1 TIMOTEO

1 TIMOTEO

Paulo Ovoli Ɔtɔnyade Kĩ Ɛtsɛlɛ Ɛma Timoteo

¹Ovoli kĩĩ to yĩ, Paulo, kĩ ĩnyɛ Yesu Kristo fɔtɔ ɔnyanɛ, kĩ Baguma boe Ɔtɛnɛ a pau, mɔ Kristo Yesu kĩ ye akũ budeĩ kɔnɛte a sɛkɛ̃. ²Nkɔa mmɛna nɔ Timoteo, kĩ ɔnyɛ yĩ obi nɛ katɛkado kamɛ. Mawã kĩ Baguma boe Ɔlɛga, mɔ Kristo Yesu boe Ɔlate bɛmɔ mi kɔnya, bɛkɛna mi sɛmɛ kalɛ, bɛkpa mi lukudɔ lɛmɛ.

Paulo Kpa Kɔdɛ Nɛ Fɔvã Fɔlɛtsa Batsanɛ a Akũ.

³Mawɛ kĩ buki kadzi nɛ Efeso ndɛ ayekĩ nwɛ ntomɛna nɔ sɛkɛ̃ nɛ lɔkɔ a kĩ ndzakũ manaa Makedonia a. Bati badi deĩ nɛ awã kĩ batsa fɔvã fɔtsa nɛ Kristo katɛkado a akũ, ade kɛnɛ kĩ ate awɛ nɛ be akũ a. ⁴Bi be kĩ bɛfɔ̃ lɔkɔ kade kabula nɛ atitifɔ fɔlɛtsa mɔ bawanyɔ bawanyɔ kasinu katokɔ̃ fɔtsa katsa awɛ. Fɔlɛtsa kĩĩ bamɛ katsa ayamɛna fɔlɛtsa kavɛlɛ nɛ bati kayite. Foe bamɛ lɛnyɛ́ Baguma nhihiɛ kĩ ɛkɛna. Katɛkado odi kamɛ bɔatsã kanyi foe. ⁵Lɛtsa a kĩ de sũ makpa nɔ mbla kĩĩ nyɛ kĩ kɛnɛ kĩ bɔanyi ɔdɔ a kĩ eto ɔwɔlɛ kpalɛwa, adzuni kpalɛwa mɔ katɛkado wĩ kamɛ. ⁶Lɛmɛ bati badi muniki nɛ fɔtsa kĩĩ liti, foesũ bɛyɛla osi wĩ a, ade bɛkɔa be lɔkɔ bɛkpa fɔlɛtsa kavɛlɛ mɔ fɔkɔasiatsa kalɛ a. ⁷Bawɛ kĩ banya Mose mbla fɔtsa batsanɛ. Lɛmɛ baánu be mɔawɛ fɔlɛtsa a kĩ balɛ, ĩye fukĩ bɛtɛ bido mɔ ɔsĩ mɔ ɔsĩ a kayɔ malo.

⁸Boe flee bunyina kĩ Mose mbla a nɛnɛ, ntɛ bɔakɛna nɛ ye akũ ndɛ ayekĩ fɔfɛta a. ⁹Kɛnɛ kĩ bɔate anɛ kĩ bɛtákɛna mbla bɛkpa bati wĩ, mbom bikĩ bafum Baguma mbla, bikĩ bideĩ atɔ ɔsĩ, bikĩ bɛnyɛ tɔkpa bakɛnanɛ, bikĩ binyína Baguma, mɔ bikĩ tɔkpa yi be kamɛkamɛ. Badi lɛmɛ nyɛ bikĩ bɛláa katɛkado kadima kamɛ, bikĩ bakɔ be balɛga mɔ bama, mɔ awudifɔ. ¹⁰Bati bɛbã lɛmɛ nyɛ bikĩ bɛkɔa akũ bɛkpa linyolewɛ mɔ litsolewɛ, banyole kĩ bawamɔ akũ, bati kĩ bapili bati kanɔ, bavãlɛvã, bikĩ balɔ fubo kama fɔvã, mɔ be flee a kĩ bitómɔ fɔtsa wĩ a katsa. ¹¹Fɔtsa katsa kĩĩ a deĩ nɛ Kalɛ Wĩ a kĩ bɛkɔa bido nɛ yĩ awɛ kĩ nlɛ a kamɛ. Kalɛ Wĩ a to Baguma a kĩ bɔakɔa obu mɔ nhila kakpa a sɛkɛ̃.

Bɔanyɛ Baguma Kɔlɛ Nɛ Ye Kɔnya Kamɔ Sũ.

