Filipenses
Paulo Ure Awu Atugoreboe Maku Toro Filipos Ba Kurireu Kejewuge Meartorure Jesus Jiwuge Ewagai
11Paulo nure imi. Inure awu atugoreboe pemegado. Timóteo imedia nure ema. Jesus Cristo utugarege nure čegi. Čere awu atugoreboe pemegado čewo maku Filipos ba kurireu kejewuge meartorure Jesus jiwuge ewagai. Tare tamagu Jesus Cristo ai tawo taro udo tuginai taro pegareu piji. Meartorure Jesus jiwuge eimijerage nure ia tagi. Meartorure Jesus jiwuge eimijerage paru towuge nure ia tagi. Etugarege nure ia tagi. Taiamedu boe tawagaire iroino awu atugoreboe tabo.
2Pao Kurireu uwo turo pemegareu maku tagai. Pao Kurireu uwo tabemegado pui. Jesus Cristo uwo turo pemegareu maku tagai jamedu. Uwo tabemegado pui jamedu.
Paulo Makore Baruto Pao Kurireu Bagai Filipos Ba Kurireu Kejewuge Meartorure Jesus Jiwuge Eparu Tabo
3Iwiabuture tawugeje dukeje imago pemegare tarore jiboeji ikimadu tabo Pao Kurireu apo rugadu. 4Imagore baruto Pao Kurireu bagai tabaru tabo dukeje iagarere i tai. 5Marigudu itaregodure tagae. Tare tagera maku inai rugadu. Ainore tarore jii aino pawo boe ewie Jesus jiboeji. Dukodire iagarere i tarore jiboeji rugadu. 6Mare Pao Kurireu emare ure tameardae pemegado tawo tagera maku inai. Umodukare nou turo akedudo jamedu. Pao Kurireu umode tameardae pemegado jii toro Jesus Cristo aregodumode du ka. Iorduware nou inoduji rugadu. 7Iwiabuture tawugeje iagare tabo. Tamaragodu pemegare itabo pawo Pao Kurireu ure maku pagaiwu pamaragodae pemegado. Ure itudo boe etae iwo ewie Jesus bataru pemegareuji. Ire ewie rugadu. Boe emeartorure Jesusji rugadu. Mare ro pegareuge ere itugu baičoreuto. Dukodi čare iragojere woe baičoreu tada. Mare Pao Kurireu rakojere itabo woe. Ro pemegare i kimo woe. Ro pemega kimore tai jamedu. Nono tare boe ewie Pao Kurireu bataruji kimo. Dukodire iwiabuture tu tu tawugeje iagare tabo jii aino. 8Boe jokodu jire inagoino. Pao Kurireu jorduware imeardaeji. Imeardu kurire tai nono Jesus Cristo meardu kurire pai dumogadure.
9Imagore baruto Pao Kurireu bagai tabaru tabo tu tu je tameardu kuriwo pui rugadu tagaidu kuriwo pui rugadu. Imagore Pao Kurireu bagai tabaru tabo tarduwawo boe remawuji, boe ekawo taekiripagado mare tarduwagoduwo boe ero pemegareuji. 10Dukodire tarduwamode tawo tageragu taro pemegareuji. Nono tamode tadawuje boe ero pegareu piji. Tamode boe emeardae pegareu barigu tabiji. Nono taro pegareu akedumode jii toro Jesus Cristo aregodumode kejewu meri ka. 11Tu Jesus Cristo umode tameardae pemegado taro pemegawo tu tu je, tameardae pemegawo tu tu je. Taro pemegareu koiare umode boe emago pemegado Pao Kurireuji. Taro pemegareu koiare umode boe egaredo Pao Kurireuji jamedu.
Paragoje Kimore Woe Moto Keje Jesus Cristo Utugaregewo Pagi
12-13Imedage nure tagi tameartorure Jesusji dukodi. Itaidure iwo tarduwado. Jesus Cristo utugare nure imi. Dukodire boe ere itugu baičoreuto. Mare paga karega. Aino ire awu baičoreu tadawu tugobaigarege ewie Jesus bataru pemegareuji. Ire Roma kejewu boe eimijera kurireu uwai tadawu tugobaigarege eiamedu boe ewie Jesus jiboeji. Dukodire inagoino. Boe pegare i mare awu Jesus bataru pemegareu uwo tumaedo boe jamedu boe parugajeje boe erduwawo Jesus jiboeji dukodire boere aino i. 14Itugudure baičoreuto. Dukodire meartorure Jesus jiwuge emeartorugodure rugadu Pagimijeraji. Epoguru akedure tumagowo rugadu Jesus jiboeji boe ewiagai.
