1 TESALONIKA

¹ Kènè alè dengan si ni kuria Tesalonika sienggo gabè ummat Dèbata Bapa dekket Tuhan Jesus Kristus. Kami imo si Paulus, si Silas dekket si Timoteus mengharapken dak idengani masèh atè Dèbata mo kènè janah iberèken mo damèna bai ndènè. ² Mendokken melias atè ngo kami dakdak taba Dèbata, kemulihken kènè karinana. Gennep mersodip kami bai Dèbata Bapanta dak kuèngèt kami ngo kènè. Dak kusodipken kami ngo kènè. Kuèngèt kami ngo barang bakunè kènè peteridahken ibas pemahan ndènè magahken percaya kènè bai Kristus, barang bakunè kènè mengkekelengi kalak sidèban janah gabè mengkebasi kalak i, janah bakunè kènè merpengharapen sintegguh taba Tuhanta Jesus Kristus. ⁴ Kubettoh kami ngo alè dengan, ikekelengi Dèbata ngo kènè janah ipilih mahan milikNa. ⁵ Ai oda ngo pellin kata-kata sambing kupesoh kami bai ndènè Sukuten Kelluahen i, tapi merdengan kuasa bak Tendi Perbadia ngo. Tok kalohon ngo kami mi kebennaren Sukuten Kelluahen i. Ibettoh kènè ngo barang bakunè pergelluh nami lako mengkepkep kènè, tikan i tengah-tengah ndènè kami. ⁶ Enggo ngo icodi kènè kami dekket mencodi Tuhan i. Ijalo kènè ngo sukuten sinibagahken bai ndènè ibagasen sampang atè, tukasi pè menggong matcam bagè simpersuk kènè, Tendi Perbadia ngo merrèken i. ⁷ Merkitè bagidi gabè codiin ngo kènè taba karina kalak Kristen ni Makedonia dekket ni Akhaya. ⁸ Ai mulai bai ndènè nai makin sarna ngo berita tersèngèt Tuhan i mi Makedonia dekket mi Akhaya, oda pellin i tupèh, tapi dekket ngo kepercayaen ndènè bai Dèbata, terberita mi suberri aur, jadi oda pella kadè nèngè sidokkenken nami tersèngèt i. ⁹ Ibagahken kalak idi ngo bakunè penjalo ndènè bai nami sinderrang roh kami mendahi kènè tikala i dekket i pennadingken ndènè gana-ganaan ndènè i, gabè roh kènè mendahi Dèbata singgelluh i janah bennar. ¹⁰ Iranaken kalak i ma ngo bakunè pemmèma-mèma ndènè i pekkiroh Anak Dèbata i sorga i nai, imo Jesus sienggo nipegelluh Dèbata i simatè nai. Jesus i ngo paluahken kita ipas hukum pungur Dèbata sinaing roh seggen i.

¹ Alè dengan ibettoh kènè ngo oda magosia pekkeroh nami mendahi kènè. ² Ibettoh kènè ngo sinderrang madèng roh kami mendahi kènè mi Tesalonika, sienggo idersa janah ilèai ngo kami i Pilipi. Tapi tukasi pè mèduk mengalo kami, iberrèken Dèbatanta ngo nggasang ni ukur bai nami lako mengerranaken bai ndènè Sukuten Kelluahen siroh bana nai. ³ Oda ngo kellalingen pengarahken nami bai ndènè i; oda ma ngo akkal-akkal barang lako mengkilang. ⁴ Tapi bagè kalak sienggo tau ngo kami dok atè Dèbata mahan kesampèen Sukuten Kelluahen i, bagidi ngo kuruapken kami oda bagè cara muat-muat ukur jelma, tapi asa gabè kelemmonken atè Dèbata simenniahi pusuh perratèen nami i ngo. ⁵ Ibettoh kènè ngo; oda nung kami merkata ndalit, oda nung kami merukur bècuk lako muat harta; Dèbata ngo saksi nami tersèngèt idi. ⁶ Oda nung kutulusi kami pemoji-mojiin bai jelma nai -- tah bai ndènè nai barang bai jelma sidèban idi nai pè, kasi pè nemmu ndorok kupido kami bai ndènè nai barang kadè, kumarna rasul Kristus i kami. ⁷ Ai melamlam ngo kami i tengah-tengah ndènè, tosè bagè partua ibages pehèdu-hèduken dukak-dukakna. ⁸ Kumarnaken ngkelleng atè nami, uè ngo kami merrèken oda pellin Sukuten Kelluahen i bai ndènè, tapi dekket ngo bang nggelluh nami i pè. ⁹ Dok atè tentu ièngèt kènè ngo alè dengan, bakunè pengkelejaken nami. Mahar ari berngin ngo kami mahan bahaan, asa ulang lot barang isè pè kènè kususahi kami sidekkah i tengah-tengah ndènè kami magahken Sukuten Kelluahen siroh bai Dèbata nai i. ¹⁰ Kènè ngo saksi, bagi ma pè bak Dèbata, ukum kami merpengelako merandal kalohoon ngo janah bennar, oda sitikasen merradepken kènè sienggo percaya bai Kristus i. ¹¹ Ibettoh kènè ma ngo, karina ngo kènè kubaing kami bagè pemmaing sada kalak bapa taba dukak-dukakna. ¹² Kupeddahi kami ngo kènè janah kuajari kami, asa merperangè mengèkutken lemmo atè Dèbata kènè. Ai enggo idilo Dèbata kènè