1 Timote

Kayëta iỹanar ir Timote

Lilaya in

Akayëta aŋo ro, Pol ỹëgwën baŋo Timote, ar enga emat gë gër andiyen and Kaxanu an. Gër akayëta aŋo osëƴali or Pol ol ex: end ɓësëƴali ɓënëgwëŝ eŋ; gë end ang ỹapëk ecale ak; do gë end ang ỹapëk exo ɗiyand alëngw ar Amara ak.

Er ex gër akayëta in:

End aniyan and gër Amara eŋ: 1.1–3.13.

End ekwëta ed ɗal eŋ do gë end osëƴali or enëgwëŝ eŋ: 3.14–4.5.

End ɓapela ɓand ɓëlëngw ɓër ɓamara eŋ: 4.6–6.21.

Ecëmar el

¹Wëno Pol kë ỹëgwëlind kayëta ijo ro. Parëxanda ir Yesu Kërisët hi këme ang re këni Kaxanu, mëŋ ar fexën këɓo an, do gë Kërisët, ar kënëŋo yarënde an. ²Wëj Timote këmi ỹëgwënëlind, wëj ar hik enim asëñiw̃ën ga ɓar ke ako ekwëta edeɓat. Awa Faba Kaxanu do gë Yesu Kërisët Axwën areɓi an, yëlëleni oyekax ol, axaỹënan in do gë oɓetak ol!

End ɓësëƴali ɓënëgwëŝ eŋ

³Në ekwitan emi end fel bami ɗamana me ƴexën gër ebar ed Masedëwan eŋ mëne eƴ ɓayi na gër Angol and Efes do eƴëɓi dexërand ɓërëmar eni teɓ osëƴali or ɓenëgwëŝ ol. ⁴Pelindëɓi eni teɓ eɓalëkënali ed ɓendacan el, do gë end omac or gër ɓandëw̃ëra ɓand këni reƴarand gë eŋata këm eŋ. Ɓeŋo ecampëre fo kë w̃ëlawënd. Ɓeŋo ala aŋo dëcand na exo kemëna emelëya ed ŝenene ed ɓend Kaxanu, ar gë ekwëta. ⁵Er këme ŝaland gë apela aŋo in ex, eɓalër ed gë ow̃ëkw ow̃ënëk el, gë onden onjekax, do gë ekwëta ed ɗal. ⁶Ɓërëmar ga langangan këni ɓeŋo, nambëraxën këni gër oyeƴandëran or gë ofëcak këm. ⁷Arafëna këni rafënand mëne ɓësëƴali ɓër acariya and Moyis hi këni xarak aɓi pëni ex na er këni sëƴalind in, ɓëte aɓi pëni ex na er këni ɓalëkënalind edeƴara in.

⁸Aye nang këne mëne acariya aŋ er ŝenene ex angëmëne eƴ tëfënd ang kë rend ak. ⁹Nangëne mëne er kë rend acariya in ɓëŝëxwëpëtaxik ɓën, gë ɓëw̃ëŝik ɓën, gë ɓësëmbak ɓën, gë ɓëw̃endëran ɓën, gë ɓëƴepën ɓër ɓend Kaxanu ɓën, gë ɓëlaw̃ ɓër ɓëxarëk ɓëreɓën ɓën, do gë ɓëlaw̃ ɓër ɓela ɓën këɓi rend. Aɓi dend na ɓër ŝenene ɓën. ¹⁰Ɓëte afaɓ faɓ këɓi ɓër yëlayand gër eñac ɓën, gë ɓër kë rind asoŝan gë asoŝan, er këni rind asoŝan gë asoxari in, gë ɓëfan ɓër okaɗëp ɓën, gë ɓënëgwëŝ ɓën, gë ɓër kë yaŝarënd gër enëgwëŝ ɓën, do gë ɗek ɓër h̃ëpëk osëƴali or ɗal ɓën. ¹¹Eŋo kë rend Atëfëtan and xwëtënan ke aŋ, and enjaran end Kaxanu, mëŋ ar gë onënga aŋ.

