ƐFESUDENƆ

ƐFESUDENƆ

Gbɛ̃kɛ kũ Luda kɛ̀wɛrɛ Kirisi gũn

¹ Makũ Pↄlu, Kirisi Yesu zĩ̀rii Luda pↄyenyĩnaa gũn, makũ mɛ́ ma takada dí kɛ̃̀ Luda gbɛ̃ kũ òtɛn Kirisi Yesu náani kɛ zaa Ɛfesunↄnɛ. ² Ó De Luda kũ Dikiri Yesu Kirisio gbɛ̃kɛ kɛárɛ, à á gba aafiaa.

³ Ò Luda ó Dikiri Yesu Kirisi De sáabu kpá! Ó kunna Kirisi gũn Luda a Nini arubarika sĩnda pínki dàógu zaa musu. ⁴ À ó sɛ́ a gũn andunia katɛna ã, de ó kunna gↄ̃ denɛ adona mamberu sari. Yenyĩ gũn ⁵ à gĩnakɛ à ó dítɛ a nɛ́nↄ ũ Yesu Kirisi gãi, lákũ àtɛn wɛtɛ a pↄyenyĩnaa gũn nà, ⁶ de à tↄ́ bo a gbɛ̃kɛ gakuride kũ à kɛ̀wɛrɛ a Nɛ́ yenyĩde gũn yãi. ⁷ A gũn à ó bó kũ a aruo. À ó taarinↄ kɛ̃̀wá a gbɛ̃kɛ zↄ̃kↄ̃ ⁸ kũ à kɛ̀wɛrɛ à gɛ̃̀ ↄla yãi. Ɔ̃ndↄ̃ sĩnda pínki kũ wɛ́zɛ̃ sĩnda pínkioo gũn ⁹ à tò o a pↄyenyĩna asiri dↄ̃̀, lákũ à zɛ̀o à kɛ Kirisi gãi nà. ¹⁰ Tó a pↄyenyĩnaa pì kɛgↄrↄ kà, ani pↄ́ sĩnda pínki kakara Kirisi ń Mìdenɛ, pↄ́ kũ à kú musu kũ zĩtɛo pínki. ¹¹ Luda kũ àdi yã sĩnda pínki kɛ lákũ à zɛ̀o a pↄyenyĩnaa gũn nà gĩnakɛ à ó dítɛ lákũ àtɛn wɛtɛ nà, à ó sɛ́ a pↄ́ ũ Kirisi gũn, ¹² de ókↄ̃nↄ kũ ó wɛ́ dↄ Kirisii zaa káakunↄ ògↄ̃ de a tↄ́ gakuride kpàrinↄ ũ. ¹³ Ákↄ̃nↄ sↄ̃, a yãpura yã mà, a baaru nna kũ à á sura bàa pìi sì. A gũn Luda a zĩda sèedaa kɛ̀áwa a Nini kũ à a lɛ́ sɛ̀ ũ. ¹⁴ Àkũmɛ túbi kũ óni le zɛnkpɛkɛ ũ ari Luda gↄ̃ gɛ́ a gbɛ̃nↄ bo, de ò a tↄ́ gakuride kpá yãi.

