NARONAA

Musa takada siikↄ̃de

Isarailanↄ kunna gbárannan 9:1-14:45, 20:1-21:35

Balamu 22:1-24:25

Vĩnla dikpɛkɛnaa

¹ Dikiri yã ò Musanɛ Sinai gbárannan Isarailanↄ bona Misila wɛ̃̀ plade mↄ káaku gũn à pì: ² Isarailanↄ gↄ̃ Vĩnla dikpɛ kɛ a gↄrↄa. ³ À dikpɛ pì kɛ mↄ díkĩna gↄrↄ gɛ̃ro donsariden ↄkↄsi. À kɛ lákũ ma dàárɛ nà pínki kũ a dokayã kũ ma dàárɛnↄ.

⁴ Musa ò Isarailanↄnɛ ò Vĩnla dikpɛ kɛ, ⁵ akũ ò dikpɛ pìi kɛ̀ Sinai gbárannan mↄ káaku gↄrↄ gɛ̃ro donsariden ↄkↄsi. Ò kɛ̀ lákũ Dikiri ò Musanɛ nà pínki. ⁶ Gbɛ̃kenↄ kú gwe ò gbãsĩ vĩ kũ ò ↄ nà gɛ̀ɛa yãi, akũ odi le ò Vĩnla dikpɛ kɛ̀ zĩ birearo. Akũ ò gɛ̀ɛ ò Musa kũ Harunao lè zĩ birea gↄ̃̀nↄ ⁷ ò pì Musanɛ: Gɛ̀ yã musu o gbã̀a lɛ̀. Bↄ́yãi ò gìwɛrɛ ò su kũ gbanↄ Dikirinɛ kũ ó gbɛ̃nↄo a gↄrↄaa? ⁸ Musa wèḿma à pì: À zɛ ari mà ma lákũ Dikiri ni o á yã musu nà. ⁹ Akũ Dikiri pì Musanɛ: ¹⁰ Ǹ o Isarailanↄnɛ, tó ń gbɛ̃kenↄ ke ń burinↄ kpɛ́ gbãsĩ vĩ gɛ̀ yã musu, ke ò gɛ̀ɛ wɛ̃tɛ zã̀zã ken, oni fↄ̃ ò Vĩnla dikpɛ kɛmɛnɛ kpɛkpɛ. ¹¹ Mↄ plade gↄrↄ gɛ̃ro donsaride ↄkↄsin oni dikpɛ pì kɛ. Oni sã nↄ̀bↄ só kũ burodi futɛnasario kũ lá kyã̀kyãao. ¹² Òsun a ke tó gu dↄ̀aro akũsↄ̃ òsun sã pì wá ke ɛ́ro. Oni Vĩnla dikpɛ pì kɛ lákũ ma dìtɛárɛ nà pínki. ¹³ Gbɛ̃ kũ adi gbã̀ lɛ́ro akũsↄ̃ adi gɛ́ wɛ̃tɛ kearo, tó à gì Vĩnla dikpɛ pì kɛi, ò ade bo a gbɛ̃nↄ tɛ́, zaakũ adi sumɛnɛ kũ gbao a gↄrↄaro. A taari ni wí a musu. ¹⁴ Bòasu kũ à kú á tɛ́ akũsↄ̃ à ye à Vĩnla dikpɛ kɛmɛnɛ, séde à kɛ lákũ ma a doka dìtɛárɛ nà. Bòasu kũ bedeo ń pínki yã dokↄ̃nↄmɛ.

Tɛ́luku dana bizakutala

(Bon 40:34-38)

¹⁵ Zĩ kũ ò bizakuta kũ̀ dↄ̀, tɛ́luku pìi dà sèeda kuta pìla. Naana zaa ↄkↄsi ari gu gɛ̀ɛ à dↄ̀o tɛ́luku pì kú kuta pìi musu lán tɛ́ bà. ¹⁶ Lɛn àdigↄ̃ kun lɛ gↄrↄ sĩnda pínki, àdigↄ̃ kú kuta pìla fãnantɛ̃, gwãani sↄ̃ lán tɛ́ bà. ¹⁷ Tó à gò kuta pìia, akũ Isarailanↄ dì futɛ kũ táo. Gu kũ tɛ́luku pìi zɛ̀n, gwen òdi bùra kátɛn. ¹⁸ Tó Dikiri mↄ̀ńnɛ lɛ, òdi bùra futɛ. Tó à mↄ̀ńnɛ dↄ, òdi ɛra ò bùra kátɛ. Tó tɛ́luku pì da kuta pìla sↄ̃, ń bùraa dìgↄ̃ katɛnamɛ. ¹⁹ Tó tɛ́luku pì tɛn gↄrↄ pla kɛ kuta pìla, òdigↄ̃ Dikiri yã ma, òdi bùra futɛro. ²⁰ Zĩkenↄa tɛ́luku pìi dì gↄrↄ pla kɛ kutalaro. Tó Dikiri mↄ̀ńnɛ, òdi bùra kátɛ, tó Dikiri ɛ̀ra à mↄ̀ńnɛ dↄ, akũ òdi bùra futɛ. ²¹ Zĩkenↄa sↄ̃ tɛ́luku pìi dì zɛ gu dokↄ̃nↄ fíti zaa ↄkↄsi ari kↄnkↄ. Tó à gòa kↄnkↄ, akũ òdi bùra futɛ. Fãnantɛ̃ ke gwãanin yá, tó tɛ́luku pìi gòa, òdi bùra futɛmɛ. ²² Tó tɛ́luku pìi gↄ̃̀ zɛna kuta pìla gↄrↄ do ke mↄ do ke wɛ̃̀ don yá, òdigↄ̃ katɛna bùran, òdi futɛro. Tó à gòa, akũ òdi bùra futɛ. ²³ Òdi bùra kátɛ ke ò bùra futɛ Dikiri lɛ́ sariro. Òdigↄ̃ Dikiri yã ma lákũ à dà Musanɛ à òńnɛ nà.

Andurufu kãkãki mɛ̀n planↄ

¹ Dikiri yã ò Musanɛ à pì: ² Ǹ kãkãki pi mɛ̀n pla kũ andurufu kũ ò gbɛ̃̀gbɛ̃ manamanao gbɛ̃nↄ kakarabↄ ũ de ò bùra futɛ. ³ Tó ò kãkãki pìnↄ pɛ̀, gbɛ̃nↄ ni su ò kakaranyĩ ń pínki dakarɛki kpɛ́lɛlɛa. ⁴ Tó kãkãki mɛ̀n don ò pɛ̀, Isaraila buri don’arɛde kũ ò de kína ũnↄ mɛ́ oni su ò kakaranyĩ. ⁵ Tó ò kãkãki pìnↄ pɛ̀ kũ yĩsãmpanaao, gbɛ̃ kũ ń bùra kú ifãboki kpanↄ mɛ́ oni bùra futɛ káaku. ⁶ Tó ò a gɛ̃̀n plade pɛ̀ kũ yĩsãmpanaao, gbɛ̃ kũ ń bùra kú gɛ̀nↄmidↄki kpanↄ mɛ́ oni bùra futɛ. Kãkãkipɛna kũ yĩsãmpanaao pìimɛ gbɛ̃nↄ dana zɛ́n sèeda ũ. ⁷ Tó ò ye ò gbɛ̃nↄ kakara, ògↄ̃ pɛ́ yĩsãmpanaa sari.

⁸ Haruna nɛ́ sa’orinↄ mɛ́ oni kãkãki pìnↄ pɛ́. Anigↄ̃ deárɛ doka ũ gↄrↄ sĩnda pínki, ákↄ̃nↄ kũ á burinↄ. ⁹ Gↄrↄ kũ a ka á bùsun, tó átɛn gɛ́ zĩ̀ ká kũ á ibɛrɛ kũ oni sù ò futɛ kãáonↄ, àgↄ̃ kãkãki pìnↄ pɛ́ kũ yĩsãmpanaao, de á yã le à dↄ makũ Dikiri á Ludagu, mani á bo á ibɛrɛɛ pìnↄ ↄĩ. ¹⁰ Gↄrↄ kũ átɛn pↄnna kɛ sↄ̃, dikpɛn yá, mↄ dufu gↄrↄ káaku zĩn yá, àgↄ̃ kãkãki pìnↄ pɛ́ á sa’opↄ kũ òdi ká tɛ́n à tɛ́ kũnↄa kũ á sáabukpana sa’opↄnↄ, á yã ni dↄmagu. Makũmɛ Dikiri á Luda ũ.

Isarailanↄ futɛna Sinai

¹¹ Wɛ̃̀ plade mↄ plade gↄrↄ barode zĩ, tɛ́luku gò sèeda kutala, ¹² akũ Isarailanↄ bùraa fùtɛ Sinai gbárannan, òtɛn bùra sↄ̃sↄ̃ ari tɛ́luku gɛ̀ɛ à zɛ̀ Parani gbárannan. ¹³ Ń bùra futɛna káakun gwe. Ò kɛ̀ lákũ Dikiri dà Musanɛ à òńnɛ nà.

¹⁴ Yuda zĩ̀karinↄ mɛ́ ò bùraa fùtɛ gã̀ kũ gã̀ao káaku kũ ń tutaao. Aminadabu nɛ́ Nasↄ̃mɛ ń don’arɛde ũ. ¹⁵ Zua nɛ́ Nɛtanɛlimɛ Isaka zĩ̀karinↄ don’arɛde ũ. ¹⁶ Eloni nɛ́ Ɛliabumɛ Zɛbuluni zĩ̀karinↄ don’arɛde ũ. ¹⁷ Gɛsↄmu burinↄ kũ Mɛrari burinↄ kuta pìi gbòro, akũ ò sɛ̀ ò dào zɛ́n.

