2 Coríntios
Paulo Ure Atugoreboe Pemegado Tuwo Maku Corinto Ba Kurireu Kejewuge Meartorure Jesus Jiwuge Etai
Atugoreboe Boigoduwu Reo Corinto Kejewuge Etai
11Paulo nure imi. Pao Kurireu makore iwagai tuwo itudo Jesus Cristo bataru tabo boe ewagai. Ainore Pao Kurireu meardaere rugadu. Inure awu atugoreboe pemegado iwo maku meartorure Jesus jiwuge boe etai Corinto ba kurireu tadawuge etae. Inure awu atugoreboe pemegado iwo maku Acaia moto kejewuge meartorure Jesus jiwuge eiamedu boe etai jamedu. Pamedia Timóteo unure awu atugoreboe maku tawagai jamedu. 2Pao Kurireu ro pemegawo tai. Uwo tameardu kurido pudui tabagudukawo boe pegareuče pugeje tabemegawo pui jamedu. Pagimijera Jesus Cristo ro pemegawo tai jamedu. Uwo tameardu kurido pudui jamedu tabemegawo pui rugadu.
Paulo Mako Pemegare Corinto Kejewuge Erore Jiboeji Pao Kurireu Biagai
3Pamago pemegawo Pao Kurireuji. Pagimijera Jesus Cristo uo nure ema. Pao Kurireu emare okudugodumode boebo rugadu. Tu Pao Kurireu umode tugera maku boe etai. 4Boe pegamode pai dukeje umode tugera maku pagai rugadu. Dukodire paroiware pawo pagera maku iage etai jamedu. Boe pegamode ei dukeje pamode pagera maku etai nono Pao Kurireu rore pai dumogadure. 5Moto kejere boe pegare Jesus Cristoji rugadu. Aino čare boe pegare čei nono jamedu. Mare čemeartorure Jesus Cristoji dukodire Pao Kurireu ure tugera maku čenai. 6Čedaidure čewo čegera maku tagai tameartoruwo Jesusji uwo taginorudo tagawo taro pegareu morido pugeje. Dukodire ro pegareuge ere boe pegado čei. Mare Pao Kurireu ure turaga maku čenai čeragawo čei. Dukodire umode tugera maku tagai jamedu. Boe pegamode tai dukeje Pao Kurireu umode turaga maku tagai taragawo tai jamedu tawudugudo tai jii toro nono rore čei dumogadure. 7Dukodire čerduware tameartorumode Jesus jituji rugadu. Boe pegare tai nono boe pegare čei dumogadure. Mare Pao Kurireu ure tugera maku tagai jamedu nono turo mogadure čei dumogadure.
8Čemedage nure tagi. Čedaidure čewo tawie pugeje. Čeragojere Ásia moto keje dukeje boe pegare čei rugadu. Boe pegare čei rugadu. Čemeardaere čewimoduie rugadu. 9Čemeardure boe egore tumoduie čewido rugadu. Boe pegare aino čei rugadu. Pao Kurireu koiare ure boedo aino čei čewiagodukawo čemeartorukawo tu čei. Mare Pao Kurireu bataru jire čemeartorumode tu rugadu. Emare ure tugera maku čenai. Emare umode bireuge eewodudo pugeje rugadu. 10Pao Kurireu ure čeginorudo čewi piji. Ure čeginorudo ia boe pegareu piji. Umode čeginorudo rugadu. Dukodire čemeartorure ji rugadu kodire čebagamode bagai rugadu. Čerduware umode čeginorudo rugadu duji. 11Tamagore baruto Pao Kurireu bagai čebaru tabo jamedu. Dutabore tare tagera maku čenai. Boe emagare tumago tabo baruto čebaru tabo. Nono Pao Kurireu umode emagore bagaiboe udo turugadu rugadu. Umode boe pemegado čei rugadu. Dukodire boe emagamode tugimadu tabo Pao Kurireu apo rugadu. Emago pemegamode Pao Kurireu rore jiboeji rugadu.
Paulo Ure Tumeardae Tawuje Tuduwo Ewagai
12Čemeardaekare toro ia boe emeardae pegareu bagai. Pao Kurireu ure turo pemegareu maku čenai dukodire čegare taekiripagado. Ure turo pemegareu maku čenai dukodire čemago pagakaregure tai. Ainore čerore boe eiamedu boei. Dukodire čedaidure awu Pao Kurireu ure maku čenaiwu čemeardaeji. Ia boe ekare čerduwado awu čemeardaeji. Pao Kurireu koiare ure nou čemeardae maku čenai. 13-14Čere awu atugoreboe towuje Pao Kurireu bataru tabo tawagai. Awu atugoreboe tadaboe tagaiwomode ji. Tarduwamode nou atugoji. Mare tarduwamodukare nou atugo jamedu boeji tači je. Mare ia meri keje tarduwamode jamedu boeji rugadu. Toro ia meri keje pugeje Pagimijera Jesus aregodumode dukeje tamago pemegamode čei čere tarduwado Pagimijera bataru jamedu boeji. Nono čemago pemegamode tai jamedu tameardu pemegare čere tarduwado jiwu Pao Kurireu bataru jamedu boeji.
15-16Iorduware tagaidure Pao Kurireu bataruji rugadu dukodire ire imeardae boetojiwu tawuje ituwo tawagai iwo tarduwado Pao Kurireu bataru jamedu boeji. Imeardaere itaregoduwo toro tagae iwo taegaredo tai. Dukejere itumode toro Macedônia moto ka tabiji. Nono imode ikirimi pai ibagi ikodaji pugeje toro tawagai iwo taegaredo tai pugeje. Nono tamode diero maku inai tawo itudo nou Judéia moto kejewu meartorure Jesus jiwuge etae. 17Ire awu imeardae tawuje rugadu. Itaidure irowo aino rugadu. Imode iwadarudo mitotu je. Imodukare iwadarudo pobe. 18Pao Kurireu kodumode tuwadaruji tu rugadu. Ainore irore jamedu. Imeardaere jiboe ire rugadu tawuje tawiagai. Dukodire ire tawie aino imeardaeji. Nou imeardae imode towuje rugadu. Ia boe emeardae karega. Pao Kurireu jorduware imeardaeji. 19Jesus Cristo batrarodumodukare. Pao Kurireu onaregedu nure ema. Imedu Silas ure tarduwado Jesusji. Timóteo ure tarduwado Jesusji jamedu. Imi jamedu ire tarduwado Jesusji. Jesus umodukare tuwadaru makado. Umode tuwadarudo mitotu je. 20Pao Kurireu ure boe ewie marigudu turomode jiboeji. Awu Jesus jire Pao Kurireu akoino rugadu. Pameardumode awu Pao Kurireu bataruji dukeje pagagomode boe jokodu ji rugaduie akoino pamago pemegawo Pao Kurireuji. 21Pao Kurireu emare ure parduwado rugadu pamugu pemegawo Jesus Cristo apo. Pao Kurireu emare ure tugeragu pai pudae tuwo pado paginai. 22Ure tugeragu pai dukodire ure pagiedo. Nono parduware Pao Kurireu ure tugeragu jiwu boe nure pagi duji. Pao Kurireu ure Tuwari maku pagai jamedu. Rakojere pagabo. Dukodire parduware Pao Kurireu umode turo pemegareu iado pai duji rugadu.
23Pao Kurireu jorduware imeardaeji rugadu. Iwadrarodumodukare tai. Itaregodumode tagae dukeje inogwa jetumode taro pegare jiboeji tawiagai. Dukodire itukare tawagai inogwa jetumode taro pegareu jitu kodi. Itaidukare iwo tagiarigo dukodi. Dukodire itukare tawagai toro Corinto ba kurireu ka. 24Čedaidukare čewo čeragado tai tameartorure jiboeji. Čerduware tai. Tameartorure Jesusji rugadu. Mare čedaidure tameartoruwo Jesusji tagaidu tabo. Čedaidure čewo tarduwado butugu tabo taegare tabo.
21Dukodire ire imeardae tawuje itukawo tawagai. Itaidukare iwo tagiarigo. 2Imode tagiarigo dukeje ikiarigodumode jamedu. Ioguduba koia ba umode iagaredo i jamedu? 3Imororamagadure tai tameartorumodukare Pao Kurireu jitu duji. Dukodire itukare tawagai mare ire atugoreboe boetojiwu pemegado iwo tarduwado taro pegareuji. Ire nou atugoreboe maku tagai marigudu tameartoruwo nou Pao Kurireu bataruji. Nono imeartorure tai tameartorumode Pao Kurireu bataru jituji rugadu. Nono itaregodumode tagae nono iagaremode i taegaregodumode tai jamedu. 4Mare imororamagadure tawagai. Itragudure taro pegareu keje. Dukodire ire jawu atugoreboe boetojiwu maku tagai tarduwawo taro pegareuji. Ire maku tagai mare iwo tagiarigo karega. Ire maku tagai iwo tardudo imeardu kurire tai duji.
Pawiagoduwo Nou Imedu Ro Pegare Jiboe Piji
5Nou imedu ro pegare jiboe ure ikiarigo. Mare ure tagiarigo kurido rugadu. (Mare itaidukare imagowo ji iwadaru kori tabo, iwadaru rakareu tabo jamedu.) 6Tare tameardae tawuje taburedukawo nou imeduji ro pegare dukodi. Mare paga karega uwo tugirimi tagae tumeardae pemegareu tabo pugeje. 7Aino čare tawiagodudo nou imedu rore jiboe piji. Tamago pemegado nou imeduji tawo kiarigodu barigu piji ukawo tugera ra tumeartorure Jesus jitu piji. 8Dukodire inogwamagudunure tai. Tameardu kurido ji rugadu. 9Ire nou atugoreboe boetojiwu maku tagai iorduwawo tameardae remawuji rugadu. Iorduwawo tameartorumode iwadaru jitu bagai rugadu. 10Tawiagodumode boe ero pegare tai dupiji dukejere iwiagodumode ero pegare tai dupiji jamedu. Itaidure irowo nono Jesus Cristo ro mogadure. Dukodire iwiagodumode boe ero pegare idu piji nono Jesus ro mogadure. 11Boe ero pegare pai mare pawiagodumode nou ero pegare pai dupiji. Dukodire bope doge eimijera Satanás rakamodukare pai pugeje. Parduware marigudu bope doge eimijera Satanás meardae pegare pai duji rugadu.
Paulo Rakojere Trôade Ba Kurireu Keje Dukejere Mororamagadure Imedu Tito Bagai
12Itaregodure Trôade ba kurireu ka iwo nou boe ewie Jesus Cristo jiboeji umoduie boe ekinorudo. Nou boe etaidure tuiorduwawo ire tuwie jiwu Jesus jiboeji rugadu. Dukodire ire ewie ji rugadu. Pagimijera Jesus koiare ure boe udo turugadu nou torowu boe eimijerage erdu pegakawo nou irore jiboeji. Ekare itudo nou Trôade ba kurireu piji. 13Mare iordukare pamedia Titoji nono. Dukodire imororamagadure bagai. Dukodire ikimadure nou boe dogebo. Dukejere iture epiji toro Macedônia moto ka pamedia Tito bagai.