End oyekax or Kaxanu eŋ

¹²Wëno gë emëkw edam el ɗek këmo ŝëkwand Yesu Kërisët, Axwën areɓi an, mëŋ ar yël ke ojaw̃ od me dixënënd andiyen andexëm an. Gayik axwëta xwëta ke seɓënanaxën ke andiyen aŋo. ¹³Ɗamana exe tanaxën Axwën an gër andiyen andexëm aŋo, wëno aŝir bamo ŝirënd, arixëra bamo rixërand, abamo ɓaxëtën na. Ɓarikan mëŋ lëkaya baxe gë axaỹënan isëm ado ɓayik amo kwëta bana, abame nang na mëne në emenan emo, në end oŋëpëgënan od lëɓ bax gër emëkw edam ok. ¹⁴Ata Axwën areɓi an, mondako xureli këŋo gër ndam oyekax ol, gë ekwëta el, do gë aŋana and gër Yesu Kërisët aŋ. ¹⁵Eyeƴan elo ed mokwëta ex do ed ỹapëk momëxwëta: Yesu Kërisët aƴow ƴow baxo gër ngwën eɓi pexën ɓëw̃endëran ɓën do wëno ex ar xurik me mendëra an. ¹⁶Ɓarikan Kaxanu gë axaỹënan w̃ëlaya ke ex canayaxën gër wëno aw̃endëran asëm ajo ɗek eɓuŋa ed Yesu Kërisët el, ang amatinali and ɓër këŋo xwëta eni cotaxën aniyan and din aŋ.

¹⁷Ar wunëk nand ex yo an,

ar ax cësënd na an,

ar anëŋo watënde na an,

ar ex gaɓat Kaxanu an,

xwënëk owëlik ol do gë enjaran eŋ din ir din! Amen!

¹⁸Asëñiw̃ën Timote, apela and këmi seɓënanënd aŋ andamat ex gë ɓend reƴa këni anëka ɓëlaw̃ënel endeƴ eŋ. Awa wëj kwitayind eyeƴan elo eƴ kemënaxën ang ar okaxër fo. ¹⁹Mëlayal ekwëta ed xwëta këƴo Kaxanu el, ɓëte ɓayilexi onden onjekax. Onden onjekax oŋo ɓërëmar aɓi bo ex na, do në eŋo lapaxën këni ekwëta ed Kërisët el. ²⁰Gër enga eŋo hi këni Imene do gë Alekësandër. Mëŋ lëxwaxën këmëni gër Sindan eni tëƴaxën mëne ax gi ex na mocir Kaxanu.

End cale eŋ

¹Awa ga re këme ɗamana ɓeŋo ɗek, kemënayindën cale iŋ, karayindëno Kaxanu, caleyindëno, këlayindëno do cëkwayindëno në end ɓela ɗek. ²Calenindënëɓi ɓemun ɓeŋ do gë ɗek ɓër ex ɓëlëngw ɓën, ene ɗiyaxënënde aniyan and gë aketëxeta, and gë emer këm, ene ɓalëkënalixënënde end Kaxanu eŋ, do ene ɗiyaxënënde ang ỹapëk ak. ³Eŋo aye yek do ah̃an h̃an ko Kaxanu, Afexën areɓi an, ⁴mëŋ ar ỹandi këŋo eni pex ɗek ɓela an do eni ŋatën enang ed end ɗal el.

⁵Enimin, Kaxanu iɓat fo ex,

ɓëte ah̃atelindër ar Kaxanu gë ɓela aɓat fo ex,

mëne ngëŋ ala ar këno w̃acënd Yesu Kërisët an.

⁶Ayëlaya yëlaya ko mëŋ dëŋ akanji eɓi dacëtaxën ɗek:

osede olo w̃asin këɓo nand ỹapëk na

mëne Kaxanu ỹandi këŋo eni pex ɗek ɓela ɓën.

⁷Në eŋo yataxën ke Kërisët me gi afemëra, parëxanda do asëƴali ɓër ɓenëng ɓecëxe eni gixën gër ekwëta do gër ɗal. Er këme rend ijo ɗal ex, ame nëgwëŝënd na.

