HEBER

HEBER

¹ Ukum arnia nggati ngo mengerana Dèbata taba empungta merkitè-kitè nabi-nabi janah merbagè ngo carana. ² Tapi i ari perpodi èn mengerana ngo Ia taba kita merkitè AnakNa. Asa merkitè AnakNa i ngo ihanaken Dèbata sagumanna silot i janah AnakNa i ngo merhak mersidasaken karinana i. ³ Bendella kehejiin Dèbata siemercuhaya i ngo ia, janah codi mi rupa Dèbata sendiri. Ia ma ngo menjaga sagumanna silot i merkitè kataNa simerkuasa i. Enggo kessa Ipepanting jelma idi ipas dosana nai, kundul mo Ia i babo tahta kerajaen i sorga rebbak dekket Dèbata Perkuasa sitermurmur i. ⁴ Bagè gerar kesurungenna i mengatasi karinana nasa gerar niberrèkenna taba malaèkat, bagi ngo kesurungen kuasaNa pè bai malaèkat-malaèkat idi nai. ⁵ Oda nung idokken Dèbata taba malaèkat kata bagèen, "Kono ngo AnakKu; sidari èn ngo kono Kutubuhken." Oda ngo pennah idokken Dèbata taba malaèkat paina pè bagèen, "Aku ngo gabè Bapana, janah Ia gabè AnakKu." ⁶ Tapi sinderrang ipasulak Dèbata AnakNa Situaan i mi dunia èn, idokken Dèbata ngo kata èn, "Kennah mersembah taba Anak idi ngo karina malaèkat Dèbata." ⁷ Ukum tersèngèt malaèkat, bagèen ngo idokken Dèbata, "Gabè angin ngo ibaing Dèbata malaèkat-malaèkatNa, janah naposoNa gabè api simergollah-gollah i." ⁸ Tapi ukum tersèngèt Anak idi, idokken Dèbata, "Kono ngo Dèbata janah soh mi amman sumendah ngo kono Raja! Sènteng ngo PemerèntahenMu." ⁹ "Ikellemmoken kono ngo ketègerren, janah ikecegoken kesalahen; idi ngo sebabna asa ipilih Dèbata kono, alè Dèbata, janah ipesampang atèMu merkitè-kitè kessangapen, lebih bai denganMu nai!" ¹⁰ Idokken Dèbata ma ngo, "Kono ngo alè Tuhan menghanaken tanoh èn i mulana i, janah tanganmu sendiri ngo menempa langit, ¹¹ Mersep ngo karina i seggen, gabè mumuk bagè oles; tapi hot ngo Kono oda mobah. ¹² Iserpih Kono ngo suberri dunia èn bagè oles, janah igancihi Kono dekket sidèban. Tapi ukum kono hot ngo oda mobah janah oda merpunca ukum nggelluhmu." ¹³ Oda nung idokken Dèbata taba malaèkatna siapaina pè bagèen, "Kundul mo kono i kamuhunKu, mèma kubaing karina musuhmu mersembah merkuraja i hadeppenmu." ¹⁴ Mula bagidi, bakunè ngo keppè malaèkat-malaèkat Dèbata idi? Karinana ngo kalak i Tendi simengkebasi Dèbata, janah ipasulak Dèbata lako megurupi kalak sinaing menjalo keluahen niperbagah-bagah Dèbata.

¹ Kerna naidi kennah memmes ngo mencèkèp peddah-peddah sienggo sidengkoh, asa ulang sitadingken kepercayanta. ² Salang tennah Dèbata nipessoh malaèkat-malaèkat taba empungta tuhu ngo mula oda iulaken bak oda iuèi jelma, ihukum ngo jelma i rembang mi si, ³ makinsa nola mo kata kelluahen èn siemrgegohen asa tennah i, otang makin magona mo kalak siso merrèken ukurna taba kelluahen i. Ai Tuhan sendiri ngo perlebbè mengeranaken i janah memmes ipesakat kalak simendengkoh kata kelluahen i taba kita. ⁴ Dekket ngo Dèbata mengindangken kesaksiin kalak idi i merkitè-kitè matcam bagè tanda kelengangen dekket kegegohen bagi merkitè pemerèken Tendi Perbadia mengèkutken lemmo atèNa. ⁵ Oda ngo menjalo kuasa malaèkat-malaèkat Dèbata lako menggem-nggemmi dunia rembaru seggen i, imo dunia siniterèngètenta ènda. ⁶ Balikna ibas Bibèl tersurat bagèen, "Kadè mo pana jelma i alè Dèbata, asa pellè ièngèt kono? Barang pè jelma i, keppèken iperdatèken Kono ia! ⁷ Sigejap ibaing Kono ngo ia ncerreppen asa malaèkat; nai gabè iberrèken Kono nola ngo bana kemuliaan dekket kessangapen, ⁸ janah gabè ipetunduk kono ngo sagumanna silot mi terruh gemgemmenna." Mula idokken Dèbata menghanaken jelma, "Perkuasa mi sagumanna silot", merlapaten ngo i, oda lot barang kadè pè mak i terruh kuasa ni jelma. Bagidi nola pè i, oda ngo lot siidah bagèndari merkuasa jelma i mi karinana. ⁹ Tapi enggo siidah Jesus merkuasa. Ibaing Dèbata ngo ia sigejjap ncerreppen asa malaèkat, asa merkitè mendè basa Dèbata, lebbè matè Ia mengkepkep karinana jelma. Bagèndari siidah ngo enggo iberrèken bana kemuliaan dekket kesangapen kumerna enggo menggong simbernit Ia, pella soh matè. ¹⁰ Enggo patutna Dèbata situmempa sagumanNa silot i -- memmaing Jesus i bagidi merkitèken kinipersuk. Asa merkitè bagidi, iarahken Jesus nterrem jelma dekket merkesangapen rebbak dekketsa, ai Ia ngo memmuka dalan bai kalak asa ndorok ipaluah. ¹¹ Itebbus Jesus ngo jelma idi ipas dosana nai, asa gabè ummat Dèbata Simbadia kalak i. Nai gabè sada Bapa mo siemenebus i dekket sitertebbus pè. Kumarna naidi ngo asa oda pella mèla Jesus mendokken kalak idi anggiNa. ¹² Nina Jesus taba Dèbata, "Kusukutken ngo gerarmu taba karina anggingKu, janah Kupoji ngo Kono i tengah-tengah kuria." ¹³ Nai dèng ma, "Dèbata ngo kubaing kepposenKu." Nai Idokken Jesus dèng ma, "Isèn ngo Aku dekket anak-anak sienggo niberrèkenmu bangKu i alè Dèbata." ¹⁴ Kumarna anak-anak sinidokken Jesus idi imo jelma siuè matè, jadi Jesus idi pè dos ngo bagè jelma i janah nggelluh tosè bagè jelma i. Ibaing pè bagidi asa merkitè permatèNa idi, italuken Sibolis simerkuasa i kemmatèen i. ¹⁵ Merkitè bagidi gabè Ipaluah mo jelma sienggo niperhamba mbiar midah kemmatèen i sidekkah nggelluhna. ¹⁶ Taridah ngo i sidi, oda ngo malaèkat nisarihkenNa, tapi pemparen si Abraham ngo. ¹⁷ Merlapaten ngo idi kennah gabè dos kalohoon ngo Ia dekket anggina ibas karinaNa. Janah merkitè sibagidi gabè Imam Huntuun ngo Ia bai kalak i janah kepposen bak permasèh atè tikanNa mengkebasi Dèbata Ia lako mahan kesasaan dosa ni kalak i. ¹⁸ Nai merkitè bagidi gabè iurupi mo kalak sienggo terunjunen i, kerna ia sendiri pè enggo kin ngo nung iunjuni janah menggong simpersuk.