¹⁸ Akũ Rubɛni zĩ̀karinↄ bùraa fùtɛ gã̀ kũ gã̀ao kũ ń tutaao. Sedeu nɛ́ Ɛlizumɛ ń don’arɛde ũ. ¹⁹ Zurisadai nɛ́ Selumiɛlimɛ Simɛↄ zĩ̀karinↄ don’arɛde ũ. ²⁰ Dɛwɛli nɛ́ Ɛliasafamɛ Gada zĩ̀karinↄ don’arɛde ũ. ²¹ Akũ Koa burinↄ Luda pↄ́nↄ sɛ̀ ò dào zɛ́n. Ò kuta pìi dↄ̀ ari ògↄ̃ ká.

²² Akũ Ɛflaimu zĩ̀karinↄ bùraa fùtɛ gã̀ kũ gã̀ao kũ ń tutaao. Amiudu nɛ́ Ɛlisamamɛ ń don’arɛde ũ. ²³ Pedazu nɛ́ Gamaliɛlimɛ Manase zĩ̀karinↄ don’arɛde ũ. ²⁴ Gideoni nɛ́ Abidãmɛ Biliaminu zĩ̀karinↄ don’arɛde ũ.

²⁵ Akũ Dã zĩ̀karinↄ bùraa fùtɛ gã̀ kũ gã̀ao kũ ń tutaao. Mↄ́kↄ̃nↄ mɛ́ òdigↄ̃ tɛ́ kpɛkpɛ. Amisadai nɛ́ Ayɛzamɛ ń don’arɛde ũ. ²⁶ Ɔkↄrana nɛ́ Pagiɛlimɛ Asa zĩ̀karinↄ don’arɛde ũ. ²⁷ Enana nɛ́ Airamɛ Nafatali zĩ̀karinↄ don’arɛde ũ. ²⁸ Lákũ Isarailanↄ dì bùra futɛfutɛ ògↄ̃ tɛ́tɛkↄ̃i nàn gwe gã̀ kũ gã̀ao.

²⁹ Obabumɛ Musa anzure Ruɛli nɛ́ ũ, Midiã burimɛ. Musa pìnɛ: Ótɛn da zɛ́n ò gɛ́ bùsu kũ Dikiri pì áni ó gban. Ǹ mↄ́ ǹ gɛ́ kũoo, óni yã mana kɛnnɛ, zaakũ Dikiri nnamana gwe lɛ́ sɛ̀wɛrɛ. ³⁰ Akũ à pìnɛ: Mani gɛ́ro, mani ɛra ma bùsun ma bedenↄ kĩnaamɛ. ³¹ Musa pì: N yã nna. Ǹsun ó tónlo, zaakũ ń bùrakatɛki mana dↄ̃ akũsↄ̃ mↄkↄ̃n mɛ́ ĩni kɛ ó wɛ́de ũ. ³² Tó n gɛ kũoo, óni yã mana kũ Dikiri ni kɛwɛrɛ kɛnnɛ se.

³³ Isarailanↄ bùraa fùtɛ Dikiri kpi sarɛ ò táa ò gↄrↄ aakↄ̃. Ò dò arɛ kũ Dikiri bàka kunna kũńwo àkpatiio de à bùrakũki mↄńnɛ. ³⁴ Tó ò fùtɛ ò dà zɛ́n, Dikiri tɛ́luku pìi dìgↄ̃ kúńla fãnantɛ̃. ³⁵ Tó ò dà zɛ́n kũ àkpatiio, Musa dì pi:

Ǹ futɛ Dikiri, de n ibɛrɛnↄ fãkↄ̃a,

n zãngurinↄ bàa lɛ́nnɛ.

³⁶ Tó ò dìtɛ, Musa dì pi:

Dikiri, ǹ ɛra ǹ su Isaraila dúbu ũgbangbanↄa.

Dikiri tɛ́ futɛnaa

¹ Isarailanↄ zuka kà Dikirii ń warikɛna yãi. Kũ Dikiri mà, à pↄ fɛ̃̀, akũ a tɛ́ fùtɛ ń tɛ́, ń bùra kpado tɛ́ kũ̀. ² Akũ gbɛ̃nↄ wiki lɛ̀ Musaa. Kũ à wɛ́ kɛ̀ Dikiria, akũ tɛ́ pìi zɛ̀. ³ Akũ ò tↄ́ kpà gu pìinɛ Tabera, kũ Dikiri tɛ́ fùtɛ ń tɛ́ gwe yãi.

Dikiri kpɛkpɛrɛwinↄ gbarɛnaa

⁴ Buri pãndenↄn kú Isarailanↄ tɛ́, òtɛn pↄ́ble pãnde ni dɛ, akũ Isarailanↄn tɛn ↄ́ↄ dↄ se ò pì: Mán óni nↄ̀bↄ len ò sóo? ⁵ Ótɛn kpↄ̀ kũ o sò Misila ó pↄyeinaaa bɛgɛ kɛ kũ plɛ̃̀nↄ kũ gbɛzɛnↄ kũ ɛfↄnↄ kũ arubasanↄ kũ arubasa gizonↄo. ⁶ Tera sà ó lɛ́ gà, zaakũ odì pↄ́ke lero, séde mana dí baasiro.

⁷ Manaa pì wɛ́ kete, à de lán lí’ↄ bàmɛ. ⁸ Isarailanↄ dì sɛ́tɛ ò lↄ́ gbɛ̀n ke òdi zↄ̃ gón. Òdi disa ò kàra kɛo. A nna lán kàra asãnaa bà. ⁹ Tó plí kpà bùran gwãani, akũ manaa pìi dì kↄ́tɛ se.

¹⁰ Musa mà òtɛn ↄ́ↄ dↄ ↄnlɛ kũ ↄnlɛo. Dikiri pↄ fɛ̃̀ manamana, akũ à kɛ̀ Musanɛ ĩni ¹¹ à pìnɛ: Bↄ́yãin ntɛn wɛ́ tãmaii? Ma yã kpate mɛ́ à kɛ̀nnɛ vãni, akũ n gbɛ̃ pìnↄ gwana aso dìmɛnɛɛ? ¹² Makũ mɛ́ ma gbɛ̃ pìnↄ nↄ̀ↄ sì yá? Makũ mɛ́ ma ń í yá? Bↄ́yãi n pìmɛnɛ mà ń kú kpɛ lán nɛ́rande bà mà gɛ́ kũńwo bùsu kũ n la dà ń dizinↄnɛnn? ¹³ Mákpan mani nↄ̀bↄ len mà kpá gbɛ̃ pìnↄa ń pínkii? Zaakũ òtɛn ↄ́ↄ dↄmɛnɛ òtɛn pi mà ń gba nↄ̀bↄↄ ò só. ¹⁴ Mani fↄ̃ mà gbɛ̃ pìnↄ aso sɛ́ ń pínki madoro, zaakũ ń aso demala. ¹⁵ Tó lɛn ĩni kɛmɛnɛ lɛ, ǹ tó ma n pↄnna le ǹ ma dɛ gↄ̃̀nↄ. Ǹsun tó mà wari pì kɛ doro. ¹⁶ Akũ Dikiri pìnɛ: Ǹ Isaraila gbɛ̃ zↄ̃kↄ̃ kũ ń ń dↄ̃ don’arɛde ũnↄ kakara gbɛ̃nↄn baaakↄ̃ akuri ǹ su kũńwo dakarɛki kuta kia ògↄ̃ kú kũnwo gwe. ¹⁷ Mani kipa mà yã onnɛ gwe mà a Nini kũ à kúmma kpado go mà dińnɛ, oni gbɛ̃nↄ gwana aso sɛ́ kũnwo de ǹsungↄ̃ ń sɛna ndo doro yãi. ¹⁸ Ǹ o gbɛ̃nↄnɛ ò gbã̀ bo ń zĩdanɛ zia yãi, oni nↄ̀bↄ le ò só. Zaakũ ò ↄ́ↄ dↄ̀mɛnɛ ò pì, mán óni nↄ̀bↄ len la ò sóo? Ò pì ò sã̀na Misila. Abire yãin mani ń gba nↄ̀bↄ ò só. ¹⁹ Oni só adi kɛ gↄrↄ donlo, gↄrↄ planlo, gↄrↄ sↄↄronlo, gↄrↄ kurinlo, gↄrↄ baronlo. ²⁰ Oni só mↄ do gbãngbãn ari à bo ń yĩn a ni bo ń pↄn. Zaakũ makũ Dikiri má kú ń tɛ́, akũ ò pã kpàmai. Ò zuka dↄ̀ma ò pì, bↄ́yãi ò bò Misilai? ²¹ Akũ Musa pì: Gↄ̃gbɛ̃nↄn kú kũmao tá gũn gbɛ̃nↄn dúbu wàa aakↄ̃, akũ n pì ĩni nↄ̀bↄ kpáḿma ò só ari mↄ do gbãngbãn yá? ²² Bee tó ò sãnↄ kũ zùnↄ dɛ̀dɛ dasidasi, ani mↄ́ḿma yá? Tó ò ísira kpↄ̀nↄ sɛ̀tɛ pínki, ani mↄ́ḿma yá? ²³ Dikiri wèa à pì: Ma gbãna ni kánloo? Ĩni e tera, tó yã kũ ma ònnɛ ni kɛ ke ani kɛro.

