Atos
Ainore Jesus Ure Tugeragu Jiwuge Erore.
Lucas Ure Bu Bapera Keje.
11-2Imedia Teófilo nure aki. Ire atugoreboe maku akai marigudu iwo awie Jesus rore jiboeji, ure boe erduwado jiboeji. Aino inure ia atugoreboe pemegado pugeje iwo awie boe jamedu boeji. Nou atugo padure bapera kejewu boetojiwu tabore ire awie nuba Jesus rore tuwo tumaragodae towuje. Ire arduwado ruture baru to duji. Ruture čeboje mare ure tugeragu jiwu ime ure erduwado Pao Kurireu Uwari rakareu makudumode tagai duji. Ure tugeragu nou imei tuwo etudo tuwadaru tabo boe eiamedu boe ewagai. 3Jesus bire dukeje jewodure pugeje. Nono meri oto padure 40 ji tumugui boe ebo dukeje. Nou ure tugeragu jiwuge erdure ji rugadu. Emare ure erduwado Pao Kurireu umode boe eimijera kurireudo pudumi duji. Erdure ji dukeje erduware ure ema rugadu duji. Erdure roji dukeje erduware ure ema rugadu duji. Dukodire erduware rugadu Jesus jewodure pugeje duji. 4Ere bato pui dukeje Jesus makore aino ei. Akore: – Tadukaba Jerusalém ba kurireu piji. Tabagado woe jao nou imode maku tagaiboe bagai. Ire tawie marigudu. Pao Kurireu umoduie Tuwari maku tagai. Tabagado bagai woe. 5João Batista ure boe etao pegodo pobo tabo. Mare kuri aino Pao Kurireu umode Tuwari rawuje tagae metuwo tameardae tada.
Jesus Ruture Baruto
6Nou uture Jesus bataru tabowuge ere bato pui Jesus apo dukeje enarare ji. Egore: – Amode Israel doge ekinorudo Roma kejewuge eimijera piji Israel doge eimijerawo aki woe Israel moto keje kuri aino na?
7Jesus akore: – Tu Pao Kurireu jorduwamode turomode kejewu meriji. Ema koiare umode boe eimijeragedo; umode boe eimijerage eraga tawuje epiji. Tagi tarduwamodukare kaba meri kejeba romode aino. 8Mare umode Tuwari maku tagai dukeje umode taraga maku tagai rugadu. Dukejere tamagomode boe ewiagai irore jiboeji, imagore jiboeji. Tamagomode boei woe Jerusalém ba kurireu keje tu jao. Dukeje tamagomode boe ewiagai Judéia moto keje, Samaria moto keje. Dukeje tadumode awu bataru tabo moto jamedu boe parugajeje.
9Jesus akoino dukeje ruture baruto. Nou meartorure Jesus jiwuge erdure ji ruture duji. Etaiwore ji dukeje okware boetuguto.
10Etaiwo kimore baruto dukeje ia baru tadawu Pao Kurireu utugarege etaregodure etae tači je. Ekudau kigadure rugadu. 11Nono egore: – Galiléia kejewuge nure tagi. Kodiba tagaiwo kimore baruto Jesus bagai? Tardure Jesus ruture baru to duji. Dureore ia meri keje umode tugirimi tuibagi. Mare umode nono tumogadure.
Boe Ere Tugeragu Ia Imeduji Muguwo Judas Iscariotes Mugato
12Nou uture Jesus bataru tabowuge ere tugirimi tuibagi Jerusalém ba kurireu ka Oliveira Ri piji. Jaere mare puredure du je jamedu. 13Ainore nou uture Jesus bataru tabowuge ekiere. Ia iere Pedro. Metia iere João. Ia iere Tiago. Metia iere André. Ia iere Filipe. Ia iere Tomé. Ia iere Bartolomeu. Ia iere Mateus. Iare Alfeu onaregedu nure ema. Iere Tiago. Ia iere Simão Zelote. Iare Tiago onaregedu nure ema. Iere Judas. Eiamedu boe ere turemo nou Jerusalém ba kurireuto dukejere etaregodure tubadure kejewu bai ka. 14Nonore ere bato pui pu ae tumagowo baruto. Areme eture toro jamedu tumagowo baruto ebo. Jesus uče Maria uture toro jamedu. Jesus uwiemage eture toro jamedu.
15Ia meri keje nou meartorure Jesus jiwuge eiamedu boe ere bato pui. Enodo oto padure kejewure cento e vinte boe doge. Dukeje Pedro ure turagojedo etoiadada tumagowo ei. 16Akore: – Imedage nure tagi. Pao Kurireu bataru jeture pudui rugadu. Marigudu Pao Kurireu Uwari ure jawu Israel doge eimijera Davi makodo. Davi makore nou Judas Iscariotes romoduie aino duji, umoduie Jesus maku nou boe eimijerage pegareuge etai. 17Judas Iscariotes tawujedure maragoduwo pagabo dukodire pamedia ure ema.
18(Boe ere diero maku Judas Iscariotes ai ro pegawo aino. Nou diero tabore ure tugeragu ia motoji pudai. Nou moto kejere nou Judas ure tuwududo tori ao piji moto ka. Buture dukeje kurire tuborodo nono peguru jamedu boe ure tudawuje piji. Dukodi bire. 19Jerusalém kejewuge eiamedu boe emeardure nou inoduji dukodire ere nou moto iedo: “Aceldama” aino. Israel doge ewadaru reno. Ainore nou boe egore: “Boe eku jeture nou moto keje”.)
20Pedro mako kimore. Akore: – Pagimijera kurireu Davi ure Pao Kurireu bataru bu bapera keje marigudu. Akore: “Boe edukare uwai tada. Boe emugumodukare uwai keje pugeje.”1.20 Awu bataru padure Salmo 69.25 keje.
– Davi ure ia Pao Kurireu bataru bu bapera keje jamedu. Akore: “Ia mugumode mugato maragoduwo maragodaeji.”1.20 Awu bataru padure Salmo 109.8 keje.
21-22– Pao Kurireu akore aino dukodire pawo pageragu ia jordure Jesus jiwu imeduji maragoduwo pagabo uwo boe ewie Jesus jewoduie pugeje duji. Pawo pageragu jiwu rakojere Jesus apo. Pawo pageragu jiwu meardure João Batista bataruji jamedu. Pawo pageragu jiwu imedu merure paro kao Jesus rekodajiwu imeduji. Pawo pageragu jiwu jordure Jesus ruture baru to duji.
23Dukodire nou Pedro metage emagore ime ewagai. Ere pobetu je. Ia iere José. Metia iere Matias. Nou José iere Barsabás jamedu. Boe egore Justo aino ji jamedu. 24-25Ča nou meartorure Jesus jiwuge emagore baruto. Egore: – Čegimijera nure aki. Aki arduware boe eiamedu boe emeardaeji. Ča čerdudo akaidure jiwu imeduji maragoduwo čedabo Judas Iscariotes mugato. Utumode awadaru tabowu mode ema. Judas uture čebiji toro boe pegareu ka turo pegareu moriče.
26Dukejere nou meartorure Jesus jiwuge ere nou ime pobedu doge ekie bu ia tori rogu keje. Nono ere nou tori barigu. Dukejere etaiwore nou toriji tuiorduwawo Jesus aidure jiwu imedu bagai. Jesus ure erdudo nou Matias ieji. Aino ere Matias mugudo Judas mugato tuwo uture Jesus bataru tabowuge enodo padudo doze pugeje.
2Pao Kurireu Uwari Aregodure
1Ia Judeu doge ewadae iere Pentecostes. Nou Pentecostes meri keje nou meartorure Jesus jiwuge eiamedu boe ere bato pui. 2Ča emeardure ia baru tadawu jaruruji. Jarurure nono bakuru rakareu jaruru mogadure. Nou jaruru aregodure nou meartorure Jesus jiwuge edu tadawu bai ka. Ure turemo nou baito. Jarurure ewai ja tada rugadu. 3Dukeje erdure iaboe ruguji. Ure nono joru mogadure mare joru karega. Ure nono boe ekeru mogadure mare boe ekeru karega. Ure taodo nono eiogi. Ure taodo nou meartorure Jesus jiwuge eiamedu boe eiogi. 4Dukeje Pao Kurireu Uwari meture eiamedu boebo. Dukodire emagore ia boe tuginaiwuge ewadaru tabo. Pao Kurireu Uwari koiare ure emagodo nou boe tuginaiwuge ewadaruji aino.
5Judeu doge etaregodure Jerusalém ba kurireu ka boe eno moto jamedu boe piji. Eku kidugodure Pao Kurireuji dukodire etaregodure tuwaduwo nou tuwadaeji tumeartoruwo Pao Kurireu ure maku Judeu doge etaiwu bakaruji. 6Ewiapagare nou meartorure Jesus jiwuge egoino duji. Dukodire eture tuwo bato pui ebo tumeardu pemegawo emagore jiboeji. Emagare. Egarere pudui eiamedu boe ewiapagare tuwadaruji kodi. Nou meartorure Jesus jiwuge emagore nou boe tuginaiwuge eiamedu boe ewadaru tabo rugadu. 7Nou meartorure Jesus jiwuge ere nou boe eku kidugo turoji dukodire egore: – Awu makore čeiwuge Galiléia kejewuge nure emage. 8Mare kočare erduware paiamedu boe pawadaruji! Nuba erore tuiorduwawo paiamedu boe pawadaruji? 9-10Ia čegi čemugure Pártia moto keje. Ia čegi čemugure Média moto keje. Ia čegi čemugure Elão moto keje. Ia čegi čemugure Mesopotâmia moto keje. Ia čegi čemugure Judéia moto keje. Ia čegi čemugure Capadócia moto keje. Ia čegi čemugure Ponto moto keje. Ia čegi čemugure Ásia moto keje. Ia čegi čemugure Frígia moto keje. Ia čegi čemugure Panfília moto keje. Ia čegi čemugure Egito moto keje. Ia čegi čemugure Líbia moto keje puredure Cireneji. Ia čegi čedaregodure Roma ba kurireu piji. 11Ia čegi Judeu doge nure čegi. Ia čegi čemeartorure Judeu doge erore jiboeji. Iage etaregodure Creta moto piji. Iage etaregodure Arábia moto piji. Pawadaru ure tuginai pume keje. Mare kočare awu ime emagore aino pai pawadaru tabo. Emagore pai pawadaru tabo Pao Kurireu ro kurire jiboeji. Nuba erore tuiorduwawo aino pawadaruji?
12Boe eiamedu boe ebogodure rugadu. Erduwakare kaboba ure aino duji. Enarare pui: – Nuba boe mode?
13Mare iage emago pegare nou meartorure Jesus jiwugei. Egore: – Awuge eke kurure ei rugadu. Eku pegare.
Pedro Makore Pao Kurireu Bataruji Boe Ewiagai
14Dukeje nou utumode Jesus bataru tabowuge ere turagojedo. Nono Pedro mako pemegare boe eiamedu boe emearduwo. Akore: – Judeu doge nure tagi dukodire iwobe nure tagi. Iwo tawie. Iwo nouia Jerusalém kejewuge ewie jamedu. Imode tarduwado awu boe erore jiboeji. Tawiapagado iwadaruji. 15Tameardaere awu boe doge eke kurure ei duji. Mare awu boe doge ekudukare piga kuruče. Meri kodu mai kimo. 16Mare erore nono makore Pao Kurireu bataru jiwu Joel bataru mogadure. Ainore Joel akore:
17– Pao Kurireu akore: “Imode moto akedudo. Du otodaire imode Iwari maku boe eiamedu boe etai. Tawobe ime, tawobe areme emagomode iwadaruji boe ewiagai. Imode tawobe ipare erdudo iwadaruji. Ime pegagodureuge eniamode iwadaruji.
18“Ainore umode rugadu. Imode Iwari maku itugarege ime etai, itugarege areme etai jamedu nou moto akedumode kejewu meri otodai. Dukodire nou ime nou areme emagomode iwadaruji.
19“Imode iro rakareu to baru tada. Imode iro rakareu to moto keje. Boe eku remode boe epiji. Joru, jeredudu umode tumaedo boe jamedu boe parugajeje.
20“Dukodire meri joku akedugodumode. Ari joku kujagumode nono boe ku kujagu mogadure. Dukejere Pagimijera Kurireu aregodumode kejewu meri mode. Nou meri kurimode, pemegamode.
21“Dukejere imode nou makore Pagimijera bagaiwuge eiamedu boe ekinorudo.”2.21 Awu bataru padure Joel 2.28-32 keje. Ainore Pao Kurireu akore.
22Ča Pedro makore pugeje. Akore: – Iwobe nure tagi. Israel doge nure tagi. Tawiapaga pemegado awu iwadaruji. Jesus ričodure Nazaré ba kurireu keje. Pao Kurireu ure nou Jesus ro rakado, ro pemegado. Tardure nou Jesus rore jiboeji. Dukodire tarduware Pao Kurireu ure arego mato pagae. 23Pao Kurireu meardae reo. Marigudu Pao Kurireu jorduware Jesus makudumode tagai tawo bito. Tagire tare bito. Tare ro pegareuge edo Jesus bito ipo padure pugajejewu keje. 24Mare Pao Kurireu ure jewodudo pugeje rugadu. Ure tawuje bireuge eda piji. Bireuge eda rakakare ji muguwo nono. 25Dujire nou mariguduwu Judeu doge eimijera kurireu akoino. Akore:
– Iordure Pagimijera Kurireuji meri jameduji. Rakoje puredure i dukodire imororamagadukare.
26– Dukodire iagarere i. Iwadaru jakarere. Imedu nure imi. Iwimode. Mare ipagamode bagai dukodire iwudugugodumode.
27– Pao Kurireu nure aki. Iwimode mare amodukare akera ra ipiji. Imeartorure awadaruji kodi. Dukodire amode itawuje bireuge eda piji. Amode iewodudo pugeje dukodire iwiri guborogodumodukare moto tada.
28– Are iordudo awara pemegareuji imugu pemegawo. Aragojere itabo dukodire iagarere i rugadu.2.28 Awu bataru padure Salmo 16.8-11 keje.
29Pedro mako kimore: – Imedage nure tagi. Imode tarduwa pemegado awu jawu pamana Davi bataruji. Jao pawobe eimijera kurireu nure ema. Imode tarduwado bataruji. Pudui karega akoino. Emare bire. Boe ere tugu mototo. Meture tadawu moto ure kimo jii aino. 30Mare makore Pao Kurireu bataru jiwu nure ema rugadu. Pao Kurireu ure bie marigudu. Akore tumoduie Davi ia uwobe Boe Eimijera Kurireudo ema nono Davi umogadure. Akore tuwiagodumodukaie awu tuwadaru piji rugadu. 31Ča Davi meartorure Pao Kurireu bataruji. Pao Kurireu ure Davi bie turomode jiboeji. Dukodire Davi jorduware Pao Kurireu romode jiboeji. Jorduware Pao Kurireu umode nou umode boe ekinorudowu maku boe etai. Jorduware nou umode boe ekinorudowu jewodumode pugeje duji. Dukodire akore aino: “Bimode mare Pao Kurireu umodukare tugera ra piji. Umode tawuje bireuge eda piji. Umode jewodudo pugeje dukodire biri guborogodumodukare moto tada.”
32– Jesus jire akoino. Pao Kurireu ure Jesus jewodudo rugadu. Čeiamedu boe čerdure nou Jesus jewodure duji. 33Pao Kurireu ure Jesus rutudo baruto. Dukodire mugure Tuo Kurireu meki. Pao Kurireu makore ji marigudu tumoduie Tuwari maku ai. Dukejere ure Tuwari maku ai rugadu uwo maku meartorure puduiwuge etai jamedu. Ča Pao Kurireu Uwari makudure čenai dukodire čerore, čemagore aino tawadaru tabo. 34-35Marigudu pagimijera Davi makore Jesus bataruji. Utukare baruto raga dukeje akore: – Pao Kurireu makore nou ikimijera umode boe ekinorudowuji. Akore: “Amugudo woe ikana pemegareu jagwai jii toro imode jordu pegare aiwuge etagedudo du ka.”2.34-35 Awu bataru padure Salmo 110.1 keje.
36Pedro mako kimore. Akore: – Israel kejewuge nure tagi. Taiamedu boe tawiapaga pemegado iwadaruji tarduwawo boe remawuji rugadu. Iwo tawie rugadu. Tare Jesus bito. Mare Pao Kurireu ure pagimijera kurireudo ema. Umode boe ekinorudowu nure ema rugadu.
37Nou boe doge emeardure nou bataruji dukeje ekiarigodure turore aino duji rugadu. Emagore Pedroji. Emagore nouia uture Jesus bataru tabowugei jamedu. Egore: – Čemana mage nure tagi. Nuba čeromode?
38Pedro makore ei. Akore: – Taiamedu boe tameardae tawuje tawo tagera ra taro pegareu boe piji. Dukejere Pao Kurireu biagodumode nou taro pegareu piji. Tagao pegododuwo boe erduwawo tameartorure Jesus jitu duji. Dukejere Pao Kurireu umode Tuwari maku tagai rugadu. 39Ainore Pao Kurireu romode tumagore bagaiwugei. Ainore akore tai, tagorei, boe eiamedu boei moto jamedu boe parugajeje.
40Pedro mako raire aino nou boei tuwo emeartorudo Jesusji. Akore: – Pao Kurireu ro pegamode ro pegareugei rugadu kuri aino. Dukodire čare tamagodo Pao Kurireu bagai uwo taginorudo.
41Boe emeartorure Jesusji nou Pedro bataru koia. Dukeje etao pegododure. Emagare. Nou meriji ure etao pegododureuge enodo padure três mil emeartorure Jesusji kodi. 42Nou uture Jesus bataru tabowuge ere nou meartorureuge erduwado Pao Kurireu bataruji. Ere bato pui tu tu je. Enogwagere puapo. Emagore puapo baruto jamedu.
Ainore Meartorure Jesus Jiwuge Erore
43Uture Jesus bataru tabowuge ero rakareu kurire. Jesus koiare ure ero rakado aino. Ere boe eku kidugo rugadu. Dukodire boe eiamedu boe ebogodure. 44Meartorure Jesus jiwuge eiamedu boe ere bato pui tu tu je. Ere toe kobo pedo pui. 45Iage ere to moto maku diero bagai. Dukeje ere nou diero maku nouia meartorure Jesus jiwuge etai nou uke bokwareuge etai. Ere nou toe maku diero bagai dukeje ere nou diero maku meartorure Jesus jiwuge etai nou uke bokwareuge etai. 46Ere bato pui Pao Kurireu uwai ja tada meri jameduji. Enogwagere puapo tuwai ja tada. Egarere pui. Enojarokare tuwadaruji. 47Mare emago pemegare Pao Kurireuji. Boe eiamedu boe etaidu pemegare ei. Meri koduredu jamedu boeji iage emeartorure Jesusji uwo tuginorudo boe pegareu piji. Dukodire Pao Kurireu ure meartorure puduiwuge emagado rugadu.
3Pedro Ure Meru Bokwareu Marenaru Imedu Pemegago
1Ia meri keje Pedro uture Pao Kurireu uwai ka João apo merirekodutabo. Judeu doge emagomode baruto merirekodutabo tu tu je. 2Nou Pao Kurireu uwai ia bai poro iere Motureu. Boe etaregodure nono ia marenaru imedu apo meri jameduji muguwo nono togwamaguduwo diero bagai. Nou imedu boture tubogora pegare dutabo dukodire meru bokware. Meri jameduji okwamagudure nou ure turemo Pao Kurireu uwai towugei diero bagai. 3Ča Pedro João etaregodure nono. Nou imedu jordure ei dukeje okwamagudure ei ia boe bagai. 4Etaiwore tu ji dukeje Pedro akore: – Akaiwodo čei.
5Dukodire aiwore ei. Meardaere emoduie ia iaboe maku pudai. 6Mare Pedro akore: – Ino diero bokwa. Mare imode ia iaboe maku akai. Nazaré pijiwu nure Jesusče. Umode boe ekinorudowu nure ema. Jesus koiare umode inagojino aino ai. Aragojedo! Amerudo!
7Dukejere Pedro ure tugeragu nou imedu ieraji. Ure rakojedo. Ča Pao Kurireu ure nou imedu bure, pogora pemegado jamedu. 8Ure turagojedo. Rakojere tuginaigodu. Merure jamedu. Dukejere ure turemo Pao Kurireu uwaito tumeruredu tabo. Ure taredo tiagare tabo. Mako pemegare Pao Kurireuji. 9Boe emagare tuiordu tabo nou imedu merure duji. Emeardure mako pemegare Pao Kurireu jituji. 10Mare erduware rakojere nou Pao Kurireu uwai poro kejewu marenaru imedu nure ema duji. Dukodire ebogodure rugadu. Nou Pao Kurireu ro ure nou boe eku kidugo.
Pedro Ure Boe Ewie Pao Kurireu Uwai Tada
11Nou imedu ukare tugera ra Pedro piji, João piji. Ia bawadu padure nou Pao Kurireu uwai kurireu tada. Nou bawadu iere Salomão Uwai Jokora. Pedro, João eragojere nono. Boe eregodure etae nono tiegarere pudui dutabo. 12Pedro jordure nou boei dukeje makore ei. Akore: – Israel kejewuge nure tagi. Iwobe nure tagi jamedu. Kodiba taebogodure aino? Kodiba tagaiwore tu čei? Čere nou imedu pemegago dukodire tameardaemode ro rakareuge nure čegi. Tameardaemode ro pemegareuge nure čegi. Čere nou imedu pemegago mare čegi karega. Čere nono tamogadure rugadu. 13Abraão meartorure Pao Kurireuji. Isaque meartorure Pao Kurireuji. Jacó meartorure Pao Kurireuji. Jao pawobe emeartorure Pao Kurireuji. Awu emeartorure jiwu Pao Kurireu ure boe kurireudo Jesusče baru tada Jesus rowo Pao Kurireu roji. Mare tagi tagaidukare Jesusji. Dukodire tare maku boe eimijera pegareuge etai. Tagimijera Pilatos aidure tuwo Jesus udo činorudo mare tagaidukare. 14Jesus ro pemegare. Ro pegareu bokware. Mare tagaidukare ji. Tagagore Pilatoji uwo ia ure boe ewidowu imedu tawuje baičoreu piji utuwo pugeje. Nono tagagore Pilatoji uwo Jesus mugudo mugato. 15Tare Jesus bito. Emare umode boe eewodudo. Tare bito mare Pao Kurireu ure jewodudo pugeje. Čerdure awu jamedu boeji. 16Čemeartorure Jesusji. Nou imedu meartorure ji jamedu. Dukodire pemegagodure aino. Jesus rakare. Jesus ure turaga maku nou imedu ai tuwo pemegago. Tagaiwodo ji.
17– Ča. Imedage nure tagi. Taro pegare Jesusji mare tarduwakare jitu kodi. Tagimijerage ero pegare aino Jesusji mare erduwakare jitu kodi. 18Marigudu Pao Kurireu ure pawie. Makore Pao Kurireu bataru jiwuge egore boe pegamoduie nou umode boe ekinorudowuji. Ča ainore Pao Kurireu ure udo rugadu. Nou makore jiboe jeture pudui rugadu. 19-20Tagaidukaba taro pegareuji pugeje. Tagera ra piji. Tagaiwodo Pao Kurireu bagai. Dukeje Pao Kurireu biagodumode taro pegareu jamedu boe piji. Dukeje Pao Kurireu umode tado tawia ra boe pegareu piji. Umode Jesus arego tagae. Ure tugeragu Jesusji marigudu uwo boe ekinorudo. 21Jesus rakojemode baru tada tu jao. Marigudu Pao Kurireu ure boe ewie tumoduie boe jamedu boe maidudo. Mariguduwuge makore Pao Kurireu bataru jiwuge ere boe ewie rugadu. Pao Kurireu umode boe jamedu boe maidudo dukeje Jesus aregodumode. 22Moisés akore: “Tameartorure jiwu Pao Kurireu umode ia makore Pao Kurireu bataru jiwu arego tagae nono ure itarego dumogadure. Tawobe mode ema. Tameartorudo tu ji rugadu. 23Meartorukare jiwuge ewarigudumode Pao Kurireu uwobe epiji etageduwo.”3.23 Awu bataru padure Deuteronômio 18.15, 18, 19 keje.
24– Makore Pao Kurireu bataru jiwuge eiamedu boe ewadaru kodure puregodaji. Ainore makore Pao Kurireu bataru jiwu imedu Samuel akore jamedu. Marigudu emagore Pao Kurireu romode pai jiboeji. 25Marigudu Pao Kurireu makore Abraãoji. Akore: “Tagore ebo imode boe pemegado boe eiamedu boei.”3.25 Awu bataru padure Gênesis 22.18, 26.4 keje. Awu Pao Kurireu bataru ure turugadu tai jamedu. Makore Pao Kurireu bataru jiwuge ere mariguduwuge tawobe ewie Pao Kurireu bataruji. Nou ewadaru ure turugadu tai jamedu. 26Ča Pao Kurireu ure tugeragu Jesusji tudugarewo ema. Ure Jesus arego tagae boetoji. Emare aidure turo pemegawo tai, tuwo tado tagera ra taro pegareu piji.
4Judeu Doge Eimijerage Emagore Pedroji Joãoji
1Pedro João emago kimore boe dogei dukeje nou ure Judeu doge enomea maku Pao Kurireu aiwuge etaregodure. Pao Kurireu uwai tadawu tugobaigarege eimijera aregodure jamedu. Saduceu doge etaregodure nono jamedu. 2Erdu pegare nou Pedro nou João ewadaruji. Pedro João egore Jesus jewoduie pugeje. Aino boe erduwaie bireuge eewodumode pugeje duji. Mare nou aregodureuge emeartorukare nou inoduji. 3Dukodire ere tugeragu Pedroji, Joãoji. Ere etugu baičoreuto nou boečoji. 4Mare nouia boe emeartorure Pedro bataruji. Dukodire emeartorure Jesus jiwuge emagagodure rugadu. Enodo padure cinco mil boe doge.
5Nou barogwato nou Judeu doge eimijerage eiamedu boe ere bato pui Jerusalém ba kurireu tada. Nou jorduware Judeu doge eno bakaru jiwuge etaregodure jamedu. 6Nou ure Judeu doge enomea maku Pao Kurireu aiwuge eimijera kurireu rakojere nono jamedu. Iere Anás. Uwagedu rakojere jamedu. Iere Caifás. Nou Anás ia uwobe eragojere nono jamedu. Ia iere João. Ia iere Alexandre. 7Nou Judeu doge eimijerage ere Pedro João etawuje baičoreu piji tuwo eragojedo nono tiogorai. Dukeje nou boe eimijerage enaragodure Pedroji, Joãoji. Egore: – Nuba tare tarodo tawo nou imedu pemegago? Nuba tare tarodo kodiba nou taraga makudure tagai?
8Pedro korobadure Pao Kurireu Uwari apo. Dutabore makore nou Judeu doge eimijerage ewadaru jipagi. 9Akore: – Nuba tagaidure tarduwawo? Tagaidure tarduwawo nuba čerore čewo nou meru bokwareu imedu pemegago? 10Čemode tawie tarduwawo, boe eiamedu boe erduwawo. Čere nou imedu pemegago mare čegi karega. Mare Jesus Cristo rakare. Emare ure nou imedu pemegago rugadu. Nou Jesus ričodure boe eda Nazaré keje. Tagi tare nou Jesus bito ipo padure pugajejewu keje. Mare Pao Kurireu ure jewodudo pugeje. 11Nou Jesus jire Pao Kurireu akoino. Akore:
“Boe emeardae pegare toriji. Egore nou tori pegaie tuwo tuwaido ema. Mare tori pemegareu nure ema rugadu boe ewo tuwaido ema rugadu.”4.11 Awu bataru padure Salmo 118.22 keje.
– Mare tori ji karega Pao Kurireu akoino. Jesus jire akoino. 12Tu Jesus umode boe ekinorudo boe pegareu piji. Pao Kurireu ukare tugeragu ia metiaji. Dukodire ia boe bokware moto jamedu boe parugajeje tuwo boe ekinorudo.
13Pedro João emugukare bapera keje mare epogurukare tumagowo nou Judeu doge eimijeragei. Nou boe eimijerage erore ta je egoino duji. Dukeje erduware eragojere Jesus apo duji. 14Ča nou boe eimijerage eroiwakare tumagowo iaboeji pugeje. Nou pemegagodureu imedu rakojere nono Pedro apo João apo jamedu. 15Dukeje egore nou imei ewo tudawuje nou bai piji tu jao. Nono nou boe eimijerage emagore pui nuba turomode. 16Egore: – Nuba paromode nou imei? Ere nou imedu pemegago. Ča Jerusalém ba kurireu kejewuge eiamedu boe erduware nou ero rakareuji. Paroiwakare pawo boe ekiripagado pugeje. 17Pawo pamago rakado nou imei ekawo boe erduwado Jesus jiboeji pugeje. Aino ia boe erduwamodukare nou inoduji pugeje.
18Dukeje nou eimijerage emagore nou ime ewagai pugeje. Emago rakare ei ekawo boe erduwado Jesus jiboeji pugeje, emagokawo Jesus bataruji boe ewiagai pugeje. 19Mare Pedro, nou João emagore nou boe eimijerage ewadaru jipagi jamedu: – Tagaiwodo boe pemegareu bagai. Nuba Pao Kurireu aidumode? Čemeartorumode tawadaruji na? Pao Kurireu bataruji kana? 20Čemodukare čegera ra čemago piji rugadu čewo boe ewie rugadu čerdure jiboeji, čemeardure jiboeji.
21Mare nou boe eimijerage emago rakare ei pugeje. Dukeje ere etudo. Nou imedu pemegagodure dukodire boe eiamedu boe emago pemegare Pao Kurireuji. Dukodire nou boe eimijerage eroiwakare turo pegawo nou imei. 22Nou Pao Kurireu ro rakare jiwu imedu o joru oto padure quarenta.
Meartorure Jesus Jiwuge Emagore Baruto Pao Kurireu Uwo Tuwadaru Pemegado
23Nou boe eimijerage ere nou Pedro nou João etudo dukeje eture tuibagi toro meartorure Jesus jiwuge etae. Ere ewie nou boe eimijerage ewadaruji. 24Nou meartorure Jesus jiwuge emeardure nou inoduji dukeje emagore baruto puapo Pao Kurireu bagai. Egore: – Čegimijera nure aki. Aki are baru to, are moto to, are pobo maereu to. Are boe eiamedu boe etowuje. 25Are Awari makodo jawu čegimijera Daviji. Nou Davi atugare nure ema. Awari makore aino ji. Akore:
“Kodiba boe tuginaiwuge ekorigodure? Kodiba Judeu doge ere tumeardae pegareu tawuje? 26Eiamedu boe eimijerage ere tudo turugadu. Ere bato pui turugoduwo Pao Kurireuji, turugoduwo umode boe ekinorudowuji.”4.26 Awu bataru padure Salmo 2.1-2 keje.
27– Ča boe jokodu jire čegimijera Davi akoino. Ainore nou čegimijera Herodes, nou čegimijera Pôncio Pilatos ere bato pui woe awu ba kurireu tada boe tuginaiwugebo, Israel kejewugebo jamedu tuwo tumeardae pegareu tawuje turo pegawo Jesusji. Atugare pemegareu nure Jesusče. Are boe ekinorudowudo ema. 28Awu čegimijerage pegareuge ere bato pui mare erore jiboe ure nono ameardae mogadure. Are nou ameardae tawuje marigudu. Are udo araga tabo. 29Ča čeginorudo nou čegimijerage ewadaru pegareu piji. Čegimijera kurireu nure aki. Atugarege nure čegi. Čeboguru bokwado čemago pemegawo awadaruji boe ewiagai. 30Amagodo boe ewiagai Jesus rore jiboeji makore jiboeji. Atugare pemegareu nure Jesusče. Dutabore akera bu boe ewugeje epemegagoduwo. Aro rakareu towuje boe egai.
