Hebreus
Awu Atugoreboe Makudure Judeu Doge Meartorure Jesus Jiwuge Etai Boetoji
1Pao Kurireu Ure Tonaregedu Arego Mato Tuwadaru Tabo Boe Etae
1Marigudu Pao Kurireu makore pawobe Judeu doge mariguduwugei. Mare ukare tuwadaru jamedu boe maku boe etai. Makokare boe eiamedu boei. Makore tu nou makore Pao Kurireu bataru jiwugei tu rugadu ewo boe ewie Pao Kurireu bataruji. Mare ukare tuwadaru rugadu maku etai. Makore ia tuwadaruji dukeje makokare pugeje. Toro ia meri keje makore nou boei pugeje. Marigudu Pao Kurireu ure ia tuwadaru maku nou makore Pao Kurireu bataru jiwuge etai eniau tada. Mare ia tuwadaru Pao Kurireu ure ia boe erdudo pudui tumagowo ei tuwo ewie tuwadaruji. Makore ia tuwadaruji ia makore Pao Kurireu bataru jiwuge ewiagai. Makore ia tuwadaruji toro ia boe ewiagai pugeje. Ainore Pao Kurireu rore marigudu tuwo tuwadaru maku nou makore Pao Kurireu bataru jiwuge etai ewo boe ewie tuwadaruji. 2Mare aino ukare aino pugeje. Aino čare Pao Kurireu ure tonaregedu arego mato pagae makowo pawiagai rugadu. Ainore Pao Kurireu rore tuwo tuwadaru maku boe etai rugadu. Pao Kurireu ure nou tonaregedu udo moto to baru to. Pao Kurireu makore marigudu tuie tugeragu nou tonaregeduji tumoduie boe jamedu boe maku ai mare kuri je karega, toro ia meri keje. Nou meri aregodumode makore jiboe ka dukeje boe jamedu boe makudumode ai. 3Pao Kurireu rore jiboe ure nono jorugu pemegareu ure tudawuje piji dumogadure. Mare jorugu ji karega inagoino. Pao Kurireu rore jiboe pemegare rugadu boe jamedu boe kori. Nou onaregedu o jorugu ure nono tuo o jorugu mogadure. Mare jorugu ji karega inagoino. Onaregedu rore jiboe pemegare rugadu nono tuo ro mogadure. Ure nono tuo mogadure rugadu. Rakare rugadu. Onaregedu emare jetu pemegare baruji kuieje dogei mare tu tuwadaru rakareu tabo rugadu. Jetu pemegare motoji. Jetu pemegare moto kejeboe jamedu boeji. Mare tu tuwadaru rakareu tabore rore aino. Turo tabo karega. Tugera tabo karega. Tu tumagore jiboe tabore jetu pemegare nou boe jamedu boeji. Makore jiboe jeture pudui rugadu tu tu je. Jetumode pudui rugadu jii toro rugadu. Umode turo rakareu towuje tu tuwadaru tabo rugadu. Emare aregodure mato moto ka jamedu tuwiwo boe eiamedu boe ero pegareu moriče Pao Kurireu biagoduwo boe ero pegareu piji. Dukejere ure tugirimi baruto pugeje. Nono ure tumugudo Tuo Kurireu ukana pemegareu jagwai. Pao Kurireu rakare rugadu boe jamedu boe kori.
Pao Kurireu Onaregedu Ie Kurire Rugadu
4Dukodi čare Pao Kurireu onaregedu kurire rugadu nou Pao Kurireu utugarege baru tadawuge epiji. Pao Kurireu ure tonaregedu ie kurido nou tudugarege baru tadawuge ekie kori. 5Padure bapera kejewu Pao Kurireu bataru akore: – Itonaregedu nure aki. Awu meriji ao nure imi rugadu.1.5 Awu bataru padure Salmo 2.7 keje.
Ainore Pao Kurireu akore marigudu. Mare tudugarege baru tadawuge ei karega akoino. Tonaregedu jire akoino. Ia padure bapera kejewu Pao Kurireu bataru akore jamedu. Akore: – Uo mode imi. Itonaregedu mode ema.1.5 Awu bataru padure 2 Samuel 7.14 keje. Padure 1 Crônicas 17.13 keje jamedu.
Ainore Pao Kurireu akore marigudu. Mare ia tudugare baru tadawu ji karega akoino. Tonaregedu jire Pao Kurireu akoino tu rugadu. Ainore Pao Kurireu akore marigudu. 6Nono ure nou tonaregedu boetojiwu rawuje baru piji moto ka dukeje makore nou tudugarege baru tadawugei. Akore: – Tabu jodo tamago pemegawo awu itonaregeduji taiamedu boe puapo.1.6 Awu bataru padure Deuteronômio 32.43 keje.
7Pao Kurireu makore pugeje. Akore: – Pao Kurireu ure tudugarege baru tadawuge edo nono bakuru mogadure. Pao Kurireu ure tudugarege baru tadawuge edo nono joru mogadure.1.7 Awu bataru padure Salmo 104.4 keje.
Tudugarege baru tadawuge eire Pao Kurireu akoino. 8Mare Pao Kurireu makore tonaregeduji. Akore: – Pao Kurireu nure aki. Boe eimijera kurireu mode aki jii toro rugadu. Du akedumodukare rugadu. Aetu pemegamode meartorure aiwugei aro pemegareu tabo akaiwo pemegareu tabo. 9Ameardu kurire boe ero pemegareuji. Ardu pegare boe ero pegareuji. Dukodire ameartorure jiwu Pao Kurireu ure tugeragu ai tuwo boe eimijera kurireudo aki. Ure aegaredo ai. Ure akie kurido amedage eiamedu boe ekori.1.9 Awu bataru padure Salmo 45.6-7 keje.
Tonaregedu jire Pao Kurireu akoino marigudu.
10Makore pugeje. Akore: – Boe eimijera kurireu nure aki. Marigudu awu motokare raga. Barukare raga. Mare aki aragojere boetoji. Dukeje čare are moto towuje. Are baru towuje jamedu. Aki rugadure aroino. 11Moto akedumode. Baru akedumode. Mare akagedumodukare rugadu. Moto baru epegagodumode nono boe ekudau areia pegagodureu umogadure. 12Amode upodo puapo nono boe emode tugudau areia upodo puapo dumogadure. Mare boe ekudau areia ji karega inagoino. Amode baru akedudo. Amode moto akedudo. Dujire inagoino. Nono amode moto udo tuginai pugeje. Nono amode baru udo tuginai pugeje. Mare aki amode nono amogadure rugadu jii toro rugadu. Amodukare ado tuginai pugeje. Awimodukare rugadu jii toro rugadu.1.12 Awu bataru padure Salmo 102.25-27 keje.
Tonaregedu jire Pao Kurireu akoino.
13Pao Kurireu makore tonaregeduji jamedu. Akore: – Amugudo woe ikana pemegareu jagwai jii toro imode jordu pegare aiwuge etagedudo du ka. Imode jordu pegare aiwuge edo nono awure ure tamudo kejewu ira mogadure. Mare ira ji karega inagoino. Imode jordu pegare aiwuge eraga ta epiji. Dujire inagoino.1.13 Awu bataru padure Salmo 110.1 keje.
Ainore Pao Kurireu akore tonaregeduji. Makokare aino tudugarege baru tadawugei rugadu. 14Mare Pao Kurireu utugarege baru tadawuge emeartorure Pao Kurireu bataruji rugadu. Baru tadawuge nure emage. Pao Kurireu ure nou tudugarege baru tadawuge etarego nou tumode ekinorudowuge ewagai tuwo tugera maku etai. Ainore eromode tu tu je.
2Pao Kurireu Umode Boe Ekinorudo Rugadu
1Dukodire pagawo pagera ra Pao Kurireu bataru remawu piji. Pawiapagare ji marigudu. Pawiapaga pemegawo ji pameartoruwo ji rugadu pagaiduwo tu ji rugadu. Dukodire pawiapagamodukare ia boe ewadaruji pugeje. Pamodukare pawarigu boeto bataru remawu piji rugadu. 2Marigudu Pao Kurireu ure tudugarege baru tadawuge etarego mariguduwuge pawobe etae tuwadaru tabo. Nou Pao Kurireu utugarege baru tadawuge ere nou mariguduwuge pawobe ewie nou Pao Kurireu bataruji. Pao Kurireu bataru remawu jire egoino nou pawobei. Boe pegare nou meartorukare nou bataru jiwugei emeartorukaredu du moriče. 3-4Aino čare Pao Kurireu ure tonaregedu arego pagae tuwo pawie tumoduie paginorudo duji. Nou meardure nou bataru jiwuge boetojiwuge emagore pai nou bataru uie turugadu. Boe jokodu jie akoino rugadu. Nono Pao Kurireu ure boe erdudo turo rakareuji jamedu dukodire boe erduware boe jokodu jire akoino duji rugadu. Boe erdure nou Pao Kurireu ro rakare jiboeji dukeje eku kidure nou roinoduji. Dukodire erduware Pao Kurireu emare roino duji rugadu. Dukodire parduware boe jokodu jire Jesus akoino boei. Nono Pao Kurireu Uwari ure turo pemegareu maku nou meartorure Jesus jiwuge etai tuwo tumaragodae maku etai nono Pao Kurireu meardae mogadure dukodire parduware boe jokodu jire akoino duji rugadu. Dukodire inure tawiedu pemegado. Pameartorumodukare Pao Kurireu onaregeduji dukeje pawarigudumode bope doge eda kejewu joru pegareuto rugadu paro pegareu moriče. Mare pameartorumode Pao Kurireu onaregeduji dukeje umode paginorudo nou bope doge eda kejewu joru pegareu piji rugadu.
Ainore Nou Umode Boe Ekinorudowu Ure
5Nou čenagoino jiwu moto baru maiwu mode rugadu. Mare Pao Kurireu makokare tudugare baru tadawugei tumoduie boe eimijeragedo emage toro nou moto maiwu keje nou baru maiwu tada jamedu. Makokare aino ei. 6-8Mare marigudu boe ere Pao Kurireu bataru bu bapera keje. Pao Kurireu akore: – Boe ero pegare dukodire Pao Kurireu ure eraga ta epiji jao eragakawo nono Pao Kurireu utugarege baru tadawuge eraga mogadure. Mare Pao Kurireu meardu kurire boei rugadu. Pao Kurireu biagodukare boe epiji rugadu. Ure boe eimijera kurireugedo emage boe jamedu boe meartoruwo ei. Ure ekie kurido. Ure boe pemegado ei rugadu.2.6-8 Awu bataru padure Salmo 8.4-6 keje.
Ainore Pao Kurireu bataru akore marigudu. Akore Pao Kurireu uie boe pemegado boei boe eimijera kurireugewo emage. Akore moto kejeboe jamedu boe emeartoruie boei. Mare awu bataru jetukare pudui raga. Boe jamedu boe emeartorukare raga boei rugadu. Boe eimijera kurireuge karegure emage. 9Mare pardure Jesusji. Pao Kurireu ure Jesus raka ta piji jao rakakawo nono Pao Kurireu utugarege baru tadawuge emogadure. Aregodure mato moto ka tuwiwo boe ero pegareu moriče. Mare paga karega. Ainore Pao Kurireu meardaere marigudu tuwo turo pemegado boei. Jesus bire rugadu dukodire čare boe pemegare ji pugeje. Aino čare ie kurire rugadu. Boe eiamedu boe emago pemegare ji rugadu. 10Pao Kurireu rore jiboe ure turugadu. Emare ure boe jamedu boe towuje pudai. Emare jetu pemegare boe jamedu boeji akedukawo rugadu. Pao Kurireu rore Jesus jiboe ure turugadu jamedu. Pao Kurireu ure boe pegado Jesusji tuwo Jesus rakado uwo boe ekinorudo. Jesus meartorure nou tuo meardaeji boe pegawo pudui duji dukodire boe pemegare Jesusji rugadu. Dukodire čare umode boe pemegado boei jamedu. Umode ekie kurido nono Jesus ie mogadure boe eimijeragewo emage jamedu. Jesus emare makore boe ewagai emeartoruwo pudui. Makore ewagai tuwo ekinorudo ero pegareu piji ewarigudukawo bope doge eda kejewu joru pegareuto ero pegareu moriče.
11Boe emeartorumode Jesusji dukeje Jesus umode ero pegareu barigu epiji tuwo epemegado. Nono eiamedu boe etuwobe nure pugi. Dukodire Jesus pogurukare tumagowo nou meartorure puduiwugei tuwobe nuie emage dukodi. Etuo ure mitotu je dukodire akoino ei. 12Jesus makore tuoji. Akore: – Ireadodumode iwobe ewiagai arore jiboe jamedu boeji. Iwobe emode bato pui dukeje iramode akie tabo boe ewiagai apemegare duji.2.12 Awu bataru padure Salmo 22.22 keje.
Ainore Jesus akore. 13Makore pugeje: – Imeartorumode Pao Kurireuji rugadu.2.13 Awu bataru padure Isaías 8.17 keje.
Akore: – Imi reo. Pao Kurireu ure maku inaiwu tore eragojere woe itabo.2.13 Awu bataru padure Isaías 8.18 keje.
Ainore Jesus akore.
14Akore Pao Kurireu ore nuie emage rugadu. Boe eire akoino rugadu. Dukodire Jesus ure tudo nono boe emogadure boewo pudumi rugadu. Rore aino tuwiwo boe ero pegareu moriče tuwo bope doge eimijera raka ta piji rugadu. Nou bope doge eimijera aidure tuwo boe eiamedu boe ewido rugadu eduwo pudabo toro nou joru pegareu tada. 15Dukodire ure boe eiamedu boe ekiripagado emeartoruwo pudui tuwo etagedudo. Epagudure tuwiwo. Dukodire boe ere bope doge emeardaere jiboe towuje tu tu je. Dukodire eroiwakare tuwo tugera ra tumeartorure bope doge eimijera jitu piji. Mare aino čare Jesus ure boe ekinorudo nou bope doge epiji epagudukawo eče pugeje. 16Dukodi čare parduware Jesus ukare tugera maku tudugarege baru tadawuge etai duji. Ure tugera maku boe etai rugadu. Ure tugera maku Abraão uwobe etai rugadu. Mare Abraão uwobe remawuge ei karega inagoino. Meartorure Pao Kurireu jiwugeire inagoino. 17Mare ure boedo pudumi tuwo tugera maku nou meartorure puduiwuge etai. Dukodi čare nou ure boe enomea maku Pao Kurireu aiwuge eimijera kurireu remawu nure ema rugadu. Emare ure boe ero pegareu mori remawu maku Pao Kurireu ai rugadu. Dukodi čare Pao Kurireu biagodumode boe ero pegare jiboe piji rugadu. Jesus okudugodure boebo rugadu. Maragodu pemegare rugadu. 18Mare ia kimore. Bope doge eimijera ure turokogado Jesusji Jesus meartoruwo pudui mare Jesus meartorukare ji. Bope doge eimijera ure boe pegado Jesusji mare Jesus biapagakare nou bope doge eimijera meardaeji rugadu. Dukodire Jesus jorduware tuwo tugera maku boe etai jamedu ewiapagakawo bope dogei, emeartorukawo bope doge eimijeraji pugeje.
