Romanos
Paulo Ure Awu Atugoreboe Maku Toro Roma Ba Kurireu Kejewuge Meartorure Jesus Jiwuge Ewagai
11Paulo nure imi. Jesus Cristo utugare nure imi. Pao Kurireu makore iwagai. Ure tugeragu i tuwo itudo Jesus bataru pemegareu tabo boe etae iwo boe ewie nou bataru pemegareuji. 2Marigudu Pao Kurireu ure nou makore Pao Kurireu bataru jiwuge ewie tumoduie nou umode boe ekinorudowu arego etae duji ia meri keje. Nou makore Pao Kurireu bataru jiwuge ere boe ewie nou Pao Kurireu bataru pemegareuji erdumoduie ji ia meri keje. Ere nou bataru pemegareu bu bapera keje jamedu. 3Jesus Cristo jire nou Pao Kurireu bataru pemegareu akoino. Pao Kurireu onaregedu nure ema. Pagimijera nure ema. Imedure ema jamedu. Jaoboe Judeu doge eimijera kurireu iere Davi. Nou Davi uwobe nure Jesusče. 4Jesus pemegare rugadu nono Pao Kurireu mogadure. Pao Kurireu ure Jesus jewodudo pugeje dutabore ure boe erdudo turagare duji. Dukodire boe erduware Pao Kurireu onaregedu nure ema duji. 5Pao Kurireu meardae koiare Jesus makore iwagai tudugarewo imi tuwo itudo boe ewagai imagowo Jesus bataruji boe ewiagai. Itaidure ituwo moto jamedu boe parugajeje iwo boe tuginaiwuge erduwado nou bataruji emeartoruwo ji, emeartoruwo nou bataruji jamedu. 6Tagi jamedu. Roma ba kurireu kejewuge nure tagi. Pao Kurireu makore tawagai tameartoruwo Jesusji. Tameartorumode Jesus Cristoji dukeje umode tuwobedo tagi.
7Dukodire ire awu bapera atugodo iwo maku tawagai toro Roma ba kurireu ka. Pao Kurireu meardu kurire tai. Makore tawagai tuwobewo tagi.
Pao Kurireu uwo turo pemegareu maku tagai tabemegawo Pao Kurireuji tabemegawo boei jamedu. Pagimijera Jesus Cristo rowo aino tai jamedu.
Paulo Mako Pemegare Roma Kejewuge Erore Jiboeji Pao Kurireu Bagai Baruto
8Ča boe eiamedu boe emeardure tameartorure Jesus jituji. Dukodire ikimadure Pao Kurireu apo tarore aino dukodi. Jesus Cristo ure tugu redo paro pegareu moriče. Nou inodu kodire pagimadumode Pao Kurireu apo rugadu. 9Pao Kurireu utugare nure imi. Imeartorure bataruji iraga tabo, imeardae tabo, itaidu tabo. Dukodire imagore Jesus bataru pemegareuji boe ewiagai. Pao Kurireu onaregedu jire awu bataru pemegareu akoino. Pao Kurireu jorduware boe jokodu jire inagoino duji. Jorduware iwiabuture tu tu tawugeje duji. 10Imagore Pao Kurireu bagai baruto dukeje iwiabuture tu tu tawugeje. Pao Kurireu meardae pemegare. Dukodire inogwamagudure ji uwo itudo toro tawagai kuri aino iorduwo tai dubagai. 11Ikiarigodure tawagai dukodire itaidure iorduwo tai rugadu. Itaregodumode tagae dukeje ireadodumode Pao Kurireu ro pemegare jiboeji tawiagai Pao Kurireu Uwari uwo turo pemegareu maku tagai tuwo tumaragodae maku tagai tameartoru rakawo Pao Kurireuji. 12Itaregodumode tagae dukeje pareadodumode Pao Kurireu rore jiboeji pu biagai. Dukodire tarduwamode imeartoru rakare Pao Kurireuji duji. Dukodire iorduwamode tameartoru rakare Pao Kurireuji duji. Nono paegaremode pai puapo rugadu.
13Imedage nure tagi. Iwo tawie. Marigudu itaidure ituwo toro tawagai. Mare iroiwakare itaregoduwo tagae. Dukodire iture ia moto ka iwo nouia boe tuginaiwuge ewie Jesus bataru pemegareuji toro. Ire emeardae pemegado emeartoruwo Jesusji rugadu. Judeu doge karegure emage. Mare aino čare itaidure itaregoduwo tagae jamedu. Itaregodumode tagae dukeje itaidure iwo ia meartorukare Jesus jiwuge tamedage emeardae pemegado jamedu emeartoruwo Jesusji. 14Imaragodae reo. Itaidure boe eiamedu boe emeartoruwo Jesus bataruji. Awu boe tuginaiwuge oe kurireuge, awu boe tuginaiwuge oe bokwareuge jamedu, awu jorduwareuge, awu jorduwa bokwareuge jamedu. 15Dukodire itaidure itaregoduwo toro tawagai jamedu imagowo Jesus bataru pemegareuji Roma kejewuge ewiagai.
Pao Kurireu Bataru Pemegareu Rakare
16Ipogurukare imagowo Jesus bataru pemegareuji boe ewiagai. Nou Jesus bataru pemegareu koiare umode boe erduwado Jesusji. Umode emeartorudo Jesusji. Emeartorumode Jesusji dukeje Pao Kurireu umode ekinorudo bope doge eda kejewu joru pegareu piji. Judeu doge emeardure nou Jesus bataru pemegareuji boetoji. Dukejere boe tuginaiwuge emeardure ji jamedu. Aino čare boe eiamedu boe emeardumode ji jamedu. Pao Kurireu aidure boe eiamedu boe emeartoruwo Jesusji rugadu. 17Nou Jesus bataru pemegareu ure pawie Pao Kurireu romode pai duji. Paro pemegareu tabo karega pamode Pao Kurireu meardu kurido pai. Pameartorumode Pao Kurireu jitu keje Pao Kurireu umode tugeragu pai pudae tuwo pado nono ro pemegareuge emogadure. Marigudu Pao Kurireu bataru padure nou bapera keje boe erduwawo. Akore: – Boe emeartoruwo tu Pao Kurireuji rugadu meri jameduji jii toro. Nono Pao Kurireu umode tugeragu ei pudae tuwo edo nono ro pemegareuge emogadure.1.17 Awu bataru padure Habacuque 2.4 keje. Dukodire nou Pao Kurireu ure tugeragu jiwuge ewimodukare pugeje.
Boe Ero Pegare
18Mare Pao Kurireu korigodure boe ero pegare dukodi. Korigodure boe emeardae pegare dukodi. Boe emeardae pegareu koiare ure boe erduwa bokwado Pao Kurireu bataru remawuji. Dukodire Pao Kurireu korigodure. 19-21Dukodire Pao Kurireu ro pegare ei rugadu ero pegareu moriče. Marigudu Pao Kurireu ure baru towuje moto towuje jamedu. Boe etaiwomode motoji, baruji dukeje erdumode Pao Kurireu maragodaeji. Nono erduware Pao Kurireu nure ema duji. Erduwamode Pao Kurireu rakare duji, raka akedumodukare rugadu jii toro rugadu. Dujire erduwamode rugadu. Mare emeartorukare Pao Kurireuji etaidukare kodi. Ekimadukare apo. Emeardae pegare rugadu. Emeardae pemegareu metukare etaora tada. Emeardaere tu turo pegawo rugadu. Emeardae ure nono boečore. Mare boečo ji karega inagoino. Ere tumadadudo tu je. 22Egore tuiorduwaie rugadu. Mare pagare egoino erduwa bokware rugadu. 23Pao Kurireu bimodukare rugadu ji toro rugadu dukodi akedumodukare. Pemegareu remawu nure ema rugadu. Mare awu boe emagokare bagai. Ekare tumago pemegado Pao Kurireu bagai. Mare emagore ia boe ere towu boeji tumeartoruwo ji. Ere irado nono imedu mogadure. Ere udo nono kiebarege emogadure. Ere udo nono barege emogadure. Ere udo nono batrareu mogadure. Nono ere tubu jodo nou ture towujeboe jokorai nono boe ero moga Pao Kurireu jokorai dumogadure.
24Dukodire Pao Kurireu ure tugera ra nou boe epiji rugadu. Nono erore tumeardaere jiboeji rugadu. Emeardaere tu turo pegawo. Ero pegare rugadu puapo. Nono boe epogurure nou boe ero pegareuče rugadu. 25Nou boe emeartorukare boe remawuji. Emeartorukare Pao Kurireu bataruji. Mare emeartorure tu pu batrarodaeji. Ere tubu jodo Pao Kurireu ure toboe jokorai tumago pemegawo ji Pao Kurireu mugato. Etaidure tumeartoruwo Pao Kurireu ure towu boeji. Mare etaidukare tumeartoruwo Pao Kurireuji. Pao Kurireu koiare ure boe jamedu boe towuje. Dukodire ča pawo pabu jodo pamago pemegawo tu Pao Kurireuji rugadu jii toro.
26Mare nou boe ero pegare. Dukodire Pao Kurireu ure tugera ra epiji. Aino čare nou boe etaidure boe epogurure jiboeji. Etaidure rugadu tu tieribariwo pui. Areme ere tugera ra ime epiji tieribariwo pui. 27Ime erore aino jamedu. Ere tugera ra areme epiji tieribariwo pui. Boe epogurure jiboe jire etaidure. Nou erore inodu koiare Pao Kurireu ro pegamode ei nou ero pegareu moriče.
28Nou boe etaidukare tuwiapagawo Pao Kurireu bataru remawuji. Dukodire Pao Kurireu ure tugera ra epiji. Aino etaoragorore nou tumeardae pegareuji turo pegareuji. Dukodire ero pegare tu tu je. 29Etaora korobadure tumeardae pegareu tabo. Etaidure tu turo pegawo. Enogwa kidure tu pudai diero keje. Eimaredure pui to diero bagai. Ere boe pegado pui. Ekorigodure tumedage enoe keje. Ere tumedage ewido. Etokire pui. Ere pu jekiripagado. Emeardae pegare tumedage erore jiboeji. Enogirure pui. 30Emago pegare tumedage erore jiboeji. Erdu pegare Pao Kurireuji. Erdu pegare boe emeardae pemegareuji. Ewadaru očarore. Emeardaere maiwu turo pegareuji. Emeartoru bokware tujeji tuoji. 31Etaidukare turo pemegawo. Emagore ia tuwadaruji boe ewiagai mare pagatu je. Enogudugodukare boebo. 32Pao Kurireu ure boe erduwado marigudu. Akore boe ero pegamoduie aino dukeje boe ewimoduie. Dukodire nou boe erduware tuwimoduie duji nou Pao Kurireu bataru kodaji. Du inodu ekare tugera ra nou turo pegareu jamedu boe piji. Erdu pemegare nou turo pegareu boeji jamedu. Erdu pemegare boe ero pegareuji jamedu nono turo mogadure. Egore pemegaie aino nou boe ero pegareuji jamedu.
2Pao Kurireu Bataru Pegareu Butumode Ro Pegareuge Ewugeje Ero Pegareu Moriče
1Ia tagi tamago pegamode tamedagei ero pegare jiboeji mare taromode nono erore dukeje tamagore jiboe butumode tawugeje jamedu. Tawadaru motumode tai mare du inodu tabo tamodukare taginorudo. Ainore boemode boe eiamedu boei rugadu. 2-3Pao Kurireu ro jetororeu reo. Parduware Pao Kurireu batrarodukare rugadu duji. Emare aiwomode boe ero pegareu bagai. Dukodire makomode boei boe ero pegareu jiboeji. Umode boe ewie turo pegamoduie ei nou ero pegareu moriče duji. Dukodire taro pegamode nono ro pegareuge ero mogadure dukeje Pao Kurireu bataru pegareu butumode tawugeje jamedu taigoia kodi taro pegareu moriče. Tagagore ia boe ero pegaie. Mare taromode nono ero mogadure dukeje boe pegamode tai jamedu. 4Tamago pegakaba Pao Kurireu ro pemegareuji. Emare ro pemegare tai rugadu. Okudugodure tagabo rugadu. Korigodumodukare tai pagatu je. Emare aidure tuwo tagiarigodudo taro pegareuji tawo tagera ra taro pegareu piji. Dukodire ro pemegare tai. Tarduware nou inoduji rugadu. 5Mare tagiarigodukare nou taro pegareuji. Tagaidure nou tabegareu roriwo tu taiogi. Tagaidukare tameartoruwo Pao Kurireuji rugadu. Dukodire tare Pao Kurireu ro pegareu kuričigodo tai. Pao Kurireu korigodure ro pegareugei. Dukodire toro ia meri keje ro pegamode ei. Mare paga karega ero pegareu moriče rugadu. Tameartorumodukare ji dukeje ro pegamode tai rugadu nouia meri keje jamedu. 6Boe ero pegamode dukeje Pao Kurireu umode erdudo boe pegareuji rugadu. Boe ero pemegamode dukeje Pao Kurireu umode erdudo boe pemegareuji jamedu. 7Ia boe ero pemegare tu tu je. Etaidure turo pemegawo. Etaidure tubemegawo. Etaidure tuwo turo pemegado tu tu je. Etaidure tieduwo toro baru tada. Nou boe erore aino emeardaere aino kodire Pao Kurireu umode eewodudo pugeje. Dukodire ewimodukare pugeje. Eragojemode Pao Kurireu apo du akedumodukare rugadu. 8Mare ia boe ewiapagare tu pudui. Etaidukare boe pemegareuji. Etaidukare Pao Kurireu bataru remawuji. Etaidure tu boe emeardae pegareuji turo pegawo tu tu je. Dukodi čare Pao Kurireu korigodumode ei rugadu. Ro pegamode ei rugadu ero pegareu moriče. 9Dukodire boe pegamode ro pegareugei rugadu. Boe rakamode ei. Erduwamodukare nuba turomode pugeje. Boe pegareure ei rugadu. Boe pegamode Judeu doge ro pegareugei. Boe pegamode boe tuginaiwuge ro pegareugei jamedu. 10Mare Pao Kurireu umode boe pemegado ro pemegareugei. Umode epemegado boe eiamedu boe etaiduwo ei eiamedu boe epemegawo pui. Mako pemegamode ei. Umode boe pemegado Judeu doge ro pemegareugei. Umode boe pemegado boe tuginaiwuge ro pemegareugei jamedu. 11Pao Kurireu jorduware boe eiamedu boei. Boe remawu tabore meardaere boe eiamedu boei. Umodukare tuiordae tumeardae tawujedu pagado boei.
12Pao Kurireu umode ro pegareuge eiamedu boe ewarigu tubiji bope doge edure kejewu joru pegareuto ero pegareu moriče. Marigudu Pao Kurireu ure Judeu doge eno bakaru maku Judeu doge etai. Dukodire nou bakaru ure Judeu doge erduwado turo pemegawo Pao Kurireu meardaeji. Mare du inodu tabo nouia Judeu doge ekodukare nou Pao Kurireu meardaeji rugadu. Ero pegare Pao Kurireu jakai. Dukodire Pao Kurireu umode ewarigu bope doge edure kejewu joru pegareuto ero pegareu moriče. Pao Kurireu ukare to bakaru maku boe tuginaiwuge etai. Mare nou boe tuginaiwuge erduware turo pemegawo jamedu. Mare du inodu tabo nou boe tuginaiwuge ere tuwarigu boeto nou tuiordae pemegareu piji rugadu. Ero pegare Pao Kurireu jakai jamedu. Dukodire Pao Kurireu umode ewarigu bope doge edure kejewu joru pegareuto ero pegareu moriče. 13Pao Kurireu ure Judeu doge eno bakaru maku etai dukeje ewiapagare nou bakaruji. Mare emeartorumodukare ji dukeje Pao Kurireu jordu pemegamodukare ei. Mare emeartorumode Pao Kurireu ure maku pudaiwu bakaruji dukeje edu pemegamode Pao Kurireu apo rugadu. 14Marigudu Pao Kurireu ukare to bakaru maku boe tuginaiwuge etai. Dukodire erduwakare Pao Kurireu o bakaruji. Mare du inodu tabo boe eiamedu boe erduware boe pegareuji boe pemegareuji jamedu. Boe ero pemegare dutabore boe erduware turo pemegare duji. Egore nou ro pemegareu nuie ema. 15Tu pudumi tumeardae tabo boe tuginaiwuge ere tumeardae udo nono Pao Kurireu meardae mogadure. Dukodire ero pemegamode. Erduware turo pemegawo. Mare ero pegamode dukeje erduwamode turo pegare duji jamedu. Ainore boe eiamedu boe erore. Ainore boe tuginaiwuge eiamedu boe erore jamedu. 16Inure tawie Jesus bataru pemegareuji. Boe eiamedu boe erduware turo pemegawo. Mare boe etaidure tuwo tumeardae pegareu biado Pao Kurireu piji. Mare Pao Kurireu jorduware boe eiamedu boe emeardaeji. Dukodire ia meri keje Pao Kurireu umode Jesus Cristo rawuje mato moto ka tuwo boe ewie kodiba boe ero pegare emeardae pegare jamedu. Pao Kurireu koiare umode Jesus rawuje tuwo ro pegareuge eiamedu boe edudo boe pegareu keje rugadu.
Judeu Doge Ero Reo
17Ia tagi Judeu doge nure tagi. Tagaidure Pao Kurireu ure maku tagaiwu bakaruji. Tagagore tameartoruie ji. Tagagore Pao Kurireu aiduie tai. 18-20Tarduware Pao Kurireu aidure jiboeji tameartoruwo ji. Nou ure maku tagaiwu bakaru ure tarduwado tawo tameardae pemegareu tawuje. Ure tarduwado tawo jorduwa bokwareuge erduwado. Ure tarduwado tawo boe etore erduwado. Boe remawu jire ure tarduwado. Ča tagagore tarduwaie tawo jorduwa bokwareuge erduwado nono boe emode joku bokwareuge erduwado dumogadure. Tagagore tarduwaie tawo jorduwa bokwareuge erduwado nono boečojiwu joru urugu pemegareu mogadure boe etododai dumogadure. 21Kočare tare boe erduwado mare tagare tarduwado. Tamagore boei boe ekiwogukawo. Mare tagire tagaidure tagiwoguwo. 22Tamagore boei eribarikawo toreduje piji toredu piji jamedu. Mare tagire taeribarire tagoreduje piji tagoredu piji rugadu. Boe ere tuwai tadawu santo dogedo tuwo tubu jodo jokorai tuwo pao kurireugedo emage pudai. Tagagore ei erokawo aino. Mare tagire tagiwogure nou eno santo doge ewai tadawu ia boeji tagoče. 23Tawadaru očarore Pao Kurireu ure tuwadaru maku tagai duji. Mare tameartorukare ji dukodire tare Pao Kurireu pogurudo. 24Marigudu padure bapera kejewu Pao Kurireu bataru akore: – Judeu doge ero pegareu koiare ure boe tuginaiwuge emago pegado Pao Kurireuji.2.24 Awu bataru padure Isaías 52.5 keje.
