Efésios
Paulo Ure Awu Atugoreboe Maku Toro Éfeso Ba Kurireu Kejewuge Meartorure Jesus Jiwuge Ewagai
11Paulo nure imi. Pao Kurireu emare ure tumeardae tawuje tuwo itudo boe ewagai Jesus bataru tabo boe emeartoruwo Jesus Cristoji. Itogea kurire kodire ire awu atugoreboe pemegado iwo maku Éfeso ba kurireu kejewuge meartorure Jesus jiwuge ewagai. Emeartorure Jesusji dukodire emugu pemegare Jesus apo rugadu. Nou Éfeso ba kurireu kejewuge ekare tugera ra Jesus Cristo piji rugadu. Emugu pemegare apo rugadu. 2Pao Kurireu ro pemegawo tai rugadu tabemegawo pudui. Uwo tabemegado boei jamedu. Pagimijera Jesus Cristo ro pemegawo tai tabemegawo pudui jamedu. Uwo tabemegado boei jamedu.
Jesus Cristo Ure Pameardae Pemegado Pameartoruwo Pao Kurireuji Rugadu
3Pamago pemegawo Pao Kurireuji. Pagimijera Jesus Cristo uo nure ema. Jesus Cristo meartorure tuoji rugadu. Pameartorure Jesus Cristoji dukodire pamugu pemegare Pao Kurireu apo. Dukodire ure baru tadawu turo pemegareu maku pagai taidu tabo tuwo paroiwado pameartoru rakawo ji. 4-5Pao Kurireu ukare moto to raga du otodai mare ure tumeardae tawuje marigudu pameartoruwo Jesus Cristoji rugadu. Jorduware ro pegareuge mode pagi. Mare du inodu tabo ure tumeardae tawuje tuwo tugeragu pai tuwobeče marigudu tuwo paro udo tuginai paro pegareu piji tumeardae ka paro pemegawo. Aino pameartorure Jesus Cristoji dukodire Pao Kurireu ure tugeragu pai pudae tuwo pado nono ro pemegareuge emogadure. Ure tugeragu pai tuwo pado nono tuwobe emogadure. Ainore Pao Kurireu meardaere marigudu. Mare paga karega. Pao Kurireu meardu kurire pai marigudu boetoji. Dukodire ure tumeardae tawuje tuwo toredo pagi. Emare ure tumeardae tawuje pameartoruwo Jesus Cristoji. Pagi karega. Mare pameartorure Jesusji dukodire Pao Kurireu ure tugeragu pai pudae tuwo toredo pagi taidu tabo rugadu. Paigoia karega pare udo tugeragu pai. Emare ure tugeragu pai tumeardae tabo taidu tabo rugadu. 6Dukodire pamago pemegawo Pao Kurireuji. Emare ro pemegare pai taidu tabo rugadu. Makudure pagaiboe ukare morido pagai. Pao Kurireu ure tumeardu kurire jiwu tonaregedu maku pagai taidu tabo. 7Pao Kurireu ro pemegare pai rugadu! Mare paro pemegare du moriče karega. Pabegare mare kočare Pao Kurireu ro pemegare pai. Emare ure tumeardae tawuje turo pemegawo pai taidu tabo. Dukodire Jesus Cristo ure tugu redo paro pegareu moriče tuwiagoduwo paro pegareu piji tuwo tugeragu pai paro pegareu piji. Emare ure padawuje paro pegareu piji pagawo paro pegareu morido pugeje. 8Ure turo pemegareu kurido pagai rugadu. Pao Kurireu jorduware rugadu. Roiware turowo boe jamedu boeji tuwo boe jamedu boe udo turugadu. 9Dukodire ure tumeardae tawuje marigudu taidu tabo. Mare boe erduwakare nou Pao Kurireu meardaeji. Mare aino čare ure itudo boe ewagai iwo boe erduwado nou tumeardaeji. Ure nou tumeardae tawuje marigudu boe emeartoruwo Jesus Cristoji. 10Nou tumeardae tabore Pao Kurireu aidure tuwo boe eiamedu boe edo bato pui pudae. Aidure tuwo baru tadawuge eiamedu boe edo bato pui pudae. Aidure tuwo moto kejewuge eiamedu boe edo bato pui pudae. Ure tugeragu Jesus Cristoji tuwo boe eimijera kurireudo ema. Dukodire ia meri keje Pao Kurireu umode boe jamedu boe udo turugadu dukejere umode nou tumeardae jetudo pudui rugadu. Boe eiamedu boe eimijera kurireu mode Jesus Cristoče rugadu.
11Boe jamedu boe ure nono Pao Kurireu meardae mogadure. Ukare moto to du otodai ure tumeardae tawuje tuwo tugeragu boei tuwo emugu pemegado pudabo. Ji aino ure nou tumeardae pemegado tuwo tugeragu pai pameartoruwo Jesus Cristoji Pao Kurireu uwo pamugu pemegado apo rugadu. 12Pao Kurireu ure tugeragu čei čegimaduwo apo rugadu jii toro rugadu, čemago pemegawo rore čei duji rugadu jii toro rugadu. Meartorure Jesus jiwuge boetojiwuge nure čegi. 13Tagi jamedu tameardure Jesus bataru remawuji. Nou bataru pemegare tai rugadu. Nono tameartorure Jesusji jamedu. Dukodire ure taginorudo taro pegareu piji dukodire ukare taro pegareu morido tagai jamedu. Dukodire mugu pemegare Pao Kurireu apowuge nure tagi jamedu. Tameartorure Jesusji dukodire Pao Kurireu ure Tuwari maku tagai. Makore boei marigudu tumoduie Tuwari maku meartorure Jesus jiwuge etai. Aino ure Tuwari maku pagai rugadu. Pao Kurireu Uwari rakojere meartorure Jesus jiwugebo rugadu dukodire boe erduware Pao Kurireu uwobe nure emage duji. 14Pao Kurireu uwobe nure meartorure Jesus jiwugeče. Dukodire Pao Kurireu Uwari rakojemode meartorure Jesus jiwugebo jii toro Jesus aregodumode du ka. Jesus aregodumode dukeje umode meartorure puduiwuge eewodudo pugeje. Umode etawuje ro pegareuge epiji emuguwo pudabo jii toro rugadu. Pao Kurireu Uwari rakojere nou meartorure Jesus jiwugebo dukodire erduware Pao Kurireu umode nou tumagore jiboe jetudo pudui rugadu. Dukodire pamago pemegawo Pao Kurireu meardae pemegareuji rugadu!
