KANYƐ KATSA
Kanyɛ Katsa Fɔlɛtsa Kĩ Bɛnyɛ Bɛtsa Yohanes
11Ovoli kĩĩ kamɛ fɔlɛtsa nyɛ Yesu Kristo kanyɛ katsa a kĩ Baguma kpa ye, kĩ ɛnyɛ ɛtsa ye basumunɛ nɛ fɔtsa a kĩ kɛnɛ kĩ fɔya nɛ lɔkɔ lukũ kamɛ a akũ. Kristo tsã ye ode fɔtɔ ɔnyanɛ akũ ɛfɔ̃ ye ɔsumunɛ Yohanes nyi fɔtsa kĩĩ flee. 2Yohanes lɛmɛ lɛ fɔlɛtsa a kĩ ɛmɔ a flee. Edi adansiɛ nɛ Baguma kalɛ a mɔ ɔnɔkɔali kalɛ a kĩ Yesu Kristo nyɛ ɛtsa ye a akũ. 3Baguma ahila oti a kĩ yakã ovoli kĩĩ, mɔ bati a kĩ batse fɔlɛtsa a kĩ bɛlɛ biyi, kĩ bɛkɛna nɛ foe akũ lɛmɛ a, kitonɛkĩ lɔkɔ a wo ɔtɔ kĩ fɔtsa kĩĩ flee fɔya nɛ foe kamɛ.
Yohanes Wɔ̃na Tɛsɔli Evũkɔnɔ a.
4Yĩ, Yohanes, lamɛna fɔlɛtsa kĩĩ katsɛlɛ kamɛna mi tɛsɔli evũkɔnɔ a kĩ tideĩ nɛ Asia amantam kamɛ a.
Baguma kĩ edzi nkpã, kĩ ɛna kɔkɔɛ, kĩ yaaya a, ɛmɔ mi kɔnya, ɛkpa mi lukudɔ. Ade ayea hũhũ evũkɔnɔ a kĩ ɛdzɛ̃ nɛ ye lɛgãkpo anɛ a, 5mɔ Yesu Kristo ɔnɔkɔali ɔdansini, kĩ ɛnyɛ bati a kĩ Baguma dzɛla etomɛna kanɔkpa kamɛ ɔtɔnyade, kĩ yanya tite akũ fɔgã flee akũ a, bɛmɔ mi kɔnya bɛkpa mi lukudɔ lɛmɛ.
Yawɛ boe kalɛ ade ɛtsã ye wuda kamɛ ɛnyɛ boe etomɛna tɔkpa kamɛ. 6Oti a kĩ eyi lɛgãkanyakɔ̃ ɛkpa boe kĩ bɔnya basɔfɔ busum ye Baguma mɔ Ɔlɛga a, ade ye mɔ mikɔa kukũkpalɛ mɔ kɔbɛ̃ mikpa daa daa! Fɔya lɔmɔ.
7Midã, ɛtsɛ̃ nɛ luflututu akũ yaya!
Odi nyɛ odi aamɔ ye,
ade bati a kĩ bɛtsɔɛ ye lɔtsɔɛ nɛ sɛklabi a lɛmɛ aamɔ ye.
Tite akũ bati flee aawula babe yoo nɛ ye akũ!
Ade aye kɛnɛ kĩ fɔna a!
Fɔya lɔmɔ.
8Boe Ɔlate, Baguma Kpale, kĩ edzi nkpã, kĩ ɛna kɔkɔɛ, kĩ yaaya a, lɛ kĩ, “Yĩ nyɛ Ɔtɔnyade mɔ Owũnade.”
Kristo Kanyɛ Katsa.
9Yĩ, Yohanes, mi ɔwaɛ̃ kĩ bɔmɔ́ mi bɔtsã butomɛna Yesu a, ĩnyɛ mi ɔkɔba kĩ bɔdɔla boe akũ, bɔmɔ́ lubo a kĩ laya kakpa bikĩ bɛnyɛ ye ode lɛgãkanyakɔ̃ bade a. Bɛkɔa yĩ bɛnadzina nɛ tite nɛ mui kayite a kĩ bavɛ Patmos a akũ, kitonɛkĩ nde lɛtsã nɛ Baguma kalɛ a, mɔ ɔnɔkɔali a kĩ Yesu nyɛ ɛtsa a akũ sũ. 10Nɛ boe Ɔlate Luwi a akũ ni, Hũhũ a tɛ yĩ kamɛ, ade nnu odo kɔɔba kĩ ɛnɛ́ ndɛ kagbulɛɛ aye, ade ɛkalɛ kɔdzɛla nɛ yĩ liti a. 11Odo a lɛ kĩ, “Tsɛlɛ lɛtsa a kĩ ɔmɔ́ a kayi, lɔkɔa kakɔa ovoli a kamɛna tɛsɔli a kĩ tideĩ nɛ tɛmatɔ tɛkpale tɛkpale evũkɔnɔ kĩĩ kamɛ. Ade te nyɛ Efeso, Smirna, Pergamo, Tiatira, Sardis, Filadelfia mɔ Laodikea a.”
12Ndani anɛ kĩ madã oti a kĩ ɛlamɛna yĩ kalɛ kabi a, ade mmɔ́ sika ngbã ɔsɛdza titse evũkɔnɔ a. 13Litsedi kĩ lɛla ndɛ Otidziwa Obi aye kĩ edo atadiɛ wulaa kĩ ɛka eko nɛ ye fɔnɛta, ade ɛkɔa sika ngbã abɔsɔ ɛbɔa nɛ ɔwɔlɛ a. 14Ye lɔlɔ tɔlɔ voe fitaa ndɛ kuveli tɛtsã ĩye ndɛ lɛdãglɛglɛ aye, ade ye banebi ata ndɛ fi luwotu aye a. 15Ye fɔnɛta ata ndɛ kɔɔble kĩ bɛvɔlɛ nɛ fi kamɛ, ade ye odo anɛ ndɛ ɔwɔ mui kĩ baka kato ɔtɔ akũ kako waa nɛ lutubu kamɛ a. 16Ɛnɛɛ fusibii evũkɔnɔ nɛ ye sɔmɔna awɛ, ade atugbe mɔ ɔbɔ̃ lɛmɛ nɛ eto ye onukpɛ̃ kamɛ a, ade anɛ kamɛ amɔanɛ ndɛ suwa ketee aye a.
17Kĩ mmɔ́ ye a, nnɛ́ ntɔ nɛ ye abɔa kamɛ ndɛ oti kĩ eku, ade ɛkɔa ye sɔmɔna awɛ ete nɛ yĩ akũ ɛlɛ kĩ, “Tavila! Yĩ nyɛ Ɔtɔnyade mɔ Owũnade, 18mɔ oti a kĩ edzi nkpã! Nku tɔ̃ lɛmɛ finyaa ndzi nkpã daa. Wuda mɔ kanɔkpade tɛsafi deĩ nɛ yĩ awɛ. 19Foesũ tsɛlɛ fɔtsa a kĩ ɔmɔ́, fukĩ fudeĩ finyaa mɔ fukĩ fɔ́aya nɛ foe kamɛ ke liti a kayi. 20Kalɛ kɔlawa kĩ kideĩ nɛ fusibii evũkɔnɔ a kĩ ɔmɔ́ nɛ yĩ sɔmɔna awɛ, mɔ sika ngbã ɔsɛdza titse evũkɔnɔ a kayɔ nyɛ. Fusibii evũkɔnɔ a nyɛ tɛsɔli evũkɔnɔ a ode fɔtɔ banyanɛ, ade ɔsɛdza titse evũkɔnɔ a lɛmɛ nyɛ́ tɛsɔli evũkɔnɔ a.”
2Baguma Ɔlɛdo a Kĩ Ɛkpa Efeso Asɔli a.
1“Tsɛlɛ fɔlɛtsa kĩĩ kama Efeso asɔli a ode fɔtɔ ɔnyanɛ a.
Ade oti a kĩ epini fusibii evũkɔnɔ nɛ ye sɔmɔna, kĩ ɛtsɛ̃ nɛ sika ngbã ɔsɛdza titse evũkɔnɔ kayite a ɔlɛdo nɛ awĩ a.
2Ĩnyina nɔ adzuma flee mɔ ayekĩ ɔbɔa mbɔdi odo ɔwɔlɛ ɔmɔ́ lubo. Ĩnyina kĩ aáwɛ bati kpa fɔlɛtsa kalɛ. Ɔsɔ bati a kĩ bavɛ be akũ kĩ fɔtɔ banyanɛ lɛmɛ bɛnyɛ́ fɔtɔ banyanɛ a ɔdã, ade ɔmɔ́ oyi ɔsũ kĩ bavãlɛvã banɛ a. 3Ĩnyina ayekĩ ɔna ɔwɔlɛ bɔɛɛ ɔmɔ́ lubo nɛ yĩ sũ, lɛmɛ akpɔ táveli nɔ.
4Lɛmɛ ndeĩ kalɛ kadi nɛ nɔ akũ. Ade ke nyɛ kĩ aáwɛ yĩ kalɛ finyaa ndɛ ayekĩ ɔnya lɔtɔ ɔwɛ yĩ kalɛ a. 5Nɛ foesũ ni, te anɛ nɛ nɔ kadzakɔ̃ a kĩ ɔdza oto ɔtɔ a akũ! Dani ɔwɔlɛ kamɛ lɔkɔa kakɛna lɛtsa a kĩ ɔnya lɔtɔ ɔkɛna a. Ntɛ ɔtádani ɔwɔlɛ kamɛ kɔ̃ ni, maaya nɛ nɔ sɛkɛ̃ ĩyaabɔɛ nɔ ɔsɛdza otse a nɛ ye kadzakɔ̃. 6Lɛmɛ lɛtsa a kĩ odeĩ kĩ lawo yĩ anɛ nyɛ kĩ akesĩ Nikolatiafɔ fɔkɛlatsa ndɛ ayekĩ yĩ malo kakesĩ foe a.
7Oti a kĩ edeĩ atɔ ni, etse lɛtsa a kĩ Hũhũ a lamɛna tɛsɔli a kabi,
Oti a kĩ ɛnya akũ ni, maakpa ye nkpã kutse a kĩ kɔdzɛ̃ nɛ Baguma kɔbã a kĩ bavɛ Paradiso a kamɛ babi badi ɛnya.”
Ɔlɛdo a Kĩ Ɛkpa Smirna Asɔli a.
8“Tsɛlɛ fɔlɛtsa kĩĩ kama Smirna Asɔli ode fɔtɔ ɔnyanɛ a.
Ade ɔlɛdo kĩ eto oti a kĩ ɛnyɛ Ɔtɔnyade mɔ Owũnade, oti a kĩ eku lɛmɛ ebuki edzi nkpã a sɛkɛ̃ nɛ awĩ a.
9Ĩnyina nɔ ɔhau flee. Ĩnyina kĩ ohiãni anɛ lɛmɛ nɛ ɔnɔkɔali kamɛ ni, osikani anɛ! Ĩnyina tuwuli kpa a kĩ bikĩ bavɛ be akũ Yudafɔ lɛmɛ bɛnyɛ́ Yudafɔ a, alɛ nɛ nɔ akũ. Bɛnyɛ Abonsam katsu a kamɛ bati. 10Tavila lubo lidi nyɛ lidi kĩ laaya nɛ nɔ akũ a kamɔ. Dã! Abonsam aafɔ̃ bipili mi kamɛ badi bido nɛ kɔla ɛsɔ mi ɛdã, ade míamɔ lubo fuwi ewua a. Di ɔnɔkɔali kakpa yĩ ntɛ fɔ́anya wuda malo, lɔkɔa maakpã nɔ nkpã ndɛ akũ kanya lɛgãbɔɛ aye.
11Oti a kĩ edeĩ atɔ ni, etse lɛtsa a kĩ Hũhũ a lamɛna tɛsɔli bati a kabi!
Bati a kĩ baanya akũ ni, wuda ayade a lɛláatamɔ be.”
Ɔlɛdo a Kĩ Ɛkpa Pergamo Asɔli a.
12“Tsɛlɛ fɔlɛtsa kĩĩ kama Pergamo Asɔli a ode fɔtɔ ɔnyanɛ a kĩ,
Ade oti a kĩ ɛnɛɛ atugbe mɔ ɔbɔ̃ a fɔlɛtsa nɛ awĩ a.
13Ĩnyina nɔ kadzikɔ̃ nɛ awã kĩ Abonsam lɛgãkpo a deĩ a. Opini yĩ dĩ mɔ ɔsĩ mɔ ɔsĩ. Lɔkɔ a kĩ bɛkɔ Antipa, yĩ ɔdansini mɔ ɔnɔkɔalini nɛ mi kamɛ nɛ awã kĩ Abonsam dzi malo ni, ɔtámuniki nɛ yĩ liti, mbom ɔtɛ yĩ odo.
14Lɛmɛ ndeĩ nɔ akũ fɔlɛtsa sukuloo. Bati badi deĩ nɛ mi kamɛ kĩ bitomɔ Balam fɔtsa katsa. Ade Balam kĩĩ lɛtsa Balak tisi ɛkpã Israelfɔ edo nɛ tɔkpa kamɛ, ade ɛfɔ̃ bɛnya funitsã kĩ bɛtɔ bɛkpa baviɔ̃, ade bɛbɔa adɔpaa a. 15Ade ayea odeĩ bati badi nɛ mi kamɛ kĩ bitomɔ Nikolatiafɔ fɔtsa katsa liti a. 16Finyaa, dani ɔwɔlɛ kamɛ! Ntɛ nnɛ́ aye ni, maaya nɛ nɔ akũ mɔatsɛ nkɔa lɛpamɛ a kĩ lideĩ nɛ yĩ onukpɛ̃ kamɛ a nnɔ mɔ bati a.
17Oti kĩ edeĩ atɔ ni, etse lɛtsa a kĩ Hũhũ a lamɛna tɛsɔli bati a kabi. Oti a kĩ ɛnya akũ ni, maakpa ye mana a kĩ bɛkɔa bɛkɔla a adi ɛnya. Bio maakpa ye de fitaa kĩ bɛtsɛlɛ dĩ vɔɛ̃ bite nɛ de akũ. Odima linyína dĩ a, mbɔɛntɛ owula a kĩ ɛtɛ de a odi.”
Ɔlɛdo a Kĩ Ɛkpa Tiatira Asɔli a.
18“Tsɛlɛ fɔlɛtsa kĩĩ kamɛna Tiatira Asɔli a ode fɔtɔ ɔnyanɛ kĩ,
Ade fɔlɛtsa a kĩ futo Baguma Obi, kĩ ye anɛ atɛ̃ ndɛ fi luwotu aye, ade ye abɔa lɛmɛ amɔanɛ ndɛ kɔɔble kĩ bɛvɔlɛ tsɔlitsɔli a nɛ awĩ a.
19Ĩnyina nɔ adzuma a kĩ ɔkɛna. Ĩnyina nɔ ɔdɔ, nɔ katɛkado, nɔ ɔsum, mɔ ayekĩ odeĩ ɔwɔlɛ bɔɛɛ. Ĩnyina kĩ ɔlamɛna adzuma kakɛna finyaa kaba ayekĩ ɔkɛna nɛ kayɔkayi a.
20Lɛmɛ kalɛ a kĩ ndeĩ nɛ nɔ akũ a nyɛ kĩ ɔkpa otsole Isabel a kĩ yavɛ ye akũ Baguma onukpɛ̃ ɔnyɛnɛ osi, kĩ yatsa yĩ basumunɛ fɔtsa, ade yakɛ be kĩ bɛbɔa adɔpaa, bɛnya funitsã kĩ bɛtɔ bɛkpa baviɔ̃ a. 21Nkpa ye lɔkɔ kĩ ɛdani ɔwɔlɛ kamɛ, lɛmɛ yaáwɛ kĩ yafɔ̃ adɔpaa kabɔa. 22Foesũ maafɔ̃ ɛkahɔ nɛ ɔkɛna akũ, awã kĩ bɛmɔ bikĩ babɔa adɔpaa a, ntɛ bɛtádani tɔwɔlɛ kamɛ finyaa ni, baamɔ lubo mɔ ɔsĩ mɔ ɔsĩ. 23Maakɔ bikĩ bitomɔ ye a flee lɔkɔa asafu a flee linyi kĩ yĩ nyɛ oti a kĩ enyina oti ɔwɔlɛ mɔ ye lɔlɔ kamɛ yededeede. Maase mi kamɛ odi nyɛ odi kɔtɔ nɛ ye adzuma a kĩ ɛkɛna a onukpɛ̃.
24Lɛmɛ mi Tiatira bati nkaɛ a kĩ mitátɛ Isabel fɔtsa katsa a, mɔ mi a kĩ mitákɔlɛ fɔtsa a kĩ bavɛ Abonsam kadikanyi dzununuunu a kɔ̃ ni, minu kĩ nláalɔla mi fɔlɔtsa bɛbã. 25Lɛmɛ mipi lɛtsa a kĩ mideĩ a mɔ ɔsĩ mɔ ɔsĩ kɛnaawo kĩ maaya.
26-27Oti a kĩ epi yĩ adzuma a kĩ mawɛ edomɔ akũ kɛnawo kawũna, mɔ ɛnya akũ ni, maakpa ye otumi a kĩ ntɛ ntomɛna Nda sɛkɛ̃ a. Maakpa ye otumi nɛ fude fude akũ, ɛkɔa sɔbɔtsaɛ otse ɛkpã be, lɔkɔa ebubuli be ndɛ ayekĩ babubuli lubui a.
28Ade maakpa ye odenyinawi lisibii a.
29Oti a kĩ edeĩ atɔ ni, etse fɔlɛtsa a kĩ Baguma Hũhũ a lamɛna tɛsɔli bati a kabi.”
3Ɔlɛdo a Kĩ Ɛkpa Sardis Asɔli a.