¹²Nláapuli ĩnyɛ boe Ɔlate Yesu Kristo kɔlɛ nɛ kɔbɛ̃ a kĩ ɛkpa yĩ nnɛɛ makɛna adzuma wĩ kĩĩ akũ. Manyɛ ye kɔlɛ kĩ ɛmɔ́ kĩ nkpɔla sũ ɛpau yĩ kĩ nkɛna ye adzuma, ¹³titɔ kĩ nɛ lɔkɔ lidi kamɛ ni, nsupa ye, ntomɔ ye liti, nvũna ye malo. Lɛmɛ Baguma mɔ́ yĩ kɔnya, kitonɛkĩ nɛ lɔkɔ a na kamɛ ni, ntátɛ ye ndo ade ntányi lɛtsa a kĩ de nkakɛna a. ¹⁴Ade boe Ɔlate mɔ́ yĩ kɔnya pii, ɛfɔ̃ nna katɛkado mɔ ɔdɔ kĩ fɔnyɛ boe fude nɛ ɔmɔa kakɛna mɔ Kristo Yesu kamɛ.

¹⁵Fɔlɛtsa a kĩ malɛ nɛ awĩ a nyɛ ɔnɔkɔali kalɛ paa, kĩ kɛnɛ kĩ bati bɛtɛ ke bido. Ade foe nyɛ kĩ Kristo Yesu ya nɛ katinya kĩĩ kamɛ kĩ yayaatɛ tɔkpa bakɛnanɛ. Yĩ nyɛ ɔkpade flefle nɛ be kamɛ. ¹⁶Lɛmɛ Baguma mɔ́ yĩ kɔnya ayekĩ Kristo Yesu aapuli ɛkɔa yĩ a kĩ ĩnyɛ tɔkpa ɔkɛnanɛ flee a, ɛtsa bati bɛmɔ́ ayekĩ edeĩ ɔwɔlɛ bɔɛɛ, lɔkɔa bikĩ bayatɛ ye bido a bɛna nkpã kĩ ɛla kawũna a. ¹⁷Mifɔ̃ bɔkɔa obu mɔ kamu bɔkpa boe Lɛgã kĩ edzi kito titiiti a, kĩ bɔámɔ mɔ anɛ, kĩ ye odi keĩ nyɛ Baguma a daa daa. Fɔya lɔmɔ.

¹⁸Yĩ obi Timoteo, kɔdɛ a kĩ makpa nɔ nɛ awĩ a tsɛ̃ nɛ katɛ mɔ fɔlɛtsa a kĩ Baguma onukpɛ̃ banyɛnɛ lɛ nɛ nɔ akũ biyi a akũ. Kɔa fɔlɛtsa kĩĩ kakɛna ndɛ kawũkanɔ fɔtsa lɔkɔa kanɔ kawũ a kanɔ wĩ. ¹⁹Pi nɔ katɛkado nɛ Kristo kamɛ mɔ ɔwɔlɛ kamɛ kakpalɛ kalɛ mɔ ɔsĩ mɔ ɔsĩ. Bati badi tátse be tɔwɔlɛ kamɛ kɔdɛ ade bɛyɛla be katɛkado a. ²⁰Be kamɛ badi nyɛ Himenaio mɔ Aleksandro, kĩ nvɛlɛ be sɔtɔ, nkɔa be ndo nɛ Abonsam awɛ. Fukĩĩ aafɔ̃ bɛfɔ̃ fubusuotsa kalɛ nɛ Baguma akũ.

Paulo Kpa Kɔdɛ Nɛ Ɔsum Akũ.

¹Fɔtsa fɔtɔnyade kĩ mawɛ kĩ mikɛna nyɛ kĩ mibɔa mpaɛ nɛ bati flee lɔlɔ. Mikaavia mi fɔtsa sĩwa mɔ be fude flee katomɛna Baguma sɛkɛ̃, mikaanyɛ ye kɔlɛ nɛ be flee lɔlɔ. ²Mikaabɔa mpaɛ kakpa fɔgã mɔ bikĩ bɛdzɛ̃ nɛ bati onukpɛ̃, ayekĩ bɔ́adzi kulokulo nɛ lukudɔ kamɛ, lɔkɔa bupuli busum Baguma nɛ obu kamɛ. ³Fukĩĩ nɛnɛ, fɔade Baguma boe Ɔtɛnɛ a kawɔlɛ, ⁴kitonɛkĩ yawɛ kĩ odi nyɛ odi ɛna katɛ lɔkɔa enu ɔnɔkɔali a kayɔ. ⁵Nɛ ɔnɔkɔali kamɛ ni, Baguma mɔapɛ deĩ, ade ayea lɛmɛ lɛma ɔkplanɛ mɔapɛ deĩ nɛ Baguma mɔ batidziwa kayite a. Ade ye nyɛ Kristo Yesu a. ⁶Ade ye lɔkɔa ye akũ ɛbɔa afɔliɛ nɛ bati flee lɔlɔ a. Ade fukĩĩ atsa kĩ lɔkɔ wĩ a kĩ Baguma lɛ eyi kĩ yaatɛ katinya kamɛ bati flee a wo ɔtɔ a. ⁷Ade fukĩĩ sũ Baguma do yĩ ndɛ fɔtɔ ɔnyanɛ mɔ fɔtsa ɔtsanɛ nɛ bikĩ bɛnyɛ́ Yudafɔ sɛkɛ̃ kĩ nde lɛtsã nɛ katɛkado mɔ ɔnɔkɔali kalɛ a akũ. Nnɛ́ fɔvã mama, ɔnɔkɔali kalɛ malɛ.

