12345678910111213141516171819202122232425262728
12345678910111213141516
123456789101112131415161718192021222324
123456789101112131415161718192021
12345678910111213141516171819202122232425262728
12345678910111213141516
12345678910111213141516
12345678910111213
123456
123456
1234
1234
12345
123
123456
1234
123
1
12345678910111213
12345
12345
123
12345
1
1
1
12345678910111213141516171819202122

2 Pedro

Pedro Ure Awu Atugoreboe Boigoduwu Towuje

1

1Simão Pedro nure imi. Jesus Cristo utugare nure imi. Iture Jesus Cristo bataru tabo boe ewagai iwo boe ewie nou bataruji.

Inure awu atugoreboe pemegado iwo maku meartorure Jesus jiwuge etai. Jesus Cristo ure emeardae pemegado emeartoruwo pudui. Umode boe ekinorudowu nure ema. Pao Kurireu nure ema. Ro pemegareu nure ema. Ure turo pemegareu maku meartorure puduiwuge etai emeartoruwo pudui rugadu. Emeartorure Jesusji nono čemeartoru mogadure.

2Meartorure Jesus jiwuge nure tagi. Tagaire inure awu atugoreboe maku. Tarduwado Pao Kurireuji. Tarduwado Pagimijera Jesusji. Nono Pao Kurireu ro pemegamode tai. Jesus ro pemegawo tai. Ewo tamugu pemegado pudabo tawiagorokawo iaboe bagai pugeje.

Pao Kurireu Ure Tumeardae Tawuje Tumagowo Boe Ewagai

3Pao Kurireu makore pawagai paragojewo pudabo to boe pemegareu keje to boe kurireu keje. Pao Kurireu rakare boe eiamedu boe epiji. Parduwamode Pao Kurireuji dukodire umode turaga maku pagai paro pemegawo rugadu. Pao Kurireu raka tabore paroiwamode paro pemegawo nono Pao Kurireu ro mogadure. 4Pao Kurireu makore pawagai. Akore tumoduie turaga maku pagai rugadu. Tumoduie turaga pemegareu, turaga kurireu maku pagai. Pao Kurireu raka tabore tamode tagera ra tameardae pegareu piji. Tameardaemode tu tameardae pegareuji dukeje nou tameardae umode tabegado rugadu, umode tagagedudo rugadu. Mare Pao Kurireu ure turaga maku tagai tawiagodukawo tuwadaru piji tarowo nono turo mogadure tameardaewo nono tumeardae mogadure. 5Pao Kurireu ure turaga maku tagai tawo taragado tai. Dukodi čare taragado tai rugadu. Tameartorudo Jesusji. Taragado taro pemegawo jamedu. Taro pemegado. Tarduwado Pao Kurireuji jamedu. 6Tarduwamode Pao Kurireuji dukeje tamode taragado tai taro pegakawo rugadu. Tamode taragado tai taro pegakawo pugeje mare tagaba tawia ra tawadaru pemegareu piji. Tagaba tawia ra tameardae pemegareu piji. Tamodukare tawia ra tawadaru pemegareu piji dukeje tarodo nono Pao Kurireu ro mogadure. Tameardaedo nono Pao Kurireu meardae umogadure. 7Taromode nono Pao Kurireu rore dukeje tagaidudo boei nono Jesus aidure boei dumogadure. Tagaidumode boei nono Jesus aidure boei dumogadure dukeje tameardu kurido boei jamedu. 8Taromode awu inagoino jiboeji mare taromode ji taraga tabo rugadu dukeje tarduwa pemegamode Pagimijera Jesus Cristoji. Mare paga karega. Nou tarduware jiboe uwo taro pemegado dubagaire inagoino. Tarduware jiboe uwo tamaragodu pemegado dubagaire inagoino. 9Mare taromodukare awu inagoino jiboeji dukeje jorduwa bokwareuge emode tagi. Taromodukare awu inagoino jiboeji dukeje tawiagodumode Pao Kurireu piji rugadu. Emare ure taro pegareu jamedu boe barigu tabiji. Mare taromodukare awu inagoino jiboeji dukeje tawiagodumode nou Pao Kurireu roino taidu piji rugadu.