²⁴ Musa bò à Dikiri yã pìnↄ òńnɛ. À Isaraila gbɛ̃ zↄ̃kↄ̃nↄ kàkara gbɛ̃nↄn baaakↄ̃ akuri à ń zɛ́ ò lìka kuta pìii. ²⁵ Akũ Dikiri kìpa tɛ́luku gũn à yã ò kãao. À a Nini kũ à kúa kpado gò à dì gbɛ̃ zↄ̃kↄ̃ gbɛ̃nↄn baaakↄ̃ akurii pìnↄnɛ. Kũ à a Nini pìi dìńnɛ lɛ, ò annabikɛyã ò, abire gbɛra odi ɛra ò kɛ̀ doro. ²⁶ Gbɛ̃ kũ Musa ń sɛ́ gbɛ̃nↄn planↄ gↄ̃̀ bùran, gbɛ̃ do tↄ́n Ɛlɛdada, gbɛ̃ do sↄ̃ Mɛdada. Odi gɛ́ kuta kĩnaaro, ama Nini pìi sùḿma se, akũ ò annabikɛyã ò bùran. ²⁷ Kɛfɛnna ke bàa lɛ̀ à gɛ̀ɛ à pì Musanɛ: Ɛlɛdada kũ Mɛdadao tɛn annabikɛyã o bùran. ²⁸ Nuni nɛ́ Yↄsuamɛ Musa kpàasi ũ zaa a kɛfɛnnakɛgↄrↄa, akũ à pì: Baa Musa, ǹ gíńnɛ. ²⁹ Akũ Musa pìnɛ: Ntɛn nɛ̀sɛgↄ̃ba kɛ kũńwo ma yã musun yá? Tó Dikiri a Nini dì a gbɛ̃nↄnɛ ò gↄ̃̀ annabinↄ ũ ń pínki, à manaroo? ³⁰ Akũ Musa ɛ̀ra bùran kũ Isarailanↄ gbɛ̃ zↄ̃kↄ̃ↄ pìnↄo.

³¹ Dikiri tò ĩa bò ísira kpa à sù kũ kpɛkpɛrɛwinↄ, ò dà bùrala. Ò lìka bùraai gu sĩnda pínki à kà tágↄrↄ do ũ, akũsↄ̃ ń vurana lei kà gã̀sãkuru pla. ³² Fãnantɛ̃ birea kũ gwãanio kũ a gu làa dↄnaao ò fùtɛ ò gɛ̀ɛ ò kpɛkpɛrɛwinↄ kũ̀kũ. Gbɛ̃ kũ adi kũkũ dasiro kũ̀kũ bùruma baro. Akũ ò fã̀tɛ à kori kɛ̀. ³³ Kũ ò a nↄ̀bↄↄ dà ń lɛ́n gↄ̃̀nↄ, odi le ò só dasiro, akũ Dikiri pↄ fɛ̃̀ńyĩ à gagagyã kàńgu. ³⁴ Akũ ò tↄ́ kpà gu pìinɛ Lɛ́’idenↄ Mira, zaakũ gwen ò gbɛ̃ kũ nↄ̀bↄ lɛ́’i ń kũnↄ vĩ̀n. ³⁵ Akũ Isarailanↄ fùtɛ gwe ò gɛ̀ɛ Azero ò gↄrↄ pla kɛ̀ gwe.

Miriamu kũ Harunao Musa taari’enaa

¹ Miriamu kũ Harunao Musa taari è Etiopia nↄ kũ à sɛ̀ yã musu, zaakũ à Etiopia nↄ sɛ̀. ² Ò pì: Musa adon Dikiri dìtɛ à yã ò a gãi yá? Adi o ó gãi seroo? Dikiri yã pìi mà. ³ Musa bi gbɛ̃ busɛɛmɛ, a sára kú andunia gũnlo. ⁴ Gwe gↄ̃̀nↄ Dikiri pì Musa kũ Harunao kũ Miriamuoonɛ: À bↄtɛ à gɛ́ dakarɛki kuta kia á gbɛ̃nↄn aakↄ̃. Akũ ò gɛ̀ɛ ń gbɛ̃nↄn aakↄ̃ ń pínki. ⁵ Dikiri kìpa tɛ́luku gũn à zɛ̀ kuta pì kpɛ́lɛlɛa. À Haruna kũ Miriamuo sìsi, akũ ò nài ń pla ń pínki. ⁶ À pìńnɛ: À ma yã ma. Tó ma annabi ke kú á tɛ́, madì bo mà sua wɛ́gupu gũn madì yã onɛ nana gũmmɛ. ⁷ Ama à de lɛ kũ ma zↄ̀bleri Musaoro. Zĩkɛri náanidemɛ ma ↄn gbɛ̃nↄ tɛ́ ń pínki. ⁸ Odì yã bo kↄ̃ lɛ́n. Madì yã onɛ mà a ke utɛnɛro. Àdi wɛ́ si ma takalɛ. À kɛ̀ dera ádi ma zↄ̀bleri Musa taari’ena vĩna kɛroo? ⁹ Akũ Dikiri pↄ fɛ̃̀ńyĩ à a tá o.

¹⁰ Kũ tɛ́luku pìi gò kuta pìla, kusu dà Miriamula gↄ̃̀nↄ, à pura kũ̀ lán buu bà. Kũ Haruna lìtɛ à a gwà, à è kusu dàala, ¹¹ akũ à pì Musanɛ: N yã nna Baa! Ǹsun tó ò yↄ̃nkↄyã taarikɛnaa gbɛ̀ lero. ¹² Ǹsun tó àgↄ̃ de lán nɛ́ kũ ò ì gɛ̀ ũ a mɛ̀ kpado yàkanaa bàro. ¹³ Musa ↄ́ↄ dↄ̀ Dikirinɛ à pì: Luda, n yã nna! Ǹ a werekↄ̃a. ¹⁴ Akũ Dikiri pìnɛ: Tó a de mɛ́ à lɛ́’i fã̀ a ãnnwa, ani kɛnɛ wé’iyã ũ ari gↄrↄ supplaroo? Ò bo kãao bùra kpɛ gↄrↄ suppla gĩa, gbasa ò a sí. ¹⁵ Miriamu kú bùra kpɛ ari gↄrↄ suppla. Isarailanↄ dí da zɛ́nlo sé kũ ò ɛ̀ra ò a sì. ¹⁶ Abire gbɛra ò fùtɛ Azero ò gɛ̀ɛ ò bùraa kàtɛ Parani gbárannan.

Gu’asirigwari gbɛ̃nↄn kuri awɛɛplanↄ zĩnaa

¹ Dikiri pì Musanɛ: ² Ǹ gbɛ̃nↄ zĩ ò gɛ́ Kanaanↄ bùsu kũ matɛn kpá Isarailanↄa yakɛ. Ǹ ń dizinↄ buri gbɛ̃ kũ ò de don’arɛde ũnↄ sɛ́ mɛ̀n dodo ǹ ń zĩ. ³ Akũ à ń gbárɛ lɛ bona Parani gbárannan lákũ Dikiri ò nà. Gbɛ̃ pìnↄ bi Isaraila don’arɛdenↄmɛ ń pínki. ⁴ Ń tↄ́nↄn dí:

Rubɛni burinↄ gũn Zaku nɛ́ Samua,

⁵ Simɛↄ burinↄ gũn Ori nɛ́ Safata,

⁶ Yuda burinↄ gũn Yefunɛ nɛ́ Kalɛbu,

⁷ Isaka burinↄ gũn Yusufu nɛ́ Igali,

⁸ Ɛflaimu burinↄ gũn Nuni nɛ́ Osea,

⁹ Biliaminu burinↄ gũn Rafu nɛ́ Paliti,

¹⁰ Zɛbuluni burinↄ gũn Sodi nɛ́ Gadiɛli,

¹¹ Yusufu nɛ́ Manase burinↄ gũn Susi nɛ́ Gadi,

¹² Dã burinↄ gũn Gɛmali nɛ́ Amiɛli,

¹³ Asa burinↄ gũn Mukaila nɛ́ Setu,

¹⁴ Nafatali burinↄ gũn Vofosi nɛ́ Nabi,

¹⁵ Gada burinↄ gũn Maki nɛ́ Guɛli.

¹⁶ Gbɛ̃ kũ Musa ń zĩ bùsu yakɛnↄn gwe. Musa tↄ́ kpà Nuni nɛ́ Oseanɛ Yↄsua.

¹⁷ Kũ Musa tɛni ń zĩ Kanaanↄ bùsu yakɛ, à pìńnɛ: À bↄtɛ kũ Nɛgɛvi gbárannao à dí bùsu gusĩsĩdea. ¹⁸ À gwa lákũ bùsuu pì de nà, tó a gbɛ̃nↄn gbãna kesↄ̃ ò busɛ, tó ò dasi kesↄ̃ ò dasiro, ¹⁹ tó ń bùsu mana kesↄ̃ à vãni, tó ń wɛ̃tɛnↄn bĩni vĩ kesↄ̃ à vĩro, ²⁰ tó a zĩtɛ gbãna kesↄ̃ à bùsa, tó à línↄ vĩ kesↄ̃ à vĩro. À kokari kɛ à bùsuu pì línɛnↄ sɛ́tɛ à suo. Zaakũ geepi nɛ́ káakunↄ mana gↄrↄn dí. ²¹ Akũ ò gɛ̀ɛ ò bùsuu pìi yakɛ̀ zaa Zini gbárannan ari Reobo, Lebo Amata kpa. ²² Kũ ò bↄ̀tɛ kũ Nɛgɛvi gbárannao, ò kà Ɛblↄnu, gu kũ Anaki burinↄ Aima kũ Sesaio kũ Talamaio kún. Ɛblↄnu katɛna Zoã kũ à kú Misila ã wɛ̃̀ supplamɛ. ²³ Kũ ò kà Ɛsɛkↄlu guvutɛn, ò geepi línɛyↄ̃ do zↄ̃̀ gwe ò lòko lía, akũ gbɛ̃nↄn planↄn sɛna. Ò bísi kũ kakapuraoo sɛ̀ dↄ. ²⁴ Ò tↄ́ kpà gu pìinɛ Ɛsɛkↄlu guvutɛ, geepi línɛyↄ̃ kũ Isarailanↄ zↄ̃̀ gwe yãi. ²⁵ Kũ ò bùsuu pìi yakɛ̀ gↄrↄ bupla, akũ ò ɛ̀ra ò sù.

