GALATIA

GALATIA

¹ Kènè karinana kuria silot i Galatia. Aku si Paulus dekket karina dengan Kristen sirebbak dekket aku mengharapken, dak ipasu-pasu Dèbata Bapanta dekket Tuhan Jesus Kristus mo kènè, janah iberrèken bai ndènè kedamèen. Gabè rasul pè aku oda ngo kumarna ipilih jelma barang pè merkitè-kitè jelma, tapi ipebangkit Jesus Kristus dekket Dèbata Bapanta sienggo pegelluhken Jesus Kristus mengolihi i kematèen nai idi ngo. ⁴ Lako mengèkutken lemmo atè Dèbata Bapanta, ipesakat Kristus ngo diriNa mimkematèen kemulihken dosa-dosanta, asa ipaluah kita ipas kejahaten idi nai. ⁵ Terpoji mo Dèbata soh mi amman sumendah. Amèn. ⁶ Lengang ngo aku midah kènè alè dengan! Idilo Dèbata ngo kènè kumarna masèh atè Kristus, keppè bagèndari bagi nola mo ndorna kènè menondali Dèbata, gabè laus kènè mengèkutken sukuten sidèban. Laèn dari pada Sukuten Kelluahen bai Dèbata nai. ⁷ Situhunna oda ngo lot ’sukuten kelluahen’ sidèban. Mula pè isukutken sidèban siroh mendahi kènè ’sukuten kelluahen’ terrèngèt Kristus laèn dari pada Sukuten Kelluahen sienggo kusukutken kami bai ndènè gabè pepèolken penarihen ndènè ngo i. ⁸ Kalak simenukutken ’sukuten kelluahen’ laèn dari pada sienggo kusukutken kami, ihukum Dèbata mo nemmi sibagidi; barang tah kami pè i barang malaèkat i sorga nai pè i! ⁹ Bagè sienggo kudokken bai ndènè tikala i, bagèndari pè kudokken dèng ma mo bai ndènè sikali nai: Barang isè kalak menukutken taba kènè ’sukuten kelluahen’ laèn dari pada Sukuten Kelluahen sienggo nijalo ndènè bai nami nai, ihukum Dèbata mo ia! ¹⁰ Mada ngo merkitè bagidi gabè kuharapken nola asa iakkui jelma? Oda ngo! Ukum sikuharapken, imo asa iakkui Dèbata. Mada ngo kutulusi bagè cara muat-muat ukur jelma asa sennang atèna midah aku? Ukum bagi ngo, oda tuhu aku naposo Kristus. ¹¹ Kennah bettohen ndènè ngo alè dengan, ukum Sukuten Kelluahen sikusukutken idi, oda ngo sukuten bai jelma nai. ¹² Oda ngo bai jelma nai kujalo sukuten idi, janah sada kalak ma poda mengaajarken i bangku, Jesus Kristus sendiri ngo mennukutken i bangku. ¹³ Tentu enggo idengkoh kènè tersèngèt aku, bakunè aku tikala i sebagè sada kalak peragama Jahudi. Ibettoh kènè ma ngo bakunè gasa-gasanku taba kuria Dèbata, janah bakunè carangku lako petumpatken kuria i. ¹⁴ Ukum mengèkuti hatoren agama kalak Jahudi tikka ngo aku bai Jahudi denganku sisada nterbang nai. Tikka ma ngo penggegohingku lako menguèi adat empung nami. ¹⁵ Tapi kumarna mendè basa Dèbata, Ipilih Dèbata ngo aku bang sinderrang madèng kin pè hana aku, janah idilo ngo aku lako menandai bak mengkebasiSa. ¹⁶ Gabè ipetarar Dèbata ngo AnakNa taba aku asa kubagahken Sukuten Kelluahen tersèngèt AnakNa i bai kalak siso Jahudi. Sinderrangna i pè, oda lot mengido ajar aku barang bai isè pè. ¹⁷ Oda ma ngo laus aku mi Jerusalem mendahi kalak sienggo perlebbè gabè rasul dari pada aku. Tapi mi nageri Arab ngo aku laus, i sidi nai balik mo aku mi Damaskus. ¹⁸ Tapi enggo kessa tellu tahun, laus mo aku mi Jerusalem lako mersitandaan dekket si Petrus. Sipuluh lima ari dekkahna rebbaksa aku. ¹⁹ Oda lot pesimbak aku dekket rasul-rasul sidèbankenna i, laènken pellin si Jakobus anggi Tuhan Jesus i ngo kessa. ²⁰ Tuhu ngo sikusuratken èn. Oda luap aku. Ibettoh Dèbata ngo i! ²¹ Enggo kessa i, laus mo aku mi nagerri bak kuta silot i aur Siria bak Kilikia. ²² Soh mi katika i, oda dèng ngo itandai kalak Kristen ni Judèa ukum abèngku. ²³ Pellin rana dèng ngo kessa idengkoh iranaken dèba, "Kalak simengeletlet kami tikala i, enggo gabè menukutken kepercayaen sinaing petumpatenna tikanna i kin." ²⁴ Nai ipoji kalak i mo Dèbata kemulihken aku.