1“Tsɛlɛ fɔlɛtsa kĩĩ kamɛna Sardis Asɔli a ode fɔtɔ ɔnyanɛ a kĩ,
Oti a kĩ ɛnɛɛ Baguma Hũhũ evũkɔnɔ mɔ fusibii evũkɔnɔ a fɔlɛtsa nyɛ fukĩĩ,
Ĩnyina nɔ adzuma a kĩ ɔkɛna a. Ĩnyina kĩ ɔtɛ dĩ kĩ odzi nkpã, lɛmɛ oku. 2Nɛ foesũ nyinya, kado lɛtsa a kĩ lite nɛ nɔ kamɛ a kĩ laaku a kɔbɛ̃. Kitonɛkĩ mmɔ́ kĩ lɛtsa a kĩ ɔkɛna a tákpɔla tɔ̃ nɛ yĩ Baguma anɛ. 3Foesũ te anɛ nɛ lɛtsa a kĩ bɛtsa nɔ, mɔ lɛtsa a kĩ onu a akũ, kakɛna nɛ foe akũ, kadani ɔwɔlɛ kamɛ. Ntɛ ɔtányinya ni, maayawo nɛ nɔ akũ ndɛ oyekpanɛ aye, ade ɔláanyi lɔkɔ a kĩ maawo nɛ nɔ akũ a malo a. 4Lɛmɛ mi kamɛ badi sukuloo deĩ nɛ Sardis kĩ bɛtádo be tɛtadiɛ tuduli. Baado tɛtadiɛ ovoe bɔmɔ be bɔtsã, kitonɛkĩ bɛkpɔla bɛkpa foe. 5Owula a kĩ ɛnya akũ ni, yaado ye tɛtadiɛ ovoe lɔmɔ, ade nláawɔla ye dĩ ĩnyɛ nɛ nkpã badzinɛ ovoli a kamɛ. Maanyɛ ye ntsa nɛ kanade nɛ Nda mɔ ye ode fɔtɔ banyanɛ anɛ kĩ yĩ ode yanɛ.
6Oti a kĩ edeĩ atɔ ni, etse fɔlɛtsa a kĩ Hũhũ a lamɛna tɛsɔli bati a kabi.”
Ɔlɛdo a Kĩ Ɛkpa Filadelfia Asɔli a.
7“Tsɛlɛ fɔlɛtsa kĩĩ kama Filadelfia Asɔli a ode fɔtɔ ɔnyanɛ a.
Ade fɔlɛtsa a kĩ futo oti kpalɛwa mɔ ɔnɔkɔalini a kĩ ɛnɛɛ Lɛgã Dawid safi a nɛ awĩ a. Ntɛ ebinya kɔla ni, odima lɛláapuli ɛbalɛ koe, ade ntɛ ɛbalɛ koe lɛmɛ ni, odima lápuli kabinya koe.
8Ĩnyina nɔ adzuma a kĩ ɔkɛna a. Mbinya opunu ĩyi nɛ nɔ lɔtɔ kĩ odima lɛláapuli ɛbalɛ ye. Ĩnyina kĩ odeĩ kɔbɛ̃ kabii, lɛmɛ otomɔ yĩ fɔtsa katsa, ade ɔtámuniki nɛ yĩ liti a. 9Dã! Bati katsu kadi deĩ kĩ kɛnyɛ Satana kade, bavãlɛvã a kĩ balɛ kĩ bɛnyɛ Yudafɔ lɛmɛ bɛnyɛ́ Yudafɔ a. Maafɔ̃ bɛyaake aduli nɛ nɔ anɛ, lɔkɔa be flee binyi kĩ mawɛ nɔ kalɛ. 10Nɛ ayekĩ odo ɔwɔlɛ ɔkɛna nɛ yĩ kalɛ akũ, ɔmɔ lubo sũ ni, yĩ malo maanyɛ nɔ ntomɛna sɔhuiɛ lɔkɔ a kĩ laaya nɛ katinya kamɛ flee, kĩ baasɔ bati flee bɛdã a.
11Maaya mɔatsɛ. Pi lɛtsa a kĩ lideĩ nɛ nɔ awɛ a mɔ kɔɔba, ayekĩ odima lɛláatɛ nɔ akũ kanya lɛgãbɔɛ a nɛ nɔ awɛ. 12Maakɛna oti a kĩ ɛnya akũ a ndɛ luku ɛdza nɛ Baguma Asɔli kɔla a kamɛ. Yaadza nɛ awã daa kĩ ɛláabuki ɛnɛ́ nɛ awã da. Maatsɛlɛ yĩ Baguma dĩ, mɔ yĩ Baguma ɔmatɔ dĩ kĩ lɛnyɛ Yerusalem vɔɛ̃ a kĩ ɛka eto ode a nte nɛ ye akũ. Maatsɛlɛ yĩ mɔawɛ dĩ vɔɛ̃ lɛmɛ nte nɛ ye akũ.
13Oti a kĩ edeĩ atɔ ni, etse fɔlɛtsa a kĩ Hũhũ a lamɛna tɛsɔli bati a kabi.”
Ɔlɛdo a Kĩ Ɛkpa Laodikea Asɔli a.
14“Tsɛlɛ fɔlɛtsa kĩĩ kakɔa kamɛna Laodikea Asɔli a ode fɔtɔ ɔnyanɛ a kĩ,
Ade oti a kĩ ɛnyɛ Fɔya lɔmɔ, kĩ ɛnyɛ ɔnɔkɔali ɔdansini wĩ a, kĩ ye nyɛ fɔtsa a kĩ Baguma bɔa katokɔ̃ a fɔlɛtsa nɛ awĩ kĩ,
15Ĩnyina nɔ adzuma a kĩ ɔkɛna a. Ĩnyina kĩ ɔtádɔ, ĩye ɔlá ovio. Mawɛ kĩ adɔ, ĩye ɔna ovio kufɛ! 16Lɛmɛ nɛ ayekĩ adã blɔblɔ, kĩ ɔtádɔ ĩye ɔlá ovio lɛmɛ sũ ni, maatua nɔ ntomɛna yĩ onukpɛ̃ kamɛ nwula! 17Alɛ kĩ, ‘Nna akũ, ndeĩ lɛtsa nyɛ lɛtsa, ade ntásĩ lɛtsama lɛmɛ a.’ Lɛmɛ onyína ayekĩ ɔkɛna pasapasa, mɔ ayekĩ nɔ akũ akɔ kɔnya. Ɔnyɛ ohiãni, odzi ɔdzɔ, ade ɔnyɛ ɔnɛkunɛ a. 18Foesũ madɛ nɔ kĩ ya sika ngbã kĩ binyinyina nɛ fi kamɛ katomɛna yĩ sɛkɛ̃, ayekĩ aadani osikani. Ya lima ovoe lɛmɛ kasua akũ, ayekĩ bɛláamɔ nɔ kɔnyɔã ɔdzɔ a. Ya anɛ kugua kado nɛ banebi kamɛ, ayekĩ aamɔ fɔkɔ. 19Bati a kĩ mawɛ kalɛ a ni, makã be anɛ, ade mavɛlɛ be sɔtɔ a. Foesũ mibɔa mbɔdi midani tɔwɔlɛ kamɛ. 20Mitse! Ndzɛ̃ nɛ onyukpɛ̃ mabɔa awɛ. Ntɛ odi nu yĩ odo mɔ ebinya kɔla a ni, maawo nɛ ye sɛkɛ̃ bɔmɔ ye bɔnya, ade ye malo yaanya nɛ yĩ sɛkɛ̃ a. 21Oti a kĩ ɛnya akũ ni, maafɔ̃ edzi nɛ yĩ ɔwɛ̃ nɛ yĩ lɛgãkpo akũ, ndɛ ayekĩ yĩ malo ĩnya akũ ndzi nɛ Nda ɔwɛ̃ nɛ ye lɛgãkpo akũ a aye.
22Oti a kĩ edeĩ atɔ ni, etse fɔlɛtsa a kĩ Hũhũ a lamɛna tɛsɔli a kabi!”
4Ayekĩ Basum Baguma Nɛ Ode.
1Fukĩĩ liti a, nna kanyɛkatsa bɛbã kadi ade mmɔ́ kĩ bibinya opunu odi biyi nɛ ode a.
Odo a kĩ ĩnya lɔtɔ nnu ndɛ kagbulɛɛ aye a, kĩ ebi yĩ tuwuli tɔ̃ a lɛ kĩ, “De kaya nɛ ode nɛ awĩ, lɔkɔa ntsa nɔ fɔtsa a kĩ kɛnɛ kĩ fɔya nɛ foe kamɛ nɛ fukĩĩ liti a.” 2Deedimɔapɛ Hũhũ wo nɛ yĩ kamɛ. Nɛ ode naa, mmɔ́ kĩ bike lɛgãkpo lidi kĩ odi dzi nɛ de akũ. 3Lukpo a akũ odzinɛ akũ ata muamua ndɛ ahuhɔɛ boe bawovoe mɔ bangbã kĩ bɛtɛ kɔya, ade odetɔ́ kamɛ sinigbɛnɛ kĩ se kalɛkadã la ndɛ tɔɔta gɔ̃ sinya lɛgãkpo a. 4Fɔgãkpo tɛya-ana bɛbã keni fusinya lɛgãkpo a, ade banɔkɔɛ̃ tɛya-ana kĩ bido tɛtadiɛ ovoe, bɛtsa sika ngbã fɔgãbɔɛ dzi nɛ foe akũ a. 5Ɔdetɔ́ kamɛ kamɔanɛ, ɔplala kakpɛnɛ, mɔ fɔwɔla kɔɔba kanɛ kato lɛgãkpo a kamɛ. Tibia evũkɔnɔ kĩ tatɛ̃ dzɛ̃ nɛ lɛgãkpo a anɛ kamɛ. Ade te nyɛ Baguma Hũhũ evũkɔnɔ a. 6Litsedi kĩ ladã ndɛ mpo kĩ bɛkɔa ahuhɔɛ bɛkɛna deĩ nɛ awã nɛ lɛgãkpo a anɛ kamɛ. Ye kamɛ kpalɛ klɛĩklɛĩklɛĩ.
Fɔtsa ɛna kĩ fudzi nkpã, kĩ fudeĩ banebi nɛ liti mɔ lɔtɔ tsua fusinya lɛgãkpo a nɛ fɔkɛ ɛna a akũ. 7Fɔtsa a kĩ fudzi nkpã a fɔtɔnyade a la ndɛ dzata, fɔyade a la ndɛ ɔnantsuenyole, fɔlalɛde a deĩ anɛ ndɛ otidziwa, ade fɔnade a anɛ la ndɛ ɔkɔliɛ kĩ yayidza a. 8Fɔtsa ɛna a kĩ fudzi nkpã a fudi nyɛ fudi deĩ fupoki evũ, ade banebi tsɛna foe kamɛ mɔ foe akũ flee a. Baáfɔ̃ tɔnɔ kasã lɛnyɛ mɔ suwa flee kĩ,
“Boe Ɔlate Baguma Kpale, nɔ akũ kpalɛ!
Nɔ akũ kpalɛ, nɔ akũ kpalɛ!
Ɔna anɛ kɔkɔɛ, odeĩ finyaa, ade aabuki ɔya a.”
9Fɔtsa ɛna a kĩ fudzi nkpã a sã kamu, obu, mɔ kɔlɛkanyɛ tɔnɔ kakpa oti a kĩ edzi nɛ lɛgãkpo akũ, kĩ edzi nkpã daa daa a. Ntɛ bɛsã te lɔmɔ a, 10banɔkɔɛ̃ tɛya-ana a atsa anɛ nɛ tite nɛ oti a kĩ edzi nɛ lɛgãkpo akũ a anɛ kamɛ, kasum ye a kĩ edzi nkpã daa a. Banyɛ be fɔgãbɔɛ kayi nɛ lɛgãkpo a lɔtɔ kalɛ kĩ,
11“Boe Ɔlate mɔ boe Baguma!
Nɔ kĩĩ kukũkpalɛ, obu mɔ otumi fɛta fɔkpa,
kitonɛkĩ nɔ lɛbɔa fɔtsa flee.
Ɔbɔa foe ndɛ ayekĩ awɛ a,
ade fudzi nɛ nɔ kawɛ onukpɛ̃ a.”
5Bɛkɔa Ovoli a Bɛkpa Kavelibi a.
1Fukĩĩ liti a, mmɔ́ ovoli butawa odi nɛ oti a kĩ edzi nɛ lɛgãkpo akũ a sɔmɔna awɛ. Bɛtsɛlɛ fɔtsa nɛ ye kamɛ mɔ liti ade bɛkɔa kɔma fɔtsa evũkɔnɔ bɛtalɛ ye onukpɛ̃ a. 2Mmɔ́ ode fɔtɔ ɔnyanɛ mɔ kɔbɛ̃ odi kĩ ɛbɔa fɔwɔla kɔɔba nɛ ode, evia kĩ, “Owei lɛkpɔla kĩ yaapuli ɛwai kɔma a, ebinya ovoli butawa a?” 3Lɛmɛ odima lɛláa nɛ ode, nɛ tite akũ, ĩye nɛ tite ɔda kĩ yaapuli ebinya ovoli a, ĩye ɛdã ye kamɛ. 4Mbe paa, kitonɛkĩ bɛtámɔ odima kĩ ɛkpɔla kĩ yabinya ovoli a, ĩye ɛdã ye kamɛ.
5Ade banɔkɔɛ̃ a kamɛ ɔmɔa bi yĩ kĩ, “Fɔ̃ kabe! Dã! Dzata a kĩ eto Yuda katete kamɛ a, kĩ ɛnyɛ Dawid kasinu kamɛ obi a nya akũ, kĩ ɛkpɔla kĩ yawai kɔma fɔtsa evũkɔnɔ a kĩ bɛkɔa bɛtalɛ ovoli a onukpɛ̃, ebinya ye lɛmɛ.”
6Kĩ ndã a, mmɔ́ Kavelibi kadi kĩ kɛdzɛ̃ nɛ lɛgãkpo a kayite nɛ fɔtsa ɛna a kĩ fudzi nkpã a kamɛ, ade banɔkɔɛ̃ tɛya-ana a sinya ye a. Fɔdã ndɛ kakɔ bɛkɔ Kavelibi a. Kavelibi a deĩ tɛlɛ evũkɔnɔ mɔ banebi evũkɔnɔ kĩ fɔnyɛ Baguma hũhũ evũkɔnɔ a kĩ edo nɛ tite flee akũ a. 7Kavelibi a naa kɛnatɛ ovoli a etomɛna oti a kĩ edzi nɛ lɛgãkpo a akũ a sɔmɔna awɛ. 8Kĩ yatɛ ovoli a, fɔtsa ɛna a kĩ fudzi nkpã a, mɔ banɔkɔɛ̃ tɛya-ana a tsa anɛ nɛ tite nɛ Kavelibi a anɛ kamɛ. Be kamɛ odi nyɛ odi nɛɛ ɔsankuo mɔ sika ngbã lɔɔda kĩ biyula mɔ titsonu mɔ ɔlɛ̃, kĩ fɔnyɛ bati a kĩ Baguma kpalɛ be akũ a mpaɛbɔ. 9Bɛsã ɔnɔ vɔɛ̃ odi kĩ,
“Nɔ kĩĩ lɛkpɔla kĩ atɛ ovoli a
lɔkɔa ɔwai kɔma evũkɔnɔ a
kĩ bɛkɔa bɛtalɛ ye onukpɛ̃ a.
Kitonɛkĩ nɔ bɛkɔ,
ade ɔkɔa nɔ babɔanɛ,
ɔya bati ɔkpa Baguma a.
Bati kĩ bito fude nyɛ fude, tide nyɛ tide,
ɔmaĩ nyɛ ɔmaĩ kamɛ,
mɔ batidziwa ahɔlɔ ahɔlɔ a kamɛ.
10Ɔkɛna be lɛgãkanyakɔ̃ basɔfɔ kĩ bisum boe Baguma,
ade baanya fɔgã nɛ tite akũ a.”
11Ade kĩ mbuki ndã a, nnu ode fɔtɔ banyanɛ mpim mpim kĩ bɛláapuli bɛkã odo. Bɛdza bisinya lɛgãkpo a, mɔ fɔtsa ɛna a kĩ fudzi nkpã a, mɔ banɔkɔɛ̃ tɛya-ana a. 12Ade bɛsã ɔnɔ kɔɔba kĩ,
“Kavelibi a kĩ bɛkɔ a,
lɛkpɔla kĩ katɛ otumi, mɔ akũ kana, mɔ nyansã,
mɔ kɔbɛ̃, mɔ obu, mɔ kukũkpalɛ mɔ kamu!”
13Adeke nnu kĩ lɛtsa nyɛ lɛtsa a kĩ Baguma bɔa nɛ tite mɔ ode, mɔ tite ɔda, mɔ mpo kamɛ, mɔ fɔtsa a kĩ fudeĩ nɛ foe kamɛ a flee lamɛna ɔnɔ kasã kĩ,
“Kamu, mɔ obu, mɔ kukũkpalɛ
mɔ otumi fɔna daa fɔkpa,
oti a kĩ edzi nɛ lɛgãkpo akũ a mɔ Kavelibi a!”
14Ade fɔtsa ɛna a kĩ fudzi nkpã a tɛ futunɔ kĩ, “Fɔya lɔmɔ!” Ade banɔkɔɛ̃ a tsa anɛ nɛ tite bisum Baguma mɔ Kavelibi a.
6Kavelibi a Wũnya Kɔma Fɔtsa a Kĩ Bɛkɔa Bɛtalɛ Ovoli a.