Paulo Makore Baruto Éfeso Kejewuge Meartorure Jesus Jiwuge Eparu Tabo
15Dukodire imagore Pao Kurireu bagai baruto tabaru tabo tu tu je. Imeardure tameartorure Pagimijera Jesus jituji. Imeardure jamedu tameardu kurie Pao Kurireu uwobe eiamedu boei duji. 16Dukodire ikimadure Pao Kurireu apo tarore jiboeji. Imagore baruto Pao Kurireu bagai tabaru tabo tu tu je. 17Inogwamagudure Pao Kurireuji uwo Tuwari maku tagai. Pao Kurireu nure ema. Pagimijera Jesus Cristo Uo Kurireu nure ema. Inogwamagudure Pao Kurireuji Uwari uwo tarduwado taro pemegareuji, uwo tarduwado Pao Kurireuji. Dukodire tarduwamode Pao Kurireuji rugadu. 18Inogwamagudure Pao Kurireuji uwo tagaora pemegado tarduwawo Pao Kurireu bataru remawuji. Pao Kurireu makore tawagai marigudu. Aino imagore Pao Kurireu bagai baruto uwo tarduwado kodiba makore tawagai. Makore tawagai tarduwawo tarudumode baru to duji rugadu. Makore turo pemegamoduie meartorure puduiwugei. Aino imagore Pao Kurireu bagai baruto uwo tarduwado nou turo pemegareuji rugadu. 19-21Aino imagore Pao Kurireu bagai baruto uwo tarduwado turagare rugadu duji. Rakare rugadu tuwo meartorure puduiwuge ero pemegado. Dukodire pameartorure ji rugadu. Pao Kurireu emare ure Jesus Cristo jewodudo pugeje nou turaga tabo. Ure Jesus mugudo pudabo tugana pemegareu jagwai baru tada nou turaga tabo jamedu. Nou turaga tabore ure pameartorudo aino pudui jamedu. Pao Kurireu ure Jesus Cristo mugudo baru tada boe eiamedu boe eimijerawo ema. Boe eimijera kurireuge eimijera nure ema. Baru tadawuge eiamedu boe eimijera nure ema. Raka kodure ro rakareu bope doge eraga kori rugadu, bope doge eimijera raka kori rugadu. Boe eimijerage eiamedu boe ekimijera nure ema. Jesus ie kurire moto kejewuge eiamedu boe ekie kori. Ie kurimode nou aregodumode boeiwu moto kejewuge boe ekie kori jamedu. 22Pao Kurireu ure boe jamedu boe mugudo Jesus iera keje dukodire boe emodukare tuginorudo Jesus piji. Meartorure Jesus jiwuge eiamedu boe eimijera pemegareu nure ema rugadu. 23Jesus ure nono boe etaora mogadure. Mare boe etaora ji karega inagoino. Meartorure Jesus jiwuge ekimijera nure Jesusče. Dujire inagoino. Meartorure Jesus jiwuge ere nono Jesus ukana upogora mogadure. Mare ukana upogora ji karega inagoino. Jesus uwobe nure nou meartorure puduiwu boeče. Jesus utugarege nure emage jamedu. Dujire inagoino. Meartorure Jesus jiwuge eragakare mare Jesus ure turaga maku nou meartorure puduiwuge etai tuwo eragado erowo nono Jesus meardae mogadure. Jesus ure boe jamedu boe udo nono tumeardae mogadure boe jamedu boe parugajeje.
2Ro Pegareuge Ere Nono Bireuge Emogadure
1Marigudu tameartorukare Pao Kurireuji dukodire taro pegare tu tu je. Dukodire tare nono bireuge emogadure. Mare tawi ji karega inagoino. Tamugu jaere Pao Kurireu piji. Taduiago bope doge eda kejewu joru pegareuto taro pegareu moriče. Dujire inagoino. 2Tameartorure ro pegareuge emeardaeji. Tameartorure bope doge eimijeraji. Iere Satanás. Nou meartorukare Pao Kurireu jiwuge eiamedu boe emeartorure nou bope doge eimijera kurireuji rugadu. Utugarege nure emage rugadu. Bope doge mareboe doge eiamedu boe emeartorure nou tugimijera pegareu Satanás bataruji rugadu. 3Marigudu paiamedu boe pare nono nou meartorukare Pao Kurireu jiwuge emogadure rugadu. Marigudu parore tu pameardaeji rugadu. Paipagakare Pao Kurireu bagai rugadu. Paipagare tu pawodure tabowu pameardae pegare jiboeji rugadu. Parore tu pagaidure jiboeji. Dukodire Pao Kurireu korigodure pai rugadu. Dukodire pawarigudumode boe pegareuto rugadu paro pegareu boe moriče rugadu. 4Mare Pao Kurireu okudugodure boebo rugadu. Meardu kurire boei rugadu. 5-6Dukodire ure tugeragu pai. Pameartorukare Pao Kurireuji dukodire pamugu jaere Pao Kurireu piji. Dukodire pare nono bireuge emogadure. Mare pawi ji karega inagoino. Pao Kurireu ure tugeragu pai pameartoruwo Jesusji. Dujire inagoino. Mare ukare morido pagai. Jesus Cristo bire paro pegareu moriče mare jewodure pugeje tuwo meartorure puduiwuge ekinorudo. Pameartorure Jesusji dukodire ure pado nono jewodureuge emogadure. Mare paewodu ji karega inagoino. Pao Kurireu ro pemegare pai rugadu. Ure paginorudo paro pegareu piji. Mare ukare pado paro pegareu morido pudai. Ema koiare ure paro pegareu morido. Dujire inagoino. Ure pamugu pemegado Jesus Cristo apo dukodire ure padawuje paro pegareu piji tuwo paro udo nono Jesus meardae mogadure. Nono boe ekimijerage umode pagi baru tada Jesus Cristo apo. 7Pao Kurireu ure paginorudo dukodire boe eiamedu boe erduware Pao Kurireu ro pemegareuji rugadu. Jii aino boe eiamedu boe erduware Pao Kurireu ro pemegareuji rugadu. Pao Kurireu ro pemegare rugadu. Meardu kurire boei rugadu. Dukodire ure Jesus Cristo maku boe etai bitoduwo boe ero pegareu boe moriče. Ia boe eromodukare nono Pao Kurireu ro pemegare boei dumogadure. Nono boe eiamedu boe erduwamode nou Pao Kurireu ro pemegareuji rugadu jii toro rugadu. 8-9Boe ekaregure turo pegareu morido tuwo tuginorudo. Tu Pao Kurireu umode boe ekinorudo ero pegareu mori piji. Emare ure tumeardae tawuje taidu tabo tugawo boe ero pegareu morido etai. Mare paga karega. Boe emeartorumode tu Jesusji tu rugadu. Nou Pao Kurireu ro pemegareu emare ure boe ekinorudo tugawo ero pegareu morido etai. Ainore Pao Kurireu ro pemegare meartorure puduiwugei. Boe emeardaere turo pemegawo tuwo turo pegareu morido. Mare pagare eroino. Boe emodukare turo pegareu morido turo pemegareu tabo. Boe ero pemegamode mare du inodu tabo boe emodukare tuginorudo. Dukodire boe emago pemegakaiago turo pemegareuji. Emago pemegawo tu Pao Kurireu ro pemegare pudui duji. 10Pao Kurireu ro pemegare pai tuwo paginorudo paro pegareu piji tuwo paro pemegado. Nono ure pamugu pemegado Jesus Cristo apo. Nono ure paragado paro pemegawo jii toro rugadu. Marigudu meardaere tuwo nou turo pemegareu maku pagai paro pemegawo nono nou tumeardae mogadure.
