ULAAN APOSTÈL

ULAAN APOSTÈL

¹ Alè Teopilus! Ipas bukkungku perlebbè i enggo kupetterrang karinana sinibahan dekket sinipeddahken Jesus, kessa nai Ia kitebbennai bahanNa, ² soh mi ari perlausna mi sorga. Sinderrang madèng laus mi sorga, enggo idokken kin taba apostèl-apostèl i merkitè kuasa Tendi Perbadia, imo apostèl nipilihNa i. ³ Enggo kessa matè Ia janah balik nggelluh, nggati ngo Ipacidah dirina janah memmaing tanda-tanda dekket mengerana ibagasen empat puluh ari dekkahna, magahken tuhu-tuhu ngo Ia balik nggelluh. Idah kalak i ngo Ia janah mengeranai dekket kalak i tersèngèt kerajaen Dèbata. ⁴ Tikan sidari tupung pulung kalak I rebbak mangan, idokken mo taba kalak idi, "Ulang kènè laus i Jerusalem nai. Pèma kènè mo i sidi soh mi iberrèken Bapa niperbagah-bagahNa i mo bagè sienggo Kubagahken idi kin bai ndènè tikala i. ⁵ Laè ngo ukum iperidiken si Johanes taba kènè, tapi oda pella ndekkah nèngè, iperridi mo kènè merkitè Tendi Dèbata." ⁶ Sinderrang mertumpu Apostèl i rebbak dekket Jesus, ikusoi kalak i mo Ia, "Tuhan, bagèndari mo pessuangenmu kerajaen i bai bangsa Israel?" ⁷ Nai ialoi Jesus mo, "Bapa ngo menentuken arina dekket tikkina. Oda pella perlu ibettoh kènè i, ai kuasa Bapa ngo i. ⁸ Tapi terolih kuasa ngo kènè, kumarna enggo senggep Tendi Dèbata bai ndènè. Gabè saksingKu mo kènè i Jerusalem dekket i suberri Judèa bak Samaria, soh mi punca dunia èn." ⁹ Enggo kessa idokken Jesus bagidi, mèter terkèkè mo Ma mi sorga inelnelli kalak i, nai ikemkemmi hembun i mo Ia ipas penengennen kalak i nai. ¹⁰ Sinderrang dak itarè kalak i dèng mi langit, sintempu mèter cènder mo dua kalak merpakèen mbulan i gembar kalak i. ¹¹ "Kènè kalak Galilea, kasa dak cènder kènè i sidi janah mennarè mi langit?" Nina taba kalak i. "Ukum Jesus sininelnellen ndènè laus mi sorga i mennadingken kènè, molih nola ngo ia luas, tosè bagè perlausna niidah ndènè ndai." ¹² Nai balik mo apostèl-apostèl i mi Jerusalem i Uruk Zaitun nai. Ukum daoh uruk Zaitun i Jerusalem nai, kira-kira sada batu ngo. ¹³ Soh kessa kalak i mi Jerusalem, ibengketti kalak i mo sada bages, bekkas kalak i kiserrang, janah merrian mo kalak idi i bilik perdatès. Apostèl-apostèl i imo si Petrus dekket si Johanes, si Jakobus dekket si Andreas, si Pilipus dekket si Tomas, si Bartolomeus dekket si Mateus, si Jakobus anak si Alpeus dekket si Simon kalak Zelot bak si Judas anak si Jakobus; ¹⁴ karinana ngo kalak i sada atè merpulung lako mersodip. Rebbak mersodip ngo kalak i dekket daberru-daberru bak si Maria inang Jesus, bagidi ma pè dekket anggi Jesus. ¹⁵ Tikan sidari nderrang merpulung -- kalak i lot ngo roh kira-kira seratus dua puluh kalak buèna -- cènder mo si Petrus lako mendokken ranana, ¹⁶ "Kènè karina alè dengan! Kennah saut ngo kata sitersurat i bagasen Bibèl, sinidokken Tendi Dèbata merkitè si Daud, tersèngèt si Judas simenguluken kalak lako menangkup Jesus idi. ¹⁷ Termasuk bilangenta ngo ukum si Judas i, janah terpilih kin ma ngo ia lako mengula rebbak dekket kita." ( ¹⁸ Ukum si Judas enggo mo kennaan tanoh mahan pendèbanna arap upahna menelbuh i. Ndabuh ngo ia janah matè, sanga mpustak beltekna janah merbincahcah ngo ginagatna. ¹⁹ Karinana pengisi Jerusalem ngo bettoh-bettohen i. Kumarna naidi ngo asa igerari kalak i tanoh i ibagasen kata kalak i "Akeldama", lapatenna "Tanoh Daroh".) ²⁰ "Ai tersurat ngo i bukku Psalm bagèen: Gabè melongo mo bekkas idi, janah oda lot nèngè pengisina. Lot ma ngo tersurat bagèen, ’Belli mo isingkat sidèban bekkasna idi kin.’ ²¹ Kerna naidi kennah lot ngo tambah sada kalak nai mahan denganta gabè saksi, magahken ukum Tuhan Jesus enggo balik nggelluh i kemmatèen nai. Janah sienggo rebbak dekket kita ngo ia sidekkah Tuhan Jesus rebbak dekket kita, ²² mulai si Johanes perridiken soh mi tikan laus Tuhan Jesus mi sorga i tengah-tengahta nai." ²³ Nai iusulken kalak i mo dua kalak mahan pilihen, imo si Josep nigerarenna ma Barsabas (igerari ma ngo ia si Justus), dekket si Matias. ²⁴ Mersodip mo kalak i karina, "Ialè Tuhan, kono ngo menandai atè-atè bak pikiren jelma. Tuduhken mo barang siapai ngo ipilih kono kalak èn, ²⁵ lako menjalo ulaan pengendeng, imo gabè apostèl nitadingken si Judas sienggo ndabuh ipas ulaan idi nai janah enggo matè." ²⁶ Nai mersijemput sinisurat mo kalak i, gabè serrang si Matias mo. Jadi ipebangkit mo ia gabè apostèl rebbak dekket apostèl sisipuluh sada nai.

¹ Dapet kessa mo ari Pentakosta, merpulung mo jelma sipercaya i sada bekkas. ² Sintempu mo terdengkoh sora i langit nai bagè sora angin ndor menempul. Merdengung ngo sorana mendomi bages kundulen kalak idi i. ³ Nai idah kalak i mo tosè bagè dilah api merdalan, nai isenggeppi mo kalak i karinana. ⁴ Nai dom Tendi Dèbata mo kalak i, janah mèter mengeranai mo kalak idi ibas kata sidèban merguru mi pemmerrèken Tendi i bai kalak i mengkatakensa. ⁵ Tikanna idi nterrem ngo kalak Jahudi i merbagè-bagè nagerri silot i dunia èn merrian i Jerusalem. Kalak simenguèi Dèbata ngo kalak i. ⁶ Gabè tersengget janah lengang mo kalak i mendengkoh apostèl i mengerana i kata kalak i gennep. ⁷ Kumarna lengangna, gabè nina kalak i mo, "Otang kalak Galilea ngo kalak i karina simengeranai i? ⁸ Kasa karina kita mendengkoh rana kalak i, i gennep katanta sendiri imo kata sinipakkènta i nagerinta? ⁹ Ai kita roh i kuta Partia, Media, Elam, Mesopotamia, Judèa, Kapadosia, Pontus, Asia, ¹⁰ Frigia, Pamfilia, Mesir, nagerri Libia si kan Kirene; dèba kita èn roh i Rom nai, ¹¹ dèba kalak Jahudi janah dèba bangsa sidèban sienggo masuk gabè agama Jahudi; dèba roh i Kreta dekket i Arab nai. Ipas katanta gennep ngo sidengkoh kalak i mengeranaken kellengangen bak kuasa nibaing Dèbata!" ¹² Kumarna hèran janah lengangna kalak idi, nina mo samah-samahsa, "Merkadè ngo ndia i?" ¹³ Tapi mengalingi ngo dèba, "Mabuk ngo kalak idi." ¹⁴ Nai cènder mo si Petrus rebbak dekket apostèl si sipuluh sada kalak nai, nai ipegang mo ranana, nina mo, "Kènè alè dengan, kalak Jahudi dekket karina kènè simertumpu i Jerusalem! Dengkohken kènè mo janah bettoh kènè mo sikudokken èn. ¹⁵ Oda ngo mabuk kami bagè nitukasken ndènè, ai pukul sibah siceggen dèng ngo bagèndari. ¹⁶ Tapi enggo kin ngo ibagahken Dèbata narap Nabi Joel: ¹⁷ Nina Dèbata ngo, ’I ari podi Kuarirken mo TendingKu bai karina kalak. Nai merralaten mo dukak-dukak ndènè janah isukutken taba kènè siKubagahken bai kalak i. Idah simatah daging ndènè mo siKupacidah bai kalak i. Lot mo nipi situa-tua ndènè, imo nipi siKuberrèken bai kalak i. ¹⁸ Taba naposongKu -- anak laki bak daberru pè -- Kuarirken mo TendingKu i ari i. Isukutken kalak i mo tersèngèt siKubagahken bai kalak idi. ¹⁹ Kubaing mo tanda kelengangen i langit, janah oda nung masa bagidi i tanoh èn; imo daroh dekket api bak cèmber gellap tuiten. ²⁰ Nai mobah mo mataniari gabè gellap bulita, janah bulan i gabè mbara bagè daroh sinderrang madèng dapet Ari Tuhan i, enggo roh ari mbellen janah mermulia i. ²¹ Ibas katika i, kalak sipingko-pingko taba Tuhan i, ipaluah ngo ia.’ ²² Kènè alè kaka anggi kalak Israel! Dengkohken kènè mo sikudokken èn: Ukum Jesus kalak Nazaret i, enggo kin ngo ipasulak Dèbata lako bai ndènè. Taridah ngo i merkitè kellengangen dekket kuasa nihanaken Dèbata merkitè Jesus i tengah-tengah ndènè. Ntangkas ngo idi ibettoh kènè. ²³ Ipessoh Dèbata ngo ia bagè nipergeddoNa kin gabè ipersilangken janah ibunuh kènè merkitè tangan perjahat. ²⁴ Tapi ipegelluh Dèbata nola ngo Ia mengolihi i simatè nai. Ibendut kemmatèen i ngo Ia tapi ipaluah Dèbata ngo Ia, ai oda mèter terrus tercèkèpen kemmatèen i Ia. ²⁵ Enggo kin ma ngo idokken si Daud tersèngèt Jesus bagèen: ’Dak kuidah ngo Tuhan i i hadeppenku; ai dak cènder ngo Ia i kamuhunku; asa ulang tergurtik barang kadè pè aku. ²⁶ Kumarna naidi ngo dak meroang-oang atèngku, babahku mengeruapken pemoji-mojiin; nai sennang mo dagingku èn memèma-mèma i pendèbaan. ²⁷ Ai oda ibelli Kono tendingku tading rebbak kalak sienggo matè. Oda ibelli kono naposoMu sibujur i macik soh mellala. ²⁸ Enggo ibagahken kono bangku dalan mi kenggelluhen situhunna. Uluk gati sampang atèngku kumarna dak ngo Kono rebbak dekket aku.’ ²⁹ Kènè alè dengan, kudokken mo ntangkas janah ntompel taba kènè tersèngèt si Daud, bapanta simeppar kita i. Matè ngo ia janah ikubur; lot dèng ngo soh bagèndari kuburenna banta èn. ³⁰ Enggo sanga ibulabanken Dèbata tersèngèt sada kalak ipas pemparen si Daud nai, ipebangkit Dèbata gabè raja. Kumarna ibettoh si Daud ngo bulaban i janah kumarna nabi ma ngo ia, ³¹ ibettoh ngo barang kadè sinaing bakinen Dèbata. Jadi enggo kin ngo ibagahken, ukum Raja Sipaluah niperbagah-bagah Dèbata, kennah balik nggelluh ngo i kemmatèen nai. Nina si Daud ngo: ’Oda ngo ibelli Ia tading i kemmatèen; oda ngo gabè mellala dagingNa sanga kerri!’ ³² Jesus i ngo sienggo ipegelluh Dèbata i kemmatèen nai. Karina ngo kami mengidah i. ³³ Enggo ipekèkè ia mi bekkas sindatesna, janah iberrèken Dèbata ngo bana kuasa ninganna menjalo Tendi Dèbata sienggo iperbagah-bagah Bapa i kin. Janah sinidengkoh bak siniidah ndènè bagèndari imo jandi sienggo Iarirken Dèbata bai nami. ³⁴ Ukum si Daud oda ngo laus mi sorga, tapi nina si Daud ngo: ’Idokken Tuhan i ngo taba Tuhanku: Kundul mo kono i kamuhunKu èn. ³⁵ Pèma Kubaing karina musuhMu tunduk baMu.’ ³⁶ Jadi bettoh kènè mo, karina kènè alè bangsa Israel, ukum Jesus sienggo nipersilangken ndènè i, ia ngo ipebangkit Dèbata gabè Tuhan janah Raja Sipaluah!" ³⁷ Idengkoh kalak i kessa mo kata i, bulisah kalohoon mo atè kalak i. Nai ikusoken kalak i mo taba si Petrus, bak taba apostèl-apostèl sidèbanna i. "Kadè mo bakinen nami alè dengan?" ³⁸ Ialoi si Petrus mo, "Tobat mo kènè ibas dosa-dosa ndènè nai. Janah kennah iperidi ngo karinana kènè mi bagasen gerar Jesus Kristus, asa iampuni dosa-dosa ndènè. Nai iberrèken Dèbata mo bai ndènè hadiah, imo Tendi Dèbata. ³⁹ Ai lako bai ndènè dekket bai pinempar ndènè bak bai kalak simerrian i sindaoh ngo siniperbagah-bagah Dèbata i; imo bai karina kalak sinidokken Tuhan Dèbata roh mendahiSa." ⁴⁰ Bagidi mo ipeterrang si Petrus taba kalak i. Janah mèduk dèng ma ngo peddah idokken taba kalak i, asa ipaluah kalak i dirina ipas bangsa jahat idi nai, sinaing ihukum Dèbata. ⁴¹ Nterrem ngo gabè percaya mendengkoh sinikataken si Petrus i, gabè iperridi mo kalak i. Nai gabè tambah mo bilangen sipercaya sidarinkenna i tellu ribu kalak. ⁴² Mertuhu-tuhu ngo kalak i merguru taba apostèl-apostèl i. Ibagasen sada ni atè sada orjok mertumpu. Rebbak mangan mo kalak i janah rebbak mersodip. ⁴³ Mèduk kalohoon ngo tanda kellengangen ibaing apostèl-apostèl i, jadi gabè merkebiaren ngo kalak i karinana. ⁴⁴ Gabè sisada ngo kalak i sipercaya i karinana, janah gabè rebbak sisada milik, i milik sisada. ⁴⁵ Idèai kalak i ngo hartana dekket silot bana, janah ipembagiken ngo tokorna i bai kalak i karinana mengèkutken keperlunna gennep. ⁴⁶ Gennep ari ngo kalak i mertumpu i Bages Dèbata, merkerrin ngo sesser bages kalak i janah rebbak mangan ibagasen sampang atè janah ibagasen ncerrep ukur. ⁴⁷ Dakdak ngo kalak i memmoji Dèbata, gabè ikellemmoken karina jelma ngo kalak i. Gennep ari ngo tambah bilangen kalak i, kerna iberrèken Tuhan i ngo bai kalak i jelma sienggo ipaluah.

¹ Tikan sidari laus mo si Petrus dekket si Johanes mi Bages Dèbata, pukul tellu ciboon, imo tikki lako mersodip. ² I Pèntu simergerar ’Pèntu merandal’, lot mo sada kalak daholi nitempuk sigading mulai tubuh. Gennep ari ngo ia itaruhken kadè-kadèna mi sidi lako mengido-ngido taba kalak siroh mbengket mi Bages Dèbata. ³ Ipido mo masèh atè bai kalak i nai. ⁴ Nai inelnelli kalak i mo ia, janah nina si Petrus mo, "Tengen dempak kami!" ⁵ Nai itengen mo kalak idi, janah harap ngo atèna lot barang kadè berrènken kalak i bana. ⁶ Tapi nina si Petrus mo mbangsa, "Ukum emmas barang pirak oda lot bangku. Tapi kadè silot bangku, kuberrèken mo bamu: Merkitè gerar Jesus kalak Nazaret i, merdalan mo kono!" ⁷ Nai mènter iteggu si Petrus mo tanganna kamuhun lako mengurupisa cènder. Jadi mèter mergegoh mo nèhèna dekket mata-mata nèhèna i. ⁸ Mèter simpusta mo ia cènder janah merdalan mo ia lumaus roh, mi sèn mi sadoi. Nai ibengketti mo Bages Dèbata rebbak dekket si Petrus dekket si Johanes; ⁹ ninganna merdalan i, mangkat-mangkat ngo ia ningan memoji-moji Dèbata. ¹⁰ Ai itandai kalak i ngo ia simengido-ngido mbaru èn janah dak kundul i "Pèntu Merandal" i Bages Dèbata. Lengang ngo kalak i janah kagum mengidah simasa bana i. ¹¹ Karina ngo kalak i dak mengèkutken si Petrus dekket si Johanes. Nai soh kessa mo kalak i sitellu mi èmpèr simergerar "Èmpèr si Salomo", merrohen mo karina jelma i mencingkoi kumarna kagumna. ¹² Idah si Petrus kessa mo jelma mbuè i, nina mo taba kalak i, "Kènè alè kalak Israel, kasa lengang kènè midah simasa èn? Mada ngo dok atè ndènè kumarna kuasa nami asa gabè merdalan jelma èn, barang kumarnaken burju nami menguèi Dèbata? ¹³ Dèbata nisembah si Abraham, si Isak, si Jakob dekket empungta i ngo enggo pessangapken NaposoNa, imo Jesus. Jesus imo nipesakat ndènè taba penguasa janah itulak kènè i hadeppen si Latus, tikanna naing ipaluah si Latus Ia. ¹⁴ Simbadia ngo ia janah bennar bana sènteng, tapi itulak kènè ngo Ia janah isessak kènè ngo si Latus asa ipaluah nola sada kalak pemmunuh mi tengah-tengah ndènè. ¹⁵ Ibunuh kènè ngo Ia tukasi pè Ia ngo benna kenggelluhen bai karinana jelma. Enggo ipegelluh Dèbata nola Ia mengolihi i kemmatèen nai. Kami ngo saksi tersèngèt i. ¹⁶ Kènè dengan enggo idah janah isaksiken kènè kadè simasa bai nitempuk sigading èn. Enggo mergegoh Ia janah malum, kemulihken percaya taba Jesus bak kuasaNa. Janah kumarna percaya mi gerar Jesus i ngo asa gabè malum iakap i hadeppen ndènè karina. ¹⁷ Kènè alè kaka-anggi! Kubettoh ngo, ibaing kènè pè bagidi, kumarna oda ibettoh kènè ngo kadè sinibaing ndènè i, tosè bagè karina pengulu-pengulu ndènè. ¹⁸ Merkitè bagidi, saut mo bagè nidokken Dèbata merkitè karina nabi-nabiNa arnia: Kennah menggong simpersuk ngo Raja Sipaluah i. ¹⁹ Kumarna naidi, satdar mo kènè janah tobat ipas dosa-dosa ndènè nai, nai balik mo kènè mendahi Dèbata, asa isasa dosa ndènè. ²⁰ Roh mo Tuhan i mi perrukuren ndènè. Janah ipasulak Tuhan i mo Jesus roh mendahi kènè kerna enggo itentuken Dèbata kin ia gabè Raja Sipaluah. ²¹ Kennah merian i sorga ngo ia lebbè, mèma iperimbaru Dèbata karinana bagè sienggo nidokkenna i merkitè nabi-nabiNa arnia. ²² Nung ngo idokken si Musa, ’Nabi sada bagè aku èn, ipecèndek Tuhan Dèbata ndènè, i tengah-tengah ndènè idi nai; dengkohken kènè mo Ia. ²³ Barang isè oda mendengkohken nidokken nabi idi, kennah iliplip ngo ia i bangsa Dèbata nai janah ibinasaken.’ ²⁴ Karina nabi sienggo nung memmagahken sinidokken janah niperbagah-bagah Dèbata mulai si Samuel nai soh mi nabi siroh i podi si Samuel, karina memeritaken tersèngèt jaman èn. ²⁵ Lako bai ndènè ngo alè dengan bagah-bagah Dèbata sinipesoh nabi-nabi. Ibas padan sinibaing Dèbata taba empung ndènè idokken Dèbata ngo taba si Abraham bagèen, ’Merkitèken pemparenmu, gabè terolih pasu-pasu ngo karina bangsa ni duniaèn.’ ²⁶ Kemulihkenna idi ngo, asa ipilih Dèbata NaposoNa, janah ipasulak lebbèen mendahi kènè, asa ipasu-pasu kènè. Ukum pasu-pasuna idi, imo maing kènè gabè tobat ibas nggelluh ndènè jahat idi nai."

¹ Sinderrang mengerana dèng si Petrus dekket si Johanes taba jelma nterrem i, roh mo imam-imam ekuten bagi ma ekuten perjaga Bages Dèbata bak kalak Sadusè. ² Mellagab mo kalak i, kumarna idokken si Petrus dekket si Johanes tersèngèt Jesus sienggo balik nggelluh i kemmatèen nai. Janah èn mo membuktiken magahken kalak simatè mengolihi nola nggelluh. ³ Nai itangkup kalak i mo rasul sidua kalak i, janah ipemasuk mi kurungen, kumarna enggo berngin, gabè i kurungen i mo kalak i soh mi sibarembenkenna. ⁴ Tapi mèduk ngo gabè percaya simendengkoh jamita apostèl i. Gabè tambah mo bilangen kalak i, enggo lot kira-kira lima ribu kalak pellin daholi. ⁵ Sibarembenkenna idi, pulung mo i Jerusalem anggota runggu agama pengulu-pengulu Jahudi dekket guru-guru agama. ⁶ Pejumpa mo kalak i i sidi dekket Imam Huntuun si Hanas bak si Kayafas, si Johanes dekket si Aleksander, bagidi ma ngo dekket karina sincelket Imam Huntuun i. ⁷ Nai iembah kalak i mo si Petrus dekket si Johanes mi hadeppen kalak i, nai ikusoi mo, "Bakunè ngo pemmaing ndènè lako pemmalumken nitempuk sigading i? Merkitè kegegohen kadè barang merkitè kuasa isè ngo kènè petupaken i?" ⁸ Nai ikuasai Tendi Perbadia mo si Petrus, ialoi mo, "Kènè alè karina pengulu-pengulu bangsa Israel dekket karina kènè pengetuai-pengetuai runggu! ⁹ Mula kennah iperrèso mo kami sidari èn kumarna simendè kubaing kami mengurupi sada kalak nitempuk sigading, janah naing ibettoh kènè merkitè kuasa isè kalak idi ipemalum, ¹⁰ bettoh kènè mo dekket karina kènè bangsa Israel. Cènder pè bagèndari kalak èn i hadeppen ndènè i sènda kumarna enggo malum iakap, imo kumarna kegegohen dekket kuasa Jesus Kristus kalak Nazaret sienggo ipersilangken kènè i ngo. Tapi enggo ipegelluh Dèbata nola Ia. ¹¹ Jesus i ngo nidokken ayat ipas Bibèl bagèen: ’Batu nipatakken ndènè tukkang bages idi, i ngo gabè batu cendi persoki.’ ¹² Pellin merkitè Jesus ngo kessa maluah jelma. Kerna sada kalak poda lot jelma i suberri dunia èn, barang merkitè gerar isè pè sienggo menjalo kuasa bai Dèbata nai lako paluahken kita." ¹³ Gabè lengang mo anggota runggu i mengidah keberaniin si Petrus dekket si Johanes i, terlebbih-lebbih kumarna ibettoh kalak idi, ukum apostèl sidua kalak idi jelma biasa ngo, siso pella ndates sikkolana. Nai ibettoh kalak idi mo, duana apostèl i, sisiin Jesus ngo. ¹⁴ Tapi oda terdokken kalak i ranana, kerna cènder ngo i hadeppen kalak i jelma sienggo nipemmalumna i, rebbak dekket si Petrus dekket si Johanes. ¹⁵ Nai ipasulak kalak i mo mi ruar apostèl sidua kalak i sigejap, jadi mersungkuun mo kalak i samahsa, ¹⁶ nina kalak i mo, "Bakunè mo sibaing taba kalak ènda? Karina pengisi Jerusalem ngo enggo bettoh-bettohen kellengangen mbellen èn, kalak i sidua ngo menghanaken. Oda terperso kita i. ¹⁷ Tapi asa ulang makin sar mi jelma nterrem, siasup mo kalak i sidua, asa ulang nèngè iranaken kalak i barang mendahi isè pè merkitè gerar Jesus." ¹⁸ Nai idiloi kalak i nola mo mengolihi apostèl sidua kalak i mi bages, iperèntahken mo, mak ndorok nèngè apostèl i menggegoli barang mengajari pè merkitè-kitè gerar Jesus. ¹⁹ Tapi ialoi si Petrus dekket si Johanes mo, "Kènè mo mengeradumi, apaina ngo sènteng i hadeppen Dèbata; menguèi perèntah ndènè ngo barang menguèi perèntah Dèbata. ²⁰ Ai oda tersipken kami, mak kennah kuranaken kami, kadè sienggo kuidah janah sienggo kudengkoh kami." ²¹ Jadi kumarna oda lot dalanna lako menghukum si Petrus dekket si Johanes, gabè pellin asup mo kessa ipememmes kalak i, nai ipaluah mo kalak i sidua, ai mbiar ngo kalak i midah jelma nterrem sidak memoji-moji Dèbata kemulihken tanda kellengangen i. ²² Merdemmu ma kalak sinipemalum idi pè engo lebbih empat puluh tahun umurna. ²³ Enggo kessa ipaluah kalak i si Petrus dekket si Johanes, balik mo kalak i mendahi denganna, isukutken mo taba kalak i karina sinidokken imam-imam ekuten dekket pengulu-pengulu Jahudi taba kalak i. ²⁴ Idengkoh karina denganna i kessa mo sinisukutken kalak idi, gabè sada atè mo kalak i rebbak mersodip taba Dèbata, "Alè Tuhan Dèbata Kono ngo meghanaken langit dekket tanoh èn, bak laut soh mo karina sinna. ²⁵ Merkitè-kitè TendiMu, enggo kin ngo idokken kono taba empung nami si Daud naposomi; nimu ngo, ’Kasa mengoga-ngoga kalak siso menandai Tuhan, kasa siso merguna ipikiri karina bangsa. ²⁶ Kèkè ngo raja-raja ni tanoh èn, janah merpulung ngo penggemnggemmi lako juhap mengalo Tuhan Raja Sipaluah i!’ ²⁷ Ai tuhu ngo enggo merpulung i kuta èn, si Herodes dekket si Pontius Silatus merrunggu dekket kalak siso menandai Tuhan rebbak dekket kalak Israel lako mengalo Jesus naposomu simbadia i; janah sienggo nipebangkitmu gabè Raja Sipaluah. ²⁸ Mersada taki ngo kalak i lako pesautken sienggo nitentukenmu kin kennah saut masa. Janah kono ngo menentuken i merkitè kuasa bak harkatMu sendiri. ²⁹ Bagèndari pè alè Tuhan tengen mo asup-asup kalak idi. Duè mo kami naposomen oda mbiar lako mennukutken kataMu i. ³⁰ Janah dak berrèken mo pengurupiMu pemalumken kalak simersakit dekket tanda kellengangen merkitèken kuasa dekket kegegohen i bagasen gerar Jesus naposoMu simbadia i." ³¹ Enggo kessa pul kalak i mersodip, mèter dumegger mo bekkas kalak idi i. Nai dom kuasa Tendi Perbadia mo kalak i karina, gabè mersampang atè mo kalak i karina lako mengeranaken kata Dèbata. ³² Karina kalak i sipercaya i, sada kata sada orjok ngo. Oda lot sada kalak pè giam sikelloten mendokken, milikna sadasa kessa hartana, tapi gabè rebbak sisada harta ngo kalak idi iètong. ³³ Nai gabè mergegoh kalohoon mo apostèl-apostèl i mengindangken enggo balik nggelluh Jesus i. Nai gabè ikellemmoken sinterrem mo kalak i, janah ipasu-pasu Dèbata. ³⁴ Ai sada kalak poda kalak i kurangen i barang kadè pè, kerna mula lot kalak i merbages barang merjuma, idèa ngo i; jadi iembah kalak i ngo tokorna i, ³⁵ ipessoh ngo tokorna i taba apostèl. Nai ipembagiken apostèl i mo kèpèng i taba kalak simemerluken. ³⁶ Bagidi ma mo lot sada kalak Lewi mergerar si Josep kalak pulo Kiprus, nigeraren Apostèl i Barnabas (lapatenna pengapoi). ³⁷ Idèa mo tanoh bagianna, iembah mo kèpèng tokorna i janah iberrèken taba apostèl i.

