1 Timóteo
Paulo Ure Awu Atugoreboe Boetojiwu Maku Toro Timedia Timóteo Bagai
11Paulo nure imi. Uture Jesus Cristo bataru tabowu nure imi. Pao Kurireu Jesus Cristo emagere emagore iwagai ituwo boe etae tuwadaru tabo. Pao Kurireu umode paginorudo. Parduware Jesus Cristo aregodumode pugeje duji.
2Inure awu atugoreboe maku Timóteo ai.
Iwadaru koiare ameartorure Jesusji dukodire itonaregedu nure aki. Itaidure Pao Kurireu uwo turo pemegareu maku akai rugadu. Jesus Cristo uwo turo pemegareu maku akai rugadu. Ewiapagakawo aro pegareuji. Ewo apemegado boei. Ewo boe epemegado ai jamedu.
Ainore Batrarodureuge Ewadaru Ure
3Itaidure aragojewo Éfeso ba kurireu keje jao. Iture apiji Macedônia moto ka dukeje ire awie. Ire awiedu pemegado aino pugeje.
Ia Éfeso kejewuge ewadrarodunure boei. Amagodo ei ewo togwa ra tuwadrarodae piji. 4Etokire pui bakaru keje tuwobe ewugeje. Amagodo ei ewo tumeardae tawuje jao tuwobe epiji, bakaru piji emeardaewo tu Pao Kurireu meardaeji. Boe emeartorumode Pao Kurireuji dukeje erduwamode Pao Kurireu meardae remawuji. 5Meartorure Jesus jiwugeire inagoino emeardu kuriwo pui. Boe emeartoru remawumode Pao Kurireuji dukeje emeardu kurimode pui. Etaidumodukare turo pegawo dukeje emeardu kurimode pui. Erduwamode turo pegakare duji dukeje emeardu kurimode pui. 6Iage emeartorure mare emeartoru jokodukare Pao Kurireuji. Iage etaidukare tuwo tumeardae pemegareu tawuje pugeje. Iage erduwakare turo pegareuji. Nouge emago raimode pui mare pagatu je. 7Etaidure tuwo boe erduwado Pao Kurireu bataruji. Mare erduwa bokware. Erduwakare tumagore jiboeji. Enojarore tuwadaruji mačare erduwa bokware tumagomode jiboe bagai.
8Parduware Pao Kurireu bataruji. Pemegare rugadu boe ewo to bakarudo ema. Mare emeartoruwo jitu bagaire eroino du pegakare. 9Boe eimijerage emode boe ero maku boe etai. Boe ero pemegamode dukeje eimijerage emagomodukare boeji. Mare ero pegamode dukeje eimijerage emagomode boe eroji ewiagai rugadu. Tawiagodukaba nou inodu piji. Ro pegareuge ero pegare rugadu. Emeartorukare Pao Kurireuji. Erore Pao Kurireu aidukare jiboeji. Emeardaekare Pao Kurireuji. Emeardaekare Pao Kurireu roji. Emode tuo bito. Emode tuje bito. Emode boe ewido rugadu. 10Eribarimode toreduje piji toredu piji. Ime emode aredudo pudumi turo pegawo ia imebo. Iage emode tugeragu boei turo pegawo ei tuwo emagu diero bagai. Iage ewadrarodumode boe eroji. Emeartorukare Pao Kurireu bataru remawuji dukodi. 11Dukodire Pao Kurireu makore turoji pawiagai. Imire ire tawie nou Pao Kurireu bataru pemegareuji. Jesus jiboe jire inagoino tawiagai. Pao Kurireu ro pemegareu kurire dukodi. Dukodire ure tuwadaru maku inai iwo boe ewie Jesus jiboeji rugadu boe emeartoruwo ji rugadu turo pegareu piji.