⁸Awa er ỹandi ke gër ed ex yo, ɓësoŝan ɓën eni yënënd otaxan omënëk, eni calend gë emëkw epeŝax, gë oxoỹ këm do gë ecampëre këm.

⁹Er ỹandi ke ɓëte, ɓësoxari ɓën eni cuɗarand ŝenene, këreni cuɗand na ɓanjëm ɓand xaw. Këreni ñaŋënarand na gë ɓamël, këreni ɓakarand na kaŋe, gë oƴeri, do gë ɓeɓër xemëk akanji. ¹⁰Ɓarikan gër oye oreɓën watindëlex ɓandixa ɓanjekax ang ỹap këɓi ɓësoxari ɓër fëɓ këŋo Kaxanu. ¹¹And këni sëƴalind aŋ, ɓësoxari ɓën cësinayindëlexëni do eni ɓaxëtënd aye. ¹²Asoxari an cësinayindëlexo, amo yël ex na or gapak or exo tëƴalind ol, amo yël ex na eŋo bëñand asoŝan an. ¹³Enimin Kaxanu, Adam ỹana këŋo eɓaƴ el, ɓaƴaxën këŋo Xawa. ¹⁴Do ŝaɓucara in wa yifa këŋo asoxari an exo ɗëngw gër emëŝen ed Kaxanu, aŋo yifa ex na Adam, asoŝan an. ¹⁵Ɓarikan fo afex ko fex, ga rëw̃ rëw̃ ko angëmëne exo ɓayi gër ekwëta, gër eɓal ed ɓela, gër eyëlaya ed gër ow̃ënëk, do gër eɓana.

End ɓëlëngw eŋ

¹Eyeƴan elo ed mokwëta ex: asoŝan ar ỹandi këŋo enim exo gi alëngw gër Amara an, andiyen anjekax ỹandi këŋo exo dind. ²Awa aỹap ỹapëk, alëngw an exo gi ar gë end këno nëp këm, icën ind asoxari aɓat, ar gë anjus, ar ye këŋo onden, ar ŝenene, ar këɓi xwëtayand aye ɓëliyer, ar xamëk osëƴali. ³Gilexo ar ɓëngw këŋo onden, ar këni wëlërënd gë ɓela, ar kë xwëỹëtand aŋana and koɗi, kërexo gi na aŝeɓ, kërexo gi na axeỹax. ⁴Kaɗacindëlexo aye ekun edexëm el, do oɓaŝ orexëm ol eni gi ɓër kë ɓaxëtënd apela ang ỹapëk ak. ⁵Enimin, angëmëne ala axo kam ex na ekaɗac ed ekun edexëm el mondake cëŋ ko w̃ëlaya Amara and Kaxanu aŋ? ⁶Alëngw an, kërexo gi na ɗe ar w̃ak eceɗe end Yesu këdi këŋo fufën ndafënan iŋ do exo gi ar këŋo nëp Kaxanu andamat gë ŝaɓucara in. ⁷Aỹap ỹapëk ɓër ax gi ex na okëreceŋ ɓën eni deƴand osede oyekax end ola orexëm eŋ, këdi kë nëxena ow̃ac orexëm ol, do eŋo tëra ŝaɓucara in gë ɓamene ɓandexëm ɓaŋ.