31Emagore baruto akedure dukeje nou eragojere tadawu bai magadugodure. Dukejere ekorobadure Pao Kurireu Uwari apo. Nono epogurukare tumagowo Pao Kurireu bataruji boe ewiagai. Ere boe ewie rugadu.
Meartorure Jesus Jiwuge Ere Toe Pedo Pui
32Nou meartorure Jesus jiwuge emeardae ure mitotu je. Ekare toe biado pubiji dukodire ere toe rugadu boe pedo pui. 33Pao Kurireu ure nou uture Jesus bataru tabowuge eragado rugadu emago pemegawo boei. Ere boe erduwado Jesus jewodure pugeje duji. Pao Kurireu ure turo pemegareu maku etai rugadu. 34-35Boe bokwakare etai rugadu. Iage ere to moto maku diero bagai. Iage ere tuwai maku diero bagai. Dukeje etaregodure nou diero tabo nou uture Jesus bataru tabowuge etae. Nou uture Jesus bataru tabowuge ere nou diero pedo nou meartorure Jesus jiwuge uke bokwareuge etai jamedu.
36Ia imedu iere José. Rore aino jamedu. Levi uwobe nure ema. Boture Chipre moto keje. Nou uture Jesus bataru tabowuge ere nou imedu iedo Barnabé. Ewadaru reo. Ainore egore “ure boe eragado rugadu”. 37Nou Barnabé ure ia to moto maku diero bagai. Dukeje aregodure nou uture Jesus bataru tabowuge etae nou to diero tabo. Ure maku etai rugadu.
5Imedu Ananias, Oreduje Safira, Ero Pegare
1Ia imedu iere Ananias. Oreduje iere Safira. Ere ia to moto maku diero bagai. 2Ere tumeardae tawuje tuwo nou diero kado puiato. Ere ia diero biado toče. Nouia diero ere maku nou uture Jesus bataru tabowuge etai. 3Ananias ure maku etai dukeje Pedro makore Ananiaji. Akore: – Kodiba awiapagare bope doge eimijera Satanás meardae pegareuji? Nou bope doge eimijera ure tumeardae pegareu maku akai awadraroduwo Pao Kurireu Uwariji. Are ia ako moto maku diero bagai. Akagore aie nou diero rugadu maku čenai mare are ia biado. 4Akore nou ako motoče rugadu. Are maku dukeje akore nou dieroče rugadu jamedu. Amodukare nou ako diero maku čenai du pegakare. Mare awadrarodure! Akagore aie diero rugadu boe maku mare akare rugadu boe maku. Are ia tawuje akoče. Awadrarodure mare čei karega. Awadrarodure tu Pao Kurireuji!
5-6Ananias meardure nou Pedro makoji dukeje bire kuri rugadu. Buture kuri tai moto keje tuwi tabo. Ia ipare ere turemo nou uwaito. Ere nou bireu upodo. Dukeje ere reko. Ere tugu mototo. Boe erduware nou Pao Kurireu rore jiboeji dukeje eiamedu boe epagudugodure rugadu.
7Nono merirekodure pobe metia bokware dukeje nou Ananias oreduje aregodure Pedro ae jamedu. Jorduwakare nuba Pao Kurireu rore toreduji. Ure turemo. 8Dukeje Pedro unarare ji. Akore: – Iwie. Akoredu ure nou tare tageragu jiwu diero rugadu maku čenai? Ia kimore?
Nou Safira akore: – Boro. Ia bokware. Ure rugadu boe maku tagai.
9Dukeje Pedro akore: – Mare kočare. Aki akoredu tagaidure tawo Pao Kurireu Uwari jekiripagado. Dukodire akoredu bire marigudu. Aino nou ipare ere akoredu tugu mototo. Emage etaregodure pugeje. Emode arego jamedu tuwo atugu mototo jamedu.
10Nou inodu kodi nou aredu buture kuri tai moto keje tuwi tabo jamedu. Nou ipare ere turemo nou baito dukeje erdure ji bire duji. Dukeje ere nou aredu reko pugeje. Ere tugu mototo jamedu toredu meki. 11Meartorure Jesus jiwuge eiamedu boe epagudugodure. Nou emeardure nou Pao Kurireu rore jiboeji dukeje eiamedu boe epagudugodure rugadu.
Pao Kurireu Ro Rakare Pugeje
12Nou uture Jesus bataru tabowuge ere Pao Kurireu ro rakareu to rugadu. Kogodureuge epemegagodure. Nou meartorure Jesus jiwuge ere bato pui nou Salomão O Iogora ka tu tu je. 13Mare meartorukare Jesus jiwuge etaidukare turagojewo ebo. Mare boe eiamedu boe etaidure nou meartorure Jesus jiwugei. 14Iage emeartorure Jesusji rugadu. Dukodire meartorure Jesus jiwuge emagare. Emagagodure rugadu. 15Nou uture Jesus bataru tabowuge ero rakare dukodire kogodureuge ere tudawuje tuwai piji turagojewo awara okwai. Boe ere kogodureuge ewu kodo keje nono awara okwai jamedu tubaga tabo ewagai. Nono Pedro kodure nou awaraji dukeje utugu kodure nou kogodureu boe etaoji. Dukejere epemegagodure. Pedro rakare Pao Kurireu Uwari meture tada kodi. Dukodire utugu rore aino kogodureugei. 16Boe eiamedu boe etaregodure tieda piji Jerusalém ba kurireu ka kogodureugebo. Etaregodure mareboe meture tadawugebo jamedu. Pao Kurireu ure nou kogodureuge nou mareboe meture tadawuge erugadu boe epemegago rugadu.
Boe Eimijerage Ero Pegare Nou Uture Jesus Bataru Tabowugei
17Nou ure Judeu doge enomea maku Pao Kurireu aiwuge eimijera kurireu ure tumeardae pegareu tawuje nou tumedage saduceu dogebo. Eiamedu boe erdu pegare nou uture Jesus bataru tabowugei. Emeardaere boe emeartoruwo tu pudui boe erduwawo boeji. Dukodire ere tumeardae pegareu tawuje turo pegawo nou uture Jesus bataru tabowugei. 18Ere tugeragu ei. Ere etugu baičoreuto. 19Mare nou boečoji Pao Kurireu utugare baru tadawu aregodure nou uture Jesus bataru tabowuge etae. Ure nou baičoreu baiporo jado. Ure nou uture Jesus bataru tabowuge etawuje baičoreu piji. Dukeje makore ei. 20Akore: – Tadudo toro Pao Kurireu uwai ka tawo boe ewie nuba Jesus romode ei emugu pemegawo.
21Nou uture Jesus bataru tabowuge emeartorure nou baru tadawu Pao Kurireu utugare bataruji. Čaboečoto eture Pao Kurireu uwai ka. Nono ere boe erduwado.
Nou ure Judeu doge enomea maku Pao Kurireu aiwuge eimijera kurireu, eimijerage parutowuge emagore nouia Judeu doge eimijerage ewagai tuwo bato pui tuwo tumeardae tawuje pugeje. Dukeje iage eture nou ere tugu baičoreu towuge ewagai pugeje. 22Etaregodure baičoreu ka dukeje erdukare nou uture Jesus bataru tabowugei nou baičoreu ja tada. Dukodire ere tugirimi toro tumedage boe eimijerage etae tuwo ewie. 23Egore: – Čedaregodure baičoreu ka. Nou baičoreu baiporo jadodukare. Nou jeture baičoreu jiwuge eragojere nono jamedu. Ma kočare čere nou baičoreu jado dukeje boe edukare tada.
24Nou ure Judeu doge enomea maku Pao Kurireu aiwuge eimijerage emeardure nou inoduji dukeje erduwakare nuba nou uture Jesus bataru tabowuge erore. Nou Pao Kurireu uwai tadawu tugobaigarege eimijera jorduwakare jamedu. Ewiagorore ewagai. 25Ča ia imedu aregodure etae dukeje akore: – Tawiapagado. Awu tare tugu baičoreu towu ime eragojere Pao Kurireu uwai ja tada. Enure boe erduwado.
26Dukodire nou tugobaigarege eimijera uture to tugobaigaregebo toro. Ere nou ime erego mato nou boe eimijerage etae. Mare epagudure nou boe dogeče dukodire ero rakakare nou uture Jesus bataru tabowugei. Epagudure nou boe doge emode togorido tori tabo duji.
27Tugobaigarege etaregodure nou uture Jesus bataru tabowugebo nou boe eimijerage ewai ka. Ere eragojedo nou boe eimijerage etoiadada. Nono nou ure Judeu doge enomea maku Pao Kurireu aiwuge eimijera kurireu unarare ei. 28Akore: – Čemago rakare tai tagawo boe erduwado Jesus jiboeji. Mare tameartorukare čei. Tare tawadarudo taodo nou Jerusalém ba kurireu parugajeje. Tagagore čegie čere Jesus bito.
29Ča Pedro nouia uture Jesus bataru tabowuge egore: – Čemeartorumodukare imei. Čemeartorumode tu Pao Kurireuji. 30Jawu pawobe emeartorure tu Pao Kurireuji. Tare Jesus kana jado ipo padure pugajejewu keje. Tare bito. Mare Pao Kurireu ure Jesus jewodudo pugeje. Awu Pao Kurireu jire jawu pawobe emeartorure. 31Dukeje Pao Kurireu ure rutudo baruto pudae rakojewo tumegi. Ure umode boe ekinorudowudo ema. Ure boe eimijera kurireudo ema. Rore aino tuwo nou Israel doge ewiago turo pegareu piji, etaidukawo turo pegareuji pugeje. Israel doge eromode aino dukeje Pao Kurireu biagodumode nou ero pegareu piji rugadu. 32Dujire čerdure, čerduware. Dukodire čenure boe ewie. Pao Kurireu umode Tuwari maku meartorure Jesus bataru jiwuge etai. Nou Pao Kurireu Uwari unure boe ewie awu boe jamedu boeji.
33Nou boe eimijerage emeardure nou ewadaruji dukeje ekorigodure rugadu. Etaidure tuwo nou uture Jesus bataru tabowuge eiamedu boe ewido. 34Mare ia nou boe eimijera ure turagojedo tumago tabo tuwo nou tumedage etaora butugugo. Fariseu nure ema. Iere Gamaliel. Jorduware Israel doge eno bakaruji rugadu. Boe eiamedu boe erdu pemegare ji. Ča ure boedo nou uture Jesus bataru tabowuge etawuje nou bai piji tu jao. 35Dukeje nou Gamaliel makore tumedage boe eimijeragei. Akore: – Pabagawo tu jao pagaiwo tabo nou imei boe emeartoru raimode ewadaru jitu bagai. 36Čowu imedu Teudas aregodure marigudu. Emare akore boe kurireu nuie pudumi. Dukodire boe etaidure ji. Nono eture apo rugadu. Enodo padure quatrocentos. Mare nou Teudas bitodure dukeje nou boe ere taodo pubiji. Emeartorukare nou Teudas bataruji pugeje. 37Dukejere ia metia aregodure pugeje. Judas Galileu aregodure. Boe eimijera kurireu aidure tuiorduwawo nou boe emagamode dubagai dukodire ure nou boe edo tugie bu bapera keje. Dukejere nou Judas aregodure. Eture nou Judas apowuge emagare jamedu. Mare nou Judas bitodure dukeje nou uture apowuge ere taodo pubiji jamedu. Emeartorukare nou Judas bataruji pugeje. 38Aino pabagawo tu jao pagaiwo tabo awu meartorure Jesus jiwugei. Pagare egore aino enure boe ekiripagado tu je. 39Mare Pao Kurireu umode nou emeardae maku etai dukodi akedumodukare rugadu. Pagaiwowo tu jao pagaiwo tabo ei parduwawo nuba boemode. Pao Kurireu umode emeardae maku etai dukeje pamodukare boe edo tugera ra ewadaru piji. Pamode ewido dukeje Pao Kurireu umode awu tuwadaru maku iage etai emagowo ji boe ewiagai pugeje.
Nou boe eimijerage etaidure nou Gamaliel bataruji. 40Dukodire ere nou uture Jesus bataru tabowuge eremo nou baito pugeje. Ere tugobaigarege edo boeto ei. Dukeje emagore ei ekawo boe erduwado Jesus bataruji pugeje. Dukejere ere etudo. 41Nou uture Jesus bataru tabowuge eture nou boe eimijerage epiji dukeje egarere pudui. Boe ero pegare ei emeartorure Jesusji kodi. Dukodire erduware Pao Kurireu ro pemegare pudui duji rugadu. 42Meri jameduji nou uture Jesus bataru tabowuge ere boe erduwado Jesus jiboeji Pao Kurireu uwai ja tada, nou boe ewai ja tada jamedu. Ere boe ewie Pao Kurireu bataru pemegareuji. Ere boe ewie Jesus umode boe ekinorudowu nure ema duji.
6Utugarege Enodo Padure Sete
1Meartorure Jesus jiwuge emagagodure pugeje. Emagare rugadu. Mare ia meri keje ia meartorure Jesus jiwuge etokire pui. Jorduware Grécia bataru jiwuge Judeu doge emagore nou Judéia kejewu Judeu dogei. Egore boe eke makudukaie tuje okoge bokwareuge areme etai. 2Nou uture Jesus bataru tabowuge enodo padure doze. Emeardure nou boe etokire pui duji dukeje emagore ewagai. Nou meartorure Jesus jiwuge eiamedu boe ere bato pui dukeje nou uture Jesus bataru tabowuge egore: – Ukare turugadu čewo čegera ra čemaragodae piji čewo boe eke maku boe etai. Čemaragodunure čemago tabo Pao Kurireu bataruji boe ewiagai. 3Čemedage nure tagi. Dukodire tagaiwodo pui tawo tageragu ia imei. Tagaiwodo mugure Pao Kurireu Uwari apowu ime ewagai. Tagaiwodo jorduwareuge ime ewagai. Tare tageragu ei dukeje čemode edo boe eke maku boe etai. 4Čegire čewiagoromode čemagowo baruto, čemagowo Pao Kurireu bataruji boe ewiagai. Awu čemaragodae mode tu rugadu.
5Nou meartorure Jesus jiwuge eiamedu boe etaidure nou uture Jesus bataru tabowuge ewadaruji. Dukodire ere tugeragu jiwu ime enodo padure sete. Ia iere Estêvão. Nou Estêvão meartorure rugadu Jesusji. Korobadure Pao Kurireu Uwari apo. Ia iere Filipe. Ia iere Prócoro. Ia iere Nicanor. Ia iere Timom. Ia iere Pármenas. Ia iere Nicolau. Nou Nicolau aregodure Antioquia ba kurireu piji. Judeu karegure ema. Mare meartorure Pao Kurireuji marigudu Judeu doge ero mogadure. 6Ča meartorure Jesus jiwuge ere nou uture Jesus bataru tabowuge ime etaiwodo nou ture tugeragu jiwu imei. Dukeje nou uture Jesus bataru tabowuge ere tugera bu nou ime etaora keje dukeje emagore baruto eparu tabo.
7Dukodire Pao Kurireu bataru ure taodo boe parugajeje. Meartorure Jesus jiwuge emagagodure Jerusalém tada. Emagare rugadu. Ia ure Judeu doge enomea maku Pao Kurireu aiwuge emeartorure Jesusji jamedu. Emagare jamedu.
Estêvão Tugudure Baičoreuto
8Pao Kurireu ro pemegare Estêvãoji rugadu. Estêvão rakare rugadu turo rakawo, turo kuriwo boe egai. 9Mare ia ime erdu pegare Estêvãoji. Nou ime Judeu doge nure emage. Ere bato pui tu tu je ia bai tada. Judeu doge emagore Pao Kurireu bagai nou bai ja tada tu tu je. Nou bai iere “Ime Pemegareuge”. Nou Judeu doge etaregodure Cirene ba kurireu piji, Alexandria ba kurireu piji jamedu. Nou Judeu doge etaidukare nou Estêvão meardaeji. Emagore Estêvãoji tuwo nou Estêvão meardae mekido. Ia Judeu doge erorino jamedu. Nouge etaregodure Cilícia moto piji, Ásia moto piji jamedu marigudu. 10Mare Pao Kurireu Uwari ure Estêvão jorduwado tumago pemegawo rugadu. Dukodire nou Judeu doge eroiwakare tumagowo Estêvão bataru jipagi. 11Dukejere ere diero maku ia ime etai ewadraroduwo. Dukodire ere Estêvão bataru aodo boe ewiagai. Egore: – Čemeardure awu Estêvão bataru pegareuji. Mako pegare jawu pamana Moisesji. Mako pegare Pao Kurireuji jamedu.
12Ainore erore tuwo boe ekorigo rugadu. Ere boe eimijerage ekorigo jamedu. Ere jorduware Judeu doge eno bakaru jiwuge ekorigo jamedu. Dukodire nou boe eimijerage ere tugeragu Estêvãoji. Ere reko toro boe eimijerage etae. 13Dukejere nou batrarodureuge etaregodure jamedu tuwadraroduwo pugeje. Egore: – Awu imedu mako pega raire awu Pao Kurireu uwaiji. Mako pegare Moisés ure maku boe etaiwu Pao Kurireu bataruji jamedu. 14Čemeardure ji jamedu. Akore nou Nazaré pijiwu Jesus umoduie awu Pao Kurireu uwai butudo. Akore nou Jesus umoduie Moisés ure maku pagaiwu paro akedudo.
15Nou mugure nou bai kejewuge boe eimijerage etaiwore nou Estêvãoji. Erdure nou Estêvão jeji. Nou Estêvão je ure nono ia Pao Kurireu utugare baru tadawu je mogadure.
7Estêvão Bataru Reo
1Nou ure Judeu doge enomea maku Pao Kurireu aiwuge eimijera kurireu makore Estêvãoji. Akore: – Boe jokodu ji na awu ime doge egoino?
2-4Estêvão akore: – Ikimijerage nure tagi. Tawiapaga pemegado iwadaruji. Pao Kurireu pemegare rugadu. Rakojere boe pemegareu remawu keje. Marigudu nou pawobe etuo Abraão mugure Mesopotâmia moto keje. Nono Pao Kurireu makore ji. Akore: “Akera ra awobe epiji, ako moto piji. Atudo toro imode ardudo jiwu moto ka.”7.2-4 Awu bataru padure Gênesis 12.1 keje. Dukeje Abraão uture Mesopotâmia moto piji toro Harã moto ka. Nono Abraão uo bire. Dukeje Pao Kurireu ure Abraão utudo pugeje awu tamugure kejewu moto ka. 5Pao Kurireu ukare awu moto maku Abraão ai. Abraão o moto bokware. Mare Pao Kurireu makore tumoduie maku Abraão ore etai. Makore ia boe umodukaie tawuje Abraão ore epiji pugeje uwobe eno moto moduie ema rugadu ji aino. Mare Abraão ore bokware. Dukodire Pao Kurireu ro pemegare Abraãoji. Dukodire Abraão onaregedu boture rugadu. 6Pao Kurireu makore aino ji. Akore: “Akanaregedu ore emugumode ia boe tuginaiwuge eno moto keje. Joru oto padu kejeboe mode quatrocentos ei toro nou boe tuginaiwuge eno moto keje. Nou akore nou boe tuginaiwuge etugarege mode emage. Nou boe tuginaiwuge ero pegamode akorei rugadu. 7Mare imire imode boe pegado nou boe tuginaiwugei. Dukejere nou akore ewobe emode tudawuje nou moto piji. Etaregodumode mato pugeje tuwo tubu jodo tumago pemegawo i woe.”7.7 Awu bataru padure Gênesis 15.13-14 keje.
8– Pao Kurireu makore aino Abraãoji dukeje ure turo maku Abraão ai boe erduwawo nou Pao Kurireu bataruji. Dukodire pawobe ime eiamedu ere tuwaga oto biri kado. Pao Kurireu ure awu paro maku nou pao Abraão ai marigudu. Dukeje Abraão ure tonaregedu Isaque baka oto biri kado. Nou Isaque boture dukeje meri oto padure sete ji dukeje ure nou Isaque baka oto biri kado. Nou Isaque ure tonaregedu Jacó baka oto biri kado jamedu. Nou Jacó ure tore ime eiamedu boe ewaga oto biri kado jamedu. Jacó ore ime enodo padure doze. Judeu doge etumana mage nure emage.
9– Nou Jacó ore erdu pegare tuwie Joseji. Dukodire ere nou tuwie José maku Egito kejewuge etai diero bagai. Mare Pao Kurireu rakojere José apo. 10Boe pegare Joseji rugadu dukejere Pao Kurireu ure ukinorudo nou boe pegareu piji. Nou Egito kejewu boe eimijera kurireu makore nou José bagai dukeje Pao Kurireu ure José mako pemegado, ure José jorduwado rugadu. Dukodire nou boe eimijera kurireu aidure Joseji. Ure boe eimijera paru towudo ema rugadu aiwowo motoji, aiwowo nou boe eimijera kurireu uwobei. 11Dukodi toro ia meri keje boe pegare nou Egito moto keje, nou Canaã moto keje jamedu. Boe pegare nou boei rugadu bubutu bokware kodi. José umana mage eragojere nou Canaã moto keje. Eke bokware rugadu jamedu. 12Etuo Jacó meardure boe eke makaie Egito moto keje duji. Dukeje ure tore etudo toro Egito moto ka tuge bagai. Jawu pawobe nure emage, eture toro mare ere tugirimi. 13Dukodi toro ia meri keje ere tugirimi Egito moto ka pugeje. Nono José ure erduwado pudui. Ainore nou Egito kejewu boe eimijera kurireu jorduware José uwobei. 14Dukodire José makore toro tuo Jacó bagai. Makore tuwobe eiamedu boe ewagai. Enodo padure kejewugere setenta e cinco. Etuwo toro Egito moto ka. 15Dukodire Jacó uture toro Egito moto ka rugadu. Nonore bire. Nou ore ewire nono jamedu. 16Mare ewobe ekare etugu nou Egito moto keje. Ere erego toro nou etuo Abraão ure akirodo jiwu moto ka tuwo etugu nono. Nou moto iere Siquém. Abraão ure akirodo nou motoji Hamor doge epiji diero tabo.
17– Ča boe puredugodure Pao Kurireu bataru jetuwu puduiwu ka. Ainore boere nono pawobei toro Egito keje nono Pao Kurireu makore Abraãoji dumogadure. Pawobe emagagodure eidodure nono Egito keje rugadu. 18Dukejere ia Egito kejewu boe eimijera kurireu maiwure pugeje. Nou boe eimijera jorduwakare Joseji. 19Ure jawu pawobe ekiripagado. Ro pegare ei rugadu. Ure edo etore ewarigu tuwai piji toro poboto ewiwo. 20-21Dukejere Moisés boture. Rogu moture rugadu. Uo uče etu pemegare ji tuwai tada. Ari ure pobe metia bokware dukeje eroiwakare tuwo nou tonaregedu rogu biado boe eimijera pegareu piji pugeje. Nono ere tugu nouia kadaraboto. Bereagu tabo ere kadarabo okwa mi okwakawo poboto. Dukejere ere nou kadarabo mugudo pobo aogeje. Mare nou Egito kejewu boe eimijera kurireu onaregedu aredu jordure ji dukeje ure tugeragu Moisesji tonaregeduče. 22Aino Moisés jorduware nou Egito kejewuge erduware jiboeji. Imedu kurireu nure ema. Mako pemegare. Ro pegakare.
23– Moisés o joru oto padure quarenta dukeje meardaere taiwowo tuwobe Israel doge ewagai tuiorduwawo nuba boere ei dubagai. 24Jordure ia Egito kejewu ure boeto ia jituji. Dukodire ure tugera maku nou tuwobe imedu ai. Ure nou Egito kejewu imedu bito nou ro pegareu du moriče. 25(Moisés meardaere nou tuwobe erduware pudui duji, tugimijera nure pudumi duji. Pao Kurireu umode rakado uwo tuwobe ekinorudo Egito kejewuge epiji. Mare erduwakare ji raga.) 26Nou barogwato jordure ia Israelita ime pobedu dogei. Erugodure pui duji. Moisés aidure tuwo togwa bu ewugeje erugodukawo pui. Akore: “Israelita doge nure tagi. Tawobe nure pugi. Tarugodukaba pui.”
27– Mare emeartorukare Moisesji. Dukodire ia akore: “Čegimijera karegure aki. 28Jao meriji are ia Egito kejewu imedu bito. Akaidunure awo iwido jamedu?”
29– Moisés meardure nou imedu bataruji dukeje pagudugodure. Boe erduware ure ia imedu bito duji. Dukodire rekodure Egito moto piji. Mugure toro Midiã moto keje. Uwirere toro. Dukeje botureu ore imere pobe nono nou moto keje.
30– Joru oto padure quarenta ji toro. Dukeje Pao Kurireu utugare baru tadawu aregodure Moisés ae. Ure Moisés jordudo pudui. Moisés jordure ia i roguji, joru čere to duji. Rakojere boe maereu keje puredure Sinai Tori Riji. 31Moisés jordure nou joru ure i rogu kowu duji dukeje ure tuburedo ji taiwo pemegawo ji. Mare meardure Pao Kurireu makore pudui duji. 32Pao Kurireu akore: “Jao awobe emeartorure jiwu Pao Kurireu nure imi. Abraão meartorure i. Isaque meartorure i. Jacó meartorure i jamedu.”7.32 Awu bataru padure Êxodo 3.6 keje. Moisés meardure Pao Kurireu makore pudui duji dukeje magadugodure tubagudu koia. Aidukare taiwowo nou iji pugeje. 33Mare Pao Kurireu makore ji pugeje. Akore: “Awu aragojere kejewu moto ino moto reo. Ire udo tuginai inoče. Dukodi čare awure okeakejewu tawuje awure piji. Nono iorduwamode ameartorure iduji. 34Ča iorduware boe pegare iwobei duji toro Egito moto keje. Epadu kiorokare boe kori koia. Itaregodure iwo ekinorudo Egito kejewuge epiji. Mato itabo. Iwo arego toro Egito moto ka.”7.34 Awu bataru padure Êxodo 3.5-10 keje.
35– Mare nou Moisés remawu Israel doge etaidukare ji marigudu. Egore: “Čegimijera karegure aki.” Mare Pao Kurireu ure nou Israel doge eimijerado Moisesče. Emare ure Moisés utudo tuibagi Egito moto ka uwo nou Israel doge ekinorudo nou Egito kejewuge epiji. Nou ure Moisés jordudo puduiwu nou i rogu pijiwu Pao Kurireu utugare baru tadawu ure tugera maku Moisés ai jamedu. 36Dukejere nou Moisés ure nou boe ekinorudo Egito piji. Ro rakare, ro kurire Egito keje. Ro rakare, ro kurire Pobo Maereu Kujagureu keje. Ro rakare, ro kurire boe maereu keje. Joru oto padure quarenta ei toro nou boe maereu keje. 37Dukodi nou Moisés mitodure makore tuwobe Israel dogei. Akore: “Pao Kurireu umode ia makore Pao Kurireu bataru jiwu imedu arego tagae rugadu nono turomoga idu mogadure. Pawobe mode ema rugadu.”7.37 Awu bataru padure Deuteronômio 18.15 keje.
38– Nou Moisés aire Pao Kurireu ure tuwadaru pemegareu maku. Ure maku ai toro Sinai Tori Ri aogeje rugadu. Nou jawu pawobe Israel doge eragojere nono jamedu nou tori paru nou boe maereu keje. Pao Kurireu utugare baru tadawu rakojere nono jamedu. Pao Kurireu bataru akedukare jii aino. Du akedumodukare rugadu.
39– Mare nou jawu pawobe emeartorukare Moisés bataruji. Etaidure tuwo tugera ra piji tuduwo tuibagi Egito moto ka. 40Dukodire emagore Arãoji. Egore: “Ia iaboe towuje pameartoruwo ji pawo pabu jodo jokorai. Imedu Moisés ure čedawuje Egito piji mare čerduwakare nuba boere ji pugeje.”7.40 Awu bataru padure Êxodo 32.1 keje41Dukodire Arão ure ia iaboe towuje etai ure nono santo mogadure nou boe emeartoruwo ji. Nou ure toboe ure nono tapira naregedu imedu mogadure. Nono ere iaboe kowu tuwo maku nou ture towu tapira ai. Ewadure rugadu tumeartorure nou tapira jitu kodi. 42Dukodire Pao Kurireu ure tugera ra epiji ewo ia tumeardae tawuje pugeje. Dukodire etaidure tumeartoruwo kuieje dogei pugeje. Etaidure tuwo tubu jodo tumago pemegawo kuieje dogei Pao Kurireu mugato. Makore Pao Kurireu bataru jiwuge ere awu Pao Kurireu bataru bu bapera keje rugadu. Akore:
– Israel doge nure tagi. Inai karega tare boe egu barege ekowu taro pegareu moriče. Tare tagera ra ipiji. Tameartoruwo ia boe pegareuji pugeje. Tarore ainowu joru oto padure quarenta toro boe maereu keje.
43– Tare tabu jodo tawai tadawu santo doge egorai tamago pemegawo ei tawo pao kurireugedo emage. Ia iere Moloque. Metia iere Renfã. Tagoredure nou Moloque uwai rogu tabo tagodureu jamedu boeji. Tagoredure nou Renfã uwai rogu tabo jamedu. Tagagore nou Renfã uwai roguie nono kuieje mogadure. Tare tagera ra ipiji tameartoruwo nou tawai tadawu santo dogei. Dukodire imode tadudo tago moto piji toro Babilônia moto jagwai aino toro.
– Ainore Pao Kurireu akore.7.43 Awu bataru padure Amós 5.25 keje.
44Estêvão mako kimore. Akore: – Nou pawobe eragojere nou boe maereu keje dukeje ere Pao Kurireu uwai rogu mugudo. Pao Kurireu ure Moisés jorduwado dukodire ere nou bai rogu mugudo aino. 45Nou pawobe Israel doge ere nou Pao Kurireu uwai rogu maku tore etai. Ere tugeragu nou boe pegareuge eno motoji Josué apo dukeje enoredure tabo. Eture nou motoji dukeje Pao Kurireu ure nou boe pegareuge etudo epiji. Nou Pao Kurireu uwai rogu mugure ebo jii toro ekimijera kurireu Davi muguredu ka. 46Pao Kurireu aidure rugadu nou Daviji. Mare Davi makore Pao Kurireuji taiduie tuwo ia bai kurireu to Pao Kurireu uwaiče. Jacó meartorure jiwu Pao Kurireu uwaiče. 47Nou Davi ukare nou bai towuje mare onaregedu Salomão ure towuje rugadu.
48– Mare ainore inagomode tai. Pao Kurireu mugumodukare ime ere towu bai tada. Makore Pao Kurireu bataru jiwu imedu ure Pao Kurireu bataru bu bapera keje. Ainore Pao Kurireu akore:
49– Imugure baru tada. Iwure emode tamudo moto keje. Boe emodukare ia bai towuje iwaiče. Boe ere towu bai kurikare imuguwo ja tada.
50– Imire ire boe jamedu boe towuje.
– Ainore Pao kurireu akore.7.50 Awu bataru padure Isaías 66.1-2 keje.
