1 Tessalonicenses

Paulo Ure Awu Atugoreboe Boetojiwu Maku Toro Tessalônica Ba Kurireu Kejewuge Meartorure Jesus Jiwuge Ewagai

¹Paulo nure imi. Inure awu atugoreboe pemegado Silas apo, Timóteo apo jamedu. Awu atugoreboe utumode meartorure Jesus jiwuge etae Tessalônica ba kurireu ka. Tameartorure Jesusji dukodire Pao Kurireu uwobe nure tagi. Jesus Cristo uwobe nure tagi. Jesus pagimijera nure ema. Imagore tabaru tabo baruto Pao Kurireu bagai, Pao Kurireu ro pemegawo tai, uwo tabemegado boei rugadu.

Tessalônica Kejewuge Emeartorure Jesusji Rugadu

²Tessalônica kejewuge nure tagi. Čegimadure Pao Kurireu apo čemago pemegare tai dutabo. Čemagore tu tu je tabaru tabo baruto rugadu. ³Čewiagodukare taro piji. Tameartorure Jesusji rugadu. Tameardu kurire Jesusji dukodire tamaragodure ai rugadu. Tabagare Jesus bagai pugeje uwo turawuje baru piji moto ka pugeje. ⁴Parduware Pao Kurireu meardu kurire tai rugadu. Ure tugeragu tai rugadu tuwo tuwobedo tagi, tuwo tudugaregedo tagi. Čemedage nure tagi jamedu. ⁵Čegire čedaregodure Jesus bataru pemegareu tabo tagae. Čere tarduwado nou bataru pemegareuji mare čeginaigodu karega. Pao Kurireu Uwari ure čeragado čewo tarduwado. Emare ure tarduwado rugadu nou Jesus bataru pemegareuji. Nou bataru jire čemeartorure rugadu. Ure turugadu rugadu.

Čeragojere tagabo dukejere tardure čerore jiboeji. Čero pemegare tai boe pemegawo tai. ⁶Dukodire tarore nono čero mogadure. Tarore nono Pagimijera ro mogadure. Tarore Jesus roji dukodire ro pegareuge ero pegare tai. Mare tameartorure rugadu Pao Kurireu bataruji dukodire Pao Kurireu Uwari ure taegaredo rugadu. ⁷Taro pemegare aino dukodire itaidure Macedônia moto kejewuge meartorure Jesus jiwuge erowo nono taro mogadure. Itaidure Acaia moto kejewuge meartorure Jesus jiwuge erowo nono taro mogadure jamedu. ⁸Taro pemegare dukodire Macedônia moto kejewuge emeartorure Pagimijera Jesusji jamedu, Acaia moto kejewuge emeartorure Pagimijera Jesusji jamedu. Torowu boe doge emeardure nou Pao Kurireu maragodu pemegare tai duji. Dukodire boe eiamedu boe erduware tameartorure Pao Kurireu jituji. Čemagomodukare tai pugeje tarduware tameartorure ji kodi. ⁹Awu meartorure Jesus jiwuge emagore tarore jiboeji ia boe ewiagai pugeje. Egore taro pemegaie čei. Čedure tagae dukeje taro pemegaie čei. Egore taie tagera ra tawai tadawu santo doge epiji tameartoruwo tu Pao Kurireuji tu rugadu. Boe remawu nure Pao Kurireuče rugadu. Okwamodukare rugadu. Bimodukare rugadu. Aino taie tagera ra bope doge epiji tameartoruwo tu Pao Kurireuji, Pao Kurireu utugaregewo tagi. Egore. ¹⁰Tabagaie Pao Kurireu bagai onaregedu Jesus aregoduwo baru piji pugeje meartorure puduiwuge ewagai. Egore. Čare iwo tawie pugeje. Pao Kurireu ure Jesus jewodudo pugeje. Pao Kurireu korigodumode moto kejewugei rugadu. Ro pegamode moto kejewugei rugadu. Mare ro pegamodukare meartorure Jesus jiwugei. Pameartorumode Jesusji dukeje umode paginorudo rugadu.