End ojakër eŋ

⁸Ojakër ok ɓëte aỹap ỹapëk eni gi ɓër mopëɓ, ɓër ax gi ex na gë odëxas oki, ɓër aɓi kurelind na ngoƴ iŋ, do këreni gi na ɓër kë ŝotënd koɗi gë enëgwëŝ. ⁹Aỹap ỹapëk eni mëlayand end ekwëta end ŝonët ko Kaxanu gë onden onjekax eŋ. ¹⁰Canayalex pere gër ɓandixa ɓandeɓën mëne ɓër ŝenene exëni eni ñanaxën andiyen and ojakër aŋ, angëmëne gë end kënëɓi nëp këm exëni. ¹¹Ɓëte ɓësoxari ɓër ex ojakër ɓën aỹap ỹapëk eni gi ɓër mopëɓ, ɓër gë anjus, ɓër mokwëta gër ɓeỹ ɗek, këreni gi na ɓëxapëndër. ¹²Jakër in gilexo icën ind asoxari aɓat, kaɗacindëleɓi ŝenene oɓaŝ orexëm ol, do mëlayayindëlexo aye ekun edexëm el. ¹³Ojakër od kë rind ŝenene andiyen andeɓën ok ɓër gër amara ɓën ɗek afëɓ kënëɓi fëɓënd, do axor këni xorënd eni yeƴan gë or gapak osëm end ekwëta ed ɓar këɓo gër Yesu Kërisët eŋ.

End ekwëta eŋ

¹⁴Timote, mondako këmi ỹëgwënëlind kayëta ijo ado ga këme yarënd mi nëngali gogo dëŋ. ¹⁵Ɓari angëmëne ame ƴeli ex na gërëgako, anang nang këƴ ang ỹapëk eƴ ɗiyand gër ekun ed Kaxanu ak. Ekun elo ex Amara and Kaxanu and w̃ëlayak ɗal aŋ, ang xëcar ir aciw̃ fo. ¹⁶Endeƴ end Kërisët end ŝon baxo Kaxanu elod ga ỹanak ngwën aŋ cëŋ, iyo aỹap ỹapëk enang ed mëne mbaŋ rafëk el:

Kërisët ŝanayaw bax gë eman,

Angoc Amënëk aŋ w̃asin këɓo mëne ar ŝenene ex,

gër omeleka ŝanaya ko,

endexëm eŋ sëfët këni gër ɓenëng ɓend ɓela,

ɓëranjëm w̃ak endexëm eŋ gër ngwën,

Kaxanu w̃ëla këŋo gër orën gë enjaran eŋ.

End ɓësëƴali ɓër ɓenëgwëŝ eŋ

¹Ɓarikan Angoc and Kaxanu aŋ rek kerët mëne gër ɓakey ɓapelatar, ɓërëmar aƴepan këɓi ƴepan ekwëta ed Kërisët el do eni kwënda etëf ed ɓend ɓangoc ɓand këɓi nambelind ɓela, do gë osëƴali or ɓend ɓëyël. ²Ɓën ex ɓër kë w̃and enëɓi yifa ɓëỹëŋënax ɓër kë laɓayand ɓën, gë ɓënëgwëŝ ɓën, do gë ɓër ŝor kënëɓi gër onden gë endun end lëxw bani xali warëk ɓën4.2 Amëd aŋo, mondako banëɓi ŝorënd ɓëlaw̃ ɓër ɓela ɓën do gë okaɗëp od baɓi naw̃and ɓëxwën ɓëreɓën ok ang kënëɓi rind oxeƴ nanganëme fo ak.. ³Ɓela ɓëjo kë sëƴalind mëne ɓërëw̃ak end Yesu do nang këni ɗal ɓën këreni ñërënd na, ɓëte këreni ƴambënd na ɓeɓërëmar xarak Kaxanu rik eni ƴambënd do eno cëkwand. ⁴Ɗek er ri ko Kaxanu in aye yek, ỹoweỹ ax gi ex na er monap angëmëne aŝëkwa këno ŝëkwand en ƴambaxën. ⁵Enimin, er ex yo kë w̃ënënd gë eyeƴan ed Kaxanu el do gë cale iŋ.