mi gemgemmenna ibas Dunia Rembaru bai Dèbata nai janah mengakapi kesangapenNa i. ¹³ Lot dèng sada nai makinken oda meradi-adi kami mendokken mejalo metangkup bai Dèbata, imo penjalo ndènè i kata Dèbata sikusukutken kami; ijalo kènè berita i oda bagè sukuten bai jelma nai, tapi berita bai Dèbata nai ngo, ai tuhu-tuhu ngo i kata bai Dèbata nai! Mengula ngo Dèbata ibagasen kènè sienggo percaya bai Kristus. ¹⁴ Alè dengan, tosè bagè sienggo iakapi kènè bagi ma ngo iakapi kuria Dèbata milik Jesus Kristus si lot i Judèa. Igong kènè ngo simbernit nibaing bangsa ndènè taba kènè, tosè bagè nigongken kuria-kuria Dèbata silot i Judèa bai kalak Jahudi nai. ¹⁵ Ibunuh kalak Jahudi ngo Tuhan Jesus dekket nabi-nabi, kami pè iletlet ngo. Dak ialo kalak i ngo Dèbata, jadi musuh karina jelma ngo ia. ¹⁶ Ihalang-halangi kalak i ngo kami menjamitaken berita kelluahen bai kalak siso Jahudi. Merkitè bagidi, dak makin itambahi kalak i ngo dosana gabè gukguk soh mi langit. Bagèndari pè lalu mo luas hukum Dèbata bai kalak i. ¹⁷ Tapi alè dengan, kessa nai laus kami, i tengah-tengah ndènè nai -- ndaoh ngo nemmuken kènè i mata -- tapi ndessing ngo ukum ibas ukur. Jadi enggo mo messeng nteddoh nami midah kènè. Nai dak ngo ipergeddo ukur nami naing roh mendahi kènè nola! ¹⁸ Kerna naidi iniatken kami ngo naing roh mendahi kènè, janah aku si Paulus enggo barang piga-piga kali mencubaken naing berkat, tapi dak ihalangi Sibolis i dèng ngo langkah nami. ¹⁹ Situhunna kènè ngo pengharapen nami dekket sampang atè nami. Mula roh kessa luas Tuhan Jesus, mengadep mo kita baNa, nai kènè mo gabè kebanggaan nami. ²⁰ Uè tupèh, kènè ngo kebanggaan dekket kelolonken ukur nami.

¹ Nai kumarna oda tertahanken nèngè messeng nteddoh nami, gabè lotiin mo dok atèngku sadaku lebbè tading i Atena, ² kuutus mo si Timoteus. Dengan sada ulaan ngo ia janah naposo Dèbata, simengula rebbak dekket kami lako mennukutken Sukuten kelluahen tersèngèt Kristus. Kuutus kami ia, asa ipetegguh ukur ndènè janah ipeddahi kènè, asa makin percayana kènè bai Kristus, ³ asa ulang lot barang isè bai ndènè nai gabè sondar kumarnaken kinipersukta èn. Ibettoh kènè ngo, dekket kepersuken i pè sienggo irencanaken Dèbata kin ngo i banta. ⁴ Ai sinderrang i tengah-tengah ndènè dèng pè kami, enggo kin ngo kubagahken kami taba kènè, kennah menggong simpersuk ngo kita. Jadi idi ngo simasa bagèndari, bagè nibettoh ndènè i kin. ⁵ Idi ngo kulih sebabna, asa kupasulak si Timoteus mendahi kènè naing kubettoh bakunè kepercayaen ndènè taba Kristus. Tah bakunè enggo iunjuni Sibolis i kènè, gabè magosia nola kelejaan nami karina. ⁶ Bagèndari enggo balik si Timoteus janah ibagahken bai nami tersèngèt kepercayaen bai Kristus dekket kelleng atè ndènè samah kènè, pesampangken ukur nami. Ibagahken dèng ma ngo bakunè lekketna i ukur ndènè kami, dekket nteddoh ndènè naing mengidah kami, tosè bagè kami pè, nteddoh ngo naing mengidah kènè. ⁷ Kerna naidi alè dengan gabè terapo mo ukur nami kumarna berita tersèngèt kènè. Kepercayaen ndènè i i ngo pegasangken pennarihen nami. ⁸ Asa bagè balik nggelluh ngo pengakap nami bagèndari, asal mo hot kènè percaya bai Tuhan i. ⁹ Oda terdokken kami merkitè kata, bakunè belgahna melias atè nami bai Dèbata kemulihken sampang atè sikujalo kami bana nai kumerna kènè. ¹⁰ Mahar ari berngin dak kupido kami ngo ibas sodip nami asa ndorok kami pejumpa hadep dekket kènè, asa kudomi kami kadè sikurangna ibas kepercayaen ndènè. ¹¹ Katerra pè, ipaduè Dèbata Bapanta dekket Tuhan Jesus Kristus mo ndorok kami pejumpa dekket kènè! ¹² Dak itambahi Tuhan i mo ngkelleng atèna samah-samah kènè dekket mengkekelengi karina jelma, asa makin mertinèncuk ngkelleng atè ndènè, tosè bagè ngkelleng atè nami midah kènè. ¹³ Asa merkitè i makin ipergegohi Tuhan i ukur ndènè, gabè mbadia kènè janah oda mertikas i hadeppen Dèbata Bapanta, tikan roh luas Tuhanta Jesus rebbak dekket karina sienggo gabè milikNa.

