Mateus

Mateus

Ure Awu Jesus Rore Jiboe Makore Jiboe Bu Bapera Keje

Jesus Uwobe Reo

¹Ainore Jesus Cristo uwobe ekiere. Mariguduwuge uwobe etumana iere Davi.1.1 Mariguduwuge Israel doge eimijera kurireu nure Daviče. Nou mariguduwuge boe eimijerage ewimode dukeje etonaregedu mugumode tumuga keje. Aino čare awu bataru ure parduwado Davi uwobe nure Jesusče rugadu. Dukodire boe eimijera kurireu nure Jesusče rugadu Davi mugato. Nou boe eimijera kurireu bagaire nou Israel doge epagare marigudu. Mare paga karega. Pao Kurireu ure Israel doge ewie marigudu. Pao Kurireu jakarere nou Davi rore jiboeji dukodire ure Davi bie rugadu tumoduie ia Davi uwobe mugudo boe eimijera kurireu mugato Israel doge eimijera kurireuče rugadu. Du akedumodukare rugadu jii toro rugadu. Nou bataru padure 2 Samuel 7.12-13 keje. Mariguduwuge uwobe etuo iere Abraão. ²Abraão onaregedu imedu iere Isaque. Isaque onaregedu imedu iere Jacó.1.2 Nou Jacó ore ime ere doze. Nou ore ime ekie tabore nou boe doge egore to clã dogei. Nono Pao Kurireu ure awu Jacó iedo Israel. Nou bataru padure Gênesis 32.28 keje. Dukodire nou uwobe ekiere Israel doge aino marigudu. Jesus boture dukeje Israel doge ekiekare Israel doge pugeje. Ekiere Judeu doge aino. 1948 joru keje Nações Unidas ure tuwadaru maku Judeu doge etai eno moto moduie pugeje nono Palestina moto keje. Dukodire čare Israel doge eno motore. Iere Israel aino. Dukodire nou boe ekiere Israel doge aino pugeje. Mare ekiere Judeu doge kimo jamedu. Jacó ore ime emagare. Ia iere Judá. ³Judá onaregedu imedu iere Peres. Ia onaregedu imedu iere Zera. Nou Peres, nou Zera etuje iere Tamar. Peres onaregedu imedu iere Esrom. Esrom onaregedu imedu iere Arão. ⁴Arão onaregedu imedu iere Aminadabe. Aminadabe onaregedu imedu iere Nasom. Nasom onaregedu imedu iere Salmom. ⁵Salmom onaregedu imedu iere Boaz. Nou Boaz uče iere Raabe. Boaz onaregedu imedu iere Obede. Nou Obede uče iere Rute. Obede onaregedu imedu iere Jessé. ⁶Jessé onaregedu imedu iere Davi. Boe eimijera kurireu nure ema. Nou Davi ure tugeragu Urias oredujeji toreduječe. Etonaregedu imedure. Iere Salomão. ⁷Salomão onaregedu imedu iere Roboão. Roboão onaregedu imedu iere Abias. Abias onaregedu imedu iere Asa. ⁸Asa onaregedu imedu iere Josafá. Josafá onaregedu imedu iere Jorão. Jorão onaregedu imedu iere Uzias. ⁹Uzias onaregedu imedu iere Jotão. Jotão onaregedu iere Acaz. Acaz onaregedu imedu iere Ezequias. ¹⁰Ezequias onaregedu imedu iere Manassés. Manassés onaregedu imedu iere Amom. Amom onaregedu imedu iere Josias. ¹¹Josias onaregedu imedu iere Jeconias. Jeconias uwiemagere jamedu. Nou Josias ore ime edu kimore Judá moto keje dukeje Babilônia kejewuge tugobaigarege ere tugeragu Judá kejewugei turaga tabo tuduwo ebo toro to moto Babilônia moto ka.1.11 Babilônia moto kejewuge tugobaigarege etaregodure Judá moto ka turugoduwo Judá kejewugei. Turaga tabo ere tugeragu Judá kejewugei rugadu. Ere Judá kejewuge etawuje eno moto piji turaga tabo tuduwo ebo to moto ka tuwo emaragodu rakado pudai nono to moto keje. Jorumode mais ou menos 590 eroino dupiji jii Jesus boture du ka.¹²Babilônia kejewuge ere Judá kejewuge erego Babilônia moto ka dukeje nou Jeconias onaregedu imedure. Ure iedo Salatiel. Nou Salatiel onaregedu imedu iere Zorobabel. ¹³Zorobabel onaregedu imedu iere Abiúde. Abiúde onaregedu imedu iere Eliaquim. Eliaquim onaregedu imedu iere Azor. ¹⁴Azor onaregedu imedu iere Sadoque. Sadoque onaregedu imedu iere Aquim. Aquim onaregedu imedu iere Eliúde. ¹⁵Eliúde onaregedu imedu iere Eleazar. Eleazar onaregedu imedu iere Matã. Matã onaregedu imedu iere Jacó. ¹⁶Jacó onaregedu imedu iere José. Nou José oreduje iere Maria. Nou Maria onaregedure Jesus rema. Nou Jesus iere Pao Kurireu ure boe ekinorudowu nure ema. Ainore Jesus iere.

¹⁷Ainore Jesus uwobe imere. Abraão pijire boe ere catorze jii Davi boture du ka.1.17 Brae egore geração aino awuji. Abraão pijire geração ure 14 jii Davi boture du ka. Abraão piji Jacó boture du ka geração ure pobe. Abraão pijire Peres ka geração ure quatro. Dujire brae egore geração aino. Davi pijire boe ere catorze pugeje jii Babilônia kejewuge ere Judá moto kejewuge etawuje du ka. Judá kejewuge edure Babilônia moto keje du pijire boe ere catorze pugeje jii nou Jesus boture du ka.

Jesus Cristo Boture

¹⁸Ainore Jesus Cristo boture. Uče Maria ure tuwadaru maku boe etai tumugumoduie imedu José apo rugadu. Mare emugukare puapo raga. Eribarikare pui raga. Nogwaredu jeribarikareudo nure nou Mariače rugadu. Mare Maria kuiarure. Pao Kurireu Uwari koiare Maria kuiarure. ¹⁹José jorduwagodure nou tumugumode apowu aredu kuiarure duji. Imedu pemegareu nure Joseče rugadu. Jorduwakare kaba kodiba Maria kuiarure dukodire aidukare tumuguwo apo pugeje. Mare aidukare tuwo Maria pogurudo boe egai. Dukodire ukare boe ewie. Ure tumeardae tawuje tumagowo tu Mariaji tumugumodukaie apo pugeje. ²⁰Nou José ure nou tumeardae tawuje dukeje ia boečoji uniaure. Nou uniau tada ia Pao Kurireu utugare baru tadawu aregodure José ae. Makore José ieji. Akore: – José. Davi onaregedu nure aki. Apagudukaba amuguwo Maria apo rugadu. Reko awai ka amuguwo apo rugadu. Kuiarure mare jeribarikare ia imeduji. Pao Kurireu Uwari koiare ure kuiarudo. ²¹Onaregedu imedumode rugadu. Emare umode boe ekinorudo ewarigudukawo bope doge eda kejewu joruto ero pegareu moriče pugeje. Dukodire tamode iedo Jesus.

Ainore nou Pao Kurireu utugare baru tadawu akore Joseji. ^22-23Marigudu Pao Kurireu makore ia imeduji tuwo boe ewie ainore boemoduie duji. Akore: – Nogwaredu jeribarikareudo kuiarumode. Onaregedu imedu mode. Emode iedo Emanuel1.22-23 Awu bataru padure Isaías 7.14 keje..

Ainore Pao Kurireu akore marigudu. Aino ča nou Pao Kurireu bataru jeture pudui rugadu. (Nou boe egore “Emanuel” aino tuwadaru tabo. Pawadaru tabo pamagore Pao Kurireu Mugure Pagabo.)

²⁴Nono čare José jetadure. Meartorure nou Pao Kurireu makore pudui duji rugadu. Ure Maria reko tuwai ka tumuguwo apo rugadu. ²⁵Mare jeribarikare nou Mariaji jii toro nou Maria kuri buture du ka. Ča Maria kuri buture rugadu. Imedu rugadu. José ure iedo Jesus rugadu.

Jorduwareuge Etaregodure Tuiorduwo Jesusji

¹Jesus boture Belém ba kurireu keje Judéia moto keje. Nou Judéia moto kejewu boe eimijera kurireu iere Herodes. Jesus boture dukeje ia boe tuginaiwuge jorduwareuge etaregodure to moto piji Jerusalém ba kurireu ka. Leste pijire etaregodure. ²Etaregodure Jerusalém ba kurireu ka dukeje enarare nou boe dogei. Egore: – Čerdure Judeu doge eimijera kurireu maiwu o kuieje tuginaiwuji baru tada. Nou kuieje tuginaiwu ruture dukeje čerdure ji. Dukodire čerduware Judeu doge eimijera kurireu maiwu boture rugadu duji. Dukodire čedaregodure aino čewo čebu jodo moto keje jokorai čemago pemegawo ji rugadu. Ema pa? Kaiba rakojere?

³Nou Jerusalém kejewu boe eimijera kurireu Herodes meardure nou egoino duji dukeje mororamagadure rugadu. Jerusalém ba kurireu kejewuge emeardure ewadaruji jamedu dukodire eiamedu boe emororamagadure jamedu. ⁴Dukodire Herodes makore nou ure Judeu doge enomea maku Pao Kurireu aiwuge eimijerage ewagai. Makore nou jorduware Judeu doge eno bakaru jiwuge eiamedu boe ewagai jamedu. Etaregodure dukeje Herodes unarare ei kaiba nou umode boe ekinorudowu botumoduie. ⁵Erduware rugadu dukodire emagore Herodes bataru jipagi. Egore: – Nou umode boe ekinorudowu botumode Belém ba kurireu keje. Ainore nou mariguduwu makore Pao Kurireu bataru jiwu batarure marigudu. Nou bataru padure bapera keje. Akore:

⁶– Belém ba kurireu mugure Judá uwobe eno moto keje. Boe eda kurikareu nure nou Belémče. Boe eimijera kurikareu mugure Belém keje. Mare nou Belém boe eda kejere ia Judeu doge eimijera kurireu botumode nono. Nou boe eimijera kurireu jetu pemegamode iwobe2.6 Pao Kurireu ure tugeragu nou Israel dogei pudae tuwo tuwobedo emage taidu tabo. Etuo pega Abraão meartorure Pao Kurireuji rugadu dukodire roino. Awu bataru padure Gênesis 15.6, 28.13-15 Israel doge eiamedu boei rugadu.2.6 Awu bataru padure Miquéias 5.2 keje.

– Ainore Pao Kurireu akore marigudu.

⁷Nono Herodes makore nou boe tuginaiwuge jorduwareuge ewagai etaregoduwo pudae. Makore ei tuginaigodu. Unarare ei dukodire ere Herodes biedu pemegado nuba merire pudui tuiorduie nou kuieje tuginaiwu rutuie duji. ⁸Nono Herodes makore ei etuwo Belém ba kurireu ka rugadu. Akore: – Tadudo toro rugadu. Tagaiwodo rugadu nou imedu rogu bagai. Tardumode ji dukeje tagirimi kuri mato tawo iwie rugadu kaiba rakojere ituwo toro jamedu iwo ipu jodo moto keje imago pemegawo ji jamedu.

⁹Nou boe tuginaiwuge jorduwareuge emeardure nou Herodes makore puduiwu boeji dukeje eture pugeje. Ča nou erdure jiwu kuieje rakoje kimore baru tada. Erdure ji. Nou kuieje uture etododai rugadu jii je rugadu. Dukeje nou kuieje ure tuwuredo nono nou imedu rogu rakojere tadawu bai aogeje. ¹⁰Nou boe tuginaiwuge jorduwareuge erdure nou kuieje roinoduji dukeje egarere pudui rugadu. ¹¹Ere tuburedo nou baiji. Nono ere turemo nou baito rugadu. Dukejere čare erdure nou imedu roguji. Rakojere tuje Maria apo rugadu. Nou jorduwareuge ere tubu jodo moto keje nou imedu rogu jokorai tumago pemegawo ji. Emago pemegare ji rugadu. Nono ere toe tadaboe jado tuwo toe maku nou imedu rogu ai. Ere toe mori kurireu maku ai rugadu. Ere tori kuieje maku imedu rogu ai. Ere roreboe mori kurireu maku ai. Ere jorubo pemegareu mori kurireu maku ai. Nou jorubo pemegareu iere mirra. ¹²Nou boečoji eniaure Pao Kurireu aregodure pudae duji. Pao Kurireu makore ei pagaie Herodes akoino ei. Pao Kurireu makore ei ekaiago tugirimi Herodes ae. Dukodire nou barogwato ekare tugirimi Herodes ae rugadu. Eture ia awaraji Belém piji tuduwo to moto ka rugadu.

José Maria Eregodure Tonaregedu Apo Egito Moto Ka Herodes Piji

¹³Nou boe tuginaiwuge jorduwareuge eture dukeje José uniaure Pao Kurireu utugare baru tadawu aregodure pudae duji. Nou Pao Kurireu utugare baru tadawu makore Joseji. Akore: – Aragojedo. Akeragu imedu roguji tuje apo jamedu taregodudo toro Egito moto ka tawo tawiado toro Herodes piji. Herodes aiwomode nou imedu rogu bagai tuwo nou imedu rogu bito. Tarego piji toro Egito moto ka. Tagaba tagirimi tago moto ka jii toro ire tawie kejewu meri ka. Imire imode tawie kaba meri kejeba tamode tagirimi tago moto ka pugeje.

Ainore Pao Kurireu akore Joseji uniau tada. ¹⁴Dukodire José ure turagojedo kuri je nou boečoji rugadu. Ure tugeragu nou imedu roguji, nou učeji. Eture nou boečoji rugadu nou tieda piji tuduwo toro Egito moto ka. Eture jii toro etaregodure Egito moto ka rugadu. ¹⁵Emugu raire nono Egito moto keje jii nou Herodes bire kejewu meri ka. Marigudu Pao Kurireu ure boe ewie ainore eromoduie. Makore Pao Kurireu bataru jiwu ure nou bataru bu bapera keje. Akore: – Imagore itonaregedu bagai utuwo Egito moto piji2.15 Awu bataru padure Oséias 11.1 keje..

Aino nou bataru jeture pudui rugadu.

¹⁶Ča nou boe tuginaiwuge jorduwareuge ere činorudo Herodes piji. Ekare tugirimi ae rugadu. Nou Herodes jorduwagodure nou inoduji dukodire korigodure rugadu. Aidure tuwo nou imedu rogu bito marigudu. Mare nou jorduwareuge ekare tuiorduwado duboba nure ema duji. Dukodire korigodure. Makore to tugobaigaregei etuwo Belém ba kurireu ka ewo boe etore ime eiamedu ewido rugadu. Nou boture maibariwuge, nou jorure mitotu, pobetu kejewuge eiamedu boe ewido. Emode nou Belém ba kurireu tadawuge boe etore kugure ime ewido, nou mugure pureduwuge boe etore ime ewido jamedu. Nou boe tuginaiwuge jorduwareuge ere Herodes bie kaba meri kejeba eture to moto piji. Dukodire Herodes meardaere jorumoduie pobe ei etaiwore bagaiwu imedu roguji. Dukodire makore to tugobaigaregei ewo nou boe etore ime ewido, ewo nou boture maibariwuge ewido, nou o jorure mitotu, pobetu kejewuge boe etore ime ewido jamedu. Dukodire nou tugobaigarege eture toro. Ere nou boe etore ime eiamedu boe ewido rugadu Belém ba kurireu keje, nou rakojere nou Belém ba kurireu pureduwuge ewido jamedu. ¹⁷Pao Kurireu ure boe ewie nou inoduji marigudu. Ure tuwadaru maku makore Pao Kurireu bataru jiwu Jeremias ai. Akore:

¹⁸– Boe eda Ramá rakoje jaekare Belém piji. Ramá kejewuge etragudu rakamode rugadu. Ekiarigodumode rugadu. Boe emeardumode etraguduji rugadu. Nou moto kejewuge etuje Raquel uwobe areme etragudumode tore ewagai. Boe erduwamodukare tuwo ewudugugo nou tugiarigodure dupiji. Etore kugure eiamedu boe ewire dukodi.2.18 Awu bataru padure Jeremias 31.15 keje.

Ainore Pao Kurireu akore marigudu. Aino čare nou Pao Kurireu bataru jeture pudui rugadu.

José Ure Tugirimi Egito Piji Maria Apo Jesus Apo Jamedu

¹⁹Toro ia meri keje Herodes bire rugadu. Nono ia Pao Kurireu utugare baru tadawu aregodure José ae toro Egito moto ka. Makore Joseji uniau tada. ²⁰Akore: – Nou aidure tuwo imedu rogu bitowu bokware. Aino ča taragojedo taduwo taibagi tago moto ka pugeje, aki, nou imedu rogu, nou uče jamedu tawo tagirimi Israel moto ka.

²¹Dukodire José ure turagojedo. Ure tugeragu toredujeji, nou imedu roguji dukeje eture rugadu toro to moto Israel moto ka rugadu. ²²Kodure awaraji dukeje José meardure nou imedu Arquelau muguie tuo Herodes mugato boe eimijera kurireuwo ema nono Judéia moto keje. Dukodire José pagudure tuduwo Judéia moto ka. Uniau tadare Pao Kurireu ure bie jamedu utukawo toro Judéia moto ka. Dukodire José uture toreduje apo nou imedu rogu apo jamedu toro Galiléia moto ka. ²³Etaregodure Galiléia moto ka dukeje eture toro Nazaré ba kurireu ka tumuguwo nono. Marigudu Pao Kurireu ure boe ewie eromoduie aino. Nou makore Pao Kurireu bataru jiwuge ere nou Pao Kurireu bataru bu bapera keje. Akore: – Nou umode boe ekinorudowu iemode Nazaré ba kurireu pijiwu nure ema.

Ainore Pao Kurireu akore marigudu. Aino ča nou Pao Kurireu bataru jeture pudui rugadu.

João Batista Makore Jiboe Reo

¹Ia meri keje João Batista rakojere boe maereu keje Judéia moto keje. Nonore rakojere tumago tabo Pao Kurireu bataruji. ²Akore: – Tagera ra taro pegareu piji. Boe puredugodu Pao Kurireu uwo boe eimijera kurireudo pudumi rugadu.

³Ainore João Batista akore. Marigudu Pao Kurireu ure boe ewie ia makore Pao Kurireu bataru jiwu aregodumoduie nono João Batista mogadure rugadu. Mariguduwu makore Pao Kurireu bataru jiwu Isaías ure nou Pao Kurireu bataru bu bapera keje. Akore:

– Ia imedu uwadodunure boe maereu keje boe ewo awara jetorodo boe eimijera aregodu pemegawo boe etae. Mare awara ji karega akoino. Boe ewo turo jetorodo. Dujire akoino. Boe ewo turo pemegado, umode boe ekinorudowu imedu aregodumode Pao Kurireu piji kodi. Dujire akoino.3.3 Awu bataru padure Isaías 40.3 keje.

João Batista jirabodu Pao Kurireu akoino. ⁴João Batista ukudaure camelo buče. Pegajejewure tapira biri rema. Okwagere tu kitariga dogei, ropa doge eweguruji tu rugadu. ⁵Boe emagare tudu tabo João Batista ae. Etaregodure Judéia moto piji. Etaregodure Jerusalém ba kurireu piji. Etaregodure Jordão Po okwaiwu moto jamedu boe piji tumearduwo João Batista makore jiboeji. ⁶Emeardure João Batista bataruji dukeje emagore turo pegareu jiboeji, taiduie tuwo tugera ra nou turo pegareu jiboe piji. Nono João Batista ure etao pegodo Jordão Po tada.

⁷Mare ia fariseu3.7 Fariseu doge Judeu doge eimijerage nure emage. Fariseu doge emeardae pemegare pudui. Emeardaere turo pega karegure. Ere turagado pudui tuiorduwawo makudure Judeu doge etaiwu bakaru jamedu boeji. Emeardaere tuiorduwaie Pao Kurireu bataruji rugadu. Mare etaidure boe emeartoruwo tu pudui rugadu. Ere boe eimijerage kurireugedo pudumi rugadu. Dukodire ere boe rakado Judeu dogei rugadu tuwo Judeu doge ero jetorodo tiagai rugadu. doge etaregodure João Batista ae. Ia saduceu3.7 Saduceu doge Judeu doge eimijerage nure emage jamedu. Saduceu doge etaidure oe kurireugei. Ewiapagakare marenarue dogei rugadu. Emeardaere boe ewimoduie dukeje etageduie rugadu. Egore boe eewodumodukaie pugeje rugadu. doge etaregodure João Batista ae jamedu. Judeu doge eimijerage nure emage. Etaregodure João Batista ae etao pegododuwo jamedu. Mare etaidukare tuwo tugera ra nou turo pegareu piji. Dukodire João Batista makore ei. Akore: – Tare nono awage pegareuge emogadure. Mare awagu ji karega inagoino. Tare tadugarege Judeu doge ekiripagado. Tagagore taro pemegaie mare ro pegareuge nure tagi rugadu. Kočare tagaregodure mato iwagai. Tarokwačereu bokware. Pao Kurireu umode boe pegado tai taro pegareu moriče rugadu. ⁸Mare taro jetorodo tarore jiboeji boe erduwo taroji boe erduwawo tare tagera ra taro pegareu piji duji. ⁹Mare tamodukare tagera ra taro pegareu piji dukeje Pao Kurireu uwobe emodukare tagi. Tagagore boe etuo Abraão ore enuie tagi dukodire Pao Kurireu uwobe enuie tagi. Ainore tagagore. Boe jokodu jire tagagoino. Abraão uwobe nure tagi rugadu. Mare du inodu kodi karega Pao Kurireu ro pegamodukare tai taro pegareu moriče. Ro pegareuge nure tagi rugadu. Dukodire tagare nono Abraão uwobe remawuge emogadure pugeje. Pao Kurireu roiware tuwo tori udo nono boe mogadure tuwo Abraão uwobedo emage tamugato. ¹⁰Boe emode tudureboe i butudo jerigiče tudu bokware dukodi. Tagi tagagomode tamoduie tagera ra taro pegareu piji mare taro pemegamodukare, tameardae pemegamodukare dukeje Pao Kurireu ro pegamode tai jamedu nono boe erore nou jerigi jitu mogadure. Mare jerigi ji karega inagoino. Boe pegamode tai rugadu. Dujire inagoino. Pao Kurireu umode boe pegado tai taro pegareu moriče kuri je rugadu. Dujire inagoino. ¹¹Boe ere tugera ra turo pegareu piji dukodire ire etao pegodo pobo tabo. Mare ia imedu ro kodumode ikoriwu aregodumode kuri iregodaji. Boe pemegareu nure ema, boe kurireu mode ema rugadu. Dukodire ipogurumode ipureduwo ji, kurikareu nure imi kodi. Emare umode Tuwari tugu boe emeardaeto boe ero pemegawo. Umode ro pegareuge ewarigu joruto jamedu. ¹²Romode nono ia imedu rore trigo jitu mogadure. Imedu umode trigo jukodo baku tabo tuwo iwo tawuje nou trigo piji. Nou trigo remawure umode tugu baito. Nou iwore umode barigu joruto. Nou umode boe ekinorudowu romode aino boei jamedu. Meartorure Pao Kurireu jiwuge ere nono trigo mogadure. Mare trigo ji karega inagoino. Umode boe ekinorudowu umode meartorure Pao Kurireu jiwuge etawuje ro pegareuge epiji tuwo edudo pudabo. Dujire inagoino. Umode ro pegareuge ewarigu bope doge eda kejewu joru pegareuto. Dujire inagoino. Nou joru akedumodukare rugadu.

Ainore João Batista akore.

Jesus Ao Pegododure

¹³Ia meri keje Jesus uture Galiléia moto piji toro Jordão Po ka, João Batista bagai, João Batista uwo Jesus ao pegodo. ¹⁴Jesus aregodure João Batista ae mare João Batista aidukare tuwo Jesus ao pegodo. Akore: – Ro pegareu nure imi dukodire ipemegakare iwo akao pegodo. Aki apemegare awo itao pegodo rugadu.

¹⁵Mare Jesus akore: – Boro. Amode itao pegodo rugadu. Ainore Pao Kurireu meardaere. Amode itao pegodo dukeje pamode Pao Kurireu makore jiboe jamedu boe jetudo pudui. Aino Pao Kurireu meardae pemegareu jire paroino rugadu.

Dukodire João Batista ure tumeardaedo nono Jesus makore jiboe mogadure. ¹⁶Ure Jesus ao pegodo rugadu. Dukeje Jesus ure tudawuje Jordão Po piji. Nono barure tuiado. Jesus jordure Pao Kurireu Uwari ure turawuje baru piji rugadu. Ure nono metugore. Ure tumugudo Jesus keje. ¹⁷Nono Pao Kurireu makore baru piji. Akore: – Itonaregedu reo. Imeardu kurire ji rugadu. Ure iagaredo i rugadu.

Mareboe Aidure Tuwo Jesus Meardae Pegado Tumeardaeji

¹Nono Pao Kurireu Uwari makore Jesusji utuwo toro boe maereu ka. Nonore mareboe doge eimijera4.1 Bope doge eimijera jire akoino. Iere Satanás. umoduie turokogado Jesusji tuwo Jesus meardae pegado tumeardaeji. ²Torore merire quarenta Jesusji. Nou meri jameduji Jesus okwagekare iaboeji iaboeji. Dukodire uke boeire ji. ³Nono nou mareboe aregodure Jesus ae rugadu. Akore: – Pao Kurireu onaregedu remawu mode aki dukeje amagodo awu toriji uwo tudo nono amireu mogadure awo kowuje.

⁴Jesus akore: – Padure bapera kejewu Pao Kurireu bataru koiare iromodukare nono ameardae mogadure. Nou bakaru akore: “Boe eke mitodu tabo karega imedu rakojemode moto keje mare Pao Kurireu o bataru jamedu boe tabo.”4.4 Awu bataru padure Deuteronômio 8.3 keje.

⁵Mareboe eimijera uture Jesus apo toro Jerusalém ba kurireu ka. Uture apo toro Pao Kurireu uwai ričoreu ao ka. ⁶Nono makore Jesusji pugeje. Akore: – Pao Kurireu onaregedu remawu mode aki dukeje amode akaredo awu bai ričoreu ao piji toro moto ka. Padure bapera kejewu Pao Kurireu bataru akore tumoduie tudugarege baru tadawuge ekera bararedo ai. Etu pemegamoduie ai akawo akogorido. Awure jamedu jetumodukaie toriji4.6 Awu bataru padure Salmo 91.11-12 keje..

⁷Mare Jesus akore: – Boro iromodukare aino. Nou padure bapera kejewu Pao Kurireu bataru remawu akore: “Boe ekawo turokogado Pao Kurireuji.”4.7 Grego doge egore boe emeartorure jiwu Boe Eimijera Kurireu Pao Kurireu aino tuwadaru tabo boe ekawo turokogado ji. Mare boe emagokare aino. Dukodire akore Pao Kurireu aino tu je. Awu bataru padure Deuteronômio 6.16 keje.

^8-9Dukejere nou mareboe eimijera uture Jesus apo toro ia tori kurireu ao ka. Ure Jesus jordudo moto jamedu boeji tači je. Akore: – Awu moto jamedu boe makudure inai inoče. Awu moto kejewuge eimijera nure imi. Itaidumode dukeje imode awu moto maku itaidure jiwuge etai. Ča amode apu jodo iogorai akagomode akaiduie i amoduie akimijerado imi ameartoruwo i dukeje imode awu moto jamedu boe maku akai, imode awu moto kejewuge eimijerado aki.

¹⁰Jesus akore: – Boro. Iromodukare aino. Padure bapera kejewu Pao Kurireu bataru akore: “Boe etaiduwo tu Pao Kurireuji ewo tubu jodo moto keje tu Pao Kurireu jokorai emago pemegawo tu Pao Kurireuji rugadu. Boe emeartoruwo tu Pao Kurireuji rugadu.”4.10 Awu bataru padure Deuteronômio 6.13 keje. Mare akiere Satanás. Mareboe nure aki rugadu. Ča atudo ipiji.

¹¹Dukodire mareboe eimijera uture Jesus piji rugadu. Nono Pao Kurireu utugarege baru tadawuge etaregodure Jesus ae. Etu pemegare Jesusji rugadu.

Jesus Ure Boe Erduwado Pao Kurireu Bataruji

¹²Mare boe eimijera ure João Batista tugu baičoreuto. Ča Jesus meardure nou inoduji dukeje ure tugirimi Galiléia moto ka Nazaré ba kurireu ka. ¹³Nono Jesus uture Nazaré ba kurireu piji. Uture toro Cafarnaum ba kurireu ka. Nou Cafarnaum ba kurireu mugure nou pobo maereu okwai. Nou pobo maereu iere Galiléia. Naftali moto kejere nou Cafarnaum ba kurireu mugure. Nou Cafarnaum ba kurireu mugu puredure Zebulom motoji jamedu. ¹⁴Dukodire ia Pao Kurireu bataru jeture pudui. Nou makore Pao Kurireu bataru jiwu imedu Isaías ure nou bataru bu bapera keje. Akore:

^15-16– Nou iere Galiléia aino jiwu pobo maereu okwai Zebulom moto mugure, Naftali moto mugure jamedu. Boe ekodumode nou moto kajeje taregoduwo nou pobo maereu ka, taregoduwo Jordão Po ka jamedu. Boe tuginaiwuge emugure nou moto keje jamedu. Nou boe emugu pemegakare. Emugure boečo tada. Emugure kejewu moto ure nono bireuge eda mogadure. Mare boečo ji karega inagoino. Nou boe erduware tuwimoduie. Dujire inagoino. Erduwakare tuwo tuginorudo nou tuwi piji. Dujire inagoino. Mare aino erdure ia jorugu kurireuji. Ure nono meri joku rutu mogadure. Mare jorugu ji karega inagoino. Meri joku rutu ji karega inagoino jamedu. Umode boe ekinorudowu jire inagoino. Boe erduware umode boe ekinorudowuji. Dujire inagoino.4.15-16 Awu bataru padure Isaías 9.1-2 keje.

Ainore Pao Kurireu akore marigudu. Aino čare Jesus aregodure. Dujire nou Pao Kurireu bataru akoino.

¹⁷Nou meri kejere Jesus makogodure boei. Makore tu tu je boe ewiagai tuwo boe erduwado Pao Kurireu meardaeji. Akore: – Tagera ra taro pegareu piji. Kuri aino Pao Kurireu umode boe eimijera kurireudo pudumi rugadu.

Jesus Makore Nou Ture Jorduwadowuge Boetojiwuge Etae

¹⁸Ia meri keje Jesus merure nou Galiléia Po Maereu okwaji. Nono jordure Simãoji nono pobo okwai. Nou Simão iere Pedro jamedu. Jesus jordure nou Simão umanaji jamedu. Nou umana iere André. Nou ime pobedu doge ere tuwuge barigu poboto kare ewagai. Emaragodae reno. ¹⁹Nono Jesus makore etae. Akore: – Mato itabo. Imode tawogudo ime ewagai. Mare tawogu ji karega inagoino. Tamode boe emeartorudo Pao Kurireuji. Dujire inagoino.

Ainore Jesus akore. ²⁰Ča nou ime pobedu doge ere tugera ra tuwuge piji tači je. Eture Jesus apo rugadu tumaragodae piji rugadu.

²¹Eture ji je dukeje erdure ia boei pugeje. Zebedeu ore ime nure emage. Ere pobe. Ia iere Tiago. Nou uwie imedu iere João. Emugure tuo apo to ika kurireu tada. Emaragodure tuwugeji tuwo tuwuge pemegado. Nono Jesus makore etae. ²²Ča eture to ika kurireu piji kuri je. Nono eture tuo piji tuduwo Jesus apo rugadu.

Jesus Ure Kogodureuge Epemegago

²³Nono Jesus kodure nou Galiléia moto jamedu boe parugajeje tuwo boe eiamedu boe erduwado Pao Kurireu bataruji. Ure turemo tu tu nou Judeu doge ere bato puiwu to baito tuwo erduwado nono. Ure ewie tu tu je Pao Kurireu umoduie boe eimijera kurireudo pudumi kuri aino rugadu. Ure kogodureuge epemegago jamedu. ²⁴Nou Jesus akaru ure tumaedo Síria moto jamedu boe ka. Dukodire boe etaregodure Jesus bagai kogodureuge eiamedu boebo. Iage etaora, emorora, ekana, epogora korire ei rugadu. Bope doge emedure iage etada. Iage epogora pegare emeru bokware. Iage ewi kigodure tu tu je tumagadu tabo. Jesus ure awu kogodureuge eiamedu boe epemegago. ²⁵Boe emagare taregodu tabo Jesus ae tuduwo Jesus apo rugadu. Boe etaregodure Galiléia moto piji, Decápolis moto piji, Jerusalém ba kurireu piji, Judéia moto piji. Nou torowu Jordão Po bakowu kejewuge boe ekurugodure nou pobo kajeje mato Jesus ae tuduwo apo jamedu.

Jesus Ruture Tori Ao Ka Tuwo Boe Erduwado

¹Jesus jordure nou boei dukeje ruture ia tori kurireu ao ka. Nono ure tumugudo. Nou ure jorduwadowuge etaregodure Jesus ae jamedu. ²Nono Jesus makore ei tuwo erduwado. Akore: – ³Ia boe enojarokare pudui. Dukodire eragojemode Pao Kurireu apo. Ere tugimijerado ema dukodire eragojemode apo rugadu boe pemegareu keje. Dukodire egaremode pudui. Boe pemegamode ei rugadu. ⁴Ia boe etragudure tugiarigodure dukodi. Mare du inodu tabo Pao Kurireu umode ewudugugo. Dukodire egaremode pudui rugadu. Boe pemegamode ei rugadu. ⁵Ia boe emaragodu pemegamode tugimijera ai mare ekorigodumodukare ji rugadu. Mare Pao Kurireu umode tumagore jiboe maku nou maragodu pemegareuge etai rugadu. Dukodire egaremode pudui. Boe pemegamode ei rugadu. ⁶Ia boe ere turagado pudui tumeartoruwo Pao Kurireuji tuwo turo jetorodo. Ewiagorore tu turo pemegawo tu rugadu. Ewiapagakare iaboeji iaboeji. Dukodire Pao Kurireu umode turaga maku etai rugadu ewo turo jetorodo. Dukodire egaremode pudui. Boe pemegamode ei rugadu. ⁷Ia boe enogudugodure boebo rugadu. Dukodire Pao Kurireu okudugodumode ebo nou ero jipagi. Dukodire boe pemegamode ei rugadu. Egaremode pudui rugadu. ⁸Ia boe emeardae pegareu bokware. Emeardae pemegare. Boe pemegamode ei rugadu. Erdumode Pao Kurireuji tuioku tabo rugadu. Dukodire egaremode pudui rugadu. ⁹Ia boe erugodukare boei. Emago kigodure boei erugodukawo pui pugeje epemegawo pui rugadu. Boe pemegamode nou boei. Pao Kurireu umode toredo emage. Dukodire egaremode pudui rugadu. ¹⁰Ia boe emeartorure Pao Kurireuji dukodire ro pegareuge emago pegare ei, ero pega kigodure ei. Mare du inodu tabo boe pemegamode nou meartorure Pao Kurireu jiwugei. Ere tugimijerado Pao Kurireuče dukodire eragojemode Pao Kurireu apo rugadu boe pemegareu keje. Dukodire egaremode pudui rugadu. ^11-12Tameartorumode imagore tai jiboeji dukodire boe emago pegamode tarore jiboeji boe emeartorukawo tai pugeje. Tagodumode iwadaru kodaji dukeje boe emago pegamode tai, ero pegamode tai, egomode taro pegaie tuwadrarodu tabo. Ainore ewobe emago pegare jamedu jaoboei. Mariguduwuge ewobe ero pegare nou mariguduwuge makore Pao Kurireu bataru jiwugei jamedu. Mare tare tameartorudo i dukodire emago pegare aino tai jamedu. Mare kočare tameartorukaba egoino jiboeji. Taegaredo tai. Mare paga karega. Pao Kurireu umode mori kurido tagai toro baru tada. Dukodire čare taegaregodumode tai rugadu.

Boe Ere Nono Sal Mogadure Ere Nono Jorugu Mogadure

¹³Jesus mako kimore. Akore: – Tameartorure i dukodire tare nono sal mogadure. Sal pemegare. Mare nou sal pegomode dukeje nou sal akedumode. Nono umodukare nono sal mogadure pugeje. Dukodire boe eromodukare iaboeji nou sal tabo pugeje. Emode barigu. Ewure jomode keje. Mare sal ji karega inagoino. Tameartorure i. Dujire inagoino. Tagaba tagera ra tameartorure i dupiji. Nono meartorukareuge erdumode taro pemegareuji. Nono etaidumode tumeartoruwo i jamedu. Dujire inagoino.

¹⁴– Tameartorure i dukodire tare nono jorugu mogadure. Boe emode jorugudo ia tori kurireu ao keje dukeje boe eiamedu boe erdumode joruguji. ¹⁵Boe emode pori bu jorugu aogeje dukeje urugumodukare. Mare boe emode jorugu bararedo, uruguwo pudui. ¹⁶Mare jorugu ji karega inagoino. Tameartorure i. Dujire inagoino. Tamodukare tagera ra tameartorure i dupiji dukeje boe erdumode taro pemegareuji. Dujire inagoino. Boe erdumode taro pemegareuji dukeje emago pemegamode tameartorure jiwu Pao Kurireuji. Emagomode Pao Kurireu bagai baruto. Dujire inagoino.

Moisés Ure Maku Judeu Doge Etaiwu Bakaru Reo

¹⁷– Ia boe egore itaregoduie iwo Moisés ure maku Judeu doge etaiwu bakaru akedudo. Mare itaregodukare iwo nou bakaru akedudo. Ia boe egore itaregoduie iwo makore Pao Kurireu bataru jiwuge emagore jiboe akedudo. Mare itaregodukare iwo nou emagore jiboe akedudo. Itaregodure iwo Moisés ure maku Judeu doge etaiwu bakaru makore jiboe jetudo pudui. Itaregodure iwo nou makore Pao Kurireu bataru jiwuge emagore jiboe jetudo pudui. ¹⁸Moisés makore jiwu Pao Kurireu o bakaru jetumode pudui rugadu. Nouia makore Pao Kurireu bataru jiwuge emagore jiwu Pao Kurireu o bakaru jetumode pudui rugadu. Nou Pao Kurireu o bakaru tadawu ia bataru rogu akedumodukare piji rugadu jii toro moto akedumode du ka, jii toro baru akedumode du ka. Nou makore jiboe jamedu boe jetumode pudui rugadu. Boe jokodu jire inagoino rugadu. ¹⁹Ia boe emeartorumodukare awu Pao Kurireu bakaru tadawu bataru roguji. Emode ia boe emeartoru bokwado nou bataru roguji jamedu dukeje Pao Kurireu umode boe eimijerado pudumi dukeje mako pegamode ei. Akomode nou roinowugei: – Itugarege jorduwakareuge nure tagi pemegakareuge nure tagi. Ainore Pao Kurireu akomode ei. Umode boe eimijera kurireudo pudumi dukeje ainore akomode ei rugadu. Mare ia boe emeartorumode awu Pao Kurireu bataruji, emode boe erduwado awu Pao Kurireu bataruji dukeje Pao Kurireu mako pemegamode ei. Akomode ei erduwaie epemegaie ekurie nou tudugarege eiamedu boe ekori. Pao Kurireu umode boe eimijera kurireudo pudumi dukeje ainore akomode ei. ²⁰Iwo tawie. Pao Kurireu umode boe eimijera kurireudo pudumi rugadu. Mare tamodukare taro jetorodo fariseu doge ero kori dukeje tagimijera umodukare Pao Kurireuče. Tamodukare taro jetorodo nou jorduware Judeu doge eno bakaru jiwuge ero kori dukeje tagimijera umodukare Pao Kurireuče.

Boe Ekawo Boe Ewido

²¹– Marigudu Pao Kurireu makore boei ekawo boe ewido.5.21 Awu bataru padure Êxodo 20.13 keje. Tarduware nou bataruji marigudu. Pao Kurireu akore boe emoduie boe ewido dukeje boe eimijerage emoduie boe pegado ei ero pegareu moriče. ²²Mare imode tawie Pao Kurireu meardae remawuji. Boe ekorigodumode timediaji dukeje Pao Kurireu umode boe pegado ei nono turo moga nou ure boe ewidowu jitu mogadure. Ia pugeje. Ia boe akomode timediaji boe kaieguie ema dukeje nou metia umode nou akoino puduiwu reko Judeu doge ekimijerage etae ewo boe pegado ji nou bataru pegareu moriče. Ainore tarore. Mare imode tawie Pao Kurireu meardae remawuji. Ia boe akomode timediaji jorduwa bokwaie rugadu dukeje boe pegamode ji rugadu. Umodukare togwa ra nou tuwadaru pegareu piji dukeje barigudumode bope doge eda kejewu joru pegareuto rugadu. ²³Dukodire imode tawie. Tagaregodumode Pao Kurireu uwai ka ia tagoe tabo tawo maku Pao Kurireu ai. Mare tagaregodu keje tawiabuture ia taro pegare tamedia jitu keje. Nou tamedia jordu pemegakaie nou taroino pudui duji. ²⁴Dukodire tamode nou tagoe bu moto keje nono Pao Kurireu uwai tada taduwo kuri nou tamedia bagai. Tardumode nou tamediaji dukeje tamago pemegado ji tagiarigoduie nou taro pegareuji, tamodukaie nou taro towuje pugeje. Dutabore tamode tabemegado ji pugeje. Tabemegamode pui pugeje dukeje tamode tagirimi Pao Kurireu uwai ka tawo nou tagoe maku Pao Kurireu ai rugadu. ²⁵Ia boe ekorigodumode tai. Egomode tumoduie tarego boe eimijera kurireu ae tumago pegawo ia tarore jiboeji nou boe eimijera biagai. Nou boe eimijera makomoduie tai tawo iaboe maku nou boe etai taro pegareu moriče. Nou boe eimijera umoduie tamagu tugobaigarege etai. Umoduie tadugu baičoreuto. Ainore nou korigodure taiwuge egomode. Parduwakare boemode aino tai rugadu duji. Dukodire imode tawie. Ia boe ekorigodumode tai. Emagomode tai tumoduie tarego boe eimijera bagai aiwowo ia taro pegareu bagai dukeje tamago pemegado ei tawo nou boe ekorigoduredu barigu epiji. Taro pemegado ei ekorigodukawo tai pugeje kuri je. ²⁶Boe jokodu jire inagoino. Tamodukare tabemegado nou korigodure taiwugei dukeje emode tarego boe eimijera bagai rugadu. Nou boe eimijera umode tadugu baičoreuto rugadu. Taedumode nono jii tamode taro pegareu morido du ka.

Boe Eribarikawo Toreduje Piji Toredu Piji

²⁷– Marigudu tarduware bakaruji rugadu. Akore boe eribarikaiago toreduje piji toredu piji.5.27 Awu bataru padure Êxodo 20.14 keje.²⁸Mare aino čare imode tawie Pao Kurireu meardae remawuji. Boe etaiwomode areduji tumeardae pegareu tabo tuwo tugeragu nou areduji. Dutabore emeardae ure nono boe ero moga tieribari tabo jitu mogadure Pao Kurireu jakai. Dukodire Pao Kurireu jordu pegare nou emeardaeji. ²⁹Boe etaidukare tuioku bokwawo. Mare epagudure tuwariguduwo bope doge eda kejewu joru pegareuto rugadu. Dukodire imode tawie. Taeku umode tameardae pegado dukeje nou taeku tawuje. Mare taeku remawu ji karega inagoino. Tagaidure jiwu tameardae pegareu jire inagoino. Nou tameardae pegareu barigu tagaora piji rugadu tameardaekawo nou tameardae pegareuji pugeje. Dujire inagoino. ³⁰Boe etaidukare tugera kadoduwo tugana piji. Mare epagudure tuwariguduwo bope doge eda kejewu joru pegareuto rugadu. Dukodire imode tawie. Tagera umode taro pegado dukeje nou tagera kado tagana piji rugadu. Mare tagera remawu ji karega inagoino. Tagaidure jiwu taro pegareu jire inagoino. Nou taro pegareu barigu tabiji rugadu tarokawo nou taro pegareuji pugeje. Dujire inagoino.

