1 PETRUS

¹ Kènè dengan sienggo ipilih Dèbata simersellaten i ranto, si ninagerri Pontus, Galatia, Kapadosia, i Asia dekket i Bitinia! Aku si Petrus rasul Jesus Kristus mengharapken dak ipasu-pasu janah iberrèken Dèbata mo damèna mertinèncuk bai ndènè. Sienggo ipilih ngo kènè gabè ummat Dèbata, kemulihken rembang mi lemmo atè Dèbata Bapa i mulana i nai. Janah enggo ibaing Tendi Dèbata kènè gabè ummatNa simbadia bai Dèbata, asa tunduk kènè bai Jesus Kristus janah ipepanting darohNa i. ³ Sidokken mo mejalo metangkup bai Dèbata Bapa ni Tuhanta Jesus Kristus, kumarna mendè basana. Kerna naidi ngo asa ibaing kita gabè jelma rembaru, merpengharapen nggelluh, kerna enggo Ipegelluh nola mengolihi Kristus ipas simatè nai. ⁴ Kerna naidi ngo asa dak siharapken pasu-pasu sinaing jalonta sienggo ipèmaken Dèbata banta i sorga, siso uè ncèda barang macik, barang pè merulang. ⁵ Bam ndènè ngo karinana i, kerna percaya kènè bai Dèbata. Dak ijagai ngo kènè ibagasen kuasa Dèbata asa ijalo kènè kelluahen sienggo hantar sinaing pettararenna i ari podi. ⁶ Kerna naidi dak mersampang atè mo kènè, mula pè bagèndari bonek kènè sigejap kemulihken pengunjunen i. ⁷ Ai pellin keteridahen kepercayaen ndènè ngo i, barang tah tuhu-tuhu ma ngo kènè percaya bai Tuhan i barang tah oda. Salang emmas siuè ncèda i pè ioji ngo janah itingtingi ipas api. Jadi mahargaan ngo kepercayaen ndènè i dari pada emmas, jadi kennah ioji ma ngo i asa gabè tulèn. Janah merkitè bagidi, ipoji mo kènè janah ipessangap ninganna ipeddates tikan roh kessa balik Tuhan Jesus Kristus. ⁸ Ikekelengi kènè ngo Ia, tukasi pè oda nung dèng idah kènè. Ikepercayai kènè ngo Ia, tukasi pè oda idah kènè Ia bagèndari. Kumarna naidi ngo asa dak ipoji kènè Dèbata ibagasen sampang atè siso ndorok terruapken merkitè kata. ⁹ Ai èn ngo buah pengkepercayai ndènè bai Tuhan i, kerna enggo dapet kènè, imo kelluahen ndènè! ¹⁰ Kelluahen i ngo sinitulusen nabi-nabi janah iperdatèken, sienggo mengalamatken pasu-pasu niberrèken Dèbata bai ndènè. ¹¹ Dak iperdatèken kalak idi ngo, ndigan barang cidahari ngo ketikana masa sinidokken Tendi Kristus i mi bagasen pusuh peratèen kalak i, sienggo mengindangken tersèngèt keppersuken sitahanen Kristus i dekket kemulianna si Roh i podinkenna. ¹² Ipettarar Dèbata pè taba nabi-nabi idi oda ngo lako bana sambing, tapi lako bai ndènè ngo sinijamotkenna i; imo tersèngèt sienggo nidengkoh ndènè bagèndari i bai kalak simennukutken Sukuten Kelluahen tersèngèt Jesus Kristus. Ipessoh kalak idi bai ndènè merkitè kuasa Tendi Dèbata si nitengeskenNa i sorga i nai. Malaèkat-malaèkat pè sèkel ngo naing memettoh sukuten nisukutken kalak idi i. ¹³ Kerna naidi, kebbasi kènè mo ukur ndènè, nterrang mo pikiren ndènè; mertuhu-tuhu mo kènè mengharap masèh atè si nibasa-basakenna bai ndènè, tikan roh kessa Jesus Kristus. ¹⁴ Uèi kènè mo Dèbata, ulang mo kènè menguèi cubellek daging ndènè bagè siarnia, sinderrang mak dèng itandai kènè Dèbata. ¹⁵ Tapi