51Ča nou Estêvão mako kimore nou Judeu doge eimijeragei. Akore: – Tameartoru bokwa! Tameardae pega! Tawija bokwa! Tameardukare Pao Kurireu bataruji! Tare nono jawu pawobe mogadure. Tagaidukare tawiapagawo Pao Kurireu Uwari bataruji tu tu je. 52Mariguduwuge pawobe ero pegare makore Pao Kurireu bataru jiwuge eiamedu boei. Mariguduwuge pawobe ere makore Pao Kurireu bataru jiwuge ewido. Nou makore Pao Kurireu bataru jiwuge ere boe ewie marigudu Pao Kurireu Utugare Pemegareu aregodumoduie duji. Ča aregodure rugadu. Jesus nure ema. Mare tarore Jesusji nono ro pegareu mogadure. Tare bito. 53Pao Kurireu ure tuwadaru maku tagai tago bakaruwo ema. Utugarege baru tadawuge ere nou o bakaru reko boe ewagai mare emeartorukare ji.
Judeu Doge Eimijerage Ere Estêvão Bito Tori Tabo
54Nou Judeu doge eimijerage emeardure nou Estêvão bataruji dukeje ekorigodure rugadu. Ere to reko pui tugoridure dukodi. 55Mare Pao Kurireu ure Estêvão rakado rugadu nou Tuwari apo. Aiwore baruto dukeje jordure Pao Kurireu o jorugu pemegareuji. Nono Jordure Jesusji. Rakojere Pao Kurireu meki. 56Estêvão akore: – Tagaiwodo. Iordure baru jadodure duji. Imedu Onaregedu Jesus rakojere tuo meki.
57Nou boe eimijerage ekudugodure tugorigodure dukodi. Ere tugera bu tuwija keje tumeardukawo nou Estêvão makore jiboeji pugeje. Dukeje eregodure Estêvão ae. 58Ere tugeragu ji. Ere tawuje toro nou ba kurireu piji. Dukeje eidore tori tabo ji. Ere tugudau biaku epa areia tawuje tubiji tugidowo nou tori tabo ji. Ere nou tugudau areia maku ia iparedu ai jetu pemegawo ji. Nou iparedu iere Saulo. 59Eidore tori tabo Estêvãoji kimo dukeje Estêvão mako rakare tugimijera Jesus bagai. Akore: – Ikimijera Jesus! Iwimode dukeje akeragu i.
60Estêvão ure tubu jodo moto keje dukeje kudugodure pugeje. Akore: – Ikimijera Jesus. Awiabutukaba awu ero pegare idu keje!
Estêvão makore aino dukeje bire.
8Saulo Ro Pegare Meartorure Jesus Jiwugei
1Saulo aidure nou tugimijerage eroino duji, ere Estêvão bito duji. Nou inodu otobiji boe ero pegare meartorure Jesus jiwugei rugadu. Dukodire meartorure Jesus jiwuge ere taodo Jerusalém piji toro Judéia moto ka, Samaria moto ka. Tu nou uture Jesus bataru tabowuge edu kimore Jerusalém ba kurireu tada. 2Aidu kurire Pao Kurireu jiwu ime ere Estêvão tugu mototo. Etragudure joki.
3Mare Saulo aidure tuwo meartorure Jesus jiwuge etagedudo. Uture boe ewai jamedu boeji meartorure Jesus jiwuge ewagai. Ure tugeragu ei tuwo etugu baičoreuto.
Boe Ere Boe Ewie Pao Kurireu Bataru Pemegareuji Samaria Moto Keje
4Nou meartorure Jesus jiwuge ere taodo moto jamedu boe parugajeje. Dukeje ere boe ewie Pao Kurireu bataru pemegareuji. 5Filipe uture Samaria ba kurireu ka. Ure nou boe erduwado Jesus umode boe ekinorudowu nure ema duji. 6Nou Samaria kejewu boe ewiapaga pemegare nou Filipe makore jiboeji. Etaiwo pemegare nou Filipe ro rakare duji. 7Ure bope doge etawuje boe epiji. Nou bope doge ewari ere tudawuje boe piji tugudu tabo. Dukeje ure pogora pegareuge emerudo. Ure meru bokwareuge emerudo jamedu. Emagare rugadu. 8Dukodire nou ba kurireu kejewuge egarere pudui rugadu.
9Ia imedu iere Simão. Mugure nou ba kurireu tada. Akore bari nuie pudumi. Marigudu ure boe erdudo turore jiboeji boe emeartoruwo pudui duji. 10Nou ba kurireu kejewuge eiamedu boe emeartorure ji. Boe kurireuge. Marenarue doge. Eiamedu boe egore: – Awu Simão raka ure nono Pao Kurireu raka mogadure. Iere Imedu Rakareu.
11Marigudu Simão ure erodo ta je turore jiboeji dukodire emeartorure ji rugadu. 12Mare emeartorure Filipe bataruji dukodire etao pegododure. Emeartorure Jesusji. Emeartorure Pao Kurireuji boe eiamedu boe eimijera nure ema duji rugadu. Ime areme etao pegododure rugadu. 13Simão jamedu meartorure ji. Ao pegododure dukeje uture Filipe apo. Jordure Filipe ro rakare duji, ro kurireuji dukeje je rore ta je.
14Jerusalém kejewuge nou uture Jesus bataru tabowuge emeardure nou Samaria moto kejewuge emeartoruie Pao Kurireu bataruji duji. Dukodire ere Pedro utudo toro nou Samaria moto kejewuge etae. Ere João utudo etae jamedu. 15Etaregodure toro dukeje emagore baruto nou meartorure maigoduwuge eparu tabo Pao Kurireu Uwari aregoduwo etae jamedu. 16Pao Kurireu Uwari ukare turawuje etae raga. Etao pegododure tu je emeartorure Jesusji kodi. 17Dukejere Pedro João ere tugera bu nou meartorure maigoduwuge boe etao keje. Dukeje Pao Kurireu Uwari ure turawuje etae tuwo eraga maku etai.
18Simão jordure nou Pao Kurireu Uwari ure turawuje nou meartorure Jesus jiwuge etae dukeje aidure tuwo diero maku Pedro ai João ai. 19Akore: – Nou taraga maku inai jamedu iwo nou Pao Kurireu Uwari maku ire ikera bu kejewuge etai jamedu.
20Mare Pedro akore: – Ameardaere awo akirodo Pao Kurireu ure maku boe etaiwu Uwariji diero tabo. Nou ameardae pega. Atudo ako diero rugadu boe tabo boe pegareuto. 21Aromodukare nono čerore jiboeji. Amaragodumodukare čedabo. Pao Kurireu jorduware ai kodi. Ameardaekare ameartoruwo Pao Kurireuji. Ameardaere tu ameardae pegareuji rugadu. 22Ča akaidukaba nou ameardae pegareuji pugeje. Amagodo Pao Kurireuji biagoduwo nou ameardae pegareu piji. 23Iordure akimaredure rugadu duji. Aro pegareu ure tugeragu ai kodi.
24Simão makore Pedroji, Joãoji. Akore: – Tamagodo Pagimijeraji iparu tabo nou tagagore jiwu boe pegareu jetukawo i.
25Nou Pedro nou João ere boe ewie nuba boe eromode tumeartoruwo Jesusji. Emagore Jesus rore jiboeji boe ewiagai. Dukeje eture tuibagi toro Jerusalém ba kurireu ka. Eture dukeje emagore Jesus rore jiboeji nou Samaria kejewu boe doge ewiagai jamedu. Nou boe doge emagare nono nou moto keje.
Filipe Makore Etiópia Kejewu Boe Eimijeraji
26Ia Pao Kurireu utugare baru tadawu makore Filipiji. Akore: – Ado arugadu. Atudo toro nou Jerusalém pijiwu Gaza kawu awara ka.
(Boe edukare nou Gaza tada pugeje). 27-28Dukodire Filipe ure tudo turugadu. Uture dukeje toro rugadu jordure ia imeduji. Nou imedu Etiópia kejewu nure ema. Nou Etiópia moto kejewuge eimijera kurireu iere Candace. Aredu nure ema. Nou Filipe jordure jiwu imedu jeture tugimijera Candace o dieroji. Dukodi umaragodae reno. Filipe jordure ji awara kajeje. Unure tugirimi Etiópia ka Jerusalém piji carreta tabo. Uture Jerusalém ka tuwo tubu jodo tumago pemegawo Pao Kurireuji. Aino ča uture tuibagi to moto ka taiwo tabo Pao Kurireu bataruji. Aiwore nou makore Pao Kurireu bataru jiwu imedu Isaías ure bu bapera kejewu Pao Kurireu bataruji. 29Ča Pao Kurireu Uwari makore Filipiji. Akore: – Atudo toro nou Etiópia kejewu imedu o carreta ka.
30Dukejere Filipe rekodure nou carreta ka. Dukeje meardure nou Etiópia kejewu imedu bataruji. Aiwore Pao Kurireu bataruji tumago tabo tu pudui. Filipe meardure nou bataruji. Dukodire unarare nou Etiópia kejewu imeduji. Akore: – Arduware nou akaiwore jiwu bataruji?
31Nou Etiópia kejewu imedu akore: – Boro. Ia boe edukare woe tuwo iorduwado awu bataruji.
Dukeje makore Filipiji uwo taredo nou carretato muguwo keje uwo tuiorduwado. 32Aiwore jiwu Pao Kurireu bataru akore aino:
– Boe ere imedu bito nono boe emode ovelha bito dumogadure. Boe emode ovelha bu kado piji dukeje nou ovelha makomodukare. Nou imedu makokare jamedu. Rore nono nou ovelha ro mogadure.
33– Ero pegare ji rugadu mare boe ekare nou ero pegareu morido etai pugeje. Tugodu mai dutabore bire dukodire ore bokware.8.33 Awu bataru padure Isaías 53.7-8 keje.
34Nou Etiópia kejewu boe eimijera makore Filipiji. Akore: – Itaidure awo iwie. Nuba nou ere bitowu iere? Pudui na nou makore Pao Kurireu bataru jiwu akoino kana? Ia boei na akoino kana?
35Dukeje Filipe ure jorduwado nou Pao Kurireu bataruji. Marigudu Pao Kurireu uie boe ewie turomodedu boeji nou bataru tabo. Mare paga karega Jesus jie Pao Kurireu akoino. Jesus umoduie boe ekinorudo rugadu. 36-37Ekodu kimore awaraji nou carreta tabo. Dukejere etaregodure ia kurugwa okwa ka. Nono nou Etiópia kejewu boe eimijera akore: – Pobo reo. Ukana turugadu itao pegododuwo?
38Dutabore ure tuwuredo to carreta tabo nono. Emare ure turawuje carreta piji Filipe apo. Ere turemo poboto. Dukeje Filipe ure ao pegodo. 39Ere tudawuje pobo piji dukeje Pao Kurireu Uwari ure Filipe tawuje piji pugeje. Nou Etiópia kejewu boe eimijera jordukare nou Filipiji pugeje. Mare uture pugeje tiegarere pudui dutabo rugadu. 40Rore puku Filipiji turagojere Azoto ba kurireu keje duji. Nono uture toro Cesaréia ba kurireu ka. Nou Cesaréia kawu awara keje ure boe eiamedu boe ewie Jesus bataru pemegareuji rugadu.
9Saulo Meartorumode Jesusji
1-2Saulo ro pegare meartorure Jesus jiwugei kimo. Akore tumoduie ewido rugadu. Aidure tuduwo Damasco ba kurireu ka taiwowo rore Jesus ro jiwuge ewagai tuwo tugeragu ei tuwo erego pudabo Jerusalém ba kurireu ka tuwo etugu baičoreuto nono. Dukodire uture nou ure Judeu doge enomea maku Pao Kurireu aiwuge eimijera kurireu ae tuwo tugeragu nou atugo padure kejewu baperaji tuduwo tabo toro Damasco ka. Nou bapera umode nou Damasco kejewu Judeu doge eimijerage erduwado nuba Saulo romode nou meartorure Jesus jiwugei, imei aremei.
3Saulo ure tugeragu nou baperaji dukeje uture. Puredugodure nou Damasco ba kurireuji dukeje rore puku je ia jorugu aregodure baru piji duji. 4Dukejere buture moto keje. Meardure iaboe makoji. Akore: – Saulo nure aki. Kodiba aro pegare i?
5Saulo akore: – Kakojiwu ba ure aki?
Nono akore: – Jesus nure imi. Aro peganure i. 6Ča aragojedo. Atudo toro Damasco ba kurireu ka. Ia imedu umode awie aromode jiboeji.
7Nou uture Saulo apowuge ime ere tuwuredo jamedu. Emagokare boeji. Emeardure nou Jesus makore jiboeji jamedu. Mare erdukare boeji. 8Saulo ure turagojedo. Ure tuioku jado mare joku bokware. Dukodire nou uture apowu ime ere tugeragu ji tugera tabo tuduwo apo toro Damasco ba kurireu ka. 9Merire pobe metia bokware ji joku bokware dukeje. Dukodire okwagekare kudukare poboče jamedu.
10Damasco keje ia meartorure Jesus jiwu imedu iere Ananias. Nou Ananias jordure ia iaboeji. Uniau mogadure dupiji Jesus makore ji. Akore: – Ananias.
Ananias akore: – Imireo.
11Jesus akore: – Ado arugadu. Atudo toro Judas uwai ka. Nou Judas uwai mugure kejewu awara iere Awara Jetororeu. Nou Judas uwai kejere amagomode Saulo bagai. Nou Saulo Tarso ba kurireu pijiwu nure ema. Emare makore baruto. 12Dukodi jordure ia iaboeji. Tuiordure jiboe piji jordure ai. Are aremo pudae tumugure kejewu baito duji. Nono are akera bu ao keje joku pemegagoduwo pugeje.
13Ananias akore: – Ikimijera nure aki. Mare boe ere iwie nou imedu Saulo ro pegareuji. Emare ro pegare meartorure aiwugei rugadu Jerusalém keje. 14Aregodure mato turo pegawo nou mako pemegare aiwuge eiamedu boei. Nou ure Judeu doge enomea maku Pao Kurireu aiwuge eimijerage ere tugie maku ai rugadu ro pegawo rugadu.
15Jesus akore: – Atudo Saulo ae rugadu. Ire ikeragu ji maragoduwo inai. Emare umode boe tuginaiwuge erduwado i. Umode boe eimijerage erduwado i. Umode Israel doge erduwado i. 16Saulo meartorumode i rugadu. Boe rakamode ji jamedu. Mare imire imode bie nou boe rakamode jituji.
17Nou Ananias uniau akedure dukeje uture Saulo bagai rugadu. Ure turemo nou Saulo rakojere tadawu baito. Ure tugera bu Saulo aora keje. Makore ji. Akore: – Ameartorure Jesusji dukodi iwobe nure aki. Jesus koiare ure itarego mato akae. Emare ure ardudo pudui toro awara keje. Ure itarego mato akae iwo aku pemegado pugeje, Pao Kurireu Uwari rakojewo akabo.
18Ananias akoino dukeje čare ia iaboe ure tudawuje Saulo joku piji. Ure nono karo botore. Nono Saulo joku pemegagodure pugeje. Ure turagojedo. Ao pegododure jamedu. 19Nono okwagere dukodire rakare pugeje.
Saulo Makore Pao Kurireu Bataruji Damasco Kejewu Boe Doge Ewiagai
Saulo rakoje raikare meartorure Jesus jiwugebo Damasco ba kurireu keje. 20Uture Judeu doge etae ere bato puiwu bai ka. Nonore makore ei Pao Kurireu Onaregedu nuie Jesusče. 21Meardure jiwuge eiamedu boe ebogodure ji. Egore: – Awu Saulo emare ure nou meartorure Jesus jiwuge ewido Jerusalém keje. Emare aregodure mato tuwo tugeragu nou meartorure Jesus jiwugei tuwo erego Jerusalém ka tuwo emagu nou ure Judeu doge enomea maku Pao Kurireu aiwuge eimijerage etai. Mare rokare aino pugeje.
22Dukodire Saulo mako pemegare rugadu. Roiware tuwo boe etaora mekido rugadu tuwo Pao Kurireu meardae maku etai. Makore ewiagai tuiorduwa tabo Jesus umode boe ekinorudowu nuie ema duji. Dukodire nou Damasco kejewu Judeu doge eroiwakare tumagowo nou Saulo bataru jipagi.
23Meri raire ji nono. Dukeje Judeu doge ere bato pui tuwo tumeardae pegareu tawuje tuwo Saulo bito. 24Etaiwore nou ba kurireu bai poroji meriji boečoji tuwo tugeragu Sauloji tuwo bito. Mare ia boe ure Saulo bie nou emeardae pegareuji. 25Ia boečoji aidure Saulo jiwuge eture apo nou ure taiado nou ba kurireu tabowu moto ri ao ka ia baito. Dukeje nou moto ri ao piji, nou bai piji ere Saulo tugu tugodaraboto dukeje ere rawuje toro moto ka. Dukodire Saulo uture Damasco piji.
Saulo Rakojere Jerusalém Ba Kurireu Keje
26Saulo uture Jerusalém ba kurireu ka. Aidure turagojewo Jesus ure jorduwadowugebo nono. Mare emeartorukare ji. Epagudure če. 27Nono Barnabé ure tugera maku ai. Ure Saulo reko nou uture Jesus bataru tabowuge etae. Ure ewie nou Saulo jorduie Jesusji awara keje duji. Jesus makoie nou Sauloji. Ure ewie Saulo rore jiboeji makore jiboeji Damasco keje. Saulo uie boe erduwado Jesus jiboeji rugadu. 28Barnabé makore aino ei dukeje etaidu pemegare nou Sauloji. Saulo rakojere ebo. Uture Jerusalém jamedu boeji tumagowo boei Jesus jiboeji. 29Mako raire nou jorduware Grécia bataru jiwu Judeu dogei. Mare etaidure tuwo Saulo bito. 30Nou meartorure Jesus jiwuge erduware nou emeardae pegareuji dukeje ere Saulo reko Cesaréia ba kurireu ka tuwo utudo toro Tarso ba kurireu ka, nou ričodure kejewu ba kurireu ka.
31Aino nou Judéia kejewuge meartorure Jesus jiwuge, nou Galiléia kejewuge meartorure Jesus jiwuge, nou Samaria kejewuge emeartorure Jesus jiwuge eiamedu boe ere tamudo. Boe ero pegare eidu akedure kodi. Nou meartorure Jesus jiwuge eku kidugodure Pao Kurireuji tumeartoruwo ji rugadu dukodire Pao Kurireu Uwari ure eragado, ure emagado pugeje.
Pedro Uture Lida Ba Kurireu Ka, Jope Ba Kurireu Ka
32Pedro uture moto jamedu boe parugajeje. Ia meri keje aregodure Lida ba kurireu ka. Aidure tuiorduwo meartorure Jesus jiwugei nono. 33Aregodure toro dukeje jordure ia imeduji. Iere Enéias. Nou Enéias ukare turagojedo kejewu joru oto padure oito pogora kugudure dukodi. 34Pedro makore ji. Akore: – Jesus Cristo unure apemegago. Aragojedo. Akeragu apadure kejewu kodoji.
Ča nou Enéias ure turagojedo tači je tugudau kodo tabo. 35Nou Lida kejewuge eiamedu erdure nou inoduji. Nou Sarom ba kurireu kejewuge eiamedu boe erdure nou inoduji jamedu. Dukodire ere tugera ra tumeartorure jiboe piji tumeartoruwo tu Jesusji.
36Jope ba kurireu kejere ia meartorure Jesus jiwu aredu iere Tabita. Iere Dorcas9.36 Nou aredu iere Tabita aramaico bataru tabo. Iere Dorcas grego bataru tabo. jamedu. Ro pemegare boei meri jameduji. Ure tugera maku marenarue doge etai rugadu. 37Ia meri keje kogodure. Nono bire kuri rugadu. Boe ere nou bireu pemegado dukeje ere tugu ia baito. 38Jope ba kurireu jakare Lida ba kurireu piji. Dukodire nou Jope kejewu meartorure Jesus jiwuge emeardure Pedro rakojeie Lida keje duji. Dukodire ere ime pobedu doge etudo toro Pedro bagai. Etaregodure ae dukeje emagore ji: – Mato čedabo amara tabo.
39Dukodire Pedro ure tudo turugadu. Uture ebo Jope ba kurireu ka. Etaregodure toro dukeje ere Pedro remo nou bireu padure tadawu baito. Areme ere tuburedo Pedroji tragudu tabo. Ere Pedro jordudo nou Dorcas maragodae pemegareuji. Nou aredu Dorcas areia midodu epa nure ema. 40Pedro makore nou boei ewo tudawuje nou bai piji. Nono ure tubu jodo moto keje. Makore baruto dukeje makore nou bireudoji. Akore: – Are. Aragojedo.
Ča nou aredu ure tuioku jado. Jordure Pedroji dukeje ure tumugudo. 41Pedro ure tugera maku ai uwo turagojedo. Dukeje makore meartorure Jesus jiwuge ewagai, nou oragudureu areme ewagai. Nono ure erdudo ji. Bikare pugeje duji. 42Nou rore ainodu ure tumaedo nou ba kurireu Jope jamedu boe parugajeje. Boe emagare tumeartorure Jesus jitu tabo. 43Pedro rakoje raire nou Jope ba kurireu keje. Mugure ia maragodure tapira biri urugudowu imedu uwai keje. Nou imedu iere Simão.
10Pedro Uture Imedu Cornélio Ae
1Ia imedu iere Cornélio. Mugure Cesaréia ba kurireu keje. Judeu karegure ema. Romano doge tugobaigarege eimijera nure ema. Nou Romano doge tugobaigarege ekiere “Italiano doge”. 2Nou Cornélio aidure Pao Kurireuji. Ema uwobe eiamedu boe eku kidugodure Pao Kurireuji tumeartoruwo ji. Nou Cornélio ure tugera maku Judeu doge marenarue doge etai jamedu. Makore baruto Pao Kurireu bagai tu tu je.
3Ia meri keje merirekodutabo emare makore baruto pugeje. Makore dukeje jordure jiboe ure nono uniau mogadure. Jordure Pao Kurireu utugare baru tadawuji. Ure turemo Cornélio uwaito dukeje makore ji. Akore: – Cornélio.
4Cornélio aiwore tu nou Pao Kurireu utugare baru tadawuji tubagudu tabo. Dukeje akore: – Imireo.
Nou Pao Kurireu utugare baru tadawu akore: – Pao Kurireu aidure rugadu aro pemegareuji. Aidure amagore baruto duji. Umode amagore bagaiboe maku akai rugadu. 5Ia ime etudo toro Jope ba kurireu ka ia imedu bagai. Nou imedu iere Simão Pedro. 6Emare mugure ia maragodure tapira biri urugudowu imedu uwai keje. Nou maragodure tapira biri urugudowu imedu iere Simão jamedu. Mugure pobo maereu okwai.
7Nono nou Pao Kurireu utugare baru tadawu uture piji. Dukeje Cornélio makore tudugare pobedu doge ewagai. Makore ia tugobaigare bagai. Nou tugobaigare aidure Pao Kurireuji jamedu. Emare jetu pemegare nou Cornélio oeji tu tu je. 8Cornélio readodure nou tuniauji ewiagai dukeje ure etudo Jope ba kurireu ka Pedro bagai.
9Nou barogwato etaregodukare raga dukeje Pedro ruture tuwai ao ka tumagowo baruto. Meri jeture pagaia keje. 10Dukeje uke boeire ji. Aidure togwagewo mare boe ekare uke pemegado raga. Nono jordure ia iaboeji. 11Jordure baru ure tuiado duji. Jordure ia boe ekudau areia kigadureuji. Nou boe ekudau areia kurire, jadodure duji. Ure turawuje baru piji gu je. 12Nou boe ekudau kejere barege pegareuge emugure, kiebarege pegareuge emugure jamedu. Iage ere nono batrareuge emogadure. Emugure keje jamedu. 13Nono ia boe makore Pedroji baru piji. Akore: – Pedro. Aragojedo. Akeragu iaji awo bito, awo kowuje.
14Mare Pedro aidukare. Nou Pao Kurireu ure maku Judeu doge etaiwu eno bakaru koiare emodukare nou barege nou kiebarege ekowuje. Dukodi Pedro akore: – Boro. Marigudu are mariguduwuge iwobe eno bakaru maku etai. Nou bakaru akore boe ekaiago ia barege ekowuje ekaiago ia kiebarege ekowuje. Akore emoduie kowuje dukeje epemegamodukaie turowo nou bakaru tadawu boe ero boeji pugeje. Marigudu ikare nou barege nou kiebarege ekowuje rugadu jii aino. Aino imodukare ekowuje rugadu.
15Mare nou baru pijiwu makore pugeje. Akore: – Pao Kurireu nure imi. Imagomode ai ia barogo uie turugadu boe ewo ko dukeje akaidudo ji.
16Pao Kurireu akore ainodu ure pobe metia bokware. Dukeje čare nou boe ekudau areia kigadureu ruture tuibagi kuri je baruto.
17Pedro biagorore nou tuiordure jiboeji. Aidure tuiorduwawo nuba boe mode. Dukeje nou Cornélio ure etudowuge etaregodure nou rakojere tadawu bai ka. 18Emagore Pedro bagai. Egore: – Simão Pedro mugure woe?
19Pedro biagoro kimore nou tuiordure jiboeji dukodire meardukare nou ime etaregodure pudae duji. Nono nou Pao Kurireu Uwari makore Pedroji. Akore: – Akaiwodo. Ime etaregodu awagai. 20Ado arugadu atuwo ebo. Ire etarego mato awagai.
21Dukodire Pedro ure turawuje nou bai ao piji. Nono makore nou imei. Akore: – Iwagai na taroino? Kodiba tagaregodure woe?
22Egore: – Tugobaigarege eimijera Cornélio koiare ure čedudo mato awagai. Imedu pemegareu nure ema. Joku kidugore Pao Kurireu jiwu nure ema tumago pemegawo Pao Kurireuji rugadu. Judeu doge eiamedu boe etaidure ji. Pao Kurireu utugare baru tadawu ure čegimijera Cornélio jorduwado tumagowo awagai atuwo tuwai ka tumearduwo awadaruji.
23Nono Pedro ure eremo tuwaito enuduwo nono nou boečoji.
Nou barogwato Pedro ure tudo turugadu dukeje uture ebo. Ia mugure Jope ba kurireu kejewu meartorure Jesus jiwuge eture ebo jamedu. 24Nou barogwato pugeje etaregodure Cesaréia ba kurireu ka. Cornélio upagare ewagai nono tuwobebo tumagore bagaiwu tumedagebo jamedu. 25Pedro uiago turemo uwaito mare nou Cornélio uture togi. Nono ure tubu jodo moto keje Pedro jokorai. 26Mare Pedro ure rakojedo. Akore: – Aragojedo. Imedu nure imi. Pao Kurireu karegure imi.
27Nono Pedro makore nou Cornélioji. Ere turemo baito. Nono Pedro jordure nou boei nou bai ja tada. Emagare rugadu. 28Makore ei. Akore: – Tagi tarduware Judeu doge eno bakaru tadawu boe ero boeji. Nou bakaru akore čedaregodukaiago ia boe tuginaiwuge ewai ka. Čemugukaiago ia boe tuginaiwugebo. Mare maigodu aino Pao Kurireu ure iorduwado tuwo imeardae pemegado boe tuginaiwugei. Boe pegareuge kaiegure emage duji. Emodukaie čebegado duji. 29Dukodire itaregodure aino woe. Amagore iwagai dukeje iture mato. Ča. Kodiba akagoino iwagai?
30Cornélio akore: – Ia jawu meriji imagore baruto iwai tada merirekodutabo. Irore puku ia imedu rakojere itogi duji. Ukudau kigadu maere ji. 31Emare makore i. Akore, “Pao Kurireu meardure akagoino baru to duji. Jordure aro pemegareuji. 32Ia boe utudo Jope ba kurireu ka ia imedu bagai. Nou imedu iere Simão Pedro. Rakojere ia maragodure tapira biri urugudowu imedu uwai keje. Nou maragodure tapira biri urugudowu jiwu iere Simão jamedu. Mugure pobo maereu okwai.” 33Dukodire imagore aino awagai. Ča akaregodure mato rugadu. Aino paragojere woe Pao Kurireu apo. Čebaganure awagai awo čewie Pao Kurireu bataruji.
Pedro Umode Erduwado Pao Kurireu Bataruji
34-35Nono Pedro makore ei. Akore: – Aino iorduwagodure Pao Kurireu meardaeji. Marigudu imeardaere Pao Kurireu aidure tu Judeu dogei duji. Mare aino iorduware Pao Kurireu aidure boe eiamedu boei duji. Aidumode meartorure puduiwuge eiamedu boei. Aidumode rore Pao Kurireu aidure jiwuge eiamedu boei. Aiwomodukare boe ewiriji boe ekudaeji. Aiwomode tu emeartorure puduidu bagai, ero pemegaredu bagai. 36Tarduware Pao Kurireu ure maku Judeu doge etaiwu eno bataruji. Ure pawie Jesus Cristo umoduie boe ekinorudo ewudugugoduwo. Jesus Cristo boe eiamedu boe eimijera kurireu nure ema rugadu. 37Tarduware nuba boere Judeu doge eno moto keje. João Batista ure boe erduwado Pao Kurireu bataruji. Nouge ere tugera ra turo pegareu piji dukeje João ure etao pegodo. 38Dukeje Jesus ure boe erdudo turoji Galiléia keje. Emare mugure Nazaré ba kurireu keje. Pao Kurireu ure Tuwari maku Jesus ai. Ure Jesus rakado rugadu. Dukeje uture nou moto jamedu boe parugajeje turo pemegareu tabo. Ure bope doge etawuje boe epiji tuwo epemegago. Pao Kurireu rakojere apo dukodire rore aino. 39Čegi čerdure Jesus rore jiboeji Israel moto keje. Čerdure rore jiboeji Jerusalém keje. Iage ere Jesus bu ipo padure pugajejewu keje. Nonore ere bito nono. 40Mare merire pobe metia bokware dukeje Pao Kurireu ure Jesus jewodudo pugeje. 41Ure boe erdudo Jesusji. Mare boe eiamedu karega. Ia čegi čerdure ji. Pao Kurireu ure nou ture tugeragu jiwuge erdudo Jesusji rugadu. Jesus jewodure dukeje čenogwagere apo, čegudure apo jamedu. 42Makore čei čewo boe ewie tuwadaru pemegareuji. Čewo boe ewie Pao Kurireu ure boe eimijerado pudumi duji. Dukodire Jesus aiwomode jaoboe eroji, maiwu boe eroji jamedu ero pemegareu bagai, ero pegareu bagai. 43Dujire nou jaoboe makore Pao Kurireu bataru jiwuge eiamedu boe emagore. Ere boe ewie Jesus biagodumoduie meartorure puduiwuge eiamedu boe ero pegare jiboe piji. Emeartorure Jesusji dukodire biagodumode ero pegare jiboe jamedu boe piji rugadu.
Pao Kurireu Uwari Ure Turemo Boe Tuginaiwugeto Jamedu
44Pedro makore aino dukeje Pao Kurireu Uwari ure turawuje nou meardureuge etae. 45Nou aregodure Pedro apowuge erore ta je nou inoduji. Judeu doge nure emage. Emeartorure Jesusji. Mare aino Pao Kurireu Uwari ure turemo boe tuginaiwugeto jamedu. 46Dukejere nou boe tuginaiwuge emagore ia boe tuginaiwuge ewadaru tabo. Nono emago pemegare Pao Kurireuji rugadu. Pemegaie, kurie rugadu. 47Nono Pedro akore pugeje: – Pao Kurireu Uwari ure turemo awu boe tuginaiwugeto nono ure turemo čedo dumogadure. Ča ure turugadu etao pegododuwo jamedu.