25Judeu doge ere tonaregedu imedurogu baka oto birirogu kado tuwo Pao Kurireu uwobedo pudumi. Tameartorumode nou Pao Kurireu ure maku Judeu doge etaiwu bakaruji dukeje ure turugadu tawo tagonaregedu imedurogu baka oto birirogu kado nou taroiaji. Mare tameartorumodukare Pao Kurireu ure maku Judeu doge etaiwu bakaruji dukeje pagatu jere taromode ainono. 26Boe tuginaiwuge ekare tonaregedu imedurogu baka oto birirogu kado. Mare emeartorumode Pao Kurireu ure maku Judeu doge etaiwu bakaruji dukeje Pao Kurireu meardae mode ei nono tumeardae moga nou ure tonaregedu imedurogu baka oto birirogu kadowuge dumogadure. 27Ia tagi Judeu doge nure tagi. Mare tameartorukare Pao Kurireu ure maku tagaiwu bakaruji. Padure bapera keje. Tare tagonaregedu imedurogu baka oto birirogu kado. Mare tameartorukare tago bakaruji. Boe tuginaiwuge ekare tonaregedu imedurogu baka oto birirogu kado. Mare emeartorure Pao Kurireu ure maku tagaiwu bakaruji. Boe erdure nou boe tuginaiwuge ero pemegareu kodure taro kori duji. Dukodire boe erduware ro pegareuge nure tagi duji. Emago pegamode taro pegareuji Pao Kurireu biagai. 28-29Pao Kurireu ure bakaru maku mariguduwuge Judeu doge etai eno bakaruče. Dukodire Judeu doge eiamedu boe emeardaere Pao Kurireu uwobe remawuge nuie pudumi duji. Nou eno bakaru koiare ure Judeu doge edo tonaregedu imedurogu baka oto birirogu kado rugadu. Mare Judeu doge emodukare tumeardae pemegado tumeartoruwo tu Pao Kurireuji taidu tabo dukeje, Pao Kurireu uwobe modukare emage. Pao Kurireu umodukare tuwobedo emage. Pao Kurireu ure bakaru maku Judeu doge etai eno bakaruwo ema. Nou inodu kodi karega Pao Kurireu umode tuwobedo emage. Mare Pao Kurireu Uwari umode Judeu doge emeardae pemegado dukeje etaidumode tumeartoruwo tu Pao Kurireuji rugadu. Judeu doge erore aino dukeje Pao Kurireu uwobere emage rugadu. Pao Kurireu Uwari umode ia boe emeardae pemegado jamedu emeartoruwo tu Pao Kurireuji. Nou boe erore aino dukeje Pao Kurireu uwobere emage rugadu. Nou meartoru kuričigore Pao Kurireu jiwuge eire Pao Kurireu ure tugeragu tuwobewo emage. Dukodire Pao Kurireu mako pemegare ei erore jiboeji rugadu. Boe emago pemegamode iagei mare Pao Kurireu mako pemegamode nou meartorure puduiwugei, kodumode toro nou boe emagore jiwuge ekori.
31Ia boe enarare. Egore: – Boe pemegamode nou Judeu dogei rugadu ka na boe tuginaiwuge epiji? Judeu doge emeartorumode Pao Kurireu ure maku pudaiwu bakaruji dukeje ekodiwamodu kana rugadu? Nono boe pemegamode ei rugadu kana?
2Mare iwo tawie boe remawuji. Boe pemegamode Judeu dogei rugadu. Etaire Pao Kurireu ure tuwadaru maku etu pemegawo nou Pao Kurireu bataruji rugadu. 3Ia boe enarare pugeje. Egore: – Ia Judeu doge emeartorukare Pao Kurireu ure maku pudaiwu bakaruji. Nono Pao Kurireu umode tugera ra epiji kana?
4Boro! Pao Kurireu umodukare tugera ra epiji. Umode tumagore jiboe jetudo pudui rugadu. Boe eiamedu boe egore tumeartoruie Pao Kurireu bataruji mare pagare egoino. Mare Pao Kurireu umodukare tugera ra epiji. Mariguduwu Judeu doge eimijera kurireu Davi ure Pao Kurireu bataru bu bapera keje marigudu. Davi ro pegare. Mare Pao Kurireu mako pegare nou Davi ro pegareuji nono Davi jorduware Pao Kurireu akoino puduiboe ure turugadu duji. Kodire Davi akore:
– Pao Kurireu mako pegare boe ero pegareuji dukodire boe jokodu jire akoino;
– Boe erdu pegare Pao Kurireu akoino pudui duji mare boe jokodu jire Pao Kurireu akoino boei dukodire eroiwakare tumagowo iaboeji Pao Kurireu bataru jipagi. 3.4 Awu bataru padure Salmo 51.4 keje.
5Mare ia boe doge egore: – Čero pegare. Boe jokodu. Čero pegare boe egai dukodire nou boe etaidu kurire Pao Kurireu ro pemegareuji. Dukodire čero pegareu koiare ure nou boe etaidudo Pao Kurireu ro pemegareuji. Dukodi čare Pao Kurireu ro pegamodukare čei nou čero pegareu moriče.
– Čero pegareu ure boe etaidudo Pao Kurireu ro pemegareuji. Etaidukare čero pegareuji dukodire etaidu kurire Pao Kurireu ro pemegareuji. Čere boe etaidudo Pao Kurireuji. Ča Pao Kurireu ro pegamodukare čei.
Ia boe egore aino mare pagare egoino. 6Nou emagore jiboe ukare turugadu. Pao Kurireu rore jiboe umode turugadu. Ro pegamode boei ero pegareu moriče rugadu. Mare du pegakare.
7Iage egore: – Čewadrarodure. Boe jokodu. Mare čewadrarodae pegare ia boe doge egai dukodire nou boe doge etaidure Pao Kurireu bataru remawuji. Boe jokodu jie Pao Kurireu akoino rugadu. Nou boe erduware boe jokodu jie Pao Kurireu akoino rugadu duji. Etaidure Pao Kurireu bataru remawuji čewadaru piji. Dukodi čare čere boe etaidudo Pao Kurireu bataru remawuji.
– Čewadrarodae koiare ure boe etaidudo Pao Kurireu bataru remawuji. Pao Kurireu bataru pemegare nou boei. Etaidukare čewadrarodaeji dukodire etaidu kurire Pao Kurireu bataru remawuji. Čere etaidudo Pao Kurireu bataruji dukodire Pao Kurireu ro pegamodukare čei čewadrarodae moriče.
Ainore ia boe doge egore. Mare pagare egoino. Erduwa bokware tumagore jiboeji. 8Nou boe doge egore: – Ča pawo paro pegado boei etaiduwo Pao Kurireu ro pemegareuji. Paro pegareu koiare umode boe etaidudo Pao Kurireuji ro pemegareu nure ema kodi.
Ainore ia boe doge egore mare pagare egoino. Emeardaere ainoie inagore jamedu. Mare aino karega inagore. Pao Kurireu ro pegamode nou akoinowugei rugadu ero pegareu, ewadaru pegareu moriče.
Boe Eiamedu Boe Ero Pegare
9Iage enarare. Egore: – Nou Judeu doge ero pemegare rugadu nou boe tuginaiwuge epiji? Aino rugadu kana?
Boro! Ire tarduwado marigudu. Judeu doge eroiwakare tuwo tugera ra nou turo pegareu piji nono nou boe tuginaiwuge emogadure. Nou boe tuginaiwuge eroiwakare tuwo tugera ra turo pegareu piji jamedu. 10Marigudu Pao Kurireu bataru padure bapera keje. Akore:
– Boe eiamedu boe ero pegare. Ro jetororeu bokware.
11– Boe erduwakare tuwo tumeardae pemegareu tawuje rugadu. Erduwakare tuwo tumeardae jetorodo. Nou inodu boe bokware rugadu.
– Mako pemegare Pao Kurireu jiwuge bokwa.
12– Boe eiamedu boe ere tugera ra Pao Kurireu ro piji.
– Eiamedu boe ere tuwarigu boeto.
– Boe eiamedu boe ero pemegakare. Ro pemegareuge bokware rugadu.3.12 Awu bataru padure Salmo 14.1-3 keje.
13– Boe eiamedu boe emode pu jekiripagado.
– Ewadrarodumode rugadu tu tu je jii aino.3.13 Awu bataru padure Salmo 5.9 keje.
– Emago pegamode boei. Ewadarure nono awagu o korireu umogadure. Tuwadaru pegareu kodi umode timedia korigo rugadu.3.13 Awu bataru padure Salmo 140.3 keje.
14– Ewadaru pijire boe pegareboe ure tudawuje.3.14 Awu bataru padure Salmo 10.7 keje.
15– Ere akedo pudui tuwo boe ewido.
16– Ere boe jamedu boe pegado tiedureu jamedu boe keje.
17– Erduwakare tuwo tuiordae pegareu barigu tubiji.3.17 Awu bataru padure Isaías 59.7-8 keje.
18– Ekare tuioku kidugo Pao Kurireuji dukodire emeartoru bokware Pao Kurireuji.3.18 Awu bataru padure Salmo 36.1 keje.
Ainore Pao Kurireu akore.
19Boe etaidumode tumeartoruwo Pao Kurireu ure maku Judeu doge etaiwu bakaruji dukeje emeartorudo nou bakaru jamedu boeji. Mare boe eroiwakare tumeartoruwo nou bakaruji rugadu. Boe etaidure tumago pemegawo pudui Pao Kurireu biagai mare parokačereu bokware pugeje emeartoru bokware kodi. Nono Pao Kurireu ro pegamode boe eiamedu boei ero pegareu moriče. 20Pameartorumode Pao Kurireu ure maku Judeu doge etaiwu bakaruji dukodi karega Pao Kurireu umode pamugu pemegado pudabo. Pao Kurireu ure maku Judeu doge etaiwu bakaru koiare ure parduwado ro pegareuge nure pagi duji.
Pao Kurireu Umode Pamugu Pemegado Pudabo
21Mare aino Pao Kurireu ure boe erduwado nuba turomode tuwo boe emugu pemegado pudabo. Umodukare udo nono ture maku Judeu doge etaiwu bakaru mogadure rugadu. Ure Moisés jorduwado nou bakaruji uwo maku Judeu doge etai. Nou bakaru ure boe ewie Pao Kurireu umoduie boe emugu pemegado pudabo duji. Nou makore Pao Kurireu bataru jiwuge ere boe ewie jamedu. 22-23Mare aino boe emeartorumode Jesus Cristoji dukeje Pao Kurireu umode emugu pemegado pudabo. Umode tugeragu ei pudae tuwo edo nono ro pemegareuge emogadure. Boe eiamedu boe ero pegare rugadu dukodire nou ero pegareu koiare ure edu jaedo Pao Kurireu piji. Mare meartorure Jesus jiwuge emagere Pao Kurireu umode ekinorudo. Umode tugeragu meartorure Jesus jiwuge eiamedu boei tuwo edo nono ro pemegareuge emogadure, tuwo emugu pemegado pudabo. Aidure turowo aino boe eiamedu boei rugadu. 24Pao Kurireu ro pemegare boei. Ure tonaregedu Jesus Cristo maku boe etai biwo boe emugato ero pegareu moriče. Dukodire Jesus Cristo umode meartorure puduiwuge eiamedu boe ekinorudo. Pao Kurireu umode tugeragu ei pudae tuwo edo nono ro pemegareuge emogadure. Mare Pao Kurireu umodukare nou turore jiboe morido boe etai. 25-26Marigudu Pao Kurireu akore tumoduie boe ero pegare jiboe morido etai. Mare okudure boebo jii je dukodire biapagakare nou boe ero pegare jiboeji jii je. Mare aino čare Pao Kurireu ure tonaregedu maku boe etai. Ure tugu redo boe eiamedu boe ero pegareu moriče. Boe emeartorumode Jesusji dukodire Pao Kurireu biagodumode ero pegareu piji. Mare paga karega. Pao Kurireu ure nou boe ero pegareu morido tonaregedu ku tabo. Dukodire Pao Kurireu makore jiboe jeture pudui rugadu boe ero pegareu morimoduie. Dukodire boe erduware Pao Kurireu rore jiboe jamedu boe jetorore duji. Mare paga karega. Pao Kurireu ure meartorure Jesus jiwuge ero pegareu barigu epiji emugu pemegawo pudabo. Dukodi čare Pao Kurireu rore jiboe jetorore rugadu.
27Dukodire pawadaru očaromodukare parore jiboeji. Pameartorumode Pao Kurireu ure maku Judeu doge etaiwu bakaruji mare pawadaru očarokawo parore jiboeji. Pameartorumode Jesus jitu keje Pao Kurireu umode paro pemegado. 28Pameartorumode Pao Kurireu ure maku Judeu doge etaiwu bakaruji du inodu tabo Pao Kurireu umodukare pamugu pemegado pudabo. Mare pameartorumode Jesus jitu keje nono Pao Kurireu umode tugeragu pai pudae tuwo pamugu pemegado pudabo. 29Tu Judeu doge karega. Mare boe eiamedu boe emeartoruwo Pao Kurireuji. Boe tuginaiwuge jamedu emeartoruwo Pao Kurireuji. 30Pao Kurireu ure mitotu je. Judeu doge emeartorumode Jesus jitu keje Pao Kurireu umode tugeragu ei pudae tuwo emugu pemegado pudabo. Boe tuginaiwuge emeartorumode Jesus jitu keje Pao Kurireu umode tugeragu ei pudae tuwo emugu pemegado pudabo jamedu. 31Pameartorure tu Jesusji rugadu mare pamodukare Pao Kurireu ure maku Judeu doge etaiwu bakaru pijido. Pameartorure Jesusji dukodire parduware Pao Kurireu ure maku Judeu doge etaiwu bakaru jeture pudui rugadu duji.
4Ainore Abraão Rore
1Tagaiwodo jawu marigudu pawobe etuo Abraão rore jiboeji. Umode tarduwado nou inagore jiboe ure turugadu. 2Abraão ro pemegare dukodi karega Pao Kurireu ure mugu pemegado pudabo. Boe ero pemegamode tumugu pemegawo Pao Kurireu apo dukeje ewadaru očaromode nou turo pemegareuji. Mare pagatu je. Pao Kurireu aidukare nou inoduji. 3Pao Kurireu ure tuwadaru bu bapera keje. Akore: – Abraão meartorure Pao Kurireuji dukodire Pao Kurireu ure tugeragu Abraãoji pudae tuwo udo nono ro pemegareu mogadure.4.3 Awu bataru padure Gênesis 15.6 keje.
4Boe emaragodumode dukeje diero makudumode etai. Makudu paga karegure etai makudure etai emaragodae moriče. 5Mare boe ero pemegare dukodi karega Pao Kurireu aidure boei. Mare boe emeartorumode Pao Kurireuji dukeje emare umode tugeragu ei pudae tuwo edo nono ro pemegareuge emogadure. Pao Kurireu akore turo pegamodukaie nou meartorure puduiwugei, tumodukaie ero pegareu morido etai. 6Jaoboe Judeu doge eimijera Davi jorduware nou inoduji. Kodire Davi akore Pao Kurireu aidure jiwu jakaremoduie pudui rugadu. Pao Kurireu ure tugeragu nou meartorure puduiwugei tuwo edo nono ro pemegareuge emogadure. Dukodire jordu pemegamode ei dukodire nou meartorure Pao Kurireu jiwuge egaremode pudui rugadu. Boe pemegamode ei. Turo pemegareu kodi karega mare emeartorure Pao Kurireuji dukodire Pao Kurireu jordu pemegare ei. Davi akore:
7– Pao Kurireu biagodumode ro pegareuge ero pegareu piji dukodi egaremode pudui rugadu. Ero pegare mare du inodu tabo Pao Kurireu umodukare edo turo pegareu morido. Boe pemegamode ei.
8– Pagimijera Kurireu umodukare ro pegareuge ero pegareu bu bapera keje dukodire egaremode pudui rugadu.4.8 Awu bataru padure Salmo 32.1-2 keje. Boe pemegamode ei kodi.
9Judeu dogeire Davi akoino. Boe tuginaiwugeire akoino jamedu. Padure bapera kejewu Pao Kurireu bataru akore: – Abraão meartorure Pao Kurireuji dukodire Pao Kurireu ure tugeragu ji pudae. Ure udo nono ro pemegareu mogadure.
10Judeu doge emeardaere boe ewo tuwaga oto biri kado Pao Kurireu uwo tugeragu pudui pudae. Mare Abraão ukare tuwaga oto biri kado. Mare ture aino dutabo Pao Kurireu ure tugeragu ji pudae tuwo udo nono ro pemegareu mogadure. 11Dukejere toro ia meri keje Abraão ure tuwaga oto biri kado tuwo boe erduwado Pao Kurireu ure tugeragu pudui duji. Pao Kurireu ure tugeragu meartorure puduiwuge eiamedu boei pudae tuwo edo nono ro pemegareuge emogadure nono turo moga Abraão jitu mogadure. Dukodire meartorure Pao Kurireu jiwuge eiamedu boe etuo nure Abraãoče. Ekare tuwaga oto biri kado mare emeartorure Pao Kurireuji. Dukodire etuo nure Abraãoče. 12Judeu doge eiamedu boe ere tonaregedu imedu baka oto biri rogu kado rugadu ji aino. Ia nou ure tuwaga oto biri kadowuge Judeu doge emeartorure Pao Kurireuji jamedu kodire etuo nure Abraãoče jamedu. Mare paga karega. Emeartorure Pao Kurireuji nono Abraão meartoru mogadure. Abraão meartorure Pao Kurireuji nono toro ia meri keje ure tuwaga oto biri kado rugadu.
Boe Emeartorumode Pao Kurireuji Dukeje Emode Tugeragu Pao Kurireu Bataru Pemegareuji.
