa. ⁵⁰ Masèh ngo atè Tuhan taba jelma simengkebiariSa, turun-temurun. ⁵¹ Merkitè tanganNa simergegoh i, Ipensèrakken ngo kalak sijukkat merrukur, janah menondati taki kalak i. ⁵² Nasa Raja ipesampur ibas kerajanNa nai tapi ukum kalak simerlèa ipedates. ⁵³ Ibessuri ngo kalak simellèhè merkitè nasa simerandal tapi ipellaus ngo sibèak oda terrolih barang kadè pè. ⁵⁴ Iurupi ngo kalak Israel, naposoNa, lako pesautken niperbagah-bagahNa taba empungta. ⁵⁵ Oda lupa Tuhan ipas jandiNa, mermasèh atè ngo Ia taba si Abraham bak mendahi pinemparNa soh mi amman sumendah." ⁵⁶ Kira-kira tellu bulan dekkahna si Maria merrian i bages si Elisabet, nai pè asa mulak ia mi bagesna. ⁵⁷ Dapet mo katikana kettaring si Elisabet. Itubuhken mo sada anak. ⁵⁸ Karina ni gembar sapona dekket kadè-kadèna mendengkoh terrèngèt simendè nibaing Tuhan i bai si Elisabet, rebbak merlolo atè ngo kalak idi dekketsa. ⁵⁹ Enggo kessa merrumur ualuh ari anak mbara i, merrohen mo kalak lako mennunatsa. Idokken kalak i mo asa si Zakharia mo bakinen gerarna, dos dekket gerar bapana. ⁶⁰ Tapi idokken inangna mo, "Oda i gerarna bakinen! Kennah si Johanes ngo gerarna." ⁶¹ "Isè poda lot kadè-kadèmu mergerar bagi," nina kalak i tabasa. ⁶² Nai ikuso kalak i mo si Zakharia merkitè maèn tangan, barang isè bakinen gerar anakna idi. ⁶³ Ipido si Zakharia mo sada batu pennuraten, nai isuratken mo isidi, "Si Johanes mo gerarna." Gabè lengang kalohon mo kalak idi karina. ⁶⁴ Gejapkenna i ma, mènter ndorok mo mengerana si Zakharia mengolihi, janah ipoji mo Dèbata. ⁶⁵ Mbiar mo karina jelma siroh idi, gabè sar mo berrita idi mi suberri nagerri uruk Judèa. ⁶⁶ Karinana kalak simendengkoh i dak kuso-kuso ukurna, "Gabè kadè mo ndia anak idi ipodi ari?" Kennah idengani kuasa Tuhan i ngo ia. ⁶⁷ Idomi Tendi Perbadia mo si Zakharia gabè ibagahken mo tennah Tuhan i, nina mo, ⁶⁸ "Ita kè mo si pojo Tuhan i, Dèbata bangsa Israel! Kerna enggo roh ia pegelluhken bangsaNa janah paluahken kalak idi. ⁶⁹ Iberrèken ngo banta tanduk kelluahen. Arap pemparen si Daud naposoNa i. ⁷⁰ Enggo kin ngo iperbagah-bagah i arnia merkitè nabi-nabi nipilihNa i, ⁷¹ lako paluahken kita ibas musuhta nai, bak ibas kuasa kalak simerceggo atè banta. ⁷² Asa merkitè-kitè bagidi, ituduhken ngo mendè basaNa taba empungta janah ipessaut bagah-bagahNa simbadia i. ⁷³ Enggo ibulabanken taba bapanta si Abraham, ⁷⁴ janah merjandi lako pelluahken kita ibas musuhta nai, asa sikebbasi Ia oda pella mbiar ⁷⁵ dak menguèi tabaSa janah memaingken lemmo atèNa sidekkah nggelluh kita. ⁷⁶ Kono alè pa, tergerar mo kono sipesakatken rana Dèbata Sintèmbul i, iutus ngo kono mahan solo-solo Tuhan i lako mengerentes dalanNa, ⁷⁷ lako memagahken mendahi bangsaNa naing paluahenNa mo kalak idi, mula enggo iampuni Dèbata dosa-dosa kalak idi. ⁷⁸ Permasèh atè ngo Tuhan i janah perkelleng atè roh ngo Ia lako paluahken kita, bagè mataniari mbincar siceggen. ⁷⁹ Bagi ngo Iberrèken bindellaNa taba karinana singgelluh ibas kegellapen janah buradan. Iteggu ngo kita mi dalan kedamèen." ⁸⁰ Makin mbelgah mo anak si Zakharia idi janah makin mergegoh bak tendina. I kellongoon ngo ia merrian soh mo jumpa kettikana ipetarar dirina mendahi bangsa Israel.

¹ Nai roh mo tikannai perèntah Kèsar Agustus, kennah suraten nasa jelma nigemgemmenna. ² Pemmilangen perlebbè mo idi tikan si Krinius gabè gubèrnur nagerri Siria. ³ Berkat mo karinana jelma mi lebbuh empungna gennep asa isurati gerarna. ⁴ Berkat mo si Josep i Nazaret nai sini Galilea, mi Betlehem i Juda mi kuta si Daud, kerna pemparen si Daud ngo ia. ⁵ Pessuratken dirina rebbak si Maria tinandana sienggo mengkandong idi. ⁶ Sinderrang i Betlehem kalak idi dapet mo kettikana kettaring si Maria idi. ⁷ Itubuhken mo sada anak buka bajuna, iampani mo, janah icoling mi babo gagaten kerna oda lot nèngè permalamen sidèban dapet kalak idi. ⁸ Lot ngo permakan i kuta i mermalam i jampalen bernginna i menjaga pinakanna. ⁹ Sintèmpu, roh mo malaèkat Tuhan i mendahi kalak idi janah mercuhaya ngo sangap Tuhan i mennerrangi kalak i, gabè mbiar kalohon mo kalak idi. ¹⁰ Nina mo, "Ulang kènè mbiar, ai Sukuten Simerandal ngo kubagahken bai ndènè -- sukuten sampang atè mbuè bai karina jelma. ¹¹ Enggo tubuh Raja Sipaluah berngin èn i kuta si Daud, imo Kristus Tuhan. ¹² Èn mo pertandanna: Anak mbara ngo dapetten ndènè, siniampanen icoling i babo gagaten." ¹³ Sintempu, roh mo rebbakken malaèkat i mbuè denganna malaèkat memoji-moji Dèbata, nina mo: ¹⁴ "Kessangapen mo bai Dèbata i bekkas sindatesna! Damè mo i tanoh èn bai jelma kellemmonken Tuhan i!" ¹⁵ Laus kessa malaèkat i mi sorga menadingken permakan idi, mengerana mo permakan i samahsa, "Laus mo kita mi Betlehem, sitengen mo simasa èn nibagahken Tuhan i mendahi kita." ¹⁶ Isudu kalak i mo laus, jumpa kalak i mo si Maria dekket si Josep dekket anak mbara idi icoling i babo gagaten. ¹⁷ Iidah permakan idi kessa anak mbara idi, ibagahken mo sinikataken malaèkat i terrèngèt anak mbara i. ¹⁸ Nai karinana mo kalak i bengap mendengkoh sukuten idi. ¹⁹ Tapi ukum si Maria, ijamotken ngo karina kata i janah iradumi ibas ukurna. ²⁰ Mulak mo permakan idi ninganna ipoji mo Dèbata, kumarna karinana niidah dekket sinidengkohna idi tuhunna ngo bagè nidokken malaèkat i tabasa. ²¹ Enggo kessa ualuh ari umurna, nai isunat mo ia. Ibaing kalak i mo gerarna Jesus, imo gerar sinibakin malaèkat idi sinderrang makdèng sellet Ia. ²² Janah dapet kessa kettikana lako pepantingken mengèkutken hatoren patiin si Musa, iembah si Josep dekket si Maria mo Anak i mi Jerusalem asa isohken mi hadeppen Tuhan i. ²³ Kerna tersurat i bukku hatoren Tuhan i bagèen, "Nasa anak buka baju kennah ipesakat mi hadeppen Tuhan i." ²⁴ Laus ngo kalak i mi Jerusalem imo pessohken pèlèen simpasang kèrap barang dua ndarapati bagè sienggo itettahken Hukum Tuhan. ²⁵ Lot mo tikannai sada kalak i Jerusalem mergerar si Simeon, sada kalak bennar ngo ia janah merkebiaren mi Dèbata dak memèma-mèma pekiroh Dèbata paluahken bangsa Israel. Idomi Tendi Perbadia mo ia, ²⁶ ai enggo kin ngo ibagahken Tendi Perbadia mbangsa, oda dèng matè ia, ukum madèng iidah ia Mesias niperbagah-bagah Dèbata. ²⁷ Merkitèken kegegohen Tendi Perbadia roh mo ia mi Bages Dèbata. Nderrang iembah partuana Jesus anak mbara i mengèkutken hatoren sitersurat ibas pati-patiin. ²⁸ Iabing si Simeon mo Anak mbara i, ipoji mo Dèbata, nina mo, ²⁹ "Bagèndari alè Tuhan, enggo mo ipesaut Kono niperbagah-bagahmi. Enggo mo sennang atèngku matè ibagasen damè. ³⁰ Ai enggo mo iidah matangku sendiri kelluahen siroh baMu idi nai. ³¹ Siniberrèkenmu taba karina bangsa. ³² Tosè bagè kecihuren lako menerrangi dalan bai bangsa sidèban asa roh mendahi kono, janah mahan kemuliaan taba bangsaMu Israel." ³³ Lengngang kalohon mo partuana mendengkoh nidokken si Simeon idi terrèngèt Anak idi. ³⁴ Nai ipasu-pasu si Simeon mo kalak idi, "Sienggo nipilih Dèbata ngo anak ènda, lako mendabuh hukum dekket pekèkèken mbuè kalak Israel. Janah tanda bai Dèbata nai ngo Ia, itonja jelma nterrem ngo Ia, ³⁵ janah merkitè bagidi terbettoh mo isi perukuren kalak i. Kinimarsak mo menurah atè-atèmu bagè peddang ntajem." ³⁶ Lot mo isidi sada kalak nabi daberru, enggo mo tua-tua kalohon ia. Si Hana ngo gerarna imo berru si Panuel, marga Asyer. Enggo kessa pitu tahun mendiri, ³⁷ mebbalu mo si Hana, janah enggo ualuh puluh empat tahun umurna. Dak tong ngo ia merrian i Bages Dèbata. Suntuk ari suntuk berngin ngo ia mersodip janah merpuasa menguèi Dèbata. ³⁸ Tupung tikan bagidi, roh ma mo ia, ipoji mo Dèbata, janah iranaken ngo terrèngèt Anak idi mendahi karina jelma simengketeddohken Jerusalem ipaluah Dèbata. ³⁹ Enggo kessa iulaken si Josep dekket si Maria karinana nihatorken Tuhan i, balik mo kalak idi mi kutana Nazaret nagerri Galilea. ⁴⁰ Makin mbelgahna janah mergegoh mo anak idi. Bijak kalohoon ngo ia janah idomi masèh atè Dèbata. ⁴¹ Gennep tahun dak laus ngo partua Jesus mi Jerusalem lako merpèsta Ari Raya Paskah. ⁴² Enggo kessa merrumur sipuluh dua tahun Jesus, rebbakken mo kalak i mi Jerusalem bagè ncemmalna mi pèsta idi. ⁴³ Pul kessa pèsta idi, balik mo kalak i, keppè tading ngo Jesus i Jerusalem siso pemmettohen partuana. ⁴⁴ Persangkaan kalak idi enggo rebakken jelma mbellang idi Jesus balik i Jerusalem nai. Enggo kessa idalani kalak i dalanen sidari, itulus mo Ia iantara kadè-kadè dekket kalak nitandanna pè. ⁴⁵ Tapi oda lot jupa kalak idi Ia, gabè balik nola mo kalak i mi Jerusalem mennulusi Jesus. ⁴⁶ Enggo tellu ari itulusi, idapet kalak i mo Ia i Bages Dèbata kundul-kundul mendengkoh-ndengkohi ninganna maing kuso-kuso mendahi guru-guru agama Jahudi. ⁴⁷ Karina kalak nisidi lengang mendengkoh ibas pengerrananNa dekket pengaloina. ⁴⁸ Lengang ma mo dekket partuaNa mengidahSa. Nai idokken inangNa i mo tabaSa, "Kasa bagi pemaingmu taba kami alè pa? Terendep-endep ngo bapaMu dekket aku mennulusi kono." ⁴⁹ Ialoi Jesus mo, "Kasa itulusi kènè Aku? Oda ibettoh kènè kennah ngo Aku i bages BapangKu?" ⁵⁰ Tapi oda iarti si Josep dekket si Maria nidokken Jesus idi. ⁵¹ Nai balik mo Jesus rebbak dekket kalak idi mi Nazaret, janah dak merpenguèi ngo Ia taba kalak idi. Karinana simasa idi isimpan si Maria ngo ibagasen ukurna. ⁵² Makin ndekkah, makin mbelgahna ngo Jesus janah tambah bijak, ikellemmoken Dèbata bak jelma ngo Ia.

¹ Pesipuluh tahunken kessa mbangkit Raja Kèsar Tiberias, gabè gubèrnur mo si Pontius Latus i Juda, janah si Herodes memerèntah i Galilea. Si Pilipus, imo dengan sibeltek si Herodes gabè raja i nagerri Iturea dekket Trakhonitis, janah si Lisanias mo mengerajai i Abilene. ² Tikannai mo imam huntuun si Hanas dekket si Kayafas. Tahunna i ma mo roh kata Dèbata mendahi si Johanes i kellongoon. ³ Laus mo si Johanes mi suberri aur Laè Jordan pesakatken sukuten bai Dèbata nai. Nina si Johanes mo, "Mertobat mo kènè ibas dosa-dosa ndènè nai janah kennah iperridi ngo kènè, asa iampuni Dèbata dosa-dosa ndènè." ⁴ Bagè si tersurat ibas bukku Nabi Jesaya: "Lot ngo sora dilo-dilo i kellongoon: Pekkadè kènè mo dalan bai Tuhan i, pepènter kènè mo dalanNa. ⁵ Nasa lembeng-lembeng kennah itanohi janah cocoon ngo nasa delleng dekket uruk-uruk. Petèger mo nasa dalan merrèluk janah peddèas mo nasa dakkal-dukkul. ⁶ Karinana jelma ni dunia èn mengidah Dèbata paluahken jelma!" ⁷ Nai idokken si Johanes mo taba jelma nterrem siroh mendahisa asa iperridi, "Kènè alè kalak jahat! Isè magahken ndorok kènè maluah tarap hukum Dèbata sinaing roh? ⁸ Tuduhken kènè mo merkitè pengelako ndènè, magahken enggo tobat kènè ibas dosa-dosa ndènè nai! Ulang mo dak idokken kènè, si Abraham ngo empung nami. Èngèt kènè mo: Ndorok ngo ibaing Dèbata i batu èn nai gabè pemparen si Abraham! ⁹ Tengngen mo, enggo ampè takkè i daling kayu, tabahen mo nasa kayu siso merbuahken mendè, janah ipatakken mi api." ¹⁰ Nai ikuso jelma nterrem idi mo si Johanes, "Kadè mo sibakinen nami?" ¹¹ Ialoi si Johanes mo, "Barang isè lot bajuna dua, kennah iberrèken sada taba kalak siso lot bajuna, janah isè lot panganna, kennah ibagi-bagiken taba sikellèhèen." ¹² Roh ma mo dekket kalak pertunggu belasting mendahi si Johanes asa iperridi. Ikusoi kalak i mo si Johanes, "O Guru, kadè ngo ulanken nami?" Ialoi mo, ¹³ "Ulang mo pido kènè lebbih dari pada sienggo itetapken." ¹⁴ Lot ma mo tenterra mengkuso, "Bakunè kami? Kadè ngo ulanken nami?" Ialoi si Johanes mo, "Ulang jalo kènè kèpèng barang bai isè nai pè merkitè paksa barang memaing tukas siso tuhu tabasa. Kesabamken mo gajimu idi!" ¹⁵ Tikanna idi pè dak terpèma-pèma ngo jelma i terrèngèt pekiroh Raja Sipaluah niperbagah-bagah idi. Jadi idokken mo ibas ukurna tah mada ngo si Johanes Raja Sipaluah idi. ¹⁶ Kernanai ngo asa idokken si Johanes taba kalak idi, "Laè ngo kuperridiken taba kènè tapi roh nè mo sada kalak belgahen bangku nai, menalkasi cipatuNa poda tellap aku. Iperridi Ia ngo kènè bak Tendi Perbadia dekket api. ¹⁷ I tanganNa ngo ndèru lako mennapi karina pagè. Nasa pagè mberras, ipepulung ngo mi kebben tapi nasa apana ket ronciNa itutung mo mi api siso ndorok mèntep!" ¹⁸ Bagidi mo ipeddahi si Johanes jelma nterrem idi, tikan memagahken Sukuten Simerandal bai Dèbata nai. ¹⁹ Tapi si Herodes gubèrnur Galilea, ipincang si Johanes ngo kemulihken ialihken ia si Herodias anggi berruna, sinibages anggina idi dekket kumarna karina kejahaten sidèbanna niulakenna. ²⁰ Tapi muat jahatna ngo si Herodes idi, ai imasukken ngo si Johanes mi bagasen kurungen. ²¹ Enggo kessa pul iperridi jelma nterrem idi, Jesus pè dekket ngo iperridi. Sinderrang mersodip Jesus, mbuka mo langit. ²² Susur mo Tendi Perbadia merrumangken ndarapati. Nai terdengkoh mo sora i sorga nai bagèen, "Kono ngo AnakKu siKukellengi idi. Lemmo ngo atèngKu midah ko." ²³ Tikan imulai Jesus ulanNa, merrumur mo Ia tellu puluh tahun. Mengèkutken pendokken sinterrem, ukum Ia anak si Josep imo anak si Eli. ²⁴ Anak si Matat, anak si Lewi, anak si Malkhi, anak si Janai, anak si Jusuf, ²⁵ anak si Matika, anak si Amos, anak si Nahum, anak si Hesli, anak si Nagai, ²⁶ anak si Mat, anak si Matica, anak si Simei, anak si Josekh, anak si Joda, ²⁷ anak si Johanas, anak si Resa, anak si Zerubabel, anak si Sealtiel, anak si Neri, ²⁸ anak si Malkhi, anak si Adi, anak si Kosam, anak si Elmadam, anak si Er, ²⁹ anak si Jesua, anak si Eliezer, anak si Jorim, anak si Matat, anak si Lewi, ³⁰ anak si Simeon, anak si Juda, anak si Jusuf, anak si Jonam, anak si Eliakim, ³¹ anak si Melea, anak si Mena, anak si Matata, anak si Natan, anak si Daud, ³² anak si Isai, anak si Obed, anak si Boas, anak si Salmon, anak si Nahason, ³³ anak si Abinadab, anak si Admin. Anak si Arni, anak si Hezron, anak si Peres, anak si Juda, ³⁴ anak si Jakob, anak si Isak, anak si Abraham, anak si Terah, anak si Nahor, ³⁵ anak si Serug, anak si Rehu, anak si Peleg, anak si Heber, anak si Salmon, ³⁶ anak si Kenan, anak si Arpakhsad, anak si Sem, anak si Noak, anak si Lamekh, ³⁷ anak si Metusala, anak si Henokh, anak si Jared, anak si Mahalaèl, anak si Kenan, ³⁸ anak si Enos, anak si Set, anak si Adam, anak Dèbata.

¹ Dom Tendi Dèbata ngo Jesus tikan itadingken Laè Jordan. Nai ibabai Tendi Dèbata mo Ia mi padang gurun. ² I sidi mo Ia iunjuni sibolis empat puluh ari empat puluh berngin dekkahna oda mangan. Jadi mellèhè mo iakap. ³ Idokken sibolis i mo mbangSa, "Mula Anak Dèbata ngo ko, dokken mo batu èn menjadi roti." ⁴ Ialoi Jesus mo, "Tersurat ngo ibas Bibèl, oda ngo roti sambing kenggelluhen jelma." ⁵ Nai iarahken Sibolis i mo Jesus mi bekkas ndates, ituduhken Sibolis i mo bai Jesus karinana kerajaen dunia èn. ⁶ Idokken sibolis i mo taba Jesus, "Karinana kuasa dekket kemuliaan bak kekayaan idi kuberrèken baMu, kerna enggo iberrèken karinana idi bangku janah merhak ngo aku merrèken bamu barang bai isè lemmo atèngku. ⁷ Jadi karinana idi gabè milikMu mula isembah kono aku." ⁸ Ialoi Jesus mo, "Tersurat ngo ibas Bibèl, pellin Tuhan Dèbatamu ngo sisembahenmu janah Ia ngo sikebbasenmu!" ⁹ Nai iembah Sibolis i mo Jesus mi Jerusalem, mi babo palas-palas Bages Dèbata. Nina mo mbang Jesus, "Mula Anak Dèbata ngo kono, dabuhken mo dirimu isidi nai mi terruh. ¹⁰ Ai tersurat ngo ibas Bibèl, ’Pasulaken Dèbata ngo malaèkatNa lako menjaga Kono.’ ¹¹ Janah ma itatang malaèkat ngo Kono asa ulang tertuktuk nèhèMu mi batu." ¹² Ialoi Jesus mo, "Tersurat ngo ibas Bibèl, oda ndorok ojiinmu Tuhan Dèbatamu." ¹³ Enggo kessa ioji Sibolis idi Jesus, laus mo ia menadingken Jesus ninganna memmèma kettika selloh nola. ¹⁴ Enggo kessa i, balik mo Jesus mi Galilea, janah idengani Tendi Dèbata ngo Ia. Saar mo berrita terrèngèt Ia i suberri nagerri idi. ¹⁵ Nai mengajari mo ia i bages perguruun, janah karina ngo memojiSa. ¹⁶ Enggo kessa i, roh mo Jesus mi Nazaret. Imo kuta bekkasNa mbelgah. Tupung ari Sabat, laus mo Ia mi Bages perguruun bagè kecemmalenna kin. Tikan cènder Ia naing menjaka Bibèl, ¹⁷ Iberrèken mo bana bukku Nabi Jesaya. Ibuka mo bukku simergolong idi, nai tupung mo mi ayat bagèen: ¹⁸ "Senggep ngo Tendi Tuhan i bangKu, kerna enggo ipilih Aku lako memmagahken Sukuten Simerandal bai Dèbata nai mendahi kalak sincoor. Ia mengutus Aku lako magahken kelluahen bai sitertaban janah gabè merpendidah ibaing kalak sipètung dekket paluahken kalak sitertekkan. ¹⁹ Janah pesarken berrita tersèngèt pekiroh Tuhan i paluahken bangsaNa." ²⁰ Nai igolong Jesus mo bukku i janah iulakken mendahi pengendeng, nai kundul mo ia. Karinana jelma nisidi dakdak nelnel mengidahSa. ²¹ Nai ipungkah Jesus mo mengerana mendahi kalak i, nina mo, "Sidarèn mo enggo saut bagè sitersurat nidengkoh ndènè sikujaka ndai." ²² Karina kalak i mennuhu-nuhuiSa, janah lengang merdengan kagum ngo kalak i mendengkoh kata merandal bak cara Jesus mengajar, gabè nina kalak i mo, "Otang anak si Josep ngo Ia?" ²³ Nai idokken Jesus mo taba kalak idi, "Tentu dokkenken ndènè mo codiin bagèen taba Aku: O datu tambari mo dirimu sendiri, sienggo kudengkoh kami nibaingmu i Kapernaum idi baing ma mo bagidi i kutamu ènda." ²⁴ Enggo kessa i idokken Jesus nola ma mo, "Èngèt kènè mo, oda maharga nabi i kutana sendiri. ²⁵ Tapi dengkohken mo: I tikki si Elia, sinderrang oda roh udan tellu setengah tahun dekkahna, gabè masa mo kellèhèen matè kocing i suberri Israel. Ipas katika i mèduk ngo lot simebbalu i Israel. ²⁶ Tapi tukasi pè bagi, oda ipasulak Dèbata si Elias mendahi barang apaina simebbalu ni Israel i. Gabè mi simebbalu ni kuta Sarpat i nagerri Sidon ngo ia ipasulak. ²⁷ Bagi ma ngo sinderrang Nabi Elisa, mbuè ngo nemmu sipuruun i Israel, tapi sada poda kalak i itambari, laènken pellin si Naeman kalak Siria idi sambing ngo." ²⁸ Nai mellaga kaloon mo karina ni bages perguruun idi mendengkohken Jesus idi. ²⁹ Cènder mo kalak i, iruah mo Jesus mi ruar kuta i, naing mendabuhkenSa i tebbing idi nai. ³⁰ Tapi merdalan ngo Jesus arap tengah-tengah kalak idi, laus mo Ia. ³¹ Enggo kessa i, laus mo Jesus mi kuta Kapernaum ni Galilea. Mengajar mo ai isidi tikan ari Sabat. ³² Kagum ngo kalak mendengkoh pengajarenna, Ia meheji ngo peddahna i. ³³ Lot mo sada kalak i bages perguruun idi isellapi sètan, dak mendempik-dempik ngo ia, ³⁴ "Alè Jesus kalak Nazaret, kadè naing bakinenmu bai nami? Naing mengago kami ngo kono asa roh? Kubettoh ngo barang isè kono. Kono ngo utusen Simbadia bai Dèbata nai!" ³⁵ Isergangi Jesus mo tendi jahat i, nina mo, "Sip! Karuar mo kono bana nai!" Nai itembemken tendi jahat i mo daging nisellapenna idi mi tengah jelma mbellang i lako karuar bana nai, oda pella menakiti. ³⁶ Lengang mo karina ni sidi, nina mo samah-samahsa, "Ah, mahantu ngo keppè, merkitè-kitè kuasa meheji iusir ngo tendi-tendi jahat idi, janah karuar ngo kalak i!" ³⁷ Saar mo berrita terrèngèt Jesus idi mi suberri nagerri idi. ³⁸ Nai laus mo Jesus i bages perguruun i nai mi bages si Simon. Mersakit panè ngo simatua berru si Simon. Ibagahken jelma i ngo idi taba Jesus. ³⁹ Laus mo Jesus mi peddemmen partua i, iusir mo panè i. Njuah mo iakap, gabè kèkè mo simatua si Simon i janah dekket mo ia merkebbasi bai kalak idi. ⁴⁰ Enggo kessa cundut mataniari, ipentaruhken dèba mo sincelketna simersakit merbagè matcam sakit mendahi Jesus. Nai iampèken Jesus mo tanangNa taba kalak sisakiten idi gennep lako pejuahkensa. ⁴¹ Merkaruaren ngo nasa sètan-sètan i i daging kalak idi nai, ninganna mendengkuk-ndengkuk mendokken, "Anak Dèbata ngo kono!" Tapi isergangi Jesus ngo kalak idi, oda ipadiat nèngè mongkam, kerna ibettoh kalak idi kin ngo Ia Raja Sipaluah niperbagah-bagah Dèbata. ⁴² Enggo kessa mbincar mataniari, laus mo Jesus i kuta i nai mi sada bekkas melongo. Nai itulusi sinterrem idi mo Ia. Jumpa kalak idi kessa Ia, icèkèpi kalak i mo Jesus asa nemmuken ulang laus menadingken kalak i. ⁴³ Tapi idokken Jesus mo bai kalak idi, "Sukuten Simerandal terrèngèt Kerajaen Dèbata kennah Kubagahken ngo dekket mi kuta sidèban pè, ai kerna naidi ngo aku asa iutus." ⁴⁴ Nai merjamita mo Ia i bages perguruun i suberri nagerri Juda.

