2 Timóteo
Paulo Ure Awu Atugoreboe Boigoduwu Maku Toro Timedia Timóteo Bagai
11Paulo nure imi. Jesus Cristo ure tuwadaru maku inai Pao Kurireu meardae tabo. Ure itudo iwo boe ewie awu Jesus bataruji pamugu pemegawo Jesus Cristo apo.
2Inure awu atugoreboe pemegado iwo maku imeardu kurire jiwu itonaregedu Timóteo ai. Iwadaru koiare ameartorure Jesusji dukodire itonaregedu nure aki. Itaidure Pao Kurireu uwo turo pemegareu maku akai rugadu. Jesus Cristo uwo turo pemegareu maku akai rugadu. Enogudugodure akabo rugadu. Ewo apemegado boei. Ewo boe epemegado ai jamedu.
Paulo Mako Pemegare Pao Kurireuji
3Imago pemegare ai aro pemegare jiboeji Pao Kurireu biagai. Utugare nure imi dukodi. Imeartoru pemegare bataruji dukodi. Jao iwobe emeartorure Pao Kurireu bataruji jamedu. Imagomode Pao Kurireuji aparu tabo meriji, boečoji dukeje ikimadumode Pao Kurireu apo rugadu. 4Iwiabuture aegurure dukeje. Dukodire itaidure rugadu iorduwo ai pugeje awo iagaredo i rugadu. 5Iwiabuture ameartorure Jesus jitu keje. Ameartoru remawure Jesusji rugadu. Ameartorure Jesusji nono ače pega Loide meartoru mogadure. Ameartorure nono ače Eunice meartoru mogadure. Boe jokodu jire inagoino. 6Dukodire itaidure iwo awiabutudo pugeje. Ire ikera bu akaora keje dukeje Pao Kurireu ure turo pemegareu maku akai tuwo tumaragodae maku akai amaragodaeče. Akaba akera ra awu Pao Kurireu ure maku akaiwu amaragodae piji. Aragado ai awo nou amaragodae to rugadu. 7Pao Kurireu ure Tuwari maku pagai. Mare nou Uwari umodukare pabogurudo. Mare paga karega. Uwari umode turaga maku pagai. Umode pameardu kurido boei. Umode turaga maku pagai tuwo paro udo tuginai.
8Dukodire apogurukaba amagowo Pagimijera Jesus jiboeji boe ewiagai. Imagore Pagimijera Jesus Cristo jiboeji boe ewiagai dukodire iragojere baičoreu tada. Apogurukaba iče. Pamedia nure pugi. Boe ero pegamode ai jamedu mare akaba akera ra nou Jesus bataru pemegareu piji. Pao Kurireu umode aragado rugadu. 9Pagimijera Jesus ure paginorudo rugadu. Emare makore pawagai tuwo paro udo tuginai paro pegareu piji paro pemegawo. Pagi pagare paginorudo. Emare meardaere tuwo paginorudo. Turo pemegareu koiare ure pado paginorudo. Marigudu rugadu awu moto bokware kimo. Pao Kurireu ukare moto to raga. Mare meardaere rugadu tuwo paginorudo turo pemegareu dukodi. Mariguduboe jire akoino. Awu moto bokware kimo. Mare Pao Kurireu jorduware paro pegamode rugadu. Dukodire meardaere Jesus Cristo biwo paro pegareu moriče. 10Ča ure paginorudowu Jesus Cristo aregodure mato moto ka dukodire boe erduware nou Pao Kurireu meardaeji. Boe emeartorumode Jesusji dukeje emororamagadumodukare tuwimode duji pugeje. Ewimode dukeje umode eewodudo pugeje ewikawo pugeje emeartorure ji dukodi.