15Iage emagore Jesus Cristo jiboeji mare tumeardae pegareu tabo etaidure tuiorduwawo nou jorduware Jesus Cristo jiboe jiwuge epiji. Iage emagore Jesus Cristo jiboeji mare ere tuwadaru očarodo tuwo nou boe epogurudo dubagai. Mare iage etaidure turo pemegawo boei rugadu. Dukodire emeardae pemegare. Emagore Jesus jiboeji boe ewiagai tuwo boe pemegado boei rugadu. 16Nou boe emeardu kurire boei. Emeardu kurire i jamedu. Erduware Pao Kurireu ure maku inaiwu imaragodaeji. Ure imaragodae maku inai iwo boe emeardae pemegado Jesus jiboeji. 17Nou iage etaidukare i. Emagore Jesus jiboeji mare tuwo tuwadaru očarodo dubagaire eroino. Emeardae pegare tumagowo Jesus jiboeji tuwo tugurido ikori boe egai tuwo boe pegado i woe baičoreu tada.
18Mare iwiapagakare nou emeardaeji. Imeardae pegakare eroino duji. Ere tuwadaru očarodo Pao Kurireu bataruji mare du inodu tabo Jesus Cristo jiboe jire egoino. Dukodire iagarere i eroino duji. Iage emeardae pemegare tumagowo Jesus jiboeji boe ewiagai. Iage emeardae pegare tuwo boe pegado i mare Jesus jiboe jire egoino. Dukodire boe emeardure Jesus jiboeji rugadu. Dukodire iagarere i eroino duji. 19Iagarere i du akedumodukare rugadu. Tamagore baruto Pao Kurireu bagai iparu tabo. Nono Jesus Cristo Uwari ure tugera maku inai. Dukodire boe eimijerage emode itawuje awu baičoreu piji rugadu. 20Itaidure iwo iragado rugadu iro pemegawo tu tu je. Ipogurukawo imagowo Jesus jiboeji boe ewiagai tu tu je. Nono imode boe emago pemegado Jesus Cristoji iro jamedu boe tabo imeardae jamedu boe tabo. Iwimode mare boe ewiagoromode imagore jiboeji dukodire emago pemegamode Jesus Cristoji. Emeartorumode ji rugadu. Iwimodukare dukeje imago kimomode Jesus jiboeji boe ewiagai. Dukejere boe emago pemegamode Jesus Cristoji. Emeartorumode ji rugadu. 21Kodiba boe eragojere moto keje? Imode tawie. Imire iragojere woe moto keje Jesus Cristo utugarewo imi imeartoruwo ji rugadu. Mare iwimode dukeje irudumode baruto. Nono boe pemegamode i rugadu. 22Mare iwimodukare kuri aino dukeje imaragodu pemegamode Jesus ai jii toro. Iorduwakare nuba imeardaemode. 23Itaidure jiwu imeardae ure pobetu je. Itaidure iwiwo itaidukare iwiwo. Itaidure iwiwo iragojewo Jesus Cristo apo. Boemode aino i dukeje boe pemegamode i rugadu. Dukodire itaidure iwiwo. 24Mare itaidukare iwiwo jamedu kuri aino iwo tameartoru kurido Jesusji. Iwimode dukeje iroiwamodukare iwo tameartoru kurido Jesusji pugeje. Dukodire itaidukare iwiwo. 25Dukodire iorduware iwimodukare duji rugadu. Iragojemode tagabo pugeje iwo tameartoru kurido Jesusji rugadu. Iwo taegaregodudo Jesus Cristoji rugadu. 26Dukodire itaregodumode tagae dukeje imode taegaregodudo Jesus Cristoji rugadu. Taegaremode tai Jesus ure itawuje baičoreu piji duji. Tamugu pemegamode Jesus Cristo apo rugadu.