⁸Nɛ asɔli adi nyɛ adi kamɛ ni, banyole a bɛnya bikĩ be tɔwɔlɛ kamɛ kpalɛ kĩ baapuli bɛdɛla akpɔ nɛ ode bɛbɔa mpaɛ kĩ kalɔkpa ĩye ɔdzɛ lɛláa be kamɛ. ⁹Mawɛ lɛmɛ kĩ batsole bɛdɔla be akũ, bidzi tilima nɛ osi kĩ fɔláatsɔlɛ anɛ akũ. Fɔnɛ́nɛ kĩ basui tɔlɔ nɛ kahɛhɛ kamɛ, bido sika ngbã mɔ fɔtsa kĩ fɔtɛ kɔya. Bɛtado tɛtadiɛ kĩ tatɛ kɔya lɛmɛ. ¹⁰Mbom be fɔtsakɛlawa fɔnya fɔtsa wĩ ndɛ batsole kĩ bɛkɔa be akũ bɛkpa Baguma. ¹¹Kɛnɛ kĩ batsole bɛdɔla be akũ, bitse kulokulo bɛkɔlɛ fɔtsa. ¹²Ntákpa be osi kĩ batsa banyole fɔtsa ĩye kĩ bɛnya banyole akũ, mbom kɛnɛ kĩ bisua onukpɛ̃ bidzi kulokulo. ¹³Kitonɛkĩ Adam Baguma nya lɔtɔ ɛbɔa fɔmɔ ɛyakɛna Eva. ¹⁴Ade nnɛ́ Adam Abonsam kɛ, mbom otsole a ɛkɛ ade ɛfɔ̃ efum Baguma mbla a. ¹⁵Lɛmɛ otsole aana nkpã nɛ ye kɔma kamɛ ntɛ edzi nɛ katɛkado mɔ ɔdɔ kamɛ, ɛkɛna ye akũ yedede nɛ akũ kadɔla kamɛ lɛmɛ.

Paulo Tsa Kutidu a Kĩ Kɔfɛta Asɔli Lɔtɔ Banyanɛ.

¹Fɔnyɛ ɔnɔkɔali kĩ ntɛ oti odi awɛ kĩ yanya asɔli lɔtɔ ɔnyanɛ ni, adzuma wĩ liti etomɛna. ²Kɛnɛ kĩ asɔli lɔtɔ ɔnyanɛ ɛnya oti kĩ nfumusu lɛláa ye akũ, kĩ ɛkɔã ɔtsɔ̃ mɔapɛ, ye adzuni waa yedede, yapi ye akũ ade bati akpa ye obu a. Kɛnɛ kĩ ɛnya oti kĩ yapuli katɛ banɔvɔɛ̃ ade yapuli katsa fɔtsa a. ³Kɛtánɛ kĩ ɛnya bavɛ owuganɛ ĩye oti kĩ ye anɛ kamɛ tádɔ, mbom kɛnɛ kĩ ɛnya oti kĩ ɛdɔ, kĩ yaákɛna ɔdzɛ, ade ɛlá anɛngbã nɛ sika akũ a. ⁴Kɛnɛ kĩ epuli ɛdãmɛna ye tɔtɔ akũ kadãmɛna wĩ, lɔkɔa ye babi bibu fɔkɔ nɛ osi nyɛ osi akũ. ⁵Kitonɛkĩ ntɛ onyole lápuli ɛdãmɛna ye tɔtɔ akũ ni, nde yaapuli ɛkpã Baguma asɔli a? ⁶Kɛnɛ kĩ ɛnya oti kĩ ebuna owi nɛ asɔli a kamɛ, ntɛ nnɛ́ aye ni yaadɛla ye akũ nɛ ode, lɔkɔa fɔtsã lukũta kamɛ ɛyaatɔ ndɛ ayekĩ fɔya fɔkpa okesĩnɛ a. ⁷Kɛnɛ kĩ ɛnya oti kĩ bikĩ bɛnyɛ́ batɛ badonɛ a malo abɔa ye dĩ wĩ, ayekĩ ɛláado ye akũ kɔnyɔã lɔkɔa ewo nɛ okesĩnɛ a awɛ kamɛ.

Paulo Tsa Bikĩ Be Kɛnɛ Kĩ Bɛnya Babumɛnanɛ Nɛ Asɔli Kamɛ.