Pao Kurireu Ure Paro Pegareu Barigu Pabiji Dukodire Pamago Pemegawo Ji
12Ikimadunure Pagimijera Jesus Cristo apo. Emare ure iragado imaragoduwo. Emare jorduware imeartorumode pudui duji dukodire ure tudugaredo imi. 13Marigudu imeartorukare ji dukodire iorduwakare iroji. Imago pegare ji. Iro pegare ji. Imago pegare Pao Kurireu ieji. Mare Pao Kurireu okudugodure itabo. 14Pagimijera ure turo pemegareu maku inai rugadu taidu tabo. Ure imeartorudo pudui. Ure imeardu kurido boei. Jesus Cristo pamedia mode ema dukeje emare romode aino pai. 15Jesus Cristo aregodure moto ka tuwo ro pegareuge ekinorudo etukawo bope doge eda kejewu joru pegareu ka. Boe jokodu. Pameartoruwo nou bataruji. Mare paga karega imire iro pegareu kodure boe eiamedu boe ekori. 16Mare Pao Kurireu okudugodure itabo awu meartorure Jesus jiwuge erduwo rore i jiboeji. Iro pegareu kodure boe eiamedu boe ekori mare Jesus Cristo okudugodure itabo rugadu. Dukodire ure imeartorudo pudui. Ure imugudo Pao Kurireu apo du akedumodukare. Ainore rore i. Boe emeartorumode ji dukeje ainore romode ei jamedu. 17Pao Kurireu ure mitotu je. Boe erdukare ji. Bimodukare rugadu. Boe eimijera kurireu nure ema. Akedumodukare rugadu. Ča pawo ie kurido. Pamago pemegawo ji pawo ie kurido rugadu. Pagawo pawadaru pemegareu akedudo. Ure turugadu.
18Iwie Timóteo nure aki. Inogituwanure ai. Awiagodukaba awu iwadaru piji. Pao Kurireu ure boe ewie marigudu boe emeartorumodukare ai duji. Mare tumoduie tugera maku akai. Nou boe ere awie nou Pao Kurireu bataruji. Awiabutudo nou bataru keje. Dukodire apogurukaba amagowo ia batrarodureugei ewadaru jipagi. 19Aino amodukare akera ra ameartorure Jesus jitu piji. Ainore arduwamode aro pegakare duji. Mare ia boe ewiapagakare tuiorduware jiwu turo pemegareuji. Dukodire ere tumeartorure Jesus jitu akedudo. 20Imedu Himeneu ure tumeartoru akedudo aino jamedu. Imedu Alexandre ure tumeartoru akedudo jamedu. Iage erore aino jamedu. Emago pegare Pao Kurireuji. Dukodire ire emagu bope doge eimijera Satanás ai ro pegawo ei. Mare paga karega. Ewo togwa ra tumago pegareu piji.
2Ainore Meartorure Jesus Jiwuge Eromode Tuwo Tubu Jodo Tumago Pemegawo Pao Kurireuji
1Tawiagodukaba awu iwadaru piji rugadu. Tamagodo Pao Kurireu bagai baruto boe eparu tabo. Tagogwamagududo Pao Kurireuji uwo boe enoe pemegado. Tamagodo boe eparu tabo epemegagoduwo, ero pemegawo. Tamago pemegado boe ero pemegareuji tagimadu tabo Pao Kurireu apo. 2Tamagodo Pao Kurireu bagai boe eimijera kurireuge eparu tabo, boe eimijerage eiamedu boe eparu tabo ero pemegawo boei. Ero pemegamode pai dukeje pamugu pemegamode. Ero pemegamode pai dukeje pamugu kioromode. Emodukare pado pagera ra pameartorure Pao Kurireu jitu piji. Emodukare pado pagera ra paro pemegareu piji. 3Paromode aino dukeje Pao Kurireu jordu pemegamode pai. Emare ure paginorudo. 4Aidure tuwo boe eiamedu boe ekinorudo. Aidure tuwo erduwado boe jokodureuji. 5Pao Kurireu ure mitotu je. Ia bokware pugeje. Umode boe erego Pao Kurireu aewu ure mitotu je jamedu. Jesus Cristo nure ema. Emare umode boe erego Pao Kurireu ae. 6Emare ure tumagu boe eiamedu boe ero pegareu moriče. Ainore ure parduwado taiduie tuwo boe eiamedu boe edo činorudo duji. 7Dukodire ure itudo Judeu doge epiji toro ia boe tuginaiwuge etae iwo erduwado Jesus bataruji emeartoruwo Jesusji jamedu, erduwawo boe jokodureuji jamedu. Iwadrarodu karegure. Boe jokodu jire inagoino rugadu.
