Colossenses

Colossenses

Paulo Ure Awu Atugoreboe Maku Toro Colossos Ba Kurireu Kejewuge Meartorure Jesus Jiwuge Ewagai

¹Paulo nure imi. Pao Kurireu meardae koiare ure Jesus Cristo udo tugeragu i tuwo itudo Jesus bataru pemegareu tabo boe ewagai iwo boe ewie Jesus jiboeji. Inure awu atugoreboe pemegado. Timóteo imedia nure ema. Emare meartorure Jesusji dukodire pamedia nure ema jamedu.

²Čere awu atugoreboe pemegado čewo maku Colossos ba kurireu kejewuge meartorure Jesus Cristo jiwuge ewagai. Emeartorure Jesusji rugadu. Ere turo pemegado nono Pao Kurireu meardae mogadure. Taire inagoino. Tameartorure Jesusji dukodire čemedage nure tagi. Pao Kurireu ro pemegawo tai. Pao Kurireu uwo tabemegado boei rugadu.

Paulo Imadure Pao Kurireu Apo

³Čemagore baruto Pao Kurireu bagai tu tu je tabaru tabo čegimadu tabo apo rugadu tu tu je. Pagimijera Jesus Cristo uo nure ema. ⁴Tameartorure Jesus Cristoji rugadu. Tameardu kurire Pao Kurireu uwobe eiamedu boei rugadu. Boere egoino čei. Dukodire čegaregodure čei čemago tabo baruto Pao Kurireu bagai tu tu je. ⁵Boe ere tawie Jesus bataru pemegareuji. Pao Kurireu bataru remawu jire egoino tawiagai. Boe ere tawie dukodire tarduware Jesus aregodumoduie pugeje tuwo boe ekinorudo. Dukodire tameartorure Jesusji. Dukodire tameardu kurire boei. Pao Kurireu umodukare nou tarduware jiwu bataru mekido. Jesus aregodumode rugadu. Umode meartorure puduiwuge ekinorudo. Umode eewodudo pugeje emuguwo pudabo baru tada rugadu. ⁶Nou Jesus bataru pemegareu umode boe pemegado boei rugadu. Unure tumaedo moto jamedu boe parugajeje. Nono boe emeartorure ji rugadu. Tameardure nou bataruji dukeje tarduware ji rugadu. Tameartorure nou bataruji dukodire tarduware Pao Kurireu ro pemegareuji rugadu. Tarduware boe jokodu jire nou bataru akoino rugadu. Tarduware nou Pao Kurireu ro pemegareu aregodumode meartorure puduiwuge eiamedu boe ewagai rugadu. ⁷Imedu Epafras emare ure tawie Pao Kurireu bataru remawuji, Jesus ro pemegamoduie meartorure puduiwugei. Nou imedu Epafras maragodure Jesus Cristo ai itabo. Pao Kurireu utugare nure ema nono čemogadure. Dukodire čemeardu kurire jiwu čemedia nure ema rugadu. ⁸Nou imedu Epafras ure čewie tarore jiboeji jamedu. Akore Pao Kurireu Uwari uie tameardu kurido boei.

⁹Ure čewie tarore jiboeji tamagore jiboeji. Dukodire čemagore baruto Pao Kurireu bagai tabaru tabo ji aino. Čenogwamagudure Pao Kurireuji uwo tarduwado rugadu taidure jiboeji, uwo tarduwado taromode jiboeji. Pao Kurireu Uwari umode tarduwado rugadu. Umode taroiwado rugadu. ¹⁰Nono tarowo Pagimijera aidure jiboeji. Tawo Pagimijera jakaredo pudui tarore jiboeji. Taro pemegawo boei. Tarduwawo Pao Kurireuji rugadu. Tagaiduwo tarduwawo ji rugadu jii toro rugadu. Dukodire čemagore tu tu tabaru tabo Pao Kurireu bagai baruto. ^11-12Pao Kurireu rakare rugadu boe jamedu boe kori. Imagore bagai baruto tabaru tabo uwo turaga maku tagai jamedu taragawo boe pegareu jamedu boeji. Boe korikawo tai tameardaekawo boe pegareuji. Tagimaduwo Pao Kurireu apo taegare tabo. Dukodire imagore baruto Pao Kurireu bagai tu tu je tabaru tabo. Pao Kurireu ure tabemegado tamuguwo baru tada ia meri keje ia meartorure Jesus jiwugebo. Pao Kurireu uwobe nure emage. Ero pemegareu ure nono jorugu pemegareu mogadure. Mare jorugu ji karega inagoino. Ero pemegareu ure boe pemegado boei. Dujire inagoino. Emeartorure Pao Kurireuji dukodire ekimijera kurireu nure ema. Pao Kurireu ure tabemegado tuwo tado nono emogadure jamedu. ¹³Pao Kurireu ure paginorudo boečo rakareu piji. Aino pameartorukare nou boečo rakareuji pugeje. Mare boečo remawu ji karega inagoino. Bope doge eimijera meardae pegareu jire inagoino. Marigudu nou bope doge eimijera meardae pegareu ure tumaedo paiogi dukodire paroiwakare pawo pawia ra piji. Dukodire paro pegare nono nou meardae pegareu mogadure tu rugadu. Dujire inagoino. Mare aino čare pameartorure Jesusji dukodire Pao Kurireu ure paginorudo paro pegareu piji. Aino pameartorumodukare nou bope doge eimijera meardae pegareuji pugeje. Dujire inagoino. Aino Pao Kurireu ure tumeardu kurire jiwu Tonaregedu Jesus jetu pemegado pai. Aino pameartorure tu Jesusji. Dukodire pagimijera kurireu nure ema. Jetu pemegamode pai rugadu. ¹⁴Emare bire paro pegareu moriče. Dukodire ure paginorudo paro pegareu piji pawarigudukawo bope doge eda kejewu joru pegareuto. Dukodire Pao Kurireu biagodure paro pegareu piji rugadu.