¹ Kerna naidi alè dengan sienggo nidiloon Dèbata! Mbages mo pikiri kènè bak radumi kènè tersèngèt Jesus i: Ipasulak Dèbata ngo Ia gabè Imam Huntuun ibas agama sikuèkutken. ² Sètia ngo Jesus i bai Dèbata sienggo memilihSa mi bahaan i, bagè si Musa tikala i, sètia mengulaken ulaan i tengah-tengah ummat bak Bages Dèbata. ³ Kemmulihkenna idi patut ngo Jesus i menjalo kesangapen lebbih daripada si Musa. Ai kalak sipeliasken bages ngo mersangapen dari pada bages i sendiri. ⁴ Gennep bages lot ngo sipekadèken, tapi ukum pekadèken sagumanna idi, imo Dèbata. ⁵ Kettoken ngo si Musa mengula i tengah-tengah ummat Dèbata, janah magahken tersèngèt sinaing pettararen Dèbata luas. ⁶ Tapi ukum Kristus kepposen ngo bagè Anak simertanggung jabab mi Bages Dèbata. Janah kita ngo Bages Dèbata, mula tetap nggasang janah tok ukurta soh mi puncana lako menjalo niharapkenta i. ⁷ Kumarna naidi bagè pendokken Tendi Perbadia, "Sidari èn tikan idengkoh kènè sora Dèbata, ⁸ ulang peppihir kènè ukur ndènè, bagè empung ndènè sipeppihirken ukurna, tikan memberontak i kalak i taba Dèbata, janah iunjuni kalak i Dèbata i padang gurun. ⁹ ’I sidi ngo iunjuni empung ndènè i Aku janah ioji Aku,’ nina Dèbata, ’pada hal enggo ngo idah kalak i siKubakin sidekkah empatpuluh tahun dekkahna.’ ¹⁰ Kerna naidi ngo asa mellaga Aku midah kalak i janah Kudokken dak laling ngo ukur kalak i janah oda uè menguèi katangKu. ¹¹ Sanga mersumbiah Aku i lagangku i, siso ndorok mbengket kalak i mi bekkasKu i!" ¹² Asa alè dengan perdatèken kènè mo, asa ulang lot sada kalak pè bai ndènè nai perukur jahat janah oda uè percaya, gabè merbalik ia mennadingken Dèbata singgelluh i! ¹³ Jadi mersipessèngèt-sèngèten mo kènè gennep ari, asa ulang lot barang isè bai ndènè nai ioto-otoi dosa i gabè ialo Dèbata, sinderrang terdokken nggelluh dèng kita; "Sidari èn" bagè pendokken Bibèl i. ¹⁴ Ai dengan sada ulaan Kristus ngo kita, mula memmes sijèmak sienggo sipercayai i mulana i nai soh mi ari podi. ¹⁵ Ai bagèen ngo tersurat ibas Bibèl, "Sidari èn tikan idengkoh kènè kata Dèbata, ulang mo peppihir kènè ukur ndènè, bagè empung ndènè peppihirken ukurna, tikan memberontak kalak i taba Dèbata." ¹⁶ Isè ngo sipeppihirken ukurna tukasi pè idengkoh kata Dèbata? Imo kalak Israel siniuluken si Musa mbungkas i Mesir nai. ¹⁷ Janah taba isè ngo mellaga Dèbata empatpuluh tahun dekkahna? Otang taba kalak simerdosa sindabuh janah matè i padang pasir ngo? ¹⁸ Taba isè ngo idokken Dèbata pella mersumbiah ia mendokken, "siso ndorok mbengket kalak i mi bekkasKu i," otang taba kalak simemberontak taba Dèbata ngo? ¹⁹ Sibettoh ngo i asa oda iberrè Dèbata pè bekkas i ibengketti, kumarna oda percaya ngo kalak i bai Dèbata!

¹ Kerna naidi siperdatèken mo dirinta, asa ulang lot bai ndènè nai gabè oda dekket mi pentadiin i, tukasi pè bagah-bagah i soh bagèndari dèng ngo i merdalan. ² Ai banta pè enggo isukutken Sukuten Kelluahen i, tosè bagè bai kalak idi. Tapi ukum bai kalak i oda lot gunana sukuten i. Ai tikan idengkoh kalak i kata i, oda ngo percaya kalak i bai Dèbata. ³ Tapi ukum kita sipercaya bai Dèbata, iberrèken ngo banta bekkas pentadiin, sienggo niperbagah-bagah Dèbata bagè nidokkenna i, "Pella kusumpahken ninganna mellaga aku, mak ndorok mbengket kalak i mi bekkas pentadiinKu!" Idokken Dèbata bagidi tukasi pè enggo pul ulanNa kessa nai Ihanaken dunia èn. ⁴ Ukum tersèngèt ari pepituken i, idokken Dèbata ngo bagèen ibas Bibèl, "Mentadi ngo Dèbata i ari pepituken i." ⁵ Janah idokken dèng ma ngo bagèen, "Mak ndorok mbengket kalak idi mi bekkas pentadinKu idi." ⁶ Asa ukum kalak siperlebbè mendengkoh kata Sukuten Kelluahen i, oda ngo ipaduè mbengket mi bekkas pentadiin i, kumarna oda percaya kalak i. Mula bagidi, tentu lot ngo kalak sidèben ndorok mbengket mi bekkas pentadiin i. ⁷ Ai enggo itentuken Dèbata nola sada ari sidèban sinidokkenna "Ari èn", imo nidokken Dèbata merkitè si Daud, "Sidari èn tikan idengkoh kènè kata Dèbata, ulang peppihir kènè ukur ndènè." ⁸ Ukum enggo kin ngo iberrèken si Josua kalak i pentadiin niperbagah-bagah Dèbata, tentu oda pella dokkenken Dèbata nèngè terrèngèt kata sada ari sidèban. ⁹ Jadi lot dèng ngo tikki bai ummat Dèbata lako mentadi bagè niperbagah-bagah Dèbata mi bekkas pentadiin i ari peppituken i. ¹⁰ Ai kalak sienggo menjalo ari pentadiin si niperbagah-bagah Dèbata idi, mentadi ngo kalak i, ipas ulanna nai karinana, tosè bagè Dèbata pè mentadi ngo ipas ulanna nai. ¹¹ Kerna naidi sikerencetken mo memengketti bekkas pentadiin niperbagah-bagah Dèbata idi. Ulang mo lot barang isè pè siso mbengket bagè kalak i arnia, kumarna oda percaya bai Dèbata. ¹² Ai nggelluh ngo kata Dèbata janah mergegoh; tajemmen asa peddang sidua babah. Mennusuk ngo kata i mi kessah dekket mi tendi; soh mi sendihi bak otok-otok pe, gabè ibettoh ngo soh mi simbagesna sinipikiren dekket sinisura-sura jelma. ¹³ Oda lot mboni barang kadè pè sinihanakenna idi i hadeppen Dèbata nai, ai ntarar ngo i karinaNa. Kennah merdabuh-dabuh ngo kita karinana baNa. ¹⁴ Èn pè, kumarna lot ngo banta Imam Huntuun Mbellen sienggo mbengket mi hadeppen Dèbata -- imo Jesus Anak Dèbata; sicèkèp mo memmes kata kepercayaen i. ¹⁵ Imam Huntuun i ngo denganta mengerasaken karina kinindotènta. Enggo iunjun Ia ibas karinana, tosè bagè kita; tapi ukum Ia oda merdosa! ¹⁶ Kerna naidi mersampang atè mo kita mendapetken Dèbata simenggem-nggemmi i merkitè masèh atè, janah asa terolih masèh atè kita mahan pengurupi banta tupung kasèana.

¹ Gennep imam huntuun sinipilih ibas ummat nai, janah ipebangkit lako mengula i hadeppen Dèbata bagè utusen jelma lako mèlèken pèlèen kesasaan dosa bai Dèbata. ² Ia pè nggati ndotè, janah kemmulihkenna i ma gabè ndorok ngo ia melamlam taba kalak siso memettoh kadè janah kalak laling. ³ Kumarna ia pè ndotè ngo, jadi ia pè kennah memmèlèken pèlèen perdosaan ngo, oda pellin pèlèen perdosaan bai ummat sambing, tapi dekket ngo bai dirina sendiri. ⁴ Oda lot barang isè pè mengaitken kessangapen sibagidi mi dirina sendiri. Dèbata ngo mendilo ia gabè imam huntuun -- tosè bagè si Aron. ⁵ Bagidi ma ngo Kristus. Oda ngo ipebangkit dirina gabè Imam Huntuun, tapi Dèbata ngo pebangkitkenSa mi ulaan i, bagè nidokkenna i, "Anakku ngo Kono; Sidari èn ngo Kono Kutubuhken!" ⁶ Idokken dèng ma ngo ipas sidèban, "Gabè Imam ngo kono soh mi amman sumendah; mengèkutken horong si Melkisedek." ⁷ Sinderrang nggelluh i dunia èn dèng Jesus tangis ngo Ia mèlèken pengidonna merdengan èlèk-èlèk taba Dèbata, sindorok paluahkenSa i kemmatèen nai; janah kumarna iuèi ngo Dèbata, gabè iuèi Dèbata ngo pengidonna i. ⁸ Tukasi pè Anak Dèbata ngo Jesus i, Iguruken ngo penguèenken merkitèken nigongkenNa simpersuk i. ⁹ Enggo kessa gabè sondel ibakin kinimerandalna, gabè Ia mo benna kelluahen bai jelma simenguèisa soh mi amman sumendah, ¹⁰ nai gabè ipebangkit Dèbata mo Ia gabè Imam Huntuun, bagè Imam Melkisedek! ¹¹ Matcam dèng ngo nemmu bagèna dokkenken nami tersèngèt Jesus Imam Huntuun i taba kènè, tapi mahal ngo kuakap kami peterangken, kerna mahal ngo iantusi kènè. ¹² Ukum mertimbangken dekkah ndènè, enggo mo patut kènè nemmuken gabè guru, tapi mengidah keteridahenna, perlu dèng ngo kènè merguru bai sidèban nai terrèngèt dangaan peddah Dèbata; ai oda terpangan kènè dèng pangaan ngkerras, tapi kennah mènum susu dèng ngo kènè lebbè. ¹³ Barang isè mènum susu dèng tosè bagè Anak mbara ngo ia, ai mdèng iantusi kadè bennar janah kadè salah. ¹⁴ Ukum pangaan ngkerras, pellin bai simbelgah ngo i, sienggo pecemmal-cemmalken dirina ndorok membijaken kadè simerandal janah kadè merroha.