3Jesus Ro Kurire Moisés Kori
1Dukodi čare imode tawie. Imedage nure tagi. Meartorure Jesus jiwuge nure tagi dukodire iwobe nure tagi jamedu. Pao Kurireu makore tawagai tameartoruwo Jesusji. Dukodire tameartorure ji rugadu. Ča pawiapagawo tu Jesus meardaeji rugadu. Pamagore boe ewiagai pameartoruie Jesusji rugadu. Pao Kurireu ure Jesus rawuje mato moto ka tuwadaru tabo tumagowo pawagai. Ure boe enomea maku Pao Kurireu aiwu Pagimijera Kurireu nure ema rugadu. 2Pao Kurireu ure tugeragu Jesusji maragoduwo pudai. Jesus meartorure Tuo Kurireuji rugadu nono Moisés meartorure Pao Kurireu jitu mogadure. Marigudu Moisés maragodure Pao Kurireu ai tietuwo Pao Kurireu uwaiji. Mare bai ji karega inagoino. Moisés jeture Judeu dogei Pao Kurireu ai. Jeture ei dukeje meartorure Pao Kurireuji rugadu. Aino čare Jesus meartorure tuoji nono Moisés meartoru mogadure. 3-4Boe emode bai pemegado tuwaiče. Mare Pao Kurireu ure boe jamedu boe towuje. Mare bai ji karega inagoino. Pao Kurireu ure tugeragu boei emeartoruwo pudui rugadu. Dujire inagoino. Mare boe emode ia bai pemegado tuwaiče dukeje ia boe emago pemegamode nou baiji emago pemegamode nou ure tuwai pemegadowu imeduji jamedu. Egomode: – Nou imedu jorduware rugadu tuwo tuwai pemegado.
Ainore boe egomode. Ča marigudu Moisés ure nono nou bai mogadure mare bai ji karega inagoino. Boe etaidure Moisesji. Emago pemegare ji. Mare aino čare Jesus rore jiboe kodure Moisés rore jiboe kori. Dukodire Jesus ure nono nou ure tuwai towujewu imedu mogadure. Mare ure tuwai towujewu ji karega inagoino. Jesus rore jiboe kodure Moisés kori rugadu. Dukodire boe emago pemegare Jesusji rugadu. 5Moisés maragodu pemegare Pao Kurireu ai tietu tabo Pao Kurireu uwaiji. Mare bai ji karega inagoino. Judeu dogeire inagoino. Moisés jetu pemegare Judeu dogei Pao Kurireu ai. Pao Kurireu utugare pemegareu nure ema. Moisés ure Judeu doge ewie Pao Kurireu makomoduie ei ia tuwadaruji toro ia meri keje. Moisés ure Judeu doge ewie nou Pao Kurireu makomode jiboeji jamedu. 6Mare Jesus Cristo emare Pao Kurireu onaregedu nure ema. Dukodire Pao Kurireu uwai tadawu boe eimijera kurireu nure ema. Mare bai ji karega inagoino. Meartorure Pao Kurireu jiwugeire inagoino. Eimijera kurireu nure Jesusče rugadu. Dukodire Jesus maragodae kurire Moisés maragodae kori tietu tabo meartorure Pao Kurireu jiwugei. Pagi pameartorure Jesusji. Parduware Jesus aregodumode pugeje duji. Pawo paragado pai pagawo pagera ra pameartorure Jesus jitu piji pabaga raiwo bagai rugadu. Mare paga karega. Pameartorumode Jesusji jii toro dukeje pamode nono Pao Kurireu uwai mogadure. Mare bai ji karega inagoino. Meartorure Jesus jiwugeire inagoino.
Meartorure Pao Kurireu Jiwuge Ewo Tamudo
7-8Pao Kurireu Uwari akore:
– Ameardumode Pao Kurireu makore aiboe jitu keje arokaba nono awobe mariguduwuge Israel doge ero mogadure. Edure boe maereu keje dukeje ere turokogado Pao Kurireuji. Emeartoru bokware Pao Kurireuji.
9Pao Kurireu akore: “Nou boe ere turokogado i. Egore pagaie inagoino ei, pagaie iroino ei. Dukodire ere ikiarigo. Joru oto padure quarenta ei erdure iro rakareu boeji. Mare du inodu tabo emeartoru bokware i rugadu.
10“Dukodire ikorigodure ei. Inagore: ‘Emeartorukare iwadaruji rugadu. Ere tugera ra ipiji tumeartoruwo ia boei.’ ” Ainore Pao Kurireu akore.
11– Akore: “Ikorigodure ei. Ire iwadaru maku etai. Inagore: ‘Ire ia moto maku nou boe etai emuguwo keje, ewo tamudo nono. Mare aino čare etaregodumodukare nou moto ka rugadu. Emugumodukare nou moto keje rugadu. Emodukare tamudo nono rugadu.’ ”3.11 Awu bataru rugadu boe padure Salmo 95.7-11 keje.
Ainore Pao Kurireu akore. Mariguduwuge Israel dogeire akoino.
12Imedage nure tagi. Tagaiwodo tameardaere jiboeji. Tameardae pegareu barigu tabiji. Tamodukare tameardae pegareu barigu tabiji dukeje nou tameardae pegareu umode tameartoru akedudo Pao Kurireuji. Mare tarokaba aino. Tagaba tagera ra Pao Kurireu piji rugadu. 13Tagera maku puai tawo pu jorduwado. Boe ero pegamode dukeje nou boe ere tiekiripagado turo pegare dutabo. Dukodire erduwamodukare turoino jiboeji. Ainore boe erore tumeartoru bokwawo Pao Kurireuji rugadu. Mare tagi tagera maku puai tu tu je tawo pu jorduwado tarore jiboeji tarokawo nono nou meartoru bokwareuge ero mogadure. Pao Kurireu bataru akore: “Awu meriji” aino. Dukodire pameartoruwo Pao Kurireu bataruji awu meriji rugadu kuri aino rugadu. 14Pameartorure Jesusji rugadu. Pawo paragado pai pagawo pagera ra pameartorure jitu piji jii toro rugadu. Mare paga karega. Pameartorumode ji jii toro rugadu dukeje pamugu pemegamode Jesus Cristo apo rugadu.
15Marigudu Pao Kurireu akore:
– Tawobe mariguduwuge emeartoru bokware Pao Kurireuji tumeartoruwo ia boei pugeje. Mare tarokaba nono ero mogadure. Tameardumode Pao Kurireu makore tai boeji awu meriji dukeje tameartoru bokwakaba ji rugadu kuri aino rugadu.3.15 Awu bataru padure Salmo 95.7-8 keje.
Ainore Pao Kurireu akore. 16Israel dogeire akoino. Nou Moisés ure tawuje Egito moto pijiwugeire Pao Kurireu akoino. Emeartoru bokware Pao Kurireuji tumeartoruwo toro ia boei. 17-18Nono Pao Kurireu korigodure ei rugadu. Dukodire Pao Kurireu akore: – Ire ia moto maku etai emuguwo keje ewo tamudo nono. Mare aino čare etaregodumodukare nou moto ka rugadu. Emugumodukare keje rugadu. Emodukare tamudo nono rugadu.
Nou meartoru bokware Pao Kurireu jiwugeire Pao Kurireu akoino. Dukodire ure emeru pagado toro boe maereu keje. Joru oto padu keje boere quarenta ei toro nou boe maereu keje rugadu. Nou meartoru bokwareuge eiamedu boe ewudure tuwi tabo nono nou boe maereu keje. 19Dukodire parduware Pao Kurireu meardaeji. Nou boe emeartorukare Pao Kurireuji dukodire emugukare nou moto keje rugadu nono Pao Kurireu meardae mogadure rugadu.
41-2Aino čare Pao Kurireu makore pai jamedu tumoduie pagamudo nono turoiago Israel dogei dumogadure. Israel doge emeardure Pao Kurireu makore pudui boeji. Mare emeartorukare ji. Dukodire nou Pao Kurireu bataru pemegakare ei. Mare aino čare pameardure Pao Kurireu bataru pemegareuji jamedu. Jesus jiboe jire akoino. Makore tumoduie pagamudo jamedu. Dukodi čare pawo paragado pai pameartoruwo Jesusji rugadu. 3Pameartorumode ji dukeje umode pado pagamudo rugadu. Mare Israel doge ekare tamudo. Pao Kurireu akore: – Ikorigodure ei dukodire ire ia iwadaru maku etai pugeje. Imagore ei etaregodumodukaie imode maku etaiwu moto ka jii toro. Imoduie edo tamudo nou moto keje mare aino imodukaie edo tamudo pugeje.4.3 Awu bataru padure Salmo 95.11 keje.
Ainore Pao Kurireu akore. Ema ure tamudo marigudu. Ure baru to, ure moto to marigudu. Dukodire ure tumaragodae iado. 4Ainore padure bapera kejewu Pao Kurireu bataru ure. Akore: – Meri oto padure seis Pao Kurireuji tuwo boe jamedu boe towuje dukejere nou barogwato ure tamudo.4.4 Awu bataru padure Gênesis 2.2 keje.
Ainore Pao Kurireu akore. 5Mare nouia Pao Kurireu bataru akore jamedu: – Imagore ei etaregodumodukaie imode maku etaiwu moto ka rugadu jii toro. Imoduie edo tamudo nou moto keje mare aino imodukaie edo tamudo pugeje.
Ainore Pao Kurireu akore. 6Nou meardure nou Pao Kurireu bataru pemegareu boetojiwuge emeartorukare nou bataruji dukodire Pao Kurireu ukare edo tamudo rugadu. Dukodire ure nou tuwadaru pemegareu maku iage etai emeartoruwo ji. 7Dukodire toro ia joru keje ia meri keje pugeje makore boe eimijera kurireu Daviji uwo nouia boe ewie. Akore: – Tameardure Pao Kurireu bataruji dukodire tameartoru bokwakaba ji awu meriji rugadu.4.7 Awu bataru padure Salmo 95.7-8 keje.
Pao Kurireu akore: “Awu meriji” aino tuwo nou boe erduwado tumoduie edo tamudo nono turoiago nou mariguduwuge Israel dogei dumogadure.
8Josué ure Israel doge etarego nou Pao Kurireu ure maku etaiwu moto ka. Emugure keje. Mare Josué ukare nou Israel doge edo tamudo nono Pao Kurireu meardae mogadure. Dukodire Pao Kurireu makore pugeje toro ia joru keje ia meri keje pugeje. Akore tumoduie meartorure puduiwuge edo tamudo ia meri keje. 9-10Dukodire parduware meartorure Pao Kurireu jiwuge emode tamudo rugadu. Emode tamudo tumaragodae piji nono Pao Kurireu ro mogadure. Pao Kurireu maragodure jiwu meri oto padure seis tuwo moto towuje dukejere ure iado. Nou barogwato ure tamudo nou tumaragodae piji. 11Dukodi čare pawo paragado pai pamaragodu pemegawo jii toro rugadu Pao Kurireu uwo pado pagamudo jamedu. Parokawo nono nou mariguduwuge Israel doge ero mogadure. Emagere emeartorukare Pao Kurireuji dukodire ukare edo tamudo rugadu. 12Pao Kurireu makore jiboe ure nono tariga kurireu meridodure pudogidu umogadure. Mare tariga ji karega inagoino. Pao Kurireu makore jiboe umode parduwado parore jiboeji rugadu. Du jire inagoino. Umode parduwado pameardae jamedu boeji pemegare duji pegare duji. Boe eroiwakare tuwo tumeardae biado Pao Kurireu piji. Boe eragakare Pao Kurireu makore jiboeji. Pao Kurireu makore jiboe rakare rugadu. Makomode pameardaere jiboeji jetumode pudui rugadu. Du jire inagoino. 13Boe eroiwakare tuwo tumeardae biado Pao Kurireu piji. Pao Kurireu jorduware boe emeardae jamedu boeji. Jorduware boe jamedu boeji moto keje baru tada jamedu. Dukodire pawadrarodumodukare parore jiboeji Pao Kurireu biagai. Pareadodumode rugadu parore jiboeji Pao Kurireu biagai rugadu.
Ure Boe Enomea Maku Pao Kurireu Aiwu Pagimijera Kurireu Nure Jesusče Rugadu
14Dukodi čare pameartoruwo Jesusji rugadu. Pagawo pagera ra piji. Jesus uture kuri Pao Kurireu ae rugadu. Pao Kurireu Onaregedu nure ema rugadu. Ure paro pegareu mori maku Pao Kurireu ai rugadu. Dukodire ure boe enomea maku Pao Kurireu aiwu pagimijera kurireu nure ema rugadu. 15Paragakare mare Jesus okudure pagabo rugadu. Jorduware nou pagoda pegareuji. Kodure ji jamedu. Bope eimijera Satanás ure turokogado Jesusji jamedu nono turore pai dumogadure tuwo Jesus ro pegado mare Jesus biapagakare ji. Jesus ro pegakare rugadu. 16Aino čare Jesus rakojere nono Pao Kurireu apo tumagowo ji pabaru tabo. Dukodi čare pabogurukawo. Pamagowo toro baruto Pao Kurireu bagai rugadu. Pao Kurireu okudugodumode pagabo rugadu. Emare umode turo pemegado pai. Boe rakare pai dukeje umode tugera maku pagai rugadu.
51Marigudu Pao Kurireu makore Israel dogei ewo tugeragu imei emaragoduwo Pao Kurireu uwai tada Pao Kurireu utugaregewo emage nou Israel doge eparu tabo ewo nou Israel doge enomea maku Pao Kurireu ai. Nono Pao Kurireu utugarege eimijera kurireu mode tu tu je jamedu. Nou eimijera kurireu umoduie boe egu barogo kowu tuwo maku Pao Kurireu ai boe ero pegareu moriče. Maragodaewo tu nouče rugadu. 2Mare nou eimijera kurireu raka bokware jamedu nono tuwobe emogadure. Dukodire jorduware togudugoduwo boebo turo butuguwo jorduwa bokwareugei, ro pegareugei. 3Nou eimijera kurireu ro pegare jamedu nono tuwobe emogadure jamedu. Dukodire ure boe egu barege ekowu tuwo maku Pao Kurireu ai boe ero pegareu moriče turo pegareu moriče jamedu. 4Boe karega ere tugeragu nou boe eimijera kurireuji. Pao Kurireu koiare ure tugeragu nou imeduji tudugare boe eimijera kurireuwo ema, uwo nou tapira kodu kowu tuwo maku Pao Kurireu ai boe ero pegareu moriče. Nou Pao Kurireu ure tugeragu jiwu boetojiwu iere Arão.
5Ainore Pao Kurireu rore tuwo tugeragu Jesusji jamedu. Jesus Cristo karega okwamagudure boe eimijerawo pudumi. Pao Kurireu ure tugeragu ji boe eimijera kurireuwo ema uwo boe enomea remawu maku Pao Kurireu ai. Pao Kurireu makore tonaregeduji. Akore: – Itonaregedu nure aki. Awu meriji ire Ao Kurireudo imi.5.5 Awu bataru padure Salmo 2.7 keje.
Ainore Pao Kurireu akore.
6Pao Kurireu makore ia tuwadaruji pugeje. Akore: – Aromode nono Melquisedeque ro mogadure. Amode boe enomea maku inai jii toro rugadu. Nou amaragodae akedumodukare rugadu.5.6 Awu bataru padure Salmo 110.4 keje.
Ainore Pao Kurireu akore tonaregeduji.
7Jesus rakojere woe moto keje dukeje makore baruto Tuo Kurireu bagai tragudu tabo Pao Kurireu uwo tudo tuginorudo tuwi piji. Mare aidure tumeartoruwo rugadu Tuo Kurireuji rugadu. Dukodire ure tudo nono Pao Kurireu utugare mogadure. Nono Pao Kurireu meardure nou tonaregedu makore pudui jiboeji. 8Pao Kurireu onaregedu nure ema rugadu. Mare boe pegare ji rugadu. Dukodire jorduwagodure tumeartoruwo Tuo Kurireuji rugadu. 9Nono Pao Kurireu ure tonaregedu pemegado rugadu nou tonaregedu uwo boe ekinorudo. Dukodire boe emeartorumode ji dukeje umode nou boe ekinorudo ewarigudukawo bope doge eda kejewu joru pegareuto. Umode emugudo Pao Kurireu apo du akedumodukare rugadu. 10Nono Pao Kurireu ure boe ewie rugadu nou tonaregedu rore jiboeji. Romoduie nono Melquisedeque ro mogadure jii toro rugadu. Ure boe enomea maku Pao Kurireu aiwu boe eimijera kurireu moduie ema rugadu. Makomoduie Pao Kurireuji boe eparu tabo tu tu je, jii toro rugadu.