13Abraão mugure boe tuginaiwuge eno moto keje. Bikare raga mare Pao Kurireu ukare Judeu doge eno bakaru maku etai. Dukodire Abraão jorduwakare Pao Kurireu ure maku Judeu doge etaiwu bakaruji. Mare Abraão meartorure Pao Kurireuji. Dukodire Pao Kurireu ure tugeragu Abraãoji pudae tuwo udo nono ro pemegareu mogadure. Dukodire Pao Kurireu makore Abraãoji tumoduie boe jamedu boe maku ai, uwobe etai jamedu. 14Tu nou meartorure Judeu doge eno bakaru jiwuge etaire Pao Kurireu makore jiboe makudumode dukeje boe emeartoru paganure Jesusji. Tu nou meartorure Judeu doge eno bakaru jiwuge etaire Pao Kurireu makore jiboe makudumode dukeje Pao Kurireu mako paga nure. Mare Pao Kurireu makore jiboe makudure boe eiamedu boe etai dukodire ure turugadu boe emeartoru kuriwo Jesusji rugadu. 15-16Pao Kurireu makore jiboe makudure meartorure puduiwuge eiamedu boe etai rugadu. Nou Pao Kurireu ure maku Judeu doge etaiwu bakaru ukare Pao Kurireu ro pemegado ei. Nou Pao Kurireu ure maku Judeu doge etaiwu bakaru koiare ure Pao Kurireu korigo ei. Boe emeartorukare nou bakaruji dukodire Pao Kurireu korigodure ei rugadu. Ainore boe erore jamedu. Boe ewadarure boe emeartoruwo ji mare ia boe erdu pegare ji dukodire boe emeartorukare ji. Nono boe ekorigodumode nou meartorukare nou boe ewadaru jiwugei. Boe emodukare tuwadaru udo turugadu boe emeartoruwo ji dukeje boe kare turugadu tumagowo boe ewadaru jipagi. Meartorukare jiwu bokwamode jamedu. Dukodire inagoino Pao Kurireu umode tumagore jiboe maku meartorure Jesus jiwuge etai. Umode tumagore jiboe maku Judeu doge meartorure Jesus jiwuge etai. Emeartorure Judeu doge eno bakaruji mare emeartorure Jesusji dukodire Pao Kurireu umode tumagore jiboe maku etai. Makore tumoduie boe jamedu boe maku etai. Mare Pao Kurireu umode tumagore jiboe maku nouia boe tuginaiwuge meartorure Jesus jiwuge eiamedu boe etai jamedu. Emeartorumode nono Abraão meartoru mogadure dukeje Pao Kurireu umode tumagore jiboe maku etai. Dukodire Pao Kurireu makore tumoduie boe jamedu boe maku rugadu taidu tabo Abraão uwobe eiamedu boe etai. Pameartorure Jesusji dukodire Abraão uwobe nure pagi. Pao nure Abraãoče jamedu. 17-19Marigudu Abraão mugure moto keje. Bikare raga. Mare ore bokware rugadu. Nono Pao Kurireu makore Abraãoji. Ure nou tuwadaru bu bapera keje. Akore: – Imode boe etuodo aki. Akoremode rugadu. Akore etore eidodumode rugadu kodire akore emagamode rugadu. Emode taodo pubiji toro ia tumuga ka. Judeu doge emode emage. Iage boe tuginaiwuge emode emage jamedu.4.17-19 Awu bataru padure Gênesis 17.5 keje.
Ainore Pao Kurireu akore Abraãoji. Nono makore ji pugeje. Ure nou bataru bu bapera keje jamedu. Akore: – Akoremode rugadu. Akore etore emagamode jamedu.
Ainore Pao Kurireu makore Abraãoji rugadu. Nou Abraão, Sara ekodu mai dutabo emugure puapo mare etore bokware rugadu jii toro tubegagodu ka. Nono ča Pao Kurireu makore ji dukeje Abraão o jorure cem. Oreduje Sara pegagodure jamedu. Dukodire meardaere toremodukaie rugadu. Mare du inodu tabo Abraão meartoru kimore Pao Kurireu makore pudui duji. Upagare Pao Kurireu makore puduiwu tonaregedu bagai. Ore bokware. Oremodukare. Mare Pao Kurireu akore tumoduie Abraão oredo dukodire Abraão upagare tonaregedu bagai rugadu. Nono Pao Kurireu ure tuwadaru udo turugadu. Makore jiboe kodure pudui rugadu. Pao Kurireu ure Abraão onaregedu imedudo toreduje Sara apo rugadu. Awu Pao Kurireu emare rakare tuwo bireuge eewodudo pugeje. Emare rakare tuwo boe jamedu boe towuje tuwadaru tabo. Boe bokware mare tuwadaru tabore ure boe jamedu boe towuje. Abraão meartorure Pao Kurireuji. Onaregedure dukodire uwobere. Boe etuore ema. Ore etore eidodure rugadu dukodire ore emagare rugadu. Ere taodo pubiji toro ia tumuga ka. 20-21Abraão mororamagadukare tumeartoruwo Pao Kurireuji. Meartoru rakare Pao Kurireuji rugadu. Aidu pemegare Pao Kurireu bataruji. Meartorure rugadu Pao Kurireu akoino jiboeji. Dukodire ure turagado pudui rugadu. Mako pemegare Pao Kurireuji. 22Abraão meartorure rugadu Pao Kurireuji dukodire Pao Kurireu ure tugeragu ji pudae tuwo udo nono ro pemegareuge emogadure. 23Nou Pao Kurireu bataru padure bapera keje. Abraão jire Pao Kurireu akoino. Mare iage eire akoino jamedu. 24Pao Kurireu ure Jesus jewodudo pugeje. Pameartorumode awu Pao Kurireuji dukeje Pao Kurireu umode tugeragu pai pudae tuwo pado nono ro pemegareuge emogadure jamedu. Umode tugeragu pai pudae nono turore Abraão jitu mogadure. Pagimijera kurireu nure Jesus rema. 25Paro pegareu mori čere Jesus makudure boe eimijerage pegareuge etai ewo bito. Mare Pao Kurireu ure Jesus jewodudo pugeje. Dukodire Pao Kurireu biagodumode meartorure puduiwuge ero pegareu piji tuwo tugeragu ei pudae.
5Nuba Paromode Pamugu Pemegawo Pao Kurireu Apo
1Pameartorure Jesusji dukodire Pao Kurireu ure tugeragu pai pudae tuwo pado nono ro pemegareuge emogadure. Pagimijera Jesus Cristo ure pagaora butugugo pamugu pemegawo Pao Kurireu apo. 2Pameartorure Jesusji dukodire ure parego Pao Kurireu muga pemegareu ka. Nono boe pemegare pai. Pameartorure Jesusji nono parduware ia meri keje pamugumode Pao Kurireu apo duji. Nono pabagare paegare tabo Jesus bagai rugadu. Emare aregodumode pugeje tuwo parududo baruto pamuguwo Pao Kurireu apo baru tada rugadu. 3Boe rakare pai mare du inodu tabo pagare pae jodo. Mare paga karega. Boe rakamode pai mare pawo paragado pai pae tobu tabo rugadu. 4Pamode paragado pai pameartoruwo Pao Kurireuji nono Pao Kurireu aidumode pai. Pao Kurireu aidumode pai nono pabagamode Pao Kurireu bagai rugadu pameartorure bataruji kodi. 5Pabagamode Pao Kurireu bagai pagiarigodumodukare. Pao Kurireu ure Tuwari maku pagai. Nou Uwari ure parduwado Pao Kurireu meardu kurire pai duji. Dukodire pabagamode Pao Kurireu bagai mare pagiarigodumodukare.
6Ro pegareuge nure pagi kodire paroiwakare pawo paginorudo. Mare Jesus Cristo bire pamugato. Bire Pao Kurireu aidure jiwu meri keje. 7Boe etaidumodukare tuwiwo ro pegareuge emugato. Boe emeartorukare jamedu tuiordumoduie ia imeduji biwo timedia pemegareu mugato jamedu. 8Mare ro pegareuge nure pagi. Mare du inodu tabo Jesus Cristo bire pamugato paro pegareu moriče. Dukodire parduware Pao Kurireu meardu kurire pai duji. Meardu kurire pai rugadu. 9Jesus Cristo ure tugu redo paro pegareu moriče. Pameartorure ji dukodire ure tugeragu pai pudae pamugu pemegawo Pao Kurireu apo. Nou inodu kodi parduware Jesus umode paginorudo duji. Pao Kurireu korigodumode ro pegareugei. Umode boe pegado ei ero pegareu moriče. Mare Jesus umode paginorudo. 10Pameartorukare marigudu kodire pardu pegare Pao Kurireuji. Mare aino čare pameartorure Jesusji dukodire Pao Kurireu ure tumedagedo pagi. Onaregedu Jesus bire paro pegareu moriče dukodire Pao Kurireu ure tumedagedo pagi. Dukodi čare parduware Jesus Cristo umode paginorudo duji. Jewodure pugeje dukodire umode paginorudo. 11Paegarere pai rugadu Pao Kurireu rore jiboeji pagai. Pagimijera Jesus Cristo ure Pao Kurireu metagedo pagi pameartorure ji kodi. Dukodire paegarere pai rugadu.
Adão Ro Pegare Mare Jesus Ro Pemegare
12Imedu boetojiwu nure Adãoče. Emare ro pegare boetoji dukodire boe eiamedu boe ero pegare jamedu. Turo pegareu koiare ure boe pegado boe eiamedu boei. Adão ro pegare dukodire boe eiamedu boe ewire Adão piji ji aino rugadu. Boe eiamedu boe ewimode turo pegare kodi. 13Marigudu Pao Kurireu ukare Judeu doge eno bakaru maku etai. Mare boe ero pegare marigudu. Mare eno bakaru bokware dukodire erduwakare turore jiboe pegare Pao Kurireu jakai duji. 14Mare boe eiamedu boe ewire rugadu Adão piji jii toro Moisés ae. Iage ero pega kurikare mare ewire jamedu. Ero pegare jiboe ukare nono Adão rore jiboe mogadure. Adão ure tuiorduwa bokwado Pao Kurireu makore pudui duji. Nonore ro pega remawu ure rugadu. Iage ero pega kurikare mare ewire jamedu. Boe eiamedu boe ewire.
Adão ure nono ia imedu mogadure. Nou imedu aregodumode ia meri keje. 15Mare ekare nono pu mogadure jamedu. Adão ro pegare. Nouia imedurema umode boe ekinorudo. Iere Jesus Cristo. Pao Kurireu onaregedu nure ema. Pao Kurireu ure nou tonaregedu maku boe etai taidu tabo turo pemegawo boei tuwo boe ekinorudo. Nou Pao Kurireu rore jiboe ukare nono Adão ro mogadure. Adão ro pegare dukodire boe eiamedu boe ewire. Mare Pao Kurireu ro pemegareu kodure nou Adão rore jiboe kori. Dukodire umode ekinorudowuge emagamode. 16Pao Kurireu ure maku boe etaiwu turo pemegareu ukare nono Adão ro pegareu mogadure. Adão ro pegare dukodire Pao Kurireu makore ji. Akore: – Ro pegareu nure aki.
Nono Adão ro pegareu jore boe eiamedu boeto. Dukodire ro pegareuge nure boe eiamedu boeče. Mare Pao Kurireu ro pemegare meartorure puduiwugei taidu tabo tuwiagoduwo ero pegareu jamedu boe piji tuwo ekinorudo. Dukodire ure tugeragu ei pudae.
17Adão ro pegare dukodire boe eiamedu boe ewire. Moto kejeboe jamedu boe akedumode jamedu. Boe jamedu boe bimode rugadu. Mare Jesus Cristo ure mitotu je jamedu. Jesus ro pemegareu kurire nou Adão ro pegareu kori. Pameartorumode Jesusji dukeje Pao Kurireu umode tugeragu pai pudae tuwo pado nono ro pemegareuge emogadure. Dukodire pameartorumode Jesusji dukeje pagogwamaguduwo Pao Kurireuji uwo nou turo pemegareu maku pagai paro pemegawo. Umode turo pemegareu maku pagai mare pamodukare nou Pao Kurireu ro pemegareu morido ai paro pemegareu tabo. Emare umode maku pagai taidu tabo rugadu. Nono jordu pemegamode pai. Dukodire Jesus Cristo umode paewodudo pugeje pamuguwo pudabo rugadu.
18Adão ure mitotu je. Ro pegare dukodire boe eiamedu boe ewire. Mare Jesus ure mitotu je jamedu. Ro pemegare tuwo boe eiamedu boe ekinorudo. Bitodure boe ero pegareu moriče. Dukodire umode tugeragu meartorure puduiwugei pudae tuwo eewodudo pugeje ewikawo pugeje. 19Adão ure tuiorduwa bokwado Pao Kurireu makore pudui duji. Kodire ro pegareu remawu nure ema rugadu. Dukodire boe eiamedu boe ero pegare jamedu. Mare Jesus meartorure tuoji dukodire bire boe ero pegareu moriče. Dukodire Pao Kurireu ure tugeragu nou meartorure puduiwugei pudae tumedagewo emage tuwo edo nono ro pemegareuge emogadure.
20Pao Kurireu ure Judeu doge eno bakaru maku etai erduwawo turo pegareuji. Dukodire erduware turo pegareu boeji rugadu. Etaidukare tumeartoruwo nou Pao Kurireu ure maku pudaiwu bakaruji. Dukodire ro pegareu remawuge nure emage rugadu. Mare nou inodu kodi karega Pao Kurireu roiwamodukare tuwo nou ro pegareuge ekinorudo ero pegareu piji. Pao Kurireu ure turo pemegareu kurido nou boe ero pegareu kori rugadu. 21Čare boe ero pegareu koiare umode boe ewido. Mare Pao Kurireu ure turo pemegareu maku boe etai taidu tabo. Dukodire umode tugeragu nou meartorure puduiwuge eiamedu boei pudae tuwo edo nono ro pemegareuge emogadure. Dukodire jordu pemegamode ei. Pameartoruwo ji. Pameartorumode ji dukeje Pagimijera Jesus Cristo umode paewodudo pugeje paragojewo Pao Kurireu apo jii toro rugadu.
6Mugu Pemegamode Jesus Apowuge Etaidukare Turo Pegawo Pugeje
1-2Ainore parore. Marigudu paro pegare mare maigodu aino pameartorure Pao Kurireuji. Dukodire biagodure paro pegareu boe piji. Ia boe emeardae pegare. Egore: – Paro pega kurimode Pao Kurireu biagodumode paro pegareu piji rugadu. Dukodi čare paro pegawo rugadu pawo Pao Kurireu ro pemegado pai rugadu.
Ainore egore. Mare iwo tawie boe remawuji. Pamodukare pagaora mekido nou boe emeardae pegareu rekodaji. Pawo pagera ra paro pegareu piji rugadu. Bireuge emeardaekare turo pegawo pugeje. Pare nono bireuge emogadure. Mare bireuge ei karega inagoino. Pawo pawia ra paro pegareu piji. Du jire inagoino. 3-4Pameartorure Jesus Cristoji dukodire ure Tuwari maku pagai. Ainore rore pai tuwo pado nono bireuge emogadure. Dukodire pawire nono Jesus bi mogadure. Mare pawi ji karega inagoino. Pare pagera ra paro pegareu piji. Du jire inagoino. Dukodire meartorure Jesus jiwuge pagi paiamedu boe pamode paremo poboto pagao pegododuwo pawo boe erduwado Pao Kurireu Uwari rore aino pai duji.
Pameartorure Jesus Cristoji dukodire ure Tuwari maku pagai. Ainore rore pai tuwo pado nono jewodureuge emogadure jamedu. Dukodire paewodure nono Jesus jewodu mogadure rugadu. Mare paewodu ji karega inagoino. Pao Kurireu ure pardae pameardae udo tuginai paro pemegawo, paro pegakawo pugeje. Du jire inagoino. Dukodire meartorure Jesus jiwuge pagi paiamedu boe pagao pegododure dukeje pamode padawuje pobo piji jamedu pawo boe erduwado Pao Kurireu Uwari rore aino pai duji jamedu. Pao Kurireu ure Jesus jewodudo turaga pemegareu tabo. Nono Pao Kurireu umode turaga maku meartorure puduiwuge eiamedu boe etai tuwo erdae emeardae udo tuginai. Nono ewo tugera ra turo pegareu piji, ero pemegawo, emugu pemegawo pudabo.
5Pamediare Jesusče rugadu pameardu kurire ji rugadu dukodire paromode nono Jesus ro mogadure rugadu. Emare bire. Pagi pare nono bireuge emogadure jamedu. Mare pawi ji karega inagoino. Pawo pawia ra pameardae pegareu piji paro pegakawo pugeje. Dujire inagoino. Nono Jesus umode paewodudo pugeje jamedu pamuguwo pudabo dubagai. Emare jewodure pugeje. Nono paewodumode pugeje nono Jesus jewodu mogadure jamedu. 6Jesus Cristo bire ipo padure pugajejewu keje paro pegareu moriče, pameardae pegareu moriče. Nou inodu kodi pameartorumode Jesusji. Nono pameardae pegareu akedumode nono bireu mogadure. Aino pameartorure Jesusji dukodi ure tumeardae pemegareu maku pagai rugadu pameardaeče pawiapagakawo nou pameardae pegareuji pugeje nou pameardae pegareu ukawo tuiodo pawugeje pugeje. Pamode pagamudo nou pameardae pegareu piji. 7Pawimode dukeje pamode pagamudo paro pegareu piji. 8Ča pameartorure Jesus Cristoji dukodire pare nono bireuge emogadure. Mare pawi ji karega inagoino. Pawiapagamodukare pameardae pegareuji pugeje paro pegakawo pugeje. Dujire inagoino. Dukodire parduware umode paewodudo pugeje duji pamuguwo pudabo toro baru tada. 9Pao Kurireu ure Jesus jewodudo pugeje rugadu. Nono bimodukare pugeje rugadu. Jesus rakare rugadu dukodire bimodukare pugeje. 10Bire boe ero pegareu moriče. Dukodire boe ero pegareu raka kodukare Jesus rore jiboe kori pugeje. Emare raka kodure boe ero pegareu piji toro rugadu. Aino Jesus mugu pemegare Pao Kurireu apo. 11Tarodo nono Jesus ro mogadure. Tawiapagakaba tameardae pegareuji pugeje nono bireuge ewiapagamodukare boe pegareu jitu mogadure. Mare tameartorudo Jesus Cristoji tawo tamediado ema. Ainore taromode tawo tamugu pemegado Pao Kurireu apo. Jesus ure taginorudo tamugu pemegawo Pao Kurireu apo.
12Boe ewodure tumeardae pegareu tabo jii toro tuwimode du ka. Boe emeardu kurimode nou tumeardae pegareuji dukeje nou ero pegareu kodumode toro tugori rugadu. Marigudu tawiapagare tameardae pegareuji jamedu. Tarokaba aino pugeje. Tawiapagakaba tameardae pegareuji tameartorukawo ji rugadu. 13Taro pegakaba tagera tabo, taeku tabo, tawadaru tabo jamedu. Taeku kidukaba ro pegareuji meardae pegareu ukawo turemo tagaorato. Taipagakaba mako pegareuge ewadaruji ewadaru pegareu ukawo turemo tagaorato. Mare tameartorudo Pao Kurireuji utugaregewo tagi. Marigudu taro pegare dukodire tare nono bireuge emogadure. Mare taro pegamodukare pugeje dukeje tamode nono jewodureuge emogadure. Dukodire tameartorudo Pao Kurireuji rugadu taro pemegawo. Tameardaewo nono Pao Kurireu meardaere. 14Judeu doge eno bakaru ukare taro pegareu barigu tabiji. Marigudu tameartorure nou Judeu doge eno bakaruji mare du inodu tabo tameardaere tu taro pegawo rugadu tu tu je. Dukodire inagoino tai tameartoruwo Jesusji. Aino čare tameartorure Jesusji dukodire Pao Kurireu ro pemegare tai tuwo taro pegareu barigu tabiji. Ro pemegare tai tuwo taraga maku tagai taro pegakawo pugeje.
