AYUBA

Setan Ayuba yↄ̃naa 1:1-2:13

Ayuba a igↄrↄ gyabonaa 3:1-3:26

Ayuba gbɛ̃nnanↄ yãweanaa 4:1-5:22

Ayuba wena a gbɛ̃nnanↄa 14, 19, 31

Dikiri wena Ayubaa 38:1-41:34

Ayuba yã mìdɛnaa 42:1-42:17

Setan Ayuba yↄ̃na káaku

¹ Gↄ̃gbɛ̃ ke kú Uzu bùsun yã, a tↄ́n Ayuba. Gbɛ̃ manamɛ, àdigↄ̃ taari vĩro. À Luda vĩna vĩ akũsↄ̃ à gì yãvãnikɛnaai. ² À nɛ́gↄ̃gbɛ̃nↄ vĩ gbɛ̃nↄn suppla, nɛ́nↄgbɛ̃nↄ gbɛ̃nↄn aakↄ̃. ³ À sãnↄ vĩ dúbu suppla, lakuminↄ dúbu aakↄ̃, zùnↄ wàa sↄↄro, zaakinↄ wàa pla kpɛ́ basↄↄro, akũsↄ̃ a zĩkɛrinↄn dasi manamana. À aruzɛkɛ zↄ̃kↄ̃ de gbɛ̃ sĩnda pínki pↄ́la ifãboki kpa. ⁴ A nɛ́gↄ̃gbɛ̃nↄ dìgↄ̃ pↄnna pↄ́ble kɛkↄ̃nɛ bɛ kũ bɛo, òdi ń dãre pìnↄ sísi ò mↄ́ ò pↄ́ ble ò í mi kũńwo lɛɛlɛ. ⁵ Gↄrↄ kũ ò pↄnna pↄ́ blè ò làka pínki, Ayuba dì gbɛ̃ zĩḿma ò gbã̀ bońnɛ. Tó gu dↄ̀, àdi futɛ kↄnkↄkↄnkↄ à sa’opↄ kũ òdi ká tɛ́n à tɛ́ kũ o ń baadinɛ à pi: Òdigↄ̃ dↄ̃ro ma nɛ́nↄ durunna kɛ̀ ò dↄkɛ̀ kũ Ludao ń swɛ̃̀n gwɛɛ. Lɛn Ayuba dìgↄ̃ kɛ lɛ gↄrↄ sĩnda pínki.

⁶ Zĩkea malaikanↄ sù ò zɛ̀ Dikiri arɛ, akũsↄ̃ Setan kú ń tɛ́. ⁷ Akũ Dikiri pì Setannɛ: N bo mámɛɛ? À wèa à pì: Matɛn gɛ́ matɛn su matɛn likara andunia gũmmɛ. ⁸ Akũ Dikiri pìnɛ: N ma zↄ̀bleri Ayuba è yá? A sára kú andunia gũnlo. Gbɛ̃ manamɛ, à taari vĩro. À ma vĩna vĩ akũsↄ̃ à gì yãvãnikɛnaai. ⁹ Akũ Setan pì Dikirinɛ: Ayuba n vĩna vĩ pãn yá? ¹⁰ Mↄkↄ̃mmɛ n karaa kpà n likai kũ a bɛo kũ pↄ́ kũ à vĩnↄ pínki. N arubarikaa dà a zĩn, akũ a pↄ́nↄ kàra à dàgula. ¹¹ Ǹ ↄ bo ǹ pá a pↄ́nↄa pínki ǹ gwa, tó adi yã vãni onnɛro. ¹² Akũ Dikiri pìnɛ: Tↄ̀! Ma a pↄ́ sĩnda pínki nànnɛ n ↄĩ, ama ǹsun ↄ pá a mɛ̀ɛaro. Akũ Setan gò Dikiri arɛ.

¹³ Zĩkea Ayuba nɛ́gↄ̃gbɛ̃nↄ kũ a nɛ́nↄgbɛ̃nↄ tɛn pↄ́ ble òtɛn sèwɛ̃ mi ń vĩ̀ni bɛa. ¹⁴ Akũ gbɛ̃ke sù Ayuba kĩnaa à pì: Zùnↄ tɛn bú wí akũsↄ̃ zaakinↄ tɛn sɛ̃̀ ble ń sarɛ, ¹⁵ akũ Sɛbanↄ lɛ̀tɛḿma ò ń sɛ́tɛ ò tà kũńwo, ò ń dã̀rinↄ dɛ̀dɛ kũ fɛ̃nɛdao. Makũ mɛ́ ma bo mado ma su a baaru kpánnɛ. ¹⁶ Adi yã o à làkaro, akũ gbɛ̃ pãnde sù à pì: Sura pɛ̀tɛ n sã kpàsanↄa ò tɛ́ kũ̀, pↄ́dãrinↄ gàga. Makũ mɛ́ ma bo mado ma su a baaru kpánnɛ. ¹⁷ Adi yã o à làkaro, akũ gbɛ̃ pãnde sù à pì: Kaladianↄ kↄ̃ kpàatɛtɛ gã̀ aakↄ̃ ò sù ò lɛ̀tɛ n lakuminↄa ò ń sɛ́tɛ ò tà kũńwo, ò ń dã̀rinↄ dɛ̀dɛ kũ fɛ̃nɛdao. Makũ mɛ́ ma bo mado ma su a baaru kpánnɛ. ¹⁸ Adi yã o à làkaro, akũ gbɛ̃ pãnde sù à pì: N nɛ́gↄ̃gbɛ̃nↄ kũ n nɛ́nↄgbɛ̃nↄ tɛn pↄ́ ble òtɛn sèwɛ̃ mi ń vĩ̀ni bɛa, ¹⁹ akũ zàga’ĩa gbãna kàka à bò gbárannan à sù ń kpɛ́ kusuru siikↄ̃nↄa, akũ à lɛ̀tɛ à sì nɛ́ pìnↄa ò gàga. Makũ mɛ́ ma bo mado ma su a baaru kpánnɛ.

²⁰ Akũ Ayuba fùtɛ à a uta gà à kɛ̃̀ à a mìi bò. Akũ à wùtɛ a gbɛrɛa à donyĩ kɛ̀ Ludanɛ ²¹ à pì:

Ma bo ma da gbɛrɛn ↄkori

akũsↄ̃ mani ɛra mà tá ↄkori.

Dikiri kpàma akũ à ɛ̀ra à sìma.

Ò Dikiri sáabu kpá.

²² Yã pìnↄ gũn pínki Ayuba dí durunna kɛ à Luda taari èro.

Setan Ayuba yↄ̃na a gɛ̃̀n plade

¹ Zĩkea malaikanↄ ɛ̀ra ò sù ò zɛ̀ Dikiri arɛ, akũsↄ̃ Setan kú ń tɛ́. À zɛ̀ Dikiri arɛ, ² akũ Dikiri a là à pì: N bo mámɛɛ? À wèa à pì: Matɛn gɛ́ matɛn su matɛn likara andunia gũmmɛ. ³ Akũ Dikiri pìnɛ: N ma zↄ̀bleri Ayuba è yá? A sára kú andunia gũnlo. Gbɛ̃ manamɛ, à taari vĩro. À ma vĩna vĩ akũsↄ̃ à gì yãvãnikɛnaai. Bee kũ n ma sã vùnɛ, ma kisira kpài pã, à kpɛ́ kun taari sari ari tera. ⁴ Akũ Setan pìnɛ: Ǹ kɛmɛnɛ mà kɛnnɛ. Pↄ́ kũ gbɛ̃ vĩ sĩnda pínki ani kpá a surabana yãi. ⁵ Ǹ n ↄ bo ǹ pá a mɛ̀ɛa ǹ gwa. Ani yã vãni onnɛ. ⁶ Akũ Dikiri pìnɛ: Tↄ̀! Ma a nànnɛ n ↄĩ, ama ǹ a wɛ̃̀ndi tó.