48Dukodire makore ia tumedagei ewo nou boe tuginaiwuge etao pegodo emeartorure Jesus Cristoji kodi. Nono emagore Pedroji rakojewo nono pudabo tu jao.
11Pedro Ure Jerusalém Tadawu Meartorure Jesus Jiwuge Ewie
1Nou uture Jesus bataru tabowuge emeardure boe tuginaiwuge emeartoruie Pao Kurireu bataruji jamedu duji. Nou Judéia kejewu meartorure Jesus jiwuge eiamedu erduware jamedu. 2Nono Pedro uture Jerusalém ba kurireu ka. Iage etaidure tuwo nou meartorureuge boe tuginaiwuge enoe oto biri11.2 Nou Judeu doge eroreno, emode tuwaga oto biri kado. Dukodi etaidure nou boe tuginaiwuge ewo tuwaga oto biri kado nono turo mogadure. kado nono Judeu doge ero mogadure. Emago pegare Pedroji. 3Egore: – Ukare turugadu aragojewo akwagewo aino boe tuginaiwuge ewai tada.
4Dukodire Pedro readodure ewiagai nuba boere pudui toro rugadu. 5Akore: – Iragojere Jope ba kurireu tada dukeje imagore baruto. Nono iordure iaboeji. Ure nono iniau mogadure. Iordure ia boe ekudau areia kigadureuji. Nou boe ekudau areia kurire, ture tuiado dukeje. Ure turawuje baru piji itae rugadu. 6Nou boe ekudau kejere barege pegareuge emugure, kiebarege pegareuge emugure jamedu. Iage ere nono batrareuge emogadure. Emugure keje jamedu. 7Dukejere imeardure ia boe makore baru piji duji. Akore, “Pedro. Aragojedo. Akeragu iaji awo bito, awo kowuje.” 8Mare inagore, “Boro. Marigudu are nou mariguduwuge iwobe eno bakaru maku etai. Nou bakaru akore boe ekaiago ia barege ekowuje ekaiago ia kiebarege ekowuje. Akore emoduie kowuje epemegamodukaie turowo nou bakaru tadawu boe ero boeji pugeje. Mare ikare nou barege nou kiebarege ekowuje rugadu jii aino. Aino imodukare ekowuje rugadu.” 9Nono nou baru pijiwu makore pugeje. Akore, “Pao Kurireu nure imi. Imagomode ai ia barogo uie turugadu boe ewo ko dukeje akaidudo ji.” 10Akoino i dure pobe metia bokware. Dukeje čare nou boe ekudau areia kigadureu ruture tuibagi baruto. 11Ruture dukeje ime etaregodure iwagai. Ere pobe metia bokware. Etaregodure Cesaréia ba kurireu piji. 12Pao Kurireu Uwari makore i ituwo ebo imara tabo. Awu meartorure Jesus jiwuge eture itabo jamedu. Jope kejewuge nure emage. Enodo padure seis. Čedure toro Cesaréia ba kurireu ka. Čere čeremo Cornélio uwaito nono. 13Emare readodure čewiagai tuiorduie Pao Kurireu utugare baru tadawuji tuwai ja tada. Akoie aino pudui, “Ia boe utudo Jope ba kurireu ka ia imedu bagai. Nou imedu iere Simão Pedro. 14Emare umode arduwado nuba aromode, nuba awobe eromode tawo taginorudo boe pegareu piji.” 15Ča itaregodure toro etae dukeje ire ewie Pao Kurireu bataru pemegareuji. Dukejere Pao Kurireu Uwari ure turawuje etae nono ure turawuje pagae dumogadure. 16Dukeje iwiabuture Pagimijera Jesus bataru keje. Akore, “João ure boe etao pegodo pobo tabo mare imire imode Pao Kurireu Uwari rawuje tagae iwo tugu tameardaeto.” 17Boe jokodu jire inagoino. Pagimijera Jesus ure Pao Kurireu Uwari maku awu boe tuginaiwuge etai nono ture maku pagai dumogadure. Pameartorure Pagimijera Jesus Cristoji dukeje ure Tuwari maku pagai. Aino ure maku etai jamedu. Imire imodukare imeardae udo tuginai Pao Kurireu meardae piji.
18Nou boe emeardure nou inoduji dukeje emago pegakare nou boe tuginaiwugei pugeje. Emago pemegare Pao Kurireuji. Egore: – Pao Kurireu aidure boe tuginaiwugei ewo tugera ra turo pegareu piji jamedu, Pao Kurireu uwo ekinorudo boe pegareu piji.
Meartorure Jesus Jiwuge Edure Antioquia Ba Kurireu Keje
19Boe eimijera pegareuge ere Estêvão bito dukeje boe pegare meartorure Jesus jiwugei rugadu. Dukodire ere taodo Jerusalém piji. Iage eture Fenícia moto ka. Iage eture Chipre moto ka. Iage eture Cirene moto ka. Emagore Pao Kurireu bataru pemegareuji tu Judeu doge ewiagai nono. 20Mare ia Chipre kejewu meartorure Jesus jiwuge eture Antioquia ba kurireu ka. Ia Cirene kejewu meartorure Jesus jiwuge eture Antioquia ba kurireu ka jamedu. Emagere emagore Jesus bataru pemegareuji boe tuginaiwuge ewiagai jamedu. Ere ewie Jesus umode ekinorudo boe pegareu piji duji. Ewo tugimijerado ema. 21Jesus ure turaga maku etai. Dukodire boe emagare tumeartoru tabo ewadaruji. Ere tugera ra tumeartorure jiboe piji tumeartoruwo tu Jesusji.
22Nou Jerusalém kejewu meartorure Jesus jiwuge emeardure nou inoduji dukeje ere Barnabé utudo etae toro Antioquia ba kurireu ka. 23Emare aregodure toro dukeje jordure Pao Kurireu ro pemegare ei duji. Dukodire jakarere pudui. Makore ei ekawo tugera ra Jesus piji. Emeartoru rakawo ji rugadu.
24Nou Barnabé imedu pemegareu nure ema. Pao Kurireu Uwari rakojere apo. Meartoru rakare Jesusji. Ure boe emeartorudo Jesusji rugadu. Emagare. 25Dukeje Barnabé uture Tarso ba kurireu ka taiwo tabo Saulo bagai. 26Jordure Sauloji dukeje ure tugirimi apo Antioquia ba kurireu ka. Jorure mitotu je ei toro ere boe erduwado Pao Kurireu bataruji dutabo. Ere bato pui meartorure Jesus jiwugebo tu tu je. Nou Antioquia kejere boe ere nou meartorure Jesus jiwuge ekiedo. Egore: “Cristo uwobe reo.”
27Ia makore Pao Kurireu bataru jiwuge eture Jerusalém piji Antioquia ba kurireu ka. 28Ia iere Ágabo. Ure turagojedo. Pao Kurireu Uwari ure Ágabo makodo. Akore bubutumodukaie moto jamedu boe parugajeje. (Ča Cláudio Romano doge eimijera kurireu ure ema dukeje bubutukare nono nou Ágabo bataru mogadure.) 29Dukodire nou Antioquia kejewu meartorure Jesus jiwuge ere tumeardae tawuje tuwo ia tuge maku diero bagai tuwo nou diero maku toro nou Judéia kejewu meartorure Jesus jiwuge ewagai. 30Erore aino rugadu. Nono ere Barnabé, Saulo etudo diero tabo toro nou Judéia kejewu meartorure Jesus jiwuge ewagai rugadu.
12Boe Pegare Meartorure Jesus Jiwugei Pugeje
1Boe eimijera kurireu Herodes ro pegare meartorure Jesus jiwugei. Ure iage etugu baičoreuto. 2Ure to tugobaigarege edo Tiago bito tariga kurireu tabo. Nou Tiago, João umana nure ema. 3-4Judeu doge etaidure nou Herodes ro pegareuji. Dukodire Herodes ure tugeragu Pedroji jamedu. Ure tugu baičoreuto. Rore aino mare Judeu doge ewadure ia tuwadaeji. Nou ewadae iere Páscoa. Dukodire Herodes roiwakare tuwo Pedro bito nou meriji. Meardaere tuwo bito nou Judeu doge ewadae akedu keje. Nono Herodes ure tugeragu tugobaigaregei. Enodo padure dezesseis. Ure etu pemegado Pedroji nou baičoreu ja tada. Herodes aidure Judeu doge emagowo boe ewo nou Pedro bito. 5Dukodire Pedro rakojere baičoreu ja tada. Mare meartorure Jesus jiwuge emago raire baruto Pao Kurireu bagai Pedro paru tabo.
Pedro Tawujedure Baičoreu Piji
6Herodes uiago Pedro maku Judeu doge etai barogwakododu keje. Mare nou boečoji Pedro unudure tugobaigarege etoiadada. Ere pobe. Ere Pedro kogudo corrente pobedu tabo. Tugobaigarege edure nou baičoreu bai poro keje jamedu. 7Rore puku Pedroji ia Pao Kurireu utugare baru tadawu rakojere nono apo duji. Urugu rakare nou baičoreu ja tada. Nou Pao Kurireu utugare baru tadawu ure tugerado Pedro poru keje jetaduwo. Akore: – Aragojedo. Amara tabo.
Ča nou corrente ure tugiwuje Pedro piji. 8Nono nou Pao Kurireu utugare baru tadawu akore: – Akudau areia tugu ai kogudo. Awure tugu awuretadauto. Paduwo. Atudo itabo.
Ča Pedro meartorure nou Pao Kurireu utugare baru tadawu bataruji. 9Uture rekodaji nou baičoreu piji. Mare meardaere tuniaunure duji. Jorduwakare boe remawu nure aino pudui duji. 10Ekodure nou tugobaigare boetojiwu kori dukeje ekodure ia kori pugeje. Nono etaregodure nou baičoreu bai poro ka. Nou bai poro ure tuiado poku je dukeje ere tudawuje nou baičoreu piji. Ekodure nou ba kurireu tadawu awaraji. Nono Pedro rore puku nou Pao Kurireu utugare baru tadawu uture tubiji duji.
11Aino čare Pedro jorduware turore jiboeji dukeje akore: – Boe remawu rugadu. Pao Kurireu ure tudugare baru tadawu arego itae uwo ikinorudo nou Herodes ro pegareu piji, nou Judeu doge etaidure jiwu ero pegareu jiboe piji jamedu.
12Jorduware ure tudawuje baičoreu piji dukeje Pedro uture João Marcos uče uwai ka. Nou uče iere Maria. Boe emagare nono. Ere bato pui tumagowo Pao Kurireu bagai Pedro paru tabo. 13Pedro aregodure toro dukeje ure tugera to nou bawadu kejewu bai poroji. Ia bai kejewu utugare nogwaredu uture tugimaduwo apo. Iere Rode. 14Puredugodure toro dukeje meardure Pedro makoji. Jorduware ji dukeje jakaregodure pudui rugadu. Dukodire rekodure tuwaito pugeje. Mare ukare bai poro jado dukodire Pedro rakoje kimore toro bawadu keje. Nou Rode makore nou boei Pedro rakojeie bawadu keje. 15Mare emeartorukare. Egore: – Akaora bai baire.
Mare emare ukare togwa ra tumagore ei dupiji. Dukodire egore: – Pedro karega. Uwarire akoino.
16Mare Pedro ure tugera to bai poroji kimo. Dukodire boe ere bai poro jado. Nono erdure ji. Pedro nure ema rugadu. Dukodire ebogodure. 17Pedro ure tugera raido emugu kiorowo nono. Readodure ewiagai nuba Pao Kurireu rore pudui tuwo tudawuje baičoreu piji duji. Akore: – Tadudo toro nou Tiago ae tawo bie. Nou meartorure Jesus jiwuge eiamedu boe ewie jamedu.
Nono Pedro uture epiji toro ia ba kurireu ka.
18Barogwakododure dukeje nou baičoreu tadawu tugobaigarege erduwakare nuba boere Pedroji dukodire etokire pui. 19Herodes mako rakare ei etaiwowo Pedro bagai mare erdukare ji. Dukodire Herodes ure nou tugobaigarege etarego pudae. Unara raire ei dukeje ure ewido. Rore aino ei dukeje Herodes uture Judéia moto piji tugiriaduwo toro Cesaréia moto ka.
Boe Eimijera Herodes Bire
20Herodes korigodure Tiro ba kurireu kejewugei, Sidom ba kurireu kejewugei jamedu. Dukejere ia nou ba kurireu kejewuge eture ae. Mare ere tumeardae maku ia Herodes uwai tadawu boe eimijera ai jao. Etaiduie tubemegawo Herodiji, etaiduie Herodes pemegawo pudui jamedu. Etuwobe etaiduie tuwo akirodo nouia tugeji Herodes piji jamedu. Nou Herodes uwai tadawu boe eimijera iere Blasto. Nou Blasto jordu pemegare nou emeardaeji. Dukodire ure tuwadaru utudo toro Herodes ae eparu tabo tuwo emeardae maku Herodes ai epemegawo pui pugeje.
21Dukodire Herodes makore ewagai. Ure meri maku etai etaregoduwo nou meriji. Ča nou meri keje Herodes ure nou tugudau boe eimijera kurireu areia motureu tugu pudui. Ure tumugudo to boe eimijera kurireu muga ira keje. Dukejere mako raire boei. 22Nou meardure nou Herodes bataru jiwuge etaidure ji rugadu. Egore: – Imedu karegure ema. Ia baru tadawu pao nure ema rugadu.
23Erore puku Pao Kurireu ure Herodes bito duji. Herodes aidure tuwo Pao Kurireu udo pudumi kodi dukodire Pao Kurireu ure bito. Ate doge ere Herodes kodu rugadu ko dukodire Herodes bire.
24Mare Pao Kurireu bataru ure tumaedo moto jamedu boe parugajeje. Meartorure Jesus jiwuge emagagodure rugadu.
25Barnabé uture Jerusalém ba kurireu ka Saulo apo tuwo nou diero reko nou meartorure Jesus jiwuge ewagai. Ere maku etai dukeje ere tugirimi Antioquia ba kurireu ka João Marcos apo.
13Pao Kurireu Uwari Ure Saulo Tawuje, Ure Barnabé Tawuje
1Makore Pao Kurireu bataru jiwuge eragojere Antioquia kejewu meartorure Jesus jiwugebo. Ure boe erduwado Pao Kurireu bataru jiwuge eragojere nono ebo jamedu. Ainore ekiere. Ia iere Barnabé. Metia iere Simão. Nou Simão iere Čoreu jamedu. Ia iere Lúcio. Nou Lúcio aregodure Cirene moto piji. Ia metia iere Manaém. Nou Manaém ričodure tu nou boe eimijera Herodes apo. Ia iere Saulo. 2Awu jorduware Pao Kurireu bataru jiwuge enogwagekare nou meri keje tuwo tubu jodo tumago pemegawo Pao Kurireuji tu rugadu nou meriji. Dukeje Pao Kurireu Uwari makore ei. Akore: – Tamedia Barnabé, tamedia Saulo etudo tabiji ewo itaidure jiwu ire maku etaiwu emaragodae towuje.
3Dukodire nou boe enogwagekare nou meriji rugadu jii nou meri butu ka rugadu. Dukeje ere tugera bu nou Saulo keje, nou Barnabé keje tumagowo baruto eparu tabo Pao Kurireu utugaregewo emage rugadu. Dukeje ere etudo.
Saulo, Barnabé Eture Chipre Moto Ka
4Pao Kurireu Uwari ure tumeardae maku etai dukodire Barnabé, Saulo eture toro Selêucia ba kurireu ka. Nou Selêucia piji eture toro Chipre moto ka ikarereu tabo. 5Etaregodure toro dukeje ere turemo Salamina ba kurireuto. Emagore Pao Kurireu bataruji boe ewiagai nou Judeu doge ere bato puiwu bai ja tada. João Marcos uture ebo tuwo tugera maku etai.
6Eture nou Chipre moto okwa ka toro nou Pafos ba kurireu ka. Nonore erdure ia bariji. Nou bari iere Barjesus. Judeu nure ema. Emare akore tumagoie Pao Kurireu bataruji mare pagare akoino. 7Nou Chipre kejewu boe eimijera iere Sérgio Paulo. Jorduwareu nure ema. Emare aidure nou Barjesusji. Nou Sérgio Paulo makore Barnabé bagai nou Saulo bagai jamedu. Aidure tumearduwo Pao Kurireu bataruji. 8Mare nou Barjesus rakojere nono jamedu. Emare iere Elimas jamedu. Bari nure ema dukodire boe ere iedo Elimas jamedu. Makore nou boe eimijeraji meartorukawo nou Barnabé nou Saulo ewadaruji, meartorukawo Pao Kurireuji. 9Nou Saulo iere Paulo jamedu. Emare Pao Kurireu Uwari rakojere apo. Paulo aiwore tu nou bariji. 10Nono Makore ji. Akore: – Bope onaregedu nure aki. Ardu pegare boe pemegareu boeji. Arduware tu boe pegareuji awo boe ekiripagado. Akaidure awo Pao Kurireu bataru pemegareu mekido awadrarodutabo. 11Pao Kurireu umode tugera rakado ai rugadu kuri aino. Aku bokwamode ardukawo boeji tu jao.
Rore puku ji nou Elimas joku bokware duji. Ure nono boetugu čoreu mogadure buture joku keje duji. Dukodire meru pagare jetu woje ia boe ewagai ewo tugeragu tugeraji tumeruwo apo. 12Nou Chipre kejewu boe eimijera jordure nou inoduji dukeje meartorure rugadu. Jebogodure nou Paulo nou Barnabé emagore jiwu Pao Kurireu bataruji.
Paulo, Barnabé Eture Antioquia Ba Kurireu Ka Pisídia Moto Ka
13Paulo uture tumedagebo ikarereu tabo Pafos ba kurireu piji toro Perge ba kurireu ka. Perge rakojere Panfília moto keje. Toro João Marcos uture epiji tuduwo tuibagi Jerusalém ka. 14Dukejere eture Perge piji. Etaregodure Antioquia ba kurireu ka Pisídia moto keje. Sábado meriji eture Judeu doge ere bato puiwu bai ka. Edure nono bai ja tada. 15Ia boe aiwore Pao Kurireu ure maku Moisés aiwu bataruji tumagowo nou rakojere nou bai tadawu boe ewiagai. Aiwore ia makore Pao Kurireu bataru jiwuge ere bu bapera kejewu Pao Kurireu bataruji jamedu. Makore ji nou boe ewiagai jamedu. Nou bai kejewuge eimijerage erdure nou Pauloji nou metagei. Dukeje emagore ewagai. Egore: – Ia tagi tagaidure tamagowo ia bataru pemegareuji čewiagai?
16Dukodire Paulo ure turagojedo. Ure tugera awagado boe emagokawo pugeje ewiapagawo nou tuwadaruji. Dukeje makore ei. Akore: – Iwobe nure ia tagi Judeu nure imi kodi. Boe tuginaiwuge nure ia tagi jamedu. Tagaregodure woe tawo tabu jodo tamago pemegawo Pao Kurireuji. Dukodi tawiapaga pemegado iwadaruji. 17Judeu doge emeartorure jiwu Pao Kurireu ure tugeragu jawu pawobei marigudu. Eragojere Egito moto keje dukeje ure emagado rugadu. Dukeje Pao Kurireu ure etawuje Egito moto piji turo rakareu tabo. 18Mare pawobe emeartorukare ji dukodire emeru pagare jetu woje boe maereu keje. Jorure 40 ei nono duji. 19Dukejere Pao Kurireu ure boe pegareuge etagedudo jawu pawobe etododai tuwo nou boe pegareuge eno moto maku jawu pawobe etai enoče. 20Jorure 450 ei eture Canaã moto piji Egito moto ka ewo tugirimi tuibagi Canaã moto ka pugeje ewo tugeragu nou motoji toče. Eimijera bokware mare Pao Kurireu ure tugeragu iagei etaiwowo nou jawu pawobe erore jiboeji. Erore aino jii toro makore Pao Kurireu bataru jiwu Samuel muguredu ka. 21Nono nou pawobe etaidure ia tugimijera kurireu bagai. Dukodire Pao Kurireu ure tugeragu Saulji eimijera kurireuče. Quis onaregedu nure ema. Judeu doge etumana Benjamim uwobe nure ema jamedu. Nou Saul nou Judeu doge eimijera kurireu nure ema dukejere jorure 40 ei nono. 22Nono Pao Kurireu ure Saul tawuje epiji. Ure tugeragu Daviji eimijera kurireuče pugeje. Jessé onaregedu nure ema. Pao Kurireu akore, “Itaidure awu Davi rore jiboeji. Emare ro pemegamode itaidure jiboeji.” 23Ča Jesusre Davi uwobe nure ema. Pao Kurireu ure tugeragu Jesusji uwo boe ekinorudowu udo ema. Ure udo aino nono nou tuwadaru mogadure. Ure aino rugadu. Emare umode Judeu doge ekinorudo boe pegareu piji. 24Jesus otodaire João Batista ure Judeu doge ewie ewo tugera ra turo pegareu piji etao pegododuwo. 25João Batista uiago tumaragodae iado dukeje ure boe ewie. Akore, “Tabagare bagaiwu karegure imi. Boe kurireu karegure imi. Mare tabagare bagaiwu aregodumode iregodaji kuri je. Boe kurireu mode ema rugadu. Ipogurumode ipureduwo ji.”
26– Ia tagi iwobe nure tagi. Abraão uwobe Judeu doge nure ia tagi jamedu. Ia tagi boe tuginaiwuge taeku kigodure Pao Kurireuji tamago pemegawo ji jamedu. Pao Kurireu ure tuwadaru pemegareu maku pagai rugadu. Ure boe ekinorudowu maku pagai rugadu. 27Jerusalém kejewuge erduwakare ji. Eimijerage erduwakare ji jamedu. Jesus umode boe ekinorudowu nure ema mare emeartorukare nou inoduji. Erduwakare tumeardure jiwu Pao Kurireu bataruji. Makore Pao Kurireu bataru jiwuge ere Pao Kurireu bataru bu bapera keje marigudu. Nou Jerusalém kejewuge emeardure nou bapera kejewu Pao Kurireu bataruji Sábado meriji tu tu je. Mare erduwakare nou padure kejewu bapera akoino jiboeji. Emeartorukare ji jamedu. Mare erore jiboe ure nou Pao Kurireu bataru jetudo pudui rugadu. Nou makore Pao Kurireu bataru jiwuge egore nou umode boe ekinorudowu bimoduie. Ča nou Jerusalém kejewuge emeartorukare nou bataruji. Mare ere Jesus bito. Turoino dutabo ere nou bataru jetudo pudui rugadu. 28Erdukare ia Jesus ro pegareuji tuwo bito mare emagore tugimijera Pilatoji uwo bito. 29Aino ere Pao Kurireu bataru udo turugadu. Jesus bire dukeje ere tawuje ipo padure pugajejewu piji. Ere tugu tori poroto. 30Mare Pao Kurireu ure jewodudo pugeje. 31Nono Jesus ure boe erdudo pudui. Boe raire ji rore aino duji. Galiléia kejewuge erdure ji. Jerusalém kejewuge erdure ji jamedu. Nou jordure jiwuge emagore tuiordure jiboeji nou Judeu doge ewiagai. 32-33Dukodire čedaregodure woe tagae. Čedaidure čewo tawie nou Jesus bataru pemegareuji. Pao Kurireu makore jawu pawobei turomode jiboeji. Aino čare ure tuwadaru jetudo pudui rugadu. Ure Jesus jewodudo rugadu. Ainore akore Salmo capítulo 2 keje. Akore, “Itonaregedu nure aki. Awu meriji ao nure imi.”13.32-33 Awu bataru padure Salmo 2.7 keje.
34– Nono Pao Kurireu makore tumoduie nou umode boe ekinorudowu jewodudo biri pegamodukaie moto tada bireuge eda keje. Akore, “Imode nou imagore Davi jiwu iro pemegareu maku tagai.”13.34 Awu bataru padure Isaías 55.3 keje.
35– Ainore akore jamedu, “Amode atugare pemegareu tawuje bireuge eda piji biri pegakawo toro.”13.35 Awu bataru padure Salmo 16.10 keje.
36– Jao pagimijera Davi rore Pao Kurireu roji. Pegagodure dukeje bire. Boe ere tugu mototo nono turo mogadure. Biri pegare toro tori poro ja tada. 37Mare nou Pao Kurireu ure jewodudowu biri pegakare toro tori ja tada. Jewodure rugadu. 38-39Iwobe Judeu doge nure tagi. Iwo tawie. Moisés ure maku Judeu doge etaiwu bakaru ukare boe etawuje ero pegareu piji. Mare awu Jesus umode meartorure puduiwuge eiamedu boe etawuje ero pegareu piji. Jesus koiare umode Pao Kurireu biagodudo boe ero pegareu piji. Dukodi čenure tawie aino. 40Taeku jado tarokawo nono jawu pawobe ero mogadure. Makore Pao Kurireu bataru jiwuge emagore ei marigudu. 41Egore, “Mako pegareuge nure tagi. Ča tarduwakare mare tawimode kuri aino. Tameartorumodukare iroji awu meriji. Boe emode tarduwado mare tameartorumodukare ji.”13.41 Awu bataru padure Habacuque 1.5 keje. Ainore Pao Kurireu akore nou boei marigudu.
– Ča tarokaba nono jorduwa bokwareuge ero mogadure.
42Ewadaru akedure dukeje nou Paulo, nou Barnabé etuiago pugeje. Nou boe emagore ei ewo tugirimi boeiwu Sábado keje ewo boe erduwado pugeje. 43Boe ere tudawuje nou bai piji dukeje eture nou Paulo nou Barnabé eregodaji. Judeu doge nure iage. Rore Judeu doge ero jiwu boe tuginaiwuge nure iage jamedu. Paulo, Barnabé utumode Pao Kurireu bataru tabowuge nure emage dukodi emagore ei. Ere egarego. Emagore ei ekawo tugera ra turo pemegareu piji Pao Kurireu ro pemegawo ei.
44Boeiwu Sábado meri keje nou ba kurireu kejewuge eiamedu boe ere bato pui tumearduwo Pao Kurireu bataruji. 45Nou Judeu doge erdure nou inoduji dukeje erdu pegare ei rugadu. Etaidukare nouia boe emearduwo Pao Kurireu bataruji. Dukodire emago pegare Paulo bataruji. Emago pegare ji rugadu. 46Mare nou Paulo nou Barnabé epogurukare tumagowo rugadu nou Judeu dogei. Egore: – Čemagore Pao Kurireu bataruji tawiagai boetoji. Judeu doge nure tagi. Mare tameartorukare Pao Kurireu bataruji. Tagaidukare tawo tado tarugadu tameartoruwo Jesusji. Dukodire tamugumodukare apo rugadu. Dukodire čedumode tabiji čewo boe tuginaiwuge ewie nou Pao Kurireu bataru pemegareuji. 47Ainore Pao Kurireu akore, “Ire atudo boe tuginaiwuge etae awo erduwado i nono jorugu umode boe erduwado awara jitu mogadure. Iwo boe tuginaiwuge eiamedu boe ekinorudo.”13.47 Awu bataru padure Isaías 49.6 keje.
48Nou rakojere nonowu boe tuginaiwuge emeardure nou bataruji dukeje egaregodure nou bataru keje rugadu. Emago pemegare nou Pao Kurireu bataruji. Pao Kurireu ure tugeragu jiwuge emeartorure rugadu. Aino ewimode mare eragojemode Pao Kurireu apo du akedumodukare.
49Aino Pao Kurireu bataru ure tumaedo nou moto jamedu boeji. 50Mare ia Judeu doge ere boe eimijerage ero pegado nou Pauloji nou Barnabeji. Nou boe eimijerage ere Paulo Barnabé etudo to moto piji. Ia mako pemegare Pao Kurireu jiwu areme etaidukare Pauloji Barnabeji jamedu nou Judeu doge ewadaru koia. Oe kurireuge nure emage. Ere Paulo Barnabé etudo jamedu. 51Dukodire Paulo Barnabé eture. Ere tuwure okeakejewu to pui tuwo moto urugudu tawuje tuwure okeakejewu piji nou boe erduwo taidukare nou ba kurireu kejewuge erore jiboe jituji. Dukeje eture Icônio ba kurireu ka. 52Mare nou Antioquia kejewu meartorure Jesus jiwuge egarere kimo. Pao Kurireu Uwari meture etada rugadu.
14Paulo Uture Icônio Ba Kurireu Ka
1Paulo uture Barnabé apo toro Icônio ba kurireu ka. Toro boe erore ei nono nou Antioquia kejewuge ero mogadure. Paulo uture nou Judeu doge ere bato puiwu bai ka. Nonore ure boe erduwado Pao Kurireu bataruji rugadu. Dukodire Judeu doge emeartorure Jesusji. Emagare rugadu. Boe tuginaiwuge emeartorure Jesusji jamedu. Emagare jamedu. 2Mare iage emeartorukare ji. Judeu doge nure emage. Ere boe tuginaiwuge ekorigo nou meartorure Jesus bataru jiwugei. 3Nou uture Jesus bataru tabowuge eragoje raire nono Icônio ba kurireu keje. Epogurukare tumagowo rugadu Jesus roji, bataruji. Jesus ure eragado ero rakawo, ero kuriwo. Ainore ure boe erduwado boe jokodu jire nou Paulo nou Barnabé egoino. Egore Pao Kurireu ro pemegamoduie meartorure puduiwugei. 4Nou Icônio kejewuge epokare puapo. Emeardaekare nono pu meardae mogadure. Iage etaidure Paulo meardaeji, Barnabé meardaeji. Mare iage etaidure nou Judeu doge emeardae pegareuji jamedu.
5Dukeje ia boe tuginaiwuge, ia Judeu doge emeardaere turo pegawo nou Pauloji nou Barnabeji. Nou ba kurireu boe eimijerage etaidure turowo aino jamedu. Etaidure tugidowo tori tabo ei. 6Nou Paulo nou Barnabé erduware nou emeardae pegareuji dukodire eture nou ba kurireu piji. Eture Listra ba kurireu ka. Eture Derbe ba kurireu ka jamedu Licaônia moto ka. Eture nou puredureu boe eda jamedu boe ka. 7Tugodui dutabo ere boe erduwado Jesus bataru pemegareuji rugadu.
Paulo Uture Listra Ba Kurireu Ka, Derbe Ba Kurireu Ka Jamedu
8Listra ba kurireu kejere ia pogora pegareu imedu mugure. Marigudu meru bokware jii je, boture tubogora pegare dutabo. 9Emare mugu puredure tu Pauloji. Meardure Paulo makore jiboeji. Meartorure rugadu. Paulo aiwore tu ji. Jordure meartorure duji. Dukodire jorduware Pao Kurireu umode pemegado duji. 10Dukodire mako pemegare ji boe eiamedu boe emearduwo. Akore: – Aragojedo ameruwo.
Ča nou imedu ure turagojedo tači je. Merure tuwure tabo rugadu. 11Nou boe erdure nou inoduji dukeje etaiwore Pauloji Barnabeji. Emeardae pegare ei egore bope doge ewari nuie emage. Ekudugodure tuwadaru tabo: – Pameartorure jiwu pawari ere imedudo pudumi taregoduwo mato pagae. Awu ime pobedu doge pawari nure emage.
12Paulo makore boetoji dukodire ere Paulo iedo Mercúrio. Ere Barnabé iedo Júpiter. 13Nou ewari Júpiter uwai mugure nou ba kurireu jokorai. Nou Júpiter uwai tadawu bari aregodure tapira doge imebo, okureboe tabo jamedu nou boe ewo nou tapira doge ekowu tomeawo ema Paulo ai, Barnabé ai tuwo tuwarido emage.
