1 TIMONTE

Eletar yay étiar yo Pool ahiĉ me

Tímonte

Waf waw wabaj me n’eletar yauye

Ñammeŋe, Tímonte nauneniwunen n’élebur yay yaa Mukanay Uᵽotoraaw ni ᵽoᵽ ni siletar sasu saa Pool. Maagen mamu, Tímonte arambena omene ala Pool ni burokol. Nátinenol n’újaorol wammeŋe. Pool naboñol ajow ulago wátañie, fáŋum wo najow me bi Tesalonik ni ᵽoᵽ bi Korent.

Pool nahiĉe Tímonte siletar súuba. Siletar sausu sihiĉi no ejangara gútiar guju me éinen, no gúĉit jangu yauyu guileni me guban. Maer ñer ŋañool esen sijangu sasu gailo gagu gájahor me ni ᵽoᵽ eliŋen gáinen gagu gala so.

Eletar yay étiar yay ehiĉihiĉ bi etar ejangaraay, ufan sijangu sasu, ni ᵽoᵽ aĉila Tímonte faŋaol.

Baje ejangara guce guman bugo nihi gubet bugan bugagu ni galim ni baloberil (1 Tímonte 1.3-7 ; 4.1-4 ; 6.3-5). Ni bajugeril buroŋ babu bal eliᵽ wásum me enil buarat, yaĉil me n’gulat waf waa búyabo, ni ᵽoᵽ etiñ mitiñay micemo. Ban wo Aláemit átut me ᵽee úariari. Dáuru Tímonte aat me aosen ejangaraay.

Ni guomunor ejangaraay baj ró ufan sijangu sasu gáĉibbeneil me ban nihi guligenil ; babaj ró may bugan bugagu garambeneil me ban ni gurok bi mala galeh me ni ᵽoᵽ bi mala úsotaaw.

Bugaa guomunor gaugu gusoholae eroŋ ni gásumay, gusoholae ᵽoᵽ min ésuh yay guruhenil. Pool nahiĉe eletar yauye bi etar bugan bugagu mala bu guot me nihi gukan bíteŋen babu, ni may bu guot me nihi gulaw nogor (1 Tímonte 2). Nagitene ᵽoᵽ bu ufan jangu yay guot me guroŋ nogor (1 Tímonte 3).

Tímonte ᵽayol an mo ala mof mamu maa Geres ; jaol, o, ajangara Asúif átut omene. Tímonte Pool aogenol min aligenol, yaĉil me náni ti añil áᵽullo ni farol. Nabile áni áĉibbena-bugan, afan ala sijangu. Pool n’eletar yauye nagitenol búoh naate anamo aroka aaro ala Yésu Kirista. Nagitenol may bu náari me ajoh guñen gúuba ajangara ánoan dó ni guomunor gagu, ni ᵽoᵽ wo naat me aligenil ban nah’ataril.

Basaf babu baa Pool

¹Injé Pool aamme aᵽotora ala Kirista ihiĉuli eletar yauye. Aᵽagenaolal Aláemit ni Yésu Kirista o núhagumal me ni o, bugo gumaŋe min íni aᵽotora. ²Injé ihiĉuli eletar yauye, aw Tímonte, aamme añolom ala maagen ni gáinen gagu : mbi Ᵽayolal Aláemit ni Ataolal Yésu Kirista guseni gáji, ñarum enil ni gásumay.

Mala ékanum uligenaaw gálodit me maagen

³Ti nilai yo me no niomme n’ejow mbaa Masedonia, urobo ᵽan dó Efes dó nuom mee. Baj dó bugan gaam n’eligen ésuh yay gurim gannamut ni wo núinenal me ni wo. Nuote úfirenil ekan burok ti baubu. ⁴Uogil guhat urej waw wañulout mee, guhat ᵽoᵽ eᵽinen sipaya gufan yámusut ebao : úru ndi ramben bugan bugagu ni gáinenil min guffas waf waw wo Aláemit aamme n’ekan, bare síceŋor bare nihi ŋárul. ⁵Nilobilob maa min mbi gurimom guinnul ni bugan bugagu gábbolior gáᵽullo n’éĉigir yakure ni biinum baaro, sammeŋe gáinen gaa maagen. ⁶Baje hum bugan guce gahalene dáuru ᵽe dauneni mee min gunogen ni síceŋor sabajut nafa yánoyan. ⁷Gumaŋe gujogil uligena búgamah bugaa gúboñ Aláemit, bare gurim gagu go bugo faŋail gulobe me gujogut go, hani sulob sasu so gulobe mee ni gafium dó.