Jesus Cristo Umode Meartorure Puduiwuge Eragado Ero Pemegawo
14Boe ekimaduwo Pao Kurireu apo rugadu. Jesus Cristo ro rakare boe eiamedu boe kori. Pao Kurireu ure čemugu pemegado Jesus Cristo apo dukodire čegodure meardae rekodaji meardae pemegare kodi. Pao Kurireu ure čedudo tuwadaru tabo boe doge etae čewo boe eiamedu boe ewie Jesus Cristo rore jiboeji. Nou bataru ure nono roreboe mogadure. Mare roreboe ji karega inagoino. Pao Kurireu bataru unure taodo boe jamedu boe parugajeje boe eiamedu boe erduwawo ji. Dujire inagoino. 15Čere nono Jesus Cristo ure maku Pao Kurireu aiwu roreboe mogadure. Mare roreboe ji karega inagoino. Čemagore jiwu Jesus bataru jire inagoino. Boe eiamedu boe emeardumode nou čemagore jiboeji. Meartorumode Jesus jiwuge emeardumode. Meartorumodukare Jesus jiwuge emeardumode jamedu. 16Ia boe emeartorumodukare Jesusji. Egai ere Jesus bataru udo nono boe kore boere. Ere udo aino emeartorukare bataruji dukodi. Emeardure čemagore jiwu Jesus bataruji dukodire erduware tuwarigudumode boe pegareuto. Dukodire ere čewadaru udo aino. Mare meartorumode Jesus jiwuge emeardumode čemagore jiwu Jesus bataruji dukejere erduwamode tuiewodumode pugeje duji. Dukodire etaidumode čewadaruji nono etaidumode roreboeji dumogadure. Mare ioguduba mako pemegamode Jesus Cristo bataruji? 17Ia boe egokodure nou bataru tabo. Epoguru bokware. Boe emode morido etai dukeje emode boe ewie Pao Kurireu bataruji. Boe emodukare morido etai emodukare boe ewie. Mare čegare aino. Pao Kurireu makore čewagai čeduwo nou tuwadaru tabo boe etae. Dukodire čemago pemegare nou bataruji boe ewiagai. Jesus Cristo utugarege nure čegi. Čerduware Pao Kurireu rakojere čedabo duji. Dukodire čenogwarikare čemago tabo Pao Kurireu bataruji boe ewiagai.
3Pameartoruwo Pao Kurireu Bataru Maiwuji
1Čegare nono ia boe emogadure. Čemagomodukare čeroji tawiagai tarduwawo čei. Tarduware čei marigudu. Ia tarduwakare jiwuge emagomode turoji tawiagai tarduwawo pudui tagaiduwo pudui. Mare čegi čerokare nono nou ero mogadure. 2Čemaragodure Pao Kurireu bataru tabo tawiagai tameardu pemegawo Pao Kurireu bataruji. Nono tameartorure nou Pao Kurireu bataruji rugadu. Ia boe erdure tameartorure Pao Kurireu bataru jituji. Dukodire emeartorure čemaragodaeji. 3Mare čegi karega. Jesus Cristo koiare ure tameartorudo čemagore tawiagaiwu Pao Kurireu bataru jituji. Pao Kurireu Uwari ukare Pao Kurireu bataru bu ia tori keje pugeje.3.3 Marigudu Pao Kurireu ure tuwadaru maku Moisés ai Judeu doge eno bakaruče. Nou eno bakaru atugore tori keje. Dujire akoino woe. Awu Pao Kurireu roino jiboe padure Êxodo 24.12 keje. Mare ure Pao Kurireu bataru tugu boe etaorato boe emearduwo ji emeartoruwo ji rugadu.
4Mare paga karega inagoino čemaragodu pemegaie Pao Kurireu bataruji tawiagai. Jesus Cristo koiare ure čemaragodu pemegado aino. Čemeartorure ji rugadu dukodire čemeartorure Pao Kurireuji rugadu. 5Čeroiwakare Pao Kurireu ure maku čenaiwu čemaragodaeji. Mare Pao Kurireu ure čeragado čemaragodu pemegawo ji. 6Emare ure čeroiwado čemeartoruwo Pao Kurireu meardae maiwuji. Ure čeroiwado čewo boe ewie ji jamedu. Nou Pao Kurireu meardae maiwu ukare nono nou tumeardae jawu mogadure. Jawure ure tori atugodo nou tuwadaru jawu tabo boe emeartoruwo nou tuwadaru jawu jamedu boeji. Kodire emode ovelha rogu bito tuwo maku Pao Kurireu ai nou turo pegareu moriče tu tu je. Mare boe emeartorumodukare nou padure tori kejewu Pao Kurireu bataru jamedu boeji tu tu je. Dukodire ewimode dukeje ewarigudumode boe pegareuto Pao Kurireu piji. Mare boe eragakare tumeartoruwo ji dukodire ewimode dukeje ewarigudumode Pao Kurireu piji boe pegareuto. Nono Pao Kurireu umode ewarigu bope doge eda kejewu joru pegareuto. Mare Pao Kurireu ure tumeardae maiwu tawuje tuwo Jesus arego biwo boe ero pegareu boe moriče. Kodire emodukare ovelha rogu bito pugeje turo pegareu boe moriče pugeje. Emeartorumode tu Jesusji rugadu. Pao Kurireu Uwari ure nou Pao Kurireu meardae maiwu tugu boe etaorato emeartoruwo ji rugadu. Boe emeartorumode Jesusji nono nou Pao Kurireu meardae maiwu mogadure dukeje emugu pemegamode Pao Kurireu apo.
7Marigudu Pao Kurireu ure tumeardae jawu maku Moisés ai uwo bu tori keje Judeu doge eno bakaruwo ema. Ure maku Moisés ai dukeje Pao Kurireu ro pemegare Moisesji. Kodire Pao Kurireu o jorugu pemegareu jore Moisés jeto. Dukodire Moisés je gurugurure rugadu. Nono Moisés ure turawuje nou tori ao piji tuwo nou tori reko Judeu doge etai dukeje je guruguru akedugodure je piji. Mare du inodu tabo Judeu doge etaidure taiwowo jeji mare eku rakakare taiwowo jeji je gurugurunure dukodi. Ainore Pao Kurireu rore Moisesji tuwo tuwadaru jawu maku nou Judeu doge etai eno bakaruwo ema. Ure Moisés je guruguru rakado tuwo boe erdudo to jorugu pemegareuji boe erduwawo Pao Kurireu rakojere Moisés apo duji tori ao keje, boe emeartoruwo Pao Kurireu ure nou bakaru jawu maku pudai duji. Mare du inodu tabo boe eragakare tumeartoruwo nou bakaru jawuji nono ewire. Dukodire Pao Kurireu umode ewarigu bope doge eda kejewu joru pegareuto. 8Mare awu Pao Kurireu Uwari ure tugu boe etaora towu Pao Kurireu meardae maiwu pemegare nou bakaru jawu piji. 9Nou bakaru jawu pemegare mare boe eroiwakare tumeartoruwo ji. Dukodire Pao Kurireu makogodure ei rugadu. Akore ro pegareuge nuie emage rugadu. Emoduie turo pegareu morido tuwire dukeje. Ewire dukejere Pao Kurireu umoduie ewarigu bope doge eda kejewu joru pegareuto. Mare Pao Kurireu ure tumeardae maiwu maku boe etai boe emeartoruwo Jesusji. Boe emeartorumode Jesusji dukeje Pao Kurireu umode ekinorudo nou boe pegareu piji ekawo turo pegareu morido pugeje. Dukodire awu Pao Kurireu meardae maiwu pemegare nou bakaru jawu piji. 10Mariguduwuge Judeu doge erdure Pao Kurireu jorugu pemegareuji. Nou jorugu kuri remawu nure egai. Epagudure če. Mare nou jorugu akedure. Dukeje boe erdukare ji pugeje. Pao Kurireu ukare tumeardae maiwu maku jorugu tabo. Mare du inodu tabo nou meardae maiwu raka kodure nou bakaru jawu kori. Dukodire boe emeartorukare nou bakaru jawuji pugeje. 11Nou bakaru jawu pemegare dukodire Judeu doge erdure Pao Kurireu joruguji. Mare nou bakaru jawu akedure. Mare awu Pao Kurireu meardae maiwu ča akedumodukare. Dukodire nou Pao Kurireu meardae maiwu pemegare rugadu nou bakaru jawu piji.
12Čerduware nou Pao Kurireu meardae maiwu ure turugadu duji. Dukodire čere čeragado čei čewo boe ewie nou Pao Kurireu meardae maiwuji rugadu emeartoruwo Jesusji rugadu. 13Čegare nono Moisés mogadure. Pao Kurireu ure Moisés je gurugurudo. Mare nou je guruguru ure tageduiago. Dukodire Moisés ure ia tugudau areia rogu bu tuie keje Judeu doge erdukawo nou tuie guruguru ure tageduiago tuie piji duji. 14Nou Judeu doge etaidukare tuwiapagawo nou bakaru jawu akoino pudui duji. Etaidukare tumeartoruwo ji jii aino. Dukodire boe ekudau areia padure nou emeardae keje nono padure Moisés je keje dumogadure erduwa pemegakawo nou bakaruji. Mare boe ekudau areia ji karega inagoino. Eroiwakare tuiorduwawo nou bakaru jawuji. Du jire inagoino. Ji aino etaidukare tumeartoruwo ji dukodire etaiwomode nou bakaru jawu padure kejewu baperaji mare erduwa pemegamodukare kaba jiba akoino. Mare boe emeartorumode Jesus Cristo jitu keje Jesus umode erduwa pemegado nou bakaru jawuji rugadu. 15Ji aino Judeu doge erduwakare nou Pao Kurireu meardae maiwuji. Dukodire etaiwomode tu nou Moisés ure bu bapera kejewu Pao Kurireu o bakaru jawuji. Erduware tumagowo nou atugoji mare erduwakare kaba jiba nou atugoreboe akoino pudui duji. 16Mare boe emode tugera ra turo pegareu piji tugoduwo Pao Kurireu meardae maiwuji tumeartoruwo Jesusji. Nono Pao Kurireu umode erduwado tumeardaeji rugadu erduwawo kaba jiba akoino pudui duji.
17Pao Kurireu Uwari rakojemode nou meartorure Jesus jiwugebo tuwo erduwado Pao Kurireu bataruji. Umode nou boe ekinorudo ero pegareu piji emeartoruwo Pao Kurireuji rugadu. 18Pameartorumode Jesusji dukeje paromode nono Pagimijera ro mogadure. Dukodire boe erdumode parore jiwu Pagimijera ro pemegareuji. Aino kodire pamodukare paro biado boe epiji. Nou Pagimijera Pao Kurireu Uwari nure ema. Emare umode paro udo nono Pao Kurireu ro mogadure tu tu je pameardae pemegawo nono meardae mogadure rugadu.
