SONAS

Sonas

Waf waw wabaj me n’élebur yauye

Elébur yauye yaa Sonas enogonogor ti garej gaaro gukan bugan bugagu n’guᵽinor. N’elob mal an o Aláemit aboñe. Naboñol mb’ajow bi ésuh yay yaa Niniv, min alob bugala yo táñi. Mata bugo nihi gúcetenceten súsuh sasu salofil me, sabajut me sembe. Dó n’élebur yay yaomen me gurim Aláemit ᵽe, ésuh yay yaa Niniv kakan ésuh yákandit maagen, ban nélaᵽut mámah (ti lobi me n’élebur yay yaa Nahum). Sonas amaŋut eke bo. Natey dáli jambi áttun gavoh Aláemit.

Elébur yauye egitenolal bu Aláemit ábahen me o naboñ me.

Firim fítinar fuogolal Sonas nak’affas búoh an ájuut atey dáli Aláemit. Sonas nájuᵽo ni baraca baam n’ejow évu búsol ésuh yay bo naaro me ajow. Bare Aláemit nainnul fúrus fámah ni fal fafu. Bugaa baraca babu n’gúholi maa buroŋil, ban ejaora gom gaffasut Aláemit. N’gugiten Sonas búoh o aĉil me matañoil. Bare búsol n’gúbbañul gúkanum Aláemit Sonas.

Firim fúuten fuogolal Sonas nak’affas waamme éhatulo n’Aláemit. Mata Aláemit naalenol bi n’ettam fal iki eol émerol. Ban dó n’élebur yay yaomen me gurim Aláemit ᵽe, fal kakan tiñ to waf waw waarat me ᵽe ni eĉet som. Dó n’ettam fal fafu, Sonas nálaul min mb’aroŋ. Najuge búoh Aláemit bare ájue aᵽagenol. Yo eĉil me naramor asalol.

Firim fúfaten fuogolal Sonas ñer nabile áttun Aláemit min akay mbaa Niniv. Nalobil mala gafumo ésugil. Bare bugal ésuh yay bi n’áviil ró n’gujoh biinum bi ehat bakaneril baarat me. Ti may ni firim fítiara, ejaora gubbañe gúkanum may Aláemit.

Firim fubarigen fuogolal Sonas fiiñol ni fitiñ mata Aláemit afumut Niniv. Bare Aláemit ajundenutol. Nacokorol nagitenol búoh aliᵽut eĉet yaa bugan bugagu gálaᵽut me. O til namaŋe guhat bakaneril baarat me min gúju guroŋ.

N’eban élebur yay, Aláemit naroren Sonas. Uffasutal wo Sonas ábahulol me. Mo may, suroren sasu usu to bi ni ánoan ajae me ejanga élebur yauye : Nemme Aláemit nah’amamaŋ ejaora, nabbañ aboket gálaᵽut me, bu ᵽan uᵽinoral mola ?

Sonas nalih etey Aláemit

¹Baje ace áine, gajaol Sonas, ᵽayol gajaol Amitay.

Ni baj funah fice, Atúla navogol naagol : ²« Uilo ujow bi n’ésuh yay yámah yay yo guoge me Niniv, min uĉafil uogil búlaᵽut babu bo guomme ni bo, nipoñbopoñ. » ³Ñer Sonas nailo ajow, bare bi etey mbal ésuh ece, gajow yo Tarisis, bi éhatulo n’Atúla. No naĉih me n’gásih gagu gaa Jafa, natoh to baraca baam n’ejow ni fal fámah mbaa Tarisis. Nacam ejaol min ájuᵽo mimanur ni bugan bugagu gajae me Tarisis, dó ᵽe bi etey Atúla.

⁴No gutey me guĉih babu, Atúla nayalil fúrus fáamah, fal fafu ni fiteh iki fumaŋ efum baraca babu. ⁵Ujaoraol n’gúholi, ánoan náᵽib nalaw nímoro álaemilol. N’guteb wañil ᵽe gubelen ni fal, mata mbi baraca babu bufaŋ m’bivilie. Sonas kan aĉila umu ró ni gatal bo, min ámoe ahay was.

