1 TIMOTEUS

¹ Alè Timoteus anakku sibujur ibagasen Tuhan i! Dukakku ngo kono kumarna percaya ko bai Kristus. Rasul Kristus Jesus ngo aku simenuratken surat èn. Gabè rasul ngo aku ipebangkit Dèbata Sipaluahken kita i, dekket merkitè-kitè Kristus Jesus pengharapenta i. Dak masèh mo atè Dèbata Bapa dekket Kristus Jesus Tuhanta i midah kono, janah iberrèken mo bamu pasu-pasu dekket damè. ³ Kupido bamu asa tong kono merian i Epesus, bagè sienggo kudokken taba kono, tikan naing laus aku mi Makedonia. Kudokken kono merian i Epesus kumarna lot i sidi barang piga-piga kalak mengajarken peddah siso tuhu, janah kennah dokkenkenmu asa ipettadi ajar latlatna i. ⁴ Pesèngèt kalak i asa ulang ipejojor-jojor tori-toriin dekket cundut-cundut siso merujung sudah. Ai pellin petubuhken perselisihen sambing ngo kessa karina i, janah oda ngo ipesaut taki Dèbata sindorok tandaan merkitè pellin percaya baNa. ⁵ Ukum nitèmbak peddah idi, imo asa gabè perkelleng atè jelma idi ibas pusuh peratènna nai, ibagasen pennarihen dekket ibagasen kepercayaen siso meradum. ⁶ Lot ngo dèba oda ibagasenna idi nèngè. Ai gabè laling ngo kalak idi ipas songsang siso merguna. ⁷ Naing ngo katèna gabè guru-guru agama kalak idi, keppèken oda iarti kalak i kata niruapkenna dekket niindangkenna. ⁸ Sibettoh ngo, mendè ngo ukum pati-patiin i mula rembang mi si pemakkèna. ⁹ Tapi kennah èngèten, iberrèken pè pati-patiin i oda ngo taba kalak simengulaken merandal tapi bai kalak perjahat siso menandai Tuhan ngo, dekket taba kalak perdosa, siso meragama simenguèi nipergeddo dunia èn; dekket taba kalak simemunuh partuana, dekket taba karina kalak pemmunuh jelma, ¹⁰ bang taba kalak simerpengelako luhlah, perlangkah julu meddem, pennamun, perluap; taba kalak saksi palsu dekket taba karina kalak simengalo peddah sènteng i. ¹¹ Ukum peddah idi imo Sukuten Kelluahen bai Dèbata nai simermulia i janah patut sipoji Ia sipesakatken bangku ulaan i, asa kujamitaken. ¹² Mendokken mejalo metangkup ngo aku taba Jesus Kristus Tuhanta i, sienggo merrèken bangku gegoh lako mengkebasiSa, janah mendilo aku mi bahaan i. ¹³ Ai kalak pengerèhèi kin ngo aku tikala i, janah pengeletlet ninganna mengellèaiSa. Tapi tukasi pè bagidi, masèh ngo atè Dèbata midah aku, ai oda dèng ngo aku percaya janah oda kubettoh dèng kin sikubakin i. ¹⁴ Keppèken gabè mertinèncuk ngo iberrèken Tuhan i bangku sibasa-basaNa. Ibaing ngo aku ndorok gabè percaya baNa janah mengkekelengi dengan jelma. Gegoh sibagidi iberrèken ngo taba kita karina sienggo sada ibagasen Jesus Kristus. ¹⁵ Kettoken ngo kata èn -- kerna naidi patut ngo sijalo i janah sikepercayai -- : "Enggo roh Jesus Kristus mi dunia èn lako paluahken jelma perdosa." Aku mo jelma perdosa sijahatna, ¹⁶ tapi kumarna naidi ngo asa masèh atè Dèbata midah aku. Asa ndorok ituduhken Jesus Kristus karina lambas ukurNa midah aku jelma perdosa èn. Janah èn mo gabè sada codiin taba karina jelma sinaing percaya baNa asa gabè terolih kenggelluhen simenettap i. ¹⁷ Kennah sipoji ngo Dèbata Raja sidekkah-dekkahna, ai hot ngo Ia soh mi amman-sumendah. Sada ngo Ia janah oda teridah! Amèn. ¹⁸ Alè anakku Timoteus! Èn mo bahaan kupesakat bamu, mernèngèt sinidokken Dèbata merkitè nabi-nabi i Kuria tersèngèt dirimu. Pakkè mo i mahan sinjatamu lako mengulaken ulaan selloh. ¹⁹ Mengula mo kono ibagasen kepercayaen situhunna dekket ibagasen ukur mpanting. Lot ngo dèba oda isarihken gertek pennarihenna, gabè ncèda mo kepercayaenna. ²⁰ I mo bagè si Hemeneus dekket si Aleksander. Enggo kupesakat kalak i sidua bai Sibolis, asa merguru nola kalak i lako mentadi menumpahi Dèbata.