⁸Ade aye lɛmɛ kɛnɛ kĩ asɔli lɔtɔ banyanɛ babumɛnanɛ a malo banya bati kĩ bideĩ ɔbla wĩ mɔ ɔnɔkɔali a. Bɛnya bati kĩ baáwuga bavɛ ade bɛlá anɛngbã nɛ sika lɛmɛ akũ. ⁹Kɛnɛ kĩ bapi katɛkado fɔlɛtsa wĩ a kĩ bɛnyɛ bɛtsa a bidomɔ akũ mɔ ɔsĩ mɔ ɔsĩ, bidzi mɔ tɔwɔlɛ kpalɛwa. ¹⁰Ade kɛnɛ kĩ basɔ be bɛdã nɛ asɔli tudzuma tidi kakɛna kamɛ. Ntɛ bɛkpɔla ni, baapuli bɛkɛna adzuma ndɛ lɔtɔ banyanɛ babumɛnanɛ aye. ¹¹Kɛnɛ kĩ batsɔ̃ malo bɛna tɛbla wĩ, kĩ bɛtanya bati kĩ balɛ bati akũ fɔlɛtsa. Bɛnya batsole kĩ baámɔa bavɛ kawuga, kĩ badi ɔnɔkɔali nɛ lɛtsa nyɛ lɛtsa kakɛna kamɛ. ¹²Dã kĩ babumɛnanɛ kĩĩ be kamɛ odi nyɛ odi deĩ ɔtsɔ̃ mɔapɛ, epuli yadãmɛna ye babi mɔ tɔtɔ kamɛ bati flee akũ kadã wĩ. ¹³Babumɛnanɛ a kĩ bakɛna be adzuma kakɛna wĩ a deĩ kadzakɔ̃ wĩ nɛ bati anɛ, ade baapuli bɛna ɔwɔlɛ kɔbɛ̃ bɛlɛ kɔdzɛla nɛ be Kristo Yesu katɛkado akũ a.

Miyi Kalɛ Bɛlawa Kpale a Ɔsũ.

^14-15Titɔ kĩ matsɛlɛ ovoli kĩĩ mma nɔ malo ni, nlamɛna osi kadã kĩ maayasɛla nɔ nɛ lɔkɔ lukũ kamɛ. Lɛmɛ matsɛlɛ ye ayekĩ ntɛ nkpa liti ni, aanyi ayekĩ bati bipi be akũ nɛ Baguma asɔli a kamɛ. Ade asɔli a nyɛ bikĩ bɛtɛ Baguma a kĩ edzi nkpã daa bido, kĩ fɔnyɛ luku kĩ lɛnɔnɛ ɔnɔkɔali a. ¹⁶Nɛ ɔnɔkɔali kamɛ ni, kalɛ a kĩ bɛkɔa bɛkɔla nɛ Baguma ɔsum kamɛ a nyɛ kalɛ kpale kĩ odima lɛláapuli esĩ ke. Ade foe nyɛ kĩ,

“Kristo ya nɛ katinya kamɛ ndɛ otidziwa aye

Baguma Hũhũ a nyɛ ɛtsa kĩ oti kpalɛwa yanɛ.

Ode fɔtɔ banyanɛ mɔ́ ye,

ade bide lɛtsã nɛ ye akũ nɛ fude fude kamɛ a.

Bɛtɛ ye bido nɛ katinya kamɛ flee,

ade Baguma bɔɛ ye ɛnamɛna ode nɛ kukũkpalɛ kamɛ a.”

Bati Aatomɔ Fɔvã Fɔtsa Batsanɛ Liti.

¹Hũhũ Kpalɛwa a nyɛ ɛtsa yededeede kĩ, nɛ fuwi nkaɛ a kamɛ ni, bati badi aafɔnɛ ɔnɔkɔali katɛkado kĩĩ awɛ bitse hũhũ kpa a kĩ yakɛ bati, mɔ hũhũ kpa fɔtsa katsa. ²Fɔvã bati kĩĩ aagbamɛna fɔtsa katsa kĩĩ odu. Bɛnyɛ bikĩ be tɔwɔlɛ kamɛ kakɔna ku ndɛ sɔbɔtsaɛ mɔ ovio bɛkɔa bipila te. ³Batsa fɔtsa kĩ kɔtsɔ̃ mɔ kɔnyɔ kadzi lɛnɛ́nɛ. Balɛ lɛmɛ kĩ kɛtánɛ kĩ bati anya funitsã fudi odu. Lɛmɛ Baguma lɛkɛna funitsã a na bamɛ, kĩ bikĩ bɛtɛ bido mɔ binyi ɔnɔkɔali a, bɛbɔa mpaɛ nɛ foe akũ bɛnya. ⁴Nɛ ayekĩ lɛtsa nyɛ lɛtsa kĩ Baguma bɔa nɛnɛ sũ ni, kɛtánɛ kĩ bati asĩ funitsã fudima, mbom kɛnɛ kĩ bɔatɛ lɛtsa nyɛ lɛtsa mɔ kɔlɛkanyɛ nɛ foe akũ. ⁵Kitonɛkĩ Baguma kalɛ a mɔ boe kɔlɛkanyɛ a akpalɛ funitsã a akũ.