8Ča meartorure Jesus jiwuge emode bato pui dukeje ainore itaidure erowo. Ime ewo tumagu Pao Kurireu ai tuwo turo udo tuginai turo pegareu piji turo pemegawo. Ekorigodukawo boei. Etokikawo pui. Emeartorumode awu iwadaruji dukeje ere turugadu tumagowo Pao Kurireu bagai baruto. 9Ainore itaidure meartorure Jesus jiwuge areme erowo. Ewo ia tugudau areia motureu tugu pudui mare nou tugudau areia torigodureu ukare turugadu. Ewo tudo nono aredu pemegareu mogadure. Itaidukare ewo tao motudo tori kuieje tabo, tori motureu tabo, boe ekudau mori kurireu tabo nono aredu pegareu ro mogadure. 10Mare meartorure Jesus jiwuge areme emode tumodudo turo pemegareu tabo nono meartorure Pao Kurireu jiwuge areme ero mogadure. 11Meartorure Jesus jiwuge emode bato pui dukeje areme edukiorowo erduwawo Pao Kurireu bataruji. Enojarokawo tuwadaruji. 12-14Pao Kurireu ure imedu Adão to boetoji. Dukejere ure aredu Eva to jamedu. Nono bope ukare Adão jekiripagado mare ure aredu Eva jekiripagado rugadu. Dukodire aredu meartorukare Pao Kurireu bataruji. Dukodire inagore aino tai. Meartorure Jesus jiwuge areme ekare turugadu tuwo ime erduwado Pao Kurireu bataruji, tuwo ime emeardae maku etai. 15Mare areme etoremode mare ero pemegamode, emeartorumode Jesusji, emeardu kurimode boei, mare emode tumagu Pao Kurireu ai. Dukodire Pao Kurireu umode ekinorudo rugadu.
3Ainore Meartorure Jesus Jiwuge Eimijerage Eromode
1Awu iwadaru ure turugadu. Imedu aidure tuwo meartorure Jesus jiwuge eimijerado pudumi dukeje pegakare. Aidure jiwu maragodae kurire rugadu. 2Mare ainore meartorure Jesus jiwuge eimijera romode. Umode turo pegareu okwado boe erdu pemegawo turore jiboeji. Mugure apowu aredu umode mitotu je. Umode turagado pudui turo pegakawo. Umode turo jetorodo. Boe etaregodumode uwai ka dukeje ro pemegamode ei. Jorduwamode tuwo boe erduwado. 3Uke kurumodukare ji. Boe korimodukare ji. Mako pemegamode. Ro butugumode. Okwa kidumodukare diero bagai. 4Jorduwamode tuwo tore ero pemegado tore emeartoruwo pudui. 5Kodi ia imedu jorduwakare tuwo tore ero pemegado tore emeartoruwo pudui dukeje jorduwamodukare tumagowo meartorure Jesus jiwugei jamedu. Jorduwamodukare tuwo erduwado rugadu. 6Maigodu aino imedu ure tumeartorudo Jesusji. Mare meartorure Jesus jiwuge emode tugimijerado ema dukeje romode nono bope doge eimijera Satanás ro mogadure. Satanás očarore pudui Pao Kurireu piji dukodire Pao Kurireu ure barigu baru piji. Ia meartorure Jesus jiwuge eimijera očaromode pudui Pao Kurireu piji dukeje Pao Kurireu ro pegamode ji jamedu. 7Mare meartorure Jesus jiwuge eimijera ro pemegamode boe eiamedu boei dukodire meartorukare Jesus jiwuge etaidu pemegamode ji jamedu. Dukodire Satanás umodukare nou meartorure Jesus jiwuge eimijera jekiripagado. Nono boe epogurumodukare nou meartorure Jesus jiwuge eimijera roji.