Ainore Jesus Cristo Ure

¹⁵Pao Kurireu biri bokware, kodu bokware dukodire boe erdumodukare Pao Kurireuji rugadu. Mare boe erdure Jesusji. Pao Kurireu nure ema jamedu. Pao Kurireu Onaregedu nure ema. Emare rakojere boetoji. Rakare Pao Kurireu ure towujeboe jamedu boe kori. ¹⁶Pao Kurireu ure Jesus udo boe jamedu boe towuje baru tada, moto keje. Ure boe erdure jiboe jamedu boe towuje. Ure boe erdumodukare jiboe jamedu boe towuje. Ure bope ewaire eiamedu boe etowuje. Ure boe eragareuge eiamedu boe etowuje. Ure boe eimijerage eiamedu boe etowuje. Ure Jesus udo boe jamedu boe towuje rugadu. Boe jamedu boe pemegare Jesus ai jamedu. ¹⁷Marigudu boe bokware. Tu Jesus Cristo ure. Nono ure boe jamedu boe towuje. Nono ča turaga tabore Jesus ure boe jamedu boe mugu pemegado tumuga keje boe jamedu boe okwakawo akedukawo. ¹⁸Meartorure Jesus jiwuge eimijera kurireu nure ema. Uwobe nure emage. Jesus emare ure meartorure puduiwuge emugu pemegado. Pao Kurireu ure Jesus jewodudo bikawo pugeje. Aino bimodukare pugeje. Dukodire boe eiamedu boe eimijera kurireu nure ema. ¹⁹Pao Kurireu ure tumeardae tawuje tuwo tonaregedu udo nono tumogadure. Dukodire Jesus ure nono Tuo Kurireu umogadure rugadu. ²⁰Pao Kurireu aidure tuwo tumedagedo boe eiamedu boeče pugeje. Dukodire ure tugeragu tonaregeduji uwo boe pemegado. Dukodire nou Onaregedu ure tugu redo ipo padure pugajejewu keje boe ero pegareu moriče. Dukodire umode boe ekinorudo tuwo epemegado Pao Kurireu ai pugeje. Dukodire Pao Kurireu ure boe jamedu boe etudo pudae. Ure moto kejeboe jamedu boe etudo pudae. Ure baru tadaboe jamedu boe etudo pudae.

²¹Tagi jamedu. Marigudu taedu jaere Pao Kurireu piji. Taro pegareu koiare ure tardu pegado Pao Kurireuji. Du ure tagi. Tameardae pegareu koiare jordu pegare Pao Kurireu jiwuge nure tagi. ²²Mare aino Jesus bire rugadu ipo padure pugajejewu keje boe ero pegareu moriče. Pao Kurireu Onaregedu nure ema. Dukodire Pao Kurireu ure tumedagedo tagi. Dukodire ure tadudo pudae. Dukodire ure taro pemegado. Dukodire ure taro pegareu barigu tabiji. Mako pegamodukare tarore jiboeji. ²³Mare paga karega. Tameartorure Pao Kurireuji dukodire rore aino tai. Ča tagaba tagera ra nou tameartorure Jesus jitu piji. Jesus aregodumode pugeje rugadu. Tarduware nou inoduji rugadu. Tagaba nou tameartoru mekido ia boe emeardae ka. Tamodukare tagera ra tameartorure Jesus jitu piji dukeje Pao Kurireu umode nou turore taiboe jamedu boe udo jii toro turo oto pa ka. Tameardure Jesus bataru pemegareuji dukeje tarduware Jesus aregodumode pugeje duji. Jesus utugare nure imi iwo boe ewie nou bataru pemegareuji. Boe ere boe ewie nou Jesus jiboeji moto jamedu boe parugajeje.