¹ Lot mo sada kalak mergerar si Ananias. Idèa ia rebbak dekket si Sapira sinibagesna i mo tanoh kalak i. ² Nai mersada taki mo kalak i sidua, iboniken mo dèba tokor tanohna i, janah dèba iberrèken taba apostèl. ³ Nai nina si Petrus mo mbang si Ananias, "Èo alè Ananias! Kasa ibelli ko ikuasai Sibolis atè-atèmu, gabè iluapi kono Tendi Dèbata merkitè iperso kono dèba tokor tanohmu idi? ⁴ Otang kono ngo sidasa tanoh nidèamu i? Mula icèkèp kono pè tokorna i, guru bamu ngo i; kasa turah ukurmu memmaing bagidi? Oda ngo jelma niluapenmu i, tapi Dèbata ngo." ⁵ Idengkoh si Ananias kessa mo kata i, mèter ranggang mo ia, janah mpostep mo kessahna. Jadi gabè buradan kalohoon mo karina simendengkoh simasa i. ⁶ Nai roh mo anak perana, ibalut mo bangkè si Ananias i, janah iembah kalak i mo mi ruar lako mennanem. ⁷ Tapi enggo kessa kira-kira tellu jom, roh mo bang sinibagesna. Oda ibettoh dèng samasa i. ⁸ Nina si Petrus mo mbangsa, "Bagahken taba aku, nasa èn ngo kessa harga tanoh ndènè idi idèa kènè?" Ialoi sinibages si Ananias mo, "Uè, nasa i ngo." ⁹ Nai idokken si Petrus mo mbangsa, "Kasa sada taki kènè dekket sinibalèmu mengunjuni Tendi Tuhan? Idi mo enggo roh balik kalak simengkubur sinibalèmu, kono pè embahen kalak i ma mo mi ruar." ¹⁰ Mèter runggang ma mo gejapkenna idi sinibages si Ananias i mi lebbè-lebbè si Petrus, janah mpostep mo kessahna. Jadi mbangkit kessa mo anak perana i mi bages, idapet mo enggo matè sinibages si Ananias i. Jadi iosong kalak i mo mi ruar lako mennanem mi gembar pendèbaan sinibalèna i. ¹¹ Gabè buradan kalohoon mo kalak i sisada kuria i, bagidi ma ngo bang kalak sidèban, simendengkoh simasa i. ¹² Merkitè pengulaken apostèl-postèl i matcam ngo bagèna tanda-tanda kellengangen masa i tengah-tengah jelma nterrem. Ibagasen sada ukur ni kalak i, merpulung karina sipercaya i èmpèr si Salomo i Bages Dèbata. ¹³ Tapi ukum jelma ruar, oda lot pang roh lako merpulung rebbak dekket sipercaya i, janah soh mo hormatna jelma nterrem i midah kalak i sipercaya i. ¹⁴ Makin ndekkahna muat mertambah mbuèna ngo kalak gabè percaya taba Tuhan i -- anak laki bang daberru pè. ¹⁵ Masa ma ngo lot bagèen: Iembah kalak idi mo si sakiten mi ruar, ipegalè mo ipas peddemmen, barang pè i babo bellagen i dalan i, asa mula mentas si Petrus, giamken kenna lèndungna sisakiten i tikan merdalan i ia. ¹⁶ Merrohen ma ngo kalak merkolan-kolan i kuta sikuliling Jerusalem nai. Iosong kalak idi ngo kadè-kadèna si sakiten bang pè nisellapen tendi jahat. Karinana idi ipemalum ngo. ¹⁷ Nai dungna mellaga mo imam huntuun dekket denganna horong Sadusè kumarna ncian ukur kalak i. ¹⁸ Itangkup mo apostèl-apostèl i janah ipemasuk mi kurungen jelma nterrem. ¹⁹ Tapi roh mo sada kalak malaèkat Tuhan bernginna i mi kurungen i, iarahken mo apostèl-apostèl i mi ruar. Idokken malaèkat i mo taba apostèl i, ²⁰ "Laus mo kènè, cènder mo kènè i Bages Dèbata, janah sukutken kènè mo taba jelma nterrem kata kenggelluhen i." ²¹ Jadi iuèi rasul-rasul i mo kata malaèkat i. Nterrang kessa mo ari sibarembenkenna i, laus mo kalak i mi Bages Dèbata, mengajari mo kalak i i sidi. Tapi ukum imam huntuun i, ipepulung mo denganna, runggu mo kalak i rebbak dekket anggota runggu mbellen bak karina pengulu-pengulu kalak Jahudi. Nai ipasulak kalak i mo mengaleng apostèl-apostèl idi i kurungen nai. ²² Keppè soh kessa mo pasulaken i mi sidi, oda idapet kalak i nèngè apostèl-apostèl idi i kurungen balik mo kalak i magahken taba runggu. ²³ "Memmes ngo nemmu kuidah kami terkonci kurungen i, janah perjaga pè, dak merjaga-jaga ngo i pèntu," nina kalak i, "tapi kubuka kami kessa mo pèntu kurungen idi, isè poda lot kuidah kami i bagasen." ²⁴ Idengkoh ekuten perjaga Bages Dèbata dekket imam-imam idi kessa mo i, jut mo ukur kalak i janah mbiar memmikiri kadè ndia naing masa. ²⁵ Tapi lot mo roh sada kalak daholi magahken, "Mengajari ngo bagèndari sinitulusen ndènè idi i Bages Dèbata!" ²⁶ Nai laus mo ekuten perjaga i rebbak dekket naposona mengalengi apostèl-apostèl i, tapi oda mengasangken gegoh nèngè ibaing kalak i, ai mbiar ngo kalak i midah jelma nterrem i; tah bakunè nola gabè ibentiri jelma nterrem i kalak i merkitè batu. ²⁷ Nai iembah kalak idi mo apostèl-apostèl i mi hadeppen runggu mbellen. Iperrèso imam huntuun i mo kalak idi nina mo, ²⁸ "Nggemmes ngo enggo kugerra kami kènè asa ulang nèngè kènè mengajari merkitè gerar i, keppè makin iempet kènè nola ngo lako pesarken peddah ndènè i mi suberri Jerusalem; janah naing nola dèng ma ngo isalahken kènè kami mendok, gabè kami nola memmaing matè ia." ²⁹ Nai nina si Petrus rebbak dekket Apostèl sidèbanna i mo mengaloi, "Kennah uèen ngo kami taba Dèbata asa taba jelma. ³⁰ Ai enggo ipegelluh Dèbata empungta i Jesus nipersilangken ndènè i. ³¹ Enggo iberrèken Dèbata baNa kuasa mbellen, gabè Pengulu janah Sipaluah, asa iberrè kesempaten taba kalak Israel lako tobat ibas dosa-dosana nai, asa gabè isasa dosana. ³² Kami ngo saksi tersèngèt karinana i -- dekket Tendi Perbadia siniberrèken Dèbata taba kalak simenguèi kataNa." ³³ Idengkoh runggu mbellen i kessa mo i, mellaga kalohoon mo kalak i, iputusken mo kennah patèenken karina apostèl i. ³⁴ Tapi lot mo sada kalak parisè ibas runggu mbellen i nai mergerar si Gamaliel. Sada kalak guru agama ngo ia janah kalak mersangap ngo idah sinterrem. Cènder mo ia, janah idokken mo kalak merembah apostèl-apostèl i mi ruar sigejap. ³⁵ Nai idokken mo katana taba kalak perunggu i, "Kènè karina kalak Israel! Manat mo kènè tersèngèt mi sibakinen ndènè taba kalak i. ³⁶ Ai tikala i pè pennah ngo kèkè si Teudas, ipebelgah ngo dirina, sanga ngo lot pengèkutna kira-kira empat ratus kalak. Tapi terbunuh ngo ia, mèrap mo pengèkutna i karina janah gabè mersep. ³⁷ I podina nola ma, imo tikanna sènsus, kèkè ma ngo si Judas kalak Galilea. Mèduk ma ngo kalak iajar-ajari. Tapi ia pè terbunuh ma ngo, janah karina pengèkutna i pè mambur mèrap ngo. ³⁸ Kerna naidi, èn ngo sipessèngètku; ulang mo kekkadè kènè kalak ènda, belli kènè mo bagidi. Ai ukum bai jelma nai ngo rohna peddah kalak idi i, kennah mersep-mersep bagidi ngo i. ³⁹ Tapi ukum bai Dèbata nai ngo rohna, oda terkekadè kènè i. Janah asa ulang terdapet nola kènè simengalo Dèbata." Jadi gabè ijalo perrunggu i mo sipessèngèt si Gamaliel i. ⁴⁰ Nai itenggoi nola mo apostèl-apostèl i, ibetbet mo janah irarang oda ndorok nèngè kalak idi mengajarken tersèngèt Jesus. Enggo kessa i, ipaluah mo kalak i. ⁴¹ Sampang kalohoon ngo atè apostèl-apostèl i mennadingken kerrungguun i, kerna tau kalak idi dok atè Dèbata lako menggongken kinilèa mengkepkep gerar Jesus. ⁴² Jadi oda mengadi-ngadi kalak idi gennep ari mengajarken Berrita Simerandal jojor bages, imo tersèngèt Jesus Raja Sipaluah si niperbagah-bagah i.

¹ Tikanna idi makin ndekkahna makin mbuè ngo sisiin Jesus. Tapi ngutnguten mo kalak Jahudi simerkata Junani taba kalak Jahudi asli, kumarna oda kennaan pengurupiin sigennep ari daberru simebbalu bai kalak i nai. ² Kerna naidi ipepulung apostèl sisipuluh dua i mo karinana kuria i, janah nina mo taba kalak i, "Oda mendè mula mentadi nola kami memeritaken kata Dèbata kumarna kennah mennarihken soal pangaan. ³ Kerna naidi, pilih kènè mo i tengah-tengah ndènè nai pitu kalak, tapi kennah selloh ngo berritana, janah siniianen Tendi Perbadia, bana kalak bujur janah bijak, asa kalak i kubaing kami lako mengulaken ulaan i. ⁴ Tapi ukum kami, sodip dekket ulaan menjamitaken kata Dèbata mo kuendengken kami." ⁵ Jadi lolo mo kalak i karina mendengkoh kata apostèl i. Ipilih kalak i mo si Stefanus imo sada kalak sipercaya kalohoon taba Jesus janah iiani Tendi Perbadia. Terpilih ma mo si Pilipus, si Prokhorus, si Nikanor, si Timon, si Parmenas dekket si Nikolaus kalak Antiokhia; ukum ia oda ngo kalak Jahudi. ⁶ Kalak idi mo ipecènder mi hadeppen apostèl-apostèl, nai mersodip mo apostèl-apostèl i lako mengido asa ipasu-pasu Tuhan i kalak idi. ⁷ Jadi makin sarna mo kata Dèbata, janah makin mertambah-tambah ngo simenukutken Jesus i Jerusalem. Imam-imam pè mèduk ngo gabè percaya bai Jesus. ⁸ Ukum si Stefanus, ipasu-pasu Dèbata ngo ia, gabè mermatcam bagè ngo ihanaken tanda-tanda kellengangen. ⁹ Tapi lot ma ngo kalak mengalosa i tengah-tengah bages perguruun kalak Jahudi nai, sinigeraren bages perguruun Libertini (Bages perguruun kalak Bèbas). Ukum anggota bages perguruun idi, imo kalak Jahudi ni Kirene dekket ni Aleksandria, rebbak dekket kalak Jahudi ni Kilikia bak Asia; mersoal mo kalak i dekket si Stefanus. ¹⁰ Tapi oda tersoal kalak i nidokken si Stefanus, ai enggo iajari Tendi Perbadia ia lako mengerana. ¹¹ Kerna naidi iberrèken kalak i mo sisip taba kalak, asa idokken kata bagèen, "Kudengkoh kami ngo kalak èn mengelèai si Musa bang Dèbata pè!" ¹² Nai igara-garai kalak i mo jelma nterrem bak pengulu-pengulu Jahudi, bagi ma bang simettoh patiin pè. Jadi gabè itangkup mo ia, janah ipehadep mi tengah runggu mbellen. ¹³ Nai ipehadep kalak idi ma mo saksi palsu, nina mo, "Dak ilèai kalak èn ngo Bages Dèbata simbadia i, ilèai ma ngo pati-patiin Dèbata siniberrèken si Musa. ¹⁴ Kudengkoh kami ma ngo naing irumpakken Jesus kalak Nazaret i ngo nina Bages Dèbata èn, jadi gabè iobah mo nina adatta sienggo nipetettah si Musa banta!" ¹⁵ Karina kalak silot i kerunggun i mengenel-nelli si Stefanus. Tikan naidi, bagè abè malaèkat ngo idah kalak i abè si Stefanus.

¹ Nai ikusoken Imam Huntuun i mo taba si Stefanus, "Ti! Tuhu ngo karinana nidokken kalak i?" ² Ialoi si Stefanus mo, "Kènè karina kaka anggi dekket partua-partua, dengkohken kènè mo lebbè ranangku èn! Sinderrang madèng mbungkas empungta si Abraham mi Haran, ipacidah Dèbata ngo dirina taba si Abraham, imo sinderrang merian i Mesopotamia dèng ia, ³ nina mo, ’Mbungkas mo kono i kuta idi nai, tadingken mo kadè-kadèmu, mi tanoh sinaing tuduhenkenKu bamu.’ ⁴ Nai berkat mo ia i nagerri Kasdim nai lompat mi Haran. Nai enggo kessa matè bapa si Abraham i sidi, ilompat Dèbata nola ma mo ia mi tanoh ianen ndènè bagèndari. ⁵ Ukum tikanna idi oda lot dèng giam iberrèken Dèbata tanoh sinteppap taba si Abraham mahan milikna. Tapi iperbagah-bagah Dèbata ngo berrènkenna tanoh bai si Abraham mahan milikna soh mi pinemparna, tukasi pè tikanna idi oda lot dèng dukakna. ⁶ Tapi bagèen ngo idokken Dèbata, ’Gabè kalak ginemgem ngo pinemparmu i tanoh ndèba. Iperhamba janah ipacik kalak i ngo sanga empat ratus tahun dekkahna. ⁷ Tapi Kuhukum mo bangsa simemperhamba kalak idi’ nina Dèbata. ’Nai ipè asa lompat nola kalak idi i kuta idi nai, lako mersembah taba Aku i bekkas èn.’ ⁸ Enggo kessa idokken bagidi, tanda hot ni bulaban, ibakin mo acara mersittak. Nai tubuh mo dukakna si Isak, isittak ma mo ia i ari peualuhken. Bagidi ma mo isittak si Isak dukakna si Jakob, janah si Jakob pè isittak ma mo dukakna si sipuluh dua kalak i; idi mo empungta simemempar kalak Jahudi. ⁹ Nai ncian mo atè empungta midah si Josep i, idèa mo ia gabè hamba mi tanoh Mesir. Tapi dak idengani Dèbata ngo ia, ¹⁰ janah ipaluah ngo ia ipas karina keppersuken nai. Iberèken Dèbata ngo bana masèh atè dekket kepantasen, bak kebijaken pè, sinderrang i hadeppen si Parao raja kalak Mesir i. Kemulihkenna idi, gabè ipebangkit si Parao ngo ia gabè pengerajai i suberri tanoh Mesir bak karina sini istana si Parao. ¹¹ Nai masa mo lèhè mbellen i suberri tanoh Mesir dekket i tanoh Kanaan, gabè mpersuk kalohoon mo iakap jelma tikala i. Empungta pè oda lot nèngè panganna tikan naidi. ¹² Terdengkoh mo bai si Jakob, ukum i Mesir mbuè ngo pagè, ipasulak mo dukak-dukakna imo empungta i mi Mesir. Imo perlebbè kaloon kalak i mi sidi. ¹³ Tikan laus nola kalak i pedua kaliken, ipetandaken si Josep mo dirina taba kaka anggina i, gabè ntangkas mo ibettoh raja Parao asal usul si Josep. ¹⁴ Nai ipasulak si Josep mo mengalengi bapana si Jakob i dekket karina denganna simpangaan asa roh mi Mesir -- pitupuluh lima kalak buèna. ¹⁵ Jadi lompat mo si Jakob mi Mesir, janah i sidi ngo ia matè bak empungta i pè. ¹⁶ Tapi ukum bangkè kalak idi, itaruhken ngo mi Sikhem, janah ikuburken ngo mi kuburen sinitokor si Abraham dekket riar bai kalak bangsa Hemor i Sikhem idi nai. ¹⁷ Tapi enggo kessa makin ndessing tikkiNa dapet niperbagah-bagah Dèbata sinibulabankenna taba si Abraham i, muat merrak-merrikna mo bangsanta i, i tanoh Mesir. ¹⁸ Nai mbangkit raja mo kalak sidèban i tanoh Mesir, siso menandai si Josep. ¹⁹ Taki-taki bècuk ngo ibakin lako mengago empungta. Ipaksa ngo empungta i, asa iambongken karinana anak mbara sirembaru tubuh, asa matè. ²⁰ Tikan bagidi i mo tubuh si Musa; anak mbara nikellemmoken Dèbata ngo ia. Tellu bulan ngo kessa dekkahna ia ipehèdu-hèdu partuana, ²¹ nai itaruhken mo ia mi ruar, ibuang, keppè gabè iperkuanak berru raja Parao ngo ia. ²² Iajarken ngo bana karina hèlmu bangsa Mesir, janah gabè mpantas ngo ia i rana barang i bahaan kadè pè. ²³ Enggo kessa merumur empatpuluh tahun si Musa, sèkel ngo ia menongkir kaka anggina bangsa Israel. ²⁴ Idah mo sada kalak bai kalak i nai ipekpekki kalak Mesir; ibèla mo siterpekpekken i, mèter ibunuh mo kalak Mesir i. ²⁵ Idokdok si Musa ngo iantusi bangsana i, naing paluahen Dèbata kalak i merkitè-kitèsa, keppè oda lot iarti kalak idi. ²⁶ Sibarembenkenna idi nola pè, roh dèng ma ngo tong ia. Tupung ma mo idah merrubati dua kalak, kalak Israel, gabè itellahi mo kalak i janah idokken asa merdamè, nina mo, ’Merkaka kuanggi ngo kènè alè dengan, kasa merrubati kènè?’ ²⁷ Tapi ionjemken simersalah i ngo si Musa ninganna idokken, ’Isè pebangkitken kono gabè raja janah gabè perhukum bai nami? ²⁸ Mada ngo naing ibunuh kono ma aku bagè kalak Mesir nibunuhmu bari?’ ²⁹ Idengkoh si Musa kessa mo nidokkenna tabasa i, mperrus mo ia i tanoh Mesir nai. Merolip-olip mo ia i tanoh Midian. Tubuh mo dua kalak anakna i sidi. ³⁰ Enggo kessa empat puluh tahun dekkahna merrian i sidi, roh mo sada kalak malaèkat mendahisa i gurun pasir ndessing mi Delleng Sinai ibagasen api mergollah-gollah ipas rambah mpulguk. ³¹ Lengang mo si Musa mengidah i, gabè ijolmiti mo lako petangkasken. Nai idengkoh mo sora Tuhan i mendokken, ³² ’Aku ngo Dèbata empungmu si Abraham, si Isak dekket si Jakob.’ Nai mèter menggirgir mo si Musa, gabè oda pang nèngè ia mencilik mi rambah mpulguk i. ³³ Nai nina Tuhan i nola ma mo, ’Talkasi cipatumi i nèhèmu i nai, ai mbadia ngo tanoh bekkasmu cènder i. ³⁴ Enggo ntangkas kuidah kinipersuk nigongken bangsangKu idi i tanoh Mesir. Enggo kudengkoh kelsoh kalak i, kerna naidi ngo asa roh Aku lako paluahken kalak i. Bagèndari pè roh mo kono, asa Kupasulak kono balik mi tanoh Mesir.’ ³⁵ Si Musa èn siso niakuun kalak Israel, tikan idokken kalak i tabasa, ’Isè pebangkitken kono gabè raja janah perhukum bai nami?’ Keppèken ia ngo ipasulak Dèbata gabè pengulu janah sipaluah merkitè pengurupi malaèkat siroh niidahna i rambah mpulguk simergollah-gollah i. ³⁶ Si Musa idi menogiken bangsa Israel karuar i tanoh Mesir nai merkitè tanda kellengangen i tanoh Mesir, i laut mbara dekket i padang gurun empat puluh tahun dekkahna. ³⁷ Si Musa èn ma ngo mendokken taba kalak Israel: ’Ipebangkit Dèbata ngo sada kalak nabi bai ndènè, i tengah-tengah ndènè nai bagè pemmilihna taba aku èn.’ ³⁸ Ia ma ngo i tangah-tengah kalak Israel i padang gurun mahan perkitèen mengeranai dekket malaèkat i Delleng Sinai taba empungta. Ijalo ngo kata kenggelluhen bai Dèbata nai asa ipessoh banta. ³⁹ Tukasi pè bagidi, oda ngo menguè empungta i tabasa. Itulak kalak idi ngo ia, janah gabè molih nola ngo ukur kalak i mi tanoh Mesir. ⁴⁰ Ai idokken kalak i ngo taba si Aron, ’Bahan mo bai nami sada sisembahen, asa ia menguluken kami. Oda nibettoh barang kadè masa taba si Musa sienggo mennogiken kita karuar i tanoh Mesir nai!’ ⁴¹ Jadi igana kalak i mo cuman-cuman anak lembu tikan naidi. Ipèlè kalak i mo gana-ganaan i janah merkerja ngo kalak i mengkesampang atèken keppandèen tanganna i. ⁴² Nai itadingken Dèbata mo kalak i, janah gabè cubelli mo Dèbata midah kalak i menembah bintang ni langit i, bagè sitersurat ibas bukku nabi-nabi bagèen, ’Kènè alè kalak Israel! Oda ngo lako bangKu asa isembellih kènè janah ipèlèken kènè jukut sidekkah empat puluh tahun kènè i padang gurun. ⁴³ Sapo-sapo sembahen Molokh rebbak dekket bintang sembahen ndènè ngo ijujung-jujung kènè i mo Repan; imo gana-ganaan si ni gana ndènè mahan sembahen. Kerna naidi, Kubuang mo kènè ndaoh mi suberrang Babilon!’ ⁴⁴ Bai empungta ngo Undung-undung bekkas Dèbata, roh mendahi jelma i padang gurun. Codi ngo ia mi sinihatorken Dèbata bai si Musa, nderrang mengeranai si Musa dekket Dèbata, asa ibahan bagè siniidahna i. ⁴⁵ Nai iembah empungta dekket si Josua nola mo undung-undung i tikan laus lako memmuat nagerrinta ènda tarap kuasa bangsa-bangsa sinipuari Dèbata i hadeppen kalak i nai. Isidi ngo tong undung-undung i soh mi tikki si Daud. ⁴⁶ Ikellemmoken Dèbata ngo si Daud, gabè ipidoken mo taba Dèbata, asa ipaduè Dèbata ia lako memajek sada Bages bai Dèbata sinisembah si Jakob. ⁴⁷ Tapi gabè si Salomo ngo saut memmajek Bages Dèbata. ⁴⁸ Tapi oda ngo merrian i bages ni bahan tangan ukum Dèbata Simermulia i, kerna idokken surat nabi ngo bagèen: ⁴⁹ ’Langit i ngo tahtangKu, janah tanoh èn ngo nènèhKu. Bages kadè ngo sinaing bahanen ndènè bangKu? Idikè ngo bekkasKu mengadi? ⁵⁰ Otang Aku ngo menghanaken sagumanna silot?’ nina Dèbata. ⁵¹ Soh mo jèngèngna kènè janah mahal kalohoon tunduk mi Dèbata! Tongkik kalohoon ngo pènggel ndènè oda merpendengkoh mi kata Dèbata! Tosè ngo kènè bagè empung ndènè dakdak mengalo Tendi Dèbata! ⁵² Otang karina ngo nabi-nabi iletlet janah idersa empung ndènè? Ibunuh kalak i ngo simennukutken pekkiroh Naposo Dèbata sibennar i. Janah bagèndari pè, iselbuh janah ibunuh kènè ngo Naposo Dèbata idi. ⁵³ Ipessakat malaèkat i ngo enggo bai ndènè pati-patiin i, tapi oda iuèi kènè!" ⁵⁴ Bagi idengkoh anggota-anggota Runggu Agama i karina sinidokken si Stefanus, hangat mo iakap kalak i janah mellaga kalohoon tabasa. ⁵⁵ Tapi ukum si Stefanus sienggo ikuasai Tendi Perbadia, itarè mo mi dates, gabè idah mo kessangapen Dèbata dekket Jesus cènder i kamuhun Dèbata, i bekkas simermulia i. ⁵⁶ Jadi nina si Stefanus mo, "Tengen kènè mo! Mbuka ngo kuidah sorga janah Anak Jelma kan kamuhun Dèbata!" ⁵⁷ Tapi ipegang anggota runggu i mo sorana ninganna ipètut kalak i copingna, nai rebbakken mo kalak i mennangkupsa. ⁵⁸ Iruah kalak i mo si Stefanus mi ruar kuta, nai ipembentirken kalak i mo batu tabasa. Ipelliniken kalak simenaksiken simasa i ngo olesna taba sada kalak anak perrana sidakdak menengen-nengen kalak idi, mergerar si Saulus. ⁵⁹ Sinderrang ipembentirken kalak i batu i taba si Stefanus, idokken si Stefanus mo katana bagèen, "Alè Tuhan Jesus, jalo mo tendingku!" ⁶⁰ Nai mersembah mo ia ninganna ipegang sorana mendokken, "Alè Tuhan, ulang mo ipunjut kono dosa kalak i!" Enggo kessa idokken bagidi, matè mo ia.