Boe Ekawo Tugera Ra Toreduje Piji Toredu Piji

³¹– Marigudu Moisés ure taro maku tagai. Akore ia imedu umoduie tugera ra toreduje piji dukeje umoduie bapera atugodo tuwo maku toreduje ai tuwo toreduje bie tuie tugera ra piji duji. Umoduie tugie bu nou bapera atugododureu keje rugadu.5.31 Awu bataru padure Deuteronômio 24.1 keje.³²Mare imode tawie Pao Kurireu meardae remawuji. Imedu umode tugera ra toreduje piji mare mugumode ia aredu apo pugeje. Du pegare Pao Kurireu jakai rugadu. Nou imedu ro peganure nou toreduje boetojiwudo piji rugadu. Ure tudo nono jeribarire toreduje pijiwu mogadure Pao Kurireu jakai. Mare imedu oreduje jeribarimode nou toredu piji dukeje nou imedu aidumode tuwo tugera ra toreduje piji du pegakare. Mare imedu oreduje jeribarikare toredu piji mare nou imedu umode tugera ra toreduje piji dukeje ro peganure nou toredujeji rugadu. Turoino dutabo umode toreduje udo nono jeribarire toredu pijiwu aredu mogadure Pao Kurireu jakai. Imedu jamedu mugukawo ia aredu ure tugera ra toredu pijiwudo apo. Mugumode apo dukeje umode tudo nono jeribarire toreduje pijiwu mogadure Pao Kurireu jakai.

Boe Emode Tuwadaru Maku Du Reo

³³– Marigudu Pao Kurireu makore boei emagomoduie Pao Kurireu ie tabo turomode jiboeji dukeje ekawo tuwadaru pogurudo. Mare boe emagomoduie Pao Kurireu ie tabo dukeje nou emagore jiboe ewo towuje rugadu. Tarduware nou bataruji marigudu. ^34-37Mare imode tawie Pao Kurireu meardae remawuji. Tamagokaba iaboe iaboe ie tabo. Mare tamagodo tameardae pemegareuji. Tawadrarodukaba rugadu. Tamagomode jiboe jetudo pudui rugadu. Tagaba tawadaru pogurudo. Tamagomode uu taromoduie ia taroji dukeje tarodo ji rugadu. Tamagomode boro taromodukaie ia boe eroji dukeje tarokaba ji rugadu. Ia boe emagore baru ie tabo tuwo boe emeartorudo tuwadaruji. Mare tamagokaba baru ie tabo. Nonore Pao Kurireu mugure. Ia boe emagore moto ie tabo tuwo boe emeartorudo tuwadaruji. Mare tamagokaba moto ie tabo. Nonore Pao Kurireu umode tuwure udo tamudo. Ia boe emagomode Jerusalém ba kurireu ie tabo tuwo boe emeartorudo tuwadaruji. Tamagokaba Jerusalém ba kurireu ie tabo. Jerusalém tadare Pagimijera Kurireu mugumode rugadu. Ia boe emagomode taora ie tabo tuwo boe emeartorudo tuwadaruji. Mare tamagokaba tagaora ie tabo. Taroiwakare tawo tagao čoreu kigadudo. Taroiwakare tawo tagao kigadureu čodo pugeje. Tu Pao Kurireu emare roiware tuwo boe etao udo nono tumeardae mogadure. Dukodire inagoino. Tawadrarodukaba. Tamagore jiboe jamedu boe jetudo pudui rugadu tawo boe emeartorudo tawadaruji. Mareboe aidure boe ewadraroduwo boe emeartorukawo pui. Dukodire nou mareboe meardae jire boe eroino tumagowo iaboe ie tabo ia tumagore jiboeji.

Boe Ero Pegareu Mori Reo

³⁸– Marigudu Pao Kurireu ure boe ewie nuba eromoduie tuwo ia boe ero pegare jiboe morido etai. Akore boe erowo ji nono ro pegare jitu mogadure. Ia boe umoduie ia timedia joku pegado dukeje boe ewo nou ro pegare timedia jiwu joku pegado jamedu ro pegare timedia jitu moriče. Ia boe umoduie ia timedia o kado dukeje boe ewo nou ro pegare timedia jiwu o kado jamedu ro pegare timedia jitu moriče. Tarduware nou Pao Kurireu bataruji marigudu.5.38 Awu bataru padure Êxodo 21.24 keje, Levítico 24.20, Deuteronômio 19.21 keje jamedu.³⁹Mare imode tawie Pao Kurireu meardae remawuji rugadu. Tagaba ro pegareu rore taiboe morido ai. Ia ro pegareu umode tugera to taeji tae abowu metia maku ai jamedu uwo tugera to ji jamedu. ⁴⁰Ia boe etumode boe eimijera bagai tuwo tugeragu tagudau meture taiwuji tabiji dukeje maku etai rugadu. Mare ia tagudau okwatorureu biaku epa maku etai jamedu. ⁴¹Ia boe tuginaiwuge tugobaigarege ero rakamode tai tagoreduwo toe tabo pudai jii quilômetro oto pa ka tageragu ji tagoreduwo tabo rugadu. Mare quilômetro udo pobe taroino enoe tabo duji. ⁴²Ia boe enogwamagudumode tai iaboe bagai dukeje maku etai rugadu. Ia boe enogwamagudumode tai ia tago diero bagai mare ia meri kejeie tumoduie morido tagai dukeje diero maku etai rugadu.

Boe Emeardu Kuriwo Jordu Pegare Puduiwugei Rugadu

⁴³– Marigudu Pao Kurireu akore boe emeardu kuriwo tumedagei tuwobei.5.43 Awu bataru padure Levítico 19.18 keje. Marigudu tagimijerage egore boe erdu pegawo jordu pegare puduiwugei. Tameardure nou bataruji marigudu. ⁴⁴Mare imode tawie Pao Kurireu meardae remawuji. Tameardu kurido jordu pegare taiwugei, onare taiwugei. Tamagodo baruto Pao Kurireu bagai nou ro pegare taiwuge eparu tabo. ⁴⁵Dukodire čare boe erduwamode Pao Kurireu ore nure tagi duji. Pao Kurireu emare ure meri joku jorugudo ro pemegareugei ro pegareugei jamedu. Emare ure bubutudo ro pemegareuge eno moto keje ro pegareuge eno moto keje jamedu. ⁴⁶Tameardu kurimode tu ro pemegare taiwugei dukeje taro pemegamodukare ro pegareuge ero kori. Nou ure tugeragu boe enoe mori jiwu imedu ro pemegare nou ro pemegare puduiwugei jamedu. Mare tameardu kuriwo boe eiamedu boei nono Pao Kurireu umode boe pemegado tai jamedu. ⁴⁷Tagimadumode tu tawobebo tu tamedagebo dukeje taro pemegamodukare ro pegareuge ero kori. Ro pegareuge meartorukare Pao Kurireu jiwuge ekimadure tuwobebo tumedagebo jamedu. Mare tagimaduwo boe eiamedu boebo. Nono Pao Kurireu jordu pemegamode tarore jiboeji. ⁴⁸Dukodire inure tawie. Taro jamedu boe pemegado nono Pao Kurireu ro pemegareu mogadure rugadu.

Boe Ewo Ia Toe Maku Marenarue Doge Etai

¹– Taro pemegamode boei tu boe egai mare boe etaiwokare dukeje tamodukare taro pemegado boei dukeje Pao Kurireu umodukare nou taro pemegareu morido baru tada. ²Dukodire tamode ia tagoe maku marenarue doge etai dukeje tagaba boe ewie tapira ukiga tabo. Ia meartorukare tuwadaru jiwuge emode boe edo tapira ukiga akodo Judeu doge ere bato puiwu bai tada, awara okwai jamedu tuwo boe eiamedu boe ewie tuie ia toe maku marenarue doge etai. Etaidure tuwo boe emeardae pemegado pudui. Dukodire boe emago pemegamode ei eroino nou marenarue dogei duji. Mare ere turo pegareu biado boe epiji. Dukodire boe emago pemegare ei du morimode tu nouče rugadu. Mare Pao Kurireu umodukare nou ero pemegareu morido etai. ³Iwo tawie. Tamode iaboe maku marenarue doge etai dukeje tagaba boe ewie taroino duji. Tagaba tamedage ewie. Tagaba tawobe ewie taroino duji. ⁴Aino taro pemegareu biadodumode boe epiji. Mare Pao Kurireu jordumode tarore jiboe jamedu boeji. Emare umode nou taro pemegareu morido tagai rugadu.

Boe Emagowo Pao Kurireu Bagai Baruto

⁵– Ia boe emeartorukare tuwadaruji. Emagere etaidure tuwo turagojedo nono Judeu doge ere bato puiwu bai tada tumagowo baruto Pao Kurireu bagai boe erduwo turoinoduji. Etaidure turagojewo nono awara kajeje nono boe eda oiadada tumagowo Pao Kurireu bagai baruto boe eiamedu boe erduwo turoinoduji. Iwo tawie. Tarokaba nono ero mogadure tamagowo Pao Kurireu bagai baruto. Boe erdure egoino duji. Dukodire boe emago pemegamode ei. Du erore ainodu morireu tu rugadu. Mare Pao Kurireu jorduware boe remawuji. Dukodire meardae pemegamodukare ei nou eroino duji. ⁶Mare tagi taremo tawaito tamagowo baruto Pao Kurireu bagai. Tawai bai poro mi tawo taro biado boe epiji. Boe erdukare Pao Kurireuji mare Pao Kurireu jordure boe erore jiboe jamedu boeji. Dukodire umode nou tare biadowu taro pemegareu morido rugadu. ⁷Tarokaba nono meartorukare Pao Kurireu jiwuge ero mogadure tamagowo Pao Kurireu bagai baruto. Meartorukare Pao Kurireu jiwuge emago raimode tumeartorure jiwu bagai. Emode tuwadaru udo nono tuwadarure tu tu je tumago raiwo tumeartorure jiwu bagai. Egore boe emodukaie tuwadaru udo nono tuwadarure tu tu je dukeje tumeartorure jiwu meardumodukaie tumagore jiboeji. ⁸Tarokaba nono ero mogadure. Tamagokare tagaidure jiboe bagai raga mare Pao Kurireu jorduware marigudu tagaidure jiboeji. ⁹Dukodire imode tawie. Tamagore Pao Kurireu bagai baruto dukeje ainore tagagomode: “Iogwa Kurireu. Mugure baru tadawu nure aki. Boe emago pemegawo akieji tuwo boe emeartorudo tu ai rugadu. ¹⁰Boe emeartoruwo awadaru jamedu boeji tuwo tugimijera kurireudo aki rugadu. Akaregodu pemegado aro pemegareu tabo mato moto ka ameardae rugadu boe jetuwo pudui rugadu, nono aro mogadure toro baru tada dumogadure. ¹¹Čege maku čenai meri jameduji. ¹²Awiagodudo čero pegareu piji nono čewiagodure ro pegare čeiwuge ero piji dumogadure. ¹³Iage etaidumode tuwo tumeardae pegareu maku čenai tuwo čero pegado. Čeginorudo epiji čewiapagakawo nou emeardae pegareuji. Čeginorudo mareboe piji rugadu. Mare paga karega. Boe eimijera kurireu nure aki. Aragare boe jamedu boe kori. Apemegare rugadu. Are aino jii toro rugadu. Ainore uwo rugadu.”

– Ainore tagagomode Pao Kurireu bagai baruto.

¹⁴– Tawiagodumode ro pegare taiwuge ero piji dukeje Pao Kurireu biagodumode taro pegare jiboe piji jamedu. ¹⁵Mare tawiagodumodukare ro pegare taiwuge ero piji dukeje Pao Kurireu biagodumodukare taro pegare jiboe piji jamedu.

Boe Ere Tugera Ra Togwage Piji Ia Meri Keje Tumagowo Pao Kurireu Bagai Baruto Du Reo

¹⁶– Ia tagimijerage emeartorukare tuwadaruji. Etaidure tuwo turo pegareu biado boe epiji. Mare emode tugera ra togwage piji ia meri keje tumagowo Pao Kurireu bagai baruto nou meriji dukeje emode tie makodudo. Mare pagare eroino. Emode tie makodudo boe erduwo pudui boe emeardae pemegawo pudui. Dukodire etaidure boe erduwo turoino duji. Boe erdure eroino duji. Dukodire boe emago pemegamode ei eroino duji. Dukodire nou boe emago pemegare pudui nou morimode tu nouče rugadu. Mare Pao Kurireu jorduware boe remawuji. Dukodire Pao Kurireu meardae pemegamodukare ei eroino duji rugadu. Ča. Iwo tawie boe remawuji. Tarokaba nono ero mogadure. ¹⁷Tamode tagera ra tagwage piji tu tu ia meri keje tamagowo Pao Kurireu bagai baruto dukeje nou taro biado boe epiji. Tae kabi. Puduga tugu tagaoji. Roreboe reko tawiriji. Tae makodukawo. ¹⁸Nono boe erduwamodukare tare tagera ra tagwage piji. Tu Pao Kurireu jorduwamode taroino duji. Boe erdumodukare Pao Kurireuji. Mare Pao Kurireu jordure boe ere biadowu turore jiboe jamedu boeji. Dukodire emare umode taro morido rugadu.

Boe Enoe Mugure Baru Tadawu Oe Kurireu Reo

¹⁹– Tawiagorokaba tu tawo tagoe kurido woe moto keje. Tamode tagoe kurido woe moto keje mare boreu umode tagoe pegado. Tagoe akedumode. Iwogureuge ekiwogumode tagoeji tabiji. ²⁰Mare tawiagorodo tawo tagoe kurido baru tada. Mare moto kejewu tagoe ji karega inagoino. Tawiagorodo tameartoruwo Pao Kurireu bataruji, tameardu kuriwo Pao Kurireuji. Dujire inagoino. Tawiagorodo tawo taro pemegado. Dujire inagoino. Tameartorumode Pao Kurireuji dukeje umode boe pemegado tai baru tada. Dujire inagoino. Baru tadare boreu umodukare boe pegado. Iwogureuge ekiwogumodukare nou Pao Kurireu ro pemegareuji tabiji. Nou boe pemegare taiboe akedumodukare rugadu. ²¹Boe etaidure tuwo toe kurido woe moto keje dukodire ewiagoromode tu nou toeji rugadu. Nou boe ewiapagamodukare Pao Kurireu bataruji. Mare boe enoe jetumode baru tada dukodire ewiagoromodukare ia moto kejewu toeji pugeje, ewiapagamode tu Pao Kurireu bataruji rugadu.

^22-23– Tuioku tabore boe erdumode boeji. Mare boe eku pegare dukeje erdumodukare boeji. Imagore jiboe ure nono boe eku mogadure. Mare boe eku ji karega inagoino. Boe emeartorumode imagore jiboeji dukeje erduwamode rugadu. Dujire inagoino. Mare boe emeartorumodukare imagore jiboeji dukeje erduwa bokwamode rugadu. Dujire inagoino. Dukodire tagi tagaidumodukare tarduwawo iwadaruji dukeje boečomode tai rugadu. Mare boečo ji karega inagoino. Tarduwamodukare boe pemegareuji rugadu.

Pao Kurireu Meardaere Boe Enoe Jitu Reo

²⁴– Ia imedu ukimijerage emode pobe dukeje meardu kurimode nouia tugimijeraji. Mare jordu pegamode nouia tugimijeraji. Meartorumode nouia tugimijera bataruji. Mare meartoru bokwamode nouia tugimijera bataruji. Dukodire boe emode tugimijerado dieroče dukeje ewiapagamodukare tumeartoruwo Pao Kurireuji pugeje. ²⁵Tamororamagadukaba tage bagai, tagudumode čeboe bagai, tagudau areia bagai. Pao Kurireu ure tadowuje. Ure tawodudo. Emare jetu pemegamode tai. ²⁶Tagaiwodo awu kiebaregei. Ekare boe tugu. Ekare tugeragu boeji. Eke ja bokware. Eke muga bokware. Mare du inodu tabo Pao Kurireu koiare ure enogwagedo. Boe nure tagi. Pao Kurireu meardu kurire boei nou kiebarege ekori. Dukodire inagoino tai jetu pemegamoduie tai rugadu. ²⁷Tamororamagadumode mare du inodu tabo tamodukare tawimode kejewu meri barigu tabiji. ^28-30Tamororamagadukaba tagudau areia bagai. Tagaiwodo awu okureboeji. Emodure rugadu mare emage eigoia karega ere tumodudo aino. Pao Kurireu koiare ure awu okureboe emodudo aino. Mariguduwu Israel doge eimijera kurireu Salomão6.28-30 Mariguduwu Israel doge eimijera kurireu nure awu Salomãoče. Jorduwa kurire. Oe kurire rugadu. oe kuričigore dukodire meture jiwu ukudau areia moture rugadu. Mare motukare nono awu okureboe emodu mogadure. Ča okureboe emodure mare joru umode ekowu kuri je. Mare boe nure tagi. Pao Kurireu meardu kurire boei nou okureboe kori. Dukodire umode tugera maku tagai rugadu. Dukodire inagoino tai tamororamagadukaiago tagudau areia bagai, tameartoruwo tu Pao Kurireuji rugadu. Tameartorumode ji dukeje tamode nono awu okureboe emogadure jamedu. Pao Kurireu jetu pemegamode tai rugadu. Kočare tameartorukare ji. ³¹Dukodire inagoino tai tamororamagadukaiago tagwagemode jiboe bagai tagudumode čeboe bagai. Tamororamagadukaba tagudau areia bagai jamedu. ^32-34Mare meartorukare Pao Kurireu jiwuge ewiagorore tu nou tuge roguji toe roguji rugadu. Mare tameartorumode Pao Kurireuji dukeje tawiagoromodukare nou inoduji pugeje. Pao Kurireu jorduware kaba jiba tagaidure. Dukodire tawiagorodo tawo tagimijera kurireudo Pao Kurireuče rugadu. Tawiagorodo tawo taro jetorodo nono Pao Kurireu meardae mogadure. Tamode tagimijerado ema dukeje umode tage jamedu boe maku tagai rugadu. Umode tagudau areia maku tagai. Jetu pemegamode tai rugadu. Tamororamagadukaba barogwato boe pegamode tai du bagai, boe rakamode tai dubagai. Boe rakare boei meri jameduji. Mare tamode tagimijerado Pao Kurireuče dukeje umode tugera maku tagai awu meriji rugadu. Umode tugera maku tagai barogwato jamedu.

Boe Etaiwokawo Boei Ero Pegareu Bagai

^1-2– Tawiapagakaba boei boe pegareu tabo. Tawiapagamode boei boe pegareu tabo dukeje Pao Kurireu biapagamode tai boe pegareu tabo jamedu. Tameardae pegamode boe erore jiboeji tamago pegawo nou boei dukeje Pao Kurireu meardae pegamode tarore jiboeji jamedu tumago pegawo tai jamedu nono tamago mogadure. Tamode tameardae tawuje taro pegawo ia tamediaji nou tamedia ro pegareu moriče. Aino jamedu Pao Kurireu romode aino tai taro pegareu moriče nono taro moga tamediaji dumogadure. ^3-5Meartorukare tuwadaru jiwuge nure tagi. Tardure tamedia joku tadawu boebutu roguji. Mare tardukare taeku tadawu iraji. Mare boebutu rogu ji karega inagoino. Boe ero pegareu rogu jire inagoino. Biagare tu je mare tardure ji. Dujire inagoino. Dukodire tamago pegare nou tamediaji. Tagagore: “Aro pegare”, aino ji. Tagagore tarduwaie tamedia ro pegareuji mare tardukare ia taro pegareuji. Dukodire tameartorukare tawadaruji. Tardukare taeku tadawu ira kurireuji. Mare ira ji karega inagoino. Taro pegareu kurireu jire inagoino. Taro pega kurire rugadu mare tagare tardudo ji. Dujire inagoino. Kočare. Tagera ra taro pegareu piji. Tamode tagera ra taro pegareu piji dukeje tarduwamode rugadu tamago pemegawo nou tamediaji nou tamedia uwo tugera ra turo pegareu biagareu piji jamedu.

⁶– Tagaba Pao Kurireu maragodae pemegareu maku ariga doge etai. Mare ariga ji karega inagoino. Meartorukare Pao Kurireu jiwuge ro pegareuge eire inagoino. Tamode taragado tawo Pao Kurireu maragodae pemegareu maku nou meartoru bokware Pao Kurireu jiwuge etai dukeje nou meartorukare Pao Kurireu jiwuge ro pegareuge ekadakagirimode tai tuwo boe emeartoru akedudo tawadaruji. Emeardaere Pao Kurireu maragodae uie pagatu je. Dujire inagoino. Tagaba Pao Kurireu maragodae pemegareu maku jugureuge etai. Mare jugureu ji karega inagoino. Meartoru bokware Pao Kurireu jiwuge ro pegareuge eire inagoino. Tamode taragado tawo Pao Kurireu maragodae pemegareu maku nou meartorukare Pao Kurireu jiwuge etai dukeje emode tumeardae pegareu tawuje nou Pao Kurireu maragodae pemegareu piji tuwo nou Pao Kurireu maragodae pemegareu akedudo boe epiji. Emeardaere Pao Kurireu maragodae uie pagatu je. Dujire inagoino.

Tagogwamaguduwo Pao Kurireuji Tagaidure Jiboe Bagai

^7-8– Tagogwamagudumode Pao Kurireuji iaboe bagai dukeje Pao Kurireu umode tamagore bagaiboe maku tagai rugadu. Pao Kurireu aidure tuwo boe erduwado pudui. Dukodire taemarumode Pao Kurireu bagai dukeje umode tarduwado pudui rugadu. Pao Kurireu aidure tuwo tuwai poro jado baru tada tuwo boe edo turemo baruto. Dukodire tamode tagera to Pao Kurireu uwai poroji dukeje umode tuwai poro jado tagai rugadu. Mare bai poro ji karega inagoino. Boe emeartoruwo Pao Kurireuji rugadu. Dujire inagoino. ⁹Ro pegareuge ero pemegamode torei. Dukodire tagore emagomode tai amireu bagai tuge boei koia. Nono tamodukare tori maku etai. Tamode amireu maku etai rugadu eke boeire ei kodi. ¹⁰Tagore emagomode tai karo bagai tuge boei koia. Nono tamodukare awagu maku etai. Tawogumode karo bagai ekeče rugadu. ¹¹Ro pegareuge nure tagi mare du inodu tabo tarduware taro pemegawo tagorei tawo eke maku etai rugadu. Tarduware tawo boe pemegareu maku tagore etai. Mare Pao Kurireu pemegare rugadu. Dukodire umode boe pemegareu maku boe etai rugadu du kodumode nou tare maku tagore etaiboe kori. ¹²Dukodire ire tawie. Taro pemegado boei boetoji nono tagaidu moga boe ero pemegawo tai dumogadure. Du nono tameartorunure makudure Judeu doge etaiwu bakaruji. Tameartorunure nou mariguduwuge makore Pao Kurireu bataru jiwuge emagore jiboeji jamedu.

^13-14– Pao Kurireu meardae ure nono baiporo biagareu ja mogadure. Ure nono awara barikareu mogadure. Boe emode baiporo biagareu jado tugoduwo nou awara barikareuji taregoduwo Pao Kurireu ae. Mare baiporo ji karega inagoino. Awara ji karega inagoino. Pao Kurireu meardae jire inagoino. Taragado tai tawo tameardae pemegado nono Pao Kurireu meardae mogadure tawo taremo baruto Pao Kurireu mugureu ka. Dujire inagoino. Bope doge eimijera meardae pegareu ure nono baiporo kurireu ja mogadure. Bope doge eimijera meardae pegareu ure nono awara barireu mogadure. Boe emode nou baiporo kurireu jado tugoduwo nou awara barireuji dukeje ewarigudumode bope doge eda kejewu joru pegareuto rugadu. Mare baiporo ji karega inagoino. Awara ji karega inagoino. Bope doge eimijera meardae pegareu jire inagoino. Boe emeartorumode kuri je nou bope doge eimijera meardae pegareuji. Dujire inagoino. Meartorure jiwuge emagare rugadu. Dujire inagoino. Etaidure tuwo turemo baru tadawu Pao Kurireu uwaito rugadu mare ekare tugimijerado Pao Kurireuče. Dukodire umodukare edo turemo rugadu. Meartorure Pao Kurireu meardae remawu jiwuge emagakare.

Makore Pao Kurireu Bataru Jiwuge Batrarodureuge Ewadaru Reo

¹⁵– Taeku jado. Nouia boe emagomode tai tumagoie Pao Kurireu bataruji. Mare pagare egoino. Ewadrarodunure. Ere tudo nono ovelha doge emogadure. Mare ovelha ji karega inagoino. Ere tuwadaru motudo boe etaiduwo tumagore jiboeji. Mare pagare egoino. Etada ere nono rie pegareuge7.15 Lobo jire boe egoino Rie aino. Toro nou moto keje barogo pegareu nure nou rieče. Rie umode tuburedo tubodu tabo ovelha dogei tuwo ia bito tu tu je. Ovelha doge eragakare rieji rugadu dukodire rie umode ovelha bito rugadu. Dukodire jeture ovelha dogeiwu aiwomode tu tu je rie bagai tuwo rie bito, tuwo rie utudo ukawo boe pegado tagu ovelha dogei rugadu. Jeture ovelha dogeiwu umode ariga doge erduwado eregoduwo rie rekodaji jamedu ewo rie utudo ovelha doge epiji jamedu. emogadure. Mare rie ji karega inagoino. Etadare emeardae pegareure. Ewadrarodure tuwo boe ekiripagado Pao Kurireu bataru remawu piji. Dujire inagoino. ¹⁶Mare tagaiwodo erore jiboeji. Erore jiboe umode tarduwado ei. Erore jiboe ure nono kurodureu tudu mogadure. Boe emodukare tugeragu uva tuduji ia boto iku piji. Boe emodukare tugeragu figo tuduji ia boto iku piji jamedu. Emode tugeragu uva tuduji ia uva iku piji. Emode tugeragu figo tuduji ia figo i piji. Mare kurodureu tudu ji karega inagoino. Makore Pao Kurireu bataru jiwuge batrarodureuge eire inagoino. Ewadaru moture mare emeardae pegare dukodire erore jiboe pegamode jamedu. Dujire inagoino. ¹⁷I pemegareu tudu pemegamode. Tudu kurodumode dukeje betumode rugadu. Mare i pegareu tudu pemegamodukare. Nou i tudu pegamode rugadu. Pagodumode rugadu. ¹⁸I pemegamode dukeje tudu pegareu bokwamode. I pegamode dukeje tudu pemegareu bokwamode. ¹⁹Ia i tudu pegareumode dukeje boe emode nou i kado rugadu. Emode barigu joruto. ²⁰Mare i tudu ji karega inagoino. Makore Pao Kurireu bataru jiwuge eire inagoino. Tumeardae jire erore aino. Dujire inagoino. Tagaiwo pemegado nou boe erore jiboeji tarduwawo ei rugadu. Nono tarduwamode makore Pao Kurireu bataru jiwuge remawugei, batrarodureugei jamedu. Tarduwa pemegamode ei rugadu.

^21-23– Ia boe egomode i: “Ikimijera. Ikimijera.” Ainore nou boe egomode i. Mare pagare egoino dukodire imodukare eremo baruto. Egomode: – Ikimijera. Ikimijera nure aki. Akie tabore imagore awadaruji boe ewiagai. Akie tabore ire bope doge ewarigu boe epiji. Akie tabore iro rakare rugadu tu tu je. Ainore nou boe egomode i. Mare imagomode ewadaru jipagi. Inagomode: “Pagare tagagoino. Iorduware tarore jiboeji. Tameartorukare Iogwa Kurireu meardaeji. Dukodire ikare iwobedo tagi. Ča. Tadudo ipiji rugadu. Ro pegareuge nure tagi.” Ainore inagomode nou boei rugadu. Dukodire inure tawie. Tu nou boe emeartorumode baru tadawu Iogwa Kurireu meardae jiwuge emode turemo baruto. Nou boe ere tugimijera remawudo Pao Kurireuče rugadu dukodire emode turemo baruto.

Meartorure Jesus Bataru Jiwuge Eromode Nono Jorduwareu Ro Mogadure

²⁴– Dukodire imode tawie aino. Boe ewiapagamode iwadaruji dukeje emeartorumode nou imagore jiboeji rugadu dukeje jorduwareuge emode emage. Jorduwareuge emode emage nono ia jorduware tuwo tuwai pemegadowu imedu mogadure. Nou imedu ure tuwai towuje. Ure iguru pemegareu tugu mototo rugadu tuwo tuwai pemegado bakuru ukawo tuwai butudo. ²⁵Nono bubuture rugadu. Pobo aregodure rugadu. Bakurure rugadu. Nou poborereu jeture nou imedu uwaiji. Mare nou uwai butukare rakare dukodi. Ča meartorure iwadaru jiwu jorduwamode tuwo boe pemegado pudui nono nou jorduwareu ure bai pemegado dumogadure. Mare bai ji karega inagoino. Boe ewiapaga pemegamode iwadaruji dukeje emeartorumode rugadu imagore jiboe jamedu boeji. Dukodire nou boe erduwamode rugadu dukodire boe pemegamode ei rugadu. Dujire inagoino. ²⁶Mare boe ewiapagamode iwadaruji mare emeartorumodukare nou imagore jiboeji rugadu dukeje jorduwa bokwareuge umode emage. Jorduwa bokwareuge umode emage nono ia jorduwa bokwareu imedu ro moga tuwai jitu mogadure. Nou imedu ure tuwai pemegado jamedu mare ure tugeragu iguru pegareuji. Ure tugu mototo mare ukare tugudu pemegado. ²⁷Nono bubuture. Nou pobo aregodure. Dukodire pobo jeture nou imedu ure towu baiji. Bakuru pegareu jetu rakare ji jamedu. Dukodire nou uwai buture tiaruru tabo rugadu. Ča nou meartorukare iwadaru jiwu jorduwa bokwamode dukodire boe pegamode ji nono boe pegare nou bai jitu mogadure. Mare bai ji karega inagoino. Boe emeartorumodukare tumeardure jiwu iwadaruji dukeje boe pegamode ei rugadu. Dujire inagoino.

²⁸Ča Jesus ure tumago akedudo. Mare nou biapagare nou Jesus bataru jiwuge eku kidure nou Jesus makore jiboeji. ²⁹Jesus makore jiboe ukare nono nou boe eimijerage jorduware Judeu doge eno bakaru jiwuge ewadaru mogadure. Jesus mako pemegare mako jetorore rugadu dukodire boe erduware Pao Kurireu bataru remawu jire Jesus akoino rugadu.

Jesus Ure Imedu Pemegago

¹Jesus ure turawuje tori ri ao piji. Mare boe eture rekodaji rugadu. Emagare rugadu. ²Nono ia imedu kogodureu aregodure Jesus togi. Nou imedu kogodae pegare ji rugadu. Ure biri pegado rugadu. Nou imedu aregodure Jesus togi dukeje ure tubu jodo moto keje Jesus jokorai. Nono makore Jesusji. Akore: – Ikimijera. Aragare rugadu awo ipemegago. Akaidumode dukeje amode ipemegago rugadu.

³Nono Jesus ure tugera raido nou imedu ae. Ure tugera bu imedu keje. Nono Jesus makore ji. Akore: – Uu. Itaidure. Ča. Apemegare rugadu.

Ča nou imedu pemegagodure tači je. Nou imedu biri pegakare pugeje. ⁴Nono Jesus makore imeduji pugeje. Akore: – Amagokaba awu irore ai boeji. Atudo kuri nou Pao Kurireu uwai ka. Nonore amode nou ure Judeu doge enomea maku Pao Kurireu aiwu imedu jordudo awiriji. Jordumode apemegagodure duji rugadu. Nono amode nou Moisés makore jiwu mori maku ai rugadu nono paro mogadure. Nono nou ure boe enomea maku Pao Kurireu aiwu imedu umode nou are maku pudaiwu mori maku Pao Kurireu ai rugadu. Dukodire boe eiamedu boe erduwamode apemegagodure rugadu duji.

Ainore Jesus makore nou imeduji.

Tugobaigarege Eimijera Meartorure Jesusji

⁵Nono Jesus aregodure Cafarnaum ba kurireu ka. Nonore ia tugobaigarege eimijera aregodure Jesus ae rugadu. Okwamagudure Jesusji rugadu. ⁶Akore: – Boe eimijera nure aki. Itugare imedu padure toro iwai tada tugogodure dutabo. Kogodure rugadu dukodire meru bokware. Korire ji rugadu.

⁷Jesus makore ji. Akore: – Itumode toro awai ka iwo atugare pemegago.

⁸Mare nou tugobaigarege eimijera makore Jesusji pugeje. Akore: – Boe eimijera kurireu nure aki rugadu. Atukaba iwai ka. Mare tu nou awadaru tabore amode itugare pemegago. Amagomode dukeje itugare pemegagodumode rugadu. ⁹Ikimijerare. Tugobaigarege eimijera nure imi jamedu. Imagomode tugobaigare imeduji utuwo toro dukeje utumode toro rugadu. Imagomode iaji aregoduwo mato itae dukeje aregodumode itae rugadu. Imagomode itugareji maragoduiago ia imaragodaeji dukeje nou itugare maragodumode ji rugadu. Dukodire iorduware nou itugare kogodae meartorumode awadaruji nono nou itugare meartorure i dumogadure.

¹⁰Jesus meardure nou tugobaigarege eimijera akoino duji dukeje Jesus jebogodure. Makore nou rakojere pudabowugei. Akore: – Iwo tawie. Judeu karegure ema mare awu imedu meartorure i rugadu Israel moto kejewu Judeu doge eiamedu boe emeartoru kori. ^11-12Marigudu Pao Kurireu makore Judeu doge ewagai emeartoruwo pudui. Makore ei tumoduie nou umode boe ekinorudowu arego etae. Abraão meartorure nou bataruji. Onaregedu Isaque meartorure. Isaque onaregedu Jacó meartorure jamedu. Dukodire toro ia meri keje Pao Kurireu umode boe ekimijerado pudumi dukeje umode ia tuwadae tawuje etai toro baru tada. Ča nou umode boe ekinorudowu aregodure. Mare Judeu doge emeartorure nou umode boe ekinorudowu jiwuge emagakare. Meartorukare nou umode boe ekinorudowu jiwuge ewarigudumode toro boečo tadawu joru pegareuto. Nonore boe etragudu rakamode rugadu, emode to reko pui tuwiri boe kori koia. Mare boe tuginaiwuge emeartorumode nou umode boe ekinorudowuji rugadu. Meartorure jiwuge emagamode rugadu moto jamedu boe parugajeje. Emugumode Abraão apo, Isaque apo, Jacó apo nono Pao Kurireu uwadae keje toro baru tada.

¹³Nono Jesus makore nou tugobaigarege eimijeraji pugeje. Akore: – Ča. Ameartorure i rugadu. Ire nou atugare pemegago tu iwadaru tabo nono ameartorure i dumogadure. Atudo aibagi toro awai ka arduwo ji.

Ča Jesus ure tuwadaru iado dukeje nou tugobaigarege eimijera utugare pemegagodure rugadu tači je.

Jesus Ure Boe Epemegago Rugadu. Emagare.

¹⁴Nono Jesus aregodure Pedro uwai ka. Nou Pedro uwai tadare Jesus jordure Pedro učarugoji. Nou Pedro učarugo kogodure rugadu. Biri urure dukodire padure nono tuba keje. ¹⁵Nono Jesus ure tugera bu Pedro učarugo iera keje. Ča nou biri uru akedure piji tači je. Dukodire nou Pedro učarugo ure tumugudo. Ure turagojedo. Dukejere ure ia tuge rogu towuje. Ure ia maku Jesus ai ukeje rugadu.

¹⁶Nou boečoji ia boe etaregodure Jesus ae. Emagare pugeje. Etaregodure bope doge emedure tadawugebo rugadu. Nono Jesus ure nou bope doge etawuje nou boe epiji tuwadaru tabo. Makore ei dukodire eture nou boe epiji. Jesus ure kogodureuge epemegago jamedu. ¹⁷Dukodire čare Pao Kurireu bataru jeture pudui rugadu. Marigudu makore Pao Kurireu bataru jiwu Isaías ure nou Pao Kurireu bataru bu bapera keje. Akore: – Rakare boe ekogodaeji. Ure boe epemegago rugadu.8.17 Awu bataru padure Isaías 53.4 keje.

Ainore Pao Kurireu akore marigudu nou umode boe ekinorudowu romoduie aino rugadu.

Iage Boe Etaidure Tugoduwo Jesus Apo

¹⁸Boe emagare nono Jesus apo rugadu. Ere taiado Jesus apo rugadu. Jesus jordure nou boe eiamedu boei emagare rugadu dukodire makore nou ture jorduwadowugei etuwo pudabo toro nou pobo maereu okwa abowu ka. ¹⁹Ere tudo turugadu tuduwo dukeje ia jorduware Judeu doge eno bakaru jiwu imedu aregodure Jesus ae. Makore Jesusji. Akore: – Boe eimijera nure aki. Itaidure ikoduwo akabo akodure jiboe ka.

²⁰Mare Jesus makore ji. Akore: – Okwa doge emugure tiari poro ja tada. Kiebarege emode tamudo tuwaradu ja tada jamedu. Imire Imedu Onaregedu nure imi. Mare iwai bokware iedureu bokware iwo itamudo tada, inuduwo tada. Boe rakamode kodure itabowugei jamedu.

²¹Ia Jesus ure jorduwadowu imedu makore Jesusji jamedu. Akore: – Ikodumode akabo rugadu mare kajao. Aino kuri aino itumode kuri iogwa uwai ka. Iogwa bire dukodire itaidure iwo iogwa tugu mototo jao. Dukejere ikodumode akabo akodure jiboe ka.

²²Mare Jesus makore ji. Akore: – Bireuge etugudumode bireugebo mare awiapagakaba ei. Atudo epiji. Ako itabo rugadu.

Jesus Ure Bakuru Pegareu Akedudo

²³Nono Jesus ure turemo ika kurireuto. Nou ure jorduwadowuge ere turemo apo jamedu. ²⁴Ekodure nou ika kurireu tabo nou pobo maereu kajeje dukeje Jesus unudure nou ika kurireu ja tada. Ča ia bakuru pegareu aregodure etae tači je. Nou bakuru ure nou pobo redo. Nou inodu kodire pobo jeture nou ika kurireuji. Dukodire pobo ure turemo nou ika kurireuto rugadu. ²⁵Nou Jesus ure jorduwadowuge epagudugodure dukodire ere Jesus jetadudo. Egore: – Čegimijera. Pawimode poboto! Arodo iaboeji awo paginorudo.

²⁶Jesus akore: – Kočare tabagudure? Kočare tameartorukare i?

Nono Jesus ure turagojedo ika ja tada. Nono makore nou bakuruji nou poboji dukodire nou bakuru akedure, nou pobo butugugodure jamedu. ²⁷Nou Jesus ure jorduwadowuge ebogodure rugadu. Egore pui: – Duboba nure awu imeduče? Kočare bakuru, pobo emeartorure awu imedu bataruji rugadu!

Jesus Ure Bope Doge Etawuje Ime Pobedu Doge Epiji

²⁸Dukejere Jesus aregodure toro nou pobo maereu okwa abowu ka ture jorduwadowugebo nou ika kurireu tabo. Nou etaregodure kawu moto iere Gadara. Etaregodure dukeje ere tudawuje ika kurireu piji. Mare bope doge emedu tadawu ime eture Jesus togi. Marigudu nou bope doge emedure nou ime etada dukodire erore pudabo turo pega tabo boe eiamedu boei. Dukodire boe epagudure eče. Dukodire boe etukare toro etae pugeje. Nou ime pobedu doge edu pagare nono aroe eda keje jamedu. ²⁹Nono ekudugodure Jesus ae. Egore: – Pao Kurireu onaregedu nure aki. Kodiba akaregodure mato čedae? Kaba kodiba aroino čewagai? Toro ia meri keje Pao Kurireu umode boe pegado čei rugadu. Aki kana amode boe pegado čei kuri aino?

³⁰Jugureuge edu puredure nono togwage tabo. Emagare rugadu. ³¹Nou meture nou ime tadawu bope doge emagore nou ime eiabiji Jesusji. Egore: – Amode čedawuje awu ime epiji dukeje čedudo toro nou jugureuge etae. Čedo čeremo nou jugureugeto.

³²Dukodire Jesus akore: – Toro.

Dukodire ere tudawuje nou ime epiji. Eture toro nou jugureuge etae. Ere turemo nou jugureugeto. Dukodire nou jugureuge eregodure toro ia moto ri ao piji tači poboto. Dukodire eiamedu boe ewire poboto rugadu. ³³Nou jeture nou jugureuge eiwuge eregodure Jesus piji toro nou tuwai mugure tadawu ba kurireu ka tureadoduwo boe ewiagai nono. Ereadodure nou Jesus rore jiboeji boe eiamedu boe ewiagai. ³⁴Nou ba kurireu kejewuge eiamedu boe eture toro Jesus ae. Erdure Jesusji dukeje emagore ji utuwo nou boe epiji. Enogwamagudure Jesusji rugadu utuwo nou moto piji rugadu.

Jesus Ure Pogora Pegareu Imedu Pemegago

¹Nono Jesus ure turemo ika kurireuto pugeje. Ure tugirimi nou pobo maereu kajeje pugeje nou ture jorduwadowugebo. Dukejere etaregodure nou Jesus mugure kejewu ba kurireu ka. ²Nono ia boe etaregodure ia imedu pogora pegareu apo. Nou imedu pogora pegareu padure tugudau kodo keje. Jesus jordure emeartorure pudui duji kodire etaregodure aino nou imedu pogora pegareu apo pudae rugadu duji. Dukodire makore nou imedu pogora pegareuji. Akore: – Me. Ire aro pegareu jamedu boe barigu apiji dukodire Pao Kurireu biagodumode aro pegare jiboe piji rugadu.

³Ia boe eimijerage jorduware Judeu doge eno bakaru jiwuge etaidukare nou Jesus akoino duji. Egore tudada: – Awu makore jiboe ukare turugadu! Pagare akoino. Unure tudo nono Pao Kurireure. Tu Pao Kurireu umode boe ero pegareu barigu boe epiji.

⁴Jesus jorduware emeardaere jiboeji rugadu. Dukodire makore ei. Akore: – Kočare kodiba tameardae pegare aino i. ⁵Boe jokodu. Boe emodukare boe ero pegareu barigu boe epiji rugadu. Tu Pao Kurireu umode boe ero pegareu barigu boe epiji rugadu. Mare boe emodukare awu imedu pogora pegareu pemegago jamedu. Emodukare pemegago rugadu. Tu Pao Kurireu koiare umode nou imedu pogora pemegago. ⁶Dukodire imode awu imedu pemegago dukeje tarduwamode Imedu Onaregedu nure imi duji. Dukodire imode tarduwado iragare iwo boe ero pegareu barigu epiji ewarigudukawo bope doge eda kejewu joru pegareuto rugadu.

Ainore Jesus akore nou boe eimijeragei. Nono ure tuie mekido nou imedu pogora pegareu ae. Nono makore ji. Akore: – Me. Aragojedo. Akeragu akudau kodoji atuwo tabo aibagi awai ka.

⁷Ča nou imedu ure turagojedo rugadu. Meru pegakare dukodire uture tuwai ka rugadu. ⁸Nou boe eiamedu boe erdure nou rore aino duji. Erore ta je. Mare emago pemegare Pao Kurireuji. Egore emaie roino Jesusji uwo nou imedu pogora pegareu pemegago.

