DOKAGBƐSISINAA

DOKAGBƐSISINAA

Musa takada sↄↄrode

Dikiri Isarailanↄ ɛrana ń gwena zĩn

¹ Tó arubarika kũ láari yã kũ ma dìtɛárɛ dínↄ á lé pínki, àgↄ̃ dↄn buri kũ Dikiri á Luda ni pɛ́áwa à á fãkↄ̃a ń tɛ́nↄ gũn. ² Tó ákↄ̃nↄ kũ á nɛ́nↄ ɛ̀ra ò arɛ dↄ̀ Dikiri á Ludaa, tó a a yã kũ matɛn ditɛárɛ gbãra mà pínki kũ nɛ̀sɛ doo kũ pↄyeinaao, ³ Dikiri á Luda ni á wɛ̃nda gwa, ani ɛra à á kakara zaa buri kũ à á fãkↄ̃a ń tɛ́nↄ gũn à su kãáo á gwena zĩn. ⁴ Bee tó à pɛ̀áwa à á fãkↄ̃a bùsu kũ ò kú ari andunia lɛ́anↄ gũn, ani á burinↄ kakara gwe à su kũńwo. ⁵ Ani ɛra kũńwo bùsu kũ à de ń dizinↄ pↄ́ ũ gũn. Tó ò bùsuu pìi kũ̀, ani arubarikaa dańgu, ani tó ò dasi kũ de ń dizinↄla. ⁶ Dikiri á Luda ni á swɛ̃̀ pípiárɛ kũ á burinↄ, á nini nigↄ̃ yei kũ nɛ̀sɛ doo de àgↄ̃ kú kũ wɛ̃̀ndiio. ⁷ Dikiri á Luda ni láari dínↄ bo á ibɛrɛ kũ ò zã̀águ òtɛn wɛ́ tãáwanↄa, ⁸ áni ɛra à Dikiri yã ma àgↄ̃ zĩ kɛ kũ a yãditɛna kũ matɛn oárɛ gbãranↄo. ⁹ Dikiri á Luda ni arubarika daágu kũ á zĩ sĩnda pínkio, ani tó á nɛ́nↄ kↄ̃ kũ á pↄ́kãdenↄ kũ á burapↄnↄ. A pↄ ni ɛra à kɛáwa nna, ani yã mana kɛárɛ lákũ a pↄ kɛ̀ nna á dizinↄa nà. ¹⁰ Tó a Dikiri á Luda yã mà a a ↄdↄki gwà akũsↄ̃ á a yãditɛna kũ ò kú doka takada díkĩna gũnnↄ kũna, tó a arɛ dↄ̀ Dikiri á Ludaa kũ nɛ̀sɛ doo kũ pↄyeinaao, ani abirenↄ kɛárɛ pínki.

Wɛ̃̀ndi ke ga

¹¹ Yã kũ matɛn ditɛárɛ gbãra pì zĩ’ũ de á gbãna lɛ́laro. À zã̀ kãáoro. ¹² À kú ludambɛro, gbasa à pi, dí mɛ́ ani gɛ́ ludambɛ à kipao de à ma à zĩ kɛa. ¹³ À kú ísira bara direro, gbasa à pi, dí mɛ́ ani bikũ ísira bara à suo de à ma àgↄ̃ kũna. ¹⁴ Yã pì kú kãáo kãnikãni, à kú á lɛ́n kũ á nɛ̀sɛɛo de à le à zĩ kɛa. ¹⁵ À ma! Matɛn wɛ̃̀ndi kũ yã manao ditɛ á arɛ gbãra kũ gao kũ yã vãnio. ¹⁶ Matɛn ditɛárɛ gbãra, àgↄ̃ ye Dikiri á Ludai àgↄ̃ tɛ́ a gɛ̀sɛgbɛɛi, à a ↄdↄki gwa àgↄ̃ a yãditɛnanↄ kũ a dokayãnↄ kũna, de àgↄ̃ kun à kɛ̀ dasi, Dikiri á Luda ni arubarika daágu bùsu kũ átɛn gɛ́ sí gũn. ¹⁷ Ama tó a kpɛ lìnɛ akũsↄ̃ ádi a yã maro, tó a kɛ̃a akũsↄ̃ a tãnanↄ gbàgba a donyĩ kɛ̀ńnɛ, ¹⁸ matɛn oárɛ gbãra, a kakatɛn gwe! Áni gì kɛ bùsu kũ átɛn bikũ Yodaa átɛn gɛ́ sí gũnlo. ¹⁹ Ludambɛ kũ zĩtɛomɛ ma sèedadenↄ ũ gbãra á yã musu. Ma wɛ̃̀ndi kũ gao dìtɛ á arɛ, arubarika yãnↄ kũ láaribona yãnↄ. À wɛ̃̀ndi sɛ́ de ákↄ̃nↄ kũ á nɛ́nↄ le àgↄ̃ kun. ²⁰ Àgↄ̃ ye Dikiri á Ludai àgↄ̃ a yã ma à naa, zaakũ àkũmɛ á wɛ̃̀ndi ũ. Ani tó à gì kɛ bùsu kũ à la dà á dizi Ibrahĩ kũ Isaakuo kũ Yakubuonↄnɛ, à pì áni kpáḿma gũn.