14Paulo Barnabé erduware nuba nou boe eromode duji dukeje ere tugudau areia bowuje. Eregodure nou boe etoiagi. 15Ekudugodure: – Tarokaba aino! Ime nure čegi nono tamogadure. Čedaregodure čewo tawie Jesus bataru pemegareuji tawo tagera ra nou tameardae pagareu piji tameartoruwo tu Pao Kurireuji. Mare paga karega. Ure rugadu. Ema koiare ure baru to, moto to, pobo maereu to, boe jamedu boe towuje. 16Marigudu boe ere tumeardae tawuje tumeartoruwo taidure jiboeji. 17Mare Pao Kurireu ro pemegare boei marigudu. Ure bubutudo turo pemegawo boe ere tugu boeji. Ure boe eke maku etai. Ure boe egaredo pudui rugadu.
18Mare nou boe etaidure tuwariwo Barnabé Paulo emageče. Etaidure tuwo iaboe kowu tuwo maku etai. 19Dukeje ia Judeu doge etaregodure Antioquia ba kurireu piji, Icônio ba kurireu piji jamedu. Ere nou boe emeardae mekido turo pegawo Pauloji. Dukodire eidore tori tabo Pauloji. Emeardaere tuie bito rugadu tori tabo dukodire ere tumugudo kororo keje toro nou ba kurireu piji. 20Ča meartorure Jesus jiwuge ere bato pui taiwowo Pauloji. Ure turagojedo dukeje uture tuibagi ebo nou ba kurireu ka pugeje. Nou barogwato nou Paulo, nou Barnabé eture epiji Derbe ba kurireu ka.
Ere Tugirimi Síria Moto Kejewu Antioquia Ba Kurireu Ka
21Paulo, Barnabé emagore nou Derbe kejewu boe ewiagai Jesus bataru pemegareuji. Dukodire ia boe emeartorure Jesusji nono jamedu. Emagare. Dukejere Paulo Barnabé eture tuibagi Listra ba kurireu ka, Icônio moto ka. Dupijire eture Pisídia moto kejewu Antioquia ba kurireu ka pugeje. 22Nono ere meartorure Jesus jiwuge emeartoru rakado. Emagore ei ekawo tugera ra tumeartorure Jesus jitu piji. Egore: – Pamode pagimijerado tu Pao Kurireuče dukeje boe rakamode pai woe awu moto keje tu jao. Mare paga karega paruduwo baruto dukodire paroino.
23Nou emeartorure Jesus jiwuge eda jamedu boe kejere nou Paulo nou Barnabé ere tugeragu iagei tuwo meartorure Jesus jiwuge eimijeragedo emage. Enogwagekare nou ture tugeragu ei kejewu meriji tumagowo baruto Pao Kurireu bagai Pao Kurireu jetu pemegawo nou meartorure Jesus jiwuge eiamedu boei.
24Ekodure nou Pisídia motoji dukeje etaregodure toro Panfília moto ka. 25Nonore ere nou Perge kejewuge ewie Pao Kurireu bataru pemegareuji. Dukeje eture Atália ba kurireu ka. 26Nou Atália pijire eture ikarereu tabo tuibagi Síria moto kejewu Antioquia ba kurireu ka. Nou Antioquia kejewu meartorure Jesus jiwuge emagere ere Paulo Barnabé etudo emaragoduwo Pao Kurireu ai. Aino ere tugirimi tuibagi pugeje. Pao Kurireu jetu pemegare ei etaregodu pemegawo tuibagi.
27Etaregodure Antioquia ba kurireu ka dukeje ere nou meartorure Jesus jiwuge edo bato pui tureadoduwo nuba Pao Kurireu rore pudui duji. Pao Kurireu ure boedo turugadu boe tuginaiwugei emeartorure Jesusji dukodi. 28Nono edu raire nono nou meartorure Jesus jiwugebo rugadu.
15Meartorure Jesus Jiwuge Eimijerage Ere Bato Pui Jerusalém Keje
1Ia Judéia kejewuge etaregodure Antioquia ba kurireu ka. Ere meartorure Jesus jiwuge erduwado. Egore: – Pao Kurireu ure maku Moisés aiwu bakaru akore boe ewo tuwaga oto biri kado. Boe emodukare tuwaga oto biri kado dukeje Pao Kurireu umodukare ekinorudo.
2Paulo Barnabé emeardaekare nono emeardae mogadure. Dukodire emago rakare ei. Mare emeardae kodukare pu meardae kodaji. Nono nou meartorure Jesus jiwuge eimijerage ere tumeardae tawuje Paulo Barnabé etuwo Jerusalém ka ia Antioquia kejewu meartorure Jesus jiwugebo emagowo nou uture Jesus bataru tabowugei, emagowo nouia meartorure Jesus jiwuge eimijeragei jamedu. Nonore erduwamode nuba turomode nou Judéia kejewuge emeardaeji.
3Dukodire nou Antioquia kejewu meartorure Jesus jiwuge ere Paulo Barnabé etudo Jerusalém ka. Ekodure jii toro dukeje etaregodure Fenícia moto ka. Ere nou moto kejewuge ewie nuba turore nou boe tuginaiwugei emeartoruwo Jesusji jamedu. Nou moto kejewu meartorure Jesus jiwuge emeardure nou inoduji dukeje egaregodure pudui. Paulo, Barnabé etaregodure Samaria moto ka jamedu turore aino dutabo jamedu. Nou Samaria moto kejewu meartorure Jesus jiwuge egarere pudui jamedu. 4Nou Paulo nou Barnabé etaregodure Jerusalém ka dukeje nou meartorure Jesus jiwuge ekimadure ebo. Nou eimijerage, nou uture Jesus bataru tabowuge ekimadure ebo jamedu. Nono Paulo makore ei tugoduie toro boe tuginaiwuge etae Pao Kurireu ro pemegaie nou boe tuginaiwugei jamedu.
5Ia meartorure Jesus jiwuge ere tudawuje fariseu doge epiji tumeartoruwo Jesusji marigudu. Nouge etaidure tuwo tumeardae maku nou boe tuginaiwuge etai. Emeardure nou Paulo bataruji dukeje ere turagojedo tumagowo jamedu. Egore: – Moisés ure maku čenaiwu bakaru koiare ure awu boe tuginaiwuge edo tuwaga oto biri kado nono čero mogadure. Eromodukare aino dukeje emeartorure Jesus jiwuge emodukare emage. Emeartoruwo čeno bakaru jamedu boeji meartorure Jesus jiwugewo emage.
6Nou uture Jesus bataru tabowuge, nou meartorure Jesus jiwuge eimijerage ere bato pui tumagowo pui nou emeardaeji. 7Emago raire pui dukeje Pedro ure turagojedo. Akore: – Imedage nure tagi. Marigudu Pao Kurireu ure tugeragu i tabiji imagowo Jesus bataru pemegareuji awu boe tuginaiwuge ewiagai, emeartoruwo tu Jesusji jamedu. 8Pao Kurireu jorduware boe eiamedu boe emeardaeji. Emare aidure nou boe tuginaiwugei nono taidumoga pai dumogadure. Ure tuwari maku etai nono ure maku pagai dumogadure dukodire parduware aidure ei duji. 9Pao Kurireu ukare turo tuginaiwudo ei. Rore ei nono turore pai dumogadure. Emeartorure Jesusji dukodire biagodure ero pegareu piji nono turore pai dumogadure. 10Ča pagawo Pao Kurireu korigo. Pagawo ia paroia maku boe tuginaiwuge etai. Jao pawobe eroiwakare tuwo nou paroia towuje. Ča aino pagi paroiwakare pawo nou paroia to jamedu. Pagawo maku etai. 11Pameartorumode Pagimijera Jesusji dukeje emare umode paginorudo taidu tabo. Pagi pamodukare paginorudo ia paro pemegareu tabo.
12Nono Barnabé, nou Paulo ere nou boe ewie nuba boere ei eture nouia moto ka dukeje. Egore Pao Kurireu ro rakaie, ro kurie nou boe tuginaiwugei. Nou boe edukiorore tuwiapaga tabo nou Paulo, nou Barnabé ewadaruji. 13Ere tuwadaru akedudo dukeje Tiago makore tumeardaeji jamedu. Akore: – Tawiapagado iwadaruji. Imedage nure tagi. 14Pedro ure pawie nuba Pao Kurireu rore tuwo tugeragu nouia boe tuginaiwugei emeartoruwo pudui uwobewo emage. 15Ia mariguduwuge makore Pao Kurireu bataru jiwuge ewadaru ure nono nou Pedro bataru mogadure jamedu. Ere Pao Kurireu bataru bu bapera keje. 16Akore:
– Tagimijera nure imi. Imire imode boe kurireugedo tagi pugeje nono tare tagimijera Davi apo dumogadure. Imode tawai jamedu boe epemegado pugeje tago moto keje tawo tagirimi moto jamedu boe piji tago moto ka. Imode taragado pugeje. 17Dukeje nouia moto kejewuge etaregodumode itae. Nou ire ikeragu jiwuge boe tuginaiwuge etaregodumode itae jamedu. 18Pao Kurireu nure imi. Marigudu rugadu ire boe ewie rugadu. Ainore iromode duji. 15.18 Awu bataru padure Amós 9.11-12 keje.
19Tiago mako kimore: – Imeardaere pagawo nou meartorure Jesus jiwuge boe tuginaiwuge erodo nono parore jiboeji. 20Pawo ia atugoreboe maku etai. Pamagowo ei ekawo ia makudure santo doge etaiwu bope doge eke kowuje. Ime eribarikawo tumugukare apowu aremei. Areme eribarikawo tumugukare apowu imei. Ekawo bukigu kogure itoru kajejewu barogo ko. Ekawo barogo ku kowuje jamedu. 21Boe eiamedu boe erduware nou Pao Kurireu ure maku Moisés aiwu bakaruji. Boe etaiwore ji ture bato puiwu bai doge emagare dutada.
Ere Atugoreboe Maku Boe Tuginaiwuge Etai
22Dukejere nou uture Jesus bataru tabowuge, nou boe eimijerage, nou meartorure Jesus jiwuge eiamedu boe emeardaere tuwo tugeragu imei tuwo etudo Paulo apo Barnabé apo toro Antioquia kejewuge meartorure Jesus jiwuge etae. Ere tugeragu ime pobedu dogei. Emeartoru rakare Jesusji rugadu. Ia iere Judas. Iere Barsabás jamedu. Nou metia iere Silas. 23Ainore nou boe ere ia atugoreboe pemegado tuwo maku nou Antioquia kejewuge ewagai nou ime pobedu dogebo. Ainore nou atugoreboe ure. Akore:
– Uture Jesus bataru tabowuge nure čegi. Meartorure Jesus jiwuge nure čegi. Čenure awu atugoreboe maku Antioquia kejewuge etai, Síria moto kejewuge etai, Cilícia moto kejewuge etai. Judeu doge karegure tagi mare tameartorure Jesusji dukodire čewobe nure tagi.
– 24Ia čewobe eture tagae dukeje etaidure tuwo tumeardae maku tagai. Mare čegare nou emeardae maku etai. Nou emeardae koiare ure tagiarigo ure tamororamagadudo. 25Mare čere bato pui woe čewo čemeardae tawuje. Dukodire čenure awu ime etudo toro čewadaru tabo tagae. Etaregodumode pameardu kurire jiwu pamedia Paulo apo, pamedia Barnabé apo jamedu. 26Emaragodure Pao Kurireu ai dukeje boe pegare ei rugadu. Boe ere tori to ei tuwo ewido mare ewikare. 27Ča nouia čere etudowu tagaewu imedu iere Judas. Nou metia iere Silas. Emagere emode tawie čewadaruji, awu čere bu bapera kejewu čewadaruji rugadu. 28-29Čewo tawie. Tagaba makudure santo doge etaiwu bope doge eke kowuje. Tagaba barogo ku kowuje. Tagaba bukigu kogure itoru kajejewu barogo ko. Taeribarikaba tamugukare apowu aremei. Taeribarikaba tamugukare apowu imei. Taromodukare nou ro pegareuji dukeje boe pemegamode tai rugadu. Pao Kurireu Uwari ukare ia Judeu doge ero maku tagai tarokawo ji. Ainore čemeardaere jamedu. Čedaidure boe pemegawo tai. Kodire čere tawie. Ča urugadureu.
30Ča nou ime pobedu doge eture toro Antioquia ba kurireu ka nou atugoreboe tabo. Toro nou meartorure Jesus jiwuge eiamedu boe ere bato pui nou ime pobedu dogebo. Nou ime ere nou atugoreboe maku etai. 31Etaiwore ji dukeje egarere pudui rugadu. Nou atugoreboe ure nou ekiarigodu barigu epiji. 32Nou Judas, nou Silas makore Pao Kurireu bataru jiwuge nure emage. Dukodire emago raire nou meartorure Jesus jiwugei tuwo emeartoru rakado tuwo emeardae pemegado. 33-34Edu raire nono nou boe dogebo. Nou Antioquia kejewu meartorure Jesus jiwuge etaidu pemegare ei. Nono ere tuwadaru pemegareu maku etai tuwo nou ime pobedu doge edo tugirimi tuibagi nou uture Jesus bataru tabowuge etae Jerusalém ka.
35Mare Paulo utukare. Rakoje raire nou Antioquia ba kurireu keje Barnabé apo. Iagebo ere boe erduwado Pagimijera Jesus jiboeji. Emago pemegare ji rugadu boe eiamedu boe emearduwo.
Paulo Barnabé Ere Tugera Ra Pubiji
36Ia meri keje Paulo makore Barnabeji. Akore: – Paduwo toro nou pamagore Pagimijera bataru kejewu boe eda jamedu boe ka parduwo meartorure Jesus jiwugei nono, parduwawo nuba boere nou pamedagei.
37Barnabé aidure João Marcos utuwo pudabo jamedu. 38Mare Paulo aidukare. João Marcos uture ebo boetoji dutabo nou João Marcos ure tugera ra epiji. Panfília moto keje ure tugera ra epiji. Ekare tumaragodae iado mare ure tugera ra epiji dukodire Paulo aidukare utuwo pudabo pugeje. 39Paulo Barnabé emago rakare pui mare ekare tumeardae tawuje. Dukodire ere tugera ra pubiji. Barnabé uture João Marcos apo toro Chipre moto ka ikarereu tabo. 40Paulo ure tugeragu imedu Silasji tuduwo apo. Nou Antioquia kejewu meartorure Jesus jiwuge emagore Jesus bagai eparu tabo Jesus ro pemegawo ei dukejere eture. 41Eture meartorure Jesus jiwuge eiamedu boe etae Síria moto ka, Cilícia moto ka. Ere nou meartorure Jesus jiwuge emeartoru rakado rugadu.
16Paulo Silas Eture Timóteo Apo
1Paulo uture Derbe ba kurireu ka. Uture Listra ba kurireu ka. Listra kejere ia meartorure Jesus jiwu mugure. Iere Timóteo. Timóteo uče meartorure Jesusji jamedu. Judeu nure ema. Mare Timóteo uo Grego nure ema. 2Nou Listra kejewu meartorure Jesus jiwuge eiamedu boe emago pemegare nou Timóteo rore jiboeji. Icônio kejewu meartorure Jesus jiwuge emago pemegare Timóteo rore jiboeji jamedu. 3Paulo ure Timóteo baka oto biri kado nono Judeu doge ero mogadure Judeu doge emago pegakawo ji. Uo Judeu karegure ema dukodire boture dukeje uče ukare Timóteo baka oto biri kado. Paulo aidure Timóteo utuwo pudabo makowo Pao Kurireu bataruji Judeu doge ewiagai jamedu. 4Ča eture. Ere nou Jerusalém kejewuge ewadaru tadawu atugoreboe maku nou meartorure Jesus jiwuge eiamedu boe etai. Enogituware ei emeartoruwo nou atugoreboe kejewu bataruji. 5Dukodire nou meartorure Jesus jiwuge emeartoru rakare Jesusji pugeje. Meri jamedu boeji emagagodure rugadu.
Paulo Jordure Iaboeji Trôade Ba Kurireu Keje
6Eture Frígia motoji, Galácia motoji mare Pao Kurireu Uwari ure tumeardae maku etai etukawo Ásia moto ka emagokawo Pao Kurireu bataruji nono. 7Etaregodure Mísia moto ka dukeje etaidure tuduwo Bitínia moto ka jamedu. Mare Pao Kurireu Uwari ure tugeragu ei etukawo toro. 8Dukodire eture Mísia moto piji toro Trôade ba kurireu ka. 9Etaregodure toro dukeje nou boečoji Paulo jordure iaboeji. Ure nono boe uniau mogadure. Jordure ia Macedônia kejewu imeduji. Rakojere duji. Makore nou Paulo bagai. Akore: – Mato Macedônia moto ka čedae tawo tagera maku čenai.
10Paulo jordure nou inoduji dukodire čerduware Pao Kurireu aidure čemagowo Jesus bataru pemegareuji nou moto kejewuge ewiagai jamedu. Dukeje čere čegera pemegado čei čeduwo Macedônia moto ka.16.10 Lucas emare ure awu atugoreboe bu bapera keje tugodu jiwu boe eda boeji Paulo apo.
Aredu Lídia Meartorure Jesusji Filipos Ba Kurireu Keje
11Čedure ikarereu tabo Trôade piji toro Samotrácia moto ka. Nou barogwato čedaregodure Neápolis ba kurireu ka. 12Neápolis pijire čedure awaraji toro Filipos ba kurireu ka. Nou Filipos ba kurireu mugure Macedônia moto keje. Romano doge ere nou Filipos ba kurireu rakojedo. Čedukare nou ba kurireu piji kuri je. 13Sábado meriji čedure poborereu okwa ka. Puredure nou ba kurireuji. Čemeardaere Judeu doge emoduie bato pui nono tumagowo baruto. Čere čemugudo nono pobo okwai. Čemagore ia aremei nono. 14Ia aredu iere Lídia. Aregodure Tiatira ba kurireu piji tuwo boe ekudau areia pemegareu maku diero bagai. Nou aredu ure tubu jodo tumago pemegawo Pao Kurireuji tu tu je. Dukodire Pao Kurireu ure nou aredu jorduwado Paulo bataruji meartoruwo Jesusji. 15Dukodire ao pegododure. Nou rakojere uwai tadawuge eiamedu boe etao pegododure jamedu. Dukeje makore čei. Akore: – Tameardaere imeartorure Jesusji rugadu dukodi mato taragojewo iwai tada.
Akore aino dukodire čebadure uwai tada rugadu.
Paulo Silas Ewarigudure Baičoreuto
16Ia meri keje čedure boe emagore baruto kejewu bai ka dukeje čedaregodure ia nogwaredu togi. Nou nogwaredu maragodure ia ime etai. Ia bope meture nou nogwaredu tada dukodire jorduware nuba boemode boei. Nou nogwaredu jorduware boe jameduji. Makore jiboe jeture pudui tu tu je. Dukodire boe ere nou bataru boe morido. Ure tugeragu diero kurireuji tugimijerage enoče. 17Nono meri raire nou nogwareduji uture Paulo rekodaji dutabo. Kudugodure jamedu. Akore: – Awu ime emaragodure baru tadawu Pao Kurireu ai. Emage enure boe ewie nuba boe eromode tuwo činorudo.
18Meri raire ji rore aino duji dukejere Paulo korigodure ji. Dukodire ure tuie kirimi togi. Makore nou bopeji. Akore: – Jesus Cristo ie tabore inagoino ai. Ema koiare atawuje nou nogwaredu piji.
Ča nou bope ure tudawuje nou nogwaredu piji rugadu. 19Nou maragodure aiwu ime erduware nou inoduji dukeje ekorigodure rugadu. Nou nogwaredu makomodukare pugeje nuba boemode duji dukodire umodukare tugeragu dieroji pugeje enoče. Dukodire nou ime ere tugeragu Pauloji, Silasji. Eture ebo toro nou ba kurireu kejewu boe eimijerage etae nou ba kurireu oia ka. 20Etaregodure nou Romano doge eimijerage etae dukeje egore: – Awu ime Judeu doge nure emage. Ero pegare woe awu ba kurireu keje. 21Enure boe ero mekido paroia piji ero pegawo. Romano doge nure pagi. Pagaidukare nou eroiaji. Paromodukare nono ero mogadure.
22Boe eiamedu boe emago pegare aino nou Pauloji nou Silasji. Dukodire nou boe eimijerage ere nou Paulo nou Silas ekudau areia tawuje epiji. Emagore tugobaigaregei ewo boeto ei. 23Tugobaigarege ere boeto ei dukeje ere ewarigu baičoreuto. Emagore nou baičoreu tadawu boe eimijeraji uwo ekogudo rugadu. 24Nou baičoreu tadawu boe eimijera meardure ewadaruji dukeje ure Paulo Silas etugu nou baičoreu tadawu baičoreu roguto. Ure ewure ekogudo ira kurireu tabo.
25Ari aregodure baru oia ka dukeje Paulo Silas eragodure Pao Kurireu bataruji. Emagore baruto Pao Kurireu bagai. Nouia baičoreu tadawu ro pegareuge ewiapagare ei. 26Rore puku ei moto magadugodu rakare duji. Ure nou baičoreu magadudo jamedu. Ča nou baičoreu bai poro rugadu boe ere tuiado. Nou corrente ere tugiwuje nou ro pegareuge eiamedu boe epiji. 27Nou baičoreu tadawu boe eimijera jetadure dukeje jordure nou bai poro rugadu boe jadodure duji. Meardaere nou baičoreu tadawuge eiamedu boe ere marigudu. Dukodire ure tugeragu to tariga kurireuji. Ure tuiago tuwido tabo. 28Mare Paulo kudugodure ae ukawo tuwido. Akore: – Akaba awido. Čeiamedu boe čeragoje kimore woe baičoreu tada.
29Nou baičoreu tadawu boe eimijera makore jorugu bagai. Dutabore ure turemo Paulo ae. Ure tubu jodo moto keje Paulo Silas egorai tumago pemegawo ei. 30Nono ure erego toro bawadu ka. Unarare ei. Akore: – Nuba iromode iwo ikinorudo?
31Egore: – Ameartorudo Pagimijera Jesusji dukeje umode akinorudo. Umode awobe ekinorudo jamedu.
32Dukejere emagore Pao Kurireu bataruji biagai, nou uwai tadawu uwobe ewiagai jamedu. 33Nou boečoji rugadu nou baičoreu tadawu boe eimijera ure jorubo reko nou ime pobedu doge ečebaeji. Nou boečoji rugadu nou baičoreu tadawu boe eimijera ao pegododure tuwobe eiamedu boe apo. 34Dukejere uture Paulo apo Silas apo toro tuwai ka tuwo enogwagedo nono tuwai keje. Ema uwobe eiamedu boe emeartorure Pao Kurireuji dukodire egarere pudui rugadu.
35Nou barogwato nou Romano doge eimijerage ere tugobaigaregedo atugoreboe maku toro nou baičoreu tadawu boe eimijera bagai. Nou atugoreboe akore: – Nou ime etudo.
36Dukodire nou baičoreu tadawu boe eimijera ure Paulo bie. Akore: – Pagimijerage ere atugoreboe maku mato inai. Egore iago tadudo baičoreu piji. Ča ure turugadu tawo tadawuje taduwo. Tadu pemegawo taibagi.
37Mare Paulo makore nou tugobaigaregei. Akore: – Boe erdukare ia čero pegareuji. Mare jawu meriji tare boeto čei boe egai. Romano doge nure čegi jamedu! Jawu meriji tagimijerage ere čedugu baičoreuto boe egai. Mare etaidukare boe erduwawo čedure duji. Mare čeromodukare aino. Nou Romano doge eimijerage emagere etaregoduwo woe tuwo čedawuje awu baičoreu piji čeduwo pugeje.
38Nou tugobaigarege ere tugimijerage ewie nou Paulo bataruji rugadu. Nou eimijerage emeardure Paulo Silas Romano dogere emage duji dukeje epagudugodure rugadu. 39Dukodire eture toro etae. Eimadure ebo dukeje ere etawuje baičoreu piji. Nono emagore ei etuwo nou ba kurireu piji. 40Mare Paulo Silas ere tudawuje nou baičoreu piji dukeje eture nou aredu Lídia uwai ka nou meartorure Jesus jiwuge etae. Emagore nou tumedagei tuwo emeartoru rakado dukeje eture. Mare imi itukare ebo.
17Eture Tessalônica Ba Kurireu Ka
1Paulo Silas eture Anfípolis ba kurireu ka nou pijire eture toro Apolônia ba kurireu ka. Nono etaregodure Tessalônica ba kurireu ka. Ia Judeu doge ere bato puiwu bai mugure nou ba kurireu keje. 2Paulo uture nou bai ka tu tu je Sábado meriji turo mogadure. Sábado merire pobe metia bokware akoe tumago tabo nou boei dukeje. Nou boe emagore ji jamedu. 3Paulo ure erduwado Pao Kurireu bataruji. Nou Pao Kurireu bataru akore nou umode boe ekinorudowu bimoduie dukeje jewodumoduie pugeje. Paulo akore: – Inure tawie Jesus umode boe ekinorudowu nure ema duji.
4Iage emeartorure Paulo bataruji dukodire ere bato pui Paulo Silas etae. Ia boe eimijerage areme emeartorure jamedu. Emagare. Ia mako pemegare Pao Kurireu jiwu Grego doge emeartorure jamedu. Emagare jamedu.
5Mare ia Judeu doge erdu pegare dukodire ere tugeragu ro pegareugei awara piji tuwo ero pegado. Ero pegare nou ba kurireuji rugadu. Ere turemo ia baito turaga tabo. Nou uwaire bai čewu iere Jasom. Meartorure Jesus jiwu nure ema. Nou ro pegareuge etaiwore Paulo bagai, nou Silas bagai. 6Erdukare ei dukeje ere tugeragu nou Jasomji turaga tabo. Ere tumugudo keje kororo je ia meartorure Jesus jiwugebo toro nou ba kurireu tadawu boe eimijerage etae. Egore: – Nou ime ero pegare rugadu moto jamedu boe parugajeje. Ča etaregodure woe jamedu. 7Awu Jasom emare ure tugera upodo ebo tuwai keje. Dukodire eiamedu boe emeartorukare pagimijera kurireu Roma tadawu Cesaji pugeje. Egore tumeartoruie ia tugimijera kurireuji. Nou ekimijera iere Jesus.
8Nou tuwadrarodu tabore ere boe ekorigo, ere nou ba kurireu tadawu boe eimijerage ekorigo rugadu. 9Nou boe eimijerage emagore nou Jasomji nou iagei ewo turo morido diero tabo etawujeduwo. Ere morido dukeje eture.
Eture Beréia Ba Kurireu Ka
10Boečodure dukeje nou ba kurireu tadawu meartorure Jesus jiwuge ere Paulo Silas etudo Beréia ba kurireu ka. Etaregodure toro dukeje eture Judeu doge ere bato puiwu bai ka. 11Nou Beréia kejewuge ekare nono nou Tessalônica kejewuge emogadure. Beréia kejewuge etaidure tuiorduwawo rugadu. Ewiapaga pemegare Paulo bataruji tiegarere puduidu tabo. Meri jamedu boeji etaiwore Pao Kurireu bataruji tuiorduwo Paulo bataruji nono boe jokodumode dubagai. 12Iage emeartorure Jesusji rugadu. Emagare. Oe kurireu areme emeartorure jamedu. Emagare. Grego doge ime emeartorure jamedu. Emagare jamedu. 13Mare toro nou Tessalônica ba kurireu keje Judeu doge emeardure Paulo rakojeie Beréia keje duji. Emeardure Paulo uie boe ewie Pao Kurireu bataruji nono duji. Dukodire nou Judeu doge etaregodure bagai turo pegawo Pauloji pugeje. Ere nou Beréia kejewu boe ekorigo Pauloji. Ere boe emagado pugeje turo pegawo Pauloji pugeje. 14Ča je nou meartorure Jesus jiwuge ere Paulo utudo nou ro pegareuge epiji. Mare Silas, Timóteo eragoje kimore Beréia keje. 15Nou eture Paulo apowu ime eture apo Atenas ba kurireu ka dukeje ere tugirimi tuibagi tuwai ka. Paulo ure tuwadaru maku etai ewo Silas Timóteo ewie etuwo kuri aino mato tuwagai.
Eragojere Atenas Ba Kurireu Keje
16Nou Atenas ba kurireu kejewuge emeartoru rakare tuwai tadawu santo dogei rugadu. Paulo upagare Silas bagai, Timóteo bagai dukeje jordure nou santo doge eiamedu boei. Emagare rugadu. Dukodire Paulo kiarigodure. 17Dukodire makore Judeu dogei nou ere bato puiwu bai ja tada tuwo emeartorudo tu Jesusji. Makore nou boe tuginaiwugei jamedu. Nou boe tuginaiwuge eku kidugodure Pao Kurireuji tumago pemegawo ji. Mare Paulo makore ei tuwo emeartorudo Jesusji. Dukeje makore nou ba kurireu oiadada jamedu boe eiamedu boei tuwo emeartorudo tu Pao Kurireuji. 18Ia jorduwareuge emago raire Pauloji jamedu. Epicureu nure iage. Estóico nure iage. Iage egore: – Awu Paulo jorduwa bokwa. Očarore tumago tabo tuwadaruji.
Iage egore: – Makonure čewiagai ia boe tuginaiwuge eno Santo dogei.
Paulo makore nou boe ewiagai Jesus bataru pemegareuji dukodire egoino. Akore Jesus jewoduie pugeje. Mare emeartorukare dukodire egoino Paulo makore jiboeji. 19Dukodire ere Paulo reko toro nou ba kurireu kejewu boe eimijerage etae. Edure kejewu bai iere Areópago. Nou boe eimijerage egore: – Čedaidure čerduwawo nou akagoino jiwu awadaru maiwuji. 20Marigudu čemeardukare nou inodu awadaruji. Čedaidure awo čerduwado nuba awadarure.
21(Nou Atenas kejewuge, nouia rakojere nou ba kurireu kejewuge emago raire pui bakaru maiwu jamedu boeji.)
22Nono Paulo ure turagojedo nou ba kurireu kejewuge boe eimijerage egai. Akore: – Tagire Atenas kejewuge meartorureuge nure tagi taro jamedu boe tabo. 23Ikodure tago ba kurireuji dukeje iordure tameartorure jiwu santo doge ewai rogu jamedu boeji bawadu keje. Nono iordure ia bairoguji pugeje. Nou bairogu keje ia bataru padure. Akore, “Parduwakare Jiwu Pao Kurireu Uwai Rogu Reo.” Ča tare tabu jodo tamago pemegawo tarduwakare jiboeji. Mare imire imode tarduwado Pao Kurireuji. 24Pao Kurireu ure moto to. Ure boe jamedu boe towuje. Baru tadawuge eimijera nure ema. Moto kejewuge eiamedu boe eimijera kurireu nure ema. Mugukare ia ime ere towu bai ja tada. 25Iaboe bokwakare ai jii aino. Emare ure paewodudo. Emare ure ake maku pagai. Emare ure boe jamedu boe maku boe etai. 26Emare ure imedu towuje. Nou imedu koiare ure boe eiamedu boe boture. Emare ure boe etaodo moto jamedu boe parugajeje. Pao Kurireu emare ure tumeardae tawuje tuwo ewodure kejewu meri udo turugadu, tuwo ewire kejewu meri udo turugadu, tuwo etudo tu taidure jiwu moto ka emuguwo nono. 27Pao Kurireu rore aino boei etaiwowo tuwagai. Etaiwomode bagai dukeje iage erdumode ji. Ma čare Pao Kurireu rakoje puredure tu pai. 28Ia jorduware Pao Kurireu bataru jiwu akore, “Pao Kurireu koiare ure paewodudo. Pao Kurireu koiare ure pamerudo.” Ia tagi mako motureuge nure tagi. Tagagore, “Pao Kurireu ore nure pagi jamedu.”