Paulo Biabuture Tessalônica Ba Kurireu Kejewu Turo Keje

¹Čemedage nure tagi. Tagire tarduware čeroji. Čedaregodure tagae dukeje čerore nono čemeardae mogadure. ²Tagi tarduware. Čeragojere Filipos ba kurireu keje dukeje ro pegareuge ero pegare čei. Ero pegare čei, emago pegare čei. Dukejere čedaregodure tagae Tessalônica ba kurireu ka. Aino ia ro pegareuge erdu pegare čerore jiboeji nono jamedu. Mare Pao Kurireu ure čeragado čemagowo Jesus bataru pemegareuji tawiagai. ³Čemagore tawiagai mare čemeardae pegareu tabo karega, čegaregure taekiripagado. Boe jokodu jire čenagoino rugadu. ⁴Čemagore Pao Kurireu ure maku čenaiwu Jesus bataru pemegareuji. Emare jorduware čemeardaeji. Čedaidukare boe emago pemegawo čei. Čedaidure tu Pao Kurireu mako pemegawo čei, čeroji. Dukodire aidure čei tuwo nou Jesus bataru maku čenai rugadu. ⁵Tagi tarduware čemeardaeji jamedu. Čedaregodure tagae mare čemago pagakare tai. Čenogwa kidukare boeji čenai dukodire čegare taekiripagado. Čedaregodure tagae mare diero bagai karega. Čere tarduwado čemeardae remawuji rugadu. Pao Kurireu jorduware. ⁶Uture Jesus Cristo jiboe bataru tabowuge nure čegi. Mare čemarukare tamago pemegawo čei boe ewiagai. Čemarukare ia boe emago pemegawo čei boe ewiagai rugadu. ⁷Jesus koiare ure čerojino mato tawagai. Dukodire čemagomode tai ia diero bagai dukeje tamode maku rugadu. Mare čemagokare. Čegi čemago pemegare tai. Čere čero butugudo tai nono aredu ro butugu moga torei dumogadure. ⁸Čemeardu kurire tai rugadu dukodire čemagore rugadu tawiagai Jesus bataru pemegareuji. Čedaidure čewo čemagu tagai rugadu. Čerdu pemegare tai rugadu. ⁹Tawiabuture čero keje. Čeragojere tagabo dukeje iemarure ia imaragodae bagai iwo akirodo ike rogu boeji tamororamagadukawo i nou tage rogu tabo. Čemaragodure meriji, boečoji. Mare čedure nono tagabo dukeje čemago pemegare nou Jesus bataru pemegareuji tawiagai.

¹⁰Tarduware čeroji. Pao Kurireu jorduware jamedu. Čedaregodure tagae dukeje čero pemegare, čere čero jetorodo, čero pegareu bokware. ¹¹Čerore tai nono boe erore torei dumogadure. Tagi tarduware. ¹²Čeragojere tagabo dukeje čere taragado. Čere tamororamagadu akedudo. Čemagore tai taro pemegawo nono Pao Kurireu aidu mogadure. Emare makore tawagai tudugaregewo tagi taragojewo pudabo boe pemegareu keje.

