Tito
Paulo Ure Awu Atugoreboe Maku Toro Timedia Tito Bagai
11Paulo nure imi. Pao Kurireu utugare nure imi. Iture Jesus Cristo bataru tabo boe ewagai. Pao Kurireu makore i iwo ture tugeragu jiwuge emeartoru rakado. Makore i iwo boe erduwado Pao Kurireu bataru remawuji Jesus jiboeji. Nou bataru jire pameartorumode. 2Pao Kurireu batrarodukare rugadu. Emare akoino meartorure puduiwuge eewodumoduie. Ewimodukaie pugeje. Eragojemoduie Pao Kurireu apo du akedumodukaie rugadu. Emare akoino marigudu rugadu. Ukare awu moto to raga dukejere akoino. Nou Pao Kurireu bataru koiare pameartorure Pao Kurireu bataruji rugadu. 3Maigodu aino Pao Kurireu ure boe erduwado nou tuwadaruji taidure jiwu meri keje. Ča ure nou tuwadaru maku inai jamedu iwo boe ewie. Pao Kurireu umode paginorudo rugadu. Emare ure itudo awu tuwadaru tabo boe etae.
4Imedu Tito nure aki. Iwadaru koiare ameartorure Pao Kurireuji nono imeartoru mogadure. Dukodire itonaregedu nure aki. Inure awu atugoreboe pemegado iwo maku akai.
Pao Kurireu ro pemegawo ai. Ure paginorudowu Jesus Cristo ro pemegawo ai jamedu. Ewo apemegado boei. Ewo boe epemegado ai jamedu.
Tito Maragodure Creta Moto Keje
5Paragojere puapo Creta moto keje. Dukejere iture apiji mare ire amaragodae maku akai aragojewo nono Creta moto keje kimo awo meartorure Jesus jiwuge ero pemegado, awo akeragu ia imei meartorure Jesus jiwuge eimijerageče eda jamedu boe keje. Imagore ai akaiwowo boe erore jiboeji awo akeragu iagei meartorure Jesus jiwuge eimijerageče. Ainore amode akeragu jiwu mode. 6Ro pemegamode. Boe emago pegamodukare rore jiboeji. Oreduje umode mitotu je. Jeribarimodukare toreduje piji. Ore emeartorumode Jesusji rugadu. Ore etaora pegamodukare kodire emeartorumode tuje tuo bataruji. 7Meartorure Jesus jiwuge eimijera aiwomode maragodure Pao Kurireu aiwuge ero boeji. Dukodire tagaiwomode ia ro pemegareu imedu bagai. Tagaiwodo boe emago pegakare rore jiboe jiwu bagai. Očaromodukare tuwadaruji. Korigodumodukare boei kuri je. Uke kurumodukare ji. Boe korimodukare ji. Korigodumodukare diero bagai toče. 8Ukimadumode boebo. Umode eremo tuwaito. Meardu kurimode boe pemegareuji. Umode turagado pudui turo pegakawo. Umode turo jetorodo. Ro pemegamode rugadu. Umode turo pegareu barigu tubiji. 9Imedu meartoru rakamode Pao Kurireu bataru remawuji. Awu bataru ure turugadu. Awu bataru umode boe erduwado Pao Kurireuji rugadu. Imedu meartoru rakamode ji dukeje umode turugadu tuwo ia boe erduwado jamedu tuwo emeartoru rakado rugadu. Umode boe ewie ia aidukare Pao Kurireu bataru jiwuge emeardae pegareuji. Boe etaidumodukare Pao Kurireu bataruji dukeje etaidumode tuwo boe ekiripagado Pao Kurireu bataru piji.
10Ia meartorure Jesus jiwuge etaidukare ia Pao Kurireu bataruji. Meartorure Jesus jiwu Judeu doge nure emage. Emagare. Iage meartorure Jesus jiwu boe tuginaiwuge nure emage. Etaidure tuwadaruji Pao Kurireu bataru piji. Kodire nouia tuwadaru tabore enure ia meartorure Jesus jiwuge ekiripagado. 11Erore aino tuwo tugeragu dieroji nou boe epiji. Epoguru bokware. Pawo awu ewadaru akedudo. Tuwadaru pegareu tabore emode boe ekiripagado tuwadaruji Pao Kurireu bataru remawu piji. Kodire nou boe erduwa bokware kakojiwu boe eimijera bataru jiba tumeartorumode. 12-13Ia Creta moto kejewu mako pemegare marigudu. Jorduwareu nure ema. Akore: – Creta kejewuge batrarodureuge nure emage. Ero rakare boei turo pegareu tabo. Etaidukare tumaragoduwo rugadu. Iera kiarireuge nure emage.