Meartorure Jesus Jiwuge Eiamedu Boe Etuwobe Nure Pugi
11Boe tuginaiwuge nure tagi. Judeu doge egore boe tuginaiwuge enuie tagi. Egore ukaie tuwaga oto biri kadowuge enuie tagi. Judeu doge egore uie tuwaga oto biri kadowuge enuie pudumi rugadu. Tore ime kugure tuwaga oto biri jire erore aino turoiaji. 12Pao Kurireu ure nou ero maku Judeu doge etai marigudu. Pao Kurireu uwobe nure emage. Mare tagi karega. Boe tuginaiwuge nure tagi. Pao Kurireu uwobe karegure tagi. Pao Kurireu ukare turo maku tagai. Pao Kurireu akore turo pemegamoduie Judeu dogei. Ure eno bakaru maku etai. Mare tagi karega. Tarduwakare Pao Kurireuji. Tameartorukare Pao Kurireuji dukodire tamugu jaere Pao Kurireu piji. Dukodire tabagakare ia Pao Kurireu ro pemegareu bagai. 13Mare aino čare tameartorure Jesus Cristoji. Dukodire tamugu pemegare Jesus apo. Jesus Cristo ure tugu redo taro pegareu moriče dutabore ure tugeragu tai. Dukodi čare tamugu puredure Pao Kurireuji. 14Jesus Cristo emare ure pabemegado pui. Ure Judeu doge boe tuginaiwuge edo nono pumogadure. Marigudu erugodure pui. Marigudu etukare puae. Mare Jesus bire boe eiamedu boe ero pegareu moriče dukodire ure nou boe emeardae pegare puidu akedudo. 15Ure nou Pao Kurireu ure maku Judeu doge etaiwu eno bakaru rugadu akedudo. Judeu doge emeartorukaiago ji pugeje tuwo tuginorudo. Emeartoruiago tu Jesusji rugadu. Dutabo čare ure Judeu doge boe tuginaiwuge edo nono pumogadure. Ure emugu pemegado pudabo puapo rugadu. Dukodire ure epemegado pui. 16Jesus bire ipo padure pugajejewu keje dukodire ure nou Judeu doge nou boe tuginaiwuge erugodu puidu akedudo pubiji pugeje tuwo ewobedo pugi puapo. Turoino dutabo ure tumedagedo emage jamedu. Jesus bire ipo padure pugajejewu keje dukodire ure tugeragu boei tuwo etudo Pao Kurireu ae. 17Ainore Jesus rore rugadu. Aregodure mato moto ka. Ure boe ewie Pao Kurireu bataru pemegareuji. Makore tumoduie boe epemegado Pao Kurireuji. Makore tumoduie boe tuginaiwuge epemegado Pao Kurireuji. Makore tumoduie Judeu doge epemegado Pao Kurireuji. Boe tuginaiwuge erduwakare Pao Kurireu o bakaruji. Judeu doge erduware Pao Kurireu o bakaruji. 18Mare Jesus Cristo emare ure paiamedu boe pabemegado Pao Kurireuji dukodire paroiware pamagowo Pao Kurireuji. Ia pagi Judeu doge nure pagi. Ia pagi boe tuginaiwuge nure pagi. Mare Pao Kurireu Uwari rakojere paiamedu boebo dukodire pamagomode Pao Kurireuji nono paragojere apo dumogadure.
19Boe tuginaiwuge nure tagi. Mare aino boe tuginaiwu remawuge karegure tagi pugeje. Aino meartorure Jesus jiwuge eiamedu boe emedage nure tagi. Pao Kurireu uwobe nure tagi jamedu meartorure Jesus jiwuge eiamedu boebo. 20Makore Pao Kurireu bataru jiwuge ere boe ewie marigudu nuba Pao Kurireu romoduie boei. Uture Jesus bataru tabowuge ere boe ewie jamedu. Tameartorure nou bataruji dukodire Pao Kurireu umode taragado nono boe emode tuwai pemegado tori tabo dumogadure. Jesus Cristo jire nou makore Pao Kurireu bataru jiwuge egoino. Dukodire ure nono tori pemegareu mogadure. Mare bai ji karega inagoino. Tori ji karega inagoino. Jesus jire boe eiamedu boe emeartorumode tumuguwo Pao Kurireu apo. Dujire inagoino. 21-22Jesus Cristo emare umode turaga maku tagai tuwo tarduwado taro pemegawo. Emare umode tado tarugadu Pao Kurireu Uwari rakoje pemegawo tagabo. Dukodire ure tabemegado nouia meartorure Jesus jiwugebo. Tamode tameardae pemegareu tawuje puapo rugadu. Nono Pao Kurireu Uwari uwai pemegareu mode tagi. Mare bai ji karega inagoino. Meartorure Jesus jiwuge eire inagoino. Pao Kurireu Uwari rakojere meartorure Jesus jiwuge eiamedu boebo. Dujire inagoino. Dukodire Pao Kurireu mugure tagabo rugadu.
3Paulo Uture Jesus Bataru Pemegareu Tabo Boe Tuginaiwuge Etae Tuwo Erduwado Ji
1Dukodire imagore baruto Pao Kurireu bagai tu tu je tabaru tabo. Paulo nure imi. Boe tuginaiwuge nure tagi. Ire boe tuginaiwuge ewie Jesus Cristo jiboeji emeartoruwo ji dukodire boe eimijerage ere itugu baičoreuto. 2Pao Kurireu ro pemegare i dukodire ure imaragodae maku inai iwo boe pemegado tai. Tarduware nou inoduji. 3-4Pao Kurireu ure iorduwado ture biadowu tumeardaeji. Ure nou tumeardae biado boe epiji marigudu. Mare aino čare ure iorduwado nou tumeardaeji iwo boe ewie tu tu je. (Ire nou Pao Kurireu meardae bu bapera keje. Nono ire nou atugoreboe maku toro tawagai. Tagaiwomode awu atugoreboeji dukeje tarduwamode iorduware jiwu Pao Kurireu meardaeji. Jesus Cristo rore jiboe jiwu Pao Kurireu meardae jire inagoino.) 5Marigudu Pao Kurireu ukare boe ewie nou tumeardaeji. Mare maigodu aino Pao Kurireu Uwari ure nou uture Jesus bataru tabowuge čegi čewie. Ure nou makore Pao Kurireu bataru jiwuge ewie jamedu. Dukodire čerduware nou Pao Kurireu jordae meardae boeji. 6Aino inure tawie jamedu tarduwawo nou Pao Kurireu jordae meardaeji jamedu. Nou Pao Kurireu meardae koiare umode Pao Kurireu ro pemegado boe tuginaiwugei nono Pao Kurireu ro pemegare Judeu dogei dumogadure. Boe tuginaiwuge Judeu doge ere nono pumogadure rugadu. Mare paga karega. Nou Pao Kurireu meardae koiare ure boe tuginaiwuge emeartorudo Jesusji. Emeartorumode Jesusji dukeje Pao Kurireu umode tuwobedo emage jamedu nono turore Judeu dogei dumogadure eiamedu boe emugu pemegawo Pao Kurireu apo rugadu. Emeartorumode Jesusji dukeje umode ekinorudo rugadu. Ainore Pao Kurireu jordae meardae ure marigudu. Ukare boe erduwado ji mare aino ča ure boe ewie nou tuiordae tumeardae boeji rugadu. 7Pao Kurireu ure turaga maku inai. Ure turo pemegareu maku inai tuwo tumaragodae maku inai imaragodaeče. Dukodire ure tudugaredo imi iwo boe ewie nou Jesus bataru pemegareuji. 