¹³Čedaregodure tagae Pao Kurireu bataru tabo dukeje tameardure ji. Dukejere tameartorure nou bataruji. Tameartorure Pao Kurireu pijire nou bataru aregodure rugadu. Tarduware boe epiji karega nou bataru aregodure. Pao Kurireu o bataru remawu nure ema. Tameartorure ji dukodire nou bataru koiare unure tameardae pemegado rugadu. Dukodire čemago pemegare taroji čegimadu tabo Pao Kurireu apo. ¹⁴Čemedage nure tagi. Judeu doge ero pegare meartorure Jesus jiwugei toro Judéia moto keje. Ča tawobe ro pegareuge ero pegare tai nono nou Judeu doge ero mogadure. ¹⁵Nou Judeu doge ere nou makore Pao Kurireu bataru jiwuge ewido. Ere Pagimijera Jesus bito. Ero pegare čei jamedu. Ere Pao Kurireu kiarigo rugadu. Erdu pegare boei rugadu. ¹⁶Ča etaidure tuwo čemago akedudo čemagokawo ia boe tuginaiwugei pugeje. Etaidukare čewo ewie Pao Kurireu bataruji. Judeu doge etaidure tu pudui Pao Kurireu ukawo boe tuginaiwuge ekinorudo. Marigudu Judeu doge ero pegare. Aino čare ere turo pegareu kurido rugadu. Dukodire Pao Kurireu korigodure ei rugadu. Kodire ro pegamode ei rugadu.

Paulo Aidure Tuduwo Etae Pugeje

¹⁷Čedure tabiji dukodire čegiarigodure tawagai rugadu jii aino. Čewiagodukare tabiji rugadu. Dukodire čere čeragado čeduwo tagae pugeje. ¹⁸Čedaidure čewo čegirimi tawagai pugeje rugadu. Imire ituiago tagae tu tu je mare bope doge eimijera Satanás aidukare. Ure boe ero pegado ewo čewuredo čedukawo tagae pugeje. ¹⁹Mare čegiarigodure tawagai. Tagi tameartorure Jesusji dukodire tare čegaredo čei. Tameartoru bagaire čeroino. Pagimijera Jesus aregodumode dukeje čegaregodumode tai rugadu tameartorure Jesusji dukodi. Čereadodumode Jesus biagai tameartorure ji rugadu. ²⁰Dukodire čenojarore tai rugadu. Tare čegaredo rugadu.

¹1Čemororamagadure tawagai rugadu. Dukodire imeardaere iragojewo Atenas ba kurireu keje ikinaigodu iwo imedia Timóteo utudo tawagai. ^2-3Pamedia remawu nure ema. Maragodure čedabo Pao Kurireu ai. Unure boe ewie Jesus bataru pemegareuji jamedu. Čere utudo tawagai uwo tameartoru rakado tagawo tagera ra Pao Kurireu piji. Ro pegareuge ero pegare tai mare tagaba tagera ra Pao Kurireu piji. Tagaba tagirimi tameardae pegareu ka pugeje. Mare paga karega. Pameartorure Pao Kurireuji dukodire ro pegareuge ero pegamode pai rugadu. ⁴Iragojere tagabo dukeje ire tawie ro pegareuge emoduie turo pegado pai rugadu. Ča. Ero pegare pai rugadu. Tarduware. ⁵Dukodire ire Timóteo utudo tawagai. Imororamagadure tawagai dukodire ire utudo tagae jorduwawo tameartoru kimore Pao Kurireu jitu bagai. Tawiapagamode bope doge eimijera meardae pegareuji pugeje dukeje tamode čemaragodu pagado tagabo.

⁶Maigodu aino Timóteo aregodure tuibagi mato tabiji. Ure čewie tarore jiboeji, tameardaere jiboeji. Akore tameartoru kimoie Pao Kurireuji. Tameardu kurie Pao Kurireuji kimo. Akore tawiabutu pemegaie čewugeje tu tu je. Ure čewie tagaidure tarduwo čei pugeje nono čedaidure čerduwo tai dumogadure jamedu. ⁷Dukodire čegiarigodu akedure. Tameartorure rugadu Pao Kurireuji dukodire tare čegiarigodu akedudo. Ro pegareuge ero pegare čei. Boe pegare čei rugadu mare čegiarigodukare. ⁸Tamugumode Pagimijera Jesus apo. Tamodukare tagera ra Jesus piji dukeje čegiarigodumodukare rugadu. ⁹Timóteo ure čewie taroji. Aino čare čegimadumode Pao Kurireu apo rugadu taro tameardae paru tabo. Aino tare čegaredo čei rugadu. Čegarere rugadu. Čemagore baruto dukeje čewiabuture tawugeje. Dukejere čegarere čei rugadu. ¹⁰Čare meriji, boečoji čenogwamagudure čeraga tabo Pao Kurireuji čeduwo tagae čewo tameartoru pemegado tameartoru remawuwo Pao Kurireuji rugadu.