Ainore Meartorure Jesus Jiwuge Eimijerage Parutowuge Eromode
8Ainore meartorure Jesus jiwuge eimijera parutowu romode. Umodukare boe ekiripagado. Ro pemegamode rugadu. Kudu kurimodukare vinho kuruče. Aidu kurimodukare dieroji. 9Umodukare tugera ra Pao Kurireu bataru piji. Meartoru raimode ji. Jorduwamode tumeartorure jituji rugadu. 10Ia boe aidure tuwo meartorure Jesus jiwuge eimijera parutowudo pudumi dukeje boe etaiwomode roji ia ro pegareu bagai. Erdumodukare ia ro pegareuji. Boe emago pegamodukare rore jiboeji dukeje umode turugadu meartorure Jesus jiwuge eimijera parutowuwo ema. 11Nou eimijera parutowu oreduje ro pemegamode jamedu. Umode tugera ra tuwadaru pegareu piji. Jorduwamode turore jiboeji jamedu. Batrarodumodukare jamedu. 12Nou eimijera parutowu mugure apowu aredu umode mitotu je. Umode tore ero pemegado. Umode tuwobe ero pemegado jamedu. 13Nou eimijera parutowu maragodu pemegamode dukeje pogurugodumodukare tumagowo tumeartorure Jesus Cristo jituji boe ewiagai. Boe etaidumode ji rugadu.
Boe Erduwakare Tuwo Turagado Tuwo Turo Pemegado
14Inure awu atugoreboe pemegado iwo maku akai. Mare itaidure ituwo akae kuri aino. 15Mare imode awu atugoreboe maku itododai. Umode arduwado paroji, meartorure Jesus jiwuge eroji. Meartorure Jesus jiwuge Pao Kurireu uwobe nure emage. Pao Kurireu jewodure rugadu. Nou meartorure Jesus jiwuge etu pemegamode Pao Kurireu bataru remawuji boe ekawo pegado boe ekawo mekido. 16Boe erduwakare tuwo turo pemegado turaga tabo. Mačare Pao Kurireu ure meartorure Jesus jiwuge erduwado tuwo turo pemegado. Boe eiamedu boe egore awu Pao Kurireu bataru kurie rugadu. Ainore awu batarure:
Boe erdure Jesusji moto keje.
Pao Kurireu Uwari ure boe erduwado Pao Kurireu aidure Jesus ro pemegareu jituji.
Pao Kurireu utugarege baru tadawuge erdure Jesusji.
Boe emagore Jesus jiboeji boe eiamedu boe ewiagai.
Boe emeartorure ji moto jamedu boe parugajeje jamedu.
Pao Kurireu ure Jesus rutudo baruto rugadu.
4Ainore Batrarodureuge Emagomode
1Pao Kurireu Uwari ure pawie rugadu. Akore boe puredugodumoduie moto akeduwo du ka dukeje iage emoduie tugera ra tumeartorure Pao Kurireu jitu piji. Emeartorumoduie batrarodureu bope dogei. Etaidumoduie mareboe doge ewadaruji. 2Batrarodureuge emode boe erduwado nou mareboe doge ewadaruji. Mare meartorukare tuwadaru jiwuge nure emage. Etaidure tuwo boe ekiripagado. Ewiagorokare turo pegareuji. Enogudugodukare nou turo pegare jiwugebo. Etaidure turo pegawo rugadu. Enogudugodukare nou turo pegare jiwugebo. 3Nou batrarodureuge emagomode boei etuwirekawo, etugogekawo. Emagomode boei ekawo ia boe eke kowuje bope aku ie nuie ema. Egore. Mare bope aku ie karega. Pao Kurireu ure nou boe eke towuje, ure maku boe etai marigudu ewo ko. Dukodire meartorure Jesus jiwuge ekimadumode Pao Kurireu apo nou tuge paru tabo dukeje emode ko rugadu. Pao Kurireu ure erduwado boe remawuji dukodire emode ko rugadu. 4Pao Kurireu ure boe jamedu boe towuje. Ure boe pemegado rugadu. Kadurumode dukeje meartorure Jesus jiwuge emode ko rugadu. Mare ekimadumode Pao Kurireu apo nou tuge paru tabo dukeje emode ko rugadu. 5Pao Kurireu umode boe jamedu boe pemegado tuwadaru tabo. Meartorure Jesus jiwuge emago pemegamode Pao Kurireuji iaboe paru tabo dukeje Pao Kurireu umode pemegado rugadu. Dukodire pemegamode rugadu. Pao Kurireu aidumode ji rugadu.