¹ Perlebbè kalohoon peddahku bamu imo: Dak mersodip mo kono mengido taba Dèbata ninganna mengondiken dengan janah mendokken mejalo metangkup bai Dèbata kumarna karina dengan; ² mengkepkep karina raja dekket karina kalak perkuasa. Pido mo asa sennang kita janah oda lot mara banta lako mengulaken bahanta bai Dèbata. ³ Sodip sibagidi ngo merandal janah ikellemmoken Dèbata Sipaluahken kita. ⁴ Ipergeddo ukurNa ngo asa karina jelma maluah janah menandai kesèntengen i, ⁵ kerna sada ngo kessa Dèbata janah sada ma ngo kessa sipedemmuken Dèbata bak jelma i, imo Jesus Kristus. ⁶ Iberrèken ngo diriNa mahan tebbus karinana jelma ipas dosana nai. Merkitè bagidi ipacidah Dèbata ngo tupung ketikana selloh, magahken Ipergeddo ukurna ngo naing paluahken karinana jelma. ⁷ Kemulihkenna idi ngo asa ipasulak aku mendahi kalak siso Jahudi lako magahken bai kalak i sukuten tersèngèt kepercayaen sènteng. Tuhu ngo sikudokken èn, oda luap i. ⁸ Barang i dikè sambing pè naing mo karina anak laki mersodip taba Dèbata ibagasen ukur mpanting, ulang merdengan pungur barang pè rubat. ⁹ Dok atèngku bang daberru pè, biasa-biasa mo pemakkèna janah rèntem. Ulang mo tikka ibaing potongen bukna merpakkè-pakkèen emmas tah pè mutiara tah gedda simahal hargana. ¹⁰ Tapi naing mo karina daberru memakkè merkitè pengèlako rèntem bagè patutna bai daberru simenguèi Dèbata. ¹¹ Kennah mersiajar ngo daberru i nono janah tuhu-tuhu merpenguèi. ¹² Oda kupaduè daberru mengajar barang pè mengerajai sinibalèna; sandok kennah nono ngo kalak i. ¹³ Kerna si Adam ngo perlebbè itempa Dèbata, nai pè asa si Hawa. ¹⁴ Janah oda ngo si Adam ioto-otoi, tapi daberru i ngo gabè mengelausi i perèntah Dèbata. ¹⁵ Tapi tukasi pè bagi merkitèken menubuhken dukak, gabè maluah ngo daberru i, asal mo tettap ia mercerrep ukur merkepercayaen bai Kristus janah tettap merkelleng atè bak metemman i hadeppen Dèbata.