11Pao Kurireu ure tugeragu i tuwo itudo Jesus bataru pemegareu tabo iwo boe erduwado ji, iwo boe ewie Pao Kurireu umoduie meartorure puduiwuge ekinorudo. 12Ire boe ewie rugadu. Mare iage etaidukare iwadaruji dukodire ero pegare i. Mare imeartoru rakare kimo Pao Kurireuji. Iorduware ji rugadu. Rakare rugadu tietu pemegawo i jii toro ure maku inaiwu imaragodae akedu ka. 13Ameartoru rakado ire arduwado jiwu Pao Kurireu bataruji jamedu. Nou bataru umode aro pemegado. Akaba akera ra ameartorure Jesus jitu piji. Akaba akera ra ameardu kurire boei dupiji. Pameartorumode Jesusji dukeje emare umode pameartoru rakado. Emare umode pameardu kurido boei. 14Pao Kurireu Uwari meture padada. Awiapaga pemegado ji uwo aragado akawo ure maku akaiwu Pao Kurireu bataru mekido.
15Arduware nou Ásia kejewuge meartorure Jesus jiwuge eiamedu boe ere tugera ra ipiji duji. Imedu Fígelo uture ipiji. Imedu Hermógenes uture ipiji. 16Mare imedu Onesíforo ure iagaredo i rugadu tu tu je. Iragojere baičoreu tada mare emare pogurukare taregoduwo itae. Dukodire itaidure Pao Kurireu ro pemegawo uwobei rugadu. 17Nou Onesíforo aregodure Roma ba kurireu ka dukeje aiwore iwagai rugadu. Aiwore iwagai dukeje jordure i rugadu. 18Ire awie marigudu awu Onesíforo uie tugera maku inai rugadu toro Éfeso ba kurireu keje jamedu. Pagimijera Jesus aiwomode boe eiamedu boe eroji mare itaidure Pagimijera okudugoduwo nou Onesíforo apo.
2Jesus Cristo Utugarege Nure Pagi
1Iwadaru koiare ameartorure Jesusji. Dukodire are nono itonaregedu mogadure. Pamugu pemegamode Jesus Cristo apo dukeje umode turo pemegareu maku pagai. Ča ameartoru rakado ji. 2Imagore boe eiamedu boe ewiagai Pao Kurireu bataruji. Ča akeragu nou imagore jiwu Pao Kurireu bataruji awo ia boe pemegareuge erduwado ji jamedu. Emagere emode ia boe erduwado ji jamedu.
3Jesus Cristo utugare nure aki dukodire ia boe etaidumodukare ai. Ero pegamode ai. Mare akaba akera ra ameartorure Jesus jitu piji. Nono Jesus utugare pemegareu mode aki. 4Tugobaigarege emeardaemodukare ia boe emaragodaeji. Tugobaigarege emeardaemode tu tumeartoruwo tugimijeraji tuwo tugimijera jakaredo pudui. Jesus utugarege ere nono nou tugobaigarege emogadure. Mare tugobaigarege karega. Jesus utugarege emeardaemode tu tumeartoruwo tugimijera Jesusji. 5Boe eregodumode tuwaduwo. Etaidumode taregoduwo boe etododai. Mare ewadu pemegawo tuwo tugeragu nou trofeuji. Jesus utugarege ere nono nou rekodure tuwadae jiwu mogadure. Mare rekodure tuwadae jiwu karega. Jesus utugarege emeartorumode Jesus bataruji turaga tabo. 6Maragodure to boepa tadawu boe makudumode ai boetoji. Jesus utugarege ere nono nou maragodure to boepa jiwu mogadure. Mare maragodure boepa jiwu karega. Jesus utugarege eire Jesus ro pemegamode boetoji. 7Awiagoromode awu iwadaruji dukeje Pagimijera Jesus umode arduwado awu iwadaru jamedu boeji.