⁶Ñer afan baraca babu najow atogol to naagol : « Buenne ? Aw gámori ? Uilo ulaw álaemili ! Ter ᵽan arumolal enil jamb’uĉelal. » ⁷Bugaa baraca babu n’gúᵽur jolil n’guoh : « Uñagoral usos min ujugal ay ni wolal aŋallo me biᵽila baube. » No guñagor wo me, ni lo ni Sonas. ⁸Ñer n’gubbañ iki guogol : « Biᵽila baube, aw ukanóli bo. Ugitenóli wa nuom dáre nekan. Bay núᵽullo ? Aw an bu ? » ⁹Nábahulil : « Injé an ala Híbori, ban ni Atúla níinene aamme fatiya, Aláemit átut me fal ni ettam. » ¹⁰Naban nagitenil waĉil me naam n’etey ráli Aláemit, n’gúholi nár. N’guogol : « Nujuge bakaneri ! » ¹¹N’gutajen guogol : « Ñer bu jijae ekani tima fal fafu ni fulluhor ? » Mata gulongos gagu ugu n’efaŋ n’gutege. ¹²Naagil : « Jujogom jibelen dó, mo fal fafu ᵽan fibeben. Maagen niffase búoh ínje iĉile min fúrus faufe fubaj. » ¹³N’gumundum ᵽan gulih even bi n’galam, bare gújuut mata fal fafu fufafaŋ ni fitege. ¹⁴Ñer n’gulaw Atúla n’guogol : « Jamb’umugóli mata ahume ! Jamb’ujogóli may bugan gamuge an añumenut eĉet ! Ban aw Atúla, nukakan wo numaŋ me. »

¹⁵No guban me, n’gujoh Sonas gural dó. Ñer fal fafu ni fúbbañul fíjebi. ¹⁶Ni ᵽúrto, n’gúkanum Atúla nár iki gukanol bísimen min gubbat gáinenil ni o.

Sonas nalaw Aláemit

¹Ñer Atúla náboñul eol yámah ékail émer Sonas. Nanamo ró ni far yo sutufunaha sífaji ni sufuga sífaji. ²Ni far eol yay nalaw Atúla aamme Aláemilol ³naagol :

« Bíyih bámah nibaje,

níbaho nivoh aw Aláemit, núttunom.

To ni butum eĉet yay níᵽib min urambenom,

nuun firimom.

⁴Ni másiko fal fafu nubelenom,

ban mal mamu múgolom múharo.

Gatey mal mamu n’guĉimenom,

gulongos gagu n’gúggubom gúharo.

⁵Injé nieh : “Nutosenom dáli ni aw.

Nimaŋene ibbañ ijuh yaŋi yanab me.”

⁶Muu mamu mímmeŋul iki mireom n’ehondor.

Injé umu n’étimo,

mafos mamu ni mugolenom ni fuhow.

⁷Nialoene bi to n’ettam gurijaŋ gagu.

Nijaene mbaa buroŋ babu baa gaĉet me,

ettam yay ᵽan eᵽamunorenom bi nánonan.

Bare aw Aláemit aamme Atúla,

núᵽunnulom maroŋe ni gasun gaugu,

⁸mata nikaene eĉet.

Bare niosen míya min ilai ;

galaom n’gujow iki gutogi bo ni yaŋi yanab me.

⁹Gabaj me gáinen bamotoŋ n’uce úbuli n’aw,

mati gúmus gubaj gásumay.

¹⁰Ban ínje ᵽan ísimeni nisali nímoro.

Ᵽan ikan wo nibbat me ni aw Atúla,

aw aamme aᵽagena ahu. »

¹¹Ñer Aláemit naah eol yay : « Uk’úmasul Sonas ni mahae ! » Nemasulol to baenah.

