ƐZƐRA

ƐZƐRA

Sirusu Isarailanↄ gbarɛnaa

¹ Pɛsianↄ kína Sirusu kíblena wɛ̃̀ káaku gũn Dikiri tɛ́ kàagu de yã kũ à dà Ilimianɛ à ò kɛ yãi. Akũ Sirusu kpàkpaa kɛ̀ a bùsun pínki, gbasa à kɛ̃̀ takadan à pì: ² Yã kũ makũ Sirusu, Pɛsianↄ kína ma òon dí. Dikiri Luda Musude tò andunia kpata sĩnda pínki gↄ̃̀ ma pↄ́ ũ, akũ à ma ditɛ mà kpɛ́ boarɛ Yurusalɛmu, Yudanↄ bùsun. ³ Gbɛ̃ kũ à de a gbɛ̃ ũ á tɛ́, Luda gↄ̃ kú kãao à tá Yurusalɛmu, Yudanↄ bùsun, à kpɛ́ bo Dikiri Isarailanↄ Luda kũ à de Dikiri ũ Yurusalɛmunɛ gwe. ⁴ Ń gbɛ̃ kũ ò gↄ̃̀ↄ pìnↄ gbɛ̃dakenↄ kpáńyĩ kũ andurufuuo kũ wuraao kũ aruzɛkɛnↄ kũ pↄ́kãdenↄ kũ Luda kpɛ́ kũ òtɛn gɛ́ bo Yurusalɛmu gbanↄ.

⁵ Akũ Yudanↄ kũ Biliaminunↄ ↄmbedenↄ kũ sa’orinↄ kũ Levinↄ kũ gbɛ̃ kũ Luda tɛ́ kàńgunↄ fùtɛ, òtɛn gɛ́ Dikiri kpɛ́ bo Yurusalɛmu. ⁶ Ń gbɛ̃dakenↄ ↄ dàḿma ò ń gbá andurufu pↄ́nↄ kũ wura pↄ́nↄ kũ aruzɛkɛnↄ kũ pↄ́kãdenↄ kũ pↄ́ ↄgↄdenↄ kũ Dikiri kpɛ́ gbanↄ pínki. ⁷ Akũ Pɛsianↄ kína Sirusu bò kũ Dikiri kpɛ́ pↄ́ kũ Nɛbukanɛza sɛ̀tɛ yã zaa Yurusalɛmu à kàtɛ a tãna kpɛ́ gũnnↄo. ⁸ À pì a ↄgↄ’utɛri Mitirɛdanɛ à pↄ́ pìnↄ naro à kpá Yudanↄ kína Sesebazaa, akũ à kɛ̀ lɛ. ⁹ Pↄ́ pìnↄ dasi lɛ́n dí:

Wura ta baraakuri,

andurufu ta wàa sↄↄro,

tire baraakuri donsari,

¹⁰ wura toko baraakuri,

andurufu toko wàa pla kũ kuriio,

ta buri pãndenↄ wàa sↄↄro.

¹¹ Wura kũ andurufu tanↄ fùtɛ pínki mɛ̀n dúbu sↄↄro kpɛ́ wàa pla. Kũ zĩ̀zↄↄ pìnↄ bↄ̀tɛ Babilↄnu ò sù Yurusalɛmu, akũ Sesebaza sù kũ pↄ́ pìnↄ pínki.

Zĩ̀zↄ kũ ò sùnↄ

¹ Babilↄnu kína Nɛbukanɛza Isarailanↄ kũ̀kũ zĩ̀zↄ ũ à tà kũńwo Babilↄnu yã, akũ ń gbɛ̃kenↄ bò zĩ̀zↄkɛ pìn ò sù Yurusalɛmu, Yudanↄ bùsun sà, akũ ń baadi tà wɛ̃tɛa. ² Ń don’arɛdenↄn dí: Zɛrubabɛli, Yesua, Nɛɛmaya, Seraya, Relaya, Mↄdekai, Bilisã, Misipa, Bigivai, Reumu kũ Baanao. Isaraila gↄ̃gbɛ̃ kũ ò sùnↄ dasi lɛ́n dí.

³ Parↄsu burinↄ gbɛ̃nↄn dúbu pla kũ mɛ̀n basↄraakↄ̃ akuri awɛɛplao.

⁴ Sefatia burinↄ gbɛ̃nↄn wàa do kũ mɛ̀n basↄraakↄ̃ akuri awɛɛplao.

⁵ Ara burinↄ gbɛ̃nↄn wàa aakↄ̃ kũ mɛ̀n bakɛ̃ndo sↄↄrosario.

⁶ Pamↄabu buri kũ ò de Yesua kũ Yoabuo burinↄ ũnↄ gbɛ̃nↄn wàa gɛ̃ro donsari kũ kuri awɛɛplao.

⁷ Elamu burinↄ gbɛ̃nↄn wàa suddo kũ mɛ̀n bupla akuri awɛɛsiikↄ̃o.

⁸ Zatu burinↄ gbɛ̃nↄn wàa siikↄ̃ kũ mɛ̀n basuppla awɛɛsↄↄroo.

⁹ Zakai burinↄ gbɛ̃nↄn wàa aakↄ̃ kũ mɛ̀n basↄraakↄ̃o.

¹⁰ Bani burinↄ gbɛ̃nↄn wàa aakↄ̃ kũ mɛ̀n bupla awɛɛplao.

¹¹ Bebai burinↄ gbɛ̃nↄn wàa aakↄ̃ kũ mɛ̀n baro awɛɛ’aakↄ̃o.

¹² Azagada burinↄ gbɛ̃nↄn wàa suddo kũ mɛ̀n baro awɛɛplao.

¹³ Adonikamu burinↄ gbɛ̃nↄn wàa aakↄ̃ kũ mɛ̀n baaakↄ̃ awɛɛsuddoo.

¹⁴ Bigivai burinↄ gbɛ̃nↄn wàa kuri kũ mɛ̀n bupla akuri awɛɛsuddoo.