End ola or ariyenin ar Kërisët eŋ

⁶Angëmëne ɓapela ɓaŋo këƴëɓi sëƴalind ɓëmaỹe ɓëŋ, ata keƴ hi ariyenin ayekax ar Yesu Kërisët. Mondako kë ŝanaya gër ola oreƴ mëne ɓend ekwëta ɓeŋ do gë osëƴali or këƴ sëfënd din ol ang eƴamb ƴamb fo hik gër aniyan andeƴ. ⁷Ɓarikan cusëlëɓi ɓër kë sëƴalind ɓendacan ɓend kë ƴepënënd ɓend Kaxanu ɓën gayik ɓësoxari ɓëxarëk këɓi ɓalënd ɓendacan ɓeŋo. Kemënal eƴ ɗiyand ang ỹapëk exo ɗiyand ar këŋo ɓalënd ɓend Kaxanu ak. ⁸Edi ed ɓeɓër kë ɓëngwënënd eman el ofëcak dëŋ exëna. Ɓarikan ofëcak or ar këŋo ɓalënd ɓend Kaxanu ol xucak ex këɓën. Gayikwa Kaxanu aɓeƴa ɓeƴa këŋo ar kë rind mondako an aniyan and gërëgako aŋ do gë and kë ƴowënd aŋ. ⁹Eyeƴan elo ed ɗal ex, ed mokwëta aye ex. ¹⁰Ɓiyi asoro këne soronde gër andiyen, axemëna këne xemënande gër ekwëta, ang ɓër okaxër fo gayik ayar kënëŋo yarënde Kaxanu, mëŋ ar gë aniyan an, adofa ɗek ɗek in ɓërëw̃ak endexëm ɓën.

¹¹Ata ɓeŋo ỹapëk eƴëɓi pelënd, do eƴëɓi tëƴalind eni dind. ¹²Awa wëj cëŋ, gil ar ŝenene, do ɓërëw̃ak ɓën korindëlexëni eni tëfëteli: eyeƴan edeƴ el, gë ɓandixa ɓandeƴ ɓaŋ, gë aŋana andeƴ aŋ, gë ekwëta edeƴ el, do gë ow̃ënëk oreƴ ol. Gayik ŝambenjar fo ɓayi këƴ, ala kërexi yaf na. ¹³Xali yatir këme ƴeli, ɓalëkënalind opën od akayëta and Kaxanu ok gër Amara. Pelindëɓi eni kemëna gër etëf ed er këni wëlelind in ɓëte kemënal eƴëɓi tëƴalind. ¹⁴Anjëla and re baxo alaw̃ënel mëne Kaxanu yël ki në end oyekax orexëm aŋ, aŝot ŝot këƴ and xwëtan këni otaxan, do ŝalen këni enga end ɓëlëngw ɓër gër Amara eŋ. Do wëj këreƴ ɗangangan na. ¹⁵Ɓalindëlexi mbaŋ ɓeŋo, yëlayal gë emëkw el ɗek gër andiyen andeƴ. Ata këni ỹana eni watënd ɓër gër Amara ɓën ɗek mëne ola oreƴ ol ang këŋo ỹapanënd Kaxanu ak dëŋ hik. ¹⁶Titinalind aniyan andeƴ aŋ do gë osëƴali oreƴ ol. Ɓalëkënalind ɓeŋo ɗek. Enimin, angëmëne mondako këƴ rind afex kën fex wëj, do gë ɓër ki ɓaxëtënd ɓën.

End ɓapela eŋ

¹Ar xarëna ki gër Amara an, pelëralo ang sorix fo, këreƴëŋo dexëra na kwëlaƴ-kwëlaƴ. Do ocambenjar ok, pelërayindëɓi ang ɓëmaỹe fo. ²Asoxari axarëk an, pelëralo ang norix fo, do ɓësoxari ɓëɓeja ɓën, pelërayindëɓi gë ow̃ënëk, ang ɓëmaỹe fo.

