2 KORINTUS

¹ Kènè dengan kuria Dèbata silot i Korintus bak karinana ummat Dèbata i suberri Akhaya. Aku, si Paulus, rasul Kristus sinipebangkitna ibas lemmo atè Dèbata nai, dekket denganta si Timoteus. ² Masèh atè bak damè ni Dèbata Bapanta dekket Tuhan Jesus Kristus imo mendengani kènè karina. ³ Nipoji mo Dèbata Bapa Tuhanta Jesus Kristus. Ia ngo Bapa permasèh atè kalohoon janah Dèbata simemerrèken ntegguh pennarihen sitermurmur i bai jelma. ⁴ Ai ia ngo petegguhken pennarihen nami ibas karina kepersuken sisempa bai nami, asa merkitè ntegguh pennarihen sikujalo kami bai Dèbata nai ndorok kupetegguh kami pennarihen karina jelma nibagasen kesusahen idi. ⁵ Kupersuken sinigong Kristus, enggo mo narih mèduk sempa bai nami ma, kemmulihkenna idi gabè ipetegguh Kristus ngo pennarihen nami. ⁶ Tapi mpersah pè kugong kami, karinana idi gabè mengapoi janah petegguhken pennarihen ndènè ngo, asa maluah kènè. Asa mula ipetegguh pennarihen nami, kènè pè dekket ngo ipetegguh, asa gabè mbingit kènè ibas sitahanen sisempa mendahi kènè, tosè bagè sisempa bai nami. ⁷ Hot ngo pengharapen nami terrèngèt kènè, ai kubettoh kami ngo dekket kènè menggong kinipersuk bagè kami, janah kemmulihkenna i dekket ma ngo kènè menjalo apo-apo dekket ipetegguh bagè kami ma. ⁸ Naing ngo dok atè nami ibettoh kènè alè dengan, bakunè sinigong nami i Asia, soh mo mbotongna kinipersuk kugongken kami, enggo sanga saip ukur nami terrèngèt mi nggelluh nami; ⁹ tosè bagè sienggo iputus hukumen nami kennah matè, ukum perrasaan nami. Tapi masa pè i asa ulang merkepposen mi diri nami ngo kami, tapi asa merkepposen taba Dèbata sipegelluh kalak sienggo matè ngo. ¹⁰ Ia ngo pelluahken kami ibas kemmatèen sintengam idi nai, janah kuharapken kami Ia ma ngo paluahken kami bang i ari podi pè. ¹¹ Tok ngo kami iurupi kènè ngo kami ibas sodip ndènè, nai ipaluah Dèbata dèng ma mo kami ibas mara nai, merkitè bagidi gabè nterrem mo kalak mendokken lias atè mi Dèbata, kumarna idengkohken Dèbata ngo sodipna lako mengkepkep kami. ¹² Èn ngo memaingken lolo atè nami; ikesaksiken pennarihen nami ngo karina sikubahanken kami i dunia èn -- terlebbih-lebbih perdemuun nami dekket kènè enggo kubakin kami ibagasen mendè janah oda merpengait siroh bai Dèbata nai. Kuulaken kami idi oda ngo kumarna bijak kejelmaan, tapi sibasa-basa niberrèken Dèbata bai nami idi ngo. ¹³ Ai sikusuratken kami, oda laèn lapatenna ibas sinijaka dekket iantusi kènè, ibagasenna i kuharapken ngo asa terrus iarti kènè. ¹⁴ Bagèndari, enggo bagè iantusi kènè dèba terrèngèt kami, tapi harap ngo kami, makin iantusi kènè kami mi podiin èn. Merkitè bagidi, ibas pekiroh Tuhan Jesus seggen, gabè sampang mo atè ndènè midah kami janah kami pè sampang mo atè nami midah kènè. ¹⁵ Kemmulihken kettoken idi ngo kènè, asa ndor kin lot hendakku mendahi kènè, asa terolih pasu-pasu kènè merlempit ganda. ¹⁶ Kuhendakken kin ngo asa kudahi kènè tikan perdalanenku mi Makedonia, janah singgah nola ma aku mendahi kènè mula balik kessa aku i sidi nai, asa ndorok urupi kènè aku ipas perdalanen lako mi Judèa. ¹⁷ Tapi gabè kuobah ngo hendakku idi; jadi ketteridahen oda hot perrukurenku mula bagidi? Barang merguru mi daging ngo hendakku idi, sipata "Uè, sipata oda?" ¹⁸ Ibagasen gerar Dèbata sidak tong kepposen terrèngèt mi sienggo iruapken, ukum sienggo kudokken idi oda ngo "Uè" bak "Oda". ¹⁹ Kerna ukum Jesus Kristus Anak Dèbata sienggo isukutken si Silas, si Timoteus dekket aku sendiri pè oda ngo kalak jelma "uè" barang "oda". Tapi kata "uè" ngo siroh bai Dèbata nai. ²⁰ Ai merkitè Ia enggo "uè" nina Dèbata terrèngèt karina niperbagahNa. Kemmulihkenna idi ngo kita mendokken "Amèn" mi Dèbata merkitè Jesus Kristus. Kubakin kami bagidi asa mermulia Dèbata. ²¹ Ai Dèbata sendiri ngo memmaing kami bak kènè pè gabè ntegguh mersaor ibagasen Kristus, janah Ia ngo memmilih kita gabè milikNa. ²² I ngo memmaing asa icap kita gabè milikNa, janah Iberrèken mi bagasen atè-atènta, TendiNa i mahan jaminen mi karinaNa. ²³ Dèbata ngo saksingku -- ai Ibettoh ngo pikirenku -- i ngo memmaingken oda saut dèng aku berkat mi Korintus asa ulang gabè marsak kènè. ²⁴ Ai oda ngo naing mengerajai pikiren ndènè aku terrèngèt kadè sinaing keppercayaen ndènè, ai enggo percaya kalohoon kènè mi Kristus. Pellin mengurupi ngo aku bai ndènè, asa makin dom sampang atè ndènè.

