Lucas
Ure Awu Jesus Rore Jiboe Makore Jiboe Bu Bapera Keje
11-4Imedia Teófilo nure aki. Ire awu bapera atugodo awagai boe remawu tabo arduwawo boe remawuji rugadu. Boe ereadodure boe ewiagai tuiordure jiwu Jesus rore jiboeji tumeardure jiwu Jesus makore jiboeji. Ia boe etaidure tuwo nou boe ereadodure jiwu Jesus rore jiboe bu bapera keje, boe ereadodure jiwu Jesus makore jiboe bu bapera keje jamedu. Ere boe ereadodure jiboe bu bapera keje jamedu. Mare imire, ire iragado i iorduwawo boe remawuji rugadu. Ire iragado i iorduwawo Jesus rore jiboeji, makore jiboeji. Dukodire imagore jordure Jesus rore jiboe jiwugei, meardure Jesus bataru jiwugei. Ere iorduwado boe remawuji rugadu. Dukodire inure awu bapera atugodo awagai boe remawu tabo arduwawo boe remawuji rugadu.
Pao Kurireu Ure Boe Ewie João Batista Botumoduie
5Judéia moto keje Herodes boe eimijera unure ema. Dukejere ia imedu maragodure Pao Kurireu uwai tada. Nou imedu iere Zacarias. Maragodure Pao Kurireu uwai tada tuwo Judeu doge enomea maku Pao Kurireu ai. Abias uwobe nure nou Zacariače. Nou Zacarias oreduje iere Isabel. Nou oreduje uwobe nure Arãoče jamedu. 6Nou Zacarias toreduje apo emeartorure rugadu Pao Kurireu ure maku Judeu doge etaiwu bakaruji. Dukodire Pao Kurireu aidure ei. Makore ro pemegareuge nuie emage. 7Mare Isabel kuiarumodukare dukodire etore bokware. Aino čare epegagodure tore bokware dutabo rugadu.
8-9Nou maragodure Pao Kurireu uwai tadawuge ime emagare rugadu. Emode roreboe kowu. Nou roreboe uredudu rore Pao Kurireu uwai tada. Ere kowu kamo keje Pao Kurireu ai. Ere tori barigu tu tu je tuiorduwawo ioguduba umode roreboe kowu nou meriji. Ia meri keje nou tori buture Zacarias ie keje dukodire Zacarias ure turemo tuginaigodu Pao Kurireu mugure tadawu baito tuwo nou roreboe kowu kamo keje Pao Kurireu ai nou tori buture tugie keje kodi. 10Nono boere turugadu dukodire Zacarias ure roreboe kowu kamo keje rugadu. Toro bawadu kejere boe emagare. Emagore baruto Pao Kurireu bagai tubaga tabo Zacarias uwo tumaragodae iado. 11Mare ukare iado raga dukeje ia Pao Kurireu utugare baru tadawu aregodure Zacarias ae. Rore puku ji nou baru tadawu rakojere nono pudabo nou kamo jagwai. 12Zacarias jordure nou Pao Kurireu utugare baru tadawuji dukeje pagudugodure. 13Mare nou baru tadawu akore: – Apagudukaba. Amagore baruto Pao Kurireu bagai uwo akoredo. Pao Kurireu meardure amagore jiboeji. Akoreduje Isabel kuiarumode rugadu. Taganaregedu imedu mode. Tamode iedo João aino. 14Botumode dukeje taegaremode ji rugadu. Boe egaregodumode ji rugadu. 15Pao Kurireu aidu kurimode nou taganaregedu Joãoji. Mako pemegamode João rore jiboeji rugadu. Mare nou taganaregedu João biedu pemegado kudukawo vinho kuruče jii toro rugadu, kudukawo piga kuruče jamedu jii toro rugadu. Pao Kurireure akoino. Botumode dukeje Pao Kurireu Uwari rakojemode apo rugadu tuwo ro pemegado jii toro rugadu. 16Ričodumode dukeje nou taganaregedu João makomode Pao Kurireu bataruji Israel moto kejewu Judeu doge ewiagai. Dukodire umode Judeu doge emeartorudo Pao Kurireuji pugeje. Nou meartorure Pao Kurireu jiwuge emagamode pugeje Israel moto keje. Emode tugimijerado Pao Kurireuče pugeje. 17Nou taganaregedu João kodumode Pao Kurireu otodai. Rakamode, kurimode nono jorduware Pao Kurireu bataru jiwu Elias mogadure. Nou taganaregedu João okituwamode boei ewudugugoduwo torebo. Umode ro pegareuge edo tugera ra turo pegareu piji ro pemegareuge emeardae ka pugeje. Umode Judeu doge ewie Pagimijera Kurireu aregodumoduie kuri je ewo tudo turugadu Pagimijera Kurireu togi.
18Zacarias unarare nou Pao Kurireu utugare baru tadawuji. Akore: – Kodiba iorduwamode awadaru jetumode pudui duji? Ipegagodure. Itoreduje pegagodure jamedu.
19Nou Pao Kurireu utugare baru tadawu akore: – Ikiere Gabriel. Imire imugure Pao Kurireu apo tu tu je. Emare ure itarego mato iwo awie tumeardae pemegareuji. 20Pao Kurireu umode imagore jiboe jetudo pudui rugadu taidure jiwu meri keje. Mare ameartorukare imagore jiboeji. Dukodire amago bokwamode jii toro nou inagore jiwu akanaregedu botumode du ka. Botumode dukeje amago padumode tači akajeje pugeje.
21Toro nou Pao Kurireu uwai jokorai boe edure nono tubaga tabo nou Zacarias uwo tumaragodae iado. Mare nou Zacarias rakoje raire toro bai tada. Dukodire nou boe emororamagadure bagai. Egore: – Kočare ukare tuie bu raga.
22Dukejere Zacarias ure tuie bu rugadu. Mare mako bokware dukodire boe erduware jordure iaboeji nono duji. Zacarias roiwakare tumagowo dukodire ure boe erduwado tumeardaeji tugera tabo.
23Nou Zacarias maragodure kejewu ari akedure dukeje uture tuibagi toro tuwai ka nouia ba kurireu ka. 24Ia meri keje oreduje Isabel kuiarure. Dukodire ukare tudawuje tuwai piji jii toro. Arire ikera aboudure ji tumugu tabo tuwai keje. 25Akore: – Mare aino Ikimijera Pao Kurireu ure tugera maku inai. Marigudu ikuiarukare dukodire ipogurure. Mare aino čare ikuiarure dukodire ipogurukare imeruwo imedage aremebo pugeje.
Boe Ewiedure Jesus Botumoduie
26-27Arire seis Isabelji kuiarure dutabo. Dukejere Pao Kurireu ure nou tudugare baru tadawu Gabriel utudo ia nogwaredu bagai tuwadaru tabo Nazaré ba kurireu ka. Nazaré ba kurireu rakojere Galiléia moto keje. Nou nogwaredu iere Maria. Nogwaredu1.26-27 Brae ewadaru tabo egore virgem aino awu nogwareduji. Bowadukare ia imeduji raga. Dujire egoino. nure ema. Bowadukare ia imeduji raga. Mugumode ia Davi uwobe imedu apo. Nou imedu iere José. Erduware tumugumode puapo duji rugadu.1.26-27 Judeu doge emagomode tuwo tuwadaru maku puai tumugumoduie puapo duji. Mare eribarimoka pui jii tumugumode puapo kejewu meri ka rugadu. Ainore Pao Kurireu ure maku etai jawu bakarure marigudu. 28Nou Pao Kurireu utugare baru tadawu aregodure Maria ae dukeje makore Mariaji. Akore: – Itaregodu. Pao Kurireu rakojere akabo. Ro pemegamode ai taidu tabo rugadu.
29Maria pagudugodure če. Mare jorduwakare kaba kodiba akoino pudui.
30-33Mare nou Pao Kurireu utugare baru tadawu makore ji. Akore: – Are. Apagudukaba. Pao Kurireu ro pemegamode ai rugadu. Akuiarumode. Akanaregedu imedu mode. Iemode Jesus. Boe kurireu umode ema. Iemode Pao Kurireu Onaregedu. Pao Kurireu umode boe eimijera kurireudo ema. Nou Jacó uwobe Judeu doge eimijera kurireu mode ema rugadu. Umode nono Judeu doge eimijera kurireu Davi umogadure. Judeu doge eimijera kurireu mode ema jii toro rugadu. Du akedumodukare rugadu.
34Maria akore: – Nuba ikuiarumode? Nogwaredu kimo nure imi. Imedu jeribarikare i raga.
35-37Nou baru tadawu akore: – Pao Kurireu Uwari umode turawuje akae. Pao Kurireu umode tonaregedu maku akai. Dukodire akanaregedumode. Boe egomode Pao Kurireu onaregedu iure ema rugadu. Pao Kurireu ro rakare kodi. Atuie Isabel kuiarure. Boe egore kuiarumodukaie pugeje pegagoduie kodi. Mare aino čare kuiarure kejewu ari oto padure seis. Pao Kurireu koiare umode onaregedudo toredu apo rugadu. Pao Kurireu ro rakare dukodire rore aino Isabelji romode aino ai jamedu.
38Maria akore: – Pao Kurireu utugare nure imi. Awadaru ure turugadu inai.
Nono nou baru pijiwu Pao Kurireu utugare uture tuibagi Maria piji.
39-40Maria ure tugera pemegado pudui tuduwo Judéia moto ka tugiriaduwo tuduie Isabel bagai. Nou Isabel mugure kejewu boe eda mugure toriguru tada. Maria aregodure dukeje ure turemo Zacarias uwaito tugimaduwo Isabel apo. 41Isabel meardure Maria makoji. Dukeje Isabel onaregedu jakarere pudui kuri tada. Pao Kurireu ure Isabel korau tubemega tabo turaga tabo, Uwari rakojere Isabel apo dukodi.
42Isabel makore Mariaji. Akore: – Pao Kurireu ro pemegare ai rugadu awu areme epiji. Akanaregedu botumode dukeje Pao Kurireu ro pemegamode ji jamedu. 43Ikimijera mode ema. Boe karegure imi. Kočare ikimijera kurireu uče aregodure itae. 44Nono imeardure amago jitu keje itonaregedu jakaregodure magadure ikuri tada jorduware boe ekimijera kurireu mode akanaregeduče dukodi. 45Ameartorure Pao Kurireu makore ai duji dukodire boe pemegamode ai rugadu. Pao Kurireu akore turomoduie aino rugadu tuwiagodumodukaie tuwadaru piji. Aki ameartorure nou bataruji. Dukodire boe pemegamode ai rugadu.
Ainore Maria Akore Tura Tabo Tiagaregodure Pudui Dutabo
46-49Maria akore: – Imeardu kurire Pao Kurireuji. Iagarere i Pao Kurireu rore aino iduji. Emare umode ikinorudo. Utugare nure imi. Boe kurireu karegure imi. Mare ro pemegare i rugadu. Dukodire boe eiamedu boe ewiabutumode iwugeje. Egomode jakarere puduiwu nuie imi Pao Kurireu ro pemegare i kodi. Ro pemegareu nure ema.
50– Okudugodure meartorure puduiwugebo ji aino rugadu. Okudugodure jawu boebo. Aino maiwu boebo jamedu.
51– Očarore tuwadaru jiwuge ere tumeardae tawuje mare Pao Kurireu ure tuwu ekajeje tugana rakareu tabo ekawo nou tumeardae utudo tudobiji.
52– Ure boe eimijera kurireuge etagedudo. Ure boe eimijeragedo marenarue dogeče.
53– Ure uke boeire jiwuge ekuredudo tuge pemegareu tabo. Ure nou o diero kurireuge etudo tugera kedo tabo.
54-55– Marigudu ure tuwadaru maku mariguduwuge pawobe etai. Aino ure tumagore jiboe jetudo pudui rugadu. Dukodire aregodure tuwo tugera maku tudugarege Israel kejewu Judeu doge etai.
– Biabuture tumeardae keje rugadu togudugoduwo Abraão uwobe eiamedu boebo jii toro rugadu.
Ainore Maria akore tura tabo.
56Maria rakoje raire tuduie Isabel apo. Arire pobe metia bokware ji nono dukeje ure tugirimi tuibagi tuwai ka.
João Batista Boture
57Ari aregodure Isabel kuri butumodewu ka. Dukodire kuri buture rugadu. Imedu rogure ema. 58Nono Isabel jakarere pudui rugadu. Nou uwobe nou mugu puredure jiwuge eiamedu boe egarere pudui jamedu nou Isabel kuri butu pemegare kodi. Erduware Pao Kurireu ro pemegare jituji rugadu.
59Merire sete nou negeduroguji dukeje boe etaregodure Isabel uwai ka tuwo nou imedu rogu oe oto biri rogu kado nono turoiaji. Dukeje etaidure tuwo iedo Zacarias nono uo ie mogadure turoiaji. 60Mare uče akore: – Boro. Pamode iedo João.
61Mare nou boe egore: – Tawobe ekiemodukare João.
62Nono ere tugera onado1.62 Ere tugera makodo – Brae egore gesto aino. nou uo ae tunarawo ji nuba nou imedu rogu iemode. 63Zacarias ure tugera onado ei tunara tabo bapera bagai. Dukejere ure tuwadaru bu nou bapera keje. Akore: – Iemode João.
Ure iedo João dukodire nou boe erore toku je. 64Zacarias ure nou ie bu nou bapera keje dukeje bataru padure tači kajeje. Dukodire mako pemegare Pao Kurireuji. 65Nou boe erdure nou inoduji dukeje epagudugodure nou bataru padure tači kajeje duji. Boe ereadodure nou boeji nou Judéia moto kejewuge boe eiamedu boe ewiagai. 66Boe emeardure nou ereadodaeji dukeje ewiagorore tuiedui. Erduware Pao Kurireu raka meture nou imedu rogu apo duji. Boe enarare pui. Egore: – Nuba nou imedu rogu romode?
Zacarias Makore Pao Kurireu Bataruji
67João uo Zacarias korobadure Pao Kurireu Uwari apo. Ure Zacarias jorduwado nuba Maria onaregedu botumodewu romode. Dukodire Zacarias makore nou Pao Kurireu bataruji. Akore:
68– Pamago pemegawo Pagimijeraji. Israel moto kejewuge emeartorure jiwu Pao Kurireu nure ema. Aregodure tuwo tugera maku meartorure puduiwuge etai tuwo ekinorudo rugadu.
69– Ure nou umode boe ekinorudowu arego mato pagae. Jawu pawobe eimijera kurireu iere Davi. Meartorure Pao Kurireuji. Nou mariguduwu boe eimijera Davi uwobe nure nou umode boe ekinorudowuče jamedu.
70-71– Marigudu Pao Kurireu akore tumoduie paginorudo jordu pegare paiwuge epiji, eraga piji. Makore Pao Kurireu bataru jiwuge ere boe ewie nou Pao Kurireu bataruji.
72– Ure tumeardae pemegareu maku jawu pawobe etai eno bakaruwo ema. Makore ei tuwiagodumodukaie nou ture maku etaiwu tumeardae piji jii toro rugadu. Makore ei togudugodumoduie ebo rugadu.
73-75– Pao Kurireu makore jawu pawobe etuo Abraãoji tumoduie tumagore jiboe jetudo pudui rugadu. Makore tumoduie paginorudo jordu pegare paiwuge epiji. Makore tumoduie pabagudure jiboe okwado pabiji tudugaregewo pagi rugadu paro pemegawo, parore jiboe uwo tuginai meartorukare jiwuge ero piji nono Pao Kurireu aidu mogadure jii toro pawimodedu ka.
Ainore Zacarias akore. Maria onaregedu jire akoino. Nono Zacarias makore pugeje. Akore:
– Aino čare itonaregedu jire imagomode iwo boe erduwado nuba itonaregedumode.
76– Itonaregedu imedu rogu nure aki. Boe emago pemegamode ai. Egomode makore Pao Kurireu bataru jiwu nuie aki.
– Akaregodure Pagimijera Kurireu otodai awo boe udo turugadu Pagimijera Kurireu togi.
77– Amode boe ewie nuba boe eromode tureadoduwo turo pegareu boeji Pao Kurireu biagai Pao Kurireu uwo ekinorudo. Boe ereadodumode turo pegareu boeji Pao Kurireu biagai dukeje Pao Kurireu biagodumode ero pegareu boe piji. Dukodire umode ekinorudo etukawo bope doge eda kejewu joru pegareu ka.
78-79– Pao Kurireu okudugodure boebo. Ro pemegamode boei rugadu. Dukodire umode parduwado nou umode paginorudowu meardaere jiboeji. Nou umode paginorudowu meardae ure nono meri rutu mogadure. Mare meri rutu ji karega inagoino. Umode boe ekinorudowu umode boe erduwado Pao Kurireu bataru remawuji. Dujire inagoino. Marigudu boe eiamedu boe erduware rugadu tuwimode duji jii aino rugadu. Dukodire boe emeardae ure nono boečo mogadure. Mare boečo ji karega inagoino. Ekiarigodure, emororamagadure tuwimode duji rugadu. Dujire inagoino. Mare aino nou umode paginorudowu umode paroiwado parore jiboeji tuwo padawuje pagiarigodure dupiji pabemegawo boebo pamugu pemegawo Pao Kurireu apo.
Ainore Zacarias akore.
80Nou Zacarias onaregedu ričodure. Ure turagado pudui tumeardae jetororeu tabo. Dukodire uture tuje piji tuo piji tumuguwo ia boe maereu1.80 Boe maereu – Brae egore deserto aino. keje. Mugu raire nono. Toro ia meri keje aregodure tuibagi Israel moto kejewu Judeu doge etae tuwo ewie Pao Kurireu bataruji. Maragodumode nou inoduji rugadu.
2Jesus Boture
1-3Síria moto kejewu boe eimijera governador iere Cirênio. Dukejere Roma kejewu boe eimijera kurireu César Augusto2.1-3 Roma kejewuge erugodure nou moto kejewuge boe eimijerage eiamedu boei marigudu. Eragare eiamedu boei rugadu. Dukodire nou Roma kejewu boe eimijera kurireu ure tudugaregedo nou Judeu doge eno moto kejewuge eiamedu boeče turaga tabo tugobaigaregebo. Aino ča nou Roma kejewu boe eimijera kurireu iere César Augusto. Dujire akoino woe. ure tuwadaru utudo boe eiamedu boe etae. Akore eiago tugirimi tuwobe edure kejewu moto ka ewo tugie bu bapera keje. Aidure tuiorduwawo nou to moto kejewu boe emagamode dubagai. Dukodire boe eiamedu boe eture mariguduwuge tuwobe ewodure kejewu ba kurireu ka tuwo tugie bu bapera keje.
4-5Dukodire Maria uture toredu José apo Nazaré ba kurireu piji Belém ba kurireu ka nou mariguduwuge tuwobe ewodure kejewu moto Belém ba kurireu ka tuwo tugie bu bapera keje. Nou Belém ba kurireu padure Judéia moto keje. Mariguduwu Judeu doge eimijera kurireu Davi boture Belém ba kurireu keje. Nono José, Maria, Davi uwobe nure emage. Dukodire eture Belém ba kurireu ka.
6-7Maria kurijirigodure etaregodure Belém ba kurireu to dukeje. Mare boe emagare nono tuwo tugie bu bapera keje dutabo. Dukodire nou Belém ba kurireu korobadure nou boebo. Maria, José eda bokware. Dukodire eture tubaduwo ia boe egu tapira doge ewai tada. Nonore kuri buture. Imedu rogure ema. Onaregedu boetojiwu nure ema rugadu. Maria ure areia upodo tonaregedu apo. Nono ure tonaregedu rogu bu ia tapira doge eke ja tada. Enudure nono nou bai tada.
Pao Kurireu Ure Jeture Ovelha Doge Eiwuge Ewie Jesus Boture Duji
8Nou boečoji ia boe edu puredure tietu tabo tagu cabrito dogei, tagu carneiro dogei, ipoguru keje. 9Nono Pao Kurireu utugare baru tadawu aregodure etae. Pao Kurireu o jorugu pemegareu urugure ei. Nono epagudugodure.
10Mare nou baru tadawu akore: – Tabagudukaba. Itaregodure Pao Kurireu o bakaru pemegareu tabo uwo boe eiamedu boe egaredo pudui. 11Ainore awu bakaru ure. Awu meriji Belém ba kurireu keje umode boe ekinorudowu boture. Pao Kurireu ure maku boe etaiwu tagimijera nure ema. Boe eimijera kurireu mode ema rugadu. 12Tadudo toro tarduwo ji. Tardumode ji areia upore apo duji. Tardumode ji ia boe egu tapira doge ewai tada, ia tapira doge eke ja tada. Tardumode aino ji dukeje tarduwamode ema rugaduie duji.
13Ča ia Pao Kurireu utugarege baru tadawuge etaregodure pugeje. Emagare rugadu. Emago pemegare Pao Kurireuji. 14Egore: – Boe emago pemegawo Pao Kurireuji rugadu baru tada. Pao Kurireu uwo taidure jiwuge epemegado pui woe moto keje.
15Nono nou baru tadawuge erudure tuibagi baruto. Nou jeture tagu ie jiwuge emagore pui. Egore: – Paduwo Belém ba kurireu ka. Parduwo Pagimijera Pao Kurireu makore pai jiboeji.
16Nono eture tači je toro Belém ba kurireu ka rugadu. Nono erdure nou Joseji nou Mariaji, nou etonaregedu roguji jamedu. Nou negedurogu padure ia tapira doge eke ja tada nono nou baru tadawuge ego mogadure rugadu. 17-18Erdure ji dukeje ereadodure boe ewiagai Pao Kurireu utugarege baru tadawuge emagore jiboeji. Boe eku kidugodure nou egore tuwiagai duji. 19Mare Maria jorduware marigudu. Dukodire roiwakare tuwiagoduwo nou Pao Kurireu bataru piji. Biagorore nou bataru boeji rugadu. 20Nou jeture ovelha doge eiwuge ere tugirimi tagu ie etae. Erare tumago pemegawo Pao Kurireuji tuiordure jiboeji tumeardure jiboeji tuwo Pao Kurireu ie kurido rugadu. Nou Pao Kurireu utugare baru tadawu makore jiboe jeture pudui rugadu. Dukodire eragodure aino čimaduwo Pao Kurireu apo.
Ere Iedo Jesus
21Merire sete Joseji Mariaji. Dukejere ere tonaregedu baka oto biri kado nono nou tuwobe Judeu doge ero mogadure. Nono ere iedo Jesus nono nou Pao Kurireu utugare baru tadawu makore ei dumogadure. Makore marigudu Mariaji kuiarure du otodai uwo iedo Jesus aino.
Eture Jesus Apo Pao Kurireu Uwai Ka
22Merire 40 Joseji Mariaji etukare Pao Kurireu uwai ka dutabo. Ainore Judeu doge erore. Etonaregedu imedu boture dukeje etukare Pao Kurireu uwai ka jii je. Ainore Moisés ure maku Judeu doge etaiwu bakaru jawu akore. Merimoduie 40 ei dukejere etuwo tonaregedu apo Pao Kurireu uwai ka. Nono merire 40 ei dukeje Maria, José eture Pao Kurireu uwai ka Jerusalém ba kurireu ka tonaregedu rogu apo tuwo Pao Kurireu jordudo ji tumagowo paru tabo jamedu Pao Kurireu utugarewo ema. 23Marigudu Pao Kurireu makore Judeu dogei. Moisés ure bu bapera keje Judeu doge eno bakaruče. Pao Kurireu akore: – Nou taganaregedu imedu boetojiwu maku inai itugarewo ema.2.23 Awu bataru padure Êxodo 13.2
24Ainore erore rugadu. Merire 40 ei dukeje ere metugoe pobedu doge ekowu tuwo turemo Pao Kurireu uwaito. Marigudu Pao Kurireu makore Judeu dogei. Akore: – Taganaregedu botumode dukeje tamode metugoe pobedu doge ekowu tawo maku inai, tawo taremo iwaito. Tago diero kurikare dukeje tamode metugo gigiri dogedo pobe. Tago diero kurire dukeje tamode metugo kurireugedo pobe tawo ekowu tawo taganaregedu maku inai.2.24 Awu bataru padure Levítico 12.6-8
Ainore Pao Kurireu akore. Moisés ure nou bataru bu bapera keje marigudu Judeu doge eno bakaruče. Dukodire José roino toreduje apo metugoe pobedu dogei.
25-26Nono Jerusalém ba kurireu kejere ia imedu pemegareu rakojere. Iere Simeão. Meartorure Pao Kurireuji. Meartorure Pao Kurireu bataruji. Pao Kurireu akore tumoduie Judeu doge ekinorudo boe pegareuge epiji. Pao Kurireu Uwari rakojere nou imedu Simeão apo. Ure Simeão bie. Akore: – Ardumode umode boe ekinorudowu imeduji awimodukare du otodai.
27Pao Kurireu Uwari ure nou Simeão utudo Pao Kurireu uwai ka nou meriji. Maria, José, etaregodure Jesus apo tumagowo Pao Kurireuji aiwowo ji. 28Nou Simeão jordure ji dukeje jorduware ji rugadu, umode boe ekinorudowu mode ema rugadu. Nono Simeão ure tugeragu Jesus roguji. Nono mako pemegare Pao Kurireu bagai. 29-32Akore: – Ikimijera nure aki. Aino čare are awadaru jetudo pudui rugadu. Iordure ioku remawu tabo umode boe ekinorudowuji rugadu dukodire imode itamudo. Are akeragu awu imedu roguji boe eiamedu boe emeartoruwo ji. Umode boe tuginaiwuge erduwado ameardae pemegareuji. Umode Judeu doge epemegado, ero pemegawo boe egai.
33Nou Jesus uo uče ebogodure nou Simeão akoino nou imedu rogu jituji. 34Simeão ure tuwadaru pemegareu bu ewugeje. Akore Mariaji: – Pao Kurireu ure tugeragu akanaregeduji. Umode ia Israel moto kejewuge etagedudo. Mare umode nouia Israel doge ekinorudo jamedu. Pao Kurireu umode akanaregedu udo nono tuwadaru mariguduwu mogadure. Dukodire boe erdumode Pao Kurireu makore jiboe jetumode pudui rugadu duji. Mare boe emeartorumodukare makore jiboeji. Emago pegamode akanaregeduji. 35Boe emeardumode egoino duji dukodire erduwamode nou boe emeardae pegareu boeji. Nono akiarigodumode rugadu. Nou akiarigodae umode boe pegado ai rugadu.
36-38Nou Pao Kurireu uwai ja tadare ia makore Pao Kurireu bataru jiwudo mugure jamedu. Iere Ana. Uo iere Fanuel. Judeu doge mariguduwuge etumana Aser uwobe nure ema.2.36-38 Pagi boe pagie boe emagare pubiji. Iage ekiere bokodori čeradu ekieče jamedu. Iage ekiere tuginai pubiji jamedu. Du ure nono nou Judeu doge ekiere jamedu. Mariguduwu etuo Jacó ore enodo padure kejewuge ere doze. Dukodire nou aredu Ana uwobe ekiere nouia Jacó onaregedu Aser ieče. Dure nono Jesusče jamedu. Uče uo ekiere nouia Jacó onaregedu metia ieče jamedu. Iere Judá. Ana okoge bokware. Marigudu oredu bire. Emugure puapo dukeje jorure sete ei dukejere oredu bire piji. Nono Ana okogekare pugeje. Aino čare o jorure oitenta e quatro. Ukare tudawuje Pao Kurireu uwai piji rugadu. Meriji, boečoji rakojere nono tumago pemegawo Pao Kurireuji. Ure tugera ra togwage piji tu tu je tumagowo baruto Pao Kurireu bagai. Aino čare jordure Mariaji, Joseji. Aregodure dukeje imadure Pao Kurireu apo nou etonaregedu rogu paru tabo. Akore nou etonaregeduie umoduie boe ekinorudo rugadu. Boe epagare Pao Kurireu bagai rugadu uwo Judeu doge ekinorudo. Aino čare nou okoge bokwareudo makore nou imedu rogu umoduie boe ekinorudo rugadu.
Maria, José Ere Tugirimi Nazaré Ba Kurireu Ka
39Ere nou Pao Kurireu makore jiboe jamedu boe udo turugadu dukeje Maria, José ere tugirimi tuibagi tuwai ka Nazaré ba kurireu ka Galiléia moto ka. 40Etonaregedu ričodure rugadu. Rakagodure pudui. Jorduwagodure rugadu. Pao Kurireu ro pemegare ji rugadu.
Jesus Uče Uo Eture Pao Kurireu Uwai Ka Tonaregedu Apo
41-42Jesus o jorure doze. Dukejere José, Maria ere Jesus reko toro Jerusalém ba kurireu ka tuwadae Páscoa ka. Ainore erore joru jamedu boeji. 43-44Nou ewadae akedure dukeje Jesus uo uče ere tugirimi tuwobebo tuibagi tieda ka. Emerure jii toro meriji. Mare Jesus kodukare ebo. Mugure Jerusalém ba kurireu keje eiageje. Uče uo erdukare ji pudabo dukeje etaiwore bagai tuwobe ekao. 45Mare erdukare ji. Dukodire ere tugirimi tuibagi Jerusalém ba kurireu ka tiemaru tabo bagai. 46-47Merire pobe metia bokware dukeje erdure ji Pao Kurireu uwai tada. Mugure jorduware Pao Kurireu bataru jiwugebo tumearduwo ewadaruji, tumagowo ewadaru jipagi. Ure boe eku kidugo tagoino duji. Nou boe eiamedu boe ebogodure akoino tuwadaru jipagi duji.
48Jesus uče, uo erore ta tonaregeduji. Maria akore: – Me. Kodiba arore aino? Imi, ao čemororamagadure čemaru tabo awagai!
49Jesus akore: – Kodiba taemarure iwagai? Tarduwakare imugure iogwa uwai tada duji?
50Uče uo emeardure Jesus makore pudui duji mare erduwakare nou tonaregedu bataruto.
51-52Jesus ure tugirimi tuo apo tuje apo toro Nazaré ba kurireu ka. Nonore Jesus ričodure. Meartorure tujeji, tuoji. Ričodure tumeardae kurigodureu tabo jamedu. Pao Kurireu jordu pemegare rore jiboeji makore jiboeji. Boe eiamedu boe erdu pemegare ji. Uče biagodukare tonaregedu roredu piji akoredu piji.
3João Batista Makore Jiboe Reo
1-3Jorure quinze Tibério César boe eimijera kurireure ema nono Roma ba kurireu keje duji. Dukeje Judéia moto kejewuge eimijera governador iere Pôncio Pilatos. Galiléia moto kejewuge eimijera iere Herodes. Itureia moto kejewuge eimijera iere Filipe. Traconites moto kejewuge eimijera nure ema jamedu. Herodes umana nure ema. Abilene moto kejewuge eimijera iere Lisânias. Jerusalém ba kurireu tadare nou ure Judeu doge enomea maku Pao Kurireu aiwuge eimijera kurireuge ere pobe. Ia iere Caifás. Metia iere Anás. Emugu kimore dutabo Pao Kurireu bataru aregodure Zacarias onaregedu João Batista ae. Ema rakojere boe maereu keje. Dukejere João Batista kodure Jordão Po okwaji tumago tabo boei. Akore: – Tagera ra taro pegareu boe piji. Nono imode tagao pegodo. Nono Pao Kurireu biagodumode taro pegareu boe piji jamedu.
4-6Dujire nou makore Pao Kurireu bataru jiwu imedu Isaías makore marigudu. Akore:
– Ia boe kudugodumode boe maereu keje boe ewo awara jetorodo boe eimijera aregodu pemegawo boe etae. Kudugodumode boe ewo moto ri butudo ewo barigu koiareuto korobaduwo moto tabo. Moto ri jamedu boe butumode dukeje nou tori jamedu ao kororogodumode. Nono boe emode awara mekireu jetorodo. Boeiako mode awara keje boe emode korau boe ewo ao kororogo jamedu nou umode boe ekinorudowu imedu aregodu pemegawo boe etae. Mare tori ji karega akoino. Awara ji karega akoino. Boe ewo tumeardae jetorodo. Dujire akoino. Boe ewo turo pemegado. Dujire akoino. Boe ewo tugera bararedo pui, umode boe ekinorudowu imedu aregodumode Pao Kurireu piji dukodi. Dujire akoino. Aino boe eiamedu boe erduwamode nuba Pao Kurireu romode tuwo boe ekinorudo.3.4-6 Awu bataru padure Isaías 40.3-5 keje.
7-9Boe emagare taregodu tabo João Batista ae tuwiapagawo bataruji. Emagore João Batistaji uiago etao pegodo. Mare João Batista makore ei. Akore: – Nou iguru tudu pegare dukeje boe ere butudo tuwo jerigido ema. Tagi tagagomode tamoduie tagera ra taro pegareu piji mare taro pemegamodukare, tameardae pemegamodukare dukeje Pao Kurireu ro pegamode tai jamedu nono boe erore nou jerigi jitu mogadure. Mare jerigi ji karega inagoino. Boe pegamode tai rugadu. Dujire inagoino. Boe pegareuge nure tagi. Tagagore boe etuo Abraão ore enuie tagi dukodire Pao Kurireu uwobe enuie tagi. Ainore tagagore. Boe jokodu jire tagagoino. Abraão uwobe nure tagi rugadu. Mare dukodi karega Pao Kurireu ro pegamodukare tai taro pegareu moriče. Ro pegareuge nure tagi rugadu. Dukodire tagare nono Abraão uwobe remawuge emogadure pugeje. Pao Kurireu roiware tuwo tori udo nono Abraão uwobe maiwuge emogadure tamugato. Tamodukare tagera ra taro pegareu piji dukeje tamodukare taginorudo Pao Kurireu piji rugadu. Umode boe pegado tai rugadu tameartorukare Pao Kurireu bataruji kodi.
10Dukodire nou boe enarare João Batistaji. Egore: – Nuba akaidure čerowo?
11João Batista akore: – Nou ukudau areiare pobewu dukeje metia maku nou ukudau areia bokwareu imedu ai. Nou ukereu umode ia tuge maku uke bokwareuge etai.
12Dukeje iage enaragodure João Batistaji etaidure João Batista uwo tao pegodo kodi. Egore: – Čegire čemode čegeragu imposto moriji boe epiji makuduwo boe eimijera kurireu ai. Nuba čeromode?
13João Batista akore: – Tagiwogukaba. Tagaba boe eno imposto mori utudo tugori.
14Tugobaigarege enarare João Batistaji jamedu. Egore: – Nuba čeromode?
João Batista akore: – Tagorigodukaba boei. Taroreru kaba boei. Tagaba tageragu dieroji epiji. Tawudugugo tu je tamaragodae mori makudure tagai duji.
15Nou boe epagare rugadu umode boe ekinorudowu imedu bagai. Emeardaere nou umode boe ekinorudowu nuie nou João Batistače. Dukodire enaragodure João Batistaji. Egore: – Aki na, amode boe ekinorudo? Amode boe ekinorudo boe pegareu piji?
16-17Mare João Batista akore: – Ire boe etao pegodo pobo tabo mare ia imedu tuginaiwu aregodumode. Ro kodumode ikori. Boe pemegareu nure ema, boe kurireu mode ema rugadu. Dukodire ipogurumode ipureduwo ji, kurikareu nure imi dukodi. Emare umode Tuwari tugu boe emeardaeto boe ero pemegawo. Umode ro pegareuge ewarigu joruto jamedu. Romode nono ia imedu ro mogadure. Imedu umode trigo jukodo baku tabo nou pegareu uwo tudawuje nou trigo piji. Nou trigo remawu umode remo baito. Nou iwore umode barigu joruto. Umode boe ekinorudowu romode aino boei jamedu. Meartorure Pao Kurireu jiwuge ere nono trigo mogadure. Mare trigo ji karega inagoino. Umode boe ekinorudowu umode meartorure Pao Kurireu jiwuge etawuje ro pegareuge epiji tuwo edudo pudabo. Dujire inagoino. Umode ro pegareuge ewarigu bope doge eda kejewu joru pegareuto. Dujire inagoino. Nou joru akedumodukare rugadu.
18Ainore João Batista mako raire boei tuwo erduwado Pao Kurireu bataruji, tuwo e mekido emeardae pegareu piji tuwo edo tugera ra turo pegareu piji. 19João Batista mako pegare boe eimijera kurireu Herodes rore jiboeji. Herodes ure tugeragu tumana oredujeji tumana piji tumuguwo nou tumana oreduje apo. Nou aredu iere Herodias. Herodes ro pegare ia turo pegareuji jamedu. Ro pegare jiboe makare. Dukodire João Batista mako pegare nou Herodes rore jiboeji. 20Dukodire Herodes ure João Batista tugu baičoreuto. Kodire ro pegareu kuričigore nouia turo pegareu kori.
Jesus Aora Pegododure
21-22João Batista rakojekare raga baičoreu tada dukejere maragodaere tuwo boe etao pegodo kimo. Boe ere tugera ra turo pegareu piji dukeje João Batista ure nou boe etao pegodo pobo tabo. Čare Jesus aregodure João Batista ae jamedu uwo tao pegodo pobo tabo jamedu. João Batista ure Jesus ao pegodo pobo tabo rugadu. Nono Jesus makore baruto tuo bagai. Dukejere Pao Kurireu Uwari ure turawuje Jesus ae. Ure tudo nono metugore. Ure tumugudo Jesus keje. Nono Pao Kurireu makore Jesusji baru piji. Akore: – Imeardu kuričigore jiwu itonaregedu unure aki. Are iagare kuričigodo i ai.
Jesus Uwobe Reo
23Jesus ure tugera tugu tumaragodaeto tuwo boe ewie Pao Kurireu bataruji tuwo boe erdudo turomode jiboeji kodire o jorure trinta. Boe emeardaere José onaregedu nuie ema duji. José uo iere Eli. 24Eli uo iere Matate. Matate uo iere Levi. Levi uo iere Melqui. Melqui uo iere Janai. Janai uo iere José. 25José uo iere Matatias. Matatias uo iere Amós. Amós uo iere Naum. Naum uo iere Esli. Esli uo iere Nagai. 26Nagai uo iere Maate. Maate uo iere Matatias. Matatias uo iere Semei. Semei uo iere José. José uo iere Jodá. 27Jodá uo iere Joanã. Joanã uo iere Resa. Resa uo iere Zorobabel. Zorobabel uo iere Salatiel. Salatiel uo iere Neri. 28Neri uo iere Melqui. Melqui uo iere Adi. Adi uo iere Cosã. Cosã uo iere Elmadã. Elmadã uo iere Er. 29Er uo iere Josué. Josué uo iere Eliézer. Eliézer uo iere Jorim. Jorim uo iere Matate. Matate uo iere Levi. 30Levi uo iere Simeão. Simeão uo iere Judá. Judá uo iere José. José uo iere Jonã. Jonã uo iere Eliaquim. 31Eliaquim uo iere Meleá. Meleá uo iere Mená. Mená uo iere Matatá. Matatá uo iere Natã. Natã uo iere Davi. 32Davi uo iere Jessé. Jessé uo iere Obede. Obede uo iere Boaz. Boaz uo iere Sala. Sala uo iere Nasom. 33Nasom uo iere Aminadabe. Aminadabe uo iere Admim. Admim uo iere Arni. Arni uo iere Esrom. Esrom uo iere Peres. Peres uo iere Judá. 34Judá uo iere Jacó. Jacó uo iere Isaque. Isaque uo iere Abraão. Abraão uo iere Tera. Tera uo iere Nacor. 35Nacor uo iere Serugue. Serugue uo iere Reú. Reú uo iere Pelegue. Pelegue uo iere Éber. Éber uo iere Selá. 36Selá uo iere Cainã. Cainã uo iere Arpaxade. Arpaxade uo iere Sem. Sem uo iere Noé. Noé uo iere Lameque. 37Lameque uo iere Matusalém. Matusalém uo iere Enoque. Enoque uo iere Jarede. Jarede uo iere Maalalel. Maalalel uo iere Cainã. 38Cainã uo iere Enos. Enos uo iere Sete. Sete uo iere Adão. Imedu boetojiwu nure Adãoče. Pao Kurireu koiare ure Adão towuje.
4Bope Doge Eimijera Aidure Tuwo Jesus Meardae Pegado Tumeardae Ka
1Pao Kurireu Uwari rakojere Jesus apo. Dutabore Jesus ure tugirimi Jordão Po piji. Nou Pao Kurireu Uwari pemegareu makore Jesusji utuwo boe maereu ka. 2Torore merire 40 ji dutabore bope doge eimijera ure turokogado Jesusji tuwo Jesus meardae pegado tuiordae tumeardae ka. Nou meri jameduji Jesus okwagekare dukodire uke boeire ji.