¹ Ukum si Saulus, lolo ngo ia mengidah ulah-ulah kalak idi i. Asa mulai i sidari i nai mo iletlet kalak idi kuria si ni Jerusalem, gabè mèrap mo kalak i karina, laènken apostèl-apostèl i, laus mi nagerri Judèa dekket mi Samaria. ² Tapi ukum si Stefanus, itanem kalak simerkebiaren midah Dèbata ngo, ninganna itangisi. ³ Tapi ukum si Saulus dak iletlet ngo kuria i. Ibengketti ngo gennep bages, iruah mo ibages i nai kalak sipercaya, ikurung mo. ⁴ Ukum kalak sipercaya sienggo mèrap i, dak isukutken ngo Sukuten Kelluahen i, barang mikè pè ia laus. ⁵ Laus ma mo si Pilipus mi kuta Samaria, ijamitaken ngo taba kalak sinisidi tersèngèt Kristus Raja Sipaluah niperbagah-bagah Dèbata. ⁶ Nai idengkoh kalak i kessa mo jamita si Pilipus janah idah kalak i tanda kellengangen nipehanana i, gabè mèduk mo bai kalak i nai mengeradum-radumi jamita si Pilipus i. ⁷ Ai karuar ngo sètan ninganna mendempik-dempik ibas daging kalak i nai. Mèduk ma ngo ipemalum kalak nitempuk sigading bak sikèpang pè. ⁸ Jadi sampang kalohoon ngo atè kalak pengisi kuta Samaria i. ⁹ Lot mo sada kalak i kuta i mergerar si Simon, perkaji ujut; dak ilalingken ngo kalak perkuta i, ai sada kalak mahantu ngo ia nina. ¹⁰ Jadi karina pengisi kuta i anak-anak soh mi simbelgah pè mbiar janah mengèkut bana, nina kalak i mo, "Kalak èn ngo kegegohen si ’Roh bai Dèbata nai’ apala simbelgahna i." ¹¹ Tapi asa ipèkut-èkut kalak idi pè ia sapatna èn, kumarna ilalingken ngo kalak i merkitè-kitè hèlmuna i. ¹² Tapi ijamitaken si Pilipus ngo Berita Simerandal i taba kalak idi, imo kerrajaan Dèbata dekket tersèngèt Jesus Kristus Raja Sipaluah i janah ikepercayai, nai iperridi mo mèduk daholi bak daberru. ¹³ Si Simon pè gabè percaya ngo janah iperridi, janah dak ièkut-èkut ngo siPilipus. Lengang kalohoon ngo ia mengidah tanda kellengangen dekket kuasa mbellen simasa nibaingken si Pilipus i. ¹⁴ Idengkoh Apostèl si ni Jerusalem kessa mo berita simendokken: Enggo keppè ijalo kalak Samaria kata Dèbata, ipasulak kalak i mo si Petrus dekket si Johanes mendahi kalak i. ¹⁵ Nai soh kessa mo kalak i mi Samaria, isodipken mo kalak ni sidi, asa ijalo kalak i Tendi Perbadia, ¹⁶ ai oda dèng iiani Tendi Perbadia barang isè pè kalak i, kerna asal iperridi bagi sambing dèng ngo kessa kalak i mi bagasen gerar Tuhan Jesus. ¹⁷ Nai iampèken si Petrus dekket si Johanes mo tanganna taba kalak i, nai gabè ijalo kalak i mo Tendi Perbadia. ¹⁸ Tapi iidah si Simon kessa mo mengampèken tangan kalak i lako memerrèken Tendi Perbadia, roh mo ia merembah riar taba si Petrus dekket si Johanes, ¹⁹ nina mo, "Berrèken kènè ma mo bangku kuasa bagidi, asa mula kuampèken kessa tanganku barang taba isè mèter ijalo ma mo Tendi Perbadia." ²⁰ Tapi ialoi si Petrus mo ia, "Mago mo kono dekket riarmi! Idokdok kono ngo pana tertokor basa-basa Dèbata merkitè-kitè riar? ²¹ Oda dapet jambarmu lako mengulaken bagè ulaan nami èn, ai oda bennar ukurmu meradepken Dèbata. ²² Kernana i tadingken mo perrukurenmu jahat i; nai pengido mo taba Tuhan i, asa Iampuni janah isasa taki-takimu jahat i! ²³ Ai kubettoh ngo dom cian ngo perukurenmu janah iperhamba kejahaten." ²⁴ Gabè nina si Simon i mo taba si Petrus dekket si Johanes, "Sodipken kènè mo aku taba Tuhan i, asa ulang sempa bangku sada pè bagè nidokken ndènè i." ²⁵ Asa enggo kessa pul kalak i menjamitaken kata Tuhan i, mulak mo si Petrus dekket si Johanes mi Jerusalem, ninganna iranaken kalak i Berita Simerandal idi i gennep kuta nibellus kalak idi i Samaria. ²⁶ Nai ipermongkami sada kalak malaèkat Tuhan mo si Pilipus, "Berkat mo kono laus dempak selatan mi dalan langlang i kellang-kellang Jerusalem dekket Gaza!" ²⁷ Nai mèter berkat mo si Pilipus dempak i. Jadi lot mo sada kalak Etiopia perpangkat ndates tupung lako balik mi kutana. Sada kalak kettoken ngo ia menjamotken harta si Kandakè raja daberru i Etiopia. Balik i Jerusalem nai ngo ia lako mersodip kin taba Dèbata. ²⁸ Kundul i kurètana ngo ia tikan naidi ninganna menjakai Bukku Nabi Jesaya. ²⁹ Nina Tendi Dèbata mo taba si Pilipus, "Lako dessingi kurèta i." ³⁰ Nai idessingi si Pilipus mo kurèta i, gabè idengkoh mo ijaka perkurèta i surat Nabi Jesaya; nai ikusoken si Pilipus mo, "Iantusi kono ngo sinijakamidi?" ³¹ Ialoi mo ia, "Bakunè mo pengantusingku ukum mak lot sipeterangken bangku?" Nai mèter ièlèk-èlèk mo si Pilipus mbangkit mi kurètana i, gabè rebbak mo kalak i kundul. ³² Ukum kata surat nijakana i bagèen ngo, "Iteggu ngo ia bagè biri-biri mi penembellihen janah bagè anak biri-biri dak nono i lebbè simenggontingsa laju oda mongkam Ia. ³³ Ipelèa-lèa ngo ia janah idabuh hukum siso puna-puna tabasa. Ai icabut ngo kessahna i babo tanoh èn nai gabè isè poda lot mennukutken tersèngèt usurNa." ³⁴ Nai nina perpangkat i mo taba si Pilipus, "Kukuso mo kono, isè ngo sinidokken nabi idi?" ³⁵ Nai mengerana mo si Pilipus, ibagahken mo Berita Simerandal tersèngèt Jesus, mermula ipas kata surat nijakana idi ndai nai. ³⁶ Tikan i perdalanen i kalak idi, jupa kalak idi mo laè, jadi nina perpangkat idi mo taba si pilipus, "Enda mo enggo laè. Kadè dèng habatna asa mak terperidi aku?" [ ³⁷ Nai nina si Pilipus mo, "Mula percaya ngo Kono ibas nasa ukurmu, ndorok ngo Kono iperidi." "Aku percaya, Anak Dèbata ngo Jesus Kristus," nina perpangkat i mo.] ³⁸ Mèter idokken mo merradi kurètana i, nai sampur mo kalak i sidua, si Pilipus dekket perpangkat i mi laè i, nai iperidi si Pilipus mo ia. ³⁹ Tapi mi darat kessa mo kalak idi i laè i nai, ibabaken Tendi Tuhan i mo si Pilipus, gabè oda idah perpangkat idi nèngè ia. Jadi ibagasen lolo atè, iterrusken perpangkat i mo sidalanenna. ⁴⁰ Tapi ukum si Pilipus, i Asdod ngo ia teridah. Niganna mennerusken sidalanna ia, dak ijamitaken ngo Berita Simerandal idi i gennep kuta soh mi Kaisarèa.

¹ Dak tong ngo iendam si Saulus memunuh kalak simengèkutken Tuhan Jesus. Idahi mo imam huntuun, ² lako mengido surat kuasa, asa laus ia mi bages perguruun silot i kuta Damaskus, asa mula lot jumpasa kalak sipercaya taba Jesus, daholi barang daberru pè, itangkup janah iembah mi Jerusalem. ³ Tapi tikan i tengah ndalan lako mendapetken kuta Damaskus dèng ia, mènter sintempu mo merdessik cuhaya i dates nai mengkalokoisa. ⁴ Geppah mo ia mi tanoh, nai idengkoh mo sora mendokken tabasa, "Saulus! Saulus! Kasa dak iletlet kono Aku?" ⁵ Nai nina si Saulus mo, "Isè ngo Kono Tuan?" Ialoi sora i mo ia, "Jesus ngo aku niletletmi. ⁶ Tapi ukum bagèndari, kèkè mo kono, bengketti mo kuta i. Isidi pè kubagahken bamu sibakinenmu." ⁷ Tapi ternono mo karina denganna sindalaan i, ai idengkoh kalak i ngo sora i, tapi oda lot barang isè idah. ⁸ Nai cènder mo si Saulus i, ibidakken mo matana, keppè oda nèngè merpendidah. Jadi gabè icèkèp kalak idi mo tanganna, itegu-tegu mo ia lako mi kuta Damaskus. ⁹ Tellu ari ngo dekkahna oda merpendidah matana, janah sidekkahna idi ma mo oda mangan dekket oda mènum ia. ¹⁰ Lot mo sada kalak i Damaskus i sisiin Tuhan Jesus mergerar si Ananias. Ipeteridahken Tuhan i mo dirina taba si Ananias, janah idokken mbangsa, "Alè Ananias!" Ialoi si Ananias mo, "Isèn ngo aku Tuhan!" ¹¹ Nai idokken Tuhan i mo, "Berkat mo kono bagèndari mi bages si Judas i dalan mergerar Mpènter. Kusoi mo i sidi sada kalak anak Tarsus mergerar si Saulus, ai sidang mersodip ngo ia bagèndari. ¹² Ibagasen alaten, idah ia mo sada kalak daholi mergerar si Ananias roh mendahisa, janah mengampèken tanganna mbangsa, asa suang nola merpendidah ia." ¹³ Tapi nina si Ananias mo mengaloi, "Alè Tuhan, enggo mèduk kalak magahken bangku tersèngèt ulah-ulahna memmaing kejahaten mengeletlet ummatMu i Jerusalem. ¹⁴ Isènda pè merkuasa ngo ia ibaing imam-imam ekuten menangkup karina sipercaya taba Kono." ¹⁵ Tapi idokken Tuhan i mo tabasa, "Laus sambing mo kono! Ai enggo Kupilih ia mahan perkebbasKu, asa isukutken Aku mendahi bangsa sidèban siso bangsa Jahudi bang mendahi raja-raja dekket mendahi kalak Israel pè. ¹⁶ Kubagahken pè bana kinipersuk sigongenkenna kumarnaken Aku." ¹⁷ Jadi berkat mo si Ananias laus mi bages i, iampèken mo tanganna taba si Saulus ninganna idokken, "O Saulus, nggia! Ipasulak Tuhan Jesus niidahmu i tengah ndalan i ngo aku misèn, asa mengolihi merpendidah nola kono, janah dak idomi Tendi Perbadia!" ¹⁸ Mèter merrurus mo bagè sisik ikan i mata si Saulus nai, gabè mengolihi mo ia merpendidah. Kèkè mo ia, lako iperidi. ¹⁹ Nai mangan kessa mo ia, gabè suang mo gegohna. Merian i Damaskus mo si Saulus barang sadikè dekkah rebbak dekket mengèkutken Jesus. ²⁰ Dak merjamitai ngo ia i bages perguruun janah ikesaksiken ngo, Jesus i ngo Anak Dèbata. ²¹ Gabè dak merkalimesso ngo perrukuren ni karina kalak simendengkoh, nina ngo, "Otang ia ngo i Jerusalem simengeletlet janah memunuh kalak sipercaya taba Jesus? Pekerohna mi sèn pè otang lako menangkup janah merembah sipercaya ma ngo mi hadeppen imam-imam ekuten!" ²² Tapi makin igegohi si Saulus ngo mengindangken janah mbuè ngo bukti ibaing magahken Jesus i ngo Kristus. Sanga ngo jut ukur kalak Jahudi ni kuta Damaskus idi ibaing. ²³ Asa enggo kessa narih toko dekkahna, mertaki mo kalak Jahudi, naing memmunuhsa. ²⁴ Tapi terbertik ngo tuptup kalak idi mi pènggel si Saulus. Suntuk ari suntuk berngin dak ientip kalak Jahudi ngo ia i pèntu pengkerruhen kuta i lako memmunuh si Saulus. ²⁵ Tikan sada berngin, itantan sisin si Saulus i mo ia ibas kirang arap babo pagar kuta idi. ²⁶ Soh kessa mo si Saulus mi Jerusalem, naing dok atèna ipebengket bilangenna taba sisiin i, tapi mbiar ngo kalak i midahsa, ai oda tok kalak i enggo gabè sisiin Jesus ia. ²⁷ Nai iarahken si Barnabas mo ia mendahi apostèl-apostèl i, ipejojor si Barnabas mo taba kalak i bakunè carana si Saulus mengidah Tuhan i, tikan i perdalanenna, dekket pendokkenna mbangsa soh mi pengkesaksikenna Tuhan idi i Damaskus. ²⁸ Nai dak rebbak mo si Saulus dekket apostèl-apostèl i merdalani i Jerusalem janah pang ngo ia menjamitaken gerar Tuhan i. ²⁹ Iantoi ngo kalak Jahudi mengeranai dekket mersoal imo Jahudi simerkata Junani, tapi mertaki ngo kalak i munuhsa. ³⁰ Nai ibettoh dengan sipercaya i kessa mo i, itaruhken kalak i mo ia mi Kaisarèa, nai ipasulak mo ia laus mi Tarsus. ³¹ Jadi gabè mènak ngo Kuria silot i suberri Judèa, Galilea dekket Samaria pè. Janah merkitè pengurupi Tendi Perbadia, dak makin mergegoh janah makin mertambah-tambah ngo kuria i, kumarna merkebiaren ngo kalak i midah Tuhan i. ³² Tapi dak iagahi si Petrus ngo karina kuria-kuria. Nai tikan sidari idahi mo kalak simengèkutken Tuhan idi i kuta Lida. ³³ Nai pejumpa mo ia i sidi dekket sada kalak mergerar si Ènèas, itempuk sigading ngo ia, janah dak gampar sambing ngo ia i peddemmenna, enggo ualuh tahun dekkahna. ³⁴ Jadi idokken si Petrus mo tabasa, "Ènèas, ipemalum Jesus Kristus mo kono. Kèkè mo ko janah balun mo peddemmenmi!" Jadi mèter kèkè mo si Ènèas i gejapkenna idi. ³⁵ Jadi karina pengisi kuta Lida bak Saron simengidahsa gabè percaya taba Tuhan i. ³⁶ Lot ma mo sada kalak daberru sipercaya taba Jesus i kuta Jope, mergerar si Tabita (Gerarna ibas kata Junani si Dorkas merlapaten balkih). Termurmur ngo sellohna mengulaken simerandal dekket pengurupina taba kalak sincor. ³⁷ Tupung ngo ia sakiten tikan naidi, nai mèter matè. Enggo kessa icuci bangkèna, ipebujur ngo ia i bilik perdates. ³⁸ Ndessing ngo kuta Jope i, i kuta Lida nai. Idengkoh simengèkutken Jesus kessa mo, i Lida ngo keppè si Petrus, ipasulak kalak i mo dua kalak mendahi si Petrus lako mengendik-ngendiksa asa ndor ia roh mi kuta Jope. ³⁹ Nai mèter kebbas mo si Petrus mengèkutken kalak i. Soh kessa kalak i, iarahken mo si Petrus mi bilik perdates. Jadi irengemmi daberru-daberru simebbalu mo si Petrus i ninganna mertangisen, janah ipacidahi kalak i mo taba si Petrus baju dekket jubah kalak i sinijarumen si Dorkas i tikan i nggelluhna dèng. ⁴⁰ Nai ipasulak si Petrus mo kalak i asa laus lebbè mi ruar; nai mersembah merkurja mo ia mersodip taba Dèbata. Enggo kessa pul ia mersodip, idempakken mo mi bangkè si Dorkas i, nina mo, "O Tabita, kèkè mo ko!" Jadi mènter mbidak mo matana, janah idah kessa mo si Petrus, mèter kundul mo ia. ⁴¹ Nai idoroken si Petrus mo tanganna lako mennegusa asa kèkè. Nai idilo mo kalak sipercaya bak daberru-daberru simebbalu ni sidi i, janah mèter ipecènder mo si Dorkas sienggo balik nggelluh idi i hadeppen kalak idi. ⁴² Nai sar mo berita idi i suberri Jope, gabè mèduk mo percaya taba Jesus Sipaluah i. ⁴³ Jadi narih ndekkah ngo merian i sidi si Petrus, i bages si Simon tukkang koling-koling ngo ia merian.

¹ Lot mo sada kalak daholi i Kaisarèa mergerar si Kornelius. Komandan "Pasukan Italia" ngo ia. ² Kalak simerkebiaren midah Dèbata ngo ia bak karina pengisi bagesna. Mèduk ngo ipemberrèken masèh atèna taba kalak Jahudi, janah oda nung lipang ia mersodip taba Dèbata. ³ Tikan sidari kira-kira pukul tellu ciboon, idah ia mo ntangkas ibas pennengenna, sada malaèkat Dèbata roh mendahisa, janah mendokken, "O Kornelius!" ⁴ Idempakken si Kornelius mo malaèkat i, gabè mbiar mo ia janah ninganna idokken, "Kadè alè Tuan?" Ialoi malaèkat i mo, "Enggo ijalo Dèbata sodipmu dekket masèh atèmu merkitè pemerrèkenmu i. ⁵ Bagèndari pè, pasulak mo laus mi Jope mengaleng si Simon janah mergerar si Petrus. ⁶ Rebbak tukkang koling-koling ngo ia bagèndari kiserrang i biding laut, janah si Simon ma ngo bekkasna kiserrang i." ⁷ Nai laus kessa mo malaèkat sikirana dekketsa i, mèter idilo mo dua kalak naposona dekket sada kalak soridadu penjagana simerkebiaren midah Dèbata. ⁸ Isukutken si Kornelius mo simasa i taba kalak i, janah terus ipasulak mo kalak i mi Jope. ⁹ Sibarembenkenna tikan i tengah ndalan dèng pasulaken i, tapi enggo soh mayak kuta i, laus mo si Petrus mi bilik perdates mersodip cèger ari. ¹⁰ Nai mellèhè kalohoon mo iakap janah sèkel mo ia mangan. Sinderrang menghantari pangaan dèng lako bana, gabè meralaten mo ia. ¹¹ Idah mo tupung mbuka langit. Nai idah mo itontoni sada bekkas bagè kaèn mbellang i langit nai, merèket ngo gennep sokina siempat i, itantan mi terruh. ¹² Lot ngo gennep macam binatang siempat nèhè ibas sinitantan i, bagi ma ngo dekket simenjoror i tanoh i pè, bak manuk-manuk simerkabangen i. ¹³ Nai idengkoh mo sora mendokken tabasa, "O Petrus, kèkè mo kono! Sèati mo i janah pangan!" ¹⁴ Tapi nina si Petrus mo mengaloi, "Ngganè Tuhan! Oda nung dèng kupangan barang kadè pangaan haram bak mellamun." ¹⁵ Tapi nina sora i dèng ma mo tabasa, "Barang kadè sienggo ihalalken Dèbata, ulang idokken kono nola i haram!" ¹⁶ Tellu kali ngo mulak-ulak roh alaten idi, nai gabè terkèkè mo kaèn i mi sorga. ¹⁷ Bagè cara bingung mo si Petrus mangarusi i, kadè ndia lapaten alaten idi. Nderrang merpikir-pikir bagi dèng si Petrus, keppè enggo mo cènder i lebbè pèntu bekkasna i pasulaken si Kornelius, ai enggo kin ngo lebbèen ikuso-kusoi kalak i taba kalak perkuta i kan dikè bages si Simon i. ¹⁸ Nai dilo-dilo mo kalak i mengkusoken, "Isèn ngo ndia kiserrang sada kalak mergerar si Simon Petrus?" ¹⁹ Tikan merpikir-pikir dèng si Petrus tersèngèt lapaten alaten idi ndai, nina Tendi Dèbata mo mbangsa, "Alè Petrus lot ngo roh tellu kalak mennulusi kono! ²⁰ Kèkè mo kono janah susur mi terruh, ulang ganggu ukurmu mengèkutken kalak i, ai Aku ngo pasulakken kalak i." ²¹ Nai susur mo si Petrus janah nina taba kalak i, "Aku ngo sinitulusen ndènè i. Kadè pana sebabna asa roh kènè?" ²² Nai ialoi kalak i mo, "Kapten Kornelius ngo pasulakken kami roh misèn. Sada kalak bujur ngo ia janah merkebiaren taba Dèbata; selloh ngo beritana i tengah-tengah kalak Jahudi. Idokken sada kalak malaèkat Dèbata ngo mbangsa, asa ipasulak nina mengaleng kono, janah asa roh kono mi bagesna; ai naing dengkohenna nina bamu nai alus sodip bak perulanna." ²³ Jadi iarahken si Petrus mo kalak i mi bages janah mermalam i sidi. Sibarembenkenna i berkat mo kalak i, dekket ma ngo dèba kalak sipercaya i kuta Jope nai mendengani kalak i. ²⁴ Sibarembenkenna soh mo kalak i mi Kaisarèa. Enggo kin ngo mèma-mèma si Kornelius rebbak dekket karina sincelketna bak supan-supanna pè sienggo nitenggona. ²⁵ Asa soh kessa mo si Petrus, mèter isimbak-simbak si Kornelius mo ia ninganna mersembah i hadeppenna. ²⁶ Tapi iteggu si Petrus mo ia asa cènder ninganna idokken, "Kèkè mo kono! Ai aku pè jelma ngo." ²⁷ Nai lako mbengket mi bages, dak mengeranai ngo kalak i sidua. Idah mo enggo mèduk keppè jelma mèmasa i bages i. ²⁸ Nai nina mo taba kalak ni sidi, "Ibettoh kènè ngo pantangen mbellen ngo bai kalak Jahudi mendahi barang mersaor dekket bangsa sidèban. Tapi enggo idokken Dèbata taba aku, oda ndorok dokkenken haram barang kotor jelma barang tah jelma bakunè pè i. ²⁹ Kumarna naidi ngo asa oda pella kujua tikan ialengi kènè aku. Asa mengkuso mo aku bagèndari; kadè ngo pana perluna asa idokken kènè roh aku mi sènda?" ³⁰ Nai ipeterrang si Kornelius mo, "Empat ari sienggo laus tupung bagèen ma kettikana pukkul tellu, mersodip ngo aku i bagesku èn. Sintempu mèter cènder mo i lebbèngku sada kalak daholi merpakèen mbulan merkillong-killong, ³¹ mendokken taba aku, ’Alè Kornelius, enggo idengkohken Dèbata sodipmu dekket nibakinmu mermasèh atè i merkitè pemerrèkenmu i. ³² Jadi pasulak mo mi kuta Jope lako mendiloi si Simon mergarar Petrus, kiserrang ngo ia i bages si Simon tukkang koling-koling, kan biding laut ngo bagesna i.’ ³³ Nai mèter kupasulak mo mengalengi Kono. Bagèndari pè enggo pulung kami karinana isèn i hadeppen Dèbata lako mendengkohken karina sinidokken Dèbata mbang Kono sinaing bagahenkenmu bangku." ³⁴ Jadi mengerana mo si Petrus, "Bagèndari enggo tangkas kuantusi, dos ngo ibaing Dèbata taba jelma karinana! ³⁵ Barang isè merkebiaren midah Dèbata janah mengulaken kebennaren, ijalo Dèbata ngo ia. ³⁶ Ibettoh kènè ngo beritana sinipesakat Dèbata taba kalak Israel, imo Berita Simerandal merkitè-kitè Jesus Kristus; Ia ngo Tuhan ni karina jelma. ³⁷ Ibettoh kènè ma ngo kadè simasa i Judèa, mulai i Galilea nai, imo i podi perridiin nipeddahkensi Johanes. ³⁸ Imo tersèngèt Jesus kalak Nazaret sienggo iminaki Dèbata merkitè Tendi Perbadia bak kuasana pè. Dak merdalani ngo Jesus idi i suberri ladang lako memmaingken simerandal janah pejuahken kalak si ni sellapen sibolis, kerna dak idengani Dèbata ngo Ia. ³⁹ Kami ngo saksi tersèngèt karinana nibakinna i, i tanoh Jahudi dekket i Jerusalem. Tukasi pè bagidi gabè ipusa janah ipersilangken kalak i ngo Ia. ⁴⁰ Tapi ipegelluh Dèbata ngo Ia i ari petelluken, janah ipetarar ngo dirina taba jelma, ⁴¹ tapi pellin taba kalak si ni pilih Dèbata arnia nai kin ngo kessa, imo mahan saksiNa, ai rebbak mangan bak mènum ngo kami dekketsa, enggo kessa balik nggelluh Ia i kemmatèen nai. ⁴² Ia ngo pasulakken kami lako menjamitaken dekket memmedahken taba jelma nterrem, magahken Ia ngo enggo ipebangkit Dèbata kin gabè Penghukum taba kalak singgelluh bang taba kalak sienggo matè pè. ⁴³ Karinana ngo nabi-nabi mengindangken tersèngèt Ia, ai nina kalak idi, karinana jelma sipercaya taba Jesus terolih kesasaan dosa merkitè gerar Jesus i." ⁴⁴ Sinderrang mengerana dèng si Petrus, mèter susur mo Tendi Dèbata janah isenggeppi mo kalak i karina simendengkoh kata i ndai. ⁴⁵ Gabè lengang ngo karina kalak Jahudi sienggo percaya simendengani si Petrus i Jope nai, kumarna iberrèken Dèbata ngo TendiNa bang taba kalak siso Jahudi pè. ⁴⁶ Kerna idengkoh ngo mengeranai kalak idi ibas kata sidèban, lako memoji-moji kebelgahen Dèbata. Nai nina si Petrus mo, ⁴⁷ "Tengen kènè mo, enggo bagè kami kalak èn menjalo Tendi Perbadia. Jadi lot dèng kalak ndorok mengambati kalak i iperidi merkitè laè?" ⁴⁸ Nai idokken si Petrus mo asa iperidi kalak i mi bagasen gerar Jesus Kristus. Enggo kessa pul idi karinana, ièlèk-èlèk kalak i mo si Petrus, asa merian i sidi lebbè ia giam barang sadikè dekkah.