Paulo Tsa Bati Kĩ Bɛnyɛ Kristo Yesu Basumunɛ Wĩ.

⁶Ntɛ atsa awaɛ̃ amɛ batɛ badonɛ fɔtsa kĩĩ bamɛ ni, lɔkɔa aanya Kristo Yesu ɔsumunɛ wĩ, kĩ bɛdɔɔla mɔ katɛkado fɔlɛtsa kĩĩ mɔ boe fɔtsa katsa wĩ a kĩ opini a. ⁷Foesũ vɛlɛ nɔ akũ nɛ atitifɔ katɛkado fɔlɛtsa mɛwa mɔ fɔlɛtsa kĩ fɔlá kayɔ ɔwɛ̃. Kɔa hũhũ kamɛ nkpã kadzi kavɛlɛ nɔ akũ. Baguma fɔlɛtsa a, tomɔ foe liti pintii, kadzi nkpã wĩ ndɛ ɔtɛ odonɛ aye. ⁸Akũ ɔsĩ nɛnɛ kɔ̃, lɛmɛ ayekĩ bakɔlɛ Baguma fɔlɛtsa mɔ foe akũ kakɛna akpa nfasɔ kĩ ɛbɛ̃ lɛtsa nyɛ lɛtsa. Kitonɛkĩ fɔakpa nɔ nfasɔ nɛ nkpã kĩĩ kamɛ mɔ nkpã nɛ wuda liti a lɛmɛ kamɛ. ⁹Ade ɔnɔkɔali kalɛ kĩĩ kɛnɛ kĩ odi nyɛ odi atɛ edo a. ¹⁰Nɛ fukĩĩ sũ bɔapuli kakɛna adzuma kɔɔba, kitonɛkĩ boe anɛ teĩ nɛ Baguma kĩ edzi nkpã a akũ. Ye nyɛ bati flee a kĩ titiliwu bikĩ bɛtɛ bido a Ɔtɛnɛ.

¹¹Kɛnɛ kĩ atsa be fɔtsa kĩĩ bamɛ flee, ɔdã kĩ odi nyɛ odi kɔlɛ foe. ¹²Tafɔ̃ oti odima lɛdã nɔ ndɛ obisɛ̃ nɛ ayekĩ ɔnyɛ opopo sũ. Mbom kɔa nɔ akũ kakɛna nfantuhũ wĩ kakpa batɛ badonɛ a nɛ nɔ kɔdzɛla, nɔ ɔbla, nɔ bati kawɛ, nɔ katɛkado, mɔ nɔ kadzi yedede kamɛ. ¹³Fɔmɔ maaya ni, kaakã Baguma kalɛ a katsa be nɛ asɔli, kakaanyɛ foe kayɔ katsa be, katsa be fɔtsa lɛmɛ. ¹⁴Tafɔ̃ hũhũ kamɛ futetsa a kĩ Baguma kɔa edo nɛ nɔ kamɛ a akũ adzuma kakɛna. Bɛkpa nɔ foe bɛtsãmɛna Baguma onukpɛ̃ banyɛnɛ akũ nɛ fɔlɛtsa a kĩ bɛlɛ biyi a kamɛ nɛ lɔkɔ a kĩ asɔli banɔkɔɛ̃ te awɛ nɛ nɔ akũ a. ¹⁵Kɔa nɔ akũ flee kakpa nɛ tudzuma kĩĩ flee kakɛna kamɛ. Pi te kadomɔ akũ ayekĩ bati flee aamɔ nɔ adzuma lɔtɔ kanaa biyi ɔsũ. ¹⁶Di nɔ akũ oni nɛ fɔtsa a kĩ atsa a akũ. Pi nɔ adzuma a kadomɔ akũ, kitonɛkĩ ntɛ ɔkɛna foe lɔmɔ ni, aatɛ nɔ mɔawɛ a akũ mɔ bikĩ batse nɔ kalɛ a nkpã.

Dã Bakunawa, Lɔtɔ Banyanɛ Mɔ Adzuma Bakɛnanɛ a Akũ Kadã Wĩ.

¹Tawũni nɛ onyolenɔkɔɛ̃ akũ, mbom dɛ ye nɛ obu kamɛ ndɛ aga aye. Bi bapopo tuwuli ndɛ awaɛ̃nyole amɛ aye. ²Bi batsolenɔkɔɛ̃ tuwuli ndɛ ama amɛ, mɔ bayitsɔ̃ lɛmɛ ndɛ awaɛ̃tsole amɛ nɛ akũ yedede kamɛ.