3Nou bope doge eimijera iere Satanás. Ča nou bope doge eimijera makore Jesusji. Akore: – Pao Kurireu onaregedu remawu mode aki dukeje amagodo awu toriji uwo tudo nono amireu mogadure awo kowuje.
4Jesus akore: – Pao Kurireu o bakaru koiare iromodukare aino. Pao Kurireu meardaekare nono ameardae mogadure. Nou bakaru akore: “Boe eke mitodu tabo karega imedu jere mare Pao Kurireu o bataru jamedu boe tabore boe ewodure boe eragare.”4.4 Awu bataru padure Deuteronômio 8.3 keje.
5-7Dukejere nou bope doge eimijera uture Jesus apo toro ia tori raireu ao ka. Ure Jesus jordudo moto jamedu boeji tači je. Akore: – Awu moto jamedu boe makudure inai inoče. Awu moto kejewuge eimijera nure imi. Itaidumode dukeje imode awu boe jamedu boe maku itaidure jiwuge etai. Ča amode apu jodo iogorai amagomode akaiduie i amoduie akimijerado imi ameartorumoduie i dukeje imode awu moto jamedu boe maku akai, imode awu moto kejewuge eimijerado aki.
8Jesus akore: – Boro. Iromodukare aino. Padure bapera kejewu Pao Kurireu bataru akore: “Boe etaiduwo tu Pao Kurireuji. Boe ewo tubu jodo moto keje tu Pao Kurireu jokorai boe emago pemegawo tu Pao Kurireuji rugadu. Boe emeartoruwo tu Pao Kurireuji rugadu.”4.8 Awu bataru padure Deuteronômio 6.13 keje.
9-11Bope doge eimijera uture Jesus apo toro Jerusalém ba kurireu ka. Uture apo toro Pao Kurireu uwai ričoreu ao ka. Nono makore Jesusji pugeje. Akore: – Pao Kurireu onaregedu remawu mode aki dukeje amode akaredo awu bai ričoreu ao piji toro moto ka. Padure bapera kejewu Pao Kurireu bataru akore tumoduie tudugarege baru tadawuge ekera bararedo ai etu pemegawo ai. Awure jamedu jetumodukaie toriji.4.9-11 Awu bataru padure Salmo 91.1 keje.
12Mare Jesus akore: – Boro iromodukare aino. Nou padure bapera kejewu Pao Kurireu bataru remawu akore: “Boe ekawo turokogado Pao Kurireuji.”4.12 Awu bataru padure Deuteronômio 6.16 keje.
13Ainore Jesus akore nou bope doge eimijera bataru jipagi. Dukejere nou bope doge eimijera uture piji tubagawo toro ia meri ka pugeje.
Nazaré Ba Kurireu Kejewuge Emeartorukare Jesusji
14-15Jesus ure tugirimi tuibagi Galiléia moto ka. Pao Kurireu Uwari ure Jesus rakado turowo Pao Kurireu ro rakareuji. Nou moto kejewuge emeardure Jesus akaru pemegareuji dukodire boe erduware Jesus rore jiboeji makore jiboeji. Jesus ure boe erduwado tu tu je. Ure nou boe erduwado ere bato puiwu bai tada. Nonore ure boe ewie tu tu je Pao Kurireu bataru remawuji. Boe eiamedu boe emago pemegare Jesusji rore jiboeji makore jiboeji.
16Jesus ure tugirimi nou Nazaré ba kurireu ka nou turijodure kejewu moto ka. Sábado meriji ure turemo nou baito, Judeu doge ere bato puiwu baito turo mogadure. Nono ure turagojedo tumagowo padure bapera kejewu Pao Kurireu bataruji boe ewiagai nou bai ja tada.
17Nou boe ere Isaías ure bu bapera kejewu Pao Kurireu o bakaru maku Jesus ai aiwowo ji, makowo ji. Ure bapera jado. Aiwore taidure jiwu bataru bagai.
Nono Jesus makore ji nou boe ewiagai. Akore:
18-19– Pao Kurireu ure tugeragu jiwu akore aino: “Pao Kurireu ure tugeragu i dukodire Uwari rakojere itabo. Ure ido bakaru pemegareu arego marenarue doge ewagai. Ure itudo boe pegare jiwuge ewagai iwo ewie tuwadaru pemegareuji. Iwo ro pegareuge ewie Pao Kurireu umode turaga maku etai duji. Dukodire ro pegareuge ero pegamodukare pugeje emeartorumodukare bope doge eimijeraji pugeje. Joku bokwareuge etaiwomode pugeje. Boe pegare jiwuge etawujedumode boe pegareu piji rugadu. Pagimijera Kurireu umode meartorure puduiwuge ekinorudo rugadu. Dujire imode boe ewie rugadu.”4.18-19 Awu bataru padure Isaías 61.1-2 keje.
20Jesus mako akedure dukeje ure nou Pao Kurireu o bapera okwa bu pugeje. Ure maku nou bai tadawu imedu ai. Nono Jesus ure tumugudo. Nou meardure Jesus akoinowuge eiamedu boe etaiwore Jesusji. 21Nono Jesus akore: – Awu meriji tameardure jiwu Pao Kurireu bataru jeture pudui rugadu. Ire akoino.
22Nou boe erdu pemegaiago Jesus bataruji. Egore: – Awu imedu mako moture. Mare kočare José onaregedu nure ema. Jorduware Pao Kurireu bataru jiwu umodukare ema rugadu.
23Jesus makore nou boe ewadaru jipagi. Akore: – Iorduware nuba tagagomode i. Ia meri keje tagagomode: “Boe egore jorubo epa remawu nuie aki dukeje akiogodo ai rugadu, čerduwo aro rakaredu bagai. Cafarnaum ba kurireu kejewuge egore aro rakaie. Ča aro rakado nouia aroji woe čegai čerduwo aroinoduji.” Ainore tagagomode i.
24– Mare imire itaidure iwo tawie boe remawuji tu rugadu. Makore Pao Kurireu bataru jiwu makomode boe eiamedu boe ewiagai. Mare turijodure kejewu boe eda kejewuge etaidumodukare makore jiboeji rugadu. 25-26Marigudu Elias makore Pao Kurireu bataruji tuwobe jaoboe Judeu doge ewiagai woe Israel moto keje. Nou Elias ure bubutu akedudo rugadu. Jorure pobe metia bokware bubutu bokware duji. Dukodire boe eke bokware rugadu. Elias rore aino dukeje okoge bokwareu areme emagare Israel moto keje. Mare Pao Kurireu ukare Elias utudo nou Judeu doge ewagai emeartorukare pudui dukodi. Ure utudo toro ia moto jaereu ka ia aredu tuginaiwudo okoge bokwareudo bagai Sarepta ba kurireu ka, Sidom moto keje. Nou aredu tuginaiwudo meartorure Pao Kurireuji dukodire Pao Kurireu ure Elias utudo bagai. 27Marigudu Eliseu makore Pao Kurireu bataruji tuwobe jaoboe Judeu doge ewiagai woe Israel moto keje. Judeu doge ewiri pegareuge emagare Israel moto keje. Mare Eliseu ukare epemegago emeartorukare Pao Kurireuji kodi. Tu ia Síria moto kejewu biri pegareu meartorure. Dukodire Eliseu ure nou Síria moto kejewu boe tuginaiwu imedu biri pemegago tu je. Nou Síria moto kejewu imedu iere Naamã.
28Ainore Jesus akore tumago pegareu tabo nou rakojere nou bai tadawu Judeu doge etuwobei. Nou boe emeardure Jesus akoino duji dukejere ekorigodure.
29Dukodire ere tugeragu Jesusji. Ere tawuje nou bai piji turaga tabo nou ba kurireu piji toro tori ao ka tuwo barigu nou tori ao piji moto ka. 30Mare Jesus padure ekajeje tači je dukodire uture epiji.
Bope Uwari Pegareu Meture Imedu Tada
31Jesus uture Cafarnaum ba kurireu ka. Nou Cafarnaum ba kurireu padure Galiléia moto keje. Sábado meriji Jesus uture Judeu doge ere bato puiwu bai ka. Nonore ure boe erduwado. 32Boe eiamedu boe eku kidure nou Jesus makore jiboeji. Jesus mako pemegare mako jetorore rugadu dukodire boe erduware Pao Kurireu bataru remawu jire akoino rugadu. 33Nou meri keje bope uwari pegareu meture tadawu imedu rakojere nou bai tada. Nou bope uwari ure tumago rakado Jesusji. 34Akore: – Jesus nure aki rugadu! Arijodure Nazaré ba kurireu keje. Ča nuba aromode čei? Amode čedagedudo na? Iorduware ai rugadu. Aro pega bokware. Pao Kurireu ure akarego mato tuwadaru pemegareu tabo boe ewagai rugadu!
35Jesus mako rakare nou bope uwari bataru jipagi. Akore: – Amugu kiorodo. Amagokaba boeji pugeje. Atawuje awu imedu piji atuwo pugeje.
Ča nou bope uwari ure nou imedu butudo moto keje nou boe egorai. Dukeje ure tudawuje nou imedu piji. Mare boe pegakare nou imeduji. Ure turugadu.
36Nou boe erdure nou inoduji dukejere erore ta je. Emagore pui. Egore: – Awu Jesus makore jiboe rakare rugadu. Makore nou bope uwariji dukeje nou bope uwari meartorure makore pudui duji rugadu. Ure tudawuje nou imedu piji kodire uture piji rugadu.
Ainore nou boe egore. 37Dukejere boe ere nou moto kejewuge boe eiamedu boe ewie nou Jesus rore jiboeji, makore jiboeji.
Jesus Ure Pemegagodureuge Emagare Rugadu
38Jesus uture nou bai piji. Uture Simão Pedro uwai ka. Simão Pedro učarugo kogodure. Biri urure rugadu. Boe ere Jesus bie nou aredu kogodure duji. 39Dukodire Jesus uture nou aredu ae. Nono rakojere nono nou Pedro učarugo upa jagwai dukeje Jesus makore ji biri urukawo pugeje. Ča nou Pedro učarugo biri uru akedure tači piji. Ča nou aredu ure turagojedo. Ure tuie bu tuwo nou boe eke pemegado ewo ko.
40Nou boečoji boe eiamedu boe etaregodure tumedage kogodureugebo Jesus bagai. Jesus ure tugera bu nou kogodureuge ewugeje. Nono ure nou kogodureuge epemegago rugadu. 41Bope doge etuwari pegareu meture iage etada. Nou bope doge ere tudawuje nou boe epiji jamedu. Ere tugudu rakado ture tudawuje nou boe epiji dukeje. Nou bope doge egore: – Pao Kurireu Onaregedu nure aki rugadu!
Erduware umode boe ekinorudowu nure Jesusče rugadu mare Jesus aidukare boe erduwawo pudui. Dukodire Jesus mako rakare nou bope doge etuwairei emagokawo iaboeji pugeje. Dukodire nou bope doge emagokare iaboeji pugeje.
Jesus Uture Pao Kurireu Bataru Tabo Judeu Doge Eda Jamedu Boe Ka
42Barogwakododure dukeje Jesus uture nou boe eda piji toro ia boe maereu ka. Mare boe emarure bagai. Erdure ji dukeje emagore ji utukawo pugeje. 43Mare Jesus makore ei. Akore: – Pao Kurireu ure itudo mato iwo boe ewie tuwadaru pemegareuji, imagowo Pao Kurireu rore jiboeji boe ewiagai. Imagowo boei ewo tugimijerado Pao Kurireuče tu rugadu. Imaragodae jire iroino. Dukodire itumode ia boe eda tuginaiwu ka pugeje.
44Dukodire Jesus uture nou moto kejewu boe eda jamedu boe ka. Uture tu tu nou Judeu doge ere bato puiwu bai ka eda jamedu boe ka. Makore Pao Kurireu bataruji boe eiamedu boe ewiagai.
5Jesus Makore Ture Jorduwadowuge Ewagai
1-2Ia meri keje Jesus rakojere ia kugaru keje Galiléia pobo maereu okwai. Jesus ure boe erduwado Pao Kurireu bataruji nono pobo maereu okwai. Boe etaregodure tuwiapagawo Jesus makore jiboeji. Emagare rugadu. Nono ere tuiodo pugeje tuwo tuburedo ji. Dukodire Jesus roiwakare tumagowo ei. Aidure tuwo tudaru epiji tumagowo ei. Jordure ika kurireu pobedu dogei nono pobo okwai. Nou ore nou ika kurireu čewuge ere tuwuge kabi nono pobo okwai jamedu. 3Jesus ure taredo nou ika kurireuto. Ore nou ika čewu iere Simão Pedro. Jesus makore Pedroji. Akore: – Ako ika kogudo gu toro nowari okwa piji. Imode imugudo nou ika ja tada imagowo awu boei.
Simão Pedro meartorure Jesus bataruji. Ure to ika kurireu kogudo gu toro nowari okwa piji. Nono Jesus ure tumugudo nou ika kurireu ja tada. Dukejere makore boei tuwo boe erduwado rugadu.
4Jesus mako raire boei tuwo erduwado. Nono ure tuwadaru akedudo dukeje makore Simão Pedroji pugeje. Akore: – Awu ika reko toro awu pobo maereu po koreu ka. Aki amedagebo tawo tawuge barigu tawoguwo.
5Simão Pedro akore: – Čegimijera. Čewogure awu boečoji jii barogwakododu ka. Mare čegare boe bito rugadu. Du amagore i dukodire imode iwuge barigu pugeje. Imeartorure awadaruji dukodire imode iwuge barigu pugeje.
6Nono Simão Pedro timediapo ere to ika reko Jesus apo toro pobo maereu po koreu ka. Ere tuwuge barigu. Ča ere tugeragu karei rugadu. Nou buke korobadure karebo dukodire nou bukere tuiago tuwowuje kare emodudu koia. 7Nono makore ia tumedage etae ewo tugera maku pudai nouia ika kurireu tabo. Ere ika kurireuge ekorau karebo. Ere tuwogwaiago poboto kare emodudu koia. 8-10Dukodire Simão Pedro jorduware Jesus emare rore aino duji. Nou metage ekiere Tiago, João. Zebedeu ore nure emage. Erore ta je jamedu Jesus ure edo kare ewido aino duji. Nono Simão Pedro ure tubu jodo Jesus jokorai. Akore: – Imedu ro pegareu nure imi. Aiado i. Ukare turugadu iragojewo akabo.
Nono Jesus makore Simão Pedroji. Akore: – Apagudukaba. Atumode itabo. Awu inodu otobiji awogumodukare kare ewagai pugeje. Awogumode boe ewagai. Mare awogu ji karega inagoino. Amode boe emeartorudo Pao Kurireuji. Dujire inagoino.
11Nono eture tuibagi pobo maereu okwa ka. Nono Pedro, nou metage, eture Jesus apo rugadu toe rugadu boe piji tumaragodae piji rugadu.
Jesus Ure Imedu Pemegago
12Ia meri keje Jesus rakojere ia boe eda keje. Ia imedu mugure nou boe eda keje tugogodae tabo. Nou kogodae koiare ure nou imedu biri pegado rugadu. Boe epagudure nou kogodaeče rugadu. Nou biri pegareu imedu jordure Jesusji dukeje ure tubu jodo moto keje Jesus jokorai. Okwamagudure Jesusji. Akore: – Ikimijera. Aro rakare rugadu awo iwiri pemegago. Akaidumode dukeje amode ipemegago rugadu.
13Jesus ure tugera raido nou imedu ae. Ure tugera bu imedu keje. Akore: – Uu. Itaidure. Ča. Apemegare rugadu.
Nono nou imedu biri pemegagodure tači je. 14Mare Jesus makore ji. Akore: – Amagokaba awu irore ai duji. Atudo kuri nou Pao Kurireu uwai ka. Nonore amode nou ure Judeu doge enomea maku Pao Kurireu aiwu imedu jordudo awiriji. Jordumode awiri pemegagodure duji rugadu. Nono amode nou Moisés makore jiwu mori maku ai rugadu nono paro mogadure. Nono nou ure boe enomea maku Pao Kurireu aiwu imedu umode nou are maku pudaiwu mori maku Pao Kurireu ai rugadu. Dukodire boe eiamedu boe erduwamode awiri pemegagodure duji.
Ainore Jesus makore nou imeduji.
15Mare boe erduwagodure Jesus rore jiboeji rugadu. Emagare taregodu tabo Jesus ae tuwiapagawo Jesus bataruji, tubemegagoduwo tugogodae piji. 16Mare Jesus rakoje raikare boebo ji je. Uture boe epiji tu tu je toro boe maereu ka tumagowo baruto Tuo Kurireu bagai.
Jesus Ure Pogora Pegareu Imedu Pemegago
17Ia meri keje Jesus ure boe erduwado pugeje. Ia boe eimijerage fariseu doge edure nono nou boebo tuwiapaga tabo Jesus bataruji. Ia boe eimijerage jorduware Judeu doge eno bakaru jiwuge edure nono jamedu. Nou boe eimijerage etaregodure tumuga jamedu boe piji. Etaregodure Galiléia moto piji, Judéia moto piji, Jerusalém ba kurireu piji jamedu. Pao Kurireu raka meture Jesus apo dukodire roiware tuwo boe epemegago. 18Nono ia boe etaregodure ia imedu pogora pegareu apo. Nou imedu pogora pegareu padure tugudau kodo keje. Etaidure tuwo turemo toro nou Jesus rakojere tadawu baito tuwo Jesus jordudo nou imedu pogora pegareuji. 19Mare boe emagare tuiedui nono. Nou bai čekare nou boei. Dukodire nou boe eroiwakare tuwo turemo nou baito nou imedu apo. Dukodire erudure nou bai ao ka nou imedu pogora pegareu apo. Ere nou bai aia porodo. Nono ere nou imedu pogora pegareu rawuje bukigu tabo tuwo mugudo Jesus jokorai nou boe etoiadada. 20Jesus jordure emeartorure pudui duji kodire etaregodure aino nou imedu pogora pegareu apo pudae duji. Dukodire makore nou imedu pogora pegareuji. Akore: – Ča. Me. Ire aro pegareu jamedu boe barigu apiji Pao Kurireu biagoduwo aro pegare jiboe piji.
21Mare nou boe eimijerage fariseu doge, nou boe eimijerage jorduware Judeu doge eno bakaru jiwuge erdu pegare nou Jesus akoino duji. Egore tudada: – Awu makore jiboe ukare turugadu! Tu Pao Kurireu umode boe ero pegareu barigu boe epiji. Awu imedu ure tudo nono Pao Kurireure. Makočarore tuwadaruji rugadu. Ukare turugadu. Mako peganure tagoino dutabo Pao Kurireuji!
22Jesus jorduware emeardaere jiboeji rugadu. Dukodire makore ei. Akore: – Kočare tameardae peganure imagore jiboeji tadada na? 23Boe jokodu. Boe emodukare boe ero pegareu barigu boe epiji rugadu. Mare boe emodukare awu imedu pogora pegareu pemegago jamedu. Emodukare pemegago rugadu. Tu Pao Kurireu koiare umode nou imedu pogora pemegago. Tu Pao Kurireu koiare umode boe ero pegareu barigu boe epiji dukodire biagodumode nou boe ero pegareu piji jamedu. 24Ča imode awu imedu pogora pegareu pemegago dukeje tarduwamode Imedu Onaregedu nure imi duji. Dukodire imode tarduwado iragare iwo boe ero pegareu barigu boe epiji ewarigudukawo bope doge eda kejewu joru pegareuto rugadu.
Ainore Jesus akore nou boe eimijeragei. Nono Jesus makore nou imedu pogora pegareuji. Akore: – Me. Aragojedo. Akeragu akudau kodoji atuwo tabo aibagi awai ka.
25Ča nou imedu ure turagojedo rugadu. Ure tugeragu tugudau kodoji. Dukejere uture tabo pugeje. Meru pegakare. Uture tumago pemegareu tabo Pao Kurireuji. Nou boe eiamedu boe erdure nou rore aino duji. 26Dukejere erore ta je. Nono epagudugodure jamedu. Mare emago pemegare Pao Kurireuji. Egore: – Awu meriji čerdure Pao Kurireu ro pemegareuji rugadu.
Jesus Makore Levi Bagai
27-28Nou inodu otobiji Jesus jordure imposto diero makudumode aiwu imeduji. Nou imedu iere Levi. Nou Levi mugure nono ira keje. Nonore ure tugeragu dieroji boe epiji eno imposto moriji tuwo maku boe eimijera kurireu ai. Nono Jesus makore ji. Akore: – Ako itabo.
Levi ure turagojedo. Ure tugera ra tumaragodae piji tuduwo Jesus apo.
29Levi makore Jesusji okwagewo toro tuwai keje pudabo. Dukodire Jesus uture Levi apo toro uwai ka. Boe emagare togwage tabo ebo nono. Imposto diero makudure aiwuge ime nure emage. Boe egore ro pegareuge nuie emage. Ia boe etaidukare jiwuge eragojere nono Jesus apo jamedu. 30Nono fariseu doge etaregodure, jorduware Judeu doge eno bakaru jiwuge etaregodure jamedu. Ča emagore nou Jesus ure jorduwadowugei. Egore: – Kočare tagwagere tagudure awu ro pegareugebo? Ukare turugadu!
31Jesus akore: – Jorubokuru epa jemarumodukare kogodukareuge ewagai. Mare kogodureuge ewagaire jemarumode tuwo epemegago. 32Irore nono nou jorubo kuru epa ro mogadure. Mare jorubokuru epa ji karega inagoino. Itaregodure woe mare ro pemegareuge ewagai karega iroino. Ro pegareuge ewagaire iroino ewo tugera ra turo pegareu piji. Dujire inagoino.
Boe Enarare Jesusji Ure Jorduwadowuge Ero Bagai
33Ia meri keje boe etaregodure Jesus ae dukeje enarare ji. Egore: – Ia meri keje João Batista ure jorduwadowuge enogwagemodukare nou meri keje tumagowo baruto Pao Kurireu bagai nou meri keje. Eromode aino tu tu je. Tu turoia jire eroino. Fariseu doge ere jorduwadowuge eromode nono ero mogadure jamedu. Kodiba nou are jorduwadowuge erokare aino jamedu?
34-35Jesus akore: – Ire nono uwiremodewu imedu mogadure. Boe etuwiremode dukeje boe emode tuwadae towuje. Nou ewadae kejere boe enogwagemode rugadu. Ewadae reno. Mare ewadae akedure dukeje uwirereu imedu utumode epiji. Dukeje ia meri keje boe enogwagemodukare rugadu nou meri keje tumagowo Pao Kurireu bagai baruto. Ire nono nou uwiremodewu imedu mogadure. Mare uwiremodewu imedu ji karega inagoino. Ire irawuje baru piji mato boe ewagai. Mare ia meri keje itumode nou boe epiji. Dujire inagoino. Itumode nou boe epiji dukeje emode ia meri tawuje togwagekawo nou meri keje tumagowo Pao Kurireu bagai baruto. Dujire inagoino.
36Nono Jesus makore ia bakaruji nou boe ewiagai tuwo jebato toro nouia Pao Kurireu meardaeji. Akore: – Boe ekudau areia pegagodureu umode tuwowuje dukeje boe emodukare tugudau areia maiwu kado tuwo bu nou tugudau areia pegagodureu tuwowujewu keje tuwo miwuje tabo pegagodure dukodi. Boe eromode aino dukeje emode nou tugudau areia maiwu pegado. Nou emode kadowu areia maiwu umodukare turugadu nou tugudau areia pegagodureu okwa togi jamedu. 37Boe ere tapira biri maiwu kado tuwo udo nono poari mogadure tuge vinho kuru maiwu jače. Mare emode vinho kuru maiwu tugu tapira biri čodureuto dukeje nou tapira biri čodureu umode tuwowuje. Nono nou vinho kuru umode tuwarigu nou tapira biri čodureu piji rugadu. 38Dukodire boe ekare tuge vinho kuru maiwu tugu tapira biri čodureuto. Ere tuge vinho kuru maiwu tugu tapira biri maiwuto tu tu je. 39Nou aidure vinho kuru čodureu jiwuge etaidumodukare vinho kuru maiwuji. Egomode: “Jowu metu raire tapira biri čodureu tadawu vinho kuru pemegare čei.”
Ainore Jesus akore. Mare areia ji karega akoino. Vinho kuru ji karega akoino. Tuwadaru maiwu jire Jesus akoino.
6Boe Enarare Jesusji Nuba Turomode Sábado Meriji
1Jesus merure boepa oiagi sábado meriji. Trigore nou boepa tada. Nou ure jorduwadowuge ekodure apo jamedu. Nono nou Jesus ure jorduwadowuge ere tugeragu trigo enariji. Ere tugera reko pui nou trigo enari tabo tuwo nou trigo tawuje čiwu piji tuwo trigo ko. 2Fariseu doge erdure erore aino duji dukeje emagore Jesusji. Egore: – Akaiwodo. Judeu doge nure pagi. Sábado meriji pamaragodumodukare pugeje. Dukodire pamodukare pageragu trigoji sábado meri keje. Mare tare tageragu trigoji sábado meri keje. Ukare turugadu!
3Jesus akore: – Tarduwakare Pao Kurireu bataruji! Dukodire tarduwakare Pao Kurireu meardae remawuji. Tarduwamode Pao Kurireu meardae remawuji dukeje tamago pegamodukare čeroino duji. Mariguduwu Judeu doge eimijera kurireu Davi rore jiboe padure Pao Kurireu bataru keje. Dujire tarduwakare. Nou Davi uke boeire ji. Utugarege tugobaigarege eke boeire ei jamedu. 4Dukodire ure turemo Pao Kurireu uwaito. Okwagere boe ere maku Pao Kurireu aiwu amireuji. Pao Kurireu ure tuwadaru maku mariguduwuge pawobe Judeu doge etai. Dukodire makore ei ekawo nou amireu kowuje. Tu nou ure Judeu doge enomea maku Pao Kurireu aiwuge emode nou Pao Kurireu uwai tadawu amireu kowuje. Ainore Pao Kurireu akore. Mare Davi ure nou Pao Kurireu uwai tadawu amireu kowuje. Ure ia maku tudugarege etai ewo kowuje jamedu. Mare Pao Kurireu mako pegakare eroino duji. Dukodire imagore aino tai tamago pegakawo čere čegeragu trigo jituji. 5Ča iwo tawie. Imedu Onaregedu nure imi. Imire imode boe erduwado rugadu nuba boe eromode sábado meri keje.
Imedu Iera Pegare
6Ia Sábado meri keje Jesus ure turemo ia Judeu doge ere bato puiwu baito pugeje. Ure nou boe erduwado Pao Kurireu bataruji. Ia imedu rakojere nono. Iera pegare. Nou iera bekurure pudo. 7Ia fariseu doge, ia jorduware Judeu doge eno bakaru jiwuge edu nono jamedu. Boe eimijerage nure emage. Nou boe eimijerage erdu pegare Jesusji. Dukodire etaiwore Jesus ia ro pegamode tiagai dubagai. Judeu doge eromodukare ia turoji sábado meri keje. Dukodire etaidukare boe eiogowo boei sábado meri keje. Mare Jesus umode nou imedu iera pemegago nou meriji dukeje nou boe eimijerage erdu pegamode nou Jesus rore aino duji. 8Mare Jesus jorduware erdu pegare pudui duji. Jorduware emeardaere jiboe jamedu boeji. Nono Jesus makore nou imedu iera pegareuji. Akore: – Aragojedo. Mato itae awu boe etoiado.
Nou imedu ure turagojedo. Nono uture Jesus ae nou boe etoiado. 9Nono Jesus unarare nou boei. Akore: – Nuba pago bakaru ure parduwado paroiago sábado meriji? Paro pegamode boei kana? Paro pemegamodukana boei? Sábado meri keje pamodukana boe ekinorudo boe pegareu piji? Pamodukana boe ewarigu boe pegareuto sábado meri keje?
10Jesus aiwore ei. Mare emago bokware Jesus bataru jipagi. Nono Jesus makore nou imedu iera pegareuji. Akore: – Akera raido itae.
Nono nou imedu ure tugera raido ae. Čare iera pemegagodure tači je. 11Nou boe eimijerage erdure nou inoduji dukeje ekorigodure rugadu. Erdu pegare Jesus rore aino sábado meri keje duji. Du otobiji emagore pui tu tu je tuwo ia tumeardae tawuje turo pegawo Jesusji.
Jesus Ure Jorduwadowuge Emagare Mare Ure Tawujewuge Enodo Padure Doze Nou Ture Jorduwadowuge Epiji
12Ia meri keje Jesus ruture ia tori ao ka tumagowo baruto. Nono makore Pao Kurireuji jii je barogwakododu ka. 13Barogwakododure dukeje makore ture jorduwadowuge ewagai. Nou ture jorduwadowuge epiji ure tugeragu jiwuge enodo padure doze. Du emagere etumode Jesus bataru tabo boe eiamedu boe ewagai.
14-16Ainore nou boe ekiere.
Simão, Jesus ure iedo Pedro.
Uwie André.
Tiago,
João,
Filipe,
Bartolomeu,
Mateus,
Tomé.
Tiago, Alfeu onaregedu.
Simão, Zelote ure ema.
Judas, Tiago onaregedu.
Judas Iscariotes. Emare umode Jesus maku boe eimijera pegareuge etai.
Jesus Ure Boe Erduwado Pao Kurireu Bataruji
17-19Nono Jesus ure turawuje nou tori ao piji nou ture tugeragu jiwu boebo. Boe emagare taregodu tabo ae tumearduwo bataruji. Boe etaregodure Judéia moto piji, Jerusalém ba kurireu piji, Tiro ba kurireu piji, Sidom ba kurireu piji tumearduwo Jesus bataruji, uwo tubemegago tugogodae boe piji. Bope ro pegare jiwu boe doge etaregodure ae jamedu. Jesus ure nou bope doge etawuje nou boe epiji. Nou boe emagare rugadu. Erduware Jesus ure boe epemegago duji rugadu. Etaidure tuwo tugera bu Jesus keje. Emeardaere tumoduie tugera bu Jesus keje dukeje umoduie tubemegago. 20Jesus makore ture jorduwadowugei. Akore: – Marenarue nure ia tagi mare taegaredo tai. Taragojemode Pao Kurireu apo rugadu. Tare tagimijerado ema dukodire taragojemode apo rugadu boe pemegareu keje. Dukodire boe pemegamode tai rugadu. 21Ia tagi tage boeire tai mare du inodu tabo taegaredo tai. Boe pemegamode tai. Mare paga karega. Tage kurimode rugadu. Ia tagi tagragudure tagiarigodu koia. Mare du inodu tabo boe pemegamode tai rugadu dukodire taegaredo tai. Tagogwarigodumode rugadu. 22-23Boe ekadakagirimode tai tameartorumode imagore tai jiboeji. Tagodumode iwadaru kodaji dukeje boe emodukare tuiordudo tai, erorerumode tai, egomode meridoge enuie tagi. Ainore etuwobe emago pegare nou jaoboei jamedu. Mariguduwu etuwobe ero pegare nou mariguduwuge makore Pao Kurireu bataru jiwugei jamedu. Mare tare tameartorudo i dukodire emago pegamode aino tai jamedu. Mare taegaredo tai. Boe pemegamode tai. Mare paga karega Pao Kurireu umode mori kurido tagai toro baru tada. Dukodire čare taegaregodumode tai rugadu.
24Mare Jesus mako pegare iagei. Akore: – Ia tagi oe kurireuge nure tagi. Dukodire taegarere tai nou tagoeji. Mare tawiapagakare baru tadaboe bagai. Dukodire boe pemegamodukare tai. Nou tagoe akedumode rugadu. Nou tagoe umodukare taginorudo boe pegareu piji.
25– Ia tagi tage kurire. Dukodire taegarere tai tageji. Mare tawiapagakare baru tadaboeji. Dukodire boe pemegamodukare tai. Tage akedumode rugadu. Tage umodukare taginorudo boe pegareu piji.
– Ia tagi taegarere tai dukodire tagogwarire aino jamedu. Mare tawiapagakare baru tadaboeji. Dukodire boe pemegamodukare tai rugadu. Tagragudumode, tamode maido tagabo jamedu.
26– Boe ebogodure ia tai. Dukodire taegaregodure tai nou ewadaruji. Mare pagare egoino. Mariguduwuge ewobe ebogodure batrarodure Pao Kurireu bataru jiwugei. Aino čare boe ebogodure tai jamedu. Mare tawiapagakare Pao Kurireu mako pemegare tai jiboeji. Dukodire boe pemegamodukare tai.
Boe Emeardu Kuriwo Jordu Pegare Puduiwugei
27Jesus mako kimore. Akore: – Tawiapagado awu iwadaruji. Tameardu kurido jordu pegare taiwugei. Taro pemegado kadakagirire taiwugei jamedu. 28Tawadaru pemegado nou bataru pegare taiwugei. Tamagodo baruto Pao Kurireu bagai nou ro pegare taiwuge eparu tabo jamedu. 29Ia ro pegareu umode tugera to aeji, ae abowu metia maku ai uwo tugera to ji jamedu. Ia boe umode akudau areia okwatorureu biaku epa tawuje apiji dukeje maku ai rugadu. Mare ia akudau areia meture aiwu maku ai jamedu. 30Iaboe maku okwamagudure aiwu boe etai. Nouia boe ure tugeragu akoe jitu keje akaba udo maku akai tuibagi pugeje. 31Taro pemegado boei boetoji nono tagaidu mogadure boe ero pemegawo tai du mogadure jamedu. 32-33Tameardu kurimode tu ro pemegare taiwugei dukeje taro pemegamodukare ro pegareuge ero kori. Ro pegareuge emeardu kurire ro pemegare puduiwugei jamedu. Taro pemegamode nou ro pemegare taiwugei mare taro pegamode nou ro pegare taiwugei dukeje tarore nono nou ro pegareuge ero mogadure jamedu. Ro pegareuge emeardu kurire ro pemegare puduiwugei jamedu. Mare tameardu kurimode ro pegare taiwugei dukeje Pao Kurireu ro pemegamode tai. 34Tamode diero maku boe etai mare tagaidure ewo maku tuibagi tagai pugeje. Taromode aino dukeje tarore nono ro pegareuge ero mogadure. Pao Kurireu mako pemegamodukare tai pugeje. Ro pegareuge emode diero maku iage etai mare ewo nou diero rugadu maku pudai tuibagi pugeje. 35-36Aino čare imode tarduwado. Pao Kurireu ro pemegare ro pegareugei. Pao Kurireu okudure boebo rugadu. Ča taro pemegado nono Pao Kurireu ro mogadure jamedu. Tameardu kurido aidukare taiwugei nono Pao Kurireu ro mogadure. Ia tagoe maku etai jamedu. Taipagakaba ewo maku tuibagi tagai pugeje nono Pao Kurireu ro mogadure. Tagogududo boebo nono Pao Kurireu okudu mogadure boebo dumogadure jamedu. Taromode aino dukeje Pao Kurireu oremode tagi. Umode boe pemegareu maku tagai.
Boe Etaiwokawo Boei Ero Pegareu Bagai
37– Tawiapagakaba boei boe pegareu tabo. Nono Pao Kurireu ro pegamodukare tai. Tagaba boe ewarigu boe pegareuto Pao Kurireu ukawo tawarigu boe pegareuto jamedu. Boe ero pegare tai dukeje tawiago nou erore tai dupiji. Dukeje Pao Kurireu biagodumode taro pegareu boe piji jamedu. 38Ia tagoe maku ia boe enoe bokwareuge etai. Nono Pao Kurireu umode ia boe pemegareu maku tagai jamedu. Umode maku tagaiboe kurimode rugadu. Umode maku tagai nono tamode maku boe etai du mogadure.
39Nono Jesus ure nou tuwadaru jebato6.39 Brae egore comparação aino. toro ia Pao Kurireu meardae ka tuwo nou boe erduwado ji. Akore: – Joku bokwareuge ekera bararemode pui dukeje ewudumode boeiakoto. Jorduwakare Pao Kurireu jiwuge ere nono nou joku bokwareuge emogadure. Mare joku bokwareuge ei karega inagoino. Jorduwakare Pao Kurireu jiwuge eroiwakare tuwo boe erduwado Pao Kurireuji. Dujire inagoino. Etaidumode tuwo erduwado mare emode ewarigu Pao Kurireu piji. Dujire inagoino. Erduwakare Pao Kurireuji. Emeartorukare ji jamedu. Dukodire eroiwakare tuwo boe erduwado Pao Kurireuji rugadu. 40Boe emeartorumodukare ia mugure bapera kejewuji jorduwamodukare nono tugimijera mogadure. Boe emeartorumode tu nou mugure bapera kejewu ukimijeraji. Mare nou ukimijera umode nou mugure bapera kejewu jorduwado tuiorduware jiboe jamedu boeji dukeje nou mugure bapera kejewu jorduware jiboe umode nono nou tugimijera jorduware jiboe mogadure. Du ure turugadu. 41-42Tagi tardure tamedia joku tadawu boe giguduji. Mare tardukare taeku tadawu iraji. Mare boe gigudu ji karega inagoino. Boe ero pegareu rogu jire inagoino. Biagare tu je mare tardure ji. Dujire inagoino. Dukodire tamago pegare nou tamediaji. Tagagore: “Aro pega” aino ji. Tagagore tarduwaie tamedia ro pegareuji mare tardukare ia taro pegareuji. Dukodire tameartorukare tawadaruji. Tardukare taeku tadawu ira kurireuji. Mare ira ji karega inagoino. Taro pegareu kurireu jire inagoino. Taro pega kurire rugadu mare tagare tardudo ji. Dujire inagoino. Kočare. Tagera ra taro pegareu piji. Tamode tagera ra taro pegareu piji dukeje tarduwamode rugadu tamago pemegawo nou tamediaji nou tamedia uwo tugera ra turo pegareu biagareu piji jamedu.
Boe Erduwamode Tuduji Dukeje Erduwamode Nou Tudu Iji
43– I pegareure tudu pegare. I pemegareure tudu pemegare. 44Boe erduwamode tuduji dukeje erduwamode nou tudu iji jamedu. Boe emodukare tugeragu figo tuduji botoguru i piji. Figo i pijire boe emode tugeragu figo tuduji. Boe emodukare tugeragu uva tuduji botoguru i piji. Uva iku pijire boe emode tugeragu uva tuduji. 45Boe ere nono nou iguru mogadure. Mare iguru ji karega inagoino. Boe emeardae koiare umode boe ero pemegado umode boe ero pegado. Dujire inagoino. Boe ewiagoromode tumeardae pegareuji dukeje ero pegamode emago pegamode nono nou tumeardae mogadure. Mare boe ewiagoromode tumeardae pemegareuji dukeje ero pemegamode emago pemegamode nono nou tumeardae mogadure. Dujire inagoino. Tumeardaere jiboe jire boe emagomode, eromode tu tu je.
Ure Tuwai Pemegadowuge Ere Pobe
46Jesus mako kimore nou boei. Akore: – Ia tagi tamagore tagimijera nuie imi. Ma kočare tameartorukare iwadaruji. 47-48Ia imedu ure tuwai towuje. Ure ia iguru pemegareu tugu mototo. Ure tugera pemegado ji tuwo tuwai pemegado bakuru ukawo tuwai butudo. Nono bubuture. Pobo aregodure rugadu. Nou poborereu jeture nou imedu uwaiji. Mare nou uwai rakare rugadu. Butukare. Ča meartorure iwadaru jiwu akedumodukare nono nou bai mogadure. Mare bai ji karega inagoino. Boe ewiapaga pemegamode iwadaruji dukeje emeartorumode rugadu imagore jiboe jamedu boeji. Dukodire nou boe erduwamode rugadu dukodire boe pemegamode ei rugadu. Dujire inagoino. 49Ia imedu ure tuwai pemegado jamedu mare ure tugeragu ia iguru pegareuji. Ure tugu mototo mare ukare bure tugu pemegado. Iera kiogwakare nou tuwaiji. Nono pobo aregodure. Dukodire pobo jeture nou imedu ure towu baiji. Nono nou uwai buture. Pobo ure nou uwai butudo rugadu. Ure rugadu pegado tači je. Ča nou meartorukare iwadaru jiwu jorduwa bokwamode dukodire boe pegamode ji nono boe pegare nou bai jitu mogadure. Mare bai ji karega inagoino. Boe emeartorumodukare tumeardure jiwu iwadaruji dukeje boe pegamode ei rugadu. Dujire inagoino.
