2 PETRUS

¹ Kènè alè dengan sienggo tuhu-tuhu percaya bagè kami! Jesus Kristus imo Dèbata janah Raja Sipaluahken kita. I ngo memmaingken ndorok kita percaya tabaSa, kerna dakdak ngo bennar iulaken barang kadè pè. Surat èn bai si Simon Petrus nai, sada kalak naposo bak rasul Jesus Kristus. ² Dak ipasu-pasu Dèbata mo kènè janah iberrèken mo bai ndènè damèna mertinèncuk karna itandai kènè Dèbata bak Jesus Tuhanta i. ³ Idilo Dèbata ngo kita asa dekket kita mengakapi kuasaNa dekket mengakapken kinimendè basaNa. Merkitè kuasaNa sendiri dekket kemulihken enggo sibettoh tersèngèt dirina, imo Dèbata sienggo mendilo kita, iberrèken ngo banta karinana siperlu ibas nggelluhta èn, asa nggelluh kita tosè mi sinipergeddo atè Dèbata. ⁴ Merkitè bagidi ngo iberrèken Dèbata banta, pasu-pasuNa simaharga i sienggo niperbagah-bagahNa kin. Janah merkitè pasu-pasuNa simaharga i ndorok maluah kènè ipas cubellek-cubellek ndènè siso kasèa i nai imo nipergeddo dunia èn, asa gabè dos bakko ndènè dekket pertendiin. ⁵ Kerna naidi mertuhu-tuhu mo kènè ipas karina gegoh ndènè nai asa makin percaya kènè taba Kristus janah kepercayaen ndènè idengani perangè selloh. Laènken pengelako merandal, perlu ngo kènè gabè kalak mpantas, ⁶ janah laènken perbinettohen, kennah ndorok ma mo kènè mengerajai diri ndènè. Janah mbingit mo kènè. Mula enggo mbingit kènè menghaloken karinana, nai nggelluh mengèkutken nipergeddo Dèbata mo kènè. ⁷ Nggelluh mengèkutken nipergeddo atè Dèbata, kennah lot ngo bai ndènè ukur kelleng midah dengan samah Kristen. Jadi mula enggo ngkelleng atè ndènè midah dengan samah Kristen, gabè kennah kelleng mo atè ndènè midah karinana jelma. ⁸ Mula enggo lot sibagidi bai ndènè, oda ipaduè nèngè kènè mahangkè dekket oda merbuah, lako menandai Jesus Kristus Tuhanta i. ⁹ Tapi ukum oda lot sibagidi bai ndènè, gabè sada tanda-tanda ngo i oda lot kadè pemettoh ndènè, janah oda ndorok kalak sibagidi mengidah barang kadè, janah enggo lupa ia, dosana pè enggo kin ma ngo ipeppanting. ¹⁰ Kumarna naidi kènè kènè alè dengan, makin ngkasahna mo kènè lako pehotken pendiloon Dèbata sienggo soh bai ndènè dekket pemilihenna i bai ndènè, asa makin ntegguh kènè. ¹¹ Merkitè bagidi gabè iberrèken mo bai ndènè kuasa asa dekket gabè sidasa ibas gemgemmen Tuhan Raja Sipaluahken kita idi, imo Jesus Kristus simemerèntah soh mi amman sumendah. ¹² Kerna nai dak kupesèngèt ngo kènè tersèngèt i karina, tukasi pè enggo ibettoh kènè i janah enggo percaya kènè i sukuten bai Dèbata nai sienggo nijalo ndènè i. ¹³ Sidekkah nggelluh dèng aku, patutna ngo dak kupesèngètken i taba kènè. ¹⁴ Ai kubettoh ngo, oda pella sadikè dekkah nai, kutadingken mo dunia èn, ai enggo ntangkas ibagahken Tuhan Jesus Kristus i bangku. ¹⁵ Dak kukerencetken ngo, asa mula enggo kessa laus aku dak tong lot dalanna ièngèt kènè karinana idi. ¹⁶ Kubagahken