¹ Idengkoh karina Apostèl dekket sipercaya ni Judèa mo enggo dekket keppè bangsa sidèban menjalo kata Dèbata. ² Nai roh kessa mo si Petrus mi Jerusalem, ilagai kalak i mo ia, nina mo, ³ "Kasa ibengketti kono bages kalak siso mertakkil? Janah mangan nola dèng ma kono rebbak dekket kalak i?" ⁴ Nai tembir mo isukutken si Petrus taba kalak i karinana sienggo masa i, nina mo, ⁵ "Sinderrang mersodip aku i kuta Jope, nai kuidah mo sada alaten. Kuidah mo susur sada bekkas mbellang bagè cara kaèn merempat soki janah bagè itantan i langit nai roh mi lebbè-lebbèngku. ⁶ Nai tikan kuperdatèken mi bagasen, gabè kuidah mo lot i sidi karina matcam binatang-binatang siempat nèhè, bagi ma dekket pinakan-pinakan bak simenjoror bang manuk-manuk pè. ⁷ Kudengkoh ma mo sora mendokken taba aku, ’Kèkè mo ko Petrus! Sèati mo i janah pangan mo!’ ⁸ Tapi ningku mo mengaloi, ’Ngganè merrebbu alè Tuhan! Oda nung dèng kuakapi pangaan haram bak mellamun.’ ⁹ Tapi nina sora i nola mo i langit nai, ’Barang kadè sienggo halal dok Dèbata ulang idokken kono nola haram i.’ ¹⁰ Sanga ngo tellu kali kuidah roh simasa i, nai ipè asa irintak mi sorga. ¹¹ Nai mèter soh ma mo gejapkenna idi pasulaken sitellu kalak i Kaisarèa nai mi bekkas nami lako mennulusi aku. ¹² Nai nina Tendi i mo taba aku, asa ulang ganggu ukurku lako laus rebbak dekket kalak i. Janah dekket ngo denganku siennem kalak èn mi Kaisarèa, jadi kubengketti kami mo bages si Kornelius i. ¹³ Nai isukutken si Kornelius mo bai nami sienggo niidahna malaèkat cènder ibagasen sapona janah mendokken tabasa, ’Pasulak mo mengalengi si Simon simergerar Petrus mi Jope. ¹⁴ Asa ia magahken taba kono kata kenggelluhen, asa maluah kono dekket pengisi bagesmu!’ ¹⁵ Tapi sinderrang merjamita dèng aku i sidi mèter senggep mo Tendi Perbadia taba kalak i, tosè bagè banta i mulana i. ¹⁶ Nai kuèngèt mo nidokken Tuhan i, ’Laè ngo ukum iperidiken si Johanes, tapi iperidi ngo kènè merkitè Tendi Perbadia!’ ¹⁷ Jadi ntangkas ngo enggo siidah, mula dos ngo keppè sibasa-basa Dèbata bai kalak siso Jahudi sienggo gabè percaya bai Tuhan Jesus Kristus dekket basa-basa banta, bakunè mo pemmaingku mengambati Dèbata?" ¹⁸ Enggo kessa idengkoh kalak idi kata i, gabè nono nai ngo kalak i. Nai ipoji kalak i mo Dèbata, nina mo, "Mula bagidi ngo keppè, dekket ngo taba kalak siso Jahudi iberrèken Dèbata lako tobat, asa gabè mi kenggelluhen." ¹⁹ Kessa nai terbunuh si Stefanus, gabè iletlet mo kalak sipercaya taba Jesus, nai gabè mèrap mo kalak idi. Dèba laus mi Penesia, dèba mi pulo Siprus dekket mi Antiokhia. Jadi ningan merdalan i kalak idi, isukutken kalak i ngo kata Dèbata, tapi pellin taba kalak Jahudi sambing ngo kessa. ²⁰ Tapi lot ngo dèba kalak sipercaya i kalak Siprus dekket kalak Kirene roh mi kuta Antiokhia, isukutken kalak i ngo Berita Simerandal tersèngèt Jesus i sidi bang mendahi siso meragama Jahudi pè. ²¹ Kumarna ipergegohi kuasa Tuhan i ngo kalak idi, gabè mèduk ngo bai kalak i nai percaya janah pesakatken dirina bai Tuhan i. ²² Soh ngo berita kalak i mi Jerusalem, nai ipasulak mo si Barnabas mi Antiokhia. ²³ Soh kessa mo si Barnabas gabè idah mo sibasa-basa Dèbata taba kalak si nisidi, lolo kalohoon mo atèna. Nai ipeddahi mo kalak i karina, asa tettap ukur kalak i menguèi taba Tuhan i. ²⁴ Merdemu kumarna kalak bujur ngo si Barnabas janah dak iiani Tendi Perbadia bana perkepercayaen mbellen, gabè mbuè ngo kalak terabin mengèkutken Tuhan i. ²⁵ Nai laus mo si Barnabas mi kuta Tarsus mennulusi si Saulus. ²⁶ Enggo kessa pejumpa dekket si Saulus, iarahken mo si Saulus i mi Antiokhia, janah sitahun mbellen mo kalak i rebbak kuria si ni sidi janah mengajari mbuè kalak janah i Antiokhia i mo perlebbè igerari sipercaya taba Jesus, kalak Kristen. ²⁷ Sinderrangna idi lot mo roh nabi-nabi i Jerusalem nai mi kuta Antiokhia. ²⁸ Sada kalak bai kalak i nai mergerar si Agabus. Ikuasai Tendi Dèbata mo ia, nai iberitaken mo masa lèhè mbellen i suberri dunia èn. (Tuhu ngo masa kellèhèen i tikan Kèsar Klaudius). ²⁹ Nai mertuptup mo kalak sipercaya taba Jesus asa menenges tumpak kalak i, barang sadikè terbakinsa mendahi dengan sitading i Judèa. ³⁰ Ipesaut kalak i mo tuptupna i, itengesken mo arap si Barnabas dekket si Saulus taba sintua kuria i.

¹ I tikanna i ma mo ilaluken si Herodes tanganna mi kuria i lako pepersuk-persukken kalak idi. ² Ibunuh ngo si Jakobus merkitè pedang, imo dengan sibeltek si Johanes. ³ Idah si Herodes kessa mo lolo ngo atè kalak Jahudi, makin iempet mo mengeletlet sipercaya i; idokken mo menangkup si Petrus tupung Pèsta Paskah imo Pesta mangan Roti Siso Meragi. ⁴ Enggo kessa itangkup, ipemasuk mo mi kurungen, janah idokken ma mo menjaga empat regu soridadu, gennep regu empat kalak soridadu. Isura-sura ukurna ngo, lebbè pul Pèsta Paskah i, asa ihukum ia i hadeppen jelma nterrem i. ⁵ Jadi dak ijaga kalak i ngo si Petrus i kurungen i; tapi ukum kuria i dak iempet kalak i ngo mennodipken si Petrus taba Dèbata. ⁶ Bernginna tikan naing ihukum si Herodes si Petrus i jolo jelma nterrem, terpeddem ngo ia irantè kalak idi ipas dua rantè ninganna ihapit dua kalak soridadu. I jolo pèntu kurungen idi pè lot ngo soridadu merjaga-jaga. ⁷ Nai sintempu mo cènder malaèkat Tuhan i bilik kurungen i mercuhaya mo sada penendang i sidi. Nai igoyok malaèkat i mo si Petrus asa ndungo, ninganna idokken, "O Petrus! Ndungo mo kono!" Nai mèter ntang-tang mo gejapkenna idi rantè bessi i tangan si Petrus i nai. ⁸ Nai idokken malaèkat i dèng ma mo, "Selluk mo geddamu, janah mercipatu mo kono!" Jadi iselluk si Petrus mo geddana janah iberretken mo cipatuna. Enggo kessa bagidi nina malaèkat idi dèng ma mo, "Selluk mo jubahmu janah èkutken mo aku!" ⁹ Nai ièkutken si Petrus mo malaèkat i mi ruar kurungen i. Tapi oda satdar dèng si Petrus, tah tuhu masa bagidi bana merkitè malaèkat i, tah oda, ai idok ngo alaten si niidahna i. ¹⁰ Tapi enggo kessa ilausi kalak i perjaga perlebbè dekket peduaken, soh mo kalak i mi pèntu bessi, imo pèntu lako mi kuta. Nai mènter mukaken bana ngo pèntu i, gabè karuar mo kalak i janah merdalan i sada lorong lako mi kuta. Sintempu ma mo mèter mersep malaèkat i sirang bana nai. ¹¹ Nai satdar mo si Petrus, nina mo, "Baru pè asa ntangkas kubettoh, ipasulak Tuhan i ngo keppè malaèkatNa lako mengerampasi aku ipas kuasa si Herodes nai bagidi ma dekket ipas sura-sura sinaing bakinen kalak Jahudi bangku." ¹² Jadi enggo kessa ntangkas bana simasa i, laus mo si Petrus mi bages si Maria inang si Johanes sinigeraren ma si Markus. Mèduk ngo mertumpu i sidi janah dak mersodip. ¹³ Ituktuki si Petrus mo pèntu bages idi i ruar, nai roh mo sada kalak naposo daberru mergerar si Rode lako memuka pèntu. ¹⁴ Itandai ngo sora simenuktuki i sora si Petrus. Tapi kumarna lolona oda mèter ibukaken dèng pèntu i, tapi lojang ngo ia mendahi jelma simertumpu i bages i magahken enggo keppè i ruar pèntu jolo si Petrus. ¹⁵ Gabè nina kalak i mo mbang daberru i, "Enggo gila kono pana." Tapi dak igegohi si Rode ngo mendokken, "Tuhu-tuhu ngo si Petrus ni ruar i." Tapi nina kalak i mo mbangsa, "Malaèkatna ngo i." ¹⁶ Tapi sinderrang bagidi, dak iempet si Petrus ngo menuktuki pèntu i. Jadi sinderrang ibuka kalak i kessa mo pèntu i, idah kalak i mo si Petrus, gabè bengngap kalohoon mo kalak idi. ¹⁷ Tapi ikilapken si Petrus mo tanganna taba kalak i asa ndong, nai isukutken si Petrus mo bai kalak i sinibaing Tuhan i lako menogikensa mi ruar kurungen i. Janah idokken dèng ma, "Bagahken kènè mo simasa èn taba si Jakobus dekket mendahi karina dengan." Jadi laus mo ia i sidi nai mi bekkas sidèban. ¹⁸ Nterrang kessa nola ari sibarembenkenna i, gontar mo karina soridadu perjaga i. Mersèto ngo ukur kalak i tersèngèt simasa taba si Petrus i. ¹⁹ Iperèntahken si Herodes mo lako menulusi si Petrus. Tapi kumarna oda jupa ia, gabè ihukum matè mo soridadu perjaga i. Mbungkas ma mo si Herodes i Judèa nai mi Kaisarèa. ²⁰ Melaga kalohoon ngo si Herodes taba kalak Tirus dekket Sidon, kumarna i roh mo kalak i rebbakken mengadepsa. Idahi kalak i mo perlebbè si Blastus kettoken si Herodes asa kan kalak i ia. Nai laus mo kalak i mendahi si Herodes mengèlèk-èlèksa asa merdamè, kumarna mergantung mi nagerri si Herodes ngo pangaan kalak i. ²¹ Nai tupung ari sienggo ititi kin, ipakkè si Herodes mo pakèen kerajanna, janah kundul mo ia i babo kundulen raja, janah merpidato mo ia taba ginemgemna. ²² Nai mèter isurakken jelma nterrem i mo, "Sora Dèbata ngo i, oda sora jelma!" ²³ Tapi mèter iparat malaèkat Tuhan mo si Herodes, kumarna oda ipesangap Dèbata. Ipangan olong-olong mo dagingna, janah lustun matè. ²⁴ Jadi makin sar mo kata Dèbata janah makin mergegoh. ²⁵ Balik mo si Barnabas dekket si Saulus i Jerusalem nai enggo kessa ipessoh kalak i tinenges masèh atè i, janah iarahken kalak i ngo dekket si Johanes Markus.

¹ Ukum i kuria Antiokhia lot ngo tikala nai nabi bak guru pè, imo si Barnabas dekket si Simeon igerari ma si Nègèr bak si Lucius kalak Kirene dekket si Mènakèm dengan raja Herodes rebbak mbelgah, dekket si Saulus. ² Tupung sidari tikan mengulaken ulaan menguèi Tuhan janah puasa kalak idi, idokken Tendi Dèbata mo taba kalak idi: "Pejaè kènè mo si Barnabas dekket si Saulus bangKu, ai naing lot bahaan kalak i petupungenKu." ³ Jadi puasa mo kalak i sisada kuria i janah mersodip, nai iampèken kalak i mo tanganna taba si Barnabas dekket taba si Saulus, kessa bagidi ipeberkat mo kalak i sidua. ⁴ Nai berkat mo kalak i si nipeberkat Tendi Dèbata laus mi kuta Seleukia, i sidi nai merkeppel mo kalak i mi pulo Siprus. ⁵ Soh kessa kalak i mi kuta Salamis, isukutken kalak i mo kata Dèbata i bages perguruun kalak Jahudi. Dekket ma ngo si Johanes Markus dengan kalak i. ⁶ Iagahi kalak i mo karina pulo i, nai soh mo kalak i mi kuta Pafos. Pejumpa mo kalak i, i sidi dekket sada kalak Jahudi mergerar Bar Jesus. Perhèlmu ngo ia janah mengaku dirina nabi. ⁷ Meralè-alè ngo ia dekket gubèrnur pulo i simergerar Sergius Paulus kalak singgeddang radumen mpantas niasè. Idilo Gubèrnur i mo si Barnabas dekket si Saulus, kerna sèkel kalohoon ia naing mendengkoh kata Dèbata. ⁸ Tapi ialo si Elimas perhèlmu i ngo si Barnabas dekket si Saulus (Elimas ngo gerarna i kata Junani), lako mengambati asa ulang percaya gubèrnur i taba Jesus dok atèna. ⁹ Tapi ukum si Saulus -- simergerar ma Paulus -- ikuasai Tendi Dèbata mo ia, ijengerri mo si Elimas perhèlmu i, ¹⁰ nina mo, "Èh, kono pendobo janah dukak sibolis! Musuh ni karina kebennaren! Oda pettadinmu dèng peppilitken nipergeddo Dèbata paluahken jelma manusia? ¹¹ Gejapkenna èn mo kono ihukum Tuhan i! Pètung mo kono lebbè, asa ulang idah ko nèngè binendang mataniari!" Nai mèter gejapkenna idi mo iakapken si Elimas bagè lot mbèrèng mennutupi matana, nai mèter gellap mo idah; jadi dak dadap-dadap mo ia lako mennulusi jelma asa lot mennegusa. ¹² Jadi idah gubèrnur i kessa mo simasa i, gabè percaya mo ia taba Jesus, ai kagum kalohoon ngo ia mi peddah tersèngèt Tuhan i. ¹³ Nai berkat mo si Paulus dekket denganna i kuta Pafos nai, merkeppel mi kuta Perga si ni Pamfilia. Tapi itadingken si Johanes Markus ngo kalak idi i si, ai laus ngo ia balik mi Jerusalem. ¹⁴ I Perga nai ipuspusken kalak i ngo dalanna soh mi Antiokhia si ni Pisidia. Tupung ari Sabat, laus mo kalak i mi bages perguruun janah kundul i sidi. ¹⁵ Enggo kessa pul ijaka Bukku si Musa dekket Bukku Nabi-nabi, ipasulak pengendeng perguruun i mo mendokken rana mendahi si Paulus bak taba denganna i bagèen, "Kènè alè dengan, tah lot peddah sinaing dokkenken ndènè taba sipulung èn, dokken kènè mo!" ¹⁶ Nai mèter kèkè mo si Paulus, ikilapken mo tanganna taba sipulung i, janah nina mo, "Kènè alè denganku kalak Israel dekket karina dengan sipulung isèn, simerkebiaren midah Dèbata, dengkohken kènè mo aku lebbè! ¹⁷ Ipilih Dèbata bangsa Israel ngo empungta, janah ibaing gabè bangsa mbellen tikan ginemgem dèng kalak idi i tanoh Mesir. Nai itogiken Dèbata mo kalak i karuar i tanoh Mesir nai merkitè-kitè kuasa mbellen. ¹⁸ Dak ianju-anju Dèbata ngo kalak i empat puluh tahun dekkahna i padang gurun. ¹⁹ Pitu bangsa ngo Irabbatken kalak idi i tanoh Kanaan, janah ibagi-bagiken mo tanohna i bai bangsa Israel gabè milikna. ²⁰ Karinana i, kira-kira empat ratus limapuluh tahun mo dekkahna. Enggo kessa i bagi-bagi kalak i tanoh Kanaan, ipebangkit Dèbata mo sigantung puhpuh bai kalak idi. Ukum sigantung puhpuh perpodi, imo Nabi Samuel. ²¹ Enggo kessa i, ipido kalak idi mo asa lot rajana. Jadi ipebangkit Dèbata mo si Saul gabè raja, imo anak si Kis marga Benjamin; empat puluh tahun dekkahna gabè raja si Saul. ²² Enggo kessa ipesampur Dèbata ia i kerajanna nai, ipebangkit Dèbata nola mo si Daud gabè raja kalak i. Janah bagèen mo pendokken Dèbata tersèngè si Daud, ’Enggo dapet Aku si Daud anak si Isai, sipesennangken ukurku. Ia mo pessautken nipergeddo atèngKu! ²³ Ipas pemparenna nai ngo roh ibaing Dèbata sada kalak Raja Sipaluah bai bangsa Israel, bagè sienggo iperbagah-bagah Dèbata kin imo Jesus. ²⁴ Sinderrang makdèng mengula Jesus enggo idiungken si Johanes taba kalak Israel, asa tobat kalak i janah uè iperridi. ²⁵ Mayak punca ulaan si Johanes idi, idokken ngo taba jelma nterrem i, ’Oda ngo aku si nipèma-pèma ndènè i. Èngèt mo, solo-solona ngo aku. Salang mengosari èkèt cipatuNa sambing pè madèng sanggup aku,’ nina. ²⁶ Kènè alè karina dengan ipas pemparen si Abraham nai, dekket karina kè simertumpu i sèn simerkebiaren midah Dèbata. Banta ngo itenges Dèbata kata kenggelluhen èn; ²⁷ ai oda itandai pengisi kuta Jerusalem dekket pengulu-pengulu kalak idi, Ia ngo Sipaluahken i. Tapi oda iarti kalak i peddah nabi si nijaka kalak i gennep ari Sabat, gabè ihukum kalak i ngo Jesus. Merkitè bagidi, saut mo sinidokken nabi-nabi i. ²⁸ Tukasi pè oda lot jumpa kalak i salahna memmakin tuk merutang kessah, ipidoken kalak i ngo bai si Latus asa ibunuh Ia. ²⁹ Asa enggo kessa ipessaut kalak i bagè sitersurat idi kin tersèngèt Ia, ipesampur kalak i mo bangkèNa i kayu persilang idi nai, itanem mo mi pendèbaan. ³⁰ Tapi ipegelluh Dèbata ngo Ia i kemmatèen nai. ³¹ Nai barang piga-piga ari dekkahna ipacidah ngo dirina taba dengan siroh i Galilea nai mi Jerusalem. Kalak i ngo bagèndari gabè saksi taba bangsa Israel. ³² Jadi bagèndari kutaruhken kami ngo Sukuten Kelluahen èn mendahi kènè; siniperbagah Dèbata taba empungta. ³³ Enggo ipessaut Dèbata mendahi kita pinemparna, imo sinderrang ipekèkè Jesus i. Bagè sitersurat ma ibas endè Psalm pasal dua: ’AnakKu ngo kono; sidari èn ngo Kono Kuperkuanak!’ ³⁴ Enggo kin ma ngo ilumbaken Dèbata, ipekèkè Ia ipas simatè nai, janah mak ndorok nèngè iakapi kemmatèen bak macik ibagasen kuburen, ai nina Dèbata ngo: ’Kuberrèken mo taba kènè bagah-bagah bennar janah tuhu, sienggo Kuperbagah-bagah taba si Daud.’ ³⁵ Bagidi dèng ma ipas ayat sidèban: ’Oda ipaduè kono idahen NaposoMu sibennar i kinimacik!’ ³⁶ Ukum si Daud, enggo kessa ipessaut lemmo atè Dèbata sidekkah nggelluhna, kumellip ngo ia, janah tertanem i gembar kuburen empungna. Macik ngo ia janah kembali nancuè. ³⁷ Tapi ukum Jesus sienggo ipegelluh Dèbata i kemmatèen nai, oda ngo mellala bak salpun. ³⁸ Asa alè dengan bettoh kènè mo, ’Kumarnaken Ia ngo asa nisukutken bai ndènè tersèngèt kesasaan dosa.’ ³⁹ Janah ibagasenSa ngo maluah karina sipercaya, ipas dosa-dosna nai, siso ndorok dapet kènè ipas pati-patiin si Musa. ⁴⁰ Kumarna naidi, manat mo kènè, asa ulang mengenna taba kènè, bagè nidokken nabi-nabi i; ai nina ngo: ⁴¹ Perdatèken kènè mo alè perpis mata, Lengang ngo ukur ndènè, nai matè mo! Bagèndari Kupehana ngo sada simasa i tengah-tengah ndènè tapi oda tok kènè, tukasi pè lot kalak peterangken taba kènè.’ " ⁴² Asa tikan naing laus si Paulus dekket si Barnabas mennadingken bages perguruun i, ipidoken kalak i mo, asa iolihi nola peterangken kata idi i ari Sabat siroh. ⁴³ Karuar kessa mo si Paulus dekket si Barnabas i bages perguruun i nai, mèduk ngo kalak Jahudi dekket bangsa sidèban sienggo masuk merragama Jahudi mengèkutken kalak i. Nai ipeddahi janah ijamitai mo kalak idi, asa tettap merian i bagasen masèh atè Dèbata. ⁴⁴ Jadi tupung ari Sabat siroh i nola hampir ngo karina si nikuta i roh mendengkohken kata Tuhan i. ⁴⁵ Idah kalak Jahudi kessa mo nterrem kalohoon roh jelma i, nangis mo atè kalak i, gabè ialo janah irèhèi mo jamita si Paulus i. ⁴⁶ Tapi makin mbohona ngo si Paulus dekket si Barnabas mendokken, "Patut bai ndènè ngo nemmuken sukuten kata Dèbata. Tapi karna oda uè kènè menjalo, kenggelluhen siamman sumendah mengèkutken pertimbangen ndènè i, gabè oda mo terolih kènè. Kerna naidi mendahi bangsa sidèban mo kudempakken kami. ⁴⁷ Ai bagèen ngo idokken Tuhan i bai nami: ’Kupasulak mo kono gabè penendang mendahi bangsa sidèban, siso bangsa Jahudi. Asa iembahken kono kelluahen taba suberri jelma i dunia èn.’ " ⁴⁸ Idengkoh kalak siso bangsa Jahudi kessa mo rana i, lolo kalohoon mo kalak i, ipoji kalak i mo kata Tuhan i. Jadi gabè percaya mo sienggo nitentuken Dèbata kin terolih kenggelluhen siamman sumendah. ⁴⁹ Jadi sar mo kata Tuhan idi i suberri nagerri i. ⁵⁰ Tapi dak igaru kalak Jahudi mo pengetua-pengetuai dekket daberru-daberru kalak mersangap ni kuta i simerkebiaren taba Dèbata. Gabè ibaing kalak i mo peraloon taba si Paulus dekket si Barnabas, nai iusir mo kalak i sidua i nagerri i nai. ⁵¹ Jadi ipaspasken apostèl i mo abu nèhèna i hadeppen kalak i mahan pernèngèten, nai laus mo kalak i mi Ikonium. ⁵² Tapi dom sampang atè ngo sipercaya ni Antiokhia ibaing Tendi Perbadia.

¹ I Ikonium pè ibengketti si Paulus dekket si Barnabas ma mo bages perguruun kalak Jahudi janah merjamita ma ngo kalak idi i sidi. Kemulihken jamitana i mèduk ngo percaya bai Jesus, kalak Jahudi bak kalak Junani. ² Tapi dak ipejuju janah igara-garai kalak Jahudi simenulak kata i mo ukur kalak siso Jahudi, gabè nggerger mo atè kalak i midah kalak sienggo percaya bai Jesus. ³ Kerna i sidi ngo si Paulus dekket si Barnabas merrian narih ndekkah. Lolo janah pang ngo kalak i merjamita mengasangken Tuhan i. Nai iberrèken Dèbata mo taba kalak i kuasa lako maing tanda kellengangen mahan bukti, magahken tuhu ngo nidokken kalak i. ⁴ Tapi gabè merralo ngo pengisi kuta i, dèba kan kalak Jahudi, dèba nai kan apostèl sidua kalak i. ⁵ Nai mertaki mo kalak Jahudi dekket siso Jahudi bang pengetuai bak pengulu kalak i siso percaya naing menggosa bak mendersa apostèl i merkitè mementiri dekket batu. ⁶ Terbertik kessa mo taki-taki i taba apostèl, mperrus mo kalak i mi kuta si ni nagerri Likonia, imo kuta Listra dekket Derbe bak mi kuta sikulilingna. ⁷ I kuta i pè ijamitaken kalak i ngo Sukuten Kelluahen i. ⁸ Lot mo sada kalak daholi i kuta Listra, pangpangen ngo ia kessa nai tubuh. Dak kundul sambing ngo ia, ai laju ngo oda pennah terbakinsa merdalan kumarna pangpangen i. ⁹ Idengkoh ngo si Paulus merjamita i. Nai itengen si Paulus mo ia, gabè idah si Paulus percaya ngo ia janah ndorok memmaing malum sakitna i. ¹⁰ Jadi ipegang si Paulus mo sorana mendokken, "Cènder mo kono ipas nèhèmu i!" Nai mèter kèkè mo ia janah merdalan. ¹¹ Idah jelma nterrem i kessa mo sinibaing si Paulus i mersurak-surak mo kalak i mendokken i kata Likaonia, "Enggo roh sembahenta i tosè bagè rupa jelma mendahi kita!" ¹² Igarari kalak i mo si Barnabas ’Zeus’ janah si Paulus ierari kalak i ’Hermes’ kerna pengerana ia. ¹³ Nai roh mo imam sembahen Zeus nikèparen kuta i merembah kerbo tonggal dekket lambè rebbak dekket jelma nterrem i memèlèken pèlèen bai rasul-rasul i. ¹⁴ Idengkoh si Barnabas dekket si Paulus kessa mo si nibakin jelma nterrem i, iribaki kalak i mo olesna, lojang mo kalak i mi tengah-tengah jelma nterrem i ninganna isurakken: ¹⁵ "Kènè alè dengan, kasa bagidi ibaing kènè? Jelma ngo kami dos dekket kènè. Asa roh pè kami mi sènda lako menaruhken Sukuten Kelluahen ngo bai ndènè, asa itadingken kènè siso merguna i, janah asa gabè mulak kènè mendahi Dèbata singgelluh i, situmempa langit dekket tanoh bak laut dekket karina pengisina. ¹⁶ Kumarna ibelli Dèbata ngo karinana bangsa tikanna idi nai mersitendeng dalanna. ¹⁷ Tapi bagidi pè i, dak ibaing ngo kesaksiin tersèngèt diriNa, imo merkitè basa mendè. Ai iberrèken ngo bai ndènè udan i dates nai dekket kiniduma. Ninganna i, ipesennang ngo ukur ndènè merkitè pangaan dekket sampang atè." ¹⁸ Tukasi pè bagidi, mahal ngo iakap apostèl i lako mennondati jelma nterrem i, asa ulang saut kalak idi ipèlè. ¹⁹ Nai roh mo dèba kalak Jahudi i Antiokhia dekket i Ikonium nai si ni nagerri Psidia mi kuta Listra, iunung mo jelma nterrem asa gabè kan kalak i, jadi gabè ibentiri kalak i mo si Paulus dekket batu, iruah mo ia mi ruar kuta i. Enggo ngo matè ia ukum dokatè jelma nterrem i. ²⁰ Tapi roh kessa mo sienggo percaya i cènder mengkulilingisa, kèkè mo ia janah rebbakken dekket sinterrem i balik mi kuta. Nai siberembenkenna i, berkat mo ia dekket si Barnabas mi kuta Derbe. ²¹ I Derbe, ijamitaken si Paulus bak si Barnabas mo Sukuten Kelluahen i, janah mèduk ngo kalak ni sidi gabè percaya bai Jesus. Nai enggo kessa i, balik mo kalak i mi Listra, nai mi Ikonium, nai mi Antiokhia si ni nagerri Psidia. ²² I kuta idi pè ipergegohi kalak i ngo kepercayaen sienggo percaya i, janah ipesèngèt asa ulang mondar kepercayaen kalak i bai Jesus, nina mo, "Kennah sibellus ngo lebbè matcam bagè kepersuken, nai ipè asa mbengket kita mi Kerajaen Dèbata." ²³ Ipebangkit kalak i ngo i gennep kuria sigabè pengendeng. Merdengan sodip dekket puasa, ipessoh kalak i ngo pengendeng nipebangkitna i taba Tuhan sinikepercayaen kalak idi i. ²⁴ Nai berkat mo si Paulus dekket si Barnabas menerusken perdalanen kalak i mengelausi nagerri Psidia soh mi Pamfilia. ²⁵ Enggo kessa isukutken kalak i kata Dèbata i Perga, laus mo kalak i mi Atalia. ²⁶ I sidi nai balik mo kalak i merkeppel mi Antiokhia. Kuta i mo tikala i bekkas kalak idi isohken taba Dèbata, asa iulaken kalak i ulaan si niulaken kalak i bagèndari. ²⁷ Soh kessa mo kalak i mi Antiokhia, idokken kalak i mo merpulung si sada kuria i nai ibagahken kalak i mo karina nihanaken Dèbata merkitè-kitè kalak i. Bagi ma pemmaing Dèbata memmuka dalan bai kalak bangsa sidèban siso Jahudi, gabè percaya bai Jesus. ²⁸ I kuta i mo si Paulus bak si Barnabas merian narih toko dekkahna rebbak dekket sipercaya ni sidi.