¹ Kerna naidi aci mo siguruken nola sidebanna i tersèngèt kinitamas nggelluh Kristen janah ulang pellin memperdatèken henjellen perlebbè peddah agamanta. Ulang mo lebbè siterèngèti nèngè peddah buka dasar tersèngèt Kristus, imo kennah mentadi jelma idi ipas ulaan siso merguna i nai dekket kennah percaya bai Dèbata; ² barang pè peddah tersèngèt peridiin barang pè mengampèken tangan bai jelma; bang pè balik nggelluh enggo kessa matè dekket hukum seggen. ³ Tapi mula iijinken Dèbata sibengketti mo peddah lebbih mbages, janah bennar. ⁴ Kalak sienggo merbalik mennadingken Dèbata, bakunè nola mo menguluken kalak i asa molih? Ai kalak sienggo nung ibagasen kecihuren Dèbata, janah sienggo nung mengakapi kinitaboh pasu-pasu i sorga nai, janah sienggo nung iiani Tendi Perbadia, ⁵ ai ibettoh kalak i ngo, merandal ngo kata Dèbata i, janah enggo mengerasaken tanda kelengangen ari segen i. ⁶ Mula gabè merbalik nola kalak idi, otang enggo mahal mengarak kalak idi asa gabè tobat nola kalak i mengolihi ipas dosa-dosana nai, ai gabè mengulaki ipersilangken kalak i nola ngo Anak Dèbata, dekket gabè ipemmèla jelma nterrem nola mo diriNa. ⁷ Tanoh simengencep udan siroh bana janah menubuhken suan-suaan merandal bai jelma simengulakensa, tanoh sibagidi ngo ipasu-pasu Dèbata. ⁸ Tapi ukum tanoh simennubuhken rih dekket dori, oda lot gunana tanoh sibagidi, sempetta nai ngo pèmanna i puncana janah gabè itutungi mo ia gabè kerri. ⁹ Tapi kudokken kami pè bagidi alè dengan sinikekellengen, ukum tersèngèt kènè, tok ngo kami simerandalna i ngo patohi kènè, imo tersèngèt kelluahen ndènè i. ¹⁰ Adil ngo Dèbata. Oda ngo lupa ia mengèngèt sienggo iulaken kènè baNa. Dak ièngèt ngo kelleng atè ndènè baNa i janah ièngèt ngo pengurupi ndènè bai dengan Kristen sidèbanna i. Janah soh bagèndari ngo iberrèken kènè pengurupiin i. ¹¹ Ipergeddo ukur nami asa karinana kènè mengkerencetken sibagidi, lako pememmesken pengharapen sijaloon ndènè i puncana. ¹² Ulang mo gabè perhangkè kènè. Codi kènè mo kalak sipercaya bai Dèbata, janah kumarna sobar memèma-mèma, gabè ijalo mo niperbagah Dèbata. ¹³ Tikan merpadan Dèbata dekket si Abraham, mi dirina i ngo mersumpah Dèbata magahken kennah ipessaut ngo karina niperbagahNa i. Nai kumarna oda lot nèngè datessen bai Dèbata nai, gabè merjandi ngo Dèbata ipas gerarNa i. ¹⁴ Nina ngo, "Kupasu-pasu ngo ko janah nterrem ngo kubaing pinemparmu." ¹⁵ Jadi kumarnaken sobar ngo si Abraham memmèma, gabè ijalo mo niperbagah Dèbata bana i. ¹⁶ Ukum jelma mersumpah, mersumpah ngo ia merkitè gerar sidèban sinidatesna, janah merkitè mersumpah i ia, gabè oda nèngè terkekadè ia. ¹⁷ Ipergeddo Dèbata bai jelma sinaing menjalo niperbagah-bagahNa i, asa tuhu-tuhu ikettoki, ukum Dèbata oda uè mengobah barang kadè sienggo niperbagahNa. Kerna naidi ngo asa ipetetah Dèbata nola bagah-bagahNa i. ¹⁸ Oda mobah-obah sidua pengkah èn; ai merkitè-kitè jandi dekket bagah-bagah i, oda ngo uè Dèbata merluap. Kerna naidi, kita sienggo ilènggemmi Dèbata merpengharapen tuhu-tuhu menjalo sienggo ihantari idi i podi ari banta. ¹⁹ Asa dosken sauh ngo pengharapen i, hot janah tettap banta kerna mbages ngo i tertanem. Pengharapen i menelpus soh mi kirè-kirè Bilik Simbadia kalohoon i Bages Dèbata i sorga. ²⁰ Enggo irentes Jesus dalan laus mi bekkas i, janah enggo mbengket mi sidi Imam Huntuunta i, janah merian i sidi ngo ia soh mi amman sumendah mengèkutken horong si Melkisedek.