kennah mbadia ngo kènè ipas karinana pemmahan ndènè, tosè bagè Dèbata simendiloi kènè i. ¹⁶ Tersurat ngo ibas Bibèl, "Kennah mbadia ngo kènè, kerna simbadia ngo Aku." ¹⁷ Idokken kènè ngo taba Dèbata i ’Bapa’, mula mersodip kènè. Asa Dèbata i ngo mendabuhken hukum bai jelma rembang mi pengellakona oda merpilih bulu. Kerna naidi sidekkah nggelluh dèng kènè i dunia èn, kennah pessangap kènè Dèbata ibas nggelluh ndènè. ¹⁸ Kennah bettohen ndènè ngo kadè igararken lako paluahken kènè ipas nggelluh siso puna-puna idi nai, sinisusurken empung ndènè bai ndènè. Oda ngo emmas barang pirak siuè karaten idi igararken, ¹⁹ tapi simahargana kalohoon i ngo, imo diri Kristus i sendiri ipèlèken bagè biri-biri pèlèen bai Dèbata, oda mertikas barang pè kurang. ²⁰ Kristus i ngo ipilih Dèbata sinderrang madèng kin pè ihanaken dunia èn. Janah mayak ari podi dunia èn, roh ngo Ia lako paluahken kènè. ²¹ Merkitè Ia ngo kènè percaya bai Dèbata sienggo pegelluhkenSa i simatè nai janah merrèken kessangapen baNa. Jadi Dèbata ngo nikepercayaen ndènè i janah Dèbata ngo siharapenken ndènè i. ²² Kumarna iuèi kènè ngo kata Dèbata, jadi kennah nggelluh ibagasen Dèbata ngo kènè janah kennah kelleng ngo atè ndènè midah kalak sipercaya bai Kristus. Kerna naidi kennah mersikekelengen ngo kènè, ²³ kerna merkitè kata Dèbata singgelluh i janah tettap, enggo iperembaru kènè, oda tubuh arap jelma tapi arap Bapa simenettap i ngo. ²⁴ Tersurat ngo ibas Bibèl bagèen, "Dosken dukut-dukut ngo karina jelma, janah bagè bunga dukut i ngo karina kesangapenna. Mula males dukut-dukut i merrurus ma mo dekket bungana. ²⁵ Tapi hot ngo kata Tuhan i soh mi amman sumendah." Kata i ngo Sukuten Kelluahen sinisukutken taba kènè.

¹ Kerna naidi, patakken kènè mo ipas diri ndènè nai karina kejahaten i; ulang nè mo merluap, ulang merakkal-akkal, ulang ncian, janah ulang lèai denganmu sidèban. ² Bagè anak rembaru tubuh mo kènè dak muas mi laè susu pertendiin situhunna, asa merkitè i makin mbelgah kènè janah ipaluah. ³ Tersurat ngo ibas Bibèl bagèen, "Enggo irasaken kènè sendiri bakunè mendè basa Tuhan i." ⁴ Kerna naidi, dapetken kènè mo Tuhan i. Ai tosè mi batu singgelluh ngo Ia, si nipatakken jelma, ai idokdok oda merguna; keppèken batu sinipilih ngo Ia janah maharga bai Dèbata. ⁵ Kènè pè alè dengan, tosè bagè batu singgelluh i ngo. Kumarna naidi uè mo kènè ibaing lako pekkadèken Bages Dèbata ipas pertendiin. Merkitè bagidi, gabè imam-imam singgelluh mo kènè janah sinipilih bai Dèbata, simemmèlèken bai Dèbata merkitè-kitè Kristus idi, imo pèlèen pertendiin sinikellemmoken Dèbata. ⁶ Ai tersurat ngo ibas Bibèl bagèen: "Enggo kupilih sada batu maharga, janah Kubaing ngo idi i Sion mahan batu persoki; barang isè percaya baNa oda ngo ipemmèla." ⁷ Maharga kalohoon ngo batu i bai ndènè sipercaya. Tapi ukum bai kalak siso percaya i, bagèen ngo pendokken Bibèl, "Batu sinipatakken tukkang bages i, idi nola ngo keppè batu persoki," ⁸ dekket "Gabè terdengdeng