2 PETRO
Petro Ovoli Ɔyade
11Ovoli kĩĩ to yĩ, Simon Petro, Yesu Kristo osumunɛ mɔ fɔtɔ ɔnyanɛ sɛkɛ̃. Ntsɛlɛ ye mamɛna bati a kĩ bɛtsã boe Baguma mɔ boe Ɔtɛnɛ Yesu Kristo tuwĩ kakɛna akũ bɛna katɛkado kĩ kideĩ kɔya ndɛ boe kade a aye.
2Baguma kɔnyakamɔ, mɔ ye lukudɔ lɛpɔ nɛ mi akũ, ayekĩ míabuki minyi ye mɔ Yesu kĩ ɛnyɛ boe Ɔlate a mibu.
Ayekĩ Baguma Vɛ Bati Ɛpau Be.
3Baguma kɔa ye mɔawɛ kɔbɛ̃ ɛkpa boe lɛtsa nyɛ lɛtsa a kĩ busĩ nɛ nkpã kamɛ a faa kĩ bupuli budzi nkpã busum ye kasum wĩ. Ɛkɛna fukĩĩ ɛnɛɛ yabumɔ boe kĩ bunyi oti a kĩ ɛvɛ boe kĩ bɔyaana tsɛfã nɛ ye mɔawɛ kukũkpalɛ mɔ tuwĩ kakɛna a kamɛ. 4Baguma tsã osi kĩĩ akũ ete boe fɔtsa kpale mɔ kɔya a kĩ ɛlɛ eyi a, ayekĩ bɔ́apuli bɔtsã futetsa kĩĩ akũ bulo nɛ fɔtsa kpa kĩ fɔakɔ oti odo kĩ fɔawɔla oti nɛ katinya onukpɛ̃, lɔkɔa bɔtsã foe akũ bɔna tsɛfã nɛ Baguma kutidu a kamɛ.
5Nɛ fukĩĩ sũ, mibɔa mbɔdi mikɔa tuwĩ kakɛna mibumɔ mi katɛkado. Ade ayea kadikanyi kibumɔ mi tuwĩ kakɛna, 6akũ kanya kibumɔ kadikanyi, ɔwɔlɛ kado kibumɔ akũ kanya, Baguma kavila kibumɔ ɔwɔlɛ kado. 7Mikɔa tɔwaɛ̃ kakɛna nɛ Kristo kamɛ mibumɔ Baguma kavila, ade mikɔa ɔdɔ mibumɔ tɔwaɛ̃ kakɛna a. 8Ntɛ mideĩ ɔbla kĩĩ mɔ ɛtɛ mi kamɛ flee ni, fɔafɔ̃ mikabɔa mbɔdi, mi akũ lɛna nfasɔ, nɛ ayekĩ minyi boe Ɔlate Yesu Kristo sũ. 9Lɛmɛ ntɛ ɔbla kĩĩ lɛláa odi kamɛ ni, kekɔ̃ eku anɛ eyua, kĩ ɛláapuli ɛmɔ mɔ lugo, ade yalɛla tɔkpa a kĩ ɛkɛna ɛtɛ̃ a kĩ Baguma wɔla nɛ ye akũ a.
10Foesũ, nwaɛ̃ amɛ, mibɔa mbɔdi mɔ ɔsĩ miba kɔkɔɛ, mido akũ ɔsĩ mifɔ̃ kavɛ a kĩ Baguma vɛ mi, mɔ kapau a kĩ ɛpau mi a, fɔnya fɔtsa kɔlɛwa fɔkpa mi. Ntɛ mikɛna foe lɔmɔ ni, miláamuniki nɛ mi katɛkado a liti. 11Ntɛ fɔtsã osi kĩĩ akũ a, baakpa mi osi faa miwo nɛ boe Ɔlate mɔ boe Ɔtɛnɛ Yesu Kristo lɛgãkanyakɔ̃ a kĩ kɛwaa daa a kamɛ.
12Titɔ kĩ minyina fɔtsa kĩĩ kɔkɔɛ, midzɛ̃ pintii nɛ ɔnɔkɔali a kĩ bɔtsa mi a kamɛ malo ni, mawɛ kĩ makate mi foe anɛ luwi daa. 13Mbu kĩ, kĩ ndzi kpã ni, fɔnɛnɛ kĩ nkaanyina mi nɛ fɔlɛtsa kĩĩ akũ. 14Ĩnyina kĩ owi lɛláabuna mɔ maaku ndɛ ayekĩ boe Ɔlate Yesu Kristo nyɛ ɛtsa yĩ pefee a. 15Nɛ foesũ maabɔa mbɔdi ntsa mi osi a kĩ nɛ yĩ wuda liti ni, míapuli mite anɛ nɛ fɔtsa kĩĩ akũ lɔkɔ nyɛ lɔkɔ.
