1 SAAŊ

Eletar yay étiar yo

Saaŋ

ahiĉ me

Waf waw wabaj me ni siletar sasu saa Saaŋ

Siletar sífaji saa Bahiĉer babu Buvugul babu siffasifas búoh Saaŋ ahiĉ so. Etíar ni siletar sausu ebajut gajow gánogan gal ahiĉa yo. Ahiĉa ahu ala eletar yay éutten ni ala éfatten yay nagitengiten búoh o aamme « afan ahu ». Nakakan afan jangu o bugan bugagu bugo nahiĉ me gúkanume faŋ.

Eletar yay étiar yay egitenut bi ni bugay ehiĉi. Eletar yay éutten yay yo ehiĉihiĉ bi ni « Aare ahu o Aláemit aĉob me ni ᵽoᵽ bi ni guñolol », dóemme bi ni fuomunor ejangara. Efátten yay yo ehiĉihiĉ bi n’ajangara ace gajaol Gaiyus. Aíne ahumu fuomunor fabaje gaunorut tutor ejangara ni gupalil ejangara fiĉilol. Siletar sausu saamme sífaji sihiĉihiĉ bi ni ejangaraay gaffas me joon ewansil yay yaa Saaŋ.

Baje símit ᵽio bo no Firim fafu Fásum me falob me mala Yésu Kirista fujui me evare balama Saaŋ ahiĉ siletarol. Ejangaraay gajangae me ewansil yay yaa Saaŋ gujamorut ni bu gujae me ejoh firimol. Guceil gúᵽure ni guomunor gagu golil gal ejangara. Bugaguil gúguegu gupalil. Gulalat éinen gaa búoh Yésu naŋaŋar gáni gal arafuhow. Ñer guoge gusoholaut Yésu : buroŋol ni eĉelol sibajut nafa ni bugo. Nihi guoh : « Wóli júmusut jitil », « wóli jiffase Aláemit », « wóli ni gajaŋa jom ». Bare buroŋil bigitengiten búoh gubibij.

Saaŋ ni siletarol naaseh ejangaraay jambi gulagen uᵽinor waw walet me waa maagen waya me ni Yésu. Guñol Aláemit gúineyinen búoh maagen mamu Yésu Kirista naŋaŋar gáni gagu gal arafuhow. Gáinenut me ni firim faufu bugo ulator Kirista bugom. Bugan bugagu gáinen me guote gujoh to liŋ tir ni firim fafu fo guun me kábiriŋ ni buju babu. Firim faufu fikelo fiĉimen faufe faah me emaŋ Aláemit bugo ni Yésu, dóemme emaŋ gupali bugan. Buroŋ ejangara buote bujaor ni gáinenil.

Firim fafu fasene me buroŋ

¹Jihiĉululhiĉ eletar yauye bi elobul mala An ahu aamme Firim fafu fasene me buroŋ. Firim faufu fubabaj kábiriŋ ni buju babu. Nuunalfowun ban nujugalfojuh táh ni gúĉilolal, nulujalfoluj ban nugoralfogor ni guñenolal. ²An ahumu aamme buroŋ babu naraŋuloraŋ ban nujugaloljuh. Yo eĉil me wóli n’jíniul n’elob mola, aĉila aamme buroŋ babu bábaerit me baamme ni Ᵽaaya, áᵽullo me ujugalol. ³Wo wóli juun me ban ni jujuh wo, wo juom maa ᵽoᵽ n’evareul, tima wolal ᵽe núnial an anur. Gajogor gagu gololal go guomme gagu go nubajal me ni Ᵽaaya bugo n’Añolol Yésu Kirista. ⁴Jihiĉululhiĉ gurim gauge min mbi ésumayoli érir.

Eroŋ ni gajaŋa Aláemit

⁵Aláemit gajaŋa nam ; bajut emoĉ yánoyan ni o. Firim faufu fo jivareeul maa, fiĉila wóli juun me ni Yésu Kirista. ⁶Uogal me nujogoraljogor n’Aláemit mbiban nuroŋal buroŋ bamoĉe, nubijalbij : ukanutal wo maagen mamu mumaŋ me. ⁷Bare eno me nuroŋale buroŋ baa gajaŋa baŋannoe ti Aláemit fumumol aamme ni gajaŋa, no ñer nujogoraljogor, ban físim fafu fal Añolol Yésu Kirista ᵽan fuᵽos utilolal ᵽoowo.