4Čere Čegera Ra Čero Pegareu Piji
1Pao Kurireu okudugodure čedabo dukodire ure čemaragodae maku čenai. Dukodire čegiarigodukare. 2Ia boe ere turo pegareu biado mare čegi čerokare aino. Boe ere pu pogurudo turo pegareuče. Mare čegi čerokare aino. Čegare boe ekiripagado. Čegare Pao Kurireu bataru pagado. Čere udo nono tumogadure rugadu. Čemago pemegare Pao Kurireu bataru remawuji boe ewiagai rugadu. Dukodire boe eiamedu boe erduware tudada čemagore Pao Kurireu bataru remawu jituji. Pao Kurireu jorduware čerore jiboeji. Dukodire Pao Kurireu bataru remawu jire čenogwa jeture boe ewiagai rugadu. 3Čemagore Jesus bataru pemegareuji boe ewiagai. Mare nou bataru biadodure nou utumode boe pegareu kawuge epiji. Emeardure nou Jesus bataru pemegareuji mare erduwakare kaba jiba akoino pudui emeartorukare ji kodi. 4Bope doge eimijera Satanás ure emeardae pegado emeartoruwo tu pudui. Aidukare emeartoruwo Jesusji. Dukodire erduwakare kaba jiba nou Jesus bataru pemegareu akoino pudui duji. Dukodire emeartorukare nou Jesus bataru pemegareuji rugadu. Mare nou Jesus bataru pemegareu ure nono jorugu pemegareu umogadure. Mare jorugu ji karega inagoino. Boe emeardumode nou Jesus Cristo jiboe bataru pemegareuji. Nono emeartorumode ji. Nono Jesus umode ekinorudo ero pegareu piji ekawo turo pegareu morido pugeje. Dujire inagoino. Jesus Cristo ure nono Pao Kurireu mogadure rugadu. Mare bope doge eimijera ure boe erduwa bokwado nou Jesus Cristo jiboe bataru pemegareuji. 5Čegi čemagokare čei boe ewiagai. Jesus Cristo jire čemagore boe ewiagai. Boe eimijera kurireu nure ema. Jesus ure čedudo toro tagae čewo tawie Pao Kurireu bataru remawuji. Mare tagimijera karegure čegi. Čemeardaere tu čewo tawie Pao Kurireu bataruji tu rugadu. Du jire čenagoino boe eiamedu boe ewiagai. 6Marigudu Pao Kurireu akore: – Jorugu pemegareu uruguwo boečoji.4.6 Awu bataru padure Gênesis 1.3 keje.
Ainore Pao Kurireu akore tuwo jorugu pemegareu towuje boetoji turaga tabo.
Čemeardure Jesus akaru pemegareuji. Nono čemeartorure Jesusji. Dukodire Pao Kurireu ure jorugu urugudo čedada jamedu. Mare jorugu ji karega inagoino. Ure čedaidu kurido pudui tuwo čerduwado tuwadaruji tuwo čerdae čemeardae pegareu barigu čebiji. Dujire inagoino. Rore aino čei dukodire čerduware Pao Kurireu rore jiboeji rugadu. Ro rakare rugadu. Meardu kurire boei rugadu. Jorduware Jesus Cristo jiwuge erduware Pao Kurireuji rugadu.
7Pao Kurireu ure čerduwado. Mare boe kurireuge karegure čegi. Boe eimijerage karegure čegi. Čere nono pori mogadure. Mare pori ji karega inagoino. Čeragakare kodire inagoino. Pao Kurireu emare rakare boe jamedu boe piji. Ure turaga maku čenai čemeartoruwo makore čei duji. 8Boe pegare čei tu tu je. Mare čegiarigodukare. Čerduwakare nuba boe mode čei tu tu je. Mare čemororamagadukare. 9Ure boe pegado čeiwuge emagare. Mare čemedage bokwakare jamedu. Boe ere čedogorido rugadu. Mare ekare čedagedudo. 10Jesus bire paro pegareu moriče. Čere boe ewie nou inoduji rugadu. Mare ia boe erdu pegare čemagore jiboeji dukodire etaidure tuwo čewido nono boe erore Jesus jitu mogadure. Ero pegare čei rugadu. Mare eroiwakare tuwo čewido raga. Dukodire boe erduware Jesus rakojere čedabo duji. 11Čemeartorure Jesusji. Čere boe ewie Jesus akaru pemegareuji tu tu je. Dukodire ro pegareuge etaidure tuwo čewido tu tu je. Dukodire boe pegamode čei rugadu jii toro. Mare čemeartorukare egoi čei duji boe erduwo čemeartorure Jesus jitu duji rugadu. Dukodire čero pemegamode Jesus rore jiboeji jii toro čewimode du ka. 12Čere boe ewie Jesus akaru pemegareuji dukodire ro pegareuge etaidure tuwo čewido. Dukodire ero pegare čei tu tu je. Du inodu tabo čemeartorukare boe ero pegare čei duji. Mare čere tawie Jesus akaru pemegareuji rugadu dukodire tameartorure Jesusji rugadu. Tamugu pemegamode apo rugadu jii toro rugadu.
13Padure bapera kejewu Pao Kurireu bataru akore: – Imeartorure Pao Kurireuji dukodire ire boe ewie Pao Kurireu makore jiboeji.4.13 Awu bataru padure Salmo 116.10 keje.
Čerore nono nou bataru mogadure. Čemeartorure Jesusji dukodire čere boe ewie Jesus jiboeji. 14Pao Kurireu ure Pagimijera Jesus jewodudo pugeje. Emare umode čewodudo jamedu nono turore Jesus jitu mogadure. Dukejere umode čerududo tagabo baruto pudae. 15Dukodire inagoino tameartoruwo Jesusji. Boe pegare čei mare čere čeragado nou inoduji boe pemegawo tai rugadu. Dukodire čenagoino tai tameartoruwo Jesusji rugadu. Nouia boe dogei jamedu čenagoino emeartoruwo Jesusji. Dukodire Pao Kurireu ro pemegareu umode tumaedo boe jamedu boe parugajeje. Nou boe eiamedu boe emagomode baruto Pao Kurireu bagai jamedu. Ekimadu raimode apo rugadu. Dutabore boe emode Pao Kurireu ie kurido rugadu.
Pameartoruwo Pao Kurireuji Rugadu
16Dukodire čegiarigodukare. Čewiri gigirigodunure čeiogi čebegagodunure dukodi. Čedagedugodunure rugadu. Čeromodukare nono čero mogadure pugeje. Mare Pao Kurireu ure turaga maku čenai tu tu je kodire čemeartorumode Pao Kurireu jitu akedumodukare. Čemeartoru kuričigore Pao Kurireuji rugadu. 17Nono boe pegare čei mare boe karegano. Akedumode kuri je. Boe pegare čei mare Pao Kurireu umode boe pemegado čei baru tada nou boe pegare čei du moriče. Nou ro pemegare čeidu pemega kuričigomode rugadu. Akedumodukare rugadu. 18Čewiagoro kurire baru tada boeji. Čewiagorokare moto keje boeji pugeje. Boe erdure jeture moto keje boeji mare jeture moto kejeboe akedumode kuri aino. Mare jeture baru tadaboe akedumodukare rugadu jii toro.
51Woe moto keje pawiri pagodu ure nono ia bai pegagodu rogu mogadure. Mare bai ji karega inagoino. Pawire dukeje pawiri pagodu akedumode nono ia bai pegagodu rogu mogadure. Dujire inagoino. Pawimode mare Pao Kurireu umode ia pawai pemegado toro baru tada. Nono pamugumode nou Pao Kurireu ure towujewu bai tada. Nou Pao Kurireu ure towujewu pawai čewu akedumodukare rugadu jii toro rugadu. Mare bai ji karega inagoino. Pagodu pawiri maiwu jire inagoino tawiagai. Baru tada Pao Kurireu umode pagodu pawiri maiwudo rugadu. Nou pagodu pawiri maiwu akedumodukare rugadu jii toro. 2-4Dukodire woe moto keje pagiarigodure nou baru tadawu pagodu pawiri maiwu bagai mare emare pagodu pawiri maiwu mode ema pugeje jii toro. Pegagodumodukare pugeje. Awu woewu pagodu pawiri pegare pai rugadu. Boe pegare pai woe awu moto keje. Pagaidukare pawiwo mare pagaidure nou pagodu pawiri maiwu bagai rugadu. Dukodire pabagare nou pagodu pawiri maiwu bagai toro pagododai pugeje. Nou pagodu pawiri maiwu akedumodukare pabiji pugeje. 5Pao Kurireu emare romode aino pai. Ure Tuwari maku pagai pameartoruwo pudui turomode aino pai duji.
6Dukodire imeartoru akedukare ji. Itukare raga toro nou baru tadawu Pagimijera uwai ka raga. Iragoje kimore woe awu moto keje ikodu iwiri tabo. 7Pardukare raga pameartorure jiboeji paeku tabo. Mare du inodu tabo pameartorure ji rugadu. 8Imeartoru akedukare ji rugadu. Itaidure ituwo awu moto piji baruto imuguwo Pagimijerapo toro rugadu. 9Mare itaidure iwo Pagimijera jakarego i. Dukodire aidumode imugu raiwo woe moto keje du pegakare i. Aidumode iruduwo pudae kuri aino baruto du pegakare i jamedu. 10Ia meri keje paiamedu boe padumode Jesus Cristo togi toro baruto. Jesus jorduware parore jiboe jamedu boeji woe moto keje. Dukodire pagaregodumode toro ae dukeje aiwomode paro pemegareu bagai, paro pegareu bagai jamedu. Nono umode paro pemegareu morido pagai. Umode paro pegareu morido pagai jamedu.
Pameartorumode Jesus Cristoji Dukeje Pao Kurireu Metage Mode Pagi
11Čerduware čewo čeku kidugo Pagimijera Jesusji čemeartoruwo ji rugadu. Dukodire čemago raire boei rugadu emeartoruwo ji jamedu. Pao Kurireu jorduware čei rugadu. Imeardaere tarduware iduji jamedu. 12Bataru očaroreuge karegure čegi. Dukodire čemagokaiago čerore jiboeji tawiagai pugeje. Mare boe etaidukare taiwowo ro pemegareuge ewagai. Ekare tuioku rawuje motureuge boe epiji. Ekudau areia moture mare emeardae pemegakare. Dukodire čere tawie boe remawuji tamago pemegawo čerore jiboeji nou boe ewiagai tamagowo ewadaru jipagi ewo tuioku ra ekudau areia motureuge boe epiji etaiwowo ro pemegareuge ewagai. 13Boe egore čedaora bai bai nure mare pagare egoino. Čemeartoru kurire Pao Kurireuji rugadu. Dukeje iage egore čedaora pegakaie. Boe jokodu jire egoino. Čemagore tameartoruiago Pao Kurireuji rugadu. 14Jesus Cristo bire boe emugato boe eiamedu boe ero pegareu moriče. Dukodire čerduware boe eiamedu boe ere tuwiago turo pegareu boe moriče. Mare Jesus Cristo bire boe emugato eiamedu boe ero pegareu moriče. Dukodire čerduware Jesus Cristo meardu kurire boei duji. Dukodire čemeartorure ji rugadu. 15Mare Jesus bire boe emugato dukodire meartorure jiwuge emeartorumodukare tumeardaeji pugeje. Mare emeartorumode tu Jesusji. Emare bire ero pegareu moriče. Pao Kurireu ure jewodudo pugeje uwo nou meartorure puduiwuge ekinorudo.