27Nono tarodo nono Jesus Cristo jiboe bataru mogadure. Tameardaedo nono Jesus Cristo meardae mogadure. Itaregodumode tagae dukeje iorduwamode taroji tameardaeji. Mare itaregodumodukare tagae mare boe emode iwie tarore jiboeji tameardaere jiboeji. Itaidure tameartoru kuriwo Jesusji. Nono tameardae umode mitotu je. Tameardaemode nono pu meardae mogadure. Nono tagaidumode tawo taragado tawo taro pemegado puapo Jesus Cristo jiboe bataru pemegareuji tameartoruwo ji rugadu. 28Tabagudukaba jordu pegare taiwugei. Taragado tai rugadu jii toro. Nono jordu pegare taiwuge erduwamode pagare eroino tai duji. Etaidure tuwo tameartoru akedudo Jesus piji. Mare erduwamode tamodukare tagera ra tameartorure Jesus jitu piji rugadu. Pao Kurireu emare umode turaga maku tagai tuwo taragado tai tameartoruwo pudui rugadu jii toro. Nou tameardae pemegareu tabore tamode tamorido nou jordu pegare taiwuge emeardae pegareu piji. Dukodire inagoino tai tabagudukaba eče. 29-30Nono Pao Kurireu ro pemegare tai. Dukodire Jesus Cristo ure tugeragu tai tudugaregewo tagi. Mare paga karega. Tameartorure ji dukodi. Nono jordu pegare Jesus jiwuge ero pegare tai jamedu. Mare Jesus utugarege nure tagi dukodire taegaredo tai eroino tai duji. Marigudu boe ero pegare i nono Filipos ba kurireu keje. Boe ero pega kimore i woe jamedu. Aino čare ero pegare tai nono turo moga i dumogadure. Dukodire inagoino tai taegarewo tai rugadu nono iro mogadure. Tagaba tagera ra Pao Kurireu ure maku tagaiwu tamaragodae piji rugadu nono iro mogadure.
2Jesus Cristo Ukare Boe Remawudo Pudumi
1Tare tamagu Jesus Cristo ai tawo tagimijerado ema dukodire ure taragado tai taro pemegawo. Jesus meardu kurire tai dukodire ure tagiarigodu barigu tabiji. Tarduware Pao Kurireu Uwariji. Makore tai. Tamagore ji. Tagi tagaidure meartorure Jesus jiwuge eiamedu boei dukodire taro pemegare ei. Ero pemegare tai jamedu. Tameardu kurire pui rugadu. 2Dukodire itaidure iwo taro pemegado, iwo tameardae pemegado. Tagaba tameardae udo tuginai nou tamedage emeardae piji. Tameardae maku puai rugadu. Tameardu kurido pui rugadu. Tagaidudo tamedage emeardaere jiboeji. Taragado tai tawo tamedagedo pugi. Tamode tamedage remawugedo pugi dukeje iagaregodumode i rugadu. 3Tagaba boe kurireugedo tagi tamedage ekori. Tagaba tagoe kurido tamedage enoe kori. Tagaba boe remawugedo tagi tamedage ekori. Pagatu jere boe eroino. Mare tagi taragado tai tawo tameardae udo nono boe etugarege emeardae mogadure. Tameardu kuričigodo boei. Tamago pemegado ei ero pemegaie taro pemegareu kori. 4Tagaba boe pemegado tu tai. Tawiagorodo tawo boe pemegado ia boei jamedu. 5Tameardae udo nono Jesus Cristo meardae mogadure.
6Jesus Cristo ure nono Pao Kurireu mogadure rugadu. Mare meardae kare tumuguwo tu nou baru tadawu tumuga keje. Mare ure tumeardae tawuje tumuguwo moto keje boebo rugadu. 7Taidu tabore ure tugera ra baru tadawu toe piji tuwo boe etugaredo pudumi. Ure tudo nono ime emogadure. 8Imedure ema rugadu. Mare ukare boe remawudo pudumi. Ure boe utugare remawudo pudumi rugadu. Meartorure Pao Kurireuji rugadu jii toro. Dukodire bire ipo padure pugajejewu keje. 9Dukodire Pao Kurireu ure jewodudo pugeje. Ure rutudo baruto pugeje boe jamedu boe ao ka. Ure Jesus ie kurido rugadu boe eiamedu boe ekie kori. 10Dukodire boe eiamedu boe baru tadawuge, moto kejewuge, bireuge, mareboe doge, emeardumode Jesus ieji dukeje emode tubu jodo tumago pemegawo ji. 11Awu boe eiamedu boe erduwamode Jesus Cristoji rugadu. Egomode boe eimijera kurireu nuie ema. Pao Kurireu kurie rugadu. Rakaie rugadu.