Yↄsua ditɛna Musa gɛ̃nɛ ũ

¹ Kũ Musa yã dínↄ ò Isarailanↄnɛ à làka, ² à pì: Tera dí bà ma ka wɛ̃̀ basuddo, mani fↄ̃ mà doárɛ arɛ doro. Dikiri pìmɛnɛ mani bikũ Yodaaro. ³ Dikiri á Luda mɛ́ ani doárɛ arɛ à bikũ. Ani buri kũ ò kú gwenↄ kakatɛárɛ de à ń bùsu sí. Yↄsua mɛ́ anigↄ̃ doárɛ arɛ sà lákũ Dikiri ò nà. ⁴ Dikiri ni kɛ buri pìnↄnɛ lákũ à kɛ̀ Amↄrinↄ kínanↄnɛ nà Siↄ̃ kũ Oguo kũ ń bùsuuo kũ à ń kákatɛ. ⁵ Dikiri ni ń naárɛ á ↄĩ áni kɛńnɛ lákũ ma dìtɛárɛ nà pínki. ⁶ À á laakari kpátɛ àgↄ̃ wↄ́rↄgↄ vĩ! Àsun tó vĩna á kũro, àsun tó swɛ̃̀ kɛ̃águ ń yãiro, zaakũ Dikiri á Luda mɛ́ àtɛn gɛ́ kãáo. Ani á tónlo ani pã kpááiro.

⁷ Akũ Musa Yↄsua sìsi Isarailanↄ wára ń pínki à pìnɛ: Ǹ zɛ gbãna ǹgↄ̃ wↄ́rↄgↄ vĩ, zaakũ mↄkↄ̃n mɛ́ ĩni gɛ́ kũ gbɛ̃ dínↄ bùsu kũ Dikiri la dà ń dizi káakunↄnɛ à pì áni kpáḿma gũn. Mↄkↄ̃n mɛ́ ĩni bùsuu pìi kpaatɛtɛńnɛ. ⁸ Dikiri mɛ́ ani donnɛ arɛ. Àkũ mɛ́ anigↄ̃ kú kũnwo, ani n tónlo ani pã kpányĩ zikiro. Ǹsun tó vĩna n kũro ǹsun bídi kɛro.

⁹ Musa doka pìi kɛ̃̀ takada gũn à kpà sa’ori Levi buri kũ òdigↄ̃ Dikiri bàka kunna kũńwo àkpati sɛnanↄa kũ Isaraila gbɛ̃ zↄ̃kↄ̃nↄ ń pínki. ¹⁰ Musa yã dìtɛńnɛ à pì: Wɛ̃̀ supplapla gbɛra, wɛ̃̀ kũ òdi fĩnadenↄ kɛ̃ Kutadↄna dikpɛgↄrↄa, ¹¹ tó Isarailanↄ sù ò ń zĩda mↄ̀ Dikiri ń Ludanɛ ń pínki gu kũ ani sɛ́ gũn, àgↄ̃ doka takada díkĩna kyó kɛńnɛ ò ma. ¹² Àgↄ̃ ń kakara, gↄ̃gbɛ̃nↄ kũ nↄgbɛ̃nↄ kũ nɛ́ fítinↄ kũ bòasu kũ ò kú á wɛ̃tɛnnↄ, de ò ma ò dada, ò le ògↄ̃ Dikiri á Luda vĩna vĩ, ògↄ̃ dokayã pìnↄ kũna pínki ògↄ̃ zĩ kɛa. ¹³ Ń nɛ́ kũ ò yã pì dↄ̃ronↄ ni ma, onigↄ̃ vĩnakɛna Dikiri á Ludanɛ dada gↄrↄ kũ á kú bùsu kũ átɛn bikũ Yodaa à gɛ́ sí pìi gũn.