³Kɔa obu kakpa bakunawa kĩ bɛlá babumɛnanɛ. ⁴Lɛmɛ ntɛ okunawa odi deĩ babi ĩye bawa ni, babi a bɛnya lɔtɔ bɛkɔlɛ be ɔsum kamɛ adzuma kakɛna kakpa be akũ bati, lɔkɔa fɔtsã foe akũ bɛdã be bamanɛ akũ bɛkɔa biyi be ayɛ. Ade fukĩĩ nyɛ lɛtsa a kĩ lawo Baguma anɛ a. ⁵Okunawa kĩ ɛlá odima kĩ yadãmɛna ye akũ kɔa ye anɛ ete nɛ Baguma akũ, yabɔa mpaɛ lɛnyɛ mɔ suwa kavia ye kabumɛna. ⁶Lɛmɛ okunawa kĩ ɛkɔa ye akũ ɛkpa nkpã kanya ni, eku kɔkɔɛ nɛ Baguma anɛ titɔ kĩ edzi nkpã malo. ⁷Kpa be kɔdɛ nɛ fɔtsa kĩĩ bamɛ akũ ayekĩ odima lɛláamɔ mfumsu nɛ be akũ. ⁸Ade ntɛ mi kamɛ odi ládãmɛna ye akũ bati akũ, titiliwu ye tɔtɔ kamɛ bade akũ ni, ade emuniki nɛ katɛkado a liti a. Oti kĩĩ nyɛ oti kpa ɛbɛ̃ bikĩ bɛtátɛ bido malo a.

⁹Takɔa okunawa odima kĩ ɛtátɛ futeli aduesia tɔ̃ dĩ obumɔ bakunawa kĩ bideĩ a. Lɛtsa kĩ libu nyɛ kĩ kɛnɛ kĩ okunawa ɛnya otsole kĩ bɛkɔã deedimɔapɛ, ¹⁰ade kɛnɛ kĩ ɛna dĩ wĩ nɛ ye sɛmɛ kalɛ kakɛna sũ, ɛnya otsole kĩ ɛdɔɔla ye babi kadɔɔla wĩ, yatɛ banɔvɔɛ̃ lɛmɛ. Ɛnya otsole kĩ yasum ye bakɔba batɛ badonɛ, yabumɔ bati kĩ bideĩ nɛ lubokamɔ kamɛ, ade ɛkɔa ye akũ ɛkpa tuwĩ kakɛna a.

¹¹Takɔa bakunawa kĩ bɛtábo anɛ buĩ odo nɛ katsu a kamɛ, kitonɛkĩ ntɛ kɔnyɔ kadzi kɔ be odo ni, baafɔnɛ Kristo awɛ, ¹²ade baatu fubo a kĩ bɛlɔ bɛkpa ye a lɔkɔa ɛkɔ be kɔtɔ. ¹³Fukĩ fubu nyɛ kĩ, babula be lɔkɔ kade, katsã kamini nɛ bati tɔtɔ kamɛ, kadani banyɔnɛpo, kĩ balɛ bati akũ fɔlɛtsa, mɔ fɔlɛtsa kĩ fɔtáfɛta kalɛ. ¹⁴Foesũ, mawɛ kĩ bakunawa kĩ bɛtábo anɛ a bidzi fɔnyɔ bɛma babi, lɔkɔa bɛdãmɛna be tɔtɔ akũ. Fukĩĩ aafɔ̃ bɛláakɛna fɔtsa kĩ fɔtáfɛta kĩ fɔ́akpa boe bakesĩnɛ osi bɛkalɛ tuwuli kpa nɛ boe akũ. ¹⁵Malɛ fukĩĩ kitonɛkĩ bakunawa pii yɛla osi kɔkɔɛ bitomɔ Abonsam.