¹ Kumarna naidi, enggo kuputusken ibas ukurku asa ulang nèngè roh aku mendahi kènè ukum gabè marsak kènè. ² Ai mula aku ngo memmakin marsak kènè, isè nola memmakin sampang atèngku, ukum mak ia sikuarsaki idi? ³ Kerna nai ngo asa kubakin surat mendahi kènè, oda uè aku roh mendahi kènè ukum gabè marsak, kerna kènè ngo memmakin sampang atèngku. Ai tok ngo aku, mula lolo aku, kènè pè lolo ngo. ⁴ Kutengesken surat èn taba kènè ibagasen keppersuken ngo aku janah posek ukurku janah merdengan èluh; oda ngo asa gabè marsak kènè asa kubagahken idi, tapi asa ibettoh kènè ngo kelleng atèngku midah kènè. ⁵ Mula lot barang isè memmaingken arsak atè ènda, oda ngo taba aku nibakinna i, tapi taba kènè karina ngo i; asa ulang pella lebbihsu ranangku bai dèba arap kènè nai. ⁶ Cukup mo hukumen taba kalak sibagidi, imo pincang-pincang sinterrem bai ndènè nai. ⁷ Bagèndari pè kennah ampuni kènè mo ia janah peddahi kènè asa ulang marsaksu ia; janah asa ulang mendellè ia. ⁸ Kupengido bai ndènè asa tuduhken kènè kelleng ndènè mengolihi mendahisa. ⁹ Idi ma ngo tinèmbak suratku i bai ndènè lako mengunjuni kènè, tah uè ma ngo kènè dak menguèi peddah bak ajarku. ¹⁰ Mula iampuni kènè salah ni kalak simersalah taba kènè, aku pè kuampuni ma mo ia. Kerna barang kadè pè sikuampuni i -- mula lot sinaing ampunen -- kumarna kènè ngo kuampuni i hadeppen Kristus. ¹¹ Kubakin pè bagidi asa ulang sanga sempat Sibolis maing seggat mi ukurta, ai sibettoh ngo taki-takina. ¹² Sinderrang soh aku mi Troas magahken sukuten kelluahen terrèngèt Kristus, enggo ngo nemmuken ibuka Tuhan i pèntu taba aku lako mengula i sidi. ¹³ Tapi gabè happu ngo kuakap, kumarna oda pejumpa aku dekket si Titus i sidi. Nai gabè kutennahi mo kalak ni sidi, janah laus mo aku mi Makedonia. ¹⁴ Tapi melias atè mo taba Dèbata, ai dak tong ngo itatang-tatang kami merkemennangen ibagasen Kristus kerna nggelluh ngo kami rebbak dekket Ia. Ipakkè Dèbata ngo kami asa makin sar berrita terrèngèt Kristus bagè sibaungkus soh mi karina nagerri. ¹⁵ Ai bagè dahupa ngo kami baungkus itutung Kristus lako bai Dèbata. Tapi ukum bai kalak silako mago, gabè bau kemmatèen simemunuh ngo kami. ¹⁶ Tapi ukum bai kalak sinaing ipaluah, baungkus ngo kami janah bagè simerembahken kenggelluhen, jadi isè ngo ndorok mengulaken bagidi? ¹⁷ Ai oda ngo bagè sidèbankenna i kami, simemmaing sukuten terrèngèt Dèbata dosken tiga-tiga sambing. Oda ngo merpengait kami, ai Dèbata ngo pasulakken kami. Janah idah Dèbata ngo, pengendeng Kristus ngo kami pessakatken berrita idi.

¹ Mada ngo katè ndènè nola kupoji-poji kami dirinami? Barang mada ngo tah porlu surat pemoji-mojiin taba kènè barang taba kami, bagè sinibakin dèba kalak sidèban i? ² Kènè sendiri ngo surat pemojiin bai nami sienggo tersurat ibagasen pusuh perratèen nami, janah ndorok ijaka gennep jelma. ³ Ai terjaka jelma idi ngo, kènè surat bai Kristus nai, merkitè-kitè kami. Isurat ngo surat i oda dekket tinta, tapi dekket Tendi Dèbata singgelluh ngo; oda ngo isurat ipas batu, tapi ibas atè-atè jelma ngo. ⁴ Kudokken kami pè bagi, kumarna tok ngo ukur nami mi Dèbata merkitèken Kristus. ⁵ Oda ngo kediriin nami lako mengulaken ulaan idi, tapi Dèbata ngo memmerrèken asa ndorok kami mengulaken idi. ⁶ Ia ngo memmaing asa tau kami gabè pengendeng ibas padan sirimbaru merkitè Tendi Dèbata; oda ngo merkitè patiin sitersurat i, tapi pegelluhken ngo ukum siroh bai Tendi Dèbata nai. ⁷ Sinderrang padan simerembahken mi kemmatèen ibahan bak iokirken mi batu, merbindella ngo cuhaya kessangapen Dèbata, merbindella kalohoon ngo cuhaya i, gabè oda nè tertengen bangsa Israel abè si Musa, tukasi pè cuhaya abè si Musa enggo mulai mèlep tikanna idi. Mula i mo bagidi ⁸ makinsa nola mo padan si niberrèken Tendi Dèbata, mak makin merbindellana mo. ⁹ Mula sinderrang iberrèken padan simennalahken jelma idi bagidi mo bindella kesangapenna tentu merkessurungen dèng ma ngo bindella kessangapen sinderrang iberrèken padan simemmaing jelma i ndorok merdamè dekket Dèbata. ¹⁰ Ndorok dokonen dosken siso merbindella nè ngo kessangapen siarnia i kumarna bindella kessangapen sibagèndari i. ¹¹ Mula bagidi mo bindella kessangapen singgèut salpun i, otang makin merbindellana mo kessangapen simenettap idi! ¹² Kerna bagidi ngo pengharapen nami asa pang kami mengerrana bagidi. ¹³ Oda bagè pemmaing si Musa pemmaing nami, ai gabè itutupi ngo abèna asa ulang idah bangsa Israel bindella kessangapen Tuhan, enggo makin mèlep janah mersep i abèna nai. ¹⁴ Nai gabè tertutup ngo pikiren kalak idi janah soh bagèndari ngo tertutup pikiren kalak i, mula pè ijaka kalak i padan siarnia. Ai pellin ibagasen Kristus ngo ndorok terbuka pennutup idi. ¹⁵ Soh bagèndari pè, mula ijaka kalak idi bukku si Musa, tong dèng ngo ikemkemmi penutup i pikirenna. ¹⁶ Tapi mula roh menghadep sada jelma taba Tuhan i, terrago mo penutup idi i abè kalak i nai. ¹⁷ Tuhan si nidokken i sèn imo Tendi. Barang i dikè Tendi Tuhan i, isidi ngo lot kelluahen. ¹⁸ Ukum abènta karina bagèndari oda nèngè ngo itutupi pengemkemmi i. Dakdak ngo kita merbindellaken cuhaya Kessangapen Tuhan Jesus, nai dakdak iobah mo kita gabè tosè bagèsa, makin ndekkah makin merbindella. Bindella siroh bai Tendi i nai janah Tendi i imo Tuhan.