Dikiri gĩnakɛ à Isarailanↄ bona a kpɛ yã ò

¹⁴ Dikiri pì Musanɛ: N gagↄrↄ kà kĩni. Ǹ Yↄsua sísi à gɛ́ zɛ dakarɛkia, mani zĩ nanɛ a ↄĩ. Akũ Musa kũ Yↄsuao gɛ̀ɛ ò zɛ̀ dakarɛkia. ¹⁵ Dikiri bò à sùḿma gwe tɛ́luku kũ à zɛna kuta pì kpɛ́lɛlɛaa gũn. ¹⁶ Akũ Dikiri pì Musanɛ: Tó n ka n dizinↄla, gbɛ̃ pìnↄ ni futɛ ò pãpã kɛ ò do bùsu kũ òtɛn gɛ̃n tãnanↄi. Oni pã kpámai ò ma bàka kunna kũńwo yã gboro. ¹⁷ Zĩ pìia mani pↄ fɛ̃ńyĩ mà pã kpáńyĩ, mani kpɛ lińnɛ ò ń kakatɛ. Kisianↄ ni wí ń musu dasi ò wari kɛ. Zĩ pìia oni pi: Kisira pìnↄ wì ó musu kũ ó Luda kú kũooro yãinloo? ¹⁸ Zĩ pìian mani kpɛ lińnɛ yã vãni kũ ò kɛ̀ yãi, ò arɛ dↄ̀ tãnanↄa.

¹⁹ Ǹ lɛ̀ díkĩna kɛ̃ takadan sà ǹ dada Isarailanↄnɛ ò sí, de àgↄ̃ demɛnɛ ń bona ma kpɛ sèeda ũ. ²⁰ Tó ma gɛ kũńwo bùsu kũ ma la dà ń dizi káakunↄnɛ gũn, bùsu kũ vĩ kũ zↄ́’io din pìi, tó ò kã̀ ò mɛ̀ɛ kpà, oni arɛ dↄ tãnanↄamɛ ò ń gbagba. Oni pã kpámai ò ma bàka kunna kũńwo yã gboro. ²¹ Tó kisira pìnↄ ń lé dasi òtɛn wari kɛ, lɛ̀ɛ pì mɛ́ ani ń yã vãni káńnɛ ń ↄĩ, zaakũ a yã ni sã ń burinↄguro. Má yã kũ à kú ń nɛ̀sɛn gbãra dↄ̃ ari màgↄ̃ gɛ́ kũńwo bùsu kũ ma la dàńnɛ gũn. ²² Musa lɛ̀ɛ pìi kɛ̃̀ takadan zĩ pìia, akũ à dà Isarailanↄnɛ.

²³ Dikiri yã dìtɛ Nuni nɛ́ Yↄsuanɛ à pì: Ǹ laakari kpátɛ ǹgↄ̃ wↄ́rↄgↄ vĩ! Mↄkↄ̃n mɛ́ ĩni gɛ́ kũ Isarailanↄ bùsu kũ ma la dàńnɛ gũn, akũsↄ̃ makũ manigↄ̃ kú kũnwo.

