João
Ure Awu Jesus Rore Jiboe Makore Jiboe Bu Bapera Keje
1Bakaru Remawu Koiare Ure Boe Towuje Aino
1Awu motokare raga mare Bakaru Remawu ure. Awu Bakaru Remawu mugure Pao Kurireu apo rugadu. Awu Bakaru Remawu Pao Kurireu nure ema. 2Bakaru Remawu mugure Pao Kurireu apo boetoji. Mare Jesus jire inagoino. 3Pao Kurireu koiare ure awu Bakaru Remawu udo boe jamedu boe towuje. Ia ukare towujeboe bokwakare moto jamedu boe parugajeje, baru tadaboe jamedu. Ure boe jamedu boe towuje rugadu. 4-5Nou Bakaru Remawu koiare ure boe edudo aino. Nou Bakaru Remawu ure nono ia jorugu pemegareu mogadure. Nou Bakaru Remawu umode boe erduwado turo pegareuji, turore jiboeji boečoji nou bakaru remawu ure nono jorugu mogadure. Mare jorugu ji karega inagoino. Nou Bakaru Remawu ure boe erduwado boe pemegareuji rugadu. Dujire inagoino. Nou Bakaru Remawu ure boe erduwado dukeje boe erduwamode turo pegareuji rugadu. Dujire inagoino. Ro pegareuge ere nono boečo mogadure. Mare boečo ji karega inagoino. Ro pegareuge erore jiboe pegare. Dujire inagoino. Mare ro pegareuge emodukare Bakaru Remawu akedudo jamedu.
6Pao Kurireu ure tudugare imedu arego mato pagae. Nou imedu iere João Batista. 7João Batista aregodure tumagowo boei Jorugu Pemegareu paru tabo boe erduwawo ji emeartoruwo ji jamedu. 8Jorugu Pemegareu karegure ema. Mare aregodure tuwo boe erduwado Jorugu Pemegareuji. 9Jorugu remawu jire João Batista akoino. Urugumode boe eiamedu boei. Mare jorugu karega. Jesus jire akoino.
10Pao Kurireu koiare ure Bakaru Remawu udo moto towuje. Nou Bakaru Remawu aregodure moto ka. Jesus jire inagoino. Mare moto kejewuge erduwakare ji. 11Aregodure ture towujewu moto ka tuwobe etae, mare uwobe etaidukare ji. 12Iagere etaidure ji. Emeartorure ji. Nou meartorure jiwugere ure Pao Kurireu oredo emage. 13Ewodukare Pao Kurireu piji nono boe etore ewodu moga tujemage epiji dumogadure. Mare Pao Kurireu ure toredo emage. Emeartorure pudui dukodire ure toredo emage.
14Bakaru Remawu ure imedudo pudumi. Rakojere pagabo. Emare meardu kurire boei rugadu. Emare ro pemegare boei jamedu. Boe jokodu jire akoino boe emeartoruwo ji rugadu. Pardure Pao Kurireu ure maku aiwu ro kurireuji. Pao Kurireu onaregedu mitodu nure ema dukodire ure turo rakareu maku nou tonaregedu ai.
15João Batista ure boe ewie ji. Akore: – Dujire ire tawie marigudu. Inagore aregodumoduie iregodaji. Kurimoduie ikori. Iwodukare raga dukeje emare rakojere baru tada marigudu.
16Emare meardu kurire boei rugadu dukodire ro pemegare paiamedu boeji. Ukare turo pemegareu akedudo. 17Marigudu Pao Kurireu ure tumeardae maku Moisés ai Judeu doge eno bakaruwo ema. Mare maigodu aino čare Jesus Cristo ure boe erduwado Pao Kurireu meardu kurire boei rugadu duji. Ure boe erduwado Pao Kurireu ro pemegareuji. Ure boe erduwado bakaru remawuji. 18Marigudu boe erdukare Pao Kurireuji. Pao Kurireu onaregedu ure mitotu je. Ure nono tuo mogadure. Mugure Pao Kurireu meki. Dukodire ure boe erduwado Pao Kurireuji rugadu.
Ainore João Batista Akore
19Jerusalém ba kurireu kejewuge boe eimijerage ere ia boe etudo João Batista ae. Iage Levita doge nure emage. Iage ure Judeu doge enomea maku Pao Kurireu aiwuge nure emage. Enarare João Batistaji. Egore: – Ioguduba nure aki?
20João Batista mako pemegare ei. Ukare tumeardae biado epiji. Akore: – Pabagare bagaiwu umode boe ekinorudowu karegure imi.
21Egore: – Mare ioguduba nure aki? Elias nure aki?
João Batista akore: – Boro. Elias karegure imi.
Egore: – Pabagare bagaiwu makore Pao Kurireu bataru jiwu nure aki?
João Batista akore: – Boro.
22Egore: – Dukodi čewie. Ioguduba nure aki? Čedaidure čewo čegimijerage ewie kaboba ure aki. Emagere ere čerojino čerduwawo ai. Nuba akagomode čei?
23Dukejere João Batista makore Pao Kurireu bataruji ewiagai. Makore Isaías ure bu bapera kejewu Pao Kurireu bataruji ewiagai. Akore: – Kudugodure boe maereu kejewu nure imi. Ainore inagore boe ero pemegaiago Pagimijera aregoduwo boe etae.1.23 Awu bataru padure Isaías 40.3 keje.
24-25Jerusalém ba kurireu kejewuge boe eimijerage ere fariseu doge etudo nou João Batista ae jamedu. Čare nou fariseu doge emagore João Batistaji jamedu. Egore: – Kočare pabagare bagaiwu umode boe ekinorudowu karegure aki. Elias karegure aki. Pabagare bagaiwu makore Pao Kurireu bataru jiwu karegure aki. Kodiba are boe etao pegodo?
26João Batista akore: – Imi ire boe etao pegodo pobo tabo. Mare ia tarduwakare jiwu rakojere tagabo. 27Emare aregodumode iregodaji. Mare ipogurumode ipureduwo ji boe kurireu karegure imi dukodi.
28Jordão po okwa abowu kejere João Batista akoino nou boei ia boe eda keje. Nou boe eda iere Betânia. Nonore João Batista ure boe etao pegodo.
Makudure Boe Ero Pegareu Mori Čewu Pao Kurireu Aku Ovelha Reo
29Nou barogwato João Batista jordure Jesus kodure pudae duji. Akore: – Makudure boe ero pegareu mori čewu Pao Kurireu aku ovelha1.29 Nou mariguduwu makudure Judeu doge etaiwu bakaru koiare Judeu doge ere ovelha bito tu tu je turo pegareu moriče. Mare ero pegareu mori remawu karegure nou ovelhače. Aino čare Jesus aregodure bitoduwo boe ero pegareu moriče rugadu. Boe ero pegareu mori remawu nure ema rugadu. Dujire João Batista akoino. reo. Emare umode boe ero pegareu barigu boe epiji.
Jesus jire João Batista akoino. 30João Batista makore kimo. Akore: – Dujire ire tawie marigudu. Inagore ia imedu aregodumoduie iregodaji. Kurimoduie ikori. Iwodukare raga dukeje rakojere baru tada marigudu. 31Imi iorduwakare ioguduba ure ema. Mare ire boe etao pegodo pobo tabo. Nono Judeu doge erdure irore jiboeji dukeje erduwamode nou makudure boe ero pegareu mori čewu aregodumode kuri aino rugadu.
32João Batista ure boe etao pegodo mare ure boe erduwado jamedu. Akore: – Iordure Pao Kurireu Uwariji rugadu. Ure metugodo pudumi. Ure turawuje baru piji. Ure tumugudo Jesus keje. 33Dukodi aino iorduware ji. Pao Kurireu ure iwie marigudu. Akore: “Ardumode Iwariji. Umode turawuje baru piji tuwo tumugudo nou imedu kanaura keje. Nou imedu koiare umode Iwari metudo boe eiamedu boe etada.”
34João Batista mako kimore. Akore: – Iordure ji rugadu. Dukodire inagoino tai. Awu Jesus Pao Kurireu Onaregedu nure ema rugadu.
Jesus Ure Jorduwadowu Boetojiwu Boe Doge Ereo
35Nou barogwato João Batista rakojere nono ia ture jorduwadowugebo. Ere pobetu je. 36Nono jordure Jesusji. Merure awaraji. Nono João Batista akore: – Makudure boe ero pegareu mori čewu Pao Kurireu aku ovelha reo.
37Nou ime pobedu doge emeardure nou João Batista bataruji dukeje eture Jesus rekodaji. 38Jesus aiwore tuibagi dukeje jordure nou ime pobedu doge ekodure turegodaji duji. Unarare ei. Akore: – Kaba bagaiba taroino?
Egore: – Čerduware jorduwareu nure aki duji. Kaiba amugure?
39Jesus akore: – Mato itabo tarduwo.
Merirekodutabore akoino ei. Nono eture Jesus apo. Erdure mugureuji. Eragojere apo nono nou meriji. 40Nouia imedu iere André. Simão Pedro umana nure ema. 41Ča uture Jesus piji tiemaru tabo tuwie Simão Pedro bagai. Jordure ji dukeje makore ji. Akore: – Čerdure umode boe ekinorudowuji. (Grego bataru tabore egore “Cristo” aino ji.) Pawobe epagare bagaiwu nure ema rugadu.
42Nono André uture tuwie Simão Pedro apo Jesus ae. Etaregodure ae dukeje Jesus aiwore Simão Pedroji. Nono Jesus makore: – Akiere Simão. João onaregedu nure aki. Mare awu inodu otobiji akiemode Cefas.1.42 Ewadaru tabo Cefas ure nono Pedro mogadure. Tori jire egoino.
Jesus Makore Felipe Bagai, Natanael Bagai Jamedu.
43Nou barogwato Jesus ure tumeardae tawuje tuduwo Galiléia moto ka. Nono jordure Filipiji. Makore ji. Akore: – Ako itabo.
44Nou Filipe boture kejewu ba kurireu iere Betsaida. Nonore André, Pedro emugure jamedu. 45Ča Filipe uture imedu Natanael bagai jamedu. Jordure ji dukeje Filipe makore ji. Akore: – Čerdure boe epagare bagaiwuji. Dujire Moisés ure maku Judeu doge etaiwu bakaru akoino. Dujire jaoboe emagore Pao Kurireu bataru jiwuge ere bu bapera keje jamedu. Iere Jesus. José onaregedu nure ema. Mugure kejewu ba kurireu iere Nazaré.
46Mare Natanael akore: – Boe pemegareu aregodumodukare Nazaré piji.
Mare Filipe akore: – Mato itabo arduwo.
47Jesus jordure Natanael kodure pudae duji. Dukodire čare makore boei. Akore: – Judeu remawu nure ema. Marigudu ukare boe ekiripagado.
48Natanael meardure Jesus akoinoduji. Nono akore: – Kočare arduware i na?
Jesus akore: – Iorduware aragojere figo i paru akinaigodu duji. Dukejere Filipe aregodure akae. Iragojekare mare iorduware.
49Nono Natanael akore: – Jorduwareu nure aki rugadu. Pao Kurireu Onaregedu nure aki rugadu. Israel doge eimijera kurireu nure aki rugadu.
50Jesus makore ji pugeje. Akore: – Iorduware aragojere figo i paru duji dukodire ameartorure i. Iro biagareu reo. Iro kurimode rugadu kimo awu iro biagareu kori.
51Nono Jesus makore nou boe dogei. Akore: – Boe jokodu jire inagoino tawiagai. Imedu Onaregedu remawu nure imi rugadu. Tardumode barure tuiado duji. Tardumode Pao Kurireu utugarege baru tadawugei etu pemegamode i rugadu.
2Jesus Uture Ure Tumuguiago Puapowuge Ewadae Ka
1-2Merire pobe dukeje Jesus uture Caná ba kurireu ka ia boe emugure puapowuge ewadae ka. Caná ba kurireu mugure Galiléia moto keje. Jesus uče rakojere nou ba kurireu keje jamedu. Boe emagore Jesus bagai nou ure jorduwadowuge ewagai jamedu etuwo nou boe ewadae ka. Dukodire čare eture. 3Eragojere nono ji je. Nono nou boe eke vinho kuru akedure. Dukeje čare Jesus uče makore nou tonaregeduji. Akore: – Vinho kuru akedu.
4Jesus makore tuje bataru jipagi. Akore: – Pao Kurireu koiare umode imaragodae maku inai. Mare meri aregodukare ka raga iwo Pao Kurireu maragodae towuje.
5Nono Jesus uče makore boe etugaregei. Akore: – Tarodo nono Jesus makore tai dumogadure.
6Poridoge enodo padu kejewugere seis nono pobo tabo nou boe ewo taimo Judeu doge turoiaji. Pobo oto padure 80 rabodu, oto padure 100 rabodu tu tu je nou pori jamedu boe etada. 7Nono Jesus makore nou boe etugaregei. Akore: – Awu poridoge ekorau pobo tabo.
Dukeje ere korobadudo rugadu pobo tabo. 8Nono Jesus makore ei pugeje. Akore: – Ča nouia pobo tawuje tawo reko toro nou boe ewadae kejewu boe eimijera ae kuduwo če.
Dukeje čare ere ia pobo tawuje nou pori piji. Ere reko toro nou boe ewadae kejewu boe eimijera ae. 9Mare Jesus ure vinhodo nou poboče. Nono nou boe ewadae kejewu boe eimijera kudure če. Mare jorduwakare kaiba pijiba nou vinho kuru aregodure. (Mare nou boe etugarege erduware.) Dukodire čare nou boe ewadae kejewu boe eimijera makore nou uwiremodewu imedu bagai. 10Akore ji: – Vinho kuru pemegareure boe emode maku boetoji tuwadae keje. Vinho kuru pemegareu akedure dukeje boe emode vinho kuru mori bokwareu maku pugeje. Ainore boe erore. Aki čare are vinho kuru pemegareu maku aino boigodu.
11Jesus ure vinhodo nou poboče. Boetojiwu turo rakareu jire roino nono nou Caná ba kurireu keje. Caná ba kurireu mugure Galiléia moto keje. Nonore ure boe erdudo turagare duji. Ure boe erdudo turo rakamode rugadu duji. Nono nou ure jorduwadowuge emeartorure ji rugadu.
12Nou turoino dupiji Jesus uture Cafarnaum ba kurireu ka tuje apo, tuwiemagebo, ture jorduwadowugebo jamedu. Rakojere nono du meri makakare ji rugadu.
Jesus Uture Pao Kurireu Uwai Ka
13Boe puredugodure Judeu doge ewadumode ia tuwadae ji du ka. Nou ewadae iere Páscoa. Dukodire Jesus uture Jerusalém ba kurireu ka. 14Aregodure toro dukeje ure turemo Pao Kurireu uwaito. Nonore jordure boe ere toe maku duji, ere tagu tapira doge, tagu ovelha doge, tagu metugoe emagu diero bagai jordure ere diero maku puai puibagi duji. 15Jesus korigodure ei erore aino duji. Ure ia barogo birido nono bukigure. Dukeje čare ure nou boe doge eguie rugadu boe etudo nou Pao Kurireu uwai piji nou barogo biri bukigu tabo. Ure tapira doge etudo. Ure ovelha doge etudo. Ure nou boe enoe padure kejewu ira jamedu boe butudo tuwo nou eno diero jamedu boe barigu epiji moto ka. 16Nono mako rakare nou ure metugoe emaguwugei. Akore: – Tadudo awu bai piji nou tagagu metugoebo. Tare Iogwa Kurireu uwaido nono boe makudure kejewu bai mogadure diero bagai tagoče. Tarokaba aino pugeje!
17Nou Jesus ure jorduwadowuge ewiabuture Pao Kurireu bataru keje. Nou Pao Kurireu bataru akore: – Imeardu kurire Pao Kurireu uwaiji rugadu. Ietu pemegamode ji rugadu.2.17 Awu bataru padure Salmo 69.9 keje.
18Judeu doge etaidukare nou Jesus rore jiboeji. Enarare ji. Egore: – Čemeartugure ai. Čegimijera karegure aki rabodu. Ča ia aro rakareu towuje čemeartoruwo ai rugadu. Aro rakareumode dukeje čegimijera mode aki arowo aino aro mogadure woe Pao Kurireu uwai tada.
19Dukodi čare Jesus makore ei. Akore: – Awu Pao Kurireu uwai butudo. Nono merimode pobe metia bokware dukeje imode rakojedo pugeje.
20Nou boe eimijerage emeartorukare ji. Egore: – Joru oto padure quarenta e seis boei ewo awu Pao Kurireu uwai iado. Merimode pobe metia bokware dukeje amodukare awu Pao Kurireu uwai towuje pugeje.
21Mare Pao Kurireu uwai ji karega Jesus akoino. Tuwiri, tugodu jire akoino. Mare tuwimode du jire akoino merimode pobe metia bokware dukeje tuiewodumoduie pugeje. Du jire Jesus akoino. 22Jewodure dukeje ure ture jorduwadowuge ewiabutudo awu tuwadaru keje. Dukodire emeartorure Pao Kurireu bataruji rugadu. Emeartorure Jesus bataru jamedu boeji.
Jesus Jorduware Boe Eiamedu Boe Emeardaeji
23Nono Jesus rakojere Jerusalém ba kurireu keje jii toro nou Judeu doge ewadae Páscoa akedu ka. Ro rakare nono. Boe erdure Jesus ro rakareuji dukeje emeartorugodure ji. 24Mare Jesus jorduware nou boei emeartoru raimodukare pudui duji. Dukodire Jesus meartorukare nou boei. 25Boe ekare Jesus jorduwado nou boei. Jorduware boe eiamedu boe emeardaeji marigudu.
3Boe Eimijera Nicodemos Uture Jesus Ae
1Ia Judeu doge eimijera iere Nicodemos. Fariseu nure ema. 2Ia boečoji uture Jesus ae tumagowo ji. Akore: – Boe eimijera nure aki. Pao Kurireu ure akarego mato čedae rugadu. Ema koiare ure ado boe erduwado rugadu. Pao Kurireu rakojemodukare akabo dukeje aro rakamodukare. Mare aro rakare rugadu. Dukodire čerduware Pao Kurireu merure akabo rugadu duji.
3Jesus akore: – Boe jokodu jire inagoino ai. Boe ewodumode pugeje kodire eimijeramode Pao Kurireuče pugeje turuduwo baruto.
4Nono Nicodemos akore: – Nuba imedu romode tuwoduwo pugeje? Umodukare turemo tuje kurito tuwoduwo pugeje.
5-6Mare Jesus akore: – Boe jokodu jire inagoino ai. Boe ewodure tuje piji dukodire emugure woe moto keje. Pao Kurireu Uwari koiare umode boe ewodudo pugeje. Mare ewoduwo pugeje ji karega inagoino. Pao Kurireu Uwari umode boe edo tuwia ra tuiordae tumeardae pegareu piji. Dujire inagoino. Ure edo tuwia ra tuiordae pegareu piji dukeje epemegamode nono ure taimowu biri kabi dumogadure. Mare ewiri ji karega inagoino. Emeardae pegareu jire inagoino boe ewo barigu tubiji. Pao Kurireu Uwari umode emeardae pemegado ewo tugimijerado Pao Kurireuče turuduwo baruto. Dujire inagoino. 7Dukodire inagoino ai awoduwo pugeje. Kodire apagudugodukaba awu iwadaruče. Boe rakakare ai arduwawo awu iwadaruji. 8Ia iwadaru pugeje. Bakuru jomode taidureu ka. Boe emeardumode bakuru akoji mare erduwamodukare kaibowu pijiba nou bakuru aregodure. Boe erduwakare kaiba nou bakuru kodumode. Pao Kurireu Uwari rore nono bakuru mogadure. Mare bakuru ji karega inagoino. Pao Kurireu Uwari koiare umode boe emeardae pemegareu maku etai mare nou boe erduwakare kaibowu pijiba nou tumeardae pemegareu aregodure pudae. Dujire inagoino.
9Nono Nicodemos akore: – Nuba akagore jiboe mode boei?
10Jesus akore: – Israel doge eimijera nure aki. Are erduwado Israel doge eno bakaruji. Kodiba arduwakare inagoino jiboeji? 11Boe jokodu jire inagoino. Imagore iorduware jiboeji tawiagai. Ireadodure iordure jiboeji tawiagai. Mare taiamedu boe tameartorukare iwadaruji. 12Imagore awu moto kejewu boeji tawiagai mare tameartorukare ji. Imagomode baru tadawu boeji tawiagai jamedu dukeje tameartorumodukare ji rugadu. 13Imedu Onaregedu nure imi. Iragojere baru tada marigudu. Iaboe iaboe erudukare baruto rugadu. Itaregodure baru piji mato moto ka.
14– Marigudu Israel doge eragojere toro boe maereu keje dukeje Moisés ure ia merirido nono awagure ipo oto keje.3.14 Awu Moisés rore jiboe padure Números 21.9 keje. Imedu Onaregedu padumode ipo keje nono nou awagu umogadure. 15Nono meartorure iwuge emugumode Pao Kurireu apo rugadu. Du akedumodukare rugadu. Ewimodukare pugeje. 16Pao Kurireu meardu kurire boei rugadu. Dukodire ure tonaregedu mitodu rawuje baru piji mato boe etae. Meartorure jiwuge eiamedu boe ewimodukare pugeje. Meartorure jiwuge emugumode Pao Kurireu apo rugadu. Du akedumodukare rugadu. 17Pao Kurireu ure tonaregedu rawuje mato moto ka mare tuwo boe ero pegareu morido. Ukare rawuje uwo boe pegado boei. Mare ure rawuje tuwo boe ekinorudo etukawo bope doge eda kejewu joru pegareu ka.
18– Pao Kurireu umodukare meartorure iwuge boe pegado ei. Mare meartorukare iwugeire Pao Kurireu umode edo turo pegareu morido rugadu. Pao Kurireu Onaregedu mitodu nure imi. 19-21Nou ro pegareuge etaidukare joruguji. Emodukare tuburedo ji. Boečo jire etaidure turo pegawo boe erdukawo turoino duji. Mare ro pemegareuge emode tuburedo joruguji urugu pemegawo pudui boe erduwo tumeartorure Pao Kurireu jituji. Čare jorugu pemegareu aregodure moto ka. Mare jorugu ji karega inagoino. Ire inagoino. Mare kočare boe emeardu kurire boečoji jorugu piji. Mare boečo ji karega inagoino. Nou boe ero pegareu jire inagoino emeardu kurire turo pegareuji kodi. Etaidukare tumeartoruwo i rugadu. Dukodire Pao Kurireu umode edo turo pegareu morido rugadu.
Ainore João Batista Rore
22Nonore Jesus uture ture jorduwadowugebo toro Judéia moto ka. Nonore rakojere jii je. Ure boe etao pegodo nono.
23João Batista ure boe etao pegodo jamedu boe eda Enom keje. Padu puredure boe eda Salimji. Pobo kurireu mugure nono. 24(Boe eimijera pegareu ukare João Batista tugu baičoreuto raga.)
25João Batista ure jorduwadowuge emago raire ia Judeu imeduji. Emeardaekare nono pumeardae mogadure tuwo taimo turoiaji tuwo turemo Pao Kurireu uwaito. Dujire emago raire pui. 26Nono čare eture João Batista ae tumagowo ji. Egore: – Jorduwareu nure aki. Awiabuture čowu rakojere toro Jordão po okwa bakowu kejewu imedu keje? Rakojere pagabo toro. Amagore nou imedu paru tabo čei. Ča unure boe etao pegodo jamedu nono paro mogadure. Dukodi čare boe eture toro ae čebiji.
27João Batista makore nou ture jorduwadowugei. Akore: – Boe emodukare boe pemegado pudui tao biji. Tu Pao Kurireu koiare umode boe pemegado boei rugadu. 28Tarduware iwadaruji. Ire tawie marigudu. Inagore: – Pabagare bagaiwu umode boe ekinorudowu karegure imi. Pao Kurireu koiare ure itarego umode boe ekinorudowu otodai. 29Imedu ure timedia bie tuwiremoduie duji. Dukodire metia ure boe pemegado timedia togi timedia uwiremode dukodi dukeje boe ewadumode. Ure boedo turugadu dukeje upagare nou uwiremodewu bagai. Meardure uwiremodewu kudu jitu dukeje jakaregodumode pudui rugadu. Ire nono nou uwiremodewu metia mogadure. Ire boedo turugadu Jesus aregodumode kodi. Čare aregodure dukodire iagarere i rugadu nono nou uwiremodewu metia mogadure. Jesus ro pemegare boei dukodire iagarere i. Ure boe etao pegodo dukodire iagarere i. 30Boe etaidu kurimode ji rugadu. Ewiagodumode ipiji. Du pegakare i rugadu. Ure turugadu iagai.
Ainore Aregodumode Baru Pijiwu Romode
31João Batista mako kimore. Akore: – Aregodumode baru pijiwu ro kurimode paiamedu boe kori. Boture moto kejewu jorduware moto kejeboe jamedu boeji. Makomode moto keje boeji. Mare aregodure baru pijiwu ro kurimode moto kejewu eiamedu boe ekori. 32Makomode tuiordure jiboeji tumeardure jiboeji boe ewiagai mare emeartorumodukare ji. 33Mare meartorure bataru jiwuge erduware boe jokodu jire Pao Kurireu akoino duji. 34Pao Kurireu Uwari umode tugera maku nou Pao Kurireu ure arego matowu tonaregedu ai. Dukodire nou aregodure matowu makomode Pao Kurireu bataruji boe ewiagai rugadu. 35Pao Kurireu meardu kurire nou tonaregeduji rugadu. Dukodire ure turaga jamedu boe maku tonaregedu ai rakawo nono turaga mogadure. 36Nono nou meartorure Onaregedu jiwuge emugumode Pao Kurireu apo rugadu jii toro rugadu. Dukodire etagedumodukare. Ewimodukare pugeje. Mare meartorukare nou Pao Kurireu Onaregedu jiwuge emugumodukare Pao Kurireu apo jamedu. Pao Kurireu ro pegamode ei jamedu. Nou ro pegare eidu akedumodukare rugadu.