⁷ Setan gò Dikiri arɛ, akũ à bↄ̀bũnu zĩ̀ Ayubaa sɛna zaa a gɛ̀sɛɛa ari à gɛ̀ɛ pɛ́ a mìdangura. ⁸ Akũ Ayuba takaso sɛ̀ à gɛ̀ɛ à vùtɛ tubura, àtɛni a zĩda wao. ⁹ A nanↄ pìnɛ: Ĩnigↄ̃ kpɛ́ kun taari sari ari teran yá? Ǹ yã vãni o Ludanɛ ǹ ga. ¹⁰ Akũ à pìnɛ: Ntɛn yã o lán nↄgbɛ̃ yↄ̃nkↄ bà. Ónigↄ̃ yã mana le Luda ↄĩ ò gí a vãni lei yá? Yã pìnↄ gũn pínki Ayuba dí durunna kɛ a yã’onaa gũnlo.

Ayuba gbɛ̃nnanↄ suna a kĩnaa

¹¹ Kũ Ayuba gbɛ̃nna gbɛ̃nↄn aakↄ̃nↄ kisira kũ à a lènↄ baaruu mà, ń baadi bò a bɛa ò kↄ̃ kàkara, akũ ò gɛ̀ɛ ò wɛ̃nda kɛ kãao ò a laakari kpátɛnɛ. Ń tↄ́nↄn dí: Temana gbɛ̃ Ɛlifaza, Sua gbɛ̃ Bilidada kũ Naamati gbɛ̃ Zofao. ¹² Kũ ò a wĩna kɛ̀ zã̀zã, odi a dↄ̃ro, akũ ò ↄ́ↄ dↄ̀, ń baadi a uta gà à kɛ̃̀, akũ ò bùsuu dã̀ ò fã̀ musu ń mìla. ¹³ Akũ ò vùtɛ kãao zĩtɛ gↄrↄ suppla fãnantɛ̃ kũ gwãanio. Ń gbɛ̃ke dí yãke o kãaoro, zaakũ ò è lákũ a warikɛnaa kɛ̀ zↄ̃kↄ̃ manamana nà.

Ayuba a igↄrↄ gyabonaa

¹ Abire gbɛra Ayuba lɛ́ wɛ̃̀ à yã vãni ò a igↄrↄ musu ² à pì:

³ Luda ma igↄrↄ kɛ pã

atɛ̃nsa gwãani kũ ò ma nↄ̀ↄ sìi pìi.

⁴ Gↄrↄ pì li gusira ũ,

zaa musu Luda sún a yã daro,

àsun tó gu puaro.

⁵ Gusira kũ níkiniki gↄrↄ pìia,

ludambɛ sira kútɛa,

gusira bìtim daala.

⁶ Gwãani pì sↄ̃ à sira kũ níkiniki,

òsun a da wɛ̃̀ gↄrↄnↄ tɛ́ doro,

òsun a naro mↄ gↄrↄnↄ gũnlo.

⁷ Gwãani pì kɛ gwãani fĩni ũ,

ayuwii súngↄ̃ dↄ gↄrↄ kũ̀aro.

⁸ Pↄ́dammari kũ òdi tó ifãntɛ̃ gu puronↄ láari kɛ gↄrↄ pìia,

gbɛ̃ kũ ò dↄ̃ lákũ òdi ↄ ká kwãsaaii pìnↄ.

⁹ A gudↄnao susunɛnↄ sira kũ,

oni a gudↄna dã pã, gu ni kɛ̃ro.

¹⁰ Zaakũ gↄrↄ pì dí ma da nɛ́’isↄ zɛ́ tatamalɛro,

à tò ma wɛ́ wari è.

¹¹ À kɛ̀ dera òdi ma i gɛ̀ ũroo?

Bↄ́yãi mádi bo gbɛrɛn ma ɛra gↄ̃̀nↄroo?

¹² À kɛ̀ dera ò ma kpa gbálaa?

Bↄ́yãin ò yↄ̃ kpàma ma mìi?

¹³ Tó ma ga yã, de ma gↄ̃ kítikiti,

de ma i ò ma kámma bò

¹⁴ kũ kínanↄ kũ andunia gũn lɛ́dammari

kũ ò kínabɛ zĩnↄ kɛ̀kɛ ò bò ń zĩdanɛnↄ,

¹⁵ kínɛ kũ ò wuraa kàkarańyĩnↄ

akũsↄ̃ ò andurufuu kà ń kpɛ́n à pà.

¹⁶ À mana yã ò ma vĩ lán nↄ̀bↄtɛnɛ bà,

lán nɛ́ kũ à sù gɛ̀ ũ adi andunia ero bà.

¹⁷ Gwen yãvãnikɛrinↄ dì ń vãnikɛna tón

akũsↄ̃ gbɛ̃ busananↄ dì kámma bon.

¹⁸ Zĩ̀zↄnↄ dì ĩampaki le gwe,

òdi ń wɛ́tãmmarinↄ kòto ma doro.

¹⁹ Gbãnadenↄ kũ talakanↄn kú gwe ń pínki,

akũsↄ̃ zↄ̀ↄ dìgↄ̃ de a dikiri pↄ́ ũ gwe doro.

²⁰ Bↄ́yãi Luda dì gu pu wɛ̃ndadenↄnɛɛ?

À kɛ̀ dera àdi wɛ̃̀ndi kpá gbɛ̃ kũ ń pↄ siranↄaa?

²¹ Ń wɛ́ dìgↄ̃ dↄ gai òdi lero,

òdi kpátɛ kɛi de aruzɛkɛ kũ à utɛnala.

²² Tó ò gà ò ń vĩ, òdi pↄnna kɛ,

ń nɛ̀sɛɛ dì kɛ nna.

²³ Luda ń zia yã ùtɛńnɛ,

à karaa lìkańyĩ kpa sĩnda pínkia.

²⁴ Wesakakara à bona mɛ́ à gↄ̃̀ ma pↄ́ble ũ,

ma ndanaa dì lákaro.

²⁵ Yã kũ ma vĩna kɛ̀nɛɛ pì mɛ́ à ma le,

yã kũ ma kã gìi pì mɛ́ à sùma.

²⁶ Má ĩampana vĩro, ma laakari kpátɛnaro.

Má kámmabona vĩro, ma wari dì lákaro.

Ɛlifaza yãwena Ayubaa

¹ Akũ Temana gbɛ̃ Ɛlifaza yã wèa à pì:

² Asa tó gbɛ̃ yã ònnɛ, ĩni pↄ fɛ̃roo?

Zaakũ mani fↄ̃ màgↄ̃ yĩtɛnaro.

³ Ǹ dↄn lákũ n lɛ́ dà gbɛ̃nↄa dasi nà,

n gbɛ̃ kũ ń gbãna làkanↄ gbà swɛ̃̀ɛ.

⁴ N yã gbɛ̃ kũ òtɛn funↄ sɛ̀ lei,

n gbɛ̃ kũ ò busananↄ gbà gbãna.

⁵ Kũ yã n le sà, akũ ntɛn fu,

kũ à sùmma, n bídi kɛ̀.

⁶ N vĩnakɛna Ludanɛ dí n laakari kpátɛroo?

N kunna taari sari dì tó ǹgↄ̃ tãmaa vĩroo?

⁷ Ǹ laasun lɛ́ ǹ gwa!

Kisira taarisaride lè ziki ari à gà yá?

Mán ò gbɛ̃ mananↄ kàkatɛn zikii?

⁸ Gbɛ̃ kũ à yã vãni bú wì à yãkete tↄ̃̀a,

ma è abire mɛ́ àdi butɛnɛ.

⁹ Luda lɛ́’ĩa mɛ́ àdi a kakatɛ,

a pↄ́ bona a yĩn mɛ́ àdi a dúgu zↄ̃.

¹⁰ A pũtãna kũ kòto gbãnao lán músuu bà dì láka,

Luda dì a saka woronɛ.

¹¹ Àdi ga lán músu kũ à nↄ̀bↄↄ wɛ̀tɛ à kùraii bà,

a nɛ́nↄ ni gbasa ò fãkↄ̃a.

¹² Yã sùma kpãni asiri gũn,

a ĩa gɛ̃̀ ma sãn.