⁸Nuffasale ᵽe búoh gúboñ gagu gaa Móis waf waaro, íni me nunabenale ni wo gulob me. ⁹Nuffasale may búoh gúboñ gaugu let bi ni bugan bugagu gakane me maaro gúomum to, bare til bi n’ukana-maarat bugagu, bi ni gaceŋe me ekan wo gulobil me, bi ni gálaᵽut me ni utilaaw, bi ni gákanumut me Aláemit ni wánowan wanab me, bi ni gamuge me sipail ter sijail, ter bugagu, ¹⁰bi ni bugagu gafiye me ni aletalet, bi ni wáineaw gafilene me gupalil wáine, bi ni gannomene me umigel, bi n’ubijaaw ni bugagu gabbate me ni jibij ró, ni bugagu ᵽe gakane me waf uce mul wannamut ni baligener babu baa maagen. ¹¹Baligener baubu ni Firim fafu Fásum me bujoumulo, falob me mala bájalo Aláemit ammeŋ me gasal. Nafiumomfium bireg nasenom fo min mb’ivare fo.

Pool o n’esal Yésu Kirista mala músumol

¹²Injé umu n’esal Ataolal Yésu Kirista, mala min ajoh me búoh niᵽiloᵽilo bi éni aroka ola, ban nasenom sembe sasu sal ekan burok baubu. ¹³Hani min iloben me maarat iya ni o, min iyogenenol me, min ijelenol me, bare Aláemit narumom enil mata iffasenut wa nikanene, ban gáinen gánogan gulelen n’ínje. ¹⁴Maagen Ataolal Yésu Kirista nammeŋenom gájiol iki gupus, min ñer asenom gáinen ni gábboli so gajogor gagu ni o nihi gúŋarul me.

¹⁵Firim ufe faa maagen faᵽiloe min bugan bugagu ᵽe gukan fo ni gaᵽin : Yésu Kirista najoulojow ni mof bi eᵽagen bugan bugagu gatile me, ban ínje gatilom gufaŋe wolil ᵽe. ¹⁶Bare Aláemit narumom enil min Yésu Kirista agiten gamutenol ᵽoogo go náju me n’ínje, aamme atila ahu átiar. Nakanmokan min mbi ní fútalloum bi ni bugan bugagu gajae me éinen ni o, ban ni guyab buroŋ bábaerit. ¹⁷Mbi bugan bugagu ᵽe gumigelet ban ni gusal Aláemit bi nánonan, aĉila aamme Aví ahu ala bándor añumut me émus aĉet, o an mát’áju me ajuh, aamme Aláemit ahu anur pat ala maagen ! Amen !

¹⁸Añolom Tímonte, niseni ñer firim faufe fannam me ni wo Aláemit alob me míya n’utum waa bugan ᵽio bo. Ujoh gurim gaugu ti nihi gúni me mitiguma min mb’úju utih fitih fafu fáari me, ¹⁹aw n’ejoh gáinen gagu gúiya guñen gúuba ban nubaj biinum bakure. Baje bugan bugo uinumil ukurut galale ekan mo, ban ñer guĉile mamu min gáinenil gullim. ²⁰Baje ni bugan bugaubugi Himene bugo ni Alsandul, bugo nihat me ni guñen gaa Seytane min mbi guteh mahat mala gújel gagu go gujele me Aláemit.