¹ Tikan sikali, cènder mo Jesus i biding Tao Genesaret. Mbuè ngo jelma nterrem i mersessak-sessak mencingkoi Jesus lako mendengkohken kata Dèbata. ² Lot mo idah Jesus dua bungki i biding tao i; ukum perrikan idi enggo mo susur i bungkina nai, lako pebersihken jalana idi. ³ Ibengketti Jesus mo sada bungki idi, imo bungki si Simon, nai idokken mo bai si Simon asa ikayuhken bungkina i asa narih ndaoh cituk i biding tao i nai. Nai kundul mo Jesus i bungki idi, mengajari jelma mbellang idi. ⁴ Enggo kessa pul mengajari, idokken mo taba si Simon, "Kayuhken mo bungki i mi bekkas mbages, nai sampakken mo jalamu idi memmuat ikan." ⁵ "O Guru," nina si Simon mengaloi, "Suntuk berngin ndaboi ngo kami menjala, tapi kadè poda dapet! Tapi kumarna pendokkenmu idi, uè dèng ngo aku menampakken jala èn." ⁶ Enggo kessa bagi, dapet kalak i mo mbuè ikan, sanga naing merribak jala idi. ⁷ Kumarna bagidi, ikilap kalak i mo denganna ni bungki sisada. Nai roh kessa mo denganna i, iisi kalak i mo bungki i, dom duana merrisi ikan, sanga naing lenneng. ⁸ Idah si Simon kessa mo idi, mersembah mo ia taba Jesus, ninganna idokken, "Laus mo kono alè Tuhan i gembarku nai, ai jelma perdosa ngo aku." ⁹ Ai lengang ngo si Simon dekket karina denganna idi mengidah bagidi buèna ikan sidapet kalak idi. ¹⁰ Bagi ma dekket dengan si Simon imo si Jakobus, si Johanes, dukak-dukak si Zebedeus. Idokken Jesus mo mbang si Simon, "Ulang kono mbiar, mulai bagèndari nai gabè penjala jelma mo kono." ¹¹ Itarik kalak idi mo bungkina i mi darat, itadingken mo bungki idi, nai ièkutken mo Jesus. ¹² Tikan sidari, Jesus i sada kuta, lot mo i sidi sada kalak daholi koliten dagingna karinana. Idah kessa mo Jesus, mènter sujud mo ia mersembah mi lebbèNa ninganna idokken, "Tuhan, mula uè ngo Kono terpejuah kono ngo aku." ¹³ "Uè ngo aku, njuah mo kono!" nina Jesus ninganna mendoroken tanganna menjamahsa. ¹⁴ Nai igerra Jesus mo ia asa ulang ibagah-bagahken barang taba isè pè. Tapi ipasulak Jesus mo ia gejapkenna i mendahi imam. "Dokken mo asa iperrèso imam idi kono," nina Jesus. "Nai laus mo kono memèlèken pèlèen bagè nidokken si Musa, mahan bukti bai karina kalak magahken enggo malum kono." ¹⁵ Tapi makin saar ngo berrita Jesus idi, janah merrohen mo kalak lako mendengkohkenSa dekket asa ipemalum sakitna. ¹⁶ Enggo kessa i laus mo Jesus mersodip mi sada bekkas melongo. ¹⁷ Tikan sidari, sinderrang Jesus mengajari, lot ma mo i sidi kundul barang piga kalak parisè dekket guru agama. Roh ngo kalak idi i kuta Galilea nai, Juda dekket i Jerusalem nai. Idomi kuasa Tuhan i ngo Jesus lako pejuahken kalak sisakiten. ¹⁸ Nai lot mo nderrangna i menaruhken sada kalak nitempuk sigading, gampar i babo peddemmenna. Iusahaken kalak idi ngo barang bakunè carana asa ndorok sisakiten idi njolmit i hadeppen Jesus. ¹⁹ Tapi kumarna mbuè ni jelma idi, oda terbakin kalak i menggamparken mi bages. Kernanai iembah kalak i mo mi babo ntarum, ibuka mo saong bages i, nai itontonken mo sisakiten i ibagasen peddemmenna lako mi hadeppen Jesus i tengah jelma mbuè idi. ²⁰ Mengidah belgahna kepercayaen kalak idi, idokken Jesus mo mbangsa, "Alè nggia, enggo iampuni dosami!" ²¹ Guru-guru agama dekket Parisè idi mengerana mo samahsa, "Jelma bakunè ngo èn berranina i mengelèai Dèbata? Isè pana ndorok mennasa dosa, laènken Dèbata?" ²² Ibettoh Jesus ngo nipikiren kalak idi, jadi idokken mo, "Kasa bagidi pikiren ndènè? ²³ Apaina ngo murahen nidokken, ’Enggo isasa dosamu! Barang, kèkè mo ko, merdalan mo kono?’ ²⁴ Tapi asa ibettoh kènè, merkuasa ngo anak jelma idi i babo tanoh ènda mennasa dosa." Nina Jesus mo taba nitempuk sigading idi, "Kudokken mo bamu, kèkè mo ko, embah mo peddemmenmu, mulak mo kono." ²⁵ Nai mènter kèkè mo sisakiten idi i lebbè jelma mbuè i nai, iembah mo peddemmenna, mulak mo ia ninganna memoji-moji Dèbata. ²⁶ Karinana jelma idi kagum kalohoon, nai ipoji kalak i mo Dèbata. Janah ibagasen mbiar, nina kalak idi mo, "Enggo siidah kellengangen sidari ènda!" ²⁷ Enggo kessa i, karuar mo Jesus i sidi nai, gabè idah mo sada kalak pertunggo belasting, si Lepi gerarna kundul i kantorna. Idokken Jesus mo tabasa, "Èkutken mo Aku." ²⁸ Mènter kèkè mo si Lepi, itadingken mo karinana, ièkutken mo Jesus. ²⁹ Nai ijamu si Lepi mo Jesus mi bagesna. Mbuè ngo merrohen pertunggu cokè bak jelma sidèban pè rebbak mangan dekket Jesus. ³⁰ Nai ngutnguten mo Parisè dekket guru-guru agama taba sisiin Jesus, nina mo, "Kasa mangan mènum kènè rebbak dekket pertunggu belasting dekket kalak perdosa?" ³¹ Nai ialoi Jesus mo, nina mo, "Oda perlu penambari bai kalak sijuah-juahen, pellin taba kalak sisakiten ngo. ³² Roh aku, oda ngo mendilo kalak sibennar, tapi kalak perdosa ngo, asa mertobat kalak i." ³³ Nai lot mo mendokken taba Jesus, "Ukum sisiin si Johanes nggati ngo puasa janah mersodip, bagi ma ngo bak sisiin Parisè. Keppè mangan mènum ngo ukum sisinMu." ³⁴ Ialoi Jesus mo, "Ndorok ngo katèndènè pendengani kèla merpuasa sidekkah rebbak dèng dekket kèla i? Tentu oda! ³⁵ Tapi roh mo tikkina, ibuat mo kèla i bai kalak i nai. Tikan bagidi mo asa puasa kalak idi." ³⁶ Nai isukutken Jesus mo taba kalak i codiin bagèen, "Isè poda uè menggonting gedda rimbaru mahan pendongkap mi gedda sienggo mumuk. Mula bagi ngo ibaing, ncèda ngo oles rimbaru idi janah ma, pendongkap rimbaru idi pè oda cocok mi gedda sienggo mumuk idi. ³⁷ Bagi ma ngo, isè poda lot mengosèken anggur rimbaru mi kiong sienggo buruk. Mula bagidi ibaing, mpustak ngo kiong sienggo buruk idi ibakin anggur rimbaru idi. Ancuh mo anggur rimbaru idi, janah ncèda ngo dekket kiong idi. ³⁸ Kennah mi kiong rimbaru ngo ibakin anggur rimbaru. ³⁹ Janah dèng ma, isè poda kalak uè mengènum anggur rimbaru sienggo mengènum anggur ndekkah, ai dokkenenna ngo: Mendèen ngo anggur sienggo ndekkah idi."

¹ Tikan i sada ari Sabat, sinderrang memellus Jesus arap juma, ipotiki sisinNa mo pagè, ikubaki janah ipangan. ² Nai mongkam mo kalak Parisè, "Kasa iulaken kènè siso ndorok ulanken tikan ari Sabat?" ³ Nai ialoi Jesus mo kalak i, "Oda dèng ngo nung ijaka kènè nibaing si Daud tikan mellèhè ia dekket denganna? ⁴ Ibengketti ngo Bages Dèbata, ibuat ngo roti sienggo ipèlèken taba Dèbata janah ipangan nola. Iberrèken ma dèba bai denganna. Padahal mengèkutken hatoren agamanta oda ndorok isè kipangan roti i laènken imam-imam." ⁵ Idokken Jesus dèng ma, "Anak Jelma idi ngo Tuhan ari Sabat!" ⁶ Tikan ari Sabat sidèban nola ma, mengajari mo Jesus i bages perguruun. Lot mo isidi sada kalak tanganna matè serrap. ⁷ Guru-guru agama dekket Parisè dakdak ngo mennulusi kessalahen Jesus asa ndorok iaduken. Nai dak ngo idatèken kalak i tah bakunè pejuahken kalak simersakit Ia tupung ari Sabat. ⁸ Tapi ibettoh Jesus ngo pikiren kalak i. Idokken mo taba kalak pertangan matè serrap idi, "Cènder mo kono i jolo èn." Kèkè mo ia, janah laus mo ia cènder mi sidi. ⁹ Enggo kessa i, nina Jesus mo taba kalak idi, "Mengèkutken hatoren agama kadè ngo ndorok bahaan tikan ari Sabat? Memmaing mendè ngo barang memmaing nggodo? Pelluahken jelma ngo barang maing mago?" ¹⁰ Itengen Jesus mo karina kalak idi kuliling, nai idokken mo taba pertangan matè serrap idi, "Doroken tanganmu i." Idoroken mo tanganna, gabè malum mo tanganna idi. ¹¹ Tapi mellaga mo guru-guru agama dekket Parisè i, gabè mersungkuun mo kalak i, bakunè bakinenna terrèngèt Jesus. ¹² Nderrangna i, menangkeng mo Jesus mi sada uruk lako mersodip. Suntuk bernginna idi dak mersodip ngo Ia mi Dèbata. ¹³ Enggo kessa nterrang ari, idilo mo simengèkutkenSa, nai ipilih mo sipuluh dua kalak bai kalak i nai, igerari mo sisipuluh dua kalak i rasul. ¹⁴ Si Simon (igerari ma si Petrus) dekket si Andreas anggi si Simon; si Jakobus bak si Johanes, si Pilipus, bak si Bartolomeus, ¹⁵ si Matèus bak si Tomas, si Jakobus anak si Alpèus, si Simon (nigerarenna berrani). ¹⁶ Si Judas anak si Jakobus dekket si Judas Iskariot sigabè penelbuh idi. ¹⁷ Enggo kessa i mengencuah mo Jesus rebbak dekket rasul sisipuluh dua idi i uruk i nai, nai mengadi mo kalak i janah cènder i sada bekkas ndèas. Mbuè ngo isidi mengèkutkenSa dekket siroh merrohen i Juda nai, i Jerusalem nai dekket i kuta Tirus bak Sidon nai i biding laut nai. ¹⁸ Pekiroh kalak idi imo naing mendengkoh rana Jesus dekket asa ipemalum ibas sakitna nai. Kalak nisellapen sètan pè roh ngo janah ipejuah. ¹⁹ Karina kalak idi sèkel janah mengusahaken asa menjamah Jesus kerna lot kuasa karuar bana nai lako pejuahken kalak i karina. ²⁰ Itengen Jesus mo karina simengèkutkenSa, nai idokken mo, "Sayurntua mo kènè kalak sincoor, kerna ginemgem Kerajaen Dèbata ngo kènè! ²¹ Sayurntua mo kènè simellèhè bagèndari; ai pebessuren mo kènè. Sayurntua mo kènè sitangis bagèndari; ai tertaba mo kènè luas. ²² Sayurntua mo kènè mula ceggo atè ndèba taba kènè, janah mula iliplip kènè bak ipellèa dekket idokken dèba kènè jahat kumernaken Anak Jelma! ²³ Nabi-nabi siperlebbè idi pè enggo ibaing bagidi. Mula bai ndènè pè masa bagidi, lolo mo kènè janah mersampang atè, kerna mbelgah ngo sulang ndènè i sorga. ²⁴ Tapi merjaya mo kènè si kaya bagèndari; kerna enggo irasa kènè sintaboh. ²⁵ Merjaya mo kènè sibessur bagèndari; ai mellèhè mo kènè! Merjaya mo kènè sitertaba bagèndari; kerna bonek mo kènè janah tangis! ²⁶ Merjaya mo kènè mula karina kalak memoji kènè, kerna bagi ma ngo nabi-nabi palsu arnia memoji-moji empung kalak idi." ²⁷ "Tapi ukum kènè simendengkohken Aku bagèndari, Kutennahken bai ndènè: Kekellengi mo musuhmu janah mendè mo baing taba kalak simerceggo atè taba kènè. ²⁸ Pasu-pasu kènè mo kalak simenumpahi kènè, sodipken mo kalak simemmaing nggodo taba kènè. ²⁹ Mula iparap dèba kurummu sisada, taroken ma mo dekket kurummu siserrap nari. Mula irampasi dèba jubahmu, berrèken ma mo dekket bajumu. ³⁰ Mula ipido dèba barang kadè bamu nai, berrèken mo tabasa, janah mula irampasi dèba hartamu, ulang nèngè mo pido i balik. ³¹ Barang kadè ipergeddo ukurmu bakinen dèba taba kono, baing mo bagidi ma tabasa. ³² Ukum pellin simengkekelengi kènè ngo kessa ikekelengi kènè, kadè mo jasa ndènè isidi? Ai kalak perdosa pè ikekelengi ngo simengkekelengisa! ³³ Janah mula mendè ibaing kènè pellin taba kalak simemmaing mendè bai ndènè sambing, kadè mo kellebihen ndènè? Kalak perdosa pè ibaing ngo bagidi! ³⁴ Mula ipejual kènè kalak kumarna lot harapen ndènè bana nai, kadè mo jasa ndènè i sidi? Ai kalak perdosa pè ipejualken ma ngo taba perdosa, janah ijalo nola balik! ³⁵ Tapi ukum kènè, kekellengi mo musuhmu mendè mo baing taba kalak idi. Pepinjamken kènè mo, janah ulang harapken balik nèngè idi. Mbelgah ngo upah ndènè janah gabè dukak-dukak Dèbata Sintèmbul i mo kènè. Kerna mendè ngo ibakin Dèbata mendahi kalak siso memettoh mendokken melias atè bang taba kalak jahat. ³⁶ Gabè permasèh atè mo kènè bagè Bapa ndènè permasèh atè i!" ³⁷ "Ulang mo kènè menghukum-hukumi sidèban, asa ulang ihukum Dèbata kènè. Ampuni kènè mo sidèban, asa iampuni Dèbata kènè. ³⁸ Berrèken mo taba sidèban, asa iberrèken Dèbata taba kènè; jalonmu mo mertinèncuk sienggo isukatken meronjat-onjat bamu, kerna persukaten sienggo nibaingmu i bai sidèban, idi ma ngo ipakkè Dèbata mendahi kono." ³⁹ Enggo kessa i, isukutken Jesus mo taba kalak idi codiin bagèen, "Mula iteggu sipètung denganna sipètung gabè rebbak terungkup mo kalak idi mi parik. ⁴⁰ Oda lot belgahen sisiin asa guru. Tapi sisiin sienggo pul merguru, dos mo ia bagè guruna. ⁴¹ Kasa nasa pellèmen ibas mata kaltumu dak iperatè-atèken kono, keppè nasa pungur i matamu sendiri oda idah kono? ⁴² Idikè mo ndorok idokken kono taba denganmu, ’Dikè kuagoi pellèmenmi’, keppèken nasa pungur ni matamu i oda idah kono? Èo kono perbuah ringadar! Agoi mo lebbè pungur silot ni matami, nai pè asa ndorok ntangkas idahenmu lako mengagoi nasa pellèmen silot i mata denganmi." ⁴³ "Oda terbuahken kayu mendè buah kayu nggodo. Bagi ma ngo oda terbuahken kayu nggodo buah kayu mendè. ⁴⁴ Nasa kayu tandaan ngo arap buahna. Oda nung nibuat buah kayu ara ibas kopi-kopi nai, barang pè buah anggur i bungkè rimbang nai. ⁴⁵ Barang isè jelma selloh, dakdak ngo ia merpengelako merandal kumarna ukurna idi merandal. Tapi barang isè merpengelako jahat dakdak ngo i mengulaken jahat, kerna ibagasen pusuh perratèenna jahat ngo. Kerna karina siniruapkenna i babahna i nai, imo siroh ibas pusuh peratenna nai." ⁴⁶ "Kasa idokken kènè Aku, ’Tuhan, Tuhan,’ keppèken oda iulaken kènè siKudokken bai ndènè? ⁴⁷ Mi kadè mo nicodiken nasa jelma siroh mendahi Aku, simendengkoh katangKu janah simengulakensa? -- Belli mo Kutuduhken bamu --. ⁴⁸ Codi mo ia bagè kalak simemajek bages; ikurak mo mbages kalohoon tanoh idi janah ipajekken mo batu cendi. Mula roh pè laè mbellen janah mengerraja lako mengelentem bages i oda terrumpakkensa, kerna batu ngo dangaan bages idi. ⁴⁹ Tapi ukum kalak simendengkoh ranangKu keppèken oda iulaken, codi mo ia bagè simemajek bages i babo tanoh, oda pella merbatu cendi. Mengerraja kessa mo laè mengelentem bages idi, merrumpak mo bages idi ncèda karina!"

¹ Enggo kessa pul iranaken Jesus idi mi jelma nterrem idi, laus mo ia mi Kapernaum. ² Lot mo i sidi sada kalak perwira tenterra Rom, kelleng kalohoon atèna midah sada naposona. Sakiten ngo naposona i, janah patè-patèen. ³ Idengkoh perwira i kessa mo terèngèt Jesus, ipasulak mo pengetuai-pengetuai Jahudi mendahi Jesus lako mengidoken asa roh Jesus pejuahken naposoNa idi. ⁴ Soh kessa pasulaken idi mendahi Jesus, ièlèk-èlèk kalak i mo Jesus asa iurupi nemmu perwira idi. Nina mo, "Patut ngo nemmu iurupi kono perwira idi." ⁵ "Ai kelleng ngo atèna midah bangsanta, janah enggo ipajek bages perguruun bai nami." ⁶ Nai laus mo Jesus rebbak dekket kalak idi. Enggo kessa naing soh Jesus mi bages idi, iutus perwira i nola mo denganNa mendahi Jesus lako mendokken, "Alè Guru, ulang mo pella ledja Guru i roh mi bagesku. ⁷ Aku sendiri pè oda sanggup roh mendahi Kono. Lotiin mo dokken singkebabah rana enggo malum iakap naposongku idi nahan. ⁸ Kerna aku pè tunduk ngo i perèntah atasenku, bagi ma i terruhku pè lot ma ngo tenterra imo perajuritku sikennah tunduk mi perèntahku. Mula kudokken taba kalak i, ’Laus!’ mènter laus ngo ia; janah mula kudokken mi sisada, ’Roh ko misèn!’ mènter roh ngo ia. Mula kudokken taba naposongku, ’Ènda mo bahan!’ mènter ibahan ngo." ⁹ Lengang mo Jesus mendengkoh i. Itulihken mo jelma nterrem i ninganNa idokken, "I tengah-tengah bangsa Israel pè, makdèng nung jumpa Aku kepercayaen bagèen belgahna!" ¹⁰ Mulak kessa pasulaken idi mi bages perwira idi, enggo mo malum perwira idi. ¹¹ Oda sadikè dekkah kellangna, laus mo Jesus mi kuta Nain rebbak dekket sisinNa, bak jelma nterrem i perrotor ma. ¹² Soh kessa Jesus mi gembar pèntu pengkeruhen kuta idi, pesimbak mo kalak i dekket rombongen simengosong bangkè mi ruar kuta idi, imo bangkè anak sada-sada bai partua ibages sienggo mebalu. Mbuè ngo pengisi kuta i mendengani simebbalu i. ¹³ Idah Jesus kessa mo daberru idi, masèh mo atèna midahsa, nina mo mbangsa, "Ulang nèngè kono tangis nangè!" ¹⁴ Nai ijolmiti Jesus mo bangkè idi, ijamah mo. Gabè ndong mo simengosong bangkè i. Idokken Jesus mo, "Alè anak perrana, Aku mendokken kèkè mo kono!" ¹⁵ Nai mènter kundul mo anak perana sienggo matè idi kin, janah ipungkah mo mengerrana. Nai ipesakat Jesus mo anak i mendahi inangna. ¹⁶ Karinana kalak buradan ninganna ipoji Dèbata. Nina kalak i mo, "Sada nabi mbellen enggo roh mi tengah-tengahta! Dèbata Jahowa enggo roh lako paluahken karina jelma!" ¹⁷ Saar mo berita terèngèt Jesus idi i suberri Juda dekket i sikulilingna pè. ¹⁸ Ibagahken sisiin si Johanes mo karina simasa i taba si Johanes. Nai idilo si Johanes mo dua kalak sisinna. ¹⁹ Nai ipasulak mo mengkuso Tuhan Jesus, "Kono ngo sinaing roh idi siniperbagah Dèbata barang sidèban dèng ngo kupèma kami?" ²⁰ Nai laus mo sisiin si Johanes sidua kalak i mendahi Jesus janah nina mo, "Ipasulak si Johanes Perridiken ngo kami mengkuso Kono, tah Kono ngo sinaing roh idi siniperbagah Dèbata barang sidèban dèng ngo kupèma kami?" ²¹ Tupung ngo tikala i Jesus pejuahken mbuè kalak ibas sakitna nai. Iusir ngo tendi jahat janah gabè merpendidah ngo ibakin kalak sipètung. ²² Jadi ialoi Jesus ngo pasulaken si Johanes i bagèen: "Laus mo kènè magahken taba si Johanes, kadè si niidah dekket sinidengkoh ndènè èn, gabè merpendidah ngo sipètung, merdalan ngo nitempuk sigading, malum ngo kalak sikoliten, merpendengkoh ngo kalak sitongkik, balik nggelluh ngo sienggo matè, janah mendahi kalak sincor ngo ibagahken Sukuten Kelluahen idi. ²³ Sayurntua mo kalak siso meralingen menulak Aku." ²⁴ Nai laus kessa mo pasulaken si Johanes idi, iranaken Jesus mo terèngèt si Johanes idi taba jelma nterrem, nina mo, "Mula laus kènè mendahi si Johanes i kellongoon, kadè ngo naing tengennen ndènè? Sirambar dukut nisempul angin ngo? ²⁵ Kadè ngo naing tengennen ndènè i sidi? Sada kalak merpakèen mendè ngo? Kalak simerpakèen mendè bak kalak nduma, i bages raja ngo i! ²⁶ Bagahken kènè mo taba aku, kadè ngo naing tengennen ndènè? naing menengen sada kalak nabi ngo? Imo tuhu. Belgahen dèng ngo ia asa sada kalak nabi. ²⁷ Kerna si Johanes ngo nidokken ayat ibas Bibèl: Èn ngo pasulakenKu, nina Dèbata, Kupasulak ngo ia lebbèen asa kono nai asa ia menghantari dalan baMu!" ²⁸ Perdatèken kènè mo ènda, nina Jesus ma, "Ibas karina jelma sienggo pennah nggelluh i dunia èn, isè poda lot belgahen dari pada si Johanes Perridiken. Tapi kalak sikettekna i Kerajaen Dèbata, belgahen ngo idi dari pada si Johanes Perridiken." ²⁹ Karina kalak -- ni sidi dekket pertunggu cokè -- mendengkohken nidokken Jesus idi; ai kalak i ngo simenguèi nidokken Dèbata janah uè iperridi si Johanes. ³⁰ Tapi ukum kalak Parisè dekket simettoh patiin oda uè menjalo hatoren Dèbata terrèngèt diri kalak idi. Oda uè kalak idi iperridi si Johanes. ³¹ Nai idokken Jesus nola ma, "Mi kadè mo ndia Kupecodi jelma sisencundut ènda? Bagè kadè ngo kalak idi? ³² Codi ngo kalak i bagè anak-anak kundul i onan, dèba mendiloken taba denganna sidèban: Mergenderrang ngo kami, tapi oda lot uè tumatak! Tangis milangi ngo kami, tapi oda uè kènè terrèluh! ³³ Roh si Johanes, puasa ngo -- ia janah oda mènum anggur -- idokken kènè nola ngo; ’nisellapen sètan ia!’ ³⁴ Roh Anak Jelma -- mangan ngo Ia -- idokken kènè nola, ’tengen kènè kalak adoi! Mokkus, permabuk, alè-alè pertunggu cokè dekket supan-supan siso kasèa dokatè jelma nterrem!’ ³⁵ Tapi tukasi pè bagidi, bennar ngo nibaing Dèbata, ai terbukti ngo i bai karina kalak simenjaloSa." ³⁶ Lot mo sada kalak Parisè mergerar si Simon, mengundang Jesus mangan mi sapona. Roh ngo Jesus mi sapona i, kundul janah mangan isidi. ³⁷ Lot ma mo i kuta i sada daberru perdosa mbuè. Idengkoh kessa mo mangan Jesus i bages Parisè idi, roh mo ia merembah sada gori-gori merisi minak baungkus. ³⁸ Cènder mo ia mi gembar nèhè Jesus ninganNa tangis, janah ilapui ngo nèhè Jesus dekket èluhna. Enggo kessa bagi, ilaap mo nèhè Jesus dekket bukna, nai isanggoh mo nèhèna i ninganna iarirken minak baungkus idi. ³⁹ Iidah Parisè simengundang Jesus i kessa mo i, tubuh mo sura-surana ibagasen, "Mula tuhu-tuhu ngo kalak ènda nabi, ibettoh ngo nemmuken barang isè daberru simenjamahsa idi, tentu ibettoh ma mo nemmu, ukum daberru idi sada kalak perdosa mbuè ngo!" ⁴⁰ Nai nina Jesus mo taba si Simon, "Simon, lot ngo sinaing kudokken bamu." "Uè Guru," nina si Simon, "dokken mo." ⁴¹ Idokken Jesus mo, "Lot mo dua kalak merutang taba sada kalak simungaken kèpèng. Utang sisada kalak lima ratus kèpèng pirak, janah sisada kalak nai lima puluh kèpèng pirak. ⁴² Duana kalak idi oda tergararsa nèngè utangna idi. Jadi ilèsèken sidasa riar idi mo utang kalak idi i. Isè ngo kalak i sidua kellengen atèna mendahi simenganakken kèpèng idi dok atèmu?" ⁴³ "Ukum katèngku, kalak simerutang mbuèen idi ngo!" nina si Simon mengaloi. "Bennar ngo pendokkenmu idi," nina Jesus. ⁴⁴ Nai itengen Jesus mo daberru idi ninganna idokken taba si Simon, "Idah kono ngo daberru ènda? Tikan roh aku mi sapo ènda, oda lot ipèmaken kono laè morih nèhèngKu, tapi ukum daberru ènda, iborih ngono nèhèngKu dekket èluhna janah ilaap dekket bukna. ⁴⁵ Oda lot isanggoh kono Aku, tapi ukum daberru ènda mak mengadi-ngadi ia menanggoh nèhèngKu kessa nai soh Aku mi sènda. ⁴⁶ Oda iminaki kono takalKu, tapi ukum daberru ènda enggo iminaki nèhèngKu dekket minak baungkus. ⁴⁷ Èngèt mo! Kumarna bagi mbelgahna kelleng atèna, tandana enggo mo isasa dosana simbuè idi. Tapi kalak perdosa kètèk siniampuni, cituk ma ngo kelleng atèna." ⁴⁸ Nai idokken Jesus mo taba daberru idi, "Enggo mo iampuni karina dosamu." ⁴⁹ Kalak sidèban sirebbak kundul mangan dekket Jesus i merkosik mo samahsa, "Isè ngo kalak ènda, asa ndorok ia mengampuni dosa?" ⁵⁰ Tapi nina Jesus mo taba daberru idi, "Kepercayaen midi ngo paluahken kono. Molih mo kono ibagasen damè!"