¹ Enggo kessa leppas sipuluh empat tahun, balaik mo aku mi Jerusalem dekket si Barnabas, kuarahken ma mo bak si Titus. ² Janah perlausku mi Jerusalem i pè, kumarna lot ngo alamat bai Dèbata nai mendokken kennah laus aku mi sidi. Janah ibas sada runggu pellin kami dekket pengendeng-pengendeng nisidi, kubagahken mo tersèngèt Sukuten Kelluahen sienggo kusukutken bai kalak siso Jahudi. Kerna oda lemmo atèngku magosia kelejanku tikala i bang pè mi podiin èn. ³ Si Titus simendengani aku kalak Junani ngo ia. Tapi tukasi pè bagidi, oda ngo ipaksa ia kennah mertakkil, ⁴ kasi pè lot dèng menggegohken, imo dengan so dengan, pesamak-samakken dirina masuk mendirip-ndirip lako mengenggep kebèbasen silot banta ibagasen Kristus Jesus. Ai naing ngo dok atèna, iarahken kita mengolihi gabè hamba bagè sitikala i, ⁵ tapi singkerjep mata pè oda tunduk kami bai kalak i, asa tong hot kebennaren Sukuten Kelluahen i bai ndènè. ⁶ Tapi tukasi pè bagidi, oda lot kadè itambahi pengendeng sitergerar i mi sienggo lot kin bangku -- ukum bangku oda lot kadè kalihna, tergerar pè kalak i barang oda, ai oda ngo mengidah-ngidah rupa Dèbata. ⁷ Tapi mengaku ngo kalak sitergerar i, Dèbata ngo merrèken ulaan i bangku lako menukutken Sukuten Kelluahen i taba kalak siso Jahudi, tosè bagè si Petrus lako magahken Sukuten Kelluahen i taba kalak siso Jahudi. ⁸ Kerna Dèbata sienggo merrèken ulaan i bai si Petrus imo ulaan kerasulen mendahi kalak Jahudi, Dèbata ma ngo merrèken bangku ulaan kerasulen mendahi kalak siso Jahudi. ⁹ Si Jakobus, si Petrus dekket si Johanes, kalak idi mo dokkenken huntuun pengendeng kuria, mengaku ngo kalak i Dèbata ngo merrèken bangku sibasa-basa i. Nai bagè isalam kalak i mo tangan si Barnabas bak tanganku bagè tanda persaoren nami, magahken kami mo laus mendahi kalak siso Jahudi, janah kalak i mo mi tengah-tengah kalak Jahudi. ¹⁰ Tapi sada ngo kessa ipergeddo kalak i bai nami nai, imo asa kuperdatèken kami kalak sincoor. Janah nggasang ngo atèngku mengulaken i. ¹¹ Nai sinderrang roh si Petrus mi Antiokhia, tompel ngo ia kualo, kerna lot salahna. ¹² Ai tikan madèng roh pasulaken si Jakobus, rebbak kundul ngo ia mangan dekket dengan siso kalak Jahudi. Tapi roh kessa mo kalak idi, mènter ipedaoh mo dirina bai dengan siso Jahudi nai; oda nèngè uè ia rebbak mangan dekket kalak i, ai mbiar ia midah kalak simendokken; kennah mertakkil ngo nina kalak siso Jahudi. ¹³ Kalak Jahudi sidèbankenna i pè munafik ma mo bagè si Petrus i, bagi ma ngo dekket si Barnabas pè, gabè terrèkut-èkut bagè kalak i. ¹⁴ Nai kuidah kessa mo oda nèngè sènteng kalak i bagè kebennaren Sukuten Kelluahen i, ningku mo mbang si Petrus, i hadeppen karina jelma silot ni sidi, "Mula kono sada kalak Jahudi, enggo bagè kalak siso Jahudi, kasa ipaksa kono nola bagèndari kalak siso Jahudi kennah bagè kalak Jahudi?" ¹⁵ Ukum mengèkutken pertubuh kalak Jahudi ngo kami; janah oda ngo "kalak siso Jahudi simerdosa i." ¹⁶ Tapi tukasi pè bagidi