1 JOÃO

1 João

João Ure Awu Atugoreboe Boetojiwu Towuje

Jesus Bataru Remawu Reo

¹Inure awu atugoreboe pemegado tawagai iwo tawie iordure jiboeji, imeardure jiboeji. Iordure Jesusji ioku tabo. Ire ikera pagado Jesusji rugadu. Dukodire itaidure iwo tarduwado. Awu Jesus bataru pemegare. Mako pemegare rugadu. Ema koiare ure boe edo. Emare rakojere boetoji boe jamedu boe etododai. ²Jesus aregodure dukeje čerdure ji. Emare umode boe edu pemegado. Marigudu rakojere Pao Kurireu apo. Dukodire umode meartorure puduiwuge eewodudo pugeje emuguwo Pao Kurireu apo jii toro rugadu. Jesus ure čewie nou turoji dukodire inure tawie jamedu. ³Inure tawie iordure jiboeji, imeardure jiboeji. Inure tawie tameardu kuriwo Pao Kurireuji nono imeardu kuri moga Pao Kurireu jitu mogadure. Inure tawie tameardu kuriwo Jesus Cristoji nono imeardu kuri moga Jesus jiture jamedu. Pao Kurireu onaregedu nure ema. ⁴Dukodire inure iwadaru bu bapera keje iwo atugoreboe maku tagai. Tameartorumode awu iwadaruji dukeje iagaremode i rugadu.

Jorugu Pemegareu Nure Pao Kurireuče Rugadu

⁵Čemeardure Pao Kurireu Onaregedu bataruji. Dujire inure tawie aino. Jorugu bokwamode dukeje boečomode. Mare jorugumode dukeje nou jorugu umode boečo akedudo. Ča Pao Kurireu ure nono jorugu pemegareu mogadure. Boe ero pegareu ure nono boečo mogadure. Mare jorugu ji karega inagoino. Boečo ji karega inagoino. Pao Kurireu ro pemegare tu rugadu. Rokare ia boe ero pegareuji. Dujire inagoino. Pao Kurireu meardae pemegare tu rugadu. Meardaekare ia boe emeardae pegareuji. Dujire inagoino. ⁶Ča ia pagi paro pegamode tu tu je mare pagagomode pameardu kurie Pao Kurireuji dukeje batrarodureuge mode pagi rugadu. Pameartorumode boe emeardae pegareuji tu tu je dukeje pamode nono boečo mogadure. Mare boečo ji karega inagoino. Pameartorumode boe emeardae pegareuji dukeje paro pegamode tu tu je. Dujire inagoino. Boe remawu ji karega paromode aino. ⁷Mare Pao Kurireu meardae ure nono jorugu pemegareu mogadure. Mare jorugu ji karega inagoino. Pao Kurireu meardae ure boe ero pemegado. Dujire inagoino. Pameartorumode Pao Kurireu meardaeji dukeje paro pemegamode tu tu je. Dukodire pameardu kurimode pui rugadu. Jesus ku umode paro pegareu rugadu boe kado. Pao Kurireu onaregedu nure ema rugadu.

⁸Pagagomode paro pegareu bokwaie mare pawadrarodure. Pardukare paro pegareuji dukodire pagagoino. ^9-10Pao Kurireu batrarodukare rugadu. Emare akoino paiamedu boe paro pegare marigudu. Mare pagagomode paro pegareu bokwaie dukeje pamode udo nono batrarodureu mogadure. Pagagoino dutabo pameartorukare Pao Kurireu bataruji. Pagagoino dutabo Pao Kurireu bataru metukare pagabo. Mare pamagomode paro pegareu boeji Pao Kurireu biagai dukeje biagodumode nou paro pegareu piji. Umode paro pegareu barigu pabiji paro pemegawo. Ainore Pao Kurireu rore. Ainore Pao Kurireu akore marigudu. Kodumode tuwadaruji tu rugadu. Umode turo jetorodo pai rugadu.

