2 TƐSALONIKADENƆ

TƐSALONIKADENƆ TAKADA PLADE

Yãkpatɛkɛna Kirisi sugↄrↄa

¹ Makũ Pↄlu kũ Silasio kũ Timↄtio, ókↄ̃nↄ mɛ́ o takada díkĩna kɛ̃̀ Tɛsalonika sↄsi gbɛ̃ kũ ò kú Luda ó De kũ Dikiri Yesu Kirisioo gũnnↄnɛ. ² De Luda kũ Dikiri Yesu Kirisio gbɛ̃kɛ kɛárɛ, à á gba aafiaa.

³ Ó gbɛ̃nↄ, à kũ̀ ògↄ̃ Luda sáabu kpá á yã musu gↄrↄ sĩnda pínki, lákũ à mana nà, zaakũ á ludanaanikɛna tɛn gɛ́ arɛ manamana, akũsↄ̃ yenyĩ kũ á baadi vĩ kũ kↄ̃o tɛn kara. ⁴ Abire yãi odì lɛ́ gbɛ̃ á yã musu Luda sↄsinↄ gũn, lákũ átɛn wɛ́tãmmana kũ wari pínkio fↄ̃ nà kũ mɛnao kũ ludanaanikɛnaao. ⁵ Abire mↄ̀wɛrɛ kũ Luda dì yã gↄ̃gↄ̃ kũ gbɛ̃nↄ a zɛ́amɛ. Abire yãi a ka à gɛ̃ kpata kũ à bò Luda kĩnaa gũn kũ átɛn wari kɛ a yãi. ⁶ Luda dì yã kɛ a zɛ́amɛ. Ani wɛ́ tã gbɛ̃ kũ òtɛn wɛ́ tãáwanↄa, ⁷ ani ákↄ̃nↄ kũ òtɛni wɛ́ tãáwanↄ gba ĩampaki kũ ókↄ̃nↄ, tó Dikiri Yesu bò ludambɛ kũ a malaika gbãnanↄ ⁸ kũ tɛ́vuraao. Ani wɛ́ tã ludadↄ̃risari kũ odi ó Dikiri Yesu baaru nna síronↄa. ⁹ Kakatɛna lakanasarin Luda ni wɛ́ tãoḿma. Oni ń kpakɛ Dikiri arɛ kũ a gbãna gakurideo. ¹⁰ Tó à sù gↄrↄ pì zĩ, ani tↄ́ bo a gbɛ̃nↄ yã musu, gbasa a náanikɛrii pìnↄ a mana bo ń pínki. Anigↄ̃ kú ń tɛ́, zaakũ a yã kũ o òárɛ sì.

¹¹ Abire yãin odìgↄ̃ adua kɛárɛ baala’i, de ó Luda tó á kunna ká gwena kũ à á sísia, à yã mana kũ a zɛ kũ a kɛnaaonↄ kũ zĩ kũ átɛn kɛ a náanikɛnaa gũnnↄ pínki papaárɛ kũ a gbãnao. ¹² Dikiri Yesu tↄ́ ni bo á musu, ákↄ̃nↄ sↄ̃ á tↄ́ ni bo a musu ó Luda kũ Dikiri Yesu Kirisi pìio gbɛ̃kɛ yãi.

Ludayãdarisari

¹ Ó gbɛ̃nↄ, Yesu Kirisi suna kũ ó kↄ̃kakaranaao de ò daalɛ yã musu, o wɛ́ kɛ̀áwa, ² àsun tó á laakari futɛ aragaro. Tó annabi yãke waazi ke takada kũ ò pì à bò ó kĩnaa pì, Dikiri sugↄrↄ kà kↄ̀, àsun bídi kɛro. ³ Àsun tó gbɛ̃ke á sãtɛ kũ yã bire takaoro, zaakũ gↄrↄ bire ni suro, séto gbɛ̃nↄ bona Luda kpɛ gↄrↄ kà gĩa kũ ludayãdarisari kũ à mìi pɛ̀ kakatɛna zɛ́a bona gupuraao. ⁴ Ani gí pↄ́ kũ òdi ń ditɛ dikiri ũnↄi kũ pↄ́ kũ òdi donyĩ kɛńnɛnↄ pínki, ani a zĩda bi deńla, ani gɛ́ à vutɛ Luda kpɛ́n, à a zĩda ditɛ Luda ũ se. ⁵ Gↄrↄ kũ má kú kãáo ma yã pìi òárɛ. Ádi dↄnloo? ⁶ Á dↄ̃ pↄ́ kũ àtɛni a dãdã de àsun bo a gↄrↄ ãro yá? ⁷ Zaakũ ludayãdanasari tɛn ↄ tá asiri gũn kↄ̀. Ani boro, séto gbɛ̃ kũ àtɛn kpánɛ gò zɛ́n baasiro, ⁸ ludayãdarisarii pì ni gbasa à bo sà. Dikiri Yesu ni a dɛ kũ a lɛ́’ĩao, à a kakatɛ kũ a suna gakurio. ⁹ Ludayãdarisari pì ni su kũ Setan gbãnao à daboyãnↄ kũ yãbonsarɛnↄ kɛ kũ sèeda ɛ́kɛ buri sĩnda pínkio. ¹⁰ Ani manafiki buri sĩnda pínki kɛ gbɛ̃ kũ ò mìi pɛ̀ kakatɛna zɛ́anↄnɛ, kũ ò gì yãpura kũ ani ń sura bai yãi. ¹¹ Abire yãi Luda ni likarana pãsĩ zĩḿma de ò ɛ́kɛ náani kɛ. ¹² Yã ni gbasa à vutɛ gbɛ̃ kũ odi yãpura síro kũ òdi pↄnna kɛ kũ a vãnionↄa ń pínki.