Ainore Jesus Utugare Pemegareu Romode
6Amode awu ire bu bapera kejewu Pao Kurireu bataru maku meartorure Jesus jiwuge etai dukeje Jesus Cristo utugare pemegareu mode aki. Boe jokodu jire Pao Kurireu akoino. Ameartorudo ji. Akaidudo Pao Kurireu bataruji nono boe etaidu mogadure tugeji dumogadure. Awiabutumode keje meri jameduji dukeje amode ameartoru rakado Jesusji. 7Akera ra Pao Kurireu bataru metukare tadawu bakaru piji. Areadodukaba ji. Pao Kurireu makore jiwu bakaru jire awiapagamode. Mare aragado arowo nono Pao Kurireu ro mogadure. 8Boe emode turagado du pegakare. Mare boe ero pemegamode Pao Kurireu bataruji dukeje boe pemegamode ei rugadu. Pao Kurireu makore tumoduie boe pemegado meartorure puduiwugei. Makore tumoduie meartorure puduiwuge eewodudo pugeje jamedu. 9Boe jokodu jire Pao Kurireu akoino. Pameartoruwo ji rugadu. 10Dukodire pamaragodu rakare aino pawo boe ewie awu bataruji. Pameartorure Pao Kurireuji. Pao Kurireu jewodureu nure ema rugadu. Umode boe ekinorudowu nure ema. Umode meartorure puduiwuge ekinorudo rugadu.
11Boe ewie awu bataruji rugadu. 12Iparedu nure aki. Mare apogurukaba awo boe erduwado. Boe emeartoruwo awadaruji. Aro pemegado boei erowo nono aro mogadure, boe emagowo awadaruji, boe emeardu kuriwo nono ameardu kuri moga boei dumogadure, boe emeartoruwo nono ameartoru moga Pao Kurireu jitu mogadure, boe ero pegareu bokwawo nono aro pegareu bokwa mogadure. 13Akaiwodo Pao Kurireu atugoreboeji amagowo ji boe ewiagai jii toro itaregodure akae du ka. Boe erduwado Pao Kurireu bataruji. Amago pemegado Pao Kurireu bataruji boe ewiagai rugadu. 14Makore Pao Kurireu bataru jiwuge emagore Pao Kurireu bataruji awiagai dukeje meartorure Jesus jiwuge eimijerage ere tugera bu akaora keje tumagowo aparu tabo baruto. Dukejere Pao Kurireu Uwari ure turo maku akai tuwo tumaragodae maku akai amaragodaeče. Dukodi čare awiagodukaba nou ure maku akaiwu amaragodae piji. 15Ameartorudo awu Pao Kurireu bataruji. Akaba akera ra piji. Dukejere aro pemegareu kurimode. Boe erdumode aro pemegare boei duji. 16Akaiwo pemegado aroino jiboeji. Awiagodukaba awadaru piji. Awiapagado awadaruji. Amodukare akera ra Pao Kurireu bataru piji dukeje akinorudodumode rugadu. Meartorure awadaru jiwuge ekinorudodumode jamedu.
5Ainore Meartorure Jesus Jiwuge Eromode Pui
1Amago pegakaba imedu pegagodureuji. Akogwamagududo ji nono amago moga ao jitu mogadure. Arodo iparei nono aro moga amana jitu mogadure. 2Arodo areme pegagodureugei nono aro moga ače jitu mogadure. Arodo nogwarei nono aro moga awie magei dumogadure. Aro pegakaba ei rugadu. 3Akera maku marenarue remawuge areme etai. Ewobe bokware dukodi. 4Ia aredu oredu bokwamode dukeje nou ore etore etu pemegawo nou tuje pegaji. Emeartorure Jesusji dukodire erore aino. Ainore emode etuje mage etuo mage ero pemegareu morido. Ainore emode Pao Kurireu jakaredo pudui. 5Ia aredu okoge bokwareudo uwobe bokware etuwo pudui dukeje emare umode tumagu Pao Kurireu ai. Makomode bagai baruto meri jameduji tubaru tabo uwo tugera maku pudai meriji, boečoji. 6Mare ia aredu okoge bokwareudo umode tumagu taidure jiwu tuwadaeji Pao Kurireu piji tiagarewo pudui dukeje ure nono bireu mogadure. Bikare mare puredugodure tuwiwo turo pegareu koia. 7Ča awu boe ewie awu iwadaruji. Dukodire taro pegamodukare. Boe erdu pemegamode tarore jiboeji. 8Mare ia boe etu pemegamodukare tuwobei dukeje emeartoru akedure Jesusji marigudu. Ero pegare meartorukare Jesus jiwuge ero kori.