¹³ Gↄrↄ kũ matɛn nana bɛ̃̀nɛ o gwãani,

gↄrↄ kũ gbɛ̃nↄ i ò ò kà zã̀,

¹⁴ vĩna ma kũ matɛn lukaluka,

ma mɛ̀gu sĩnda pínki tɛn luka.

¹⁵ Ĩa ke buri ma pa ma ãnnwa,

ma mɛ̀kãsɛsɛɛ fùtɛ à zɛ̀.

¹⁶ Kũ à zɛ̀, mádi a taka dↄ̃ro,

pↄ́ pì kú ma arɛ,

akũ ma a kòto kpãni mà à pì,

¹⁷ bisãsiri ni fↄ̃ àgↄ̃ de yãnnade ũ Ludanɛ yá?

Gbɛ̃ ni fↄ̃ àgↄ̃ zɛ̃na a Kɛ̀ri arɛ yá?

¹⁸ Zaakũ Luda dì a malaikanↄ náani kɛro,

akũsↄ̃ àdi a zĩkɛrii pìnↄ taari le,

¹⁹ ókↄ̃nↄ kũ ó mɛ̀ de lán ɛ̃ kpɛ́ bà,

ó kasana de bùsu kori ũ

akũsↄ̃ òdi ó dúgu zↄ̃ lán dã̀mboroo bà,

oni ó pↄ́ o dↄ yá?

²⁰ Zaa kↄnkↄ ari ↄkↄsi gbɛ̃nↄ dì gaga,

òdi kakatɛ ari gↄrↄ sĩnda pínki,

òdi ń tàasi káro.

²¹ Luda dì ń kuta lí gborońnɛ,

akũ òdi ga ↄ̃ndↄ̃ sari.

¹ Ǹ lɛ́ zú sà ǹ ma tó gbɛ̃ke ni wemma.

Malaika kpaten ĩni arɛ dↄaa?

² Íbɛtɛsɛnaa dì yↄ̃nkↄ dɛ,

nɛ̀sɛgↄ̃baa dì mìsaride kakatɛ.

³ Ma è yↄ̃nkↄ zĩni pɛ̀tɛ,

akũ zĩni pìi yↄ̀ kãnto.

⁴ A nɛ́nↄ zã̀ kũ aafia kĩnaao,

òdi ń yãnↄ mátɛmatɛńnɛ yãkpatɛkɛkia,

gbɛ̃ke dì zɛ kũńworo.

⁵ Nàdɛrinↄ dì a burapↄnↄ ble,

bee pↄ́ kũ à lɛ̀ɛ lìkainↄ,

ímidɛrinↄ dì luka a aruzɛkɛi.

⁶ Kisira dì futɛ bùsunlo,

wari dì butɛ zĩtɛro.

⁷ Lákũ tɛ́pũtãna gɛna musu sika vĩro nà,

lɛn gbɛ̃ kũ ò ì pínki dì wari le lɛ.

⁸ Tó makũmɛ sↄ̃, Ludan mani gbɛka,

mani ma yã kpátɛ a arɛ.

⁹ Àdi yã zↄ̃kↄ̃ kɛ kũ oni fↄ̃ ò a gbá dↄ̃ro,

oni fↄ̃ ò a yãbonsarɛkɛnanↄ lɛ́ dↄ̃ro.

¹⁰ Àdi tó legũ ma zĩtɛ,

àdi tó a í dagula sɛ̃̀ntɛ.

¹¹ Àdi gbɛ̃ busananↄ sɛ́ lei,

àdi wɛ̃ndadenↄ da pↄnnan.

¹² Àdi yã kũ manafikidenↄ tɛn pɛ́a gboro,

de ń ↄzĩ súngↄ̃ arubarika vĩro yãi.

¹³ Àdi ↄ̃ndↄ̃rinↄ kũ ń wɛ́zɛ̃ gũn,

àdi tó yãlɛkpɛrɛ’orinↄ yãgↄ̃gↄ̃na kɛ pã.

¹⁴ Gu dì sira kũḿma fãnantɛ̃,

òdi ↄ mátɛmatɛ fãnantɛ̃ lán gwãani bà.

¹⁵ Àdi takasidenↄ bo ga lɛ́i,

àdi pↄ́saridenↄ bo gbãnamↄnnɛrinↄ ↄĩ.

¹⁶ A yã mɛ́ à tò gbãnasaridenↄn tãmaa vĩ,

yãzɛdesaridenↄ dì yĩtɛ kyáu.

¹⁷ Arubarikaden gbɛ̃ kũ Luda dì a toto ũ.

Tó àtɛni n sã gaga, ǹsun yãvunu káro.

¹⁸ Zaakũ àdi gbɛ̃ kĩnna akũ àdi a bↄ̀ gwa,

àdi gbɛ̃ wíwi akũ àdi a werekↄ̃a.

¹⁹ Ani n bo yãn gɛ̃̀n suddo,

bee tó à kà gɛ̃̀n suppla, kisira ni n lero.

²⁰ Ani n sí gaa nàgↄrↄ,

ani n bo fɛ̃nɛda lɛ́i zĩ̀lan.

²¹ Dikiri ni n bo gbɛ̃yakarinↄ ↄĩ,

tó yakanaa sù, vĩna ni n kũro.

²² Ĩni yakana kũ nàao yáa dↄ,

ĩni vĩna kɛ nↄ̀bↄ pãsĩnↄnɛro.

²³ Zaakũ ĩnigↄ̃ kun aafia kũ gbɛ̀nↄ,

ĩnigↄ̃ nna kũ nↄ̀bↄsɛ̃ntɛnↄ,

²⁴ ĩnigↄ̃ dↄ̃ kũ n ↄn nigↄ̃ nna,

tó n gɛ n kpàsan, pↄ́ke ni kĩaro.

²⁵ Ĩnigↄ̃ dↄ̃ kũ n nɛ́nↄ ni kɛ dasi,

n burinↄ ni dagula lán sɛ̃̀ɛ bà.

²⁶ Ĩni zĩ kũ yúkuyuku gbasa ǹ ga

lán ése kũ à mà ò kɛ̃̀ a gↄrↄaa bà.

²⁷ Kũ o yã pìi asiri gbɛ̀ka, lɛn à de lɛ.

Ǹ yã pì sí ńgↄ̃ dↄ̃ kũ n zĩda yãmɛ.

Ayuba yã’ona Ludanɛ

¹ Bisãsiri dì bo nↄgbɛ̃ kĩnaamɛ,

a wɛ̃̀ndii kusu, àdigↄ̃ kun yãkete sariro.

² Àdi pia lán lávu bà àdi kori kɛ,

àdi gɛ̃tɛ lán uraa bà àdi gì kɛro.

³ Gbɛ̃ dí takan ĩni wɛ́ dↄa

ǹ yãkpatɛ kɛ kãao yá?

⁴ Pↄ́ gbãsĩ ni fↄ̃ à pↄ́ gbãsĩsari i yá?

Ani sí kɛro.

⁵ N bisãsiri gↄrↄ dìtɛnɛ,

a mↄ lɛ́ kú n ↄĩ,

n a wɛ̃̀ lɛ́ dànɛ, ani fↄ̃ à vĩalaro.

⁶ Ǹ wɛ́ goa ǹ a tó gwe

ari a gↄrↄ lɛ́ papa lán zamalingakɛrii bà.

⁷ Lí dìgↄ̃ tãmaa vĩmɛ,

zaakũ tó ò zↄ̃̀, àdi ɛra à bↄ̀tↄ pá,

akũsↄ̃ a bↄ̀tↄ dufu pìi dì furo.

⁸ Bee tó a zĩni zĩ kũ̀ zĩtɛ gũn,

akũsↄ̃ a mukutu gà bùsun,

⁹ tó à í gbĩ mà, ani bↄ̀tↄ pá,

ani gã̀ bo lán lí kũ ò pɛ̀ɛ bà.

¹⁰ Tó gbɛ̃ gà sↄ̃, àdigↄ̃ wutɛna sↄ̀rↄrↄ,

àdi tá àdigↄ̃ kun doro.