7Jesus Ure Tugobaigarege Eimijera Utugare Pemegago
1Jesus mako akedure nou boei dukeje uture epiji toro Cafarnaum ba kurireu ka. 2Roma kejewu tugobaigarege edure nono nou ba kurireu keje jamedu. Nou tugobaigarege eimijera aidure rugadu ia tudugare imeduji. Mača aino nou utugare imedu kogodure. Puredugodure tuwiwo. 3Nou tugobaigarege eimijera meardure Jesus rore jiboeji. Meardure Jesus aregodure mato duji. Dukodire ure Judeu doge eimijerage etudo toro Jesus bagai Jesus aregoduwo uwo nou tudugare imedu kogodureu pemegago. 4Dukodire nou Judeu doge eimijerage eture Jesus bagai. Etaregodure Jesus ae dukeje enogwamagudure Jesusji utuwo pudabo toro nou tugobaigarege eimijera uwai ka uwo nou tugobaigarege eimijera utugare imedu pemegago. Emagore Jesusji. Egore: – Awu tugobaigarege eimijera ro pemegare boei. 5Meardu kurire Judeu dogei. Čegimijera pemegareu nure ema. Ure ia bai rakojedo čenai čewo bato pui nou bai ja tada čemagowo baruto Pao Kurireu bagai nono.
6Dukodire Jesus uture nou Judeu doge eimijeragebo toro nou tugobaigarege eimijera uwai ka. Mare etaregodukare toro raga dukeje ia tugobaigarege etaregodure etogi nou tugimijera bataru tabo. Emagore Jesusji. Egore: – Čegimijera makore atukaiago toro tuwai ka pugeje. Akore boe eimijera kurireu nuie aki. Akore boe eimijera kurireu ukaie gure pudumi. Dukodire akore akaregodukaiago pudae toro tuwai ka. 7Akore tuboguruie turore jiboeji dukodire taregodumodukaie mato atogi. Akore amagomoduie dukeje tudugare pemegagodumoduie. 8Akore tugobaigarege eimijera nuie pudumi. Akore tugimijeraie jamedu. Kodire tuiorduwaie boe eimijera rore jiboeji. Akore tumagomoduie ia tugobaigare utuwo ia boe eda ka dukeje nono tugobaigare utumoduie rugadu. Meartoruie tuwadaruji kodi. Tumagomoduie ia tugobaigare aregoduwo pudae dukeje nou tugobaigare aregodumoduie pudae rugadu. Tumagomoduie tudugare rowo iaboeji dukeje tudugare meartorumoduie tumagore jiboeji rugadu. Akore boe eimijera kurireu nuie aki rugadu. Boe ekogodae meartorumoduie awadaruji rugadu. Amagomoduie dukeje tudugare pemegagodumoduie tači rugadu.
9Nou tugobaigarege eimijera bataru ure Jesus joku kidugo. Jesus makore nou rakojere pudabowu boe dogei. Akore: – Iwo tawie. Nou tugobaigarege eimijera meartorure idu kodure Israel moto kejewu Judeu doge eiamedu boe emeartorure idu kori.
10Nono nou tugobaigarege eimijera utugarege ere tugirimi Jesus piji tugimijera uwai ka. Etaregodure dukeje erdure nou tugimijera utugare kogodureuji. Mare kogodukare pugeje. Pemegagodure rugadu.
Jesus Ure Okoge Bokwareu Aredu Onaregedu Jewodudo Pugeje
11Nouia barogwato Jesus uture Naim ba kurireu ka ture jorduwadowugebo. Nouia boe emagare rugadu tugodui Jesus rekodaji. 12Jesus puredugodure nou ba kurireu ka dukeje ia boe ere tudawuje nou Naim ba kurireu piji ia iparedu bireu apo tuwo tugu mototo. Nou iparedu uče oredu bire pijiwudo onaregedu rogu ure mitotu je. Boe emagare rugadu ture tudawuje nou Naim ba kurireu piji tudui nou bireu apo dutabo. 13Jesus jordure nou areduji dukeje okudugodu kuričigore nou aredu apo. Akore: – Akragudukaba.
14Nono ure tuburedo nou bireu meture tadawu ira ka. Nono ure tugera bu nou metu tadawu ira aogeje. Nono nou oredure nou bireu apowuge ere tuwuredo. Jesus makore nou bireu ipareduji. Akore: – Me. Amugudo. Atawuje nou ira piji.
15Nono nou iparedu ure tumugudo. Jewodure tuwi piji rugadu dukodire makore jamedu. Nono Jesus ure nou iparedu maku tuje ai. 16Nou boe eiamedu boe epagudugodure Jesus rore aino duji. Egore: – Ča makore Pao Kurireu bataru jiwu imedu kurireu aregodure pagae rugadu. Pao Kurireu aregodure tuwo tugera maku pagai rugadu.
17Awu bataru pemegareu ure tumaedo nou Judéia moto jamedu boe parugajeje. Ure tumaedo nou moto tuginaiwu jamedu boe parugajeje jamedu.
João Batista Ure Jorduwadowuge Ere João Batista Bataru Reko Jesus Bagai
18-19João Batista ure jorduwadowuge eture João Batista ae baičoreu ka tureadoduwo biagai awu Jesus rore jiboeji. Ereadodure biagai dukeje João Batista makore nou ture jorduwadowuge pobedu doge ewagai. Makore ei. Akore: – Tanarado Jesusji, “Nou Pao Kurireu umoduie maku boe etaiwu boe ekinorudowu nure aki rugadu kana? Čebagamode ia bagai kimo kana?” Tanarado aino Jesusji inai.
20Nono nou ime eture Jesus ae rugadu. Emagore Jesusji. Egore: – João Batista ure čedudo mato akae čenaragoduwo aino ai. Nou Pao Kurireu umoduie maku boe etaiwu boe ekinorudowu remawu nure aki? Čebaga kimomode kana ia bagai?
21Nou meriji Jesus ure kogodureuge epemegago. Ure bope doge etawuje epijiwuge emagare jamedu. Ure joku bokwareuge etaiwodo pugeje jamedu. 22Dukodire Jesus makore nou João Batista ure jorduwadowugei. Akore: – Tagirimi tawo João Batista biedu pemegado rugadu tardure jiwu irore jiboeji, tameardure jiwu imagore jiboeji. Ire joku bokwareuge epemegago etaiwowo pugeje. Ire pogora pegareuge epemegago emeruwo pugeje. Ire kogodureuge ewiri pegareuge epemegago ewiri pemegawo pugeje. Ire bija bokwareuge epemegago emearduwo pugeje. Ire bireuge eewodudo pugeje. Ire marenarue doge ewie nou umode boe ekinorudowu aregoduie rugadu. 23Boe pemegamode nou meartorure iwu boei. Emodukare tugera ra tumeartorure i dupiji nono egaremode pudui rugadu.
24-25Nou João Batista ure jorduwadowuge eture pugeje dukeje Jesus makore João Batista rore jiboeji nou rakojere pudabowu boe doge ewiagai. Akore: – Marigudu tadure jiče boe maereu ka mare tarduwo bakuru jeture boebutu jitu bagai karega. Tarduwo ukudau areia motureu jiwu boe ewagai karega. Tarduwo oe kurireuge ewagai karega. Nou ukudau areia motureu jiwu boe emugure bai kurireu tada. Oe kurireuge emugure bai kurireu tada. Tadumode bai kurireu ka nouge ewagai. Mare tadure boe maereu ka. Tadure toro tarduwo João Batistaji. João Batista mugure boe maereu keje. Ukudau areia pemegakare, motukare ji. 26Tarduware João Batista makore Pao Kurireu bataru jituji. Dukodire tadure toro boe maereu ka João Batista bagai. Aino ča imode tawie. João Batista makore Pao Kurireu bataruji rugadu. Iwo tawie iaboeji pugeje. João Batista rore nono Pao Kurireu meardae mogadure rugadu. 27Marigudu Pao Kurireu akore: “Imode itugare arego uwo boe pemegado nou umode boe ekinorudowu togi.”7.27 Awu bataru padure Malaquias 3.1 keje. Ainore Pao Kurireu akore marigudu. João Batista jire akoino. Dukodi čare awu bataru jeture pudui rugadu.
28Jesus mako kimore. Akore: – Iwo tawie. João Batista kurire boe eiamedu boe ekori. Mare aino ia boe etugare umode tugimijerado Pao Kurireuče dukeje Pao Kurireu jakai boe kurireu mode ema João Batista kori.
29Nou boe eiamedu boe emeardure nou Jesus makore jiboeji. Ia imposto mori makudure aiwuge eragojere nono ebo jamedu. Marigudu João Batista ure etao pegodo. Emeartorure Pao Kurireu bataruji dukodire João Batista ure etao pegodo. Aino čare emeardure Jesus makore jiboeji dukeje emago pemegare Pao Kurireu meardaeji. Egore pemegaie. 30Mare fariseu doge ekare João Batista udo tao pegodo. Nou jorduware Judeu doge eno bakaru jiwuge ekare João Batista udo tao pegodo jamedu. Turore aino dutabo ere boe erduwado tumeardae pegareuji. Nou fariseu doge, nou jorduware Judeu doge eno bakaru jiwuge ere tumeardae pegareu tawuje tumeartorukawo Pao Kurireu makore pudui jiboeji.
31Jesus makore boei pugeje. Akore: – Imode tarduwado nuba nou meartoru bokwareuge emeardaere. 32Boe etore ewadure puapo mare etokire pui. Egore: “Čere bapo akodo. Nono čemagore tai tareruwo mare tarerukare. Nono čemagore tai tagraguduwo čedabo mare tagragudukare.”
– Ainore boe etore egore pui. Epemegakare pui rugadu. Ča nou meartoru bokwareuge ere nono nou boe etore emogadure. Mare boe etore ei karega inagoino. Pao Kurireu makore meartoru bokwareuge ewagai mare erokare iaboeji. Dujire inagoino 33Pao Kurireu ure João Batista arego mato boe etae. João Batista ure tugera ra tuge piji tumagowo baruto jao nono boe ero mogadure. João Batista kudukare vinho kuruče nono ro pemegareu boe ero mogadure. Mare boe emago pegare ji. Egore bope uwari metuie tada. 34Nono Pao Kurireu ure Imedu Onaregedu arego mato boe etae. Mare ire inagoino. Inogwagere boebo. Ikudure boebo. Mare du inodu tabo boe emago pegare i jamedu. Egore inogwage ierikaie. Mare pagare egoino. Egore Ikudu kigoduie vinho kuruče. Itaiduie ro pegareugei, imposto mori makudure aiwugei, marenarue dogei jamedu. Ainore egore. Mare tumago pegareu tabore egoino i. Dukodire inagoino meartoru bokwareuge nure emage. 35Mare Pao Kurireu jorduware boe jamedu boeji. Ia boe emeartorumode Pao Kurireu bataruji dukeje meardae kurireuge mode emage. Nou ero koiare umode boe erdudo Pao Kurireu ure erduwado boe remawu jituji rugadu.
Jesus Uture Simão Uwai Ka
36Fariseu imedu makore Jesusji okwagewo pudabo tuwai keje. Nou imedu iere Simão. Jesus uture uwai ka. Ure tumugudo ebo togwagewo.
37-38Dukeje aredu umode tumagu paga paga ime etaiwudo jorduware Jesus okwagere nou fariseu uwai keje duji. Dukejere nou aredu aregodure Jesus ae nou boe ewai ka poari rogu tabo. Nou boe ere nou poari towuje tori tabo. Nou tori iere alabastro. Roreboe mori kurireu meture nou poari rogu tada. Nono nou aredu biabuture nou turo pegareu boe keje dukodire ragudu kuričigore dukodire nou jokuru buture Jesus bure keje. Ča nono nou aredu ure Jesus bure kidudo tao tabo. Nono ure togwa to bureto. Nono ure nou roreboe redo Jesus bure joki.
39Nou fariseu imedu jordure nou aredu rore aino duji dukeje jordu motukare nou aredu rore aino Jesus jituji. Dukodire nou fariseu imedu biagorore tudada. Akore: – Kočare nou aredu rore aino nou Jesusji. Iordu motukare rore aino iwai ja tada duji. Kodiba Jesus ure nou aredu rodo ino pudui? Makore Pao Kurireu bataru jiwu karegure ema. Makore Pao Kurireu bataru jiwu umode ema dukeje jorduwamode nou aredu rore jiboeji, umode tumagu paga paga ime etaiwudo nure emarodo rugadu. Dukeje awu Jesus umodukare nou aredu rodo ino pudui. Makore Pao Kurireu bataru jiwu karegure ema rugadu.
40Mare Jesus jorduware nou Simão makore tudada jiboeji. Dukodire makore Simãoji. Akore: – Iorduware awu areduji, umode tumagu paga paga ime etaiwudo nure ema rodo rugadu. Ča ireadodumode iaboeji tawiagai.
Simão akore: – Areadodudo.
41Jesus akore: – Imedu ure diero maku aiwuge imere pobe. Ia ai ure oto bu 5007.41 Nou eno diero ure nono diária mogadure. Boe etaidumode to diero aregoduwo 500 ka dukeje, meri mode 500 ei jamedu tumaragodu tabo.. Nou metia ai ure oto bu 50. 42Boe aregodure nou meri ka ewo nou diero maku tuibagi nou imedu ai. Mare ere nou diero rugadu akedudo kodire eroiwakare tuwo morido tuibagi. Dukodire nou imedu makore ei ekawo morido pudai enoe bokware kodi. Kaibowu imedu ba meardu kurimode nou imeduji rugadu?
43-44Simão akore: – Ure diero oto bu 500 aiwu imedure meardu kurimode rugadu nou ure diero maku pudaiwu imeduji rugadu ukare udo morido pudai kodi. Jakaremode pudui akore aino pudui duji. Okwa imadumode apo rugadu ukare udo morido pudai kodi.
Nono Jesus akore: – Boe jokodu. Ča ire iremo awaito mare akimadukare itabo. Akare pobo maku inai iwo iwure kabi akimaduwo itabo nono Judeu doge ero mogadure. Mare awudorema ure iwure kabi tuioguru tabo, ure iwure kidudo tao tabo. 45Aki akare akogwa to ie koduto akimaduwo itabo nono Judeu doge ero mogadure mare awudorema ukare tugera ra ture togwa to iwureto dupiji. 46Akare boekaguru tugu itaoto nono Judeu doge erore tugimaduwo boebo dumogadure, mare awudorema ure roreboe reko iwure joki. 47Awu aredu rore aino i dukodire iorduware meardu kurire i rugadu duji. Pao Kurireu biagodure awu aredu ro pegare jiboe piji tuwo awu aredu ro pegareu boe pijido ukawo morido pugeje dukodire meardu kuričigore aino i. Mare tagi tameardaere taro pegareu bokwaie kodire Pao Kurireu ukare taro pegareu pijido. Dukodire tameardu kurikare aino i rugadu.
48Nono Jesus makore nou areduji. Akore: – Aro pegareu jamedu boe iwiagodure piji marigudu.
49Dukodire čare nou Simão, nou mugure nono apowuge, erdu pegare Jesus akoino duji. Egore: – Ukare turugadu. Awu Jesus umodukare boe ero pegareu barigu boe epiji. Tu Pao Kurireu romode aino tu rugadu.
Emeartorukare Jesusji dukodire egoino.
50Jesus makore nou areduji pugeje. Akore: – Ameartorure i dukodire akinorudodure aro pegareu jamedu boe piji dukodire awarigudumodukare toro bope doge eda kejewu joru pegareuto. Akirimi aibagi awai ka. Amororamagadukaba. Boe pegareu puredumodukare ai.
8Areme Ekodure Jesus Apo
1Jesus uture ture jorduwadowu imebo boe eda jamedu boe ka tuwo boe ewie tuwadaru pemegareuji, tumagowo Pao Kurireu rore jiboeji boe ewiagai. Makore boei Pao Kurireu umoduie boe eimijerado pudumi kuri je. Nou Jesus ure jorduwadowuge enodo padure doze. 2-3Ia areme ekodure Jesus apo jamedu. Iarodo iere Maria Madalena. Metago iere Joana. Nou iarodo iere Susana. Marigudu bope doge emedure nou Maria Madalena tada. Nou bope doge enodo padure sete. Mare Jesus ure nou bope doge etawuje nou Maria Madalena piji dukodire nou Maria Madalena kodure apo. Nou Joana oredu iere Cuza. Nou Cuza maragodure boe eimijera Herodes ai. Ia areme ekodure Jesus apo jamedu. Jesus ure bope doge etawuje iage epiji. Ure iage epemegago tugogodae piji. Dukodire nou areme ere tugera maku etai nou toe makudu tabo Jesus ai, nou utugarege etai jamedu.
Boepa Tadaboe Jiwu Bakaru Reo
4Boe emagare taregodu tabo Jesus ae. Etaregodure tieda jamedu boe piji tuwo bato pui Jesus ae tumearduwo Jesus makore jiboeji. Dukeje Jesus readodure ewiagai ia bakaruji tuwo jebato toro nouia Pao Kurireu meardae ka. 5Akore: – Ia imedu ure tudawuje tuwo boe a roto ja ja moto joki to boepa tada. Ia a buture awara okwaji. Boe ewure jore nou buture awara okwa jiwu a keje, kiebarege ere nou boe a rugadu kowuje. 6Ia a buture toriguru tada. Boture mare kidure, tori uru koia, moto pegare ji kodi. 7Ia a buture botoguru tada. Botoguru boture tabo jamedu mare botoguru ure bito. 8Mare ia a buture moto pemegareu keje. Ere tuguwu sacu ure mitotu je. Botu pemegare, ričodu pemegare, enari kurire rugadu. Kidure dukeje ere rawuje čiwu piji. Ere a rawuje tuwo tugu sacuto. Nou sacu oto padure kejeboere cem nou boe a tabo.
Nono Jesus okituware nou boei. Akore: – Tawiapaga pemegado awu iwadaruji tarduwawo kaba jiba inagoino tai.
Jesus Ure Ture Jorduwadowuge Erduwado Tumagore Jiboeji
9Nou Jesus ure jorduwadowuge enarare ji: – Kaba awadaru jiba akaidure čerduwawo akagoino čei duji?
10Jesus akore: – Ire boe erduwado toro nouia Pao Kurireu meardaeji rugadu nou bakaru tabo. Mare paga karega. Ireadodure aino Pao Kurireu uwo tarduwado meture pudabowu tumeardae boeji, boe ewo tugimijerado tu ema, tarduwawo nuba Pao Kurireu romode tudugaregei. Mare ireadodure bakaruji kodire ia boe erduwamode awu bakaruji mare emodukare boe pa nou bakaruji. Ewiapagamode ji mare erduwamodukare nou Pao Kurireu meardaeji.8.10 Awu bataru padure Isaías 6.9 keje.
11– Ainore awu bakaru ure. Boe eire inagoino. Pao Kurireu bataru ure nono nou boe a mogadure. Mare boe a ji karega inagoino. Pao Kurireu bataru aregodumode boe etae. Nono boe emeardumode Pao Kurireu bataruji. Dujire inagoino. 12Boe emeardumode Pao Kurireu bataruji dukeje bope doge eimijera umode nou Pao Kurireu bataru tawuje nou boe epiji nono nou kiebarege ere nou boe a tawuje moto piji dumogadure. Mare kiebarege ei karega inagoino. Bope doge eimijera jire inagoino. Umode boe ewiago Pao Kurireu bataru piji. Dujire inagoino. Dukodire nou boe emeartorumodukare Pao Kurireu bataruji pugeje. 13Ia boe emeardumode Pao Kurireu bataruji pugeje. Nono nou boe emode nono nou boture toriguru tadawu boe a mogadure. Nou boture toriguru tadawu boe a rakamodukare. Mare boe a ji karega inagoino. Boe eire inagoino. Nou boe eragamodukare tumeartoru raiwo Pao Kurireuji. Dujire inagoino. Emode tugeragu Pao Kurireu bataruji tiagare tabo mare emeartoru raimodukare ji. Dujire inagoino. 14Ia boe emeardumode Pao Kurireu bataruji pugeje. Awu boe emode nono nou boture botoguru tadawu boe a mogadure. Botoguru umode boe pegado ji. Mare boture botoguru tadawu boe a ji karega inagoino. Boe eire inagoino. Nou boe emeardumode Pao Kurireu bataruji mare emororamagadumode tu nou tumeardae pegareu boeji. Dujire inagoino. Emeardaere tu pudui tuwo to diero kurido. Emeardaere tu nou taidure jiboeji. Dukodire toro ia meri keje nou boe emode tugera ra Pao Kurireu bataru piji. Dujire inagoino. 15Mare ia boe emeardumode Pao Kurireu bataruji dukeje emeartorumode ji rugadu. Dukodire epemegamode rugadu nono nou boture moto pemegareu boe a mogadure. Mare boture moto pemegareu kejewu boe a ji karega inagoino. Boe eire inagoino. Nou boe emeardumode Pao Kurireu bataruji nono emeartorumode ji rugadu. Dujire inagoino. Emodukare tugera ra tumeartorure jitu piji rugadu jii toro rugadu. Dujire inagoino.
Boe Emodukare Pori Bu Jorugu Aogeje
16Jesus makore kimo. Akore: – Boe emode pori bu jorugu aogeje dukeje urugumodukare. Boe emode jorugu mugudo tuba kuda dukeje urugumodukare jamedu. Mare boe emode jorugu bararedo, uruguwo pudui. 17-18Mare paga karega iwadaru ure nono nou lamparina urugu mogadure. Mare lamparina urugu ji karega inagoino. Marigudu boe erduwakare ia Pao Kurireu meardaeji. Marigudu boe erduwakare ia boe ero pegare jiboeji. Mare boe emeardumode iwadaruji dukeje boe erduwamode Pao Kurireu meardae pemegareu jamedu boeji. Boe emeardumode iwadaruji dukeje erduwamode boe ero pegare jiboeji. Dujire inagoino. Erduwakare ia boe ero pegare jiboeji mare erduwamode ji. Dujire inagoino. Erduwakare ia Pao Kurireu meardae pemegareuji mare erduwamode ji. Dujire inagoino. Dukodire tameardae pemegado tawiapagare jiwu iwadaruji tawo taragado tai tameartoruwo ji rugadu. Mare paga karega. Boe etaidumode tumeartoruwo tuiorduware jiwu Pao Kurireu bataruji dukeje Pao Kurireu umode erduwa kurido pudui emeartoruwo pudui rugadu. Mare ia boe etaidumodukare tumeartoruwo tuiorduware jiwu Pao Kurireu bataruji dukeje Pao Kurireu umode erduwa bokwado tuwadaruji. Emeardaere tuiorduwaie rugadu mare pagatu je.
Jesus Uče Uwiemage Etaregodure
19Jesus uče uwiemage etaregodure tuiorduwo Jesusji tumagowo ji. Mare eroiwakare tubureduwo ji boe emagare nono apo kodi. 20Ia imedu ure Jesus bie. Akore: – Ikimijera. Ače, awiemage etaregodure awagai. Etaidure tumagowo ai.
21Mare Jesus makore: – Biapagare Pao Kurireu bataru jiwuge emeartorure jiwuge ere nono iwobe emogadure. Ere nono iwie mage emogadure. Ere nono muga mage emogadure.
Jesus Ure Bakuru Pegareu Akedudo
22Ia meri keje Jesus ure turemo ture jorduwadowugebo ia ika kurireuto. Makore ei: – Pagurugoduwo awu pobo maereu okwa abowu ka.
23Nono eture. Ekurugodure dutabo Jesus unudure. Mačare ia bakuru pegareu aregodure etae tači je. Nou bakuru ure nou pobo maereu rutudo. Kodire pobo jeture nou ika kurireuji. Dukejere nou pobore turemo nou ika kurireuto rugadu. Boe pegare nou ika kurireu tadawu boe dogei rugadu. 24Jesus ure jorduwadowuge epagudugodure rugadu dukodire ere Jesus jetadudo. Egore: – Čegimijera! Pawimode poboto!
Nono Jesus ure turagojedo. Nono makore nou bakuruji nou poboji dukodire nou bakuru akedure, nou pobo butugugodure jamedu. 25Nono Jesus makore nou ture jorduwadowugei. Akore: – Tameartorukare i na?
Mare epagudure. Ebogodure. Egore pui: – Duboba nure awu imeduče? Kočare bakuru, pobo emeartorure awu imedu bataruji rugadu!
Jesus Ure Bope Doge Etawuje Imedu Piji
26Ekurugodure Galiléia pobo maereu okwa abowu ka. Nou etaregodure kawu moto iere Gerasa. 27-29Nono Jesus ure tudawuje ika piji dukeje bope doge emedu tadawu imedu uture Jesus togi. Marigudu nou bope doge emedure nou imedu tada dukodire boe ere kogudo ia meriri iku tabo boe etuwo ji rekodukawo. Mare nou bope doge ere nou imedu rakado rugadu dukodire nou imedu ure nou meriri iku kado tu tu je. Nono nou bope doge ere nou imedu utudo boe epiji. Dukodire merure tuwiri kedo tabo, rekodure tuwai piji jamedu. Mugure boe ere bireuge etugu tadawu tori poro ja tada boe maereu keje.
Nono Jesus makore nou meture nou imedu tadawu bope dogei. Akore: – Tadawuje nou imedu piji!
Nou imedu kudugodu rakare dukeje ure tuwududo Jesus jokorai. Ure tumago rakado. Akore: – Jesus! Boe eimijera Pao Kurireu onaregedu nure aki! Nuba aromode čei? Inogwamagudumode ai. Akaba čedudo boe pegareuto.
30-31Jesus unarare ji: – Nuba akiere?
Nou meture nou imedu tadawu mareboe doge emagare dukodire egore: – Čegiere bope doge makareuge.
Nono nou meture nou imedu tadawu bope doge enogwamagudu raire Jesusji ro pegakawo pudui ukawo tuwarigu boe eiawu moto koreuto.
32Jugureuge edu puredure nono togwage tabo. Nono nou mareboe doge enogwamagudure Jesusji uwo tudo turemo nou jugureugeto. Jesus makore ei uie turugadu. 33Nono ere tudawuje nou imedu piji dukejere ere turemo nou jugureugeto. Dukodire nou jugureuge eregodure kuri ia moto ri ao piji poboto. Dukodi eiamedu boe ewire poboto.
34Dukodire nou jeture jugureuge eiwuge ime eregodure toro nou tuwai mugure tadawu ba kurireu ka tureadoduwo boe ewiagai nono. Ereadodure nou Jesus rore jiboeji boe eiamedu boe ewiagai nou moto jamedu boe parugajeje. 35-39Nou ba kurireu kejewuge eture toro Jesus ae dukeje erdure nou bope doge emedu tadawu imeduji pemegagodure duji. Butugugodure. Ukudau areia meture jituji. Erduware Jesus ure bope doge etawuje nou imedu piji dukejere epagudugodure. Eiamedu boe emagore Jesusji utuwo nou to moto piji. Dukodire Jesus ure tuduiago dukeje nou bope doge ere tudawuje pijiwu imedu makore Jesusji. Akore: – Itaidure ikoduwo akabo.
Mare Jesus akore: – Atudo aibagi awai ka. Areadoduwo boe ewiagai nuba Pao Kurireu ro pemegare ai duji.
Dukodire nou imedu uture tuibagi tuwai ka. Readodure nou ba kurireu kejewuge boe eiamedu boe ewiagai nuba Jesus ro pemegare pudui duji.
Jesus Ure Areme Epemegago
40Jesus kurugodure tuibagi ika kurireu tabo pobo maereu okwa abowu ka pugeje ture jorduwadowugebo. Etaregodure dukeje boe ekimadure Jesus apo. Epagare bagai marigudu tuwiapagawo Jesus bataruji. 41-42Ča ia bai kejewu boe eimijera iere Jairo. Judeu doge ere bato puiwu bai kejewu boe eimijera nure ema. Nou imedu Jairo aregodure Jesus ae, tragudu tabo. Okwamagudure Jesusji koduiago pudabo toro tuwai ka. Tonaregedu nogwaredu rogu ure mitotu jedu bigoduiure.
Dukodire Jesus uture apo uwai ka. Mare nono nou boe emagare rugadu dukodire ere taiado pači Jesus apo. 43Ia aredu kodure ebo Jesus rekodaji. Marigudu nou aredu kogodaere tu tu je. Nou aredu ku rere piji nono areme etorewudae mogadure. Mare nou aredu ku akedukare piji. Re kimore piji meri jamedu boeji. Joru oto padure doze nou aredu ku rere piji dukeje. Kodire uture jorubo epage etae. Mare ekare nou aredu pemegago nou tugogodae piji. Pega kimore rugadu. 44Aino čare nou aredu ure tugera raido. Nono iera otorogu jeture Jesus ukudau areiaji. Dukeje nou aredu pemegagodure tači je. Nou aredu ku rekare piji pugeje. 45Ča Jesus ure tuwuredo tu je. Akore: – Ioguduba ure tugera raido ikudau areia ka?
Boe emagokare boeji. Dukejere Pedro akore: – Kodiba akagore aino? Boe emagare woe pagabo. Boe eiamedu boe ekera jeture akudau areiaji.
46Mare Jesus akore: – Iorduware ipijire ia iraga rakareu ure tudawuje dukejere iogore ia boei. Dukodire iorduware ia boe ekera jeture ikudau areia jituji.
47Nou aredu jorduwagodure Jesus jorduware pudumie tuie tugera raido pudae duji. Dukodire ure tuburedo Jesusji. Mare pagudure dukodire mororamagadure. Ure tubu jodo moto keje Jesus jokorai dukejere readodure turore jiboeji Jesus biagai. 48Jesus makore ji. Akore: – Are. Ameartorure tu i dukodire apemegagodure. Mare amororamagadukaba. Ire akogodae akedudo apiji rugadu.
49Jesus mako kimore nou areduji dukeje ia imedu aregodure etae Jairo uwai piji. Makore Jairoji. Akore: – Akanaregedu rogu bokware. Amagokaba nou pagimijeraji pugeje.
50Mare Jesus meardure emagore pui duji. Nono makore Jairoji. Akore: – Amororamagadukaba. Ameartorudo i rugadu. Akanaregedu pemegagodumode.
51-53Makore aino dukeje Jesus uture ture jorduwadowugebo Jairo apo uwai ka. Etaregodure uwai ka dukeje boe emagare nono tragudu tabo nou Jairo onaregedu rekodaji bire kodi.
Jesus akore: – Tagragudukaba pugeje. Bikare. Unudunure. Unure tamudo tu je.
Mare nou nogwaredu bire rugadu. Mare Jesus jorduware turomode jiboeji dukodire akoino ei. Mare nou boe erduware nou nogwaredu bire rugadu duji. Dukodire enogwarigodure ji emeartorukare ji kodi. Nono Jesus makore Pedroji, Joãoji, Tiagoji jamedu, ewo turemo pudabo, Jairo apo, Jairo oreduje apo jamedu. Makore nou iagei epagawo toro bawadu keje.
54Ere turemo dukeje Jesus ure tugeragu nou nogwaredu ieraji. Makore ji. Akore: – Are. Aragojedo.
55-56Ča. Nou nogwaredu jewodure tači je. Nono ure turagojedo. Uče, uo erore ta je Jesus rore aino duji. Mare Jesus makore ei. Akore: – Awu tagonaregedu okwagedo. Imode tawie. Tareadodukaba boe ewiagai irore aino woe tawai keje duji.
9Jesus Ure Tumaragodae Maku Ture Jorduwadowuge Etai
1Nono Jesus makore ture jorduwadowuge ewagai. Enodo padure doze. Ure turaga maku etai ewo boe epemegago ewo bope doge etawuje boe epiji jamedu. Ure eragado turaga tabo ewo boe epemegago ekogodae boe piji. 2-5Jesus makore nou ture jorduwadowugei. Akore: – Tadukaba nou tagedure jiwu tagaibo tabo. Tadukaba marenaru ukudau areia meture tadawu kadarabo tabo. Tadukaba tage tabo. Tadukaba diero tabo. Tadudo tu meture taiwu tagudau areia tabo. Tadukaba ia tagudau areia metia tabo pugeje. Tagaregodumode ia boe eda ka dukeje tardumode boei. Etaidumode tai dukeje tamugudo ebo jii nou tadumode kejewu meri ka. Mare tagaregodumode ia boe eda ka pugeje mare nou boe etaidumodukare tai. Ekimadumodukare tagabo dukeje tadudo epiji. Tadumode epiji dukeje tawure okeakejewu to pui egai tawo moto urugudu tawuje nou tawure okeakejewu piji nou boe erduwo Pao Kurireu aidukare nou erore jiboeji kodire umode tugera ra epiji.
Jesus makore nou ture jorduwadowugei dukeje ure etudo ewo boe ewie Pao Kurireu bataru pemegareuji boe ewo tugimijerado tu Pao Kurireuče. Ure etudo ewo kogodureuge boe epemegago jamedu. 6Dukodire nou Jesus ure jorduwadowuge eture. Eture boe eda jamedu boe ka. Ere boe eiamedu boe ewie nou Jesus bataru pemegareu jamedu boeji. Ere kogodureuge epemegago jamedu.
Herodes Jorduwa Bokware Nou Jesus Ure Jorduwadowuge Erore Jiboeji
7Galiléia moto kejewu boe eimijera iere Herodes. Meardure nou Jesus rore jiboeji makore jiboeji. Mare jorduwa bokware ioguduba nuie ema duji. Ia boe egore João Batista jewoduie pugeje kodie João Batista nure ema. 8Ia boe egore Elias uie tugirimi baru piji. Iage egore ia mariguduwu makore Pao Kurireu bataru jiwu jewoduie pugeje. 9Herodes akore: – Boe egore ia imedu ro rakaie rugadu. Dukodire imire imagore itugaregei ewo João Batista itoru kado. Dukodire ere bito rugadu. Ema karega rore aino. Ča kakojiwu imedu ba ro rakare aino pugeje?
Dukodire Herodes jemarure Jesus bagai tunarawo ji ioguduba nuie ema rugadu.
Jesus Ure Boe Eke Maku Boe Etai. Ime Enodo Padure Cinco Mil
10-11Nou uture Jesus bataru tabowuge ere tugirimi tuibagi Jesus ae. Ereadodure turore jiboeji Jesus biagai. Dukejere Jesus uture ebo pugeje boe epiji. Etuiago toro Betsaida ba kurireu ka. Mare boe erduware Jesus kodure toro duji dukeje eture rekodaji. Emagare. Dukodire Jesus ure tuwuredo nono boe maereu keje tumagowo nou boei. Ure erduwado Pao Kurireu bataru pemegareuji boe ewo tugimijerado Pao Kurireuče. Nono nou tumugureu keje ure boe kogodureuge epemegago jamedu. 12Nono merirekodutabo nou Jesus ure jorduwadowuge emagore Jesusji. Egore: – Boe doge etudo awu boe maereu piji. Edo taodo ia tieda puredureu bagai emuguwo keje etaiwowo ia tuge rogu bagai. Boe bokware woe du kodire.
13-14Jesus akore: – Boro. Taigoiare tamode enogwagedo.
Egore: – Awu boe emagare rugadu. Ime enodo padure cinco mil. Mare page amireu rogure ikera aboudure tu je. Page karo rogure pobetu je. Tu rugadu. Akaidukana čeduwo toro ba kurireuto čewo čegeragu awu boe eiamedu boe ekeji kana?
Mare Jesus akore: – Tamagodo awu boei ewo tudo pui enodo paduwo cinquenta tu tu tumuga boe keje.
15Nono nou Jesus ure jorduwadowuge erore aino. Ere nou boe eiamedu boe edo tudo pui tumuga jamedu boe keje. Eiamedu boe ere tudo pui rugadu. Dukodire ere tumugudo tu tu tumuga boe keje. 16Nono Jesus ure tugeragu nou boe eke roguji tumagowo Tuwo Kurireu bagai baruto nou boe eke rogu paru tabo. Imadure Tuwo Kurireu apo nou boe eke rogu paru tabo dukeje Jesus ure nou boe eke kado puiato ture jorduwadowuge ewo maku boe etai. Nou boe erore puku je nou boe eke itodure aino duji. Dukodire nou boe eke ure turugadu boe eiamedu boei. 17Boe eiamedu boe enogwagere. Nono ča ekuredure egarere pudui rugadu. Ča nou Jesus ure jorduwadowuge ere nou kadarabo doge ekorau nou boe eke kobo tabo. Nou kadarabo doge enodo padure doze nou boe eke kobo tabo rugadu.
Pedro Makore Nuba Tumeardaere Jesusji
18Ia meri keje Jesus makore baruto Tuo Kurireu bagai. Rakojere tuginaigodu. Tu nou Jesus ure jorduwadowuge edure tu nono Jesus apo. Jesus ure tuwadaru akedudo dukeje unarare nou ture jorduwadowugei: – Nuba boe emeardaere i?
19Egore: – Boe egore João Batista nuie aki. Nou iage egore Elias nuie aki. Nou iage egore ia mariguduwu makore Pao Kurireu bataru jiwu imedu jewodureu nuie aki.
20Jesus akore: – Mare tagi. Nuba tameardaere i?
Pedro akore: – Pao Kurireu ure maku boe etaiwu nure aki. Umode boe ekinorudowu nure aki.
21-22Jesus akore: – Tareadodukaba nou inoduji boe ewiagai. Mare du inodu tabo boe erorerumode i. Boe etaidumodukare i. Judeu doge eimijerage erdu pegamode i rugadu. Jorduware Judeu doge eno bakaru jiwuge erdu pegamode i rugadu. Nou ure Judeu doge enomea maku Pao Kurireu aiwuge eimijerage erdu pegamode i rugadu. Boe emode iwido rugadu. Mare merimode pobe metia bokware dukeje iewodumode tači je pugeje.
23Nono Jesus makore nouia boei pugeje. Akore: – Ia tagi tagaidure tagoduwo itabo kana? Ča iwo tawie. Tagaidumode dukeje tameartorudo tu i dukeje tagera ra taro pegareu piji, tawia ra tameardae pegareu piji, tagaidure jiboe piji jamedu. Tado tarugadu meri jameduji boe pegamode tai nono boe pegamode i dumogadure. Iwimode ipo padure pugajejewu keje. Dukodire inagoino tai tado tarugadu tagoduwo itabo. 24Mare ia boe ewiapagamode tuwo boe pemegado tu pudui turaga tabo dukeje nou boe eraga akedumode epiji rugadu. Egare remawu modukare. Emodukare činorudo bope doge eda kejewu joru pegareu piji rugadu. Mare ia boe ewiapagamodukare tumeardaeji pugeje tuwo tugera ra nou turo pegareu piji tumeardae pegareu piji taidure jiboe piji dukeje Pao Kurireu umode boe pemegado ei, umode egare remawudo rugadu. Nono ewarigudumodukare bope doge eda kejewu joru pegareuto jamedu. 25Pagatu jere boe emode turagado pudui toe kuriwo awu moto keje. Ča nou enoe umodukare erududo baruto. Ewiagorokare tuwo tumeartorudo tu Pao Kurireuji kodi. Ewiagorore tu tuwo toe kurido mare pagatu je. 26Ia boe epogurumode tumagowo iwadaruji tumedage ewiagai dukeje imi imodukare ikeragu ei itae. Itaregodumode Pao Kurireu o jorugu kurireu tabo Pao Kurireu utugarege baru tadawugebo dukeje imodukare ikeragu ei. Nou Pao Kurireu o jorugu kurireu urugure Pao Kurireu kujegajeje. Imode ikirimi mato dukeje urugumode ikujegajeje jamedu. Urugumode nou aregodumode itabowu Pao Kurireu utugarege baru tadawuge ekujegajeje jamedu. 27Iwo tawie boe remawuji. Pao Kurireu umode boe eimijera kurireudo pudumi dukeje ia tagi tardumode awu Pao Kurireu roino duji. Tawimodukare jii toro tardumode roino jitu ka.
Jesus Ruture Tori Ao Ka
28Nou akoinodu bataru rekodaji semanare mito. Dukeje Jesus uture Pedro apo, Tiago apo, João apo jamedu toro ia tori ričoreu ao ka. Toro nou tori ričoreu ao kejere Jesus makore Pao Kurireu bagai baruto. 29Jesus makore baruto dukeje je ure tudo tuginai. Ukudau areia kigadu maere ji. Gurugure nono boeiaragudu urugu mogadure rugadu. 30-31Nono ia ime doge epadure tači toro ae. Ere pobe. Ia iere Moisés. Metia iere Elias. Nou Pao Kurireu jorugu pemegareu urugure ekujegajeje. Emagore Jesusji. Jesus makore ei jamedu. Ere pu bie Pao Kurireu meardaeji. Nou Pao Kurireu meardae koiare boe pegamoduie Jesusji nono Jerusalém ba kurireu keje dukodire Jesus bimoduie Jerusalém ba kurireu keje rugadu. Mare jewodumoduie pugeje turuduwo baruto rugadu.