1Ke liti a, mmɔ́ kĩ Kavelibi a wai kɔma evũkɔnɔ a kĩ bɛkɔa bɛtalɛ ovoli a foe fɔtɔnyade. Ade nnu kĩ fɔtsa ɛna a kĩ fudzi nkpã a kamɛ fɔmɔa lɛ kɔdzɛla ndɛ ɔplala lɛkpɛnɛ kĩ, “Ya!” 2Ndã fɔkɔ ade mmɔ́ ɔpɔnkɔ ovoe odi a. Oti a kĩ edzi nɛ ye akũ a nɛɛ kɔta nɛ awɛ, ade bɛkpa ye lɛgãbɔɛ lidi a. Edzi ye ɛnɛ ndɛ kawũ akũ ɔnyanɛ aye kĩ yanaanya akũ.
3Ke liti a, Kavelibi a wai kɔma kɔyade a, ade nnu kĩ fɔtsa a kĩ fudzi nkpã a fɔyade a lɛ kĩ, “Ya!” 4Ɔpɔnkɔ bɛbã kĩ ɛyɔɔlɛ nɛ́. Bɛkpa oti a kĩ edzi nɛ ye akũ a kɔbɛ̃ kĩ ɛnyɛ lukudɔ nɛ tite akũ, lɔkɔa bati bɛkɔ be akũ akũ. Bɛkpa ye kɔpã kpale kudi.
5Kavelibi a wai kɔma kɔlalɛde a, ade nnu kĩ fɔtsa a kĩ fudzi nkpã a fɔlalɛde a lɛ kĩ, “Ya!” Kĩ ndã fɔkɔ a, mmɔ́ ɔpɔnkɔ tũũtũ odi. Oti a kĩ edzi nɛ ye akũ a nɛɛ sɔbɔtsaɛ a kĩ bakɔa kakali fɔtsa a nɛ awɛ. 6Nnu odo odi kĩ ɛnɛ́ eto fɔtsa ɛna a kĩ fudzi nkpã a kayite ɛlɛ kĩ, “Kamɔnɛ lɔɔda mɔa lɛtɛ luwi mɔa kɔtɔkase, ade fugbanɔ tsensi futukũ ɛlalɛ fɔtɛ luwi mɔa kɔtɔkase, lɛmɛ mitabula kugua mɔ waĩ kade!”
7Ke liti a, Kavelibi a wai kɔma fɔnade a, ade nnu kĩ fɔtsa a kĩ fudzi nkpã a fɔnade a lɛ kĩ, “Ya!” 8Kĩ ndã fɔkɔ a, mmɔ́ ɔpɔnkɔ odi kĩ ye akũ la ndɛ batɔ aye. Oti a kĩ edzi nɛ ye akũ a dĩ nyɛ Wuda ade Kanɔkpade tomɔ ye nɛ liti a. Bɛkpa be kɔbɛ̃ nɛ katinya kamɛ kasɛ̃ kanade a akũ, kĩ bɛkɔa kawũkanɔ, kɔlɛ, fɔsɔ kpa mɔ bayaɛ kpa bɛkɔ bati.
9Kĩ Kavelibi a wai kɔma kulode a, mmɔ́ bati a kĩ bɛkɔ, nɛ ayekĩ bide lɛtsã nɛ Baguma kalɛ a akũ, mɔ ayekĩ bidi adansiɛ nɛ ke akũ sũ a tɛkla nɛ afɔlibɔ atɛnyɛ a kayɔ. 10Bɛbɔa fɔwɔla kɔɔba kĩ, “Baguma Kpale, oti kpalɛwa mɔ ɔnɔkɔalini anɛ! Lɔkɔ lɔwɔdabe koũ aadzɛmɔ tite akũ bati, lɔkɔa ɔvɛlɛ bikĩ bɛkɔ boe a sɔtɔ?” 11Bɛkpa be kamɛ odi nyɛ odi atadiɛ ovoe wulaa ade bibi be kĩ bibuki bidzi bɛwɛya sukuloo kɛnaawo lɔkɔ a kĩ baakɔa be bakɔba basumunɛ mɔ be bawaɛ̃ a kĩ baakɔ ndɛ be aye a lidede bibumɔ be, ayekĩ kakã a onukpɛ̃ aakpɔla.
12Mmɔ́ Kavelibi a kĩ ɛwai kɔma kuvũde a. Tite kuna mɔ ɔsĩ mɔ ɔsĩ, ade suwa dani ndɛ lima ɔɔwɔ tsutsulitsui, odetɔ lɛmɛ dani gbãã ndɛ babɔanɛ aye a. 13Fusibii ka fɔtɔ nɛ tite ndɛ ayekĩ ɔwɛ mɔ ɔsĩ awili kutse babi bũũ kawula a. 14Odetɔ́ kamɛ yɛla ndɛ ɔyaɛ ovoli kĩ bibuta aye, ade bɛbɔlɛ tɔtɔ mɔ tite kĩ mui sinya a tidi nyɛ tidi nɛ te kadzakɔ̃ a.
15Tite akũ fɔgã, abãã banɔkɔɛ̃, sodzafɔ banɔkɔɛ̃, asikafɔ, otumifɔ, bati flee, basate mɔ bikĩ bidzi be akũ akũ a, bɛla nɛ tite tɛkɛ mɔ tɔtɔ akũ boe tɛkɛ kamɛ. 16Ade bɛbɔa fɔwɔla bibi tɔtɔ a kĩ, “Midzuli miko nɛ boe akũ, lɔkɔa mikɔla boe nɛ oti a kĩ edzi nɛ lɛgãkpo akũ a anɛ, mɔ Kavelibi a kalɔkpa onukpɛ̃. 17Kitonɛkĩ be kalɔkpa luwi mɔ libe a wo ɔtɔ. Owei aapuli ɛdza nɛ de onukpɛ̃?”
7Bɛpau Bati Mpim Ɔha Tɛna-ana Nɛ Israel.
1Fukĩĩ liti a, mmɔ́ ode fɔtɔ banyanɛ ɛna kĩ bɛdzɛ̃ nɛ tite tukontoũ ɛna a akũ. Bisua tite akũ ɔwɛ fɔkɔ ɛna a osi, kĩ ɛtavũ nɛ tite akũ, ĩye mpo akũ, ĩye nɛ kutse kudima kamɛ.
2Ade mmɔ́ ode fɔtɔ ɔnyanɛ bɛbã kĩ eto suwa kadekɔ̃ yaya, kĩ ɛnɛɛ Baguma kĩ edzi nkpã a ɔsũkayi fɔtsa a nɛ awɛ. Ɛbɔa fɔwɔla kɔɔba ɛvɛ ode fɔtɔ banyanɛ ɛna a kĩ Baguma kpa kɔbɛ̃ kĩ bɛkɛna tite mɔ mpo awɔda a, 3ɛlɛ kĩ, “Mitakɛna tite, mpo ĩye futse lɛtsamanɔ kɛnaawo kĩ bɔ́akɔa ɔsũkayi fɔtsa buyi boe Baguma basumunɛ a ɔsũ nɛ be nnyɛ.” 4Ade nnu kĩ bati a kĩ biyi be ɔsũ mɔ Baguma ɔsũkayi a kĩ bito Israelfɔ futete ewua-nviã kamɛ a lidede nyɛ bati mpim ɔha tɛna-ana (144,000).
5Nɛ Yuda katete a kamɛ biyi bati mpim ewua-nviã ɔsũ.
Ruben katete kamɛ bati mpim ewua-nviã.
Gad katete kamɛ bati mpim ewua-nviã.
6Aser katete kamɛ bati mpim ewua-nviã.
Naftali katete kamɛ bati mpim ewua-nviã.
Manase katete kamɛ bati mpim ewua-nviã.
7Simeon katete kamɛ bati mpim ewua-nviã.
Levi katete kamɛ bati mpim ewua-nviã.
Isakar katete kamɛ bati mpim ewua-nviã.
8Zebulon katete kamɛ bati mpim ewua-nviã.
Yosef katete kamɛ biyi bati mpim ewua-nviã.
Ade nɛ Benyamin lɛmɛ katete kamɛ biyi bati mpim ewua-nviã ɔsũ a.
Yohanes Mɔ́ Bati Kɔdabu Baũ.
9Fukĩĩ liti a, mmɔ́ bati kɔdabu baũ kudi kĩ odima lɛláapuli ɛkã. Bito batidziwa ahɔlɔ ahɔlɔ a, kade nyɛ kade, ɔmaĩ nyɛ ɔmaĩ, mɔ tide nyɛ tide flee kamɛ, ade bɛdza bɛtsɛlamɔ lɛgãkpo mɔ Kavelibi a. Be flee bido tɛtadiɛ ovoe wulaa, ade bɛnɛɛ tukuo nɛ awɛ a. 10Bɛbɔa fɔwɔla kɔɔba kĩ, “Nkpã katɛ a to boe Baguma a kĩ edzi nɛ lɛgãkpo a akũ, mɔ Kavelibi a sɛkɛ̃!” 11Ode fɔtɔ banyanɛ a flee dza bisinya lɛgãkpo a, mɔ banɔkɔɛ̃ a, mɔ fɔtsa ɛna a kĩ fudzi nkpã a, ade bɛka bɛtsa anɛ nɛ tite nɛ lɛgãkpo a anɛ bisum Baguma, 12bɛlɛ kĩ,
“Fɔya lɔmɔ!
Kamu, mɔ kukũkpalɛ,
mɔ nyansã, mɔ kɔlɛkanyɛ, obu,
kɔbɛ̃ mɔ otumi
nyɛ boe Baguma fude daa daa!
Fɔya lɔmɔ!”
13Banɔkɔɛ̃ a kamɛ ɔmɔa odi via yĩ kĩ, “Bawei nyɛ bikĩ bido tɛtadiɛ ovoe wulaa kĩĩ a? Nɛ ndia bito?”
14Nkpa ye mbuayɛ kĩ, “Yĩ Ɔlate, ĩnyína. Nɔ nyina.”
Ade ebi yĩ kĩ, “Ade be nyɛ bati a kĩ bɛtsã lubo kamɔ kpale kamɛ bɛnɛ sɔũ a. Bɛvɔlɛ be tɛtadiɛ tivoe fitaa nɛ Kavelibi babɔanɛ a kamɛ. 15Ade foesũ bɛdzɛ̃ nɛ Baguma lɛgãkpo a anɛ basum ye lɛnyɛ mɔ suwa flee nɛ ye Asɔli Kɔla kamɛ a. Oti a kĩ edzi nɛ lɛgãkpo a akũ a, aafɔ̃ lɛtsama lɛláakɛna be nɛ ye anɛ kamɛ.
16Kɔlɛ ĩye ɔmɔado lɛláabuki ɛkɔ be da.
Suwa lɛláapila be ĩye ovio libuki ɛkɔ be da.
17Kitonɛkĩ Kavelibi a kĩ kideĩ nɛ lɛgãkpo a kayite a nyɛ be ɔkpãnɛ.
Yaakpã be ɛnamɛna awã kĩ nkpã mui anɛ kato a,
ade Baguma aayɔ babe flee nɛ be anɛ a.”
8Kavelibi a Wai Kɔma Kuvũkɔnɔde a.
1Kĩ Kavelibi a wai kɔma kuvũkɔnɔde a, ode kɛna dĩĩ fɔ́ana ndɛ dɔũhuilɛ sɛkɛ.
2Ke liti a, mmɔ́ ode fɔtɔ banyanɛ evũkɔnɔ kĩ badza nɛ Baguma anɛ a, ade bɛkɔa kugbulɛɛ evũkɔnɔ bido be nɛ awɛ a.
3Ode fɔtɔ ɔnyanɛ bɛbã kĩ ɛnɛɛ sika ngbã ɔnyɔ kate lubui a nɛ́ ɛyadza nɛ afɔlibɔ atɛnyɛ a ɔwɛ̃. Bɛkpa ye tutsonu mɔ ɔlɛ̃ beblebee kĩ ɛkɔa ebumɔ Baguma bati flee mpaɛbɔ, ɛkɔa ɛbɔa afɔliɛ nɛ sika ngbã afɔliɛ atɛnyɛ a kĩ ɛdzɛ̃ nɛ lɛgãkpo a anɛ a akũ. 4Tutsonu a kĩ bite fi a ɔnyɔ, mɔ Baguma bati mpaɛbɔ a nɛ́ nɛ ode fɔtɔ ɔnyanɛ a kĩ ɛdzɛ̃ a awɛ fude fɔnaa Baguma sɛkɛ̃. 5Ke liti a, ode fɔtɔ ɔnyanɛ a nyɛ fi nɛ afɔlibɔ atɛnyɛ a kamɛ eyula ɔnyɔ kate lubui a, ade ɛta foe eko nɛ tite akũ a. Ɔplala kpɛnɛ kɔɔba, odetɔ́ kamɛ mɔanɛ ade tite kuna a.
Ode Fɔtɔ Banyanɛ a Vɔ̃ Be Kugbulɛɛ.
6Ade ode fɔtɔ banyanɛ evũkɔnɔ a kĩ bɛnɛɛ kugbulɛɛ a manɛ akũ kĩ baavɔ̃ be kugbulɛɛ a.
7Ode fɔtɔ ɔnyanɛ ɔtɔnyade a vɔ̃ ye kagbulɛɛ a. Lɛtalɛta lɛdãglɛglɛ mɔ fi kĩ babɔanɛ tsɛka nɛ foe kamɛ ka fɔyako nɛ tite akũ. Tite kasɛ̃ kamɛ katsu kalalɛde vio, tite akũ futse foe kasɛ̃ kamɛ katsu kalalɛde vio mɔ tuwĩ gɔ̃ flee vio.
8Ode fɔtɔ ɔnyanɛ ɔyade a lɛmɛ vɔ̃ ye kagbulɛɛ a. Bɛta litsedi kĩ ladã ndɛ ɔtɔ kpale kĩ ɛkatɛ̃ mɔ fi bido nɛ mpo kamɛ, ade mpo a kasɛ̃ kamɛ katsu kalalɛde dani babɔanɛ a. 9Fɔtsa a kĩ fudzi nkpã nɛ mpo kamɛ a foe kasɛ̃ kamɛ katsu kalalɛde ku, ade tɔkɔlɔ a kĩ titeĩ nɛ mui anɛ a te kasɛ̃ kamɛ katsu kalalɛde bu kade a.
10Ke liti a, ode fɔtɔ ɔnyanɛ ɔlalɛde a vɔ̃ ye kagbulɛɛ a, ade lisibii kpale kĩ latɛ̃ ndɛ ɔbia aye to ode lɛyatɔ nɛ tɔwɔ kasɛ̃ kamɛ katsu kalalɛde mɔ mui kanɛkɔ̃ kamɛ a. 11Bavɛ lisibii kĩĩ kĩ tuwĩ mɔ ɔnyɛ, ade mui kasɛ̃ kamɛ katsu kalalɛde a dani mɔ ɔnyɛ mɔ ɔnyɛ, ade bati beblebee ku a, kitonɛkĩ mui a dani otsonu kpa.
12Ode fɔtɔ ɔnyanɛ ɔnade a lɛmɛ vɔ̃ ye kagbulɛɛ a. Deedimɔapɛ bɛbɔa suwa kasɛ̃ kamɛ kalalɛde, odetɔ kasɛ̃ kamɛ kalalɛde mɔ fusibii kasɛ̃ kamɛ katsu kalalɛde a. Fukĩĩ fɔ̃ kade kanyina kasɛ̃ kamɛ kalalɛde mɔ lɛnyɛ kasɛ̃ kamɛ kalalɛde tána ɔhaĩ.
13Ke liti a, ndã fɔkɔ ade nnu ɔkɔliɛ odi kĩ ɛlamɛna kayidza nɛ ɔwɛ kamɛ flee ɛlɛ mɔ odo kɔɔba kĩ, “Bɔbɔɛ, bɔbɔɛ, bɔbɔɛ makpa bati a kĩ bidzi nkpã nɛ tite akũ ntɛ ode fɔtɔ banyanɛ ɛlalɛ a kĩ bite a yavɔ̃ be kugbulɛɛ a.”
91Ade ode fɔtɔ ɔnyanɛ olode a vɔ̃ ye kagbulɛɛ a. Mmɔ́ lisibii lidi kĩ lɛka lɛtɔ nɛ tite akũ, ade bɛkɔa lɛkɛ dzununuunu a safi bido nɛ ye awɛ a. 2Lisibii a binya lɛkɛ dzununuunu a ade ɔnyɔ tugbluu ndɛ fi luwotu kpale kamɛ ɔnyɔ a nɛ́ eto de kamɛ a. Ɔnyɔ nɛ lɛkɛ dzununuunu a kamɛ fɔ̃ suwa anɛ mɔ odetɔ́ kamɛ ke ɔtũ. 3Koolo nɛ́ eto ɔnyɔ a kamɛ ɛyako nɛ tite akũ, ade bɛkpa koolo kɔbɛ̃ a kĩ kakpɔ̃na deĩ a odu. 4Bibi be kĩ bɛtabula tuwĩ, futse ĩye tuwĩ blɔblɔ tidima kade, mbom bɛkɛna bati a kĩ Baguma ɔsũkayi lɛláa nɛ be nnyɛ a ablɔ. 5Bɛtákpa koolo a osi kĩ bɛkɔ bati kĩĩ, mbom kĩ bɛkɛna be awɔda tidetɔ elo. Ntɛ bɛta oti a, fɔawo ndɛ ayekĩ kakpɔ̃na kata aye. 6Nɛ tidetɔ elo a na kamɛ ni, bati aawɛ wuda, lɛmɛ bɛláana ye, baawɛ kĩ baku lɛmɛ wuda aalo be.