¹ Adumna i alè dengan, naing mo nemmuken ièkutken kènè codiin sikubaing kami tersèngèt bakunè carana kènè lako pesampangken atè Dèbata. Nemmuken enggo ngo ibagasenna i kènè, tapi bagèndari ibagasen kuasa Tuhan Jesus memmes kupidoken kami taba kènè, asa makin tangna kènè mengulaken i! ² Kerna enggo ibettoh kènè peddah sienggo kuberrèken kami bai ndènè merkitè kuasa Tuhan Jesus. ³ Ai èn ngo ipergeddo Dèbata: Naing mo mpanting kènè ipas ulaan luhlah i nai. ⁴ Karina anak laki i tengah-tengah ndènè, kennah ibettoh bakunè carana nggelluh rebbak sinibagesna maing lolo atè Dèbata bak jelma. ⁵ Ulang mo kumarnaken cubellek daging bagè pemmaing kalak pemmèlè bègu siso menandai Dèbata. ⁶ Ipas sibagèen i ulang lot barang isè pè memmakin salah taba denganna, barang pè mengakkal-ngakkali. Tikala i enggo kubagahken kami taba kènè i, ihukum Dèbata ngo kalak simengulaken kessalahen sibagidi. ⁷ Ai mi kebadiaan ngo kita idilo Dèbata, oda ngo mi simerroha. ⁸ Kerna naidi barang isè pis matana midah peddah ènda, oda jelma nilèanna, tapi merpis mata midah Dèbata simerrèken TendiNa Simabadia i ngo. ⁹ Ukum tersèngèt bakunè carana kènè mengkekelengi samah dengan oda pella pessèngètenku nèngè kènè. Ai enggo iajari Dèbata kènè tersèngèt mersikekelengen. ¹⁰ Janah enggo mo ituduhken kènè i taba dengan Kristen i suberri Makedonia. Tapi alè dengan memmes kupido kami taba kènè, naing mo makin sellohna pengulanken ndènè. ¹¹ Kerencetken kènè mo gabè kalak persip janah ulang iantoi simasa bai sidèban. Mahan bahaan mo kènè asa lot pangaan ndènè; bagè sienggo kuaturken kami tikala i bai ndènè. ¹² Merkitè bagidi, oda nèngè mengharapken kalak kènè, nai gabè ipesangap kalak siso percaya bai Kristus i mo kènè. ¹³ Kènè alè dengan, dok atè nami naing mo ntangkas iarusi kènè tersèngèt kalak sienggo kumellip i, asa ulang bonek atè ndènè bagè kalak siso merpengharapen. ¹⁴ Mula percaya ngo kita, sienggo matè Jesus, janah nggelluh nola mengolihi, sikepercayai ma mo pegelluhen Dèbata ma ngo karina kalak sienggo kumellip sipercaya bai Jesus, asa rebbak kalak i dekketSa. ¹⁵ Tersèngèt idi, bagèen ngo peddah Tuhan i sinaing pessohken nami bai ndènè: Mula pè nggelluh dèng kita soh mi pekerroh Tuhan Jesus, oda ngo kita mengelebbèi kalak sienggo perlebbè kumellip i. ¹⁶ Sampur kessa mo seggen Tuhan Jesus i sorga nai, mersurak-surak mo ekuten malaèkat janah isempul mo sarunè Dèbata mahan pertandaan. Nai ipegelluh mo perlebbè kalak simatè sienggo percaya bai Tuhan Jesus. ¹⁷ Enggo kessa bagidi, kita singgeluhna dèng pè tikan bagidi, iarahken mo rebbak dekket kalak i merkitè hembun lako menimbak-nimbak Tuhan i, i abang-abang i. Nai rebbak mo kita dekket Tuhan i soh mi amman sumendah. ¹⁸ Kerna naidi, dak mersiapoon mo kènè samah kènè merkitè kata ènda.