32Mare Pedro unudure tumedagebo. Čare edadure dukeje erdure nou urugure Jesus kujegajejewu Pao Kurireu jorugu pemegareuji. Erdure nou ime pobedu dogei jamedu. 33Ča nou ime pobedu doge ere tuduiago tuibagi baruto dukeje Pedro makore Jesusji. Akore: – Ikimijera. Ure turugadu paeduwo woe. Čemode ia mačebradudo pobe metia bokware. Iamode akai. Iamode Moisés ai. Iamode Elias ai jamedu.
Mare Pedro jorduwakare tuiordure jiboeji dukodire mako pagare.
34Pedro mako kimore dukeje ia boe tugu ure turawuje etae. Nou boe tugu ure turorido eiogi. Dukodire nou Pedro, nou rakojere apowuge metage epagudugodure. 35Nono emeardure ia boe emagoji nou boe tugu piji. Akore: – Imeardu kurire jiwu itonaregedu reo. Ire ikeragu ji iwo udo boe ekinorudo. Tawiapaga pemegado makore jiboeji.
36Akore aino dukeje nou boe tugu akedure. Ča Jesus rakojere nono. Nou ime pobedu doge eragojekare nono pugeje. Mare Pedro, Tiago, João nou meriji ereadodukare tumedage ewiagai tuiordure tumeardure jiboeji jii toro, ia boe ewiagai jii toro jamedu.
Jesus Ure Bope Uwari Tawuje Iparedu Piji
37Nou barogwato ere turawuje nou tori ao piji dukejere boe emagare taregodu tabo Jesus togi. 38-40Ia imedu akore: – Ikimijera! Ikimijera! Inogwamaguduwo ai itonaregedu rogu paru tabo bope uwari pegareu meture tada kodi. Nou bope uwari ro pegare ji kodire ure magadudo, ure kudugo. Jataro aregodure jabiji, rakakare tuwo turagojedo pugeje. Kodire ure tiamedu boe korido. Ukare tudawuje itonaregedu piji rugadu. Dukodire inogwamagudunure ai akaiwowo ji awo pemegago. Rogure mitotu inai. Imagore awu ia are jorduwadowugei ewo nou bope uwari pegareu barigu piji. Mare ero rakakare ji.
41Jesus akore nou boei: – Tare ikiarigo. Tameartorukare rugadu. Tarduwakare tawo tameardae pemegado. Iragoje raimodukare tagabo. Nuba tagaidure irowo tameartoruwo i?
Nono Jesus makore nou imeduji. Akore: – Mato akanaregedu apo.
42Nono boe ere nou iparedu reko Jesus ae dukeje nou bope uwari pegareu ure nou iparedu butudo moto keje pugeje. Magadugodure nono nou moto keje. Mare Jesus mako rakare nou bope uwariji uwo tudawuje nou iparedu piji. Ainore čare ure nou bope tawuje nou iparedu piji rugadu. Dukodire ure pemegago. Nono ure nou iparedu maku tuo ai pugeje. 43Boe eiamedu boe ebogodure Pao Kurireu ro rakare aino duji.
Jesus Ure Ewie Pugeje Tuwimoduie Duji
Nou boe ebogodu kimore Jesus rore jiboeji. Dukeje Jesus makore ture jorduwadowugei pugeje. 44Akore: – Imedu Onaregedu nure imi. Imagudumode ro pegareuge etai ero pegawo i. Tawiagodukaba awu imagore tai dupiji.
45Mare nou Jesus ure jorduwadowuge erduwakare kaba jiba Jesus akoino pudui duji. Nou Jesus makore jiboe ukare turemo etaorato. Dukodire ure tuwiado epiji. Mare epagudure jamedu tunarawo Jesusji kaba jiba Jesus akoino pudui.
Jesus Ure Jorduwadowuge Etaidure Tuiorduwawo Kakojiwu Pudumi Ba Boe Eimijera Mode Pudumi Dubagai
46Nou Jesus ure jorduwadowuge ere bato pui tunarawo kakojiwu pudumiba boe kurireu mode ema. Eiamedu boe egore boe eimijera kurireu moduie pudumi nou tumedage epiji. 47Mare Jesus jorduware emeardae jamedu boeji. Nono Jesus ure tugeragu ia boe etonaregedu roguji. Makore ji rakojewo nono pudabo tugana pemegareu jagwai. 48Nono Jesus makore ture jorduwadowugei. Akore: – Meartorure iwu umode tugera podo boe etonaregedu apo dukeje unure tugera podo itabo jamedu. Meartorure iwu umode tugera podo itabo dukeje unure tugera podo nou ure itarego matowu apo jamedu. Tagaidumodukare tawo tagurido tamedage ekori pugeje, mare tamode tado itugaregedo tagi dukeje Pao Kurireu aidu kurimode tai boe eimijerage kurireuge ekori.
Ro Pegakare Paiwuge Emeardu Kurinure Pai
49João makore Jesusji. Akore: – Čerdure ia imeduji. Ure bope doge etawuje boe epiji akie tabo. Pamedia karegure ema. Dukodire čemagore ji uwo tugera ra nou turo piji makokawo akie tabo pugeje.
50Mare Jesus makore ei. Akore: – Piji. Ro pegakare paiwuge emeardu kurinure pai.
Ia Samaria Moto Kejewu Boe Etaidukare Jesusji
51Jesus jorduware meri puredugodure pudui turuduwo baruto. Dukodire ure tumeardae udo turugadu tuduwo Jerusalém ba kurireu ka. 52Ure tugeragu nouia ture jorduwadowuge pobedu dogei tuwo etudo tododai tuwadaru tabo toro Samaria moto kejewu ia boe eda ka ewo boe udo turugadu Jesus togi aregodumode toro kodi. 53Dukodire nou pobedu doge eture nou Samaria moto kejewu boe eda ka rugadu. Mare nou boe erduware Jesus utumoduie Jerusalém ba kurireu ka dukodire etaidukare Jesus aregoduwo pudae. 54Mare nou pobedu doge erduware nou boe emeardaeji dukodire ere tugirimi Jesus ae tuwo Jesus bie nou boe egore Jesus jituji. Ere Jesus bie dukeje nou Tiago, nou João emeardure egoino duji jamedu. Dukodire emagore Jesusji. Egore: – Čegimijera. Akaidukana čemagowo baruto joru butuwo nou boe ewugeje, uwo nou boe etagedudo?
55Mare Jesus akore: – Boro. Tameardae pegakaba ei.
56Dukejere Jesus uture ture jorduwadowugebo toro ia boe eda ka pugeje.
Ia Boe Etaidu Jokodukare Tugoduwo Jesus Apo
57Jesus kodure awaraji dukeje ia imedu aregodure ae. Makore ji. Akore: – Itaidure ikoduwo akabo rugadu atumode kaboe ka.
58Jesus makore ji. Akore: – Okwa doge emode tamudo tiari poro ja tada. Kiebarege emode tamudo tuwaradu ja tada jamedu. Imedu Onaregedu nure imi. Mare iwai bokware dukodire imode itamudo tadaboe bokware.
59Dukeje Jesus makore ia imeduji. Akore: – Ako itabo.
Mare nou imedu akore: – Ikodumode akabo rugadu mare kajao. Aino kuri aino itumode iogwa uwai ka. Iogwa bire dukodire iwo iogwa tugu mototo jao. Dukejere ikodumode akabo akodure jiboe ka.
60Jesus akore: – Bireuge etugudumode mototo bireugebo mare awiapagakaba ei. Atudo epiji ia boe eda ka awo nou boe ewie boe eimijera kurireu moduie Pao Kurireuče rugadu duji.
61Ia boe makore Jesusji pugeje. Akore: – Ikodumode akabo rugadu. Mare kajao. Iwo ikirimi iwai ka jao ikimaduwo iwobebo.
62Mare Jesus makore ji. Akore: – Ia boe aidumode tumaragoduwo motoji tuwo nou merirido moto kado kuwaru apo dukeje umodukare tuie mekido tododaiwu moto piji tuwo nou ture kadowu moto jetorodo. Aiwomodukare tuibagi. Tarodo nono nou umode moto kadowu ro mogadure. Mare umode moto kadowu ro ji karega inagoino. Tamaragoduwo Pao Kurireu ai tawo boe ewie boe eimijera kurireu mode Pao Kurireuče. Dujire inagoino. Boe etaidumode tumaragoduwo Pao Kurireu ai dukeje ekawo tugera ra Pao Kurireu piji tuwo tugirimi turo pegareu ka pugeje. Dujire inagoino. Emode tugera ra Pao Kurireu piji dukeje Pao Kurireu umodukare tudugaregedo emage.
10Jesus Ure Ime Etudo Tuwadaru Tabo
1Jesus ure tugeragu imei pugeje tuwo etudo tuwadaru tabo boe etae. Enodo padure kejewugere setenta e dois. Ure edo pobe čai čai je puapo tudumodewu ka. 2Makore ei. Akore: – Boepa kurire rugadu. Nou boepa tadaboe ure turugadu boe ewo kado. Mare nou umode boepa tadaboe kadowuge emagakare. Dukodire tamagodo baruto Pao Kurireu bagai. Boepa jiwu boe eimijera kurireu nure ema. Tamagodo ji uwo nou maragodure boepa jiwuge emagado etuwo boepato ewo boepa tadaboe kado rugadu.
Mare boepa remawu ji karega Jesus akoino. Meartorumode Pao Kurireu jiwugeire akoino. Boe emode boe erduwado Pao Kurireu bataruji dukeje emeartorumode ji, Pao Kurireu umode ekinorudo rugadu. Dujire akoino.
3Nono Jesus makore ei pugeje. Akore: – Nou imode tadudo etaewuge ere nono rie doge emogadure. Mare tagire tare nono ovelha doge emogadure. Mare barogo remawu ji karega inagoino. Tameardae pegareu bokware. Dujire inagoino. Mare nou tadumode etaewuge emeardae pegamode tai rugadu. Dujire inagoino. Ča tadudo toro boe ewagai. 4Mare tadukaba ia diero tabo. Tadukaba marenaru ukudau areia meture tadawu kadarabo tabo. Mare tadudo tu nou meture tawuretadau tawure okeakejewu tabo. Tadukaba ia metia tabo pugeje. Tagaba tawuredo awara kajeje tagimaduwo ia boebo. 5Tagaregodumode nou boe ewai ka dukeje tagimadudo nou boebo. Tamagodo aino ei: “Boe epemegawo awu bai tadawugei.”
6– Tamagomode aino nou boei dukeje tarduwamode ei. Etaidure tuwo tubemegado boei dukeje tawadaru pemegareu maku etai Pao Kurireu uwo boe pemegado ei. Mare etaidumodukare tuwo tubemegado boei dukeje tagaba tawadaru pemegareu maku etai jamedu. 7-8Nou boe etaidumode tai dukeje tabaduwo nou ewai keje. Tabadu paga paga kaba ia boe ewai keje. Nou aidure taiwuge ewai kejere tabaduwo. Tagwagedo nou emode maku tagaiwu tageji. Taeku irukaba nou emode maku tagai boeji. Tagududo nou emode maku tagaiwu boeče. Nou tagwagere jiboe, nou tagudure čewu makudure tagai tamaragodae moriče. 9Tawo nou boe eda kejewu kogodureuge epemegago. Tamagodo nou boei Pao Kurireu umoduie boe eimijera kurireudo pudumi kuri aino. 10Mare tagaregodumode ia boe eda metia ka dukeje etaidumodukare tugimaduwo tagabo dukeje tagaba taremo ewaito nou boe eda keje. Dukeje toro bawadu keje tagagomode aino ia boe ewiagai. 11Tamagodo aino ei: “Čedaregodure čewo boe ewie Pao Kurireu umoduie boe eimijera kurireudo pudumi kuri aino. Mare ia tagi tawiapagakare čewadaruji. Dukeje čemode čewure okeakejewu to pui taegai čewo nou moto urugudu tawuje čewure okeakejewu piji nou boe erduwo Pao Kurireu aidukare tarore aino čei duji.” Ainore tagagomode ei. 12Mare imode tawie. Pao Kurireu okudugodumodukare nou aidukare taiwugei. Toro ia meri keje aiwomode boe eiamedu boe erore jiboeji tuwo nou erore jiboe morido etai. Marigudu nou Sodoma kejewuge ero pegare. Dukodire nou meri keje Pao Kurireu umode boe pegado nou Sodoma kejewugei ero pegareu moriče. Mare nou aidukare taiwuge boe eire Pao Kurireu ro pega kuričigomode nou Sodoma kejewuge ekori.
Ainore Jesus akore nou setenta e dois boe doge ewiagai.
Nou Ba Kurireu Kejewuge Emeartorukare Jesusji
13Nono Jesus makore nouia boei. Akore: – Iro rakare Corazim ba kurireu keje iwo nou boe erduwado i. Mare emeartorukare i. Dukodire boe pegamode ei rugadu. Iro rakare Betsaida ba kurireu keje iwo nou boe erduwado i. Mare emeartorukare i. Dukodire boe pegamode ei jamedu. Marigudu rugadu Tiro ba kurireu kejewuge emeartorukare Pao Kurireuji. Marigudu rugadu Sidom ba kurireu kejewuge emeartorukare Pao Kurireuji. Nou Tiro ba kurireu kejewuge, nou Sidom ba kurireu kejewuge erdumode nou Corazim ba kurireu kejewuge erdure jiwu iro rakareuji dukeje ekiarigodumode turo pegare jiboeji rugadu. Emode tugera ra turo pegareu piji. Emode jorugudu bu taora keje tuwo boe erduwado tugiarigodure turo pegareu boe jituji tuwo tugera ra turo pegareu piji. Mare erdukare i, erdukare iro rakareuji dukodire erduwakare i. Ekare tugera ra turo pegareu piji rugadu. Mare kočare Corazim ba kurireu kejewuge, Betsaida ba kurireu kejewuge, erdure iro rakareuji mare du inodu tabo ekiarigodukare turo pegareuji. Etaidukare tuwo tugera ra turo pegareu piji rugadu. 14Mare Pao Kurireu ure ia meri tawuje taiwowo boe eiamedu boe ero pegareu bagai nou meri keje. Mare nou Tiro ba kurireu kejewuge emeartorukare Pao Kurireuji dukodire Pao Kurireu umode boe pegado ei nou makore kejewu meri keje. Sidom ba kurireu kejewuge emeartorukare Pao Kurireuji dukodire Pao Kurireu umode boe pegado ei jamedu nou makore kejewu meri keje. Mare Corazim ba kurireu kejewuge, Betsaida ba kurireu kejewuge erdure iro rakareuji mare du inodu tabo emeartorukare i. Dukodire Corazim ba kurireu kejewuge eire, Betsaida ba kurireu kejewuge eire, Pao Kurireu ro pega kuričigomode nou Sidom kejewuge ekori, nou Tiro kejewuge ekori jamedu. Pao Kurireu romode aino ei toro ia meri keje. Nou makore kejewu meri keje umode boe pegado ei rugadu. 15Cafarnaum ba kurireu kejewuge emeartorure tu pudui turuduwo baruto. Mare pagatu je. Pao Kurireu umode ewarigu toro bope doge eda kejewu joruto nou taiwomode boe ero pegareu bagaiwu meri keje.
16Nono Jesus makore ture jorduwadowugei. Akore: – Biapagare taiwuge ewiapagare i jamedu. Jordu pegare taiwuge erdu pegare i jamedu. Jordu pegare iwuge erdu pegare ure itarego matowuji jamedu.
Uture Jesus Bataru Tabowuge Ere Tugirimi Tuibagi Jesus Ae
17Uture Jesus bataru tabowuge ere tugirimi tuibagi Jesus ae. Enodo padure kejeboere setenta e dois. Egarere pudui taregodure dutabo rugadu. Egore: – Čegimijera. Čemagore bope dogei akie tabo ewo tudawuje boe epiji dukodire emeartorure čewadaruji rugadu!
18Jesus akore ei: – Iordure bope doge eimijera pegareu Satanás buture baru piji duji. Buture nono boeiaragudu butu mogadure. 19Tawiapaga pemegado awu iwadaruji. Ire tarduwado. Ire ia iraga maku tagai. Dukodire taragare jordu pegare paiwu Satanásji. Dukodire čare boe pegareu umodukare tagogorido. Awagu umodukare toedo tai. Betaga umodukare tudugo tugu tado. 20Bope doge etuwaire emeartorure tai mare taegaregodukaba nou inoduji. Taiamedu boe taegaredo tai nou tagie padure bapera keje baru tada kodi.
Jesus Jakarere Pudui
21Nou meriji Pao Kurireu Uwari ure Jesus jakaredo pudui rugadu. Dukodire Jesus makore Pao Kurireu bagai baruto. Akore: – Iogwa. Baru tadawuge, moto kejewuge eiamedu boe eimijera kurireu nure aki tu rugadu. Are nou mugukare bapera kejewuge erduwado. Nou are erduwado jiboe are biado jorduwareuge epiji marigudu. Are biado nou mugure bapera kejewuge epiji jamedu. Mare are mugukare bapera kejewuge erduwado. Dukodire ikimadure toro awagai. Are nou ameardae jetudo pudui rugadu akaidu tabo.
22Jesus ure nou tuwadaru iado tumagore tuo jitu keje makore nou boei. Akore: – Iogwa ure boe jamedu boe maku tu inai. Tu Pao Kurireu jorduware nou Tonaregeduji. Tu nou Onaregedu jorduware Tuoji. Dukodi nou Onaregedu umode nou taidure jiwuge erduwado Pao Kurireuji jamedu.
23Nono Jesus ure tumegido nou ture jorduwadowuge etae. Dukeje makore ei. Akore: – Tardure irore jiboeji dukodire boe pemegare tai. 24Jawu pawobe emagore Pao Kurireu bataru jiwuge etaidure tuiorduwo i nou itaregodumode kejewu meri keje tuiorduwo nou tardure jiwu irore jiboeji. Mare ewire marigudu dukodire erdukare i. Jawu pawobe eimijera kurireuge etaidure tuiorduwo i nou itaregodumode kejewu meri keje tuiorduwo nou tardure jiwu irore jiboeji. Mare ewire marigudu dukodire erdukare i. Etaidure tumearduwo tameardure jiwu imagore jiboeji. Mare emeardukare ji, ewire kodi.
Samaria Kejewu Imedu Pemegareu O Bakaru Reo
25Ia meri keje ia jorduware Pao Kurireu o bakaru jiwu unarare Jesusji: – Nuba iromode iewoduwo pugeje iragojewo Pao Kurireu apo baru tada jii toro rugadu?
Mare pagatu jere ure tunarado Jesusji. Aidure tuwo Jesus barigu boeto Jesus makowo ia tuwadaru pegareuji nono tumago pegawo Jesusji.
26Jesus akore: – Nuba Pao Kurireu bataru akore boe eroiago? Nuba ameardaere ji?
27Nou imedu akore: – Pao Kurireu makore pai pameardu kuriwo Pao Kurireuji paraga tabo, pameardae pemegareu tabo, parore jiboe jamedu boe tabo.10.27 Awu bataru padure Deuteronômio 6.5 keje. Makore pai pameardu kuriwo pamedagei nono pameardu kurimode pai dumogadure.10.27 Awu bataru padure Levítico 19.18 keje.
28Jesus akore: – Boe jokodu jire akagoino. Aromode aino dukeje aragojemode Pao Kurireu apo du akedumodukare rugadu.
29Mare nou imedu aidukare turo pemegawo tumeardae pemegawo tumedagei. Dukodire unarare Jesusji pugeje. Akore: – Kaibowugeba imedage mode emage rugadu?
30Nono Jesus akore: – Ia imedu ure turawuje Jerusalém ba kurireu piji tuduwo toro Jericó ba kurireu ka. Nou awara keje iwogureuge eiwogure nou imeduji. Ere ukudau areia tawuje piji tugiwoguwo ji. Ere boeto ji. Ere kugudugodudo. Nono dukeje eture piji. Nou imedu bigodunure. Boe etaiwomodukare ji puredugodure tuwiwo kodi. 31Ča ia ure Judeu doge enomea maku Pao Kurireu aiwu imedu kodure nou awaraji. Jordure nou ere boeto jiwu imeduji mare ure tumegido awara okwa abowu ka. Aidukare tuwo tugera maku ai. 32Dukeje ia Levi uwobe imedu kodure nono pugeje. Aiwore ji mare ure tumegido awara okwa abowu ka jamedu. 33Nono ia moto tuginaiwu kejewu imedu kodure nou awaraji. Samaria moto kejewu nure ema. Jordure nou imeduji dukeje okudugodure apo. Jorduwakare ji mare okudugodure apo, dukodire ure tugera maku ai. 34Ure tuburedo ji. Iogore nou epae oiaji. Dukejere ure barigu tagu kuwaru ao ka. Nono ure reko toro boe enudumode boe enogwagemode kejewu bai ka. 35Nou barogwato ure dierodo pobe uwaire bai čewu ai jetuwo nou imeduji. Akore: “Imode ikirimi dukeje imode aeture jidu morido akai pugeje.”
36Nono Jesus unaragodure nou imeduji. Akore: – Kaibowu imedu ba ure timediado nou imedu koridodureuče?
37Nou jorduware Judeu doge eno bakaru jiwu akore: – Nou Samaria moto kejewu imedure jeture nou imedu koridodureuji kodire ure timediado ema.
Jesus akore: – Toro. Arodo nono nou Samaria moto kejewu imedu ro mogadure.
Jesus Uture Marta, Maria Ewai Ka
38Jesus uture pugeje ture jorduwadowugebo. Etaregodure ia boe eda ka. Nou boe eda kejere ia aredu mugure. Iere Marta. Imadure ebo. Makore ei enogwagewo tuwai keje. 39Nou aredu uwie iere Maria. Jesus ure turemo ewaito dukeje Maria ure tumugudo nono Jesus jokorai tuwiapagawo Jesus bataruji rugadu. 40Marta maragodu kimore tumugure kejewu bai tada tuwo tuge udo turugadu, tuwo boe jamedu boe udo turugadu. Mare nou uwie ukare tugera maku ai dukodire korigodure tuwie areduji. Dukodire Marta mako pegare tuwieji Jesus biagai. Akore: – Ikimijera nure aki. Mare awu iwie ukare tugera maku inai. Imire ire boe jamedu boe towuje ikinaigodu. Kočare amagokare ji uwo tugera maku inai. Amagodo ji uwo tugera maku inai rugadu.
41Mare Jesus makore Martaji. Akore: – Amororamagadu kurire amaragodae jamedu boeji. 42Mare awie Maria meardae pemegare ameardae kori. Kodire ure tumugudo iogorai tuwiapagawo imagore jiboeji. Boe emodukare nou biapagare jiboe tawuje aora piji rugadu. Dukodire boe emeardaemode tuwiapagawo iwadaruji nono nou Maria meardae mogadure, dukeje nou emeardae koiare umode boe pemegado boei.
11Jesus Ure Boe Erduwado Tumagowo Baruto
1Ia meri keje Jesus makore baruto tuo bagai. Ure jorduwadowuge eragojere nono apo. Ia akore: – Čegimijera. Čerduwado čemagowo baruto nono João Batista ure jorduwadowuge emogadure.
2Jesus akore: – Ainore tagagomode baruto. Iogwa Kurireu. Mugure baru tadawu nure aki. Boe emago pemegawo akieji tuwo boe emeartorudo tu ai rugadu. Boe emeartoruwo awadaru jamedu boeji tuwo tugimijera kurireudo aki rugadu. Akaregodu pemegado aro pemegareu tabo mato moto ka ameardae rugadu boe jetuwo pudui rugadu, nono aro mogadure toro baru tada dumogadure. 3Čege maku čenai meri jameduji. 4Awiagodudo čero pegareu piji nono čewiagodure ro pegare čeiwuge ero piji dumogadure. Iage etaidumode tuwo tumeardae pegareu maku čenai tuwo čero pegado. Čeginorudo epiji čewiapagakawo nou emeardae pegareuji. Čeginorudo boe pegareu piji rugadu.
5-6Nono Jesus makore ture jorduwadowugei pugeje. Akore: – Ia boečo aregodure toia ka dukeje imedu utumode timedia uwai ka tumagowo timediaji ia uke amireu bagai. Akore: “Me. Imedia aregodu. Utu jaere tugiriadu tabo mato iwai ka. Mare ike bokware. Ia ake amireu udo pobe metia bokware inai jao. Barogwato imode ia maku akai tuibagi pugeje.” 7Mare nou imedu umodukare tie bu. Rakojemode tu tuwai ja tada tumago tabo bataru jipagi. Akomode: “Boro. Akaradaino ipiji. Ire iwai baiporo mi marigudu. Itore enudunure. Ipadure ipa kamoreu keje marigudu iwo itamudo. Imodukare ie bu iwo iaboe maku akai rugadu. Atudo iwai piji.” 8Mare nou imedu utumodukare nou timedia uwai piji rugadu. Pogurukare togwamagudu raiwo nou imeduji ia uke amireu bagai. Nono nou tumagore dutabo ure nou timediado tie bu pudae rugadu. Nono nou metia ure nou imedu makore bagaiwu amireu maku ai rugadu. 9-10Imedu rore aino. Pao Kurireu ro kodumode nou imedu ro kori. Dukodire imode tawie. Pao Kurireu aidure tuwo boe emagore bagaiboe maku boe etai rugadu. Dukodire tagogwamagudumode Pao Kurireuji iaboe bagai dukeje Pao Kurireu umode tamagore bagaiboe maku tagai rugadu. Pao Kurireu aidure tuwo boe erduwado pudui. Dukodire taemarumode Pao Kurireu bagai dukeje umode tarduwado pudui rugadu. Pao Kurireu aidure tuwo tuwai poro jado baru tada tuwo boe edo turemo baruto. Dukodire tamode tagera to Pao Kurireu uwai poroji dukeje umode tuwai poro jado tagai rugadu. Mare bai poro ji karega inagoino. Boe emeartoruwo Pao Kurireuji rugadu. Dujire inagoino.
11– Ro pegareuge erduware turo pemegawo torei. Dukodire tagore emagomode tai karo bagai tuge boei koia. Nono tamodukare awagu maku etai. Tawogumode karo bagai ekeče. 12Tagore enogwamagudumode kagariga ba bagai tuge boei koia dukeje tamode maku etai. Tamodukare betaga maku etai rugadu. 13Ro pegareuge nure tagi mare du inodu tabo tarduware taro pemegawo tagorei tawo eke pemegareu maku etai. Tarduware tawo boe pemegareu maku tagore etai. Mare Pao Kurireu pemegare rugadu. Dukodire umode boe pemegareu maku boe etai rugadu du kodumode nou tare maku tagore etaiboe kori. Umode Tuwari maku okwamagudure puduiwuge etai rugadu.
Boe Egore Bope Uwari Kurireu Belzebu Metuie Jesus Tada
14Jesus ure bope uwari pegareu tawuje imedu piji. Nou bope uwari ure nou imedu mako bokwado. Mare Jesus ure nou bope uwari tawuje piji dukodire nou imedu makore pugeje. Boe erdure Jesus rore aino duji dukeje erore ta je. 15Mare iage emeartorukare ji. Dukodire egore: – Bope doge eimijera pegareu Belzebu11.15 Bope doge eimijera kurireu ure mitotu je mare iere pobe. Iere Satanás. Iere Belzebu jamedu. meture Jesus tada dukodire ure turaga maku Jesus ai Jesus uwo bope uwari pegareu tawuje boe epiji.
16Ia meartorukare Jesus jiwuge etaidure tunarawo Jesusji tuwo Jesus barigu boeto. Enogwamagudure Jesusji uwo ia turo rakareu to tiagai tuiorduwo nouia ro rakareu aregodure rugadu Pao Kurireu piji du bagai. 17Mare Jesus jorduware emeardae pegareuji. Dukodire makore ei. Akore: – Boe epomodukare puapo dukeje emeardaere tu turugoduwo pui dukeje etagedumode. Boe erugodumode tuwobei dukeje emode tugera ra pubiji rugadu. 18Ča meartorure Satanás jiwuge epomodukare puapo dukeje emeardaere tu turugoduwo pui dukodi etagedumode. Kočare tagagore nou Satanás raka taboie ire bope uwari pegareu tawuje boe epiji. 19Mare nou tare jorduwadowuge nuba erore tuwo nou bope uwari tawuje boe epiji? Pao Kurireu raka tabore eroino kana? Tu Pao Kurireu rakare tuwo bope doge etawuje boe epiji rugadu. Dukodire nou tare jorduwadowuge egomode pagaie tagagoino, Belzebu raka tabo karega ire bope uwari pegareu tawuje boe epiji rugadu. 20Pao Kurireu koiare ure turaga maku inai iwo bope doge etawuje boe epiji rugadu. Dukodire boe erdure Pao Kurireu ro rakareuji rugadu. Turore aino dutabo Pao Kurireu makonure boe ewagai ewo tugimijera kurireudo tu pudumi rugadu.
21– Tugobaigare rakareu umode tuwaiga pemegado rugadu. Umode tudariga merido tietu pemegawo tuwaiji, tietu pemegawo toeji. 22Mare iwogureu jorduware turagamode ji dukeje umode tubodo apo rugadu. Umode tugobaigare butudo dukeje umode tugeragu uwaigaji piji, utariga kurireuji piji jamedu. Umode tugeragu nou tugobaigare oeji tuduwo tabo toro tumedage etae tuwo pedo pui.
23– Aidukare iwu aidumode turo pegawo i tuwo iro pegado. Ukare tugera maku inaiwu umodukare boe etarego itae. Umode boe edo taodo ipiji.
Bope Uwari Umode Tugirimi
24Jesus mako kimore boei. Akore: – Bope uwari pegareu umode tudawuje ia imedu piji dukeje utumode toro boe maereu ka taiwo tabo tumode tamudo kejeboe bagai. Jordumodukare taidure jiboeji dukeje meardaemode tuwo tugirimi nou tumedure tadawu imedu bagai pugeje tuwo turemo to pugeje. 25Dukodire nou bope uwari pegareu umode tugirimi nou tumedure tadawu imedu ae rugadu. Aregodumode dukeje jordumode ji pemegare duji. Jordumode ji ure nono tuwai motureu mogadure duji. 26Dukejere utumode toro tumedage bope doge ewagai. Enodo padure sete. Makomode ei etuwo pudabo toro nou imedu ae. Nono emode turemo nou imeduto pugeje. Dukodire boe pegamode nou imeduji rugadu. Boetojiwu meture tadawu bope uwari ure mitotu je. Aino čare bope doge enodo padu kejewumode oito nou imedu tada. Dukodire boe pegamode nou imeduji rugadu.
Jesus Ure Boe Erduwado Egaregodu Remawuwo Pudui
27Jesus ure nou tuwadaru akedudo dukeje, nou boe etoiadada ia aredu ure tumago rakado toro Jesus ae mare mako pemeganure ji. Akore: – Ače maragodu rakare tuwo arijodudo. Kurijirigodure awoduwo. Ure akogwagirido. Mare aino čare boe pemegare ačeji rugadu. Jakarere pudui rugadu arore jiboeji, amagore jiboeji.
28Jesus makore nou aredu bataru jipagi. Akore: – Boro. Boe pemegamode biapagare Pao Kurireu bataru jiwugei, meartorure Pao Kurireu bataru jiwugei. Egare remawumode pudui rugadu.
Boe Emagore Ia Jesus Ro Rakareu Bagai Pugeje
29Boe emagare nono Jesus apo. Ere taiado apo rugadu tuwiapagawo Jesus bataruji. Mare pagatu jere eroino. Etaidukare tumeartoruwo Jesus bataruji. Nono Jesus akore: – Aino čare boe emeardae pegare rugadu, ero pegare rugadu. Ainore tameardaere jamedu. Tamagore i iwo ia iro rakareu towuje taegai tarduwo iro rakareuji tarduwawo kaboba nuie imi. Mare pagatu jere tagagoino. Tardure iro rakareuji marigudu. Mare tagaidukare tarduwawo i. Tagaidukare tameartoruwo i rugadu. Dukodire iromodukare ia iro rakareuji taegai pugeje. Mare boemode i nono boere Jonas jitu mogadure. Dukejere boe erduwamode i rugadu. 30Marigudu Pao Kurireu ure Jonas tawuje karo kurireu kuri piji turo rakareu tabo Jonas utuwo Nínive ba kurireu ka Pao Kurireu bataru tabo. Dukodire nou Nínive kejewuge erduware boe jokodu jire Jonas akoino pudui duji. Pao Kurireu umode itawuje bireuge eda piji turo rakareu tabo jamedu dukodire tarduwamode boe jokodu jire inagoino tai duji rugadu. 31Marigudu Sabá moto kejewuge boe eimijerago kurireudo aidure rugadu tuiorduwawo Judeu doge eimijera kurireu Salomão jorduware jiboeji. Dukodire ure tudawuje to moto piji tuduwo toro Salomão uwai ka tumearduwo Salomão makore jiboeji. Mare boe eimijera kurireu nure imi. Iro kodure Salomão ro kori. Iorduware jiboe kodure Salomão jorduware jiboe kori. Mare du inodu tabo tagaidukare tameartoruwo i. Toro ia meri keje Pao Kurireu umode boe eewodudo pugeje taiwowo boe ero pegareu bagai tuwo boe pegado ei ero pegareu moriče. Nou meriji nou Sabá moto kejewu boe eimijerago aredu mako pegamode tai tawiapagakare awu iwadaruji kodi. 32Marigudu Jonas uture Nínive ba kurireu ka tuwo nou ba kurireu kejewuge ewie Pao Kurireu bataruji. Emeardure Pao Kurireu bataruji dukodi ekiarigodure turo pegareuji. Ere tugera ra nou turo pegareu piji rugadu tumeartoruwo tu Pao Kurireuji. Mare boe eimijera kurireu nure imi. Iro kodure nou Jonas ro kori. Iorduware jiboe kodure Jonas jorduware jiboe kori. Mare du inodu tabo tagaidukare tameartoruwo i. Tagaidukare tawo tagera ra nou taro pegareu piji rugadu. Toro ia meri keje Pao Kurireu umode boe eewodudo pugeje taiwowo boe ero pegareu bagai tuwo boe pegado ei ero pegareu moriče. Nou meri keje nou Nínive kejewuge emago pegamode tai tawiapagakare awu iwadaruji dukodi.
Boe Erdure Jesusji Rugadu
33Jesus mako kimore boei. Akore: – Boe emode jorugu biado dukeje urugumodukare. Boe emode pori bu jorugu aogeje dukeje urugumodukare. Mare boe emode jorugu bararedo, uruguwo pudui boe ewo turemo tuwaito. 34Tuioku tabore boe erdure boeji. Mare boe eku pegare dukeje erdumodukare boeji. Imagore jiboe ure nono boe eku mogadure. Mare boe eku ji karega inagoino. Boe emeartorumode tu imagore jiboeji dukeje boe emeardae kurimode rugadu. Dujire inagoino. Mare boe emeartorumodukare imagore jiboeji dukeje emeardae bokwamode rugadu. Dujire inagoino. 35Dukodire čare tameartorudo imagore jiboeji. Tagaidumodukare tameartoruwo imagore jiboeji dukeje boečomode tai rugadu. Mare boečo ji karega inagoino. Tarduwa bokwamode taro pegare jiboeji rugadu. Dujire inagoino. 36Mare tameartorumode imagore jiboeji dukeje jorugumode tai. Mare jorugu ji karega inagoino. Tameardae pegareu bokwamode pugeje. Dujire inagoino. Tagaidumodukare taro pegawo pugeje. Taro pemegamode rugadu. Dujire inagoino.
Jesus Mako Pegare Fariseu Dogei, Mako Pegare Jorduware Judeu Doge Eno Bakaru Jiwugei Jamedu
37Jesus ure nou tuwadaru akedudo dukeje ia fariseu imedu makore ji utuwo pudabo toro tuwai ka okwagewo pudabo tuwai keje. Dukodire Jesus uture nou fariseu uwai ka. Ure turemo uwaito dukeje ure tumugudo ira keje togwagewo. 38Mare Jesus ukare tugera kabi nono Judeu doge ero mogadure. Nou fariseu jerore ta je tuiordure Jesus rore aino duji. 39-41Mare Jesus jorduware nou fariseu meardaeji. Dukodire akore: – Fariseu doge nure tagi. Tare taruwobo kabi tabagaga11.39-41 Taruwobo, brae egore: – prato. Tabagaga, brae egore: – copo. kabi tawo epemegado tarowo nono Pao Kurireu ure maku tagaiwu bakaru umogadure. Tare taragado tai tawo nou tagoroe kabi rugadu tabemegawo nono nou makudure tagaiwu bakaru umogadure taro boeji. Mare kočare tu tadadare tameardae pegareu meture. Tarduwa bokware! Tagare tameardae pegareu barigu tabiji. Tawiapagare tu tai tawo tagoe kurido tamedage ekori rugadu. Tagaidure tawo boe pegado boei, tawo boe rakado boei. Mare Pao Kurireu koiare ure boe jamedu boe towuje. Ure boe etowuje jamedu. Eire Pao Kurireu ure maku tagaiwu bakaru akoino jamedu boe ewo nono nou ture kabiwu turuwobo mogadure tubagaga mogadure jamedu. Mare tu boe eruwobo ji karega akoino. Tu boe epagaga ji karega akoino jamedu. Meture boe etadawu emeardae jire akoino. Ča meture taruwobo tadaboe maku marenarue doge etai. Padure tabagaga tadaboe maku marenarue doge etai jamedu. Taromode aino dukeje tabemegamode tarowo nono tago bakaru umogadure taro boeji. Mare nou tameardae pemegareu tabo tamode boe pemegado tai jamedu.
42Jesus mako raire nou boei. Akore: – Fariseu doge nure tagi. Tare tago boepa pijiwu boe aru rogu mori kurireboe kado puiato tu tu je tagomeawo iarogu tabo Pao Kurireu ai jamedu. Mare tameardaekare tawo taro jetorodo boei. Tameardaekare tameardu kuriwo Pao Kurireuji jamedu. Kodire boe pegamode tai rugadu. Tameardu kurido Pao Kurireuji. Taro jetorodo boei. Mare tawiagodukaba tawo nou mori kurireboe kado puiato tu tu je tagomeawo iarogu tabo Pao Kurireu ai jamedu11.42 “Dízimo” jire akoino. Akaiwodo Mateus 23.23 kejewu bataruji jamedu..
43– Fariseu doge nure tagi. Tadumode Judeu doge ere bato puiwu bai ka dukeje tare tageragu boe eimijera mugure kejewu iraji tamuguwo keje. Tadumode ba kurireu ka dukeje tagaidure boe emago pemegawo tai tagaidure boe ekimijeragewo tagi kodi. Dukodire boe pegamode tai rugadu! 44Tare nono bireuge emedure tadawu moto poro mogadure. Mare moto poro ji karega inagoino. Tabegareu meture tadada tameardae pegare kodi. Dujire inagoino. Boe erduwakare ia bireuge edaji dukodire emerumode bireuge etaoji. Erdumodukare bireu meture nou moto tada duji. Tare nono nou boe erduwakare jiwu bireuge eda mogadure. Mare bireuge eda ji karega inagoino tai. Boe erdukare nou meture tadadawu tameardae pegareuji. Dujire inagoino tai. Dukodire boe pegamode tai rugadu!
45Ia jorduware Judeu doge eno bakaru jiwu makore Jesusji. Akore: – Amago pegare fariseu dogei dutabore amago pegare čei jamedu.