Gu’asirigwarinↄ baarukpanaa

²⁶ Kũ ò sù Kadɛsi, Parani gbárannan, ò gɛ̀ɛ Musa kũ Harunao kũ Isarailanↄ kĩnaa pínki. Ò sù kũ baaruuo Isarailanↄnɛ ń pínki, akũ ò bùsuu pì línɛnↄ mↄ̀ńnɛ. ²⁷ Ò yã pìi gbã̀ Musanɛ ò pì: O gɛ bùsu kũ n ó zĩn. Vĩ kũ zↄ́’io di gwe. A línɛnↄn dí. ²⁸ Ama bùsupidenↄ gbãna. Ń wɛ̃tɛnↄn bĩni vĩ akũsↄ̃ ń wɛ̃tɛ pìnↄn zↄ̃kↄ̃ manamana. O Anaki burinↄ è gwe se. ²⁹ Amalɛkinↄn kú Nɛgɛvi gbárannan. Itinↄ kũ Yebusinↄ kũ Amↄrinↄn kú bùsu gusĩsĩden, akũsↄ̃ Kanaanↄn kú ísira sarɛ kũ Yoda sarɛo. ³⁰ Kalɛbu gbɛ̃nↄ lɛ́ yĩ̀tɛ Musa arɛ, akũ à pì: Ò gɛ́ ò bùsu pì sí, zaakũ óni fↄ̃ ò zĩ̀ bleḿma. ³¹ Akũ gbɛ̃ kũ ò gɛ̀ɛ kãaonↄ pì: Óni fↄ̃ ò lɛ́tɛ gbɛ̃ pìnↄaro, zaakũ ń gbãna deóla. ³² Akũ ò bùsu kũ ò yakɛ̀ɛ pì gya bò Isarailanↄnɛ ò pì: Bùsu kũ o yakɛ̀ɛ pì bi bùsu kũ àdi a gbɛ̃nↄ mↄ́mↄmɛ. Gbɛ̃ kũ o ń é gwenↄ ń pínki bi gbɛ̃ gbã̀nanↄmɛ. ³³ O gbɛ̃ gbã̀nagbãnanↄ è gwe Anaki burinↄ ũ. O ó zĩda è lán babanɛnↄ bà, lɛn ó de lɛ ń wɛ́n se.

Isarailanↄ bona Dikiri kpɛ

¹ Isarailanↄ tɛn wiki gbãna lɛ́ ń pínki, òtɛn ↄ́ↄ dↄ gwãani pìa. ² Ò zuka dↄ̀ Musaa kũ Harunao ń pínki ò pìńnɛ: Tó o gaga Misila kesↄ̃ gbárannan la, de à kɛ̀ mana. ³ Bↄ́yãin Dikiri tɛn tá kũoo bùsuu pìnn? Oni ó dɛdɛ kũ fɛ̃nɛdaomɛ, oni ó nↄgbɛ̃nↄ kũ ó nɛ́nↄ kũkũ. Ó ɛrana Misila sã̀naroo? ⁴ Akũ ò pìkↄ̃nɛ: Ò don’arɛde bo ò ɛra ò tá Misila.

⁵ Musa kũ Harunao wùtɛ ń nɛ̀sɛlɛ kutɛna pari arɛ. ⁶ Akũ bùsuyakɛrinↄ gbɛ̃nↄn pla Nuni nɛ́ Yↄsua kũ Yefunɛ nɛ́ Kalɛbuo ń utanↄ gàga ò kɛ̃̀kɛ̃ ⁷ ò pì gbɛ̃nↄnɛ: Bùsu kũ o bↄtɛn o yakɛ̀ɛ pì mana manamana. ⁸ Tó ó yã kà Dikirigu, ani gɛ́ kũoo bùsuu pìn, bùsu kũ vĩ kũ zↄ́’io din pìia, à ó gba. ⁹ Àsun bo Dikiri kpɛro. Àsun vĩna kɛ bùsupidenↄnɛro, zaakũ ó pↄ́blenↄmɛ, ò utɛki vĩ doro. Dikiri kú kũoo, àsun vĩna kɛro.

¹⁰ Gbɛ̃ sĩnda pínki tɛni pi ò ń pápa kũ gbɛ̀ɛo, akũ Dikiri gakuri bò à sù Isarailanↄa dakarɛki kuta kia. ¹¹ Dikiri pì Musanɛ: Gbɛ̃ pìnↄ nigↄ̃ ma gya bo gↄrↄ sĩnda pínkin yá? Bee kũ daboyã dasi kũ ma kɛ̀ ń tɛ́nↄ, onigↄ̃ gí ma náani kɛi gↄrↄ sĩnda pínkin yá? ¹² Mani gagagyã káńyĩ mà ń kakatɛ, mani n burinↄ kɛ dasi, ń gbãna nigↄ̃ de gbɛ̃ pìnↄla. ¹³ Akũ Musa pì Dikirinɛ: Mↄkↄ̃n mɛ́ n gbɛ̃ pìnↄ bↄ̀tɛ Misila kũ n gbãnao. Tó Misilanↄ mà, ¹⁴ oni gí o bùsu dí denↄnɛiro. Zaakũ ò dↄ̃ kũ ń kú kũoo, ndì bo ǹ suwá tɛ̃tɛ̃ntɛ̃. Ò dↄ̃ kũ n tɛ́luku dìgↄ̃ kú ó musu, ndì dowɛrɛ arɛ a gũn fãnantɛ̃, gwãani sↄ̃ tɛ́ gũn. ¹⁵ Tó n gbɛ̃ pìnↄ dɛ̀ kãnto gↄ̃̀nↄ, buri kũ ò yã pìi mànↄ ni pi: ¹⁶ Dikiri fùa à gɛ́ kũ gbɛ̃ pìnↄ bùsu kũ à la dàńnɛn, abire yãin à ń dɛdɛ gbárannan. ¹⁷ Dikiri, ǹ n gbãna zↄ̃kↄ̃ mↄńnɛ sà, lákũ n ò nà n pì ¹⁸ ndì pↄ fɛ̃ likalikaro, ń gbɛ̃kɛ vĩ zↄ̃kↄ̃, ndì gbɛ̃nↄ yã vãninↄ kũ ń taarinↄ kɛ̃ḿma, ama ndì tó taaride bò pãro. Ndì denↄ yã vãninↄ wí ń burinↄ musu ari à gɛ́ à pɛ́ ń sãkpɛnↄa kũ ń nasionↄ. ¹⁹ Lákũ n sùruu kɛ̀ kũ gbɛ̃ pìnↄo nà zaa Misila ari ò gɛ̀ɛ ò kào la, ǹ ń durunna kɛ̃ḿma n gbɛ̃kɛ zↄ̃kↄ̃ↄ gũn.

Zukakarinↄ wɛ́tãmmanaa

²⁰ Akũ Dikiri pì: Lákũ n wɛ́ kɛ̀ma nà, mani sùru kɛ kũńwo. ²¹ Ama lákũ madìgↄ̃ kun nà akũsↄ̃ ma gakuri dà anduniala pínki, ²² gbɛ̃ kũ ò ma gakuri è kũ daboyã kũ ma kɛ̀ Misila kũ gbáranna gũnwo kũ ò ma lɛ ò ma gwa gɛ̃̀n kuri ò gì ma yã mainↄ, ²³ ń gbɛ̃ke ni wɛ́ sí bùsu kũ ma la dà ń dizinↄnɛɛ pìlɛro. Gbɛ̃ kũ ò ma gya bònↄ ke ni wɛ́ sialɛro. ²⁴ Lákũ ma zↄ̀bleri Kalɛbu nɛ̀sɛɛ bò ado nà, à tɛ́mai kũ nɛ̀sɛ doo, mani tó à gɛ̃ bùsu kũ à gɛ̀ɛn pìi gũn, a burinↄ ni le túbi ũ. ²⁵ Zaakũ Amalɛkinↄ kũ Kanaanↄn kú guvutɛn gwe, à ɛra à da gbáranna zɛ́n zia Isira Tɛ̃ra kpa.

²⁶ Dikiri pì Musanɛ kũ Harunao: ²⁷ Gbɛ̃ vãni dínↄ ni zuka kámai gↄrↄ sĩnda pínkin yá? Ma zuka kũ òtɛn kámai mà. ²⁸ Ǹ pińnɛ makũ Dikiri ma pì má kun. Lákũ ò wɛ́ kɛ̀ma nà, lɛn mani kɛńnɛ lɛ. ²⁹ Ń gɛ̀nↄ ni gↄ̃ kátɛ gbárannan la, ń gbɛ̃ kũ ò kà wɛ̃̀ baro ke à dealanↄ pínki. Ń gbɛ̃ kũ ò ń náro akũsↄ̃ ò zuka kàmainↄ ³⁰ ni gɛ̃ bùsu kũ ma a la dàńnɛnlo, séde Yefunɛ nɛ́ Kalɛbu kũ Nuni nɛ́ Yↄsuao baasiro. ³¹ Ń nɛ́ kũ ò pì oni ń kũkũnↄn mani gɛ̃ kũńwo, de ò bùsu kũ ń denↄ gìi pì nna ma. ³² Mↄ́kↄ̃nↄ sↄ̃, ń gɛ̀nↄ ni gↄ̃ katɛna gbárannan lamɛ. ³³ Ń nɛ́nↄ ni pↄ́nↄ dãdã gbárannan la ari wɛ̃̀ bupla, ò ń denↄ náani sari gbɛ̀ le. Ń denↄ gɛ̀nↄ ni gↄ̃ gbárannan la ń pínki. ³⁴ Lákũ ò bùsuu pìi yakɛ̀ gↄrↄ bupla nà, lɛn onigↄ̃ ń yã vãni gbɛ̀ le lɛ ari wɛ̃̀ bupla, wɛ̃̀ dodo gↄrↄ dodo, onigↄ̃ dↄ̃ lán ibɛrɛsɛna kũmao de nà. ³⁵ Makũ Dikiri makũ mɛ́ ma yã pìi ò, lɛmɛ sↄ̃ mani kɛ gbɛ̃ vãni kũ ò kàkaramai pìnↄnɛ lɛ. Oni gaga gbárannan la ń pínki.