¹⁵ Adini burinↄ gbɛ̃nↄn wàa pla kũ mɛ̀n bupla akuri awɛɛsiikↄ̃o.

¹⁶ Ata burinↄ gbɛ̃nↄn basↄↄro plansari.

¹⁷ Bezai burinↄ gbɛ̃nↄn wàa do kũ mɛ̀n basuddo awɛɛ’aakↄ̃o.

¹⁸ Yora burinↄ gbɛ̃nↄn basↄↄro akuri awɛɛpla.

¹⁹ Asumu burinↄ gbɛ̃nↄn wàa do kũ mɛ̀n baro awɛɛ’aakↄ̃o.

²⁰ Giba burinↄ gbɛ̃nↄn basiikↄ̃ akuri awɛɛsↄↄro.

²¹ Bɛtilihamudenↄ gbɛ̃nↄn basuddo awɛɛ’aakↄ̃.

²² Nɛtofadenↄ gbɛ̃nↄn bupla akuri awɛɛsuddo.

²³ Anatodenↄ gbɛ̃nↄn basuddo akuri plansari.

²⁴ Azamavɛdenↄ gbɛ̃nↄn bupla awɛɛpla.

²⁵ Kiriayarimudenↄ kũ Kɛfiradenↄ kũ Berodenↄ gbɛ̃nↄn wàa aakↄ̃ kũ mɛ̀n basuppla awɛɛ’aakↄ̃o.

²⁶ Ramadenↄ kũ Gɛbadenↄ gbɛ̃nↄn wàa aakↄ̃ kũ mɛ̀n baro awɛɛdoo.

²⁷ Mikimasadenↄ gbɛ̃nↄn basuddo awɛɛpla.

²⁸ Bɛtɛlidenↄ kũ Aidenↄ gbɛ̃nↄn wàa do kũ mɛ̀n baro awɛɛ’aakↄ̃o.

²⁹ Nɛbodenↄ gbɛ̃nↄn bupla akuri awɛɛpla.

³⁰ Magbisidenↄ gbɛ̃nↄn basuppla akuri awɛɛsuddo.

³¹ Elamu pãnde burinↄ gbɛ̃nↄn wàa suddo kũ mɛ̀n bupla akuri awɛɛsiikↄ̃o.

³² Arimu burinↄ gbɛ̃nↄn wàa do kũ mɛ̀n basuddoo.

³³ Lodudenↄ kũ Adididenↄ kũ Onↄdenↄ gbɛ̃nↄn wàa aakↄ̃ kũ mɛ̀n basuddo awɛɛsↄↄroo.

³⁴ Yɛrikodenↄ gbɛ̃nↄn wàa do kũ mɛ̀n basuppla awɛɛsↄↄroo.

³⁵ Senadenↄ gbɛ̃nↄn wàa baro plansari kũ mɛ̀n baraakurio.

³⁶ Sa’ori buri kũ ò sùnↄn dí:

Yesua buri Yedaya burinↄ gbɛ̃nↄn wàa siikↄ̃ kũ mɛ̀n basↄraakↄ̃ akuri awɛɛ’aakↄ̃o.

³⁷ Ima burinↄ gbɛ̃nↄn wàa sↄↄro kũ mɛ̀n bupla akuri awɛɛplao.

³⁸ Pasu burinↄ gbɛ̃nↄn wàa suddo kũ mɛ̀n bupla awɛɛsupplao.

³⁹ Arimu burinↄ gbɛ̃nↄn wàa sↄↄro kũ mɛ̀n gɛ̃ro awɛɛplao.

⁴⁰ Levi kũ ò sùnↄn dí:

Odavia buri Yesua kũ Kadamiɛlio burinↄ gbɛ̃nↄn baaakↄ̃ akuri awɛɛsiikↄ̃o.

⁴¹ Asafa buri lɛ̀sirinↄ gbɛ̃nↄn basuddo akuri plansari.

⁴² Zɛ́dãkpãri kũ ò de Salumu kũ Atao kũ Talamↄo kũ Akubuo kũ Atitao kũ Sobaio buri ũnↄ gbɛ̃nↄn basuppla donsari.

⁴³ Gbɛ̃ dínↄ burinↄ mɛ́ ò Luda ↄn zĩkɛrinↄ ũ:

Zia, Asufa, Tabao,

⁴⁴ Kerosu, Sia, Padↄ̃,

⁴⁵ Lebana, Agaba, Akubu,

⁴⁶ Agabu, Salamai, Anana,

⁴⁷ Gidɛli, Gaa, Raya,

⁴⁸ Rezĩ, Nɛkoda, Gazamu,

⁴⁹ Uza, Pasea, Besai,

⁵⁰ Asana, Mɛunimu, Nɛfusimu,

⁵¹ Bakabuku, Akufa, Aru,

⁵² Bazalu, Mɛida, Asa,

⁵³ Bakosi, Sisera, Tema,

⁵⁴ Nɛzia kũ Atifao.

⁵⁵ Sulemanu zↄ̀bleri dínↄ burinↄ mɛ́ ò bò zĩ̀zↄkɛn ò sù:

Sotai, Asofɛrɛ, Peruda,

⁵⁶ Yala, Daakↄ̃, Gidɛli,

⁵⁷ Sefatia, Atili, Pↄkɛrɛ Azebaimu kũ Amio.

⁵⁸ Luda ↄn zĩkɛrii pìnↄ kũ Sulemanu zↄ̀blerii buri pìnↄ kà gbɛ̃nↄn wàa do kũ mɛ̀n bakɛ̃ndo akuri awɛɛplao.