Meartorure Jesus Jiwuge Ere Nono Jorugu Pemegareu Mogadure Dukodire Ere Boe Ewie Jesus Jiboeji
12Imeardu kurire jiwuge imedage nure tagi. Iragojere tagabo dukeje tameartorure iwadaruji. Aino iragojekare tagabo pugeje. Mare iwo tawie. Taragado tai tagawo tawia ra tameartorure iwadaru jitu piji. Tameartorure Jesusji dukodire ure taginorudo tawarigudukawo bope doge eda kejewu joru pegareuto. Aino tabagududo tu boe ero pegareuče taro pegakawo pugeje. Taragado tai taro pemegawo nono činorudowuge ero mogadure. 13Mare paga karega. Pao Kurireu umode tumeardae maku tagai tu tu je tuwo tameardae udo nono tumeardae mogadure. Nono taromode nono Pao Kurireu meardaeji. Nou Pao Kurireu meardae pemegare rugadu. Umode boe pemegado boei rugadu.
14Tagokikaba pui. Tamago pegakaba tamaragodure jiboeji. Taro pemegado tagaidu tabo. 15Taromode aino dukeje ro pemegareuge emode tagi. Taromode nono Pao Kurireu ore ero mogadure. Taro pegareu bokwamode. Boe erdumodukare ia taidukare jiwu taroji. Meartorukare Pao Kurireu jiwuge ero pegare marigudu. Emagare rugadu. Dukodire taro pemegamode etoiadada dukeje tamode nono kuieje doge emoga baru tada dumogadure. Mare kuieje ji karega inagoino. Tarore jiboe umode tuginai ero piji. Dujire inagoino. Boe eiamedu boe erdumode taro pemegareuji. Dujire inagoino. 16Boe erduwamode taro pemegareuji emeardumode tawadaruji dukeje erduwamode tumeartoruwo Jesusji uwo ekinorudo ero pegareu piji ukawo ero pegareu morido etai jamedu. Nono iagaremode i rugadu tarore jiboeji tamagore jiboeji. Nono Jesus Cristo aregodumode pugeje dukeje imago pemegamode tai tameartoruie Jesusji rugadu. Iorduwamode paga karega imaragodu rakare iwo tarduwado Jesus jiboeji.
17Iorduwakare nuba boe eromode i. Emode iku redo. Emode iwido. Mare iorduwakare. Mare iagaremode i. Tagi tameartorure Jesusji. Tare tagimijerado ema rugadu dukodire tare tagomeado Pao Kurireu bagai tarore jiboe jamedu boe tabo. Tare taro udo nono Pao Kurireu meardae mogadure. Dukodire jordu pegare Jesus jiwuge ero pegare tai. Dujire inagoino. Mare du inodu tabo taegarere tai tameartorure Pao Kurireu jituji. Aino boe emode iwido dukeje imode nono boe enomeare Pao Kurireu ai turo pemegareu tabo dumogadure jamedu. Imeartorure Pao Kurireuji dukodire boe pegamode i. Dujire inagoino. Mare iorduwakare nuba boe eromode i. Mare emode iwido du inodu tabo iagaremode i rugadu nono taro mogadure. 18Boe pegare tai mare tagiarigodukaba. Taegaredo tai rugadu tameartoruwo Jesusji rugadu. Boe pegamode i mare tagiarigodukaba. Taegaredo tai itabo rugadu.
Timóteo Utumode Filipos Kejewuge Etae Imedu Epafrodito Apo
19Pagimijera Jesus aidumode dukeje imode Timóteo utudo tawagai kuri aino. Emare umode iwie nuba boere tai. Umode iwie tarore jiboeji. Dukodire umode iagarego i. 20Tu nou Timóteo meardaere nono imeardae mogadure. Imedia remawu nure ema. Emare meardu kurire tai rugadu. 21Boe eiamedu boe emeardaekare pui. Emeardaere tu pudui. Emeardaekare tumaragoduwo Jesus Cristo ai. 22Mare tagi tarduware Timóteo rore jiboeji. Ro pemegare rugadu. Maragodure itabo marigudu. Ure nono itonaregedu mogadure. Čemaragodure puapo čewo boe ewie Jesus bataru pemegareuji rugadu. 23Dukodire itaidure iwo utudo tawagai. Mare kuri aino iorduwamode nuba boe eromode i. Dukejere imode Timóteo utudo tawagai. 24Imeartorure Pagimijera Jesusji rugadu. Imeardaere umode ikinorudo baičoreu piji rugadu ituwo tagae kuri aino jamedu.