¹¹ Lákũ sɛ̀bɛ’i dì lago nà,

akũsↄ̃ swa’i dì baba à láka,

¹² lɛn bisãsiri dì wútɛ lɛ àdi futɛ doro,

ari ludambɛ gɛ́ gɛ̃tɛo, ani vuro,

ani vu kũ i pìioro.

¹³ Tó ĩni ma utɛ gyãwãnn

ǹ ↄ kúma ari n pↄ gòma dé!

Tó ĩni gↄrↄ lɛ́ ditɛmɛnɛ gwe

gbasa ǹ dↄ ma yãn dé!

¹⁴ Tó gbɛ̃ gà, ani ɛra àgↄ̃ kun yá?

Tó lɛmɛ, manigↄ̃ wɛ́ dↄ ma vunaai

ma ↄsikanaa gũn gↄrↄ sĩnda pínki.

¹⁵ Ĩni lɛ́ zumai mani wemma,

ĩni makũ kũ má de n ↄzĩ ũ bɛgɛ kɛ.

¹⁶ Gↄrↄ birea n wɛ́ nigↄ̃ tɛ́ ma yãkɛnanↄi,

ama ĩni ma durunna yã da doro.

¹⁷ Ĩni ma taarinↄ ká bↄ̀kↄn ǹ yĩ ǹ ditɛ,

ĩni lá kú ma yãvãnikɛnaa pìnↄa.

¹⁸ Lákũ kpi dì gboro à fãkↄ̃a nà,

akũsↄ̃ sĩ̀sĩ musu gbɛ̀ gbɛ̃̀ntɛ̃ɛ dì sↄ̃sↄ̃,

¹⁹ lákũ swa’i dì gbɛ̀ lↄ́lↄ nà,

akũsↄ̃ í dì bùsu sɛ́tɛ à táo,

lɛn ndì bisãsiri tãmaa nɛnɛ lɛ.

²⁰ Ndì gbãna mↄnɛ à tá, àdi su doro,

ndì tó a ãn litɛ à andunia tó.

²¹ Tó a nɛ́nↄ gↄ̃̀ gbɛ̃ bɛ̀ɛrɛdenↄ ũ, ani dↄ̃ro,

tó ò kɛ̀ gbɛ̃ fítinↄ ũmɛ sↄ̃, ani ero.

²² Wãwãn anigↄ̃ ma ado,

a zĩda pↄsiran àdigↄ̃ kɛ.

Ayuba wena a gbɛ̃nnanↄa

¹ Akũ Ayuba wè a gbɛ̃nnanↄla à pì:

² Ari bↄrɛn ánigↄ̃ wari dↄma,

àgↄ̃ ma nɛ̀sɛ yakamɛnɛ kũ yãzↄ̃zↄ̃naaoo?

³ A ma sↄ̃sↄ̃ à kɛ̀ gɛ̃̀n kuri sà,

átɛni ma fobo, wé’i dì á kũro.

⁴ Tó ma sãtɛmɛ yãpura,

ma taari de ma zĩda yã ũmɛ.

⁵ Tó a gi átɛni á zĩda sɛ́ lei demala,

akũsↄ̃ átɛni ma taari e yã kũ à ma le musu,

⁶ àgↄ̃ dↄ̃ kũ Luda mɛ́ à yã dí kɛ̀mɛnɛ kpɛdangara,

à tankutɛ kpàkpamɛnɛ à ma kũ.

⁷ Madì faaba wiki lɛ́, gbɛ̃ke dì wemaro,

madì surabana ↄ́ↄ dↄ, yãzɛde kunlo.

⁸ Luda zɛ́ zↄ̃̀mɛnɛ, gɛ̃ki kunlo,

à gusira dà ma zɛ́la.

⁹ À ma kpe bò,

à ma fùraa gò.

¹⁰ Àdi ma wíwi kpa sĩnda pínkia ari ma laka,

àdi ma tãmaa nɛ lákũ òdi lí nɛ́ nà.

¹¹ Àdi a pↄfɛ̃ kipama,

àdi ma ditɛ a ibɛrɛ ũ.

¹² A zĩ̀karinↄ dì futɛmai lɛɛlɛ,

òdi ma kagura kɛ,

òdi bùra kátɛ ò lika ma kpɛ́i.

¹³ À tò ma gbɛ̃nↄ dì kakara kũmao doro,

gbɛ̃ kũ ò ma dↄ̃nↄ lɛ̀ɛ zↄ̃̀ ò tàtamalɛ.

¹⁴ Ma danɛnↄ pã kpàmai,

ma gbɛ̃nnanↄ sã̀ ma yãn.

¹⁵ Ma gↄ̃ nibↄ ũ ma bɛ zĩkɛrinↄnɛ,

ma gↄ̃ńnɛ lán buri zĩ̀tↄↄ bà.

¹⁶ Tó ma a bɛgwarii sìsi, àdi wema doro,

bee tó ma kútɛ kɛ̀nɛ kũ ma zĩda lɛ́o.

¹⁷ Ma lɛ́’ĩa dì kɛ ma nanↄnɛ lɛ́fↄtↄ ũmɛ,

ma vĩ̀ninↄ kũ ma dakũnanↄ yemai doro.

¹⁸ Bee nɛ́ ketenↄ dì ma gya bo se,

tó ma futɛ ma zɛ, òdigↄ̃ ma lalandi kɛmɛ.

¹⁹ Ma kpàasinↄn ye ma yãiro,

ma gbɛ̃ yenyĩdenↄ bò ma kpɛ.

²⁰ Ma mɛ̀ yitoro kũ̀,

à gↄ̃̀ fíti mà ga.

²¹ À ma wɛ̃nda gwa ma gbɛ̃nnanↄ,

à ma wɛ̃nda gwa, zaakũ Luda ↄ tↄ̃̀mamɛ.

²² À kɛ̀ dera adì wɛ́ dↄma lán Luda dì wɛ́ dↄma nà?

Ma nↄ̀bↄ sona dí mↄ́áwa lɛroo?

²³ De ò ma yãnↄ kɛ̃̀

ò kà takadan.

²⁴ De ò kɛ̃̀ gbɛ̀ɛa kũ gão,

ò daruma kpàtɛn àgↄ̃ kun ari gↄrↄ sĩnda pínki.

²⁵ Zaakũ má dↄ̃ kũ ma Zɛkũnwode kun,

ani futɛ à zɛ ma sèedade ũ kpɛkpɛ.

²⁶ Tó ma mɛ̀bara díkĩna kàkatɛ,

mani wɛ́ si Ludalɛ mɛ̀ɛ sari.

²⁷ Mani wɛ́ sialɛ ma zĩda,

ani kɛmɛnɛ gbɛ̃ zĩ̀tↄ ũro.

Yã pì ma kũna gbãna ma swɛ̃̀ɛ gũn.

²⁸ À kɛ̀ dera a wɛ́ dↄ̀mɛnɛ,

a pì makũ ma a zĩda lèoo?

²⁹ À vĩna kɛ Luda fɛ̃nɛdanɛ,

zaakũ ani pↄfɛ̃ kipao yãvãnikɛrinↄa,

de àgↄ̃ dↄ̃ kũ yãkpatɛ tɛni á dã.

Ayuba zɛna kũ a taarisarikɛo

¹ Ma la dà kũ ma wɛ́ nigↄ̃ kú nↄkparearo.

² Bↄ́ mɛ́ ani gↄ̃ bisãsiri baka ũ Luda kĩnaa zaa musuu?

Bↄ́ túbin ani le Gbãnasĩndapinkide kĩnaa zaa ludambɛɛ?

³ Gbɛ̃ vãninↄn kisira dì ń leroo?

Vãnikɛrinↄn kakatɛnaa dì gɛ̃ńyĩroo?

⁴ À de Luda tɛni ma yãkɛnanↄ e

à ma gɛ̀sɛsɛna lɛ́ dↄ̃roo?

⁵ Madìgↄ̃ táa o kũ manafikion yá?

Madì wã mà gbɛ̃ sãtɛn yá?

⁶ Luda ma yↄ̃ a zɛ́a à gwa,

ani dↄ̃ kũ má taari vĩro.