ngo kalak i i batu i, janah batu i maing kalak i tergempang." Terdengdeng ngo kalak i kumarna oda percaya mi kata Dèbata. Bagi ngo enggo itentuken Dèbata tersèngèt kalak i. ⁹ Tapi bangsa sinipilih ngo kènè, imam-imam naposo raja janah bangsa simbadia nipilih bai Dèbata, bak ummat Dèbata sendiri. Ipilih janah idiloi Dèbata ngo kènè karuar ibas sigellap i nai, lako mbengket mi bagasen kecihurenna sinterrang i, janah asa isukutken kènè berita tersèngèt sinibaingna simeheji i. ¹⁰ Ukum arnia oda ngo kènè ummat Dèbata, tapi ukum bagèndari enggo gabè ummatna. Arnia oda ngo dekket kènè menjalo masèh atè Dèbata, tapi ukum bagèndari enggo iakapi kènè masèh atèNa i. ¹¹ Kènè alè dengan sinikekellengen! Kalak sidèban janah kalak ranto ngo kènè i dunia èn. Kerna naidi memmes kupido bai ndènè, asa ulang uèi kènè cubellek jelma simerralo dekket ukur. ¹² Kennah mendè ngo pengellako ndènè i tengah-tengah jelma nterrem siso menandai Tuhan, asa tah pè ilèai kènè, bagè kalak perjahat, mula idah kalak i kessa mo pengellako ndènè selloh i, gabè ipoji kalak i mo Dèbata tikan roh kessa ia mi dunia èn. ¹³ Kennah uèi kènè mo pemerèntah silot i dunia èn; tah pè i Kèsar sigabè perkuasa tuhu-tuhu, ¹⁴ tah pè i gubèrnur sinihunjuk Kèsar lako menghukum kalak simerpengelako jahat janah menghormati kalak simerpengelako mendè. ¹⁵ Ai ipergeddo Dèbata ngo, asa gabè sip kalak simengerrana manggang, merkitèken pengellako ndènè simerandal i. ¹⁶ Ai sienggo maluah ngo kènè, tapi ulang mo baing kènè kelluahen ndènè i lako mengkemkemmi kejahaten, tapi bagè pergelluh naposo Dèbata mo pergelluh ndènè. ¹⁷ Rèntem mo kènè taba karina kalak, kekellengi mo dengan samah-samah Kristen, kebiari mo Dèbata; pessangap mo Raja. ¹⁸ Kènè dengan sigabè perkebbas, uèi kènè janah merkebiaren mo kènè taba induk somang ndènè, oda pellin taba kalak siperrukur selloh janah melamlam, tapi dekket ngo bai induk perukur ntuing. ¹⁹ Ai ipasu-pasu Dèbata ngo kènè mula saddar kènè kadè lemmo atè Dèbata, imo sobar lako menggongken siso patut janah oda adil. ²⁰ Kadè mo kelebbihen ndènè mula pè sobar kènè menggongken ligas-ligas keppèken kerna kessalahen ndènè? Tapi mula mbingit kènè menggong simpersuk ali perulaan ndènè merandal, nai gabè ipasu-pasu Dèbata mo kènè. ²¹ Mi si ngo kènè idiloi Dèbata, Kristus sendiri pè menggong simpersuk ngo mengkepkep kènè, memmaing codiin bai ndènè, asa ièkutken kènè caraNa. ²² Oda nung ia merdosa, janah oda lot isè pennah mendengkoh Ia merluap. ²³ Oda mengerrèhè Ia tikan irisak, oda nung mengasupi Ia tikan menggong simpersuk; ipessoh ngo karinaNa i taba Dèbata Perhukum sènteng i. ²⁴ Ipersan Jesus i ngo karina dosanta mi kayu persilang i, asa maluah kita ipas kuasa dosa i nai, janah asa nggelluh kita codi mi lemmo atè Dèbata. Kumarna ugahna i ngo malum iakap kènè. ²⁵ Bagè biri-biri laling ngo kènè arnia, tapi ukum bagèndari enggo mo itatang nola kènè balik mengèkutken Kristus, permakan janah sipehèdu-hèduken kènè.