Jesus Umode Tugera Maku Pagai

¹Imeardu kurire tai nono imeardu kuri moga itorei dumogadure. Nono inure awu atugoreboe pemegado iwo maku tagai taro pegakawo. Mare paro pegamode dukeje ia boe makomode Pao Kurireu bagai pabaru tabo. Iere Jesus Cristo. Emare ro pemegare rugadu. ²Awu Jesus ure tugu redo ure tugu maku Pao Kurireu ai paro pegareu moriče, boe eiamedu boe ero pegareu moriče moto jamedu boe parugajeje.

³Pameartorumode Pao Kurireu bataruji dukeje parduware Pao Kurireuji rugadu. ⁴Pagagomode parduwaie Pao Kurireuji mare pameartorumodukare bataruji dukeje pawadrarodunure rugadu. Batrarodureuge nure pagi. ^5-6Mare pameartorumode Pao Kurireu bataruji dukeje boe erduwamode pameardu kurire Pao Kurireu jituji. Pao Kurireu meardu kurire pai rugadu. Dujire boe erduwamode rugadu. Dukodire parduware pamugure Pao Kurireu apo duji. Pagagomode pamugu pemegaie Pao Kurireu apo dukeje paromode nono Jesus Cristo ro mogadure rugadu.

Pao Kurireu Bataru Maiwu Reo

⁷Imeardu kurire jiwu imedage nure tagi. Dukodire inure awu Pao Kurireu bataru bu bapera keje iwo maku toro tawagai. Awu Pao Kurireu bataru maiwu karega. Marigudu ure pawie awu tuwadaruji. Marigudu tameardure awu Pao Kurireu bataruji tameartoruwo ji. ⁸Mare mariguduwu boe erduwakare awu Pao Kurireu bataruji. Dukodire Pao Kurireu bataru maiwu nure awu bataruče rugadu. Jesus makore awu Pao Kurireu bataru maiwuji. Boe erduware Jesus roji dukeje emeartorure Jesus bataruji. Boe jokodu jire akoino. Inure awu Jesus bataru bu bapera keje iwo maku tawagai. Tarore nono Jesus ro mogadure dukodire ia boe emeartorure Jesus bataruji pugeje. Ere tugera ra turo pegareu piji. Ero pegareu ure nono boečo mogadure. Ero pemegareu ure nono jorugu mogadure. Mare jorugu ji karega inagoino. Boečo ji karega inagoino. Nou ero pegareu akedunure. Dujire inagoino. Ero pemegareu unure tumaedo nono jorugu mogadure. Dujire inagoino.

^9-11Parduware boe remawuji dukeje pare nono jorugu mogadure. Pare nono boe edu pemegare jorugu pemegareu jitu mogadure. Mare jorugu ji karega inagoino. Pameardu kurire pamedagei dukeje parduware boe remawuji. Pamodukare boe ero pegado. Dujire inagoino. Pagaora butumodukare boe emeardae pegareu ka. Dujire inagoino. Mare pagagomode parduwaie boe remawuji mare pardu pegamode pamedagei dukeje parduwakare boe remawuji rugadu ji aino. Pare nono boe edu pagare boečo tada dumogadure. Mare boečo ji karega inagoino. Pardu pegamode boei dukeje pardumodukare paro pegareuji. Dujire inagoino. Pardumodukare paro pegareuji dukeje paro pegareu umode parduwa bokwado nono boečo kurireu mogadure. Mare boečo ji karega inagoino. Pardumodukare paro pegareuji dukeje parduwamodukare paro pemegareu bagai rugadu. Dujire inagoino.

¹²Imeardu kurire tai nono imeardu moga itorei dumogadure. Inure awu bataru bu bapera keje tarduwawo Pao Kurireu biagodure taro pegareu piji rugadu. Jesus bire boe ero pegareu moriče dukodire Pao Kurireu biagodure taro pegareu piji. ¹³Ia tagi boe etuo mage nure tagi. Tarduware Pao Kurireuji dukodire inure awu atugoreboe pemegado iwo maku tawagai jamedu. Pao Kurireu emare rakojere boetoji. Ia tagi ipare nure tagi, nogware nure tagi jamedu. Tare bope doge eimijera utudo tabiji dukodire inure awu atugoreboe pemegado iwo maku tawagai jamedu.