7Koolo a la ndɛ bapɔnkɔ kĩ bɛmanɛ be bɛkpa kawũkanɔ. Litsedi teĩ nɛ be fɔlɔ ndɛ sika ngbã lɔbɔɛ aye, ade be anɛ la ndɛ otidziwa ade aye a. 8Be tɔlɔ la ndɛ batsole tide, ade be adɔ̃ la ndɛ dzata ade a. 9Bɛkɔa litsedi kĩ ladã ndɛ babĩĩ katɛ sɔbɔtsaɛ bɛtsa nɛ tɔwɔlɛ. Be fupoki kamɛ kakuna atunɔ ndɛ ayekĩ bapɔnkɔ mɔ kawũkanɔ tihilili beblebee wula atsɛ banaa kawũ a. 10Bideĩ tɛkã mɔ fubĩĩ ndɛ kakpɔ̃na aye, ade be tɛkã kĩĩ kamɛ kɔbɛ̃ a kĩ baakɔa bɛkɛna bati awɔda a deĩ a. 11Bideĩ lɛgã kĩ lanya be akũ. Ade ye nyɛ fɔtɔ ɔnyanɛ a kĩ yadãmɛna lɛkɛ dzununuunu a akũ a. Ye dĩ nɛ Hebri tide kamɛ nyɛ Abadon, ade bavɛ de nɛ Hela tide kamɛ kĩ Apolion.
12Lubokamɔ kpale lɛtɔnyade a yatɛ̃, lɛmɛ lubo kamɔ nviã buki fɔaya.
13Ke liti a, ode fɔtɔ ɔnyanɛ ovũde a vɔ̃ ye kagbulɛɛ a, ade nnu odo odi kĩ ɛnɛ́ eto sika ngbã afɔlibɔ atɛnyɛ a kĩ ɛdzɛ̃ nɛ Baguma anɛ a atɔ ɛna a kamɛ a. 14Odo a bi Baguma ode fɔtɔ ɔnyanɛ ovũde a kĩ ɛnɛɛ kagbulɛɛ a kĩ, “Wũnya Baguma ode fɔtɔ banyanɛ ɛna a kĩ bisuli bɛdzɛla nɛ Frat ɔwɔ kpale abuĩ a!” 15Ade biwũnya Baguma ode fɔtɔ banyanɛ ɛna a, kĩ bɛmanɛ biyi badzɔlɛ ɔdɔũ a, mɔ luwi a, mɔ odetɔ a, mɔ kateli a kĩ bɛkɔ batidziwa be kasɛ̃ kamɛ katsu kalalɛde a.
16Bibi yĩ kĩ bapɔnkɔ badzinɛ a lidede nyɛ mpim mpim ɔha nviã. 17Ade ayekĩ mmɔ́ bapɔnkɔ mɔ be badzinɛ a nɛ kanyɛkatsa kamɛ a nɛ awĩ a. Bɛbla ɔwɔlɛ babĩĩ katɛ fɔbɔtsaɛ kĩ fɔadã gbãã ndɛ fi katɛ̃ aye, fubuki fɔadã ndɛ safir de aye, fɔyɔɔlɛ lɛmɛ ndɛ sulfa de aye. Bapɔnkɔ a fɔlɔ la ndɛ dzata fɔlɔ aye, ade fi, ɔnyɔ mɔ fukpokpo gɛĩgɛĩ nɛ́ futo be tunukpɛ̃ kamɛ a. 18Bɛkɔa lubo kamɔ fɔtsa ɛlalɛ kĩ fɔnyɛ fi, ɔnyɔ, mɔ fukpokpo gɛĩgɛĩ kĩ futo bapɔnkɔ a tunukpɛ̃ a bɛkɔ batidziwa kasɛ̃ kamɛ katsu kalalɛde. 19Kitonɛkĩ bapɔnkɔ a kɔbɛ̃ deĩ nɛ be tunukpɛ̃ mɔ tɛkã kamɛ. Be tɛkã a la ndɛ bɔɛ aye, kĩ tideĩ fɔlɔ. Ade te bakɔa kakɛna bati ablɔ a.
20Bati a kĩ bite bidzi nkpã a flee, kĩ bɛtákɔ be nɛ lubo kamɔ kĩĩ kamɛ a, támuniki nɛ fɔtsa a kĩ be mɔawɛ bɛkɔa awɛ bɛmɛ a kasum liti. Bɛtáfɔ̃ hũhũ kpa, baviɔ̃ kĩ bɛkɛna mɔ sika ngbã, sika ovoe, kɔɔble, de, ĩye otse, kĩ fɔámɔ, fɔánu ĩye fɔátsã a kasum! 21Bɛtádani tɔwɔlɛ kamɛ nɛ bati kakɔ, kanɔkɔnɛ kadã, linyolewɛ mɔ litsolewɛ, mɔ kaye kamɛ.
10Ode Fɔtɔ Ɔnyanɛ Odi Mɔ Kavolibi a.
1Ke liti a, mmɔ́ ode fɔtɔ ɔnyanɛ mɔ kɔbɛ̃ bɛbã odi kĩ eto ode yaka. Edeĩ nɛ luflututu kamɛ, ade sinigbɛnɛ sinya ye lɔlɔ a. Ye anɛ ata ndɛ suwa aye, ade ye abɔa la ndɛ fi fɔmɛ fuku aye kĩ fɔade nɛ ode a. 2Ɛnɛɛ kavolibi kadi kĩ bibinya a nɛ awɛ. Ɛkɔa ye sɔmɔna kɔbɔa eke nɛ mpo akũ ade ɛkɔa sɛba kɔbɔa lɛmɛ eke nɛ tite akũ a. 3Ɛbɔa fɔwɔla kɔɔba ndɛ dzata amɛ kaklumɛ aye. Kĩ ɛbɔa fɔwɔla a, ɔplala evũkɔnɔ a nyɛ tunukpɛ̃. 4Kĩ ɔplala evũkɔnɔ a nyɛ tunukpɛ̃ a, nwɛ kĩ matsɛlɛ fɔtsa ĩyi, lɛmɛ nnu odo odi kĩ eto ode ɛlɛ kĩ, “Talɛ lɛtsa a kĩ ɔplala evũkɔnɔ a lɛ a onukpɛ̃, tatsɛlɛ foe oyi.”
5Ade ode fɔtɔ ɔnyanɛ a kĩ mmɔ́ kĩ ɛdzɛ̃ nɛ mpo mɔ tite akũ a dzɛla ye sɔmɔna awɛ nɛ ode, 6ɛlɔ fubo nɛ Baguma kĩ edzi nkpã daa a, kĩ ɛkɛna tite mɔ te akũ fɔtsa, ode mɔ ye kamɛ fɔtsa, mpo mɔ ye kamɛ fɔtsa a dĩ akũ kĩ, “Liti kakpa lɛláabuki lɛna! 7Lɛmɛ lɔkɔ a kĩ ode fɔtɔ ɔnyanɛ ovũkɔnɔde a aavɔ̃ ye kagbulɛɛ ni, Baguma nhihiɛ kɔlawa a aaya nɛ foe kamɛ ndɛ ayekĩ ɛnyɛ ɛtsa ye onukpɛ̃ banyɛnɛ a kĩ bɛnyɛ basumunɛ a.”
8Ke liti a, odo a kĩ nnu ntomɛna ode a buki ebi yĩ kĩ, “Naatɛ kavolibi a kĩ bibinya a nɛ ode fɔtɔ ɔnyanɛ a kĩ ɛdzɛ̃ nɛ mui mɔ tite akũ a awɛ.”
9Nnaa ode fɔtɔ ɔnyanɛ a sɛkɛ̃ mbi ye kĩ ɛkɔa kavolibi a ɛkpa yĩ. Ebi yĩ kĩ, “Tɛ ke kaba ke. Fɔ́akɛna mɔ ɔnyɛ mɔ ɔnyɛ nɛ nɔ lupu kamɛ, lɛmɛ fɔ́ana ɔmɛnɛ nɛ nɔ onukpɛ̃ kamɛ ndɛ kɔsã aye.”
10Ntɛ kavolibi a nɛ ye awɛ mba ke. Fɔna ɔmɛnɛ ndɛ kɔsã aye nɛ yĩ onukpɛ̃ kamɛ, lɛmɛ kĩ mmɛna foe a, fɔna ɔnyɛ nɛ yĩ lupu kamɛ. 11Ke liti a, ebi yĩ kĩ, “Kɛnɛ kĩ abuki ode lɛtsã Baguma fɔlɛtsa a nɛ bati, tɛmaĩ, tide mɔ fɔgã pii akũ.”
11Adansifɔ Nviã a.
1Ke liti a, bɛkɔa otse kĩ ɛla ndɛ fɔtsa kakɔna otse bɛkpa yĩ, ade bibi yĩ kĩ, “Naakɔna yĩ Baguma Asɔli Kɔla a mɔ afɔlibɔ atɛnyɛ a, kakã bati a kĩ basum nɛ Asɔli Kɔla a kamɛ lɛmɛ. 2Lɛmɛ takɔna ablanda nɛ Asɔli Kɔla akũ a, kitonɛkĩ bɛkɔa awã bɛkpa amamufɔ. Ade be aasumini Ɔmatɔ Kpalɛwa a nɛ tidetɔ tɛna-nviã kamɛ a. 3Maado yĩ adansifɔ nviã kĩ bidzi nɛ tikpekpe tilima kamɛ, bɛyaade lɛtsã nɛ Baguma fɔlɛtsa akũ nɛ fuwi apim mɔa mɔ ɔha nviã mɔ aduesia kamɛ.”
4Adansifɔ nviã kĩĩ nyɛ kugua futse nviã mɔ ɔsɛdza titse nviã a kĩ tɛdzɛ̃ nɛ tite Ɔlate a anɛ kamɛ a. 5Ntɛ odi wɛ kĩ yakɛna foe ablɔ ni, fi anɛ kato foe tunukpɛ̃ kamɛ kawɔla be mɔ bakesĩnɛ a. Ntɛ odi wɛ kĩ yakɛna be ablɔ ni, baakɔ ye. 6Bideĩ kɔbɛ̃ kĩ basua ode osi kĩ oni ɛtako nɛ lɔkɔ a kĩ bade lɛtsã nɛ Baguma fɔlɛtsa akũ a kamɛ. Bideĩ kɔbɛ̃ lɛmɛ kĩ badani mui bɛkɛna babɔanɛ, ade bideĩ kɔbɛ̃ kĩ bayamɛna lubo kamɔ lidi nyɛ lidi nɛ tite akũ nɛ lɔkɔ nyɛ lɔkɔ kĩ bawɛ.
7Ntɛ bide lɛtsã nɛ Baguma fɔlɛtsa a akũ biyua a, ɔyaɛ kpa a kĩ eto lɛkɛ dzununuunu kamɛ ɛnɛ a, aanɔ kawũ mɔ be. Yaanya be akũ, ɛkɔ be. 8Be banɔkpa aawa nɛ ɔmatɔ kpale a ɔblɔnu akũ nɛ awã kĩ bɛbɔa be Ɔlate nɛ asendua akũ a. Ɔmatɔ a dĩ kɔlawa nyɛ Sodom ĩye Egipte. 9Bati aato ɔmaĩ nyɛ ɔmaĩ, kade nyɛ kade, tide nyɛ tide mɔ katinya kamɛ bati flee kamɛ bɛyaadã banɔkpa a nɛ fuwi ɛlalɛ mɔ sɛkɛ kamɛ, ade bɛláakpa osi kĩ bibila be a. 10Tite akũ bati flee aamɔ kawɔlɛ nɛ bati nviã kĩĩ wuda akũ. Baanya luwi bɛmɛna akũ futelitsa kitonɛkĩ Baguma onukpɛ̃ banyɛnɛ nviã kĩĩ vɛlɛ lubo kamɔ baũ bɛma batidziwa.
11Fuwi ɛlalɛ mɔ sɛkɛ a liti a, nkpã kawɛya to Baguma sɛkɛ̃ kɛyawo nɛ be kamɛ, ade biyidza bɛdza a. Libe paa wo bati a kĩ bɛmɔ́ be a flee. 12Adeke Baguma onukpɛ̃ banyɛnɛ nviã a nu odo mɔ ɔsĩ odi kĩ eto ode ebi be kĩ, “Mide miya nɛ awĩ!” Kĩ be bakesĩnɛ a dza bɛkadã a, bide bɛnaa ode nɛ luflututu kamɛ.
13Nɛ lɔkɔ a na kamɛ pɛpɛɛpɛ a, tite kuna mɔ ɔsĩ mɔ ɔsĩ, ɔmatɔ kpale a ye kasɛ̃ kamɛ katsu kawuade a bubuli bubloo, ade bati mpim evũkɔnɔ ku a. Libe wo bati nkaɛ a, ade bimu ode Baguma a.
14Lubokamɔ mɔ libe lɛyade a yatɛ̃, lɛmɛ fɔlalɛde mɔ libe a aaya finyaa.
Bɛvɔ̃ Kagbulɛɛ Kavũkɔnɔde a.
15Ke liti a, ode fɔtɔ ɔnyanɛ ovũkɔnɔde a vɔ̃ ye kagbulɛɛ a, ade tido kɔɔba nɛ́ nɛ ode tɛlɛ kĩ, “Katinya kamɛ lɛgãkanyakɔ̃ a dani boe Ɔlate mɔ ye Kristo a fude, ade yaanya akũ daa daa a!” 16Adeke banɔkɔɛ̃ tɛya-ana a kĩ bidzi nɛ be fɔgãkpo akũ nɛ Baguma anɛ kamɛ a, ka bɛtsa anɛ nɛ tite bisum Baguma, 17bɛlɛ kĩ,
“Boe Ɔlate otumifɔ,
kĩ edeĩ, kĩ ɛna anɛ kɔkɔɛ.
Bɔanyɛ nɔ kɔlɛ kĩ ɔtɛ nɔ otumi kpale a,
oyi lɛgãkanya a kayɔ!
18Amamufɔ na kalɔkpa,
kitonɛkĩ lɔkɔ a wo ɔtɔ kĩ anyɛ nɔ kalɔkpa ɔtsa.
Lɔkɔ wo ɔtɔ kĩ adzɛmɔ banɔkpa.
Lɔkɔ wo ɔtɔ kĩ ase nɔ basumunɛ onukpɛ̃ banyɛnɛ a kɔtɔ,
mɔ nɔ bati kpalɛwa a kĩ bakpa nɔ obu,
mɔ bati a kĩ bavila nɔ dĩ a,
banɔkɔɛ̃ mɔ babisɛ̃.
Lɔkɔ wo ɔtɔ,
kĩ awɔla bati a kĩ babula tite akũ kade a!”
19Ke liti a, bibinya Baguma Asɔli Kɔla nɛ ode a biyi, ade bɛmɔ́ ye apam adakã a nɛ koe kamɛ a. Deedimɔapɛ, odetɔ́ kamɛ mɔanɛ, tido nɛ́, ɔplala kpɛnɛ, tite kuna ade oni ko mɔ fɔdãglɛglɛ baũbaũ a.
12Otsole a Mɔ Kɔɛ Kpale a.
1Ke liti a, nsɛntsɛlɛni kpale adi nɛ́ nɛ odetɔ́ kamɛ. Otsole odi kɔa suwa esua akũ ndɛ atadiɛ aye. Odetɔ deĩ nɛ ye abɔa kayɔ, ade ɛtsa lɛgãbɔɛ kĩ bɛkɔa fusibii ewua-nviã bɛkɛna de nɛ ye lɔlɔ a. 2Ɛtsɛ̃mɔ kɔma. Ade kĩ sɛmɛ pi ye sũ a, ɛkatsimtsim akũ mɔ fɔwɔla kɔɔba nɛ foe kawo sũ. 3Nsɛntsɛlɛni bɛbã nɛ́ nɛ odetɔ́ kamɛ. Dã, fɔnyɛ kɔɛ kpale ngbã, kĩ kudeĩ fɔlɔ evũkɔnɔ, mɔ tɛlɛ ewua, ade kɔtsa fɔgãbɔɛ evũkɔnɔ nɛ fɔlɔ a akũ a. 4Kɔkɔa koe ɔkã kɔlɔ fusibii kasɛ̃ kamɛ katsu kalalɛde a kutomɛna odetɔ́ kamɛ kɔta kuwula nɛ tite akũ. Finyaa kɔɛ kpale a yidza kɔdza nɛ ɔmatsɔ̃ a kĩ sɛmɛ pi ye a anɛ kamɛ, kĩ ntɛ esila ɛma pɛ kɔ́abɔɛ obisɛ̃ a kɔmɛna. 5Otsole a má obinyole kĩ yaakɔa sɔbɔtsaɛ otse ɛnya fude fude bati flee akũ. Lɛmɛ bɛbɔɛ kabisɛ̃ɛ̃ a lɛtalɛta bɛnamɛna Baguma mɔ ye lɛgãkpo a sɛkɛ̃. 6Otsole a lo ɛnaa kɔsa kamɛ, awã kĩ Baguma manɛ eyi ɛkpa ye kĩ bɛdã ye akũ fuwi apim mɔa, ɔha nviã mɔ aduesia.
7Ke liti a, kawũ nɛ́ nɛ ode. Mikael mɔ ye ode fɔtɔ banyanɛ nɔ kawũ mɔ kɔɛ kpale a, ade kɔɛ a mɔ koe fɔtɔ banyanɛ a nɔ bɛtsɛlamɔ be a. 8Lɛmɛ bɛnya kɔɛ kpale a akũ, ade bɛtákpa koe mɔ koe basumunɛ a osi kĩ bibuki bidzi nɛ ode a. 9Bɛta kɔɛ kpale a bimuni nɛ tite akũ. Ade koe nyɛ anɛ kɔkɔɛ kɔɛ a kĩ bavɛ kĩ Abonsam ĩye Satana, kĩ kɔkɛ katinya kamɛ bati flee a. Koe mɔ koe fɔtɔ banyanɛ a flee bɛta bimuni nɛ tite akũ.
