2 TESALONIKAFƆ

2 TESALONIKAFƆ

Paulo Ovoli Ɔyade Kĩ Ɛtsɛlɛ Ɛma Tesalonikafɔ

¹Yĩ, Paulo, Silvano mɔ Timoteo, bɔtsɛlɛ ovoli kĩĩ bɔama mi a kĩ minyɛ Baguma mɔ boe Ɔlate Yesu Kristo bade a nɛ Tesalonika. ²Bɔwɛ kĩ Baguma boe Ɔlɛga, mɔ boe Ɔlate Yesu Kristo, bɛmɔ mi kɔnya, bɛkpa mi lukudɔ lɛmɛ.

Bɔawã Baguma Kĩ Mi Kadzi Kamɛ Kiketimɔ Ye Kavɛ a.

³Nwaɛ̃ amɛ, kɛnɛ kĩ bɔanyɛ Baguma kɔlɛ nɛ mi lɔlɔ. Fɔnɛnɛ kĩ bɔanyɛ ye kɔlɛ, kitonɛkĩ mi katɛkado abo anɛ, ade mi bawaɛ̃ akũ kawɛ lɛmɛ lamɛna lɔtɔ kanaa a. ⁴Nɛ fukĩĩ sũ bɔapia nɛ mi akũ katsa Baguma tɛsɔli a. Bɔapia lɛmɛ nɛ ayekĩ midzɛ̃ pintii nɛ mi katɛkado a akũ, titɔ kĩ bitomɔ mi liti ade miamɔ lubo lɛmɛ.

⁵Fukĩĩ flee atsa kĩ Baguma kadzɛ kamɛ kpalɛ, nɛ foesũ yaamɔ mi kĩ mikpɔla mikpa kadzikɔ̃ nɛ ye lɛgãkanyakɔ̃ a kĩ de akũ miamɔ lubo a kamɛ. ⁶Baguma aakɛna lɛtsa a kĩ lɛnɛnɛ nɛ de osi akũ, ade yaavɛlɛ lubo kamɔ eko nɛ bikĩ bɛmɔna mi lubo akũ a. ⁷Yaafɔ̃ mi a kĩ mimɔ́ lubo a, mɔ boe a flee bɔna kawɛya. Baguma aakɛna fukĩĩ nɛ lɔkɔ a kĩ boe Ɔlate Yesu mɔ ye ode fɔtɔ banyanɛ anɛ nɛ odetɔ́ kamɛ nɛ fi mɔ kɔbɛ̃ kamɛ. ⁸Yaavɛlɛ bati a kĩ binyína Baguma, mɔ bikĩ bisĩ boe Ɔlate Yesu Kristo Kalɛ Wĩ a sɔtɔ. ⁹Boe Ɔlate aablɔmɛna be nɛ ye anɛ kamɛ mɔ ye awã kĩ ye kukũkpalɛ mɔ ye kɔbɛ̃ deĩ a. Yaawɔla be mɔ odu mɔ odu, ¹⁰ntɛ ɛya nɛ Luwi kpale a akũ. Yaatɛ obu mɔ kamu etomɛna ye batɛ badonɛ a flee sɛkɛ̃. Mi malo míana nɛ be kamɛ, kitonɛkĩ mitɛ ye fɔlɛtsa wĩ a kĩ bubi mi a mido.

¹¹Ade fukĩĩ sũ bɔabɔa mpaɛ nɛ mi lɔlɔ lɔkɔ nyɛ lɔkɔ a. Bɔawã Baguma kĩ ɛfɔ̃ mi kadzi kamɛ kiketimɔ kavɛ a kĩ ɛvɛ mi a. Ye kɔbɛ̃ kɔfɔ̃ mi tuwĩ kakɛna flee nɛ mi katɛkado kamɛ a fɔya nɛ foe kamɛ. ¹²Fɔ́atsã fukĩĩ akũ boe Ɔlate Yesu dĩ aade nɛ ode, mi malo mina dĩ kadɛla nɛ ode mitomɛna ye sɛkɛ̃ nɛ Baguma mɔ boe Ɔlate Yesu Kristo kɔnyakamɔ sũ.

Mitafɔ̃ Bati Badima Lɛkɛ Mi.