Pↄlu aduakɛna Ɛfesudenↄnɛ

¹⁵ Abire yãi zaa gↄrↄ kũ ma á Dikiri Yesu náanikɛnaa mà kũ yenyĩ kũ á vĩ kũ Luda gbɛ̃nↄ ń pínki, ¹⁶ mádi kámma bo kũ Luda sáabukpanaao á yã musuro. Á yã dìgↄ̃ dↄmagu wɛ́kɛ kũ madì kɛ Ludaaa gũn. ¹⁷ Madì wɛ́ kɛ De gakuride, ó Dikiri Yesu Kirisi Ludaa, de à á gba ↄ̃ndↄ̃, à á wɛ́ kɛ̃árɛ kũ a Nini gbãnao de à le à a dↄ̃ swáswa. ¹⁸ Madì wɛ́ kɛa à á nɛ̀sɛ wɛ̃árɛ de à le à tãmaa kũ à á sísia dↄ̃. À a túbi gakuride aruzɛkɛ pìnↄ dìtɛ a gbɛ̃nↄnɛ ¹⁹ kũ a gbãna zↄ̃kↄ̃ bonsarɛ kũ àtɛn zĩ kɛ ókↄ̃nↄ kũ odì a náani kɛnↄ gũnwo. Gbãna zↄ̃kↄ̃ↄ pì zĩ kɛ̀ Kirisi gũn ²⁰ gↄrↄ kũ Luda a vù gan, à a vùtɛ a ↄplai zaa musu. ²¹ Gwen Kirisi de kpatablerinↄ kũ ikodenↄ kũ gbãnadenↄ kũ dikirinↄla ń pínki kũ tↄ́ kũ òdi mì natɛńnɛnↄ pínki. Adi kɛ andunia tera díkĩna adonlo, kũ a pↄ́ kũ ani suomɛ dↄ. ²² Luda tò à iko vĩ pↄ́ sĩnda pínkia, akũ à a dìtɛ pↄ́ sĩnda pínki mìde ũ sↄsi gbɛ̃nↄnɛ. ²³ Sↄsi gbɛ̃ pìnↄmɛ Kirisi mɛ̀ ũ, à de Kirisi kũ àdi pↄ́ sĩnda pínki papa gu sĩnda pínkia papana ũ.

Vu à bona gan gɛ̃na wɛ̃̀ndin

¹ Á de yã gɛ̀nↄ ũ Ludanɛ á taarinↄ kũ á durunnanↄ yãi. ² Á tɛ́ andunia díkĩna ágbai, a mìi nàtɛ ĩa gbãnadenↄ kínanɛ, Setan kũ à kpɛ́ dona ludayãdarisarinↄnɛ arɛ pìi. ³ Ó pínki ó de lán ń bà yã se. Odì pↄ́ kũ ó mɛ̀ yeii kũ yã kũ à ó pↄ gbào kɛ. Ó inaa gũn ó de gbɛ̃ kũ Luda ni pↄfɛ̃ kipaḿmanↄ ũ lán dakenↄ bà, ⁴ ama Luda sùru zↄ̃kↄ̃, à yenyĩ vĩwɛrɛ manamana. ⁵ Gↄrↄ kũ ó de gɛ̀nↄ ũ ó taarinↄ yãi, à ó fútɛ kũ Kirisio lɛɛlɛ. À á sura bà a gbɛ̃kɛ gũn. ⁶ Kirisi Yesu gũn à ó sɛ́ à ó vútɛ kãao zaa musu, ⁷ de à le à a gbɛ̃kɛ zↄ̃kↄ̃ bonsarɛ mↄńnɛ andunia kũ ani su gũn yãi yã mana kũ à kɛ̀wɛrɛ Kirisi Yesu gũn musu. ⁸ Luda á sura bà a gbɛ̃kɛ gũn Yesu náani kũ a kɛ̀ yãi. Abire dí bo á kĩnaanlo, Luda mɛ́ à á gbá. ⁹ Á surabana dí bo á yãkɛna gãinlo, de gbɛ̃ke sún ĩa dãoro yãi. ¹⁰ Luda ↄgbɛn ó ũ. Kirisi Yesu gũn à ó kɛ́ de ògↄ̃ kú kũ yã mana kũ à gĩnakɛ à dìtɛwɛrɛ kɛnaao.