¹ Kata bennar ngo èn, "Barang isè kalak mennulusi ulaan gabè pengendeng i kuria, selloh kalohoon ngo i, ai ulaan maharga ngo nitulusenna i!" ² Kerna naidi ulang mo lot sitikasen perulaan pengendeng; pellin sada kalak mo ukum sinibagesna; merpengerrem, bijak, metemman, dak mersampang atè mertamuè janah pandè mengajari bak memmeddahi; ³ ulang permabuk, ulang perrubat-rubat, kennah perlemlam ngo ia janah perdamè. Ulang mbara matana midah riar. ⁴ Pandè mengerajai denganna sada bages, perdukak simenguèi ajar bak mehormat janah menguèi bana. ⁵ Kerna mula oda ngo ibettoh mengajari pengisi bagesna, bakunè mo ia ndorok mengatur kuria Dèbata? ⁶ Ulang mo kalak sirembaru gabè Kristen ibaing gabè pengendeng, asa ulang ndates ukurna, asa ulang gabè ndabuh ia mi hukumen bagè si Sibolis arnia. ⁷ Kennah mendè ngo beritana bai jelma nterrem, mula oda bagidi ilèai dèba mo ia, janah gabè ndabuh nola ia mi bagasen tinogong Sibolis i. ⁸ Bagidi ma ngo kalak sipengurupi ipas bahaan kuria, kennah kalak bujur ngo ia; oda ndorok kalak sisobur pola barang mbara matana midah riar. ⁹ Kennah kalak perkepercayaen ntegguh mi kekristenen sienggo nipeterrang Dèbata. Kennah iulaken kalak i ngo i, ibagasen pusuh peratènna mpanting tuhu-tuhu. ¹⁰ Kennah ioji ngo lebbè ia, nai mula oda lot terdapet tikasna, baru pè asa ndorok ipebangkit ia gabè pengurupi i tengah-tengah kuria. ¹¹ Sinibagesna pè kennah kalak metemman ngo, ulang njalmit pekata-kataken janah peroha-rohaken sidèban. Kennah kalak merpengerrem ngo ia janah kettoken ipas karinana. ¹² Kalak pengurupi ibahaan kuria, kennah sada ngo kessa sinibagesna. Kennah ibettoh mengatur dukak-dukakna dekket sinibagesna. ¹³ Mula enggo selloh perulanna i pengurupina i ulaan kuria i, ihormati dèba mo ia, janah makin nggasangna mo ia mengerranaken taba jelma tersèngèt kepercayaen bai Kristus. ¹⁴ Harap ngo aku oda pella sadikè dekkah nèngè, roh mo aku mendahi kono. Tapi tukasi pè bagidi, kutengesken ngo surat èn mendahi kono, ¹⁵ asa tah bakunè mellaun nola aku asa roh, giamken enggo ibettoh kono kin bakunè patutna kita merpengelako i hadeppen Dèbata, imo kuria Dèbata singgelluh i. Ai kuria i ngo dosken binangun janah simenjujung kebennaren bai Dèbata nai. ¹⁶ Isè poda terbakinsa mempersomada bagidi mbagesna rusia agamanta i: Ipetarar ngo diriNa merupaken jelma janah enggo ipetandap Tendi Perbadia kebennarenna janah enggo idah malaèkat-malaèkat i. Enggo idengkoh karina bangsa beritaNa janah enggo percaya dunia èn bana, janah enggo laus Ia mi sorga.