Makore Nou Boei Ekawo Tugera Ra Tumeartorure Jesus Jitu Piji
11Čewadaru kurire kimo čewo tarduwado. Mare nou čewadaru rakare dukodire čeroiwakare čewo tarduwado ji. Tagaora rakare tarduwawo boeji. 12Marigudu tameardure Pao Kurireu bataruji. Tarduwawo ji marigudu mare tarduwakare. Dukodire taroiwakare tawo ia boe erduwado Pao Kurireu bataruji. Tagaidure tu nou tarduware jiwu Pao Kurireu bataru rogu kurikareuji. Tare nono boe etore emogadure. Kudure mokuru kuru čewuge nure tagi. Mare mokuru kuru ji karega inagoino. Pao Kurireu bataru kurikareu jire inagoino. 13-14Boe etore emagere ekudumode mokuru kuruče. Imere aremere enogwagemode boe eke remawuji. Tarduware jiboe ure nono mokuru kuru mogadure dukodire tare nono boe etore emogadure. Mare mokuru kuru ji karega inagoino. Boe etore ei karega inagoino. Tarduware tu Pao Kurireu bataru rogu kurikareuji. Tarduwakare Pao Kurireu bataru kurireuji. Dujire inagoino. Boe erduwamode Pao Kurireu bataru kurireuji rugadu dukeje erduwamode boe ero pemegareu ure tuginai boe ero pegareu piji duji. Erduwamode tuwo tugera ra turo pegareu piji. Erduwamode tuwo tugeragu boe ero pemegareuji tu tu je.
61-3Pawiagodukawo parduware jiwu Pao Kurireu bataru piji. Mare aino ča parduwagoduwo rugadu Pao Kurireu bataru rugadu boeji. Marigudu boe ere tawie Pao Kurireu bataruji. Ere tawie tamodukaie taginorudo taro pemegareu tabo. Ere tawie tawo tagera ra taro pegareu piji. Egore tameartorumoduie Jesusji dukeje umoduie taginorudo bope doge eda kejewu joru pegareu piji. Tameartorumoduie dukeje tamagomoduie tagao pegododuwo. Boe emoduie tugera bu tawugeje tumagowo baruto Pao Kurireu bagai tabaru tabo. Pao Kurireu umoduie meartorure puduiwuge eewodudo pugeje. Pao Kurireu umoduie meartorukare puduiwuge ewarigu toro bope doge eda kejewu joru pegareuto rugadu eduwo nou joru tada jii toro rugadu. Awu Pao Kurireu bataru jire boe ere tawie marigudu. Ča tawiagodukaba piji. Mare ia kimore. Aino čare itaidure iwo tarduwado ia Pao Kurireu bataruji pugeje. Pao Kurireu meardaemode tuwo tugera maku pagai dukeje tarduwagodumode Pao Kurireu bataru jamedu boeji rugadu.
4Boe emode tugera ra tumeartorure Jesus jitu piji dukeje ekiarigodumodukare turo pegareuji pugeje. Emodukare tugirimi tumeartorure Jesus jitu ka pugeje. Erduware Pao Kurireu bataru pemegareuji marigudu tumeartoruwo Jesusji. Erduware marigudu baru tadaboe pemegare duji. Pao Kurireu Uwari makudure etai marigudu. 5Erduware marigudu Pao Kurireu bataru pemegare pudui duji. Erdure marigudu Jesus ro rakareuji. Erduware umode tugirimi mato pugeje moto ka duji. Nou rugadu boe jire erduware marigudu. 6Mare nou boe emode tugera ra nou jamedu boe piji tumeartorure Jesus jitu piji dukeje nou boe ekiarigodumodukare turo pegareuji pugeje, emodukare tugera ra turo pegareu piji pugeje. Turo pegareu tabore emode Jesus udo nono bitodureu mogadure pudai pugeje. Turo pegareu tabore emode ia boe emeardae pegado Jesusji pugeje.
7-8Pao Kurireu ure bubutudo moto ka tuwo moto pegodo boe eno boepa tadaboe botu pemegawo. Boe eke kurimode nou boepa tada dukeje nou boepa pemeganure. Mare botoguru botumode boepa tada tu rugadu umode rorogodudo dukeje nou boepa peganure. Boe emode botoguru ukwa tawuje boe ewo kowu tuwo botoguru akedudo. Ča boe ere nono boepa mogadure jamedu. Mare boepa ji karega inagoino. Boe ero jire inagoino. Boe ero pemegareu bokwamode. Boe ero pegareu mode tu je dukeje ekodu puredumode Pao Kurireu mako pegawo ei. Dukodi čare umode ewarigu bope doge eda kejewu joru pegareuto rugadu. Dujire inagoino. Mare boe eromode nono Pao Kurireu meardae mogadure dukeje Pao Kurireu mako pemegamode ei. Ro pemegamode ei. Dujire inagoino.
9Awu čemagore jiboe rakare tai mare čemedage nure tagi. Čemeardu kurire tai. Tagiarigodukaba. Čerduware tarore jiboeji. Čerduware tameartorure Jesus jituji dukodire boe pemegamode tai rugadu. 10Pao Kurireu ro jetorore rugadu. Meardaemode tai boe remawu tabo. Biagodumodukare taro pemegare jiboe piji. Tare tagera maku meartorure Jesus jiwuge etai tu tu je. Tameardu kurire Pao Kurireuji dutabore taroino. Biagodumodukare nou inodu piji rugadu. 11Čedaidure nou tarore jiboeji rugadu. Dukodire inagoino tai. Tagaba tagera ra nou taro pemegare jiboe piji jii toro rugadu. Tarodo aino tagaidu tabo rugadu. Dukejere nou tameartorure jiwu Pao Kurireu makore tai jiboe jetumode pudui rugadu. 12Tagera kiarikaba. Tarodo nono nouia meartorure Jesus jiwuge ero mogadure. Ekiarigodukare. Epagare Pao Kurireu bagai tiegare tabo tugawo tugera ra tumeartorure jitu piji. Nono toro ia meri keje Pao Kurireu makore tumoduie boe maku etaiboe makudumode etai rugadu.
Pao Kurireu Makore Turomode Jiboe Jetumoduie Pudui Rugadu
13Marigudu Pao Kurireu makore Abraãoji tumoduie Abraão oredo. Mare paga karega. Ure Abraão biedu pemegado turomode jiboeji rugadu. Pao Kurireu kurire boe jamedu boe piji. Dukodire makokare iaboe ie tabo tuwo Abraão jorduwado tumode tumagore jiboe jetudo pudui duji. Makore tugie tabo rugadu tuwo Abraão jorduwado tumode tumagore jiboe jetudo pudui rugadu. 14Akore: – Imode imagore jiboe jetudo pudui rugadu. Imode boe pemegado ai. Imode akore etuwobe emagado rugadu.
Ainore Pao Kurireu akore. 15Abraão kiarigodukare. Upagare tiegare tabo nou Pao Kurireu makore puduiboe bagai. Upagare tiegare tabo jii nou Pao Kurireu makore puduiboe jetuwo pudui du ka rugadu. Nono Pao Kurireu ure tumagore jiboe maku Abraão ai rugadu. 16Pagi pamode boe erduwado ia boe eimijera kurireu ie tabo pamode pamagore jiboe jetudo pudui duji dukeje boe emagomodukare pawadaru jipagi pugeje. 17Ainore Pao Kurireu rore jamedu. Aidure tuwo boe erduwado rugadu. Tumodukaie ia tumeardae tawuje pugeje. Tumoduie tumagore jiboe jetudo pudui rugadu. Dukodire makore tugie tabo nou boe ewiagai erduwawo rugadu nou tumagore jiboe jetumoduie pudui rugadu. 18-20Pao Kurireu ie akedumodukare. Pao Kurireu makore jiboe akedumodukare jamedu. Jetumode pudui rugadu. Dukodire parduware Pao Kurireu batrarodumodukare rugadu. Nono parduware umode paginorudo duji. Dukodire pagiarigodu akedure. Dukodire pare paragado pai. Dukodire pamodukare pagera ra pameartorure Jesus jitu piji rugadu. Nou parduware jiboe umodukare tudawuje pabiji. Jesus umode paginorudo rugadu. Emare rakojere baru tada Pao Kurireu uwai remawu tada. Paroiwakare pawo paro pegareu morido mare Jesus ure tugu redo paro pegareu moriče. Ure nou turo reko toro baruto Pao Kurireu ae. Makore meartorure puduiwuge eparu tabo tu tu je Pao Kurireuji nono Melquisedeque ro mogadure. Mako kimore Pao Kurireuji nou meartorure puduiwuge eparu tabo jii aino rugadu. Makomode eparu tabo jii toro rugadu. Umode meartorure puduiwuge ekinorudo rugadu. Dukodire ure boe enomea maku Pao Kurireu aiwu boe eimijera kurireu nure ema jii toro rugadu.
7Ainore Melquisedeque Rore
1Ainore Melquisedeque rore. Mariguduwuge Salém7.1 Salém jire egore “boe epemegare pui” aino tuwadaru tabo. ba kurireu kejewuge boe eimijera kurireu nure ema. Nou mariguduwuge ere tomea maku nou Melquisedeque ai tu tu je uwo maku Pao Kurireu ai. Mariguduwuge Judeu doge etuo Abraão rugodure boe eimijerage pegareugei. Mare Abraão o tugobaigarege eragare nou boe eimijerage pegareuge eno tugobaigaregei dukodire ere etagedudo. Nono Abraão ure tugirimi nou turugodureu piji tuibagi tuwai ka nou to tugobaigaregebo, nou ture tugeragu jiboe tabo. Nou boe eimijerage pegareuge enoere. Dukodire Abraão ure tugeragu nou enoeji epiji tuwo tugirimi tabo tuwai ka. 2Abraão kodure awaraji tugobaigaregebo dukeje etaregodure nou Melquisedeque togi. Nono Melquisedeque mako pemegare Abraãoji boe pemegamoduie Abraãoji. Nono Abraão ure ia nou ture tugeragu jiboe maku Melquisedeque ai tomeawo nono makudure Pao Kurireu aiboe umogadure tu tu je7.2 Diero mode dez dukeje umode maku Pao Kurireu aiboe mode mitotu je. Diero mode cem dukeje umode maku aiboe mode dez rugadu. Brae egore “décima parte” aino. Egore “dez porcento” aino. Ainore Pao Kurireu akore marigudu makudure pudaiboe mode tu tu je.. (Nou jaoboe egore ro jetororeu boe eimijera kurireu nuie ema dukodire egore Melquisedeque aino ji tuwadaru tabo. Egore boe emugu pemegare apowu boe eimijera kurireu nuie ema jamedu.) 3Boe erduwakare Melquisedeque uoji učeji. Boe erduwakare nouia uwobei jamedu. Boe erduwakare nou Melquisedeque boture kejewu meriji. Erduwakare bire kejewu meriji. Dukodire ure nono Pao Kurireu Onaregedu mogadure. Kodire boe ere tomea maku tu tu ai du akedukare jii aino.
4Iwo tarduwado imedu kurireu nure ema duji. Jao pawobe etuo kurireu Abraão ure ture tugeragu jiboe kado puiato. Dukeje ure ia maku Melquisedeque ai7.4 Ure aino pugeje. Dez mode dukeje umode maku aiboe umode mitotu je. Akaiwodo 7.6-14 kejewu bataruji jamedu. Awu jire akoino nono jamedu. uwo tomea maku Pao Kurireu ai. 5Toro ia meri keje ia Abraão uwobe etonaregedu iere Levi. Pao Kurireu ure Israel doge eno bakaru maku Moisés ai dukeje nou bakaru makore nou Levi uwobei emaragoduwo Pao Kurireu ai emagowo tu tu Israel dogei ewo toe kado puiato ewo ia maku pudai tomeawo Pao Kurireu ai jamedu. Nou Levi uwobe ime eiamedu boe emaragodumode tu Pao Kurireu ai rugadu jii toro rugadu. 6Mare Melquisedeque uwobe karegure emage. Abraão uwobere emage. Mare Abraão ure toe kado puiato tuwo ia maku Melquisedeque ai uwo tomea maku Pao Kurireu ai. Dukejere Melquisedeque mako pemegare Abraão paru tabo boe pemegawo Abraãoji. Pao Kurireu makore marigudu turo pemegamoduie Abraãoji. Mare nouia meri keje Melquisedeque mako pemegare Abraão paru tabo boe pemegawo ji. 7-10Boe erduware marigudu mako pemegare boe eparu tabowu bataru kurire nou tumagore jiboe kori. Dukodire Melquisedeque bataru kurire Levi bataru kori. Mare Abraão ure toe kado puiato tuwo ia maku Melquisedeque ai uwo tomea maku Pao Kurireu ai. Mare Levi botukare raga. Boe egore nou Levi metu kimoie ia Abraão onaregedu tada. Botumoduie toro ia meri keje. Dukodire boe egore nou Levi metuie tuo Abraão tada. Dukodire Abraão ure toe kado puiato Melquisedeque ai dukeje Levi jamedu ure maku Melquisedeque ai meture nou Abraão tada kodi. Dukodire parduware Melquisedeque bataru kurire Levi bataru kori. Mare toro ia meri keje Levi boture. Nono uwobe emaragodure Pao Kurireu ai jamedu. Emagore boei ewo toe kado puiato ewo ia maku pudai tuwo tomeado Pao Kurireu ai. Mare nou Levi uwobe eiamedu boe ewire tu tu je. Mare nou Melquisedeque čare boe erduwakare bire kejewu meriji. Ainore Pao Kurireu bataru akore. Dukodire parduware Melquisedeque bataru kurire Levi bataru kori, Levi uwobe ewadaru kori jamedu.
11Ainore Pao Kurireu rore rugadu. Pao Kurireu ure Israel doge eno bakaru maku etai. Nou bakaru makore nou Levi uwobei emaragoduwo Pao Kurireu ai, emagowo Israel dogei ewo toe kado puiato ewo ia maku pudai tomeawo Pao Kurireu ai jamedu. Ainore Israel doge eno bakaru akore. Dukodire nou Levi uwobe erore aino rugadu. Mare nou Levi uwobe eiamedu boe ewire tu tu je. Ia erore jiboe ukare turugadu jamedu. Dukodire Pao Kurireu ure ia imedu ro tuginaiwu mugudo emugato. Nou imedu tuginaiwu rore nono Melquisedeque ro mogadure. Rokare nono Levi onaregedu Arão uwobe ero mogadure pugeje. 12-14Ča Jesus jire Pao Kurireu akoino. Judá uwobe nure ema. Levi uwobe karegure ema. Marigudu Israel doge ekare ia toe maku nouia Judá uwobe ai uwo tomea maku Pao Kurireu ai. Judá uwobe ekare boe enomea maku Pao Kurireu ai rugadu jii aino. Emaragodukare Pao Kurireu uwai tada. Boe ere ia toe maku tu Levi uwobe etai ewo tomeado Pao Kurireu ai tu tu je. Ainore Pao Kurireu ure maku Moisés aiwu bakaru akore rugadu. Mare aino čare Pao Kurireu makore Judeu dogei erokawo aino pugeje. Eromode jiboe ure tuginai pugeje nou mariguduwuge tuwobe ero piji. Aino čare Pao Kurireu ure nou Judeu doge7.12-14 Marigudu nou boe ekiere Israel doge aino. Jesus rakojere moto keje dukeje ekiere Judeu doge aino. Ainore ekiere jii aino rugadu. eno bakaru udo tuginai pugeje Judeu doge ewo toe maku Pagimijera Jesus ai pugeje, ekawo toe maku Levi uwobe etai rugadu.