¹⁶Lɛmɛ ntɛ bakunawa deĩ nɛ otsole ɔtɛ odonɛ odi awɛ nɛ ye tɔtɔ kamɛ ni, kɛnɛ kĩ ɛdã be akũ, ɛtakɔa fɔlɔtsa a ete nɛ asɔli a akũ. Fukĩĩ aafɔ̃ batɛ badonɛ a lɛdã bakunawa a kĩ bɛlá babumɛnanɛ a akũ. ¹⁷Kɛnɛ kĩ bɛkpa batɛ badonɛ banɔkɔɛ̃ a kĩ bakpã bati kakpã wĩ a obu mɔ kɔtɔkase kutsu nviã, titiliwu bikĩ bakɛna adzuma mɔ ɔsĩ mɔ ɔsĩ nɛ fɔtsa katsa mɔ fɔtsa kayɔ kanyɛ kamɛ. ¹⁸Kitonɛkĩ Katsɛlɛ Kpalɛwa a lɛ kĩ, “Tasui ɔyaɛ kĩ yabumɔ nɔ kamɔnɛ kagɔlɛ onukpɛ̃.” ade, “Kɛnɛ kĩ bise adzuma ɔkɛnanɛ kɔtɔ bɛkpa adzuma a kĩ ɛkɛna a.” ¹⁹Ntɛ odi bɔɛ kalɛ nɛ asɔli ɔnɔkɔɛ̃ akũ ni, tatɛ foe ɔkpa ye mbɔɛntɛ otse kalɛ otomɛna adansifɔ nviã ĩye be ɛlalɛ sɛkɛ̃. ²⁰Kã bati a kĩ bakɛna tɔkpa anɛ nɛ batɛ badonɛ flee anɛ kamɛ, ayekĩ fɔ́ado babɛbã a libe.

²¹Ndzɛ̃ nɛ Baguma, mɔ Kristo mɔ ode fɔtɔ banyanɛ anɛ kamɛ mabi nɔ nɛ kudulike kamɛ kĩ pi fɔtsa katsa a kadomɔ akũ, tadã oti anɛ nɛ nɔ tudzuma kakɛna kamɛ. ²²Tawɛ sɔwa kĩ ate awɛ nɛ odi akũ ɔkpa ye boe Ɔlate adzuma kĩ ɛkɛna. Tado akũ nɛ bati bɛbã tɔkpa kakɛna kamɛ. Pi nɔ akũ yededeede.

²³Nɛ sɛmɛ kpa kĩ odeĩ sũ ni, takamɔa mui odi mbom kaamɔa bavɛ sukuloo sukuloo fubumɛna nɔ.

²⁴Bati badi titikpa anɛ kanya mɔatsɛ kanya be lɔtɔ kanamɛna kadzɛ kamɛ, lɛmɛ badi kɔ̃, liti liti fɔmɔ be tɔkpa anɛ kanya. ²⁵Ade aye a tuwĩ kakɛna lɛmɛ lábɛla a, ade fukĩ fɔbɛla a malo fɔ́anɛ kanya.

¹Kɛnɛ kĩ bi batɛ badonɛ a kĩ bɛnyɛ basumunɛ a kĩ bɛkɔa obu bɛkpa be balate ayekĩ odima lɛláalɛ tuwuli kpa nɛ Baguma dĩ mɔ boe fɔtsa katsa a akũ. ²Ade kɛtáfɛta kĩ basumunɛ a kĩ be balate nyɛ batɛ badonɛ bɛkɔa be katɛkado kamɛ ɔmɔa kakɛna sũ bisupa be balate a. Mbom kɛnɛ kĩ bisum be kasum wĩ bɛba, kitonɛkĩ balate a kĩ bana be akũ nfasɔ a nyɛ be batɛ badonɛ mɔ bawɛnɛ. Kɛnɛ kĩ atsa be ɔnɔkɔali fɔlɛtsa kĩĩ lɔkɔa odo be fi bɛkɛna nɛ foe akũ.

Misĩ Fɔvã Fɔtsa Katsa Mitomɔ Baguma Liti.

^3-4Odi nyɛ odi kĩ yatsa fɔtsa kĩ fɔtáketi mɔ boe Ɔlate Yesu Kristo ɔnɔkɔali fɔlɛtsa, mɔ boe katɛkado fɔtsa katsa a ni, oti a naa dɛla ye akũ nɛ ode, ade enyína lɛtsama a. Edeĩ ɔdɔ nɛ fɔlɛtsa kavɛlɛ mɔ ɔdzɛ kakɛna mɔ bati akũ. Fukĩĩ ayamɛna lineke kanɔ, ɔdzɛ kakɛna, bati kavũna mɔ adzuni kpa kakɔna nɛ oti akũ. ⁵Foe lɛmɛ fɔayamɛna fɔlɛtsa kavɛlɛ mɔatsɛ mɔatsɛ. Bati kĩĩ be lɔlɔ kamɛ lɛ́waa yedede ade bɛyɛla ɔnɔkɔali kalɛ a lɛmɛ a. Bakɔna kĩ Baguma ɔsum nyɛ akũ kana fɔtsa osi odi.