¹ Tapi ntangkas ngo idokken Tendi Perbadia; gabè merbalik ngo dèba luas ipas kepercayaen i nai, oda nèngè menguèi peddah Kristus. Gabè penguèi mo kalak i mi tendi pengoto-ngotoi simengellalingken dekket mi pengajar-ngajari tendi jahat, ² imo sinijarken kalak perbuah ringadar bana perluap. Enggo gellap pennarihen kalak i. ³ Ipeddahken kalak i ngo taba jelma, asa ulang jejap janah ulang ipangan dèba pangaan nihanaken Dèbata. Keppèken ihanaken Tuhan i ngo karina pangaan i, asa ipangan jelma i enggo kessa lebbèen idokken mejalo metangkup bai Dèbata siniruapkenNa kerna percaya ia bai Kristus janah enggo itandai peddah merandal bai Dèbata nai. ⁴ Ai merandal ngo karina sinihanaken Dèbata, janah sada poda ipas si nihanakenna i nai haram, mula enggo nijalo ibas ukur menjalo metangkup taba Dèbata. ⁵ Halal ngo karinana pangaan kumarna bai Dèbata nai ngo rohna janah mula enggo nisodipken taba Dèbata. ⁶ Mula ipeddahken kono i bai karina dengan sisada kepercayaen, naposo Jesus Kristus simengulaken selloh mo kono. Janah kennah kenggelluhenkenmu ngo ibas ukurmu kata Dèbata sisipercayai i, rebbak dekket peddah kesèntengen nigurukenmu sapatna èn. ⁷ Pesisi mo tori-toriin kesipèlèbèguun siso merguna i, pecemmal-cemmal mo dirimu mi nggelluh sinikellemmoken atè Dèbata. ⁸ Cituk ngo kessa guna pekebbelken daging, tapi ukum pecemmal-cemmalken diri mi simerandal, mi karinana ngo merguna i, ai merpengkerrohken ngo i mi nggelluh bagèndari dekket tikki silako roh. ⁹ Kettoken ngo kata èn janah sikepercayaen. ¹⁰ Kumarna naidi ngo asa leja kita janah mertuhu-tuhu mengula ai mengharapken Dèbata singgelluh i ngo kita, Ia ngo Paluahken karina jelma, tapi merkesurungen ngo kalak sipercaya i. ¹¹ Peddahken mo karinana i janah dokken mo asa iulaken kalak i. ¹² Ulang belli pis mata ndèba midah kono kumarna bajar i dèng kono. Tapi kennah codiin mo kono taba kalak sipercaya, merkitè-kitè pengerananmu, pengelakomu, ngkellengmu, kepercayaenmu dekket nggelluhmu simetemman i. ¹³ Ninganna idi mèma roh aku, empet mo menjakaken Bibèl taba sinterrem i janah ajari mo kalak i. ¹⁴ Ulang menahang ukurmu mernèngèt sibasa-basa Tendi Perbadia sienggo lot bamu. Ai ijalo kono i tikanna i, lebbè iampèken pengendeng kuria ngo tanganna mi babontakalmu, janah nabi-nabi pesakatken tennah Dèbata terrèngèt dirimu. ¹⁵ Mertuhu-tuhu mo i ulaken asa idah jelma nterrem karina kemajunmi. ¹⁶ Perdatèken dirimu dekket pengajarenmu, kennah tutus ukurmu mengulaken i karinana, ai paluahken dirimu ngo dekket kalak simendengkohken kono mula ibaing kono bagidi.

¹ Ulang sergangi situa-tua. Tapi èlèk-èlek mo ia gabè dosken bapa bamu, janah ètong mo dosken dèdahenmu kalak mula posoon dèng ia bamu nai, ² janah ètong ma mo daberru sienggo tua-tua i dosken inangmu. Mula simerbaju, ètong mo ia dosken turangmu, nai kennah rèntem bana metemman ngo kono merpengelako taba kalak i. ³ Persangapi daberru simebbalu sitading pellin sadasa. ⁴ Tapi mula merdukak janah merkempu ngo enggo daberru simebbalu i, ajari mo pinemparna i, asa isarihken kalak i kadè-kadèna i, janah memmales kiniselloh partuana