16Ia boe erore jiboe pemegare boe egai dukodi karega pardu pemegamode ji. Pagodumode Pao Kurireu meardaeji. Boe erore jiboe pemegare Pao Kurireu jakai dukodire pardu pemegamode nou boe erore jiboeji jamedu. Boe erore jiboe pegare Pao Kurireu jakai dukodire pardu pegamode nou erore jiboeji jamedu. Marigudu Jesus Cristo rore jiboe pegare ia boe egai. Dukodire pardu pegare ji jamedu mare pameartorukare ji kodi. Mare aino pardu pemegare Jesus Cristoji pameartorure ji kodi. 17Mugu pemegare Jesus Cristo apowu rokare nono turo mogadure pugeje. Ro maiwu nure. Biapagare tumeardae maiwuji. 18Marigudu jordu pegare Pao Kurireu jiwuge nure pagi. Mare aino ure tumedagedo pagi. Ure Jesus Cristo mugudo pagabo tuwo pardae pameardae pemegado paro pemegawo parokawo nono paro mogadure pugeje. Makore pai paduwo ia boe etae emeartoruwo Pao Kurireuji jamedu Pao Kurireu metagewo emage jamedu. 19Boe emeartorure Jesus Cristoji dukodire Pao Kurireu ure tumedagedo emage. Tu awu jire čenagoino boe ewiagai. Pao Kurireu biagodure meartorure Jesus jiwuge ero pegareu piji. Ure čedudo boe etae rugadu čewo ewie awu Pao Kurireu bataruji emeartoruwo Jesusji rugadu Pao Kurireu uwo tumedagedo emage.
20Ča. Čegi reo. Čemagore tai tameartoruwo Jesus Cristoji. Mare čewadaru karega. Pao Kurireu emare akoino tameartoruwo Jesusji rugadu. Dukodire čenagoino tai tameartoruwo Jesus Cristoji rugadu. Pao Kurireu umode tabemegado dukodire jordu pegare Pao Kurireu jiwuge emodukare tagi pugeje. Umode tumedagedo tagi rugadu. 21Jesus Cristo ro pegareu bokware. Mare Pao Kurireu ure Jesus barigu boe ero pegareu mugato biwo boe ero pegareu moriče. Dukodire Pao Kurireu umode boe edo bato pui pudae. Mare paga karega. Boe emeartorumode Jesusji dukejere emugu pemegamode Jesus apo. Dukejere Pao Kurireu umode epemegado ero pemegawo nono turo mogadure.
61Čemaragodure Pao Kurireu apo čewo boe ewie Pao Kurireu bataruji. Tameartorure Pao Kurireuji dukodire ure turo pemegareu bu tawugeje. Mare itaidure inogwamaguduwo tai. Tagaba tagera ra tameartorure Pao Kurireu jitu piji. 2Tawiapagado Pao Kurireu bataruji rugadu. Akore:
– Itaidure iro pemegawo tai rugadu dukodire ikare tawadaru pogurudo. Tagogwamagudure i bagaiboe ire udo turugadu. Dukodire itaidure iwo taginorudo taro pegareu piji tagawo taro pegareu morido pugeje. Dukodi ire ikera maku tagai.6.2 Awu bataru padure Isaías 49.8 keje.
Ainore Pao Kurireu akore boei. Taipagado iwadaruji! Tageragu Pao Kurireu meardae pemegareuji awu meriji. Dukejere ro pemegamode tai. Umode taginorudo taro pegareu piji awu meriji rugadu tagawo taro pegareu morido pugeje.
3Boe etaiwore čerore jiboeji. Dukodire čedaidure čero pemegawo boei tu tu je. Čedaidukare čewo boe emeartoru akedudo Pao Kurireuji. 4Pao Kurireu utugarege nure čegi. Dukodire čemeartorure ji tu tu je. Boe erduware nou inoduji. Boe erduware ia boe ero pegare čei duji jamedu. Mare čero pegakare ei ero pegare čeidu jipagi. Boe pegare čei mare čemagokare boeji. Boe rakare čei mare du inodu tabo čere čeragado nou inoduji čero pemegawo rugadu. 5Boe ere boeto čei. Boe ere čedugu baičoreuto. Boe eregodure čedae boe korire pudui dutabo. Čemeardae koiare čere čemaragodae rakado čei. Kodire čenudukare. Čenogwagekare. 6Mare Pao Kurireu utugarege nure čegi. Dukodire čemeardae pemegare. Čere čerduwado boe pemegareuji. Čewudugugodure boebo. Dukodire čero pemegare boei. Boe erduware čerore jiboeji dukodire erduware čei jamedu. Pao Kurireu Uwari ure čero pemegado aino boei. Čemeardu kurire boei rugadu. Čegare boe ekiripagado. 7Čemagore tu Pao Kurireu bataru remawuji. Pao Kurireu ure turaga maku čenai. Čero pemegareu tabore čemode nou batrarodureuge ewadaru pogurudo. Čero pemegare kodire boe erduware čei rugadu. 8Ia boe emago pemegare čei mare iage emago pegare čei. Ia boe emago pemegare čerore jiboeji mare iage emago pegare čerore jiboeji. Boe jokodu jire čenagoino boe ewiagai tu tu je mare iage egore čewadrarodunuie. 9Boe eiamedu boe erduware čei. Mare iage egore tuiorduwakaie čei. Čewikare raga. Mare iage emeardaere čewie marigudu rugadu. Boe ere boe rakado čei mare ekare čewido. 10Boe ere čegiarigo. Mare du inodu tabo čegarere čei tu tu je. Čeno diero bokware mare čere boe pemegado jiwuge emagare. Boe egore marenarue nuie čegi. Mare čenoe kurireu jeture toro baru tada.
11Corinto ba kurireu kejewuge nure tagi. Čemedage remawuge nure tagi. Dukodire čere čemago pemegado tai. Čemeardu kurire tai rugadu. 12Čegare čegera ra čemeardu kurire tai dupiji. Mare tagi tare tagera ra tameardu kurire čei dupiji. 13Dukodire inogituwanure tai nono boe enogituwa moga torei dumogadure. Ča tameardu kurido čei rugadu nono čemeardu kurire tai dumogadure.
Paulo Ure Ewie Ro Pegareuge Erore Jiboeji
14Tamaragodumode meartorukare Jesus jiwugebo mare tamediakaba nou meartorukare Jesus jiwugeče. Ro pemegareu mugu pemegamodukare nou ro pegareugebo. Jorugu boečo edu jaemode pui. 15Jesus Cristo meardaekare nono bope doge eimijera Satanás6.15 Brae egore “diabo” aino bope doge eimijeraji jamedu. Grego bataru tabo nou mariguduwuge egore “Beliar” aino ji. meardae mogadure. Meartorure Jesus jiwu umodukare tumeardaedo nono meartorukare Jesus jiwuge emeardae mogadure. 16Pao Kurireu ure tuwaido tuginai bope doge ewai piji. Pao Kurireu mugukare tuwai tada pugeje. Pao Kurireu Uwari mugure meartorure Jesus jiwugebo. Dukodire nou meartorure Jesus jiwuge ere nono Pao Kurireu uwai mogadure. Mare bai ji karega inagoino. Pao Kurireu Uwari rakojere meartorure Jesus jiwuge eiamedu boebo. Dujire inagoino. Pao Kurireu bimodukare rugadu. Marigudu rugadu akore:
– Imugumode boebo.
– Emeartorumode tu i rugadu.
– Iwobe emode emage.6.16 Awu bataru padure Levítico 26.12 keje, Ezequiel 37.27 keje jamedu.
Pao Kurireure akoino.
17-18Dukodire ainore ia Pao Kurireu batarure pugeje. Akore:
– Tagera ra ro pegareuge epiji.
– Tadu jaedo epiji jamedu.6.17-18 Awu bataru padure Isaías 52.11 keje, Ezequiel 20.34, 41 keje jamedu.
– Taro pegamodukare dukeje tamodukare tabegado.
– Dukodire imode ikeragu tai iwo ikera upodo tagabo.
– Tao mode tu imi.
– Itore areme itore ime mode tu tagi jamedu.
Ainore Pao Kurireu akore. Emare rakare boe eiamedu boe epiji.6.17-18 Awu bataru padure 2 Samuel 7.8, 14 keje.
71Imeardu kurire jiwu imedage nure tagi. Pao Kurireu ure tuwadaru pemegado pai parduwawo nuba romode pai duji rugadu. Dukodire pawo pagera ra paro pegareu piji paro pemegawo pugeje. Pameartoru kuriwo Pao Kurireuji pawo paro pemegado jakai rugadu.
Paulo Jakarere Corinto Kejewuge Meartorure Jesus Jiwugei
2Tameardu kurido čei rugadu. Čero pegakare boei. Čegare boe emeardae pegado boei. Čegare čegeragu boe enoeji boe epiji. 3Mare imago pegawo tarore jiboeji dukodi karega inagoino. Marigudu ire tawie. Čemedage mode tagi rugadu. Iwimode tagabo mare imodukare ikera ra tabiji. Imedage mode tagi jii toro rugadu. Dukodire inagoino tai tameardu kuriwo čei jamedu nono čemeardu kurire tai dumogadure. 4Iorduware tameardaeji rugadu. Inojarore tai rugadu. Boe pegare čei rugadu mare du inodu tabo iagarere i. Iorduware iraga kimore duji.
5Čedaregodure Macedônia moto ka. Mare čeroiwakare čewo čedamudo. Boe ere boe pegado čei. Meartorukare Jesus jiwuge etokire čei. Čemororamagadure rugadu. 6Mare Pao Kurireu ure boe egaredo pudui. Ure čegaredo čei rugadu. Ure čemedia Tito arego čedae dukodi čare čegarere čei rugadu. 7Nou čemedia Tito aregodure čedae tabiji dukeje readodure tarore jiboeji čewiagai. Dukodire čemororamagadukare tawagai pugeje. Tito readodure tarore jiboeji čewiagai. Makore taro pemegaie pudui. Dukodire tare čegaredo čei rugadu. Tito makore tagaiduie tarduwo i pugeje. Makore tagiarigoduie taro pegareuji. Taie tarugadu tamago pemegawo irore jiboeji boe eimijerage ewiagai. Iagarere tai. Dukodi čare iagarere i jii aino rugadu.
8Nou ire maku tagaiwu atugoreboe boetojiwu ure tagiarigo. Mare imi ipogurukare nou iwadaruji. Ire maku tagai iwo tawie taro pegareuji. Dukodire tagiarigodure mare jii toro karega. Iorduware tagiarigodure duji dukodire ikiarigoduiago jamedu. 9Ire tagiarigo. Mare taro pegareu jire tagiarigodure dukodire tare tagera ra nou taro pegareu piji. Pao Kurireu emare ure tado tagera ra nou taro pegareu piji tagiarigodure taro pegareuji dukodi. Dukodire čegare boe pegado tai. Aino čare iagarere i rugadu. 10Boe ekiarigodumode turo pegareuji. Emeartorumode Pao Kurireuji uwo edo tugera ra turo pegareu piji. Dukejere Pao Kurireu umode ekinorudo ero pegareu piji ekawo turo pegareu morido pugeje. Dukodire boe egaregodumode pudui rugadu. Mare boe ekiarigodumode turo pegareuji mare emeartorumodukare Pao Kurireuji dukeje ewimode turo pegareu moriče rugadu. 11Mare tagare aino. Tagiarigodure taro pegareuji mare tameartorure Pao Kurireuji. Nono tameardae ure turugadu nono imeardae mogadure. Aino tagaidukare boe ero pegareuji pugeje. Tagorigodure boe ero pegareuji. Tagaidukare boe ero pegareuji pugeje. Tameartorure Jesusji rugadu. Tare tarugadu tawo boe rakado ro pegareugei ero pegareu boe moriče. Aino čare iorduware tai. Taro pemegare nou ire tawie jiboe kori rugadu.