10Dukodire inagoino tai. Taragado tai rugadu taro pemegawo Pao Kurireu makore tai jiboeji. Pao Kurireu makore tawagai taro pemegawo tumeardaeji. Imedage nure tagi. Taro pemegamode Pao Kurireu meardaeji dukeje tamodukare tagera ra tameartorure Jesus jitu piji. 11Tamodukare tagera ra tameartorure Jesus jitu piji dukeje umode tabemegado tawo taremo Pagimijera Jesus Cristo mugure tadawu baruto. Nono pagimijera mode ema jii toro. Akedumodukare rugadu. Ema koiare umode paginorudo boe pegareu piji rugadu.

12Marigudu boe ere tawie awu iwadaruji. Jesus bataru remawu reo. Tarduware ji marigudu. Tameartorure ji marigudu. Mare ire tawie pugeje tawiagodukawo piji. Imode tawie pugeje rugadu. 13Boe pegakare iwo tawie tu tu je jii toro iwimode du ka tawiagodukawo nou Jesus jiboe piji. 14Kuri aino iwimode. Ikodu akedumode moto tada mare baru tada aroe mode imi. Pagimijera Jesus Cristo ure iorduwa pemegado nou inoduji. 15Dukodi iwikaredu otodai ire awu bataru bu bapera keje tawiagodukawo nou bataru piji.

Boe Erdure Jesus Ro Boe Pemegareuji

16Pagimijera Jesus aregodumode pugeje. Čere tawie marigudu. Čemeardae remawu ji karega čenagoino tawiagai. Čerdure čeku tabo Jesus o boe pemegareuji. 17Čeragojere Jesus apo rugadu. Pao Kurireu ure Jesus je urugu maedo joki. Ure Jesus ukudau areia kigadudo rugadu. Kigadu maere ji. Čerdure ji. Čemeardure Pao Kurireu makoji. Akore: – Itonaregedu reo. Imeardu kurire ji rugadu. Rore jiboe ure iagaredo i rugadu.1.17 Awu Pedro readodure jiboe padure Mateus 17.5 keje, Marcos 9.7, Lucas 9.35 keje jamedu.

Pao Kurireu kurire boe jamedu boe kori. 18Čegi čeragojere Jesus apo tori aogeje. Dukejere čemeardure awu Pao Kurireu bataruji baru piji nou Pao Kurireu o tori tuginaiwu aogeje.

19Čemeardure Pao Kurireu makore jiboeji dukodire čerduware Pao Kurireu makore jiboe jamedu boe ure turugadu duji. Mariguduwuge makore Pao Kurireu bataru jiwuge ewadaru jire inagoino jamedu. Dukodi čare tawiapaga pemegado awu Pao Kurireu bataru jamedu boeji. Pao Kurireu makore jiboe umode boe erduwado nono jorugu mogadure. Mare jorugu karega. Pao Kurireu makore jiboe umode tarduwado jii toro Jesus aregodumode du ka. Jesus aregodumode dukeje umode nono meri joku mogadure. Mare meri joku karega. Jesus aregodumode dukeje umode tarduwado Pao Kurireuji rugadu tameartorure pudui kodi. Nono tarduwamode jiboe umode nono barogwatabowu kuieje joku mogadure. Mare barogwatabowu kuieje joku karega. Tarduwamode boe remawuji rugadu. Dujire inagoino. 20Mare tawiagodukaba. Nou makore Pao Kurireu bataru jiwuge ekare nou bataru tawuje taora piji. 21Tumeardae tabo karega ere Pao Kurireu bataru tawuje. Mare Pao Kurireu Uwari koiare ure Pao Kurireu bataru maku etai emagowo ji boe ewiagai.