kubettoh kami ngo, asa gabè mendè nola mengolihi persaoren jelma dekket Dèbata kennah percaya ngo ia bai Jesus Kristus, oda ngo kumarna idalanken hatoren pati-patiin i. Ai kami pè, lebbè percaya ngo kami bai Jesus Kristus asa gabè mendè nola kami mersaor taba Dèbata, oda ngo kumarna kudalanken kami hatoren pati-patiin i. Ai ukum mendalanken hatoren pati-patiin i ngo kessa, isè poda terbakinsa mendè nola mengolihi persaorenna dekket Dèbata. ¹⁷ Merkitè mersaor dekket Kristus, kuusahaken kami ngo asa gabè mendè nola mengolihi persaoren nami dekket Dèbata. Tapi enggo kessa mo kubaing kami bagidi, keppèken terdapet nola ngo kami "kalak perdosa" ma bagè kalak siso Jahudi. Mada ngo gabè Kristus nola memmaing kami merdosa? Tentu oda! ¹⁸ Mula kumulai nola memajek perugamaan sienggo kurumpakken kin, keteridahenna sienggo gabè mengelanggar ngo aku. ¹⁹ Ai enggo matè aku ibakin hatoren pati-patiin idi -- ipatèken hatoren pati-patiin i sendiri -- asa ndorok nggelluh aku bai Dèbata. Enggo ipersilangken aku rebbak dekket Kristus. ²⁰ Oda aku nèngè singgelluh bagèndari, Kristus ngo nggelluh ibagasen aku. Ai nggelluh pè aku bagèndari merkitè-kitè kepercayaen bai Anak Dèbata simermasèh atè midah aku janah memerrèken diriNa mengkepkep aku i ngo. ²¹ Oda ngo gabè kèdèk atèngku sibasa-basa Dèbata. Mula mendè ngo mengolihi persaoren jelma i dekket Dèbata kumarna idalanken hatoren pati-patiin, merlapaten ngo i, oda lot kadè gunana matè Kristus i.

¹ È kènè kalak Galatia siso merrukur! Isè ngo kalak simerrèken ajar latlat i bai ndènè? Enggo mo ntangkas kubagahken bai ndènè tersèngèt permatè Kristus i kayu silang i. ² Bagahken kènè mo bangku tersèngèt si sada matcam èn: Ijalo kènè tikala i Tendi Perbadia, kumarnaken idalanken kènè ngo hatoren pati-patiin i, barang tah kumarnaken idengkohken kènè ngo Sukuten Kelluahen i janah percaya kènè taba Kristus? ³ Kasa gabè moto kènè! Nggelluh ndènè rembaru i, merkitè-kitè Tendi Perbadia ngo imulai kènè, kasa bagèndari iunjunu kènè merkitè kuasa perdagingen ndènè sendiri nola? ⁴ Mèter magosia mo karinana sienggo irasai kènè idi kin? Ulang mo magosia! ⁵ Dèbata ngo merrèken TendiNa bai ndènè janah memmaingken tanda-tanda kellengangen i tengah-tengah ndènè. Jadi ibaing Dèbata karinana idi kumarnaken idalanken kènè ngo hatoren pati-patiin idi, barang kumarnaken idengkohken kènè ngo Sukuten Kelluahen i ninganna percaya bai Kristus? ⁶ Tosè ngo i bagè sitersurat i Bibèl tersèngèt si Abraham -- bagèen, "Percaya ngo si Abraham bai Dèbata janah kemulihken kepercayanna idi gabè ijalo Dèbata ngo ia bagè kalak sienggo ikellemmoken atè Dèbata." ⁷ Jadi bettoh kènè mo; kalak sipercaya bai Dèbata ngo kessa pemparen si Abraham. ⁸ Enggo kin ngo lebbèen idokken i Bibèl i; ndorok ngo mersaor nola mengolihi dekket Dèbata kalak siso Jahudi, mula percaya ia bai Dèbata. Ai lebbèen kin ngo ibagahken Sukuten Kelluahen i taba si Abraham merkitè bagah-bagah èn, "Merkitèken kono, ipasu-pasu Dèbata