¹ Ukum si Melkisedek raja i kuta Salem janah imam Dèbata Sindates i ngo ia. Tikan balik geraha si Abraham janah enggo mèduk raja-raja italuken, isimbak-simbak janah ipasu-pasu si Mèlkisèdèk mo ia. ² Nai iberrèken si Abraham mo bai si Melkisedek sipersipuluh harta taban-tabanna i. (Melkisedek lapatenna perlebbè imo "Raja Adil".) ³ Ukum tersèngèt si Melkisedek èn, oda lot dapet keterangen barang i dikè pè, tah lot bapana barang inangna bak asal usulna pè, oda lot keterangen tersèngèt pertubuhna barang permatèna pè. Tosè ngo ia bagè Anak Dèbata; imam ngo ia soh mi amman sumendah. ⁴ Jadi siidah ngo barang bakunè belgahna kesangapen si Melkisedek i; pella ngo iberrèken si Abraham empungta persadaan i sipersipuluh harta taban-taban i bana. ⁵ Ipas hatoren agama Jahudi itentuken ngo, kennah gararen kalak Israel ngo sipersipuluh i hartana nai bai marga Lewi sienggo gabè imam tukasi pè idi kaka-anggina sendiri, ai samah-samah pemparen si Abraham ngo kalak i. ⁶ Tukasi pè oda marga Lewi si Melkisedek tapi ijalo ngo sipersipuluh bagian ipas milik si Abraham nai, janah ipasu-pasu ngo si Abraham sienggo kessakaten bagah-bagah Dèbata. ⁷ Jadi oda termadaken simemasu-masu ngo belgahen dari pada sinipasu-pasu. ⁸ Ukum imam-imam simenjalo sipersipuluh bagian i, jelma biasa ngo ia janah matè. Tapi ukum si Melkisedek simenjalo sipersipuluh bagian bai si Abraham nai, nggelluh ngo soh mi amman-sumendah, bagi ngo tersurat ibas Bibèl. ⁹ Jadi terdokken ngo si Lewi -- sendiri pè dekket ngo menggarar sipersipuluh bagian i taba si Melkisedek merkitè si Abraham, tukasi pè pinemparna kin ngo nemmuken simenjalo nipersipuluh bagian bai bangsa Israel nai. ¹⁰ Tuhu sinderrang pejumpa si Melkisedek dekket si Abraham, oda dèng ngo tubuh si Lewi; tapi ibagasen daging empungna i ngo enggo ia. ¹¹ Asa mula pè iberrèken Dèbata pati-patiin i bai bangsa Israel janah merpengguruun bai marga Lewi, tapi kumarna oda iulaken imam-imam marga Lewi i seppè kalohoon, tukasi pè kennah ulankenna ngo nemmuken i, jadi kennah lot ngo Imam sidèban imo horong si Melkisedek; oda nèngè Imam horong si Aron! ¹² Jadi mula mobah ngo perkundul imam, pati-patiin idi pè kennah mobah ngo. ¹³ Tuhanta i ngo sinitèmbak kata èn. Ai marga sidèban ngo ia, janah oda nung i margaNa nai mengulaken ulan imam. ¹⁴ Karina kalak mettoh, marga Judèa ngo Tuhanta i janah oda nung iranaken si Musa i marga idi nai sienggo gabè imam. ¹⁵ Makin ntangkas kalohoon ngo sinidokken èn, merkitèken pekiroh sada kalak imam sidèban bagè si Melkisedek. ¹⁶ Ipebangkit pè ia gabè imam, oda ngo kumarnaken permargaan, tapi kemmulihken kuasana dekket nggelluhna siso uè salpun i ngo. ¹⁷ Ai nina ngo ibas Bibèl, "Gabè imam ngo kono soh mi amman-sumendah, mengèkutken hatoren si Melkisedek." ¹⁸ Jadi merkitè bagidi, oda nèngè perlu hatoren sinderbi, kumarna oda merguna. ¹⁹ Oda lot kadè terbaing pati-patiin i lako memmaing sondel kinimendè. Kumarna naidi ngo asa iberrèken banta sada pengharapen merandal, janah merkitèken i ndorok sijolmiti Dèbata. ²⁰ Janah dèng ma, merkitèken mang-mang Dèbata ngo i. Ukum sidèbanna idi oda ngo pella merkitè mangmang Dèbata ia ipebangkit. ²¹ Tapi ukum Jesus ipebangkit Dèbata gabè imam merkitè-kitè mang-mang ngo, ai nina ngo, "Enggo imangmangken Tuhan i, janah oda nèngè iondari sienggo niruapkenNa i. ’Imam soh mi amman sumendah ngo kono.’ " ²² Asa merkitèken i, Jesus ngo gabè jaminen padan simerandalna kalohoon i. ²³ Mèduk ngo kalak i gabè malim, tapi kumarna mermatèen ngo kalak idi karina, gabè oda ngo ndorok kalak idi menerusken ulanna. ²⁴ Tapi ukum Jesus nggelluh ngo soh mi amman sumendah, jadi hot ngo ia imam janah oda suberrang kemalimenNa i taba sidèban. ²⁵ Kerna naidi terbaing Jesus ngo paluahken jelma i mi kessennangen soh mi amman sumendah ninganna mengondiken kita mi Dèbata. ²⁶ Jadi Jesus ngo Imam Huntuun si siperluken i, simbadia, siso mersalah janah sienggo ikella bai perdosa nai, janah ipeddates mi bekkas datessen asa langit. ²⁷ Oda pella bagè imam huntuun sidèbanna i ia, dak gennep ari mèlèken pèlèen tersèngèt dosana perlebbè, nai pè asa dosa bangsa i. Ukum Jesus sikali ngo kessa ibahanken i, tikan Ipèlèken i diriNa mahan pèlèen. ²⁸ Ukum pati-patiin idi, ipebangkit ngo jelma perdosa i gabè imam huntuun. Tapi i podi pati-patiin idi nola, iperbagah-bagah Dèbata ngo merdengan mangmang sada Imam Huntuun, imo Anakna i sienggo sondel merandal soh mi amman sumendah.

¹ Jadi èn mo pangkalna ipas rana èn: Lot ngo banta Imam Huntuun sibagidi; kundul i kamuhun Dèbata simeheji idi i sorga. ² Simenjamotken ulaan Imam Huntuun i bekkas Meheji janah Simbadia, ibagasen Undung-undung Jahowa si Tuhanna, imo si nipajek Tuhan i, oda ngo jelma peliasken. ³ Karina imam huntuun sinipebangkit ngo, lako mèlèken pèlèen bai Dèbata. Bagi ma ngo Imam Huntuun èn. Jadi kennah lot ma ngo milikna mahan pèlèenkenna. ⁴ Ukum i tanoh èn Ia, oda ndorok Ia gabè imam, kumarna enggo kin lot imam-imam simemmèlèken pèlèen bagè sinihatorken pati-patiin i. ⁵ Asa ukum ulaan sinijamotken imam-imam idi, pellin lèndung janah cuman-cuman si ni sorga i ngo i, bagè sienggo ibagahken Dèbata taba si Musa kin, tikan naing ipajek si Musa jerro i, "Èngèt janah tengen!" nina, ’Bahan mo tosè bagè siniidahmu i babo ndelleng i.’ ⁶ Tapi bagèndari Jesus terolih ulaan imam, ndaoh seppèen daripada ulaan imam nijamotken kalak idi nai. Ai padan nibakin Dèbata dekket jelma merkitè-kitè Jesus, i ngo padan simerandalna kalohoon. ⁷ Ukum oda lot kurangna bagah-bagah siperlebbè i, oda pella perlu nèngè ibakin padan sipeduaken i. ⁸ Tapi enggo idah Dèbata barang kadè kurangna taba ummatNa, gabè idokken Dèbata nola mo, "Èngèt mo! Roh mo tikkina, Kubakin mo padan rembaru bai pinempar kalak Israel dekket marga Judèa. ⁹ Oda dos padan i dekket padan sienggo Kupadanken bai empung kalak i, imo tikan Kuarak kalak idi i Mesir nai. Ai oda hot kalak i menjèmak padan sienggo Kupadanken bai kalak i; kerna naidi oda nèngè Kusarihken kalak i. ¹⁰ Tapi bagèndari èn mo padan sikupadanken bai bangsa Israel, sinaing Kuberrèken i luas; tikan ari perpodi, nina Tuhan i. Kuberrèken mo pati-patinKu mi bagasen pusuh peratèen kalak i, janah kuokirken mi bagasen atè-atè kalak i. Aku ngo gabè Dèbata kalak i, janah kalak idi mo gabè ummatKu. ¹¹ Oda pella nèngè iajari denganna sada bangsa kalak i barang pè memagahken taba kaka anggina ’Tandai mo Tuhan.’ Ai karinana mo kalak i menandai Aku mulai anak-anak soh mi simbelgah pè. ¹² Kuampuni mo karina kessalahen kalak i, janah oda nèngè kupèngèt-èngèt dosana i." ¹³ Merkitè iberrèken padan sirembaru i, gabè oda nèngè perlu padan siperlebbè idi ibaing Dèbata; janah karina siso perlu lako salpun mo i.