Jesus Makore Mateus Bagai

⁹Jesus uture nou boe epiji. Kodure awaraji dukeje jordure ure tugeragu boe enoe mori jiwu imeduji. Du iere Mateus. Nou Mateus mugure nono ira keje. Nonore ure tugeragu dieroji boe epiji tuwo maku boe eimijera kurireu ai.9.9 Brae eno tabo egore cobrador de impostos aino nou Mateus maragodaeji. Ure tugeragu dieroji boe epiji boe eimijera ai. Nou mariguduwuge Judeu doge erdu pegare nou maragodure ainowugei. Egore ro pegareuge nuie emage rugadu. Mare paga karega. Nou boe ere tugeragu dieroji boe epiji. Nono ere nou diero maku tugimijerage etai mare ere ia tawuje toče. Ekare jamedu boe maku tugimijerage etai. Dukodire boe egore ro pegareuge nuie emage rugadu. Dukodire João Batista makore nou cobrador de imposto boei ekiwogukawo boei. (Akaiwodo Lucas 3.12-13) Nono Jesus makore ji. Akore: – Ako itabo.

Nono Mateus ure turagojedo. Ure tugera ra tumaragodae piji tuduwo Jesus apo rugadu.

¹⁰Mateus makore Jesusji okwagewo tuwai keje pudabo. Dukodire Jesus uture Mateus apo toro uwai ka. Jesus ure jorduwadowuge eture Jesus apo jamedu. Boe emagare nono togwage tabo ebo. Imposto diero makudure aiwuge ime nure emage. Boe egore ro pegareuge enuie emage. Ia boe etaidukare jiwuge eragojere nono Jesus apo jamedu. ¹¹Fariseu doge etaregodure toro etae jamedu. Erdure Jesus rore jiboeji dukeje emagore nou Jesus ure jorduwadowugei. Egore: – Kočare tagimijera okwagere awu ro pegareugebo? Ukare turugadu!

¹²Jesus meardure egoino duji dukeje makore nou fariseu doge ewadaru jipagi. Akore: – Jorubo kuru epa jemarumodukare kogodukareuge ewagai. Mare kogodureuge ewagaire jemarumode tuwo epemegago. ¹³Irore nono nou jorubo kuru epa ro mogadure. Mare jorubo kuru epa ji karega inagoino. Itaregodure woe mare ro pemegareuge ewagai karega iroino. Ro pegareuge ewagaire iroino ewo tugera ra turo pegareu piji. Dujire inagoino. Marigudu Pao Kurireu ure tawie. Tagaiwodo nou Pao Kurireu bagai. Akore: “Boe emode boe egu barogo rogu kowu tuwo maku inai turo pegareu moriče. Mare itaidure boe enogudugoduwo puapo rugadu. Dujire itaidure rugadu.”9.13 Awu bataru padure Oséias 6.6 keje. Ainore Pao Kurireu akore marigudu. Ča tarduwado nou bataruji tameartoruwo ji tarore jiboe tabo.

Boe Enarare Jesusji Ure Jorduwadowuge Ero Bagai

¹⁴Ia meri keje João Batista ure jorduwadowuge etaregodure Jesus ae. Egore: – Ia meri keje čenogwagemodukare nou meriji čemagowo Pao Kurireu bagai baruto nou meri keje. Ainore čerore. Fariseu doge eromode aino jamedu čero mogadure. Kodiba nou are jorduwadowuge erokare aino jamedu?

¹⁵Jesus makore ewadaru jipagi. Akore: – Ire nono uwiremodewu imedu mogadure. Boe etuwirere dukeje boe ere tuwadae towuje. Nou ewadae kejere boe enogwagemode rugadu. Ewadae reno. Ekiarigodumodukare nou meriji. Mare ewadae akedure dukeje uwirereu imedu utumode epiji toreduje apo. Dukejere čare boe emode ia meri tawuje togwagekawo nou meriji tumagowo Pao Kurireu bagai baruto nou meriji. Ire nono nou uwiremodewu imedu mogadure. Mare uwiremodewu imedu ji karega inagoino. Ire inagoino. Ire irawuje baru piji mato boe ewagai. Mare ia meri keje itumode nou boe epiji. Dujire inagoino. Itumode nou boe epiji dukeje boe emode ia meri tawuje togwagekawo nou meriji tumagowo Pao Kurireu bagai baruto nou meri keje. Dujire inagoino. ¹⁶Boe ekudau areia pegagodureu umode tuwowuje. Mare boe emodukare tugudau areia maiwu kado tuwo nou tugudau pegagodureu poro miwuje tabo. Boe eromode aino dukeje nou ekudau areia maiwu gigirimode. Dukodire umode tuwowuje nou boe ekudau areia pegagodureu piji kuri je rugadu. Dukodire nou ekudau areia pegagodureu umode tuwowuje ja je pugeje.9.16 Boe emode tugudau areia maiwu kabi dukeje gigirimode. Brae egore “encolhe” aino. Mare boe ekudau areia pegagodureu gigirimodukare pugeje. Dukodire boe ekare tugudau pegagodureu poro miwuje boe ekudau areia maiwu tabo. Mare areia ji karega Jesus akoino. Tuwadaru maiwu jire akoino. Boe emeartorumode nou bataru maiwuji dukeje emode tugera ra nou turo mariguduwu piji. Dujire akoino.¹⁷Boe ere tapira biri maiwu pemegado nou tuge vinho kuru maiwu jače. Mare emode vinho kuru maiwu tugu tapira biri čodureuto dukeje nou tapira biri čodureu umode tuwowuje. Nono nou vinho kuru umode tuwarigu nou tapira biri čodureu piji rugadu. Dukodire boe ekare tuge vinho kuru maiwu tugu tapira biri čodureuto. Ere tuge vinho kuru maiwu tugu tapira biri maiwuto tu tu je.9.17 Vinho kuru maiwu mugu raimode tuia tada dukeje umode tugurido tu je. Nou tapira biri maiwu ja umode tuiado gu gu je. Mare nou tapira biri čodureu umodukare tuiado pugeje pegagodure kodi. Dukodire nou vinho kuru maiwu umode nou tapira biri čodureu ja bowuje. Dukodire nou mariguduwuge ere vinho kuru maiwu tugu tu tapira biri maiwu jato. Mare vinho kuru ji karega Jesus akoino. Tuwadaru maiwu jire akoino. Boe emeartorumode nou bataru maiwuji dukeje emode tugera ra nou turo mariguduwu piji. Dujire akoino.

Ainore Jesus akore. Mare areia ji karega akoino. Vinho kuru ji karega akoino. Tuwadaru maiwu jire Jesus akoino.

Jesus Ure Areme Epemegago

¹⁸Jesus akoino dukeje ia boe eimijera9.18 Judeu doge ere bato puiwu bai tadawu boe eimijera nure ema. aregodure ae. Ure tubu jodo moto keje Jesus jokorai. Makore Jesusji. Akore: – Itonaregedu aredu bire aino maigodu. Mare atudo itabo iwai ka awo akera bu nou itonaregedu aredu biri keje dukeje jewodumode pugeje.

¹⁹Jesus ure turagojedo tumuga piji. Uture nou boe eimijera apo toro uwai ka ture jorduwadowugebo.

^20-21Ekodure awaraji dukeje ia aredu kodure ebo Jesus rekodaji. Marigudu nou aredu kogodaere tu tu je. Nou aredu ku rere piji nono areme etorewudae mogadure. Mare nou aredu o akedukare piji. Re kimonure piji meri jameduji. Joru oto padu kejeboere doze nou aredu ku rere piji duji. Aino nou aredu makore tudada. Akore: – Imode ikera otorogu jetudo Jesus ukudau areiaji dukeje ipemegagodumode.

Ainore nou aredu akore tudada. Dukodire nou aredu ure tugera raido. Nono iera otorogu jeture Jesus ukudau areiaji. ²²Nono Jesus ure tuie mekido. Jordure nou areduji rugadu. Akore: – Are. Ameartorure i rugadu. Dukodire apemegagodumode rugadu.

Nono nou aredu pemegagodure tači je rugadu.

^23-24Nono Jesus aregodure nou boe eimijera uwai ka. Boe emagare nono tragudu tabo. Edukiorokare. Nou boe ere tuwabo ako rakado jamedu. Jesus jordure nou inoduji dukeje makore nou boei. Akore: – Tadawuje awu bai piji. Aredu rogu bikare. Unudunure tu je.

Mare nou boe erduware nou nogwaredu bire rugadu duji dukodire enogwarigodure Jesusji. ²⁵Mare nou boe eimijera ure nou boe etawuje tuwai piji. Dukejere Jesus ure turemo nou nogwaredu padure tadawu baito. Dukeje ure tugeragu nou nogwaredu ieraji. Nono nou nogwaredu jewodure pugeje rugadu. Ure tumugudo rugadu. ²⁶Nou boe erduware nou inoduji dukodire ereadodure boe eiamedu boe ewiagai awu Jesus rore jiboeji nou moto jamedu boe parugajeje.

Jesus Ure Ime Epemegago Jamedu

²⁷Nono Jesus uture pugeje. Mare ia ime joku bokwareuge ekodure Jesus rekodaji. Ere pobe. Ekudugodure Jesus bagai. Egore: – Mariguduwu Judeu doge eimijera kurireu Davi uwobe nure aki. Akogudugo čedabo.

²⁸Jesus ure turemo ia baito. Nono nou ime joku bokwareuge ere turemo Jesus rekodaji. Etaregodure Jesus ae rugadu. Jesus makore ei. Akore: – Tameartorure i imode tabemegago duji rugadu kana?

Egore: – Uu. Čegimijera nure aki.

²⁹Dukejere Jesus ure tugera bu eku keje. Nono makore ei. Akore: – Tameartorure jiboe jetuwo pudui tai rugadu.

³⁰Nono epemegagodure tači je rugadu. Etaiwore pugeje rugadu. Mare Jesus makogodure ei. Akore: – Tareadodukaba boe ewiagai awu irore jiboeji.

³¹Mare eture Jesus piji dukeje ereadodure Jesus rore jiboeji boe eiamedu boe ewiagai nou moto rugadu boe parugajeje.

³²Eture dukeje iage etaregodure ia imedu apo Jesus bagai pugeje. Nou imedu mako bokware. Roiwakare tumagowo. Bope meture tada kodi. ³³Mare Jesus ure nou bope tawuje nou imedu piji dukeje nou imedu makore pugeje. Boe emagare nono tuiordure Jesus roino jitu tabo. Eiamedu boe ebogodure rugadu. Egore: – Marigudu Israel moto kejewu boe erdukare ia awu inodu boeji jii aino.

³⁴Mare fariseu doge etaidukare Jesus rore jiboeji. Emago pegare ji. Egore: – Bope doge eimijera kurireu raka tabore awu Jesus roino tuwo bope doge etawuje boe epiji.

Maragodure Pao Kurireu Aiwuge Emagakare

³⁵Jesus kodure nou moto jamedu boe parugajeje boe eda jamedu boe ka. Aregodumode ia boe eda ka dukeje ure turemo nou Judeu doge ere bato pui towu baito. Nonore ure erduwado tuwadaru pemegareuji tu tu je. Ure ewie Pao Kurireu umoduie boe eimijerado pudumi kuri je rugadu. Ure kogodureuge eiamedu boe epemegago jamedu. ³⁶Boe emagare Jesus apo tu tu je. Jesus jordure nou boei dukeje okudugodure ebo rugadu. Akore eie nono ovelha doge emogadure. Jetu pemegare eiwu bokwaie. Boe pegaie ei. Erduwakaie nuba turomode. Mare ovelha ji karega akoino. Nou boe eroiwakare tuwo tuginorudo. Dujire akoino. Ure erduwado Pao Kurireu bataru remawu jiwu bokware. Dujire akoino. ³⁷Nono Jesus makore ture jorduwadowugei. Akore: – Boepa kurire rugadu. Nou boepa tadaboe ure turugadu boe ewo kado. Mare umode boepa tadaboe kadowuge emagakare. ³⁸Dukodire tamagodo baruto Pao Kurireu bagai. Boepa jiwu boe eimijera kurireu nure ema. Tamagodo ji maragoduwo boepa jiwuge emagawo etuwo boepato ewo boepa tadaboe kado rugadu.

Mare boepa ji karega Jesus akoino. Meartorumode Pao Kurireu jiwugeire akoino. Boe emode boe erduwado Pao Kurireu bataruji dukeje emeartorumode ji, Pao Kurireu umode ekinorudo. Dujire akoino.

Jesus Ure Jorduwadowuge Enodo Padure Doze

¹Jesus makore nou ture jorduwadowuge ewagai pudae. Ere doze. Nono ure eragado ewo bope doge etawuje boe epiji. Ure eragado ewo boe epemegago ekogodae boe piji. ²Ainore nou Jesus ure jorduwadowuge ekiere:

Simão. Iere Pedro jamedu.

André. Pedro uwie nure ema.

Tiago. Nou Tiago uo iere Zebedeu.

João. Tiago uwie nure ema.

³Filipe,

Bartolomeu,

Tomé,

Mateus. Boe ere to diero maku nou Mateus ai uwo maku boe eimijerage etai.

Tiago. Alfeu onaregedu nure ema.

Tadeu.

⁴Simão. Emare makore tumedagei marigudu emeartorukawo Roma kejewu boe eimijeragei pugeje.

Judas Iscariotes. Emare umode Jesus maku boe eimijera pegareuge etai.

Nou ime eture Jesus bataru tabowuge umode emage rugadu.

⁵Awu doze ime dogere Jesus ure etudo tuwadaru tabo. Makore ei. Akore: – Tadukaba boe tuginaiwuge etae. Tadukaba ia Samaritano doge eda ka. ⁶Tadudo tu Judeu doge etae. Ere nono okware boetowuge ovelha doge emogadure. Mare ovelha ji karega inagoino. Nou Judeu doge emeartorukare Pao Kurireuji pugeje. Dujire inagoino. ⁷Tadumode dukeje tamagomode tardure jiwuge ewiagai awu iwadaruji. Tamagodo: “Pao Kurireu umode boe eimijera kurireudo pudumi kuri je.” Ainore tagagomode boei. ⁸Tadumode dukeje tamode kogodureuge epemegago. Tamode bireuge eewodudo pugeje. Tamode kogodureuge biri pegareuge epemegago. Tamode bope doge etawuje boe epiji. Ire taragado tarowo awu inagoino jiwu taroji mare ikare nou ire maku tagaiboe morido. Dukodire tamodukare boe edo iaboe maku tagai tarore jiboe moriče jamedu. ⁹Tadukaba tori kuieje tabo. Tadukaba prata tabo. Tadukaba ia diero tabo rugadu. ¹⁰Tadukaba ia tagudau areia meture tadawu kadarabo tabo. Tadukaba ia tagudau areia tabo. Tadukaba ia tawure okeakejewu tabo. Tadukaba ia tagedu jiwu tagaibo tabo. Tadudo tu meture taiwu tagudau areia tabo. Tadumode tawo boe ewie iwadaruji. Dukodire boe etu pemegamode tai. ¹¹Tagaregodumode ia boe eda ka dukeje tagaiwodo ia ro pemegareu bagai tamuguwo nono uwai keje jii tadure kejewu meri ka. ¹²Tamode taremo nou baito dukeje tagimadudo nou boebo. ¹³Nou bai tadawuge ero pemegamode tai, etaidumode tai tietu pemegawo tai dukeje tawadaru pemegareu maku etai Pao Kurireu uwo boe pemegado ei. Mare ero pemegamodukare tai dukeje tagaba tawadaru pemegareu maku etai. ¹⁴Ia boe eda kejewuge etaidumodukare tamagore jiboeji. Ekimadumodukare tagabo dukeje tadudo epiji. Tadumode nou boe eda piji dukeje tawure okeakejewu to pui egai tawo moto urugudu tawuje nou tawure okeakejewu piji nou boe erduwo Pao Kurireu aidukare nou erore jiboe jituji kodire umode tugera ra epiji. ¹⁵Inure tawie. Boe pegamode nou aidukare taiwugei rugadu. Toro ia meri keje Pao Kurireu aiwomode boe eiamedu boe erore jiboeji. Mariguduwuge Sodoma kejewuge ero pegare. Gomorra kejewuge ero pegare jamedu. Dukodire nou meri keje Pao Kurireu umode boe pegado nou Sodoma kejewugei ero pegareu moriče. Umode boe pegado nou Gomorra kejewugei ero pegareu moriče. Mare nou aidukare taiwuge boe eire Pao Kurireu ro pega kuričigomode nou Sodoma kejewuge ekori, nou Gomorra kejewuge ekori jamedu.

Boe Pegamode Meartorure Jesus Jiwugei

¹⁶– Nou ire tadudo etaewuge ere nono rie doge emogadure. Tare nono ovelha doge emogadure. Mare barogo ji karega inagoino. Tameardae pegareu bokware. Dujire inagoino. Mare tadumode ewagaiwuge emeardae pegamode rugadu. Dujire inagoino. Dukodire inure tawie. Taeku jado nono awagu ro mogadure. Mare awagu ji karega inagoino. Tarduwado boe emeardae jamedu boeji. Dujire inagoino. Mare tameardae pegareu bokwado nono metugo mogadure. Mare metugo ji karega inagoino. Tameardae pegakaba boei rugadu. Dujire inagoino. ¹⁷Taeku jado ro pegareuge emeardae pegareu bagai. Mare ro pegareuge emode tugeragu tai rugadu. Emode tamagu Judeu doge eimijerage etai. Emode tarego Judeu doge ere bato puiwu bai ka. Nonore emode boeto tai tapira biri iku tabo. ¹⁸Tameartorumode i dukodire ro pegareuge emode tamagu boe ekimijera governador doge etai. Emode tamagu boe ekimijerage kurireuge etai rugadu. Nono tamode nou boe ekimijerage ewie iwadaruji jamedu. Tamode boe tuginaiwuge ewie iwadaruji jamedu. ^19-20Mare nou boe ekimijerage emode tadugu baičoreuto dukeje tamororamagadukaba ia tamagomode jiboe bagai. Tamororamagadukaba tamode ewie jiboe bagai. Tamagomode mare tawadaru karega. Pao Kurireu Uwari makomode tai tuwo tamagore jiboe maku tagai Tao nure ema kodi. Emare umode tarduwado Pao Kurireu makomode jiboeji tamagowo nou Pao Kurireu bataruji nou boe ekimijerage ewiagai.

^21-22– Imode tawie iaboeji pugeje. Tameartorure i dukodire boe erdu pegamode tai, ero pegamode tai. Mare tamodukare tagera ra ipiji dukeje imode taginorudo rugadu. Ia boe emeartorumode i dukodire etumana mage emode nou tuwiemage meartorure iwuge emagu boe eimijerage pegareuge etai ewidoduwo. Ia boe emeartorumode i dukodire etuo jordu pegamode ei. Dukodire nou etuo umode tore meartorure iwuge emagu boe eimijerage pegareuge etai ewidoduwo. Ia boe etore etuje meartorumode i dukodire boe etore etaidumodukare nou tujeji pugeje. Ia boe etore etuo meartorumode i dukodire nou boe etore etaidumodukare nou tuoji pugeje. Dukodire nou boe etore emode tujemage tuomage meartorure iwuge emagu boe eimijerage pegareuge etai ewidoduwo jamedu. ²³Mare ia boe ero pegamode tai dukeje tarego nou boe epiji tamuguwo ia boe eda keje pugeje. Iwo tawie. Imedu Onaregedu nure imi. Tadumode Judeu doge eno moto kejewu boe eda jamedu boe ka jii toro imode ikirimi kejewu meri ka. Mare tagaregodumodukare nou Judeu doge emugure kejewu eda jamedu boe ka jii itaregodumode du ka. ²⁴Boe emeartorumodukare ia mugure bapera kejewuji jorduwamodukare nono tugimijera mogadure. Boe emeartorumode tu nou mugure bapera kejewu ukimijeraji. Boe emeartorumodukare ia boe eimijera utugareji. Boe emeartorumode tu nou boe eimijeraji. ²⁵Mare nou mugure bapera kejewu jorduware jiboe umode nono nou ukimijera jorduware jiboe mogadure. Du ure turugadu. Nou boe eimijera utugare romode nono tugimijera ro mogadure. Du ure turugadu. Boe emode ia boe etuo iedo “Mareboe10.25 Nou mariguduwuge emagore Grego bataru tabo. Nou Grego bataru tabore nou mareboe iere Belzebu. Bope doge eimijera nure ema rugadu.” aino dukeje emode nou imedu uwobe ekiedo aino jamedu. Mare ire inagoino. Taire inagoino jamedu. Boe etokire i nou bope ie tabo. Etokimode tai jamedu. Dujire inagoino. Etoki kuričigomode tai rugadu tokire i dupiji rugadu. ²⁶Mare tabagudukaba eče. Boe ero pegamode dukeje etaidumode tuwo nou turo pegareu biado boe epiji tumagowo ro pemegareuge nuie pudumi. Mare Pao Kurireu jorduware marigudu ero pegareuji dukodire boe erduwamode nou ero pegareuji jamedu. ²⁷Tu tagi tarduware ia ire tarduwado jiboeji mare tamagodo nou ire tarduwado jiboeji boe ewiagai rugadu. Tamago pemegado ji boe eiamedu boe emearduwo tamagore jiboeji.

Boe Epagudukawo Čeboe Reo

²⁸– Tabagudukaba boeče. Boe emode tawido mare eragakare tuwo tawarigu bope doge eda kejewu joru pegareuto. Dukodire inagoino tai. Tabagudukaba eče. Tu Pao Kurireu meardae koiare umode boe ewarigu bope doge eda kejewu joru pegareuto boe ewi keje. Tabagududo tu Pao Kurireuče. Mare tabagudu remawu ji karega inagoino. Taragado tai rugadu tameartoruwo tu Pao Kurireuji rugadu. Dujire inagoino. ²⁹Ča kiebarege kugure emode pobe dukeje boe emode to diero tori rogu udo mitotu je tuwo akirodo nou kiebarege kugurei tugeče tuwo kowuje10.29 Nou mariguduwuge marenarue doge eke jire akoino. Egu ie bokware. Dukodire nou mariguduwu mercado tada boe emode tugeragu kiebarege kugurei tuge kodu roguče. Nou kiebarege ere nono pardal mogadure. Tu marenarue doge emode tugeragu ei tugeče.. Nou kiebarege emori bokware mare du inodu tabo Pao Kurireu biagodumodukare epiji rugadu. Ewudumodukare moto ka Pao Kurireu meardae piji. ^30-31Mare Pao Kurireu aidure tai du kodure nou kiebarege kugure eiamedu boe ekori. Dukodire jetu pemegamode tai rugadu. Jorduware tai rugadu. Jorduware tagao iku jamedu boeji. Jorduware nou inodu rogu boeji kodire jorduware nuba boe mode tai duji rugadu. Jetu pemegamode tai rugadu. Dukodire inagoino tai tabagudukawo boeče rugadu.

Boe Ewo Boe Ewie Tumeartoruie Jesusji

³²– Iwo tawie iaboeji pugeje. Ia boe emagomode boe eiamedu boe ewiagai tuie tumagu inai tumeartoruwo tu i dukeje imagomode Pao Kurireu biagai baru tada nou meartorure iwu nuie ema rugadu. Toro nou Pao Kurireu aiwomode boe ero pegareu bagaiwu meri kejere imagomode aino ji. ³³Mare ia boe makomode boe ewiagai tugaie tumagu inai, tumeartorukaie i dukeje imagomode Pao Kurireu biagai baru tada nou meartorukare iwu nuie ema rugadu. ³⁴Tameardaere itaregodure iwo boe epemegado pui. Ča itaregodure iwo boe pemegado boei rugadu. Mare ia boe emeartorumodukare i. Dukodire emeardaemodukare nono pumeardae mogadure imagore jiboeji. Dukodire boe epemegamodukare pui. ^35-36Marigudu Pao Kurireu ure boe ewie nuba boemode meartorure iwugei. Aino nou Pao Kurireu bataru jetumode pudui rugadu. Akore:

– Ime emeardaemodukare nono tuo meardae mogadure. Dukodire nou etuo meardae pegamode nou tore imei. Areme emeardaemodukare nono tuje meardae mogadure. Dukodire nou etuje meardae pegamode nou tore aremei. Areme emeardaemodukare nono turagomage emeardae mogadure. Dukodire nou eturago mage emeardae pegamode nou tujarugo magei. Nou imedu uwobe erdu pegamode ji. Jordu pegare jiwuge emode emage10.35-36 Awu bataru padure Miquéias 7.6 keje..

– Ainore Pao Kurireu akore marigudu. ³⁷Iwo tawie pugeje. Boe emeardu kurimodukare i tuje kori, tuo kori, tore ime ekori, tore areme ekori, dukeje ukare turugadu iwo erduwado imeardaeji. ³⁸Imeartorure Iogwa Kurireuji dukodire boe erdu pegare i, emode iwido. Boe etaidumode tuwo tumeartorudo imeardaeji dukeje ewo tudo turugadu tuwiwo nono iwimode dumogadure. Emodukare tudo turugadu tuwiwo nono iwimode dumogadure dukeje imodukare erduwado imeardaeji. ³⁹Boe emeardae pemegare tuwo tuginorudo mare emeardaere tu pudui. Mare nou eraga akedumode epiji rugadu. Egare remawu modukare. Emodukare tuginorudo bope doge eda kejewu joru pegareu piji rugadu. Mare ia boe ewiapagamodukare tumeardaeji pugeje tuwo tugera ra tumeardae piji, taidure jiboe piji tumeartoruwo i rugadu. Dukejere Pao Kurireu umode boe pemegado ei, umode egare remawudo rugadu. Nono ewarigudumodukare bope doge eda kejewu joru pegareuto. ⁴⁰Inure tawie. Ia boe erduware tameartorure i duji. Nono ekimadumode tagabo ekimadunure itabo jamedu. Ire eroino jamedu. Boe ekimadumode itabo ekimadunure ure itarego matowu Pao Kurireu apo jamedu. Ire eroino Pao Kurireu jire eroino jamedu. ⁴¹Boe erduware ia makore Pao Kurireu bataru jiwugei dukodire ekimadumode ebo dukodire Pao Kurireu umode boe pemegado ei nono turo moga makore Pao Kurireu bataru jiwugei dumogadure. Boe erduware ia ro pemegareugei dukodire ekimadumode ebo dukodire Pao Kurireu umode boe pemegado ei nono turo moga ro pemegareugei dumogadure. ⁴²Iwo tawie rugadu. Boe erduware meartorure iwugei dukodire emode pobo maku etai ekuduwo če. Dukodire Pao Kurireu umode boe pemegado ei eroino du moriče.

João Batista Ure Jorduwadowuge Ero Reo

¹Jesus ure tumago akedudo nou ture jorduwadowugei dukeje uture pugeje. Nou ure jorduwadowuge enodo padure doze. Ča uture Galiléia moto kejewu boe eda jamedu boe ka tuwo boe erduwado. Makore Pao Kurireu bataruji boe ewiagai tu tu je. ²João Batista rakojere baičoreu tada. Boe ere João Batista bie nou Jesus rore jiboeji makore jiboeji. Dukodire João Batista ure ia ture jorduwadowuge etudo toro Jesus bagai. ³Makore ei enarawo Jesusji Pao Kurireu umoduie maku boe etaiwu boe ekinorudowu nure ema rugadu kana? Enarawo Jesusji boe epagaiago ia bagai kimo kana? Dukodire eture Jesus ae rugadu. Enarare Jesusji nono tugimijera makore pudui dumogadure rugadu.

⁴Nono Jesus makore ewadaru jipagi. Akore: – Tagirimi tawo João biedu pemegado rugadu tardure jiwu irore jiboeji tameardure jiwu imagore jiboeji. ⁵Ire joku bokwareuge epemegago etaiwowo pugeje. Ire pogora pegareuge epemegago emeruwo pugeje. Ire kogodureuge ewiri pegareuge epemegago ewiri pemegawo pugeje. Ire bija bokwareuge epemegago emearduwo pugeje. Ire bireuge eewodudo pugeje. Ire marenarue doge ewie nou umode boe ekinorudowu aregoduie rugadu. ⁶Boe pemegamode nou meartorure iwu boei. Emodukare tugera ra tumeartorure i dupiji nono egaremode pudui rugadu.

^7-9Nou João Batista ure jorduwadowuge eture pugeje Jesus piji. Dukeje Jesus makore João Batista rore jiboeji nou rakojere pudabowuge boe ewiagai. Akore: – Marigudu tadure jiče boe akurugudu maereu ka mare tarduwo bakuru jeture boebutu jitu bagai karega. Tarduwo ukudau areia motureu jiwu boe ewagai karega. Tarduwo oe kurireuge ewagai karega. Nou ukudau areia motureu jiwu boe emugure bai kurireu tada. Oe kurireuge emugure bai kurireu tada. Tadumode bai kurireu ka nouge ewagai. Mare tadure boe maereu ka. Tadure toro tarduwo João Batistaji. Tarduware João Batista makore Pao Kurireu bataru jituji. Dukodire tadure toro boe maereu ka João Batista bagai. Aino ča imode tawie. João Batista makore Pao Kurireu bataruji rugadu. Mare imode tawie iaboeji pugeje. João Batista rore nono Pao Kurireu meardae mogadure rugadu. ¹⁰Dujire Pao Kurireu ure boe ewie marigudu. Nou bataru padure bapera keje. Akore: “Imode itugare arego uwo boe pemegado nou umode boe ekinorudowu togi.”11.10 Awu bataru padure Malaquias 3.1 keje. Ainore Pao Kurireu akore marigudu. João Batista jire akoino. Dukodire čare awu bataru jeture pudui rugadu.

¹¹Jesus mako kimore. Akore: – Iwo tawie boe remawuji rugadu. João Batista kurire boe eiamedu boe ekori. Mare aino ia boe etugare umode tugimijerado Pao Kurireuče dukeje kurimode João Batista kori Pao Kurireu jakai. ¹²João Batista aregodure dukeje ure boe ewie Pao Kurireu ure maku aiwu tuwadaru pemegareuji. Ainore rore jii aino. Akore Pao Kurireu umoduie boe eimijera kurireudo pudumi kuri aino. Dukodire nou aidukare nou bataru pemegareu jiwuge ere turokogado nou ure tugimijerado Pao Kurireu čewugei emeartorukawo ji pugeje. ¹³Moisés ure maku Judeu doge etaiwu bakaru ure boe ewie nuba Pao Kurireu romode. Makore Pao Kurireu bataru jiwuge ere Pao Kurireu bataru bu bapera keje jamedu boe erduwawo Pao Kurireu meardaeji. Ainore Pao Kurireu rore tuwo boe ewie tumeardaere jiboeji jii toro João Batista aregodure du ka. ¹⁴Marigudu Pao Kurireu ure boe ewie tumoduie Elias arego mato boe etae. Mare Elias ji karega akoino. Nou aregodumodewu romode nono Elias ro mogadure. Dujire akoino. Aino ča imode tawie. Awu João Batista nure ema rugadu. João Batista jire Pao Kurireu akoino. Rore nono Elias ro mogadure. Tameartorumode nou inoduji dukeje tameartorumode iwadaruji jamedu. ¹⁵Tawiapaga pemegado iwadaruji. ¹⁶Imode tarduwado nuba meartorukare João Batista jiwuge emeardaere. Ere nono boe etore ewadure puapo nono bawadu keje dumogadure. Ewadure puapo mare etokire pui. ¹⁷Egore: “Čere bapo akodo. Nono čemagore tai tareruwo mare tarerukare. Nono čemagore tai tagraguduwo čedabo mare tagragudukare.”

– Ainore boe etore egore pui. Epemegakare pui rugadu. Ča nou meartorukare João Batista jiwuge ere nono nou boe etore emogadure. Mare boe etore ei karega inagoino. João Batista makore boe ewiagai ewo tugimijerado Pao Kurireuče mare erokare aino. Dujire inagoino. ¹⁸João Batista ure tugera ra tuge piji jao tumagowo baruto nono boe ero mogadure. João Batista kudukare vinho kuruče nono ro pemegareu ro mogadure. Mare boe emago pegare ji. Egore bope uwari metuie tada. ¹⁹Imedu Onaregedu nure imi. Pao Kurireu ure itarego mato boe etae. Inogwagere boebo. Ikudure boebo. Mare du inodu tabo boe emago pegare i jamedu. Egore inogwage ierikaie. Mare pagare egoino. Egore ikudu kigoduie vinho kuruče. Mare pagare egoino. Egore itaiduie ro pegareugei, nou ure tugeragu boe enoe mori jiwugei, marenarue dogei jamedu. Ainore egore. Mare tumago pegawo i dubagaire egoino. Mare ia boe emeartorumode i. Dukodire boe erduwagodumode Pao Kurireu bataru remawu jire João Batista akoino duji. Boe erduwagodumode Pao Kurireu bataru remawu jire inagoino duji jamedu.

Ia Boe Eda Kejewuge Ekiarigodukaie Turo Pegareuji, Ekaie Tugera Ra Turo Pegareu Piji

²⁰Nono Jesus mako pegare ia boe eda kejewugei. Jesus ure turo rakado boe egai nono nou boe eda jamedu boe keje mare du inodu tabo nou boe ekare tugera ra turo pegareu piji. Emeartorukare Jesusji rugadu. ²¹Jesus akore: – Iro rakare Corazim ba kurireu keje iwo nou boe erduwado i. Dukodire erdure iro rakareuji. Mare du inodu tabo emeartorukare i. Dukodire boe pegamode ei rugadu. Iro rakare Betsaida ba kurireu keje iwo nou boe erduwado i. Erdure iro rakareuji. Mare du inodu tabo emeartorukare i. Dukodire boe pegamode ei jamedu. Marigudu Tiro ba kurireu kejewuge emeartorukare Pao Kurireuji. Marigudu Sidom ba kurireu kejewuge emeartorukare Pao Kurireuji. Nou Tiro ba kurireu kejewuge, nou Sidom ba kurireu kejewuge erdumode iro rakareuji dukeje ekiarigodumode turo pegareuji rugadu. Emode tugera ra turo pegareu piji. Emode jorugudu bu taora keje tuwo boe erduwado tugiarigodure turo pegareu boeji. Emode tugudau areia kwatorureu tugu pudui tuwo boe erduwado tugiarigodure turo pegareu boeji rugadu tumode tugera ra turo pegare jiboe piji duji.11.21 Ainore nou mariguduwuge erore jorugudu tabo, tugudau areia kwatorureu tabo. Boe ekiarigodure turo pegare jiboeji rugadu dukeje ere jorugudu bu taora keje rugadu, ere tugudau tawuje tubiji tuwo tugudau areia kwatorureu tugu pudui rugadu. Nono boe erdumode ia boe eroino duji dukeje erduware emeardae remawuji rugadu ekiarigodure turo pegare jiboeji rugadu, emode tugera ra nou turo pegareu piji rugadu. Mare erdukare i, erdukare iro rakareuji dukodire erduwakare i. Ekare tugera ra turo pegareu piji rugadu.11.21 Boe pegare Tiro ba kurireu kejewuge eiwu bataru padure Isaías 23.1-3 keje. Boe pegare Sidom ba kurireu kejewuge eiwu bataru padure Isaías 23.4 keje. Mare kočare Corazim ba kurireu kejewuge, Betsaida ba kurireu kejewuge, erdure iro rakareuji mare du inodu tabo ekiarigodukare turo pegareuji. Etaidukare tuwo tugera ra turo pegareu piji rugadu. ²²Pao Kurireu ure ia meri tawuje taiwowo boe eiamedu boe ero pegareu bagai nou meri keje. Tiro ba kurireu kejewuge emeartorukare Pao Kurireuji dukodire Pao Kurireu umode boe pegado ei nou ture tawujewu meri keje. Sidom ba kurireu kejewuge emeartorukare Pao Kurireuji dukodire Pao Kurireu umode boe pegado ei jamedu nou ture tawujewu meri keje. Mare Corazim ba kurireu kejewuge, Betsaida ba kurireu kejewuge erdure iro rakareuji mare du inodu tabo emeartorukare i. Dukodire Corazim ba kurireu kejewuge eire, Betsaida ba kurireu kejewuge eire, Pao Kurireu ro pega kurimode ei rugadu nou Sidom kejewuge ekori, nou Tiro kejewuge ekori. Pao Kurireu romode aino ei toro ia meri keje. Nou ture tawujewu meri kejere umode boe pegado ei rugadu. ²³Cafarnaum ba kurireu kejewuge emeartorure tu pudui turuduwo baruto. Mare pagatu je. Pao Kurireu umode ewarigu toro bope doge eda kejewu joruto nou taiwomode boe ero pegareu bagaiwu meri keje. Marigudu Sodoma ba kurireu kejewuge erdukare Pao Kurireu jordae pemegareuji dukodire ero pegare rugadu. Erdumode iro rakareuji nono Cafarnaum ba kurireu kejewuge erdure dumogadure dukeje ekiarigodumode turo pegareuji rugadu. Emode tugera ra turo pegareu piji. Mare erdukare. Dukodire ekare tugera ra turo pegareu piji rugadu. Dukodire Pao Kurireu ure nou Sodoma ba kurireu akedudo.11.23 Awu boe pegare Sodoma ba kurireu jiwu bataru padure Gênesis 19.15-29 keje. Mare nou Cafarnaum ba kurireu kejewuge erdure iro rakareuji rugadu. Mare du inodu tabo ekiarigodukare turo pegareuji. ²⁴Dukodire imode tawie. Boe pegamode nou Sodoma kejewugei nou Pao Kurireu aiwomode boe ero pegareu bagaiwu meri keje. Mare nou meri keje nou Cafarnaum ba kurireu kejewuge eire Pao Kurireu ro pega kurimode ei rugadu nou Sodoma kejewuge ekori.

Jesus Umode Meartorure Puduiwuge Edo Tamudo

²⁵Nono Jesus makore Pao Kurireu bagai baruto. Akore: – Iogwa. Imago pemegawo ai. Baru tadawuge eimijera kurireu nure aki. Moto kejewuge eimijera kurireu nure aki. Are mugukare bapera kejewuge erduwado ameardaeji. Mare are nou ameardae biado jorduwareuge epiji. Are biado mugure bapera kejewuge epiji. Mare are mugukare bapera kejewuge erduwado. Dukodire imago pemegare aino ai. ²⁶Ainore ameardaere. Nou ameardae ure aegaredo ai rugadu.

²⁷Jesus ure nou tuwadaru akedudo baruto dukeje makore boei. Akore: – Iogwa ure boe jamedu boe maku inai. Tu Pao Kurireu jorduware Tonaregeduji. Tu nou Onaregedu jorduware Tuoji. Mare Onaregedu umode nou ture tugeragu jiwuge erduwado Pao Kurireuji jamedu. ²⁸Ia tagi tamagore tameartorumoduie Pao Kurireuji dukodire tare taragado tai tameartoruwo nou Judeu doge eno bakaruji. Mare taraga tabore taroiwakare. Dukodire tagiarigodure, tamedugodure. Ča. Mato itae. Imode taraga maku tagai tawo tagamudo. ^29-30Imode maku boe etaiwu iwadaru rakakare. Iro butugumode boei rugadu. Ikare boe remawudo imi iwo imeardae pemegado boe eiamedu boei. Imode maku boe etaiwu iro rakakare boei. Dukodire meartorure iwuge emode tamudo rugadu. Dukodire inagoino tai tameartoruwo i. Tarduwagoduwo iwadaruji rugadu tameartoruwo i rugadu.

Boe Enarare Jesusji Nuba Turomode Sábado Meri Keje

¹Jesus merure boepa oiagi sábado meriji. Trigo ure nou boepa tada. Nou ure jorduwadowuge ekodure apo. Ča nou Jesus ure jorduwadowuge eke boeire ei. Dukodire ere tugeragu trigo enariji tuwo ko. ²Fariseu doge erdure erore aino duji dukeje emagore Jesusji. Egore: – Akaiwodo. Judeu doge nure pagi. Sábado meriji pamaragodumodukare rugadu. Dukodire pamodukare pageragu trigoji sábado meri keje. Mare nou are jorduwadowuge ere tugeragu ji. Ukare turugadu!

³Jesus akore: – Kočare tarduwakare Pao Kurireu bataruji! Dukodire tarduwakare Pao Kurireu meardae remawuji. Tarduwamode Pao Kurireu meardae remawuji dukeje tamago pegamodukare čeroino aino duji. Mariguduwu Judeu doge eimijera kurireu Davi rore jiboe padure Pao Kurireu bataru keje. Dujire tarduwakare. Nou Davi uke boeire ji. Utugarege tugobaigarege eke boeire ei jamedu. ⁴Dukodire ure turemo Pao Kurireu uwaito. Okwagere boe ere maku Pao Kurireu aiwu amireuji. Pao Kurireu ure turo maku mariguduwuge pawobe Judeu doge etai. Makore ei ekawo nou amireu kowuje. Tu nou ure Judeu doge enomea maku Pao Kurireu aiwuge emode nou Pao Kurireu uwai tadawu amireu kowuje. Ainore Pao Kurireu akore. Ainore pawobe Judeu doge erore. Mare Davi ure nou Pao Kurireu uwai tadawu amireu kowuje. Ure ia maku tudugarege etai ewo kowuje jamedu. Mare Pao Kurireu mako pegakare eroino duji.12.4 Awu bataru padure 1 Samuel 21.1-6 keje. Dukodire imagore aino tai tamago pegakawo čere čegeragu trigo jituji jamedu. ⁵Kočare tarduwakare Pao Kurireu bataruji! Nou Moisés ure maku Judeu doge etaiwu bakaru akore nou maragodure Pao Kurireu uwai tadawuge ewo tagu barogo kowu boe ero pegareu moriče sábado meri keje. Ainore Pao Kurireu akore. Aino emaragodure sábado meri keje. Mare Pao Kurireu jordu pegakare eroino duji.12.5 Awu bataru padure Números 28.9-10 keje.⁶Iwo tawie. Ikurire Pao Kurireu uwai kori. ⁷Pao Kurireu bataru remawu akore Pao Kurireu aiduie boe enoguduwo puapo. Aiduie boe ewo tagu barogo rogu kowu turo pegareu moriče mare aidu kurie boe enoguduwo puapo rugadu.12.7 Awu bataru padure Oséias 6.6 keje. Tarduwamode awu Pao Kurireu bataru remawuji dukeje tameartorumode ji. Dukeje tamago pegamodukare aino ro pega bokwareugei. ⁸Ča iwo tawie. Imedu Onaregedu nure imi. Imire imode boe erduwado rugadu nuba boe eromode sábado meri keje.

⁹Jesus ure nou tuwadaru akedudo dukeje uture nou boe epiji. Uture ere bato puiwu bai ka. Ure turemo. ¹⁰Ia imedu rakojere nono. Iera pegare. Nou ierare tudorido puapo. Ia boe eimijerage edu nono jamedu. Erdu pegare Jesusji. Dukodire etaiwore Jesus ia ro pegamode tiagai dubagai. Judeu doge eromodukare ia turore jiboeji sábado meri keje. Dukodire etaidukare boe eiogowo boei sábado meri keje. Mare Jesus umode nou imedu iera pemegago nou meriji dukodire nou boe eimijerage erdu pegamode nou Jesus rore aino duji. Dukodire enarare Jesusji. Egore: – Pago bakaru ure parduwado boe eiogowo sábado meri keje?

¹¹Mare Jesus makore ewadaru jipagi. Akore: – Tagagore boe emaragodukaiago sábado meri keje tumeartoruwo pago bakaruji. Mare nuba paromode pagagu ie ovelha dogei sábado meri keje? Ia pagagu ovelha butumode moto poroto sábado meri keje dukeje pamodukare tawuje rugadu kana? Boro pamode tawuje rugadu. Kočare pamaragodu tabo kana parore aino? ¹²Ča Pao Kurireu aidure boei nou boe egu ovelha doge ekori. Dukodire paro pemegamode boei sábado meri keje du pegamodukare Pao Kurireu ure maku pagaiwu bakaruji.