12Ire nou atugoreboe boetojiwu maku tagai. Mare paga karega. Ikare maku nou ro pegareu ai. Ikare maku nou boe pegare jiwu ai jamedu. Mare ire nou atugoreboe boetojiwu pemegado iwo maku tagai iwo tarduwado nuba tare duji. Iwo tarduwado tameardu kurire čei duji. Pao Kurireu jorduware tameardu kurire čei duji rugadu. 13Dukodire tare čegaredo čei.
Mare tu čegi karega. Tare Tito jakaredo pudui jamedu. Tito readodure nou inoduji čewiagai. Dukodire čegarere čei rugadu jamedu. 14Imago pemegare tarore jiboeji Tito biagai marigudu. Nono Tito aregodure tagae dukeje tarore ji nono taro mogadure rugadu. Čemago kigodure boe remawuji tawiagai rugadu. Nono čemago pemegare tarore jiboeji Tito biagai. Boe jokodu jire čenagoino Tito biagai jamedu. 15Dukodire Tito meardu kurire tai rugadu. Meardu kurimode tai rugadu. Tito aregodure toro tagae dukeje tare tado tarugadu tameartoruwo Tito ure tawie jiwu Pao Kurireu bataruji rugadu. Tito aregodure toro tagae tare tagera upodo apo tagaidu tabo rugadu. Dukodire Tito biabutumode taro pemegare puduiboe keje kodire meardu kurimode tai rugadu. 16Aino čare iorduware tai. Tameartorure Jesus bataru remawuji rugadu. Dukodire iagarere i tai rugadu.
8Meartorure Jesus Jiwuge Emode Diero Pedo Pui
1Čemedage nure tagi. Čedaidure čewo tawie Pao Kurireu rore jiboeji Macedônia moto keje. Pao Kurireu ro pemegare nou meartorure Jesus jiwugei toro nou moto keje. 2Boe pegare ei rugadu. Boe rakare ei rugadu. Mare egarere pudui nou inodu kujiagi rugadu dukodire ere diero kurido rugadu tuwo maku Pao Kurireu ai. Marenarue doge nure emage mare du inodu tabo ere diero kurireu maku Pao Kurireu ai. 3-4Etaidure tuwo tugera maku Judéia moto kejewuge meartorure Jesus jiwuge etai rugadu. Dukodire enogwamagudu maere i iwo awu eno diero reko toro Judéia moto kejewuge etae. Nono ere to diero rugadu maku taidu tabo etai. Dukodire eno diero bokware nono ebo rugadu. 5Čemeardaekare eromode aino duji. Ere tumagu Pao Kurireu ai tumeartoruwo ji rugadu. Dukodire ere tugera maku čenai jamedu Pao Kurireu meardaere jiboe umogadure. 6Dukodire čemagore Titoji uwo tarduwado jamedu. Čare Tito ure tawie nou Judéia kejewuge eno diero bokware duji. Nou Tito mugumode tagabo tamaragoduwo diero bagai tawo maku nou Judéia kejewuge meartorure Jesus jiwuge ewagai jamedu. Nono tamode tagera maku etai tagaidu tabo. 7Tameartoru kurire Jesusji. Tarduware Pao Kurireu makore jiboeji rugadu. Dukodire tamagore Pao Kurireu bataruji rugadu. Tagaidure tawo tagera maku boe etai rugadu. Tameardu kurire čei rugadu. Dukodire čenagoino tai tameardu kuriwo awu Judéia kejewugei meartorure Jesus jiwugei tawo tagera maku etai dubagai. Tagera maku etai tagaidu tabo rugadu.
8Ikaregure tameartorudo imeardaeji iwadaru rakareu tabo. Mare itaidunure iwo tarduwado ia boe erore jiboeji tarowo nono ero mogadure. Ere tudo turugadu tuwo tugera maku boe doge etai. Tare tado tarugadu tawo tagera maku boe doge etai jamedu dukeje boe erduwamode tameardu kurire boei duji. 9Tarduware Pagimijera Jesus Cristo ro pemegareuji. Jesus oe kurire baru tada. Mare ure tugera ra toe rugadu boe piji tuwo turawuje mato moto ka pagae. Rakojere woe dukeje oe bokware rugadu. Mare paga karega. Aregodure tuwo boe enoe kurido toro baru tada.
10Jawu joruji tare tameardae tawuje tawo diero maku nou Judéia moto kejewuge ewagai. Taigoiare tare tameardae tawuje tawo diero reko ewagai. Tare diero maku. Mare tagare diero rugadu boe maku nou boe ewagai. Aino čare nou diero rugadu boe maku toro ewagai rugadu. 11Tarodo nono tameardae mogadure. Taiamedu boe tago diero rogu to čo čo pui tawo maku tagaidu tabo Judéia kejewuge meartorure Jesus jiwuge ewagai. 12Pao Kurireu jorduware tagoeji. Aidure tawo ia maku tagaidu tabo. Mare Pao Kurireu okwamagudukare tai ia padukare tagaboboe bagai.
13-14Tagoe kurire. Iage enoe kurikare. Nou enoe kurikareuge etaidumode tuwo ia toe maku jamedu dukeje pegakare. Mare itaidure tawo diero maku rugadu marenarue doge etai tago diero kurire kodi. Toro ia meri keje tago diero akedumode dukeje boe emode tugera maku tagai jamedu boe erduware taro pemegare dukodi. Nono boe eiamedu boe ero pemegamode pu jamedu boeji. 15Padure bapera kejewu Pao Kurireu bataru akore: – Pao Kurireu ure boe eke barigu mato baru piji boe etae ewo tugeragu tugeji. Ia boe umode tugeragudo kurido nou tugeji dukeje umode pedo tuwobei nou meriji rugadu. Nono nouia uwobe ure tugeragu jiboe kurimodukare dukeje umode turugadu ji. Nono eiamedu boe ekere turugadu eiamedu boei rugadu.8.15 Awu bataru padure Êxodo 16.18 keje.
Ainore Pao Kurireu batarure.
Imedu Tito Ro Reo
16Imagore Pao Kurireuji imedu Tito paru tabo. Pao Kurireu ure imedu Tito aidudo tuwo tugera maku tagai nono čedaidu mogadure. 17Čenogwamagudure Titoji utuwo tawagai uwo tugera maku tagai dukeje aidure rugadu. Akore: – Marigudu itaidure ituwo toro ewagai rugadu.
Ainore Tito akore. 18Dukodire čere utudo toro tawagai rugadu. Nono čere ia pamedia utudo apo toro tawagai jamedu. Meartorure Jesus jiwuge eiamedu boe emago pemegare awu pamedia rore jiboeji. Etaidure awu pamedia rore jiboeji rugadu. Makore Jesus bataru pemegareuji rugadu boe ewiagai. 19Awu woewuge meartorure Jesus jiwuge eiamedu boe ere tugeragu awu pamediaji utuwo čedabo toro Judéia moto ka čewo nou diero reko toro ewagai. Čemeardu kurire boei dukodire čere čegera maku boe etai emago pemegawo Pagimijera Jesusji. Čere čegera maku boe etai erduwawo čedaidure pudui duji rugadu.
20Boe ere diero maku čenai čewo reko toro Judéia moto kejewuge ewagai. Dukodire čemode reko toro rugadu. 21Pagimijera Jesus jorduware čerore jiboeji. Boe eiamedu boe erduwamode čerore jiboeji jamedu. Dukodire čero jetorore nou diero tabo rugadu.
22Nono čere ia pamedia utudo toro tawagai nou Tito magebo. Čedaiwore awu pamedia rore jiboeji marigudu. Ro pemegare. Ure tudo turugadu tuwo tugera maku boe etai rugadu. Emare jorduware tai rugadu. Dukodire aidure tuduwo toro tawagai tuwo tugera maku tagai rugadu. 23Tito maragodure itabo rugadu. Imedia nure ema rugadu. Ia pamedage etumode apo jamedu toro tawagai. Emagere emeardaere nono awu meartorure Jesus jiwuge emeardae mogadure jamedu. Emode tarduwado nuba boemode woe duji. Ero pemegare dukodire boe emeartorure Jesus Cristoji rugadu. 24Tito mage etaregodumode tagae rugadu. Nono tameardu kurido ei rugadu. Tameardu kurimode ei dukeje awu woewuge emeartorure Jesus jiwuge erduwamode tarore jiboeji. Čemago pemegare tarore jiboeji awu woewuge meartorure Jesus jiwuge ewiagai. Taro pemegamode Tito magei dukeje awu woewuge erduwamode boe jokodu jire čenagoino pudui duji.
9Boe Ewo Tugera Maku Meartorure Jesus Jiwuge Marenarue Doge Etai
1Inure awu bapera atugodo iwo maku tawagai iwo tarduwado diero makudumode meartorure Jesus jiwuge etai. Judéia moto kejewuge meartorure Jesus jiwuge etaire nou diero makudumode rugadu. Mare tarduware nou inoduji marigudu. 2Tagaidure tawo tagera maku etai rugadu. Iorduware. Dukodire ire Macedônia moto kejewuge meartorure Jesus jiwuge ewie nou tameardaeji rugadu. Inagore: – Acaia moto kejewuge meartorure Jesus jiwuge ere tudo turugadu tuwo diero maku Judéia moto kejewuge ewagai marigudu.
Ainore inagore ei. Tare tarugadu tawo diero maku tagaidu tabo dukodire awu Macedônia kejewuge etaidure tuwo ia diero maku Judéia moto kejewuge ewagai jamedu. 3Nono ire awu pamedage Tito mage etudo toro tawagai tawo nou diero maku etai ewo reko toro Judéia moto kejewuge ewagai. Mare tamodukare maku dukeje boe emeartorumodukare čemagore jiboeji pugeje. Mare imeartorure tamode nou diero maku etai rugadu duji. 4Mare itaregodumode tagae awu pamedagebo mare tamodukare tarugadu tawo maku dukeje čebogurumode tarore jiboeji. Tabogurumode jamedu. 5Dukodire ire awu pamedage Tito mage etudo itododai awu atugoreboe tabo toro tawagai tawiabutuwo tamagore jiboe keje. Tagagore tamoduie diero maku nou Judéia moto kejewuge etai rugadu. Nou tago diero tamode makuwu udo turugadu tawo maku etai. Itaregodumode tagae dukeje tare nou diero udo turugadu tawo maku rugadu tagaidu tabo. Boe eiamedu boe erduwamode nou inoduji rugadu.