¹ Dèbata ngo merrèken ulaan i bai nami ibagasen masèh atèna, janah i ngo maing kami asa oda mendellè. ² Oda ngo kubaing kami bagè cara-cara kegellapen tapi maing kemmemalu. Oda ngo bagè cara akkal barang pè pebalik-balikken kata Dèbata. Ntangkas ngo kusukutken kami lemmo atè Dèbata. Kernana idi harap ngo kami karina kalak mendokken ibagasen ukurna selloh terrèngèt kami, i hadeppen Dèbata. ³ Mula oda dèng ngo iarti Sukuten Kelluahen sikubagahken kami idi, kalak silako mago i ngo siso mengantusi. ⁴ Ipepètung tendi jahat ni dunia èn ngo pikiren kalak siso percaya idi. Ia ngo mengellègenni kalak i asa ulang idah kalak idi bindella kessangapen Sukuten Kelluahen terrèngèt Kristus i; ai ibas Kristus idi ngo kita mengidah rupa Dèbata. ⁵ Berrita sikubagahken kami i, oda ngo berrita nami, tapi berrita terrèngèt Jesus Kristus ngo. Ia ngo Tuhan, janah kami ngo perkebbas ndènè kumarnaken Ia. ⁶ Dèbata ngo mendokken, "Mbincar ngo cuhaya i sigellap nai," Dèbata i ma ngo pebincarken cuhaya i mi bagasen perrukurenta, asa gabè ntangkas siantusi bindella kessangapen Dèbata ipas abè Kristus. ⁷ Tapi harta pertendiin simerandal i kuembah kami ibagasen diri nami, siso maharga èn sipellias ibas tanoh nai. Merkitè-kitè bagidi, terridah mo kinibelgah kuasa Dèbata, oda ngo kuasa nami. ⁸ Iletlet ngo kami, tapi oda ngo gabè tersessak kami. Posek ngo kuakap kami, tapi oda gabè mendellè kami. ⁹ Mbuè ngo mendersa kami, tapi oda ibelli kami punjung. Tukasi pè dak nggati kami ibetbet sampè geppah, tapi oda matè kami. ¹⁰ Barang i dikè kami, dak ngo kurasaken kami permatè Jesus, asa terridah nggelluh Jesus i ibas badan nami. ¹¹ Sidekkah nggelluh kami dak ngo mengenggep kemmatèen i bai nami kumarna Jesus, asa gabè ntarar pernggelluh Jesus i ipas daging nami siuè matè èn. ¹² Lapatenna dakdak ngo kemmatèen i menessak bai nami, tapi kenggelluhen ngo ukum menessak kènè. ¹³ Tersurat ngo ibas Bibèl bagèen, "Percaya ngo aku, kerna naidi ngo asa mengerrana aku." Asa kumarna kepercayaen idi ngo, asa mengerrana kami. ¹⁴ Ai tok ngo kami, Dèbata sienggo pekèkèken Tuhan Jesus, ipekèkè ma ngo bang kami rebbak Jesus, janah mengarak kènè rebbak dekket kami mi hadeppenNa. ¹⁵ Karinana idi lako keperluun bai ndènè ngo, ai mula makin mbuè jelma mengakapken masèh atè Dèbata, makin mbuè ma ngo jelma pesohken sodip lias atè taba Dèbata. Merkitè bagidi, makin mermulia mo Dèbata. ¹⁶ Kumarna naidi ngo asa oda mendellè kami. Ai tukasi pè makin buruk daging nami perduru i, tapi dak ngo iperimbaru ukum daging nami perbagasen idi gennep ari. ¹⁷ Ai keppersuken siso sadikè janah sigejap sikutahanken kami èn, gabè mengkerrohken kessenangen sitermurmur soh mi amman sumendah ngo bai nami. Janah dosken siso mada ngo kepersuken i mula nibandingken mi kessangapen idi. ¹⁸ Ai mi siso terridah idi ngo kutembèrèngken kami, oda ngo mi siterridah èn, ai persigejapen ngo ukum siterridah, tapi hot ngo ukum siso taridah i soh mi amman sumendah.

¹ Kubettoh ngo, mula irontas bages si niianenta bagèndari i -- imo dagingta -- ni dunia ènda nai, ipèmaken Dèbata ngo banta bages i sorga, sinipellias Dèbata sendiri janah hot soh mi amman sumendah. ² Ai dak kekelsohen ngo kita mengiani bages sibegèndari i, kumarna dak nteddoh ngo kita naing mengiani bagesta si ni sorga i. ³ Bages idi mo daging rembaru banta. ⁴ Sidekkah mengiani bages dunia èn dèng kita, dakdak ngo kita kekelsohen kumarna mbotong sitanggungenta. Oda ngo kumarna asa italkasi kita ibas dagingta èn nai, tapi asa iberrèken ngo banta daging ni sorga idi nai, asa ikuasai dagingta singgelluh i, dagingta siuè matè èn. ⁵ Dèbata ngo petauken kita lako mi sidi, enggo kessa Iberrèken TendiNa banta mahan jaminenna. ⁶ Kerna naidi pos ngo atè nami, tukasi pè kubettoh kami ukum sidekkah merrian dèng kami ibas daging nami èn, ndaoh dèng ngo kami i bages bekkas nami dekket Tuhan idi nai. ⁷ Ai ibagasen percaya taba Kristus ngo kami nggelluh, oda nggelluh kumarna sindorok niidah, ⁸ kerna naidi ngo asa pos atè nami. Nemmuken loloon ngo kami mula maluah kami ibas daging nami èn nai, asa ndorok kami rebbak dekket Tuhan i. ⁹ Kerna naidi dak ngo kukeperluken kami lako pessenangken atèNa, sinderrang ibas rembaga èn dèng pè kami, barang pè soh kessa mi sadèi seggen. ¹⁰ Ai karina ngo kita seggen ipehadep i lebbè perhukumen Kristus, janah gennep mo menjalo pemallessen tosè perulanna i dunia èn -- perulaan merandal barang pè jahat. ¹¹ Kubettoh kami ngo kadè lapatenna merkebiaren taba Tuhan; kerna naidi ngo asa kuusahaken kami lako peposken ukur kalak tersèngèt diri nami. Ntangkas ngo kami itandai Dèbata, janah kuharap ngo kènè pè itandai kènè ma kami ibas pusuh perratèen ndènè. ¹² Oda ngo asa ipoji kènè kami, mula pè kudokken bagidi. Tapi merkitè i kuberrèken bai ndènè sada ketterangen selloh, asa lot dalan ndènè memmoji kami, janah asa ibettoh kènè mengaloi kalak simemerluken rupana, oda bakkona. ¹³ Mula bagè siso merrukur ngo kami idahen, lako siperlu bai Dèbata ngo i. Janah mula merrukur ngo kami idahen, perlu bai ndènè ngo i. ¹⁴ Kelleng atè Kristus i ngo mengarak-arak kami. Janah kubettoh kami ngo, mula enggo matè sada kalak mengkepkep karina jelma, merlapaten ngo i, karinana jelma enggo matè. ¹⁵ Kristus matè mengkepkep karinana jelma, asa kalak singgelluh idi ulang nèngè nggelluh ibas dirina, tapi lako bai Kristus sienggo matè janah enggo ipegelluh mengolihi lako mengkepkep kalak idi ma. ¹⁶ Kemmulihken idi oda nèngè ngo kami menandai jelma i, mengèkutken cara kejelmaan, tapi ukum bagèndari oda nèngè ngo bagidi. ¹⁷ Barang isè enggo ibagasen Kristus, kalak sienggo nitempa rimbaru mo enggo ia. Enggo salpun pengelako sinderbi i -- karinana ngo enggo iperimbaru. ¹⁸ Dèbata ngo memmaingken idi karina, merkitèken Kristus gabè ipedamè Dèbata kita mi dirina, nai ipasulak ngo kita lako peddamèken karina jelma dekket Dèbata. ¹⁹ Èn mo kubagahken kami; Merkitèken Kristus, ipeddamè Dèbata ngo jelma i mi diriNa, oda pella ijujur Dèbata kessalahen-kessalahen jelma i tabaSa. Imo ulaan nami asa kubagahken kami i taba dunia èn. ²⁰ Kernana i pertennahen Kristus ngo kami. Mengerana kami dempak kènè, Dèbata ngo simengerrana dekket kènè i. Singkat Kristus i ngo kami mengèlèk-ngèlèk kènè; jalo kènè mo rana Dèbata sigabè peddamèken kènè dekketSa. ²¹ Oda ngo merdosa Kristus, tapi gabè ia ngo menggongken dosanta, asa merkitè enggo ibagasen Kristus i kita, gabè merdamè mo kita dekket Dèbata.