29– Ča Pao Kurireu ore mode pagi dukeje parduwamode ji. Ukare nono ia imedu ure toboe mogadure. Ukare nono tori kuieje mogadure. Ukare nono prata mogadure. Ukare nono ia tori mogadure. 30Marigudu boe ere tuwaire etowuje erduwakare Pao Kurireuji kodi mare Pao Kurireu ukare edo nou turo morido. Mare aino ča makore boe eiamedu boei ewo tugera ra turo pegareu boe piji. 31Ure boe pagado ia meri ka rugadu. Nou meriji rugadu aiwomode boe eiamedu boe eroji. Pao Kurireu ure tugeragu jiwu umode nou boe eiamedu boe edo turo pegareu morido. Pao Kurireu ure nou ture tugeragu jiwu jewodudo pugeje boe eiamedu boe erduwawo ji, boe eiamedu boe erduwawo nou Pao Kurireu ure tugeragu jiwu umode boe eiamedu boe edo turo pegareu morido rugadu.
32Paulo makore ia boe jewoduie dukodire iage enogwarigodure ji emeartorukare nou readodaeji kodi. Mare iage egore: – Čedaidure čemearduwo awadaruji pugeje ia meri keje.
33Nono Paulo uture nou boe eimijerage epiji. 34Ia boe doge eture apo. Emeartorure Jesusji. Ia meartorure jiwu iere Dionísio. Boe eimijera nure ema. Ia aredu meartorure jiwu jamedu. Iere Damáris. Ia boe doge emeartorure Jesusji jamedu.
18Paulo Uture Corinto Ba Kurireu Ka
1Nono Paulo uture Atenas ba kurireu piji tuduwo toro Corinto ba kurireu ka. 2Nonore jordure Judeu ia imeduji. Iere Áquila. Boture Ponto moto keje. Aino maigodu aregodure Itália piji toreduje apo. Oreduje iere Priscila. Roma kejewu boe eimijera kurireu makore Judeu dogei eiamedu boe ewo tudawuje Roma ba kurireu piji. Nou boe eimijera kurireu iere Cláudio. Dukodire awu Áquila ure tudawuje Roma piji mato Corinto ba kurireu ka toreduje apo. Nono Paulo uture etae. 3Rakojere ebo. Maragodure ebo. Emaragodure tapira biriji. Dutabore ere bai rogu to boe ewaiče. Ere nou bai rogu maku diero bagai tuwo tugeragu tuge roguji tugudau areia roguji. 4Sábado meri keje tu tu je Paulo uture Judeu doge ere bato puiwu bai ka. Makore nou Judeu dogei nono emeartoruwo Jesusji. Makore nou Grego dogei emeartoruwo jamedu.
5Ča Silas, nou Timóteo etaregodure Macedônia moto piji nou Paulo ae dukeje Paulo ure tugera ra tumaragodae piji. Makore Pao Kurireu bataruji boe ewiagai tu rugadu. Aidure tuwo Judeu doge emeartorudo Jesusji, umode boe ekinorudowu nure ema kodi. 6Mare etaidukare tumeartoruwo bataruji. Emago pegare ji. Dukodire Paulo ure tugudau areia jukodo tuwo moto urugudu rawuje tugudau piji. Ainore ure nou Judeu doge erdudo ture tugera ra tubiji rugadu duji. Makore ei rugadu. Akore: – Tameartorumodukare dukeje tagi rugadu tamode tawarigu boe pegareuto rugadu. Imi karega. Tamodukare taginorudo. Ire tawie. Aino imagomodukare tai pugeje. Imagomode tu boe tuginaiwugei.
7Dukodire Paulo uture epiji tumuguwo ia boe tuginaiwu imedu uwai tada. Iere Tício Justo. Nou Tício Justo ure tubu jodo tumago pemegawo Pao Kurireuji tu tu je. Uwai mugu puredure Judeu doge ere bato puiwu kejewu baiji. 8Nou Judeu doge ere bato puiwu bai tadawu boe eimijera meartorure Jesusji. Ure tugimijerado ema rugadu. Iere Crispo. Uwobe eiamedu boe emeartorure jamedu. Ia Corinto ba kurireu kejewuge emeardure nou Pao Kurireu bataruji dukeje emeartorure jamedu. Dukejere etao pegododure jamedu.
9Ia boečoji Paulo jordure iaboeji. Ure nono boe uniau mogadure. Nono Pagimijera Jesus makore ji. Akore: – Apagudukaba. Akaba akera ra amagore iwadaru jitu piji. 10Iragojere akabo. Ia boe pegareuge emoka turo pegado ai. Iwobe emagare awu ba kurireu keje.
11Dukodire Paulo rakoje raire nou ba kurireu keje. Jorure mito ji nono, ari oto padure seis ji nono pugeje ture boe erduwado Pao Kurireu bataruji duji.
12Roma kejewu boe eimijera kurireu ure Gálio utudo Acaia moto kejewuge etae eimijerače. Dukejere ia Judeu doge ere bato pui turo pegawo Pauloji. Ere tugeragu ji. Eture apo nou boe eimijera Gálio ae. 13Egore: – Awu imedu makore boei ewo turo udo tuginai tuwo tubu jodo tumago pemegawo Pao Kurireuji čero piji. Dukodire meartorure awu imedu jiwuge etaidukare tumeartoruwo Roma kejewu boe eimijeraji pugeje.
14Paulo makoiago nou Gálioji mare nou Gálio makore nou Judeu dogei. Akore: – Tagare iwudugugo nou taro keje. Awu imedu ro pega bokware. Ro pegamode dukeje itaiwomode ji. Mare ro pegare jiboe bokware. 15Tu tago bakaru koiare ure tagarego woe. Taro jire tagagoino. Roma kejewuge ero karega. Dukodire tagi tarduwamode nuba taromode ji. Imire itaiwomodukare ji.
16Dukodire ure etudo tuwai piji. 17Dukejere ere tugeragu ia imeduji. Iere Sóstenes. Ere boeto ji nou Gálio rakojere tadawu bai meki. Emare Judeu doge ere bato puiwu bai tadawu boe eimijera nure ema. Mare nou Gálio aiwokare nou ero pegareuji.
Paulo Ure Tugirimi Tuibagi Antioquia Ba Kurireu Ka
18Paulo rakoje raire nou Corinto kejewu meartorure Jesus jiwugebo. Aidure tuduwo Síria moto ka Priscila apo Áquila apo jamedu. Dukodire uture pugeje nou Corinto kejewuge tumedage epiji. Etaregodure Cencréia ba kurireu ka dukeje Paulo ure tao kado. Marigudu makore turomoduie aino duji Pao Kurireu biagai. Dukodire ukare tao kado boe erduwawo tumagore aino Pao Kurireu jituji. Mare kuri aino ure tumagore jiwu turo iado dukodire ure tao kado. 19Eture Cencréia piji ikarereu tabo. Nono etaregodure Éfeso ba kurireu ka. Paulo uture nou Judeu doge ere bato puiwu bai ka. Makore Judeu dogei nono. 20Etaidure Paulo rakoje raiwo pudabo mare Paulo aidure tuduwo kuri je. 21Ure ewie. Akore: – Pao Kurireu aidumode dukeje itaregodumode mato pugeje tagae.
Dukejere uture Éfeso piji ikarereu tabo pugeje. Mare Áquila Priscila ekodukare apo pugeje. Emugure nono Éfeso ba kurireu keje.
22Paulo aregodure Cesaréia ba kurireu ka Judéia moto ka. Dukeje uture Jerusalém ka. Nonore uture meartorure Jesus jiwuge etae tugimaduwo ebo. Dupijire uture Antioquia ba kurireu ka Síria moto ka.
Paulo Uture Pugeje Tuwo Meartorure Jesus Jiwuge Emeartoru Rakado
23Paulo rakoje raire nou Antioquia ba kurireu keje. Dukejere uture pugeje toro Galácia moto ka, Frígia moto ka tuwo nou moto kejewu meartorure Jesus jiwuge emeartoru rakado jamedu.
24Paulo rore aino dukeje ia imedu aregodure Éfeso ba kurireu ka. Judeu nure ema. Iere Apolo. Boture Alexandria ba kurireu keje Egito moto keje. Emare mako pemegare. Jorduware rugadu Pao Kurireu bataruji. 25Boe ere nou Apolo jorduwado Jesus roji. Dukodire makore boe ewiagai tuwo erduwado Jesus roredu jiboeji tiegare tabo. Mare Apolo jorduwakare meartorure Jesus jiwuge etao pegododure duji. Jorduware tu João Batista ure boe etao pegodo duji. 26Ča Apolo pogurukare tumagowo Pao Kurireu bataruji Judeu doge ewiagai ere bato pui bai tada. Priscila, Áquila emeardure Apolo bataruji dukeje emagore ji utuwo pudabo toro tuwai ka. Ewai tadare ere Apolo jorduwado Pao Kurireu ro remawuji. 27Dukejere Apolo ure tumeardae tawuje tuduwo Acaia moto ka. Nou Éfeso kejewu meartorure Jesus jiwuge ere atugoreboe pemegado nou Acaia moto kejewuge ewagai tuwo erduwado nou Apoloji, ewo tugera upodo apo. Ča uture. Aregodure toro dukeje Apolo ure tugera maku nou meartorure Jesus jiwuge etai rugadu. Pao Kurireu ro pemegare ei emeartoruwo Jesusji rugadu. 28Nou Apolo ure Judeu doge erduwa bokwado tuwadaru pemegareu tabo. Boe erdure nou Apolo roji. Pao Kurireu bataru tabore Apolo ure boe erduwado Jesus umode boe ekinorudowu nure ema rugadu duji.
19Paulo Uture Éfeso Ba Kurireu Ka
1Apolo rakojere Corinto ba kurireu keje dukeje Paulo uture Ásia moto ka taregoduwo Éfeso ba kurireu ka. Aregodure dukeje Paulo jordure ia meartorure Jesus jiwugei. 2Unarare ei. Akore: – Tameartorure Jesusji? Pao Kurireu Uwari ure turawuje tagae?
Egore: – Čerduwakare nou akagore jiwu Pao Kurireu Uwariji.
3Paulo akore: – Tagao pegododure mare ioguduba bataru koiaba tagao pegododure?
Egore: – Čemeartorure João Batista bataruji dukodire čedao pegododure nono João Batista rore boei dumogadure.
4Paulo akore: – Boe ere tugera ra turo pegareu piji dukeje João Batista ure etao pegodo. Emare ure boe ewie, ure nou Judeu doge ewie, ia imedu kurireu aregodumoduie turegodaji. Makore ei emeartoruwo nou turegodajiwuji. Nou João Batista rekodajiwu Jesus nure ema.
5Nou boe emeardure nou Paulo bataruji dukeje etao pegododure pugeje emeartorure Pagimijera Jesusji kodi. 6Paulo ure tugera bu ewugeje dukeje Pao Kurireu Uwari ure turawuje etae. Dukodire emagore tuiorduwakare jiwu boe tuginaiwuge ewadaruji. Emagore Pao Kurireu bataruji nou boe tuginaiwuge ewiagai. 7Nou ime enodo padure kejewure doze.
8Paulo rakojere nou ba kurireu keje dukeje arire pobe metia bokware ji. Uture tu tu je Judeu doge ere bato puiwu bai ka tumagowo ei nono. Pogurukare tumagowo boe ewiagai. Aidure tuwo emeartorudo Jesusji rugadu, emeartoruwo Pao Kurireu ure boe eimijera kurireudo ema duji. 9Mare iage emeartoru bokware. Etaidukare tumeartoruwo rugadu. Emago pegare Pagimijera Jesus ure maku boe etaiwu turoji nou boe eiamedu boe ewiagai. Dukodire Paulo uture nou boe epiji meartorure Jesus jiwugebo tuduwo imedu Tirano o escola ka. Meri jameduji makore nono nou escola tada tuwo boe emeartorudo Jesusji. 10Jorure pobe ji rore aino duji. Dukodire awu Ásia moto kejewuge eiamedu boe emeardure Pao Kurireu bataruji rugadu. Judeu doge emeardure. Boe tuginaiwuge emeardure jamedu.
Ceva Ore Ime Etaidure Tuwo Bope Doge Etawuje Boe Epiji
11Pao Kurireu ure Paulo ro rakado. 12Boe ere tugeragu nou Paulo ukudau areia roguji. Eture nou areia rogu tabo kogodureuge etae. Dukodire nou kogodureuge epemegagodure rugadu. Bope doge ere tudawuje iage epiji. 13-14Ča ia Judeu doge erdure nou boe erore jiboeji. Etaidure turowo aino jamedu. Nou ure Judeu doge enomea maku Pao Kurireu aiwuge eimijera ore nure emage. Enodo padure sete. Etuo iere Ceva. Marigudu nou Ceva ore ime ere bope doge etawuje boe epiji. Erore aino tu tu je. Mare aino etaidure tumagowo Jesus ieji tuwo bope doge etawuje boe epiji. Emeartorukare Jesusji mare etaidure tumagowo Jesus ie tabo. Emagore bope dogei. Egore: – Tadawuje awu boe epiji Paulo makore jiwu Jesus ie koia.
15Mare nou bope makore ei. Akore: – Iorduware Jesusji. Iorduware Pauloji. Mare iorduwakare tai. Imeartorumodukare tai jamedu.
16Nou bope metu tadawu imedu ure taredo nou Ceva orei turugoduwo ei. Ure turagado ei rugadu dukodire eregodure nou imedu uwai piji. Ure etogorido. Ure ekudau areia bowuje. 17Nou Éfeso ba kurireu kejewuge eiamedu boe emeardure nou inoduji dukeje epagudugodure rugadu. Ere Pagimijera Jesus ie kurido rugadu. 18Ia meartorure Jesus jiwuge edure nono jamedu. Marigudu ekare boe ewie nou tumeartorure jituji. Mare aino ere boe eiamedu boe ewie tumeartorure Jesusji rugadu. Egore marigudu turo pegaie rugadu mare aino turo pegamodukaie pugeje. 19Iage bari nure emage. Ere turo bu bapera keje. Mare emeartorure Jesusji dukeje etaregodure nou bapera tabo tuwo kowu tuwo nou bapera akedudo. Nou ewadaru padure kejewu bapera mori kurire rugadu. Mori oto padure kejewure cinquenta mil moeda de prata. Mare aino ere nou ture towu bapera akedudo. 20Ča aino Pagimijera Jesus bataru ure taodo boe ewokwaji. Ure boe emeartorudo rugadu.
Éfeso Kejewuge Ere Bato Pui Tumago Rakawo Pui
21Nou inodu otobiji Paulo ure tumeardae tawuje tuduwo Macedônia moto ka, tuduwo Acaia moto ka, dukeje tuduwo Jerusalém ba kurireu ka jamedu. Akore: – Itumode Jerusalém ka dukeje itaidure ituwo Roma ba kurireu ka.
22Dukejere ure tudugarege etudo tododai toro Macedônia moto ka. Ere pobe. Ia iere Timóteo. Metia iere Erasto. Mare rakoje kimore Éfeso ba kurireu keje, Ásia moto keje.
23Rakoje kimo nono dukeje boe pegare meartorure Jesus jiwugei Éfeso keje. 24Ia Éfeso kejewu imedu ure bairogu towuje boe emeartorure jiwu bope doge ewaiče. Maragodae nure tu ema rugadu. Nou imedu iere Demétrio. Nou ure toboe ure nono nou Éfeso kejewuge emeartorure jiwu bope uwari uwai mogadure. Nou bope aredu uwari iere Diana. Nou Diana uwai kurireu mugure nou ba kurireu keje. Nou Demétrio ure nou bairogu to prata tabo. Nou ure towu bai pigigodure. Nou Éfeso kejewuge ere diero maku nou Demétrio ai tuwo tugeragu nou ure towu bai roguji tuwariče. Dukodire nou Demétrio o diero kurire. Utugarege eno diero kurire jamedu. 25Demétrio ure tudugarege edo bato pui. Makore nouia maragodure nou inodu jiwuge ewagai jamedu. Demétrio makore ei. Akore: – Tarduware pago diero kurire duji pamaragodae koia. 26Mare tarduware Paulo bataruji. Ema makore boe emeartorukawo pare towu boeji pugeje, boe ewo tugera ra pare toboe piji. Unure boe emeardae mekido woe Éfeso ba kurireu keje, awu Ásia moto jamedu boe parugajeje. Boe emagare tumeartoru tabo nou Paulo bataruji. 27Boe emeartorumode nou Paulo bataruji dukeje etaidumodukare awu pare towu boeji pugeje. Erdu pegamode awu pamaragodaeji. Pameartorure jiwu bope aredu uwari Diana uwai kurireu pegamode jamedu. Boe emeartorumodukare ji pugeje. Boe eiamedu boe ere tubu jodo tumago pemegawo awu bope aredu uwari Dianaji moto jamedu boe parugajeje. Mare boe emode tugera ra nou Diana uwai kurireu piji dukeje nou bai pegamode. Boe erdu pegamode paroji jamedu.
28Nou boe emeardure nou inoduji dukeje ekudugodure. Egore: – Éfeso kejewu uwari Diana kurire rugadu! Pameartorumode tu ji rugadu!
29Nou erore jiboe ure tumaedo nou ba kurireu jamedu boe parugajeje. Nou boe ere tugeragu Paulo metage pobedu dogei. Ia iere Gaio. Metia iere Aristarco. Macedônia kejewuge nure emage. Nou boe eture ebo toro nou mugure ba kurireu oiadadawu tuwororo okwa ka. 30Paulo aidure tuduwo nou boe etae tumagowo ei mare nouia meartorure Jesus jiwuge ere togwa bu keje utukawo toro etae. 31Ia nou moto kejewu boe eimijerage ere tuwadaru maku nou Paulo bagai. Metage nure emage. Emagore Pauloji utukawo toro jamedu. 32Nou ba kurireu oiadadare nou boe emagare rugadu. Boe korire ei rugadu. Ere taiado puapo. Iage ekudugodure iaboeji. Nou iage ekudugodure ia tumeardae pegareuji pugeje. Erduwakare kodiba ture bato pui kodi boeji. 33Ia Judeu doge ere ia imedu rakojedo nou boe egorai. Nou imedu iere Alexandre. Iage ekudugodure ji dukeje ure tugera nado edukiorowo. Aidure tumagowo nou boei. 34Mare nou boe erduware Judeu nure ema duji dukeje ekudugodu rakare pugeje. Hora oto padure pobe ei tagoino dutabo. Egore: – Éfeso kejewu bope aredu uwari Diana kurire rugadu!
35Ča ia Éfeso kejewu boe eimijera ure nou boe edukiorowo. Akore: – Éfeso kejewuge enure pagi. Boe eiamedu boe erduware paetu pemegare nou buture baru pijiwu tori uwaiji rugadu duji. Awu torire pawari nure ema. Pameartoru kurire ji rugadu. Awu torire iere Diana Kurireu. 36Boe eiamedu boe erduware nou inoduji. Dukodire tawudugudo tagawo taro pegareu to. 37Tagaregodure awu imebo woe. Mare ekiwogukare nou tori padure tadawu baiji. Emagokare ia tuwadaru pegareuji nou pameartorure jiwu bope uwari areduji. 38Awu Demétrio utugaregebo etaidumode tumago pegawo ia boei dukeje etumode nou aiwomode boe ero jiwu boe eimijerage etae etaiwowo ero pegareu bagai. 39Mare tagaidumode tarowo ia taroji dukeje taro pemegado nono paro mogadure. 40Boe erduwamode awu meri jiwu parore jiboeji dukeje emago pegamode pai boe eimijera kurireuge ewiagai. Awu paro ukare turugadu. Pameardaekare turugadu awu paroji dukodire paroiwamodukare pawo pagimijerage emeardae pemegado awu meri jiwu parore jiboeji.
41Nou eimijera makore aino dukeje ure nou boe doge etudo.
20Paulo Uture Macedônia Moto Ka Pugeje. Nou Pijire Uture Acaia Moto Ka Jamedu.
1Nou kudugodureuge eture tuwai ka dukeje Paulo makore meartorure Jesus jiwuge eiamedu boe ewagai. Ure emeartoru rakado. Ukimadure ebo dukeje uture epiji. Uture Macedônia moto ka. 2Uture nou Macedônia moto kejewuge meartorure Jesus jiwuge etae. Ure emeartoru rakado Pao Kurireu bataruji rugadu. Nou piji uture Acaia moto ka. 3Rakojere nou Acaia moto kejewu arire pobe metia bokware ji nono. Utuiago Síria moto ka mare jorduware Judeu doge etaidure turo pegawo pudui toro duji. Dukodire ure tumeardae tawuje tuduwo tuibagi Macedônia moto ka pugeje. 4Ia Beréia ba kurireu kejewu imedu uture apo. Iere Sópatro. Pirro onaregedu nure ema. Ia Tessalônica ba kurireu kejewu ime pobedu doge eture apo jamedu. Ia iere Aristarco. Metia iere Segundo. Nou Derbe ba kurireu kejewu imedu Gaio uture apo jamedu. Timóteo uture apo jamedu. Ásia moto kejewu ime pobedu doge eture apo jamedu. Ia iere Tíquico. Metia iere Trófimo. 5Nou boe doge eture čedododai tubagawo čewagai toro Trôade ba kurireu keje. 6Judeu doge ewadae akedure dukeje čedure jamedu. Nou ewadae iere Amireu. Čedure Filipos ba kurireu piji ikarereu tabo. Imire iture Paulo apo jamedu. Merire ikera aboudure dukeje čedaregodure nou pamedage etae Trôade ba kurireu ka. Semana oto padure mito čei nono.
Paulo Utumodukare Trôade Ba Kurireu Ka Pugeje
7Sábado boečoji čere bato pui meartorure Jesus jiwugebo čenogwagewo puapo. Nou barogwato Paulo utumode dukodire nou boečoji mako raire nou boe dogei. Makore ei jii toro ari aregodure baru oia ka du ka. 8Jorugu urugu makare nou čere bato puiwu bai ja tada. Čere bato pui nou bai aogejewu bai ja tada. 9Ia iparedu mugure nou bai poro keje tuwiapaga tabo. Iere Êutico. Ča Paulo mako raire dukodire norire nou Êutico jokuji. Dukodire unudure tuku je dukodire buture nou bai poro piji toro moto ka. Boe erdure buture duji dukodire ere turawuje ae. Etaregodure ae dukeje erdure bokware duji. 10Mare Paulo ure turawuje nou bai piji nou iparedu ae. Ure tugeragu ji. Ure tona bu kajeje. Dukeje akore: – Tamororamagadukaba. Bikare raga. Jere kimo.
11Dukejere Paulo ruture nou bai aogejewu bai ka pugeje. Ure tumugudo. Ure tuge pemegado dukeje okwagere. Nono mako raire nou boei pugeje jii toro barogwakododu ka. Ča barogwakododure dukeje Paulo uture epiji. 12Mare nou boe eture nou iparedu apo tuwai ka. Jere kimo. Bikare rugadu. Dukodire ewudugugodure.
Paulo Uture Mileto Ba Kurireu Ka
13Čedure Paulo otodai ikarereu tabo Assôs ba kurireu ka čebagawo Paulo bagai nono. Paulo akore tudumoduie toro tuwure tabo. 14Ča aregodure čedae dukeje ure taredo ikarereuto jamedu. Dukeje čedure Mitilene ba kurireu ka. 15Nou barogwato čedure pugeje. Čegodu puredure Quios motoji. Pobore taiado nou moto tabo. Nou barogwato čedaregodure Samos moto ka. Merire mito pugeje dukeje čedaregodure Mileto ba kurireu ka. 16Akere Pauloji taregoduwo Jerusalém ba kurireu ka tuwaduwo nou Judeu doge ewadaeji. Nou ewadae iere Pentecostes. Aidure taregoduwo toro nou ewadumode jiwu meri otodai. Dukodire meardaere tudukawo Éfeso ba kurireu ka.
Paulo Ukimadure Nou Éfeso Kejewu Meartorure Jesus Jiwuge Eimijeragebo
17Dukodire Paulo makore nou Éfeso kejewu meartorure Jesus jiwuge eimijerage ewagai etaregoduwo tudogi. 18Etaregodure dukeje Paulo makore ei. Akore: – Iragoje raire tagabo dukodire tarduware irore jiboeji. 19Ikare boe remawudo imi Pao Kurireu utugare pemegareuwo imi. Imaragodure dukeje itragudure boe rakare i dukodi. Judeu doge ere tumeardae tawuje turo pegawo i rugadu. Mare Pagimijera Jesus utugare nure imi rugadu dukodire imaragodure aino ai. 20Tarduware. Ire boe erduwado Pao Kurireu bataruji rugadu. Ipogurukare imagowo rugadu. Ipagudukare imagowo ba kurireu oiadada, boe ewai ja tada jamedu. 21Ire Judeu doge ewie ewo tugera ra turo pegareu piji tumeartoruwo Pao Kurireuji, tumeartoruwo Pagimijera Jesusji. Ire boe tuginaiwuge ewie aino jamedu. 22Ča imeartorure Pao Kurireu Uwariji dukodi iturumode Jerusalém ba kurireu ka. Iorduwakare nuba boe eromode i toro. 23Mare iorduware marigudu Pao Kurireu Uwari ure iwie iwarigudumoduie baičoreuto, boe pegamoduie i rugadu. 24Mare itaidukare irowo ia imeardaere jiboeji. Itaidukare boe pemegawo i. Itaidure tu imeartoruwo Pagimijera Jesusji iwo ure maku inaiwu imaragodae iado. Imagowo boe ewiagai imaragodae nure ema kodi. Iwo boe ewie Jesus koiare Pao Kurireu aidure tuwo boe ekinorudo rugadu. 25Iragoje raire tagabo iwo tawie tawo tagimijerado Pao Kurireuče. Mare itaregodumodukare mato pugeje. 26Dukodire inure tawie aino. Ia tagi tameartorukare Jesusji raga mare imi igoia karega. Tameartorumodukare Jesusji dukeje tamodukare taginorudo bope doge eda pegareu piji. Ire tawie marigudu. 27Ikare ia Pao Kurireu bataru biado tabiji. Ire tawie Pao Kurireu meardae jamedu boeji. 28Dukodire taro pemegado, tameardae pemegado taetu pemegawo nou meartorure Jesus jiwugei. Pao Kurireu Uwari ure emagu tagai. Nou meartorure Jesus jiwuge eimijerage nure tagi dukodire taetu pemegado ei. Pao Kurireu onaregedu Jesus ure tugu redo emoriče dukodire Pao Kurireu ure tugeragu ei. 29Itumode tabiji dukeje ia boe pegareuge etaregodumode turo pegawo meartorure Jesus jiwugei. Ero pegamode nono rie ro mogadure. 30Ia rakojere tagabowu ime ewadrarodumode awu taetu pemegare jiwu meartorure Jesus jiwugei tuwo tugeragu ei emeartorukawo pugeje Pao Kurireuji. 31Dukodire inagoino tai. Taetu pemegado ei. Tawiagodukaba iro piji. Itragudu tabo ire tarduwado Pao Kurireu bataruji meriji boečoji. Jorure pobe metia bokware i irore aino tai dutabo. 32Ča imagonure Pao Kurireuji tabaru tabo jetu pemegawo tai rugadu. Tawo boe ewie jamedu emare aidure tuwo boe ekinorudo. Emare umode turo pemegado tai jamedu tameartoru rakawo pudui. Ainore rore rugadu meartorure Jesus jiwuge eiamedu boei. 33Imi itaidukare ia boe enoe prataji, itaidukare enoe tori kuiejeji, ekudau areiaji. 34Tarduware irore jiboeji. Ire boe ewie Pao Kurireu bataruji mare imaragodure ia boe etai jamedu ia diero bagai iwo ikeragu nou itaidure jiboeji nou imedage etaidure jiboeji jamedu. 35Irore aino iwo boe erduwado tumaragodae tabore emode tugeragu ia dieroji tuwo maku marenarue doge etai. Pagimijera Jesus emare akoino, “Boe emode boe ekuna dukeje egaremode pudui ture ekunauge ekori. Boe pemegamode ei nou ture ekunauge ekori.”
36Ainore Paulo ure tumago akedudo. Dukeje ure tubu jodo moto keje nou meartorure Jesus jiwuge eimijeragebo. Emagore baruto aino. 37Etragudure tugiarigodure dukodi. Ere tona bu pugajeje. Ekimadure Paulo apo. 38Ekiarigodure rugadu Paulo makore ei tuiordumokaie ei pugeje kodi. Dukeje eture apo ikarereu ka utumode kodi.
21Paulo Uture Jerusalém Ba Kurireu Ka
1Čegimadure ebo dukeje čedure. Čeno ikarereu utu jetorore toro nou Cós moto ka. Nou barogwato čedaregodure Rodes ba kurireu ka. Dupijire čedure Pátara ba kurireu ka. 2Nou Pátara kejere čerdure ia ikarereuji. Nou ikarereu kurire tudu jaewo pobo maereuji. Utuiago Fenícia moto ka. Dukodire čere čedaredo to. Dukeje čedure. 3Čerdure Chipre motoji dukeje čere čemegido toro Síria moto ka. Čedaregodure Tiro ba kurireu ka dukeje čere čedawuje ikarereu piji. Nou ikarereu ure tuwuredo tuwo nou ikarereu tadaboe tawuje nono. 4Tiro keje čerdure meartorure Jesus jiwugei. Čeragojere ebo kejewu meri oto padure sete. Pao Kurireu Uwari ure ewie boe pegamoduie Pauloji Jerusalém keje dukodire emagore ji utukawo toro. 5Mare čeragojere ebo kejewu meri akedure dukeje čedure pugeje. Eiamedu boe tuwobebo, torebo eture čedabo toro pobo maereu okwa ka. Nonore čere čebu jodo moto keje čemagowo Pao Kurireu bagai baruto. 6Dukejere čegimadure ebo. Čere čedaredo nou ikarereuto pugeje. Mare eture tuibagi tuwai ka.
7Ča čedure pugeje. Čedure Tiro piji Ptolemaida ba kurireu ka. Čegimadure nou meartorure Jesus jiwuge čemedagebo nono. Čeragojere ebo kejewu merire mitotu je. 8Nou barogwato čedure pugeje. Čedaregodure Cesaréia ba kurireu ka. Nonore čeragojere Filipe apo. Nou Filipe ure boe emeartorudo Jesusji rugadu. Marigudu Jerusalém kejewu meartorure Jesus jiwuge ere tugeragu imei ewo boe eke pedo boei. Enodo padure sete. Iare nou Filipe rema. 9Ore areme ere pobe puibiji. Emagere ere boe ewie Pao Kurireu bataruji. 10Čeragojere nono dukeje ia makore Pao Kurireu bataru jiwu imedu aregodure. Iere Ágabo. Aregodure Judéia moto piji. 11Aregodure čedae dukeje ure tugeragu Paulo opeagajejewuji. Ure tuwure kogudo, tugera kogudo tabo. Dukeje akore: – Pao Kurireu Uwari akore Judeu doge pegareuge ero pegamoduie nou ore opeagajejewu čewuji, emoduie kogudo Jerusalém tada. Emoduie maku boe tuginaiwuge etai ero pegawo ji.
