Eletar yay yo Pool ahiĉ me
Tit
Waf waw wabaj me n’eletar yauye
Tit nakakan arambena Pool ni burokol. Narambenol faŋ no Pool ajuh me mátañie n’ejangaraay bugaa Korent. No Pool ahiĉol me eletar yauye, totoh aĉila baamer ni júloŋ jaju jo guvoge me Kiret. Ni júloŋ jauju, naramben dó ejangaraay min gubaj fiilo.
Pool naosewosen Tit gáni gagu gáari me go ufan bugaa jangu guot me gubaj (Tit 1.5-16). Natarol mala gajogor gagu go naat me abaj ni bugan bugagu gábulior me bugaa fuomunor, gaamme bugan bugagu gafanet me, waareaw gaputi me, úᵽur waw, umigel waw (Tit 2.1-15). Yésu Kirista nasesen buroŋol min mb’aallor bugan bugagu ni gatil gánogan (Tit 2.14) : buroŋ ejangara buvugul ni dáuru búhagoe.
Gannay gagu no Pool ahiĉ me siletar sasu, sasu bi ni Tímonte, yayu bi ni Tit, ejangaraay gujoge búoh Yésu mati ᵽan ábbañul maer-maer ye. Guote guligen eroŋ n’enah yajae eᵽio.
1Basaf babu baa Pool
1Injé Pool, aamme amigel ala Aláemit ni aᵽotora ala Yésu Kirista, ihiĉuli eletar yauye. Aláemit nasenomsen burok babu bal ekan bugan bugagu bugo naĉob me min gúinen ni o, ni ᵽoᵽ bal ekanil n’guffas maagen mamu máju me miĉilil n’guroŋ ni gáinen gagu. 2Niete ikan mo tima bugan bugagu n’gubaj gafium gagu gal eyab buroŋ babu bábaerit me. Balama buju babu, Aláemit o nd’abij me naaseh ᵽan asenolal buroŋ baubu. 3No tinah talu to nakiĉ me tiĉih me, Aláemit aamme Aᵽagenaolal nagiten Firimol n’eboñ yay yo naboñom me, ban naagom íjoul ivareul fo.
4Injé ihiĉuli eletar yauye, aw Tit aamme añolom ala maagen ni gáinen gagu go nuguma me : mbi Aláemit Ᵽaaya bugo ni Yésu Kirista aamme Aᵽagenaolal gúsonieni ban ni guseni gásumay !
Burok babu baa Tit ni júloŋ jaju jaa Kiret
5Nihalihat ni júloŋ jaju jaa Kiret, min mb’ufaben burok babu baŋaño bo me, ban nuroben ufan bugaa jangu ni ésuh yánoyan dó jangu yom. Uosen gurim gagu go nilobi me : 6afan jangu, an aatut ajuh maarat ni o, ban naate áni ánaine ayabe anaare anur pat. Guñolol guote gúni bugan gáinene ni Yésu, bugo an ájuut ahajen ujail mala bakaneril, ter ᵽoᵽ mala búoh gúkanumut sipail. 7Maagen mamu, afan jangu o gusene burok bal Aláemit, an aatut ajuh maarat ni o : jambi ní an atennoroe, ter an o fiiñol fujase n’etiñ, ter áhalla, ter árigena-bugan, ban ᵽoᵽ jambi ní an aŋese fubaj faarat. 8Afan jangu til naate áni an ájue ealen wári ejaora súndool, naate may áni an amaŋe maaro ; naate ᵽoᵽ áni an abaje biinum ban naĉol, an ala Aláemit ájue ejogoro. 9Naate ajoh liŋ tir ni biinumol firim fafu faamme faa maagen, fajaor me ni wo guligenol me. Mamu ᵽan áju me aŋar baligener babu baamme baa maagen min asen bugagu buaken, ban ᵽan áju ᵽoᵽ agiten gaceŋeol me búoh gulet ni maagen.