ngo karina jelma i babo tanoh èn." ⁹ Jadi kerna percaya si Abraham, gabè ipasu-pasu ngo ia. Bagi ma ngo karina sipercaya ipasu-pasu rebbak dekket si Abraham. ¹⁰ Barang isè kalak mergantung mi hatoren pati-patiin i sambing, kenna sumpah ngo i. Ai tersurat ngo ibas Bibèl, "Barang isè oda mendalanken karina hatoren pati-patiin sitersurat ibas Bibèl kenna sempetta Dèbata ngo kalak i sibagidi!" ¹¹ Isè poda ndorok mersaor dekket Dèbata, ukum kumernaken mendalanken hatoren pati-patiin i, ai ntangkas ngo idokken ibas Bibèl, "Kalak sienggo mendè nola persaorenna mengolihi dekket Dèbata, ia ngo nggelluh, ia ngo nggelluh kumerna kepercayanna bai Dèbata!" ¹² Tapi ukum hatorenpati-patiin oda ngo merdangaan mi kepercayaen. Tersurat ngo ibas Bibèl, "Nggelluh ngo kalak simengulaken hatoren pati-patiin kumarna hatoren i." ¹³ Ipaluah Kristus i ngo kita ipas sumpah hatoren pati-patiin i nai merkitè-kitè iberrèken diriNa kenna sumpah pati-patiin i mengkepkep kita. Tersurat ngo ibas Bibèl, "Kenna sumpah ngo gennep sinigantung i kayu persilang." ¹⁴ Ibaing Kristus bagidi, asa ijalo kalak siso Jahudi ngo niperbagah Dèbata taba si Abraham i. Merkitè bagidi, kita sipercaya bai Dèbata pè, ndorok mo menjalo Tendi sienggo iperbagah Dèbata idi kin. ¹⁵ Alè dengan! Kebiasaan jelma mo lebbè kubaing mahan codiin. Mula lot ibaing jelma sada bulaban, janah enggo isahken, jadi isè poda ndorok mengosè bulaban i barang pè menambahisa. ¹⁶ Bagidi ma ngo bulaban Dèbata sienggo ibulabanken taba si Abraham dekket mi pemparenna. Ibas Bibèl oda lot tersurat "dekket taba kalak pinempar si Abraham," tentu jelma nterrem ngo i. Tapi ukum sitersurat imo; "dekket taba pemparenmu," lapatenna sada kalak sambing, imo Kristus. ¹⁷ Sikudokken i sènda imo: Enggo lot bulaban Dèbata janah enggo isahken lebbèen. Asa hatoren pati-patiin siniberrèkenna enggo kessa lebbè leppas empat ratus tellupuluh tahun, oda ndorok membatalken sienggo isahken idi kin, ukum gabè mago nola ngo kegegohen bulaban Dèbata i. ¹⁸ Ai ukum mergantung mi pati-patiin ngo basa-basa Dèbata, oda nèngè ngo ibasa-basaken sienggo ibulabanken; kerna enggo kin ngo ibulabanken Dèbata bai si Abraham, jadi iberrèken Dèbata mo i bana. ¹⁹ Mula bagi, man kadè ngo hatoren pati-patiin idi iberrèken? Gunana imo: iberrèken hatoren pati-patiin i mahan tambahna ngo, lako magahken kadè dosa jelma merradepken Dèbata. Mergegoh ngo hatoren pati-patiin idi ninggat pekerroh sada kalak pemparen si Abraham i mo sinibulabanken Dèbata kin taba si Abraham i. Hatoren pati-patiin idi iberrèken merkitè malaèkat-malaèkatna bai jelma merkitè sada kalak jelma. ²⁰ Lebbè lot ngo dua kalak kettubungen, asa perlu lot tellangkè. Tapi ukum Dèbata oda pella memmaing tellangkè, kerna Ia sendiri ngo hadep memmaingkensa. ²¹ Mula bagidi meralo ngo hatoren pati-patiin idi mi siniperbagah Dèbata? Oda ngo! Ai ukum hatoren pati-patiin niberrèkenna i ndorok merrèken kenggelluhen taba jelma merlapaten ngo i ndorok