¹ Ipas padan siperlebbè idi pè, lot ngo nemmuken hatoren perpulungen janah lot ma ngo bang jerro nipekkadè jelma. ² Ibahan ngo ipas jerro i kan lebbè sada bekkas mergerar Bekkas Simbadia. Isidi ngo perpelitaan dekket mèja bak roti ipèlèken bai Dèbata. ³ Tapi i podi kirè-kirè peduaken i lot bekkas igerari Simbadia Kalohoon. ⁴ Lot ngo i sidi langgaten perdahupaan ilantak dekket buradda. I Bagasen Pèti i lot gori-gori emmas sin manna, bagidi ma bak tongket si Aron simertunas i dekket dua lèi batu bekkas pati-patiin Dèbata sisipuluh i isuratken. ⁵ I babo Pèti i lot gombaren Kerubim, tuduh-tuduh ngo i, magahken i sidi ngo Dèbata. Ngkèrbang ngo kabengna i babo bekkas pemispisen daroh mahan tanda kesasaan dosa. Tapi oda terpeterrang i bagèndari sada-sada. ⁶ Bagidi mo ipekkadè meratur. Nai gennep ari mo mbengket imam mi bilik kan lebbè lako mengulaken ulaan kepengendengenken. ⁷ Tapi ukum mi bilik peduaken i, pellin imam huntuun ngo kessa ndorok mbengket mi sidi, i pè sikali sitahun ngo kessa. Janah kennah merembah daroh ngo ia mahan pèlèen bai Dèbata kumarna dirina sendiri dekket kumarna dosa-dosa siniulaken arap siso nibettoh bangsa i. ⁸ Merkitè idi iajari Tendi Perbadia ngo kita sidekkah lot dèng bilik lebbè-lebbè jerro i, dalan mbengket mi bilik Simbadia Kalohoon, simadèng mbuka. ⁹ Tuduh-tuduh mi tikki èn ngo i; ai ukum merkitè pinakan ngo ipèlèken, oda terbakin i petettahken ukur simemmèlèken. ¹⁰ Kerna pellin acara simerdemmu mi pangaan, ènumen, dekket matcam bagè sipeppantingken sambing ngo kessa i; hatoren perdagingen, soh dapet ketikana iperimbaru Dèbata nola. ¹¹ Tapi enggo roh Kristus. Ia ngo Imam Huntuun perolihen sinaing roh i. Ukum bages jerro bekkasNa mengulaken keImamenna idi imo bages termurmuren janah termendèen, oda ngo jelma memajek, lapatenna oda i dunia èn nai ihanaken. ¹² Ai pellin sikali ngo kessa ibengketti Kristus Bilik Simbadia kalohoon i soh mi sidekkahna. Oda ngo daroh kambing bajar barang daroh anak lembu iembah mahan pèlèen, tapi darohna sendiri ngo asa merkitè darohNa i, ipaluah kita soh mi amman sumendah. ¹³ Ai salang daroh kambing bajar dekket daroh lembu jenggi bak abu anak lembu mula ipispisken taba simellamun gabè mpanting ngo perdagingen perluar i; ¹⁴ makinsa nola mo daroh Kristus i. Ai merkitè Tendi simenengteng i, ipèlèken Kristus ngo diriNa sendiri bai Dèbata mahan pèlèen siso lot kurangna. DarohNa i ngo peppantingken perukurenta ipas ulaan siso kasèa idi nai, asa ndorok kita menguèi Dèbata singgelluh i. ¹⁵ Kumarna naidi ngo asa ibaing Dèbata nola padan sirembaru merkitè Kristus asa ijalo sienggo ni diloon Dèbata idi pasu-pasu soh mi amman sumendah niperbagah-bagahna i. Karinana i ndorok masa, kemmulihken enggo lot matè, imo Kristus; janah kumarna matè i Ia, gabè maluah mo jelma i pas lènggemmen padan sinderbi idi nai. ¹⁶ Ukum lot surat harta tading-tadingen, kennah lot ngo buktina enggo matè simemmaingken surat tading-tadingen i. ¹⁷ Ai lebbè matè ngo simemmaing surat harta tading-tadingen i, asa sah surat i, tapi ukum nggelluh dèng ngo ia, oda dèng ngo sah surat i. ¹⁸ Kumarna naidi ngo asa padan siperlebbè i pè isahken merkitè daroh. ¹⁹ Ai enggo kessa iranaken si Musa karinana tennah bak pati-patiin Dèbata taba karina kalak Israel, ibuat si Musa mo daroh anak lembu dekket daroh kambing tonggal, icampur mo i dekket laè, nai ipispisken mo i mi lapihen pati-patiin Dèbata dekket taba karinana bangsa Israel merkitè lumut dekket bukbuk biri-biri mbara kalohoon; ²⁰ ninganna idokken si Musa, "Èn ngo simensahken padan Dèbata sikennah uèen ndènè!" ²¹ Nai ipispisken si Musa mo daroh i mi Undung-undung Jahowa i dekket i karina barang-barang keperluun memmèlè Dèbata. ²² Janah ukum mengèkutken agama Jahudi, karina sinaing peppantingken, ipeppanting ngo merkitè-kitè daroh: asa dosa pè, pellin merkitè-kitè daroh ngo kessa asa ndorok sasa. ²³ Merkitè bagidi ngo ipeppanting karina simertuduh-tuduh mi sorga idi, iperluken ngo kennah merandalen pèlèen i daripada tuduh-tuduh i nai. ²⁴ Ai bekkas Simbadia nibengketten Kristus i oda ngo bekkas simbadia nibahan tangan jelma i, pellin mertuduh-tuduh mi bekkas Simbadia situhunna i. Sorga i ngo nibengketten Kristus i; i sidi ngo Ia bagèndari i hadeppen Dèbata lako mengondiken kita. ²⁵ Ukum Imam huntuun kalak Jahudi, gennep tahun ngo memengketti bilik Simbadia i Bages Jerro, merembah daroh pinakan. Tapi ukum Kristus oda ngo mbengket mi sidi imo lako memmèlèken diriNa merulak-ulak. ²⁶ Ai ukum bagidi ngo, enggo dakdak menggong simpersuk Ia mulak-ulak, kessa nai ihanaken dunia èn. Tapi pellin sikali ngo Ia roh lako mennasa dosa, merkitè-kitè memmèlèken diriNa sendiri. ²⁷ Enggo itettapken Dèbata matè jelma i pellin sakali ngo kessa, enggo kessa idi, ihukumi mo rembang mi pengellakona. ²⁸ Bagi ma ngo bang Kristus ipèlèken sikali mahan kesasaan dosa mbuè jelma. Roh nola ngo Ia pedua kaliken, oda nèngè ngo lako menelangsaèken persoalen dosa tapi lako paluahken kalak simemèma-mèma pekirohNa ngo.

¹ Ukum pati-patiin i, pellin lèndung simerandal sinaing roh i ngo kessa i, oda dèng gombaren situhunna. Dak ipèlèken ngo pèlèen bagè sinidokken pati-patiin i janah dos ngo pèlèen i barang ndigan tahun. Bakunè mo ndorok pati-patiin i dekket pèlèen sibagidi memmakin merandal kalohoon kalak siroh mersembah taba Dèbata? ² Ukum enggo ngo mpanting jelma i ipas dosana nai kumarnaken naidi, tentu oda nèngè pella roh jelma i memmèlèken pèlèenna taba Dèbata. ³ Tapi merkitè memmèlè i ia gennep tahun, gabè idi nola mo pessèngètken jelma i tersèngèt dosana, ⁴ kerna oda ngo terbaing daroh lembu barang daroh kambing bajar mennasa dosa. ⁵ Kumarna naidi ngo asa idokken Kristus taba Dèbata tikan roh Ia mi dunia èn, "Oda ipergeddo Kono pèlèen barang pè pemmerrèken; tapi enggo ipèmaken Kono badanKu. ⁶ Oda lemmo atèmu midah jukut situtungen mahan pèlèen barang pè pèlèen sinipèlèken mahan kesasaan dosa! ⁷ Nai Kualoi mo: Èn ngo Aku alè Dèbata! Roh ngo aku mengulaken lemmo atèMu, bagè sienggo tersurat i bas Bibèl i tersèngèt diringKu." ⁸ Mula-mula idokken Kristus, "Oda ipergeddo atèmu pèlèen dekket pemmerrèken; oda lemmo atèmu midah pinakan mahan pèlèen situtungen, janah oda lemmo atèmu midah pèlèen siniberrèken lako mennasa dosa." Idokken Kristus bagidi tukasi pè nemmuken pèlèen idi ipèlèken mengèkutken pati-patiin. ⁹ Nai idokken Kristus mo, "Èn ngo Aku alè Dèbata! Roh mo Aku mengulaken lemmo atèMu." Kerna naidi ipettadi Dèbata mo pèlèen-pèlèen siperlebbè i, janah igancihi dekket pèlèen Kristus. ¹⁰ Jadi enggo mo iulaken Kristus kadè lemmo atè Dèbata, janah enggo ipeppanting kita ipas dosanta nai merkitèken ipèlèken Jesus i diriNa sikali sambing. ¹¹ Karina imam kalak Jahudi, gennep ari ngo ia mengulaken keimamenna janah dak iulak-ulaki ngo mèlèken pèlèen. Tapi ukum pèlèen si nipèlèkenna i oda terbaing mennasa dosa. ¹² Tapi ukum Kristus, pellin sikali sambing ngo kessa Ia mèlèken pèlèen kerna dosa, janah enggo kessa i, gabè rebbak mo Ia memmerèntah dekket Dèbata. ¹³ Asa ukum bagèndari memmèma nai ngo kessa Ia soh mi ipeppatu Dèbata karina musuhNa. ¹⁴ Jadi merkitè sada pèlèen, gabè mpanting ngo jelma idi ibaing Kristus ipas dosana nai. ¹⁵ Tersèngèt i dekket ngo Tendi Perbadia mengindangken taba kita, ai nina ngo, ¹⁶ " ’Èn ngo padan siKubaing dekket kalak i, i ari sinaing roh èn,’ nina Tuhan i. ’Kuokirken mo pati-patinKu mi bagasen atè-atè kalak i.’ " ¹⁷ "Oda nèngè kupèngèt-èngèt dosa dekket pengelausiin kalak i." ¹⁸ Jadi dosa dekket pengelausiin kejahaten i, enggo mo iampuni; asa oda nèngè pella perlu memèlèken pèlèen kesasaan dosa. ¹⁹ Jadi bagèndari alè dengan, kemmulihken permatè Kristus i, maluah mo kita janah bèbas mbengket mi bekkas Simbadia kalohoon i. ²⁰ Ai enggo ibuka Jesus sada dalan rembaru banta, imo dalan mi kenggelluhen, arap kirè-kirè i, imo daging Jesus sendiri. ²¹ Janah lot ngo bagèndari sada kalak Imam Huntuun simertanggung jabab mi Bages Dèbata. ²² Kerna naidi sidessingi mo Dèbata merkitè ukur tutus janah percaya tabasa; bagi ma dekket ukur sienggo mpanting ipas kessalahen-kessalahen idi nai dekket badan sienggo iborih merkitè laè nciho. ²³ Sicèkèp mo memmes pengharapenta i, ai kettoken ngo Dèbata tersèngèt niperbagah-bagahNa i. ²⁴ Janah kennah mersiantoon mo kita samah kita, ninganna mersipejujuun mengulaken simerandal ibagasen kelleng. ²⁵ Ulang kita mahangkè lako mertumpu, bagè dèba dengan, tapi mersiarah-arahenken mo kita, ai sibettoh ngo, oda ndekkah nèngè roh mo Tuhan i. ²⁶ Mula enggo soh banta kata Dèbata, keppèken dak siempet merdosa, oda lot nèngè pèlèen sindorok mennasa dosanta. ²⁷ Pellin hukumen nai ngo mèma banta, imo api dekket pungur Dèbata simengelettup soh tumpat jelma simengalo Dèbata! ²⁸ Kennah matè ngo jelma simengellausi pati-patiin si Musa, mula enggo lot saksi dua barang tellu kalak mahan bukti enggo mersalah ia. ²⁹ Mula bagi ngo keppèken hukum taba jelma sibagidi, bakunè nola mo ndia hukum taba jelma simengellèai Anak Dèbata janah siso menghargai permatè Kristus, mahan jaminen bagah-bagah Dèbata lako peppantingken jelma i nemmuken ipas dosana nai dekket kalak simengelèai Tendi Perbadia simermasèh atè tabasa. Radumi janah pikiri kènè mo bakunè mpiahna hukum idabuh taba kalak sibagidi! ³⁰ Sibettoh ngo isè mendokken kata èn, "Aku ngo mendabuh hukum." ³¹ Soh mo mpiahna mula ndabuh mi tangan Dèbata Singgelluh i! ³² Èngèt kènè mo bakunè kin kènè tikala i. Ai enggo kessa icuhayai kecihuren Dèbata kènè, matcam ngo bagèna kinidersa igongken kènè, tapi itahanken kènè ngo i. ³³ Sipata ilèa-lèai janah irèhè-rèhèi ngo kènè i hadeppen jelma nterrem. Sipata menggong simpersuk ngo kènè rebbak dekket kalak sinibaingna bagidi, ³⁴ janah irasaken kènè ngo bakunè pengerasaan kalak siterkurung. Mula irampasi harta ndènè, mersampang atè ngo kènè menggongken i, kumarna ibettoh kènè lot dèng ngo milik ndènè lebbih merandalen janah tahan soh mi amman sumendah. ³⁵ Kerna naidi ulang gabè saip ukur ndènè, ai ukum ntegguh ngo kepercayaen ndènè, mbelgah ngo upah ndènè! ³⁶ Keperluken kènè mo mbingit, asa ndorok ibahanken kènè lemmo atè Dèbata, janah merkitè bagidi terjalo kènè mo niperbagah-bagah Dèbata. ³⁷ Tersurat ngo ibas Bibèl, "Sigejap nai ngo, roh mo sienggo nitentukenna roh i; janah oda isondati pekerohNa i. ³⁸ Jadi nggelluh mo ummatKu sibennar kumarna percaya ia taba Aku; tapi mula lot bai kalak i nai gabè sondar, oda ngo lemmo atèngKu midah kalak sibagidi." ³⁹ Tapi ukum kita oda ngo sondar barang laling, tapi percaya ngo kita bai Dèbata janah sienggo ipaluah ngo kita.

¹ Ukum kepercayaen i, pos niatè ngo i tersèngèt siharapen janah pemmettohen pasti tersèngèt simadèng ndidah. ² Kumarna percaya i ngo jelma siarnia asa lemmo atè Dèbata midah kalak i. ³ Kemmulihken kepercayaen i ngo, gabè siantusi ihanaken Dèbata ngo dunia èn, janah merkitèken ranana gabè menjadi si siidah i, ipas siso lot teridah idi nai kin. ⁴ Kumarna kepercayaen ngo maing asa merandalen pèlèen si Habel bai Dèbata daripada pèlèen si Kain, janah merkitèken kepercayaenna i, gabè ikesaksiken Dèbata ngo si Abèl i jelma selloh, kerna ijalo Dèbata ngo pèlènna i. Ukum si Abèl enggo ngo matè, tapi soh bagèndari ngo mengerrana kepercayaenna i. ⁵ Kumarnaken kepercayaen si Henokh ngo asa oda pella matè ia, tapi mèter iabin Dèbata ngo ia mi sorga. Isè poda lot pejumpa nèngè dekketsa, kumarna enggo iabin Dèbata ia. Tersurat ngo ipas Bibèl, kelemmoon Dèbata ngo ia sinderrang madèng kin pè iabin ia mi sorga. ⁶ Asa ukum oda ngo percaya, isè poda lot ikellemmoken Dèbata. Ai barang isè roh mendahi Dèbata, kennah percaya ngo ia lot Dèbata, janah iberrèken upah bai kalak simennulusiSa. ⁷ Kumarna kepercayaen ngo asa ijalo si Noak sipesèngèt Dèbata bana tersèngèt sinaing masa i podi ari, madèng pè masa tanda-tandana. Kerna naidi ngo asa iuèi si Noak mahan perrau nidokken Dèbata bana asa maluah ia rebbak dekket pengisi bagesna. Kemulihkenna idi gabè ihukum ngo dunia èn, tapi ukum si Noak gabè kalak bennar ngo ia idokken Dèbata kerna kepercayanna i. ⁸ Kumarna kepercayaen ngo asa iuèi Dèbata dilo-dilo Dèbata bana. Nai berkat mo si Abraham oda pè ibettoh dèng barang mikè tumburenna. ⁹ Kumarna kepercayaen ngo asa merian si Abraham gabè ginemgem i nagerri si niperbagah-bagah Dèbata bana i, bagè i tanoh kalak sidèban. Sapo-sapo ngo iiani si Abraham rebbak dekket si Isak bak si Jakob sienggo menjalo bagah-bagah i bai Dèbata nai. ¹⁰ Ipèma-pèma si Abraham ngo bekkas simerdangaan ntegguh sinipellias janah itukkangi Dèbata. ¹¹ Kumarna kepercayaen ngo asa lot dukak si Abraham dekket si Sara, tukasi pè enggo tua-tua si Abraham kennah saut ngo siniperbagah Dèbata. ¹² Tukasi pè tikanna i mak nèngè harapen merpinempar si Abraham i, tapi tubuh ngo pinemparna oda terkira buèna, bagè bintang i langit dekket bagè kersik i biding laut. ¹³ Karinana ngo kalak i merkepercayaen, tapi soh matè pè kalak i, oda dèng ngo ijalo bagah-bagah Dèbata i. Pellin mennatap ngo kessa kalak idi ipas sindaoh nai ninganna mengharap. Jadi merkitè bagidi, idokken kalak i mo taba dunia èn, kalak sidèban janah pengeranto ngo ia i tanoh èn. ¹⁴ Asa merkitè pendokken kalak