6Tarduware. Boe eno boepa biagare tu je kodire nou enoe rogu kurimodukare nou boepa tada. Mare boe eno boepa kurireu kejere enoe kurimode nou boepa tada jamedu. 7Boe ekare turagado tai tawo tago diero maku. Tamode tameardae tawuje tawo diero kurireu maku Judéia kejewuge meartorure Jesus jiwuge boe etai. Du pegakare. Tamode tameardae tawuje tawo diero biagareu maku. Du pegakare. Mare nou tameardaere jiboe rugadu boe maku tagaidu tabo, taegare tabo. Pao Kurireu aidu kurire nou ure to diero maku tiagare tabowugei. 8Tamode maku dukeje Pao Kurireu umode boe pemegareboe maku tagai. Tagoe bokwamodukare pugeje. Tagoemode tawo maku marenarue doge etai rugadu. Taro pemegareu kurimode tu tu je rugadu. 9Ainore padure bapera kejewu Pao Kurireu batarure: – Pao Kurireu ure boe kurido marenarue doge etai. Ro pemegare ei taidu tabo jii toro. Akedumodukare rugadu. 9.9 Awu bataru padure Salmo 112.9 keje.
10Pao Kurireu umode boe a maku boe etai ewo tugu to boepato. Umode amireu maku uke bokwareuge etai ewo kowuje. Emare umode boe pemegareu kurido toro tagai jamedu. Tamode diero maku meartorure Jesus jiwuge etai dukeje Pao Kurireu umode tago diero kobo kurido rugadu. Tago diero umode nono boe a mogadure. Boe ere boe a tugu dukeje boture rugadu. Dukeje enari kurire boe a tabo. Dukodire nou boe a makare pugeje nou boe a mitodu piji. Aino tago diero umode nono nou boe a moga mitotu je dumogadure. Mare boe a ji karega inagoino. Pao Kurireu umode tago diero kurido rugadu. Dujire inagoino. 11Pao Kurireu umode tago diero kurido tu tu je tawo pedo oe bokwareuge etai jamedu. Nono boe ekimadumode Pao Kurireu apo taro pemegare pudui dukodi. Nono čemode diero reko toro Judéia kejewuge etae rugadu. 12Tamode diero maku meartorure Jesus jiwuge etai nou marenarue doge etai nono eno diero mode rugadu. Tamode diero maku dukodire boe ekimadumode Pao Kurireu apo tabaru tabo rugadu. 13Tamode diero maku meartorure Jesus jiwuge marenarue doge etai dukeje boe erduwamode tai rugadu. Tagagore tameartoruie Jesusji rugadu. Nono erduwamode boe rugadu jire tagagoino duji. Tameartoruie Jesusji rugadu. Tare tago diero maku etai rugadu. Tare maku ia boe etai jamedu. Dukodire nou boe emago pemegamode Pao Kurireuji rugadu. 14Erduwamode Pao Kurireu ro pemegare tai duji rugadu. Nono etaidu kurimode tai rugadu. Emagomode baruto Pao Kurireu bagai tabaru tabo jamedu. 15Mare Pao Kurireu ure tonaregedu maku pagai boetoji paro pegareu moriče. Paroiwakare rugadu nou paro pegareu mori bagai. Dukodire pagimadumode Pao Kurireu apo rugadu.
10Paulo Mako Pemegare Turoji
1Paulo nure imi. Iragojere tagabo dukeje boe egore imago rakakaie boei. Boe egore inojarokaie iwadaruji. Mare iragojekare nono tagabo dukeje ia boe egore iragaie imago rakawo tai tae paga keje. Iragojekare tagabo mare itaidure inogwamaguduwo tai. Itaidure imago pemegawo tai nono Jesus mako mogadure. Itaidure iwo iro butugudo tai rugadu nono Jesus Cristo ro mogadure. 2Itaidure inogwamaguduwo tai. Tameartoruwo awu atugo padure bapera kejewu iwadaruji dukeje imago rakamodukare tai pugeje. Mare iage egomode čemeardaie nono meartorukare Jesus jiwuge emeardae mogadure dukeje imago rakamode ei rugadu ewadaru jipagi. 3Čeragojere meartorukare Jesus jiwugebo rugadu. Mare čemeardaekare nono emeardae mogadure. Čerugodumode mare čerugodumodukare nono emeardae mogadure. 4Čerugodumodukare baiga tabo. Pao Kurireu ure čeragado čerugoduwo bope doge etuwairei. Bope uwari umode boe ewadrarodudo Pao Kurireu bataruji dukeje čemode ewadaru to eiagi rugadu. Dujire inagoino tai. 5Boe enojaromode tuwadaruji Pao Kurireu bataru piji. Mare pagare egoino. Čemode nou ewadaru očaroreu to eiagi rugadu. Čemode čemeardae rugadu udo turugadu čemeartoruwo Jesus Cristo bataruji rugadu. 6Tagi jamedu tameartoru kurimode Jesus Cristo makore jiboeji jamedu. Mare ia tagi tamode tagera ra tameartorure Jesus makore jiboe piji dukeje čemode boe rakado tai tameartoruwo Jesus makore jiboeji pugeje.
7Ia tagi tarduwakare čei du inodu tabo tameardae pegare čei tamago pegare čei. Mare čemeartoru kurire Jesus Cristoji nono tamogadure. Tameartorure tu Jesus Cristoji rugadu. Tameartorukare ia boei. Čegi jamedu čemeartorukare ia boei jamedu. Čemeartorure tu Jesus Cristo bataruji nono tameartorure jitu mogadure. 8Jesus ure nou meartorure puduiwuge eimijerado imi. Ure iorduwado rugadu. Mare paga karega. Ure iorduwado iwo tameartoru rakado pudui. Imodukare tameartoru akedudo tabiji. Dukodire ipogurukare imago raiwo Pao Kurireu bataru remawuji tawiagai rugadu. Inure tawie boe remawuji rugadu. 9Itaidukare tabaguduwo awu ino atugoreboe aregodumode tagae duji. 10Iage egomode: – Paulo rakojere čedabo dukeje mako rakakare čei. Mako pegakare čei. Pogurure tumagowo čei kodi. Mare rakoje jaere čebiji dukejere mako rakare nou ture towu atugoreboeto mato čewagai.
Ainore ia boe egomode i rugadu.
11Pagare awu boe egoino iwadaruji. Ikare iwadarudo pobe. Iwadaru ure mitotu je. Iragojere tagabo dukeje imagore jiboe ure nono padure awu atugoreboe kejeboe umogadure. Iromode nono awu atugo padure bapera kejeboe mogadure.
12Čegare nono nou očarore tuwadaru jiwuge emogadure. Erduwa bokware. Ere tumeardae pegareu tumeardae pemegareu tawuje taora piji tu tumeardae tabo rugadu. Dukodire erdu pegare tumedage erore jiboeji. Mare pudumi erdu pegakare turore jiboeji. Dukodire inagoino erduwa bokware rugadu. 13Mare Pao Kurireu ure čemaragodae maku čenai čewo boe ewie tuwadaru remawuji. Čenojaromodukare ia čemaragodaeji. Čenojaromode tu nou Pao Kurireu ure maku čenaiwu čemaragodaeji. Čere tawie Pao Kurireu bataru remawuji rugadu dukodire čenojarore nou čemaragodaeji. 14Pao Kurireu koiare ure čedudo toro tawagai. Dukodire čere tawie Jesus Cristo bataru pemegareuji. 15Ia boe etaidumode tumaragoduwo tagabo mare čewiagorokare nou inoduji. Pao Kurireu ukare awu emaragodae maku čenai. Čemaragodae ukare nono ero mogadure. Čemeardaere tu tameartoru rakawo Jesusji. Dukodire čedaidure čemaragoduwo rugadu tameartoru rakawo Jesusji rugadu Pao Kurireu meardaeji. 16Čeromode aino tai dukeje čedumode tabiji toro ia boe ewagai pugeje čewo ewie Jesus bataru pemegareuji jamedu. Boe ekare nou iage ewie raga dukodire čedaidure čeduwo toro ewagai jamedu. Emeartorumode Jesusji dukeje čenojaromode ei jamedu.
17Padure bapera kejewu Pao Kurireu bataru akore: – Boe enojarowo Pao Kurireu rore jiboeji tu rugadu.10.17 Awu bataru padure Jeremias 9.24 keje.
18Pameardae pemegamode pamaragodaeji mare pagatu je. Paegai ure turugadu. Mare Pagimijera Jesus jakai ukare turugadu. Mare Pagimijera Jesus aidumode nou pamaragodae jitu keje parduwamode pamaragodae ure turugadu duji.
11Uture Jesus Bataru Tabowu Remawu Reo
1Očarore puduiwuge emago pemegare tu pudui mare pagatu jere egoino. Emago paga paganure nou tuwadaruji. Imago pemegamode i dukeje boe egomode imago paga paga nuie iwadaruji jamedu. Ča imago pemegamode i tawiagai rugadu. Mare tamode tawia tugu iwadaruto dukeje tarduwamode imago paga karegure iwadaruji tawiagai. Boe jokodu jire inagoino tawiagai rugadu. 2Imedu makomode ia imeduji tumoduie tonaregedu nogwaredu maku ai muguwo apo dukodire uo jetu pemegamode nou tonaregedu nogwareduji jii toro mugumode nou imedu apo du ka rugadu. Jetu pemegamode tonaregedu nogwareduji mugukawo toro ia imedu apo mare muguwo tu nou togwamagudure jiwu imedu apo rugadu. Tare nono nou nogwaredu mogadure. Ire nono nou nogwaredu uo mogadure. Mare nogwaredu ji karega inagoino. Uo ji karega inagoino jamedu. Imagore tai tameartorukawo ia boei. Tameartoruwo tu Jesus Cristoji rugadu. Du jire inagoino. Dukodi čare inagoino tai. Tameartorukaba ia boei. Tameartoru rakado tu Jesus Cristoji rugadu. Awu imeardae ure nono Pao Kurireu meardae mogadure. Emare aidure rugadu tameartoruwo tu pudui rugadu. 3-4Mare boe etaregodure tagae tuwo tarduwado Jesusji. Mare nou emagore jiwu Jesus ukare nono awu čemagore jiwu mogadure. Ewadrarodunure tawiagai. Mare tameartorure nou ewadrarodaeji. Emagore jiboe ure tuginai. Emagokare Pao Kurireu Uwari bataruji tawiagai. Emagokare Jesus bataru pemegareuji tawiagai. Čegi čere tarduwado Pao Kurireu Uwari remawuji. Čere tarduwado Jesus bataru remawuji. Emagere ere tarduwado ia tuwari tuginaiwuji. Egore tameartoruwo tuwadaruji tawo taginorudo. Mare ewadaru ukare turugadu. Mare tagaidure ewadaruji. Dukodire imororamagadure tawagai. Tameartorumode ewadaruji dukeje ewadaru umode tameardaere jiboe pegado. Ewadaru umode tado tawia ra Jesus Cristo bataru piji. Tameartorumodukare ji pugeje. Emode taekiripagado nono awagu rore aredu boetojiwu Eva11.3-4 Tagaiwodo Gênesis 3 kejewu bataruji tarduwo awu readodaeji. jitu mogadure ure jekiripagado tuwadrarodae tabo dumogadure.