25Itaidure iwo imedu Epafrodito utudo tuibagi tawagai jamedu. Imedia nure ema jamedu. Emare maragodure itabo jamedu. Mako raire boe ewiagai erduwawo Jesus jiboeji. Emare aregodure tabiji iwagai. Tare arego mato itae rugadu tawo tagera maku inai. Ure tugera maku inai rugadu tamugato. 26-27Akere ji tuwo tugirimi tagae pugeje tuiorduwo tai pugeje. Tameardure imedu Epafrodito kogoduie. Kogodure rugadu. Puredugodure tuwiwo. Mare Pao Kurireu okudugodure apo dukodire pemegagodure. Okudugodure itabo jamedu. Imedu Epafrodito bimode dukeje ikiarigodumode rugadu. Mare pemegagodure dukodire ikiarigodukare. Mare imedu Epafrodito mororamagadure tawagai tuwo tawie tubemegagoduie rugadu duji. 28Dukodire akere ji tuwo tugirimi tagae. Akere i jamedu iwo utudo tagae rugadu. Aregodumode tagae dukeje taegaremode tai rugadu. Ikiarigodu akedumode jamedu. 29Aregodumode tagae dukeje tagera upodo apo taegarere tai dutabo rugadu nono Jesus romoga jitu mogadure. Tamago pemegado ji rugadu. Nono ia boe eromode nono nou imedu Epafrodito ro mogadure dukeje tamago pemegado ei jamedu nono taro moga Epafrodito jitu mogadure. 30Imedu Epafrodito jorduware tuwimode nou tumaragodae keje mare du inodu tabo pagudukare. Maragodure Jesus Cristo ai woe itabo rugadu. Dukodire puredugodure tuwiwo rugadu. Mare paga karega. Rore aino tuwo tugera maku inai taiageje. Dukodire inagoino tamago pemegawo ji rugadu.
3Meartorure Jesus Jiwuge Ero Pemegareu Remawu Reo
1Imedage nure tagi tameartorure Jesusji dukodi. Tameartorure Pagimijeraji. Dukodire iwo tawie. Taegaredo tai Pagimijera Jesus ure taginorudo duji.
Imode tawie iaboeji pugeje. Ire tawie marigudu atugoreboe tabo. Aino čare inure tawie pugeje awu atugoreboe tabo jamedu. Mare paga karega. Tawiapagamode ire tawie jiboeji dukeje boe emodukare taekiripagado. 2-3Taeku jado ro pegareugei. Ere nono barogo pegareuge emogadure. Mare barogo ji karega inagoino. Ure boe ewiri kadoduwuge nure emage. Emago raire boei tuwo tumeardae maku etai ewo tuwaga oto biri kado. Dujire inagoino. Egore meartorure Jesus jiwuge emoduie tuwaga oto biri kado tumeartoruwo Jesusji. Egore nou turo taboie boe emode Pao Kurireu uwobedo pudumi. Mare enure tiekiripagado. Ainore Judeu doge egore jamedu. Egore tumeartoruie turoji tuwo Pao Kurireu uwobedo pudumi. Mare enure tiekiripagado. Turo pemegareu tabo karega boe emode Pao Kurireu uwobedo pudumi. Mare boe etaiduwo rugadu Pao Kurireuji tuwo tubu jodo tumago pemegawo ji rugadu. Nono Pao Kurireu umode Tuwari maku meartorure Jesus jiwuge etai tuwo emugu pemegado pudabo. Pagi pameartorure Jesus Cristoji rugadu. Dukodire mugu pemegare Pao Kurireu apowuge remawuge nure pagi. Pameartorukare parore jiboeji. Pameartorure tu Jesus Cristoji dukodire paegarere ji. Nou Uwari emare ure pamugu pemegado Pao Kurireu apo rugadu. Ure pamago pemegado Pao Kurireuji pabu jodo dutabo. 4Marigudu irore awu Judeu doge ero jamedu boeji marigudu. Mare pagatu jere iroino. Dukodire iorduware. Ia tagi tameardaere tameartoruwo Judeu doge eroji tawo Pao Kurireu uwobedo tagi mare inure tawie. Tamodukare Pao Kurireu uwobedo tagi tameartorure Judeu doge ero jitu tabo. Iorduware. 