¹¹Pameartorure jiwu Pao Kurireu emare uwo boe udo turugadu čei čedaregoduwo tagae rugadu. Pagimijera Jesus uwo boe udo turugadu čei čedaregoduwo tagae rugadu. ¹²Pagimijera Jesus uwo tameardu kurido pui, uwo tameardu kurido boe eiamedu boei tameardu kuriwo rugadu. Tameardu kuriwo boei nono čemeardu kuri moga tai dumogadure. ¹³Taromode aino dukeje Pao Kurireu umode taragado tai tarokawo tameardae pegareuji pugeje taro pemegawo rugadu, taro pegareu bokwawo. Nono Pagimijera Jesus aregodumode Pao Kurireu utugarege baru tadawugebo dukeje taragojemode Pao Kurireu apo. Toro taro pegareu bokwamode. Pao Kurireu jordumodukare ia taro pegareuji rugadu.

Ainore Pamode Pao Kurireu Jakaredo

¹Čemedage nure tagi. Čere tarduwado nuba tarowo tawo Pao Kurireu jakaredo. Tarore aino rugadu. Tare Pao Kurireu jakaredo taroji. Aino čemagowo tai pugeje tagawo tagera ra nou taro piji. Čenogituwanure aino tai Pagimijera Jesus aidure kodi. ²Tagi tarduware Pagimijera Jesus aidure jiboeji. Čere tarduwado marigudu. ³Tarodo nono Pao Kurireu meardae mogadure tawo taro udo tuginai meartorukare Pao Kurireu jiwuge ero piji, taro pemegawo rugadu, tameardae pemegawo rugadu. Tameardae pemegado jeribarire tumugukare apowuge emeardae pegareu piji taeribarikawo tamugukare apowugei rugadu. Ainore Pao Kurireu meardaere rugadu. ⁴Imedu uwo turagado pudui tuwiapagakawo tuwodure tabowu tumeardae pegareuji pugeje, tumugu pemegawo toreduje apo ro pemegawo ji. ⁵Imedu uwo turagado pudui taidukawo tuwo tugeragu ia aredu tuginaiwudoji toreduje piji. Meartorukare Pao Kurireu jiwuge erdure aremei dukeje etaidure tuwo tugera ra toreduje piji tuwo tugeragu ia areduji pugeje. Nouge erduwakare Pao Kurireuji. ⁶Mare tagi tarokaba aino. Taro pegakaba meartorure Jesus jiwugei. Tagaba meartorure Jesus jiwuge ekiripagado. Nono boe pemegamode ei rugadu. Čere tawie aino marigudu. Pagimijera Jesus ro pegamode ro pegareugei rugadu. Čere tawie marigudu tarokawo nono nou ro pegareuge ero mogadure. ⁷Pao Kurireu makore pawagai pawiapagakawo pameardae pegareuji pugeje. Makore pawagai pawo pagera ra paro pegareu piji paro pemegawo rugadu. ⁸Pao Kurireu bataru jire čenagoino. Meartorukare awu čewadaru jiwuge emeartorukare Pao Kurireu bataruji. Mare Pao Kurireu ure Tuwari maku tagai tameartoruwo tuwadaruji.

⁹Pao Kurireu ure tarduwado tameardu kuriwo pui marigudu. Dukodire čemodukare nou inodu bu bapera keje. ¹⁰Tameardu kurire Macedônia kejewu meartorure Jesus jiwuge eiamedu boei. Aino čenogwamaguduwo tai pugeje tagawo tagera ra nou taro piji. Taro pemegareu ko toro tugori. ¹¹Čemagore tai marigudu. Tamugu butugudo boebo. Tagaba tagera raido boe emaragodaeto. Tagwagedo tagududo tu tamaragodae tabo. ¹²Taromode aino dukeje meartorukare Jesus jiwu boe etaidu pemegamode tai. Taromode aino dukeje taipagamodukare ia boei tage bagai.