5Nou boe egore uture Jesus bataru tabowuge enuie pudumi. Egore tumago motuie rugadu Pao Kurireu bataruji boe ewiagai. Mare Pao Kurireu bataru remawu pa? Emago kana Pao Kurireu bataru ji rugadu? Nou uture Jesus bataru tabowu remawu nure imi. 6Egore iorduwakaie imago motuwo boei. Boe rugadu. Iorduwakare imago motuwo boei rugadu. Mare iorduware jiboe kurire rugadu erduware jiboe kori. Ire tarduwado marigudu. Dukodire tarduware i marigudu. Tarduware boe jokodu jire inagoino tawiagai duji.
7Imagore Pao Kurireu bataruji tawiagai tarduwawo Jesus bataru pemegareuji. Mare imagokare tai tawo morido inai. Nou iage ere tado morido pudai. Imi ikare ino diero kurido. Nou iage ere to diero kurido. Ča iro pegareu pa? Iro pega karegure tai dukodire ire nono marenarue doge emogadure iwo tawie Jesus bataruji boe pemegawo tai rugadu. 8Imagore Pao Kurireu bataruji tawiagai mare tagare diero maku inai nou imaragodae moriče. Ia mugu jaereuge meartorure Jesus jiwuge eigoiare ere diero maku inai. Dutabore ire akirodo ikeji inoe rogu boeji imuguwo nono tagabo. 9Iragojere tagabo dukeje ino diero bokware rugadu. Mare imagokare tai ia tago diero bagai inoče. Nou Macedônia moto kejewuge meartorure Jesus jiwuge etaregodure nouia diero rogu tabo tuwo maku inai iwo akirodo ike roguji inoe rogu boeji. Nono iromode tai pugeje nono nou iro mogadure rugadu. Imagomodukare tai iaboe bagai inai rugadu. 10Jesus Cristo bataru remawu meture itaora tada rugadu. Dukodire imode iwadaru udo turugadu tawiagai. Awu irore jiboe imagomodukare tai tawo morido inai. Tamodukare iwarigu awu irore aino dupiji. Acaia moto kejewuge eiamedu boe emodukare iwarigu awu irore aino dupiji rugadu. 11Inogwamagudukare tai diero bagai dukodire ia tagi tameardaere imeardu kurikare tai duji. Dukodiba tameardaere aino? Imeardu kurire tai dukodire irore aino tai. Pao Kurireu jorduware boe jokodu jire inagoino tai duji.
12Iromode nono awu irore jiboe mogadure rugadu. Iage egore uture Jesus bataru tabowuge enuie pudumi. Mare pagare egoino. Dukodire itaidukare boe emeartoruwo nou boei. Nono eroiwamodukare tumago pemegawo turore jiboeji. Enogwa aregodumodukare čemagore jiboe ka. Emago pagarumode tawiagai. 13Uture Jesus bataru tabowuge remawuge karegure emage. Ewadrarodure turore jiboeji boe ewiagai. Etaidure tuwo boe ekiripagado. Egore uture Jesus bataru tabowuge enuie pudumi. Mare pagare egoino. Ere tudo nono uture Jesus bataru tabowuge emogadure. Mare pagare egoino. 14Mare paga karega. Erore nono tugimijera pegareu ro mogadure. Ekimijera Satanás umode tudo nono baru tadawu jorugu pemegareu mogadure jamedu boe emeartoruwo pudui dubagai. Umode turo pemegado boe egai boe ewo tie mekido tiagwai. Emeartoruwo tu pudui. Emeartorukawo Pao Kurireuji pugeje. 15Dukodire nou boe erore nono nou tugimijera Satanás ro mogadure. Ere tudo nono ro pemegareuge emogadure. Mare pagare eroino. Toro ia meri keje boe pegamode ei rugadu nou ero pegareu jamedu boe moriče.
Boe Ere Boe Pegado Pauloji
16Iwo tawie pugeje. Jorduwa bokwareu karegure imi rugadu. Mare imago pemegamode irore jiboeji nono nou jorduwa bokwareuge emago mogadure. Dukodire tameardaemode jorduwa bokwareu nure imi duji. Mare tawiapaga pemegado iwadaruji tameartoruwo i nono tameartoru moga nou jorduwa bokwareugei dumogadure. 17Pagimijera Jesus aidukare imago pemegawo irore jiboeji. Mare tameartorure nouia jorduwa bokwareugei. Jorduwa bokwareuge nure emage. Mare tameartorure ei. Dukodire imagomode nono emago mogadure tameartoruwo imagore jiboeji jamedu. 18Mare mako pemegare turo jiwuge emagare. Dukodire inagomode nono ego mogadure. 19Tameardaere tarduwaie rugadu. Mare tameartorure jorduwa bokwareugei. 20Boe etaidure tuwo tudugaregedo tagi. Nono tamaragodure etai. Etaidure tuwo toe kurido tagoe tabo. Nono tare tagoe maku etai. Ere taro akedudo. Nono tarokare boeji pugeje. Egore maragodu bokwareuge enuie tagi. Mare tamagokare boeji ewadaru jipagi. Ere boe pegado tai mare tamagokare iaboeji ei. 21Ipogurure imago pemegawo irore jiboeji mare čerokare nono nou boe erore jiboe umogadure. Emago pemegare turore jiboeji mare ero pegare rugadu. Imi imagore boe remawuji. Du inodu tabo imago pemegamode irore jiboeji rugadu nono nou jorduwa bokwareuge emago mogadure tarduwawo imago jetoronure duji. 22Nou boe egore Judeu doge enuie pudumi. Judeu nure imi jamedu. Nou boe egore Pao Kurireu uwobe enuie pudumi. Pao Kurireu uwobe nure imi jamedu. Egore Abraão uwobe enuie pudumi. Abraão uwobe nure imi jamedu. 23Egore Jesus Cristo utugarege enuie pudumi. Mare Jesus Cristo utugare remawu nure imi rugadu. Itaidukare imagowo aino. Imagore nono ia jorduwa bokwareuge emago mogadure. Nou boe egore tumaragodu rakaie. Mare imaragodae kodure emaragodae kori. Boe ere itugu baičoreuto. Boe ere boeto i barogo biri tabo dukejere ere tuiago iwido tu tu je. 24Judeu doge ere barogo biri to i du oto padure kejewure 39. Du ere to idu ure ikera aboudure. 25Romano doge ere iwara to i du ure pobe metia bokware. Ia boe eidore tori tabo i tuwo iwido rugadu. Iture tabowu ikarereu doge ere pobe metia bokware duwuge ewogware poboto itabo. Ipadure pobo maereu tada merire mito i boečore mito i jamedu pobo maereu tada. 26Iture Jesus bataru tabo rugadu dukejere boe pegare i rugadu. Iwikare poboto. Iwogu kigodureuge ero pegare i jamedu. Iwobe Judeu doge ero pegare i jamedu. Boe tuginaiwuge ero pegare i jamedu. Itaregodure ba kurireuto dukeje ba kurireu kejewu boe ero pegare i jamedu. Boe pegare i itura maereu tada jamedu. Boe pegare i pobo maereu tada jamedu. Boe egore imedage enuie pudumi mare ere iordudo boe pegareuji rugadu. 27Nou imaragodae tore inudu pemegakare, inogwage pemegakare, ikudukare poboče, iwai bokware, ikudau areia bokware. 28Boe pegare i rugadu. Mare imororamagadure toro meartorure Jesus jiwuge eiamedu boe ewagai jamedu. Nou inodu ure imororamagadudo rugadu. 29Boe eragakare dukodi čare iraga akedure ipiji jamedu. Boe ere ekiripagado ero pegawo rugadu dukodire ikiarigodure rugadu nou inoduji jamedu.
30Imago pemegamode irore jiboeji dukeje inogwa jetumode tu aino boere i duji. Dukodire tarduwamode iraga akedure ipiji duji. 31Iwadrarodukare. Pao Kurireu jorduware boe jokodu jire inagoino duji. Pagimijera Jesus uo nure ema rugadu. Boe emago pemegawo ji rugadu jii toro. 32Marigudu iragojere Damasco ba kurireu keje dukeje nou moto kejewu boe eimijera kurireu iere Aretas. Nou Aretas ure ia timedia jetudo nou Damasco ba kurireuji boe eimijera governador uwo ema nono nou ba kurireu keje. Nou Damasco ba kurireu kejewu boe eimijera governador makore tugobaigaregei eduwo nou ba kurireu bai poro keje taiwo tabo iwagai tuwo tugeragu i tuwo itugu baičoreuto. 33Mare boe ere irawuje moto ri aogejewu tuwai poro piji kadarabo kurireu tabo bukigu tabo toro moto ka. Dukodire ire ikinorudo nou boe eimijera pegareu piji.
12Paulo Uniaure Pao Kurireu Makore Pudui Duji
1Tagaidure imago pemegawo irore jiboeji tawiagai. Mare imi karega. Itaidukare imago pemegawo irore jiboeji. Itaidure tameartoruwo tu Jesusji rugadu. Mare ireadodumode iordure jiboeji. Ireadodumode Pagimijera Jesus ure iordudo jiboeji. 2Iorduware ia meartorure Jesus jiwu imeduji.12.2 Puduire Paulo akoino. Joru oto padu kejeboere catorze jii toro rekodaji rugadu boere nono nou imeduji. Pao Kurireu ure nou imedu rutudo baruto. Jordure baru tadaboeji. (Iorduwakare nuba Pao Kurireu rore ji tuwo jordudo nou inoduji. Uniauto kana jordure nou inoduji? Ukana rutudo rugadu tuwo jordudo nou boe rugadu boeji? Parduwakare. Mare Pao Kurireu jorduware.) 3-4Iorduware nou imedu jordure moto pemegareu jituji. (Iorduwakare nuba Pao Kurireu rore ji tuwo jordudo nou inoduji. Mare Pao Kurireu jorduware.) Nono baru tada nou imedu meardure boeji. Mare boe eguwakare tumagowo nou imedu meardure jiboeji. 5Dukodire imago pemegamode nou imedu jordure jiboeji rore jiboeji. Mare ia imedu ji karega inagoino. Ire inagoino. Imire iordure nou baru tadaboe jamedu boeji. Mare iwadaru očaromodukare irore jiboeji. Inagomodukare nou boe kurireu nuie imi tawiagai. Imagomode iragakare jiboeji tawiagai. 6Imago pemegamode irore jiboeji tawiagai du pegakare. Iwadrarodu karegure tawiagai. Ikare nono jorduwa bokwareu mogadure. Boe jokodu jire inagoino tawiagai. Mare imago pemegamodukare irore jiboeji rugadu. Tarduware i. Tarduware irore jiboeji. Tarduware imagore jiboeji. Itaidukare tamagowo i ia irore jiboe bagai. Iwadaru očaromodukare irore jiboeji rugadu. Ire tu nono ire rugadu.
7Nou imagore jiwu tawiagaiwu imedu nure imi. Iordure nou boe pemegareu boeji baru tada. Nono bope ro pegare i. Dukodire itogorire i. Mare paga karega. Pao Kurireu koiare ure rodo aino i inojarokawo i dubagai. Dukodire inojaromodukare irore jiboeji pugeje. Inojaromodukare iordure jiboeji pugeje. 8Imagore baruto Pao Kurireu bagai du ure pobe metia bokware uwo nou jeture iboe barigu ipiji ipemegagoduwo. 9Mare Pao Kurireu akore: – Imodukare barigu apiji. Mare iro pemegamode ai. Aragamodukare dukeje imode iraga maku akai.