mendè nola mengolihi persaoren jelma dekket Dèbata kemulihken hatoren pati-patiin i. ²² Tapi tersurat ngo ibas Bibèl: karina jelma enggo ilenggemmen kuasa dosa. Kernana idi, sibasa-basa nibulabankenna kumernaken kepercayaen bai Jesus, ndorok ma ngo iberrèken taba jelma sipercaya bana. ²³ Tikan makdèng dapet tikkina jelma i percaya bai Kristus, idèdah hatoren pati-patiin idi ngo kita lebbè; bagè cara ikandang ngo kita soh mi tikki perntarar ni kepercayaen i. ²⁴ Jadi dosken pendèdah ngo hatoren pati-patiin i banta mersembah kita soh mi pekerroh Kristus lako pelliasken persaorenta dekket Dèbata, kerna percaya kita bai Kristus. ²⁵ Bagèndari kerna enggo dapet tikkina jelma i percaya bai Kristus, jadi oda nèngè ngo kita igemgemmi pendèdah i, imo hatoren pati-patiin i. ²⁶ Kerna percaya ngo kènè bai Jesus Kristus, gabè mersaor mo kènè dekketSa, kernana idi gabè dukak-dukak Dèbata mo kènè. ²⁷ Enggo ngo iperridi kènè mi bagasen gerar Kristus. Jadi sada daiging ngo enggo kènè dekket Kristus. ²⁸ Kemulihkenna idi, oda nèngè ngo lot bèdana kalak Jahudi bang kalak siso Jahudi pè, kalak hamba barang siso hamba, anak laki barang daberru. Gabè sisada ngo kènè ibagasen Kristus. ²⁹ Mula milik Kristus kènè, jadi pemparen si Abraham ngo kènè. Karina ngo kènè merhak menjalo niperbagah-bagah Dèbata.

¹ Èn ngo sikudokken; sidekkah anak-anak dèng ahli waris i, oda lot kalihna bagè sada kalak hamba, tukasi pè ia ngo sidasa karinana. ² Tapi ibagasen penjamotiin janah pengurusen ngo ia, mèma soh umurna mi sienggo ibuhul Bapana kin. ³ Bagidi ma ngo bang kita pè; sidekkah anak-anak dèng kita dak iperhamba tendi simerkuasa i duniaèn ngo kita. ⁴ Tapi enggo kessa dapet tikkina, ipasulak Dèbata mo AnakNa mi dunia èn, itubuhken sada kalak daberru situnduk mi gemgemmen pati-patiin, ⁵ asa merkitè bagidi, Ipaluah kalak sinigemgemmen hatoren pati-patiin idi, nai kernana idi ndorok mo kita gabè dukak-dukak Dèbata. ⁶ Kumarna dukak-dukak Dèbata ngo kènè, gabè ipasulak Dèbata mo Tendi AnakNa i mi bagasen ukur ndè bak ukurku, imo Tendi simendilo-ndiloken "Abba, alè Pa!" ⁷ Jadi kumarna naidi, oda nèngè ngo hamba kènè tapi dukak ngo. Janah kumarna dukak Dèbata kènè, iberrèken Dèbata mo bai ndènè karinaNa silot bana i, gabè perbagianen bai dukak-dukakNa. ⁸ Ukum tikala i, oda dèng ngo itandai kènè Dèbata, kernana idi iperhamba siso Dèbata i ngo kènè. ⁹ Tapi ukumbagèndari, enggo itandai kènè Dèbata, jadi itandai Dèbata ma ngo kènè pè. Nai kasa uè nola kènè balik taba tendi dunia siso mergoldè janah simerlèa i? Kasa uè dèng kènè iperhamba sibagidi? ¹⁰ Enggo gabè kalak peniti-niti ari, bulan bak tahun-tahun tertentu nola kènè? ¹¹ Kekelsohen ngo aku kumarna kènè bagidi, tah mada ngo oda merguna kelejanku mengkepkep kènè! ¹² Kènè alè dengan! Kupido bai ndènè, asa bagè aku mo kènè, ai aku pè enggo bagè kènè. Oda lot kadè pè salah ibaing kènè taba aku. ¹³ Katèngku ièngèt kènè dèng ma ngo bakunè tikala i aku mennukutken Sukuten