⁸Uogal me wolal ubajutal util, wolal ubutoroale ban maagen milet ni wolal. ⁹Bare ulobal me Aláemit utilolal, ᵽan aboketolal wo ban ᵽan áᵽuren maarat mánoman maam ni wolal, mata an nam o nah’akan wo nalobe me ban naĉoĉol. ¹⁰Uogal me may ubajutal util, nujogaloljoh abija ban ñer firimol filet ni wolal.

Kirista aamme arambenaolal

¹Gúñum, nihiĉulhiĉ gurim gauge jambi julo ni gatil. Bare eno me ace ni buru natile, nubajale arambena bújoŋor Ᵽaaya : aĉila aamme Yésu Kirista, an ahu aĉol me. ²O faŋaol nasenorosenoro eĉet áni bísimen mala utilolal, ban let mala wololal bare, bare ᵽoᵽ mala waa bugan bugagu ᵽe gaamme ni mof.

³Eno me núkanumale gúboñol, nújuale ubajal gafium gaa búoh nuffasalol. ⁴Eno me an naage « ínje niffasol », mbiban ákanumut gúboñol, an ahumu abija om ban maagen mánoman milet ni o. ⁵Bare eno me an nákanume firimol ban nakan wo fulob me, gábboli gagu go nabaj me bi n’Aláemit ᵽan gúni maagen mamu ni o faŋ. Dáure diĉil maa min újual ubajal gafium gagu gaa búoh nujogoraljogor n’Aláemit : ⁶an aah me o najogojogor bándor ni o, an ahumu naate aroŋ ti Yésu aroŋ me.

Gáboñ gagu gavugul gagu

⁷Gupalom, let gáboñ gavugul nihiĉulul, bare til gáboñ gafan go jiᵽie n’jibaj kábiriŋ ni buju babu. Gáboñ gaugu gafan gaugu go guomme firim fafu fo juun me. ⁸Bare bae mul gáboñ gavugul nihiĉulul, mata maagen mamu mala go mujugijuh ni Kirista ni ᵽoᵽ ni buru. Maagen mamu, emoĉ yay uyu n’ekay, ban gajaŋa gagu gaa maagen gufaene gúni n’eŋannen emoĉ yay.

⁹An aah me o ni gajaŋa gagu nam mbiban nalat atiol, an ahumu naroŋe n’emoĉ yay bi maer. ¹⁰An ábboli me atiol, an ahumu umu nánonan ni gajaŋa, ban bajut uce ni o wájue uĉilol min alo ni gatil. ¹¹Bare an alat me atiol, an ahumu umu n’emoĉ ; umu n’ejow n’emoĉ m’baffasut mbaa bay naam n’ejow, mata emoĉ yay ekanolkan nápim.

Etey waf waw waa buroŋ be

¹²Guñolom, nihiĉululhiĉ bi egitenul búoh util waw wolul uboketiboket, dó ᵽe mala gajow gagu gaa Yésu Kirista. ¹³E sipaya, nihiĉululhiĉ min igitenul búoh buru jiffase an ahu aᵽi me náni kábiriŋ ni buju babu. Uᵽúr waw, buru nihiĉululhiĉ min igitenul búoh jiheke Seytane. ¹⁴Gúñum, nihiĉululhiĉ bi etajen igitenul búoh jiffase Ᵽaaya. Sipayom, nihiĉulul itajen mul bi egitenul búoh jiffase an ahu aᵽi me náni kábiriŋ ni buju babu. Uᵽúr waw, nihiĉulul ibbañ itajen mul bi egitenul búoh jibaje sembe : Firim Aláemit ufu nánonan ni buru, ban jiheke Seytane.