Nou Boe Enoe Makudure Aiwu Imedu Ure Nono Melquisedeque Mogadure
15Dukodi čare parduware rugadu Jesus kurire Levi uwobe epiji duji. Jesus aregodure boe etae. Rore nono Melquisedeque ro mogadure. 16Levi uwobe mode ema dukeje Jesus romode nono Levi uwobe ero mogadure. Romode nono Judeu doge eno bakaru umogadure. Mare Levi uwobe karegure ema. Levi uwobe eiamedu boe ewire tu tu je. Mare čare Jesus jewodure pugeje. Bimodukare pugeje rugadu jii toro. Dukodire Pao Kurireu ure nou tumaragodae tawuje Levi uwobe epiji tuwo maku Jesus ai rugadu. Dukodire Jesus maragodumode Pao Kurireu ai boe eparu tabo rugadu. Jesus makomode Pao Kurireuji boe eparu tabo rugadu. 17Padure bapera kejewu Pao Kurireu bataru akore: – Amaragodumode inai boe eparu tabo jii toro rugadu nono Melquisedeque ro mogadure. Du akedumodukare jii toro rugadu.7.17 Awu bataru padure Salmo 110.4 keje.
Ainore Pao Kurireu akore. 18Dukodire nou mariguduwuge pawobe erore jiboe akedure. Nou erore jiboe rakakare tuwo boe ekinorudo. Dukodire boe emodukare ia toe maku Levi uwobe etai pugeje. 19Boe emeartorure Moisés ure maku etaiwu bakaruji tuwo ia toe maku Levi uwobe etai mare nou bakaru ukare ero pemegado. Mare aino čare boe erduware ia bataru pemegareuji tumeartoruwo ji. Boe emeartorumode ji dukeje edu jaemodukare Pao Kurireu piji pugeje.
20Ia pugeje. Pao Kurireu makokare tumoduie tuwadaru jetudo pudui Levi uwobe etai. Emaragodure pudai mare makokare tumoduie tuwadaru jetudo pudui etai. 21Mare Jesus jire Pao Kurireu makore tugie tabo tumoduie tuwadaru jetudo pudui ai rugadu. Akore: – Marigudu imagore ai ikie tabo rugadu amaragodumoduie inai boe eparu tabo tu tu je jii toro rugadu. Imode imagore jiboe jetudo pudui rugadu. Iwiagodumodukare piji.7.21 Awu bataru padure Salmo 110.4 keje.
Ainore Pao Kurireu akore Jesusji. Tumeardae maiwu jire akoino.
22Nou Pao Kurireu makore Jesus jiwu meardae maiwu jeture pudui rugadu. Nono Jesus maragodae koiare Pao Kurireu umodukare tuwadaru mekido pugeje. Nou Pao Kurireu meardae pemegare nou meardae boetojiwu piji rugadu. Dukodi čare Jesus rore jiboe pemegare Levi uwobe ero piji.
23Levi uwobe emagare tumago tabo baruto boe eparu tabo. Eiamedu boe ewire nou tumaragodae piji. Dukodire ia Levi uwobe emugure emugato tu tu je. 24Mare Jesus bimodukare pugeje. Dukodire Jesus maragodae makudumodukare ia boe etai pugeje. 25Dukodire tu Jesus roiware tuwo boe ekinorudo. Ia bokware. Nono boe emeartorumode Jesusji makowo eparu tabo Pao Kurireu bagai dukeje Jesus umode ekinorudo rugadu. Rakojere nono Pao Kurireu apo rugadu. Okwamagudumode Pao Kurireuji nou meartorure puduiwuge eparu tabo rugadu tu tu je. Maragodae nure nou inoduče dukodi.
26Dukodire makore boe eparu tabowu kurireu nure ema rugadu. Jesus jorduware pagaidure jiboeji rugadu okwareu boeji jamedu. Jesus ro pegareu bokware. Ro pemegare tu rugadu. Ro pemegareu nure ema rugadu. Dukodire makore pabaru tabo rugadu Pao Kurireu bagai nou okwareboe bagai rugadu. Pao Kurireu ure Jesus udo tuginai ro pegareuge epiji. Pao Kurireu ure Jesus rutudo baruto rugadu. 27Levi uwobe emaragodure Pao Kurireu ai boe eparu tabo tu tu je. Mare ere ia boe egu barogo rogu bito tuwo nou barogo ku redo turo pegareu moriče boetoji. Ainore erore meri jameduji tu tu je. Dukejere ere ia boe egu barogo rogu bito pugeje tuwo ku redo pugeje nouia boe ero pegareu moriče jamedu. Ainore erore meri jameduji tu tu je. Ainore erore tumaragoduwo Pao Kurireu ai boe eparu tabo tuwo enomea maku Pao Kurireu ai.7.27 Akaiwodo Levítico 9.7 kejewu bataruji arduwawo nou Pao Kurireu ure maku Levi uwobe etaiwu emaragodae boeji. Mare Jesus rokare nono nou Levi uwobe ero mogadure. Ukare ia boe egu barogo bito. Jesus ure tumagu tuwidoduwo. Ukare boe egu barogo ku redo. Ure tugu redo. Ure redo boe eiamedu boe ero pegareu moriče rugadu. Nou rore inodu boe moriče ure turugadu rugadu. Dukodire bimodukare pugeje. Nou mori ure mitotu je. Pemegamode jii toro rugadu. Romodukare nono nou boe ero mogadure. 28Moisés ure maku Israel doge etaiwu bakaru makore ei ewo tugeragu Levi uwobe imei nou ure boe enomea maku Pao Kurireu aiwugewo emage. Mare eragakare tuwo turo pegareu barigu tubiji jamedu. Mare nou Moisés ure Israel doge eno bakaru maku etai dukeje toro ia meri keje Pao Kurireu makore tonaregeduji tumoduie tugeragu ji uwo boe enomea maku pudai. Pao Kurireu makore tugie tabo tumoduie nou tumeardae maiwu jetudo pudui rugadu. Dukodire nou ure boe enomea maku Pao Kurireu aiwuge eimijera kurireu nure Jesusče rugadu jii toro rugadu. Nono ča Pao Kurireu ure tonaregedu rakado ro pegakawo. Ro pegamodukare jii toro rugadu. Dukodire Pao Kurireu onaregedu pemegare rugadu nou Levi uwobe epiji rugadu.
8Jesus Maragodu Kigodure Pao Kurireu Ai Pabaru Tabo
1Jesus ure paro pegareu mori maku Pao Kurireu ai rugadu. Dukodire ure boe enomea maku Pao Kurireu aiwu boe eimijera kurireu remawu nure ema rugadu. Awu atugoreboe tabore inure tawie rugadu. Jesus mugure baru tada Pao Kurireu ukana pemegareu jagwai. Boe eimijera kurireu nure Pao Kurireuče rugadu. Mugure boe eimijera kurireu muga ira keje rugadu. 2Ča Jesus maragodure nono Pao Kurireu uwai remawu tada baru tada. Woe moto keje boe ere ia Pao Kurireu uwai towuje. Mare boe ekare nou baru tadawu Pao Kurireu uwai remawu towuje. Pagimijera Jesus emare ure towuje rugadu baru tada.
3Marigudu Judeu doge ere tugeragu ia Levi uwobe imei ewo Judeu doge enomea maku Pao Kurireu ai. Ere boe egu barege ewido. Ere nou boe egu barege eku redo tu tu je boe ero pegareu moriče nou mori makuduwo Pao Kurireu ai. 4-6Erore aino woe moto keje. Jesus rakojemode woe moto keje dukeje ure boe enomea maku Pao Kurireu aiwu modukare ema. Nou Levi uwobe erore aino marigudu nono nou Moisés ure maku Judeu doge etaiwu bakaru boetojiwu umogadure. Mare boe remawu ji karega eroino. Boe remawu jire Jesus roino baru tada rugadu. Nou Levi uwobe emaragodure woe moto keje Pao Kurireu uwai tada. Baru tada karega. Moisés rakojere tori aogeje dukeje Pao Kurireu ure Moisés jordudo nuba nou baru tadawu tuwai remawu ure. Pao Kurireu makore Moisesji uwo tuwai towuje moto keje jamedu uwo udo nono tuiordure jiwu bai mogadure.8.4-6 Awu bataru padure Êxodo 25.40 keje. Nono nou Levi uwobe emaragodure tu nou moto kejewu Pao Kurireu uwai ja tada. Emaragodaere nono Pao Kurireu maragodae mogadure. Mare remawu karega. Remawu rugadu mugure baru tada. Nou Levi uwobe emaragodukare nou baru tadawu Pao Kurireu uwai remawu tada. Mare Jesus rakojere nou baru tadawu Pao Kurireu uwai remawu tada rugadu. Dukodire boe remawu jire Jesus roino nono. Rore jiboe pemegare nou Levi uwobe erore jiboe kori rugadu. Dukodire nou Jesus aregodure tabowu bakaru maiwu pemegare nou Moisés ure maku Judeu doge etaiwu bakaru boetojiwu piji Pao Kurireu ro pemegawo boei rugadu. Nou bakaru maiwu makore jiboe pemegare nou bakaru boetojiwu piji rugadu.
7-8Nou bakaru boetojiwu pemegamode dukeje Pao Kurireu umodukare ia tumeardae maiwu maku boe etai pugeje eno bakaruče. Mare nou mariguduwuge emeartorukare nou Pao Kurireu meardae boetojiwuji. Nou meardae boetojiwu ukare boe ero pemegado. Dukodire Pao Kurireu mako pegare ei. Mako pegare nou ture maku boe etaiwu bakaru boetojiwuji. Nou Pao Kurireu makore jiboe padure bapera keje. Akore:
– Toro ia meri keje imode ia imeardae maiwu maku Israel doge etai eno bakaruče emeartoruwo ji. Israel moto kejewuge etuwobeire inagoino. Judá moto kejewuge etuwobeire inagoino jamedu.8.7-8 Israel moto kejewugere, Judá moto kejewugere eiamedu boe Judeu dogere emage rugadu. Mare marigudu ia eimijera ure tugeragu nou Israel moto kejewugei pudae nou iage epiji. Dupijire eno motore pobe aino. Ia iere Israel aino. Ia iere Judá aino. Mare nou mugure nou moto kejewuge eiamedu boe etuwobe nure pugi rugadu.
9– Nou imeardae maiwu umodukare nono nou boetojiwu mogadure. Ire nou mariguduwuge Israel doge etawuje Egito moto piji dukeje ire nou imeardae boetojiwu maku etai eno bakaruče. Mare emeartorukare nou bakaruji. Dukodire iro pemegakare ei jamedu.
10– Mare aino ia meri keje imode ia imeardae maiwu maku Israel doge etai eno bakaruče pugeje. Imode nou boedo tuginai etaiduwo tumeartoruwo i taidu tabo. Imode iwadaru tugu etaorato. Erduwamode imeardaeji rugadu. Erduwamode iroji rugadu. Dukodire emeartorumode tu i. Iwobe mode emage rugadu.
11– Boe eiamedu boe erduwamode i rugadu. Boe eimijerage kurireuge erduwamode i. Boe etugarege erduwamode i jamedu. Dukodire boe emodukare pu jorduwado i pugeje. Boe emodukare tuwobe erduwado i pugeje. Boe emodukare mugure pudabowuge erduwado i pugeje.
12– Imode ero pegareu jamedu boe barigu epiji. Iwiagodumode ero pegareu jamedu boe piji rugadu. Dukodire imodukare edo turo pegareu morido.8.12 Awu bataru padure Jeremias 31.31-34 keje.
13Ainore Pao Kurireu akore marigudu tuwo boe ewie tumoduie ia tumeardae maiwu maku boe etai eno bakaruče. Nou bataru tabore Pao Kurireu ure nou bakaru boetojiwu akedugodudo. Dukodire akedumode kuri je rugadu.
9Boe Emode Tubu Jodo Tumago Pemegawo Pao Kurireuji Baru Tada
1Nou Pao Kurireu ure maku Israel doge etaiwu bakaru boetojiwu ure erduwado ewo tubu jodo tumago pemegawo Pao Kurireuji woe moto keje. Ure erduwado tuwo ia bai rogu pemegado moto keje Pao Kurireu uwaiče jamedu boe emago pemegawo Pao Kurireuji nono nou bai rogu ja tada. 2-3Dukodire nou boe ere ia bai rogu rakodo tapira biri tabo. Nono ere ia areia kurireu jado nou bai oiagajeje tuwo ia ai kurido tuwo ia ai biagado. Nou areia kurireu motudure rugadu dukodire akedukare rugadu. Pegamodukare rugadu. Ere nou bai ja boe iedo. Nou bai ja kurireu jire egore: “Bai Tuginaiwu” aino. Nou bai ja biagareu jire egore: “Pao Kurireu Mugure Kejewu Bai Tuginaiwu” aino. Nou egore Bai Tuginaiwu aino jiwu ja tadare ere iaboe pemegado jorugu mugače. Ere ia ira pemegado jamedu nou Bai Tuginaiwu ja tada ture maku Pao Kurireu aiwu amireu muguwo nou ira aogeje.9.2-3 Akaiwodo Êxodo 25.23-40 e Êxodo 26.1-30 arduwawo nou Israel doge erore jiboeji.4Nou egore Pao Kurireu Mugure Kejewu Bai Tuginaiwu aino jiwu bai ja biagareu tadare ia tori kuieje padure kejewu kamo rogu mugure nono. Ere roreboe kowu nono nou kamo rogu aogeje rowo nou bai ja tada. Nou bai ja biagareu tada nou bai oiadada ia ira mugure jamedu. Tori kuieje padure nou ira keje jamedu. Nou ira ja tadare ia ruwobo rogu meture. Ia buture baru pijiwu boe eke meture nou ruwobo rogu ja tada. Nou ruwobo towujedure tori kuieje tabo jamedu. Nou ira ja tadare nou Arão merure tabowu taibo meture jamedu. Aru boture nou utaibo oto piji. Ere nou utaibo tugu nou ira jato. Nou ira ja tadare nou tori atugoreu meture jamedu. Pao Kurireu ure nou ture maku Israel doge etaiwu bakaru atugo bu nou tori keje. Nou tori meture nou ira ja tada jamedu. 5Boe ere ia barege etowuje tori kuieje tabo jamedu tuwo emugudo nou ira aogeje. Ere nou barege edo nono Pao Kurireu utugarege baru tadawuge emogadure. Ere nou ture towujewu barege emugudo nou ira aogeje boe erduwawo nonore Pao Kurireu mugure duji. Nou barege ere pobetu je. Ekanare nono kiebarege ekana mogadure. Nou barege ekana jare nono nou ira aogeje. Nou ira aogejere boe ero pegareu mori padure. Boe enomea makudure aiwuge Levi uwobe eimijera kurireu umode boe egu barogo ku bu nou iaboe rogu keje nou ira aogeje tuwo maku Pao Kurireu ai Pao Kurireu biagoduwo boe ero pegareu piji. Ainore nou mariguduwuge Israel doge erore joru jameduji. Mare imodukare tarduwado jamedu boeji.