Kelluahen i bai ndènè, imo tikan sakiten i aku. ¹⁴ Oda ngo moyang atè ndè midah aku tikan naidi, tukasi pè dagingku gabè sada pengojiin bai ndènè. Dosken malaèkat Dèbata ngo aku ijalo kènè tikan naidi, bak bagè penjalo ndènè bai Jesus Kristus sendiri. ¹⁵ Sennang kalohon ngo kènè tikala i, tapi bagèndari enggo bakunè lolo ukur ndènè i? Ukum tikala i uè ngo kènè bang mencokil mata ndènè idi pè merrèken bangku, ukum terbakin kin. ¹⁶ Jadi gabè musuh ndènè nola ngo aku kumarna kudokken situhunna taba kènè? ¹⁷ Ukum kalak sidèban i, laèn ngo maksudna taba kènè, mula pè idahen bagè cara mertuhu-tuhu kalak i nggasang mendahi kènè, ai ukum tujuun kalak idi imo asa mpostep persaorenta, nai gabè mengèkut bai klak i mo kènè katèna. ¹⁸ Selloh ngo nggasang mi ulaan merandal tapi ulang mo nemmu lebbè i tengah-tengah ndènè aku asa nggasang kènè. ¹⁹ Kènè alè dukak-dukak sikukellengi! Mengolihi mpiah ngo kuakap bagèndari kumarna kènè. Bagè sada kalak partua ibages ngo aku bagèndari mengakap mpiah tikan mennubuhken dukakna. Janah dak terrus ngo bagidi, mula oda tersuan dèng bakko Kristus bai ndènè! ²⁰ Nteddoh ngo aku bagèndari roh mi tengah-tengah ndènè, asa ndorok mengerana aku pessèngètken kènè, ai oda kubettoh nèngè bagèndari bakunè mo ndia kubakin bai ndènè! ²¹ Kènè alè siuè nigemgemmen hatoren pati-patiin i, dengkohken kènè mo ranangku èn; asa kubagahken bai ndènè bakunè tersurat ibas Bukku hatoren si Musa. ²² Tersurat ngo i sidi: Dua kalak ngo dukak si Abraham, hamba ngo inang dukakna sisada, tapi oda ngo hamba inang dukakna sisada nai. ²³ Ukum anak nitubuhken hamba i, tubuh mengèkutken nipergeddo daging ngo, tapi ukum anak nitubuhken berru nitokor i, tubuh kumarna enggo kin ngo iperbagah-bagah Dèbata. ²⁴ Gabè sada codiin ngo i; daberru sidua kalak i codi ngo mi dua padan; sada mo idi i Delleng Sinai nai asalna, imo si Hagar; itubuhken ngo dukakna mahan hamba. ²⁵ Jadi si Hagar imo Delleng Sinai si ni nagerri Arab. Ia ngo lèndung kuta Jerusalem bak karina pengisina sibagèndari i, sienggo gabè hamba. ²⁶ Tapi ukum Jerusalem si ni sorga i, imo Jerusalem bèbas, janah ia ngo inangta. ²⁷ Tersurat ngo ibas Bibèl, "Lolo mo kono alè daberru nggempus, siso nung mennubuhken. Mersampang atè janah merroang-oang mo kono alè siso nung mengakapken bakunè mpiahna mennubuhken! Ai buèen ngo dukak daberru nitadingken serrangenna dari pada dukak daberru ni ianken serrangenna." ²⁸ Kènè ngo alè dengan dukak-dukak Dèbata sinitubuhken kumarna bagah-bagah Dèbata; codi ngo kènè bagè si Isak. ²⁹ Tikanna idi dak idersa anak situbuh kumarna nipergeddo daging i ngo kènè anak situbuh kumarna lemmo atè Tendi Perbadia. Bagi ngo soh bagèndari. ³⁰ Tapi bakunè ngo idokken sitersurat i bai Bibèl? Bagèen ngo, "Pelaus mo daberru hamba i rebbak dekket dukakna, kerna mak ndorok rebbak usur dukak daberru hamba i dekket dukak daberru nitokor i." ³¹ Asa, alè dengan, oda ngo dukak daberru hamba i kita; tapi dukak daberru nitrokor i ngo.