Pao Kurireu Utugarege Ero Pemegamode
15Ča. Parduware nou Judeu doge eno bakaru umodukare paro pegareu barigu pabiji duji rugadu. Dukodire pagare pagimijerado nou Judeu doge eno bakaruče. Mare nuba paromode? Paro pegamokana? Boro. Paro pegamodukare. Pao Kurireu ro pemegare boei dukodire pameartoruwo ji pagaidu tabo rugadu. 16Tarduware. Boe emode tugeragu ia boei tugimijerače dukeje boe emeartorumode tu ji rugadu bataruji jamedu. Dukodire utugarege mode emage rugadu. Ča. Tameardae tawuje nuba taromode. Tawiapagamode tameardae pegareuji nono umode tuiodo tawugeje rugadu taro pegawo. Nono taro pegamode rugadu. Dukodire tawarigudumode boe pegareuto rugadu tawi keje. Mare Pao Kurireu utugarege mode tagi nono tameartorudo tu ji rugadu. Tawiapagamodukare nou tameardae pegareuji pugeje. Dukodire Pao Kurireu umode tamugu pemegado pudabo. 17Pao Kurireu pemegare rugadu! Ikimadure apo rugadu! Mare paga karega. Marigudu taiamedu boe taroiwakare tawo tagera ra nou taro pegareu piji. Mare boe ere tarduwado Pao Kurireu bataruji. Dukodire tameartorure ji tameardae jamedu boe tabo. 18Dukodire Pao Kurireu ure taginorudo taro pegareu piji taro pemegawo. Utugarege nure tagi taro pemegawo rugadu. 19Inure tawie Pao Kurireu meardaere jiboeji. Mare inure tawie tawadaru ure aino duji tarduwawo imagore jiboeji. Marigudu tameardaere tu taro pegawo. Marigudu tagaidure tu tameardae pegawo tawo taro pegareu kurido tagori. Mare aino ča tawiapagado tameardae pemegareuji taro pemegawo rugadu. Aino ča tameartorudo tu Pao Kurireu makore jiboeji tameardae pemegawo, taro pemegawo, tarore jiboe uwo tuginai meartorukare Pao Kurireu jiwuge ero piji.
20Marigudu tameardaere tu taro pegawo. Tameardaekare taro pemegawo. 21Mare iwo tawie nuba nou taro pegareu rore tai duji. Ure boe pegado tai rugadu. Umode tawarigu boe pegareuto tawi keje rugadu. Mare aino ča tabogurure nou taro pegare jiboeji rugadu. 22Aino čare Pao Kurireu ure taginorudo nou taro pegare jiboe piji. Dukodire Pao Kurireu utugarege nure tagi. Mare paga karega. Tare tameartorudo tu Pao Kurireuji tu rugadu. Dukodire tarore jiboe ure tuginai meartorukare Pao Kurireu jiwuge ero piji. Tarore jiboe ure tuginai ero piji rugadu. Nono ča Pao Kurireu umode taewodudo pugeje dukodire tamugumode apo. Du akedumodukare. 23Boe ero pegareu morire. Boe ewarigudumode boe pegareuto ewi keje turo pegareu moriče rugadu. Mare Pao Kurireu umode meartorure Jesus jiwuge ekinorudo taidu tabo. Makomode ei ekawo turo pegareu morido pudai. Taidu tabore umode eewodudo pugeje emugu pemegawo pudabo jii toro rugadu. Ewimodukare pugeje. Mare paga karega boe emeartorumode Pagimijera Kurireu Jesus Cristoji. Dukodire romode aino boei rugadu.
7Paro Reo
1Imedage nure tagi dukodire iwo tawie. Boe emeartorumode tugimijeragei emagore jiboeji jii toro tuwi ka rugadu. Boe ewi keje boe ere tamudo nou boe eimijerage eno bakaru piji. Taiamedu boe tarduware awu inagoino jiboeji. 2Aino inure tarduwado. Aredu okogemode dukeje. Boe eno bakaru koiare aredu meartorumode toreduji. Mare oredu bimode dukeje aredu okoge bokwamode pugeje. Toro ia meri keje aidumode tumuguwo ia imedu apo pugeje. Du pegakare. 3Mare oredu bikare raga dukeje ukare turugadu aredu jeribariwo ia imedu metiaji. Jeribarimode toredu piji dukeje boe emago pegamode ji. Egomode aredu pegareudo nuie ema. Mugu kiorokare toredu apo. Mare oredu bimode nono aredu okoge bokware pugeje. Toro ia meri keje aredu aidumode tumuguwo ia imedu apo pugeje. Du pegakare. Ainore boe erore. 4-6Marigudu parore pagaidure jiwu paro pegareuji. Parduware Pao Kurireu ure maku Judeu doge etaiwu bakaruji. Nou bakaru ure pawie paro pemegawo. Mare pameardae pegareu ure tuiodo pawugeje pameartorukawo nou bakaruji. Pagaidure pawiapagawo tu paro pegareuji. Dukodire paro pegare tu tu je. Paro pegareu koiare umode pardudo boe pegareuji dukodire pawimode rugadu. Mare aino pameartorure Jesusji dukodire pare nono bireuge emogadure pugeje. Mare bireu ji karega inagoino. Pameardaemodukare paro pegareuji pugeje. Dujire inagoino. Dukodire pare pawia ra paro pegareu piji. Pameardaekare paro pegawo pugeje. Paro pegareu metumodukare padada pugeje. Pameartorure Jesusji. Dukodire Pao Kurireu ure maku Judeu doge etaiwu bakaru akedure paegai. Imedage nure tagi. Tare nono bireuge emogadure. Mare tawi ji karega inagoino. Jesus bire tamugato tawo tagera ra taro pegareu piji. Dujire inagoino. Jesus Cristo ure tumedagedo tagi. Dukodire tare nono Jesus mogadure. Emare bire dukodire tare nono bireuge emogadure. Mare Jesus jewodure pugeje. Dukodire pameartorure tu Jesusji. Pameartorumodukare mariguduwu parore jiboeji pugeje. Pare pagamudo nou mariguduwu nou boe eno bakaru boe piji. Aino pameartorure Pao Kurireu o bakaru maiwuji. Nou Pao Kurireu Uwari ure nou bakaru maiwu maku pagai dukodire pameartorure ji rugadu.
Pao Kurireu Ure Maku Judeu Doge Etaiwu Bakaru Reo
7Tameardae pegakaba Pao Kurireu ure maku Judeu doge etaiwu bakaruji. Nou bakaru koiare ure boe erduwado turo pegareuji. Nou bakaru akore: – Taebogodukaba tamedage enoeji.7.7 Awu bataru padure Êxodo 20.17 keje.
Pao Kurireu makomodukare aino nou boei dukeje boe erduwamodukare tiebogodure tumedage enoeji pudai duji pegare Pao Kurireu jakai duji. Erduwamodukare ia turo pegareuji. 8Mare nou bakaru ure boe erduwado boe ero pegareuji. Dukodire boe erduware. Mare tu emeardae pegareu koiare ure nou boe emeartoru bokwado nou bakaruji. Erduware nou bakaruji mare du inodu tabo ere tumeartoru bokwado ji. Boe erduwamodukare nou bakaruji nono boe erduwamodukare turo pegareu bagai. 9Marigudu iorduwakare Pao Kurireu o bakaruji. Dukodire iwiagorokare boeji. Mare iorduware Pao Kurireu o bakaruji dukeje Pao Kurireu bataru ure iorduwado iro pegareuji rugadu. Du inodu tabo imeartorukare ji. Itaidure iro pegawo pugeje. 10Dukodire iorduware iwarigudumode bope doge eda pegareuto rugadu iwi keje iro pegareu moriče. Imeartorumode Pao Kurireu o bakaru jamedu boeji dukeje iwarigudumodukare bope doge eda kejewu joru pegareuto iwi keje. Mare imeartorukare ji dukodire iro pegareu moridodumode. 11Iro pegareu ure iekiripagado. Iorduware Pao Kurireu o bakaruji. Mare iro pegareu ure imeartoru bokwado ji. Iro pegareu ure ido nono bireu mogadure. Mare iwi ji karega inagoino. Iwarigudumode bope doge eda kejewu joru pegareuto iwi keje. Du jire inagoino.
12Pao Kurireu ure nou tuwadaru maku Judeu doge etai eno bakaruče. Nou bakaru pegakare. Pemegare. Umode boe erduwado boe ero pegareuji boe ero pemegareuji jamedu. Boe emeartorumode ji dukeje ero pegamodukare. 13Imeartorumodukare ji dukeje iwimode. Pao Kurireu o bakaru koia karega umode iwido. Iro pegareu koiare umode iwido. Mare Pao Kurireu o bakaru ure iorduwado iro pegareuji. Ure iorduwado iwarigudumode bope doge eda kejewu joru pegareuto iwi keje iro pegareu boe moriče rugadu.
Pawo Paragado Pawo Paro Pegareu Barigu Pabiji
14Pao Kurireu o bakaru ure turugadu. Marigudu bimodurewu nure imi. Iragakare iwo ikera ra iro pegareu piji. Imeardae pegareu ure tuiodo iwugeje toro boe pegareu ka rugadu. Ikimijerare ema rugadu. 15Iorduwakare irore jiboeji. Itaidure iro pemegawo. Mare nou iro pegareu kare iragado iro pemegawo. Itaidukare iro pegawo mare irore itaidukare jiwu iro pegareuji. 16Boe jokodu jire Pao Kurireu o bakaru akoino pai. Pagaidukare paro pegawo mare ro pegareuge nure pagi. 17Mare paga karega. Pameardae pegareu ure paro pegado tu tu je. Pagaidure paro pemegawo mare pameardae pegareu koiare ure paro pegado. 18Ro pegareu nure imi rugadu. Itaidure iro pemegawo mare iragakare iro pemegawo ro pegareu nure imi rugadu. 19Irokare itaidure jiwu iro pemegareuji. Mare irore itaidukare jiwu iro pegareuji. 20Iromode itaidukare jiwu irore jiboeji dukeje iorduwamode imeardae pegareu jiboeji. Imi karega. Mare meture itadawu imeardae pegareu koiare ure irodo aino.
21Itaidure iro pemegawo. Mare imeardae pegareu meture itada. Dukodire iragakare iro pemegawo. Dukodire iro pegare rugadu. 22Itadare imeardaere imeartoruwo Pao Kurireu o bakaruji itaidure ji kodi. 23Mare itadare ia imeardae pegareu meture jamedu iwo imeartoru bokwado nou Pao Kurireu bakaruji. Imeardae pemegareu meture itada jamedu. Mare imeardae pegareu kodure imeardae pemegareu kori. Dukodire iroiwakare iwo ikinorudo imeardae pegareu piji. 24-25Ainore ire rugadu. Itaidure Pao Kurireu o bakaruji. Mare ire mitotu je dutabo iroiwakare imeartoruwo ji. Imeardae pegareu ure tuiodo iwugeje iro pegawo tu tu je. Dukodire ikiarigodure rugadu. Iwarigudumode bope doge eda kejewu joru pegareuto iwi keje nou imeardae pegareu moriče rugadu. Mare iorduware umode ikinorudowuji. Jesus Cristo umode ikinorudo rugadu. Pagimijera nure ema. Dukodire ikimadure Pao Kurireu apo tu tu je. Imodukare ikera ra ikimadure Pao Kurireu apo dupiji tu tu je rugadu.
8Pao Kurireu Umode Paragado Paro Pemegawo
1Meartorure Jesus Cristo jiwuge emugu pemegare Jesus apo rugadu. Dukodire Jesus mako pegamodukare ei. Umodukare ewarigu boe pegareuto. 2Marigudu paro pegareu koiare ure pamugu jaedo Pao Kurireu piji. Mare pameartorure Jesusji dukodire ure Pao Kurireu Uwari maku pagai tuwo pamugu pemegado Jesus Cristo apo. Pamugu jaemode Pao Kurireu piji dukodi pawi keje pawarigudumode toro nou bope doge eda kejewu joru pegareuto. Mare Pao Kurireu ure Tuwari maku pagai pameartoruwo pudui tuwo paginorudo padukawo nou bope doge eda kejewu joru pegareuto pamugu pemegawo Pao Kurireu apo rugadu. Pao Kurireu ure Tuwari maku pagai tuwo paginorudo paro pegareu piji paro pemegawo. 3Pao Kurireu makore boei marigudu ero pemegawo, ewo tugera ra turo pegareu piji. Ure nou tuwadaru maku Judeu doge etai eno bakaruče emeartoruwo ji. Mare boe eroiwakare tumeartoruwo nou bakaruji. Eragakare tuwo tugera ra turo pegareu piji. Aino čare Pao Kurireu umode boe eragado tuwo tugera ra turo pegareu piji. Marigudu akore boe ero pegareu morie. Dukodire ure tonaregedu imedu rawuje moto ka. Ure nono boe emogadure. Mare ro pega bokware, ro pegamodukare boei jii toro. Dukodire Pao Kurireu akore ema rugaduie bimode boe ero pegareu moriče emare ro pegareu bokware kodi. 4Ainore Pao Kurireu rore tuwo boe ero pegareu mori barigu boe epiji. Ure paginorudo nou paro pegareu piji paro pemegawo Pao Kurireu ure maku boe etaiwu bakaruji. Pameartorumode Pao Kurireu Uwariji dukeje paro pemegamode. Pameartorumodukare pameardae pegareuji pugeje. Dukeje paro pemegamode rugadu. 5Mare boe ewiapagamode tu tumeardae pegareuji dukeje eroiwamodukare tuwo tuwia ra nou tumeardae pegareu piji. Mare boe emeartorumode Pao Kurireu Uwari bataruji dukeje emodukare tuwia ra Pao Kurireu Uwari piji. 6Boe ewiapagamode tu tumeardae pegareuji dukeje ewarigudumode joru pegareuto ewi keje rugadu. Mare emeartorumode Pao Kurireu Uwariji dukeje emugu pemegamode Pao Kurireu apo. Emororamagadumodukare iaboeji pugeje tumeardae kuriwo Pao Kurireuji rugadu. 7Mare boe ewiapagamode tu tumeardae pegareuji dukeje erdu pegamode Pao Kurireuji. Emeartorumodukare Pao Kurireu bataruji. Eroiwamodukare tumeartoruwo ji rugadu. 8Biapagare tumeardae pegareu jiwuge emodukare Pao Kurireu jakaredo pudui rugadu.
9Ča Pao Kurireu Uwari rakojere tagabo dukodire tawiapagakaba tameardae pegareuji pugeje. Tameartorumode Pao Kurireu Uwari bataruji rugadu. Mare Pao Kurireu Uwari rakojemodukare tagabo dukeje Pao Kurireu uwobe modukare tagi. 10Mare tameartorumode Jesus Cristoji dukeje mugu pemegamode tagabo. Dukeje Uwari koiare umode tamugu pemegado Pao Kurireu apo. Dukodire umode boe pemegado tai rugadu. Boe ero pegareu koiare ure boe pegado awu motoji. Dukodire paiamedu boe pawimode. Meartorukare Jesus jiwuge ewimode. Meartorure Jesus jiwuge pagi pawimode jamedu. 11Mare Pao Kurireu ure Jesus jewodudo pugeje. Pameartorure Jesusji kodire Pao Kurireu Uwari rakojere pagabo. Dukodire Pao Kurireu umode Tuwari udo paewodudo pugeje jamedu nono turo moga Jesus jitu mogadure. Dukodire pawarigudumodukare bope doge eda kejewu joru pegareuto paragojewo Pao Kurireu apo.
12Dukodire Pao Kurireu utugarege nure pagi. Pawo pagera ra pameardae pegareu piji rugadu pawiapagakawo ji pugeje. 13Pawiapagamode pameardae pegareuji dukeje pawarigudumode bope doge eda kejewu joru pegareuto rugadu pawi keje. Mare Pao Kurireu Uwari raka tabore pamode pagera ra paro pegareu piji dukeje pamugu pemegamode Pao Kurireu apo jii toro rugadu. Du akedumodukare rugadu. 14Meartorure Pao Kurireu Uwari jiwuge Pao Kurireu ore nure emage. 15Nou Pao Kurireu ure maku tagaiwu Uwari umodukare tabagududo. Umodukare boe emeardae pegareu utugaregedo tagi. Mare umode Pao Kurireu oredo tagi. Pao Kurireu Uwari romode aino tai dukeje tamagomode Pao Kurireuji. Tagagomode, “Iogwa” aino ji. 16Pao Kurireu Uwari rakojemode pagabo dukodire ure pawie Pao Kurireu ore nure pagi duji. 17Pao Kurireu ore nure pagi dukodire umode boe pemegareboe maku pagai rugadu. Umode boe pemegareboe maku tu tuwobe etai. Umodukare maku ia boe etai. Umode boe pemegareboe maku Jesus Cristo ai. Nono umode nou tumode maku Jesus aiboe maku pagai jamedu. Boe pegamode pai nono boe pegare Jesus Cristo jitu mogadure. Dukejere Pao Kurireu umode boe pemegado pai nono turo moga Jesus jitu mogadure jamedu. Ure Jesus ie kurido rugadu. Umode pagie kurido jamedu nono turo moga Jesus jitu mogadure.
Ia Meri Keje Boe Pemegamode Rugadu
18Boe pegare pai rugadu. Mare jii toro karega. Ia meri keje Pao Kurireu umode boe pemegado pai rugadu. Nono pameardaemodukare nou boe pegare paidu ka pugeje. Toro ia meri keje Pao Kurireu umode boe pemegado pai rugadu. 19Awu moto kiarigodure Pao Kurireu bagai uwo tore remawuge ekinorudo. Nono boe eiamedu boe erduwamode Pao Kurireu ore remawugei. 20Jawu boe ero pegare dukodire Pao Kurireu ure boe pegado motoji nou boe ero pegareu moriče. Pao Kurireu ro koiare ure boe pegado motoji. 21Mare Pao Kurireu makore motoji upagawo umode boe ekinorudowu bagai. Dukejere tumoduie moto udo činorudo jamedu nono turo moga torei dumogadure. Dukejere awu moto akedumodukare pugeje. 22Ji aino awu moto ako padure kajeje nono aredu ako moga tugurijirigodu kori koia dumogadure. 23-24Tu moto karega. Pagi jamedu. Pagiarigodure mare boe pegareu boe koia. Mare Pao Kurireu ure Tuwari maku meartorure Jesus jiwuge etai marigudu. Dukodire rakojere pagabo. Mare pabaganure Pao Kurireu bagai kimo. Umode toredo pagi rugadu. Umode paginorudo rugadu. Pao Kurireu ure paginorudo kodire pamodukare paro pegare jiboe morido pugeje. Dukodire pabagare Pao Kurireu bagai paragojewo apo rugadu boe pemegawo pai rugadu. Pardukare ji raga. Pardumode Pao Kurireuji dukeje nono pabagamodukare bagai pugeje. 25Mare pardukare ji raga. Dukodire pawuduguwo pai pabaga tabo bagai.