2

Batrarodureuge Ewadaru Reo

1Batrarodureuge etaregodure jaoboe etae. Egore tumagoie Pao Kurireu bataruji. Mare pagare egoino. Aino iage etaregodumode tagae pugeje. Egomode tumagoie Pao Kurireu bataruji. Mare pagare egoino. Batrarodureuge nure emage jamedu. Ewadaru umode boe pegado boei. Emode boe ewarigu Pao Kurireu bataru piji. Emeartorukare ure akirodo paiwu Pagimijeraji. Egomode umodukaie boe ekinorudo. Mare tameartorukaba ei. Umode boe ekinorudowu nure ema rugadu. Dukodi čare nou batrarodureuge emode tagedudo tači je nou tuwadrarodu tabo. 2Du inodu tabo boe emeartorumode nou batrarodureugei rugadu. Dukodi emode tugeragu aremei nono nou batrarodureuge ero mogadure. Nono ero pegamode ebo. Dukodi čare boe emago pegamode meartorure Jesus jiwugei. Egomode boe remawu ji karegaie eroino. 3Nou batrarodureuge enogwa kidure tu pudai rugadu. Dukodire emode tugeragu dieroji boe epiji tumagore jiboe moriče. Egomode tumagoie Pao Kurireu bataruji. Mare pagare egoino. Tumeardae tabore ere nou tuwadaru towuje pagatu je. Marigudu Pagimijera ure tudo turugadu tuwo nou batrarodureuge edo nou turo pegareu morido. Umode etagedudowu ure tudo turugadu tuwo etagedudo jamedu!

4Marigudu rugadu ia Pao Kurireu utugarege baru tadawuge ero pegare. Pao Kurireu ukare ekinorudo ero pegareu mori piji bope dogewo emage. Ure ewarigu toro ia joru pegareuto. Ure ekogudo meririku tabo nono. Boečore rugadu nou bope doge eda keje. Ji aino edu kimo nono nou tieda keje. Epagamode jii toro nuba Pagimijera romode puduidu bagai. 5Marigudu boe ero pegare. Pao Kurireu ukare ekinorudo ero pegareu mori piji. Pao Kurireu ure pobodo tumaedo moto jamedu boe parugajeje. Pobo ure jeture moto kejewuge eiamedu boe etagedudo rugadu. Pao Kurireu ure imedu Noé udo činorudo tu rugadu. Noé makore boei ero pemegawo. Mare emeartorukare. Dukodi čare Pao Kurireu ure etagedudo. Mare ure imedu Noé udo činorudo tuwobebo. Ure činorudowuge enodo padu kejewure oito. Tu rugadu. 6Marigudu Pao Kurireu ukare ia ba kurireu iere Sodoma kejewuge ekinorudo ero pegareu mori piji. Ukare ia ba kurireu iere Gomorra kejewuge ekinorudo ero pegareu mori piji jamedu. Pao Kurireu ure joru barigu nou Sodoma Gomorra kejewuge boe dogei. Dukodi čare ure etagedudo rugadu. Nou inodu kodire boe eiamedu boe erduware nuba Pao Kurireu romode ro pegareugei rugadu. 7Mare ia Sodoma kejewu imedu pemegare. Iere Ló. Dukodire Pao Kurireu ure udo činorudo. Ló kiarigodure nou ro pegareuge ero pegare jiboeji. Emeartoru bokware boe ero remawuji. Tu tumeardae pegareu jire emeartorure tu rugadu. Dukodire ero pegare aremei rugadu. 8Nou ro pemegareu Ló mugure ebo. Meardure nou ro pegareuge ewadaru pegareuji. Jordure ero pegareu jamedu boeji. Dukodire kiarigodure rugadu erore aino duji.

9Dukodi čare parduware boe pegamode pai duji. Mare pameartorumode Pao Kurireuji dukeje ro pemegareuge mode pagi. Dukodire Pao Kurireu umode paginorudo boe pegareu piji. Mare ia meri keje Pao Kurireu umode ro pegareuge ero pegareu morido etai rugadu. Pao Kurireu jorduware nou meriji. 10Ia ro pegareuge emeardaere nono ariga doge emeardae mogadure tuwo tugeragu aremei tu tu je. Erdu pegare Pao Kurireu bataruji. Etaidukare tumeartoruwo Pao Kurireuji rugadu. Emagere Pao Kurireu umode ero pegareu morido etai rugadu. Emodukare činorudo piji rugadu.