barang empungna pè, ai idi ngo ikellemmoken Dèbata. ⁵ Tapi daberru simebbalu siso lot sima-simana sindorok mennarihkensa, mengharap mo ia bai Dèbata, janah mersodip mo ia gennep ari gennep berngin mengido pengurupiin bana nai. ⁶ Tapi ukum daberru mebalu simengulaken cubellek-cubellek dagingna, sienggo matè ngo tendina tukasi pè nggelluh dèng ia. ⁷ Pesakat peddahmu bai kalak i asa ulang sirèhèen kalak i. ⁸ Mula lot siso mennarihken kadè-kadèna, terlebbih mula sincelketna, sienggo mengelausken kepercayanna sendiri ngo kalak sibagidi, jahaten dèng ngo ia daripada siso percaya i. ⁹ Siterdokken daberru mbalu imo: kennah enggo merumur ennempuluh tahun janah pellin sikali ngo kessa ia jejap; ¹⁰ mendè pengelakona, umpamana; enggo ipehèdu-hèdu dukakna soh mbelgah, mersampang atè menjalo tamuè mermalam i bagesna, mengkebasi kalak sipercaya, mengurupi kalak susah, janah simengulaken mertuhu-tuhu karina matcam bagè ulaan simerandal. ¹¹ Ulang dèng pemmasuk mi sidi daberru mbalu mula narih matah dèng ngo dagingna, ai tah mula sèkel dèng ia jejap, gabè kurang sètia ngo ia bai Kristus. ¹² Salah ngo kalak i kumarna iosè padanna sienggo iberrèken bana. ¹³ Ningan naidi bagè pesia-siaken tikki ngo kalak sibagidi saik mi jèhè saik mi julu. Simparahna dèng dak iperoha-roha ngo sidèban janah icampuri siso ulanna, nai nggèut ngo sibagidi mengeruapken kata siso patut ruapenken. ¹⁴ Kerna naidi, lotiin mo sijahè nola daberru sinceppet mebalu i asa lot dukakna janah asa ipehèdu-hèdu bagesna, asa ulang lot botcir bai musuh-musuhta i lako peroha-rohaken kita. ¹⁵ Ai lot ngo dèba simebbalu i merbalik nola laus mengèkutken tendi jahat. ¹⁶ Tapi mula lot sincelket kalak Kristen mebalu, kennah ipehèdu-hèdu kalak Kristen sincelketna i mo ia, ulang ibelli kuria i pehèdu-hèduken; asa tah lot simebbalu siso mersima-sima, sibagidi mo ipehèdu-hèdu kuria. ¹⁷ Pengendeng kuria simertuhu-tuhu mengulaken kepengendengenna, patut ngo ihargai kuria i dua kali lempit, terlebbih-lebbih pengendeng singkasah merjamita dekket memmeddahi. ¹⁸ Ai tersurat ngo ibas Bibèl, "Oda kontamen kerbo tikan mengerrik ia," bagi dèng ma, "Merupah ngo karina simengula." ¹⁹ Mula lot pengaduun tersèngèt sada kalak pengendeng, oda mèter jaloon pengaduun i, ukum oda lot dua barang tellu kalak saksi. ²⁰ Kalak perdosa, pincang mo ia i hadeppen kuria i, asa gabè mbiar sidèbankenna i. ²¹ Kupido bamu i hadeppen Dèbata dekket Jesus Kristus bak malaèkat-malaèkatna siterpilih i, asa ijamotken kono sipessèngètku èn ibagasen ukur borjok, ulang pella mersèto ukurmu ulang merdikkan kono. ²² Ulang kono merudu-rudu mengampèken tangan lako pebangkitken kalak gabè pengendeng. Ulang ko mersaor taba kalak perdosa, tapi jamotken dirimu asa tong mpanting kono. ²³ Ulang pellin laè sambing iènum kono; ènum ma mo situk-situk anggur ai tambar beltek ngo i kumarna nggati ko mersakit-sakit. ²⁴ Ukum dèba enggo ntarar dosana tukasi pè madèng irungguken, tapi dèba lebbè perpodi pè asa terbettoh dosana. ²⁵ Bagidi ma dèba ntarar ngo perulanna merandal, janah siso mudah idahen pè tong ngo oda mèter terrus mboni.