Paulo Maragodure Tuwo Meartorure Jesus Jiwuge Erduwado

²⁴Ire boe ewie Jesus jiboeji dukodire ro pegareuge ere itogorido, ere boe pegado i. Mare iwiapagakare eroino iduji. Iagarere i kimo. Boe pegare i mare paga karega. Boe pegare i nono boe pegare Jesus Cristo jitu mogadure. Ro pegareuge ere boe pegado Jesusji. Mare Jesus biapagakare ei. Boere aino Jesusji ia boe emeartoruwo Jesusji rugadu. Emeartorure Jesusji dukeje Jesus ure tuwobedo emage. Aino ro pegareuge emode boe pegado meartorure Jesus jiwugei nono turo moga Jesus jitu mogadure. ²⁵Pao Kurireu ure imaragodudo meartorure Jesus jiwuge etai. Ure imaragodae maku inai iwo tawie Jesus jiboeji iwo boe pemegado tai. Ure imaragodae maku inai iwo boe eiamedu boe ewie bataru pemegareuji. Jesus jire nou bataru akoino. ²⁶Marigudu Pao Kurireu ure nou bataru pemegareu biado boe epiji. Ure biado jii toro Jesus aregodure du ka. Mare maigodu aino ure meartorure puduiwuge ewie nou bataru pemegareuji. ²⁷Pao Kurireu meardae reo. Marigudu ukare boe tuginaiwuge ewie nou bataru pemegareuji. Mare aino aidure tuwo meartorure puduiwuge eiamedu boe ewie nou bataru pemegareuji. Nou bataru pemegare moture rugadu. Aino Pao Kurireu aidure boe eiamedu boe emeartoruwo nou bataru pemegareuji. Ča boe emeartorumode Jesus Cristoji dukodire Jesus rakojemode ebo. Dujire nou bataru pemegareu akoino. Jesus rakojemode boebo dukodire emugumode Pao Kurireu apo o boe pemegareu keje. Dujire nou bataru pemegareu akoino jamedu.

²⁸Dukodire čere boe eiamedu boe ewie nou bataru pemegareuji. Čere čewadaru pemegado čerduware jiboe tabo čewo boe erduwa pemegado nuba boe mode ei. Emeartorumodukare Jesusji dukeje čere ewie nuba boe mode ei jamedu. Emeartorumode Jesusji dukeje čere erduwado boe pemegamode ei duji. Dukodire čere čeragado čewo boe emeartorudo Jesusji rugadu. Čedaidure čewo boe emeartoru rakado Jesusji rugadu čewo erego Pao Kurireu ae. ²⁹Dukodire imaragodu rakare. Jesus Cristo ure turaga maku inai rugadu imaragodu pemegawo iwo boe ewie nou bataru pemegareuji rugadu.

¹Itukare toro tagae raga. Dukodire tardukare i. Iragojere woe baičoreu tada. Mare iwiagorore tawagai rugadu. Imagore tu tu je Pao Kurireu bagai tabaru tabo rugadu iraga tabo. Imaragodu rakare iwo Jesus jiboe bu bapera keje iwo maku tawagai. Irore nono Laodiceia ba kurireu kejewuge meartorure Jesus jiwuge etai jamedu. Imaragodure iwo Jesus jiboe bu bapera keje iwo maku ia jorduwakare iwuge ewagai jamedu. ²Ire Jesus jiboe bu bapera keje iwo maku tawagai tawo taragado tameartoruwo ji rugadu. Ire Jesus jiboe bu bapera keje iwo maku tawagai tameardu kuriwo pui rugadu tamugu pemegawo puapo. Jorduware Jesus jiwuge erduware boe remawuji rugadu. Dukodire emororamagadumodukare mare erduwamode tudumoduie baruto rugadu. Marigudu Pao Kurireu ure tumeardae biado boe epiji. Mare aino ure boe erduwado nou tumeardaeji. Meardaere aino boe emeartoruwo tu Jesusji rugadu. Nono erduwamode Jesusji rugadu. ³Marigudu Pao Kurireu ure tuiorduware jiboe biado boe epiji. Mare aino Jesus umode meartorure puduiwuge erduwado Pao Kurireu jorduware jiboeji. Ia boe umodukare boe erduwado Pao Kurireu jorduware jiboeji. Nou Pao Kurireu jorduware jiboe ure nono mori kurireboe umogadure. ⁴Dukodire ire awu atugoreboe pemegado tawagai iwo tarduwado boe remawuji boe ekawo taekiripagado boe remawu piji. Mare paga karega. Ia boe etaidumode tuwo taekiripagado tuwadaru motureu tabo. Mare tuwadrarodu tabore emode tuwadaru motudo. Tameartorukaba ei. Tagaba tameardae mekido emeardae rekodaji. ⁵Iragojekare tagabo. Mare iwiagorore tu tu tawagai. Aino iorduware tameartoru rakare Jesusji rugadu. Tare taragado tai tameartoruwo ji rugadu. Dukodire tare iagaredo i rugadu.