¹³Nono Jesus makore nou imedu iera pegareuji. Akore: – Akera raido itae.

Nono nou imedu ure tugera raido Jesus ae. Čare iera pemegagodure tači je rugadu. Pemegare nono nou iera abowu mogadure. ¹⁴Nou boe eimijerage fariseu doge ekorigodure rugadu. Erdu pegare Jesus rore aino duji sábado meri keje. Du ainodu otobiji emagore pui tu tu je tuwo ia tumeardae pegareu tawuje tuwo Jesus bito rugadu.

Pao Kurireu Ure Tugeragu Jiwu Utugare Reo

¹⁵Mare Jesus jorduware emeardae pegareuji. Dukodire uture nou boe eda piji. Mare boe emagare tudure Jesus apo duji. Dukodire Jesus ure nou uture pudabowuge kogodureuge epemegago. ¹⁶Mare makore ei ekawo boe ewie kaboba ure pudumi duji. ¹⁷Dujire Pao Kurireu makore marigudu. Marigudu ure tuwadaru maku Isaías ai uwo bu bapera keje. Akore:

¹⁸– Itugare reo. Ire ikeragu ji rugadu. Imeardu kurire ji rugadu. Ure iagaredo i rugadu. Imode Iwari maku ai rugadu. Emare umode boe ewie Pao Kurireu ro pemegamoduie boei duji. Umode boe ewie Pao Kurireu umoduie meartorure puduiwuge ekinorudo ero pegareu mori piji. Umode Judeu doge ewie. Umode boe tuginaiwuge ewie jamedu. ¹⁹Okimodukare boei. Mako rakamodukare boei. Mako pegamodukare toro nou boe etae. ²⁰Umodukare boe pegado rakakareugei. Umodukare boe pegado marenarue dogei. Ainore itugare romode jii boe emeartorure jitu ka uwo boe ekinorudo turo pegareu mori piji. ²¹Nou itugare ie jire boe eiamedu boe emeartorumode. Epagamode uwo meartorure puduiwuge eiamedu boe ekinorudo du bagai rugadu.12.21 Awu bataru padure Isaías 42.1-4 keje.

Aino čare awu Pao Kurireu bataru jeture pudui rugadu.

Boe Egore Bope Eimijera Kurireu Belzebu Metuie Jesus Tada

²²Ia meri keje boe etaregodure Jesus ae ia joku bokwareu imedu apo. Nou imedu mako bokware jamedu. Mare bope uwari meture tada dukodire nou bope uwari koiare ure nou imedu joku bokwado ure mako bokwado. Nono Jesus ure nou imedu pemegago rugadu dukodire nou imedu makore pugeje, aiwore pugeje. ²³Nou boe eiamedu boe erore ta je. Enarare pui. Egore: – Nou Pao Kurireu umoduie maku pagaiwu Davi Onaregedu kana?12.23 Davi Onaregedu Akaiwodo Mateus 1.1 kejewu rodapé bataru roguji.

²⁴Fariseu doge emeardure egoino duji dukeje emago pegare Jesusji pu biagai. Egore: – Bope doge eimijera Belzebu12.24 Nou Belzebu iere Satanás jamedu. Bope doge eimijera jire nou jaoboe egoino. Akaiwodo Mateus 10.25 kejewu rodapé bataru roguji. meture Jesus tada dukodire ure turaga maku Jesus ai Jesus uwo bope uwari tawuje boe epiji.

²⁵Mare Jesus jorduware emeardae pegareuji. Dukodire makore nou fariseu dogei. Akore: – Nou epokare puapowu boe erugodumode pui rugadu. Dukeje eraga akedumode epiji kuri je. Boe erugodumode tuwobei dukeje emode tugera ra pubiji rugadu. ²⁶Ča meartorure Satanás jiwuge emode Satanás utugarege bope doge etawuje ia boe epiji dukeje ere nono epokare puapowuge emogadure. Erugodumode pui rugadu. Dukodire nou meartorure Satanás jiwuge eragamodukare rugadu etagedumode rugadu. ²⁷Kočare tagagore nou Belzebu raka taboie ire bope uwari pegareu tawuje boe epiji. Mare nou tare jorduwadowuge nuba erore tuwo bope uwari tawuje boe epiji? Pao Kurireu raka tabore eroino na? Tu Pao Kurireu rakare tuwo bope doge etawuje boe epiji tu rugadu. Dukodire nou tare jorduwadowuge egomode pagaie tagagoino Belzebu raka taboie ire bope uwari tawuje boe epiji. ²⁸Pao Kurireu koiare ure turaga maku inai iwo bope doge etawuje boe epiji rugadu. Dukodire boe erdure Pao Kurireu ro rakareuji rugadu. Turore aino dutabo Pao Kurireu makonure boe ewagai ewo tugimijera kurireudo tu pudumi rugadu. ²⁹Ča iwogureu aidure tuwo turemo ia tugobaigare uwaito tuwo tugeragu nou tugobaigare oeji. Mare umode nou tugobaigare kogudo bukigu tabo boetoji. Nono umode tugeragu nou tugobaigare oeji rugadu tuduwo tabo rugadu. ³⁰Aidukare iwu aidumode tuwo imeardae pegado tuwo iro bokwado. Ukare tugera maku inaiwu umodukare boe etarego itae. Umode boe edo taodo ipiji. ^31-32Boe jokodu jire inagoino. Boe etaidukare turo pegareuji pugeje dukeje Pao Kurireu biagodumode nou ero pegareu piji. Boe emago pegamode Imedu Onaregeduji mare toro ia meri keje ekiarigodumode nou tuwadaru pegareuji. Emagomode Pao Kurireuji biagoduwo nou tuwadaru pegareu piji. Dukeje Pao Kurireu biagodumode ewadaru pegareu piji rugadu. Mare ia boe emago pegamode Pao Kurireu Uwariji dukeje Pao Kurireu biagodumodukare nou ewadaru pegareu piji. Nou bataru metumode nou boebo jii rugadu. Du akedumodukare rugadu. Dukodire Pao Kurireu biagodumodukare nou inodu piji rugadu.

³³– Iwo tawie. Iguru pegareu tudu pemegamodukare. Iguru pemegareu tudu pemegamode rugadu. Boe erduwamode tuduji dukeje erduwamode nou tudu iji jamedu. Mare iguru ji karega inagoino. Ire inagoino. Ča tameardae tawuje nuba ire taegai. ³⁴Mare tare nono awage pegareuge emogadure. Mare awagu ji karega inagoino. Ro pegareuge nure tagi marigudu. Dujire inagoino. Dukodire tameardae pemegamodukare i rugadu. Dukodire tamago pemegamodukare i jamedu. Boe ewiagoromode tumeardae pegareu tabo dukeje emago pegamode nono nou tumeardae mogadure. ³⁵Boe ewiagoromode tumeardae pegareu tabo dukeje ero pegamode emago pegamode nono nou tumeardae mogadure. Mare boe ewiagoromode tumeardae pemegareu tabo dukeje ero pemegamode emago pemegamode nono nou tumeardae mogadure jamedu. ³⁶Toro ia meri keje Pao Kurireu aiwomode boe eiamedu boei ero pegareu bagai. Dukeje boe eiamedu boe emagomode turore jiboeji tumagore jiboeji Pao Kurireu biagai rugadu. Boe etaidumode tuwo ia tuwadaru biado mare pagatu je. Pao Kurireu jorduware marigudu emeardaeji. ³⁷Dukodire imode tawie. Tamagore jiboe pemegamode dukeje Pao Kurireu mako pegamodukare tai. Mare tamagore jiboe pegare dukeje Pao Kurireu makomode tai tumoduie boe pegado tai tawadaru pegareu moriče.

Boe Emagore Ia Jesus Ro Rakareu Bagai Pugeje

³⁸Nono ia fariseu doge emagore Jesusji. Ia jorduware Judeu doge eno bakaru jiwuge emagore Jesusji jamedu. Egore: – Čegimijera. Čerdudo ia aro rakareuji čemeartoruwo ai.

Mare pagatu jere egoino. Etaidukare tumeartoruwo Jesus bataruji. ³⁹Nono Jesus makore ewadaru jipagi. Akore: – Aino čare boe emeardae pegare rugadu, ero pegare rugadu. Ainore tameardaere jamedu. Tamagore i iwo ia iro rakareu tawuje taegai tarduwo iro rakareuji tarduwawo kaboba ure imi duji. Mare pagatu jere tagagoino. Dukodire iromodukare ia iro rakareuji taegai pugeje. Mare boemode i nono boe moga Jonas jitu mogadure. Dukejere boe erduwamode i rugadu. ⁴⁰Marigudu Jonas meture karo kurireu kuri tada. Merire pobe metia bokware ji nono nou karo kuri tada. Dukejere Pao Kurireu ure Jonas tawuje nou karo kurireu kuri piji rugadu.12.40 Awu Jonas jiwu bakaru padure Jonas 1.17 keje. Aino Imedu Onaregedu rakojemode moto tada jamedu. Merimode pobe metia bokware ji nono jamedu. ⁴¹Pao Kurireu ure Jonas tawuje karo kurireu kuri piji dukeje uture Nínive ba kurireu ka Pao Kurireu bataru tabo. Dukodire nou Nínive kejewuge erduware boe jokodu jire Jonas akoino pudui duji. Ekiarigodure turo pegareuji. Ere tugera ra turo pegareu piji rugadu tumeartoruwo Pao Kurireuji. Mare boe eimijera kurireu nure imi. Ikodure Jonas kori. Iorduware jiboe kodure Jonas jorduware jiboe kori. Mare du inodu tabo tagaidukare tarduwawo i. Tagaidukare tawo tagera ra taro pegareu piji. Toro ia meri keje Pao Kurireu umode boe eewodudo pugeje taiwowo boe ero pegareu bagai tuwo boe pegado ei ero pegareu moriče. Nou meri keje nou Nínive ba kurireu kejewuge emago pegamode tai tawiapagakare iwadaruji dukodi. ⁴²Marigudu Sabá moto kejewuge boe eimijerago kurireudo aidure rugadu tuiorduwawo Judeu doge eimijera kurireu Salomão jorduware jiboeji12.42 Awu Sabá moto kejewuge boe eimijerago jiwu bakaru padure 1 Reis 10.1-10 keje, 2 Crônicas 9.1-12 keje jamedu.. Dukodire ure tudawuje to moto piji tuduwo toro Salomão uwai ka tumearduwo Salomão makore jiboeji. Mare boe eimijera kurireu nure imi. Ikodure Salomão kori. Iorduware jiboe kodure Salomão jorduware jiboe kori. Mare du inodu tabo tagaidukare tarduwawo i. Toro ia meri keje Pao Kurireu umode boe eewodudo pugeje taiwowo boe ero pegareu bagai tuwo boe pegado ei ero pegareu moriče. Nou meri keje nou Sabá moto kejewu boe eimijerago aredu mako pegamode tai tawiapagakare iwadaruji dukodi.

Bope Uwari Umode Tugirimi

^43-44Jesus mako kimore boei. Akore: – Bope uwari pegareu umode tudawuje ia imedu piji dukeje utumode toro boe maereu ka taiwo tabo tumode tamudo kejewu bagai. Jordumodukare taidure jiboeji dukeje meardaemode tuwo tugirimi nou tumedure tadawu imedu ae pugeje tuwo turemo to pugeje. Dukodire nou bope uwari pegareu umode tugirimi nou tumedure tadawu imedu ae rugadu. Aregodumode dukeje jordumode ji pemegare duji. Jordumode ji ure nono tuwai motureu umogadure. ⁴⁵Dukejere utumode toro tumedage bope doge ewagai. Enodo padure sete. Epegare nou bope uwari boetojiwu kori. Bope uwari boetojiwu makomode ei etuwo pudabo toro nou imedu ae. Nono emode turemo nou imeduto pugeje. Dukodire boe pegamode nou imeduji rugadu. Boetojiwu meture tadawu bope uwari ure mitotu je. Aino čare bope doge enodo padu kejeboere oito nou imedu tada. Dukodire boe pegamode nou imeduji rugadu. Ča iwo tawie. Meartoru bokware iwugeire boe pegamode rugadu nono boe pegare nou imedu jitu mogadure.

Jesus Uče Uwiemage Etaregodure

⁴⁶Jesus mako kimore boei dukeje uče uwiemage etaregodure bagai. Etaidure tumagowo ji. Mare ekare turemo baito. Epagare bagai toro bawadu keje. ⁴⁷Ia imedu ure Jesus bie. Akore: – Ače, awiemage etaregodure. Eragojere toro bawadu keje. Etaidure tumagowo ai.

⁴⁸Jesus akore: – Imode tawie ioguduba nure mugače, ioguduba nure iwobeče.

⁴⁹Nono Jesus ure tugera raido nou ture jorduwadowuge eiagwai. Akore: – Awu ire jorduwadowuge ere nono iwobe emogadure. ⁵⁰Meartorure Iogwa Kurireu meardae jamedu boe jiwuge ere nono iwobe emogadure rugadu. Ere nono iwie mage emogadure rugadu. Ere nono muga mage emogadure rugadu.

Boepa Tadaboe Jiwu Bakaru Reo

^1-2Nou meriji rugadu Jesus uture nou bai piji pobo maereu okwa ka pugeje. Boe ere bato pui nono tumearduwo Jesus bataruji pugeje. Emagare rugadu. Dukodire Jesus ure taredo ia ika kurireuto. Nou ika kurireu padure nono pobo tada. Nou boe edure pobo okwai tumearduwo Jesus bataruji. Jesus ure tumugudo nou ika kurireu ja tada. ³Dukejere Jesus readodure ewiagai ia bakaruji tuwo erduwado toro nouia Pao Kurireu meardaeji. Akore: – Ia imedu ure tudawuje tuwo boe a roto ja ja moto joki to boepa tada. ⁴Ia a buture awara okwaji. Dukodire kiebarege ere nou buture awara okwa jiwu boe a rugadu kowuje. ⁵Ia a buture toriguru tada. Boture kuri je mare moto pegare ji. ⁶Dukodire boeru jeture ji dukejere nou boeru ure nou botureboe bito kuri je rugadu. Ukwa bokware kodi. Moto pegare kodi. ⁷Ia a buture botoguru tada. Botoguru boture tabo mare botoguru ure bito. ⁸Mare ia a buture moto pemegareu keje. Ere tuguwu sacu ure mitotu je. Botu pemegare, ričodu pemegare, enari kurire rugadu. Kidure dukeje ere rawuje čiwu piji. Ere a rawuje tuwo tugu sacuto. Nou sacu doge emagare. Enodo padu kejeboere trinta, ere sessenta, ere cem nou boe a tabo rugadu. ⁹Tawiapaga pemegado awu iwadaruji tarduwawo kaba jiba inagoino tai.

¹⁰Nou Jesus ure jorduwadowuge enarare Jesusji. Egore: – Kaba kodiba areadodure bakaruji aino boe ewiagai?

¹¹Jesus akore: – Ireadodure bakaruji iwo boe erduwado toro nouia Pao Kurireu meardaeji. Mare paga karega. Ireadodure bakaruji aino Pao Kurireu uwo tarduwado meture pudabowu tumeardae boeji, boe ewo tugimijerado ema. Mare iage emodukare boe pa nou bakaruji. ¹²Boe erduware Pao Kurireu bataruji. Etaidure tumeartoruwo ji dukeje Pao Kurireu umode erduwa kurido pudui emeartoruwo pudui rugadu. Mare ia boe etaidumodukare tumeartoruwo tuiorduware jiwu Pao Kurireu bataruji dukeje Pao Kurireu umode erduwa bokwado tuwadaruji. Emeardaere tuiorduwaie rugadu mare pagatu je. ¹³Dukodire ire boe erduwado toro nouia Pao Kurireu meardaeji nou bakaru tabo boe ewiagai. Dukodire etaiwomode rugadu mare erdumodukare boeji. Ewiapagamode mare erduwamodukare boeji. ¹⁴Marigudu Isaías ure Pao Kurireu bataru bu bapera keje. Awu boe eire nou bataru akoino. Akore:

– Tameardumode Pao Kurireu bataruji jii je mare tarduwamodukare ji. Tardumode Pao Kurireu rore jiboeji jii je mare tameartorumodukare emare roino duji rugadu. ¹⁵Boe etaidukare tumeartoruwo Pao Kurireuji. Etaidumode tumeartoruwo Pao Kurireuji dukeje etaiwomode Pao Kurireu rore jiboeji tuiorduwawo Pao Kurireu meardaeji. Etaidumode tumeartoruwo Pao Kurireuji dukeje ewiapaga pemegamode Pao Kurireu bataruji tuiorduwawo Pao Kurireu meardaeji rugadu. Dukejere etaidumodukare turo pegareuji pugeje. Emode tugera ra turo pegareu piji. Dukodire imode ekinorudo ero pegareu piji. Mare etaidukare tumeartoruwo dukodire ewijare mare ewiapaga pemegamodukare. Ekure mare ere tuioku mi taiwokawo Pao Kurireu rore jiboeji.13.15 Awu bataru padure Isaías 6.9-10 keje.

– Ainore Pao Kurireu makore marigudu. ¹⁶Mare tagi tagaidure tameartoruwo rugadu dukodire tagaiwore irore jiwu Pao Kurireu rore jiboeji. Tawiapaga pemegare imagore jiwu Pao Kurireu bataruji. Dukodire tarduwagodunure Pao Kurireu meardaeji rugadu. ¹⁷Imode tawie. Mariguduwuge makore Pao Kurireu bataru jiwuge etaidure rugadu tuiorduwo tardure jiwu irore jiboeji. Mariguduwuge ro pemegareuge etaidure rugadu tuiorduwo tardure jiwu irore jiboeji. Mare erdukare ji. Etaidure tumearduwo tameardure jiwu imagore jiboeji mare emeardukare ji rugadu.

¹⁸– Dukodire čare imode tawie nou imagore jiwu bakaruji. ¹⁹Ainore awu bakaru ure. Boe eire inagoino. Pao Kurireu o bataru ure nono nou boe a mogadure. Mare boe a ji karega inagoino. Pao Kurireu bataru aregodumode boe etae. Nono boe emeardumode Pao Kurireu bataruji. Dujire inagoino. Boe emeardumode Pao Kurireu bataruji dukeje bope doge eimijera umode nou Pao Kurireu bataru tawuje nou boe epiji nono nou kiebarege ere nou boe a tawuje awara piji dumogadure. Mare kiebarege ei karega inagoino. Bope doge eimijera jire inagoino. Umode boe ewiago Pao Kurireu bataru piji rugadu. Dujire inagoino. Dukodire nou boe emeartorumodukare Pao Kurireu bataruji rugadu. Emodukare tugimijerado ema rugadu. ^20-21Ia boe emeardumode Pao Kurireu bataruji pugeje. Nono nou boe emode nono nou boture toriguru tadawu boe a mogadure. Nou boture toriguru tadawu boe a rakamodukare. Mare boe a ji karega inagoino. Boe eire inagoino. Nou boe eragamodukare tumeartoru raiwo Pao Kurireuji. Dujire inagoino. Emode tugeragu Pao Kurireu bataruji tiagare tabo mare emeartoru raimodukare ji. Dujire inagoino. Boe emode boe pegado ei dukeje emode tugera ra tumeartorure Pao Kurireu jitu piji kuri je. ²²Ia boe emeardumode Pao Kurireu bataruji pugeje. Awu boe emode nono nou boture botoguru tadawu boe a mogadure. Botoguru umode boe pegado ji umode bito. Mare boture botoguru tadawu boe a ji karega inagoino. Boe eire inagoino. Nou boe emeardumode Pao Kurireu bataruji. Etaidure tumeartoruwo ji mare kuri je emororamagadumode tu tumeardae boeji pugeje. Dujire inagoino. Emeardaere tu pudui tuwo to diero kurido. Dujire inagoino. Emeardaere to diero umode tuginorudo pagatu je. Dukodire emode tugera ra Pao Kurireu bataru piji. Dujire inagoino. ²³Mare ia boe emeardumode Pao Kurireu bataruji dukeje emeartorumode ji rugadu. Dukodire epemegamode rugadu nono nou boture moto pemegareu boe a mogadure. Mare boture moto pemegareu kejewu boe a ji karega inagoino. Boe eire inagoino. Nou boe emeardumode Pao Kurireu bataruji nono emeartorumode ji rugadu. Dujire inagoino. Emodukare tugera ra tumeartorure jitu piji rugadu jii toro rugadu. Dujire inagoino.

Boepa Tadawu Boto Jiwu Bakaru Reo

²⁴Jesus makore boei pugeje. Readodure ia bakaruji tuwo boe erduwado toro nouia Pao Kurireu meardaeji pugeje. Akore: – Imode tawie duba ure tugimijerado Pao Kurireu čewuge ere. Boemode ei du mode nono ia imedu moga ure to boepa pemegado dumogadure. Imedu ure boe a pemegareu tugu to boepato. ²⁵Dukejere boečoji boe eiamedu boe enudure. Mare nou boečoji ia jordu pegare nou imedu jiwu uture nou imedu o boepa ka. Ure boto a tugu nou boepato nou trigo oiadada. Dukeje uture pugeje. ²⁶Nou trigo a boture dukeje ričodure. Mare boto boture nou trigo tabo dukodire boto ričodure trigo tabo rugadu. ²⁷Nou ore boepa čewu utugarege etaregodure tugimijera ae. Emagore tugimijeraji. Egore: “Čegimijera. Are trigo a pemegareu tugu ako boepa tada rugadu. Kočare kodiba boto boture nou trigo tabo rugadu?”

²⁸– Nou ore boepa čewu akore: “Imedu jordu pegare iwu ro pegare ino boepaji rugadu.”

– Utugarege enarare ji. Egore: “Akaidure čeduwo ako boepato čewo nou boto tawuje moto piji čegera tabo čewo ako boepa akudo kana?”

²⁹– Ore boepa čewu akore: “Boro. Tamode boto tawuje moto piji dukeje nou trigo tawujedumode jamedu boto tabo. ³⁰Parokawo boeji botoji ji je. Ričodumode trigo tabo gu nou trigo kurodumode du ka. Trigo kurodure dukeje imode nou umode trigo kadowuge ewie ewo boto kado boetoji. Emode boto kado trigo piji dukeje ewo boto kogudo. Nono emode barigu joruto tuwo boto kowu rugadu. Nono imagomode ei ewo trigo kado rugadu, ewo trigo reko nou ire trigo jeto tadawu bai ka.”

Ainore Jesus akore.

Mostarda A Jiwu Bakaru Reo. Fermento Jiwu Bakaru Reo

³¹Jesus readodure ia bakaruji pugeje tuwo boe erduwado toro nouia Pao Kurireu meardaeji pugeje. Akore: – Imode tawie nuba nou emode tugimijerado Pao Kurireu čewuge emode. Nou emode tugimijerado Pao Kurireu čewuge emagamodukare boetoji mare ia meri keje emagagodumode rugadu. Emode nono mostarda a mogadure. Imedu ure nou mostarda a tugu to boepato. ³²Nou mostarda a kurikare rugadu. Boe a jamedu boe kurire nou mostarda a kori. Mare boture dukeje ričodumode rugadu nou boe emode tugu to boepa tadaboe iku jamedu boe kori. Ričomode nono iguru mogadure. I kurimode. Tugu kurimode jamedu. Dukodire kiebarege emode tumugudo keje.

³³Nono Jesus readodure ia bakaruji pugeje tuwo boe erduwado toro nouia Pao Kurireu meardaeji pugeje. Akore: – Imode tawie nuba nou ere tugimijerado Pao Kurireu čewuge emode. Nou emode tugimijerado Pao Kurireu čewuge emagamodukare boetoji mare ia meri keje Pao Kurireu utugarege emagagodumode rugadu. Emode nono fermento mogadure. Aredu ure tugeragu fermentuji. Ure tugu trigo kuduto. Nono ure trigo kudu udo amireuče. Nou fermento jore nou amireu jamedu boeto.

³⁴Ainore Jesus akore. Readodu kigodure bakaruji boe ewiagai tuwo boe erduwado toro nouia Pao Kurireu meardaeji rugadu. Tu tureadodu tabore ure boe erduwado. ³⁵Dujire Pao Kurireu ure boe ewie marigudu. Akore: – Imagomode dukeje ireadodumode bakaruji iwo boe erduwado toro ia Pao Kurireu meardaeji. Marigudu Pao Kurireu ure nou tumeardae biado boe epiji boe erduwakawo ji. Ure moto towuje baru towuje dupijire boe erduwakare nou Pao Kurireu meardaeji. Nono ireadodumode bakaruji boe ewiagai iwo erduwado toro nou Pao Kurireu meardaeji rugadu13.35 Awu bataru padure Salmo 78.2 keje..

Ainore nou makore Pao Kurireu bataru jiwu akore marigudu. Ure nou tuwadaru bu bapera keje marigudu rugadu. Aino ča nou bataru jeture pudui rugadu. Jesus jire akoino.

Jesus Ure Ture Jorduwadowuge Erduwado Nou Boepa Tadawu Boto Bakaruji

³⁶Jesus ure nou tuwadaru akedudo dukeje uture nou boe epiji toro ia bai ka. Ure turemo nou baito. Nono nou Jesus ure jorduwadowuge etaregodure ae. Enarare ji. Egore: – Kaba jiba akagoino nou boepa tadawu botoguru bakaru jiboeji?

³⁷Jesus makore ewadaru jipagi. Akore: – Nou ure boe a pemegareu tugu to boepa towu ure nono Imedu Onaregedu mogadure. ³⁸Nou boepa ure nono boe emogadure. Nou boe a pemegareu ure nono nou ure tugimijerado Pao Kurireu čewuge emogadure. Nou boto ure nono nou meartorure bope doge eimijera jiwuge emogadure. ³⁹Nou ure boto tugu boepa towu ure nono bope doge eimijera mogadure. Boe ere nou boepa tadaboe kado dure nono Pao Kurireu umode moto akedudo kejewu meri mogadure. Nou ure boepa tadaboe kadowuge ere nono Pao Kurireu utugarege baru tadawuge emogadure. ^40-42Mare boto ji karega inagoino. Meartorure bope doge eimijera jiwugeire inagoino. Boe a pemegareu ji karega inagoino. Ure tugimijerado Pao Kurireu čewugeire inagoino. Imedu Onaregedu umode tugirimi pugeje dukeje umode tudugarege baru tadawuge etudo tododai nou meartorure bope doge eimijera jiwuge ro pegareuge ewagai. Pao Kurireu utugarege baru tadawuge emode tugeragu nou meartorure bope doge eimijera jiwuge eiamedu boei nou ure tugimijerado Pao Kurireu čewuge epiji. Emodukare tugeragu nou ure tugimijerado Pao Kurireu čewugei. Nono nou Pao Kurireu utugarege baru tadawuge emode nou meartorure bope doge eimijera jiwuge ewarigu toro bope doge eda kejewu joru pegareuto. Nonore etragudu rakamode rugadu joru kori koia. Emode to reko pui tuwiri boe kori koia. ⁴³Mare nou ure tugimijerado Pao Kurireu čewuge ro pemegareuge emugumode nou Pao Kurireu apo. Ekimijera mode ema rugadu. Pao Kurireu umode emugu pemegado nono rugadu. Umode egaredo pudui rugadu. Boe eiamedu boe erdumode ei egarere pudui duji boe pemegare ei duji. Meardure awu inagoino jiwuge ewiapaga pemegawo awu iwadaruji rugadu tumeartoruwo ji rugadu.

Boe Etaiduwo Tuwo Tugimijerado Pao Kurireuče Nono Boe Etaidure Boe Enoe Mori Kurireu Jitu Mogadure

⁴⁴Jesus mako kimore boei. Readodure ia bakaruji ewiagai tuwo erduwado toro ia Pao Kurireu meardaeji. Akore: – Boe etaiduwo tuwo tugimijerado Pao Kurireuče nono boe etaidure biadodureu tori kuieje mori kurireu jitu mogadure. Nou tori kuieje tugudure mototo biadoduwo boe epiji. Toro ia meri keje imedu jordure nou biadodureu tori kuiejeji nou moto keje. Jakarere pudui rugadu. Mare utukare tabo raga. Ure tugu mototo pugeje jii tumode akirodo nou moto jitu ka. Dukeje rekodure tuibagi tuwai ka. Ure nouia toe jamedu boe maku diero bagai. Nou diero tabore ure akirodo nou motoji rugadu. Nono ore nou tori kuieje mori kurireuče jamedu. Ainore rore tuwo tugeragu nou tori kuieje mori kurireuji toče.

Mare tori kuieje ji karega Jesus akoino. Boe ewo tuwia ra tumeardae jamedu boe piji tumeartoruwo Pao Kurireuji tuwo tugimijerado ema. Dujire akoino.

⁴⁵Jesus makore boei pugeje. Readodure ia bakaruji ewiagai pugeje tuwo ewie nou Pao Kurireu meardaeji. Akore: – Nou ure tugimijerado Pao Kurireu čewuge ere nono ia umode akirodo pérola tori jiwu imedu mogadure. ⁴⁶Nou imedu aiwore ia pérola tori mori kurireu bagai. Jordure ia motureu mori kurireuji dukeje uture tuibagi tuwai ka. Ure toe jamedu boe maku diero bagai. Nou diero tabore ure tugirimi nou pérola tori mori kurireu bagai pugeje. Nou diero tabore ure akirodo nou pérola tori mori kurireuji rugadu. Ča boe etaiduwo rugadu tuwo tugimijerado Pao Kurireuče nono nou imedu aidure rugadu tuwo akirodo nou pérola tori mori kurireu jitu mogadure.

Mare pérola tori ji karega Jesus akoino. Boe ewo tuwia ra tumeardae jamedu boe piji tumeartoruwo Pao Kurireuji tuwo tugimijerado ema. Dujire akoino.

Jesus Makore Boe Ewogure Tabowu Bukeji

⁴⁷Jesus makore boei pugeje. Readodure ia bakaruji ewiagai pugeje tuwo ewie toro ia Pao Kurireu meardaeji. Akore: – Nou ure tugimijerado Pao Kurireu čewuge ere nono boe ewogure tabowu buke mogadure. Boe ere buke barigu dukejere ere tugeragu karei rugadu. ⁴⁸Nou buke korobadure karebo dukeje boe ere buke tawuje pobo piji toro pobo okwa ka. Nono boe ere kare etawuje buke piji. Karo pemegareugere boe ere tugu kadaraboto. Mare karo pegareugere boe ere barigu. ^49-50Nou karo pegareuge ere nono meartorukare Pao Kurireu jiwuge emogadure. Karo pemegareuge ere nono nou ure tugimijerado Pao Kurireu čewuge emogadure. Mare karo ji karega inagoino. Boe eire inagoino. Imode moto akedudo dukeje imode Pao Kurireu utugarege baru tadawuge etudo itododai. Emage emode ro pegareuge etawuje nou meartorure Pao Kurireu jiwuge epiji. Nono emode nou ro pegareuge ewarigu toro bope doge eda kejewu joru pegareuto rugadu. Nono etragudu rakamode rugadu joru kori koia. Emode to reko pui tuwiri boe kori koia.

⁵¹Nono Jesus unarare nou boei. Akore: – Tarduware awu imagore jiboe jamedu boeji kana?

Egore: – Uu. Čerduware akagoino jiboeji rugadu.

⁵²Nono Jesus makore ei. Akore: – Jorduware Judeu doge eno bakaru jiwuge nure tagi. Aino ire tarduwado ure tugimijerado Pao Kurireu čewuge ere. Dukodire tare nono ia ore bai čewu mogadure. Nou ore bai čewu aiwomode tuwaito toe bagai. Nono jordumode nou ture tugeragu mariguduwu toeji. Mare jordumode nouia ture tugeragu jiwu toe maiwuji jamedu.

Mare ore bai čewu ji karega Jesus akoino. Ture jorduwadowuge eire Jesus akoino. Boe enoe maiwu ji karega akoino. Ture erduwado jiboe jire akoino.

Nazaré Ba Kurireu Kejewuge Erdu Pemegakare Jesusji

⁵³Jesus readodure awu bakaru jamedu boeji. Dukeje uture nou boe epiji. ⁵⁴Aregodure turijodure kejewu Nazaré ba kurireu ka. Uture nou Judeu doge ere bato puiwu bai ka. Nonore ure boe erduwado pugeje. Nou boe erdu pemegakare nou Jesus makore jiboeji. Egore: – Ioguduba ure awu imedu jorduwado? Ioguduba ure turaga maku ai ro rakawo awu turo rakareu boeji? ⁵⁵Maragodure ira jiwu imedu onaregedu nure ema. Uče iere Maria. Uwie ime ekiere Tiago, José, Simão, Judas. Čerduware ji marigudu. ⁵⁶Uwie areme emugu kimore woe awu pago ba kurireu keje rugadu. Boe eimijera karegure ema. Boe eimijera ukare jorduwado. Pagare akoino. Ro rakare mare pagatu je.

⁵⁷Dukodire nou boe etaidukare Jesus makore jiboeji rore jiboeji. Mare Jesus makore nou boei. Akore: – Makore Pao Kurireu bataru jiwu makore jiboe pemegamode boei. Boe emeartorumode ji. Mare turijodure kejewu boe eda kejewuge etaidumodukare makore jiboeji. Uwai tadawu boe etaidumodukare makore jiboeji. Tu emage rugadu. Iage etaidumode ji.

⁵⁸Dukodire Jesus ukare turo rakareu makado nono Nazaré ba kurireu keje. Emeartorukare Jesusji dukodire ukare turo rakareu makado nono rugadu.

João Batista Bire

¹Ča boe eimijera governador nure Herodes toro nou Galiléia moto keje. Herodes meardure boe emagore Jesus akaru jituji. ²Nono ča Herodes makore tudugaregei. Akore nou imedu nuie João Batistače. Emare jewoduie pugeje dukodire ro rakaie nono boe ereadodure jiboe mogaduie jamedu. Ainore Herodes akore. ^3-4Mare Herodes ure tiekiripagado. João Batista karega. João Batista bire marigudu. Marigudu Herodes ure boe edo tugeragu João Batistaji. Ere iera kogudo tuwo tugu baičoreuto. Mare paga karega. Herodes ure tugeragu tumana Filipe oredujeji tumana piji toreduječe. Nou aredu iere Herodias. Herodes ure tugeragu ji tumana piji tumuguwo apo rugadu. Dukodire João Batista mako pegare Herodes rore nono duji. Mako raire ji. Akore: – Arokaba aino amana oredujeji. Paro kigodukare aino. Ameartoru bokware dukodire amugure nou aredu Herodias apo.

Ainore João Batista akore14.3-4 Nou Judeu doge eno bakaru koiare nou Herodes rore tumana oreduje jiboe ukare turugadu rugadu. Nou umana rakoje kimomode dukeje ukare turugadu Herodes muguwo nou tumana oreduje apo rugadu jii nou umana bimode du ka. Ro pegare rugadu. Dukodire nou João Batista makore jiboe ure turugadu.. ⁵Dukodire Herodes korigodure. Aidure tuwo João Batista bito mare pagudure boe eče. Boe etaidure João Batistaji. Emeardaere makore Pao Kurireu bataru jiwu nure ema rugadu. Dukodire Herodes roiwakare tuwo João Batista bito rugadu.

⁶Ia meri keje Herodes ure tuwadae towuje tuwiabutuwo tuwudure kejewu ariji meriji. Nou uwadae keje nou aredu Herodias onaregedu aredu rerure boe eiamedu boe egai. Moture rugadu. Ure Herodes jakaredo pudui rugadu. ⁷Nono Herodes makore nou nogwareduji. Akore: – Ameartorudo i. Imode akogwamagudure bagaiboe jamedu boe maku akai rugadu.

⁸Dukodire nogwaredu uture tuje bagai okituwawo pudui nuba turowo nuba togwamaguduwo Herodiji. Uče okituware ji dukodire okwamagudure João Batista aora bagai paduwo ia baku keje kuri aino rugadu. ⁹Boe eimijera Herodes kiarigodure. Makore nou boe egai tumoduie nou nogwaredu okwamagudure bagaiboe jamedu boe maku ai rugadu. Nou makore bagaiboe makudumode ai rugadu. ¹⁰Nono ča makore tugobaigaregei ewo João Batista aora kado nou baičoreu tada rugadu. ¹¹Dukodire tugobaigarege etaregodure aora tabo. Padure baku keje rugadu. Nono ča ere maku nou nogwaredu ai. Dukejere ure reko toro tuje ae rugadu. ¹²Nono João Batista utugarege etaregodure tugimijera bireu ka. Nono ere tugeragu tugimijera biji. Ere reko toro to moto ka tuwo tugu mototo. Dukodire eture toro tureadoduwo Jesus biagai.

Jesus Ure Boe Makareuge Enogwagedo

¹³Jorduware boe pegare João Batista jituji. Dukodire čare Jesus ure tudawuje nou boe epiji. Nono ure taredo ika kurireuto tuduwo nou boe maereu ka turagojewo nono tuginaigodu. Du inodu tabo nou boe makareuge erduware kaiba rakojere. Tieda pijire nou boe eture tuwure tabo Jesus rekodaji. ¹⁴Ča Jesus ure tudawuje ika kurireu piji. Aiwore, jordure boe emagare duji. Okudugodure ebo rugadu. Nono ča iogore nou kogodureugei, nou mugure nonowugei jamedu. ¹⁵Nono ča nou Jesus ure jorduwadowuge etaregodure Jesus ae merirekodutabo. Ča egore: – Merirekodu. Awu boe etudo awu boe maereu piji.

Emeardaere tuwo nou boe etudo ia boe etae ewo tugeragu ia tuge roguji.

¹⁶Dukeje Jesus makogodure ewadaru jipagi. Akore: – Nou boe etumodukare. Taigoiare tamode enogwagedo.

¹⁷Ča egore: – Čege amireure ikera aboudure tu je. Čege karo rogu ere pobetu je jamedu.

¹⁸Jesus akore: – Arego mato itae.

¹⁹Nono ča makore nou boei ewo tumugudo boebutu keje. Dukeje ure tugeragu nou amireuji nou kare kugurei jamedu. Nono ča aiwore baruto. Imadure Pao Kurireu apo nou amireu paru tabo nou kare kugure eparu tabo uwo nou amireu nou kare kugure eidodudo. Nono ča ure nou amireu kado puiato. Ča ure maku tudugarege etai ewo pedo boei. ²⁰Nono ča eiamedu boe enogwagere. Nono ča ekuredure egarere pudui rugadu. Ča nou utugarege ere nou kadarabo doge korau nou boe eke kobo tabo. Nou kadarabo dogere enodo padu kejeboere doze nou boe eke kobo tabo rugadu. ²¹Nou okwagereuge ime enodo padu kejeboere cinco mil. Ekare areme eremagu. Ekare etore eremagu jamedu.

Jesus Merure Pobo Aoji

²²Kuri je dukeje Jesus makore nou ture jorduwadowugei etuwo pobo maereu okwa ka ewo turemo ika kurireuto etuwo tododai. Ekurugoduwo nou pobo maereu kajeje toro bakowu ka. Jesus rakojere eiageje tumago tabo nou boei tuwo etudo. ²³Ure boe etudo dukeje Jesus ruture ia tori ao ka tumagowo Pao Kurireuji tuginaigodu. Nono ča boečodure. Mare Jesus mugu kimore nono tuginaigodu kimo. ²⁴Dukeje čare nou ure jorduwadowuge ekodure tabowu ika kurireu mugu kimore pobo maereu oiadada rugadu. Nono bakuru jore etogi dukodire nou pobo jetu rakare nou ika kurireuji rugadu. ²⁵Toro baregodutabo, Jesus uture toro tumeru tabo pobo aoji. ²⁶Dukeje nou utugarege erdure Jesus merure pobo ao jituji. Dukodire etokudure tubagudu koia. Egore: – Pardure ia boe pegareuji!

²⁷Mare Jesus akore: – Taragado tai! Imi rugadu reo. Tabagudukaba.

²⁸Nono Pedro makore: – Ikimijera mode aki rugadu dukeje imerudo pobo aoji jii toro akae.

²⁹Jesus akore: – Mato.

Dukodire čare Pedro ure tudawuje ika kurireu piji dukeje čare merure pobo aoji jii toro Jesus ae jamedu. ³⁰Mare puredugodure Jesus ae dukeje jordure bakuru rakare pudui duji. Dukeje ča pagudugodure. Nono ure tuwogwaiago poboto dukeje ča kudugodure. Akore: – Ikimijera! Akeragu ikeraji! Iwogwakawo poboto!

³¹Kuri je Jesus ure tugera raido. Nono ča ure tugera kogudo Pedro iera kajeje. Makore Pedroji. Akore: – Ča ameartoru biagare tu je. Kodiba amororamagadure iwadaru boeji? Ameartorukanure i pugeje?

³²Nono ča ei pobedu ere turemo ika kurireuto. Nono ča bakuru akedure jamedu. ³³Nono ča nou Jesus ure jorduwadowuge emeartorure Jesusji rugadu. Ere tubu jodo tumago pemegawo Jesusji rugadu. Egore: – Pao Kurireu onaregedu nure aki rugadu.

Jesus Iogore Boei Genesaré Ba Kurireu Keje

³⁴Jesus kurugodure ture jorduwadowugebo pobo maereu kajeje dukeje etaregodure Genesaré ba kurireu ka. ³⁵Boe erduware Jesusji dukodi ča ere mugure puredure puduiwuge kogodureuge ewie. Dukeje čare nou boe ere kogodureuge erego toro Jesus ae. ³⁶Boe enogwamagudure Jesusji nou kogodureuge ewo tugera bu nou Jesus ukudau areia okwa keje. Nou ure tugera bu ukudau areia okwa kejewuge epemegagodure rugadu.

Jesus Makore Nou Judeu Doge Eroiaji

¹Ča ia fariseu doge etaregodure Jerusalém piji. Nouia jorduware bakaru jiwuge jamedu etaregodure Jerusalém piji jamedu tumagowo Jesusji. Ča enarare ji. ²Egore: – Kodiba atugarege enogwagere tugera rorogodu tabo? Emeartorukare nou jaoboe emagore jiboeji. Erokare nono jaoboe ero mogadure.

³Jesus makogodure ei. Akore: – Kodiba tameartorukare Pao Kurireu makore jiboeji? Tagodure tu nou tameardae rekodaji. ⁴Ča Pao Kurireu akore: “Tameartorudo taoji, tajeji. Ča nou boe mako pegamode tuoji, tujeji tuwo epogurudo dukeje bitoduiago.”15.4 Awu bataru padure Êxodo 20.12, Deuteronômio 5.16, Êxodo 21.17, Levítico 20.9 keje. Ainore Pao Kurireu akore jawu tawobei. ^5-6Mare tagi tare boe erduwado ia bataru tuginaiwuji boe ekawo tugera maku tuwo ai tuje ai. Tagagore imedu makomoduie tujeji tuoji tumodukaie tugera maku etai tumoduie toe maku Pao Kurireu ai kodi. Dukodire tumodukaie tugera maku tuwo ai tuje ai. Ainore boe eromoduie. Mare pagare egoino. Etaidukare tuwo tugera maku tuwo ai tuje ai dukodire egoino. Taigoiare tare boe egodo aino. Dukodire čare tagaidukare Pao Kurireu bataruji rugadu. Tameartorukare ji. Tagaidure tagoduwo tu nou tameardae rekodaji. ⁷Ča tamagore boei tawo boe erduwado. Mare tameartorukare tagagoino jiboeji. Tagodu pegare nou tagagoino jiboeji tarore jiboeji rugadu. Mariguduwu makore Pao Kurireu bataru jiwu Imedu Isaías mako pemegare. Makore ainore taromode rugadu duji. Akore:

⁸– Pao Kurireu akore: “Awu boe emagore togwa tabo tumeartoruie i mare nou boe rugadu boe emeardae remawu ure tuginai rugadu toro imeardae piji rugadu. ⁹Awu boe ere tubu jodo tumago pemegawo i mare pagare egoino. Ere boe erduwado bakaruji. Egore iwadaruie. Mare pagare egoino. Ia tumagore jiwu bakaru jire nou boe egoino rugadu.”15.9 Awu bataru padure Isaías 29.13 keje.