Luda á sɛ́ de à á sura ba

¹³ Ó gbɛ̃ Dikiri yenyĩdenↄ, à mana ògↄ̃ Luda sáabu kpá gↄrↄ sĩnda pínki á yã musu, zaakũ Luda á sɛ́ zaa káaku, de à bo kũ a Nini kũ à tò o gↄ̃ a pↄ́ ũ gbãnao á yãpura sina yãi. ¹⁴ Luda á sísi à á sɛ́ baaru nna kũ o kpàárɛ yãi, de á baka gↄ̃ kú ó Dikiri Yesu Kirisi gakuri gũn. ¹⁵ Abire yãi ó gbɛ̃nↄ, à zɛ gbãna, àgↄ̃ yã kũ o dàárɛ kũ lɛ́o ke takada gũn kũna. ¹⁶ Ó Dikiri Yesu Kirisi kũ Luda ó Deo yewái, a gbɛ̃kɛ gũn à ó laakarii kpàtɛwɛrɛ ari gↄrↄ sĩnda pínki, à tãmaa mana dàógu. ¹⁷ À á laakari kpátɛárɛ, à á gba gbãna yãmanakɛna kũ yãmana’onaao gũn pínki.

À adua kɛwɛrɛ

¹ Yã kũ à gↄ̃̀n dí, ó gbɛ̃nↄ, à adua kɛwɛrɛ, de Dikiri yã le à dagula likalika, àgↄ̃ bɛ̀ɛrɛ vĩńnɛ lákũ à vĩ á kĩnaa nà. ² À adua kɛwɛrɛ de à ó bo gbɛ̃ vãni dↄ̀rↄsaridenↄ ↄĩ, zaakũ adi kɛ gbɛ̃ sĩnda pínki mɛ́ à Luda yã sìro. ³ Dikiri náani vĩ, ani á gba gbãna, ani á sí a vãnia. ⁴ O á náani kɛ̀ Dikiri gũn kũ átɛn yã kũ o òárɛnↄ kɛ, akũsↄ̃ ánigↄ̃ kɛ. ⁵ Dikiri tó à Luda yenyĩ kũ Kirisi mɛnao gbázɛ dↄ̃ á swɛ̃̀n.

Òsun ma’ã kɛro

⁶ Ó gbɛ̃nↄ, o naárɛ Dikiri Yesu Kirisii, à kɛ̃ ó gbɛ̃ kũ ò ma’ã vĩnↄa, kũ òdi zĩ kɛ kũ yã kũ o dàńnɛoronↄ. ⁷ Á dↄ̃ kũ á zĩdao, kũ à mana àgↄ̃ tɛ́ ó ágbai, zaakũ ma’ãdenↄn ó ũ gↄrↄ kũ ó kú á tɛ́ro. ⁸ Ódi gbɛ̃ke pↄ́ble sí o blè fĩnabonaa sariro, o zĩ kɛ̀ gwãani kũ fãnantɛ̃o, o wari kɛ̀ ari í sìwá, de òsun gↄ̃ á gbɛ̃kenɛ aso ũro yãi. ⁹ Ó a zɛ́ vĩ à kpáwái, ama o kɛ̀ lɛ de à ó ágba sɛ́ yãimɛ. ¹⁰ Gↄrↄ kũ ó kú kãáo, o dìtɛ kũ gbɛ̃ kũ à ye zĩkɛnaairo ni pↄ́ blero. ¹¹ O mà kũ á gbɛ̃kenↄ ma’ã vĩ, òdi pↄ́ke kopiro, séde gudɛ. ¹² O dìtɛ gbɛ̃ bire takanↄnɛ, o nańnɛ Dikiri Yesu Kirisii, ò vutɛki kũ ò zĩ kɛ ò ń zĩda gwa.

¹³ Ákↄ̃nↄ sↄ̃ ó gbɛ̃nↄ, àsun kpasa kũ yãmanakɛnaaoro. ¹⁴ Tó gbɛ̃ke dí yã kũ o òárɛ takada dí gũn daro, à a yã bo à dítɛ. Àsun kakara kãaoro, de wé’i le à a kũ yãi. ¹⁵ Ama àsun a sɛ́ á ibɛrɛ ũro, à lɛ́ daa á gbɛ̃ndo ũ.

¹⁶ Dikiri Aafiade á gba aafia gↄrↄ sĩnda pínki yã sĩnda pínki gũn. Dikiri gↄ̃ kú kãáo á pínki. ¹⁷ Makũ Pↄlu makũ mɛ́ ma fↄkpammana díkĩna kɛ̃̀ kũ ma zĩda ↄo. Abirekũmɛ ma takada pínki sèeda ũ, lɛn madì kɛ̃ lɛ. ¹⁸ Ó Dikiri Yesu Kirisi gbɛ̃kɛ kɛárɛ á pínki.