Jesus Umode Boe Emugu Pemegado Pudabo

⁶Tameartorure Jesus Cristoji. Tare tagimijerado ema. Čare tameartorudo ji rugadu. Tagaba tagera ra tameartorure jitu piji rugadu. Tamugu pemegado apo. ⁷Tarodo tu Jesus aidure jiboeji. Nono tameartoru rakado Jesusji rugadu nono i kurireu ukwa raka mogadure. Mare i ukwa ji karega inagoino. Tameartoru kuriwo Jesus jitu bagaire inagoino tai rugadu. Dujire inagoino. Aino tameartorumode boe ere tarduwado jiwu Pao Kurireu bataru remawuji. Nono tagimadudo Pao Kurireu apo ro pemegare tai dukodi.

⁸Ia boe erduware jiboe motumode boe egai. Ia bope doge eimijerage erduware jiboe jamedu motumode boe egai. Dukodire boe etaidumode tuiorduwawo ji rugadu. Du nou ere tore erduwado jiboe nou bope doge ere boe erduwado jiboe aregodukare Pao Kurireu piji. Mare emage rugadu ere nou tumeardae tawuje taobiji. Mare taeku jado. Nou boe erduware jiboe tabore boe etaidumode tuwo taekiripagado. Bope doge eimijera jorduware jiboe tabore boe etaidumode tuwo taekiripagado. Tameartorukaba ei. Tameartorumode ei dukeje ro pegareuge etugarege mode tagi. Tameartorudo tu Jesusji rugadu. ⁹Jesus Cristo imedure ema woe moto keje. Mare Pao Kurireu nure ema jamedu dukodire ure nono Pao Kurireu mogadure. Rore nono Pao Kurireu ro mogadure. Pao Kurireu nure ema dukodi rugadu. ¹⁰Nono tameartorure ji dukodire ure tamugu pemegado pudabo rugadu. Emare raka kodure bope doge eimijerage eraga kori. Raka kodure boe eimijerage eraga kori jamedu.

¹¹Tameartorure Jesusji dukodire tamugu pemegare apo. Marigudu Judeu doge ere tore ime etuwaga oto biri kado Pao Kurireu jorduwo tumeartorure pudui duji nono Pao Kurireu bataru mogadure. Aino tare tagera ra taro pegareu piji nono Judeu doge ero moga tuwo tore ime etuwaga oto biri kado dumogadure. Mare ere tore ime etuwaga oto biri kado ji karega inagoino. Tare tagera ra taro pegareu piji Pao Kurireu jorduwo tameartorure Jesus jituji. Dujire inagoino. Mare taraga tabo karega taroino. Jesus emare ure turaga maku tagai tuwo taragado tawo tagera ra taro pegareu piji tawo tawia ra tameardae pegareu piji. ¹²Tare taremo poboto tagao pegododuwo dukeje tadugudure poboto nono Jesus tugudure mototo dumogadure. Tare taremo poboto tagao pegododuwo dukejere tare tadawuje pobo piji pugeje nono Jesus ure tudawuje moto piji dumogadure. Jesus jewodure pugeje dukeje ure tudawuje moto piji. Tameartorure Pao Kurireu ro rakareuji. Emare ure Jesus jewodudo pugeje turaga tabo. Tameartorure ji dukodire ure turaga maku tagai tuwo tado tagera ra taro pegareu piji. Aino tagao pegododure tawo boe erdudo awu Jesus rore tai duji. ¹³Marigudu boe tuginaiwugere tagi dukodire tarduwakare Pao Kurireu ure maku Judeu doge etaiwu eno bakaruji. Taro pegareu koiare ure taedu jaedo Pao Kurireu piji. Dukodire tare nono bireuge emogadure. Mare tawi ji karega inagoino. Taedu jaere Pao Kurireu piji. Dujire inagoino. Aino tameartorure Jesus Cristoji dukodire Pao Kurireu ure tado nono jewodureuge emogadure. Mare paewodu ji karega inagoino. Pameartorure Jesusji dukodire Pao Kurireu biagodure paro pegareu piji. Ure pameardae pemegado paro pemegawo. Dujire inagoino. ¹⁴Boe ero pegare dukodire emode nou turo pegareu morido nono to bakaru umogadure. Mare nou eno bakaru rakare boei. Ere turagado pudui tumeartoruwo nou to bakaruji. Ainore paiamedu boe parore tu tu je. Marigudu pare paragado pai pameartoruwo paro jamedu boeji. Mare paroiwakare pawo paro pemegado. Dukodire pamode paro pegareu morido. Mare Jesus bire ipo padure pugajejewu keje nou paro pegareu jamedu boe moriče. Dukodire pamodukare paro pegareu boe morido pugeje. ¹⁵Jesus bire ipo padure pugajejewu keje dukodire ure bope doge eimijerage rakareuge erdudo turaga kodure nou eraga kori duji. Du ure eraga tawuje epiji. Ure boe erdudo eraga bokwaie duji. Ure edo nono baičoreu tadawuge emogadure.

¹⁶Boe etaidumode tuwo tameartorudo ia bakaru mariguduwu Pao Kurireu ure maku Judeu doge etaiwu eroji. Egomode tai tagwagewo tu ia boe ekeji, tagwagekaiago ia boe ekeji. Mare tameartorukaba ei. Egomode: – Taguduwo awuče. Tagudukaba awuče.