5Iwodure dukeje meri oto padure sete i dukeje iwaga oto biri kadodure nono Judeu doge ero mogadure. Iogwa imuga Judeu doge nure emage. Iwobe Benjamim uwobere emage. Judeu remawu nure imi rugadu. Fariseu ure imi marigudu. Imeartorure mariguduwu Judeu doge ero jamedu boeji nono fariseu doge ero mogadure. 6Ire iragado i rugadu iwo boe emeartorudo fariseu doge eroji. Dukodire iro pegare meartorure Jesus jiwugei. Iro pegare ei rugadu. Imeartorure rugadu mariguduwu Judeu doge eno bakaruji rugadu. Ikare iro mekido eno bakaru piji. 7Mare ia meri keje ire awu iro jamedu boe barigu ipiji. Imeartorure Jesus Cristoji rugadu. Itaidukare nou boetojiwu iroji pugeje. 8Ia pugeje. Imode ia iro barigu ipiji jamedu iorduwawo Ikimijera Jesus Cristoji. Inoe moture kurire mare kodukare Jesus Cristo bataru pemegareu kori. Aregodukare Jesus Cristo bataru oto pa ka. Dukodire imode iro jamedu boe barigu ipiji imeartoruwo tu Jesus Cristoji iorduwawo Jesus Cristo jiboeji. 9Itaidure imugu pemegawo Jesus apo rugadu. Iraga tabo iro pemegamodukare. Iraga tabo itaidumode imeartoruwo Judeu doge eno bakaruji iwo iro pemegado. Mare iroiwamodukare. Mare imeartorure Jesus Cristoji dukodire emare ure turaga maku inai iro pemegawo. Boe emeartorumode Pao Kurireuji dukeje Pao Kurireu umode turaga maku etai ero pemegawo rugadu nono Pao Kurireu meardae mogadure. 10Itaidure tu iorduwawo Jesus Cristoji. Emare rakare. Jewodure pugeje. Dukodire itaidure uwo turaga maku inai. Boe pegare ji. Bire ipo padure pugajejewu keje. Itaidure boe pegawo i nono boe pegare Jesus jitu mogadure. Itaidure imeardaewo nono Jesus meardae mogadure. Emare meartorure tuoji tuwi tabo. Itaidure imeartoruwo ji jamedu jii toro rugadu. Boe pegamode i, iwimode mare itaidure imeartoruwo Jesusji iorduwawo tu ji tu rugadu. 11Nono imeardaemode nono Jesus meardae mogadure dukeje Pao Kurireu umode iewodudo pugeje jamedu. Jesus umode turawuje moto ka pugeje dukeje Pao Kurireu umode iewodudo nou meartorure Jesus jiwuge eiamedu boebo rugadu.
Boe Ewo Turagado Tumeartoruwo Tu Jesusji
12Jesus ure tugeragu i imeartoru kuriwo pudui. Mare ikare iro jamedu boe pemegado raga. Itaregodukare raga Jesus meardae oto pa ka. Mare ire iragado i iorduwagoduwo Jesus Cristoji rugadu. Itaidure iorduwawo Jesus meardaeji rugadu irowo nono Jesus meardae jamedu boeji. 13-14Imedage nure tagi tameartorure Jesusji dukodi. Iwo tawie. Ire iragado i nono re rakareu ro mogadure. Imedu re rakamode taregoduwo boetoji tumedage epiji. Aregodumode boetoji dukeje boe pemegareboe makudumode ai. Mare re rakareu ji karega inagoino. Ire iragado i iwo iro jetorodo iwo iro jamedu boe udo nono Jesus meardae mogadure. Dujire inagoino. Aino ire iro udo nono Jesus meardae mogadure mare iro jamedu boe karega. Mare ire iragado i iwiagoduwo nouia boetojiwu iro piji pugeje iwo iro jamedu boe pemegado rugadu nono Jesus meardae mogadure. Pao Kurireu makore iwagai imeartoruwo Jesus Cristoji. Imeartorure ji dukodire umode ikinorudo rugadu imuguwo baru tada.
15Meartorure Jesus jiwu remawuge emode tagi dukeje tameardaemode nono awu imeardae mogadure rugadu. Ia tagi tameardaemode ia tameardae tuginaiwuji dukeje Pao Kurireu umode tarduwado boe remawuji tameardaewo nono tumeardae mogadure. 16Pameartorure Jesusji dukeje paro pemegare. Ča parowo aino rugadu pameartoruwo Jesusji rugadu jii toro rugadu.