Bati a Kĩ Bɛmɔ́ Kristo Kukũkpalɛ a.
16Nnɛ́ tugu kĩ bɛmɛ nɛ nyansã kamɛ bɔkɔa bɔlɛ boe Ɔlate Yesu Kristo kaya nɛ kɔbɛ̃ kamɛ a bɔtsa mi. Boe mɔawɛ a lɛmɔ ye kɔbɛ̃, obu mɔ kukũkpalɛ a mɔ anɛ. 17Bɔna nɛ awã luwi a fɔmɔ Baguma boe Ɔlɛga a kɔa ye obu mɔ kukũkpalɛ ɛkpa ye, ade odo to ode nɛ Kukũkpalɛ Flee Ɔlate a sɛkɛ̃ ɛlɛ kĩ, “Ade yĩ Obi kĩ maátunɔ kalɛ a. Yawo yĩ anɛ.” 18Boe mɔawɛ a linu odo kĩĩ kĩ eto ode nɛ lɔkɔ a kĩ bɔna nɛ ye sɛkɛ̃ nɛ ɔtɔ kpalɛwa a akũ.
19Nɛ foesũ boe mbom bɔtɛ Baguma onukpɛ̃ banyɛnɛ lɛtsã a kĩ bide nɛ ye akũ a budo bɔba. Mibɔa mbɔdi mipi ɔlɛdo a kĩ ɛla ndɛ ɔsɛdza kĩ yavɔlɛ nɛ ɔtũ kamɛ a mido mɔ akũ, kɛnaawo odenyinawi kĩ ɔnɔnɛ lisibii a aade lɛvɔlɛ nɛ mi tɔwɔlɛ kamɛ. 20Lɛmɛ lɛtsa a kĩ lɛbɛ̃ foe flee nyɛ kĩ, mite anɛ kĩ odima lɛláapuli ɛnyɛ Katsɛlɛ Kpalɛwa fɔlɛtsa a kĩ bɛlɛ biyi a kayɔ nɛ ye mɔawɛ akũ akũ. 21Kitonɛkĩ Baguma onukpɛ̃ banyɛnɛ fɔlɛtsa fudima táto otidziwa kawɛ kamɛ fɔya tɔ̃ da, mbom Hũhũ Kpalɛwa a kɔbɛ̃ lɛfɔ̃ bati lɛ Baguma ɔlɛdo a biyi.
2Petro Kpa Kɔdɛ Nɛ Bavãlɛvã Fɔtsa Batsanɛ Akũ.
1Ndɛ ayekĩ fɔvã onukpɛ̃ banyɛnɛ nɛ́ nɛ bati kamɛ kɔkɔɛ a, ade ayea bavãlɛvã fɔtsa batsanɛ aanɛ nɛ mi kamɛ a. Baatsã tɛdake kamɛ bɛyamɛna fɔvã fɔtsa katsa a kĩ fɔ́abula bati kade, ade baasĩ boe Ɔlate a kĩ ɛya be ɛtɛ be nkpã a malo. Be fɔtsakɛlawa aafɔ̃ bɛwɔla be mɔatsɛ. 2Bati pii aatomɔ be ɔbla kpa kabɔa a liti, ade nɛ fɔvã fɔtsa batsanɛ a sũ ni, bati bɛbã aalɛ kɔdzɛla kpa bitia ɔnɔkɔali osi a. 3Ayekĩ bavãlɛvã fɔtsa batsanɛ kĩĩ deĩ anɛngbã nɛ sika akũ sũ ni, baatsã tɛdake mɔ fɔvã kamɛ bɛna mi akũ nfasɔ. Lɛmɛ Baguma kɔ be kɔtɔ eyi anɛ kɔkɔkɔɛ, ade Oti a kĩ yaawɔla be a lɛmɛ lanyɛ anɛ nɛ be akũ!