¹ Bagidi ma ngo bang kènè pè alè partua ibages, kennah tunduk ngo kènè taba sinibalè ndènè, asa tah lot dèba kalak i siso percaya bai Dèbata, jadi merkitè pengellako ndènè i gabè percaya nola mo ia, janah oda pella perlu merkitè-kitè kata ndènè, ² Kerna idah kalak idi perangè ndènè rèntem i, ninganna merpenguèi. ³ Ulang pellin ipejagar-jagar kènè rupa ndènè kan duru sambing merkitèken mendandan buk barang merpakèen buradda barang memakkè pakèen maharga-maharga. ⁴ Tapi naing mo nemmu kinimberru ndènè i arap pusuh perratèen ndènè nai rohna, umpamana merpengelako lamlam janah damè; i ngo kinimberru ikellemmoken atè Dèbata. ⁵ Bagidi ngo daberru simeragama ukum arnia memakkè, janah merpenguèi bai sinibalèna. ⁶ Si Sara pè bagi ngo, merpenguèi ngo ia bai si Abraham, janah idokken ngo ia tuanna. Kènè pè dukak si Sara ngo. Jadi ulaken kènè mo simerandal i, ulang kumarnaken mbiar midah kalak. ⁷ Bang kènè pè alè partua ibalè, merukur mo kènè lako mendengani si nibages ndènè, janah bettoh kènè mo perdaging ndotè ngo daberru. Mehormat mo kènè taba kalak i, ai dekket ngo kalak i dengan sidasa i masèh atè Dèbata, imo kenggelluhen siamman sumendah. Mula bagi ngo ibaing kènè, oda ngo lot nèngè mengkella-kella sodip ndènè. ⁸ Rèmpunna sada kata janah sada orjok mo kènè, sada pengerrasaan, janah dak mersikekelengen bagè kalak merkaka kuanggi. Dak mersimasèh atèen mo kènè janah perncerrep ukur. ⁹ Ulang mo balesken kènè jahat alo jahat, rèhè bales rèhè, tapi mersodip mo kènè taba Dèbata, kerna idilo pè kènè lako menjalo pasu-pasu bai Dèbata nai ngo. ¹⁰ Tersurat ngo ibas Bibèl bagèen, "Barang isè naing nggelluh janah sèkel mengidah ari sennang, kennah ipettadi mo dilahna mengeruapken simerroha, asa ulang ruap kata nggodo dekket luap. ¹¹ Ipeddaoh mo dirina i kejahaten idi nai, iulaken mo simerandal. Tuhu-tuhu mo itulusi damè, janah imo iayaki. ¹² Ai mendahi kalak simengulaken lemmo atè Dèbata ngo pennengenNa, janah dak idengkohken Dèbata ngo sodip kalak sibagidi; tapi ialo Tuhan i ngo kalak simahanken jahat." ¹³ Isè ngo maing nggodo taba kènè, mula dak iperluken kènè simendè? ¹⁴ Tapi mula pè tah menggong simpersuk kènè kumarnaken mengulaken sibennar, merlaba olih ngo kènè! Kerna naidi ulang pella mbiar kènè midah barang kadè janah ulang buradan. ¹⁵ Tapi perbadiai kènè mo Kristus i bagasen ukur ndènè ai Tuhan ngo Ia. Gennep tèk mo kebbas mengaloi kalak simengkusoi kènè tersèngèt si niharap ndènè i. ¹⁶ Tapi ulaken kènè mo idi ibagasen rana melamlam janah mehormat, kennah mpanting ngo ukur ndènè asa termèla kalak simengerrèhèi kènè, kerna merandal ngo ibaing kènè bagè kalak simengèkutken Kristus. ¹⁷ Lotiin mo kènè menggong simpersuk -- kumarna mengulaken simerandal mula i ngo lemmo atè Dèbata -- dari pada menggong simpersuk kumarna mengulaken simerroha. ¹⁸ Kristus pè enggo matè sikali kumarna dosanta -- asa itogiken kita mendahi Dèbata. Ibunuh ngo dagingNa tapi ipegelluh ngo Ia merkitè Tendi. ¹⁹ Ibagasen Tendi ngo Ia laus mennukutken Sukuten bai Dèbata nai taba tendi si nikurungen, ²⁰ imo tendi kalak siso menguèi Dèbata tikan i umur si Noak. Ai dak ipèma-pèma Dèbata ngo tikala i sidekkah mahan keppel si Noak -- tapi pellin ualuh kalak mo kessa maluah tikan masa laè mbuncar i. ²¹ Simasa i imo merrumangken codiin ipas perridiin sibagèndari lako paluahken kènè. Ukum perridiin idi, oda ngo memmorih simellamun nidaging i nai, tapi gabè sada perjandiin ndènè ngo i taba Dèbata ibagasen pusuh perratèen ndènè nai. Perridiin i ngo paluahken kènè kerna enggo balik nggelluh Jesus Kristus i simatè nai, ²² janah enggo laus mi sorga. Merkuasa ngo Ia bagèndari janah kundul i kamuhun Dèbata janah memerèntah karina malaèkat, karina penguasa dekket kegegohen.