Boe jokodu jire nou jorduwareu akoino. Dukodire amago rakado awu meartoru jokodukareugei emeartoru rakawo rugadu Pao Kurireu bataru jamedu boeji. 14Judeu doge ere to bakaru tuginaiwu tawuje taora piji tumeartorukawo boe jokodureuji. Mare meartoru jokodukare Pao Kurireu bataru jiwuge ewo tugera ra nou Judeu doge eno bakaru tuginaiwu piji tumeartoruwo tu Pao Kurireu bataruji. Meartorukare boe jokodureu bataru jiwuge ere tuiordae tawuje taora piji. Mare meartoru jokodukare Pao Kurireu bataru jiwuge ewo tugera ra nou erdae piji jamedu tumeartoruwo tu Pao Kurireu bataruji. 15Boe emeardaemode tu turo pemegawo dukeje ero pega bokwamode rugadu. Mare boe emeardae kigodumode turo pegawo, emeartorumodukare Pao Kurireu bataruji dukeje ero pegamode rugadu. Emeardae, erdae pegamode rugadu. Etaora buture tu turo pegareu keje rugadu. 16Egore tuiorduwaie rugadu Pao Kurireuji mare ewadrarodunure. Ero pegareu koiare ure boe erduwado tuwadrarodaeji. Boe erdu pegare nou boe erore jiboeji. Emeartorukare tugimijeraji. Ekare turugadu. Ero pemegamodukare rugadu.
2Ainore Pao Kurireu Meardae Pemegareu Ure Boei
1Akire amode boe erduwado tu Pao Kurireu bataru remawuji. Akaba boe erduwado ia bataru pegareuji rugadu. 2Ime erduwado ewo tugera ra piga kuru piji. Emeardae pemegawo rugadu. Ewo turagado pudui turo pegakawo. Emeartoruwo rugadu Jesusji. Emeardu kuriwo rugadu boei. Ekawo tugera ra turo pemegareu piji. 3Amode areme erduwado jamedu erowo aredu ro pemegareu roji. Ero pegakawo tuwo boe erdudo ture Pao Kurireu utugaredo pudumi duji. Emago pegakawo boe erore jiboeji tuwadrarodu tabo. Etaidukawo tuguduwo vinho kuruče pugeje. Ewo boe erduwado boe pemegareuji. 4Ewo nogware erduwado emeardu kuriwo toreduji, torei. 5Ewo turagado pudui turo pegakawo. Ero pemegawo rugadu. Emaragodu pemegawo tuwai tada. Ewo turo butugudo boei. Emeartoruwo toreduji. Eromode aino dukeje boe emago pemegamode Pao Kurireu bataruji rugadu.
6Ča amagodo iparei jamedu ewo turagado pudui turo pegakawo jamedu. 7Aki jamedu aro pemegado boe erowo nono aro mogadure. Akaba boe ekiripagado. Awo boe erduwa pemegado. 8Amagodo boe remawuji. Aino boe emago pegamodukare awadaruji. Jordu pegare aiwuge erdumodukare ia paro pegareuji dukeje epogurumode tumeardae pegareuji.
9Boe etugarege emeartoruwo tugimijeragei tuwo tugimijerage egaredo tumaragodure jiboeji. Emago pegakawo tugimijera bataru jipagi. 10Ekiwogukawo tugimijerage enoeji. Mare ero pemegawo tugimijeragei. Emeartoruwo tugimijeragei. Du ainodu tabo emode tugimijerage etaidudo Jesusji emeartorure ji kodi. Emode tugimijerage etaidudo Pao Kurireu bataruji. Pao Kurireu koiare umode paginorudo rugadu.
11Pao Kurireu ure boe eiamedu boe erdudo turo pemegareuji tuwo boe ekinorudo. 12Nou Pao Kurireu ro pemegareu ure parduwado pawo pagera ra boe ero pegareu piji, pawo pagera ra meartorukareuge etaidu rakare jiboe piji. Mare pameartorumodukare nou egoino jiboeji rugadu. Pao Kurireu ro pemegareu ure parduwado pawo paragado pai paro pegakawo, paro jetorowo. Parowo nono Pao Kurireu meardae mogadure woe awu moto keje. 13Pabaganure pameartorure jiwu Jesus Cristo bagai aregoduwo pugeje. Parduware aregodumode duji. Pao Kurireu nure ema. Umode paginorudowu nure ema rugadu. Aregodumode dukeje pardumode ji rugadu. Boe eimijera kurireu mode ema rugadu. Urugu pemegareu umode tudawuje piji rugadu. 14Jesus ure tumagu paro pegareu moriče tuwo paginorudo paro pegareu piji, boe ero pegareu jamedu boe piji, tuwo paginorudo boe pegareu jamedu boe piji rugadu. Tuwo paro pemegado. Tuwo tugeragu pai pameartoruwo tu pudui rugadu. Meartorukare puduiwuge umodukare tugeragu ei. Meartorure puduiwuge umode tugeragu ei tuwo tuwobedo emage. Tuwo emeardaedo ero pemegawo taidure dutabo.