17Imedage nure tagi tameartorure Jesusji dukodi. Ire tarduwado awu irore jiboeji marigudu. Aino ča tarodo nono iro mogadure rugadu. Tagaiwodo nou meartorure iwuge erore jiboeji tarowo nono ero mogadure jamedu. Emage erore nono iro mogadure. 18Ire tawie marigudu. Aino čare imode tawie pugeje. Iage egore tumeartoruie Jesusji mare ero pegare. Dukodire jordu pegare Jesus jiwuge nure emage. Ero pegare dukodire ia boe emeartorumodukare Jesusji pugeje. Dukodire ikiarigodure rugadu. Ioguru rere ioku piji. 19Awu ro pegareuge ewimode dukeje emugumode bope doge eda kejewu joru pegareu tada. Eipagare tuwariwo tu pudumi rugadu. Epogurukare turo pegareuji. Enojarore turo pegareuji. Ewiagorore tu awu moto kejewu boeji. 20Mare pagi karega. Mugure baru tadawuge mode pagi. Pabagare rugadu Umode Paginorudowu bagai. Pagimijera nure ema. Jesus Cristo nure ema. Aregodumode baru piji pawagai. 21Pawiri rakakare. Pagodu rakakare. Ia meri keje pawimode. Mare Jesus umode pawiri pagodu udo tuginai. Emare rakare tuwo boe eimijera kurireudo pudumi. Nou turaga tabore umode pawiri udo nono tuwiri pemegareu baru tadawu mogadure. Turaga tabore umode pagodu udo nono tugodu pemegareu baru tadawu mogadure.
4Paulo Ure Filipos Kejewuge Meartorure Jesus Jiwuge Ero Maku Etai
1Imedage nure tagi tameartorure Jesusji dukodi. Mare paga karega inagoino. Imeardu kurire tai rugadu. Ikiarigodure tawagai rugadu. Tare itaidu kurido taroji dukodire tare iagaredo i rugadu. Dukodi čare tagaba tagera ra tameartorure Pagimijera Jesus jitu piji taro pemegawo Jesus aidure jiboeji jii toro rugadu. 2Aredu Evódia, aredu Síntique emeartorure Pagimijera Jesusji dukodire uwobe nure emage. Mare ekare tumeardae tawuje puapo. Čare itaidure imagowo ei ewo tumeardae pemegado puapo rugadu. 3Ia maragodure itabowu nure aki. Itaidure awo akera maku awu areme etai. Nou areme emaragodure itabo rugadu. Čere boe ewie Jesus bataru pemegareuji rugadu. Dukodire inagoino ai awo akera maku etai ewo tumeardae tawuje puapo epemegawo pui. Imedu Clemente maragodure itabo jamedu ia boe dogebo jamedu. Taiamedu boe tagie padure Pao Kurireu o bapera keje. Boe ekie padumode nou Pao Kurireu bapera keje dukeje nou boe ewimodukare pugeje.
4Taegaredo tai Pagimijera Jesusji tu tu je. Inure tawie. Taegaredo ji rugadu. 5Taro butugudo boe eiamedu boei. Pagimijera Jesus aregodumode pugeje kuri aino rugadu. 6Tamororamagadukaba iaboe bagai. Mare tamagodo baruto Pao Kurireu bagai tagogwamaguduwo ji tagaidure jiboe bagai. Tagimadudo apo rore tai jiboeji. Tagimadudo apo ure maku tagaiboe paru tabo dukeje tagogwamagudumode ji iaboe bagai pugeje. 7Dukejere Pao Kurireu umode tamororamagadu akedudo rugadu tamugu pemegawo tameardae kuriwo Pao Kurireuji rugadu. Umode tagaora butugugo rugadu. Boe erduwakare tuwo boe emororamagadu akedudo nono Pao Kurireu ro mogadure. Dukodire Pao Kurireu umode tagaora butugugo rugadu. Umode tameardae butugugo rugadu. Mare paga karega tameartoru raimode Jesus Cristoji dukeje Pao Kurireu umode tameardae pemegado rugadu jii toro rugadu.