Pagimijera Jesus Aregodumode Pugeje

¹³Čemedage nure tagi. Čedaidure čewo tarduwado boe remawuji. Tarduwamode boe remawuji dukeje tagiarigodumodukare bireuge ewagai pugeje. Mare meartoru bokwareuge epagakare tuiorduwo bireugei pugeje dukodire ekiarigodumode rugadu. ¹⁴Pameartorure Jesus bire duji, jewodure pugeje rugadu. Dukodire pameartorure Pao Kurireuji uwo meartorure Jesus jiwuge bireuge eewodudo pugeje jamedu. Emeartorure Jesusji tuwimode otodai dukodire umode eewodudo pugeje. Nono umode erududo baruto tudogi. ¹⁵Ainore Pagimijera Jesus akore. Ure čerduwado. Pagimijera Jesus aregodumode pugeje dukeje meartorure Jesus jiwuge bireuge eewodumode pugeje. Nono erudumode baruto Jesus togi bikareuge etododai. ¹⁶Ia baru pijiwu uwadodumode. Pao Kurireu utugarege baru tadawuge eimijera makogodumode jamedu. Pao Kurireu o tapira ukiga akomode jamedu. Dukejere Jesus umode turawuje baru piji. Nono meartorure Jesus jiwuge bireuge eewodumode pugeje turuduwo Jesus togi. ¹⁷Dukejere pagi, pameartorure Jesus jiwuge bikareuge pagi parudumode ebo toro boetugu ka baruto Pagimijera Jesus togi. Aino čare pamugumode Pagimijera Jesus apo. Du akedumodukare rugadu. ¹⁸Dukodi čare tamagodo awu bakaruji pu biagai tawo tagiarigodu akedudo.

Tado Tarugadu Pagimijera Jesus Aregodumode Pugeje Pawagai

¹Čemedage nure tagi. Boe erduwakare nou Pagimijera Jesus aregodumode kejewu meriji. Tarduware nou inoduji marigudu. Dukodire imodukare bu awu bapera keje pugeje. ²Mare Pagimijera Jesus aregodumode kejewu meri aregodumode nono ia iwogu kigodureu mogadure. Iwogureu aregodumode boečoji boe erdukawo pudui. ³Ainore Jesus romode jamedu. Boe egomode: “Boe pemegare pai. Boe pegamodukare pai.” Mare rore puku boe pegamode ei rugadu. Boe pegare jiboe umode eto pui nono aredu kurijirigodu mogadure. Dukodire nou boe emoka tuginorudo rugadu. ⁴Jorduwa bokware Pao Kurireu jiwuge nure emage du kodi. Mare tagi tameartorure Jesusji dukodire tarokare nono nou meartorukare Jesus jiwuge ero mogadure. Dukodire Jesus aregodumode dukeje umodukare taeto pui. Boe epagamodukare iwogu kigodureu bagai mare tabaganure Jesus bagai rugadu. ⁵Boe ero pegamode boečoji tuwo turo pegareu biado boe epiji. Mare ro pemegareuge nure tagi. Parokare nono nou ro pegareuge boečojiwuge ero mogadure. ⁶Dukodire taeku jado. Pawo pagera ra pagerakiari piji. Pawo paragado pai paro pegakawo. ⁷Boe enudumode boečoji dukeje erdumodukare boeji. Uke kurure jiwu jordumodukare boeji. ⁸Mare pameartorure Jesusji dukodire paromode nono ro pemegareuge eromoga meri jitu mogadure. Dukodire pawo paragado pai paro pegakawo. Pameartoruwo Jesusji rugadu. Pameardu kuriwo Jesusji rugadu. Ainore pagoduiwawo bope doge epiji nono tugobaigare umode tugeragu tumorora kejewu meririji tugoduiwawo boe etugo piji dumogadure. Pabagawo Jesus bagai aregoduwo tuwo paginorudo. Aino pamode pagoduiwadudo bope doge emeardae pegareu piji nono tugobaigare umode tugeragu tatadawu meririji tuwo tugu taoto dumogadure. ⁹Pao Kurireu ure tugeragu pai. Mare tugorigoduwo pai karega. Ure tugeragu pai pameartoruwo Pagimijera Jesus Cristoji uwo paginorudo rugadu. ¹⁰Emare bire pamugato paro pegareu moriče pamuguwo pudabo. Jesus aregodumode pugeje dukeje bireuge bikareuge emugumode apo. Dukodire pamugumode apo rugadu. ¹¹Nou bataru tabore pawo pagiari barigu pabiji. Pawo pagera maku puai. Ainore tarore rugadu mare tagaba tagera ra nou taro piji.