¹ Kumarna dengan sada ulaan Dèbata ngo kami, jadi kuèlèk-èlèk kami mo kènè asa ulang magosia ibaing kènè masèh atè Dèbata. ² Nina Dèbata ngo ibas Bibèl i, "Tikan permasèh atèen ngo kènè kudengkohken. Janah tikan ari kelluahen ngo kènè kuurupi!" Bettoh kènè mo! Bagèndari mo tikki permasèh atèen i. Bagèndari mo kelluahen idi. ³ Oda lot kubakin kami barang kadè asa gabè merdosa jelma i. Jadi isè poda terbakinsa mennalahken pengkebasi nami. ⁴ Ibas karinana ngo kutuduhken kami diri nami bagè naposo Dèbata. Mermatcam bagè kinipersuk ngo kugongken kami ibas mbingit; ⁵ isiksa ngo kami, ikurung, idersa; leja ngo kami, nggati ngo maker mata nami janah nggati ngo kami rapar. ⁶ Ibagasen metemman, bijak, sobar, janah lambas ukur, kutuduhken kami diri nami bagè naposo Dèbata. Ibagasen pengurupiin Tendi Dèbata dekket ibagasen kelleng atè siso merpengait, ⁷ janah ninganna memagahken berrita bai Dèbata nai, ibagasen kegegohen Dèbata. Dak kucèkèp kami ngo lemmo atè Dèbata mahan sinjata nami, tikan juhap barang tikan ikubu dèba pè. ⁸ Ipesangap ngo kami, tapi dak ngo ipellèa; ipoji; tapi itukas. Bujur pè kami idokken ngo perluap. ⁹ Bagè siso itandai ngo kami, tapi karina ngo kalak menandai kami. Dok atèna matè ngo enggo kami, keppè nggelluh dèng ngo kami. Tukasi pè kami isiksa, tapi oda matè kami. ¹⁰ Tukasi pè irennuk ukur nami, tapi mersampang atè ngo kami. Ncoor ngo kami idahen, tapi enggo mèduk kalak gabè bèak kubaing kami. Kadè poda lot bai nami idahen, tapi karina ngo lot bai nami. ¹¹ Kènè alè kalak Korintus sinikekellengen! Enggo ntarar kubagahken kami bai ndènè karinana silot ibas pusuh perratèen nami. ¹² Mbuka ngo ukur nami bai ndènè, keppè ibekkem kènè ngo ukur ndènè bai nami. ¹³ Asa ukum bagèndari naing mo nemmuken mersijaloon; tosè mi dukak-dukak mo ranangku èn taba kènè: Buka kènè mo ukur ndènè bai nami. ¹⁴ Ulang kènè uè mertumpu dekket kalak siso percaya bai Jesus, ai oda ngo mendè bagi. Idikè mo ndorok kalak simengulaken lemmo atè Dèbata mertumpu dekket kalak simengalo Dèbata! Oda nung rebbak sinterrang dekket sigellap. ¹⁵ Oda ndorok rebbak Kristus dekket Sibolis. ¹⁶ Kadè mo perdemmuun bages Dèbata dekket bages gana-gana? Ai bages Dèbata singgelluh i ngo kita, ai nina Dèbata ngo, "Naing merrian i tengah-tengah kalak i ngo aku, janah rebbak nggelluh dekket kalak idi. Aku ngo gabè Dèbata kalak i, janah gabè ummatKu mo kalak idi. ¹⁷ Kerna naidi, tadingken kènè mo kalak siso menandai Dèbata idi, janah peddaoh dirimu bai kalak i nai. Ulang mo demmu kènè dekket kalak simellamun, asa Kujalo kènè. ¹⁸ Aku ngo gabè Bapa bai ndènè, janah kènè gabè dukak-dukakKu, nina Tuhan pergegoh siso lot codinna."

¹ Kènè alè dengan sinikekellengen! Banta ngo karina siniperbagahna idi. Kerna naidi kennah sipepanting mo dirinta ibas nasa sipellamunken daging bak tendinta i nai. Merkebiaren mo kita taba Dèbata, asa tuhu-tuhu nggelluhta i lako bai Dèbata. ² Jalo kènè mo kami ibagasen atè-atè ndènè! Oda lot salah kubakin kami barang bai isè pè kènè, janah oda nung kubakin kami rogi. Oda nung kubuat kami laba barang bai isè nai pè. ³ Kudokken pè bagidi oda ngo lako mennalahken kènè, ai bagè sikudokken perlebbè ndai, ibagasen pusuh perratèen nami ngo kènè, ai denganku ngo kènè matè barang nggelluh pè. ⁴ Percaya ngo aku midah kènè janah soh ngo lolongku midah kènè! Ai menggong mbuè simpersuk pè kami, tapi dakdak ngo nggasang ukur nami kumarna kènè. Tuhu-tuhu ngo sampang atèngku! ⁵ Kessa soh mi Makedonia pè kami, tong ngo susah kuakap kami. Ibas karinana ngo kami susah; perraloon bai sidèban nai, buradan ibagasen pikiren nami nai. ⁶ Tapi mellias atè mo mi Dèbata, ai dak ngo iapoi perrukuren ni kalak simendellè; ai iapoi ngo ukur nami merkitèken pekiroh si Titus. ⁷ Lolo kami, oda ngo pellin kumarna pekkiroh si Titus, tapi dekket ngo kumarna penjalo ndènè bana bak ibagahken bai nami terrèngèt kènè; imo nteddoh ndènè naing pejumpa dekket aku, bagi ma pè terrèngèt enggo peselsel kènè, janah gabè mertuhu-tuhu kènè membèla aku. Idi ngo memmaingken lebbih lolo atèngku. ⁸ Tukasi pè bonek kènè kubakin merkitè suratku idi, oda pella kuselseli ukurku. Tapi kumarna gabè bonek ngo kènè ibakin suratku idi -- tukasi pè nemmuken sigejap sambing ngo bonek ndènè idi -- gabè kuselseli nola ngo ukurku. ⁹ Tapi ukum bagèndari lolo ngo atèngku -- oda kumarna bonek idi kènè, tapi kumarna enggo gabè tobat kènè kemmulihken bonek atè ndènè i ngo! Tuhu bonek ukur ndènè i sindalan ngo bak hendak Dèbata. Jadi oda lot kurogiken kami kènè. ¹⁰ Ai ikerrohken bonek atè bai Dèbata nai ngo gabè lot pertobaten asa mi kelluahen, janah oda peselsel jelma kerna naidi. Tapi ukum bonek atè i dunia èn nai mengkerrohken kemmatèen ngo i. ¹¹ Peratè-atèken kènè lebbè bonek siroh bai Dèbata nai, otang gabè ikerrohken i ngo bai ndènè lako pecihoken simellètuk! Ai moyang ngo atè ndènè midah dosa, gabè mbiar mo kènè, ntedoh mo kènè, gabè nggasang ngo kènè, gabè uè mo kènè menghukum kalak simersalah! Ibas karina simasa persoalen i, enggo ituduhken kènè diri ndènè oda mersalah. ¹² Jadi kutenges pè surat idi taba kènè, oda ngo kumarna kalak sienggo mersalah i, oda ma ngo kumarna kalak sienggo susah kumarna kessalahenna idi. Kusurat pè idi asa gabè ntarar ngo i hadeppen Dèbata, bakunè belgahna pennarihen ndènè taba kami. ¹³ Idi ngo memmaing nggasang ukur nami. Oda pellin nggasang kessa tupèh, muat lolona ngo atè nami mengidah nggasangna atè si Titus; ai enggo ipegasang kènè ukurna, alè dengan. ¹⁴ Enggo kin ngo kupoji-poji kènè meradepkensa. Tuahna mo, oda termèla aku ibaing kènè. Ai tuhu ngo karinana sienggo kuranaken kami bai ndènè. Bagi ma ngo terrèngèt pemoji nami taba kènè mendahi si Titus, tuhu ngo karinana. ¹⁵ Asa ukum bagèndari enggo makin mbelgahna kelleng atèna midah kènè, ai ièngèt ngo penguèi ndènè mi sinidokkenna janah bakunè penjalo ndènè bana merdengan hormat janah patuh. ¹⁶ Lolo kalohoon atèngku, ai ibas karinana ngo kènè ndorok kettoken.