4Jesus Makore Samaria Moto Kejewu Areduji
1Fariseu doge emeardure Jesus ure boe etao pegodo duji. Emeardure nou Jesus ure jorduwadowuge emagagodure nou João Batista ure jorduwadowuge epiji. 2(Ča Jesus ukare boe etao pegodo. Nou ure jorduwadowuge eigoiare ere boe etao pegodo.) 3Nono Jesus jorduware nou fariseu doge emeardaeji. Dukodi čare uture Judéia moto piji tuduwo tuibagi pugeje Galiléia moto ka. 4Kodure Samaria moto oiagi tuduwo Galiléia moto ka.
5Dukeje aregodure Sicar ba kurireu ka. Nou Sicar ba kurireu mugure nou Samaria moto keje rugadu4.5 Samaria moto kejewuge etaidukare Judeu dogei. Judeu doge etaidukare Samaria moto kejewugei jamedu. Judeu nure Jesusče dukodire awu Jesus rore jiboe ure tuginai Judeu doge ero piji.. Marigudu jawu Israel doge etuo Jacó ure ia moto maku tonaregedu José ai. Nou Sicar ba kurireu padu jakare nou motoji. 6Nou Jacó ure porodowu kačiba mugure nono jamedu. Ča Jesus metugodure dukodi čare ure tuwuredo nono nou kačiba keje. Ure tumugudo nono tuwo tamudo. Meri aregodure pagaia ka dukeje.
7-8Mare nou Jesus ure jorduwadowuge eture otodai nou ba kurireu ka tuwo akirodo tugeji. Jesus mugure nou kačiba po okwai ture tamudo dutabo. Nono ia Samaria kejewudo aredu aregodure pobo bagai nou kačiba po ka. Jesus makore ji. Akore: – Pobo maku inai ikuduwo če.
9Nono nou aredu makore: – Judeu nure aki. Imire Samaria kejewudo nure imi. Judeu doge etaidukare čei rugadu. Ekudumodukare poboče čegopo tabo. Enogwagemodukare čeno meriri keje jamedu. Aki čare amagore i pobo bagai akuduwo če.
10Jesus makore: – Arduwakare Pao Kurireu ure maku boe etai boeji. Arduwamode i rugadu dukeje akogwamagudumode i pobo remawu bagai awikawo.
11Nou aredu akore: – Are pobo tugu toboe bokware. Pobo padu jaere čemoroi nou kačiba ja tada. Nuba aromode awo akeragu nou akagoino jiwu pobo remawuji? 12Jao pawobe etuo Jacó koiare ure awu kačiba towuje. Dukodire pagore aino ema. Emare kudure awu poboče boetoji. Ore ekudure awu poboče. Aku ie ekudure awu poboče jamedu. Ji aino pobore kimo. Aro kodumodukana nou Jacó ro kori? Nuba aromode awo ia pobo maku čenai pugeje?
13Jesus akore: – Boe ekudumode awu poboče mare pobo boeimode ei pugeje. 14Mare boe ekudumode ire maku etaiwu poboče dukeje pobo boeimodukare ei pugeje jii toro rugadu. Kačiba mugumode etada kodire nou etadawu pobo akedumodukare epiji rugadu.
Mare pobo ji karega Jesus akoino. Boe emeartorumode Jesus ure maku pudaiwu tuwadaruji dukeje ewimodukare pugeje. Jesus umode emugudo Pao Kurireu apo. Du akedumodukare rugadu.
15Mare nou aredu meardaere pobo remawu ji rugadu Jesus akoino. Akore: – Nou akagoino jiwu pobo maku inai ikuduwo če pobo boeikawo i pugeje itaregodukawo woe pugeje pobo bagai.
16Jesus akore: – Toro. Atudo awo akoredu bie. Dukeje amode akirimi mato pugeje.
17Aredu akore: – Ikogekare. Itoredu bokwa.
Jesus akore: – Uu. Iorduware. Akogere mare are akera ra epiji. 18Akogere ikera aboudure. Aino čare amugure ia apo pugeje mare akoredu karegure ema. Awadunure ji. Boe jokodu jire akagoino iwiagai.
19Nou aredu akore: – Kočare arduware i rugadu! Jorduwareu nure aki rugadu. Makore Pao Kurireu bataru jiwu rabodunure aki rugadu. 20Jao iwobe Samaria kejewuge ere tubu jodo tumago pemegawo Pao Kurireuji woe awu tori aogeje. Judeu doge tagire tagagore awu čerore jiboe ukaie turugadu. Tagagore tu Jerusalém ba kurireu kejeie boe emode tubu jodo tumago pemegawo tu Pao Kurireuji.
21Jesus akore: – Ameartorudo awu iwadaruji. Tu awu tori aogeje karega boe emode tubu jodo tumago pemegawo Pao Kurireuji. Tu Jerusalém ba kurireu keje karega boe emode tubu jodo tumago pemegawo Pao Kurireuji. Kuri aino boe emode tubu jodo moto keje moto jamedu boe parugajeje tumago pemegawo Pao Kurireuji. 22Samaria kejewuge nure tagi. Tamago pemegare Pao Kurireuji mare tarduwakare ji. Judeu doge nure čegi. Čerduware Pao Kurireuji. Ure Judeu doge ewie marigudu tumoduie boe ekinorudo duji. 23Kuri aino Pao Kurireu Uwari umode boe eragado emago pemegawo Pao Kurireuji rugadu. Erduwamode Pao Kurireu meardae remawuji rugadu dukodire emode tubu jodo tumago pemegawo Pao Kurireuji rugadu boe remawu tabo rugadu. 24Pao Kurireu ure nono tuwari mogadure. Dukodire boe erdukare ji. Kodire boe emodukare tuwadaru udo paga paga tumago tabo Pao Kurireuji. Pao Kurireu Uwari koiare umode boe erduwado Pao Kurireu meardae pemegareuji ewo tubu jodo tumago pemegawo Pao Kurireuji boe remawu tabo rugadu.
25Nou aredu makore Jesusji: – Iorduware umode boe ekinorudowu aregodumoduie duji. Aregodumode dukeje umode parduwado boe jamedu boeji rugadu.
26Jesus akore: – Nou akagoino jiwu umode boe ekinorudowu nure imi rugadu.
27Ča nou Jesus ure jorduwadowuge etaregodure ba kurireu piji tuibagi. Erdure Jesus makore nou aredu jituji dukodi čare eku kidure ei. Ere tumagoiago nou areduji kaboba bagaiba roino. Mare emagokare. Ere tumagoiago Jesusji jamedu kodiba akoino nou areduji. Mare emagokare. 28Ča nou aredu uture tubori piji toro ba kurireu ka tuibagi. Aregodure ba kurireu ka dukeje makore boei. 29Akore: – Mato itabo tarduwo ia imedu kurireuji. Emare jorduware mariguduwu irore jiboe jamedu boeji rugadu. Ema koia kana umode boe ekinorudo? Ema kana pabagare bagai marigudu?
30Dukodi čare nou boe eture nou aredu apo ba kurireu piji toro Jesus bagai.
31Nou aredu rakoje kimore toro ba kurireu tada dukeje nou Jesus ure jorduwadowuge emagore Jesusji. Egore: – Akwagedo.
32Mare Jesus akore: – Ire ia tarduwakare jiwu ike rogu kowuje.
33Dukeje nou ure jorduwadowuge emagore pui. Egore: – Ia boe etaregodu kana ia tuge tabo tuwo maku ai?
34Mare Jesus akore: – Boe eke ji karega inagoino. Pao Kurireu koiare ure itarego mato. Imeartorure bataruji kodire umode iraga maku inai. Imode ure maku inaiwu imaragodae iado rugadu. Dujire inagoino. 35Boe egore: “Arimode pobe puibiji dukeje boe eno boepa tadaboe kurodumode.” Tagaiwodo boe dogei. Ere turugadu tumeartoruwo Pao Kurireuji marigudu rugadu. Ere nono boepa tadawu kurodureboe mogadure. 36Boe emode tugeragu kurodureboe jitu keje emaragodae mori makudumode etai. Mare boepa tadaboe ji karega inagoino. Boe emode Pao Kurireu bataru maku boe etai dukeje Pao Kurireu umode emaragodae mori maku etai jamedu. Boe emagare tumaragodae tabo tuwo boe emeartorudo Pao Kurireuji rugadu emuguwo Pao Kurireu apo baru tada jii toro rugadu, ewikawo pugeje. Boe emeartorure Pao Kurireu bataruji dukeje nou ure Pao Kurireu bataru maku boe etaiwuge eiamedu boe egaremode pudui rugadu. Egaremode pudui nono nou ure boepa tuguwu jakarere pudui dumogadure. Egaremode pudui nono nou ure tugeragu kurodureboe jiwu jakarere pudui dumogadure. 37Boe jokodu jire boe egoino: “Ia imedu umode to boepa tugu. Ia umode kurodu rawuje.” 38Ča tare nono nou umode kurodureboe rawujewu mogadure. Mare boepa tadaboe ji karega inagoino. Tadumodukare boepa ka. Boeire inagoino. Inure tadudo iwadaru tabo boe etae rugadu. Iage ere nou boe erduwado Pao Kurireu bataruji tuwo edo turugadu emeartoruwo i. Aino ča tadumode iwadaru tabo etae emeartoruwo i rugadu.
39Ča nou aredu makore nou Samaria kejewu boe ewiagai Jesus bataruji dukodi čare emeartorure Jesusji rugadu. Akore: – Emare jorduware mariguduwu irore jiboe jamedu boeji rugadu.
Dukodire nou ba kurireu kejewuge emeartorure Jesusji rugadu. Emagare. 40Nono nou Samaria kejewuge etaregodure Jesus ae. Enogwamagudure Jesusji muguwo pudabo jao. Dukodire merire pobe Jesusji toro ebo. 41Jesus ure erduwado dukodi čare boe emagare nono apo tumeartorure jitu tabo. 42Emagore nou areduji. Egore: – Aino čare pameartorure ji rugadu. Are čewie marigudu. Mare aino čewiapagare ji rugadu. Čewiapagare bataruji dukodire čemeartorure ji. Čerduware emaie umode boe ekinorudo rugadu.
Jesus Ure Boe Eimijera Onaregedu Pemegago
43Merire pobe Jesusji nono nou ba kurireu keje. Dukeje uture pugeje Galiléia moto ka. 44Marigudu akore: – Makore Pao Kurireu bataru jiwu makomode Pao Kurireu bataruji boe eiamedu boe ewiagai. Mare turijodure kejewu moto kejewuge etaidumodukare makore jiboeji.
45Jesus aregodure Galiléia moto ka dukeje nou boe ekimadure apo. Judeu doge ewadae Páscoa kejere Jesus ro rakare Jerusalém ba kurireu keje. Awu Galiléia kejewuge edure nono jamedu dukodire erdure Jesus rore jiboeji. Dukodire egarere pudui Jesus aregodure pudae duji.
46Dukejere Jesus uture pugeje Caná ba kurireu ka. Marigudu ure pobo udo vinho kuruče nou Caná ba kurireu keje. Ia Cafarnaum ba kurireu kejewu boe eimijera rakojere nono Caná ba kurireu keje jamedu. Onaregedu kogodure toro Cafarnaum keje. 47Jorduware Jesus aregodure Judéia moto piji Galiléia moto ka. Dukodire uture ae. Okwamagudure Jesusji tonaregedu paru tabo ure tuwiago kodi. Aidure Jesus utuwo Cafarnaum ba kurireu ka uwo nou tonaregedu pemegago. 48Jesus akore ji: – Taiamedu boe tagaidure tarduwo ia iro rakareuji tameartoruwo i.
49Nou boe eimijera akore: – Ikimijera nure aki. Itonaregedu bimode. Mato itabo awo itonaregedu pemegago.
50Jesus akore ji: – Toro. Atudo akinai. Akanaregedu pemegagodumode.
Nou boe eimijera meartorure Jesus bataruji dukodire uture. 51Nou barogwato nou boe eimijera kodu kimore awaraji dukeje ia utugarege etaregodure togi. Ere bie. Egore: – Akanaregedu pemegagodure.
52Unaragodure kaiba meri jeture dukejeba tonaregedu pemegagodure. Egore: – Jao meriji meri aregodure pagaia ka dukeje biri uru akedure piji.
53Nono nou boe eimijera biabuture meri aregodure pagaia ka dukeje Jesus akore tonaregedu pemegagodumoduie. Meri aregodure pagaia ka dukeje pemegagodure rugadu. Dukodire nou boe eimijera meartorure Jesusji tuwobe eiamedu boe ebo.
54Jesus ro rakareu boetojiwu koiare ure vinhodo poboče. Aino aregodure Judéia moto piji Galiléia moto ka pugeje. Dukeje ure nou boe eimijera onaregedu pemegago. Dukodire boe erdure Jesus ro rakareu ure pobetu je nono Galiléia moto keje duji.
5Jesus Ure Ia Kogodureu Pemegago Pugeje
1Nono Jesus uture Jerusalém ba kurireu ka. Uture tuwaduwo ia Pao Kurireu bowadaeji Judeu dogebo. 2Jerusalém kejewu ia baiporo ri iere “Ovelha”. Ia brae etaimoda kejewu pobo puredure nou bai poroji. Hebreu bataru tabo nou brae etaimoda iere “Betezata”. 3-4Boe emagare tubadu nono dutabo nouia bai koadureu tada nou bai koadureuge enodo padure kejewugere ikera aboudure. Ekogodure kodi. Iage eku bokware. Iage epogora pegare. Emeru bokware. Epadure nono tubaga tabo nou brae etaimoda tadawu pobo magadugoduwo tuwo turemo nou poboto tubemegagoduwo. Nou pobo magadugodu paga karegure. Ia Pao Kurireu utugare baru tadawu koiare ure pobo magadudo toro ia meri keje. Meri jamedu boeji karega nou pobo magadugodumode. Pobo magadugodure dukeje nou ure taredo boetojiwu pobo towu pemegagodure. 5Joru oto padure kejewure ure trinta e oito ia imedu kogodureuji tubaduie nono dutabo. Pogora pegare dukodire meru bokware. 6Jesus jordure padure nono duji. Jorduware nou imedu kogodure marigudu rugadu. Dukodire unarare ji. Akore: – Akaidure apemegagoduwo?
7Nou kogodureu imedu akore: – Uu. Itaidure. Mare iroiwakare iwo iremo nou poboto ipemegagoduwo. Awu pobo magadugodure dukeje ia kogodureu ure taredo nou poboto itododai tu tu je tubemegagoduwo. Nou pobo magadugodure dukeje umode boe epemegago.
8Jesus makore ji. Akore: – Aragojedo. Amerudo. Akeragu akudau kodoji atuwo pugeje.
9Dukodi čare nou imedu pemegagodure tači rugadu. Ure turagojedo. Ure tugeragu tugudau kodoji. Dukeje uture tumeru tabo rugadu. Sábado meri kejere Jesus rore aino ji. 10Ča Judeu doge eimijerage erdure nou imeduji dukeje ekorigodure ji. Egore: – Amerure aino akudau kodo tabo Sábado meri keje du pegare rugadu. Arokaba aino pugeje.
11Nou imedu akore: – Ure ipemegadowu imedu makore i iwo ikeragu awu ikudau kodoji imeruwo tabo pugeje.
12Nou boe eimijerage egore: – Duba koiaba ure arodo aino?
13Mare nou imedu jorduwakare Jesusji. Jesus ure pemegago dukejere uture piji. Boe emagare nono dukodire nou imedu jordukare uture tubiji duji. Dukodire makokare ji pugeje.
14Merirekodutabo Jesus jordure nou imeduji pugeje Pao Kurireu uwai tada. Jesus makore ji. Akore: – Awiapaga pemegado iwadaruji. Apemegagodure. Mare akera ra aro pegareu piji jamedu. Amodukare akera ra aro pegareu piji dukeje boe pegamode ai pugeje du kodumode awu boetojiwu akogodae kori rugadu.
15Nono nou imedu uture Jesus piji Judeu doge eimijerage etae. Ure ewie Jesus ieji. Makore ema koiaie uie tubemegago. 16Nono nou boe eimijerage erdu pegare Jesus rore aino duji. Etaidukare Jesus ure nou imedu pemegago sábado meri keje duji. Erokare aino kodi. Egore boe ekaiago boe epemegado sábado meriji. Dukodire etaidure tuwo boe pegado Jesusji rugadu.
17Mare Jesus makore ewadaru jipagi. Akore: – Iogwa maragodure meri jamedu boeji. Iromode aino jamedu.
18Ainore Jesus rore rugadu. Judeu doge eromodukare ia turore jiboeji sábado meriji. Edu pagamode tu tumuga keje rugadu. Mare Jesus meartorukare nou erore jiboeji. Jesus akore tuoie Pao Kurireu rema. Akore aino dutabo akore Pao Kurireu nuie pudumi jamedu. Mare nou Judeu doge eimijerage erdu pegare akoinoduji. Dukodire čare ekorigodure ji. Ere tumeardae tawuje tuwo Jesus bito.
Pao Kurireu Onaregedu Boe Eimijera Nure Ema
19Nono Jesus makore nou Judeu doge eimijeragei. Akore: – Boe jokodu jire inagoino tawiagai. Pao Kurireu Onaregedu romodukare ia boeji tumeardae tabo. Jordumode Tuo Kurireu roji dukeje romode nono nou Tuo ro mogadure. Onaregedu romode nono Tuo ro mogadure rugadu. 20Awu Pao Kurireu Onaregedu nure imi. Iogwa meardu kurire i. Dukodire ure iorduwado turo jamedu boeji irowo nono turo mogadure jamedu. Ča Iogwa ro kurimode nou turo kori pugeje. Umode iorduwado nou turo kurireuji irowo ji jamedu. Tardumode nou iro kurireuji dukeje taebogodumode i rugadu. 21Iogwa Kurireu umode bireuge eewodudo pugeje tuwo emugu pemegado turo pegareu piji. Onaregedu nure imi. Imode itaidure jiwuge emugu pemegado ero pegareu piji jamedu. 22Iogwa Kurireu aiwomodukare boe ero pegareu bagai. Ure boe eimijerado imi. Dukodire imire itaiwomode boe ero pegareu bagai. 23Itaiwomode boe ero pegareu bagai dukodire boe emode ikie kurido nono ere Iogwa Kurireu ie kurido dumogadure. Mare mako pemegakare iwu mako peganure Iogwaji jamedu. Iogwa koiare ure itarego mato boe etae.
24– Boe jokodu jire inagoino. Iogwa Kurireu ure itarego mato boe etae. Ewiapagamode iwadaruji dukeje emeartorumode Iogwa Kurireuji jamedu. Dukeje emugumode Iogwa Kurireu apo jii toro rugadu. Du akedumodukare. Emeartorumode Iogwaji dukeje umodukare boe pegado boei. Boe ero pegare dukodire ewimode. Dukodire ere nono bireuge emogadure. Mare emeartorumode Iogwaji dukeje ewimodukare pugeje. Emugu pemegamode Iogwapo rugadu jii toro rugadu. 25Boe jokodu jire inagoino tawiagai. Pao Kurireu ure tawie marigudu bireuge emeardumoduie Tonaregedu bataruji. Pao Kurireu Onaregedu nure imi rugadu. Tare nono bireuge emogadure. Ča tameardure iwadaruji. Tameartorumode iwadaruji dukeje tamodukare nono bireugere pugeje. 26Iogwa Kurireu koiare ure boe etowuje erijodudo. Emare jeture boei kodi. Ema koiare ure tonaregedu rakado uwo boe etowuje jamedu. Emare jeture boei jamedu. 27Pao Kurireu Onaregedu nure imi. Imedu Onaregedu nure imi. Dukodire Iogwa ure boe eimijerado imi itaiwowo boe ero pegareu bagai ewo turo pegareu morido rugadu. 28-29Ia meri keje bireuge eiamedu boe eewodumode pugeje bireuge eda piji. Ro pemegareuge eewodumode pugeje. Nono ewimodukare pugeje. Emugu pemegamode Iogwapo. Du akedumodukare. Ro pegareuge eewodumode jamedu mare imago pegamode erore jiboeji dukeje ewarigudumode bope doge eda kejewu joru pegareuto boe pegawo ei jii toro rugadu. Du akedumodukare rugadu.
Boe Ereadodumode Jesus Rore Jiboeji Boe Ewiagai
30Jesus mako kimore. Akore: – Imi karega ire boe eimijerado imi. Iromodukare itaidure jiboeji itaobiji. Dukodire imeardae karega mare Pao Kurireu koiare ure imeardae maku inai itaiwowo boe ero pegareu bagai. Pao Kurireu koiare ure itarego woe. Dukodire iromode aidure jiboeji tu tu je rugadu. 31Mare imagomode boei iro pemegaie dukeje emeartorumodukare i. 32Mare Pao Kurireu makore boe ewiagai iro pemegaie. Boe jokodu jire akoino. 33Boe jokodu jire João Batista akoino jamedu. Tare boe etudo ae. Ure tawie iromode jiboeji marigudu. 34Itaiwokare mako pemegare iwuge ewadaru bagai iwo tameartorudo i. Pao Kurireu uwo tawie irore jiboeji du pegakare. Mare ire tawiabutudo João Batista bataru keje. Makore boe ewiagai iro pemegamoduie tai duji tameartoruwo i iwo taginorudo boe pegareu piji rugadu. 35João Batista bataru ure nono jorugu mogadure. Mare jorugu karega. Ure tarduwado. Tagaidure bataruji ia ari keje. 36João Batista makore tawiagai i boeji. Mare iro pemegareu, iro rakareu, umode tarduwado i rugadu. Iogwa Kurireu ure iragado iro rakawo rugadu. Iro rakamode dukeje tarduwamode Iogwa Kurireu koiare ure itarego mato boe etae duji. 37-38Iogwa Kurireu koiare ure tawie iromode jiboeji. Ure itarego mato mare marigudure tardukare ji. Marigudu tameardukare makoji. Tameartorukare ji jamedu dukodire tagare Iogwa Kurireu bataru metudo tagaora tada. Tawiagodure piji. 39Tagaiwore Pao Kurireu bataru padure kejewu baperaji. Tameardaere nou taro koiare umode tamugu pemegado Pao Kurireu apo tawikawo pugeje. Mare nou tagaiwore jiwu Pao Kurireu bataru unure tawie irore jiboeji. 40Mare tagaidukare tarduwawo i tagaidukare tameartoruwo i. Tameartorumode i dukeje tamugu pemegamode Pao Kurireu apo jii toro rugadu. Dukodi tawimodukare pugeje.
41– Itaiwokare mako pemegare iwuge ewadaru bagai. 42Iorduware tai rugadu. Tawiapagakare tameardu kuriwo Pao Kurireuji pugeje. 43Iogwa Kurireu koiare ure boe eimijerado imi. Du inodu tabo tameartorukare i. Ia imedu aregodumode tagae. Umode boe eimijerado pudumi dukeje tameartorumode ji rugadu. 44Tagaidure boe emago pemegare tai duji boe ebogoduwo tai. Mare tagaidukare tawiapagawo Pao Kurireu bataruji tameartoruwo ji mako pemegawo tai. Ča. Tameartorumodukare i jamedu. 45Mare imago pegamodukare tai Iogwa Kurireu biagai. Tagaidure jawu Judeu doge eimijera Moisés bataruji. Mare emare mako pegamode tai Pao Kurireu biagai tameartorukaie i. 46Tameartorumode Moisés bataruji rugadu dukeje tameartorumode i jamedu. Emare makore irore jiboeji. Ure nou tuwadaru bu bapera keje. 47Mare tameartorukare nou padure bapera kejewu Moisés bataruji dukodire tameartorumodukare iwadaruji jamedu.
6Jesus Ure Boe Eke Maku Etai
1-2Jesus ro rakare rugadu. Ure kogodureuge epemegago. Nono Jesus kurugodure nou Galiléia pobo maereu bakowu ka ture jorduwadowugebo. Nou pobo maereu iere Tiberíades jamedu. Boe eture Jesus rekodaji. Emagare rugadu. Erdure Jesus ro rakare jiboeji dukodire eture rekodaji. 3Etaregodure bakowu ka dukeje Jesus ruture ia tori ao ka. Nonore ure tumugudo ture jorduwadowugebo. 4Judeu doge ewiapagagodure tuwadae Páscoaji mare nou meri kodu mai kimore nou ewadae ka. 5Jesus aiwore tubiji dukeje jordure boe doge ekodure pudae duji. Emagare rugadu. Nono unarare Filipiji. Akore: – Kaiba pagodumode pawo pageragu boe ekeji awu boe doge ekeje?
6Jesus jorduware tumeardaeji marigudu. Du inodu tabo unarare Filipiji tuiorduwo Filipe meartorumode pudui dubagai.
7Filipe akore: – Awu boe emagare rugadu. Pamode pageragu boe ekeji eiamedu boewo kowuje mare mori kurimode rugadu. Imedu maragodumode kejewu ari oto padumode oito dukeje o diero mode tuwo akirodo boe ekeji.
8Jesus ure jorduwadowu ia imedu iere André. Simão Pedro uwie nure ema. 9André akore: – Čege amireu ure ikera aboudure woe ia imedu rogu apo. Čege karo rogu ure pobe apo jamedu. Mare awu boe eke rogu aregodumodukare enodo ka emagare rugadu kodi.