⁵⁹ Gbɛ̃kenↄ bò Tɛlɛmɛla kũ Tɛlasao kũ Kɛrubuo kũ Adↄ̃o kũ Imao, akũ odi le ò ń buri bozirɛ òńnɛ kũ Isarailanↄmɛ ń ũro. ⁶⁰ Delaya kũ Tobiao kũ Nɛkodao burinↄmɛ, ò kà gbɛ̃nↄn wàa aakↄ̃ kũ mɛ̀n bupla akuri awɛɛplao. ⁶¹ Sa’ori buri kũ ò de Obaya kũ Akozuo kũ Bazilaio burinↄ ũ sù dↄ. Bazilai pì Giliada bùsu gbɛ̃ Bazilai nɛ́ sɛ̀ yã, akũ à a anzure pì tↄ́ sɛ̀. ⁶² Gbɛ̃ pìnↄ ń tↄ́ wɛ̀tɛ buri bozirɛ takadan, ama odi boaro, akũ ò gìńnɛ kũ sa’orikɛo. ⁶³ Bùsu don’arɛde pìńnɛ, tó adi kɛ sa’ori ń yã gwà kũ Urimuo kũ Tumimuo baasiro, òsun sa’opↄ blero.

⁶⁴ Gbɛ̃ pìnↄ ń pínki gbɛ̃nↄn dúbu bupla awɛɛpla kpɛ́ wàa do kũ basↄraakↄ̃omɛ. ⁶⁵ Ń zↄ̀bleri gↄ̃gbɛ̃nↄ kũ nↄgbɛ̃nↄ kun dↄ gbɛ̃nↄn dúbu suppla kpɛ́ wàa do kũ basuddo akuri awɛɛsupplao. Lɛ̀sirinↄ gↄ̃gbɛ̃ kũ nↄgbɛ̃o kú kũńwo dↄ gbɛ̃nↄn wàa do. ⁶⁶ Ò sↄ̃ vĩ mɛ̀n wàa aakↄ̃ kũ mɛ̀n basuddo akuri awɛɛsuddoo, baragbãsↄ̃ wàa do kũ mɛ̀n bupla awɛɛsↄↄroo, ⁶⁷ lakumi wàa pla kũ mɛ̀n baraakuri awɛɛsↄↄroo, zaaki dúbu suddo kpɛ́ wàa aakↄ̃ kũ basuddo.

⁶⁸ Kũ ò kà Dikiri kpɛ́ bokia Yurusalɛmu, ń ↄmbedenↄ gba dà, de ò le ò Luda kpɛ́ kɛkɛ ò boo a gbɛ̀n. ⁶⁹ Ò gba dà kpɛ́ zĩ ↄgↄditɛki gũn ń gbãna lɛ́n, wura kiloo wàa pla kpɛ́ basↄↄro, andurufu tↄn aakↄ̃ kũ sa’ori gyabanↄ basↄↄro. ⁷⁰ Sa’orinↄ kũ Levinↄ kũ lɛ̀sirinↄ kũ zɛ́dãkpãrinↄ kũ Luda ↄn zĩkɛrinↄ kũ gbɛ̃ kpara kenↄ vùtɛvutɛ lakutu kũ ò kɛ̀kɛńnɛnↄ gũn, akũ Isaraila kparanↄ vùtɛ ń wɛ̃tɛnↄ gũn.

Dikiri gbagbaki bonaa

¹ Kũ wɛ̃̀ mↄ supplade kà, Isarailanↄn vutɛna ń wɛ̃tɛnↄ gũn, akũ ò kↄ̃ kàkara Yurusalɛmu gbɛ̃ dokↄ̃nↄnↄ ũ. ² Yozadaka nɛ́ Yesua kũ a sa’ori dakenↄ kũ Sealatiɛli nɛ́ Zɛrubabɛlio kũ a gbɛ̃nↄ Isarailanↄ Luda gbagbaki bò, de ò sa’opↄ kũ òdi ká tɛ́n à tɛ́ kũ oa lákũ Luda gbɛ̃ Musa ò a doka gũn nà. ³ Bee kũ òtɛn vĩna kɛ gbɛ̃ kũ ò kú bùsuu pìi gũnnↄnɛ, ò gbagbaki pìi bò a gbɛ̀n, akũ ò sa’opↄ kũ òdi ká tɛ́n à tɛ́ kũ ò Dikiria kↄnkↄ kũ ↄkↄsio. ⁴ Ò Kutadↄna dikpɛ kɛ̀ lákũ à kú takada gũn nà, òdigↄ̃ sa’opↄ kũ òdi ká tɛ́n à tɛ́ kũ o lákũ gu dìgↄ̃ dↄ nà lákũ ò a lɛ́ dìtɛ nà. ⁵ Abire gbɛra ò sa’opↄ kũ òdigↄ̃ ká tɛ́n à tɛ́ kũ gↄrↄ sĩnda pínki ò kũ mↄ dufu pↄ́o kũ dikpɛ kũ Dikiri dìtɛnↄ pↄ́o kũ gba kũ òdi suonɛnↄ. ⁶ Mↄ supplade gↄrↄ káaku zĩn ò nà Dikiri gbagbanaa lɛ, bee kũ odi a kpɛ́ bo kↄ̀ro.