26Rakakareuge nure pagi. Mare pameartorure Jesusji dukodire Pao Kurireu Uwari aregodure pagae turagojewo pagabo rugadu. Rakakareuge nure pagi. Dukodire parduwakare kaibowu pawadaru taboba pamagomode baruto Pao Kurireu bagai. Mare Pao Kurireu Uwari makore Pao Kurireu bagai baruto pabaru tabo parduwakare pamagowo jitu kodi. Makore jiboe ure tuginai pawadaru piji tumago tabo Pao Kurireu bagai baruto pabaru tabo rugadu. Kodire boe erduwamodukare akoino jiboeji. 27Pao Kurireu jorduware pameardae jamedu boeji. Jorduware Tuwari meardaeji jamedu. Uwari makore Pao Kurireu bagai meartorure Pao Kurireu jiwuge eparu tabo rugadu. Nou Pao Kurireu Uwari makore jiboe kodure Pao Kurireu jordae meardae boeji rugadu.
28Boe pegamode meardu kurire Pao Kurireu jiwugei mare du inodu tabo Pao Kurireu umode boe pemegado ei rugadu. Marigudu Pao Kurireu makore ewagai tumeardae tabo emeardu kuriwo pudui dubagai. 29Marigudu Pao Kurireu jorduware turomode jiboeji. Dukodire ure tumeardae ta ia boei tuwo toredo emage tuwo edo nono tonaregedu Jesus mogadure. Mare Pao Kurireu Onaregedu boetojiwu nure Jesusče. Dukodire meartorure Pao Kurireu jiwuge etumana remawu nure ema. 30Pao Kurireu ure tumeardae ta nou boei tuwo toredo emage. Dukodire makore ewagai. Nono ure tugeragu nou tumagore bagaiwugei pudae tuwo edo nono ro pemegareuge emogadure. Dukodire umode emugudo pudabo ewi keje. Dukodire boe pemegamode ei toro baru tada rugadu.
Jesus Cristo Koiare Ure Parduwado Pao Kurireu Meardu Kurire Boei Duji
31Pao Kurireu ro pemegare pai aino rugadu. Dukodire pawiapagamodukare ia pameardae pegareuji pugeje. Pao Kurireu bataru remawu jire pawiapagamode tu rugadu. Pao Kurireu umode turaga maku pagai dukeje ia boe eragamodukare pai rugadu. 32Pao Kurireu rugodumodukare pai. Mako pegamodukare pai. Emare ure tonaregedu maku rugadu paro pegareu moriče. Ure tonaregedu maku pagai dukodire umode boe pemegareu jamedu boe maku pagai rugadu. 33Boe emago pegamodukare Pao Kurireu ure tugeragu jiwugei. Emago pegamode ei mare pagare egoino. Pao Kurireu emare akoino nou meartorure puduiwuge emodukaie turo pegare jiboe morido. 34Dukodire boe emagomodukare Pao Kurireu ure tugeragu jiwuge emoduie turo pegare jiboe morido duji. Emagomode mare pagare egoino. Jesus bire mare jewodure pugeje. Dukejere ruture baruto turagojewo nono Pao Kurireu ukana pemegareu jagwai rugadu. Emare mako raire Pao Kurireuji pabaru tabo rugadu. 35Jesus Cristo meardu kurire pai rugadu. Nono boe emodukare Jesus Cristo meardu kurire paidu akedudo. Boe rakamode pai mare Jesus Cristo meardu kurire pai. Boe pegamode pai mare Jesus meardu kurire pai. Boe emode boe pegado pai mare meardu kurire pai kimo. Page bokwamode, pago diero akedumode, paedu puredumode boe pegareuji, paburedugodumode pawiwo mare Jesus meardu kurire pai kimo. 36Marigudu Pao Kurireu bataru padure bapera keje. Akore:
– Pameartorure Pao Kurireuji dukodire boe etaidure tuwo pawido. Eromode pai nono turo moga ovelha dogei dumogadure tuwo pawido.8.36 Awu bataru padure Salmo 44.22 keje.
37Boe jokodu jire inagoino. Jesus Cristo meardu kurire pai rugadu. Dukodire ure paragado pameardae pemegawo, paro pemegawo. Boe pegareu keje, boe pemegareu keje umode paragado pameardae pemegawo. 38Boe emodukare Jesus udo tugera ra pabiji rugadu. Meardu kurimode pai jii toro rugadu. Pawimode mare umodukare tugera ra pabiji. Pawimodukare mare umodukare tugera ra pabiji jamedu. Pao Kurireu utugarege baru tadawuge emodukare Jesus udo tugera ra pabiji. Bope doge etuwaire emodukare Jesus udo tugera ra pabiji. Toro ia meri keje ia boe emodukare Jesus udo tugera ra pabiji jamedu. 39Baru tadawuge eragakare tuwo Jesus udo tugera ra pabiji. Bireuge eda kejewuge eragakare tuwo Jesus udo tugera ra pabiji. Moto kejewuge eragakare tuwo Jesus udo tugera ra pabiji jamedu. Pagimijera kurireu nure ema rugadu. Pao Kurireu meardu kurimode meartorure Jesus Cristo jiwugei jii toro rugadu.
9Pao Kurireu Uwobe Reo
1Imeartoru rakare Jesus Cristoji rugadu. Dukodire iwadrarodumodukare tawiagai. Pao Kurireu Uwari koiare ure iordae imeardae udo turugadu. Dukodire iwadrarodu karegure tawiagai. Boe jokodu jire inagoino tawiagai rugadu. 2Ikiarigodu kuričigore iwobe Judeu doge ewagai emeartorukare Jesusji kodi. 3Iwobe nure emage. Mare emeartorukare Jesusji raga. Dukodire ikiarigodure toro ewagai. Imeardaere etaidure tumeartoruwo Jesusji rugadu. Itaidure rugadu. Itaidure Pao Kurireu ro pegawo i nou iwobe emugato nou iwobe emeartoruwo Jesus jitu bagai. Mare nou inodu umodukare iwobe emeartorudo Jesusji rugadu. 4Marigudu Pao Kurireu ure tugeragu Judeu dogei tuwobeče emeartoruwo pudui dubagai. Ure toredo emage. Ure erdudo tuiorugu pemegareuji erduwawo turagojere pudabo duji. Ure tumeardae maku etai tu tu je. Makore ei. Akore: – Tameartorumode imeardaeji dukeje imode boe pemegado tai rugadu. Ainore Pao Kurireu makore ei tu tu je. Ure to bakaru maku etai eno bakaruwo ema emeartoruwo ji. Ere Pao Kurireu uwai pemegado. Ere tubu jodo tumago pemegawo Pao Kurireuji tu tu je nou bai ja tada. Pao Kurireu makore turomode jiboeji ewiagai tu tu je. 5Mariguduboe Judeu doge etuo mage boetojiwuge emeartorure Pao Kurireuji. Judeu doge epijire Jesus boture. Boe eiamedu boe ekimijera kurireu nure ema rugadu. Pao Kurireu nure ema rugadu. Boe emago pemegawo ji rugadu, jii toro rugadu. Ainore uwo rugadu!
6Pao Kurireu bataru jetumode pudui rugadu. Mare Judeu doge eiamedu karega emeartorure Pao Kurireuji. 7Mariguduboe Judeu doge etuo Abraão ore eiamedu karega Pao Kurireu orere emage. Pao Kurireu makore Abraãoji. Akore: – Akanaregedu Isaque pijire nou imagore aiwu nou boe ewodumode. Emage čare awobe remawuge emode emage rugadu.9.7 Awu bataru padure Gênesis 21.12 keje.
8-9Ainore Pao Kurireu makore Abraãoji. Akore: – Itaidure jiwu meri keje imode ikirimi awagai pugeje. Dukodire akoreduje Sara onaregedu imedu botumode.9.8-9 Awu bataru padure Gênesis 18.10, 14 keje.
Ainore Pao Kurireu akore Abraãoji. Nou Abraão Sara etore bokware tugodu maidutabo jii toro tubegagodu ka rugadu. Epegagodure dukeje Pao Kurireu akore aino ei etore moduie rugadu. Nono Pao Kurireu makore jiboe jeture pudui rugadu. Pao Kurireu koiare ure nou Abraão Sara etonaregedu imedu botudo rugadu. Dukodire Pao Kurireu uwobe nure nou imedu roguče. Abraão ure iedo Isaque. Nono Abraão orere pugeje mare Pao Kurireu bataru koia karega. Dukodire Pao Kurireu uwobe karegure emage. Ewodure nono boe etore ewodu mogadure. Dukodire Pao Kurireu uwobe karegure emage.
10Ia pugeje. Nou Isaque ričodure nono jaoboe Judeu doge etuo nure ema. Oreduje iere Rebeca. Nou Rebeca ore ere pobe kuri tada, emegure pudo. Ewodure puapo. Mare imere emage. 11-12Boture boetojiwu iere Esaú. Boture boigoduwu iere Jacó. Ewodukare raga dukeje Pao Kurireu makore etujeji. Akore: – Imeardae koiare imode Esaú meartorudo tuwie Jacoji.9.11-12 Awu bataru padure Gênesis 25.23 keje.
Ewodukare raga dukeje Pao Kurireu akoino etujeji. Erokare boeji raga dukeje Pao Kurireu akore aino etujeji. Dukodire parduware Pao Kurireu ure tugeragu uwieji turo pemegawo jitu bagai. Mare Pao Kurireu meardae koiare ure udo aino rugadu. Makore nou uwie bagai dukodire ure tugeragu ji turo pemegawo jitu bagai. Aiwokare ia ero pemegareu bagai. Aiwokare ia ero pegareu bagai jamedu. Pao Kurireu tumeardae pemegareu tabore ure tugeragu ji aino. 13Pao Kurireu ure tuwadaru bu bapera keje marigudu. Akore: – Imeardu kurire Jacoji. Iordu pegare Esauji.9.13 Awu bataru padure Malaquias 1.2-3 keje.
Ainore Pao Kurireu akore rugadu. 14Mare du inodu tabo pamago pegamodukare Pao Kurireuji. Pao Kurireu rore jiboe jamedu boe ure turugadu. Meardaere jiboe jamedu boe ure turugadu. 15Marigudu makore Moisesji. Akore: – Inogudumode itaidure jiwu apo. Imodukare udo turo pegare jiboe morido.9.15 Awu bataru padure Êxodo 33.19 keje.
16Dukodire paro pemegare mare dukodi karega Pao Kurireu umode tugeragu pai. Emare jorduwamode tumode tugeragu jiwu boei. Okudugodumode ia boe dogebo dukeje umode tugeragu ei. 17Marigudu Pao Kurireu ure tuwadaru bu bapera keje. Makore Egito moto kejewu boe eimijera kurireuji. Akore: – Ire boe eimijera kurireudo aki iwo boe erdudo iro rakareuji, iwo boe erduwado i moto jamedu boe parugajeje.9.17 Awu bataru padure Êxodo 9.16 keje.
18Ainore Pao Kurireu meardaere rugadu. Umode tugeragu boei dukeje okudugodumode ebo. Mare umode ia tugare tugeragu jiwuge emeartoru bokwado pudui.
Pao Kurireu Korigodumode Boei Mare Okudugodumode Ia Boebo
19Ia boe enaramode i. Egomode: – Pao Kurireu koiare ure iage emeartoru bokwado pudui. Mare Pao Kurireu akore emage eigoiaie emeartorukaie pudui. Kodiba Pao Kurireu akore emage eigoiaie? Ukare turugadu čegai. Pao Kurireu koiare ure emeartoru bokwado pudui rugadu. Boe eragakare Pao Kurireuji. Ema ro rakare boe jamedu boeji rugadu.
20Ainore iage egore. Mare imode tawie boe remawuji. Tamagokaba Pao Kurireu bataru jipagi. Boe emode ia pori towuje dukeje nou pori makomodukare nou ure nou pori towujewuji: – Kodiba are itowuje?
Nou pori akomodukare aino. 21Nou maragodure rotu jiwu imedu emare jorduware kaboba tumode towuje nou rotu tabo. Pori rabodu aria rabodu ruwobo rabodu.
22Ainore Pao Kurireu ure jamedu. Jorduware nuba turomode boei. Korigodumode ia boei du pegakare. Umode erdudo tugera rakare pudui duji du pegakare. Mare korigodukare ei kuri je. Mako raire ewagai ewo tugera ra turo pegareu piji mare ekare tugera ra. Dukodire Pao Kurireu korigodure ei. Umode ewarigu toro boe pegareuto nou ero pegareu moriče rugadu. 23Ia boeire Pao Kurireu aidure tuwo erdudo turo pemegareuji. Okudugodure ebo rugadu. Okudugodure pagabo jamedu. Ure pabemegado tuwo pardudo turo pemegareuji. 24Makore bagaiwuge nure pagi. Ia pagi Judeu doge nure pagi. Ia pagi boe tuginaiwuge nure pagi. Pao Kurireu makore pawagai pameartoruwo pudui rugadu. 25Marigudu Pao Kurireu makore tuwadaruji Oséias biagai. Oséias ure bu bapera keje. Akore:
– Iwobe karegure emage mare imagomode ewagai iwo iwobedo emage.
– Imeardu kurikare ei mare aino čare imeardu kurimode ei.9.25 Awu bataru padure Oséias 2.23 keje.
26– Marigudu inagore ei: – Iwobe karegure tagi.
– Mare ia meri keje imagomode nou boe ewagai rugadu.
– Imode iwobedo emage rugadu. Pao Kurireu oremode emage rugadu.9.26 Awu bataru padure Oséias 1.10 keje.
27Isaías ure Pao Kurireu bataru bu bapera keje jamedu. Akore: – Judeu doge emagamode nono pobo maereu okwa kejewu kugaru mogadure. Mare Pao Kurireu ure ekinorudowugere enowaromode tu je. 28Pao Kurireu umode boe pegado jeture moto kejewuge eiamedu boei tači je ero pegareu moriče rugadu.9.28 Awu bataru padure Isaías 10.22-23 keje.
29Nou Isaías akore: – Pao Kurireu rakare rugadu. Ure Sodoma ba kurireu kejewuge eiamedu boe etagedudo. Ure Gomorra ba kurireu kejewuge eiamedu boe etagedudo jamedu. Umode paiamedu boe pagagedudo jamedu mare ure ia pagi paginorudo. Pagowarore tu je. 9.29 Awu bataru padure Isaías 1.9 keje.
Judeu Doge Emeartoruwo Jesusji Jamedu
30Dukodire inagoino tai. Boe tuginaiwuge etaiwokare Pao Kurireu bagai. Etaidukare tuwo turo jetorodo tuwo tumugu pemegado Pao Kurireu apo. Mare aino emeartorure Jesusji dukodire Pao Kurireu ure tugeragu ei pudae tietu pemegawo ei rugadu. 31Mare Pao Kurireu uwobe nure Judeu dogeče. Judeu doge etaiwore ia bakaru bagai tumeartoruwo ji tuwo turo jetorodo tumugu pemegawo Pao Kurireu apo. Mare erdukare ji. 32Mare paga karega. Etaidukare tumeartoruwo tu Pao Kurireuji. Etaidure tuwo turo jetorodo tumeardae tabo rugadu. Dukodire erduwakare Pao Kurireu ure maku pudaiwu toriji. Egore nou tori pegaie kodire emeartorukare nou toriji. Mare tori ji karega inagoino. Jesus jire inagoino. 33Marigudu Pao Kurireu ure nou tuwadaru bu bapera keje. Akore:
– Tagaiwodo. Ire ia tori bu Judeu doge eno moto keje.
Boe ewure jetumode nou toriji.
Nou tori umode ewududo.
Mare meartorure nou tori jiwuge ekiarigodumodukare pugeje.9.33 Awu bataru padure Isaías 8.14 keje, 28.16 keje jamedu.
Mare tori remawu ji karega Pao Kurireu akoino. Jesus jire Pao Kurireu akoino. Judeu doge emeartorukare Jesusji dukodire boe pegare ei. Dujire akoino. Mare boe emeartorumode Jesusji dukeje ekiarigodumodukare pugeje. Dujire Pao Kurireu akoino.
101Imedage nure tagi. Mare iwiagoro raire iwobe Judeu doge ewagai. Itaidure Judeu doge eiamedu boe emeartoruwo Jesusji. Jesus uwo ekinorudo nou ero pegareu piji ekawo turo pegareu morido ewarigudukawo nou joru pegareuto. Dukodire imagore Pao Kurireu bagai iwobe eparu tabo jii aino. 2Iorduware ei rugadu. Emeardaere tumeartoruie Pao Kurireuji mare paga. Emeardaere tumeartoruie Pao Kurireuji turaga tabo rugadu mare paga. Erduwakare Pao Kurireu bataru remawuji dukodire emeartorukare Pao Kurireuji. 3Pao Kurireu umode tugeragu meartorure Jesus jiwugei pudae tietu pemegawo ei. Mare iwobe Judeu doge erduwakare nou Pao Kurireu meardaeji. Emagere emeardaere tuwo turo pemegado Pao Kurireu jordu pemegawo pudui. Mare awu emeardae ukare turugadu. Emeartorukare Pao Kurireu meardaeji. Ero pemegamode mare dukodi karega Pao Kurireu jordu pemegamode ei. 4Jesus Cristo ure Pao Kurireu ure maku Judeu doge etaiwu bakaru akedudo. Mare paga karega boe emeartorumode Jesusji dukodire Pao Kurireu umode tugeragu ei pudae tietu pemegawo ei.
Jesus Aidure Tuwo Boe Eiamedu Boe Ekinorudo
5Marigudu Moisés ure Pao Kurireu bataru bu bapera keje. Emare akore boe emeartorumoduie Pao Kurireu ure maku Judeu doge etaiwu bakaruji dukeje emugu pemegamoduie Pao Kurireu apo. Akore: – Boe emeartorumode nou Pao Kurireu ure maku Judeu doge etaiwu bakaruji dukeje boe emeartoruwo nou bakaru jamedu boeji rugadu tumugu pemegawo Pao Kurireu apo.10.5 Awu bataru padure Levítico 18.5 keje.
6Mare boe eroiwakare tumeartoruwo nou bakaru jamedu boeji rugadu. Dukodire Moisés ure ia Pao Kurireu bataru bu bapera keje jamedu. Makore boe emeartoruwo umode boe ekinorudowuji. Umode boe ekinorudowu umoduie boe emugu pemegado Pao Kurireu apo. Moisés makore boei. Akore: – Aroiwakare aruduwo baruto nou umode boe ekinorudowu bagai mare amororamagadukaba. Boe erudure baruto mare dukodi karega erdumode nou umode boe ekinorudowuji. 7Aroiwakare awo arawuje bireuge eda ka nou umode boe ekinorudowu bagai mare amororamagadukaba. Boe ere turawuje toro bireuge eda ka dukodi karega erdumode nou umode boe ekinorudowuji.10.7 Awu bataru padure Deuteronômio 30.13 keje.