8Boe kurireu karegure imi. Meartorure Jesus jiwuge eiamedu boe etugare nure imi. Mare kočare Pao Kurireu ure nou tumaragodae pemegareu maku inai ituwo boe tuginaiwuge ewagai iwo ewie Jesus Cristo bataru pemegareuji. Iwo ewie Jesus Cristo ro pemegareuji. Jesus Cristo koiare umode boe pemegado boei rugadu. Boe erduware jiboe aregodumodukare Jesus Cristo rore jiboe oto pa ka. Boe erduware jiboe aregodumodukare Jesus Cristo meardaere jiboe oto pa ka. 9Pao Kurireu ure tumeardae rugadu boe towuje rugadu. Aino ure itudo boe ewagai iwo ewie nuba Pao Kurireu romode tuwo tumeardaere jiboe towuje. Marigudu rugadu ure nou tumeardae biado boe epiji jii aino. Mare aino maigodu aino ure iorduwado ji iwo boe ewie. 10-11Ukare moto to du otodai ure nou tumeardae tawuje marigudu Jesus Cristo aregoduwo mato moto ka. Mare ure nou tumeardae biado boe epiji jii toro Jesus aregodumode du ka. Aino ča ure Pagimijera Jesus Cristo arego mato moto ka. Dujire Pao Kurireu meardaere. Nono boe emeartorumode Jesusji dukeje nou boe ekodumode nou Pao Kurireu meardae rekodaji. Pao Kurireu jorduware rugadu. Mare boe emeartorumode Jesusji dukeje eiamedu boe emode nono pumogadure Pao Kurireu jakai. Dukodire baru tadawuge rakareuge erduwagodumode Pao Kurireuji, jorduwareu nure ema duji. Egomode Pao Kurireu jorduwaie rugadu boe jamedu boeji. Bope doge rakareuge eiamedu boe egomode jamedu Pao Kurireu jorduwaie rugadu boe jamedu boeji. 12Pameartorure Jesusji dukodire pamugu pemegare apo. Dukodire pabogurukare pamagowo Pao Kurireu bagai rugadu. Pamugu pemegare apo dukodire pamagomode ji rugadu. Parduware meardumode pamagore tuwagai duji. 13Dukodire inogwamagudumode tai. Tagiarigodukaba boe pegare i duji. Ire tawie Jesus bataru pemegareuji boe pemegawo tai. Tameartorure ire tawie jiwu bataruji rugadu. Dukodire inagoino tagiarigodukaba.
Jesus Cristo Meardu Kurire Boei
14Dukodire ire ipu jodo mototo. Imagore Pao Kurireu bagai tu tu je. 15Pao Kurireu ure baru tadawuge eiamedu boe etowuje. Ure moto kejewuge eiamedu boe etowuje. Meartorure jiwuge etuo nure ema rugadu. 16Pao Kurireu kurire rugadu, rakare rugadu. Dukodire inogwamagudure ji uwo turaga maku tagai. Uwari uwo taragado tai rugadu. Dukodire taraga mode rugadu tameartoru kuriwo Jesusji jii toro rugadu. Ainodu koiare umode taragado tai. 17Inogwamagudure Pao Kurireuji tameartoruwo rugadu Jesus Cristoji. Tameartorumode ji dukeje mugumode tagabo. Inogwamagudure Pao Kurireuji tameardu kuriwo boei rugadu. Tagaba tagera ra tameardu kurire boei dupiji. 18Jesus Cristo emare meardu kurire boei rugadu. Jesus umodukare tugera ra tumeardu kurire boei dupiji rugadu. Akedumodukare rugadu. Meardu kurire boe eiamedu boei rugadu. Inogwamagudure Pao Kurireuji uwo turaga maku tagai tarduwawo nou inagoino jiwu Jesus meardu kurire boei duji rugadu. 19Inogwamagudure Pao Kurireuji tarduwawo Jesus meardu kurire tai rugadu duji. Boe erduwa pemegamodukare Jesus meardu kurire boeiwu meardae jamedu boeji. Mare tarduwamode bega bega Jesus meardu kurire boeiwu meardaeji dukeje tameardae pemegamode nono Pao Kurireu meardae mogadure. Taro pemegamode nono Pao Kurireu ro mogadure. 20Pao Kurireu rakare rugadu. Raka kodure pagogwamagudae boe kori rugadu. Dukodire umode turaga maku pagai rugadu tuwo boe jamedu boe pemegado pai. Pameardae pemegamode mare paroiwakare pameardaewo awu Pao Kurireu ro pemegareu jamedu boeji. 21Dukodire meartorure Jesus jiwuge eiamedu boe emago pemegawo Pao Kurireuji Jesus apo rugadu. Nou boe emago pemegareu akedukawo. Emago pemegawo Pao Kurireuji jii toro rugadu. Nono rugadu uwo aino rugadu jii toro.
4Meartorure Jesus Jiwuge Emeardae Pegamodukare Pui
1Pagimijera Jesus utugare nure imi dukodire ia boe etaidukare i. Dukodire ere itugu baičoreuto. Mare iwo tawie tu je. Pao Kurireu makore tawagai tameartoruwo tuwadaruji. Dukodire taro pemegado nono Pao Kurireu meardae mogadure. 2Tagaba boe remawugedo tagi boe utugarege pemegawo tagi. Tamago rakakaba boei. Mare tamago pemegado boei. Tagorigodukaba boei. Mare taro butugudo boei. Tameardu kurido boei. Dukodire tagogudugodumode boebo. 3Pao Kurireu Uwari ure tabemegado pui. Dukodire ure tameardae pegareu akedudo tabiji tameardae pegakawo pui. Ča taragado tai tagawo tagera ra nou Pao Kurireu Uwari rore tai dupiji tameardae pemegawo pui rugadu. Nono tabemegamode pui rugadu. 4Mare paga karega inagoino. Meartorure Jesus jiwuge ere nono Jesus biri kodu mogadure. Mare kodu ji karega inagoino. Biri ji karega inagoino. Jesus uwobe nure emage. Dujire inagoino. Dukodire emodukare tudo tuginai pubiji. Dujire inagoino. Dukodire inagoino tai tameardae pemegawo meartorure Jesus jiwuge eiamedu boei tabemegawo pui rugadu. Mugure tagabowu Pao Kurireu Uwari ure mitotu je. Pobe karega. Dukodire inagoino tai tameardae pemegawo pui. Pao Kurireu makore tawagai taiamedu boe tameartoruwo tu Jesusji tabagawo bagai uwo tugirimi dubagai. Tabagare bagaiwu ure mitotu je. Tu Jesus bagaire tabagare uwo tugirimi dubagai. Dukodire inagoino tai tameardae pemegawo pui. 5Pagimijera ure mitotu je. Dukodire inagoino tai tameardae pemegawo pui. Umode paginorudowu ure mitotu je dukodire paiamedu boe pameartorumode tu ji rugadu. Dukodire inagoino tai tameardae pemegawo pui. Boe emeartorure Jesusji dukeje eiamedu boe etao pegododure. Judeu doge etao pegododure nono boe tuginaiwuge etao pegododure dumogadure. Eiamedu boe emeartorure Jesusji dukodire eiamedu boe etao pegododure nono puro mogadure. Tagao pegododure nono ero mogadure jamedu. Dukodire inagoino tai tameardae pemegawo pui rugadu. 6Pao Kurireu ure mitotu je. Meartorure Jesus jiwuge eiamedu boe etuo nure ema rugadu. Dukodire pao nure ema jamedu. Ia pao kurireu bokware. Ure mitotu pagai. Dukodire inagoino tai tameardae pemegawo pui. Paiamedu boe Pagimijera Kurireu nure ema rugadu. Maragodure pagabo boe jamedu boeji. Rakojere pagabo rugadu. Dukodire inagoino tai tameardae pemegawo pui rugadu jii toro rugadu.