Ainore egomode tai. Mare tameartorukaba ei. Egomode tai tawaduwo nouia meri keje tarowo tu ia taro tuginaiwuji tu nou meri keje rugadu. Egomode tai tawaduwo ia ari maiwu kejewu boe ewadaeji. Egomode tai tameartoruwo sábado meri kejewu Judeu doge eroji. Mare tameartorukaba ei. Tameartorukaba nou emeardaeji. ¹⁷Marigudu Pao Kurireu ure nou bakaru mariguduwu maku nou Judeu doge etai emeartoruwo nou boe egoino jiboeji. Pao Kurireu ure nou bakaru mariguduwu maku nou Judeu doge etai tuwo boe erduwado Jesus romode jiboeji. Mare du inodu tabo erduwa pemegakare Jesus romode jiboeji. Mare aino Jesus aregodure. Boe remawu nure ema. Dukodire boe erduware boe remawuji. Ewiapagamodukare nou mariguduwu bakaruji pugeje. ¹⁸Ia boe egore boe remawuge kaiegure pudumi mare tuiorduie iaboeji. Egore tuiorduie jiboe ure tuginai. Egore pemegaie, kurie. Nono ere tumeardae tuginaiwu tawuje tuwo boe emeartorudo ji. Mare pagare egoino. Pagare eroino. Egore aino boe emeartoruwo pudui. Egore boei ewo tubu jodo tumago pemegawo Pao Kurireu utugarege baru tadawugei. Egore boe kurireuge enuie pudumi. Mare pagare egoino. Emago pegamode taroji mare tameartorukaba ewadaruji. Nou boe emeardaere boe kurireuge enuie pudumi mare pagatu je. Emeardaere nono ro pegareuge emeardae mogadure. Emeardaekare nono Pao Kurireu meardae mogadure. ¹⁹Ere tugera ra Jesus Cristo piji. Mare Jesus ure nono boe etaora mogadure. Mare boe etaora ji karega inagoino. Meartorure Jesus jiwuge eimijera kurireu nure ema. Dujire inagoino. Meartorure jiwuge ekare tudawuje pubiji nono boe epogodawu mogadure, boe ekanaura mogadure. Mare boe epogodawu ji karega inagoino. Boe ekanaura ji karega inagoino. Boe emeartorumode Jesusji dukeje ewiagoromode tuwo boe pemegado pui. Dujire inagoino. Jesus umode tumeardae pemegareu maku meartorure puduiwuge etai ero pemegawo pui rugadu. Pao Kurireu umode meartorure Jesus jiwuge emeartoru kurido Jesusji dukeje erore jiboe jamedu boe umode nono Jesus aidure jiboe umogadure.

Pawo Pagera Ra Paro Pegareu Piji Pamugu Pemegawo Jesus Apo

^20-22Tameartorure Jesus Cristoji dukodire tare nono bireuge emogadure. Mare tawi ji karega inagoino. Tare tameardae pemegareu tawuje taro pegareu bokwawo pugeje. Dujire inagoino. Taragare tawiapagakawo bope doge eimijerage emeardae pegareuji pugeje. Dujire inagoino. Mare kočare tameartorure ia boe ewadaruji. Egore tai tagaiago tagera bu iaboe keje. Egore tai tagaiago ia boe eke kowuje. Egore tai tagaiago tageragu iaboeji. Mare pagatu je nou boe egoino. Pagatu je boe emeartorumode nou eroji. Pagatu je boe eromode nou eroji. Boe ere nou tumeardae tawuje taora piji. Pao Kurireu meardae karega. Mare kočare tameartorure nou ewadaruji. Dukodire tare tado nono meartorukare Jesus jiwuge emogadure. Kodiba taroino? ²³Nou boe egore boei ewo tubu jodo tumago pemegawo baru tadawuge Pao Kurireu utugaregei. Emagore nou boei etadragawo pudui eragawo. Egore boe eimijera kaie pudumi. Mare pagare egoino. Etaidure tuwo boe eimijeragedo pudumi rugadu. Boe egomode jorduwa kurireuge enuie emage rugadu. Mare pagatu je. Boe emeartorumode nou boe emeardaeji mare du inodu tabo eraga bokwamode tuwo tugera ra taidure jiwu turo pegareu piji.