kami bai ndènè bakunè kehejiin Tuhan Jesus Kristus tikan roh. Oda ngo i bagè cara sukut-sukuten bai jelma nai, tapi sienggo kuidah kami ngo. ¹⁷ Ai i sidi ngo kami tikala i tikan ijalo kessangapen simeheji i bai Dèbata Bapa i nai, ai terdengkoh ngo sora bagèen, "Èn ngo anakKu siKukekelengi i, lemmo ngo atèngKu midahsa!" ¹⁸ Kudengkoh kami sendiri ngo sora i roh i sorga nai tikan rebbak kami dekketsa i babo ndelleng simbadia i. ¹⁹ Merkitè bagidi makin tokna mo kami mi sukuten nabi-nabi tersèngèt Dèbata. Merandal kalohoon ngo mula iperatè-atèken kènè sukuten i, ai codi mi pellita merbendella ngo i, ipas sigellap mèma mbincar mataniari dekket mercuhaya kecihuren i bagasen pusuh peratèen ndènè. ²⁰ Tapi perlebbè sièngèten ndènè, èn ngo: Tennah Dèbata sinipesoh nabi-nabi oda ndorok itafsirken mengèkutken pendapet sendiri. ²¹ Ai oda nung tennah bai Dèbata nai pellin merkitè lemmo atè jelma. Tapi sinidomen Tendi Perbadia ngo kalak lako pesakatken tennah bai Dèbata nai sendiri.

¹ Tosè bagè arnia enggo roh guru-guru palsu mi tengah-tengah ummat Dèbata, bagi ma ngo bang mi tengah-tengah ndènè pè, kennah roh ngo guru-guru palsu. Iajarken kalak i ngo siso tuhu lako mencèdai jelma, janah ipersomada kalak i ngo Tuhan sienggo menebbussa; nai gabè iabinken kalak i ngo kemmagoon i ndor sangkem mi dirina. ² Tukasi pè bagidi, mèduk ngo mengèkutken guru-guru palsu i sienggo nirajaan cubellek-cubellek dagingna siso kasèa i. Jadi kemulihken ulah-ulah kalak i bagidi, mèduk ngo kalak mengelèai Dalan Bennar, imo simerdemmu mi Dèbata. ³ Kumarnaken ukur merpengait guru-guru palsu i, gabè ioto-otoi ngo kènè merkitè sukut-sukuten siturah ibas ukurna nai sendiri, lako muat laba bai ndènè nai. Tapi enggo mo ipèmaken hukum bai kalak i, janah enggo mo tertentu kin kemagoon bai kalak i. ⁴ Malaèkat-malaèkat sienggo merdosa i pè oda ngo ikellini Dèbata ipas hukumen idi nai, idabuh ngo kalak i mi api narakka, mi bakkas gellap tuiten ngo kalak idi ikurung mèma dapet Ari Perhukumen simbellen i. ⁵ I jaman dunia sinderbi pè bagi ma ngo, oda ikellini Dèbata ipas hukum idi nai. Ai iperroh Dèbata ngo laè mbuncar mi dunia siniianen jelma siso uè percaya bai Dèbata tikala i. Pellin si Noak dekket si pitu kalak i nai ngo kessa ijamotken, kumarna dak ibagahken si Noak ngo berita kenggelluhen tosè mi sinipergeddo atè Dèbata. ⁶ Bagi ma ngo bang kuta Sodom bak Gomora; ihukum Dèbata ngo kuta i, ilettup merkitè api, asa lot mahan lumba-lumba taba kalak siso uè percaya bai Dèbata. ⁷ Tapi ipaluah ngo si Lot, kumarna iuèi si Lot Dèbata, tukasi pè dak isusahi kalak siso menguèi kata Dèbata ia. ⁸ Tersiksa ngo pengakap si Lot i tengah-tengah kalak sibagidi, ai dak gennep ari ngo idah janah idengkoh pengellako kalak i siso kasèa i. ⁹ Jadi ibettoh Tuhan i ngo bakune paluahken kalak simenguèi lemmo atèna mula tupung sempa