¹ Kènè alè dengan, kubagahken ma mo taba kènè bakunè sellohna ibakin Dèbata mendahi kuria Makedonia. ² Ioji ngo kalak i merkitè pengunjunen kepersuken mbotong kalohon. Tapi ibagasen kinipersuk idi, mersampang atè ngo kalak i memerrèken pengurupiin bai sidèbaan, tukasi pè ncoor kalohoon ngo kalak idi. ³ Ndorok ngo kupastiken iberrèken kalak i ngo nasa terbakin kalak i, dèba lebbih tupèh ibas gegohna nai, oda pella isè lot mennuruh. ⁴ Memmes ngo ipidoken kalak i bai nami, mula ndorok asa dekket kalak i memerrèken pengurupiin bai ummat Dèbata ni Judèa. ⁵ Iurupi kalak idi ngo merkitè niberrèkenna, oda kumarna kuharapken kami bai kalak i nai kin, tapi kumarna enggo perlebbè isohken kalak i dirina mi Tuhan i, nai mendahi kami ma, rembang mi hendak Dèbata. ⁶ Kemmulihkenna idi ngo asa kudokken kami taba si Titus -- simentebbennai bahaan idi -- asa i tengah-tengah ndènè pè iterusken bahaan merandal i. ⁷ Merkesurungen ngo kè alè dengan ibas karinana, ibas kepercayaen, ibas mengeruapken isi ukur, perbinettohen, ngkasah merrusaha, dekket pengkekelengi ndènè mendahi kami. Jadi ibas ulaan merandal èn pè naing mo lot ma kesurungen ndènè. ⁸ Kudokken katangku èn, oda ngo dosken perèntah. Tapi magahken bakunè pengkerencetken dengan i mengurupi denganna, jadi naing ngo kubettoh bakunè belgahna kelleng ndènè. ⁹ Ai ibettoh kènè ngo bakunè pengkekelengi Jesus Kristus Tuhanta i banta: Kaya kin ngo ia tapi gabè ibaing ngo diriNa ncoor, asa gabè kaya kènè kumarna kinicorNa i. ¹⁰ Ukum katèngku, patut ngo i ulanken ndènè bagè sienggo imulai kènè mengulaken bagidi tahun buari, ai kènè ngo mula-mula mengulaken bagidi. Memmikiri lako mengulaken bagidi pè, bai ndènè nai ngo rohna. ¹¹ Asa bagèndari pè bakin kènè mo tong bagidi tosè ninggat gegoh ndènè. Jadi naing mo nggasang kènè pepulken usaha idi, bakunè kin nggasang ndènè mengerencanaken i. ¹² Mula lot ngo sura-sura ndènè naing memerrèken, ijalo Dèbata ngo siniberrèken ndènè idi merguru mi lotna bai ndènè, oda merguru mi siso lot bai ndènè. ¹³ Oda ngo lot sura-surangku sendiri, asa gabè maluah dèba dengan i ibas tanggung jababna, lako maingken mberrat bai ndènè kubaing. Tapi kennah merdos ngo. ¹⁴ Tapi kumarnaken kelloten ngo kènè bagèndari, patut ngo kènè menampal sikurangna bai kalak idi. Ipodi ari tah bakunè kurangen ma kènè, kalak idi enggo kelloten nola, tentu iurupi kalak idi ngo kènè. Merkitè bagi kacimbang mbellahna mersikebbasen. ¹⁵ Rembang mi sitersurat, "Kalak simercinari mbuè oda pella merlebbih-lebbih, janah kalak siso sadikè cinarina, oda pella kurangen." ¹⁶ Kudokken kami mellias atè taba Dèbata, kerna enggo Iberrèken nggasang ni ukur sibagidi taba si Titus lako mengurupi kènè. ¹⁷ Ai oda pellin iuèi si Titus pengidoon nami, tapi mertuhu-tuhu ngo ia lako mengurupi kènè, ai ibas ukurna nai ngo mendokken laus ia mendahi kènè. ¹⁸ Rebbak dekketsa kuutus kami ma ngo sada kalak dengan siterpoji i gennep kuria kumarna ulanna mennukutken Sukuten Kelluahen bai Dèbata nai. ¹⁹ Ninganna i ma, ipilih Kuria i ngo ia lako mendengani kami mi perdalanen nami, ai naing berkat mo kami lako mennaruhken pengurupiin i, mahan kemmuliaan Tuhan i, janah asa idah kènè ma, kami pè nggasang ngo mengurupi. ²⁰ Mermanat ngo kami asa ulang lot mennalahken kami ibas pesakatken tumpak pengurupi simbelgahna. ²¹ Ai dok atè nami bujur kubakin kami oda pellin i hadeppen Tuhan i, tapi kennah dekket ngo i hadeppen jelma pè. ²² Rebbak dekket si Titus bang dengan i, kupasulak kami dèng ma ngo sada kalak nai dengan sidèban. Enggo barang piga-piga kali kuoji kami ia, janah ketteridahenna nggasang ngo ia mengurupi. Bagèndari pè terruluk ngo nggasangna mengurupi kènè, ai tok kalohon ngo atèna midah kènè. ²³ Ukum si Titus denganku ngo ia, rebbak mengula lako mengurupi kènè. Nai denganku sirebbakken dekketsa idi, sinipilih kuria ngo ia, mahan pemoji-mojiin mi Kristus. ²⁴ Harap ngo aku asa tuduhken kènè taba kalak idi sènteng kelleng atè ndènè, asa karinana kuria memettoh, ngkelleng ngo atè ndènè midahsa janah asa tuhu karinana sikupojiken bai ndènè idi.