¹ Ukum bagèndari enggo mo ipaluah kita, kerna enggo ipaluah Kristus i! Kerna naidi pertahanken mo kebèbasenmu, janah ulang nèngè uè iperhamba. ² Èngèt kènè mo; mula ipidoken kènè asa itakkil kènè, merlapaten ngo i oda lot kadè gunana bai ndènè Kristus i. Aku si Paulus ngo mendokken èn bai ndènè. ³ Kuulaki mendokken sikali nai taba kènè kalak simengido asa itakkil i, kennah iulaken ngo karina hatoren pati-patiin i! ⁴ Ai mula merkitè mengulaken hatoren pati-patiin i naing merdamè kènè dekket Dèbata enggo gabè mpostep persaoren ndènè dekket Kristus. Jadi gabè iruar masèh atè Dèbata ngo kènè. ⁵ Tapi ukum kami dak mengharapken pengurupi Tendi Perbadia janah merdangaan ipas kepercayaen bai Kristus idi ngo asa gabè ndorok merdamè dekket Dèbata. ⁶ Ai mula enggo ibagasen Kristus Jesus kita, mertakkil barang oda mertakkil oda nèngè soal i. Siperluna imo percaya bai Kristus, janah keteridahenna imo merrukur ngkelleng taba kalak sidèban. ⁷ Tikala i toko ngo pengonggal ndènè! Keppè bagèndari kasa oda nèngè merpenguèi kènè mi lemmo atè Dèbata? Isè mengajar-ngajari kènè? ⁸ Oda ngo bai Dèbata sienggo mendilo kènè i nai rohna simengkella-kella kènè i! ⁹ "Cituk pè ragi, kembang ngo ibaing nditak sienggo igaru!" nina simendokken. ¹⁰ Tapi bagi pè idi, tok ngo aku bai ndènè, oda gabè laèn nola perrukuren ndènè bangku nai, ai enggo sisada kita ibagasen Kristus. Janah tok ngo aku, barang isè pè mengkella-kella kènè, ihukum Dèbata ngo i. ¹¹ Ukum tersèngèt aku alè dengan kasa imusuhi kènè aku mula kujamitaken hatoren mertakkil idi perlu? Mula kujamitaken bagidi oda ngo lot nèngè persoalen tersèngèt silang Kristus i. ¹² Lotiin mo karuar kalak simengkella-kella perrukuren ndènè bagidi i kuria nai! ¹³ Asa mi kelluahen i ngo kènè idilo. Tapi ulang mo baing kènè kelluahen i gabè pepulakken cubellek-cubellek daging ndènè. Dak ibagasen kelleng i mo kènè mersipeuè-uèen. ¹⁴ Èn ngo rèmpun hatoren pati-patiin "Kennah kekellengenmu ngo denganmu jelma dosken dirimu." ¹⁵ Tapi mula mersingatngaten ngo kènè samah kènè, manat mo kènè, ai gabè rebbak tumpat mo kènè. ¹⁶ Èn ngo kudokken: Belli mo Tendi Dèbata mengarak-ngarak kono, janah ulang kono nggèut menguèi cubellek-cubellek dagingmu. ¹⁷ Merralo ngo lemmo atè Dèbata mi cubellek daging, janah nikellemmoken Tendi Perbadia pè, merralo ngo mi cubellek daging. Juhap ngo dakdak sidua i, gabè oda nèngè terbaing kono mengulaken nipercinta ukurmu. ¹⁸ Tapi mula Tendi Perbadia ngo mengarak-ngarak kènè, oda ngo ikuasai hatoren pati-patiin idi kènè. ¹⁹ Ai ntangkas ngo perulaan daging; imo luhlah, mellamun, siso patut, ²⁰ kesipèlèbèguun, kinangguruun, persilisihen-persilisihen, merrubat-rubat, cimburu, pungur, dirina kessa isarihken, mersikosomen, dekket mersitaki-takiin, ²¹ cian, permabuken, merkerja-kerja dekket sidèbankenna codi misi. Ukum klak simengulaken bagidi tosè bagè sienggo kudokken tikala i, bagi ma ngo kudokken bang bagèndari pè; oda dekket kalak sibagidi gabè ummat Dèbata. ²² Tapi èn buah sienggo iarak-arak Tendi Perbadia: Nkelleng, lolo, damè, sobar, budi, atè mbersih, sètia, ²³ merrukur ncerrep, mengerajai diri. Oda merralo hatoren pati-patiin dempak kalak sibagidi. ²⁴ Kalak sienggo gabè milik Jesus Kristus, enggo ipersilangken bakko kejelmaan rebbak dekket cubellek, bak ketagiin dagingna. ²⁵ Kumarna enggo iberrèken Tendi Perbadia banta nggelluh sirembaru, jadi patut ngo ia menguasai nggelluhta. ²⁶ Oda ndorok kita gabè sombong, ulang memmaing cio atè barang mersicianen.

