2 TIMOTEUS

¹ Alè Timoteus anakku sikukekelengi! Aku si Paulus simennuratken surat èn mendahi kono, janah dak kuharapken ngo, asa ipasu-pasu Dèbata Bapa dekket Tuhanta Jesus Kristus i kono janah iberrèken masèh atèna dekket damèNa i bamu. Merkitè lemmo atè Dèbata, ipebangkit ngo aku gabè rasul Kristus Jesus, janah ipasulak lako magahken kenggelluhen sienggo iperbagah-bagah Dèbata idi kin. Sijalo ngo kenggelluhen i kumarna mersada kita dekket Kristus Jesus. ³ Kudokken ngo melias atè taba Dèbata, sikukebasi ibas karina pusuh peratènku nai, bagè sienggo ibaing empungta siarnia. Dak kudokken ngo mejalo metangkup taba Dèbata gennep kuèngèt ko ipas sodipku, mahar barang berngin pè. ⁴ Kuèngèt ngo bonek ukurmu. Kumarna naidi ngo asa sèkel kalohoon atèngku naing pejumpa dekket kono, asa tuhu-tuhu lolo kalohoon atèngku. ⁵ Kuèngèt ngo kepercayanmu simertuhu-tuhu i bai Kristus, tosè bagè kepercayaen empungmu si Lois bak inangmu si Eunike. Tok ngo aku bagidi ma ngo bang kepercayanmu pè. ⁶ Kerna naidi kupesèngèt mo kono, asa kenggelluhken sibasa-basa niberrèken Dèbata bamu i, sinderrang kuampèken i tanganku bamu. ⁷ Kerna ukum Tendi siniberrèken Dèbata banta i, oda ngo Tendi memmaing kita asa gabè buradan. Tapi memmaing kita gabè mergegoh ngo, dom masèh atè janah merpengerrem. ⁸ Kerna naidi ulang kono mèla mengindangken Tuhanta i, janah ma ulang mèla kono tersèngèt aku siterkurung kumarnakenSa. Tapi naing mo kono pè ipergegohi Dèbata bang pè menggong simpersuk kumarna Sukuten Kelluahen i. ⁹ Ipaluah janah idiloi Dèbata ngo kita asa gabè ummatNa. Ibaing pè bagidi oda ngo kemmulihken perulanta, tapi kemulihken masèh atèNa sendiri ngo. Iberrèken ngo masèh atèNa banta merkitè Kristus Jesus sinderrang madèng ihanaken dunia èn. ¹⁰ Bagèndari ipacidah Dèbata ngo masèh atèNa i banta merkitè pekeroh Raja Sipaluahken kita i, imo Kristus Jesus. Italuken Jesus ngo kuasa kemmatèen i janah merembahken kenggelluhen si amman sumendah merkitè Sukuten Kelluahen i. ¹¹ Lako magahken Sukuten Kelluahen i ngo asa ipebangkit Dèbata aku gabè rasul janah guru. ¹² Kumarnaken i ngo asa kugongken karina simpersuk èn, tapi tok ngo aku, ai kubettoh ngo isè si sikupercayai i. Tok ma ngo aku barang kadè sienggo nipessohna bangku idi ndorok ngo Ia menjamoti i soh mi Ari Kiamat. ¹³ Tuhu-tuhu mo codi peddah bennar sienggo kuajarken bamu i. Hot mo kono ibagasen kepercayaen dekket kelleng sienggo gabè milikta i kerna persaorenta dekket Jesus Kristus. ¹⁴ Jamoti mo sienggo tersoh bamu i merkitè pengurupiin Tendi Dèbata singgelluh ibagasen kita i. ¹⁵ Ibettoh kono ngo, enggo karina kalak per Asia mennadingken aku, si Pigelus bak si Hermogenes pè. ¹⁶ Tapi ukum simpangaan si Onesiporus nggati ngo enggo ipesampang atèngku. Dak masèh mo atè Tuhan i bai kalak i. Ai tukasi pè i kurungen aku, oda ngo ikemmèlaken si Onesiporus i aku. ¹⁷ Ai soh kessa ia mi kuta Rom, mèter itulusi ngo aku soh pejumpa kami. ¹⁸ I Epesus pè mbuè kalohoon ngo pengurupina bangku. Enggo ngo ibettoh kono karinana i. Dak masèh mo atè Tuhan i bana, mula roh kessa ari perhukumen Tuhan i taba karina jelma manusia.