⁷ Tó ma pã zɛ́nɛ,

akũsↄ̃ pↄ́ kũ ma wɛ́ ènↄ mɛ́ àtɛni ma swɛ̃̀ ble,

ke tó ma ↄ kú yã vãni ke gũn,

⁸ tó lɛmɛ, mà pↄ́ tↄ̃ gbɛ̃ pãndenↄ ble,

ò pↄ́ kũ ma bànↄ wowo.

⁹ Tó gbɛ̃ke nↄ ni gɛ̃̀ ma swɛ̃̀n,

tó ma nagui ma gbɛ̃dake nↄ yãi,

¹⁰ tó lɛmɛ, gbɛ̃ pãnde gbá di ma nanↄa,

àgↄ̃ kĩni kɛ dakenↄnɛ.

¹¹ Zaakũ tó ma yã pìi kɛ̀, dà vãnimɛ,

durunna kũ à kà ò a yã gↄ̃gↄ̃mɛ.

¹² Yã pì bi tɛ́ pↄ́kakatɛriimɛ,

kũ à de à dↄ ma burapↄnↄa à tɛ́ kũ kororo.

¹³ Tó ma gↄ̃gbɛ̃ ke nↄgbɛ̃ zĩkɛri yã vĩ kũmao,

tó mádi gↄ̃gↄ̃ a zɛ́aro,

¹⁴ mani kɛ deramɛ, tó Luda fùtɛmaii?

Tó à sùmai, mani pinɛ deramɛɛ?

¹⁵ Luda kũ à ma í kàsa nɛ́’isↄn mɛ́ à ade í kàsa seroo?

Luda mɛ̀n do pì mɛ́ à ó baadi kɛ̀ a da gbɛrɛnloo?

¹⁶ Tó ma takaside tɛ̃̀ pↄ́ kũ àtɛni a ni dɛ,

tó ma gi gyaanↄ wɛ̃nda gwai,

¹⁷ tó ma pↄ́ blè,

ma tonɛ kũ à gwàri vĩro tɛ̃̀ sↄ̃, tↄ̀!

¹⁸ Lɛnlo! Zaa ma kɛfɛnnakɛgↄrↄa

tonɛnↄ demɛ ma ũ.

Zaa lákũ ma bo ma da nɛ́’isↄn nà

gyaanↄnↄ kpànyĩriimɛ ma ũ.

¹⁹ Tó ma gbɛ̃ke è kũ ĩa tɛni a dɛ,

ke tó ma takaside è kũ à biza vĩ à kúalaro,

²⁰ tó adi ma sáabu kpá

kũ ma a sãkã biza kùala a mɛ̀ɛ kɛ̀ lↄ́gↄlↄgↄro,

²¹ tó ma gbãna mↄ̀ tonɛnɛ,

kũ má dↄ̃ kũ oni zɛ kũmao yãkpatɛkɛnan yãi,

²² ma gã̀ bokũn,

ma gã̀sã wó a pɛ́kia.

²³ Má Luda wɛ́tãmmanaa vĩna vĩ,

a zↄ̃kↄ̃kɛ yãi mani fↄ̃ mà yã dí taka kɛro.

²⁴ Tó wuraan ma gbãna lèa,

tó ma pì wura atɛ̃nɛ má náanikɛna,

²⁵ tó ma aruzɛkɛ zↄ̃kↄ̃ↄn ma pↄ dↄa,

ↄgↄda kũ à gɛ̃̀ ma ↄĩ pìi,

²⁶ tó ifãntɛ̃ tɛ́kɛnaan má tɛ́i,

ke mↄvura táa’ona kũ a manakɛo,

²⁷ akũ ń yã tɛni ma swɛ̃̀ ble busɛbusɛ,

ari ma lɛ́ pɛ̀ ma ↄa ma fↄ kpàoḿma,

²⁸ abirekũ bi durunna kũ à kà ò a yã gↄ̃gↄ̃mɛ,

manafikikɛna Luda Musudenɛn gwe.

²⁹ Mádi pↄnna kɛ ma zãnguri kũ kisira a lè yã musuro,

mádi a yáa dↄ kũ yã a lè yãiro.

³⁰ Mádi we ma durunna kɛ̀ ma a kàro.

³¹ Dí mɛ́ à kìpama kũ adi pↄ́ ble à kã̀roo?

Ma bedenↄmɛ ma sèedadenↄ ũ.

³² Ma bɛ zɛ́ dìgↄ̃ wɛ̃na nibↄnↄnɛ,

madì we nibↄ gɛ̃̀zɛla ì batunlo.

³³ Ma a taarinↄ ùtɛ gbɛ̃nↄnɛ yá?

Ma lá kù ma durunnanↄan yá?

³⁴ Pari vĩna ma kũ ari ma fua mà yã o yá?

Kũ oni ma gya bo yãin ma gi bo kpɛ́nyĩ yá?

³⁵ O’o! Dí mɛ́ ani ma yã díkĩna mamaa?

Ma zɛo. Gbãnasĩndapinkide wema sà.

Luda kũ à yã vĩ kũmao pì kɛ̃ takadan.

³⁶ Mani takada pì sɛ́ mà da ma gã̀n,

mani kú fùra ũ,

³⁷ mani gɛ́ mà yã kũ ma kɛ̀nↄ babanɛ pínki,

mani nai lán kínɛ bà.

³⁸ Tó ma bura tɛn gímai,

akũsↄ̃ a dↄ̀rↄnↄn tɛn wiki lɛ́ma,

³⁹ tó ma burapↄ blè akũsↄ̃ mádi zĩtɛ pìi fĩna boro,

ke tó ma gbɛ̃ kũ ò vĩ yãnↄ dɛ̀dɛ,

⁴⁰ tó lɛmɛ, lɛ̀kara butɛ gbado gɛ̃nɛ ũ,

pampara sↄ̃ à butɛ ése gbɛ̀n.

Ayuba yã lɛ́n gwe.

Dikiri a kíkɛ mↄna Ayubanɛ

¹ Akũ Dikiri yã wè Ayubaa zàga’ĩa gũn à pì:

² Dí mɛ́ àtɛn fayasariyã ká ma ↄ̃ndↄ̃laa?

³ Ǹ futɛ ǹ zɛ lán nɛ́gↄ̃gbɛ̃ bà,

mani n la yãi, ĩni wema.

⁴ Kũ ma andunia kàtɛ, ń kú mámɛɛ?

Tó ń dↄ̃na vĩ, ǹ omɛnɛ.

⁵ Dí mɛ́ à a zĩtɛ lɛ́ sèedaa lɛ̀ɛ?

Dí mɛ́ à bàa yↄ̃̀a à gwàa? À de ń dↄ̃ↄ?

⁶ Bↄ́ mɛ́ à zĩtɛ kũnaa?

Dí mɛ́ à a ɛ̃ pɛ̀tɛ

⁷ gↄrↄ kũ gudↄna susunɛnↄn tɛn ayuwii kɛ,

malaikanↄ pↄnna wiki dↄ ń pínkii?

⁸ Kũ ísira gu fↄ̃̀ à bò,

dí mɛ́ à zɛ́ tàtaalɛɛ?

⁹ Ma ludambɛ luku dànɛ pↄ́kasa ũ,

ma gusira yĩ̀nɛ biza ũ.

¹⁰ Ma a lɛ́zɛki dànɛ,

ma zɛ́nↄ tàta ma gùrukpanↄ dàdan.

¹¹ Ma pìnɛ: Ĩnigↄ̃ ká la ǹsun vĩalaro,

n ísↄ̃kɛna gbãnanↄ ni zɛ la.

¹² Zaa lákũ ò n i nà n yã dìtɛ kↄnkↄnɛ yá?

N boki mↄ̀ gudↄnaanɛ ziki yá?

¹³ Gudↄnaa dì andunia kũ a lɛ́a

de à gbãkɛ lán biza bà a yãvãnikɛrinↄ kↄ́tɛ.

¹⁴ Àdi andunia litɛ kokũkokũ lán kwã kpɛ bà,

kpinↄ dì bo gupuraa lán uta yĩyĩkↄ̃anaa bà.