Gↄ̃na mɛ̀ dokↄ̃nↄ ũ Kirisi gũn

¹¹ Ákↄ̃nↄ kũ á de buri pãndenↄ ũ inaa gũn, à laasun lɛ́ á kunna yãa. Tↄ̃̀zↄ̃nadenↄ dì á sísi gyↄfↄrↄdenↄ, ama ń tↄ̃̀zↄ̃na de bisãsiri ↄgbɛ ũmɛ. ¹² Gↄrↄ birea á kun Kirisi sari, á de gbɛ̃ zĩ̀tↄnↄ ũ Isarailanↄnɛ. Á baka kú Luda bàka kunna kũńwo kũ a lɛ́sɛnnɛnaaoo gũnlo. Á kú andunia gũn tãmaa sari ludadↄ̃naa sari. ¹³ Kirisi Yesu gũn tera, ákↄ̃nↄ kũ á zã̀ kũ Ludao yãnↄ a nai kãni kũ Kirisi aru gbãnao. ¹⁴ Àkũmɛ ó kunna kũ kↄ̃o nna ũ, à tò Yudanↄ kũ buri pãndenↄ gↄ̃̀ mɛ̀ dokↄ̃nↄ ũ. A mɛ̀ɛ gũn à ibɛrɛ kũ à da ń dagura bĩni ũ gbòro, ¹⁵ à Musa doka nà gui kũ a yãditɛnanↄ de à tó ń pla ń pínki gↄ̃ kãao gbɛ̃ dufu mɛ̀n do ũ. Lɛn à tò ò kɛ̀ kũ kↄ̃o nna lɛ. ¹⁶ À ibɛrɛ làka, à ń pla ń pínki kɛ̀ nna kũ Ludao mɛ̀ dokↄ̃nↄ pìi gũn a gana lía yãi. ¹⁷ À sù à kɛna nna kũ Ludao baaruu kpà ákↄ̃nↄ kũ á zã̀ kũ Ludaonↄnɛ kũ gbɛ̃ kũ ò kãni kãaonↄ dↄ. ¹⁸ Kirisi yãi ó pínki ó zɛ́ vĩ ò na De Ludai kũ a Nini dokↄ̃nↄ gbãnao.

¹⁹ Abire yãi á de gbɛ̃ zĩ̀tↄnↄ ke bòasunↄ ũ doro, a gↄ̃ bedenↄ ũ kũ Luda gbɛ̃nↄ, a ↄndenↄ ũmɛ. ²⁰ Ákↄ̃nↄmɛ kpɛ́ kũ Luda bò ɛ̃ kũ zĩ̀rinↄ kũ annabinↄ nàaa ũ, akũsↄ̃ Kirisi Yesumɛ à ɛ̃pɛtɛgbɛ ũ. ²¹ A gũnn kpɛ́ pↄ́ sĩnda pínki dì kↄ̃ kũn, àdigↄ̃ gbã Luda kpɛ́ ũ Dikiri gũn. ²² A gũn ákↄ̃nↄ se, á de kpɛ́ pì bobↄnↄ ũ, ákↄ̃nↄmɛ Luda Nini kúki ũ.

Pↄlu zĩkɛna buri pãndenↄ tɛ́

¹ Abire mɛ́ à tò makũ Pↄlu, má de purusuna ũ Kirisi Yesunɛ ákↄ̃nↄ buri pãndenↄ yãi. ² Ádi ma lákũ Luda a gbɛ̃kɛkɛnnɛna zĩ dàmɛnɛ mà kɛ á tɛ́roo? ³ Luda a asiriyã mↄ̀mɛnɛ, ma kɛ̃̀árɛ fíti kↄ̀. ⁴ Tó a a kyó kɛ̀, áni fↄ̃ à dↄ̃ lákũ ma wɛ́ kɛ̃̀ nà Kirisi asiriyã musu. ⁵ Luda dí yã pì o gbɛ̃kenɛ yãro, akũ tera sà à mↄ̀ a zĩ̀rinↄ kũ a annabinↄnɛ kũ a Nini gbãnao. ⁶ Yã kũ à utɛna yã pìn dí: Kirisi Yesu gũn baaru nna mana yãi buri pãndenↄ gↄ̃̀ Luda túbiblerinↄ ũ lɛɛlɛ kũ Yudanↄ, ò gↄ̃̀ kũńwo mɛ̀dokↄ̃nↄdenↄ ũ. Ń baka kú lɛ́ kũ Luda sɛ̀ɛ gũn. ⁷ Ma gↄ̃ baaru nna pìi kpàri ũ gba kũ Luda dàmɛnɛ, a gbãna tɛ́n zĩ kɛ ma gũn yãi. ⁸ Makũ kũ má kĩana Luda gbɛ̃nↄ tɛ́, Luda gba pìi dàmɛnɛ, akũ matɛn Kirisi aruzɛkɛ lakanasari baaru kpá buri pãndenↄnɛ, ⁹ matɛn asiriyã kũ Luda tɛn wɛtɛ gbɛ̃ sĩnda pínkinɛ bońnɛ gupuraa. Asiriyã pì utɛna Luda kũ à pↄ́ sĩnda pínki kɛ̀ kĩnaa zaa káaku, ¹⁰ akũ tera sà à tò kpatablerinↄ kũ ikode kũ ò kú musunↄ a ↄ̃ndↄ̃ buri dasinↄ dↄ̃̀ sↄsi gbɛ̃nↄ gãi. ¹¹ Luda pↄyenyĩna kũ à kun zaa káaku pì lɛ́ pàpa Kirisi Yesu ó Dikiri gãi. ¹² A gũn ó zɛ́ vĩ ò na Ludai kũ swɛ̃̀ɛo kpatɛna a náanikɛna yãi. ¹³ Abire yãi ma wɛ́ kɛ̀áwa, àsun tó á nɛ̀sɛ yaka wari kũ matɛn kɛ á musu yãiro. Á kpetana yãimɛ.