⁷ Ò ↄgↄ kpà gbɛ̀’arinↄ kũ lí’arinↄa, akũ ò pↄ́ble kũ pↄ́minaao kũ nísio kpà Sidↄ̃denↄ kũ Tayadenↄa, de ò sida lí zↄ̃zↄ̃ Lɛbana bùsun ò yĩyĩ ò gɛ́o ari Yↄpa funa ísirala, lákũ Pɛsianↄ kína Sirusu ń gbá zɛ́ nà. ⁸ Ń kana Luda kpɛ́ bokia Yurusalɛmu wɛ̃̀ plade mↄ plade gũn, Sealatiɛli nɛ́ Zɛrubabɛli kũ Yozadaka nɛ́ Yesuao nà zĩa kũ ń gbɛ̃ kparanↄ, sa’orinↄ kũ Levinↄ kũ gbɛ̃ kũ ò bò zĩ̀zↄkɛn ò sù Yurusalɛmunↄ ń pínki. Ò Levi kũ ò kà wɛ̃̀ baro ke kũ ò dealanↄ dìtɛ Dikiri kpɛ́ zĩ pì gbɛ̃ zↄ̃kↄ̃nↄ ũ. ⁹ Yesua kũ a burinↄ nàkↄ̃a kũ Kadamiɛlio kũ a nɛ́ Odavia burinↄ, akũ ò gↄ̃̀ zĩ pì gbɛ̃ zↄ̃kↄ̃nↄ ũ kũ Enadadao kũ a burinↄ. Levinↄmɛ ń pínki. ¹⁰ Kũ Dikiri kpɛ́borinↄ tɛn kpɛ́ pì ɛ̃ pɛ́tɛ, sa’orinↄn zɛzɛ gwe sa’ori pↄ́kasanↄ dadana, ò ń kãkãkinↄ kũkũna, akũsↄ̃ Levi nɛ́ Asafa burinↄn kú gwe dↄ kũ sɛ̃̀gɛ̃nↄ de ò Dikiri táaki lɛ́o lákũ Isarailanↄ kína Dauda dìtɛ yã nà. ¹¹ Ò lɛ̀ sì ò Dikiri táaki lɛ̀ ò a sáabu kpà ò pì:

Dikiri mana,

a gbɛ̃kɛ kɛna ókↄ̃nↄ Isarailanↄnɛ lakana vĩro.

Akũ gbɛ̃ sĩnda pínki wiki gbãna lɛ̀ ò Dikiri táaki lɛ̀, kũ ò Dikiri kpɛ́ ɛ̃ pɛ̀tɛ yãi. ¹² Ama sa’ori paride kũ Levinↄ kũ bede kũ ò zĩ kũ̀ ò wɛ́ sì kpɛ́ káakulɛnↄ, kũ ò kpɛ́ pì ɛ̃bonaa è, ò wɛ̃nda ↄ́ↄ dↄ̀. Gbɛ̃ kparanↄ sↄ̃, òtɛn pↄnna wiki lɛ́ dasi. ¹³ Gbɛ̃ke dí pↄnna wiki dↄ̃kↄ̃nɛ kũ wɛ̃nda ↄ́ kũ òtɛn dↄo doro, kũ baadi tɛn wiki gbãna lɛ́ yãi, akũsↄ̃ ò wiki pìi mà zã̀.

Ibɛrɛsɛna kũ Dikiri kpɛ́borinↄ

¹ Kũ Yudanↄ kũ Biliaminunↄ ibɛrɛnↄ mà zĩ̀zↄ kũ ò sùnↄ tɛn kpɛ́ bo Dikiri Isarailanↄ Ludanɛ, ² ò sù ò Zɛrubabɛli kũ ↄmbedenↄ lè ò pìńnɛ: À tó ò kpɛ́ bo kãáo, zaakũ odì á Luda ki wɛtɛ lán á bàmɛ se. Odìgↄ̃ a gbagbamɛ zaa gↄrↄ kũ Asirianↄ kína Esaradↄ̃ sù kũoo la. ³ Akũ Zɛrubabɛli kũ Yesuao kũ Isaraila bede kparanↄ pìńnɛ: Ó Luda kpɛ́bona de á yã ũro. Óni ó pↄ́ bo Dikiri Isarailanↄ Ludanɛ ó tɛ̃nɛ lákũ Pɛsianↄ kína Sirusu dìtɛwɛrɛ nà. ⁴ Akũ bùsupidenↄ tɛn wɛtɛ ò Yudanↄ nɛ̀sɛɛ yaka, òtɛn wɛ́ tãḿma de òsun kpɛ́ pì boro yãi. ⁵ Ò fĩna bò kína lɛ́dammarinↄnɛ zaa Sirusu gↄrↄ ari à gɛ̀ɛ pɛ́ Pɛsianↄ kína Dariusu kíblegↄrↄa, akũ ò gìńnɛ kũ yã kũ òtɛn pɛ́aao.

⁶ Ò takada kɛ̃̀ Asuerunɛ kũ à kí blè gↄ̃nↄ ò gbɛ̃ kũ ò kú Yurusalɛmunↄ kũ Yudanↄ bùsuuo pínki káara kɛ̀ a kia. ⁷ Bisilamu kũ Mitirɛdao kũ Tabɛlio kũ ń gbɛ̃ kparanↄ takada kɛ̃̀ Pɛsianↄ kína Atasɛsɛnɛ dↄ a kíblegↄrↄa. Ò kɛ̃̀nɛ kũ Siria yão, akũ ò bↄ̀kↄtɛnɛ. ⁸ Bùsu gbɛ̃ zↄ̃kↄ̃ Reumu kũ a takadakɛ̃ri Simisaio takada kɛ̃̀ kína Atasɛsɛnɛ Yurusalɛmu yã musu dↄ ò pì: ⁹ Bùsu gbɛ̃ zↄ̃kↄ̃ Reumu kũ a takadakɛ̃ri Simisaio kũ ń gbɛ̃ kpara yãkpatɛkɛrinↄ kũ gbãnadenↄ kũ Tiripↄlidenↄ kũ Pɛsianↄ kũ Ɛrɛkidenↄ kũ Babilↄnudenↄ kũ Susade kũ ò bↄ̀tɛ Elamu bùsuu gũnnↄ ¹⁰ kũ gbɛ̃ kũ kína zↄ̃kↄ̃ bɛ̀ɛrɛde Asubanipali ń bↄ́tɛ ń bùsun à ń vútɛvutɛ Samaria wɛ̃tɛn kũ Yuflati bara la gu pãndenↄ, ¹¹ ókↄ̃nↄ Yuflati baraladenↄ n zↄ̀blerinↄ mɛ́ o takada dí kɛ̃̀nnɛ kína Atasɛsɛ, o pì:

¹² Kína, ǹgↄ̃ dↄ̃ kũ Yuda kũ ò bò n kĩnaa ò sù lanↄ gɛ̀ɛ òtɛn Yurusalɛmu wɛ̃tɛ vãni pãsĩ pì kátɛ, ò ɛ̀ra òtɛni a bĩni bo dↄ, òtɛni a bɛzĩ futɛ. ¹³ Kína, ǹgↄ̃ dↄ̃ dↄ, tó ò ɛ̀ra ò wɛ̃tɛ pìi kàtɛ ò a bĩni bò ò làka, oni táfe bonnɛ doro ke ɛtɛ’ↄgↄ ke bɛ’ↄgↄ, n ↄgↄ kũ ndì sí ni lago. ¹⁴ Tera lán dí bà kína, lákũ n bɛ wisin odì ble nà, adi kũ ò n kpɛ ero. A yã mɛ́ à tò o takada díkĩna kpã̀zãnnɛ de ò yã pì onnɛ. ¹⁵ Ǹ wɛtɛ n dizinↄ takadanↄ gũn ǹ gwa, ĩni dↄ̃ dera wɛ̃tɛpidenↄ sã gbãna, ò wari dↄ̀ kínanↄa kũ bùsu gbãnadenↄ. Zaa zĩ wɛ̃tɛpidenↄ yãkete kɛ̀ zↄ̃kↄ̃. Abire yãin ò wɛ̃tɛ pìi gbòro. ¹⁶ Kína, ótɛn onnɛ, tó ò ɛ̀ra ò wɛ̃tɛ pìi fùtɛ ò ɛ̀ra ò a bĩni bò ò làka, ĩnigↄ̃ pↄ́ke vĩ Yuflati bara la doro.

¹⁷ Abire gbɛra kína takada kpã̀zãńnɛ à pì: Bùsu gbɛ̃ zↄ̃kↄ̃ Reumu kũ a takadakɛ̃ri Simisaio kũ á gbɛ̃ kpara kũ ò kú Samaria kũ Yuflati bara direnↄ, ma fↄ kpàáwa. ¹⁸ Takada kũ a kpã̀zãmɛnɛ, ò a kyó kɛ̀ ò bↄ̀kↄtɛmɛnɛ. ¹⁹ Ma pì ò wɛtɛ takada zĩnↄ gũn, akũ ò lè yãpuramɛ, wɛ̃tɛpidenↄ dìgↄ̃ bo kínanↄ kpɛmɛ. Zaa zĩ yãketedenↄmɛ. ²⁰ Kína zↄ̃kↄ̃nↄ kpata blè Yurusalɛmu gwe, ò gbãna blè Yuflati baradiredenↄa ń pínki, akũ ò táfe bòńnɛ kũ ɛtɛ’ↄgↄo kũ bɛ’ↄgↄo. ²¹ À yã ditɛ gbɛ̃ pìnↄnɛ ò kámma bo sà. Òsun ɛra ò wɛ̃tɛ pì futɛro ari mà ń gba lɛ́. ²² À laakari kɛ! Àsun nigãzĩ kpá yã pìiaro, de yã vãni pì sún ↄ tá à ó ásaru kɛro yãi.

²³ Kũ ò kína Atasɛsɛ takada pì kyó kɛ̀ ò bↄ̀kↄtɛ Reumunɛ kũ a takadakɛ̃ri Simisaio kũ ń gbɛ̃ kparanↄ, akũ ò fùtɛ ò gɛ̀ɛ ò Yudanↄ lè Yurusalɛmu gↄ̃̀nↄ. Ò gìńnɛ pãsĩpãsĩ ò pì ò kámma bo. ²⁴ Lɛn ò kámma bò lɛ kũ Luda kpɛ́ zĩ kũ òtɛn kɛ Yurusalɛmuo ari Pɛsianↄ kína Dariusu kíblena wɛ̃̀ plade gũn.

Tatenai takadakɛ̃na kína Dariusunɛ

¹ Annabi Agai kũ annabi Zakari, Ido nɛ́o annabikɛyã ò Yuda kũ ò kú Yurusalɛmunↄ kũ Yudanↄ bùsuuo kũ Isarailanↄ Luda tↄ́o. ² Akũ Sealatiɛli nɛ́ Zɛrubabɛli kũ Yozadaka nɛ́ Yesuao fùtɛ ò nà Luda kpɛ́ bonaaa Yurusalɛmu. Luda annabii pìnↄn kú kũńwo òtɛn kpáńyĩ. ³ Gwe gↄ̃̀nↄ Yuflati bara la don’arɛde Tatenai kũ Seta Bozɛnaio kũ ń gbɛ̃nↄ sù ò ń lé ò ń lá ò pì: Dí mɛ́ à á gbá zɛ́ à kpɛ́ dí kɛkɛ à boo? ⁴ Ò gbɛ̃ kũ òtɛn kpɛ́ pì bonↄ tↄ́ gbɛ̀ka dↄ. ⁵ Ama Luda wɛ́ tɛ́ Yuda gbɛ̃ zↄ̃kↄ̃ↄ pìnↄi, akũ odi ońnɛ ò kámma boro. Ò pì oni lɛ́gbãzã kɛ Dariusunɛ gĩa, oni takada kũ ani kɛ̃ a yã musu le. ⁶ Yuflati bara la don’arɛde Tatenai kũ Seta Bozɛnaio kũ ń gbɛ̃ Pɛsianↄ takada kɛ̃̀, akũ ò kpã̀zã kína Dariusunɛ. ⁷ Lɛ́gbãzã kũ ò kɛ̀nɛɛn dí, ò pì:

Kína Dariusu, o fↄ kpàmma manamana. ⁸ Kína, ǹgↄ̃ dↄ̃ kũ o gɛ Yudanↄ bùsun ari Luda kũ à zↄ̃kↄ̃ kpɛ́n. Òtɛn kpɛ́ pì bo kũ gbɛ̀ gbɛ̃̀ntɛ̃nↄ òtɛn lí lɛ̀kɛtɛ kpátɛ kpɛ́ pìi gbĩ̀nↄn. Òtɛn zĩ pì kɛ kũ laakariio àtɛn táa o. ⁹ O yã làla ń gbɛ̃ zↄ̃kↄ̃nↄa o pì: Dí mɛ́ à á gbá zɛ́ à kpɛ́ díkĩna kɛkɛ à boo? ¹⁰ O ń tↄ́ gbɛ̀ka de ò le ò onnɛ, akũ o ń don’arɛde pìnↄ tↄ́ dà takadan. ¹¹ Lákũ ò yã wèwá nàn dí. Ò pì, musu kũ zĩtɛo Luda zↄ̀blerinↄmɛ ń ũ. Kpɛ́ kũ ò bò yã à wɛ̃̀ɛ kɛ̀ ò kɛ̀kɛ òtɛn bo dↄ. Isarailanↄ kína zↄ̃kↄ̃ mɛ́ à bò yã. ¹² Ò pì ń dizinↄ Luda Musude pↄ fɛ̃̀, akũ à ń ná Kaladia buri Nɛbukanɛza, Babilↄnu kínanɛ a ↄĩ, akũ à kpɛ́ pìi wìwi à gbɛ̃ pìnↄ sɛ̀tɛ à tà kũńwo Babilↄnu. ¹³ Ama Babilↄnu kína Sirusu kíblena wɛ̃̀ káaku gũn à yã dìtɛ à pì ò ɛra ò Luda kpɛ́ pì bo dↄ. ¹⁴ Bee wura kũ andurufu pↄ́ kũ Nɛbukanɛza sɛ̀tɛ Luda kpɛ́n zaa Yurusalɛmu à kàtɛ a tãna kpɛ́n Babilↄnunↄ, kína Sirusu bↄ̀tɛ à kpà Sesebaza kũ à dìtɛ bùsu don’arɛde ũa. ¹⁵ À pìnɛ à pↄ́ pìnↄ sɛ́ à gɛ́ à kátɛ Luda kpɛ́n zaa Yurusalɛmu, tó ò kpɛ́ pìi kɛ̀kɛ ò bò. ¹⁶ Akũ Sesebaza sù Luda kpɛ́ ɛ̃ pɛ̀tɛ. Òtɛn kpɛ́ pì bo zaa gↄrↄ kũ̀a ari kũ a gbãrao, ama adi láka kↄ̀ro. ¹⁷ Kína, tó à kɛ̀nnɛ mana, ǹ takada wɛtɛ kínanↄ takadakatɛkia zaa Babilↄnu ǹ gwa tó kína Sirusu yã dìtɛ ò Luda kpɛ́ bo Yurusalɛmu. Lákũ n è nà, ǹ lɛ́gbãzã kɛwɛrɛ.

Dariusu yãditɛna Luda kpɛ́ bona yã musu

¹ Kína Dariusu yã dìtɛ, akũ ò takada pìi wɛ̀tɛ takada kũ ò kàtɛ Babilↄnu takadakatɛkianↄ tɛ́. ² Akũ ò bò takada kokonaaa Ɛkɛbatana wɛ̃tɛ bĩniden Midiã bùsun. Yã díkĩna kú a gũn de òsun sãsãiro yãi:

³ Kína Sirusu kíblena wɛ̃̀ káaku gũn à yã dìtɛ Luda kpɛ́ kũ à kú Yurusalɛmu musu, à pì ò kpɛ́ pì bo sa’oki ũ. Ò a ɛ̃ kpátɛ, kpɛ́ pì lei ká gã̀sãkuru baaakↄ̃, a yàasa gã̀sãkuru baaakↄ̃. ⁴ Ò gbɛ̀ gbɛ̃̀ntɛ̃ mɛ̀n aakↄ̃ didikↄ̃a, lí lɛ̀kɛtɛ mɛ̀n do, gbɛ̀ gbɛ̃̀ntɛ̃ aakↄ̃, lí lɛ̀kɛtɛ mɛ̀n do. Oni a fĩna bo kũ kínabɛ ↄgↄo. ⁵ Wura kũ andurufu pↄ́ kũ Nɛbukanɛza sɛ̀tɛ Luda kpɛ́n Yurusalɛmu à sùo Babilↄnunↄ sↄ̃, oni ɛra ò gɛ́ kátɛ a gbɛ̀n Luda kpɛ́n Yurusalɛmu.

⁶ Akũ kína Dariusu lɛ́gbãzã kɛ̀ à pì: Tera sà Yuflati bara dire gbɛ̃ zↄ̃kↄ̃ Tatenai kũ Seta Bozɛnaio kũ á gbɛ̃ kũ ò kú Yuflati bara gwenↄ, à á zĩda gá gwe. ⁷ À Luda kpɛ́ bòrinↄ tó tɛɛnɛ. À tó Yuda don’arɛdenↄ kũ ń gbɛ̃ zↄ̃kↄ̃nↄ Luda kpɛ́ pì kɛkɛ ò bo. ⁸ Matɛn yã kũ àsun kɛ Yuda gbɛ̃ zↄ̃kↄ̃nↄnɛ Luda kpɛ́ pì bonaa musu ditɛárɛ. À pↄ́ kũ ò yeinↄ sɛ́tɛ ma aruzɛkɛkatɛkin gwe kũ Yuflati bara dire táfe kũ ò bòo, à kpáḿma pínki de zĩ pì sún zɛ doro yãi. ⁹ Pↄ́ kũ ò yei pínki, zùsaa, sãkaroo, sãnɛ bↄ̀rↄ kũ òdi Luda Musude gbagbaoo, pↄ́blewɛ, wisi, sèwɛ̃, nísi, àgↄ̃ kpá Yurusalɛmu sa’orinↄa lákũ gu dìgↄ̃ dↄ nà lákũ ò gbɛ̀ka nà funaa sari, ¹⁰ de ò le ò sa kũ à kà Luda Musudegu oa, ò wɛ́ kɛamɛnɛ kũ ma nɛ́gↄ̃gbɛ̃nↄ. ¹¹ Tó gbɛ̃ke yã kũ ma dìtɛ díkĩna lìtɛ, oni ade kpɛ́ lí wo ò a páa ò pɛ́tɛ ò a bɛ kɛ tubura ũ. ¹² Tó kína ke buri ke tɛn wɛtɛ yã pì litɛ ke àtɛn wɛtɛ Luda kpɛ́ kũ à kú Yurusalɛmu pì wí, Luda kũ à tò a tↄ́ kúaa pì a kakatɛ. Makũ Dariusu makũ mɛ́ ma yã pìi dìtɛ. Ò zĩ kɛa manamana.

