JAKOBUS

JAKOBUS

¹ Kènè karina kaka anggi ummat Dèbata simersèrak i suberri dunia! Njuah-njuah mo bai ndènè, bangku nai si Jakobus naposo Dèbata dekket Jesus Kristus. ² Alè dengan! Mula roh mendahi kènè matcam bagè pengunjunen, ètong kènè mo i perlabaan. ³ Ai mula tettap kènè percaya bai Tuhan i tikan roh pè pengunjunen i, gabè mengkerohken mbingit perukuren ngo i. ⁴ Perdimata kènè mo asa ukur mbingit ndènè i, ulang singgat pertengahen ndalan sambing, tapi dak tong mo terrus i soh mbelgah janah seppè, janah oda lot kurangna i barang kadè pè. ⁵ Mula lot bai ndènè nai kurang bijak, ipido mo kebijaken i bai Dèbata nai, asa iberrèken Dèbata bana kebijaken i; ai mbuas ngo Dèbata merrèken idi ibagasen masèh atèna janah oda merdengan pengèah. ⁶ Tapi kennah ibagasen tok ngo sipido i, ulang mo ragu. Ukum kalak perukur ragu, tosè ngo i bagè galombang laut si nisempul angin mi sèn mi sadoi. ⁷ Janah kalak sibagidi, oda hot pikirenna; oda tertentukensa barang kadè pè. Kerna naidi ulang mo iharapken kalak sibagidi barang kadè pè bai Tuhan i nai. ⁹ Kennah lolo mo ukur kalak Kristen sincor mula ipedates Dèbata ia. ¹⁰ Bagi ma ngo kalak Kristen Bèak, mersampang atè mo ia mula pè ipecerrep Dèbata ia. Ai lako salpun ngo sibèak i bagè bunga dukut-dukut. ¹¹ Mula isenggang mataniari ia, males mo ia janah merurus mo bungana, mersep ma mo dekket kinimendèna. Bagi ngo kalak sibèak, mago ngo ia tikan mendalanken usahana i. ¹² Sayur ntua ngo kalak mula mbingit ibas pengojiin i, ijalo mo upahna, imo kenggelluhen niperbagah-bagah Dèbata. ¹³ Ulang mo dok atè barang isè, mula tikan terunjun ia gabè nina, "Bai Dèbata nai ngo pengunjunen i," ai oda uè Dèbata mengunjuni barang isè merkitè kejahaten. ¹⁴ Tapi terunjun pè jelma i kumarna iabin janah ihèla-hèla cubellekna simeroha i ngo ia. ¹⁵ Nai mula iuèi cubellekna simeroha i, tubuh mo dosana, janah mula enggo ibahanken dosa, mi kemmatèen mo ujungna. ¹⁶ Ulang kènè tertipu alè dengan sinikekellengen! ¹⁷ Sagumanna pemerrèken merandal dekket mendè basa bai Dèbata ni sorga i nai ngo rohna i, simenghanaken kecihuren i langit i. Ia ngo Dèbata siso mobah-obah, janah oda uè mennadingken kita, gabè tading pellin lèndung sambing i gembarta. ¹⁸ Ibas taki ukurNa sendiri ngo kita iabin gabè dukak-dukakNa merkitè kataNa bennar i. Ibaing pè bagidi asa gabè kita ngo perlebbè ipas karina sinihanakenNa i nai. ¹⁹ Èngèt kènè mo alè dengan sinikekellengen! Gennep jelma, ngkasah mo ia mendengkoh-ndengkohi; ulang gerrèdèk mengerana, ulang murah mellaga. ²⁰ Oda terulaken kalak simurah mellaga simerandal nikellemoken atè Dèbata. ²¹ Kerna naidi, patakken kènè mo kecemmalen simerroha janah singgodo i. Ipas ukur ncerrep mo jalo kènè peddah nisuanken Dèbata mi bagasen perrukuren ndènè, ai mergegoh ngo peddah i paluahken tendi ndènè. ²² Naing mo nemmu kènè mengulaken kadè sinidokken Dèbata, ulang pellin mendengkohken sambing, asa ulang gabè mengoto-ngotoi diri ndènè kènè. ²³ Kalak simendengkoh kata Dèbata keppèken oda iulaken codi mo i bagè mengidah rupana i cermin. ²⁴ Enggo kessa ntangkas iperèso abèna i, laus mo ia, keppè oda ièngèt nèngè bakunè bentuk abèna i. ²⁵ Ukum Patiin Dèbata merandal ngo i janah merkegegohen paluahken jelma. Jadi kalak simengeradum-radumi janah simemperatè-atèken bak simengulaken kata i, oda pellin idengkohken sambing janah oda ilupaken, kalak sibagidi ngo ipasu-pasu Dèbata ipas ulanna. ²⁶ Mula lot kalak mendokken ibas ukurna kalak peragama ia, keppèken oda irantè dilahna, mengoto-ngotoi dirina sendiri ngo ia; magosia ngo peragamanna i. ²⁷ Ukum peragama sènteng siso lot tikasna i hadeppen Dèbata, imo: Pehèdu-hèduken sinceppet mak merbapa mak merinang dekket kalak simebbalu janah mpersah; ninganna menjaga dirina sendiri ulang icèdai dunia èn.