10Boebutu pemegareu jeture nono dukodire Jesus akore: – Tamagodo awu boei ewo tumugudo nou boebutu keje.
Nono nou boe doge eiamedu boe ere tumugudo nou boebutu keje. Ime doge enodo padu kejeboere cinco mil nono. 11Jesus ure tugeragu nou imedu rogu uke amireu roguji. Imadure Pao Kurireu apo nou amireu paru tabo. Dukeje čare ure kado puiato. Ure maku nou boe doge etai. Boe eiamedu boe ere tugeragu ji. Rorino nou kare kugurei jamedu. Ure kado puiato dukeje ure maku etai jamedu. Boe eiamedu boe ere tugeragu ji. Nou boe eiamedu boe enogwagere rugadu. Ere ko jii toro tuguredu ka. 12Ekuredure dukeje Jesus makore ture jorduwadowugei. Akore: – Tageragu nou boe eke koboji. Tagaba barigu.
13Dukodire nou Jesus ure jorduwadowuge ere tugeragu nou boe eke koboji boe epiji. Ere kadarabo doge korau nou boe eke kobo tabo. Nou kadarabo enodo padu kejeboere doze nou boe eke kobo tabo rugadu. 14Nou boe doge erdure nou Jesus rore aino duji dukeje emagore pui. Egore: – Makore Pao Kurireu bataru jiwu nure ema rugadu. Boe epagare bagai marigudu. Marigudu Pao Kurireu ure boe ewie ia makore Pao Kurireu bataru jiwu aregodumoduie boe etae. Aino čare aregodure boe etae rugadu. Ema rugadu. Pao Kurireu bataru jeture pudui rugadu.
15Ere turagado tuwo tugeragu Jesusji tugimijera kurireuwo ema. Mare Jesus jorduware emeardaeji. Dukodire uture epiji turagojewo tuginaigodu toro ia tori aogeje.
Jesus Merure Pobo Aoji
16Nou boečoji Jesus ure jorduwadowuge eture pobo maereu okwa ka. 17Ere turemo ika kurireuto tugurugoduwo pobo maereu kajeje toro Cafarnaum ba kurireu ka. Ča boečodure ei rugadu. Jesus aregodukare etae raga. 18Ekurugodu kimore nou pobo maereu kajeje dukeje bakuru rakareu aregodure etogi. Dukodire nou pobo jetu rakare nou ika kurireuji. 19Traiga tabore nou Jesus ure jorduwadowuge emaragodure traiga tabo ika kurireuji. Ekodu ja kimore nou pobo maereu okwaji dukeje erdure Jesus merure pobo ao jituji. Kodu mato etae ika kurireu ka. Nou ure jorduwadowuge epagudugodure če rugadu. 20Mare Jesus makore ei. Akore: – Tabagudukaba. Imire iroino!
21Dukodi čare epagudu akedure. Ere udo turemo ika kurireuto pudabo. Dukeje čare erore puku etaregodure toro nou turoino kaboe ka duji.
Boe Etaiwore Jesus Bagai Pugeje
22Nou barogwato nou boe doge edu kimore toro nou pobo maereu bakowu keje. Erduware ika kurireu ure mitotu je duji. Erduware Jesus kodukare ture jorduwadowugebo duji. Nou Jesus ure jorduwadowuge eture ika kurireu tabo Jesus piji. 23Dukeje čare ia boe etaregodure nou boe etae ika kurireu tabo jamedu. Etaregodure Tiberíades ba kurireu piji. Ika kurireuge ebore etaregodure. Etaregodure dukeje erudure Jesus ure boe eke maku boe etaiwu tori ao ka. 24Mare Jesus rakojekare nono. Ure jorduwadowuge eragojekare nono jamedu. Dukodi čare nou boe eture tuibagi pobo maereu okwa ka. Ere taredo ika kurireugeto dukeje eture Cafarnaum ba kurireu ka taiwo tabo Jesus bagai.
Boe Eke Remawu Nure Jesusče
25Nou boe erdure Jesusji nou pobo maereu okwa bakowu keje dukeje eture ae. Egore: – Nuba arore akaregoduwo woe?
26Jesus akore: – Boe jokodu jire inagoino. Tare ire maku tagaiwu amireu kowuje dukodire taguredure. Dukodire taemarure iwagai pugeje. Mare tarduwakare imeardaeji. Tarduwakare kodiba iro rakare aino duji. 27Tawiapagakaba tu tage bagai. Pegamode. Mare tawiapagado tu baru tadawu boe eke remawu bagai. Tamode kowuje dukeje tamugumode Pao Kurireu apo rugadu jii toro rugadu. Du akedumodukare. Imedu Onaregedu nure imi. Pao Kurireu ure iro rakado tuwo boe erduwado taidure i duji. Imire imode nou boe eke remawu maku tagai.
28Nono enarare Jesusji. Egore: – Nuba čeromode Pao Kurireu ai aiduwo čei?
29Jesus akore: – Pao Kurireu koiare ure itarego mato. Emare aidure tameartoruwo i.
30Egore: – Aro rakamode čegai dukeje čemeartorumode ai rugadu. Nuba aromode? 31Jao pawobe ere baru pijiwu boe eke kowuje toro boe maereu keje. Moisés ure turo rakareu to tuwo nou boe eke maku etai. Pao Kurireu bataru padure kejewu bapera akore: “Pao Kurireu ure baru pijiwu boe eke maku etai ewo kowuje.”6.31 Awu bataru padure Êxodo 16.4-16 keje.
32Jesus akore: – Boe jokodu jire inagoino tai. Nou Moisés ure maku etaiwu boe eke baru pijiwu boe eke remawu karega. Pao Kurireu koiare emare umode boe eke remawu maku tagai baru piji. 33Aregodure baru piji rugadu. Pao Kurireu ure nou boe eke remawu rawuje mato moto ka tuwo boe emugu pemegado pudabo. Du akedumodukare.
34Erduwakare kaba jiba Jesus akoino. Egore: – Nou akagoino jiwu boe eke remawu maku čenai tu tu je.
35Jesus akore: – Nou boe eke remawu nure imi. Aidure tuiorduwawo iwuge emeartorumode i dukeje eke boeimodukare ei pugeje. Mare boe eke ji karega inagoino. Emugu pemegamode Pao Kurireu apo. Meartorure iwuge pobo boeimodukare ei jamedu. Mare pobo ji karega inagoino. Emugu pemegamode Pao Kurireu apo rugadu. 36Aino čare ire tawie. Tardure i mare tameartorumodukare i. 37Iogwa Kurireu ure maku inaiwu boe etaregodumode itae rugadu. Imodukare etudo ipiji. 38Itaregodukare iwo itaidure jiboe towuje. Itaregodure baru piji imeartoruwo ure itarego matowu Iogwa bataruji. 39Emare aidukare iwo ia aregodure itaewuge ewarigu ipiji. Dukodire imodukare ewarigu rugadu. Mare awu moto akedumode dukeje imode eewodudo pugeje ewikawo pugeje. 40Pao Kurireu aidure meartorure iwugei. Erdumode i mare emeartorumode i dukeje emugu pemegamode Pao Kurireu apo rugadu. Du akedumodukare. Imire imode eewodudo pugeje awu moto akedu keje.
41Jesus makore nou baru pijiwu boe eke remawu nuie pudumi mare boe etaidukare nou akoinoduji. 42Egore pui: – José onaregedu nure ema. Parduware uoji učeji. Pagare akoino tuie turawuje baru piji duji.
43Mare Jesus akore: – Tagagokaba aino. 44Iogwa Kurireu umodukare boe etudo itae dukeje etaregodumodukare itae rugadu. Iogwa Kurireu koiare ure itarego mato. Umode boe etudo itae dukeje emeartorumode i rugadu. Nono imode eewodudo pugeje awu moto akedu keje. 45Makore Pao Kurireu bataru jiwuge ere Pao Kurireu bataru bu bapera keje. Egore: “Pao Kurireu umode boe eiamedu boe erduwado.”6.45 Awu bataru padure Isaías 54.13 keje. Dukodire imagore aino. Biapagare Iogwa Kurireu bataru jiwu aregodumode itae. Iogwa umode jorduwado dukeje aregodumode itae. 46Mare inagokare boe erduie Iogwa Kurireuji. Tu nou aregodure Pao Kurireu pijiwu jordure Iogwa Kurireuji. 47Boe jokodu jire inagoino. Meartorure iwu mugu pemegamode Pao Kurireu apo. Du akedumodukare rugadu. 48Boe eke remawu nure imi. 49Jawu jaoboe ere ia boe eke kowuje boe maereu keje. Mare ewire tiamedu boe tabo. 50Mare baru pijire boe eke remawu aregodure. Umode kowujewuge ewimodukare pugeje. 51Nou boe eke remawu nure imi. Nou aregodure baru pijiwu nure imi. Tamode nou boe eke remawu kowuje dukeje tamugu pemegamode Pao Kurireu apo. Du akedumodukare. Boe eke remawu nure ikoduče. Imode ikodu maku tagai tawo kowuje. Imode ikodu maku boe etai ewikawo pugeje.
52Nou boe erdu pegare nou Jesus batarure aino duji. Etokire pui nou bataru keje. Egore: – Boe emodukare awu imedu kodu kowuje rugadu.
53Jesus akore: – Boe jokodu jire inagoino. Imedu Onaregedu nure imi. Boe emodukare ikodu kowuje mare emugu pemegamodukare jamedu. Boe ekudumodukare ikuče dukeje emugu pemegamodukare. 54Mare boe emode ikodu kowuje, ekudumode ikuče dukeje emugu pemegamode Pao Kurireu apo rugadu. Du akedumodukare. Moto akedumode dukeje imode eewodudo pugeje ewikawo pugeje. 55Boe eke remawu nure ikoduče. Boe eke remawu nure ikuče. 56Boe emode ikodu kowuje dukeje emugumode itabo. Imugumode ebo jamedu. Boe ekudumode ikuče dukeje emugumode itabo. Imugumode ebo jamedu. 57Iogwa Kurireu ure rugadu. Ema koiare ure itarego mato. Ema koiare ure imugu pemegado jamedu. Aino čare boe emode ikowuje dukeje imode emugu pemegado jamedu. 58Ainore baru pijiwu boe ekere. Ukare nono nou jawu jaoboe enogwagere jiboere. Jawu jaoboe eiamedu boe ewire. Mare boe emode awu inagoino jiwu boe eke remawu kowuje dukeje ewimodukare pugeje. Emugumode Pao Kurireu apo jii toro rugadu. Du akedumodukare rugadu.
59Cafarnaum ba kurireu kejere Jesus rakojere. Nou Judeu doge ere bato puiwu bai kejere akoino nou boe dogei.
Boe Emeartorumode Awu Jesus Bataruji Dukeje Emugumode Pao Kurireu Apo Rugadu
60Nou uture Jesus rekodajiwugere emeardure nou Jesus akoinoduji dukodire etaidukare ji. Egore: – Awu makore jiboe rakare pai. Boe erduwamodukare ji. Boe emeartorumodukare ji jamedu.
61Jesus meardukare ewadaruji mare jorduware emago pegare pudui duji. Dukodire čare makore ei pugeje. Akore: – Kočare tagaidukare imagore jiboeji. 62Tardumode irudure baruto duji ibagi duji dukeje nuba tameardaemode i pugeje? 63Inagore taiago ikodu kowuje. Mare ikodu remawu ji karega inagoino. Pao Kurireu Uwari jire inagoino. Inagore taguduiago ikuče jamedu mare iku remawu ji karega inagoino. Pao Kurireu Uwari jire inagoino. Ema koiare umode meartorure iwuge emugu pemegado Pao Kurireu apo. Taraga tabo karega tamugu pemegamode. Mare Pao Kurireu Uwari koiare umode boe emugu pemegado. 64Mare ia tagi tameartorukare i rugadu.
Marigudu Jesus jorduware meartorumodukare puduiwugei. Jorduware ia imedu umoduie tumagu boe eimijerage pegareuge etai duji jamedu. Jorduware nou imedu romode pudui duji marigudu.
65Nono Jesus makore pugeje. Akore: – Tameartorukare dukodire inagoino. Boe etaregodumodukare itae tao biji. Pao Kurireu koiare umode boe pemegado boei etaregoduwo itae.
66Ča Jesus akore aino nou boe dogei dukodi čare emagare tudu tabo piji. Etukare Jesus rekodaji pugeje. 67Dukodire Jesus unarare ture jorduwadowugei. Enodo padu kejeboere doze. Akore: – Tagaidure taduwo ipiji jamedu?
68Mare Simão Pedro akore: – Boro. Awadaru koiare umode čemugu pemegado Pao Kurireu apo jii toro rugadu. Čerduwakare ia boe ewagai pugeje. 69Aino čare čemeartorure ai rugadu. Čerduware Boe Pemegareu Remawu nure aki duji rugadu. Akire akaregodure Pao Kurireu piji rugadu.
70Jesus akore: – Tanodo padu kejeboere doze. Ire ikeragu taiamedu boei inai. Mare ia tamedia bope nure ema nono tagabo.
71Judas Iscariotes jire Jesus akoino. Simão Iscariotes onaregedu nure ema. Jesus ure nou Judas Iscariotes jorduwado. Du inodu tabo umode Jesus maku boe eimijerage pegareuge etai rugadu.
7Jesus Rakojere Tuwiemagebo
1Nou inodu otobiji Jesus kodure Galiléia motoji. Judéia moto kejewu Judeu doge eimijerage etaidure tuwo Jesus bito. Dukodire Jesus aidukare tugoduwo Judéia motoji. 2Kuri aino Judeu doge ewadumode ia tuwadaeji. Nou ewadure jiwu ewadae iere “Mačebradu”. 3-4Nono Jesus uwiemage emagore ji. Egore: – Boe etaidumode boe erduwawo pudui boe emodukare turo rakareu biado boe epiji. Ča atudo toro Judéia moto ka. Nou Judéia moto kejewuge emeardure boe egore aro rakaie. Etaidure tuduwo akabo. Atudo toro awo erdudo aro rakareuji. Dukodire boe eiamedu boe erduwamode ai rugadu.
5Mare nou Jesus uwiemage emeartorukare ji dukodire egoino.
6Mare Jesus makore ei. Akore: – Tameardae pagare. Iorduware itumode toro kejewu meriji. Kajao. 7Boe erdu pegakare tai. Mare imi ire boe ewie ero pegareu jamedu boeji dukodire erdu pegare i rugadu. 8Tadudo nou Judeu doge ewadae ka. Itumodukare raga. Nou itumode kejewu meri aregodukare raga.
9Jesus utukare nou Galiléia moto piji nou meriji rugadu.
Jesus Uture Judeu Doge Ewadae Ka
10Jesus uwiemage eture toro nou Judeu doge ewadae ka. Dukejere Jesus uture toro jamedu. Mare ure tuwiado boe epiji. 11Nou ewadae kejere nou Judeu doge eimijerage emarure Jesus bagai. Egore: – Ema pa?
12Nou ewadae kejewu boe doge enogwa podure pui Jesus jiboeji. Iage egore: – Imedu pemegareu nure ema.
Mare iage egore: – Boro. Unure boe ekiripagado.
13Mare emagokare nou inodu boeji boe ewiagai. Epagudure tugimijerageče kodi.
14Nou Judeu doge ewadure rugadu nou tuwadaeji. Mare ewadu kimore dukeje Jesus uture Pao Kurireu uwai ka. Nonore ure boe erduwado. 15Judeu doge eimijerage erore ta je. Egore: – Boe ekare awu imedu jorduwado. Kodiba čare jorduware aino?
16Jesus akore: – Pao Kurireu koiare ure itarego woe. Du bataru jire inagore aino iwo boe erduwado. 17Aidure tumeartoruwo Pao Kurireu bataru jiwuge erduwamode iwadaruji. Erduwamode jamedu iwadaru ji karega inagoino. Erduwamode Pao Kurireu bataru remawu jire inagoino duji. 18Ia boe emagomode tu pudumie tuiorduware. Nouge etaidure boe etaiwowo tu pudui, boe enojarowo nou tuwadaruji. Mare ia aidumode boe emago pemegawo nou ure tarego matowuji dukeje batrarodumodukare. Boe jokodu jire akoino boe etaiduwo nou ure tarego matowuji. 19Mariguduwuge pawobe eimijera Moisés ure Pao Kurireu meardae maku etai eno bakaruče. Dukodire tago bakarure aino jii aino. Mare taiamedu boe tameartorukare nou tago bakaruji rugadu. Kodiba tagaidure tawo iwido?
20Nou boe egore: – Čedaidukare čewo awido. Ia bope uwari meture atada rugadu kodire akagoino.
21Jesus akore: – Iro rakare sábado meri keje dukodire taerore ta je. 22Marigudu Moisés ure taro maku tagai tawo tagore ime ewaga oto biri kado. Mare ia jawu jaoboe eigoiare ere nou taro maku tagai boetoji. Nono Moisés rore aino tai jamedu aino boigodu. Dukodire tare tagore ime eiamedu boe ewaga oto biri kado rugadu. Taromode aino sábado meri keje jamedu. 23Moisés ure tago bakaru maku tagai. Akore tamaragodukaiago sábado meri keje mare boe pegakaie tai tawo tagore ime ewaga oto biri kado sábado meri keje. Ire nou imedu pemegado sábado meri keje dukodire tagorigodure aino i. Tagagore boe erokaie aino sábado meri keje. 24Tagaiwokaba boei tameardae pegareu tabo. Tagaiwodo boei eromode jiboeji emeardaemode jiboeji jamedu. Dukodire tarduwamode ei rugadu.
Boe Epagare Bagaiwu Umode Boe Ekinorudowu Nure Ema?
25Nouia mugure Jerusalém ba kurireu kejewuge egore: – Čowu pagimijerage etaidure tuwo bitowu imedu karegau? 26Kočare makore boe eiamedu boe ewiagai boe eiamedu boe egai. Mare boe emago pegareu bokware ia tuwadaruji ji. Pagimijerage erduwa kana umode boe ekinorudowu nure ema duji? Erduwa kana pabagare bagaiwu nure ema duji? 27Boe erduwamodukare kaibowu pijiba umode boe ekinorudowu aregodumode. Mare paiamedu boe parduware kaibowu pijiba awu imedu aregodure.
28Jesus ure boe erduwado Pao Kurireu uwai tada dukeje ure tumago pemegado toro boe etae boe eiamedu boe emearduwo tuwadaruji. Akore: – Tameardaere tarduwaie itaregodure pijiwu motoji. Mare nou ure itarego matowu emare ure itudo jetu. Imi itaobiji karega itaregodure. Nou ure itarego matowu batrarodumodukare. Boe remawu nure ema rugadu. Mare tarduwakare ji. 29Iragojere apo dukodire iorduware ji. Ema koiare ure itarego mato.
30Nono iage etaidure tuwo tugeragu ji tuwo tugu baičoreuto. Mare Pao Kurireu aidukare dukodire erokare aino ji rugadu. 31Mare iage emeartorure Jesusji. Awu meartorure jiwuge emagare. Egore: – Awu imedu ro rakare nono pabagare bagaiwu umode boe ekinorudowu mogadure rugadu.
Boe Eimijerage Ere Tugobaigarege Etudo Tuwo Tugeragu Jesusji
32Fariseu doge emeardure nou boe enogwa podure pui Jesus jiboe jituji. Dukejere ere tugobaigarege etudo toro tuwo tugeragu Jesusji. Nou ure Judeu doge enomea maku Pao Kurireu aiwuge eimijerage emeardaere nono nou fariseu doge emeardae mogadure jamedu. 33Jesus makore boei. Akore: – Iragoje biagamode tu tagabo. Kuri aino itumode tabiji toro ure itarego matowu bagai ibagi. 34Tagaiwomode iwagai mare tardumodukare i. Taroiwamodukare taduwo toro iragojemodewu ka.
35Nou Judeu doge egore pui: – Kaiba kodumode? Utumode kana toro pawobe etae toro ia Grécia moto kejewu ba kurireu ka tuwo nou Grécia kejewuge erduwado? Nuba romode pardukawo pudui pugeje? 36Akore pagaiwomoduie tuwagai mare pardumodukaie pudui. Akore paroiwamodukaie paduwo toro turagojemodewu ka. Kaba jiba akoino?
Awu Pobo Umode Boe Emugu Pemegado Pao Kurireu Apo
37Awu meriji nou Judeu doge ewadae remawu akedu kejewu meri reo. Jesus ure turagojedo. Ure tumago pemegado boe eiamedu boe emearduwo. Akore: – Pobo boeire ia tai dukeje tadudo itae. 38Pao Kurireu bataru padure bapera keje. Akore: “Meartorure iwuge ekudumode nou poboče dukeje umode turedo epiji. Nou pobo umode emugu pemegado rugadu. Du akedumodukare rugadu.”
39Mare pobo ji karega Jesus akoino. Pao Kurireu Uwari jire Jesus akoino. Boe emeartorumode Jesusji dukeje Pao Kurireu umode Tuwari maku nou boe etai. Dujire Jesus akoino. Mare Jesus akore aino nou boei kimo mare Pao Kurireu ukare Tuwari maku boe etai raga. Jesus jewodukare tuwi piji raga turuduwo baruto dukodire ukare maku etai raga.
Nou Boe Emeardaekare Nou Pumeardaeji
40Nou boe emeardure nou Jesus bataruji dukeje iage egore: – Pao Kurireu ure pawie jiwu, makore Pao Kurireu bataru jiwu nure awu imeduče rugadu.
41Iage egore: – Pabagare bagaiwu umode boe ekinorudowu nure ema.
Mare iage emeartorukare. Erduwakare Jesus boture Belém ba kurireu keje duji. Dukodire egore: – Ema karega. Awu imedu boture Galiléia moto keje. 42Pao Kurireu akore Belém ba kurireu kejeie nou pabagare bagaiwu umode boe ekinorudowu botumode. Jao pagimijera kurireu Davi uwobe moduie ema. Belém ba kurireu kejere nou Davi mugure. Mare awu Jesus botukare Belém ba kurireu keje.
Ainore nou boe egore. Mare erduwakare Jesus boture Belém ba kurireu keje duji. Dukodire egoino. 43Dukodire emeartorukare ji. Dukodire nou boe emeardaekare pumeardae mogadure Jesus jiture. 44Iage etaidure tuwo tugeragu ji tuwo tugu baičoreuto. Mare boe eragakare tuduwo ae.
Judeu Doge Eimijerage Emeartorukare Jesusji
45Dukodire tugobaigarege eture tuibagi tugimijerage fariseu doge etae, tugimijerage ure Judeu doge enomea maku Pao Kurireu aiwuge eimijerage etae. Nou tugobaigarege eimijerage enarare ei. Egore: – Kodiba tagaregodukare apo?
46Nou tugobaigarege egore: – Marigudu boe emagokare nono nou imedu makore jiboe mogadure ji aino. Mako pemegare rugadu.
47Nou fariseu doge ekorigodure. Egore: – Ure taekiripagado rugadu. 48Judeu doge eimijerage eiamedu boe emeartorukare ji rugadu. Fariseu doge nure čegi. Čeiamedu boe čemeartorukare ji rugadu. 49Awu boe erduwakare Moisés ure maku pagaiwu pago bakaruji paroji. Dukodire Pao Kurireu ro pegare ei. Dukodi čare boe pegamode ei rugadu.
Ainore nou fariseu doge egore.
50Ia fariseu iere Nicodemos. Emare uture Jesus ae marigudu tuiorduwawo Jesus bataruji. Aino čare makore tumedage fariseu dogei. 51Akore: – Pawiapagamode boe ewadaruji parduwawo eroji dukeje pagaiwomode ero pegareu bagai. Ainore pago bakaru ure. Ainore parore. Paromodukare aino dukeje paro peganure.
52-53Mare nou fariseu doge egore: – Awodu kana Galiléia moto keje jamedu nono awu imedu Jesus mogadure? Akaidure ji? Akaiwodo Pao Kurireu bataru padure kejewu baperaji. Akaiwomode ji dukeje arduwamode nou makore Pao Kurireu bataru jiwuge eiamedu boe ewodukare nou Galiléia moto keje rugadu.
8Boe Eimijerage Erdure Aredu Jeribarire Tumugukare Apowu Imedu Jituji
1Boe eiamedu boe eture tuibagi tuwai ka pugeje. Mare Jesus ruture ia tori iere Oliveira Ri ao ka. 2Barogwakododu kejere ure turawuje. Uture tuibagi Pao Kurireu uwai ka pugeje. Boe ere bato pui ae. Emagare. Dukodire ure tumugudo boebo dukeje ure erduwado. 3Jorduware Judeu doge eno bakaru jiwuge etaregodure ae aredu apo. Fariseu doge etaregodure ebo jamedu. Erdure nou aredu jeribarire tumugukare apowu imedu jituji. Dukodire etaregodure nou aredu apo aino. Nono ere nou aredu rakojedo boe etoiadada. 4Emagore Jesusji. Egore: – Jorduwareu nure aki. Čerdure awu aredu jeribarire tumugukare apowu imedu jituji. 5Marigudu Moisés ure Pao Kurireu meardae maku jawu pawobe etai pago bakaruče kodire parore aino rugadu. Emare akore aredu jeribarie tumugukare apowu imeduji dukeje boe eiago nou aredu bito tori tabo. Ča nuba ameardaere parowo awu areduji?