6Ainore jaoboe erore. Meri jameduji nou ure Judeu doge enomea maku Pao Kurireu aiwuge emaragodure nou Pao Kurireu uwai kurireu ja tada. Emaragodure Pao Kurireu ai boe eparu tabo. 7Mare nou Pao Kurireu uwai ja biagareu tore emodukare turemo. Tu eimijera kurireu umode turemo to. Mare meri jamedu karega. Merire mitotu je joru jameduji uwo turemo nou Pao Kurireu uwai ja biagareuto. Umode turemo nouia boe egu barogo ku tabo tuwo nou barogo ku bu nou ira aogeje tuwo maku Pao Kurireu ai turo pegareu moriče, boe eiamedu boe erduwakare jiwu turo pegareu moriče. 8-10Mare nou erore jiboe woe awu moto kejeboe jire eroino. Boe eke jire eno bakaru akoino. Boe ere towujewu kurureboe jire eno bakaru akoino. Erore nou moto kejewu Pao Kurireu uwai jiboe jire nou bakaru akoino. Nou boe ere boe egu barogo bito ere nou barogo ku redo tuwo maku Pao Kurireu ai nou moto kejewu bai rogu ja tada boe ero pegareu moriče. Nou moto kejewu Pao Kurireu uwai rakoje kimore dukeje erore aino tu tu je. Mare du inodu tabo nou boe ero pega kimore. Dukodire nou boe erduware nou to bakaru akedumoduie toro ia meri keje. Erduware Pao Kurireu umoduie ia tumeardae maiwu maku boe etai eno bakaruče pugeje tuwo ero udo tuginai pugeje. Mare nou bakaru boetojiwu ure boe erduwado nuba Pao Kurireu meardae maiwu mode boei. Nou bakaru boetojiwu tabore Pao Kurireu Uwari ure parduwado boe eiamedu boe ero pegare dukodire epemegakare tubureduwo Pao Kurireuji nou ero pegare dukodi. Nou bakaru boetojiwu makore boei ekawo turemo nou bai ja biagareuto. Dujire inagoino. Tu nou ure boe enomea maku Pao Kurireu aiwuge eimijera kurireu umode turemo to tu rugadu. Ukaiago turemo to meri jameduji. Meri moduie mitotu je joru jameduji uwo turemo nou Pao Kurireu uwai ja biagareuto. Dukodire boe erduware tubemegakaie tubureduwo Pao Kurireuji. Dukodire boe erduware Pao Kurireu umoduie ia tumeardae maiwu maku boe etai eno bakaruče pugeje tuwo boe epemegado etaregoduwo pudae rugadu.
11Aino čare Jesus Cristo aregodure. Nou ure boe enomea maku Pao Kurireu ai boe eimijera kurireu nure ema rugadu. Ure boe ero pegareu mori maku Pao Kurireu ai rugadu dukodire ure boe pemegado boei. Mare ure boe ero pegareu mori maku Pao Kurireu ai nou Pao Kurireu uwai remawu tada. Nou inagore jiwu moto kejewu bai rogu tada karega. Boe ekare Pao Kurireu uwai remawu towuje. Pao Kurireu uwai remawu rakojekare ture towujewu moto keje. 12Mare Jesus Cristo ure turemo nou Pao Kurireu uwai remawu baito Pao Kurireu ae rugadu dukeje uture tugu tabo tuwo tugu maku Pao Kurireu ai boe ero pegareu moriče. Ukare tapira ku maku. Ukare cabrito ku maku. Ure tugu maku boe ero pegareu moriče tuwo boe ekinorudo ero pegareu mori piji ewikawo rugadu ewarigudukawo bope doge eda kejewu joru pegareuto. Nou mori ure turugadu rugadu jii toro rugadu. Jesus Cristo ku makudumodukare pugeje rugadu. 13Jaoboe ero pegare dukeje nou maragodure Pao Kurireu uwai rogu tadawuge ere ia tapira bito tuwo nou tapira ku barigu boe eiogi tuwo epemegado ero pegareu piji. Emodukare tapira bito dukeje emode cabrito bito tuwo nou cabrito ku barigu boe eiogi nou tapira imedu ku mugato. Ere tapira aredu botugodu kowu tuwo nou ture kowu tapira kodu urugudukudu barigu boe eiogi jamedu tuwo epemegado ero pegareu piji jamedu. Dukodire nou boe epemegare. Mare epemega remawukare. Epemegare tu turowo nou bakaru tadawu boe ero boeji tu rugadu. Mare epemegakare taregoduwo Pao Kurireu ae. 14Dukodi čare Jesus Cristo ure tugu maku Pao Kurireu ai. Pao Kurireu Uwari ure tugera maku Jesus ai Jesus ro pegareu bokwawo. Dukodire ro pegareu bokware rugadu. Pemegare tuwo tugu maku Pao Kurireu ai boe ero pegareu moriče. Ure tugu maku Pao Kurireu ai dukodire ure pagaora butugugo. Dukodire pagaiwomodukare ia paro bagai pugeje paro pegareu moriče. Paromodukare ia parore jiboeji paro pegareu moriče pugeje. Dukodi čare Pao Kurireu utugarege nure pagi rugadu.
15Dukodire inagoino. Jesus Cristo ure nou Pao Kurireu meardae maiwu udo turugadu boei. Pao Kurireu makore boe ewagai emeartoruwo pudui. Emeartorumode dukeje Pao Kurireu ro pemegamode ei jii toro rugadu. Du akedumodukare. Mare paga karega. Jesus bire boe ero pegareu moriče dukodire umode boe ekinorudo boe ero pegareu piji. Marigudu boe etaidure tumeartoruwo nou bakaru boetojiwuji mare eroiwakare dukodire ero pegare. Mare aino čare Jesus umode boe ekinorudo nou boe ero pegareu piji rugadu.
16-17Boe ewikare dukeje emode tumeardae bu bapera keje tuwo tore erduwado ero pemegawo toeji tuwimode dukeje. Imedu bimode dukeje ore etaiwomode nou tuo meardae padure kejewu baperaji tuiorduwawo turomode tuo oe jituji. Nono eromode nou tuo oeji nono tuo meardae mogadure tuwo nou tuo oe pedo pui. Mare bikare raga dukeje etaiwomodukare nou baperaji. Nou etuo oe boe pedodukare nou torei raga. Oe kimo nure toeče. Ukare pedo torei raga. 18Dukodire Pao Kurireu makore Israel dogei ewo ia boe egu barogo bito tuwo nou barogo ku redo. Pao Kurireu ure tumeardae boetojiwu maku Israel doge etai eno bakaruče dukodire akoino ei ewo boe egu barogo bito. 19Moisés makore nou bakaru jamedu boeji nou Israel doge ewiagai erduwawo ji rugadu. Dukejere ure tapira ku barigu ariato pobo tabo. Nono ure mekido pugao. Nono ure ovelha bu kujagureu kogudo ia ipo rogu oto kajeje. Nono ure nou ovelha bu pegodo nou poboto tapira kuto. Nono ure nou ku barigu nou bakaru boetojiwu padure kejewu tori aogeje. Ure nou ku barigu toro nou boe eiogi jamedu. 20Akore: – Pao Kurireu ure tumeardae maku pagai pago bakaruče pameartoruwo ji. Nou tapira ku tabore pare pageragu nou bakaruji pagoče pameartoruwo ji.
Ainore Moisés akore nou boei.9.20 Awu bataru padure Êxodo 24.8 keje.21Dukejere ure ia ku barigu nou Pao Kurireu uwai rogu ao ka jamedu. Ure ia barigu nou jeture nou bai rogu tadaboe jamedu boe joki jamedu. 22Nou Pao Kurireu ure maku etaiwu bakaru akore boe ku taboie boe emode boe jamedu boe pemegado. Akore boe ku redodumoduie boe ero pegareu moriče mare redodumodukaie dukeje Pao Kurireu biagodumodukaie boe ero pegare jiboe piji.
Jesus Cristo Ure Tugu Redo Dukodire Umode Boe Ero Pegareu Barigu Boe Epiji
23Nou mariguduwuge Israel doge ere nou ture towujeboe jamedu boe udo nono baru tadawuboe umogadure. Mare boe remawu padure baru tada. Mare nou mariguduwuge Israel doge ere boe egu barogo ku barigu nou ture towujeboe keje tuwo pemegado rakojewo ture towujewu Pao Kurireu uwai rogu ja tada. Boe egu barogo ku redodure mare boe ero pegareu mori remawu karegure ema. Dukodire ia boe ku pemegamode nou boe egu barogo ku kori aregoduwo baruto boe ero pegareu mori remawuče. Jesus Cristo ku jire inagoino. Jesus Cristo ku redodure boe ero pegareu mori remawuče. 24Dukodire Jesus Cristo ukare tugu reko nou moto kejewu Pao Kurireu uwai rogu ka. Ure reko toro baru tadawu Pao Kurireu uwai remawu ka toro baruto. Aino čare rakojere nono baru tada Pao Kurireu apo tumagowo Pao Kurireuji pabaru tabo. 25Joru jameduji ure mariguduwuge Israel doge enomea maku Pao Kurireu aiwuge eimijera kurireu imedu ure turemo awu moto kejewu Pao Kurireu uwai ja biagareuto ia boe egu barogo ku tabo. Awu bai ja biagareu iere Pao Kurireu Mugure Kejewu Uwai Tuginaiwu aino. Rore aino dukeje boeiwu joru keje rore aino pugeje. Rore aino joru jameduji. Mare Jesus Cristo rokare aino. Ukare tugu maku aino tuwo maku pugeje toro ia meri keje pugeje. 26Romode aino dukeje umode tumagu tuwidoduwo pugeje tu tu je Pao Kurireu ure moto to dupiji jii toro awu moto akedumode du ka. Mare rokare aino. Ure tumagu tuwidoduwo tuwo tugu maku Pao Kurireu ai boe ero pegareu moriče. Dure mitotu je. Bimodukare pugeje jii toro rugadu. 27Boe eiamedu boe ewimode rugadu dumode mitotu je jamedu. Boe ewire dukeje Pao Kurireu makomode ei turomode ei duji erore jiboe moriče. Emodukare tugirimi tuibagi pugeje. 28Nono Jesus Cristo bire jamedu dure mitotu je. Bire boe ero pegareu moriče tuwo boe ero pegareu barigu epiji. Aregodumode pugeje mare tuwiwo kodi karega. Aregodumode tuwo meartorure puduiwuge ekinorudo.
101Mariguduwuge Israel doge ere nou to bakaru boetojiwu makore jiboe towuje. Nou ere towujewu ure nono baru tadaboe remawu mogadure. Mare baru tadaboe jamedu boe karega. Nou mariguduwuge ere towujewu ure boe erduwado bega bega baru tadawu boe remawu boeji. Dukodire boe erduware mare erduwa pemega jokodukare baru tadawu boe remawu boeji. Dukodire inagoino. Jaoboe emeartorure nou bakaruji tuwo tubu jodo tumago pemegawo Pao Kurireuji dukodire ere boe egu barege ewido turo pegareu moriče. Mare nou erore jiboe ukare epemegado. 2Nou erore jiboe umode epemegado ewo tubu jodo tumago pemegawo Pao Kurireuji. Nou erore jiboe umode ero pegareu barigu epiji dukeje emode tugera ra nou turo pegareu jamedu boe piji rugadu. Dukodire erduwamode turo pegareu bokware pugeje duji. Nou erore jiboe umode etaora udo tamudo turo pegareu piji. Nono emodukare ia boe egu barogo bito pugeje nou turo pegare jiboe moriče pugeje. 3Mare erokare aino. Ere boe egu barege ewido tu tu je rugadu turo pegareu moriče. Dukodire nou bitodureu boe egu barogo ure ewiabutudo ero pegareu keje tu tu je. Dukodire erduware turo pega kimore jii aino duji. 4Dukodire inagoino. Nou tapira ku, nou cabrito ku umodukare boe ero pegareu barigu boe epiji rugadu. Umodukare boe ero pegareu morido rugadu.
5Dukodire Jesus Cristo makore Tuo Kurireuji. Ure tudo turugadu taregoduwo mato moto ka dukeje makore tuoji. Akore:
– Akaidukare boe egu barogo kuji boe ero pegareu moriče pugeje. Akaidure ikoduji ikuji.
6– Boe ere boe egu barege ekowu kamo keje turo pegareu moriče mare akaidukare ji. Boe ere boe egu barogo ku redo turo pegareu moriče mare akaidukare ji.
7– Imi reo. Imeartorumode ai rugadu. Nou are maku Israel doge etaiwu eno bakaru tadare amagore iboe padure. Nou awadaru jetumode pudui rugadu. Iromode nono ameardaeji rugadu.
Ainore Jesus akore Tuo Kurireuji.10.7 Awu bataru padure Salmo 40.6-8 keje.
8Mare ainore Jesus makore boetoji. Akore: – Akaidukare boe egu barogo kuji boe ero pegareu moriče. Akaidure ikoduji ikuji.
Ainore Jesus akore boetoji. Mare Pao Kurireu meardae boetojiwu koiare boe ere boe egu barogo ku redo turo pegareu moriče tumeartoruwo Pao Kurireu ure maku pudaiwu bakaru boetojiwuji. 9Mare aino Jesus akore: – Imi reo. Imeartorumode ai rugadu.
Ainore Jesus akore aino boigodu. Dukodire parduware Pao Kurireu ure nou tumeardae boetojiwu akedudo. Ure nou ture maku Israel doge etaiwu eno bakaru boetojiwu tadawu boe ero akedudo rugadu boe emeartoruwo nou Pao Kurireu meardae maiwuji. Jesus Cristo ure tugu redo, ure tugu maku Pao Kurireu ai dukodire boe emodukare boe egu barege eku redo pugeje turo pegareu moriče. Emeartorumode Jesusji tu rugadu. 10Jesus Cristo meartorure Tuo Kurireu makore puduiboe jamedu boeji. Ure tumagu tuwiwo tuwo tugu redo tuwo nou tugu maku Tuo Kurireu ai boe ero pegareu moriče. Dujire pameartorure. Dukodire emare umode paro udo tuginai paro pegareu piji paro pemegawo rugadu. Umodukare tuwido pugeje rugadu. Umodukare tugu maku Tuo Kurireu ai pugeje.
11Mariguduwuge Israel doge emagare ture tomea maku nou ure boe enomea maku Pao Kurireu aiwuge etai dukodire emaragodure meri jameduji nou Pao Kurireu uwai rogu tada tuwo boe egu barege eku redo nou tuwobe ero pegareu moriče tu tu je. Mare nou boe egu barege eku ukare nou boe ero pegareu barigu epiji. Ero pegareu mori remawu karegure ema dukodi. 12Mare Jesus Cristo ure tugu maku Pao Kurireu ai boe ero pegareu moriče. Dure mitotu je. Mare nou ure makuwu tugu umode boe eiamedu boe ero pegareu morido rugadu jii toro rugadu. Ure tugu maku Pao Kurireu ai dukeje ure tumugudo Pao Kurireu kana pemegareu jagwai. 13Mugu kimore nono ji aino rugadu. Mugumode nono jii toro Pao Kurireu umode jordu pegare Jesus jiwuge eraga ta epiji du ka. 14Jesus ure tugu maku boe ero pegareu moriče. Dukodire ure nou meartorure puduiwuge ero udo tuginai ero pegareu piji ero pemegawo. Ero pegamode mare umode ero pegareu barigu epiji tu tu je jii toro ero pegareu akedure du ka. Meartorure puduiwugeire romode aino. Dukodire nou meartorure Jesus jiwuge epemegare turo pegareu piji Pao Kurireu jakai rugadu jii toro rugadu. Dukodire Jesus umodukare tugu maku pugeje.