Nou batrarodureuge enojarore tuwadaruji. Enojarore pudui rugadu. Emeartorukare baru tadawu boe pemegareugei rugadu. Dukodi emago pegare baru tadawuge ero pemegareuji jamedu. 11Pao Kurireu utugarege baru tadawuge eragare rugadu. Eragare nou batrarodureuge eraga kori. Mare Pao Kurireu utugarege baru tadawuge emago pegakare nou batrarodureuge erore jiboeji Pao Kurireu biagai. 12Mare nou batrarodureuge emago pegare tuiorduwa bokware jiboeji jamedu. Erore nono barege ro pegareuge emogadure. Barege ero pegare dukodire boe ere ekogudo tuwo ewido. Nono nou batrarodureuge etagedumode nono barege emogadure. 13Boe pegamode ei nono ere boe pegado boei dumogadure. Pao Kurireu umode boe pegado ei rugadu ero pegareu moriče. Epogurukare tieribariji. Eribari ierikare. Emode tugeragu pui boe egai. Dukodi boe epogurure eče erore aino duje. Enogwagere tagabo mare emeardaere boe erduwakaie turore jiboeji. Etaidure tuwo boe ekiripagado. Etaidure turo pegareuji rugadu kodi. 14Emarure areme ewagai tieribariwo tuwire epiji. Areme emarure ime ewagai jamedu tieribariwo tugoge epiji jamedu. Ero raire nou turore aino pui dutabo. Ere jorduwa bokwareuge ekiripagado. Marigudu enogwa kidure tu pudai rugadu tuwo to diero kurido boe epiji. Dukodire Pao Kurireu akore tumoduie boe pegado ei rugadu ero pegareu moriče. 15-16Ere tugera ra Pao Kurireu meardae pemegareu piji. Dukodire ere tuwarigu boeto rugadu. Jawu imedu Beor onaregedu imedu iere Balaão. Bari nure ema. Marigudu boe pegareuge etaidure tuwo diero maku Balaão ai koduwo nou tumeardae pegareuji jamedu. Balaão aidure nou dieroji rugadu dukodire aidure turowo nono emeardae mogadure rugadu. Mare Pao Kurireu ure Balaão aku burro makodo ji boe ewadaru tabo rokawo nono nou ro pegareuge ero mogadure. Dukodire Pao Kurireu ure Balaão udo tugera ra nou boe emeardae pegareu piji. Aino čare nou batrarodureuge erore nono nou Balaão ro mogadure.2.15-16 Awu Pedro readodure jiboe padure Números 22.4-35 keje.

17Nou batrarodureuge ere nono kačiba po bokwareu umogadure. Ere nono bakuru jeture jiwu boetugu pegareu mogadure. Pao Kurireu jorduware kaiba tumode nou batrarodureuge ewarigu. Umode ewarigu boečo maereuto. 18Nou batrarodureuge emago raire boei mare erduwa bokware. Ewadaru pegare. Enojarore pudui pagatu je. Ere boe ekiripagado tieribarire pui dutabo. Boe etaidure tuwo tugera ra turo pegareu piji mare nou batrarodureuge emode tumeardae pegareu maku etai tuwo ero pegado rugadu. 19Nou batrarodureuge eroiwakare tuwo tugera ra turo pegareu piji. Mare egore iagei tuiorduwaie tuwo ekinorudo. Pagare egoino. Turo pegareu jire boe ewiapagamode tu je dukeje eroiwamodukare tuwo tugera ra turo pegareu piji rugadu. 20Mare boe erduwamode Pagimijera Jesus Cristoji dukeje umode boe ekinorudo ro pegareuge emeardae pegareu piji. Emeardae pegareu koiare ure boe ero pegado tu tu je. Mare Jesus koiare umode boe ekinorudo emeardae pegareu piji. Ia boe emode tugera ra turo pegareu piji mare umode tugirimi nou turo pegareu ka pugeje dukeje boe pegamode ji rugadu. Umode tugirimi nou turo pegareu ka dukeje nono meardaemode tu nou turo pegareuji rugadu. Roiwamodukare tuwo tugera ra nou turo pegareu piji rugadu. Boe pegare ji jao mare aino čare boe pega remawu mode ji rugadu. 21Boe erduwakare tuwo činorudo turo pegareu piji turo pemegawo Pao Kurireu meardaeji. Dukodi čare boe pegamode ei. Mare boe erduwamode Pao Kurireu koiare umode boedo činorudo boe ero pegareu piji boe pemegareu ka. Du inodu tabo emode tugera ra Pao Kurireu piji tuwo tugirimi nou boetojiwu turo pegareu ka pugeje. Dukeje čare boe pegamode ei rugadu. Boe pega kuričigomode ei rugadu. 22Erore aino dukodire parduware. Boe jokodu jire boe egoino rugadu. Ariga doge emode tugirimi towearigodure taboboe ka tuwo kowuje pugeje. Boe emode jugureuge etaimo mare jugureuge emode tugirimi moto bekuru ka tuibagi pugeje rugadu.