8Mare padure bapera kejewu Pao Kurireu bataru akore: – Tameardure Pao Kurireu bataruji dukodire meture tagaora tada. Tawiagorore tawiabuture kuri Pao Kurireu bataru keje tameartoruwo ji rugadu. Tamagomode Pao Kurireu bataruji nono boe emeardumode tamagore jiboeji rugadu.10.8 Awu bataru padure Deuteronômio 30.14 keje.
Ainore Pao Kurireu akore. Ča awu bataru jire ire boe ewie emeartoruwo Jesus jitu bagai rugadu. 9Boe emode boe ewie ture tugeragu Jesus jituji tuwo tugimijerado ema. Boe emeartorumode Pao Kurireu ure Jesus jewodudo pugeje duji rugadu. Dukodire Jesus umode ekinorudo rugadu ero pegareu piji. Dukodire nou boe emugu pemegamode Pao Kurireu apo rugadu. 10Mare paga karega pameartorumode Jesusji dukeje umode tugeragu pai pudae tietu pemegawo pai. Pagagomode pagimijera nuie ema dukeje Jesus umode paginorudo. Dukodire pamodukare paro pegareu morido pugeje. 11Padure bapera kejewu Pao Kurireu bataru akore: – Meartorure Jesus jiwuge ekiarigodumodukare ia boe ewagai pugeje boe eimijera pemegareu unure ema rugadu.10.11 Awu bataru padure Isaías 28.16 keje.
12Boe eiamedu boe eire akoino. Judeu doge eire akoino. Boe tuginaiwuge eire akoino jamedu. Ere nono pure. Boe eiamedu boe eimijera nure Pao Kurireuče. Boe emagomode Pao Kurireu bagai dukeje umode tugera maku boe etai rugadu. 13Padure bapera kejewu Pao Kurireu bataru akore: – Boe emagomode Pagimijera bagai uwo tugera maku pudai dukeje umode boe ekinorudo rugadu. Emodukare turo pegareu morido pugeje. 10.13 Awu bataru padure Joel 2.32 keje.
14-15Mare boe etumodukare Jesus bataru tabo boe etae nono nou boe emeardumodukare Jesus jiboeji. Boe emeardumodukare Jesus bataruji nono emeartorumodukare Jesusji. Boe emeartorumodukare ji nono emagomodukare bagai uwo tugera maku pudai. Padure bapera kejewu Pao Kurireu bataru akore: – Boe etaregodumode ia boe etae tuwo erduwado Jesus bataru pemegareuji du pegakare. Pemegare boei rugadu.10.14-15 Awu bataru padure Isaías 52.7 keje.
16Mare ia boe etaidukare Jesus bataru pemegareuji. Marigudu Isaías ure boe ewie Pao Kurireu bataruji mare emeartorukare. Dukodire Isaías makore Pao Kurireuji. Akore: – Boe emeartorukare nou ire ewie jiwu awadaruji.10.16 Awu bataru padure Isaías 53.1 keje.
17Dukodire inagoino. Boe ewo boe ewie Jesus Cristo makore jiboeji. Boe emeardumode nou Pao Kurireu bataruji dukeje erduwamode tumeartoruwo Jesusji rugadu.
18Mare nou meartorukare Jesus jiwuge Judeu doge emeardure rugadu. Emeardure Pao Kurireu bataru pemegareuji. Dujire nou padure bapera kejewu Pao Kurireu bataru akore: – Makore iwadaru jiwuge ere boe eiamedu boe ewie moto jamedu boe parugajeje.10.18 Awu bataru padure Salmo 19.4 keje.
19Mare nou meartorukare Jesus jiwuge Judeu doge erduware Pao Kurireu bataruji mare emeartorukare ji. Moisés ure nou Pao Kurireu bataru bu bapera keje. Pao Kurireu akore: – Imode ia boe tuginaiwuge emeartorudo i dukeje korimode iwobe Judeu dogei. Emeardaere tu puduie imeardu kurie. Mare imode ia jorduwa bokwareu boe tuginaiwuge emeartorudo i rugadu. Dukodire iwobe Judeu doge ekorigodumode. Emeardaere tu pudumie tuiorduwaie i.10.19 Awu bataru padure Deuteronômio 32.21 keje.
20Isaías ure Pao Kurireu bataru bu bapera keje jamedu. Pao Kurireu akore: – Boe tuginaiwuge etaiwokare iwagai mare ire erdudo i. Emagokare iwagai mare itaregodure etae.10.20 Awu bataru padure Isaías 65.1 keje.
21Mare Israel kejewu Judeu doge eire Pao Kurireu akoino. Akore: – Ire ikera bararedo ei rugadu ji je. Itaidure ikimaduwo ebo. Mare meartoru bokwareuge nure emage. Araga bokwareuge nure emage.10.21 Awu bataru padure Isaías 65.2 keje.
11Pao Kurireu Okudugodure Judeu Dogebo
1Mare Pao Kurireu aidu kimore tuwobe Judeu dogei. Ukare ewarigu tubiji raga. Judeu nure imi jamedu. Mariguduwuge Judeu doge etuo nure Abraãoče. Du uwobe nure imi jamedu. Mariguduwuge Judeu doge etumana Benjamim uwobe nure imi. 2Pao Kurireu ukare tugera ra tuwobe Judeu doge epiji. Ure tugeragu ei marigudu tuwo tuwobedo emage. Ukare moto to raga dukeje meardaere tuwo tugeragu ei tuwo tuwobedo emage. Tarduware padure bapera kejewu Pao Kurireu bataruji. Marigudu Elias mako pegare tuwobe Judeu dogei Pao Kurireu biagai. Nou Elias bataru padure nou bapera keje. 3Elias akore: – Ikimijera nure aki. Awu iwobe Judeu doge ere nou makore awadaru jiwuge ime eiamedu boe ewido. Awu iwobe Judeu doge ere kamo doge erugadu boe butudo. Boe ewo tapira naregedu kowu nou kamo keje turo pegareu moriče. Mare ere kamo rugadu boe butudo. Imire ire mitotu je boe eiageje imeartorure ai dutabo. Ia meartorure aiwu bokware. Dukodire awu Judeu doge etaidure tuwo iwido jamedu.11.3 Awu bataru padure 1 Reis 19.10, 14 keje.
4Mare Pao Kurireu makore nou Elias bataru jipagi. Akore: – Meartorure iwuge ime enodo padure sete mil kimo. Ire ewiado nou ro pegareuge epiji. Nou ime ekare tumago pemegado nou egore Baal aino jiwu bope doge eimijeraji.11.4 Awu bataru padure 1 Reis 19.18 keje.
Ainore Pao Kurireu akore. 5Aino čare boe aregodure nou Pao Kurireu makore jiboe ka pugeje. Nou meartorure Pao Kurireu jiwu Judeu doge enowarore tu je kimo. Mare Pao Kurireu ure tugeragu ei taidu tabo. 6Okudugodure ebo dukodire ure tugeragu ei. Pao Kurireu aiwokare boei ero pemegareu bagai. Aiwore ei. Okudugodu kurire ebo rugadu. Dukodire meardaekare turo pegawo ei.
7Mare Judeu doge erdukare taiwore bagai boeji. Mare nou Pao Kurireu ure tugeragu jiwuge erdure ji. Mare enowarore tu je. Nouia Judeu doge erdukare ji. Dukodire ere tudo nono bija bokwareuge emogadure. Pao Kurireu makore ewagai mare ekare tumeardudo. 8Padure bapera kejewu Pao Kurireu bataru akore:
– Pao Kurireu ure etaora rakado erduwa bokwawo. Ure edo nono bija bokwareuge emogadure. Dukodire erduwakare Pao Kurireuji jii aino. Emeardukare Pao Kurireu bataruji jii aino.11.8 Awu bataru padure Deuteronômio 29.4 keje, Isaías 29.10 keje jamedu.
9Davi ure Pao Kurireu bataru bu bapera keje jamedu. Ainore Pao Kurireu akore:
– Boe ere tumeardae tawuje tuwo tumeartorudo Pao Kurireuji mare pagatu je. Etaidunure tuwo boe ekiripagado tu je. Dukodire emode tuwadae towuje tiegarewo pudui turore jiboeji. Mare pagatu jere eroino egoino. Ero pegare kimo rugadu. Dukodi čare ere tiekiripagado nou tuwadae keje. Dukodire erore puku nou jordu pegare eiwuge etaregodumode etae tuwo boe pegado ei nou ewadae keje rugadu. Boe pegawo ei ero pegareu moriče.
10– Ewo nono joku bokwareu mogadure. Boe rakamode ei rugadu nou emeartorukare i du moriče.11.10 Awu bataru padure Salmo 69.22-23 keje.
11Judeu doge ero pegare mare etagedukare. Ero pegare dukodire Pao Kurireu uture boe tuginaiwuge etae tuwo ekinorudo. Ainore rore tuwo Judeu doge erdu pegado boe tuginaiwugei. Dukodire Judeu doge emode tugera ra turo pegareu piji tumeartoruwo Jesusji jamedu. 12Judeu doge ero pegare mare boe pemegare boe tuginaiwugei moto jamedu boe parugajeje. Judeu doge emeartorukare Jesusji dukodire Pao Kurireu ure turo pemegado boe tuginaiwugei emeartoruwo Jesus jitu bagai. Mare Pao Kurireu umode tugeragu jiwu Judeu doge emeartorumode Jesusji jamedu toro ia meri keje. Dukejere boe pemegamode boe eiamedu boei rugadu.
Jesus Umode Boe Tuginaiwuge Ekinorudo
13Ia tagi boe tuginaiwuge nure tagi. Pao Kurireu ure itudo Jesus bataru tabo boe tuginaiwuge etae. Dukodire imago pemegamode nou bataruji nou boe ewiagai tu tu je. 14Nono iwobe Judeu doge erduwamode Pao Kurireu bataru aregodure tagae duji. Dukodire ia nou Judeu doge erdumode tameartorure Jesusji dukeje, eku kidumode taromode jiboeji nono etaidumode tumeartoruwo Jesusji jamedu. 15Pao Kurireu ure tugera ra epiji tumagowo boe tuginaiwuge ewagai dukeje Pao Kurireu jordu pegakare nou boe tuginaiwugei pugeje. Jordu pemegare ei. Mare umode tugera maku Judeu doge etai pugeje dukeje boe pemegamode ei rugadu. Emode nono jewodureuge emogadure.
16Judeu doge ere boepa tadaboe kado dukeje ere to amireu boetojiwu to. Dukejere ere nou amireu boetojiwu maku Pao Kurireu ai. Ainore Judeu doge erore tumagowo to amireu jamedu boe paru tabo Pao Kurireu bagai.
Judeu doge emagore awu tumaragodure jiwu oliveira i ukwa paru tabo Pao Kurireu bagai Pao Kurireu uwo udo nono to mogadure. Ainore Judeu doge emagore mare emagonure nou i rugadu paru tabo Pao Kurireu bagai Pao Kurireu ro pemegawo nou oliveira i ukwaji nou oliveira i ričodu pemegawo. Nou meartorure Pao Kurireu jiwuge Judeu doge boetojiwuge ere nono nou i ukwa mogadure. Mare i ukwa ji karega inagoino. Judeu doge eiamedu boe ewodure nou tuomage Judeu doge boetojiwuge epiji. Dujire inagoino. Pao Kurireu makore Judeu dogei emeartoruwo pudui rugadu nono nou etuo mage ero mogadure. Dujire inagoino. 17Boe emaragodumode oliveira i tugudureuji. Ere nouia itura pegareu kado oliveira i tugudureu piji. Meartorukare Pao Kurireu jiwuge Judeu doge ere nono nou boe ere kadowu itura mogadure. Mare oliveira itura ji karega inagoino. Pao Kurireu ure tugera ra nou meartorukare puduiwuge Judeu doge epiji. Dujire inagoino. Boe ere ia itura pegareu kado oliveira i tugudureu piji dukejere etaregodure oliveira i itura tadawu itura tabo tuwo tugu nou oliveira i tugudureuto nou itura kadodureu mugato. Dukodire ere itura mekudo nou ture kadowu mugato. Boe tuginaiwuge nure tagi. Tare nono nou ere mekudowu itura mogadure. Mare oliveira itura ji karega inagoino. Tameartorure Jesusji dukodire ure tuwobedo tagi. Dujire inagoino. Dukodire Pao Kurireu ro pemegare tai nono turo moga tuwobe mariguduwuge Judeu doge etuo magei dumogadure. 18Nou mariguduwuge Judeu doge etuo mage ere nono i ukwa kurireu mogadure. Mare i ukwa ji karega inagoino. Nou mariguduwuge Judeu doge etuo mage emeartorure Pao Kurireuji rugadu. Du jire inagoino. Dukodire tardu pegakaba Judeu dogei. Tagojarokaba tai. Tagare nono i ukwa kurireu mogadure. Tare nono nou boe tadawu itura mogadure. Mare itura ji karega inagoino. Tagire boe tuginaiwuge nure tagi. Dujire inagoino. Tameartorudo Pao Kurireuji rugadu nono nou mariguduwu Judeu doge etuo mage emogadure. Dujire inagoino rugadu. 19Tagagomode Pao Kurireu uie Judeu doge ewarigu tubiji tuwo tamugudo emugato. 20Boe jokodu jire tagagoino. Mare tagojarokaba tai. Emeartorukare dukodire Pao Kurireu ure ewarigu tubiji. Tameartorure dukodire ukare tawarigu tubiji jamedu. Mare tagojarokaba tai. Tameartorudo Pao Kurireuji rugadu. 21Judeu doge ere nono oliveira itura kadodureu mogadure. Mare nou itura ji karega inagoino. Pao Kurireu ure Judeu doge ewarigu tubiji. Dujire inagoino. Tameartorumodukare Pao Kurireuji pugeje dukeje umode tawarigu tubiji jamedu. 22Aino čare parduware Pao Kurireu ro pemegareuji rugadu. Mare Pao Kurireu ro pegamode boei ero pegareu moriče jamedu. Ro pegamode meartorukare puduiwugei. Mare tamodukare tagera ra tameartorure Pao Kurireu jitu piji dukeje ro pemegamode tai. Mare tamode tagera ra tameartorure Pao Kurireu jitu piji dukeje umode tawarigu tubiji rugadu. 23Nono Judeu doge emode tugera ra tumeartoru bokware Pao Kurireu jitu piji tumeartoruwo Pao Kurireuji rugadu dukeje Pao Kurireu umode ekirimi pudae pugeje emugu pemegawo pudabo. Pao Kurireu ro kurire ei rugadu. 24Boe tuginaiwuge nure tagi. Tare nono oliveira i itura tadawu itura mogadure. Mare itura ji karega inagoino. Mariguduwuge tawobe emeartorukare Pao Kurireuji. Dujire inagoino. Boe emodukare itura tadawu oliveira i itura tugu nou oliveira i tugudureu itura kadodureu mugato. Tare nono nou itura tadawu itura mogadure. Mare itura ji karega inagoino. Tameartorure Pao Kurireuji. Pao Kurireu ure tamugudo Judeu doge emugato turo pemegawo tai. Dujire inagoino. Judeu doge ere nono oliveira i tugudureu mogadure. Mare oliveira i ji karega inagoino. Mariguduwu Judeu doge emeartorure Pao Kurireuji. Dujire inagoino. Aino Judeu doge emeartorukare ji pugeje. Dukodire Pao Kurireu ure ewarigu tubiji. Mare Pao Kurireu jorduware tuwo Judeu doge emeartorudo pudui pugeje. Dukodire toro ia meri keje boemode turugadu Judeu dogei emeartoruwo Pao Kurireuji pugeje.
Pao Kurireu Okudugodumode Boe Eiamedu Boebo
25Imedage nure tagi. Imode tawie ia boe erduwakare jiwu Pao Kurireu bataru remawuji. Itaidure iwo tarduwado tardu pegakawo Judeu dogei. Inure tawie boe remawuji tagojarokawo tai pugeje. Judeu doge emeartoru bokware Jesusji. Boe tuginaiwuge nure tagi. Mare tameartorure ji. Ia boe tuginaiwuge emeartorumode ji jii toro. Nono iage emeartorumode ji pugeje. Pao Kurireu jorduware nou meartorumode Jesus jiwuge eiamedu boei. Nou boe tuginaiwuge meartorure Jesus jiwuge etaregodumode nou todo pa ka dukeje, toro ia meri keje Pao Kurireu umode tugeragu Judeu dogei pugeje emeartoruwo pudui. 26Dukodire Pao Kurireu umode Judeu doge eiamedu boe ekinorudo. Padure bapera kejewu Pao Kurireu bataru akore:
– Umode boe ekinorudowu aregodumode Judeu doge eno moto ka.
– Nonore umode Jacó uwobe Judeu doge ero pegareu jamedu boe barigu epiji.
27– Pao Kurireu nure imi. Imode iro maiwu maku etai dukeje imode ero pegareu jamedu boe barigu epiji.11.27 Awu bataru padure Isaías 59.20-21 keje, Jeremias 31.33-34 keje jamedu.
28Judeu doge emeartorukare Jesus bataru pemegareuji dukodire ere nono Pao Kurireu jordu pegare jiwuge emogadure mare jii toro karega. Pao Kurireu ure turo pemegareu mekido epiji tu jao turo pemegawo boe tuginaiwugei emeartoruwo pudui jamedu. Mare marigudu Pao Kurireu ure tugeragu jaoboe Judeu doge etuo magei tuwobewo emage. Dukodire ure nou mariguduwu Judeu doge edo nono tumeardu kurire jiwu tumedage emogadure. Dukodire Pao Kurireu okudugodumode Judeu dogebo toro ia meri keje pugeje. 29Pao Kurireu umodukare tumeardae mekido tumode tugeragu jiwuge epiji, turo pemegamode jiwuge epiji. 30Mare boe tuginaiwuge nure tagi. Marigudu tawobe boe tuginaiwuge emeartorukare Pao Kurireuji. Mariguduwuge Judeu doge emeartorure Pao Kurireuji. Awu maiwuge Judeu doge emeartorukare ji. Dukodi čare Pao Kurireu ure turo pemegareu mekido nou Judeu doge epiji jao. Kodire okudugodure boe tuginaiwugebo tuwo emeartorudo pudui. Dukodire tameartorure ji. Boe tuginaiwuge nure tagi. 31Nono toro ia meri keje Pao Kurireu romode Judeu dogei nono turo moga tai dumogadure. Judeu doge emeartorukare Pao Kurireuji nono mariguduwu tawobe ero mogadure. Dukodire Pao Kurireu okudugodure tagabo. Mare Pao Kurireu okudugodumode Judeu dogebo jamedu nono turo moga tai dumogadure. 32Boe eiamedu boe emeartorukare Pao Kurireu bataruji marigudu. Pao Kurireu ukare etawuje nou tumeardae pegareu piji kuri je tuwo erduwado turo pegareu jiboeji. Umode ekinorudo ero pegareu piji dukeje erduwamode Pao Kurireu okudugodu kurire pudabo duji rugadu.