¹ Alè Timoteus anakku! Kennah ntegguh ngo kono sinipeteguh sibasa-basa sienggo niberrèkenna banta i, kumarna persaorenta ibagasen Kristus Jesus. ² Peddah sienggo nidengkohmu bangku nai tikala i, i hadeppen jelma nterrem, kennah peddahken i bai jelma kettoken janah sindorok mengajari jelma sidèban. ³ Kennah dekket ngo ko menggong simpersuk bagè tenterra Kristus Jesus siburju janah sètia. ⁴ Sada kalak tenterra simerjaga-jaga, oda ngo uè mengkelaputi urusenna sendiri, ai sèkel ngo ia pesampangken atè pakkalimana. ⁵ Barang isè naing mersiadu, oda ngo terbaingsa mennang ukum oda iuèi hatoren mersiadu. ⁶ Peruma-uma sienggo mertuhu-tuhu mengula, kennah ia ngo lebbèen merhak menjalo hasil suan-suanenna. ⁷ Radumi mo karina sienggo kudokken èn, kerna iberrèken Tuhan i ngo bamu kebijaken lako mengantusi i karina. ⁸ Èngèt mo èn: Sukuten Kelluahen sienggo kubagahken i, imo tersèngèt Jesus Kristus, pemparen si Daud; Ia ngo Kristus sienggo balik nggelluh i simatè nai. ⁹ Kumarna mennukutken Sukuten Kelluahen i ngo menggong simpersuk aku; sanga irantè bagè kalak perjahat. Tapi ukum kata Dèbata oda ndorok irantè. ¹⁰ Idi ngo sebabna asa mbingit aku menggongken i karinana lako paluahken karina kalak sienggo ipilih Dèbata, asa gabè maluah kalak i merkitèken Kristus Jesus, janah terolih kemuliaan simenettap i. ¹¹ Tuhu ngo kata èn, "Mula enggo rebbak matè kita dekketSa gabè rebbak nggelluh ma mo kita dekketSa. ¹² Mula dak mbingit ngo kita, gabè rebbak mengerajai mo kita dekketSa. Mula situlak ngo Ia, itulak ma ngo bang kita. ¹³ Mula oda sètia kita Ia pè oda sètia ai oda ndorok merralo Ia mi diriNa sendiri". ¹⁴ Kennah pesèngètenmu ngo karina jelma tersèngèt karinana i. Pessèngèt mo kalak idi i hadeppen Dèbata asa ulang merselisih kumarna kata-kata, ai oda lot merguna i, tapi gabè maing merkalimesso nola ngo i mi ukur kalak simendengkoh. ¹⁵ Kennah mertuhu-tuhu ngo kono mengulaken i, asa gabè kalak sipojiin kono mi Dèbata. Ulang kemmèlaken ulanmu, tapi tettah mo ajarken peddah sibai Dèbata nai. ¹⁶ Peddaoh dirimu ipas pengeranaan siso merguna janah siso merjullat i nai janah simengelèai Dèbata ai memmaing muat jahatna ngo kalak kumarna pengeranaan sibagidi. ¹⁷ Ai langket ngo peddah sibagidi bagè sakit puru, bagè si Himeneus dekket si Piletus. ¹⁸ Enggo menurimpang kalak idi ipas dalan mpènter i nai nginganna menursari kepercayaen ni dèba dengan. Idokken kalak idi enggo mo dapet tikkina balik nggelluh i simatè nai. ¹⁹ Tapi oda ngo terdegger kalak i dangaan ntegguh si nibaing Dèbata. Tersurat ngo i babona, "Itandai Tuhan i ngo barang isè milikNa," dekket "Barang isè mendokken milik Tuhan ngo ia, kennah ulang nèngè ia merpengelako jahat." ²⁰ Mermatcam bagè ngo perkekkas ibas bages mbellen. Lot ngo idi iteppa ipas pirak barang pè i emmas nai, tapi lot ma ngo ijadiken ipas kayu barang i tanoh nai. Lot ngo idi ibaing mi ulaan mbellen, lot ma dèba mi ulaan biasa. ²¹ Barang isè pepantingken dirina ipas karina kejahaten nai, kalak sibagidi ngo ipakkè mi ulaan mbellen. Gabè milk merkedekoon ngo ia janah merguna bai indukna. Ipèmaken ngo ia mi ulaan simerandal. ²² Peddaoh dirimu ipas kessennangen simatah daging nai. Usahaken mo asa nggelluh ipas lemmo atè Dèbata kono, sètia mi peddahNa janah perkelleng atè bak damè. Bagidi mo kènè rebbak nggelluh dekket kalak simendiloi Tuhan idi ibagasen ukur mbersih. ²³ Ulang campuri persoalen kalak simoto siso memettoh barang kadè. Ai ibettoh kono ngo pellin maing perselisihen sambing ngo kessa sibagidi. ²⁴ Oda mendè gabè petubuhken perselisihen ukum naposo Tuhan i; kennah melamlam ngo ia taba karina kalak janah ndorok memeddahi jelma i, ibagasen selloh janah mbingit. ²⁵ Kennah melamlam ngo ia mengajari kalak pengalo-ngalo; asa katerra pè ibuka Dèbata tikki pertobaten taba kalak sibagidi i dosana nai, janah asa itandai peddah situhunna i. ²⁶ Merkitè bagidi gabè saddar nola mo kalak i mengolihi, janah maluah ipas togong-togong Sibolis simemmaksa kalak i kennah menguèi lemmo atèna.