3

Pagimijera Jesus Umode Tugirimi Moto Ka Pugeje Rugadu

1Imeardu kurire jiwu imedage nure tagi. Ire iwadaru boetojiwu bu bapera keje. Ire maku tagai marigudu. Aino ire awu boeiwu iwadaru bu bapera keje makuduwo tawagai pugeje. Dutabore ire tawiabutudo Pao Kurireu bataru keje. Dutabore itaidure iwo tameardae pemegado tameardae pegakawo pugeje. 2Marigudu makore Pao Kurireu bataru jiwuge ero pemegare rugadu. Tawiabutudo ewadaru keje. Tawiabutudo Pagimijera Jesus bataru keje jamedu tameartoruwo ji. Umode boe ekinorudowu nure ema. Jesus ure ime etudo tuwadaru tabo. Dukodi čare ere tawie Jesus jiboeji rugadu. 3Ainore awu bataru ure. Tarduwado ji. Boe puredugodumode awu moto akeduwo dukeje ia boe etaregodumode tagae. Emeardaemode tu tumeardae pegareuji rugadu. Ekadakagirimode tai. 4Enaramode tai: – Jesus pa?

Egomode: – Jesus akore tumoduie tugirimi pugeje mare pagare akoino. Aregodumodukare. Jaoboe ewogware marigudu mare boe akedukare ji aino. Marigudu awu moto towujedure mare akedukare ji aino. Akedumodukare rugadu!

Ainore nou boe doge egomode tai. 5Mare taipagakaba ewadaruji. Pagare egoino. Ere taora mekido Pao Kurireu rore jiboe piji. Tuwadaru tabore Pao Kurireu ure baru towuje, ure moto towuje jamedu. Awu boe erduware nou Pao Kurireu rore jiboeji mare ere taora mekido piji tuwiagoduwo piji. Pao Kurireu ure moto tawuje pobo piji dukodi pobo aiare tabo. 6Mare Pao Kurireu ure moto kejewuge eiamedu boe etagedudo pobo tabo jamedu. Ure pobo maedo moto jamedu boe parugajeje. Dukodire ure jaoboe etagedudo. 7Aino čare Pao Kurireu jeture awu motoji tuwadaru tabo akedukawo. Pao Kurireu jeture awu baruji tuwadaru tabo akedukawo jamedu. Mare Pao Kurireu makore marigudu tumoduie awu moto awu baru akedudo rugadu joru tabo. Pao Kurireu umode meartorukare Jesus jiwuge ero pegareu morido etai rugadu. Umode etagedudo rugadu. Mare upaganure tu jao tuiorduwo ia boe emeartoruwo pudui dubagai. Dukodire ukare awu moto awu baru akedudo raga.

8Imeardu kurire jiwu imedage nure tagi. Tawiagodukaba awu iwadaru piji. Pagimijera jordure boe jamedu boeji. Joru oto padu mode mil mare Pagimijera jorduware ji marigudu. Merimode mitotu je mare Pagimijera jorduware ji marigudu. Joru oto padu mode mil Pao Kurireu ai mare ure nono merire mitotu je dumogadure Pao Kurireu ai. 9Iage egore Pagimijera Jesus umodukaie tumagore jiboedo turugadu kuri aino. Pagare egoino. Boe rai jokodumodukare Jesusji uwo tumagore jiboe udo turugadu tuwo tugirimi mato pugeje. Mare paga karega. Korigodukare boei kuri je. Aidure boe eiamedu boe ewo tugera ra turo pegareu piji tumeartoruwo Jesusji rugadu.