9Amode areme okoge bokwareuge ekie bu bapera keje ere tumagu Pao Kurireu ai kodi. Mare ia aredu okoge bokwareudo o joru aregodukare 60 ka raga dukeje amodukare ie bu nou bapera keje. Aredu okoge bokwareudo ure tugera ra toredu piji tumuguwo ia imedu apo dukeje amodukare ie bu nou bapera keje jamedu. Mare o joru aregodure 60 ka dukeje ukare tugera ra toredu piji dukeje nou aredu okoge bokwareudo ie bu nou bapera keje rugadu. 10Aredu okoge bokwareudo ro pemegare boei dukeje amode ie bu nou bapera keje. Nou aredu okoge bokwareudo ure tore ime ero pemegado, ure tore areme ero pemegado. Nou aredu ro pemegare tuiorduwakare jiwugei. Nou aredu meartorure Jesus jiwuge etugare nure ema. Ure tugera maku ia boe etai. Ure tumagu turo pemegareu ka. Ainore nou aredu okoge bokwareudo rore marigudu dukeje amode ie bu bapera keje rugadu.
11Mare ia aredu okoge bokwareudo pegagodukare raga dukeje amodukare ie bu bapera keje. Aidumode tuwadu pagawo imeduji dukeje umode tugera ra Jesus piji. 12Makore taiduie tuwo tumagu Jesus ai mare umode tugera ra tuwadaru piji. 13Dukeje jorduwamode tu tumugu pagawo, tu tugiriaduwo boe ewai ka mare jorduwamodukare tumaragodu pemegawo. Okirureu mode ema rugadu. Aidumode tuwo tumeardae maku boe etai pagatu je. Jorduwamodukare tumagore jiboeji. 14Dukodire inagoino areme okoge bokwareuge etugogewo pugeje. Epegagodukare raga dukodire etoremode pugeje, etu pemegamode tuwaiji rugadu. Eromode aino dukodire jordu pegare paiwuge erdumodukare ia paro pegareuji. Emodukare tumago pegado paroji. 15Mačare ia areme okoge bokwareuge ere tugera ra Jesus piji tugoduwo Satanás bataru kodaji. 16Mare meartorure Jesus jiwuge areme etu pemegawo tuwobe okoge bokwareugei. Etu pemegamode tuwobei dukeje emodukare ia meartorure Jesus jiwuge emaragodae kurido. Mare etu pemegamodukare tuwobei dukeje ia meartorure Jesus jiwuge emaragodae kurimode etai etu pemegawo nou boei. Mare nouia meartorure Jesus jiwuge etu pemegamode uwobe bokwareugei okoge bokwareugei.
17Meartorure Jesus jiwuge eimijerage emaragodu pemegamode dukeje meartorure Jesus jiwuge ewo diero kurido etai emaragodae moriče. Ia umode turagado tumagowo rugadu Pao Kurireu bataruji boe ewiagai dukeje meartorure Jesus jiwuge ewo diero kurido rugadu ai nou maragodae moriče. Ia umode turagado tuwo boe erduwado Pao Kurireu bataruji dukeje meartorure Jesus jiwuge ewo diero kurido rugadu ai nou maragodae moriče. 18Padure bapera kejewu Pao Kurireu bataru akore: – Tapira maragodumode boepaji dukeje uke kurido ai.5.18 Awu bataru padure Deuteronômio 25.4 keje.