^1-2Jesus Cristo jewodure pugeje dukeje ruture baruto boe eimijera kurireuwo ema. Dukodire mugure baru tada to ira keje Pao Kurireu ukana pemegareu jagwai. Tagire ča tameartorure Jesus Cristoji dukodire tare nono jewodureuge emogadure. Mare taewodu ji karega inagoino. Tare tagera ra taro pegareu piji. Tameardae pemegare taro pemegawo nono Jesus Cristo meardae mogadure. Dujire inagoino. Dukodire imode tawie. Tameardae pemegado tu baru tadawu Jesus meardae mogadure taro pemegawo nono Jesus meardaeji. Tameardaekaba awu woewu moto kejewuge emeardae mogadure. Tameardaewo tu baru tadawu Jesus meardae pemegareuji. ³Mare paga karega. Tawire nou taro pegareu piji. Mare tawi ji karega inagoino. Tameardae maiwure tawo tagera ra taro pegareu piji tameardaewo tu baru tadaboe bagai. Dujire inagoino. Mare meartorukare Jesus jiwuge erduwakare raga kaba kodiba taroino. Erduwakare Jesusji dukodire erduwakare raga nuba boemode tai baru tada. Jesus rakojere Pao Kurireu apo. Dukodire erduwakare raga Pao Kurireu meardaeji. ⁴Mare Jesus Cristo utugarege nure tagi. Tameartorure ji rugadu. Ure tamugu pemegado Pao Kurireu apo. Dukodire Jesus Cristo aregodumode baru piji mato moto ka pugeje dukeje boe eiamedu boe erdumode ji. Taragojemode apo jamedu tameartorure ji kodi. Nono boe erdumode tai jamedu boe pemegare tai duji rugadu. Tamode nono Jesus mogadure rugadu. Boe pemegamode tai rugadu. Nono boe erduwamode rugadu tamugu pemegare Pao Kurireu apo duji rugadu.

Boe Ero Pegareu Reo. Boe Ero Maiwu Reo.

⁵Tagera ra tawodure tabowu tameardae pegareu piji. Boe eiamedu boe ewodure tumeardae pegareu meture tudada dutabo. Dukodire emeardaere tu turo pegawo. Emeardaere tieribariwo tumugukare apowugei tu je. Emeardaere tieribari kigoduwo aremei. Ekare tuwia ra areme epiji. Areme jamedu emeardaere tuwo tumagu ime etai tu tu je. Emeardaere tieribari kigoduwo imei jamedu. Ekare tuwia ra ime epiji jamedu. Moto kejewuge ime areme etaidure tu turo pegawo rugadu. Enogwa kidure tu pudai tuwo toe kurido tumedage epiji. (Boe enogwa kidure tu pudai du aino erore nono meartorure tuwari santo dogeiwuge ero mogadure.) Pagare eroino. ⁶Pao Kurireu jordu pegare eroino duji. Dukodire umode boe pegado ei rugadu nou eroino du moriče. ⁷Ainore tarore marigudu. Tameardaere tu taro pegawo nono moto kejewuge ero mogadure jamedu. Taroiwakare tawo tagera ra piji. Mare aino čare tameartorure Jesusji. ⁸Dukodi čare tarokaba aino pugeje. Tagorigodukaba boei. Tardu pegakaba boei. Tagaba taro pegado boei. Tamago pegakaba boe eroji. Tawadaru pegareu barigu tabiji. ⁹Tawadrarodukaba boe ewiagai. Tameartorure Jesusji dukodire tare tagera ra nou taro pegareu jamedu boe piji rugadu. Marigudu taro pegareu meture tagaora tada tameardaekawo ia boe emeardae pemegareuji. Mare aino taromodukare ji pugeje. ¹⁰Tare tageragu Jesus ure maku tagaiwu taro maiwuji. Pao Kurireu unure tado nono tumogadure gu gu je. Emare ure boe jamedu boe towuje. Emare unure taro udo nono turo mogadure gu gu je. Dukodire umode tarduwado pudui rugadu. ¹¹Meartorure Jesus jiwuge eiamedu boe ere nono pumogadure Pao Kurireu jakai. Meardae pemegare eiamedu boei. Dukodire Judeu doge emode nono boe tuginaiwuge emogadure. Ero umode tuginai pubiji mare Pao Kurireu jakai ere nono pumogadure. Boe emeartorumode Jesusji dukeje emode nono meartorure Jesus jiwuge brae emogadure Pao Kurireu jakai. Kaiamo doge emeartorumode Jesusji dukeje emode nono meartorure Jesus jiwuge boe emogadure Pao Kurireu jakai. Boe etugarege emeartorumode Jesusji dukeje emode nono meartorure Jesus jiwuge boe eimijerage emogadure jamedu. Jesus Cristo kurire moto kejeboe jamedu boe kori, baru tadaboe jamedu boe kori. Tu Jesus Cristo jire boe emeartorumode tiamedu boe tabo. Jesus rakojere meartorure puduiwuge eiamedu boe ebo jamedu.