10Mare Pagimijera Jesus aregodumode kimo rugadu. Parduwakare nou aregodumode kejewu meriji. Jesus umode boe eto pa pui taregodure jiwu meri keje. Nou meri keje joru umode turagoje wadudo woje baru tada. Joru čemode baruto rugadu. Dukodire awu baru akedumode rugadu. Nou meri keje awu moto akedumode jamedu. Awu jeture moto kejeboe jamedu boe etagedumode rugadu. 11Boe jamedu boe akedumode rugadu. Mare paga karega. Boe jokodu jire akoino rugadu. Dukodire čare taro udo tuginai taro pegakawo pugeje. Taro udo nono Pao Kurireu meardae kodaji rugadu. 12Tabagado Pao Kurireu bagai. Aregodumode pugeje. Tado tarugadu tawo boe ewie. Tamode boe ewie dukeje Pao Kurireu aregodumode kuri je. Aregodumode dukeje joru čemode awu baruto. Baru akedumode rugadu. Joru uru koiare umode jeture baru tadaboe jamedu boe kowu, umode rugadu boe gigirido. 13Mare pagi pabagare Pao Kurireu ure pawie jiboe bagai. Ure pawie marigudu tumoduie baru maiwu towuje. Tumoduie moto maiwu towuje.3.13 Awu bataru padure Isaías 65.17 keje. Nou baru maiwu nou moto maiwu kejeie ro pemegareuge edumode. Ro pegareuge edumodukare nono.

14Imeardu kurire jiwu imedage nure tagi. Tabagare Pagimijera bagai nou inagoino jiboe bagai. Dukodi čare taragado tai taro pemegawo taro pega bokwawo. Taragado tai tameartoruwo Pao Kurireuji rugadu. Taragado tai tamugu pemegawo Pao Kurireu apo. Nono Pao Kurireu mako pegamodukare tai jamedu. 15Pagimijera aregodukare raga. Mare paga karega. Aidure boe emeartoruwo pudui rugadu. Dukodire upaga raire ewagai. Dukodire čare tameartorudo Jesusji. Ema koiare umode taginorudo tadukawo bope doge eda kejewu joru ka. Čemeardu kurire jiwu čemedia Paulo ure maku tagaiwu atugoreboe ure nono ire maku tagaiwu mogadure. Pao Kurireu ure Paulo jorduwado rugadu uwo boe ewie tuwadaruji. 16Paulo ure towu atugoreboe jamedu boe ure nono imeardae mogadure rugadu. Paulo ure bu bapera kejewu tuwadaru rakare ia boei rugadu. Jorduwa bokwareuge nure emage. Nou jorduwa bokwareuge ekare nou Paulo makore jiboedo nono ture, boe ewiagai. Ere Pao Kurireu ia batarudo tuginai jamedu. Pao Kurireu bataru remawu ji karega emagore. Dukodire emode tagedudo rugadu.

17Mare tarduware. Imeardu kurire jiwu imedage nure tagi. Tarduware dukodi čare taeku jado nou batrarodureuge ewagai. Batrarodureuge ewadrarodumode tawiagai mare tameartorukaba ei. Tameartorumode ewadaruji dukeje tawarigudumode Pao Kurireu piji. Meartoru bokware boe ero remawu jiwuge nure emage. 18Tameartorukaba ei. Tameartorudo tu Pao Kurireuji. Dukodire Pagimijera Jesus Cristo umode turo pemegareu maku tagai. Umode boe ekinorudowu nure ema. Tarduwado ji rugadu. Pawo pamago pemegado Jesusji jii toro rugadu. Pawo ie kurido rugadu jii toro rugadu. Pagawo pagogwa ra piji jii toro rugadu. Umode turugadu rugadu.