15Nou inodu jire Pao Kurireu Uwari makore jamedu. Akore:
16– Mare aino ia meri keje imode ia imeardae maiwu maku Israel doge etai eno bakaruče pugeje. Dutabore imode edo tuginai etaiduwo tumeartoruwo i taidu tabo. Imode iwadaru tugu etaorato. Erduwamode imeardaeji rugadu. Erduwamode iroji rugadu. Dukodire emeartorumode tu i rugadu.
Ainore Pao Kurireu Uwari akore.10.16 Awu bataru padure Jeremias 31.33 keje.
17Nono makore pugeje. Akore: – Iwiagodumode ero pegareu piji rugadu.
Ainore akore.10.17 Awu bataru padure Jeremias 31.34 keje.18Pao Kurireu biagodumode boe ero pegareu piji rugadu. Dukodire parduware Jesus rore jiboe ure turugadu duji. Bimodukare boe ero pegareu moriče pugeje.
Pamagowo Pao Kurireuji Rugadu
19Imedage nure tagi. Iwo tarduwado. Pameartorure Jesusji dukodire ure paginorudo paro pegareu mori piji. Emare bire paro pegareu moriče. Aino pameartorure ji dukodire pare parugadu pamagowo Pao Kurireuji rugadu. Pao Kurireu meardumode pamagore jiboeji rugadu. Pare nono paragojere baru tadawu uwai remawu tada dumogadure. 20Marigudu boe epemegakare. Mare aino čare Jesus ure meartorure puduiwuge epemegado. Mare paga karega. Ure tumagu tuwidoduwo tuwo tugu maku Pao Kurireu ai boe ero pegareu moriče dukodire pawimodukare paro pegareu moriče. Pamodukare boe egu barogo bito paro pegareu moriče. Pameartorure Jesusji dukodire ure pado nono paragojere baru tadawu Pao Kurireu uwai remawu tada dumogadure pamagowo Pao Kurireuji rugadu. 21Jesus rakojere nono rugadu Pao Kurireu uwai remawu tada tietu pemegawo ji. Emare makomode pabaru tabo Pao Kurireuji. Ro pemegare rugadu. Dukodire pagomea makudure Pao Kurireu aiwu remawu nure ema rugadu. 22Dukodire pabogurukawo pamagowo Pao Kurireu bagai baruto pamagowo ji rugadu. Pameartoruwo ji mare pabagudu tabo karega. Pameartoruwo ji pagaidu tabo. Pameartorure ji dukodire ure pameardae pemegado ure pagaora udo tamudo paro pegareu boe mori piji pamororamagadukawo paro pegareu mori bagai pugeje. Ure pado nono ure taimowuge emogadure. Mare pagaimodu ji karega inagoino. Ure paro pegareu barigu pabiji rugadu. Dujire inagoino. 23Jesus umode tugirimi rugadu dukodire pamagowo boe ewiagai pameartorure jiboeji. Pagawo pagera ra nou pameartorure Jesus jitu piji. Emare ure pawiedu pemegado dukodire parduware umode tugirimi meartorure puduiwuge ewagai duji rugadu. 24Pawiagorowo pawo boe pemegado boei. Pawo pagera maku puai. Pameardu kuriwo boei rugadu. Paro pemegawo boei rugadu. 25Pawo bato pui tu tu je pamagowo Pao Kurireu bataruji pu biagai. Mare iage ere tugera ra nou turoino dupiji marigudu. Mare parokawo aino nono ero mogadure. Pawo bato pui tu tu je. Jesus aregodumode kejewu meri aregodumode dukeje boe pegamode boei rugadu. Boe pegare boei marigudu dukodire parduware nou meri aregodumode kuri je. Dukodire inagoino tai pawo bato pui tu tu je pawo pameartoru rakado Jesusji rugadu.
26Boe erduwamode Pao Kurireu bataru remawuji mare emeartoru bokwamode ji. Ero pegamode taidu tabo rugadu. Dukejere boe eroiwamodukare tuwo iaboe maku Pao Kurireu ai nou boe ero pegareu moriče. 27Nou ro pegareuge erdumode Pao Kurireu rore pudui duji rugadu. Dukodire epagudumode rugadu jii toro nou meri aregodumode du ka. Pao Kurireu umode meartoru bokware puduiwuge etagedudo joru tabo rugadu tuwo ewarigu toro bope doge eda kejewu joru pegareuto rugadu. 28Nou Moisés ure maku Israel doge etaiwu bakaru boetojiwu koiare ure mariguduwuge Israel doge edo ro pegareuge ewido. Ro pegareuge emeartorukare nou bakaruji dukodire boe enogudukare ebo. Ere ewido rugadu. Mare paga karega. Jordure ro pegareu jiwuge ewo pobetu je boe ewo boe pegado ro pegareugei. Eno bakaru akoino. Jordure ro pegare jiwuge ere pobe dukeje boe erduware boe jokodu jire egoino duji. Nou jordure ro pegare jiwuge ere boe ewie nou tuiordure jiboeji. Ewadaru umode pu bataru mogadure dukeje boe erduware boe jokodu jire egoino duji. Mare jordure ro pegare jiwu umode mitotu je dukeje boe erduwamodukare raga boe jokodu jire akoino duji. Mare emode pobe dukeje boe erduware rugadu boe rugadu jire egoino. Boe erduware nou ro pegare rugadu. Dukodire ere nou ro pegareu bito rugadu. Ainore mariguduwuge Israel doge erore tu tu je. 29Mare aino čare Pao Kurireu Onaregedu aregodure boe etae. Emare ure tugu redo tuwo Pao Kurireu meardae maiwu maku boe etai emeartoruwo ji. Ure tugu maku Pao Kurireu ai boe ero pegareu mori remawuče. Ainore nou Pao Kurireu meardae ure. Mare boe emeartorumodukare nou Pao Kurireu meardae maiwuji dukeje Pao Kurireu umode boe pegado ei rugadu. Umode boe pegado ei nou ture maku Israel doge etaiwu bakaru boetojiwu kori. Boe emeartorumodukare boe remawu jire Jesus roino duji dukeje Pao Kurireu umode boe pegado ei rugadu. Boe etaidumodukare Jesus roino pudui duji dukeje Pao Kurireu umode boe pegado ei rugadu. Emago pegamode Pao Kurireu Uwari ro pemegare pudui duji dukeje Pao Kurireu umode boe pegado ei rugadu. Ro pegamode ei rugadu nou bakaru boetojiwu kori rugadu. 30Pao Kurireu akore: – Imode boe pegado boei ero pegareu jipagi rugadu.10.30 Awu bataru padure Deuteronômio 32.35 keje.
Ainore Pao Kurireu akore. Akore pugeje: – Pao Kurireu aiwomode boe ero pegareu bagai tuwo ro pegareuge edo turo pegareu morido.10.30 Awu bataru padure Deuteronômio 32.36 keje. Padure Salmo 135.14 keje jamedu.
Ainore Pao Kurireu akore. 31Pao Kurire ure rugadu. Dukodire meartorukare Pao Kurireu jiwuge etaregodumode ae dukeje Pao Kurireu ro pegamode ei rugadu ero pegareu moriče. Nono ča erduwamode tumodukare tuginorudo Pao Kurireu piji rugadu. Dukodire epagudumode če rugadu.
32Tawiagodukaba boe erore tai mariguduboe dupiji. Tarduwagodure Pao Kurireu bataru remawuji. Marigudu. Nono tameartorure ji. Nono boe ero pegare tai rugadu. Mare tare taragado tai tagawo tagera ra tameartorure Jesus jitu piji. 33Boe emago pegare tai boe ewiagai. Boe ero pegare tai boe egai. Nono tardure boe erore aino nouia tamedagei jamedu dukodire tadure toro etae nou boe ero pegawo tai jamedu tamedagebo. 34Boe ere tadugu baičoreuto. Boe ere tugeragu tagoe rugadu boeji tabiji mare tagiarigodukare nou inoduji. Tagare taegare barigu tabiji. Tarduware tagoe pemegareu mode rugadu baru tada. Nou baru tadawu tagoe akedumodukare rugadu. 35Dukodire inagoino tai. Boe pegamode tai mare taragado tai. Tamode taragado tai tawiapagakawo nou boe pegare tai duji dukeje Pao Kurireu umode tagoe kurido nou tare taragado tai du moriče. 36Tawudugudo tu tai tagorigodukawo. Tagaba tagera ra tameardae pemegareu piji jii toro rugadu. Tameartorudo Pao Kurireu meardaeji rugadu. Tameartorumode ji dukeje umode tumagore jiboe maku tagai rugadu. 37Padure bapera kejewu Pao Kurireu bataru akore:
– Umode boe ekinorudowu aregodumode kuri je rugadu. Umodukare boe raido taregoduwo pugeje rugadu. 38Meartorure iwuge ro jetororeuge emodukare tugera ra tumeartorure idu piji rugadu dukodire ewimodukare. Mare emode tugirimi tuibagi turo pegareu ka pugeje tuwo tugera ra ipiji dukeje iagaremodukare ei pugeje.
Ainore Pao Kurireu akore.10.38 Awu bataru padure Habacuque 2.3-4 keje.
39Pamode pagera ra pameartorure Pao Kurireu jitu piji pawo pagirimi paro pegareu ka pugeje dukeje ure tuwarigu boetowuge emode pagi. Mare pamodukare pagirimi paro pegareu ka pugeje rugadu. Pameartorumode Pao Kurireuji jii toro rugadu dukodire umode paginorudo rugadu.
11Meartorure Pao Kurireu Jiwuge Ero Reo
1Boe emeartorumode Pao Kurireuji dukeje erduwamode makore puduidu jiboe jetumode pudui duji rugadu. Emeartorumode Pao Kurireuji dukeje erduwa kičarumode tuiordukare jiboeji Pao Kurireu ure erduwado dukodi. 2Ainore jaoboe meartorure Pao Kurireu jiwuge ere rugadu. Emeartorure Pao Kurireuji dukodire Pao Kurireu jordu moture erore jiboeji.
3Tuwadaru tabore Pao Kurireu ure baru to, ure moto towuje. Mare pardukare roinoduji. Mare pameartorure ji dukodire parduware tuwadaru tabore Pao Kurireu ure baru to duji ure moto to duji rugadu. Pao Kurireu ure boe jamedu boe towuje boe erdukare jiboe tabo boe erduwo ji rugadu.
4Imedu Abel meartorure Pao Kurireuji dukodire ure Pao Kurireu makore bagaiboe maku Pao Kurireu ai tomeawo Pao Kurireu ai. Mare umana Caim rokare nono tuwie Abel ro mogadure. Mare Abel meartorure Pao Kurireuji dukodire Pao Kurireu aidure nou Abel ure maku pudaiwu boeji. Mako pemegare Abel rore jiboeji. Akore ro jetororeu nuie ema. Nou Abel bire marigudu mare boe erduware rore jiboeji jii aino. Dukodire emeartorure Pao Kurireuji nono Abel meartoru mogadure.
5Imedu Enoque meartorure Pao Kurireuji dukodire bikare. Pao Kurireu ure Enoque rutudo tači pudae baruto. Dukodire boe erdukare ji pugeje. Padure bapera kejewu Pao Kurireu bataru akore: – Enoque rakoje kimore moto keje dukeje Pao Kurireu jakarere ji rugadu.
Ainore Pao Kurireu bataru akore.11.5 Awu bataru padure Gênesis 5.21-24 keje.6Mare boe emeartorumodukare Pao Kurireuji dukeje Pao Kurireu jakaregodumodukare boei. Boe etaidure tumagowo Pao Kurireuji iaboe bagai. Mare enogwamaguduwo tumeartorure dutabo Pao Kurireuji rugadu. Emeartoruwo Pao Kurireu ure duji rugadu. Emeartoruwo jamedu Pao Kurireu ro pemegamode nou ure turagado pudui tumeartoruwo Pao Kurireu jiwugei. Boe emeartorumode nou inoduji dukeje Pao Kurireu meardumode emagore jiboeji.
7Marigudu rugadu boe erduwakare bubutuji. Bubutu bokware. Mare Pao Kurireu makore Noéji bubutumoduie, tumoduie bubutudo. Nono Noé ure tuioku kidugo nou Pao Kurireu bataruji. Dukodire meartorure nou Pao Kurireu makore pudui jiboeji. Jorduwakare bubutuji mare meartorure Pao Kurireu makore pudui jiboeji. Pao Kurireu makore ji uiago ia ikarereu kurireu towuje. Dukodire Noé ure nou ikarereu kurireu towuje rugadu. Nono bubuture rugadu. Pao Kurireu ure pobo maedo moto jamedu boe aoji tuwo boe etagedudo ero pegareu moriče. Mare Noé meartorure Pao Kurireuji dukodire ure turemo ture towujewu ikarereu kurireuto tuwobebo. Dukodire Pao Kurireu ure ekinorudo nou ture boe etagedudo tabowu pobo piji. Noé meartorure Pao Kurireuji dukodire Pao Kurireu ure tugeragu Noéji pudae tuwo udo nono ro pemegareuge emogadure.
8Marigudu Pao Kurireu makore Abraãoji utuwo to moto piji toro ia tumode maku aiwu moto ka. Abraão jorduwakare nou tugodumode kawu motoji mare meartorure Pao Kurireuji dukodire uture to moto piji rugadu. 9Nono mugure ia boe tuginaiwuge eno moto keje nono. Mare meartorure Pao Kurireuji. Uwai bokware nono. Ure mačebradu rakojedo tu tu je tuwaiče mare meartorure Pao Kurireuji. Pao Kurireu makore tumoduie nou moto maku ai rugadu. Makore aino Abraão onaregedu Isaqueji, makore aino nou Isaque onaregedu Jacoji jamedu tumoduie nou moto maku etai, etuwobe etai jamedu. 10Abraão meartorure ji rugadu. Jorduware Pao Kurireu umode ia boe eda kurireu towuje duji. Boe eda motureu mode ema. Pao Kurireu umode towuje nono tumeardae mogadure. Nou boe eda akedumodukare jii toro rugadu. Abraão jorduware tumugumode nou boe eda keje duji rugadu.
11Abraão oreduje iere Sara. Etore bokware. Kuridoge nure emage dukodire etoremodukare rugadu. Mare Pao Kurireu makore ei etoremoduie. Nono Abraão meartorure Pao Kurireu makore pudui duji rugadu dukodire etonaregedu imedu rogure rugadu. 12Abraão pegagodure rugadu. Mare onaregedure. Nou onaregedu orere. Nou onaregedu ore etorere. Dukodire uwobe emagagodure rugadu. Emagagodure nono baru tadawu kuieje doge emagare dumogadure. Ere tumaedo nono kugaru umode tumaedo dumogadure. Boe erduwakare nuba ere. Emagare rugadu.
13Nou inagoino jiwuge eiamedu boe ewire marigudu. Mare ewikare raga dukeje ekare tugera ra tumeartorure Pao Kurireu jitu piji. Erdukare Pao Kurireu makore tumoduie maku pudaiwu boeji. Mare erduware Pao Kurireu umode maku pudai baru tada duji. Eragojere woe moto keje dukeje egore boe tuginaiwuge nuie pudumi. Egore to moto remawu karegau awu moto rema. Egore to moto remawu moduie baru tada. 14Erduware ia to moto remawu mode pugeje dukodire nou boe egoino. 15Ekiarigodukare ture tudawuje pijiwu moto bagai pugeje. Ekiarigodumode bagai dukeje emode tugirimi tuibagi nou moto ka pugeje. 16Mare etaidure ia moto pemegareuji baru tada. Pao Kurireu ure eda pemegado nono baru tada rugadu. Nou boe egore Tuo Kurireu nuie ema rugadu. Nono Pao Kurireu pogurukare eče. Aidure nou boe emagore jiboeji rugadu nou boe emeartorure pudui dukodi.