³Dëcarayindëɓi ɓësoxari ɓëseɓëta seɓëta ɓën angëmëne ani gi ex na gë ar këɓi rëcarand. ⁴Angëmëne asoxari aseɓëta seɓëta an gë oɓaŝ exo ba gë ejiw̃ ɓën exo, ɓën tëƴalexëni emëlaya edexëm el. Maŝënindëlenëɓi ɓëxarëk ɓën eɗëɓa ed lëɓa kënëɓi el eni wataxënënd ɓër hi këni ekun eɓat ɓën ekwëta edeɓën el gayik eŋo këŋo nënganënd Kaxanu. ⁵Ar hik enim asoxari aseɓëta seɓëta an, ar ɓayik gaɓat an, ajo ex ar këŋo yarënd Kaxanu an. Ciŝ wec xemëna ko cale iŋ do gë okar od eŋo dëca ok. ⁶Ɓarikan asoxari aseɓëta seɓëta, ar xwëndak amëkëña and gë ɓësoŝan an, anëka nemi ko ado ga ɓayi ko mopër. ⁷Eŋo ỹapëk eƴëɓi pelënd ɓësoxari ɓëseɓëta seɓëta ɓën eni ɗiyaxënënd gë end kënëɓi nëp këm. ⁸Angëmëne ala eŋo keƴ emëlaya ed ɓërexëm el, adofa ɓër ekun edexëm ɓën, anëka lap ko ekwëta edexëm el, anëka ỹëŋën ko nëmëc gë ar elod axo gi ex na këreceŋ an.

⁹Eno ñëgwaxën asoxari aseɓëta seɓëta an gër akayëta and ɓësoxari ɓëseɓëta seɓëta, tëkëleŋo pere ɓëniy ofëxw ocongeɓat do gilexo ar ỹër baŋo asoŝan aɓat fo. ¹⁰Ɓela ɓën deƴayindëlexëni mëne ari baxo rind ɓenjekax ɓeŋo: aye baɓi w̃ëlayand oɓaŝ orexëm ol, gë emëkw epeŝax baɓi xacand ɓëliyer ɓën, aneɓën baɓi neɓënënd osapar oŋ ɓërëw̃ak ɓën, arëcara baɓi rëcarand ɓër ŝëmura këɓi ɓën, do ɓenjekax ɓend ex yo baxo rind.

¹¹End ɓësoxari ɓëɓeja ɓëseɓëta seɓëta eŋ cëŋ, aỹandi këɓi ỹandiɗ enëɓi ñër gaŝëxe, do eno teɓ Kërisët. Men ex, këreƴëɓi ñëgwënd na gër akayëta and ɓësoxari ɓëseɓëta seɓëta. ¹²Ɓësoxari ɓëseɓëta seɓëta ɓër seɓëk eyëla eñanar ed yëlaya bani el monëp exëni. ¹³Mondako hixën këni ɓëxwëlaraxik, do këni sëfërand ɓëciw̃ ɓëŋ gë omëkara. Ɓëte er xurik ex ñënën in ex, ga wata këni eyeƴan gë ofëcak këm el, do gë eɗil ed gër ɓend ax gi ex na ɓendeɓën el. ¹⁴Awa wëno er këmëni xaranënd ɓësoxari ɓëɓeja ɓëseɓëta seɓëta ɓën enëɓi ñërënd gaŝëxe, enëɓi cotënd oɓaŝ, do eni mëlayand ŝenene ekun edeɓën el, këdi këni ŝot ɓërangoỹëra andeɓi ɓën er kënëɓo renaraxën. ¹⁵Ɓërëmar cëŋ anëka ŝapa këni do këno sëfënd Sindan in. ¹⁶Angëmëne asoxari arëw̃ak eɓi cot ɓësoxari ɓër nëng irexëm ɓëseɓëta seɓëta, kemënalexo eɓi dëcarand këdi këɓi lenga emëlaya edeɓën el ɓër gër Amara ɓën do eni tëkwan edëcaran ed ɓësoxari ɓëseɓëta seɓëta ɓër ax gi ex na gë ar këɓi rëcarand ɓën.

End epëɓ ed ɓëlëngw ɓër Amara eŋ

¹⁷Ɓëlëngw ɓër Amara ɓër kë xaɗacënd ŝenene ɓën, aỹap ỹapëk enëɓi pëɓënd do enëɓi dëcarand adofa ɓër xemënak gër epemëra ed end Kaxanu do gër osëƴali ɓën. ¹⁸Ga rek wa Oñëgw Omënëk ok:

«Këren kapënd na etëỹ ed engaŝ end këŋun wëñënd bële eŋ.» Do

«Ar kë riyenind an ỹap këŋo acosa aŋ5.18 Andocane 25.4.»