Luda kpɛ́ sakɛnaa

¹³ Kũ kína Dariusu lɛ́gbãzã pìi kɛ̀ lɛ, Yuflati bara la gbɛ̃ zↄ̃kↄ̃ Tatenai kũ Seta Bozɛnaio kũ ń gbɛ̃nↄ yã pìi kɛ̀ kũ laakariio. ¹⁴ Akũ Yuda gbɛ̃ zↄ̃kↄ̃nↄ kpɛ́bona tɛn gɛ́ arɛ lákũ annabi Agai kũ annabi Zakari Ido nɛ́o annabikɛyã ò nà. Ò kpɛ́ pìi bò ò làka lákũ Isarailanↄ Luda ò nà, lákũ Pɛsianↄ kínanↄ Sirusu kũ Dariusuo kũ Atasɛsɛo a yã dìtɛ nà. ¹⁵ Ò Luda kpɛ́ làka Ada gↄrↄ aakↄ̃de zĩ kína Dariusu kíblena wɛ̃̀ suddode gũn. ¹⁶ Akũ Isarailanↄ Luda kpɛ́ sa kɛ̀ kũ pↄnnao, sa’orinↄ kũ Levinↄ kũ gbɛ̃ kpara kũ ò sù kũ zĩ̀zↄkɛonↄ ń pínki. ¹⁷ Luda kpɛ́ sakɛnaa pì yãi ò sa ò kũ zùsanↄ mɛ̀n basↄↄro kũ sãkaronↄ mɛ̀n wàa do kũ sãnɛ bↄ̀rↄnↄ mɛ̀n wàa pla, akũ ò sa ò kũ blèkofĩninↄ mɛ̀n kuri awɛɛpla Isaraila dasi lɛ́n ń pínki durunna kútɛkɛbↄ ũ.

¹⁸ Ò sa’orinↄ dìtɛditɛ gã̀ kũ gã̀ao, akũ ò Levinↄ dìtɛditɛ gã̀ kũ gã̀ao dↄ de ò zĩ kɛ Ludanɛ Yurusalɛmu lákũ à kú Musa takada gũn nà. ¹⁹ Mↄ káaku gↄrↄ kuri awɛɛsiikↄ̃de zĩ, zĩ̀zↄ kũ ò sùu pìnↄ Vĩnla dikpɛ kɛ̀. ²⁰ Sa’orinↄ kũ Levinↄ gbã̀ bò ń zĩdanɛ ò gↄ̃̀ gbãsĩ sari ń pínki, akũ ò Vĩnla sã kùtu kpàkpa zĩ̀zↄ kũ ò sùnↄnɛ kũ ń sa’ori dakenↄ pↄ́o kũ ń zĩda pↄ́o. ²¹ Isaraila zĩ̀zↄ kũ ò sùu pìnↄ mɛ́ ò sò kũ gbɛ̃ kũ ò ń zĩda kɛ̃̀ buri pãndenↄ yãbɛ̃̀nɛkɛnanↄa òtɛn Dikiri Isarailanↄ Luda ki wɛtɛnↄ. ²² Akũ ò Burodi Futɛnasari dikpɛ kɛ̀ kũ pↄnnao ari gↄrↄ suppla. Dikiri tò ń pↄ kɛ̀ nna, zaakũ à tò Asirianↄ kína nɛ̀sɛɛ lìtɛ ń yã musu, akũ à kpàńyĩ a kpɛ́ bona zĩ gũn, Isarailanↄ Luda pìi.

Ɛzɛra su à Yurusalɛmu sorukɛnaa

¹ Yã birenↄ gbɛra Pɛsianↄ kína Atasɛsɛ kíblegↄrↄa Ɛzɛra bò Babilↄnu à sù. Sa’oriki zↄ̃kↄ̃ Haruna mɛ́ à Ɛlɛaza ì, Ɛlɛaza Finɛasi ì, Finɛasi Abisua ì, Abisua Buki ì, Buki Uzi ì, Uzi Zeraya ì, Zeraya Mɛrayo ì, Mɛrayo Azaria ì, Azaria Amaria ì, Amaria Aitubu ì, Aitubu Zadↄki ì, Zadↄki Salumu ì, Salumu Ilikia ì, Ilikia Azaria ì, Azaria Seraya ì, akũ Seraya Ɛzɛra pìi ì. ⁶ Ɛzɛra bi yãdannɛriimɛ, à Musa doka kũ Dikiri Isarailanↄ Luda dìtɛ dↄ̃ sãnsãn. Lákũ Dikiri a Luda ↄ kúa nà, kína pↄ́ kũ à wɛ́ kɛ̀aa kpàa pínki. ⁷ Kína Atasɛsɛ kíblena wɛ̃̀ supplade gũn Isaraila kenↄ sù Yurusalɛmu dↄ. Sa’orinↄn kú ń tɛ́ kũ Levinↄ kũ lɛ̀sirinↄ kũ zɛ́dãkpãrinↄ kũ Luda ↄn zĩkɛrinↄ. ⁸ Ɛzɛra kà Yurusalɛmu kína kíblena wɛ̃̀ supplade mↄ sↄↄrode gũn. ⁹ À fùtɛ Babilↄnu mↄ káaku gↄrↄ káaku zĩ, akũ à kà Yurusalɛmu mↄ sↄↄro gↄrↄ káaku zĩ. A Luda ↄ kúa, ¹⁰ zaakũ Ɛzɛra mɛ̀ɛ kpà Dikiri doka wàaripanaaa kũ a kɛnaao, de à le à a yãditɛnanↄ kũ a dokayãnↄ dada Isarailanↄnɛ.