17Pao Kurireu aidure tuwo boe rakado Abraãoji Abraão meartorumode pudui dubagai. Dukodire makore Abraãoji uwo tonaregedu Isaque bito uwo tomeado ema pudai. Mare Abraão meartorure nou Pao Kurireu makore pudui jiboeji. Ure turugadu tuwo tonaregedu bito rugadu tuwo tomeado ema Pao Kurireu ai. Pao Kurireu makore Abraãoji marigudu tumoduie nou onaregedu Isaque oredo, tumoduie nou ore etoredo. Tumoduie emagado rugadu. 18Pao Kurireu akore: – Imagore ai awobe emagagodumoduie. Nou akanaregedu Isaque oremode. Ore etoremode. Epijire nou inagoino jiwu awobe emagagodumode rugadu. Imagore jiboe jetumode pudui rugadu.
Ainore Pao Kurireu akore. 19Dukodire Abraão meardaere Pao Kurireu umoduie tonaregedu Isaque jewodudo pugeje. Abraão meardaere tuwo tonaregedu bito tumeartorure Pao Kurireu makore pudui dukodi. Mare Pao Kurireu umoduie tonaregedu jewodudo pugeje. Ainore Abraão meardaere. Ure tuiago tonaregedu bito dukeje Pao Kurireu makore ji ukawo bito pugeje. Dukodire Isaque ure nono jewodureu mogadure rugadu.
20Isaque meartorure Pao Kurireuji jamedu dukodire makore tonaregedu Jacó paru tabo tuwo boe pemegado ji. Makore tonaregedu Esaú paru tabo jamedu tuwo boe pemegado ji jamedu. Akore tumagore jiboe jetumoduie pudui rugadu.
21Jacó meartorure Pao Kurireuji dukodire makore tonaregedu José ore ime pobedu doge eparu tabo tuwo boe pemegado ei. Jacó pegagodure rugadu mare ure turagojedo rugadu. Iera bararere tudaiboji tuwo turagojedo. Ure turagojedo tumago pemegawo Pao Kurireuji rugadu.
22José meartorure Pao Kurireuji jamedu. Pegagodure rugadu dukeje akore tuwobe Israel doge emoduie tudawuje nou tumugure kejewu Egito moto piji. Makore tuwobei tuwimoduie dukeje ekawo tudugu nou Egito moto keje. Ewo turego toro Pao Kurireu umoduie maku etaiwu moto ka rugadu.
23Moisés uče uo emeartorure Pao Kurireuji jamedu. Emeartorukare tumugure kejewu Egito moto kejewu boe eimijera kurireu makore puduidu jiboeji. Emare akore nou Israel doge eiamedu boei ewo tore ime kugure eiamedu boe ewido. Mare epagudukare nou boe eimijerače. Etonaregedu imedu rogu Moisés boture dukeje erdure moture duji. Dukodire ere nou tonaregedu Moisés biado nou boe eimijera kurireu piji. Ekare bito. Arire pobe metia bokware ei eroino duji.
24Nono Egito kejewu boe eimijera kurireu onaregedu aredu ure tugeragu Moisesji tonaregeduče. Dukodire Moisés ričodure nono nou boe eimijera kurireu uwai ja tada. Mare Moisés meartorure Pao Kurireuji dukodire makore nou aredu onaregedu kaiegure pudumi. 25Nou Moisés uwobe Israel doge emeartorure Pao Kurireuji dukodire nou Egito kejewu boe eimijera kurireu ure boe pegado ei. Moisés rakojemode nono nou Egito kejewu uwai keje jao dukeje boe pemegamode ji. Jakaremode pudui. Mare umode nono nou ro pegare Israel dogeiwu boe eimijera mogadure. Ro pegareu mode ema Pao Kurireu jakai. Mare Moisés aidukare turagojewo nono nou boe eimijera uwai keje nou boe pemegareu keje. Jorduware boe pegamode pudui duji mare uture nou turijodure tadawu boe eimijera uwai piji turagojewo tuwobe Israel dogebo. 26Jorduware toro ia meri keje Pao Kurireu umode nou umode boe ekinorudowu imedu arego mato boe ewagai duji. Pogurukare tumeartoruwo nou umode boe ekinorudowu aregodumode duji. Meartorumodukare Pao Kurireu romode aino duji dukeje umode tugeragu Egito moto kejewu diero rugadu boeji pagatu je. Mare meartorure Pao Kurireuji rugadu dukodire boe pegare ji. Egito kejewuge emago pegare ji. Mare biapagakare nou boe pegare pudui duji. Biapagare tu toro ia meri kejewu Pao Kurireu umode maku pudaiwu boe pemegareu boeji.
27Moisés meartorure Pao Kurireuji dukodire uture Egito moto piji. Nou Egito moto kejewu boe eimijera kurireu korigodure ji mare Moisés pagudukare če rugadu. Ure Israel doge etawuje nou Egito moto piji rugadu. Boe erdukare Pao Kurireuji. Mare Moisés meartorure ji dukodire tiagaire Pao Kurireu ure nono boe erdure jiboe mogadure. Dukodire ukare tugirimi Egito moto ka Israel dogebo pugeje. 28Etukare raga Egito moto piji dukeje Pao Kurireu makore Moisesji uwo Israel doge edo carneiro ku reko tuwai poroji. Pao Kurireu utugare pegareu ure Egito moto kejewuge etore boture boetojiwuge eiamedu boe ewido. Mare Moisés meartorure Pao Kurireuji dukodire ure Israel doge edo nou carneiro rogu ku reko tuwai poroji. Dukodire nou Pao Kurireu utugare pegareu ukare nou Israel doge etore boture boetojiwuge ewido jamedu. Dukodire Moisés ure nou Israel doge ewadae tawuje boe ewiabutuwo nou inodu keje. Egore Páscoa aino nou tuwadaeji.
29Israel doge emeartorure Pao Kurireuji dukodire Pao Kurireu ure pobo maereu kujagureu kado puiato. Ure kidudo Israel doge etododai Israel doge emeruwo moto kireuji toro bakowu ka tugurugoduwo pobo maereu kujagureu kajeje. Egito kejewu tugobaigarege ekurugodure eregodaji dukeje nou pobo ure tugirimi tumuga ka. Nono pobore turorido nou tugobaigarege eiogi. Dukodire Egito kejewu tugobaigarege eiamedu boe ewire.
30Nou Israel doge etaregodure nou Jericó ba kurireu ka dukeje emeartorure Pao Kurireuji. Meri oto padure sete ei ere taiado nou ba kurireu kujegajeje rugadu tumeru tabo duji. Dukejere nou padure Jericó ba kurireu kujegajejewu moto ri rugadu buture jo je. 31Nouia Jericó kejewudo aredu iere Raabe. Marigudu ure tumagu ime etai diero bagai. Tu noure maragodae rema. Mare Israel doge etaregodure Jericó ba kurireu ka dukeje Raabe meartorure Pao Kurireuji. Israel doge ere tugobaigarege etudo Jericó ba kurireu ka tubodu tabo etaiwowo tu toro. Nono nou aredu ure ewiado nou Jericó kejewu tugobaigarege epiji. Meartorure Pao Kurireuji kodi. Dukodire bikare nou tuwobebo. Nou Jericó kejewuge emeartorukare Pao Kurireu bataruji dukodire eiamedu boe ewire. Mare nou aredu bikare.
32Imago raimode dukeje ireadodumode Gideão rore jiboeji, Baraque rore jiboeji, Sansão rore jiboeji. Ireadodumode Jefté rore jiboeji, Davi rore jiboeji, Samuel rore jiboeji. Ireadodumode nouia makore Pao Kurireu bataru jiwuge erore jiboeji. 33Emeartorure Pao Kurireuji rugadu. Erugodure moto tuginaiwu kejewu tugobaigaregei. Eragare ei rugadu. Ero pemegare dukodire Pao Kurireu makore eiboe makudure etai rugadu. Ere leão doge enogwa mi ekawo etogorido. 34Ere joru kurireu akedudo. Ere tuginorudo tugobaigarege eno rago piji. Eraga bokware dukeje Pao Kurireu ure eraga maku etai pugeje. Tugobaigare kurireuge nure emage. Erugodure moto tuginaiwu kejewu tugobaigaregei rugadu. Ere etagedudo rugadu. 35Areme emeartorure Pao Kurireuji jamedu dukodire etuwobe bireuge eewodure pugeje.
Iage emeartorure Pao Kurireuji jamedu mare boe pegare ei. Boe pegareuge emagore ei emeartorukaiago Pao Kurireuji pugeje. Emeartorumodukaie Pao Kurireuji pugeje dukeje tumoduie tugera ra epiji etuwo pugeje. Mare ekare tugera ra tumeartorure Pao Kurireu jitu piji. Dukodire nou boe pegareuge ero pegare ei. Ere ewido rugadu. Nou bitodureuge emeartorure Pao Kurireuji mare paga karega. Erduware Pao Kurireu umode tuiewodudo pugeje duji. Erduware tumugumode boe pemegareu keje duji. Dukodire ekare tugera ra tumeartorure Pao Kurireu jitu piji rugadu. 36Ro pegareuge emago pegare ia meartorure Pao Kurireu jiwugei. Ere boeto iagei. Ro pegareuge ere ia meartorure Pao Kurireu jiwuge ekera kogudo ewure kogudo tuwo etugu baičoreuto. 37Ro pegareuge eidore tori tabo iagei. Ro pegareuge ere ia meartorure Pao Kurireu jiwuge ekado puiato serrote tabo. Ro pegareuge ere iage ewido tariga kurireu tabo. Ia meartorure Pao Kurireu jiwuge ekudau areia bokware. Ere tugudaudo cabrito biriče. Eno diero bokware. Boe ero pegare ei. Boe etaidukare emeartoruwo Pao Kurireuji pugeje. 38Ia meartorure Pao Kurireu jiwuge eno moto bokware dukodire emeru pagare jiče woje boe maereu ka, tori ao ka. Emugure tori poro tada ia moto poro tada jamedu. Nou ro pegare eiwuge emeardae pegare nou meartorure Pao Kurireu jiwugei. Egore boe kaieguie emage. Mare boe kurireuge nure emage Pao Kurireu jakai rugadu. Dukodire čare nou meartorukare Pao Kurireu jiwuge eiamedu boe epogurure eče pugeje.
39Aino čare boe eiamedu boe erduware nou meartorure Pao Kurireu jiwuge erore jiboeji. Emeartorure Pao Kurireuji. Pao Kurireu mako pemegare emeartorure pudui duji. Mare Pao Kurireu ukare tumagore jiboe maku etai raga. 40Mare paga karega. Pao Kurireu ure tumeardae pemegareu tawuje tuwo boe pemegado ei rugadu, tuwo boe pemegado pai jamedu. Meardaere tubagawo jao tuwo boe pemegado paiamedu boei puapo. Nou Pao Kurireu meardae maiwu pemegare nou meardae boetojiwu piji tuwo paiamedu boe pado nono tumeardae mogadure rugadu.
12Pao Kurireu Reo
1Aiwore parore jiboe jiwuge boe emagare. Nou inagoino jiwu mariguduwuge meartorure Pao Kurireu jiwugeire inagoino. Ere nono aiwore parore jiboe jiwuge emogadure. Emagare rugadu. Mare etaiwo ji karega inagoino. Parowo nono ero mogadure pameartoruwo Pao Kurireuji rugadu nono emeartoru mogadure. Dujire inagoino. Dukodire pawo boe pega boe barigu pabiji. Pawo paro pegareu barigu pabiji. Paro pegare jiboe ure tugeragu pai marigudu. Aidukare tuwo tugera ra pabiji rugadu. Mare ča pawo paro pegareu barigu pabiji rugadu. Re rakareu umode turagado pudui ture rakawo rugadu. Parowo nono re rakareu mogadure. Mare pare rakareu ji karega inagoino. Pawo paragado pai pameartoru pemegawo Pao Kurireuji jii toro rugadu. Dujire inagoino. 2Pawiapagawo tu Jesusji tu rugadu pameartorukawo iaji. Emare jorduware tuwimode duji ipo padure pugajejewu keje. Mare biapagakare nou inoduji. Jorduware tiegaremode pudui pugeje tuwimode du rekodaji. Dukodire ukare tugera ra tumeartorure Tuo Kurireu jitu piji. Boe ere Jesus bito ipo padure pugajejewu keje tuwo Jesus pogurudo. Mare Jesus biapagakare nou inoduji. Aino čare mugure baru tada Pao Kurireu ukana pemegareu jagwai boe eimijera mugure kejewu ira keje. Emare makore pawagai pameartoruwo pudui. Emare umode paragado pameartoru rakawo pudui. Dukodire pameartoruwo ji rugadu.
3Tarodo nono Jesus ro mogadure. Ro pegareuge erdu pegare ji mare biapagakare eroi pudui duji. Tagiarigodukaba jamedu. Tagaba tagera ra tameartorure Jesus jitu piji jamedu. 4Tare taragado tai taro pegakawo. Tamagore boei tagaidukaie taro pegareu boeji pugeje. Boe ere boe pegado meartorure Jesus jiwugei ewo tugera ra Jesus piji dukodire ere nouia meartorure Jesus jiwuge ewido. Ere boe pegado tai jamedu tuwo taekiripagado taro pegawo pugeje mare ekare tawido. 5Mare du inodu tabo tawiagodure ia Pao Kurireu bataru pemegareu piji. Akore tore nuie tagi. Boe ewiapagamode nou bataruji dukeje eragamode pugeje tumeartoruwo Pao Kurireuji rugadu. Pao Kurireu akore:
– Itonaregedu nure aki. Pao Kurireu nure imi. Inogituwamode ai ia aro pegareuji dukeje awiapagado iwadaruji. Imagomode ai aro pemegawo pugeje dukeje akiarigodukaba. 6Pao Kurireu nure imi. Imeardu kurimode boei dukeje inogituwamode ei ia ero pegare jiboeji ero pegakawo pugeje. Iromode ei nono boe etuo ro moga torei dumogadure dukodire imode boe rakado ei tu je ia ero pegareu bariguduwo epiji.
Ainore Pao Kurireu akore.12.6 Awu bataru padure Provérbios 3.11-12 keje.
7Boe etuo mage emode boe rakado torei ero pegareu bariguduwo epiji. Ainore Pao Kurireu rore jamedu. Boe rakamode tai dukeje tarduwamode Pao Kurireu emare roino tai duji taro pegareu bariguduwo tabiji nono boe eromode torei dumogadure. Dukodi čare taragado tai tagiarigodukawo nou boe rakamode tai duji. 8Pao Kurireu ore remawuge emodukare tagi dukeje umodukare boe rakado tai. Umodukare boe rakado tai dukeje tamode nono marenarue doge emogadure. 9Moto kejewu pao mage ere boe rakado pai paro pegareu bariguduwo pabiji dukeje pameartorure ei paro pegakawo pugeje. Dukodi čare pameartoruwo baru tadawu Pao Kurireuji rugadu pamugu pemegawo apo. 10Moto kejewu pao mage ere boe rakado pai tu je paro pegareu bariguduwo pabiji nono tumeardae mogadure. Mare Pao Kurireu rore jiboe pemegare pao mage ekori rugadu. Pao Kurireu ure boe rakado pai tuwo paro pemegado rugadu, paro pemegawo nono turo mogadure. 11Umode boe rakado pai paro pegareu bariguduwo pabiji dukeje pagiarigodumode ro rakare pai duji. Pameardaemodukare pawo paegaredo pai. Mare ure boe rakado pai paro pegareu bariguduwo pabiji dukodire toro ia meri keje boe pemegamode pai rugadu. Paro jetoromode rugadu. Pabemegamode Pao Kurireuji rugadu. Pao Kurireu pemegamode pai. Pamugu pemegamode Pao Kurireu apo rugadu.