7Mare Jesus Cristo ure tumeardae tawuje tuwo turo pemegareu maku pagai, meartorure puduiwuge eiamedu boe etai. Tuwo tumaragodae maku pagaire Jesus roino. Mare nou pamaragodae ure tuginai pagai tu tu je. Dukodire umode pamaragodu pemegado nou pamaragodaeji jamedu. 8Padure bapera kejewu Pao Kurireu bataru akore: – Ure tugeragu nou moto kejewu boei tuwo ekinorudo nou bope doge epiji etuwo pudabo. Ča ruture ebo. Čare ure turo pemegareu maku moto kejewuge boe etai tuwo tumaragodae maku etai emaragodaeče.4.8 Awu bataru padure Salmo 68.18 keje.
9Jesus jire akoino. Emare ure turawuje boetoji baru piji moto ka, moto towu aroe eiawuto jamedu. Dukejere ruture. Dukodire Pao Kurireu akore “ruture” aino. 10Nou ure turawujewu ure nono nou rutureu mogadure. Ure mitotu je. Ruture baruto dukeje ruture nou kuieje doge toro etao ka toro turagojewo Pao Kurireu apo baru jamedu boe parugajeje boe eiamedu boe eimijera kurireuwo ema baru jamedu boe tada. 11Emare ure turo pemegareu maku meartorure puduiwuge etai tuwo tumaragodae maku etai. Dukodire ure ia meartorure puduiwuge etudo puduiboe to bataru tabo ia boe ewagai. Ure ia meartorure puduiwuge erduwado tuwadaruji emagowo ji boe ewiagai. Ure iage erduwado ewo boe emeartorudo Jesusji. Ure iage erduwado etuwo meartorure Jesus jiwugei tuwo emeardae pemegado, ewo boe erduwado Pao Kurireu bataruji. 12Ainore Jesus rore nou turo pemegareuji tuwo meartorure puduiwuge edo turugadu emeartoruwo Pao Kurireu bataruji rugadu. Ainore Jesus rore tuwo nou meartorure puduiwuge eragado ekawo tugera ra tumeartorure puduidu piji. 13Dukodire pameartorumode tu Jesusji. Nono pameardae pegamodukare pui. Mare parduwamode Pao Kurireu Onaregeduji rugadu. Nono jorduwareuge mode pagi. Nono pameartorumode Jesus Cristoji nono Jesus Cristo meartorure Pao Kurireu jitu mogadure nono pamode Pao Kurireu jakaredo pudui rugadu parore jiboeji. 14Dukodire paromodukare nono boe etore ero mogadure pugeje. Boe etore erduwakare kaba jiba tumeartorumode. Mare parduware. Dukodire pameartorumodukare boe meardae pegareugei pugeje. Egore tumagoie Pao Kurireu bataruji, Pao Kurireu meardaeji. Mare pagare egoino. Etaidure tuwo paekiripagado. Emode tuwadaru pemegado pai tuwadrarodae tabo tuwo paekiripagado pameardae pegawo nono tumeardae mogadure. Mare eroiwamodukare pai pugeje. Pameartorumodukare ei pugeje. 15Mare pameartoru rakamode Jesusji. Emare ure nono pagaora mogadure. Mare pagaora ji karega inagoino. Pagimijera nure ema dukodi. Dujire inagoino. Dukodire pamodukare boe ekiripagado. Pamagomode Pao Kurireu bataru remawuji tu rugadu. Mare pamago rakamodukare boei. Pameardu kurimode boei pawadaru pemegareu tabo. Nono pameartoru rakamode Jesus Cristoji nono Jesus Cristo meartorure Pao Kurireu jitu mogadure. 16Meartorure Jesus jiwuge ere nono boe etore erijodu umogadure. Boe etore erijodumode dukeje epogora ekana rakagodumode. Meartorure Jesus jiwuge ere nono nou boe etore erijodu umogadure. Erore puiboe ure nono boe epogora boe ekana umogadure. Mare boe erijodu ji karega inagoino. Boe epogora boe ekana ji karega inagoino. Jesus emare jorduware tuwo boe ero jamedu boe udo turugadu. Meartorure Jesus jiwuge emode tugeragu Jesus meardaeji dukeje emeardu kurimode pui. Dujire inagoino. Nono emode tugeragu Jesus ure maku pudaiwu tumaragodaeji tumaragoduwo ji. Nono emode nou tumaragodae towuje rugadu tubemegare pui dutabo tumeardae pemegare pui dutabo. Dujire inagoino. Nono emeardu kurimode pui rugadu jii toro rugadu. Dujire inagoino. Nono emeartoru kurimode Jesusji rugadu. Dukejere emeartoru remawumode Jesusji rugadu. Dujire inagoino.