10Ke liti a, nnu odo kpaa odi nɛ ode ɛlɛ kĩ, “Finyaakɔ̃ Baguma oti katɛ ya! Baguma nyɛ ye kɔbɛ̃ ɛtsa ndɛ Lɛgã aye! Finyaa ye Kristo a nyɛ ye otumi kanya! Kitonɛkĩ ɛta oti a kĩ ɛdza nɛ Baguma anɛ ɛkatsua boe bawaɛ̃ onukpɛ̃ kakpa Baguma lɛnyɛ mɔ suwa a emuni. 11Ade be lɛtsã Kavelibi a babɔanɛ, mɔ ɔnɔkɔali fɔlɛtsa a kĩ bidi adansiɛ nɛ ye akũ a bɛnya ye akũ. Bɛwɛ kĩ bakɔa be nkpã bɛkpa faa ntɛ fɔ́anya wuda malo. 12Nɛ foesũ ni, kawɔlɛ kide mi ode, mɔ mi a kĩ mideĩ nɛ awã a flee! Lɛmɛ tite mɔ mpo, bɔbɔɛ makpa mi, kitonɛkĩ Abonsam duma ɛya nɛ mi kamɛ mɔ kalɔkpa, ade enyina kĩ fuwi sukuloo lite ye.”
13Kĩ kɔɛ kpale a mɔ́ kĩ biɛta koe bimuni nɛ tite akũ a, kutomɔ otsole a kĩ ɛma obinyole a liti. 14Lɛmɛ bɛkpa otsole a ɔkɔliɛ kpale fupoki nviã a eyidza ɛnaa awã kĩ Baguma manɛ eyi ɛkpa ye nɛ kɔsa kamɛ a. Baadãmɛna ye akũ nɛ awã futeli ɛlalɛ mɔ sɛkɛ, lɔkɔa ɛwɛya nɛ kɔɛ kpale a awɛ kamɛ. 15Ade kɔɛ kpale a vũma mui kĩ bitini ndɛ ɔwɔ kutomɛna koe onukpɛ̃, bitomɔ otsole a kĩ bɛbɔɛ ye bɛnamɛna. 16Lɛmɛ tite bumɔ otsole a. Tite binya onukpɛ̃ tɛmɔa mui a kĩ kɔɛ kpale a vũma etomɛna otsole a flee. 17Kɔɛ kpale a na kalɔkpa mɔ ɔsĩ nɛ otsole a akũ, ade kɔdzakũ kĩ kɔnaanɔ kawũ mɔ ye babi mɔ bawa nkaɛ a. Ade be nyɛ bati a kĩ bakɛna nɛ Baguma mbla a akũ, kĩ bipini ɔnɔkɔali fɔlɛtsa a kĩ Yesu nyɛ ɛtsa lɛmɛ a. 18Ade kɔɛ kpale a nɛ́ kɔnadza nɛ mpo abuĩ a.
13Yohanes Mɔ́ Bayaɛ Kpa Nviã.
1Ke liti a, mmɔ́ ɔyaɛ kpa odi kĩ ɛnɛ yato mpo kamɛ. Edeĩ fɔlɔ evũkɔnɔ mɔ tɛlɛ ewua, ade lɛgãbɔɛ tsanɛ nɛ ɔlɛ odi nyɛ odi akũ a. Bɛtsɛlɛ mbusuo dĩ kĩ lasupa Baguma bite nɛ lɔlɔ lidi nyɛ lidi akũ. 2Ɔyaɛ kpa a la ndɛ dzakpa aye. Ye abɔa la ndɛ kalikii abɔa, ade ye onukpɛ̃ lɛmɛ la ndɛ dzata onukpɛ̃ a. Kɔɛ kpale a kɔa ye mɔawɛ kɔbɛ̃, ye lɛgãkpo mɔ ye lɛgãkanya otumi kpale a ɛkpa ɔyaɛ kpa kĩĩ. 3Fɔdã ndɛ ɔyaɛ kpa a lɔlɔ mɔa tɛ wuda kaakpa nɛ de akũ, lɛmɛ kaakpa a ku. Fɔkɛna katinya kamɛ bati flee wãwã, ade bitomɔ ye a. 4Bati flee sum kɔɛ kpale a, kitonɛkĩ ɛkɔa ye kɔbɛ̃ ɛkpa ɔyaɛ kpa a. Bisum ɔyaɛ kpa a lɛmɛ bɛlɛ kĩ, “Owei la ndɛ ɔyaɛ kpa kĩĩ? Owei aapuli ɛnɔ kawũ mɔ ye?”
5Bɛkpa ɔyaɛ kpa a osi kĩ ɛlɛ kukũpia mɔ fubusuotsa pii ɛnya akũ tidetɔ tɛna-nviã. 6Eyi kayɔ mɔ Baguma, mɔ ye dĩ, mɔ awã kĩ edzi, mɔ bati flee a kĩ bideĩ nɛ ode a kadumu. 7Bɛkpa ye osi kĩ ɛnɔ kawũ mɔ Baguma bade a ɛnya be akũ, ade bɛkpa ye otumi lɛmɛ nɛ fude nyɛ fude, ɔmaĩ nyɛ ɔmaĩ, tide nyɛ tide mɔ tite bati flee akũ a. 8Tite akũ bati flee aasum ye, mbɔɛntɛ bikĩ be buĩ bɛtsɛlɛ nɛ Kavelibi a kĩ bɛkɔ a nkpã ovoli kamɛ, kito anɛ kĩ bɛbɔa katinya a.
9Foesũ oti a kĩ edeĩ atɔ ni, etse! 10Odi nyɛ odi kĩ bihihiɛ biyi kĩ bipi ye ndom ni, baapi ye ndom, ade odi nyɛ odi kĩ bihihiɛ biyi kĩ yaatɔ nɛ kɔpã onukpɛ̃ ni, yaatɔ nɛ kɔpã onukpɛ̃ kokooko. Ade fukĩĩ kamɛ mɔ kɛnɛ kĩ Baguma bade a bɛna ɔwɔlɛ kado mɔ katɛkado a.
11Ke liti a, mmɔ́ ɔyaɛ kpa bɛbã kĩ ɛnɛ́ eto tite kamɛ. Edeĩ tɛlɛ nviã ndɛ kavelibi aye, ade yalɛ kɔdzɛla ndɛ kɔɛ kpale a. 12Ɛkɛna kɔbɛ̃ kpale a kĩ ɛtɛ etomɛna ɔyaɛ kpa ɔtɔnyade a sɛkɛ̃ a akũ adzuma nɛ ye anɛ kamɛ. Ɛhɛ tite mɔ te akũ bati flee kĩ bisum ɔyaɛ kpa ɔtɔnyade a kĩ ye kaakpa ku a. 13Ɔyaɛ kpa ɔyade kĩĩ kɛna awãwã fɔtsa pii. Ɛfɔ̃ fi malo nɛ futo ode fɔyatɔ nɛ tite akũ nɛ bati anɛ.
14Ɛkɛ tite akũ bati flee mɔ awãwã fɔtsa a kĩ bɛkpa ye osi kĩ ɛkɛna nɛ ɔyaɛ kpa ɔtɔnyade a anɛ sũ. Ɔyaɛ kpa a bi be kĩ bɛmɛ ɔyaɛ kpa a kĩ bipila mɔ kɔpã a lɛmɛ ebuki edzi nkpã a kutidu bɛdzɛla. 15Bɛkpa ɔyaɛ kpa ɔyade a osi kĩ ɛwɛya nkpã edo nɛ ɔyaɛ kpa ɔtɔnyade kutidu a kĩ bɛmɛ a kamɛ, ayekĩ yaapuli ɛlɛ kɔdzɛla, ɛfɔ̃ bɛkɔ bati a kĩ baasĩ kĩ bɛláasum ye a.
16Ɔyaɛ kpa kĩĩ hɛ bati flee, babisɛ̃ mɔ banɔkɔɛ̃, asikafɔ mɔ ahiãfɔ, basate mɔ akũ akũ badzinɛ, kĩ bite sɔkpɔ̃na nɛ be sɔmɔna kɔkpɔ ĩye nɛ be nnyɛ. 17Odima lɛláapuli ɛya fɔtsa ĩye ɛnɔ lɛtsama ntɛ sɔkpɔ̃na kĩĩ liteĩ nɛ ye akũ. Sɔkpɔ̃na kĩĩ nyɛ ɔyaɛ kpa a dĩ, ĩye kakã katsɛlɛ kĩ fɔdzɛ̃ fɔkpa dĩ a.
18Fɔlɛtsa kĩĩ akũ kakɔna sĩ nyansã. Odi nyɛ odi kĩ enyina kadi aapuli ebu ɔyaɛ a dĩ kakã katsɛlɛ a akũ akunta, enu foe kayɔ, kitonɛkĩ kakã katsɛlɛ a dza fɔkpa oti dĩ. Ye kakã katsɛlɛ a nyɛ ɔha evũ mɔ taavũ-evũ (666).
14Kavelibi a Mɔ Ye Bati.
1Ke liti a, ndã fɔkɔ ade mmɔ́ Kavelibi a kĩ ɛdzɛ̃ nɛ Zion ɔtɔ a akũ a. Bati mpim ɔha tɛna-ana (144,000) kĩ bɛtsɛlɛ Kavelibi a dĩ mɔ Ɔlɛga a dĩ bite nɛ be nnyɛ a dzɛ̃ nɛ ye sɛkɛ̃ nɛ awã. 2Ade nnu odo odi kĩ ɛnɛ́ eto ode kĩ ɛla ndɛ ayekĩ mui ato ɔtɔ akũ kaka kako, ĩye ndɛ ayekĩ ɔplala kakpɛnɛ aye. Odo a buki ɛla ndɛ tɔnɔ kĩ babɔa nɛ tɛsankuo akũ. 3Bati mpim ɔha tɛna-ana a dza bɛkasã ɔnɔ vɔɛ̃ nɛ lɛgãkpo a, mɔ fɔtsa ɛna a kĩ fudzi nkpã a, mɔ banɔkɔɛ̃ a anɛ. Otidziwa odima lɛláapuli ɛkɔlɛ ɔnɔ a na, mbɔɛntɛ bati mpim ɔha tɛna-ana a kĩ be odi lɔlɔ kɔtɔ bise nɛ tite akũ a. 4Ade be nyɛ bati a kĩ bɛkpalɛ be akũ, kĩ binyína batsole, bɛnyɛ badedzaa. Ade be atomɔ Kavelibi a kanaa kakɔ nyɛ kakɔ kĩ yanaa a. Ade be lɛmɛ nyɛ bati a kĩ bise be lɔlɔ kɔtɔ nɛ batidziwa kasinu a kamɛ, bɛkɛna be bati batɔnyade lɛmɛ bɛkpa Baguma mɔ Kavelibi a. 5Bɛtámɔ tɔ̃ kĩ bɛma fɔvã, ade nfumusu adima lɛmɛ lɛláa be akũ a.
Ode Fɔtɔ Banyanɛ Ɛlalɛ.
6Ke liti a, mmɔ́ ode fɔtɔ ɔnyanɛ bɛbã kĩ yayidza nɛ tite mɔ ode kayite. Ɛnɛɛ Kalɛ wĩ a kĩ kɛlá kawũna a, kĩ yaade lɛtsã nɛ ke akũ ɛkpa tite akũ bati, batidziwa ahɔlɔ ahɔlɔ, fude nyɛ fude, tide nyɛ tide mɔ ɔmaĩ nyɛ ɔmaĩ. 7Ɛbɔa fɔwɔla kɔɔba ɛlɛ kĩ, “Mivila Baguma, mikpa ye obu, kitonɛkĩ lɔkɔ wo ɔtɔ kĩ yadzɛmɔ batidziwa. Misum ye a kĩ ɛkbɔa tite mɔ ode, mpo mɔ mui kĩ banɛ nɛ tite kamɛ a!”
8Ode fɔtɔ ɔnyanɛ ɔyade tomɔ ɔtɔnyade a ɛkalɛ kĩ, “Ɛtɔ o-o! Babilonia a kĩ ɛtɛ dĩ a tɔ tsoo! Ɛfɔ̃ fude fude flee mɔa ye waĩ mɔ ɔsĩ a kĩ fɔnyɛ linyolewɛ mɔ litsolewɛ a!”
9Ode fɔtɔ ɔnyanɛ ɔlalɛde a tomɔ be nviã a ɛkabɔa fɔwɔla kɔɔba kĩ, “Ntɛ odi sum ɔyaɛ kpa mɔ ye kutidu a kĩ bɛmɛ a, mɔ ɛtɛ ye sɔkpɔ̃na nɛ ye nnyɛ ĩye kɔkpɔ ni, 10yaamɔa Baguma kawũnaba waĩ a kĩ ɛkɔa eko nɛ ye kalɔkpa kɔɔpu kamɛ a. Bati flee a kĩ bɛkɛna fukĩĩ odu a, Baguma aamɔna be lubo nɛ fi mɔ fukpokpo gɛĩgɛĩ kamɛ nɛ ode fɔtɔ banyanɛ kpalɛwa a mɔ Kavelibi a anɛ kamɛ. 11Be lubo kamɔ fi ɔnyɔ a aakade nɛ ode daa daa. Bati a kĩ basum ɔyaɛ kpa a mɔ ye kutidu a kĩ bɛmɛ a, mɔ bikĩ ye dĩ sɔkpɔ̃na a teĩ nɛ be akũ a, lɛláana kawɛya lɛnyɛ mɔ suwa da.”
12Ade awĩ mɔ Baguma bade a kĩ bakɛna nɛ ye mbla a akũ, bɛtɛ Yesu bido lɛmɛ a, sĩ ɔwɔlɛ kado a.
13Ke liti a, nnu odo odi kĩ eto ode ɛkalɛ kĩ, “Tsɛlɛ kayi kĩ, Kito finyaa kanaa ni, Baguma hila bati a kĩ biku nɛ Kristo katɛkado kamɛ a!” Hũhũ a tɛ etunɔ kĩ, “Nuwĩ, Baguma hila be! Baawɛya bitomɛna be lubo kamɔ kamɛ, kitonɛkĩ be tudzuma kakɛna tomɔ be!”
Tite Akũ Bati Kakpɔta.
14Ke liti a, ndã fɔkɔ ade mmɔ́ luflututu fitaa lidi, kĩ litsedi ndɛ otidziwa aye dzi nɛ de akũ. Ɛtsa sika ngbã lɔbɔɛ, ɛnɛɛ lɛsɛga mɔ ɔbɔ̃ nɛ awɛ. 15Ade Baguma ode fɔtɔ ɔnyanɛ bɛbã nɛ́ eto Asɔli Kɔla a kamɛ, ɛbɔa fɔwɔla kɔɔba ebi oti a kĩ edzi nɛ luflututu akũ a kĩ, “Kɔa nɔ lɛsɛga a kanɛna fudutsa, kitonɛkĩ lɔkɔ wo ɔtɔ, tite akũ fudutsa bo fɔkpa kakpɔta!” 16Ade ke oti a kĩ edzi nɛ luflututu akũ a wũnya ye lɛsɛga nɛ tite akũ ɛkpɔta fudutsa a flee a.
17Ke liti a, mmɔ ode fɔtɔ ɔnyanɛ bɛbã odi kĩ ɛnɛ́ eto ode Asɔli Kɔla a kamɛ. Ye malo ɛnɛɛ lɛsɛga mɔ ɔbɔ̃ lidi.
18Ade ode fɔtɔ ɔnyanɛ bɛbã odi kĩ edeĩ otumi nɛ fi akũ a nɛ́ eto afɔlibɔ atɛnyɛ a kamɛ a. Ɛbɔa fɔwɔla kɔɔba ebi ode fɔtɔ ɔnyanɛ a kĩ ɛnɛɛ lɛsɛga mɔ ɔbɔ̃ a kĩ, “Kɔa nɔ lɛsɛga a kakpalɛ waĩ babi a nɛ tite akũ kɔbã a kamɛ, kitonɛkĩ waĩ babi a yɔɔlɛ!”
19Foesũ ode fɔtɔ ɔnyanɛ a wũnya ye lɛsɛga a nɛ tite akũ ade ɛna waĩ babi a nɛ tɔwɛ̃ akũ a. Ɛta be eko nɛ waĩ kakã lɛkɛ kpale, kĩ lɛnyɛ Baguma kalɔkpa a kamɛ. 20Binuna waĩ babi a mɔ fɔnɛta nɛ ɔmatɔ a ɔbaɛ̃, ade babɔanɛ tini bito waĩ kakã lɛkɛ a kamɛ a, bɛtɛ̃ ndɛ ɔwɔ a. Babɔanɛ a kadzũ kamɛ aana ndɛ fɔnɛta elo ĩye ɔpɔnkɔ akũ kadzɛla, ade bitini bɛnaa ndɛ fusikũ ɔha nviã a.
15Ode Fɔtɔ Banyanɛ Kɔa Lubokamɔ Nkaɛ a Bɛyamɛna.
1Ke liti a, mmɔ́ awãwã fɔtsa kpale bɛbã kĩ fɔanyɛnɛ akũ paa nɛ odetɔ́ kamɛ. Ade foe nyɛ ode fɔtɔ banyanɛ evũkɔnɔ kĩ bɛnɛɛ lubokamɔ evũkɔnɔ a. Lubokamɔ kĩĩ nyɛ nkaɛ flee a kĩ foe aanyɛ Baguma kalɔkpa nkaɛ a fɔtsa.
2Ade mmɔ́ litsedi ndɛ mpo kĩ ladã ndɛ ahuhɔɛ kĩ fi tsɛka mɔ ye. Mmɔ́ bati a kĩ bɛnya ɔyaɛ kpa, mɔ ye kutidu a kĩ bɛmɛ́, mɔ ye kakã katsɛlɛ dĩ akũ a, kĩ bɛdzɛ̃ nɛ ahuhɔɛ mpo a abuĩ, bɛnɛɛ tɛsankuo kĩ Baguma kpa be.3Bɛkasã Baguma ɔsumunɛ Mose mɔ Kavelibi a ɔnɔ kĩ,
“O boe Ɔlate Baguma Kpale,
nɔ tudzuma pɔnɛ,
ade takɛna wãwã a!
Nɔ fude fude flee Lɛgã,
Nɔ tisi adã kpĩĩ,
ade tɛnyɛ ɔnɔkɔali a!
4O boe Ɔlate, owei koũ lɛláavila nɔ?