bai kalak i pengojiin. Janah ibettoh Tuhan i ngo barang bakunè pedèmpuken kalak perjahat asa isiksa tupung Ari Perhukumen, ¹⁰ imo kalak simenguèi cubellek dagingna, mengulaken ulaan mellamun mi dirina janah simengelèai kuasa Dèbata. Ai tunggang janah tois ngo guru-guru palsu i, salang mengèlèai kalak simersangap ni sorga i pè oda ngo alang atèna. ¹¹ Keppèken ukum malaèkat-malaèkat, tukasi pè ndaoh mergegohen janah merkuasaan dari pada kalak guru-guru palsu i, oda nung ilèai kalak simersangap ni sorga i, i hadeppen Tuhan i. ¹² Tapi ukum guru-guru palsu i tosè bagè binatang ngo tubuh pellin lako itangkup bak ibunuh sambing ngo kalak i. Oda merpikir kalak i, ai pellin menguèi sura-sura ukurna sambing ngo kessa kalak i, mengelèai siso nibettohna, gabè mago mo kalak i bagè binatang penjerngem. ¹³ Ali pengelako kalak i jahat i, imo kinipersuk. Sennang ngo atè kalak i maing barang bakunè sambing tikan mahar lako peppuasken cubellek dagingna. Mula rebbak kundul kalak i dekket kènè i perpèstaan, dak iurat-urati mo kènè lako peburuk-burukken gerar ndènè asa merlèa, ai mabuk ngo enggo kalak i kumarna pengelakona luhlah i. ¹⁴ Oda merkeleja-lejaan kalak i mengulaken dosa, lommo ngo atè kalak i mengidah daberru luhlah. Janah kalak sikurang ntefuh kepercayanna dekket kurang tok ukurna, ikella-kella kalak i. Enggo kecemmalen bai kalak i merukur nahaka. Kalak sienggo kenna sempetta ngo kalak i. ¹⁵ Kumarna oda uè kalak i merdalan arap dalan mpenter, taling mo kalak i. Dalan si Bileam anak si Beor arnia ngo jekutken kalak i, ai dak sèkel ngo si Bileam menjalo upah arap dalan siso patut. ¹⁶ Tapi gabè mposi ngo pengajaren bana kumarnaken kejahatenna i, ai kalodè siso ndorok kin kirana bagè jelma, idi nola ngo pesèngètkensa, gabè ipaksa mo nabi i mentadi ipas perulanna gila i nai. ¹⁷ Codi bagè mata laè sienggo ngkerrah ngo guru-guru palsu i, janah bagè hembun si nisempul angin. Enggo ipèmaken Dèbata bai kalak i bekkas gellap tuiten. ¹⁸ Dak iranaken kalak i ngo rana nèam-nèam pènggel tapi oda mernidok, lako menghèla-hèla kalak sirembaru dèng mennadingken dalanna dekket jelma laling kumarna cubellek nipergeddo dagingna. ¹⁹ Dak iperbagah-bagah guru palsu i ngo kelluahen, tukasi pè hamba kemagoon i ngo kalak i, ai barang isè talu ibaing barang kadè pè i, hambana ngo ia. ²⁰ Barang isè enggo pessidingken simerroha ni dunia èn kumarna enggo itandai Tuhan janah Raja Sipaluahken kita imo Jesus Kristus, keppè mula terjorat nola ia janah tersundalih, gabè mparahen nola ngo kalak sibagidi i puncana dari pada i mulana. ²¹ Lotiin kin ngo bai kalak i ulang sanga itandai dalan sènteng bai Dèbata nai, dari pada itadingken nola, keppè enggo kin sanga itandai. ²² Tuhu ngo bagè nidokken kata umpama èn tersèngèt kalak i, "Dak ipangan biang ngo utahna," dekket "Dak merkubang nola ngo babi sienggo iperridi."