¹ Oda pella sadikè dekkah nai, iagahi Jesus mo kuta dekket sosor-sosor merkuliling lako memagahken Sukuten Simerandal terrèngèt Dèbata pecèndekken Kerajaenna. Dekket sisinNa sisipuluh dua kalak rebbak dekketSa. ² Bagi ma bak daberru-daberru sienggo ipemalum ibas sakitna nai dekket nisellapen sètan pè, imo si Maria simergerar Magdalena pè (pitu sètan ipellaus bana nai). ³ Si Johana sinibages si Kusa, pugabè istana si Herodes; si Susana, mbuè dèng tupèh daberru sidèban. Ikebbasi kalak i ngo karina mi sindalanen idi dekket riarna sendiri. ⁴ Dak merrohen ngo jelma idi i merbagè kuta nai mendahi Jesus. Enggo kessa mbuè kalohoon pulung, isukutken Jesus mo umpama taba kalak idi, nina mo, ⁵ "Lot mo sada kalak laus menabur bennih. Tikan menabur idi ia, lot mo dèba bennih idi ndabuh mi dalan, nai ideddohi dèba mo i janah ipangani manuk-manuk. ⁶ Dèba ndabuh mo i mi tanoh batu. Tikan turah dèng ngo bennih idi mènter males mo, kerna ngkerrah ngo tanohna. ⁷ Dèba ndabuh mi tanoh kopi-kopi, rebbak tubuh mo kopi-kopi idi dekket bennih i, gabè ipetcek kopi-kopi idi mo bennih siturah idi. ⁸ Tapi lot ma mo dèba ndabuh bennih i mi tanoh nggabur, turah janah ndeppur mbellen mo ia janah merbuahken serratus lempit." Iujungi Jesus mo sukutenna idi bagèen, "Kènè simendengkohkensa, radumi kènè mo i mendè-mendè!" ⁹ Nai ikusoi sisiin idi mo Jesus, kadè lapaten codiin idi. ¹⁰ Ialoi Jesus mo, "Ipergeddo Dèbata ngo asa pellin kenè kessa memettoh rusia kerajaenNa idi. Kernana i ngo asa taba sidèban isukutken idi merkitè codiin, asa mula pè merpenengen kalak i tapi oda merpendidah, tukasi pè merpemeggè kalak idi tapi oda merpendengkoh janah oda iarti." ¹¹ "Bagèen ngo lapaten codiin ndai; Ia ukum bennih idi, imo kata Dèbata. ¹² Bennih sindabuh mi dalan idi imo kalak simendengkoh kata i, tapi roh mo Sibolis irampasi mo berrita idi i pusuh perratèen kalak idi nai, gabè oda nèngè kalak idi percaya janah oda maluah. ¹³ Bennih sindabuh mi tanoh batu, imo kalak simendengkoh sukuten idi menter lolo ngo ia menjalo. Tapi oda ikeddarohken. Pellin sigejjap ngo kessa percaya ia. Ai roh kessa pengunjunen gabè oda nè hot kalak idi. ¹⁴ Bennih sindabuh mi tengah kopi-kopi, imo kalak simendengkoh sukuten idi, tapi olang-aling ngo kalak idi, ai sèkel kalohoon kalak i kaya janah mersennang-sennang i dunia èn. Idi nola mo menessak kalak idi gabè oda nè merbuahken selloh kalak idi. ¹⁵ Ukum bennih sindabuh mi tanoh nggabur idi, imo kalak simendengkoh sukuten idi janah mènter ipennep mendè ibagasen pennarihenna. Iulaken ngo mendè ibagasen mbingit, gabè merbuahken mbuè janah mendè." ¹⁶ "Oda lot kalak mengelakati pellita itungkupi nola dekket kendang, barang ibaing nola mi terruh peddemmen. Tapi mi babo perpelitaan i ngo ibakin asa karina kalak simbengket mi bages mengidah cuhayana. ¹⁷ Oda lot simboni mak gabè terridah janah oda lot sinirahasiaken mak ntarar nola janah terbettoh. ¹⁸ Kernana i peratè-atèken mo mendè sinidengkoh ndènè. Ai barang isè enggo lot bana, iberrèken nola ma ngo bana, tapi barang isè madèng lot bana, buaten ngo bana nai barang kadè sienggo lot bana idi kin." ¹⁹ Roh mo inang bak anggi Jesus mendahiSa, tapi oda terbakin kalak idi soh mendahi Jesus, kerna buèna jelma nterrem idi. ²⁰ Nai lot mo sada kalak mendokken taba Jesus, "Guru, i ruar ngo bagèndari inang bak anggimu pè, naing pejumpa dekket kono." ²¹ Tapi nina Jesus mo taba kalak idi, "Kalak simendengkoh janah simengulaken kata Dèbata ingo inangku bak kaka-anggingKu." ²² Tikan i sada ari, mbangkit mo Jesus rebbak dekket sisinNa mi sada bungki, janah idokken taba sisinna, "Laus mo kita mi suberrang tao," nai mènter berkat mo kalak idi. ²³ Sinderrang mengkayuh idi kalak i, terpeddem ngo Jesus. Sintempu roh mo angin sapa-sipu i tao i. Sumampak-sampak mo laè i masuk mi bungki janah lako bahaya mo kalak i karina. ²⁴ Idapetken sisiin i mo Jesus janah idungoi, nina mo, "O Guru, Guru, mago mo kita!" Kèkè mo Jesus, isergangi mo angin bak tao situmuyu-tuyu idi. Nai mènter mènak mo angin bak tao i. ²⁵ Idokken Jesus mo taba sisinNa, "Kasa buradan kènè? Idikè ngo kepercayaen ndènè?" Gabè mbiar janah kagum kalohoon mo kalak idi, nina mo samahsa, "Isè ngo ndia tuhu kalak ènda dekket ngo angin topan bak galombang ndorok iperèntah, janah tunduk ngo tabasa!" ²⁶ Soh mo Jesus dekket sisinNa mi nagerri Gerasa i suberrang tao Galilea kan kebincaren. ²⁷ Sampur kessa mo Jesus mi darat, idahi sada kalak daholi siniselluki tendi jahat ngo Ia. I kuta nai ngo kalak i. Enggo toko dekkahna oda nèngè uè ia meroles janah oda uè tading i bages. Dak merian ibas liang kuburen ngo ia. ²⁸ Iidah kessa mo Jesus, mènter mersurak mo ia ninganna mersembah merkuraja i hadeppen Jesus janah nina mo, "O Jesus, Anak Dèbata Sintèmbul i! Merkadè kono roh mendahi aku? Kuèlèk-èlèk mo kono asa ulang isiksa kono aku!" ²⁹ Idokken pè bagidi, kumarna enggo iusir Jesus ia bana nai. Mbuè ngo tendi jahat i menellukisa. Asa enggo pè irantè ia irettes ngo rantèna i janah iembah tendi jahat i mi kellongoon. ³⁰ Ikuso Jesus mo ia, "Isè gerarmu?" "Ukum gerarku: Lègiun," nina mengaloi -- kerna mbuè ngo enggo tendi jahat i menellukisa. ³¹ Ièlèk-èlèk tendi jahat i mo Jesus, asa ulang iusir kalak idi mi Lembeng Kematèen. ³² Ndessing mi bekkas idi lot mo mbuè kalohoon babi, dak menggigi i pispis delleng ni sidi. Gabè i’lèkken tendi jahat i mo asa ipaduè nemmu kalak i memengketti babi idi. Nai ipaduè Jesus mo kalak idi misidi. ³³ Karuar mo tendi jahat idi bai jelma idi nai janah ibengketti mo babi i, nai mènter mermangkaten mo babi idi i tebbing i nai mi tao gabè terneknek mo. ³⁴ Iidah simermakan babi idi kessa mo simasa i, bulanting mo ia laus mi kuta, ibagahken mo simasa idi bai perkuta dekket mi sosor sikulilingna. ³⁵ Merrohen mo kalak lako menengen simasa i. Idahi kalak i mo Jesus, gabè iidah kalak i mo enggo malum siniselluken tendi jahat idi kin kundul i gembar nèhè Jesus. Enggo mo merroles ia janah enggo merpikiren nterrang. Gabè buradan mo kalak idi karinana. ³⁶ Isukutken sienggo mengidah simasa idi mo taba jelma siroh idi terrèngèt permalumna. ³⁷ Karina pengisi Gerasa mengendik-endik Jesus asa itadingken bekkas idi, kerna mbiar kalohoon ngo kalak idi karina. Nai ibengketti Jesus mo bungki lako balik. ³⁸ Ièlèk-èlèk niselluken tendi jahat idi mo Jesus, asa ipadiat ia mengèkut rebbak Jesus. Tapi ipasulak Jesus mo ia molih, ³⁹ idokken Jesus mo mbangsa, "Molih mo kono mi sapomu janah sukutken mo barang kadè sienggo ibakin Tuhan i bamu." Nai laus mo ia, iagahi mo kuta i memagahken sienggo nibaing Jesus tabasa. ⁴⁰ Balik kessa Jesus i suberrang tao i nai, lolo kalohoon mo jelma nterrem idi, ai ipèma-pèma ngo Ia. ⁴¹ Nai roh mo sada kalak pengendeng bages perguruun mergerar si Jairus. Isembah mo Jesus, janah ièlèk-èlèk asa roh mi bagesna. ⁴² Kerna mpiah kaloon ngo iakap berruna sisada i sienggo merrumur sipuluhdua tahun idi, ai enggo patè-patèen. Sinderrang merdalan Jesus mi bages si Jairus, dak sessak ngo jelma nterrem idi. ⁴³ Lot mo isidi sada kalak daberru enggo sipuluhdua tahun dekkahna dak bubus. Enggo mbuè keroginna mertambar tapi laju oda malum. ⁴⁴ Ibas tengah-tengah jelma nterrem idi nai mènter ijolmiti daberru idi mo Jesus i podi nai, ijamah mo punca jubah Jesus. Nai mènter mentadi mo iakap ia darohna bubus idi. ⁴⁵ Ikuso Jesus mo jelma i, "Isè menjamah Aku?" Tapi isè poda lot mengaku, gabè nina si Petrus mo, "Guru, mbuè ngo jelma i kulilingmu, ai dak isessak kalak i ngo Kono!" ⁴⁶ Idokken Jesus mo, "Tapi lot ngo menjamah Aku. Kubettoh ngo i, ai karuar ngo gegoh bangKu nai." ⁴⁷ Satdar mo daberru idi, enggo terbettoh sinibaingna idi. Roh mo ia menggirgir, isembah mo Jesus. Ibagahken mo karinana, tah kadè sebabna asa ijamah ia Jesus, idengkoh jelma nterrem idi, janah barang bakunè permalumna sakitna i gejapkenna i. ⁴⁸ Nai nina Jesus mo tabaSa, "Alè nangè, kepercayanmi ngo pemalumken kono. Njuah-njuah mo ko balik!" ⁴⁹ Tikan mengerana dèng Jesus, soh mo sada kalak pasulaken i bages si Jairus nai. Idokken mo taba si Jairus, "Ulang pella lejai nèngè Guru i, ai enggo matè berrumu idi." ⁵⁰ Idengkoh Jesus ngo nidokken pasulaken i, gabè nina mo mbang si Jairus, "Ulang kono ganggu, percaya mo ko, njuah mono iakap berrumu i." ⁵¹ Soh kessa mi bages si Jairus, isè poda ipadiat Jesus mbengket rebbakkensa laènken pellin si Petrus, si Johanes, si Jakobus dekket partua anak idi mo kessa. ⁵² Karina nisidi tangis ngo janah marsak kumarna permatè anak idi. Idokken Jesus mo, "Ulang kènè tangis, oda ngo matè anak ènda, pellin meddem ngo!" ⁵³ Nai itertabai kalak idi mo Jesus, ai ibettoh kalak i ngo enggo matè berru idi. ⁵⁴ Nai ijamah Jesus mo tangan anak idi, ninganna idokken, "Alè tatat, kèkè mo kono!" ⁵⁵ Mènter roh mo kessah anak idi janah kèkè mo ia. Enggo kessa i, idokken Jesus mo asa iberrèken anak idi mangan. ⁵⁶ Lengang kalohoon mo partua ni anak idi. Tapi igerai Jesus ngo kalak idi asa ulang ibagahken barang mendahi isè pè simasa idi.

¹ Idilo Jesus mo pulung sisinNa sisipuluh dua kalak idi, iberrèken mo bai kalak i gegoh dekket kuasa lako mengusir sètan bak pemalumken sakit. ² Nai ipasulak mo kalak i menukutken sukuten terrèngèt Kerajaen Dèbata bak pemalunken sakit. ³ "Ulang embah kè barang kadè mi perdalanen," nina Jesus taba kalak idi. "Ulang embah kènè tongket barang bagut-bagut bekkas cudekkah, barang togoh, barang riar barang pè pakkèen dua mpasang. ⁴ Barang i dikè kènè ijalo dèba, i bagesna i mo kènè lebbè mèma laus nola i kuta idi nai. ⁵ Janah barang i dikè kènè oda ijalo dèba, pispisken mo abu silekket i tapap nèhè ndènè i sinderrang lako menadingken kuta i kènè, mahan pertandaan pesèngètken kalak idi." ⁶ Berkat mo sisiin i lako menukutken Sukuten Simerandal i sada kuta nai mi kuta sidèban. ⁷ Nderrang idengkoh si Herodes Raja i Galilea, karina simasa i, gabè bingung mo ia. Kerna lot memagahken bana, "Enggo balik nggelluh si Johanes Perridiken!" ⁸ Lot ma sidèban magahken, enggo roh nola si Elias. Sidèban nola mendokken, enggo balik nggelluh sada kalak ibas nabi-nabi arnia. ⁹ Nina si Herodes mo, "Enggo ngo kudokken ipancong takal si Johanes, tapi isè ngo ndia tuhu kalak ènda? Enggo mbuè kudengkoh terrèngèt ia." Nai iusahaken si Herodes mo asa idah ia nemmu Jesus. ¹⁰ Balik kessa mo rasul-rasul idi, ibagahken kalak i mo mendahi Jesus karinana sienggo nibahan kalak idi. Nai iarahken Jesus mo kalak idi pellin laus mi sada kuta mergerar Betsaida. ¹¹ Ibettoh sinterrem kessa mo i, gabè ièkutken mo Jesus. Ijalo Jesus ngo kalak idi janah iranaken mo bai kalak idi terrèngèt Kerajaen Dèbata janah ipemalum ngo kalak sisakiten. ¹² Enggo kessa bon ari, roh mo sisiin sisipuluh dua i mendahi Jesus. Idokken kalak i mo, "Guru, pasulak mo jelma nterrem idi laus, asa ndorok itulusi panganna dekket permalamenna i kuta bak i sosor sindessingna isèn, ai melongo ngo bekkas ènda." ¹³ "Oda," nina Jesus taba kalak idi. "Berrè kènè mo mangan kalak idi." Ialoi sisiin idi mo Jesus, "Pellin lima roti dekket dua ikan ngo kessa lot bai nami. Oda lot nèngè laènkenna idi. Laèn mo mula kennah laus kami menokor pangaan lako bai karina jelma nterrem ènda?" ( ¹⁴ Lot ngo kira-kira lima ribu kalak daholi i sidi). Nai idokken Jesus mo taba sisinNa, "Dokken kènè mo asa kundul kalak idi merturpuk-turpuk, lima-lima puluh kalak." ¹⁵ Ibakin sisiin idi mo bagè nidokken Jesus idi. Idokken mo kundul jelma nterrem idi. ¹⁶ Ibuat Jesus mo roti silima i dekket ikan sidua i, itarè mo mi dates ninganna idokken melias atè bai Dèbata. Ipenggelli mo roti i dekket ikan i ipemberrèken mo mendahi sisinNa asa ipembagi-bagiken taba jelma nterrem idi. ¹⁷ Mangan mo kalak idi karina bessur. Ipepulung sisiin i mo siso kerri ipangan jelma nterrem idi, dom sipuluhdua baka nai. ¹⁸ Tikan sada ari, nderrang pellin Jesus mersodip, roh mo sisinNa mendapetkenSa. Nai ikuso Jesus mo kalak idi, "Isè ngo Aku idokken sinterrem?" ¹⁹ Ialoi kalak idi mo, "Idokken dèba, si Johanes Perridiken ngo Guru i, tapi lot ma dèba mendokken si Elias. Nai lot ma dèba mendokken sada kalak ibas nabi-nabi arnia nai sienggo balik nggelluh." ²⁰ "Nai pendokken ndènè, isè ngo Aku?" nina Jesus mengkusoi. Mènter ialoi si Petrus mo, "Kristus, Raja Sipaluah niperbagah-bagah Dèbata i ngo kono." ²¹ Nai ipernoi Jesus mo sisinna, asa ulang ibagah-bagahken i barang bai isè pè. ²² Nai ibagahken Jesus mo, "Kennah menggong simpersuk ngo Anak Jelma i janah itulak pengulu-pengulu bak imam-imam ekuten dekket guru-guru agama. Nai ibunuh mo, tapi balik nggelluh ngo ia i ari petelluken." ²³ Enggo kessa i, idokken Jesus nola mo taba jelma nterrem idi, "Barang isè naing mengèkutken Aku, kennah ilupaken ngo dirina, nai kennah ipersan mo silangna gennep ari janah ièkutken mo Aku. ²⁴ Barang isè menarihken nggelluhna, kemagoon nggelluhna situhu mo ia. Tapi barang isè kemagoon nggelluhna kumarnaken Aku, idi mo pegelluhkensa. ²⁵ Kadè mo labana bai jelma mula pè gabè milikna suberri dunia èn, tapi ncèda janah mago nggelluhna? ²⁶ Barang isè mèla mengindangken Aku janah mengkemèlaken peddahKu i hadeppen sidèban, Anak Jelma idi pè mèla ngo mengakuisa, roh kessa Ia luas ibagasen kemuliaanNa dekket kemuliaan Bapa bak kemuliaan malaèkat simbadia! ²⁷ Perdatèken kènè mo sikudokken ènda: Lot ngo barang piga kalak nisènda èn oda sanga matè ia, kum mak lebbè idah ia ipecènder Dèbata Kerajaenna idi." ²⁸ Kira ualuh ari enggo kessa iajarken Jesus sindai, iarahken mo si Petrus, si Johanes dekket si Jakobus mi babo sada delleng lako mersodip. ²⁹ Sinderrang mersodip Jesus isidi, mènter mobah mo abèNa, pakkènNa pè oda kalih bagè mbulan merkillok. ³⁰ Sintempu lot mo dua kalak mengeranai dekket Jesus, imo si Musa bak si Elias. ³¹ Mermulia kalohoon ngo kalak idi tengennen. Mengerranai ngo kalak idi dekket Jesus terrèngèt permatèNa i Jerusalem siso pella ndekkah nè. ³² Nderrang bagidi, terpeddem ngo si Petrus dekket denganna. Ndungo kessa kalak idi, idah kalak i mo kemuliaan Jesus merbindella, bagidi ma dekket denganna sidua kalak cènder idi. ³³ Nai tikan naing itadingken sidua kalak i Jesus, mongkam mo si Petrus, "Sennangna i i sènda Guru! Kupekkadè mo isèn tellu sapo-sapo, sada baMu, sada bai si Musa, janah sada nai bai si Elias." (Idokken si Petrus pè bagidi, oda iantusi kadè nidokkenna idi.) ³⁴ Sinderrang mengerana bagidi dèng si Petrus, taridah mo roh hembun menangkemmi si Petrus, si Johanes bak si Jakobus. Buradan mo kalak idi kumarna isangkemmi hembun idi. ³⁵ Nai terdengkoh mo sora i hembun idi nai mendokken, "Èn ngo anakKu siKupilih i. Uèi kènè mo Ia!" ³⁶ Enggo kessa bagi, pellin Jesus nai ngo kessa i sidi. Si Musa bak si Elias oda lot nèngè i sidi. Oda ibagahken sisiin idi simasa i barang taba isè pè. ³⁷ Sibarembenkenna, mengencuah mo kalak idi i delleng idi nai, janah merrohen mo jelma nterrem mendahi Jesus. ³⁸ Lot mo sada kalak daholi mersurak i tengah jelma nterrem idi nai, "Alè Guru, masèh mo atèmu, kuèlèk-èlèk mo kono asa tengngen mo lebbè anakku -- ai pellin sada i ngo kessa dukakku. ³⁹ Mula isellapi tendi jahat kessa ia, mènter mendengkuk ngo ia, dagingna pè menter nggenggeng mo sampè merkupkup babahna. Soh mo mpiahna iakap, ai oda uè karuar tendi jahat i bana nai! ⁴⁰ Enggo ngo nemmu kupido pengurupi bai sisinmi asa iusir tendi jahat i, tapi oda tellap kalak idi." ⁴¹ Ialoi Jesus mo, "Èo, kènè siso percaya mi Dèbata, sadikè dekkah nai aku rebbak dekket kènè janah sobar Aku midah kènè? Embahken mo dukakmu idi mi sènda!" ⁴² Nderrang merdalan anak idi mendahi Jesus, itulpasken tendi jahat idi ngo ia janah ipegenggeng mo daging anak idi. Tapi idokken Jesus mo tendi jahat idi ruar janah malum mo anak idi. Nai ipesakat Jesus mo anak i taba bapana. ⁴³ Lengang mo karinana jelma nisidi mengidah bagi belgahna kuasa Dèbata. Tikan lengang dèng jelma nterrem idi mengidah karinana simasa nibakin Jesus i, idokken Jesus mo taba sisinNa, ⁴⁴ "Èngèt kènè mo mendè siKudokken ènda: Ipesakat mo Anak Jelma idi taba kuasa jelma." ⁴⁵ Tapi oda iarti sisiin idi nidokken Jesus idi. Ai mboni ngo idi ibaing bai kalak idi asa ulang iantusi barang kadè artina. Tapi oda pang kalak i mengkusoken taba Jesus. ⁴⁶ Enggo kessa i tubuh mo persilisihen iantara sisiin Jesus, imo terrèngèt isè kalak idi simbelgahna. ⁴⁷ Ibettoh Jesus mo pikiren kalak idi, idilo Jesus mo sada kalak anak-anak, janah ipecènder mi gembarNa. ⁴⁸ Nai idokken Jesus mo taba kalak idi, "Barang isè menjalo anak-anak èn kumarnaken Aku, merlapaten ngo idi menjalo Aku. Janah barang isè menjalo Aku, menjalo simengutus Aku ngo Ia isidi. Ai barang isè sikètèkna bai ndènè nai, ia mo simbelgahna." ⁴⁹ Nai idokken si Johanes mo, "O Guru, lot ngo kuidah kami kalak mengusir sètan merkitè gerarMu. Kugerra kami ngo ia asa ulang nèngè iterrusken bagidi, kerna oda ngo simengèkutken kita ia." ⁵⁰ "Ulang gerra kènè ia," nina Jesus taba si Johanes bak sisinna sidèbanna i. "Barang isè oda mengalo kènè, dengngan ndènè mo ia." ⁵¹ Enggo kessa njolmit katikana Jesus lako mi sorga, mermaksud ngo Jesus laus mi Jerusalem. ⁵² Ipasulak mo dèba utusen perlebbè baNa nai. Berkat mo utusen i janah mbengket mi sada kuta i Samaria. Ihantari kalak idi ngo karina siperlu bai Jesus. ⁵³ Tapi oda ijalo jelma ni kuta idi Jesus, kerna ntangkas ngo langkah Jesus laus mi Jerusalem. ⁵⁴ Ibettoh dua kalak sisiin i kessa mo i, imo si Jakobus dekket si Johanes, idokken kalak idi mo, "Tuhan ipaduè Kono ngo asa kupengido kami roh api i langit nai asa kerri ilettup pengisi kuta èn?" ⁵⁵ Itulihken Jesus mo mi podi, ilagai mo kalak idi. ⁵⁶ Nai laus mo kalak idi terrus mi laèn kuta. ⁵⁷ Tikan menerusken perdalanenna Jesus rebbak dekket sisinNa, lot mo mendokken taba Jesus, "Guru, naing kuèkutken ngo Kono barang dempak dikè Kono laus!" ⁵⁸ Ialoi Jesus mo, "Merliang ngo serrigala, merrasar ngo ukum manuk-manuk, tapi ukum Anak Jelma, oda lot bekkasna meddem." ⁵⁹ Nai idokken Jesus mo taba sada kalak sidèbanna, "Èkutken mo Aku." Tapi ialoi ia mo Jesus, "Guru, paduè mo balik aku lebbè mengkubur bapangku." ⁶⁰ Ialoi Jesus mo ia, "Belli mo simatè i mengkuburken simatèna. Tapi ukum kono, bagahken mo Sukuten terrèngèt enggo ipecèndek Kerajaen Dèbata." ⁶¹ Lot ma mo sidèban mendokken, "Guru, uè ngo aku mengèkutken Kono, tapi paduè mo aku lebbè balik memagahken taba kadè-kadèngku." ⁶² Nai idokken Jesus mo mbangsa, "Barang isè kalak sienggo mencèkèp pangkur lako mengula, keppè dak itengen mi podi, oda terpakkè Dèbata kalak sibagdi i Kerajanna."