Owei aasĩ kĩ ɛláado nɔ dĩ obu?
Kitonɛkĩ nɔ odi nyɛ oti kpalɛwa,
fude fude flee a aayasum nɔ,
kitonɛkĩ bɛnyɛ nɔ fɔtsa kakɛna kpĩĩ a bɛtsa bati flee.”
5Ke liti a, ndã fɔkɔ ade mmɔ́ kĩ bibinya Asɔli Kɔla nɛ ode a kĩ Lɛpɛ Kpalɛwa a deĩ nɛ koe kamɛ a biyi. 6Ode fɔtɔ banyanɛ evũkɔnɔ a kĩ bɛnɛɛ lubo kamɔ evũkɔnɔ a nɛ́ bito Asɔli Kɔla a kamɛ. Bido aklala fitaa kĩ yata muamua tɛtadiɛ, ade bɛkɔa sika ngbã abɔsɔ bɛbɔa nɛ tɔwɔlɛ a. 7Ade fɔtsa ɛna a kĩ fudzi nkpã a kamɛ fɔmɔa kɔa sika ngbã tɔkɔɔpu evũkɔnɔ kĩ tiyi tsɔnɔnɔɔnɔ mɔ Baguma kĩ edzi nkpã daa a kalɔkpa, ɛkpa ode fɔtɔ banyanɛ evũkɔnɔ a. 8Ade ɔnyɔ a kĩ eto Baguma kukũkpalɛ mɔ ye kɔbɛ̃ kamɛ a yi Asɔli Kɔla a flee kamɛ a. Odima tápuli ewo nɛ Asɔli Kɔla a kamɛ kɛnawo kĩ lubo kamɔ evũkɔnɔ a kĩ ode fɔtɔ banyanɛ evũkɔnɔ a yamɛna a onukpɛ̃ tsua.
16Bitsokui Baguma Kalɔkpa Nɛ Tɔkɔɔpu Kamɛ a Biko Nɛ Tite Akũ.
1Ade nnu odo kɔɔba odi kĩ ɛnɛ́ eto Asɔli Kɔla a kamɛ ɛkabi ode fɔtɔ banyanɛ evũkɔnɔ a kĩ, “Minaatsokui Baguma kalɔkpa nɛ tɔkɔɔpu kamɛ a miko nɛ tite akũ!”
2Adeke Baguma ode fɔtɔ ɔnyanɛ ɔtɔnyade a natsokui ye kɔɔpu kamɛ fɔtsa a eko nɛ tite akũ a. Bati a kĩ bite be ɔyaɛ kpa sɔkpɔ̃na a, mɔ be a kĩ bisum ye kutidu mɛwa a nɛ́ fɔɔkpa kĩ fɔawo, kĩ fɔakũ lɛmɛ nɛ akũ.
3Ade ode fɔtɔ ɔnyanɛ ɔyade a naa ɛnatsokui ye kɔɔpu kamɛ fɔtsa a eko nɛ mpo kamɛ a. Mui a dani ndɛ ɔnɔkpa babɔanɛ aye, ade lɛtsa nyɛ lɛtsa kĩ lidzi nkpã nɛ mpo kamɛ a ku a.
4Ke liti a, ode fɔtɔ ɔnyanɛ ɔlalɛde a lɛmɛ tsokui ye kɔɔpu kamɛ fɔtsa a eko nɛ tɔwɔ mɔ mui kanɛkɔ̃ kamɛ, ade mui a dani babɔanɛ a. 5Nnu kĩ ode fɔtɔ ɔnyanɛ a kĩ yadãmɛna mui akũ a lɛ kĩ,
“O Oti Kpalɛwa, nɔ kĩ odeĩ daa, kĩ ɔna anɛ kɔkɔɛ a,
akɔ ɔtɔ nɛ osi kpĩĩ akũ!
6Bati kĩĩ ko Baguma bade a mɔ ye onukpɛ̃ banyɛnɛ babɔanɛ nɛ tite,
nɛ foesũ ɔkpa be babɔanɛ kĩ bɛmɔa.
Nuwĩ, sɔtɔ kavɛlɛ kĩĩ fɛta be!”
7Ade nnu odo odi kĩ ɛnɛ́ eto afɔlibɔ atɛnyɛ a kamɛ kĩ, “O boe Ɔlate Baguma, nɔ otumifɔ adi ɔnɔkɔali, ade akɔ kɔtɔ nɛ osi kpĩĩ akũ a.”
8Ode fɔtɔ ɔnyanɛ ɔnade a tsokui ye kɔɔpu kamɛ fɔtsa a eko nɛ suwa akũ, ade bɛkpa se osi kĩ sipila bati mɔ se fi a. 9Fi a otutuo mɔ ɔsĩ a pila bati ade bɛlɛ fubusuotsa nɛ Baguma a kĩ ye deĩ otumi nɛ lubo kamɔ kĩĩ akũ a, lɛmɛ bisĩ kĩ baádani tɔwɔlɛ kamɛ bimu ye.
10Ke liti a, ode fɔtɔ ɔnyanɛ olode a tsokui ye kɔɔpu kamɛ fɔtsa a eko nɛ ɔyaɛ kpa a lɛgãkpo akũ. Adeke ɔtũ ke nɛ ɔyaɛ kpa a lɛgãkanyakɔ̃ a, ade bati dɔ̃ fɔmɛ nɛ ayekĩ fɔawo be a sũ. 11Nɛ foesũ bɛlɛ fubusuotsa nɛ Baguma kĩ edeĩ nɛ ode a akũ. Titɔ kĩ fɔɔkpa a kĩ bɛnɛ́ a awo be malo ni, bisĩ kĩ baádani tɔwɔlɛ kamɛ nɛ bɛ fɔtsa kpa kakɛna kamɛ.
12Ade ode fɔtɔ ɔnyanɛ ovũde a tsokui ye kɔɔpu kamɛ fɔtsa a eko nɛ Frat ɔwɔ kpale a kamɛ a. Ɔwɔ a viɔ̃ ade ɛnyɛ osi ɛkpa fɔgã a kĩ futo suwa kadekɔ̃ a. 13Ke liti a, mmɔ́ hũhũ fĩĩ ɛlalɛ kĩ bɛla ndɛ fɔpɔtrɔlɔ, bɛnɛ bito kɔɛ kpale a onukpɛ̃, mɔ ɔyaɛ kpa a onukpɛ̃ mɔ fɔvã onukpɛ̃ ɔnyɛnɛ a onukpɛ̃ kamɛ. 14Be nyɛ hũhũ kpa a hũhũ kĩ yakɛna awãwã fɔtsa a. Hũhũ ɛlalɛ kĩĩ anɛ kanaa katinya kamɛ fɔgã flee sɛkɛ̃, kakpɔta be kakpa kawũkanɔ nɛ Baguma Otumifɔ Flee Luwi kpale a akũ.
15“Mitse! Maya ndɛ oyekpanɛ aye! Baguma hila oti a kĩ esi lipe yadãmɛna ye tɛtadiɛ akũ, ayekĩ ɛláatsã ɔdzɔ, kɔnyɔã liwo ye nɛ kanade!”
16Ade hũhũ kpa a kpɔta fɔgã a nɛ awã kĩ bavɛ nɛ Hebri tide kamɛ kĩ Armagedon a.
17Ke liti a, ode fɔtɔ ɔnyanɛ ovũkɔnɔde a natsokui ye kɔɔpu kamɛ fɔtsa a eko nɛ ɔwɛ kamɛ. Ade odo kɔɔba odi nɛ́ eto lɛgãkpo a nɛ Asɔli Kɔla a kamɛ kĩ, “Fuwoli!” 18Ade odetɔ́ kamɛ kamɔanɛ, tido mɔ ɔsĩ kanɛ, ɔplala kakpɛnɛ kɔɔba, ade tite lɛmɛ kuna mɔ ɔsĩ mɔ ɔsĩ a. Kito anɛ kĩ otidziwa nɛ katinya ni, tite tákuna mɔ libe lɔmɔ tɔ̃. Ade fukĩĩ nyɛ tite kakuna kĩ kiwo libe kɛba flee a! 19Ɔmatɔ kpale a bɛ̃ nɛ fɔkɛ ɛlalɛ kamɛ, ade fude flee tɛmatɔ tɛkpale tɛkpale bubuli a. Baguma te anɛ nɛ Babilonia kĩ ɛtɛ dĩ a akũ, ade ɛfɔ̃ ɛmɔa ye kalɔkpa waĩ mɔ ɔsĩ a nɛ ye kɔɔpu a kamɛ a. 20Tite a kĩ mui sinya te a flee yɛla, ade tɔtɔ flee lɛmɛ buki tɛláa kĩ bamɔ a. 21Fɔdãglɛglɛ baũ baũ kĩ lidi nyɛ lidi ɔlɔmɛ aana ndɛ kilo taalo to ode fɔyawula nɛ bati akũ. Ade bɛlɛ fubusuotsa nɛ Baguma akũ nɛ foe kawo a sũ a.
17Ɔdɔpaani a Kĩ Ɛtɛ Dĩ a Sɔtɔ Kavɛlɛ.
1Ke liti a, ode fɔtɔ banyanɛ a kĩ bɛlɛ tɔkɔɔpu evũkɔnɔ a kamɛ ɔmɔa ya nɛ yĩ sɛkɛ̃ ebi yĩ kĩ, “Ya, ntsa nɔ ayekĩ bɛvɛlɛ adɔpaani a kĩ ɛtɛ dĩ, kĩ edzi nɛ tɔwɔ pii akũ a sɔtɔ. 2Tite akũ fɔgã bɔa adɔpaa mɔ ye, ade ye adɔpaa kabɔa waĩ a wugɛla tite akũ bati a.”
3Ode fɔtɔ ɔnyanɛ a kpã yĩ nɛ hũhũ kamɛ ɛnamɛna kɔsa kamɛ. Nɛ awã mmɔ́ otsole odi kĩ edzi nɛ ɔyaɛ kpa ngbã odi akũ. Bɛtsɛlɛ mbusuo buĩ kĩ basupa Baguma bite nɛ ɔyaɛ a akũ flee, ade edeĩ fɔlɔ evũkɔnɔ mɔ tɛlɛ ewua a. 4Otsole a do atadiɛ ngbã mɔ fɔwɔwa ntsɛkantsɛka, ade ɛhɛhɛ akũ mɔ sika ngbã fɔtsa, boe mɔ kɔya, mɔ fulitsa mɔ kɔya a. Ɛnɛɛ sika ngbã kɔɔpu kĩ eyi mɔ efĩĩ mɔ kɔwɛ̃ fɔtsa a kĩ ɛna etomɛna ye adɔpaa kabɔa kamɛ a nɛ awɛ. 5Bɛtsɛlɛ dĩ kĩ de kayɔkanyɛ bɛla bite nɛ ye nnyɛ kĩ,
Babilonia kĩ ɛtɛ dĩ,
Adɔpaafɔ mɔ tite akũ fubusuotsa flee ɔma.
6Otsole a kĩ mmɔ́ a wuga Baguma bade a, mɔ bikĩ bidi adansiɛ nɛ Yesu katɛkado akũ sũ a babɔanɛ.
Kĩ mmɔ́ ye a, fɔkɛna yĩ wãwã paa. 7Ade ode fɔtɔ ɔnyanɛ a via yĩ kĩ, “Nde sũ fɔkɛna nɔ wãwã? Maabi nɔ kalɛ nɛ otsole a, mɔ ɔyaɛ a kĩ edeĩ fɔlɔ evũkɔnɔ mɔ tɛlɛ ewua, kĩ ye akũ edzi a fɔlɛtsa kɔlawa. 8Ɔyaɛ kpa a kĩ ɔmɔ́ a dzi nkpã tɔ̃ lɛmɛ finyaa eku. Yaanɛ eto lɛkɛ dzununuunu a kamɛ ɛyaatɛ̃ ɛnaa bɛwɔla ye. Fɔ́akɛna bati a kĩ bidzi nkpã nɛ tite akũ, kĩ bɛtátsɛlɛ be buĩ bido nɛ nkpã ovoli a kamɛ, kito anɛ kĩ bɛbɔa katinya a wãwã ntɛ bɛmɔ́ ɔyaɛ a, kitonɛkĩ ɛnyɛ oti kĩ edzi nkpã tɔ̃, finyaa ɛláa, lɛmɛ yaabuki ɛya.
9“Fukĩĩ sĩ fɔkpa nyansã mɔ fɔtsa kayɔkanu mɔ nyansã. Fɔlɔ evũkɔnɔ a nyɛ kɔtɔbii evũkɔnɔ, awã kĩ otsole a adzi a. 10Fubuki fɔnyɛ fɔgã evũkɔnɔ, kĩ foe elo tɔ kɔkɔɛ, lɔmɔa anya akũ finyaa, ade de nkaɛ a táya tɔ̃. Ntɛ lɛya ni, kɛnɛ kĩ lɛnya akũ lɔkɔ lukũ odi. 11Ɔyaɛ kpa a kĩ edzi tɔ̃, lɛmɛ ebuki ɛláa a nyɛ lɛgã lɛlɛ̃de, kĩ lɛnyɛ fɔgã evũkɔnɔ a kamɛ ɔmɔa kĩ laanaa bɛwɔla de.
12“Tɛlɛ ewua a kĩ ɔmɔ́ a nyɛ fɔgã ewua kĩ bɛtádo tɔ̃ fɔgã kanya awɛ, lɛmɛ bɛkpa be kɔbɛ̃ kĩ baanya fɔgã dɔũhuilɛ mɔa mɔ ɔyaɛ kpa a. 13Fɔgã ewua kĩĩ flee deĩ botaɛ mɔapɛ, ade baakɔa be kɔbɛ̃ mɔ otumi bɛkpa ɔyaɛ kpa a. 14Baanɔ kawũ mɔ Kavelibi a, lɛmɛ Kavelibi a aanya be akũ, kitonɛkĩ ye nyɛ balate flee Ɔlate, fɔgã flee Lɛgã. Bɛmɔ ye bade a kĩ ɛvɛ, ɛpau, mɔ bikĩ bitomɔ ye nɛ ɔnɔkɔali kamɛ a, aanya akũ mɔ ye.”
15Ode fɔtɔ ɔnyanɛ a buki ebi yĩ kĩ, “Mui a kĩ ɔmɔ́ kĩ ɔdɔpaani a dzi nɛ be akũ a nyɛ ɔmaĩ nyɛ ɔmaĩ, fude nyɛ fude, batidziwa flee mɔ tide ahɔlɔ ahɔlɔ. 16Tɛlɛ ewua a kĩ ɔmɔ́ a mɔ ɔyaɛ kpa a aakesĩ ɔdɔpaani a. Baatɛ lɛtsa nyɛ lɛtsa nɛ ye awɛ bɛfɔ̃ edzi ɔdzɔ. Baaba ye sɛkɛna bido ye fi evio. 17Kitonɛkĩ Baguma lɛkɔa foe edo nɛ be tɔwɔlɛ kamɛ kĩ bɛkɛna nɛ nhiɛhiɛ a kĩ ɛkɛna eyi a akũ, fɔfɔ̃ bɛkɛna ɔmɔa bɛkɔa be kɔbɛ̃ bɛkpa ɔyaɛ kpa a ɛnya akũ, kɛnaawo lɔkɔ a kĩ Baguma fɔlɛtsa a ya nɛ foe kamɛ.
18“Otsole a kĩ ɔmɔ́ a nyɛ ɔmatɔ kpale a kĩ yanya tite akũ fɔgã akũ a.”
18Bibubuli Babilonia Ɔmatɔ a.
1Ke liti a, mmɔ́ ode fɔtɔ ɔnyanɛ bɛbã kĩ eduma eto ode yaka. Edeĩ kɔbɛ̃ paa, ade ye akũ ɔhaĩ kpalɛ tite flee akũ a. 2Ɛbɔa fɔwɔla kɔɔba ɛlɛ kĩ,
“Ɛtɔ o-o! Babilonia ɔmatɔ a kĩ ɛtɛ dĩ a tɔ tsoo!
Ɛdani hũhũ kpa mɔ hũhũ kĩ efĩĩ deĩ nɛ ye akũ,
mɔ efĩĩ kɔvɔlabi, mɔ kɔvɔlabi kĩ bakesĩ a kadzikɔ̃.
3Kitonɛkĩ fude flee mɔa ye adɔpaa akũ kalɔkpa bavɛ a.
Tite akũ fɔgã bɔa adɔpaa mɔ ye,
ade katinya kamɛ fɔyaatɔ banyanɛ tsã ye anɛngbã kana kamɛ bɛdani asikafɔ a.”
4Ade nnu odo bɛbã kĩ eto ode ɛlɛ kĩ,
“Yĩ bati, minɛ́ nɛ ye kamɛ!
Kɛtánɛ kĩ miakɛna tɔkpa a na odu,
ade kɛtánɛ kĩ miana ye sɔtɔ kavɛlɛ a na odu a.
5Kitonɛkĩ bɛtɛɛtɛɛ ye tɔkpa tide tɛnatamɔ ode,
ade Baguma te anɛ nɛ ye tɔkpa akũ a.
6Mikɛna ye ndɛ ayekĩ ye malo ɛkɛna mi a.
Mise ye foe titi nviã nɛ fukĩ ɛkɛna a onukpɛ̃.
Miyula bavɛ mɔ ɔsĩ tɛkɔɔpu nviã mikpa ye,
nɛ amɔa a kĩ ɛkpa mi a onukpɛ̃!
7Mimɔna ye lubo,
ebe kɔnya ayekĩ kɛfɛta
fuketimɔ ayekĩ edzi nɛ akũ kahɛhɛ mɔ nkpã kanya kamɛ a.
Kitonɛkĩ yabi ye akũ daa kĩ,
‘Ndzi nɛ awĩ ndɛ lɛgãtsole aye!
Nnɛ́ okunawa manɛ,
ade nláabe ayɔlɔhɔ da a!’