Pao Kurireu makore pugeje. Akore: – Diero maku boe etugarege etai emaragodae moriče.5.18 Awu bataru padure Lucas 10.7 keje.
19Ia imedu mako pegamode meartorure Jesus jiwuge eimijeraji. Mare awiapagakaba ji iage erdukare nou ro pegareuji kodi. Mare ia boe pobedu doge erdumode ia meartorure Jesus jiwuge eimijera ro pegareuji dukeje awiapagado ewadaruji ewo awie nou ro pegareuji. 20Nono ia meartorure Jesus jiwu ro pegamode dukeje amagodo ji boe egai. Dukodire nou boe epagudumode turo pegakawo pugeje.
21Pao Kurireu jorduware awu iwadaruji. Jesus Cristo jorduware awu iwadaruji. Pao Kurireu utugarege baru tadawuge pemegareuge erduware awu iwadaruji. Dukodire ameartorudo ji rugadu. Aro pemegado boe eiamedu boei. Akaidukaba ure mitotu jewuji. Akaidudo boe eiamedu boei. 22Apagado jao akawo akera bu boe ewugeje. Akaiwodo eroino duji jao. Ero pemegamode dukeje amode akera bu ewugeje awo Pagimijera Jesus utugaregedo emage. Akaba arodo nono ro pegareuge ero mogadure. Aro pemegado tu tu je.
23Akuri korimode tu tu je. Dukodire akudumode ia vinho kuruče. Akudu biagado tu je jorubo kuruče. Mare akudure poboče du pegakare.
24Ia boe ero pegamode dukeje boe erduwamode eroji. Dukodire boe erduware boe pegamode ei duji ero pegareu moriče. Mare iage emode turo pegareu biado dukodire boe erduwamodukare nou ero pegareuji kuri je. Mare kajao. Boe erduwamode nou ero pegareuji jamedu ia meri keje. Ero pegareu moridodumode jamedu. 25Boe ero pemegamode dukeje ia boe erduwamode ero pemegare duji jamedu. Iage erdumodukare nou boe ero pemegareuji mare ia meri keje erduwamode nou ero pemegareuji rugadu.
61Utugarege emeartoruwo tugimijeragei. Emeartorure Jesusji mare emeartoruwo tugimijeragei jamedu boe erdu pemegawo emeartorure Jesus jituji, emago pegakawo čere erduwadowu Pao Kurireu bataruji. 2Ukimijera meartorumode Jesusji mare nou utugare meartorure Jesusji jamedu dukeje emedage emode pugi. Mare nou utugare meartoruwo tugimijeraji. Meartoru pemegawo ji rugadu. Meartorure Jesusji dukodire aidumode tuwo boe pemegado meartorure Jesus jiwuge eiamedu boei. Ukimijera meartorure Jesusji dukeje nou utugare meardu kurimode ji rugadu. Itaidure awo meartorure Jesus jiwuge erduwado awu iwadaruji ekoduwo iwadaru kodaji rugadu.
Pagaidu Kurikawo Dieroji
3-5Ia boe umode boe erduwado jiboe umodukare nono Pagimijera Jesus Cristo bataru remawu mogadure dukeje jorduwa bokwamode rugadu. Jorduwamodukare Pao Kurireu bataruji tuwo boe erduwado ji dukeje jorduwa bokwamode rugadu. Aidumode tuwo boe ekiripagado. Meardaemode boe kurireu nuie pudumi. Biabutumode boe ero pegareu keje tuwo boe etokido pui, emago pegawo pui, emeartorukawo pui, ekorigoduwo pu oe keje pui rugadu. Mare Pagimijera Jesus bataru remawu ure turugadu pai. Umode paro pemegado rugadu. Mare nou jorduwa bokwareuge emeardae pegare. Etaidure to diero kuriwo Pao Kurireu bataru tabo. Mačare erugodumode pui rugadu. Ča erduwa bokware Pao Kurireu bataru remawuji rugadu.