¹ Nteng, kumarna enggo mersitahanen Kristus ipas perdagingen kènè pè kennah ngo mersenjataken ukur sibagidi. Kerna barang isè mersitahanen secara perdagingen, enggo mentadi ia mengulaken dosa. ² Kerna naidi barang sadikè dekkah nai kènè nggelluh i dunia èn, naing mo nemmu kènè mengèkutken nipergeddo Dèbata, ulang mo mengèkutken nipergeddo cubellek kejelmaan. ³ Tikala i enggo ndekkah kènè mengulaken bahaan siniulaken siso menandai Dèbata, imo menguèi cubellek-cubellek, mabuk-mabuk, mangan mènum dekket mersembah taba bègu siso patut i. ⁴ Ukum bagèndari lengang ngo kalak siso menandai Tuhan i mengidah kènè kumarna oda nè uè kènè mengulaken bagè ulaan janah pergelluh kalak siso selloh i. Kerna nai ngo asa ilèai kalak i kènè. ⁵ Jadi kennah ipertanggung jababken kalak i ngo segen karina ulah-ulahna i taba Dèbata sienggo memmèmaken hukum taba jelma singgelluh bak sienggo matè i pè. ⁶ Kumarna naidi ma ngo asa enggo ibagahken Sukuten Kelluahen i taba kalak sienggo matè i. Ai mula pè enggo matè kalak i cara daging -- bagè karinana jelma kennah matè -- tapi ukum ibagasen pertendiin, nggelluh ngo kalak i kemulihken lemmo atè Dèbata. ⁷ Enggo mo ndessing ajal dunia èn, kerna nai mengerrem mo kènè janah merjaga-jaga, asa ndorok kènè mersodip. ⁸ Tapi ibabo karinana idi, tuhu-tuhu mo kènè mersikekelengen, ai mula mersikekelengen kènè, mbuè ngo dosa ikemkemmi. ⁹ Keperluken kènè mo mersitamuèen, tapi ulang ngutnguten. ¹⁰ Enggo mo ijalo kènè pasu-pasu bai Dèbata nai mermatcam bagè. Kerna naidi karinana mo kènè pehèdu-hèduken samah-samah dengan kadè niberrèken Dèbata i bai ndènè. ¹¹ Kalak simennukutken berrita bai Dèbata nai mo ibagahken; barang isè mengurupi denganna sidèban, iurupi mo merkitè kuasa bai Dèbata nai, asa terpoji Dèbata merkitè Jesus Kristus. Ia ngo simerkuasa janah patut ipoji soh mi amman-sumendah. Amèn. ¹² Alè dengan si nikekellengen! Ulang pella sungkar dok atè ndènè mula roh kinidersa, kerna lako mengoji kènè ngo i. Jadi ulang pella camber dok atè ndènè i. ¹³ Tapi lolo mo kènè kerna enggo dekket kènè menggong simpersuk rebbak dekket Kristus. Jadi ntarar kessa mo kemmuliaan Kristus gabè meroang-oang mo kènè. ¹⁴ Mertuah ngo kènè mula ilèai dèba kènè kemulihken mengèkutken Kristus i kènè. Sada tanda-tanda ngo i, magahken iiani Tendi Perbadia ngo kènè. ¹⁵ Ulang mo lot bai ndènè nai menggong simpersuk kumarna memmunuh ia, barang mennangko, barang kumarna merjahat ia, barang kumarna iantoi siso bahanna. ¹⁶ Tapi mula menggong simpersuk kènè kumarna kalak Kristen kènè, ulang pella mèlà kènè kumarna naidi. Dokken kènè mo mejalo metangkup taba Dèbata, kerna igerari ngo kènè ibagasen gerar Kristus. ¹⁷ Enggo dapet ketikana ihukum Dèbata dunia èn. Janah ummat Dèbata sendiri ngo lebbèen ihukum. Jadi mula lebbèen ngo kita ihukum bakunè nola mo ndia hukum taba kalak siso percaya taba Sukuten Kelluahen bai Dèbata i nai? ¹⁸ Bagèen ngo tersurat ibas Bibèl, "Mula kalak bennar pè enggo mahal paluahen, bakunè mo ndia masa bai kalak perdosa siso menandai Tuhan!" ¹⁹ Kerna nai, mula lot kalak menggong simpersuk, ipas lemmo atè Dèbata nai, kennah bennar mo pergelluh kalak i janah isohken mo dirina taba situmempasa. Ai dak ièngèt ngo bagah-bagahNa.