4Baguma támɔ ye ode fɔtɔ banyanɛ a kĩ bɛkɛna tɔkpa a kɔnya, mbom edo be nkɔsɔnkɔsɔ, ɛta be edo nɛ fi kĩ fɔádĩ da a kamɛ, awã kĩ bideĩ nɛ ɔtũ kamɛ badzɔlɛ kadzɛ Luwi a. 5Ade ayea Baguma támɔ atitifɔ katinya bati a kɔnya a. Ɛfɔ̃ mui kayili wɔla bati a kĩ bɛtávila Baguma nɛ katinya kamɛ flee a, mbɔɛntɛ Noa kĩ ede lɛtsã nɛ nkpã kadzi kpĩĩ akũ, mɔ bati evũkɔnɔ bɛbã odi Baguma nyɛ nɛ foe kamɛ.
6Baguma kɔ Sodom mɔ Gomora tɛmatɔ tɛkpale tɛkpale a kɔtɔ, ade ɛfɔ̃ fi wɔla te bubloo tɛdani batɔ nɛnɛ a. Ɛkɛna be kĩ bɛnya nfantuhũ bɛkpa bikĩ baávila Baguma a lɛtsa a kĩ laaya nɛ be akũ. 7Lɛmɛ Baguma nyɛ Lot, oti kpĩĩ kĩ bati ɔbla kpa kabɔa kaha ye ɔwɔlɛ. 8Oti wĩ kĩĩ dzi nɛ be kamɛ, ade be ɔbla kpa a kĩ ɛkamɔ ɛkanu mɔ be titikpa a kaha ye ɔwɔlɛ luwi nyɛ luwi. 9Nɛ foesũ boe Ɔlate nyina ayekĩ yanyɛ bati a kĩ bavila ye a etomɛna be sɔhuiɛ kamɛ, mɔ ayekĩ yafɔ̃ bati kpa aana nɛ sɔtɔ kavɛlɛ kamɛ bɛkɔa bɛdzɔlɛ kadzɛ luwi a. 10Yakɛna foe titiliwu nɛ bati a kĩ bitomɔ sukɛna fɔwɛtsa kpa kĩ fɔakɔ odo liti, kĩ foesũ baábu Baguma otumi kĩ yanya be akũ a kado nɛ lɛtsama kamɛ.
Fɔvã fɔtsa batsanɛ kĩĩ deĩ anɛ ɔsĩ, ade badɛla be akũ nɛ ode a. Baákɔa obu kakpa ode bati kpalɛwa a, ade ntɛ balɛ tɔkpa nɛ be akũ malo ni, akũ lányɛnɛ be. 11Baguma ode fɔtɔ banyanɛ a kĩ bideĩ kɔbɛ̃ mɔ otumi bɛbɛ̃ fɔvã fɔtsa batsanɛ malo a lákɔa fɔlɛtsa kpa katsua be onukpɛ̃ nɛ boe Ɔlate a anɛ. 12Lɛmɛ bati kĩĩ la ndɛ bayaɛ kpa kĩ bɛlá adzuni, kĩ katinya nyɛ be kĩ bati bipili be bɛkɔ. Balɛ fɔlɛtsa kpa nɛ lɛtsa nyɛ lɛtsa a kĩ bɛtánu de kayɔ a akũ. Baguma aawɔla be ndɛ ayekĩ batidziwa awɔla tuwĩ kamɛ bayaɛ.
13Baamɔ lubo nɛ lubo a kĩ bɛfɔ̃ bati mɔ́ a sũ. Be kawɔlɛ nyɛ kĩ bɛkɛna be sukɛna fɔwɛtsa kpa fudi nyɛ fudi nɛ suwa ketee. Bɛnyɛ kɔnyɔã mɔ tuduli fɔtsa bakɛnanɛ, ade ntɛ mi mɔ be midzi mianya a, bamɔ kawɔlɛ nɛ be bati kakɛ tisi a akũ. 14Bideĩ anɛ kĩ yamɔ batsole adɔpaafɔ, ade anɛ a kakɔa kakɛna tɔkpa láplo be a. Bavɛlɛ bati kĩ be katɛkado lɛdzɛ́ pintii kado nɛ tɔkpa kamɛ. Bɛvɛlɛ be akũ bɛkpa anɛngbã. Baguma kadumu tomɔ be! 15Bɛfɔnɛ nɛ osi kpĩĩ a awɛ, ade bɛyɛla osi a. Bɛtsã osi a kĩ Balam, Boer obinyole a tsã a. Balam mɔ kawɔlɛ nɛ sika a kĩ yaana etomɛna tɔkpa kakɛna kamɛ a akũ. 16Lɛmɛ Baguma kã ye anɛ nɛ ye tɔkpa a sũ. Ye mɔawɛ aflimu kĩ ɛnɔnɛ lɛ kɔdzɛla mɔ oti odo, ade esua onukpɛ̃ ɔnyɛnɛ a fɔbɔdamtsa kakɛna osi a.