6Nou boe eimijerage etaidure tuwo turokogado Jesusji tumearduwo ia Jesus bataru pegareu bagai. Dukodire egoino ji. Mare Jesus makokare boeji. Ure tubu jodo moto keje tuwo tuwadaru bu moto keje tugerako tabo. 7Nou boe eimijerage enara kimore ji dukeje Jesus ure turagojedo pugeje. Dukeje makore ei. Akore: – Ia tagi taro pegareu bokware dukeje tagidomode tori tabo nou areduji boetoji.
8Nono Jesus ure tubu jodo moto keje pugeje dukeje ure ia tuwadaru bu moto keje tugerako tabo pugeje. 9Nou boe eimijerage emeardure nou Jesus akoino duji dukeje eture Jesus piji etododai. Pegagodureuge eture boetoji. Dukeje iage eture eregodaji. Nono iage eture pugeje. Ča nou boe eimijerage eiamedu boe eture rugadu. Aino Jesus rakojere nono tuginaigodu nou etaregodure apowu aredu apo. 10Nono Jesus ure turagodo dukeje makore nou areduji. Akore: – Kaiba ekodure? Boe edukare woe pugeje tumago pegawo ai.
11Nou aredu akore: – Boro. Eiamedu boe eture marigudu.
Jesus akore: – Ča imago pegamodukare ai jamedu. Atudo awai ka aibagi. Mare paga karega. Aro pegakaba pugeje.
Jesus Ure Nono Jorugu Pemegareu Mogadure
12Jesus makore nou fariseu dogei pugeje. Akore: – Jorugu pemegareu koiare umode boe edo činorudo boe pegareu piji boečoji. Ire nono jorugu pemegareu mogadure. Mare jorugu ji karega inagoino. Imode boe edo činorudo turo pegareu piji. Boe ekodumode itabo dukeje imode boe erdudo turo pegareuji erokawo aino pugeje. Imode eroiwado tuwo tugera ra turo pegareu piji.
13Nou fariseu doge egore: – Amagore čei mare aragojere woe akinaigodu. Tu akire akagoino. Dukodire čare awadaru ukare turugadu čegai.
14Jesus akore: – Boro. Iorduware boe jokodu jire inagoino tai duji. Tarduwakare kaibowu pijiba itaregodure. Imire iorduware. Tarduwakare kaiba ikodumode. Imire iorduware. Dukodire inagoino irore jiboeji tawiagai. 15Tagaiwomode boe eroji dukeje tamagomode ero pegareuji boe ewiagai nono boe ero mogadure. Mare imi imagokare boe ero pegareu boeji tawiagai. 16Imagomode boe ero pegareu boeji boe ewiagai dukeje iwadrarodumodukare. Boe jokodu jire imagomode. Iragojekare woe ikinaigodu. Iogwa Kurireu rakojere itabo. 17Tamode pobe dukeje tamagomode jiboe kodumode puregodaji dukeje boe emeartorumode tagagoino jiboeji. Egomode boe remawu jie tagagoino. Ainore tago bakaru akore. Tagi taro reo. Boere pobe tumago pegare dutabo ia ro pegareu jitu dutabo dukeje boe emeartorumode emagore jiboeji. Umode mito tumagore dutabo dukeje boe emeartorumodukare ji. Ainore tagagore. Padure bapera keje. 18Ča imagore irore jiboeji tawiagai. Mare Iogwa Kurireu koiare ure itarego mato. Emare makore irore jiboeji boe ewiagai jamedu. Aino čere pobe jamedu tameartoruwo čemagore jiboeji.
19Enarare Jesusji. Egore: – Ao pa?
Jesus akore: – Tarduwakare i. Tarduwakare iogwaji jamedu. Tarduwamode i dukeje tarduwamode iogwaji jamedu.
20Ainore Jesus akore Pao Kurireu uwai tada. Ure boe erduwado nono. Ia ira mugure nono jamedu boe ewo toe tugu jagi tuwo maku Pao Kurireu ai.
Jesus Utumode Dukeje Boe Eroiwamodukare Taregoduwo Ae
21Nono Jesus makore boei pugeje. Akore: – Iturumode tabiji pugeje. Tagaiwomode iwagai. Mare taro pegare kodi tawimode. Itumode tabiji dukeje taroiwakare taduwo iregodaji.
22Nou Judeu doge eimijerage emagore pui. Egore: – Emare akoino paroiwamodukaie paduwo turegodaji. Tuwimodedu ji kana akoino? Umokana tuwido?
23Jesus makore ewadaru jipagi. Akore: – Awu moto kejewuge nure tagi. Imi rema itaregodure baru piji. Tawodure woe awu moto keje. Mare imi moto kejewu karegure imi. 24Dukodire inagoino tai tawimode nou taro pegareu kodi. Ča itagedumodukare rugadu. Tameartorumodukare i dukeje tawimode rugadu taro pegareu jamedu boe tabo.
25Egore: – Ioguduba nure aki?
Jesus akore: – Ire tawie marigudu. 26Itaidure imago raiwo taro boeji. Itaidure iwo boe ewie taro pegareu jamedu boeji. Mare ure itarego matowu ure tuwadaru maku inai iwo boe ewie. Emare batrarodumodukare. Imagomodukare ia iwadaruji tawiagai.
27Pao Kurireu jire Jesus akoino. Mare nou boe erduwakare akoino jiboeji. 28Dukeje Jesus makore ei pugeje. Akore: – Imedu Onaregedu nure imi. Tamode ipo padure pugajejewu rakojedo itabo dukeje tarduwamode akedumodukareu nure imi duji. Nono tarduwamode Iogwa Kurireu bataru jire inagoino rugadu. Imeardae ji karega inagoino. Iogwa Kurireu meardae koiare ure inagodo aino tai. 29Ema koiare ure itarego mato. Rakojere itabo jamedu. Imeartorure ji rugadu dukodire utukare ipiji.
30Boe emeardure Jesus akoino duji dukodire emagare tumeartorure jitu tabo.
Boe Emeartorumode Jesus Bataruji Dukeje Umode Etawuje Boe Pegareu Piji
31Nono Jesus makore nou meartorure puduiwugei. Akore: – Tameartorumode iwadaruji rugadu dukeje ire jorduwadowuge remawuge emode tagi rugadu. 32Tarduwamode iwadaru remawuji dukodire nou iwadaru remawu umode tadawuje boe pegareu piji. Tawiapagamodukare tameardae pegareuji taibagi pugeje. Tamode tagamudo piji rugadu.
33Egore: – Amode čedawuje boe pegareu piji? Kaba jiba akagoino čei? Čemugu pegakare. Abraão uwobe nure čegi. Marigudu čemaragodukare ia boe tuginaiwuge etai jii aino. Čewiapagakare ei. Čeragojekare boe pegareu keje.
34Mare Jesus akore: – Boe jokodu jire inagoino tawiagai. Boe ero pegare dukodire emeardu kurire nou turo pegare jiboeji. Ewiapagamode tu tu nou turo pegareu boeji. 35Boe emaragodumode ia boe etai dukeje utugarege nure emage. Emugumode ebo mare etuwobe karegure emage. Mare boe etore boe etuwobe nure emage rugadu jii toro. 36Pao Kurireu Onaregedu nure imi. Imode tadawuje boe pegareu piji tagawo tagirimi nou taro pegareu ka pugeje dukeje tawiapagamodukare taro pega boeji taibagi pugeje. 37Iorduware Abraão uwobe nure tagi duji. Mare tameartorukare iwadaruji dukodire tagaidure tawo iwido. 38Imagore Iogwa Kurireu ure iorduwado jiwu tuwadaruji. Mare tagi tameartorure tao bataru pegareu jamedu boeji.
39Egore: – Iogware Abraão rema.
Jesus akore: – Abraão ore mode tagi dukeje taromode nono Abraão ro mogadure. 40Itaidure iwo tarduwado Pao Kurireu makore iwu tuwadaru remawuji tawiagai. Boe jokodu jire Pao Kurireu akoino. Mare tagaidure tawo iwido. Abraão rokare aino. Kodire tao karegure ema. 41Mare tagaidure tarowo nono tao remawu ro mogadure.
Egore: – Pao Kurireu ure mitotu je kodire ure toredo čegi rugadu. Pao Kurireu ore remawuge nure čegi rugadu.
42Jesus akore: – Pao Kurireu oremode tagi dukeje tameardu kurimode i. Itaregodure Pao Kurireu piji. Ča imi reo. Pao Kurireu koiare ure itarego mato tuwadaru tabo. Imi igoia karega. 43Mare tagaidukare iwadaruji dukodire tagaidukare tawiapagawo imagore jiboeji. Dukodire tarduwakare iwadaruji. 44Bope doge eimijera ore nure tagi. Tameartorure tao bope doge eimijera meardaeji. Marigudu ure boe ewido ji aino kimo. Aidukare boe ewadaru pemegareuji rugadu. Tuwadrarodae jire jorduware tu rugadu. Marigudu batrarodure tu tu je ji aino. Batrarodureuge etuo nure ema. 45Boe jokodu jire inagoino tai. Tao batrarodureu koiare ure tawarigu ipiji tameartorukawo i. 46Iro pegakare dukodire tarduwakare ia iro pegareu bagai. Imagore boe remawuji tawiagai tameartoruwo i mare tameartorukare i. 47Pao Kurireu ore ewiapagamode Pao Kurireu bataruji. Mare Pao Kurireu ore karegure tagi. Dukodire tagaidukare tawiapagawo ji.
Judeu Doge Emago Pegare Jesusji
48Nono emagore Jesusji. Egore: – Boro. Čegi čerduware boe remawuji rugadu. Samaria moto kejewu nure aki. Bope uwari meture atada.
Nou boe erdu pegare Samaria moto kejewugei dukodire erdu pegare Jesusji jamedu.
49Jesus makore ewadaru jipagi. Akore: – Bope uwari metukare itada. Imeartorure Iogwa Kurireu bataruji kodi. Mare tamago pegare ikieji. 50Itaidukare boe emago pemegawo ikieji. Mare Iogware aidure boe emago pemegawo ikieji. Emare aiwore irore jiboeji dukodire mako pemegare irore jiboeji. 51Boe jokodu jire inagoino. Boe emeartorumode iwadaruji dukeje ewimodukare jii toro rugadu.
52Egore: – Ča ainore čerduware bope uwari meture atada rugadu duji. Abraão bire marigudu. Nou makore Pao Kurireu bataru jiwuge eiamedu boe ewire marigudu jamedu. Mare aki akagore meartorumode aiwuge ewimodukaie jii toro. 53Iogwa Abraão bire marigudu. Akurikare Abraão kori. Nou makore Pao Kurireu bataru jiwuge eiamedu boe ewire marigudu. Ioguduba nure aki?
54-55Jesus akore: – Imode ikie kurido ikinaigodu dukeje boe kurireu modukare imi. Mare Iogwa Kurireu koiare ure ikie kurido. Tagagore tameartoruie Pao Kurireuji rugadu. Mare marigudu tarduwakare ji. Mare imire iorduware ji rugadu. Imagomode iorduwakaie jituji dukeje iwadrarodumode nono tawadrarodu mogadure. Mare iorduware ji rugadu. Imeartorure makore jiboeji. 56Tao Abraão jorduware tuiordumoduie itaregodure duji dukodi jakarere pudui rugadu. Nono jordure i dukeje jakarere pudui rugadu.
57Egore: – Ako joru oto padukare 50. Dukodire ardukare Abraãoji rugadu.
58Jesus akore: – Boe jokodu jire inagoino tai. Abraão botukare raga mare imire imugure baru tada marigudu.
59Nono nou boe ere tugeragu toriji tugidowo tabo ji mare Jesus ure tuwiado epiji. Dukeje uture Pao Kurireu uwai piji.
9Jesus Ure Joku Bokwareu Imedu Pemegago
1Jesus merure awaraji. Nono jordure joku bokwareu imeduji. Nou imedu boture tuioku bokwa tabo ji aino imedure pudumi du ka. 2Nono nou Jesus ure jorduwadowuge enarare ji. Egore: – Jorduwareu nure aki. Ioguduba ro pegare? Kodiba awu imedu boture tuioku bokwa tabo? Ema na ro pegare? Dukodi kana joku bokware? Uo kana ro pegare? Uče na ro pegare? Dukodi kana boture tuioku bokwa tabo?
3Jesus akore: – Boe ero pegareu koia karega joku bokware. Boture tuioku bokwa tabo Pao Kurireu uwo pemegago tuwo boe erdudo ture joku pemegago duji tuwo boe erdudo turo rakareuji. 4Mare Pao Kurireu ure itarego mato. Pamaragoduwo meri kimoto iwo ure itarego matowu meardae towuje ji je. Mare kuri aino boe pegamode boei. Boe mode boei nono boečo mogadure. Boe emaragodumodukare pugeje. 5Iragojere woe moto keje dukeje imode nono jorugu pemegareu mogadure. Mare jorugu ji karega inagoino. Imode boe erduwado boe remawuji rugadu. Dujire inagoino.
6Jesus akore aino dukeje ure todoguru barigu mototo. Ure moto bekurudo nou todoguru tabo. Ure tugeragu nou moto bekuruji. Ure bu nou imedu joku bokwareu joku keje. Nono makore ji. 7Akore: – Atudo toro nou Siloé po ka awo ae kabi.
Nou Judeu doge ewadaru tabore egore “Utudowu”. Ainore egore nou Siloé poji tuwadaru tabo.
Nono nou imedu joku bokwareu uture nou Siloé po ka. Ure tuie kabi dukeje joku pemegagodure. Ure tugirimi tuibagi tuwai ka pugeje. 8Nono nou jorduware jiwuge erore ta je. Egore: – Čewu imedu joku bokwareu karega? Kočare mugure woe maigodu togwamaguduwo boei diero rogu bagai toče.
9Iage egore: – Ema rugadu.
Mare iage egore: – Ema karega. Jere nono nou joku bokwareu je mogadure mare ema karega.
Mare nou imedu akore: – Imi rugadu reo.
10Nou boe egore: – Kočare akaiwo pemegare rugadu? Nuba boere ai?
11Dukeje akore: – Ia imedu iere Jesus. Ema koiare ure moto bekurudo todoguru tabo. Ure nou moto bekuru bu ioku keje. Dukeje makore i ituwo toro Siloé po ka iwo ie kabi poče. Dukodi čare iture toro. Ire ie kabi rugadu. Dukodi čare itaiwo pemegare aino rugadu.
12Nou boe egore: – Nou Jesus pa?
Imedu akore: – Iorduwakare bagai.
Fariseu Doge Etaiwore Nou Jesus Roji Tuiorduwawo Ji
13Nou boe ere nou imedu reko toro fariseu doge etae. 14Jesus ure nou imedu joku pemegago Sábado meriji. 15Nou fariseu doge enarare nou imeduji. Egore: – Nuba boere ai aeku pemegagoduwo aino?
Nou imedu akore: – Ia imedu ure moto bekuru bu ioku keje. Dukeje makore i iwo ie kabi. Dukeje čare itaiwo pemegare aino rugadu.
16Ia fariseu doge egore: – Nou roinowu imedu meartorukare paroji kodire rore aino Sábado meri keje. Pagi parokare aino. Dukodire Pao Kurireu piji karega aregodure.
Mare iage egore: – Ia ro pegareu imedu ro rakamodukare nono awu imedu ro raka mogadure. Awu imedu pemegare rugadu.
Dukeje čare emeardaekare nono pumeardaere.
17Dukodi čare nou fariseu doge enarare nou joku bokwareu imeduji pugeje. Egore: – Nou imedu ure aeku pemegagowu nuba ameardaere ji? Nou imedu pemegare rugadu?
Nou joku bokwareu imedu makore ewadaru jipagi. Akore: – Ia makore Pao Kurireu bataru jiwu nure ema rugadu.
18Mare nou Judeu doge eimijerage etaidukare tumeartoruwo nou joku bokwareu akoino duji. Emeardaere joku bokwareu karegure ema. Dukodire emagore nou imedu uče bagai uo bagai jamedu. 19Enarare nou učeji, nou uoji jamedu. Egore: – Taganaregedu nure awu imeduče? Boture tuioku bokwa tabo? Nuba boere ji joku pemegagoduwo aino?
20Nou uče uo egore: – Čedonaregedu nure ema rugadu. Boture tuioku bokwa tabo rugadu. 21Mare čerduwakare nuba boere ji kodiba joku pemegagodure aino. Čerduwakare iduba koiaba ure joku pemegago. Ča. Imedu nure ema. Tanarado ji. Ema koiare umode tawiedu pemegado nuba nou imedu rore pudui duji.
22Mare marigudu nou Judeu doge eimijerage emagore boei emeartorukawo Jesusji. Egore ia meartorumoduie Jesusji umode boe ekinorudowu nure ema duji dukeje tumode utudo nou ture bato puiwu bai piji rugadu aregodukawo nou bai ka pugeje. Dukodire nou joku bokwareu uče uo epagudugodure nou tugimijerageče. 23Dukodire emagokare Jesus ieji tugimijerage ewiagai. Egore tonaregedu koiaie umoduie ewie iduba roino pudui duji.
24Dukodire nou Judeu doge eimijerage emagore nou joku bokwareu imedu bagai pugeje. Emagore ji. Egore: – Pao Kurireu aiwonure ai rugadu. Awadarudo turugadu. Nou ure apemegadowu imedu ro pegareu nure ema rugadu.
25Nono nou imedu joku bokwareu akore: – Imedu ro pegareu mode ema dukeje mare iorduwakare ji. Mare imire ioku bokware rugadu. Aino čare itaiwo pemegare rugadu.
26Egore: – Nuba rore ai tuwo aeku pemegado akaiwo pemegawo pugeje?
27Nou imedu akore: – Ire tawie marigudu. Tawiapagakare iwadaruji. Kodiba tanarare i pugeje? Tagaidure tameartoruwo ji uwo tarduwado jamedu?
28Nono nou fariseu doge ekorigodure. Emago pegare nou joku bokwareu imeduji. Egore: – Akire ure jorduwadowu nure aki. Mare čegi Moisés ure jorduwadowuge nure čegi. 29Pao Kurireu makore Moisesji rugadu. Mare awu imedu karega. Čerduwakare kaibowu pijiba awu imedu aregodure.
30Nou joku bokwareu imedu akore: – Nou imedu ure ipemegago itaiwowo pugeje. Ioku bokwakare pugeje. Boe eimijerage nure tagi. Kočare tarduwakare nou imeduji. Kočare arduwakare kaibowu pijiba awu imedu aregodure. 31-32Iwodure ioku bokwa tabo. Aino ča nou imedu ure itaiwodo pugeje. Marigudu rugadu ia boe erokare nono ro mogadure. Ča Pao Kurireu biapagamodukare ro pegareuge emagore pudui jiboe bagai. Boe jokodu. Mare Pao Kurireu biapagamode meartorure puduiwuge ewagai rugadu. Boe emeartorumode Pao Kurireu bataruji dukeje Pao Kurireu biapagamode ewadaruji. 33Nou imedu aregodukare Pao Kurireu piji dukeje ro rakamodukare. Umodukare ipemegago. Kodiba ure ipemegago? Ča aregodure Pao Kurireu piji rugadu.
34Nou boe eimijerage egore: – Awodure dukeje ro pegareu nure aki rugadu jii aino. Aki na akaidure awo čerduwado? Arduwa bokwa.
Dukodi čare ere nou imedu utudo nou ture bato puiwu bai piji aregodukawo nou bai ka pugeje.
Boe Erduwakare Pao Kurireu Meardaeji
35Jesus meardure nou boe eimijerage erore aino duji dukeje jemarure nou ture pemegagowu imedu bagai. Jordure ji dukeje makore ji. Akore: – Aki na ameartorure Imedu Onaregeduji rugadu?
36Nou imedu akore: – Ioguduba nure ema? Iwie imeartoruwo ji rugadu.
37Jesus akore: – Ardure ji marigudu. Imi reo rugadu. Imi rugadu inagoino ai.
38Nou imedu ure tubu jodo moto keje Jesus jokorai. Akore: – Imeartorumode ai rugadu. Ikimijera mode aki rugadu.
39Jesus akore: – Itaregodure woe moto ka itaiwowo boe ero pegareu bagai. Aino joku bokwareuge etaiwomode pugeje. Mare joku bokwareuge ei karega inagoino. Jorduwakare iwugeire inagoino emeartoruwo i rugadu. Mare očarore tuwadaru jiwuge emode nono joku bokwareuge emogadure. Mare joku bokwareuge ei karega inagoino. Egore tuiorduwaie Pao Kurireu meardaeji. Mare pagatu jere egoino. Dukodire erduwamodukare i rugadu.
40Ia fariseu doge eragojere nono jamedu. Emeardure nou Jesus akoino duji. Dukodire emagore Jesusji. Egore: – Ameardaere joku bokwareuge nure čegi rugadu? Čedaiwo pemegare.
41Jesus akore: – Inagore joku bokwareugeie. Mare joku bokwareuge ei karega inagoino. Boe egomode turo pegaie mare turo pegamodukaie aino pugeje. Dukeje Pao Kurireu biagodumode nou ero pegare jiboe piji rugadu. Mare tagagore tarduwaie Pao Kurireu meardaeji rugadu. Tagagore taro pega bokwaie. Aino tagojarore tawadaruji rugadu. Dukodi ro pegareuge nure tagi aino rugadu.
10Jeture Carneiro Doge Eiwu Bakaru Reo
1-2Jesus akore: – Boe jokodu jire inagoino. Boe emode tagu carneiro doge edu tadawu ibora pemegado eduwo tada boečoji. Jeture carneiro doge eiwu umode turemo etae nou eda ibora baiporoji. Mare iwogureu umodukare turemo nou edu tadawu ibora baiporoji. Umode turemo edu tadawu ibora kujiado. 3Nou jeture nou ibora baiporo jiwu umode nou carneiro doge eda baiporo jado nou jeture carneiro doge eiwu uwo turemo carneiro doge etae. Nou jeture carneiro doge eiwu jorduware tagu carneiro doge ekieji. Dukodire makomode tagu carneiro doge ewagai dukeje erduware makoji. Kodire etumode rekodaji tieda piji. 4Umode etawuje eda piji dukeje etumode rekodaji rugadu erduware jetu pemegare puduiwu makoji rugadu. Jeture eiwu utumode etododai. 5Carneiro doge etumodukare ia boe eregodaji rugadu. Ia makomode ewagai mare eregodumode piji rugadu. Erduwakare makoji dukodi eregodumode piji.
6Jesus makore nou inoduji boe ewiagai mare nou boe erduwakare kaba jiba akoino.
Jesus Jetu Pemegare Boei
7Nono Jesus makore ei pugeje. Akore: – Boe jokodu jire inagoino tawiagai. Ire nono nou carneiro doge eda kejewu bai poro mogadure. Mare bai poro ji karega inagoino. 8Meartorure iwuge ere nono carneiro doge emogadure. Mare carneiro dogei karega inagoino. Marigudu iage etaregodure tuwo boe erego ikoda piji mare meartorure iwuge ewiapagakare ei. 9-10Iwogureu aidure tu tuwo tugeragu boeji boe epiji. Aidure tu tuwo boe ewido. Aidure tu tuwo boe etagedudo. Mare imire ire nono bai poro remawu mogadure. Mare bai poro ji karega inagoino. Boe etumode itae dukeje imode ekodiwado tugodure jiboeji. Ča itaregodure woe iwo boe emugu pemegado. Emugu pemegamode rugadu.
11– Jetu pemegare carneiro dogeiwu umode iaboedo tuwido tuwo tagu carneiro doge ekinorudo barege pegareuge epiji. Ča iromode nono nou jetu pemegare carneiro dogeiwu ro mogadure. Mare carneiro doge ewugeje karega imode imagu boe etai. Imode imagu ro pegareuge etai iwo boedo činorudo boe pegareu piji. 12-13Nou akure carneiro doge ečewu utugare biagoromodukare tietu pemegawo carneiro dogei. Aku ie karega. Dukodire rekodumode nou barogo pegareu piji. Umode tugera ra carneiro doge epiji. Dukeje nou barogo pegareu umode tugeragu ia carneiroji. Umode nouia carneiro doge edo taodo pubiji toro boe maereu ka. 14-15Ča irore nono nou jetu pemegare carneiro dogeiwu ro mogadure. Mare carneiro dogei karega inagoino. Ietu pemegamode boe dogei rugadu. Iogwa Kurireu jorduware i. Iorduware Iogwa Kurireuji jamedu. Nono iorduware meartorure iwugei rugadu. Meartorure iwuge erduware i rugadu. Ire irugadu iwiwo emugato. 16Ia boe emeartorumode i jamedu. Mare eragojekare woe. Imode ikeragu ei jamedu emugu pemegawo itabo rugadu. Ewiapagamode iwadaruji rugadu. Meartorumode iwuge eiamedu boe emugumode puapo. Jetu pemegare eiwu umode mitotu je.
17– Ire irugadu iwiwo dukodire Iogwa Kurireu meardu kurire i rugadu. Dukodire umode iewodudo pugeje. 18Imi imode imagu boe pegareuge etai itaidu tabo ewo iwido. Itaidumode imode imagu. Itaidumode iewoduwo dukeje iewodumode. Ainore Pao kurireu akore iroiago.
19Jesus makore aino dukeje nou boe emeardaekare nono pumeardae mogadure pugeje nou Jesus bataru keje. 20Iage egore: – Ia bope uwari meture awu Jesus tada. Aora bai baire rugadu. Pawiapagamodukare ji rugadu.
21Mare iage egore: – Ia bope uwari metumode tada dukeje makomodukare aino. Romodukare aino. Ure joku bokwareu aiwodo pugeje. Ča bope uwari meture tadawu romode aino? Romodukare aino!