¹ Enggo kessa i, ipilih Jesus mo pitu puluh kalak sisiin. Ipasulak mo kalak idi dua kalak sindalanen, joloon laus merdalan lako mengagahi kuta bak bekkas sinaing dahinNa. ² "Enggo mbuè kalohoon peraniin," nina Jesus taba kalak idi, "tapi cituk ngo ukum simerrani. Jadi pido kènè mo bai sidasa perraniin i nai asa ipasulak lako merrani. ³ Asa, berkat mo kènè bagèndari, Kupasulak ngo kènè bagè biri-biri mi tengah-tengah biahat. ⁴ Ulang pella embah kènè tagan-tagan barang bagut-bagut barang pè cipatu. Ulang mo pella tendo kè i tengah ndalan lako merrèken salam barang taba isè pè. ⁵ Mula ibengketti kènè sada bages, mènter dokken kènè mo: ’Damè mo mi pengisi bages ènda.’ ⁶ Mula lemmo atè perbages idi damè, selloh ngo salam ndènè idi bana. Tapi ukum oda lemmo atèna damè idi, jalo kènè mo balik salam ndènè idi. ⁷ Iani kènè mo sada bages, janah jalo kènè mo barang kadè ikebbasi bai ndènè i sidi, ai patut ngo menjalo upah kalak simahan bahaan. Ulang pella pindah-pindah kènè i sada bages nai mi bages sisada. ⁸ Mula soh kènè mi sada kuta janah ijalo ngo kènè mendè i sidi, pangan kènè mo nihidangkenna i sidi. ⁹ Pemalum kènè mo simersakit nisidi janah dokken kènè mo taba jelma nisidi: Oda ndekkah nèngè, ipecèndek Dèbata mo Kerajanna i tengah-tengah ndènè. ¹⁰ Tapi mula ibengketti kènè sada kuta, janah oda ijalo kènè i sidi. Laus mo kènè mi dalan mbellen ni kuta idi janah dokken kènè mo: ¹¹ ’Abu silekket ni tapap-tapap nèhè nami pè kupispisken kami ngo mahan pernèngèten bai ndènè. Tapi èngèt kènè mo, oda ndekkah nèngè roh mo Kerajaen Dèbata i tengah-tengah ndènè!’ ¹² Èngèt mo, mula roh ari kiamat, masèhen ngo atè Dèbata midah kuta Sodom, ulang pada midah kuta idi!" ¹³ "Merjaya mo kono Korazim dekket kono alè Betsaida! Ukum i kuta Tirus dekket Sidon kin ibakin tanda kellengangen sinibakin i tengah-tengahna idi, enggo mo nemmu peselsel kalak nisidi janah mertobat! ¹⁴ Lotiin mo pengisi Sidon dekket Tirus terrolih masèh atè i ari kiamat, ulang pada kènè. ¹⁵ Bang kènè pè alè Kapernaum; idokdok kènè ngo ipedates kènè soh mi langit? Oda, tapi ibuang mo kènè mi narakka!" ¹⁶ Nai nina Jesus mo taba sisinNa, "Barang isè menguèi rana ndènè simenguèi Aku mo i. Barang isè menonja kènè, simenonja Aku mo i. Janah barang isè menonja Aku, simengutus Aku ngo nitonjana isidi." ¹⁷ Balik mo sisiin sipitu puluh kalak idi ibagasen sampang atè. "Tuhan" nina kalak idi. "Tunduk ngo karinana dekket sètan pè kubakin kami mengasangken gerarMu!" ¹⁸ Ialoi Jesus mo, "Kuidah ngo ndabuh i langit nai Sètan i bagè pellian. ¹⁹ Èngèt kènè mo, enggo Kuberrèken kuasa bai ndènè mendeddoh nipè dekket bik, bak kuasa lako mennaluken karinana musuh. Janah kadè poda ndorok mencilakai kènè. ²⁰ Tapi ulang pella lolo ukur ndènè kumarna karina tendi jahat i tunduk bai ndènè. Tapi lolo mo kènè, kerna enggo isuratken gerar ndènè i sorga." ²¹ Nderrangna i ma, mersampang atè mo Jesus ibagasen Tendi Perbadia. Idokken Jesus mo, "Ialè Pa, Tuhan ni karina langit dekket tanoh èn! Kudokken melias atè baMu, kerna nirusiakenmu taba kalak simpantas niasè dekket simbages nahu, ipeterar Kono ngo taba kalak sikurang nahu. Ibaing kono ngo karinana i alè Pa, ibas lemmomu nai." ²² "Karina enggo ipesakat BapangKu bangKu. Keppè isè ma poda menandai Aku, laènken Bapa i. Janah oda lot menandai Bapa laènken Anak i, kalak nipetandaken Anak i taba Bapa mo kessa." ²³ Nai itulihken Jesus mo sisinNa, idokken mo pellin bai kalak idi, "Sayurntua mo kènè kumarna niidah ndènè i bagèndari. ²⁴ Èngèt kènè mo: Mbuè kalohon ngo nabi dekket raja pè sèkel naing mengidah bagè niidah ndènè i, tapi oda terbaing kalak i mengidah idi. Sèkel kalohon ngo kalak idi mendengkoh bagè sinidengkoh ndènè i, tapi oda terbaing kalak i mendengkohsa." ²⁵ Tikan sidari, roh mo cènder sada kalak guru agama lako mengunjuni Jesus, ikusoken mo, "O Guru, kadè ngo sibakinenku asa dapet aku kenggelluhen siamman sumendah idi?" ²⁶ Ialoi Jesus mo ia, "Kadè sitersurat ibas Bibèl? Nai bakunè ngo pana pengantusimu terrèngèt idi?" ²⁷ Ialoi simettoh patiin idi mo, "Kennah kekellengenmu ngo Tuhan Dèbatamu ibas nasa pusuh peratèenmu, dekket i nasa kessahmu, dekket nasa gegohmu, dekket nasa atè-atèmu, janah kekellengenmu ngo denganmu jelma tosè bagè dirimu." ²⁸ "Tuhu ngo pengaloimu i," nina Jesus tabasa, "Baing mo bagidi asa nggelluh kono." ²⁹ Tapi naing mo ipènterri guru-guru agama i dirina, ikuso mo, "Isè ngo dengan jelma idi?" ³⁰ Ialoi Jesus mo, "Lot mo sada kalak daholi mengencuah i Jerusalem nai mi Jeriko. I tengah ndalan isamun pennamun mo ia. Ipupus mo nasa hartana, janah ipekpekki pella naing-naing matè ia, nai itadingken mo ia bagidi ugahen. ³¹ Nai lot mo tupung memellus sada kalak imam arap i. Iidah imam i ngo nemmu ia, tapi iimbilken mo merdalan janah iterrusken perdalanenna. ³² Enggo kessa i, mentas ma mo arap idi sada kalak marga Lewi, iidah ma mo nisamun ndèba i gampar. Ilausken ma mo arap dalan sidèban. ³³ Tapi lot mo sada kalak Samaria mentas arap i, iidah kessa sitersamun i masèh mo atèna. ³⁴ Idapetken mo sitersamun idi, idaisken mo minak dekket anggur mi ugahna, ibaluti mo ugahna i. Idokong mo mi babo kudana janah iembah mo mi permalamen, ikebbaru mo ia isidi. ³⁵ Sibarembenkenna ibuat mo dua kèpèng pirak, iberrèken mo taba sidasa bages permalamen idi ninganna idokken, ’Kebbaru mo ia,’ nina. ’Mulak kessa aku sikalèn mi sènda, kugarar pè karina kerogiin misidi.’ " ³⁶ Nai nina Jesus mo mengujungi sukutenna i, "Siapaina ngo dok atèmu kalak i sitellu ndai gabè dengan jelma bai sitersamun idi?" ³⁷ Ialoi guru agama idi mo, "Kalak simermasèh atè tabasa idi ngo!" "Mula bagi, laus mo kono mengulaken bagidi!" nina Jesus mbangsa. ³⁸ Sinderrang i perdalanen Jesus dekket sisinNa, soh mo kalak i mi sada kuta. Lot mo i kuta i sada kalak daberru mergerar si Marta menjalo kalak i mi bagesna. ³⁹ Anggi si Marta imo si Maria. Ukum si Maria dak kundul ngo mendengkohken peddah Jesus. ⁴⁰ Tapi ukum si Marta, dak merkebbas ngo iperluken. Nai idapetken si Marta mo Jesus janah idokken mbangsa, "Tuhan, tengen mo anggingku ènda, ibelli ngo pellin aku merkebbas. Dokken mo asa iurupi aku!" ⁴¹ Idokken Jesus mo, "O alè Marta, kasa pella bagidi pengkebasimu, ⁴² sada ngo siperluna! Ipilih si Maria ngo simendèna, oda buaten idi bana nai."

¹ Tikan sikali mersodip mo Jesus i sada bekkas. Pul kessa ia mersodip idi idokken sada kalak sisinNa mo tabasa, "Tuhan, ajari mo kami mersodip, bagè si Johanes iajari ngo sisinna mersodip." ² Nai idokken Jesus mo taba kalak idi, "Mula mersodip kènè, bagèen mo sodip ndènè: ’Ialè Bapa, Pellin sada Ko ngo Dèbata Katerra pè isembah janah ipesangap mo Ko. ³ Berrèken mo bai nami sipat ari pangaan siperlu bai nami. ⁴ Ampuni mo dosa-dosa nami, kerna kami pè kuampuni kami ngo gennep jelma simerdosa dempak kami. Janah ulang belli mago kepercayaen nami, tikan roh pengojiin bai nami.’ " ⁵ Enggo kessa i, idokken Jesus mo taba sisinNa, "Umpamana laus kènè tengah mberngin mi bages supan ndènè, nai idokken kènè tabasa, ’Oè, pejual aku lebbè giam tellu rotimi, ⁶ kerna rimbaru roh supan-supanku i perdalanen nai, janah enggo i sapongku ia bagèndari, ai oda lot pangaan naing berrènken bana!’ ⁷ Mula tah idokken supan-supanmu idi taba kono, ’Ulang dak susahi aku, enggo tergerruk pèntu janah ma pè enggo meddem kami karinana. Oda terbakin aku kèkè lako memerrèken barang kadè bamu.’ " ⁸ "Bakunè mo mula bagi?" nina Jesus nola ma. "Tukasi pè oda kèkè ia, janah oda uè merrèken barang kadè pè bamu, tapi kumarna supan-supanmu ngo ia janah mula dak ipido kono pukpuk, kennah ngo kèkè ia janah iberrèken bamu niperlukenmu idi. ⁹ Asa, èngèt kènè mo! Mula ipido kènè, iberrèken ngo bai ndènè; tulusi kènè mo, dapet kènè ngo i, tuktuki kènè mo, ibuka ngo pèntu bai ndènè. ¹⁰ Kerna menjalo ngo nasa simengido, kennaan ngo kalak simennulusi janah ibuka ngo pèntu bai kalak simenuktuki. ¹¹ Isè mo partua merrèken nipè taba dukakna ukum ikan ngo ipido? ¹² Barang tah bik iberrèken, mula tinaruh ngo ipido? ¹³ Tukasi pè jahat kalohon kènè, ibettoh kènè ngo merrèken simendè taba dukak ndènè, makinsa nola mo Bapa ni sorga idi. Tentu iberrèken ngo tendiNa taba kalak simengido tabaSa!" ¹⁴ Tikan sikali iusir Jesus mo tendi jahat memmakin pekkak, karuar arap nisellapenna nai. Kessa karuar tendi jahat idi, mènter mengerranai mo nisellapenna idi. Lengang mo karinana jelma simengidahsa, ¹⁵ tapi dèba mendokken, "Ndorok pè iusir tendi jahat idi, kumarna iberrèken Beelzebul ekuten tendi jahat i ngo kuasa bana." ¹⁶ Lot ma mo dèba lako mengenggep Jesus. Ipido kalak i mo asa ibaing Jesus sada tanda kellengangen roh i sorga nai. ¹⁷ Tapi ibettoh Jesus ngo pikiren kalak idi, nai nina mo, "Sada kerajaen, mula masa perselisihen ibagasenna, oda nèngè ndekkah mertahan kerajaen idi, bagi ma ngo mula kalak simpangaan dakdak merrubati samahsa, lako sursar mo idi. ¹⁸ Bagi ma ngo ibas kerajaen Sibolis, mula merselisih sada pulungen mi pulungen sidèbanna, sursar mo kerajaenna idi. Idokken kènè nola Aku mengusir tendi jahat merkitè kuasa Beelzebul. ¹⁹ Mula bagidi ngo, merkitè kuasa isè ngo pemparen ndènè mengusir sètan idi? Nai, pemparen ndènè i nola ngo menghukum kènè! ²⁰ Ukum Aku, kuusir pè tendi jahat idi, mengasangken Dèbata ngo, oda mengasangken Beelzebul. Janah i mo buktina enggo roh Kerajaen Dèbata mi tengah-tengah ndènè. ²¹ Mula ijaga sada kalak simergegoh janah mersinjata bagesna, sellamat mo karina hartana. ²² Tapi mula roh mergegohen asa ia lako mengkubusa, talu ngo ia. Karina sinjatana irampasi janah hartana pè itaban janah ibagi-bagiken. ²³ Kalak siso kan Aku, alongKu mo ia, janah kalak siso uè mengurupi Aku situhunna mencèdai ulanKu ngo i." ²⁴ "Mula tendi jahat enggo karuar bai jelma nai, laus mo ia mengagahi bekkas-bekkas ngkerrah lako mennulusi bekkas mentadi, tapi oda jupasa. Kernana i nina mo ibas atèna, ’Balik mo aku mi bages sienggo kutadingken idi kin!’ ²⁵ Soh kessa ia misidi, idapet mo enggo mbersih janah merratur bages idi. ²⁶ Nai idiloi mo pitu nai tendi jahat, jahaten bana nai. Nai rebbak roh mo kalak idi, gabè merrian ibagasen jelma idi, nai gabè merrohaan mo pengelako jelma i ujungna, mertimbangken i mulana idi." ²⁷ Enggo kessa idokken Jesus karinana idi, mongkam mo sada kalak daberru ibas jelma nterrem idi nai, nina mo taba Jesus, "Sayurntua ngo daberru simenubuhken janah sipesusuken kono!" ²⁸ Tapi ialoi Jesus mo, "Oda ngo bagi. Kalak simendengkoh kata Dèbata janah mengulaken i ngono sayurntua!" ²⁹ Sinderrang irengemmi jelma nterrem idi Jesus, iterrusken Jesus ngo mengerraNa nina mo, "Jahat ngo jelma sisincundut ènda. Ipido kalak i ngo naing iidah tanda kelengangen. Tapi sada poda pacidahen tanda kellengangen idi bana, laènken tanda kellengangen Nabi Jona. ³⁰ Bagè Nabi Jona gabè kellengangen Bai Jelma sincundut ènda. ³¹ I ari podi, tikan ihukum Dèbata dunia ènda, cènder ngo Raja Daberru i Selatan nai gabè saksi terrèngèt kesalahen jelma sincundut ènda kerna pellin naing mendengkoh peddah si Salomo simpantasniasè janah bijak idi sambing. Igongken Raja Daberru idi ngo merdalan ndaoh i punca tanoh èn nai. Èngèt kènè mo! Belgahen ngo nisènda bagèndari ulang pada si Salomo! ³² Tikan ihukum Dèbata luas dunia ènda, cènder mo pengisi Niniwe gabè saksi terrèngèt kesalahen ndènè, kerna mobah ngo kalak idi ibas dosa-dosana nai tikan idengkoh kalak idi sukuten bai Dèbata nai sinipesoh si Jona. Èngèt mo! Lebbihen dari pada si Jona ngo kalak nisènda èn!" ³³ "Oda lot kalak memaing lampu nilakatenna mi tongkarang barang menungkupi dekket kendang. Tapi mi perpelitaan ngo ibakin lampu i, asa iidah dèba cuhayana. ³⁴ Pellita daging ngo ukum mata. Mula njenger penengenmu, ncihur mo pengakap dagingmu. Tapi ukum ramben ngo penengenmu, gellap bulita mo karina dagingmu. ³⁵ Kernana idi mermanat mo kènè, asa ulang gabè mèntep kecihuren sienggo lot bai ndènè i. ³⁶ Mula karina dagingmu ibendangi cuhaya, nterrang janah ncihur mo karina badanmu tosè nibendangen lampu idi." ³⁷ Enggo kessa pul Jesus mengajari, itenggo sada kalak Parisè mo Jesus mi sapona mangan. Nai laus mo Jesus misidi. ³⁸ Lengang ngo Parisè mengidah Jesus lako mangan i oda pella merborih. ³⁹ Kernana idi idokken Jesus mo tabasa, "Kecemmalen ndènè Parisè ngo memorih mangkuk dekket piring pellin mbersih perluarna sambing, tapi kum ibagasen dirimu sendiri dom akkal-akkal dekket kejahaten. ⁴⁰ Èo, kènè sikurang ukur, otang Dèbata ngo memaingken bagian perluarna idi dekket bagian perbagasen? ⁴¹ Silot ibagasen mangkuk dekket piring ndènè idi, imo nemmu kennah iberrè kènè bai kalak sincor. Merkitè bagidi gabè mpanting mo kènè. ⁴² Merjaya mo kènè alè kalak Parisè! Nasa hasil suan-suanen ngo ipersipuluh kènè bai Dèbata, tapi iparduliken kènè poda kebennaren dekket kelleng atè taba Dèbata. Padahal kennah idi ngo ulanken ndènè ninganna mengulaken sidèbanna. ⁴³ Merjaya mo kèè alè kalak Parisè. Ipilih kènè ngo kundulen lebbè-lebbè ibages perguruun, janah ikelloloken kènè ngo asa ipesangap dèba kènè i onan. ⁴⁴ Merjaya mo kènè! Kènè mo tosè bagè kuburen siso lot mertanda, ideddoh dèba pè oda terrasa." ⁴⁵ Nai nina sada kalak guru agama mo taba Jesus, "O Guru, merkitè katamu i enggo ihina Kono dekket kami." ⁴⁶ Ialoi Jesus mo, "Merjaya ma ngo bak kènè guru-guru agama pè. Ipido kènè ngo simahal ulanken dekket memaing hatoren-hatoren mbotong keppe kènè sendiri oda uè mengurupi lako mengulaken. ⁴⁷ Merjaya mo kènè! Ipekkadè kènè ngo mendè kuburen nabi-nabi sinibunuh empung ndènè. ⁴⁸ Merkitè bagidi ikesampangken kènè ngo pemmahan empung ndènè i. Ai kalak i ngo memmunuh nabi-nabi, nai kènè mo memahan tugu i babona. ⁴⁹ Kumarna i ngo asa idokken Dèbata, ’Kupasulak ngo nabi-nabi dekket rasul; mendahi kalak idi, gabè idersa janah ibunuh kalak idi ngo!’ ⁵⁰ Jadi gabè mersimpetta mo daroh nabi-nabi sinibunuh idi kessa nai tembem dunia èn taba jelma sisincundut ènda. ⁵¹ Mungkah terbunuh si Abel soh mi terbunuh nola si Zakharia i kellang-kellang kuburen dekket bilik simbadia Bages Dèbata. Percaya mo kènè, karinana idi sisincundut ènda mo gemongken. ⁵² Merjaya mo kènè guru-guru agama. Bai ndènè ngo anak konci perbinettohen tapi kènè sendiri oda uè mbengket mi bagasen lako mengayaki perbinettohen idi. Keppè ihalang-halangi kè ngo kalak sinaing mbengket mi bagessen!" ⁵³ Itadingken Jesus kessa bekkas idi, mulai mo guru-guru agama dekket Parisè i mellaga janah mengalo Jesus. Nai ienggep kalak i mo Ia merkitè-kitè kuso-kuso, ⁵⁴ asa ndorok kalak i menangkupsa merkitè rana niruapkenNa.