¹⁵Jambi jimaŋ waf waw waa buroŋ be. An amaŋ me buroŋ be, an ahumu ábboliut Aláemit Ᵽaaya. ¹⁶Waf waw waa buroŋ be wo uomme : gamaŋ gaarat gal enil, ésilaet ebaj wo nujugale me, ni ᵽoᵽ batennoro mala fubaj. Waf wauwu ᵽe let ni Ᵽaaya ujoumulo, bare til ni buroŋ be. ¹⁷Ban buroŋ be ᵽan bubao, bo ni waf waw wakane me bugan bugagu min gubaj gaija ; bare an ahu akane me wo Aláemit amaŋ me, o ᵽan aroŋ bi nánonan.

Alatora ahu ala Kirista

¹⁸Gúñum, tinah talu tíbanum tulofulo. Juune búoh Alatora ahu ala Kirista umu n’éjoul. Ban maer, baje ulatora gammeŋe bugaa Kirista gáᵽullo. Dáuru digitenolal me búoh tinah talu tíbanum tulofulo. ¹⁹Ulatoraaw ubugi ni wolal gúᵽurume, bare guᵽiut n’gúnie bugan bugololal. Maagen mamu, enoen me bugan bugololal guomene, ᵽan gúnien nánonan ni wolal. Bare gúᵽupur ni wolal min ŋanno ca búoh bajut ace ni bugo aamen maagen mamu an ololal. ²⁰Buru til jiyayab Biinum Banabe, ban Kirista asenul bo. Yo eĉil me buru ᵽooul n’jiffas maagen mamu. ²¹Min ihiĉulul me, let ter búoh buru jiffasut maagen mamu, bare til mala min jiffas mo me. Ban jiffase ᵽoᵽ búoh jibij jánojan jújuut jújoumul ni maagen.

²²Kan ñer ay aamme abija ahu ? Leti an ahu aceŋ me gaa búoh Yésu aamme Kirista ahu ? An ahumu aamme hum Alatora ahu ala Kirista ; mimanur, naceŋe gaa búoh Aláemit aamme Ᵽaaya ban Yésu náni Añolol ! ²³An aceŋ me gaa búoh Yésu aamme Añil ahu, an ahumu affasut may Ᵽaaya ; an aah me Yésu aamme Añil ahu, an ahumu may naffase Ᵽaaya.

²⁴Yo eĉil me, jikan n’uinumul gurim gagu go juun me kábiriŋ ni buju babu. Eno me gurim gaugu jibaŋgobaŋ bándor n’uinumul, buru ᵽoᵽ ᵽan jujogor n’Añil ahu ni Ᵽaaya. ²⁵Ban wo Kirista alobolal me esen, wo uomme buroŋ babu bábaerit me. ²⁶Bugan bugagu gamaŋ me ebutul bugo guĉile min ihiĉulul gurim gaugu. ²⁷Buru ñer, Kirista naŋaŋar Biinum Banabe akan ni buru. Nemme Biinum baubu ubu nánonan ni buru, jusoholaut min ace akelul eligen uce, mata biĉila ᵽan biligenul waf waw ᵽe. Ban wo bujae me eligenul, waf wom waa maagen, let waf waa jibij. Yo eĉil me jibaj gajogor galiŋe ni Kirista, ti Biinum babu biligenul yo me.

²⁸Ey, guñolom, jujoh guñen gúuba gajogor gagu golul ni Kirista, tima no najae me ébbañul natogolal min ummeŋale gafium, ban jamb’ubajal ñusu bújoŋorol funah fafu fo najae me éjoul. ²⁹Eno me maagen mamu jiffase gaa búoh Kirista an nam aĉole, juote may jiffas gaa búoh ánoan akane maĉole añol Aláemit nam.

Ení uñil bugal Aláemit

¹Jujuh gábboli gagu go Ᵽaaya ábboliolal me ! Gújalojalo bireg nah’avogolal guñolol ! Ban, ti maagen, bugo nuomale. Mof mamu, mo, muffasut Ᵽaaya ; yo eĉil me muffasutolal may. ²Gutiom bugo nimaŋ me nár, maer wolal guñol Aláemit nuomale ; ban min ujaale me éni gajem, uraŋerut ᵽan. Bare nuffasale búoh no Kirista ajae me éraŋul, ᵽan únial ti o, mata ᵽan ujugalol ti náni me. ³Anóan abaje gafium gaugu ni o ᵽan akan to biinumol min áni an akure, ti aĉila Kirista faŋaol aamme an akure.