¹⁴Tare nono itore emogadure. Inure awu atugoreboe pemegado iwo maku tawagai. Tarduware Pao Kurireuji. Inure awu atugoreboe maku boe etuo mage ewagai erduware Pao Kurireuji kodi. Pao Kurireu emare boetojiwu nure ema. Inure awu atugoreboe maku ipare ewagai nogware ewagai eragare kodi. Pao Kurireu bataru meture etada. Ere bope doge eimijera utudo tubiji dukodi.

¹⁵Tagaidukaba boe ero pegareuji. Tagaidukaba nou ro pegareu boe enoroeji. Tameardu kurimode boe ero pegareuji dukeje tameardu kurimodukare Pao Kurireuji. ¹⁶Ro pegareuge etaidure turo pegawo rugadu. Tumeardae jire eroino. Pao Kurireu meardae ji karega eroino. Ro pegareuge etaidumode boe enoroe jamedu boeji. Etaidure tuwo toe kurido rugadu. Mare Pao Kurireu ro ji karega eroino. Pao Kurireu meardae ji karega eroino. Tumeardae jire eroino. Ro pegareuge enojarore turo pegareuji. Mare Pao Kurireu meardae ji karega eroino. Tumeardae pegareu jire eroino. ¹⁷Awu moto akedunure. Boe etaidure jiboe jamedu boe akedunure jamedu. Mare meartorure Pao Kurireu bataru jiwuge etagedumodukare. Ewimodukare rugadu.

Jordu Pegare Jesus Jiwu Reo

¹⁸Imeardu kurire tai nono imeardu kuri moga itorei dumogadure. Ča Jesus aregodumode kuri aino! Boe ere tawie jordu pegare Jesus jiwu aregodumoduie. Ča jordu pegare Jesus jiwuge emagare. Etaregodure! Dukodire parduware Jesus aregodumode kuri aino duji rugadu. ¹⁹Awu jordu pegare Jesus jiwuge ere bato pui pagabo. Mačare ere tugera ra pabiji. Emeardaekare Jesusji nono pameardae mogadure. Emeardaemode nono pameardae mogadure dukeje eragoje kimomode pagabo. Mačare eture dukodire parduware emeardaeji. Emeardaekare Jesusji nono pameardae mogadure.

²⁰Mare Jesus Cristo ure Pao Kurireu Uwari maku tagai dukodire taiamedu boe tarduware boe remawuji. ²¹Tarduwamodukare boe remawuji dukeje imode awu atugoreboe udo tuginai. Mare tarduware boe remawuji rugadu. Dukodire inure awu atugoreboedo aino tawagai. Tarduware kodi. Ča boe jokodu jiboe batrarodumodukare. Tarduware.

²²Mare batrarodureuge egore nou umode boe ekinorudowu kaiegure Jesusče dukodire ewadrarodure rugadu. Nouge erdu pegare Jesusji. Dukodire egoino. Etaidukare Pao Kurireuji. Etaidukare Pao Kurireu Onaregeduji. Dukodire egoino. ²³Boe etaidumodukare Pao Kurireu Onaregeduji dukeje etaidumodukare Pao Kurireuji jamedu. Boe emeartorumode Pao Kurireu Onaregeduji dukeje emeartorumode Pao Kurireuji jamedu.

²⁴Tagaba tagera ra tameardure boetojiwu Pao Kurireu bataru piji. Tameartorumode nou bataruji dukeje tamugu pemegamode Pao Kurireu apo, Onaregedu apo. Emagere emugu pemegamode tagabo jamedu jii toro. Du akedumodukare. ²⁵Ainore Jesus akore rugadu. Ure pawie rugadu tumoduie paewodudo pugeje pamuguwo Pao Kurireu apo jii toro rugadu.