Meartorure Jesus Jiwuge Ero Maiwu Reo
17Dukodire iwo tawie Pagimijera Jesus jiboeji. Taeku jado. Tagera ra nou boe tuginaiwuge meartorukareuge ero piji. Tarokaba nono ero mogadure. Emagere emeardaere jiboe ukare turugadu. Emode tumeardae tawuje mare pagatu je. 18Erduwa bokware nono jorduwa bokware awara bagaiwu boečo kaowu umogadure. Erduwakare rugadu. Emeartoru bokware Pao Kurireuji. Dukodire edu jaere Pao Kurireu meardae pemegareu piji. Ekare tugeragu Pao Kurireu meardaeji rugadu. 19Epoguru bokware turo pegareuji. Ekigodu tumagu piga kuru bagai. Ime doge areme doge eribari kigodure pui. Emeardaere tu turo pegawo boe ero pegareu jamedu boeji. 20Mare tagi tarduwagodure Jesus Cristoji. Mare nou ro pegareuge ero tabo karega. 21Tawiapagare ire tarduwado jiwu Jesus bataruji dukeje tameartoru kurire ji. Nono mugu pemegare Jesus apowuge nure tagi. Dukodire boe ere tarduwado Jesus bataru remawuji. 22Dukodi čare tagera ra tameardae pegareu jamedu boe piji. Marigudu tameardae pegareu koiare ure taro pegado. Marigudu tameardae pegareu ure taekiripagado dukodire ure tagaidudo boe pegareu boeji. Dukodire tameardae pegareu uiago tagagedudo marigudu. 23Mare aino čare Jesus bataru remawu ure tarduwado tawo tameardae maiwu mugudo tameardae pegareu mugato tawo tagaidure jiboe maiwudo. 24Ča tageragu nou Pao Kurireu ure maku tagaiwu tameardae maiwuji. Pao Kurireu ure nou tameardae udo nono tumeardae remawu mogadure. Tameardae maiwumode dukeje taro pemegamode. Taromodukare nono meartoru bokwareuge ero mogadure pugeje. 25Tagogwa ra tawadrarodae piji. Pameartorure Jesusji dukodire Jesus Cristo uwobe nure pagi. Dukodire tamagodo tu pui tawadaru pemegareu remawu tabo. 26Tagorigodu raimode dukeje taro pegamode rugadu. Tagorigodumode mare tagorigodu barigu tabiji kuri je rugadu taro pegakawo boei. Tawia ra tagorigodu piji kuri aino. 27Tawiapagakaba bope doge eimijeraji. 28Ia tagi tagiwogure mare tagiwogukaba pugeje. Tamaragodudo diero bagai. Tamaragodu pemegamode dukeje diero makudumode tagai tamaragodae moriče. Dukodire taroiwamode tawo tagera maku marenarue doge etai. 29Tamago pegakaba boei. Tamago pemegado boei tawo erduwado, tawo ero pemegado. Dukejere boe pemegamode nou biapagare taiwugei. 30Tagaba Pao Kurireu Uwari kiarigo. Tameartorure ji dukodire ure Tuwari maku tagai tuwobewo tagi mare ure Tuwari maku tagai tuwo tarduwado jamedu tumoduie taginorudo taro pegareu piji rugadu jii toro Jesus aregodumode kejewu ia meri ka. 31Tameardae pegareu barigu tabiji tardu pegakawo boei pugeje. Tagorigodukaba boei pugeje. Boe korikaba tai pugeje. Tagokikaba boei pugeje. Tagaba tagogwa pegado boei pugeje. Tagaba tardu pegado boei pugeje. 32Mare taro pemegado boei. Tameardu kurido pui. Tawiagodudo boe ero pegare tai dupiji nono Pao Kurireu biagodure taro pegareu piji dumogadure. Tameartorure Jesus Cristoji dukodire Pao Kurireu biagodure taro pegareu piji. Dujire inagoino rugadu.
5Meartorure Jesus Jiwuge Erowo Turo Pemegareuji Tu Tu Je Ji Toro Rugadu
1Pao Kurireu meardu kurire jiwuge ore nure tagi. Dukodire taragado tai tarowo nono Pao Kurireu ro mogadure. 2Jesus Cristo meardu kurire pai dukodire ure tumagu tuwiwo paro pegareu moriče. Dukodire tameardu kurido boei nono Jesus Cristo ro mogadure. Jesus bire pamugato. Jesus rore aino du pemegare Pao Kurireuji nono roreboe pemegareu mogadure. Mare roreboe pemegareu ji karega inagoino. Pao Kurireu jakarere pudui Jesus bitodure duji boe ero pegareu moriče. Dujire inagoino. 3Pao Kurireu uwobe nure tagi taro jetorowo. Dukodire taeribarikaba tamugukare apowugei. Tawia ra taeribari piji. Tawia ra boe emeardae pegareu jamedu boe piji. Tagogwa kidukaba boeji tu tagai tameardaekawo tawo tagoe kurido tamedage epiji. Taburedukaba boe ero pegareuji boe emeardae pegakawo tarore jiboeji. 4Tamagokaba boei boe eribariji. Tagaba tamago pegado boei. Tamagokaba tawadaru pegareuji. Mare tagimadudo Pao Kurireu ro pemegareuji. 5Ime areme ero pegare tieribari tabowuge eragojemodukare Pao Kurireu apo, eragojemodukare Jesus Cristo apo. Boe ero kigodumode nono ariga doge erore pui dumogadure dukeje eragojemodukare Pao Kurireu apo, eragojemodukare Jesus Cristo apo. Boe enogwa kidumode tu pudai tuwo toe kurido tumedage epiji tu tu je dukeje ewiapagamode tu toeji rugadu. Dukodire ere toe udo nono Pao kurireu ure tiagai Pao Kurireu mugato. Eroino jiboe ure nono meartorure tuwari santo dogeiwuge ero mogadure. Nou boe eragojemodukare boe eimijera kurireu Jesus Cristo apo. 6Pao Kurireu korigodumode nou rore ainowu boei rugadu. Korigodumode meartoru bokware puduiwugei rugadu. Mare boe erduware tuwo boe ewarigu boeto. Egore Pao Kurireu korigodumodukaie ro pegareugei. Mare pagare egoino. Nou tuwadrarodae tabore etaidumode tuwo tawarigu boeto jamedu. Mare tameartorukaba ei rugadu. 7Tagaba tamedagedo emage. 8Marigudu tare tawarigu boeto nono boečo ure boe ewarigu boeto awara piji dumogadure. Mare boečo ji karega inagoino. Taro pegareu jire inagoino. Marigudu taro pegare nono ero mogadure jamedu. Tarduwakare Pao Kurireu ro pemegareuji. Tarduware tu taro pegawo. Mare maigodu aino tare tamagu Pagimijera ai uwobewo tagi. Tarduware Pagimijera Jesus bataruji dukodire Pagimijera bataru ure tarduwado taro pemegawo. Ča taro pemegado rugadu. Dukodire tamode nono nou ro pemegare meri jiwuge emogadure. Mare meri ji karega inagoino. Boe ero pemegareu jire inagoino. 9Pao Kurireu bataru ure nono meri joku urugu pemegareu mogadure. Meri jire boe erdumode boeji turo pemegawo. Mare meri joku ji karega inagoino. Pao Kurireu bataru umode boe erduwado ewo tugera bararedo boei. Dujire inagoino. Pao Kurireu bataru umode boe erduwado ewo turo jetorodo Pao Kurireu jakai. Dujire inagoino. Boe remawu jire boe emagomode pu biagai. Dujire inagoino. 10Dukodi čare taipaga pemegado Pao Kurireu bataruji tarduwagoduwo Pagimijera Jesus aidure jiboeji tameartoruwo ji rugadu. 11Meartorukare Jesus jiwuge emode turo tawuje mare pagatu je. Erore jiboe ure nono boečo mogadure. Mare boečo remawu ji karega inagoino. Ero pegare tu tu je. Dujire inagoino. Mare tagi tarokaba nono ero mogadure. Etaidure tuwo turo pegareu biado boe epiji. Tagogituwado ei ero pegare jiboeji. 12(Nou ia boe ero pega kuričigore rugadu. Boe epogurure tureadoduwo nou erore jiboeji boe ewiagai.) 13Mare tamagomode Pao Kurireu bataruji ewiagai tagogituwawo ei ero pegareuji dukeje erduwamode ro pegareu nure pudumi duji, erduwamode Pao Kurireu meardae pegare erore aino duji. 14Boe erduwamode boe ero pegareuji dukeje nou boe emode tugera ra turo pegareu piji. Ainore meartorure Jesus jiwuge egore tura tabo: Are nono nudureu mogadure. Are nono bireu mogadure. Aedadudo! Aewoduwo pugeje! Nono Jesus Cristo umode arduwado nono jorugu pemegareu mogadure. Umode arduwado aro pemegawo. Mare boe enudu ji karega nou boe erare jiboe akoino. Boe ewi ji karega akoino. Boe ero pegareu jiboe jire akoino. Boe ero pegareu koiare ure boe edu jaedo Pao Kurireu piji. Boe emeartoruwo Jesusji taidu tabo. Dujire akoino. 15Dukodire tagaiwo pemegado tarore jiboeji. Tarokaba nono jorduwa bokwareuge ero mogadure. Tarodo nono jorduwareuge ero mogadure. 16Ro pegareuge ere tumaedo rugadu. Dukodire taragado tai taro pemegawo rugadu tu tu je. 17Tagaba jorduwa bokwareugedo tagi. Mare tagaiwodo Pao Kurireu bataruji taemaruwo Pagimijera Jesus meardae bagai tarowo nono Pagimijera meardae mogadure. 18Tage kurukaba tai vinho kuru tabo. Tage kurumode tai dukeje boe pegamode tai rugadu. Mare tamagu Pao Kurireu Uwari ai uwo taro pemegado. 19Taragodu pemegado Pao Kurireu ie tabo rugadu. Taegaredo tai Pao Kurireu apo rugadu. Tamago pemegado pui nou taragodure jiwu bataru pemegareu tabo taegarewo tai boe makodukawo. 20Tameartorure Jesus Cristoji. Pagimijera nure ema. Dukodire tagimadudo Jesus ie tabo boe jamedu boeji Pao Kurireu biagai. Tagimadudo Jesus ie tabo Pao Kurireu rore jiboe jamedu boeji.