Kirisi yenyĩ

¹⁴ Abire yãi madì kútɛ De Ludanɛ. ¹⁵ A kĩnaa a bede kũ ò kú musu kũ zĩtɛonↄ ń tↄ́ lèn ń pínki. ¹⁶ Madì wɛ́ kɛa à á gba gbãna á nɛ̀sɛɛ gũn kũ a Nini gbãnao a aruzɛkɛ gakuride lɛ́n, ¹⁷ de Kirisi vutɛ á swɛ̃̀n a náani kũ átɛn kɛ yãi, á zĩnipɛtɛna gↄ̃ gbãna yenyĩ gũn, ¹⁸ de à le à a yenyĩ yàasa kũ a gbã̀nao kũ a leio kũ a lòkotooo gbá dↄ̃ kũ Luda gbɛ̃nↄ pínki, ¹⁹ de à le à a yenyĩ kũ oni fↄ̃ ò a lɛ́ dↄ̃ pínkiro dↄ̃, Luda papana pínki pɛkɛrɛáwa.

²⁰ Luda zↄ̃kↄ̃! Ani fↄ̃ à kɛwɛrɛ de lákũ odì a wɛ́ kɛ ke odì a laasun lɛ́ nàla manamana kũ gbãna kũ àtɛn zĩ kɛ ó gũnwo. ²¹ Ògↄ̃ a tↄ́ kpá sↄsi gbɛ̃nↄ kũ Kirisi Yesuoo gũn wɛ̃̀ kũ wɛ̃̀ɛo ari gↄrↄ sĩnda pínki! Aami.

Mɛ̀dokↄ̃nↄkɛnaa

¹ Makũ kũ má de purusuna ũ Dikirinɛ, ma wɛ́ kɛ̀áwa, á kunna gↄ̃ de lákũ Luda á sísi àgↄ̃ de nà. ² À kↄ̃ fↄ̃, àgↄ̃ yekↄ̃i zĩdabusanaa gũn kũ nɛ̀sɛyĩdao kũ mɛnao. ³ À wɛ́ tã àgↄ̃ lɛ́dokↄ̃nↄ kũ à bò Luda Nini kĩnaa vĩ bà kũ àdi á dↄkↄ̃a ũ. ⁴ Mɛ̀ mɛ̀n domɛ, akũsↄ̃ Nini pìi mɛ̀n domɛ. Lɛn tãmaa kũ Luda á sísiaa mɛ̀n do lɛ se. ⁵ Dikiri mɛ̀n do, akũsↄ̃ donyĩzɛ mɛ̀n do kũ da’itɛkɛna mɛ̀n doo. ⁶ Luda mɛ̀n domɛ ó pínki De ũ. Àkũ mɛ́ à iko vĩ ó baadia, àdigↄ̃ zĩ kɛ ó gbɛ̃ sĩnda pínki gũn, à kú kũ ó gbɛ̃ sĩnda pínkio.

⁷ Kirisi gbɛ̃kɛ kɛ̀ ó baadinɛ, lákũ à gba dàwɛrɛ nà lɛ́n. ⁸ Abire yãi à kɛ̃na Luda yãn ò pì:

Kũ à fùtɛ à tà musu, à dò zĩ̀zↄnↄnɛ arɛ,

à gba dà gbɛ̃nↄnɛ.