¹⁵ Àdi gí yãvãnikɛrinↄnɛ ò ń gusira yã kɛ,

àdi ń ↄ sɛna musu ɛ́’ɛ.

¹⁶ N gɛ ari zaa ísira ísɛ̃bokinↄa yá?

N táa ò í lòkotoo pìi gãnun ziki yá?

¹⁷ Ò ga bĩnilɛ gbànↄ mↄ̀nnɛ yá?

N gyãwãn gãnulɛnↄ è yá?

¹⁸ N andunia yàasa lɛ́ tàasii kà yá?

Tó ń yã birenↄ dↄ̃ pínki, ǹ omɛnɛ.

¹⁹ Gupura bɛ zɛ́n máa?

Ń gusirakuki dↄ̃ yá?

²⁰ Ĩni fↄ̃ ǹ gɛ́ kũńwo ń bùsun yá?

Ń ń bɛ zɛ́ dↄ̃roo?

²¹ Ń dↄ̃ sàee! À de ò n i gↄrↄ birea!

À de n wɛ̃̀ lɛ́ vĩroo?

²² N gɛ̃ laasi kũ ma gu yĩda kàtɛn yá?

N ma legũgbɛ dↄ̃̀ↄ è yá?

²³ Madì utɛ ari warikɛgↄrↄa,

madì gbarɛ zĩ̀kagↄrↄ zĩ.

²⁴ Gupura dì bo mámɛ à dagulaa?

Ifãboki kpa ĩa dì bo à da zĩtɛla deramɛɛ?

²⁵ Dí mɛ́ àdi zɛ́ bo legũ dasinɛɛ?

Dí mɛ́ àdi gu para surapũtãnaanɛɛ?

²⁶ Àdi mↄtↄ pisi zĩtɛ kũ gbɛ̃ke kunloa,

bee gbáranna kũ bisãsiri kunlo.

²⁷ Àdi bɛzĩ kũ tàragaao yĩda kũ,

àdi tó sɛ̃̀ butɛ gwe.

²⁸ Legũ de vĩ yá?

Dí mɛ́ à plí ìi?

²⁹ Dí nɛ́’isↄn legũgbɛɛ dì bonn?

Dí mɛ́ àdi suka i gbasa à kpáa?

³⁰ Dí mɛ́ àdi tó í li à kɛ gbɛ̀ ũ

à tó ísira musu kɛ kpakparakpaa?

³¹ Ĩni fↄ̃ ǹ susunɛ mɛ̀n supplanↄ yĩ ǹ kakara yá?

Ĩni fↄ̃ ǹ susunɛ azianↄ fãkↄ̃a yá?

³² Ĩni fↄ̃ ǹ mↄ’azia bo a gↄrↄa yá?

Ĩni fↄ̃ ǹ gu mↄ susunɛ ko nɛ́rande kũ a nɛ́nↄnɛ yá?

³³ Ń musu pↄ́nↄ doka dↄ̃ yá?

Ĩni fↄ̃ ǹ ń ká kpatan zĩtɛla yá?

³⁴ Ĩni fↄ̃ ǹ lɛ́ zu legũi

de à sisi à í bo à n yaku yá?

³⁵ Ĩni fↄ̃ ǹ legũpinanↄ gbarɛ ò da zɛ́n yá?

Òdi su ò onnɛ ókↄ̃nↄ dí yá?

³⁶ Dí mɛ́ à ↄ̃ndↄ̃ dà ludambɛ lukunↄnɛ à legũ maa?

Dí mɛ́ à dↄ̃naa kpà sukaa à kpáa?

³⁷ Dí ↄ̃ndↄ̃ mɛ́ à kà à ludambɛ lukunↄ naroo?

Dí mɛ́ ani fↄ̃ à musu orozãnↄ kpákasia kɛɛ?

³⁸ Tó a í bↄ̀tɛ, bùsu kori dì gↄ̃ bↄkↄtↄ ũ,

làkpakↄ̃nↄnↄ dì nanakↄ̃a.

³⁹ Mↄkↄ̃mmɛ ndì tofe ká músudanɛ,

tó àtɛn nↄ̀bↄ dãdã dàkoo gũn yá?

Mↄkↄ̃mmɛ ndì pↄ́ble kpá a nɛ́nↄa ò kã

gↄrↄ kũ ò kú ń tòn yá?

⁴¹ Tó kãakãanna nɛ́nↄ tɛn likara gui,

òtɛn lɛ́ zu Ludai kũ pↄ́ble kĩ̀aḿma yãi,

dí mɛ́ àdi pↄ́ble kpáḿmaa?

¹ Ń zↄ̃ nɛ́’igↄrↄ dↄ̃ yá?

N gãsi è gↄrↄ kũ àtɛn nɛ́ i yá?

² Ndì ń nↄ̀ mↄ dↄdↄ yá?

Ndì ń nɛ́’igↄrↄ dↄ̃ yá?

³ Òdi kútɛ ò nɛ́ imɛ,

akũ ń nɛ́’iwãwã dì kpátɛ.

⁴ Ń nɛ́nↄ dì gbãna kũ sɛ̃̀n òdi pɛ́tɛ,

òdi gɛ̃ zɛ́la òdi su ń danↄa doro.

⁵ Dí mɛ́ à tò zaakisɛ̃ntɛ gↄ̃̀ a zĩdanɛɛ?

Dí mɛ́ à a pòro à a gbàrɛɛ?

⁶ Ma sɛ̃̀ntɛ dìtɛnɛ a bɛ ũmɛ,

ma zĩtɛ wiside kɛ̀nɛ a kúki ũ.

⁷ Àdi pã kpá wɛ̃tɛ kĩnii,

àdi a kpàkɛrii zuka maro.

⁸ Àdigↄ̃ kure sĩ̀sĩnↄa àgↄ̃ sɛ̃̀ wɛtɛ,

àdigↄ̃ kpátɛ kɛ pↄ́ ísinↄi pínki.

⁹ Zùsɛ̃ntɛ ni we à zĩ kɛnnɛ yá?

Ani we à i n zùnↄ karan yá?

¹⁰ Ĩni bà dↄa de à bú wínnɛ yá?

Ĩni gbãngo danɛ de à kpase kɛ̃nnɛ yá?

¹¹ Ĩni náani dↄa a gbãna zↄ̃kↄ̃ yãii?

Ĩni n zĩ tónɛ yá?

¹² Ĩni a náani kɛ à n pↄ́wɛ sɛ́sɛ

à suonnɛ pↄ́wɛgbɛ̃kia yá?

¹³ Sↄ̃bã dì a dɛ̀mbɛrɛnↄ poro kũ pↄnnao,

ama ani sí lɛkↄ̃a kũ tokũ dɛ̀mbɛrɛoro.

¹⁴ Àdi nɛ́gbĩni da zĩtɛ,

àdi tó bùsu’atɛ̃ nɛ́gbĩnii pìnↄ wã à pipi.

¹⁵ À sã̀sãn kũ oni su ò gɛ̀sɛ pɛ́tɛa à wíwi,

kesↄ̃ nↄ̀bↄsɛ̃ntɛnↄ ni táa oa.

¹⁶ Àdigↄ̃ pãsĩ kũ a nɛ́nↄ,

ĩnigↄ̃ dↄ̃ se a zĩda nɛ́nↄnlo,

zĩ pã kɛnaa dì kɛnɛ yãke ũro.

¹⁷ Zaakũ mádi a gba ↄ̃ndↄ̃ro,

mádi a baka da fayadenↄ tɛ́ro.

¹⁸ Ama tó à fùtɛ à bò kũ bàao,

àdi gɛ̃ sↄ̃la à a dìri yáa dↄ.

¹⁹ Mↄkↄ̃n mɛ́ ndì tó sↄ̃ gↄ̃ gbãna vĩ yá?

Mↄkↄ̃n mɛ́ n sɛ̀rɛkã pɛ̀pɛ a wakaaa yá?

²⁰ Mↄkↄ̃n mɛ́ ndì tó àgↄ̃ vĩvĩ lán kwa bà yá?

A pↄ́ bona a yĩn kĩni gbãna dì tó vĩna ń kũ.