46Jesus akore: – Jorduware Judeu doge eno bakaru jiwuge nure ia tagi. Mare boe pegamode tai jamedu. Tare boe erduwado bakaruji mare tawo boe pemegado ei karega. Tagogudukare boebo. Tagaidure tawo boe rakado boei rugadu. Tagare tagera maku boe etai rugadu. 47-49Marigudu Pao Kurireu makore tumoduie jorduware tuwadaru jiwuge etarego boe etae ewo boe ewie iwu bakaruji. Mare boe emoduie iage ewido. Emoduie boe pegado iagei jamedu. Ainore Pao Kurireu akore marigudu. Ainore mariguduwu tawobe erore rugadu. Ero pegare nou makore Pao Kurireu bataru jiwugei rugadu. Ere iage ewido rugadu. Aino čare tare tori motureu rakojedo nou bireuge etugudure towu moto keje boe erduwawo nonore nou makore Pao Kurireu bataru jiwuge bireuge emedure. Mare tameartorukare nou bitodureuge emagore jiwu Pao Kurireu bataruji. Dukodire boe erduware tameardaeji. Tameardaere nono nou tawobe mariguduwu emeardae pegareu mogadure rugadu. Tagaidure emeardae pegareuji rugadu. 50Dukodire Pao Kurireu umode boe pegado tai rugadu nou makore Pao Kurireu bataru jiwuge eiamedu boe ewi moriče. 51Tawobe ere ro pemegareuge ewido marigudu. Ere imedu Abel bito. Makore Pao Kurireu bataru jiwu boetojiwu nure ema. Ere makore Pao Kurireu bataru jiwu boigoduwu Zacarias bito jamedu. Ere nou Zacarias bito Pao Kurireu uwai jokorai rugadu. Nou Abel pijire jii nou Zacarias ae makore Pao Kurireu bataru jiwuge emagare rugadu. Mare tawobe mariguduwuge ere iage ewido jamedu. Dukodire awu maiwu pawobe emode mariguduwu jaoboe ero pegareu morido, aino kuri aino. Inure tawie boe remawuji rugadu. 52Taetu pemegare Pao Kurireu bataru padure bapera kejewuji. Taro pemegare nou baperaji rugadu. Tarduware Pao Kurireu bataruji. Mare du inodu tabo tarduwakare Pao Kurireu meardae remawuji. Dukodire tameartorukare ji. Tagagore taie boe erduwado Pao Kurireu bataruji. Mare tu tameardae jire tare boe erduwado. Pao Kurireu bataru remawu ji karega tagagoino boei. Dukodire nou tare jorduwadowuge erduwakare Pao Kurireu meardae remawuji jamedu. Dukodi čare boe pegamode tai rugadu.
53Jesus ure tuwadaru iado dukeje uture nou boe epiji. Dukejere nou fariseu doge, nou jorduware Judeu doge eno bakaru jiwuge emago pegare Jesusji rugadu. Eture rekodaji tunarawo ji dutabore ere tumago rakado ji boe jamedu boe bagai. 54Etaidure tuwo Jesus barigu boeto ia tuwadaru keje.
12Jesus Makore Boei Emeardae Kaiago Nono Nou Fariseu Doge Emeardae Mogadure.
1Boe emagare nono Jesus apo. Dukodire ere tuwuredo pu bure keje rugadu. Mare Jesus makore tu ture jorduwadowugei boetoji. Akore: – Taeku jado nou fariseu doge emeardaere jiboeji. Emeardae ure nono fermento mogadure. Mare fermento remawu ji karega inagoino. Emeardaere tuwo turo pegareu biado boe epiji tu tu je. Ere boe emeartorudo tu tuwadaruji mare emage emeartorukare nou tumagore jiboeji. Dujire inagoino. Tarokaba nono ero mogadure. 2-3Boe ero pegamode dukeje etaidumode tuwo nou turo pegareu biado boe epiji tagowo ro pemegareuge nuie pudumi. Mare Pao Kurireu jorduware ero pegareuji marigudu dukodire boe erduwamode nou ero pegareuji jamedu. Dukodire itaidure iwo tawie. Tarokaba nono fariseu doge ero mogadure. Tamago pegamode iaboeji boečoji dukeje Pao Kurireu meardumode rugadu. Toro ia meri keje boe eiamedu boe emeardumode nou tamagore jiboeji jamedu. Tamago podumode pui pu bijato ia tameardae pegareuji tawai tada mare Pao Kurireu meardumode nou tamagore jiboeji rugadu. Dukodire uwadodumode nou tamagore jiboe tabo boe eiamedu boe ewiagai. Dukodire inure tawie. Taro pegakaba, tamago pegakaba nono nou fariseu doge ero mogadure.
Boe Epagudumode Čeboe Reo
4Jesus mako kimore. Akore: – Imedage nure tagi. Iwo tawie. Tabagudukaba boeče. Tabagudukaba bope dogeče. Boe emode tawido mare eragakare tuwo tawarigu bope doge eda kejewu joru pegareuto. Bope uwari umode boe pegado tai mare rakakare tuwo tawarigu tieda kejewu joru pegareuto. 5Iwo tawie. Tabagududo tu Pao Kurireuče. Tu Pao Kurireu meardae koiare umode boe ewarigu bope doge eda kejewu joru pegareuto boe ewi keje. Dukodire inagoino tai. Tabagududo tu Pao Kurireuče. 6-7Mare tabagudu remawu ji karega inagoino. Taeku kidugo Pao Kurireuji tameartoruwo tu ji rugadu. Dujire inagoino. Tameartorumode tu Pao Kurireuji dukeje tamororamagadumodukare boe pega boeji pugeje. Dujire inagoino. Pao Kurireu jetu pemegamode tai rugadu. Dukodire tameartorudo tu ji rugadu. Dukodire inagoino tai. Ča kiebarege kugure emode ikera aboudure dukeje boe emode diero tori rogu udo pobe emoriče tuwo akirodo ei tugeče tuwo ekowuje. Nou kiebarege emori bokware. Mare du inodu tabo Pao Kurireu biagodumodukare nou kiebarege ekugure piji rugadu jii toro. Jorduware kiebarege eiamedu boei. Aidure kiebarege kugurei. Mare Pao Kurireu aidure tai du kodure nou kiebarege kugure eiamedu boe ekori. Dukodire jetu pemegamode tai rugadu. Jorduware tai rugadu. Jorduware tagao iku jamedu boeji. Jorduware nou inodu rogu boeji kodire jorduware nuba boe mode tai duji rugadu. Jetu pemegamode tai rugadu. Dukodire inagoino tai tabagudukawo boeče pugeje.
Nuba Boe Emeardaemode Jesusji
8Jesus mako kimore. Akore: – Imedu Onaregedu nure imi. Iwo tawie. Ia boe emagomode boe eiamedu boe ewiagai tuie tumagu inai tumeartoruwo tu i dukeje imagomode Pao Kurireu utugarege baru tadawuge ewiagai nou meartorure iwu nuie ema rugadu. 9Mare ia boe emagomode boe ewiagai tugaie tumagu inai, tumeartorukaie i dukeje imagomode Pao Kurireu utugarege baru tadawuge ewiagai nou meartorukare iwu nuie ema rugadu. 10Boe emago pegamode Imedu Onaregeduji mare toro ia meri keje ekiarigodumode nou tuwadaru pegareuji. Emagomode Pao Kurireuji biagoduwo nou tuwadaru pegareu piji. Dukeje Pao Kurireu biagodumode ewadaru pegareu piji rugadu. Mare ia boe emago pegamode Pao Kurireu Uwariji dukeje Pao Kurireu biagodumodukare nou ewadaru pegareu piji rugadu. 11Tameartorure i. Dukodire boe emode tugeragu tai tuwo tarego boe eimijerage etae etaiwowo taro pegareu bagai tuwo boe pegado tai tameartorure i dukodi. Emago pegamode tai mare tamororamagadukaba tamagowo ewadaru jipagi. 12Pao Kurireu Uwari umode tarduwado nou meriji tamago pemegawo ewadaru jipagi.
Ia Imedu Oe Kurireu Jorduwa Bokwareu O Bakaru Reo
13Boe emagare nono Jesus apo. Ia imedu makore Jesusji. Akore: – Ure boe erduwadowu nure aki rugadu. Čare inogwamaguduwo ai. Amagodo imanaji uwo iogware maku pudaiwu moto kado puiato uwo ia maku inai inoče jamedu.
14Jesus akore: – Itaidure ai. Mare umode boe enoe kado puiatowu boe eimijera karegure imi.
15Dukodire Jesus makore boe eiamedu boei. Akore: – Taeku jado. Boe emeardaere tu pudui tuwo toe kurido tumedage ekori rugadu. Taragado tai tarokawo nono nou boe ero mogadure. Tagoe kurimode mare tagoe umodukare tamugu pemegado. Boe enoe koia karega umode boe emugu pemegado moto keje tiegarere pudui dutabo.
16Nono Jesus makore ia bakaruji nou boe ewiagai. Akore: – Ia imedu oe kurire. O moto kurire. O boepa kurire rugadu. Nouia joruji ure kadoboe kurire rugadu. 17Ure boe jamedu boe tawuje nou to boepa piji dukeje makore tudada. Akore: “Imode biadowu towu bai kurikare iwo ire kadoboe jamedu boe jetudo ja tada. Ča nuba iromode?” 18Nono ure tumeardae tawuje pugeje. Akore: “Ainore iromode. Imode nou iwai jamedu boe butudo iwo ia iwai kurireu mugudo pugeje iwo ire kadoboe jamedu boe jetudo nou iwai kurireu maiwu ja tada, iwo inoe kurireu jamedu boe jetudo nou iwai kurireu ja tada jamedu. 19Dukeje inagomode iwaidigirire rugadu. Aino čare imode itamudo rugadu. Imaragodumodukare pugeje. Nono iagaremode inogwarimode nou inoe kurireu jamedu boeji. Joru makamode i mare inoe akedumodukare inoe kurire kodi. Čare iwadumode imedagebo. Inogwagemode. Ikudumode. Boe pemegamode i rugadu jii toro rugadu. Boe rakamodukare i pugeje.”
20– Ainore nou imedu akore. Mare Pao Kurireu makore nou oe kurireu imeduji. Akore: “Arduwa bokware. Awu boečoji awimode rugadu. Mare atumodukare nou akoe kurireu boe tabo. Nou akoe mugumode aiageje moto keje. Ča duboba umode tugeragu nou akoeji?”
21Nono Jesus makore pugeje. Akore: – Ainore boemode nou ure toe kuridowuge boe eiamedu boei. Ere toe kurido mare ewiapagakare tumeartoruwo Pao Kurireuji. Dukodire enoe bokwamode baru tada. Marenarue doge nure emage Pao Kurireu jakai.
Pao Kurireu Jire Pameartorumode
22Jesus mako kimore ture jorduwadowugei. Akore: – Tamororamagadukaba tage bagai, tagudau areia bagai. 23Pao Kurireu ure tadowuje. Ure tawodudo. Emare jetu pemegamode tai. 24Tagaiwodo awu kiebaregei. Ekare boe tugu. Ekare tugeragu boeji. Eke ja bokware. Eke muga bokware. Mare du inodu tabo Pao Kurireu koiare ure enogwagedo. Boe nure tagi. Pao Kurireu meardu kurire boei nou kiebarege ekori. Dukodire inagoino, jetu pemegamoduie tai. 25-26Pao Kurireu jorduware tawimode kejewu meriji. Tagi rema tarduwakare. Tamororamagadumode mare tamodukare tawimode kejewu meri raido toro tagododai tamugu raiwo moto keje. Dukodire inagoino, tamororamagadukaiago iaboe rogu bagai pugeje. Tameartorudo tu Pao Kurireuji. 27-28Tagaiwodo awu okureboeji. Emodure mare emage eigoia karega ere tumodudo. Pao Kurireu koiare ure awu okureboe emodudo aino. Mariguduwu Israel doge eimijera kurireu Salomão oe kuričigore dukodire meture jiwu ukudau areia moture rugadu. Mare motukare nono awu okureboe emodu mogadure. Ča okureboe emodure mare joru umode ekowu kuri je. Mare boe nure tagi. Pao Kurireu meardu kurire boei nou okureboe ekori. Dukodire umode tugera maku tagai rugadu. Dukodire inagoino tai tamororamagadukaba tagudau areia bagai, tameartoruwo tu Pao Kurireuji rugadu. Tameartorumode ji dukeje tamode nono awu okureboe umogadure jamedu. Pao Kurireu jetu pemegamode tai rugadu. Kočare tameartoru kurikare ji? 29Tamororamagadukaba nou tagwagemode jiboe bagai. Tamororamagadukaba nou tagudumode čeboe bagai. 30Mare meartorukare Pao Kurireu jiwuge ewiagorore tu nou tuge roguji tuge rogu bagai. Mare tameartorumode Pao Kurireuji dukeje tawiagoromodukare nou inoduji. Pao Kurireu jorduware kaba jiba tagaidure. 31Dukodire tameardae tawuje tawo tagimijera kurireudo tu Pao Kurireuče. Tamode tagimijerado ema dukeje umode tage jamedu boe maku tagai rugadu.
Baru Tadawu Boe Kurireu Remawu Reo
32Jesus mako kimore: – Tabagudukaba. Pao Kurireu aidure tuwo tagimijerado pudumi tuwo boe pemegareu maku tagai baru tada. 33Tagoe rugadu boe maku. Nou morire tamode maku marenarue etai. Taromode aino dukeje tanure tagoe kurireu jetudo baru tada. Toro tagoe akedumodukare rugadu. Toro iwogureu iwogumodukare nou tagoeji. Toro boreu umodukare nou tagoe pegado. 34Boe etaidure tu tuwo toe kurido woe moto keje dukodire ewiagoromode tu nou toeji woe rugadu. Nou boe ewiapagamodukare Pao Kurireu bataruji. Mare boe emode toe jetudo baru tada dukeje boe ewiagoromodukare ia moto kejewu toeji pugeje, boe ewiapagamode tu Pao Kurireu bataruji rugadu.
Boe Etugarege Pemegareuge Reo
35– Tado tarugadu tamaragoduwo Pao Kurireu ai. Tarodo nono boe eimijera utugarege ero mogadure. Ere tumaragodure tabowu tugudau areia metudo pudui. Enoredure jorugu tabo tumaragoduwo boečoji. 36Epagare tugimijera bagai. Ekimijera uture uwiremodewu bowadae ka. Mare aregodure tuibagi tuwai ka boečoji dukeje ure tugera to tuwai poroji. Nono utugarege ere baiporo jado kuri kuri je rugadu. 37Ekimijera aregodure dukeje jordure nou tudugaregei enudukare duji. Dukodire jakarere pudui nou tudugaregei. Nono utugarege egarere pudui rugadu. Egarere pudui nou tugimijera jakarere pudui dukodi. 38Ekimijera aregodukare kuri je. Boečo aregodure toia ka dukejere aregodure. Mare utugarege ere tudo turugadu tugimijera aregodu bagai rugadu. Dukodire egarere pudui rugadu. 39Uwaire bai čewu jorduwamode kaba meri kejeba iwogu kigodureu aregodumode. Dukeje umode tudo turugadu taiwo tabo nou iwogu kigodureu bagai, nou iwogu kigodureu ukawo turemo nou tuwaito. 40Ča iwo tawie. Tado tarugadu, taerodo tagaiwo tabo tabiji. Mare iwogureu bagai karega. Tado tarugadu Imedu Onaregedu togi. Tarduwakare kaba meri kejeba aregodumode dukodire inagoino tai, tawo tado tarugadu jii toro rugadu.
Boe Etugarege Ero Pemegawo
41Pedro unarare Jesusji. Akore: – Tu čei na akagoino? Boe eiamedu boei na akagoino nou bakaruji?
42Jesus akore: – Ča nuba boemode pemegareu jorduwareu boe etugareji? Ukimijera aidumode tuduwo toro ia moto ka dukeje umode nou tudugare pemegareu mugudo tumugato tudugarege eimijerawo ema uwo eke maku etai nou tudure jiwu meri keje. 43Nou utugare ro pemegamode meartorumode tugimijeraji jii toro tugimijera aregodumode kejewu meri ka dukeje jakaremode pudui rugadu. 44Dukejere čare nou boe eimijera umode nou tudugare jetudo toe jamedu boeji rugadu jetu pemegawo ji. Boe jokodu jire inagoino nou meartorure iwadaru jiwugei. 45Mare ia boe utugare meardae pegamode. Nou ukimijera utu jaemode jamedu dukeje aregodumodukare tuibagi kuri je. Nono nou utugare pegareu meardaemode tugimijera aregodumodukaie pugeje. Nono umode boeto nouia tudugarege imei, aremei jamedu. Nono maragodumodukare pugeje mare okwagemode, kudumode jamedu. Nono uke kurumode ji jamedu. 46Čare ia meri keje nou ukimijera aregodumode tuibagi pugeje. Mare nou utugare upagakare bagai. Jorduwakare aregodumode kejewu meriji. Nono nou boe eimijera jordumode nou tudugare ro pegare duji. Dukodire nou ukimijera umode nou tudugare bito. Umode bowuje rugadu. Nono umode nou tudugare mugudo meartoru bokwareugebo bope doge eda kejewu joru pegareu keje.
47– Ia boe utugare jorduware tugimijera meardaeji mare ukare turagado pudui tumeartoruwo tugimijera bataruji. Nono nou ukimijera umode boeto ji bukigu tabo turaga tabo rugadu. Umode boetodu kurido ji rugadu. 48Ia utugare jorduwakare nou tugimijera meardaeji dukodire ro pegare. Dukodire ukimijera umode boeto ji bukigu tabo jamedu mare umodukare boetodu kurido ji. Boe eimijera umode tudugare maragodae rogu maku ai dukeje nou ukimijera aidumode nou tudugare meartoruwo pudui tuwadaruji uwo nou tumaragodae rogu iado rugadu. Mare nou ukimijera meardaemodukare tuwo ia tumaragodae maiwu maku tudugare ai, jorduwamodukare tuwo towuje kodi. Mare boe eimijera umode tudugare jorduwado tumaragodae jamedu boeji dukeje nou ukimijera aidumode nou tudugare uwo nou tumaragodae jamedu boe towuje rugadu.
Boe Emeardaekare Nono Pumeardae Mogadure Jesus Makore Jiboeji
49Jesus mako raire boei kimo. Akore: – Itaregodure iwo joru barigu moto ka. Itaidure joru bariguduwo moto ka marigudu mare Iogwa aidukare raga. Mare joru remawu ji karega inagoino. Pao Kurireu umode boe pegado ro pegareugei. Dujire inagoino. Ro pegareuge ewarigudumode toro nou joru pegareuto. Dujire inagoino. 50Mare boe pegamode i boetoji dukodire ikiarigodure rugadu. 51Tameardaere itaregodure iwo boe epemegado tai. Ča itaregodure iwo boe pemegado boei rugadu. Mare ia boe doge emeartorumodukare i. Dukodire emeardaemodukare nono pumeardae mogadure imagore jiboeji. Dukodire boe epemegamodukare pui. 52Dukodi čare boe epomodukare puapo dukeje emeardaemodukare nono tuwobe emeardae mogadure. Emode tugera aboudure dukeje. Nou ime pobedu doge emeardae pegamode nouia tuwobe emeardaere jiboeji, dukodire emode tuiado pubiji. 53Ime emeardaemodukare nono tuo meardae mogadure. Dukodire nou etuo meardae pegamode nou tore imei. Areme emeardaemodukare nono tuje meardae mogadure. Dukodire nou etuje meardae pegamode nou tore aremei. Areme emeardaemodukare nono turagomage emeardae mogadure. Dukodire nou eturagomage emeardae pegamode nou tujarugomagei.
Ainore Boe Erduwamode Nuba Boemode Motoji
54Jesus mako kimore nou boei. Akore: – Tardumode ia boe tugu čoreuji baru tada kodure tagae duji dukeje tagagomode bubutumoduie rugadu. Nono bubuture rugadu. 55Bakuru urureu jetumode tai dukeje tagagomode awu meriji boeru butumoduie jamedu. Nono boerure rugadu. 56Tarduware tawo boe ewie bubutuji boeruji. Dukodire tagagore jorduwareuge nuie tagi. Nono tagagomode tarduwaie nuba boemoduie boei. Mare kočare meartorukare tuwadaru jiwuge nure tagi. Tagagore tarduwaie Pao Kurireu meardae remawuji. Tardure iro rakareu remawuji mare tarduwakare kaba jiba iroino. Dukodi čare tarduwakare Pao Kurireu meardae remawuji.
Boe Ewo Tubemegado Aidukare Puduiwugei
57Jesus mako kimore boei. Akore: – Kodiba tagare tameardae tawuje nuba boe ero pemegareumode? 58Ia boe aidumodukare ia arore pudui duji. Aidumode tuduwo akabo toro boe eimijera ae aiwowo aroji aro pegareu bagai. Mare amago pemegado ji tawo tameardae maku puai taro pegakawo pugeje tawo tabemegado pui. Mare amago pemegamodukare ji dukeje umode arego toro boe eimijera ae rugadu. Nou boe eimijera aiwomode arore jiboeji dukeje jorduwamode aro pegare jiboeji rugadu. Nono umode amagu tugobaigarege etai ewo atugu baičoreuto. 59Iwo awie. Amodukare apemegado nou korigodure aiwuji dukeje atugudumode baičoreuto rugadu. Aragojemode nono baičoreu tada jii amode aro morido du ka.
131Nou meriji ia boe ere Jesus bie. Egore: – Boe pega. Ia pawobe Galiléia kejewuge eiago boe egu barogo rogu kowu tomeawo Pao Kurireu bagai mare Roma pijiwu boe eimijera Pilatos ure ewido.
2Jesus akore: – Tameardaere nou pawobe Galiléia kejewuge bireuge ero pegaie nou tumedage ekori dukodire ewidodure aino? Ainore boe emeardaere. 3Mare imode tarduwado. Ero pegareu koia karega ewire aino. Paedure boe pegareu tada kodire boe ewimode. Iwo tawie. Tamodukare tagera ra taro pegareu piji dukeje tawimode jamedu nono ewi mogadure. 4Ia Jerusalém kejewuge ewire jamedu. Enodo padure dezoito. Edure Siloé tada Jerusalém ba kurireu keje. Dukejere ia mačebradu ričoreu buture ewugeje dukodire ure ewido. Boe egore nou boe ero pegaie nouia tumedage Jerusalém ba kurireu kejewuge ekori dukodire ewire aino. 5Mare iwo tarduwado. Du inodu kodi karega ero pegare tumedage ekori. Iwo tawie. Boe eiamedu boe ero pegare. Tagi jamedu. Tamodukare tagera ra taro pegareu piji dukeje tawimode jamedu nono nou enodo padure dezoito boe doge ewi mogadure.
Figo I Tudukare Rugadu
6Nono Jesus readodure ia to bakaruji nou boe ewiagai. Mare bakaru remawu karega. Readodure tuwo erduwado toro nouia Pao Kurireu meardaeji. Akore: – Ia imedu o boepare. Uva ikure nou boepa tada. Nono nou uva iku oiadada ia figo i rakojere jamedu. Nou ore boepa čewu aiwore nou figo ito ia tudu kurodu bagai mare jordukare ia tuduji rugadu. 7Dukodire makore tudugareji. Akore: “Jorure pobe metia bokware i itaiwo tabo nou figo ito. Mare iordukare ia tudu roguji. Dukodi awu figo i kado. Butudo. Rakojekawo nono ino boepa tada pugeje!” Ainore nou ore boepa čewu akore. 8Mare nou utugare akore: “Kajao. Imaragodumode nou figo iji awu joruji pugeje. Imode boe pemegado ji rugadu. Imode tapira pe bu nou figo i paru keje moto pemegawo nou figo iji tuduwo. 9Nono tudumode. Mare tudumodukare boeiwu joru keje dukeje pamode nou figo i kado rugadu.”
Ainore Jesus akore.
Jesus Ure Aredu Poru Pegareu Pemegago
10Ia sábado meri keje Jesus rakojere Judeu doge ere bato pui towu bai ja tada. Ure boe erduwado nono. 11Nono jordure ia aredu kogodureudoji. Bope ure pegado kejewu joru oto padure dezoito. Merukare tiedoro tabo. Roiwakare tuwo tiedorodo. 12Jesus makore bagai dukeje makore ji. Akore: – Ire akinorudo akogodae piji. Ire apemegago.
13Nono Jesus ure tugera bu nou aredu poru keje. Ča nou aredu pemegagodure tači je. Jakaregodure pudui rugadu. Mako pemegare Pao Kurireuji, Jesus rore aino pudui dukodi.
14Nou jeture nou bai jiwu boe eimijera korigodure Jesus rore aino Sábado meri keje duji. Dukodire makore nou bai tadawu boei: – Pao Kurireu makore pai pamaragodukawo sábado meri keje. Dukodire tagaregodukaba mato sábado meriji boe ewo tabemegago. Tagarego mato boe ewo tabemegago ia meri keje.
15-16Jesus akore: – Ča tameartorukare tamagore jiboeji jamedu. Tamode tagagu ie etarego pobo ka tawo ekududo poboče sábado meriji mare tardu pegakare nou tarore aino duji. Mare tagaidukare boe pemegawo awu areduji sábado meriji. Pawobe nure ema. Bope doge eimijera Satanás ure kogodudo marigudu. Kogodure oto padure kejewu jorure dezoito rugadu. Mare aino Pao Kurireu ure pemegago awu meriji. Mure kodiba tagaidukare pemegagoduwo sábado meriji? Tamagore Pao Kurireu makore jiboeji mare tameartorukare ji!
17Jesus akore aino dukeje nou aidukare Jesus jiwuge erduwakare tumagowo Jesus bataru jipagi. Dukodire epogurure tumagowo ia tuwadaruji pugeje. Mare boe eiamedu boe egarere pudui Jesus ro pemegare aino duji.
Mostarda A Boture
18Jesus akore: – Itaidure iwo tarduwado nuba nou ure tugimijerado Pao Kurireu čewuge ere. Nou Pao Kurireu utugarege emagakare mare ia meri keje Pao Kurireu utugarege emagagodumode rugadu. Ireadoduwo ia bakaruji tawiagai, dukeje tarduwamode kaboba jiba inagoino. 19Ia imedu ure ia mostarda a tugu to boepato. Nono boture. Ričodure rugadu. Nono i kurire, tugu kurire jamedu. Kiebarege ere tumugudo keje. Ere tuwaradu pemegado keje. Pao Kurireu utugarege ere nono nou mostarda a rogu mogadure. Mare mostarda a remawu ji karega inagoino. Ure tugimijerado Pao Kurireu čewuge eire inagoino. Emagakare mare ia meri keje nou Pao Kurireu utugarege emagamode rugadu.
Jesus Makore Fermentuji
20Jesus mako kimore ei. Akore: – Itaidure iwo tarduwado nuba ure tugimijerado Pao Kurireu čewuge emode. Nou Pao Kurireu utugarege emagakare mare toro ia meri keje nou Pao Kurireu utugarege emagagodumode rugadu. Ireadoduwo ia bakaruji tawiagai, dukeje tarduwamode kaboba jiba inagoino. 21Ia aredu ure fermento tugu trigo kuduto. Dukejere ure nou trigo udo amireuče. Nono nou fermento jore nou amireu jamedu boeto, dukeje ure nou amireu barodudo. Pao Kurireu utugarege ere nono nou fermento mogadure. Mare fermento remawu ji karega inagoino. Ure tugimijerado Pao Kurireu čewuge eire inagoino. Emagakare boetoji mare toro ia meri keje nou Pao Kurireu utugarege emagagodumode rugadu.
Baiporo Biagareu
22Jesus uture pugeje. Kodure Jerusalém ba kurireu kawu awaraji tuduwo Jerusalém ba kurireu ka. Boe eda jamedu boe keje ure boe erduwado. 23Toro ia boe eda keje ia boe enarare ji. Egore: – Ioguduba umode činorudo? Ure činorudowuge emagamodu kana?
24Jesus makore nou boei. Akore: – Pao Kurireu meardae ure nono baiporo biagareu ja mogadure. Boe emode turemo baiporo biagareuto taregoduwo Pao Kurireu ae. Mare baiporo remawu ji karega inagoino. Pao Kurireu meardae jire inagoino. Taragado tai tawo tameardae pemegado nono Pao Kurireu meardae mogadure tawo taremo baruto Pao Kurireu mugureu ka. Aidumode tuwo turemo baru tadawu Pao Kurireu uwai towuge emagamode rugadu mare eroiwamodukare tuwo turemo toro. Ekare tugimijerado Pao Kurireuče dukodire iage emodukare turemo rugadu. 25Pao Kurireu umode tuwai kejewu baiporo miwuje dukeje ia tagi tamodukare taremo baru tadawu Pao Kurireu uwaito rugadu. Mare baiporo remawu ji karega inagoino. Pao Kurireu jorduware jiwu meri jire inagoino. Toro ia meri keje Pao Kurireu umode tumeardae tawuje tuwo nou meartorukare puduiwuge ewarigu bope doge eda kejewu joru pegareuto. Dujire inagoino. Dukodire nou boe eroiwamodukare tuwo turemo baruto rugadu. Ia tagi tagare tagimijerado Pao Kurireuče. Tamagomode Pao Kurireuji: “Čeremo baruto čeragojewo čemedagebo baru tada.” Ainore tagagomode Pao Kurireuji. Mare umodukare taremo baruto rugadu. Pao Kurireu makomode: “Imedage karegure tagi. Iwobe karegure tagi.” Ainore Pao Kurireu akomode ia tai rugadu. 26Nono tagagomode: “Čenogwagere akabo. Čegudure akabo. Are boe erduwado čedabo čeda keje.” Ainore tagagomode. 27Mare Pao Kurireu makomode pugeje: “Iwobe karegure tagi. Tadudo ipiji. Ro pegareuge nure tagi.” Ainore Pao Kurireu akomode tai. 28Nou meriji tardumode Abraãoji, Isaqueji, Jacoji nono Pao Kurireu apo rugadu. Nou meriji tardumode nouia makore Pao Kurireu bataru jiwugei jamedu nono Pao Kurireu apo rugadu. Mare tawarigudumode toro bope doge eda kejewu joru pegareuto. Dukodire tagragudu rakamode rugadu. Tamode tago reko pui tawiri boe kori koia. 29Nou meriji Pao Kurireu umode boe eimijera kurireudo pudumi nono meartorure Pao Kurireu jiwuge etaregodumode Pao Kurireu ae moto jamedu boe piji. Nono emode tumugudo Pao Kurireu apo nono Pao Kurireu bowadae keje toro baru tada. 30Ia meartorukare iwuge enoe kurire woe moto keje mare nou meriji Pao Kurireu umode marenarue dogedo emage. Ia marenarue doge emeartorure i woe moto keje dukodire nou meriji Pao Kurireu umode enoe kurido rugadu nono Pao Kurireu muga keje.
Jesus Meardu Kurire Jerusalém Ba Kurireu Kejewugei
31Nono ia fariseu doge etaregodure Jesus ae tumagowo ji. Egore: – Atudo awu boe piji toro ia boe eda ka. Boe eimijera pegareu Herodes aidure tuwo awido.
32Jesus akore: – Herodes ro pegare nono okwa ro pega mogadure. Jerore turo pegawo tu tu je. Tadudo toro bagai tawo Herodes bie nuba iromode boei duji. Awu meriji, barogwato imode bope doge etawuje boe epiji. Imode boe epemegago jamedu. Boeiwu barogwato imode nou imaragodae iado. Biedu pemegado awu inagore aino duji. 33Mare iwo tawie. Iturumode Jerusalém ba kurireu ka awu meriji, barogwato, boeiwu barogwato jamedu. Mariguduwuge ere nouia makore Pao Kurireu bataru jiwuge ewido nono Jerusalém ba kurireu keje tu tu je. Dukodire itumode toro iwiwo nono jamedu.
34– Jerusalém kejewuge nure tagi. Tare nou mariguduwuge makore Pao Kurireu bataru jiwuge ewido. Tagidore tori tabo aregodure Pao Kurireu bataru tabowugei. Mare imeardu kurire tai rugadu. Kagariga umode tore ewiado tugana kuda tietu pemegawo ei. Itaidure irowo taiamedu boei nono nou kagariga ro moga torei dumogadure. Mare tagaidukare i. 35Dukodire Pao Kurireu mugumodukare Jerusalém kejewu tuwai tada pugeje. Iwo tawie. Tardumodukare i pugeje jii toro tameartorumode i du ka. Tagagomode: “Pagimijera reo! Aregodure Pao Kurireu meardae tabo. Pao Kurireu ro pemegawo ji.” Tagagomode aino i dukeje itaregodumode tagae pugeje.
141Ia sábado meri keje Jesus uture toro ia fariseu uwai ka togwagewo apo. Judeu doge eimijera nure ema. Dukodire boe etaiwore Jesus makore nou boe eimijera jituji. Ia fariseu doge edure nono jamedu. Ia jorduware Judeu doge eno bakaru jiwuge edure nono jamedu. 2Nono ia imedu aregodure Jesus ae nono nou fariseu uwai ka. Pogora bokodure. Kana bokodure jamedu. 3Nono Jesus unarare nou fariseu dogei, nou jorduware Judeu doge eno bakaru jiwugei jamedu. Akore: – Nuba pago bakarure? Pamodukana boe epemegago sábado meri keje?
4Nou fariseu doge, nou jorduware Judeu doge eno bakaru jiwuge emagokare boeji. Nono Jesus ure nou imedu pemegago. Ure kana bokodu akedudo, ure pogora bokodu akedudo jamedu. Nono Jesus ure nou imedu utudo tuibagi tuwai ka. Mare nou fariseu doge, nou jorduware Judeu doge eno bakaru jiwuge erdu motukare boewo boe epemegago sábado meri keje. 5Mare Jesus makore nou fariseu dogei. Makore nou jorduware Judeu doge eno bakaru jiwugei jamedu. Akore: – Ia tagi tagagu tapira imedu butumode ia kačiba poto sábado meriji dukeje tamode nou tagagu tapira tawuje nou kačiba po piji nou meri keje rugadu. Ia tagi taganaregedu butumode kačiba poto sábado meriji dukeje tamode nou taganaregedu tawuje nou kačiba po piji nou meri keje kuri je rugadu.
6Nou boe eimijerage fariseu doge eroiwakare tumagowo Jesus bataru jipagi. Nou jorduware Judeu doge eno bakaru jiwuge eroiwakare tumagowo Jesus bataru jipagi jamedu.
Jesus Ure Boe Erduwado Enojarokawo Tuwadaruji Pugeje
7Boe etaregodure nou bai ka togwagewo dukeje Jesus aiwore nou boe erore jiboeji. Aregodure boetojiwuge ere tumugudo boe eimijerage emuga keje boe pemegareu keje. Dukodire Jesus makore nou boei tuwo emeardae pemegado. 8Akore: – Boe emagomode tawagai tagaregoduwo boe uwiremodewu bowadae ka dukeje tadumode toro. Nou makore tawagaiwu makomode ia boe eimijera kurireu bagai jamedu mare tarduwakare. Tagaregodure dukeje tagaba tamugudo boe pemegareu keje tagojaro tabo tai. Tamode tamugudo boe pemegareu keje. 9Mare nou boe eimijera kurireu aregodumode dukeje nou makore tawagaiwu umode tadawuje nou boe pemegareu piji nou boe eimijera kurireu uwo tumugudo tumuga keje. Akomode aino tai: “Aragojedo awu boe eimijera uwo tumugudo woe awu boe pemegareu keje.” Ainore akomode tai. Nono tabogurumode. Nono tamode tamugudo toro nou boe etugarege emuga keje. 10Dukodire inagomode aino tai. Tagaba tamugudo boe pemegareu keje tameardae tabo. Tagaregodumode boe ewadae ka dukeje tamugudo nono nou boe etugaregebo. Nono nou boe ewadae kejewu boe eimijera makomode tawagai tuwo tamugudo nono taidure jiboe keje. Nono tabogurumodukare. Boe emago pemegamode tarore jiboeji. 11Iwo tawie. Boe enojaromode pudui, emode tugimijerado tu pudumi tumeardae tabo dukeje Pao Kurireu umode epogurudo. Mare boe emode boe utugaregedo pudumi turo pemegawo boei dukeje Pao Kurireu umode boe eimijera pemegareugedo emage.
12Nono Jesus makore nou uwaire bai čewuji. Akore: – Amode ake kurido awadae keje mare amagokaba amedage ewagai enogwagewo akabo. Amagokaba awobe ewagai enogwagewo akabo. Amagokaba oe kurireuge ewagai enogwagewo akabo jamedu. Enogwagemode akabo dukeje toro ia meri keje emage emagomode awagai jamedu akwagewo pudabo jamedu nou arore pudui du moriče. 13Mare are ake kuričigodo awadae keje. Dukeje amagodo marenarue doge ewagai, joku bokwareuge ewagai, pogora pegareuge ewagai, kogodureuge ewagai enogwagewo akabo. 14Nono boe pemegamode ai rugadu. Emagere emodukare boe pemegareu maku akai nou arore pudui du moriče. Mare toro ia meri keje Pao Kurireu umode boe eewodudo pugeje dukeje umode boe pemegado ai nou aro pemegareu moriče.
Boe Ewadae Kurireu Reo. Jesus Ure Nou Boe Ewadae Jebato Toro Ia Pao Kurireu Meardae Ka Pugeje
15Nouia mugure nono Jesus apowu meardure Jesus akore aino duji dukejere makore Jesusji. Akore: – Pao Kurireu umode boe eimijera kurireudo pudumi dukeje umode boe enogwagedo pudabo. Nou baru tadawu Pao Kurireu uke kurimode rugadu. Dukodire boe pemegamode nou okwagemode Pao Kurireu apowugei. Egaremode pudui rugadu.
16Nono Jesus makore ji. Akore: – Marigudu ia imedu ure ia boe ewadae kurireu towuje. Makore bagaiwuge emagare rugadu. Mare makore ewagai etaregoduwo nou ture tawujewu meri ka enogwagewo pudabo. 17Ure boe jamedu boe udo turugadu dukeje ure tudugare utudo nou tumagore bagaiwuge ewagai tuwo ewie boe uie turugadu duji etaregoduwo tuwadae ka rugadu. Nou utugare uture nou boe ewagai rugadu. Makore ei. Akore: “Mato boe ewadae ka. Ikimijera ure boe jamedu boe udo turugadu.”
18– Mare nou makore bagaiwuge etaidukare tuduwo toro. Eiamedu boe egore nou utugareji tudumodukaie. Ia akore: “Ire ikeragu ia motoji inoče dukodire itumode toro nou moto ka iorduwo ji. Dukodire iroiwakare ituwo nou akimijera bowadae ka.”
19– Metia akore jamedu: “Ire akirodo tapira dogei. Enodo padure dez. Ewo tumugudo ino carroça keje. Dukodire itumode toro nou tapira doge ewagai iorduwo emaragodu pemegamode dubagai. Dukodire iroiwakare ituwo nou akimijera bowadae ka.”
20– Ia metia akore: “Maigodure iwirere. Iragojemode tu woe itoreduje apo. Dukodire iroiwakare ituwo nou akimijera bowadae ka.”
21– Nono nou utugare ure tugirimi tuibagi tugimijera bagai. Readodure nou boe egore aino pudui duji nou tugimijera biagai. Nou ukimijera korigodure nou tumagore bagaiwuge ewagai. Makore nou tudugareji. Akore: “Atudo toro nou boe eda ka amara tabo. Amagodo marenarue dogei. Amagodo joku bokwareugei. Amagodo pogora pegareugei. Amagodo kogodureugei. Akarego mato ebo enogwagewo pagabo.”
22– Nou utugare meartorure nou tugimijera bataruji rugadu. Makore nou boe eiamedu boei rugadu. Aregodure nou boebo tuibagi kuri je. Dukeje makore tugimijeraji pugeje. Akore: “Imeartorure awadaruji rugadu. Mare aino čare pawai ja kuri kimore dukodire čere boei kimo.”
23– Dukodire nou ukimijera akore: “Atudo toro ia boe eda kawu awaraji nou mugure awara okwaiwu boe ewai jamedu boe ka amagowo nou boe ewagai jamedu. Etudo mato rugadu. Itaidure iwai korobaduwo boebo rugadu. 24Mare iwo tawie. Nou imagore bagaiwuge boetojiwuge enogwagemodukare woe itabo rugadu.”
Ainore nou Jesus readodure jiwu bakaru ure.
Boe Ewo Turagado Tumeartoruwo Jesusji
25Ia meri keje boe emagare nono Jesus apo tugodui apo. Nono Jesus ure tuwuredo tumagowo ei. 26Akore: – Ia boe etaidumode tumeartoruwo imeardaeji. Mare emeardu kurimode i dukeje imode erduwado imeardae remawuji rugadu. Emeardu kurimode i tuje kori, tuo kori, tore ekori, tumanamage ekori, tuduiemage ekori dukeje imode erduwado imeardae remawuji. Mare emeardu kurimodukare i tuje piji, tuo piji, toreduje piji, tore epiji, tumanamage epiji, tuduiemage epiji dukeje imodukare erduwado imeardae remawuji. 27Imeartoru kurire Iogwa Kurireuji dukodire boe erdu pegare i, emode iwido. Boe etaidumode tuwo tumeartorudo imeardaeji dukeje ewo tudo turugadu tuwiwo nono iwimode dumogadure. Emodukare tudo turugadu tuwiwo nono iwimode dumogadure dukeje imodukare erduwado imeardae remawuji. 28Boe emode ia tuwai towuje dukeje boe emode tumeardae pemegareu tawuje tuiorduwawo nuba turomode tuwo tugeragu boe jamedu boeji tuwo nou tuwai pemegado. Etaiwomode to diero kurimode dubagai tuwo akirodo boe jamedu boeji tuwo tuwai iado. 29Emodukare tumeardae pemegado dukeje eromode ta je to diero akedure duji rugadu dukodire emodukare tuwai iado. Nono boe egokodumode ei. 30Egomode aino: “Akare awai iado. Ameardae pegare kodi.” Ainore egomode.