8Nɛ fukĩĩ sũ ni, nɛ luwi mɔapɛ kamɛ,
lubo kamɔ kĩ fɔnyɛ,
wuda, fɔsɔ, kɔnya kabe mɔ kɔlɛ aaya nɛ ye akũ.
Baapila ye mɔ fi evio gbunugbunugbunu,
kitonɛkĩ boe Ɔlate Baguma a kĩ ɛkɔ ye kɔɔtɔ a nyɛ ɔbɛlɛbɛ.
9“Ntɛ tite akũ fɔgã a kĩ bɛbɔa adɔpaa mɔ ɔmatɔ a, bɛnya nkpã mɔ ye a, mɔ́ fi a kĩ fɔapila ye ɔnyɔ a yade ni, baabɔa fɔwɔla bibe ye. 10Baadza mɔ lugo nɛ ye lubo kamɔ kavila a sũ bɛlɛ kĩ,
‘Ao! Ao! Nɔ, ɔmatɔ kĩ ɛtɛ dĩ!
Nɔ, Babilonia kĩ odeĩ kɔbɛ̃!
Dɔũhuilɛ mɔapɛ kamɛ bɛkɔ nɔ kɔtɔ!’
11“Tite akũ fɔyaatɔ banyanɛ a lɛmɛ aabe biwo ɔblɔ mɔ ye, kitonɛkĩ odima buki yaáya be fɔtsa. 12Kɔyaatɔ fɔtsa a nyɛ sika ngbã, sika ovoe, boe mɔ kɔya, fulitsa mɔ kɔya, aklala, tilima ngbã, tilima ɔɔwa, tilima plɔplɔ, titse kĩ tabɔa mɔ ɔlɛ̃, kunu adɔ̃ fɔtsa, mɔ titse mɔ kɔya, kɔɔble mɔ sɔbɔtsaɛ ɔɔwa fɔtsa, mɔ kɔla kake boe kĩ bɛtɛ kɔya. 13Fɔbɛbã nyɛ futse fɔkpã mɔ ɔlɛ̃ kĩ bavɛ sinamɔn mɔ kutu ɔlɛ̃ kado fɔtsa, lifii mɔ klubɔũ, bavɛ mɔ kugua kĩ bakɔa katɔ, onuvoe kpɛtɛɛ mɔ fɔwã, kugua kĩ batsɛla, banantsue mɔ baveli, bapɔnkɔ mɔ tihilili, basate mɔ batidziwa kĩ baya kɔkɔ malo.
14“Fɔyaatɔ banyanɛ a aalɛ kĩ, ‘Futse babi a kĩ fɔakɔ nɔ odo a aalo fɔfɔnɛ nɔ. Nɔ akũ kana fɔtsa flee mɔ nɔ akũ kahɛhɛ a yɛla nɛ nɔ akũ, ɔláabuki ɔmɔ́ foe da!’ 15Fɔyaatɔ banyanɛ a kĩ bɛnya kɔyaatɔ fɔtsa kumɛkumɛ kamɛ mɔ ɔmatɔ a bɛdani asikafɔ a, aadza mɔ lugo, nɛ lubo kamɔ kavila sũ. Bibe, biwo ɔblɔ,
16bɛlɛ kĩ, ‘Ao! Ao! Ɔmatɔ kĩ ɛtɛ dĩ!
Ɔmatɔ kĩ bɛhɛhɛ ye mɔ aklala fitaa, tilima ngbã, tilima ɔɔwa,
sika ngbã fɔtsa, boe kĩ bɛtɛ kɔya mɔ fulitsa mɔ kɔya!
17Dɔũhuilɛ mɔapɛ kamɛ ye akũ kana fɔtsa a flee bu kade pasaa.’
“Ɔkɔlɔ a kamɛ banɔkɔɛ̃ flee, mɔ ɔwɔ akũ basitsãnɛ, ɔkɔlɔ batanɛ a mɔ bati bɛbã a kĩ batsã mpo akũ kanya kɔyaatɔ a dza mɔ lugo, 18bɛbɔa fɔwɔla kɔɔba nɛ lɔkɔ a kĩ bɛmɔ́ ɔmatɔ a kĩ ɛlamɛna kavio a ɔnyɔ a kĩ, ‘Ɔmatɔ kpale kĩĩ odu nɛ́ katinya tɔ̃?’ 19Bifila kudu biko nɛ be fɔlɔ kamɛ ade bibe mɔ kɔnya bɛlɛ kĩ,
‘Bɔbɔɛ bɔbɔɛ bɔakpa ɔmatɔ kpale kĩĩ!
Ɔmatɔ kpale kĩ ye kamɛ futima balate
na akũ bitomɛna ye akũ kana fɔtsa kamɛ bɛdani asikafɔ.
Kitonɛkĩ nɛ dɔũhuilɛ mɔapɛ kamɛ bɛkɛna ye bubloo!
20O ode, mɔ mi Baguma bade a, mɔ mi fɔtɔ banyanɛ mɔ Baguma onukpɛ̃ banyɛnɛ a, mimɔ kawɔlɛ!
Kitonɛkĩ Baguma kɔ ye kɔtɔ ɛkpa mi nɛ lɛtsa a kĩ ɛkɛna mi a sũ!’ ”
21Ke liti a, ode fɔtɔ ɔnyanɛ mɔ kɔbɛ̃ odi bɔɛ de kĩ lɔpɔnɛ lububu ndɛ kɔwɔlɛ ade ɛta edo nɛ mpo kamɛ, ɛlɛ kĩ,
“Ade aye baabɔɛ Babilonia ɔmatɔ kpale a bibo mɔ fɔkɔ,
ade bɛláabuki bɛmɔ́ ye da a.
22Bɛláabuki binu tɔwɛ̃ tɛsankuo, tifluti mɔ kugbulɛɛ tido
nɛ nɔ kamɛ da.
Bɛláabuki bɛmɔ́ awɛ adzuma ɔkɛnanɛ odima lɛmɛ
nɛ nɔ kamɛ da,
ade ayea lɛmɛ bɛláabuki binu fɔtsa kawɔlɛ
nɛ kɔwɔlɛ akũ nkã da nɛ nɔ kamɛ a!
23Bɛláabuki bɛmɔ́ ɔsɛdza katɛ̃
nɛ nɔ kamɛ da,
ade bɛláabuki binu olitsɔ̃ mɔ obolitsɔ̃ nyɔ tido
nɛ nɔ kamɛ da a.
Nɔ kɔyaatɔ banyanɛ a
nyɛ katinya kamɛ banɔkɔɛ̃ banɔkɔɛ̃,
ade ɔkɔa nɔ kanɔkɔnɛ kadã ɔkɛ katinya kamɛ bati flee a.
24Bɛvɛlɛ Babilonia sɔtɔ, kitonɛkĩ ye kamɛ bɛmɔ́ Baguma onukpɛ̃ banyɛnɛ mɔ Baguma bade a babɔanɛ.
Nnɛ́ be odi bade bɛmɔ́, mbom mɔ bati a kĩ bɛkɔ nɛ tite akũ a
babɔanɛ bɛ́mɔ nɛ ye kamɛ.”
191Fukĩĩ liti a, nnu litsedi ndɛ bati kɔdabu baũ odo nɛ ode, ɛkalɛ kĩ,
“Mimu Baguma!
Nkpã katɛ, kukũkpalɛ mɔ kɔbɛ̃ nyɛ boe Baguma fude!
2Yadzɛ fɔlɛtsa nɛ ɔnɔkɔali kamɛ, ade yakɔ kɔtɔ nɛ osi kpĩĩ akũ a.
Ɛkɔ ɔdɔpaani kpale a kĩ ɛkɔa ye adɔpaa ebula katinya kamɛ kade a kɔtɔ.
Baguma vɛlɛ ye sɔtɔ kitonɛkĩ ɛkɔ́ ye basumunɛ a.”
3Bibuki bɛbɔa fɔwɔla kĩ,
“Mimu Baguma!
Ɔnyɔ a kĩ yanɛ nɛ ɔmatɔ a kamɛ a ade nɛ ode daa.”
4Banɔkɔɛ̃ tɛya-ana, mɔ fɔtsa ɛna a kĩ fudzi nkpã a ka bɛtsa nɛ tite bisum oti a kĩ edzi nɛ lɛgãkpo akũ, ade bɛlɛ kĩ,
“Fɔya lɔmɔ! Mimu Baguma!”
Kavelibi a Obolitsɔ̃ Kapi Luwi Kanya.
5Ade odo odi nɛ́ eto lɛgãkpo a kamɛ kĩ,
“Mimu boe Baguma,
mi flee a kĩ mi ye basumunɛ mɔ ye bati flee,
banɔkɔɛ̃ mɔ babisɛ̃ a kĩ miavila ye a.”
6Ke liti a, nnu odo odi ndɛ bati kɔdabu baũ fɔwɔla kabɔa ĩye ndɛ ato ɔtɔ akũ mui kaka kako nɛ lutubu kamɛ, ĩye ɔplala kakpɛnɛ mɔ ɔsĩ aye. Odo a lɛ kĩ,
“Mimu Baguma!
Kitonɛkĩ boe Ɔlate Baguma Kpale anya Lɛgã!
7Mifɔ̃ bɔmɔ kawɔlɛ, butu osee budo ye obu.
Kitonɛkĩ Kavelibi a obolitsɔ̃ kapi luwi a wo ɔtɔ,
ade ye obolitsɔ̃ a manɛ akũ ɛkpa foe a.
8Bɛkɔa aklala fitaa, kĩ yata muamua lima bɛkpa ye kĩ edzi.”
Aklala fitaa kpalɛwa a nyɛ fɔtsa wĩ a kĩ Baguma bade a kɛna.
9Ade ode fɔtɔ ɔnyanɛ a bi yĩ kĩ, “Tsɛlɛ kayi kĩ bihila bati a kĩ bɛvɛ kĩ bɛya nɛ Kavelibi a obolitsɔ̃ kanyakɔ̃.” Ebuki ɛlɛ kĩ, “Baguma onukpɛ̃ kamɛ fɔlɛtsa pɛpɛɛpɛ nyɛ fukĩĩ.”
10Ade ntɔ nɛ ye abɔa kamɛ kĩ masum ye a, lɛmɛ ebi yĩ kĩ, “Takɛna foe! Bɔmɔ nɔ mɔ awaɛ̃ amɛ a kĩ bidi adansiɛ nɛ Kristo akũ a kamɛ ɔmɔa manɛ. Ke aduli kakpa Baguma odi!”
Kitonɛkĩ adansiɛ a kĩ Kristo di a ado Baguma onukpɛ̃ banyɛnɛ kɔbɛ̃.
Ɔpɔnkɔ Ovoe Akũ Odzinɛ a.
11Ke liti a, mmɔ́ kĩ ode binya ɛwaa, ade mmɔ́ ɔpɔnkɔ ovoe odi kĩ ɛdzɛ̃ a. Oti a kĩ edzi nɛ ɔpɔnkɔ a akũ a dĩ nyɛ Oti Kpĩĩ mɔ Ɔnɔkɔalini. Yadzɛ fɔlɛtsa kanɔ kawũ nɛ osi kpĩĩ akũ. 12Ye banebi la ndɛ fi sɛmɛ aye, ade fɔgãbɔɛ beblebee tsanɛ nɛ ye lɔlɔ a. Bɛtsɛlɛ dĩ lidi bite nɛ ye akũ, kĩ odima linyína de kayɔ, mbɔɛntɛ ye odi. 13Edo atadiɛ kĩ bisi bido nɛ babɔanɛ kamɛ. Ye dĩ nyɛ Baguma Kalɛ a. 14Ode sodzafɔ kɔdabu kɔdabu do aklala ovoe fitaa tɛtadiɛ, bidzi nɛ bapɔnkɔ ovoe akũ bitomɔ ye. 15Lɛpamɛ mɔ ɔbɔ̃ nɛ́ lito ye onukpɛ̃ kamɛ, kĩ yaakɔa ɛwɔla fude akũ. Yaakɔa sɔbɔtsaɛ otse ɛnya be akũ, ade yaasumini Baguma Kpale kalɔkpa mɔ ɔsĩ a ɛnyɛ ye waĩ kanunakɔ̃ a. 16Dĩ a kĩ bɛtsɛlɛ nɛ ye atadiɛ wulaa mɔ lutolo akũ a nyɛ
Fɔgã Flee Lɛgã mɔ Balate Flee Ɔlate.
17Ke liti a, mmɔ́ ode fɔtɔ ɔnyanɛ odi kĩ ɛdzɛ̃ nɛ suwa akũ. Ɛbɔa fɔwɔla kɔɔba ebi kɔvɔlabi a kĩ kɔayidza nɛ ɔwɛ kamɛ a kĩ, “Miyaatsɛna minya Baguma olobe funitsã kpale a. 18Miyaatsuli fɔgã, sodzafɔ banɔkɔɛ̃, sodzafɔ, bapɔnkɔ mɔ bapɔnkɔ badzinɛ sɛkɛna, akũ akũ badzinɛ, banɔkɔɛ̃ mɔ babisɛ̃ flee sɛkɛna!”
19Adeke mmɔ́ kĩ ɔyaɛ kpa a, mɔ tite akũ fɔgã a kpɔta be sodzafɔ kɔdabu a kĩ banɔ kawũ mɔ oti a kĩ edzi nɛ ɔpɔnkɔ akũ a mɔ ye sodzafɔ flee a. 20Bipi ɔyaɛ kpa a, mɔ fɔvã onukpɛ̃ ɔnyɛnɛ a kĩ ɛkɛna awãwã fɔtsa nɛ ye anɛ a. Ade awãwã fɔtsa kĩĩ ɛkɔa ɛkɛ bati a kĩ bɛtɛ ɔyaɛ kpa a sɔkpɔ̃na mɔ bikĩ bisum ye kutidu kamɛ a. Bɛta ɔyaɛ kpa a mɔ fɔvã onukpɛ̃ ɔnyɛnɛ a ɔgɔ̃ bido nɛ fi lutubu kĩ latɛ̃ gɛĩgɛĩ a kamɛ. 21Bɛkɔa oti a kĩ edzi nɛ ɔpɔnkɔ akũ a lɛpamɛ a kĩ lɛnɛ lito ye onukpɛ̃ kamɛ a bɛkɔ bati nkaɛ, ade kɔvɔlabi flee yatsuli be sɛkɛna ayekĩ kɔ́apuli a.
20Bido Okesĩnɛ a Nɛ Kɔla Futeli Apim Mɔa.
1Ke liti a, mmɔ́ ode fɔtɔ ɔnyanɛ odi kĩ eto ode yaka, kĩ ɛnɛɛ lɛkɛ dzununuunu a safi mɔ nkɔsɔnkɔsɔ kpale adi nɛ awɛ. 2Epi kɔɛ kpale a, kĩ kɔna kɔkɔɔkɔɛ a, kĩ bavɛ Abonsam ĩye Satana a, esuli koe eyi ɛkpa futeli apim mɔa. 3Ode fɔtɔ ɔnyanɛ kɔa ye edo nɛ lɛkɛ dzununuunu a kamɛ ɛbalɛ de onukpɛ̃, ɛtalɛ de lɛmɛ ayekĩ ɛláapuli ebuki ɛkɛ fude fude bati kɛnaawo kĩ futeli apim mɔa a yatɛ̃. Lɛmɛ nɛ foe liti a, kɛnɛ kĩ bɛfɔnɛ ye awɛ sukuloo.
4Ke liti a, mmɔ́ fɔgãkpo fudi, ade bati a kĩ bidzi nɛ foe akũ a, bɛkpa be kɔbɛ̃ kĩ bɛdzɛ fɔlɛtsa. Mbuki mmɔ́ bati a kĩ bikpeli be fɔlɔ, nɛ ayekĩ bidi adansiɛ nɛ Yesu ɔnɔkɔali, mɔ Baguma kalɛ a akũ sũ a tɛkla. Ade be lɛtásum ɔyaɛ kpa ĩye ye kutidu a kĩ bɛmɛ a, ĩye bɛtɛ ye sɔkpɔ̃na nɛ be nnyɛ ĩye nɛ awɛ a. Biyidza bibuki bidzi nkpã bɛnya lɛgã mɔ Kristo futeli apim mɔa. 5Ade fukĩĩ nyɛ banɔkpa kayidza kadzi nkpã atɔnyade a. Banɔkpa nkaɛ a kɔ̃ táyidza bidzi nkpã kɛnawo kĩ futeli apim mɔa a aatɛ̃. 6Baguma hila bati a kĩ bɛna tsɛfã nɛ banɔkpa kayidza katɔnyade kĩĩ kamɛ a, kĩ ɛkpalɛ be akũ lɛmɛ a. Wuda ayade a lɛlá kɔbɛ̃ nɛ be akũ, baanya Baguma mɔ Kristo basɔfɔ, ade baanya fɔgã mɔ ye futeli apim mɔa a.
Bɛnya Satana Akũ.
7Ntɛ futeli apim mɔa wũna a, baanyɛ Satana nɛ kɔla, 8ade yanaa ɛnaakɛ fude fude kĩ fudeĩ nɛ katinya tukontoũ ɛna a kamɛ kĩ fɔnyɛ Gog mɔ Magog, ɛkpɔta be ɛkpa kawũkanɔ. Be lidede aana ndɛ mpo abuĩ dã. 9Bɛtsã tite dzɛlɛwa a akũ bɛnadza bisinya Baguma bade a kadzikɔ̃ mɔ ye ɔmatɔ kpale a kĩ yawɛ kalɛ a. Lɛmɛ fi to ode fɔyawɔla be flee. 10Ade bɛta Abonsam a kĩ ɛkɛ be a bido nɛ fi lutubu mɔ fukpokpo gɛĩgɛĩ a kamɛ, nɛ awã kĩ bɛnya lɔtɔ bɛta ɔyaɛ kpa mɔ fɔvã onukpɛ̃ ɔnyɛnɛ a bido a. Baamɔna be lubo lɛnyɛ mɔ suwa daa daa.