¹ Kènè alè dengan! Ulang mo kènè mengidah-ngidah rupa, mula tuhu-tuhu ngo kènè percaya bai Jesus Kristus simermulia i. ² Ai mula roh sada kalak sibèak mercincin emmas janah merpakèen mbara mbèrèng mi perpulungen ndènè, nai roh mo sada kalak sincor merpakèen ompak-ampik, ³ nai laèn mo cara ndènè menghormati simerpakèen mbara-mbèrèng i, dok ndènè mo tabasa, "Mi julu meddem èn mo kènè kundul." Tapi ukum taba kalak sincor i dok ndènè, "Kan tellagahen adoi mo kènè cènder," barang ma "I sarimar èn mo kono kundul." ⁴ Merkitè bagidi otang merbagi dua perrukuren ndènè janah enggo pejaè-jaè ibaing kènè taba samah-samah jelma merdangaan mi sura-sura jelma siso kasèa. ⁵ Èngèt kènè mo alè dengan sinikekellengen! Kalak sincor atè dunia èn, ipilih Dèbata gabè kaya merkepercayaen bai Tuhan i. Kalak sibagidi mo mbengket mi kerajaen Dèbata sienggo niperbagah-bagahna taba kalak simerkelleng atè midahSa. ⁶ Tapi ilèai kènè ngo kalak sincor, pada hal kalak sibèak i ngo pepersuk-persukken kènè janah mengaduken kènè mi perhukumen. ⁷ Kalak idi ma ngo simengelèai gerar sienggo ienggerarken Dèbata bai ndènè. ⁸ Merandal ngo nibaing ndènè mula iulaken kènè kata Dèbata sitersurat ibas Bibèl bagèen, "Kekellengi mo denganmu jelma dosken dirimu!" ⁹ Tapi mula mengidah-ngidah abè ngo kènè, merdosa ngo kènè, janah idokken Dèbata, mengellausi kata Dèbata ngo kènè ukum bagi. ¹⁰ Barang isè mengellausi salah satu dari pada pati-patiin i, enggo mo pengellausi ia i karinana pati-patiin i. ¹¹ Kerna simendokken, "Ulang merlangkah julu medem," ia ma ngo mendokken, "ulang memmunuh." Jadi mula oda pè kènè merlangkah julu meddem, tapi mula memmunuh, sienggo mengellausi pati-patiin i ngo enggo kènè. ¹² Asa, mula mengerana kono barang mengulaken barang kadè pè, kennah èngèten ndènè lebbèen, kennah meralus ngo kono seggen rembang mi si nidokken Dèbata sipaluahken jelma manusia. ¹³ Barang isè kalak siso mermasèh atè taba kalak sidèban, kenna hukum ngo ia, oda terolih masèh atè. Tapi belgahen ngo masèh atè dari pada hukum. ¹⁴ Kadè mo gunana alè dengan mula pè nidokken, "Percaya ngo aku," keppèken oda merdengan perulaan? Ndorok ngo kepercayaen sibagidi paluahkensa? ¹⁵ Umpamana mula lot dengan samah Kristen, memerluken gedda janah dèng ma oda lot panganna. ¹⁶ Kadè mo gunana idokken kènè tabasa, "Njuah-njuah mo kènè memakè dekket mangan mènum!" -- keppèken oda iberrè kènè siperlu bana i tanoh èn? ¹⁷ Tosè bagi ngo kepercayaen i mula oda sipacidah merkitè-kitè perulaan, oda lot kadè lapaten kepercayaenta i. ¹⁸ Tah bakunè lot mendokken, "Dèba ia merdangaan mi kepercayaen, dèba nai merdangaan mi perulaan." Aku mendokken taba kènè, "Pacidah mo kuidah kepercayaenmu siso merdangaan mi perulaan, asa kupacidah taba kono kepercayaen merkitè perulanku." ¹⁹ Percaya ngo kènè pellin sada ngo kessa Dèbata, selloh ngo i. Tapi sibolis pè percaya ngo tersèngèt idi janah buradan ngo ia ninganna kadotdot! ²⁰ Tapi alè jelma rumar! Perlu ngo ndia ipacidah taba kènè magahken oda lot lapatenna percaya ukum oda merdengan perulaan? ²¹ Tengen kènè mo si Abraham empungta i. Ijalo Dèbata ngo ia kumarna perulanna. ²² Terridah i sidi nai, kennah nipacidah ngo kepercayaen i merkitè perulaan asa gabè sondel kinisellohna. ²³ Tosè ngo i mi sinidokken Bibèl