Takada kũ kína Atasɛsɛ kpà Ɛzɛraa

¹¹ Takada kũ kína Atasɛsɛ kpà sa’ori Ɛzɛraa yãn dí, kũ àdi Dikiri yãditɛnanↄ kũ a dokayãnↄ da Isarailanↄnɛ. ¹² Atasɛsɛ, kínanↄ kína mɛ́ à takada díkĩna kɛ̃̀ Luda Musude dokadannɛri sa’ori Ɛzɛranɛ. Ma fↄ kpàmma. ¹³ Ma yã dìtɛ ma pì Isaraila ke sa’ori ke Levi kũ à kú ma bùsun kũ à ye à gɛ́ kũnwo Yurusalɛmu à gɛ́. ¹⁴ Makũ kũ ma ìba gbɛ̃nↄn supplanↄ mɛ́ o n gbarɛ de ǹ gɛ́ Yurusalɛmu kũ Yudanↄ bùsuuo pínki yã gwagwa n Luda doka kũ ń kũna musu. ¹⁵ Ǹ andurufu kũ wura kũ makũ kũ ma ìbanↄ o Isarailanↄ Luda kũ a bɛ kú Yurusalɛmu gbà sɛ́tɛ ǹ gɛ́o ¹⁶ kũ andurufuuo kũ wura kũ n lè Babilↄnu bùsunwo pínki kũ pↄ́ kũ gbɛ̃nↄ kũ sa’orinↄ kpà ń Luda kpɛ́ pↄ́ ũ Yurusalɛmuo. ¹⁷ Ǹ zùsanↄ kũ sãkaronↄ kũ sãnɛ bↄ̀rↄnↄ lúlu kũ ↄgↄ pìio n laakariia ǹ sa’opↄ kũ òdi ká tɛ́n à tɛ́ kũ o n Luda kpɛ́ gbagbakia Yurusalɛmu kũ flawa gbao kũ pↄ́mina gbao. ¹⁸ Mↄkↄ̃n kũ n gbɛ̃nↄ à kɛ kũ andurufuuo kũ wura kũ à gↄ̃̀ↄo lákũ à kɛ̀árɛ mana nà, lákũ á Luda yei nà. ¹⁹ Ǹ pↄ́ kũ ò nànnɛ n ↄĩ n Luda kpɛ́ donyĩkɛbↄ ũnↄ kpá Luda kũ à kú Yurusalɛmu pìia. ²⁰ Tó ń ye Luda kpɛ́ pↄ́ kparanↄi, tó a kɛkɛnaa gↄ̃̀ n yã ũmɛ, ǹ sɛ́ ma laasin gwe. ²¹ Makũ kína Atasɛsɛ, ma yã dìtɛ Yuflati bara dire ↄgↄ’utɛrinↄnɛ ń pínki. À wɛ́kɛ kũ Luda Musude dokadannɛri sa’ori Ɛzɛra kɛ̀áwa kpáa gↄ̃̀nↄ pínki. ²² Andurufu sún de tↄn aakↄ̃laro. Pↄ́blewɛ sún de tↄn baraakurilaro. Sèwɛ̃ kũ nísio sún de lita wàa basↄsↄↄrolaro. Wisi sↄ̃, lákũ à yei nà lɛ́n. ²³ Lákũ Luda Musude dìtɛ pínki nà, à kpá gↄ̃̀nↄ a kpɛ́ pↄ́ ũ, de àsun pɛ̃tɛ̃ kɛ kũ ma kíkɛo ke kũ ma nɛ́nↄoro. ²⁴ Àgↄ̃ dↄ̃ sↄ̃ kũ á zɛ́ vĩ à táfe ke ɛtɛ’ↄgↄ ke bɛ’ↄgↄ sí Luda ↄnn pì zĩkɛrinↄaro ke sa’orinↄ ke Levinↄ ke lɛ̀sirinↄ ke zɛ́dãkpãrinↄ ke zĩkɛri pãndenↄ.

²⁵ Mↄkↄ̃n sↄ̃ Ɛzɛra, ǹ yãkpatɛkɛrinↄ kũ yãgↄ̃gↄ̃rinↄ ditɛditɛ ↄ̃ndↄ̃ kũ n Luda kpàmma lɛ́n, de ògↄ̃ yã kɛkɛ a zɛ́a gbɛ̃ kũ ò kú Yuflati bara direnↄnɛ ń pínki. Onigↄ̃ de gbɛ̃ kũ ò n Luda doka dↄ̃nↄ ũ. Gbɛ̃ kũ ò dↄ̃ronↄ sↄ̃, ǹ dadańnɛ. ²⁶ Gbɛ̃ kũ n Luda doka kũ bùsu dokao kũna ↄplaplaro, oni yã daala, a dɛnaa ke a bona bùsun ke a aruzɛkɛ sinaa ke a dana kpɛ́sirann yá.

²⁷ Akũ Ɛzɛra pì: Ò Dikiri ó dizinↄ Luda sáabu kpá! À laasun mana dà kínanɛ a swɛ̃̀n, akũ kína pì gbãna kpà a kpɛ́ kũ à kú Yurusalɛmua lɛ. ²⁸ À tò ma yã kà kína kũ a ìbanↄgu kũ a kína gbãnade dakenↄ ń pínki. Lákũ Dikiri ma Luda ↄ kúma nà, ma kùu kɛ̀ gbãna, akũ ma Isaraila don’arɛdenↄ kàkara ò gɛ́ kũmao.