¹⁰Jesus makore boe makareuge etae ewo bato pui pudae. Akore: – Tawiapagado. Tarduwado. ¹¹Nou tagwagemode jiboe umodukare tabegado Pao Kurireu jakai dukodire tawujedumodukare mugure tagabowu tago bakaru piji rugadu. Mare nou taiabijiwu tawadaru pegareu emare umode tabegado Pao Kurireu jakai dukodire tawujedumode mugure tagabowu tago bakaru piji rugadu jii toro rugadu.

¹²Ča nou Jesus ure jorduwadowuge ere tuburedo ji. Egore: – Nou fariseu doge ekorigodure nou amagore čei jiboeji.

¹³Ča Jesus makore pugeje. Akore: – Nou baru tadawu Iogwa ukare tuguwu iguru rugadu boe tawujedumode. Mare iguru ji karega inagoino. Nou fariseu doge eire inagoino. ¹⁴Dukodire tamororamagadukaba nou fariseu dogei. Eku bokware. Mare nou joku bokwareu iera bararemode nou timedia joku bokwareuji dukeje ei pobedu ewudumode nou boeiakoto. Mare eku bokwa ji karega inagoino. Emeardae pegare nou Pao Kurireu meardae remawu piji. Dujire inagoino.

¹⁵Ča Pedro okwamagudure: – Čerduwado nou akagoino mariguduboe jiboeji čewiagai.

¹⁶Jesus akore: – Kočare tagaora rakare tarduwagoduwo boe remawuji? ¹⁷Nou tagwagere jiboe utumode tagurito mare umode tudawuje tabiji. ¹⁸Mare nou umode tudawuje taiabijiwu tawadaru aregodumode nou tameardae piji. Nou inodu koiare umode boe epegado Pao Kurireu jakai dukodire etawujedumode to bakaru tadawu turo piji jii je. ¹⁹Du nou tameardae pegareu aregodumode tabiji rugadu. Nou umode boe ewidowu, nou jeribarimode toreduje pijiwu toredu pijiwu, nou umode turo pegareu tieribari tabowu, nou iwogureu, nou umode boe ekiripagadowu, nou mako pegamode timedia ro jiwu. ²⁰Awu boe ero pegareu koiare umode boe epegado rugadu Pao Kurireu jakai dukodire etawujedumode to bakaru tadawu turo piji rugadu. Mare boe enogwagemode tugera rorogodutabo du umodukare boe epegado Pao Kurireu jakai.

Aredu Tuginaiwudo

²¹Jesus ure tudawuje nou boe piji nono utu puredure nouia boe eda ka. Nou boe eda mugu puredure nou Tiro ba kurireuji, nou Sidom ba kurireuji jamedu. ²²Ča nouia aredu cananeu kejewudo mugure nou moto kejewudo ure tuburedo Jesus ae. Ča kudugodure boe eiamedu boe emearduwo. Akore: – Ikimijera nure aki. Jawu boe eimijera kurireu Davi onaregedu nure aki. Ča akogududo itabo. Bope meture itonaregedu aredu tada. Ro pega kigodure ji dukodire boe pegare ji rugadu. Awo nou bope tawuje itonaregedu piji.

²³Mare Jesus makokare boeji. Dukodire čare ure jorduwadowuge etaregodu puredure ae. Ča egore: – Awu aredu utudo pabiji. Ukare boe kiorodo paregodaji.

²⁴Ča Jesus makogodure: – Imi itaregodure woe itaiwowo nou Israel doge egu ovelha okwareuge ewagai. Mare ovelha ji karega inagoino. Israel moto kejewu meartorukare Pao Kurireu jiwuge eire inagoino.

²⁵Ča nou aredu aregodure. Ča ure tubu jodo moto keje Jesus bure keje. Ča akore: – Akera maku inai.

²⁶Jesus akore: – Ukare turugadu boe ewo tore eke rogu tawuje epiji tuwo maku tagu ariga doge etai.15.26 Boe eke ji karega Jesus akoino. Tumeardae pemegareu, tuwadaru pemegareu jire akoino. Turo pemegareu rakareu jire akoino jamedu. Boe etore ei karega akoino. Israel doge eire akoino. Ariga doge ei karega akoino. Boe tuginaiwuge eire akoino. Jesus ure tumeardae pemegareu tuwadaru pemegareu maku Israel doge etai boetoji. Dujire akoino. Ure turo rakareu to Israel dogei boetoji. Dujire akoino. Nono makudumode boe tuginaiwuge etai boigodu. Dujire akoino. Nou boe tuginaiwudo aredu očarokare pudui dukodire korigodukare Jesus makore jiboeji. Korigodukare tuie nono ariga mogadure Pao Kurireu jakai. Mare meartorure ji rugadu dukodire akore nou boe eke gigudu boeji. Mare boe eke gigudu ji karega nou aredu akoino. Pao Kurireu ro biagareu kurikareu jire akoino. Jorduware nou Pao Kurireu ro biagareu kurikareu rakare rugadu tuwo nou bope tawuje tonaregedu piji. Dukodire Jesus akore aino nou areduji meartoru kurie pudui rugadu.

²⁷Ča aredu makogodure: – Boe rugadu. Mare ariga doge emode nou buture nou ira kudawu boe eke gigudu rugadu boe kowuje.

²⁸Ča Jesus akore aino nou areduji. Akore: – Aredu. Ameartoru kurire i rugadu. Nou akaidure bagaiboe todumode rugadu.

Ča kuri je nou aredu onaregedu pemegagodure rugadu.

Jesus Iogore Boe Makareugei

²⁹Jesus ure tudawuje nou boe epiji. Nono uture toro nou Galiléia pobo maereu okwa ka. Nono Jesus kodure nou Galiléia pobo maereu okwaji. Nono ča ruture nouia tori ao ka. Ča ure tumugudo nono. ³⁰Nono ča boe makareuge eture Jesus ae. Ere nou kogodureuge erego toro Jesus ae. Nou joku bokwareuge, nou mako bokwareuge, nou meru bokwareuge, nou pogora pegareuge, nou kana pegareuge, nou kogodureuge jamedu ere erego toro Jesus ae. Nono Jesus iogore eiamedu boei. ³¹Nou boe erore ta je erdure nou mako bokwareuge emagore duji, nou kana pegareuge nou pogora pegareuge epemegagodure duji, nou meru bokwareuge emerure duji, nou joku bokwareuge etaiwore duji. Nono ča nou boe emago pemegare Pao Kurireuji. Egore: – Israel moto kejewu pawobe emeartorure jiwu Pao Kurireu ro pemegare pai rugadu.

Jesus Ure Ia Boe Makareuge Enogwagedo Jamedu

³²Jesus makore nou ture jorduwadowuge etae. Nono ča makore ei. Akore: – Inogudugodure awu boebo. Merire pobe metia bokware ei woe itabo. Woe boe eke bokware rugadu ewo ko. Itaidukare iwo etudo tuguri bioro tabo. Eragamodukare tumeruwo awaraji tuguri bioro tabo.

³³Nono ča Jesus ure jorduwadowuge egore nou boe emagaie nono dukodire enaragodure nuba turomoduie nou boe maereuto boe eke bagai nou boe ekeje.

³⁴Jesus akore: – Nuba tage amireu rogure tu je?

Egore: – Amireu oto padure sete. Kare kugure enowarore tu je.

³⁵Nono ča Jesus makore nou boe ewo tumugudo moto keje. ³⁶Nono ča ure tugeragu nou sete amireuji nou kare kugurei jamedu. Nono ča imadure Pao Kurireu apo nou amireu paru tabo nou kare kugure eparu tabo jamedu uwo nou amireu nou kare kugure eidodudo. Nono ča ure kado puiato. Ure maku nou ture jorduwadowuge etai. Nono ere reko nou boe etae. Ere pedo boei rugadu. ³⁷Nono ča nou boe eiamedu boe enogwagere rugadu. Egarere pudui rugadu tuguredure duji. Nono ča nou Jesus ure jorduwadowuge ere kadarabo korobadureugedo sete nou boe eke kobo tabo. ³⁸Nou okwagereuge boe enodo padu kejeboere quatro mil ime. Aremere jamedu. Boe etore kugurere jamedu. ³⁹Nono ča Jesus makore nou boei etuwo. Ča ure taredo nou ika kurireuto. Nono ča uture nou pobo maereu kajeje toro nou Magadã ba kurireu ka.

Enogwamagudure Ia Jesus Ro Rakareu Bagai

¹Nouia fariseu doge nouia saduceu doge jamedu eture tumagowo Jesusji. Etaidure tuiorduwawo nouia ro rakareu bagai. Dukeje enogwamagudure Jesusji uwo ia turo rakareu to tiagai tuiorduwo nouia ro rakareu aregodure rugadu Pao Kurireu piji du bagai. ²Mare Jesus makogodure: – Baru kujagure merirekodutabo dukeje tamagore boe pemegamoduie baru kujaguie dukodi. Bubutumodukaie barogwato. Ainore tagagore. Ainore tarduware. ³Mare baru kujagumode braekododutabo dukeje tagagore bubutumoduie baru kujagure boe tugure dukodi. Tarduware tagaiwowo baruto. Tarduware boetugu umode bubutudo. Kočare iro rakare jiboe ukare tarduwado Pao Kurireu meardae remawuji? ⁴Tagi taro pegare tameartorukare Pao Kurireuji. Dukodire tagogwamagudure ia iro rakareu bagai mare pagatu je. Ča marigudu jawu makore Pao Kurireu bataru jiwu Jonas jiboere makudumode tagai.16.4 Marigudu Jonas makore Pao Kurireu bataruji Judeu doge ewiagai. Mare ia meri keje Jonas aidukare tumeartoruwo Pao Kurireuji tuwo ia boe tuginaiwuge ewie Pao Kurireu bataruji. Rekodure toro ia moto ka pugeje. Mare kodure ia ikarereu tada pobo maereuji tudu jaewo nou boe tuginaiwuge epiji tugawo ewie Pao Kurireu bataruji. Mare pobo maereu kajeje bakuru pegareu aregodure. Jonas jorduware pudumie koiare Pao Kurireu ure nou bakuru pegareu jetudo nou ikarereuji. Dukodire ure nou ikarereu tadawu boe eimijera bie nou inoduji rugadu. Dukodire Jonas barigudure poboto. Pobo tada Pao Kurireu ure ia karo kurireu arego Jonas bagai. Nou karo kurireu ure Jonas remo. Jonas padure nou karo kuri tada jii je. Merire pobe metia bokware Jonaji nou karo kuri tada. Mare Jonas kiarigodure turo pegareuji. Nono Pao Kurireu jetu pemegare Jonaji dukodire Jonas bikare nou karo kuri tada. Merire pobe metia bokware ji dukeje Pao Kurireu ure nou karo kurireu udo Jonas barigu boeki ka tuwerigodu tabo. Dukodire Jonas rakojere boeki keje pugeje. Ure nono jewodureu mogadure. Dujire Jesus akoino awu tuwadaru tabo boemoduie pudui nono boere Jonaji dumogadure. Meri moduie pobe metia bokware pudui jamedu turagojemode moto tada duji. Dukejere tuiewodumoduie pugeje. Dujire Jesus akoino. Mare boemode i nono boe moga Jonas jitu mogadure jamedu. Dujire inagoino. Dukodire boe erduwamode i rugadu. Mare du inodu tabo tameartorumodukare i. Tamagore i iwo ia iro rakareu tawuje taegai. Mare pagatu jere tagagoino. Dukodire iromodukare ia iro rakareuji taegai pugeje.

Jesus ure tuwadaru akedudo dukeje ure tudawuje epiji. Ča uture.

Fariseu Doge Saduceu Doge Ero Pegareu Reo

⁵Dukeje nou Jesus ure jorduwadowuge ekurugodure Jesus apo toro nouia pobo maereu okwa ka. Nono ewiagodure tuwo nouia tuge amireu towuje. ⁶Jesus makore ei. Akore: – Tamearduwadudo tai nou fariseu doge nou saduceu doge eno fermentuji.

⁷Nou Jesus ure jorduwadowuge emagore pui kaba jiba akoino nou fermento jiboeji. Nono egore pui: – Pawiagodure page amireu piji dukodire pagimijera akoino pai.

⁸Jesus jorduware egoino pui duji. Nono unaragodure ei. Akore: – Kodiba tamagore pui nou tage amireu bokwaie duji? Tameartoru kurikare. Tameartoru biagare tu je. ⁹Kočare tarduwa bokware kimo. Tawiabutudo nou irore jiboe keje nou amireu rogu ure ikera aboudure tu je. Dutabore ire boe enogwagedo nou ime enodo padure cinco mil. Ča nuba tare nou kadarabo dogedo nou boe eke kobo tabo? ¹⁰Ča ia meri keje pugeje nou amireu doge enodo padure sete boe etai pugeje du nou ime enodo padure quatro mil. Ča nuba tare nou kadarabo dogedo nou boe eke kobo tabo? ¹¹Kočare tarduwakare kimo imago karegure amireu jiboeji. Imagore tai tamearduwaduwo tai nou fariseu doge nou saduceu doge emeardaere jiboeji. Emeardae ure nono fermento mogadure. Mare fermento ji karega inagoino. Emeardaere jiboe jire inagoino.

¹²Nono ča nou Jesus ure jorduwadowuge ere tuwia tugu boeto nou Jesus akoino jiboeji. Dukodire erduwagodure makore pudui jiboeji. Erduwagodure fermento remawu ji karega akoino duji. Mare nou fariseu doge nou saduceu doge ere boe erduwado jiboe jire akoino. Dujire Jesus akoino ture jorduwadowugei emeardu waduwo pudui rugadu.

Pedro Akore Umoduie Boe Ekinorudowu Nuie Jesusče Rugadu

¹³Jesus uture ia moto ka ture jorduwadowugebo. Etaregodure toro dukeje ure tuwuredo ebo. Epuredure nou Cesaréia Filipe ba kurireuji. Nono ča Jesus unaragodure nou ture jorduwadowugei nuba boe emeardaere nou Imedu Onaregeduji. ¹⁴Emage emagogodure: – Boe egore João Batista nuie aki. Nouiage egore Elias nuie aki. Nouiage egore Jeremias nuie aki. Nouiage egore ia mariguduwu makore Pao Kurireu bataru jiwu nuie aki.

¹⁵Jesus unaragodure ei pugeje. Akore: – Tagi. Nuba tameardaere i?

¹⁶Nono ča Simão Pedro makogodure. Akore: – Umode boe ekinorudowu nure aki rugadu16.16 Brae egore Messias aino. Egore Cristo aino. Umode boe ekinorudowu jire egoino brae ewadaru tabo.. Pao Kurireu remawu onaregedu nure aki rugadu.

¹⁷Jesus makore Pedroji. Akore: – Akiere Simão. João onaregedu nure aki. Boe remawu jire akagoino. Mare boe ekare arduwado. Pao Kurireu koiare ure arduwado aino. Dukodire boe pemegare ai rugadu. ¹⁸Dukodire inagoino ai akire akiere Pedro.16.18 Pedro: Tori jire nou mariguduwuge boe egoino. Dutabore Jesus ure iedo Pedro. Awu tori tabore imode iwai towuje. Mare iwai ji karega inagoino. Meartorure iwuge emagagodumode. Dujire inagoino. Imode emagagodudo rugadu. Bope doge etaidumode turo pegawo ei. Mare du inodu tabo boe emagamode tumeartorure i dutabo rugadu. ¹⁹Nono imode mugure baru tadawu chave maku akai. Mare chave ji karega inagoino. Ardu pegamode boe erore jiboeji woe moto keje baru tadawuge erdu pegamode ji jamedu. Dujire inagoino. Nono ardu pemegamode boe erore jiboeji woe moto keje baru tadawuge erdu pemegamode ji jamedu. Dujire inagoino.

²⁰Nono Jesus makore nou ture jorduwadowugei ereadodukawo boe ewiagai umode boe ekinorudowu nuie pudumi duji.

Jesus Makore Tudugaregei Tuwimoduie Duji

²¹Nono ča Jesus makogodure rugadu nou ture jorduwadowugei. Akore: – Itumode nou Jerusalém ba kurireu ka. Nonore Judeu doge eimijerage emode boe pegado i rugadu. Nou ure Judeu doge enomea maku Pao Kurireu aiwuge eimijerage ero pegamode i jamedu. Nou jorduware Judeu doge eno bakaru jiwuge emode boe pegado i jamedu. Nou boe eiamedu boe emode iordudo boe koriji rugadu. Iwimode rugadu. Mare merimode pobe metia bokware i dukeje iewodumode pugeje.

²²Mare Pedro aidukare nou Jesus makore jiboeji. Ure tumegido Jesus apo kuri nono tumagowo ji. Akore: – Boe modukare aino ai. Pao Kurireu aidukare boewo aino ai rugadu.

²³Mare Jesus ure tumegido nono makore Pedroji. Akore: – Akaradai ikoda piji bope Satanás. Are nono ia tori mogadure nou itowara oiadada. Arore aino i awo iwududo. Mare tori ji karega inagoino. Ameardae jire inagoino. Ameardaere nono boe emeardae mogadure. Boe emeardae kare nono Pao Kurireu meardae mogadure dukodi.

²⁴Nono Jesus makore nou ture jorduwadowugei. Akore: – Ia tagi tagaidumode tameartoruwo i dukeje tagera ra nou taro pegareu piji, tawia ra tameardae pegareu piji tagaidure jiboe piji. Tado tarugadu boe pegawo tai nono boe pegamode i dumogadure. Iwimode ipo padure pugajejewu keje. Dukodire inagoino tai tado tarugadu tagoduwo itabo. ²⁵Boe etaidumode tuwo boe pemegado tu pudui turaga tabo dukeje nou boe eraga akedumode epiji rugadu. Egare remawu modukare. Emodukare činorudo bope doge eda kejewu joru pegareu piji rugadu. Mare nou boe ewiapagamodukare tumeardaeji pugeje tuwo tugera ra turo pegareu piji tumeardae pegareu piji taidure jiboe piji dukeje Pao Kurireu umode boe pemegado ei, umode egare remawudo rugadu. Nono ewarigudumodukare bope doge eda kejewu joru pegareuto jamedu. ²⁶Boe emode toedo boe jamedu boeče. Mare nou enoe umodukare erududo baruto. Boe ewiagorokare tuwo tumeartorudo Pao Kurireuji. Ewiagorore tu tuwo toe kurido pagatu je. Mare paga karega inagoino. Boe emodukare turudure barutodu morido toe tabo. ²⁷Imedu Onaregedu nure imi. Imode ikirimi mato moto ka pugeje. Itaregodumode nono iraga mode nono iogwa raka mogadure. Itaregodumode Pao Kurireu utugarege baru tadawugebo. Itaregodumode iogwa o jorugu pemegareu tabo. Nono imode ro pegareuge ero morido etai rugadu. Imode ro pemegareuge ero morido etai jamedu. ²⁸Boe jokodu jire inagoino tawiagai. Imedu Onaregedu nure imi. Imode boe eimijera kurireudo imi dukeje imode ikirimi pugeje. Ia tagi tardumode awu inagoino jiboeji. Tawimodukare jii toro tardumode awu inagoino jiboe jitu ka.

Jesus Ure Tiedo Tuginai

¹Meri oto padure seis Jesusji pugeje. Nono ča uture ia ture jorduwadowugebo toro ia tori ričoreu ao ka. Nou ure jorduwadowuge ere pobe metia bokware. Pedrore, Tiagore, Joãore. Tiago uwie nure Joãoče. ²Etaregodure nou tori ao ka rugadu. Nonore Jesus jere tuginai. Nou ure jorduwadowuge erdure ji rugadu. Mare Pao Kurireu koiare ure Jesus je udo aino. Dukodire Jesus jere nono meri joku urugu mogadure. Dukodire je ure nono jorugu urugu mogadure. Pao Kurireu ure Jesus ukudau areia kigadu maereudo ji. Kigadure rugadu kigadureboe jamedu boe kori. ³Nono ča rore puku ei ime pobedu doge edure nono ebo. Moisere, Eliare edu nono tumago tabo Jesusji. ⁴Nono Pedro makore Jesusji. Akore: – Čegimijera nure aki rugadu. Padure woe dure turugadu pai. Ameardaemode nono imeardaeji dukeje imode ia mačebradudo pobe metia bokware woe. Iamode akai. Iamode Moisés ai. Iamode Elias ai jamedu.

⁵Pedro mako kimore dukeje nono ia boetugu ure turawuje etae. Nou boetugu urugu kigadure rugadu. Ure taiado ebo. Nono nou boe emeardure ia boe emagoji nou boetugu piji. Akore: – Itonaregedu reo. Imeardu kurire ji rugadu. Rore jiboe ure iagaredo i rugadu. Tawiapaga pemegado awu itonaregedu bataruji rugadu.

⁶Nou Jesus utugarege emeardure nou bataruji dukeje epagudugodure rugadu. Nono ere tubu jodo tori keje. ⁷Mare Jesus ure tuburedo ei nono ure tugera bu ewugeje. Akore: – Taragojedo. Tabagudukaba.

⁸Nono ere turagojedo. Nono ere tie maedo mare erdukare ia boei pugeje. Tu emage eragojere nono Jesus apo. ⁹Nono ere turawuje nou tori ao piji. Dukejere Jesus makore ei. Akore: – Tareadodukaba tardure jiboeji boe ewiagai. Imedu Onaregedu nure imi. Iewodumode pugeje dukeje tareadodumode awu tardure jiboeji boe ewiagai.

¹⁰Nou ure jorduwadowuge enarare ji. Egore: – Kodiba pawobe erduware Judeu doge eno bakaru jiwuge egore Elias aregodumoduie nou umode boe ekinorudowu otodai?17.10 Awu bataru padure Malaquias 3.1 e 4.5-6 keje.

¹¹Jesus akore: – Boe jokodu. Pao Kurireu akore Elias aregodumoduie rugadu. Umoduie boe ewie ewo tudo turugadu nou umode boe ekinorudowu togi. ¹²Mare inure tawie. Nou Pao Kurireu makore jiwu imedu Elias aregodure marigudu. Rore nono Elias ro mogadure. Mare boe etaidukare ji. Ero pegare ji tumeardae pegareu tabo. Inure tawie. Imedu Onaregedu nure imi. Nou boe ero pegamode i nono erore jitu mogadure.

¹³Nono nou Jesus ure jorduwadowuge erduwagodure João Batista jire Jesus akoino duji rugadu.

Jesus Ure Mareboe Meture Tadawu Iparedu Pemegago

¹⁴Nono Jesus ure turawuje tori ao piji boe etae pugeje Pedro apo, João apo, Tiago apo. Boe emagare nono. Nono ča ia imedu aregodure Jesus ae rugadu. Ure tubu jodo moto keje Jesus jokorai. ¹⁵Nou imedu makore Jesusji. Akore: – Boe eimijera nure aki. Inogwamagudunure ai akoguduwo itonaregedu iparedu apo. Boe pegare ji rugadu. Ia boe kogodae pegareu jeture ji dukodire butumode moto ka pagatu je. Boe romode puku ji buture duji. Butumode joruto. Butumode poboto. ¹⁶Itaregodure apo nouia are jorduwadowuge ewagai ewo pemegago. Mare eroiwakare tuwo pemegago rugadu.

¹⁷Jesus makore ei. Akore: – Tare ikiarigo. Tameartorukare rugadu. Tarduwakare tawo tameardae pemegado. Iragoje raimodukare tagabo. Nuba tagaidure irowo tameartoruwo i?

Nono Jesus makore iagei. Akore: – Mato nou iparedu apo itae!

¹⁸Jesus mako pegare nou meture nou iparedu tadawu mareboeji. Dukodire ure tudawuje nou iparedu piji rugadu. Nono ča nou iparedu pemegare rugadu. Jesus ure pemegago tači je rugadu.

¹⁹Nou boe eture dukeje Jesus rakojere nou ture jorduwadowugebo. Emagore Jesusji. Egore: – Kodiba čeroiwakare čewo nou mareboe tawuje nou iparedu piji?

²⁰Jesus makore ewadaru jipagi. Akore: – Iwo tawie. Tameartoru biagare Pao Kurireuji kodire taroiwakare. Mare tameartoru biagamode Pao Kurireuji mare tamode taragado tai tameartoru rakawo tu jao. Nono tamagomode ia tori ričoreuji uwo tudawuje tumuga piji. Nono Pao Kurireu koiare umode nou tori ričoreu meartorudo tawadaruji rugadu. Pao Kurireu raka koiare umode taroiwado boe jamedu boeji. ²¹Boe emodukare togwa ra tuge piji jao tumagowo Pao Kurireu bagai baruto dukeje eroiwamodukare tuwo awu inodu mareboe tawuje boe epiji. Boe emode togwa ra tuge piji ia meri keje togwamaguduwo Pao Kurireu bagai baruto nono eroiwamode tuwo awu inodu mareboe tawuje boe epiji rugadu.

Jesus Ure Boe Ewie Tuwimoduie Tuiewodumoduie Pugeje Duji

²²Jesus uture nou moto piji ture jorduwadowugebo jii toro nou Galiléia moto ka. Nonore Jesus makore nou ture jorduwadowugei. Akore: – Imedu Onaregedu nure imi. Imagudumode ro pegareuge etai. ²³Emode iwido. Mare merimode pobe metia bokware dukeje iewodumode pugeje.

Dukodi nou Jesus ure jorduwadowuge ekiarigodure rugadu.

Pao Kurireu Uwai Mori Reo

²⁴Jesus aregodure ture jorduwadowugebo Cafarnaum ba kurireu ka. Nono nou Pao Kurireu uwai pijiwuge ime etaregodure Pedro ae. Ure tugeragu boe enoe mori jiwuge nure emage. Ere tugeragu Pao Kurireu uwai mori roguji boe eiamedu boe epiji tuwo maku Pao Kurireu uwai tadawuge eimijera ai. Awu ime emaragodae nure nou inoduče rugadu. Nono enarare Pedroji. Egore: – Nou ure tarduwadowu imedu umode Pao Kurireu uwai mori maku kana?

²⁵Pedro akore: – Uu! Ure maku rugadu.

Nono Pedro uture epiji. Ure turemo Jesus rakojere tadawu baito. Nouia utugarege edu nono jamedu. Nono Jesus makore boetoji. Akore: – Nuba ameardaere Pedro? Ioguduba pijiba moto kejewu boe eimijerage emode tugeragu boe enoe moriji? Emode tugeragu ji tuwobe epiji? Emode tugeragu ji ia boe tuginaiwuge epiji kana?

²⁶Pedro akore: – Boro. Emode tugeragu boe tuginaiwuge enoe moriji mare emodukare tugeragu tuwobe enoe moriji rugadu.

Jesus akore: – Uu. Boe jokodu jire akagoino. Emodukare tugeragu tuwobe enoe moriji rugadu. ²⁷Ča Pao Kurireu Onaregedu nure imi dukodire ukare turugadu iwo nou Pao Kurireu uwai mori maku. Mare pagawo nou Pao Kurireu uwai tadawuge eimijera korigo. Pawo nou mori maku rugadu. Ča atudo toro nou pobo maereu ka. Awodiku barigu. Amode bitowu karo boetojiwu okwa jado. Nou karo okwa ja tadare ardumode ia diero toriji. Nou diero umode turugadu pai pawo nou Pao Kurireu uwai mori maku. Nou tardumode jiwu diero tori reko nou ure tugeragu Pao Kurireu mori jiwuge etae rugadu.

Duboba Boe Eimijerage Mode Emage

¹Nono ča nou Jesus ure jorduwadowuge etaregodure Jesus ae. Enarare ji. Egore: – Pao Kurireu umode boe eimijera kurireudo pudumi dukeje umode boe eimijeragedo iageče jamedu. Ča duboba umode emage?

²Jesus makore ia boe etonaregedu rogu bagai. Makore ji rakojewo nono nou boe etoiadada. ³Nono Jesus akore: – Boe remawu jire imode tawie. Tamodukare tameardae udo nono boe etore emeardae mogadure dukeje tamodukare tagimijerado Pao Kurireuče. Tamodukare taremo baruto. ⁴Mare boe emode tumeardae pemegado tugawo boe remawugedo pudumi nono boe etore emogadure dukeje Pao Kurireu umode boe eimijerage paru towugedo emage. Pao Kurireu umode boe eimijera kurireudo pudumi dukeje umode boe eimijera paru towugedo emage jamedu. ⁵Boe emode tugera podo boe etonaregedu apo dukeje itabore ere tugera podo jamedu. ⁶Boe emode tori kurireu kogudo imedu itoru kajeje tuwo barigu poboto dukodire nou barigudure pobo towu imedu bimode rugadu. Mare ia boe umode nou itore meartorure maibari iwuge18.6 Boe etore meartorure puduiwuge eire Jesus akoino. Mare imeire aremeire Jesus akoino jamedu. Jesus akore boe etore aino ei mare areme ime meartorure maibari puduiwuge nure emage jamedu. Emeartorure pudui aino maibari dukodire ere nono boe etore emogadure tiagai. edo tugera ra ipiji ero pegawo pugeje dukeje boe pegamode nou ure nou boe etore etaora pegadowuji rugadu. Jire boe pegareu kodumode nou barigudure pobo towu imedu kori. ⁷Boe pegamode meartorukare iwugei. Ere tumeardae kodudo boe emeardae pegareu kodaji dukodire boe pegamode ei ero pegareu moriče. Boe emeardae pegareu makudumode boe etai tu tu je emeardae pegawo ero pegawo jamedu. Mare boe pegamode rugadu nou ure tumeardae pegareu maku boe etaiwugei rugadu.

⁸Jesus mako kimore: – Tagera umode taro pegado tameartorukawo i dukeje tagera kado tabiji. Tawure jamedu umode taro pegado tameartorukawo i dukeje tawure kado tabiji. Mare tagera remawu tawure remawu ji karega inagoino. Tameardae pegareu jire inagoino tawo barigu tabiji. Mare paga karega. Tameartorumodukare i dukeje tawarigudumode bope doge eda kejewu joru maereuto. Nou joru akedumodukare rugadu. Tadumode toro dukeje boe pegamode tai rugadu jii toro rugadu. Mare tameartorumode i dukeje imode tarududo baruto. Tadumode toro dukeje boe pemegamode tai nono jii toro rugadu. Kodire inagoino tai. Boe ekera umode mitotu je, boe ewure umode mitotu je mare du inodu tabo emeartorure i dukeje erudumode baruto rugadu tuwikawo pugeje. ⁹Taeku jamedu umode taro pegado tameartorukawo i dukeje taeku tawuje tabiji. Mare taeku remawu ji karega inagoino. Tameardae pegareu jire inagoino tawo barigu tabiji. Mare paga karega. Tameartorumodukare i dukeje tawarigudumode bope doge eda kejewu joru maereuto. Nou joru umode boe ekowu jii toro rugadu. Nou joru akedumodukare. Mare tameartorumode i dukeje imode tarududo baruto. Tarudumode baruto dukeje boe pemegamode tai rugadu jii toro rugadu. Kodire inagoino tai. Taeku umode mitotu je mare tameartorure i rugadu dukeje tarudumode baruto rugadu tawikawo pugeje.

Carneiro Ure Tuwarigu Boeto

^10-11Jesus mako kimore: – Taeku jado. Tardu pegakaba nou meartorure maibari iwugei. Itore nure emage. Pao Kurireu utugarege baru tadawuge emagore awu itore eparu tabo Pao Kurireu bagai. Nou Pao Kurireu utugarege baru tadawuge edu nono Pao Kurireu apo tu je. Imedu Onaregedu nure imi. Itaregodure iwo ure tuwarigu boetowuge ekinorudo etukawo bope doge eda kejewu joru pegareuto, etuwo baruto rugadu.

¹²Jesus mako kimore: – Ireadoduwo ia bakaruji tawiagai iwo tarduwado ia Pao Kurireu meardae pemegareuji. Ia imedu aku carneiro doge enodo padure cem. Ia okware boeto nou iage epiji. Nou akure čewu imedu uture rugadu nou tagu noventa e nove carneiro doge epiji taiwowo nou okware boetowu carneiro bagai rugadu. Nou noventa e nove carneiro doge edure nono boebutu pemegareu keje. Mare nou akure čewu imedu aiwore rugadu nou okware boetowu tagu carneiro bagai jii toro tuiordure jitu ka. ¹³Jordure ji dukeje jakaregodure pudui rugadu. Jakarere tagu noventa e nove carneiro dogei. Mare jakarere pudui rugadu nou tuiordure jiwu carneiro roguji nou tiagarere noventa e nove carneiro dogei du kori. ¹⁴Iwo tawie. Pao Kurireu aiwomode meartorumode puduiwuge ewagai nono nou imedu aiwore tagu carneiro bagai dumogadure. Mare carneiro ji karega inagoino. Boe eire inagoino. Emeartorumodukare Pao Kurireuji dukeje emode tuwarigu boeto. Ewarigudumode bope doge eda kejewu joru maereuto. Pao Kurireu aidukare boewo aino boei rugadu.

Meartorure Jesus Jiwu Biagodumode Ro Pegare Puduiwu Ro Pegareu Piji

¹⁵Jesus mako kimore: – Ia meartorure iwu ro pegamode ia tai dukeje atudo toro ae awo nou ro pegare aiwu bie. Amagodo ji ro pegare ai du boeji. Mare amago rakakaba ji. Tu aki amagodo ji. Tamagodo tu pui. Nono nou ro pegare aiwu biapagamode amagore jiboeji dukeje amedia mode ema. Tamedage mode pugi pugeje. Awiagodumode nou ro pegare ai dupiji. ¹⁶Mare biapagamodukare amagore pudui duji dukeje akaiwodo ia meartorure iwuge ewagai. Emode mito pobe dukeje atudo ebo toro nou ro pegare aiwu bagai pugeje. Nou uture akabowuge ewiapagamode tamagore pui jiboeji. Ainore padure bapera kejewu Pao Kurireu bataru akore marigudu. Makore boei erowo pui tuwo tumeardae pegare puidu barigu pubiji18.16 Awu bataru padure Deuteronômio 19.15 keje.. Akore: “Boe ewo pobe, boe ewo pobe metia bokware emagore jiboe uwo nono pu mogadure boe erduwawo boe remawuji.” Ainore padure bapera kejewu Pao Kurireu bataru akore marigudu. ¹⁷Dukodire atumode amedagebo nou ro pegare aiwu bagai mare nou ro pegare aiwu biapagamodukare amagore jiboeji, amedage emagore jiboeji dukeje atumode nou meartorure iwuge ere bato puiwu bai ka tawo nou meartorure iwuge eiamedu boe ewie nou ro pegare aiwu ro pegare jiboeji. Nono nou meartorure iwuge emagomode nou ro pegare aiwuji jamedu. Biapagamodukare nou meartorure iwugei dukeje tamode tagera ra nou ro pegare aiwu piji. Tamode udo nono meartorukare iwu mogadure taegai. Tamode udo nono ia ro pegareu ure tugeragu boe enoe mori jiwu iwogureu mogadure taegai. ¹⁸Inure tawie boe remawuji. Tardu pegamode boe erore jiboeji woe moto keje du baru tadawuge erdu pegamode ji jamedu. Nono tardu pemegamode boe erore jiboeji woe moto keje du baru tadawuge erdu pemegamode ji jamedu. ^19-20Iwo tawie pugeje. Ia tagi tamode pobe, tamode pobe metia bokware dukeje tamode bato pui tamagowo pui, tarduwawo imeardaeji. Nono iragojemode tagabo rugadu. Dukodire tameardaemode nono pu meardaere dukeje tamagomode nou tameardaeji Pao Kurireu bagai baruto dukeje Pao Kurireu umode nou tagogwamagudure bagaiboe udo turugadu tai ure nono imeardae mogadure dukodi.

Boe Utugare Ro Pegareu Reo

²¹Jesus akoino dukeje Pedro ure tuburedo Jesusji. Unarare: – Čegimijera nure aki. Ia meartorure aiwu ro pegamode i dukeje nuba iromode ji? Iwiagodumode nou ro pegare iboe piji kana? Mare ro pegamode i oto padumode sete dukeje nuba iromode? Iwiagodumode nou ro pegare iboe jamedu boe piji rugadu kana?

²²Jesus makore nou Pedro bataru jipagi. Akore: – Iwo awie rugadu. Sete karega. Ia meartorure iwu ro pegamode ai dumode setenta e sete dukeje awiago nou ro pegare aidu jamedu boe piji.

²³Jesus mako kimore. Akore: – Ireadoduwo iwo tarduwado nou Pao Kurireu meardaeji tawiagai. Pao Kurireu umode boe eimijerado pudumi dukeje romode nono ia boe eimijera kurireu ro mogadure. Nou boe eimijera aidure tuwo nou tudugarege ere tugeragu jiboe mori makuduwo pudai. ²⁴Dukodire makore tudugarege ewagai ewo nou mori maku pudai rugadu. Ča ia utugare aregodure tugimijera ae. Nou utugare ure tugeragu jiboe kurire18.24 Nou diero kurireu ure nono milhões e milhões de reais mogadure. rugadu. Maragodumode jii toro tuwi ka mare umodukare tugeragu jiboe morido ai rugadu. ²⁵Nono roiwakare tuwo nou mori maku tugimijera ai rugadu. Dukodire nou boe eimijera makore tumoduie nou tudugare maku oreduje maku ore kugure emagu jamedu diero bagai rugadu.

²⁶Jesus mako kimore: – Nou boe eimijera utugare jorduware nou tugimijera meardaeji dukeje ure tubu jodo moto keje nou tugimijera jokorai. Okwamagudure tugimijeraji. Akore: “Akorigodukaba i. Arokaba ia arore jiboeji i kuri je imode ikare maku akaiboe rugadu maku akai rugadu.”

²⁷– Ča nou ukimijera okudure apo rugadu. Makore nou tudugareji ukaiago ture tugeragu jiboe morido pudai. Nou rore jiboe akeduie rugadu. Tuwiagodumoduie nou rore jiboe piji rugadu. Nono makore nouia tudugaregei ekawo nou tudugare barigu baičoreuto pugeje.

²⁸– Nono nou utugare imedu uture pugeje nou tugimijera piji. Toro jordure ia timediaji emaragodure puapo tugimijera ai. Mare nou metia ukare ia boe mori maku ai dukodire aidure nou toe mori bagai. Mare nou boe mori rogu kurikare18.28 Nou diero rogu ure nono 10 reais, 20 reais tu je.. Mare nou imedu okudugodukare timedia apo rugadu. Ure tugera kogudo nou timedia itoru kajeje. Mako rakare ji. Akore: “Nou akare boe mori maku inaiwu mori maku inai rugadu kuri aino rugadu.”

²⁹– Nou metia ure tubu jodo moto keje. Okwamagudure nou imeduji tragudu tabo. Akore: “Akorigodukaba i. Arokaba ia arore jiboeji i kuri je. Imode ikare maku akaiboe rugadu maku akai rugadu.”

³⁰– Mare nou imedu ukare tumeardae mekido nou tumeardae pegareu piji rugadu. Uture tugobaigarege ewagai. Makore ei ewo nou timedia barigu baičoreuto. Rakojemoduie baičoreu tada jii tugare morido inaiboe oto pa ka. ³¹Nou boe eimijera ia utugarege erduware nou timedia rore jiboeji dukeje emororamagadugodure rugadu. Eture tugimijera bagai. Ereadodure nou timedia rore jiboe jamedu boeji tugimijera biagai. ³²Nono nou ekimijera makore nou tudugare bagai pugeje. Nou roiwakare tuwo toe morido pudaiboe tudugare bagaire makore. Nou utugare aregodure pugeje dukeje nou boe eimijera mako rakare ji rugadu. Akore: “Itugare pegareu nure aki. Ro pegareu nure aki rugadu. Akogwamagudure i akragudu tabo. Dukodire inogudugodure akabo rugadu. Imagore ai akaiago nou are akeragu jiboe morido inai pugeje. Amodukaie maku inai jii toro rugadu. Iwiagodumoduie nou diero piji rugadu. ³³Kočare akogudugoduwo amedia apo jamedu nono iro mogadure. Mare ameardae pegare rugadu. Akogudukare amedia apo rugadu.”

³⁴– Nono nou boe eimijera korigodure nou tudugareji rugadu. Ure nou tudugare maku tugobaigarege etai rugadu ewo boeto ji rugadu, ewo tugu baičoreuto rugadu jii umode ture tugeragu jiboe moridodu ka.

³⁵Jesus mako kimore: – Ainore baru tadawu Iogwa Kurireu romode taiamedu boei. Tagogudugodumodukare tamedagebo dukeje Iogwa Kurireu ro pegamode tai jamedu. Tawiagodumode tamedage ero pegare tai dupiji tagaidu tabo dukeje Iogwa Kurireu okudugodumode tagabo jamedu.

Boe Emugu Pemegawo Puapo Ekawo Tugera Ra Pubiji

¹Jesus ure nou tumago akedudo dukeje uture Galiléia moto piji. Uture Judéia moto ka. Kurugodure Jordão po kajeje toro bakowu ka. ²Boe emagare tudu tabo Jesus rekodaji toro nou moto ka. Jesus ure kogodureuge epemegago.

³Ia fariseu doge etaregodure nono Jesus rakojereu ka jamedu. Etaidure tuwo turokogado Jesusji tuiorduwo ia Jesus ro pegareuji ia Jesus mako pegareuji. Erdumode dukeje emago pegamode ji rugadu. Dukodire enarare Jesusji. Egore: – Nuba Pao Kurireu ure maku Moisés aiwu pago bakaru akore? Ukana turugadu imedu uwo toreduje utudo tubiji tumugukawo apo pugeje? Romode aino pagatu je mare pegakare kana? Nou pago bakaru ukana turugadu imedu rore aino duji?

⁴Jesus makore ewadaru jipagi. Akore: – Tagaiwore Pao Kurireu bataru remawu boetojiwuji rugadu. Kočare tarduwakare ji. Nou bataru akoino Pao Kurireu uie boe jamedu boe towuje dukeje ure imedu boetojiwu towuje. Ure aredu boetojiwudo towuje jamedu19.4 Awu bataru padure Gênesis 1.27 keje.. ⁵Pao Kurireu makoie ei imedu utumoduie tuo piji tuje piji tumuguwo toreduje apo dukeje emodukaie pobe pugeje, emoduie mitotu je rugadu19.5 Awu bataru padure Gênesis 2.24 keje.. ⁶Dukodire imedu mugumode aredu apo dukeje ere nono mitotu puapo turoi pui dutabo Pao Kurireu jakai. Ča Pao Kurireu aidure emugure puapo duji. Dukodire emuguwo puapo jii toro rugadu. Ekawo tugera ra pubiji rugadu.

⁷Nono nou fariseu doge enarare Jesusji pugeje. Egore: – Mare nou ure pago bakaru maku pagaiwu Moisés makore nou mariguduwuge pawobei. Nou bakaru akore imedu aiduie tuwo toreduje utudo tubiji dukeje uwo ia bapera atugodo tuwo toreduje bie kaba kodiba tuie utudo tubiji rugadu. Imedu romoduie aino du pegakaie. Uwo toreduje utudo tubiji rugadu. Ainore nou mariguduwu jorduware Pao Kurireu bataru jiwu makore pawobei marigudu. Nou bataru ure turugadu kana?

⁸Jesus akore: – Uu. Mariguduwuge pawobe etaora rakare dukodire etaidukare tuiorduwawo, etaidukare turo pemegawo. Dukodire Moisés ure nou paro maku mariguduwuge pawobe etai ewo tugera ra toreduje piji. Mare Pao Kurireu meardae remawu ukare aino boetoji. Aidukare imedu uwo tugera ra toreduje piji rugadu. ⁹Dukodire iwo tawie Pao Kurireu meardae remawuji pugeje. Imedu umode tugera ra toreduje piji mare mugumode ia aredu apo pugeje. Du pegare Pao Kurireu jakai. Nou imedu ro peganure nou toreduje boetojiwudoji rugadu. Ure tudo nono jeribarire toreduje pijiwu mogadure Pao Kurireu jakai. Mare imedu oreduje jeribarimode nou toredu piji dukeje nou imedu aidumode tuwo tugera ra toreduje piji du pegakare.