¹Nwaɛ̃ amɛ, bɔawɛ kĩ bɔabi mi fɔlɛtsa fudi nɛ boe Ɔlate Yesu Kristo kabuki kaya mɔ boe kakpɔta nɛ ye sɛkɛ̃ a akũ. ²Ntɛ minu kĩ boe Ɔlate kaya luwi a ya kɔkɔɛ ni, mitafɔ̃ mi kakɔna litutulu ĩye libe liwo mi. Ɔsa míakɔna kĩ boe lɛlɛ fukĩĩ nɛ lɔkɔ a kĩ bɔnyɛ Baguma onukpɛ̃, ĩye kĩ bɔlɛ Baguma kalɛ a, ĩye kĩ bɔtsɛlɛ ovoli odi bɔma mi. ³Mitafɔ̃ oti odima lɛkɛ mi nɛ osi odima akũ, kitonɛkĩ boe Ɔlate luwi a lɛláaya mbɔɛntɛ lɔkɔ a kĩ bati pii aayidza bɛdza nɛ Baguma akũ a ya, ade oti kpa a kĩ Baguma nyɛ eyi kĩ yaawɔla a aanɛ ɛdza a. ⁴Oti Kpa a aayidza ɛdza nɛ Baguma Hũhũ kɔbɛ̃ adi nyɛ adi akũ, ĩye lɛtsa nyɛ lɛtsa kĩ bati asum akũ, lɔkɔa ɛbɔɛ ye akũ kĩ ɛbɛ̃ hũhũ a flee. Malo kɔlaa, yanadzá nɛ Baguma Asɔli Kɔla kamɛ, ɛkɛna ye akũ kĩ ye nyɛ Baguma mɔawɛ a.

⁵Miáte anɛ kĩ lɔkɔ a kĩ nna nɛ mi sɛkɛ̃ a mbi mi fukĩĩ bamɛ? ⁶Lɛmɛ kɔbɛ̃ kudi sua foe kaya osi finyaakĩĩ. Mi mɔawɛ a minyina lɛtsa kĩ fɔanɛ. Oti Kpa a aanyɛ ye akũ kanya ntɛ ye lɔkɔ wo ɔtɔ. ⁷Tɔkpa kakɛna kɔbɛ̃ lamɛna adzuma kakɛna nɛ kabɛla kamɛ kɔkɔɛ. Lɛmɛ fɔtsa a kĩ fɔ́aya a ni, fɔláaya nɛ foe kamɛ tɔ̃ kɛnaawo kĩ Baguma nyɛ oti a kĩ yasua foe osi. ⁸Fukĩĩ liti ni, Baguma aanyɛ oti kpa a kanya, lɛmɛ ntɛ boe Ɔlate Yesu ya ni, yaakɔa ye onukpɛ̃ kamɛ otutuo ɛkɔ ye lɔkɔa ɛkɔa ye kukũkpalɛ ɛwɔla ye. ⁹Oti Kpa a na aaya mɔ Abonsam kɔbɛ̃, lɔkɔa ɛkɛna awãwã mɔ fɔvã nsɛntsɛlɛni fɔtsa kumɛkumɛ. ¹⁰Ade bati a kĩ baya kawɔkɔ̃ a ni, oti kpa a aatsã ablɔ tɛdake tisi nyɛ tisi akũ ɛkɛ be. Baawɔ kitonɛkĩ bɛtátɛ ɔnɔkɔali kalɛ wĩ a kĩ fɔ́afɔ̃ Baguma lɛkpa be nkpã a bido. ¹¹Nɛ fukĩĩ sũ, Baguma aakɔa hũhũ kĩ yaafɔ̃ bɛyɛla osi edo nɛ be kamɛ ayekĩ baatɛ fɔvã kama fɔlɛtsa bido. ¹²Foe kawũna aanya kĩ, Baguma aakɔ be flee kɔtɔ, kitonɛkĩ bɛtátɛ ɔnɔkɔali kalɛ a bido, mbom bamɔ kawɔlɛ nɛ tɔkpa kakɛna akũ.

Bɛpau Mi Kĩ Mina Nkpã.

¹³Nwaɛ̃ amɛ, kɛfɛta kĩ bɔanyɛ Baguma kɔlɛ daa nɛ mi lɔlɔ, kitonɛkĩ yawɛ mi kalɛ paa. Kito anɛ kayɔkayi a, Baguma nyɛ mi kĩ mina katɛ. Ɛkɔa ye Hũhũ Kpalɛwa ɛkpalɛ mi akũ nɛ ayekĩ mitɛ kalɛ wĩ a mido sũ. ¹⁴Ade fɔtsã Kalɛ Wĩ a kĩ bubi mi a akũ sũ ni, Baguma vɛ mi kĩ miyaana tsɛfã nɛ boe Ɔlate Kristo kukũkpalɛ a kamɛ. ¹⁵Nɛ fukĩĩ sũ, nwaɛ̃ amɛ, midza kɔɔba, mipi ɔnɔkɔali fɔlɛtsa a kĩ bɔtsa mi nɛ boe fɔtsa katsa, mɔ boe tuvoli kamɛ a midomɔ akũ.

¹⁶Bɔawã boe Ɔlate Yesu Kristo, mɔ Baguma boe Ɔlɛga kĩ yawɛ boe kalɛ a, kĩ nɛ ye kɔnyakamɔ kamɛ ni, ɛkpa boe ɔwɔlɛ kado mɔ kɔnɛte pii, ¹⁷ɛkpa mi kɔbɛ̃, edo mi tɔwɔlɛ fi nɛ kɔdzɛla wĩ kalɛ, mɔ tudzuma wĩ kakɛna kamɛ.