Mala elaw bi ni bugan bugagu ᵽe

¹Firimom fáamumma fo fuomme min uakenal ni galaw n’écin nímoro Aláemit bi ni bugan bugagu ᵽe. Nuotale ufotenoral bújoŋorol ban nusalalol mala wo nakanolal me ᵽe. ²Mbi galaw gukani bi ni úviaw ni bugagu ᵽe gaamme ni guhow gagu, tima nújual uroŋal buroŋ bájebie, baa gásumay, bo an mat’ajel, dó ᵽe min úkanumal Aláemit ban nuroŋal buroŋ baᵽiloe eyab gasal. ³Dáuru díari me ban ni dúsum Aláemit aamme aᵽagenaolal, ⁴amaŋ me bugan bugagu ᵽe guyab gaᵽah ban ni jáenumil iki guffas maagen mamu.

⁵Maagen mamu Aláemit anur pat abaje,

ban ᵽoᵽ ajaa-bulago anur pat abaje tutor Aláemit ni bugan bugagu.

An ahumu o aamme Yésu Kirista,

⁶asen me súñunduol bi eallor utilolal wolal ᵽe.

No tinah talu to Aláemit aᵽi me naĉob tiĉih me,

Yésu Kirista nakan mo bi egiten me búoh

Aláemit namamaŋ min bugan bugagu ᵽe guyab gaᵽah.

⁷Dáuru diĉil me min Aláemit aĉobom íni aloba-uhoŋen ni ᵽoᵽ aᵽotora, bi egiten bugan bugagu galet me Esúif wa uomme gáinen ni maagen. Ibijut, maagen mamu nilobeul.

Gailo gagu go ánaine ni anaare guot me gubaj ni jangu

⁸Nimaŋe ñer tánotan wáineaw guteben guñen gakure mbal émit min gulaw m’babajut bitiña-fiiñ ter biinum baa gárig.

⁹Nimaŋe may waareaw nihi gusimo jon, jambi lejeho, jambi ᵽoᵽ sanumeto ; jambi gueĉo gueĉo gattinenie, ter gúibor úibor wal éurus, ter waa banuh, ter mul bisimo básumut ebaj, ¹⁰bare til gukan maaro, ti jáhor me ni waare gaage bugo Aláemit gúkanume. ¹¹Waareaw guote gualenoro ban ni guᵽanor an baamer n’eligenil. ¹²Ijíut min anaare nah’aligen bugan, ter min ágogen ánaine ; naate ajoh butumol. ¹³Leti Aláemit Adam namundum me áuwen, mbiban Eva ? ¹⁴Ban Seytane let Adam nabute, bare til aarema, min alo mamu ni gatil. ¹⁵Bare hani mo bae, aare ahu ᵽan ayab gaᵽah o babuger uñil, íni me najoge liŋ ni éinen yay ni Yésu, íni me nábbolie gupalol, íni me naroŋe buroŋ banabe, íni me may naalenoroe.

Ufan waw bugaa jangu yay

¹Firim faufe mifiumay faah me : An ni buru amaŋ me áni ni fuhow jangu yay, an ahumu namaŋe ekan burok babaje hámma. ²An aam ni fuhow jangu naate áni an o mati bugan bugagu gubaj waf wáhojie gulob guya ni o ; naate ayab anaare anur, naate áni an ájue ejogoro, an o nd’akan gáaĉ, an ájebie, an ájue ealen bugan yaŋol wári, an ájue eligen bugan bugagu. ³Aatut áni áhalla, aatut ᵽoᵽ áni an ala fiiñ, bare til naate áni an abubie, an ala gásumay ; jambi ní an amaŋe síralam nár. ⁴Naate may áni an ájue ejoh yaŋol wári, an o guñolol gúttune firimol ni gákanum dó. ⁵Maagen mamu, an ájuut me aogen yaŋol faŋaol, bu ñer ᵽan áju me acokor Jangu yay yal Aláemit ? ⁶Jambi ᵽoᵽ áni an ajue éinen ni Yésu Kirista ; let mo, ᵽan ateben ubandol nár ban may Aláemit ᵽan ategol ti nateh me Seytane. ⁷An aam ni fuhow jangu naate ᵽoᵽ áni an o bugan bugagu galet me ejangara may gúkanume, mamu jambi bugan bugagu gulalol ban nalo ni fumbal fafu faa Seytane.