8Čare iwadaru akedugodu. Mare iwo tawie iaboeji pugeje. Tu boe pemegareboe tugu tagaorato. Tawiagorodo boe pemegareu boeji. Tawiagorodo boe emago pemegare jiboeji. Tawiagorodo boe jokodureu bataruji. Tawiagorodo boe epogurukare jiwu boe eroji. Tawiagorodo boe ero jetororeuji. Tawiagorodo boe ero pemegareuji. Tawiagorodo boe pega bokwareu boeji. Tawiagorodo boe motureu boeji. Tawiagorodo tawo boe pemegado boei. 9Tameardure ire tarduwado jiboeji. Dukodi čare tameartorudo ji rugadu. Tardure irore jiboeji. Dukodi čare tarodo nono iro mogadure. Dukejere Pao Kurireu rakojemode tagabo. Emare umode boe epemegado pui. Umode boe emororamagadu akedudo rugadu. Rakojemode tagabo jii toro rugadu.
Ere Diero Maku Dukodire Paulo Imadure Ebo Erore Aino Pudui Duji
10Imago pemegare Pagimijera Jesusji iagarere i dutabo. Mare paga karega. Tare itaidure jiboe maku inai. Marigudu tagaidure tawo boe maku inai mare taroiwakare. Maigodu aino čare tare maku inai taetu pemegawo i rugadu. 11Imeardae pegakare taroji. Iorduware tagaidure iduji marigudu. Mare iwudugugodure marigudu jeture itabowu inoe boe keje. 12Boe bokwamode i dukeje pegamodukare i. Ike kurimode, inoe kurimode dukeje boe pegamodukare i jamedu. Iorduware marigudu iroiwawo jeture itabowu boeji. Nono ike boeimode i mare iwudugugodumode. Ikuredumode mare iwudugugodumode. Inoe bokwamode mare iwudugugodumode. Inoe kurimode mare iwudugugodumode. Iwudugugodumode meri jamedu boe keje iragojere kejewu boe parugajeje. 13Mare paga karega. Jesus Cristo ure turaga maku inai dukodire iragare i iwudugugoduwo boe jamedu boe keje.
14Aino boe rakare i mare tare boe maku inai tawo tagera bararedo i. Taro pemegare rugadu. 15-16Marigudu iture Macedônia moto piji ituwo Tessalônica ba kurireu ka iwo ewie Jesus bataru pemegareuji nono jamedu. Dukejere boe rakare i rugadu nono Tessalônica ba kurireu keje. Mare tare diero maku inai nono. Ia meartorure Jesus jiwuge ekare iaboe maku inai. Mare tagi tare maku inai. Tarduware. Filipos kejewuge meartorure Jesus jiwuge nure tagi. Boe rakare i nono Tessalônica ba kurireu keje dukeje tare iaboe maku inai tu tu je. 17-18Aino čare imedu Epafrodito aregodure mato itae pugeje woe baičoreu ka woe Roma ba kurireu ka nou tare maku inaiboe tabo. Ire ikeragu ji. Imagore iaboe rogu bagai mare tare ino diero kurido rugadu. Itaidukare iaji pugeje. Pao Kurireu aidure nou taroji rugadu. Nou tare maku inaiboe ure nono roreboe mogadure Pao Kurireu jakai. Mare roreboe ji karega inagoino. Pao Kurireu jordu moture tarore aino i duji. Dujire inagoino. Tarore aino i mare Pao Kurireu aire taroino. Pao Kurireu jakarere pudui tarore aino duji. Dukodire Pao Kurireu ure tagoe kurido baru tada jamedu. Iorduware. Dukodire ire tawie tawo iaboe rogu maku inai. 19Nou imeartorure jiwu Pao Kurireu oe kurire rugadu baru tada. Tameartorure Jesus Cristoji dukodire Pao Kurireu umode tagaidure jiboe jamedu boe maku tagai tawikawo tage boe koia, boe okwakawo tagai. 20Pamago pemegawo Pao Kurireuji pawo ie kurido jii toro. Pagawo pamago pemegareu akedudo rugadu jii toro rugadu.
Paulo Ukimadure Toro Nou Boe Ewagai
21-22Tagimadudo meartorure Jesus jiwuge eiamedu boebo inai. Awu woewu meartorure Jesus jiwuge eiamedu boe etaidure tugimaduwo tawagai jamedu. Ia woewu meartorure Jesus jiwuge emaragodure Roma kejewu boe eimijera kurireu uwai kurireu tada. Emagere etaidure tugimaduwo tawagai rugadu.
23Pagimijera Kurireu Jesus Cristo ro pemegawo tai rugadu jii toro rugadu. Urugadureu.