³⁶ Gbɛ̃ kũ Musa ń zĩ ò bùsuu yakɛ̀ kũ ò sù ò bùsuu pì gya bò ò tò ò zuka dↄ̀anↄ, ³⁷ Dikiri gagagyã kà gbɛ̃ pìnↄgu, akũ ò gàga. ³⁸ Gbɛ̃ kũ ò gɛ̀ɛ ò bùsuu yakɛ̀ɛ pìnↄ tɛ́, Nuni nɛ́ Yↄsua kũ Yefunɛ nɛ́ Kalɛbuo mɛ́ ò gↄ̃̀ kũ wɛ̃̀ndiio.

³⁹ Musa yã pìnↄ gbã̀ Isarailanↄnɛ pínki, akũ ò ↄ́ↄ dↄ̀ manamana. ⁴⁰ Ò fùtɛ kↄnkↄ káakukaaku, ò mìi pɛ̀ kpinↄa ò pì: À gwa, ótɛn gɛ́ gu kũ Dikiri òn. O ó durunna dↄ̃̀ sà. ⁴¹ Musa pì: Bↄ́yãi átɛn pã Dikiri yãnɛɛ? Abire ni sí kɛro. ⁴² Àsun gɛ́ro, zaakũ Dikiri kú kãáoro. Á ibɛrɛnↄ ni á ble kũ zĩ̀io. ⁴³ Amalɛkinↄ kũ Kanaanↄn kú á arɛ gwe. Oni á dɛdɛ kũ fɛ̃nɛdao. Dikiri nigↄ̃ kú kãáoro, kũ a gi tɛ́ii yãi. ⁴⁴ Akũ ò sãgbãna kɛ̀ ò mìi pɛ̀ kpinↄa, bee kũ Dikiri bàka kunna kũńwo àkpatii gↄ̃̀ bùran kũ Musao. ⁴⁵ Akũ Amalɛkinↄ kũ Kanaa kũ ò kú gusĩsĩde pìnnↄ lɛ̀tɛḿma ò ń blé kũ zĩ̀io ò pɛ̀ḿma ari Ɔↄma.

Í bona gbɛ̀n

(Bon 17:1-7)

¹ Isarailanↄ kà Zini gbárannan ń pínki mↄ káaku gũn, akũ ò vùtɛ Kadɛsi. Gwen Miriamu gàn, ò a vĩ̀. ² Í kun ò miro, akũ ò kàkara Musa kũ Harunaoi. ³ Ò zuka kà Musai ò pì: Tó o gaga yã kũ gbɛ̃ kũ ò gàga Dikiri arɛnↄ, de abire sã̀na. ⁴ Bↄ́yãi a su kũoo gbáranna díkĩnan de ò gaga la kũ ó pↄ́kãdenↄoo? ⁵ Bↄ́yãi a bↄtɛ kũoo Misila a su kũoo gu vãni díkĩna gũnn? Pↄ́blewɛ ke kaka lí ke geepi nɛ́ ke bísi kú laro, akũsↄ̃ í kú la ò miro. ⁶ Musa kũ Harunao gò paria ò gɛ̀ɛ dakarɛki kpɛ́lɛlɛa ò wùtɛ ń nɛ̀sɛlɛ kutɛna, akũ Dikiri gakuri bò à sùḿma. ⁷ Dikiri yã ò Musanɛ à pì: ⁸ Ǹ gò sɛ́, mↄkↄ̃n kũ n vĩ̀ni Harunao à gbɛ̃ pìnↄ kakara à yã o gbɛ̀si direnɛ ń wára, í ni bon. Lɛn ĩni í bońnɛ gbɛ̀ pìn ò mi lɛ kũ ń pↄ́kãdenↄ.

⁹ Musa gòo sɛ̀ Dikiri arɛ lákũ à ònɛ nà. ¹⁰ Musa kũ Harunao ń kákara gbɛ̀si pì arɛ, akũ à pìńnɛ: À ma á sãgbãnadenↄ! Á ye ò í boárɛ gbɛ̀ dínn yá? ¹¹ Akũ Musa ↄ sɛ̀ musu à gbɛ̀ɛ pìi lɛ̀ kũ a gòoo gɛ̃̀n pla. Í bò manamana, akũ ò mì kũ ń pↄ́kãdenↄ. ¹² Akũ Dikiri pì Musanɛ kũ Harunao: Zaakũ ádi ma náani kɛ a ma tↄ́ bò Isarailanↄnɛro, áni gɛ̃ kũńwo bùsu kũ matɛn kpáḿmanlo. ¹³ Mɛriba ísɛ̃bokin gwe, gu kũ Isarailanↄ zuka kàn Dikirii, akũ à a ludakɛnaa mↄ̀ńnɛ.

Ɛdↄmunↄ gina Isarailanↄnɛ ò gɛ̃tɛ ń bùsula

¹⁴ Musa gbɛ̃nↄ zĩ̀ ò bò Kadɛsi ò gɛ̀ɛ Ɛdↄmunↄ kína kĩnaa ò pì: Ókↄ̃nↄ n danɛ Isarailanↄ pì, ń wari kũ à ó lénↄ dↄ̃ pínki. ¹⁵ Ó dizinↄ gɛ̀ɛ Misila, akũ o gìi kɛ̀ gwe. Misilanↄ wari dↄ̀wá kũ ó dizinↄ. ¹⁶ O wiki lɛ̀ Dikiria, akũ à yã sì kũoo. À a Malaikaa zĩ̀ à bò kũoo Misila. Tera sà ó kú Kadɛsi, n bùsu lɛ́zɛkin. ¹⁷ Ǹ ó gba zɛ́ ò gɛ̃tɛ n bùsuua. Óni gɛ̃tɛ buranↄ ke geepi búnↄaro, óni á lↄ̀gↄ’i miro. Ónigↄ̃ tɛ́ kína zɛ́da gũmmɛ. Óni litɛ ↄplai ke ↄzɛiro ari ò gɛ́ gɛ̃tɛo n bùsula. ¹⁸ Akũ Ɛdↄmunↄ pìńnɛ: Áni le à gɛ̃tɛ ó bùsuuaro. Tó a gi, óni bo ò daálɛ kũ fɛ̃nɛdao. ¹⁹ Isarailanↄ pìńnɛ: Óni gɛ̃tɛ zɛ́daamɛ. Tó ókↄ̃nↄ ke ó pↄ́kãdenↄ á í mì, óni a fĩna bo. Gɛ̃tɛnaan ótɛn wɛtɛ ado. ²⁰ Ɛdↄmunↄ pì: Áni le à gɛ̃tɛro. Akũ ń zĩ̀karinↄ bↄ̀tɛ dasidasi ò sù dańlɛ kũ gbãnao. ²¹ Zaakũ Ɛdↄmunↄ gì Isarailanↄnɛ ò gɛ̃tɛ ń bùsuua, akũ Isarailanↄ pã̀ńnɛ.

Haruna ganaa

²² Isarailanↄ bò Kadɛsi ń pínki ò kà Oru kpia ²³ Ɛdↄmu bùsu lɛ́zɛkin. Gwen Dikiri yã òn Musanɛ kũ Harunao à pì: ²⁴ Haruna ni ká a dizinↄla tera, ani gɛ̃ bùsu kũ matɛn Isarailanↄ gba gũnlo, kũ á gbɛ̃nↄn pla a gi ma yã ma zaa Mɛriba yãi. ²⁵ Ǹ Haruna kũ a nɛ́ Ɛlɛazao sɛ́ ǹ didi kũńwo Oru kpia ²⁶ ǹ Haruna pↄ́kasanↄ bↄtɛa ǹ da a nɛ́ Ɛlɛazanɛ gwe. Gwen Haruna ni gan à ká a dizinↄla.

²⁷ Musa kɛ̀ lákũ Dikiri ònɛ nà. À dìdi Oru kpia gbɛ̃ sĩnda pínki wára ²⁸ à Haruna pↄ́kasanↄ bↄ̀tɛa à dà a nɛ́ Ɛlɛazanɛ, akũ Haruna gà kpi pìi musu gwe. Kũ Musa kũ Ɛlɛazao kìpa kpi pìia ²⁹ akũsↄ̃ Isarailanↄ mà kũ Haruna gà, akũ ò a gɛ̀ wɛ̃nda kɛ̀ gↄrↄ baraakuri.

Zĩ̀blena Kanaanↄa Nɛgɛvi bùsun

¹ Aradi kũ à kú Nɛgɛvi bùsun kína bi Kanaa gbɛ̃mɛ. Kũ à mà Isarailanↄn tɛ́ Atarimu zɛ́n òtɛn su, akũ à bò à dàńlɛ kũ zĩ̀io à ń gbɛ̃kenↄ kũ̀kũ. ² Akũ Isarailanↄ lɛ́ sɛ̀ Dikirinɛ ò pì: Tó n gbɛ̃ pìnↄ nàwɛrɛ ó ↄĩ, óni ń wɛ̃tɛnↄ kakatɛ mámmam. ³ Dikiri Isarailanↄ yã mà, akũ à Kanaa pìnↄ kpàḿma. Ò ń kákatɛ kũ ń wɛ̃tɛnↄ pínki, akũ ò tↄ́ kpà gu pìinɛ Ɔↄma.