Pamago Pemegawo Pao Kurireuji
33Čare Pao Kurireu ro kurire. Jorduwa kurire. Roiware rugadu. Boe etaregodumodukare Pao Kurireu jorduware jiboe oto pa ka. 34Padure bapera kejewu Pao Kurireu bataru akore:
– Boe erduwakare Pao Kurireu meardaeji.
– Boe enogituwamodukare Pao Kurireuji.11.34 Awu bataru padure Isaías 40.13 keje.
35– Boe emode iaboe maku Pao Kurireu ai mare ewiapagamodukare mori bagai tuibagi.11.35 Awu bataru padure Jó 41.11 keje.
36Pao Kurireu ure boe jamedu boe towuje. Pudaire ure nou boe jamedu boe towuje. Kodire boe epagamodukare ture maku Pao Kurireu aiboe mori bagai tuibagi. Pao Kurireu koiare ure boe jamedu boe udo turugadu. Dukodire pamago pemegawo Pao Kurireuji jii toro. Uwo aino rugadu.
12Ainore Paromode Pameartoruwo Pao Kurireuji
1Imedage nure tagi. Pao Kurireu okudugodure pagabo. Dukodire inogituwamode tai. Tameartorudo Pao Kurireuji rugadu utugaregewo tagi rugadu. Tagera ra tagaidure jiboe piji tameardae piji taro jamedu boe piji. Pao Kurireu makore jiboe jire taipagado tu rugadu jii toro rugadu. Tagaidudo tu Pao Kurireuji dukodire jakaremode tai. Taromode awu inagoino jiboeji dukeje Pao Kurireu ie kurimode rugadu. Ainore boe eromode tuwo tubu jodo tumago pemegawo Pao Kurireuji. Mare ewo tubu jodo ji karega inagoino. Boe emeartoru remawumode Pao Kurireuji dukeje Pao Kurireu jakaremode pudui ei. Du jire inagoino. 2Tarokaba nono meartorukare Jesus jiwuge ero mogadure. Tameardaekaba nono meartorukare Jesus jiwuge emeardae mogadure. Mare tamagodo Pao Kurireu bagai uwo tameardae pemegado, uwo tumeardae maku tagai tameardaeče. Dukejere tarduwamode Pao Kurireu meardaeji. Tameartorumode Pao Kurireu meardaeji dukeje taro pemegamode, taromode Pao Kurireu aidure jiboeji, tamode Pao Kurireu jakaredo pudui rugadu.
3Pao Kurireu aidure turo pemegawo i dukodire ure tuwadaru maku inai. Dukodire inogituwanure aino tai. Tagojarokaba tai, tarore jiboeji, tameardaere jiboeji jamedu. Ča tagaiwodo taroji rugadu taro pegareu bagai taro pemegareu bagai jamedu. Pao Kurireu ure tameartorudo pudui. Tameartorumode ji rugadu dukeje tarduwamode taro pegareuji taro pemegareuji jamedu. 4Paganare pabogorare. Pagana rore jiboe ure tuginai. Pabogora rore jiboe ure tuginai jamedu. Mare pagana pabogora emodukare tudawuje pabiji pamorora piji pagaora piji. Kodire pagana pabogora jeture tu pado rugadu. 5Meartorure Jesus jiwuge pagi pare nono pagana pabogora mogadure. Mare pagana pabogora ji karega inagoino. Pao Kurireu ure parduwado parore jiboeji. Du jire inagoino. Mare ure iorduwado jiboe ure tuginai nou ure tarduwado jiboe piji. Ure ia tagi tarduwado jiboe udo tuginai nouia tagi ure tarduwado jiboe piji jamedu. Ure parduwado jiboe udo tuginai čai čai pubiji. Kodire pabadure tu tu parduware jiboe keje. Mare pagare paginai Jesus Cristo piji. Pare nono umogadure. Pagare paginai ia meartorure Jesus jiwuge epiji jamedu kodire pardu pemegamode ei. Kodire padu pemegamode puapo rugadu. 6-7Pao Kurireu emare ure tuiordae pemegareu maku tu tu pagai tuwo tumaragodae maku pagai pamaragodaeče. Ure nou ture maku pagaiwu pamaragodae udo tuginai tu tu paiamedu boe ai. Dukodire ia tagi ure tarduwado tamagowo Pao Kurireu bataruji. Dukodi čare tameartoru rakawo Pao Kurireuji rugadu tamagowo Pao Kurireu bataruji boe ewiagai rugadu emeartoruwo Jesusji nono tameartoru mogadure. Ia tagi ure tarduwado tawo tagera maku boe etai. Dukodire čare tagera maku boe etai rugadu tagaidu tabo. Ia tagi ure tarduwado tawo ia boe erduwado jamedu dubagai. Dukodi čare tado tarugadu tawo boe erduwado rugadu. 8Pao Kurireu ure ia tagi tarduwado tawo boe ekiarigodu barigu epiji rugadu. Dukodi čare tado tarugadu tawo boe ekiarigodu barigu epiji egaregoduwo pudui rugadu. Boe emode toe pedo tumedagei dukeje ewo maku taidu tabo rugadu. Boe eimijerage emaragodu pemegawo boebo taidu tabo rugadu. Boe emode tugera maku boe etai dukeje erowo aino tiagare tabo.
9Tameardu kurido boei rugadu. Tagaba boe ekiripagado. Tardu pegado boe ero pegareuji. Tagaba tagera ra boe ero pemegareu piji. 10Tameardu kurido pui rugadu nono boe etuwobe emeardu kurimode pui dumogadure. Ainore meartorure Jesus jiwuge erore. Tado tarugadu tagawo tagera ra tameardu kurire pui du piji. 11Tamaragodu pemegado. Tawia ra nou tagera kiarire dupiji. Tameartorudo Pagimijera Jesus bataruji taragare dutabo rugadu. 12Tabagado Jesus bagai taegare tabo. Boe pegamode tai mare tagorigodukaba. Taragado tai boere aino tai duji. Tamagodo baruto Pao Kurireu bagai meri jamedu boeji. 13Ia meartorure Jesus jiwuge enoe bokwamode dukeje ia akoe kado puiato etai. Tarduwakare jiwuge etaregodumode tawai ka dukeje edo tamudo tawai tada tagabo.
14Ia boe ero pegamode tai mare tagokikaba ei. Mare tawadaru pemegareu bu ewugeje. Tamagodo baruto Pao Kurireu bagai eparu tabo. Tamagodo Pao Kurireuji uwo tugera maku etai. 15Boe egaregodumode pudui dukeje taegaredo tai nou jakarere puduiwugebo. Boe etragudumode dukeje tagragududo ebo jamedu. 16Taetu pemegado boe eiamedu boei nono taro moga tawobei dumogadure. Tagojarokaba tawadaruji. Tamaragodudo marenarue dogebo emaragodae rakareuji. Tamedagewo emage jamedu. Tameardaekaba tarduwaie boe jamedu boe jituji.
17Boe ero pegamode tai mare taro pegakaba boei. Ero pegamode tai mare tagaba ero kirimi. Taragado tai taro pemegawo. Tarodo boe etaidure jiboeji. 18Taro pemegado boe eiamedu boei taedu pemegawo ebo tagaidu tabo taegare tabo. 19Imeardu kurire jiwu imedage nure tagi. Boe ero pegamode tai mare tagaba ro pegareuge ero kirimi. Pao Kurireu ro pegamode ei. Emare umode boe pegado ro pegareugei ero pegareu boe moriče. Padure bapera kejewu Pao Kurireu bataru akore: – Pao Kurireu nure imi. Imire imode boe pegado ro pegareugei ero pegareu moriče12.19 Awu bataru padure Deuteronômio 32.35 keje..
20Padure bapera kejewu Pao Kurireu bataru akore: – Jordu pegare taiwuge eke boeimode ei dukeje ia tage maku etai. Jordu pegare taiwuge pobo boeimode ei dukeje pobo maku etai. Taromode aino dukeje tamode epogurudo. Nono ewiabutumode turo pegareu keje.12.20 Awu bataru padure Provérbios 25.21-22 keje.
21Taro pegakaba nono ro pegareuge ero mogadure. Tagaba ero kirimi. Mare nou boe ero pegareu morido taro pemegareu tabo. Dukeje emode tuwia ra nou tumeardae pegareu piji rugadu.
13Meartorure Jesus Jiwuge Emeartoruwo Boe Ekimijeragei
1Boe ekimijerage eiamedu boe Pao Kurireu koiare ure boe ekimijeragedo emage. Dukodire paiamedu boe pameartoruwo pagimijeragei. 2Meartorukare tugimijera jiwu meartorukanure Pao Kurireuji jamedu. Boe emeartorumodukare tugimijeraji dukodire nou ero pegareu moridodumode etai rugadu. 3Ro pegareuge epagudumode tugimijerageče rugadu. Mare ro pemegareuge epagudumodukare tugimijerageče. Taro pemegamode dukeje tabagudumodukare tagimijerageče pugeje. Taro pemegamode dukeje tagimijerage emago pemegamode tarore jiboeji. 4Pao Kurireu utugarege nure emage dukodire emago pemegamode taro pemegareuji. Etaidure boe pemegawo tai. Mare taro pegamode dukeje tabagudumode eče rugadu. Eragare rugadu tuwo boe pegado boei ero pegareu moriče. Pao Kurireu utugarege nure emage. Etaire Pao Kurireu ure tumeardae maku ewo boe pegado boei ero pegareu moriče. 5Dukodire tameartorudo boe ekimijeragei. Tameartorumode dukeje taro pegareu bokwamode. Tamodukare taro pegareu morido pugeje. Nono tawiagoromodukare taro pegawo pugeje.
6Boe ekimijerage emaragodu pemegamode dukeje emaragodure Pao Kurireu jordae meardaeji rugadu. Dukodire tamode tago imposto mori diero maku boe ekimijerage etai. 7Boe ekimijerage emagomode boei ewo imposto mori diero maku pudai dukeje tamode ia maku etai rugadu. Tameartorudo boe ekimijeragei rugadu tawo nou emagore bagaiwu diero maku etai. Tamago pemegado ei.
Ainore Meartorure Jesus Jiwuge Eromode Pui
8Tagaba tageragudu pagado boe eno dieroji. Tamode tageragu ji dukeje morido etai. Tameardu kurido boei nou inodu kori rugadu. Tameardu kurimode boei dukeje tameartorure Pao Kurireu ure maku Judeu doge etaiwu bakaruji rugadu. 9Nou bakaru akore: – Aeribarikaba akoreduje piji akoredu piji. Akaba boe ewido. Akiwogukaba. Aeku kidukaba boe enoeji akai jamedu.13.9 Awu bataru padure Êxodo 20.13-15 keje.
Nono boe emeardu kurimode boei dukeje emeartorumode rugadu awu bakaru jamedu boeji. Padure bapera kejewu Pao Kurireu bataru akore: – Ameardu kurido boei nono ameardu kuri moga ai dumogadure.13.9 Awu bataru padure Levítico 19.18 keje.
10Tameardu kurimode boei dukeje taro pegamodukare ei rugadu. Dukodire boe emeardu kurimode boei dukeje ere nono meartorure Pao Kurireu bataru jiwuge emogadure.
11Tameartorure Jesusji. Mare tare nono jorduwa bokwareugere. Ča taedu pagakaba pugeje. Tameardu kurido boei rugadu. Meri puredugodure pai rugadu Pao Kurireu uwo paginorudo. 12-14Parowo nono boe ero moga meri jitu mogadure. Boečoji boe ero pegamode. Ewadu raimode tuioku pega tabo toreduje piji toredu piji. Eke kurumode ei. Eribarimode tumugukare apowugei. Emeardae pegamode aremei imei. Erugodumode pui. Ekimaredumode pui. Mare boe puredugodure awu boe ero pegareu akeduwo rugadu nono boečo akedumode dumogadure. Dukodire paromodukare nono awu boe ero mogadure. Paro pemegawo nono meri jiwu boe ero mogadure. Pawo pageragu Jesusji nono boe emoga tugeragu tuwaigaji dumogadure. Jesus umode paragado paro pemegawo. Pagimijera nure ema. Marigudu pagaidure paro pegawo. Pawo pagera ra nou pagaidure jiwu paro pegareu piji. Pawiagoduwo nou paro pegareu piji rugadu.
14Tagaiwokaba Boei Boe Ero Pegareu Bagai
1Tardu pegakaba meartoru rakakare Jesus jiwugei. Tagokikaba ei, emeardaere jiboeji. 2Ia meartorure Jesus jiwuge emeartoru rakare dukodire enogwagemode boe jamedu boeji. Mare ia meartorure Jesus jiwuge emeartoru rakakare dukodire enogwagemodukare ia barogo koduji. 3Mare nou okwagere boe jamedu jiwu jordu pegakawo nou okwagekare barogo kodu jiwugei. Nono nou okwagekare barogo kodu jiwu mako pegakawo nou okwagere boe jamedu jiwu roji. Pao Kurireu aidure eiamedu boei. 4Tamago pegakaba ia boe utugaregei emaragodu pegare duji. Eimijera emare jorduwamode emaragodu pegare duji. Meartorure Jesus jiwuge eimijera nure Jesusče rugadu. Emare jorduwamode emeartorure puduiwuge ewagai. Umode eragado emeartoruwo tuwadaru jitu bagai rugadu.
5Ia boe emeardaere meri ukaie nono pure. Ere nouia meri tawuje. Dukodire nou meri keje eragodumode emago pemegamode Pao Kurireu bagai baruto. Mare iage emeardaere meri uie nono pure. Kodire eragodumode emago pemegamode Pao Kurireu bagai meri jamedu boeji. Awu inodu koiare tamode tameardae pemegareu tawuje tagaora piji. 6Ia boe emeartorure nouia meri pemegareuji. Mare paga karega tugimaduwo Pagimijera Jesus apo nou meri keje kodire eroino. Ia boe enogwagere boe jamedu boeji. Mare paga karega tuwo boe ekimadudo Pagimijera Jesus apo dukodire eroino. Enogwagemode dukeje ekimadumode Pao Kurireu apo nou tuge paru tabo. Mare ia boe enogwagekare barogo koduji mare paga karega tuwo boe ekimadudo Pagimijera Jesus apo jamedu kodire eroino. Enogwagemode dukeje ekimadumode Pao Kurireu apo nou tuge paru tabo jamedu. 7Paipagamodukare tu pai mitogodu. Pawimode mare paipagamodukare tu pai mitogodu. 8Pawiagorowo pameartoruwo tu Pagimijera Jesusji rugadu. Mare pawimode mare du inodu tabo pameartorumode Pagimijera Jesusji rugadu. Paromode aino dukeje Pagimijera Jesus utugarege umode pagi rugadu. 9Jesus Cristo bire mare jewodure pugeje. Dukodire bikareuge eimijera nure ema. Bireuge aroe eimijera nure ema jamedu. 10Meartorure Jesus jiwuge nure tagi. Dukodire tamedage nure pugi. Ča tagi tagwagekare barogo koduji. Tamago pegakaba nou okwagere barogo kodu jiwugei. Ia tagi tagwagere boe jamedu boeji. Tamago pegakaba nou okwagekare barogo kodu jiwugei. Paiamedu boe paragojemode Pao Kurireu jokorai rugadu. Pao Kurireu emare aiwomode pai ia paro pegareu bagai. 11Padure bapera kejewu Pao Kurireu bataru akore:
– Pao Kurireu remawu nure imi. Tagimijera nure imi.
– Boe eiamedu boe emode tubu jodo moto keje iogorai.
– Boe eiamedu boe egomode Pao Kurireu unuie imi rugadu.14.11 Awu bataru padure Isaías 45.23 keje.
12Dukodire paiamedu boe pamagomode parore jiboeji Pao Kurireu biagai.
Tagaba Boe Emeartoru Akedudo Jesusji
13Čare tagogwa aidukaba boe pegareuji pui. Mare tameardae tawuje taro pemegawo boei tagawo boe emeartoru akedudo Jesus piji. Tameardae tawuje taro pemegawo boei tagawo boe ero pegado. 14Imugu pemegare Pagimijera Jesus apo dukodire iorduware boe eke jamedu boe ure turugadu boe ewo ko. Mare ia tagi tameardaere ia boe eke ukare turugadu boe ekawo ko. Dukodire nou boe eke ukare turugadu tai rugadu. 15Ia tagi tagwagemode barogo koduji nou tamedage egai dukeje tamode epogurudo nou tagwagere jiboeji. Tameardu kurikadunure ei kodire tarore aino. Tagera ra nou tamedage etaidukare jiwu tage piji. Tamodukare tagera ra dukeje tamode nou tamedage emeartoru akedudo. Mare paga karega Jesus Cristo bire boe eiamedu boe ero pegareu moriče rugadu. 16Dukodire taro pegakaba boei emago pegakawo taro pemegare jiboeji. 17Tagwagere jiboe, tagudure čeboe tabo karega tamode tagimijerado Pao Kurireuče. Tameartorure ji dutabo tamode tagimijerado Pao Kurireuče rugadu. Mare Pao Kurireu Uwari emare umode taro jetorodo. Emare umode tabemegado pui. Emare umode taegaredo tai pu jamedu boeji. Dukodire Pao Kurireu utugarege mode tagi. Tagimijera Kurireu mode ema. 18Tameartorumode aino Jesus Cristo bataruji dukeje tamode tagimijerado Pao Kurireuče rugadu.
19Dukodire taragado tai tawo tameardae tawuje tawo tamedagedo boe eiamedu boeče tabemegawo pui. Tameardae maku puai tawo tameartoru kurido Jesusji. 20Tagokikaba pui boe eke keje. Tagokimode pui boe eke keje nono tamodukare ia boe emeartorudo Pao Kurireu bataruji. Emeartorumodukare Jesusji rugadu. Ča ure turugadu meartorure Jesus jiwuge ewo boe eke jamedu boe ko. Ia boe emodukare nou boe eke ko. Mare imode nou boe eke ko nou boe egai du nou boe emeartorumodukare Jesusji pugeje. Iromode aino dukeje imire ire boe pegado ei emeartorukawo Jesusji. 21Ia meartorure Jesus jiwuge emodukare barogo kodu ko. Taragojere ebo dukeje tagaba ko egai ekawo ko jamedu. Emode barogo kodu ko tagabo nono emeardaemode turo pega nuie. Ia meartorure Jesus jiwuge ekudumodukare vinho kuruče rugadu. Taragojere ebo dukeje tagudukaba vinho kuruče egai ekudukawo če jamedu. Ekudumode tagabo dukeje emeardaemode turo pega nuie. Ia meartorure Jesus jiwuge eromodukare ia turore jiboeji pugeje. Tarokaba ji aino jamedu egai. Eromode nou taidukare jiwu turoji pugeje emeardaemode turo pega nuie. 22Dukodire tamagomode tameardaeji tu Pao Kurireu biagai. Boe emode tumeardae pemegado dukeje egaregodumode pudui nou turo pemegareuji. Ekiarigodumodukare turo pemegare dukodi. Boe pemegamode ei rugadu. 23Mare boe erore gara nou tumode ko boeče mare enogwagemode nou boe ekeji rugadu dukeje nou erore jiboe pegamode Pao Kurireu jakai. Enogwagemode dukeje emeardaemode turo peganuie. Pao Kurireu mako pegamode nou erore jiboeji jamedu. Etaidure turowo nou turore jiboeji mare erduwakare umode turugadu Pao Kurireu jordae meardae jituji. Mare du inodu tabo eromode nou turore jiboeji. Etaidukare tumeartoruwo Pao Kurireu jordae meardaeji. Etaidure turowo tu tuiordae tumeardaeji rugadu. Dukodire nou erdae emeardae pijiwu ero jamedu boe pegare Pao Kurireu jakai rugadu.