¹ Situhunna ukum terrèngèt pengurupiin taba ummat Dèbata ni Judèa, oda pella sadikè perluna kusuratken bai ndènè. ² Ai kubettoh ngo ukum kènè nggasang ngo mengurupi bagè sienggo kubagah-bagahken taba kalak Makedonia. Ai kubagahken ngo bai kalak idi, ukum kènè per Akhaya, i tahun buari nai ngo kènè dak enggo memerrèken pengurupiin; janah kemmulihken nggasang ndènè i, enggo mo kèkè dèba perrukuren kalak idi. ³ Bagèndari kupasulak ngo si Titus rebbak dekket denganna dua kalak nai mendahi kènè, asa karinana sienggo kupojiken terrèngèt kènè, naing mo nemmu tuhu. Enggo mo nemmu kebbas kènè ai enggo kudokken kin taba kalak idi, ukum kènè tettap ngo kebbas mi ulaan i. ⁴ Asa tah bakunè lot kalak Makedonia dekket rebbakken aku sikali èn mendahi kènè, keppèken oda dèng kebbas kènè, nang alè nang, soh mo mèlana kuakap, ai enggo sanga kudokken kami, tok ngo kami ukum bai ndènè! Janah kènè pè mèla ma ngo! ⁵ Idi ngo sebabna asa lebbèen kupasulak dengan èn mendahi kènè, lako pepulungken pengurupiin sienggo nidokken ndènè i kin. Kubakin bagidi asa roh kessa aku, enggo pulung kudapet. Merkitè bagidi terridah mo pemmerrèken ndènè i, ibas nienjar ukur ndènè nai ngo lako merrèken, oda kumarna terpaksa. ⁶ Èngèt mo! Simengardangken cituk, cituk ma ngo perraninna; tapi simengardangken mbuè, mbuè ma ngo perraninna. ⁷ Gennep mo memmerrèken ibas nienjar ukurna nai. Ulang mo malang atèna barang pè kumarna terpaksa. Ai ngkelleng ngo atè Dèbata midah kalak simersampang atè memmerrèken. ⁸ Merkuasa ngo Dèbata memmerrèken bai ndènè pasu-pasu mertinèncuk, asa tuk bai ndènè janah merlebbih-lebbih tupèh lako memmakin mendè. ⁹ Ai tersurat ngo ibas Bibèl bagèen: "Ipemberrèken ngo mendahi kalak sincor, menettap ngo mendè basaNa soh mi amman sumendah." ¹⁰ Ipèmaken Dèbata ngo bennih taba kalak simardang, bagi ma ipèmaken pangaan banta, Dèbata ma ngo pejadiken dekket pegandaken barang kadè niardangken ndènè, asa makin mbuè buah pennarihenmu simermasèh atè i. ¹¹ Merkitè bagidi kaya mo kènè ibas karinana, gabè dakdak mo kènè memerrèken ibagasen sampang atè. Janah kemmulihken pemmerrèken ndènè sikubagi-bagiken i, mengkerohken mbuè kalak mendokken lias atè taba Dèbata. ¹² Kerna simendè nibakin ndènè idi, oda pellin asa cukup bai ummat Dèbata sambing, tapi mengkerrohken nterrem kalak mendokken lias atè mi Dèbata. ¹³ Janah kumarna perrulaan ndènè mendè nituduhken ndènè i, gabè mèduk kalak Kristen i Judèa memmoji Dèbata, kerna idah kalak i ngo penguèen ndènè i Sukuten Kelluahen terrèngèt Kristus nikepercayaen ndènè i. Bagi ma kerna sampang atè ndènè memmerrèken taba kalak i dekket sidèban, kadè silotna janah ndorok bakinen ndènè. ¹⁴ Nai kalak idi pè isodipken mo kènè ibagasen kellengna mengidah kènè, kumarna basa-basa ni Dèbata sienggo ijalo kènè. ¹⁵ Sidokken mo mellias atè bai Dèbata, kumarna niberrèkenNa simertinèncuk idi.

¹ Bagèndari aku si Paulus, lot naing dokkenenku taba kènè. Idokken dèba ukum aku nina melamlam tikan hadep abè dekket kènè, tapi berrani nina, mula peddaoh-daoh. Jadi kumarna lamlam dekket mendè atè ni Kristus, ² kupido bai ndènè, ulang mo paksa kènè aku memmaing kasar taba kènè, roh kessa aku sikali èn. Ai enggo kusura-suraken, tegas mo aku sikali èn taba kalak simendokken, "lot nina tujuun nami terrèngèt dunia èn." ³ Tuhu nggelluh dèng ngo kami i tanoh èn, tapi oda bagè tanoh èn pemmaing nami. ⁴ Ai oda ngo i dunia èn nai sinjata nami, tapi sinjata bai Dèbata nai ngo janah mergegoh lako mengerumpakken pertahanen kejelmaan, kupesiding kami ngo persiroon-persiroon, ⁵ kurumpakken kami ngo nasa ukur ntudak simengilakken sibennar bai Dèbata nai. Kutaban kami ngo pikiren ni dèba, janah gabè penguèi kalak i taba Kristus. ⁶ Asa mula enggo seppè penguèi ndènè, enggo mo kebbas kami bagèndari lako menghukum kalak siso menguèi idi. ⁷ Naing mo bettohen ndènè keadaan sebenarna. Mula percaya ngo kalak i milik Kristus ia, kennah iperrèso mo dirina janah ibettoh mo; kami pè milik Kristus ngo bagè ia. ⁸ Ai oda ngo pella termalu kami mula buèen kupoji-poji kami siniberrèken Tuhan i bai nami, ai iberrèken pè bai nami kuasa i, lako pehèdu-hèduken kènè ngo, oda lako mencèdaken. ⁹ Oda ngo lako pebiar-biarken kènè aku merkitè suratku idi. ¹⁰ Idokken dèba ngo, "Surat-surat si Paulus ntegas ngo janah merseppuh, tapi mula i tengah-tengahta ia ndotè ngo ia janah oda mernidok ranana!" ¹¹ Kalak sibagidi satdar mo ia bagèndari nai, mula roh kessa kami sikali èn, kubaing kami mo tosè bagè sienggo kusuratken kami ibagasen surat idi. ¹² Tentu oda pang kami lako pedosken diri nami dekket kalak simengètong dirina enggo ndates. Ai moto ngo kalak i mula dirina ibakinken alat persukaten mi samah denganna. ¹³ Ukum kami oda uè bagidi. Mula pè kupoji kami diri nami, lot ngo batasna. Tettap ngo kami ibagasen batas sienggo itentuken Dèbata bai nami. Kènè pè alè dengan dekket ngo ibagasenna idi. ¹⁴ Jadi, mula roh kami mendahi kènè merembah Sukuten Kelluahen terrèngèt Kristus, oda ngo kulausi kami baleng bekkas ulaan nami i, kerna kènè pè ibagasenna idi ngo. ¹⁵ Oda ngo gabè gegah kami kumarna perrulaan sidèban i i ruar sienggo nitentuken Dèbata. Tapi makin gandana mo ulaan nami i tengah-tengah ndènè, asa makin mertambah-tambahna kepercayaen ndènè, tapi tong mo ibagasen sienggo itentuken Dèbata bai nami. ¹⁶ Merkitè bagidi, terbakin kami mo mennukutken Sukuten Kelluahen i mi nagerri sidèban, siso pella memmoji-mojiken diri ibas ulaan i bekkas nagerri sidèban. ¹⁷ Ibas Bibèl tersurat, "Barang isè gegah, ibagasen Tuhan idi mo ia gegah." ¹⁸ Ai kalak siterpoji, imo kalak sienggo nipoji Tuhan i, oda ngo kalak simemmoji dirina.