idi bagidi, dak mennulusi kuta ngo kalak i mahan lebbuhna. ¹⁵ Tapi oda nèngè ngo ipèngèt-èngèt kuta sienggo itadingken kalak idi i, ai kum bagi kin ngo ukurna, terbaing kalak i ngo nemmu balik mi sidi. ¹⁶ Tapi iketeddohken ngo kuta simerandalen, imo sorga. Kumarna naidi, oda ngo mèla Dèbata idokken kalak i Ia Dèbatana, kumarna enggo ihantari Dèbata kuta bai kalak i. ¹⁷ Kumarna kepercayaen i ma ngo ioji Dèbata si Abraham, gabè uè si Abraham memmèlèken anakna si Isak i. Tukasi pè anak bagah-bagah i enggo iberrèken Dèbata bai si Abraham tapi bagi pè i, uè ngo si Abraham memmèlèken anakna sada-sada i. ¹⁸ Tukasi pè enggo kin idokken Dèbata tabasa, "Arap si Isak i ngo pinemparmu siKuperbagah-bagah i bamu." ¹⁹ Ai ikettoki si Abraham ngo, ndorok ngo ipegelluh Dèbata si Isak idi ipas simatè nai -- jadi terdokken mo, I kemmatèen nai nola ngo si Isak i ijalo si Abraham. ²⁰ Kumarna kepercayaen ngo iperbagah si Isak pasu-pasu bai si Jakob dekket bai si Esau i ari podi. ²¹ Kumarna kepercayaen ngo, asa sinderrang madèng matè si Jakob tetongket mo ia i tongketna ninganna mersembah taba Dèbata -- nai ipasu-pasu mo pemparen si Josep. ²² Kumarna kepercayaen ngo, asa sinderrang naing matè si Josep iranaken tersèngèt kalak Israel kennah karuar i Mesir nai. Jadi itennahi si Josep mo kalak i tersèngèt sibakinenna mi tulan-tulanna. ²³ Kumarna kepercayaen ngo asa iboniken partuana si Musa tellu bulan dekkahna enggo kessa tubuh ia, kerna dukak selloh ngo ia idah kalak i janah oda mbiar kalak i midah perèntah raja. ²⁴ Kumarna kepercayaen ngo, asa enggo kessa mbelgah si Musa oda uè ia gabè anak nikamet berru raja Mesir. ²⁵ Lotiin ngo ipilih rebbak ia dekket bangsa Dèbata daripada mersennang-sennang sigejap, tapi dom dosa. ²⁶ Ai hargaan ngo iakap si Musa mengkepkep Raja Sipaluahken i tukasi pè gabè merlèa ia, dari pada harta nagerri Mesir, kerna iharapken si Musa ngo upah i ari podi. ²⁷ Kumarna kepercayaen ngo, asa itadingken si Musa tanoh Mesir, janah oda pella ikebbiari laga raja Parao. Dak ipuspusken si Musa ngo langkahna, bagè cara enggo idah ia Dèbata, siso nung teridah i kin. ²⁸ Kumarna kepercayaen ngo, asa iulaken si Musa Paskah i janah idokken asa ipempalitken kalak Israel daroh i babo tekkang pèntu kalak i, asa ulang ibunuh Malaèkat Pengago i karina buka baju kalak idi. ²⁹ Kumarna kepercayaen ngo, asa tersuberrangi kalak Israel Laut Mbara tosè bagè i babo tanoh ngkerrah kalak i merdalan, keppè kum kalak Mesir, inengneng laut i ngo sinderrang isuberrangi kalak i ma laut i. ³⁰ Kumarna kepercayaen ngo, asa ikulilingi kalak Israel kessa kuta Jeriko pitu ari dekkahna gabè megargar mo kuta i. ³¹ Kumarna kepercayaen ma ngo, asa maluah si Rahab daberru perkendangen i, oda dekket ia terbunuh rebbak dekket kalak simengalo Dèbata, kerna ijalo ngo mi bagesna perkakap kalak Israel i. ³² Mbuè dèng ngo nemmuken sukutenkenku, umpamana bagè si Gideon, si Barak, si Simson, si Jepta, si Daud, si Samuel dekket nabi-nabi i, tapi oda cukup tikkingku. ³³ Ai kumarna kepercayaen ngo asa italuken kalak i mbuè raja. Iulaken kalak i ngo kebennaren asa gabè italuken kalak i mbuè raja. Iulaken kalak i ngo kebennaren asa gabè ijalo kalak i niperbagah-bagah Dèbata. Ikontam kalak i ngo babah singa. ³⁴ Iènteppi kalak i ngo api mergollah-gollah. Maluah ngo kalak idi i babah peddang nai. Mergegoh ngo kalak idi ibas kinindotèna nai, janah muat mergegohna ngo kalak i tupung mergerraha, italuken kalak i ngo balapergunggung bangsa sidèban. ³⁵ Kumarna kepercayaen ngo, asa ijalo daberru-daberru balik nggelluh simatèna. Lot ma ngo dèba lotiin isiksa soh matè janah oda uè ia ipaluah asa gabè mulak nggelluh ia lako menjalo sitermerandalen. ³⁶ Lot ngo dèba menggongken rèhè-rèhè, isiksa, irantè janah ikurung. ³⁷ Ibentiri dekket batu soh matè, dèba igettap merkitè garagaji kerahongna, ibunuh merkitè peddang. Mberrus mo kalak i ninganna merrolesken bebbak unto barang pè bebbak kambing; rapar, iletlet, isiksa. ³⁸ Asa oda ngo bekkas kalak i ukum tanoh èn. Mampar-ampar ngo kalak idi i Padang Pasir dekket i kellongoon, janah i liang-liang i ngo kalak i merbekkas, bak ipas luhung-luhung i tanoh i. ³⁹ Mbelgah kalohoon ngo kemmennangen kalak i kumarna kepercayanna i, ⁴⁰ ai mi simerandalna i ngo sura-sura Dèbata, imo kennah lebbè rebbak ngo kita baru pè asa sondel kinimerandal kalak idi.

¹ Kerna naidi bang kita pè, kumarna mèduk ngo saksi i sikulilingta, sigamparken mo karina simemberati kita bak dosa simengellekketti dirinta, janah mbingit mo kita lojang mi lebbè. ² Sitengen mo dempak Jesus, kerna Ia ngo mengurupi kita, asa terbaing kita percaya bana, i bennana nai soh mi puncana, igongken ngo matè tersilang. Oda ngo pella kemmemèla iradumi matè i kayu persilang i, lako mengayaki sampang atè sinaing jalonNa i podi ari. Asa kum bagèndari, kundul ngo Ia i kamuhun Dèbata rebbak mengerajai. ³ Pikiri mo bakunè mpiahna iakap Jesus menahanken peraloon sibagidi bai kalak simengalosa nai. Kerna naidi ulang mo kèdèk atè ndènè janah ulang mendellè. ⁴ Ai oda pella nung dèng tiris daroh ndènè lako mengalo dosa i ⁵ Ulang lupa kènè i peddah Dèbata sitaba kènè i, kerna dukakNa ngo kènè, ai nina ngo, "O alè pa, ulang toisken pengajaren Tuhan i, janah ulang mendellè kono, mula pè ipincang kono. ⁶ Iajar Tuhan i ngo karina jelma nikekellengenNa, janah Iligas ngo karina dukak nikametNa." ⁷ Mbingit mo kènè sinderrang iligas Tuhan i ai kerna dukakNa ngo kènè iètong Dèbata. Isè mo nung dukak-dukak siso nung iajar partuana? ⁸ Mula oda iajar kènè, merlapaten ngo i oda ngo dukak nikametna kènè. ⁹ Lot ngo partuanta i dunia èn. Iajar ngo kita, janah sikebbiari ngo ia. Otang makin merpenguèen mo kita taba Bapanta si ni sorga i asa nggelluh kita. ¹⁰ Ukum partuanta ni tanoh èn iajar ngo kita oda pella sadikè dekkah merguru mi penimbangen ukurna bakunè merandal. Tapi ukum Dèbata, iajar ngo kita mi simerguna, asa bagèsa kita mpanting janah merkebadiaan. ¹¹ Tuhu, mula tikan ipincang kita, oda ngo sampang atè siakap, tapi siarsakenken ngo; tapi enggo kessa leppas idi, gabè ibuahken idi ngo banta nggelluh mengekutken lemmo atè Dèbata, janah memmaing damè ipas perrukurenta. ¹² Kerna naidi petegguh mo tangan ndènè ndalmèh i bak nèhè ndènè sikadotdot i! ¹³ Merdalan mo kènè arap dalan sindèas i, asa ulang makin sihitna nèhè ndènè sièangen i, tapi asa makin malumna. ¹⁴ Kerencetken kènè mo merdamè nggelluh ndènè taba karina jelma ninganna ayaki kènè mo nggelluh ibagasen Tuhan i, ai isè poda ndorok mengidah Tuhan i, ukum oda bagidi nggelluhna. ¹⁵ Perdatèken mo asa