²⁶Iage etaidure tuwo taekiripagado dukodire inure awu atugoreboe maku tawagai iwo taeku jado, iwo tarduwado erore jiboeji. ²⁷Ča Jesus Cristo ure Tuwari maku tagai. Emare umode tarduwado Pao Kurireu bataruji. Boe jokodu jire akoino. Batrarodu karegure. Emare rakojere tagabo dukodire tagaiwokare ia jorduwareu bagai pugeje uwo tarduwado. Tameartorure tu Pao Kurireu Uwari bataruji. Ča tagaba tagera ra nou ure tarduwado jiboe piji. Tamugu pemega raido Jesus Cristo apo rugadu.

²⁸Imeardu kurire tai nono imeardu kurire itorei dumogadure. Dukodire inagoino tai. Tamugu pemegado Jesus Cristo apo. Pamugu pemegamode apo dukeje ema aregodumode dukeje pabagudumodukare če. Pabogurumodukare. Pamodukare pawiado piji. ²⁹Jesus Cristo ro pega bokware rugadu. Tarduware nou inoduji marigudu. Mare iwo tawie pugeje. Dukodire tarduware Pao Kurireu ore eroji jamedu. Meartorure Pao Kurireu jiwuge ere turo pemegado. Pao Kurireu ure toredo emage rugadu dukodire eroino.

Ainore Pao Kurireu Ore Ere

¹Pao Kurireu meardu kurire pai rugadu. Tawiapagado! Meardu kurire pai dukodire ure toredo pagi. Dukodire makore pai. Akore: – Itore nure tagi.

Mare meartorukare Pao Kurireu jiwuge erduwakare ji dukodire erduwakare pai jamedu. ²Imeardu kurire jiwu imedage nure tagi. Ča Pao Kurireu ore nure pagi mare parduwakare raga nuba pamode. Jesus Cristo aregodumode dukeje pardumode ji rugadu. Pardumode ji dukeje umode pado nono ture rugadu. Parduware nou inoduji rugadu. ³Upagare tumeartoru tabo Jesus Cristo bagaiwuge emode turo pegareu barigu tubiji turo pemegawo nono Jesus Cristo ro mogadure.

⁴Boe ero pegamode dukeje emeartorukare Pao Kurireu ure maku boe etaiwu bakaruji. Ča boe ero pegare jiboe jire boe eroino tumeartoru bokware Pao Kurireu ure maku boe etaiwu bakaru jitu piji. ⁵Tarduware Jesus Cristo aregodure tuwo boe ero pegareu tawuje epiji. Tarduware ema ro pega bokware. ⁶Dukodire mugu pemegamode Jesus apowu umode turo pegareu barigu tubiji. Mare ro pegareuge erdukare Jesusji. Ro pegareuge erduwakare Jesusji.

⁷Batrarodureuge etaidure tuwo taekiripagado. Tameartorukaba ei. Imeardu kurire tai nono imeardu kurire itore kugurei dumogadure. Boe ero pemegamode dukeje epemegare nono Jesus pemegare dumogadure. ⁸Ro pegareuge emeartorure bope doge eimijeraji. Ekimijera nure ema rugadu. Dukodire ero pegare rugadu. Bope doge eimijera ro pega kurire boei rugadu. Pao Kurireu ure moto to dukeje nou bope doge eimijera ro pegare tu tu je rugadu. Dukodire Pao Kurireu Onaregedu aregodure tuwo bope doge erore jiboe akedudo.

⁹Pao Kurireu ore ero pegamode mare ero pegareu raimodukare Pao Kurireu meardae meture etada kodi. Emode turo pegareu barigu tubiji. Etuo nure Pao Kurireuče dukodire ero pega raimodukare. ¹⁰Ainore tarduware Pao Kurireu orei. Mare tarduware bope doge eimijera orei jamedu. Ro pegareuge nure emage. Dukodi čare tarduware ei. Pao Kurireu ore karegure emage. Meardu kuri bokwareuge nure emage. Dukodi čare tarduware ei. Pao Kurireu ore karegure emage. Bope doge eimijera ore nure emage.