Mↄ̀gotɛ̃ mlɛ̃̀ɛ

⁴ Kũ ò fùtɛ Oru kpi pì kĩnaa, ò Isira Tɛ̃ra zɛ́ sɛ̀ de ò pã Ɛdↄmunↄ bùsuunɛ. Akũ ò fù mɛnaa zɛ́n ⁵ ò Luda kũ Musao taari è ò pì: Bↄ́yãi a ó bↄ́tɛ Misila de ò gaga gbárannann? Pↄ́ble kunlo, í kunlo, o zã pↄ́ble gina dín. ⁶ Akũ Dikiri mlɛ̃̀ pãsĩnↄ zĩ̀ḿma ò ń lɛlɛ, akũ ò gàga dasidasi. ⁷ Gbɛ̃nↄ sù Musa kĩnaa ò pì: O durunna kɛ̀, zaakũ o Dikiri kũ mↄkↄ̃nwoo taari è. Ǹ kútɛ kɛnɛwɛrɛ de à ó kɛ̃kↄ̃a kũ mlɛ̃̀ dínↄ. Akũ à kútɛ kɛ̀nɛńnɛ. ⁸ Dikiri pìnɛ: Ǹ mlɛ̃̀ pi ǹ loko lía ǹ pɛ́tɛ. Tó mlɛ̃̀ gbɛ̃ lɛ̀, tó à wɛ́ sɛ̀ à a gwà, ani aafia le. ⁹ Akũ à mↄ̀gotɛ̃ pì mlɛ̃̀ ũ à lòko lía à pɛ̀tɛ. Tó mlɛ̃̀ gbɛ̃ lɛ̀ akũsↄ̃ à wɛ́ sɛ̀ à mↄ̀gotɛ̃ mlɛ̃̀ɛ pìi gwà, àdi aafia le.

Isarailanↄ pãna Ɛdↄmunↄ kũ Mↄabunↄ bùsunↄnɛ

¹⁰ Isarailanↄ dà zɛ́n, akũ ò bùraa kàtɛ Obo. ¹¹ Bona Obo ò gɛ̀ɛ ò bùraa kàtɛ Iyɛ’abarimu gbárannan Mↄabunↄ bùsu ifãboki kpa. ¹² Bona gwe ò gɛ̀ɛ ò bùraa kàtɛ Zeredi guvutɛn. ¹³ Bona gwe ò bùraa kàtɛ Anↄ bara dire, gbáranna kũ à kú Amↄrinↄ bùsu lɛ́zɛkin. Anↄ pìmɛ Mↄabunↄ kũ Amↄrinↄ bùsunↄ lɛ́zɛki ũ. ¹⁴ Abire yãin ò pì Dikiri zĩ̀katakada gũn:

Waɛbu kũ à kú Sufa bùsun kũ Anↄ swa’ↄnɛnↄ

¹⁵ kũ ń guvutɛ kũ ò tà ari Aranↄo

Mↄabunↄ bùsu lɛ́zɛkin.

¹⁶ Bona gwe dↄ ò gɛ̀ɛ Lↄ̀gↄ, gu kũ Dikiri pìn Musanɛ: Ǹ gbɛ̃nↄ kakara mà í kpáḿma. ¹⁷ Gwen Isarailanↄ lɛ̀ díkĩna sìn:

Í bo lↄ̀gↄn, gbasa ò lɛ̀ sínɛ,

¹⁸ lↄ̀gↄ kũ ó don’arɛdenↄ yↄ̃̀ kũ línↄ,

lↄ̀gↄ kũ kínɛnↄ pà kũ ń gònↄ.

Bona gbárannan ò gɛ̀ɛ Matana. ¹⁹ Matana gbɛra Naliɛli, Naliɛli gbɛra Bamↄ. ²⁰ Bamↄ gbɛra guvutɛ kũ à kú Mↄabunↄ bùsun, gu kũ Pisiga mìsↄ̃ntɛ arɛ dↄ gbárannaa.

Zĩ̀blena Siↄ̃ kũ Oguooa

²¹ Isarailanↄ gbɛ̃nↄ zĩ̀ Amↄrinↄ kína Siↄ̃a ò pì: ²² Ǹ ó gba zɛ́ ò gɛ̃tɛ n bùsuua. Óni pã buranↄ ke geepi líkpɛlaro, óni á lↄ̀gↄ’i miro. Ónigↄ̃ tɛ́ kína zɛ́da gũmmɛ ari ò gɛ́ gɛ̃tɛo n bùsula. ²³ Siↄ̃ dí ń gba zɛ́ ò gɛ̃tɛ a bùsuuaro. À a zĩ̀karinↄ kàkara ń pínki, ò bↄ̀tɛ òtɛn gɛ́ńyĩ gbárannan. Kũ ò kà Yaza, ò zĩ̀i kà kũ Isarailanↄ, ²⁴ akũ Isarailanↄ ń dɛdɛ kũ fɛ̃nɛdao ò ń bùsuu sìḿma zaa Anↄ ari Yabokui Amↄninↄ bùsun, zaakũ Amↄninↄ bùsu lɛ́zɛki pì pãsĩ, àdi sí gɛ̃nlo. ²⁵ Isarailanↄ Amↄri wɛ̃tɛnↄ sì pínki kũ Ɛsɛbↄ̃o kũ a lakutunↄ pínki, akũ ò vùtɛn. ²⁶ Ɛsɛbↄ̃mɛ Amↄrinↄ kína Siↄ̃ wɛ́ra ũ. Siↄ̃ zĩ̀i kà yã kũ Mↄabunↄ kína káakuo, akũ à a bùsuu sìa ari Anↄ swai. ²⁷ Abire yãin kɛrɛnↄ dì pi:

À mↄ́ Ɛsɛbↄ̃,

ò Siↄ̃ wɛ́ra pì kɛkɛ ò kátɛ!

²⁸ Tɛ́ bò Ɛsɛbↄ̃ yã,

zĩ̀karinↄ bò Siↄ̃ wɛ̃tɛ pìi gũn,

ò Mↄabunↄ bùsu wɛ́ra Ara kàkatɛ

Anↄ mìi sĩ̀sĩ gbɛ̃ pìnↄ.

²⁹ Waiyoo Mↄabunↄ!

Kɛmↄsi gbàgbarinↄ, a kakatɛmɛ!

Kɛmↄsi tò á gↄ̃gbɛ̃nↄ fã̀kↄ̃a,

à á nↄgbɛ̃nↄ kpà Amↄrinↄ kína Siↄ̃a zĩ̀zↄnↄ ũ.

³⁰ Akũ o ń fú,

o ń dɛdɛ zaa Ɛsɛbↄ̃ ari Dibↄ̃.

O ń kákatɛ ari Nↄfa kũ Mɛdɛbao.

³¹ Lɛn Isarailanↄ vùtɛ Amↄrinↄ bùsun lɛ. ³² Musa gbɛ̃nↄ zĩ̀ Yaza asiri gwa, akũ Isarailanↄ gwe sì kũ a lakutunↄ pínki, ò pɛ̀ Amↄri kũ ò kú gwenↄa.

³³ Akũ Isarailanↄ lìtɛ ò Basã zɛ́ sɛ̀. Akũ Basã kína Ogu gɛ̀ɛńyĩ kũ a zĩ̀karinↄ ń pínki ò zĩ̀i kà kũńwo Ɛdɛrɛi. ³⁴ Dikiri pì Musanɛ: Ǹsun vĩna kɛnɛro, zaakũ ma a nànnɛ n ↄĩ kũ a gbɛ̃nↄ kũ a bùsuuo pínki. Ǹ kɛnɛ lákũ n kɛ̀ Amↄrinↄ kína Siↄ̃ kũ à kí blè Ɛsɛbↄ̃nɛ nà. ³⁵ Akũ ò Ogu dɛ̀ kũ a nɛ́nↄ kũ a zĩ̀karinↄ ń pínki, bee gbɛ̃ mɛ̀n do dí boro, akũ ò a bùsuu pìi sì.

Mↄabunↄ kína Balaki Balamu sísinaa

¹ Isarailanↄ dà zɛ́n, akũ ò bùraa kàtɛ Mↄabunↄ bùsu sɛ̃̀n Yoda bara dire kũ à arɛ dↄ Yɛrikoa. ² Zipo nɛ́ Balaki Mↄabunↄ kína è lákũ Isarailanↄ kɛ̀ Amↄrinↄnɛ nà, ³ akũ swɛ̃̀ɛ kɛ̃̀ Mↄabunↄgu, vĩna ń kũ Isarailanↄ dasikɛ yãi. ⁴ Akũ Mↄabunↄ pì Midiã gbɛ̃ zↄ̃kↄ̃nↄnɛ: Pari díkĩna ni pↄ́ kũ à likawáinↄ ble pínki lán zùu dì sɛ̃̀ só nà. ⁵ Akũ Balaki gbɛ̃nↄ zĩ̀ Bɛↄ nɛ́ Balamua ari Peto, Yuflati sarɛ a bɛ bùsun. À pìńnɛ ò a sísi à su, ò pinɛ: Gbɛ̃ kenↄ bò Misila ò dàgula ò kátɛ ma sarɛ. ⁶ N yã nna! Ǹ mↄ́ ǹ lɛ́ kɛńnɛmɛnɛ, zaakũ ń gbãna demala. Òdigↄ̃ dↄ̃ro ke mani le mà zĩ̀ bleḿma mà pɛ́ḿma bùsu dín gwɛɛ. Má dↄ̃ kũ gbɛ̃ kũ n sa mana ònɛ nigↄ̃ de arubarikade ũmɛ. Gbɛ̃ kũ n sa vãni ònɛ sↄ̃, anigↄ̃ de láaribona pↄ́ ũmɛ.