ulang lot peddaohken dirina ipas masèh atè Tuhan i nai, asa ulang i gabè dori i tengah-tengah ndènè mengkerrohken kesusahen, janah memmaing ncèda jelma nterrem. ¹⁶ Jagaken mo asa ulang lot luhlah barang oda ihargai simerdemmu mi pertendiin, bagè nibakin si Esau. Ai idèa ngo sulangna situaan i kumarnaken pangaan cituk. ¹⁷ Ibettoh kènè ngo sèkel ngo ia menjalo pasu-pasu i bai bapana nai, tapi itulak ngo ia. Ai barang tangis kin pè ia lako mengido pelliasken kesalahenna i, oda dapetsa nèngè i. ¹⁸ Oda ngo lot iakapi kènè bagè pengakap kalak Israel i arnia. Ukum kalak idi idapetken ngo sindorok idadap i, imo Delleng Sinai dekket apina mergollah-gollah i; bagi ma dekket gellap tuiten bak angin kaba-kaba; ¹⁹ bagidi ma dekket sora sarunè bak ginoling sora. Tikan i tengah kalak i sora i, mersembah merkuraja mo kalak i mengido, asa ulang taba kalak idi ipehonggem sora idi. ²⁰ Kerna oda tahan kalak i mendengkoh perèntah nipessoh sora i taba kalak i, mendokken, "Barang kadè dais mi delleng èn, tah pinakan barang jelma pè i, kennah iderder ngo merkitè ibentiri dekket batu soh matè." ²¹ Sondel ngo hejji siniidah kalak Israel i, ai si Musa pè sanga idokken, "Buradan ngo aku janah kadotdot!" ²² Tapi ukum kènè, Delleng Sion i ngo idapetken kènè dekket kuta Dèbata singgelluh i, imo Jerusalem i sorga, bak malaèkatna simerribu-ribu i. ²³ Bagi ma sinidapetken ndènè pertumpuun meriah janah rami kalohoon imo pertumpuun dukak-dukak situaan ni Dèbata, sienggo tersurat gerarna i sorga, dekket Dèbata simenghukumi karina jelma bak tendi jelma sienggo iperandal, ²⁴ dekket Jesus tellangkè simahanken padan rembaru i dekket darohna simenguras i, ndaoh merandalen dèng dari pada daroh si Habel. ²⁵ Kerna naidi, jagaken kènè mo, asa ulang mak idengkohken kènè Ia simengerrana i. Salang kalak i siso uè mendengkohken simennukutken Sukuten bai Dèbata nai, tukasi pè kalak siso terbakinsa maluah, tapi mak ndorok mennilahken, makinsa nola mo kita simendengkohken Ia simengerrana i sorga i nai. Mula oda kita uè mendengkohkenSa bakunè mo permaluahta bana nai! ²⁶ Ukum tikala i, dumegger ngo tanoh èn mendengkoh soraNa. Tapi ukum bagèndari Iperbagah-bagah ngo, "Ukum sikali nai oda pellin tanoh èn gontar Kubaing, tapi dekket mo langit i." ²⁷ Kata simendokken ’sikali nai’ magahken, sagumanna sienggo ihanaken janah ndorok dumegger i kennah itingtingi, asa pellin siso terdegger idi nai ngo kessa tading. ²⁸ Kumarna naidi, sidokken mo mejalo metangkup taba Dèbata, kerna sijalo ngo bai Dèbata nai bekkas siso ndorok dumegger. Kennah sidokken mo mejalo metangkup bai Dèbata janah siuèi mo ia ninganna merkebiaren janah metemman, tosè bagè nipergeddo Dèbata. ²⁹ Ai tosè bagè api mengelettup ngo Dèbatanta i.

¹ Kennah tettap ngo kènè mersikekelengen samah kènè bagè kalak Kristen simerkaka-kuanggi. ² Ulang njais kènè mertamuè, tukasi pè oda itandai kènè dèng siroh mi bages ndènè i; ai merkitè bagidi, pennah ngo enggo itamuèi dèba malaèkat i bagesna, siso pemettohenna. ³ Èngèt kènè mo kalak siterkurung bagè dengan rebbak terkurung. Bagi ma èngèt kènè mo kalak siterkilang, ai kènè pè ndorok ngo bagè terkilang ma. ⁴ Hargaken kènè mo perjejapen i, janah ulang mo gabè samur nola perjejapen i; kennah mersipeuè-uèen ngo sinibalè dekket si nibages. Ai ihukum Dèbata ngo kalak luhlah dekket perlangkah julu meddem. ⁵ Ulang mo irajai riar nggelluh ndènè tapi kesampangken kènè mo silot bai ndè; ai idokken Dèbata ngo, "Oda kubelli kono sengsara; oda kutadingken kono." ⁶ Kennah pos ngo atènta mendokken, "Tuhan i ngo Mengurupi aku, jadi oda mbiar aku. Isè poda terbakinsa mengkekkadè aku?" ⁷ Ulang lupa kènè mernèngèt simengendengken kènè, sienggo pessohken sukuten bai Dèbata nai bai ndènè. Perdatèken kènè mo bakunè cara pernggelluh kalak i dekket bakunè cara permatè kalak i janah èkutken kènè mo kepercayaen kalak i. ⁸ Ukum Jesus Kristus i, bagi arnia, bagèndari, bagi ma ngo soh amman sumendah. ⁹ Ulang uè kènè ikella-kella peddah simermatcam bagè janah simengelalingken kènè. Kennah ntegguh ngo perukurenta, kumarna mendè atè Dèbata, idi ngo merandal; oda ngo merkitèken hatoren-hatoren sipanganen. Kalak sienggo menjamoti hatoren i tikala i, kadè poda buahna dapetsa. ¹⁰ Lot ngo banta langgaten bekkas memèlèken pèlèen bai Dèbata. Janah imam-imam simemmèlèken i pè i bages jerro, oda ndorok kipangan pèlèen si nipèlèken i babo langgaten i. ¹¹ Ai jukut sienggo isèat, janah darohna ipèlèken imam huntuun i Bilik Simbadia kalohoon idi ibagasen jerro i, i ruar jerro i ngo itutungi. ¹² Kumarna naidi ma ngo asa Jesus pè matè i ruar pèntu pengkerruhen kuta i ngo lako peppantingken ummatNa ipas dosana nai merkitè darohNa sendiri. ¹³ Kerna nai sidapetken mo ia mi ruar perundung-undungen i, janah dekket mo kita ipelèa-lèa rebbak dekketSa. ¹⁴ Kerna oda lot i dunia èn bekkasta hot; situlusi mo bekkas hot sinaing roh i. ¹⁵ Kerna naidi, dak sipoji mo Dèbata merkitè-kitè Jesus Kristus, ai idi ngo pèlèen merlias atè baNa, sipèlèken merkitè rananta bana lako pessangapken gerarNa. ¹⁶ Ulang lupa kènè memmaing merandal, janah mersiurupen, ai i ngo pèlèen nikellemmoken atè Dèbata. ¹⁷ Uèi kènè mo kata simenguluken kènè, janah tunduk mo kènè bana. Ai kalak i ngo menjagai tendi ndènè janah kalak i ma ngo segen mertanggung jabab taba Dèbata. Mula iuèi kènè ngo kalak i, terbaing kalak i mo mengendengken kènè; jadi oda laba olih i bai ndènè. ¹⁸ Dak sodipken kènè mo kami. Tok ngo kami, oda pella iselselli gerrek nibas perrukuren nami i kami, kerna simerandal i ngo kuulaken kami. ¹⁹ Kupido dèng ma taba kènè dak sodipken kènè mo aku taba Dèbata, asa ipaduè Dèbata nola aku ndor roh mendahi kènè. ²⁰ Enggo ipegelluh Dèbata Tuhanta Jesus, i kemmatèen nai. Jadi kemmulihken matè i Ia, enggo gabè permakan Mbellen Ia taba kita biri-biriNa. Kerna matè i Ia, imo gabè jaminen i padan Dèbata simenettap i. ²¹ Dak iberrèken Dèbata benna ni Damè i mo taba kènè karina simerandal lako menguèi lemmo atèna, janah dak ipetupung Dèbata merkitè Jesus i mo banta kadè lemmo atèNa. Nipoji mo Kristus soh mi amman sumendah! Amèn. ²² Kuèlèk-èlèk mo kènè asa peratè-atèken kènè ajarku èn ibagasen mbingit, kerna oda pella nggeddangsu suratku èn. ²³ Bettoh kènè ma mo, ukum denganta si Timoteus, enggo ngo ipaluah i kurungen nai. Mula enggo roh ia sikali èn mendahi aku kuarahken pè ia asa dekket ia roh mendahi kènè. ²⁴ Pesakat kènè mo salamku taba karina simengendengken kènè dekket taba karinana ummat Dèbata. Jalo kènè ma mo dekket salam denganta per Italia. ²⁵ Dak ipasu-pasu Dèbata mo kènè karinana.