Tameardu Kurido Pui

¹¹Tameardure boetojiwu bataru reo. Pameardu kuriwo pai. Ainore awu bataru ure. ¹²Parokawo nono imedu Caim ro mogadure. Ema meartorure bope doge eimijeraji dukodire ure tuwie imedu bito. Mare paga karega. Uwie meartorure Pao Kurireu bataruji turo pemegawo. Mare Caim meartorukare Pao Kurireu bataruji turo pemegakawo. Dukodire ure tuwie bito.

¹³Imedage nure tagi. Meartorukare Pao Kurireu jiwuge erdu pegamode tai mare tabagudukaba. ¹⁴Meardu kuri bokwareuge ere nono bireuge emogadure. Emodukare tudawuje tuwi piji. Mare pagi karega. Marigudu pare nono bireugere jamedu. Mare aino pare pagera ra paro pegareu piji dukodire pagare nono bireugere pugeje. Pare nono bikareugere. Boe erduware nou inoduji. Pameardu kurire boei dukodire boe erduware bikareuge nure pagi duji. ¹⁵Mare jordu pegare boeiwuge ere nono ure boe ewidowuge emogadure rugadu. Tarduware. Ure boe ewidowuge ewimode rugadu. Eewodumodukare pugeje. Emugumodukare Pao Kurireu apo rugadu. ¹⁶Jesus Cristo ure tumagu paro pegareu moriče. Ainore paromode pameardu kuriwo boei. Paromode nono Jesus ro mogadure. Pamode pamagu pawo pamedia udo tuginorudo boe pegareu piji. ¹⁷Oe kurireu jordumode ia marenaruji. Mare ukare iaboe maku ai. Nono nou oe kurireu makomode tumeardu kurie Pao Kurireuji mare pagare akoino. Ukare boe maku marenaru ai. ¹⁸Imeardu kurire tai nono imeardu kurire itore kugurei dumogadure. Tameardu kurido boei taro pemegareu tabo. Tu tawadaru tabo karega. Taro tabo tamode tameardu kurido boei. Taro udo nono Pao Kurireu bataru remawu mako mogadure. Nono čare tameardu kurimode boei rugadu.

Boe Epogurumodukare Tumagowo Pao Kurireuji

¹⁹Pameardu kurimode pui dukeje parduwamode pameartorure jiboeji. Pao Kurireu jire pameartorure. Boe remawu jire pameartorure. Pameartorumode ji rugadu dukeje pameardu kurimode pui. Nono pabogurumodukare pamagowo Pao Kurireuji. ²⁰Pawiagoromode paro pegareuji dukeje nou paro pegareu umode pagiarigo. Dukodi čare pameartoruwo Pao Kurireu bataruji. Ema kurire paiamedu boe kori. Emare jorduware boe jamedu boeji. Pameartorure Pao Kurireuji dukeje umode pagiarigodu barigu pabiji. ²¹Imeardu kurire jiwu imedage nure tagi rugadu. Čare pawiagoromode paro pegareuji dukeje pameartoruwo tu Pao Kurireuji. Dukejere pabogurumodukare pamagowo Pao Kurireuji pugeje. ²²Pameartorure Pao Kurireu bataruji dukeje umode pamagore bagaiboe maku pagai. Paromode aidure jiboeji dukeje umode pamagore bagaiboe maku pagai. Ainore parduwamode ore remawuge nure pagi duji. Ainore pabogurumodukare pamagowo Pao Kurireuji. ²³Emare makore pai pameartoruwo Tonaregedu Jesus Cristoji. Makore pai pameardu kuriwo pui. Ainore Jesus Cristo makore pai jamedu. ²⁴Pameartorumode Pao Kurireu bataruji dukeje pamugu pemegamode Pao Kurireu apo. Pao Kurireu mugu pemegamode pagabo jamedu. Pao Kurireu ure Tuwari maku meartorure puduiwuge eiamedu boe etai. Dukodire Pao Kurireu Uwari rakojemode pagabo dukeje parduwamode Pao Kurireu mugure pagabo duji rugadu.