¹ Èngèt kènè mo èn: Matcam ngo bagèna kesusahen tupung ari perpodi. ² Pellin dirina ngo kessa isarihken jelma i, karina kalak mata kèpèngen, jukkat janah dak luap. Dak ilèa-lèai ngo denganna sidèban, dak mengalo-ngalo taba situa-tua, oda ibettoh mendokken mejalo metangkup janah ikecegoken ngo ulaan pertendiin. ³ Oda lot bana ukur ngkelleng, oda uè pehembunken ukurna dak iperoha-roha ngo gerar sidèban, tunggang, jahat janah ikecegoken ngo simerandal. ⁴ Penelbuh ngo kalak i, oda ipikirken ari podi janah dak sombong. Lemmoon atèna midah kessennangen dunia èn daripada menguèi Dèbata. ⁵ Tukasi pè tengennen mertuhu-tuhu kalak i mendalanken hatoren agama, tapi itulak kalak i ngo inti agama i. Peddaoh mo dirimu bai kalak sibagidi nai. ⁶ Lot ngo enggo dèba kalak i mendirip-ndirip masuk mi bages, janah iajar-ajari mo daberru-daberru sikurang ntegguh merkepercayaen janah simbuè dosa bak sienggo idomi matcam bagè cubellek daging. ⁷ Dak ipidoken daberru sibagidi ngo asa dak iajari kalak i, tapi oda nung menandai pengajaren Dèbata sibennar i. ⁸ Tosè bagè si Janès dekket si Jambrès mengalo si Musa arnia, bagi ma ngo kalak sibagidi mengalo peddah siroh bai Dèbata nai. Ai enggo ncèda pikiren kalak i, janah oda lot nèngè kepercayanna. ⁹ Tapi oda ngo lot dapet kalak i barang kadè pè, ai ibettoh karinana jelma ngo kemmotoon kalak i, bagè pengakap si Janès dekket si Jambrès i. ¹⁰ Tapi ukum kono, enggo mo ièkutken kono sikupeddahken i dekket sikupengelakoken i bang pè si nituju nggelluhku. Enggo ngo idah kono kepercayanku, mbingitku, ngkelleng atèngku bak kesobarenku pè. ¹¹ Enggo ngono idah kono aku idersa dekket menggong simpersuk. Ibettoh kono ma ngo simasa bangku i Antiokhia, i Ikonium dekket i Listra; ibettoh kono ngo karina sikugongken! Tapi ipaluah Dèbata ngo aku i pas karinana kinidersa i nai. ¹² Karina ngo kalak simenguèi dekket simersaor dekket Kristus Jesus idersa, ¹³ janah kalak jelma perjahat bak perkilang dak makin jahatna ngo. Ikilang kalak i ngo jelma i, keppè kalak idi pè terkilang ngo. ¹⁴ Tapi ukum kono alè Timoteus, kennah hot mo kono menjèmak peddah sènteng i sienggo iajarken bamu janah sienggo nikepercayanmu i; ai ibettoh kono ngo barang isè gurumu. ¹⁵ Kennah èngètenmu ngo, i mulai kèdèkmu nai ngo enggo itandai kono Bibèl. Iajari Bibèl i ngo kono asa iantusi janah dapet kono kelluahen merkitè percaya bai Kristus Jesus. ¹⁶ Karina sitersurat ibas Bibèl, bai Dèbata nai ngo rohna i janah mengajarken situhunna, lako pesèngètken janah pekkadèken si salahna, janah mengajari jelma i asa nggelluh ia mengèkutken lemmo atè Dèbata. ¹⁷ Merkitè Bibèl i gabè tettah mo naposo Dèbata lako mengkebasi matcam bagè ulaan merandal.