⁶Fɔnyɛ ɔnɔkɔali kĩ ntɛ oti yɔɔla anɛ nɛ Baguma liti katomɛna akũ, mɔ fɔtsa a kĩ edeĩ a fuwo ye anɛ ni, ɛdani osikani, ⁷kitonɛkĩ awɛ pupulidza bɔkɔa bɔya nɛ katinya kamɛ, ade bɔ́adzakũ mɔ awɛ pupulidza a. ⁸Foesũ ntɛ budeĩ tilima mɔ funitsã ni, mifɔ̃ fuwo boe anɛ. ⁹Lɛmɛ bati a kĩ anɛ ayɔɔla be nɛ akũ kana fɔtsa akũ ni, bawo nɛ sɔhuiɛ kamɛ ade batɔ a. Fɔkɔasiatsa mɔ fɔwɛtsa kpa tɔwɛ̃ pini be fɔavɛlɛ be kanamɛna lubo kamɔ mɔ kawɔ kamɛ. ¹⁰Kitonɛkĩ sika anɛngbã kamɛ tɔkpa kumɛkumɛ flee anɛ kato. Badi tomɔ sika kawɛ liti limii kĩ bɛyɛla katɛkado a, ade biwo nɛ ayɔlɔhɔ pii kĩ ɛfɔ̃ be tɔwɔlɛ tɛ kaakpa kamɛ a.

Dza Pintii Nɛ Katɛkado Adzuma a Akũ.

¹¹Lɛmɛ Timoteo, Baguma oti anɛ sũ vɛlɛ nɔ akũ nɛ fɔlɛtsa kpa kĩĩ flee ɔwɛ̃. Pili kakpa tuwĩ kakɛna, katomɔ Baguma liti nɛ katɛkado, ɔdɔ mɔ ɔwɔlɛ kado, mɔ akũ kadɔla kamɛ. ¹²Pili kɔɔba kanya nkpã kĩ ɛla kawũna a kakpa nɔ akũ. Ade nkpã kĩĩ sũ Baguma pau nɔ nɛ lɔkɔ a kĩ ɔnyɛ nɔ katɛkado ɔtsa pefee nɛ adansifɔ pii anɛ a. ¹³Ade makpa nɔ mbla kĩĩ nɛ Baguma kĩ yakpa lɛtsa nyɛ lɛtsa nkpã, mɔ Kristo Yesu kĩ ɛnyɛ ye katɛkado ɛtsa pefee nɛ Pontio Pilato anɛ kamɛ a dĩ akũ kĩ, ¹⁴pi fɔlɛtsa kĩĩ kadomɔ akũ pɛpɛɛpɛ ayekĩ odima lɛláamɔ tɔkpa nɛ nɔ akũ, kɛnaawo Luwi a kĩ boe Ɔlate Yesu Kristo aabuki ɛya. ¹⁵Baguma fɛta ɛkpa obu, yanya lɛtsa nyɛ lɛtsa akũ, ɛnyɛ fɔgã flee Lɛgã. Lɛtsa nyɛ lɛtsa avɛ ye kĩ Baguma Kpale. Ade ye aanyɛ Kristo kanya nɛ lɔkɔ wĩ a kĩ eyi ɛkpa a kamɛ a. ¹⁶Ye odi keĩ dzi nkpã kĩ ɛlá kawũna dadaada, edzi nɛ ɔhaĩ kĩ odima lɛláapuli efuã ɛdã ye a kamɛ. Odima támɔ tɔ̃ ye ade odima lɛláapuli ɛmɔ́ ye da. Ye fude nyɛ kamu, obu mɔ otumi daa. Fɔya lɔmɔ.

¹⁷Dɛ bikĩ bideĩ katinya kamɛ akũ fɔtsa kĩ bɛtapia be akũ, ade bɛtakɔa anɛ bite nɛ akũ kana fɔtsa a kĩ fɔláawa daa akũ, mbom bɛkɔa anɛ bite nɛ Baguma kĩ ye akpa boe lɛtsa nyɛ lɛtsa mɔ sɛmɛ kalɛ ayekĩ bɔ́amɔ kawɔlɛ a akũ. ¹⁸Bi be kĩ bɛkakɛna tuwĩ bɛnya asikafɔ nɛ tudzuma wĩ kakɛna kamɛ, bɛkɛna sɛmɛ kalɛ, bɛkaate ahiãfɔ fɔtsa faa. ¹⁹Ntɛ bɛkɛna foe lɔmɔ ni, baakpɔta fɔtsa kĩ fɔáwɔ biyi bɛkpa be akũ nɛ kunya kamɛ, lɔkɔa be awɛ aata nkpã wĩ a.

²⁰Timoteo, dã fɔtsa a kĩ Baguma kɔa edo nɔ nɛ awɛ a akũ kadã wĩ. Tado akũ nɛ kɔlɔmɛna pupulidza mɔ fɔkɔasiatsa kavɛlɛ kamɛ. Ade fukĩĩ badi nɛɛ bakɛ bati kĩ kadikanyi fɔlɛtsa fɔanɛ a. ²¹Kitonɛkĩ badi bɔɛ be akũ kĩ binyina fukĩna bamɛ, lɛmɛ fɔtsɛ̃ foe akũ bɛyɛla katɛkado osi a.

Mawã Baguma kĩ ɛmɔ mi kɔnya.