Uwirereuge Okogereuge Ero Reo
21Tameartorure Jesus Cristoji dukodire tameartorudo pui jamedu. 22Areme emeartoruwo tugoge ewadaruji nono tumeartorure Jesus jitu mogadure. 23Meartorure Jesus jiwuge emeartorumode tu ji eimijera nure ema dukodi. Nono aredu meartoruwo toredu bataruji oredure ema dukodi jamedu. Jesus umode meartorure puduiwuge ekinorudo ero pegareu piji rugadu. Uwobe nure emage dukodi. 24Dukodire areme emeartoru pemegawo tugogei nono meartorure Jesus jiwuge emeartoru moga Jesus jitu mogadure. 25Ime emeardu kuriwo tuwirei nono Jesus Cristo ro mogadure. Jesus meardu kurire meartorumode puduiwugei rugadu. Dukodire ure tumagu tuwiwo emugato ero pegareu moriče. 26-27Bire emugato tuwo meartorumode puduiwuge ero pegareu mori okwado epiji nono boe emode tugudau areia kabi pobo tabo dumogadure. Mare boe ekudau ji karega inagoino. Boe emeartorumode Jesus bataruji dukeje Jesus umode ero pegareu mori okwado epiji tugu tabo. Umode ero pemegado rugadu. Dujire inagoino. Ainore Jesus rore tuwo meartorure puduiwuge emodudo nono aredu motureu mogadure. Mare emodu ji karega inagoino. Jesus umode meartorure puduiwuge ero pemegado. Dujire inagoino. Jesus umode meartorure puduiwuge etudo pudae eragojewo pudabo. Dujire inagoino. 28-29Nono imedu meardu kuriwo toredujeji tietu pemegawo ji nono tietu pemegare pudui dumogadure. Boe erdu pegakare pudui rugadu. Dukodire inagoino imei emeardu kuriwo tuwirei tietu pemegawo ei nono tietu pemegare pudui dumogadure. Imedu meardu kurimode toredujeji nono boe pemegamode oredujeji, boe pemegamode ji jamedu. Boe erdu pegakare pudui rugadu. Boe emarure tuge bagai tietu pemegawo pudui. Dukodire inagoino imei emeardu kuriwo tuwirei tietu pemegawo ei nono tietu pemegare pudui dumogadure. Boe etu pemegare pudui nono Jesus Cristo jetu pemegare meartorure puduiwugei dumogadure jamedu. 30Pameartorumode Jesus Cristoji dukeje uwobe mode pagi rugadu. 31Padure bapera kejewu Pao Kurireu bataru akore: – Dukodire imedu umode tudawuje tuo piji tuje piji tumuguwo toreduje apo. Dukodire ere pobe puapo mare Pao Kurireu jakai ere mitotu puapo rugadu.5.31 Awu bataru padure Gênesis 2.24 keje.
32Boe jokodu jire awu Pao Kurireu bataru akoino. Mare ia Pao Kurireu ure biadowu tumeardae meture awu bataru tada. Imire iorduware ji. Jesus Cristo jire akoino. Meartorure Jesus jiwuge eire akoino. Meartorure Jesus jiwuge emagare mare emeardaere nono Jesus meardaere puapo dukodire ere mitotu je Jesus apo Pao Kurireu jakai. Dujire akoino. 33Mare uwirereuge eire akoino jamedu rugadu. Dukodire ure ime emeardu kurido tuwirei tietu pemegawo ei nono tietu pemegare pudui dumogadure. Ure areme emeartorudo tugoge ewadaruji jamedu.
6Ainore Boe Etore Eromode Tujeji Tuoji
1Boe etore nure ia tagi. Tameartorure Jesusji. Dukodire tameartorudo tajeji, taoji. Tameartorumode ei dukeje tamode taro jetorodo. 2Padure bapera kejewu Pao Kurireu bataru akore: – Tameartorudo tajeji, taoji.
Mare Pao Kurireu o bataru boetojiwu reo boe emeartoruwo ji tuwo boe pemegado pudui. 3Akore: – Tameartorumode tajeji taoji dukeje boe pemegamode tai rugadu. Taragoje raimode moto keje rugadu.6.3 Awu bataru padure Deuteronômio 5.16 keje.
Ainore Pao Kurireu akore marigudu. 4Taro pegakaba tagorei jamedu ekorigodukawo tai. Mare erduwado Pao Kurireu bataruji tawo ero jetorodo nono meartorure Jesus jiwuge ero mogadure.
Boe Etugarege Emeartoruwo Tugimijeragei
5Ia tagi boe etugarege nure tagi. Taragado tai tameartoruwo rugadu tagimijeragei. Tameartorudo ei tagaidu tabo nono tameartorure Jesus Cristoji dumogadure. 6Tagimijerage etaiwomode tai dukeje tamaragodu pemegado rugadu tameartoruwo ei. Mare tagimijerage eragojemodukare tagabo mare du inodu tabo tamaragodu pemegado tameartoruwo tagimijerage ewadaruji rugadu. Nono tagimijerage etaidumode tamaragodaeji. Mare tameartorudo ei taraga tabo rugadu, tagaidu tabo rugadu. Ainore taromode Pao Kurireu aidure jiboeji. Dutabore tamode tado nono Jesus Cristo utugarege emogadure. 7Tamaragodudo taegarere tai dutabo. Tamaragodure ime etai mare tamaragodu pemegado nou ime etai nono tamaragodu pemegare Pagimijera Jesus ai dumogadure. 8Ia tagi boe etugarege nure tagi. Ia čegi boe etugarege karegure čegi. Mare tawiagodukaba. Pamode boe pemegado boei dukeje Pagimijera Jesus umode boe pemegado pai pamaragodae moriče. 9Ia tagi boe ekimijerage nure tagi. Tamago rakakaba tadugaregei. Taro pemegado tadugaregei. Tagimijerare jamedu dukodire inagoino tai tamago rakakaiago, taro pemegaiago tadugaregei. Nono ča tagimijera ure nono ekimijera mogadure. Rakojere baru tada. Pagimijera Jesus jire inagoino. Utugarege nure pagi. Pagimijera jorduware boe eiamedu boei. Boe remawu tabore rore boe eiamedu boei. Umodukare tuiordae tumeardae tawujedu pagado boei.