17Fɔvã fɔtsa batsanɛ kĩĩ la ndɛ fɔwɔkɛ kĩ fuviɔ̃, ĩye luflututu kĩ ɔwɛ mɔ ɔsĩ abɔa kanamɛna. Baguma manɛ kadzikɔ̃ eyi ɛkpa be nɛ ɔtũ kpli kamɛ. 18Balɛ kɔdzɛla mɔ akũ kata, kalɛ fɔkɔasiatsa lɛmɛ. Bakɔa sukɛna fɔwɛtsa kĩ fɔakɔ odo kakɛ bikĩ owi tábuna kĩ bilo nɛ amamu kadzi kamɛ. 19Bakpa be anɛ kate nɛ akũ akũ kadzi akũ, lɛmɛ be mɔawɛ a bɛnyɛ ɔbla kpa a kĩ yawɔla bati a basate, kitonɛkĩ lɛtsa a kĩ lɛnya oti akũ ni, oti a adani ɔsate ɛkpa lɛtsa a.
20Ntɛ bati tsã boe Ɔlate mɔ Ɔtɛnɛ Yesu Kristo kanyi kamɛ bilo nɛ katinya kamɛ fɔtsa a kĩ fɔado oti efĩĩ sɛkɛ̃, mɔ́ ɔbla a na muniki ewo nɛ be kamɛ ɛnya be akũ ni, bati a na nkpã awũnade a abu kade kaba atɔnyade a. 21Ntɛ kanyi kĩĩ bɛtanyi lɛtsama nɛ kadzi nɛ osi kpĩĩ akũ ni, kufɛ fɔnɛnɛ kɔlaa fɔkpa be kɛba kĩ binyi osi wĩ kĩĩ lɛmɛ bibuki bimuniki nɛ mbla kpalɛwa a kĩ Baguma kpa be a liti.
22Lɛtsa a kĩ lɛya nɛ be akũ a atsa kĩ fɔgbã kĩĩ nyɛ ɔnɔkɔali kĩ, “Okpete amuniki kanaabɔɛ ye mɔawɛ tɛdã,” ade, “Ɔplakuo kĩ bɛwɔla ye mui yededeede amuniki kanaato tɔdɔ̃.”
3Mimanɛ Akũ Mikpa Boe Ɔlate Kabuki Kaya.
1Nwaɛ̃ amɛ kĩ maátunɔ kalɛ, ade ovoli ɔyade kĩ ntsɛlɛ mamɛna mi a. Nɛ tuvoli nviã a kamɛ a, nwɛ kĩ manyina mi adzuni nɛ fɔtsa wĩ kakɛna akũ, ndɛ fɔlɛtsa kakai aye. 2Mawɛ kĩ mite anɛ nɛ fɔlɛtsa a kĩ Baguma onukpɛ̃ banyɛnɛ kpalɛwa a lɛ biyi anɛ kɔkɔɛ a, mɔ tɛbla a kĩ mi fɔtɔ banyanɛ a tɛ bitomɛna boe Ɔlate mɔ Ɔtɛnɛ sɛkɛ̃ bɛma mi a akũ.
3Minya lɔtɔ minu foe kayɔ kĩ nɛ fuwi nkaɛ a kamɛ ni, nsekuo badinɛ aaya. Baadzi nkpã nɛ be sukɛna fɔwɛtsa kĩ fɔakɔ oti odo onukpɛ̃ bidi mi nsekuo. 4Ade baalɛ kĩ, “Ɛlɛ eyi kĩ yaaya. Nde ye? Kitonɛkĩ anɛ kĩ boe bawanyɔ ku kɛyawo finyaa, ade ayea lɛtsa nyɛ lɛtsa buki lideĩ ndɛ ayekĩ fɔna kĩ Baguma bɔa katinya a!” 5Bibua pa bisĩ ɔnɔkɔali a kĩ anɛ kɔkɔɛ mɔ Baguma kɔa kalɛ ɛbɔa tite mɔ ode. Ɛkɛna tite etomɛna mui kamɛ, tɛdzɛ̃ nɛ mui kamɛ, 6ade mui lɛmɛ, mui a kĩ biyili a ɛkɔa ɛwɔla katinya kɔɛ a. 7Ade Baguma kalɛ mɔapɛ kĩĩ pini tite mɔ ode a kĩ fudeĩ finyaa, ade ɛmanɛ foe eyi kĩ yaakɔa fi ɛwɔla foe a. Baguma manɛ foe eyi ɛkpa kadzɛ luwi a kĩ yaawɔla bati a kĩ bɛtávila ye a.