Katinya Kamɛ Kadzɛmɛna Nkaɛ.
11Ke liti a, mmɔ́ lɛgãkpo kpale ovoe lidi mɔ oti a kĩ edzi nɛ de akũ a. Tite mɔ ode lo nɛ ye anɛ kamɛ, ade bɛtána kakɔma bɛkpa te a. 12Ade mmɔ́ banɔkpa, banɔkɔɛ̃ mɔ babisɛ̃ kĩ bɛdzɛ̃ nɛ lɛgãkpo a anɛ a. Bibinya tuvoli biyi, ade bibinya ovoli bɛbã odi lɛmɛ kĩ ɛnyɛ nkpã ovoli a. Bɛdzɛmɔ banɔkpa nɛ be fɔkɛlatsa onukpɛ̃ ndɛ ayekĩ bɛtsɛlɛ biyi nɛ tuvoli a kamɛ a. 13Mpo nyɛ banɔkpa a kĩ bideĩ nɛ ye kamɛ a ɛkpa, ade wuda mɔ kanɔkpade lɛmɛ nyɛ banɔkpa a kĩ bɛnɛɛ a bɛkpa a. Ade bɛdzɛmɔ be kamɛ odi nyɛ odi nɛ ye fɔkɛlatsa onukpɛ̃ a. 14Ke liti a, bɛta wuda mɔ kanɔkpade biwula nɛ fi lutubu baũ a kamɛ. Fi lutubu baũ kĩĩ nyɛ wuda ayade a. 15Ade odi nyɛ odi kĩ bɛtámɔ ye dĩ nɛ nkpã ovoli a kamɛ ni, bɛta ye bido nɛ fi lutubu baũ a kamɛ.
21Tite Mɔ Ode Vɔɛ̃.
1Ke liti a, mmɔ́ tite vɔɛ̃ mɔ ode vɔɛ̃, kitonɛkĩ tite tɛtɔnyade a mɔ ode ɔtɔnyade a yɛtɛ̃, ade mpo lɛmɛ buki ɛláa a. 2Ade mmɔ́ Ɔmatɔ Kpalɛwa, Yerusalem vɔɛ̃ a, kĩ eto ode nɛ Baguma sɛkɛ̃ yaka. Bɛhɛhɛ ye ndɛ obolitsɔ̃ kĩ bɛmanɛ bɛkpa ɔnyɔ aye. 3Ade nnu odo kɔɔba kĩ ɛnɛ eto lɛgãkpo a kamɛ ɛlɛ kĩ, “Finyaa kɔ̃ Baguma kadzikɔ̃ deĩ nɛ batidziwa kayite! Yaadzi nɛ be sɛkɛ̃, ade baanya ye bati a. Baguma mɔawɛ aadzi nɛ be kamɛ, ade yaanya be Baguma a. 4Yaayɔ ɛnyɛ babe nɛ be anɛ kamɛ. Wuda lɛláabuki ɛna. Ade ayea ayɔlɔhɔ, kabe mɔ kalɔɛ lɛláabuki fɔna a, kitonɛkĩ kɔkɔɛ fɔtsa a yatɛ̃.”
5Ade oti a kĩ edzi nɛ lɛgãkpo akũ a lɛ kĩ, “Dã, finyaa nkɛna fɔtsa flee fɔvɔɛ̃!” Ebi yĩ lɛmɛ kĩ, “Tsɛlɛ fukĩĩ kayi, kitonɛkĩ fɔlɛtsa kĩĩ nyɛ ɔnɔkɔali kĩ baapuli bɛtɛ foe bido.”
6Ade ɛlɛ kĩ, “Biyua, lɛtsa nyɛ lɛtsa! Yĩ nyɛ ɔtɔnyade mɔ owũnade, kayɔkayi a mɔ kawũna a. Odi nyɛ odi kĩ ɔmɔado akɔ ye ni, maakpa ye osi ɛmɔa mui etomɛna nkpã lɔwɔkɛ kamɛ faa. 7Odi nyɛ odi kĩ ɛnya akũ ni, yaana fukĩĩ etomɛna yĩ sɛkɛ̃. Maanya ye Baguma ade ye malo yaanya yĩ obi a. 8Lɛmɛ babelibe, bati abɔa banyɛnɛ, kɔwɛ̃ fɔtsa bakɛnanɛ, awudifɔ, adɔpaafɔ, kanɔkɔnɛ badãnɛ, baviɔ̃ basumunɛ mɔ bavãlɛvã flee a, aana be tsɛfã nɛ fi lutubu baũ a kĩ latɛ̃ mɔ fukpokpo gɛĩgɛĩ a kamɛ. Ade fukĩĩ nyɛ́ wuda ayade a.”
Yerusalem Vɔɛ̃ a.
9Ke liti a, ode fɔtɔ banyanɛ evũkɔnɔ a kĩ bɛnɛɛ tɔkɔɔpu evũkɔnɔ a kĩ tiyi mɔ lubo kamɔ evũkɔnɔ nkaɛ a, kamɛ ɔmɔa ya nɛ yĩ sɛkɛ̃, ade ebi yĩ kĩ, “Ya, ntsa nɔ Obolitsɔ̃ a kĩ ɛnyɛ Kavelibi a ɔtsɔ̃ a.” 10Hũhũ a wo nɛ yĩ kamɛ, ade ode fɔtɔ ɔnyanɛ a bɔɛ yĩ ɛnamɛna ɔtɔ geĩ odi kalete a. Ɛtsa yĩ Yerusalem, Ɔmatɔ Kpalɛwa a, kĩ ɛka eto ode nɛ Baguma sɛkɛ̃ yaya a, 11ade ɛkata mɔ Baguma kukũkpalɛ a. Ɔmatɔ a kata la ndɛ de kĩ lideĩ kɔya, fɔla lɛmɛ ndɛ yaspa de kĩ de kamɛ kpalɛ ndɛ ahuhɔɛ aye. 12Bike seebi kpale gɛlɛlɛɛlɛ bisinya ye ade bɛnyɛ tunyukpɛ̃ ewua-nviã kĩ ode fɔtɔ banyanɛ ewua-nviã dzi nɛ te tunyukpɛ̃ a. Bɛtsɛlɛ Israel futete ewua-nviã a buĩ bite nɛ tunyukpɛ̃ a akũ. 13Tunyukpɛ̃ ɛlalɛ deĩ nɛ sɛkɛ sidi nyɛ sidi akũ, te ɛlalɛ deĩ nɛ suwa kadekɔ̃, te ɛlalɛ deĩ nɛ kayɔ, te ɛlalɛ deĩ nɛ nyangɛ, ade te ɛlalɛ deĩ nɛ suwa katomukɔ̃ a. 14Bike ɔmatɔ a seebi a nɛ kayɔkayi futekũ boe ewua-nviã akũ, ade Kavelibi a fɔtɔ banyanɛ ewua-nviã a buĩ teĩ nɛ be akũ a.
15Ode fɔtɔ ɔnyanɛ a kĩ bɔmɔ ye bɔlɛ kɔdzɛla a nɛɛ sika fɔtsa kakɔna otse, kĩ yaakɔa ɛkɔna ɔmatɔ a, ye tunyukpɛ̃ mɔ seebi a. 16Ɔmatɔ a deĩ fɔkɛ ɛna, kĩ ye lɛsa mɔ ye lugo kamɛ keti. Ode fɔtɔ ɔnyanɛ a kɔna ɔmatɔ a mɔ ye fɔtsa kakɔna otse a. Ɛmɔ́ kĩ sɛkɛ mɔa tɛ fusikũ apim mɔa mɔ ɔha elo (1,500). Ɔmatɔ a lɛsa, ye lugo mɔ ye akũ kadzɛla flee keti. 17Ode fɔtɔ ɔnyanɛ a kɔna seebi a lɛmɛ, ade se akũ kadzɛla nyɛ fɔnɛta ɔha nviã mɔ ye ewua-avũ (216) nɛ ye fɔtsa kakɔna otse a onukpɛ̃ a. 18Bɛkɔa boe kĩ bavɛ Yaspa bɛkɔa bike seebi a, ade bɛkɔa sika ngbã kĩ se kamɛ kpalɛ ndɛ ahuhɔɛ aye bitsua ɔmatɔ mɔawɛ a. 19Bɛkɔa boe ahɔlɔ ahɔlɔ kĩ bideĩ kɔya bɛhɛhɛ ɔmatɔ a seebi kayɔkayi futekũ boe a. Litekũ lɛtɔnyade a nyɛ ahuhɔɛ de kĩ bavɛ yaspa, lɛyade nyɛ safir, lɛlalɛde nyɛ yalkedon, lɛnade nyɛ smaragdo, 20lilode nyɛ sardonik, livũde nyɛ sardis, livũkɔnɔde nyɛ krisolit, lɛlɛ̃de nyɛ beril, livedide nyɛ topas, liwuade nyɛ krisopras, liwua-odide nyɛ hiakint, ade liwua-nviãde a nyɛ ametist a. 21Tunyukpɛ̃ ewua-nviã a fulitsa bowa ewua-nviã. Litsabi bowa mɔapɛ bɛkɔa bɛkɛna onyukpɛ̃ odi nyɛ odi. Ɔmatɔ a ɔblɔnu nyɛ sika ngbã, kĩ se kamɛ kpalɛ ndɛ ahuhɔɛ aye.
22Ntámɔ asɔli kɔla nɛ ɔmatɔ a kamɛ, kitonɛkĩ boe Ɔlate Baguma Kpalɛ mɔ Kavelibi a nyɛ ye asɔli kɔla. 23Ɔmatɔ a tásĩ suwa kĩ sɛta ĩye odetɔ kĩ ɛvɔlɛ nɛ ye kamɛ, kitonɛkĩ Baguma kukũkpalɛ nyɛ́ ye ɔhaĩ ade Kavelibi a lɛmɛ nyɛ́ ye ɔsɛdza a. 24Katinya kamɛ bati aatsã ye haĩ kamɛ, ade tite akũ fɔgã aakɔa be akũ kana fɔtsa bɛyamɛna nɛ ye kamɛ a. 25Bɛláabalɛ ɔmatɔ a tunyukpɛ̃ mɔ suwa da, kitonɛkĩ kade lɛláadɔ nɛ awã da. 26Baakɔa fude fude akũ obu fɔtsa mɔ akũ kana fɔtsa bɛyamɛna nɛ ɔmatɔ a kamɛ. 27Lɛmɛ lɛtsa a kĩ de akũ tákpalɛ lidima lɛláawo nɛ ɔmatɔ a kamɛ. Ade odi nyɛ odi kĩ yakɛna fɔnyɔãtsa ĩye ɛnyɛ ɔvãlɛvã lɛmɛ lɛláawo nɛ awã, mbɔɛntɛ bati a kĩ bɛtsɛlɛ be buĩ bido nɛ Kavelibi a nkpã ovoli a kamɛ aawo nɛ ɔmatɔ a kamɛ.
22Nkpã Ɔwɔ Mɔ Nkpã Kutse a.
1Ke liti a, ode fɔtɔ ɔnyanɛ a tsa yĩ nkpã ɔwɔ kĩ ye mui akpa nkpã. Ye mui a kamɛ kpalɛ ndɛ ahuhɔɛ aye, ade bɛkanɛ kato Baguma mɔ Kavelibi a lɛgãkpo a kamɛ, 2ade batɛ̃ nɛ ɔmatɔ a ɔblɔnu kayite a. Nkpã kutse a dzɛ̃ nɛ ɔwɔ a futuni nviã akũ. Kɔawũ babi titi ewua-nviã nɛ kateli mɔa kamɛ, nɛ odetɔ mɔa kamɛ deedi. Koe tɔɔta bakɔa katsa fude fude bati fɔsɔ. 3Bɛláabuki bɛmɔ́ lɛtsa a kĩ Baguma dumu lidima nɛ ɔmatɔ a kamɛ. Baguma mɔ Kavelibi a lɛgãkpo aana nɛ ɔmatɔ a kamɛ ade ye basumunɛ aasum ye a. 4Baamɔ ye anɛ ade ye dĩ aana nɛ be nnyɛ a. 5Kade lɛláabuki kɛdɔ ade bɛláasĩ ɔsɛdza ĩye suwa, kitonɛkĩ boe Ɔlate, Baguma aanya be ɔhaĩ, ade baanya akũ ndɛ fɔgã aye daa daa a.
Yesu Kaya.
6Ke liti a, ode fɔtɔ ɔnyanɛ a bi yĩ kĩ, “Fɔlɛtsa kĩĩ nyɛ ɔnɔkɔali ade baapuli bɛtɛ foe bido a. Boe Ɔlate, onukpɛ̃ banyɛnɛ Hũhũ Baguma a lido ye ode fɔtɔ ɔnyanɛ kĩ ɛyaanyɛ lɛtsa a kĩ laaya mɔatsɛ a ɛtsa ye basumunɛ.”
7Yesu lɛ kĩ, “Midã! Maya mɔatsɛ! Baguma hila bati a kĩ bakɛna nɛ ovoli kĩĩ kamɛ fɔlɛtsa a kĩ bɛlɛ biyi a akũ!”
8Yĩ, Yohanes, nyɛ́ oti a kĩ ye linu, ɛmɔ fɔtsa kĩĩ flee a. Kĩ nnu fukĩĩ, mmɔ́ foe a, nke aduli nɛ ode fɔtɔ ɔnyanɛ a kĩ ɛnyɛ foe ɛtsa yĩ a anɛ kĩ masum ye. 9Lɛmɛ ebi yĩ kĩ, “Takɛna foe! Basumunɛ bɔmɔ́ nɔ, mɔ awaɛ̃ amɛ Baguma onukpɛ̃ banyɛnɛ, mɔ bati a kĩ bakɛna nɛ ovoli kĩĩ kamɛ fɔlɛtsa akũ a bɔanɛ. Sum Baguma odi!”
10Ade ebi yĩ kĩ, “Takɔa fɔlɛtsa a kĩ bɛlɛ biyi nɛ ovoli kĩĩ kamɛ a ɔkɔla, kitonɛkĩ lɔkɔ fuã kĩ foe flee fɔya nɛ foe kamɛ. 11Odi nyɛ odi kĩ yakɛna tɔkpa ni, ɛdanɛ tɔkpa kakɛna, odi nyɛ odi kĩ yado akũ efĩĩ ni, ɛdanɛ akũ efĩĩ kado. Odi nyɛ odi kĩ yakɛna tuwĩ ni, ɛdanɛ tuwĩ kakɛna, ade odi nyɛ odi kĩ ɛnyɛ oti kpalɛwa ni, ɛdanɛ oti kpalɛwa kanya.”
12Yesu lɛ kĩ, “Maaya mɔatsɛ! Maya mɔ yĩ kɔtɔkase, nkpa odi nyɛ odi nɛ ye lɛkɛnana onukpɛ̃. 13Yĩ nyɛ Ɔtɔnyade mɔ Owũnade, Kayɔkayi mɔ Kawũna a.
14“Bihila bati a kĩ bɛvɔlɛ be tɛtadiɛ wulaa tɛnɛ fitaa a, kĩ nɛ foesũ bideĩ osi kĩ banya nkpã kutse a babi, kĩ bideĩ osi lɛmɛ kĩ batsã tunyukpɛ̃ a kamɛ biwo nɛ ɔmatɔ a kamɛ. 15Lɛmɛ ɔmatɔ a ɔbaɛ̃ badzinɛ nyɛ́ fɔnyɔãtsa bakɛnanɛ ndɛ bakpete aye, kanɔkɔnɛ badãnɛ, bikĩ bɛtsɛ̃ mɔa linyolewɛ mɔ litsolewɛ, awudifɔ, baviɔ̃ basumunɛ mɔ bikĩ bawɛ fɔvã, kama fɔvã lɛmɛ.
16“Yĩ, Yesu, lido yĩ ode fɔtɔ ɔnyanɛ kĩ ɛyaadi adansiɛ nɛ fɔlɛtsa kĩĩ akũ ɛkpa mi nɛ tɛsɔli a kamɛ. Ĩnyɛ Dawid onu mɔ ye kasinu a kamɛ obi, ade yĩ lɛmɛ nyɛ ɔnɔnɛ lisibii a kĩ lavɔlɛ a.”
17Hũhũ a mɔ Obolitsɔ̃ a lɛ kĩ, “Ya!”
Odi nyɛ odi kĩ enu fukĩĩ ni, ɛlɛ kĩ, “Ya!”
Odi nyɛ odi kĩ ɔmɔado akɔ ye ni, ɛya. Odi nyɛ odi kĩ yawɛ nkpã mui ni, ɛyaatɛ be faa.
Fɔlɛtsa a Kawũna.
18Yĩ, Yohanes, mabi odi nyɛ odi kĩ enu fɔlɛtsa a kĩ bɛlɛ biyi a, kĩ bide foe lɛtsã nɛ ovoli kĩĩ kamɛ a kĩ ntɛ odi kɔa litsedi ebumɔ foe ni, Baguma aakɔa lubo kamɔ a kĩ bɛtsɛlɛ nɛ ovoli kĩĩ kamɛ a ebumɔ ye sɔtɔ kavɛlɛ. 19Ade ayea ntɛ odi nyɛ litsedi nɛ fɔlɛtsa a kĩ bɛlɛ biyi nɛ ovoli kĩĩ kamɛ a kamɛ ni, Baguma aanyɛ ye tsɛfã nɛ nkpã kutse libi a kamɛ, ade ɛláana tsɛfã nɛ Ɔmatɔ Kpalɛwa a lɛmɛ kamɛ a.
20Oti a kĩ yadi adansiɛ nɛ fɔtsa kĩĩ flee akũ a lɛ kĩ, “Oo, maaya mɔatsɛ!”
Fɔya lɔmɔ. Boe Ɔlate Yesu, ya!
21Boe Ɔlate Yesu kɔnyakamɔ kɔtamɔ odi nyɛ odi.