Boe Emeartorukare Jesusji
22Biaku buture dukeje nou Judeu doge ewadure ia tuwadaeji Jerusalém ba kurireu keje. Nou tuwadae tabore ewiabuture ture Pao Kurireu uwai rakojedo du ka. 23Jesus merure Pao Kurireu uwai ja tada. Salomão Uwai Jokora jire merure. 24Nono boe ere bato pui ae dukeje enarare ji. Egore: – Akare čewie marigudu dukodire boe raire čerduwawo ai rugadu. Ča čewiedu pemegado. Aki na amode boe ekinorudo? Čebagare bagaiwu nure aki?
25Jesus akore: – Ire tawie marigudu. Mare tameartorukare i. Iogwa Kurireu ure iro rakado tameartoruwo iro rakare rugadu duji. 26Mare tameartorukare i. Iwobe karegure tagi. 27Meartorure iwuge eromode nono carneiro doge ero mogadure. Ire nono jeture carneiro dogeiwu mogadure. Mare carneiro dogei karega inagoino. Meartorure iwuge ewiapagamode iwadaruji. Iorduware ei. Ekodumode iregodaji. 28Imode emugu pemegado. Du akedumodukare rugadu. Ewimodukare pugeje. Ia boe emodukare tugeragu ei ipiji. 29Imeardu kurire awu Iogwa ure maku inaiwugei. Iogwa Kurireu jetu pemegamode ei rugadu dukodire ia boe emodukare tugeragu ei Iogwa piji. 30Iogwa imi čere aino pure tu je.
31Nono boe ere tugeragu toriji tuwo tori to Jesusji. 32Mare Jesus makore ei. Akore: – Iogwa Kurireu koiare ure iro rakado. Tardure nou iro pemegareuji. Kodiba tagaidure tawo iwido?
33Egore: – Aro pemegakare kodi. Imedu nure aki. Mare akaidure awo Pao Kurireudo aki. Mare akagoino dutabo amago peganure Pao Kurireuji rugadu.
34Nono Jesus akore: – Pao Kurireu ure taro maku tagai dukodi nou taro padure bapera keje nou tago bakaru tada. Nou bakaru akore: “Pao Kurireu ore nure tagi10.34 Awu bataru padure Salmo 82.6 keje..” 35Boe jokodu jire bapera kejewu Pao Kurireu bataru akoino. Ainore ure jii aino. Akedumodukare rugadu. Ča Pao Kurireu ure tuwadaru maku boe etai. Emare makore ei tore nuie emage. 36Mare imi. Iogwa Kurireu ure tugeragu i. Ure itarego mato moto ka. Imire inagoino Pao Kurireu Onaregedu nuie imi. Itaidukare tamago pegawo i. Imi imago pegakare Iogwa Kurireuji rugadu. 37Iromodukare Iogwa Kurireu aidure jiboeji dukeje tameartorumodukare i. 38Tameartorumodukare i mare iromode Iogwa Kurireu aidure jiwu iro rakareuji dukeje tameartorudo iro rakare jiboeji. Tameartorumode irore jiboeji dukeje tarduwamode Iogwa merure itabo rugadu duji. Tarduwamode iragojere Iogwa Kurireu apo rugadu duji. Čere aino pure tu je.
39Ča ere tuiago tugeragu Jesusji rugadu mare Jesus ure tumegido pači toro epiji. 40Nono uture pugeje. Kurugodure Jordão po kajeje toro João Batista ure boe etao pegodo kejewu ka. Nonore Jesus rakojere tu jao. 41Nonore boe etaregodure Jesus ae pugeje. Emagare. Egore: – João Batista ro rakareu bokware. Mare ure boe erduwado Jesus jiboe jamedu boe jeture pudui rugadu.
42Dukodire boe emagare nono tumeartorure Jesus jitu tabo rugadu.
11Lázaro Bire
1Ia imedu kogodure. Mugure Betânia ba kurireu keje. Nou imedu iere Lázaro. Uwie aredu iere Maria. Nou Maria utuie iere Marta. Eiamedu boe emugure nou Betânia ba kurireu keje. 2Marigudu nou Maria ure roreboe pemegareu reko Jesus bure joki. Ure reko dukejere ure kidudo tao tabo pugeje. Mare aino čare uwuri kogodure. 3Dukodire nou Maria, nou Marta ere boe erego tuwadaru tabo toro Jesus bagai. Egore nou boe egoiago nou Jesusji tuwuri kogoduie. Meardu kurire jiwu tuwuri kogoduie.
4Nou boe etaregodure Jesus ae dukeje ere Jesus bie nou areme ewadaruji. Jesus meardure nou ewadaruji dukeje akore: – Iorduware nuba boe mode nou imedu Lazaruji. Kogodure mare bimodukare. Kogodure Pao Kurireu ie kuriwo. Lázaro bimodukare dukodi Pao Kurireu ie kurimode boe emago pemegawo ji. Lázaro bimodukare dukodi Pao Kurireu Onaregedu ie kurimode boe emago pemegawo ji jamedu.
5Jesus meardu kurire Martaji, Mariaji, Lazaruji jamedu. 6-7Mare utukare toro ewai ka kuri je. Merire pobe ji nono dukejere makore nou ture jorduwadowugei. Akore: – Pugeje. Pawo pagirimi toro Judéia moto ka Lázaro uwai ka.
8Mare etaidukare utuwo. Egore: – Čegimijera. Maibari nou jeture Judéia moto kejewuge etaidure tuwo awido tori tabo. Atukaba toro pugeje.
9Mare Jesus akore: – Meri oto padukare doze hora raga. Boe emerumode meriji dukeje ewure jetumodukare iaboeji erdure boeji kodi. Meri jire boe etaiwo pemegare. 10Mare boe emerumode boečoji dukeje ewure jetumode iaboeji rugadu jorugu bokware kodi.
11Nono Jesus makore ei: – Pamedia Lázaro unudunure mare itumode toro bagai iwo jetadudo.
12Nou ure jorduwadowuge egore: – Ča unudure. Čare pemegagodumode.
13Erduwakare Jesus ure tuwadaru inodudo pudui duji. Jesus akore Lázaro unudunuie mare jorduware Lázaro bire duji. Dujire akoino. Mare nou ure jorduwadowuge emeardaere Lázaro unudunuie rugadu duji. Emeardaere bikaie raga. 14Dukodi čare Jesus mako pemegare ei. Akore: – Lázaro bire rugadu. 15Iragojekare toro apo iwo pemegago. Mare aino tardumode iraga rakare duji. Dukodi tameartorumode i rugadu. Ča paduwo toro bagai.
16Nono Tomé makore tumedagei. Akore: – Pagimijera bimode toro Judéia moto keje. Paduwo toro pagimijerapo pawiwo apo jamedu.
Boe egore “Tomé” aino ji. Judeu doge ewadaru tabo egore “emegure puapowu”.
Jesus Umode Boe Eewodudo Pugeje Ewikawo Pugeje
17Ča Jesus uture toro Betânia ba kurireu ka ture jorduwadowugebo. Etaregodure dukeje boe ere Jesus bie Lázaro bie marigudu. Egore tuie merido pobe puibiji ji meture moto tada dukeje. Aino ča Jesus aregodure.
18-19Ča Judéia moto kejewuge etaregodure nou Lázaro uwiemage ewai ka tuwo uwie Marta, uwie Maria ewudugugo. Nou boe emagare rugadu. Etaregodure Maria ae Marta ae tuwo etaora butugugo ewiagoduwo nou tuwuri piji. Nou Betânia ba kurireu padu puredure Jerusalém ba kurireuji. Du ure três quilômetros.
20Ča Marta jorduware Jesus aregodure duji dukeje ure tudawuje tuwai piji Jesus togi. Mare Maria ukare tudawuje. 21Marta aregodure Jesus ae dukeje makore ji. Akore: – Aragojemode woe čedabo čewuri bimodukare. 22Mare iorduware Pao Kurireu umode amagore bagaiboe maku akai rugadu duji.
23Jesus makore Martaji. Akore: – Awuri jewodumode pugeje.
24Marta akore: – Iorduware. Ia meri keje awu moto akedumode dukeje iwuri jewodumode pugeje turuduwo baruto.
25Nono Jesus makore ji. Akore: – Imire ire boe etowuje. Imire imode boe eewodudo rugadu. Meartorure iwuge ewimode mare eewodumode pugeje. 26Meartorure iwuge ewimodukare pugeje jamedu. Meartorure iwadaru jiwuge ewimodukare pugeje rugadu. Ameartorure nou inoduji?
27Marta akore: – Uu! Imeartorure rugadu. Čebagare bagaiwu umode boe ekinorudowu nure aki. Pao Kurireu Onaregedu nure aki. Pao Kurireu ure jawu pawobe ewie marigudu akaregodumoduie mato moto ka duji.
Jesus Ragudure Lázaro Joki
28Marta ure tuwadaru akedudo Jesusji dukeje ure tugirimi tuwai ka. Makore tuwie Maria bagai. Makore tu ji. Akore: – Pagimijera aregodu. Makore awagai.
29Maria meardure nou tuduie bataruji dukeje ure tuie bu tači je. Ure tumara tabo pudui toro Jesus togi. 30Jesus aregodukare nou Betânia ba kurireu ka raga mare rakoje kimore toro tuiordure Marta jiwu awara keje. 31Nou rakojere Maria uwai tadawuge erdure Maria uture toro duji. Dukeje eture rekodaji. Emeardaere Maria utumoduie toro bireu bagai traguduwo joki. 32Mare Maria uture Jesus togi. Jordure Jesus jitu keje ure tuwududo moto keje Jesus bure paru. Makore Jesusji. Akore: – Čegimijera. Aragojemode woe dukeje iwuri bimodukare.
33Jesus aiwore ji akoe tragudu tabo duji. Nono jordure nouia boe etragudure jamedu duji. Okudugodure ebo rugadu. 34Nono makore ei. Akore: – Kaiba tare tugu?
Egore: – Mato ka.
35Eture apo toro ture Lázaro tugu towu tori poro ka. Nono Jesus ragudure. 36Nou boe erdure Jesus ragudure duji dukeje emagore pui. Egore: – Ča Jesus meardu kurire Lazaruji rugadu.
37Mare iage egore: – Kočare. Ure joku bokwareuge etaiwodo pugeje. Kodiba aregodukare kuri je tuwo Lázaro pemegago bikawo?
Jesus Ure Lázaro Jewodudo Pugeje
38Jesus okudugodure nou Lázaro uwobebo rugadu. Dukejere ure tuburedo nou bireu padure tadawu tori poroji. Ia tori kurireu padure nou tori poro je keje. 39Dukeje Jesus makore nou boei. Akore: – Nou tori kurireu tawuje tori poro je piji.
Mare Marta akore: – Merire pobe puibiji ji meture nou tori poro tada duji. Dukodire kigogodure rugadu.
40Mare Jesus makore ji. Akore: – Ire awie. Ameartorumode i dukeje ardumode Pao Kurireu ro rakare duji.
41Nono nou boe ere nou tori kurireu tawuje nou tori poro je piji. Nono Jesus aiwore baruto dukeje akore: – Iogwa Kurireu. Awiapagare iwadaruji. Dukodire itaidure imago pemegawo ai rugadu. 42Iorduware awiapagare iwadaru jituji rugadu mare itaidure iwo awu boe erduwado nou inoduji jamedu emeartoruwo i, emeartoruwo aki aigoiare are itarego mato rugadu duji.
43Jesus ure tuwadaru akedudo tuo bagai dukeje makore toro nou Lázaro bagai. Akore: – Lázaro! Ae bu mato nou tori poro piji!
44Ča Lázaro ure tudawuje nou tori poro piji rugadu! Bikare pugeje. Jewodure pugeje rugadu. Nou boe ere upodo tabowu areia upo kimore apo. Upo kimore je tabo jamedu. Nono Jesus makore nou boei. Akore: – Nou areia tawuje piji utuwo tuwai ka.
Boe Eimijerage Ere Tumeardae Pegareu Tawuje Turo Pegawo Jesusji
45Nou rakojere nonowu boe eiamedu boe erdure Jesus rore aino duji. Dukodire emeartorure Jesusji. 46Mare iagere tugirimi tuibagi Jerusalém ba kurireu ka. Eture tugimijerage fariseu doge etae tuwo ewie Jesus rore jiboeji. 47Dukodire nou fariseu doge ere bato pui nou Judeu doge eimijeragebo. Nou ure Judeu doge enomea maku Pao Kurireu aiwuge eimijerage edure nono jamedu. Emororamagadure rugadu boe emeartorumodukare pudui pugeje duji. Emagore pui. Egore: – Nuba paromode? Nou imedu Jesus ro rakare rugadu. 48Boe eiamedu boe emeartorumodukare pai pugeje tumeartoruwo awu imedu Jesusji. Nono Roma kejewuge boe eimijerage erdu pegamode boe eroino duji jamedu. Dukodire Roma kejewuge boe eimijerage etaidumode turo pegawo pai. Emode awu Pao Kurireu uwai pegado. Emode pawobe etagedudo.
49Awu joruji nou ure Judeu doge enomea maku Pao Kurireu aiwuge boe eimijera kurireu iere Caifás. Rakojere nono nou boe eimijeragebo jamedu. Makore nou tumedagei. Akore: – Tarduwa bokware. 50Boe pegakawo pai pawo nou imedu bito pawobe ewo činorudo Roma kejewu boe eimijerage pegareuge epiji. Pamodukare bito paiamedu boe pawimode.
51Nou Caifás nou ure Judeu doge enomea maku Pao Kurireu aiwuge eimijera kurireu nure ema nou joruji. Dukodire Pao Kurireu ure tumeardae maku ai makowo nou tuwadaruji nou boe eimijerage ewiagai. Mare nou Caifás jorduwakare Pao Kurireu bataru taboie tagoino duji. Akomode pudumie tagoino. Mare ema karega akoino. Pao Kurireure akoino. Ainore Pao Kurireu rore tuwo boe ewie Jesus bimoduie duji Judeu doge ero pegareu boe moriče. 52Jesus bimode boe eiamedu boe ero pegareu moriče jamedu. Dukodire meartorure Jesus jiwuge eiamedu boe Pao Kurireu oremode emage. Etuwobe mode pugi.
53Nou meri otobiji nou Judeu doge eimijerage ere tumeardae pegareu tawuje tuwo Jesus bito. 54Jesus jorduware emeardaeji. Dukodire merukare Judéia motoji pugeje mare utu jaere ia moto akurugudu maereu ka. Uture ture jorduwadowugebo toro ia boe eda ka. Nou boe eda iere Efraim. Nonore rakojere ture jorduwadowugebo pugeje.
55Boe puredugodure Judeu dogei ewaduwo ia tuwadaeji. Nou ewadae iere Páscoa. Dukodire boe emagare tudu tabo Jerusalém ka Judéia moto piji tuwo tubemegado turowo nou to bakaru tadawu turo boeji tuwaduwo nou tuwadae Pascoaji. 56-57Nou fariseu doge, nou ure Judeu doge enomea maku Pao Kurireu aiwuge eimijerage emagore boe eiamedu boei ewo Jesus maku pudai. Boe erdumode Jesusji dukeje ewo nou boe eimijerage ewie nou boe eimijerage ewo tugeragu Jesusji. Dukodire nou boe etaiwore Jesus bagai nono Pao Kurireu uwai tada. Emagore pui. Egore: – Nuba tameardaere? Jesus aregodumokana?
Iage egore: – Aregodumodukare. Jorduware pagimijerage etaidure turo pegawo pudui duji.
12Aredu Ure Roreboe Reko Jesus Bure Joki
1Ča Jesus uture Betânia ba kurireu ka pugeje. Uture ture jewodudowu Lázaro uwai ka. Okwareu meri oto padure seis Judeu doge ewaduwo tuwadae Pascoaji. 2Ča Jesus rakojere nou Lázaro uwai keje. Nou uwai kejewuge ere boe eke pemegado Jesus uwo kowuje. Aredu Marta ure ia boe eke maku Jesus ai. Lázaro mugure nou ira keje togwagewo jamedu. 3Nono Maria aregodure roreboe mori kurireu tabo. Nou roreboe iere nardo. Nono Maria ure nou roreboe reko Jesus bure joki nou boe erduwawo boe eimijera kurireu nure ema duji. Dukejere ure Jesus bure kidudo tao tabo. Nou roreboe ro jore nou bai oto jamedu boeto. 4Nono Jesus ure jorduwadowu imedu makore ji. Nou imedu iere Judas Iscariotes. Ema koiare umode Jesus maku boe eimijerage pegareuge etai. 5Akore: – Kodiba awu aredu ukare nou roreboe maku diero bagai tuwo diero kurido tuwo maku marenarue doge etai? Awu roreboe mori kurire rugadu. Boe emaragodumode jii joru akedu ka tuwo tugeragu nou diero kurireuji tuwo akirodo awu roreboeji.
6Mare pagare Judas akoino. Aidukare tuwo diero maku marenarue doge etai. Aidure tugiwoguwo ji. Jesus ure nou Judas jetudo to dieroji. Mare nou Judas iwogure tu tu Jesus o dieroji.
7Mare Jesus akore: – Akaba awu aredu pogurudo rore i duji. Ure reko iwure joki tuwo iwiri udo turugadu ituguduwo mototo iwi keje nono Pao Kurireu meardae mogadure. 8Marenarue doge edumode tagabo jii toro rugadu. Mare imire itumode tabiji rugadu.
Boe Eimijerage Pegareuge Etaidure Tuwo Lázaro Bito
9Boe erduware Jesus rakojere Lázaro uwai keje Betânia keje duji. Dukodire eture toro ae. Emagare. Etaidure tuiorduwo nou Jesus ure jewodudowu Lazaruji jamedu. 10-11Mare nou ure Judeu doge enomea maku Pao Kurireu aiwuge eimijerage etaidukare nou Lazaruji jamedu. Jesus ure Lázaro jewodudo dukodire Judeu doge emeartorukare nou ure Judeu doge enomea maku Pao Kurireu aiwugei pugeje tumeartoruwo Jesusji. Dukodire nou ure Judeu doge enomea maku Pao Kurireu aiwuge eimijerage ere tumeardae pegareu tawuje tuwo Lázaro bito jamedu.
Jesus Mugure Jumenta Onaregedu Keje Tuduwo Jerusalém Ba Kurireu Ka
12Nou barogwato boe emagare nono Jerusalém ba kurireu keje tuwaduwo nou tuwadae pascoaji. Erduware Jesus aregodumode pudae duji. 13Dukodire ere tugeragu apidoguru aiji. Eture tabo toro Jesus togi. Ekudugodure bagai. Egore: – Israel kejewu boe eimijera kurireu reo! Pao Kurireu ure arego mato pagae. Ure turaga maku ai rugadu. Boe eiamedu boe emago pemegawo ji rugadu! Pao Kurireu uwo boe pemegado ji rugadu!
14Nono Jesus jordure ia jumenta onaregeduji. Mugure keje tuduwo Jerusalém ba kurireu ka. Marigudu Pao Kurireu makore ainoie Jesus romode rugadu. Akore:
15– Awu mugure Jerusalém kejewuge tagi. Tabagudukaba. Tagimijera kurireu mugumode jumenta onaregedu keje taregoduwo tagae.12.15 Awu bataru padure Zacarias 9.9 keje.
16Nou Jesus ure jorduwadowuge erduwakare nou Pao Kurireu akoino jiboeji. Mare ia meri keje Jesus jewodumode pugeje. Jesus jewodumode pugeje dukeje nou ure jorduwadowuge ewiabutumode nou Pao Kurireu bataru keje. Dukodi čare erduwamode ji. Erduware Pao Kurireu makore Jesus jiboeji jeture pudui rugadu duji. 17Jesus ure Lázaro jewodudo pugeje dukeje ia boe ere boe eiamedu boe ewie nou Jesus rore aino duji. Erdure Jesus rore aino duji dukodi čare ere boe ewie. Dukodire boe eiamedu boe erduware Jesus ro rakare duji. 18Dukodire boe emagare tugodui Jesus togi. 19Mare fariseu doge etaidukare. Egore pui: – Tagaiwodo. Boe erore tači pabiji. Boe eiamedu boe emeartorure awu Jesusji. Dukodire erore tači pabiji toro togi.
Ia Grécia Kejewuge Emagore Jesus Bagai
20Ia Grécia kejewuge eragojere Jerusalém ba kurireu keje tuwaduwo nou Judeu doge ewadaeji ebo tumago pemegawo Pao Kurireuji. 21Eture Filipe ae. Nou Filipe boture Betsaida ba kurireu keje. Nou Betsaida ba kurireu mugure Galiléia moto keje. Nou Grécia kejewuge emagore nou Filipiji. Egore: – Čedaidure čerduwo Jesusji.
22Filipe uture André ae. Ure André bie nou Grécia kejewuge etaidure jiboeji. Dukejere eture puapo Jesus ae tuwo Jesus bie. 23Dukeje Jesus makore ewadaru jipagi. Akore: – Imedu Onaregedu nure imi. Kuri aino boe erduwamode boe kurireure imi duji, boe pemegareure imi duji. 24Boe jokodu jire inagoino. Boe emodukare ia trigo a tugu mototo botuwo dukeje botumodukare rugadu. Mare umode mitotu je tu rugadu. Mare boe emode trigo a tugu mototo dukeje nou trigo enogo botumode. Mare botumode dukeje nou trigo a pegagodumode moto tada. Botumode dukeje ričodumode enarimode. A makamode rugadu. 25Ia boe etaidu kurimode turowo taidure jiboeji turaga tabo tu rugadu. Nou boe eraga akedumode epiji rugadu. Egare remawu modukare. Nou boe ewarigudumode toro bope doge eda kejewu joru pegareuto jamedu. Mare ia boe etaidumodukare tumeardaere jiboeji tuwo tugera ra taidure jiboe piji tumeartoruwo Pao Kurireuji dukeje boe pemegamode ei rugadu. Egare remawumode rugadu. Ewarigudumodukare bope doge eda kejewu joru pegareuto jamedu. Mare emugumode baru tada jii toro rugadu. Du akedumodukare. 26Ia boe aidumode tumeartoruwo iwadaruji dukeje umode tugera ra taidure jiwu turo tago pegareu boe piji tuduwo itabo. Dukeje nou meartorure iwu rakojemode itabo. Iogwa Kurireu umode boe pemegado meartorure iwadaru jiwugei. Mako pemegamode ei rugadu.
Jesus Ure Boe Ewie Tuwimode Duji
27– Boe ero pegamode i dukodire ikiarigodure rugadu. Mare imago pegamodukare Iogwa Kurireuji uwo ero pegamode idu utudo ipiji. Boro. Iogwa ure maku inaiwu imaragodae koiare boe ero pegamode i. Dukodire itaregodure woe moto ka.
28Dukeje Jesus makore baruto tuo bagai. Akore: – Iogwa. Boe erdudo aro kurireuji boe erduwawo akurire rugadu duji.
Nono Pao Kurireu makore baru piji. Akore: – Ire boe erdudo iro rakareuji marigudu. Imode erdudo iro rakareuji pugeje, iro pemegareuji jamedu.
29Boe emeardure nou baru pijiwu makoji. Iage emeardaere boeiaruruie akoino. Mare iage egore: – Ia Pao Kurireu utugare baru tadawure akoino baru piji Jesusji.
30Mare Jesus makore ei. Akore: – I karega akoino mare taire akoino tarduwawo Pao Kurireu bataruji. 31Kuri aino Pao Kurireu aiwomode awu moto kejewuge eiamedu boe eroji ero pemegareu bagai, ero pegareu bagai jamedu. Kuri aino Pao Kurireu umode awu moto kejewu bope doge eimijera raka ta piji. 32Boe emode ipo padure pugajejewu rakojedo itabo dukeje imode boe emeartorudo i rugadu.
33Jesus akoino nou boei tuwo erduwado nuba boe eromode pudui tuwo tuwido ipo padure pugajejewu keje.
34Nou boe egore: – Pago bakaru ure parduwado. Akore umode boe ekinorudowu bimodukaie. Akedumodukaie. Mare akagore Imedu Onaregedu bimoduie ipo padure pugajejewu keje. Ioguduba nure aki?
35Jesus akore: – Jorugu pemegareu rakojemode tagabo tu je. Tamerudo nou jorugu tabo. Tamerumode jorugu tabo dukeje boečomodukare tumaedo taiogi. Merumode boečo kaowu jorduwamodukare kaiba tuiomode. Mare boečo ji karega inagoino. Boe ero pegareu jire inagoino. Jorugu ji karega inagoino jamedu. Ire inagoino. 36Iragoje kimore tagabo dukeje tameartorudo i rugadu. Tameartorumode i dukeje tarduwamode taro pemegawo nono boe erdure boeji jorugu tada dumogadure. Mare jorugu ji karega inagoino. Boe ero pemegareu jire inagoino.
Jesus ure nou tuwadaru akedudo dukeje uture boe epiji tuwo tuwiado epiji.
Boe Emeartorumodukare Jesusji
37Ure turo rakareu towuje nou boe egai. Ure epemegado. Ure boe pemegado ei. Mare emeartorukare Jesusji. 38Erore aino dukodire Isaías makore jiboe mariguduboe jeture pudui rugadu. Emare makore Pao Kurireu bataruji marigudu. Marigudu ure Pao Kurireu bataru bu bapera keje. Akore:
– Pao Kurireu nure aki. Boe emeartorumodukare are maku inaiwu awadaruji. Ire boe ewie ji mare emeartorukare Pao Kurireu nure aki duji. Are boe erdudo aragaji. Mare emeartorukare ai rugadu.12.38 Awu bataru padure Isaías 53.1 keje.