¹ Selloh ngo lebbè mula idengkohken kènè sigejap kemmotonku sicituk ènda. ² Nteddoh kalohoon ngo aku midah kènè, bagè Dèbata sendiri pè nteddoh midah kènè. Codi ngo kènè bagè simerbaju tertatakken rambu-rambu dèng, sienggo kuuèken kabin ia mi sada kalak sinibalèna, imo Kristus. ³ Tapi sangsi aku, tah bakunè mulak matah pikiren ndènè gabè oda metemman taba Kristus, tosè bagè si Hawa arnia, tergoda ibakin taki-taki bècuk nipè i. ⁴ Ai rupana sennang ngo kènè menjalo kalak siroh mengajarken terrèngèt Jesus sidèban -- laèn dari pada Jesus sienggo ipetandaken kami bai ndènè i. Janah ijalo kènè ma ngo "tendi" dekket "sukuten kelluahen" siso tosè bagè Tendi Dèbata dekket Sukuten Kelluahen sienggo nijalo ndènè bai nami nai. ⁵ Oda ngo kètèken aku asa rasul-rasul ndènè simahantu i! ⁶ Tah bakunè kurang pandè aku mengerrana, tapi ukum perbinettohen terrèngèt Dèbata, oda ngo moto aku. Enggo kutuduhken kami i bai ndènè ibas karinana. ⁷ Tikan kusukutken Sukuten Kelluahen bai Dèbata nai mendahi kènè, oda lot kupido bai ndènè nai mahan belanjangku giam cituk pè, merkitè bagidi kupecerrep ngo diringku, asa gabè ndates kènè. Jadi salah ngo aku merradepken kènè ndia kumarna bagidi? ⁸ Ai sinderrang mengula aku i tengah-tengah ndènè, bai kuria sidèban nai ngo belanjangku. Terdokken rogi kubaing kuria sidèban, asa ndorok mengurupi kènè. ⁹ Mula pè kurangen belanja aku tikala i, oda lot barang isè bai ndènè nai kususahi, ai barang kadè kekurangen bangku mènter ngo isediaken dengan siroh i Makedonia nai. Dak kujaga ngo asa ulang kususahi kènè i barang kadè pè dekket barang i dikè pè kènè, janah dak kubakin ngo bagidi soh mi podiin èn. ¹⁰ Kumarnaken peddah Kristus silot bangku i, oda ndorok murak kebangganku barang i dikè pè i suberri Akhaya. ¹¹ Kasa kudokken bagidi? Kumarna oda ngo ngkelleng atèngku midah kènè? Ibettoh Dèbata ngo ngkelleng atèngku! ¹² Sikuulaken bagèndari i, kuulaken ngo bagi mi podiin èn, asa ulang lot cidalihen rasul-rasul sidèban i lako gegah ninganna idokken, dos ngo nina pengulanken kalak i dekket aku. ¹³ Kalak sibagidi mo rasul-rasul palsu, pengula sipakulah-kulahken, rasul-rasul Kristus ia nina. ¹⁴ Oda pella lengang kita i si, ai Sibolis pè ipakulah-kulah ngo bagè malaèkat kecihuren i! ¹⁵ Jadi oda pella lengang kita mula ipakulah-kulah naposo Sibolis bagè naposo simengulaken nipergeddo Dèbata. Ujungna ijalo kalak idi rembang bagè perulanna i. ¹⁶ Kuulaki sikali nai mendokken: Ulang lot merdokatè, moto aku. Tapi ukum bagidi tong anggapen ndènè, jalo kènè mo aku simoto èn, asa terpoji aku diringku cituk. ¹⁷ Kudokken mo lebbè kebangganku. Tapi oda ngo Tuhan i mendokken bangku. Tapi bagè sada kalak simoto mo lebbè aku. ¹⁸ Nterrem ngo kalak gegah kumarna dunia èn, jadi aku pè gegah ma mo cituk. ¹⁹ Ai sobar ngo kènè mengidah simoto, ai dokatè ndènè pandè ngo kènè! ²⁰ Mula iperhamba dèba kènè, barang pè gabè pencari-carina janah gabè perlabanna, janah datessen ia katèna, pang memmarap kènè, gabè ijalo kènè mo sibagidi. ²¹ Mèla ngo kuakap mendokken èn, ai kalak ndotè ngo kami mengulaken bagidi. Tapi kadè siniggegahken dèba, pang ma ngo aku menggegahken! (Bagè rana simoto ngo ranangku èn.) ²² Kalak Heber ngo kalak idi? Aku pè kalak Heber ma ngo! Kalak Israel ngo kalak idi? Aku pè kalak Israel ma ngo! Pemparen si Abraham ngo kalak idi? Aku pè bagi ma ngo! ²³ Naposo Kristus ngo kalak idi? Dengkohken bagè rana siso merpendèngèt ngo enggo ranangku, tapi terlebbih ngo pengkebasingku bai kalak i nai karina! Ai lejaan ngo aku mengula asa kalak i; nggati ngo aku ikurung, nggati ngo aku isiksa janah nggati ngo naing matè. ²⁴ Enggo lima kali aku isiksa kalak Jahudi, ibetbet tellupuluh sibah kali. ²⁵ Tellu kali aku ipekpekki kalak Roma, pennah ngo aku ibentiri dekket batu, tellu kali aku mengalami naing karam i laut, sikali aku mombang-ombang i laut duapuluh empat jom dekkahna. ²⁶ Nggati ngo aku mermara i perdalanen; mermara ibas laè mengeraja, mermara ibaing pennamun, mermara ibaing Jahudi dekket kalak siso Jahudi pè, mermara i kuta, mermara i ruar kuta, mermara i laut dekket mermara i tengah-tengah kalak simengaku dirina Kristen, keppèken oda. ²⁷ Dak ngo kureppuk tulanku mengula ibagasen kesusahen, nggati maker matangku kumarna oda meddem, muasen janah mellèhè, nggati rapar, bergohen kerna oda lot oles, janah oda lot bekkas merrian. ²⁸ Laènkenna idi, suntuk ari ngo aku dakdak kekelsohen memmikirken karina kuria. ²⁹ Mula lot ndotè, aku pè gabè ndotè, mula lot ndabuh mi dosa mellala ngo atè-atèngku. ³⁰ Mula kennah gegah mo aku, mergegahen ngo ketteridahen ibas kinindotèngki. ³¹ Oda luap aku; Dèbata, Bapa Tuhan Jesus ngo saksi! Terpoji mo gerarNa soh mi amman sumendah. ³² Tikan i Damaskus aku, lot ngo i sidi sada kalak Gubèrnur memerèntah i terruh kuasa Raja Aretas. Ipasulak ngo soridadu menjaga kuta i, lako menangkup aku. ³³ Tapi ibagasen sada kirang itontonken dengan i ngo aku lako mi terruh arap ruang pagar. Gabè maluah mo aku i sidi nai.