¹ Merribu-ribu kalak jelma mersessak-sessak, sanga dèba mersideddohen nèhè. Tikanna rengem i jelma nterrem i, idokken Jesus mo taba sisinNa, "Mermanat mo kènè midah Parisè, artiNa, imo terrèngèt pengelako perbuah ringadar. ² Barang kadè itutup-tutupi kennah taridah, janah barang kadè irusiaken kennah terbettoh. ³ Barang kadè iranaken kènè tikan berngin, kennah terdengkoh tikan mahar, janah barang kadè ikosikken kènè mi pènggel jelma i bilik, kennah isurakken i bubung sapo nai." ⁴ "Èngèt kènè mo alè supan-supanKu! Ulang mo kebbiari kènè sindorok memmunuh daging, ai laènkenna idi oda ndorok nèngè terbaingsa. ⁵ Selloh mo Kutuduhken bamu isè sipatut kebbiaren ndènè. Kebbiari kènè mo Dèbata! Kerna enggo kessa ibunuh, merkuasa dèng ngo Ia membuang mi narakka! Èngèt kènè mo, Ia mo kennah sikebbiaren ndènè! ⁶ Otang idèa dèba ngo nina lima perrik dua sèn? Tapi tukasi pè bagi, sada perrik pè oda nung ilupaken Dèbata. ⁷ Salangken buk ni takal ndènè idi enggo ibilang Dèbata karinana, kernana idi, ulang kènè mbiar; ai mahargaan dèng ngo kènè asa perrik!" ⁸ "Èngèt kènè mo selloh: Barang isè mengaku sisinKu ia nina i lebbè sinterrem, ia pè iakkui Anak Jelma ma mo i hadeppen malaèkat Dèbata. ⁹ Tapi barang isè oda mengakui Aku i hadeppen sinterrem janah oda menandai Aku, ia pè oda ma mo iakkui Anak Jelma i hadeppen malaèkat Dèbata. ¹⁰ Barang isè mendokken rana mengalo Anak Jelma, ndorok dèng ngo iampuni; tapi barang isè medokken ranana mengalo Tendi Perbadia, oda nèngè terampuni ia. ¹¹ Mula iembah dèba kènè mi bages perguruun lako iadili i hadeppen pemerèntah barang perkuasa, ulang pella kelsohen kènè terrèngèt membèla diri ndènè bak barang kadè sidokkenen ndènè. ¹² Ai barang kadè naing kennah dokonen ndènè, mènter iajarken Tendi Perbadia ngo bai ndènè i tikkina." ¹³ Nai lot mo sada kalak ibas jelma nterrem idi nai mendokken taba Jesus, "O Guru, dokken mo taba denganku sibeltek asa kubagi kami harta tading-tadingen bapa nami." ¹⁴ Ialoi Jesus mo, "Isè ngo pebangkitken Aku gabè penimbang barang pembagi harta tading-tadingen ndènè sidua?" ¹⁵ Janah idokken Jesus mo taba karina nisidi, "Mermanat mo kènè janah jaga kènè mo diri ndènè asa ulang gabè jelma nahaka kènè. Tukasi pè mbuè harta, oda ngo harta i ukuren nggelluhna." ¹⁶ Nai iranaken Jesus mo bai kalak i umpama èn, "Lot mo sada kalak sibèak. Mbellang ngo tanohna janah nggabur, nai mbuè kalohon mo hasilna. ¹⁷ Mersura-sura mo sibèak i, ’Bakunè mo ndia kubaing bagèndari. Oda cukup nèngè bekkas memennep karina hasil tanohku idi.’ ¹⁸ Nai mersura-sura nola mo ia, janah nina ibas ukurna, ’O lot keppè akkal, kurontas mo keppè langgihku i, asa kubahan nola terbelgahen, asa isidi mo kupennep hasil tanohku bak karinana hartangku idi. ¹⁹ Nai kudokken mo mi diringku, Mersennang-sennang mo kono, ai enggo mbuè hartamu janah oda nèngè kerri barang piga-piga tahun. Ulang pella kelsohen nèngè kono! Mangan mènum mo kono, asa sennang nggelluhmu!’ ²⁰ Tapi idokken Dèbata mo tabasa, ’Èo, kono alè moto! Berngin èn mo kubuat kessahmu! Gabè milik isè nola mo hartamu sienggo nipennepmu idi?’ ²¹ Bagidi mo ujungna kalak sipepulungken harta mi dirina, mula oda ia merharta i hadeppen Dèbata." ²² Nai idokken Jesus mo taba sisinNa, "Kumarna bagi ngo asa Kudokken bai ndènè, ulang kelsohen kènè i nggelluh ndènè mendok, ’Kadè mo pangaan nami, kadè oles nami.’ ²³ Ai perluun ngo nggelluh asa pangaan, janah perluun ngo daging asa perrolessen. ²⁴ Perdatèn kènè mo manuk-manuk kak i! Oda ngo mardang kalak i, oda merrani, oda ma lot kebben barang langgihna, tapi dak ipehèdu-hèdu Dèbata ngo kalak idi. Lebbih mahargaan dèng ngo kènè asa manuk-manuk! ²⁵ Isè mo kènè ndorok menambahi umurna giam siasta merkitèken kelsohen? ²⁶ Mula bagidi mo citukna keppè oda terbahanken kènè, kasa mo pella ikelsohken kènè sidèban? ²⁷ Perdatèn kènè mo bunga pancur simertubuhen i juma-juma idi: oda nung mengula ia, janah oda nung mertennun. Kudokken mo bai ndènè, salangken si Salomo sendiri tikan kebungaren kerajanna, oda nung memakkè bagè mendèna bunga-bunga idi. ²⁸ Mula bagidi mo keppè bunga-bunga i mendèna ipejèngkar Dèbata ari èn, tupa baremben nola enggo iporoni, makinsa nola mo kènè alè sikurang percaya! ²⁹ Kerna nai, ulang mo kelsohen kènè kumarna pangaan mada lot barang pè ènumen ndènè. ³⁰ Kalak siso menandai Dèbata ngo mengkelsohken janah menarihken sibagidi. Ai ibettoh Bapa ndènè ni sorga idi ngo siperlu bai ndènè. ³¹ Tapi kennah lebbèen mo tulusi kènè Kerajaen Dèbata, nai iberrèken mo bai ndènè sidèbanna idi." ³² "Ulang kènè mbiar alè pulungen sicituk! Ai lemmo ngo atè Dèbata merrèken pasu-pasu bak PemerèntahenNa. ³³ Dèaken mo karina ugasenmu, nai berrèken mo karina tokorna bai kalak sincor. Pellias mo bamu dompèt merandal siso nggèut ncèda, tulusi kènè mo harta Sorga siso uè mumuk, siso terjolmiten kalak penangko janah oda terpangan ngitngit. ³⁴ Ai barang idikè hartamu, misidi ngo dakdak ukurmu." ³⁵ "Tetap mo kènè merjaga-jaga. Kennah tetap mo memmes pakèen ndènè janah lakat lampu ndènè, ³⁶ tosè bagè naposo tikan memèma-mèma indukna balik merbayo. Mula roh kessa molih indukna idi janah ituktuk pèntu, enggo memèma ia lako memuka pèntu. ³⁷ Soh mo labana naposo mula idapet indukna ia tetap memèma. Èngèt kènè mo: Dokonen indukna i mo tabasa asa kundul naposo i, janah indukna i mengkebasi bana. ³⁸ Soh mo labana naposo mula idapet indukna ia dak tong mèma, tukasi pè roh tengah mberngin barang lebbih isidi nai. ³⁹ Èngèt mo èn! Mula ibettoh sidasa bages idi ndigan roh penangko, tentu ndungo ngo ia merjaga-jaga asa ulang mbengket penangko idi mi sapona. ⁴⁰ Kerna kènè pè, kennah ngo dak kebbas mèma, ai roh mo Anak Jelma ibas ketika siso pengharapen ndènè." ⁴¹ Nai gabè idokken si Petrus mo, "Tuhan, bai nami ngo idokken Kono codiin ndai barang tah dekket ngo taba karina kalak?" ⁴² Ialoi Jesus mo, "Isè ngo naposo siburju idi? Imo nipebangkit indukna gabè ekuten janah memerrè bekkel taba naposo sidèban, tupung tikki sienggo itentuken kin. ⁴³ Sayurntua mo naposo simengulaken bagidi idapet indukna tikan roh ia. ⁴⁴ Percaya mo kènè: Ai gabè ipesakat indukna i mo karina hartana ijamoti naposona idi. ⁴⁵ Tapi mula nina naposo i ibas atèna, ah, ndekkah dèng ngo tupèh asa balik indukku; nai ibet-betti mo naposo anak laki dekket daberru, ninganna mangan mènum mo ia janah mabuk-mabuk, ⁴⁶ nai, roh mo indukna ibas siso nibettohna, kenna kata mo ia janah itellohi indukna, nai ibakin mo naposo i rebbakken dekket kalak siso menguèi Dèbata. ⁴⁷ Asa, naposo simemettoh nipergeddo indukna, keppè oda iulaken, gabè makap tangan mo naposo i ibakin indukna. ⁴⁸ Tapi naposo simemettoh nipergeddo indukna, nai iulaken sipincangen; aturen makap-tangan kin pè ia, gabè hanjar ngo ipesèngèt indukna ia. Ai mbuè ngo itunggu bai kalak sienggo mbuè menjalo. Janah kalak sienggo kettoken ibas simbuè, mbuè ma ngo tungguun bana nai." ⁴⁹ "Roh Aku mi tanoh èn lako merembah api asa kemessengen tanoh ènda. Mendè kalohon ngo mula enggo merjollah-jollah api idi! ⁵⁰ Tapi lot dèng sitahanen mpersah sinaing kennah Kubellus. Janah bulisah ngo Aku, mula makdèng saut idi. ⁵¹ Tah idok kènè ngo roh Aku mi tanoh èn lako merembah damè? Kudokken mo bai ndènè, oda ngo merembahken damè, tapi merembah perraloon ngo. ⁵² Mulai bagèndari nai, masa mo perraloon i tengah-tengah lima kalak sidasa bages, imo tellu kalak mengalo dua, barang dua mengalo tellu kalak. ⁵³ Bapana mengalo anakna, janah anakna mengalo bapana. Inangna mengalo berruna, berruna mengalo inangna. Simatuana berru mengalu purmaènna, janah permaènna mengalo simatuana berru." ⁵⁴ Idokken Jesus nola mo taba jelma nterrem i, "Mula iidah kènè hembun naik mi dates i kesunduten, mènter idokken kènè ngo, ’naing roh mo udan.’ Janah tuhu ngo roh udan. ⁵⁵ Mula iakapken kènè menempul angin i selatan nai (Mula idah kènè mbara langit tikan ciboon), mènter idokken kènè mo, ’Leggo mo ari.’ Janah tuhu ngo leggo! ⁵⁶ Ibettoh kènè ngo tanda-tanda ni langit idi bak i tanoh ènda. Kasa oda ibettoh kènè tanda-tanda jaman bagèndari?" ⁵⁷ "Kasa oda ibettoh kènè bakunè sibennar? ⁵⁸ Mula lot kalak mengaduken kènè mi hakim, merusaha mo kènè merdamè dekketsa nderrang i tengah ndalan dèng. Kum oda bagi, iembah mo kènè mi hakim, janah ipesakat hakim mo kènè mi polisi, nai gabè ikurungken polisi nola mo kènè. ⁵⁹ Kudokken mo bai ndènè, oda karuar kènè i sidi nai, mula mak lebbè selangsaè utang ndènè idi karinana."

¹ Tikanna i, roh mo kalak memagahken mendahi Jesus terrèngèt kalak Galilea sinibunuh si Latus, nderrang memèlè Dèbata kalak idi. ² Mendengkoh berrita idi, idokken Jesus mo, "Idokdok kènè ngo merdosaan sinibunuh idi ulang pada kalak Galilea sidèbanna? ³ O Oda! Tapi èngèt kènè mo, mula oda mertobat kènè ibas dosa-dosa ndènè nai bagè kalak i, matè ngo kènè karina. ⁴ Bagi ma ngo sisipuluh dua kalak matè itinggang palas-palas i gembar Siloam? Idokdok kènè ngo belgahen dosana ulang pada kalak simerrian i Jerusalem? ⁵ Oda ngo, tapi èngèt kènè mo, mula oda mertobat kènè, matè ma ngo kènè bagè kalak idi." ⁶ Enggo kessa i, isukutken Jesus mo codiin taba kalak idi: "Lot mo kayu ara ibas pekken sada kalak. Idahi sidasa i mo kayuara i menulusi buahna, tapi singkabuah poda jumpasa. ⁷ Nai idokken mo taba tukang pekken, ’Tengen mo enggo tellu tahun dekkahna dakdak roh aku misènda naing memmuat buah kayuara idi, tapi singkabuah poda lot. Kernana i, tabah kènè mo batangna idi. Man kadè mo i pegelluhen mula sia-sia sambing ngo!’ ⁸ Tapi ialoi tukang pekken idi mo, ’Tuan, belli mo lebbè nggelluh isidi kayuara idi giamken sitahun nai, asa kukurak lebbè kuliling merparik janah kupupuki. ⁹ Tah bakunè nggèut ia merbuah tahun siroh. Tapi ukum oda bagidi, nai ipè asa ipasulak Tuan i lako menabah.’ " ¹⁰ Ibagasen sidari, tupung ari Sabat, mengajar mo Jesus i bages perguruun. ¹¹ Lot mo isidi sada daberru enggo sipuluh ualuh tahun dekkahna mersakit kumarna iiani tendi jahat ia. ¹² Iidah Jesus kessa daberru i, idilo mo, "O nangè, malum mo iakap kono sakitmu idi!" ¹³ Nai iampèken mo tanganNa mi daberru i, nai mènter ndorok mo cènder daberru i gejapkenna i janah ipoji mo Dèbata. ¹⁴ Mellaga mo pengendeng bages perguruun i kumarna ipemalum Jesus sisakiten tupung ari Sabat. Nina mo taba jelma nisidi, "Lot ngo ennem ari bekkasta mengula; sidekkah ennem ari i mo kènè roh mertambar, ulang tupung ari Sabat!" ¹⁵ Ialoi Tuhan i mo pengendeng bages perguruun i, "Èo, kènè perbuah ringadar! Otang karina ngo kè paluahken lembu barang pè kalodè tikan ari Sabat janah mengiring mi ruar lako pesoburken. ¹⁶ Bagèndari pè, isèn lot daberru pemparen si Abraham enggo sipuluh ualuh tahun dekkahna ièkèti Sibolis. Oda ngo ndorok iosari èkètna idi tikan ari Sabat?" ¹⁷ Gabè termèla mo simengalo rana Jesus idi. Tapi ukum sidèbanna idi lolo ngo mengidah karina kellengangen nibakin Jesus idi. ¹⁸ Nai idokken Jesus mo, "Tosè mi kadè mo Kerajaen Dèbata janah mi kadè mo codinna Kubakin? ¹⁹ Codi ngo idi bagè buah arum, ibuat sada kalak menuanken mi jumana. Turah mo i janah ndeppur mbellen bagè kayu, nai merrasar mo manuk-manuk simerkabangen ibas dahan-dahanna." ²⁰ Idokken Jesus nola ma, "Mi kadè mo ndia kucodiken Kerajaen Dèbata? ²¹ Codi ngo Kerajaen Dèbata bagè ragi sinicampurken mi empat puluh sellup nditak, nai igaru-garu mo idi sampè kambang." ²² Lako laus mi Jerusalem, idalani Jesus mo kuta-kuta dekket sosor ninganna mengajari. ²³ Nai lot mo kalak mengkuso tabaSa, "Guru, cituk ngo kessa jelma ipaluah ndia?" Ialoi Jesus mo, ²⁴ "Kennah usahaken kènè mo mbengket arap pèntu sempit. Kudokken mo bai ndènè: Mbuè ngo kalak merrusaha naing masuk arap pèntu i, tapi oda ndorok. ²⁵ Ai mula ndungo kessa sidasa bages idi igerruk mo pèntu i. Nai cènder mo kènè i ruar, jadi mulai mo ituktuki kènè, ninganna mendiloken, ’Tuan, buka mo pèntu èn, asa mbengket kami!’ Nai ialoi Tuan i mo, ’Oda kubettoh tah idikè nai roh ndènè.’ ²⁶ Nai idokken kènè mo, ’Enggo rebbak mangan mènum kènè dekket kami, janah enggo ma ngo mengajari kènè i dalan mi kuta nami!’ ²⁷ Tapi idokken Tuan i nola mo, ’Oda kubettoh barang idikè nai kènè roh. Laus mo kènè isèn nai, kènè simengulaken kejahaten!’ ²⁸ Asa, sinderrang iidah kènè kessa si Abraham, si Isak dekket si Jakob bak karinana nabi-nabi mersennang-sennang i Kerajaen Dèbata, gabè tangis mo kènè janah susah kalohon kumarna iusir kènè i sidi nai! ²⁹ Keppèken merrohen mo kalak i kebincaren nai dekket i kesunduten nai, i utara nai bak i selatan nai, asa mersennang-sennang i Kerajaen Dèbata. ³⁰ Situhunna lot ngo kalak perpodi kin gabè perlebbè, janah perlebbè kin gabè perpodi." ³¹ Tikanna idi ma, lot mo roh kalak Parisè mendahi Jesus, nina mo, "Laus mo kono isèn nai mi bekkas sidèban, ai naing ibunuh si Herodes ngo Kono." ³² Ialoi Jesus mo, "Laus mo kono bagahken mo taba jelma siso merguna i, ’Ari èn dekket baremben, pemalumken sisakiten ngo Aku, tapi i ari petelluken, isidi mo mendungi ulanKu.’ ³³ Ukum ari èn, baremben dekket kaduan, kennah Kuterusken ngo perdalanenKu, ai kennah i Jerusalem ngo nabi ibunuh. ³⁴ Jerusalem, Jerusalem! Nabi-nabi ibunuh kono janah ibentiri kono dekket batu, sinipasulak mendahi kono sampè matè! Enggo nggati naing kukeruduk pengisimidi bagè pengkeruduk inang manuk mi terruh kabengna, tapi oda uè kono! ³⁵ Èngèt mo, gabè tading mo bagesmu i janah melongo. Kudokken mo bamu, mulai bagèndari oda idahèn ndènè nè Aku, mèma idokken kènè, ’Nipasu-pasu mo siroh merkitè gerar ni Tuhan i.’ "

¹ Tikan sikali ari Sabat, laus mo Jesus mangan mi bages sada kalak Parisè. Karina nisidi dak memperatèken Jesus. ² Nai, roh mo sada kalak sipuru-mbèangen cènder i lebbèna. ³ Nai ikuso Jesus mo guru-guru agama dekket Parisè silot isidi, nina, "Ndorok ngo pejuahken kalak simersakit tupung ari Sabat mengèkutken hatoren agamanta barang tah oda ndorok?" ⁴ Sip ngo guru-guru agama bak kalak Parisè i. Nai idilo Jesus mo kalak i, ipemalum mo janah ipemolih. ⁵ Enggo kessa i, idokken Jesus mo taba kalak idi, "Mula ndabuh dukak ndènè barang lembu ndènè mi geddung tupung ari Sabat, otang mènter iteggu kènè ngo dukak ndènè i barang pè lembu i mi darat, tukasi pè ari Sabat?" ⁶ Tapi sada kalak poda ndorok mengaloi Jesus terrèngèt misi. ⁷ Kumarna idatèken Jesus lot tamuè-tamuè memmilih bekkas simendèna janah simetunggungna, gabè ibakin mo sada codiin taba kalak idi karina. ⁸ "Mula idilo dèba kènè mi sada pèsta, ulang mènter kundul kènè mi bekkas simendèna barang simetunggungna. Tah bakunè lot idilo sukut i kalak lebbih mersangap bamu nai, ⁹ gabè roh nola sukut idi mendokken bamu, ’Sentabi! Berrè lebbè bekkas idi bana.’ Gabè mèla kalohoon iakap kono laus isidi nai janah kundul nola kan podi kalohon. ¹⁰ Asa, mula idilo dèba kènè, doliin mo kènè kundul i podi kalohon, nai mula roh sukut idi mendokken taba kono, ’Mi takal bellagen ènda mo kono kundul’ nina. Nai gabè mersangap mo kono i hadeppen karinana tamuè idi. ¹¹ Ai barang isè pedatesken dirina gabè peterruhen ngo i, janah barang isè pecerrepken dirina, gabè pedatessen ngo." ¹² Enggo kessa bagidi, idokken Jesus mo taba sidasa bages idi, "Mula itenggo kono kalak mangan barang mènum pè, ulang mo tenggo sincelketmu barang supan-supanmu, barang denganmu sakuta sibèak. Kerna ibales nola ngo i merkitè menenggo kono, merkitè bagidi enggo ijalo kono balesna. ¹³ Tapi mula ibaing kono pèsta dilo mo kalak sincoor, simertikas, kalak sikèpang, bagi ma sipètung. ¹⁴ Nai gabè terolih pasu-pasu mo kono, kerna oda terbales kalak i simendè nibakinmi. Tapi karina simerandal nibakimu idi balessen Dèbata mo i ibas ari perkèkèen simbelgah i." ¹⁵ Mendengkoh rana Jesus idi, lot mo sada kalak mendokken ranana tikan rebbak mangan idi, nina, "Sayurntua mo kalak sinidilo mi pèsta i Kerajaen Dèbata!" ¹⁶ Tapi nina Jesus mo taba kalak i, "Tikan sikali, lot mo sada kalak merpèsta, mbuè ngo kalak idilo mi pèsta idi. ¹⁷ Tikan enggo dapet mata pèsta idi, ipasulak mo naposona mendilo undangen memagahken, ’Roh mo kènè ai enggo hantar karina!’ ¹⁸ Tapi karina ngo kalak i mercudalihen. Siperlebbè mendokken bagèen, ’Rimbaru dèng kutokor juma, oda terbakin aku mak kutongkir juma idi. Raja kono, ondiken aku.’ ¹⁹ Sidèbanna mendokken, ’Rimbaru dèng kutokor lima rabaan lembu penarik, naing lako mengurus i mo aku. Raja ko, ondiken aku.’ ²⁰ Sidèbanna nola mendokken, ’Rimbaru jejap dèng aku, jadi oda terbakin aku roh.’ ²¹ Molih mo naposo pasulaken i, ibagahken mo taba indukna. Mellaga mo Tuan idi, nina mo taba naposona i, ’Ndor mo kono laus mi kasèan-kasèan dekket balè ni kuta, arahken mo kalak sincoor, nitempuk sigading, sipètung dekket kalak sipangpangen.’ ²² Jadi nina naposo idi mo, ’Tuan, enggo saut nidokkenmi, tapi lumbang dèng ngo.’ ²³ Gabè idokken sukut i mo taba naposona, ’Laus mo kènè mi dalan-dalan kètèk kebasbasen, sapo juma i ruar kuta èn, dokken kènè mo kalak idi asa dom bagesku. ²⁴ Èngèt mo! Sada poda ndorok kalak sienggo niundang idi kin kipangan pangaan pèsta sienggo hantar èn!’ " ²⁵ Mbuè ngo kalak rebbak merdalan dekket Jesus. Jadi tumulih mo Jesus, idokken mo taba kalak idi, ²⁶ "Barang isè naing mengèkutken Aku, tapi kellengen atèna bai inangna, bapana, sinibagesna, dukak-dukakna, kaka-anggina dekket turangna, bang dirina sendiri pè, oda ndorok ia mengèkutken Aku. ²⁷ Kalak siso uè menggong simpersuk lako mengèkutken Aku, oda ndorok ia gabè sisinKu. ²⁸ Ai barang isè naing memajek palas-palas, tentu lebbè kundul ia lako mengètong siperluna, asa ibettoh tah cukup ngo riarna lako memahan palas-palas idi barang oda. ²⁹ Mula oda ngo cukup riarna, keppè enggo ipajek batu cendina, tentu itertabai dèba mo ia. ³⁰ Gabè idokken dèba mo, ’Èah, enggo imulai kalak èn memajek, keppè oda lot pul!’ ³¹ Mula sada kalak raja lot sipuluh ribu tenterrana lako mergeraha mengalo raja sidèban lot duapuluh ribu tenterrana, bakunè pè kennah kundul ia lebbè merpikir tah terralosa ma musuhna idi. ³² Mula ibettoh ngo oda terralosa, tentu nderrang ndaoh dèng musuhna idi, ipasulak mo utusenna lako mengido asa merdamè." ³³ Perpodi idokken Jesus mo, "Bagi ma ngo bang kènè pè, isè poda ndorok kènè gabè sisinKu ukum oda tertadingkensa karinana i." ³⁴ "Merguna kalohon ngo sira. Tapi mula gabè ndèngap sira i, bakunè nola mo pemasinken? ³⁵ Mikè poda lot nèngè gunana. Mi juma ningin, oda kadè lapatenna, mahan pupuk pè, oda lot datina. Isampakken mo i. Kènè simerpènggel merbineggè, radumi kènè mo i."

¹ Tikan sidari, merrohen mo mbuè pertunggu belasting dekket kalak siso kasèa dokatè sinterrem, mi gembar Jesus lako mendengkohken katana. ² Jadi ngutnguten mo kalak Parisè bak guru-guru agama, nina mo, "Nong alè nang, idengani kalak èn ngo jelma siso kasèa, janah rebbak mangan ia dekket kalak idi!" ³ Kernana i, isukutken Jesus mo codiin bai kalak idi. ⁴ "Umpamana lot biri-biri ndènè serratus, nai mbalang mo sada -- bakunè ngo ndia bakinenna? Tentu itadingken mo lebbè biri-biri sisibah-puluh sibah idi i jampalen, nai laus mo ia menulusi simbalang i sampè jumpasa. ⁵ Jumpasa kessa biri-biri sisada i, iampèken mo biri-biri i mi barana kumarna sampang atèna. ⁶ Ipersan mo balik. Jadi enggo kessa soh ia, idilo mo supan-supanna dekket denganna sakuta, nina mo, ’Lolo kalohon ngo ukurku kumara enggo dapet aku biri-biri simbalang idi. Kernana idi, roh mo kènè asa sigohon-gohoni!’ ⁷ Kudokken mo bai ndènè, bagidi ngo bang i sorga i pè! Loloon ngo Tuhan i mengidah sada kalak perdosa sienggo mertobat, ulang pada mengidah sisibah puluh sibah kalak sibennar siso pella mertobat." ⁸ "Barang, ukum sada kalak daberru merkèpèng sipuluh riar pirak, nai mbalang mo sada riar -- bakunè mo ndia bakinenna? Ilakati mo lampu, isapu mo bagesna lako menulusi riarna simbalang idi, sampè dapet. ⁹ Enggo kessa dapetsa, idiloi mo supan-supanna dekket dengan balengna, nina mo, "Sampang kalohoon atèngku kerna enggo dapet riarku simbalang idi. Roh mo kènè asa rebbak mengkeloloken kita!" ¹⁰ Kudokken mo bai ndènè: Bagi ma ngo malaèkat-malaèkat Dèbata idi, lolo kalohoon kalak idi mula lot sada kalak perjahat gabè mertobat i dosa-dosana nai!" ¹¹ Idokken Jesus dèng ma mo, "Lot mo sada kalak pertua, dua anakna. ¹² Nai idokken sikèdèken i mo taba bapana, ’O bapa, berrèken mo bagèndari bangku titik bagianku ibas hartanta idi nai.’ Nai ibagiken bapana i mo harta i, bai anakna sidua kalak i. ¹³ Oda ndekkah kessa bagidi, idèa sikèdèken i mo harta bagianna i karina, nai laus mo ia mi nagerri ndaoh. Iembah mo karinana riarna idi, isidi mo ihambur-hamburken riarna i mengèkutken cubellekna. ¹⁴ Kerri kessa karinana kèpèngna idi, masa mo i nagerri idi lèhè mbellen, nai gabè mpersuk mo iakap. ¹⁵ Karèjo mo ia taba kalak nisidi, idokken mo ia mermakan babi i juma. ¹⁶ Isè poda lot memerrèken barang kadè tabasa, mula pè nemmu koling gadong nakan babi idi iberrè, enggo mo lolo ukurna kipangan. ¹⁷ Nai satdar mo ia, nina mo ibagasen pikirenna, ’Mbuè ngo jelma igaji bapa, janah oda kurangen pangaan, keppèken aku enggo naing matè mada mangan! ¹⁸ Kèkè mo aku, laus mo aku mendahi bapa, asa kudokken tabasa: Ialè Pa, enggo merdosa aku mendahi Dèbata dekket taba Kono. ¹⁹ Oda patut nèngè aku dokkenenMu dukakmu. Pekamet mo aku bagè sada kalak sigajinMu idi.’ ²⁰ Nai kèkè mo ia, balik mo ia mendahi bapana. Tapi ndaoh dèng i sapo nai, enggo mo keppè itatap bapana idi ia. Masèh kalohon mo atè bapana i midahsa, gabè lojang mo ia menimbaki, nai ikaol mo anakna i janah isanggoh. ²¹ ’O bapa,’ nina anakna i taba bapana. ’Enggo merdosa aku taba Dèbata dekket taba Kono pè. Oda patut nè aku dokkenkenmu anakMu.’ ²² Tapi idilo bapana i mo naposona, nina mo, ’Kettu kènè mo mengaleng gedda simendèna, asa salin kènè mo ia. Baing mo cincin mi jari-jarina, janah sipatu mi nèhèna. ²³ Enggo kessa i, alèng kènè mo anak lembu singgomokna, sembellih kènè mo, asa igohon-gohoni ia. ²⁴ Kerna enggo kin ngo matè anakku èn, bagèndari nggelluh nola, enggo kin ngo mago ia, bagèndari enggo balik.’ Jadi imulai kalak idi mo menggohon-gohoni anak idi. ²⁵ Sinderrang bagidi, kum anakna situaan i juma ngo. Tikan mulak ia mi kuta janah enggo kessa ndessing mi sapona, idengkoh mo sora genderrang merkata sipitu dekket oang-oang merdengan tumatak. ²⁶ Idilo mo sada kalak naposo, ikuso mo, ’Merkadè pana i rumah?’ ²⁷ Ialoi naposo i mo, ’Enggo balik anggimu! Enggo isèat lembu singgomokna, kumarna enggo balik anakna idi merkinijuah!’ ²⁸ Mellaga mo situaan i, oda uè mbengket mi bages. Nai idapetken bapana mo ia mi ruar mengendik-ngendiksa. ²⁹ Tapi nina mo taba bapana i, ’Mertahun-tahun mo dekkahna aku mengula rebbak dekket kono pa, oda pennah kualo katamu. Kadè ngo enggo iberrèken Kono bangku? Sada kambing poda nung iberrèken bapa, asa merpèsta aku dekket dengan-denganku! ³⁰ Keppèken anakmu sisada i enggo ikerriken ia karina hartamu rebbak dekket daberru sibabijalang, tapi roh kessa ia mènter isembellih kono anak lembu simendèna lako bana!’ ³¹ Ialoi bapana idi mo, ’O alè pa, anakku, ukum kono menettap ngo kita rebbak i sènda. Karina silot bangku idi, kono ngo sidasa i. ³² Tapi ukum bagèndari, patut ngo kita menggohon-gohoni merdengan sampang atè, ai sienggo matè ngo anggimi, keppè nggelluh nola, sienggo mago ngo ia, keppè enggo balik bagèndari.’ "