Pool o n’eĉaf mala uligenaaw gabije me
10Maagen mamu, baje bugan gammeŋe, ni fáŋum Esúif yay, galale ekan ti firim faufu fulob me, ban nihi gubut bugan bugagu ni baloberil babajut mee nafa. 11Juote jipeh utum waw wolil, mata gúguegu ñace guil búruŋago ni baligener bo guotenut guligen bugan bugagu, ban gukanmokan tima n’gúbajum to waf, suneni nogor mice. 12Ace ni bugo, aamme an ala Kiret ban ᵽoᵽ náni aboñer ahu olil, nah’aah : « Bugaa Kiret guᵽiᵽi n’gukane uᵽula-sulob, súnuhureŋ sálaᵽute, bugan gayuge bugo nihi guᵽinor mala emmeŋen garil bare. » 13Gurim gaugu go nalob mee maagen dom. Yo eĉil me, unnuril ni sembe tima n’gúbbañul gúni bugan gabaje gáinen gaĉole. 14Jambi gúinen me jibij jaju jáᵽureul me n’Esúif yay, jambi ᵽoᵽ gulagen me ni gurim gagu go bugan bugagu galat me maagen mamu gulobe me ésuh yay. 15Wáfowaf ᵽe usigout bi ni bugan bugagu bugo uinumil ukur me. Bare bugan bugagu gasigo me ban ni gulat éinen n’Aláemit, waf waw ᵽe usigosigo ni bugo, mata uinumil ni gaᵽinoril sisigosigo. 16Ᵽan guoh guffase Aláemit, bare bakaneril bigitengiten til búoh guffasutol. Guarat hani, gúkanumerit Aláemit hani jatiito, ban gújuut ekan waf wáarie.
2Baligener babu baĉol me
1Bare aw, Tit, ugiten ésuh yay waf waw wajaor me ni baligener babu báari me. 2Uoh wáineaw gáfanum me jambi gúvafen ni wáfowaf ; guote gúni bugan gasunamoe, bugan gabaje uinum, bugan bugo gáinenil guliŋe, gammeŋe gábboli ni buaken to me. 3Ulob ᵽoᵽ waareaw gáfanum me uogil buroŋil buote bíni buroŋ baa bugan gasenoroe bi n’Aláemit. Jambi nihi guhajen ujow bugan bugagu, jambi nihi gúhalenor iki gát. Mbi nihi guligen bugan bugagu ekan maaro. 4Mbi guligen mamu waareaw gakan me uñil bu guot me gumaŋ wáinil ni guñolil ; 5guligenil bu guot me gukan min gubaj uinum, min ᵽoᵽ gúni waare gáteerit búsol wáine, gúni waare gájue eogen saŋil wári, ban ni gúni bugan gaaro, gákanume wáinil, mamu an mat’alob gurim gaarat aya ni Firim fafu fal Aláemit.
6Uramben ᵽoᵽ úᵽur waw min gúni bugan gabaje uinum. 7Aw faŋai úni ni waf waw ᵽe bigitenum baa buroŋ báarie. Baligeneri mbi bíni baligener baa maagen ban ni buĉol biw. 8Gurimi guote gúni gurim gaĉole go an ájuut aceŋ, mamu ulatori mati gúju gulob gurim gaarat guya ni wolal, min ñer mbi gubaj ñusu.
9Bugan bugagu gaamme umigel guote gúttun ni wáfowaf ufan waw gaĉilil me ; guote guliᵽ min gúsumil ban jambi nihi guceŋil, 10jambi may gúkuetil wáfowaf. Mbi nihi gugitenil nánonan búoh bugo mifiumay gom, tima n’gúŋarul gasal baligener babu mala Aláemit aamme Aᵽagenaolal.
Gáji gagu gal Aláemit gáŋareul me gaᵽah
11Aláemit nagitengiten gájiol gáŋareul me gaᵽah gagu gaa bugan bugagu ᵽee. 12Gáji gagu guĉila guligenolal elat bakaner baarat ni ᵽoᵽ elat gúrasor gagu gaa babe n’ettam, min uroŋal ni mof me buroŋ baa bugan gabaje uinum, baa bugan gaĉole gákanume Aláemit. 13Mamu nujaale me eyab gásumay gagu go nunagale me, funah fafu no gasal gagu gaa Yésu Kirista, aamme Aláemilolal ámah ni aᵽagenaolal, gujae me éraŋul. 14Aĉila faŋaol nasesen súñunduol min aallorolal n’utilolal ᵽoowo ban nájellulolal, min ñer ábahenolal únial bugan bugola, bugan gásuᵽe n’ekan maaro.