15Boe erduwado awu iwadaruji. Apogurukaba. Eimijera nure aki. Dukodire aragado awo boe egaredo. Aragado amagowo boe ero pegareuji ewiagai jamedu. Ewiedu pemegado emeartoruwo ai rugadu.
3Ainore Meartorure Jesus Jiwuge Eromode
1Rakojere akabowu meartorure Jesus jiwuge ewie pugeje emeartoruwo boe eimijeragei ewo turugadu turo pemegawo turo jamedu boe tabo. 2Amagodo ei emago pegakawo boe erore jiboeji tuwadrarodu tabo. Edu pemegawo boebo epemegawo pui. Etaidu pemegawo boei. Emeardae pemegawo tugawo boe remawugedo pudumi turo pemegawo boe eiamedu boei. 3Marigudu parduwa bokware jamedu. Pameartorukare pagimijeraji. Paro pegare. Pagaidukare pawo pagera ra paro pegareu piji. Pagaidure tu pameardae pegawo boe ero pegareuji rugadu. Pagaidure pawo boe ekiripagado. Pagorigodure boe enoe keje. Boe erdu pegare pai. Pardu pegare boei jamedu. 4Mare Pao Kurireu ure pardudo tumeardu kurire pai duji. Ure pardudo turo pemegareuji. Parduware Pao Kurireu meardaeji. Aidure tuwo paginorudo awu paro pegareu jamedu boe piji. 5Dukejere ure paginorudo rugadu. Ro pemegareu mode pagi mare pagare paginorudo. Pao Kurireu emare ure paginorudo. Okudugodure pagabo kodire ure paginorudo. Uwari ure paro pegareu barigu pabiji tuwo boe maiwudo pagi. 6Pameartorure Jesus Cristoji dukodire ure paginorudo. Dutabore Pao Kurireu ure Tuwari rawuje pagae rugadu. 7Rore aino tuwo turo pemegareu maku pagai tuwo tugeragu pai pudae tuwo pamugu pemegado pudabo. Aino pawimode mare umode paewodudo pugeje. Nono paragojemode Pao Kurireu apo du akedumodukare rugadu. Dukodire pabaganure Pao Kurireu bagai rugadu. 8Boe jokodu jire inagoino. Boe erduwado awu iwadaruji rugadu. Meartorure Pao Kurireu jiwuge erduwamode awu iwadaruji rugadu dukeje emeardaemode turo pemegawo meri jamedu boeji tuwo boe pemegado boe eiamedu boei. 9Boe emago rakamode pui pagatu je mare arokaba aino. Boe emago raire pui tunara tabo pui kaibowu boe erakuduie pudumi mare arokaba aino. Boe etokimode pui mare arokaba aino. Boe emago rakamode pui turoia keje mare arokaba aino. Pagatu jere nou boe egore aino. 10Ia boe aidumode tuwo meartorure Jesus jiwuge edo tugera ra pubiji dukeje amagodo ji rokawo aino pugeje. Aidu kimomode dukeje amagodo ji pugeje rokawo aino pugeje. Aidu kimomode tuwo meartorure Jesus jiwuge edo tugera ra pubiji dukeje amagodo ji utuwo tabiji rugadu rokawo aino pugeje meartorure Jesus jiwugei ekawo tugera ra pubiji. 11Aidure turo pegawo meartorure Jesus jiwugei tuwo edo tugera ra pubiji dukodire tarduware ro pegareu nure ema duji. Ema ure turo pegado Pao Kurireu jakai tumeardae tabo rugadu.
Paulo Ure Tuwadaru Iado
12Aino itumode Nicópolis ba kurireu ka. Iorduwakare iduba imode utudo akae. Imedu Ártemas rabodu imedu Tíquico rabodu. Imode utudo akae dukeje aragado akaregoduwo mato itae Nicópolis ba kurireu ka. Ire imeardae tawuje iragojewo nono nou ba kurireu keje awu joruji. 13Imedu Zenas makore boe eimijeragei boe eparu tabo tu tu je. Aidure tuduwo rugadu. Imedu Apolo aidure tuduwo jamedu. Dukodire akera maku etai ewo tudo turugadu tuduwo. 14Meartorure Jesus jiwuge erduwado ero pemegawo jamedu. Aino emaragodumode rugadu. Dukejere iaboe okwamodukare etai. Mare emaragodumodukare du ukare turugadu.
15Awu rakojere itabowuge etaidure tugimaduwo akabo. Akimadudo nou meartorure Jesus jiwuge pamedagebo čenai.
Pao Kurireu ro pemegawo tai rugadu.