¹ Alè dengan! Mula idapet kènè tersor jelma mengulaken dosa, peddahi kènè sienggo menguèi Tendi Perbadia i mo ia, merkitè-kitè rana melamlam, asa balik ia mi ulaan sènteng, tapi jamoti kènè mo diri ndènè asa ulang dekket kènè pè gabè terèkut-èkut. ² Mersiurupen mo kènè memersan embahen simbotong i ai merkitè bagidi, enggo iuèi kènè pati-patiin Kristus. ³ Ai mula ipeburnang dèba dirina, keppèken kadè poda ia, mengelluapi dirina ngo ia. ⁴ Gennep mo memerrèso dirina, tah selloh ma pengellakona barang tah oda. Nai ndorok mo ia gegah kerna simendè nibaingna i. Ulang pella ibanding-bandingken pemmaingna i dekket nibaing sidèban. ⁵ Ai gennep jelma ngo memersan tanggung jababna. ⁶ Kalak simenjalo peddah bai Kristus nai, ibagiken mo dèba simerandal silot bana i bai simengajarisa. ⁷ Ulang kènè laling. Oda uè Dèbata akkal-akkalen! Barang kadè isuanken jelma idi ma ngo perraninna. ⁸ Barang isè mennuan mengèkutken bakko kejelmaan, kemmatèen ngo iperrani i bakkona i nai. Tapi barang isè mennuan mengèkutken Tendi Perbadia, iperrani mo kenggelluhen siamman sumendah bai Tendi Perbadia nai. ⁹ Kernana idi ulang mo kita merkeleja-lejaan mengulaken simerandal; ai mula oda mengadi-ngadi kita mengulaken simerandal, siperrani mo luas hasilna. ¹⁰ Jadi tikan lot dèng kesempaten banta, siulaken mo simerandal taba karina jelma, terlebbih mo taba samah dengan sipercaya bai Jesus. ¹¹ Perratè-atèken kènè mosuratku sikusuratken i sèn! ¹² Barang isè mengayaki kesangapen daging, kalak sibagidi mo simemaksa kènè lako mengèkutken hatoren mertakkil. Tapi ibaing kalak i pè bagidi, pellin asa ulang i letlet Jahudi sambing ngo kessa ia kerna silang Kristus. ¹³ Salangkalak i semengulaken mertakkil i, oda ngo i dalanken karinana hatoren pati-patiin. Tapi dok atèna mertakkil mo kènè nemmu, asa i poji kalak i dirina, kumarna i uèi kènè hatoren i! ¹⁴ Tapi ukum aku, oda uè aku moji-moji diringku, laènken kumarna Tuhanta Jesus Kristus sienggo matè i persilangken i. Ai kumarna nggo matè Ipersilangken ia, oda nèngè ngo lotlapaten dhunia èn bangku. Janah aku pè nggo bagè cara sienggo matè meradepken dhunia èn. ¹⁵ Mertakkil barang oda mertakkil, oda pella kadè i, ai ukum siperluna i mo gabè jelma rembaru. ¹⁶ Jadi bai karina jelma simengulaken i bak karina ummat Dèbata, dak i berrèken Dèbata mo bana damè dekket masèh atè. ¹⁷ Laènkenna i, ulang pella lot nèngè barang isè pè mennusahi aku, kerna lot ngo i pas dagingku tandha-tandha magahken si mengèkutken Jesus ngo aku. ¹⁸ Dak i pasu-pasu Tuhanta Jesus Kristus i mo kènè karina. Amèn. Tabe nami, Paulus