¹⁰Nono nou Jesus ure jorduwadowuge emeardure Jesus akoino duji dukeje emagore Jesusji. Egore: – Ča nou akagoino jiwu Pao Kurireu meardae remawu rakare boei rugadu. Ime eragamodukare tumuguwo tu toreduje apo rugadu. Dukodire ukare turugadu imedu uwirewo.

¹¹Jesus makore ewadaru jipagi. Akore: – Awu iwadaru rakare dukodire ia boe etaidumodukare ji. Mare Pao Kurireu ure tumeardae maku etaiwuge etaidumode nou iwadaruji rugadu emeartorure Pao Kurireuji kodi. ¹²Ia ime ewodure dukeje ewa pegare dukodire ime mode emage mare eroiwakare tieribariwo areduji dukodire etuwiremodukare. Ia ime ewa bokware mare ime ro pegareuge ero koiare ere nou ime ewa tawuje. Dukodire etuwiremodukare. Mare ia ime emode tumeardae tawuje tuwirekawo. Mare paga karega. Etuwiremodukare tuwo tumagu Pao Kurireu ai tuwo Pao Kurireu utugaregedo pudumi. Ia boe eragare taiduwo awu iwadaruji du etaiduwo ji rugadu.

¹³Nono ia boe etaregodure Jesus ae ia boe torebo. Emagore Jesusji uwo tugera bu nou boe etore ewugeje makowo eparu tabo Pao Kurireu bagai baruto. Mare Jesus ure jorduwadowuge etaidukare eroino duji. Emagore ei etuwo torebo Jesus piji. ¹⁴Mare Jesus makore ture jorduwadowugei rugadu. Akore: – Tagaba tawu boe etore emeardae ekajeje etaregoduwo itae rugadu. Etarego itae rugadu. Boe ewo tumeardae udo nono boe etore emeardae mogadure tuwo tugimijerado Pao Kurireuče rugadu turuduwo baruto.

¹⁵Nono ča Jesus ure tugera bu nou boe etore ewugeje. Nono uture nou boe epiji rugadu.

Imedu Oe Kurire

¹⁶Ia imedu aregodure Jesus ae. Unarare Jesusji. Akore: – Jorduwareu nure aki. Nuba iromode iwo iro pemegado iewoduwo pugeje imuguwo baru tada Pao Kurireu apo du akedukawo rugadu?

¹⁷Jesus akore: – Ča anarare i boe ero pemegareu bagai. Arduwa kana kaba jiba akagoino? Pemegareu ure mitotu je. Marigudu arduware nou Pao Kurireu ure maku Judeu doge etaiwu bakaruji. Ure maku etai marigudu. Akaidure aewoduwo pugeje amuguwo Pao Kurireu apo du akedukawo dukodi ameartorudo nou Pao Kurireu ure maku Judeu doge etaiwu bakaruji.

¹⁸Nou imedu unarare pugeje. Akore: – Nou bakaru kurire rugadu. Imeartorumodu kana nou bakaru jamedu boeji? Kaba bataru ji ba imeartorumode?

Jesus makore nou imedu bataru jipagi. Akore: – Akaba boe ewido. Aeribarikaba akoreduje piji. Akiwogukaba. Awadrarodukaba boe erore jiboeji. ¹⁹Ameartorudo ačeji, aoji. Ameardu kurido amedagei nono ameardu kuri moga ai dumogadure. Ameartorudo awu bataru boeji19.19 Awu bataru padure Êxodo 20.12, Deuteronômio 5.16-20, Levítico 19.18 keje..

²⁰Nou imedu akore: – Marigudu imeartorure awu bataru jamedu boeji ji aino. Kaba jiba iromode pugeje?

²¹Nono Jesus makore imeduji pugeje. Akore: – Akaidure awo ro pemegareu remawudo aki dukeje akoe jamedu boe maku diero bagai. Nou ako diero rugadu maku marenarue doge etai. Dukeje Pao Kurireu umode akoe kurido baru tada. Aromode aino dukeje akaregodumode itae pugeje akoduwo itabo rugadu.

²²Nou imedu meardure Jesus bataruji dukeje kiarigodure. Oe kurire dukodire aidukare tuwo toe maku. Kiarigodure rugadu. Kodire uture Jesus piji. Meartorukare Jesus bataruji. ²³Nono Jesus makore ture jorduwadowugei. Akore: – Iwo tawie boe remawuji. Kočare. Boe rakare oe kurireugei etaiduwo tuwo tugimijerado Pao Kurireuče tumuguwo Pao Kurireu apo baru tada. ²⁴Boe rakare oe kurireu imeduji rugadu uwo tugimijerado Pao Kurireuče tumuguwo apo nono boe rakare cameloji19.24 Camelo Nou moto kejewu barogo jire akoino. Nou boe ere tugeragu nou barogoji tagu ieče tumuguwo keje nono boe ero moga kuwaru keje dumogadure. Nou camelo kurire kuwaru kori. Dukodire umodukare turemo agulha poroto rugadu. uwo turemo agulha poroto dumogadure.

²⁵Nou Jesus ure jorduwadowuge emeardure nou Jesus bataruji dukeje eku kidure ji. Dukodire enarare ji. Egore: – Kočare. Ioguduba umode tuginorudo tuiewoduwo pugeje tumuguwo Pao Kurireu apo?

²⁶Jesus aiwore nou ture jorduwadowugei. Akore: – Boe eroiwakare tuwo činorudo rugadu. Mare Pao Kurireu roiware tuwo boe ekinorudo rugadu. Pao Kurireu rakare tuwo boe jamedu boe pemegado boei.

²⁷Nono Pedro akore: – Čegi čere čegera ra čenoe jamedu boe piji čegoduwo akabo. Nuba boemode čei?

²⁸Jesus akore: – Imode tawie boe remawuji rugadu. Toro ia meri keje Pao Kurireu umode boe jamedu boe maiwudo pugeje. Nono Imedu Onaregedu mugumode boe eimijera kurireu mugure kejewu to ira motureu keje, dukeje nou kodure itabowuge tagi tamugumode boe eimijera mugure kejewu ira keje jamedu. Nono tagaiwomode Israel doge erore jiboeji ero pegareu bagai ero pemegareu bagai jamedu. Nou ira doge enodo padumode doze nono nou Israel doge eno clã dogere doze dumogadure. ²⁹Boe emode tugera ra tuwai piji, tuo piji, tuje piji, tumanamage epiji, tuwiemage epiji, to boepa piji tugoduwo itabo tuwo boe ewie iwadaru pemegareuji dukeje boe rugadu boe makudumode etai eroino du moriče. Nou mori kurimode eture pijiboe kori rugadu. Nono ia meri keje eewodumode pugeje emuguwo toro baru tada. Ewimodukare pugeje jii toro rugadu. ³⁰Boe emeardae pemegare oe kurireugei dukeje egore boe eimijerage nuie emage mare emeartorumodukare Pao Kurireuji dukeje marenarue doge mode emage. Iage enoe bokware dukodire boe emeardae pegare ei mare emeartorumode Pao Kurireuji dukeje oe kurireuge mode emage toro ia meri keje rugadu.

Maragodure Uva Iku Jiwuge Reo

¹Jesus makore boei pugeje. Akore: – Ireadodumode ia maragodure boepa jiwuge erore jiboeji tawiagai iwo tawie ia Pao Kurireu meardaeji. Boe eimijera kurireu nure ema. Boe emode tugimijerado ema tumuguwo apo baru tada dukeje Pao Kurireu romode ei nono ia ore moto čewu ro mogadure. Nou ore moto čewu o boepare. Uva iku makare nou o boepa tada. Nou boepa kurire. Ia meri keje meri rutukare raga dukeje nou ore moto čewu ure tudawuje tuwai piji taiwowo ia ime ewagai tumagowo ei emaragoduwo to boepa tada pudai. ²Jordure ia imei dukeje makore ei tumoduie emaragodae morido rugadu. Tumoduie nou moto kejewu diero udo mitotu je etai emaragodae moriče. Nou moto keje emaragodae ainore morire rugadu. Dukodire nou ime etaidure nou ore moto čewu meardaeji. Nono ere tuwadaru maku ai tumaragodumoduie ai nou meriji jii merirekodu ka nou akoino jiwu mori bagai rugadu. ³Nono emaragodure rugadu. Mare meri aregodure gu je pugeje nou ore moto čewu ure tumeardae tawuje tuwo tugeragu ia maragodureugei pugeje. Nono uture nou boe eda ka pugeje nou ime ewagai. Jordure ia imei toro. Emugu pagare nono. ⁴Nono makore ei. Akore: “Tadumode ino boepa ka. Tamaragodumode tada jii merirekodu ka dukeje imode diero maku tagai tamaragodae moriče rugadu. Iro pegamodukare tai.”

⁵– Nou ime etaidure nou ore moto čewu bataruji dukodire eture o boepa ka rugadu.

– Nono meri aregodure pagaia ka dukeje nou ore moto čewu uture boe eda ka pugeje. Ure tugeragu ia imei pugeje emaragoduwo to boepa tada. Makore ei nono tumagore boetojiwugei dumogadure. Merirekodutabo nou ore moto čewu rore aino pugeje ia maragodure to boepa jiwuge ewagai pugeje. ⁶Nono merirekodugodutabo rugadu dukeje nou ore moto čewu uture boe eda ka pugeje. Jordure ia imei nono pugeje. Edu pagare tu nono. Nono nou ore moto čewu unarare ei. Akore: “Kaba kodiba tadu pagare woe awu meriji jii merirekodu ka?”

⁷– Egore: “Iaboe emagokare čei čemaragoduwo pudai. Čemaragodae bokware.”

– Nono nou ore moto čewu makore ei. Akore: “Ča tadudo toro ino boepa ka tamaragoduwo tada. Nono imode diero maku tagai tamaragodae moriče.”

– Dukodire eture toro rugadu tumaragoduwo nou ore moto čewu o boepa tada.

⁸– Nono ča merirekodure rugadu dukodire boečodure ei rugadu dukeje nou ore moto čewu makore nou to boepa kejewu boe eimijeraji makowo nou maragodureuge eiamedu boe ewagai. Tumoduie diero maku etai emaragodae moriče. Makoiago nou aregodure boeiwuge ewagai boetoji.

⁹– Dukodire nou boepa kejewu boe eimijera makore nou aregodure boeiwuge ewagai etaregoduwo mato nou ore moto čewu imedu ae. Emage etaregodure tumaragoduwo boigodu, merirekodutabo rugadu. Nono nou ore moto čewu ure ia nou moto kejewu eno diero udo mitotu je etai emaragodae moriče. ¹⁰Nou aregodure boetojiwuge erduware nou inoduji dukeje emeardaere to diero kurimode nou aregodure boeiwuge eno diero kori rugadu. Nou aregodure boetojiwuge emaragodure aino ča je jii merirekodu ka rugadu. Emaragodu rakare rugadu. Dukodire emeardaere nou ore moto čewu umoduie to diero kurido tumagore jiboe kori. Mare nou ore moto čewu ure eno diero udo mitotu je etai jamedu nono turore nou aregodu boeiwugei dumogadure. ¹¹Ure nou diero maku etai dukeje erduware to diero ure mitotu je rugadu. Emago pegare nou ore moto čewu rore pudui duji. Egore ukaie turugadu. ¹²Egore: “Čegi čemaragodu rakare aino ča je jii merirekodu ka rugadu boeru kuda rugadu. Nou aregodure boeiwuge etaregodure merirekodutabo rugadu. Emaragodure kuri uma hora ka. Mare are emaragodae mori udo nono čemaragodae mori mogadure. Ukare turugadu čegai.”

¹³– Mare nou ore moto čewu makore ei. Akore: “Imedage nure tagi. Iro pega karegure tai. Imagore tawagai tamaragoduwo inai dukeje ire tawie nuba imode diero udo tamaragodae moriče. Tagi tagagore uie turugadu tai. ¹⁴Ča ire nou imagore jiboe maku tagai rugadu. Tageragu ji. Taegaredo tai nou tamaragodae moriji. Nou aregodure boeiwuge etaire itaidure iwo emaragodae mori udo nono tamaragodae mori mogadure du pegakare. ¹⁵Iromode ino dieroji nono imeardae mogadure rugadu du pegakare. Itaidure iro pemegawo ei du pegakare. Mare kočare iro pemegare ei mare tardu pegare iro pemegare ei duji. Du ukare turugadu.”

¹⁶Jesus mako kimore: – Nou ore moto čewu rore jiboe ure nono Pao Kurireu ro mogadure meartorure puduiwugei. Mare maragodure boepa jiwugei karega inagoino. Ure tugimijerado Pao Kurireu čewugeire inagoino. Iage ere tugimijerado Pao Kurireuče marigudu. Iage ere tugimijerado ema aino maibari. Mare Pao Kurireu ro pemegamode eiamedu boei. Ro pemegamode nou meartorure puduiwuge boeiwugei. Ro pemegamode nou meartorure puduiwuge boetojiwugei jamedu. Umode eiamedu boe emugudo pudabo baru tada rugadu.

Jesus Ure Boe Ewie Pugeje Tuwimoduie

¹⁷Nono Jesus uture pugeje. Kodure Jerusalém ba kurireu kawu awaraji. Nono ure tuwuredo nou ture jorduwadowugebo tumagowo ei. Enodo padure doze. ¹⁸Akore: – Padumode Jerusalém ba kurireu ka. Imedu Onaregedu nure imi. Imagudumode nou ure Judeu doge enomea maku Pao Kurireu aiwuge eimijerage etai. Imagudumode nou jorduware Judeu doge eno bakaru jiwuge etai. Nou boe eimijerage egomode ipegaie. Etaidumode tuwo iwido rugadu. ¹⁹Dukodire emode imagu boe tuginaiwuge eimijera ai nou boe tuginaiwuge eimijera uwo to tugobaigarege edo boeto i. Emode iwido ipadumode ipo padure pugajejewu keje. Mare merimode pobe metia bokware dukeje iewodumode pugeje rugadu.

Ia Jesus Ure Jorduwadowuge Etuje Makore Jesusji Tore Eparu Tabo

²⁰Ia aredu aregodure Jesus ae tore ime pobedu dogebo. Etuo iere Zebedeu. Nou aredu ore ime ekodure Jesus apo marigudu. Jesus ure jorduwadowuge nure emage. Etuje ure tubu jodo moto keje togwamaguduwo Jesusji iaboe bagai. ²¹Jesus makore nou areduji. Akore: – Kaba jiba akaidure?

Nou aredu akore: – Amode boe eimijerado aki woe dukeje amugumode ira kurireu keje nono boe ekimijerage ero mogadure. Itaidure awo itore ime emugudo amegi boe eimijera mugure kejewu ira keje jamedu. Ia mugudo nono akana pemegareu jagwai. Metia mugudo akana pegareu jagwai.

²²Jesus meardure nou aredu bataruji dukeje makore nou aredu ore ime pobedu dogei. Akore: – Tarduwakare kaboba bagaiba taje akoino. Boe pegamode tai nono boe pegamode i dumogadure dukeje taroiwakana tawo taragado tai tagawo tagera ra tameartorure idu piji?

Egore: – Uu. Čemode čeragado čei rugadu.

²³Jesus makore ei pugeje. Akore: – Inure tawie. Boe pegamode tai rugadu nono boe pegamode i dumogadure. Mare iroiwakare iwo tamugudo itabo ikana pemegareu jagwai, ikana pegareu jagwai. Iogwa Kurireu emare ure nou imegiwu udo turugadu. Tu ema jorduware turomode jiboeji. Emare umode taidure jiwuge emugudo ikana pemegareu jagwai, ikana pegareu jagwai.

²⁴Nou pobedu doge emedage enodo padure dez. Jesus ure erduwado jamedu. Emeardure nou tumedage etuje okwamagudure jiboeji dukeje ekorigodure nou tumedage pobedu dogei. ²⁵Nono Jesus makore eiamedu boe etae ewiapagawo tuwadaruji. Akore: – Tarduware boe tuginaiwuge ekimijerage erore jiboeji. Ero rakare boei. Boe emeartorumode tugimijeragei rugadu. Emeartorumodukare ei dukeje nou boe ekimijerage emode boe pegado nou meartorukare puduiwugei rugadu. ^26-27Mare tarokaba nono nou boe tuginaiwuge ekimijerage ero mogadure. Ia tagi tagaidumode tawo boe ekimijerado tagi dukeje tameardae udo nono boe utugare meardae mogadure tawo boe eimijera pemegareugedo tagi. Boe eimijera romode nono boe utugare ro mogadure tuwo boe eimijera pemegareudo pudumi. ²⁸Tarodo nono iro mogadure. Imedu Onaregedu nure imi. Itaregodukare iwo boe ekimijerado imi. Itaregodure iwo boe etugaredo imi. Itaregodure iwo imagu boe etai. Itaregodure iwiwo boe ero pegareu moriče rugadu.

Jesus Ure Joku Bokwareuge Ime Pobedu Doge Epemegago

²⁹Toro ia meri keje, Jesus uture Jericó ba kurireu piji ture jorduwadowugebo. Ia boe ekodure awaraji Jesus apo jamedu. Emagare rugadu. ³⁰Joku bokwareuge ime pobedu doge emugure nono nou awara okwai. Emeardure Jesus kodure tugori duji. Kodire ekudure Jesus rekodaji. Egore: – Čegimijera! Davi Onaregedu nure aki! Akogududo čedabo!

Nou joku bokwareu ime erduware Davi uwobe nure Jesusče duji dukodire egoino Davi Onaregedu nuie ema. ³¹Nou kodure nonowu boe emago rakare ei emugu kiorowo. Mare ekudu rakare pugeje. Egore: – Čegimijera! Davi Onaregedu nure aki! Akogududo čedabo!

³²Nono ča Jesus ure tuwuredo nono. Makore toro etae. Akore: – Kaba jiba tagaidure irowo tai?

³³Egore: – Čegimijera nure aki. Čedaidure čedaiwowo pugeje.

³⁴Jesus okudugodure ebo rugadu. Ure tugera bu eku keje. Aino ča etaiwore pugeje tači je. Etaiwo pemegare rugadu. Dukodire ekodure Jesus rekodaji rugadu.

Jesus Aregodure Jerusalém Ba Kurireu Ka Dukeje Boe Egarere Ji

¹Nou inodu otobiji Jesus uture Jerusalém ba kurireu ka ture jorduwadowugebo. Epuredugodure boe eda Betfagé ka. Nou boe eda mugu puredure Oliveira Riji. Aregodure toro dukeje makore nou ture jorduwadowuge ime pobedu dogei tuwo etudo tododai. ²Akore ei: – Tadudo toro nou boe eda ka. Tagaregodumode dukeje tardumode ia jumenta areduji onaregedu apo duji. Boe ere ekogudo nono duji. Tamode bukigu kiwuje dukeje tadumode mato ebo itae. ³Ia boe enaramode kaba kodiba tarore aino dukeje tamagodo aino ji: “Pagimijera aidure ei”, aino. Nono nou boe emode tadudo ebo itae rugadu.

⁴Dukodire ia Pao Kurireu bataru jeture pudui. Marigudu ia makore Pao Kurireu bataru jiwu ure nou bataru bu bapera keje. Akore:

⁵– Awu mugure Jerusalém kejewuge tagi. Tabagudukaba. Tagimijera kurireu ro butugumode boei rugadu. Mugumode jumenta keje taregoduwo tagae. Jumenta onaregedu kejere mugumode rugadu taregoduwo tagae.21.5 Awu bataru padure Zacarias 9.9 keje.

⁶Nono ča nou Jesus ure jorduwadowuge pobedu doge erore nono Jesus makore pudui dumogadure rugadu. ⁷Etaregodure tuibagi nou jumenta apo, nou jumenta onaregedu apo rugadu Jesus ae rugadu. Nono nou boe ere tugudau areia cobertor boe bu nou jumenta poru keje, nou jumenta onaregedu poru keje Jesus muguwo keje rugadu. ⁸Boe emagare nono nou Jerusalém kawu awara keje. Iage ere tugudau areia cobertor bu awara keje rugadu. Iage ere bai kado. Ere nou bai bu awara keje jamedu Jesus koduwo nou jumenta apo nou awaraji Jerusalém ba kurireu ka. ⁹Boe emagare rugadu tugodu tabo Jesus apo. Eture tiegarere pudui dutabo rugadu. Dukodire ewadodu rakare Pao Kurireu ie tabo tumago pemegare ji dutabo. Egore: – Davi onaregedu nure ema dukodire pagimijera kurireu nure ema rugadu. Pao Kurireu uwo boe pemegado ji rugadu! Pao Kurireu ure arego mato pagae. Ure turaga maku ai rugadu. Boe eiamedu boe emago pemegawo ji rugadu woe moto keje, baru tada jamedu.21.9 Awu bataru padure Salmo 118.26 keje.

¹⁰Nono ča Jesus aregodure Jerusalém ba kurireu ka rugadu. Nou ba kurireu tadawuge eiamedu boe erore ta je. Erduwakare kodiba nou boe eroino. Dukodire enarare boei. Egore: – Ioguduba ure ema?

¹¹Nou kodure Jesus apowuge boe emagareuge egore: – Jesus reo. Emare makore Pao Kurireu bataruji. Aregodure Galiléia moto piji, Nazaré ba kurireu piji.

Jesus Ure Turemo Pao Kurireu Uwaito

¹²Jesus ure turemo Pao Kurireu uwaito. Nono jordure nou boei ere tagu metugoe emagu diero bagai duji ere diero maku puai duji.21.12 Boe etaregodure nou Pao Kurireu uwai ka tuwo toe omeado Pao Kurireu ai. Mare enoe pemega jokodukare tuwo omeado Pao Kurireu ai. Dukodire nouia boe eragojere nono Pao Kurireu uwai tada tuwo metugoe emagu tuwo diero tuginaiwu maku boe etai diero bagai nou boe ewo nou ture akirodo jiboe omeado Pao Kurireu ai nono uwai tada. Dukodire korigodure rugadu. Ure nou boe enoe rugadu barigu. Ure emugure kejewu ira rugadu boe barigu. Ure nou metugoe emedure tadaboe rugadu barigu. Ure nou boe etudo Pao Kurireu uwai piji rugadu. ¹³Jesus akore: – Pao Kurireu uwai tadare boe emagomode bagai baruto. Ainore Pao Kurireu akore. Ainore bapera atugo ure. Mare tare awu Pao Kurireu uwai udo nono iwogureuge ewai mogadure.21.13 Awu bataru padure Isaías 56.7, Jeremias 7.11 keje. Iwogureuge remawuge karegure emage. Mare ewiapagakare tumagowo Pao Kurireu bagai nono Pao Kurireu uwai tada. Ewiagorore tuwo toe kurido tu rugadu. Dukodire Jesus akoino eie nono iwogureuge emogadure. Ro pegareuge nuie emage tiagai.

¹⁴Joku bokwareuge, pogora pegareuge, etaregodure Jesus ae nou Pao Kurireu uwaito. Nono Jesus ure epemegago. ¹⁵Mare nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge erdure Jesus ure boe epemegago duji. Emeardure nou boe etore ekudure Jesus ro pemegareu tabo boe egai duji. Dukodire ekorigodure. Nou boe etore egore Davi onaregedu nuie ema duji. Pagimijera kurireu nuie ema rugadu. Pawo boe pemegado ji rugadu! Dukodire nou boe eimijerage erdu pegare Jesusji. Ekorigodure. ¹⁶Dukodire emagore Jesusji. Egore: – Ameardu kana nou boe etore emagoji? Emagore jiboe ukare turugadu. Pagare egoino. Atudo toro etae awo edukiorodo.

Mare Jesus akore: – Boro. Tarduwakare Pao Kurireu bataru remawuji. Marigudu Pao Kurireu ure boe ewie nou emagomoduie aino duji rugadu. Padure bapera keje. Akore Pao Kurireu uie boe etore kugure emago pemegado rugadu. Emago pemegaie Pao Kurireuji rugadu. Dujire Pao Kurireu aidure. Dujire Pao Kurireu meardae remawure21.16 Awu bataru padure Salmo 8.2 keje..

¹⁷Nono ča Jesus uture nou boe epiji. Uture Jerusalém ba kurireu piji toro Betânia boe eda ka. Nonore unudure nou boečoji.

Jesus Mako Pegare Ia Figo Iji

¹⁸Nou barogwato ča boečoto Jesus kodure awaraji pugeje tuwo tugirimi Jerusalém ba kurireu ka pugeje. Mare uke boeire ji. ¹⁹Nono jordure ia figo iji nou awara okwai. Uture nou i ka. Aiwore ia tudu kurodureu bagai mare jordukare boeji. Jordure tu aruji rugadu. Nono Jesus mako pegare nou iji. Akore: – Boe emodukare akurodu kowuje pugeje awimode kodi.

Ča nono nou figo i bire aino tači je! ²⁰Nou Jesus ure jorduwadowuge erdure nou inoduji dukeje eku kidure rugadu. Egore: – Kočare awu figo i bire aino tači je rugadu?

²¹Jesus makore ei. Akore: – Inure tawie boe remawuji. Tameartorudo Pao Kurireuji rugadu. Tameartugukaba ji. Tameartorumode dukeje taromode figo iji nono iro mogadure. Nono tamagomode tori riji uwo tuwarigu pobo maereuto. Tamagomode ji dukeje barigudumode pobo maereuto rugadu. Mare tameartorumodukare dukeje umodukare tuwarigu. ²²Tameartorumode dukeje tamagomode Pao Kurireu bagai baruto iaboe bagai dukeje umode tamagore bagaiboe maku tagai rugadu.

Boe Enarare Jesusji Ioguduba Koiaba Ure Turaga Maku Ai

²³Jesus aregodure Pao Kurireu uwai ka pugeje. Ure turemo dukeje ure boe erduwado nono. Nou ure Judeu doge enomea maku Pao Kurireu aiwuge eimijerage, nouia boe eimijerage etaregodure Jesus ae jamedu. Emagore Jesusji: – Ioguduba ure akarego mato? Ioguduba ure turaga maku akai aro rakawo aino?

^24-25Jesus akore: – Imi jamedu inaramode tai. Ioguduba ure João Batista udo boe etao pegodo? Pao Kurireu koia kana? Ia boe eigoia kana? Tamagomode iwadaru jipagi dukeje imagomode tawadaru jipagi jamedu.

Mare nou boe eimijerage erduwakare tumagowo Jesus bataru jipagi. Dukodire emagore pui nuba tagomode Jesus bataru jipagi. Egore: – Pamagomode Pao Kurireu koiare ure João Batista udo boe etao pegodo mare pameartorukare nou inoduji. Awu Jesus jorduware pameartorukare nou inodu jituji. Dukodire pagagomode aino dukeje Jesus umode pawadaru pogurudo. Akomode: “Kodiba tameartorukare ji?” Ainore akomode pai. ²⁶Mare pagagomode boe eigoiaie dukeje awu woewu boe ekorigodumode pai rugadu. Boe eiamedu boe emeartorure João Batista makore Pao Kurireu bataru jituji. Egore Pao Kurireu koiare ure João Batista udo boe etao pegodo rugadu. Pagagomode boe eigoiaie mare pabagudure boeče dukodire pamagomodukare aino.

²⁷Nono nou boe eimijerage emagore Jesusji. Egore: – Čerduwakare ioguduba koiare ure João Batista udo boe etao pegodo.

Nono Jesus makore ei. Akore: – Tamagokare iwadaru jipagi dukodire imagomodukare ioguduba ure itarego mato jamedu duji.

Imedu Ore Ime Ere Pobe

²⁸Jesus mako kimore nou boe eimijeragei. Akore: – Ireadodumode ia bakaruji iwo tawie ia Pao Kurireu meardaeji. Ia imedu ore ime ere pobe. Nou imedu makore nou tonaregedu imedu boetojiwuji. Makore ji. Akore: “Atudo toro pago boepato amaragoduwo nou boepa tadawu uva ikuji.”

²⁹– Mare nou imedu onaregedu boetojiwu akore tudumodukaie, tumaragodumodukaie boepaji nou meriji. Mare nou imedu onaregedu boetojiwu ure tumeardae mekido dukodire uture rugadu boepato rugadu. Maragodure ji rugadu nou meriji. ³⁰Mare nou uo jorduwakare nou inoduji dukodire uture nou tonaregedu boigoduwu bagai. Makore ji utuiago to boepato nou meriji, maragoduiago boepaji nou meriji. Nou imedu onaregedu boigoduwu akore tudumoduie tumaragoduwo rugadu. Mare ča utukare rugadu.

^31-32Ainore Jesus readodure. Nono Jesus unarare nou boe eimijeragei. Akore: – Kakojiwu imedu onaregedu ba meartorure nou tuo makore pudui duji?

Nou boe eimijerage egore: – Nou imedu onaregedu boetojiwu emare meartorure tuo bataruji.

Jesus akore: – Boe jokodu jire tagagoino. Boe egore nou umoduie tugeragu boe enoe morijiwu emugumodukaie Pao Kurireu apo baru tada. Boe egore nou areme ure tugeragu dieroji tieribari tabowuge emugumodukaie Pao Kurireu apo baru tada erore aino dukodi. Mare iwo tawie boe remawuji. João Batista makore nou boei dukodire ekiarigodure nou turo pegareuji. Ere nou tumeardae pegareu barigu tubiji tumeartoruwo Pao Kurireuji rugadu. Ainore boe erore tuwo tudo turugadu tumuguwo Pao Kurireu apo baru tada rugadu. João Batista ure tarduwado jamedu. Ure tarduwado Pao Kurireu meardaeji. Ure tarduwado nuba taromode tawo tado nono ro pemegareugere Pao Kurireu jakai. Tardure nouia boei ere tumeardae pegareu barigu tubiji duji. Tardure nouia boei emeartorure João Batista makore pudui duji. Mare tagire tameartorukare. Tagare tameardae pegareu barigu tabiji. Dukodire tagare tarugadu raga tamuguwo Pao Kurireu apo baru tada rugadu.

Ro Pegareuge Etu Pemegawo Boepaji

³³Jesus mako kimore nou boe eimijerage pegareugei. Akore: – Imagowo ia bakaruji tawiagai iwo tawie Pao Kurireu meardae remawuji pugeje. Ainore nou bakaru ure. Ia imedu ure uva tugu to boepa tada. Ure ramiku aiado to boepa tabo. Ure ia moto porodo tuwo tuwuredo nou uva kurodu keje tuwo kuru tawuje. Ure ia tugamo pemegado boe ewo tumugudo toro aogeje taiwo pemegawo boepaji. Nono ure tugeragu ia boei tuwo etudo nou to boepaji. Nono nou ore boepa čewu uture epiji tugiriadu tabo toro ia boe eda jaereu ka. ³⁴Nou boepa tadawu uva kurodumode kejewu ari puredugodure dukeje nou ore boepa čewu imedu ure tudugarege etudo toro nou jeture to boepa jiwuge etae nou tugiriadure kawu moto piji. Ure nou tudugarege etudo ewo tugeragu nou makudumode pudaiwu boeji. Nou jeture nou boepa jiwuge emode uva rugadu kado dukeje emode ia kado puiato nou ore boepa čewu imedu ai. ³⁵Nou imedu utugarege etaregodure nou boepa ka. Mare nou jeture nou boepa jiwuge etaidukare tuwo uva kado puiato pugeje nou ore boepa čewu ai. Dukodire ere tugeragu nou imedu utugaregei turaga tabo. Ere boeto iaji. Ere ia bito. Eidore tori tabo iaji.

³⁶Jesus mako kimore: – Nou utugarege etaregodukare iaboe tabo dukeje nou ore boepa čewu imedu ure ia tudugarege etudo pugeje toro nou jeture to boepa jiwuge ewagai pugeje. Ure tudugarege emagado toro rugadu. Mare nou jeture boepa jiwuge ero pegare nou imedu utugaregei nono turo mogadure pugeje. ³⁷Nono ča nou ore boepa čewu ure tonaregedu imedu utudo nou jeture boepa jiwuge ewagai boigodu. Imedu makore tudada tonaregedu jie emeartorumoduie. ³⁸Mare nou jeture boepa jiwuge erdure nou ore boepa čewu onaregedu kodure aino pudae duji dukeje emagore pui. Egore: “Awu ore boepa čewu onaregedu reo. Emare omode tuo oe jamedu boeče. Pawo bito pagowo oe jamedu boeče.” ³⁹Ainore emagore pui. Nono ere tugeragu nou ore boepa čewu onaregeduji. Ere barigu nou boepa piji. Nono ere bito toro.

⁴⁰Jesus mako kimore nou boe eimijeragei. Akore: – Ainore erore rugadu. Ča. Nuba tameardaere nou ore boepa čewu romode nou jeture boepa jiwugei?

⁴¹Nou boe eimijerage emagore Jesus bataru jipagi. Egore: – Umode nou jeture to boepa jiwuge ro pegareuge ewido. Nono umode to boepa maku ia ime etai etuwo ji. Nouge ča emode ia kurodureboe maku nou ore boepa čewu ai rugadu.

⁴²Jesus akore: – Boe rugadu jire tagagoino. Mare tagaiwokare rugadu kana ia padure bapera kejewu Pao Kurireu bataruji? Ainore awu Pao Kurireu bataru akore:

– Boe emeardae pegare toriji. Egore pegaie tuwo tuwaido ema. Mare nou tori pemegareu nure ema rugadu boe ewo tuwaido ema rugadu. Pao Kurireu koiare ure nou tori pemegado aino. Ure pemegado nouia tori jamedu boe ekori. Boe eiamedu boe ebogodure nou Pao Kurireu roino duji.21.42 Awu bataru padure Salmo 118.22-23 keje. – Ainore nou batarure.

^43-44Jesus mako kimore: – Iwo tawie awu Pao Kurireu bataru boeji. Tori ji karega akoino. Umode boe ekinorudowu imedu jire Pao Kurireu akoino. Nou umode boe ekinorudowu romode boei nono ia boe ewudure kejewu tori ro mogadure. Buture tori aogejewuge eiamedu boe emode togorido. Mare tori ji karega inagoino. Nou umode boe ekinorudowu umode meartorukare puduiwuge erugadu boe epegado. Dujire inagoino. Nou umode boe ekinorudowu romode boei nono ia buture boe ewugejewu tori ro mogadure jamedu. Tori butumode boe ewugeje dukeje umode nou boe egugudo. Mare tori ji karega inagoino. Nou umode boe ekinorudowu umode boe pegado nou meartorukare puduiwuge eiamedu boei. Dujire Pao Kurireu akoino. Čare imode tawie boe remawuji. Tameardaere tamugumoduie Pao Kurireu apo baru tada. Tameardaere tagimijera nuie Pao Kurireuče. Mare pagare tagagoino. Pao Kurireu makomodukare tawagai pugeje. Makomode ia boe ewagai. Nono emeartorumode Pao Kurireuji rugadu dukodire emagere emugumode Pao Kurireu apo baru tada rugadu. Emode tugimijerado Pao Kurireuče rugadu.

⁴⁵Nou ure Judeu doge enomea maku Pao Kurireu aiwuge eimijerage emeardure nou Jesus bataruji. Nou boe eimijerage fariseu doge emeardure jamedu. Emeardure Jesus readodure jiwu bakaruji dukeje erduware puduire Jesus akoino duji.21.45 Jeture boepa jiwuge ei karega Jesus akoino. Nou Judeu doge eimijerage fariseu doge, nou ure Judeu doge enomea maku Pao Kurireu aiwuge eimijerage eire Jesus akoino. Nou ore boepa čewu ji karega Jesus akoino. Pao Kurireu jire akoino. Ore boepa čewu onaregedu ji karega Jesus akoino. Pudumire akoino. Nou boe eimijerage emode Jesus bito. Dujire akoino. Mako pegare nou boe eimijeragei rugadu. Dukodire ekorigodure Jesusji rugadu.⁴⁶Dukodire nou boe eimijerage pegareuge eiamedu boe etaidure tuwo tugeragu Jesusji tuwo tugu baičoreuto kuri je rugadu. Mare boe etaidukare ero pegawo Jesusji. Egore makore Pao Kurireu bataru jiwu nuie ema rugadu. Pao Kurireu uie arego rugadu. Boe etaidure tuwiapagawo Jesus makore jiboeji. Dukodire nou boe eimijerage pegareuge epagudure, eroiwakare tuwo tugeragu Jesusji nou boe epiji rugadu.

Boe Emugure Puapowu Boe Ewadae Kurireu Reo

¹Jesus makore nou boei pugeje. Makore ia bakaruji tuwo boe ewie toro ia Pao Kurireu meardae ka pugeje. ²Akore: – Pao Kurireu umode boe eimijera kurireudo pudumi dukeje ainore boemode. Imode tawie bakaruji. Ia boe eimijera kurireu onaregedu imedu uwiremode. Dukodire nou boe eimijera kurireu ure ia boe ewadae kurireu towuje. ³Ure boe jamedu boe udo turugadu dukeje ure tudugarege etudo nou tumagore bagaiwuge ewagai tuwo ewie boe uie turugadu duji etaregoduwo tuwadae ka rugadu. Mare nou makore bagaiwuge etaidukare tuduwo toro. Eiamedu boe egore tudumodukaie. ⁴Dukodire nou boe eimijera kurireu ure ia tudugarege etudo pugeje toro nou makore bagaiwuge ewagai pugeje. Akore nou tudugaregei: “Tamagodo nou imagore bagaiwugei ire boe eke kurido rugadu. Tapira kodu kareu uie turugadu. Boe jamedu boe uie turugadu.” ⁵Ainore nou boe eimijera kurireu akore. Dukodire nou utugarege eture nou boe ewagai. Mare nou boe ewiapagakare ewadaruji. Eture nou boe eimijera kurireu utugarege epiji. Ia uture to boepato. Ia uture tumaragodure tadawu bai ka. ⁶Iage ere tugeragu nou boe eimijera kurireu utugaregei. Ero pegare ei. Ere ewido. ⁷Nou boe eimijera jorduware nou inoduji dukeje korigodure nou boei rugadu. Ure to tugobaigarege etudo nou boe eda ka. Nou tugobaigarege ere nou boe ewido rugadu. Ere joru tugu nou ewai jamedu boeto. ⁸Nono nou boe eimijera kurireu makore tudugaregei pugeje. Akore: “Itonaregedu uwiremode dukodire ire ewadae pemegado. Boe jamedu boe ure turugadu. Mare nou imagore bagaiwuge epemegakare, etaregodukare. Itaidukare ei pugeje. ⁹Dukodire čare tadudo toro nou boe eda ka ia boe ewagai pugeje. Tamagodo tardumode jiwuge eiamedu boei etaregoduwo mato nou iwadae ka.” ¹⁰Dukodire čare nou utugarege eture nou boe eda ka rugadu. Ekodure nou boe eda jamedu boe parugajeje. Emagore tuiordure jiwuge eiamedu boei etaregoduwo nou tugimijera kurireu uwadae ka. Nou emagore jiwuge epemegare iage epegare. Dukodire nou boe eimijera kurireu uwadae kejewu bai kurireu korobadure boebo rugadu. ¹¹Nono nou boe eimijera kurireu ure turemo nou boe ewadaemode kejewu bai kurireuto tuiorduwo nou aregodureuge boei. Nono jordure ia imeduji nono nou bai tada. Mare nou imedu ukudau areia ure tuginai. Ukare nou tugudau areia boe ewadae kejewu tugu pudui. ¹²Nou boe eimijera kurireu makore nou imeduji. Akore: “Me. Boe ewadae kejewu akudau areia metukare ai. Kočare nuba arore awo aremo awu iwaito?”

– Mare nou imedu bataru bokware. ¹³Nono nou boe eimijera kurireu makore tudugaregei. Akore: “Tageragu nou imeduji. Iera kogudo. Bure kogudo. Nono barigu toro bawadu ka, toro boečo ka. Torore boe etragudu rakare. Torore boe emode to reko pui tuwiri boe kori koia.” ¹⁴Mare paga karega. Pao Kurireu makore bagaiwuge emagare mare ure tugeragu jiwuge emagakare rugadu.

Boe Ewo Toe Mori Maku Roma Kejewu Boe Eimijera Kurireu César Ai

¹⁵Ia fariseu doge ere tumeardae pegareu tawuje. Etaidure tuwo Jesus barigu boeto tagoino jiboeji. ¹⁶Dukodire ere ture jorduwadowuge etudo Jesus bagai. Aidure Herodes jiwuge eture ebo jamedu. Etaregodure Jesus ae dukeje enarare ji. Egore: – Boe eimijera nure aki. Awiapagakare boe ewadaru pegareuji. Boe jokodu jire akagoino. Akare awadaru udo paga boei. Ameardaere boei boe remawu tabo. Arduware Pao Kurireu meardaeji. Are boe erduwado nou Pao Kurireu meardaeji tu tu je. Awiapagakare ia boe emeardae pegareuji rugadu. ¹⁷Dukodire čare čedaidure čenarawo ai ameardae bagai. Nuba pago bakaru akomode paromode jiboeji? Pamode pagoe mori maku Roma kejewu boe eimijera kurireu César ai na? Pamode maku kana? Pamodukana maku?

¹⁸Mare Jesus jorduware emeardae pegareu boeji. Dukodire mako rakare ei. Akore: – Meardae pegareuge nure tagi. Tameartorukare tawadaruji. Kaba kodiba tagaidure tawo iwarigu boeto tagagoino idu tabo? ¹⁹Nou boe mode morido aiwu imedu boe enoe diero tori maku inai iorduwo ji ka.

Nono ia boe ere ia diero tori maku Jesus ai. ²⁰Nono Jesus unarare ei: – Ioguduba je ba padure awu diero tori keje? Ioguduba ie ba padure awu diero tori keje?

²¹Nou boe egore: – Roma kejewu boe eimijera kurireu César ie padure keje.

Nono Jesus makore ei. Akore: – Boe rugadu. Čare awu César oeboe maku César ai. Mare Pao Kurireu oeboe maku Pao Kurireu ai jamedu.

²²Nou boe emeardure Jesus akoino duji dukodire erore ta je akoino pudui duji. Dukodire emagokare ji pugeje. Nono eture piji.

Ia Boe Eimijerage Enarare Jesusji Pugeje

²³Nou meriji rugadu ia saduceu doge etaregodure Jesus ae tuwo Jesus barigu boeto tagoino jiboeji jamedu. Nou saduceu doge emeardaere boe eewodumodukaie pugeje. ²⁴Nono emagore Jesusji. Egore: – Jorduwareu nure aki. Ča mariguduwu makore Pao Kurireu bataru jiwu Moisés ure jaoboe ero maku etai pameartoruwo ji jii aino rugadu. Akore imedu bimoduie mare ore bokwaie dukeje nou imedu uwie muguwo nou tumana bireu oreduje apo orewo nou bireu tumana ai. ²⁵Ča ia meri keje ime enodo padure sete. Etumana etuwie mage nure pugi. Etumana mugure ia aredu apo. Mare čare bire. Mare ore bokware. Dukodire nou imedu uwie mugure nou tumana bireu oreduje apo rugadu. ²⁶Ča nou bire jamedu. Dukodire uwie imedu mugure nou aredu apo. Mare bire jamedu. Dukodire nou uwie ime eiamedu boe emugure nou aredu apo rugadu. Mare eiamedu boe ewire. ²⁷Dukeje čare nou aredu bire jamedu. ²⁸Dukodire čedaidure čenarawo ai. Pao Kurireu umode eewodudo pugeje dukeje duboba mugumode nou aredu apo? Eiamedu boe emugure apo moto keje mare duboba mugumode nou aredu apo baru tada?

²⁹Jesus makore nou boe ewadaru jipagi. Akore: – Tarduwa bokware. Tarduwakare Pao Kurireu bataru padure kejewu baperaji. Tarduwakare Pao Kurireu ro rakareuji. ³⁰Bireuge eewodumode pugeje dukeje emode nono Pao Kurireu utugarege baru tadawuge emogadure. Etuwiremodukare. Etugogemodukare. ^31-32Mare tameardaere boe eewodumodukaie pugeje. Tagaiwo kana padure bapera kejewu Pao Kurireu bataruji? Pao Kurireu akore: “Abraão meartorure jiwu Pao Kurireu nure imi. Isaque meartorure jiwu Pao Kurireu nure imi. Jacó meartorure jiwu Pao Kurireu nure imi.”22.31-32 Awu bataru padure Êxodo 3.6 keje.