⁹ A futɛ à tana musu bire de deramɛɛ? Abire pì à kìpa ari zĩtɛ gɛ̃i gĩa. ¹⁰ Gbɛ̃ kũ à kìpaa pìimɛ gbɛ̃ kũ à fùtɛ à tà ludambɛ musumusu ũ, de à gu sĩnda pínki pa. ¹¹ Àkũ mɛ́ à gbɛ̃kenↄ gbà zɛ́ ògↄ̃ de zĩ̀rinↄ ũ, gbɛ̃kenↄ annabinↄ, gbɛ̃kenↄ baarunnakparinↄ, gbɛ̃kenↄ pasutonↄ ke yãdannɛrinↄ, ¹² de Luda gbɛ̃nↄ gↄ̃ kú a zĩ soru gũn, de Kirisi mɛ̀ gbãna kũ, ¹³ ari ó pínki ògↄ̃ gɛ́ ká Luda Nɛ́ náani dokↄ̃nↄ kɛnaaa a dↄ̃na dokↄ̃nↄ gũn, de ò gↄ̃ gbɛ̃ papananↄ ũ Kirisi kũ pↄ́ sĩnda pínki pɛ̀kɛrɛa zↄ̃kↄ̃ lɛ́n. ¹⁴ Tó lɛmɛ ónigↄ̃ de nɛ́ fíti kũ òdi ↄ̃ndↄ̃ kũ manafikio kɛńnɛ ò ń sãtɛnↄ ũ doro, kũ yã dufu dannɛna dì ń sɛ́ lán ĩa ke ísↄ̃ bà. ¹⁵ Oi, óni yãpura o kũ yenyĩo, ò gbã yã sĩnda pínki musu Kirisi kũ à de a mì ũ gũn. ¹⁶ A gũnn mɛ̀gu sĩnda pínki dì kↄ̃ kũn ò nakↄ̃a kũ tĩnↄ gbãnao, akũ mɛ̀gunↄ dì zĩ kɛ a zɛ́a, mɛ̀ɛ dìgↄ̃ gbã àgↄ̃ kara kũ yenyĩo.

Kunna zĩ kũ kunna dufuo

¹⁷ Abire yãi matɛn yã oárɛ kũ Dikiri tↄ́o, matɛni á gbao laakarii. Àsungↄ̃ kun lán kifiri kũ ń nɛ̀sɛfutakɛ dońnɛ arɛnↄ bàro. ¹⁸ Ń laasun ń kɛ́ yↄ̃nkↄ, ò zã̀ kũ wɛ̃̀ndi kũ Luda dì kpáḿmao, kũ ń wɛ́ sira, akũsↄ̃ ń sã gbãna yãi. ¹⁹ Ò nɛ̀sɛ vĩro, ò ń zĩda kpà wé’isariyãa, ò dà vãni buri sĩnda pínki kɛna ni vĩ. ²⁰ Ákↄ̃nↄ sↄ̃, ádi Kirisi yã dada lɛro. ²¹ Yesu gũn a a yã mà, a yãpura kũ à vĩ dàda. ²² Ò òárɛ à ↄ gbarɛ á dà zĩ kũ à doárɛ arɛi, kũ à yàka á pↄ́nidɛna vãninↄ yãi. ²³ Ò òárɛ à á nɛ̀sɛ litɛ á laasun gↄ̃ dufu, ²⁴ áni dà dufu kũ Luda kɛ̀ lán a pↄ́ bà sɛ́, á kunna nigↄ̃ adona kunna yãpurade ũ yãzɛdekɛ gũn.

²⁵ Abire yãi à ↄ gbarɛ manafiki yãi, á baadi gↄ̃ yãpura o a gbɛ̃dakenɛ, zaakũ mɛ̀dokↄ̃nↄdenↄmɛ ó ũ. ²⁶ Tó á pↄ fɛ̃̀, àsun durunna kɛro. Àsun tó ifãntɛ̃ gɛ̃ kpɛ́n àgↄ̃ kpɛ́ pↄfɛ̃naro, ²⁷ de àsun Ibilisi gba zɛ́ro yãi. ²⁸ Gbɛ̃ kũ àdi kpãni o yã à kpãni tó. À wɛ́ tã à zĩ mana kɛ kũ a ↄo, de à pↄ́ le à bo takasidenↄnɛ. ²⁹ Àsun tó yã vãni ke bo á lɛ́nlo, séde a zɛ́de kũ ani gbɛ̃ kara, à kɛ àre ũ gbɛ̃ kũ òtɛn manↄnɛ. ³⁰ Àsun Luda Nini kũ à kú adona da pↄsiranlo. À de sèeda kũ Luda kɛ̀áwa ari á bona gↄrↄ zĩ ũ. ³¹ Àsun kɛ ĩni kũ gbɛ̃keoro. À pↄfɛ̃ tó kũ pɛ̃tɛ̃o kũ patana gbãnao kũ gbɛ̃sↄ̃sↄ̃naao kũ pãsĩkɛna buri sĩnda pínkio. ³² Àgↄ̃ gbɛ̃kɛ kɛ kũ kↄ̃o. Àgↄ̃ kↄ̃ wɛ̃nda gwa. À sùru kɛ kũ kↄ̃o lákũ Luda sùruu kɛ̀ kãáo nà Kirisi gũn.