Urambenaaw bugaa jangu yay

⁸Urambenaaw ni burok babu baa jangu yay guote may gúni bugan bugo gufiume, guotut gubaj gurim gúuba ; guotut nihi gurem bunuh iki gúgatten, hani may eliᵽ ebut bugan min gubaj síralam. ⁹Guote nánonan gujoh liŋ m’biinum bakure maagen mamu mo Aláemit agitenolal me min úinenal. ¹⁰Ᵽan gáinenil gumundum gúlingeni ; mbi bajut me maarat majugi ni bugo, no ñer ᵽan gúju me gúni urambena bugaa jangu yay.

¹¹Waareaw urambenaaw may guote gúni bugan bugo ésuh yay gufiume, ban may guotut nihi gulob n’ujow bugan. Guote gúni bugan gájue ejogoro ban ni gúni bugan gufiumay ni waf waw ᵽe. ¹²Arambena ala jangu ánoan naate ayab anaare anur ; naate áju eogen jon yaŋol ᵽooyo bi ni guñolol ró. ¹³Arambena ala jangu akan me burokol wári, nah’ababaj gailo gaaro ban náh’ájuju alob ni gakañen dó mala gáinen gagu go nubajal me ni gajogorolal ni Yésu Kirista.

Waf waw waa gáinenolal waffasenuti me

¹⁴Tímonte, ínje umu n’ehiĉuli eletar yauye ni gafium gagu ró gaa búoh mati ᵽio nikeli bujuh. ¹⁵Bare íni me ejoulom ban eᵽio, eletar ye ᵽan egiteni bu nuot me uroŋ nogor ni Jangu yay yal Aláemit, yaamme fiil fafu fal Aláemit ahu aroŋ me. Fiil faufu fo fuomme erujen yay ni fúhag fafu saᵽem me maagen mamu. ¹⁶Ey, an ájuut aceŋ yo, waf waw waa gáinenolal waffasenuti me újalojalo :

Aláemit nagitenoroe ni gáni gal arafuhow,

Biinum Banabe bigitenolal gaĉolol go naĉol me,

ban emalakaay gujugol ;

gajaol guvarei ni súsuh sasu ᵽe,

bugan bugagu bugaa mof gúinene ni o,

ban natebeni bi fatiya n’émit ni gasal ró.

Eĉaf mala baligener babu balet me baa maagen

¹Ban bae Biinum Banabe bulobyolob ŋanno ca búoh ni gunah gagu gúsola bugan guce ᵽan gubelen gáinenil min nihi gúttun balober babu babute me ni baligener babu baa siseytane sasu. ²Ᵽan guhat bugan bugo uinumil uĉele, gálodit maagen, min gullimenil. ³Ubijaaw ubugi guligeneligen bugan bugagu búoh jambi guyab ban jambi gutiñ mitiñay micemo. Ban bae Aláemit nátutul mitiñay maumu min mbi bugan bugagu gáinen me ni o, gaffas me maagen mamu, gulaol ban ni gusalol balama gutiñ mo. ⁴Waf waw ᵽe wo Aláemit átul me úariari ; bajut uce wo mb’úfireni fitiñ, samen balama utiñal wo, numundumal ulaal Aláemit ban nusalalol, ⁵mata firimol ni galaolal ᵽan siĉil wo min úni wola.

Ení aroka aaro ala Yésu Kirista

⁶Ugiten me gurim gauge gutiolal ejangara, ᵽan úni aroka ala maagen ala Yésu Kirista ; yo ᵽan egiten me búoh biinumi bimmemmeŋ gurim gagu gaa gáinen gagu ni baligener babu baa maagen bo nuyab me ban nuroŋ ti bulob me. ⁷Bare urej waw wañulout mee wajaorut mee ni gainen gagu, wo, utey wo. Uligen eroŋ nánonan ni gajogor gagu n’Aláemit. ⁸Maagen mamu, egoren enil ebaje nafa, bare nafa yauyu ereut miñ ; bare gajogor gagu n’Aláemit, go, gubabaj nafa ni waf waw ᵽe, mata gúŋareulŋar gásonien bi ni buroŋ babu baa jama ni ᵽoᵽ babu bájaeul me. ⁹Firim faufu firim fom faa maagen, ban fiᵽiloe min bugan bugagu ᵽe guyab fo. ¹⁰Dáuru diĉil me min wóli jíni n’etaj ni burok, mata gáhagumoli jibangobaŋ n’Aláemit ahu aroŋ me aamme Aᵽagena ahu ala bugan bugagu ᵽe, ni faŋ ala bugagu gáinen me. ¹¹Ugiten bugan bugagu gurim gaugu ᵽe, ban may nuligenil ekan wo gulob me.