6Dukodire pawudugugoduwo pago diero keje. Aino ča umode turugadu pai. 7Pawodure dukeje pago diero bokware, ia pagoe bokware. Pawimode dukeje pamodukare ia pagoe reko pagabo, pamodukare ia pago diero reko pagabo jamedu. 8Ča pagemode, pagudau areia mode dukeje pawudugugoduwo keje tu je. 9Boe etaidure tuwo to diero kurido rugadu dukeje ewiapagamode boe emeardae pegareuji. Mare parokawo aino. Bope umode ekiripagado tuwo ero pegado rugadu. Etaidumode jiboe umode boe pegado ei. Etaidumode jiboe umode erduwa bokwado. Dukejere umode etagedudo rugadu. 10Meardu kurire dieroji dukodire meardaemode turo pegareu jamedu boeji. Iage etaidu kurire dieroji dukodire ere tugera ra tumeartorure Jesus jitu piji. Mare ere tugera ra Jesus piji dukeje nou ero pegareu ure ekiarigo rugadu. Ekiarigodu kuričigore ji aino.
Paulo Okituware Timóteoji
11Arokaba aino. Meartorure Pao Kurireu jiwu nure aki. Akaidudo aro pemegawo. Akaidudo arowo nono Pao Kurireu ro mogadure. Ameartorudo Jesusji rugadu. Ameardu kurido boei rugadu. Akaba akera ra ameartorure Jesus jitu piji. Aro butugudo boei. 12Amagore Pao Kurireuji boe egai ameartorumoduie Jesusji. Dukodi čare aragado ai ameartoruwo Jesusji rugadu. Pao Kurireu makore awagai ameartoruwo Jesusji. Ameartoru pemegamode ji dukodire aewodumode pugeje aragojewo Pao Kurireu apo jii toro rugadu. 13-14Pao Kurireu ure boe jamedu boe eewodudo. Dukodire Pao Kurireu biagaire inagoino awagai ameartoruwo awu iwadaruji rugadu arore jiboe jamedu boe tabo. Jesus Cristo mako pemegare Pôncio Pilatoji tumeartoruie Pao Kurireuji. Dukodire Jesus biagaire inagoino awagai ameartoruwo awu iwadaruji rugadu jii toro Pagimijera Jesus Cristo aregodumode kejewu meri ka. Ameartorumode awu iwadaruji rugadu arore jiboe jamedu boe tabo dukeje boe emago pegamodukare arore jiboeji rugadu. 15Pao Kurireu emare umode Jesus arego pugeje. Emare jorduwamode Jesus aregodumode kejewu meriji. Pao Kurireu boe eimijera kurireu nure ema. Pemegareu nure ema. Boe eimijerage kurireuge eimijera kurireu nure ema. 16Tu emare bimodukare. Mugure jorugu pemegareu keje. Boe epemegakare dukodire epuredumodukare nou jorugu pemegareuji. Marigudu boe erdukare Pao Kurireuji. Boe erdumodukare ji rugadu. Pao Kurireu raka akedumodukare rugadu. Pamago pemegawo ji rugadu. Uwo aino rugadu.
17Amagodo oe kurireugei enojarokawo pudui. Amagodo ei emeartorukawo toeji. Nou enoe umodukare ekinorudo boe pegareu piji. Amagodo ei emeartoruwo tu Pao Kurireuji. Emare umode ekinorudo boe pegareu piji. Emare umode pagaidure jiboe rugadu maku pagai pagaiduwo ji. 18Amagodo boei ero pemegawo ewo turo pemegareu kurido. Amagodo ei ewo toe kado puiato boei taidu tabo. 19Emode toe kado puiato boei dutabo emode toe kurido baru tada emugu pemegawo baru tada awu moto akedure du rekodaji. Ainore emode tumugu pemegado. Boe eda remawu nure ema.
20Timóteo nure aki. Akaba akera ra awu makudure akaiwu bataru piji. Akaba amago pagado. Boe emago raimode pagatu je dukeje egomode tuiorduwa kurie. Mare pagare egoino. Arokaba aino ero mogadure. 21Emagere emeartorure batrarodureuji dukodire ewiagodure tumeartoruwo Jesus jitu piji.
Pao Kurireu ro pemegareu butu tawugeje. Urugadureu.