¹ Lot mo roh barang piga-piga kalak i Judèa nai mi Antiokhia, memmeddahken bagèen, "Ukum oda mertakkil kènè mengèkutken pati-patiin Dèbata bagè nidokken taba si Musa, oda ndorok maluah kènè." ² Ialoi si Paulus bak si Barnabas ngo kalak i. Jadi ipasulak mo si Paulus bak si Barnabas rebbak dekket barang piga-piga kalak denganna i Antiokhia nai laus mi Jerusalem lako mendahi apostèl bak pengendeng silot i sidi, mengkusoken persoalen i. ³ Itaruhken kuria i ngo kalak i soh mi ruar kuta i. Arap tanoh Penesia ngo kalak i merdalan, ilausi ma mo dekket Samaria. Ibagahken kalak i ngo, enggo dekket kalak siso Jahudi menjalo kata Tuhan idi i si, gabè lolo mo atè kalak i mendengkoh berita i. ⁴ Nai soh kessa mo kalak i mi Jerusalem, mendè ngo penjalo si sada kuria i bak apostèl dekket pengendeng-pengendeng i. Isukutken kalak i mo karinana si nibaing Dèbata merkitè kalak i. ⁵ Tapi kèkè mo dèba kalak Parisè sienggo gabè percaya i, "Kennah itakkil ngo janah kennah peddahen ngo kalak i asa iulaken pati-patiin Dèbata nipessohna merkitè si Musa." ⁶ Nai gabè pulung mo Apostèl i bagi ma dekket pengituai-pengituai lako mengeranai tersèngèt mi si. ⁷ Enggo kessa ndekkah kalak i mertukar pikiren, kèkè mo si Petrus, nina mo, "Kènè karina kaka anggi! Ibettoh kènè ngo, enggo ipilih Dèbata aku i tengah-tengah ndènè nai lako magahken Sukuten Kelluahen i taba kalak bangsa sidèban siso Jahudi, asa kalak idi pè mendengkoh janah percaya. ⁸ Ijalo Dèbata simemettoh ukur ngo kalak i. Ipetandaken ngo penjalona i merkitè-kitè iberrèken Tendina tosè bagè pemerrèkenNa i banta. ⁹ Oda lot kadè kalihna kita dekket kalak idi ibaing Dèbata, enggo kessa ipepanting ukurna merkitè kepercayaen i. ¹⁰ Nteng, kasa nola bagèndari naing ialo kènè Dèbata merkitè mengampèken sada kewajiben meberrat i mahan ulanken kalak idi, padahal empungta bak kita sendiri pè oda sanggup merembah barang mengulakensa? ¹¹ Balikna, ai sikepercayai ngo merkitèken masèh atè Tuhan Jesus sambing ngo makin asa maluah kita. Kalak idi pè bagidi ma ngo." ¹² Nai nono mo karina kalak simertumpu i. Nai idengkohken kalak i mo si Barnabas dekket si Paulus, pejojorken tanda bak kellengangen nibaing Dèbata i tengah-tengah bangsa sidèba siso Jahudi merkitèken kalak i. ¹³ Enggo kessa salpun iranaken kalak i karinana, ialoi si Jakobus mo, "Kènè karina kaka anggi, dengkohken kènè mo aku lebbè! ¹⁴ Ndai ngo ibagahken si Simon bakunè penatap Dèbata taba bangsa sidèban siso Jahudi i mulana nai, asa gabè ijalo kalak i gabè ummatNa. ¹⁵ Jadi merdemmu ngo i mi kata nabi-nabi, ai bagèen ngo isuratken: ¹⁶ ’Enggo kessa i roh nola mo Aku lako pekkadèn bages si Daud sienggo merumpak i, janah kupelias nola mo sienggo ncèda i; ¹⁷ asa karina kalak sitadingna mennulusi Tuhan i rebbak dekket karina bangsa sidèban siso Jahudi sienggo Kudilo gabè milikKu.’ Bagidi mo kata Tuhan, ¹⁸ sienggo ibagahken kin i sinderbi nai!" ¹⁹ Kerna naidi, mengèkutken pertimbangenku nina si Jakobus, "Oda ndorok susahenta nèngè kalak i si roh i bangsa sidèban idi nai mendahi Dèbata lako mennohken dirina. ²⁰ Tapi sitengesken mo surat hatoren mahan sièngèten kalak i, asa ulang ipangan kalak i pangaan sienggo ipèlèken bai bègu, ulang ipangan jukut siso isèat, ulang ipangan daroh, ipeddaoh dirina ipas ulaan memmaing mellamun janah ulang merlangkah julu meddem. ²¹ Ai dak ijakaken ngo pati-patiin Dèbata gennep ari Sabat i bages perguruun silot i gennep kuta, imo niberrèken Dèbata merkitè si Musa." ²² Nai iputusken apostèl-apostèl dekket pengituai-pengituai bak kuria i mo barang piga kalak bai kalak i nai mahan utusen mi Antiokhia rebbak dekket si Paulus bak si Barnabas. Nai ipilih kalak i mo si Silas bak si Judas sinigeraren ma si Barsabas. Duana kalak èn imo kalak siterkemuka bai kalak sipercaya i Jerusalem. ²³ Ibahan kalak i mo surat siembehenna bagèen, "Kènè karina dengan sienggo percaya bai Jesus Kristus, imo siso bangsa Jahudi kin, si lot i Antiokhia, i Siria bak Kilikia. Tabì nami apostèl-apostèl bak pengituai-pengituai mo bai ndènè karinana. ²⁴ Soh ngo bai nami berita, lot keppèken roh dèba bai nami nai mendahi kènè, mengeributi kènè merkitè-kitè peddah kalak i mengelalingken kènè. Oda ngo berkat sungkun nami i. ²⁵ Kerna naidi enggo runggu kami janah enggo sada ukur nami lako pasulakken kalak ènda rebbak dekket si Barnabas bak si Paulus sikukekellengi kami. ²⁶ Ukum kalak èn sidua, sienggo isomadaken ngo kessahna kumarna Tuhanta Jesus Kristus. ²⁷ Kupasulak kami ngo si Judas dekket si Silas mendahi kènè, asa ibagahken bai ndènè keputusen nami merkitè rana pè taba kènè, imo sienggo kusuratken kami èn. ²⁸ Enggo isetujui -- Tendi Dèbata bak kami pè selloh -- ngo dok atè nami, ulang pella iampèken taba kènè ulaan mbotong, laènken siperlu èn: ²⁹ ulang pangan kènè pèlèen sienggo ipèlèken bai bègu, ulang pangan kènè daroh, ulang pangan kènè jukut siso isèat, janah ulang kènè merlangkah julu meddem. Mula ipesisi kènè ngo diri ndènè ibas karinana idi, enggo mengulaken simerandal kènè. Bagidi mo, njuah-njuah mo." ³⁰ Enggo kessa mersitennahen nai ipeberkat kalak i mo utusen i laus mi Antiokhia, jadi soh kessa mo utusen idi, ipepulung mo karina ruas kuria i lako pesakatken surat i. ³¹ Nai ijaka kuria i kessa mo surat i, lolo kalohoon mo atè kalak i, ai terapo mo perrukuren kalak i. ³² Tapi ukum si Judas bak si Silas, nabi ngo kalak i. Matcam ngo bagèna jamita kalak i lako mempergegohi janah petegguhken ukur sinterrem i. ³³ Enggo kessa narih ndekkah merian si Judas dekket si Silas i sidi, ipasulak kuria i mo kalak idi balik mendahi sipasulakkensa merembah kata lias atè. [ ³⁴ Tapi ukum si Silas lemmo kalohoon ngo atèna merian i Antiokhia.] ³⁵ Si Paulus bak si Barnabas pè, narih ndekkah ma ngo merrian i Antiokhia. Isukutken kalak i ngo kata Tuhan i rebbak dekket dengan sidèbanna i pè. ³⁶ Oda sadikè dekkah nai idokken si Paulus mo taba si Barnabas, "Laus nola mo kita mendahi karina dengan sienggo sijamitai idi kin mi gennep kuta, imo sienggo gabè percaya bai Jesus, tah enggo bakunè kalak i!" ³⁷ Tapi ukum dokatè si Barnabas, naing mo nemmu dekket si Johanes simergerar Markus, ³⁸ tapi ukum dokatè si Paulus, oda selloh nèngè dekket si Markus i, kumarna enggo pennah itadingken ia kalak idi i Pamfilia, janah oda uè mendengani kalak i mi ulaan i. ³⁹ Jadi gabè merselisih mo kalak i sidua, sanga mersirang. Jadi iarahken si Barnabas mo si Markus denganna merbungki mi pulo Siprus. ⁴⁰ Ukum si Paulus, si Silas ngo iarahken mahan denganna. Berkat mo kalak i enggo kessa lebbè ipessoh dengan ni Antiokhia i kalak i mi bagasen masèh atè Tuhan i. ⁴¹ Ikulilingi kalak i mo tanoh Siria dekket Kilikia, lako petegguhken kuria ni sidi i.

¹ Iterusken si Paulus mo perdalanenna mi kuta Derbe kessa i mi Listra. Lot mo i sidi sada kalak simengèkutken Jesus mergerar si Timoteus. Berru Jahudi ngo inangna sienggo percaya taba Jesus; tapi ukum bapana kalak Junani ngo. ² I tengah-tengah si percaya i kuta Listra dekket Ikonium, termurmur ngo kiniselloh si Timoteus. ³ Jadi ipergeddo si Paulus ngo asa dekket nemmu si Timoteus mahan denganna mi perdalanen. Saut mo dekket ia, tapi lebbè itakkil ngo ia kumarna kalak Jahudi silot i aur i, ai karina ngo memettoh kalak Junani bapana. ⁴ I gennep kuta niagahen kalak idi i, ibagahken kalak i ngo keputusen runggu apostèl-apostèl dekket pengendeng-pengendeng si ni Jerusalem simahan ulanken janah jamotenken kalak idi. ⁵ Jadi makin ntegguhna mo kepercayaen kuria i karina, janah dak mertambah-tambah ngo bilangenna gennep ari. ⁶ Kumarna oda ipadiat Tendi Dèbata ijamitaken si Paulus dekket si Silas kata Dèbata i Asia, gabè iterusken kalak i mo pedalanenna mi Frigia dekket Galatia. ⁷ Nai soh kessa mo kalak i mi perbalengen tanoh Misia, ioji kalak i mo merdalan mi suberri aur Bitinia tapi oda ipadiat Tendi Jesus kalak i. ⁸ Nai gabè merdalan mo kalak i mengarbis aur Misia, jadi soh mo kalak i mi Troas. ⁹ Bernginna idi i Troas idah si Paulus mo sada alaten. Ibas alaten idi idah mo sada kalak Makedonia dak mengendik-ngendiksa mendokken, "Suberrang mo kono mi Makedonia mengurupi kami." ¹⁰ Idah si Paulus kessa mo alaten i, mèter itaki kami mo berkat mi Makedonia, ai dokatè nami, Dèbata ngo mendokken kami laus mi sidi lako magahken Sukuten Kelluahen i. ¹¹ Nai mèter merbungki mo kami i Troas nai memènter mi Samotrake janah sibarembenkenna mi Nèapolis. ¹² I sidi nai berkat mo kami mi Pilipi imo kuta simbelgahna i nagerri Makedonia, janah termasuk gemgemmen Rom ngo i. I sidi mo kami barang piga-piga ari. ¹³ Tupung ari Sabat laus mo kami mi ruar kuta i, mi biding laè, lako mennulusi bekkas mersodip kalak Jahudi, ai dok atè nami tentu lot i sidi. Nai kundul-kundul mo kami ninganna mengeranai dekket daberru-daberru sienggo mertumpu i sidi. ¹⁴ Lot mo i sidi sada kalak daberru mergerar sm Lidia. Sada kalak pertiga-tiga kaèn mbalo ngo ia i Tiatira, janah merkebiaren midah Dèbata. Jadi ibuka Tuhan i mo pennarihenna, gabè iradum-radumi mo jamita si Paulus i. ¹⁵ Nai gabè iperridi mo si Lidia dekket karina kalak i si sada jabu, janah gabè iarahken mo kami mi bagesna, nina mo, "Mula tuhu ngo enggo percaya aku taba Jesus dokatè ndènè, kiserrang mo kènè lebbè mi bagesku." Pella dak ièlèk-èlèk kami. ¹⁶ Tikan sikali tupung laus kami mi bekkas mersodip i, pesimbak mo kami dekket sada kalak daberru hamba janah nangguru pertendung ngo ia. Merkitè tendungna i, mbuè ngo laba dapet indukna. ¹⁷ Dak ièkut-èkut ngo si Paulus bak kami ninganna mendilo-ndiloken, "Naposo Dèbata simeheji i ngo kalak èn, lako magahken dalan kelluahen ndènè!" ¹⁸ Dak iempet daberru i ngo katana bagidi barang piga-piga ari. Tapi gabè ncego mo atè si Paulus, itulihken mo ia janah idokken, "Merkitè-kitè gerar Jesus Kristus, kudokken karuar kono i daberru idi nai!" Nai mèter karuar mo gejapkenna i silanna i bai daberru idi nai. ¹⁹ Tapi idah induk somangna i kessa mo oda lot nèngè laba iakap bai daberru idi nai, itangkup kalak i mo si Paulus dekket si Silas, iruah kalak i mo mi kerungguun mi hadeppen penghukum. ²⁰ Iaduken mo si Paulus dekket si Silas taba pengerajai, nina mo, "Gontar ngo ibaing kalak Jahudi èn kutanta! ²¹ Ipeddahken ngo siso ndorok ulanken janah ngganè ngo i banta kalak Rom. Oda ndorok terjalo kita barang pe menguei kecemmalen bagi." ²² Nai gabè dekket ngo jelma nterrem mengalo taba si Paulus bak si Silas, iribaki penghukum i mo oles kalak i sidua, janah isuruh mo mengeligasi. ²³ Enggo kessa narih toko dekkahna iligasi, ipemasuk mo kalak i mi kurungen. Idokken ma mo taba perjaga kurungen i, asa tuhu-tuhu ijaga kalak i. ²⁴ Kumernaken perèntah idi, gabè ipemasuk nola mo kalak i mi kurungen perbagasen, janah ibèangken ngo nèhè kalak i. ²⁵ Mayak tengah mberngin mersodip mo si Paulus dekket si Silas janah merendè memoji-moji Dèbata ipedengkoh-dengkoh si ni kurungen i. ²⁶ Nai sintempu mo masa rènur mergegoh kalohoon sanga tumuyu-tuyu batu cendi kurungen i. Nai mèter mbuka mo gejapkenna idi pèntu kurungen i, janah ntalkas mo karina rantè bak bèangen ni sidi. ²⁷ Ndungo janah tersengget mo penjaga kurungen i. Idah kessa mo dalngah ngo keppè pèntu kurungen i, iberkat mo peddangna naing mendelles, ai idokdok enggo mperrus karina siterkurung ni sidi. ²⁸ Tapi ipegang si Paulus mo sorana mendiloken, nina mo, "Ulang idelles ko dirimu, ai isèn ngo kami karina!" ²⁹ Nai ipido mandur kurungen i mo togok, lojang mo ia mi bagasen, mèter isembah mo si Paulus dekket si Silas ninganna menggirgir. ³⁰ Iarahken mo kalak i mi ruar janah mengkuso mo ia taba kalak i, nina mo, "Kènè alè Tuan, bakunè ngo kubakin asa maluah aku?" ³¹ Nai ialoi si Paulus bak si Silas mo, "Kepercayai mo Tuhan Jesus -- asa maluah kono dekket pengisi bagesmu!" ³² Nai iajarken si Paulus bak si Silas mo kata Tuhan i bai mandur kurungen i, dekket taba karina jelma silot i bagesna. ³³ Nai mèter ialengi mandur kurungen i mo kalak i bernginna idi, ipebersih mo ugah pengeligasen i. Jadi mèter iperridi kalak i mo ia rebbak dekket karina pengisi bagesna. ³⁴ Nai iarahken mo si Paulus dekket si Silas mi bagesna janah ihantari mo pangaan taba kalak i sidua. Lolo kalohoon ngo atèna dekket karina pengisi bagesna kumarna enggo percaya ia taba Dèbata. ³⁵ Siceggen sibarembenkenna nola, ipasulak penghukum i mo upasna mi kurungen mendokken, taba mandur kurungen i asa ipaluah si Paulus dekket si Silas i. ³⁶ Ibagahken mandur kurungen i mo berita i taba si Paulus, nina mo, "Enggo iperèntahken penghukum maluah mo kènè. Nteng, karuar mo kènè, janah njuah-njuah mo!" ³⁷ Tapi idokken si Paulus mo taba upas i, "Kalak Rom ngo kami. Enggo iligasi kami i hadeppen sinterrem janah ikurung, oda lebbè iperèso. Keppè bagèndari idokken asa laus kami bagi sipsip? Oda uè kami! Dokken mo roh penghukum i lako paluahken kami." ³⁸ Nai ibagahken upas i mo kata i taba penghukum i. Enggo kessa ibettoh penghukum i, kalak Rom ngo keppè si Paulus dekket si Silas mbiar mo kalak i. ³⁹ Roh mo kalak i mengidoken asa ulang pella ilugun si Paulus bak si Silas pemmakinna i. Jadi iarahken mo kalak i mi ruar, janah ièlèk-èlèk mo kalak i sidua, asa itadingken kuta i. ⁴⁰ Itadingken si Paulus bak si Silas mo kurungen i, laus mo kalak i mendahi si Lidia. Perridah kessa mo kalak i dekket sipercaya i, mendokken kata apo-apo mo kalak i, nai berkat mo si Paulus dekket si Silas.

¹ Iterusken si Paulus bak si Silas mo perdalanen memellus kuta Amfipolis dekket kuta Apolonia, nai soh mo kalak i mi kuta Tesalonika. Lot ngo i kuta i bages perguruun kalak Jahudi. ² Laus mo si Paulus mi bages perguruun i -- bagè kecemmalenna. Hojor mo tellu kali ari Sabat dak irisiki kalak i ayat-ayat Bibèl rebbak dekket jelma ni sidi. ³ Mengèkutken sitersurat i, kennah menggong simpersuk ngo Kristus Raja Sipaluah i, janah kèkè nola i kemmatèen nai. "Asa, Jesus sienggo kusukutken kami taba kènè i ngo Raja Sipaluah niperbagah-bagah Dèbata," nina si Paulus. ⁴ Nai gabè percaya mo dèba janah gabè mengèkut taba si Paulus bak si Silas; bagidi ma ngo nterrem bang kalak Junani simerkebiaren midah Dèbata, janah daberru-daberru simersangap pè mèduk ngo gabè percaya. ⁵ Tapi ncian mo atè kalak Jahudi. Ipepulung mo jelma dalang-dalangen, iunung mo kalak i, asa memaing kegontaren i kuta i. Nai ikubu kalak i mo bages si Jason lako mennulusi si Paulus bak si Silas naing embahen mi hadeppen jelma nterrem. ⁶ Tapi kumarna oda jupa kalak i si Paulus bak si Silas, gabè iruah kalak i mo si Jason dekket barang piga-piga kalak sipercaya mi hadeppen penggemgemmi kuta i. Idilo-diloken kalak i mo, "Dak menggutturi ngo kalak èn barang i dikè sambing pè! Bagèndari roh ngo kalak èn mi kuta èn, ⁷ enggo ijalo si Jason mi bagesna. Dak mengalo Hatoren Kèsar Rom ngo kalak i karina, ai ipeddahken ngo lot dèng nina Raja sidèban mergerar Jesus." ⁸ Merkitèken asung-asung kalak idi i, gontar mo jelma nterrem i bak simenggemgem kuta i. ⁹ Kessa pè lebbè ijalo kalak i riar, jaminen bai si Jason nai bak sipercaya idi nai, asa ipaluah kalak i. ¹⁰ Bernginna idi ipeberkat kalak sipercaya i mo si Paulus dekket si Silas mi Berea. Soh kessa kalak i mi sidi, idahi kalak i mo bages perguruun kalak Jahudi. ¹¹ Burjuun ngo kalak Berea dari pada kalak Tesalonika, ai nggasang ngo atè kalak i mendengkohken berita tersèngèt Jesus, janah gennep ari ngo irisiki kalak i Bibèl, barang tah tuhu ngo nipeddahken si Paulus i. ¹² Mèduk ngo kalak i percaya bai Jesus, janah mèduk ma ngo kalak Junani sitergerar gabè percaya; daberru dekket anak laki pè. ¹³ Tapi idengkoh kalak Jahudi ni Tesalonika kessa mo enggo keppè isukutken si Paulus kata Dèbata i Berea, roh mo kalak i mi Berea lako mengunung dekket menggutturi sinterrem i. ¹⁴ Nai ndor mo itaruhken dengan i si Paulus mi biding laut, tapi ukum si Silas dekket si Timoteus, tading dèng ngo i Berea. ¹⁵ Itaruhken kalak i ngo si Paulus soh mi Atena, nai balik mo simenaruhken i mi Berea ninganna merembah tennah si Paulus, asa ndor ipadapetti si Silas bak si Timoteus ia. ¹⁶ Sinderrang memmèma si Silas bak si Timoteus si Paulus i kuta Atena, mellui kalohon ngo atèna midah bagi buèna gana-ganaan i kuta i. ¹⁷ Kumarna naidi dak mertukar pikiren ngo ia dekket kalak Jahudi i bages perguruun, bagi ma pè dekket kalak simerkebiaren midah Dèbata bang dekket kalak siroh mi pasar-pasar i gennep ari. ¹⁸ Mersoal ngo ia dekket guru-guru kalak Epikuros bak horong Stoa pè. Dèba kalak i mendokken, "Kadè mo nahu jelma bagèen?" Cituk ngo pemmettohna, buèen rana ngo kessa ia. Tapi dèba mendokken, "Bagè cara isukutken ngo tersèngèt sembahen sidèban. Idokken kalak i pè bagidi, kumarna isukutken si Paulus ngo Jesus dekket kekèkèen i simatè nai." ¹⁹ Nai iarahken kalak i mo si Paulus mi Bages kerungguun Areopagus, nina kalak i mo mbangsa, "Ndorok ngo bettohen nami barang peddah rembaru bakunè ngo nidokkenmu i? ²⁰ Ai bagè laèn ngo kudengkoh kami kata nisukutkenmu i. Kerna naidi naing ngo kubettoh kami kadè ngo i." ( ²¹ Karina kalak Atena bak kalak simerian ni sidi, lemmo kalohon ngo atèna menukutken bak mendengkohken berita rimbaru.) ²² Nai cènder mo si Paulus i tengah-tengah Areopagus i, nina mo, "Kènè alè kalak Atena! Kuidah mbiar kalohoon ngo kènè menengen sembahen ndènè i. ²³ Ai tikan merdalan-dalan aku janah mendatèken bekkas-bekkas pemèlèen ndènè i, kuidah lot sada langgaten janah isuratken i sidi: Bai Dèbata Siso Nitandaan! Asa nisembah ndènè siso nitandaan ndènè i ngo sikusukutken taba kènè. ²⁴ Ukum Dèbata situmempa langit dekket tanoh èn soh mi karina pengisina, ia ngo Tuhan ni karina langit dekket tanoh èn soh mi karina pengisina, Ia ipas bages sembahen nipellias tangan. ²⁵ Oda ngo perlu bana pengurupiin jelma, kerna Ia ngo merrèken kenggelluhen, kessah dekket sagumanna siperlu bai jelma. ²⁶ Arap sada jelma ngo Ipehana karinana jelma merbangsa-bangsa, janah idokken ngo jelma i mengiani suberri sisik tanoh èn. Ia ma ngo menentuken i mulana nai, ndigan janah i dikè ia merian. ²⁷ Ibaing Dèbata pè karinana i bagidi, asa dak itulusi jelma i ngo Ia, janah katerra pè asa ndorok pejumpa jelma i dekketSa, ai oda ngo ndaoh ia banta èn nai gennep. ²⁸ Bagè pendokken dèba jelma: nggelluh, gumerrek bak hana pè kita i dunia èn, kerna kuasana ngo! Tosè bagè pendokken singgeddang radumen ndènè, ai nina ngo, ’Karina ngo kita dukak-dukakNa.’ ²⁹ Asa, mula dukak-dukak Dèbata ngo kita, ulang dok atènta codi mi gana-ganaan buradda Dèbata, barang codi mi pirak, barang codi mi batu si niokir jelma. ³⁰ Tapi oda ngo pella ilugun Dèbata tikki kemotonta i, tapi ukum bagèndari suberri jelma ngo idokken Dèbata kennah mertobat ipas dosa-dosana nai. ³¹ Ai enggo ibuhul Dèbata kin tikkina, asa ihukum dunia èn merkitè kesèntengen. Perhukumen idi ihukumken sada kalak sienggo ipilih Dèbata kin, janah enggo ngo ibuka Dèbata dalan, asa gabè percaya karina jelma i, ipekèkè ngo gabè balik nggelluh ia i kemmatèen nai." ³² Idengkoh kalak i kessa mo kata tersèngèt balik nggelluh i kemmatèen nai, lot mo dèba bai kalak i nai mentertabai si Paulus. Tapi lot ma ngo dèba mendokken, "Naing Kudengkoh kami dèng ngo ranamu tersèngèt i." ³³ Enggo kessa bagidi, laus mo si Paulus mennadingken kalak i. ³⁴ Tapi lot ma ngo dèba tan kalak i nai gabè kan si Paulus jahna percaya bai Jesus, imo si Dionisius anggota runggu Areopagus, dekket sada kalak daberru mergerar si Damaris bang piga-piga kalak nai.