bagèen, "Percaya ngo si Abraham bai Dèbata, janah merkitè kepercayaenna i, gabè ijalo Dèbata ngo ia simengulaken lemmo atè Dèbata." Kemmulihkenna idi ngo asa igerari si Abraham i, "supan-supan Dèbata." ²⁴ Jadi ntangkas ngo sibettoh bagèndari, ijalo Dèbata ngo jelma i kumarnaken merandal perulaan jelma i, oda ngo pellin kepercayaen sambing. ²⁵ Bagidi ma ngo bang daberru si Rahab daberru luhlah i. Ijalo Dèbata ngo ia kumarna perulanna menjalo perkakap kalak Israel mi bagesna, janah iurupi ngo kalak i lako laus arap dalan sidèban, asa maluah. ²⁶ Codi bagè daging i, mula oda mertendi, enggo matè i; bagi ngo mula percaya pè kita tapi oda merdengan perulaan, enggo matè kepercayanta i, oda lot nè gunana.

¹ Kènè alè denganku! Ulang mo mbuèsu kènè gabè guru. Otang ibettoh kènè ngo mberraten ngo hukum taba guru dari pada sidèbankenna i? ² Nggati ngo kita karina salah. Barang isè oda nung salah merkitè-kitè pekerananna, kalak sibagidi mo simerandalna kalohoon sindorok mengerajai karina dagingna i. ³ Mula sikontam muncung kuda, iuèi ngo kita barang mikè pè ia siteggu. ⁴ Keppel pè bagi ngo. Tukasi pè mbelgah kalohoon keppel i janah iembusken angin ndor kalohoon, tapi dak ipetupung-tupung ngo merkitè kemudi sikètèk kaloon i mi lemmo atè jurumudi. ⁵ Tosè bagi ngo dilahta; tukasi pè kettèk dilahta i tapi kataltil ngo katana, kata jukkat bana sombong. Kètèk ngo api, tapi ndorok ngo ilettup rambah mbellang! ⁶ Tosè ngo dilah i bagè api. Bagè dosken benna kejahaten ngo ia, memmaing kejahaten mi suberri dagingta. Mellekkup ngo ibaing karinana nggelluhta merkitè api simerbenna i narakka i nai. ⁷ Sagumanna matcam binatang pennoro, manuk-manuk, simenjoror bak ikan, ndorok ngo iajar gabè melemmuk ibaing jelma. ⁸ Tapi ukum dilah, oda terpelemmuk barang isè pè i. Dom kejahaten ngo dilah i janah dom racun simemmunuh soh matè. ⁹ Merkitè dilah i siruapken ngo kata menjalo metangkup bai Tuhan janah Bapanta, tapi dilah i ma ngo tong sipakkè lako menumpahi dengan jelma sienggo ihanaken tosè bagè rupa Dèbata. ¹⁰ Arap sada babah ngo ruap kata menjalo metangkup dekket kata sumpah. Patutna oda ndorok nemmuken bagi! ¹¹ Otang oda ngo lot takal laè mengarirken laè malum bak laè mpagit? ¹² Kènè alè dengan, oda terbuahken kayu ara buah kayu zaitun; anggur pè oda terbuahkensa buah kayu ara. Mata laè masin pè, oda terarirkensa laè malum. ¹³ Mula lot i tengah-tengah ndènè kalak mpantas janah merukur, ituduhken mo merkitè perangè selloh merkitè mengulaken simerandal idengani kecereppen ukur bak kebijaken. ¹⁴ Tapi ukum dak cemburu ngo kènè, perncio atè, perlaga janah dak mengait mi diri ndènè sambing, ulang mo igegahken kepantasenna i, ai merkitè bagidi gabè ipebalik kènè nola ngo berita kebennaren bai Dèbata nai. ¹⁵ Oda i sorga nai kepantasen sibagidi, tapi i tanoh èn nai ngo idi, oda bai Tendi Perbadia nai, tapi bai sibolis nai ngo! ¹⁶ Barang bai isè lot cimburu barang mengait mi diri sendiri, i sidi ngo terdapet rukrak dekket matcam bagè kejahaten. ¹⁷ Tapi ukum kepantasen si ni dates idi nai, memellin ngo i janah oda merpengait, ikelloloken ngo merdamè, persaor janah merpenguèi. Idomi masèh atè ngo i janah merperangè selloh. Oda ganggu i janah oda merakkal-akkal. ¹⁸ Merandal ngo buah damè i sinisuanken jelma perdamè.