Kunna gupuran

¹ Lákũ á de Luda nɛ́ yenyĩdenↄ ũ nà, à a ágba sɛ́. ² Lákũ Kirisi yewái nà à gì a wɛ̃̀ndiii ó yãi sa’obↄ kũ a gbĩ nna Ludanɛ ũ, à tó yekↄ̃i doárɛ arɛ lɛ se.

³ Lákũ á de Luda gbɛ̃nↄ ũ nà, adi kũ ò pãpãkɛna ke dà vãni buri sĩnda pínki ke wãkũ yã ma á tɛ́ sero. ⁴ Wé’isariyã’ona kũ yã dↄ̀rↄ sari onaao kũ fàai bɛ̃̀nɛ bonaao mana kãáoro dↄ, sé sáabukɛna yã. ⁵ Àgↄ̃ dↄ̃ sãnsãn kũ pãpãkɛri ke kesↄ̃ dàvãnide ke kesↄ̃ wãkũde ke ni kpata kũ à bò Luda kĩnaa ble lɛɛlɛ kũ Kirisioro. Pↄ́ kũ gbɛ̃ dì a wãkũ kɛ gↄ̃̀ a dikiri ũmɛ. ⁶ Àsun tó gbɛ̃ke á sãtɛ kũ yã pã korioro. Yã bire takanↄ mɛ́ ani tó Luda pↄfɛ̃ kipa a yãdarisarinↄa. ⁷ Àsun tó á bàka gↄ̃ kú kũńworo. ⁸ Á kú gusiran yã, tera sà Dikiri gũn á kú gupuran. Àgↄ̃ kun gupura gbɛ̃nↄ ũ, ⁹ zaakũ gupura dì mana buri sĩnda pínki ińnɛ kũ yãzɛdeo kũ yãpurao. ¹⁰ À yã kũ àdi ká Dikirigu dada. ¹¹ Á bàka súngↄ̃ kú kũ gusira yãkɛna kũ à karana vĩrooro. À yã birenↄ bobo gupurai. ¹² Bee yã kũ gbɛ̃ pìnↄ dì kɛ asiri gũn ona bi wé’iyãmɛ. ¹³ Tó ò bò kũ yão gupurai, òdi a súsu dↄ̃, ¹⁴ zaakũ gupura dì tó ò pↄ́ sĩnda pínki e. Abire yãi òdi pi:

I’ori ǹ vu ǹ futɛ bona gan,

Kirisi ni gu punnɛ.

¹⁵ Àgↄ̃ á táa’ona dↄ̃ manamana. Àsungↄ̃ de yↄ̃nkↄnↄ ũro, sé ↄ̃ndↄ̃rinↄ. ¹⁶ Àgↄ̃ yã kũ Luda a zɛ́ bòárɛ kɛ, zaakũ gↄrↄ díkĩnanↄn vãni. ¹⁷ Abire yãi àsungↄ̃ de yↄ̃nkↄnↄ ũro, àgↄ̃ dↄ̃ lákũ Dikiri pↄyenyĩna de nà. ¹⁸ Àsungↄ̃ kú kũ wɛ̃dɛkɛnaaoro, àdi pãpã zĩḿmamɛ, ama à tó Luda Nini gↄ̃ zĩ kɛ á guu papana, ¹⁹ gbasa à fàai bo kũ kↄ̃o kũ zaburao kũ Luda tↄ́kpanaao kũ lɛ̀ kũ Luda Nini dì daárɛo. À lɛ̀ sí, à Dikiri tↄ́ kpá á swɛ̃̀ɛ gũn, ²⁰ àgↄ̃ De Luda sáabu kɛ gↄrↄ sĩnda pínki yã sĩnda pínki gũn kũ ó Dikiri Yesu Kirisi tↄ́o. ²¹ À mì natɛkↄ̃nɛ Kirisi vĩna kũ á vĩ yãi.