8Awiagodukaba Jesus Cristo piji. Ire boe ewie Jesus bataru pemegareuji Jesus jewoduie duji. Jao Judeu doge eimijera kurireu Davi uwobe pijire Jesus boture. Ainore inagore boe ewiagai. 9Imagore nou Jesus bataru pemegareuji dukeje ia boe etaidukare iwadaruji. Ero pegare i rugadu. Ere ikogudo corrente tabo tuwo itugu baičoreuto imagokawo nou bataruji pugeje. Mare ia meartorure Jesus jiwuge emago kimore Jesus bataruji boe ewiagai imugato. Pao Kurireu bataru nure ema dukodi. 10Dukodire ire iragado imagokawo nou ro pegare iwuge ewadaru jipagi. Aino ča Pao Kurireu ure tugeragu jiwuge erduwamode Pao Kurireu bataruji jamedu emeartoruwo Jesusji. Emeartorumode ji dukeje Jesus Cristo umode ekinorudo. Ewimode dukeje umode eewodudo pugeje ewikawo pugeje eragojewo Pao Kurireu apo jii toro rugadu.
11Boe jokodu jire meartorure Jesus jiwuge egoino:
– Meartorure Jesus jiwuge eromodukare turo pegareuji pugeje. Nono ewimode dukeje emugu pemegamode Jesus apo.
12– Meartorure Jesus jiwuge emeartorure Jesusji rugadu. Boe pegamode ei mare emoka tugera ra tumeartorure Jesus jitu piji. Emodukare tugera ra tumeartorure Jesus jitu piji dukeje Jesus umode boe eimijeragedo emage etu pemegawo boei pudabo. Mare boe emagomode tuiorduwakaie Jesusji dukeje emare makomode tuiorduwakaie ei jamedu. Aregodumode dukeje biapagamodukare ei jamedu.
13– Meartorure Jesus jiwuge etaidumode tuwo tugera ra tumeartorure jitu piji mare Jesus umodukare tugera ra turo pemegareu piji. Umodukare tugera ra tumeardae pemegareu piji rugadu.
Ainore Jesus Utugare Pemegareu Romode
14Meartorure Jesus jiwuge emode bato pui akabo dukeje ewie rugadu erugodukawo pui to bakaru keje. Ewie Pao Kurireu aiwoie ei duji. Erugodumode pui to bakaru keje dukeje boe pemegamodukare ei. Emode ia boe ekiarigo rugadu. 15Pao Kurireu aiwore boei rugadu. Dukodire aro pemegado Pao Kurireu aidu pemegawo ai. Aromode aino dukeje apogurumodukare amaragodaeji. Amode boe erduwado rugadu Pao Kurireu bataru remawuji. Amodukare Pao Kurireu bataru pegado. 16Boe emago pagamode pui mare apuredukaba ei. Etaidure nou tumagore jiboe jire boe emeartoruwo. Dukodire ere boe edo tugera ra Pao Kurireu bataru piji. 17Boe emago pagamode pui dukeje ewadaru ure nono ia boe ewiri bori mogadure. Mare boe ewiri bori karega. Boe emago pagamode pui dukeje emode boe edo tugera ra Pao Kurireu piji. Emode boe ewiagodudo Pao Kurireu piji rugadu. Nou imedu Himeneu bataru koiare ure boe etudo Pao Kurireu piji. Ia imedu Fileto bataru koiare ure boe etudo Pao Kurireu piji jamedu. 18Nou ime pobedu doge ere tugera ra Pao Kurireu bataru remawu piji dukodire ere iage emeartoru akedudo. Egore meartorure Jesus jiwuge eewodumodukaie pugeje. 19Mare Pao Kurireu bataru remawu umodukare tumegido. Umode boe emeartoru rakado rugadu. Akore: – Pao Kurireu jorduware meartorure puduiwugei rugadu.
Akore: – Boe egomode tumeartoruie Pao Kurireuji dukeje emode tugera ra turo pegareu piji.
Ainore Pao Kurireu akore.2.19 Awu bataru padure Números 16.5 keje.