¹ Roh nola ngo balik Kristus Jesus mi dunia èn lako menghukum kalak singgelluh dekket sienggo matè pè; janah roh ngo Ia lako memmerèntah bagè Raja. Kerna naidi memmes kupido bamu i hadeppen Dèbata dekket Kristus Jesus: ² Kennah jamitaken kata Dèbata idi janah terrus mendessak asa idengkoh dèba tah pè uè kalak i barang oda. Kennah tok ngo kalak nipesèngètmu i kerna kesalahenna, janah toat mo kalak idi. Mbingit mo kono mengajari kalak i. ³ Ai lot ngo tikkina, oda nèngè uè jelma i menjalo ajar bennar, tapi dak menguèi nipergeddo atèna nai ngo ia, janah pepulungken mbuè guru, asa iajarken bana pellin selloh dengkohen pènggel sambing. ⁴ Isompel kalak i ngo copingna, asa ulang idengkohken ajar bennar, tapi ukum mi sukut-sukuten ajar latlat mèter cingir ngo copingna. ⁵ Tapi tukasi pè bagidi, kennah perdatèken dirimu barang tah tupung bakunè pè i. Mbingit mo kono menggong sindersa, ulaken mo ulanmu bagè sada kalak simagahken Sukuten Kelluahen i, janah mendè mo pengkebasimu bagè naposo Dèbata. ⁶ Ukum tersèngèt diringku, enggo dapet tikkingku matè mahan pèlèen bai Dèbata. Sigejap nai kutadingken mo dunia èn. ⁷ Enggo dekket aku merpacu janah selloh ngo kuulaken i, jadi enggo mo soh mi tujuun perpodi. Tettap ngo sètia aku taba Kristus soh mi puncana. ⁸ Ukum bagèndari enggo mèma bangku hadiah kemennangen i. Iberrèken Tuhan Raja simenghukum i mo bangku hadiah i tupung Ari Kiamat kerna enggo merdamè aku dekket Dèbata. Tapi oda ngo pellin aku sambing menjalo hadiah i, karina kalak simengketeddohken pekerroh Tuhan i ngo. ⁹ Usahaken mo roh kono ndor mendahi aku, ¹⁰ kerna enggo itadingken si Demas aku kumarna i kekellengi ngo dunia èn. Enggo laus ia mi Tesalonika. Si Kreskes enggo laus mi Galatia janah si Titus laus mi Dalmatia. ¹¹ Pellin si Lukas nai ngo kessa tading rebbak aku. Alèng ma mo si Markus janah rebbakken mo kènè roh, ai ndorok terharapken ngo ia mengurupi aku ipas ulanku. ¹² Enggo kupasulak si Tikikus mi Epesus. ¹³ Mula roh kessa kono, embah mo mantèlku sikutadingken i Troas i bages si Karpus. Embah ma mo dekket bukku-bukkungku, terlebbih bukkungku si nibahan ipas kertas koling-koling i nai. ¹⁴ Ukum si Aleksander tukkang tembaga i, jahat kalohoon ngo pemmaingna bangku. Ibalesken Tuhan i mo bana rembang mi pemmaingna bangku i. ¹⁵ Kono pè kennah mermanat mbangsa, ai sondel mo pengalona banta. ¹⁶ Tikan perlebbè kalohoon i aku lako membèla diringku, isè poda lot mendengani aku; karinana ngo mennadingken aku. (Katerra pè ulang mo nemmu ilugun Dèbata kalak idi!) ¹⁷ Tapi idengani Tuhan i ngo aku. Iberrèken ngo bangku gegoh, gabè ndorok kubagahken Sukuten Kelluahen i karinana, asa idengkoh karina kalak siso Jahudi. Janah maluah ngo aku ipas mara kemmatèen i nai. ¹⁸ Tuhu ngo dak ipaluah Tuhan i ngo aku ipas karina simaing jahat bangku i. Iembah ngo aku merkinijuah mi bagasen KerajanNa si ni sorga i. Kessangapen mo bana soh mi amman sumendah! Amèn. ¹⁹ Pessoh salamku bai si Priskila dekket bai si Akwila, bagi ma taba dengan simpangaan si Onesiporus. ²⁰ Ukum si Erastus, i Korin ngo ia tading janah si Trofimus sakiten ngo ia kutadingken i Milèt. ²¹ Usahaken mo roh sinderrang madèng mosim mbergoh. Menenges salam ngo bamu si Ebulus, si Pudes, si Linus dekket si Klaudia; bagidi ma ngo dekket karina dengan si sada kepercayaen sidèbanna i. ²² Dak idengani Tuhan i mo kono. Dak ipasu-pasu Tuhan i mo kènè karina! Tabe nami, Paulus