Gↄ̃gbɛ̃ kunna kũ a nanↄo

²² Ákↄ̃nↄ nↄgbɛ̃nↄ, á baadi gↄ̃ mì natɛ a zãnɛ lákũ Dikirin átɛn kɛnɛ bà. ²³ Zaakũ gↄ̃gbɛ̃mɛ nↄgbɛ̃ mì ũ, lákũ Kirisi de sↄsi gbɛ̃ kũ ò de a mɛ̀ ũnↄ mì ũ nà kũ ń Surabariio. ²⁴ Lákũ sↄsi gbɛ̃nↄ dì mì natɛ Kirisinɛ nà, lɛmɛ se nↄgbɛ̃nↄ gↄ̃ mì natɛ ń zãnↄnɛ lɛ yã sĩnda pínki gũn.

²⁵ Ákↄ̃nↄ gↄ̃gbɛ̃nↄ sↄ̃, á baadi gↄ̃ ye a nanↄi lákũ Kirisi ye sↄsi gbɛ̃nↄi nà, à gì a wɛ̃̀ndiii a yãi. ²⁶ À gbã̀ bònɛ kũ ío a yã gãi de àgↄ̃ de a pↄ́ ũ, ²⁷ de à ń kpan’arɛ kɛ kũ gakurio sãa sari yitorokũnaa sari mamberu sari gbãsĩ sari taari sari. ²⁸ Lɛn à kũ̀ gↄ̃gbɛ̃ sĩnda pínki gↄ̃ ye a nanↄi lɛ lán a zĩda mɛ̀ɛ bà. Gbɛ̃ kũ à ye a nanↄi ye a zĩdaimɛ. ²⁹ Gbɛ̃ke dì gí a zĩda mɛ̀ɛiro. Àdi pↄ́ble kpáa, àdi laakari dↄa lákũ Kirisi dì kɛ sↄsi gbɛ̃nↄnɛ nà, ³⁰ kũ ó de a mɛ̀gunↄ ũ yãi. ³¹ Abire yãi gↄ̃gbɛ̃ ni bo a de kũ a dao bɛa, oni nakↄ̃a kũ a nanↄo, ń gbɛ̃nↄn pla ni gↄ̃ mɛ̀ do ũ. ³² Asiri zↄ̃kↄ̃ kú yã pìi gũn, ma è à de lɛ Kirisi dagura kũ sↄsi gbɛ̃ↄo. ³³ Bee kũ abireo à de á yã ũ se dↄ. Á baadi gↄ̃ ye a nanↄi lán a zĩda bà. Nↄgbɛ̃ sↄ̃, à a zã yã da.

Nɛ́nↄ yã

¹ Ákↄ̃nↄ nɛ́nↄ, Dikiri gũn àgↄ̃ á de kũ á dao yã ma, zaakũ abire mɛ́ à mana. ² À bɛ̀ɛrɛ lí á de kũ á daonɛ, de àgↄ̃ aafia à gì kɛ andunia gũn. Yã kũ Luda dìtɛ káaku kũ lɛ́sɛnaaon gwe.

⁴ Ákↄ̃nↄ denↄ sↄ̃, àsun á nɛ́nↄ pↄ yakaro. À ń tùtu kɛ à lɛ́ daḿma Yesude nɛ́gwana ũ.

Zↄ̀nↄ yã

⁵ Ákↄ̃nↄ zↄ̀nↄ, àgↄ̃ á andunia dí dikirinↄ yã ma kũ nɛ̀sɛdoo kũ vĩnao kũ lukanaao lákũ Kirisin átɛn kɛnɛɛ bà. ⁶ Àsun zĩ kɛńnɛ ń wɛ́ yãiro. Àgↄ̃ Luda pↄyenyĩna kɛ kũ yãpurao kũ ákↄ̃nↄmɛ Kirisi zↄ̀nↄ ũ yãi. ⁷ Àgↄ̃ zĩ kɛ kũ kokario lákũ Dikirin átɛn kɛnɛɛ bà, adi kɛ bisãsirinlo. ⁸ Àgↄ̃ dↄ̃ kũ Dikiri ni baadi yãmanakɛna fĩna bonɛ, zↄ̀ kesↄ̃ zĩdade.