¹ Nai idokken Jesus mo taba sisinNa, "Lot mo sada kalak sikaya joong, janah lot mo sada kalak kepala perkèpèngen mengurus hartana. Terbertik mo taba sikaya joong idi magahken enggo ihambur-hamburken kepala perkèpèngen idi riarna. ² Jadi idilo mo ia, nina mo mbangsa, ’Bakunè ngo i, sikudengkoh terrèngèt kono? Bagèndari pacidah mo bangku perrètongen hartangu karinana. Mulai bagèndari, oda ndorok nèngè kono kesakaten hartangku.’ ³ Nai merpikir-pikir mo kesakaten hartana idi, ’Kadè mo ndia kubaing bagèndari? Kerna indukku naing petadiken aku. Memangkur ningin, oda lot gegohku, mengido-ngido mèla diri. ⁴ Oo, bagèn mo keppè; mula iperadiken aku, kennah mbuè mo denganku singgèut menjalo aku i bagesna!’ ⁵ Idilo kesakaten riar idi mo kalak simerutang taba indukna sada-sada. Nina mo taba siperlebbè, ’Sadikè utangmu taba indukku?’ ⁶ ’Seratus goci minak,’ nina mengaloi. Nai idokken pugabè idi mo mbangsa, ’Na, surat utangmu èn. Kundul mo kono isidi, ndor mo suratken lima puluh.’ ⁷ Kessa i, idokken mo taba sipeduaken, ’Kono sadikè utangMu?’ ’Seratus pikkul pagè ngo,’ nina. Nai idokken kesakaten riar idi mo mbangsa, ’Na surat utangmi. Suratken mo ualuh puluh.’ ⁸ Nai ipoji induk sipesakatken riar idi ngo akkal kepala perkèpèngen siso bujur i; pandèen ngo jelma ni dunia èn mengatur urusenna sendiri ulang pada anak kecihuren i." ⁹ Nai nina Jesus nola mo, "Dengkohken kènè mo! Pakkè kènè mo harta dunia èn lako menulusi supan-supan ndènè, asa mula mak lot nèngè harta dunia ènda, terjalo mo kènè mi bekkas amman-sumendah idi. ¹⁰ Barang isè kettoken ibas sicituk, kettoken ma mo ia bang i simbuè pe. Tapi barang ise oda kettoken ibas sicituk oda ma kettoken ibas simbuè pe. ¹¹ Mula terrèngèt harta dunia èn, oda nèngè kettoken ukum kènè, nai isè mo tok bai ndènè terrèngèt harta sorga i? ¹² Janah mula oda kettoken kènè terrèngèt harta ni dèba, isè mo uè memerrèken bai ndènè barang kadè lako milik ndènè kin? ¹³ Oda teruèen sada naposo dua induk; ceggo ngo atèna midah sisada, tapi ikekelengi ngo sisada nai. Barang, iuèi ngono sisada, tapi oda iparduliken sisada nai. Oda terulaken jelma rebakken menguèi Dèbata dekket harta." ¹⁴ Karinana rana sinidokken Jesus idi ibeggè kalak Parisè ngo. Nai gabè itertabai kalak idi mo Jesus, kerna karina kalak idi mbara ngo matana midah kèpèng. ¹⁵ Tapi idokken Jesus mo mendahi kalak idi, "Dokatè ndènè ngo bennar kènè i hadeppen sinterrem, tapi ibettoh Dèbata ngo ukum perukuren ndènè. Simaharga dokatè jelma, oda kasèa i bai Dèbata. ¹⁶ Hatoren-hatoren Agama, pati-patiin niberrèken si Musa dekket peddah silot ibas bukku nabi-nabi, menettap ngo i soh mi tikki si Johanes Perridiken. Mulai isidi nai, dak isukutken ngo Sukuten Simerandal terrèngèt Kerajaen Dèbata. Janah dak igegohken dèba ngo asa masuk ia mi sidi. ¹⁷ Murahen ngo ncèda langit bak tanoh ulang pada sada surat ibas hatoren-hatoren niberrèken Dèbata idi nai gabè sondat. ¹⁸ Merlangkah julu meddem ngo barang isè menirangken sinibagesna, mula kabin nola ia dekket daberru sidèban. Merlangkah julu meddem ma ngo anak laki simengkabini daberru sisirang idi." ¹⁹ "Lot mo sada kalak sibèak dak merpakèen maharga-maharga janah pernggelluhna pè sennang ngo gennep ari. ²⁰ Nai lot mo sada kalak sincor mergerar si Lazarus, dom baroh ngo dagingna. Dak kundul-kundul ngo ia i lebbè babah pèntu bages sibèak idi. ²¹ Ninganna naing ngo ia kipangan iba-iba pangaan simerrurusen i mèja sibèak idi nai. Roh mo biang dakdak mendilati barohna i. ²² Daoh-daoh ariin, matè mo kalak sincoor idi, nai iembah malaèkat mo ia mi bekkas mersangap i gembar si Abraham i sorga. Matè ma mo bang sibèak idi janah ikubur. ²³ Soh mo ndersana iakap i bekkas kematèen idi. Nderrang bagidi, menarè mo ia mi babo, itatap mo si Abraham dekket si Lazarus i gembarna. ²⁴ Nai dilo-dilo mo sibèak idi, ’Ialè empung Abraham! Masèh mo atèmu midah aku, pasulak mo si Lazarus menernepken pucuk jari-jarina mi laè, asa itèktèkken giamken laè mi dilahku; ai soh mo mpiahna kuakap ibagasen api ènda!’ ²⁵ Tapi ialoi si Abraham mo ia, ’Èngèt mo alè pa, tikan i nggelluhmu dèng enggo ijalo kono simendè, tapi ukum si Lazarus pellin menjalo singgodo ngo. Bagèndari pè, sennang mo iakap isènda, ukum kono mpersuk mo. ²⁶ Janah lot ngo lembeng mbages ibakin mahan kellang-kellangta asa ulang terbakin laus misidi, janah asa ulang terbaing roh isidi nai misèn!’ ²⁷ ’Mula bagidi alè empung, kuèlèk-èlèk mo Kono, asa pasulak giamken si Lazarus mendahi bapa,’ nina sibèak idi. ²⁸ ’Asa ipesèngèt si Lazarus nemmu kaka-anggingku idi, lot dèng lima kalak nai. Katerra pè ulang nemmu dekket kalak idi mi bekkas mpersah ènda.’ ²⁹ Ialoi si Abraham nola mo, ’Otang lot ngo bai kalak idi bukku si Musa bak bukku nabi-nabi? Idi mo iuèi kalak i!’ ³⁰ Tapi nina sibèak idi mo, ’Oda cukup dèng i alè Empung Abraham. Tapi ukum lot balik nggelluh sienggo matè kin, janah roh mendahi kalak i, tobat mo kalak idi ibas dosa-dosana nai.’ ³¹ Tapi idokken si Abraham mo mbangsa, ’Mula oda iparduliken kalak idi si Musa dekket nabi-nabi, oda ma ngo uè percaya kalak idi mula pè lot balik nggelluh kalak sienggo matè.’ "

¹ Idokken Jesus mo taba sisinNa, "Dak ngo lot memaing kalak mengulaken dosa, tapi merjaya mo kalak simemaingken idi! ² Lotiin mo igantungken lessung batu mi kerrahongna nai ipitakken mi laut. Lotiin mo bagidi, ulang pada gabè merdosa barang apaina ibas sikètèk ènda nai. ³ Kernana idi, merjaga-jaga mo kènè! Mula merdosa denganmi, pesèngèt mo ia. Mula enggo peselsel ia, ampuni mo ia. ⁴ Mula merdosa ia taba kono pitu kali sidari, janah dak roh ia mendahi kono mengido asa ulang pella ilugun kono dosana i, ampuni mo ia." ⁵ Nai nina rasul-rasul idi mo taba Tuhan Jesus, "Tuhan, petegguh mo kepercayaen nami." ⁶ Ialoi Tuhan i mo, "Mula lot kepercayaen ndènè nasa batu sabi, ndorok ngo dokonen ndènè bai kayu jabi-jabi adoi: ’Mbungkar mo kono janah tertanem mi laut,’ pasti iuèi kayu idi ranamidi." ⁷ "Isè mo kènè mendokken taba naposona, mula mulak kessa i juma nai barang balik mermakan, ’Mangan mo kono’? ⁸ Tentu oda! Gabè sungkarna nola ngo idokken kènè, ’Kebbasken mo pangaan bangku. Janah enggo kessa pul kènè mangan, nai pè asa idokken kènè: mangan mo kono.’ ⁹ Janah idokken kènè ma ngo melias atè kumarna enggo iulaken karina nidokken ndènè idi? ¹⁰ Bagidi ma ngo bang kènè pè. Mula enggo ibahanken kènè karina sinidokken taba kènè, dokken kènè mo: Naposo biasa sambing ngo kami; ai pellin sipatutna dèng ngo kessa kuulaken kami!" ¹¹ Tikan menerusken perdalanen Jesus mi Jerusalem, memellus mo ia arap perbalengen nagerri Samaria bak Galilea. ¹² Lako masuk mi sada kuta, idapetken sipuluh kalak sikoliten mo Jesus. Cènder ndaoh-ndaoh ngo kalak idi, ninganna dilo-dilo, ¹³ "O Jesus, Guru! Masèh mo atèmu midah kami!" ¹⁴ Nai mtengen Jesus mo kalak i, nina mo, "Laus mo kènè mendahi imam-imam, pidoken kènè mo asa iperrèso daging ndènè i." Tikan i tengah ndalan dèng kalak idi, mènter ntangtang mo sakitna i iakap. ¹⁵ Sada kalak bai kalak i nai, gabè balik roh mendahi Jesus kumarna enggo malum iakap, memojo-moji Dèbata. ¹⁶ Soh kessa ia mi lebbè Jesus, mènter ipetangkep mo dirina mi tanoh mersembah taba Jesus. Ia ukum kalak idi kalak Samaria ngo. ¹⁷ Nai idokken Jesus mo, "Otang sipuluh kalak ngo sienggo malum idi? Idikè ngo ndia sisibah kalak nai? ¹⁸ Kasa pellin kalak sidèban ènda sambing kessa balik mendokken lias atè taba Dèbata?" ¹⁹ Nai nina Jesus mo tabasa, "Kèkè mo kono, molih mo kono. Kepercayaenmi ngo pemalumken kono." ²⁰ Barang piga-piga kalak Parisè mengkuso taba Jesus, ndigan mo roh Kerajaen Dèbata. Ialoi Jesus mo, "Ukum pekiroh Kerajaen Dèbata, oda ngo pella mersolo-solo bagè simasa i dunia. ²¹ Janah oda terdokken, ’Tengngen mo, adoi barang èn mo!’ Ai enggo i tengah-tengah ndènè Kerajaen Dèbata." ²² Enggo kessa i, idokken Jesus mo taba sisinNa, "Roh mo katikana, sèkel kalohon kènè naing mengidah sada ari ibas ari Anak Jelma idi, tapi oda terbakin kènè mengidah idi. ²³ Idokken dèba mo luas mendahi kènè, ’Tengen mo i sadoi ngo ia, barang isèn ngo.’ Tapi ulang dahi kènè. ²⁴ Bagè perdebbet pellian i langit nai, mercala-cala i punca langit sisada soh mi punca sisada, bagidi mo Anak Jelma idi ibas ari pekirohNa. ²⁵ Tapi kennah lebbè menggong mermatcam bagè simpersuk ngo Ia, janah itulak jelma sisencundut ènda. ²⁶ Bagè tikan ari si Noak, codi bagi ma mo ari Anak Jelma idi luas. ²⁷ Mangan mènum ngo jelma idi, jejap janah pejajapken dirina, soh mi kettikana mbangkit si Noak mi keppelna, nai roh mo laè mbuncar idi mengenengneng jelma i karina. ²⁸ Bagè simasa tikan si Lot. Mangan mènum ngo jelma i, merdèa bak menokor, mardang bak majek bages. ²⁹ Tapi tikan karuar si Lot i Sodom nai, roh mo api dekket barèrang idabuh i langit nai lako mengelettup kalak idi karinana. ³⁰ Bagi ma mo masa i pekiroh Anak Jelma. ³¹ I ari idi, barang isè tupung i babo saong sapona, ulang mo pella susur nèngè ia mi terruh lako memmuat hartana. Bagi ma kalak sinijuma pè, ulang nèngè balik mi bagesna. ³² Èngèt kènè mo: tikan masa bai sinibages si Lot! ³³ Barang isè dak mengkellini kessahna, kemmagoon kessah mo ia. Tapi barang isè kemmagoon kessah, idi ngo paluahken kessahna. ³⁴ Kudokken mo bai ndènè: Bernginna idi, lot mo dua kalak simpeddemmen. Sada kalak ngo iembah, tapi sada kalak nai itadingken. ³⁵ Mula lot dua kalak menutu, sada ngo iembah, sisada nai itadingken. ³⁶ Mula lot dua kalak i juma, sisada kalak ngo iarahken, janah sisada nai itadingken." ³⁷ Nai ikusoken sisinna i mo, "Idikè ngo masa karinana idi Tuhan?" Ialoi Jesus mo, "Barang idikè lot bangkè, misidi ngo mertumpu kelliki."

¹ Enggo kessa idi, isukutken Jesus mo sada codiin bai kalak idi, lako mengajarken asa kennah tetap kalak idi mersodip ulang merkeleja-lejaan. ² Nina mo, "I sada kuta, lot mo sada hakim oda parduli mi Dèbata, janah oda isarihken nè bang jelma pè. ³ Lot mo i kuta idi sada kalak simebbalu, pukpuk iempet roh mendahi hakim i asa ibèla perkarana. ’Urupi mo aku lako mengalo alongku idi,’ nina simebbalu idi. ⁴ Tah sadikè dekkahna, oda lot nggèut hakim idi. Tapi gabè merpikir mo hakim idi ibas ukurna, ’Ah, tukasi pè oda perduli aku taba Dèbata, janah oda kusarihken jelma. ⁵ Kumarna dak ièlèk-èlèk simebbalu idi aku, padaan mo kubèla perkarana idi, tah bakunè dak roh pukpuk ia mendahi aku, gabè ijonggala nola aku.’ " ⁶ Nai idokken Jesus mo, "Radumi kènè mo, kadè sinidokken hakim sijahat idi! ⁷ Asa mula mengido mengèlèk kènè taba Dèbata mahar bak berngin, otang ibèla ngo perkara sinigemgemNa? Patut nola katèndènè oda iurupi kalak idi? ⁸ Kudokken mo bai ndènè: Bakunè pè ndor ngo kalak idi iurupi! Nai bakunè nola mo luas, roh kessa Anak Jelma mi dunia ènda, lot dèng ma ngo idapet kalak sipercaya?" ⁹ Nai isukutken Jesus mo codiin taba kalak simendokken dirina ngo kessa bennar, ukum sidèbanna merlèa ngo dok atèna. ¹⁰ Nina mo, "Lot mo dua kalak laus mi Bages Perguruun lako mersodip. Sada imo kalak Parisè, janah sada kalak nai pertunggu belasting. ¹¹ Cènder mo Parisè idi mersodip ibagasen ukurna bagèen, ’Alè Dèbata, kudokken melias atè baMu kerna oda dos aku dekket jelma sidèban, pennamun, perjahat, perlangkah julu meddem. Janah oda ma aku bagè pertunggu belasting adoi. ¹² Dak puasa ngo aku dua ari gennep minggu, janah kuberrèken ngo baMu nipersipuluh cinaringku.’ ¹³ Tapi ukum pertunggu belasting idi, narih ndaoh ngo ia cènder, janah oda pang ia giamken mennarè mi langit. Ninganna itempuk tentenna idokken mo, ’Ialè Dèbata, masèh mo atèmu midah aku perdosa èn!’ " ¹⁴ "Kudokken mo bai ndènè," nina Jesus, "Nderrang balik kalak i mi sapona, sodip pertunggu belasting idi ngo ijalo Dèbata, ukum Parisè idi oda ngo ijalo. Kerna barang isè pedatesken dirina, kennah ipeterruh ngo, janah barang isè pecerrepken dirina, ipedates ngo." ¹⁵ Lot mo kalak merrohen merembah dukak-dukakna bai jelma asa ijamah janah ipasu-pasu. Iidah sisinna kessa bagidi, ipincang mo kalak idi. ¹⁶ Tapi idilo Jesus mo kalak idi, nina mo, "Belli mo roh anak-anak idi mendahi Aku, ulang gerai kènè, ai kalak sibagidi ngo ginemgem Kerajaen Dèbata. ¹⁷ Èngèt kènè mo! Kalak siso uè iperèntah Dèbata bagè anak-anak, oda terbakin ia ginemgem Kerajaen Dèbata." ¹⁸ Lot mo sada kalak pengulu Jahudi mengkuso taba Jesus, nina mo, "O Guru, simendè roka, bakunè ngo kennah bakinenku asa kujalo kenggelluhen amman sumendah?" ¹⁹ Ialoi Jesus mo merkitè kuso-kuso, "Kasa idokken kono aku simendè roka? Isè poda permendè roka, laènken Dèbata. ²⁰ Ibettoh kènè ngo pati-patiin Dèbata: Ulang merlangkah julu meddem, ulang memmunuh, ulang menangko, ulang merluap, pesangap inangmu dekket bapamu." ²¹ Ialoi pengulu i mo, "Karinana idi enggo kuulaken mulai i kepposoenku nai." ²² Mendengkoh idi Jesus, idokken mo tabasa, "Sada nai ngo perlu ulankenenmu: Dèaken mo karina silot bamu, berrèken mo tokorna taba kalak sincoor, nai merharta mo kono i sorga. Enggo kessa i, roh mo kono mengèkutken Aku." ²³ Idengkoh kessa bagidi, bonek mo ukurna, kerna kalak sibèak tangas-tangasen ngo ia. ²⁴ Ibettoh Jesus ngo bonek idi ia, kerna naidi nina mo, "Soh mo mahalna kalak sibèak mbengket mi kerajaen Dèbata. ²⁵ Murahen ngo gajah mbengket mi lubang jarum, asa sibèak mbengket mi Kerajaen Dèbata." ²⁶ Nai mengkuso mo kalak simendengkoh idi, "Mula bagidi, isè mo kessa saut maluah?" ²⁷ Ialoi Jesus mo, "Siso terpetupa jelma, terpetupa Dèbata ngo!" ²⁸ Nai idokken si Petrus mo, "Ukum kami, enggo mo kutadingken kami karina silot bai nami lako mengèkutken Kono." ²⁹ Ialoi Jesus mo, "Tuhu ngo i!" nina Jesus, "Barang isè menadingken bagesna, sinibagesna, kaka-anggina dekket partuana barang dukak-dukakna kumarna mengèkutken Aku dekket menguèi Dèbata, ³⁰ gabè iberrè mo bana merlempit ganda bagèndari, janah seggen pè jalonna mo kenggelluhen amman-sumendah." ³¹ Iarahken Jesus mo sisinNa sisipuluh dua idi, nina mo mbang kalak idi, "Bagèndari laus mo kita mi Jerusalem, janah terjadi mo karina nisuratken nabi-nabi terrèngèt Anak Jelma idi. ³² Ipesakat mo ia mendahi kalak siso menandai Dèbata, irèhè-rèhèi mo ia, ilèai, icèduri. ³³ Isiksa mo ia janah ibunuh; tapi balik nggelluh ngo i ari petelluken." ³⁴ Tapi cituk poda iantusi sisiin idi. Oda lot iarti kalak i nidokken Jesus idi. Oda ibettoh tah terrèngèt kadè niranaken Jesus idi. ³⁵ Nai soh kessa Jesus mi kuta Jeriko, lot mo isidi sada kalak sipètung mengido-ngido i biding dalan. ³⁶ Idengkoh sipètung idi kessa mo lot sora memellus jelma mbuè arap idi, ikuso mo, "Kadè masa?" ³⁷ Ibagahken jelma i mo bana, "Jesus kalak Nazaret i ngo memellus." ³⁸ Nai mènter dilo-dilo mo ia, "O Jesus, pemparen si Daud, masèh mo atèmu midah aku!" ³⁹ Tapi igerra kalak simentas perlebbè idi mo ia asa sip katèna. Tapi makin ipegang mo sorana mendiloken nola, "Alè pemparen si Daud, masèh mo atèmu midah aku!" ⁴⁰ Nai, tendo mo Jesus, ipasulak mo mengalengi sipètung idi. Soh kessa sipètung idi, ikuso Jesus mo ia, ⁴¹ "Kadè ipergeddo Kono naing bakinenku bamu?" Ialoi sipètung idi mo, "Merpendidah mo nemmu matangku èn alè Tuhan!" ⁴² Idokken Jesus mo tabasa, "Merpendidah mo kono! Kepercayaenmi ngo pemalumken kono." ⁴³ Nai mènter merpendidah mo tuhu ia, janah ièkutken mo Jesus ninganna memoji-moji Dèbata. Gabè karina jelma nterrem simengidah idi, memoji-moji Dèbata.