8Lɛmɛ nwaɛ̃ amɛ kĩ maátunɔ kalɛ, mitalɛla kalɛ mɔa kĩĩ! Ade ke nyɛ kĩ nɛ boe Ɔlate sɛkɛ̃ ni, luwi mɔa la ndɛ futeli apim, ade futeli apim lɛmɛ la ndɛ luwi mɔa a. 9Nɛ badi kakɔna onukpɛ̃ ni, boe Ɔlate lána sɔwa nɛ lɛtsa a kĩ ɛlɛ eyi a kakɛna akũ. Fɔlá lɔmɔ, mbom ɔwɔlɛ bɔɛɛ edeĩ ɛkpa mi, kitonɛkĩ yaáwɛ kĩ odima ɛyaawɔ, mbom yawɛ kĩ bati flee bɛdani tɔwɔlɛ kamɛ.
10Lɛmɛ boe Ɔlate Luwi a aaya ndɛ ayekĩ oyekpanɛ aya a aye. Nɛ luwi a akũ ni, ode aatɛ̃ ɛnaa nɛ odo kpaa kanɛ kamɛ, ade odetɔ́ kamɛ fɔtsa flee a aatɛ̃ fuvio fɔwɔ, ade tite mɔ te akũ fɔtsa flee lɛmɛ aavio a.
11Foesũ ntɛ baawɔla fɔtsa kĩĩ flee nɛ osi kĩĩ akũ ni, bati bawɔdabe odu kɛnɛ kĩ mianya? Kɛnɛ kĩ mibɔa ɔbla kĩ ɛkpalɛ, mikɔa mi akũ flee misum Baguma, 12nɛ lɔkɔ a kĩ midzi miadzɔlɛ Baguma Luwi a mɔ akũ kasĩ kĩ lɛya mɔatsɛ. Ade luwi a mɔ ode aapi fi evio, ade fi ɔwɛ a aanyinyina odetɔ́ kamɛ fɔtsa flee a. 13Lɛmɛ boe kɔ̃ nɛ Baguma kalɛkayi onukpɛ̃ ni, bɔadzɔlɛ ode vɔɛ̃ mɔ tite vɔɛ̃, awã kĩ fɔtsa wĩ kakɛna tɛ tɔtɔ.
14Foesũ nwaɛ̃ amɛ, kĩ miadzɔlɛ boe Ɔlate Luwi a ni, mibɔa mbɔdi kĩ míanya bati kpalɛwa, kĩ nfumusu lɛláa mi akũ nɛ Baguma anɛ, mbom lukudɔ lɛna nɛ mimɔ Baguma kayite. 15Kɛnɛ kĩ bɔabu boe Ɔlate a ɔwɔlɛ bɔɛɛ kana kakpa boe a ndɛ osi kĩ ebinya ɛkpa mi kĩ mina nkpã katɛ. Ade fɔlɛtsa kĩĩ boe ɔwɛnɛ Paulo malo tsɛlɛ ɛma mi nɛ nyansã a kĩ Baguma kpa ye a onukpɛ̃ a. 16Ade lɛtsa a kĩ yalɛ nɛ fɔlɛtsa kĩĩ akũ nɛ ye tuvoli a kamɛ a. Ye tuvoli a kamɛ fɔlɛtsa a fudi kayɔ kanu deĩ ɔsĩ. Nɛ foesũ bati a kĩ binyína tuvoli mɔ bikĩ bɛtátim nɛ be katɛkado kamɛ a adani foe kayɔ kanyɛ, ndɛ ayekĩ bakɛna mɔ Katsɛlɛ Kpalɛwa fɔlɛtsa bɛbã a fudi. Fukĩĩ kakɛna aafɔ̃ bɛwɔla be akũ.
17Lɛmɛ mi yĩ bakɔba, minyina fukĩĩ kɔkɔɛ. Foesũ midã mi akũ kadã wĩ ayekĩ bati a kĩ baábu mbla a lɛláanyɛ kudu nɛ mi abɔa kayɔ minɛ mitɔ! 18Mibo anɛ nɛ boe Ɔlate mɔ Ɔtɛnɛ Yesu Kristo kɔnyakamɔ mɔ kanyi kamɛ. Ye kade nyɛ kukũkpalɛ kito finyaa kanaa daa. Fɔya lɔmɔ.