²⁴ Kũ Musa dokayã pìnↄ kɛ̃̀ takadan à làka pínki, ²⁵ à yã dìtɛ Levi buri kũ òdigↄ̃ Dikiri bàka kunna kũńwo àkpati sɛnanↄnɛ à pì: ²⁶ À doka takada díkĩna sí à ditɛ Dikiri á Luda bàka kunna kãáo àkpatii sarɛ, àgↄ̃ kú gwe á bona Dikiri kpɛ sèeda ũ. ²⁷ Zaakũ má á sãgbãna dↄ̃, lákũ adì gí yãi nà. Zaa gↄrↄ kũ má kú kãáo adìgↄ̃ bo Dikiri yã kpɛmɛ ari kũ a terao. Oni ma ga gbɛra pↄ́ o dↄ yá? ²⁸ À á buri gbɛ̃ zↄ̃kↄ̃nↄ kũ á don’arɛdenↄ kakaramɛnɛ, de mà yã dínↄ dańnɛ ń sãn, ludambɛ kũ zĩtɛo nigↄ̃ de ma sèedadenↄ ũ á yã musu. ²⁹ Zaakũ má dↄ̃ kũ áni á zĩda yaka ma ga gbɛra, áni kɛ̃ zɛ́ kũ ma mↄ̀árɛa. Abire gbɛra kisira ni á le, zaakũ áni yã kũ à vãni Dikirinɛ kɛ, ani pↄ fɛ̃ái tãna kũ a kɛ̀nↄ yãi.

³⁰ Akũ Musa lɛ̀ɛ pì yã dà Isaraila kũ ò kakarananↄnɛ ń sãn mámmam.

Musa ganaa

¹ Musa bò Mↄabunↄ bùsu sɛ̃̀ntɛ à dìdi Nɛbo kpia ari Pisiga kpi mìsↄ̃ntɛ kũ à arɛ dↄ Yɛrikoa, akũ Dikiri bùsuu pìi mↄ̀nɛ pínki zaa Giliada bùsun ari Daninↄ bùsun ² kũ Nafatalinↄ bùsuuo pínki kũ Ɛflaimunↄ bùsuuo kũ Manasenↄ bùsuuo kũ Yudanↄ bùsuuo pínki ari ísira kũ à kú ifãlɛtɛ kpa ³ kũ Nɛgɛvio kũ Yɛriko wɛ̃tɛ dominalide guvutɛo ari Zoa. ⁴ Akũ Dikiri pìnɛ: Bùsu kũ ma la dà Ibrahĩnɛ kũ Isaakuo kũ Yakubuo ma pì mani kpá ń burinↄaa pìin gwe. Ma tò n wɛ́ sìalɛ, ama ĩni bikũ Yodaa ǹ gɛ̃nlo.

⁵ Akũ Dikiri zↄ̀bleri Musa gà Mↄabunↄ bùsun gwe lákũ Dikiri ò nà. ⁶ Akũ Dikiri a vĩ̀ guvutɛn gwe Bɛtɛpeo kpa. Gbɛ̃ke a mira ki dↄ̃ro ari kũ a gbãrao. ⁷ Musa gà a wɛ̃̀ basuddode gũmmɛ. A wɛ́ nna akũsↄ̃ a gbãna dí lagoro. ⁸ Isarailanↄ a gɛ̀ɛ kɛ̀ gↄrↄ baraakuri Mↄabunↄ bùsu sɛ̃̀ntɛ, akũ a gɛ̀kɛna kũ ↄ́ↄdↄo làka.

⁹ Ɔ̃ndↄ̃ pàpa Nuni nɛ́ Yↄsuaa kũ Musa ↄ nàa yãi. Isarailanↄ a yã mà, ò kɛ̀ lákũ Dikiri dà Musanɛ nà. ¹⁰ Annabi ke dí bo Isarailanↄ gũn lán Musa bà doro. Àdi yã o kũ Dikirio tɛ̃tɛ̃ntɛ̃ ¹¹ akũsↄ̃ à sèedanↄ kũ daboyã kũ Dikiri à zĩ̀onↄ kɛ̀ Misila, Firi’auna kũ a ìbanↄ kũ a gbɛ̃nↄ arɛ ń pínki. ¹² Gbɛ̃ke dí yã naasi zↄ̃kↄ̃ kɛ kũ iko gbãnao lán Musa bà Isarailanↄ wɛ́ sìalɛ doro.