¹ Soh mo Jesus mi kuta Jeriko, merdalan mo ia memellus arap kuta idi. ² Lot ngo i kuta idi sada kalak ekuten pertunggu belasting mergerar si Zakheus. ³ Sèkel kalohoon ngo ia naing mengidah Jesus, tapi oda terbakinsa kumarna jelma mbellang idi, janah kalak joppok ma ngo ia. ⁴ Nai lojang mo ia mengelebbèi jelma nterrem idi, ipenangkih mo sada kayu, asa isidi nai ndorok iidah Jesus, kerna arap terruhna i ngo mentas Jesus sigejjap nai. ⁵ Soh kessa Jesus arap bekkas idi, itarè mo mi dates janah idokken mo taba si Zakheus, "O Sakkèus, ndor mo kono susur! Ai naing kiserrang aku mi sapomu ari èn." ⁶ Nai ikettu si Zakheus mo susur, janah lolo kalohoon mo ia menjalo Jesus. ⁷ Ngutnguten ngo karina jelma simengidah i, nina mo, "Iah, mertamu ngo keppèken ia mi bages perdosa!" ⁸ Roh mo si Zakheus mendokken taba Tuhan i, "O Tuhan, sitengah hartangku kucedekkahken mo bai kalak sincor, janah barang isè nung kalak kukilang, empat kali lempit mo kuulakken tabasa!" ⁹ Nai idokken Jesus mo tabasa, "Mertuah ngo pengisi bages ènda sidari èn ibakin Dèbata, kemulihken pemparen si Abraham ngo bang ia pè. ¹⁰ Ai roh ngo Anak Jelma lako menulusi janah paluahken kalak simago." ¹¹ Kumarna mbuè ngo simendengkoh rana Jesus i, jadi iranaken mo codiin bai kalak idi, kerna enggo ndessing mi Jerusalem, idokdok kalak idi mo mènter petararen Kerajaen Dèbata. ¹² Kumarna naidi nina Jesus mo, "Lot mo sada kalak berkat mi nagerri ndaoh, lako ipebangkit gabè raja isidi, nai pul kessa i, baru pè asa balik ia. ¹³ Sinderrang makdèng berkat, idilo mo sipuluh kalak naposona, ipemberrèken mo taba kalak i gennep tersada riar emmas, janah idokken mo taba kalak idi, ’Perpokok kènè mo riar ènda, sinderrang oda isèn aku,’ nina. ¹⁴ Tapi ceggo ngo atè ginemgem i midahsa, ipasulak kalak idi ngo suruhenna mengayakisa magahken, ’Oda uè kami rajanna nèngè.’ ¹⁵ Tapi ipebangkit kessa ia gabè raja, balik mo ia mi kutana. Idilo mo naposona simenjalo riar idi mi hadeppenna, ai naing ibettoh barang sadikè laba ni kalak i gennep. ¹⁶ Naposo perlebbè roh mendokken, ’Tuan ukum labangku, sipuluh riar emmas ngo kemulihken riarmu sada idi.’ ¹⁷ ’Selloh,’ nina tuan i. ’Kono naposo mendè janah burju! Kumarna kettoken ngo ko ibas sicituk, jadi jalo mo kuasa lako mengerajai sipuluh kuta.’ ¹⁸ Roh mo naposo peduaken, nina mo, ’Tuan, merkitè sada riar emmas niberrèkenmi bangku, dapet aku ma ngo laba lima riar emmas.’ ¹⁹ Nai idokken tuan i mo mbangsa, ’Kono pè rajai mo lima kuta.’ ²⁰ Roh nola ma mo naposo sidèban nina mo, ’Tuan, èn ngo riar emmasmu idi, ai kubaluti ngo dekket sèkka. ²¹ Ai mbiar ngo aku midah Tuan i, ai kubettoh kalak mpihir ngo Tuan i. Ibuat Tuan i ngo siso lahna, janah ipepulung Tuan i ngo siso nisuanna.’ ²² Gabè idokken raja i mo mbangsa, ’Tosè mi pendokkenmi ngo kuhukum kono alè naposo jahat! Ibettoh kono ngo keppèken aku kalak mpihir janah kubuat siso lahku, kupepulung siso nisuanku. ²³ Mula bagidi ngo, kasa oda ianakken kono riarku idi dekket anakna.’ ²⁴ Nai idokken raja i mo taba jelma silotna i sidi, ’Buat kènè mo riar idi bana nai, berrèken mo bai naposo sidapet bagian sipuluh riar idi.’ ²⁵ Gabè idokken nisidi mo taba raja i, ’Tuan, otang enggo lot sipuluh riar emmas bagianna.’ ²⁶ Ialoi raja i mo, ’Kudokken mo bai ndènè, berrènken ngo taba kalak simerrusaha asa lot bana. Tapi ukum kalak siso uè merrusaha, tukasi pè cituk silot bana i, buaten ngo bana nai. ²⁷ Bagèndari, embah mo ia mi sèn musuhku i siso uè kurajai idi. Bunuh kènè mo kalak idi karina i lebbè-lebbèngku!’ " ²⁸ Enggo kessa iruapken Jesus karinana idi, ilebbèi mo jelma nterrem idi laus mi Jerusalem. ²⁹ Soh kessa ia mi gembar Betpage dekket Betania i Uruk Zaitun, ipasulak Jesus mo dua kalak sisinNa laus perlebbè. ³⁰ "Laus mo kènè mi kuta ni lebbè ndènè adoi," nina Jesus taba kalak idi. "Soh kessa kènè nahan mi kuta id, idahèn ndènè mo isidi sada anak kalodè tertambat janah madèng nung ipasang dèba. Talkasi kènè mo kalodè idi, nai embah kènè mo mi sènda. ³¹ Mula ikuso dèba kènè, ’Kasa italkasi kènè kalodè idi i penambaten nai?’ dokken kènè mo tabasa, ’Perlu ngo idi bai Tuhan i.’ " ³² Nai laus mo sisiin sidua kalak idi. Idapet mo karinana tuhu bagè nidokken Jesus idi. ³³ Tikan mengosari kalodè i kalak i, nina sidasa i mo taba kalak idi, "Kasa iosari kènè kalodè idi?" ³⁴ Ialoi kalak idi mo, "Perlu ngo idi bai Tuhan i." ³⁵ Nai iembah kalak idi mo anak kalodè i mendahi Jesus. Jadi ipengalasken kalak idi mo mi babo kalodè i olesna, janah ipekundul mo Jesus mi babona. ³⁶ Tikan ibellus Jesus dalan idi merkalodè, ipengalasken jelma nterrem i ngo olesna i babo dalan idi. ³⁷ Lako soh mo Jesus mi Jerusalem, imo i rebbèen pispis Uruk Zaitun, karina jelma nterrem simengèra-ngèra Jesus idi mersurak-surak, meroang-oang memoji Dèbata, kemulihken karina tanda kellengangen sienggo niidah kalak idi. ³⁸ Kata surak ni kalak idi imo, "Ipasu-pasu mo Jesus siroh merkitè-kitè gerar Tuhan i! Damè mo i sorga janah kemmuliaan bai Dèbata!" ³⁹ Nai kalak Parisè sirebbakken jelma nterrem idi mendokken taba Jesus, "O Guru, dokken mo asa sip sisiin simengèkutken Kono i." ⁴⁰ Ialoi Jesus mo, "Kudokken mo bai ndènè, mula sip kalak idi, gabè mersurak-surak mo batu ènda." ⁴¹ Enggo kessa njolmit Jesus mi kuta Jerusalem janah iidah kuta i, itangisi mo kuta i nina mo, ⁴² "Nong ngalè, ukum bagèndari kin mo nemmuken itandai kono sipedamèken kono! Tapi mboni ngo idi ibas penengenmu nai. ⁴³ Roh mo seggen musuhmu mengkubu kono janah isessak mo kono i kambirang kamuhunmu nai. ⁴⁴ Kerri mo kono ireppuk rebbakken pengisi ni tengah-tengahmu idi, janah oda ibelli dua batu mertindih-tindih i bekkasna kin, kerna oda isarihken kono ndigan pekiroh Dèbata menongkir kono lako paluahenna!" ⁴⁵ Nai ibengketti Jesus mo Bages Dèbata janah iusir mo kalak pertiga-tiga nisidi. ⁴⁶ Nina mo, "Tersurat ngo ibas Bibèl: Bekkas mersodip ngo ukum BagesKu. Tapi gabè ibakin kènè ngo bekkas pennamun!" ⁴⁷ Gennep ari ngo dak mengajari ukum Jesus i Bages Dèbata. Nai imam ekuten, simettoh Patiin dekket pengulu-pengulu Jahudi, mennulusi dalan lako memmunuh Jesus. ⁴⁸ Tapi oda dapet kalak idi dalan lako pesautken takina idi, karna karina sinterrem idi merlemmo atè mendengkoh peddah Jesus.

¹ Ibas sada ari tikan mengajar Jesus terrèngèt Sukuten Simerandal bai Dèbata nai i Bages Dèbata, roh mo imam-imam ekuten dekket simettoh Patiin bak pengituai-pengituai. ² Nina kalak i mo taba Jesus, "Bagahken mo bai nami barang idikè nai ngo kuasamu lako mengulaken idi karinana, isè memerrè kuasa baMu?" ³ Ialoi Jesus mo kalak idi, "Aku pè mengkuso kènè ma. Bagahken kènè mo bangKu. ⁴ Ia ukum perridiin nibaing si Johanes, bai Dèbata nai ngo barang bai jelma nai?" ⁵ Nai mersungkuun mo kalak idi samahsa, "Kadè mo tuhu ndia jababna. Mula sidokken, ’I Sorga nai,’ tentu dokkenenna banta, ’Mula bagi ngo, kasa oda percaya kènè taba si Johanes?’ ⁶ Tapi mula sidokken nola, ’Bai jelma nai ngo,’ karina nahan jelma nterrem idi mementiri kita dekket batu, kerna kalak idi percaya ngo karina ukum si Johanes idi nabi ngo." ⁷ Nai idokken kalak i mo, "Oda kubettoh kami." ⁸ Nai idokken Jesus mo taba kalak idi, "Mula bagi ngo, Aku pè oda Kubagahken barang idikè nai kuasangku lako mengulaken idi karinana." ⁹ Nai isukutken Jesus mo codiin taba jelma nterrem idi, "Lot mo pekken anggur ni sada kalak daholi. Ipebellahken mo pekken anggurna idi taba barang piga-piga kalak, nai laus mo ia mengeranto janah toko ngo dekkahna i pengerantoen idi. ¹⁰ Enggo kessa mosim memuat buahna, ipasulak sidasa pekken i mo naposona lako mengaleng bagianna. Tapi ipekpekki ngo pasulaken idi, janah ipellaus oda lot iberrè. ¹¹ Nai ipasulak sidasa pekken idi nola mo naposona sidèban, tapi tong ma ngo ipekpekki, ipellèa janah ipemèla, nai ipellaus ma ngo oda lot iberrè. ¹² Enggo kessa bagidi, ipasulak sidasa pekken i dèng ma mo naposona petellu kaliken, tapi tong bagidi ibakin kalak idi, janah iambongken mi ruar pekken idi. ¹³ Perpodi, nina sidasa pekken i mo ibas ukurna. Bakunè nola mo ndia kubaing? Kuutus mo tupèh anakku sendiri kekellengenki, tentu nangga ngo atè kalak idi midahsa. ¹⁴ Tapi iidah simengula pekken idi kessa mo roh anakna idi, idokken kalak idi mo samahsa, ’Èn mo anak sidasa pekken idi. Aci sibunuh mo ia, asa banta hartana i.’ ¹⁵ Nai mènter itangkup mo ia, iruah mo mi ruar pekken idi janah ibunuh mo. ’Bakunè ngo ndia bakinen sidasa pekken i taba kalak idi?’ nina Jesus mengkuso jelma nterrem simendengkoh codiin idi. ¹⁶ Tentu roh mo ia lako mengeripasken kalak idi, janah isohken nola mo pekken idi taba pemellah pinang sidèban." Mendengkoh idi, nina kalak i mo, "Ah ulang mo bagidi!" ¹⁷ Tapi itengen Jesus mo kalak idi ninganna idokken, "Mula oda ngo bagidi, bakunè mo lapaten ayat Bibèl idi? Batu sinipatakken tukang bages i, idi ngo gabè batu persoki. ¹⁸ Barang isè ndabuh mi batu idi kennah merreppuk, janah barang isè itinggang, kennah nggeppu." ¹⁹ Iarti simettoh Patiin dekket imam ekuten ngo mengarusi codiin idi janah mendahi kalak idi ngo lapatenna itujuken. Kumarna idi, iusahaken kalak i mo naing menangkup Jesus gejapkenna idi. ²⁰ Nai, itulusi kalak i mo tikki mendè. Isisip mo kalak peteridahken dirina bagè kalak bujur, ipasulak mo mengenggep Jesus merkitè-kitè kuso-kuso, asa ndorok iserahken kalak idi Jesus mi gubèrnur asa itahan. ²¹ Nai idokken pasulaken simettoh Patiin dekket imam ekuten mo taba Jesus, "O Guru, kubettoh kami ngo karina niranakenmu bak nipeddahkenmi, tuhu ngo karina. Kubettoh kami ma ngo oda uè Kono mengidah-idah abè; pellin memeddahken situhunna sambing ngo kono terrèngèt nipergeddo Dèbata bai jelma. ²² Kernanai, bagahken mo bai nami tah ndorok ngo menggarar belasting taba Kèsar mengèkutken agamanta, barang tah oda?" ²³ Tapi ibettoh Jesus ngo taki-taki ni kalak idi. Kernana i, idokken mo: ²⁴ "Pacidah mo bangKu sada kèpèng pirak! Gombaren dekket surat isè ngo ibas kèpèng ènda?" Ialoi kalak idi mo, "Gombaren dekket surat Kèsar i ngo," nina kalak i mengaloi. ²⁵ "Mula bagi ngo," nina Jesus mengaloi, "Berrèken kènè mo mi Kèsar, milik Kèsar idi janah berrèken mo balik mi Dèbata, milik Dèbata." ²⁶ Gabè oda dapet kalak idi kesalahen Jesus i lebbè-lebbè jelma nterrem. Pellin mertahan sip mo kalak idi ninganNa kagum mendengkoh pengaloi Jesus idi. ²⁷ Roh mo horong kalak Sadusè mendahi Jesus. (Horong kalak idi oda percaya balik nggelluh sienggo matè.) Ikusoi kalak i mo Jesus, ²⁸ "O Guru, isuratken si Musa, mula matè sada kalak anak laki menadingken sinibagesna, keppè oda sanga lot dèng dukakna, kennah ipekèkè anggina mo sinibages kakana sienggo mebbalu i, asa lot anak bai sienggo matè idi. ²⁹ Jadi lot mo pitu kalak sibeltek. Jejap mo situaan, keppè menter matè oda sanga dèng lot anakna. ³⁰ Nai ipekèkè sipeduaken mo sinibages kakana idi, tapi ia pè matè ngo oda sanga lot anakna. ³¹ Nai mi sipetelluken pè tong ma bagidi perasatna ipekèkè ma ngo daberru idi. Bagidi mo soh mi pepituken, karinana kalak idi mengkabini daberru i, janah matè oda lot mersikèdèk-kèdèk. ³² Perpodi kalohoon, matè ma mo daberru idi. ³³ Nai tikan balik nggelluh seggen jelma sienggo matè idi, sinibages isè mo daberru idi bai sipitu kalak idi? Ai pituna ngo kalak idi mengkabinisa." ³⁴ Ialoi Jesus mo, "Jelma ni dunia ènda ngo kabin, ³⁵ tapi ukum jelma sipatut balik nggelluh i ari podi idi seggen oda nèngè ngo kabin. ³⁶ Nggelluh ni kalak idi, tosè bagè malaèkat janah oda ndorok matè. Gabè dukak-dukak Dèbata mo kalak idi, kerna enggo kèkè kalak i ibas kematèen nai. ³⁷ Si Musa sendiri enggo memagahken balik nggelluh sienggo matè idi, imo suratna terrèngèt rambah mpulguk silakat idi, ’Tuhan i, imo Dèbata si Abraham, Dèbata si Isak, dekket Dèbata si Jakob.’ ³⁸ Jadi oda ngo Dèbata simatè Tuhan i, tapi Dèbata singgelluh ngo! Kerna nggelluh ngo karina jelma i hadeppen Tuhan." ³⁹ Mendengkoh idi, idokken kalak simettoh Patiin mo, "Guru, kenna kalohoon ngo pengaloimu idi." ⁴⁰ Kernana i, oda pang nèngè kalak idi lako mengkusoi Jesus. ⁴¹ Ikusoken Jesus mo taba kalak idi, "Bakunè mo i, Raja Sipaluah niperbagah Dèbata idi pemparen si Daud? ⁴² Padahal si Daud sendiri mendokken ibas bukku Psalm: ’Nina Tuhan i ngo mbang Tuhanku: Kundul mo kono i kamuhunKu ènda, ⁴³ pèma Kubakin karina musuhMu tunduk baMu.’ ⁴⁴ Jadi, mula idokken si Daud ngo Raja Sipaluah idi ’Tuhan,’ idikè mo terdokken Ia pemparen si Daud?" ⁴⁵ Enggo kessa mengerana Jesus taba karina jelma nisidi, idokken Jesus mo taba sisinNa, ⁴⁶ "Manat mo kènè taba kalak simettoh Patiin. Lolo ngo kalak i merdalan-dalani ninganna memakkè jubahna nggeddang janah ipido ukurna ngo asa itabi dèba ia i tengah ndalan dekket i onan. Dak ipilih kalak i ngo bekkasna kundul i lebbè mula ibages perguruun, janah bekkas simersangapna mula i perpèstaan. ⁴⁷ Ikilang kalak i ngo daberru simebbalu janah ilaum bagesna. Nai memmoniken pengelakona jahat idi, mersodip nggeddang mo kalak i. Mberrat ngo kaduan hukumen kalak idi!"

¹ I Bages Dèbata, idah Jesus mo kalak sibèak memakin kèpèngna mi pèti pèlèen. ² Iidah ma mo sada daberru mebbalu memmaing mi pèti idi dua pèsèr. ³ Nai idokken Jesus mo, "Kudokken mo bai ndènè, buèen ngo siniberrèken daberru mebbalu adoi, ulang pada karinana sidèbanna idi. ⁴ Ia ukum pèlèen niberrèken sidèbankenna idi, iba-ibana sambing ngo i. Tapi ukum daberru sincoor idi, ibas kinicorna idi ngo ia memmèlèken karina silot bana, tukasi pè i nai kessa nggelluhna." ⁵ Lot mo kalak mengerrana terrèngèt kinimendè Bages Dèbata, ilantak dekket batu merandal bagi ma barang barang sinipèlèken mi Dèbata. Nai idokken Jesus mo taba kalak idi, ⁶ "Roh mo luas tikkina, karina niidah ndènè mendè idi irumpakken janah oda belliin dua pè giam batu mertindih i bekkasna kin!" ⁷ Nai ikuso sisiin imo Jesus, "O Guru, ndigan mo masa i? Kadè mo tanda-tandana mula naing masa idi?" ⁸ Idokken Jesus mo, "Mergermet mo kènè, asa ulang ilalingken dèba kènè. Ai mbuè ngo roh kalak menelluk gerarKu janah mendokken, ’Aku ngo Ia!’ janah, ’Enggo ndessing katikana.’ Tapi ulang mo percaya kènè. ⁹ Ulang kènè tersengget mendengkoh berrita geraha bak pemberontaken. Kennah masa ngo idi lebbèen, tapi oda dèng ngo idi tikki perpodi barang kiamat." ¹⁰ Nai iudut Jesus mo pengerananNa taba kalak idi, nina mo, "Ikubu bangsa sisada mo bangsa sisada, janah kèkè mo kerajaen mengalo kerajaen. ¹¹ Idikè pè dak masa mo rènur, masa mo lèhè matè kocing dekket sakit wabba. Masa mo memaingken buradan dekket tanda kellengangen i langit. ¹² Tapi sidang makdèng masa idi, itangkup mo kènè janah ikurungken. Nai iruah mo kènè mi hadeppen raja-raja dekket penguasa kemulihken aku. ¹³ I sidi mo kesempaten bai ndènè lako mengindangken aku. ¹⁴ Kernana i, petegguh kènè mo ukur ndènè, asa ulang pella ipikirken kènè barang kadè jabab ndènè i sidi. ¹⁵ Aku ngo mengajari kènè mengerrana, gabè isè poda musuh-musuh ndènè idi ndorok mengalo janah menjabab sinidokken ndènè i. ¹⁶ Isidi ma mo kènè itakiken bapa inang ndènè, kaka-anggi ndènè, sincelket bak supan-supan ndènè. Nai ibunuh ngo kènè dèba. ¹⁷ Karina mo kalak mengkosomi kènè kemulihken Aku. ¹⁸ Tapi sirambar pè buk ndènè idi oda ndorok bennè. ¹⁹ Barang isè uè mertahan janah sobar, maluah mo ia janah dapetten kenggelluhen." ²⁰ "Mula iidah kènè ikubu tenterra kuta Jerusalem, bettohen ndènè mo enggo ndessing kettikana, irumpakken mo kuta idi. ²¹ Nderrang bagidi, kennah mperrus mo kalak ni Juda mi delleng, nai kalak nibagasen kuta pè mperrus menadingken kutana, janah kalak siniruar kuta oda ndorok nèngè mi kuta. ²² Kerna ari idi mo ari ’Mendabuh Hukum’, ai merkitè bagidi saut mo nidokken sitersurat ibas Bibèl. ²³ Soh mo karuna i ari i iakap daberru simengkandong barang simerdukak kèdèk dèng! Karina pengisi nagerri menggong kinipersuk siso terpetia-tia, janah ihukum Tuhan mo bangsa èn. ²⁴ Dèba mo ibunuh merkitè peddang, dèba itaban; janah Jerusalem ideddohi kalak siso menandai Dèbata, soh mi tikki sienggo ibuhul Tuhan bai kalak idi." ²⁵ "Janah lot mo seggen tanda-tanda i mataniari, bulan dekket bintang pè. Buradan mo bangsa-bangsa ni dunia èn mengidah perdengung bak pergoncang laut. ²⁶ Sompar-baèr mo jelma kumarna buradanna janah terendep-endep memèma sinaing masa i dunia èn, ai kumeccaho ngo kegegohen langit i. ²⁷ Nai iidah jelma i mo roh Anak Jelma merkitè hembun ibagasen kuasa dekket kesangapen meheji. ²⁸ Mula masa kessa sibagidi, kèkè mo kènè, janah pedorgak kènè mo takal ndènè, ai enggo njolmit kelluahen ndènè." ²⁹ Nai isukutken Jesus mo codiin èn bai kalak idi, "Perdatèken kènè mo kayuara dekket kayu sidèbanna i. ³⁰ Mula iidah kènè kayu idi mertunasi, bettoh kènè mo enggo ndessing pertahunen mpeddas. ³¹ Bagi ma ngo mula iidah kènè masa sikubagahken idi, bettoh kènè mo enggo mo ndessing Kerajaen Dèbata. ³² Bettoh kènè mo! Oda matè dèng karina singgelluh bagèndari, enggo saut terjadi karinana idi. ³³ Salpun pè karina langit dekket tanoh èn, kum katangki mak ndorok salpun!" ³⁴ "Jaga kènè mo diri ndènè, asa ulang lalap ukur ndènè dak merpèsta-pèsta dekket mabuk kumarna ènumen mperngis, barang mergih-gihken nggelluh ndè i tanoh èn, ulang mak kebbas kènè mèma pekiroh Ari idi sintempu. ³⁵ Kerna Ari ni Tuhan idi sintempu ngo bagè pennaib sambil i babo tanoh ènda. ³⁶ Merjaga-jaga mo kènè janah iempet mersodip, asa mergegoh kènè menghaloken simasa idi, janah asa tahan kènè cènder i hadeppen Anak Jelma." ³⁷ I bages Dèbata idi ngo Jesus mengajar tikanna mahar idi, tapi cibonna laus mo ia mi Uruk Zaitun janah merberngin isidi. ³⁸ Gennep ceggen, merrohen ngo karinana jelma mi Bages Dèbata lako mendengkohken peddah Jesus.