Pao Kurireu Uwari Ukare Nono Bopere

¹Imeardu kurire jiwuge imedage nure tagi. Tameartorukaba kuri aino boe eiamedu boei. Taipaga pemegado ewadaruji jao ewadaru umode nono Pao Kurireu batarure dubagai. Batrarodureuge emagare kodire inagoino. Ere tumaedo moto jamedu boe parugajeje tuwo boe ekiripagado Pao Kurireu bataru remawu piji. ²Ainore tarduwamode Pao Kurireu Uwari bataru remawuji. Ia imedu akore Jesus Cristo aregoduie baru piji tuwo imedudo pudumi woe moto keje du nou imedu apore nou Pao Kurireu Uwari rakojere. ³Mare ia imedu akomode Jesus aregodukaie baru piji. Akomode imedu nuie ema tu rugadu. Dukeje Pao Kurireu Uwari rakojekare nou imedu apo. Bope rakojere apo. Urugodure Jesus jiwu bope doge eimijera ure nou bope maku nou imedu ai. Marigudu tameardure nou urugodure Jesus jiwu aregodumoduie. Ča aregodure marigudu. Rakojere woe moto keje rugadu.

⁴Mare tagi Pao Kurireu utugarege nure tagi. Tare nono itore emogadure. Pao Kurireu Uwari rakojere tagabo. Bope doge eragojere meartorukare Jesus jiwugebo. Mare Pao Kurireu Uwari rakare bope doge eiamedu boe ekori. Ča iage egore tumagoie Pao Kurireu bataruji mare ewadrarodunure. Pao Kurireu Uwari ure taragado tameartorukawo nou batrarodureugei. Ča tameartorukare ei rugadu. ⁵Awu batrarodureuge emagore tu meartorukare Jesus jiwuge emeardaeji. Emagore tu meartorukare Jesus jiwuge ero jiboeji. Dukeje meartorukare Jesus jiwuge emeartorure nou batrarodureuge ewadaruji rugadu emeartorukare Jesusji kodi. ⁶Mare pagi pameartorure Pao Kurireuji rugadu. Jorduware Pao Kurireu jiwu biapagamode awu iwadaruji. Meartorukare Pao Kurireu jiwu biapagamodukare awu iwadaruji. Ainore parore parduwawo boe jokodureu Pao Kurireu Uwariji. Ainore parore parduwawo batrarodureu bope dogei.

Pao Kurireu Meardu Kurire Boei Rugadu

⁷Imeardu kurire jiwu imedage nure tagi. Pao Kurireu umode pameardu kurido pui. Ča pameardu kuriwo pui rugadu. Pao Kurireu ore nure tagi dukeje tameardu kurimode boei. Tarduware Pao Kurireuji dukeje tameardu kurimode boei. ⁸Mare jorduwakare Pao Kurireu jiwu meardu kurimodukare boei. Pao Kurireu meardu kurire boei marigudu. Boe emeardu kurimodukare boei dukodire boe erduware nou boei, nou boe erduwakare Pao Kurireu jituji. ⁹Pao Kurireu meardu kurire boei rugadu. Dukodire ure tonaregedu mitodu rawuje pagae moto ka paro pegareu moriče pamugu pemegawo Pao Kurireu apo du akedukawo. Dukodire parduware Pao Kurireu meardu kurire boei duji. ¹⁰Ainore ure rugadu. Emare meardu kurire boei boetoji. Pagi karega. Parduwakare pameardu kuriwo Pao Kurireuji. Emare meardu kurire pai boetoji. Dukodire ure tonaregedu rawuje mato moto ka bitoduwo paro pegareu moriče tuwiagoduwo paro pegareu piji.

¹¹Ainore Pao Kurireu rore. Meardu kurire pai rugadu. Dukodire pameardu kuriwo pui jamedu. Imeardu kurire jiwu imedage nure tagi. ¹²Boe erdukare Pao Kurireuji mare pameardu kurimode pui dukeje Pao Kurireu mugu pemegamode pagabo. Umode pameardu kurido pui rugadu.