²¹ Àdi a gbá gátɛgatɛ guvutɛn,

àdi pↄnna kɛ a gbãna yãi,

akũ àdi gɛ́ da zĩ̀karinↄlɛ.

²² Àdi pↄ́ kũ òdi vĩna kɛnɛ yáa dↄ,

swɛ̃̀ɛ dì kɛ̃aguro, àdi boru kpɛ fɛ̃nɛdanɛro.

²³ Kàa dìgↄ̃ kĩni kɛ gbàtan a musu,

sári lɛ̀kɛtɛ kũ sári gésedeo dì pí.

²⁴ Tó ò zĩ̀ kuru pɛ̀, àdigↄ̃ a zĩda daki dↄ̃ro,

àdigↄ̃ zĩtɛ lɛ́lɛ àdigↄ̃ vĩvĩ àdigↄ̃ kɛ kɛ̀rɛkɛrɛ.

²⁵ Tó ò kuru yĩsãm pà,

àdi pↄ́ bo a yĩn à pi, ɛ̃hɛ̃!

Àdigↄ̃ zĩ̀ ĩa sɛ́sɛ zaa zã̀zã

kũ gbɛ̃ zↄ̃kↄ̃nↄ wiki gbãnao kũ kùwikikɛnaao.

²⁶ N ↄ̃ndↄ̃ mɛ́ à tò boro dì yàa kɛ,

à a dɛ̀mbɛrɛ poro à gɛ́ gɛ̀nↄmidↄki kpa yá?

²⁷ Mↄkↄ̃n mɛ́ n dìtɛ vãunɛ

àgↄ̃ vura zã̀zã à a sà da zaa musu yá?

²⁸ Àdigↄ̃ kú gbɛ̀ɛ musu, gwen àdi in,

àdi di gbɛ̀ mìsↄ̃ntɛa a aafialeki ũ.

²⁹ Zaa gwen àdigↄ̃ kpátɛ kɛ pↄ́blei,

àdi wɛ́ pá pↄ́nↄa zaa zã̀.

³⁰ Arun a nɛ́nↄ pↄ́ble ũ,

gu kũ pↄ́ gɛ̀ kún, gwen àdigↄ̃ kún.

Bisãsiri dì fↄ̃ à Luda vãni boro

¹ Akũ Dikiri ɛ̀ra à pì Ayubanɛ:

² Makũ Gbãnasĩndapinkide,

ĩni ma taari e ǹ ma gba laakari yá?

Ludavãnibori, ǹ yã wema sà.

³ Akũ Ayuba wèa à pì:

⁴ Pↄ́ken ma ũro fá! Deran mani wemmaa?

Séde mà ↄ kú ma lɛ́a baasiro.

⁵ Ma yã ò gɛ̃̀n do, mani ɛra mà o doro,

ma ò gɛ̃̀n pla se, mani yã wemma doro.

⁶ Akũ Dikiri ɛ̀ra à yã ò Ayubanɛ zàga’ĩa gũn à pì:

⁷ Ǹ futɛ ǹ zɛ lán nɛ́gↄ̃gbɛ̃ bà,

mani n lala yãi, ĩni wema.

⁸ Ĩni lá kú ma yãkɛna a zɛ́alan yá?

Ń ye ǹ ma taari e de n yã bo nnan yá?

⁹ N gã̀sã gbãna kà ma pↄ́ ũ yá?

N kòto ni fↄ̃ à gu yĩgã lán ma pↄ́ bà yá?

¹⁰ Ǹ zↄ̃kↄ̃kɛ kũ kíkɛo da pↄ́kasa mananↄ ũ,

ǹ gakuri kũ bɛ̀ɛrɛɛo da uta zↄ̃kↄ̃ ũ.

¹¹ Ǹ n pↄfɛ̃ kipaḿma,

ǹ zĩdabirinↄ gwa kũ wɛ́ pãsĩo ǹ wé’i daḿma.

¹² Ǹ zĩdabirinↄ gwa kũ wɛ́ pãsĩo ǹ ń busa,

ǹ ń dúgu zↄ̃ gu kũ ò kún,

¹³ ǹ ń vĩ zĩtɛ ń pínki,

ǹ ń yĩyĩ ǹ ń ká gyãwãnn,

¹⁴ gbasa mà n sáabu kpá,

kũ n zĩ̀i blè kũ n gã̀sã gbãnao yãi.

Ũma yã

¹⁵ Ǹ ũma gwa,

kũ ma a kɛ̀ lákũ ma n kɛ nà.

Àdi sɛ̃̀ ble lán zùu bàmɛ.

¹⁶ A gbãna kú a wógbaaamɛ,

a iko kú a gbɛrɛ báasiamɛ.

¹⁷ A vlã porona lán sida lí bà,

a gbáda tĩ de lán bà tãnaa bà.

¹⁸ A wánↄ gbãna lán mↄ̀gotɛ̃ bà,

a gbánↄ de lán mↄ̀ gòo bà.

¹⁹ A zↄ̃kↄ̃ mɛ́ à de pↄ́ bɛ̃nɛ kũ ma kɛ̀nↄla pínki,

a Kɛ̀ri ado mɛ́ ani a fↄ̃.

²⁰ Sĩ̀sĩnↄ musun àdi pↄ́ blen,

gwen nↄ̀bↄsɛ̃ntɛnↄ dì fàai bon ń pínki.

²¹ Àdi wútɛ lɛ̀’itɛ gbáru,

àdigↄ̃ sↄtↄ vↄ̃n dã̀dãa gũn.

²² Lɛ̀’itɛ uraa dì daala,

swa sarɛ lubanↄ dì likai.

²³ Bee tó ísↄ̃ tɛn vĩvĩ, àdi bídi kɛro,

tó Yoda ísↄ̃kɛna tɛni a lɛ́ pá,

a laakarii dìgↄ̃ kpátɛnamɛ.

²⁴ Oni fↄ̃ ò a wɛ́ wíwi ò a kũ yá?

Oni fↄ̃ ò ↄ̃ndↄ̃ kɛnɛ ò a yĩ fↄ̃ yá?

Kwã kàsaraa

¹ Ĩni fↄ̃ ǹ kwã kàsara kũ kũ daburuuo

ǹ gátɛ ǹ boo yá?

Ĩni fↄ̃ ǹ bà dↄ a nɛ́nɛa yá?

² Ĩni fↄ̃ ǹ bà ká a yĩn yá?

Ĩni fↄ̃ ǹ a lɛ́gbako fↄ̃ kũ kúrao yá?

³ Ani kútɛ kɛnnɛ ǹ a gbarɛ yá?

Ani pinnɛ ǹ sùru kɛ yá?

⁴ Ani wennɛ ǹ a sɛ́ n zↄ̀ ũ

ari a wɛ̃̀ndi lɛ́n yá?

⁵ Ĩni a dato lákũ òdi bã dato nà yá?

Ĩni bà dↄa ǹ kpá n nɛ́nↄgbɛ̃nↄa yá?

⁶ Sↄrↄkↄnↄ ni kwã kàsaraa pì tↄkɛḿma yá?

Oni a líli lagatarinↄnɛ yá?

⁷ Ĩni fↄ̃ ǹ a pápa kũ sakao ǹ a bára fↄ̃ yá?

Ĩni fↄ̃ ǹ a mì kɛ yákiyaki kũ sário yá?

⁸ Ǹ wɛtɛ ǹ ↄ naa ǹ gwa!

Ɔsi pì yã ni sãnguro,

ĩni we ǹ a buri kɛ doro.

⁹ Tó ntɛn da ĩni a fↄ̃, ntɛni n zĩda kɛkɛmɛ,

tó n wɛ́ sìalɛ, ndìgↄ̃ sùummɛ.

¹⁰ Zaakũ gbɛ̃ke wↄ́rↄgↄ dí ká à a go a gbɛ̀nlo,

dí mɛ́ ani fↄ̃ à zɛ ma arɛ sↄ̃ↄ?

¹¹ Dí fĩna mɛ́ à dↄma kũ mani bonɛɛ?

Pↄ́ kũ à kú andunia gũn sĩnda pínki bi ma pↄ́mɛ.