¹⁹Ar këŋo lëxwënd alëngw ar Amara xarak axo gi ex na gë otede oki ba otas, këreƴëŋo yaka na. ²⁰And ko w̃endëra ala gër Amara aŋ, dexëralo poyoma eni yëdaraxën ɓëte ɓër ɓayik ɓën.

²¹Axara xara këmi gë oɓal osëm, gër lëngw ir Kaxanu, gër ir Yesu Kërisët, do gër ir omeleka omënëk: tanal eƴ dind ɗek ɓeɓër këmi felënd ɓëjo, do ỹoweỹ këreƴ dind na gë epitëndër ed ɓela. ²²Kemënal wëj dëŋ eƴ gi din aw̃ënëk fo. Kërexi nëkanënd na etana ed ala mokwëtan otaxan exo gixën alëngw el, gë ala këren ɓar na gër ɓeñëŋënax ɓendexëm. ²³Gayikako laŋ ki ƴambënënd acël aŋ xali eƴ ɗaki, ceɓind tëkër ngoƴ iŋ, teɓël eceɓ ed wayët men fo el.

²⁴Na fo exëni ɓër gë ɓamena ɓand wat-wat ɗamana kiti ex gixën indeɓën iŋ. Ɓëte na fo exëni ɓër kë ŝonënd ɓamena ɓandeɓën do and kë nëka aŋ fo kë ŝanayand. ²⁵Andamat ex gë ɓandixa ɓanjekax ɓaŋ: ɓand ax watind na ataŋ ɓaŋ dëŋ ax ɓayi na ga ŝonayak.

End okaɗëp eŋ

¹Ɗek ɓër ex gër oxaɗëp ɓën, pëɓindëlenëɓi mbaŋ ɓëxwën ɓëreɓën ɓën ang ỹapëk ak, mëŋ ɓayik ɓër fac ɓën ani denara na ow̃ac or Kaxanu ol, ani ƴepën na osëƴali oreɓi ol. ²Ɓërëw̃ak ɓër ex okaɗëp ɓën kërenëɓi yafënd na ɓëxwën ɓëreɓën ɓën ado ga hi këni ɓëmaỹe ɓëndeɓën gër ekwëta. Ɓëte gayikako ɓën ɓërëw̃ak, ɓër h̃an këɓi Kaxanu kënëɓi riyeninënd, këɓënëlex nëmëc andiyen andeɓën aŋ.

End osëƴali eŋ

Eŋo ỹapëk eƴëɓi tëƴalind do eƴëɓi pelënd eni di. ³Angëmëne ala exo tëƴalind ɓecëxen, ɓend fitarëk gë eyeƴan ed ɗal ed Yesu Kërisët, Axwën areɓi el, angëmëne axo tëfënd na ɓeɓër sëƴali këmun mëne aỹapan këŋo ỹapanënd Kaxanu ɓën, ⁴awa ajo ar fufën këŋo ndafënan hi ko, ar nemërak hi ko. Mokanj këŋo xanjënd ecampëre el do gë ekeỹër ed në end ɓëndeƴ ɓëtil el. Mondako kë ỹanand oƴakëraxi ol, gë ow̃er oŋ, gë odenar ok, do gë eyëlandër ed ɓeñëŋënax el. ⁵Ɓakucara ɓand ɓela ɓëjo ɓaŋ ax kwëtënd na gë ekwët. Ɓakucara ɓand ɓër gë onden otëmbak ex, ɓand ɓër ax bo ex na gër ɗal ex, ɓand ɓër kë yëland mëne ekwëta ed xwëta këno Kaxanu el acotëraxën ex. ⁶Eyo ɗal ex mëne, eɓalëkënali ed ɓend Kaxanu el acotëraxën atëm ex angëmëne anëngandëra ki nëngandërand gë er ŝot këƴ in. ⁷Enimin ỹoweỹ ane mëlaw exe na gër ngwën ro, ɓëte ỹoweỹ ane mëlaye na. ⁸Awa angëmëne aŝot këne ŝotënde eƴamb ƴamb in, do gë ɓanjëm ɓaŋ, gwac eɓo. ⁹Ɓarikan ɓër kë faỹënd gër ow̃ëkw oreɓën mëne afo eni gi ɓër gë napul ɓën kë wëcënd gër eñëŋënax. Ɓën këɓi sërand ang amene fo oñandi odanjëm, oñandi opënirëx, oñandi oñëŋënax. Do oñandi oko këɓi sëw̃ënd eni nëxena do eni nambëra. ¹⁰Enimin, aŋana and koɗi aŋ ex anëmbët and gër ed kë ỹanawënd toro ind ex yo. Ata ɓërëmar ga h̃an këni koɗi in, h̃awëtaxën këni ekwëta ed Kaxanu el, do sëkaxën këɓi oƴot odanjëm.