15Dáuru nuot me uligen bugan bugagu. Uŋar fufanei min usenil buaken ter nunnuril. Jamb’uhat me an min avilieni.
3Eroŋ buroŋ bal ajangara
1Utállen ejangaraay ᵽe búoh guote gúkanum ufan waw gaogen me mof mamu ni ᵽoᵽ bugagu ufan ; guote gúttunil, ban may guote gubaj gailo gagu gal ekan maaro mánoman. 2Jambi gulob maarat guya n’an, jambi ᵽoᵽ gúni bugan bugaa gárig. Guote gúni bugan gásume, bugan gájebie uinum bújoŋor bugan bugagu ᵽe. 3Maagen mamu, wolal may bítinar bugan gaffasenut wáfowaf nuomenale, bugan gáttunut Aláemit, bugan gallime. No, umigel bugaa gaija nuomenale, gaŋesene músume mamu maa buroŋ be bare, ban nuroŋenal buroŋ baa búlaᵽut ni bísilaet, min ukanoroal mamu bugan gaarat, ban nukanoroenal búlator n’etulolal. 4Bare no Aláemit, aamme Aᵽagenaolal, agiten me músumol ni gábboliol so nabaj me bi ni bugan bugagu, 5naᵽagenolal, let mala búoh bakanerolal bice baĉole biĉile, bare mala ñarumol enil ño náju me. Ni gaᵽoso gagu gaĉile me min arafuhow abbañ abugi náᵽagenumolal, dó ᵽe ni búkanum baa Biinum Banabe bo nihi bisen me an buroŋ buvugul. 6Aláemit ni Yésu Kirista aamme Aᵽagenaolal nájoume min avis Biinum Banabe ni wolal maagen mamu. 7Aláemit nakanmokan min mb’únial bugan gaĉole bújoŋorol, dó ᵽe mala gájiol. Nakanmokan may min mbi buroŋ babu bábaerit me bo nunagale me bíni bololal.
8Firim fe fo nilob maa maagen dom, ban nimaŋe min uĉimen fo faŋfaŋ, tima bugan bugagu gáinen me n’Aláemit n’gujoh to liŋ min gukan maaro. Maagen ekan maaro éariari faŋ ban ebabaj nafa bi ni bugan bugagu ᵽe. 9Bare utey síceŋor sasu saa bamotoŋ maa sipaya gufan, ter maa gúboñ gagu gaa Móis : úru ᵽe waf urakel wom wabajut nafa. 10An ayaor me bugan, ᵽan umundum uĉafol gaĉaf gátiar, mbiban núutten uĉafol ; ᵽúrto me ahalut, núᵽunnol. 11Uffas búoh an ti ahumu nahahat bulago babu baĉol me, ban min alat me ehat ekan maarat nagitengiten aban búoh o ategoroe.
Gurim Pool gúsola
12No nijae me eboñuli Arutemas ter Tiĉik, ukan wáfowaf min újoul utogom n’ésuh yay yaa Nikopolis, mata bo nijoge bi ekan bo gúvagen gagu. 13Ukan min úju me min uramben Senas, ataliŋa ahu, o ni Apolos, ni bújaor babu bolil : jambi waf uce wo gusoholae uŋañoil bo ebaj. 14Buganolal faŋail guote guaken n’ekan maaro, tima n’guramben bugan bugagu gabajut me, mamu buroŋil m’bubaj nafa.
15Bugan bugagu ᵽe gaamme tale n’ínje gusafi. Usaf may gupalolal bugo nugumal me gáinen ni Yésu Kirista. Mbi Aláemit ásonienul buru ᵽooul !