¹²Čare Pao Kurireu uwobe nure tagi. Emare meardu kurire tai. Ure tugeragu tai tuwo taro udo tuginai nono tumeardaeji tarokawo tameardae pegareuji pugeje taro pemegawo tu je. Dukodire tageragu Pao Kurireu ro pemegareuji tarowo ji. Tagogududo boebo. Taro pemegado boei. Tagaba boe remawugedo tagi mare boe utugaregedo tagi. Taro pega kaba boei. Taro butugudo boei. ¹³Tagorigodukaba boei. Tamedage ero pegamode tai mare taro pegakaba ei ero pegareu moriče. Tawiagodudo nou ero pegare tai dupiji. Pagimijera biagodure taro pegareu piji rugadu. Dukodi čare tarodo nono awu Pagimijera Jesus rore tai dumogadure taro pegakawo tamedagei ero pegare tai du moriče. ¹⁴Nono tameardu kurido boei. Tameardu kurimode boei dukeje taro pemegamode awu inagoino boe ero pemegareuji rugadu. Boe emeardu kurimode pui dukeje boe pemegamode ei rugadu. Emeardaemode pumeardaeji. Emeardaemodukare toro ia boe emeardaeji pubiji.

¹⁵Tamode tameardae pemegareu tawuje dukeje Jesus Cristo umode tamororamagadu akedudo tabiji tameardae kuriwo Pao Kurireuji rugadu. Nono tarduwamode rugadu tare tameardae pemegareu tawuje rugadu. Pao Kurireu makore tawagai tameartoruwo pudui rugadu dukodire ure tamororamagadu akedudo rugadu. Nono ure tado nono tuwobe emogadure taedu pemegawo pudabo taedu pemegawo puapo jamedu. Dukodire Pao Kurireu uwobe nure tagi rugadu. Dukodi čare imode tawie. Tagimadudo Pao Kurireu apo rugadu rore aino tai duji. ¹⁶Jesus Cristo jiwu bakaru ure turugadu. Kurire rugadu. Tameartorudo ji rugadu. Tarduwado ji rugadu. Nono tawo pu jorduwado awu Jesus bataruji rugadu boe ewo turo pemegado jamedu. Nono taragodudo Jesus bataruji jamedu. Tawo roia ta Pao Kurireu bataru tabo. Taragodudo Pao Kurireu bataru tabo Pao Kurireu biagai taegarere tai dutabo. ¹⁷Taegaredo tai Jesus rore tai jiboeji tagimadu tabo Pao Kurireu biagai. Taro jamedu boe pemegado boei Jesus ie tabo nono Pagimijera Jesus ro mogadure. Tawadaru jamedu boe pemegado boei Jesus ie tabo nono Pagimijera Jesus bataru mogadure jamedu.

Meartorure Jesus Jiwuge Ero Maiwu Reo

¹⁸Aremeire imagore. Tameartorudo tagogei. Ainore meartorure Jesus jiwuge areme erore.

¹⁹Imeire imagore jamedu. Tameardu kurido tawirei. Tamago rakakaba ei.

²⁰Boe etore eire imagore. Tameartorudo taomagei tajemagei tu tu je taro jamedu boe tabo. Ainore meartorure Jesus jiwuge erore. Tameartorumode taomagei tajemagei dukeje tamode Pao Kurireu jakaredo pudui tarore aino duji.

²¹Boe etuo mage eire imagore jamedu. Tagaba tagore ekorigo. Tamode ekorigo dukeje ekiarigodumode rugadu.

²²Boe etugarege eire imagore. Tameartorudo tagimijeragei tu tu je taro jamedu boe tabo. Etaiwomode taroji dukeje tameartorumode emagore jiboeji tawo egaredo taroji. Mare eragojemodukare tagabo taiwowo taroji mare du inodu tabo tameartorudo emagore jiboeji rugadu. Mare paga karega. Tameardaere tameartoruwo Pagimijera Jesusji. Emare aidure tameartoruwo tagimijeragei tu tu je. ²³Tamaragodudo taraga tabo taro jamedu boeji. Tamaragodae udo nono Pagimijera Jesus maragodae mogadure tamaragodu pemegawo rugadu. ²⁴Pagimijera Jesus umode iaboe pemegareu maku meartorure puduiwuge etai ero pemegareu moriče rugadu. Jesus Cristo utugarege nure tagi. Tagimijera Remawu nure ema. ²⁵Mare umode boe pegado ro pegareugei ero pegareu moriče. Boe remawu tabore Pao Kurireu meardaere boe eiamedu boei. Umodukare tuiordae tumeardae tawujedu pagado boei.

¹Boe eimijerage eire imagore jamedu. Taro jetorodo tadugaregei. Taro pegakaba ei. Tawiagodukaba Tagimijera Kurireu piji jamedu. Rakojere baru tada.

Paulo Okituware Nou Colossos Ba Kurireu Kejewugei

²Tagaba tagera ra tamagore Pao Kurireu bagai baruto du piji. Tamagodo baruto Pao Kurireu bagai tu tu je. Taeku jado tarduwo Pao Kurireu rore jiboeji. Tagimadudo Pao Kurireu apo taegarere tai dutabo. ³Tamagodo Pao Kurireu bagai čebaru tabo jamedu Pao Kurireu uwo boe emeardae pemegado ewiapagawo čewadaruji. Čere boe ewie Pao Kurireu bataruji tu tu je čewo boe erduwado Jesusji. Boe erduwakare Jesusji marigudu. Dukodire ire boe ewie nou bataruji dukodire ro pegareuge ere itugu baičoreuto. ⁴Dukodire tamagodo iparu tabo Pao Kurireu bagai baruto iwo irugadu imagowo boe ewiagai. Pao Kurireu uwo imago pemegado boe ewiagai erduwawo rugadu.