¹²Jamb’uhat an min aĉotiheni mala min ukan me añil, bare úni bilihorum bi ni bugan bugagu gáinen me n’Aláemit, ni baloberi, ni bakaneri, ni gábbolii, ni gáineni ni ᵽoᵽ min ukan me an akure bújoŋor Aláemit. ¹³Balama ᵽan iĉigul, mbi nuh’ujanga Bahiĉer babu bújoŋor ésuh yay ᵽe, mb’uaken n’evareil ban may nuligenil. ¹⁴Jamb’ulejehen gáji gagu gaa Biinum Banabe gaamme n’aw, go nuyab me no Aláemit alob me míya n’utum waa bugan, no ufan jangu yay guremben me guñenil ni fuhoi min gúsonieni. ¹⁵Uilo ñer faŋ mala burok baubu ᵽe, usenoro ᵽooi mala bo ; mamu bugan bugagu ᵽe ᵽan gujuh bu nuaken me n’ejaor yay yíya n’Aláemit. ¹⁶Ukánum wo nukane me, núkanum ᵽoᵽ wo nuligene me bugan bugagu. Uaken faŋ n’ekan yay dáuru ᵽe, mata ukan mo me, Aláemit ᵽan aᵽagenul, aw ni bugan bugagu gauttenei me.

¹Jamb’unnur gáfanum gáine bannur bátañie, bare til ulob ni go ti nihi ní me ᵽai nulobe ni o. Ujoh úᵽur waw ti nihi ní me gutii, ²waareaw gáfanum me, bugo, ujogil ti sijai, waareaw upuma jambi biinumi biteb bi ni bugo, bare ujogil ti gúlini.

Mala eramben waareaw bugo wáinil guĉet me

³Ucokor wári waareaw bugo wáinil guĉet me gabajut me an arambenil. ⁴Bare íni me anaare o áinol aĉele nabaje uñil ter gabulaken, uñiaw ubugi guote gumundum guligen ekan dó yaŋil wo bulagoolal buroren me, tima n’gúju gubbañen ubugail maaro mamu mo gukanil me, mata dó waf wom wásume Aláemit. ⁵Anaare o áinol aĉele ban abajut an ajae ecokorol, n’Aláemit náhagume, ban etufunaha n’efuga umu n’elaol to me m’báelout tima narambenol. ⁶Bare ahu o nuffas me búoh gaᵽinorol ᵽe eŋes másume mamu maa mof, o naĉele aban, hani min bae aamme ni buroŋ. ⁷Waf wauwu nuote útallenil jambi baj maarat mo bugan bugagu gújue gulob guya ni bugo. ⁸An acokorut me buganol, ni fáŋum bugaa yaŋol fumumol, an ahumu nahalekalen gáinen gagu gola, ban nafaŋe gaarat an áinenut.

⁹Anaare o áinol aĉele, balama gajaol guhiĉi dó waa waareaw bugo wáinil guĉet me uhiĉi me bi eyab garamben, naate abaj faŋ símit úvi gúfaji (60), ban náni anaare átije n’ánaine anur pat. ¹⁰Mb’áni anaare o bugan bugagu gujuge búoh bakanerol búariari : áni anaare ahure guñolol wári, anaare o nah’ayab sijaora yaŋol wári, anaare aᵽose guot bugan Aláemit, anaare arambene bugan bugagu gaamme ni sílam ban nah’akan waf wánowan waaro.