31– Ča ia bakaru reo pugeje. Ia boe eimijera o tugobaigarege enodo padure dez mil. Mare nou turugodumode jiwu boe eimijera o tugobaigarege enodo padure vinte mil. Dukodire nou boe eimijera urugodumodukare nouia boe eimijeraji kuri je. Umode tumeardae pemegareu tawuje. Jordumode nou to tugobaigarege eraga kodumode nou iage eraga kori duji. 32Eragamodukare dukeje umode tuwadaru maku tudugarege etai ewo reko toro nou turugodumode jiwu boe eimijera bagai. Mare erugodukare pui raga dukodire makomode nou boe eimijeraji tumoduie iaboe pemegareu maku ai erugodukawo pui pugeje tuwo tumedagedo puče.
33– Ča tarodo aino jamedu. Tagera ra tagoe jamedu boe piji tameartoruwo tu i. Nono imode tarduwado tameartoruwo imeardae jamedu boeji.
Sal Pemegamodukareu Reo
34Jesus makore pugeje: – Sal pemegare. Mare nou sal pegomode dukeje nou sal akedumode. Nono umodukare nono sal mogadure pugeje. 35Dukodire boe eromodukare iaboeji nou sal tabo pugeje. Emode barigu. Mare sal remawu ji karega inagoino. Meartorure iwugeire inagoino ekawo tugera ra tumeartorure i dupiji rugadu. Tawiapaga pemegado awu iwadaruji tawo awu iwadaru metudo tagaora tada tameartoruwo ji rugadu.
15Carneiro Doge Ere Tuwarigu Boeto
1Ia meri keje Judeu doge etaidukare jiwuge boe etaregodure Jesus ae tuwiapagawo Jesus makore jiboeji. Imposto mori makudure aiwuge nure iage. Nou Judeu doge egore ro pegareuge uie iage. 2Nono fariseu doge etaregodure jamedu. Jorduware Judeu doge eno bakaru jiwuge etaregodure jamedu. Emago pegare pu biagai nou Jesus rore aino nou boe dogei duji. Egore: – Awu Jesus imadure nou boe etaidukare jiwuge ro pegareugebo. Okwagere ebo jamedu. Nou ukare turugadu.
3Dukodire Jesus readodure ia bakaruji ewiagai. Mare tuwo jebato toro Pao Kurireu meardae pemegareu jitu bagaire akoino, tuwo jebato nou boe eimijerage emeardae pegareu jitu bagaire akoino jamedu. 4Akore: – Ia tagi tagagu carneiro doge enodo padumode cem. Ia okwamode boeto nou iage epiji dukeje tadumode rugadu nou noventa e nove carneiro doge epiji tagaiwowo nou okware boetowu carneiro bagai rugadu. Nou noventa e nove carneiro doge tamode edudo tubaga tabo ia boebutu pemegareu keje. Nono tadumode tagaiwowo nou okware boetowu carneiro bagai jii toro tardure jitu ka. 5Tardumode ji dukeje taegaregodumode tai rugadu. Tamode bu taganaura keje tawo reko tawai ka tuibagi pugeje. 6Tagaregodumode apo tawai ka dukeje tamagomode tamedage ewagai tawo ewie tarduie okware boetowu carneiroji rugadu. Taegaregoduie tai. Tamoduie boe ewadae towuje ebo. Ainore tarore. Ainore boe erore rugadu. 7Ča baru tadawuge erore nono nou taro mogadure jamedu. Mare carneiro doge ewagai karega eroino. Boe ero pemegamode dukeje baru tadawuge egaremode pudui. Ro pemegareuge emode noventa e nove dukeje baru tadawuge egaremode nou noventa e nove eiamedu boei. Mare ia ro pegareu umode mitotu je dukeje umode tugera ra turo pegareu piji turokawo aino nou turo pegareuji pugeje dukeje baru tadawuge egaregodumode pudui rugadu. Egaremode nou ure tugera ra turo pegareu pijiwuji nou noventa e nove ro pemegareuge eiamedu boe ekori.
Diero Tori Okware Boetowu Reo
8Jesus mako kimore. Akore: – Ia aredu o diero tori rogu enodo padure dez. Ure nono prata mogadure dukodire mori kurire. Mare akore ia okwaie tubiji. Nuba tameardaere nou aredu romode? Umode jorugu pemegado tuwai ja tada. Umode vassoura reko tuwai ja otoji. Aiwo pemegamode tuwai ja otoji jii toro tuiordure nou diero tori jitu ka. 9Ča jordure ji dukeje makomode tumedage areme ewagai ewo bato pui pudae. Etaregodure pudae dukeje makomode ei. Akore: “Iagarere i rugadu iordure čewu ino diero tori rogu okware ipijiwuji. Pawaduwo rugadu.” Ainore nou aredu akomode tumedage aremei. 10Pao Kurireu utugarege baru tadawuge egaremode pudui jamedu nono nou aredu jakare moga pudui dumogadure. Mare diero remawu ji karega egaremode. Ure tugera ra turo pegareu pijiwu jire egaregodumode. Ia ro pegareu umode tugera ra turo pegareu piji turokawo nono nou turo mogadure pugeje dukeje Pao Kurireu utugarege baru tadawuge egaregodumode pudui nou inoduji rugadu.
Iparedu Ure Tuwarigu Boeto
11Jesus readodure ia bakaruji pugeje tuwo jebato toro nouia Pao Kurireu meardaeji boe ewiagai. Akore: – Ia imedu orere pobe. Iparere emage. 12Naregedu boigoduwu aidukare tubagawo tuo bimodedu bagai, aidure tuo oe kadoduwo puiato makuduwo pudai. Nou naregedu boigoduwu aidure makudumode pudaiwu tuo oeji kuri je. Makore tuoji. Akore: “Iogwa. Itaidukare ipagawo awimode du bagai nou akoe makuduwo čenai. Itaidure awo čeno diero kado puiato awo ino maku inai kuri je.” Ainore nou onaregedu boigoduwu akore tuoji. 13Dukodire uo ure to diero kado puiato ei. Ure maku tore pobedu doge etai rugadu. Nono nou onaregedu boigoduwu ure tugeragu nou dieroji. Dukeje čare uture pugeje nou diero tabo. Utu jaere toro ia moto ka. Nono ure nou to diero rugadu akedudo boe pega boeto. 14Dukodi čare ure to diero rugadu akedudo. Nono ča nou joruji boe pegare boe eiamedu boei. Bubutu bokware dukodire boe eke bokware. Dukodire nou iparedu uke boeire ji o diero akedure dukodi. 15Nono nou iparedu okwamagudure ia oe kurireu imeduji tumaragoduwo ai. Nono nou oe kurireu imedu ure nou iparedu maragodae maku ai jetuwo jugureugei uwo nou jugureuge enogwagedo. 16Nono nou iparedu maragodure nono nou oe kurireu imedu ai rugadu. Ure jugureuge eke maku etai tu tu je. Mare aidure tuwo jugureuge eke kowuje tuge boe koia. Mare nou oe kurireu imedu aidukare uwo ko jugureugebo. 17Toro ia meri keje čare nou iparedu biagorore turo pegareuji. Makore tudada. Akore: “Iragojemode woe iwimode ike boe koia. Mare iogwa uwai keje iogwa utugarege eke makare rugadu. 18Imode ikirimi iogwa uwai ka. Imagomode ji ie iwarigu boeto. Iro pegaie Pao Kurireuji rugadu. Iro pegaie ji jamedu. 19Dukodire ukare turugadu onaregeduwo imi pugeje. Nono utugare rumode imi rugadu. Imaragodumode ai rugadu. Ainore inagomode iogwaji rugadu.”
20– Ainore nou iparedu akore tudada. Dukeje čare ure tudawuje nou boe piji tuduwo toro tuo uwai ka rugadu. Ča uo jordu jaere tonaregedu iparedu puredugodure pudae duji. Nono okudugodure nou tonaregedu apo rugadu. Rekodure tiagare tabo nou tonaregedu togi. Nono ure tona bu kajeje. 21Nono nou iparedu makore tuoji. Akore: “Ire iwarigu boeto. Iro pegare Pao kurireuji. Iro pegare ai jamedu. Dukodire ukare turugadu akanaregeduwo imi pugeje.”
22– Mare nou uo biapagakare nou tonaregedu bataruji. Makore tudugarege ewagai. Makore ei. Akore: “Tageragu ia areia pemegareuji. Mato tabo tawo tugu awu itonaregeduji. Ia ieratadau tugu ierakoto jamedu. Ia bure okeakejewu tugu bureto jamedu. 23Tapira kareu bito pagwagewo, pawaduwo, paegarewo pai, itonaregedu ure tugirimi kodi. 24Imeardaere bie kodi. Mare awu meriji čare iorduware bikaie duji. Itonaregedu uture ipiji nono imeardaere umodukaie tugirimi pugeje duji, mare awu meriji aregodure tuibagi iwai ka pugeje.”
– Nono ewadure tiagarere pudui dutabo rugadu.
25– Mare nou onaregedu boetojiwu rakojere toro ipoguru keje tumaragodu tabo. Jorduwakare tuwie aregodure duji. Nono ure tugirimi tuibagi tuo uwai ka. Mare puredugodure tuo uwai ka dukeje meardure boe eraji, boe enogwariji toro tuo uwai keje. 26Dukodire unaragodure tudugaregei. Akore: “Kaba kodiba boe egoino tiagarere pudui dutabo?”
27– Nou utugare akore: “Awie ure tugirimi. Aregodure pugeje. Aregodu pegakare dukodire ao ure tapira kareu bito boe ewaduwo ia tuwadaeji.”
28– Nou naregedu boetojiwu korigodure. Korigodure rugadu dukodire ukare turemo nou tuo uwaito ewadae ka boe kori koia. Dukodire uo ure tie bu toro tonaregedu boetojiwu ae togwamaguduwo ji uwo turemo tuwaito. 29Mare nou onaregedu boetojiwu mako rakare tuoji. Akore: “Imaragodu rakare akai marigudu. Irore nono atugarege ero mogadure rugadu. Imeartorure amagore i jamedu boeji. Mare akare iaboe maku inai. Akare ia cabrito rogu maku inai iwo iwadae towuje imedagebo. 30Aino čare nou akanaregedu boigoduwu ro pegare, ure ako diero rugadu maku areme pegareuge etai pagatu je. Mare aregodure tuibagi mato pugeje dukeje are ia tapira kareu bito boe ewaduwo aregodure dukodi. Ukare turugadu!”
31– Nono uo makore nou tonaregedu boetojiwuji. Akore: “Boro. Akagore aino du ukare turugadu. Itonaregedu nure aki. Atukare ipiji. Aragoje pemegare woe itabo jii aino. Ire inoe jamedu boe maku akai marigudu akoče. 32Mare awu awie ča imeardaere bire marigudu. Mare bikare rabodu. Aregodure pugeje rugadu. Dukodi čare pawaduwo paegarewo pai ji rugadu. Ure tuwarigu boeto mare aino ča boe erdure ji pugeje.”
16Jeture Tugimijera Oe Jiboe Reo
1Jesus makore ture jorduwadowugei. Akore: – Ia imedu oe kurireu utugare jeture nou tugimijera oe jamedu boeji. Mare jetu pemegakare ji. Dukodire ia boe ereadodure nou imedu oe kurireu biagai nou utugare ro pegare jiboeji uie nou tugimijera o diero akedudo boe pegareuto paga tu je. 2Dukodire nou imedu oe kurireu makore nou tudugare bagai. Makore ji: “Boe ere iwie arore jiboeji. Dukodire aetumodukare inoe boeji pugeje. Nou inoe mori padure kejewu bapera jamedu boe maku inai iwo ia itugare jetudo ji pugeje.”
3– Dukodire nou utugare uture nou bapera jamedu boe bagai. Mare meardaere tu tudada. Akore: “Ikimijera unure itawuje imaragodae piji. Nuba iromode imaragoduwo pugeje? Iraga bokware imaragoduwo iwo boepa butudo ia boe etai. Ipogurure dukodire inogwamagudumodukare ia boei eke kobo rogu bagai ikeje. Nuba iromode? 4-5Ča iorduware. Imagomode nou ukare toe morido ikimijera aiwuge ewagai. Imode nou ere tugeragu ikimijera pijiboe mori kado tu tu puiato. Dukodire nou boe ewiagodumodukare ipiji. Imedage mode emage.” Ainore nou imedu oe kurireu utugare meardaere tudada. Dukodire makore nou ukare toe moridowu tugimijera aiwuge eiamedu boe ewagai. Unarare nou aregodure boetojiwuji. Akore: “Are akirodo ikimijera pijiboe akare morido raga. Nuba nou jetu kimore akaboboe mori oto padu kejeboere?”
6– Nou imedu akore: “Tambor oto padure cem azeite kuru tabo iwo maku nou akimijera ai.”
– Mare nou utugare akore: “Uu. Ainore ure woe awu bapera keje jamedu. Mare akaiwodo. Pamodukare morido cem pugeje. Pawo udo cinquenta ai pugeje awu bapera keje.”
– Dukodire padure nou bapera keje nou imedu umoduie maku aiwu tambor oto padure cinquenta tu rugadu azeite kuru tabo. Ainore nou utugare ure nou imedu jakaredo pudui mare ukimijera jorduwakare nou tudugare rore aino pudui duji.
7– Nono nou utugare makore nouia imeduji. Akore: “Are akirodo ikimijera pijiboe akare morido raga. Nuba nou jetu kimore akaboboe mori oto padu kejeboere?”
– Nou imedu akore: “Trigo oto padure 25 mil quilos iwo maku akimijera ai.”
– Nono nou utugare ure tugeragu nou imedu o baperaji jamedu. Akore: “Ča. Pawo oto padudo vinte mil quilos tu rugadu awo maku ikimijera ai.”
8– Nou oe kurireu imedu jorduwagodure nou tudugare rore aino pudui duji dukejere mako pemegare nou tudugare rore jiboeji. Akore jeroreu nuie ema.
Jesus mako kimore ture jorduwadowugei. Akore: – Imode tawie. Meartorure Pao Kurireu jiwuge emodukare jeroreugedo pudumi. Mare meartorukare Pao Kurireu jiwuge ere jeroreugedo pudumi tu tu je emode tuiorduwa jetorodo nuba turowo taidure jiboe bagai.
9– Ča iwo tarduwado. Tameardaekaba tawo tago diero kurido. Mare tago diero maku, tagoe maku jamedu boe etai tamedagewo emage. Awu moto kejewu tagoe rugadu boe akedumode. Mare baru tadare tamugu pemegamode jii toro rugadu. 10Boe etu pemegamode iaboe roguji dukeje etu pemegamode iaboe kurireuji jamedu. Mare boe eiwogumode iaboe roguji dukeje eiwogumode iaboe kurireuji jamedu. 11Taetu pemegamodukare moto kejewu boe enoeji dukeje Pao Kurireu umodukare taetudo baru tadawu boe remawu boeji rugadu. 12Taetu pemegamodukare ia boe enoeji dukeje Pao Kurireu umodukare ia baru tadawu tagoe remawu maku tagai. 13Ia imedu ukimijerage emode pobe dukeje meardu kurimode nouia tugimijeraji. Mare jordu pegamode nouia tugimijeraji. Meartorumode nouia tugimijera bataruji. Mare meartoru bokwamode nouia tugimijera bataruji. Dukodire boe emode tugimijerado dieroče dukeje ewiapagamodukare tumeartoruwo Pao Kurireuji pugeje.
Jesus Makore Boei Pugeje
14Ia fariseu doge emeardure Jesus akore aino duji. Emeardu kurire dieroji rugadu. Dukodire egokodure Jesus akore aino duji. 15Mare Jesus makore ei. Akore: – Tare taro pemegado boe egai. Mare Pao Kurireu jorduware tameardae pegare tadada duji. Jorduware tagaidukare pudui duji. Tagaidure tu dieroji. Kočare boe etaidu kurimode Pao Kurireu jordu pegare jiwu boe ero pegareuji rugadu.
16– Moisés ure Pao Kurireu bataru maku Judeu doge etai eno bakaruwo ema boe emeartoruwo tu ji. Makore Pao Kurireu bataru jiwuge ere Pao Kurireu bataru bu bapera keje boe emeartoruwo ji. Boe emeartoruwo nou bataru jamedu boeji jii toro João Batista aregodure du ka. João Batista aregodure dukeje ure boe ewie ia Pao Kurireu bataru pemegareuji. Makore boe eimijera kurireu moduie Pao Kurireuče rugadu. Dukodire nou aidure nou bataru pemegareu jiwuge eiamedu boe ere turagado pudui tuwo tugimijerado tu Pao Kurireuče rugadu. 17Moto, baru akedumode mare Pao Kurireu makore jiboe akedumodukare rugadu jii toro rugadu. Pao Kurireu makore jiboe jamedu boe jetumode pudui rugadu. 18Ča iwo tawie Pao Kurireu meardae remawuji. Imedu umode tugera ra toreduje piji mare mugumode ia aredu apo pugeje. Du pegare Pao Kurireu jakai rugadu. Nou imedu ro peganure nou toreduje boetojiwudoji rugadu. Ure tudo nono jeribarire toreduje pijiwu mogadure Pao Kurireu jakai. Ainore Pao Kurireu meardaere. Aredu umode tugera ra toredu piji dukeje ia imedu mugumode nou aredu apo pugeje. Du pegare Pao Kurireu jakai jamedu. Nou mugure nou aredu apowu imedu ure tudo nono jeribarire toreduje pijiwu mogadure Pao Kurireu jakai jamedu. Ainore Pao Kurireu meardaere.
Ainore Oe Kurireu Imedu Rore Marenaru Imedu Lazaruji
19Jesus mako kimore boei: – Marigudu ia imedu oe kurire. Ukudau areia mori kurire. Uwai kurire. Oe kurire rugadu. Iaboe iaboe bokwakare ai meri jamedu boeji. 20Ia marenaru imedu rakojere nou boe keje jamedu. Iere Lázaro. Nou Lázaro biri jamedu boe pegare. Boe ere nou Lázaro reko tu tu je nou oe kurireu imedu uwai poro ka okwamaguduwo ia uke rogu bagai. 21Meardaere tumoduie tugeragu nou buture moto kejewu ia boe eke roguji nono nou oe kurireu imedu uwai tada. Ariga doge etaregodure tu tu nou Lázaro ae tuwo tugeru reko nou Lázaro biri pegareu jamedu boeji. 22Ia meri keje nou marenaru imedu Lázaro bire rugadu. Pao Kurireu utugarege baru tadawuge ere nou Lázaro reko toro baruto muguwo Abraão apo okwagewo nono jii toro tuguredu ka. Nono nou imedu oe kurireu bire jamedu. Boe ere nou imedu oe kurireu tugu mototo. 23Čare rakojere bireuge eda pegareu keje. Nonore joru ure nou oe kurireu imedu korido rugadu. Dukejere aiwore toro. Jordure Abraãoji toro baru tada. Jordure nou marenaru imedu Lazaruji jamedu Abraão apo. 24Dukodire makogodure toro etae. Akore: “Iogwa Abraão! Akogududo itabo! Nou imedu Lázaro arego mato itae uwo tugerako tugu poboto tuwo reko ikeruji boeru akeduwo ikeru piji. Awu joru unure ikowu rugadu.”
25– Mare Abraão akore: “Kočare. Awikare dukeje akoe kurire, boe pemegareboe kurire awai tada. Mare boe pegare awu Lazaruji rugadu. Mare aino čare boe pemegare awu Lazaruji rugadu mare boe pegare ai, joru unure akowu. 26Čare iaboe ure nono moto poro kurireu mogadure. Padure nono pagaiadada. Dukodire taroiwakare tagurugoduwo mato nou moto poro kurireu kajeje. Dukodire tagurugodumodukare mato rugadu. Čeroiwakare čegurugoduwo kajeje toro tagae jamedu.”
27-28– Dukodire nou oe kurireu imedu akore: “Iogwa Abraão! Inogwamagudunure ai rugadu. Nou imedu Lázaro jewodudo pugeje utuwo tuibagi iogwa uwai ka uwo iwie mage ewie. Iwie magere ikera aboudure. Nou Lázaro utudo toro ewagai tuwo ewie boe pegaie woe duji. Emeartoruwo tu Pao Kurireuji etukawo mato awu joru ka jorukawo ekowu nono boe moga idu mogadure.”
29– Mare Abraão akore: “Moisés makore jiwu Pao Kurireu bataru padure bapera keje. Nou iage makore Pao Kurireu bataru jiwuge ewadaru padure bapera keje jamedu. Awie mage etaiwowo nou baperaji tuiorduwawo boe pegamode pudui duji. Emeartoruwo nou Pao Kurireu bataruji etukawo nou boe pegareu ka.”
30– Mare nou oe kurireu imedu akore: “Ukare turugadu. Emeartorumodukare nou bapera kejewu bataruji. Mare ia boe jewodumode pugeje tuduwo etae tuwo ewie dukeje emeartorumode, emode tugera ra turo pegareu piji.”
31– Mare Abraão akore: “Ewiapagamodukare Moisés makore jiwu Pao Kurireu bataruji. Ewiapagamodukare nou iage emagore Pao Kurireu bataru jiwuge ewadaruji dukeje, ewiapagamodukare ia jewodureu imedu bataruji jamedu. Emeartorumodukare ji rugadu.”
171Jesus makore ture jorduwadowugei. Akore: – Boe emode turokogado boei tuwo tumeardae pegareu maku boe etai tu tu je emeardae pegawo ero pegawo jamedu. Mare boe pegamode rugadu nou ure tumeardae pegareu maku boe etaiwugei rugadu. 2Boe emode tori kurireu kogudo ia boe ekidoru kajeje tuwo ewarigu poboto dukodire ewimode. Mare ia boe umode nou itore meartorure maibari iwuge edo tugera ra ipiji ero pegawo pugeje dukeje boe pegamode nou ure nou boe etore etaora pegadowuji rugadu. Jire boe pegareu kodumode nou barigudure pobo towuge ekori. 3Taeku jado tarore jiboeji. Mare ia tawobe ro pegare dukeje tamagodo ji rokawo aino pugeje. Mare kiarigodumodukare nou turo pegareuji dukeje umodukare tugera ra turo pegareu piji rugadu. Mare kiarigodumode nou turo pegareuji dukeje makomode turomodukaie aino pugeje. Nono tagogudugo apo. Tawiago nou ro pegare dupiji. 4Ia meri keje ro pegamode tai nono aregodumode tagae tumagowo tai tagoguduwo pudabo, tawiagoduwo nou turo pegareu piji. Nono nou meriji rugadu ro pegare tai pugeje. Uture tagae pugeje tumagowo tai tawiagoduwo nou turo pegareu piji pugeje. Dukeje nou meriji rugadu ro pegare tai pugeje. Dukeje uture tagae pugeje tumagowo tai tawiagoduwo turo pegareu piji pugeje. Nono nou ro pegareu oto aregodumode sete ka nou meri keje rugadu dukeje tawiago nou ro pegareu boe piji.
Ainore Jesus akore boe ewiagoduiago boe ero pegare emago pegare pudui dupiji.
Ainore Boe Emeartorumode
5Nou Jesus ure jorduwadowuge emagore tugimijeraji. Utumode Jesus bataru tabowuge emode emage. Egore: – Čemeartoru kurido Pao Kurireuji.
6Jesus akore: – Tameartoru biagamode Pao Kurireuji. Mare tamode taragado tai tameartoru rakawo tu jao. Nono tamagomode ia kodui iji uwo tudawuje tumuga piji tuguduwo toro pobo maereuto. Nono Pao Kurireu koiare umode nou kodui i meartorudo tawadaruji rugadu.
Ainore Boe Etugarege Eromode
7Jesus mako kimore. Akore: – Boe utugare maragodure boepaji. Jeture boe egu ieji ipoguru keje jamedu. Dukeje aregodumode tuibagi tugimijera uwai ka mare okwagemodukare kuri je taregodu keje. 8Ukimijera makomode ji tuge bagai. Dukodire umode tugimijera uke pemegado. Umode maku tugimijera ai. Ukimijera umode togwage iado dukeje makomode tudugareji okwagewo jamedu. 9Boe eimijera makomodukare nou tudugare pemegareuji tuwo timediado ema. Umodukare timediado ema rugadu. Mare utugare pemegareu meartorumode tu tugimijeraji rugadu. 10Tarodo nono nou utugare pemegareu ro mogadure jamedu. Tameardaekaba tawo boe eimijerado tagi. Tameartorudo tu Pao Kurireu makore taiboe jamedu boeji dukeje tamagomode aino: “Boe eimijerawo imi kodi karega irore aino. Pao Kurireu utugare rogu nure imi. Ire irugadu imeartoruwo ji rugadu.” Tamagodo aino. Tameardaedo aino jamedu.
Jesus Ure Pemegadowuge Enodo Padure Dez
11Jesus kodure Jerusalém ba kurireu kawu awaraji tuduwo Jerusalém ba kurireuto rugadu. Nou awara kodure Samaria moto okwaji Galiléia moto okwaji. Nou Samaria moto, nou Galiléia moto okwa jore pudodu oiagi nou awara kodure. 12Jesus puredugodure taregoduwo ia boe eda ka. Dukeje ia ime etaregodure Jesus togi. Nou ime enodo padure dez. Ekogodure. Nou ekogodae pegare ei rugadu. Ure ewiri pegado rugadu. Dukodire ekare tuburedo boei. Dukodire ekare tuburedo Jesusji jamedu. 13Ere tumago pemegado toro Jesus ae. Egore: – Jesus! Čegimijera nure aki! Akogudugo čedabo awo čebemegago!
14Jesus jordure ei. Nono makore toro etae. Akore: – Tadudo toro nou ure Judeu doge enomea maku Pao Kurireu aiwuge etae. Etaiwomode tai tuiorduwawo tabemegagodure dubagai.
Ča eture. Ekodure awaraji dukeje epemegagodure tači je rugadu. 15-16Nono ia jorduware tubemegagodure duji dukeje ure tugirimi pači tuibagi Jesus togi pugeje. Ure tumago pemegado boe eiamedu boe emearduwo tagoino duji. Mako pemegare Pao Kurireuji rugadu. Aregodure Jesus togi dukeje ure tubu jodo Jesus bure paru. Imadure Jesus apo rore aino pudui duji. Nou rore ainowu imedu boture Samaria moto keje. Samaria moto kejewu imedu nure ema. 17Nono Jesus akore: – Ire pemegagodureuge ime enodo padure dez. Nou iage pa? 18Tu nou boe tuginaiwu imedu ure tugirimi itae tumago pemegawo Pao Kurireuji. Kodiba nou iage erokare aino jamedu?
19Nono Jesus makore nou imeduji. Akore: – Aragojedo. Ameartorure i dukodire ire apemegago.
Pao Kurireu Aregodumode Boe Eiamedu Boe Eimijerawo Ema
20-21Ia fariseu imedu unarare Jesusji. Akore: – Kaba meri kejeba Pao Kurireu aregodumode turo pemegareu tabo boe eiamedu boe eimijerawo ema?
Jesus akore: – Ča Pao Kurireu nure ema rugadu. Umode boe emeardae pemegado ewo tugimijerado Pao Kurireuče rugadu. Dukodire Pao Kurireu aregodumodukare nono ia boe erdu jiboe mogadure. Boe egomodukare: “Emareo, emariče”, aino.
22Nono Jesus makore ture jorduwadowugei. Akore: – Ia meri keje tagaidumode tarduwo Pao Kurireu Onaregeduji mare tardumodukare ji rakojemode baru tada kodi. 23Boe egomode tai: “Emareo! Aregodu!” Mare tameartorukaba nou boe ewadaruji. Mare ia meri keje Imedu Onaregedu umode tugirimi pugeje rugadu. 24Aregodumode dukeje boe erdumode ji rugadu nono boe erdure boeiaraguduji dumogadure. Umode nono boeiaragudu rugu jo moga boeto dumogadure. 25Mare aino boetoji boe ero pegamode ji, boe etaidumodukare ji, boe pegamode ji rugadu.
26– Imedu Onaregedu aregodumode pugeje dukeje boe emeardaemode nono rakojere boe etumana Noé apowuge emeardae pegareuge emogadure. 27Mariguduboe etumana Noé rakoje kimore dukeje boe ewiapagakare boeji. Ewiapagare tu tugeji tugudure čeboeji. Ime ewiapagare tu tuwirewo. Areme ewiapagare tu tugogewo jamedu. Erore aino jii toro Noé ure turemo ikarereu to du ka. Noé ure turemo ikarereuto tu tuwobebo rugadu. Emagere ere činorudo pobo piji. Mare iage ewiapagakare Noéji dukodire erduwa bokware pobo umode moto kejewuge eiamedu boe etagedudo duji. Dukodire nou pobo aregodure, ure eiamedu boe etagedudo rugadu. Ainore boe emeardaemode pugeje. Imedu Onaregedu aregodumode pugeje mare boe ewiapagamodukare bagai rugadu. 28Jaoboe etumana Ló rakoje kimore dukeje ainore nou rakojere apowuge boe erore jamedu. Eiamedu boe ewiapagare tu tugeji tugudure čeboeji. Ewiapagare tuwo akirodo boeji. Ewiapagare tuwo boe maku diero bagai. Ewiapagare tuwo boe tugu to boepato. Ewiapagare tuwo tuwai kurido. 29Ló ure ewie boe pegareu butumoduie nou boe eda keje. Makore ei eregoduwo tuwai piji mare ewiapagakare bataruji. Nono Ló rekodure nou tuwai piji Sodoma ba kurireu piji rugadu. Nou meri keje rugadu joru buture baru piji Sodoma keje. Nou enxofre buture baru piji jamedu. Nou joru, nou enxofre ure nou Sodoma kejewuge eiamedu boe ewido. 30Imedu Onaregedu umode tugirimi moto ka pugeje dukeje ainore boemode boei jamedu. Mare boe ewiapagamodukare nou inodu bagai pugeje.
31– Itaregodumode pugeje nono boe pegamode motoji rugadu. Nou meriji rugadu rakojere tuwai ao kejewuge eregoduwo tuwai piji tači je. Ekawo turemo tuwai jagi iaboe bagai. Nou maragodure to boepa jiwuge eregoduwo nou to boepa piji tači je jamedu. Ekawo tugirimi tuwai ka iaboe bagai jamedu. 32Tawiabutudo Ló oreduje rore jiboe keje tarokawo aino. Uture Sodoma ba kurireu piji mare ure tuwuredo taiwowo tuibagi tuwai ka dukeje bire. 33Ia boe etaidumode tuwo boe pemegado tu pudui turaga tabo dukeje eraga akedumode epiji rugadu. Egare remawu modukare. Emodukare činorudo bope doge eda kejewu joru pegareu piji rugadu. Mare iage ewiapagamodukare tumeardae pegareuji tuwo tugera ra turo pegareu piji taidure jiboe piji dukeje Pao Kurireu umode nou boe ekinorudo. Umode boe pemegado ei, umode egare remawudo rugadu. 34Nou itaregodumode kejewu boečoji nudureuge emode pobe tubadure ira keje dutabo. Imode ikeragu iaji mare nou metia utumodukare. 35Areme emode pobe tumaragodae keje tuwo trigo kududo. Imode ikeragu iarodoji mare metago utumodukare. 36Ime emode pobe ipoguru keje. Imode ikeragu iaji mare metia utumodukare.
37Nou Jesus ure jorduwadowuge enarare ji. Egore: – Čegimijera. Kaiba aromode aino?
Jesus akore: – Boe erdumode Imedu Onaregedu aregoduji nono boe erdure pobureuge ere tago puae tuge barogo bireu ka dumogadure.
18Okoge Bokwareudo Aredu Makore Boe Eimijeraji
1Nono Jesus makore ture jorduwadowugei. Aidure tuwo erduwado emagowo baruto Pao Kurireu bagai tu tu je ekiarigodukawo jii toro rugadu. Dukodire makore ia bakaruji ewiagai. Mare bakaru remawu karega tuwo jebato toro ia Pao Kurireu meardae ka. 2Akore: – Ia boe eda keje ia boe eimijera kurireu mugure. Emare umode ro pegareuge mori maku etai. Aiwore boe ero pegareu bagai tu tu je. Jordure boe ero pegareu jitu keje ure nou boe edo turo pegareu morido jamedu. Nou inodure maragodae rema. Mare nou boe eimijera meartoru bokware Pao Kurireuji. Meartoru bokware boei jamedu. Biapagakare boei jamedu. Dukodire maragodu pemegakare tumaragodaeji. 3Nou boe eda keje ia aredu okoge bokwareudo rakojere jamedu. Ia boe ero pegare nou areduji dukodire nou aredu aregodure nou boe eimijera ae tumagowo ji uwo nou ro pegare puduiwuge edo turo pegareu morido. 4Mare nou boe eimijera pegareu rokare iaboeji jii toro. Makokare iaboeji nou ro pegare nou aredu jiwugei. Mare nou aredu ukare togwa rawuje tumagore nou boe eimijera jitu piji. Aregodure ae tu tu je tumagowo ji uwo nou ro pegare puduiwuge edo turo pegareu morido. Dukodire toro ia meri keje nou boe eimijera makore tudada. Akore: “Ikare ioku kidugo Pao Kurireuji dukodire imeartoru bokware Pao Kurireuji. Imeartoru bokware boei. 5Mare nou aredu ukare togwa rawuje idu piji rugadu. Nou aredu butugugodukare. Dukodire imode aidure jiboe towuje. Imodukare boe pemegado ai dukeje umodukare togwa ra ipiji rugadu tumagowo i dupiji. Mako raimode i rugadu. Ča imedugodure nou aredu makore i du boeji. Dukodire imode boe pemegado ai. Imode nou ro pegare jiwuge edo turo pegareu morido ai rugadu.”
6Nono Jesus makore ture jorduwadowugei. Akore: – Tawiapagado nou boe eimijera pegareu bataruji. Pegare mare ro pemegare nou areduji. 7-8Mare Pao Kurireu pemegare dukodire ro pemegareu kodumode nou boe eimijera pegareu ro kori rugadu. Boečoji, meriji, boe enogwamagudumode Pao Kurireuji uwo tuginorudo ro pegare puduiwuge epiji dukeje umode tugera maku etai rugadu tuwo ekinorudo nou ro pegare puduiwuge epiji rugadu. Umodukare tumeardae raido tuwo tumeardae tawuje tuiorduwawo nuba turomode nou ro pegareugei duji. Aiwomode nou meartorure puduiwuge ereadodure jiboeji nono umode tumeardae tawuje kuri je rugadu. Mare Imedu Onaregedu aregodumode pugeje. Aregodumode dukeje romode aino rugadu. Nou meriji jordumode meartorukare puduiwugei. Emagamode moto keje rugadu.
Jesus Readodure Fariseu Rore Jiboeji, Ro Pegareu Imedu Rore Jiboeji Jamedu
9Jesus jorduware iagei enojarore pudui duji rugadu. Nou boe emeardaere turo jetoroie mare emeardae pegare iagei jamedu. Dukodire Jesus makore ia bakaruji nou boe ewiagai tuwo erduwado emeardaeji, tuwo erduwado pudui dubagai. 10Akore: – Imere pobe tudu tabo Pao Kurireu uwai ka tumagowo bagai baruto. Fariseure ia. Imposto mori makudure aiwu ro pegareu imedure ia. Nou fariseu očarore tuwadaruji rugadu. Meardaere tuiorduwaie Pao Kurireu bataruji, meardaere tugoduie Pao Kurireu bataru kodaji. Mare jorduwakare Pao Kurireu bataruji. Kodukare Pao Kurireu bataru kodaji. 11Nono makore Pao Kurireuji turagoje tabo očarore tuwadaruji kodi. Rakojere boe egorai tumago tabo baruto tubaru tabo. Akore: “Iogwa, iagarere i imedu pemegareu nure imi kodi. Ikare nono awu imedu ro pegareu imposto mori makudure aiwu mogadure. Ro pegareu nure ema. Mare imi karega. Ikiwogukare. Iwadrarodukare. Ieribarikare imugure apowu aredu piji. Irore nono akaidure jiboe mogadure. 12Merire ikera aboudure i inogwagere dukeje. Merire pobe inogwagekare dukeje imago tabo baruto tu tu awagai. Ainore irore tu tu je. Ire ia ino diero maku akai tu tu je jamedu.” Ainore nou očarore tuwadaru jiwu imedu akore.
13– Mare nou imposto makudure aiwu ro pegareu imedu jorduware tugiwogure boei duji. Jorduware tuwadrarodure boei duji. Kiarigodure turo pegareuji. Aidukare turo pegareuji pugeje dukodire pogurure tuwo tuburedo boei. Rakoje jaere nou boei. Pogurure taiwowo baruto. Dukodire makore baruto tie jo tabo Pao Kurireu bagai. Akore: “Iogwa Kurireu. Imedu ro pegareu nure imi rugadu. Dukodire iorduware aro pegamode i iro pegareu moriče rugadu. Mare inogwamagudunure ai akoguduwo itabo akawo iwarigu joru pegareuto.” Ainore nou ro pegareu imedu akore.
14Nono Jesus ure tuwadaru iado. Akore: – Imagomode aino tai. Awu ro pegareu imedu makore turo pegareuji Pao Kurireu biagai dukodire emare ure tugirimi tuwai ka tubemegare Pao Kurireu jitu tabo. Dukodire Pao Kurireu pemegare ji jamedu. Mare čewu fariseu imedu makokare nono nou ro pegareu imedu mako mogadure. Nou fariseu meardaekare turo pegareuji. Akore tubemegaie mare Pao Kurireu jorduware pegare duji. Dukodire imagomode aino tai. Boe enojaromode pudui, emode tugimijerado pudumi tumeardae tabo dukeje Pao Kurireu umode epogurudo. Mare boe epogurumode turo pegareuji, emode boe utugaregedo pudumi dukeje Pao Kurireu umode boe pemegado ei, umode boe remawugedo emage.
Jesus Ure Tuwadaru Pemegareu Bu Boe Etore Ewugeje
15Ia boe etaregodure torebo Jesus ae uwo tugera bu nou tore ewugeje. Mare Jesus ure jorduwadowuge erdure nou inodu jiboeji dukeje etaidukare eroino duji. Emagore ei etaregodukaiago torebo Jesus bagai. 16Mare Jesus makore nou boe etorei rugadu. Akore: – Mato.
Etaregodure dukeje Jesus makore nouia boei. Akore: – Tagaba tawu boe etore emeardae kajeje etaregoduwo itae. Etarego itae rugadu. Boe ewo tumeardae udo nono boe etore emeardae mogadure tuwo tugimijerado Pao Kurireuče rugadu turuduwo baruto. 17Tawiagodukaba iwadaru piji. Boe etore emeartorure tuo tuje makore jiboeji. Mare boe etore ji karega inagoino. Boe emeartoruwo Pao Kurireu bataruji. Dujire inagoino. Boe emeartorumode Pao Kurireuji tuwo tugimijerado ema dukeje emugumode Pao Kurireu apo jamedu. Mare emeartorumodukare Pao Kurireuji dukeje emugumodukare Pao Kurireu apo rugadu.
Imedu Oe Kurireu Meardae Reo
18Ia Judeu doge eimijera unarare Jesusji. Akore: – Čegimijera pemegareu nure aki. Nuba iromode iewoduwo pugeje imuguwo Pao Kurireu apo du akedukawo?
19-20Jesus akore: – Ča akagore ipemegaie. Mare tu Pao Kurireure pemegare rugadu. Arduwa kana Pao Kurireu nuie imi rugadu? Aino čare ameardae pemegado ameartoruwo i rugadu. Marigudu arduware nou Pao Kurireu ure maku Judeu doge etaiwu bakaruji. Ure maku etai marigudu. Nou bakaru akore aeribarikaiago akoreduje piji, akaiago boe ewido, akiwogukaiago boei, awadrarodukaiago, ameartoruwo aoji ačeji. 18.19-20 Awu bataru padure Êxodo 20.12, Deuteronômio 5.16-20 keje.
21Nono nou imedu akore: – Ikodu maidure dutabo imeartorure awu bataru jamedu boeji ji aino.
22Nono Jesus akore: – Iaboe okwa kimore ameartoruwo ji jamedu. Akoe rugadu boe maku diero bagai. Nono nou ako diero rugadu maku marenarue doge etai. Dukeje Pao Kurireu umode akoe kurido baru tada. Aromode aino dukeje akaregodumode itae pugeje akoduwo itabo rugadu.