12Čemeardure nou inoduji dukeje čemago raire Pauloji utukawo Jerusalém ka. 13Mare Paulo akore: – Kodiba tagagoino i? Tare ikiarigo. Ire irugadu nou Judeu doge ewo ikogudo. Ire irugadu iwiwo imeartorure Pagimijera Jesusji kodi.
14Čegare Paulo meardae mekido dukodire čere čenogwa ra piji. Čenagore: – Pagimijera Jesus aidumode dukeje ainore umode rugadu.
15Čeragoje raire nono dukeje čere čenoroe pemegado čeduwo pugeje toro Jerusalém ka. 16Ia Cesaréia kejewu meartorure Jesus jiwuge eture čedabo jamedu. Ere čerego čebadumode kejewu bai ka. Nou uwaire bai čewu iere Menasom. Chipre kejewu nure ema. Meartorure Jesusji marigudu.
Paulo Uture Tiago Ae
17Čedaregodure Jerusalém ka dukeje nou meartorure Jesus jiwuge čemedage ekimadure čedabo rugadu. 18Nou barogwato Paulo uture čedabo Tiago ae. Nou meartorure Jesus jiwuge eimijerage eiamedu boe eragojere nono jamedu. 19Paulo ukimadure ebo dukeje readodure ewiagai tumaragodaeji, nuba Pao Kurireu rore toro boe tuginaiwugei. 20Emeardure ji dukeje emago pemegare Pao Kurireuji. Dukeje emagore Pauloji. Egore: – Čemana nure aki. Meartorure Jesus jiwu Judeu doge emagare rugadu. Arduware. Emeartorure rugadu Moisés ure maku pagaiwu Pao Kurireu bataruji. 21Boe ere čewie akagoie Judeu doge emeartorumoduie Jesusji dukeje ewo tugera ra nou Moisés ure maku pagaiwu bakaru piji paro piji. Akagore ei ekawo tore ime ewaga oto biri kado pugeje. Akagore ei ewo tugera ra Judeu doge ero piji. 22Judeu doge erduwamode akaregodure duji dukeje etaidumode turo pegawo ai. Nuba aromode? 23Čedaidure atuwo ia imebo. Ere pobe puibiji. Marigudu emagore Pao Kurireuji turomode jiboeji. Dukodire ekare tao kado. 24Ča atudo ebo awo ero morido, arowo erore jiboeji jamedu. Emode tao kado kuri je nono paroia mogadure. Nono tamode tarugadu tawo taremo Pao Kurireu uwaito nono Judeu doge ero mogadure. Dukodire čare Judeu doge erduwamode akare akera ra nou Moisés ure maku pagaiwu paro piji rugadu duji. Erduwamode tumeardure jiwu bataru ukare turugadu. Boe ewadrarodure ai boe ewiagai. 25Mare boe tuginaiwuge meartorure Jesus jiwuge etaire čere ia atugoreboe maku etai marigudu. Čenagore ei ekawo ia makudure santo doge etaiwu bope doge eke kowuje, ekawo barogo ku kowuje, ekawo ia bitodureu bukigu kogure itoru kajejewu barogo ko, eribarikawo tumugukare apowu aremei, eribarikawo tumugukare apowu imei.
26Dukodire Paulo uture nou imebo. Rore nono erore tuwo tubemegado turowo Judeu doge eno bakaru tadawu turo boeji. Dukeje ure turemo nou Pao Kurireu uwaito. Ure boe ewie nou turoino jiboe akedumoduie kejewu meriji. Akedumoduie dukeje tumoduie ia barogo kowu Pao Kurireu ai turo pegareu moriče, nou ime ero pegareu moriče jamedu.
Ere Paulo Kogudo Pao Kurireu Uwai Tada
27Nou Paulo makore jiwu meri puredugodure pudui dukeje ia Ásia moto pijiwu Judeu doge erdure Pauloji Pao Kurireu uwai ja tada. Ere boe ekorigo tuwadrarodu tabo dukodire ere tugeragu Pauloji. 28Ekudugodure: – Judeu doge nure pagi. Tagera maku čenai. Awu imedu ure boe eiamedu boe emeardae pegado pai. Ure boe emeardae pegado Moisés ure maku pagaiwu pago bakaruji parore jiboeji jamedu. Ure boe emeardae pegado awu Pao Kurireu uwaiji. Aino ure ia boe tuginaiwuge eremo awu Pao Kurireu uwaito. Ukare turugadu. Ere awu bai pemegareu pegado rugadu.
29Erdure ia Éfeso kejewu imeduji Paulo apo nou ba kurireu keje. Dukodire emeardaere Paulo uie nou imedu remo Pao Kurireu uwai to duji. Nou imedu iere Trófimo. Mare pagare egoino. Paulo ukare nou imedu remo Pao Kurireu uwaito rugadu.
30Ča nou ba kurireu kejewuge erduwakare tumeardae bagai pugeje. Boe eregodure tuwo bato pui. Ere tugeragu Pauloji rugadu. Ere tumugudo kororo keje nou Pao Kurireu uwai piji. Nono ere Pao Kurireu uwai poro miwuje. 31Nou boe etaidure tuwo Paulo bito. Mare nou Jerusalém ba kurireu kejewu Romano doge etugobaigarege eimijera meardure nou emeardaeji. 32Dukodire rekodure tugobaigaregebo toro etae. Nou boe erdure nou tugobaigaregei dukeje ere tugera ra ture boeto Paulo jitu piji. 33Nou tugobaigarege eimijera uture Paulo ae. Ure tugeragu ji. Makore tugobaigaregei ewo Paulo kogudo corrente tabo. Dukeje unarare nou boei. Akore: – Ioguduba nure ema? Nuba rore?
34Nou boe emagore bataru jipagi tugudu tabo, tugorigodu tabo. Mare emagore jiboe ure tuginai pubiji. Iage emagore iaboeji. Mare iage emagore ia bataruji pugeje. Dukodire nou tugobaigarege eimijera jorduwakare nuba tumeardaemode nou boe erore aino Paulo jituji. Dukodire makore tugobaigaregei etuwo Paulo apo toro tubadure tadawu bai rakareu ka. 35-36Eture toro apo. Etaregoduiago toro dukeje nou boe ekorigodure rugadu. Eiore jetu woje toro. Ekudugodure. Egore: – Nou Paulo bito!
Nou korigodureuge ere taiado pači Paulo apo. Dukodire nou tugobaigarege enoredure Paulo apo tuwo turemo tuwaito nou korigodureuge epiji.
Paulo Makore Turoji Boe Ewiagai
37-38Nou tugobaigarege eiago turemo tuwai rakareuto Paulo apo dukeje Paulo makore nou eimijeraji. Akore: – Itaidure imagowo ai.
Makore Grego bataru tabo dukodire nou tugobaigarege eimijera makore bataru jipagi. Akore: – Amagore i Grego bataru tabo. Dukodire jowu Egito kejewu imedu karegure aki. Emare aidure tuwo pagagedudo. Uture boe maereu ka imebo. Enodo padu kejewure quatro mil. Ewaigare jamedu.
39Paulo akore: – Boro. Judeu nure imi. Iwodure Tarso ba kurireu tada Cilícia moto keje. Nou ba kurireu kurire nou moto keje. Ča itaidure imagowo awu boei.
40Nou tugobaigarege eimijera akore: – Ure turugadu.
Dukodire Paulo ure turagojedo nou bai rakareu baiporo keje. Ure tugera nado boe edukiorowo. Edukiorore dukeje Paulo makore ei Judeu doge ewadaru tabo.
221Paulo makore nou Judeu dogei. Akore: – Iwobe nure tagi. Tawiapaga pemegado iwadaruji iwo tarduwado irore jiboeji.
2Emeardure ji makore ewadaru tabo duji dukodire edukiorore rugadu.
3Nono Paulo makore pugeje. Akore: – Judeu nure imi. Iwodure Tarso ba kurireu tada Cilícia moto keje. Mare irijodure woe Jerusalém ba kurireu tada. Jorduwareu Gamaliel ure iorduwado. Ure iorduwado nou mariguduwu pawobe eno bakaruji. Itaidure irowo Pao Kurireu roji nono tagaidu mogadure. 4Imeardaere Jesusji Pao Kurireu karegure ema duji nono tameardae mogadure. Dukodire iro pegare awu meartorure Jesus jiwugei iwo ewido. Ire ikeragu imei, aremei iwo etugu baičoreuto. 5Nou ure Judeu doge enomea maku Pao Kurireu aiwuge eimijera kurireu jorduware nou irore jiboeji. Nouia pagimijerage erduware jamedu. Ere bapera maku inai iwo maku Damasco ba kurireu kejewu Judeu doge etai iwo ikeragu nou meartorure Jesus jiwugei toro jamedu. Itaidure iwo ekogudo corrente tabo iwo erego mato Jerusalém ka ibagi iro pegawo ei. Dukodire iture toro.
Paulo Readodure Ewiagai Tumeartorure Jesusji Rugadu
6– Ča ikodure nou Damasco kawu awaraji. Ipuredugodure Damasco ba kurireuji. Meri aregodure baru oia ka dukeje ia jorugu rakareu aregodure itae baru piji. 7Ure iwududo moto ka dukeje imeardure makoji. Akore, “Saulo, Saulo! Kodiba akaidure aro pegawo aino i?” 8Inagore, “Ioguduba ure aki?” Akore, “Nazaré pijiwu Jesus nure imi. Aro peganure i rugadu.” 9Nou uture itabowu ime erdure nou joruguji mare emeardukare nou makore jiboeji. 10Nono inarare ji pugeje. Inagore, “Ikimijera nure aki. Nuba iromode?” Dukeje Pagimijera Jesus akore, “Aragojedo. Atudo Damasco ba kurireu ka. Torore boe emode awie Pao Kurireu aidure jiwu aromode jiboeji.” 11Ioku bokware nou jorugu rakareu koia. Dukodire nou imedage ere tugeragu ikeraji tuwo irego Damasco ba kurireu ka rugadu.
12– Nou ba kurireu Damasco tadare ia meartorure pago bakaru jiwu imedu mugure. Iere Ananias. Nou Damasco kejewu Judeu doge eiamedu boe etaidu pemegare ji. 13Nou Ananias aregodure itae. Makore i. Akore, “Imana Saulo. Akaiwodo pugeje.” Ča ioku pemegagodure tači je. Dukeje itaiwore pugeje. 14Akore, “Jawu pawobe emeartorure jiwu Pao Kurireu ure tugeragu ai arduwawo taidure jiboeji. Ardumode Utugare Jesusji. Ameardumode bataru jameduji uwo arduwado. 15Dukodire amode boe eiamedu boe ewie ardure jiboeji, ameardure jiboeji jamedu. 16Ča amara tabo. Amagodo baruto Pao Kurireu uwo aro pegareu barigu apiji. Akao pegododumode jamedu.”
Pao Kurireu Makore Pauloji Uwo Boe Tuginaiwuge Ewie Pao Kurireu Bataruji
17– Ča ire ikirimi ibagi Jerusalém ka. Imagore baruto Pao Kurireu uwai tada dukeje iordure iaboeji. Ure nono boe eniau mogadure. 18Iordure Pagimijera Jesusji. Makore i. Akore, “Amara tabo. Atudo Jerusalém piji. Awu boe emeartorumodukare akagore iboeji boe ewiagai.” 19Inagore, “Ikimijera nure aki. Erduware irore jiboeji marigudu. Marigudu iture Judeu doge ere bato puiwu bai jamedu boe ka. Ire ikeragu nou meartorure aiwugei iwo etugu baičoreuto. Ire boeto ei. 20Boe ere atugare Estêvão bito dukeje iragojere nono jamedu. Itaidure ere bito duji. Ietu pemegare nou ere bitowuge ekudau areiaji.” 21Nono Pagimijera Jesus makore i pugeje. Akore, “Atudo. Inure atu jado toro boe tuginaiwuge etae.”
22Paulo makore aino tuduie toro boe tuginaiwuge etae Pao Kurireu bataru tabo dukodire nou Judeu doge ekorigodure rugadu. Ewiapagakare makore jiboeji pugeje. Ekudugodu rakare. Egore: – Awu imedu barigu. Bito. Ukare turugadu rakojewo moto keje.
23Ekudugodu rakare. Ere motorugudu barigu baruto. Ere tugudau areia jukodo rugadu. 24Nou Romano doge etugobaigarege eimijera makore tugobaigaregei ewo Paulo remo nou bai rakareuto. Makore ei ewo boeto Pauloji Paulo makowo kodiba nou Judeu doge ekorigodure aino pudui duji. 25Ča ere remo dukeje ere kogudo. Eiago boeto ji. Mare Paulo makore nouia tugobaigareji. Akore: – Boe etaiwokare raga ia iro pegareu bagai. Romano kejewu nure imi. Ukana turugadu na awo boeto i?
26Nou tugobaigare meardure nou inoduji dukeje uture tugimijera ae. Akore: – Ukare turugadu pawo boeto awu imeduji. Romano kejewu nure ema.
27Dukodire nou tugobaigarege eimijera uture Paulo ae. Unarare ji. Akore: – Aki na ia Romano kejewu nure aki?
Paulo akore: – Uu.
28Nono tugobaigarege eimijera akore: – Diero tabore ire Romano kejewudo imi jamedu.
Paulo akore: – Kodi iwodure dukeje Romano kejewu nure imi.
29Ča nou ime epagudugodure ero pegare ia Romano kejewuji kodi. Ere taradaino piji tumagokawo ji pugeje. Nou boe eimijera pagudugodure rugadu. Romano kejewu eimijera kurireu makore tugobaigaregei marigudu ekawo ia Romano kejewu kogudo nono turomoga Paulo jitu mogadure.
Paulo Makore Judeu Doge Eimijeragei
30Nou tugobaigarege eimijera aidure tuiorduwa birigoduwo kodiba nou Judeu doge ekorigodure Pauloji. Dukodire nou barogwato ure nou ture Paulo kogudo tabowu corrente tawuje Paulo piji. Dukejere makore nou Judeu doge eimijeragei ewo tudo pui nou ure Judeu doge enomea maku Pao Kurireu aiwuge eimijeragebo. Dukejere uture Paulo apo toro etae. Ure Paulo rakojedo etoiadada.
231Paulo aiwore tu nou boe eimijeragei. Dukejere makore ei: – Iwobe nure tagi. Iro pegakare imeartoru rakare Pao Kurireuji ji aino kodi.
2Nou ure Judeu doge enomea maku Pao Kurireu aiwuge eimijera kurireu iere Ananias. Makore nou rakoje puredure Paulo jiwugei ewo tugera to Paulo okwaji. 3Dukejere Paulo mako rakare ji. Akore: – Pao Kurireu umode boeto ai rugadu. Boe epaga keje aro pegare boei rugadu. Akaidure akaiwowo iroji ia Judeu doge erokare jiwu iro pegareu bagai. Mare amagore awu imei ewo tugera to i dukodire akire arokare nono Judeu doge ero mogadure.
4Nono nou puredure Paulo jiwuge ime ere Paulo bie. Egore: – Amago pegare nou ure Judeu doge enomea maku Pao Kurireu aiwuge eimijera kurireuji.
5Dukodire Paulo kiarigodure nou tumagore jiboeji. Nono akore: – Iwobe nure tagi. Iorduwakare iwobe eimijera kurireu nure ema duji. Ire iwarigu boeto nou imagore jiboeji. Pao Kurireu makore, “Akaba amago pegado boe eimijera kurireugei.23.5 Awu bataru padure Êxodo 22.28 keje.”
6Dukeje Paulo jorduware ia nou boe eimijeragei saduceu doge nure emage duji. Ia nou boe eimijerage fariseu doge nure emage. Dukeje makore nou boe eimijerage eiamedu boei. Akore: – Iwobe nure tagi. Fariseu nure imi. Fariseu onaregedu nure imi. Iorduware meartorure Pao Kurireu jiwuge eewodumode pugeje rugadu. Ire boe ewie nou inoduji. Dukodire tagaiwonure aino iroji woe awu meriji.
7Paulo makore aino dukeje nou saduceu doge nou fariseu doge etokire pui. Emeardaekare nono pumeardae mogadure. 8Nou saduceu doge egore bireuge eewodumodukaie pugeje. Egore bope uwari bokwaie. Egore baru tadawu bokwaie jamedu. Mare nou fariseu doge emeardaere marigudu bireuge eewodumoduie pugeje duji. Egore bope dogeie, baru tadawugeie jamedu. 9Emago rakare pui pugeje. Nono ia jorduware Judeu doge eno bakaru jiwuge ere turagojedo. Fariseu doge nure emage. Egore: – Čerdukare awu imedu ia ro pegareuji. Ia bope rakudu, ia Pao Kurireu utugare baru tadawu rakudu makore aino ji rugadu.
10Dukodire nou boe eimijerage etaidure turo pegawo pui rugadu. Nou tugobaigarege eimijera rakoje kimore nono. Meardaere emoduie Paulo bowuje nono rugadu. Dukodire makore tugobaigaregei ewo turawuje etae tuwo tugeragu Pauloji epiji tuwo reko tuibagi nou bai rakareu ka.
11Nou boečoji Pagimijera Jesus aregodure Paulo ae. Makore ji. Akore: – Apagudukaba. Are awu Jerusalém kejewuge ewie iwadaruji. Aino inure atudo toro Roma ba kurireu ka awo ewie toro jamedu.
Judeu Doge Ere Tumeardae Tawuje Tuwo Paulo Bito
12Nou barogwato ia Judeu doge ere bato pui tuwo tumeardae tawuje tuwo Paulo bito. Emagore pui tugudumodukaie, togwagemodukaie jii toro ture Paulo bito du ka. 13Ime emagare rugadu nono. Enodo padure kejeboe kodure quarenta kori. 14Dukeje eture nou ure Judeu doge enomea maku Pao Kurireu aiwuge eimijerage etae tumagowo ei. Egore: – Čere čemeardae maku puai čegudumodukaie čenogwagemodukaie jii toro čere Paulo bito du ka. 15Ča tagi tamagodo nou tugobaigarege eimijeraji aregoduwo Paulo apo mato. Tamagodo ji tagaiduie tamagowo Pauloji pugeje tagaiwowo nou Paulo ro bagai pugeje. Nono čebagamode nono awara keje. Čere čerugadu čewo bito awara keje dukodire aregodumodukare mato pugeje.
16Ča Paulo utuie onaregedu meardure nou emeardae pegareuji. Dukodire uture nou bai rakareu ka tuwo Paulo bie. 17Dukodire Paulo makore nouia tugobaigare bagai tumagowo ji. Akore: – Awu iparedu reko akimijera ae. Emare readodumode iaboeji biagai.
18Dukodire nou tugobaigare ure nou Paulo utuie onaregedu reko tugimijera ae. Makore nou tugimijeraji. Akore: – Nou pare pageragu jiwu imedu Paulo makore iwagai iwo awu iparedu reko mato akae readoduwo ia boe remawuji awiagai.
19Nou tugobaigarege eimijera ure tugeragu nou iparedu ieraji tuduwo apo toro nou tugobaigarege epiji. Dukejere makore ji. Akore: – Kaba jiba akaidure areadoduwo iwiagai?
20Nou iparedu makore ji. Akore: – Judeu doge eimijerage emagomode ai nou Paulo bagai pugeje barogwato. Etaidure awo reko toro ere bato pui tadawu bai ka pugeje. Ewadrarodumode taiduie tumagowo Pauloji pugeje tuiorduwawo nou Paulo rore jiboeji pugeje. 21Awiapagakaba ewadaruji. Ime ekodure quarenta kori emode tuwiado awara okwaji tubagawo Paulo bagai tuwo bito nono awara keje. Emagore tugudumodukaie togwagemodukaie pugeje jii toro ture Paulo bito du ka. Aino ere tudo turugadu tuwo Paulo bito rugadu. Epagamode Paulo bagai barogwato.
22Nou tugobaigarege eimijera makore nou ipareduji. Akore: – Amagokaba ia boe ewiagai awu akagore iboeji.
Dukeje ure nou iparedu utudo pugeje.
Tugobaigarege Eimijera Ure Paulo Utudo Boe Eimijera Félix Ae
23Nono nou tugobaigarege eimijera kurireu makore nou tugobaigarege eimijerage paru towuge ewagai. Ere pobe. Makore ei. Akore: – Tageragu tugobaigaregei. Enodo padudo duzentos. Edo turugadu taduwo Cesaréia ba kurireu ka. Tageragu mugure kuwaru kejewu tugobaigaregei jamedu. Enodo padudo setenta. Tageragu lança epagei jamedu. Enodo padudo duzentos jamedu. Tadudo nou Paulo apo awu boečoji ari ruture dukeje. 24Nou Paulo mugudo kuwaru keje. Tagaregodu pemegado apo toro boe eimijera governador Félix ae.
25Dukejere nou tugobaigarege eimijera ure ia atugoreboe pemegado. 26Ainore akore: – Ikimijera Félix nure aki. Itaidure boe pemegawo ai rugadu. 27Judeu doge ere tugeragu awu inure utudo akaewu imeduji. Egore iago bito. Mare iorduware Romano kejewu imedu nure ema duji. Dukodire ire tawuje epiji ino tugobaigaregebo. 28Itaidure iorduwawo kodiba eroino ji dukodire ire reko tugimijerage etae. 29Ukare ia turo pegareu to bitoduwo, tuguduwo baičoreuto. Mare nou Paulo bataru kodukare Judeu doge emeardae kodaji. Dukodire ekorigodure aino ji rugadu. Eno bakaru koiare eroino ji. 30Nono ia boe ure iwie ime ere tumeardae tawuje tuwo Paulo bito dukodire imeardaere iwo awu Paulo utudo toro akae. Ire nou jordu pegare Paulo jiwuge ewie emagowo ai etaidukare jiboeji. Cláudio Lísias nure imi, imire ire awu bapera atugodo toro awagai.
31Nou tugobaigarege emeartorure nou tugimijera bataruji rugadu. Eture Paulo apo nou boečoji rugadu. Etaregodure Antipátride ba kurireu ka nou boečoji. 32Nou barogwato nou mugure kuwaru kejewu tugobaigarege eture Paulo apo pugeje. Mare nouia tugobaigarege ere tugirimi tuibagi nou tuwai rakareu ka. 33Nou mugure kuwaru kejewu tugobaigarege etaregodure Paulo apo toro Cesaréia ba kurireu ka rugadu. Nono ere Paulo maku nou boe eimijera kurireu ai. Ere nou atugoreboe maku ai jamedu. 34Nou boe eimijera kurireu Félix aiwore nou atugoreboeji dukeje unarare Pauloji. Akore: – Kaibowu moto keje ba awodure?
Paulo akore tuwoduie Cilícia moto keje. 35Dukejere nou Félix akore: – Nou jordu pegare aro jiwuge etaregodumode dukeje iwiapagamode ewadaruji, awadaruji jamedu.
Nono makore tugobaigaregei etaiwowo Pauloji, utukawo nou tumaragodure tadawu bai kurireu piji.
24Judeu Doge Eimijerage Emago Pegare Paulo Roji
1Merire ikera aboudure dukeje Judeu doge eimijerage eture Cesaréia ba kurireu ka. Ia eimijera iere Ananias. Nou ure Judeu doge enomea maku Pao Kurireu aiwuge eimijera kurireu nure ema. Ia iere Tértulo. Emare jorduware Judeu doge eno bakaruji. Etaregodure nou boe eimijera kurireu Félix ae. Dukeje emagore nou boe eimijeraji. Egore Paulo ro pegaie. 2Nou boe eimijera Félix makore Paulo bagai. Paulo ure turemo dukeje nou Tértulo makore nou boe eimijera kurireuji rugadu. Akore: – Čegimijera nure aki. Arduwa kurire dukodire aro pemegare čei. Aki aigoiare akare boe pegareuge erugo čei marigudu. Aki aigoiare are čeno moto pemegado. 3Čedaidure arore jiboeji dukodire čemago pemegare aino ai. 4Itaidukare iwo akiarigo ma čare awiapagado čewadaruji tu jao. 5Čedaidukare awu imedu rore jiboeji. Ro pegare rugadu. Ure Judeu doge ekiripagado. Ure boe erugo pui moto jamedu boe parugajeje. Meardae pegareuge eimijera nure ema. Nou boe ekiere nazareno doge. 6-7Aidure turo pegawo awu Pao Kurireu uwaiji dukodire čere čegeragu ji čewo tugu baičoreuto. 8Anara pemegamode ji dukeje arduwamode boe jokodu jire čenagoino duji.
9Nouia Judeu doge emagore aino pugeje nou boe eimijera kurireuji. Mare pagare egoino biagai. Ewadrarodunure.
Paulo Makore Nou Judeu Doge Ewadaru Jipagi Nou Félix Biagai
10Nono nou boe eimijera Félix ure tugera nado Paulo ae, Paulo makowo jamedu. Dukodire Paulo makore. Akore: – Marigudu awu woewu boe eimijera kurireu ure aki rugadu. Arduware akaiwowo boei ero pegareu bagai. Dukodire imeartorure ai imagowo awu boe eimijerage ewadaru jipagi awiagai. 11Iture Jerusalém ba kurireu ka iwo ipu jodo imago pemegawo Pao Kurireuji merire doze iroino dukeje. Anaramode boei dukeje emode awie nou inagoino duji. 12Mare imago pegakare boei nono Pao Kurireu uwai tada. Ikare boe ekiripagado nono. Awu Judeu doge erduware nou inoduji. Iro pegakare boei nou ba kurireu tada, nou boe ere bato puiwu bai tada jamedu. 13Akaiwo pemegamode ewadaruji dukeje arduwamode ewadrarodunure duji. Emago pegare i mare ewadrarodunure. 14Mare imagomode aino ai. Ire ipu jodo imago pemegawo jawu čewobe emeartorure jiwu Pao Kurireuji. Irore nono nou meartorure Jesus jiwuge ero mogadure jamedu. Mare awu emeartorukare Jesus jiwuge. Egore pagaie čenagoino. Mare čemeartorure Moisés ure bu bapera kejewu Pao Kurireu bataruji. Čemeartorure mariguduwuge makore Pao Kurireu bataru jiwugei, ere bu bapera kejewu Pao Kurireu bataruji jamedu. 15Imeartorure awuge emeartorure jiwu Pao Kurireuji. Awu Pao Kurireu koiare umode ro pemegareuge, ro pegareuge eiamedu boe eewodudo pugeje. 16Dukodire ire idurudo iro pemegawo Pao Kurireuji, iro pemegawo boei jamedu, ia boe pegareu metukawo itaora tada. 17Ča iragoje raire toro ia moto keje. Dukejere itaregodure mato pugeje Jerusalém ba kurireu ka ia diero tabo iwo maku iwobe etai. Itaidure iwo iro pegareu mori maku Pao Kurireu ai uwai tada jamedu nono Judeu doge ero mogadure. 18Dukodire awu Judeu doge erdure i Pao Kurireu uwai tada. Mare inure itaimo nono ero mogadure ipemegawo irowo Judeu doge eno bakaru tadawu boe ero boeji iwo iremo nou Pao Kurireu uwaito nono ero mogadure jamedu. Boe edure nono mare erdu pegakare nou irore jiboeji dukodire ekare bato pui itae. Emago pegareu kare pui. 19Ia Ásia pijiwuge Judeu doge edure nono jamedu. Erdu pegamode ia irore jiboeji dukeje etaregodumode woe tumago pegawo i. Mare erdu pegakare irore jiboeji dukodire etaregodukare aino mato. 20Awu woewu Judeu doge erdukare ia iro pegareuji jamedu. Iragojere Judeu doge eimijeragebo dukeje emagokare i ia iro pegareuji. 21Mare imagore aino, “Imeartorure bireuge eewodumode pugeje duji dukodire tagaiwonure ia iro pegareu bagai.” Ainore inagore. Dukodi ča awuge ekorigodure aino i.
22Nono Félix ure emago akedudo. Jorduware meartorure Jesus jiwuge emeardaeji erore jiboeji. Akore: – Tugobaigarege eimijera Lísias aregodumode dukeje imode imeardae tawuje iorduwawo nuba iromode ai.
23Makore tugobaigareji aiwo pemegawo Pauloji baičoreu tada mare ro pegakawo ji, tumagomoduie Paulo metage ewagai etaregoduwo mato ewo tugera maku ai.
Félix Biapagare Paulo Bataruji Toreduje Drusila Apo
24Ia meri keje Félix aregodure Paulo ae toreduje apo. Iere Drusila. Judeurodo nure ema. Makore Paulo bagai dukeje ewiapagare Paulo bataruji. Dukodire Paulo ure erduwado boe emeartorure Jesus jitu duji. 25Paulo makore ei boe ewo turagado pudui turo pegakawo. Makore ei boe ewo turo jetorodo. Makore ei Pao Kurireu aiwomoduie boei rugadu ia meri keje. Dukeje Félix pagudugodure. Akore: – Atudo ipiji baičoreuto. Imode irugadu pugeje dukeje imagomode awagai pugeje.
26Mare aidure Paulo uwo ia diero maku pudai dukodire mako makore Paulo bagai tumagowo pui.
27Jorure pobe dukeje Félix ure tudawuje boe eimijera governador pudumi dupiji. Pórcio Festo mugure mugato. Mare Félix aidukare tuwo Judeu doge ekorigo dukodire ukare Paulo tawuje baičoreu piji.
25Paulo Aidure Tuduwo Romano Doge Eimijera Kurireu Ae
1Boe eimijera kurireu Festo aregodure nou moto ka tumuguwo Félix mugato. Merire pobe metia bokware dukeje uture Cesaréia ba kurireu piji toro Jerusalém ba kurireu ka. 2Judeu doge eimijerage emago pegare Pauloji nou Festo biagai. Nou ure Judeu doge enomea maku Pao Kurireu aiwuge eimijerage emago pegare Pauloji Festo biagai jamedu. 3Enogwamagudure Festoji uwo Paulo arego pudae Jerusalém ka. Mare pagare egoino. Ere tumeardae tawuje tuwo Paulo bito awara keje. 4Mare Festo akore: – Paulo rakojere Cesaréia keje baičoreu tada. Kuri aino imode ikirimi ibagi toro. 5Tagimijerage etudo itabo toro Cesaréia ba kurireu ka jamedu. Tardumode ia awu Paulo ro pegareuji dukeje tamagodo ro pegareuji jakai rugadu.
6Festo rakojere nono Jerusalém ba kurireu keje. Meri oto padure oito rabodu, dez rabodu ji nono. Dukejere ure tugirimi tuibagi Cesaréia ba kurireu ka. Nou barogwato ure tumugudo tumuga ira keje taiwowo boe erore jiboeji. Dukeje ča makore Paulo bagai. 7Etaregodure apo baičoreu piji dukeje nou etaregodure Jerusalém ba kurireu pijiwuge Judeu doge ere taiado apo rugadu. Emago pegare ji rugadu. Egore Paulo ro pegaie rugadu. Mare boe erdukare nou Paulo ia ro pegareuji. 8Mare paga karega Paulo makore ewadaru jipagi. Akore: – Irore nono Judeu doge ero mogadure. Ikare imegido nou ero piji. Iro pegakare Pao Kurireu uwaiji. Iro pegakare Romano doge eimijera kurireu Cesaji.
9Mare Festo aidure turo pemegawo Judeu dogei etaiduwo pudui. Dukodire makore Pauloji. Akore: – Akaidure atuwo Jerusalém ba kurireu ka itabo? Nono ča iorduwamode boe jokodu jire akagoino duji.