¹ Peddahku taba pengendeng si lot i tenah-tengah kuria ndènè. Kusuratken surat èn bai ndènè, bagè sada kalak pengendeng ngo aku sienggo mengidah kepersuken si nigongken Kristus, janah persulang ipas kesangapen sipettararenna roh kessa Kristus merkessangapen mendahi jelma. Memmes kupido taba kènè, ² asa permakani kènè mo biri-biri siniberrèken Dèbata, ulang mo kumarna oda terjua. Ulang ma mo kumarna pellin naing menjalo laba bak upah, tabi kemulihken ukur ndènè tutus mo lako mengendengken. ³ Ulang mo kènè bagè memmerèntah taba kalak i tapi gabè codiin mo kènè bai kalak i. ⁴ Jadi roh kessa mo Permakan Mbellen i luas, jaloon ndènè mo rudang kessangapen siso uè males i. ⁵ Bagi ma mo kènè pè alè simatah daging. Uèi kènè mo situa-tua. Kennah mersipecerrep ukurna ngo kènè karina janah mersipehèdu-hèduun. Kerna tersurat ngo ibas Bibèl, "Ialo Dèbata ngo kalak sindates merrukur, tapi masèh ngo atèna midah kalak sincerrep merukur." ⁶ Kerna naidi, peterruh kènè mo diri ndènè mi terruh kuasa Dèbata, asa ipeddates kènè tupung kettikana. ⁷ Pessoh mo karina nikelsohken ukurmu taba Dèbata, ai Ia ngo pehèdu-hèduken kènè. ⁸ Terrus mo ukur ndènè janah merjaga-jaga mo kènè! Dak kadap ngo musuh ndènè Sibolis i bagè biahat merngengngeng lako menulusi sindorok jerngemenna. ⁹ Mertuhu-tuhu mo kènè mengalosa, janah ulang mo ganggu kènè mengkepercayai Kristus, ai ibettoh kènè ngo, karinana ngo dengan ndènè sipercaya bai Kristus ni dunia èn menggong simpersuk tosè bagè kènè. ¹⁰ Jadi mula enggo menggong simpersuk kènè sigejap, gabè ipetetah, ipetteguh janah ipetettap mo kènè, ai Dèbata permasèh atè ngo Ia, sienggo mendiloi kènè asa dekket menjalo kesennangen simenettap i merkitè Kristus. ¹¹ Hot ngo kuasana soh mi amman sumendah! Amèn. ¹² Kusuratken suratku sipondok èn bai ndènè merkitè pengurupi si Silas, sikuètong dosken anggingku i pas keKristenen i janah sètia. Kusuratken èn taba kènè lako menduhduh kènè janah asa makin tok kènè, bennar ngo karinana sikusuratken èn janah sènteng tersèngèt masèh atè Dèbata. Tettap mo kènè ibagasen masèh atèNa i. ¹³ Soh mo bai ndènè salam dengan silot i kuria Babilon, imo sienggo nipilih Dèbata, bagidi ma bak salam anakku si Markus sikukekkelengi i. ¹⁴ Mersisalamen mo kènè samah kènè dom ibagasen kelleng merkaka-kuanggi sebagè kalak Kristen. Dak iberrèken Dèbata mo bai ndènè damèNa sitermurmur i alè kènè sienggo gabè milik Kristus. Tabe nami, Petrus