Paulo Ure Tuwadaru Iado

¹²Čemedage nure tagi. Čenogwamagudunure tai. Tameartorudo ure tarduwado Pao Kurireu bataru jiwugei. Tagimijerage nure emage. Enure tarduwado tarowo meartorure Jesus jiwuge eroji. ¹³Ero pemeganure tai. Dukodire tagaidu pemegado ei. Tameardu kurido ei. Tamugu pemegawo puapo tabemegawo pui rugadu.

¹⁴Čemedage nure tagi. Dukodire čenogituware aino tai tawo iera kiarireuge ewie ero koiare boe pegamode ei. Iage epogurure tumagowo. Tamagodo ei epogurukawo. Tagera maku rakakareuge etai. Tagorigodukaba boei mare tawudugugoduwo boe eiamedu boebo. ¹⁵Tagaiwodo boei ero pegakawo. Ro pegareuge ero pegamode ei mare emagokawo. Mare taro pemegado meri jameduji boe eiamedu boei.

¹⁶Tagaba taegare akedudo. ¹⁷Tagaba tamago akedudo baruto. ¹⁸Boe pegamode tai mare tagaba tagera ra tamagore baru to dupiji tagimadu tabo Pao Kurireu apo. Tagimadudo Pao Kurireu apo rugadu jii toro rugadu. Ainore Pao Kurireu meardaere tameartorure Jesus jitu kodi.

¹⁹Tagaba tawia ra Pao Kurireu Uwari piji. ²⁰Tameartorudo makore Pao Kurireu bataru jiwuge ewadaruji. ²¹Tagaiwo pemegado boe jameduji. Tawo tageragu boe ero pemegareuji. ²²Tawo boe ero pegareu barigu tabiji. Taburedukaba ji.

²³Ča Pao Kurireu uwo turo pemegareu bu tawugeje taro pemegawo, taro pegareu bokwawo rugadu. Emare umode boe epemegado pui. Umode boe epemegado Pao Kurireuji. Jesus Cristo aregodumode dukeje aiwomode tai. Dukodire Pao Kurireu uwo tameardae jamedu boe pemegado, taro pemegado rugadu. Uwo taro pegareu okwado tabiji jii toro Pagimijera Jesus Cristo aregodumode du ka. ²⁴Nou makore tawagaiwu Pao Kurireu umodukare tugera ra tabiji. Kodumode tuwadaruji tu rugadu. Dukodire umode nou turo to rugadu.

²⁵Tameartorure Jesusji dukodire čemedage nure tagi. Tamagodo baruto čebaru tabo. ²⁶Tagimadu pemegado meartorure Jesus jiwuge eiamedu boebo nono taro moga tawobei dumogadure. ²⁷Pagimijera Jesus aiwore paroji. Dukodire itaidure tamagowo awu atugoreboeji meartorure Jesus jiwuge eiamedu boe ewiagai erduwawo nuba awu atugoreboe ure jamedu.

²⁸Pagimijera Jesus Cristo ro pemegawo pai rugadu.