¹² Mani gí kwã kàsaraa pì gbánↄ yã oiro

ke a gↄ̃sagbãnakɛ ke a manakɛ.

¹³ Dí mɛ́ ani fↄ̃ à a tɛ̀kɛɛ gogoo?

Dí mɛ́ ani we à sↄ̃mↄ kánɛɛ?

¹⁴ Dí mɛ́ ani we à a lɛ́ wɛ̃kↄ̃aa?

A saka kà à gbɛ̃ naasi kũ.

¹⁵ A tɛ̀kɛ de lán sɛ̃gbakonↄ bà a kpɛ,

à didikↄ̃ana sarapura sari dↄ̀rↄdↄrↄ.

¹⁶ A tɛ̀kɛɛ pìnↄ nanakↄ̃amɛ,

bee ĩa dì gɛ̃ki lero.

¹⁷ Ò pɛ́pɛkɛrɛna gíngin,

oni sí gokↄ̃aro.

¹⁸ Tó à yĩ sã̀, gu dì pumɛ,

a wɛ́ de lán ifãntɛ̃ bina kↄnkↄ bà.

¹⁹ Tɛ́nɛnɛ dì bↄtɛ a lɛ́n,

sĩsĩ tɛ́de dì bon dↄ.

²⁰ Túsukpɛ dìgↄ̃ bↄtɛ a yĩn

lán í kũ ò dì tɛ́a àtɛn pípi puusu bà.

²¹ A lɛ́’ĩa dì tó sĩsĩ tɛ́ sɛ́,

tɛ́nɛnɛ dì bo a lɛ́n.

²² A gbãna kú a wakaaamɛ,

gbɛ̃ kũ à bòa mɛ̀ɛ dì kɛ kpã̀m.

²³ A báasi dìgↄ̃ sↄ̃sↄ̃kↄ̃ana gíngin,

à naa gbãngbãn, àdi yĩgãro.

²⁴ A kù gbãna lán gbɛ̀ɛ bà,

lán wísilↄgbɛ da bà.

²⁵ Tó à fùtɛ, swɛ̃̀ɛ dì kɛ̃ gↄ̃sa gbãnanↄgu,

òdi kↄ̃ kɛ̃ kùo ò kura gɛ́kii.

²⁶ Fɛ̃nɛda kũ ò a lɛ̀o pínki dì pↄ́ke kɛnɛro

ke sári ke kà ke saka.

²⁷ Àdi mↄ̀si gwa lán leba bàmɛ,

mↄ̀gotɛ̃ dìgↄ̃ denɛ lán lí mùkumukuu bàmɛ.

²⁸ Àdi bàa lɛ́ kàanɛro,

gbɛ̀mba gbɛ̀ɛ dìgↄ̃ denɛ lán ése ũkã bàmɛ.

²⁹ Àdigↄ̃ gò gwa lán sɛ̃̀ kori bàmɛ,

sári kĩni dìgↄ̃ denɛ yáadↄyã ũmɛ.

³⁰ A gbɛrɛ tɛ̀kɛ de lán takaso bà,

a gbɛ̀ɛ dìgↄ̃ tɛ́ bↄkↄtↄn

lán zùswa guwibↄↄ bà.

³¹ Àdi í lòkoto ya lán í kũ àtɛn pípi oron bà,

àdi ísira dɛ lán nísidɛnaa bà.

³² Íwisi dìgↄ̃ tɛ́ a kpɛ,

ísira pìi dì ya a kpɛ púu.

³³ A sára kú andunia gũnlo,

ma pↄ́nↄ tɛ́ àkũ mɛ́ à vĩna vĩro.

³⁴ Àdi nↄ̀bↄ kũ òdi ń zĩda binↄ da pↄ́ke ũro,

àkũmɛ nↄ̀bↄ kũ ò dìtɛ ò kànↄ kína ũ.

Ayuba mìnatɛna Ludanɛ

¹ Akũ Ayuba pì Dikirinɛ:

² Má dↄ̃ kũ ĩni fↄ̃ ǹ yã sĩnda pínki kɛ,

gbɛ̃ke ni fↄ̃ à kpá n pↄyeinaanɛro.

³ N pì, dí mɛ́ àtɛn kpá ↄ̃ndↄ̃nɛ dↄ̃naa sarii?

Yãpuramɛ, ma yã kũ má a gbá dↄ̃ro ò,

yãbonsarɛ kũ à de ma dↄ̃nala.

⁴ N pì mà sã kpá, ĩni yã o,

ĩni yã lalama, mani wemma.

⁵ Ma n yã mà kũ sãomɛ yã,

tera sà ma wɛ́ sìnlɛ.

⁶ Abire yãi ma a zĩda gya bò,

ma a nɛ̀sɛɛ lìtɛ ma vutɛ bùsutitin tubura.

Dikiri ɛra à Ayuba zĩni pɛtɛnaa

⁷ Dikiri yã birenↄ onaa gbɛra à yã ò Temana gbɛ̃ Ɛlifazanɛ à pì: Ma pↄ fɛ̃̀nyĩ kũ n gbɛ̃nna gbɛ̃nↄn planↄ, zaakũ ádi ma yã o a zɛ́a lán ma zↄ̀bleri Ayuba bàro. ⁸ À zùsanɛ bↄ̀rↄ sɛ́ mɛ̀n suppla kũ sãkarooo mɛ̀n suppla, à gɛ́o ma zↄ̀bleri Ayuba kĩnaa à sa’opↄ kũ òdi ká tɛ́n à tɛ́ kũ oo, ma zↄ̀bleri Ayuba ni adua kɛárɛ. Mani a aduakɛna sí mani kɛárɛ á yↄ̃nkↄkɛnaaaro. Ádi ma yã o a zɛ́a lán ma zↄ̀bleri Ayuba bàro. ⁹ Akũ Temana gbɛ̃ Ɛlifaza kũ Sua gbɛ̃ Bilidadao kũ Naamati gbɛ̃ Zofao gɛ̀ɛ ò kɛ̀ lákũ Dikiri òńnɛ nà, akũ Dikiri Ayuba aduakɛnnɛnaa sì.

¹⁰ Ayuba aduakɛna a gbɛ̃nnanↄnɛɛ gbɛra Dikiri tò à sù a gwena zĩn. À ɛ̀ra à pↄ́ kũ à vĩ yã kàranɛ lɛu pla. ¹¹ A vĩ̀ni kũ a dakũnanↄ sù a kĩnaa ń pínki kũ a gbɛ̃ dↄ̃nanↄ ń pínki. Ò pↄ́ blè kãao a bɛa ò wɛ̃nda kɛ̀ kãao, ò a laakarii kpàtɛnɛ yã kũ Dikiri tò à a lè pínki yãi. Akũ ń baadi a gbà andurufu ↄgↄ kũ wura tãnkao mɛ̀n dodo.

¹² Dikiri arubarikaa dà Ayubagu kpɛkpɛ de káakupↄla. À sãnↄ vĩ dúbu gɛ̃ro donsari, lakuminↄ dúbu suddo, zùnↄ wàa kuri kũ zaakinↄ wàa sↄↄro. ¹³ À nɛ́gↄ̃gbɛ̃nↄ ì gbɛ̃nↄn suppla kũ nɛ́nↄgbɛ̃nↄ mɛ̀n aakↄ̃ dↄ. ¹⁴ A nɛ́nↄgbɛ̃ káakude tↄ́n Yemima, a plade tↄ́n Kezia, a aakↄ̃de tↄ́n Kɛrɛnapuku. ¹⁵ Bùsuu pìi gũn pínki nↄgbɛ̃ ke kun a mana kà Ayuba nɛ́nↄgbɛ̃ pìnↄ ũro. Ń de ń túbi dìtɛńnɛ kũ ń dãgↄ̃nↄ.

¹⁶ Ayuba warikɛnaa gbɛra à kɛ̀ wɛ̃̀ basuppla dↄ, à wɛ́ sì a daikorenↄ kũ a sãkpɛnↄ kũ a nasionↄ lɛ́. ¹⁷ À zĩ kũ̀ yúkuyuku, àkũ à gà.