20Ia bai kurireu tadare boe enoe makare. Boe ere copudo tori kuieječe. Boe ere aria merirido prata meririče. Boe ere tubadu irače. Boe ere turuwobodo rotuče. Boe emode tugeragu iaji togwagewo keje meri jameduji. Mare ia jire boe emode tugeragu ji togwagewo keje tu boe eimijerage etaregodu keje. 21Meartorure Jesus jiwuge emode turo pegareu barigu tubiji dukeje Pao Kurireu umode tumaragodae pemegareu maku etai. Umode erodo tuginai ero pegareu piji ero pemegawo Tugimijera Jesus ai. Etumodukare Tugimijera Jesus maragodae piji. Ere turugadu turo pemegawo rugadu. Pao Kurireu aidumode ei rugadu. 22Iparedu nure aki mare akera ra ipare nogware etaidure jiboe piji. Aragado ai awo aro jetorodo, ameartoruwo Pao Kurireuji rugadu, ameardu kuriwo boei, aedu pemegawo boebo apemegawo ei rugadu. Ainore makore Pao Kurireu bagaiwuge eromode rugadu. Etaidure tu boe pemegawo boei rugadu. 23Inagore aino pugeje. Boe emago pagamode pui mare akaba apuredudo ei egoino duji. Etokimode pui. Ire awie. 24Mare Pagimijera Jesus utugare nure aki. Dukodire akokikaba boei. Aro pemegado boe eiamedu boei. Amago pemegado awo erduwado. 25Iage etaidumodukare awadaruji mare amago rakakaba ei. Amago pemegado ei. Dukeje Pao Kurireu umodukare etagedudo kuri aino ewo tugera ra turo pegareu piji etaidukawo turo pegareuji pugeje emeartoruwo Pao Kurireu bataru remawuji. 26Bope doge eimijera ure ekiripagado marigudu dukodire ure emeartorudo tuwadaruji. Mare erduwamode Pao Kurireu bataru remawuji dukeje emeardae pemegamode. Emeartorumode Pao Kurireu bataruji dukeje emode tuginorudo bope doge eimijera piji.
3Ainore Boemode Awu Moto Akedu Keje
1Awiagodukaba. Awu moto puredugodumode tageduwo dukeje boe pegamode boei rugadu. 2Boe emeardaemode tu pudui. Emeardaemode tu tuwo toe kurido. Emode tugurido tuwadaru očaro tabo. Emeardaemode tubemegaie ia tumedage ekori. Emago pegamode boei. Emeartorumodukare tujeji tuoji. Boe emode boe maku etai mare emago pemegamodukare jipagi. Emodukare turo udo tuginai turo pegareu piji rugadu. 3Ero pegamode boei dukodire epemegamodukare boei. Enogudugodumodukare boebo dukodire ewiagodumodukare boe ero pegareu piji. Emagomode boe ero pegaie mare tuwadrarodu tabo. Emodukare turagado pudui dukodire eroiwamodukare tuwo tugera ra turo pegareu piji. Ero rakamode boei tuwo boe etogorido. Erdu pegamode ro pemegareugei. 4Emeardaemode tu tuwo boe ekiripagado. Emeartoru bokwamode boe ewadaruji. Enojaromode tuwadaruji boe ewadaru jipagi. Etaidumode tu tuwaduwo. Emeardu kurimodukare Pao Kurireuji. 5Emagomode ia Pao Kurireu bataruji. Etaidumode turowo aino Pao Kurireu ro mogadure. Mare emeartorumodukare rugadu Pao Kurireuji. Apuredukaba ei arokawo nono ero mogadure. 6Iage ere turemo boe ewaito tuwo tumeardae maku areme etai. Nou areme eragakare tuwo tumeardae pemegado iage emeardae pegareu piji. Ero pegare dukodire ekiarigodure rugadu nou turo pegareuji. Kočare etaidure tu boe pegareuji dukodire eroino. 7Awu areme etaidure tuiorduwawo mare marigudu erduwakare boe jokodureu bataruji. 8-9Jao pamana Moisés ure boe erduwado. Mare imedu Janes, imedu Jambres emago pegare nou Moisés bataruji jawu pawobe ewiagai. Mare jawu boe emeartorukare Janes bataruji. Emeartorukare Jambres bataruji. Aino ča awu boe erore pugeje nono jawu Janes, Jambres ero mogadure. Awu boe etaidukare boe jokodureu bataruji. Etaora ukare turugadu tuwo ia tumeardae pemegareu tawuje. Ere tugera ra tumeartorure Pao Kurireu jitu piji. Mare boe emeartorumodukare ewadaruji. Boe erduwamode awugei erduwa bokware duji. Aino ča boe emeartorumodukare awugei nono jawu boe emeartorukare Janes, Jambres ewadaru jitu mogadure jamedu.