¹ Enggo kessa bagidi, berkat mo si Paulus i Atena nai mi kuta Korintus. ² Nai jumpasa mo i sidi sada kalak Jahudi mergerar si Akwila, ukum kuta bekkasna tubuh i nagerri Pontus ngo. Rembaru roh dèng ngo ia i Italia nai rebbak dekket sinibagesna mergerar si Priskila. Roh pè kalak i mi Korintus, kemulihken perèntah Kèsar Klaudius ngo, ai iusir ngo karina kalak Jahudi i kuta Rom nai. ³ Gabè rebbak kalak i mo si Paulus merian, janah rebbak mahan bahaan, ai dos ngo pencariin kalak i dekket si Paulus imo mertennun tènda. ⁴ Tapi gennep ari Sabat dak laus ngo si Paulus mi bages perguruun lako mengeranai dekket kalak Jahudi bak kalak Junani, asa percaya bai Jesus. ⁵ Roh kessa mo si Silas dekket si Timoteus i Makedonia nai, gabè karina tikki si Paulus ibaing lako mengindangken taba kalak Jahudi, Jesus i ngo Kristus Raja Sipaluah niperbagah-bagah Dèbata. ⁶ Tapi kumarna ialo janah irèhèi kalak i ngo si Paulus, gabè ipaspasken mo abu silekket i olesna mahan pertandaan tersèngèt kesalahen kalak i, ninganna idokken, "Mersempetta bai ndènè mo kessah ndènè oda nè pendikèi ukum aku! Mulai bagèndari nai mo aku laus mendahi kalak siso Jahudi." ⁷ Mènter lompat mo si Paulus i sidi nai, mi bages kan bages perguruun i. Kalak siso Jahudi ngo sidasa bages i mergerar si Titius Justus; tapi isembah ngo Dèbata. ⁸ Tapi ukum si Krispus imo pengendeng bages perguruun i dekket karina pengisi bagesna percaya ngo bai Tuhan i. Mèduk dèng ma ngo kalak Korintus sidèbanna i, simendengkoh sukuten si Paulus i gabè percaya janah iperridi. ⁹ Tapi tupung i sada berngin, idah si Paulus mo ipas alatenna Tuhan i mendokken bana, "Ulang kono mbiar; ranaken mo dakdak, ulang ko gabè sip, ¹⁰ ai Aku ngo denganmu. Isè poda ndorok mengagoken kono, ai mèduk dèng ngo kalak perkuta èn milikKu." ¹¹ Jadi merian i Korintus mo si Paulus tengah dua tahun dekkahna lako mengajarken kata Dèbata taba persidi. ¹² Tapi tikan si Galio mbangkit gubèrnur menggem-nggemmi Akhaya, mersada sungkun mo kalak Jahudi lako mengalo si Paulus, iaduken mo si Paulus mi kerungguun. ¹³ Nina kalak i mo i pengadunna i, "Iajar-ajari kalak èn ngo jelma nterrem menguèi Dèbata, tapi merralo ngo dekket pati-patiin Dèbata siniberrèkenna merkitè si Musa bai nami!" ¹⁴ Jadi sinderrang naing mengerana si Paulus mengaloi kalak i, mèter nina si Galio mo taba kalak Jahudi, "Kènè alè kalak Jahudi! Ukum kumarna kejahaten barang kumarna kegèduken ngo asa iaduken kènè ia, uè ngo aku menjalo pengaduun ndènè i. ¹⁵ Tapi merselisih pè kènè kumarna kata-kata dekket gerar-gerar bak pati-patiin ndènè ngo, jadi kènè sendiri ngo mendungi i. Oda uè aku menghukum sibagidi." ¹⁶ Nai ipelaus mo kalak idi ipas perhukumen idi nai. ¹⁷ Nai gabè itangkup kalak idi mo si Sostenes pengendeng bages perguruun i, ipekpekki kalak i mo ia i lebbè bages perhukumen i. Tapi oda iantoi si Galio kalak i. ¹⁸ Enggo kessa bagidi tong dèng ma ngo narih ndekkah si Paulus i Korintus, baru pè asa mertinading kata ia taba kalak sipercaya nisidi i. Nai merkeppel mo ia laus mi Siria, rebbakken dekket si Priskila bak si Akwila. Soh kessa kalak i mi Kengkrea, mergonting mo si Paulus, ai enggo kin ngo ibelli hambuk-hambuken bukna kumarna lot kin niatna taba Tuhan i. ¹⁹ Soh kessa kalak i mi Epesus, itadingken si Paulus mo si Priskila bak si Akwila, laus mo ia mi bages perguruun, mertukar pikiren dekket kalak Jahudi i sidi. ²⁰ Ipidoken ni sidi ngo nemmuken tabasa asa merian i sidi lebbèken ia, tapi oda uè si Paulus. ²¹ Tapi tukasi pè bagidi, tikan naing berkat ia, nina mo taba kalak i, "Mula ipaduè Dèbata luas, kuolihi pè mendahi kènè." Enggo kessa idokken bagidi, nai merkepel mo ia laus i Epesus nai. ²² Soh mo ia mi Kaisarèa, nai iterusken mo mi Jerusalem lako pesakatken kata njuah-njuahna taba kuria i, janah i sidi nai berkat mo ia mi Antiokhia. ²³ Asa enggo kessa ndekkah ia i sidi, berkat nola mo ia mi Galatia dekket mi Frigia lako petegguhken kepercayaen sipercaya ni sidi. ²⁴ Tikan bagidi, roh mo mi kuta Epesus sada kalak Jahudi mergerar si Apolos, roh i Aleksandria nai. Kalak pandè ngo ia mengerana janah ntangkas ngo iantusi isi Bibèl, ²⁵ enggo kin ma ngo ipeddahken tabasa tersèngèt Jesus. Nggasang kalohoon ngo ukurna memmeddahken janah risik ngo pemeddahkenna tersèngèt Jesus, tukasi pè pellin perridiin si Johanes ngo kessa ibettoh. ²⁶ Merjamita mo si Apolos i bages perguruun idi ipas ukurna nggasang nai; idengkoh si Akwila dekket si Priskila kessa mo jamitana i, iarahken kalak i mo ia mi sapona. Ipeterrang mo tabasa ntangkas dalan Dèbata lako paluahken jelma, merkitè-kitè Jesus. ²⁷ Nai merhendak mo ia naing laus mi Akhaya. Jadi ibaing dengan ni Epesus mo surat embahenna, asa ijalo dengan sipercaya ni Akhaya si Apolos ibagasen rahè atè. Jadi soh kessa mo ia mi sidi, terasa ngo penumpakna taba dengan sipercaya taba Jesus kumarna masèh atè Dèbata. ²⁸ Merkitè keterangen nterang kalohoon; talu ngo kalak Jahudi ibaing si Apolos mula mersoal kalak i i hadeppen jelma nterrem. Ai ibuktiken ngo merkitè-kitè ayat-ayat Bibèl i, Jesus ngo Raja Sipaluah niperbagah-bagah Dèbata.

¹ Tikan i Korintus si Apolos dak idalani si Paulus ngo kuta ni pispis delleng, nai soh mo ia mi kuta Epesus. Jumpasa mo i sidi dèba sienggo percaya bai Jesus. ² Nai ikusoken mo taba kalak i, "Enggo ma ngo ijalo kènè Tendi Perbadia tikan gabè percaya kènè bai Jesus?" Ialoi kalak i mo, "Madèng! Janah oda nung dèng kudengkoh kami lot Tendi Perbadia!" ³ Nai nina si Paulus mo, "Mula bagidi, perridiin apaina ngo iperridiken bai ndènè?" Ialoi kalak idi mo, "Perridiin si Johanes ngo," nina. ⁴ Nai idokken si Paulus mo, "Ukum perridiin si Johanes, pellin mendokken mertobat ngo kessa i. Tapi ipeddahken ngo taba kalak Israel, asa ikepercayai siroh i podinkenna, imo Jesus." ⁵ Idengkoh kalak i kessa mo i, gabè uè mo kalak idi iperridi nola mi bagasen garar Tuhan Jesus. ⁶ Jadi sinderrang iampèken si Paulus tanganna taba kalak i, mèter isenggeppi Tendi Perbadia mo kalak i. Nai mèter mengeranai mo kalak idi i kata sidèba janah meralaten. ⁷ Kira-kira sipuluh dua kalak ngo buè kalak idi. ⁸ Tellu bulan ngo dekkahna si Paulus i sidi janah dak ibagasen nggasang perukuren; tompel ngo ia merjamita i bages perguruun. Ipeddahi ngo kalak Jahudi, ninganna pesèngètken kalak i, bakunè cara kerajaen Dèbata. ⁹ Tapi lot ma ngo barang piga-piga kalak pepihirken ukurna, janah oda uè percaya. I lebbè karina kalak simertumpu i sidi iduhuli kalak i ngo peddah tersèngèt taki Dèbata lako paluahken jelma merkitè Jesus. Kerna naidi gabè itadingken si Paulus mo kalak i nai laus dekket simengèkutken Jesus. Jadi gabè i persikolaan si Tiranus mo gennep ari si Paulus merjamita. ¹⁰ Dua tahun ngo dekkahna bagi cara si Paulus memmeddahi kalak i, gabè rata mo mendengkoh kata Tuhan i karina pengisi Asia, kalak Jahudi barang kalak Junani pè. ¹¹ Matcam ngo bagèna tanda kelengangen ibakin Dèbata merkitè si Paulus. ¹² Pella ngo dekket sèkka-sèkka barang abit pementing sienggo nung ipakkè si Paulus, mula idaisken taba simersakit, mèter malum ngo sakitna i, janah karuar ngo tendi jahat bai sinisellapenna nai. ¹³ Lot mo barang piga-piga datu kalak Jahudi dak kadap lako tandang guru, menandangken kinanggurunna lako mahan pemalengi dekket memmuro sètan. Icuba kalak i ngo pelausken sètan merkitè gerar Tuhan Jesus, nina ngo taba sètan i, "Mengasangken gerar Jesus nisukutken si Paulus i, kupelaus kono!" ¹⁴ Lot mo pitu kalak dukak ni sada imam huntuun mergerar si Skewa mengulaken bagidi. ¹⁵ Tapi nina sètan i mo taba kalak i, "Kutandai kami ngo Jesus, janah si Paulus pè kutandai kami ma ngo. Tapi isè ngo kènè?" ¹⁶ Mèter iarakeppi nisellapen sètan i mo kalak idi, igosa mo janah ipengeribakken mo oles kalak i, jadi gabè mperrus mo kalak i sabar i bages idi nai, ai enggo ijang-jangi oles kalak i janah dom ugah i dagingna. ¹⁷ Karina kalak Jahudi dekket bangsa sidèban ni Epesus simendengkoh i gabè buradan. Nai makin ipoji kalak i mo gerar Tuhan Jesus. ¹⁸ Nai mèduk ngo kalak sienggo percaya taba Jesus roh mengakui ulah-ulahna siso kasèa i hadeppen jelma nterrem. ¹⁹ Nai mbuè ngo kalak perhèlmu sihir, mersiembah lapihenna, iporoni mo i karina janah ilekkup i hadeppen jelma mbellang. Karina harga lapihen sinilettup i, lot ngo lima puluh ribu kèpèng pirak. ²⁰ Bagi mo makin sarna kata Tuhan i janah makin ntegguhna bai sinterrem. ²¹ Enggo kessa i isura-sura si Paulus mo naing laus mi Jerusalem arap nagerri Makedonia bak Akhaya, ai nina ngo, "Mula enggo mi sidi aku, kennah mo dekket kuta Rom kudahi." ²² Jadi ipasulak mo dua kalak simendenganisa imo si Timoteus dekket si Erastus perlebbè laus mi Makedonia. Tapi ukum ia, tading dèng ngo i Asia. ²³ Tikan naidi mo masa kegontaren i Epesus kemulihken peddah tersèngèt Jesus i. ²⁴ Lot mo sada kalak i kuta i tukkang pirak mergerar si Demetrius, mennukkangi bages-bages pirak bai sembahen Artemis. Mbuè ngo laba-laba poncan ipettupung taba kalak peneppa i. ²⁵ Ipepulung mo peneppa-peneppa dekket karina tukkang-tukkang sidèbanna idi, nina mo mbang kalak i, "Kènè alè dengan, ibettoh kènè ngo, ipas ulanta ènda nai ngo pengemmonta. ²⁶ Bagèndari ntangkas ngo idah janah ibettoh kènè kadè sinibaing si Paulus i, ai nina ngo, Oda ngo tuhu sembahen ukum nipellias tangan. Janah enggo mèduk kalak ibaing gabè percaya mi peddahna i; oda pellin i Epesus èn, tapi dekket ngo i suberri Asia. ²⁷ Marana, oda pellin pencarinta gabè somada, tapi dekket ngo sembahen Artemis sitermurmur i, sisembahen ni karina jelma ni Asia bak suberri dunia èn gabè merlèa janah mago kemmulianna." ²⁸ Idengkoh kalak i kessa mo rana i, punguren mo kalak i, nai nggang-nggang mo idiungken, "Termurmur ngo Artemis dèbata kalak Epesus!" ²⁹ Gabè mèter gontar mo karina kalak ni kuta i. Isaran penggutturi i mo si Gayus dekket si Aristarkhus kalak Makedonia simendengani si Paulus i perdalanen. Iruah mo kalak i mi stadion kuta i. ³⁰ Jadi naing mo itellas si Paulus mi tengah jelma mbellang i, tapi oda ipadiat dengan sipercaya i ia. ³¹ Bagi ma ngo barang piga-piga kalak pengituai kalak Asia supan-supan si Paulus pasulakken suruhenna mendahi si Paulus janah mengèlèkken, asa ulang laus ia mi stadion kuta i. ³² Ningan bagidi, ukum jelma simerpulung i stadion kuta i, soh mo gulutna, ai pejaè-jaè ngo ipengsurakken, janah buèen ngo oda bettoh-bettohen barang kadè sebabna asa pulung jelma idi i si. ³³ Nai lot mo sada kalak mergerar si Aleksander i tengah-tengah jelma mbellang i nai ijula-julaken kalak Jahudi. Ikirapken si Aleksander mo tanganna asa sip sinterrem i, ai naing mendokken rana ia taba jelma mbellang ni sidi. ³⁴ Tapi idah kalak i kessa, kalak Jahudi ngo keppèken ia, gabè rebbakken menurakken mo sinterrem i, "Termurmur ngo Artemis dèbata kalak Epesus!" nina. Kira-kira dua jom ngo dekkahna kalak i mennurakken bagidi. ³⁵ Tapi roh mo juru tulis kuta i, ipemmènak mo sinterrem i, nina mo, "Kènè alè kalak Epesus! Karina ngo kalak memettoh kuta Epesus ngo bekkas sembahen Artemis sitermurmur i, dekket bekkas gana-ganaan sindabuh i langit nai. ³⁶ Isè poda lot memerso i. Kerna naidi mènak mo kènè janah ulang lot memmakin siso puna-puna. ³⁷ Bagèndari itaruhken kènè kalak èn mi sèn, so lot ibuat kalak ènda milik ni bages sembahen barang pè mengellèai sembahenta i. ³⁸ Mula tah lot pè asung-asung si Demetrius dekket denganna peneppa barang taba isè, lot ngo hukum dekket sijèmak puhpuh banta, mi sidi mo kalak i mersiaduun. ³⁹ Tapi tah lot dèng sidèban sura-sura ndènè, kennah i hadeppen sinterrem ngo idi itimbangi! ⁴⁰ Tah bakunè iaduken dèba nola kita kumarna simasa ari èn, ai ndorok ngo gabè idokken dèba nola kita memberontak, gabè isè poda lot nèngè terbaing maluah." ⁴¹ Enggo kessa idokken bagidi, ipasulak mo jelma mbellang i balik mi bekkasna gennep.

¹ Enggo kessa mènak kegontaren ni Epesus i, idilo si Paulus mo sipercaya ni Epesus i merpulung mi lebbèna. Nai mertading kata mo ia, jadi iterusken mo perdalanenna mi Makedonia. ² Iagahi mo karinana nagerri Makedonia janah memerrèken mbuè peddah taba kalak sipercaya bai Jesus nisidi petegguhken ukur kalak i. Kessa i laus mo ia mi tanoh Junani. ³ Tellu bulan ngo dekkahna ia merian i sidi. Jadi tikan merkebbas-kebbas ia naing laus merkeppel mi Siria, terbertik mo lot kalak Jahudi mertaki lako memmunuhsa. Kerna naidi gabè iputusken mo ibas ukurna, asa balik ia arap Makedonia. ⁴ Rebbak dekketsa ngo berkat si Sopater anak si Pirus kalak Berea, bagidi ma dekket si Aristarkhus bak si Sekundus kalak Tesalonika, bangsa si Gayus anak kuta Derbe. Nai si Timoteus, si Tikikus dekket si Trofimus kalak propinsi Asia. ⁵ Perlebbè ngo kalak i berkat, nai ipèma mo kami i Troas. ⁶ Jadi salpun kessa mo Pèsta Paskah mangan roti siso meragi, merkeppel mo kami i Pilipi nai. Pelima ariken, soh mo kami mi Troas. Isidi mo kami pejumpa dekket kalak i, janah seminggu mo dekkah nami mengadi i sidi. ⁷ I ciboon ari Sabtuna, pulung mo kami lako rebbak mangan, merjamita mo si Paulus janah ipegeddang ngo Jamitana i, soh tengah mberngin, ai mersura-sura ngo ia naing berkat sibarembenkenna. ⁸ Mbuè ngo lampu i bilik perdates janah ilakati i bekkas nami merpulung i. ⁹ Nai lot mo sada kalak anak perana mergerar si Eutikus kundul ipas jendèla mendengkohken jamita si Paulus i. Keppè enggo tertunduh ia kumarna dekkahna si Paulus merjamita i, janah lustun terpeddem, gabè ndabuh mo ia i tingkaten petelluken nai mi terruh. Tikan idokong kalak i ia, enggo mo keppè matè. ¹⁰ Susur mo si Paulus mi terruh, irègep mo si Eutikus i, nina mo taba jelma nisidi, "Ulang pella roga kènè, ai nggelluh dèng ngo ia." ¹¹ Balik mo si Paulus mi dates, ipenggelli mo roti i, nai mangan mo kalak i karina. Enggo kessa salpun mangan, mengerrana dèng ngo si Paulus soh mi mayak nterrang ari, jadi terrus berkat mo ia. ¹² Ukum anak perrana i, itaruhken kalak i ngo ia nggelluh mi bagesna, janah terapo kalohoon ngo ukur kalak i karina kemulihken naidi. ¹³ Nai laus mo kami merkeppel lako berkat mi Asos, janah i sidi mo kusinggahi kami si Paulus. Ai bagi ngo iaturken si Paulus kerna naing merdalan arap darat ngo ia soh mi Asos. ¹⁴ Enggo kessa pesimbak kami i Asos, rebbak mo kami merkeppel mi Metilene. ¹⁵ I sidi nai pè merkeppel ngo kami, janah sibarembenkenna i nola soh mo kami mi kèparen Kios; nai dua berngin nai nola soh mo kami mi Samos, janah sibarembenkenna i nola soh mo kami mi Miletus. ¹⁶ Oda pella singgah kami dok atè si Paulus mi Epesus, asa ulang ipedekkah-dekkahken kami i Asia, ai dak i kudus ngo asa ndor soh mi Jerusalem tupung pèsta Pentakosta. ¹⁷ Nai ipasulak si Paulus mo i Milèt nai mendiloi pengendeng kuria Epesus, asa roh kalak i menjumpai si Paulus. ¹⁸ Roh kessa mo kalak idi, nina si Paulus mo taba kalak i, "Kènè alè dengan, ibettoh kènè ngo bakunè aku i tengah-tengah ndènè kessa nai soh aku mi Asia. ¹⁹ Mengula ngo aku bai Tuhan idi ibagasen ukur ncerrep merdengan èluh menggongken kinidersa kumarna taki jahat siroh bai kalak Jahudi nai. ²⁰ Ibettoh kènè ngo oda lot alang-alangen aku memagahken bai ndènè, barang kadè simerguna bai ndè. Kuajari ngo kènè i perpulungen-perpulungen jelma nterrem bak ibas pulungen perjabu-jabu. ²¹ Dak tong ngo kudokken bai kalak Jahudi dekket bai kalak siso Jahudi pè, asa tobat kalak idi ipas dosana nai janah roh mendahi Dèbata, ninganna percaya taba Tuhan Jesus. ²² Bagèndari lako menguèi perèntah Tendi Perbadia laus ngo aku mi Jerusalem. Janah oda kubettoh tah kadè masa bangku i sidi. ²³ Pellin èn kessa kubettoh; kira i gennep kuta enggo tangkas ibagahken Tendi Perbadia taba aku, enggo mèma kurungen dekket simpersuk bangku i sidi. ²⁴ Tapi oda pella kukellini kessahku, asal mo ndorok pul kubakin sienggo ipessoh Tuhan Jesus bangku janah tong burju aku soh mi punca nggelluhku memeritaken Sukuten Kelluahen tersèngèt masèh atè Dèbata. ²⁵ Enggo kudahi kènè karina janah enggo kusukutken bakunè tersèngèt Kerajaen Dèbata. Bagèndari pè kubettoh ngo, oda nèngè perridah kita. ²⁶ Kumarna naidi tegas kudokken bai ndènè sidari èn mula lot ibas kènè nai binasa kaduan, oda salahku nè idi. ²⁷ Oda nung menurimpang aku ipas ulanku nai lako memagahken bai ndènè karina rencana Dèbata. ²⁸ Nteng, jamoti kènè mo diri ndènè dekket karinana kuria sienggo nipesakat Tendi Dèbata bai ndè mahan jamoten ndènè, ai enggo ipebangkit kènè, asa iperdimata kènè kuria i. Permakani kènè mo kuria ni Dèbata idi bagè permakan menjaga biri-birina, kerna enggo ibakin Dèbata kuria i gabè milikNa sendiri merkitè permatè AnakNa. ²⁹ Ai laus kessa mo aku, kubettoh ngo, roh mo mendahi kènè sorigala penjerngem. Janah kalak sinipermakan ndènè i gabè jerngemmen sorigala i. ³⁰ Salang i tengah-tengah ndènè nai pè, lot ngo gabè memeddahken siso tuhu. Ibaing kalak i bagidi asa sienggo percaya bai Jesus gabè laling janah asa mengèkut taba kalak i. ³¹ Kerna naidi, dak merjaga-jaga mo kènè. Èngèt kènè mo tellu tahun dekkahna oda mengadi-ngadi aku mahar dekket berngin memeddahi kènè merdengan èluh. ³² Bagèndari pè kupesakat mo kènè bai Dèbata dekket mi bagasen masèh atèna, asa ia mempergegohi janah menjamotken kènè, asa iberrèken bai ndènè pasu-pasu sienggo ipehantar bai karina kalak sienggo percaya baNa. ³³ Oda nung kuteddo barang kadè bang bai isè nai kènè, tah pirak barang oles pè. ³⁴ Ibettoh kènè ngo, aku sendiri ngo mencariken siperlu bangku dekket taba denganku pè. ³⁵ Ipas karinana ngo kutuduhken diringku mahan codiin bai ndènè, asa kennah merkitè mahan bahaan ngo kita, asa ndorok kita mengurupi kalak sindotè. Kerna kennah ngo èngètenta kadè sinidokken ni Tuhan Jesus, ai nina ngo, ’Mertuahen ngo simemerrèken dari pada simenjalo!’ " ³⁶ Enggo kessa pul idokken si Paulus ranana idi, rebbak sujud mo kalak i lako mersodip. ³⁷ Tangis ngo kalak i karinana, nai ikaol kalak i mo si Paulus janah isanggohi. ³⁸ Bonek kalohoon ngo atè kalak i karinana, terlebbih kerna rana si Paulus simendokken, oda nèngè mo peridah kalak i. Nai itaruhken kalak i mo si Paulus soh mi keppel i.

¹ Mersitennahen mo kami dekket pengendeng kuria i Epesus idi nai, kessa i tading mo kalak i. Merkeppel mo kami mennèger mi pulo Kos, janah sibarembenkenna i soh mo kami mi pulo Rodos. I sidi nai terrus mo kami mi pelabuhen Patara. ² I Patara idapet kami mo sada keppel naing berkat mi Penesia. Kubengketti kami mo keppel i, nai berkat mo kami. ³ Janah merkeppel mo kami soh kuidah kami pulo Siprus kan kambirang nami, tapi terrus ngo kami mi Siria. Mendarat mo kami i Tirus, ai singgat i ngo kessohen embahen keppel sikutompangi kami i. ⁴ Kudahi kami ngo i sidi dengan sienggo percaya bai Jesus, janah i sidi mo kami mengadi sada minggu dekkahna. Merkitè gerrek bai Tendi Perbadia nai ipesèngèt kalak i ngo si Paulus asa ulang laus mi Jerusalem. ⁵ Tapi enggo kessa dapet ari nami naing berkat, berkat mo kami mennadingken kalak i, janah menerusken perdalanen nami. Karina ngo kalak i mennaruhken kami, partua ibages bak partua ibalè pè soh mi anak-anak mennaruhken kami soh mi ruar kuta i. Nai sujud mo kami mersodip i biding laut i. ⁶ Nai mersisalamen mo kami, kessa i mbengket mo kami mi keppel, janah balik ma mo kalak i mi bagesna gennep. ⁷ Merkeppel ngo kami i Tirus nai soh mi Ptolemais. Kudahi kami ngo sipercaya ni sidi lako pesakatken tabè nami, nai gabè i sidi mo kami sada berngin rebbak dekket kalak i. ⁸ Sibarembenkenna i, berkat nola mo kami nai soh mo kami mi Kaisarèa. Kudahi kami ngo si Pilipus perjamita i mi sapona, imo sada kalak ipas sipitu kalak siterpilih i Jerusalem idi nai, janah mi sapona i mo kami mentadi. ⁹ Lot ngo empat kalak berruna simerbaju sienggo menjalo sibasa-basa bai Dèbata nai merberita simerandal. ¹⁰ Enggo kessa narih ndekkah kami i sidi, roh mo i Judèa nai sada kalak nabi mergerar si Agabus. ¹¹ Idapetken mo kami, ibuat mo pènggang si Paulus. Irakutken mo penggang i mi tanganna dekket mi nèhèna, nai nina mo, "Bagèen ngo idokken Tendi Perbadia: Kennah ièkèti kalak Jahudi ngo bagèen sidasa pènggang èn i Jerusalem, janah isohken ngo ia taba kalak siso Jahudi." ¹² Kudengkoh kami kessa mo i, kuèlèk-èlèk kami dekket dengan-dengan si ni Kaisarèa i mo si Paulus, asa ulang laus ia mi Jerusalem. ¹³ Tapi nina si Paulus mo mengaloi, "Kadè mo gunana dak tangis kènè, memmakin gabè mellala atè-atèngku? Kebbas ngo aku oda pellin ièkèti, tapi bang matè nola pè ukum kumarna Tuhan Jesus!" ¹⁴ Kumarna oda uè ia mendengkohken sèngèt-sèngèt nami, sip nai ngo kami karina, nai dok nami mo, "Saut mo lemmo atè Tuhan i." ¹⁵ Asa enggo kessa i sidi kami barang piga-piga ari, berkat mo kami laus mi Jerusalem. ¹⁶ Tapi dekket ngo dèba dengan i, i Kaisarèa nai mennaruhken kami mi saposi Manason, ai mi sapona ngo kami merberngin. (Si Manason imo sada kalak Siprus sienggo ndekkah percaya bai Jesus.) ¹⁷ Soh kessa kami mi Jerusalem, sampang ngo atè dengan ni sidi menjalo kami. ¹⁸ Nai sibarembenkenna i, rebbakken mo si Paulus dekket kami mendahi si Jakobus; nai merrohen mo mi bages i karinana pengendeng. ¹⁹ Enggo kessa isalam si Paulus kalak i karinana, ipejojor mo karina sinibaing Dèbata taba kalak siso Jahudi merkitèkensa. ²⁰ Mendengkoh sukuten si Paulus idi, ipoji kalak i mo Dèbata. Jadi nina kalak i mo mbangsa, "Alè nggia, idah kono ngo enggo merribu-ribu kalak Jahudi percaya bai Jesus janah karinana ngo kalak i sètia mengulaken pati-patiin nipessoh si Musa. ²¹ Idengkoh kalak i ngo, enggo ipeddahi kono kalak Jahudi karinana si ni ranto, asa sirang ipas pati-patiin si nipessoh si Musa idi nai, janah idokken kono ngo, asa ulang pella itakkil nèngè dukak-dukakna janah ulang pella ijamotken nèngè adat kalak Jahudi. ²² Ukum bagèndari tentu ibettoh kalak i ngo enggo roh kono mi sèn; jadi bakunè mo ndia? ²³ Èn pè, uèi mo sipessèngèt nami èn: Lot ngo empat kalak bai nami èn, merutang bagah-bagah bai Tuhan i. ²⁴ Togiken mo kalak i, janah uras mo dirimu dekket kalak i, asa igonting bukna. Merkitè bagidi, bettohen sinterrem mo oda keppè tuhu berita sinidengkohna i tersèngèt Kono, tapi dekket ngo Kono tupèh menjamotken pati-patiin i. ²⁵ Tapi ukum tersèngèt siso bangsa Jahudi sienggo percaya taba Jesus, enggo kubaing kami surat pati-patiin bai kalak i, asa ulang ipangan kalak i pangaan sienggo ipèlèken mi bègu, ulang ipangan daroh bagi ma dekket jukut siso isèat; oda ndorok kalak i merlangkah julu meddem." ²⁶ Jadi sibarembenkenna i, iarahken si Paulus mo si empat kalak i; iuras mo dirina bak kalak i pè. Nai laus mo kalak i mi Bages Dèbata memmagahken asa ituruti ari menguras i, mèma ibakin kalak i pèlènna gennep. ²⁷ Tapi naing dung kessa mo sipitu ari i, idah kalak Jahudi ni Asia nai mo si Paulus i Bages Dèbata. Nai iunung kalak i mo jelma nterrem, gabè guttur mo kalak i, janah itangkup kalak i mo si Paulus, ²⁸ ninganna isurakken, "Kènè alè kalak Israel, urupken kènè mo! Èn ngo kalakna simemeddahken barang i dikè sambing pè, peddah mendahi karina jelma asa ialo kalak i bangsa Israel dekket pati-patiin si Musa bak Bages Tuhan ènda pè. Bagèndari pè dekket ngo kalak siso Jahudi iarahken mi Bages Dèbata èn asa gabè mellamun bekkas simbadia èn!" ( ²⁹ Idokken kalak i pè bagidi kumarna enggo idah kalak i ngo si Trofimus kalak Epesus i rebbak dekketsa i kuta i, nai gabè idokken kalak i nola mo enggo iarahken si Paulus ia mi Bages Dèbata.) ³⁰ Jadi gabè gontar mo karina kuta i. Pulung mo jelma nterrem i karina, itangkup kalak i mo si Paulus, isaran mo mi ruar kuta, janah mèter ikonci mo pèntu Bages Dèbata. ³¹ Tapi tikan naing ipusa kalak i si Paulus, lot mo magahken taba ekuten soridadu Rom, mendokken soh mo gutturna karina kuta Jerusalem. ³² Nai mèter iarahken komandan i mo soridaduna dekket barang piga-piga kalak perwira, isudu kalak i mo mendahi bekkas i. Nai idah kalak i kessa mo enggo roh soridadu bak komandanna mi sidi, ipettadi kalak i mo memmekpekki si Paulus i. ³³ Nai idahi komandan soridadu i mo si Paulus, itangkup mo ia janah irantè. Ikusoi mo ia barang kalak dikè ia janah kadè pana ibakinken. ³⁴ Nai dak mersidoroken katana mo sinterrem i, gabè oda mertentu nèngè, merbulut sambing ngo rana i, oda dapet iantusi, gabè iembah mo si Paulus mi markas. ³⁵ Tapi enggo kessa soh si Paulus mi ardan markas i, makin mengamuk mo penggutturi i, gabè idokong soridadu i nai ngo si Paulus. ³⁶ Nai dak ièkutken jelma nterrem i ngo ia ninganna idilo-diloken, "Kennah bunuhen ngo ia!" ³⁷ Tapi naing masuk kessa mo kalak i merembah si Paulus mi markas, nina mo taba komandan soridadu i, "Ndorok ngo aku mengerana sigejap dekket Kono?" Jadi nina komandan soridadu i mo tabasa, "Ibettoh kono ngo keppè kata Junani? ³⁸ Oda ngo keppè kalak Mesir i kono, simengarahken empat ribu kalak naing memberontak i padang gurun i?" ³⁹ Ialoi si Paulus mo, "Kalak Jahudi ngo aku, i Tarsus nai, imo kuta sitermurmurna i Kilikia. Kuèlèkken bamu, asa padiat lebbè aku mengerana taba sinterrèm èn!" ⁴⁰ Nai ipadiat kessa mo, cènder mo si Paulus i ardan i, ikilapken mo tanganna taba sinterrem i. Sip kessa mo jelma nterrem i, nina mo taba jelma nterrem idi ibas kata Heber:

¹ "Kènè alè karina partua bak kaka anggi, dengkohken kènè mo lebbè keterangenku èn!" ² Idengkoh kalak i kessa mo merkata Heber si Paulus taba kalak i, mèter sip mo kalak i, nai iterusken si Paulus mo ranana, nina mo, ³ "Kalak Jahudi ngo aku, tubuh i Tarsus i nagerri Kilikia, tapi mbelgah i kuta Jerusalem èn ngo aku, janah seppè kalohoon ngo aku iajari i persikolaan si Gamaliel lako mengguruken pati-patiin siniberrèken si Musa taba empungta i. Enggo mo kukedarohken menguèi Dèbata, tosè bagè kènè ni sèn sidari èn. ⁴ Kuletlet janah kupatèken ngo kalak sipercaya taba Jesus, sanga ngo dèba matè. Kutangkup ngo karina anak laki bak daberru janah kumasukken mi kurungen. ⁵ Imam Huntuun dekket imam ekuten i ngo saksingku tersèngèt i, ai bai kalak i nai ngo kujalo surat embahenku mendahi kalak Jahudi mi Damaskus, ai merkitèken surat sikuembah idi, ndorok mo kutangkup janah kuiring mi Jerusalem karinana kalak sipercaya mi peddah rembaru i, asa ihukum." ⁶ "Tapi sinderrang laus aku janah ndessing mi Damaskus kira-kira cèger ari, sintempu mo lot cuhaya nterrang kalohoon i langit nai mengkalokoi aku. ⁷ Nai mèter geppah mo aku mi tanoh janah kudengkoh mo sora mendokken taba aku bagèen, ’Saulus! Saulus! Kasa iletlet kono Aku?’ ⁸ Nai ningku mo mengaloi, ’Isè ngo Kono Tuhan?’ Jadi nina mo taba aku, ’Jesus kalak Nazaret i ngo aku niletletmi!’ ⁹ Idah denganku i ngo ukum cuhaya i, tapi oda idengkoh sora simengerana dekket aku i. ¹⁰ Nai ningku nola mo mengkusoi, ’Kadè ngo sibahanenku Tuhan?’ Jadi ialoi mo aku, ’Kèkè mo kono, lako mo mi Damaskus. Isidi mo nahan ibagahken bamu sinaing bahanenmu.’ ¹¹ Tapi gabè oda merpendidah nèngè aku kumarnaken bendella cuhaya i, itegu-tegu denganku i nai ngo aku soh mi Damaskus. ¹² Lot mo i sidi sada kalak mergerar si Ananias, sada kalak burju ngo ia janah simengulaken pati-patiin i. Janah mersangap ngo ia ibaing kalak Jahudi silot i Damaskus. ¹³ Roh ngo ia menongkir aku, janah cènder i gembarku ninganna mendokken, ’Alè Saulus, nggia, merpendidah nola mo kono!’ Jadi mèter kuidah mo ia gejapken naidi. ¹⁴ Nina nola dèng ma mo taba aku, ’Enggo ipilih Dèbata ni empungta i kono, asa ibettoh kono lemmo atèNa, janah asa idah kono Jesus, Naposo Dèbata simegulaken lemmo atè Dèbata janah simendengkoh sora Jesus sendiri. ¹⁵ Kennah gabè kalak simengindangkensa ngo kono taba karina jelma tersèngèt siniidah dekket sinidengkohmu. ¹⁶ Bagèndari pè kettu mo ulang pedekkah-dekkah. Kèkè mo kono, perridiken mo dirimu. Dilo mo Tuhan i, asa mpanting kono ipas dosa-dosamu nai.’ " ¹⁷ "Nai balik kessa mo aku mi Jerusalem èn, ikuasai Tendi Perbadia mo aku sinderrang mersodip aku i Bages Dèbata. ¹⁸ Kuidah ngo Tuhan i mendokken taba aku, ’Kettu mo laus kono i Jerusalem èn nai, kerna oda ijalo kalak sinisèn i pengindangkenmu tersèngèt Aku.’ ¹⁹ Nai ningku mo, ’Alè Tuhan, ibettoh kalak i ngo, aku ngo roh mi bages perguruun lako menangkup dekket mengerantè bak membet-bet sipercaya taba Kono. ²⁰ Bagi ma ngo tikan terbunuh saksiMu si Stefanus, i sidi ngo aku janah lolo ngo aku kerna terbunuh i ia. Aku ngo tupèh menjaga oles kalak simemmunuhsa i.’ ²¹ Tapi nina Tuhan i mo taba aku, ’Laus mo kono, ai Kupasulak ngo ko mi bekkas sindaoh mendahi bangsa sidèban siso Jahudi.’ " ²² Ukum ninggat rana i dènga, dak idengkohken kalak i ngo ia mengerana. Tapi soh kessa mo mi rana perpodi i, gabè ipegang kalak i mo sorana mennurakken, "Bunuh mo ia! Oda belliin nggelluh jema bagidi!" ²³ Ningan mersurak i kalak idi, ipengambas-ambasken ngo olesna janah ipengsampakken abu mi dates. ²⁴ Jadi idokken ekuten soridadu i mo iembah ia mi tangsi, iligasi mo ia tikan iperrèso, asa ibettoh kadè sebabna asa bagi surak-surak kalak Jahudi tabasa. ²⁵ Tapi iberretken kessa mo si Paulus lako mengeligas, nina si Paulus mo taba perwira sicènder nisidi, "Ndorok ngo iligasi kènè sada kalak Rom, tukasi pè makdèng iadili?" ²⁶ Mendengkoh kata si Paulus i, idahi pèrwira i mo komandan soridadu i, nina mo tabasa, "Kadè naing bakinenmu tabasa? Ai kalak Rom ngo ia!" ²⁷ Nai idapetken komandan soridau i mo si Paulus, nina mo mbangsa, "Bagahken taba aku, tuhu ngo ko kalak Rom?" Jadi ialoi mo, "Uè, kalak Rom ngo aku." ²⁸ Nai nina komandan soridadu i dèng ma mo tabasa, "Ukum aku toko ngo buèna kugarar, asa ndorok aku gabè kalak Rom!" Ialoi si Paulus mo, "Ukum aku kessa nai tubuh ngo aku enggo kalak Rom." ²⁹ Nai mèter sondar mo anggota-anggota soridadu sinaing memerèso si Paulus i. Ekuten soridadu i pè gabè mbiar ngo, ibettoh kessa kalak Rom ngo keppè si Paulus, keppè enggo sanga irantè. ³⁰ Ukum komandan soridadu Rom i sèkel kalohoon ngo ia naing memettoh kadè kulih sebabna asa isalahken kalak Jahudi si Paulus i. Nai sibarembenkenna, idiloi mo pulung karina imam-imam ekuten dekket sanhèdrin. Ipaluah mo si Paulus janah iarahken mi tengah-tengah kalak idi.

¹ Tikan itengen si Paulus karina anggota runggu i, idokken mo ranana, "Kènè karina kaka anggi! Merperangè ngo aku ipas nasa ukurku menguèi Dèbata soh mi ari sidari èn." ² Idokken si Paulus kessa ranana i, mèter idokken Imam Huntuun simergerar si Ananias mo asa iparap sicènder i gembar si Paulus i ia. ³ Nai idokken si Paulus mo mbang imam huntuun i, "Iparap Dèbata mo ko alè dingding sinikapur! Kundul ngo kono i sidi lako menghukum aku merguru mi pati-patiin i, keppèken kono sendiri mengelanggar pati-patiin i, ai idokken kono asa iparap aku, pada hal enggo merralo i mi pati-patiin!" ⁴ Nai nina sicènder i gembar si Paulus i mo taba si Paulus, "Kasa ilèai kono imam huntuun Dèbata?" ⁵ Ialoi si Paulus mo, "Kènè alè dengan, oda kubettoh mula imam huntuun i keppèken ia. Tersurat ngo ibas Bibèl bagèen, ’Ulang ilèai kono pengulu bangsamu!’ " ⁶ Ibettoh si Paulus mo horong Sadusè ngo keppèken dèba sipulung i, dèba nai horong Parisè. Kerna nai nina mo taba perrunggu i, "Kènè karina kaka anggi! Kalak Parisè ngo aku, janah dukak Parisè. Iadili pè aku isèn, kumarna pengharapen dekket kumarna percaya ngo aku, balik nggelluh kalak sienggo matè." ⁷ Idokken kessa bagidi gabè merselisih mo horong Parisè dekket Sadusè, janah gabè bellah dua mo perrunggu i. ( ⁸ Ukum kalak Sadusè, oda percaya balik nggelluh sienggo matè, malaèkat pè oda ngo nina lot, bang tendi pè; tapi ukum horong Parisè, iperketuhu ngo i karina.) ⁹ Guttur mo runggu i, kèkè mo dèba kalak Parisè sigabè guru agama mengalo, nina mo, "Cituk poda lot kesalahen kalak èn kuidah kami! Tah tuhu ngo lot tendi barang malaèkat mermongkamisa!" ¹⁰ Tapi makin guyuna mo perselisihen kalak idi i, gabè mbiar mo komandan soridadu i tah bakunè gabè ipersuragè kalak i nola si Paulus dok atèna. Idokken mo roh soridadu lako merembah si Paulus i tengah-tengah kalak i nai mi tangsi. ¹¹ Nai bernginkenna i, cènder mo Tuhan i, i gembar si Paulus janah mendokken tabasa, "Pos atèmu! Enggo ikesaksiken kono aku i Jerusalem, kennah bagi ma ngo ikesaksiken kono Aku i kuta Rom!" ¹² Sicegenna nola sibarembenkenna i, lot mo dèba kalak Jahudi i merbulaban. Mersumpah ngo kalak i, mak ndorok mangan mak ndorok mènum kalak i, ukum mak dèng ipusa kalak i si Paulus. ¹³ Lebbih ngo empat puluh kalak simerbulaban i. ¹⁴ Idahi kalak i ngo imam-imam Ekuten dekket pengulu-pengulu, nina mo taba kalak i, "Enggo ngo kusumpahken kami mak ndorok mangan mak ndorok mènum kami, sidekkah mak dèng kubunuh kami si Paulus. ¹⁵ Kerna naidi, baing kènè mo rebbak dekket anggota Mahkamah Agama surat taba ekuten soridadu i, asa iembah nola si Paulus mi hadeppen ndènè, bagè cara naing iperèso kènè dèng perkarana i. Tapi ukum kami, enggo kin mèma i tengah ndalan, asa i sidi kupusa kami ia i tengah ndalan i dèng." ¹⁶ Tapi terbertik ngo bulaban kalak idi i bai bebberrè si Paulus. Jadi laus mo ia mi tangsi lako magahken taba si Paulus. ¹⁷ Nai idilo si Paulus mo sada kalak perwira mi gembarna, nina mo tabasa, "Taruhken lebbè anak perana èn mendahi komandan soridadu, ai lot sinaing bagahenkenna tabasa." ¹⁸ Jadi itaruhken mo anak perana i mendahi ekuten soridadu, nina mo mbangsa, "Idiloi si Paulus tahanen i ngo aku, janah idokken asa kutaruhken anak perana èn taba Kono, kerna lot nina sinaing bagahenkenna bamu." ¹⁹ Nai icèkèp komandan i mo tangan anak perana i mennegu narih mboni, nai ikuso mo ia, "Kadè pana naing bagahenkenmu bangku?" ²⁰ Ialoi anak perana i mo ia, "Mertuptup ngo kalak Jahudi, lako mengidoken asa iembah Kono si Paulus baremben mi runggu, bagè cara naing iperèso kalak i dèng perkarana i asa ntangkas. ²¹ Tapi ulang mo uèi pengidoon kalak idi i, ai enggo lebbih empat puluh kalak merbulaban, mengentip ngo kalak idi i tengah ndalan, asa i sidi nina ipusa kalak i si Paulus. Ai rebbak mersumpah ngo enggo kalak i, mak ndorok mangan barang mènum pè kalak i, sidekkah madèng ibunuh kalak i si Paulus. Bagèndari pè enggo mo kebbas kalak idi, pellin katamu nai ngo pèmaan kalak i." ²² Jadi nina komandan i mo tabasa, "Ulang pella ibagahken kono barang taba isè pè sienggo nibagahkenmu i taba aku." Nai ipasulak mo ia balik. ²³ Nai idiloi komandan i mo dua kalak perwira, nina mo taba kalak i, "Pèmaken lebbè dua ratus kalak soridadu dekket pitu puluh kalak nai simerkuda, dekket dua ratus kalak nai lengkap mersenjata, asa berkat kènè mi Kaisarèa pukul sibah berngin èn. ²⁴ Pèmaken kin ma mo sada kuda kundulen si Paulus, asa taruhken kènè ia mendahi Gubèrnur Feliks." ²⁵ Nai ibaing komandan i mo surat embahen kalak i bagèen katana, ²⁶ "Tabè mo bamu alè sinipersangapen Gubèrnur Feliks, bangku nai Klaudius Lisias. ²⁷ Itangkup kalak Jahudi ngo èn; jadi sinderrang naing ipusa ia, roh ngo aku dekket soidadu mengerampasisa, kubettoh kessa kalak Rom ngo ia keppèken. ²⁸ Tapi sinderrang naing kuperèso ia kadè salahna, kuembah mo ia mi runggu mbellen agama kalak i. ²⁹ Keppèken oda lot kesalahenna, memmaing patut merutang kessah ia, barang pè ikurung. Ai pellin tersèngèt pati-patiin agama kalak i ngo perselisihenna. ³⁰ Nai lot mo magahken bangku, lot taki-taki jahat kalak idi tabasa. Kerna naidi ngo asa kupasulak ia mendahi kono. Enggo ma ngo kudokken taba pengadu i, asa taba kono iandèken pengadunna i." ³¹ Jadi iembah soridadu i mo si Paulus, bagè perèntah sienggo nijalona i, itaruhken mo bernginna i soh mi Antipatris. ³² Sibarembenkenna i nola pellin soridadu merkuda i nai ngo kessa mennaruhken si Paulus soh mi Kaisarèa, ai molih ngo sidèbankenna i mi markasna. ³³ Soh kessa kalak simenaruhken i mi Kaisarèa, iberrèken kalak i mo surat i taba gubèrnur, janah si Paulus i pè itogiken mo mi hadeppenna. ³⁴ Ijaka gubèrnur i kessa mo surat i, ikusoi mo si Paulus, barang i dikè nai asalna. Ibettoh kessa mo kalak Kilikia ngo keppèken si Paulus i, ³⁵ nina mo tabasa, "Kuperrèso pè perkaramu i, mula enggo kessa roh simengaduken kono mi sèn." Nai idokken mo asa itahan si Paulus ibas tahanen si Herodes.

¹ Enggo kessa lima ari nola, roh mo Imam Huntuun Ananias rebakken dekket pengulu-pengulu dekket sada kalak pengacara mergerar Tertulus, mi Kaisarèa, mengaduken si Paulus mendahi Gubèrnur Feliks. ² Enggo kessa mbuka perkara i, idhaba si Tertulus mo si Paulus bagèen, "Alè gubèrnur nipersangapen! Mènak ngo nagerri nami kessa nai kono menggem-nggem kami. Janah naik ngo pernggelluh nami, ai enggo mbuè ibaing kono simendè mi bangsa nami. ³ Karinana pennarihkenmu i bai nami, kudokken kami mejalo metangkup bamu, janah jalo mo penghormati nami siso terasam belgahna. ⁴ Tapi asa ulang mbuèsu magosia tikki ndènè, kupido kami bamu, dengkohken mo lebbè sigejap pengaduun nami si cituk èn. ⁵ Dapet kami ngo kalak èn mengago janah menggutturi taba kalak Jahudi barang i dikè sambing. Ia ma ngo pengulu geraken kalak Nazaret. ⁶ Ioji ngo memmaing asa gabè samur Bages Dèbata, jadi kutangkup kami ngo ia. [Janah naing kuhukum kami ngo ia rembang mi pati-patiin nami. ⁷ Tapi roh komandan Lisias, irampasi mo ia bai nami nai, ⁸ janah memerèntahken taba kami asa roh kami menghadep taba kono.] Karinana sikudokken kami èn, ndorok ngo ibettoh kono i bana nai, mula ikusoi kono ia." ⁹ Karinana kalak Jahudi ni sidi mennuhu-nuhui pendokken si Tertulus i. ¹⁰ Nai ibaing gubèrnur i mo pertanda bai si Paulus asa ialoi. Nai nina si Paulus mo, "Ntangkas ngo kubettoh, enggo ndekkah Tuan i gabè penghukum i nagerri èn. I ngo sampang atèngku mendokken ranangku èn i lebbè Tuan i. ¹¹ Ndorok ngo iselidik Tuan i, oda lebbih sipuluh dua ari sienggo laus i dèng ngo laus aku mi Jerusalem lako mersodip. ¹² Oda pennah idapet kalak Jahudi aku merselisih barang dekket isè pè barang memmaing kegontaren i Bages Dèbata, barang i bages perguruun barang i tengah kuta pè. ¹³ Kalak èn pè oda ngo terindangkensa taba aku sinitukaskenna i. ¹⁴ Tuhu, kuuèi ngo Dèbata ni empung nami tosè mi sinipeddahken Tuhan Jesus; tapi pilit ngo i ukum idokken kalak èn. Percaya ngo aku mi isi sitersurat ibas bukku si Musa dekket Bukku Nabi-nabi. ¹⁵ Lot ngo pengharapenku bai Dèbata, tosè bagè kalak idi, imo tersèngèt karina jelma sienggo matè -- kennah balik nggelluh nola ngo, barang jelma bujur i tah pè barang jelma nggèduk i. ¹⁶ Kerna naidi ngo asa dak kukeburjuken, asa mpanting ukurku merradepken Dèbata bang meradepken jelma pè. ¹⁷ Enggo kessa salpun barang piga-piga tahun oda nèngè aku i Jerusalem, roh mo aku mi sidi merembah tumpak pengurupiin, imo riar bai bangsangku nai, janah naing memèlè Dèbata. ¹⁸ Tikan kuulaken i, jupa kalak i mo aku i Bages Dèbata, enggo kessa pul aku menguras. Oda lot sinterrem rebbak dekket aku, janah oda ma ngo lot kegutturen idi. ¹⁹ Tuhu lot ngo i sidi tikan naidi kalak Jahudi i propinsi Asia nai. Asa kennah mo nemmu isèn kalak i lako memmaing pengadunna tersèngèt aku taba kènè alè tuan gubèrnur, mula tah lot siadunkenna tersèngèt aku bak kesalahenku. ²⁰ Mula pè oda isèn kalak i, kalak èn pè iruapken mo barang kadè kegèdukenku ibettoh kalak i tikanna irungguken kalak èn aku i Runggu Agama. ²¹ Pellin kata èn ngo kudokken ninganna cènder aku i tengah-tengah kalak èn, Irungguken pè aku sidari èn kumarna percaya ngo aku lot perkèkèen ipas simatè nai." ²² Nai iondari si Feliks sienggo memettoh ntangkas tersèngèt Jesus mo perkara i, nina mo, "Lebbè roh pè komandan Lisias asa kuputusken perkara èn." ²³ Nai idokken mo perwira menjamotken si Paulus i asa tong itahan ia, tapi narih merongkah mo, janah ulang iararang barang isè denganna si uè mengurupi janah mengkebasisa. ²⁴ Nai barang piga-piga ari nai nola, roh mo si Feliks rebbak dekket sinibagesna si Drusila berru Jahudi ngo ia. Nai ipasulak si Feliks mo mengalengi si Paulus. Nai idengkohken si Feliks mo rana si Paulus tersèngèt percaya bai Kristus Jesus. ²⁵ Tapi soh kessa mo sukuten tersèngèt ketègerren, metemman dekket hukum seggen, gabè mbiar mo si Feliks nai nina mo, "Singgat i mo lebbè. Tah cidahari nola lot tikki kesempatenku, kupasulak pè mengalengi kono." ²⁶ Tapi harap ngo si Feliks berrènken si Paulus riar bana; kumarna naidi ngo asa nggatimi pasulak mengaleng si Paulus asa mengeranai dekketsa. ²⁷ Tapi enggo kessa mo dua tahun dekkahna mbangkit mo si Perkius Festus gabè gubèrnur menggancihi si Feliks. Kumarna naing muat ukur kalak Jahudi si Feliks, gabè ibelli mo si Paulus i kurungen.

¹ Enggo kessa tellu ari si Festus soh mi nagerri i, berkat mo ia i Kaisarèa nai mi Jerusalem. ² Roh mo mi hadeppenna imam-imam ekuten dekket pengulu-pengulu Jahudi mennerrèngèti pengaduun kalak i tersèngèt si Paulus. Mersembah merkuraja ngo kalak i mendokken taba si Festus: ³ "Masèh mo nemmu atè gubèrnur Festus, ipasulak mo nemmu si Paulus mi Jerusalem; ai enggo kin ngo sada taki kalak i lako mengenggep i tengah ndalan janah asa ipusa." ⁴ Tapi nina si Festus mo mengaloi, "Itahan ngo bagèndari si Paulus i Kaisarèa, janah ndor ngo aku balik mi sidi. ⁵ Jadi dekket mo pengulu-pengulu asa rebbakken kami laus mi Kaisarèa, janah iasè kin mo kadè pengaduun ndènè mula tah lot ibahanken siso hukum," nina. ⁶ Asa enggo kessa merian i sidi ia ualuh soh mi sipuluh berngin, berkat mo si Festus balik mi Kaisarèa. Sibarembenkenna, mèter ibuka mo runggu perhukumen, idokken mo mengalengi si Paulus asa roh mi hadeppenna. ⁷ Soh kessa mo si Paulus, mèter ikulilingi kalak Jahudi siroh i Jerusalem nai mo ia; ipendokken mo tukas mberrat mengaduken si Paulus. Tapi oda terbuktiken kalak i tukas sinidokkenna i. ⁸ Jadi itariasken si Paulus mo, nina mo, "Oda lot kesalahenku tersèngèt pati-patiin kalak Jahudi barang pè mi Bages Dèbata, barang dempak Kèsar Rom pè." ⁹ Tapi lako muat ukur Jahudi, nina si Festus mo taba si Paulus, "Uè ngo kono mi Jerusalem, asa i sidi kutimbang perkaramu rembang mi si nitukasken kalak i ndai?" ¹⁰ Ialoi si Paulus mo, "Cènder ngo aku i kerungguun Kèsar Rom, i sidi ngo aku iadili. Ntangkas ngo ibettoh kono, oda lot kessalahenku taba kalak Jahudi. ¹¹ Mula lot kulausi hukum, sindorok memmaing aku patut merutang kessah, ijin ngo aku matè. Tapi ukum oda ngo tuhu nitukasken kalak i taba aku, isè poda ndorok pessakatken aku taba kalak i. Kupengido, asa irungguken aku i kerungguun Kèsar i!" ¹² Enggo kessa mersungkuun si Festus dekket denganna penghukum, gabè idokken mo, "Ipido kono ngo asa irungguken kono i kerungguun Kèsar i; jadi berkat mo kono menghadep Kèsar." ¹³ Enggo kessa salpun barang piga-piga ari, roh mo raja Agripa dekket Bernike mi Kaisarèa lako mendokken kata njuah-njuah taba si Festus. ¹⁴ Enggo kessa i sidi kalak i barang piga-piga ari, ibagahken si Festus mo taba raja Agripa tersèngèt perkara si Paulus i, nina mo, "Lot ngo isèn sada kalak tahanen itadingken si Feliks. ¹⁵ Tikan i Jerusalem aku, roh mo imam-imam ekuten menghadep taba aku bagi ma pè dekket pengulu-pengulu Jahudi lako magahken pengadunna tersèngèt sitertahan i, janah ipidoken kalak i asa kudabuh hukum bana. ¹⁶ Tapi ningku ngo mengaloi kalak i, Oda hukum i bai kalak Rom, mula bagi sambing mèter ihukum sada kalak sitertukas, ukum makdèng hadep sitertukas i dekket sipenukas, janah iberrèken kesempaten bana membèla dirina. ¹⁷ Jadi sinderrang roh kalak i misènda, oda pella kupedekkah-dekkah, ai siberembenkenna mèter kubaing mo runggu, janah kudokken mo asa iembahken ia menghadep aku. ¹⁸ Tikan iranaken pennukas i tukas bana ninganna cènder, kudokdok kin ngo lot itukasken kalak idi kejahaten. ¹⁹ Tapi pellin pejaè pendapet ngo kalak i dekketsa tersèngèt agama kalak i, dekket tersèngèt sada kalak mergerar Jesus sienggo matè. Tapi mertahan ngo si Paulus mendokken enggo balik nggelluh nina Jesus i. ²⁰ Tapi kumarna bingung aku tersèngèt bakunè asa ndorok dapet aku keterangen tersèngèt perkara i, gabè kukusoi mo si Paulus, tah uè ia laus mi Jerusalem, asa i sidi irungguken ia. ²¹ Tapi ipidoken si Paulus ngo asa tong ia lebbè ikurung pèma irungguken ia mi kerungguun Kèsar. Kerna naidi kudokken ngo asa ikurung ia, mèma kutengesken ia mendahi Kèsar." ²² Nai nina si Agripa mo taba si Festus, "Aku pè sèkel ngo mendengkoh ranana." Mula bagidi, "baremben mo dengkohenmu," nina si Festus. ²³ Sibarembenkenna, roh mo Agripa dekket Bernike merpakèen kerajaen. Ibengketti mo kerungguun rebbakken dekket lubalang-lubalang bagi ma dekket simersangap ni kuta i. Jadi idokken si Festus mo mengaleng si Paulus. ²⁴ Nai nina si Festus mo, "Alè Raja Agripa, dekket kènè karina sitampak pulung isènda. Èn mo kalakna siniaduken kalak Jahudi bangku, kalak i si ni Jerusalem bang si ni sèn. Janah dak idilo-diloken kalak i ngo, oda pegelluhen nina jelma bagèen. ²⁵ Tapi kubettoh ngo oda lot iulaken kalak èn siso hukum, memmaing patut ia merrutang kessah. Tapi kumarna ia sendiri mengido asa perkarana èn irungguken i kerungguun Kèsar, enggo kuputusken, asa pasulaken mo ia laus mi sidi. ²⁶ Tapi oda lot dèng bangku sada keterangen tegas mahan suratenken ibas surat sinaing kutenges mi Kèsar. Kumarna naidi ngo asa kuhadapken ia mendahi kènè karinana, terlebbih-lebbih kono Alè Raja Agripa! Maksudku asa merkitè penimbangen ndènè, lot suratenkenku. ²⁷ Ai dok atèngku kurang ngo sellohna mula nitengesken sada kalak tahanen keppè oda nibagahken kadè tukas nitukasken pengadu bana."