¹³Pao Kurireu ure Tuwari maku pagai. Dukodire parduware pamugu pemegare apo duji. Parduware mugu pemegare pagabo duji jamedu. ¹⁴Pao Kurireu ure tonaregedu rawuje boe etae. Čerdure ji rugadu. Dukodire čere boe ewie aino. Umode boe ekinorudowu nure nou Pao Kurireu onaregeduče rugadu. ¹⁵Pamagomode boe ewiagai Pao Kurireu Onaregedu nuie Jesusče dukeje pamugu pemegamode Pao Kurireu apo. Pao Kurireu mugu pemegamode pagabo jamedu. ¹⁶Pagi parduware Pao Kurireu meardu kurire pai rugadu. Dukodire pabagudukare Pao Kurireuče. Pabogurukare pamagowo ji.

Ainore Pao Kurireu ure. Meardu kurireu nure ema rugadu. Dukodire pameardu kuri raimode boei dukeje pamugu pemegamode Pao Kurireu apo. Pao Kurireu mugu pemegamode pagabo jamedu. ¹⁷Ia meri keje Pao Kurireu umode boe erdudo turo pegareu moriji. Mare meartorure Jesus jiwuge emoridodure marigudu dukodire epogurumodukare nou roino jiwu meri keje. Pameartorure Jesusji. Dukodire umode pameardu kurido pudui rugadu. Umode pameardu kurido boei jamedu. Dukodire paromode boei nono Jesus Cristo ro mogadure. ¹⁸Pao Kurireu meardu kurire jiwu pagudumodukare Pao Kurireu rore pudui jiboeji. Pao Kurireu umode pameardu kurido rugadu dukeje umode pabagudu bokwado. Mare jorduwakare Pao Kurireu jiwu pagudure rugadu. Pagudure turo pegareu jitu kodi. Meardu kurimodukare rugadu.

¹⁹Ča Pao Kurireu meardu kurire boei boetoji dukodire pameardu kuriwo ji jamedu. Pameardu kuriwo boe eiamedu boei rugadu. ²⁰Pamagomode pameardu kurie Pao Kurireuji mare pardu pegare boei dukejere pawadrarodunure. Pagaidu pemegamodukare pardure jiwu boei dukeje pagaidu pemegamodukare pardukare jiwu Pao Kurireuji. ²¹Jesus Cristo makore pai rugadu. Pameardu kuriwo boei. Pameardu kurimode Pao Kurireuji dukeje pameardu kurimode boe eiamedu boei.

Meartorure Jesus Jiwuge Eromodukare Ro Pegareuge Emeardae Jiboeji

¹Umode boe ekinorudowu nure Jesusče rugadu. Meartorure nou inodu jiwuge Pao Kurireu ore nure emage jamedu. Boe emeardu kurire boei dukeje emeardu kurimode nou boe etorei jamedu. ²Pameardu kurimode Pao Kurireuji dukeje pameartorumode Pao Kurireu bataruji. Paromode aino dukeje parduware pameardu kurire Pao Kurireu orei jamedu. ^3-4Pameardu kurire Pao Kurireuji dukeje pameartorumode Pao Kurireu bataruji jamedu. Pao Kurireu ore ewiapagamodukare ro pegareuge emeardae pegareuji. Ča Pao Kurireu ore nure pagi dukodire boe rakakare pai pameartoruwo Pao Kurireu bataruji. Paromodukare ro pegareuge emeardae pegareuji pameartorure Pao Kurireuji dukodi. ⁵Pao Kurireu onaregedu nure Jesusče. Tu nou meartorure nou inodu jiwu biapagamodukare ro pegareuge emeardae pegareuji tu rugadu.