Ɓapela ɓapelatar ɓaŋ

¹¹End wëj ala ar Kaxanu eŋ cëŋ, kwëỹëtal ɓeŋo. Calayind aniyan and ŝenene, and h̃an ko Kaxanu, and gë ekwëta; aniyan and gë aŋana and ɓela, and gë eɓuŋa, and gë onden omëngwëk. ¹²Kaxërind okaxër onjekax ond ar xwëta këŋo Kaxanu oŋ, kwëtayal aye aniyan and din and w̃aceli ki aŋ. Ax gi ex na nde ga ŝot këƴ aniyan aŋo rixën baƴ osede oyekax ol do wël këni otede odanjëm? ¹³Gër lëngw ir Kaxanu, mëŋ ar këɓi yëlënd aniyan ɗek ɓeɓër gë onjën an, do gër lëngw ir Yesu Kërisët, mëŋ ar reƴa bax osede oyekax gër lëngw ir Poŋës Pilat an, këmi felënd eŋo: ¹⁴kwëtayal apela aŋ do eƴ ɓayi, aw̃ënëk do ar gë end këno nëp këm xali yatir ko ɓakaw Yesu Kërisët, Axwën areɓi an. ¹⁵Aɓaka ko ɓakaw and këŋo h̃atan Kaxanu aŋ,

mëŋ ar ex gë onënga do axwën owun an,

ar ex enim Emun an,

ar ex Emun end ɓemun an,

do Axwën ar ɓëxwën an.

¹⁶Mëŋ gaɓat ex ar ax cësënd na an,

mëŋ ex ar lëgëk gaɓat gër angoɓen an,

angoɓen and ala ax tëkand na aŋ,

angoɓen and elod ala ax wat na aŋ,

angoɓen and ala ax kor na exo nëkon aŋ.

Mëŋ xwënëk enjaran eŋ

do gë panga ind din ir din iŋ! Amen!

¹⁷Pelëralëɓi ɓër ŝotëk napul ir gër ngwën ro ɓën, këreni dafënand na. Pelëlëɓi eno kwëtand Kaxanu, mëŋ ar kë yëlënd ɗëm ɓeỹ ɗek, eɓo nëngandëraxënënd an. Do këreni kwëtand na napul ir kë xor ex kwët ijo. ¹⁸Pelëlëɓi eni dind enjekax eŋ, napul ireɓën in gilex añësa and ɓandixa ɓanjekax. Dëcarayindëlenëɓi ɓela ɓën gë emëkw epeŝax, këreni kwëjënalind na. ¹⁹Do Taỹëndëlexëni mondako napul isëm ir këni xanaɗ ecan ecan in, eni ɗëkayaxën aniyan and ɗal aŋ.

²⁰E Timote, kwëtayal aye er xwëtënan ki Kaxanu in. Kwëỹëtal eyeƴan ed kë ƴepënënd ɓend Kaxanu el, teɓël eyeƴandëra ed ax ɓaŝënënd na ekwëta el. Kwëỹëtal ecampëre ed në end onangëran or fuɗac ol. ²¹Ɓërëmar cëŋ, ga bani soŝanand mëne aŝot ŝot këni onangëran olo, seɓaxën këni ekwëta ed Kaxanu el.

Awa Kaxanu yëlëleŋun oyekax orexëm ol!