– Pao Kurireu makore jiwu ime ewire marigudu. Mare Pao Kurireu makore emeartoruie pudui rugadu. Dukodire parduware eewodure pugeje duji. Bireuge emeartorumodukare Pao Kurireuji. Jewodureuge emeartorumode ji. Dukodire tameardae ukare turugadu. Boe eewodumode pugeje rugadu.

³³Mare boe emagare nono tuwiapaga tabo Jesus akoino duji. Emeardure dukeje eku kidure nou Jesus bataruji rugadu.

Pao Kurireu Bataru Kurireu Reo

³⁴Fariseu doge erduware Jesus mako pemegare nou saduceu doge ewadaru jipagi duji. Dukodire ere bato pui pugeje. ³⁵Ia jorduware Pao Kurireu ure maku etaiwu bakaruji rugadu. Emare ure tumeardae tawuje tunarawo Jesusji pugeje. ³⁶Akore: – Kakojiwu Pao Kurireu bataru pemegareu remawu jiba pamode pageragu?

^37-38Jesus akore: – Ere pobe. Boetojiwu bataru kurireu ure aino: “Pao Kurireu ure mitotu je. Tameardu kurido Pao Kurireuji taraga tabo, tameardae pemegareu tabo, tarore jiboe jamedu boe tabo. Boe eiamedu boe erduwawo awu bataruji rugadu.”22.37-38 Awu bataru padure Deuteronômio 6.5 keje. Ainore Pao Kurireu bataru kurireu boetojiwu ure. ³⁹Pao Kurireu bataru boigoduwu ure aino: “Tameardu kurido tamedagei nono tameardu kuri moga tai dumogadure.”22.39 Awu bataru padure Levítico 19.18 keje. Ia bataru kurireu bokware nono awu bataru pobedu doge emogadure. ⁴⁰Boe emeartorumode nou bataru pobedu dogei boetoji. Dutabore emeartorumode makudure Judeu doge etaiwu bakaruji rugadu. Dutabore emeartorumode nou mariguduwu makore Pao Kurireu bataru jiwuge emagore jiboeji jamedu.

Jesus Unarare Fariseu Dogei Emeardae Bagai

⁴¹Fariseu doge edure nono Jesus apo kimo. Dukejere Jesus unarare ei. ⁴²Akore: – Nuba tameardaere nou umode boe ekinorudowuji. Ioguduba onaregedu mode ema?

Egore: – Mariguduwu pawobe ekimijera kurireu Davi onaregedu mode ema.

^43-44Jesus akore: – Mare Pao Kurireu Uwari ure Pao Kurireu bataru maku nou Davi ai marigudu. Dukodire Davi akore:

– Pao Kurireu makore nou ikimijera umode boe ekinorudowuji. Akore: “Amugudo woe ikana pemegareu jagwai jii toro imode nou jordu pegare aiwuge etagedudo du ka.”22.43-44 Awu bataru padure Salmo 110.1 keje.

– Ainore nou Davi akore marigudu tuwo boe ewie Pao Kurireu bataruji rugadu. ⁴⁵Tagoino dutabo Davi akore tugimijera nuie nou umode boe ekinorudowuče. Mare Davi onaregedu mode ema jamedu. Ča nuba nou umode boe ekinorudowu ure?

⁴⁶Nou boe erduwakare tumagowo nou Jesus bataru jipagi pugeje. Dupijire boe eraga bokware tunarawo Jesusji pugeje. Eraga bokware tuwo Jesus barigu boeto tagoino jiboeji rugadu.

Jesus Mako Pegare Fariseu Dogei Ia Boe Eimijeragei Jamedu

¹Nono Jesus makore ture jorduwadowugei. Boe emagare nono ebo. Jesus makore nou boe eiamedu boei. ²Akore: – Nou ure boe erduwado Judeu doge eno bakaru jiwuge ere tumugudo Moisés mugato. Nou fariseu doge ere tumugudo Moisés mugato. Dukodire tagimijerage nure emage. ³Dukodire tameartorudo ei emagore taiboe jamedu boeji. Mare tarokaba nono ero mogadure. Emage emeartorukare tuwadaruji rugadu. Dukodire inagoino tarokawo nono ero mogadure. ⁴Ere turo makado boe etai tuwo boe rakado ei rugadu. Mare ekare tugera maku nou boe etai tuwo turaga maku etai. ⁵Erore jiboe etaidure boe erduwo turore jiboeji boe emagowo pudui boe emago pemegawo pudui. Ere boe etaiwodo tugudau areia motureu meture pudui duji23.5 Nou Judeu doge ere ia taidure jiwu Pao Kurireu bataru bu ia boe ekudau areia rogu keje. Nono ere nou tugudau areia rogu kogudo tuie kajeje, tugana pegareu kajeje jamedu. Ere tugera pemegado nou tugudau areia roguji boe erdu motuwo ji rugadu. Dujire akoino.. Etaidure tuwo boe epogurudo. Egore tu pudumie tuiorduwaie tumago raiwo Pao Kurireu bagai. Mare pagatu je. Emago raikare tumeardae remawu tabo Pao Kurireu bagai. ⁶Etumode boe ewadae ka dukeje etumode boe eke jeture kejewu ira ka boe etododai togwagewo boetoji. Etumode Judeu doge ere bato puiwu bai ka dukeje emode tugeragu nou boe eimijera mugure kejewu iraji tumuguwo keje. ⁷Etumode ba kurireu ka dukeje etaidure boe emago pemegawo pudui etaidure boe ekimijeragewo pudumi dukodi.

⁸– Mare tarokaba nono ero mogadure. Tagimijera ure mitotu je. Pao Kurireu nure ema. Dukodire taiamedu boe tawobe nure pugi. Tagaidukaba tawo boe eimijeragedo tagi. ⁹Tagaidukaba tawo tado nono boe etuo mogadure. Pao ure mitotu je. Rakojere baru tada. ¹⁰Tagaidukaba tawo tado nono umode boe erduwadowu mogadure. Umode boe erduwadowu remawu ure mitotu je. Umode boe ekinorudowu nure ema. ¹¹Mare ia tagi tagaidumode tawo boe ekimijeragedo tagi dukeje tameardaemode nono boe utugare meardae mogadure tawo boe eimijera pemegareugedo tagi. ¹²Boe enojaromode pudui, emode tugimijerado pudumi tumeardae tabo dukeje Pao Kurireu umode epogurudo. Mare boe emode boe utugaregedo pudumi turo pemegawo boei dukeje Pao Kurireu umode boe eimijera pemegareugedo emage rugadu.

¹³Nono ča Jesus makore fariseu dogei. Makore ure boe erduwado Judeu doge eno bakaru jiwugei jamedu. Akore: – Boe eimijerage nure tagi mare tameartorukare tawadaruji. Dukodire boe pegamode tai rugadu. Tare boe emeartoru okwado Pao Kurireuji dukodire emodukare tugimijerado Pao Kurireuče. Tagi jamedu tagare tagimijerado Pao Kurireuče. Mare ia boe etaidure tuwo tugimijerado Pao Kurireuče rugadu. Mare tare ewarigu boeto nou emeardae piji rugadu. Dukodire boe pegamode tai rugadu. ¹⁴Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tagiwogure okoge bokwareuge eno dieroji epiji. Mare tagaidure tawo boe etaidudo tai dukodire tamago raimode Pao Kurireu bagai baruto boe ewiagai. Mare pagare taroino tagagoino. Boe emeardae pemegawo tai dubagaire taroino. Dukodire boe pegamode tai rugadu. ¹⁵Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tagodu jaemode. Tagurugodumode pobo maereu kajeje tagaiwowo ia boe ewagai tawo emeartorudo tawadaruji, tarore jiboeji. Nono tamode emeartorudo mare taroino dutabo tamode ro pegareu remawugedo emage. Ero pegamode taro pegareu kori. Dukodire ewarigudumode bope doge eda kejewu joru pegareuto rugadu tagabo rugadu. ¹⁶Boe pegamode tai rugadu. Tare nono joku bokwareuge emogadure. Mare taeku ji karega inagoino. Tarduwakare boe remawuji rugadu. Dujire inagoino. Tare boe erduwado tameardaeji. Tagagore boe emagomoduie Pao Kurireu uwai kurireu ie tabo. Mare emodukaie nou tumagore jiboe towuje. Dukeje boe pegamodukaie ei. Ainore tagagore. Dujire tare boe erduwado. Mare tagagore boe emagomoduie Pao Kurireu uwai tadawu tori kuieje ie tabo. Mare boe emodukaie nou tumagore jiboe towuje. Dukeje boe pegamoduie ei rugadu. Ainore tagagore. Dujire tare boe erduwado. ¹⁷Mare pagare tagagoino. Jorduwa bokwareuge nure tagi. Tare nono joku bokwareuge emogadure. Mare taeku ji karega inagoino. Tarduwakare boe remawuji. Dujire inagoino. Ča iwo tawie boe remawuji. Nou mugure Pao kurireu uwai tadawu tori kuieje na ure Pao kurireu uwaido tuginai? Boro. Pao kurireu uwai pemegare nou tori kuieje kori rugadu. Mare nou tori kuieje mugumodukare Pao kurireu uwai ja tada dukeje tori kuieje tuginaiwu modukare ema rugadu. Pao Kurireu uwai pemegare nou tori kuieje kori rugadu. Dukodire inagoino tamagore jiboe ukare turugadu. ¹⁸Tagagore boei emagomoduie Pao Kurireu uwai tadawu kamo ie tabo. Mare emodukaie tumagore jiboe towuje. Dukeje boe pegamodukaie ei. Ainore tagagore. Mare tagagore boei emagomoduie nou padure nou kamo kejeboe ie tabo. Mare emodukaie nou tumagore jiboe towuje. Dukeje boe pegamoduie ei rugadu. Ainore tagagore. ¹⁹Tare nono joku bokwareuge emogadure. Mare taeku ji karega inagoino. Tarduwa bokware. Dujire inagoino. Nou Pao Kurireu uwai tadawu kamo kejere boe emode ia tagu barogo kodu kowu tomeawo tabo Pao Kurireu ai. Padumodukare nou kamo keje dukeje tagomeamodukare tabo Pao Kurireu ai. Dukodire nou kamo pemegare nou padure kamo kejeboe kori. ²⁰Dukodire imode tawie. Boe emagomode nou Pao Kurireu uwai tadawu kamo ie tabo dukeje nou kamo kejeboe ie tabore egoino jamedu. ²¹Boe emagomode Pao Kurireu uwai kurireu ie tabo dukeje Pao Kurireu ie jire egoino jamedu. Pao Kurireu mugure tuwai kurireu tada rugadu dukodi. ²²Boe emagomode baru ie tabo dukeje nou baru tadawu Pao Kurireu mugure kejewu ira ie tabore egoino jamedu. Pao Kurireu ie tabore egoino jamedu. ²³Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tare tago boepa pijiwu boe aru rogu mori kado puiato tu tu je tagomeawo iarogu tabo Pao Kurireu ae23.23 Brae egore “dízimo” aino awu eroji. Eno diero mode dez dukeje makudumode Pao Kurireu ai umode mitotu je. Woe nou fariseu doge eno boepa pijiwu aru morimode. Nono morimode dez dukeje emode omeado Pao Kurireu aiboe umode mitotu je. Cada dez mode nono makudumode Pao Kurireu aiboe umode mitotu je tu tu je rugadu. Dujire brae egore “dízimo” aino.. Nou tarore jiboe pegakare. Tarodo ji rugadu. Mare tagare tameartorudo Pao Kurireu bataru remawuji rugadu. Tameardaekare tawo taro jetorodo boei. Tameardaekare tagoguduwo boebo. Tameardaekare tameartoruwo Pao Kurireu bataruji jii toro rugadu. Dujire inagoino. Dukodire čare boe pegamode tai rugadu. Ča taro jetorodo boei. Tagogududo boebo. Tameartorudo Pao Kurireu bataruji jii toro rugadu. Dujire inagoino tameartoruwo Pao Kurireu bataru remawuji. ²⁴Joku bokwareuge nure tagi mare du inodu tabo tare boe erduwado awaraji. Mare taeku ji karega inagoino. Tarduwa bokware Pao Kurireu bataru remawuji. Dujire inagoino. Dukodire tawiapagare tawo ia ruke rogu tawuje tagudumode čewu pobo piji mare tare barogo kurireu remo tagogwato. Mare ruke ji karega inagoino. Taro pegareu biagareu jire inagoino. Barogo ji karega inagoino. Taro pegareu remawu jire inagoino. Tamororamagadure taro pegareu biagareuji mare tawiapagakare nou taro pegareu remawuji rugadu. Dujire inagoino. ²⁵Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tare tago pagaga kabi tawo pemegado tarowo nou taro boeji nou pagaga tabo. Tare tago ruwobo kabi tawo pemegado tarowo nou taro boeji nou ruwobo tabo jamedu. Ainore tago bakaru ure. Tameardaere tare Pao Kurireu jakaredo pudui nou taro tabo. Mare pagatu jere taroino. Tadadare tameardae pegare rugadu. Tagogwa kidure tu tagai tawo tagoe kurido tamedage epiji. Tagaidure tawo boe pemegado tu tai. ²⁶Tarduwa bokware! Tadadare tamode tameardae pemegado dukeje tabemegamode Pao Kurireu jakai. Mare taro jire inagoino jamedu. ^27-28Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Tare nono bireuge emedure tadawu moto poro mogadure. Mare moto poro ji karega inagoino. Tabegareu meture tadada tameardae pegare dukodi. Dujire inagoino. Boe etaiwore tai dukeje emeardae pemegare tai. Egore ro pemegareuge nuie tagi. Mare tadadare tameardae ure nono bireu ra mogadure. Tameardae ure nono bireu apowu ro kigoreboe mogadure. Mare bireu ra ji karega inagoino. Ro kigoreboe ji karega inagoino. Tameardaere jiboe jire inagoino. Tameardaere tawo Judeu doge erduwado tawadaruji. Mare pagatu je. Tameartoru bokware nou tawadaruji. Dujire inagoino. Tameardae pegare taro pegawo rugadu. Dujire inagoino. ²⁹Fariseu doge nure tagi. Ure boe erduwado Judeu doge eno bakaru jiwuge nure tagi. Tameartorukare tawadaruji dukodire boe pegamode tai rugadu. Mariguduwu tawobe ero pegare makore Pao Kurireu bataru jiwugei rugadu. Ere iage ewido rugadu. Aino čare tare tori motureu rakojedo nou bireuge etugudure towu moto keje boe erduwawo nonore nou makore Pao Kurireu bataru jiwuge bireuge emedure duji. ³⁰Tagagore: “Paragojemode nou mariguduwu pawobebo dukeje pamodukare nou makore Pao Kurireu bataru jiwuge ewido nono pawobe ero mogadure.” ³¹Mare pagare tagagoino. Tameartorukare i. Dukodire tagi rugadu tare boe erduwado tameardae remawuji. Tare nono nou mariguduwuge emogadure ere makore Pao Kurireu bataru jiwuge ewido rugadu. Tare nono emogadure. ³²Dukodire čare taromode nono nou mariguduwuge tawobe ero mogadure jii nou tameardae pegareu idu oto pa ka.

³³– Tare nono awagu pegareuge emogadure rugadu. Mare awagu ji karega inagoino. Tameardae pegare rugadu taro pegawo rugadu. Dujire inagoino. Dukodire tawarigudumode bope doge eda kejewu joru pegareuto rugadu. ³⁴Mare paga karega. Imode makore Pao Kurireu bataru jiwuge etarego tawagai. Imode jorduwareuge etarego tawagai. Imode ure boe erduwadowuge etarego tawagai. Mare tawiapagamodukare ei. Taro pegamode ei. Tamode iage ewido ipo padure pugajejewu keje. Tamode boeto iagei bukigu tabo Judeu doge ere bato puiwu bai tada. Taregodumode iage eregodaji boe eda jamedu boe parugajeje. ³⁵Dukodire nou ro pemegareuge eiamedu boe ewi mori butumode tawugeje rugadu. Tawobe ere ro pemegareuge ewido marigudu. Ere ro pemegareu boetojiwu Abel bito. Ere ro pemegareu boigoduwu Baraquias onaregedu Zacarias bito jamedu. Ere nou Zacarias bito Pao Kurireu uwai jokorai. Nou Abel piji jii Zacarias ae ro pemegareuge emagare rugadu. Mare tawobe mariguduwuge ere bitowuge emagare jamedu. Mare tagaire Pao Kurireu umode nou tawobe ero pegareu jamedu boe morido tagai. ³⁶Nou mariguduwuge tawobe ero pegareu jamedu boe mori barigudumode tawugeje rugadu meartorukare iwuge tawobe ewugeje jamedu aino kuri aino. Inure tawie boe remawuji rugadu.

Jesus Meardu Kurire Jerusalém Kejewugei

³⁷Jesus aiwore toro Jerusalém ba kurireu ka. Dukejere čare kiarigodure rugadu. Mako kimore. Nou Jerusalém kejewugeire akoino. Akore: – Jerusalém kejewuge nure tagi. Tare nou mariguduwuge makore Pao Kurireu bataru jiwuge ewido. Aregodure Pao kurireu bataru tabo tagaewuge tare tori barigu etae tawo ewido. Mare imeardu kurire tai rugadu. Kagariga umode tore ewiado tugana kuda tietu pemegawo ei. Itaidure irowo taiamedu boei nono nou kagariga ro moga torei dumogadure. Mare tagaidukare i. ³⁸Dukodire Pao Kurireu mugumodukare Jerusalém kejewu tuwai tada pugeje. ³⁹Iwo tawie. Tardumodukare i pugeje jii toro tameartorumode i du ka. Tagagomode: “Pagimijera reo! Aregodure Pao Kurireu meardae tabo. Pao Kurireu ro pemegawo ji.”23.39 Awu bataru padure Salmo 118.26 keje. Tamagomode aino i dukeje itaregodumode tagae pugeje rugadu.

Jesus Akore Pao Kurireu Uwai Kurireu Akedumoduie

¹Jesus ure tudawuje Pao Kurireu uwai kurireu piji. Kodure dukeje nou ure jorduwadowuge ere tuburedo Jesusji. Etaiwore nou Pao Kurireu uwai kurireuji. Egore nou bai motuie rugadu. ²Nono Jesus akore: – Iwo tawie boe remawuji. Ro pegareuge emode nou tardure jiwu bai kurireu butudo rugadu. Tori tabore pawobe ere towuje marigudu. Mare ia meri keje nou tori jamedu boe epadumodukare pu aogeje pugeje.

Ro Pegareuge Ero Pegamode Meartorure Jesus Jiwugei

³Jesus uture Oliveira ri ao ka. Nono ure tumugudo nono. Nou ure jorduwadowuge ere tumugudo nono Jesus apo jamedu. Tu emagere emugure nono. Nono enarare Jesusji. Egore: – Akagore ro pegareuge emoduie Pao Kurireu uwai butudo ia meri keje. Kaba meri kejeba emode butudo? Kaba jiba čerdumode čerduwawo boe puredugodure akaregoduwo pugeje rugadu duji? Kaba jiba čerdumode čerduwawo moto akedumode kuri aino duji?

⁴Jesus akore: – Taeku jado boe ekawo taekiripagado. ⁵Boe emagamode tuwadaru pemegareu tabo. Egomode umode boe ekinorudowu nuie pudumi. Mare pagare egoino. Mare du inodu tabo emode boe ekiripagado rugadu. ⁶Tameardumode bakaru pegareuji. Boe emode tawie boe erugoduie pui tuwaiga tabo. Boe erugodu akedukaie. Boe egomode nou torowu boe ekorigoduie dukodie erugodu kurie pui rugadu. Mare taragado tai tamororamagadukawo. Pao Kurireu jorduware ro pegareuge erugoduji marigudu. Umodukare nou erugodu tawuje epiji. Erugodumode pui tuwaiga tabo rugadu mare moto akedumodukare raga. ⁷Boe eimijerage kurireuge erugodumode pui tugobaigaregebo. Boe eke bokwamode boe jamedu boe parugajeje. Dukodire boe ewimode tuge boei koia. Moto magadugodumode boe jamedu boe parugajeje jamedu. ⁸Awu inagoino jiwu iwadaru jetumode pudui dukeje tarduwamode moto akedumode kuri aino duji nono aredu kurijirigodu mogadure. Aredu kurijirigodure dukeje boe erduware kuri butumode kuri aino duji. Mare aredu kurijirigodu ji karega inagoino. Boe pegamode motoji nono iwadaru mogadure dukeje tarduwamode moto akedumode kuri aino duji. Dujire inagoino. ⁹Nono ro pegareuge emode tamagu boe eimijerage pegareuge etai ero pegawo tai, ewo tawido. Tameartorure i dukeje boe erdu pegamode tai moto jamedu boe parugajeje. ¹⁰Nou meri keje boe emode tugera ra tumeartorure idu piji rugadu. Erdu pegamode pui. Emode pu maku boe eimijera pegareuge etai. ¹¹Boe egomode tumagoie Pao Kurireu bataruji. Mare pagatu jere egoino. Mare du inodu tabo boe emeartorumode ei. Emode jekiripagadowuge emagamode rugadu. ¹²Boe emode turo pegareu kodudo tugori pugeje. Dukodi boe emeardu kurimodukare pui pugeje. Meardu kurire puiwuge enowaromode tu je. ¹³Mare ia boe emodukare tugera ra tumeartorure i dupiji dukeje imode ekinorudo. ¹⁴Nono boe emagomode boei ewo tugimijerado Pao Kurireuče moto jamedu boe parugajeje. Emagomode nou bataruji boe tuginaiwuge eiamedu boe ewiagai dukeje moto akedumode. ¹⁵Iwo tawie. Tardumode nou Pao Kurireu jordu pegare jiboeji Pao Kurireu uwai tada. Marigudu nou makore Pao Kurireu bataru jiwu imedu Daniel ure boe ewie boemoduie aino rugadu24.15 Awu bataru padure Daniel 9.27, 11.31, 12.11 keje.. Jordumode awu bapera jiwuge eiamedu boe ewiapaga pemegawo awu bataruji. ¹⁶Mare boe erdumode nou Pao Kurireu jordu pegare jiboeji Pao Kurireu uwai tada dukeje Judéia moto kejewuge eregodu rakamode toro tori ao ka tuwo tuginorudo boe pegareu piji. ¹⁷Nou rakojere tuwai ao kejewuge eregoduwo tuwai piji kuri je rugadu. Ekawo turemo tuwai jagi iaboe bagai. Etuwo tugera kedo tabo rugadu. ¹⁸Nou maragodure to boepa jiwuge eregoduwo nou to boepa piji kuri je jamedu. Ekawo tugirimi tuwai ka ia tugudau areia bagai. ¹⁹Nou meriji boe pegamode kuiarureugei rugadu. Boe pegamode ei rugadu eroiwakare turegodu rakawo dukodi. Boe pegamode boe etore etuje magei jamedu eroiwakare ture rakawo dukodi. ²⁰Tamagodo baruto Pao Kurireu bagai boe pegakawo aino boei sábado meri keje. Tamagodo baruto Pao Kurireu bagai biaku butukawo boei nou eregodure jiwu meri keje. ^21-22Mare paga karega. Boe pegamode boei rugadu boe pega jamedu boe kori. Pao Kurireu ure moto to dupiji boe erdukare awu boe pegareu boeji jii aino. Mare boe pegamode motoji rugadu. Nou boe pegamode kejewu meri makamode. Mare Pao Kurireu umode nou merido biagatu je rugadu. Nou boe pegamode kejewu meri makamode rugadu dukeje boe eiamedu boe ewimode rugadu. Mare Pao Kurireu umode nou boe pegamode kejewu merido biagatu je tuwo meartorure puduiwuge edo činorudo. ²³Mare boe pegamode kejewu meri aregodumode dukeje boe egomode: “Umode boe ekinorudowu aregodu! Ema reo!” Ainore boe egomode. Mare tawiapagakaba ewadaruji. Pagare egoino. ²⁴Mare paga karega inagoino. Boe etaregodumode rugadu nou tuwadaru tabo rugadu. Egomode umode boe ekinorudowu nuie pudumi. Mare pagare egoino. Egomode tumagoie Pao Kurireu bataruji mare pagare egoino. Ero rakamode boe emeartoruwo pudui Pao Kurireu piji pagatu je. Emodukare meartorure Pao Kurireu jiwuge remawuge ekiripagado. Mare etaidumode tuwo meartorure Pao Kurireu jiwuge ekiripagado nou turo rakareu tabo rugadu. ²⁵Dukodi čare ire tawie rugadu. Taeku jado. Pagare eroino. ²⁶Dukodire tarduwamode. Boe egomode umode boe ekinorudowu rakojeie boe maereu keje mare tameartorukaba ei. Boe egomode rakojeie ia bai tada mare tameartorukaba ei. ²⁷Imedu Onaregedu aregodumode moto ka pugeje dukeje boe erdumode ji rugadu nono boe erdure boeiaragudu jitu mogadure. Boeiaragudure dukeje boe erdu jaere ji. Nono boe erdu jaemode itaregoduji jamedu. ²⁸Boe erdumode Imedu Onaregedu aregoduji nono boe erdure pobureuge ere tago puae barogo bireu kodu keje jitu mogadure. ²⁹Boe pegare moto jiboe akedumode dukeje meri joku akedumode jamedu. Ari joku akedumode. Kuieje doge ewudumode baru piji jamedu. Baru magadugodumode rugadu24.29 Awu bataru padure Isaías 13.10, 34.4 keje.. ³⁰Dukeje čare boe erdumode Imedu Onaregeduji baru tada. Boe tuginaiwuge eiamedu boe ekiarigodumode rugadu boe jamedu boe parugajeje. Erdumode Imedu Onaregeduji kodure boetugu aoji. Erdumode Imedu Onaregedu ro rakareuji. Erdumode Imedu Onaregedu o jorugu kurireuji. Jorugure moto jamedu boe parugajeje. ³¹Nono umode tudugare baru tadawu udo tapira ukiga akodo tuwo tudugarege baru tadawuge etudo Pao Kurireu ure tugeragu jiwuge ewagai moto jamedu boe parugajeje. Emode edo tudo pui. ³²Figo i ure tarduwado tu tu je. Figo i okurogu boture dukeje tarduware bubutumode kuri je rugadu. Tagaiwore figo iji tarduwawo bubutumode kejewu meriji. Ainore tarore tu tu je. ³³Ča ire tawie nuba boemode meri jokuji nuba boemode ari jokuji. Iwo tawie. Tagaiwodo awu ire tawie jiboe jamedu boeji emode tarduwado dubagai. Tardumode ire tawie jiwu iwadaru jetumode pudui duji dukeje tarduwamode boe puredugodure itaregoduwo iwo boe jamedu boe akedudo. Mare bubutu ji karega inagoino. Nou itaregodumode jiwu meri jire inagoino. ³⁴Iwo tawie boe remawuji. Toro ia meri keje ia tawobe erdumode awu imagore jiboe jeture pudui duji rugadu. Jetumode pudui rugadu tuwimodedu otodai. ³⁵Baru akedumode. Moto akedumode jamedu. Mare iwadaru akedumodukare jii toro rugadu. Jetumode pudui rugadu.

Boe Erduwakare Jesus Aregodumode Kejewu Meriji

³⁶Nono Jesus mako kimore. Akore: – Boe erduwakare nou meriji rugadu. Boe erduwakare nuba meri mode awu iwadaru jetuwo pudui. Pao Kurireu utugarege baru tadawuge erduwakare. Pao Kurireu Onaregedu jorduwakare. Tu Pao Kurireu jorduware tu rugadu. ³⁷Imedu Onaregedu aregodumode pugeje dukeje boe emeardaemode nono rakojere boe etumana Noé apowuge emeardae pegareu mogadure. ^38-39Mariguduboe etumana Noé rakoje kimore dukeje boe ewiapagakare pobo aregodumode duji. Ewiapagare tu tugeji tugudure če boeji. Ime ewiapagare tu tuwirewo. Areme ewiapagare tu tugogewo jamedu. Erore aino jii toro Noé ure turemo ikarereu to du ka. Noé ure turemo ikarereuto tu tuwobebo rugadu. Mare iage ewiapagakare Noéji dukodire erduwa bokware pobo umode moto kejewuge eiamedu boe etagedudo duji. Dukodire nou pobo aregodure, ure eiamedu boe etagedudo rugadu.24.38-39 Awu Jesus readodae padure Gênesis capítulo 6-7 keje. Ainore boe emeardaemode pugeje. Imedu Onaregedu aregodumode pugeje mare boe ewiapagamodukare bagai rugadu. ⁴⁰Ime emode pobe tumaragodae keje ipoguru keje. Imode ikeragu iaji mare metia utumodukare. ⁴¹Areme emode pobe tumaragodae keje tuwo trigo kududo. Imode ikeragu iarodoji mare metago utumodukare. ⁴²Dukodire inagoino tai taeku jaewo. Tarduwakare kaba meri kejeba Tagimijera Kurireu aregodumode pugeje. ⁴³Mare tawiagodukaba. Uwaire bai čewu jorduwamode kaba meri kejeba iwogureu aregodumode dukeje umode tudo turugadu taiwo tabo nou iwogureu bagai nou iwogureu ukawo turemo nou baito nou boečoji. ⁴⁴Tado tarugadu tagaiwo tabo jamedu. Mare iwogureu bagai karega. Tado tarugadu Imedu Onaregedu aregodumode dubagai. Tarduwakare kaba meri kejeba aregodumode dukodire inagoino tawo tado tarugadu jii toro rugadu.

Boe Utugare Pemegareu Reo

⁴⁵Jesus mako kimore. Akore: – Nuba boemode boe utugare pemegareu jorduwareuji? Ukimijera aidumode tuduwo toro ia moto ka dukeje umode nou tudugare pemegareu mugudo tumugato tudugarege eimijerawo ema uwo iage eke maku etai nou tudure jiwu meri keje. ⁴⁶Nou utugare ro pemegamode meartorumode tugimijeraji jii toro tugimijera aregodumode kejewu meri ka dukeje jakaremode pudui rugadu. ⁴⁷Dukejere čare nou boe eimijera umode nou tudugare jetudo toe jamedu boeji jetu pemegawo ji. Boe jokodu jire inagoino rugadu. ⁴⁸Mare ia boe utugare meardae pegamode. Nou ukimijera utu jaemode jamedu dukeje aregodumodukare tuibagi kuri je. Nono nou utugare pegareu meardaemode tugimijera aregodumodukaie pugeje duji. ⁴⁹Nono umode boeto nouia tudugarege imei, aremei jamedu. Nono maragodumodukare pugeje mare okwagemode, kudumode jamedu. Nono uke kurumode ji jamedu. ⁵⁰Čare ia meri keje nou ukimijera aregodumode tuibagi pugeje. Mare nou utugare upagakare bagai. Jorduwakare aregodumode kejewu meriji. ⁵¹Nono nou boe eimijera jordumode nou tudugare ro pegare duji. Dukodire nou ukimijera umode nou tudugare bito. Umode bowuje rugadu. Nono umode nou tudugare barigu toro boe pegareuto ime pegareugebo nou meartorukare tuwadaru jiwugebo. Torore boe etragudu rakamode. Torore boe emode to reko pui tuwiri boe kori koia.

Nogware Enodo Padure Dez

¹Jesus mako kimore. Akore: – Imode tawie nuba ure tugimijerado Pao Kurireu čewuge emode toro nou inagoino jiwu meri keje. Ireadodumode bakaruji iwo tawie. Ča nogware enodo padu kejeboere dez. Ere tudawuje tuwai piji joru kuru meture tadawu to jorugu tabo tuduwo uwiremodewu iparedu togi. ²Jorduwareuge nogwarere ikera aboudure. Jorduwa bokwareuge nogwarere ikera aboudure jamedu. ³Nou jorduwa bokwareuge nogware eture to jorugu tabo mare etukare ia joru kuru kobo tabo. Eture tabowu joru kuru meture to jorugu tada tu rugadu. ⁴Mare nou jorduwareu nogware eture to jorugu tabo, nou meture to jorugu tadawu joru kuru tabo, ia joru kuru kobo tabo jamedu, joru kuru akedukawo. ⁵Ča nou uwiremodewu iparedu akekare ji dukodire aregodukare jii boečoji. Dukodire nou nogware eiamedu boe enudure. Norire ekuji dukodire enudure. ⁶Ča ari aregodure baru oia ka dukeje boe ekudure boe etae. Egore: “Uwiremodewu iparedu aregodu! Mato! Mato togi!” ⁷Dukodire nou nogware edadure. Ere nou to jorugu uradu rogu kado urugu pemegawo. ⁸Mare nou jorduwa bokwareuge nogware emagore nou jorduwareugei. Egore: “Ia joru kuru maku čenai. Čeno joru kuru akedugodu.” ⁹Mare nou jorduwareuge nogware egore: “Boro. Čeno joru kuru kurikare. Umode turugadu tu čei tu rugadu. Umodukare turugadu tai. Tadudo toro boe jetureu ka tawo tageragu ia joru kuruji pugeje tagoče.” ¹⁰Dukodire nou jorduwa bokwareuge nogware eture rugadu tuwo akirodo joru kuruji. Mare ekare tugirimi dukeje nou uwiremodewu iparedu aregodure. Nou jorduwareuge nogware ere tudo turugadu marigudu dukodire ere turemo nou uwiremodewu uwaito nou boe ewadae ka rugadu. Nono nou bai poro midure tuku rugadu. ¹¹Jii je dukeje nou jorduwa bokwareuge nogware etaregodure boe jetureu piji. Nono egore: “Čegimijera. Bai poro jado čenai.” ¹²Mare nou uwiremodewu iparedu uwai tadawu boe eimijera akore: “Iorduwakare tai. Imodukare jado.”

¹³Jesus mako kimore. Akore: – Ainore nou boe egore. Mare Pao Kurireu meardae jire ireadodure aino tawiagai. Tarduwakare kaba meri kejeba Pao Kurireu aregodumode pugeje dukodire tado tarugadu marigudu.

Boe Etugarege Ere Pobe Metia Bokware

¹⁴Jesus mako kimore. Akore: – Ča ia bakaru reo pugeje iwo tawie nuba ure tugimijerado Pao Kurireu čewuge emode toro nou inagoino jiwu meri keje. Ia meri keje imedu ure tumeardae tawuje tudu jaewo toro ia moto ka. Dukodire makore tudugarege ewagai. Ure etudo toe jamedu boeji. ¹⁵Nou utugarege pemegareuge etaire ure to diero kurido etai. Dukodire ure diero tori kuieje oto padudo quinhentos makuduwo ia tudugare pemegareu ai. Ure udo quinhentos ai utugare pemegareu nure ema kodi. Ure diero tori kuieje oto padudo duzentos makuduwo ia tudugare ai. Ure diero tori kuieje oto padudo cem makuduwo ia tudugare ai pugeje. Ure udo cem ai utugare pemega jokodukare dukodi. Nono nou imedu uture. Utu jaere toro ia moto ka. ¹⁶Nou quinhentos makudure aiwu imedu ure tudawuje kuri je tumaragoduwo nou diero tabo tuwo nou diero kurido tugori pugeje. Dukodire ure nou diero kurido rugadu dukodire o diero oto padure mil. ¹⁷Nou duzentos makudure aiwu imedu rore nono nou timedia ro mogadure jamedu. Ure to diero kurido jamedu dukodire o diero oto padure quatrocentos pugeje. ¹⁸Mare nou cem makudure aiwu imedu maragodukare nou makudure pudaiwu diero tabo. Ure tudawuje nou diero tabo. Ure moto porodo nono ure nou makudure pudaiwu diero tugu nou mototo tuwo nou tugimijera o diero biado. ¹⁹Toro ia meri keje nou utu jaereu imedu aregodure tuibagi to moto ka tuwai ka. Dukeje čare makore nou tudugarege ewagai pugeje tumagowo nou eture jiwu diero bagai. ²⁰Nou quinhentos makudure aiwu utugare aregodure nou to diero rugadu boe tabo. Akore: “Ikimijera. Are quinhentos maku inai. Ča ire kurido dukodire oto padure mil aino. Ema reo.” ²¹Ukimijera akore: “Aru! Aro pemegare rugadu. Itugare pemegareu nure aki rugadu! Ameartorure i rugadu dukodire aro pemegare inoe roguji. Dukodire imode boe eimijerado aki rugadu aetu pemegawo inoe kurireuji rugadu. Mato. Aremo iwaito aegarewo ai itabo.” ²²Nono nouia utugare aregodure jamedu. Akore: “Ikimijera. Are duzentos maku inai. Akaiwodo. Ire ako diero kurido. Dukodire oto padure quatrocentos aino. Ema reo.” ²³Ukimijera akore: “Aru! Aro pemegare rugadu. Itugare pemegareu nure aki rugadu! Ameartorure i rugadu dukodire aro pemegare inoe roguji. Dukodire imode boe eimijerado aki rugadu aetu pemegawo inoe kurireuji rugadu. Mato. Aremo iwaito aegarewo ai itabo.” ²⁴Nono nou utugare pemega jokodukareu aregodure jamedu. Akore: “Ikimijera. Ipagudure ače. Are boe emaragodae rakado ei awo akoe kurido. Are boe emaragodu rakado ako boepaji. Emagere ere ako boepa pemegado mare akai rugadu. Are emaragodae rakado ei ako boepa tadaboe kadoduwo mare etai karega akai rugadu. ²⁵Dukodire itaidukare iwo ako diero barigu boeto. Dukodire imaragodukare ako diero tabo. Ire biado moto kuda akedukawo. Ča itaregodure tabo. Ema reo.” ²⁶Mare nou ukimijera jordu pegare tudugare roino duji. Akore: “Aro pega! Akera kiarire rugadu. Ameardae pega kana irore jiboeji? Ire tamaragodae maku tagai tawo ino boepa pemegado rugadu dukodire inoe kurire rugadu. ²⁷Mare kodiba akare ino diero tugu boe mode tugeragu diero pijiwu baito? Aromode aino dukeje ino diero itodumode rugadu.” ²⁸Nono nou ukimijera makore ia tudugarege ewagai. Makore ei. Akore: “Tageragu nou dieroji nou itugare pegareu piji tawo maku nou mil apowu ai. ²⁹Imode tawie. Maragodu pemegareuge etaire boe makudumode. Mare nou maragodu pegareuge etaire boe makudumodukare rugadu. Nou maragodu pegareuge enoe rogu mode mare nou enoe rogu akedumode epiji rugadu. ³⁰Ča nou itugare pegareu barigu toro boečoto. Nou rakojere torowuge etragudu rakamode rugadu. Torore nou boe emode to reko pui tuwiri boe kori koia rugadu.”

Pao Kurireu Umode Ro Pemegareuge Etawuje Ro Pegareuge Epiji

³¹Jesus mako kimore. Akore: – Toro ia meri keje Imedu Onaregedu aregodumode to jorugu kurireu tabo joruguwo moto jamedu boe parugajeje. Aregodumode turo rakareu tabo jamedu. Pao Kurireu utugarege baru tadawuge etaregodumode apo jamedu. Dukeje Imedu Onaregedu umode tumugudo boe eimijera mugure kejewu to ira motureu keje. Boe erduwamode baru tadawu nure ema duji. ³²Nono boe eiamedu boe etaregodumode bagai moto jamedu boe piji. Dukeje čare Imedu Onaregedu aiwomode boei. Umode tugeragu meartorure Pao Kurireu jiwuge remawugei tuwo etawuje meartorukare Pao Kurireu jiwuge epiji. Romode nono ia imedu jeture boe eguie jitu ro mogadure. Jeture ovelha dogeiwu umode ovelha doge etawuje cabrito doge epiji. ³³Nono umode nou ture tugeragu jiwuge ovelha doge emugudo nono tugana pemegareu jagwai. Mare umode nou cabrito doge emugudo nono tugana pegareu jagwai. ³⁴Mare boe eguie ji karega inagoino. Boe eire inagoino. Boe Eimijera Pao Kurireu makomode nou mugure tugana pemegareu jagwaiwugei. Akomode: “Mato. Taremo Pao Kurireu uwaito. Pao Kurireu aidure tai. Tare tagimijerado ema tameartoruwo tu ji dukodire umode nou tameartorure pudui du morido tagai tamuguwo boe pemegareu keje. Ure nou boe pemegareu towuje marigudu. Ukare moto to raga dukeje ure nou boe pemegareu towuje meartorure puduiwuge emuguwo keje toro ia meri keje. ³⁵Mare paga karega. Ike boeire i dukeje tare ike maku inai. Pobo boeire i dukeje tare pobo maku inai ikuduwo če. Boe tuginaiwure imi dukeje tare iremo tawaito iwo itamudo. ³⁶Ikudau areia bokware dukeje tare ia boe ekudau areia maku inai ikudauče. Ikogodure dukeje taetu pemegare i. Iragojere baičoreu tada dukeje tagaregodure itae tamagowo i tawo ikiarigodu barigu ipiji.” Ainore Pao Kurireu makomode nou mugure tugana pemegareu jagwaiwugei. ³⁷Nono nou ro pemegareuge emagomode Pao Kurireuji. Egomode: “Čegimijera. Kočare čerdukare ai ake boeire ai duji dukodire čegare boe eke maku akai. Čerdukare ai pobo boeire ai duji dukodire čegare pobo maku akai akuduwo če. ³⁸Čerdukare ai boe tuginaiwu nure aki duji dukodire čegare aremo čewaito. Čerdukare ai akudau bokware duji dukodire čegare čegudau areia maku akai. ³⁹Čerdukare ai akogodure baičoreu tada duji dukodire čedaregodukare akae čewo akiarigodu barigu apiji.” Ainore nou ro pemegareuge egomode. ⁴⁰Mare Pao Kurireu makomode ei: “Iwo tawie boe remawuji. Meartorure iwugeire tarore awu inagoino jiboeji dukodire inaire taroino. Emeartorure i dukodire iwobere emage. Rakakareuge nure emage marenarue doge nure emage mare du inodu tabo taro pemegare ei dukodire inaire taroino.” Ainore Pao Kurireu makomode nou mugure tugana pemegareu jagwaiwugei. ⁴¹Mare Pao Kurireu makomode nou mugure tugana pegareu jagwaiwugei. Akomode: “Ipiji! Boe pegamode tai rugadu! Ire joru pegareu towuje bope doge eimijera bariguduwo to, bope doge ewariguduwo to. Nou joru pegareu akedumodukare jii toro rugadu. Ča tawariguduwo to ipiji jamedu. ⁴²Mare paga karega. Tardure i ike boeire iduji mare tagare ike maku inai. Pobo boeire i mare tagare pobo maku inai. ⁴³Tardure i boe tuginaiwu nure imi duji mare tagare iremo tawaito iwo itamudo. Ikudau areia bokware mare tagare tagudau areia maku inai ikudauče. Ikogodure. Iragojere baičoreu tada. Mare tagaiwokare i taetu pemegakare i.” Ainore Pao Kurireu akomode nou mugure tugana pegareu jagwaiwugei. ⁴⁴Mare egomode: “Čegimijera. Kočare čerdukare ai ake boeire ai duji. Čerdukare ai pobo boeire ai duji. Čerdukare ai boe tuginaiwu nure aki duji. Čerdukare ai akogodure duji. Čerdukare ai baičoreu tada. Dukodire čegare čegera maku akai.” ⁴⁵Mare Pao Kurireu akomode: “Mare imode tawie boe remawuji. Tardure meartorure iwugei rugadu. Eire inagoino. Tagare tagera maku nou meartorure iwuge etai dukodire inagoino tagare tagera maku inai. Ire taroino. Eragakare marenarue doge nure emage mare du inodu tabo iwobere emage dukodire inagoino ire taroino.”