Mite Anɛ Mikaabɔa Mpaɛ Nɛ Boe Lɔlɔ.

¹Yĩ kalɛ kawũnade nyɛ kĩ, nwaɛ̃ amɛ, mibɔa mpaɛ nɛ boe lɔlɔ ayekĩ boe Ɔlate kalɛ a aagba nɛ fɔkɔ kumɛkumɛ, lɔkɔa bɛtɛ ke mɔ obu ndɛ ayekĩ fɔna nɛ mi kamɛ a. ²Mibɔa mpaɛ lɛmɛ kĩ Baguma ɛnyɛ boe etomɛna tɔkpa mɔ bati kpa awɛ kamɛ, kitonɛkĩ nnɛ́ bati flee lɛtɛ kalɛ a bido. ³Lɛmɛ boe Ɔlate nyɛ ɔnɔkɔalini, ade yaado mi kɔbɛ̃, ɛdã mi akũ ayekĩ okesĩnɛ a lɛláanya mi akũ. ⁴Boe Ɔlate akpa boe katɛkado nɛ mi akũ kĩ míakɛna nɛ fukĩ bɔtsa mi a akũ, ade bɔatɛ kado kĩ míakɛna nɛ foe akũ lɛmɛ a. ⁵Bɔawã Baguma kĩ ɛkpa mi ye ɔdɔ a kayɔkanu baũ, mɔ ɔwɔlɛ kado a kĩ Kristo akpa a.

Mikɛna Mi Tudzuma.

⁶Nwaɛ̃ amɛ, bɔasi mi mbla nɛ boe Ɔlate Yesu Kristo dĩ akũ kĩ mivɛlɛ mi akũ nɛ batɛ badonɛ banyɔnɛpo a kĩ baákɛna nɛ fɔtsa kĩ bɔtsa mi akũ a ɔwɛ̃. ⁷Mi mɔawɛ minyina yededeede kĩ kɛnɛ kĩ miakɛna adzuma ndɛ ayekĩ boe malo bɔkɛna a, kitonɛkĩ bɔtákɛna ɔnyɔnɛ nɛ lɔkɔ a kĩ bɔna nɛ mi sɛkɛ̃ a. ⁸Bɔtákɔa boe kanya bute nɛ odima akũ kĩ bɔtáse kɔtɔ. Mbom bɔkɛna adzuma mɔ ɔsĩ mɔ ɔsĩ lɛnyɛ mɔ suwa ayekĩ odima lɛláabɔa kɔtɔ nɛ boe akũ kadã kamɛ. ⁹Budeĩ osi kufɛ kĩ bɔakɔa boe akũ kadã bute nɛ mi akũ, lɛmɛ bɔkɛna foe kĩ mikɔlɛ mitomɛna boe sɛkɛ̃. ¹⁰Míate anɛ kĩ lɔkɔ a kĩ bɔna nɛ mi sɛkɛ̃ a, bɔkabi mi kĩ odi nyɛ odi kĩ esĩ kĩ yaakɛna adzuma ni, ɛtanya lɛmɛ.

¹¹Bɔabi mi fɔtsa kĩĩ bamɛ kitonɛkĩ bɔanu kĩ banyɔnɛpo badi deĩ nɛ mi kamɛ, kĩ baákɛna lɛtsama kɛba bakɔba akũ fɔlɛtsa katsã kalɛ. ¹²Bɔasi bati kĩĩ mbla bɔkpa be kɔdɛ mɔ ɔsĩ mɔ ɔsĩ nɛ boe Ɔlate Yesu Kristo dĩ akũ, kĩ bidzi kadzi wĩ lɔkɔa bɛkɛna adzuma bɛdã be mɔawɛ akũ.

¹³Lɛmɛ, nwaɛ̃ amɛ, mitafɔ̃ akpɔ liveli mi nɛ tuwĩ kakɛna kamɛ. ¹⁴Ade ntɛ odi lákɛna nɛ fɔlɛtsa a kĩ bɔabi mi nɛ ovoli kĩĩ kamɛ akũ ni, miyi ye ɔsũ lɔkɔa mifɔnɛ ye awɛ, kɔnyɔã kuwo ye. ¹⁵Lɛmɛ mitabɔɛ ye likesĩ, mbom midɛ ye ndɛ ɔwaɛ̃ aye.

Bɔakla Mi.

¹⁶Bɔawã boe Ɔlate mɔawɛ a kĩ ɛnyɛ lukudɔ oti a, kĩ ɛkpa mi lukudɔ daa nɛ mi kadzi kamɛ. Boe Ɔlate ɛdãmɛna mi flee akũ.

¹⁷Yĩ Paulo mɔawɛ lɛtsɛlɛ fɔlɛtsa kĩĩ makla mi. Ade aye mado awɛ nɛ yĩ tuvoli flee kayɔ a, ade aye lɛmɛ matsɛlɛ fɔtsa a. ¹⁸Bɔawã kĩ boe Ɔlate Yesu Kristo ɛmɔ mi flee kɔnya.