Dukodire iagarere iraga bokware duji rugadu. Imago pemegamode iragakare duji. Mare paga karega. Jesus Cristo umode turaga maku inai tietu pemegawo i rugadu. 10Iragamodukare i dukeje Jesus umode turaga maku inai. Dukodire iagaremode i rugadu. Boe emago pegamode i du inodu tabo ire iwudugudo i boebo. Boe pegamode i du inodu tabo iagarere i. Boe ero pegamode i du inodu tabo ikorigodukare nou boei. Boe pegamode i du inodu tabo ikiarigodumodukare rugadu. Iagaremode i rugadu. Iragamodukare i dukeje Jesus umode turaga maku inai rugadu.
Paulo Mororamagadure Corinto Kejewu Meartorure Jesus Jiwuge Ewagai
11Kočare tameartorure jorduwa bokwareuge ewadaruji. Emago pemegare turore jiboeji tawiagai dukodire tameartorure ei. Kodire tameartorukare čei pugeje. Dukodire imago pemegamode irore jiboeji tawiagai nono nou jorduwa bokwareuge ero mogadure. Itaidukare imagowo irore jiboeji mare tagire tare irodo aino kodire imago pemegamode irore jiboeji tawiagai. Tagi tarduware i marigudu. Mare kočare tamago pemegakare irore jiboeji. Irore jiboe kodure nou tameartorure jiwu jorduwa bokwareuge ime erore jiboe kori. Egore uture Jesus bataru tabowuge enuie pudumi mare pagare egoino. Egore iro rakakaie. Dukočare tamagokare ewadaru jipagi egore aino i duji. Dukodire imago pemegamode irore jiboeji tawiagai. 12Mare iragoje raire tagabo dukeje ire tarduwado Jesus jiboeji mare iwadaru pegareu ji karega imagore tawiagai. Iwadaru pemegareu jire imagore tawiagai kodire imago rakakare tai. Ire iro rakado taegai iwo kogodureuge epemegago tarduwo iro rakareuji. Dukodire tarduware uture Jesus bataru tabowu remawu nure imi rugadu. Iaboe iaboe karega. Tu nou uture Jesus bataru tabowuge remawuge ero rakamode nono iro rakareu mogadure. 13Kočare tamagore iro pegaie. Mare irore tai nono iro mogadure ia meartorure Jesus jiwugei dumogadure. Mare imagokare tai diero bagai. Nou inodu kodi na tardu pegare i?
14Iture tagae dure pobe. Aino ire irugadu ituwo toro tagae pugeje. Mare imagomodukare tai iaboe bagai. Imagomodukare tai diero bagai. Itaidure iwo ikera maku tagai. Boe etore kugure emaragodumodukare tuo tuje eke bagai. Mare boe emaragodumode tore kugure eke bagai. Ire tado nono itore emogadure. 15Dukodire imode ino diero rugadu maku iwo ikera maku tagai. Ire ido irugadu iwo ikera maku tagai rugadu. Imeardu kurire tai rugadu. Tagi na tameardu kurimodukare i rugadu?
16Iragojere tagabo dukeje ikare boe pegado tai. Tarduware. Mare iage egore inure taekiripagado. Egore iwadrarodu nuie tawiagai iwo tameardae pegado. 17Pagare egoino. Tagaiwodo irore jiboeji. Ikare boe pegado tai. Ire imedage etudo tawagai mare ekare tugeragu ia tagoe boeji tabiji. Eture toro tawagai tuwo iwadaru reko tawagai. 18Imagore imedia Titoji utuwo tawagai nouia pamedia meartorure Jesus jiwu apo. Mare Tito ukare tugeragu ia boeji tabiji. Emare rore nono iro mogadure. Meardaere nono imeardae mogadure.
19Ia tagi tameardaere čedaidukare boe jokawo čewugeje dubagaie čenagoino aino tawiagai. Boe emeartoruwo čei dubagaie čenagoino tawiagai. Mare nou inodu karega. Čemagore Jesus Cristo meardaere jiboeji. Pao Kurireu jorduware čerore jiboeji. Čedaidure čewo čegera maku tagai čero jamedu boe tabo. Čemeardu kurire jiwu čemedage nure tagi rugadu. 20Itaregodumode tagae dukeje iordumode tai. Iordumode tarore jiboeji. Tardumode i jamedu. Tardumode irore jiboeji. Iorduwakare raga tarore jiboeji. Itaidukare iorduwo ia taro pegareuji. Imororamagadure tawagai iordumode ia taro pegareu jitu bagai. Iordumode ia taro pegareuji dukeje imagomode tai taro pegare duji rugadu. Dukeje tagaidumodukare i pugeje. Iorduwakare raga tarore jiboeji. Mare itaregodumode tagae dukeje iordumode. Dukodire imororamagadure toro tawagai itododai tagokimode pui dubagai. Tagimaredumode pui dubagai. Boe korimode tai dubagai. Imororamagadure itododai epokare puapowuge mode tagi dubagai. Tamago pegamode pu roji dubagai. Tagogirumode pui dubagai. Tagojaromode tawadaruji dubagai. Itaidure tawo nou taro jamedu boe jetorodo rugadu. 21Itaregodumode tagae dukeje iordumode tarore jiboeji. Dukodire imororamagadure toro tawagai itododai. Pao Kurireu umode iordudo taro pegare jiboeji dukeje ipogurumode tarore jiboeji rugadu. Marigudu tagaiwore areme ewagai tawo tageragu ei. Tare tageragu aremei rugadu. Areme taeribarire tamugukare apowu imei jamedu. Tawadae kejere tare tarduwa bokwado kodire taboguru bokware. Ime jamedu erore nono areme ero mogadure kodire erduwakare tuboguru bagai jamedu. Ainore tarore marigudu. Taromode aino kimo dukeje tamode itragududo nou taro pegareu boe keje. Tagiarigodukare nou taro pegare jiboeji dukeje itragudumode nou taro pegareu boe keje rugadu. Mare tagiarigodure nou taro pegare jiboeji tare tagera ra taro pegareu piji dukeje tamode iagarego i rugadu.
13Paulo Ukimadure Corinto Kejewuge Meartorure Jesus Jiwugebo
1Iture tawagai boetoji. Ča iture aino tawagai pugeje. Aino ča itaregodumode toro tawagai pugeje.
Padure bapera kejewu Pao Kurireu bataru akore: – Boe mode pobe tuiordure ia boe ero pegareu jitu keje emode ia boe ewie nou tuiordure jiwu ro pegareuji. Enogwa kodumode nou pu okwa kodaji dukeje boe emeartorumode ei rugadu. Mare jordure nou ro pegareu jiwu umode mitotu je dukeje aidumode tumagowo nou boe ewiagai duji. Umode mitotu tuginai dutabo kodire boe emeartorumodukare makore jiboeji. Mare ia metiamode dukeje boe emeartorumode emagore jiboeji.13.1 Awu bataru padure Deuteronômio 19.15 keje.
2Ia tagi taro pegare rugadu. Iwo tawie. Iwo ro pegareuge eiamedu boe ewie. Itaregodumode toro tagae dukeje imago pegamode taro pegare jiboeji rugadu. Iragojere tagabo dukeje ire tawie. Mare aino imode tawie pugeje. 3Dukejere tarduwamode Jesus Cristo makore i duji. Emare umode boe pegado ro pegareugei turaga tabo. Rakareu nure ema. Umode tardudo turo rakareuji. 4Jesus ure tudo nono raka bokwareu boere dukodire bire ipo padure pugajejewu keje. Mare Pao Kurireu ure turaga maku ai tuwo jewodudo pugeje. Ainore čerore jamedu. Čere čedo nono raka bokwareugere nono Jesus mogadure. Mare Pao Kurireu ure turaga maku čenai čeragojewo tagabo Pao Kurireu ro rakareu tabo.
5Tagaiwodo tarore jiboeji tameardaere jiboeji tameartorure Jesus jitu bagai. Tameartorumode Jesus Cristoji dukeje rakojemode tagabo. Tarduware rakojere tagabo duji rugadu. Mare tameartorumodukare ji dukeje rakojemodukare tagabo. 6Čedaidure tarduwawo čemeartorure Jesus jituji rugadu. 7Čemagore baruto Pao Kurireu bagai tu tu je tabaru tabo taro pegakawo. Mare boe emeardae pemegakawo čei du bagai karega čenagoino. Ia boe egomode pagaie čeroino mare du inodu tabo čeipagakare nou inoduji. Tu toro tawagaire čemororamagadure taro pemegawo tu tu je. 8Pamodukare Pao Kurireu bataru remawu akedudo rugadu. Boe etaidumode tuwo Pao Kurireu bataru remawu akedudo mare eroiwakare eragakare Pao Kurireuji. Dukodire emodukare Pao Kurireu bataru akedudo rugadu. Boe etaidukare boe erduwawo Pao Kurireu bataru remawuji mare du inodu tabo Pao Kurireu umode boe erduwado tuwadaruji rugadu. Dukodi čare pawo boe ewie nou bataruji rugadu Pao Kurireu meardae mogadure. 9Čewiagorokare tu čei. Dukodire čemodukare čemago pemegado čerore jiboeji. Čegaregure boe kurireugedo čegi. Čewiagorore tu toro tawagai. Taragamode taro pemegawo dukeje čegaregodumode tai rugadu. Čemagore Pao Kurireu bagai baruto tu tu je tabaru tabo tameartoru kuriwo Jesusji rugadu. 10Dukodire inure awu atugoreboe pemegado iwo maku toro tawagai. Iragoje jaere tabiji mare itaidure iwo tarduwado pugeje awu atugoreboe tabo. Tameartorumode awu atugoreboeji dukeje iromodukare iaboeji tai pugeje. Itaregodumode toro tagae pugeje mare tameartorumodukare awu atugoreboeji nono imode iragado tai rugadu tarokawo aino pugeje. Pagimijera Jesus ure meartorure puduiwuge eimijerado imi. Dukodire imago pemegamode taro pemegare jiboeji. Mare imago pegamode taro pegareuji jamedu. Mare paga karega tameartoru kuriwo Jesusji rugadu.
11Imedage nure tagi rugadu. Dukodire ikimadure toro tawagai. Taro pemegado rugadu. Tawiapaga pemegado awu iwadaruji. Tameardaere jiboe tawuje puapo. Taedu pemegado puapo taegare tabo tabemegawo pui rugadu. Pao Kurireu meardu kurire boei rugadu. Umode boe edu pemegado pudabo rugadu. Rakojemode tagabo rugadu.
12-13Tagimadudo puapo inai rugadu. Meartorure Jesus jiwuge eiamedu boe ekimadure toro tawagai.
14Pagimijera Jesus Cristo ro pemegawo tai. Pao Kurireu meardu kuriwo tai. Pao Kurireu Uwari rakojewo tagabo tuwo tamugu pemegado puapo. Iwadaru urugadureu.