23Nou imedu meardure Jesus akore aino pudui duji dukeje kiarigodure rugadu. Oe kurire rugadu. Aidukare tuwo tugera ra nou toe jamedu boe piji rugadu.
24-25Jesus jordure nou imedu kiarigodure duji dukodire akore: – Kočare boe rakare oe kurireu imeduji uwo tugimijerado tu Pao Kurireuče rugadu tumuguwo Pao Kurireu apo baru tada. Oe kurire dukodire biapagakare Pao Kurireuji. Boe rakare oe kurireu imeduji uwo tugimijerado tu Pao Kurireuče nono boe raka cameloji uwo turemo agulha poroto dumogadure.
26Boe emeardure nou Jesus bataruji dukeje enarare ji: – Mare ioguduba umode činorudo tuiewoduwo pugeje tumuguwo Pao Kurireu apo?
27Nono Jesus akore: – Boe eroiwakare jiboe, Pao Kurireu roiware ji.
28Nono Pedro makore Jesusji. Akore: – Čeiamedu boe čere čegera ra čenoe jamedu boe piji čegoduwo akabo.
29-30Jesus akore: – Uu. Boe jokodu jire inagoino tai. Boe emode tugera ra tuwai piji, toreduje piji, tuo piji tuje piji tumanamage epiji, tuwiemage epiji tuwo tugimijerado tu Pao Kurireuče tuwo boe emeartorudo Pao Kurireuji dukeje boe pemegareu makudumode etai eroino du moriče. Eture tuwai piji, toreduje piji, tumana mage epiji, tuo tuje epiji, tore epiji tumeartoruwo Pao Kurireuji. Dukodire nou mori kurimode eture pijiboe kori rugadu woe awu moto keje. Mare toro ia meri keje Pao Kurireu umode boe pemegareu kurido etai rugadu baru tada. Toro baru tadare emugumode rugadu, ewimodukare pugeje rugadu jii toro.
Jesus Ure Boe Ewie Pugeje Tuwimoduie
31-33Ia meri keje Jesus makore tu nou ture jorduwadowugei. Akore: – Tawiapagado. Padurumode Jerusalém ba kurireu ka. Mariguduwuge makore Pao Kurireu bataru jiwuge ere Pao Kurireu meardae bu bapera keje. Egore imagudumoduie boe tuginaiwuge etai. Nou boe tuginaiwuge egorerumoduie i, erorerumoduie i, emoduie todoguru to i, emoduie boeto i, emoduie iwido. Mare merimoduie pobe metia bokware dukeje iewodumoduie pugeje. Ainore nou mariguduwuge makore Pao Kurireu bataru jiwuge egore. Pao Kurireu meardae jire egoino. Boemode aino i rugadu. Nou bataru jetumode pudui rugadu.
34Mare nou ure jorduwadowuge erduwakare kaba jiba Jesus akoino. Erduwa bokware Jesus akoino jiboeji. Dukodire erduwakare rugadu.
Jesus Ure Marenaru Joku Bokwareu Imedu Pemegago
35Jesus aregodure Jericó ba kurireu ka dukeje ia joku bokwareu imedu mugure awara okwai togwamagudu tabo boei ia diero bagai, ia boe eke rogu bagai jamedu. 36Boe emagare tugodu tabo Jesus apo. Etaregodure dukeje nou joku bokwareu imedu meardure nou ewure akoji. Dukeje unarare ia imeduji. Akore: – Kaibowu boeba ekodure aino? Amagodo iwiagai.
37Nou imedu akore: – Jesusre kodure aino woe. Nazaré ba kurireu kejewu nure ema.
38Nono nou joku bokwareu imedu kudugodure Jesus rekodaji. Akore: – Jesus! Jesus! Mariguduwu Judeu doge eimijera kurireu Davi uwobe nure aki. Akogudugo itabo!
39Ia boe emago pegare nou joku bokwareu imeduji mugu kiorowo. Mare ure tugudu rakado pugeje rugadu. Akore: – Jesus! Davi Onaregedu nure aki. Akogudugo itabo!
40-41Nono Jesus ure tuwuredo. Makore boei ewo nou joku bokwareu imedu reko pudae. Aregodure ae dukeje Jesus akore: – Kaba jiba akaidure irowo ai?
Nou joku bokwareu imedu akore: – Ikimijera. Itaidure itaiwowo pugeje.
42Jesus akore: – Ča akaiwodo. Ameartorure i dukodire apemegagodure.
43Ča nou imedu joku bokwareu pemegagodure tači je rugadu. Aiwore pugeje rugadu. Dukodire nou imedu jakaregodu kuričigore pudui rugadu. Mako pemegare Pao Kurireuji rore aino pudui duji boe eiamedu boe ewiagai. Nono kodure Jesus rekodaji tagoino dutabo. Boe erdure Jesus rore aino duji dukodire nou boe emago pemegare Pao Kurireuji rugadu.
19Jesus Uture Imposto Makudure Aiwu Imedu Zaqueu Uwai Ka
1Jesus aregodure Jericó ba kurireu ka dukeje boe emagare tugodui rekodaji dutabo. 2Ia imedu iere Zaqueu. Nou ure tugeragu imposto diero jiwuge eimijera nure ema. O diero kurire. Ure tugeragu boe eno imposto dieroji tuwo maku boe eimijera kurireu ai. 3Nou Zaqueu aidure tuiorduwo Jesusji nou boe ekao. Mare roiwakare ričokare kodi. 4Dukodire čare rekodure Jesus otodai nou boe etododai. Dukeje ruture ia kodui i ričoreuto tubagawo Jesus bagai nono. Meardaere taiwowo nou i piji toro moto ka. Jesus kodumode nono dukeje nou Zaqueu jordumode ji rugadu. 5Ča Jesus kodure nono rugadu. Mare jorduware Zaqueu rakojere nou i tada duji rugadu dukodire ure tuwuredo nou i paru taiwo tabo nou Zaqueu bagai. Jordure Zaqueuji nono makore Zaqueu ieji. Akore: – Zaqueu. Arawuje nou i piji. Amara tabo. Awu meriji itaidure ipaduwo awai keje.
6Dukodire Zaqueu ure turawuje tumara tabo. Nono uture Jesus apo tuwai ka tiegarere pudui dutabo. 7Boe eiamedu boe erdu pegare Jesus uture Zaqueu apo duji. Egore: – Jesus uture tubaduwo ia ro pegareu uwai keje.
8Toro nou Zaqueu uwai ja tada Zaqueu ure turagojedo. Nono makore Jesusji. Akore: – Ikimijera. Aino čare imode inoe kado puiato iwo ia maku marenarue doge etai. Ikiwogure jiwuge etaire imode makudu kurido pobe puibiji etai.
9-10Nono Jesus akore: – Awu meriji Pao Kurireu ure awu bai tadawuge ekinorudo ero pegareu boe piji. Mare paga karega awu meriji rugadu emeartorure Pao Kurireuji kodi nono nou mariguduwu etuo Abraão meartoru mogadure. Itaregodure iemaruwo ro pegareuge ewagai iwo etawuje ero pegareu boe piji iwo ekinorudo etukawo bope doge eda kejewu joru pegareu ka ero pegareu moriče.
Tori Kuieje Diero Oto Padure Dez
11Jesus kodure Jerusalém kawu awaraji rugadu. Jaekare Jerusalém ba kurireuji rugadu. Boe ekodure rekodaji tuwiapaga tabo Jesus akoino duji. Nou boe emeardaere Pao Kurireu umode boe eimijerado pudumi woe moto keje kuri je. Egore nou boe eimijera umoduie Jesusče rugadu. Mare Jesus makore nou boei. 12Akore: – Ia meri keje ia oe kurireu imedu ure tudo turugadu tudu jaewo rugadu toro ia moto tuginaiwu ka. Nou moto tuginaiwu boe eimijera kurireu makore nou oe kurireu imedu bagai tumagowo ji boe eimijerawo ema toro to moto keje. Nono nou oe kurireu imedu umode tugirimi mato to moto ka pugeje boe eimijerawo ema nono to moto keje. 13Dukodire makore tudugarege ewagai. Enodo padure dez. Ure ia to diero tori kuieje19.13 Awu diero tori kuieje ure nono diero kurireu mogadure. Ure nono arimode pobe metia bokware kejewu salário mogadure. maku eiamedu boe etai. Ure udo mito mito eiamedu boe etai. Makore ei. Akore: “Itu jaemode rugadu. Nou ire maku tagaiwu diero kurido tu tu je jii toro itaregodumode mato ibagi du ka.” Ainore nou boe eimijera makore tudugaregei. 14Mare nou moto kejewu ia boe etaidukare nou oe kurireu imeduji. Etaidukare boe eimijerawo ema nono pudabo. Dukodire ere ia tumedage etudo toro nou moto tuginaiwu boe eimijera kurireu bagai tuwo bie taidukaie nou oe kurireu imeduji, taidukaie boe eimijerawo ema nono pudabo.
15– Mare nou moto tuginaiwu boe eimijera kurireu aidure nou oe kurireu imeduji rugadu. Ure boe eimijerado ema rugadu. Nono nou oe kurireu imedu ure tugirimi tuibagi to moto ka pugeje boe eimijerawo pudumi nono to moto keje rugadu. Aregodure dukeje makore tudugarege eiamedu boe ewagai. Aidure tuiorduwawo nuba erore to diero jamedu boe tabo. 16Utugare boetojiwu aregodure tugimijera ae. Akore: “Ire ako diero mitodu rogu kurido pugeje. Nou diero rogu tabo imaragodure. Ire oto padudo dez.” Ainore nou utugare akore. 17Nono nou boe eimijera akore: “Ure turugadu. Amaragodu pemegare inoe rogu boeji. Dukodi čare imode boe eimijerado aki jamedu. Akaiwomode jiwuge emugure kejewu boe eda oto padumode dez.” Ainore nou boe eimijera akore tudugare boetojiwuji. 18Nono nouia utugare aregodure tugimijera ae. Akore: “Ire ako diero mitodu rogu kurido pugeje. Ire udo ikera aboudure.” Ainore nou utugare akore. 19Nono nou boe eimijera akore: “Ure turugadu. Imode boe eimijerado aki jamedu. Akaiwomode jiwuge emugure kejewu boe eda umode ikera aboudure.” Ainore nou boe eimijera akore nou tudugareji jamedu. 20Nono ia utugare aregodure tugimijera ae jamedu. Akore: “Ikimijera nure aki. Ikare ako diero rogu barigu. Ire biado boe epiji ia ikudau areia rogu tada. Ema reo. 21Ipagudure ače. Are boe emaragodae rakado ei awo akoe kurido. Are boe emaragodu rakado ako boepaji. Emagere ere ako boepa pemegado mare akai rugadu. Are boe emaragodae rakado ei ako boepa tadaboe kadoduwo mare etai karega, akai rugadu.” Ainore nou utugare akore tugimijeraji. Mare pagare akoino. 22Nono nou boe eimijera akore: “Aro pega. Iromode ai nono akago mogadure. Akagore ie amaragodae rakado ai. Akagore amaragodu rakaie ino boepaji dukodie inoe kurie. Kodire akire ameardae pegare i. 23Kočare akare ino diero rogu tugu bancoto metu pemegawo nono banco tada, makagoduwo nono banco tada.” 24Nono nou boe eimijera makore nouia tudugaregei. Akore: “Tageragu nou ino diero tori kuieje mitodu roguji nou imedu piji. Maku nouia itugare ai nou diero oto padure dez apowu ai.” Ainore nou boe eimijera akore. 25Mare nou rakojere nonowuge egore: “Akaba maku ai. O diero tori kuieje kurire. Enodo padure dez.” Egore. 26Mare nou boe eimijera makore ewadaru jipagi. Akore: “Boe makudumode nou maragodu pemegareuge etai. Mare nou maragodu pegareuge etaire boe makudumodukare rugadu. Nou maragodu pegareuge enoe rogu mode mare nou enoe rogu akedumode epiji rugadu. 27Aino čare tageragu nou aidukare iwugei emagore boe ekimijera kurireuji taidukaie i woe pudabo tugimijerawo imi. Mato ebo itae tawo ewido woe. Emagore boe eimijera kurireuji taidukaie i. Emagore taidukaie tugimijerawo imi. Dukodire ewimode.”
Jesus Aregodure Jerusalém Ba Kurireu Ka Dukeje Boe Egarere Ji
28Nou inodu otobiji Jesus uture nou Jerusalém ba kurireu kawu awaraji rugadu. 29Puredugodure boe eda Betfagé ka, boe eda Betânia ka jamedu. Nou boe eda mugu puredure Oliveira Tori Riji. Aregodure toro dukeje makore nou ture jorduwadowuge ime pobedu dogei tuwo etudo tododai. 30Akore ei: – Tadudo toro nou boe eda ka. Tagaregodumode toro dukeje tardumode ia jumenta onaregeduji boe ere kogudo nono duji. Ia boe ekare tumugudo nou jumenta onaregedu keje raga. Tamode bukigu kiwuje dukeje tadumode mato apo itae. 31Ia boe enaramode nukodiba tarore aino dukeje tamagodo bataru jipagi: “Pagimijera aidure ji”, aino.
32Nono nou ime pobedu doge eture toro nou boe eda ka rugadu. Erdure nou jumenta onaregeduji nono Jesus mako mogadure. 33Ere kiwuje dukeje nou akure čewuge enarare ei. Egore: – Kaba kodiba taroino nou čenagu jumenta onaregeduji?
34Egore: – Pagimijera aidure ji.
35Nono eture apo Jesus togi. Etaregodure Jesus ae dukeje ere tugudau areia cobertor boe bu nou jumenta naregedu poru keje Jesus uwo tumugudo keje. Nono ere tugera maku Jesus ai rutuwo nou jumenta naregedu ao ka. 36-37Nou jumenta naregedu boe korikare ji. Pagudu bokware rugadu. Jesus uture apo. Uture dukeje boe ere tugudau areia cobertor bu awaraji tuwo awara pemegado. Nou awara ure turawuje Oliveira Tori Ri piji. Kodure Jerusalém ba kurireu ka rugadu. Boe emagare rugadu tugodui Jesus apo. Eture tiegarere pudui dutabo rugadu. Egarere Jesus ro rakare jiboeji. Dukodire ewadodu rakare Pao Kurireu ie tabo tumago pemegare ji dutabo. 38Egore: – Pagimijera Kurireu reo. Pao Kurireu ure arego mato pagae. Ča Pao Kurireu uwo boe pemegado ji rugadu! Pao Kurireu uwo boe pemegado baru tadawugei rugadu. Boe eiamedu boe emago pemegawo pagimijeraji rugadu moto keje, baru tada jamedu.
39Fariseu doge edure nono nou boebo jamedu mare emeardaekare nono nou boe emeardae mogadure. Egore Jesusji: – Amagodo nou merure akabowu boei edukiorowo.
40Jesus makore ewadaru jipagi. Akore: – Nou boe egarere pudui kodire egoino tugudu tabo. Emagomodukare dukeje nou toriguru mako pemegamode Pao Kurireuji aino nou boe emugato.
41Jesus jordure Jerusalém ba kurireuji dukeje ure tuwuredo nono. Okudure nou Jerusalém ba kurireu kejewugebo dukodire ragudure. 42Akore: – Jerusalém ba kurireu kejewuge nure tagi. Kočare awu meriji umode boe ekinorudowu aregodure tagae mare tameartorukare ji dukodire tarduwakare tabemegawo pui, Pao Kurireuji jamedu. 43Ia meri keje jordu pegare taiwuge emode taiado tagabo dukeje emode tubodo tagabo jiče woje. 44Emode tabegado. Emode tagore erugadu etagedudo. Nono emode tawai rugadu boe butudo jamedu. Mare paga karega. Pao Kurireu ure umode boe ekinorudowu arego tawagai tuwo taginorudo taro pegareu piji mare tameartorukare ji dukodire boe pegamode aino tai rugadu.
Jesus Uture Pao Kurireu Uwai Ka
45Jesus aregodure Jerusalém ba kurireu ka dukeje ure turemo Pao Kurireu uwaito. Nono jordure nou boei ere toe maku diero bagai duji ere morido puai duji ere tagu ie maku diero bagai duji. Dukodire korigodure. Ure nou boe enoe rugadu barigu. Ure nou boe etudo Pao Kurireu uwai piji rugadu. 46Jesus akore: – Pao Kurireu uwai tadare boe emagomode bagai baruto.19.46 Awu bataru padure Isaías 56.7 keje. Ainore Pao Kurireu akore. Ainore nou bapera atugo ure. Mare tare awu Pao Kurireu uwai udo nono iwogu kigodureuge ewaire.19.46 Awu bataru padure Jeremias 7.11 keje.
47-48Meri jameduji Jesus ure boe erduwado Pao Kurireu uwai tada. Mare nou ure Judeu doge enomea maku Pao Kurireu aiwuge eimijerage, nou jorduware nou Judeu doge eno bakaru jiwuge eimijerage, nou ba kurireu tadawu boe eimijerage eiamedu boe ere bato pui tumagowo pui nuba turowo Jesusji. Etaidure tuwo bito mare eroiwakare ji. Mare paga karega. Boe emagare tu tu je tuwiapaga tabo Jesus bataruji. Boe etaidure tumearduwo Jesus makore jiboeji. Dukodire nou boe eimijerage eroiwakare tuwo tugeragu Jesusji.
20Boe Enarare Jesusji Ioguduba Koiare Ure Turaga Maku Ai
1Ia meri keje Jesus rakojere Pao Kurireu uwai tada tuwo boe erduwado Pao Kurireu bataru pemegareuji tuwo boe emeartorudo pudui. Nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge eimijerage, nouia Judeu doge eimijerage etaregodure Jesus ae. 2Emagore Jesusji. Egore: – Amagodo čei. Ioguduba koiare ure turaga maku akai aro rakawo aino?
3-4Jesus akore: – Imi jamedu inaramode tai. Ioguduba ure João Batista udo boe etao pegodo? Pao Kurireu koia kana? Ia boe koia kana?
5Mare nou boe eimijerage erduwakare tumagowo Jesus bataru jipagi. Dukodire emagore pui nuba tagomode Jesus bataru jipagi. Egore: – Pagagomode Pao Kurireu koiaie ure João Batista udo boe etao pegodo mare pameartorukare nou inoduji. Awu Jesus jorduware pameartorukare nou inodu jituji. Du inodu tabo pagagomode aino dukeje Jesus umode pabogurudo. Akomode: “Kodiba tameartorukare ji?” Ainore akomode pai. 6Mare pagagomode boe eigoiaie dukeje awu woewu boe ekorigodumode pai rugadu. Boe eiamedu boe emeartorure João Batista makore Pao Kurireu bataruji kodi. Egore Pao Kurireu koiaie ure João Batista udo boe etao pegodo rugadu. Du inodu tabo ekorigodumode pai. Eidomode tori tabo pai tuwo pawido rugadu.
7Dukodire nou boe eimijerage emagore Jesusji. Egore: – Čerduwakare ioguduba ure João Batista udo boe etao pegodo.
8Nono Jesus makore ei. Akore: – Tamagokare iwadaru jipagi dukodire imagomodukare ioguduba ure itarego mato jamedu.
Boe Etu Pemegawo Boepaji
9Nono Jesus makore ia bakaruji nou boe ewiagai tuwo jebato toro Pao Kurireu meardae ka. Akore: – Ia imedu ure uva tugu to boepato. Nono ure tugeragu ia boei tuwo etudo nou to boepaji emaragoduwo ji. Nono nou ore boepa čewu uture epiji tugiriaduwo. Boe raire ji nou tugiriadu tabo. 10Nou boepa tadawu uva kurodumode kejewu ari puredugodure pudui dukeje nou ore boepa čewu ure ia tudugare utudo toro nou jeture to boepa jiwuge etae nou tugiriadure jiwu moto piji. Ure nou tudugare utudo uwo tugeragu nou makudumode pudaiwu boeji. Nou jeture nou boepa jiwuge emode uva rugadu kado dukeje emode ia kado puiato nou ore boepa čewu imedu ai. Ča nou utugare aregodure nou boepa ka. Mare nou jeture boepa jiwuge etaidukare tuwo uva kado puiato pugeje nou ore boepa čewu ai. Dukodire ere tugeragu nou imedu utugareji. Ere boeto ji. Ere utudo tuibagi tugera kedo tabo. 11Dukeje nou ore boepa čewu ure ia tudugare utudo etae toro pugeje. Mare nou jeture boepa jiwuge ere boeto ji jamedu. Ere udo tugirimi tugera kedo tabo. 12Dukejere nou ore boepa čewu ure ia tudugare utudo etae pugeje. Mare ere boeto ji dukeje ere barigu toro tubiji. 13Nono nou ore boepa čewu makore tudada. Akore: “Imode imeardu kurire jiwu itonaregedu utudo etae toro. Jire emeartorumode.”
14– Mare nou jeture boepa jiwuge erdure nou ore boepa čewu onaregedu kodure aino pudae duji dukeje emagore pui. Egore: “Awu ore boepa čewu onaregedu reo. Emare omode nou tuo oe jamedu boeče. Pawo bito pagowo awu uo o motoče.”
15-16– Dukeje nou jeture boepa jiwuge ere nou ore boepa čewu onaregedu barigu boepa piji. Ere bito toro rugadu. Ainore erore. Ča. Nuba nou ore boepa čewu romode nou jeture boepa jiwugei? Aregodumode etae. Umode ewido. Nono umode to boepa maku ia ime etai pugeje etuwo ji.
Ainore Jesus akore. Mare ia boe etaidukare nou ure tuwie jiwu bakaruji. Egore: – Boro. Nou ore boepa čewu romodukare aino.
17-18Nono Jesus aiwore tu nou boei. Dukejere akore: – Ainore nou padure bapera kejewu Pao Kurireu bataru ure marigudu. Akore: “Boe emeardae pegare toriji. Egore pegaie tuwo tuwaido ema.20.17-18 Tori tabore nou Judeu doge ere tuwai towuje. Etaiwore tu tori pemegareuge doge ewagai tuwo tuwai pemegado tabo rugadu. Mare nou tori pemegareu ure turugadu boe ewo tuwaido tabo rugadu.”20.17-18 Awu bataru padure Salmo 118.22 keje. Ainore nou batarure. Mare tori ji karega akoino. Umode boe ekinorudowu imedu jire Pao Kurireu akoino. Nou umode boe ekinorudowu romode boei nono ia boe ewudure kejewu tori ro mogadure. Buture tori aogejewuge eiamedu boe emode togorido. Mare tori ji karega inagoino. Nou umode boe ekinorudowu umode meartorukare puduiwuge erugadu boe epegado. Dujire inagoino. Nou umode boe ekinorudowu romode boei nono ia buture boe ewugejewu tori ro mogadure jamedu. Tori butumode boe ewugeje dukeje umode nou boe egugudo. Mare tori ji karega inagoino. Nou umode boe ekinorudowu umode boe pegado nou meartorukare puduiwuge eiamedu boei. Dujire inagoino.
19Nou jorduware Judeu doge eno bakaru jiwuge eimijerage erduware puduie Jesus akoino duji. Nou ure Judeu doge enomea maku Pao Kurireu aiwuge eimijerage erduware puduie Jesus akoino jamedu.20.19 Akaiwodo Mateus 21.45-46 kejewu anexo tadawu bataruji. Nou Jesus readodure jiwu bakaru jire akoino. Dukodire nou boe eimijerage pegareuge eiamedu boe etaidure tuwo tugeragu Jesusji tuwo tugu baičoreuto kuri je rugadu. Mare nouia boe etaidure Jesusji. Dukodire nou boe eimijerage epagudure, eroiwakare tuwo tugeragu Jesusji.
Jorduware Judeu Doge Eno Bakaru Jiwuge Etaidure Tuwo Jesus Jekiripagado
20Nou boe eimijerage etaiwore ia Jesus ro pegareu bagai rugadu. Ere ime etudo taiwo tabo Jesus ae ia Jesus bataru pegareu umode dubagai. Etaidure Jesus ro pegawo mako pegawo tuwo maku boe eimijera governador ai. Dukodire nou ime ere tudo nono ro pemegareuge mogadure mare pagare eroino. 21Nono ia unaragodure Jesusji tuwo barigu boeto dubagai. Akore: – Boe eimijera nure aki. Boe jokodu jire akagore tu je. Arduware Pao Kurireu bataru remawuji. Are boe eiamedu boe erduwado rugadu Pao Kurireu bataruji rugadu. Ameardaere boei boe remawu tabo. 22Ča amagodo čei. Nuba pago bakaru akomode paromode jiboeji? Pamode pagoe imposto mori maku Roma kejewu boe eimijera kurireu César ai na? Pamode maku kana? Pamodukare maku kana?
23-24Mare Jesus jorduware pagare egoino duji. Emeartorukare tuwadaruji rugadu. Dukodire makore ei. Akore: – Ia imposto morireu diero tori maku inai.
Ere ia diero tori maku Jesus ai dukeje Jesus unarare ei. Akore: – Ioguduba je ba padure awu diero tori keje? Ioguduba ie ba padure awu diero tori keje?
Nou boe egore: – Roma kejewu boe eimijera kurireu César iere padure keje.
25Jesus akore: – Boe rugadu. Čare awu César oeboe maku César ai. Mare Pao Kurireu oeboe maku Pao Kurireu ai jamedu.
26Dukodi čare nou boe eimijerage pegareuge ekare Jesus udo tuwarigu boeto tagoino jiboeji. Dukodire eroiwakare tumago pegawo Jesus makore jiboeji boe ewiagai. Erore ta je akoino pudui duji. Dukodire emagokare pugeje.
Ia Boe Enarare Jesusji Pugeje
27Nono ia saduceu doge etaregodure Jesus ae tuwo Jesus barigu boeto tagoino dutabo jamedu. Nou saduceu doge emeartorukare boe eewodumode pugeje duji. Ča emagore Jesusji. 28Egore: – Jorduwareu imedu nure aki. Ča mariguduwu makore Pao Kurireu bataru jiwu Moisés ure jaoboe ero maku etai pameartoruwo ji jii aino. Moisés akore imedu bimoduie mare ore bokwaie dukeje nou imedu uwie muguwo nou tumana bireu oreduje apo torewo nou tumana bireu oreduje apo. 29Ainore Moisés akore marigudu tuwo paro maku pagai. Ča ia meri keje ime enodo padure sete. Etumana etuwie mage nure pugi. Etumana mugure ia aredu apo. Čare bire. Mare ore bokware. 30Dukodire nou uwie imedu mugure nou aredu apo. Mare nou imedu bire jamedu. 31Nono uwie imedu mugure nou aredu apo jamedu. Mare bire jamedu. Nou uwie ime eiamedu boe emugure nou aredu apo. Mare eiamedu boe ewire. Etore bokware nou aredu apo rugadu. 32Dukeje čare nou aredu bire jamedu. 33Dukodire čedaidure čenarawo ai. Pao Kurireu umode erugadu boe eewodudo dukeje duboba mugumode nou aredu apo? Eiamedu boe emugure apo woe moto keje mare duboba mugumode nou aredu apo baru tada?
34Jesus makore ei. Akore: – Boe emugumode puapo tu woe moto keje 35-36Meartorure Pao Kurireu jiwuge eewodumode pugeje dukeje emode nono Pao Kurireu utugarege baru tadawuge emogadure. Ewimodukare pugeje. Etuwiremodukare pugeje. Etugogemodukare pugeje. Pao Kurireu ore mode emage eewodure pugeje dukodi. 37Moisés ure bu bapera kejewu Pao Kurireu bataru ure boe erduwado boe eewodumode pugeje duji. Pao Kurireu ure Moisés meardudo tuwadaruji ture iaboedo nono joru mogadure enado i piji. Dukejere Pao Kurireu makore Moisesji. Akore: “Abraão meartorure jiwu Pao Kurireu nure imi. Isaque meartorure jiwu Pao Kurireu nure imi. Jacó meartorure jiwu Pao Kurireu nure imi.”20.37 Awu bataru padure Êxodo 3.6 keje.38Ainore Pao Kurireu akore. Mare nou Pao Kurireu akoino jiwu ime ewire marigudu. Mare Pao Kurireu makore emeartoruie pudui rugadu. Dukodire parduware eewodure pugeje duji. Bireuge emeartorumodukare Pao Kurireuji. Jewodureuge emeartorumode ji. Pao Kurireu umode meartorure puduiwuge eiamedu boe eewodudo pugeje rugadu.
39Nono ia jorduware Judeu doge eno bakaru jiwuge eimijerage egore: – Boe jokodu jire akagoino.
40Mare pagare egoino. Ča boe eraga bokware tunarawo Jesusji pugeje. Eraga bokware tuwo Jesus barigu boeto tagoino jiboe tabo rugadu.
Jesus Ure Boe Erduwado Umode Boe Ekinorudowuji
41Nono Jesus unarare nou boei. Akore: – Boere boe erduwado umode boe ekinorudowuji. Egore Davi onaregedu moduie ema. Mare erduwa pemegakare Pao Kurireu bataruji. 42-43Nou mariguduwu boe eimijera Davi ure ia Pao Kurireu bataru bu bapera keje. Akore:
– Pao Kurireu makore nou ikimijera umode boe ekinorudowuji. Akore: “Amugudo woe ikana pemegareu jagwai jii toro imode nou jordu pegare aiwuge etagedudo du ka.”20.42-43 Awu bataru padure Salmo 110.1 keje.
44– Tagoino dutabo Davi akore tugimijera nuie nou umode boe ekinorudowuče. Mare Davi onaregedu mode ema jamedu. Ča nuba nou umode boe ekinorudowu ure?
Jesus Ure Boe Erduwado Boe Eimijerage Ero Pegare Jiboeji
45Boe emagare nono tuwiapaga tabo Jesus bataruji. Nono Jesus ure ture jorduwadowuge erduwado. 46Akore: – Taeku jado jorduware Judeu doge eno bakaru jiwugei. Etaidure boe emeartoruwo tu pudui. Ere boe etaiwodo tugudau areia motureu meture pudui duji. Etaidure tuwo boe epogurudo. Etumode ba kurireu ka dukeje etaidure boe emago pemegawo pudui etaidure boe ekimijeragewo pudumi kodi. Dukodire erore aino. Nou jorduware Judeu doge eno bakaru jiwuge etumode Judeu doge ere bato puiwu bai ka dukeje emode tugeragu boe eimijera mugure kejewu iraji tumuguwo keje. Etumode boe ewadae ka dukeje etumode boe eke jeture kejewu ira ka boe etododai togwagewo boetoji. 47Eragojemode boebo dukeje emago raimode baruto boe emearduwo tagoi tuwadaru motureu jituji. Mare pagatu je. Ekiwogure okoge bokwareuge aremei. Ere nou areme okoge bokwareuge ewai aru epiji. Dukodire Pao Kurireu ro pega kuričigomode ei rugadu nou ero pegareu moriče.
21Okoge Bokwareudo Aredu Ure To Diero Rogu Maku Pao Kurireu Ai
1Jesus rakojere Pao Kurireu uwai ja tada taiwo tabo nou boei. Dukejere jordure nou oe kurireugei. Ere ia toe tugu ia ira jagi tuwo maku Pao Kurireu ai. 2Dukejere jordure ia okoge bokwareudo areduji, marenaruji. Nou okoge bokwareudo ure to diero tori rogu pobedu tugu nou ira jagi. Toe mitodu rogu ure maku. 3Nono Jesus akore: – Iwo tawie boe remawuji. Awu marenaru aredu okoge bokwareudo ure to diero jamedu boe maku dukodire ure to diero makudu kurido nou oe kurireuge eiamedu boe ekori. 4Mare diero kurireu ji karega inagoino. Nou oe kurireuge ere to diero kurido Pao Kurireu ai mare etaidukare jiwu kobo rogure ere maku. Enoe kurire rugadu kimo. Mare awu aredu ure to diero rugadu boe maku. Dujire inagoino tai.
Jesus Akore Pao Kurireu Uwai Akedumoduie
5Ia Jesus ure jorduwadowuge emagore pui Pao Kurireu uwai jiboeji. Egore Pao Kurireu uwai motuie. Boe ere towuje tabowu tori motuie. Boe eie toe makudu kurido Pao Kurireu ai. Du paduie nono nou Pao Kurireu uwai ja tada. 6Mare Jesus makore nou ture jorduwadowugei. Akore: – Moture mare ia meri keje ro pegareuge emode awu Pao Kurireu uwai butudo rugadu. Tori tabore pawobe ere towuje marigudu. Mare nou tori jamedu boe epadumodukare pu aogeje pugeje.
Jesus Ure Ewie Nuba Boe Mode Boei
7Nou Jesus ure jorduwadowuge enarare Jesusji. Egore: – Kaba meri kejeba Pao Kurireu uwai butumode? Kaba jiba čerdumode čerduwawo nou akagoino jiboe jetumode pudui kuri aino duji?
8Jesus makore ei. Akore: – Taeku jado boe ekawo taekiripagado. Boe emagamode tuwadaru pegareu tabo. Egomode umode boe ekinorudowu nuie pudumi. Boe puredugoduie moto akeduwo. Mare pagare egoino. Mare du inodu tabo emode boe ekiripagado rugadu. Mare tameartorukaba ei. 9Tameardumode bakaru pegareuji. Boe emode tawie boe erugoduie pui tuwaiga tabo. Erugodu akedukaie. Emoduie tugimijerage etawuje turaga tabo. Mare taragado tai tamororamagadukawo. Pao Kurireu jorduware ro pegareuge erugoduji marigudu. Umodukare nou erugodu tawuje epiji. Erugodumode pui tuwaiga tabo rugadu mare moto akedumodukare raga.
10Jesus mako kimore ei. Akore: – Boe eimijera kurireuge erugodumode pui tugobaigaregebo. 11Moto magadugodumode boe jamedu boe parugajeje. Boe eke bokwamode boe jamedu boe parugajeje. Dukodire boe ewimode tuge boei koia. Jorubo pegareu jetumode boei moto jamedu boe parugajeje. Boe erdumode boe pegareu boeji ure turawuje baru piji duji. 12Mare ro pegareuge emode tugeragu tai. Emode boe pegado tai rugadu. Emode tamagu Judeu doge eimijerage etai. Nou boe eimijerage emode tarego Judeu doge ere bato puiwu bai ka taiwowo ia taro pegare jiboe bagai. Nono emode tadugu baičoreuto. Boe eimijera kurireuge emagomode tawagai jamedu tumago pegawo tarore jiboeji. 13Dukejere tamagodo iwadaru pemegareuji ewadaru jipagi. 14Mare tamororamagadukaba tamagore jiboe bagai. Tamagomode mare tawadaru karega. 15Imode iwadaru maku tagai tamagowo ewadaru jipagi. Dukodire nou boe eimijerage ero rakamodukare tai tawadaru jipagi pugeje. 16Tawie mage emode tamagu boe eimijerage pegareuge etai. Taomage tajemage emode tamagu boe eimijerage pegareuge etai. Ia tawobe emode tamagu boe eimijerage pegareuge etai. Ia tamedage emode tamagu boe eimijerage pegareuge etai. Ia tagi tawidodumode rugadu. 17Tameartorumode i dukodire boe eiamedu boe erdu pegamode tai. 18Mare ietu pemegamode tai ia tagao iku butukawo tagaora piji rugadu. 19Tagaba tagera ra tameartorure i dupiji dukeje imode taginorudo tawarigudukawo bope doge eda ka rugadu taruduwo baruto itae.
Jerusalém Ba Kurireu Akedumode
20Jesus makore kimo. Akore: – Tardumode tugobaigarege pegareuge ere taiado Jerusalém ba kurireu tabo duji dukeje tarduwamode boe akedumode kuri aino duji. 21Inure tawie. Boe erdumode nou inoduji dukeje Judéia moto kejewuge eregodu rakawo toro tori ao ka. Jerusalém ba kurireu tadawuge eregodu rakawo. Nou rakojere ipoguru kejewuge eregodu rakawo jamedu. Ekawo tugirimi tuwai ka iaboe bagai pugeje tuwo tuginorudo boe pegareu piji. 22Nou meri keje boe pegamode boei rugadu ero pegareu moriče. Pao Kurireu ure boe ewie marigudu boe pegamoduie boei rugadu boe ero pegareu moriče. Aino makore jiboe jetumode pudui rugadu. 23Nou meriji boe pegamode kuiarureugei rugadu. Boe pegamode ei rugadu eroiwamoka turegodu rakawo kodi. Boe pegamode etore kugure etuje magei jamedu eroiwamoka turegodu rakawo kodi. Boe pegamode awu motoji rugadu. Pao Kurireu umode boe pegado awu Judeu dogei rugadu ero pegareu moriče. 24Iage ewidodumode tariga kurireu tabo. Boe emode iage etudo toro moto tuginaiwu ka etuguduwo baičoreuto toro. Nono boe tuginaiwuge etaregodumode Jerusalém ba kurireu ka tuwo akedudo rugadu jii toro Pao Kurireu jorduware jiwu meri ka.
Imedu Onaregedu Aregodumode Pugeje
25Jesus mako kimore: – Meri joku umode tuginai. Ari joku umode tuginai. Kuieje doge emode tuginai jamedu. Moto kejewu boe eimijera kurireuge epagudumode rugadu. Epagudumode pobo maereu ako pegareu akoji. Pobo maereu umode pobo barigu moto ao ka. 26Boe erduwamode boe pegare moto jituji. Baru magadugodumode jamedu. Boe edu pagamode turoiwakare nou boe pegare jiboeji kodi. Dukodire ekugudugodumode tubagudu koia. 27Dukejere čare boe erdumode Imedu Onaregedu aregodumode tugodu tabo boetugu ao jituji. Erdumode Imedu Onaregedu ro rakareuji. Erdumode Imedu Onaregedu o jorugu kurireuji. Jorugure moto jamedu boe parugajeje. 28Tardumode nou iwadaru jetumode pudui duji dukeje taragojedo tawo tado tarugadu. Tagaiwowo iwagai. Tarduwamode imode taginorudo rugadu kuri aino duji rugadu.
Figo I Ure Boe Erduwado
29Jesus mako kimore. Akore: – Figo i ure tarduwado tu tu je. 30Figo i okurogu boture dukeje tardure roino duji rugadu. Dukodi čare tarduware bubutumode kuri je rugadu. Tagaiwore figo iji tarduwawo bubutumode kejewu meriji. Ainore tarore tu tu je. 31Ča ire tawie nuba boemode meri jokuji nuba boemode ari jokuji. Iwo tawie. Tagaiwodo awu ire tawie jiboe jamedu boeji emode tarduwado dubagai. Tardumode ire tawie jiwu iwadaru jetumode pudui duji dukeje tarduwamode itaregodumode kuri aino duji boe eimijera kurireuwo imi. Bubutu ji karega inagoino. Ire inagoino rugadu. Itaregodumode kejewu meri jire inagoino tai. 32Iwo tawie boe remawuji. Toro ia meri keje ia tawobe erdumode awu imagore jiboe jeture pudui duji rugadu. Jetumode pudui rugadu tuwimodedu otodai. 33Baru akedumode. Moto akedumode. Mare iwadaru akedumodukare rugadu jii toro rugadu. Jetumode pudui rugadu.
Boe Ewo Tuioku Jado
34Jesus mako kimore ei. Akore: – Taeku jado. Tamororamagadukaba tawadae bagai. Tagaba tage kurudo tai. Tamororamagadukaba tamaragodae bagai. Tamororamagadumode nou inoduji dukeje tamodukare tado tarugadu nou ire tawie jiwu meri aregodumodedu ka. 35Nou meri keje aregodumode tagae tae pagare tu je du ka. Moto kejewuge eiamedu boe emodukare činorudo nou itaregodumode kejewu meri keje. 36Dukodire inagoino tai. Taeku jado. Tamagodo baruto Pao Kurireu bagai tu tu je uwo taragado, uwo taginorudo boe pegareu boe piji, tagawo tagera ra tameartorure i dupiji jii toro itaregodumode du ka.
37Nono Jesus ure boe erduwado Pao Kurireu uwai ja tada meri jamedu boeji jii toro merirekodu ka tu tu je. Nou boečoji ure tudawuje nou ba kurireu piji tuduwo toro Oliveira Ri tori ao ka tu tu je. 38Barogwakododure dukeje ure tugirimi Pao Kurireu uwai ka pugeje tuwo boe erduwado nono. Boe eiamedu boe eture Pao Kurireu uwai ka Jesus togi tu tu je tuwiapagawo Jesus makore jiboeji pugeje. Ainore Jesus rore nou meri jameduji.