¹ Kènè alè dengan si nikekellengen! Èn mo suratku pedua kaliken mendahi kènè lako mendungkul pusuh peratèen ndènè, ² asa ièngèt kènè karinana kata sienggo iruapken nabi-nabi Dèbata i sinderbi dekket perèntah Tuhan i Raja Sipaluahken kita si nipessoh taba kènè merkitè rasul-rasul. ³ Èn mo siperluna naing bettohen ndènè; mayak ari perpodi roh mo kalak nggelluhna idomi cubellek dagingna sendiri, irèhèi mo kènè ⁴ merkitè mendokken bagèen, "Roh kin mo nina Tuhan Jesus bagè sienggo niperbagah-bagahna i! I dikè mo lot roh Ia? Empungta i pè enggo mo matè. Tapi hot ngo karinana bagidi kessa nai ntembem dunia èn!" ⁵ Ai laju ngo oda merdatè kalak i, hana pè langit dekket tanoh èn arnia, kata Dèbata ngo maing; ipas laè nai ngo ihanaken tanoh èn janah merkitè laè; ⁶ janah merkitè laè ma ngo -- ipetumpat dunia siperlebbè i -- tikan masa laè mbuncar. ⁷ Tapi ukum langit bak tanoh silot bagèndari, idi nola mo sinaing ipetumpat merkitè api segen, ijamotken kata Dèbata i ma ngo soh mi tikki i hukum Dèbata kalak siso percaya i soh tumpat. ⁸ Tapi alè sinikekellengen, tangkas mo èngèt kènè èn, Dosken sedari ngo bai Tuhan i ukum seribu tahun bai jelma. ⁹ Oda ngo ipedekkah-dekkah Dèbata bagah-bagahNa bagè si nidokken dèba kalak. Tapi ipehembun ngo ukurna midah kènè, ai oda lemmo atèna lot barang isè mago. Ipergeddo ukurna ngo asa karina kalak mertobat ipas dosa-dosna nai. ¹⁰ Tapi dapet nè mo Ari pekiroh Tuhan i pedua kaliken codi bagè pekiroh penangko. Merdebbur mo langit i lako salpun janah melettup mo sagumanna silot i langit i; tanoh dekket sagumanna silot pengisina idi pè salpun mo. ¹¹ Enteng mula salpun ngo keppè karinana sagumanna silot i, kerna naidi bakunè ngo kita patut nggelluh? Kennah mbadia ngo nggelluh, menguèi Tuhan i mo kènè, ¹² sidekkah mèma-mèma janah mengketedohken Ari Tuhan i kènè lako menghukum karina jelma. Tupung Ari i mo kerri langit i melettup, janah kumarna nggarana gabè melala mo sagumanna silot i langit i. ¹³ Tapi ukum kita dak sipèma-pèma ngo langit sirembaru, bekkas ketègerren i rembang mi bagah-bagahna. ¹⁴ Kerna naidi alè sinikekellengen, sidekkah ipèma-pèma kènè Ari i, kerencetken kènè mo nggelluh oda merdosa nèngè janah ulang mertikas i hadeppen Dèbata. Peselloh kènè mo nggelluh ndènè taba Dèbata. ¹⁵ Radumi kènè mo lambas ukur Dèbata i, mahan kesempaten iberrèken banta, asa maluah kita. Otang si Paulus dengan si ni kekelleng i pè bagi ma ngo isuratken bai ndènè? Kepantasen siroh bai Dèbata nai ngo bana asa isuratken i mendahi kènè. ¹⁶ Ibas karina surat-suratna i dak idokken si Paulus ngo tersèngèt i. Tuhu lot ngo dèba mahal arusen kata suratna i, janah kalak siso ntegguh kepercayanna, janah oda mengarusi kadè sinidokken surat si Paulus i, gabè ibaling nola mo surat i i bas Bibèl idi nai pè, bagi ma ngo dèba ibaing kalak i. Karinana pemaing kalak idi i, kennah mengenna ngo mi dirina sendiri. ¹⁷ Enteng kènè alè dengan kekellengen, enggo mo ibettoh kènè i. Kerna naidi dak mermanat mo kènè, asa ulang terabin kènè mi kelalingen kalak siso menandai perèntah Dèbata i, gabè ndabuh nola kènè luas i bekkas ndènè selloh idi nai. ¹⁸ Dak makin iakapken kènè mo mendè basa Tuhan, Raja Sipaluahken kita i, imo Jesus Kristus, janah dakdak makin itandai kènè mo Ia. Bana mo kessangapen bagèndari nai soh mi amman sumendah. Amèn. Tabe nami, Petrus