10Mare Paulo aidukare. Akore: – Iragojere woe. Boe eimijera nure aki amaragodure Romano doge eimijera kurireu César ai akaiwowo boe erore jiboeji awu amuga ira keje. Woe ča ure turugadu awo ameardae tawuje akaiwowo ia iro pegareu bagai. Iro pega bokware Judeu dogei. Aki arduware nou inoduji. 11Emode ia ro pegareuge ewido ero pegare kodi. Pegakare. Mare iro pegareu bokware. Ewadrarodunure rabodu dukeje boe emoka imagu etai. Dukodire itaidure Romano doge eimijera kurireu César aiwowo irore jiboeji ia iro pegareu bagai.
12Dukodire Festo makore okituware puduiwugei. Nono makore Pauloji pugeje. Akore: – Akaidure Romano doge eimijera kurireu aiwowo arore jiboeji ia aro pegareu bagai. Dukodire čemode atudo toro Roma ba kurireu ka nou Romano doge eimijera kurireu César bagai.
Boe Eimijera Agripa Aregodure Tuwie Berenice Apo Tuiorduwo Pauloji
13Ia meri keje boe eimijera Agripa aregodure tuwie Berenice apo Cesaréia ba kurireu ka tugimaduwo Festo apo. 14Nou boei barogwato Festo readodure ewiagai Paulo rore jiboeji makore jiboeji jamedu. Akore: – Ia imedu rakojere woe. Félix ure tugu baičoreuto. 15Itaregodure toro Jerusalém ba kurireu ka dukeje imeardure nou Judeu doge eimijerage emago pegare awu imeduji. Etaidure iwo bito. 16Mare ire ewie awu Romano kejewuge čeroji. Čemodukare ia ro pegareu bito nou ro pegareu ukare tugiegi dukeje. Mako pegare jiwuge emagomode tuiordu pegare jiboeji jokuto dukeje emare makomode ewadaru jipagi. Dukeje čerdumode ia ro pegare jiboeji dukeje čemode tugu baičoreuto rabodu, čemode bito rabodu. Ainore čerore. 17Dukodire awu Judeu doge eimijerage etaregodure woe. Ča nou barogwato imagore nou imedu bagai emago pegawo ji jokuto rugadu. 18Jordu pegare jiwuge eragojere woe mare emagokare imeardaere jiboeji. 19Emagore awu imedu meartorukaie Judeu doge erore jiboeji. Emagore awu imedu meartorukaie Pao Kurireu bataru jameduji. Ia imedu iere Jesus. Egore nou Jesus bie. Mare awu imedu Paulo akore nou Jesus bikaie. 20Ča iorduwakare emeartorure jiboeji dukodire imeardaere ituwo Jerusalém ba kurireu ka Paulo apo iorduwa pemegawo erore jiboeji, emeartorure jiboeji. Dukeje itaiwowo awu Paulo ia ro pegareu bagai. 21Mare Paulo aidukare. Makore taiduie Roma kejewu pagimijera kurireu aiwowo ia turo pegareu bagai. Dukodire ire tugu baičoreuto pugeje iwo utudo toro Roma ba kurireu ka pagimijera kurireu César bagai.
22Agripa makore Festoji. Akore: – Itaidure imearduwo awu imedu bataru jamedu boeji.
Festo akore: – Ča barogwato ameardumode ji.
23Nou barogwato Agripa aregodure tuwie aredu Berenice apo nou boe eimijera kurireu Festo aiwomode boe ero pegareu bagai kejewu bai ka. Tugobaigarege eimijerage etaregodure jamedu. Nou ba kurireu kejewuge eimijerage etaregodure jamedu. Ere turo pemegado tuwo turemo nou baito nono turo mogadure. Dukejere Festo makore Paulo bagai. Dukodire tugobaigarege ere turemo Paulo apo. 24Festo makore Agripaji, nou bai tadawu boei jamedu. Akore: – Tardure awu imeduji. Judeu doge emago pegare ji rugadu. Etaregodure woe nou tuwadaru pegareu tabo Jerusalém piji. Ekudugodure iwo bito rugadu. 25Mare iordukare ia ro pegare jiboeji iwo bito. Mare emare aidure Roma kejewu pagimijera kurireu aiwowo turore jiboe bagai ia turo pegareu bagai. Dukodire ire imeardae tawuje iwo utudo Roma ba kurireu ka nou pagimijera kurireu aiwowo rore jiboeji. 26Mare iorduwakare nuba imagomode atugoreboeto iwo nou pagimijera kurireu bie kodiba ire utudo toro. Dukodire ire arego mato taegai tawo iorduwado nuba imagomode atugoreboeto. Boe eimijera Agripa. Akaiwodo nou Paulo roji awo iorduwado iwo atugoreboe pemegado pagimijera kurireu bagai. 27Itaidure iwo ia atugoreboe pemegareu to iwo pagimijera jorduwado Paulo rore jiboeji. Iromode aino dukeje imode utudo Roma ba kurireu ka rugadu.
26Paulo Makore Turore Jiboeji Agripa Biagai
1Agripa makore Pauloji. Akore: – Aino. Amagodo arore jiboeji čewiagai.
Dukodire Paulo ure tugera nado. Dukejere makore turore jiboeji Agripa biagai. 2Akore: – Ikimijera nure aki. Imagomode irore jiboeji awiagai dukodire iwaidigirire awu meriji. Awu Judeu doge emago pegare irore jiboeji. 3Mare aki arduware Judeu doge erore jiboeji, egore jiboeji jamedu. Dukodire inogwamagudunure aino ai. Awiapaga pemegado iwadaruji.
4– Judeu doge eiamedu erduware i marigudu. Ikodu mai kimo dukeje itaregodure ino moto piji Jerusalém ba kurireu ka. Dukodire Judeu doge erduware irore jiboeji marigudu. 5Itaregodure dukeje ire fariseudo imi. Nou inodu otobiji fariseu ure imi jii aino. Fariseu doge emeartoru rakare rugadu turoji tumeardaeji. Dukodire emeardaere tumeartorure Pao Kurireu jituji. Imire ikare imegido nou fariseu doge ero piji. 6Aino ča iragojere woe. Mare marigudu Pao Kurireu makore jawu čewobei tuwo turo maku etai. Imeartorure nou Pao Kurireu bataruji rugadu. 7Čewobe etumana mage ere doze. Čeiamedu boe čemeartorure čebaga tabo awu Pao Kurireu makore jiboe jetuwo pudui rugadu dubagai. Dukodire čemago pemegare rugadu Pao Kurireuji meriji, boečoji čebaga tabo nou umode boe ekinorudowu bagai. Awu čemeartorure jiboe koiare awu Judeu doge emago pegare aino irore jiboeji. 8Emeartorure Pao Kurireuji mare emeartorukare Pao Kurireu umoduie nou umode boe ekinorudowu jewodudo pugeje bireuge epiji duji. Dukodire erdu pegare iwadaruji. 9Marigudu imeardaere iwo boe pegado meartorure nou umode boe ekinorudowu jiwugei. Emeartorure Jesus ure ema duji. Itaidure iwo etagedudo. 10Ainore irore Jerusalém ba kurireu tada. Nou ure Judeu doge enomea maku Pao Kurireu aiwuge eimijerage ere tugie maku inai iwo meartorure Jesus jiwuge etugu baičoreuto rugadu. Boe eimijerage etaidure tuwo ewido dukeje imeardaere nono nou boe eimijerage emeardae mogadure jamedu. 11Iture Judeu doge ere bato puiwu bai doge etae iro pegawo meartorure Jesus jiwugei nono. Imagore ei ewo tugera ra tumeartorure Jesus jitu piji emago pegawo Jesusji. Ikorigodure ei rugadu dukodire itu jaere ia moto ka meartorure Jesus jiwuge ewagai.
Paulo Readodure Ewiagai Jesus Rore Puduidu Boeji
12Paulo mako kimore. Akore: – Dukodire iture Damasco ba kurireu ka. Nou ure Judeu doge enomea maku Pao Kurireu aiwuge eimijerage ere boe eimijerado imi iro pegawo meartorure Jesus jiwugei nono. 13Nou awaraji meri aregodure baru oia ka dukeje iordure ia jorugu rakareuji. Urugu kodure meri urugu kori. Urugure baru piji i, uture itabowugei jamedu. 14Čeiamedu boe čewudure kuri po moto ka. Dukeje imeardure ia baru pijiwu makoji. Makore čewadaru Hebreu bataru tabo rugadu. Makore nou mariguduwu ikieji. Akore, “Saulo! Saulo! Kodiba aro pegare aino i? Arore nono ia boe korire jiwu tapira ro mogadure. Mare tapira karega. Aki ameartorukare i marigudu.” 15Dukeje inagore ji, “Ioguduba ure aki?” Nono makore i, “Ikiere Jesus. Aro pega remawunure i. 16Ma ča aragojedo. Ire ardudo aino i itugarewo aki. Aki amode boe ewie iboeji. Awu meri keje ardure aino i. Imode ardudo i rugadu iwo arduwado rugadu. Dukeje amode boe eiamedu boe ewie. 17Imode atudo boe tuginaiwuge etae. Imode akinorudo Judeu doge epiji, boe tuginaiwuge epiji jamedu. 18Amode erduwado rugadu awo emegido ero pegareu piji boečo piji ero pemegawo. Awo etawuje bope doge eimijera Satanás piji rakakawo ei pugeje emeartoruwo tu Pao Kurireuji. Emeartorumode i dukodire Pao Kurireu biagodumode ero pegareu jamedu boe piji. Emeartorumode i dukodire Pao Kurireu umode ture tugeragu jiwugedo emage.”
– Ainore Jesus makore i.
Paulo Readodure Turore Jiboeji Ewiagai
19Paulo mako kimore. Akore: – Ainore irore rugadu. Ikare ikera ra awu imeartorure jitu piji. Imeartorure rugadu nou baru pijiwu iordure jiboeji. 20Boetoji Damasco ba kurireu tada imagore boei ewo tugera ra turo pegareu piji ewo turo mekido tumeartoruwo Pao Kurireuji boe erduwawo ere tugera ra turo pegareu piji duji. Dukejere imagore aino Jerusalém ba kurireu tada jamedu. Dukeje imagore aino nou Judeu doge eno moto jamedu boe parugajeje. Imagore aino nou boe tuginaiwugei jamedu. 21Dukodire awu Judeu doge ere tugeragu aino i. Iragojere Pao Kurireu uwai tada dukeje ere tugeragu i tuwo iwido. 22Mare ji aino Pao Kurireu ure tugera maku inai dukodire iragojere aino woe ireadodutabo tawiagai, boe kurireuge ewiagai, marenarue doge ewiagai jamedu. Iwadaru ure nono jawu makore Pao Kurireu bataru jiwuge ewadaru mogadure. Iwadaru ure nono Moisés bataru mogadure. Ere pawie nuba boe mode pai. Inure tawie aino jamedu. 23Egore nou umode boe ekinorudowu bimoduie mare jewodumoduie pugeje. Jewodureu boetojiwu moduie ema. Umoduie Judeu doge ewie, boe tuginaiwuge ewie nuba eromode tuwo tuginorudo boe pegareu piji. Nou bataru umoduie nono joru urugu mogaduie. Mare joru karega. Nou bataru jire egoino umode boe erduwado boe remawuji kodi.
24Paulo makore aino dukeje Festo kudugodure bukajeje. Akore: – Akaora bai baire! Are arduwa kurido mare awu arduware jiboe ure akaora bai baido.
25Paulo akore: – Itaora pegakare, ikimijera. Boe jokodu jire inagoino rugadu tawiagai.
26-27Nono Paulo makore nou boe eimijera Agripaji pugeje. Akore: – Aki arduware awu inagoino jiboe jamedu boeji marigudu. Dukodire ipogurukare imagowo aino ai. Awu meartorure Jesus jiwuge ekare turo biado boe epiji. Dukodire arduware erore jiboeji rugadu, ewadaruji rugadu. Ameardae pemegado! Iorduware ameartorure jawu makore Pao Kurireu bataru jiwuge ewadaruji rugadu!
28Mare Agripa makore Pauloji. Akore: – Akaidure awo imeartorudo Jesusji kuri aino mare imeartorukare ji raga.
29Paulo akore: – Uu. Itaidure ameartoruwo Jesusji kuri aino. Ameartorukare kuri aino mare ia meri keje itaidure ameartoruwo Jesusji. Imagonure Pao Kurireu bagai baruto aparu tabo ameartoruwo ji rugadu, awu woewu boe eparu tabo emeartoruwo ji jamedu nono imeartoru moga jitu mogadure. Mare itaidukare boe ewo tagogudo corrente tabo nono ero moga i dure.
30Dukodire nou boe eimijera kurireu Agripa ure turagojedo. Nou boe eimijera kurireu Festo ure turagojedo jamedu. Nou Agripa uwie aredu Berenice ure turagojedo jamedu. Boe eiamedu boe ere turagojedo. 31Dukejere eture nou bai piji. Egore pui: – Awu imedu ro pega bokware, kodire ukare turugadu bitoduwo, tugudukawo baičoreuto jamedu.
32Nono Agripa makore Festoji. Akore: – Awu imedu utumode pabiji mare makore taiduie Roma kejewu pagimijera kurireu aiwowo turore jiboeji ia turo pegareu bagai. Dukodire pawo utudo toro pagimijera kurireu César bagai rugadu.
27Paulo Uture Roma Ba Kurireu Ka Ikarereu Tabo
1Nou boe eimijerage ere tumeardae tawuje tuwo čedudo Roma ba kurireu ka dukeje ere Paulo maku tugobaigarege eimijera ai. Nou tugobaigarege eimijera iere Júlio. Nou Roma padure kejewu moto iere Itália. Ere ia ro pegareuge emagu nou Júlio ai jamedu. Nou tugobaigarege ekiere Roma kejewu boe eimijera kurireu o tugobaigarege reo. 2Čedure nou moto piji ikarereu tabo. Nou ikarereu aregodure Adramítio ba kurireu piji. Ure turugadu tuduwo Ásia kejewu ba kurireu ka dukodire čedure tabo. Ia Macedônia kejewu imedu uture čedabo jamedu. Aregodure Tessalônica ba kurireu piji. Iere Aristarco. 3Nou barogwato čedaregodure Sidom ba kurireu ka. Júlio ro pemegare Pauloji dukodire Paulo uture ikarereu piji tuiorduwo tumedagei nono Sidom ba kurireu keje. Emagere ere ia tuge maku Paulo ai utuwo tabo. 4Sidom pijire čedure pugeje. Mare bakuru jeture čeno ikarereuji dukodire čedure Chipre moto kujegajeje nou bakuru jetukawo ikarereuji pugeje. 5Čegurugodure nou pobo maereu kajeje toro bakowu ka, Cilícia moto ka, Panfília moto ka jamedu. Dukeje čedaregodure Mirra ba kurireu ka. Nou Mirra rakojere Lícia moto keje. 6Čere čedawuje nou ikarereu piji nono. Dukejere Júlio jordure ia ikarereuji čeduwo tabo Itália moto ka. Aregodure Alexandria ba kurireu piji. Dukodire čere čedaredo nouia ikarereuto rugadu.
7Čedure pugeje. Čegodure gu gu je. Boe rakare čei čedaregoduwo Cnido ba kurireu ka. Bakuru jore čedogi dukodire čedukare nou bakuru togi rugadu. Dukodire čere čemegido čeduwo Creta moto ka. Čerdure Salmona Riji. 8Čegodu puredure nou Creta motoji. Čemaragodu rakare čedaregoduwo ia moto ka pugeje. Iere Čebadada Pemegareu. Puredure Laseia ba kurireuji.
9Čemugu raire nou Čebadada Pemegareu keje. Čedumode pugeje dukeje boe pegamode čei nou ari kejere bubutu pegareu bakuru pegareu buture tu tu je. Judeu doge ere tuwadae iado marigudu. Nou ewadae iere Boe Ero Pegareu Bariguduwo Epiji.
Nono Paulo makore nou ikarereu tadawu imei. 10Akore: – Ča iordure nuba boe mode pai. Padumode awu boe piji dukeje boe pegamode pai rugadu. Boe pegamode awu ikarereuji jamedu. Boe pegamode awu ikarereu tadawu boei jamedu. Ia pagi pawimode jamedu.
11Mare nou ikarereu tadawuge eimijera ure tumeardae maku nou tugobaigarege eimijera ai tuduwo pugeje. Emeartorukare Paulo bataruji kodi. 12Nou čebadada pemegakare ikarereu paduwo keje nou boeki keje. Dukodire boe eiamedu boe etaidure tuduwo pugeje. Etaidure tuduwo Fenice ba kurireu ka turagojewo nono boeki keje. Nou Fenice rakojere Creta moto keje. Nou Fenice kejewu čebadada pemegare ikarereuji paduwo nono boeki keje.
Bakuru Pegareu Jeture Ikarereuji
13Ia meri keje ia bakuru pemegareu aregodure sul piji. Dukodire nou mugure ikarereu tadawuge ime emeardaere tuduwo pugeje. Dukodire ere meriri tawuje pobo piji ikarereu utuwo pugeje. Dukeje čedure nou čebadada piji. Čegodu puredure nou Creta moto okwaji. 14Ma čare ia bakuru rakareu aregodure nou moto piji pugeje. Bakuru pegareu nure ema rugadu. 15Nou bakuru pegareu jeture ikarereuji. Čeragakare čewo ikarereu utudo nou bakuru togi dukodire čere čegera ra piji. Nou bakuru pegareu ure tuiodo ikarereu keje toro pobo maereu ka. 16Čeburedure ia moto roguji. Iere Cauda. Nou moto rogu ure nou bakuru raka tawuje tu jao. Dukodire čere ika ta pobo piji čewo barigu ikarereuto. 17Ere kogudo rugadu bakuru ukawo barigu poboto pugeje. Ere ikarereu kogudo bukigu kurireu tabo jamedu pobo pegareu ukawo ikarereu bowuje. Epagudure tubureduwo Líbia motoji pobo ko bokware nono kodi. Dukodire ere vela rawuje ikarereu re rakakawo. Bakuru uwo tuiodo ikarereu keje. 18Nou bakuru pegareu akedukare kuri je. Nou barogwato bakuru pegareu kimore dukodire ere ia meture ikarereu tadaboe barigu poboto. 19Nou barogwato bakuru pega kimore dukodire ere ia tumaragodure ikarereuji taboboe barigu poboto jamedu ikarereu barigoduwo, bakuru pegareu ukawo ikarereu bowuje. 20Nou bakuru pegareu jeture ikarereu jiwu meri makare rugadu. Čerdukare meriji, kuiejeji boečoji jamedu. Dukodire čemeardaere čewimoduie rugadu.
21Boe enogwagekare marigudu. Dukodire Paulo ure turagojedo tumagowo boei. Akore: – Tameartorukare iwadaruji toro Creta moto keje. Tameartorukare iwadaruji dukodire awu boe pegareu buture aino pai rugadu. 22Mare aino inure tawie. Taragado tai rugadu. Pawimodukare rugadu. Tu awu ikarereu akedumode. 23Imeartorure Pao Kurireuji. Utugare nure imi kodi. Ure ia tudugare baru tadawu arego itae boečoji. 24Nou baru tadawu makore i. Akore, “Apagudukaba. Aragojemode Roma kejewu boe eimijera kurireu César jokorai. Pao Kurireu pemegare ai rugadu dukodire umode awu boe ekinorudo awu bakuru pegareu piji ewikawo.” 25Ainore Pao Kurireu akore i. Dukodire inagoino tai. Tabagudukaba. Taragado tai. Imeartorure Pao Kurireu bataruji rugadu. Umode nono mako moga i dumogadure. 26Mare nou bakuru pegareu umode parego ia pobo maereu tadawu moto rogu ka.
27Boečo oto padure catorze bakuru ure čerego kimo nou pobo maereu to dukeje. Nou pobo maereu iere Mediterrâneo. Boečo oia keje nou maragodure ikarereu jiwuge erduware pobo ko akedunure duji. Čebureduiago motoji. 28Dukodire ere bukigu rawuje buwodo ri tabo poboto tuwo pobo ko remagu. Nou pobo kore trinta e seis metros nono. Epagare tu jao. Nono ere bukigu rawuje pugeje. Pobo kore vinte sete metros. 29Nono epagudure ikarereu bure jetuwo toriji dukodire ere meriri rawuje dure pobe puibiji tuwo ikarereu buredo nono. Nono nou maragodure ikarereu jiwuge emagore tuwaire ewagai barogwakododuwo kuri je rugadu. 30Nono nou maragodure ikarereu jiwuge eiago taredo ikarereu piji. Ere ika rawuje poboto ikarereu piji. Boe emeardaere emaragoduie duji. 31Mare Paulo makore tugobaigarege eimijeraji. Akore: – Nou maragodure ikarereu jiwuge etumode pabiji dukeje tamodukare taginorudo awu bakuru pegareu piji.
32Dukodire nou tugobaigarege ere bukigu kado nou ikarereu piji ika utuwo epiji maragodure ikarereu jiwuge ekawo taredo nou ikato. Ča bakuru ure tuiodo nou ika keje nou ikarereu piji.
33Barogwakododure dukeje Paulo mako raire ei enogwagewo. Akore: – Tagwagekare jiwu merire catorze. 34Ča inogwamagudunure tai. Ia tage ko taragawo tawo taginorudo awu bakuru pegareu piji. Tamode taginorudo rugadu. Tamodukare tagogorido. Ia tagao tawujedumodukare tagaora piji.
35Paulo makore aino dukeje ure tugeragu amireuji. Nono imadure Pao Kurireu apo nou amireu paru tabo nou boe ewiagai. Dukeje ure nou amireu kado. Nono ure ia kowuje. 36Dukodire nou boe emororamagadukare pugeje. Eiamedu boe enogwagere jamedu. 37Nou boe enodo padure kejewure 276 nou ikarereu tada. 38Eiamedu boe ekuredure tuge tabo dukeje ere nouia trigo jamedu boe barigu poboto nou ikarereu barigoduwo.
Ikarereu Ure Tugado
39Barogwakododure dukeje čerdure ia motoji. Mare nou maragodure ikarereu jiwuge erduwakare nou motoji. Mare erdure ia kugaruji nono pobo maereu okwai. Etaidure tuwo nou ikarereu bu nou kugaru keje. 40Dukodire ere nou kogure meriri tabowu bukigu iku kado. Ere maragodure ikarereu jiwu traiga doge ekiwuje maragoduwo nou ikarereuji pugeje. Nono ere vela rutudo bakuru uwo ikarereu redo pugeje. Dukejere čedure mare ikarereu aregodukare pobo okwa ka. 41Ča nou ikarereu ure tuwuredo ia pobo ko bokwareu kugaru keje. Nou ikarereu tudure nono. Nou pobo pegareu jetu rakare nou ikarereuji rugadu dukodire uiago nou ikarereu bowuje.
42Tugobaigarege ere tumeardae tawuje tuwo baičoreu tadawuge ewido, ekawo tuginorudo nou ikarereu piji tugobaigarege epiji. 43Mare eimijera aidukare Paulo biwo dukodire makore tugobaigaregei ekawo baičoreu tadawuge ewido. Nono makore eiamedu boei ewo taredo poboto tugurugoduwo boe kireu ka. 44Iage ewo tugeragu ia ikarereu pijiwu iraji tuduwo tabo boe kireu ka. Aino čare čeiamedu boe čedaregodure boe kireu ka rugadu. Dukodire ia čegi čewikare poboto.
28Edure Malta Moto Keje
1Čedaregodure nou moto ka dukeje čerduware nou moto iere Malta aino duji. 2Nou Malta kejewuge ero pemegare čei rugadu. Bubutu aregodure čedae. Biakure čei rugadu. Dukeje iage ere jorugo čenai. 3Paulo uture jerigi bagai. Ure tugeragu jerigiji dukeje ure bu joru keje. Ča awagu ure tudawuje jerigi piji joru uru koia. Ure toedo Paulo ieraji. 4Nou Malta kejewuge erdure nou inoduji dukeje egore pui: – Awu imedu ro pegareu nure ema rugadu. Ure boe ewidowu nure ema rugadu. Ure tuginorudo pobo pegareu piji mare umodukare tuginorudo tuwi piji rugadu. Bimode rugadu.
5Mare Paulo ure nou awagu barigu tugera piji joruto. Boe pegakare ji rugadu. 6Nou Malta kejewuge epagare Paulo iera bokoduwo, biwo pači je. Čare epagare ji je mare boe pegakare Pauloji. Pegakare rugadu. Dukodire ere tumeardae mekido pugeje. Egore: – Boe etuwari nure ema!
7Nou moto kejewuge eimijera iere Públio. O boepa padu puredure nou čeragojere kejewu boeji. Dukodire makore čei čeragojewo pudabo tuwai keje. Čeragojere uwai tadawu merire pobe metia bokware. 8Nou Públio uo kogodure rugadu. Ukare tuie bu tubadure kejewu ira piji. Biri urure. Pegagurure jamedu. Ča Paulo ure turemo nou Públio uo padure tadawu baito. Makore paru tabo baruto Pao Kurireu bagai. Ure tugera bu keje. Nono ure pemegago. 9Rore aino dukeje nouia kogodureu boe etaregodure nou Malta moto jamedu boe piji. Ure epemegago jamedu. 10Dukodire emago pemegare čei. Ere turo pemegado čei. Ere toe maku čenai. Čedure pugeje dukeje čegere, čegudau areiare jamedu.
Paulo Uture Malta Moto Piji Roma Ba Kurireu Ka
11Arire pobe metia bokware dukeje čedure Malta moto piji ia ikarereu tabo pugeje. Nou ikarereu aregodure Alexandria ba kurireu piji. Nou ikarereu keje ia santo doge ekie padure, du ekiere Castor e Pólux. Nou ikarereu padure nono Malta moto keje nou boe ki keje. Aino čare čedure nou ikarereu tabo Malta moto piji. 12Čedaregodure Siracusa ba kurireu ka dukeje čeragojere nonowu merire pobe metia bokware. 13Dukeje čedure Siracusa ba kurireu piji ikarereu tabo. Nou barogwato čedaregodure Régio ba kurireu ka. Nou barogwato bakuru ure tumegido. Aino ča bakuru ure turugadu tuwo ikarereu re rakado. Dukodire merire pobe čei čedaregoduwo Pozuoli ba kurireu ka. 14Nou ba kurireu keje čerdure ia čemedagei. Meartorure Jesus jiwuge nure emage. Emagore čei čebaduwo pudabo. Čeragojere ebo kejewu semana oto padure mitotu je. Dukeje čedure Roma ba kurireu ka čewure tabo. 15Nou Roma kejewu čemedage meartorure Jesus jiwuge emeardure čedaregoduiago duji dukeje eture čedogi toro Ápio ba kurireu ka, Três Vendas ba kurireu ka. Paulo jordure nou meartorure Jesus jiwugei dukeje imadure Pao Kurireu apo nou boe doge etaregodure tudogi duji. Jakaregodure pudui rugadu.
Paulo Rakojere Roma Ba Kurireu Keje
16Čedaregodure Roma ba kurireu ka dukeje ekare Paulo tugu baičoreuto. Ere mugudo ia bai tada. Tugobaigare mugure taiwo tabo ji nono. 17Merire pobe metia bokware dukeje Paulo makore Judeu doge eimijerage ewagai ewo bato pui nono tuwai tada. Etaregodure dukeje Paulo makore ei. Akore: – Iwobe nure tagi. Iro pegakare pawobei Jerusalém ba kurireu tada. Ikare ikera ra jawu pawobe ere maku pagaiwu paro piji. Mare ere tugeragu i dukodire ere imagu Romano doge etai. 18Romano doge enara raire i dukeje etaidure tuwo itudo pugeje. Erdukare ia iro pegareuji dukodire ekare iwido. 19Mare pawobe Judeu doge etaidukare nou emeardaeji. Dukodire imagore ei ewo imagu Romano doge eimijera kurireu César ai aiwowo ia iro pegareu bagai. Mare imagokare iaboeji awu pawobe Judeu doge erore iboeji. 20Dukodire imagore aino tawagai iwo tawie. Pawobe Israel doge epagare umode boe ekinorudowu bagai. Dujire imeartorure jamedu. Dukodire ikogudodure woe.
21Nou boe egore: – Čewobe Judéia moto kejewuge ekare ia atugoreboe maku jetu čewagai tuwo čewie aiboeji. Aregodure nou Judéia moto pijiwuge čewobe emagokare iaboeji čewiagai jamedu. Erdu pegakare ai. 22Mare čedaidure čerduwawo ameardaeji. Čemeardure boe emago pegare nou meartorure ameardae jiwugei duji.
23Dukodire ere ia meri tawuje tuwo bato pui pugeje Paulo apo. Nou meriji Judeu doge etaregodure Paulo uwai ka pugeje. Emagare rugadu. Paulo ure erduwado tumeardaeji ča boečoto jii toro boečodumodu ka. Ure erduwado nuba Pao Kurireu rore pugeje, nuba Pao Kurireu utugarege ere, nuba boe eromode tuwo tugimijerado Pao Kurireuče. Paulo makore ei Moisés ure bu bapera kejewu Pao Kurireu bataruji. Makore ei mariguduwu makore Pao Kurireu bataru jiwuge ere bu bapera kejewu Pao Kurireu bataruji jamedu. Akore Jesus jie egoino. 24Aino Paulo ure nou iage emeartorudo Jesusji. Mare iage emeartorukare rugadu. 25Eture Paulo piji dukeje ekare tumeardae maku puai. Paulo makore ei marigudu. Akore: – Pao Kurireu Uwari mako pemegare marigudu jawu pawobei. Ainore akore nou makore Pao Kurireu bataru jiwu imedu Isaías biagai. 26Akore,
– Atudo awobe etae amagowo ei. Amagodo aino: “Tameardumode iwadaruji jii je mare tarduwamodukare iwadaruji. Tardumode irore jiboeji jii je mare tameartorumodukare i irore jiboeji rugadu. 27Tagaidukare tameartoruwo Pao Kurireuji. Tagaidumode tameartoruwo Pao Kurireuji dukeje tagaiwomode Pao Kurireu rore jiboeji tarduwawo Pao Kurireu meardaeji. Tagaidumode tameartoruwo Pao Kurireuji dukeje tawiapaga pemegamode Pao Kurireu bataruji tarduwawo Pao Kurireu meardaeji rugadu. Dukejere tagaidumodukare taro pegareuji pugeje. Tamode tagera ra taro pegareu piji. Dukodire imode taginorudo taro pegareu piji. Mare tagaidukare tameartoruwo, tawijare mare tawiapaga pemegakare. Taekure mare tare taeku bu pugeje tagaiwokawo Pao Kurireu rore jiboeji.”28.27 Awu bataru padure Isaías 6.9-10 keje.
– Ainore Pao Kurireu akore marigudu.
28-29Nono Paulo uiago tuwadaru akedudo nou tuwobe Judeu dogei dukeje. Akore: – Inure tawie. Pao Kurireu bataru pemegareu utunure boe tuginaiwuge etae jamedu Pao Kurireu uwo ekinorudo jamedu. Emagere emeartorumode ji rugadu.
Paulo akore aino dukeje nou Judeu doge eture piji. Emagore pui: – Akaidure nou Paulo bataruji? Akaidukare bataruji? Amagodo.
30Paulo mugure nou bai kejewu jorure pobe ji nono. Tugobaigarege edure nono jamedu tietu tabo ji. Paulo ukimadure nou aregodure pudaewu boe eiamedu boebo. 31Makore Pao Kurireu bataruji ewiagai. Ure erduwado nuba eromode tuwo tugimijerado Pao Kurireuče. Ure erduwado Pagimijera Jesus Cristo roji bataruji. Pogurukare tumagowo jiboeji. Tugobaigarege erdu pegakare nou Paulo makore jiboeji jamedu.