15Pawo Pamedage Emeartoru Kurido Jesusji
1Ia pagi pameartoru rakare Jesusji rugadu. Mare iage emeartoru rakakare ji. Pawo pagera maku etai pawo emeartoru rakado Jesusji. Pagogudumodukare tu pagabo. Pagoguduwo pamedagebo jamedu. 2Mare pagaiwo pemegawo pamedagei pawo boe pemegado ei jamedu. Paromode aino dukeje pamode emeartoru rakado Jesusji rugadu. 3Paromode nono Jesus Cristo ro mogadure. Emare biapagakare boe pemegawo pudui. Biapagare boe pemegawo boe eiamedu boei. Padure bapera kejewu Pao Kurireu bataru akore: – Boe ewadaru pegareu jeture i pugeje.15.3 Awu bataru padure Salmo 69.9 keje.
Jesus jire akoino rugadu.
4Marigudu Pao Kurireu ure boe edo tuwadaru bu bapera keje. Pao Kurireu rore aino tuwo boe erduwado tuwadaruji. Parduwamode Pao Kurireu bataruji dukeje pamode pawudugudo pai. Parduwamode dukeje paegaregodumode pai Pao Kurireu bataru keje. Dukodire pagiarigodumodukare pugeje mare pamode paragado pai pabagawo umode paginorudowu bagai rugadu. 5Pao Kurireu koiare umode taedu butugudo. Ema koiare umode turaga maku tagai jamedu. Uwo tameardae pemegado pui. Uwo tameardae udo nono Jesus Cristo meardae mogadure. Tarowo nono Jesus ro mogadure. Tardu pemegawo pu rore jiboeji. 6Dukodire tameardae kodumode pu meardae kodaji taiamedu boe tamago pemegawo Pao Kurireuji tawadaru pemegareu tabo tawo Pao Kurireu ie kurido. Pagimijera Jesus Cristo uo nure Pao Kurireuče rugadu.
Ire Boe Tuginaiwuge Ewie Pao Kurireu Akaru Pemegareuji Jamedu
7Tagaidudo pui nono Jesus aidumoga tai dumogadure. Tagaidumode pui dukeje boe erdumode Pao Kurireu koiare ure tameardae pemegado duji. 8Mare paga karega. Jesus Cristo aregodure moto ka tuwo tudo nono Judeu doge etugare mogadure. Ure erduwado Pao Kurireu rore jiboeji. Ure erduwado Pao Kurireu bataru remawuji. Pao Kurireu umodukaie tugera ra epiji. Dukodi čare Jesus aregodure tuwo Pao Kurireu bataru jetudo pudui rugadu. Marigudu Pao Kurireu makore Judeu dogei nou umode boe ekinorudowu aregodumoduie. Čare aregodure rugadu. 9Mare Jesus aregodure boe tuginaiwuge etae jamedu emeartoruwo Pao Kurireuji emago pemegawo Pao Kurireuji jamedu. Pao Kurireu okudugodure boebo. Dukodire boe tuginaiwuge emeartorumode Pao Kurireuji emago pemegawo Pao Kurireuji rugadu. Padure bapera kejewu Pao Kurireu bataru akore:
– Iragojere boe tuginaiwugebo dukeje imago pemegamode Pao Kurireuji; iragodumode imago pemegare Pao Kurireu jitu tabo.15.9 Awu bataru padure 2 Samuel 22.50 keje, Salmo 18.49 keje jamedu.
10Padure bapera kejewu Pao Kurireu bataru akore pugeje:
– Boe tuginaiwuge egaregoduwo pudui Pao Kurireuji rugadu Judeu dogebo!15.10 Awu bataru padure Deuteronômio 32.43 keje.
11Padure bapera kejewu Pao Kurireu bataru akore pugeje:
– Boe tuginaiwuge eiamedu boe emago pemegawo Pao Kurireuji;15.11 Awu bataru padure Salmo 117.1 keje.
– Boe eiamedu boe emago pemegawo Pao Kurireuji.
12Marigudu Isaías ure Pao Kurireu bataru bu bapera keje. Akore:
– Ia boe eimijera kurireu Davi naregedu aregodumode boe eimijera kurireuwo pudumi;
– Boe tuginaiwuge eimijera mode ema;
– Boe tuginaiwuge emeartorumode ji uwo činorudo.15.12 Awu bataru padure Isaías 11.10 keje.
Ainore Isaías ure bu bapera kejewu Pao Kurireu batarure. Jesus jire akoino. Jesus aregodure tuwo awu Pao Kurireu bataru jetudo pudui rugadu.
13Pao Kurireu koiare umode boe ekiarigodu barigu boe epiji rugadu. Tameartorudo ji uwo taegaredo tai, uwo tamedagedo boeče tamororamagadukawo boe pegareuji pugeje. Dukodire Pao Kurireu Uwari umode turaga maku tagai tawo tawia ra tagiarigodu piji tabagawo Jesus bagai rugadu.
Paulo Ure Awu Pao Kurireu Bataru Bu Bapera Keje
14Imedage nure tagi. Iorduware tarore jiboeji marigudu. Taro pemegare boei marigudu. Tarduware boe remawuji. Tagi tarduware tagogituwawo boei boe pemegareu tabo. 15-16Mare awu atugoreboe tabore inogituware tai. Ipogurukare iwo tawiabutudo tarduware jiboe keje. Pao Kurireu ro pemegare i dukodire ure Jesus Cristo utugaredo imi. Makore i ituwo Jesus jiwu bakaru pemegareu tabo iwo boe tuginaiwuge ewie. Dukodire ipogurukare imagowo boei rugadu. Pao Kurireu utugare nure imi. Imaragodae ure nono nou maragodure Pao Kurireu uwai tadawu boe emaragodae mogadure. Emage ere Judeu doge ewie Pao Kurireu bataruji. Imire ire boe tuginaiwuge ewie Jesus jiwu bakaru pemegareuji emeartoruwo Pao Kurireuji ewo tugimijerado ema. Nou boe tuginaiwuge emeartorumode Jesusji dukeje Pao Kurireu Uwari umode ero pegareu barigu epiji. Pao Kurireu aidumode ei rugadu. 17Jesus Cristo rakojere itabo. Ure imeartoru pemegado Pao Kurireu bataruji dukodire inojarore Pao Kurireu ure maku inaiwu imaragodaeji. 18Nono ipogurumodukare imagowo rugadu boe tuginaiwuge ewiagai Jesus Cristo ro pemegare i duji. Dukodire imode boe tuginaiwuge emeartorudo Pao Kurireu bataruji. Ure iorduwado imagowo boe ewiagai. Ure iragado iro pemegawo boei. 19Ure iro rakado. Boe erore ta je irore jiboeji. Pao Kurireu Uwari ure turaga maku inai rugadu. Dukodire ire boe ewie rugadu Jesus Cristo umoduie boe ekinorudo duji. Ikodure Jerusalém ba kurireu piji toro Ilíria moto ka. Imerure boe jamedu boe parugajeje dutabo ire boe ewie awu bakaruji. 20Imeardaere iwo jorduwakareuge ewie Jesus bataru pemegareuji. Ia boe edure nou boebo ture ewie nou Jesus bataru jitu tabo dukodire itumodukare etae. Mare iage erduwakare Jesus meardaeji umodukaie boe ekinorudo duji. Ia boe ekare ewie. Dukodire itaidure ituwo nou boe ewagai iwo erduwado boe remawuji. 21Aino čare Pao Kurireu bataru jeture pudui. Padure bapera kejewu Pao Kurireu bataru akore:
– Boe ekare ewie marigudu mare aino erduwamode nou umode boe ekinorudowuji,
– Marigudu ewiapagakare mare aino erduwamode bataruji rugadu.15.21 Awu bataru padure Isaías 52.15 keje.
Paulo Aidure Tuduwo Roma Ba Kurireu Ka
22Itaidure ituwo tawagai marigudu. Mare ji aino iroiwakare ituwo tawagai. 23Mare kuri aino imode imaragodae iado awu moto keje. Marigudu itaidure ituwo tawagai iorduwo tai. 24Imeardaere kuri aino itaregodumoduie tagae rugadu. Itumode Espanha moto ka. Tamugure Espanha kawu awara okwai dukodire iordumode tai. Dukodire umode turugadu tawo tagera maku inai ituwo Espanha moto ka. Mare iragojemode tagabo jao pamagowo pu biagai. 25Mare aino itumode Jerusalém ba kurireu ka jao iwo ikera maku nou meartorure Pao Kurireu jiwuge etai nono. 26Macedônia kejewu meartorure Jesus jiwuge ere ia to diero maku inai iwo reko toro nou Jerusalém kejewu meartorure Jesus jiwuge ewagai. Eno diero bokware. Acaia moto kejewu meartorure Jesus jiwuge ere ia to diero maku ewagai jamedu. 27Awu Macedônia moto kejewuge boe tuginaiwuge nure emage. Awu Acaia moto kejewuge boe tuginaiwuge nure emage jamedu. Eiamedu boe ere nou tumeardae tawuje taidu tabo tuwo diero maku awu Jerusalém kejewuge Judeu doge ewagai. Erowo aino rugadu. Mare paga karega. Judeu doge ere Pao Kurireu bataru pemegareu utudo boe tuginaiwuge ewagai emeartoruwo Jesusji dukodire nou boe tuginaiwuge meartorure Jesus jiwuge ere nou to diero maku nou Judeu doge meartorure Jesus jiwuge ewagai. 28Imode nou diero rugadu maku nou meartorure Jesus jiwuge Judeu doge etai dukeje itumode pugeje epiji ituwo toro Espanha moto ka. Itaregodumode tagae tamugure ikodumode jiwu awara okwai dukodi. 29Itaregodumode tagae dukeje iorduware Jesus Cristo ro pemegamode pai rugadu duji. Paegaremode pai rugadu.
30Imedage nure tagi. Pagimijera Kurireu nure Jesus Cristoče rugadu. Pao Kurireu Uwari ure pameardu kurido boei. Dukodire itaidure iwo tawie. Tamago raido iparu tabo Pao Kurireu bagai baruto. 31Tamagodo Pao Kurireuji iparu tabo uwo ikinorudo Judéia moto kejewuge meartorukare Jesus jiwuge epiji. Tamagodo Pao Kurireuji iparu tabo imaragodu pemegawo Jerusalém ba kurireu kejewuge meartorure Jesus jiwugebo. 32Imaragodu pemegamode ebo dukeje iagaregodumode i. Pao Kurireu aidumode dukeje itaregodumode tawagai rugadu iagare tabo. Dukejere pamago raimode pui rugadu. 33Ča Pao Kurireu rakojewo tagabo rugadu. Emare umode tugera bu pawugeje pamororamagadukawo boe pegareuji pugeje. Uwo aino rugadu.
16Paulo Ukimadure Roma Ba Kurireu Kejewugebo
1Ia pamedago iere Febe. Emare maragodu pemegare meartorure Jesus jiwuge etai Cencréia ba kurireu keje.16.1 Diaconisa brae eno tabo. Meartorure Jesus jiwuge eimijera paru towu jire akoino.2Awu aredu Febe aregodumode tagae dukeje taro pemegado ji nono Jesus ro mogadure mugu pemegawo tagabo rugadu. Emare ro pemegare boei rugadu. Ro pemegare i jamedu. Dukodire tagera bararedo ji jamedu.
3Tagimadudo Priscila apo, Áquila apo inai. Emagere emaragodure itabo Jesus Cristo ai. 4Ere tuiago boe edo tuwido tuwo ikinorudo ro pegareuge epiji. Dukodire itaidure ei rugadu. Imago pemegamode erore jiboeji rugadu. Boe tuginaiwuge meartorure Jesus jiwuge eiamedu boe etaidure ei jamedu. 5Ia meartorure Jesus jiwuge emode bato pui ewai tada tu tu je. Tagimadudo ebo inai jamedu.
Ia imedia iere Epêneto. Imeardu kurire ji. Tagimadudo apo inai. Ásia moto kejewu nure ema. Emare meartorure Jesusji boetoji nou tumedage Ásia moto kejewuge epiji.
6Tagimadudo Maria apo inai. Emare maragodu rakare tagai.
7Tagimadudo imedu Andrônico apo inai. Tagimadudo aredu Júnia apo inai jamedu. Iwobe nure emage. Edure itabo baičoreu tada marigudu toro ia ba kurireu keje. Boe kurireuge nure emage. Uture Jesus bataru tabowuge nure emage. Emeartorure Jesusji itododai marigudu.
8Tagimadudo imedu Amplíato apo inai. Meartorure Jesusji dukodire inagomode imana aino ji. Imeardu kurire ji rugadu.
9Tagimadudo imedu Urbano apo inai. Emare maragodure itabo Jesus maragodaeji. Tagimadudo imedu Estáquis apo inai jamedu. Imeardu kurire jiwu imedia nure ema.
10Tagimadudo imedu Apeles apo inai. Jesus Cristo aidure awu imedu maragodaeji.
Tagimadudo mugure imedu Aristóbulo uwai tadawugebo inai.
11Tagimadudo imedu Herodião apo inai. Iwobe nure ema.
Tagimadudo mugure imedu Narciso uwai tadawugebo inai. Emeartorure Jesusji dukodi.
12Tagimadudo aredu Trifena apo inai. Tagimadudo aredu Trifosa apo inai. Emagere emaragodu rakare Pagimijera Jesus ai.
Tagimadudo pamedago Pérside apo inai. Paiamedu boe pameardu kurire ji rugadu. Emare maragodu rakare Pagimijera Jesus ai jamedu.
13Tagimadudo imedu Rufo apo inai. Pao Kurireu ure tugeragu ji meartoruwo Jesusji. Emare maragodu pemegare Jesus ai. Tagimadudo Rufo uče apo inai jamedu. Uče ro pemegare i nono muga ro pemega moga i dumogadure.
14Tagimadudo imedu Asíncrito apo inai. Tagimadudo imedu Flegonte apo inai. Tagimadudo imedu Hermes apo inai. Tagimadudo imedu Pátrobas apo inai. Tagimadudo imedu Hermas apo inai. Tagimadudo nou rakojere nou ime apowuge pamedagebo inai. Eiamedu boe emeartorure Jesusji dukodire inagoino.
15Tagimadudo aredu Filólogo apo inai. Tagimadudo aredu Júlia apo inai. Tagimadudo aredu Nereu apo inai. Tagimadudo Nereu uwie aredu Olimpas apo inai jamedu. Tagimadudo rakojere ebowuge meartorure Jesus jiwuge eiamedu boebo inai jamedu.
16Tagimadudo pu jamedu boe apo.
Meartorure Jesus Cristo jiwuge eiamedu boe eimadure taiamedu boe bagai.
Paulo Ure Roma Kejewuge Erduwado
17Imedage nure tagi. Iage etaidure tuwo meartorure Jesus jiwuge emeardae pegado pui. Taeku jado tameardaekawo nono emeardaere. Etaidure tuwo tagaora pegado tarduware jiboe piji. Taipagakaba ewadaruji. Tadaru toro epiji. 18Awu boe emaragodukare Pagimijera Jesus ai. Emaragodure tumeardae pegareuji tuwo boe ewarigu tumeardae pemegareu piji. Emago pemegare. Emago moture. Mare tuwo boe ekiripagado dubagaire egoino. 19Mare tameartorure Jesus bataruji rugadu. Boe eiamedu boe erduware nou tarore jiboeji. Dukodire iagarere i tarore jiboeji rugadu. Mare itaidure iwo tarduwado boe pemegareuji. Jorduwareugewo tagi tarduwawo boe pemegareuji. Mare tarduwakawo boe pegareuji. 20Pao Kurireu umode tugera bu pawugeje pamororamagadukawo boe pegareuji pugeje. Emare umode bope raka tawuje piji rugadu. Bope rakamodukare tai. Umodukare tumorido tai rugadu. Umode nono ia pagatu jewu boere.
Pagimijera Jesus ro pemegawo tai rugadu.
21Pamedia Timóteo aidure čimaduwo tagabo. Lúcio aidure čimaduwo tagabo. Jasom aidure čimaduwo tagabo. Sosípatro aidure čimaduwo tagabo. Judeu doge nure emage. Iwobe nure emage.
22Imire ikiere Tércio. Imire ire awu Paulo bataru bu bapera keje Paulo ai. Itaidure ikimaduwo tagabo jamedu. Pagimijera ro pemegawo tai.
23-24Čeragojere Gaio uwai keje. Ro pemegare čei rugadu. Emare aidure tugimaduwo tagabo. Awu woewu meartorure Jesus jiwuge eiamedu boe etaidure tugimaduwo tagabo jamedu.
Awu ba kurireu kejewu boe eimijera iere Erasto. Emare aidure tugimaduwo tagabo. Meartorure Jesus jiwu imedia Quarto aidure tugimaduwo tagabo jamedu.
Ča Pagimijera Jesus Cristo ro pemegawo taiamedu boei rugadu.
Paulo Mako Pemegare Pao Kurireu Rore Jiboeji
25Pamago pemegawo Pao Kurireuji. Pamago pemegawo Pao Kurireu rore jiboeji. Emare roiware tuwo tameartoru rakado Jesusji. Ire boe ewie Jesus bataru pemegareuji emeartoruwo Jesus Cristoji. Jaoboe erduwakare nou bataruji. Pao Kurireu ure nou tuwadaru biado nou jaoboe epiji. Mare Pao Kurireu ure nou tuwadaru maku inai. 26Maigodu aino čare boe erduware nou bataruji. Marigudu makore Pao Kurireu bataru jiwuge ere Pao Kurireu bataru bu bapera keje tuwo boe ewie nuba boe mode boei ia meri keje. Maigodu aino boe erdure nou bataru jeture pudui duji dukodire erduware boe remawuji. Pao Kurireu bimodukare rugadu. Emare makore boei ewo boe eiamedu boe ewie nou tuwadaruji emeartoruwo Jesusji, emeartoruwo Jesus bataruji jamedu.
27Pamago pemegawo Pao Kurireuji. Tu emare jorduware boe jamedu boeji. Pao Kurireu ure mitotu je. Iakare toro pugeje. Jesus Cristo bire boe ero pegareu moriče boe emago pemegawo Pao Kurireu rore jiboeji. Boe emago pemegawo jii toro rugadu. Ča uwo aino rugadu.