¹ Nemmuken oda ngo lot barang kadè labana gegah. Tapi lemmo ngo atèngku menggegahken nipacidah Dèbata bangku arap alamat bak alaten. ² Lot mo kutandai sada kalak Kristen, icukung mi bekkas sindatesna i sorga, imo sipuluh empat tahun sienggo leppas (tah ibagasen dagingna ia tikan icukung i barang i ruar dagingna, oda pella kubettoh -- Dèbata ngo mettohsa.) ³ Kudokken sikali nai: Kubettoh ngo icukung ia mi Paradaiso (Tah ibagasen dagingna ia tikan icukung i barang tah merupaken alaten sambing, oda pella kubettoh -- Dèbata ngo memmetohsa.) ⁴ Idengkoh kalak i ngo i sidi terrèngèt perkataan siso tellap iranaken jelma, janah oda ma ipadiat iranaken jelma. ⁵ Ia ngo sikupeppoji-poji, oda ngo diringku. Ai ukum terrèngèt diringku, pellin ketteridahen kinindotèngku i ngo kugegahken. ⁶ Asa mula pè kugegahken diringku, oda uè aku bagè pembual, merkata luap; situhunna i ngo kuruapken. Tapi kuorom ngo i, asa ulang laèn aku idah dèba ibas sienggo niidahna kuulaken, barang pè sienggo idengkoh kuranaken. ⁷ Tapi asa ulang gabè jukkatsu aku kumarna alaten-alaten sikuidah i, ibakin ngo mersakit aku bagè rumang perkitèen alat Sibolis. Sakit idi mo ibakin lako menendel aku, asa ulang gabè sombong aku. ⁸ Tellu kali mo aku enggo mersodip mi Tuhan, asa nemmuken iagoi sakit idi bangku nai. ⁹ Tapi ialoi Tuhan i ngo, "Ngkelleng ngo atèngku midah kono, janah cukup mo i bamu; ai tikan ndotè kono isi mo roh kuasangKu simergegohna." Kerna i ngo asa kupoji diringku ipas kendotèenku idi, ai mula ndotè aku, tikanna bagidi ngo kuakapken roh Kristus mengurupi aku dekket kegegohenNa. ¹⁰ Jadi lolo ngo aku mula pè ndotè aku. Lolo ngo aku mula pè ilèai dèba aku, barang pè mula susah kuakap, barang mula iletlet dèba aku, barang pè mula mpersah kuakap kumarna Kristus. Ai tikan ndotè idi aku, isidi mo aku gabè mergegoh. ¹¹ Enggo gabè dosken kalak moto aku -- tapi kènè ngo menessakken aku asa gabè bagidi, kènè kin ngo nemmuken memmoji aku. Ai oda pè kadè lapatenku, tapi oda pella talu aku dempak rasul-rasul ndènè simahantu i! ¹² Enggo mo nemmuken nibaing tanda-tanda kellengangen merkitè-kitè kebingiten taba kènè, magahken tuhu ngo aku rasul. ¹³ Ibas kadè mo kènè mak niperdatèken mertimbangken kuria sidèbanna idi? Pellin, oda kususahi idi mo kessa kènè lako memelanjoi aku. Ampuni kènè mo kessalahenku idi! ¹⁴ Enggo pella petellu kaliken aku kebbas lako mendahi kènè, janah oda kususahi kènè, ai oda ngo harta ndènè i perlu bangku, tapi diri ndènè i ngo. Ai oda ngo patut dukak-dukak mennarihken pangaan partuana, tapi partuana ngo mennarihken pangaan dukak-dukakna. ¹⁵ Kernana i, sampang ngo atèngku mengururi, barang soh nola pè diringku kugiaken lako mengkepkep kènè. Bagi mo ngkelleng atèngku midah kènè, ai patut nola mo kurang ngkelleng atè ndènè midah aku? ¹⁶ Ipertuhu kènè ngo oda nung kènè kususahi. Tapi lot ngo mendokken perakkal-akkal nina aku; ai buèen nina perlabaenku bai ndènè nai kumarna akkal-akkalku idi. ¹⁷ Idikè mo tuhu i! Lot ngo perlabanku bai ndènè nai kumarna kupasulak i utusenku mendahi kènè? ¹⁸ Kupasulak ngo tuhu si Titus mendahi kènè, janah kupasulak ma ngo dengan Kristen sidèbankenna i rebbak dekket ia. Lot ibuat si Titus perlabaan bai ndènè nai? Ai rebbakken mengual ngo kami, janah bagè aku ngo ia i perrukuren dekket i pertendiin pè! ¹⁹ Tah lot sura-sura ndènè sidekkahna èn, bagè cara kupènterri kami diri nami merradepken kènè? Oda ngo bagi! Alè sinikekellengen! Ibettoh Dèbata ngo karina sikuruapken kami bai ndènè idi, tosè mi lemmo atè ni Kristus ngo i kuruapken kami. Karinana sikubakin kami i lako pehèdu-hèduken kènè ngo i. ²⁰ Ai mbiar ngo aku tah bakunè oda kudapet kènè ipas pekkirohku sikali èn tosè bagè sikuharapken kin, janah aku pè tah oda ma bagè niharapken ndènè. Tah bakunè nola lot perselisihen, nangis atè, pungur, pegulut, merkata tondal, jukkat dekket maing gontar. ²¹ Mbiar aku tah bakunè ipeterruh Dèbata sikuuèi i nola aku i hadeppen ndènè tikan roh i aku mendahi kènè. Tah bakunè pella nola kutangisi sienggo merdosa i, kumarna oda mobah idi dekket oda ipettadi pengelakona luhlah idi, bak perbuatenna simellamun janah siso patut i.

¹ Èn mo petellu kaliken aku roh mendahi kènè. Ibas Bibèl tersurat ngo "Mula lot dua barang tellu saksi, ndorok mo iputusken perkara i." ² I pekkirohku pedua kaliken tikala i, enggo kupesèngèt karinana simengulaken dosa bak mi dengan pè. Ukum bagèndari tikan peddaoh-daoh dèng aku dekket kènè, kupesèngèt mo kènè; mula roh aku isè poda maluah sikali èn ibas hukumen nai. ³ Nai dapet kènè mo karina bukti siniperluken ndènè magahken tuhu-tuhu ngo Kristus mengerrana merkitèken aku. Mula sanga Kristus memmakin barang kadè taba kènè, oda ngo alang-alang Ia pecidahken kuasaNa taba kènè. ⁴ Tuhu bagè ndotè ngo Ia tikan ipersilangken idi, tapi nggelluh ngo Ia bagèndari kumarna kegegohen Dèbata. Ndotè ma ngo bang kami pè, kumarna ibagasen Kristus kami nggelluh, tapi ukum lako pesèngètken kènè mergegoh ngo kami rebbak dekket Kristus kumarna kegegohen dekket kuasa Dèbata. ⁵ Oji kènè mo diri ndènè janah perdatèken kènè, tah tuhu-tuhu ma ngo kènè nggelluh tosè bagè pengkepercayai ndènè mi Kristus! Oda ngo satdar kènè, Kristus Jesus ngo ibagasen kènè? -- Laèn mo mula kepercayaen ndènè i oda tuhu-tuhu kepercayaen. ⁶ Kuharapken ngo asa bettohen ndènè, kami pè mennahen ngo ibas pengunjunen. ⁷ Kusodipken kami ngo mi Dèbata, asa iurupi kènè ulang mersalah nèngè. Oda ngo mendokken enggo pandè janah enggo tau kami, tapiasa iulaken kènè ngo lemmo atè Dèbata -- tukasi pè oda tau kami idahen. ⁸ Ai oda terbakin kami mengulaken simerralo bai Dèbata. Kennah kuuèi kami ngo nipergeddo atè ni Dèbata. ⁹ Lolo ngo kami mula ndotè kami, janah mula mergegoh kènè. Kusodipken kami ngo asa gabè ntegguh ukur ndènè. ¹⁰ Kerna naidi ngo asa kusuratken surat èn bai ndènè sinderrang oda dèng roh aku mendahi kènè, asa mula enggo kessa soh aku mendahi kènè, ulang pella nèngè ngkerrassu pemincangku taba kènè mengasangken kuasa niberrèken Tuhan i bangku lako pehèdu-hèduken kènè, ulang mo lako mencèdai. ¹¹ Èn pè alè dengan! Dak nggasang mo atè ndènè, janah uè mo kènè pehèdu-hèduun asa gabè ntegguh. Jalo kènè mo peddah janah sipesèngètku èn. Sada ukur mo kènè janah mersada ibagasen kedamèen. Idengani ngkelleng atè dekket damè ni Dèbata mo kènè. ¹² Mersisalamen mo kènè ibagasen ngkelleng samah-samah Kristen. Karinana ummat Dèbata mennengesken salam mendahi kènè. ¹³ Katerra pè, Tuhan Jesus Kristus mo memmasu-masu kènè, bagi ma ngo masèh atè Dèbata. Tendi Dèbata mo mendengani kènè karinana! Tabe nami, Paulus