⁴Anóan ᵽe atile o ákanumut gúboñ gagu gal Aláemit, mata etil yoemme elat ékanum gúboñ gagu gal Aláemit. ⁵Bare buru jiffase gaa búoh Yésu Kirista najoulojow bi éᵽuren util waw, ban aĉila fumumol abajut gatil gánogan. ⁶Yo eĉil me an ajogor me liŋ tir ni o mat’abbañ nah’atil. Bare an ahu aroŋ me n’etil, o, ámusut ajuh Yésu ban may affasutol.

⁷Gúñum, jíkanum jamb’an abutul. An akane maĉole nakakan an aĉole ti Yésu Kirista fumumol akan me an aĉole. ⁸An aroŋ me n’etil, an ahumu an ala Seytane nam, mata Seytane kábiriŋ ni buju babu natilulo. Yauyu eĉil me Añol Aláemit nájoul ni mof bi ehajen búrokum babu baa Seytane. ⁹An áni me añil ala Aláemit, mat’abbañ nah’atil, mata firim Aláemit ᵽan fíni ni o ti nihi ní me eugit yola ; ájuut ñer abbañ atil mul mata añil ala Aláemit nam. ¹⁰An akanut me maĉole, ter ᵽoᵽ amaŋut atiol, an ahumu alet añil ala Aláemit. Maume nújual me uffasal bugay guomme guñol Aláemit, ni may bugay guomme guñol Seytane : ánoan alale ekan maĉole, ter ábboliut atiol, an ahumu alet añil ala Aláemit.

¹¹Maagen mamu, firim faufe faah me úbbolioral juunfowun kábiriŋ ni buju babu. ¹²Jamb’ukanal ti Kaeŋ aamen me añil ala Seytane, amuh me atiol. Ni bu namugumol ? Mata aĉila Kaeŋ bakanerol buarat, bare bal atiol, bo, buĉoĉol.

¹³Gutiom, jambi jijahali bugan bugagu bugaa buroŋ be balalerul. ¹⁴Nuffasale búoh n’eĉet yay núᵽumulale unonal ni buroŋ babu, mata núbbolialboli gutiolal. An ábboliut me atiol, an ahumu naroŋ dó n’eĉet yay. ¹⁵An alat me atiol, an ahumu amuga-bugan nam. Ban jiffase búoh amuga-bugan buroŋ bábaerit bilet ni o.

¹⁶Yésu Kirista nasesen buroŋol mololal ; mamu núffasumal me wa uomme gábboli. Yo eĉil me nuotale may usenal buroŋolal mala gutiolal. ¹⁷Bare eno me asanum najuge atiol majoga bajogerol, mbiban abajut ñarum enil ñánoñan bi ni atiol ahumu, bu ñer asanum ahumu ájue aah gábboli Aláemit ugu ni o ?

¹⁸Gúñum, jambi gábboliorolal gúni gaa gurim ni elob n’utum bare ; bare til ugitenal gábbolior gaa maagen ni bakanerolal. ¹⁹Mamu ᵽan uffasal me búoh wolal bugan bugaa maagen. Mamu ᵽoᵽ uinumolal ᵽan úju me ufilo bújoŋor Aláemit. ²⁰Maagen mamu, hani uinumolal uceŋolal mala bakanerolal, wolal nuffasale búoh Aláemit nafaŋ wo bájalo, mata aĉila naffase waf waw ᵽe. ²¹Gubugeom, íni me uinumolal uceŋut bakanerolal, nújuale uiyal bújoŋor Aláemit ni gafium dó, ²²ban nuyabaleyab wáfowaf wo núcinealol me, mata núh’úkanumalkanum gúboñol, ban nukanal wo namaŋ me. ²³Gúboñol go guomme uge : úinenal n’Añolol Yésu Kirista, ban numaŋoral ti aĉila Kirista alobolal yo me. ²⁴An ákanum me gúboñ Aláemit, an ahumu umu n’Aláemit, ban may Aláemit umu ni o. Ni búkanum baa Biinum Banabe bo nasenolal me núffasumal me búoh Aláemit umu ni wolal.