¹ Nai nina si Agripa mo taba si Paulus, "Dokken mo rana pembèlanmu!" Jadi ikilapken si Paulus mo tanganna, ninganna idokken, ² "Alè Raja Agripa! Dapetten tuah ngo aku kuakap sidari èn kumarna ndorok aku mengerana dekket kono tersèngèt nitukasken kalak Jahudi bangku; ³ kerna enggo lebbih penandaan Raja idi i karina adat dekket permasalehen kalak Jahudi. Kerna i kupido bamu; sobar mo kono lebbè mendengkohken ranangku èn! ⁴ Ibettoh karina kalak Jahudi ngo bakunè nggelluhku, mulai anak-anak nai aku, i tengah-tengah bangsangku. Janah kessa nai anak perana aku i Jerusalem. ⁵ Mulai tikala i nai enggo ngo itandai kalak i aku. Ukum uè kalak idi, terindangken kalak idi ngo, imulana nai ngo aku nggelluh bagè sada kalak Parisè, janah mengèkutken karinana hukum-hukumna, janah horong èn mo si seppèna menniahi agamanta i. ⁶ Bagèndari cènder ngo aku isèn lako irungguken kumarna pengharapen dekket kepercayaenku mi si tersèngèt bagah-bagah niperbagah Dèbata taba empung nami. ⁷ Kumarna bagah-bagah i ma ngo niharap kalak Israel sisipuluh dua marga i, asa dak iuèi kalak i Dèbata mahar dekket berngin ipas karina gegohna nai. Jadi kumarna bagah-bagah i ngo alè Raja Agripa memmaingken asa iaduken kalak Jahudi aku. ⁸ Kasa nola kaka-anggingku kalak Jahudi oda percaya, ipegelluh Dèbata kalak sumatè? ⁹ Ai aku pè tikanna i, ukum pendapetku, kennah mertuhu-tuhu aku mengalo Jesus kalak Nazaret i. ¹⁰ Janah saut ngo enggo kubahanken idi i Jerusalem. Ai kujalo ngo surat kuasa bai imam-imam ekuten nai, asa kukurung mbuè kalak sipercaya janah simengèkutken Dèbata. Janah aku sendiri pè setuju ngo asa ihukum matè kalak i. ¹¹ Mèduk janah ngkatep ngo kusiksa kalak idi i bages perguruun, memaksa kalak i, asa ialo kepercayaenna i. Soh mo nggettemna kuakap mengidah kalak i, memmaingken asa mi kuta sidèban pè kuletlet ngo kalak idi." ¹² "Bagidi ma ngo laus aku mi Damaskus merembah surat kuasa, ipeberkat imam-imam ekuten. ¹³ Jadi sinderrang i tengah ndalan dèng aku, tupung cèger ari, kuidah mo Alè Raja Sinihormaten, roh cuhaya i langit nai, ncihuren asa sendang mataniari, icuhayai mo sikulilingku dekket karina denganku sindalaan i. ¹⁴ Nai geppah mo kami karina mi tanoh. Kudengkoh mo sora mendokken taba aku i kata Heber bagèen, Saulus! Saulus! Kasa dak iletlet kono Aku? Mpiah mo akapenmu mula dak ialo Ko penguluken tuanmu! ¹⁵ Nai ningku mo, ’Isè ngo Ko Tuan?’ Ialoi Tuhan i mo, ’Jesus ngo aku siniletletmi. ¹⁶ Tapi kèkè mo kono, janah cènder mo ko! Ai kupacidah pè diringku taba kono, lako milih kono ngo, asa gabè naposongKu. Kupasulak mo kono mengindangken si ni idahmu sidari èn dekket sinaing pacidahenku dèng mi podiin èn. ¹⁷ Kupaluah mo kono i bangsa Israel nai dekket i bangsa sidèban siso Jahudi nai. Kupasulak mo ko laus mendahi kalak i, asa ibuka kono mata kalak i, ¹⁸ janah asa karuar kalak idi ibas sigellap idi nai balik mi kecihuren; asa maluah kalak idi ipas gemgemmen Sibolis i nai, balik mi gemgemmen Dèbata. Ai merkitè percaya kalak i bangKu, ijalo kalak i mo kesasaan dosana janah gabè persulang rebbak dekket kalak sienggo ginemgem Dèbata sienggo terpilih i.’ " ¹⁹ "Kumarna naidi alè Raja Agripa, dak ngo kuusahaken menguèi karina peddah siroh bai Dèbata nai. ²⁰ Nai kujamitai mo kalak ni Damaskus i perlebbè, asa tobat kalak i ipas dosa-dosana nai, janah asa ipessoh dirina taba Dèbata, janah kennah teridah ngo i merkitè perangè selloh tandana enggo ia mertobat. Bagi ma ngo bang i Jerusalem dekket i suberri Judèa soh mendahi kalak siso bangsa Jahudi pè. ²¹ Jadi kemulihken naidi mo asa itangkup kalak Jahudi aku i Bages Dèbata nai, janah naing ibunuh. ²² Tapi iondingi Dèbata ngo aku soh mi sidari èn, asa cènder aku begèndari isèn lako mennaksiken taba karina jelma -- simbelgah bang singkèdèk pè. Karinana sienggo kudokken i, tosè ngo i bagè sienggo ni lumbaken nabi-nabi dekket si Musa; ²³ mendokken: Menggong simbernit ngo Kristus Raja Sipaluah niperbagah-bagah Dèbata, janah ia ngo perlebbè balik nggelluh i simatè nai; asa merkitèken bagidi Iberitaken kecihuren kelluahen i taba kalak Jahudi dekket kalak sidèban siso Jahudi pè!" ²⁴ Enggo kessa idokken si Paulus bagidi, ipegang si Festus mo sorana mendokken, "Enggo mo pana gila ko Paulus! Kepandèenmi ngo memmaing kono gila." ²⁵ Tapi ialoi si Paulus mo, "Oda ngo gila aku alè Festus nipersangapen; karna ukum kata sienggo kuruapken i, bennar ngo i janah roh ibas pikirenku situhunna nai! ²⁶ Ai ntangkas ngo ibettoh Raja Agripa i idi. Kumarna naidi ngo asa nggasang ukurku lako mengeranai i hadeppenNa, janah oda pella alang-alangen; kum dok atèngku sada poda mak ntangkas i bai raja i, ai masa ngo i karinana ipas sintarar. ²⁷ Otang percaya ngo kono mi sinidokken nabi-nabi Alè Raja Agripa? Kubettoh ngo percaya ngo kono!" ²⁸ Nai nina si Agripa mo taba si Paulus, "Idokdok kono ngo murah memmaing aku gabè kalak Kristen ibagasen sigejap sambing?" ²⁹ Nai nina si Paulus mo, "Barang ibagasen sigejap barang pè ndekkah dènga, kusodipken ngo taba Dèbata, asa dekket kono alè Raja bak karina simendengkoh aku sidari èn -- naing mo nemmu bagè aku èn, tapi oda dekket rantèngku èn!" ³⁰ Nai dungna cènder mo raja i, gubèrnur Festus bak si Bernike dekket karina denganna. ³¹ Laus mo kalak i sigejap mi ruar, janah mengeranai mo kalak i samahsa bagèen, "Oda lot ulah-ulah kalak èn barang kadè salah, memmaing ia ndorok merutang kessah, barang kurungen pè." ³² Janah idokken si Agripa mo taba si Festus, "Terpaluah ngo nemmuken kalak èn, ukum oda kin idokken asa irungguken perkarana idi i kerungguun Kèsar."

¹ Nai iputusken mo hukum taba si Paulus, kennah merkeppel mo kami laus mi Italia, isohken mo si Paulus dekket dèba nai sienggo ikurung kin, taba sada kalak perwira mergerar si Julius, imo ekuten "Soridadu Kèsar." ² Mbengket mo kami mi keppèl siroh i Adramitium nai, nai berkat mo kami arap keppel i, ai enggo kin ngo kebbas ninganna dak meninggahi pellabuhen-pellabuhen silot i propinsi Asia. Lot ngo dengan nami sada kalak Makedonia mergerar si Aristarkhus roh i Tesalonika nai. ³ Sibarembenkenna soh mo kami mi Sidon. Ukum si Julius, selloh ngo ibaing taba si Paulus, ipadiat ngo ia laus mendahi dengan silot ni sidi i, asa ijalo bai kalak i nai kadè siperlu bana. ⁴ I sidi nai merkeppel mo kami kan biding-biding Selatan Pulo Siprus, kumarna sapa-sipu ngo angin. ⁵ Nai kubellus kami mo laut pènterenken Sisilia dekket Pamfilia, jadi soh mo kami mi Mira i nagerri Likia. ⁶ Jumpa komandan i mo i sidi keppel Aleksandria naing laus mi Italia, gabè ipindahken mo kami karina mi keppel i. ⁷ Hanjar kalohoon ngo keppel nami i merlayar barang piga-piga ari dekkahna, janah kumarna hanjarna, jadi mahal ngo perdalanen i soh mi Knidus. Kumarna dak tong ngo sapa-sipu angin, oda ngo terbaing kami tèngken merkeppel mi tujuun dak memiding-miding pulo Kreta mo kami memellus Tanjung Salmone, asa narih terlègen i angin topan i nai. ⁸ Soh mo lejana kuakap kami memellus biding pulo i, jadi dungna sakat mo kami mi sada bekkas mergerar Pelabuhen Merandal, oda sadikè daoh i kuta Lasea nai. ⁹ Tikan naidi enggo leppas tikki Ari Raya Perdamèen kalak Jahudi. Enggo mbuè magosia tikki nami, asa oda tikkina nè aman merkeppel, gabè dak mermara nai ngo mula merkeppel. Kumarna naidi ipesèngèt si Paulus ngo kalak i, nina mo, ¹⁰ "Kènè alè dengan kuidah dak mermara janah mengkerohken kerogiin ngo taba kita mula siterusken merkeppel. Oda pellin embahen dekket keppel sambing mermara, tapi dekket ngo kessahta mermara." ¹¹ Tapi token ngo komandan i mi kata juru mudi dekket nahoda keppel i dari pada kata si Paulus. ¹² Tuhu kurang selloh ngo labuhen i bekkas keppel ukum tupung tahun mbergoh. Kerna naidi buèen ngo pekerja keppel i setuju lako merkeppel terrus mennadingken pelabuhen i, katerra pè giam ndorok soh mi Feniks, janah mentadi i sidi sidekkah mosim mbergoh. Feniks imo sada pelabuhen i Kreta mendempak barat daya dekket barat laut. ¹³ Ipas katika i narih hanjar ngo penempul angin selatan, gabè idokdok perkeppel i mo ndorok merlayar dèng lako mennerusken perdalanen i. Nai itarik mo sauh, nai merlayar mo menembiri pulo Kreta. ¹⁴ Tapi oda pella ndekkah -- mèter sapa-sipu mo kaba-kaba i pulo i nai, mergerar kaba-kaba Timur Laut, ¹⁵ gabè ipuyu mo keppel nami i. Kumarna oda terjuljul keppèl i nèngè angin i, kubelli kami nai ngo keppel i merkinisohna barang mikè iembah angin i. ¹⁶ Jadi tikan iombang-ambingken angin i keppel nami i, keppè soh mo kami mi kan Sèlatan pulo Kauda sikèdèk i. Kumarna narih terlègennen pulo kètèk i kami dak kucèkèpi kami mo sekoci keppel i, tukasi pè mersusah payah. ¹⁷ Enggo kessa ipenaik sekoci i mi keppel i, ililiti mo dekket tinali keppel i, asa tambah ngkongana. Kumarna mbiar lekket mi dasar pasir Sirtis i laut Libia, ilèmpang kalak i mo layar i, gabè bagidi nai ngo kami mombang-ombang. ¹⁸ Sibarembenkenna nola, makin mengamukna ngo angin i, gabè idabuhi mo dèba embahen keppel i. ¹⁹ Mbiar ngo kalak i tah bakunè nola terhantuk keppel nami i mi batu karang, jadi gabè idabuh kalak i mo empat sauh kan podi keppel i mema nterrang ari. ²⁰ Tah sadikè dekkahna oda nèngè kuidah kami mataniari barang bintang pè, bagi dèng ma penessak kaba-kaba i, enggo saip ukur nami oda nèngè maluah kami. ²¹ Enggo toko dekkahna oda nèngè uè mangan kalak i, nai kèkè mo si Paulus mi tengah-tengah kalak i, nina mo, "Kènè alè dengan! Ukum idengkohken kènè kin ranangku asa ulang mèrèt kita i pulo Kreta nai, tentu oda siakapi kesusahen dekket kerogiin èn. ²² Bagèndari pè, kupido bai ndènè karina, asa tong nggasang ukur ndènè, ai oda pella lot kembalangen kessah barang isè bai ndènè nai, pellin keppel i ngo kessa bennè. ²³ Ai roh ngo berngin i mi gembarku malaèkat Dèbata sikusembah, imo Dèbata sidasa aku, ²⁴ mendokken taba aku, ’Ulang kono mbiar alè Paulus! Ai kennah cènder ngo kono i lebbè-lebbè Kèsar i. Janah kumarnaken sibasa-basa Dèbata bamu, gabè njuah-njuah ngo karina pengisi keppel i kumarnaken kono!’ ²⁵ Ai percaya ngo aku bai Dèbata, kennah saut ngo karina nidokkenNa bangku i. ²⁶ Tapi ukum keppelta èn, tertuktuk bana terhantuk ngo mi sada pulo." ²⁷ Pesipulu empat bernginken dak mombang-ombang kami i Laut Adria. Nai tupung tengah mberngin, bagè irasaken perkeppel idi mo, enggo ndessing darat. ²⁸ Nai idabuh kalak i mo tinali pengasak mi terruh tah sadikè nai bages laut i. Keppè lot ngo empat puluh mèter bagesna bekkas i. Enggo kessa ma merdalan keppel i sigejap nai, iasak kalak i nola dèng ma mo laut i, terbettoh nola ma mo hampir tellu puluh mèter bagesna. ²⁹ Mbiar ngo kalak i tah bakunè nola terhantuk keppel nami i mi batu karang, jadi gabè idabuh kalak i mo empat sauh kan podi keppel i mèma nterrang ari. ³⁰ Lot ngo dèba perkeppel i sipsip naing mperrus. Itontoni kalak i mo sekoci mi laut merdalihken bagè cara naing mendabuh sauh i lebbè keppel idi nai. ³¹ Tapi idokken si Paulus mo taba Perwira dekket soridadu ni keppel i, "Kènè alè dengan, ukum oda ibagasen keppel èn kalak idi, oda terbaing kènè maluah." ³² Kerna naidi igettap soridadu i mo èkèt sekoci i, nai ndabuh mo sekoci i janah mayup-ayup bagi tah mikè. ³³ Ningan mèma mbincar mataniari, idasdas si Paulus mo mangan kalak i karina, nina mo, "Pesipulu empat ariken mo bagèndari dak terendep-endep kènè, janah laju oda mangan. ³⁴ Kerna naidi, kudokken mo taba kènè, asa mangan kènè lebbè, asa lot menumpak gegoh ndènè. Karina kènè oda mermara, janah sirambar buk poda lot mermara bai ndènè nai." ³⁵ Enggo kessa idokken si Paulus bagidi, ibuat mo roti, idokken mo mejalo metangkup bai Dèbata i hadeppen kalak i, nai ipenggelli mo roti i, jadi mangan mo kalak i. ³⁶ Nai gabè nggasang nola mo ukur kalak i karinana janah mangan mo kalak i. ³⁷ Ukum buè kalak si ni keppel i, dua ratus ennem puluh ngo. ³⁸ Enggo kessa salpun mangan kalak i, idabuh kalak i mo embahen keppel i mi laut, asa mennahang keppel i. ³⁹ Jadi enggo kessa nterrang ari, idah perkeppel i mo sada pulo, tapi oda ibettoh kalak i barang pulo kadè i. Itatap kalak i mo sada suak laut bak bidingna. Merhendak mo kalak i asa mi sidi ipetupung keppel idi ukum terbaing. ⁴⁰ Nai igettap kalak i mo tali sauh, janah ibelli ngo sauh i lenneng. Iosari kalak i ma mo èkèt kemudi. Ipekimbang kalak i mo layar kan lebbè keppel i, asa isempul angin keppel i tèngken mi biding suak laut i. ⁴¹ Tapi terhantuk nola ngo keppel i mi kersik, gabè tersanggal mo takal keppel i janah lekket i sidi; podina pè mereppuk ngo iempasken galombang mbelgah-mbelgah i. ⁴² Tapi mertaki mo soridadu i naing memmunuh sikurungen i ai mbiar kalak i tah bakunè nola merlangi kalak i mi darat lako mperrus. ⁴³ Tapi igerra komandan i ngo taki soridadu i, kumarna naing pegelluhenna ngo si Paulus. Ipasulak mo merlangi sindorokna merlangi perlebbè mi biding laut i. ⁴⁴ Sidèbanna i perpodi mo, janah ibaing kalak i mo rapan-rapanna papan-papan barang pè pecah-pecahen keppel i. Bagi mo carana kami njuah-njuah soh mi darat.

¹ Enggo kessa soh kami mi darat ibagasen njuah-njuah, baru pè kubettoh kami gerar pulo i Malta. ² Selloh kalohoon ngo basa pengisi pulo i meradepken kami. Ilakati kalak i ngo api; nai iarahken mo kami cidudu, kumarna enggo roh nola ma udan, janah soh mo mbergohna. ³ Sinderrang pepulungken ranting-ranting si Paulus lako memmaing mi api i, mèter morot mo nipè darih i sidi nai kumarna nggarana, itebbi mo tanganna. ⁴ Idah pengisi pulo i kessa mo nipè i mantong-antong i tangan si Paulus, nina kalak i mo samahsa, "Pemmunuh ngo pana tuhu kalak ènda, ai tukasi pè maluah ia i laut i nai, tapi oda ipadiat dèbata kesèntengen i ia nggelluh." ⁵ Tapi ikurpasken si Paulus ngo nipèi mi api, janah oda pella kadèen ia. ⁶ Ukum dok atè kalak idi, bakunè pe kennah mbessar mo sigejap nai tangan si Paulus i, barang simpusta runggang lako matè. Tapi enggo kessa narih ndekkah ipèma kalak idi, oda kadèen ia idah kalak i, mobah nola mo perukuren kalak i, nina mo, "sembahen ngo ia." ⁷ Ndessing i bekkas idi nai, lot ngo pekken pengulu kalak ni pulo i, mergerar si Publius. Mendè ngo kami ijalo janah itamuè tellu ari dekkahna. ⁸ Tapi dak gampar ngo bapa si Publius i sakiten, kumarna sakit panè dekket adum kikiren. Idah si Paulus mo ia, nai mersodip mo si Paulus ninganna iampèken tanganna dempaksa, nai malum mo iakap. ⁹ Kemulihken naidi merrohen mo kalak sisakiten ni pulo idi mendahi si Paulus, gabè ipemalum mo kalak i karinana. ¹⁰ Jadi mersangap ngo kami idah kalak i; janah tikan naing laus nola kami merkeppel, ipemberrèken kalak idi mo karina siperlu bai nami, janah kalak i dèng ma ngo merembah mi keppel. ¹¹ Enggo kessa tellu bulan, berkat nola mo kami merkeppel i pulo i nai, arap keppel Aleksandria, ai sidekkah mosim mbergoh, merlabuh ngo ia i pulo i. Lot ngo cap keppel i, "Sembahen Leppa Kastor dekket Poluks." ¹² Nai merlabuh mo kami i kuta Sirakusa janah mentadi isidi tellu ari dekkahna. ¹³ I sidi nai dak mengèkut-ngèkut biding mo kami soh mi kuta Regium. Sibarembenkenna menempul mo angin selatan, pedua ariken soh mo kami mi kuta Putioli. ¹⁴ Pejumpa mo kami i sidi dekket barang piga-piga kalak sipercaya bai Jesus, janah kumarna pencèkèpi kalak idi, gabè mengadi mo kami i sidi pitu ari dekkahna. Nai berkat nola mo kami mi kuta Rom. ¹⁵ Roh ngo dengan sipercaya bai Jesus ni kuta Rom simendengkoh berita nami menimbak-nimbak kami soh mi Pasar Apius dekket mi Pesenggerahen Tellu. Idah si Paulus kessa mo kalak i, mendokken melias atè ngo si Paulus bai Dèbata, janah makin nggasangna ngo atèna. ¹⁶ Soh kessa kami mi kuta Rom, ipadiat ngo si Paulus merian i bages lemmo atèna, tapi dak ijagai sada kalak soridadu ngo ia. ¹⁷ Enggo kessa tellu ari, idiloi si Paulus mo pengitua-pengituai kalak Jahudi ni kuta i. Pulung kessa mo kalak i, nina mo taba kalak i, "Kènè alè dengan! Ukum aku, oda ngo lot kubaingken salah taba bangsanta barang pè dempak adat kebiasaan si sijalo bai empungta nai. Tapi tukasi pè bagidi, itangkup ngo aku i Jerusalem, janah ipesakat taba kalak Rom. ¹⁸ Enggo kessa iperrèso kalak i aku, naing ipaluah ngo nemmuken aku, kerna oda lot terdapet aku memmaing barang kadè pè patut memmaing aku merutang kessah. ¹⁹ Tapi kumarna dak ialo kalak Jahudi, terpaksa kudokken, Kèsar Rom mengadili perkara èn. Kudokken pè bagidi, oda pella lot pengadunku tersèngèt bangsanta. ²⁰ Kumarna naidi ngo asa kudilo kènè; ai irantè pè aku kumarna pengharapen kalak Israel tersèngèt Sipaluah i ngo." ²¹ Nai nina kalak i mo mengaloi, "Oda lot dèng kujalo kami surat i Judèa nai tersèngèt kono, janah oda lot barang isè pè dengan i roh mi sènda memmagahken tersèngèt kono, bang pè tah lot jahat iulaken kono. ²² Tapi tukasi pè bagidi, sèkel ngo kami mendengkoh tersèngèt pikirenmu, ai kubettoh kami ngo ukum tersèngèt ajaren sinikettokenku idi, dak ialo dèba ngo i barang i dikè sambing pè." ²³ Nai ititi kalak i mo sada ari dekket si Paulus lako mertumpu nola. Asa dapet kessa mo ari sienggo ititi i, nterrem ngo merrohen kalak i mi bekkas si Paulus. Jadi siceggen nai soh mi ciboon ipeterrang si Paulus ngo taba kalak i tersèngèt kerajaen Dèbata. Ipejojor mo taba kalak i ayat-ayat tersèngèt Jesus, mulai i Bukku si Musa nai dekket Bukku Nabi-nabi, janah merrusaha ngo si Paulus asa percaya kalak i bai Jesus. ²⁴ Lot ngo dèba percaya mi sinidokken si Paulus i, tapi lot ma ngo dèba oda percaya. ²⁵ Gabè merselisih pendapet ngo kalak i ninganna mennadingken bekkas i, enggo kessa idokken si Paulus bagèen, "Bennar ngo sinidokken Tendi Dèbata merkitè Nabi Jesaya taba empung ndènè arnia! ²⁶ Ai nina ngo, ’Lako mo bagahken taba bangsa èn: Dak ngo idengkoh kènè i, tapi laju oda iarti kènè, dak ngo iperdatèken kènè tapi oda ibettoh kènè kadè masa. ²⁷ Ai enggo mpihir pusuh peratèen bangsa èn, janah enggo isompel pènggelna, enggo ipècengken matana. Masa pè èn asa ulang merpendidah mata kalak i, janah oda merpendengkoh pènggel kalak i, pusuh peratèenna oda mengantusi, janah ulang balik nemmu kalak i mendahi Aku, nai gabè Kupejuah nola kalak idi.’ " ²⁸ Perpodi idokken si Paulus mo, "Bettoh kènè mo alè dengan enggo iberitaken Sukuten Kelluahen i taba kalak bangsa sidèban siso Jahudi; janah idengkohken kalak i ngo i!" [ ²⁹ Enggo kessa idokken si Paulus bagidi, merlausen mo kalak Jahudi i sidi nai, ninganna mersoal samah-samahsa.] ³⁰ Dua tahun ngo dekkahna si Paulus i kuta Rom, i bages ni ongkosna i. Sennang ngo ukurna menjalo kalak siroh mendahisa. ³¹ Berrani ngo ia janah nggasang kalohoon mennukutken Kerajaen Dèbata bai kalak i, bak dekket tersèngèt berita Tuhan Jesus Kristus; bèbas ngo ia memmaing bagidi, oda lot menghalang-halangi.