22Boe Eimijerage Ere Tumeardae Pegareu Tawuje
1Judeu doge epuredugodure tuwo tuwadae towuje. Nou ewadae iere Páscoa. Nou tuwadae kejere emode ia amireu tuginaiwu ko. Fermento metukare nou amireu tada.
2Nou ure Judeu doge enomea maku Pao Kurireu aiwuge eimijerage ere bato pui jorduware Judeu doge eno bakaru jiwugebo. Emagore pui nuba turowo tuwo tugeragu Jesusji tuwo bito du bagai. Mare boe etaidure Jesusji dukodire nou jordu pegare Jesus jiwuge boe eimijerage epagudure turo pegawo ji.
Judas Iscariotes Akore Tumoduie Jesus Maku Boe Eimijerage Pegareuge Etai
3Nono bope doge eimijera Satanás ure turemo nou Jesus ure jorduwadowu Judas Iscariotito. 4Dukodire Judas Iscariotes uture toro nou ure Judeu doge enomea maku Pao Kurireu aiwuge eimijerage etae tumagowo ei tumoduie Jesus maku etai. Pao Kurireu uwai tadawu tugobaigarege eimijerage eire Judas Iscariotes akoino jamedu. 5Dukodire nou boe eimijerage eiamedu boe egarere pudui. Nou boe eimijerage ere diero tori udo 30 Judas Iscariotes ai. 6Dukodire Judas ure tugeragu nou dieroji. Du nou meri pijire nou Judas Iscariotes aiwore Jesus rore jiboeji tuiorduwo boe emagakare apo dubagai tuwo Jesus maku boe eimijerage pegareuge etai nou meri keje.
Jesus Umode Páscoa Kejewu Boe Eke Ko Ture Jorduwadowugebo
7Páscoa meri aregodure Judeu doge ere tuge amireu pemegado, ere tagu carneiro doge kugure ewido tuwo pemegado tuwo kowuje jamedu nono turo mogadure tuwaduwo Páscoaji. 8Jesus makore Pedroji, Joãoji jamedu. Akore: – Tadudo toro tawo page pemegado pawo kowuje pawaduwo Páscoaji.
9Egore: – Kaiba čemode nou page pemegado?
10-11Jesus akore: – Tadumode Jerusalém ba kurireu ka. Tagaregodumode toro dukeje ia imedu aregodumode tadogi ia pori po tabo. Tadudo nou imedu rekodaji. Umode turemo ia baito dukeje tanarado nou uwaire bai čewuji ia paedumodureu bagai. Tagagodo aino: “Pagimijera aidure ia tiedumodureu bagai togwagewo Páscoa kejewu boe ekeji ture jorduwadowugebo nou boe edureu ja tada.” 12Tagagomode aino dukeje nou uwaire bai čewu umode tardudo ia boe edure kejewu bai pemegareuji. Nou bai pemegamode rugadu pagwagewo Páscoa kejewu pageji. Nonore tamode page pemegado.
13Nono Pedro uture João apo jamedu. Etaregodure Jerusalém ba kurireu ka dukeje erdure boeji nono Jesus akoino jiboeji. Nono ere tuge pemegado tuwaduwo Pascoaji nou bai tada rugadu.
14Nono Jesus aregodure nouia ture jorduwadowugebo. Nou boečoji Jesus mugure nono ia ira keje togwage tabo ebo. Utumode Jesus bataru tabowuge emode emage. 15Akore: – Itaidure rugadu iwo awu Páscoa kejewu boe eke kowuje mare boe ero pegamode i du otodai. 16Nono imodukare awu boe eke kowuje pugeje jii toro Boe Eimijera Pao Kurireu aregodumode nou meartorure puduiwuge ewagai du ka. Nono imode Pao Kurireu uke remawu kowuje Pao Kurireu apo.
17Jesus ure tugeragu vinho kuruji. Imadure Pao Kurireu apo nou vinho kuru paru tabo. Dukeje makore pugeje nou ture jorduwadowugei. Akore: – Awu pedo tai. 18Inure tawie aino. Ikudumodukare awu vinho kuruče pugeje jii toro itaregodumode iwo boe eimijera kurireudo imi du ka.
19Jesus ure tugeragu amireuji. Imadure Pao Kurireu apo nou amireu paru tabo. Nono ure nou amireu kado dukeje ure pedo ei. Akore: – Ikodu reo. Makudumode taro pegareu moriče. Tagwagedo awuji tawiabutuwo iwugeje, irore jiboe keje.
20Enogwagere dukeje Jesus ure tugeragu vinho kuruji jamedu turowo ji nono turo moga amireu jitu mogadure. Akore: – Ikure nou uva kuru rema. Pao Kurireu meardae maiwu koiare imode iku redo boe ero pegareu moriče. 21Ča. Tagaiwodo. Umode imagu boe eimijerage pegareuge etaiwu mugure woe itabo ira keje. 22Mare iwimode nono Pao Kurireu meardae mogadure rugadu. Mare boe pegamode nou umode imagu boe eimijerage pegareuge etaiwuji jamedu.
23Jesus akore aino dukeje čare nou ure jorduwadowuge enarare pui duboba romode aino tuwo Jesus maku boe eimijerage etai du bagai.
Jesus Ure Jorduwadowuge Etokire Pui
24Nono Jesus ure jorduwadowuge eiamedu boe etokire pui. Eiamedu boe egore boe eimijera kurireu moduie pudumi nou tumedage ekori. 25Mare Jesus makore ei. Akore: – Boe tuginaiwuge eimijerage meartorukare Pao Kurireu jiwuge egore boe emedage enuie pudumi mare pagare egoino. Ero rakare boei. Boe emeartorure tugimijeragei rugadu. Emeartorumodukare ei dukeje nou boe eimijerage emode boe pegado nou meartorukare puduiwugei rugadu. 26Mare tagi tarokaba nono nou boe eimijera kurireuge ero mogadure. Ia tagi tagaidumode tawo boe eimijerado tagi dukeje tagojarokaba tai tawo tado nono ipare enojaromoga pudui tumanamagei dumogadure. Ia tagi tagaidumode tawo boe eimijerado tagi dukeje tameardae udo nono boe utugare meardae mogadure tawo boe eimijera pemegareugedo tagi. Boe eimijera romode nono boe utugare ro mogadure tuwo boe eimijera pemegareudo pudumi. 27Boe eimijerage kurireuge enogwagemode boetoji. Utugarege emode boe eke maku etai. Boe eimijera kurireu nure imi rugadu mare ire ido nono boe etugare mogadure iwo tage maku tagai. Tarodo nono iro mogadure jamedu. 28-29Boe rakare i. Du inodu tabo taragojere woe itabo. Tardure boe rakare i duji. Mare Iogwa Kurireu ure boe eimijera kurireudo imi ietuwo boei. Dukodire imode boe eimijerado tagi jamedu taetuwo boei. 30Mare boe eimijera kurireu mode imi dukeje tagwagemode itabo tagudumode itabo imugureu keje. Tamugumode boe eimijerage emuga keje jamedu. Boe eimijerage emode tagi jamedu tagaiwowo Judeu doge eiamedu boe ero pegareu bagai.
Jesus Makore Pedroji Umoduie Tuiorduwa Bokwado Pudui
31-32Nono Jesus makore Pedroji. Akore: – Simão. Simão. Awiapaga pemegado imagomode ai jiboeji. Bope doge eimijera Satanás okwamagudure tuwo turokogado ai tuwo ameardae pegado. Dukodire imagore Pao Kurireuji aparu tabo ameartorure idu akedukawo. Nono amode akirimi ameartoruwo i pugeje nono amode amedage emeartoru kurido i jamedu.
33Mare Pedro akore: – Ikimijera kurireu nure aki rugadu. Imeartorure tu ai rugadu. Ire irugadu ikoduwo akabo imeduwo baičoreu tada akabo, iwiwo akabo jamedu.
34Jesus akore: – Inure awie boe remawuji. Awu boečoji akagomode arduwakaie i dumode pobe metia bokware. Dukeje čare kagariga kudugodumode.
35Nono Jesus makore ture jorduwadowuge eiamedu boei pugeje. Akore: – Ire tadudo toro boe etae marigudu tawo boe ewie iwadaruji. Mare ire tadudo tagadarabo bokware dutabo, tamijigu bokware dutabo, tawure okeakejewu bokware dutabo. Ča inarawo tai. Tadure toro ia boe bokware tagai kana?
Egore: – Boro. Iaboe okwakare čenai rugadu.
36Jesus akore: – Aino čare ore mičigureu umode tugeragu to mičiguji. Ukadaraboreu umode tugeragu tugodaraboji. Iaboe maku diero bagai tawo akirodo ia tarigaji. 37Tawiapaga pemegado iwadaruji. Pao Kurireu bataru padure bapera keje marigudu. Akore aino: “Boe ere udo nono ro pegareu mogadure.”22.37 Awu bataru padure Isaías 53.12 keje. Ainore padure bapera kejewu Pao Kurireu bataru akore marigudu. Aino ča nou bataru jetumode pudui rugadu. Boe mode aino i rugadu nono nou bataru mogadure.
38Ia nou Jesus ure jorduwadowu imedu akore: – Akaiwodo. Padarigare pobe woe.
Jesus akore: – Ure turugadu.
Jesus Makore Baruto Pao Kurireu Bagai
39Jesus uture ture jorduwadowugebo nou Jerusalém ba kurireu piji Oliveira ri ao ka turoiaji. 40Aregodure taidure jiboe ka dukeje Jesus makore ei. Akore: – Tamagodo itabo Pao Kurireu bagai baruto bope ukawo tumeardae pegareu maku tagai taro pegakawo.
41Nono Jesus ure tudawuje epiji kuri je tumagowo baruto. Ure tubu jodo moto keje tumagowo Tuoji. 42Akore: – Iogwa. Boe ero pegamode idu utudo ipiji. Mare umodukare nono itaidu mogadure. Mare uwo nono akaidu mogadure.
43Dukeje ia Pao Kurireu utugare baru tadawu aregodure Jesus ae tuwo raka maku ai. 44Jesus mako kimore baruto turaga tabo. Akaru ure nono boe ekure tuwudure moto ka dutabo.
45Ure tumago akedudo dukeje Jesus ure tugirimi ture jorduwadowuge etae. Jordure ei enudure duji. Emedugodure tugiarigodure dukodi. 46Jesus makore ei. Akore: – Kodiba tanudure? Taragojedo. Tamagodo baruto Pao Kurireu bagai bope ukawo tumeardae pegareu maku tagai taro pegakawo.
Boe Eimijera Pegareuge Ere Tugeragu Jesusji
47Jesus mako kimore aino nou ture jorduwadowugei dukeje boe emagare taregodu tabo ae. Nou Jesus ure jorduwadowu Judas Iscariotes emare roino ebo tuwo erego Jesus bagai tuwo Jesus maku etai. Nono Judas ure tuburedo Jesusji tugimaduwo apo. Ure togwa to čo Jesus je koduto tuwo nou boe pegareuge erdudo taidure tuwo tugeragu jiwu imedu nure ema duji. 48Jesus makore Judaji. Akore: – Are imagu awu boe pegareuge etai. Kočare akaidure akimaduwo aino itabo?
49Ia Jesus ure jorduwadowuge erdure nou boe pegareuge emode tugeragu Jesus jituji dukeje enarare Jesusji: – Čegimijera! Čemode čebodo ebo tariga tabo?
50Mare nouia Jesus ure jorduwadowu upagakare Jesus makowo nou tumedage ewadaru jipagi. Ure taredo nou ure Judeu doge enomea maku Pao Kurireu aiwuge eimijera kurireu utugare ae. Ure tariga bu nou utugare bija kajeje.
51Mare Jesus akore: – Tarokaba aino. Urugadu.
Nono Jesus ure tugera bu nou imedu bija keje. Ča ure pemegago tači je. 52-53Dukeje Jesus makore nou ure Judeu doge enomea maku Pao Kurireu aiwuge eimijeragei, nou Pao Kurireu uwai tadawu tugobaigaregei jamedu, nouia boe eimijeragei jamedu. Akore: – Ire boe emeardae pegado kana emeartorukawo tugimijeragei kana? Kočare tagaregodure tariga kurireu tabo, rago tabo, tawo tageragu i nono taro moga ro pegareuge eidu mogadure. Iragojere tagabo meri jameduji Pao Kurireu uwai ja tada. Mare tagare tageragu i nono. Mare bope aidure boečoji kodire tare tarodo aino boečo kao tawo tageragu aino i boečoji rugadu tameartorure tagimijera bope doge eimijeraji dukodi.
Pedro Makore Tuiorduwakaie Jesusji
54Dukeje nou tugobaigarege ere tugeragu Jesusji. Eture apo. Ere reko nou Judeu doge eimijerage etae toro ure Judeu doge enomea maku Pao Kurireu aiwuge eimijera kurireu uwai ka. Pedro uture eregodaji mare ure tugodu jaedo ei. Nou boe eimijerage ere nou tugobaigarege etudo Jesusji nono bawadu keje. 55Nono boe ere jorugo nono bawadu keje. Pedro uture nou boe etae. Ure tumugudo nono ebo. 56Ia utugare aredu jordure Pedroji nono nou joru okwai. Aiwo pemegare ji dukeje akore: – Awu imedu rakojere Jesus apo jamedu.
57Mare Pedro akore: – Boro. Iorduwakare ji.
58Mare Pedro utukare. Rakoje kimore nono nou bawadu keje. Nono ia imedu jordure ji dukeje makore Pedroji. Akore: – Ia Jesus apowu nure aki jamedu?
Pedro akore: – Boro. Imi karega.
59Nou inodu rekodaji ia imedu makore Pedroji pugeje. Akore: – Iorduware ai. Aragojere Jesus apo. Awadarure nono Galiléia kejewu boe ewadaru mogadure.
60Mare Pedro akore: – Iorduwakare kaba jiba akagoino.
Pedro makore aino dukeje ia kagariga kudugodure. 61Nono Jesus aiwore tu Pedroji. Dukeje Pedro biabuture Jesus makore puduiwu bataru keje. Jesus makore Pedroji makomoduie tuiorduwakaie pudui dukeje kagariga kudugodumoduie rugadu. Pedro makomoduie tuiorduwakaie Jesusji dumode pobe metia bokware rugadu. 62Nono Pedro biabuture nou Jesus bataru keje jeture pudui rugadu duji. Dukodi čare Pedro uture nou boe epiji rugadu. Ragudu rakare rugadu turore aino duji.
Boe Eimijerage Etaiwore Jesus Ro Pegareu Bagai
63Tugobaigarege ere boeto Jesusji, egokodure ji jamedu. 64Ere areia kogudo Jesus je kajeje. Nono enarare ji: – Ioguduba ure boeto ai? Amagodo!
Mare pagare egoino. Enure tago kodudo ji turoi jitu tabo. 65Nono emago pegare ji rugadu.
66Barogwakododure dutabo boe eimijera kurireuge ere bato pui. Nou ure Judeu doge enomea maku Pao Kurireu aiwuge eimijerage edure nono. Jorduware Judeu doge eno bakaru jiwuge edure nono jamedu. Nono tugobaigarege etaregodure Jesus apo etae.
67-68Dukeje nou boe eimijerage enaragodure Jesusji. Egore: – Amagodo. Aki na umode boe ekinorudowu nure aki?
Jesus akore: – Inagomode uu. Imie rugadu mare tameartorumodukare i dukodire imagomodukare tawadaru jipagi. Inaramode tai iaboeji mare tarduwamodukare tamagowo iwadaru jipagi jamedu. Dukodire inaramodukare boeji tai. 69Mare Pao Kurireu raka kodure boe eiamedu boe kori. Nono inure tawie. Awu inodu otobiji imugumode Pao Kurireu ukana pemegareu jagwai.
70Jesus akore aino dukeje nou boe eimijerage enarare Jesusji. Egore: – Mare aki na Pao Kurireu Onaregedu nure aki?
Jesus akore: – Boe jokodu jire tagagoino. Imi rugadu.
71Mare nou boe eimijerage emeartorukare nou inoduji marigudu. Dukodire emagore pui tumago pegare Jesus jitu tabo. Egore: – Pagare akoino. Batrarodunure. Mako peganure Pao Kurireuji. Kodi čare ure tumagu pagai nou tuwadaru pegareu tabo. Paipagamodukare ia bataru pegareu bagai pugeje.
23Boe Eimijera Pilatos Aiwore Jesus Rore Jiboeji
1Nono nou Judeu doge eimijerage ere Jesus reko toro Pilatos ae. Emare Romano doge eimijera kurireu nure ema nono. 2Etaregodure Pilatos ae dukeje nou Judeu doge eimijerage emago pegare Jesusji Pilatos biagai tuwadrarodu tabo. Egore: – Čerdure awu imedu ro pegareuji. Ure čewobe Judeu doge emeardae pegado Roma kejewu pagimijera kurireuji. Makore boei ekawo imposto diero maku Roma kejewu pagimijera kurireu César ai. Akore tumoduie boe ekinorudo Roma kejewuge epiji. Akore boe eimijera kurireu unuie pudumi.
3Dukodire Pilatos unarare Jesusji. Akore: – Boe rugadu na? Judeu doge eimijera kurireu nure aki rugadu?
Jesus akore: – Uu. Boe jokodu jire akagoino.
4Mare Pilatos makore nou Judeu dogei, eimijeragei jamedu. Akore: – Iordukare awu imedu ia ro pegareuji. Imodukare barigu boe pegareuto.
5Mare nou boe emagore Pilatoji pugeje. Egore: – Ure boe ekiripagado Judéia kejewu moto parugajeje tuwadaru tabo. Ainore rore Galiléia moto keje ji taregodure aino woe du ka.
6-7Pilatos unarare nou boei. Akore: – Nou Galiléia moto kejewu nure ema na?
Nou boe egore uie ema rugadu. Dukodire Pilatos ure nou Judeu doge eimijerage etudo Galiléia moto kejewuge eimijera bagai Jesus apo. Nou Galiléia moto kejewuge eimijera iere Herodes. Nou Herodes rakojere nono Jerusalém ba kurireu keje nou meriji. Dukodire Pilatos ure Jesus utudo toro bagai.
8Etaregodure Jesus apo Herodes ae dukeje Herodes jakaregodure pudui. Marigudu aidure tuiorduwo ia Jesus ro rakareuji kodi. 9Dukodire Herodes unara raire Jesusji. Mare Jesus makokare boeji, rokare ia boeji. 10Nono nou ure Judeu doge enomea maku Pao Kurireu aiwuge eimijerage, nou jorduware Judeu doge eno bakaru jiwuge emago pegare Jesusji nou Herodes biagai.
11Nono Herodes ure tuwadaru očarodo Jesusji. Nou rakojere apowu tugobaigarege ere tuwadaru očarodo ji jamedu. Dukeje Herodes ure ia tugudau areia motureu tugu ji mare roreru nure ji. Dukeje ure Jesus utudo toro tuibagi Pilatos ae. 12Dukodire nou meriji Herodes, Pilatos ere tumedagedo puče. Marigudu erdu pegare pui. Aino čare ere tubemegado pui.
13Etaregodure tuibagi Pilatos ae pugeje. Dukeje Pilatos makore nou ure Judeu doge enomea maku Pao Kurireu aiwuge eimijeragei, nouia Judeu doge eimijeragei, nouia boei jamedu. 14Akore: – Tagaregodure awu imedu Jesus apo woe itae. Tagagore uie boe emeardae pegado emeartorukawo tugimijerage čei pugeje. Aino inara raire ji woe taiamedu boe taegai. Mare iordukare ia tagagoino jiwu awu imedu ro pegareuji. Iordukare ia tagagoino jiwu awu imedu bataru pegareuji. 15Ire utudo Herodes ae. Mare Herodes jordukare ia awu imedu ro pegareuji jamedu. Ure utudo tuibagi mato itae pugeje. Awu imedu ro pegareu kurimode dukeje imagomode tugobaigaregei ewo bito. Mare iagai ro pegareu remawu bokware dukodire imodukare edo bito. 16Imode tugobaigarege edo boeto ji bukigu tabo nono imode ikera ra piji utuwo pugeje.
17-19Páscoa kejewu meriji nou Judeu doge ero koiare nou Pilatos umode ia mugure baičoreu tadawu imedu tawuje utuwo nou boe epiji ainore rore tu tu je. Ainore erore joru jamedu boeji. Dukodire Pilatos meardaere tuwo Jesus utudo aino. Ia imedu iere Barrabás. Ure boe ewido. Ure boe ero pegado rugadu boe eimijeragei. Ro pegareu nure ema rugadu. Dukodire nou Barrabás rakojere baičoreu tada marigudu. Mare nou boe ere tumago rakado toro Pilatos ae. Egore: – Nou imedu Barrabás tawuje čenai utuwo pugeje! Awu imedu Jesus remo baičoreuto nou Barrabás mugato bitoduwo!
20Pilatos meardaere tuwo Jesus utudo rugadu dukodire makore nou boei pugeje. 21Mare ere tumago rakado toro Pilatos ae. Egore: – Bito ipo padure pugajejewu keje! Bito ipo padure pugajejewu keje!
22Mare Pilatos makore nou boei pugeje. Akore: – Kodiba tagagoino? Ro pegareu pa? Iagai awu imedu ro pegareu remawu bokware dukodire imodukare tugobaigarege edo bito. Imode edo boeto ji bukigu tabo nono imode ikera ra piji utuwo pugeje.
23Mare nou boe ere tugudu rakado toro Pilatos ae rugadu Jesus bitoduwo ipo padure pugajejewu keje rugadu! Ere tumago raido aino dukodire ere nou Pilatos meardae kodudo nou tumeardae rekodaji.
24-25Dukodire Pilatos ure Barrabás utudo baičoreu piji mare makore nou boei Jesus bitodumoduie. Nou Barrabás imedu ro pegareu nure ema rugadu. Ure boe ewido. Ure boe emeardae pegado tumeartorukawo tugimijeragei pugeje. Mare nou meriji boe etaidure ji. Emagore Pilatoji uwo nou Barrabás tawuje baičoreu piji. Dukodire Pilatos ure utudo rugadu. Mare boe etaidukare Jesusji. Etaidure tuwo Jesus bito rugadu. Nono Pilatos ure Jesus maku tugobaigarege etai bitoduwo nono nou boe etaidu mogadure.
Jesus Bitodure Ipo Padure Pugajejewu Keje
26Du inodu rekodaji tugobaigarege eture toro Jesus apo. Jesus oredure nou tubadumode kejewu ipo tabo. Mare Jesus rakakare nou ipo tabo. Dukodire tugobaigarege emagore ia imeduji oreduwo nou ipo tabo Jesus rekodaji. Nou imedu iere Simão. Cirene ba kurireu pijiwu nure ema. Maigodu aino nou Simão aregodure ipoguru piji nou Jerusalém ba kurireu ka.
27Boe emagare Jesus kodumode jiwu awaraji. Ia Jerusalém kejewuge areme etragudu rakare Jesus apo.
28-29Mare Jesus makore nou aremei. Akore: – Tagragudukaba itabo. Tagragududo tagabo. Tagragududo tagorebo. Mare paga karega boe pegareu aregodumode tagae kodi. Boe pega rakamode boe etorei rugadu dukodire areme ekiarigodumode rugadu, etragudumode rugadu torebo. Boe emagomode aino: “Čerdure boe pegare čedorei rugadu dukodire boe pega kuričigore čei rugadu. Dukodi boe pegakare ore bokwareu aremei. Ore bokwareu areme egarere pudui.” Ainore boe egomode. 30Mare paga karega. Boe pegamode boei rugadu. Dukodi nou meri keje boe emagomode tori ri butuwo tuwugeje, tuwiwo boe pegareu koda piji.23.30 Awu bataru padure Oséias 10.8 keje.31Iwidodumode nono boe ere joru tugu ia jerigi kidukareu to dumogadure. Mare ia meri keje tagi tamode nono jerigi pemegareure. Boe pegamode tai rugadu nono joru ure jerigi kowu dumogadure.
Mare joru ji karega Jesus akoino ei. Boe pega raimodukare pudui. Dujire akoino ei. Toro ia meri keje boe pega kuričigomode Judeu dogei. Dujire akoino ei.
32Tugobaigarege eture ia ime pobedu dogebo Jesus apo jamedu. Ro pegareuge nure emage. Ewidodumode jamedu. 33Nono etaregodure ture boe ewido kejewu tori ao ka. Nou tori iere “Boe ewireuge etaora era jeta reo”. Nonore ere Jesus bito ipo padure pugajejewu keje. Ere nou ro pegareu ime pobedu doge ewido nono jamedu. Ia rakojere Jesus kana pemegareu jagwai. Metia rakojere Jesus kana pegareu jagwai jamedu.
34Nono Jesus akore: – Iogwa. Awiago awu boe ero pegare i dupiji. Erduwakare kaba jiba turoino.
Nou tugobaigarege ere Jesus ukudau areia pedo pui. Ere tuwadu rogu towuje tori rogu tabo tuiorduwo duboba umode tugeragu Jesus ukudau areiaji.
35Boe etaregodure nou Jesus ae nou ipo padure pugajejewu ka. Eragojere nono taiwo tabo Jesus bimode dubagai. Nou boe eimijerage ekadakagirire Jesus jiwuge etaregodure nono tuiorduwo Jesus bire duji. Egore: – Are boe ekinorudo boe pegareu piji. Ča akinorudo jamedu nou ipo padure pugajejewu piji. Pao Kurireu ure tugeragu jiwu umode boe ekinorudowu mode aki rugadu dukeje amode akinorudo nou ipo padure pugajejewu piji.
36-37Tugobaigarege etomeare turore Jesus jituji jamedu. Ere vinho kuru maku Jesus ai mare kudukare če. Nono emagore ji. Egore: – Judeu doge eimijera kurireu nure aki dukeje amode akinorudo awu ipo padure pugajejewu piji.
38Nono ere ia ira atugodo. Ere bu Jesus aogeje. Ainore nou ira atugo ure: – Judeu doge eimijera kurireu reo.
39Nou ro pegareu pobedu doge epadure ipo padure pugajejewu keje nono jamedu Jesus apo jamedu. Ia makore Jesusji. Akore: – Umode boe ekinorudowu nure aki dukeje amode akinorudo amode čeginorudo jamedu.
40-41Mare nou metia makore nou timediaji. Akore: – Kočare akare aeku kidugo Pao Kurireuji rugadu. Boe pegare aino pai paro pegare kodi. Boe enure pawido ipo padure pugajejewu keje paro pegareu moriče. Mare awu pagaiadadawu imedu ro pega bokware rugadu. Dukodire ukare turugadu biwo aino pawi mogadure.
42Dukeje makore Jesusji. Akore: – Akaregodumode pugeje boe eimijera kurireu ure aki dutabo dukeje awiabutudo iwugeje.
43Jesus akore: – Boe jokodu jire imagomode ai. Awu meriji rugadu aragojemode itabo boe pemegareu keje.
Jesus Bire Rugadu
44Meri puredugodure pagaia ka dukeje boečodure tači je moto jamedu boe parugajeje. Boečodure rugadu. Nou boečo kodure kuri toro nou três hora ka. 45Čare rore puku je nou areia kurireu bararere Pao Kurireu uwai ja tadawu ure tuwowuje nou bai ja oto piji moto ka.
46Nono Jesus kudugodu rakare. Akore: – Iogwa. Iwinure aino mare imugudo akera keje.
Makore aino dukeje bire.
47Tugobaigarege eimijera jordure nou inoduji dukeje makore Pao Kurireu bagai baruto. Akore: – Boe rugadu. Awu imedu ro jetororeu nure ema rugadu.
48Nou etaregodure taiwowo boe ewimode dujiwuge erdure Jesus bire duji dukeje ere tugirimi tuibagi tuwai ka pugeje tugiarigodu tabo. Ere boeto tumororaji nono Judeu doge ero mogadure tuwo boe erdudo tugiarigodure rugadu duji. 49Mare nou Jesus metage edu kimore nono taiwo tabo. Nou aregodure Jesus rekodajiwuge Galiléia pijiwuge areme edu kimore nono jamedu taiwo tabo Jesus bire duji.
Jesus Tugudure Tori Poroto
50-51Ia Judéia moto kejewu Arimatéia ba kurireu kejewu imedu Judeu doge eimijera pemegareu iere José. Upagare umode boe ekinorudowu bagai boe emeartoruwo ji boe ewo tugimijerado Pao Kurireuče. Boe eimijerare ema jamedu mare meardaekare nono tumedage Judeu doge eimijerage emeardaere. Aidukare Jesus bitoduwo. 52-54Barogwato Judeu doge emaragodumodukare. Dukodire nou José okwamagudure Pilatoji tuwo Jesus tugu ia tori poroto nou Sábado rekodajiwu meri keje. Pilatos akore pegakaie dukodire nou imedu José ure Jesus rawuje nou ipo padure pugajejewu piji. Ure upodo areia pemegareu tabo. Nono ure Jesus reko tumode tugu towu tori poro ka. Boe ere nou tori porodo mare ekare ia bireu tugu to raga. Ča nou José ure Jesus tugu nou tori poroto sexta feira meriji merirekodutabo.
55Nou etaregodure Galiléia pijiwuge areme ekodure nou José rekodaji. Erdure José ure tugu tori poro to duji. Ere turemo nou tori poroto tuiorduwo Jesus meture nono duji. 56Nono ere tugirimi tuwai ka pugeje tuwo roreboe pemegado tuwo reko nou Jesus biriji.
Nono Sábado meri keje nou areme ere tamudo tuwai keje tumeartoruwo Judeu doge eno bakaruji nono turoiaji.
24Jesus Jewodure Pugeje
1Domingo boečoto nou areme eture Jesus meture tadawu tori poro ka nou ture tugera pemegado jiwu roreboe tabo. 2Etaregodure toro dukeje erdure nou Jesus meture tadawu tori poro jare duji. Sexta feira meriji ime ere nou tori poro mi ia tori kurireu tabo. Mare aino nou tori kurireu padukare nou tori poro keje pugeje. 3Dukodire nou areme ere turemo. Etaiwore mare Jesus padukare nono pugeje. 4Eragoje kimore nono tuiorduwa bokwa tabo dukeje nou areme etaiwore tubiji. Erore puku je erdure Pao Kurireu utugarege baru tadawugei. Ere pobe. Ekudau kigadure ei rugadu. Kigadure nono boeiaragudu mogadure boe etaiwowo ji. 5Ča nou areme epagudugodure rugadu. Ere tubu jodo moto keje. Ere tuie jodo jamedu. Nono nou baru tadawuge egore: – Kodiba tagaregodure woe bireu metumode tadawu tori poro ka? 6Tardumodukare tagaiwore bagaiwuji. Tagaiwore bagaiwu jewodure pugeje dukodire rakojekare woe pugeje. Marigudu, toro Galiléia moto keje, ure tawie turomode jiboeji. Tawiabutudo nou makore jiboe keje. 7Akore aino: “Imagudumode ro pegareuge etai. Emode iwido ipo padure pugajejewu keje. Mare merimode pobe metia bokware dukeje iewodumode pugeje.” Ainore akore tai marigudu.
8-9Nono nou areme ewiabuture nou Jesus makore jiboe keje rugadu. Dukodire čare eregodure boe piji toro nou Jesus ure jorduwadowuge etae tureadoduwo tuiordure jiboeji tumeardure jiboeji eiamedu boe ewiagai. 10Nou areme ekiere Maria Madalena, Joana, Maria. Nou Maria Tiago uče nure ema. Ia areme ekodure ebo jamedu. Nou areme etaregodure nou Jesus ure jorduwadowuge etae dukeje ereadodure tuiordure jiboe jamedu boeji nou Jesus ure jorduwadowuge ime ewiagai. 11Jesus ure nou ime erduwado tuwo etudo tuwadaru tabo boe ewagai moto jamedu boe parugajeje. Mare nou areme ereadodure tuiordure jiboeji nou uture Jesus bataru tabowuge ewiagai dukeje nou ime emeardaere pagare egoino duji. Emeartorukare nou aremei. 12Mare Pedro rekodure toro nou Jesus meture tadawu tori poro ka. Aregodure toro dukeje ure turemo mare jordukare boeji. Tu nou areia jire jordure. Nono ure tugirimi tuibagi tuwiagoro tabo. Meardaere tudada nuba boere?
Jesus Ure Boe Erdudo Pudui Emaús Kawu Awaraji
13Nou meri keje rugadu nouia Jesus ure jorduwadowuge ere pobedu doge eture Jerusalém ba kurireu piji toro ia boe eda ka. Nou boe eda iere Emaús. Nou Emaús rakojere dez quilômetros Jerusalém ba kurireu piji. 14Nou ime pobedu doge ekodure nou Emaús kawu awaraji dukeje emagore pui tuiordure jiboeji Jerusalém ba kurireu tada. 15Emagore aino pui dukeje Jesus aregodure eregodaji tugoduwo ebo jamedu. 16Etaiwore ji mare erduwakare ji. 17Nono Jesus makore ei. Akore: – Kaboba jiba tagagoino pui tagodui aino awaraji?
Ere tuwuredo ča je. Ekiarigodure rugadu. 18Ia iere Cleopas. Emare makore Jesusji. Akore: – Boe pegare Jerusalém ba kurireu tada rugadu. Nou Jerusalém kejewuge eiamedu boe erduware nou inoduji. Kočare arduwakare?
19Jesus akore: – Kaba jiba boe eroino? Iwie.
Egore: – Boe ero pegare Jesusji rugadu. Nazaré pijiwu Jesus jire eroino. Makore Pao Kurireu bataru jiwu nure ema. Pao Kurireu aidure ji. Boe etaidure ji jamedu. Ro rakare rugadu turo jamedu boe tabo. Mako pemegare jamedu. Jorduware rugadu Pao Kurireu bataruji boe eiamedu boe kori. 20Mare nou pagimijerage nou ure Judeu doge enomea maku Pao Kurireu aiwuge eimijerage, nouia pagimijerage jamedu ero pegare ji. Ere maku nouia boe eimijera kurireu ai. Ere tumeardae pegareu maku nou boe eimijera kurireu ai jamedu uwo Jesus maku tugobaigarege etai ewo bito. Dukodire ere bito ipo padure pugajejewu keje rugadu. 21Čemeartorure Jesusji. Čemeardaere umode pawobe Judeu doge ekinorudo boe pegareuge epiji duji. Ča iaboe kimore. Merire pobe metia bokware jamedu. 22Awu meriji ia čerduware jiwu areme ere čeku kidugo rugadu. Eture nou ere Jesus tugu towu tori poro ka. 23Mare erdukare ji nono. Ere tugirimi tuibagi tureadoduwo nou boe ewiagai tuiorduie Pao Kurireu utugarege baru tadawugei. Nou Pao Kurireu utugarege baru tadawuge egoie Jesus jewoduie pugeje. 24Ia čemedage eregodure toro nou tori poro ka jamedu. Erdure jiboe ure nono nou areme emagore jiboe mogadure. Erdukare Jesusji rugadu.
25Nono Jesus makore nou imei. Akore: – Tagaora rakare boe emagore jiwu Pao Kurireu bakaruji. Dukodire tarduwa jokodukare makore Pao Kurireu bataru jiwuge emagore jiboeji. Tameartoru pemegakare ji jamedu kodi. 26Ere boe ewie marigudu boe pegamode nou umode boe ekinorudowuji rugadu. Dukejere rutumoduie baruto pugeje. Ainore nou makore Pao Kurireu bataru jiwuge egore marigudu.
27Nono Jesus ure erduwado nou padure bapera kejewu Pao Kurireu bataru makore pudui jiboeji. Makore Moisés ure bu bapera kejewu Pao Kurireu bataruji ewiagai. Makore nouia makore Pao Kurireu bataru jiwuge ewadaruji jamedu tuwo erduwado nuba boemode pudui. Mare erduwakare raga puduire Jesus akoino duji. 28Ča etaregoduiago nou boe eda ka dukeje Jesus utuiago nouia awaraji pugeje. 29Mare nou ime emagore ji. Egore: – Mato čedabo čewai ka. Merirekodu. Akamudo čewai keje jao.
Dukodire Jesus uture ebo ewai ka. 30Etaregodure dukeje ere tumugudo ira keje togwagewo. Nono Jesus imadure Pao Kurireu apo nou tuge amireu paru tabo. Nono ure nou boe eke amireu kado puiato. Ure ia maku nou ime etai. 31Dukejere nou ime erduwagodure Jesus nuie ema duji rugadu. Mare Jesus okware tači epiji pugeje. 32Emagore pui. Egore: – Pagodure awaraji dukeje ure parduwado Pao Kurireu bataruji. Dukejere paebogodure nou makore pai jiboeji rugadu.
33-34Dukodire ere tugirimi tumara tabo rugadu Jerusalém ba kurireu ka nou tumedage ewagai tureadoduwo ewiagai. Mare Jesus ure Simão Pedro jordudo pudui. Nono Pedro readodure nouia Jesus ure jorduwadowuge ewiagai dukodire ere bato pui tumagowo pui. Egore: – Boe jokodu! Pagimijera jewodure pugeje! Simão Pedro jordure ji!
35Nono nou pobedu doge ereadodure nou boe ewiagai tuiorduie Jesusji jamedu. Ereadodure tuiorduie ji jamedu duji tugoduie Emaús kawu awaraji dutabo. Ereadodure tuiorduware Jesusji ure amireu kado dukeje erduware Jesus uiure ema duji.
Jesus Ure Ture Jorduwadowuge Erdudo Pudui
36Emago kimore pui dukeje Jesus jepadure tači etoiado. Akore: – Itaregodure pugeje.
37Nou boe epagudugodure rugadu. Emeardaere aroe uiure ema. 38Mare Jesus makore ei. Akore: – Mure kodiba tabagudure? Mure kodiba tamororamagadure iwadaruji tarduwa jokodukare imire iroino duji? 39Tagaiwodo ikeraji, iwureji. Imi rugadu reo! Aroe karegure imi. Aroe mode imi dukeje ikodu modukare iwiri modukare. Ča tagera pagado i dukeje tameartorumode i.
40Makore aino ei dutabo ure erdudo tugeraji, tuwureji. 41Ebogodure ji rugadu. Egarere pudui rugadu. Mare emeartoru jokodukare ji kimo. Nono Jesus unarare ei ia eke bagai togwagewo. 42-43Ere ia karo kodu maku ai. Nono Jesus ure ko egai.
44-45Nono Jesus ure nou boe emeardae pemegado tuwo erduwado. Akore: – Iragojere tagabo dukeje ire tawie boe mode aino i duji. Ainore Moisés, makore Pao Kurireu bataru jiwuge, ere bu bapera keje iboe jamedu boe jeture pudui rugadu. 46Egore nou umode boe ekinorudowu bimoduie mare merimoduie pobe metia bokware dukeje jewodumoduie pugeje. 47Egore nou umoduie boe ekinorudowu ie taboie boe etumoduie moto jamedu boe parugajeje tuwo boe eiamedu boe ewie Pao Kurireu bataru pemegareuji boe ewo tugera ra tumeardae pegareu piji, boe emagowo turo pegareuji Pao Kurireu biagai Pao Kurireu biagoduwo nou ero pegareu piji. Boe etumoduie nou bataru tabo Jerusalém ba kurireu kejewuge etae boetoji. Nono etumoduie nou bataru tabo moto jamedu boe parugajeje. Ainore Pao Kurireu akore marigudu.
48-49– Aino čare nou Pao Kurireu bataru jeture pudui rugadu. Nou umode boe ekinorudowu nure imi. Tagire tarduware i rugadu. Tagire tardure iro rugadu boeji. Dukodire ikie jire tamode boe ewie rugadu imagore jiboeji irore jiboeji nono Pao Kurireu bataru mogadure. Imode Iogwa Kurireu Uwari utudo tagae. Mare tabagado bagai woe Jerusalém ba kurireu keje. Iogwa Kurireu Uwari aregodumode tagae woe. Ema umode taragado rugadu. Nono tareadodumode imagore jiboeji irore jiboeji boe eiamedu boe ewiagai moto jamedu boe parugajeje.
Jesus Ruture Baruto
50Nono Jesus uture ebo Jerusalém ba kurireu piji nou boe eda Betânia kawu awaraji. Epuredugodure Betânia ka dukeje ure tugera rakojedo ewugajeje tumago pemegawo eiogi. 51Mako kimore eiogi dukeje uture epiji. Dukeje čare ruture baruto rugadu. 52Ere tubu jodo moto keje tumago pemegawo ji rugadu. Dukeje čare ere tugirimi tuibagi Jerusalém ba kurireu ka. Eiamedu boe egarere pudui rugadu. 53Nono eture Pao Kurireu uwai ka. Edure tu nono rugadu. Emago pemegare Pao Kurireuji rugadu nou Pao Kurireu uwai tada tu tu je.