⁷ Mↄabu kũ Midiã gbɛ̃ zↄ̃kↄ̃nↄ dà zɛ́n, ò màsokɛna gba kũ oni da Balamunɛ kũna. Kũ ò kà a kĩnaa, ò yã kũ Balaki ń zĩoo ònɛ. ⁸ À pìńnɛ: À i la, mani yã kũ Dikiri ni omɛnɛ oárɛ. Akũ Mↄabu kínanɛ pìnↄ ì Balamu bɛa. ⁹ Akũ Luda bò à sù Balamua à a là à pì: Dínↄn gbɛ̃ kũ ò kú kũnwo díkĩnanↄ ũu? ¹⁰ À wèa à pì: Zipo nɛ́ Balaki, Mↄabunↄ kína mɛ́ à ń zĩma. Ò pì ¹¹ gbɛ̃ kenↄ bò Misila ò dàgula. Akũ à pì mà su mà lɛ́ kɛńnɛarɛ de à le à zĩ̀ bleḿma à pɛ́ḿma. ¹² Akũ Luda pìnɛ: Ǹsun tɛ́ńyĩro. Ǹsun sa vãni ońnɛro, zaakũ ma arubarikaa dàńgu kↄ̀. ¹³ Kũ Balamu fùtɛ kↄnkↄ, à pì Balaki kínanɛnↄnɛ: À tá á bùsun, zaakũ Dikiri gì mà tɛ́ái. ¹⁴ Akũ Mↄabu kínanɛ pìnↄ fùtɛ ò tà Balaki kĩnaa ò pì: Balamu gì su kũooi.

¹⁵ Balaki ɛ̀ra à kínanɛ pãndenↄ zĩ̀ dↄ, ń dasi kũ ń gakurio de gbɛ̃ káakunↄ pↄ́la. ¹⁶ Kũ ò kà Balamu kĩnaa, ò pì: Zipo nɛ́ Balaki pì ǹsun tó pↄ́ke kpánnɛ kũ suna a kĩnaaoro, ¹⁷ zaakũ áni gba kɛnnɛ manamana. Pↄ́ kũ n òarɛ pínki, áni kɛ. N yã nna! Ǹ mↄ́ ǹ lɛ̀ kɛarɛ gbɛ̃ pìnↄa. ¹⁸ Akũ Balamu pì Balaki zĩ̀rii pìnↄnɛ: Bee tó Balaki andurufu kũ wura kũ à kú a bɛaoo kpàma pínki, mani fↄ̃ mà bo Dikiri ma Luda yã kpɛro, bee fíti. ¹⁹ À i la gwãaniala lákũ gbɛ̃ káakunↄ kɛ̀ nà ari mà ma dↄ yã kũ Dikiri ni karamɛnɛ. ²⁰ Luda bò à sùa gwãani à pìnɛ: Zaakũ gbɛ̃ díkĩnanↄ sù n sísi, ǹ futɛ ǹ gɛ́ kũńwo, ama yã kũ mani on ǹ kɛ.

Balamu zaaki yã’onaa

²¹ Balamu fùtɛ kↄnkↄ à gàarii yĩ̀ a zaakinɛ, akũ à gɛ̀ɛ kũ Mↄabu kínanɛ pìnↄo. ²² Luda pↄ fɛ̃̀ kũ à gɛ̀ɛ yãi, akũ Dikiri Malaikaa gɛ̀ɛ à zɛ̀ à zɛ́ zↄ̃̀nɛ. Balamu di a zaaki kpɛ, a zĩkɛri gbɛ̃nↄn planↄn tɛ́ kãao. ²³ Kũ zaaki pìi è Dikiri Malaika zɛna zɛ́ gũn à fɛ̃nɛda wòto à kũna, akũ à lìtɛ sɛ̃̀n. Balamu a lɛ̀, akũ à ɛ̀ra à dà zɛ́n. ²⁴ Dikiri Malaikaa gɛ̀ɛ à zɛ̀ zɛ́ tererennan geepi líkpɛ kũ gbɛ̀ karaa likainↄ dagura. ²⁵ Kũ zaaki pì Dikiri Malaikaa è, à nà gbĩ̀ia à Balamu gbá lↄ̀a. Akũ Balamu ɛ̀ra à a lɛ̀ dↄ. ²⁶ Dikiri Malaikaa ɛ̀ra à gɛ̀ɛ arɛ dↄ à zɛ̀ gu kpakoto kũ à litɛki vĩron. ²⁷ Kũ zaaki pì Dikiri Malaikaa pìi è, à kùtɛ kũ Balamuo. Akũ Balamu pↄ fɛ̃̀ à a lɛ̀ kũ gòoo. ²⁸ Akũ Dikiri zaaki pìi gbà lɛ́ à yã ò Balamunɛ à pì: Bↄ́n ma kɛ̀nnɛ n ma lɛ ari gɛ̃̀n aakↄ̃ↄ? ²⁹ Balamu wèa à pì: Kũ n yↄ̃nkↄyã kɛ̀mɛnɛ yãimɛ. Tó má fɛ̃nɛ kũna, de ma n dɛ gↄ̃̀nↄ. ³⁰ Akũ zaaki pìi pìnɛ: N zaaki kũ ndìgↄ̃ dia gↄrↄ sĩnda pínkia ari suna gbãramɛ ma ũroo? Ma kɛ̀nnɛ lɛ yã yá? À pì: Oi. ³¹ Akũ Dikiri Balamu wɛ́ kɛ̃̀nɛ, à a Malaikaa è zɛna zɛ́n à fɛ̃nɛda wòto à kũna. Akũ à kùtɛ à mìi pɛ̀tɛ.

³² Dikiri Malaika a là à pì: Bↄ́yãin n n zaaki lɛ̀ ari gɛ̃̀n aakↄ̃ↄ? Ma su zɛ́ zↄ̃nnɛmɛ, zaakũ n wãmɛnɛ. ³³ Kũ zaaki pì ma e, akũ à lìtɛmɛnɛ ari gɛ̃̀n aakↄ̃. Tó adi litɛmɛnɛ yãro, de ma n dɛ ma a tò. ³⁴ Balamu pì Dikiri Malaikaa pìinɛ: Ma durunna kɛ̀, zaakũ má dↄ̃ kũ n zɛ́ zↄ̃̀mɛnɛro. Zaakũ ma gɛnaa kɛ̀nnɛ ĩni, mani ɛra mà tá. ³⁵ Akũ Dikiri Malaikaa pì Balamunɛ: Ǹ gɛ́ kũ gbɛ̃ pìnↄ, yã kũ mani dannɛn ǹ o. Akũ Balamu gɛ̀ɛ kũ Balaki kínanɛ pìnↄo.

³⁶ Kũ Balaki mà Balamu tɛn su, akũ à gɛ̀ɛ à dàalɛ wɛ̃tɛ kũ à kú Anↄ bara, Mↄabunↄ bùsu lɛ́zɛkin. ³⁷ Akũ à pì Balamunɛ: Kũ ma gbɛ̃nↄ zĩ̀ ò n sísi yã, à kɛ̀ dera ńdi suroo? Mani fↄ̃ mà gba kɛnnɛnloo? ³⁸ Balamu wèa à pì: Ma su sà, ama má yã sĩnda pínki ona zɛ́ vĩro. Yã kũ Luda ni damɛnɛn mani o. ³⁹ Akũ Balaki gɛ̀ɛ kũ Balamuo Kiria’uzo. ⁴⁰ À sa ò kũ zùnↄ kũ sãnↄ à a nↄ̀bↄↄ kpà Balamua kũ kínanɛ kũ ò kú kãao lɛɛlɛnↄ. ⁴¹ Kũ gu dↄ̀, à Balamu sɛ̀ à gɛ̀ɛ kãao Bamↄbaali. Gwen Balamu Isarailanↄ bùra kpado èn.

Balamu yã káaku kũ à è onaa

¹ Balamu pì Balakinɛ: Ǹ gbagbaki bomɛnɛ la mɛ̀n suppla, ǹ sumɛnɛ kũ zùsanↄ mɛ̀n suppla kũ sãkaronↄ mɛ̀n suppla. ² Balaki kɛ̀ lákũ Balamu ònɛ nà, akũ ò sa ò kũ zùsaao kũ sãkarooo gbagbaki pìnↄa pínki. ³ Akũ Balamu pìnɛ: Ǹ zɛ n sa’opↄi. Mani gɛ́ mà gwa tó Dikiri ni su yã omɛnɛ, mani yã kũ ani omɛnɛ onnɛ. Akũ à gɛ̀ɛ à zɛ̀ gulei gbáagbaaa. ⁴ Luda sù à a lè, akũ Balamu pìnɛ: Ma gbagbaki bò mɛ̀n suppla, akũ ma sa òḿma pínki kũ zùsaao kũ sãkarooo. ⁵ Dikiri yã dànɛ a lɛ́n, akũ à pì: Ǹ ɛra ǹ gɛ́ ǹ Balaki le ǹ onɛ lákũ ma dànnɛ nà. ⁶ Akũ à ɛ̀ra à gɛ̀ɛ à a lè zɛna a sa’opↄi kũ Mↄabu kínanɛnↄ ń pínki, ⁷ akũ à yã kũ à èe ò à pì:

Mↄabunↄ kína Balaki ma sisi Siria bùsun,

akũ ma bo ifãboki kpa kpinↄ kĩnaa ma su.

À pì mà boarɛ Isarailanↄ kpɛ,

mà su mà sa vãni oarɛ Yakubu buri pìnↄnɛ.

⁸ Mani kɛ dera mà gbɛ̃ kũ Luda dí ń káronↄ káa?

Mani kɛ dera mà bo gbɛ̃ kũ Dikiri dí bo ń kpɛronↄ kpɛɛ?

⁹ Zaa kpi mìsↄ̃ntɛa matɛni ń e,

zaa gu lei musu matɛn wɛ́ sińlɛ.

Gbɛ̃ pìnↄn kú ńdona,

ò ń zĩda dìtɛ ńdona kũ buri pãndenↄ.

¹⁰ Yakubu burinↄn dasi lán bùsu’atɛ̃ bà,

oni fↄ̃ ò Isarailanↄ naro ò ń lɛ́ dↄ̃ro.

Luda tó ma ga gↄ̃ de lán a gbɛ̃nↄ pↄ́ bà,

ma lakana gↄ̃ de lán ń pↄ́ bà.