Ainore Boe Erduware Jesusji

⁶Jesus aregodure moto ka dukeje ao pegododure pobo tabo. Aregodure moto ka dukeje bire. Ure tugu maku boe etai kodire bire. Pao Kurireu Uwari akoino jamedu. Emare batrarodumodukare ^7-8Jesus ao pegododure pobo tabo boe erduwawo Jesus ure pudumi duji. Ure tugu redo boe erduwawo Jesus ure pudumi duji. Pao Kurireu Uwari ure boe ewie Jesus ure ema duji. ⁹Pameartorumode boe ewadaruji. Mare Pao Kurireu bataru jetorore boe ewadaru kori. Emare makore tonaregedu jiboeji. ¹⁰Nou Pao Kurireu bataru meture meartorure onaregedu jiwuge ebo. Mare meartorukare Pao Kurireu jiwuge egore batrarodunuie. Emeartorukare Pao Kurireu makore tonaregedu jiboe jituji. ¹¹Pao Kurireu onaregedu bire paro pegareu moriče dukodire Pao Kurireu umode pamugudo pudabo. Du akedumodukare. ¹²Meartorure Pao Kurireu Onaregedu jiwu mugumode Pao Kurireu apo rugadu. Du akedumodukare rugadu. Mare nou meartorukare Pao Kurireu Onaregedu jiwu mugumodukare Pao Kurireu apo rugadu.

Mugure Pao Kurireu Apowu Akedumodukare

¹³Inure awu atugoreboe maku tagai tarduwawo tamugumode Pao Kurireu apo rugadu. Nou tamugure Pao Kurireu apo du akedumodukare rugadu. Tameartorure Pao Kurireu Onaregeduji dukeje tamugumode apo rugadu jii toro rugadu. Aino čare tarduware awu ire tawie jiboeji rugadu. ¹⁴Pamagomode Pao Kurireu bagai pagaidure jiboe bagai Pao kurireu meardae pemegareu tabo dukeje meardumode rugadu. Dukodire pabogurumodukare pamagowo Pao Kurireuji rugadu. ¹⁵Pamagomode Pao Kurireuji dukeje meardumode pai rugadu. Parduware nou inoduji dukodire parduware umode pamagore bagaiboe maku pagai rugadu duji.

¹⁶Ia meartorure Jesus jiwu ro pegamode dukeje tamagodo baruto nou meartorure Jesus jiwu paru tabo. Pao Kurireu biagodumode boe ero pegare jiboe piji rugadu. Biagodure piji dukeje nou boe butugugodure Pao Kurireu apo rugadu. Mare ia boe ero pegare jiboe ure tuginai. Du pijire Pao Kurireu biagodumodukare rugadu. Tamagokaba baruto awu rore aino jiwu paru tabo. ¹⁷Boe ero pegamode pui. Mare paga karega Pao Kurireu jire eroino turo pegareu jamedu boe tabo. Mare ia boe ero pegare jiboe ure tuginai. Du pijire Pao Kurireu biagodumodukare rugadu.

¹⁸Parduware Pao Kurireu ore ero pega raimodukare rugadu. Pao Kurireu Onaregedu jetu pemegare ei. Bope doge eimijera umodukare tugera to ei.

¹⁹Parduware Pao Kurireu utugarege nure pagi duji. Mare Bope Doge Eimijera unure tumeardae maku meartorukare Jesus jiwuge eiamedu boe etai emeartoruwo tu nou tumeardae pegareuji rugadu.

²⁰Parduware Pao Kurireu Onaregedu aregodure rugadu. Emare ure parduwado. Dukodi čare parduware Pao Kurireuji. Boe Remawu nure ema. Pamugu pemegare Pao Kurireu apo. Pamugu pemegare Onaregedu Jesus Cristo apo jamedu. Pao Kurireu Remawu nure ema. Umode pamugudo baru tada pudabo. Du akedumodukare.

²¹Imeardu kurire tai nono imeardu kurire itorei dumogadure. Dukodire imagore aino tai. Tameartorukaba bope doge ewadaruji. Tameartorukaba boe ewai tadawu santo dogei. Tagaba Pao Kurireudo emage.

Urugadureu.