¹ I dikè nai ngo rohna perrubaten dekket perselisihen i tengah-tengah ndènè? Otang ipas cubellek-cubellek ndènè sidak tong merralo i bagasen diri ndènè nai ngo, imo lako muat kesennangen dunia èn! ² Sèkel ngo kènè, tapi oda dapet, nai gabè memmunuh mo kènè! Nangis mo atè ndènè, tapi oda dapet kènè nipergeddo ukur ndènè, nai gabè merrubat mo kènè janah mermusuh, tapi oda lot kadè dapet kènè nipergeddo ukur ndènè, ai gabè merrubat mo kènè janah mermusuh, tapi oda lot kadè dapet kènè kumarna oda bai Dèbata nai ipido kènè. ³ Janah mula pè ipido kènè, tapi oda ngo menjalo kènè, kerna salah ngo tujuun ndènè mengido i; ai kesennangen ukur dekket kesennangen diri ndènè ngo ipido kènè. ⁴ Kalak siso hot merrukur ngo kènè! Oda ngo ibettoh kènè, mula merdengan kènè dekket dunia èn, meralo ngo kènè dekket Dèbata? ⁵ Barang tah dok atè ndènè, dèra-dèra ngo nidokken sitersurat èn, "Mposi ngo tendi niberrèken Dèbata mi bagasen kita." ⁶ Tapi tukasi pè bagidi, gegohen ngo basa-basa Dèbata niberrèkenna banta i dari pada nipergeddo tendinta i. Kumarna i ngo tersurat ma i Bibèl bagèen, "Ialo Dèbata ngo kalak sindates merukur, tapi masèh ngo atèna midah kalak sincerrep merukur." ⁷ Kerna naidi, uèi kènè mo Dèbata, janah alo kènè mo Sibolis, nai mperrus mo Sibolis i bai ndènè nai. ⁸ Jolmiti kènè mo Dèbata, nai gabè ijolmiti Dèbata mo kènè. Borih kènè mo tangan ndènè, alè kènè kalak perdosa, janah peppanting kènè mo ukur ndènè, kènè alè kalak simerdua ukur! ⁹ Tuhu-tuhu mo kènè peselsel, tangis janah mengandung; mobah mo pertaba-tabanken ndènè gabè tangis, janah lolo atè ndènè i gabè bonek! ¹⁰ Pecerrep kènè mo ukur ndènè i hadeppen Tuhan i, asa ipedates Tuhan i kènè. ¹¹ Kènè alè dengan ulang mo kènè mengerèhè-rèhèi dengan barang mersisalahenken. Barang isè kalak mengerèhè-rèhè dengan barang pè mennalahken dengan samah Kristen, dosken mengkata-katai dekket mennalahken pati-patiin Dèbata ngo i. Jadi mula isalahken kènè ngo pati-patiin Dèbata merlapaten ngo i oda iuèi kènè pati-patiin i, balikna nola gabè ihukumi kènè nola ngo i tupèh. ¹² Sada ngo kessa ndorok merrèken pati-patiin bai jelma dekket menghukum jelma, imo Dèbata; terbakinsa ngo paluahken dekket mengeripasken jelma. Tapi ukum kono isè ngo kono asa ihukumi kono denganmu jelma, ai samah-samah jelma ngo kènè? ¹³ Dèba dengan mendokken, "Ari èn barang baremben naing berkat mo kami mi kuta adoi, janah i sidi mo lebbè kami sitahun èn mertiga-tiga bak mencari." Dengkohken kènè mo sipessèngètku èn. ¹⁴ Oda ngo ibettoh kènè barang kadè masa bai ndènè i ari baremben! Tosè bagè cèmber ngo ukum nggelluh ndènè i, taridah sigejap, nai mersep mo. ¹⁵ Lotiin ngo nemmuken idokken kènè bagèen, "Mula ipadiat Tuhan i nggelluh kami, nai kubahan kami mo èn barang adoi." ¹⁶ Tapi dak ilanjangken kènè ngo rana manggang ndènè. Salah ngo karina kata lanjang sibagidi. ¹⁷ Kernana i, merdosa ngo barang isè memmettoh merandal tapi oda iulaken.