39Nono nou boe eroiwakare tumeartoruwo rugadu. Ainore Isaías akore marigudu:
40– Pao Kurireu ure erduwa bokwado emeartorukawo pudui. Pao Kurireu akore: “Ire eku bokwado. Ire etaora pegado. Mare emeardae remawu jire inagoino. Dukodire ekure mare emeardaemodukare taiwowo irore jiboeji. Etaorare mare erduwamodukare irore jiboeji. Dukodire emodukare tugera ra turo pegare jiboe piji tumeartoruwo i rugadu. Dukodire imodukare ekinorudo ero pegareu piji.”12.40 Awu bataru padure Isaías 6.10 keje.
41Marigudu rugadu Isaías makore. Emare jordure Jesus ro pemegamode jiboeji, ro rakamode jiboeji. Dukodire ure awu bataru bu bapera keje.
42Ma čare ia Judeu doge eimijerage emeartorure Jesusji. Mare fariseu doge etaidukare Jesusji dukodire nou meartorure Jesus jiwuge emagokare boeji. Emagokare tumeartorure Jesus jituji. Emagomode dukeje fariseu doge emode etudo nou Judeu doge ere bato puiwu bai piji. 43Etaidu kurire boe emago pemegawo pudui. Dukodire etaidu kurikare Pao Kurireu mako pemegawo pudui epagudure nou boe eimijerageče dukodi.
Jesus Bataru Umode Boe Ekiarigo Turo Pegareuji
44Jesus uwadodure tuwadaru tabo nou boe eiamedu boe emearduwo tagoino jiboeji. Akore: – Meartorure iwuge emeartorumode ure itarego matowuji jamedu. 45Jordure iwuge erdure ure itarego matowuji jamedu. 46Itaregodure mato moto ka iwo nono jorugu mogadure. Mare jorugu ji karega inagoino. Iwo boe ewie turo pegareuji. Dujire inagoino. Boe emeartorumode i dukeje emerumodukare boečo kao pugeje. Mare boečo ji karega inagoino. Boe emeartorumode i dukeje emode tugera ra turo pegareu piji. Dujire inagoino. 47Mare boe emeartorumodukare iwadaruji du inodu tabo imodukare boe pegado ei kuri aino. Iwo boe pegado boei dubagai karega iroino mato. Itaregodure iwo boe ekinorudo bope doge eda kejewu joru pegareu piji. 48Mare ia meri keje boe pegamode meartorukare iwugei, aidukare iwugei. Awu moto akedumode dukeje imode ewiabutudo awu iwadaru keje dukeje boe pegamode ei rugadu emeartorukare i kodi. 49Boe rugadu jire inagoino. Mare iwadaru karega. Iogwa Kurireu koiare ure itarego mato. Emare ure awu iwadaru maku inai iwo boe ewie ji. Dukodire imagore jiboe ure turugadu. 50Iogwa Kurireu bataru umode meartorure puduiwuge ekinorudo eduwo pudabo jii toro. Du akedumodukare. Awu tuwadarure Iogwa Kurireu ure maku inai iwo boe ewie ji rugadu.
13Jesus Ure Ture Jorduwadowuge Ewure Kabi
1Ča okwareu merire mitotu je Judeu doge ewaduwo tuwadae Pascoaji. Dukodire Jesus jorduware tudumode baruto kuri aino duji awu moto piji Tuo bagai. Jesus meardu kurire meartorure puduiwugei rugadu. Meardu kurire ei jii toro tuwimodedu ka.
2Nou boečoji Jesus ure tumugudo ia bai tada togwagewo nou ture jorduwadowugebo. Bope doge eimijera ure tumeardae pegareu tugu Judas aorato tuwo Jesus maku boe eimijera pegareuge etai. Nou Judas uo iere Simão Iscariotes. 3Jesus jorduware Pao Kurireu ure turaga jamedu boe maku pudai duji. Jorduware taregodure Pao Kurireu piji rugadu. Jorduware tudumode tuibagi Pao Kurireu ae pugeje duji. 4Dukodire Jesus ure turagojedo nou bai tada. Ure tugudau areia biaku epa tawuje tubiji. Ure ia areia kogudo tubeagajeje. 5Dukejere ure pobo redo pori piji ia meririto. Nono ure nou ture jorduwadowuge ewure kabi nou pobo tabo. Ure ewure kabi dukeje ure ekidudo nou areia tabo. 6Uiago Simão Pedro bure kabi dukeje Simão Pedro makore ji. Akore: – Ukare turugadu awo iwure kabi. Ikimijera nure aki kodi.
7Jesus makore Simão Pedroji. Akore: – Arduwakare irore jiboeji. Mare ia meri keje arduwamode.
8Simão Pedro akore: – Amodukare iwure kabi rugadu!
Mare Jesus makore ji pugeje. Akore: – Imodukare awure kabi dukeje ire jorduwadowu modukare aki pugeje.
9Nono Simão Pedro akore: – Ča iwure kabi. Itaora kabi. Ikera kabi. Iamedu boe kabi.
10Jesus akore: – Boe emode taimo dukeje ekabidure rugadu. Dukeje etumode tuibagi tuwai ka dukeje emodukare taimo pugeje kuri aino. Tu tuwurere emode kabi. Mare boe ewiri ji karega inagoino. Boe ero pegareu jire inagoino. Ča Pao Kurireu ure taro pegareu jamedu boe barigu tabiji. Mare ia imedu ro pegareu ure mitotu tagabo. Pao Kurireu ukare nou imedu ro pegareu barigu piji.
11Jesus jorduware nou imeduji dukodire akoino. Nou imedu umode Jesus maku boe eimijera pegareuge etai. Jesus jorduware nou imedu romode pudui duji. Dujire akoino nou ture jorduwadowugei. Akore: – Pao Kurireu ukare ia imedu mitotu jedu ro pegareu barigu piji.
12Jesus ure nou ture jorduwadowuge ewure kabi dukeje ure tugudau areia jamedu tugu pudui pugeje. Dukejere ure tumugudo tumuga ira keje. Nono akore: – Kodiba ire tawure kabi? Imode tarduwado. 13Tagagore “Jorduwareu” aino i. Tagagore “Boe Eimijera” aino i. Boe jokodu jire tagagoino. Ure Tarduwadowu nure imi rugadu. Tagimijera nure imi rugadu. 14Mare ire ido nono tadugaregere iwo tawure kabi. Tarowo nono iro mogadure. Dukodire tamode pu bure boe kabi. Tamode tagera maku puai. 15Ire tardudo iroji tarowo nono iro mogadure tarduwawo nuba taromode. 16Boe jokodu jire inagoino tai. Boe emeartorumodukare ia boe eimijera utugareji ukimijera kori. Boe emeartorumodukare ia boe eimijera utugare uture tugimijera bataru tabowuji tugimijera kori jamedu. 17Dukodi čare tarodo nono iro mogadure jamedu. Taromode nono iro mogadure dukeje taegaregodumode tai. Boe pemegamode tai rugadu. Tawiagodukaba awu ire tarduwado jiwu iwadaru piji.
18– Iorduware ire ikeragu jiwugei. Taire inagoino tarowo nono iro mogadure. Mare ia romodukare aino. Pao Kurireu ure boe ewie marigudu. Akore: “Okwagere itabowu jordu pegamode i.”13.18 Awu bataru padure Salmo 41.9 keje.19Ča itaidure iwo tawie tarduwawo nuba boe mode i duji. Nou iwadaru jetumode pudui dukeje tarduwamode i rugadu. Pao Kurireu nure imi rugadu. Itagedumodukare rugadu. 20Boe jokodu jire inagoino. Boe emode tugera upodo nou uture iwadaru tabowugebo enure tugera upodo itabo jamedu iragojere nou uture iwadaru tabowugebo kodi. Pao Kurireu koiare ure itarego boe etae rugadu. Dukodire boe emode tugera upodo itabo enure tugera upodo Pao Kurireu apo jamedu.
Jesus Ure Ewie Tumagudumoduie Boe Eimijerage Pegareuge Etai
21Jesus ure nou tuwadaru akedudo dukeje kiarigodure rugadu. Dukodire makore pugeje. Akore: – Iwo tawie boe remawuji. Ia tagi tamode imagu boe eimijerage pegareuge etai.
22Nou Jesus ure jorduwadowuge etaiwore pui. Erduwakare kaba jiba Jesus akoino. 23Ia mugure Jesus meki. Jesus meardu kurire nou ture jorduwadowuji. 24Nono Simão Pedro ure tugera nado ae utuwo pudae. Nono makore ji. Akore: – Anarado ji uwo pawie ioguduba jiba akoino.
25Dukodire nou Jesus ure jorduwadowu ure tuburedo Jesusji tunarawo ji. Akore: – Ioguduba jiba akagoino?
26Jesus akore: – Imode awu amireu pegodo nou iaboe kuru to dukeje imode maku ia imedu ai. Nou imedu koiare umode imagu boe eimijerage pegareuge etai.
Nono Jesus ure tugeragu amireuji. Ure pegodo tagoino jiboe kuruto. Dukejere ure maku Judas ai. Nou Judas uo iere Simão Iscariotes. 27Judas ure tugeragu nou amireuji dukeje bope doge eimijera pegareu Satanás ure turemo nou Judato. Jesus makore Judaji. Akore: – Ameardae pegareu towuje. Amara tabo!
28Nouia rakojere Jesus apowuge erduwakare kodiba Jesus akoino Judaji. 29Marigudu Judas jeture nou eno dieroji. Dukodire iage emeardaere Judas umoduie akirodo ia boe ekeji pugeje. Iage emeardaere Judas umoduie ia diero maku marenarue doge etai.
30Judas ure tugeragu nou amireuji dukeje uture epiji kuri je. Boečodure marigudu.
Jesus Ure Erduwado Turo Maiwuji
31Judas uture epiji dukeje Jesus makore nouia ture jorduwadowugei. Akore: – Boe erdunure aino Imedu Onaregedu pemegareuji. Awu imedu onaregedu nure imi. Inure Pao Kurireu ro pemegareu towuje dukodire boe erdumode Pao Kurireu ro pemegareuji rugadu. 32Iromode Pao Kurireu ro pemegareuji dukeje Pao Kurireu romode iro pemegareuji jamedu boe eiamedu boe erduwawo čero pemegareuji kuri aino rugadu ewo Pao Kurireu ie kurido rugadu kuri je rugadu. 33Tare nono itore emogadure. Iragojemodukare tagabo kuri aino pugeje. Tagaiwomode iwagai mare taroiwakare taduwo iregodaji. Ire Judeu doge eimijerage ewie nou inoduji marigudu. 34Mare imode ia taro maiwu maku tagai. Tameardu kurido pui. Tameardu kurido pui aino imeardu kurimoga tai dure. 35Tameardu kurimode pui dukeje boe erduwamode ire jorduwadowuge nuie tagi duji.
Jesus Ure Ewie Pedro Makomode Jiboeji
36Pedro makore Jesusji. Akore: – Kaiba akodumode?
Jesus akore: – Akare arugadu atuwo itabo. Mare ia meri keje atumode toro itae.
37Pedro akore: – Ikimijera nure aki. Itaidure ituwo akabo. Ire irugadu iwiwo amugato.
38Jesus akore: – Iwo awie. Akare arugadu awiwo imugato. Awu boečoji akagomode arduwakaie i dumode pobe metia bokware rugadu. Dukeje čare kagariga kudugodumode.
14Jesus Koiare Umode Boe Erego Pao Kurireu Ae
1Jesus makore ture jorduwadowugei. Akore: – Tamororamagadukaba. Tameartorudo Pao Kurireuji. Tameartorudo i jamedu. 2Iogwa uwai kurireu tadare boe eda kurireu mugure. Itumode toro iwo tawai pemegado nono. Ainore ure rugadu. Dukodire ire tawie aino. 3Imode tawai pemegado toro baru tada dukeje imode ikirimi mato pugeje tawagai iwo tarego baruto taragojewo itabo toro. 4Tarduware ikodumode jiwu awaraji.
5Mare Tomé makore Jesusji. Akore: – Čegimijera. Čerduwakare kaiba akodumode. Nuba čeromode čerduwawo awaraji čedaregoduwo toro?
6Jesus akore: – Umode boe erego baru towu nure imi. Boe remawu nure imi. Imire imode boe eraga maku boe etai. Imire imode boe eewodudo pugeje. Boe etumodukare tuginaigodu Pao Kurireu ae. Tu imire imode boe erego Pao Kurireu ae. 7Tarduware i. Dukodi tarduwamode Iogwa Kurireuji jamedu. Awu meriji čare tarduware ji. Tardure ji rugadu.
8Felipe akore: – Čegimijera. Čedaidure čerduwo Pao Kurireuji. Čerdudo ji. Dukodire čemode čerugadu.
9Jesus makore Felipeji. Akore: – Iragojere tagabo marigudu. Aki na arduwakare i? Jordure iwu jordure Iogwa Kurireuji. Kodiba akagoino iwo tardudo Iogwa Kurireuji? 10Felipe nure aki. Iragojere Iogwa Kurireu apo. Iogwa Kurireu rakojere itabo. Ameartorure nou inoduji? Imagore tai mare iwadaru ji karega inagoino. Iogwa Kurireu rakojere itabo dukodire inagoino Iogwa bataruji tawiagai. Iogwa maragodae jire iroino. 11Tameartorudo awu iwadaruji. Iragojere Iogwa Kurireu apo. Iogwa Kurireu rakojere itabo jamedu. Tameartorumodukare inagoino jiboeji dukeje mare tameartorudo tardure jiwu iro rakareuji tameartoruwo i. 12Boe jokodu jire inagoino. Boe emeartorumode i dukeje eromode nono iro mogadure. Uu. Ero kurimode iro kori rugadu. Itumode Iogwa Kurireu ae. Dukodire meartorure iwuge ero kurimode rugadu. 13Itumode Iogwa Kurireu ae dukodire iromode tagaidure jiboeji. Tamagomode itaidure jiboe bagai dukeje iromode awu tamagore bagai boeji. Irore aino dutabo imode boe erdudo Iogwa Kurireu ro pemegareu rugadu boeji, ro rakareu rugadu boeji jamedu. 14Tamagomode itaidure jiboe bagai dukeje iromode awu tamagore bagai boeji jamedu.
Jesus Akore Tumoduie Pao Kurireu Uwari Maku Boe Etai Rugadu
15– Tameardu kurire i dukeje tameartorumode iwadaruji rugadu. 16Inogwamagudumode Iogwa Kurireuji dukeje umode Tuwari maku tagai rugadu. Nou Uwari umode tugera bararedo tai. Rakojemode tagabo jii toro. Utumodukare tabiji. 17Pao Kurireu Uwari nure ema. Emare ure boe erduwado Pao Kurireuji. Boe jokodu jire ure boe erduwado. Meartorukare Pao Kurireu jiwuge erdumodukare Pao Kurireu Uwariji. Erduwamodukare ji jamedu. Dukodi nou meartorukare Pao Kurireu jiwuge emodukare tugeragu Uwariji. Mare tarduware ji. Nou Pao Kurireu Uwari rakojere tagabo. Rakojemode tagabo jii toro rugadu.
18– Iturumode. Mare ietu pemegamode tai. Nono imode ikirimi tagae. 19Kuri aino boe erdumodukare i pugeje. Mare tardumode i rugadu. Iewodumode dukodire taewodumode pugeje jamedu. 20Iewodumode pugeje dukeje tarduwamode iragojere Iogwa Kurireu apo duji. Tarduwamode taragojere itabo duji jamedu. Tarduwamode iragojere tagabo duji rugadu. 21Meardu kurire iwuge etaidumode iwadaruji. Meardu kurire iwuge emeartorumode iwadaruji. Iogwa Kurireu meardu kurimode meardu kurire iwugei. Imeardu kurimode ei jamedu. Imode erduwado i rugadu.
22Judas makore Jesusji mare Judas Iscariotes karega. Akore: – Čegimijera. Amode čerduwado ai mare amodukare meartorukare aiwuge erduwado ai. Kodiba meartorukare aiwuge erduwamodukare ai?
23Jesus makore ji. Akore: – Meardu kurire iwuge emeartorumode iwadaruji. Iogwa Kurireu meardu kurimode ei jamedu. Itaregodumode etae iogwapo čemuguwo ebo. 24Mare meardu kurikare iwuge emeartorumodukare iwadaruji. Ikare tarduwado iwadaruji. Ire tarduwado Iogwa Kurireu bataruji. Ema koiare ure itarego mato tagae. 25Iragoje biagamode tu tagabo dukodire ire tawie aino. 26Mare Pao Kurireu umode Tuwari maku tagai imugato. Umode tugera bararedo tai. Umode tarduwado nou imagore jiwu Iogwa bataru rugadu boeji. Umode tawiabutudo awu imagore jiwu Iogwa bataru jamedu boe keje.
27– Inure tado tagamudo tameardae kuriwo Pao Kurireuji. Meartorukare iwuge emodukare tameardae kurido Pao Kurireuji nono iro mogadure. Tamororamagadukaba. Tagiarigodukaba. Tabagudugodukaba jamedu. 28Tameardure iwadaruji marigudu. Ire tawie itumoduie tabiji duji. Mare imoduie ikirimi pugeje tagae. Tameardu kurimode i dukeje taegaremode tai iture Iogwa Kurireu ae duji. Iogwa Kurireu ro kurire iro kori. 29Ire tawie nuba boemode tai, nuba boemode i jamedu. Tardumode awu inagoino jiboeji dukeje tameartorumode i rugadu. 30-31Awu moto kejewu bope doge eimijera aregodumode iwagai awu boečoji rugadu dukodire imago raimodukare tai. Nou bope doge eimijera rakakare i mare Iogwa Kurireu meardae koiare imode imagu ai. Imeardu kurire Iogwaji dukodi. Itaidure boe eiamedu boe erduwawo imeardu kurire Iogwa Kurireu jituji. Dukodire imeartorure Iogwa Kurireu bataruji rugadu.
– Ča paduwo awu bai piji.
15Jesus Ure Nono Uva I Pemegareu Mogadure
1Jesus makore kimo ture jorduwadowugei. Akore: – Ire nono uva iku paru pemegareu mogadure. Iogwa Kurireu ure nono jetu pemegare boepa jiwu mogadure. 2-5Ire nono uva iku paru pemegareu mogadure. Tare nono uva iku mogadure. Iku kadodumode dukeje nou iku bimode, tudumodukare pugeje. Mare iku jetu kimomode čiguto dukeje bimodukare, tudumode rugadu. Iku tudumodukare dukeje Iogwa Kurireu umode nou iku kado tubaru piji. Mare iku tudumode dukeje Iogwa Kurireu umode nou iku pemegado nou iku tudu pemegawo rugadu. Mare uva iku paru ji karega inagoino. I rugadure inagoino. Iku ji karega inagoino. Meartorure iwugeire inagoino. Boepa ji karega inagoino jamedu. Pao Kurireu jire inagoino. Ire tarduwado dukodire ire tabemegado, taro pemegawo. Tameartoru raimode i dukeje iragojemode tagabo. Nono taedu pemegamode itabo rugadu. Tameartoru raimode i dukeje imode taragado taro pemegawo, tawo taro pegareu barigu tabiji. Mare iragojemodukare tagabo dukeje taro pemegamodukare rugadu. 6Meartorukare iwuge ewarigudumode joruto nono jerigi mogadure. Mare jerigi ji karega inagoino. Ewarigudumode Pao Kurireu piji emeartorukare ji kodi. 7Mare tameartoru raimode i tarduwamode iwadaruji rugadu dukeje tamagomode i tagaidure jiboe bagai. Imode tardudo tagaidure jiboeji tameartorure i kodi. 8Taro pemegamode nono Iogwa Kurireu ro mogadure dukeje tamode boe erduwado Iogwa Kurireu ro pemegareuji. Taromode aino dukeje ire jorduwadowuge nure tagi.
9– Imeardu kurire tai nono Iogwa Kurireu meardu kurimoga i dumogadure. Tagaba iwarigu tabiji imeardu kuriwo tai jii toro. 10Tameartorumode iwadaruji dukeje tamodukare iwarigu tabiji. Dukodi imeardu kurimode tai jii toro rugadu. Imeartorure Iogwa Kurireu bataruji. Ikare barigu ipiji. Emare meardu kurire i rugadu. 11Ire tawie aino tameartoruwo awu inagoino jiboeji, iagarewo tai rugadu. Taegarewo pui jamedu. 12Ča iwadaru reo. Tameardu kurido pui nono imeardu kurimoga tai dumogadure. 13Ia boe meardu kurimode rugadu ia timediaji dukeje aidumode tuwiwo nou timedia mugato nou timedia bikawo. 14Ča tameartorumode iwadaruji dukeje imedage mode tagi. 15Itugarege modukare tagi pugeje. Boe eimijera utugarege erduwakare tugimijera meardaeji. Mare imedage nure tagi. Dukodire ire tawie imeardae jamedu boeji. Ire tawie Iogwa Kurireu makore iwu tuwadaru jamedu boeji. 16Tagare tageragu i. Imire ire ikeragu tai. Imagore tai taro pemegawo, tawo boe pemegado boei. Taro akedumodukare. Dukodire Iogwa Kurireu umode tamagore bagaiboe maku tagai rugadu. Tamagomode itaidure jiboe bagai dukeje Iogwa umode maku tagai rugadu. 17Ča itaidure jiwu taro reo. Tameardu kurido pui rugadu.
Meartorukare Jesus Jiwuge Erdu Pegamode Rugadu
18– Tawiagodukaba. Meartorukare iwuge erdu pegamode tai mare erdu pegare i boetoji. 19Taromode nono meartorukare iwuge ero mogadure dukeje etaidumode tai. Etaidumode tai nono etaidumoga pui dumogadure. Mare ire ikeragu tai nou meartorukare iwuge ero piji tarokawo nono ero mogadure pugeje. Dukodire meartorukare iwuge erdu pegare tai. 20Tawiagodukaba imagore tai dupiji. Boe etugarege ekurikare tugimijera kori dukodire boe emeartorumodukare nou boe etugaregei ekimijera piji. Tagimijera nure imi. Boe emeartorumode iwadaruji dukeje emeartorumode ire maku tagaiwu tawadaruji jamedu. Mare boe ero pegare i dukodire ero pegamode tai jamedu. 21Ero pegamode tai tameartorure i kodi. Erduwakare ure itarego matowu Iogwa Kurireuji kodi. 22Imodukare ewie ero pegareu boeji dukeje egomode turo pegakaie. Mare ire ewie. Ire ewie ero pegareu boeji. Dukodire egomodukare tuiorduwakaie turo pegareuji. 23Jordu pegare iwuge erdu pegare Iogwa Kurireuji jamedu. 24Itaregodure etae iro rakareu tabo. Ire erdudo iro rakareuji. Ia boe erokare nono iro rakareure marigudu. Erdumodukare iro rakareuji dukeje erduwamodukare i. Nono egomode tuiorduwakaie turo pegareuji. Mare erdure iro rakareuji dukodire erduware i. Erduware ipemegare duji. Mare erdu pegare i. Erdu pegare Iogwa Kurireuji. 25Pao Kurireu makore marigudu nuba eromoduie. Nou bataru padure bapera keje eno bakaruče. Akore: “Iro pegakare ei mare erdu pegare i.”15.25 Awu bataru padure Salmo 35.19, 69.4 keje. Aino čare awu bataru jeture pudui rugadu.
26Jesus mako kimore. Akore: – Pao Kurireu Uwari aregodumode tagae. Umode tarduwado Pao Kurireuji rugadu. Boe jokodu jire makomode. Imi igoiare imode Pao Kurireu Uwari arego tagae. Umode tarduwado i rugadu. 27Nono tamode nou mugu jaereuge pawobe ewie i jamedu. Taragojere itabo marigudu dukodi tamode nou boe erduwado i jamedu.
161Jesus mako kimore. Akore: – Ire tawie marigudu. Dukodi tagaba tagera ra tameartorure i dupiji. 2Judeu doge emode tadudo nou ture bato puiwu bai piji. Emode ia tawido jamedu. Emeardaere ainore Pao Kurireu aidure boe erowo meartorure iwugei. 3Mare erduwakare i. Erduwakare Iogwa Kurireuji. Dukodire ero pegamode tai. 4Marigudu iragojere tagabo dukodire ikare tawie. Mare aino čare ire tawie. Dukodi boe ero pegamode tai dukeje tawiabutumode awu iwadaru keje rugadu.
Ainore Pao Kurireu Uwari Rore Boei
5Jesus mako kimore. Akore: – Kuri aino imode ikirimi ure itarego matowu Iogwa bagai. Marigudu tanarakare i kaiba ikodumode. 6Ča ire tawie dukodire tagiarigodure rugadu. 7Boe jokodu jire inagoino tawiagai. Itumode tabiji dukeje boe pegamode tai rugadu. Ire tawie. Mare itumode tabiji boe pemegawo tai dubagai jamedu. Itumode tabiji Pao Kurireu Uwari aregoduwo tagae dubagai jamedu. Itumodukare tabiji dukeje Pao Kurireu Uwari aregodumodukare tagae. Mare itumode tabiji dukeje imode Pao Kurireu Uwari arego tagae rugadu. Dukodire inagoino boe pemegamoduie tai rugadu. 8Boe erduwakare turo pegareu boeji. Mare Pao Kurireu Uwari aregodumode boe etae dukeje umode boe erduwado Pao Kurireu aidukare jiwu boe ero pegareu boeji boe ewo tugera ra turo pegareu boe piji rugadu. Boe emeardaere ro jetororeuge nuie pudumi. Erduwakare tuwo turo jetorodo. Pao Kurireu Uwari aregodumode dukeje umode erduwado ero jetorokare duji. Umode boe erduwado iro jetorore duji. Boe emeardaere tuiorduwaie Pao Kurireuji. Mare Pao Kurireu Uwari umode erduwado erduwakare Pao Kurireu jituji. Pao Kurireu umode boe pegado meartorukare iwugei ero pegareu moriče. 9Emeartorukare i dukodire erduwakare ro pegareuge nuie pudumi duji. 10Iro jetorore. Nono itumode Iogwa Kurireu bagai dukeje Iogwa Kurireu umode tona bu ikajeje toro. Pao Kurireu Uwari umode boe erduwado nou inoduji rugadu tuwo erduwado iro jetorore duji. Dukeje čare boe erduwamode iro jetorore duji rugadu. Pao Kurireu Uwari umode boe erduwado ro jetorokareuge nure emage duji jamedu. 11Emeardaere Pao Kurireu ro pegamodukaie pudui. Mare erduwakare. Marigudu ure bope doge eimijera bie tumoduie boe pegado ji nou bope doge eimijera ro pegareu moriče. Ro pegareuge emeartorure nou bope doge eimijeraji jamedu. Dukodire Pao Kurireu ro pegamode ei jamedu ero pegareu moriče rugadu.