Sonas nájaenum firim Atúla bi Niniv

¹Ñer Atúla nabbañ aah Sonas : ²« Uilo, ujow bi Niniv, ésuh yay yámah yay, uk’ugitenil bo wo nilobi me. » ³Ñer Sonas nailo ajow, bare ñañe bi Niniv, ti Atúla alobol yo me. Ban Niniv ésuh yom yájaloe nár ; ᵽan ukan gunah gúfaji bala ujow yo ᵽe. ⁴No Sonas anogen me n’ésuh yay, najow ró funah fanur iki fubao bala áelo. Naagil : « Juutten min ilobul. Tale gunah úvi gúuba, Niniv mati ebbañ éni ésuh ! »

⁵Ñer bugaa Niniv n’gúinen n’Aláemit. N’guoh baor n’gukano wañ waa ñuhul bugo ᵽe, gabaj me bi ni gabajut me, bi egiten gaa búoh guteteh mahat. ⁶Kan elob yay eunoe bi n’ávi ahu. Nailo n’efenjeŋol náᵽuren gájuool gal ávi min ñer asimo may ti buganol, aban nanamo ni bukugay. ⁷Aví ahu ni úvulaol n’gusen gúboñ gauge : « Jigiten gurim gauge n’ésuh yay ᵽe : Fírenifiren marem ni fitiñ bugan bugagu ni súnuhureŋ sasu ; jambi ébe, gabbarum, ejamen sifen. ⁸Min ánoan akano wañ waa ñuhul, bugan bi ni súnuhureŋ dó. Ᵽan ánoan alaw ni sembeol ᵽe Aláemit. Anóan ahat bakanerol baarat me, ahat búlaᵽut bánoban bo nah’akanen me. ⁹Ay affase ? Ter Aláemit ᵽan abbañ abaj gaᵽinor gace, min aalen fiiñol bújoŋorolal jamb’uĉelal. »

¹⁰Aláemit no najuh me búoh ubugu n’ehat bakaneril baarat me, nábahen gaᵽinorol. Nahat, buyoh babu bo naᵽinoren me ekanil, abbañut akan bo.

Sonas ni bitiña-fiiñol, Atúla nalob ni o

¹Sonas súmutol hani, min Aláemit aboket me bugaa Niniv, ban fiiñol ni fitiñ Aláemit. ²Nalaol aagol : « Atúla, no niomen me n’ésugom, niᵽiene niffas búoh ᵽan uboketil. Mo kane nisommen nitey mbaa Tarisis. Niᵽie niffas búoh aw gamaŋi gújalojalo, nújuju ñarum enil, nújuju ebeben waf, nummemmeŋ gábboli, ban nuhat sílam sasu so numaŋenil me ekan. ³Maer ñer, Atúla, uŋarom min íelo. Ey, eĉet efaŋom buroŋ. » ⁴Ñer Atúla naagol : « Núinene ni maageni fiiñi fitiñ me ? »

⁵Sonas ñer nágat ak’arobo ga galam gaa Niniv bo tinah túᵽureul me. Nacokor bo gateb min áuro, tima mb’ajuh wajae me ebaj n’ésuh yay yaa Niniv. ⁶Ñer Aláemit Atúla nakan jununuh jiilo bi éurenol, ni may bi ealen fiiñol. Sonas ni súmol nár mata jo.

⁷Tihalen fo, bala tinah túᵽurul, Aláemit náboñul eo ek’eya jununuh jaju min jihay. ⁸Mbi no tinah titebulo me, ni baj érus yásuᵽe yo Aláemit ainnulo bo tinah túᵽureul me, ban bunaa babu m’búsuᵽ nár ni fuhow Sonas ak’amaŋ érit. Ñer naᵽinor eĉet bare, naah : « Eĉet éhoyumom buroŋ. » ⁹Aláemit narorenol : « Aw núinene ni maageni fiiñi fitiñ me mata jununuh jauju ? » Nábahulol : « Ey, ni maagenom fiiñom fitiñe, iki imaŋ eĉet. »

¹⁰Atúla nabbañ aagol : « Aw enili erundum jununuh jauju, ban aw ukanut jo burok bánoban. Let aw ukan jo n’jiilo. N’efuga yanur jibbage, n’efuga yanur may jihae. ¹¹Uluj Niniv : Gaam dó me gufaŋe súuli ekeme ni ávi, gaffasut me maaro ni maarat. Baj ró may súnuhureŋ sammeŋe. Ñer aw nuoge ésuh yauyu yájalo me yaamme Niniv, ínje iarenat irum yo enil ? A-a, íjuut ikan mo ! »