Okituwamode Ji Pugeje
10Mare aki ameartorure rugadu iwadaruji. Arore nono iro mogadure. Ameardaere nono imeardae mogadure. Ardure nuba boere i. Ire imeardae tawuje rugadu. Imeartorure Jesusji. Iwudugugodure i boebo. Imeardu kurire boei. Ikare ikera ra imaragodae piji. 11Boe ero pegare i imeartorure Jesusji dukodi. Boe pegare i itaidure Jesusji dukodi. Arduware awu jamedu boeji. Arduware nuba boere i Antioquia ba kurireu keje. Arduware nuba boere i Icônio ba kurireu keje. Arduware nuba boere i Listra ba kurireu keje. Boe ero pegare i rugadu. Mare Pagimijera Jesus ure ikinorudo awu boe pegareuge epiji. 12Ča inure awie. Boe etaidumode turo pemegawo tumugu pemegawo Jesus Cristo apo dukeje ro pegareuge ero pegamode ei rugadu. 13Ro pegareuge emode turo pegado rugadu turo pegareu kori. Mare ekiripagamode rugadu. Ure tuwiadowuge emode boe ekiripagado rugadu. Mare ekiripagamode jamedu. 14Mare aki arokaba aino. Ameartorudo rugadu boe jokodu jiwu bataruji. Arduware ji rugadu. Arduware ere arduwadowu boei. 15Iparedu rogure aki dutabo ere arduwado Pao Kurireu bataruji. Pao Kurireu bataru umode boe erduwa kurido. Pao Kurireu bataru koiare boe emeartorumode Jesus Cristoji. Emeartorumode ji dukeje umode ekinorudo boe pegareu piji. 16Pao Kurireu bataru jamedu boe ure turugadu. Ure tuwadaru maku rugadu boe etai ewo bu bapera keje. Pao Kurireu bataru tabore boe emode boe erduwado boe jokodureuji. Pao Kurireu bataru tabore boe emago pegamode boe ero pegare jiboeji. Pao Kurireu bataru tabore boe emode boe edo turo pegareu barigu tubiji. Pao Kurireu bataru tabore boe enogituwamode boei ero pemegawo. 17Dukodire boe epemegamode Pao Kurireu utugaregewo emage. Eroiwamode turowo ro pemegareu jamedu boeji.
41Jesus Cristo aregodumode rugadu. Aiwomode nou bireuge eroji. Aiwomode bikareuge erore jiboeji jamedu. Aiwomode ero pemegareu bagai ero pegareu bagai. Aregodumode dukeje boe eiamedu boe eimijera kurireu mode ema. Ema koiare ure imagodo aino ai. Pao Kurireu koiare ure imagodo aino ai. 2Amago pemegado Pao Kurireu bataruji boe ewiagai. Boe etaidumodukare tuwiapagawo awadaruji mare akaba akera ra amago piji. Boe erduwado Pao Kurireu bataruji awadaru pemegareu tabo awo boe emeardae pemegareu maku etai. Awo boe emeardae pegareu barigu epiji. Awo boe emeartoru rakado. Mare akorigodukaba boei. Amago raka kaba amagore boei dutabo. 3Ia meri keje boe ewiapagamodukare boe jokodureu bataruji. Ewiagoromode tu taidure jiboeji. Boe emagomode etaidure jiboeji dukeje etaidumode tumearduwo ewadaruji. Mare boe emagomode etaidukare jiboeji dukeje ewiapagamodukare nou bataruji. 4Ewiapagamodukare boe jokodureu bataruji. Ewiapagamode tu ia boe jokodukareu bataruji. 5Mare akire amode aro pemegado meri jameduji. Boe pegamode ai mare amagokaba. Pao Kurireu utugare nure aki. Amaragodudo Pao Kurireu ai. Amago pemegado Pao Kurireu bataru pemegareuji boe ewiagai boe emeartoruwo Jesusji rugadu.