Okituware Nou Boei
12Tamedugodure. Tabogora kugudugodure. Ča taragado tai. 13Mare tagana tabogora ji karega inagoino. Taragado tai tameartoruwo rugadu Jesusji jii toro rugadu. Taro pemegado. Taro jetorodo. Nono tabemegagodumode. Mare tabemega ji karega inagoino. Tameardae pemegamode tameartoruwo Jesusji tu rugadu jii toro rugadu. Dujire inagoino. Tamodukare tagera ra tameartorure Jesus jitu piji rugadu.
14Taragado tai tamugu pemegawo boe eiamedu boebo tabemegawo pui rugadu. Taragado tai tawo taro udo tuginai taro pegareu piji taro pemegawo rugadu. Boe emodukare turo udo tuginai turo pegareu piji dukeje erdumodukare Pagimijeraji. 15Taeku jado tagawo tagera ra Pao Kurireu ro pemegareu piji. Tardu pegakaba ia boei. Tardu pegamode ia boei dukeje nou tameardae pegareu umode nono jorubo pegareu umogadure. Boe ekudumode če boe ewimode. Mare jorubo ji karega inagoino. Nou tardae tameardae umode boe pegado tai rugadu. Dujire inagoino. Dukodire inagoino tardu pegakawo boei. 16Taro pegareu pijido. Taeribarikaba tamugukare apowugei rugadu. Tawiagodukaba Pao Kurireu piji nono Esaú ro mogadure. Boe emeartorumodukare Pao Kurireuji dukeje emeardae bokwamode nono Esaú meardae bokware dumogadure. Isaque onaregedu imedu boetojiwu nure ema dukodire Isaque ore jiboe makudumode nou Esaú ai rugadu. Mare ia meri keje Esaú uke boeire ji dukodire nou Esaú makore tuwieji ia tuge rogu bagai. Ure nou makudumode pudai boe rugadu boe maku tuwie ai nou tuge rogu moriče. Meardaekare nuba boemode pudui meri jameduji. Meardaere tu nou meriji rugadu. 17Toro ia meri keje Esaú makore tuoji mako pemegawo tubaru tabo Pao Kurireu bagai boe pemegawo pudui tu tu je ore jiboe makuduwo pudai. Mare uo makokare. Makore uwieji marigudu. Ure nou uwie udo nono tonaregedu boetojiwure tumago pemegawo paru tabo boe pemegawo ji tu tu je jii toro. Nou Esaú ragudure mare uo ukare tumago pemegado ji. Tarokaba nono Esaú ro mogadure. Tawiagorodo tameardaewo nono Pao Kurireu meardaere dumogadure.
18Pao Kurireu rokare tai nono turo moga mariguduwuge Israel dogei dumogadure. Marigudu Israel doge etaregodure Sinai Ri ka dukeje erdure joruji toro nou tori ri aogeje. Nono ča boečodure ei. Jeredudure ei. Nono bakuru pegareu buture ewugeje bubutu tabo. 19Dukejere čare emeardure tapira ukiga akoji. Nono emeardure ia boe emagoji jamedu. Israel doge emeardure nou boe emagoji dukeje enogwamagudure ji makokawo pugeje. Nou bataru rakare ei. 20Akore: – Ia boe ia barogo umode tugera bu awu tori keje dukeje bimode. Boe eidowo tori tabo ji ewo bito rugadu.
Ainore akore. Israel doge emeardure nou bataruji dukeje epagudugodure rugadu. Etaidukare tumearduwo iaboeji pugeje. 21Nou boe erdure jiboe pegare ei rugadu. Epagudugodure rugadu. Moisés pagudure jamedu. Akore: – Itomagadugodure ipagudu koia.12.21 Awu bataru padure Deuteronômio 9.19 keje.
22Mare tagire Pao Kurireu ukare tabagudugo aino. Aino čare Jesus bire boe egore Sião Ri aino jiboe tori aogeje boe ero pegareu moriče boe epagudukawo pugeje. Mare paga karega. Nou Jesus jire tameartorumode. Ure tarduwado baru tadawu Jerusalém ba kurireu remawuji. Nonoie Pao Kurireu muguie rugadu. Ure tarduwado tudugarege baru tadawuge emagare rugadu duji. Nou utugarege ere bato pui tiagare tabo nono baru tada. Pao Kurireu ure tawie meartorure Jesus jiwuge edumoduie baru tada tiegare tabo nono tudugarege baru tadawuge emogadure. Nou bataru jire tameartorumode. 23Pao Kurireu ure meartorure Jesus jiwuge ekie bu baru tadawu bapera keje. Dukodire ere nono boture boetojiwuge emogadure. Mare boe ewodu ji karega inagoino. Pao Kurireu ure meartorure Jesus jiwuge edo nono tore emogadure. Dujire inagoino. Dujire tameartorumode. Pao Kurireu aiwore boe eiamedu boei meartorure puduiwuge ewagai meartorukare puduiwuge ewagai jamedu. Dujire tameartorumode. Dukodire tameartorure Jesusji rugadu tabemegawo Pao Kurireu apo, ukawo taro pegare jiboe morido tagai, Pao Kurireu pemegawo tai tawo nono mariguduwuge meartorure Pao Kurireu jiwuge emogadure. Pao Kurireu ure nou mariguduwuge meartorure puduiwuge epemegado rugadu toro baru tada. Dujire tameartorumode. 24Tameartorure Jesusji. Emare ure boe pemegado Pao Kurireu meardae maiwu makuduwo boe etai. Marigudu rugadu Caim ure tuwie Abel bito dukodire Abel ku rere pagatu je. Mare Jesus ure tugu redo boe ero pegareu mori remawuče. Dujire tameartorumode.
25Taeku jado. Tawiapagado Pao Kurireuji rugadu. Marigudu makore Pao Kurireu bataru jiwuge ere boe ewie Pao Kurireu umoduie boe pegado boei ero pegareu moriče. Nou boe emeartorukare dukodire ekare tuginorudo nou Pao Kurireu ro pegare puduidu piji. Dukodi čare pameartorumodukare nou baru tadawu Jesus makore jiboeji dukeje pamodukare paginorudo ro pegare pai dupiji rugadu. 26Marigudu Pao Kurireu mako ako rakare. Nono ure moto magadudo. Mare aino čare makore boei pugeje. Akore: – Imode moto magadudo pugeje. Imode baru magadudo jamedu.
Ainore Pao Kurireu akore.12.26 Awu bataru padure Ageu 2.6 keje.27Nou bataru koiare parduware Pao Kurireu umode moto akedudo duji, umode baru akedudo duji. Tu nou magadumodukareu jiboe akedumodukare. Pao Kurireu jire inagoino. Meartorure jiwugeire inagoino.
28Paegarewo pai. Pameartorure Pao Kurireuji dukodire paragojemode apo pagimijerawo ema. Rakojere apowuge emororamagadumodukare, etagedumodukare rugadu. Dukodi čare pawo pabu jodo pamago pemegawo pagimadu tabo Pao Kurireu apo pawo jakarego. Pawiapaga pemegawo ji. Paboguruwo paro pegareuče pawo paro pegareu barigu pabiji. Pawo paeku kidugodudo Pao Kurireuji pameartoruwo rugadu Pao Kurireu bataru jamedu boeji. 29Pao Kurireu nure ema. Umode boe pegareu akedudo nono joru pegareu ro mogadure.
13Pao Kurireu Aidure Boe Eromode Jiboe Reo
1Tameardu kurido pui nono tameardu kuri moga tawobei dumogadure. Ainore meartorure Jesus jiwuge erore. 2Tagimadudo tarduwakare jiwugebo. Meartorure Jesus jiwuge emode emage dukeje tarodo ei nono taro moga tawobei dumogadure. Eremo tawaito taro pemegawo ei. Iage erore nono dukodire ekimadure Pao Kurireu utugarege baru tadawugebo. Mare erduwakare baru tadawugeire turoino. Emeardaere ia boe eire turoino. 3Tawiagodukaba tugudure baičoreu towu boe epiji. Taro pemegado ei. Tadugudumode baičoreuto dukeje tagaidumode boe ero pemegawo tai jamedu. Tagogududo boe pegare jiwugebo. Boe pegamode tai dukeje tagaidumode boe enogudugoduwo tagabo jamedu.
4Tameartorudo Pao Kurireu bataruji tawirewo tagogewo. Boe eribarikaiago tumugukare apowugei. Boe emugumode puapo dukeje eribariwo tu pui. Emugure puapo dukeje ekawo tugera ra toredu piji toreduje piji tieribariwo iaji iarodoji pugeje. Eribariwo tu pui rugadu. Ia jeribarimode ia tumugukare apowuji ia tumugukare apowudoji dukeje Pao Kurireu umode boe pegado ji rugadu. Iarodo umode tugera ra toredu piji tieribariwo iaji dukeje Pao Kurireu umode boe pegado ji jamedu. Ia umode tugera ra toreduje piji tieribariwo iarodoji dukeje Pao Kurireu umode boe pegado ji rugadu.
5Tagogwa kidukaba boe eno dieroji. Tawudugugo tu tagoe rogu keje. Mare paga karega. Pao Kurireu akore turagojemoduie tagabo jii toro rugadu. Tumodukaie tugera ra tabiji rugadu jii toro. Ainore Pao Kurireu akore.13.5 Awu bataru padure Deuteronômio 31.6 keje.6Dukodire pawo paragado pai. Pamagowo nono mariguduwu makore Pao Kurireu bataru jiwu mako mogadure. Akore: – Pao Kurireu ure tugera maku inai tu tu je. Ipagudumodukare boeče. Boe pegamodukare i rugadu.
Ainore padure bapera kejewu Pao Kurireu bataru ure.13.6 Awu bataru padure Salmo 118.6 keje. Ainore pamagomode jamedu.
7Mariguduwu tagimijerage ere tawie Pao Kurireu bataruji. Tawiabutudo erore jiboe keje, emeartorure Jesusji jii toro tuwi ka. Tameartorudo Pao Kurireuji nono emeartorure jitu mogadure. 8Jesus Cristo ure nono tu tumogadure rugadu. Umode nono tumogadure jii toro rugadu. Marigudu ukare tumeardaere jiboe udo tuginai ji aino rugadu. Meardaere jiboe umode mitotu je rugadu jii toro rugadu. 9Dukodi čare boe etaregodumode tagae ia bataru tuginaiwu tabo mare tameartorukaba ji. Tameartorudo tu Pao Kurireu bataru remawuji. Ia boe emeardaere boe emode tumeartoru rakado Jesusji togwagere jiboe tabo. Dukodire enogwagemodukare iaboeji. Emeardaere turore aino dutabo tumoduie tumeartoru rakado Jesusji. Mare pagare eroino. Pao Kurireu emare umode turaga maku boe etai taidu tabo emeartoru rakawo Jesusji.
10-14Marigudu jaoboe ere Israel doge enomea maku Pao Kurireu aiwuge eimijera kurireu ure ia barogo ku reko nou Pao Kurireu uwai ja biagareuto tuwo maku Pao Kurireu ai nou joru kejewu boe ero pegare jiboe jamedu boe moriče. Mare ukare nou barogo kodu kowuje. Ure nou barogo barigu toro nou boe eda piji aino toro. Dukeje ure joru tugu to tuwo akedudo. Tuwo kowu karega. Tuwo akedudo rugadu. Ainore boe erore Jesusji jamedu. Eture Jesus apo toro tieda Jerusalém ba kurireu piji aino toro tuwo bito toro. Dukodi čare pameartoruwo Jesusji. Pawo pagera ra pamedage erore jiboe piji pawo parore jiboe udo tuginai paro pegakawo pugeje. Boe erdu pegamode pai emago pegamode pai paroinoduji nono turo moga Jesus jitu mogadure. Mare pabogurumodukare paroinoduje. Paeda remawu mugukare woe awu moto keje. Marigudu Pao Kurireu uwai rogu mugure woe moto keje. Mare nou uwai rogu akedure. Uwai remawu karegure ema dukodi. Pagi jamedu awu moto kejewu pawai jamedu boe akedure tu tu je. Mare paeda remawu mugure baru tada. Pamugumode kejewu ba kurireu remawu mugure baru tada. Dukodire pamode maku Pao Kurireu aiboe ure tuginai nou maragodure Pao Kurireu uwai rogu tadawuge ero piji. 15-16Pare maku Pao Kurireu aiboe reo. Pamago pemegare Pao Kurireuji du pare maku Pao Kurireu aiboe reo. Pameartorure Jesusji du pare maku aiboe reo. Pare boe ewie pameartorure jituji du pare maku aiboe reo. Pare pagera maku puai du pare maku Pao Kurireu aiboe reo jamedu. Nou parore jiboe jamedu boe jire pare maku Pao Kurireu aiboe reno. Dujire Pao Kurireu aidure. Dukodire inagoino nou maragodure Pao Kurireu uwai tadawuge mariguduwuge ere maku Pao Kurireu aiboe ure tuginai pare maku Pao Kurireu aiboe piji.
17Tameartorudo tagimijeragei. Meartorure Jesus jiwuge eimijerage eire inagoino. Etu pemegare tai. Ekare tamudo. Pao Kurireu unaramode ei erore taiboe jamedu boe bagai. Tameartorumode ei dukeje egaremode tumaragodaeji. Egaremode tureadoduwo turore taidu jiboe jamedu boeji Pao Kurireu biagai rugadu. Mare tameartorumodukare ei dukeje ekiarigodumode. Ekiarigodumode dukeje eroiwamodukare tuwo boe pemegado tai.
18Tamagodo baruto Pao Kurireu bagai čebaru tabo. Čere čeragado čei čero pemegawo tu tu je dukodire čere čedaorado tamudo. Čedaidure čero pemegawo boei rugadu. 19Tagogwamagududo Pao Kurireu bagai rugadu uwo ido ikirimi ibagi tawagai itaregoduwo tagae kuri je.
Makore Baruto Pao Kurireu Bagai Eparu Tabo
20-21Pao Kurireu ure Pagimijera Jesus jewodudo pugeje. Jetu pemegare meartorure puduiwugei rugadu. Ure tugu redo tuwo maku Pao Kurireu ai boe ero pegareu moriče emeartorukawo nou bakaru boetojiwuji pugeje. Emeartoruwo tu Jesusji rugadu. Ainore Pao Kurireu meardaere. Nou Pao Kurireu meardae akedumodukare rugadu jii toro rugadu. Aino čare Pao Kurireu uwo boe pemegado tai tameartoruwo ji rugadu. Pao Kurireu uwo turaga maku tagai tardu pemegawo pui. Paiamedu boe pameartoruwo Jesus Cristoji Pao Kurireu uwo taidure jiwu turo pemegareu maku pagai. Dukodi čare boe emago pemegawo Jesus Cristoji rugadu tuwo ie kurido jii toro rugadu. Nou emago akedukawo rugadu jii toro rugadu. Umode turugadu rugadu.
Bataru Urugadureu
22Imedage nure tagi. Inogwamaguduwo tai. Taipaga pemegado awu iwadaruji. Ire awu atugoreboe pemegado mare ikare raido. 23Iwo tawie jamedu. Pamedia Timóteo tawujedure baičoreu piji. Aregodumode mato itae kuri je dukeje itumode apo toro tawagai. Kuri je itumode toro tagae rugadu.
24Tagimadudo tagimijerage eiamedu boebo čenai. Tagimadudo meartorure Pao Kurireu jiwuge eiamedu boebo čenai. Awu woewuge Itália moto kejewuge meartorure Jesus jiwuge emagore čei čegimaduwo tawagai pudai.
25Pao Kurireu ro pemegawo tai jii toro rugadu. Iwadaru urugadureu.