¹ Dapet nèngè mo Ari Raya kipangan roti siso meragi, mergerar Paskah. ² Dak itulusi imam ekuten dekket guru-guru agama ngo dalan mboni-mboni lako memmunuh Jesus, kerna ikebbiari kalak idi ngo jelma nterrem idi. ³ Nai ibengketti Sibolis mo si Judas simergerar Iskariot, imo sada kalak ibas sisiin Jesus sipuluhdua i nai. ⁴ Laus mo si Judas mersinunu dekket imam ekuten bak penjaga Bages Dèbata, lako mennulusi dalan pessohken Jesus bai kalak idi. ⁵ Nai dos mo pekkat kalak idi, janah merjandi mo kalak idi merrèken kèpèng bana. ⁶ Iuèi si Judas mo i, jadi mulai i sidi nai mo itulusi si Judas tikki lako mennerahken Jesus taba kalak idi, siso pemettohen jelma nterrem. ⁷ Dapet mo Ari Raya mangan Roti Mak Meragi, imo kennah mennèat biri-biri pangaan Paskah. ⁸ Ipasulak Jesus mo si Petrus bak si Johanes, nina mo, "Laus mo kènè mengkebasi pangaan Paskah banta." ⁹ "Idikè katèmu kukebbasi kami?" nina Jesus. ¹⁰ "Ibengketti kènè kessa nahan kuta i, pesimbak mo kènè dekket sada kalak anak laki merjujung goci merrisi laè. Èkutken kènè mo ia mi sapona, ¹¹ nai dokken kènè mo taba sidasa sapo idi, ’Tennah Guru i, idikè ngo bekkas berrènkenmu bangku dekket sisinKu lako kipangan pangaan paskah?’ ¹² Mènter ituduhken mo bai ndènè sada bilik mbellen i pagu sienggo terramaken mendè. Isidi mo kebbasi kènè banta." ¹³ Nai laus mo si Petrus dekket si Johanes, jumpa kalak i mo tuhu bagè nidokken Jesus i bai kalak idi. Nai ikebbasi mo pangaan Paskah idi. ¹⁴ Enggo kessa dapet katikna kipangan pangaan Paskah, kundul mo Jesus rebbak dekket sisinNa. ¹⁵ Nai nina mo taba kalak idi, "Sèkel kalohoon ngo ukurku kipangan pangaan Paskah ènda rebbak dekket kènè, sinderrang makdèng sempa sitahanenki!" ¹⁶ Kudokken mo bai ndènè, "Oda nèngè kupangan pangaan idi, soh mi persaut lapaten pangaan ènda ipecèndek i Kerajaen Dèbata." ¹⁷ Nai idokong Jesus mo perrènumen anggur idi, idokken mo melias atè bai Dèbata, nina mo, "Buat kènè mo ènda, bagiken kènè mo samah kènè; ¹⁸ bettoh kènè mo: Oda Kuènum nèngè anggur ènda soh mi lebbè ipecèndek Dèbata Kerajanna." ¹⁹ Enggo kessa i, ibuat Jesus mo roti idi, idokken mo melias atè bai Dèbata, ipenggelli mo, nai ipemberrèken mo bai kalak idi ninganNa idokken, "DagingKu ngo ènda, [siniberrèken lako mengkepkep kènè. Bakin kènè mo bagidi, mahan pernèngèten ndènè bangKu." ²⁰ Bagi ma mo perrènumen idi enggo kessa mangan kalak idi, iberrèken mo bai kalak idi ninganna idokken, "Ukum perrènumen ènda padan rimbaru ngo idi, merkitè-kitè darohKu siniorèken mengkepkep kènè."] ²¹ "Tapi tengen kènè mo! Kalak simenelbuh Aku, rebbak ngo bagèndari dekket Aku i mèja ènda! ²² Kennah matè ngo nemmuken Anak Jelma i, bagè sienggo itentuken kin, tapi merjaya mo kalak sipesakatkenSa!" ²³ Gabè mersikosoon mo kalak idi samahsa, isè ngo ndia kalak idi memmaingken bagidi. ²⁴ Nai tubuh mo persoalen bai kalak idi, terrèngèt barang isè ngo kalak idi simbelgahna. ²⁵ Gabè idokken Jesus mo taba kalak idi, "Raja-raja siso menandai Dèbata menèndes ginemgemna, janah kalak simemerèntah ’igerari ngo i percilèndungen.’ ²⁶ Tapi ulang mo masa idi bai ndènè, ai barang isè kènè simbelgahna, ia mo gabè sikètèkna, janah barang isè pengulu, kennah gabè perkebbas mo ia. ²⁷ Isè simbelgahna kalak sikundul mangan i mèja ngo barang simengkebasi? Tentu kalak sikundul ngo. Tapi i tengah-tengah ndènè ngo Aku bagè perkebbas. ²⁸ Ibagasen kepersukenKu idi, dak igembarKu ngo kènè. ²⁹ Tosè bagè Bapangku enggo memerrèken bangKu kuasa, bagidi ma mo Kuberrèken bai ndènè kuasa memerèntah. ³⁰ Merkitè bagidi, dekket mo kènè mersennang-sennang dekket Aku tikan mbangkit Raja aku. Janah iberrèken mo kuasa bai ndènè lako memerèntah kalak Israel sisipuluh dua marga idi." ³¹ "Simon, Simon, dengkohken mo! Enggo iberrè ijin bai Sibolis lako mengoji kènè; bagè mennapi pagè gabè ipejaè mo simerandal ibas simerroha nai. ³² Tapi enggo Kusodipken kono, asa hot kepercayanmu. Nai enggo kessa balik ukurmu luas taba Aku, pergegohi mo ukur ni kaka-anggimu." ³³ Ialoi si Petrus mo, "Tuhan, kebbas ngo aku mendengani kono mi kurungen barang mi kematèen pè!" ³⁴ "Kudokken mo mbang kono alè Petrus," nina Jesus, "Siderrang makdèng takuak manuk berngin ènda, enggo tellu kali iperso kono aku; oda itandai kono nimu Aku." ³⁵ Nai nina nola mo, "Tikanna Kupasulak kènè, oda pella merembah bagut-bagut, oda merrucang, oda mercipatu, nung ngo kènè kurangen?" "Oda ngo tuhu nung," nina klak idi. ³⁶ Nai nina Jesus mo, "Tapi ukum bagèndari, isè lot bagut-bagutna barang ucangna, kennah iembah mo; janah siso mergolok, idèa mo jubahna asa lot menokor golokna. ³⁷ Kernana i, kudokken mo bai ndènè, ayat sitersurat i Bibèl bagèen, ’Iètong ngo ia perjahat,’ kennah saut mi diringKu. Kerna kadè sienggo tersurat ibas Bibèl terrèngèt Aku, saut mo idi masa berngin ènda." ³⁸ "Tuhan," nina sisiin Jesus, "Tengen mo, lot ngo isènda dua peddang." "Enggo mo i!" nina Jesus mengaloi. ³⁹ Nai itadingken Jesus mo Jerusalem, janah ncemmalna laus ngo ia mi Uruk Zaitun. SisinNa pè dekket ngo mengèkutkenSa. ⁴⁰ Soh kessa kalak idi misidi, nina mo taba sisinNa, "Mersodip mo kènè asa ulang merdosa kènè mula mbengket kènè mi pengunjunen." ⁴¹ Nai laus mo Jesus narih mi lebbè, kira-kira ndorok bentiren. ⁴² Nai mertongkel tèun mo ia mersodip, "Ialè Pa, mula ndorok ngo dok atèMu, pedaoh mo bangKu nai kinidersa ènda. Tapi ulang mo merguru bangKu, merguru bamu mo." [ ⁴³ Roh ngo sada kalak malaèkat mendahiSa, lako mempergegohiSa. ⁴⁴ Mbiar kalohoon ngo Jesus, gabè mertuhu-tuhu mo Ia mersodip. Rendes ngo panasNa bagè daroh menèktèken mi tanoh.] ⁴⁵ Kessa pul ia mersodip, molih mo ia mendahi sisinNa. Tapi terpeddem ngo sisinNa idapet kumarna bonekna. ⁴⁶ Nai nina Jesus mo taba kalak idi, "Kasa meddem kènè? Kèkè mo kènè janah mersodip mo, asa ulang mbengket kènè mi pengojiin." ⁴⁷ Tikanna mengerana dèng Jesus, roh mo mbuè jelma iuluken si Judas, imo sada kalak ibas sisinNa i nai. Idapetken mo Jesus, mènter isanggoh mo. ⁴⁸ Tapi idokken Jesus mo tabasa, "O alè Judas, tah ngo merkitè sanggoh i iselbuh kono Anak Jelma?" ⁴⁹ Iidah sisiin Jesus kessa mo simasa idi, idokken kalak idi mo, "Tuhan, kutampul kami mo dekket peddang ènda?" ⁵⁰ Nai mènter itampulken sada kalak mo peddangna mi naposo imam huntuun, gabè ntalsun mo copingna kamuhun. ⁵¹ Tapi idokken Jesus mo, "Enggo mi!" Nai ijamah Jesus mo copingna idi, ipemalum mo. ⁵² Nai idokken Jesus mo taba imam-imam ekuten dekket taba ekuten pengabal Bages Dèbata bagi ma pengulu Jahudi sienggo roh mi sidi lako menangkup Jesus, "Bagè mendapetken pennamun ngo kènè roh merpeddang bak merpalu-palu menangkup Aku. ⁵³ Gennep ari ngo Aku rebbak dekket kènè i Bages Dèbata, tapi oda itangkup kènè Aku. Tapi tupèh èn mo ketikana kènè mertindak, katikana kuasa kegellapen sidasa tampuk." ⁵⁴ Nai itangkup kalak i mo Jesus janah iembah mi bages imam huntuun. Tapi dak mengèkut ngo si Petrus ndaoh-ndaoh. ⁵⁵ I tengah-tengah kasèan i lakat ngono api, gabè roh mo si Petrus mi gembar api idi kundul rebbak dekket sikundul nisidi. ⁵⁶ Lot mo sada kalak naposo daberru mengidah si Petrus, kundul i gembar api idi; iperdatèken daberru idi mo si Petrus, gabè nina mo, "Kalak èn pè ndai rebbak ngo dekket Jesus!" ⁵⁷ Tapi memerso ngo si Petrus, nina mo, "Oda kutandai idi!" ⁵⁸ Nai oda pella sadikè dekkah nai, iidah sidèbanna nola mo si Petrus, idokken mo, "Sada kalak ibas kalak idi nai ngo kono!" Tapi ialoi si Petrus mo, "Ah, oda aku i!" ⁵⁹ Kira-kira sada jam nola ma, idokken sidèbanna nola ma mo nggang, "Tuhu ngo kalak ènda dengan Jesus, ai kalak Galilea ngo ia!" ⁶⁰ Tapi ialoi si Petrus mo, "Oda kuantusi nidokkenmu i!" Gejapkenna idi tikan mongkam i si Petrus, mènter takuak mo manuk. ⁶¹ Nai itulihken Jesus mo si Petrus mennengensa. Ièngèt si Petrus mo sinidokken Tuhan i tabasa, "Sinderrang madèng takuak manuk, berngin èn, tellu kali mo iperso kono, oda itandai kono nimu Aku." ⁶² Nai karuar mo si Petrus isidi nai, tangis mo ia semmeb-semmep. ⁶³ Ukum kalak simenjaga Jesus, ipellèa-lèa janah iligasi mo Jesus. ⁶⁴ Ibaluti kalak idi mo mataNa, nai ikuso mo, "Ibettoh kono ngo barang isè mengelligasi kono?" ⁶⁵ Matcam dèng ngo bagèna kata-kata pengelèai iruapken tabaSa. ⁶⁶ Nterrang kessa ari siceggenna i, merpulung mo pengulu-pengulu Jahudi, imam-imam ekuten dekket guru-guru agama, nai iteggu mo Jesus mi hadeppen Runggu Mbellen. ⁶⁷ Nina kalak idi mo mengkuso Jesus, "Bagahken mo bai nami, kono ngo Raja Sipaluah niperbagah-bagah Dèbata?" Ialoi Jesus mo, "Mula pè kubagahken idi taba kènè, oda lot percaya kènè. ⁶⁸ Janah mula Kukuso nola pè kènè, oda ngo ialoi kènè. ⁶⁹ Tapi mulai bagèndari nai, kundul mo Anak Jelma i kamuhun Dèbata si Perkuasa idi." ⁷⁰ Nai karinana mo kalak i mendokken, "Mula bagidi, Anak Dèbata ngo kono?" Ialoi Jesus mo, "Bagè nidokken ndènè i mo." ⁷¹ Nai idokken kalak i mo, "Oda perlu nèngè tulusen saksi! Ai enggo ntangkas sidengkoh ranaNa sendiri!"

¹ Nai kèkè mo karinana kalak idi lako menaruhken Jesus mi hadeppen si Latus. ² Iaduken kalak idi mo Ia, nina mo, "Kudapet kami ngo kalak èn mengelalingken jelma nterrem. Iajar-ajari ngo jelma nterrem i asa ulang menggarar belasting taba Kèsar; kerna nina, Kristus ngo Ia sada kalak raja." ³ Nai ikusoi si Latus mo ia, "Tuhu ngo Kono raja ni kalak Jahudi?" Ialoi Jesus mo, "Bagè nidokkenmu ngo." ⁴ Gabè idokken si Latus mo taba imam-imam ekuten dekket jelma nterrem idi, "Oda lot dapet aku kesalahen kalak ènda, lako menghukumSa." ⁵ Tapi dak ipaksa kalak idi mo, nina mo, "Merkitè peddahNa, dak Iajar-ajari ngo karinana bangsa nami, mulai i Galilea nai soh mi Juda, janah bagèndari soh ma mi sènda." ⁶ Idengkoh si Latus kessa mo idi, mengkuso mo ia, "Ai kalak Galilea ngo keppè ia?" ⁷ Nai ibettoh kessa mo kalak Galilea ngo keppè Jesus imo gemgemmen si Herodes, ipasulak mo merembahken Jesus mi si Herodes, ai tupung i Jerusalem ngo ia tikanna bagidi. ⁸ Lolo kalohoon ngo si Herodes enggo kessa iidah ia Jesus, ai enggo ndekkah idengkoh terrèngèt Jesus janah sèkel ia naing mengidahSa. Dak ipercinta ukurna ngo idahenNa tanda kellengangen sibakinen Jesus. ⁹ Kernana idi matcam mo bagèNa ikusoken taba Jesus, tapi dak sip sambing ngo ukum Jesus. ¹⁰ Tapi dekket ngo roh imam-imam ekuten bak guru-guru agama nisidi lako mengaduken Jesus, idokken kalak i mo tuduhen mberrat bai Jesus. ¹¹ Nai irèhè-rèhèi si Herodes rebbak dekket pengabalna mo Jesus, isellukken mo bai Jesus pakkèen kebelgahen, nai ipasulak mo Jesus balik mendahi si Latus. ¹² Mulai sidarinkenna i nai, gabè mersupan-supan mo si Herodes dekket si Latus mengolihi, ai mersikosomen kin ngo kalak idi. ¹³ Nai ipepulung si Latus mo imam-imam ekuten, pengulu-pengulu bak jelma nterrem ginemgem pè, ¹⁴ nina mo taba kalak idi, "Iaduken kènè ngo kalak ènda bangku, janah mendokken Ia mengelalingken jelma. Bagèndari pè iidah kènè ngo enggo kutangkasi Ia, tapi kesalahen nidokken ndènè i oda lot dapet aku baNa. ¹⁵ Si Herodes pè oda ma lot jumpasa, kernana idi ngo asa iulakken ia mendahi aku. Situhunna oda lot ibahanken kalak ènda barang kadè pè memmaingken kennah merrutang kessah. ¹⁶ Kumarna nai, kuligas mo Ia, nai kupaluah mo Ia," [ ¹⁷ Biasana gennep ari raya Paskah ipaluah si Latus ngo sada kalak sikurungen bai kalak i nai.] ¹⁸ Tapi karina nisidi menggegohken surakna, "Bunuh mo Ia! Si Barabas mo paluah bai nami!" ( ¹⁹ I kurungen pè si Barabas, kumarna menggutturi ngo ia janah kumarna memmunuh.) ²⁰ Kumarna naing ipaluah si Latus ngo Jesus, idokken mo sikali nai taba jelma nterrem idi. ²¹ Tapi isurakken kalak idi mo, "Persilangken mo Ia! Persilangken mo Ia!" ²² Idokken si Latus mo bai kalak i petellu kaliken, "Kadè ngo kessalahenNa? Ai oda lot dapet aku kessalahenNa tuk memmaingkensa merrutang kessah. Kuligas mo Ia, nai pè asa kupaluah." ²³ Tapi dak isurakken kalak idi mo mergegoh mendokken asa ipersilangken Jesus, ujungna gabè mennang mo kalak idi. ²⁴ Nai iputus si Latus mo hukumen matè bai Jesus, rembang bagè nipido jelma nterrem idi. ²⁵ Nai ipaluah mo si Barabas bagè nipido kalak idi imo sienggo ikurungken kumarna menggutturi dekket memmunuh. Nai ipesakat mo Jesus bai kalak idi asa ibaing bana merguru lemmo atè kalak idi. ²⁶ Nai iiring kalak i mo Jesus mi ruar. I tengah ndalan, pesimbak mo kalak i dekket sada kalak mergerar si Simon kalak Kirene, rimbaru roh dèng ia mi kuta idi. Ia mo itangkup kalak idi janah ipaksa memersan kayu silang idi ipodi Jesus. ²⁷ Mbuè ngo kalak merrotor mengèkutken Jesus -- dèba mo ia daberru -- janah itangisi kalak i ngo Jesus. ²⁸ Tapi itulihken Jesus mo mi podi, janah nina mo taba kalak idi, "Kènè alè karina daberru Jerusalem! Ulang mo tangisi kènè Aku, tapi diri ndènè mo tangisi kènè dekket dukak-dukak ndènè. ²⁹ Kerna roh mo tikkina dokkenen ndèba mo, ’Sayurntua mo daberru nggempus, siso nung tubuh-tubuhen janah oda nung pesusuken!’ ³⁰ Nai idokken dèba mo ipas katika i taba delleng, ’Tinggang mo kami!’ Janah taba uruk-uruk idokken, ’Tamburi mo kami!’ ³¹ Kerna mula bagidi pemaing kalak idi taba kayu nggelluh, bakunè mo ndia pemmaing kalak idi taba kayu sienggo matè!" ³² Lot dua kalak sidèban perjahat -- iembah kalak idi asa ihukum matè rebbak dekket Jesus. ³³ Soh kessa mo mi bekkas mergerar "Pertulanen", ilabangken kalak idi mo Jesus mi kayu persilang. Bagidi ma mo perjahat sidua kalak i -- ipersilangken mo sada kan kamuhun Jesus janah sada nai kan kambirangna. ³⁴ Nai mersodip mo Jesus, "Ialè Pa, ulang pella ilugun kono pemmaing kalak idi, ai oda ibettoh kalak idi sinibaingna idi." Ibagi-bagi kalak idi mo isidi oles Jesus merkitè tendung. ³⁵ Mbuè ngo kalak cènder i sidi janah mengidah karina simasa idi, ninganna pengulu-pengulu Jahudi dak mengerèhè-rèhè Jesus, nina mo, "Sidèban ipaluah ngo, bagèndari diriNa mo nemmu ipaluah mula tuhu ngo Ia Mesias Raja Sipaluah niperbagah-bagah Dèbata!" ³⁶ Soridadu-soridadu idi pè mengerèhèi Jesus ngo. Roh ngo kalak idi mi gembar Jesus, iberrèken kalak i mo anggur macem tabasa. ³⁷ Ninganna idokken kalak idi, "Mula raja ni kalak Jahudi ngo Kono, paluah mo diriMu!" ³⁸ I babo kayu persilang Jesus idi, isurat ngo bagèen, "Èn mo Raja ni kalak Jahudi." ³⁹ Sada ibas perjahat nipersilangken idi mengelèai Jesus, nina ngo, "Otang Kristus Raja Sipaluah niperbagah-bagah Dèbata ngo kono? Paluah mo diriMu, bak kami pè!" ⁴⁰ Tapi ipesèngèt sisada kalak nai mo ia, nina mo, "Oda ngo keppè ikebbiari kono Dèbata, tukasi pè kita rebbak ihukum matè? ⁴¹ Sènteng ngo hukum simengenna banta, ai sijalo ngo ali perrulanta. Tapi ukum Ia, kadè poda lot salahna!" ⁴² Nai nina nola mo taba Jesus, "O Jesus, èngèt aku, Enggo kessa soh kono gabè Raja!" ⁴³ Nai idokken Jesus mo tabasa, "Kudokken mo bamu, sidari èn mo kono rebbak dekket Aku i Paradaiso." ⁴⁴ Kira-kira pukkul duabellas tengngah ari, gellap mo suberri nagerri idi kerna oda mercuhaya mataniari soh mi pukkul tellu cibon. ⁴⁵ Nai merribak mo kirè-kirè ni Bages Dèbata, i babo nai soh mi terruh. ⁴⁶ Nai mersora nggang mo Jesus, "Alè Pa! Mi bagasen tanganMu mo Kupesakat tendingKu!" Enggo kessa idokken bagidi, mpostep mo kessahna. ⁴⁷ Iidah ekuten soridadu i kessa mo simasa i, ipoji kalak i mo Dèbata nina mo, "Tuhu ngo oda mersalah kalak ènda!" ⁴⁸ Mbuè ngo roh jelma mi bekkas idi janah iidah ngo karina simasa idi. Mulak mo kalak i mi sapona merdengan ukur peselsel. ⁴⁹ Karina simendahi Jesus bagi ma daberru simengèkutkensa i Galilea nai, cènder ndaoh-ndaoh janah mengidah karina simasa idi. ⁵⁰ Lot mo sada kalak simergerar si Josep kalak Arimatea i nagerri Juda. Kalak selloh ngo ukurna janah ihormati sinterrem ngo ia, janah ia pè memmèma-mèma ngo i Kerajaen Dèbata idi senggep. ⁵¹ Oda ngo tuju iakap ukurna pemmakin ni runggu idi, tukasi pè ia masuk bilangen rungguun mbellen. ⁵² Laus mo ia menghadep mi si Latus, ipido mo bangkè Jesus. ⁵³ Nai ipesampur mo bangkè Jesus idi i kayu persilang idi nai, ibalut mo dekket kaèn kapan ibas kaèn lennen nai. Nai igamparken mo bangkè idi mi bagasen kuburen sienggo ipahat i sada delleng batu. Oda nung dèng terpakkè kuburen idi. ⁵⁴ Ari perkebbasen mi ari Sabat ngo arinna idi, janah oda pella ndekkah nèngè mulai mo ari Sabat. ⁵⁵ Daberru-daberru siroh i Galilea nai sirebbakken Jesus idi, ièkutken ngo si Josep lako mengidah kuburen idi. Iidah kalak idi ngo barang bakunè pergampar bangkè Jesus ibagasen kuburen idi. ⁵⁶ Nai molih mo kalak idi, ikebbasi mo rempah-rempah dekket minak baungkus lako memminaki bangkè Jesus. Sibarembenkenna, ari Sabat idi, mentadi ngo kalak idi ibas ulanna, mengèkutken pati-patiin.

¹ Tikan ari Minggu, njengkas kalohoon, laus mo daberru-daberru i mi kuburen merembah rempah-rempah sienggo ihantari kalak idi kin. ² Soh kessa kalak idi mi kuburen, idapet kalak i enggo nggoling batu penutup lubang kuburen idi. ³ Nai ibengketti kalak idi mo kuburen idi, tapi oda idah kalak idi bangkè Jesus idi. ⁴ Sinderrang cender idi kalak i janah jellak ukurna kerna simasa i, sintempu mo cènder dua kalak merpakèen mbulan merkillok-killok i gembar kalak idi. ⁵ Buradan mo kalak idi, nai gabè sujud mo kalak i mersembah soh mi tanoh, mènter idokken sidua kalak idi mo bai kalak i, "Kasa itulusi kènè singgelluh i bekkas simatè? ⁶ Oda isèn ia; enggo balik nggelluh ia! Èngèt kènè mo sienggo nidokkenNa i kin bai ndènè sinderrang i Galilea dèng Ia, ⁷ imo: Kennah ipesakat ngo Anak Jelma i mi tangan kalak perdosa, nai ipersilangken mo ia, tapi balik nggelluh ngo i ari petelluken." ⁸ Gabè ièngèt daberru-daberru idi mo kata nidokken Jesus idi kin. ⁹ Nai balik kessa kalak idi i pendèban idi nai, ibagahken kalak i mo karina simasa i mendahi sisiin sipuluhsada idi dekket mi karina simengèkutkensa sidèbanna i. ¹⁰ Ukum daberru-daberru idi imo: si Maria Magdalena, si Johana dekket si Maria inang si Jakobus, dekket daberru-daberru sidèbanna sirebbakken dekket kalak idi. ¹¹ Tapi oda tok ukum sisiin idi mi sukuten daberru-daberru idi, ai idokdok ngo sukut-sukuten sambing. ¹² Tapi kèkè mo si Petrus, lojang mo ia mi pendèban. Tungkuk mo ia menengngen mi bagasen, iidah mo pellin kaèn kapan mo kessa i sidi. Lengang kalohoon ngo si Petrus, balik mo ia dekket ukur merkalimesso terrèngèt karina simasa idi. ¹³ Sidarinkenna idi ma, laus ngo dua kalak sisiin Jesus mi sada kuta mergerar Emaus, kira-kira sipuluhsada batu daohna i Jerusalem nai. ¹⁴ Ninganna merdalan idi kalak i, dak icakapi kalak idi ngo karina terrèngèt simasa i. ¹⁵ Sinderrang kiranai idi kalak i, mènter roh mo Jesus mendahi kalak idi gabè rebbakken merdalan. ¹⁶ Iidah kalak i ngo Jesus tapi lot memmaingken asa oda itandai kalak i Ia. ¹⁷ Idokken Jesus mo taba kalak i, "Kadè ngo pana iranai kènè ninganna merdalan èn?" Terridah ngo ibas abè kalak idi marsak, merradi mo kalak idi merdalan idi. ¹⁸ Nai sada bai kalak i nai mergerar si Kleopas mengkuso taba Jesus, "Pellin kono ngo pana simerrian Jerusalem siso memettoh simasa mbaru dèng isidi?" ¹⁹ "Kadè pana masa?" nina Jesus mengaloi. "Simasa taba Jesus kalak Nazaret idi," nina kalak idi. "Ia sada kalak nabi, mergegoh kalohoon ngo ranaNa dekket pemahanNa pè i penengennen Dèbata bang jelma pè. ²⁰ Enggo ipesakat imam-imam ekuten dekket pengulu-pengulu bangsanta Ia ihukum matè janah enggo mo ipersilangken Ia! ²¹ Harap ngo kami asa Ia naing paluahken Israel! Petellu ariken ènda mo enggo, kessa nai masa bagidi. ²² Nai dèng ma barang piga-piga kalak daberru horong nami memmaing kami gabè tersengget. Ai njengkas kalohon ngo ndaboi laus kalak idi mi kuburen, ²³ tapi oda idapet kalak idi nèngè isidi bangkè Jesus. Balik mo kalak idi, janah nina iidah kalak idi ngo malaèkat; idokken malaèkat idi nggelluh ngo Jesus. ²⁴ Dèba ma dengan nami enggo laus mi kuburen, idapet kalak idi ngo tuhu bagè sukuten daberru idi, pellin Jesus ngo kessa oda iidah kalak idi." ²⁵ Nai idokken Jesus mo taba kalak idi, "Èo, kènè simoto! Mahal nai kènè percaya mi sinidokken nabi-nabi! ²⁶ Mesias Raja Sipaluah niperbagah Dèbata idi, otang kennah menggong simpersuk ngo lako soh mi kemulianNa?" ²⁷ Nai ipeterrang Jesus mo taba kalak idi, kadè idokken ibagasen Bibèl terrèngèt diriNa, mulai i bukku si Musa nai soh mi bukku nabi-nabi. ²⁸ Ujungna naing soh mo kalak idi mi kuta nitujuna. Ipakulah Jesus mo bagè naing iterrusken merdalan, ²⁹ tapi icèkèpi kalak idi mo ia, "Rebbak mo kita" nina kalak idi tabaSa, "ai enggo ramben ari, mataniari pè enggo sundut." Nai mbengket mo ia rebbak dekket kalak idi. ³⁰ Tikan kundul rebbak mangan kalak idi, ibuat Jesus mo roti idi, idokken mo lias atè taba Dèbata, nai ipenggelli mo roti i dekket tanganNa, iberrèken mo bai kalak idi. ³¹ Gabè satdar mo kalak idi janah itandai mo ia. Tapi mersep mo Jesus ibas pengidah kalak i nai. ³² Nina kalak idi mo samahsa, "Otang bagè mpeddas ngo ndai siakap tikan kirana Ia dekket kita i tengngah ndalan bak sinderrang ipeterrang ma banta isi Bibèl?" ³³ Nai gejapkenna i mènter kèkè mo kalak idi kebbas, balik mo kalak idi mi Jerusalem. Idapet kalak i, enggo tumpu sisiin Jesus sisipuluh sada idi, bagi ma dekket sidèbanna pè. ³⁴ Nai idokken sisiin i mo, "Tuhu-tuhu ngo enggo balik nggelluh Tuhan i! Enggo ipetarar diriNa bai si Simon!" ³⁵ Nai isukutken sidua kalak i ma mo simasa i tengah ndalan, soh mi penandai kalak i mi Tuhan i tikan memenggelli roti. ³⁶ Sinderrang mengeranai kalak i, terrèngèt sindai, sintempu mo cènder Jesus i tengngah kalak idi ninganna mendokken, "Damè mo bai ndènè!" ³⁷ Tersengget mo kalak idi janah buradan, idok ngo pana bègu niidah kalak idi. ³⁸ Tapi idokken Jesus mo, "Kasa kènè mbiar janah kasa oda percaya kènè? ³⁹ Tengngen mo tanganKu dekket nèhèngKu! Aku ngo èn, dadap mo janah tengngen kènè mo: ukum bègu oda ngo merdaging janah mertulan bagè niidah ndènè Aku." ⁴⁰ Ninganna idokken Jesus bagidi, ipacidah mo tanganNa bak nèhèNa taba kalak idi. ⁴¹ Tapi kumarna oda dèng kalak i percaya, kemulihken lolo bak lengang, idokken Jesus mo taba kalak idi, "Lot ngo pangaan ndènè isèn bagèndari?" ⁴² Nai iberrèken kalak i mo tabaSa sada ikan pinanggang. ⁴³ Ijalo Jesus mo ikan i janah ipangan ipetengngen-tengngen kalak idi. ⁴⁴ Enggo kessa i, idokken Jesus mo bai kalak i, "Èn mo sienggo Kudokken i kin taba kènè, nderrang rebbak dèng Aku dekket kènè, ai tersurat terrèngèt Aku ibas Bukku si Musa bak Nabi-nabi dekket Psalm pè, kennah saut ngo i masa." ⁴⁵ Nai ibuka Jesus mo pikiren kalak idi, asa iantusi kalak i nidokken Bibèl. ⁴⁶ Idokken Jesus mo taba kalak i, "Tersurat ngo ibas Bibèl, kennah menggong simpersuk ngo Raja Sipaluah niperbagah-bagah Dèbata idi, janah balik nggelluh i ari petelluken. ⁴⁷ Tersurat ma ngo, kennah isukutken ngo merkitè gerarna taba karina bangsa, iampuni Dèbata ngo dosa ni kalak simertobat. Berrita idi isiarken mulai i Jerusalem nai. ⁴⁸ Kènè ngo gabè saksi terrèngèt karinana idi. ⁴⁹ Kupasulak mo mendahi kènè niperbagah-bagah Bapangku. Tapi ulang mo kènè mèrèt ibas kuta ènda nai, pèma roh ipesenggep bai ndènè kuasa Dèbata." ⁵⁰ Enggo kessa i, iarahken Jesus mo kalak i mi ruar kuta sampè soh mi Betania. Ipekimbang mo tanganNa memasu-masu kalak idi. ⁵¹ Sinderrang memasu-masu idi Ia, mersirang mo kalak idi, laus mo Ia mi sorga. ⁵² Mersujud mo kalak idi mersembah dempak Jesus, nai molih mo kalak i mi Jerusalem ibagasen merlolo atè kalohon. ⁵³ Dak i Bages Dèbata ngo kalak idi memoji-moji Dèbata.