¹¹Bare waareaw bugo wáinil guĉet me garoŋ me ᵽan ni físimil, bugo, jamb’uhiĉ ró ujail ; mata no gujae me ebaj gafoga gagu gal ebbañ gúyabo, ᵽan gúvu Kirista búsol, ¹²ban ñer ᵽan gulo ni gatil mala min guᵽirih me gajogoril gátiar ni o. ¹³Ban ᵽoᵽ, ᵽan gubaj gaᵽulen gagu gal enamo m’bakanut wáfowaf min nihi gunonor saŋ bugan bugagu ; bare wafaŋ me ᵽe gaarat ni bugo, wo uomme min gujae me ébbañul gúni bugan gammeŋe elob ban ni gumeneŋo, nihi gulob sulob saŋaŋutil. ¹⁴Yo eĉil me nimaŋ waareaw garoŋ me ni físimil bugo wáinil guĉet me gubbañ gúyabo, n’gubaj uñil ban ni gucokor saŋil, jambi usenal ulatorolal bulago bal elob maarat guya ni wolal. ¹⁵Nilobul maa mata guce ni waareaw ubugi gufaene gujunden bulago babu báari me min gulagen Seytane. ¹⁶Eno me baje anaare áinene ni Kirista abaje ni buganol waare bugo wáinil guĉele, naate arambenil ; aatut ahalil n’gúni bíteb bi ni jangu yay, tima jangu yay néju eramben bugagu waare bugo wáinil guĉet me gaamme maagen mamu nevonil.

Mala ufan waw bugaa jangu yay

¹⁷Ufan waw gaogene me jangu yay jon guᵽiloe eyab gasal ñáuba, fáŋum bugagu gaamme ni bíteb babu baa gavare ni eligen nímoro bugan bugagu Firim fafu Fásum me. ¹⁸Maagen mamu Bahiĉer babu buoge : « An mat’uŋar gákanay uoᵽ ni butum ébe yaam n’ehah ble min úfiren yo gafen5.18 Juluj Dáteronom 25.4. » Buoge may : « Aroka naate ayab bacamol. »

¹⁹Jamb’úinen sulob so gutege anafan, íni let bugan gúuba ter gúfaji gamate no sibaj me gukelo gulobi yo. ²⁰Anafan atil me, unnurol bújoŋor bugan bugagu ᵽe min mbi bugagu may gúholi ekan ti o.

²¹Injé ñer umu n’elai faŋ bújoŋor Aláemit, bújoŋor Yésu Kirista, ni ᵽoᵽ bújoŋor emalakaay ganab me iegi : Ukan wo gurim gaugu gulob me m’balujut n’uul bugan bugagu, m’bajogut an afaŋ apalol ni bakaneri. ²²Jamb’usommen me n’eŋar guñeni uremben ni fuhow an bi eñendol áni afan jangu, mata akanut me burokol ti naat me akan bo, gahajenol ᵽan jugum go ; úni nánonan an akure.

²³Jambi nuh’urem mal barebare ; nihi may urem bunuh jatiito min úsoten buruma ni fari, mata núsotoresotor nár.

²⁴Guce utilil ujugeijuh ŋanno ca balama gutaliŋil ; bare guceil, bugo, wolil búsol til nuh’ujugi. ²⁵Bakaner baaro, bo may nihi bujugijuh ŋanno ca, ban hani babu bo ndi bufaen me bujugi bújuut bukoᵽ bíni to me.

Mala umigel waw

¹Bugan bugagu ᵽe gaamme ni fimigelet guote gujoh ufanil bugan gaᵽiloe eyab gákanum gámah, mamu jambi an abaj bulago bal ehajen gajow Aláemit ni ᵽoᵽ baligener babu bo nuligenale me bugan bugagu. ²Umigel waw bugo ufanil gúinen me ni Yésu guotut guceŋ ékanumil mala min guomme gutiil bugo gugum me gáinen ganur ; guote til gufaŋ n’guroke bi ni bugo, mata bugo may bugan bugom gáinene ni Yésu bugo gúbbolie.

Dáuru nuote uligen bugan bugagu ban nukanil min guaken n’ekan wo nulobeil me.