12– Iwadaru kurire iwo tawie ji. Mare taragakare tarduwawo jamedu boeji. 13Mare Pao Kurireu Uwari aregodumode tagae dukeje umode tarduwado Pao Kurireuji rugadu. Umode tarduwado boe jokodu remawuji. Makomodukare tuwadaruji. Makomode tumeardure jiwu Pao Kurireu bataruji tu rugadu. Umode tawie nuba boe mode boei awu moto jituji. 14Umode tawie i jamedu. Umode tawie iwadaruji. Dukodire umode boe erduwado i. Ipemegare rugadu. Dujire umode boe erduwado. 15Iogwa Kurireu bataru jire inagoino. Dukodire ire tawie aino. Pao Kurireu Uwari makomode iwadaruji tawiagai rugadu.
Boe Ekiarigodumode Mare Egaremode Pugeje
16– Kuri aino tardumodukare i pugeje. Mare ia meri keje tardumode i rugadu.
17Jesus ure jorduwadowuge emagore pui. Egore: – Kaba jiba akoino pai? Akore pardumodukare pudui kuri aino. Akore ia meri kejeie pardumoduie pudui pugeje. Akore tudumoduie Pao Kurireu ae kuri aino. 18Kaboba jiba akoino? Parduwakare kaba jiba akoino pai.
19Jesus jorduware nou ture jorduwadowuge emeardaeji. Dukodire makore ei pugeje. Akore: – Inagore tai tardumodukaie i kuri aino mare ia meri keje tardumoduie i pugeje. Mare tarduwakare awu iwadaruji dukodire tagagoino aino pui. 20Boe jokodu jire inagoino tawiagai. Tagiarigodumode rugadu. Tagragudumode rugadu. Mare meartorukare iwugere egaremode pudui. Tagiarigodumode mare taegaregodumode tai pugeje. 21Aredu kurijirigodure dukeje kiarigodure tugurijiri kori koia. Mare kuri buture dukeje biagodure nou tugurijiriredu piji. Jakarere tonaregeduji rugadu tonaregedu boture kodi. 22Tagiarigodure mare iordumode tai pugeje. Dukeje taegaregodumode tai pugeje. Boe emodukare taegare akedudo tabiji rugadu. 23Iwo tawie. Nou meriji Pao Kurireu umode tagaidure jiboe maku tagai dukodire tagogwamagudumodukare i iaboe bagai. Tamagomode tagaidure jiboe bagai ikie tabo dukeje Iogwa Kurireu umode maku tagai rugadu. 24Marigudu tagogwamagudukare i iaboe bagai ikie tabo. Tamagomode bagai dukeje makudumode tagai rugadu. Dukodire taegaregodumode tai rugadu.
Eromodukare Boe Ero Pegareuji Pugeje
25– Ireadodure boeji tawiagai iwo Iogwa Kurireu jebato iaboeji iwo tarduwado Iogwa Kurireu rore jiboeji. Mare ia meri keje imodukare Iogwa Kurireu jebato iaboeji pugeje. Imago pemegamode iwo tarduwado rugadu Iogwa Kurireuji. 26Nou meriji tagi rugadu tamagomode ji rugadu tagaidure jiboe bagai ikie tabo. Imi karega imagomodukare ji. Tagire tamagomode ji rugadu. 27Emare meardu kurire tai. Tameardu kurire i. Tameartorure Pao Kurireu ure itarego mato duji dukodire Iogwa Kurireu meardu kurire tai rugadu. 28Itaregodure Iogwa Kurireu piji rugadu. Itaregodure mato moto ka. Mare itumode awu moto piji pugeje ituwo Iogwa Kurireu bagai.
29Nono nou Jesus ure jorduwadowuge emagore Jesusji. Egore: – Aino čare amago kičarure čewiagai. Akare Pao Kurireu bataru jebato iaboeji pugeje. 30Aino čerduware ai. Arduware boe jamedu boeji rugadu. Boe emodukare awie tumeardaeji mare arduware emeardaeji rugadu. Dukodire čerduware ai. Akaregodure Pao Kurireu piji rugadu.
31Nono Jesus makore ei. Akore: – Ča. Tameartoru kana i rugadu? 32Kuri aino ro pegareuge emode tagaodo ipiji taduwo tawai ka ipiji. Dukodi iragojemode ikinaigodu. Mare ikinaigodu jokodu karega. Iogwa Kurireu rakojemode itabo. 33Ire tawie. Dukodi čare tadudo itabo. Tadumode itabo dukeje tamode tagamudo rugadu tameardae kuriwo Pao Kurireuji. Meartorukare iwuge ero pegamode tai. Mare tardu pegakaba. Taragado tai! Toro ia meri keje imode etagedudo rugadu.
17Jesus Makore Baruto Ture Jorduwadowuge Eparu Tabo
1-2Jesus ure tuwadaru akedudo ture jorduwadowugei dukeje aiwore baruto tumagowo Pao Kurireu bagai. Akore: – Iogwa. Akanaregedu nure imi. Iwimode kuri aino boe ero pegareu moriče. Mare paga karega iwo boe ekinorudo rugadu. Are boe eiamedu boe eimijerado imi iwo akaidure jiwuge ekinorudo ewikawo pugeje emuguwo akabo jii toro rugadu. Ča iro udo turugadu iwo awu imaragodae iado, iwo imaragodae pemegado. Imode iado dukeje boe erdumode ameardaere jiwu imaragodae pemegare rugadu duji, kurire rugadu duji. Ameardae kurire boe eiamedu boe emeardae piji. Ameardae kurire awo boe ekinorudo ewikawo pugeje emuguwo akabo jii toro rugadu. 3Pao Kurireu nure aki rugadu. Ia bokware. Are mitotu je. Boe remawu nure aki rugadu. Akurire boe eiamedu boe kori. Aire boe erduwamode rugadu tumeartoruwo ai rugadu tumuguwo akabo baru tada du akedukawo. Ameardae koiare are itarego mato moto ka. Ire boe erduwamode jamedu tumeartoruwo i emuguwo pagabo rugadu jii toro rugadu. Jesus Cristo nure imi rugadu. 4Ire boe erduwado aro rakareuji aro pemegareuji woe moto keje. Aino čare ire are maku inaiwu imaragodae iado woe. Dukodire ire boe erdudo apemegare duji. Apemegare boe eiamedu boe piji. 5Iogwa Kurireu nure aki. Marigudu akare awu moto to raga dukeje baru tadawuge erduware marigudu ipemegare duji. Dukodire baru tadawuge emago pemegare i. Ere ikie kurido. Aino ire irawuje mato moto ka. Kuri aino itumode ibagi baruto iragojewo akabo pugeje. Itaidure awo boe erdudo ipemegare duji nono baru tadawuge erdu mogadure.
6– Are ia awu moto kejewu boe emagu inai emeartoruwo i. Ire erduwado ai rugadu. Emeartorure ai. Dukodire are emagu inai iwo erduwado. Nono emeartorure awadaruji rugadu. 7Aino erduware are maku inai boeji. Apijire are maku inai. 8Ire awadaru maku etai. Are awadaru maku inai dukeje ire ewie awadaruji. Emeartorure ji rugadu. Erduware itaregodure apiji duji rugadu. Are itarego mato rugadu. Emeartorure rugadu.
9– Meartorure aiwuge eparu tabore inagoino baruto awagai. Imagokare meartorukare iwuge eparu tabo. Mare imagore nou are maku inaiwuge boe eparu tabo emeartorure ai kodi. 10Meartorure iwuge emeartorumode ai jamedu. Meartorure aiwuge emeartorumode i jamedu. Emeartorumode iwadaruji dukeje boe eiamedu boe erduwamode imi rugadu iro pemegareu kodure boe eiamedu boe kori duji. 11Kuri aino itumode baruto akae. Iragojemodukare meartorukare iwugebo pugeje. Mare meartorure iwuge eragojemode woe awu moto keje kimo. Ča Iogwa Pemegareu nure aki rugadu. Aragare rugadu. Aetu pemegado awu meartorure iwugei emeardae pemegawo pui nono imi aki pamogadure puapo dumogadure. Pameardae ure mitotu je. Are nou araga maku inai marigudu. 12Dukodire ietu pemegare awu meartorure iwugei nou are maku inaiwu araga tabo. Dukodire ekare tugera ra tumeartorure i dupiji. Ma kočare ure tugera ra ipijiwu ure mitotu je. Emare meartorukare i rugadu. Marigudu akagore ia ure tugera ra ipijiwu umoduie imagu boe eimijera pegareuge etai amoduie boe pegado ji rugadu. Dukodire boe pegamode nou umode imagu etaiwuji rugadu. Dukodire nou awadaru jetumode pudui rugadu. 13Ča, kuri aino itaregodumode baruto akae pugeje. Ire iwadaru maku awu ire jorduwadowuge etai egarewo iwadaruji rugadu nono iagare mogadure. 14Ire awadaru maku awu ire jorduwadowuge etai mare meartorukare iwuge erdu pegare ei rugadu. Awu ire jorduwadowuge emeartorure i dukodire erore nono iro mogadure. Erokare nono meartorukare iwuge ero mogadure. Dukodire meartorukare iwuge erdu pegare ei jamedu. 15Imagokare awagai awo awu meartorure iwuge etawuje awu moto piji. Mare itaidure aetu pemegawo ei rugadu awo ekinorudo bope doge eimijera piji. 16Imeardaekare nono awu meartorukare iwuge emeardae mogadure. Awu ire jorduwadowuge emeardaekare nono awu meartorukare iwuge emeardae mogadure jamedu. 17Awadaru ure turugadu. Boe jokodu jire akagoino. Meartorure iwuge ero pemegawo. Emeartoruwo awadaruji atugaregewo emage awo ero jetorodo rugadu. 18Are itarego mato moto ka meartorukare iwuge etae. Dukodire ire awu ire jorduwadowuge etudo meartorukare iwuge etae jamedu nono are itarego meartorukare iwuge etae dumogadure. 19Dukodire akaidumode jiboe ire irugadu imeartoruwo awadaruji rugadu. Awu ire jorduwadowuge ewo tudo turugadu jamedu tumeartoruwo awadaruji jamedu nono imogadure.
20– Imagore eparu tabo awagai toro baruto. Emode boe erduwado iwadaruji dukodire boe emeartorumode i rugadu. Imagore nou meartorumode iwuge eparu tabo jamedu. 21Imagore eparu tabo emeardae pemegawo puapo, emeardaewo nono pameardae dumogadure. Aragojere itabo. Iragojere akabo jamedu. Paedure puapo. Pawiapagare tu pu bataruji. Dukodire pameardae ure mitotu je. Itaidure awu meartorure iwuge eduwo pagabo emeardae pemegawo puapo nono pameardae mogadure. Ia boe erdumode nou boe emeardae pemegare puapo duji dukeje emeartorumode i are itarego moto ka duji rugadu. 22-23Are iro rakado woe moto keje. Are iro pemegado woe moto keje jamedu. Dukodire boe erdure ipemegare rugadu duji. Ča ire awu iro rakareu maku awu meartorure iwuge etai. Dukodire boe erdumode meartorure iwuge epemegare duji jamedu. Nono emeardae pemegamode puapo nono pameardae dumogadure rugadu. Ikare imeardae udo tuginai apiji. Akare ameardae udo tuginai ipiji jamedu. Nono are iraga maku inai. Imode meartorure iwuge eragado jamedu. Nono emodukare tumeardae udo tuginai pubiji jamedu. Nono boe eiamedu boe erdure nou meartorure iwuge emeardae pemegare puapo duji dukeje emeartorumode i, are itarego moto ka duji rugadu. Erduwamode ameardu kurire nou meartorure iwugei duji jamedu. Ameardu kurire ei nono ameardu kurire i dumogadure.
24– Iogwa Kurireu nure aki. Are nou meartorure iwuge emagu inai. Dukodire itaidure eduwo itabo toro imugureu keje. Eragojemode itabo dukeje erdumode iragare boe jamedu boe jituji, erdumode boe pemegare irore jiboeji. Are iraga maku inai marigudu. Are boe pemegado i marigudu. Akare moto to raga mare are iraga maku inai marigudu. Are boe pemegado i marigudu jamedu. Mare paga karega. Ameardu kurire i dukodire aroino i. 25Iogwa Kurireu nure aki kodi. Apemegare rugadu. Meartorukare iwuge erduwakare ai. Mare imire iorduware ai rugadu. Awu meartorure iwuge erduware ai are itudo mato duji. 26Ire ewie ai. Mare imode erduwado ai tu tu je jamedu emeardu kuriwo boei rugadu nono ameardu kurimoga i dumogadure. Imode erduwado iragojere ebo duji emeardu kuriwo boei nono imeardae mogadure.
18Boe Eimijerage Pegareuge Ere Tugeragu Jesusji
1Jesus ure nou baru towu tuwadaru iado dukeje uture pugeje ture jorduwadowugebo. Ekurugodure pobo kajeje. Nou pobo iere Cedrom. Nono etaregodure nou oliveira iguru ka. 2Judas Iscariotes jorduware nou oliveira iguruji. Marigudu Jesus uture ture jorduwadowugebo nou oliveira iguru jetureu ka tu tu je. Dukodire Judas Iscariotes jorduware eragojere nono duji. Meardaere tuwo Jesus maku boe eimijerage pegareuge etai nou tugobaigarege etai jamedu. 3Dukodire nou Judas Iscariotes uture nou oliveira iguru ka Roma kejewu tugobaigaregebo. Fariseu doge, nou ure Judeu doge enomea maku Pao Kurireu aiwuge eimijerage ere Pao Kurireu uwai tadawu tugobaigarege etudo ebo jamedu. Eture tariga kurireu tabo, rago tabo. Eture jorugu tabo jamedu tuiordu pemegawo awaraji. 4Jesus jorduware boe mode nono pudui duji rugadu. Jorduware eromode pudui rugadu boeji. Nono uture etogi. Dukejere unaragodure ei. Akore: – Ioguduba bagaiba taroino?
5Egore: – Čedaiwonure Jesus bagai. Nazaré kejewu nure ema.
Jesus akore: – Imireo.
Judas Iscariotes rakojere nono ebo jamedu. Emare ure etarego toro Jesus ae tuwo Jesus maku etai. 6Jesus akore “imireo” aino dukeje nou tugobaigarege ere tudaru piji. Dukeje ewudure moto ka. 7Nono Jesus unarare ei pugeje. Akore: – Ioguduba bagaiba tagaiwore?
Egore: – Čedaiwonure Jesus bagai. Nazaré kejewu nure ema.
8Jesus akore: – Imireo. Iwagaire taroino. Mare tagaba tageragu awugei. Etudo pugeje.
9Jesus akore aino tuwadaru jetuwo pudui. Ture jorduwadowugeire akoino. Marigudu makore Pao Kurireu bagai baruto dukeje akore: – Ietu pemegare nou ire jorduwadowugei dukodire ekare tugera ra tumeartorure i dupiji.
10Simão Pedro iedure ia tariga kurireuji. Ure tawuje tuia piji dukeje ure ia imedu bija kado. Nou imedu iere Malco. Maragodure nou ure Judeu doge enomea maku Pao Kurireu aiwuge eimijera kurireu ai. Nou imedu ukana pemegareu jagwaiwu bijare ure kado. 11Mare Jesus makore Pedroji. Akore: – Arokaba aino. Tariga kurireu tugu tuiato. Arduwakare. Imode imagu awu boe pegareuge etai boe pegawo i rugadu nono Iogwa Kurireu meardae mogadure.
Tugobaigarege Eture Jesus Apo Boe Eimijerage Etae
12Nono nou Roma kejewuge tugobaigarege eture Jesus apo. Eimijera uture ebo jamedu. Judeu doge nou tugobaigarege eture ebo jamedu. Ere Jesus kogudo. 13Dukejere eture Jesus apo toro nou ure Judeu doge enomea maku Pao Kurireu aiwuge boe eimijerage etae. Ere maku Anás ai. Nou Anás uwagedu iere Caifás. Nou Caifás nou ure Judeu doge enomea maku Pao Kurireu aiwuge eimijera kurireu nure ema nou joruji. 14Marigudu nou Caifás makore tumeardaeji Judeu doge eimijerage ewiagai. Akore: – Boe pegakare pai pawo ia imedu bito pawobe Judeu doge ewo činorudo Roma kejewu boe eimijerage pegareuge epiji.
Pedro Akore Tuiorduwakaie Jesusji
15Simão Pedro uture Jesus rekodaji. Ia Jesus ure jorduwadowu uture eregodaji jamedu. Caifás jorduware nou Jesus ure jorduwadowu imeduji. Dukodire nou imedu uture Jesus rekodaji nou Caifás uwai ka. 16Mare Pedro ukare turemo nou baito. Nono nouia Jesus ure jorduwadowu ure tuie bu nou Caifás uwai piji toro Pedro ae. Makore nou jeture nou baiporo jiwudo areduji Pedro uwo turemo. Dukeje nou jeture baiporo jiwudo ure Pedro udo turemo nou baito. 17Mare nou aredu makore Pedroji. Akore: – Ia Jesus ure jorduwadowu karegure aki?
Mare Pedro akore: – Boro. Imi karega.
18Biakure ei dukodire nou utugarege, nou tugobaigarege ere jorugu nono nou bai tada. Nono ere taiado nou joru tabo tuwo tuwarudo jao. Nono Pedro ure tuburedo nou joruji tuwo tuwarudo nono ebo jamedu.
Nou Ure Judeu Doge Enomea Maku Pao Kurireu Aiwuge Eimijera Kurireu Unarare Jesusji Ia Ro Pegareu Bagai
19Anás unarare Jesusji jorduware jiboe bagai. Akore: – Kaba jiba are boe erduwado?
20Jesus akore: – Ikare iwadaru biado boe epiji marigudu. Boe eiamedu boe emeardure ire boe erduwado jiwu iwadaruji. Ire boe erduwado Judeu doge ere bato puiwu bai ja tada. Ire boe erduwado Pao Kurireu uwai tada. Boe ere bato pui itae tumearduwo iwadaruji rugadu. 21Kočare anarare maigodu i iorduware jiboe bagai? Anarado nou meardure iwadaru jiwugei. Emagere erduware iwadaruji.
22Jesus makore aino dukeje ia tugobaigare ure boeto Jesusji. Dukejere makore Jesusji. Akore: – Akagokaba aino awu ure Judeu doge enomea maku Pao Kurireu aiwuge eimijera kurireu bataru jipagi! Boe eimijera kurireu nure ema!
23Mare Jesus akore: – Iwadaru pegareumode dukeje awu boe ewie nou iwadaru pegareuji. Mare iwadaru pegareu bokware. Kodiba are boeto i?
24Dukejere Anás ure tugobaigarege edo Jesus reko Caifás ae. Jesus kana kogu kimore puapo rugadu. Caifás nou ure Judeu doge enomea maku Pao Kurireu aiwuge eimijera kurireu nure ema.
Pedro Makore Tuiorduwakaie Jesusji Pugeje
25Pedro rakoje kimore nono joru okwai. Iage emagore ji. Egore: – Ia Jesus ure jorduwadowu karegure aki?
Mare Pedro akore: – Boro. Imi karega.
26Nono ia Caifás utugare makore Pedroji jamedu. Akore: – Iordure ai Jesus apo toro oliveira iguru keje.
Pedro ure bija kadowu imedu uwobe nure ema.
27Mare Pedro akore: – Boro.
Čare rore puku kagariga kudugodure dukeje rugadu.
Ere Jesus Reko Boe Eimijera Pilatos Ae
28Čaboečoto ere Jesus reko Caifás uwai piji toro Roma pijiwu boe eimijera governador uwai ka. Judeu doge ere tuwaduiago tuwadae Pascoaji kuri aino. Judeu doge eimijerage ere tudo turugadu tuwaduwo nou tuwadaeji nou meri keje dukodire ekare turemo nou boe eimijera uwaito. Judeu karegure ema dukodi. Emode turemo ia boe tuginaiwuge ewaito dukeje epemegamodukare turowo to bakaru tadawu boe ero boeji. Dukodire ewadumodukare nou tuwadaeji pugeje. Enogwagemodukare nou Páscoa jiwu boe ekeji pugeje. Mare eno bakaru tadawu boe ero reo. Dukodire ekare turemo nou Roma eimijera uwaito. 29Nou boe eimijera kurireu iere Pilatos. Emare ure tuie bu toro bawadu ka nou Judeu doge eimijerage etogi tumagowo ei. Akore: – Nuba awu imedu rore? Awu imedu ro pegareu pa?
30Nou Judeu doge eimijerage egore: – Ro pegamodukare dukeje čedaregodumodukare apo woe akae. Ro pegare rugadu bitoduwo.
31Mare Pilatos akore: – Dukodi tadudo apo toro tawai ka tagaiwowo awu imedu ro pegareu bagai taroiaji tawo boe pegado ji tardu jiwu ro pegareu moriče taroiaji.
Egore: – Roma kejewu boe eimijera kurireu akore čei čegawo ia boe ewido. Ure ado mitotu woe čedabo. Akagomode bito. Boe emode bito rugadu. Amagomodukare dukeje boe emodukare bito rugadu.
32Erduwakare mare Jesus makore marigudu tuwimoduie duji. Tuwimoduie ipo padure pugajejewu keje. Aino čare Jesus bataru jeture pudui rugadu.
33Pilatos ure turemo tuwaito tuibagi tumagowo Jesusji pugeje. Unarare ji. Akore: – Boe rugadu kana? Judeu doge eimijera kurireu nure aki rugadu kana?
34Jesus akore: – Aki na akaidure arduwawo? Ia boe eigoia na ere arduwado?
35Pilatos akore: – Judeu karegure imi. Awobe ere amagu inai. Awobe nou ure Judeu doge enomea maku Pao Kurireu aiwuge eimijerage ere amagu inai. Kaba jiba arore? Kodiba egoino aino ai?
36Jesus akore: – Boe eimijera kurireu nure imi mare awu woewu moto kejewu karegure imi. Boe eimijera mode imi woe moto keje dukeje meartorure iwuge erugodumode awu Judeu doge eimijeragei ekawo tugeragu i. Boe eimijera kurireu nure imi rugadu mare woe karega.
37Pilatos akore: – Boe eimijera kurireu nure aki?
Jesus akore: – Uu. Iwodure woe awu moto keje iwo boe erduwado boe jokodu jiboeji. Aidure tuiorduwawo boe remawu jiboe ewiapagamode iwadaruji rugadu.
38Mare Pilatos akore: – Boe remawu bokware. Boe pemegareu bokware rugadu.
Pilatos Makore Jesus Biwo
Nono Pilatos ure tie bu toro bawadu ka pugeje nou Judeu doge eimijerage etae. Makore ei. Akore: – Iorduwakare awu imedu ia ro pegareuji. Ro pegakare i. Imodukare bito. 39Tawadae Páscoa kejere tare ido ro pegareu tawuje baičoreu piji utuwo pugeje nono taroia mogadure. Ča tagaidu kana iwo awu Judeu doge eimijera kurireu Jesus tawuje baičoreu piji utuwo pugeje?
40Mare nou Judeu doge eimijerage ekudugodure. Egore: – Boro! Ema karega! Čedaidukare ji. Čedaidure nou imedu Barrabásji awo tawuje baičoreu piji utuwo pugeje.
Nou boe emagore bagaiwu imedu iere Barrabás. Imedu iwogu kigodureu nure ema. Ure boe ewidowu nure ema jamedu.
191Nono Pilatos ure tugobaigarege edo boeto Jesusji bukigu tabo. 2Nou tugobaigarege ere ia ikuredu otoreu upodo puapo tuwo udo nono boe eimijera atadawu mogadure. Nono ere tugu Jesus aorato koriwo aoraji rugadu. Nono ere boe eimijera ukudau areia rugureu motureu tugu Jesusji jamedu. 3Nono nou tugobaigarege emagore Jesusji. Egore: – Judeu doge eimijera kurireu nure aki. Boe pemegawo ai awikawo jii toro.
Mare tuwudorekeadae tabore egoino Jesusji. Nono ere tugera to ji jamedu.
4Pilatos ure tugirimi toro boe doge etae pugeje. Akore: – Tagaiwodo. Imode awu imedu Jesus reko mato tagae tarduwo ji. Iordukare awu Jesus ia ro pegareuji. Dukodire imodukare boe edo bito.
5Nono tugobaigarege etaregodure Jesus apo etae. Nou ikuredu otoreu kogu kimore aora kajeje. Nou ukudau areia rugureu motureu metu kimore ji. Nono Pilatos makore nou boei pugeje. Akore: – Emareo.