⁹ Ákↄ̃nↄ dikirinↄ sↄ̃, àgↄ̃ kɛńnɛ lɛ se. À yã pãsĩ ońnɛna tó. Àgↄ̃ dↄ̃ kũ mↄ́kↄ̃nↄ kũ ákↄ̃nↄo pínki, á Dikiri kú musu, àdi yã kɛ gbɛ̃ke wɛ́ yãiro.

Gↄ̃kɛbↄ kũ Luda kpàwánↄ

¹⁰ Yã kũ à gↄ̃̀n dí: Àgↄ̃ gbãna Dikiri gũn kũ a iko gbãna zↄ̃kↄ̃ↄo. ¹¹ À gↄ̃kɛbↄ kũ Luda kpàáwanↄ da pínki, de à le à zɛ gíngin à Ibilisi ↄ̃ndↄ̃ fↄ̃. ¹² Zaakũ adi kɛ bisãsirinↄn ótɛn ↄsi ká kũńworo, sé nini vãni kũ ò kú musunↄ. Ò de andunia díkĩna gusira kíblerinↄ ũ kũ ń mìdenↄ kũ ń ikodenↄ. ¹³ Abire yãi à gↄ̃kɛbↄↄ pìnↄ sɛ́tɛ à da pínki, de à fↄ̃ à zɛ à gí gↄrↄ vãnia, gbasa à gↄ̃ zɛna gíngin a pínki kɛnaa gbɛra. ¹⁴ Àgↄ̃ zɛna gbãna, à yãpura dↄ á pi asa ũ, à yãzɛdekɛ da mↄ̀ uta ũ. ¹⁵ À kɛna nna kũ Ludao baaru nna kpá kyate ũ, de àgↄ̃ kú kũ soruo. ¹⁶ Àgↄ̃ ludanaanikɛna kũna sɛ̃gbako ũ gↄrↄ sĩnda pínki, de à fↄ̃ à Setan kà tɛ́denↄ dɛ pínki. ¹⁷ À surabana sɛ́ à kú mↄ̀ fùra ũ, àgↄ̃ Luda yã kũ à de a Nini fɛ̃nɛda ũ kũna. ¹⁸ Àgↄ̃ adua kɛ gↄrↄ sĩnda pínki, àgↄ̃ Luda kpányĩ gbɛka yã sĩnda pínki gũn kũ a Nini donnɛna arɛo. Àgↄ̃ itɛ̃ kɛ kũ mɛna zↄ̃kↄ̃ↄo, àgↄ̃ adua kɛ Luda gbɛ̃nↄnɛ ń pínki. ¹⁹ À adua kɛmɛnɛ dↄ, de tó matɛn yã o, Luda ma gba lɛ́ mà a baaru nna asiri ońnɛ vĩna sari. ²⁰ Baaru nna pì yãi má de Luda wɛ́de kũ ò dà kpɛ́siran ũ. Àgↄ̃ adua kɛmɛnɛ, de mà baaru nna kpá vĩna sari lákũ à kũ̀ mà kpá nà.

Lɛ́zammanaa

²¹ Ó gbɛ̃ndo yenyĩde Tikiku, Dikiri zĩkɛri náanide ni ma baaru kpáárɛ pínki, de à le àgↄ̃ ma kunna dↄ̃ kũ pↄ́ kũ matɛn kɛo. ²² Ma a zĩ̀áwa de à ó kunna oárɛmɛ, á nɛ̀sɛ le à yĩda kũ.

²³ Ó gbɛ̃nↄ, De Luda kũ Dikiri Yesu Kirisio á gba aafia, à á yena kↄ̃i karaárɛ kũ á ludanaanikɛnaao. ²⁴ Luda gbɛ̃kɛ kɛ gbɛ̃ kũ ò ye ó Dikiri Yesu Kirisii lakanaa sarinↄnɛ ń pínki.