6Mare imire ire imagu Pao Kurireu ai marigudu imaragoduwo Pao Kurireu ai. Mare aino meri aregodure todo pa ka i iwiwo. 7Ire imaragodae iado Pao Kurireu ai. Ire iragado imaragoduwo Pao Kurireu ai nono ia boe emoga turagado tuwadae tabo dumogadure. Ikare ikera ra imeartorure Jesus jitu piji. 8Irore Pao Kurireu aidure jiboeji. Jesus aiwonure boe eiamedu boe eroji. Aregodumode dukeje umode iaboe pemegareu maku inai iro pemegareu moriče. Boe epagamode Jesus bagai tumeardu kurire jitu tabo. Dukeje umode iaboe pemegareu maku eiamedu boe etai ero pemegareu moriče.
Paulo Ure Tuwadaru Iado
9Aragado akaregoduwo itae kuri aino. 10Imedu Demas biapagare tu tuwo akirodo boeji toče dukodire ure tugera ra ipiji. Ure marigudu toro Tessalônica ba kurireu ka. Imedu Crescente uture ipiji Galácia moto ka. Imedu Tito uture ipiji Dalmácia moto ka. 11Lucas emare rakojere tu woe itabo. Akaiwodo João Marcos bagai. Akarego mato apo itae. Emare maragodumode itabo. 12Ire Tíquico utudo Éfeso ba kurireu ka. 13Akarego mato ikudau areia biaku epa tabo. Iwiagodure piji imedu Carpo uwai tada Trôade ba kurireu keje. Akarego ino bapera tabo mato iwagai jamedu. Nou tapira biri emare ire ino baperado ema. Akarego tabo mato iwagai.
14Maragodure meriri jiwu imedu Alexandre emare ro pegare i rugadu. Mare Pagimijera umode nou Alexandre udo turo pegareu morido. 15Aeku jado ji. Aidukare pawadaruji rugadu. Korigodure pai rugadu.
16Awu Roma kejewu boe eimijera kurireu makore iwagai ireadoduwo iroji tuwiagai. Ireadodure mare imedage eiamedu boe ere tugera ra ipiji. Boe edukare itabo tumagowo iro pemegareuji. Tu imire ireadodure iroji nou boe eimijera kurireu biagai. Imedage eture ipiji mare inogudure ebo. Pao Kurireu biagoduwo nou ero pegareu piji. 17Pagimijera Jesus rakojere itabo rugadu. Ure iragado imagowo Pao Kurireu bataru pemegareu jamedu boeji awu boe tuginaiwuge eimijerage ewiagai. Emeardure ji rugadu. Nono Pao Kurireu ure ikinorudo awu boe tuginaiwuge epiji. Emeardure ireadodaeji dukodire ekare tugobaigarege edo iwido. 18Ča Pagimijera Jesus umode ikinorudo rugadu boe pegareu piji rugadu. Umode irududo baruto rugadu. Nonore boe emago pemegamode Pagimijeraji jii toro tuwo ie kurido. Du akedumodukare.
19Akimadudo aredu Priscila apo imedu Áquila apo inai. Akimadudo imedu Onesíforo apo uwobe eiamedu boebo inai jamedu. 20Imedu Erasto rakoje kimore Corinto ba kurireu keje. Imedu Trófimo kogodure Mileto ba kurireu keje. Dukodire utukare itabo. 21Akarego mato itae biaku otodai. Imedu Êubulo, imedu Prudente, imedu Lino, aredu Cláudia ekimadure awagai. Awu woewu meartorure Jesus jiwuge eiamedu boe ekimadure awagai.
22Pagimijera Jesus rakojewo akabo rugadu tuwo ameardae pemegado. Pao Kurireu ro pemegawo ai rugadu. Urugadureu.