Ekánum baligener babu balet me baa maagen

³Iní me an naligene bugan bugagu bulago bice bábulie min ahabo gurim gagu gaa maagen gal Ataolal Yésu Kirista ni ᵽoᵽ baligener babu bajaor me ni gáinenolal, ⁴an ahumu nammemmeŋ batennoro ban may affasut wáfowaf. Násomusomut gásomut gaa síceŋor ni gárig maa gurim ; dáuru nihi diinnul me ésilaet, gárig, gújel, eᵽinor maarat uya ni an, ⁵ni ᵽoᵽ síceŋor sábaerit tutor bugan bugo uinumil uĉele mala min gubbañut me guffas maagen mamu. Bugan bugaubugi guᵽinore búoh éinen n’Aláemit bulago bom baa bi ni fubaj. ⁶Maagen, éinen n’Aláemit fubaj fom fámah bi n’arafuhow, íni me naree ni wo nabaj me. ⁷Maagen mamu bajut uce wo nuŋallale ni mof me, ti may nújuutal me úᵽunnal ró uce újaenumal. ⁸Yo eĉil me, ubajal me utiñal ban nusimoal, wote ᵽiloolal. ⁹Bugan bugagu galiᵽe me fusanumet nihi gulolo ni gabut ; nihi gulolo n’ékotondiŋ yay yaa gafoga gámah gasoŋete ban ni gúholleni go nihi gújaenumil bi ni gahajen ni gallim. ¹⁰Maagen mamu, ebaj gaija gaa síralam yo néh’éŋarul maarat mánoman. Bugan guce gubabaj gaija gámah gal ebaj so bireg ni gupil guhat gáinen gagu min ñer gúruroro ni sílam sammeŋe.

Pool o n’etar Tímonte batar búsola

¹¹Bare aw aamme an ala Aláemit, utey dáuru ᵽe, ban nuliᵽ ekan waĉol me, waamme éhagum n’Aláemit, gáinen, gábboli, emuten ni gabubi. ¹²Utaj bútaj babu báari me baa gáinen, ujoh to liŋ buroŋ babu bábaerit me bo Aláemit avogi me bi ni bo, bo nulob me mala bo aw n’egiten gáineni bújoŋor bugan gammeŋe. ¹³Injé umu n’elobi bújoŋor Aláemit asene me waf waw ᵽe buroŋ, ni ᵽoᵽ bújoŋor Yésu Kirista alob me gurim gabubie gaa maagen fáĉil Pons Ᵽilat ¹⁴iegi : Ukan wo nilobi me, ban nujoh to liŋ jambi an áju alob to uce, bi no Ataolal Yésu Kirista ajae me ébbañul. ¹⁵Ebbáñul yauyu ᵽan ekano tinah talu baĉiger to Aláemit akiĉ me :

Aĉila aamme Aví ahu anur pat ammeŋ me gasal,

afaŋ me úviaw ᵽe,

Ataw ahu afaŋ me bugagu ᵽe.

¹⁶Aĉila bare añumut me émus aĉet ;

ni gajaŋa naĉine go an mát’áju alof.

Bajut an ámuse ajugol,

ban an mát’áju ajugol.

Gasal ni sembe sábaerit síni ni o bi nánonan !

Amen.

¹⁷Uoh bugan bugagu gasanumet me fusanumet faa buroŋ be jambi gutennoro, ban may jambi gubaŋ gáhagumil ni gubaj gagu gañumut mee eᵽio, bare til gubaŋ go n’Aláemit asenolal me waf waw ᵽe m’baᵽinut, min mbi úsumaetal ni wo. ¹⁸Ulobil min nihi gukan maaro, mo mbi míni me fubajil. Uogil gúni bugan gásume gájue egabor wafil ni bugagu. ¹⁹Mamu, ᵽan guomen bi ni bugo fubaj faaro ban ni fiᵽio bi gajem, min mbi gúju guyab buroŋ babu baa maagen.

²⁰Aw Tímonte o níbboli me nár, ubaŋ joon waf wauwu ᵽe wo Aláemit aseni me uogen. Utey sulob sasu sabajut me nafa sannamut me ni gáinen gagu gololal, ni ᵽoᵽ síceŋor sasu saa bugan bugagu gabije me n’guoh bugo gaffas gace gubaje. ²¹Maagen mamu, guce gumandore ebaj gaffas gaugu, ban gupile guhat gáinen gagu.

Mbi Aláemit ásonienul buru ᵽooul !