6Nono nou ure Judeu doge enomea maku Pao Kurireu aiwuge eimijerage erdure Jesusji. Nou Pao Kurireu uwai tadawu tugobaigarege erdure Jesusji jamedu. Dukejere eiamedu ekudugodure. Egore: – Bito ipo padure pugajejewu keje! Bito ipo padure pugajejewu keje!
Nono Pilatos akore: – Iordukare ia Jesus ro pegareuji. Imodukare bito. Tagaidumode tawo bito. Bito.
7Nono nou boe egore: – Čeno bakarure. Dukodire čeroiare woe. Ia boe makomode Pao Kurireu Onaregedu nuie pudumi dukeje čemode bito rugadu. Ainore čeno bakarure. Ainore akore. Ča awu imedu Jesus makore Pao Kurireu Onaregedu nuie pudumi rugadu. Dukodire bitodumode rugadu nono čeno bakaru mogadure.
8Pilatos meardure egore aino duji dukeje pagudugodure. 9Ure tugirimi tuibagi tuwaito Jesus ae pugeje. Unarare Jesusji. Akore: – Kaiba pijiba akaregodure?
Mare Jesus makokare boeji. 10Nono Pilatos makore ji pugeje. Akore: – Amagodo. Itaidure imearduwo awadaruji. Akimijera kurireu nure imi. Imagomode atuwo atumode. Imagomode tugobaigaregei ewo awido emode awido.
11Nono Jesus makore ji. Akore: – Mare Pao Kurireu emare ure ikimijerado aki. Umodukare ikimijerado aki dukeje aromodukare boeji i. Dukodire ure imagu akaiwu ro pegare rugadu.
12Pilatos meardure Jesus bataruji dukeje aidure tuwo Jesus tawuje baičoreu piji utuwo pugeje. Mare nou boe ekudugodure kimo. Egore: – Amode tawuje baičoreu piji dukeje Roma kejewu boe eimijera kurireu César aidumodukare ai pugeje. Awu Jesus makore boe eimijera kurireu nuie pudumi. Makore boei emeartorukaiago Roma kejewu boe eimijera kurireu César bataruji.
13Pilatos meardure ewadaruji. Dukejere uture Jesus apo toro bawadu ka. Dukejere Pilatos ure tumugudo tumuga ira pemegareu keje. Nou ira kejere makore tumeardaeji tu tu je boe ewiagai nuba turomode ro pegareugei. Nou ira mugure kejewu bawadu iere Bawadu Kejewu Tori. Hebreu bataru tabore egore: “Gabatá” aino ji. 14Nou barogwato ewadumode tuwadae Pascoaji. Mare aino čare meri aregodure baru oia ka dukeje Pilatos makore nou boei. Pilatos akore: – Tagimijera kurireu reo!
15Mare nou boe ekudugodure. Egore: – Bito! Bito! Bito ipo padure pugajejewu keje!
Pilatos unaragodure ei. Akore: – Tagaidure iwo tagimijera kurireu bito?
Nou ure Judeu doge enomea maku Pao Kurireu aiwuge eimijerage egore: – Čegimijera karega. Čemeartorure tu nou Roma kejewu pagimijera kurireuji.
16Nono Pilatos ure Jesus maku etai ewo bito ipo padure pugajejewu keje.
Jesus Bitodure Ipo Padure Pugajejewu Keje
Nono nou boe ere tugeragu Jesusji. 17Tugobaigarege eture Jesus apo nou Jerusalém ba kurireu piji. Oredure tuwimode kejewu ipo tabo. Eture tori ao ka. Nou tori iere Boe Ewireuge Etaora Ra Jeta. Judeu doge ewadaru tabore egore: “Gólgota” aino ji. 18Nou tori ao keje ere Jesus bito ipo padure pugajejewu keje. Ere ia ro pegareuge ewido nono jamedu. Jesus rakojere etoiadada. 19Pilatos ure tuwadaru bu ira keje. Ure tudugare udo nou ira bu Jesus ao keje nou ipo oto keje. Nou Pilatos bataru akore: – Nazaré pijiwu Jesus nure ema. Judeu doge eimijera kurireu nure ema rugadu.
20Boe eture toro ere Jesus bito kejewu tori ao ka. Emagare. Erdure nou Pilatos ure tuwadaru bu kejewu iraji Jesus ao keje nou ipo oto keje. Pilatos ure tuwadaru bu nou Judeu doge ewadaru tabo, latim bataru tabo, grego bataru tabo jamedu boe eiamedu boe erduwawo tagoino jituji. 21Nou ure Judeu doge enomea maku Pao Kurireu aiwuge eimijerage erdure nou iraji. Etaidukare nou ira kejewu bataruji. Nono eture Pilatos ae. Egore: – Judeu doge eimijera kurireu karegure ema. Akagokaba aino. Boe eimijera kurireu karegure ema. Amagodo aino. Emare akoino Judeu doge eimijera kurireu nuie pudumi. Emare akore tu aino pudui rugadu.
22Pilatos makore ei. Akore: – Imodukare iwadaru pegado.
23Tugobaigarege ere Jesus bito ipo padure pugajejewu keje. Dukejere ere tugeragu Jesus ukudau areiaji. Ere pedo pui. Nou tugobaigarege ere pobe puibiji. Dukodire eiamedu boe ere tugeragu ia Jesus ukudau areiaji. Jesus ukudau areia biaku epa ure mitotu je. 24Tugobaigarege eroiwakare tuwo kado puiato dukeje egore pui: – Pagawo kado puiato. Pawaduwo tori roguji. Nou tori umode tudawuje ie tabowu ukudaumode nou ukudau areiače.
Erduwakare mare marigudu Pao Kurireu makore eromoduie aino pudui rugadu. Pao Kurireu akore: – Boe emode ikudau areia pedo pui. Ewadumode ia tori roguji jao. Nou tori umode tudawuje ie tabowu ukudaumode awu ikudau areiače.19.24 Awu bataru padure Salmo 22.18 keje.
Ainore nou tugobaigarege erore rugadu. Nou Pao Kurireu bataru jeture pudui rugadu.
25Jesus uče rakoje puredure nono nou tonaregedu bitodure kejewu ipo padure pugajejewuji. Clopas oreduje rakojere nono jamedu. Iere Maria. Jesus uče uwie rakojere nono jamedu. Maria Madalena rakojere nono jamedu. 26Nou Jesus meardu kurire jiwu imedu rakojere nono jamedu. Ure jorduwadowu nure ema. Jesus jordure ji. Jordure tujeji jamedu. Dukeje makore tujeji. Akore: – Awu imeardu kurire jiwu imedu akanaregedu mode ema rugadu.
27Dukejere Jesus makore nou tumeardu kurire jiwu imeduji jamedu. Akore: – Awu imuga ače mode ema jamedu.
Dukodire nou imedu ure tuwai maku Jesus uče ai uwaiče muguwo tada rugadu.
Jesus Bire
28Jesus jorduware ture tumaragodae iado duji. Marigudu Pao Kurireu ure boe ewie Jesus romode jiboeji, makomode jiboeji. Marigudu Pao Kurireu ure boe ewie Jesus makomoduie pobo bagai rugadu. Aino čare Jesus akore: – Itaidure ikuduwo poboče.
Dukodi čare Pao Kurireu bataru jeture pudui rugadu.
29Ia pori mugure nono vinho kuru pagodureu tabo. Nou vinho kuru mori kurikare. Dukeje boe ere ia areia pemegareu pegodo nou vinho kuruto. Ere nou areia pemegareu kogudo ipo oto tabo. Dukejere ere nou areia pemegareu raido toro Jesus okwa ka. 30Jesus kudure nou vinho kuruče dukeje makore ei. Akore: – Ire imaragodae rugadu iado. Boe bokwa.
Nono itoru kugudugodure tuwi tabo rugadu. Dukodi bire rugadu.
Tugobaigare Ure Rago Tugu Jesus Japoroto
31Ča nou Judeu doge eimijerage eture Pilatos ae pugeje. Etaidure tuwo nou ere bitowuge epogora kado tuwo ewido kuri je tuwo erawuje ipo padure pugajejewu piji kuri je rugadu. Turo koiare etaidukare turowo boeji ia bireuji nou boečoji. Nou barogwato sábado meriji mode ema. Etaidukare bireuge epaduwo ipo padure pugajejewu keje sábado meriji. Nou barogwato ewadumode tuwadae páscoaji kodi. Ukare turugadu ei erowo boeji bireugei nou sábado meri keje. 32Dukodire tugobaigarege ere nou iwogu kigodureu imedu pogora kado. Dukeje ere nouia iwogu kigodureu imedu pogora kado jamedu. 33Mare etaregodure Jesus ae dukeje erdure Jesus bire rugadu duji. Dukodire ekare Jesus pogora kado. 34Ia tugobaigare ure rago tugu Jesus japoroto. Ure rago tawuje dukeje Jesus ku rere japoro piji, pobo rere japoro piji jamedu. 35Imire iordure awu inagore jiboeji ioku tabo. Boe jokodu jire inagoino. Iwadrarodukaregure. Dukodire ire bu bapera keje aino. 36Marigudu Pao Kurireu makore nuba boe mode Jesusji rugadu. Akore Jesus ra kadodumodukaie rugadu.19.36 Awu bataru padure Êxodo 12.46 keje.37Akore boe emoduie rago tugu to rugadu. Boe erdumoduie ere rago tugu to duji rugadu.19.37 Awu bataru padure Zacarias 12.10 keje. Aino čare nou Pao Kurireu makore jiboe rugadu boe jeture pudui rugadu.
Boe Ere Jesus Tugu Mototo
38Dukejere José makore Pilatoji Jesus bagai tuwo Jesus tugu mototo. Nou José boture Arimatéia ba kurireu keje. Meartorure Jesusji mare ukare boe ewie. Pagudure Judeu doge eimijerageče kodi. Dukodire readodukare boe ewiagai tumeartorure Jesus jituji. Ča Pilatos makore nou Joseji uie turugadu uwo tugeragu Jesusji uwo tugu mototo. Dukodire José ure tugeragu Jesusji. 39Imedu Nicodemos uture José apo. Nou Nicodemos uture Jesus ae boečoji marigudu tuiorduwawo Jesus bataruji. Aino čare uture roreboe tabo tuwo reko Jesus biri joki. Nou roreboe motudu oto padure trinta e cinco quilos. 40Nou ime pobedu doge ere tugeragu bireu Jesusji. Ere nou roreboe reko biri joki nono Judeu doge ero mogadure. Ere upodo areia tabo nono turo mogadure tuwo tugu mototo. 41Boe ere Jesus bitowu kejere nouia iguru jeture nono. Puredure nono ere Jesus bitowuji. Nou iguru tadare ia tori poro mugure nono. Boe ere nou tori porodo tuwo bireuge etugu to. Mare ekare ia bireu tugu to raga ji aino. 42Barogwato Judeu doge emaragodumodukare dukodire akere ei tuwo boe jamedu iado nou meriji rugadu. Aino merirekodure ei dukodire nou ime pobedu doge ere Jesus tugu nou tori poroto rugadu.
20Jesus Jewodure Pugeje
1Domingo meriji ča boečoto Maria Madalena uture ere Jesus tugu towu tori poro ka. Aregodure toro dukeje jordure tori baiporo jadodure duji. Boe ere Jesus tugu to dukeje ere ia tori kurireu bu nou tori poro je keje tuwo nou tori poro miwuje. Mačare nou tori padukare tumuga keje pugeje. Nou tori poro jadodure rugadu. 2Nono Maria Madalena rekodure nou tori poro piji Simão Pedro bagai, nouia Jesus ure jorduwadowu imedu bagai jamedu. Jesus meardu kurire nouia ture jorduwadowu imeduji. Maria Madalena aregodure etae dukeje makore ei. Akore: – Ia boe ere tugeragu Pagimijeraji nou tori poro piji. Parduwakare kaiba padure pugeje.
3Maria makore aino ei dukeje nou ime pobedu doge eregodure toro tori poro ka. 4Eregodure rugadu. Nou metia aregodure boetoji. 5Aiwore nou tori poroto. Ukare turemo tori poroto mare jordure nou upore Jesus apowu areiaji. 6Dukejere Simão Pedro aregodure jamedu. Ure turemo krai je. Jordure nou upore Jesus apowu areiaji jamedu. 7Jordure nou upore Jesus aora tabowu areiaji jamedu. Padure nouia upore apowu areia meki. Mare erdukare Jesusji. 8Nono nouia Jesus ure jorduwadowu ure turemo jamedu. Emare aregodure nou tori poro ka boetoji. Aiwore mare jordukare Jesusji jamedu. Nono meartorure Jesus jewodure pugeje duji. 9Pao Kurireu makore marigudu Jesus jewodumoduie pugeje. Mare nou ime erduwakare raga nou Pao Kurireu bataruji. 10Nono nou ime pobedu doge ere tugirimi tuibagi tuwai ka.
Jesus Ure Maria Madalena Jordudo Pudui
11Maria rakoje puredure nou tori baiporoji pugeje. Ragudu kimore rugadu. Dukeje ure tumegido taiwowo nou tori poro ka. 12Aiwore dukeje jordure ime pobedu dogei. Mare ime karega. Pao Kurireu utugarege baru tadawuge eire jordure. Emugure nono nou tori poro tada nou Jesus padure kejewu tori keje. Jesus padukare nono pugeje mare nou Pao Kurireu utugarege baru tadawuge emugure nono. Ia mugure Jesus aora jagwai. Nouia okwačere bure jagwai. 13Emagore Mariaji. Egore: – Are! Kodiba akragudure?
Maria makore ei. Akore: – Ia boe ere tugeragu ikimijeraji awu tori poro piji. Iorduwakare kaiba ere tugu pugeje.
14Nono Maria ure tumegido pugeje nou tori poro piji. Nono jordure Jesusji nono. Mare jorduwakare Jesus ure ema duji. 15Jesus makore Mariaji. Akore: – Are! Kodiba akragudure? Ioguduba bagaiba akaiwore?
Maria jorduwakare raga Jesus nuie ema duji. Meardaere maragodure boepa jiwu utugare nuie ema. Dukodire makore ji Jesus bagai. Akore: – Aki na are akeragu Jesusji? Kaiba are tugu pugeje? Iorduwado ituwo bagai.
16Nono Jesus makore Maria ieji. Akore: – Maria.
Makore tugie jitu keje čare Maria jorduware Jesus ure ema duji rugadu. Dukodire uture ae. Nono Maria makore aramaico bataru tabo. Akore: – Rabôni!
Maria makore tuwadaru tabo mare Imedu Jorduwareu jire akoino.
17Jesus makore Mariaji pugeje. Akore: – Akaba akeragu i. Irudukare raga Iogwa Kurireu ae. Ča atudo toro ire jorduwadowuge etae awo ewie. Imode ikirimi Iogwa Kurireu ae duji. Iogwa Kurireu Etuo Kurireu nure ema jamedu. Pao Kurireu nure ema rugadu.
18Dukodire Maria Madalena uture nou Jesus ure jorduwadowuge etae. Ure ewie tuiordure Jesus jituji. Ure ewie Jesus makore pudui duji rugadu.
Jesus Ure Ture Jorduwadowuge Erdudo Pudui
19Nou Domingo meriji boečoji Jesus ure jorduwadowuge ere bato pui ia bai ja tada. Ere baiporo rugadu miwuje pudui epagudure Judeu doge eimijerageče dukodi. Dukeje Jesus jepadure tači etoiado nou bai ja tada. Makore ei. Akore: – Itaregodure pugeje.
20Nono Jesus ure erdudo tugeraji. Ure erdudo tiaporoji. Nou Jesus ure jorduwadowuge erdure nou rago oiaji japoroto. Erdure nou meriri oiaji ierato. Dukodire erduware emaie rugadu duji. Dukodire egarere Jesusji rugadu. 21Nono Jesus makore ei pugeje. Akore: – Tamororamagadukaba. Iogwa Kurireu ure itarego mato tawagai. Nono imode tadudo boe ewagai jamedu.
22Nono Jesus ure togwamu ei. Dukejere akore: – Ča Pao Kurireu Uwari umode turawuje tagae dukeje tagaba utudo tabiji. 23Boe ekiarigodumode turo pegareuji dukeje tawiagodumode ero pegareu piji. Nono Pao Kurireu biagodumode ero pegareu piji jamedu. Mare ia boe ekiarigodumodukare turo pegareuji dukeje tawiagodumodukare ero pegareu piji jamedu. Nono Pao Kurireu biagodumodukare ero pegareu piji jamedu.
Tomé Jordure Jesusji
24Ia Jesus ure jorduwadowu iere Tomé. Iere Dídimo jamedu. Metage eiamedu boe eragojere nono kodire erdure Jesusji. Mare emare rakojekare nono kodire jordukare Jesusji. 25Nou Jesus ure jorduwadowuge ere Tomé bie. Egore: – Čerdure Jesusji rugadu!
Mare Tomé akore: – Imeartorukare. Iordumode enoe oiaji Jesus ierato dukeje imode ikera reko nou epaeji. Nono imeartorumode emaie rugadu duji. Iordumode japoroji dukeje imode ikera reko ji jamedu. Nono imeartorumode emaie rugadu duji. Mare iordumodukare dukeje imeartorumodukare rugadu.
26Semanare mito ei pugeje dukeje nou Jesus ure jorduwadowuge eragojere ia bai ja tada. Ere baiporo miwuje pudui rugadu. Tomé rakojere ebo. Ma čare Jesus aregodure kuri etae. Rakojere nono ebo dukeje makore ei. Akore: – Itaregodu.
27Nono Jesus makore Toméji. Akore: – Akera reko ikeraji. Akera reko iaporoji jamedu. Akaiwodo ikeraji. Imi rugadu reo! Amororamagadukaba i pugeje arduwawo rugadu imire iroino duji. Ameartorudo i.
28Nono Tomé makogodure ji. Akore: – Ikimijera kurireu nure aki. Pao Kurireu nure aki. Imeartorumode ai rugadu.
29Jesus akore: – Ardure i dukeje ameartorure i rugadu. Mare iage erdumodukare i mare du inodu tabo emeartorumode i rugadu. Dukodire boe pemegamode ei rugadu egarewo pudui rugadu.
João Ure Awu Pao Kurireu Bataru Bu Bapera Keje
30Jesus ro rakare rugadu. Ure jorduwadowuge erdure Jesus rore jiboeji. Ire Jesus ro rakare jiboe bu awu bapera keje mare boe jamedu karega. 31Mare ire awu Jesus bataru bu bapera keje mare boe emeartoruwo Jesusji rugadu du bagai. Umode boe ekinorudowu nure ema rugadu. Pao Kurireu Onaregedu nure ema rugadu. Boe emeartorumode ji dukeje emugu pemegamode Pao Kurireu apo rugadu.
21Jesus Ure Ia Ture Jorduwadowuge Erdudo Pudui Pugeje
1Jesus ure ia ture jorduwadowuge erdudo pudui pugeje Galiléia pobo maereu okwai. Nou pobo maereu iere Tiberíades jamedu. 2Simão Pedro, Tomé, Natã, ere bato pui nono. Zebedeu ore ime pobedu doge eragojere nono ebo jamedu. Ia Jesus ure jorduwadowuge eragojere nono jamedu. Ere pobe. 3Jesus rakojekare ebo raga mare Pedro makore ei. Akore: – Pawoguwo.
Egore: – Uu. Pawoguwo.
Nono ere taredo to ika kurireuto dukeje ewogure. Mare nou boečoji ekare boe bito jii toro barogwakododu ka. 4Barogwakododure dukeje Jesus rakojere nono kugaru keje pobo maereu okwai. Ure jorduwadowuge etaiwo jaere toro ae ika kurireu piji. Erdure ji mare erduwakare ji. 5Jesus unaragodure ei ere boe bito dubagai. Akore: – Tare boe bito?
Egore: – Boro! Čegare boe bito rugadu!
6Jesus makore ei. Akore: – Tawuge barigu tagana pemegareu jagwai. Nono tamode tageragu karei rugadu.
Dukodire ere tuwuge barigu tugana pemegareu jagwai. Ča eroiwakare tuwo tuwuge tawuje pobo piji. Motudure rugadu karebo.
7Nou Jesus meardu kurire jiwu ure jorduwadowu makore Pedroji. Akore: – Pagimijera nure ema rugadu.
Pedro meardure nou bataruji dukeje ure tugudau areia biaku epa tugu pudui dukeje ure taredo poboto ika piji. Nou pobo maereu po kokare nono dukodire Pedro aregodure nou pobo maereu okwa ka. 8Edu jaere pobo okwa jitu oto padure cem metros. Nono nouia ure jorduwadowuge eture ika kurireu tabo pobo okwa ka. Ere tumugudo nou tuwuge keje nou karebo. 9Etaregodure dukeje ere tudawuje nou ika kurireu piji. Dukejere erdure Jesusji nono. Erdure joruji, kare epadure joradu keje duji jamedu. Ia amireu padure joradu keje jamedu. Jesus maragodae reo. 10Nono Jesus makore ei. Akore: – Mato ia tare bitowu karebo itae.
11Simão Pedro ure tugirimi ika ka pugeje kare ewagai. Ure nou buke tawuje ika piji. Ure reko pobo okwa ka. Nou buke korobadure kare kurireugebo. Kare enodo padure kejeboere cento e cinquenta e cinco nou buke tada. Mare buke ukare tuwowuje ebo. 12Nono Jesus makore ei pugeje. Akore: – Mato. Tagwagewo.
Nou Jesus ure jorduwadowuge enarakare Jesus ie bagai. Erduware ure ema duji rugadu. 13Nono Jesus ure tugeragu amireuji dukeje ure maku nou ture jorduwadowuge etai. Nono ure kare emagu etai jamedu.
14Ainore Jesus rore tuwo nou ture jorduwadowuge erdudo pudui. Tiewodure dukodi rugadu.
Jesus Makore Pedroji
15Enogwagere dukeje Jesus makore Simão Pedroji. Akore: – Akiere Simão. João onaregedu nure aki. Aki na ameardu kurire i rugadu awu amedage epiji?
Pedro akore: – Ikimijera nure aki rugadu. Imeardu kurire ai rugadu.
Jesus akore: – Aetu pemegado inagu carneiro dogei. Mare carneiro dogei karega inagoino. Meartorure iwuge eire inagoino.
16Nono Jesus makore Pedroji pugeje. Akore: – Simão. João onaregedu nure aki. Aki na ameardu kurire i rugadu?
Pedro akore: – Uu. Ikimijera nure aki. Imeardu kurire ai rugadu.
Jesus akore: – Aetu pemegado inagu carneiro dogei. Mare carneiro dogei karega inagoino. Meartorure iwuge eire inagoino.
17Nono Jesus makore Pedroji pugeje. Akore: – Simão. João onaregedu nure aki. Ameardu kurire i na?
Jesus makore aino pugeje dukodire Pedro kiarigodure rugadu. Akore: – Ikimijera nure aki rugadu. Arduware boe jamedu boeji. Imeardu kurire ai duji.
Jesus akore: – Aetu pemegado inagu carneiro dogei. Mare carneiro dogei karega inagoino. Meartorure iwuge eire inagoino. 18Boe jokodu jire inagoino ai. Iparedure aki dukeje are arugadu atuwo akaidure jiboe ka. Mare apegagodumode dukeje ro pegareuge emode tugeragu ai tuwo akana raido tuwo akera kogudo rugadu tuwo atudo taidure jiboe ka tuwo awido.
19Jesus akoino dutabo ure Pedro bie ro pegareuge eromoduie jitu duji. Ro pegareuge emoduie Pedro bito mare du inodu tabo Pedro umodukaie tugera ra tumeartorure Pao Kurireu jitu piji rugadu. Dukodire boe erduwamoduie Pao Kurireu pemegare rugadu duji. Emoduie Pao Kurireu ie kurido rugadu duji.
Čare Jesus makore Pedroji pugeje. Akore: – Mato itabo.
Pedro Aidure Tuiorduwawo Nuba Boemode Nouia Jesus Ure Jorduwadowuji
20Pedro ure tumegido dukeje jordure nou Jesus meardu kurire jiwu imeduji. Jesus ure jorduwadowu imedu nure ema jamedu. Marigudu Jesus okwagere nou ture jorduwadowugebo boečoji dukeje nou ure jorduwadowu ure tuburedo Jesusji tunaragoduwo Jesusji nubureu imedu koiaba umode Jesus maku boe eimijerage pegareuge etai. Nou Jesus meardu kurire jiwu imedu emare unarare Jesusji marigudu.
21Aino čare Pedro jordure nou Jesus meardu kurire jiwu imeduji dukeje makore Jesusji. Akore: – Nuba boemode awu pamediaji?
22Jesus akore: – Itaidumodukare bikawo jii toro itaregodure du ka du bimodukare rugadu. Mare amororamagadukaba bagai. Ameartorudo imagore jiboeji rugadu.
23Nou Jesus ure jorduwadowuge emeardaere Jesus makore nou tumeardu kurire jiwu imedu bimodukaie duji. Mare makokare aino. Akore: – Itaidumodukare bikawo dukeje bimodukare rugadu.
24Ire Jesus akoino. Imire ikiere João. Jesus ure jorduwadowu nure imi. Imagore awu Jesus rore jiboeji boe ewiagai. Ire bu bapera keje jamedu. Boe jokodu jire inagoino tawiagai.
25Jesus rore ia turoji jamedu. Mare bapera kurimode rugadu boe ewo Jesus rore jiboe makore jiboe jamedu boe bu nou bapera keje. Boe mode bataru jamedu bu bapera keje dukeje kodumode awu moto kori rugadu.