¹¹ Akũ Balaki pìnɛ: N kɛ̀mɛnɛ deran gwee? Ma su kũnwo de ǹ ma ibɛrɛnↄ kámɛnɛ, akũ sa manan n òńnɛ yá? ¹² À wèa à pì: Yã kũ Dikiri dàmɛnɛ ma lɛ́nn mani oroo?

Balamu yã plade kũ à è onaa

¹³ Balaki pìnɛ: Ǹ mↄ́ ò gɛ́ gu pãndea, gu kũ ĩni ń en. Ǹ ń kámɛnɛ gwe, zaakũ ń kpadomɛ ĩni e, ĩni ń e ń pínkiro. ¹⁴ Akũ à gɛ̀ɛ kãao gudãkpãrinↄ buran Pisiga kpi mìsↄ̃ntɛa. À gbagbaki bò gwe mɛ̀n suppla, akũ à sa òḿma pínki kũ zùsaao kũ sãkarooo. ¹⁵ Akũ Balamu pìnɛ: Ǹ zɛ n sa’opↄi la, mani gɛ́ mà a le gwe. ¹⁶ Akũ Dikiri sù à yã dànɛ a lɛ́n, akũ à pìnɛ: Ǹ ɛra ǹ gɛ́ ǹ Balaki le ǹ onɛ lákũ ma dànnɛ nà. ¹⁷ Akũ à ɛ̀ra à gɛ̀ɛ à a lè zɛna a sa’opↄi kũ Mↄabu kínanɛnↄo. Balaki a là à pì: Dikiri pì deramɛɛ? ¹⁸ Akũ à yã kũ à èe ò à pì:

Zipo nɛ́ Balaki,

ǹ sã kpá ǹ ma yã ma!

¹⁹ Luda bi bisãsirinlo kũ à gbasa à ɛ́kɛ to,

àdi nɛ̀sɛ litɛ lán bisãsiri bàro.

Ani gí yã kũ à ò kɛi yá?

Ani gí lɛ́ kũ à gbɛ̃̀ńnɛ papai yá?

²⁰ À pìmɛnɛ mà sa mana ońnɛmɛ.

À arubarikaa dàńgu, mani fↄ̃ mà gíro.

²¹ Mádi yã vãni ke e Yakubu burinↄaro,

mádi yã’ũmmana ke e Isarailanↄaro.

Dikiri ń Luda kú kũńwo,

òdi a kíkɛ tↄ́ sɛ́ lei ń tɛ́.

²² Luda ń bↄ́tɛ Misila,

ò gbãna vĩ lán zùsɛ̃ntɛ bà.

²³ Oni fↄ̃ ò pↄ́ da Yakubu burinↄaro,

oni fↄ̃ ò àlesi bɛ̃̀nɛ kpá Isarailanↄnɛro.

Zaa gbãra onigↄ̃ o ń yã musu,

yã kũ Luda kɛ̀n gwe.

²⁴ Buri pìi dì futɛ lán músuda bà,

àdi a zĩda bi lán músusaa bà.

Àdi wútɛro ari à gɛ́ pↄ́ kũ à só,

ari à gɛ́ pↄ́ kũ à dɛ̀nↄ aru mi.

²⁵ Balaki pìnɛ: Ǹsun ń káro. Ǹsun sa mana ońnɛ sero. ²⁶ Balamu pìnɛ: Mádi onnɛ kũ yã kũ Dikiri dàmɛnɛn mani oroo?

Balamu yã aakↄ̃de kũ à è onaa

²⁷ Balaki pì Balamunɛ: Ǹ mↄ́ sà, mani gɛ́ kũnwo gu pãnden. Òdigↄ̃ dↄ̃ro tó ani kɛ Ludanɛ ǹ gbɛ̃ pìnↄ kámɛnɛ gwe sà. ²⁸ Akũ Balaki gɛ̀ɛ kãao Peo kpi musu kũ à arɛ dↄ gbárannaa. ²⁹ Balamu pìnɛ: Ǹ gbagbaki bomɛnɛ la mɛ̀n suppla, ǹ mↄmɛnɛ kũ zùsanↄ mɛ̀n suppla kũ sãkaronↄ mɛ̀n suppla. ³⁰ Balaki kɛ̀ lákũ à ònɛ nà à sa òḿma kũ zùsaa pìnↄ kũ sãkaroo pìnↄo.

¹ Kũ Balamu è sa mana ona Isarailanↄnɛ kà Dikirigu, adi gɛ́ màso kɛ lán yã bà doro, akũ à arɛ dↄ̀ gbárannaa. ² Kũ à wɛ́ zù, akũ à Isarailanↄ è katɛna ń buria. Luda Nini kìpaa, ³ akũ à yã kũ à èe ò à pì:

Bɛↄ nɛ́ Balamu yãn dí,

makũ kũ ma wɛ́ kɛ̃na yãn dí.

⁴ Makũ kũ madì Luda yã ma yãn dí.

Ma Gbãnasĩndapinkide wɛ́gupu è,

ma wutɛ nɛ̀sɛlɛ kutɛna, ma wɛ́ wɛ̃na.

⁵ Yakubu burinↄ bùrakatɛna mana fá!

Isaraila bizakutanↄn mana!

⁶ Ò katɛna lán guvutɛ dàkonↄ bà,

lán swa dↄ̀rↄ kara búnↄ bà.

Ò de lán zà lí kũ Dikiri bànↄ bà,

lán sida lí kũ ò kú í sarɛnↄ bà.

⁷ Í ni ń orozãnↄ pa yɛ́rɛrɛ,

ń pↄ́tↄ̃nanↄ ni í le manamana.

Ń kína gbãna nigↄ̃ de Agaga pↄ́la,

ń kpata ni tↄ́ bo.

⁸ Luda ń bↄ́tɛ Misila,

ò gbãna vĩ lán zùsɛ̃ntɛ bà.

Òdi zĩ̀ ble buri kũ ò ibɛrɛɛ kpà kũńwonↄa,

òdi ń wánↄ wíwi òdi ń pápa kũ kàao.

⁹ Òdi sↄ̃pɛtɛ ò wútɛ lán músuu bà,

dí mɛ́ ani fↄ̃ à ń futɛɛ?

Luda arubarika da gbɛ̃ kũ oni sa mana ońnɛnↄgu,

à gbɛ̃ kũ oni sa vãni ońnɛnↄ ká.

¹⁰ Balaki pↄ fɛ̃̀ Balamui à ↄnɛ dↄ̀a à pì: Ma ibɛrɛnↄ kana yãin ma n sisi, akũ n sa mana òńnɛ gɛ̃̀n aakↄ̃ yá? ¹¹ Ǹ tá n bɛa gↄ̃̀nↄ. Ma pì mani gba kɛnnɛmɛ yã, akũsↄ̃ Dikiri gìnnɛ ǹ láada le. ¹² Balamu pìnɛ: Mádi o gbɛ̃ kũ n ń zĩmanↄnɛroo! ¹³ Ma pì bee tó n ma gba n bɛ kũ à pana kũ andurufuuo kũ wuraao, mani bo Dikiri yã kpɛ mà yã kɛ kũ ma zĩda pↄyeinaaoro, a mana ke a vãni. Yã kũ Dikiri pì mà on mani o. ¹⁴ Matɛn tá ma gbɛ̃nↄ kĩnaa sà. Ǹ mↄ́ mà onnɛ lákũ gbɛ̃ pìnↄ ni kɛ n gbɛ̃nↄnɛ nà zia.

Balamu yã siikↄ̃de kũ à è onaa

¹⁵ Akũ Balamu yã kũ à èe ò à pì:

Bɛↄ nɛ́ Balamu yãn dí,

makũ kũ ma wɛ́ kɛ̃na yãn dí.

¹⁶ Makũ kũ madì Luda yã ma yãn dí.

Má Luda Musude nɛ̀sɛgũnyã dↄ̃.

Ma Gbãnasĩndapinkide wɛ́gupu è,

ma wutɛ nɛ̀sɛlɛ kutɛna, ma wɛ́ wɛ̃na.

¹⁷ Matɛn Isarailanↄ e, adi kɛ teranlo,

matɛni ń gwa, a gↄrↄ dí ká gĩaro.

Susunɛ ni bo Yakubu burinↄ tɛ́,

kpatableri ni bo Isarailanↄ tɛ́,

ani Mↄabunↄ mì wíwi,

ani zukakari pìnↄ mìtoko fↄ̃fↄ̃.

¹⁸ Ɛdↄmu bùsu ni gↄ̃ a pↄ́ ũ,

a ibɛrɛ Sei bùsu ni gↄ̃ a pↄ́ ũ,

Isarailanↄ gbãna nigↄ̃ karamɛ.

¹⁹ Yakubu buri ke ni kí bleḿma,

ani gbɛ̃ kpara kũ ò gↄ̃̀nↄ kakatɛ.

²⁰ Balamu Amalɛki burinↄ è, akũ à yã kũ à èe ò à pì:

Amalɛki burinↄ bi burinↄ mìdemɛ,

ama oni kakatɛ zã.

²¹ Kũ Balamu Keninↄ è, akũ à yã kũ à èe ò à pì:

Á kúki gbãna gíngin,

á sà kú gbɛ̀ musu.

²² Bee kũ abireo oni á kakatɛmɛ,

Asirianↄ ni á kũkũ zĩ̀zↄnↄ ũ.

²³ Balamu yã kũ à èe ò dↄ à pì:

O’o, tó Luda kɛ̀ lɛ, dí mɛ́ ani boo?

²⁴ Gó’itɛnↄ ni bo Sipiru bùsun,

oni zĩ̀ ble Asirianↄ kũ Eberunↄa,

ama mↄ́kↄ̃nↄ ni kakatɛmɛ se.

²⁵ Balamu fùtɛ à tà a bɛa, akũ Balaki dà zɛ́n se.