¹ Tapi alè dengan, oda pella kusuratken kami taba kènè ndigan mo kettikana masa i. ² Ai ntangkas ngo ibettoh kènè, ukum Ari pekiroh Tuhan i, bagè pekiroh pennangko berngin ngo. ³ Mula idokken dèba, "Mènak ngo karina," nai tikan bagidi mo sempa kememmago bana! Masa ngo karinana i tosè bagè pengakap daberru rabisen lako mennubuhken dukakna. ⁴ Tapi ukum kènè alè dengan, oda ngo ibagasen sigellap, gabè uè tersengget bagè pennangko kumarna kaharen. ⁵ Karinana ngo kènè nggelluh ibas kecihuren janah dukak-dukak sinterrang. Oda ngo kita nggelluh ipas sigellap barang pè kalak gellap tuiten. ⁶ Kerna naidi, ulang mo kita terpeddem bagè kalak sidèban; kennah ndungo ngo kita merjaga-jaga janah nterrang merrukur. ⁷ Ai tikan berngin ngo terpeddem kalak, janah tupung berngin ngo mabuk kalak simabuk. ⁸ Tapi ukum kita kalak kecihuren ngo, kerna naidi kennah terrus ukurta. Kennah ngo kita tettap percaya taba Tuhan, janah mengkekelengi kalak sidèban janah tok merpengharapen ipaluah Dèbata ngo kita. Idi mo senjata mengelènggemmi kita ibas perjuapen mengalo kegellapen. ⁹ Oda ngo ipilih Dèbata kita mahan lagana, tapi asa terrolih kelluahen ngo kita merkitè-kitè Tuhan Jesus Kristus. ¹⁰ Ai enggo matè Jesus mengkepkep kita -- jadi roh kessa ia luas, mula pè nggelluh dèng kita barang enggo matè pè -- gabè nggelluh nola mo kita rebbak dekketSa. ¹¹ Kerna naidi naing mo kènè mersipesèngèten janah mersipehèdu-hèduun ibagasen kepercayaen, bagè sienggo nibaing ndènè bagèndari. ¹² Alè dengan, memmes kupido kami bai ndènè, asa hargai kènè kalak simengkebasi kènè i tengah-tengah ndènè, imo kalak sienggo ipilih Tuhan i lako menguluken janah memeddahi kènè. ¹³ Hargaken kènè mo kalak i janah kekellengi kènè mernèngèt bahaan sienggo ibahanken kalak i. Dak merdamè mo kènè samah kènè. ¹⁴ Kupido kami dèng ma taba kènè alè dengan, asa pincang kènè kalak siso uè karèjo. Pepos kènè mo ukur kalak simbiar; urupi kènè kalak siperlu urupen, janah merpenganju mo kènè taba karina jelma. ¹⁵ Perdatèken kènè mo asa ulang lot memmalesken nggodo bales nggodo. Merandal mo baing kènè samah kènè bang taba karina jelma pè. ¹⁶ Dak merlolo atè mo kènè, ¹⁷ janah ulang mengadi-ngadi mersodip. ¹⁸ Mendokken mejalo metangkup mo kènè kumernaken karinana ai i ngo ipergeddo Dèbata bai ndènè nai sienggo ibagasen Kristus Jesus. ¹⁹ Ulang ènteppi kènè Tendi Perbadia! ²⁰ Ulang pis mata ndènè midah sukuten niberrèken Tendi Perbadia. ²¹ Pemmanat kènè mo karinana, janah patohi kènè mo sisellohna. ²² Peddaoh kènè mo karina kejahaten. ²³ Dak ibaing Dèbata simerrèken banta damè i mo bai ndènè nggelluh pellin ibagasen Dèbata sambing. Janah dak ijamoti Dèbata mo tendi, kessah dekket daging ndènè karinana, asa ulang mertikas kènè tikan roh kessa Tuhan Jesus Kristus mengolihi. ²⁴ Dèbata sienggo mendilo kènè; pessautenna ngo karinana i, kerna sètia ngo Ia. ²⁵ Sodipken kènè mo kami alè dengan! ²⁶ Mersisalamen mo kènè merkitè salam ngkelleng taba dengan sipercaya bai Kristus. ²⁷ Kuèlèk-èlèk mo kènè i hadeppen Tuhan, asa jakaken kènè surat èn taba karina dengan sipercaya bai Kristus. ²⁸ Dak ipasu-pasu Tuhan Jesus Kristus mo kènè. Tabe nami, Paulus