⁴⁶– Dukeje čare nou boe ewarigudumode nou bope doge eda kejewu joru pegareuto eragojewo nono jii toro rugadu. Mare nou ro pemegareuge emugumode Pao Kurireu apo rugadu jii toro rugadu.

Boe Eimijerage Ere Tumeardae Tawuje Tuwo Jesus Bito

¹Jesus ure tuwadaru akedudo nou boei. Nono čare makore ture jorduwadowugei. ²Akore: – Merimode pobe dukeje boe emode tuwadae Páscoa towuje nono paroiaji. Nono Imedu Onaregedu makudumode boe eimijerage pegareuge etai bitoduwo ipo padure pugajejewu keje.

³Toro nou ure Judeu doge enomea maku Pao Kurireu aiwuge eimijera kurireu rakojere tuwai kurireu tada nouia Judeu doge eimijeragebo. Nou ure Judeu doge enomea maku Pao Kurireu aiwuge eimijera kurireu iere Caifás. ⁴Ere bato pui nono tuwo tumeardae pegareu tawuje tuwo tugeragu Jesusji tuwo bito. Mare emagore pui tumoduie nou tumeardae biado boe epiji. ⁵Egore: – Pawadae Páscoa kejere pamodukare pageragu ji. Pamode pageragu ji pawadae keje dukeje boe ekorigodumode pai. Emode bato pui turugoduwo pai. Dukodire pamodukare pageragu ji pawadae keje rugadu.

Jesus Uture Boe Eda Betânia Ka

⁶Nono Jesus uture boe eda Betânia ka. Nonore rakojere Simão uwai tada. Nou Simão iere Biri Pegareu jamedu. ⁷Jesus mugure nono nou bai tada ira keje togwage tabo. Nono ia aredu aregodure Jesus ae poari rogu tabo. Nou boe ere nou poari towuje tori tabo. Nou tori iere alabastro. Roreboe mori kurireu meture nou poari rogu tada. Nono ča nou aredu ure nou poari jado. Ure nou roreboe redo Jesus aora joki. ⁸Jesus ure jorduwadowuge erdure nou aredu roino duji dukeje emago pegare rore jiboeji. Egore: – Kočare ure barigu. ⁹Nou roreboe mori kurire rugadu. Kočare ukare maku diero bagai tuwo diero kurido tuwo maku marenarue doge etai.

¹⁰Mare Jesus jorduware emagore pui duji. Dukodire makore ei. Akore: – Tagaba awu aredu pogurudo rore i duji. Rore i du moture Pao Kurireu jakai. ¹¹Mare paga karega. Marenarue doge edumode tagabo jii toro rugadu. Mare imire itumode tabiji rugadu. ¹²Emarodo ure iwiri udo turugadu ituguduwo mototo iwi keje.26.12 Judeu doge ere roreboe pemegareu reko bireuge ewiri joki tuwo etugu mototo. Ainore ero kigodure marigudu tuwo bireuge edo turugadu tuguduwo mototo.¹³Dukodire imode tawie boe remawuji. Awu aredu rore iboe akedumodukare boe etaora piji jii toro rugadu. Boe etumode moto jamedu boe parugajeje tuwo boe erduwado emeartoruwo i iwo ekinorudo dukeje ereadodumode awu aredu rore iduji boe eiamedu boe ewiagai. Dukodire boe ewiagodumodukare awu aredu piji rugadu jii toro rugadu.

Judas Iscariotes Akore Tumoduie Jesus Maku Boe Eimijerage Pegareuge Etai

^14-15Nono nou Jesus ure jorduwadowu Judas Iscariotes uture nou ure Judeu doge enomea maku Pao Kurireu aiwuge eimijerage etae. Makore ei: – Imode Jesus maku tagai dukeje nuba tamode dierodo inai nou iro moriče?

Etaidure Judas bataruji dukodire ere diero prata oto padudo trinta Judas Iscariotes ai uwo Jesus maku pudai. ¹⁶Du nou meri pijire nou Judas Iscariotes aiwore Jesus rore jiboeji tuiorduwo tumode maku boe eimijerage pegareuge etaiwu meri bagai.

Jesus Okwagemode Páscoa Kejewu Boe Ekeji Ture Jorduwadowugebo

¹⁷Páscoa meri boetojiwu aregodure dukeje Judeu doge ere tuge amireu pemegado nono turo mogadure tuwaduwo Páscoaji. Nou meriji nou Jesus ure jorduwadowuge enarare Jesusji. Egore: – Kaiba čemode page pemegado pawo ko, pawaduwo Páscoaji?

¹⁸Jesus akore: – Tadudo toro nou ba kurireu ka. Torore tardumode imeduji. Tamagodo ji tagimijera akoie uwai tadare uie turugadu tuwo tuge ko tuwaduwo Pascoaji ture jorduwadowugebo.

¹⁹Jesus akoino ei dukodire nou ure jorduwadowuge erore nono Jesus mako mogadure. Nono ere tuge pemegado tuwaduwo Pascoaji. ²⁰Nou boečoji Jesus mugure nono ira keje togwagewo ture jorduwadowugebo. Nou ure jorduwadowuge eiamedu boe edu nono dukodire enodo padure doze nono Jesus apo. ²¹Enogwagere dukeje Jesus makore ei. Akore: – Iwo tawie boe remawuji. Ia tagi tamode imagu boe eimijerage pegareuge etai.

²²Ekiarigodure nou Jesus makore pudui duji. Dukodire emagore tugimijeraji tu tu puregodaji. Egore: – I karega akagoino ikimijera?

²³Jesus akore: – Nou ure tuge amireu pegodo nou carneiro kuru towu nono itabowu emare umode imagu boe ekimijerage pegareuge etai. ²⁴Marigudu Pao Kurireu ure boe ewie iwimoduie duji. Nou Pao Kurireu bataru padure bapera keje. Aino čare iwimode nou Pao Kurireu meardae koia. Mare boe pegamode rugadu nou ure imagu boe eimijerage pegareuge etaiwuji. Botumodukare dukeje boe pegamodukaie ji. Mare aino čare umode imagu boe ekimijerage pegareuge etai dukodire boe pegamode ji rugadu.

²⁵Judas umode Jesus maku rugadu boe eimijerage pegareuge etai rugadu. Nono emare makore Jesusji. Akore: – I karega akagoino ikimijera?

Jesus akore: – Uu. Aki rugadu.

²⁶Čare enogwage kimore. Jesus ure tugeragu amireuji. Imadure Pao Kurireu bagai nou amireu paru tabo. Nono ure nou amireu kado dukeje ure pedo nou ture jorduwadowugei. Akore: – Tagwagedo awuji. Ikodu reo tawiabutuwo iwugeje, irore jiboe keje.

²⁷Nono ure tugeragu vinho kuruji jamedu. Imadure Pao Kurireu bagai nou uva kuru paru tabo dukeje ure pedo ei jamedu. Akore: – Tagududo če taiamedu boe. ²⁸Ikure nou uva kuru rema. Iku redodumode boe eiamedu boe ero pegareu moriče. Pao Kurireu ure boe ewie marigudu tumoduie turo maiwu26.28 Marigudu Pao Kurireu ure tumeardae boetojiwu maku Moisés ai Sinai Ri ao keje Israel doge eno bakaruče. Toro ia meri keje ure ewie tumoduie tumeardae maiwu maku etai rugadu. Nou bataru padure Jeremias 31.31-34 keje. Dujire Jesus akoino woe tumoduie tugu redo tuwo nou Pao Kurireu meardae maiwu ro maiwu udo turugadu. maku boe etai tuwo boe ekinorudo. Aino čare iku umode nou Pao Kurireu bataru jetudo pudui rugadu. Nou iku koiare Pao Kurireu biagodumode meartorure puduiwuge ero pegare jiboe piji tuwo ekinorudo rugadu. ²⁹Mare iwo tawie. Ikudumodukare awu vinho kuruče pugeje jii toro itaregodumode mato ibagi pugeje du ka. Itaregodumode pugeje dukeje boe eiamedu boe eimijera kurireu mode imi. Nono ikudumode vinho kuru maiwuče tagabo.

³⁰Jesus akoino dukeje urare Pao Kurireu bataru tabo nou ture jorduwadowugebo. Nono ere tudawuje nou ba kurireu piji tuduwo toro Oliveira Ri ao ka.

Jesus Jorduware Nuba Pedro Akomode

³¹Nono Jesus makore ture jorduwadowugei pugeje. Akore: – Awu boečoji ro pegareuge emode tugeragu i rugadu. Dukodire taiamedu boe tamode tagera ra ipiji. Pao Kurireu ure boe ewie marigudu. Nou bataru padure bapera keje. Akore: “Pao Kurireu umode nou jeture boeiwu bito. Nono nou boe eiamedu boe emode taodo nou tugimijera piji nono ovelha doge ero mogadure.”26.31 Awu bataru padure Zacarias 13.7 keje.³²Ainore Pao Kurireu akore marigudu. Ire akoino. Mare iewodumode pugeje dukeje itumode tagododai toro Galiléia moto ka.

³³Mare Pedro makore Jesusji. Akore: – Nou iage emode tugera ra apiji mare imire iromodukare aino. Imodukare ikera ra apiji rugadu.

³⁴Jesus akore: – Imode awie boe remawuji. Awu boečoji rugadu akagomode arduwakaie i dumode pobe metia bokware rugadu. Dukeje čare kagariga kudugodumode.

³⁵Mare Pedro aidukare Jesus akoino pudui duji. Akore: – Iwimode akabo mare imodukare iwadaru udo nono akago mogadure. Imodukare ikera ra apiji rugadu.

Ainore Pedro akore. Nono nouia Jesus ure jorduwadowuge egore nono Pedro ako mogadure jamedu.

Jesus Makore Baruto Pao Kurireu Bagai Getsêmani Moto Keje

³⁶Nono Jesus aregodure ture jorduwadowugebo ia iguru jetureu ka. Nou iguru iere Getsêmani. Nono Jesus makore nou ture jorduwadowugei. Akore: – Tamugudo woe. Itumode kuri je. Imagomode baruto Pao Kurireu bagai.

³⁷Nono Jesus ure tugeragu Pedroji, Tiagoji, Joãoji tuduwo ebo kuri nono. Dukeje kiarigodu rakare. Jorduware boe pegamode pudui duji rugadu. ³⁸Nono makore nou ture tugeragu jiwugei. Akore: – Ikiarigodu rakare rugadu. Rakare tuwo iwido rugadu. Ča tadu ruga woe tamagowo baruto Pao Kurireu bagai itabo.

³⁹Nono Jesus ure tudaru gu epiji. Nono ure tuie jodo moto ka tumagowo Pao Kurireu bagai baruto. Akore: – Iogwa Kurireu nure aki. Boe ero pegamode idu utudo ipiji. Mare ukawo nono itaidu mogadure. Mare uwo nono akaidu mogadure.

⁴⁰Čare ure tugirimi nou ture jorduwadowuge ewagai. Mare kočare enudunure. Nono makore Pedroji. Akore: – Amagodo Pao Kurireu bagai itabowu hora uwo mitotu je mare kočare anudure kuri je. ⁴¹Ameardae pemegare. Mare araga bokware. Aino čare anudukaba pugeje. Amagodo itabo Pao Kurireu bagai baruto bope ukawo tumeardae pegareu maku akai aro pegakawo.

⁴²Nono Jesus ure tudaru gu epiji pugeje. Čare makore Pao Kurireu bagai baruto pugeje. Akore: – Iogwa. Boe ero pegamode idu utumodukare ipiji dukeje uwo nono akaidu mogadure.

⁴³Nono Jesus ure tugirimi nou ture jorduwadowuge etae pugeje. Jordure ei enudu kimore duji. Norire ekuji dukodire enudure rugadu. ⁴⁴Dukodire ure tudaru gu epiji pugeje. Makore baruto Pao Kurireu bagai pugeje. Makore nono nou tuwadaru mogadure pugeje. ⁴⁵Dukeje čare ure tugirimi nou ture jorduwadowuge etae pugeje. Nono makore ei. Akore: – Tamugudo. Tanudu kimo nure rugadu kana? Aino čare imagudumode boe eimijerage pegareuge etai kuri aino rugadu. ⁴⁶Ča taragojedo. Pugeje. Paduwo. Nou ure imagu boe eimijerage pegareuge etaiwu aregodu!

Boe Eimijerage Pegareuge Ere Tugeragu Jesusji

⁴⁷Jesus mako kimore dukeje Judas Iscariotes aregodure. Jesus ure jorduwadowu nure ema rugadu. Mare aino nou Judas Iscariotes aregodure boebo. Nou ure Judeu doge enomea maku Pao Kurireu aiwuge eimijerage, nouia boe eimijerage pegareuge ere nou boe etudo toro Jesus bagai dukodire etaregodure rago tabo, tariga kurireu tabo. ⁴⁸Nou Judas Iscariotes makore ei tumoduie Jesus maku etai. Tugimadumoduie Jesus apo, tumoduie togwa to je koduto tuwo boe pegareuge erdudo etaidure tuwo tugeragu jiwu nure ema duji. ⁴⁹Dukodire Judas Iscariotes uture kuri Jesus ae rugadu. Ukimadure apo rugadu. Akore: – Jorduwareu nure aki rugadu.

Nono Judas Iscariotes ure togwa to Jesus je koduto.26.49 Ainore nou mariguduwuge erore tugimaduwo puapo.⁵⁰Jesus makore ji. Akore: – Me. Arodo akaidure jiboeji rugadu.

Nono nouia ime ere tuburedo Jesusji. Nono ere tugeragu Jesusji turaga tabo rugadu. ⁵¹Mare ia Jesus ure jorduwadowu ure tugeragu tariga kurireuji. Ure ia imedu bija kado. Nou imedu nou ure Judeu doge enomea maku Pao Kurireu aiwuge eimijera kurireu utugare nure ema. ⁵²Mare Jesus akore: – Arokaba aino. Tariga kurireu tugu tuiato pugeje. Boe emode tugeragu tariga kurireuji turugoduwo tabo dukeje ewimode tariga kurireu tabo rugadu. ⁵³Tawiapagakare iragaji rugadu. Itaidumode imagowo Iogwa Kurireu bagai dukeje umode tudugarege baru tadawuge enodo padu kejewudo doze mil etuwo mato iwagai emeartoruwo i erowo nono imeardae mogadure. ⁵⁴Mare imagomodukare ewagai. Marigudu Pao Kurireu ure boe ewie tumeardae remawuji iwimoduie. Padure bapera keje. Aino čare nou bataru jetumode pudui rugadu. Dukodire imagomodukare nou baru tadawuge Pao Kurireu utugarege ewagai rugadu.

⁵⁵Nono Jesus makore nou ro pegamoduie puduiwuge eiamedu boei. Akore: – Ire boe emeardae pegado kana emeartorukawo tugimijeragei kana? Kočare tagaregodure tariga kurireu tabo rago tabo tawo tageragu i nono taro moga ro pegareuge eidu mogadure. Iragojere tagabo meri jameduji Pao Kurireu uwai tada. Ire boe erduwado nono. Mare tagare tageragu i nono. ⁵⁶Mare aino tagaregodure iwagai woe tarowo i nono tarore ro pegareugei dumogadure. Dujire Pao Kurireu akoino marigudu. Aino ča nou Pao Kurireu makore jiboe jeture pudui. Nou makore Pao Kurireu bataru jiwuge ere nou bataru bu bapera keje marigudu.26.56 Awu bataru padure Isaías 53.12 keje.

Jesus akoino dukeje nou ure jorduwadowuge eiamedu boe eregodure piji rugadu.

Jesus Rakojere Judeu Doge Eimijerage Egorai

⁵⁷Nou boe ere Jesus reko toro Judeu doge ekimijera kurireu uwai ka. Nou imedu iere Caifás. Ure Judeu doge enomea maku Pao Kurireu aiwuge ekimijera kurireu nure ema. Nouia Judeu doge eimijerage edu nono jamedu. Jorduware Judeu doge eno bakaru jiwuge edu nono jamedu. Boe eimijerage paru towuge edu nono jamedu. ⁵⁸Pedro kodu jaere boei tudu tabo Jesus rekodaji boe erdukawo pudui. Nono aregodure nou Judeu doge ekimijera kurireu uwai ka. Nou uwai kejere ure tumugudo nono tugobaigaregebo tuiorduwawo nuba boemode Jesusji. ⁵⁹Nou bai ja tadare nou ure Judeu doge enomea maku Pao Kurireu aiwuge eimijerage edure. Nou Jerusalém kejewu Judeu doge eimijerage eiamedu boe edure nono jamedu. Eiamedu boe etaiwore ia Jesus ro pegareu bagai. Ewiapagare batrarodureuge ewadaruji taiwo tabo nou Jesus ro pegareu bagai. Etaidure tuwo Jesus bito. ⁶⁰Mare erdukare ia Jesus ro pegareuji. Nou boe egore Jesus ro pegaie. Mare ewadaru kodukare puregodaji. Nono čare imere pobe ere turagojedo tumagowo. ⁶¹Egore: – Awu imedu akore tumoduie awu Pao Kurireu uwai kurireu butudo dukeje merimoduie pobe metia bokware tuwo nou bai rakojedo pugeje.

⁶²Nono nou ure Judeu doge enomea maku Pao Kurireu aiwuge eimijera kurireu ure turagojedo jamedu. Makore Jesusji. Akore: – Amagomodukare nou ewadaru jipagi kana? Boe rugadu ji kana egoino ai rugadu?

⁶³Mare Jesus makokare boeji rugadu. Nono nou ure Judeu doge enomea maku Pao Kurireu aiwuge eimijera kurireu unarare ji pugeje. Akore: – Pao Kurireu aiwore pai. Dukodire amagodo boe remawuji čei rugadu. Umode boe ekinorudowu nure aki kana? Pao Kurireu onaregedu nure aki rugadu kana?

⁶⁴Jesus akore: – Uu. Boe jokodu jire akagoino. Mare iwo tawie Imedu Onaregedu romode jiboeji. Awu inodu otobiji tardumode i imugure Pao Kurireu ukana pemegareu jagwai duji. Tardumode i ire irawuje baru piji boetugu tabo duji.

⁶⁵Čare nou ure Judeu doge enomea maku Pao Kurireu aiwuge eimijera kurireu ure tugudau areia mega bowuje tugorigodure dukodi. Dukodire makore tumedage boe eimijeragei. Akore: – Unure tudo nono Pao Kurireure. Pagare akoino. Mako peganure Pao Kurireuji rugadu. Pawiapagamodukare ia boe emagore jiboeji pugeje. Tameardure ji mako pegare Pao Kurireu jituji rugadu. ⁶⁶Dukodi čare nuba tameardaere? Nuba paromode?

Nou boe eimijerage egore: – Mako pegare Pao Kurireuji rugadu. Dukodire čare bitoduwo rugadu.

⁶⁷Nono ere todoguru barigu Jesus je joki. Ere boeto ji jamedu. ⁶⁸Egokodure ji. Egore: – Umode boe ekinorudowu nure aki rugadu kana? Ioguduba ure boeto ai? Amagodo!

Pedro Makore Tuiorduwakaie Jesusji

⁶⁹Pedro mugu kimore nono bawadu keje. Nono ia aredu maragodure nou bai tadawu ure tuburedo Pedro ae. Akore: – Aragojere nou Galiléia kejewu Jesus apo jamedu.

⁷⁰Mare Pedro akore turagojekaie apo rugadu nou boe eiamedu boe ewiagai. Akore: – Iorduwakare kaba jiba akagoino.

⁷¹Dukejere Pedro uture nou bai poro bawadu kejewu ka mare ukare tudawuje. Nonore rakojere rugadu. Dukejere čare ia aredu jordure ji. Makore boei nono. Akore: – Awu imedu rakojere nou Nazaré kejewu imedu Jesus apo rugadu.

⁷²Mare Pedro akore: – Boe rugadu jire inagoino. Iorduwakare ji rugadu.

⁷³Mare Pedro utukare. Rakojere ji je nono rugadu. Dukejere čare iage ere tuburedo Pedroji pugeje. Egore: – Awadarure nono nou rakojere Jesus apowuge ewadaru mogadure. Dukodire čare boe erduware aragojere Jesus apo duji rugadu.

⁷⁴Mare Pedro mako pegare ei tumagomodukaie boe remawuji dukeje Pao Kurireu uiago boe pegado pudui. Akore: – Iorduwakare nou tagagoino jiwu imeduji rugadu.

Čare rore puku kagariga kudugodure rugadu duji. ⁷⁵Kodire Pedro biabuture Jesus makore puduiwu tuwadaru keje. Jesus makore Pedroji makomoduie tuiorduwakaie pudui dukeje nou kagariga kudugodumoduie rugadu. Pedro makomoduie tuiorduwakaie Jesusji dumoduie pobe metia bokware rugadu. Aino ča Pedro biabuture nou Jesus bataru keje rugadu jeture pudui duji rugadu. Dukodire uture nou boe epiji rugadu. Ragudure rugadu turore aino duji.

Boe Ere Jesus Reko Boe Eimijera Pilatos Uwai Ka

¹Nou barogwato, barogwakododutabo nou Judeu doge enomea makudure aiwuge eimijerage, nou Judeu doge eimijerage eiamedu boe emagore pui tuwo tumeardae tawuje tuwo Jesus bito rugadu. ²Nono ere Jesus kogudo. Dukejere ere reko nou boe eimijera governador Pilatos27.2 Roma kejewu boe eimijera kurireu ure tugeragu nou Pilatoji muguwo Judeu doge eno moto keje boe eimijera governador uwo ema. Mare Judeu karegure ema. Roma pijiwu nure ema. Ča nou Roma kejewu boe eimijera kurireu makore nouia Judeu doge eimijeragei emodukaie ro pegareu bito ia turo moriče. Tu nou Roma pijiwu boe eimijera governador umoduie ro pegareu bito ia turo moriče. Dukodire nou Judeu doge eimijerage etaregodure Jesus apo nou boe eimijera governador Pilatos ae. Etaidure Jesus bitoduwo rugadu. bagai rugadu.

Judas Iscariotes Ure Tuwido

³Nou ure Jesus maku boe eimijera pegareuge etaiwu Judas Iscariotes jorduware Jesus bitodumoduie dukeje kiarigodure rugadu. Dukeje čare uture nou Judeu doge eimijerage ewagai pugeje, nou ure Judeu doge enomea maku Pao Kurireu aiwuge eimijerage ewagai pugeje tuwo nou diero tori maku tuibagi etai. Ere nou diero tori prata oto padudo trinta Judas Iscariotes ai uwo Jesus maku pudai. ⁴Judas Iscariotes akore: – Iro pegare. Ire maku tagaiwu imedu ro pegareu bokware.

Mare nou boe eimijerage egore: – Aki rugadu aroino. Čegi karega.

⁵Ča Judas Iscariotes ure nou diero tori rugadu boe barigu nou Pao Kurireu uwai kurireuto. Dukeje čare uture pugeje toro nou ba kurireu piji. Dukeje čare ure tuwido ture bukigu kogudo tugidoru kajeje dutabo.

⁶Nou Pao Kurireu uwai kurireu tadare nou ure Judeu doge enomea maku Pao Kurireu aiwuge eimijerage ere tugeragu nou diero tori kugurei. Egore pui: – Awu diero makudure imedu bitoduwo. Parore jiboe koiare pamodukare awu diero maku Pao Kurireu uwai tadaboe bagai. Pago bakaru jire paromodukare aino.

⁷Dukodire nou boe eimijerage ere tumeardae tawuje puapo tuwo tugeragu ia moto roguji nou diero tabo. Nonore boe tuginaiwuge etugudumode mototo aroe eda keje. ⁸Nou diero makudure Jesus bitoduwo dukodire nou boe ere nou moto iedo. Egore Boe Eku Jeture Kejewu Moto Reo aino ji. Ainore iere jii aino. ⁹Mare paga karega. Marigudu Pao Kurireu ure boe ewie boe eromoduie aino duji. Makore Pao Kurireu bataru jiwu imedu Jeremias ure nou bataru bu bapera keje. Akore: – Israel kejewuge ere tumeardae tawuje puapo tuwo diero prata tori oto padudo trinta nou imedu moriče. ¹⁰Nono boe ere tugeragu nou dieroji. Ere nou diero maku ia maragodure rotu jiwu imedu ai tuwo tugeragu ia moto roguji. Mare paga karega emeartoruwo Pao Kurireu makore jiboeji27.10 Awu bataru padure Zacarias 11.12-13 keje..

Ainore nou padure bapera kejewu Pao Kurireu bataru akore rugadu. Jeture pudui rugadu.

Jesus Rakojere Boe Eimijera Pilatos Jokorai

¹¹Toro nou boe eimijera governador uwai kejere Jesus rakojere nou boe eimijera kurireu Pilatos jokorai. Unarare Jesusji. Akore: – Boe rugadu kana? Judeu doge eimijera kurireu nure aki rugadu?

Jesus akore: – Uu. Boe jokodu jire akagoino.

¹²Mare nouia boe eimijerage, nou ure Judeu doge enomea maku Pao Kurireu aiwuge eimijerage emago pegare Jesus rore jiboeji makore jiboeji nou Pilatos biagai. Mare Jesus makokare boeji tubaru tabo ewadaru jipagi. ¹³Dukodire čare Pilatos unarare Jesusji pugeje. Akore: – Ameardu kana nou boe emago pegare ai duji rugadu?

¹⁴Mare Jesus makokare boeji pugeje. Dukodire nou Pilatos joku kidure Jesusji rugadu.

Egore Jesus Bitoduiago Rugadu

¹⁵Judeu doge ewadae Páscoa kejere Pilatos ure ia ro pegareu tawuje baičoreu piji Judeu doge eroiaji. Judeu doge emagomode ia ro pegareu ieji dukeje Pilatos umode nou ro pegareu tawuje baičoreu piji utuwo pugeje joru jameduji. ¹⁶Ča awu joruji ia boe erduware jiwu ro pegareu imedu rakojere baičoreu tada. Iere Barrabás. Boe eiamedu boe erduware ji rugadu. Ro pegareu remawu nure ema rugadu. ¹⁷Nono nou boe emagare ture bato pui dutabo Pilatos ae. Dukejere Pilatos unarare ei. Akore: – Ioguduba jiba tagaidure iwo tawuje baičoreu piji awu joruji utuwo pugeje? Tagaidu kana Barrabaji utuwo pugeje kana? Tagaidu kana awu boe egoino umode boe ekinorudowu Jesusji kana utuwo pugeje?

¹⁸Pilatos akoino tuwo Jesus utudo pugeje rugadu. Jorduware nou Judeu doge eimijerage emeardae pegare Jesus jituji. Etaidure boe emeartoruwo tu pudui rugadu. Dukodire etaregodure Jesus apo Pilatos ae boe emeartorukawo Jesusji pugeje. ¹⁹Ča Pilatos mugure nou taiwore boe ero pegareu bagaiwu ira keje. Dukeje čare oreduje bataru makudure ai nono. Akore: – Akera ra nou imedu piji. Ro pegareu bokware rugadu. Iniau pegare ji awu boečoji dukodire ipagudure če.

Ainore nou Pilatos oreduje makore nou toredu bagai.

²⁰Mare nou Judeu doge eimijerage, nou ure Judeu doge enomea maku Pao Kurireu aiwuge eimijerage ere boe ero jodo nono Pilatos jokorai. Dukodire nou boe emagore Pilatoji uwo ro pegareu imedu Barrabás tawuje baičoreu piji utuwo pugeje. Mare uwo Jesus bito rugadu.

²¹Pilatos unarare ei pugeje. Akore: – Ioguduba imode tawuje baičoreu piji utuwo pugeje?

Egore: – Barrabás tawujeduiago rugadu!

²²Dukeje čare Pilatos unarare pugeje. Akore: – Nuba iromode awu boe egoino umode boe ekinorudowu Jesusji?

Nou boe eiamedu boe egore: – Bito ipo padure pugajejewu keje rugadu!

²³Pilatos akore: – Kodiba tagagoino? Ro pegareu pa?

Mare ewiapagakare ji. Ere tugudu rakado. Egore: – Bito ipo padure pugajejewu keje rugadu!

²⁴Ča Pilatos jorduware nou boe ekorigodure rugadu tugaie ewudugugo kodi. Dukeje čare ure tugeragu poboji. Ure tugera kabi nou boe egai. Akore: – Ča. Imi karega imode awu imedu ku redo. Tagire taromode aino rugadu.

²⁵Nou boe eiamedu boe egore: – Uu! Čeigoia rugadu čemode ku redo rugadu dukodire čegire čemode morido, čedore emode morido jamedu.

²⁶Dukodire čare Pilatos ure Barrabás tawuje baičoreu piji utuwo pugeje. Mare ure tugobaigarege edo boeto Jesusji bukigu tabo. Nono ure maku etai ewo Jesus bito ipo padure pugajejewu keje.

Tugobaigarege Egokodure Jesusji

²⁷Tugobaigarege ere tugeragu Jesusji. Ere turemo apo nou tugimijera Pilatos uwaito. Nono emagore nouia tugobaigarege ewagai. Ere bato pui nono Jesus ae. ²⁸Čare ere Jesus ukudau areia tawuje piji. Nono ere ia boe eimijera kurireu ukudau areia motureu kujagureu tugu Jesusji. ²⁹Ere ia boe eimijera kurireu atadawu towuje. Ere nou atadawudo botoguruče. Dukejere ere tugu Jesus aoto atadawuwo ema. Ere Jesus iedudo ia ipoji tugana pemegareu tabo. Dukejere čare ere tubu jodo Jesus jokorai tuwadarukeadae pegareu tabo. Egore: – Judeu doge eimijera kurireu nure aki. Boe pemegawo ai rugadu.

Mare pagare egoino. Emeartorukare Jesusji dukodi rugadu. ³⁰Dukodire ere todoguru barigu ji. Ere tugeragu nou ipoji piji dutabore ere boeto ji nou ipo tabo rugadu. Ere boeto boeto aoraji rugadu. ³¹Ere tumago pegado ji pugeje. Dukejere čare ere nou boe eimijera kurireu ukudau areia motureu tawuje Jesus piji. Ere Jesus ukudau areia tugu ji pugeje. Nono ere tugeragu Jesusji tuduwo apo Jerusalém piji tuwo bito ipo padure pugajejewu keje rugadu.

Boe Ere Jesus Bu Ipo Padure Pugajejewu Keje

³²Eture Jesus apo rugadu. Ekodure dukeje erdure ia imeduji. Iere Simão. Cirene ba kurireu pijiwu nure ema. Ča nou tugobaigarege ere tugeragu nou Simãoji oreduwo nou Jesus bitodumode kejewu ipo tabo rugadu. ³³Nono eture Jesus apo toro ia tori ri ao ka. Ewadaru tabo nou tori iere Gólgota. Nou Gólgota ewadaru tabo iere: “Boe ewireuge etaora ra jeta reo”, aino.27.33 Aroe eda ji karega egoino. Parduwakare kodiba nou boe ere nou tori iedo aino.³⁴Ere ia jorubo barigu vinho kuruto. Nou jorubo iere mirra. Nono ere nou vinho kuru maku Jesus ai kuduwo če. Mare Jesus ure togwa pagado ji dukodire aidukare tuguduwo če. ³⁵Nono tugobaigarege ere Jesus bu ipo padure pugajejewu keje. Ere Jesus ukudau areia pedo pui. Ere tuwadumode tabowu tori rogu barigu tuiorduwawo duboba umode tugeragu Jesus ukudau areiaji. ³⁶Dukejere čare ere tumugudo nono taiwo tabo Jesusji rugadu. ³⁷Ere atugoreboe bu ipo keje Jesus aora bukajeje. Egore: – Judeu doge eimijera kurireu reo. Iere Jesus.

³⁸Ere ia ro pegareuge ime pobedu doge emugudo nono Jesus apo jamedu nou meriji. Ia rakojere Jesus kana pemegareu jagwai. Metia rakojere Jesus kana pegareu jagwai jamedu. ³⁹Boe etaregodure nono dukeje ere taora paradudo. Emago pegare Jesusji. ⁴⁰Egore: – Akagore amoduie Pao Kurireu uwai butudo mare merimoduie pobe metia bokware dukeje amoduie rakojedo pugeje. Ča Pao Kurireu onaregedu mode aki dukeje amode arawuje nou ipo piji awo akinorudo.

⁴¹Nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge, nouia Judeu doge eimijerage eiamedu boe edu nono tumago pega tabo Jesusji jamedu. ⁴²Egore: – Ure boe ekinorudo mare kočare roiwakare tuwo tuginorudo rugadu! Judeu doge eimijera kurireu karegure ema kana? Umode turawuje nou ipo padure pugajejewu piji dukeje čemeartorumode ji rugadu. ⁴³Kočare awu Jesus meartoruie Pao Kurireuji. Akore Pao Kurireu onaregedu nuie pudumi. Mare pagare akoino. Aino Pao Kurireu umodukare udo činorudo rugadu.

Ainore nou boe eimijerage eiamedu boe egore tumago pega tabo ji rugadu. ⁴⁴Nou rakojere Jesus apowuge ro pegareuge pobedu doge emago pegare Jesusji jamedu.

Jesus Bire

⁴⁵Meri aregodure pagaia ka dukeje boečodure moto jamedu boe parugajeje. Boečodure rugadu. Nou boečo kodure kuri toro nou três hora ka. ⁴⁶Dukeje čare Jesus makore tugudu tabo nou boe ewadaru tabo. Akore: – Eli, Eli lemá sabactani?

Boe ewadaru tabore akore: – Pao Kurireu, Pao Kurireu! Kaba kodiba are akera ra ipiji? – Dujire akoino tuwadaru tabo27.46 Marigudu Pao Kurireu ure boe ewie akomoduie aino rugadu. Nou Pao Kurireu bataru padure Salmo 22.1 keje..

⁴⁷Ia boe emeardure nou Jesus bataruji dukeje egore: – Tawiapagado. Jesus kudugodure Elias bagai.27.47 Mariguduwu Israel moto kejewu makore Pao Kurireu bataru jiwu nure Eliače.

⁴⁸Ia imedu rekodure ia esponja tabo. Ure nou esponja pegodo vinho kuru tabo. Nono aregodure tabo Jesus ae. Ure nou esponja kogudo ipo oto tabo. Nono ure nou esponja raido nou ipo tabo toro Jesus okwa ka kuduwo če. ⁴⁹Nou iage egore: – Ča parokawo iaboeji pugeje. Pabagawo Elias bagai. Aregodumode rugadu kana? Umode Jesus rawuje nou ipo padure pugajejewu piji kana?

⁵⁰Nono Jesus kudugodu rakare dukeje bire. ⁵¹Čare rore puku je nou areia kurireu bararere Pao Kurireu uwai ja tadawu ure tuwowuje nou bai ja oto piji moto ka.27.51 Nou areia kurireu ukare boe puredudo nou Pao Kurireu uwai tadawu boeji. Nou Judeu doge enomea makudure aiwuge eimijerage ere turemo Pao Kurireu uwaito tu tu je. Mare ekare turemo nou areia kurireuto. Tu nou enomea makudure aiwuge eimijera kurireu ure turemo. Tu ema rugadu. Meri jameduji karega. Umode turemo nou areia kurireuto ia meri keje tu je rugadu. Moto magadugodure. Nou tori boe ere tuwowuje. ⁵²Bireuge eiari ere tuiado jamedu. Nono meartorure Pao Kurireu jiwuge bireuge eewodure pugeje. Emagare rugadu. ⁵³Ere tudawuje nou etugudure towu tori poro boe piji. Jesus jewodumode pugeje dukeje nou jewodureuge etumode nou Jerusalém ba kurireuto. Israel doge emuga kurireu reo. Nonore boe erdure nou jewodureugei rugadu. Jordure eiwuge emagare nou ba kurireu keje. ⁵⁴Mare aino nou Romano doge tugobaigarege eimijera jordure moto magadugodure duji. Nou tugobaigarege erdure jamedu. Eiamedu boe erdure nou inodu boeji. Dukodire epagudugodure rugadu. Egore: – Boe rugadu! Awu imedu nure Pao Kurireu onaregeduče rugadu.

^55-56Areme eragojere nono jamedu. Emagare. Iarodo iere Maria Madalena. Ia etumedago iere Maria jamedu. Nou Maria ore ime ere pobe. Ia iere Tiago. Umana iere José. Zebedeu ore etuje rakojere nono jamedu. Jesus rakoje kimore Galiléia moto keje dutabo nou areme emeartorure ji. Ekodure Jesus apo tu tu je tietu pemegawo Jesusji rugadu.

Boe Ere Jesus Tugu Tori Poroto

^57-58Merirekodugodutabo José aregodure. Arimatéia ba kurireu pijiwu nure ema. Oe kurireu nure ema. Meartorure Jesusji jamedu. Nou José uture boe eimijera Pilatos bagai tumagowo ji bireu Jesus bagai tuwo Jesus tugu mototo. Nono Pilatos makore tugobaigaregei ewo Jesus bireu maku nou José ai rugadu. ⁵⁹Dukodire čare José ure tugeragu bireu Jesusji. Ure upodo areia pemegareu tabo. ⁶⁰Nono ure Jesus tugu to tori poro maiwuto.27.60 Nou moto kejewuge ere bireuge etugu tori poroto. Ainore erore rugadu. Nou José utugarege emagere eroino bireu Jesusji tumeartoruwo José makore pudui duji. Emare ure nou tori porodo aino maigodu. Dukeje ure tuiodo nouia tori kurireu keje tuwo bu nou tori poro je keje tuwo nou tori poro midu pemegado. ⁶¹Nou Maria Madalena, nou iarodo Maria ere tudaru nou tori poro ka tumugu pureduwo nou tori poroji taiwo tabo nou José roino duji.

Tugobaigarege Emugure Nou Tori Poro Je Jagwai Taiwo Tabo Ji

⁶²Nou barogwato nou ure Judeu doge enomea maku Pao Kurireu aiwuge eimijerage eture Pilatos bagai ia fariseu dogebo. Sábado meri kejere eroino. ⁶³Emagore Pilatoji. Egore: – Čegimijera. Čewiabuture nou Jesus bataru keje. Akore merimoduie pobe metia bokware pudui dukeje tuiewodumoduie pugeje. Tuwo boe ekiripagado dubagaire nou Jesus akoino. ⁶⁴Dukodire čedaidure čewo čemeardae maku akai. Ukana turugadu awo ia tugobaigarege etu pemegado nou bireu meture tadawu tori poroji jii nou akoino jiwu meri akedumode du ka? Amodukare tugobaigarege etudo toro dukeje ia ure jorduwadowuge etumode toro nou tori poro ka. Emode bireu tawuje nou tori poro piji. Nono ewadrarodumode boe ewiagai jewoduie pugeje duji. Dutabore emode boe ekiripaga kurido nou Jesus makore jiboe kori.

⁶⁵Nono Pilatos akore: – Ča. Tadudo awu tugobaigaregebo taetu pemegawo nou bireu meture tadawu tori poroji nono tameardae umogadure.

⁶⁶Dukodi ča eture rugadu. Ere iaboe bu nou tori okwaji boe erduwawo tawujedukare nou tori poro piji rugadu. Nono ere nou tugobaigarege emugudo nono etaiwo pemegawo nou tori poroji rugadu boe ekawo tugeragu nou bireuji nou tori poro piji.

Jesus Jewodure Pugeje

¹Nou Sábado meri akedure dukeje nou barogwato kuri ča je Maria Madalena uture nou Maria apo toro nou Jesus meture tadawu tori poro ka taiwowo ji. ²Ča moto magadugodu rakare rugadu. Mare ia Pao Kurireu utugare baru tadawu ure turawuje baru piji. Aregodure nou tori poro ka rugadu. Dukeje ča ure tuiodo nou padure nou tori poro je kejewu tori kurireu keje tuwo nou tori poro jado. Dukeje ča ure tumugudo nou tori keje. ³Ukudau areia kigadure rugadu. Ure nono boeiaragudu mogadure boe etaiwo tabo ji. ⁴Dukodire čare nou tugobaigarege epagudugodure če rugadu. Dukodire epogora kugudugodure rugadu. Ere nono bireuge emogadure. Mare ewi ji karega inagoino. Erokare iaboeji iaboeji. Dujire inagoino. ⁵Ča nono nou baru pijiwu Pao Kurireu utugare makore nou aremei. Akore: – Tabagudukaba. Iorduware tagaiwore bagaiwu boeji. Tagaiwore bitodureu Jesus bagai. ⁶Ča rakojekare woe pugeje. Jewodure pugeje. Makore jiwu bataru jeture pudui rugadu. Mato tagaiwowo padureu ka. ⁷Tadumode dukeje tadudo tamara tabo tawo ure jorduwadowuge ewie jewodure pugeje duji. Ewie utumoduie tagododai toro Galiléia moto ka. Toroie tardumoduie pudui. Ča inure tawie aino.

⁸Dukodire nou areme eture nou tori poro piji tumara tabo rugadu. Epagudure. Mare egarere pudui jamedu. Eregodu rakare toro nou Jesus ure jorduwadowuge ewagai. ⁹Mare erore puku je Jesus ure tuie bu tači etae. Akore: – Itaregodu.

Ere tuburedo ji. Nono ere tubu jodo jokorai. Ere tugeragu bureji. Emago pemegare ji. ¹⁰Nono Jesus makore ei. Akore: – Tabagudukaba. Tadudo toro ire jorduwadowuge ewagai. Aino ere nono imedage remawuge emogadure. Tamagodo ei etuwo toro Galiléia moto ka. Nonore erdumode i rugadu.

Boe Eimijerage Emagore Tugobaigaregei Ewadraroduwo

¹¹Ča nou areme eture rugadu. Mare ča nou tugobaigarege eture jamedu toro ba kurireu ka tureadoduwo nou ure Judeu doge enomea maku Pao Kurireu aiwuge eimijerage ewiagai nou boe jamedu boeji. ¹²Nono ča nou ure Judeu doge enomea maku Pao Kurireu aiwuge eimijerage ere bato pui nouia boe eimijeragebo tuwo tumeardae tawuje. Dukodire ere tumeardae maku puai tuwo diero kurireu maku nou tugobaigarege etai. ¹³Ere nou diero maku nou tugobaigarege etai tumagore ei dutabo. Egore: – Tawadrarodumode boe eiamedu boei tanuduie nou boečoji dukejeie ure jorduwadowuge etaregoduie nou tori poro ka. Emageie ere tugeragu nou bireuji nou tori poro piji. ¹⁴Nou tagimijera Pilatos meardumode nou tawadrarodaeji dukeje korigodumode tai tanudure duji. Mare tamororamagadukaba. Čegi čemode butugugo boe pegakawo tai.

¹⁵Dukodire čare nou tugobaigarege ere tugeragu nou dieroji rugadu. Dukeje ewadrarodure nono nou boe eimijerage egore pudui dumogadure. Dukodire nou ewadrarodae ure tumaedo nou Judeu doge ekao jii aino.

Jesus Ure Ture Jorduwadowuge Erdudo Pudui Rugadu

¹⁶Aino ča nou Jesus ure jorduwadowuge enodo padure onze. Nono ča eture Galiléia moto ka rugadu. Dukeje čare etaregodure nou Jesus makore jiwu tori ao ka. ¹⁷Etaregodure dukeje erdure Jesusji rugadu. Ere tubu jodo moto keje tumago pemegawo ji. Mare iage erduwa jokodukare ure ema duji. ¹⁸Dukeje čare Jesus ure tuburedo ei. Nono akore: – Pao Kurireu ure baru tadawu raka jamedu boe maku inai. Ure moto kejewu raka jamedu boe maku inai. ¹⁹Dukodire imode tawie. Tadudo boe eiamedu boe ewagai moto jamedu boe parugajeje tamago raiwo boei emeartoruwo i ewo tugimijerado imi. Emeartorumode i dukeje etao pegodo jamedu Pao Kurireu ie tabo, Onaregedu ie tabo, Uwari ie tabo jamedu. ²⁰Erduwado ire maku tagaiwu taro jamedu boeji emeartoruwo ji jamedu. Mare tawiagodukaba. Iragojemode tagabo meri jameduji rugadu jii toro moto akedumode du ka.