¹ Barang isè kalak Kristen gabè hamba, iètong mo indukna i patut pesangapenna asa ulang terrèhèi dèba Dèbata bang pè pengajarenta i. ² Tapi mula Kristen ngo induk hamba i, ulang mo mapas iakap nola indukna i, kumarna samah-samah kalak Kristen i kalak i. Tapi makin ulukna mo pengkebasina bai indukna i, kerna kalak Kristen ngo indukna i janah sinikekellengen. Karina mo idi kennah ajarken janah peddahken. ³ Mula lot kalak mengajarken laèn daripada i, janah oda toko iakap peddah tuhu janah merandal bai Tuhanta Jesus Kristus idi nai, dekket peddah agamanta. ⁴ Kalak tunggang ngo sibagidi, janah oda lot kadè pemettohna. Ntagi kalohoon ngo iakap kalak sibagidi mersoal janah petangkis tersèngèt sada-sada perkataan, gabè pekerohken cian atè, perselisihen, rèhè-rèhè, rubat dekket penukasiin simeroha i, ⁵ bagi ma persilisihen siso mengadi-ngadi bai jelma sienggo ncèda ukurna. Ai idokdok ndorok gabè bèak ibas agama i nai. ⁶ Pengemoon mbellen ngo tuhu agama i, mula ikesabamken silot bana i bas ukurna. ⁷ Ai oda lot siembah mi dunia èn. Janah oda lot kadè terembah kita bang lako menadingken dunia èn. ⁸ Jadi mula lot banta pangaan barang perrolessen, sikesampangken mo i! ⁹ Barang isè naing bèak, ndabuh ngo i mi bagasen pengunjunen dekket sambil cubellek kemmotoon simengago i, mengelennengken jelma i mi tulbang dekket kemagoon. ¹⁰ Ai urat ni karina kejahaten ngo mula mbara mata midah riar, dèba pellin idi sambing ngo iayaki, gabè itadingken peddah Kristus, gabè iabinken bana mermatcam bagè simbernit memmaing gabè mellui ukurna. ¹¹ Tapi milik Dèbata ngo ukum kono, kerna naidi kennah pedaoh dirimu i sidi nai. Usahaken mo gabè kalak bennar i hadeppen Dèbata janah merpenguèi bana ninganna percaya bai Kristus, siperkelleng, mbingit ibas sitahanen, janah perukur lamlam. ¹² Burju mo kono mertuhu-tuhu nggelluh sebagè kalak Kristen, asa ndorok kono mengayaki kenggelluhen siamman sumendah i. Ai dempak i ngo kono idilo Dèbata tikanna iakuken kono i hadeppen jelma nterrem magahken percaya kono bai Kristus. ¹³ Bagèndari i hadeppen Dèbata simemerèken kessah bai karina simenggormit dekket i hadeppen Jesus Kristus simengindangken situhunna i hadeppen si Pontius Pilatus bagèen mo kupidoken taba kono: ¹⁴ Uèi mo karina patiin èn, janah ulang ketikasen soh mi pekiroh Tuhanta Jesus Kristus pedua kaliken. ¹⁵ Enggo kin ngo itentuken pekirohna i tupung ari sinipilih Dèbata sendiri. Ia ngo kessa merkuasa janah meheji. Raja ni karina raja janah Tuhan ni akrina tuan. ¹⁶ Pellin sadasa ngo kessa oda terkuasaan kematèen i; merrian i kecihuren siso terdessingen barang isè ngo ia. Isè poda nung jelma mengidahSa, janah oda nung tertengen barang isè pè ia. Bana mo siberrèken kemuliaan, kekkuasaan soh mi amman sumendah! Amèn. ¹⁷ Pesèngèt mo sibèak ni tanoh èn, asa ulang gegah kalak i, janah ulang tok atèna midah harta siso menettap -- umpamana bagè kinibèak. Tapi ikettoki mo Dèbata simemerèken karinana silot banta sanga mertinèncuk, asa sennang kita. ¹⁸ Peddahi kalak i asa iulaken kalak i simerandal janah tettap mengulaken selloh ninganna merukur dak nggèut merrèken. ¹⁹ Idi ngo dalan kalak i pepulungken peremmasen mi ari seggen. Merkitè bagidi dapet kalak i mo kenggelluhen siamman sumendah, imo nggelluh situhunna. ²⁰ Alè Timoteus! Tuhu-tuhu mo jamoti sienggo nijalomu i. Pesiding mo rana siso merjullat janah oda merguna ulang antoi kalak mersoal sinidokken dèba perbinettohen keppèken oda ngo. ²¹ Ai lot ngo dèba memmaing bagidi gabè menurimpang nola ngo ia ipas peddah Kristen nai si nikepercayanna kin. Dak idengani masèh atè Dèbata mo kènè. Tabe nami, Paulus