⁵Iwo tawie. Taroiwado taro pemegawo meartorukare Jesus jiwugei. Nono boe emode turugadu tumearduwo tamagore jiboeji. Tagi jamedu tado tarugadu tawo ewie Pao Kurireu bataruji jamedu. ⁶Tagaba tawadaru rakado boei. Tamago pemegado boe ewiagai etaiduwo tawadaruji. Tarduwa pemegado tarduwawo tamago pemegawo boe enarare jiboe jipagi.

Paulo Ukimadure Nou Boebo

⁷Pamedia Tíquico maragodu pemegare Pagimijera Jesus ai. Meartorure Jesusji dukodire pamedia remawu nure ema. Pagimijera Jesus utugare nure ema. Imeardu kurire ji. Tíquico aregodumode tagae dukeje readodumode iboeji tawiagai. ⁸Imire ire utudo tawagai uwo tawie nuba boere i. Čebegakare woe rugadu. Umode tawie dukeje umode taegaredo tai. ⁹Imeardu kurire jiwu imedu Onésimo utumode apo jamedu. Pamedia remawu nure ema jamedu. Colossos ba kurireu kejewu nure ema jamedu. Awu Tíquico, awu Onésimo emode tawie nuba boere woe rugadu.

¹⁰Imedu Aristarco aidure tugimaduwo toro tawagai. Rakojere woe itabo awu baičoreu tada. Marcos aidure tugimaduwo toro tawagai jamedu. Barnabé uwie nure ema. (Ire tawie marigudu. Awu Marcos aregodumode tagae dukeje tagera upodo apo rugadu). ¹¹Josué aidure tugimaduwo toro tawagai jamedu. Iere Justo jamedu. Awu boe Judeu doge nure emage mare emeartorure Jesusji. Emaragodure itabo tuwo boe ewie Jesus jiboeji boe ewo tugimijerado ema. Ia meartorure Jesus jiwuge Judeu doge bokware woe tumaragoduwo itabo. Mare awu Aristarco, Marcos, Josué ere tugera maku inai woe rugadu. Emagere tu je.

¹²Imedu Epafras aidure tugimaduwo toro tawagai jamedu. Colossos ba kurireu kejewu nure ema jamedu. Jesus Cristo utugare nure ema jamedu. Emare makore baruto Pao Kurireu bagai tu tu je tabaru tabo rugadu. Makore Pao Kurireuji uwo turaga maku tagai tameartoru rakawo Jesusji rugadu, tagawo tagera ra tameartorure Jesus jitu piji. Makore Pao Kurireuji uwo tarduwado rugadu tuwadaruji tameartoruwo Pao Kurireu bataruji rugadu. ¹³Iorduware Epafras roji. Maragodu rakare tagai rugadu. Maragodu rakare Laodiceia ba kurireu kejewuge meartorure Jesus jiwuge etai. Maragodu rakare Hierápolis ba kurireu kejewuge meartorure Jesus jiwuge etai jamedu. ¹⁴Pameardu kurire jiwu pamedia Lucas ukimadure tawagai jamedu. Jorubo epa nure ema rugadu. Imedu Demas ukimadure tawagai jamedu.

¹⁵Tagimadudo Laodiceia ba kurireu kejewuge meartorure Jesus jiwugebo čenai. Tagimadudo aredu Ninfa apo čenai. Ia meartorure Jesus jiwuge emode bato pui Ninfa uwai tada tu tu je tumagowo Pao Kurireu bataruji pu biagai. Tagimadudo ebo čenai jamedu. ¹⁶Tagaiwomode awu atugoreboeji tamago tabo rakojere tagabowu meartorure Jesus jiwuge ewiagai dukeje awu atugoreboe maku Laodiceia ba kurireu kejewuge meartorure Jesus jiwuge etai etaiwowo ji jamedu erduwawo awu iwadaruji jamedu. Ire ia atugoreboe maku awu Laodiceia ba kurireu kejewuge meartorure Jesus jiwuge etai jamedu. Tagaiwodo nou atugoreboeji jamedu. ¹⁷Imedu Arquipo bie jamedu. Pao Kurireu ure tumaragodae maku Arquipo ai. Nou Arquipo biedu pemegado uwo nou tumaragodae iado rugadu tumeartoruwo Pagimijera Jesusji rugadu.

¹⁸Paulo nure imi. Imire ire ikie bu awu bapera keje ikera tabo rugadu tarduwawo imire ire awu bapera atugodo duji. Ikimaduwo toro tawagai rugadu. Tawiagodukaba boe ere ikogudo woe awu baičoreu tada du piji.

Pao Kurireu ro pemegawo tai rugadu.