Biinum babu báᵽullo me n’Aláemit ni babu báᵽullo me ni Seytane

¹Gubugeom, jambi jíinen bugan bugagu ᵽe gájaeul me guĉigul n’guogul Biinum Aláemit buom ni bugo ; jíkimil min jiffas ter biinum babu baamme ni bugo n’Aláemit búᵽullo. Maagen mamu, uboñer gammeŋe galet bugaa maagen gúᵽullo tánotan ni mof me. ²Dáure dújue digitenul ter maagen Biinum Aláemit bom : Anóan ajae me egiten búoh maagen mamu Yésu najoulojow ni gáni gal arafuhow, an ahumu Biinum Aláemit ubu ni o. ³Bare an ajae me elat Yésu ahumu, o biinumol búᵽullat n’Aláemit ; bola bal Alatora Kirista bom, o juun me búoh umu n’éjoul, ban maer naĉilo aban ni mof.

⁴Buru gúñum, buru til bugan bugal Aláemit jom, ban jihehek uboñer waw ubugi galet mee bugaa maagen ; mata Biinum babu baamme ni buru bufaŋe sembe fúf babu baamme n’ulatoraaw ubugi, baamme baa mof. ⁵Bugo bugan bugaa babe ni mof gom ; yo eĉil me baloberil m’bíni may baa mof, ban mof mamu ni múttunil. ⁶Bare wolal bugan bugal Aláemit nuomale. An áni me an ala Aláemit ᵽan áttunolal, bare an alet me ola, mát’áttunolal. Dáuru dijae me ekanolal min únanumal Biinum babu baa maagen ni babu bal ebut bugan.

Aláemit gábboli nam

⁷Gubugeom, úbbolioral, mata gábboli n’Aláemit gujoumulo. An ábbolie bugan o añil ala Aláemit nam, ban an ahumu o naffase Aláemit. ⁸An ábboliut me apalol, o affasut Aláemit, mata Aláemit o gábboli nam. ⁹Aláemit naboñulo ni mof Añolol Erímbani yay min mbi úroŋumal ni o ; mamu nagitenolal mee bu nábboliolal me nogor. ¹⁰Ban gábboli gagu gulet ter ni gábboliolal go wolal úbbolial me Aláemit, bare til ni min aĉila ábboliolal me, aban náboñul Añolol asenoro me ní bísimen bi mala gaboket gal utilolal.

¹¹Gubugeom, nemme Aláemit nábboliolal bábbolier baubu bare mee, nuotale wolal may úbbolioral. ¹²An ámusut ajuh Aláemit. Bare úbbolioral me, Aláemit ᵽan áni ni wolal, ban gábboliol ᵽan gujugi ni wolal ni gárira go ŋanno ca. ¹³Aláemit nasenolalsen Biinumol. Mamu núffasumal me búoh wolal ubugu nánonan n’Aláemit ban may aĉila umu nánonan ni wolal. ¹⁴Wóli jujuge táh ban wóli faŋaóli ubugu n’egiten búoh, Ᵽaaya naboñuloboñ Añolol ni mof min mb’áni Aᵽagena ahu ala mo. ¹⁵An áinen me aban naamben gaa búoh Yésu Añol Aláemit nam, Aláemit umu ni o, ban may o umu n’Aláemit. ¹⁶Maagen, wolal nujugale gábboli gagu go Aláemit ábboliolal me, ban núinenale ni go.

Aláemit gábboli nam ; an aroŋ me ni gábboli ró, an ahumu umu n’Aláemit, ban may Aláemit umu ni o. ¹⁷Gábbolior gagu gaamme ni wolal guote gúrir, mamu nújual ubajal gafium funah fafu faa bataliŋ babu. Ᵽan ubajal go mata maer, ni buroŋ be, nubajalbaj gajogor n’Aláemit ti Yésu Kirista abaj go me ni o. ¹⁸Gáholi gulet ni gábboli ; gábboli gárire nihi guhakam gáholi. An áholi me, dóemme gúteh nanage ; yo eĉil me ñer an áholle gábboliol gúrirut.

¹⁹Wolal núbbolialeboli bugan bugagu mata Aláemit amundum me ábboliolal. ²⁰An aah me : « Injé níbboliboli Aláemit » mbiban nalat atiol, an ahumu abija om. Maagen mamu, an ábboliut me atiol o najuge me, mát’áju ábboli Aláemit o nájugerit me. ²¹Gáboñ gauge Yésu Kirista asenolal mee gaah me : an ábboli me Aláemit, naate may ábboli atiol.