¹ Kènè alè dengan sibèak! Dengkohken kènè mo sipessèngètku èn. Tangis mo kènè janah derru-derru, kerna menggongken simpersuk mo kènè! ² Enggo macik kinibèak ndènè. Oles ndènè i pè enggo ipangan ngitngit. ³ Emmas dekket pirak ndènè i enggo karaten; karatna i nola ngo gabè saksi mengalo kènè janah kerri ngo ipangan karat idi daging ndènè i tosè bagè pemmaing api. Dak ipepulung-pulung kènè ngo harta mayak ari perpodi èn. ⁴ Oda igarar kènè upah simengula i juma ndènè. Dengkohken kènè mo uo-uo kalak i sipepulungken hasil juma ndènè, ai enggo soh uo-uo kalak idi ninganna mengido urup mi pènggel Dèbata, Tuhan Pergegoh Sisotercodi. ⁵ Enggo merlebbih-lebbih irasai kènè kesennangen dunia èn. Bagè cara ipegomok kènè ngo daging ndènè mèma isembellih. ⁶ Ihukum janah ibunuh kènè ngo siso mersalah, janah oda ngo mengalo kalak i taba kènè. ⁷ Kerna nai mbingit mo kènè alè dengan soh mi ari pekeroh Tuhan i. Codi kènè mo bakunè mbingitna peruma-uma i memèma ari perudan dekket udan mbuah bagi ma mèma ari perudan dekket udan mbuah bagi ma mèma buah maharga i tanoh i nai. ⁸ Kènè pè kennah mbingit ngo janah mersampang atè, ai enggo ndessing ari pekeroh Tuhan i. ⁹ Ulang kènè ngutnguten janah ulang mersiselsellen, asa ulang ihukum Dèbata kènè. Èngèt mo! Roh nèngè mo penghukum i! ¹⁰ Tengen kènè mo nabi-nabi simerjamita merkitè-kitè gerar Tuhan i. Mbingit ngo kalak i menggong simpersuk; imo codi kènè. ¹¹ Sayur ntua ngo kalak i dokonen, kumarna mbingit i kalak i. Enggo ma ngo idengkoh kènè tersèngèt kebingiten si Job, janah ibettoh kènè ma ngo, ujungna ipasu-pasu Tuhan i nola ngo ia. Ai permasèh atè mbellen ngo Tuhan i janah permendè basa. ¹² Tapi perlebbè kalohoon alè dengan, imo: ulang mo kènè mersumpah-sumpah mi langit i barang mi tanoh barang mi kadè sambing pè tupèh. Dokken kènè mo "Uè" mula uè kin, "Oda" mula oda kin, asa ulang ihukum Tuhan i kènè. ¹³ Mula lot kalak mpersah i tengah-tengah ndènè, mersodip mo ia. Mula lot merlolo atè, merendè mo ia memoji Dèbata. ¹⁴ Mula lot mersakit, idilo mo pengendeng kuria. Isodipken pengendeng i mo simersakit i janah ialunken mo minak merkitè-kitè gerar Tuhan i. ¹⁵ Ipemalum sodip simenodipken taba Tuhan ibagasen kepercayaen ngo sakit i. Ipemalum Tuhan i mo ia, janah isasa mo karina dosa nibahankenna. ¹⁶ Kernana i mersisasaan dosa mo kènè janah mersisodipenken, asa ipemalum kènè. Mergegoh kalohoon ngo sodip simenguèi Dèbata. ¹⁷ Jelma ngo bang si Elias bagè kita. Mertuhu-tuhu ngo isodipken asa ulang roh udan, gabè oda mo tuhu roh udan tengah empat tahun dekkahna. ¹⁸ Enggo kessa bagidi, mersodip nola mo ia, nai roh mo udan i langit i nai, gabè iberrèken tanoh i mo hasilna. ¹⁹ Kènè alè dengan! Mula lot i tengah-tengah ndènè nai siso menguèi nèngè mi kata Dèbata, nai lot nola menogikensa balik taba Dèbata, ²⁰ èngèt kènè mo kata èn: Paluahken tendina ibas kemmatèen nai ngo kalak barang isè menogiken perdosa balik ipas dosana nai mendahi Dèbata, janah mèduk ngo dosa iampuni kemulihkenna i.