Pao Kurireu Ukudau Areia Ro Rakareu Reo
10Nono čare tameartoru rakado Pagimijera Jesusji. Emare rakare rugadu. Uwobe nure tagi. Jesus ure turaga maku tagai dukodi ča taragado tai. 11Pao Kurireu umode tugudau ro rakareu maku tagai. Tugu tai. Tamode tugu tai dukeje tawiapagamodukare bope doge eimijera meardaeji. Mare boe ekudau ji karega inagoino. Tameartorumode Jesus bataruji tawo taragado tai tawiapagakawo bope doge eimijera meardae pegareuji. Dujire inagoino. Bope doge eimijera aidumode tuwo taekiripagado mare tameartorumode Jesusji dukeje bope doge eimijera roiwamodukare tai pugeje. 12Parugodure rugadu mare boei karega. Parugodure bope dogei mareboei. Ro pegareuge eimijerage nure emage. Boe eimijerage pegareuge eimijerage nure emage. Ro pegareuge etuwaire nure emage. Eire parugodure rugadu. Emeardae pegareu jire parugodumode rugadu. 13Dukodire inagoino tai. Pao Kurireu ukudau ro rakareu tugu tai rugadu. Ro pegareuge ero pegareu ure tumaedo kejewu meri aregodumode rugadu. Mare tamode Pao Kurireu ukudau areia rakareu tugu tai dukeje tawiapagamodukare emeardae pegareuji. Mare boe ekudau ji karega inagoino. Tameartoruwo Pao Kurireu bataruji rugadu. Dujire inagoino. Tamodukare tagera ra tameartorure Jesus jitu piji rugadu dukeje taragamode tai rugadu ro pegareuge emeardae pegareu piji. Dujire inagoino. 14Ainore Pao Kurireu ukudau areia rakareu ure nono boe pegajejewu mogadure. Mare boe ekudau areia ji karega inagoino. Boe pegajejewu ji karega inagoino. Tawadrarodukaba. Tamagodo tu boe remawuji. Dujire inagoino. Tawadrarodumodukare. Tamagomode tu boe remawuji. Dure tarugodumode bope doge eimijeraji. Dujire inagoino. Pao Kurireu ukudau rakareu ure nono padure boe emorora kejewu meriri mogadure. Mare padure boe emorora kejewu meriri ji karega inagoino. Taro jetorodo. Dujire inagoino. Tamode taro jetorodo tarugoduwo bope dogei. Dujire inagoino. 15Pao Kurireu ukudau rakareu ure nono boe ewure okeakejewu mogadure. Mare boe ewure okeakejewu ji karega inagoino. Tado tarugadu tawo boe ewie Jesus bataru pemegareuji tawo boe epemegado pui. Dujire inagoino. Tamode tarugadu tawo boe ewie Jesus jiboeji dure tarugodumode bope doge eimijeraji. Dujire inagoino. 16Pao Kurireu ukudau rakareu ure nono boere onado puduiwu meriri mogadure. Mare meriri ji karega inagoino. Tameartorudo Jesusji rugadu. Dujire inagoino. Tameartorumode ji dukeje bope doge eimijera meardae pegareu umodukare taekiripagado. Bope doge eimijera aidumode tuwo tumeardae jetudo tai nono boe ere joru tugu tugo ototo dumogadure tuwo barigu toro nou boe ewai ao ka dumogadure. Mare tugo ji karega inagoino. Tameartorumode Jesusji dukeje tameartorumodukare bope doge eimijera meardae pegareuji. Dujire inagoino. Tameartorudo Jesusji rugadu dure tarugodumode bope doge eimijeraji. Dujire inagoino. 17Pao Kurireu ukudau rakareu ure nono atadawu meriri mogadure. Mare boe etaotadawu meriri ji karega inagoino. Tameartorumode Jesusji dukeje umode taginorudo. Dujire inagoino. Tameartorudo Jesusji uwo taginorudo. Dure tarugodumode bope doge eimijeraji. Dujire inagoino. Tameartorudo Pao Kurireu bataruji rugadu. Pao Kurireu bataru ure nono Pao Kurireu Uwari rago mogadure. Mare rago ji karega inagoino. Tarduwado Pao Kurireu bataruji. Tameartorudo Pao Kurireu bataruji. Dujire inagoino. Tarduwamode Pao Kurireu bataruji. Tameartorumode ji jamedu. Dure Pao Kurireu Uwari rugodumode bope doge eimijeraji. Dujire inagoino. 18Nono tagaba tagera rawuje tamago tabo baruto Pao Kurireu bagai. Nono Uwari umode tameardae pemegado tamagowo Pao Kurireu bagai rugadu. Boe pegare tai dukeje tamagodo bagai uwo tugera maku tagai. Boe pemegare tai mare tamagodo Pao Kurireu bagai tamago pemegawo ji. Tamagodo Pao Kurireu bagai ia boe eparu tabo jamedu. Tamagodo Pao Kurireu bagai meri jameduji. Mare taeku jado. Taragado tai rugadu tamago raiwo baruto Pao Kurireu bagai meartorure Jesus jiwuge eiamedu boe eparu tabo. 19Tamagodo baruto Pao Kurireu bagai iparu tabo jamedu. Tamagodo Pao Kurireu bagai uwo tuwadaru maku inai iwo irugadu iwo boe ewie Jesus bataru pemegareuji rugadu. Uwo tugera maku inai ipogurukawo imagowo boe ewiagai rugadu iwo ewie biadodureu Jesus bataru pemegareuji. 20Imaragodae reo iwo boe erduwado Jesus bataru pemegareuji. Mare itugudure baičoreuto. Tamagodo iparu tabo baruto ipogurukawo imagowo rugadu Jesus bataru pemegareuji boe eiamedu boe ewiagai irowo nono Pao Kurireu meardae mogadure rugadu.
Paulo Ukimadure Nou Boe Ewagai
21Imedu Tíquico aregodumode tagae. Meartorure Pagimijera Jesusji rugadu. Imeardu kurire Tíquicoji. Imedia remawu nure ema. Ukare tugera ra tumeartorure Jesus jitu piji rugadu. Emare umode tawie nuba boere i rugadu. Nono tarduwamode nuba boere i rugadu. Tarduwamode irore jiboeji. 22Imire ire Tíquico utudo tawagai uwo tawie nuba boe erore i. Aino umode taragado tai rugadu. 23Ča Pao Kurireu uwo tabemegado pui. Pao Kurireu uwo tameardu kurido pui. Pao Kurireu uwo tameartorudo pudui rugadu. Pagimijera Jesus Cristo uwo tabemegado pui, uwo tameardu kurido pui jamedu. Uwo tameartorudo pudui rugadu jamedu. 24Boe emeardu kuriwo Pagimijera Jesus Cristoji. Ekawo tugera ra tumeardu kurire Jesus jitu piji jii toro rugadu. Nono Pao Kurireu ro pemegawo tai rugadu.