Etebolal ebeŋ ni buroŋ be

¹An áinen me búoh Yésu aamme Kirista ahu, an ahumu o añil ala Aláemit nam ; ban an ábboli me Aláemit Ᵽaaya, ᵽan ábboli ᵽoᵽ guñolol. ²Ubbólial me Aláemit, ban núkanumal ᵽoᵽ gúboñol, dó ᵽan digitenolal me búoh núbbolialboli guñol Aláemit. ³Maagen, ébboli Aláemit, yo yuomme ékanum gúboñol ; ban ékanum gúboñol étañiut, ⁴mata añil ánoan ala Aláemit nahehek mof mamu ; ban ni gáinen gagu gololal núhekumal mo me. ⁵Ay ahek me mof mamu, íni let an ahu áinen me búoh Yésu aamme Añol Aláemit ?

⁶Aĉila faŋaol Yésu Kirista ajoulo bi ni wolal ni mal mamu maa gábatiseol ni físim fafu fal eĉelol. Let ni mal bare najoulo, bare mal ni físim. Ban Biinum Banabe bigitene búoh maagen dom, mata Biinum babu bo buomme maagen mamu. ⁷Kan ñer baje ugitenum wono úfaji : ⁸Biinum babu, mal mamu ni físim fafu ; ban wo waamme úfaji ujamojamor ni yo. ⁹Iní me ban uruhenal bagitener babu baa bugan, ube baamme bal Aláemit bufaŋbofaŋ fúf : Aláemit nagitengiten mala Añolol ! ¹⁰An áinen me ni Añol Aláemit, an ahumu náineyinen ni firim faufu. An áinenut me ni Aláemit, an ahumu najojoh Aláemit aᵽula-elob, mata áinenut ni gurim gagu go Aláemit alob me mala Añolol. ¹¹Gurim gaugu go guomme uge : Aláemit nasenolalsen buroŋ babu bábaerit me, ban buroŋ baubu ubu ni Añolol. ¹²An ayab me Añol Aláemit, buroŋ babu nayabe ; an ayabut me Añol Aláemit, ayabut may buroŋ babu.

Buroŋ babu bábaerit me

¹³Nihiĉululhiĉ gurim gaugu, buru jáinen me ni gajow gagu gal Añol Aláemit, tima n’jiffas búoh jibabaj buroŋ babu bábaerit me. ¹⁴Gafium gauge nubajale n’Aláemit gaa búoh úcinaol me waf wajaore ni búnongumol, ᵽan áttunolal. ¹⁵Nemme nuffasale búoh Aláemit wáfowaf wo núcinaol náttuneolaltun, nuffasale may búoh wo núcineaol me ᵽan asenolal wo.

¹⁶An ajuh me atiol akan gatil gaatut guĉilol naĉet, naate alaw, ban Aláemit ᵽan asen atiol ahumu buroŋ, eno maagen mamu gatil gaugu guotut guĉilol naĉet. Maagen baje gatil go nihi guĉil an naĉet ; let gatil gaugu niegul jilaw mala go. ¹⁷Bakaner bánoban baarat gatil gom ; bare let gatil gánogan nihi guĉil an naĉet.

¹⁸Nuffasale búoh an áni me añil ala Aláemit, mati nah’atil áni to me, mata Añol Aláemit napoyolpoy ban Seytane mát’ájuol ekan wáfowaf. ¹⁹Nuffasale ᵽoᵽ búoh Aláemit aĉilolal, bare mof mamu ᵽe umu ni fujoh faa sembe sasu saa Seytane. ²⁰Nuffasale may búoh Añol Aláemit najoulojow, ban nakanolal min uffasal Aláemit ahu ala maagen. Ni Añolol Yésu Kirista ᵽoᵽ núbajumale gajogor n’Aláemit ahu ala maagen. Kirista ahumu, aĉila fumumol aamme Aláemit ahu ala maagen, aĉila aamme buroŋ babu bábaerit me.

²¹Gúñum, jíkanum úlaemit waw galet me bugaa maagen !